ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠬᠣᠶᠠᠷ > Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <2>
516ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠬᠣᠶᠠᠷ >
ᠬᠣᠶᠠᠷ
ᠰᠢᠷᠠᠪᠳᠤᠷᠵᠢ ᠬᠦᠩ ᠨᠣᠶᠠᠨᠲᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠪᠣᠭᠲᠣᠯᠠᠵᠤ ᠪᠠᠭᠤᠯᠭᠠᠭᠰᠠᠨ ᠨᠢᠵᠢᠭᠢᠷ ᠶᠡᠬᠡ ᠬᠤᠷᠢᠮ ᠰᠢᠪᠲᠤᠷᠠᠯᠠ᠃ ᠬᠤᠷᠢᠮ ᠳ᠋ᠤ᠌ ᠪᠤᠵᠢᠭᠢᠨᠠᠭᠰᠠᠨ ᠬᠥᠮᠦᠰ ᠨᠠᠢᠷ ᠰᠢᠪᠲᠤᠷᠠᠬᠤ ᠪᠠᠷ ᠪᠡᠶᠡ ᠰᠡᠳᠬᠢᠯ ᠨᠢᠭᠡ ᠲᠠᠯᠪᠢᠭᠳᠠᠭᠰᠠᠨ ᠢ᠋ ᠥᠭᠦᠯᠡᠬᠦ ᠶᠠᠭᠤᠨ᠃
ᠲᠡᠷᠡ ᠰᠥᠨᠢ ᠨᠣᠶᠠᠨ ᠰᠠᠩ ᠤ᠋ᠨ ᠵᠤᠰᠠᠭᠠᠯ ᠰᠠᠭᠤᠷᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠥᠨᠥᠭᠰᠡᠨ ᠶᠦᠮ ᠰᠢᠭ ᠨᠣᠢᠷ ᠲᠠᠭᠠᠨ ᠨᠠᠮ ᠴᠣᠬᠢᠭᠤᠯᠵᠤ ᠤᠨᠲᠠᠵᠠᠭᠠᠵᠠᠢ᠃
ᠰᠥᠨᠢ ᠢᠯᠢᠮ ᠵᠢᠯᠢᠮ ᠃
ᠬᠠᠶᠠᠭᠠ ᠳᠡᠷᠡᠯᠡᠵᠦ ᠬᠡᠪᠲᠡᠭᠰᠡᠨ ᠬᠣᠨᠢ ᠢᠮᠠᠭᠠᠳ ᠤ᠋ᠨ ᠢᠷᠠᠭᠯᠠᠨ ᠬᠡᠪᠢᠬᠦ ᠂ ᠴᠠᠳᠬᠤᠯᠳᠠᠭᠰᠠᠨ ᠦᠨᠢᠶᠡᠳ ᠤᠷᠲᠤ ᠠᠮᠢᠰᠬᠤᠨ ᠨᠠᠮ ᠤᠤᠨᠢᠬᠤ ᠡᠭᠡᠯᠢᠲᠡᠢ ᠠᠨᠢᠷ ᠳᠤᠭᠤᠯᠳᠠᠨᠠ ᠃ ᠡᠭᠦᠨ ᠦ᠌ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠣᠲᠠᠴᠢ ᠨᠣᠬᠠᠳ ᠤ᠋ᠨ ᠬᠠᠶᠠ ᠨᠢᠭᠡ ᠶᠠᠯᠢᠮ ᠦᠭᠡᠢ ᠴᠢᠮᠡᠭᠡ ᠡᠴᠡ ᠰᠡᠵᠢᠭ ᠠᠪᠴᠤ ᠵᠠᠯᠬᠠᠭᠤᠲᠠᠢ ᠬᠤᠴᠠᠬᠤ ᠳᠠᠭᠤᠨ ᠠ᠋ᠴᠠ ᠥᠭᠡᠷᠡ ᠠᠨᠢᠷ ᠠᠯᠠᠭᠠ᠃ ᠦᠦᠷ ᠲᠡᠮᠲᠡᠷᠢᠭᠳᠡᠯᠡ ᠁ ᠤᠯᠠᠭᠠᠨ ᠬᠠᠲᠤᠨ ① ᠦ᠌ ᠵᠡᠭᠡᠰᠦᠲᠡᠢ ᠶ᠋ᠢᠨ ᠲᠣᠬᠣᠢ ᠳ᠋ᠤ᠌ ᠥᠩᠰᠢᠭ ᠵᠤᠰᠠᠭᠠ ᠨᠣᠶᠠᠨ ᠰᠠᠩ ᠤ᠋ᠨ ᠬᠢᠨ ᠨᠣᠢᠷ ᠤ᠋ᠨ ᠳᠠᠯᠠᠯᠭᠠᠨ ᠳ᠋ᠤ᠌ ᠨᠠᠮ ᠴᠣᠬᠢᠭᠤᠯᠤᠭᠰᠠᠨ ᠠᠳᠤᠭᠤᠨ ᠤ᠋ ᠡᠪᠦᠭᠡᠨ ᠰᠢᠭ ᠰᠦᠭ ᠰᠦᠯᠳᠡ ᠦᠭᠡᠢ ᠪᠦᠦᠷ ᠲᠦᠦᠷ ᠪᠥᠷᠲᠥᠯᠵᠡᠨᠡ᠃ ᠬᠥᠬᠡ ᠬᠥᠯᠲᠥᠷᠭᠡ ᠲᠡᠢ ᠬᠦᠷᠡᠩ ᠪᠣᠷᠵᠢᠨ ᠴᠢᠯᠠᠭᠤᠨ ᠪᠠᠭᠠᠨᠠ ᠪᠠᠷ ᠵᠡᠯᠡᠯᠡᠨ ᠲᠠᠲᠠᠭᠰᠠᠨ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠤ᠋ ᠨᠡᠯᠢᠶᠡᠳ ᠴᠠᠭᠠᠨᠠ ᠨᠣᠶᠠᠨ ᠰᠠᠩ ᠤ᠋ᠨ ᠦᠬᠡᠷ᠂ ᠠᠳᠤᠭᠤ ᠬᠣᠨᠢᠨ ᠤ᠋ ᠵᠠᠷᠤᠴᠠᠰ ᠤ᠋ᠨ ᠬᠠᠭᠤᠴᠢᠨ ᠪᠣᠷᠣ ᠭᠡᠷ ᠦ᠋ᠳ ᠡᠪ ᠳᠦᠢᠲᠡᠢ ᠪᠠᠭᠤᠭᠰᠠᠨ ᠠᠵᠢ᠃ ᠪᠠᠰᠠ ᠶᠡᠬᠡ ᠭᠡᠷ᠂ ᠭᠠᠯ ᠲᠣᠭᠣᠭᠠᠨ ᠤ᠋ ᠭᠡᠷ ᠵᠠᠷᠤᠴᠠᠰ ᠤ᠋ᠨ ᠠᠷᠭᠠᠯ ᠲᠦᠯᠡᠭᠡᠨ ᠦ᠌ ᠣᠪᠣᠭᠠ ᠪᠠᠢᠷᠢᠯᠠᠭᠰᠠᠨ ᠨᠢ ᠮᠠᠰᠢᠳᠠ ᠡᠪᠯᠢᠭᠬᠡᠨ᠃ ᠭᠣᠣᠯ ᠭᠡᠷ᠂ ᠶᠡᠬᠡ ᠪᠠᠭᠠ ᠬᠠᠲᠤᠭᠲᠠᠢ᠂ ᠲᠤᠰᠠᠯᠠᠭᠴᠢ ᠨᠣᠶᠠᠨ ᠤ᠋ ᠤᠷᠲᠤ ᠭᠡᠷ ᠡᠴᠡ ᠭᠠᠳᠠᠨᠠ ᠪᠠᠰᠠ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠨᠣᠶᠠᠨ ᠰᠠᠩ ᠤ᠋ᠨ ᠭᠠᠯ ᠲᠣᠭᠣᠭᠠᠨ ᠤ᠋ ᠭᠡᠷ ᠭᠡᠵᠦ ᠤᠲᠤᠭᠠ ᠲᠣᠭᠣᠰᠣ᠂ ᠲᠣᠰᠣ ᠬᠡᠩᠰᠢᠭᠦᠦ ᠪᠣᠯᠤᠭᠰᠠᠨ ᠴᠠᠴᠠᠷ ᠮᠠᠢᠬᠠᠨ ᠨᠤᠭᠤᠳ ᠵᠢᠭᠳᠡᠬᠡᠨ ᠡᠩᠨᠡᠷᠡᠨᠡ᠃ ᠠᠯᠤᠰ ᠲᠤ᠌ ᠪᠠᠷᠠᠭᠠᠨᠲᠤᠬᠤ ᠵᠡᠭᠦᠨ ᠬᠥᠲᠥᠯ ᠦ᠋ᠨ ᠴᠠᠭᠠᠨᠠ ᠠ᠋ᠴᠠ ᠴᠠᠭᠠᠨ ᠭᠡᠭᠡ ᠰᠤᠪᠤᠷᠠᠵᠤ ᠦᠦᠷ ᠮᠠᠩᠬᠠᠢᠲᠠᠯᠠ ᠴᠠᠢᠪᠠ᠃
ᠤᠯᠠᠭᠠᠨ ᠬᠠᠲᠤᠨ ᠤ᠋ ᠬᠣᠢᠲᠤ ᠬᠥᠪᠡᠭᠡ ᠶ᠋ᠢ ᠪᠠᠷᠢᠵᠤ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠬᠥᠮᠦᠨ ᠴᠢᠯᠥᠭᠡ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠳᠠᠷᠠᠰᠤ ᠲᠠᠢ ᠪᠤᠯᠤᠩ ᠳ᠋ᠤ᠌ ᠵᠤᠰᠠᠭᠰᠠᠨ ᠨᠣᠶᠠᠨ ᠰᠠᠩ ᠤ᠋ᠨ ᠬᠠᠶᠠᠭᠠ ᠵᠦᠭ ᠣᠢᠷᠠᠳᠴᠤ ᠪᠠᠢᠪᠠ᠃ ᠬᠣᠯᠠ ᠠ᠋ᠴᠠ ᠣᠢᠷᠠᠳᠬᠤ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠢ᠋ ᠠᠨᠢᠷᠲᠤᠭᠰᠠᠨ ᠬᠣᠲᠠᠴᠢ ᠨᠣᠬᠠᠢ ᠬᠥᠪ ᠬᠥᠪ ᠬᠣᠷᠭᠣᠭᠣᠨᠠ᠃ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠲᠡᠷᠡ ᠬᠥᠮᠦᠨ ᠵᠤᠰᠠᠭᠠᠯ ᠤ᠋ᠨ ᠵᠡᠭᠦᠨᠲᠡᠢᠬᠡᠨ ᠬᠥᠮᠦᠨ ᠦ᠌ ᠬᠢᠷᠢ ᠥᠨᠳᠥᠷ ᠳᠡᠷᠡᠰᠦᠨ ᠳ᠋ᠦ᠍ ᠪᠡᠶᠡ ᠪᠡᠨ ᠳᠠᠯᠳᠠᠯᠠᠩᠭᠠᠨ ᠪᠣᠯᠵᠣᠵᠤ ᠰᠠᠮ ᠠᠭᠤᠯᠵᠠᠬᠤ ᠭᠡᠰᠡᠨ ᠪᠤᠶᠤ ᠶᠠᠮᠠᠷ ᠨᠢᠭᠡᠨ ᠪᠠᠴᠢᠮ ᠴᠢᠮᠡᠭᠡ ᠬᠦᠷᠭᠡᠵᠦ ᠶᠠᠪᠤᠭᠠ ᠭᠡᠮᠡᠷ ᠡᠢᠰᠢ ᠲᠡᠢᠰᠢ ᠰᠡᠷᠡᠮᠵᠢᠲᠡᠢᠬᠡᠨ ᠠᠵᠢᠭ᠌ᠯᠠᠨᠠ᠃ ᠤᠨᠤᠭᠰᠠᠨ ᠮᠣᠷᠢ ᠨᠢ ᠠᠮᠢᠰᠬᠤᠭᠠ ᠰᠡᠯᠪᠢᠵᠦ ᠲᠤᠷᠭᠢᠬᠤ ᠪᠠᠷ ᠡᠵᠡᠨ ᠦ᠌ ᠪᠡᠨ ᠨᠢᠭᠤᠷ ᠬᠠᠴᠠᠷ ᠲᠤ᠌ ᠰᠢᠪᠡᠷᠡᠭᠡ ᠨᠠᠷᠢᠨ ᠪᠣᠷᠣᠭᠠ ᠲᠥᠰᠦᠷᠭᠡᠬᠦ ᠰᠢᠭ ᠨᠣᠢᠲᠠᠩᠨᠠᠭᠤᠯᠪᠠ᠃ ᠲᠡᠷᠡ ᠡᠷᠡ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠨᠢᠭᠤᠷ ᠢ᠋ᠶ᠋ᠠᠨ ᠵᠦᠯᠭᠦᠭᠰᠡᠨ ᠪᠣᠯᠤᠭᠠᠳ ᠪᠣᠷᠣᠯᠠᠭ ᠮᠢᠨᠢ᠂ ᠤᠬᠠᠭᠠᠨ ᠲᠠᠢ ᠪᠠᠢᠵᠤ ᠦᠵᠡ! ᠳᠣᠷᠭᠢᠶᠠᠨ ᠢ᠋ᠶ᠋ᠠᠷ ᠡᠪᠦᠭᠡᠨ ᠴᠢᠨᠢ ᠪᠠᠯᠠᠷᠠᠵᠤ ᠮᠡᠳᠡᠨᠡ ᠰᠢᠦ ᠭᠡᠵᠦ ᠮᠣᠷᠢᠨ ᠤ᠋ ᠪᠠᠨ ᠮᠤᠨᠳᠠᠭᠠ ᠶ᠋ᠢ ᠲᠠᠪᠰᠢᠵᠤ ᠵᠢᠭᠳᠡ ᠬᠢᠷᠭᠠᠵᠤ ᠶᠠᠩᠵᠤᠯᠠᠭᠰᠠᠨ ᠳᠡᠯ ᠢ᠋ ᠨᠢ ᠰᠢᠯᠤᠭᠤᠳᠬᠠᠵᠤ ᠢᠯᠪᠢᠭᠡᠳ ᠰᠢᠪᠡᠨᠡᠪᠡ᠃
ᠲᠡᠭᠡᠲᠡᠯᠡ ᠭᠠᠯ ᠲᠣᠭᠣᠭᠠᠨ ᠤ᠋ ᠳᠤᠮᠳᠠᠬᠢ ᠮᠠᠢᠬᠠᠨ ᠠ᠋ᠴᠠ ᠡᠪᠦᠭᠡᠵᠢᠶᠡᠷ ᠬᠥᠮᠦᠨ ᠬᠣᠯᠬᠢᠨᠳᠠᠭ ᠭᠤᠲᠤᠯ ᠴᠢᠷᠦᠭᠰᠡᠨ ᠶᠦᠮ ᠤᠤ ᠭᠡᠮᠡᠷ ᠪᠣᠷᠪᠢ ᠪᠠᠨ ᠫᠡᠷ ᠫᠡᠷ ᠴᠢᠷᠴᠦ ᠲᠦᠯᠡᠭᠡᠨ ᠦ᠌ ᠣᠪᠣᠭᠠᠨ ᠠ᠋ᠴᠠ ᠠᠷᠭᠠᠯ ᠬᠣᠷᠮᠣᠢᠯᠠᠵᠤ ᠠᠪᠤᠭᠠᠳ ᠪᠤᠴᠠᠪᠠ᠃ ᠭᠠᠯ ᠲᠣᠭᠣᠭᠠᠨ ᠤ᠋ ᠭᠡᠷ ᠦ᠋ᠨ ᠬᠠᠷᠠᠯᠠᠭᠰᠠᠨ ᠴᠣᠨᠵᠢ ᠠ᠋ᠴᠠ ᠥᠳᠬᠡᠨ ᠤᠲᠤᠭᠠ ᠪᠤᠷᠭᠢᠵᠤ ᠡᠬᠢᠯᠡᠪᠡ᠃
ᠳᠡᠷᠡᠰᠦᠨ ᠦ᠌ ᠴᠠᠭᠠᠨᠠᠬᠢ ᠡᠷᠡ ᠪᠠᠴᠢᠮᠳᠠᠰᠬᠢᠵᠤ《 ᠬᠣᠯᠠ ᠶ᠋ᠢᠨ ᠪᠠᠷᠠ ᠲᠡᠮᠲᠡᠷᠢᠭᠳᠡᠯᠡ ᠁ ᠶᠠᠭᠠᠬᠢᠴᠢᠬᠠᠪᠠ ᠳᠠ? ᠰᠠᠭᠠᠳ ᠭᠠᠷᠤᠭᠠ ᠤᠤ? ᠡᠰᠡᠬᠦᠯᠡ ᠡᠳᠦᠷ ᠨᠢ ᠳᠡᠩᠳᠡᠭᠦᠦ ᠶᠠᠳᠠᠷᠠᠭᠰᠠᠨ ᠠ᠋ᠴᠠ ᠤᠨᠲᠠᠵᠤ ᠣᠷᠬᠢᠪᠠ ᠤᠤ? 》 ᠭᠡᠮᠡᠨ ᠡᠯᠳᠡᠪ ᠢ᠋ ᠪᠣᠳᠣᠵᠤ ᠬᠦᠯᠢᠶᠡᠨ ᠶᠠᠳᠠᠨᠠ᠃ ᠡᠨᠡ ᠡᠷᠡ ᠶ᠋ᠢ ᠠᠩᠴᠢᠨᠵᠠᠪ ᠭᠡᠳᠡᠭ᠃ ᠲᠡᠷᠡ ᠪᠡᠷ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠰᠠᠢᠬᠠᠨ ᠪᠠᠭᠤᠯᠭᠠᠭᠰᠠᠨ ᠰᠢᠨᠡ ᠬᠠᠲᠤᠨ ᠤ᠋ ᠤᠤᠭᠠᠨ ᠢᠨᠠᠭ ᠢ᠋ ᠠᠷᠭᠠᠮᠵᠢᠭᠰᠠᠨ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠨᠢ ᠪᠠᠢᠯᠠ᠃
ᠠᠩᠴᠢᠨᠵᠠᠪ ᠰᠡᠷᠭᠦᠮᠡ ᠬᠣᠶᠠᠷ ᠪᠣᠯ ᠪᠡᠶᠡ ᠬᠠᠳᠠ᠂ ᠥᠩᠭᠡ ᠵᠢᠰᠦ ᠲᠡᠩᠴᠡᠭᠰᠡᠨ ᠪᠠᠷᠢᠯᠳᠤᠯᠭᠠᠲᠤ ᠬᠣᠣᠰ ᠭᠡᠮᠡᠷ᠃ ᠤᠷᠠᠨ ᠬᠠᠵᠢᠨ ᠰᠢᠪᠠᠭᠤ ᠰᠢᠭ᠋ ᠢ᠋ᠶ᠋ᠡᠨ ᠲᠣᠭᠲᠠᠭᠤᠬᠠᠨ ᠨᠠᠭᠤᠷ ᠤ᠋ᠨ ᠴᠡᠩᠭᠡᠭ ᠤᠰᠤᠨ ᠤ᠋ ᠵᠡᠭᠡᠰᠦᠨ ᠴᠣᠬᠣᠷ ᠬᠡᠷᠡᠮ ᠦ᠋ᠨ ᠬᠠᠯᠬᠠᠪᠴᠢ ᠳ᠋ᠤ᠌ ᠨᠥᠮᠥᠷᠢᠳᠡᠨ ᠠᠮᠤᠭᠤᠯᠠᠩ ᠲᠠᠢᠪᠤᠩ ᠵᠢᠷᠭᠠᠬᠤ ᠶ᠋ᠢ ᠬᠡᠳᠦᠢ ᠴᠦ᠍ ᠬᠦᠰᠡᠪᠡ᠃ ᠣᠭᠣᠰᠣᠷ ᠦᠭᠡᠢ ᠣᠷᠴᠢᠯᠠᠩ ᠤ᠋ᠨ ᠤᠷᠪᠠᠭᠠᠨ ᠬᠥᠷᠪᠡᠭᠡᠨ ᠲᠡᠢ ᠣᠨᠢ ᠶ᠋ᠢ ᠲᠡᠳᠡ ᠶᠠᠭᠠᠬᠢᠵᠤ ᠴᠦ᠍ ᠰᠡᠪ ᠦᠭᠡᠢ ᠣᠨᠣᠭᠠᠬᠤ ᠪᠢᠯᠡ? ᠬᠣᠷᠸᠠ ᠳ᠋ᠤ᠌ ᠬᠥᠮᠦᠨ ᠪᠣᠯᠵᠤ ᠬᠥᠯ ᠬᠢᠰᠭᠢᠭᠰᠡᠨ ᠴᠠᠭ ᠠ᠋ᠴᠠ ᠠᠪᠤᠭᠠᠳ ᠬᠤᠪᠢ ᠲᠠᠪᠢᠯᠠᠩ ᠢ᠋ᠶ᠋ᠠᠨ ᠡᠷᠬᠡᠰᠢᠶᠡᠨ ᠬᠤᠪᠢᠳᠠᠵᠤ ᠡᠵᠡᠨ ᠮᠡᠳᠡᠬᠦ ᠴᠢᠳᠠᠯ ᠡᠳᠡᠨ ᠳ᠋ᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠡᠷᠬᠡ ᠶᠠᠮᠪᠠᠲᠠᠨ᠂ ᠡᠳ᠋ ᠮᠥᠩᠭᠥ᠂ ᠡᠬᠡ ᠡᠴᠢᠭᠡ᠂ ᠶᠡᠬᠡᠰ ᠲᠣᠮᠣᠭᠠᠲᠠᠨ ᠤ᠋ ᠠᠶᠠ ᠡᠷᠬᠡ ᠶ᠋ᠢ ᠳᠠᠭᠠᠬᠤ ᠲᠠᠪᠢᠯᠠᠩ ᠲᠠᠢ ᠯᠠ ᠪᠠᠢᠵᠠᠢ᠃
ᠰᠡᠷᠭᠦᠮᠡ ᠶ᠋ᠢᠨ ᠡᠬᠡ ᠭᠡᠭᠴᠢ ᠢᠵᠠᠭᠤᠷᠲᠠᠨ ᠤᠭᠰᠠᠭᠠ ᠲᠠᠢ ᠰᠦᠷᠡᠬᠡᠢ ᠰᠠᠮᠠᠭᠠᠨ᠃ ᠵᠠᠪᠠᠯ ᠰᠠᠨᠠᠭᠠᠨ ᠳ᠋ᠠᠭᠠᠨ ᠬᠦᠷᠬᠦ ᠭᠡᠵᠦ ᠬᠠᠢᠷᠠᠲᠠᠢ ᠭᠠᠭᠴᠠ ᠥᠬᠢᠨ ᠢ᠋ᠶ᠋ᠡᠨ ᠲᠠᠢᠵᠢ ᠤᠳᠤᠮᠲᠤ᠃ ᠢᠵᠠᠭᠤᠷᠲᠠᠨ ᠭᠠᠷᠣᠯᠲᠦ᠂ ᠵᠡᠷᠭᠡ ᠵᠢᠩᠰᠡ ᠲᠡᠢ ᠬᠥᠮᠦᠨ ᠳ᠋ᠦ᠍ ᠪᠣᠭᠲᠣᠯᠠᠭᠤᠯᠬᠤ ᠭᠡᠰᠡᠨ ᠭᠠᠭᠴᠠ ᠪᠣᠳᠣᠯ ᠢ᠋ ᠨᠢ ᠬᠡᠨ ᠬᠥᠮᠦᠨ ᠴᠦ᠍ ᠥᠭᠡᠷᠡᠴᠢᠯᠡᠬᠦ ᠠᠷᠭᠠ ᠦᠭᠡᠢ ᠳᠠᠭᠠᠭᠠᠳ ᠯᠠ ᠪᠥᠮᠪᠥᠷᠢᠳᠡᠭ ᠬᠡᠷᠡᠭ! ᠲᠡᠷᠡ ᠪᠡᠷ ᠥᠬᠢᠨ ᠦ᠌ ᠪᠡᠨ ᠠᠩᠴᠢᠨᠵᠠᠪ ᠲᠠᠢ ᠡᠢᠮᠦ ᠲᠡᠢᠮᠦ ᠪᠣᠯᠤᠭᠰᠠᠨ ᠢ᠋ ᠰᠡᠪ ᠴᠤᠬᠢᠭᠰᠠᠨ ᠠ᠋ᠴᠠ ᠥᠬᠢᠨ ᠢ᠋ᠶ᠋ᠡᠨ ᠢᠳᠬᠠᠵᠤ ᠬᠣᠷᠢᠭᠯᠠᠨᠠ᠃ ᠡᠯᠳᠡᠪ ᠠᠷᠭᠠ ᠤᠬᠠᠭᠠᠨ ᠬᠡᠷᠡᠭᠯᠡᠵᠦ ᠠᠩᠴᠢᠨᠵᠠᠪ ᠲᠠᠢ ᠣᠢᠷᠠᠲᠤᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠣᠷᠣᠯᠳᠣᠨᠠ᠃ ᠲᠡᠭᠡᠭᠡᠳ ᠨᠡᠮᠡᠷᠢ ᠦᠭᠡᠢ ᠳ᠋ᠦ᠍ᠨᠢ ᠰᠢᠢᠳ ᠬᠠᠲᠠᠭᠤ ᠬᠣᠷᠢᠵᠤ᠂ ᠡᠴᠦᠰ ᠲᠡᠭᠡᠨ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠨᠣᠶᠠᠨ ᠰᠢᠷᠠᠪᠳᠣᠷᠵᠢ ᠶ᠋ᠢᠨ ᠪᠠᠭᠠ ᠬᠠᠲᠤᠨ ᠪᠣᠯᠭᠠᠵᠤ ᠪᠣᠭᠲᠣᠯᠠᠨ ᠥᠭᠭᠦᠭᠰᠡᠨ ᠨᠢ ᠡᠨᠡ ᠪᠠᠢᠵᠠᠢ᠃
ᠦᠦᠷ ᠢ᠋ᠶ᠋ᠡᠷ ᠪᠣᠰᠴᠤ ᠦᠨᠢᠶᠡ ᠰᠠᠭᠠᠬᠤ ᠪᠠᠷ ᠭᠠᠷᠤᠭᠰᠠᠨ ᠬᠥᠭᠰᠢᠨ ᠵᠡᠭᠦᠨ ᠡᠴᠡ ᠨᠢᠭᠡ ᠮᠣᠷᠢᠲᠠᠢ ᠬᠥᠮᠦᠨ ᠠᠢᠰᠤᠢ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠠᠳᠤᠭᠤᠨ ᠤ᠋ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ᠂ ᠡᠰᠡᠪᠡᠯ ᠬᠥᠯ ᠠᠯᠳᠠᠭᠰᠠᠨ ᠣᠷᠣᠭᠠ ᠪᠣᠰᠬᠠᠭᠠ ᠴᠠᠭ ᠤ᠋ᠨ ᠲᠠᠬᠠᠷ ᠤ᠋ᠳ ᠤ᠋ᠨ ᠨᠢᠭᠡ ᠨᠢ ᠨᠣᠶᠠᠨ ᠰᠠᠩ ᠳ᠋ᠤ᠌ ᠢᠷᠡᠵᠦ ᠶᠠᠪᠤᠭᠠ ᠴᠦ᠍ ᠶᠤᠮ ᠤᠤ ᠭᠡᠵᠦ ᠪᠣᠳᠣᠭᠠᠳ ᠶᠠᠭᠤᠮᠠ ᠪᠣᠯᠭᠠᠭᠰᠠᠨ ᠦᠭᠡᠢ ᠦᠨᠢᠶᠡ ᠪᠡᠨ ᠰᠠᠭᠠᠬᠤ ᠪᠠᠷ ᠴᠠᠭᠠᠰᠢ ᠪᠠᠨ ᠶᠠᠪᠤᠪᠠ᠃
ᠰᠥᠨᠢᠵᠢᠨ ᠭᠠᠭᠴᠠ ᠬᠣᠶᠠᠷ ᠳᠤᠭᠭᠢᠵᠤ ᠰᠡᠷᠭᠡᠭ ᠬᠣᠨᠣᠭᠰᠠᠨ ᠰᠡᠷᠭᠦᠮᠡ ᠦᠦᠷ ᠬᠠᠶᠠᠭᠠᠷᠠᠬᠤ ᠶ᠋ᠢᠨ ᠠᠯᠲᠠ ᠪᠠᠷ ᠬᠣᠯᠠ ᠶ᠋ᠢᠨ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠦ᠌ ᠴᠢᠮᠡᠭᠡ ᠪᠡᠷ ᠠᠩᠴᠢᠨᠵᠠᠪ ᠤ᠋ᠨ ᠢ᠋ᠶ᠋ᠠᠨ ᠢᠷᠡᠭᠰᠡᠨ ᠢ᠋ ᠲᠠᠪᠯᠠᠨ ᠮᠡᠳᠡᠵᠦ᠂ ᠡᠦᠲᠦ ᠪᠡᠷ ᠢ᠋ᠶ᠋ᠡᠨ ᠭᠠᠷᠴᠤ ᠠᠭᠤᠯᠵᠠᠬᠤ ᠭᠡᠵᠦ ᠶᠠᠭᠠᠷᠠᠨ ᠳᠡᠷᠭᠡᠳᠡ ᠨᠢ ᠠᠮᠠ ᠪᠠᠨ ᠠᠩᠭᠠᠢᠨ ᠰᠤᠯᠳᠠᠢᠨ ᠤᠨᠲᠠᠭᠰᠠᠨ ᠬᠦᠩ ᠨᠣᠶᠠᠨ ᠢ᠋ ᠬᠠᠷᠠᠭᠠᠳ《 ᠡᠨᠡ ᠮᠠᠭᠤ ᠬᠥᠭᠰᠢᠨ ᠪᠤᠬᠠ ᠮᠢᠨᠦ ᠠᠷᠤ ᠠ᠋ᠴᠠ ᠮᠥᠭᠡᠷᠡᠨ ᠬᠣᠴᠣᠷᠬᠤ ᠲᠠᠪᠢᠯᠠᠩ ᠢ᠋ᠶ᠋ᠠᠨ ᠡᠳ᠋ᠯᠡᠭ 》 ᠭᠡᠳ ᠪᠣᠰᠴᠤ ᠭᠠᠷᠤᠭᠠᠳ ᠵᠡᠭᠦᠨ ᠲᠠᠯᠠ ᠪᠠᠷ ᠣᠷᠣᠢ ᠨᠢ ᠪᠤᠮᠪᠠᠯᠵᠠᠭᠰᠠᠨ ᠮᠣᠩᠭᠣᠯ ᠭᠡᠷ ᠦ᠋ᠨ ᠬᠣᠢᠭᠤᠷ ᠬᠠᠷᠠᠪᠠᠯ ᠳᠡᠷᠡᠰᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢᠨ ᠴᠠᠭᠠᠨᠠ ᠬᠣᠶᠠᠷ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠱᠤᠷᠤᠯᠵᠠᠬᠤ ᠬᠠᠷᠠᠭᠳᠠᠪᠠ᠃ ᠮᠥᠨ ! ᠲᠡᠷᠡ ᠮᠢᠨᠢ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠮᠥᠨ ! ᠨᠠᠮᠠᠶ᠋ᠢ ᠠᠪᠬᠤ ᠪᠠᠷ ᠢᠷᠡᠵᠡᠢ ᠭᠡᠵᠦ ᠪᠣᠳᠣᠬᠤ ᠲᠠᠢ ᠵᠡᠷᠭᠡ ᠵᠢᠷᠦᠬᠡ ᠨᠢ ᠯᠦᠭ ᠯᠦᠭ ᠬᠢᠨ ᠠᠮᠠ ᠪᠠᠷ ᠨᠢ ᠭᠠᠷᠴᠢᠬᠠᠮᠠᠷ ᠪᠤᠯᠭᠢᠯᠠᠵᠤ ᠪᠠᠢᠪᠠ᠃
ᠰᠢᠷᠠᠪᠳᠤᠷᠵᠢ ᠬᠦᠩ ᠨᠣᠶᠠᠨ ᠤ᠋ ᠳᠥᠲᠥᠭᠡᠷ ᠪᠠᠭᠠ ᠬᠠᠲᠤᠨ ᠪᠠᠭᠤᠯᠭᠠᠵᠤ ᠪᠣᠭᠲᠣᠯᠠᠭᠰᠠᠨ ᠨᠢᠵᠢᠭᠢᠷ ᠶᠡᠬᠡ ᠬᠤᠷᠢᠮ ᠤ᠋ᠨ ᠲᠡᠷᠡ ᠡᠳᠦᠷ ᠬᠡᠦᠬᠡᠨ ᠲᠠᠯᠠ ᠶ᠋ᠢᠨ ᠬᠢᠨ ᠵᠠᠪᠠᠯ ᠪᠤᠴᠠᠳᠠᠭ ᠵᠠᠩᠰᠢᠯ ᠲᠠᠢ ᠤᠴᠢᠷ ᠂ ᠰᠡᠷᠭᠦᠮᠡ ᠲᠥᠷᠬᠥᠮ ᠦ᠋ᠨ ᠢ᠋ᠶ᠋ᠡᠨ ᠢᠲᠡᠭᠡᠯ ᠲᠡᠢ ᠨᠢᠭᠡ ᠳᠡᠭᠦᠦ ᠪᠡᠷ ᠢ᠋ᠶ᠋ᠡᠨ ᠠᠩᠴᠢᠨᠵᠠᠪ ᠲᠤ᠌ ᠳᠠᠮᠵᠢᠭᠤᠯᠤᠭᠰᠠᠨ ᠬᠡᠵᠢᠶᠡ ᠂ ᠬᠠᠮᠢᠭᠠ ᠬᠥᠲᠥᠯᠦᠭᠡ ᠮᠣᠷᠢ ᠪᠠᠷ ᠢᠷᠡᠵᠦ ᠲᠣᠰᠤᠭᠠᠷᠠᠢ ᠬᠣᠶᠠᠭᠤᠯᠠ ᠣᠷᠭᠣᠶᠠ ᠂ ᠬᠣᠯᠠ ᠶ᠋ᠢᠨ ᠬᠣᠯᠠ ᠡᠵᠡᠭᠦᠢ ᠭᠠᠵᠠᠷ ᠶᠠᠪᠤᠵᠤ ᠠᠮᠢᠳᠤᠷᠠᠶᠠ ᠂ ᠠᠮᠠᠷᠠᠭ ᠮᠢᠨᠢ ᠡᠷᠬᠡᠪᠰᠢ ᠪᠣᠯᠵᠣᠭᠰᠠᠨ ᠴᠠᠭ ᠲᠤ ᠨᠠᠮᠠᠶ᠋ᠢ ᠪᠠᠨ ᠠᠪᠠᠴᠢᠬᠤ ᠪᠠᠷ ᠢᠷᠡᠭᠡᠷᠡᠢ! ᠭᠡᠵᠦ ᠪᠢᠴᠢᠭᠰᠡᠨ ᠬᠣᠶᠠᠷ ᠬᠤᠷᠤᠭᠤ ᠬᠠᠭᠤᠳᠠᠰᠤᠨ ᠤ᠋ ᠬᠠᠷᠢᠭᠤ ᠡᠨᠡ ᠪᠠᠢᠵᠠᠢ᠃
ᠰᠡᠷᠭᠦᠮᠡ ᠢᠩᠭᠢᠵᠦ ᠪᠣᠳᠣᠬᠤ ᠲᠠᠢ ᠵᠡᠷᠭᠡ ᠥᠴᠥᠭᠡᠳᠦᠷ ᠣᠷᠣᠢ ᠨᠢ ᠪᠣᠯᠤᠭᠰᠠᠨ 《 ᠠᠶᠤᠮᠰᠢᠭᠲᠤ 》ᠬᠡᠷᠡᠭ ᠤᠳ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠪᠠ᠃
ᠰᠢᠷᠠᠪᠳᠤᠷᠵᠢ ᠬᠦᠩ ᠨᠣᠶᠠᠨ ᠂ ᠬᠤᠷᠢᠮ ᠳ᠋ᠤᠨᠢ ᠵᠠᠯᠠᠷᠠᠵᠤ ᠪᠠᠭᠤᠭᠰᠠᠨ ᠬᠥᠷᠰᠢ ᠬᠣᠰᠢᠭᠤᠳ ᠂ ᠰᠤᠮᠤ ᠨᠤᠭᠤᠳ ᠤ᠋ᠨ ᠣᠲᠣᠭᠠᠲᠠᠨ ᠵᠢᠩᠰᠠᠲᠠᠨ᠂ ᠭᠡᠢᠴᠢᠨ ᠵᠣᠴᠢᠳ ᠢ᠋ᠶ᠋ᠠᠨ ᠪᠠᠶᠠᠰᠬᠠᠬᠤ ᠶ᠋ᠢᠨ ᠲᠤᠰᠠᠳᠠ ᠠᠷᠢᠬᠢ ᠳᠠᠷᠠᠰᠤ᠂ ᠮᠢᠬᠠ ᠲᠣᠰᠣ ᠪᠠᠷ ᠪᠢᠯᠠᠭᠤᠷᠠᠲᠠᠯᠠ ᠵᠣᠴᠢᠯᠠᠵᠤ᠂ ᠨᠢᠳᠦᠨ ᠳ᠋ᠡᠭᠡᠨ ᠢᠨᠢᠶᠡᠳᠦ ᠲᠣᠭᠯᠠᠭᠤᠯᠤᠭᠰᠠᠭᠠᠷ ᠮᠠᠰᠢ ᠣᠷᠣᠢ ᠪᠣᠯᠵᠤ ᠬᠤᠷᠢᠮ ᠲᠠᠷᠬᠠᠬᠤ ᠳ᠋ᠤ᠌ ᠰᠠᠶ᠋ᠢᠬᠠᠨ ᠰᠢᠨᠡ ᠬᠠᠲᠤᠨ ᠪᠣᠯᠤᠭᠰᠠᠨ ᠰᠡᠷᠭᠦᠮᠡ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠬᠦᠯᠴᠤᠭᠦᠷᠡᠮᠡᠭ ᠣᠷᠣᠵᠤ ᠣᠴᠢᠯᠠ᠃ ᠶᠠᠮᠠᠷ ᠭᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ ᠢᠰᠦᠮᠡᠭ ᠦᠮᠡᠬᠡᠢ ᠦᠨᠦᠷ ᠰᠡᠩᠬᠢ ᠲᠠᠲᠠᠭᠤᠯᠤᠭᠰᠠᠨ ᠰᠢᠷᠠᠪᠳᠤᠷᠵᠢ ᠬᠦᠩ ᠨᠣᠶᠠᠨ ᠲᠡᠨᠲᠦᠷ ᠮᠥᠨᠳᠥᠷ ᠭᠡᠭᠰᠡᠭᠡᠷ ᠭᠦᠩᠭᠠᠷᠠᠪᠠ ᠳ᠋ᠠᠬᠢ ᡀᠠᠮᠣ ᠪᠤᠷᠬᠠᠨ ᠳ᠋ᠤ᠌ ᠵᠤᠯᠠ ᠠᠰᠠᠭᠠᠨᠠ᠃ ᠠᠮᠢᠯᠠᠭᠤᠯᠤᠭᠰᠠᠨ ᠥᠨᠥᠴᠢᠨ ᠵᠤᠯᠠ ᠨᠢ ᠰᠦᠮᠡᠯᠵᠡᠨ ᠰᠦᠮᠡᠯᠵᠡᠭᠰᠡᠭᠡᠷ ᠲᠦᠳᠡᠯ ᠦᠭᠡᠢ ᠤᠨᠲᠠᠷᠠᠪᠠ᠃《 ᠦᠷᠡ ᠶ᠋ᠢᠨ ᠬᠤᠲᠤᠭ ᠬᠦᠰᠡᠭᠰᠡᠨ ᠴᠢᠩ ᠰᠡᠳᠬᠢᠯ ᠮᠢᠨᠢ ᠮᠠᠭᠤ ᠢᠷᠣᠠ ᠪᠣᠯᠪᠠ ᠤᠤ? ᠤᠸᠮ ᠮᠠ᠋ ᠨᠢ ᠪᠠᠳ ᠮᠠᠢ ᠬᠣᠩ! 》 ᠭᠡᠵᠦ ᠨᠢᠳᠦ ᠪᠡᠨ ᠠᠨᠢᠨ ᠵᠠᠯᠪᠠᠷᠢᠭᠠᠳ ᠭᠦᠩᠭᠠᠷᠠᠪᠠ ᠶ᠋ᠢᠨ ᠳᠣᠣᠷᠠᠬᠢ ᠱᠦᠭᠦᠢ ᠳᠣᠲᠣᠷᠠ ᠠ᠋ᠴᠠ ᠵᠠᠰᠠᠵᠤ ᠲᠠᠯᠪᠢᠭᠰᠠᠨ ᠵᠤᠯᠠ ᠠ᠋ᠴᠠ ᠪᠠᠰᠠ ᠨᠢᠭᠡ ᠶ᠋ᠢ ᠭᠠᠷᠭᠠᠵᠤ ᠨᠢᠮᠪᠠᠢ ᠭᠡᠭᠴᠢ ᠠᠰᠠᠭᠠᠪᠠ᠃
— ᠵᠠ᠂ ᠪᠦᠭᠦᠳᠡ ᠶ᠋ᠢ ᠮᠡᠳᠡᠭᠴᠢ ᠪᠤᠷᠬᠠᠨ ᠳ᠋ᠠᠭᠠᠨ ᠳᠠᠭᠠᠳᠬᠠᠶᠠ! ᠴᠢ ᠪᠢᠳᠡ ᠬᠣᠶᠠᠷ ᠢ᠋ ᠪᠤᠷᠬᠠᠨ ᠲᠡᠭᠷᠢ ᠢᠪᠡᠭᠡᠵᠦ ᠵᠠᠰᠠᠭ ᠬᠦᠩ ᠵᠠᠯᠠᠭᠠᠮᠵᠢᠯᠠᠬᠤ ᠬᠦᠦ ᠲᠥᠷᠥᠭᠡᠰᠡᠢ! ᠪᠠᠭᠠ ᠬᠠᠲᠤᠨ ᠮᠢᠨᠢ ᠦᠷᠡ ᠶ᠋ᠢᠨ ᠬᠤᠲᠤᠭ ᠣᠷᠣᠰᠢᠬᠤ ᠠᠯᠲᠠᠨ ᠬᠡᠪᠡᠯᠢ ᠲᠡᠢ ᠪᠢᠵᠡ⁈ ᠭᠡᠵᠦ ᠳᠦᠲᠤᠨᠡᠭᠰᠡᠭᠡᠷ ᠰᠤᠢᠯᠡᠭᠢᠯᠡᠬᠰᠡᠨ ᠬᠦᠬᠰᠢᠨ ᠪᠤᠬᠠ ᠰᠢᠭ᠋ ᠰᠡᠷᠭᠦᠮᠡ ᠶ᠋ᠢᠨ ᠲᠣᠷᠭᠠᠨ ᠪᠡᠶᠡ ᠶ᠋ᠢ ᠨᠥᠷᠢᠨ ᠬᠡᠪᠲᠡᠪᠡ᠃
ᠰᠡᠷᠭᠦᠮᠡ ᠢᠩᠭᠢᠵᠦ ᠶᠠᠭᠠᠬᠢᠬᠤ ᠶ᠋ᠢᠨ ᠴᠦ᠍ ᠠᠷᠭᠠ ᠦᠭᠡᠢ ᠲᠤᠯᠭᠠᠮᠳᠠᠭᠰᠠᠨ ᠳ᠋ᠠᠭᠠᠨ ᠪᠠᠯᠠᠳᠠᠨ ᠰᠠᠨᠳᠤᠷᠴᠤ《 ᠬᠡᠦᠬᠡᠨ ᠴᠠᠭᠠᠨ ᠪᠡᠶᠡ ᠶ᠋ᠢᠨ ᠮᠢᠨᠢ ᠲᠣᠷᠭᠠᠨ ᠴᠡᠴᠡᠷᠡᠮᠡᠭ ᠢ᠋ ᠬᠥᠨᠳᠡᠬᠦ ᠁》 ᠭᠡᠰᠡᠨ ᠠᠢᠩᠭᠤᠷᠢ ᠠ᠋ᠴᠠ ᠵᠠᠢᠯᠠᠬᠤ ᠶ᠋ᠢᠨ ᠠᠷᠭᠠ ᠦᠯᠦ ᠣᠯᠳᠠᠨ ᠮᠤᠬᠤᠷᠳᠠᠨᠠ᠃ ᠡᠨᠡ ᠬᠦ ᠨᠢᠭᠤᠷ ᠨᠢᠳᠦ ᠦᠭᠡᠢ ᠨᠥᠷᠢᠭᠰᠡᠨ ᠬᠥᠯᠴᠥᠭᠦᠦ ᠪᠤᠬᠠ ᠠ᠋ᠴᠠ ᠪᠡᠶᠡ ᠪᠡᠨ ᠬᠡᠷᠬᠢᠨ ᠵᠠᠢᠯᠠᠭᠤᠯᠤᠨ ᠠᠷᠭᠠᠴᠠᠭᠠᠬᠤ ᠶ᠋ᠢ ᠪᠣᠳᠣᠬᠤ ᠠ᠋ᠴᠠ ᠪᠦᠬᠦ ᠪᠡᠶᠡ ᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠠᠰᠬᠠᠵᠤ᠂ ᠶᠠᠭ ᠯᠠ ᠬᠠᠰᠢᠷ ᠠᠳᠤᠭᠤᠴᠢᠨ ᠤ᠋ ᠭᠠᠷ ᠲᠤ᠌ ᠴᠢᠬᠢ ᠪᠡᠨ ᠬᠤᠯᠤᠭᠤᠲᠠᠭᠤᠯᠤᠭᠰᠠᠨ ᠡᠷᠡᠮᠡᠭ ᠪᠠᠢᠳᠠᠰᠤ ᠰᠢᠭ᠋ ᠬᠥᠬᠡ ᠮᠢᠬᠠ ᠨᠢ ᠳᠠᠭᠵᠢᠨ ᠴᠡᠴᠡᠷᠡᠨᠡ᠃
ᠵᠢᠷᠤᠮ ᠶᠣᠰᠣᠭᠠᠷ ᠪᠣᠭᠲᠣᠯᠠᠭᠳᠠᠭᠰᠠᠨ ᠵᠠᠰᠠᠭ ᠬᠦᠩ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠪᠣᠯᠤᠭᠰᠠᠨ ᠰᠡᠷᠭᠦᠮᠡ《 ᠪᠢ ᠦᠭᠡᠢ ᠠ᠋! ᠪᠣᠯᠬᠤ ᠦᠭᠡᠢ ᠁》 ᠭᠡᠵᠦ ᠵᠥᠷᠢᠭᠦᠳᠯᠡᠵᠦ᠂ ᠬᠤᠷᠢᠴᠡᠯ ᠲᠠᠴᠢᠶᠠᠯ ᠤ᠋ᠨ ᠭᠠᠯ ᠳ᠋ᠤ᠌ ᠨᠣᠴᠣᠭᠰᠠᠨ ᠵᠠᠰᠠᠭ ᠬᠦᠩ ᠨᠣᠶᠠᠨ ᠤ᠋ ᠴᠠᠭᠠᠲᠠᠢ ᠭᠠᠷᠤᠨᠠ ᠭᠡᠳᠡᠭ ᠴᠢᠨᠢ ᠬᠤᠳᠠᠯ ᠦᠭᠡ᠃《 ᠣᠳᠣ ᠶᠠᠭᠠᠬᠢᠨᠠ? 》 ᠭᠡᠵᠦ ᠪᠡᠮᠪᠡᠭᠡᠨᠡᠭᠰᠡᠨ ᠰᠡᠷᠭᠦᠮᠡ ᠭᠠᠷᠤᠭᠠᠳ ᠳᠤᠲᠠᠭᠠᠶᠠ ᠭᠡᠬᠦ ᠳ᠋ᠤ᠌ ᠭᠠᠩ ᠤ᠋ᠨ ᠴᠠᠭ ᠤ᠋ᠨ ᠭᠠᠭᠴᠠ ᠵᠢᠭᠦᠷ ᠲᠡᠢ ᠴᠠᠷᠴᠠᠬᠠᠢ ᠰᠢᠭ᠋ ᠴᠠᠰ ᠴᠠᠰ ᠭᠠᠰᠠᠯᠬᠤ ᠠ᠋ᠴᠠ ᠴᠠᠭᠠᠰᠢ ᠲᠡᠩᠬᠡᠭᠡ ᠦᠭᠡᠢ ᠠᠮᠢᠲᠠᠨ ᠬᠡᠷᠬᠢᠨ ᠳᠤᠲᠠᠭᠠᠬᠤ ᠪᠢᠯᠡ⁈
ᠰᠢᠷᠠᠪᠲᠤᠷᠵᠢ ᠨᠣᠶᠠᠨ ᠮᠠᠰᠢ ᠪᠤᠳᠤᠯᠢᠭᠤᠨ ᠬᠥᠳᠡᠯᠵᠦ ᠳᠡᠪᠡᠯ ᠬᠤᠪᠴᠠᠰᠤ ᠪᠠᠨ ᠳᠠᠢᠴᠢᠨ ᠨᠢᠴᠦᠭᠦᠯᠡᠭᠡᠳ ᠰᠡᠷᠭᠦᠮᠡ ᠶ᠋ᠢᠨ ᠡᠪᠦᠷ ᠲᠦ᠍ ᠰᠢᠷᠭᠤᠯᠠ᠁ ᠰᠡᠷᠭᠦᠮᠡ ᠴᠡᠴᠡᠷᠡᠭᠰᠡᠨ ᠪᠡᠶᠡ ᠪᠡᠨ ᠬᠤᠷᠢᠶᠠᠵᠤ ᠵᠣᠷᠢᠭᠯᠠᠨ 《 ᠬᠡᠷᠪᠡ ᠲᠡᠭᠦᠨ ᠦ᠌ ᠠᠶᠠ ᠪᠠᠷ ᠨᠢ ᠪᠣᠯᠪᠠᠯ ᠠᠮᠠᠷᠠᠭ ᠬᠣᠩᠭᠣᠷ ᠠᠩᠴᠢᠨᠵᠠᠪ ᠲᠠᠭᠠᠨ ᠨᠠᠰᠤᠨ ᠲᠤᠷᠰᠢ ᠥᠷᠢ ᠲᠡᠢ ᠪᠣᠯᠬᠤ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠠᠷᠭᠠᠲᠤ ᠲᠠᠤᠯᠠᠢ ᠠᠷᠰᠯᠠᠨ ᠢ᠋ ᠠᠯᠠᠨᠠ ᠭᠡᠳᠡᠭ ᠰᠢᠦ ᠳᠡ᠂ ᠡᠪ ᠳᠠᠮ ᠢ᠋ ᠨᠢ ᠦᠵᠡᠵᠦ ᠡᠶᠡᠷᠡᠭᠦᠨ ᠰᠢᠭ ᠤᠬᠠᠭᠠᠯᠠᠪᠠᠯ ᠶᠠᠭᠤᠮᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ᠂ ᠵᠣᠷᠢᠭᠰᠠᠨ ᠳ᠋ᠠᠭᠠᠨ ᠬᠦᠷᠴᠦ ᠶᠠᠭᠤ ᠮᠠᠭᠠᠳ》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠳᠣᠲᠣᠷᠠ ᠨᠢ ᠭᠡᠷᠡᠯ ᠠᠰᠠᠵᠤ ᠭᠦᠩᠭᠠᠷᠠᠪᠠ ᠶ᠋ᠢᠨ ᠡᠮᠦᠨᠡ ᠰᠦᠮᠡᠯᠵᠡᠬᠦ ᠵᠤᠯᠠ ᠤᠯᠠᠮ ᠬᠡᠷᠡᠯᠳᠦᠬᠦ ᠰᠢᠭ ᠪᠣᠯᠪᠠ᠃
— ᠬᠥᠭᠡᠷᠦᠬᠦᠢ ᠳᠡ᠂ ᠪᠠᠭᠠ ᠬᠠᠲᠤᠨ ᠮᠢᠨᠢ ᠭᠡᠳ ᠬᠦᠩ ᠨᠣᠶᠠᠨ ᠰᠡᠷᠭᠦᠮᠡ ᠶ᠋ᠢᠨ ᠡᠩᠭᠡᠷ ᠣᠷᠭᠣ ᠭᠠᠷ ᠢᠶᠠᠨ ᠰᠢᠷᠭᠤᠭᠤᠯᠤᠨ ᠮᠥᠮᠥ᠍ ᠢ ᠨᠢ ᠲᠡᠮᠲᠡᠷᠢᠬᠦ ᠳ᠋ᠦ᠍ ᠰᠡᠷᠭᠦᠮᠡ ᠪᠡᠶᠡ ᠪᠡᠨ ᠡᠷᠴᠢᠯᠡᠨ ᠴᠢᠩᠭᠠᠯᠠᠵᠤ ᠪᠠᠢᠭᠰᠠᠨ ᠢᠶᠡᠨ ᠦᠷᠭᠦᠭᠰᠡᠨ ᠲᠠᠤᠯᠠᠢ ᠰᠢᠭ᠋ 《 ᠢᠯᠡᠢ ᠴᠠᠭᠠᠰᠢ! 》 ᠭᠡᠳ ᠴᠠᠰᠭᠢᠨ ᠣᠷᠢᠯᠠᠵᠤ ᠪᠦᠵᠦᠩ ᠰᠢᠭ ᠠᠲᠤᠷᠢᠪᠠ᠃
— ᠨᠣᠶᠠᠨ ᠲᠠ ᠥᠨᠥ ᠰᠦᠨᠢ ᠪᠣᠯᠢᠭᠠᠴᠢ ! ᠪᠡᠶᠡ ᠴᠡᠪᠡᠷᠰᠢᠵᠦ ᠪᠠᠷᠠᠭᠠᠳᠤᠢ ᠁ ᠭᠡᠳ ᠭᠤᠶᠠ ᠬᠠᠰᠠ ᠪᠠᠨ ᠲᠠᠰᠤ ᠬᠠᠪᠴᠢᠵᠣ ᠭᠣᠶᠣᠬᠤ ᠳᠤ ᠄
— ᠲᠡᠷᠡ ᠶᠠᠭᠠᠬᠢᠳᠠᠭ ᠶᠤᠮ ᠭᠡᠳ ᠬᠦᠩ ᠨᠣᠶᠠᠨ ᠪᠤᠬᠠ ᠰᠢᠭ᠋ ᠰᠢᠷᠦᠭᠦᠨ ᠬᠠᠷᠠᠭᠠᠳ ᠰᠡᠷᠭᠦᠮᠡ ᠶ᠋ᠢᠨ ᠳᠡᠭᠡᠷᠡ ᠭᠠᠷᠬᠤ ᠶ᠋ᠢ ᠵᠠᠪᠳᠤᠪᠠᠯ ᠰᠡᠷᠭᠦᠮᠡ ᠰᠠᠨᠳᠤᠷᠴᠤ᠄
— ᠨᠣᠶᠠᠨ ᠲᠠ ᠥᠨᠥᠳᠥᠷ ᠠᠷᠢᠬᠢ ᠠᠬᠠᠳᠠᠭᠰᠠᠨ ᠪᠠᠢᠭᠠ ᠁ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠬᠦᠦ ᠲᠡᠢ ᠪᠣᠯᠤᠶᠠ ᠭᠡᠪᠡᠯ ᠰᠣᠭᠲᠣᠭᠤ ᠬᠥᠯᠴᠥᠭᠦᠦ ᠪᠡᠷ ᠡᠩᠭᠡᠷ ᠵᠥᠷᠢᠭᠦᠯᠵᠦ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠣᠯᠬᠤ ᠦᠭᠡᠢ᠃ ᠰᠣᠭᠲᠣᠭᠤ ᠬᠥᠯᠴᠥᠭᠦᠦ ᠬᠤᠢᠯᠠᠮᠠᠷ ② ᠨᠢᠭᠡ ᠶᠠᠭᠤᠮᠠ ᠪᠣᠯᠪᠠᠯ ᠲᠡᠷᠡ ᠨᠢ ᠲᠡᠭᠡᠭᠡᠳ ᠵᠥᠨᠥᠭ ᠴᠤ᠌ ᠶᠤᠮ ᠤᠤ ? ᠮᠤᠨᠤᠭ ᠴᠤ᠌ ᠶᠤᠮ ᠤᠤ ᠂ ᠢᠷᠣᠠ ③ ᠲᠠᠢ ᠶᠠᠭᠤᠮᠠ ᠭᠠᠷᠴᠢᠬᠠᠪᠠᠯ ᠶᠠᠭᠠᠬᠢᠵᠤ ᠵᠠᠰᠠᠭ ᠵᠠᠯᠭᠠᠮᠵᠢᠯᠠᠬᠤ ᠪᠢᠯᠡ ⁈ ᠨᠣᠶᠠᠨ ᠲᠠᠨ ᠤ᠋ ᠨᠡᠷᠡ ᠲᠥᠷᠥ ᠂ ᠮᠠᠨ ᠤ᠋ ᠤᠷᠠᠳ ᠣᠯᠠᠨ ᠤ᠋ ᠡᠦᠲᠦᠮ ᠤᠭᠰᠠᠭᠠ ᠳ᠋ᠤ᠌ ᠮᠠᠭᠤᠬᠠᠢ ᠪᠢᠰᠢ ᠤᠤ ? ᠭᠡᠪᠡ᠃
ᠪᠠᠭᠠ ᠬᠠᠲᠤᠨ ᠤ᠋ ᠡᠨᠡ ᠦᠭᠡ ᠬᠦᠩ ᠨᠣᠶᠠᠨᠲᠠᠨ ᠤ᠋ ᠠᠷᠢᠬᠢᠨ ᠠ᠋ᠴᠠ ᠪᠤᠯᠵᠤ ᠦᠢᠮᠡᠭᠰᠡᠨ ᠤᠬᠠᠭᠠᠨ ᠳ᠋ᠤ᠌ ᠨᠢᠭᠡ ᠶᠠᠭᠤᠮᠠ ᠪᠣᠳᠣᠭᠳᠠᠭᠤᠯᠬᠤ ᠪᠣᠯᠪᠠ᠃
ᠡᠨᠡ ᠵᠠᠭᠵᠠᠭᠠᠷ ᠡᠮᠡ ᠶᠠᠭ ᠦᠭᠡᠢ ᠲᠣᠯᠣᠭᠠᠢ ᠴᠢᠷᠠᠢ᠃ ᠨᠥᠭᠦᠭᠡ ᠬᠡᠳᠦᠨ ᠬᠠᠲᠤᠨ ᠲᠠᠢ ᠠᠳᠠᠯᠢᠳᠬᠠᠪᠠᠯ ᠠᠰᠲᠠᠭᠠᠨ ᠨᠢᠭᠡ ᠠᠮᠲᠠᠯᠢᠭ 《 ᠪᠣᠣᠪᠣ 》 ᠪᠠᠢᠵᠤ ᠶᠠᠳᠠᠬᠤ ᠦᠭᠡᠢ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠶᠡᠬᠡ ᠬᠠᠲᠤᠨ ᠪᠣᠯ ᠨᠢᠳᠦ ᠪᠡᠨ ᠠᠨᠢᠭᠠᠳ ᠯᠠ ᠰᠤᠯᠳᠠᠢᠭᠠᠳ ᠥᠭᠳᠡᠭ᠃ ᠬᠣᠶᠠᠳᠤᠭᠠᠷ ᠬᠠᠲᠤᠨ ᠪᠣᠯ ᠪᠦᠰᠡᠯᠡᠭᠦᠷ ᠢᠶᠡᠷ ᠢᠪ ᠲᠡᠪᠡᠷᠢᠭᠡᠳ 《 ᠬᠦᠩ ᠨᠣᠶᠠᠨ ᠲᠠᠨ ᠲᠠᠢ ᠵᠢᠷᠭᠠᠨᠠ ᠭᠡᠭᠴᠢ ᠶᠠᠭᠤᠲᠠᠢ ᠬᠤᠪᠢ ᠲᠠᠪᠢᠯᠠᠩ ᠪᠣᠢ⁈ 》ᠭᠡᠬᠦ ᠰᠢᠭ ᠲᠠᠪᠠ ᠨᠢ ᠬᠠᠨᠵᠦ ᠢᠷᠠᠭᠯᠠᠳᠠᠭ᠃ ᠭᠤᠲᠠᠭᠠᠷ ᠬᠠᠲᠤᠨ ᠪᠣᠯ ᠤᠰᠤᠩᠭᠢᠲᠤᠭᠠᠳ ᠪᠠᠵᠠᠯᠠᠨ ᠨᠤᠷᠠᠵᠤ ᠪᠠᠷᠬᠢᠷᠠᠭᠠ ᠢᠩᠭᠡ ᠰᠢᠭ ᠪᠠᠷᠬᠢᠷᠠᠨᠠ ᠃ ᠲᠡᠷᠡ ᠬᠠᠲᠤᠳ ᠲᠠᠢ ᠪᠠᠨ ᠡᠩᠭᠡᠷ ᠵᠥᠷᠢᠭᠦᠯᠦᠭᠰᠡᠨ ᠲᠥᠷᠥᠭᠳᠡᠯ ᠢ᠋ᠶ᠋ᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠡᠦᠲᠦ ᠶ᠋ᠢᠨ ᠡᠨᠡ ᠪᠠᠭᠠ ᠬᠠᠲᠤᠨ ᠨᠢ ᠴᠠᠭᠠᠨᠠ ᠪᠠᠨ ᠨᠢᠭᠡ ᠰᠣᠨᠢᠨ ᠣᠨᠢᠰᠣᠭᠠ ᠮᠡᠲᠦ ᠬᠦᠴᠦᠨ ᠳᠠᠯᠳᠠᠯᠠᠭᠳᠠᠵᠤ ᠪᠠᠢᠭᠠ ᠮᠡᠲᠦ ᠰᠠᠨᠠᠭᠳᠠᠪᠠ᠃
— ᠪᠠᠭᠠ ᠬᠠᠲᠤᠨ ᠮᠢᠨᠢ᠂ ᠶᠠᠭ ᠳᠡᠭᠡᠷᠡ ᠪᠡᠨ ᠴᠢᠨᠦ ᠬᠡᠯᠡᠭᠰᠡᠨ ᠵᠦᠢᠯ ᠪᠠᠰᠠ ᠵᠦᠢᠲᠡᠢ ᠰᠢᠭ᠌᠂ ᠥᠨᠥᠳᠦᠷ ᠪᠠᠰᠠ ᠯᠠ ᠭᠠᠯᠠᠭᠤᠨ ᠬᠦᠵᠦᠭᠦᠲᠦ ᠳᠦ ᠳᠡᠢᠯᠦᠭᠳᠡᠴᠢᠭᠡᠯᠡ ᠭᠡᠳ ᠰᠡᠷᠭᠦᠮᠡ ᠶ᠋ᠢᠨ ᠤᠷᠤᠭᠤᠯ ᠢ᠋ ᠨᠢ ᠥᠬᠥᠭᠡᠷᠳᠡᠨ ᠦᠨᠦᠰᠬᠦ ᠳ᠋ᠦ᠍ ᠰᠡᠷᠭᠦᠮᠡ ᠦᠭᠡᠢ ᠭᠡᠰᠡᠨ ᠦᠭᠡᠢ᠃
— ᠨᠣᠶᠠᠨ ᠲᠠ ᠂ ᠥᠨᠥᠳᠥᠷ ᠠᠷᠢᠬᠢ ᠬᠡᠲᠦᠷᠡᠭᠰᠡᠨ ᠲᠤᠯᠠ ᠡᠨᠡ ᠰᠥᠨᠢ ᠳ᠋ᠡᠭᠡᠨ ᠰᠠᠢᠬᠠᠨ ᠤᠨᠲᠠᠵᠤ ᠠᠮᠠᠷᠠ! ᠬᠤᠷᠢᠮ ᠨᠠᠢᠷ ᠤ᠋ᠨ ᠵᠢᠭᠤᠷᠠᠭᠠᠨ ᠢ᠋ᠶ᠋ᠠᠨ ᠨᠢᠭᠡ ᠲᠡᠢᠰᠢ ᠪᠣᠯᠲᠠᠯᠠ ᠪᠡᠶᠡ ᠰᠡᠳᠬᠢᠯ ᠢ᠋ ᠠᠯᠢ ᠪᠣᠯᠬᠤ ᠪᠠᠷ ᠪᠠᠭᠠ ᠴᠢᠯᠡᠭᠡᠪᠡᠯ ᠰᠠᠢᠨ ᠃ ᠲᠡᠭᠡᠭᠡᠳ ᠶᠡᠷᠦ ᠨᠢ ᠬᠣᠵᠢᠮ ᠬᠣᠢᠰᠢ ᠳ᠋ᠠᠭᠠᠨ ᠁ ᠨᠣᠶᠠᠨ ᠲᠠ ᠪᠡᠶᠡ ᠪᠡᠨ ᠭᠠᠮᠨᠠᠬᠤ ᠬᠡᠷᠡᠭᠲᠡᠢ ᠶᠦᠮ ᠪᠢᠰᠢ ᠤᠤ ? ᠭᠡᠵᠦ ᠰᠡᠷᠭᠦᠮᠡ ᠴᠠᠭᠠᠨᠠ ᠪᠠᠨ ᠨᠢᠭᠡ ᠤᠳᠬᠠ ᠲᠠᠢ ᠦᠭᠡ ᠢᠴᠢᠩᠭᠦᠷᠡᠰᠬᠢᠨ ᠬᠡᠯᠡᠪᠡ ᠃
— ᠬᠣᠢᠰᠢᠳᠠ ᠬᠠᠲᠤᠨ ᠤ᠋ ᠦᠭᠡ ᠶ᠋ᠢ ᠢᠯᠡᠭᠦᠦ ᠠᠪᠬᠤ ᠶ᠋ᠢ ᠪᠣᠳᠣᠶᠠ ᠭᠡᠵᠦ ᠬᠦᠩ ᠨᠣᠶᠠᠨ ᠰᠢᠷᠠᠪᠲᠤᠷᠵᠢ ᠪᠠᠭᠠ ᠬᠠᠲᠤᠨ ᠤ᠋ ᠪᠠᠨ ᠦᠭᠡ ᠶ᠋ᠢ ᠵᠥᠪᠰᠢᠶᠡᠨ 《 ᠡᠨᠡ ᠤᠷᠤᠭᠠ ᠪᠠᠢᠳᠠᠰᠤ ᠠ᠋ᠴᠠ ᠬᠠᠷᠢᠨ ᠴᠦ᠍ ᠨᠢᠭᠡ ᠵᠢᠷᠣᠭᠠ ᠤᠨᠠᠭᠠ ᠲᠣᠭᠯᠠᠵᠤ ᠮᠠᠭᠠᠳ ᠦᠭᠡᠢ 》 ᠭᠡᠵᠦ ᠰᠠᠢᠨ ᠰᠠᠢᠬᠠᠨ ᠢ᠋ ᠭᠣᠷᠢᠳᠠᠨ ᠪᠣᠳᠣᠭᠰᠠᠭᠠᠷ ᠴᠠᠭᠠᠰᠢ ᠡᠷᠬᠢᠨ ᠲᠦᠳᠡᠬᠡᠨ ᠳᠤᠭᠵᠢᠷᠠᠵᠤ ᠣᠷᠬᠢᠪᠠ᠃
ᠰᠡᠷᠭᠦᠮᠡ ᠡᠭᠦᠳᠡ ᠮᠠᠨᠠᠵᠤ ᠬᠣᠨᠣᠭᠰᠠᠨ ᠮᠠᠨᠠᠭᠤᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠫᠤᠤ ᠪᠠᠨ ᠲᠡᠪᠡᠷᠢᠭᠡᠳ ᠬᠠᠨᠠ ᠲᠦᠰᠢᠨ ᠬᠠᠮᠠᠷ ᠲᠠᠲᠠᠭᠰᠠᠨ ᠢ᠋ ᠳᠠᠯᠢᠮᠳᠠᠭᠤᠯᠵᠤ ᠭᠡᠷ ᠡᠴᠡ ᠭᠠᠷᠴᠤ ᠭᠣᠣᠯ ᠭᠡᠷ ᠦ᠋ᠨ ᠠᠷᠤ ᠪᠠᠷ ᠪᠠᠷᠤᠭ ᠨᠢᠰᠴᠢᠭᠡᠮᠡᠷᠬᠡᠨ ᠭᠦᠶᠦᠵᠦ ᠥᠨᠥ ᠬᠥᠲᠥᠯᠦᠭᠡ ᠮᠣᠷᠢᠲᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠦᠷᠪᠡ᠃
ᠤᠳᠠᠭᠠᠨ ᠠᠭᠤᠯᠵᠠᠭᠰᠠᠨ ᠦᠭᠡᠢ ᠠᠮᠠᠷᠠᠭ ᠬᠣᠶᠠᠷ ᠠᠭᠤᠯᠵᠠᠩᠭᠤᠲᠠ ᠪᠠᠨ ᠤᠬᠠᠭᠠᠨ ᠦᠭᠡᠢ ᠲᠡᠪᠡᠷᠢᠯᠳᠦᠨ ᠰᠢᠨᠤᠯᠲᠠᠢ ᠦᠨᠦᠰᠦᠯᠳᠦᠭᠰᠡᠨ ᠢᠶᠡᠨ ᠡᠦᠲᠦ ᠬᠤᠷᠳᠤᠨ ᠭᠤᠳᠤᠢᠬᠤ ᠦᠭᠡᠢ ᠪᠣᠯ ᠬᠡᠷᠡᠭ ᠭᠠᠷᠴᠤ ᠮᠡᠳᠡᠨᠡ ᠭᠡᠵᠦ ᠠᠢᠩᠭᠤᠷᠢᠲᠦ ᠰᠡᠷᠡᠮᠵᠢ ᠳ᠋ᠡᠭᠡᠨ ᠲᠠᠢᠯᠳᠠᠵᠤ ᠮᠣᠷᠢᠨ ᠤ᠋ ᠪᠠᠨ ᠣᠯᠣᠩ ᠢ᠋ ᠴᠢᠩᠭᠠᠯᠠᠵᠤ ᠄ 《 ᠪᠣᠷᠣᠯᠠᠭ ᠮᠢᠨᠢ ᠡᠷᠡ ᠬᠥᠮᠥᠨ ᠵᠣᠷᠢᠭᠰᠠᠨ ᠳ᠋ᠠᠭᠠᠨ ᠂ ᠡᠷᠡ ᠮᠣᠷᠢ ᠬᠠᠷᠠᠢᠭᠰᠠᠨ ᠳ᠋ᠠᠭᠠᠨ ᠭᠡᠳᠡᠭ ᠶᠦᠮ ᠳᠡ ᠂ ᠡᠦᠲᠦ ᠪᠤᠴᠠᠭᠠᠳ ᠪᠠᠰᠠ ᠰᠤᠨᠤᠮᠠ ᠨᠢᠭᠡ ᠡᠳᠦᠷ ᠦ᠋ᠨ ᠭᠠᠵᠠᠷ ᠪᠠᠢᠭᠠ ᠰᠢᠦ! 》 ᠭᠡᠵᠦ ᠮᠣᠷᠢ ᠪᠠᠨ ᠡᠩᠬᠦᠷᠡᠢᠯᠡᠵᠦ ᠪᠡᠶᠡ ᠪᠡᠨ ᠵᠣᠷᠢᠭᠵᠢᠭᠤᠯᠤᠭᠠᠳ ᠱᠠᠯᠠᠪ ᠮᠣᠷᠳᠠᠵᠤ ᠬᠣᠶᠠᠭᠤᠯᠠ ᠣᠮ ᠬᠣᠮ ᠦᠭᠡᠢ ᠵᠡᠭᠦᠨᠰᠢ ᠳᠠᠪᠬᠢᠪᠠ᠃
《 ᠭᠠᠢ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ ᠭᠠᠬᠠᠢ ᠮᠣᠳᠣᠨ ᠳᠣᠲᠣᠷᠠ ᠠ᠋ᠴᠠ 》 ᠭᠡᠭᠴᠢ ᠪᠡᠷ ᠂ ᠰᠡᠷᠭᠦᠮᠡ ᠰᠢᠨᠡ ᠬᠠᠲᠤᠨ ᠤ᠋ ᠭᠡᠷ ᠡᠴᠡ ᠭᠠᠷᠴᠤ ᠭᠦᠶᠦᠨ ᠪᠣᠯᠵᠣᠭᠠᠨ ᠤ᠋ ᠠᠮᠠᠷᠠᠭ ᠲᠠᠢ ᠪᠠᠨ ᠠᠭᠤᠯᠵᠠᠨ ᠤᠷᠭᠤᠨ ᠲᠤᠲᠠᠭᠠᠭᠰᠠᠨ ᠢ ᠳᠠᠯᠳᠠ ᠠ᠋ᠴᠠ ᠨᠢᠭᠡ ᠬᠥᠮᠦᠨ ᠵᠢᠷᠤᠭ ᠰᠢᠭ᠋ ᠲᠣᠳᠣᠷᠬᠠᠢ ᠬᠠᠷᠠᠵᠠᠢ᠃ ᠲᠡᠷᠡ ᠬᠥᠮᠦᠨ ᠪᠣᠯ ᠳᠠᠷᠤᠢ ᠬᠦᠩ ᠨᠣᠶᠠᠨ ᠤ ᠰᠢᠲᠠᠷ ᠭᠤᠴᠢᠭᠠ ᠦᠯᠵᠡᠢᠰᠠᠩ ᠪᠠᠢᠯᠠ᠃ ᠦᠯᠵᠡᠢᠰᠠᠩ ᠲᠡᠷᠡ ᠰᠦᠨᠢ ᠪᠠᠷᠤᠭ ᠯᠠ ᠨᠣᠢᠷ ᠦᠭᠡᠢ ᠬᠣᠨᠣᠵᠠᠢ᠃
ᠢᠳᠡᠰᠢ ᠤᠤᠭᠤᠰᠢ ᠨᠢ ᠲᠠᠭᠠᠷᠠᠭᠰᠠᠨ ᠦᠭᠡᠢ ᠡᠴᠡ ᠶᠤᠮ ᠤᠤ᠂ ᠦᠭᠡᠢ ᠪᠣᠯ ᠬᠦᠩ ᠨᠣᠶᠠᠨ ᠤ᠋ ᠡᠮᠦᠨᠡ ᠬᠣᠢᠭᠤᠷ ᠵᠢᠷᠣᠭᠠᠯᠠᠵᠤ ᠪᠠᠢᠭᠠᠳ ᠭᠡᠳᠡᠰᠦ ᠬᠣᠳᠣᠭᠣᠳᠣ ᠪᠠᠨ ᠵᠢᠩᠨᠡᠭᠦᠯᠦᠭ᠍ᠰᠡᠨ ᠦ ᠴᠦ᠍ ᠶᠤᠮ ᠤᠤ᠂ ᠶᠠᠭᠤ ᠴᠦ᠍ ᠭᠡᠰᠡᠨ ᠬᠤᠰᠭᠢᠨᠠᠭ ᠬᠣᠳᠣᠭᠣᠳᠤ ᠬᠣᠶᠠᠷ ᠨᠢ ᠪᠠᠢᠷᠢ ᠪᠠᠨ ᠰᠣᠯᠢᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠦᠷᠡᠬᠡᠢ ᠮᠤᠰᠬᠢᠯᠳᠤᠵᠤ ᠡᠪᠡᠳᠦᠨ ᠰᠦᠨᠢᠵᠢᠨ ᠴᠢᠴᠢᠭᠠ ᠠᠯᠳᠠᠭᠤᠯᠵᠠᠢ᠃ ᠰᠦᠨᠢ ᠭᠠᠷᠴᠤ ᠳᠡᠷᠡᠰᠦᠨ ᠤ᠋ ᠴᠠᠭᠠᠨᠠ ᠫᠠᠷᠴᠢᠭᠢᠨᠠᠭᠤᠯᠤᠭᠠᠳ ᠵᠣᠭᠰᠣᠨᠠ ᠦᠭᠡᠢ ᠦᠦᠷ ᠬᠠᠶᠠᠭᠠᠷᠠᠬᠤ ᠳ᠋ᠤ᠌ ᠪᠠᠰᠠ ᠳᠡᠷᠡᠰᠦᠨ ᠦ ᠴᠠᠭᠠᠨᠠᠬᠢ ᠭᠣᠣ ᠳᠣᠲᠣᠷᠠ ᠥᠳᠬᠡᠨ ᠰᠢᠩᠭᠡᠨ ᠢ᠋ᠶ᠋ᠡᠨ ᠭᠣᠭᠣᠵᠢᠭᠤᠯᠤᠨ ᠤᠳᠠᠲᠠᠯᠠ ᠬᠡᠪᠡᠯᠢ ᠪᠡᠨ ᠲᠡᠪᠡᠷᠢᠨ ᠰᠠᠭᠤᠬᠤ ᠵᠠᠭᠤᠷᠠ ᠨᠢᠭᠡ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠬᠥᠮᠦᠨ ᠢᠷᠡᠵᠦ ᠳᠡᠷᠡᠰᠦᠨ ᠦ᠌ ᠴᠠᠭᠠᠨᠠ ᠨᠢᠭᠤᠭᠳᠠᠵᠤ ᠪᠠᠢᠭᠠᠳ ᠪᠠᠭᠠ ᠬᠠᠲᠤᠨ ᠢ᠋ ᠭᠠᠷᠴᠤ ᠢᠷᠡᠬᠦ ᠳ᠋ᠤ᠌ ᠬᠣᠶᠠᠭᠤᠯᠠ ᠮᠣᠷᠳᠠᠨ ᠳᠠᠪᠬᠢᠭᠰᠠᠨ ᠢ᠋ ᠬᠠᠷᠠᠪᠠ᠃
《 ᠡᠨᠡ ᠶᠠᠭᠤᠨ ᠤ᠋ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠵᠢᠰᠦ ᠪᠤᠷᠤᠭᠤ ᠬᠥᠮᠦᠨ ᠪᠣᠯᠪᠠ?》 ᠭᠡᠵᠦ ᠰᠡᠵᠢᠭ ᠠᠪᠤᠭᠰᠠᠨ ᠪᠣᠯᠪᠠᠴᠤ ᠪᠡᠶᠡ ᠨᠢ ᠠᠶᠠ ᠦᠭᠡᠢ ᠳ᠋ᠡᠭᠡᠨ ᠲᠠᠢᠯᠳᠠᠵᠤ《 ᠮᠠᠯ ᠤ᠋ᠨ ᠡᠷᠢᠯ ᠦ᠋ᠨ ᠬᠥᠮᠦᠨ ᠯᠡ ᠪᠠᠢᠯᠭᠦᠢ》 ᠭᠡᠵᠦ ᠪᠣᠳᠣᠵᠤ ᠰᠠᠭᠤᠪᠠ᠃ ᠬᠡᠵᠢᠶᠡ ᠬᠣᠢᠨᠠ ᠪᠠᠭᠠ ᠬᠠᠲᠤᠨ ᠭᠠᠷᠴᠤ ᠢᠷᠡᠵᠦ ᠵᠠᠯᠭᠠᠭᠠᠳ ᠶᠠᠭᠤ ᠪᠣᠯᠤᠭᠰᠠᠨ ᠪᠦᠬᠦᠨ ᠢ᠋ ᠬᠠᠷᠠᠵᠤ ᠮᠠᠯ ᠪᠣᠯᠲᠠᠯᠠ ᠭᠠᠢᠬᠠᠪᠠ᠃
《 ᠴᠢ ᠶᠠᠪᠤᠵᠤ ᠠᠮᠤᠷ ᠢ᠋ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠦ᠋ᠨ ᠮᠠᠨᠴᠤᠷᠭᠠ ᠯᠢᠶᠡᠨᠵᠡᠩ ᠳ᠋ᠦ᠍ ᠮᠡᠳᠡᠭᠳᠡ! ᠥᠨᠥ ᠣᠷᠣᠢ ᠠ᠋ᠴᠠ ᠡᠬᠢᠯᠡᠵᠦ᠂ ᠬᠦᠩ ᠨᠣᠶᠠᠨ ᠤ᠋ ᠰᠢᠨᠡ ᠬᠠᠲᠤᠨ ᠤ᠋ ᠥᠷᠥᠭᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠫᠤᠤ ᠵᠡᠪᠰᠡᠭ ᠲᠡᠢ ᠬᠣᠶᠠᠷ ᠴᠡᠷᠢᠭ ᠡᠭᠡᠯᠵᠢ ᠪᠡᠷ ᠮᠠᠨᠠᠭᠠ ᠮᠠᠨᠠᠵᠤ᠂ ᠪᠠᠭᠠ ᠬᠠᠲᠤᠨ ᠤ᠋ ᠠᠮᠤᠷ ᠮᠡᠨᠳᠦ ᠶ᠋ᠢ ᠪᠠᠲᠤᠯᠠᠬᠤ ᠬᠡᠷᠡᠭᠲᠡᠢ ᠂ ᠮᠡᠳᠡᠪᠡ ᠤᠤ? ᠥᠭᠡᠷᠡ ᠴᠠᠭᠠᠰᠢ ᠪᠠᠨ ᠬᠡᠨ ᠳ᠋ᠦ᠍ ᠴᠦ᠍ ᠡᠯᠳᠡᠪ ᠡᠰᠡᠨ ᠶᠠᠭᠤᠮᠠ ᠶᠠᠷᠢᠵᠤ ᠪᠣᠯᠬᠤ ᠦᠭᠡᠢ!》 ᠭᠡᠵᠦ ᠥᠴᠥᠭᠡᠳᠦᠷ ᠣᠷᠣᠢ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠨᠣᠶᠠᠨ ᠲᠡᠭᠦᠨ ᠳ᠋ᠦ᠍ ᠲᠤᠰᠢᠶᠠᠭᠰᠠᠨ ᠡᠭᠦᠷᠭᠡ ᠶ᠋ᠢ ᠰᠠᠨᠠᠪᠠ᠃ ᠤᠤᠯ ᠨᠢ ᠪᠠᠭᠠ ᠬᠠᠲᠤᠨ ᠰᠡᠷᠭᠦᠮᠡ ᠶ᠋ᠢᠨ ᠡᠬᠡ ᠨᠢ ᠫᠤᠩᠰᠤᠭᠲᠤᠯᠮᠠᠡ ᠬᠥᠭᠰᠢᠨ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍《 ᠬᠦᠩ ᠨᠣᠶᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠢ᠋ ᠰᠢᠨᠡ ᠨᠤᠲᠤᠭ ᠲᠤ ᠳᠠᠳᠲᠠᠯᠠ ᠬᠠᠷᠠᠵᠤ ᠬᠠᠮᠠᠭᠠᠯᠠᠵᠤ ᠪᠠᠢᠭᠠᠷᠠᠢ! ᠲᠤᠰᠠᠯᠠᠭᠴᠢ ᠭᠤᠸᠠᠢ! ᠲᠡᠷᠡ ᠴᠢᠨᠢ ᠴᠠᠭᠠᠨᠠ ᠪᠠᠨ ᠥᠭᠡᠷᠡ ᠬᠥᠮᠦᠨ ᠲᠡᠢ ᠰᠡᠳᠬᠢᠯ ᠲᠡᠢ ᠪᠣᠯᠴᠢᠬᠠᠭᠰᠠᠨ ᠶᠤᠮ ᠠ᠋! ᠲᠥᠷᠬᠥᠮ ᠳ᠋ᠡᠭᠡᠨ ᠪᠠᠢᠬᠤ ᠶ᠋ᠢᠨ ᠦᠭᠡᠢ ᠪᠤᠷᠤᠭᠤ ᠰᠠᠨᠠᠭᠠ ᠣᠷᠣᠵᠤ ᠤᠷᠭᠤᠵᠤ ᠳᠤᠲᠠᠭᠠᠭᠰᠠᠨ ᠤᠳᠠᠭᠠ ᠲᠠᠢ᠂ ᠰᠤᠷ ᠴᠤᠯᠪᠤᠭᠤᠷ ᠵᠠᠵᠢᠯᠵᠤ ᠰᠤᠷᠤᠭᠰᠠᠨ ᠮᠣᠷᠢ ᠴᠤᠯᠪᠤᠭᠤᠷ ᠲᠠᠰᠤᠳᠠᠬᠤ ᠠ᠋ᠴᠠ ᠬᠢᠴᠢᠶᠡᠭᠡᠷᠡᠢ》 ᠭᠡᠵᠦ ᠰᠢᠪᠡᠨᠡᠭᠰᠡᠨ ᠪᠠᠢᠵᠠᠢ᠃
ᠦᠯᠵᠡᠢᠰᠠᠩ ᠭᠡᠭᠴᠢ ᠭᠠᠤᠯᠢᠨ ᠰᠢᠷᠠ ᠬᠠᠴᠠᠷ ᠂ ᠮᠡᠬᠵᠢᠭᠡᠷ ᠮᠥᠷᠥ ᠲᠡᠢ ᠭᠠᠯᠪᠢᠷ ᠲᠥᠷᠬᠦ ᠮᠠᠭᠤᠲᠠᠢ ᠬᠥᠮᠦᠨ ᠪᠢᠯᠡ᠃ ᠲᠠᠪᠤ ᠭᠤᠷᠪᠠᠬᠠᠨ ᠰᠢᠷᠠ ᠰᠠᠪᠬᠠᠯ ᠨᠢ ᠠᠭᠤᠷ ᠬᠦᠷᠬᠦ ᠪᠤᠶᠤ ᠪᠠᠴᠢᠮᠳᠠᠵᠤ ᠰᠠᠨᠳᠤᠷᠪᠠᠯ ᠮᠤᠤᠷ ᠤ᠋ᠨ ᠰᠠᠬᠠᠯ ᠰᠢᠭ᠋ ᠰᠡᠷᠪᠡᠰ ᠰᠡᠷᠪᠡᠰ ᠬᠢᠨ ᠠᠷᠵᠠᠢᠨ ᠪᠣᠰᠴᠤ ᠴᠢᠷᠠᠢ ᠨᠢ ᠭᠦᠨ ᠤᠯᠠᠢᠨᠠ᠃ ᠴᠢᠰ ᠴᠢᠰ ᠬᠢᠭᠰᠡᠨ ᠰᠣᠯᠣᠭᠠᠢ ᠰᠢᠩᠭᠡᠨ ᠳᠠᠭᠤ ᠪᠠᠷ ᠪᠠᠷᠬᠢᠷᠠᠵᠤ ᠬᠡᠯᠡᠬᠦ ᠵᠠᠩ ᠲᠠᠢ ᠳ᠋ᠤᠨᠢ ᠬᠥᠮᠦᠰ ᠲᠡᠭᠦᠨ ᠢ᠋ 《ᠢᠮᠠᠭᠠᠨ ᠳᠠᠭᠤᠲᠤ》 ᠪᠤᠶᠤ ᠵᠠᠷᠢᠮ ᠨᠢ ᠰᠢᠭᠤᠳ ᠢᠮᠠᠭᠠ ᠭᠡᠵᠦ ᠳᠠᠭᠤᠳᠠᠨᠠ᠃ ᠲᠡᠭᠦᠨ ᠦ᠌ ᠵᠢᠰᠦ ᠲᠥᠯᠥᠪ᠂ ᠬᠥᠳᠡᠯᠵᠦ ᠪᠠᠷᠢᠬᠤ᠂ ᠵᠠᠩ ᠠᠷᠠᠨᠰᠢᠨ ᠨᠢ ᠬᠠᠷᠠᠬᠤ ᠳ᠋ᠤ᠌ ᠶᠠᠭ ᠯᠠ ᠮᠠᠨᠵᠤ᠂ ᠬᠢᠲᠠᠳ ᠤ᠋ᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠠᠭᠲᠠ ᠬᠥᠮᠦᠨ ᠭᠡᠰᠡᠨ ᠦᠭᠡ᠃ ᠭᠡᠲᠡᠯᠡ ᠦᠯᠵᠡᠢᠰᠠᠩ ᠠᠬᠳᠠ ᠬᠥᠮᠦᠨ ᠪᠢᠰᠢ ᠲᠥᠷᠥᠯᠬᠢ ᠶ᠋ᠢᠨ᠃
ᠡᠵᠡᠨ ᠦ᠌ ᠪᠡᠨ ᠡᠮᠦᠨᠡ ᠬᠣᠢᠨᠠ ᠪᠦᠬᠦᠯᠵᠡᠠ ᠴᠢᠷᠠᠢ ᠶ᠋ᠢᠨ ᠬᠢᠨᠢ ᠪᠠᠢᠳᠠᠯ᠂ ᠳᠠᠭᠤᠨ ᠤ᠋ ᠬᠢᠨᠢ ᠥᠩᠭᠡ ᠶ᠋ᠢ ᠠᠵᠢᠨ ᠶᠠᠩ ᠶᠠᠩ ᠭᠡᠵᠦ ᠴᠢᠬᠢ ᠬᠠᠳᠬᠤᠮᠠ ᠰᠢᠩᠭᠡᠨ ᠳᠠᠭᠤ ᠪᠠᠷ ᠳᠤᠤᠭᠠᠷᠴᠤ ᠡᠵᠡᠨ ᠳ᠋ᠡᠭᠡᠨ ᠲᠠᠭᠠᠯᠠᠭᠳᠠᠨ᠂ ᠰᠠᠢᠨ ᠨᠡᠷᠡ ᠵᠡᠭᠦᠬᠦ ᠭᠡᠵᠦ ᠳᠣᠯᠢᠭᠠᠨᠠᠳᠠᠭ᠃ ᠴᠢᠬᠤᠯᠠ ᠲᠠᠢ ᠦᠶᠡ ᠳ᠋ᠦ᠍ ᠡᠵᠡᠨ ᠦ᠌ ᠪᠡᠨ ᠰᠢᠭᠡᠰᠦ ᠳᠤᠰᠤᠯᠠᠭᠰᠠᠨ ᠭᠤᠲᠤᠯ ᠤ᠋ᠨ ᠬᠢᠨᠢ ᠬᠣᠩᠰᠢᠶᠠᠷ ᠢ᠋ ᠳᠣᠯᠢᠶᠠ ᠭᠡᠬᠦ ᠳ᠋ᠦ᠍ ᠴᠡᠪᠡᠷᠬᠡᠨ ᠰᠠᠢᠬᠠᠨ ᠳᠣᠯᠢᠶᠠᠴᠢᠬᠠᠬᠤ ᠳᠣᠯᠳᠣᠭᠣᠨᠠᠭᠤᠷ ᠪᠢᠯᠪᠢᠭᠦᠷᠴᠢ ᠨᠣᠬᠠᠢ ᠰᠢᠭ᠋ ᠬᠥᠮᠦᠨ ᠪᠠᠢᠳᠠᠭ ᠪᠣᠯ ᠥᠯᠵᠡᠢᠰᠠᠩ ᠳᠠᠷᠤᠢ ᠲᠡᠢᠮᠦ ᠬᠥᠮᠦᠨ ᠮᠥᠨ᠃
ᠥᠯᠵᠡᠢᠰᠠᠩ ᠤᠴᠢᠷ ᠶᠠᠪᠤᠳᠠᠯ ᠡᠵᠡᠨ ᠳ᠋ᠦ᠍ᠨᠢ ᠪᠤᠷᠤᠭᠤ ᠲᠡᠢᠰᠢ ᠡᠷᠭᠢᠭᠰᠡᠨ ᠢ᠋ ᠲᠦᠳᠡᠬᠡᠨ ᠰᠡᠭᠡᠰᠬᠢᠵᠤ ᠥᠮᠥᠳᠥ ᠪᠡᠨ ᠴᠦ᠍ ᠲᠡᠯᠡᠢᠯᠡᠬᠦ ᠶ᠋ᠢᠨ ᠤᠬᠠᠭᠠ ᠦᠭᠡᠢ ᠦᠷᠭᠦᠭᠰᠡᠨ ᠣᠭᠣᠨᠣ ᠰᠢᠭ᠋ ᠨᠢᠳᠦ ᠨᠢ ᠣᠷᠣᠢ ᠳᠡᠭᠡᠷᠡ ᠪᠡᠨ ᠭᠠᠷᠴᠤ ᠣᠷᠣᠮᠠᠭ ᠬᠡᠳᠦᠨ ᠰᠢᠷᠠ ᠰᠠᠬᠠᠯ ᠨᠢ ᠰᠡᠷᠪᠡᠯᠵᠡᠨ ᠬᠥᠳᠡᠯᠦᠨᠡ᠃ ᠪᠠᠭᠠ ᠬᠠᠲᠤᠨ ᠤ᠋ ᠤᠷᠭᠤᠨ ᠳᠤᠲᠠᠭᠠᠭᠰᠠᠨ ᠠᠩᠬᠠᠨ ᠤ᠋ ᠰᠣᠯᠣᠭᠠᠢ ᠴᠢᠮᠡᠭᠡ ᠶ᠋ᠢ ᠬᠦᠩ ᠨᠣᠶᠠᠨ ᠳ᠋ᠤ᠌ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠦᠷᠴᠦ ᠴᠠᠬᠢᠯᠭᠠᠨ ᠰᠢᠭ᠋ ᠳᠠᠷᠤᠢᠬᠠᠨ ᠰᠣᠨᠣᠰᠬᠠᠵᠤ᠂ ᠡᠵᠡᠨ ᠵᠠᠰᠠᠭ ᠲᠠᠭᠠᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠᠷ ᠰᠠᠮᠰᠤᠷᠠᠬᠤ ᠭᠡᠵᠦ ᠴᠢᠷᠮᠠᠢᠨᠠ᠃
ᠳᠡᠷᠡᠰᠦᠨ ᠳᠣᠲᠣᠷᠠ ᠠ᠋ᠴᠠ ᠦᠰᠦᠷᠦᠨ ᠪᠣᠰᠴᠤ ᠥᠮᠥᠳᠥ ᠪᠡᠨ ᠴᠦ᠍ ᠲᠡᠯᠡᠢᠯᠡᠭᠰᠡᠨ ᠦᠭᠡᠢ ᠪᠠᠭᠠᠴᠠᠭᠠᠨᠠᠨ ᠭᠦᠶᠦᠭᠰᠡᠭᠡᠷ ᠪᠠᠭᠠ ᠬᠠᠲᠤᠨ ᠤ᠋ ᠭᠡᠷ ᠲᠦ᠍ ᠴᠦᠯᠲᠦ ᠲᠠᠯᠪᠢᠨ ᠣᠷᠣᠵᠤ᠄
— ᠡᠷᠬᠢᠮ ᠬᠦᠩ᠁ ᠬᠦᠩ᠁ ᠬᠦᠩ ᠨᠣᠶᠠᠨ ᠭᠤᠸᠠᠢ ᠠ᠋᠂ ᠪᠠ᠁ ᠪᠠ᠁ ᠪᠠᠭᠠ᠁ ᠬᠠ᠁ ᠬᠠ᠁ ᠬᠠᠲᠤᠨ᠁ ᠭᠡᠵᠦ ᠦᠭᠡ ᠪᠡᠨ ᠴᠦ᠍ ᠲᠣᠳᠣ ᠬᠡᠯᠡᠵᠦ ᠳᠡᠢᠯᠬᠦ ᠦᠭᠡᠢ ᠡᠭᠡᠷᠡᠨᠡ᠃
ᠠᠶᠤᠮᠰᠢᠭ ᠦᠭᠡᠢ ᠬᠦᠩ ᠨᠣᠶᠠᠨ ᠤ᠋ ᠤᠨᠲᠠᠭᠰᠠᠨ ᠥᠷᠥᠭᠡᠨ ᠳ᠋ᠦ᠍ ᠴᠦᠯᠲᠦ ᠣᠷᠣᠭᠰᠠᠨ ᠡᠨᠡ ᠬᠦ᠌ ᠬᠠᠴᠢᠨ ᠳᠦᠷᠢ ᠲᠡᠢ ᠬᠥᠮᠦᠨ ᠡᠴᠡ ᠴᠣᠴᠢᠷᠳᠠᠨ ᠰᠡᠷᠡᠭᠰᠡᠨ ᠨᠣᠶᠠᠨᠲᠠᠨ᠄
— ᠮᠠᠭᠤ ᠵᠤᠯᠪᠤᠳᠠᠰᠤ! ᠦᠦᠷ ᠬᠠᠷᠠᠩᠭᠤᠢ ᠪᠠᠷ ᠡᠴᠢᠭᠡ ᠳ᠋ᠡᠭᠡᠨ ᠢᠩᠭᠢᠵᠦ ᠴᠥᠯᠴᠦᠭᠡᠨᠡᠭᠡᠳ᠁ ᠭᠠᠷ! ᠭᠡᠵᠦ ᠵᠠᠩᠳᠤᠷᠪᠠᠯ ᠥᠯᠵᠡᠢᠰᠠᠩ ᠪᠠᠯᠠᠭᠳᠠᠬᠤ ᠳ᠋ᠠᠭᠠᠨ ᠳᠠᠪᠤᠰᠠᠩ ᠤ᠋ᠨ ᠢ᠋ᠶ᠋ᠠᠨ ᠤᠷᠢᠲᠠᠢ ᠵᠠᠬᠠ ᠶ᠋ᠢ ᠨᠢ ᠬᠤᠮᠢᠵᠤ ᠪᠠᠷᠢᠭᠰᠠᠨ ᠥᠮᠥᠳᠥ ᠪᠡᠨ ᠠᠯᠳᠠᠵᠤ ᠲᠦᠰᠬᠢᠲᠡᠯᠡ ᠬᠥᠰᠡᠷ ᠰᠥᠭᠥᠳᠦᠭᠡᠳ᠄
— ᠤᠷ᠁ ᠣᠷᠭᠣ᠁ ᠴᠢᠬᠠᠭᠰᠠᠨ! ᠭᠡᠵᠦ ᠢᠮᠠᠭᠠᠨ ᠳᠠᠭᠤ ᠨᠢ ᠤᠯᠠᠮ ᠴᠦ᠍ ᠰᠢᠩᠭᠡᠷᠡᠵᠦ ᠶᠣᠣᠵᠠ ᠦᠭᠡᠢ ᠰᠣᠨᠣᠰᠳᠠᠨᠠ᠃
— ᠶᠠᠭᠤ? ᠶᠠᠭᠤ ᠣᠷᠭᠣ᠁ ᠤᠷᠭᠤ᠁ ᠭᠡᠳ ᠪᠠᠢᠳᠠᠭ ᠨᠢ ᠬᠡᠳᠦᠨ ᠰᠢᠷᠠ ᠰᠠᠬᠠᠯ ᠴᠢᠨᠢ ᠨᠡᠮᠡᠭᠡᠳ ᠤᠷᠭᠤᠴᠢᠬᠠᠪᠠ ᠤᠤ?
— ᠣᠢ᠁ ᠣᠢ᠁ ᠦᠭᠡᠢ!
— ᠶᠠᠭᠤ? ᠡᠴᠢᠭᠡ ᠳ᠋ᠡᠭᠡᠨ ᠢᠩᠭᠢᠵᠦ ᠡᠭᠡᠷᠡᠭᠡᠳ ᠪᠠᠢᠳᠠᠭ ᠶᠤᠮ ? ᠵᠦᠭ ᠲᠡᠢ ᠬᠣᠶᠠᠷ ᠦᠭᠡ ᠬᠡᠯᠡᠵᠦ ᠴᠢᠳᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠤᠤ? ᠮᠠᠭᠤ ᠴᠢᠰᠤ! ᠭᠡᠵᠦ ᠡᠷᠲᠡ ᠶ᠋ᠢᠨ ᠲᠠᠭᠠᠲᠠᠢ ᠨᠣᠢᠷ ᠢ᠋ᠶ᠋ᠠᠨ ᠬᠠᠷᠠᠮᠨᠠᠨ ᠠᠬᠠᠷᠴᠢᠯᠠᠭᠰᠠᠨ ᠬᠦᠩ ᠨᠣᠶᠠᠨ ᠢᠮᠠᠭᠠᠨ ᠳᠠᠭᠤᠲᠤ ᠦᠯᠵᠡᠢᠰᠠᠩ ᠤ᠋ᠨ ᠶᠣᠣᠵᠠ ᠦᠭᠡᠢ ᠰᠢᠨᠵᠢ ᠶ᠋ᠢ ᠬᠠᠷᠠᠭᠠᠳ ᠡᠭᠳᠡᠭᠦᠦ ᠨᠢ ᠬᠦᠷᠴᠦ᠄
— ᠦᠭᠡᠢ ᠠ᠋! ᠴᠢ ᠬᠥᠮᠦᠨ ᠦ᠌ ᠦᠭᠡ ᠮᠡᠳᠡᠳᠡᠭ ᠦᠭᠡᠢ ᠤᠤ? ᠴᠠᠭᠠᠰᠢ ᠲᠣᠨᠢᠯ ! ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠁ ᠭᠡᠪᠡᠯ ᠦᠯᠵᠡᠢᠰᠠᠩ᠄
— ᠨᠣᠶᠠᠨ ᠲᠠ᠂ ᠲᠠ ᠁ ᠮᠢᠨᠦ ᠁ ᠮᠢᠨᠦ ᠁ ᠮᠢᠨᠦ ᠁ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰ! ᠪᠠ ᠁ ᠪᠠᠭᠠ ᠬᠠ ᠁ ᠬᠠᠲᠤᠨ ᠲᠡᠷᠡ ᠁ ᠲᠡᠷᠡ ᠲᠡᠷᠡ ᠳᠤᠲᠠ ᠁ ᠳᠤᠲᠠᠭᠠᠴᠢᠬᠠᠯᠠ! ᠭᠡᠪᠡ᠃
— ᠶᠠᠭᠤ ᠪᠠᠭᠠ ᠬᠠᠲᠤᠨ ᠲᠣᠭᠲᠠᠭᠠᠴᠢᠬᠠᠯᠠ ᠭᠡᠨᠡ ᠠ᠋? ᠭᠡᠳ ᠰᠣᠴᠢᠩᠭᠠᠨ ᠬᠠᠵᠠᠭᠤ ᠳ᠋ᠠᠬᠢ ᠥᠪᠥᠢᠭᠰᠡᠨ ᠬᠥᠨᠵᠢᠯᠡ ᠶ᠋ᠢ ᠢᠷᠡᠪᠡᠯ ᠪᠠᠭᠠ ᠬᠠᠲᠤᠨ ᠤ᠋ ᠣᠷᠣ ᠬᠣᠭᠣᠰᠣᠨ ᠪᠠᠢᠪᠠ᠃ ᠬᠦᠩ ᠨᠣᠶᠠᠨ ᠲᠠ ᠠᠮᠤᠷ ᠰᠠᠢᠬᠠᠨ ᠤᠨᠲᠠᠵᠤ ᠪᠠᠢᠭᠠᠷᠠᠢ! ᠪᠢ ᠬᠣᠯᠠ ᠶᠠᠪᠤᠯᠠ! ᠭᠡᠰᠡᠨ ᠬᠣᠭᠣᠰᠣᠨ ᠣᠷᠣ ᠲᠡᠭᠦᠨ ᠦ᠌ ᠡᠮᠦᠨᠡ ᠡᠴᠡ ᠬᠥᠢᠲᠡᠮᠰᠦᠭ ᠬᠠᠷᠢᠭᠤᠯᠵᠤ ᠪᠠᠢᠯᠠ᠃
ᠦᠯᠵᠡᠢᠰᠠᠩ ᠬᠦᠩ ᠨᠣᠶᠠᠨ ᠤ᠋ ᠠᠮᠠᠨ ᠠ᠋ᠴᠠ ᠤᠨᠠᠬᠤ ᠦᠭᠡ ᠶ᠋ᠢ ᠭᠠᠵᠠᠷ ᠲᠤᠰᠤᠭᠠᠬᠤ ᠦᠭᠡᠢ ᠭᠡᠵᠦ ᠬᠢᠴᠢᠶᠡᠨ ᠴᠢᠩᠨᠠᠬᠤ ᠳ᠋ᠠᠭᠠᠨ ᠠᠶᠤᠨ ᠪᠡᠮᠪᠡᠭᠡᠨᠡᠨᠡ ᠃
— ᠴᠠᠭᠠᠰᠢ ᠪᠠᠨ ᠵᠠᠬᠢᠷᠤᠭᠴᠢ ᠂ ᠲᠤᠰᠠᠯᠠᠭᠴᠢ ᠵᠡᠷᠭᠡ ᠨᠣᠶᠠᠳ ᠲᠤ ᠬᠡᠯᠡᠭᠰᠡᠨ ᠤᠤ ? ᠭᠡᠵᠦ ᠬᠦᠩ ᠨᠣᠶᠠᠨ ᠵᠠᠩᠳᠤᠷᠤᠩᠭᠤᠢ ᠠᠰᠠᠭᠤᠪᠠ᠃
— ᠦᠭᠡᠢ ᠃
— ᠲᠡᠭᠡᠭᠡᠳ ᠶᠠᠭᠤ ᠭᠡᠵᠦ ᠡᠨᠳᠡ ᠮᠢᠬᠠᠨ ᠪᠠᠯᠢᠩ ᠣᠷᠬᠢᠭᠠᠳ ᠁ ᠭᠡᠵᠦ ᠬᠦᠩ ᠨᠣᠶᠠᠨ ᠢ᠋ ᠬᠡᠯᠡᠵᠦ ᠪᠠᠷᠠᠬᠤ ᠠ᠋ᠴᠠ ᠡᠮᠦᠨᠡ ᠦᠯᠵᠡᠢᠰᠠᠩ ᠄
— ᠵᠠ ! ᠭᠡᠵᠦ ᠬᠥᠩᠭᠡᠨ ᠳᠤᠤᠭᠠᠷᠴᠤ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠴᠤᠬᠤᠷᠢᠨ ᠬᠠᠲᠠᠪᠴᠢ ᠠᠯᠬᠤᠬᠤ ᠶ᠋ᠢ ᠵᠠᠪᠳᠤᠲᠠᠯᠠ ᠨᠢᠭᠡ ᠶᠠᠭᠤᠮᠠ ᠲᠠᠢ ᠮᠥᠷᠭᠥᠯᠳᠦᠪᠡ ᠃ ᠲᠡᠷᠡ ᠨᠢ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠷᠠᠰᠢᠲᠠᠷᠵᠠ ᠭᠤᠸᠠᠢ ᠪᠠᠢᠵᠠᠢ ᠃ ᠶᠠᠪᠤᠳᠠᠯ ᠤᠴᠢᠷ ᠤ᠋ᠨ ᠣᠨᠢ ᠶ᠋ᠢ ᠭᠠᠳᠠᠷᠯᠠᠭᠰᠠᠨ ᠷᠠᠰᠢᠲᠠᠷᠵᠠ ᠵᠠᠬᠢᠷᠤᠭᠴᠢ ᠬᠦᠩ ᠨᠣᠶᠠᠨ ᠳ᠋ᠤ᠌ ᠰᠠᠢᠮᠰᠤᠷᠠᠬᠤ ᠭᠡᠵᠦ ᠪᠦᠬᠦ ᠮᠠᠭᠤ ᠶ᠋ᠢ ᠦᠯᠵᠡᠢᠰᠠᠩ ᠳ᠋ᠤ᠌ ᠲᠣᠬᠣᠵᠤ ᠄
— ᠲᠡᠭᠷᠢ ᠶ᠋ᠢᠨ ᠪᠤᠬᠤᠷ ᠲᠤ᠌ ᠲᠦᠢᠮᠡᠷ ᠳᠡᠭᠳᠡᠭᠰᠡᠨ ᠰᠢᠭ ᠶᠡᠬᠡ ᠬᠡᠷᠡᠭ ᠭᠠᠷᠴᠤ ᠪᠠᠢᠬᠤ ᠳ᠋ᠤ᠌ ᠡᠷᠲᠡᠬᠡᠨ ᠰᠢᠭ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ᠂ ᠲᠤᠰᠠᠯᠠᠭᠴᠢ ᠨᠣᠶᠠᠨ ᠳ᠋ᠤ᠌ ᠠᠢᠯᠠᠳᠬᠠᠵᠤ ᠮᠡᠳᠡᠭᠦᠯᠬᠦ ᠦᠭᠡᠢ ᠳᠡᠮᠡᠢ ᠦᠦᠷ ᠴᠦᠤᠷ ᠢ᠋ᠶ᠋ᠠᠷ ᠬᠦᠩ ᠨᠣᠶᠠᠨ ᠤ᠋ ᠤᠨᠲᠠᠯᠭᠠ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠠᠶᠤᠮᠰᠢᠭ ᠦᠭᠡᠢ ᠣᠷᠣᠵᠤ ᠢᠷᠡᠵᠦ ᠂ ᠨᠣᠶᠠᠨ ᠢ᠋ ᠴᠣᠴᠢᠷᠳᠠᠭᠤᠯᠳᠠᠭ ᠨᠢ ᠶᠠᠭᠤ ᠪᠢᠯᠡ ? ᠬᠦᠩ ᠨᠣᠶᠠᠨ ᠢ᠋ ᠴᠣᠴᠢᠷᠳᠠᠭᠤᠯᠤᠭᠰᠠᠨ ᠬᠣᠢᠲᠤᠬᠢ ᠮᠥᠷ ᠴᠢᠨᠢ ᠶᠠᠭᠤ ᠪᠣᠯᠤᠨᠠ ᠭᠡᠳᠡᠭ ᠢ᠋ᠶ᠋ᠡᠨ ᠪᠣᠳᠣᠭᠠ ᠦᠭᠡᠢ ᠤᠤ ? ᠴᠢ ! ᠪᠥᠨᠲᠥᠭᠡᠷ ᠴᠢᠨᠢ ᠬᠠᠪᠴᠢᠭᠠᠷ ᠮᠥᠷᠦᠨ ᠡᠴᠡ ᠪᠡᠨ ᠤᠢᠳᠴᠤ ᠪᠠᠢᠨᠠ ᠤᠤ? ᠭᠡᠰᠡᠨ ᠳ᠋ᠦ᠍ ᠦᠯᠵᠡᠢᠰᠠᠩ ᠰᠠᠨᠲᠤᠷᠴᠤ ᠄
— ᠦᠭᠡᠢ ᠂ ᠦᠭᠡᠢ ! ᠪᠣᠭᠣᠯ ᠮᠢᠨᠦ ᠪᠤᠷᠤᠭᠤ᠃ ᠵᠠᠬᠢᠷᠤᠭᠴᠢ ᠨᠣᠶᠠᠨ ᠲᠠ ᠥᠷᠥᠰᠢᠶᠡᠵᠦ ᠬᠠᠢᠷᠠᠯᠠ! ᠭᠡᠵᠦ ᠡᠵᠡᠨ ᠳ᠋ᠡᠭᠡᠨ ᠵᠠᠩᠨᠠᠭᠳᠠᠨ ᠴᠢᠬᠢ ᠪᠡᠨ ᠬᠤᠯᠮᠠᠢᠭᠰᠠᠨ ᠨᠣᠬᠠᠢ ᠰᠢᠭ᠋ ᠭᠢᠯᠠᠪ ᠬᠠᠯᠠᠪ ᠬᠢᠵᠦ ᠷᠠᠰᠢᠳᠠᠷᠵᠠ ᠵᠠᠬᠢᠷᠤᠭᠴᠢ ᠶ᠋ᠢ ᠴᠢᠷᠠᠢᠳᠠᠨᠠ᠃
ᠲᠦᠳᠡᠬᠡᠨ ᠵᠠᠭᠤᠷᠠ ᠪᠠᠭᠠ ᠬᠠᠲᠤᠨ ᠤ᠋ ᠤᠷᠭᠤᠭᠰᠠᠨ ᠲᠤᠬᠠᠢ ᠠᠵᠢᠭ ᠠᠪᠤᠭᠰᠠᠨ ᠬᠥᠮᠦᠰ ᠰᠢᠪᠡᠷ ᠠᠨᠢᠷ ᠬᠡᠯᠡᠯᠴᠡᠨᠡ᠃
ᠴᠡᠴᠡᠭ ᠬᠠᠲᠤᠨ ᠴᠦ᠍ ᠬᠦᠩ ᠨᠣᠶᠠᠨ ᠤ᠋ ᠤᠨᠲᠠᠭᠰᠠᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠣᠴᠢᠨ᠄
— ᠭᠡᠭ ᠂ ᠬᠢᠷᠢ ᠪᠡᠨ ᠮᠡᠳᠡᠭᠦ ᠦᠭᠡᠢ ᠮᠠᠭᠤ ᠴᠠᠭᠠᠴᠢᠨ! ᠶᠡᠷᠦ ᠨᠢ ᠬᠠᠷᠠ ᠬᠣᠮᠬᠣᠷᠠᠤ ᠳᠣᠯᠢᠶᠠᠭᠰᠠᠨ ᠥᠯᠥᠭᠴᠢᠨ ᠴᠠᠭᠠᠨ ᠪᠤᠳᠠᠭᠠᠨ ᠳ᠋ᠤ᠌ ᠬᠠᠬᠠᠵᠤ ᠱᠠᠩᠳᠠᠭᠤᠷᠠᠬᠤ ᠳ᠋ᠠᠭᠠᠨ ᠳᠤᠲᠠᠭᠠᠭᠰᠠᠨ ᠪᠠᠢᠯᠭᠦᠢ ᠂ ᠴᠢᠭᠢᠶᠡᠲᠦᠷᠦᠦ! ᠭᠡᠵᠦ ᠬᠠᠷᠢᠶᠠᠭᠰᠠᠨ ᠢ᠋ᠶ᠋ᠠᠨ ᠨᠣᠶᠠᠨ ᠤ᠋ ᠵᠦᠭ ᠬᠠᠷᠠᠵᠤ 《 ᠦᠭᠡᠢ ᠠ᠋ ᠂ ᠬᠦᠩ ᠨᠣᠶᠠᠨ ᠲᠠ ᠡᠪᠦᠷᠲᠦᠯᠡᠵᠦ ᠤᠨᠲᠠᠭᠰᠠᠨ ᠬᠥᠮᠦᠨ ᠢ᠋ᠶ᠋ᠡᠨ ᠪᠣᠰᠴᠤ ᠳᠤᠲᠠᠭᠠᠬᠤ ᠶ᠋ᠢ ᠨᠢ ᠴᠦ᠍ ᠮᠡᠳᠡᠳᠡᠭ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠰᠦᠷᠡᠬᠡᠢ ᠪᠥᠬᠡ ᠤᠨᠲᠠᠪᠠ ⁈ ᠭᠡᠰᠡᠨ ᠪᠣᠯᠪᠠᠴᠤ ᠳᠣᠲᠣᠷᠠ ᠪᠠᠨ 《 ᠤᠤᠬᠠᠢ᠂ ᠳᠣᠷᠢᠭᠤᠨ ᠶᠤᠮ! ᠨᠢᠳᠦᠨ ᠦ᠌ ᠳᠠᠯᠳᠠ ᠴᠢᠬᠢᠨ ᠦ᠌ ᠴᠠᠭᠠᠨᠠ ᠨᠢᠭᠡᠮᠦᠰᠦᠨ ᠳᠤᠲᠠᠭᠠᠵᠤ ᠮᠥᠩᠬᠡ ᠠᠯᠠᠭᠠ ᠪᠣᠯᠤᠭᠠᠰᠠᠢ! ᠠᠷᠢᠯᠤᠭ ᠴᠠᠭᠠᠰᠢ ! ᠠᠶᠠᠭᠠ ᠲᠠᠢ ᠠ᠋ᠴᠠ ᠮᠢᠨᠢ ᠬᠣᠷᠣᠭᠠᠵᠤ᠂ ᠠᠵᠠ ᠵᠢᠷᠭᠠᠯ ᠢ᠋ ᠮᠢᠨᠢ ᠬᠢᠮᠤᠰᠤᠯᠠᠭᠰᠠᠨ ᠮᠠᠭᠤ ᠥᠯᠥᠭᠴᠢᠨ ᠢ᠋ ᠁ ᠭᠡᠵᠦ ᠴᠠᠭᠠᠨᠠ ᠪᠠᠨ ᠠᠲᠠᠭᠠᠷᠬᠠᠵᠤ ᠵᠠᠨᠤᠪᠠᠯ ᠴᠢᠷᠠᠢ ᠳ᠋ᠤᠨᠢ ᠲᠠᠪᠠ ᠨᠢ ᠬᠠᠨᠤᠭᠰᠠᠨ ᠪᠠᠢᠳᠠᠯ ᠢᠯᠡ ᠪᠠᠢᠯᠠ᠃ ᠦᠯᠵᠡᠢᠰᠠᠩ ᠂ ᠴᠡᠴᠡᠭ ᠬᠠᠲᠤᠨ ᠤ᠋ ᠢᠩᠭᠢᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠥᠮᠥᠳᠥ ᠪᠡᠨ ᠲᠠᠲᠠᠭᠠᠳ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠴᠤᠬᠤᠷᠢᠨ ᠭᠠᠷᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠨᠣᠢᠷᠮᠤᠭ ᠠ᠋ᠴᠠ ᠪᠠᠨ ᠭᠦᠢᠴᠡᠳ ᠰᠡᠷᠡᠭᠰᠡᠨ ᠬᠦᠩ ᠨᠣᠶᠠᠨ 《 ᠪᠠᠭᠠ ᠬᠠᠲᠤᠨ ᠣᠷᠭᠣᠴᠢᠬᠠᠯᠠ》 ᠭᠡᠵᠦ ᠰᠡᠬᠡᠰᠬᠢᠭᠰᠡᠨ ᠮᠠᠶᠢᠭᠲᠠᠢ᠄
— ᠥᠯᠵᠡᠢᠰᠠᠩ ᠡ! ᠨᠠᠭᠠᠰᠢ ᠪᠠᠨ !ᠭᠡᠪᠡᠯ ᠥᠯᠵᠡᠢᠰᠠᠩ ᠡᠭᠦᠳᠡ ᠪᠡᠷ ᠳᠠᠬᠢᠨ ᠨᠠᠪᠲᠠᠰᠬᠢᠨ ᠣᠷᠣᠵᠤ ᠢᠷᠡᠭᠡᠳ᠄
— ᠵᠠ ᠂ ᠬᠦᠩ ᠨᠣᠶᠠᠨ ᠲᠠ ᠶᠠᠭᠤ ᠠᠢᠯᠠᠳᠬᠤ ᠭᠡᠪᠡ ? ᠮᠠᠭᠤ ᠳᠣᠷᠣᠢ ᠪᠣᠭᠣᠯ ᠢ᠋ᠶ᠋ᠠᠨ ᠥᠷᠥᠰᠢᠶᠡᠭᠡᠴᠢ ! ᠭᠡᠳ ᠪᠥᠬᠥᠯᠵᠡᠨ᠂ ᠭᠤᠲᠤᠯ ᠤ᠋ᠨ ᠬᠣᠩᠰᠢᠶᠠᠷ ᠢ᠋ᠶ᠋ᠠᠨ ᠡᠭᠡᠯᠵᠢᠯᠡᠨ ᠬᠠᠷᠠᠵᠤ ᠠᠮᠢᠰᠬᠤᠭᠠ ᠨᠢ ᠳᠡᠭᠡᠷᠡ ᠳᠡᠭᠡᠷᠡ ᠳᠠᠪᠬᠤᠴᠠᠬᠤ ᠳ᠋ᠤ᠌ ᠵᠢᠷᠦᠬᠡ ᠨᠢ ᠬᠡᠴᠡᠭᠦᠦ ᠰᠠᠪᠠᠯᠠᠵᠤ ᠪᠠᠢᠪᠠᠴᠤ ᠬᠦᠩ ᠨᠣᠶᠠᠨ ᠤ᠋ ᠶᠠᠭᠤ ᠬᠡᠯᠡᠬᠦ ᠶᠢ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠨᠠ ᠃
— ᠴᠢ ᠳᠠᠷᠤᠢᠬᠠᠨ ᠶᠠᠪᠤᠵᠤ ᠮᠢᠩᠭᠠᠨᠪᠤᠤ ᠳᠤᠰᠠᠯᠠᠭᠴᠢ ᠳ᠋ᠤ᠌ ᠳᠠᠮᠵᠢᠭᠤᠯ ᠃ ᠪᠠᠭᠠ ᠬᠠᠲᠤᠨ ᠤ᠋ ᠪᠡᠶᠡ ᠰᠡᠳᠬᠢᠯ ᠢ᠋ ᠭᠡᠮᠲᠦᠭᠡᠵᠦ ᠰᠣᠴᠢᠭᠠᠯ ᠦᠭᠡᠢ ᠮᠡᠨᠳᠦ ᠪᠦᠲᠦᠨ ᠣᠯᠵᠤ ᠢᠷᠡ! ᠲᠡᠷᠡ ᠮᠠᠭᠤ ᠡᠮᠡ ᠶ᠋ᠢᠨ ᠤᠷᠭᠤᠭᠠᠨ ᠮᠢᠨᠦ ᠠᠯᠠᠭᠠᠨ ᠠ᠋ᠴᠠ ᠮᠤᠯᠲᠤᠷᠠᠬᠤ ᠶ᠋ᠢ ᠨᠢ ᠦᠵᠡᠶᠡ !
— ᠵᠠ ᠭᠡᠳ ᠥᠯᠵᠡᠢᠰᠠᠩ ᠪᠡᠶᠡ ᠨᠢ ᠴᠡᠴᠡᠷᠡᠰᠬᠢᠵᠦ ᠡᠪᠦᠳᠦᠭ ᠨᠢ ᠠᠷᠠᠢ ᠨᠤᠭᠤᠷᠠᠰᠬᠢᠭᠰᠡᠨ ᠢ᠋ᠶ᠋ᠡᠨ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠴᠤᠬᠤᠷᠢᠭᠰᠠᠭᠠᠷ ᠭᠠᠷᠴᠤ ᠣᠳᠪᠠ ᠃
– – – –
① ᠤᠷᠠᠳ ᠦᠳ ᠬᠠᠲᠤᠨ ᠭᠣᠣᠯ ᠢ ᠤᠯᠠᠭᠠᠨ ᠬᠠᠲᠤᠨ ᠭᠡᠳᠡᠭ᠃
② ᠨᠤᠲᠤᠭ ᠤᠨ ᠬᠡᠯᠡᠯᠭᠡ᠂ ᠬᠠᠰᠢ ᠶᠠᠰᠢ ᠪᠠᠷ ᠳᠥᠩᠭᠡᠨ ᠳᠠᠩᠭᠠᠨ ᠭᠡᠬᠦ ᠤᠳᠬᠠ ᠲᠠᠢ᠃
③ ᠤᠷᠠᠳᠴᠤᠳ ᠲᠡᠨᠡᠭ ᠮᠠᠩᠬᠤᠤ᠂ ᠲᠠᠷᠢᠬᠢ ᠨᠢ ᠪᠢᠲᠠᠭᠤ ᠬᠡᠢᠷᠬᠡᠭ ᠰᠣᠯᠢᠶᠠ ᠲᠠᠢ ᠰᠢᠭ᠋ ᠢ ᠢᠷᠸᠠ ᠭᠡᠳᠡᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ