ᠬᠠᠨ ᠮᠤᠨᠠ ᠶᠢᠨ ᠰᠡᠭᠦᠷᠡᠰᠦ < ᠳᠡᠭᠡᠳᠦ > – ᠮᠥᠩᠬᠡ ᠵᠣᠬᠢᠶᠠᠪᠠ ᠂ ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠨᠢᠭᠡ > Хан мунын сүүрс < дээд > – Мөнх зохиоов ᠂ Тэргүүн бодь – Нэгдүгээр бүлэг <1>
1345ᠲᠡᠷᠢᠭᠦᠨ ᠪᠣᠲᠢ – ᠨᠢᠭᠡᠳᠦᠭᠡᠷ ᠪᠦᠯᠦᠭ < ᠨᠢᠭᠡ >
ᠲᠡᠷᠢᠭᠦᠨ ᠪᠣᠲᠢ
ᠨᠢᠭᠡᠳᠦᠭᠡᠷ ᠪᠦᠯᠦᠭ
ᠴᠣᠭᠴᠠᠯᠠᠭᠰᠠᠨ ᠪᠤᠶᠠᠨ ᠤ᠋ ᠬᠢᠨᠢ ᠦᠷᠡ ᠨᠢ
ᠴᠣᠭᠴᠠ ᠪᠡᠶᠡ ᠶ᠋ᠢᠨ ᠰᠠᠨᠠᠭᠠᠨ ᠤ᠋ ᠠᠮᠤᠷ ᠰᠠᠢᠨ
ᠴᠣᠬᠣᠮ ᠡᠷᠬᠢᠮ ᠰᠡᠳᠬᠢᠯ ᠳ᠋ᠡᠬᠢ ᠴᠢᠨᠠᠷ ᠨᠢ
ᠴᠣᠭᠲᠤ ᠰᠦᠮᠪᠦᠷ ᠠᠭᠤᠯᠠ ᠮᠡᠲᠦ ᠪᠠᠲᠤ ᠰᠠᠢᠨ
ᠤᠴᠠᠷᠠᠯ ᠤ᠋ᠨ ᠵᠣᠬᠢᠯᠳᠤᠬᠤ ᠶᠣᠰᠣ ᠨᠢ
ᠣᠯᠠᠨ ᠲᠢᠪ ᠦ᠋ᠨ ᠲᠥᠷᠥ ᠮᠡᠲᠦ ᠨᠠᠢᠷ ᠲᠠᠢ ᠰᠠᠢᠨ
ᠤᠬᠠᠭᠠᠨ ᠤ᠋ ᠵᠣᠬᠢᠯᠳᠤᠬᠤ ᠪᠣᠳᠣᠯᠭᠠ ᠨᠢ
ᠣᠯᠣᠮ ᠦᠭᠡᠢ ᠳᠠᠯᠠᠢ ᠮᠡᠲᠦ ᠠᠭᠤᠳᠠᠮ ᠰᠠᠢᠨ
< ᠮᠡᠷᠭᠡᠨ ᠭᠡᠭᠡᠨ ᠦ᠌ ᠵᠣᠬᠢᠶᠠᠭᠰᠠᠨ《 ᠴᠣᠭᠴᠠᠯᠠᠭᠰᠠᠨ ᠪᠤᠶᠠᠨ》 ᠭᠡᠳᠡᠭ ᠤᠷᠠᠳ ᠠᠷᠠᠳ ᠤ᠋ᠨ ᠳᠠᠭᠤᠤ>
ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡ ᠨᠢ ᠭᠠᠷᠪᠠᠯ
ᠴᠢᠭᠢᠭ ᠨᠢ ᠤᠨᠠᠳᠠᠭ ᠶᠤᠮ ᠳᠠ
ᠴᠢᠩᠳᠠ ᠰᠡᠳᠬᠢᠯ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠪᠠᠯ
ᠴᠢᠭᠯᠡᠭᠡᠳ ᠢᠷᠡᠯᠭᠦᠢ ᠳᠡ ᠬᠦ
ᠪᠠᠳᠠᠷᠠᠩᠭᠤᠢ ᠡᠭᠦᠯᠡ ᠨᠢ ᠭᠠᠷᠪᠠᠯ
ᠪᠣᠷᠣᠭᠠᠨ ᠨᠢ ᠣᠷᠣᠳᠠᠭ ᠶᠤᠮ ᠠ᠋ ᠬᠦ
ᠪᠠᠲᠤ ᠰᠡᠳᠬᠢᠯ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠪᠠᠯ
ᠪᠤᠴᠠᠭᠠᠳ ᠢᠷᠡᠯᠭᠦᠢ ᠳᠡ ᠬᠦ
< ᠤᠷᠠᠳ ᠠᠷᠠᠳ ᠤ᠋ᠨ ᠳᠠᠭᠤᠤ >
ᠨᠢᠭᠡ
ᠨᠠᠷᠠ᠂ ᠴᠡᠩᠬᠡᠷ ᠰᠡᠮᠡᠵᠡᠨ ᠬᠠᠳᠠᠭ ᠢ᠋ᠶ᠋ᠠᠷ ᠴᠢᠷᠠᠢ ᠪᠠᠨ ᠨᠢᠭᠤᠰᠬᠡᠭᠰᠠᠨ ᠦᠵᠡᠰᠬᠦᠯᠡᠩᠲᠦ ᠪᠦᠰᠡᠭᠦᠢ ᠮᠡᠲᠦ ᠪᠡᠷ ᠡᠨᠡ ᠬᠣᠷᠸᠠ ᠳ᠋ᠤ᠌ ᠬᠠᠢᠷᠠ ᠪᠠᠨ ᠪᠦᠲᠦᠨ ᠡᠳᠦᠷ ᠢᠪᠢᠯᠭᠡᠭᠡᠳ ᠴᠦ᠍ ᠰᠡᠤᠠᠬᠡᠯ ᠬᠠᠨᠤᠭᠠ ᠦᠭᠡᠢ ᠭᠡᠮᠡᠷ ᠴᠢᠷᠠᠢ ᠨᠢ ᠤᠯᠠᠰᠬᠢᠭᠡᠳ ᠠᠯᠭᠤᠷ ᠠᠭᠤᠯᠠ ᠶᠢᠨ ᠲᠣᠯᠣᠭᠠᠢ ᠰᠢᠭᠦᠷᠡᠪᠡ᠃
ᠴᠢᠨᠳᠠᠮᠤᠨᠢᠯᠠᠵᠤ ᠪᠠᠷᠢᠭᠰᠠᠨ ᠨᠣᠶᠠᠨ ᠰᠠᠩ ᠤ᠋ᠨ ᠵᠣᠰᠠᠭᠠᠯ ᠤ᠋ᠨ ᠭᠡᠷ ᠦ᠋ᠳ ᠪᠦᠭᠦᠳᠡ ᠣᠩᠭᠣᠢᠵᠤ ᠬᠥᠮᠦᠨ ᠬᠠᠷᠠ ᠵᠥᠩᠳᠡᠭᠡᠨ ᠰᠦᠯᠪᠡᠯᠳᠦᠨ ᠬᠠᠶᠠ ᠲᠡᠨᠲᠦᠷ ᠮᠥᠨᠳᠥᠷ ᠬᠠᠢᠪᠠᠯᠵᠠᠭᠰᠠᠨ ᠰᠣᠭᠲᠣᠭᠤ ᠨᠤᠭᠤᠳ ᠤ᠋ᠨ ᠠᠮᠠᠨ ᠠ᠋ᠴᠠ《 ᠮᠠᠨ ᠤ᠋ ᠰᠢᠷᠠᠪ ᠨᠣᠶᠠᠨ ᠭᠡᠵᠦ ᠮᠥᠨ ᠴᠦ᠍ ᠰᠠᠢᠬᠠᠨ ᠬᠠᠲᠤᠨ ᠤ᠋ ᠬᠤᠪᠢ ᠲᠠᠢ ᠬᠥᠮᠦᠨ ᠶᠦᠮ ᠠ᠋ ᠁ 》᠂《 ᠭᠣᠶᠣ ᠭᠣᠶᠣ ᠪᠦᠰᠡᠭᠦᠢ ᠬᠡᠦᠬᠡᠨᠴᠦᠳ ᠢ᠋ ᠡᠩᠨᠡᠭᠦᠯᠵᠦ ᠪᠠᠢᠭᠠᠳ ᠁ 》 ᠭᠡᠬᠦ ᠵᠡᠷᠭᠡ ᠪᠡᠷ ᠠᠮᠠᠨ ᠲᠠᠪᠠ ᠪᠠᠷ ᠪᠤᠷᠠᠬᠤ ᠨᠢ ᠪᠤᠷᠠᠵᠤ᠂ ᠵᠠᠷᠢᠮ ᠨᠢ《 ᠠᠯᠲᠠᠢ ᠬᠠᠩᠭᠠᠢ ᠶ᠋ᠢᠨ ᠠᠷᠤ ᠲᠠᠯᠠ ᠠ᠋ᠴᠠ ᠨᠢ ᠠᠯᠬᠤᠯᠠᠭᠰᠠᠭᠠᠷ ᠢᠷᠡᠯᠡ ᠁ ᠠᠬᠠ ᠳᠡᠭᠦᠦ ᠲᠠ ᠨᠠᠷ ᠲᠠᠢ ᠪᠠᠨ ᠵᠣᠯᠭᠠᠶᠠ ᠭᠡᠵᠦ ᠢᠷᠡᠯᠡ ᠁ ᠠᠯᠳᠠᠷ ᠰᠠᠢᠬᠠᠨ ᠨᠡᠷᠡ ᠶ᠋ᠢ ᠴᠢᠨᠢ ᠳᠠᠭᠤᠯᠠᠭᠰᠠᠭᠠᠷ ᠯᠠ ᠬᠠᠷᠢᠶᠠ ᠁ 》 ᠭᠡᠵᠦ ᠡᠷᠢᠶᠡᠨ ᠮᠡᠷᠢᠶᠡᠨ ᠢ᠋ᠶ᠋ᠡᠷ ᠠᠶᠠᠯᠵᠤ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠪᠦᠭᠦᠷᠭᠡ ᠪᠡᠨ ᠲᠡᠪᠡᠷᠢᠭᠰᠡᠨ ᠰᠣᠭᠲᠣᠭᠤ ᠬᠥᠯᠴᠥᠭᠦᠦ ᠡᠷᠡᠰ ᠵᠡᠯᠡ ᠱᠣᠩ ᠲᠣᠭᠣᠷᠢᠨ ᠨᠠᠭᠤᠷ ᠲᠤ᠌ ᠬᠣᠷᠭᠣᠳᠠᠭᠰᠠᠨ ᠤᠰᠤᠨ ᠤ᠋ ᠰᠢᠪᠠᠭᠤ ᠰᠢᠭ᠋ ᠡᠷᠭᠢᠨ ᠪᠤᠴᠠᠨ ᠪᠠᠢᠯᠠ᠃
ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠦᠩ ᠨᠣᠶᠠᠨ ᠰᠢᠷᠠᠪᠲᠤᠷᠵᠢ ᠲᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠪᠠᠭᠤᠯᠭᠠᠭᠰᠠᠨ ᠬᠤᠷᠢᠮ ᠤ᠋ᠨ ᠭᠣᠣᠯ ᠨᠠᠢᠷ ᠲᠠᠷᠬᠠᠵᠤ ᠪᠠᠢᠭᠠ ᠨᠢ ᠡᠨᠡ᠃
ᠠᠯᠲᠠᠨ ᠰᠢᠷᠠ ᠭᠢᠯᠠᠭᠠᠷ ᠥᠯᠵᠡᠢ ᠦᠰᠦᠭ ᠲᠡᠢ ᠬᠣᠷᠭᠣᠢ ᠲᠡᠷᠯᠢᠭ ᠲᠡᠭᠡᠨ ᠭᠠᠤᠯᠢᠨ ᠵᠣᠭᠣᠰᠤᠨ ᠬᠡ ᠲᠡᠢ ᠬᠠᠷᠠ ᠲᠣᠷᠭᠠᠨ ᠬᠠᠨᠵᠢᠶᠠᠷ ᠬᠡᠲᠡᠷᠦᠬᠰᠡᠨ ᠰᠢᠷᠠᠪ ᠨᠣᠶᠠᠨ ᠡᠩᠭᠡᠷ ᠲᠡᠭᠡᠨ ᠡᠭᠡᠯᠲᠤᠷᠭᠡᠯᠡᠬᠰᠡᠨ ᠴᠡᠩᠬᠡᠷ ᠬᠠᠰ ᠡᠷᠢᠭᠡ ᠪᠡᠨ ᠢᠮᠡᠷᠬᠦ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠢᠨᠢᠶᠡᠪᠬᠢᠯᠡᠨ ᠪᠣᠢ ᠴᠣᠩᠬᠢᠭᠠᠷ ᠴᠠᠷᠡᠢ ᠶ᠋ᠢᠨ ᠬᠢᠨᠢ ᠴᠢᠮᠡᠭ ᠪᠣᠯᠤᠭᠰᠠᠨ ᠰᠣᠶᠣᠭᠠ ᠬᠠᠷᠠ ᠰᠠᠬᠠᠯ ᠨᠢ ᠭᠡᠨᠡᠳᠲᠡ ᠬᠠᠷᠠᠬᠤ ᠳ᠋ᠤ᠌ ᠬᠠᠷᠢᠶᠠᠴᠠᠢ ᠶ᠋ᠢᠨ ᠵᠢᠭᠦᠷ ᠮᠡᠲᠦ ᠠᠵᠢ᠃
ᠨᠠᠢᠷ ᠤ᠋ᠨ ᠮᠠᠢᠬᠠᠨ ᠤ᠋ ᠪᠠᠨ ᠡᠭᠦᠳᠡᠨ ᠳ᠋ᠦ᠍ ᠶᠠᠮᠪᠠᠷᠬᠠᠨ ᠵᠣᠭᠰᠣᠭᠠ ᠡᠨᠡ ᠬᠦ ᠬᠦᠩ ᠨᠣᠶᠠᠨ ᠤ᠋ ᠡᠮᠦᠨᠡ ᠬᠥᠮᠦᠰ ᠢᠷᠡᠵᠦ ᠡᠪᠦᠳᠦᠭ ᠴᠢᠴᠠᠤᠯᠠᠨ《ᠬᠦᠩ ᠨᠣᠶᠠᠨ ᠠᠬᠠᠢᠲᠠᠨ ᠲᠠᠪᠠᠲᠠᠢ ᠰᠠᠭᠠᠳᠠᠭᠠᠷᠠᠢ!》 ᠭᠡᠳ ᠠᠶᠠᠷᠯᠠᠨᠠ᠃ ᠢᠩᠭᠢᠵᠦ ᠬᠦᠩ ᠨᠣᠶᠠᠨᠲᠠᠨ ᠲᠠᠢ ᠪᠡᠶᠡ ᠮᠡᠬᠦᠢᠨ ᠶᠣᠰᠣ ᠮᠡᠨᠳᠦᠯᠡᠵᠦ ᠠᠶᠠᠷᠯᠠᠨ ᠪᠣᠢ ᠬᠥᠮᠦᠰ ᠮᠤᠩ ᠦᠭᠡᠢ᠃
ᠡᠭᠡᠯ ᠳᠣᠣᠷᠠᠳᠤᠰ᠂ ᠨᠣᠶᠠᠳ ᠶᠠᠮᠪᠠᠲᠠᠳ ᠲᠤ᠌ ᠡᠪᠦᠳᠦᠭ ᠰᠥᠬᠥᠷᠡᠨ ᠲᠣᠯᠣᠭᠠᠢ ᠮᠡᠬᠦᠢᠵᠦ ᠡᠰᠡ ᠶᠣᠰᠣᠯᠠᠪᠠᠰᠤ ᠶᠣᠰᠣ ᠪᠤᠰᠤᠴᠢᠯᠠᠭᠰᠠᠨ ᠤᠴᠢᠷ ᠪᠣᠯᠬᠤ ᠲᠤᠯᠠ ᠨᠣᠶᠠᠳ ᠶᠠᠮᠪᠠᠲᠠᠳ ᠪᠣᠯ ᠡᠭᠦᠨ ᠢ᠋ ᠢᠯᠡᠭᠦᠴᠡ ᠶᠠᠭᠤᠮᠠ ᠭᠡᠵᠦ ᠣᠭᠲᠣ ᠰᠠᠨᠠᠳᠠᠭ ᠦᠭᠡᠢ᠂ ᠬᠠᠷᠢᠨ ᠡᠭᠦᠨ ᠳ᠋ᠡᠭᠡᠨ ᠰᠡᠳᠬᠢᠯ ᠬᠠᠨᠵᠤ ᠤᠯᠠᠮ ᠴᠦ᠍ ᠶᠡᠬᠡᠷᠬᠡᠨᠡ᠃ ᠶᠣᠰᠣᠲᠠᠢ ᠯᠠ《 ᠮᠤᠤᠷ ᠲᠤ ᠶᠠᠭᠤᠮᠠ ᠥᠭᠪᠡᠯ ᠪᠤᠯᠢᠶᠠᠭᠳᠠᠭᠰᠠᠨ ᠰᠢᠭ᠋᠂ ᠮᠠᠭᠤ ᠬᠥᠮᠦᠨ ᠳ᠋ᠦ᠍ ᠶᠠᠭᠤᠮᠠ ᠥᠭᠪᠡᠯ ᠠᠶᠤᠭᠰᠠᠨ ᠰᠢᠭ᠋》 ᠭᠡᠭᠴᠢ ᠠᠵᠢ᠃ ᠢᠩᠭᠢᠬᠦᠯᠡᠷ ᠭᠡᠳᠡᠢᠳᠡᠭ ᠦ᠋ᠨ ᠡᠮᠦᠨᠡ ᠡᠴᠡ ᠡᠭᠡᠯᠴᠦᠦᠯ ᠳᠣᠣᠷᠠᠳᠤᠰ ᠮᠡᠬᠦᠢᠵᠦ ᠮᠥᠷᠭᠥᠬᠦ ᠨᠢ ᠵᠦᠢ ᠶᠣᠰᠣᠨ ᠤ᠋ ᠤᠴᠢᠷ᠃ ᠡᠰᠡ ᠲᠡᠢᠮᠦ ᠪᠣᠯ ᠨᠣᠶᠠᠳ ᠬᠡᠷᠬᠡᠮᠴᠤᠰ ᠤ᠋ᠨ ᠯᠠᠷᠵᠢᠶᠠ ᠶᠠᠮᠪᠠ ᠨᠡᠷᠡ ᠨᠢᠭᠤᠷ ᠢ᠋ ᠠᠯᠲᠠᠳᠠᠨ ᠭᠣᠣᠳᠠᠬᠤ ᠶᠣᠰᠣ ᠭᠣᠷᠢᠮ ᠲᠠᠲᠠᠭᠤᠷᠠᠵᠤ ᠨᠡᠷᠡ ᠶ᠋ᠢ ᠨᠢ ᠬᠤᠭᠤᠯᠤᠨ ᠨᠢᠳᠡᠷ ᠢ᠋ ᠨᠢ ᠭᠤᠲᠤᠭᠠᠭᠰᠠᠨ ᠬᠡᠷᠡᠭ ᠪᠣᠯᠬᠤ ᠪᠤᠶᠤ᠃
ᠥᠶᠥᠭ ᠲᠠᠩᠰᠤᠭ ᠬᠤᠷᠢᠮ ᠤ᠋ᠨ ᠰᠢᠷᠡᠭᠡᠨ ᠡᠴᠡ ᠰᠠᠯᠵᠤ ᠲᠦᠪᠳᠡᠬᠦ ᠦᠭᠡᠢ ᠬᠣᠷᠭᠣᠳᠠᠭᠰᠠᠨ ᠬᠥᠮᠦᠰ ᠨᠠᠩᠴᠢᠳ ᠤ᠋ᠨ ᠳᠠᠯᠳᠠ ᠬᠠᠲᠠᠭᠤ ᠬᠦᠴᠦᠨ ᠳ᠋ᠦ᠍ ᠤᠬᠠᠭᠠ ᠠᠯᠳᠠᠵᠤ ᠠᠶᠠᠷᠯᠠᠬᠤ ᠲᠦᠭᠦᠰ ᠪᠣᠯᠬᠤ ᠳ᠋ᠤ᠌ ᠬᠦᠩ ᠨᠣᠶᠠᠨ ᠭᠤᠸᠠᠢ ᠮᠡᠬᠦᠢᠭᠰᠡᠨ ᠬᠥᠮᠦᠰ ᠵᠦᠭ ᠬᠠᠶᠠ ᠲᠣᠯᠣᠭᠠᠢ ᠳᠣᠬᠢᠵᠤ ᠭᠠᠷ ᠵᠠᠩᠭᠠᠨ《 ᠵᠠ᠂ ᠵᠠ᠂ ᠲᠠ ᠨᠠᠷ ᠵᠠᠮ ᠳ᠋ᠠᠭᠠᠨ ᠰᠠᠢᠨ ᠶᠠᠪᠤᠵᠠᠭᠠ᠂ ᠰᠠᠢᠨ ᠶᠠᠪᠤᠵᠠᠭᠠ!》 ᠭᠡᠮᠡᠨ ᠬᠠᠷᠢᠭᠤ ᠶᠣᠰᠣ ᠭᠦᠢᠴᠡᠳᠬᠡᠬᠦᠢᠴᠡ ᠪᠣᠯᠵᠤ ᠳᠦᠳᠦᠨᠡᠨ᠂ ᠬᠥᠲᠥᠯ ᠦ᠋ᠨ ᠴᠠᠭᠠᠭᠤᠷ ᠲᠠᠯᠳᠠᠷᠠᠬᠤ ᠰᠢᠬᠠᠭᠰᠠᠨ ᠨᠠᠷᠠ ᠶ᠋ᠢ ᠭᠢᠯᠠᠮᠭᠢᠭ᠌ᠰᠠᠨ ᠢ᠋ᠶ᠋ᠠᠨ《 ᠨᠠᠷᠠ ᠣᠷᠣᠢ ᠪᠣᠯᠵᠤ ᠰᠢᠦ!》 ᠭᠡᠵᠦ ᠬᠡᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠥᠭᠦᠯᠡᠪᠡ᠃
ᠬᠥᠮᠦᠰ ᠤᠪᠤᠨ ᠴᠤᠪᠤᠨ ᠲᠠᠷᠬᠠᠵᠤ ᠶᠠᠪᠤᠨ ᠬᠤᠷᠢᠮ ᠤ᠋ᠨ ᠭᠡᠢᠴᠢᠨ ᠰᠢᠩᠭᠡᠷᠡᠭᠰᠡᠭᠡᠷ ᠪᠠᠢᠪᠠ᠃
ᠵᠢᠪᠡᠷᠡᠭᠰᠡᠨ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠭᠣᠯᠢᠨ ᠰᠠᠭᠤᠷᠢ ᠲᠠᠢ ᠱᠢᠷᠤᠨ ᠵᠢᠩᠰᠡᠨ ᠦ᠌ ᠣᠷᠣᠢ ᠭᠢᠯᠠᠯᠵᠠᠨ ᠬᠠᠷᠠᠭᠳᠠᠨᠠ᠃ ᠭᠢᠯᠠᠰ ᠵᠢᠩᠰᠡ ᠲᠡᠢ ᠡᠷᠡ᠂ ᠰᠢᠷᠢᠳᠡᠭ ᠲᠡᠪᠢᠰᠤᠭᠰᠡᠨ ᠦᠳᠡᠯᠭᠡ ᠶ᠋ᠢᠨ ᠰᠤᠮᠤᠨ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠬᠠᠷᠠ ᠬᠦᠷᠡᠩ ᠬᠣᠳᠣᠭᠣᠳᠣᠨ ᠪᠣᠳᠣᠩ ᠠ᠋ᠴᠠ ᠠᠷᠢᠬᠢ ᠬᠡᠮᠨᠡᠵᠦ ᠮᠣᠷᠳᠠᠬᠤ ᠭᠡᠢᠴᠢᠳ ᠲᠦ᠍ ᠳᠥᠷᠥᠭᠡ ᠴᠢᠩᠭᠠᠯᠠᠬᠤ ᠠᠷᠢᠬᠢ ᠭᠡᠮᠡᠨ ᠪᠠᠷᠢᠵᠤ ᠮᠠᠰᠢ ᠶᠠᠭᠠᠷᠠᠯᠲᠠᠢ ᠪᠥᠭᠴᠥᠭᠡᠨᠡᠨᠡ᠃ ᠳᠤᠮᠳᠠ ᠶ᠋ᠢᠨ ᠪᠡᠶᠡ ᠲᠡᠢ᠂ ᠬᠠᠪᠴᠢᠭᠠᠷ ᠮᠥᠷᠥ ᠲᠡᠢ᠂ ᠬᠥᠷᠯᠡᠬᠡᠷ ᠵᠡᠰ ᠬᠦᠷᠡᠩ ᠴᠢᠷᠠᠢ ᠲᠠᠢ ᠡᠨᠡ ᠬᠥᠮᠦᠨ ᠪᠣᠯ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠷᠠᠰᠢᠳᠠᠷᠵᠠ ᠪᠠᠢᠪᠠ᠃
ᠭᠣᠣᠯ ᠨᠠᠢᠷ ᠤ᠋ᠨ ᠥᠷᠥᠭᠡᠨ ᠦ᠌ ᠡᠭᠦᠳᠡᠨ ᠳᠡᠭᠡᠷᠡ ᠤᠲᠤᠭᠠ ᠵᠠᠯᠠᠭᠠ ᠲᠠᠢ᠂ ᠬᠢᠵᠢᠶᠡᠯ ᠨᠠᠰᠤᠨ ᠤ᠋ ᠬᠣᠶᠠᠷ ᠬᠡᠷᠭᠡᠮᠲᠡᠨ ᠡᠷᠡ ᠮᠥᠷᠥ ᠮᠥᠷᠥ ᠪᠡᠨ ᠲᠠᠪᠰᠢᠨ ᠬᠣᠭᠣᠷᠣᠨᠳᠣ ᠪᠠᠨ ᠨᠠᠭᠠᠳᠤᠮ ᠤ᠋ᠨ ᠦᠭᠡ ᠬᠡᠯᠡᠵᠦ ᠪᠠᠢᠪᠠ᠃ ᠡᠭᠦᠨ ᠳ᠋ᠦ᠍ ᠪᠠᠨᠲᠠᠩ ᠪᠡᠶᠡ ᠲᠡᠢ ᠬᠦᠵᠦᠭᠦᠦ ᠦᠭᠡᠢ ᠯᠠᠭᠯᠠᠭᠠᠷ ᠲᠠᠷᠭᠤᠨ ᠡᠷᠡ ᠨᠢ ᠳᠤᠮᠳᠠᠳᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠠᠮᠪᠠᠨ ᠪᠠᠪᠤᠤ ᠪᠠᠢᠯᠠ᠃ ᠨᠥᠭᠦᠭᠡ ᠥᠨᠳᠥᠷ ᠪᠣᠯᠪᠠᠴᠤ ᠱᠤᠪᠲᠤᠩ ᠮᠥᠷᠥ ᠲᠡᠢ᠂ ᠮᠠᠨᠵᠤ ᠮᠠᠶ᠋ᠢᠭ ᠤ᠋ᠨ ᠬᠠᠯᠢᠭᠤ ᠶ᠋ᠢᠨ ᠠᠷᠠᠰᠤᠨ ᠳᠤᠭᠤᠢ ᠮᠠᠯᠠᠭᠠᠢ ᠰᠦᠷᠡᠬᠡᠢ ᠵᠣᠬᠢᠭᠰᠠᠨ ᠡᠷᠡ ᠪᠣᠯ ᠤᠷᠠᠳ ᠤ᠋ᠨ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠪᠠᠢᠯᠠ᠃ ᠲᠡᠷᠡ ᠪᠡᠷ ᠬᠥᠮᠦᠨ ᠬᠣᠩᠬᠣᠷ ᠪᠠ ᠤᠷᠤᠭᠤᠯ ᠤ᠋ᠨ ᠢᠷᠮᠢᠭ ᠲᠤᠰᠢᠶᠠ ᠵᠢᠭᠳᠡᠬᠡᠨ ᠬᠢᠷᠭᠠᠭᠰᠠᠨ ᠬᠠᠷᠠ ᠰᠠᠬᠠᠯ ᠢ᠋ ᠵᠠᠪᠠᠵᠢ ᠰᠢᠨᠠ ᠤᠷᠤᠭᠤ ᠪᠠᠨ ᠤᠭᠠᠯᠵᠠᠯᠠᠨ ᠮᠠᠲᠠᠷᠢᠭᠤᠯᠤᠭᠰᠠᠨ ᠨᠢ ᠲᠡᠭᠦᠨ ᠢ᠋ ᠤᠯᠠᠮ ᠴᠦ᠍ ᠵᠢᠪᠬᠤᠭᠠ ᠲᠠᠢ ᠪᠣᠯᠭᠠᠪᠠ᠃ ᠡᠷᠡ ᠶ᠋ᠢᠨ ᠴᠢᠮᠡᠭ ᠰᠠᠬᠠᠯ᠂ ᠭᠡᠷ ᠦ᠋ᠨ ᠴᠢᠮᠡᠭ ᠡᠬᠡᠨᠡᠷ ᠭᠡᠵᠦ ᠠᠷᠭᠠ ᠦᠭᠡᠢ ᠦᠨᠡᠨ ᠦᠭᠡ ᠶᠦᠮ ᠳᠡ᠃
ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠴᠡᠩᠬᠡᠷ ᠬᠣᠷᠭᠣᠢ ᠲᠡᠷᠯᠢᠭ ᠦ᠋ᠨ ᠬᠣᠷᠮᠣᠢ ᠶ᠋ᠢ ᠰᠢᠭᠤᠵᠤ᠂ ᠪᠥᠰᠡᠨ ᠳ᠋ᠡᠭᠡᠨ ᠬᠠᠰ ᠪᠠᠯ ᠲᠠᠢ ᠮᠥᠩᠭᠥᠨ ᠬᠢᠲᠤᠭᠠ ᠬᠠᠪᠴᠢᠭᠤᠯᠤᠭᠠᠳ᠂ ᠮᠣᠷᠢᠨ ᠤ᠋ ᠲᠠᠬᠠᠷ ᠠ᠋ᠴᠠ ᠪᠠᠪᠤ ᠠᠮᠪᠠᠨ ᠤ᠋ ᠪᠤᠷᠤᠭᠤ ᠲᠠᠢᠰᠢ ᠪᠠᠨ ᠤᠨᠵᠢᠭᠰᠠᠨ ᠳᠡᠯ ᠲᠡᠢ ᠬᠢᠯᠢᠩ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠬᠢᠯᠭᠠᠰᠤᠨ ᠴᠤᠯᠪᠤᠭᠤᠷ ᠢ᠋ ᠰᠢᠭᠦᠷᠡᠨ ᠠᠪᠴᠤ᠂ ᠡᠮᠡᠭᠡᠯ ᠢ᠋ ᠨᠢ ᠵᠠᠰᠠᠩᠭᠠᠨ ᠴᠠᠪᠢᠯᠠᠩ ᠢ᠋ ᠨᠢ ᠴᠢᠩᠭᠠᠯᠠᠪᠠᠯ ᠬᠠᠷᠠ ᠠᠵᠢᠷᠭᠠ ᠴᠢᠬᠢ ᠪᠡᠨ ᠬᠤᠯᠮᠠᠢᠨ ᠮᠢᠩᠭᠠᠨᠪᠤᠤ ᠶ᠋ᠢᠨ ᠬᠠᠰᠠ ᠶ᠋ᠢ ᠬᠠᠵᠠᠬᠤ ᠠᠯᠲᠠᠨ ᠬᠣᠷᠳ᠋ ᠬᠠᠷᠳ᠋ ᠬᠢᠵᠦ ᠬᠠᠮᠠᠷ ᠢ᠋ᠶ᠋ᠠᠨ ᠳᠤᠤᠭᠠᠷᠭᠠᠨᠠ᠃
– ᠵᠠ ᠬᠦ ᠂ ᠡᠨᠡ ᠴᠦ᠍ ᠪᠠᠰᠠ ᠡᠷᠡ ᠬᠥᠮᠦᠨ ᠦ᠌ ᠡᠳ᠋ᠯᠡᠳᠡᠭ ᠵᠡᠪᠡᠭᠦᠨ ① ᠠᠳᠤᠭᠤᠰᠤ ᠪᠠᠢᠬᠤ ᠨᠢ ᠠ᠋ ! ᠭᠡᠳ ᠭᠣᠪᠢᠯ ᠭᠠᠷᠤᠭᠰᠠᠨ ᠬᠣᠨᠳᠣᠯᠠᠢ ᠶ᠋ᠢ ᠨᠢ ᠫᠠᠳ ᠬᠢᠲᠡᠯᠡ ᠠᠯᠠᠭᠠᠳᠠᠬᠤ ᠳ᠋ᠤ᠌ ᠬᠢᠯᠢᠩ ᠬᠠᠷᠠ ᠠᠵᠢᠷᠭᠠ ᠴᠣᠷᠣᠢᠨ ᠦᠰᠦᠷᠪᠡ ᠃
– ᠬᠠᠷᠠᠪᠠ ᠤᠤ ? ᠮᠢᠨᠦ ᠮᠠᠭᠤ ᠬᠢᠯᠢᠩ ᠬᠠᠷᠠ ᠡᠵᠡᠨ ᠡᠴᠡ ᠪᠡᠨ ᠥᠭᠡᠷᠡ ᠬᠥᠮᠦᠨ ᠳ᠋ᠦ᠍ ᠵᠠᠩ ᠲᠠᠢ ᠪᠠᠢᠳᠠᠭ ᠴᠦ᠍ ᠬᠠᠷᠢᠨ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠳ᠋ᠤ᠌ ᠠᠷᠠᠢ ᠭᠠᠢᠭᠤᠢ ᠪᠠᠢᠬᠠ ᠠᠳᠤᠭᠤ ᠮᠠᠯ ᠳ᠋ᠤ᠌ ᠡᠪ ᠬᠠᠪᠤ ᠦᠭᠡᠢ ᠬᠦᠢᠲᠡᠨ ᠠᠮᠢᠰᠬᠤᠯ ᠲᠠᠢ ᠠᠢᠳᠠᠷ ᠠᠮᠢᠲᠠᠨ ᠪᠠᠢᠭᠰᠠᠨ ᠪᠣᠯ ᠠᠯᠢ ᠬᠡᠳᠦᠢᠨ ᠬᠠᠮᠤᠴᠢᠬᠠᠭᠰᠠᠨ ᠰᠢᠦ !
– ᠶᠣᠰᠣᠲᠠᠢ ᠯᠠ ᠠᠵᠢᠷᠭᠠ ᠤᠨᠤᠭᠰᠠᠨ ᠬᠥᠮᠦᠨ ᠦ᠌ ᠠᠯᠠ ᠪᠡᠷᠲᠡᠮ᠂ ᠠᠮᠪᠠᠨ ᠨᠣᠶᠠᠨ ᠤ᠋ ᠠᠮᠠ ᠪᠠᠷᠳᠠᠮ ᠭᠡᠭᠴᠢ ᠪᠣᠯᠵᠤ ᠪᠠᠢᠨᠠ᠃ ᠵᠠ ᠂ ᠠᠮᠪᠠᠨ ᠭᠤᠸᠠᠢ ᠣᠳᠣ ᠮᠣᠷᠳᠠ᠂ ᠮᠣᠷᠳᠠ ! ᠨᠠᠷᠠ ᠣᠷᠣᠢ ᠪᠣᠯᠵᠤ ᠪᠠᠢᠨᠠ ! ᠭᠡᠳ ᠬᠢᠯᠢᠩ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠬᠢᠯᠭᠠᠰᠤᠨ ᠴᠤᠯᠪᠤᠭᠤᠷ ᠢ᠋ ᠪᠠᠪᠤᠤ ᠠᠮᠪᠠᠨ ᠳ᠋ᠤ᠌ ᠥᠭᠪᠡᠯ ᠪᠠᠪᠤᠤ᠄
– ᠵᠠ᠂ ᠵᠦᠭᠡᠷ᠂ ᠵᠦᠭᠡᠷ᠃ ᠬᠠᠷᠢᠨ ᠬᠡᠯᠡᠬᠦ ᠡᠴᠡ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠦ᠌ ᠠᠷᠢᠬᠢᠨ ᠤ᠋ ᠪᠣᠳᠣᠩ ᠤ᠋ᠨ ᠢᠷᠣᠭᠠᠷ ᠨᠢ ᠳᠡᠭᠡᠭᠰᠢ ᠪᠡᠨ ᠤᠷᠤᠭᠤᠯ ᠨᠢ ᠳᠣᠷᠣᠭᠰᠢ ᠪᠠᠨ ᠬᠠᠨᠳᠤᠴᠢᠬᠠᠵᠠᠢ ᠠ᠋ ! ᠶᠠᠪᠤᠶᠠ ᠂ ᠶᠠᠪᠤᠶᠠ ᠡᠷᠲᠡᠬᠡᠨ ᠳᠤᠮᠳᠠᠳᠤ ᠬᠦᠩ ᠳ᠋ᠡᠭᠡᠨ ᠬᠠᠷᠢᠵᠤ ᠠᠷᠢᠬᠢᠨ ᠤ᠋ ᠴᠠᠩᠭᠠᠭᠠ ᠪᠠᠨ ᠨᠢᠭᠡ ᠲᠠᠢᠯᠤᠶᠠ ! ᠶᠣ ᠃! ᠶᠣᠬᠣ! ᠭᠡᠵᠦ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠤᠤ ᠶ᠋ᠢᠨ ᠬᠣᠷᠣ ᠶ᠋ᠢ ᠮᠠᠭᠠᠵᠢᠭᠰᠠᠨ ᠭᠠᠰᠢᠭᠤᠨ ᠦᠭᠡ ᠬᠡᠯᠡᠨᠡ᠃
– ᠠ᠂ ᠴᠠᠪᠠᠰᠤ ! ᠮᠤᠨᠠ ᠶ᠋ᠢᠨ ᠠᠷᠤ ᠶ᠋ᠢᠨ ᠮᠣᠯᠣᠭᠣᠷ ᠬᠠᠷᠠ᠂ ᠮᠢᠬᠠ ᠲᠣᠰᠣᠨ ᠳ᠋ᠤ᠌ ᠬᠣᠪᠳᠣᠭ ᠬᠠᠷᠠ ᠭᠡᠳᠡᠭ ᠨᠢ ᠬᠤᠳᠠᠯ ᠦᠭᠡ ᠪᠠᠰᠢ ᠪᠠᠢᠨᠠ ᠰᠢᠦ ! ᠡᠨᠡ ᠮᠠᠭᠤ ᠬᠣᠵᠤᠤᠯᠠ ᠰᠢᠭ᠋ ᠮᠢᠬᠠᠨ ᠲᠠᠭᠠᠷᠢᠳᠠᠰᠤ ᠶ᠋ᠢ ᠬᠣᠬᠣᠢ᠂ ᠬᠡᠵᠢᠶᠡ ᠳ᠋ᠡᠭᠡᠨ ᠢᠳᠡᠴᠢᠬᠡᠭᠰᠡᠨ ᠴᠦ᠍ ᠠᠮᠠ ᠨᠢ ᠬᠠᠭᠤᠷᠠᠢ᠂ ᠪᠠᠭᠠᠭᠰᠠᠨ ᠴᠦ᠍ ᠪᠥᠭᠰᠡ ᠨᠢ ᠬᠠᠭᠤᠷᠠᠢ ᠠᠮᠢᠲᠠᠨ ᠶᠤᠮ ᠠ᠋ !《 ᠵᠤᠳᠪᠠ ᠮᠡᠢᠷᠡᠨ ᠠ᠋ ᠂ ᠨᠠᠭᠠᠰᠢ ᠪᠠᠨ ᠠᠷᠢᠬᠢ ! 》 ᠭᠡᠵᠦ ᠳᠠᠭᠤᠳᠠᠬᠤ ᠳ᠋ᠤ᠌ ᠶᠡᠬᠡ ᠬᠤᠷᠢᠮ ᠤ᠋ᠨ ᠵᠡᠭᠦᠨ ᠭᠠᠷ ᠤ᠋ᠨ ᠳᠠᠭᠠᠭᠠᠮᠠᠯ ᠡᠯᠪᠡᠭ ᠴᠢᠷᠠᠢᠲᠠᠢ᠂ ᠮᠣᠷᠢᠨ ᠴᠠᠭᠠᠨ ᠰᠢᠲᠦᠨ ᠦ᠌ ᠪᠡᠨ ᠬᠣᠶᠠᠷ ᠰᠣᠶᠣᠭᠠ ᠶ᠋ᠢ ᠠᠯᠲᠠ ᠪᠠᠷ ᠪᠤᠯᠬᠠᠭᠰᠠᠨ ᠪᠥᠬᠡ ᠰᠢᠭ ᠥᠨᠳᠥᠷ ᠪᠦᠳᠦᠭᠦᠨ ᠡᠷᠡ ᠵᠣᠳᠪᠠ ᠮᠡᠢᠷᠡᠨ 《 ᠵᠠ᠂ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠠ᠋ ᠂ ᠣᠳᠣᠬᠠᠨ ᠂ ᠣᠳᠣᠬᠠᠨ》 ᠭᠡᠳ ᠭᠠᠯᠠᠭᠤᠨ ᠬᠦᠵᠦᠭᠦᠲᠦ ᠪᠣᠳᠣᠩ ᠢ᠋ ᠲᠡᠪᠡᠷᠢᠵᠦ ᠬᠣᠶᠠᠷ ᠮᠥᠩᠭᠥᠨ ᠴᠥᠭᠥᠴᠡ ᠲᠡᠢ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠨᠭᠭᠠᠨᠪᠤᠤ ᠳ᠋ᠤ᠌ ᠥᠭᠪᠡ᠃
ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ ᠪᠠᠪᠤᠤ ᠠᠮᠪᠠᠨ ᠬᠣᠶᠠᠭᠤᠯᠠ ᠮᠠᠰᠢ ᠵᠤᠵᠠᠭᠠᠨ ᠨᠠᠢᠷ ᠲᠠᠢ ᠲᠤᠯᠠ ᠬᠠᠮᠢᠭᠠ ᠠᠭᠤᠯᠵᠠᠭᠰᠠᠨ ᠭᠠᠵᠠᠷ ᠨᠠᠭᠠᠳᠤᠮ ᠲᠣᠭᠣᠬᠤ ᠬᠢᠵᠦ ᠰᠠᠯᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠨᠢᠭᠡ ᠨᠢᠭᠡᠨ ᠦ᠌ ᠪᠡᠨ ᠬᠣᠷᠣ ᠶ᠋ᠢ ᠮᠠᠯᠲᠠᠬᠤ ᠦᠭᠡᠢ ᠪᠣᠯ ᠰᠠᠨᠠᠭᠠ ᠨᠢ ᠠᠮᠠᠷᠠᠳᠠᠭ ᠦᠭᠡᠢ ᠤᠯᠤᠰ᠃ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠪᠠᠪᠤᠤ ᠠᠮᠪᠠᠨ ᠬᠣᠶᠠᠭᠤᠯᠠ ᠭᠤᠷᠪᠠᠨ ᠴᠥᠭᠥᠴᠡ ᠠᠷᠢᠬᠢ ᠴᠢᠴᠠᠤᠯᠠᠵᠤ ᠤᠤᠭᠤᠴᠢᠬᠠᠭᠠᠳ ᠪᠠᠪᠤᠤ ᠠᠮᠪᠠᠨ ᠮᠣᠷᠳᠠᠬᠤ ᠳ᠋ᠠᠭᠠᠨ᠄
– ᠵᠠ ᠪᠣᠯᠢᠶᠠ᠂ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠠᠷᠢᠬᠢ ᠶ᠋ᠢ ᠬᠣᠭᠣᠰᠣᠷᠠᠲᠠᠯᠠ ᠤᠤᠭᠤᠭᠰᠠᠨ ᠴᠦ᠍ ᠬᠣᠳᠣᠭᠣᠳᠣ ᠬᠠᠯᠠᠬᠤ ᠶᠤᠮ ᠪᠢᠰᠢ ᠠ᠋! ᠮᠣᠷᠳᠠᠶᠠ᠂ ᠮᠣᠷᠳᠠᠶᠠ! ᠭᠡᠳ ᠪᠠᠪᠤᠤ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠪᠠᠨ ᠣᠯᠣᠩ ᠢ᠋ ᠴᠢᠩᠭᠠᠯᠠᠪᠠ᠃
ᠮᠢᠩᠭᠠᠨᠪᠤᠤ ᠲᠤᠰᠠᠯᠠᠭᠴᠢ᠄
– ᠵᠠ ᠪᠠᠢᠵᠠ! ᠡᠨᠡ ᠮᠠᠭᠤ ᠮᠣᠯᠣᠭᠣᠷ ᠬᠠᠷᠠ ᠲᠠᠭᠠᠷᠢᠳᠠᠰᠤ ᠶ᠋ᠢᠨ ᠠᠷᠢᠬᠢ ᠭᠦᠵᠡᠭᠡᠯᠡᠬᠦ ᠭᠡᠭᠴᠢ ᠢᠷᠣᠭᠠᠷ ᠦᠭᠡᠢ ᠰᠠᠪᠠ ᠤᠷᠤᠭᠤ ᠶᠡᠭᠦᠯᠡᠬᠦ ᠰᠢᠭ ᠶᠦᠮ ᠠ᠋! ᠭᠡᠰᠡᠨ ᠢ᠋ᠶ᠋ᠡᠨ《 ᠵᠠ᠂ ᠮᠠᠢ! 》 ᠭᠡᠳ ᠮᠡᠯᠮᠡᠯᠵᠡᠲᠡᠯᠡ ᠲᠦᠭᠦᠷᠭᠡᠬᠰᠡᠨ ᠴᠥᠭᠥᠴᠡ ᠲᠡᠢ ᠠᠷᠢᠬᠢ ᠪᠠᠷᠢᠵᠤ᠄
– ᠣᠳᠣ ᠳᠥᠷᠥᠭᠡ ᠶ᠋ᠢ ᠴᠢᠨᠢ ᠴᠢᠩᠭᠠᠯᠠᠵᠤ ᠮᠣᠷᠢ ᠶ᠋ᠢ ᠴᠢᠨᠢ ᠮᠢᠯᠢᠶᠠᠶᠠ ᠭᠡᠳ ᠴᠥᠭᠥᠴᠡ ᠠᠷᠢᠬᠢ ᠶ᠋ᠢ ᠬᠢᠯᠢᠩ ᠬᠠᠷᠠ ᠠᠵᠢᠷᠭᠠᠨ ᠤ᠋ ᠮᠠᠩᠨᠠᠢ ᠳᠡᠭᠡᠷᠡ ᠰᠠᠴᠤᠪᠠ᠃ ᠨᠠᠩᠴᠢᠳ ᠤ᠋ᠨ ᠦᠨᠦᠷ ᠠᠪᠤᠭᠰᠠᠨ ᠬᠠᠷᠠ ᠠᠵᠢᠷᠭᠠ ᠶ᠋ᠢᠨ ᠴᠢᠨᠣᠠ ᠶ᠋ᠢᠨ ᠬᠣᠶᠠᠷ ᠴᠢᠬᠢ ᠨᠢ ᠰᠣᠷᠲᠣᠯᠵᠠᠨ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠨᠠᠭᠠᠳᠤᠨ ᠬᠦᠴᠦᠲᠡᠢ ᠲᠤᠷᠭᠢᠬᠤ ᠨᠢ《 ᠠᠮᠪᠠᠨ ᠭᠤᠸᠠᠢ ᠮᠢᠨᠢ ᠣᠳᠣ ᠮᠣᠷᠳᠠᠭᠠᠴᠢ ᠳᠠ! ᠪᠢ ᠪᠡᠯᠡᠬᠡᠨ ᠪᠣᠯᠤᠭᠠ ᠁》ᠭᠡᠬᠦ ᠰᠢᠭ ᠪᠠᠢᠯᠠ᠃ ᠪᠠᠪᠤᠤ ᠠᠮᠪᠠᠨ ᠮᠣᠷᠳᠠᠬᠤ ᠭᠡᠬᠦ ᠳ᠋ᠤ᠌ ᠨᠠᠩᠴᠢᠳ ᠲᠤ᠌ ᠠᠷᠭᠢᠶᠠᠲᠤᠭᠰᠠᠨ ᠬᠠᠷᠠ ᠠᠵᠢᠷᠭᠠ ᠡᠵᠡᠨ ᠠᠮᠪᠠᠨ ᠢ᠋ᠶ᠋ᠠᠨ ᠳᠥᠷᠥᠭᠡ ᠠᠪᠤᠭᠤᠯᠬᠤ ᠦᠭᠡᠢ ᠪᠠᠢᠪᠠ᠃ ᠪᠠᠪᠤᠤ ᠠᠮᠪᠠᠨ ᠮᠣᠷᠢᠨ ᠤ᠋ ᠪᠠᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠲᠠᠪ ᠬᠢᠲᠡᠯᠡ ᠮᠣᠷᠳᠠᠬᠤ ᠳ᠋ᠤ᠌ ᠬᠦᠷᠡᠩ ᠠᠭᠠᠷᠤ ᠬᠣᠵᠤᠤᠯᠠ ᠶ᠋ᠢ ᠮᠣᠷᠢᠨ ᠤ᠋ ᠡᠮᠡᠭᠡᠯ ᠳᠡᠭᠡᠷᠡ ᠲᠣᠪᠯᠠᠭᠠᠳ ᠲᠠᠯᠪᠢᠴᠢᠬᠠᠭᠰᠠᠨ ᠰᠢᠭ᠋ ᠮᠣᠭᠵᠣᠢᠵᠤ ᠬᠠᠷᠠᠭᠳᠠᠨᠠ᠃
ᠵᠠᠮ ᠡᠯᠭᠦᠬᠦ ᠪᠡᠷ ᠶᠠᠭᠠᠷᠠᠨ ᠵᠢᠯᠣᠭᠣ ᠳᠤᠭᠲᠤᠷᠤᠭᠰᠠᠨ ᠬᠠᠷᠠ ᠠᠵᠢᠷᠭᠠ ᠣᠷᠣᠨ ᠳ᠋ᠠᠭᠠᠨ ᠴᠣᠪᠬᠣᠴᠢᠬᠤ ᠳ᠋ᠤ᠌᠂ ᠳᠡᠭᠡᠷᠡ ᠨᠢ ᠯᠠᠭᠯᠠᠢᠭᠰᠠᠨ ᠪᠠᠪᠤᠤ ᠠᠮᠪᠠᠨ᠄
– ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠠ᠋᠂ ᠬᠡᠵᠢᠶᠡ ᠨᠢᠭᠡ ᠠᠷᠤ ᠭᠣᠪᠢ ᠶ᠋ᠢ ᠲᠤᠭᠤᠯᠵᠤ ᠠᠮᠠᠷᠠᠭ ᠬᠣᠪᠢᠯ ② ᠢ᠋ᠶ᠋ᠠᠨ ᠡᠷᠭᠢᠬᠦ ᠪᠡᠷ ᠶᠠᠪᠤᠪᠠᠯ ᠵᠠᠮ ᠳ᠋ᠠᠭᠠᠨ ᠮᠠᠨ ᠤ᠋ ᠬᠢ ᠪᠡᠷ ᠮᠣᠷᠢᠯᠠᠵᠤ ᠰᠠᠭᠠᠲᠠᠨᠠ ᠤᠤ? ᠭᠡᠳ ᠵᠢᠯᠣᠭᠣ ᠪᠠᠨ ᠰᠤᠯᠠ ᠲᠠᠯᠪᠢᠪᠠᠯ ᠬᠢᠯᠢᠩ ᠬᠠᠷᠠ ᠠᠵᠢᠷᠭᠠ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠳᠠᠪᠬᠢᠵᠤ ᠣᠳᠪᠠ᠃
– ᠴᠢᠭᠢᠶᠡᠲᠦᠷᠦᠦ! ᠡᠨᠡ ᠮᠠᠭᠤ ᠶ᠋ᠢᠨ ᠠᠮᠠᠨ ᠠ᠋ᠴᠠ ᠬᠡᠵᠢᠶᠡ ᠰᠠᠢᠨ ᠦᠭᠡ ᠭᠠᠷᠴᠤ ᠪᠠᠢᠯᠠ᠁ ᠭᠡᠵᠦ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠮᠢᠩᠭᠠᠨᠪᠣᠣ ᠦᠭᠡ ᠪᠡᠨ ᠳᠤᠲᠠᠭᠤ ᠬᠡᠯᠡᠭᠡᠳ ᠬᠠᠭᠤᠷᠠᠢ ᠢᠨᠢᠶᠡᠨ ᠬᠣᠴᠣᠷᠪᠠ᠃
ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠨᠣᠶᠠᠨ ᠮᠢᠩᠭᠠᠨᠪᠣᠣ ᠳᠤᠮᠳᠠᠳᠤ ᠬᠦᠩ ᠦ᠋ᠨ ᠠᠮᠪᠠᠨ ᠪᠠᠪᠤᠤ ᠶ᠋ᠢᠨ ᠬᠠᠯᠠᠰᠠᠭᠤ ᠠᠮᠠᠨ ᠠ᠋ᠴᠠ ᠫᠠᠷᠭᠢᠭᠰᠠᠨ ᠦᠭᠡ ᠶ᠋ᠢ ᠬᠠᠵᠠᠭᠤ ᠬᠠᠪᠢᠷᠭᠠ ᠶ᠋ᠢᠨ ᠬᠥᠮᠦᠰ ᠰᠣᠨᠣᠰᠤᠭᠠᠳ ᠲᠡᠭᠦᠨ ᠦ᠌ ᠨᠢᠭᠤᠷ ᠲᠤ᠌ ᠬᠦᠷᠬᠦ ᠰᠠᠨᠠᠭᠳᠠᠨ ᠪᠠᠬᠠᠨ ᠡᠪ ᠦᠭᠡᠢᠳᠡᠭᠰᠡᠨ ᠪᠣᠯᠪᠠᠴᠤ ᠠᠷᠢᠬᠢ ᠤᠤᠭᠤᠭᠰᠠᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠨᠢᠭᠤᠷ ᠨᠢ ᠨᠢᠯᠴᠢᠭᠢᠨᠡᠵᠦ ᠠᠪᠤᠭᠠᠳ ᠤᠯᠠᠢᠭᠰᠠᠨ ᠡᠰᠡᠬᠦ ᠨᠢ ᠮᠡᠳᠡᠭᠳᠡᠭᠰᠡᠨ ᠦᠭᠡᠢ ᠥᠩᠭᠡᠷᠡᠪᠡ᠃《 ᠵᠠ᠂ ᠨᠠᠭᠠᠳᠤᠮ ᠴᠤ᠌ ᠶᠠᠭᠠᠬᠢᠬᠤ ᠪᠣᠢ! ᠡᠭᠦᠨ ᠦ᠌ ᠬᠢᠷᠢ ᠴᠦ᠍ ᠭᠠᠢᠭᠤᠢ! ᠬᠠᠷᠢᠨ ᠰᠠᠮᠠᠭᠠᠨ ᠰᠣᠨᠣᠰᠪᠠᠯ ᠭᠠᠪᠢᠬᠤ ᠦᠭᠡᠢ ᠶᠠᠭᠤᠮᠠ ᠪᠣᠯᠤᠨᠠ》 ᠭᠡᠵᠦ ᠪᠣᠳᠣᠵᠤ ᠠᠮᠵᠢᠭᠰᠠᠨ ᠢ᠋ᠶ᠋ᠠᠨ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠰᠠᠮᠠᠭᠠᠨ ᠮᠠᠨᠤᠨᠪᠠᠤᠠᠮᠡ ᠪᠡᠨ ᠣᠢᠷᠠ ᠬᠠᠪᠢ ᠪᠠᠷ ᠪᠠᠢᠬᠤ ᠡᠰᠡᠬᠦ ᠶ᠋ᠢ ᠶᠠᠭᠠᠷᠠᠪᠴᠢᠯᠠᠨ ᠬᠠᠷᠠᠪᠠᠯ᠂ ᠲᠡᠷᠡ ᠵᠡᠯᠡ ᠶ᠋ᠢᠨ ᠴᠠᠭᠠᠨᠠ ᠭᠡᠷ ᠦ᠋ᠨ ᠣᠪᠣᠭᠠᠨ ᠤ᠋ ᠳᠡᠷᠭᠡᠳᠡ ᠬᠠᠷᠢ ᠶ᠋ᠢᠨ ᠭᠡᠢᠴᠢᠨ ᠬᠠᠩᠭᠢᠨ ᠬᠤᠳᠠᠭᠠᠢ ᠪᠡᠷᠭᠡᠳ ᠲᠡᠢ ᠨᠠᠷᠭᠢᠵᠤ ᠵᠣᠭᠰᠣᠭᠠ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠭᠠ ᠨᠢ ᠠᠭᠤᠵᠢᠷᠠᠬᠤ ᠰᠢᠭ᠋ ᠪᠣᠯᠪᠠ᠃
ᠲᠠᠰᠢᠬᠤ ᠨᠠᠷᠠᠨ ᠤ᠋ ᠤᠯᠠᠪᠤᠷ ᠲᠤᠶᠠᠭᠠᠨ ᠳ᠋ᠤ᠌ ᠵᠠᠬᠠ ᠠ᠋ᠴᠠ ᠪᠠᠨ ᠰᠡᠮᠡᠵᠡᠷᠡᠨ ᠤᠯᠠᠢᠭᠰᠠᠨ ᠡᠭᠦᠯᠡᠰ ᠢ᠋ ᠬᠠᠷᠠᠭᠠᠳ ᠰᠠᠨᠠᠭᠠ ᠪᠠᠨ ᠳᠡᠯᠭᠡᠷ ᠬᠠᠩᠭᠠᠢ ᠶ᠋ᠢᠨ ᠠᠷᠤ ᠭᠣᠪᠢ ᠳ᠋ᠤ᠌ ᠪᠡᠯᠴᠢᠭᠡᠨ᠂ ᠬᠡᠴᠢᠨᠡᠭᠡᠨ ᠵᠢᠯ ᠡᠯᠡᠭᠡᠬᠰᠡᠨ ᠪᠣᠯᠪᠠᠴᠤ ᠮᠠᠷᠲᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠨᠢᠭᠤᠴᠠᠭᠠᠢᠬᠠᠨ ᠠᠮᠠᠷᠠᠭ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠪᠣᠳᠣᠯ ᠳ᠋ᠠᠭᠠᠨ ᠵᠢᠷᠭᠠᠬᠤ ᠶ᠋ᠢ ᠬᠡᠯᠡᠬᠦ ᠶᠠᠭᠤᠨ! ᠬᠦᠰᠡᠬᠰᠡᠨ ᠶᠠᠭᠤᠮᠠ ᠪᠡᠶᠡᠯᠡᠳᠡᠭ ᠦᠭᠡᠢ ᠬᠣᠭᠣᠰᠣᠨ ᠵᠢᠷᠭᠠᠬᠤ ᠲᠣᠰᠤᠮ ᠥᠪᠡᠷ ᠲᠦ᠋ᠨᠢ ᠵᠣᠪᠠᠯᠠᠩ ᠪᠣᠯᠵᠤ ᠪᠡᠶᠡ ᠰᠡᠳᠬᠢᠯ ᠢ᠋ ᠨᠢ ᠲᠠᠷᠴᠢᠯᠭᠠᠳᠠᠭ ᠢ᠋ ᠶᠠᠭᠠᠬᠢᠨᠠ᠃ ᠲᠤᠩᠭᠠᠯᠠᠭ ᠣᠭᠲᠠᠷᠭᠤᠢ ᠳ᠋ᠤ᠌ ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡ ᠠᠶᠠᠷᠬᠠᠨ ᠨᠡᠭᠦᠬᠦ ᠳ᠋ᠦ᠍ ᠰᠡᠳᠬᠢᠯ ᠳ᠋ᠦ᠍ ᠶᠠᠭᠤᠲᠠᠢ ᠴᠡᠯᠮᠡᠭ ᠠᠷᠢᠭᠤᠨ ᠪᠠᠢᠯᠠ᠃ ᠢᠩᠭᠢᠬᠦ ᠳ᠋ᠦ᠍ ᠬᠡᠨ ᠨᠢᠭᠡᠨ ᠦ᠌᠄
ᠴᠡᠩᠬᠡᠷ ᠴᠠᠭᠠᠨ ᠡᠭᠦᠯᠡ ᠨᠢ ᠭᠠᠷᠪᠠᠯ
ᠴᠢᠭᠢᠭ ᠨᠢ ᠤᠨᠠᠳᠠᠭ ᠶᠤᠮ ᠳᠠ
ᠴᠢᠩᠳᠠ ᠰᠡᠳᠬᠢᠯ ᠵᠠᠩ ᠢᠶᠡᠷ ᠢᠶᠡᠨ ᠪᠠᠢᠪᠠᠯ
ᠴᠢᠭᠯᠡᠭᠡᠳ ᠢᠷᠡᠯᠭᠦᠢ ᠳᠡ
ᠪᠠᠳᠠᠷᠠᠩᠭᠤᠢ ᠡᠭᠦᠯᠡ ᠨᠢ ᠭᠠᠷᠪᠠᠯ
ᠪᠣᠷᠣᠭᠠᠨ ᠨᠢ ᠣᠷᠣᠳᠠᠭ ᠶᠤᠮ ᠳᠠ
ᠪᠠᠲᠤ ᠰᠡᠳᠬᠢᠯ ᠵᠠᠩ ᠢᠶᠡᠷ ᠢᠶᠡᠨ ᠪᠠᠢᠪᠠᠯ
ᠪᠤᠴᠠᠭᠠᠳ ᠢᠷᠡᠯᠭᠦᠢ ᠳᠡ᠁ ᠭᠡᠮᠡᠨ ᠳᠠᠭᠤᠯᠠᠭᠰᠠᠨ ᠴᠠᠩᠭᠢᠨᠠᠮᠠ ᠰᠠᠢᠬᠠᠨ ᠠᠶᠠ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠣᠶᠠᠩᠭᠠᠲᠠᠢᠬᠠᠠ ᠰᠣᠨᠣᠰᠲᠠᠯᠠ᠃ ᠨᠠᠨ ᠳᠠᠭᠤᠤ ᠶ᠋ᠢᠨ ᠠᠶᠠ ᠳ᠋ᠤ᠌ ᠪᠣᠳᠣᠯ ᠬᠥᠲᠥᠯᠦᠬᠳᠡ ᠴᠦᠯ ᠭᠣᠪᠢ ᠪᠠᠷ ᠬᠣᠪᠢᠯᠴᠡᠴᠡᠭ ᠢᠶᠡᠨ ᠦᠭᠡᠢᠯᠡᠨ ᠰᠠᠨᠠᠵᠤ《 ᠶᠠᠭᠠᠬᠢᠪᠠᠴᠤ ᠪᠣᠯᠳᠠᠭ ᠦᠭᠡᠢ ᠴᠡᠷᠢᠭ ᠦ᠋ᠨ ᠬᠠᠲᠠᠭᠤ ᠠᠯᠪᠠᠨ ᠳ᠋ᠤ᠌ ᠲᠠᠭᠤᠭᠳᠠᠵᠤ᠂ ᠠᠮᠠᠷᠠᠭ ᠬᠣᠩᠭᠣᠷ ᠢᠶᠡᠨ ᠥᠨᠥᠴᠢᠷᠡᠭᠦᠯᠵᠦ ᠣᠷᠬᠢᠭᠠᠳ ᠁》 ᠭᠡᠵᠦ ᠪᠣᠳᠣᠮᠠᠭᠴᠠ᠄
ᠰᠠᠭᠠᠯᠢ ᠪᠠᠨ ᠪᠠᠷᠢᠭᠠᠳ
ᠰᠠᠷᠬᠤᠳ ᠤ᠋ᠨ ᠳᠡᠭᠡᠵᠢ ᠪᠡᠷ ᠡᠶᠡᠠ ᠰᠠᠭᠠᠲᠠᠭᠠᠯᠵᠣ ᠪᠠᠢᠬᠤᠯᠠᠷ
ᠰᠠᠭᠠᠳ ᠨᠢ ᠣᠷᠣᠭᠰᠠᠨ ᠰᠸᠲᠡᠩ ᠦᠵᠡᠩ ③
ᠰᠠᠨᠳᠤᠷᠤᠭᠤᠯᠤᠭᠠᠳ ᠭᠣᠷᠢ ᠦᠭᠡᠢ ᠳᠡ! ᠭᠡᠵᠦ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠠᠭᠤᠤ ᠭᠢᠩᠰᠢᠭ᠍ᠰᠡᠨ ᠢᠶᠡᠨ ᠰᠠᠮᠠᠭᠠᠨ ᠤ᠋ ᠪᠠᠨ ᠪᠠᠷᠠ ᠪᠠᠷ ᠳᠠᠷᠤᠢᠬᠠᠨ ᠵᠣᠭᠰᠣᠪᠠ᠃
ᠲᠡᠷᠲᠡᠭᠡ ᠭᠡᠷ ᠦ᠋ᠨ ᠣᠪᠣᠭᠠᠨ ᠤ᠋ ᠡᠮᠦᠨᠡ ᠥᠯᠥᠩ ᠡᠪᠡᠰᠦᠨ ᠳ᠋ᠦ᠍ ᠦᠯᠦ ᠮᠡᠳᠡᠭ ᠬᠠᠯᠴᠠᠭᠠᠢᠷᠠᠭᠰᠠᠨ ᠬᠠᠰᠠᠭ ᠤ᠋ᠨ ᠬᠠᠷᠭᠤᠢ ᠶ᠋ᠢ ᠪᠠᠷᠢᠵᠤ ᠵᠤᠰᠤᠭᠰᠠᠨ ᠬᠠᠯᠲᠠᠷ ᠮᠣᠷᠢ ᠬᠦᠯᠦᠬᠰᠡᠠ ᠰᠡᠦᠬᠡ ᠲᠡᠷᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠮᠣᠷᠳᠠᠬᠤ ᠪᠠᠷ ᠪᠡᠯᠡᠨ ᠪᠣᠯᠤᠭᠠ ᠶᠡᠬᠡ ᠵᠣᠣ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠬᠤᠳᠠᠭᠠᠢ ᠪᠡᠷᠭᠡᠳ ᠢ᠋ ᠭᠠᠷ ᠢ᠋ ᠨᠢ ᠪᠠᠷᠢᠨ ᠪᠠᠷᠢᠨ ᠶᠠᠭᠤ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠵᠦ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠯᠭᠡᠵᠦ ᠵᠣᠭᠰᠣᠭᠰᠠᠨ ᠵᠠᠮᠠᠭ ᠤ᠋ᠨ ᠨᠣᠭᠣᠭᠠᠨ ᠥᠩᠭᠡᠲᠡᠢ ᠲᠣᠷᠭᠠᠨ ᠲᠡᠷᠯᠢᠭ ᠳᠡᠭᠡᠷᠡ ᠪᠡᠨ ᠮᠥᠩᠭᠥᠨ ᠲᠣᠪᠴᠢ ᠲᠠᠢ ᠴᠢᠪᠠᠭᠠᠨ ᠬᠦᠷᠡᠩ ᠤᠤᠵᠢ ᠡᠮᠦᠰᠦᠬᠰᠡᠨ ᠬᠦᠬᠰᠢᠠ ᠪᠣᠯ ᠮᠢᠩᠭᠠᠪᠣᠣ ᠶᠢᠨ ᠰᠠᠮᠠᠭᠠᠨ ᠮᠠᠨᠣᠠᠪᠠᠤᠠᠮᠡ ᠮᠥᠨ᠃ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠢᠨ ᠲᠡᠭᠦᠨ ᠢ᠋《 ᠤᠷᠠᠨ ᠬᠣᠩᠰᠢᠶᠠᠷᠠᠳᠣ ᠤᠬᠠᠭᠠᠨ ᠤ᠋ ᠤᠭᠤᠲᠠ》 ᠭᠡᠵᠡᠭᠡᠨᠡ᠃
ᠶᠡᠬᠡ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠬᠥᠬᠡ ᠪᠣᠷᠣ ᠲᠡᠨᠢᠭᠡᠷ ᠴᠢᠯᠠᠭᠤᠨ ᠤ᠋ ᠥᠩᠭᠡ ᠲᠡᠢ ᠳᠠᠪᠬᠤᠷ ᠬᠠᠷᠠ ᠡᠮᠵᠢᠶᠡᠷᠢ ᠲᠡᠢ ᠬᠠᠭᠣᠪᠴᠢᠷᠲᠣᠷ ᠲᠡᠷᠯᠢᠭ ᠲᠦ᠍ ᠰᠢᠨᠡᠷᠬᠡᠭᠦᠠ ᠬᠦᠷᠡᠩ ᠬᠠᠨᠵᠢᠶᠠᠷ ᠵᠣᠬᠢᠴᠠᠭᠤᠯᠵᠤ ᠡᠮᠦᠰᠦᠨ ᠪᠤᠷᠤᠭᠤ ᠲᠠᠯᠠ ᠳ᠋ᠤ᠌ ᠪᠠᠨ ᠠᠯᠲᠠᠨ ᠮᠥᠩᠭᠥᠨ ᠮᠢᠨᠳᠠᠰᠤᠨ ᠬᠡ ᠤᠭᠠᠯᠵᠠ ᠲᠠᠢ ᠥᠯᠵᠡᠢ ᠵᠠᠩᠭᠢᠶᠠ ᠪᠠ ᠬᠤᠸᠠᠷᠲᠠᠢ ᠬᠦᠬᠦᠷ ᠦ᠋ᠨ ᠳᠠᠯᠢᠶᠠᠷ ᠬᠠᠪᠴᠢᠭᠤᠯᠤᠨ ᠵᠥᠪ ᠲᠠᠯᠠ ᠶ᠋ᠢᠨ ᠲᠠᠰᠢᠶᠠᠨ ᠳ᠋ᠠᠭᠠᠨ ᠬᠠᠰ ᠴᠠᠭᠠᠨ ᠪᠠᠯ ᠲᠠᠢ ᠬᠢᠲᠤᠭᠠ ᠵᠡᠭᠦᠭᠰᠡᠨ ᠥᠨᠳᠥᠷ ᠲᠣᠮᠣ ᠡᠷᠡ ᠶᠡᠬᠡᠳᠡ ᠶᠠᠭᠠᠷᠠᠨᠠ᠃ ᠲᠡᠭᠦᠨ ᠦ᠌ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ᠂ ᠥᠷᠭᠡᠨ ᠬᠦᠷᠡᠩ ᠮᠠᠩᠨᠠᠢ᠂ ᠵᠡᠰ ᠬᠦᠷᠡᠩ ᠰᠢᠨᠠᠭᠠᠨ ᠳᠤᠬᠤ ᠶ᠋ᠢ ᠭᠢᠯᠠᠢᠲᠠᠯᠠ ᠲᠣᠪᠯᠠᠵᠤ ᠡᠮᠦᠰᠦᠭᠰᠡᠨ ᠵᠢᠩᠰᠡᠲᠦ ᠳᠤᠭᠤᠢ ᠮᠠᠯᠠᠭᠠᠢ ᠨᠢ ᠲᠡᠭᠦᠨ ᠢ᠋ ᠤᠯᠠᠮ ᠰᠦᠷᠲᠡᠢ ᠶᠡᠬᠡᠮᠰᠦᠭ ᠪᠣᠯᠭᠠᠵᠤ᠂ ᠨᠢᠳᠦ ᠬᠥᠮᠥᠰᠬᠡ᠂ ᠠᠮᠠ ᠬᠠᠮᠠᠷ ᠪᠦᠷ ᠣᠷᠣᠨ ᠵᠠᠢ ᠪᠠᠨ ᠡᠵᠡᠯᠡᠵᠦ ᠡᠪ ᠲᠣᠪ ᠲᠠᠢ ᠲᠡᠩᠴᠡᠵᠦ ᠲᠥᠷᠥᠭᠰᠡᠨ ᠢ᠋ ᠬᠡᠯᠡᠬᠦ ᠶᠠᠭᠤᠮᠠ ᠠᠯᠠᠭᠠ᠃ ᠠᠭᠤᠵᠢᠮ ᠪᠣᠷᠣ ᠴᠢᠷᠠᠢ ᠳ᠋ᠠᠬᠢ ᠲᠣᠭᠣᠷᠢᠮ ᠤ᠋ᠨ ᠤᠰᠤ ᠰᠢᠭ᠋ ᠲᠤᠩᠭᠠᠯᠠᠭ ᠬᠣᠶᠠᠷ ᠨᠢᠳᠦᠨ ᠡᠴᠡ ᠨᠢ ᠬᠣᠯᠠ ᠶ᠋ᠢᠨ ᠴᠠᠭᠠᠨᠠ ᠶᠠᠭᠤᠮᠠ ᠶ᠋ᠢ ᠲᠤᠩᠭᠠᠨ ᠪᠣᠳᠣᠭᠰᠠᠨ ᠴᠣᠭ ᠵᠠᠯᠢ ᠢᠯᠡᠬᠡᠨ ᠠᠵᠢ᠃ ᠲᠡᠭᠦᠨ ᠦ᠌ ᠡᠭᠡᠯᠢᠲᠡᠢ ᠴᠢᠷᠠᠢ᠂ ᠡᠶᠡᠯᠳᠡᠭ ᠬᠠᠷᠠᠴᠠ ᠶ᠋ᠢ ᠬᠠᠷᠠᠬᠤ ᠳ᠋ᠠᠭᠠᠨ ᠬᠥᠮᠦᠰ ᠲᠦ᠍ ᠠᠪᠤᠷᠠᠯ ᠥᠷᠥᠰᠢᠶᠡᠯ ᠬᠠᠢᠷᠠᠯᠠᠮᠠ ᠳᠣᠲᠣᠨᠣᠬᠠᠨ ᠰᠠᠨᠠᠭᠳᠠᠪᠠᠴᠤ ᠳᠤᠭᠰᠢᠨ ᠬᠠᠷᠠᠴᠠ ᠶ᠋ᠢ ᠨᠢ ᠬᠠᠷᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠠᠢᠳᠠᠰ ᠬᠦᠷᠦᠮᠡ ᠠᠵᠢ᠃ ᠡᠨᠡ ᠬᠥᠮᠦᠨ ᠪᠣᠯ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠵᠡᠭᠦᠨ ᠲᠤᠰᠠᠯᠠᠭᠴᠢ ᠨᠣᠶᠠᠨ᠂ ᠨᠡᠷᠡ ᠡᠯᠳᠡᠩᠭᠡ ᠭᠡᠨᠡ᠃
ᠲᠡᠷᠡ ᠥᠨᠥᠳᠥᠷ ᠬᠦᠩ ᠨᠣᠶᠠᠨ ᠤ᠋ ᠡᠮᠦᠨᠡ ᠡᠴᠡ ᠬᠤᠷᠢᠮ ᠠ᠋ᠴᠠ ᠲᠠᠷᠬᠠᠵᠤ ᠣᠳᠬᠤ ᠭᠡᠢᠴᠢᠨ ᠢ᠋ ᠡᠨᠳᠡ ᠦᠳᠡᠵᠦ ᠵᠣᠭᠰᠣᠬᠤ ᠳ᠋ᠠᠭᠠᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠢᠨᠢᠶᠡᠪᠬᠢᠯᠡᠨ᠄
– ᠡᠷᠬᠢᠮ ᠵᠣᠴᠢᠳ ᠵᠠᠮ ᠳ᠋ᠠᠭᠠᠨ ᠲᠠᠢᠪᠤᠭᠤ ᠲᠣᠭᠲᠠᠭᠤᠨ᠂ ᠰᠠᠢᠨ ᠶᠠᠪᠤᠭᠠᠷᠠᠢ ᠁ ᠭᠡᠵᠦ ᠬᠠᠷᠢ ᠬᠥᠷᠰᠢ ᠬᠣᠰᠢᠭᠤᠳ ᠤ᠋ᠨ ᠨᠣᠶᠠᠳ ᠠᠮᠪᠠᠰ ᠲᠤ᠌ ᠠᠮᠠᠨ ᠤ᠋ ᠪᠡᠯᠭᠡ ᠲᠡᠢ ᠦᠭᠡ ᠥᠴᠢᠨᠡ᠃ ᠲᠡᠷᠡ ᠂ ᠭᠣᠣᠯ ᠭᠣᠣᠯ ᠭᠡᠢᠴᠢᠳ ᠢ᠋ᠶ᠋ᠡᠨ ᠮᠣᠷᠳᠠᠭᠤᠯᠴᠢᠬᠠᠭᠠᠳ ᠣᠷᠣᠢ ᠶ᠋ᠢᠨ ᠰᠢᠪᠡᠷ ᠨᠠᠢᠷ ④ ᠡᠨᠡ ᠲᠡᠷᠡ ᠶᠠᠭᠤ ᠪᠣᠯᠤᠨᠠ ᠭᠡᠭᠴᠢ ᠶ᠋ᠢ ᠲᠣᠪᠯᠠᠨ ᠪᠣᠳᠣᠵᠤ ᠭᠣᠣᠯ ᠭᠡᠷ ᠤᠷᠤᠭᠤ ᠠᠯᠬᠤᠪᠠ᠃
ᠨᠠᠷᠠ ᠪᠠᠷᠠᠭᠤᠨᠰᠢ ᠵᠢᠷᠭᠠᠪᠠ᠃
ᠲᠡᠭᠷᠢ ᠶ᠋ᠢᠨ ᠪᠠᠷᠠᠭᠤᠨ ᠬᠠᠶᠠᠭᠠ ᠴᠣᠭ ᠲᠠᠢ ᠬᠣᠪᠣᠩ ᠤ᠋ᠨ ᠢᠷᠮᠡᠭ ᠲᠦ᠍ ᠳᠠᠨᠳᠠᠢᠯᠠᠭᠰᠠᠨ ᠵᠡᠰ ᠳᠡᠪᠦᠷᠡ ᠶ᠋ᠢᠨ ᠥᠩᠭᠡ ᠲᠡᠢ ᠤᠯᠠᠢᠵᠤ ᠬᠠᠷᠠᠭᠳᠠᠨᠠ᠃
ᠬᠤᠷᠢᠮ ᠤ᠋ᠨ ᠭᠣᠣᠯ ᠲᠠᠭᠲᠤ ᠶᠢᠨ ᠡᠭᠦᠳᠡᠨ ᠳ᠋ᠦ᠍ ᠵᠡᠭᠦᠨ ᠪᠠᠷᠠᠭᠤᠨ ᠲᠤᠰᠠᠯᠠᠭᠴᠢ ᠂ ᠵᠠᠬᠢᠷᠤᠭᠴᠢ ᠂ ᠬᠦᠩ ᠨᠣᠶᠠᠨ ᠤ᠋ ᠨᠥᠭᠦᠭᠡ ᠬᠡᠳᠦᠨ ᠬᠠᠲᠤᠳ ᠬᠣᠶᠠᠷ ᠵᠢᠭᠦᠷᠯᠡᠨ ᠲᠡᠷᠢᠭᠦᠨ ᠮᠡᠬᠦᠰᠬᠢᠨ ᠵᠣᠭᠰᠣᠵᠤ ᠠᠬᠤ ᠨᠢ ᠶᠠᠮᠠᠷ ᠨᠢᠭᠡᠨ ᠡᠷᠭᠢᠨ ᠬᠡᠷᠭᠡᠮᠲᠡᠨ ᠢ᠋ ᠦᠳᠡᠬᠦ ᠭᠡᠵᠦ ᠪᠠᠢᠭᠠ ᠨᠢ ᠡᠨᠡ ᠠᠵᠢ᠃
ᠭᠣᠣᠯ ᠲᠠᠭᠲᠤ ᠶ᠋ᠢᠨ ᠡᠭᠦᠳᠡ ᠪᠡᠷ ᠪᠠᠭᠲᠠᠨ ᠶᠠᠳᠠᠮᠠ ᠳᠥᠷᠪᠡᠯᠵᠢᠯᠡᠨ ᠠᠯᠬᠤᠭᠰᠠᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠨᠢᠭᠡ ᠬᠡᠷᠭᠡᠮᠲᠡᠨ ᠬᠠᠯᠭᠢᠭᠰᠠᠨ ᠢᠨᠢᠶᠡᠳᠦ ᠲᠡᠢ ᠬᠦᠩ ᠨᠣᠶᠠᠨ ᠯᠤᠭᠠ ᠪᠠᠷᠠ ᠬᠠᠨᠢᠰᠠᠨ ᠭᠠᠷᠴᠤ ᠢᠷᠡᠯᠡ ᠃
ᠲᠡᠷᠡ ᠪᠡᠷ ᠪᠠᠷᠠᠭᠤᠨ ᠨᠢᠳᠦ ᠨᠢ ᠠᠨᠢᠭᠠᠷᠳᠠᠭᠤ ᠰᠣᠬᠣᠷ ᠂ ᠤᠷᠤᠭᠤᠯ ᠬᠠᠯᠵᠠᠨ ᠂ ᠠᠷᠠᠮᠠᠭ ᠲᠠᠷᠠᠮᠠᠭ ᠡᠷᠡᠦ ᠰᠠᠬᠠᠯ ᠲᠠᠢ ᠂ ᠬᠠᠯᠵᠠᠷᠠᠭᠰᠠᠨ ᠳᠤᠬᠤᠨ ᠳᠡᠭᠡᠷᠡ ᠪᠡᠨ ᠨᠣᠮᠢᠨ ᠱᠢᠷᠦ ᠵᠢᠮᠰᠡᠭ ᠲᠡᠢ ᠬᠠᠷᠠ ᠲᠣᠭᠣᠷᠴᠣᠭ ᠲᠠᠯᠪᠢᠵᠠᠢ᠃ ᠲᠡᠭᠦᠨ ᠦ᠌ ᠨᠢᠷᠤᠭᠤᠨ ᠭᠣᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠬᠠᠢ ᠶ᠋ᠢᠨ ᠰᠡᠭᠦᠯ ᠰᠢᠭ ᠭᠣᠳᠣᠩ ᠭᠡᠵᠢᠭᠡ ᠤᠨᠵᠢᠭᠤᠯᠤᠨ ᠬᠠᠯᠪᠠᠭᠠᠨᠠᠭᠤᠷ ᠰᠢᠷᠭᠠᠯ ᠴᠠᠭᠠᠨ ᠲᠣᠷᠭᠠᠨ ᠬᠠᠨᠲᠠᠭᠠᠰᠤ ᠡᠮᠦᠰᠴᠦ ᠥᠷᠭᠡᠨ ᠵᠠᠬᠠ ᠲᠠᠢ ᠬᠠᠷᠠ ᠥᠮᠥᠳᠥᠨ ᠦ᠌ ᠰᠢᠷᠬᠤᠨᠠᠭ ᠢ᠋ ᠵᠣᠮᠪᠣᠢᠲᠠᠯᠠ ᠪᠣᠭᠣᠭᠠᠳ ᠵᠠᠳᠠᠭᠠᠢ ᠨᠠᠢ᠍ᠮᠠᠯᠵᠢ ᠬᠥᠯ ᠳ᠋ᠡᠭᠡᠨ ᠬᠣᠶᠠᠷ ᠰᠤᠵᠠᠭᠠ ᠴᠢᠮᠬᠢᠶᠡᠷᠢ ᠬᠠᠮᠠᠷ ᠲᠠᠢ ᠬᠠᠷᠠ ᠱᠠᠬᠠᠢ ᠡᠮᠦᠰᠴᠦ ᠲᠠᠰᠢᠶᠠᠨ ᠳ᠋ᠠᠭᠠᠨ ᠪᠡᠶᠡᠨᠽᠢ ⑤ ᠪᠠᠯᠳᠠᠭᠠᠨᠠᠭᠤᠯᠤᠨ ᠵᠡᠭᠦᠨ ᠭᠠᠷ ᠲᠠᠭᠠᠨ ᠬᠠᠷᠠ ᠬᠢᠯᠭᠠᠰᠤᠨ ᠶᠢᠩᠱᠤᠸᠠᠰᠠ ( ᠢᠯᠠᠭᠠᠨ ᠭᠦᠪᠢᠭᠦᠷ ) ᠰᠠᠵᠢᠯᠠᠨ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠨᠢ ᠭᠡᠨᠡᠳᠲᠡ ᠬᠠᠷᠠᠬᠤ ᠳ᠋ᠤ᠌ ᠰᠣᠷᠲᠣᠭᠣ ᠲᠠᠢ ᠮᠡᠲᠦ ᠠᠪᠠᠴᠤ ᠳᠠᠬᠢᠨ ᠬᠠᠷᠠᠪᠠᠯ ᠭᠠᠯᠪᠢᠷ ᠮᠠᠭᠤᠲᠠᠢ ᠠᠵᠢ᠃
ᠮᠢᠬᠠ ᠠᠷᠢᠬᠢᠨ ᠤ᠋ ᠠᠭᠠᠭ ᠲᠤ᠌ ᠴᠢᠷᠠᠢ ᠨᠢ ᠮᠢᠨᠴᠢᠢᠲᠡᠯᠡ ᠤᠯᠠᠢᠵᠤ ᠂ ᠭᠥᠯᠢᠭᠡᠷ ᠮᠠᠩᠨᠠᠢ ᠳ᠋ᠤᠨᠢ ᠲᠣᠰᠣ ᠭᠢᠯᠲᠠᠭᠠᠨᠠᠨ ᠂ ᠣᠷᠣᠢ ᠨᠢ ᠤᠯᠠᠭᠠᠨ ᠰᠠᠷᠢᠮᠰᠠᠭ ᠬᠠᠮᠠᠷ ᠳᠡᠭᠡᠷᠡ ᠨᠢ ᠬᠥᠯᠥᠰᠥ ᠪᠠᠳᠬᠤᠵᠤ ᠂ ᠴᠠᠳᠬᠤᠯᠳᠠᠬᠤ ᠳ᠋ᠠᠭᠠᠨ ᠵᠣᠭᠢᠰᠴᠤ ᠂ 《 ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠥᠭᠡᠬᠦ ᠲᠣᠰᠣ ᠠᠷᠢᠬᠢ ᠳᠠᠷᠠᠰᠤ ᠠᠰᠢᠲᠠᠢ ᠰᠠᠢᠬᠠᠨ ᠶᠤᠮ ᠳᠠ》 ᠭᠡᠵᠦ ᠰᠠᠨᠠᠭᠠ ᠰᠡᠳᠬᠢᠯ ᠵᠣᠬᠢᠷᠠᠭᠰᠠᠨ ᠰᠢᠭ᠋ ᠬᠡᠩᠬᠦᠯᠵᠡᠨᠡ᠃
ᠡᠨᠡ ᠬᠥᠮᠦᠨ ᠢ᠋ ᠸᠠᠩ ᠱᠣᠣ ᠸᠧᠨ ᠭᠡᠨᠡ᠃ ᠥᠷᠥᠭᠡᠰᠦᠨ ᠨᠢᠳᠦ ᠨᠢ ᠡᠭᠦᠯᠡ ᠲᠡᠢ᠂ ᠶᠠᠭᠤᠮᠠ ᠣᠯᠵᠤ ᠦᠵᠡᠳᠡᠭ ᠦᠭᠡᠢ ᠪᠣᠯᠬᠣᠷ ᠬᠠᠷᠠᠭᠠ ᠮᠠᠭᠤ ᠪᠠᠷᠭᠠᠳ ᠨᠢᠳᠦ ᠪᠡᠨ ᠠᠨᠢᠪᠴᠢᠭᠰᠠᠭᠠᠷ ᠪᠠᠢᠵᠤ ᠵᠣᠪᠬᠢ ᠨᠢ ᠠᠨᠢᠭᠠᠷᠳᠠᠭᠤ ᠪᠣᠯᠵᠠᠢ᠃ ᠬᠡᠳᠦᠢ ᠭᠠᠭᠴᠠᠬᠠᠨ ᠨᠢᠳᠦ ᠲᠡᠢ ᠪᠣᠯᠪᠠᠴᠤ ᠶᠠᠭᠤᠮᠠ ᠬᠠᠷᠠᠬᠤ ᠳ᠋ᠤ᠌ ᠬᠣᠶᠠᠷ ᠨᠢᠳᠦ ᠲᠡᠢ ᠬᠥᠮᠦᠨ ᠡᠴᠡ ᠦᠯᠦ ᠬᠣᠴᠣᠷᠤᠨᠠ᠃ ᠲᠡᠭᠦᠨ ᠦ᠌ ᠣᠯᠬᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠨᠣᠮᠣᠨ ᠰᠣᠬᠣᠷ ᠰᠢᠭ᠋ ᠭᠠᠵᠠᠷ ᠰᠢᠭᠢᠳᠦᠭᠡᠳ ᠰᠢᠨᠤᠳᠠᠭ ᠲᠠᠭᠠᠨ ᠰᠠᠭᠠᠭ ᠤᠨ ᠬᠠᠯᠢᠰᠤ ᠶ᠋ᠢ ᠲᠠᠰᠢᠵᠤ ᠲᠣᠰᠣ ᠭᠠᠷᠭᠠᠳᠠᠭ ᠤᠪᠠᠳᠢᠰ ᠲᠠᠢ ᠭᠡᠵᠦ ᠬᠥᠮᠦᠰ ᠬᠡᠯᠡᠯᠴᠡᠬᠦ ᠪᠥᠭᠡᠳ ᠵᠠᠷᠢᠮ ᠨᠢ ᠨᠣᠮᠣᠨ ᠰᠣᠬᠣᠷ ᠭᠡᠵᠦ ᠬᠣᠴᠢᠯᠠᠵᠤ ᠳᠠᠭᠤᠳᠠᠳᠠᠭ᠃ ᠸᠠᠩ ᠰᠣᠬᠣᠷ ᠭᠡᠭᠰᠡᠭᠡᠷ ᠤᠷᠠᠳ ᠤᠨ ᠪᠠᠷᠠᠭᠤᠨ᠂ ᠵᠡᠭᠦᠨ᠂ ᠳᠤᠮᠳᠠᠳᠤ ᠬᠦᠩ ᠦ᠋ᠨ ᠬᠢᠨ ᠪᠠᠢᠲᠤᠭᠠᠢ ᠶᠡᠬᠡ ᠵᠤᠤ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠳᠠᠯᠠᠳ᠂ ᠵᠦᠩᠭᠠᠷ᠂ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠪᠠᠶᠠᠳ ᠢᠵᠠᠭᠤᠷᠲᠠᠳ ᠴᠦ᠍ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠠᠯᠠᠭᠠ᠃ ᠲᠡᠷᠡ ᠪᠠᠢᠲᠤᠭᠠᠢ ᠳᠡᠭᠡᠭᠰᠢ ᠪᠡᠨ ᠲᠥᠷᠥ ᠭᠦᠷᠦᠨ ᠦ᠌ ᠡᠵᠡᠨ ᠨᠣᠶᠠᠳ ᠲᠠᠢ ᠴᠦ᠍ ᠨᠠᠢᠷ ᠲᠠᠯᠠ ᠲᠠᠢ ᠪᠣᠯᠬᠣᠷ ᠡᠳ᠋ ᠮᠥᠩᠭᠥ ᠶ᠋ᠢᠨ ᠬᠦᠴᠦ ᠪᠡᠷ ᠡᠳᠦᠢ ᠲᠡᠳᠦᠢ ᠴᠡᠷᠢᠭ ᠲᠡᠵᠢᠭᠡᠵᠦ ᠰᠣᠷᠲᠣᠭᠣᠯᠠᠨ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠠᠭᠠᠰᠢᠯᠠᠬᠤ ᠠᠵᠤᠭᠤ᠃ ᠸᠠᠩ ᠰᠣᠬᠣᠷ ᠵᠡᠭᠦᠨᠰᠢ ᠪᠡᠨ ᠪᠤᠭᠤᠲᠤ᠂ ᠰᠠᠭᠠᠯᠢᠴᠢᠨ᠂ ᠪᠠᠷᠠᠭᠤᠨᠰᠢ ᠦᠶᠤᠸᠠᠨ᠂ ᠱᠠᠮᠪᠠ ᠣᠷᠣᠲᠠᠯᠠ ᠪᠠᠨ ᠪᠦᠷ ᠴᠡᠷᠢᠭ ᠰᠠᠭᠤᠯᠭᠠᠵᠤ᠂ ᠪᠠᠶᠠᠳ ᠢᠵᠠᠭᠤᠷᠲᠠᠳ᠂ ᠸᠠᠩ ᠬᠦᠩ ᠨᠣᠶᠠᠳ ᠲᠤ᠌ ᠬᠡᠭᠡᠯᠢ ᠬᠠᠬᠤᠤᠯᠢ ᠲᠦᠯᠬᠢᠵᠦ ᠂ ᠮᠣᠩᠭᠣᠯ ᠬᠢᠲᠠᠳ ᠡᠭᠡᠯ ᠠᠷᠠᠳ ᠢ᠋ ᠬᠢᠬᠠᠨ ᠮᠥᠯᠵᠢᠳᠡᠭ ᠪᠠᠢᠨᠠ᠃ ᠲᠡᠭᠡᠬᠦᠯᠡᠷ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠬᠣᠰᠢᠭᠤ ᠨᠤᠲᠤᠭ ᠲᠤ᠌ ᠲᠡᠷᠡ ᠪᠡᠷ ᠠᠯᠢ ᠳᠤᠷᠠ ᠲᠠᠢ ᠪᠠᠨ ᠬᠢᠵᠦ ᠲᠠᠩᠬᠠᠢᠷᠠᠨᠠ᠃ ᠲᠡᠭᠦᠨ ᠦ᠌ ᠬᠠᠷᠭᠢᠰ ᠬᠤᠢᠬᠤᠷ ᠠᠵᠢᠯᠯᠠᠭᠠ ᠳ᠋ᠤ᠌ ᠶᠠᠳᠠᠭᠤ ᠠᠷᠠᠳ ᠪᠠᠢᠲᠤᠭᠠᠢ ᠂ ᠬᠢᠷᠢ ᠪᠠᠷᠤᠭ ᠤ᠋ᠨ ᠪᠠᠶᠠᠳ ᠨᠣᠶᠠᠳ ᠴᠦ᠍ ᠬᠠᠯᠳᠠᠬᠤ ᠠ᠋ᠴᠠ ᠪᠠᠨ ᠡᠮᠢᠶᠡᠵᠦ ᠠᠯᠢ ᠪᠣᠯᠬᠤ ᠪᠠᠷ ᠵᠠᠢᠯᠠᠳᠠᠭ ᠪᠠᠢᠨᠠ᠃
ᠮᠣᠷᠢᠳ ᠤ᠋ᠨ ᠤᠶᠠᠭᠠᠨ ᠤ᠋ ᠨᠠᠭᠠᠨᠠ ᠭᠤᠷᠪᠠ ᠬᠥᠯᠦᠭᠰᠡᠨ ᠳᠥᠷᠪᠡᠨ ᠬᠦᠷᠳᠦᠲᠡᠨ ᠰᠡᠦᠬᠡ ᠲᠡᠷᠭᠡ ᠵᠣᠭᠰᠣᠵᠤ᠂ ᠭᠦᠵᠡᠭᠡᠨ ᠴᠠᠭᠠᠨ ᠠᠯᠴᠢᠭᠤᠷ ᠢ᠋ ᠮᠠᠩᠨᠠᠢ ᠳᠡᠭᠡᠷᠡ ᠪᠡᠨ ᠬᠠᠷᠢᠶᠠᠴᠠᠢ ᠶ᠋ᠢᠨ ᠵᠢᠭᠦᠷ ᠰᠢᠭ ᠬᠠᠢᠴᠢᠯᠠᠨ ᠣᠷᠢᠶᠠᠭᠰᠠᠨ ᠫᠤᠤ ᠵᠡᠪᠰᠡᠭ ᠲᠡᠢ ᠠᠷᠪᠠᠭᠠᠳ ᠬᠠᠷᠠ ᠴᠡᠷᠢᠭ ᠰᠠᠯᠬᠢ ᠰᠢᠭ᠋ ᠬᠤᠷᠳᠤᠨ ᠬᠥᠳᠡᠯᠵᠦ᠂ ᠬᠣᠶᠠᠷ ᠨᠢ ᠰᠤᠭᠤᠷᠠᠵᠤ ᠢᠷᠡᠭᠡᠳ ᠸᠠᠩ ᠰᠣᠬᠣᠷ ᠤ᠋ᠨ ᠬᠣᠩᠭᠣ ᠡᠪᠦᠳᠦᠭ ᠢ᠋ᠶ᠋ᠡᠷ ᠨᠢ ᠡᠷᠭᠦᠵᠦ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠬᠥᠩᠭᠡᠬᠡᠨ ᠭᠡᠭᠴᠢ ᠰᠠᠭᠤᠯᠭᠠᠪᠠ᠃
ᠤᠯᠠᠭᠠᠨ ᠮᠣᠨᠴᠣᠭ ᠲᠠᠢ ᠭᠤᠷᠪᠠᠨ ᠮᠤᠰᠬᠢᠭᠤᠷᠳᠤ ᠬᠤᠯᠤᠰᠤᠨ ᠲᠠᠰᠢᠭᠤᠷ ᠲᠣᠬᠢᠯᠵᠠᠵᠤ᠂ ᠫᠢᠱ ᠭᠡᠬᠦ ᠲᠡᠢ ᠵᠡᠷᠭᠡ ᠲᠡᠷᠭᠡ ᠤᠬᠤᠰᠬᠢᠨ ᠬᠥᠳᠡᠯᠪᠡ᠃ ᠰᠡᠦᠬᠡ ᠲᠡᠷᠭᠡᠨ ᠦ᠌ ᠬᠠᠵᠠᠭᠤ ᠶ᠋ᠢᠨ ᠴᠣᠩᠬᠣ ᠪᠠᠷ ᠨᠣᠮᠢᠨ ᠱ᠌ᠢᠷᠦ ᠲᠡᠢ ᠬᠠᠷᠠ ᠲᠣᠭᠣᠷᠴᠣᠭ ᠂ ᠥᠷᠥᠭᠡᠰᠦᠨ ᠨᠢᠳᠦ ᠂ ᠤᠯᠠᠭᠠᠨ ᠦᠵᠦᠭᠦᠷᠲᠦ ᠬᠠᠮᠠᠷ ᠨᠢᠭᠡ ᠴᠤᠬᠤᠢᠵᠤ ᠂ ᠸᠠᠩ ᠰᠣᠬᠣᠷ ᠲᠣᠯᠣᠭᠠᠢ ᠲᠣᠬᠢᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠳᠠᠬᠢᠨ ᠳᠠᠯᠳᠠᠷᠠᠪᠠ ᠃
ᠮᠡᠬᠦᠰᠬᠢᠨ ᠶᠣᠰᠣᠯᠠᠵᠤ ᠬᠣᠴᠣᠷᠤᠭᠰᠠᠨ ᠬᠥᠮᠦᠰ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠬᠤ ᠳ᠋ᠤ᠌ ᠬᠦᠩ ᠨᠣᠶᠠᠨ ᠰᠢᠷᠠᠪᠲᠤᠷᠵᠢ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠵᠢᠷᠦᠬᠡᠨ ᠲᠤᠰᠢᠶᠠ ᠪᠠᠨ ᠨᠠᠮᠬᠠᠨ ᠳᠠᠷᠤᠵᠤ ᠮᠡᠬᠦᠢᠭᠰᠡᠨ ᠢ᠋ᠶ᠋ᠡᠨ ᠳᠡᠭᠡᠭᠰᠢ ᠪᠣᠯᠵᠤ᠂ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠬᠡ ᠬᠠᠰ ᠤ᠋ᠨ ᠡᠷᠢᠭᠡ ᠪᠡᠨ ᠪᠥᠮᠪᠥᠷᠢᠭᠦᠯᠵᠦ 《 ᠪᠠᠭᠠ ᠬᠠᠲᠤᠨ ᠳ᠋ᠤ᠌ ᠮᠢᠨᠢ ᠠᠯᠲᠠᠨ ᠡᠳ᠋ᠯᠡᠯ᠂ ᠰᠤᠪᠤᠳ ᠤ᠋ᠨ ᠭᠡᠯᠬᠢᠶᠡᠰᠦᠲᠦ ᠰᠣᠨᠳᠣᠷ᠂ ᠯᠤᠤ ᠮᠤᠰᠬᠢᠷᠠᠯᠳᠤᠭᠰᠠᠨ ᠬᠡ ᠲᠡᠢ ᠠᠯᠲᠠᠨ ᠪᠠᠭᠤᠤ᠂ ᠱ᠌ᠢᠷᠦᠨ ᠨᠢᠳᠦᠲᠡᠢ ᠮᠥᠩᠭᠥᠨ ᠪᠦᠯᠡᠵᠡᠭ ᠁ ᠵᠠᠰᠠᠯ ᠵᠢᠮᠰᠡᠭ ᠦ᠋ᠨ ᠣ ᠡᠩᠭᠡᠰᠬᠡ ᠁ ᠵᠡᠷᠭᠡ ᠦᠨᠡᠲᠦ ᠶᠠᠭᠤᠮᠠ ᠪᠡᠯᠡᠭᠯᠡᠭᠰᠡᠨ ᠶᠦᠮ ᠠ᠋ ! ᠡᠨᠡ ᠸᠠᠩ ᠵᠠᠩᠭᠤᠢᠳᠠ ᠶ᠋ᠢᠨ ᠪᠡᠯᠡᠭ ᠦ᠋ᠨ ᠬᠦᠨᠳᠦ ᠡᠴᠡ ᠰᠡᠳᠬᠢᠯ ᠨᠢ ᠪᠦᠷ ᠴᠦ᠍ ᠬᠦᠨᠳᠦ ᠶᠦᠮ ᠳᠡ᠃ ᠡᠭᠦᠨ ᠢ᠋ ᠪᠣᠳᠣᠪᠠᠯ ᠮᠠᠨ ᠤ᠋ ᠮᠣᠩᠭᠣᠯ ᠬᠣᠰᠢᠭᠤᠳ ᠤ᠋ᠨ ᠸᠠᠩ ᠬᠥᠭ ᠨᠣᠶᠠᠳ ᠤ᠋ᠨ ᠡᠷᠭᠦᠭᠰᠡᠨ ᠪᠡᠯᠡᠭ ᠰᠡᠯᠲᠡ ᠭᠡᠳᠡᠭ ᠴᠢᠨᠢ ᠬᠡᠦᠬᠡᠳ ᠦ᠋ᠨ ᠲᠣᠭᠯᠠᠭᠠᠮ ᠯᠠ ᠭᠡᠰᠡᠨ ᠬᠡᠷᠡᠭ 》ᠭᠡᠵᠦ ᠳᠦᠳᠦᠨᠡᠨᠡ᠃
ᠬᠤᠷᠢᠮ ᠤ᠋ᠨ ᠭᠣᠣᠯ ᠨᠠᠢᠷ ᠢᠩᠭᠢᠵᠦ ᠰᠢᠪᠲᠤᠷᠠᠪᠠ᠃ ᠵᠠᠯᠭᠠᠭᠠᠳ ᠰᠢᠪᠡᠷ ᠨᠠᠢᠷ ᠭᠡᠳᠡᠭ ᠭᠠᠯᠴᠢ ᠲᠣᠭᠣᠭᠠᠴᠢ᠂ ᠡᠮᠦᠨᠡ ᠬᠣᠢᠨᠠ ᠵᠠᠷᠤᠭᠳᠠᠭᠰᠠᠨ ᠬᠥᠮᠦᠰ ᠡᠨᠡ ᠲᠡᠷᠡ ᠪᠤᠶᠤ ᠦᠬᠡᠷ ᠠᠳᠤᠭᠤᠨ ᠤ᠋ ᠬᠥᠮᠦᠨ ᠢ᠋ ᠪᠠᠶᠠᠰᠬᠠᠨ ᠴᠠᠳᠬᠠᠬᠤ ᠨᠠᠢᠷ ᠪᠣᠯᠬᠤ ᠭᠡᠵᠦ ᠬᠥᠮᠦᠰ ᠦᠷᠭᠦᠯᠵᠢᠯᠡᠨ ᠮᠣᠩᠭᠠᠨᠢᠵᠠᠭᠠᠨᠠ᠃
ᠨᠠᠷᠠ ᠰᠢᠩᠭᠡᠵᠦ ᠪᠦᠷᠦᠢ ᠪᠣᠯᠬᠤ ᠶ᠋ᠢ ᠲᠡᠰᠬᠦ ᠠᠯᠳᠠᠷᠠᠨ ᠬᠦᠯᠢᠶᠡᠭᠰᠡᠨ ᠬᠦᠩ ᠨᠣᠶᠠᠨ ᠳ᠋ᠤ᠌ ᠰᠢᠨᠡ ᠪᠠᠭᠤᠯᠭᠠᠭᠰᠠᠨ ᠪᠠᠭᠠ ᠬᠠᠲᠤᠨ ᠢ᠋ᠶ᠋ᠠᠨ ᠲᠡᠪᠡᠷᠢᠵᠦ ᠤᠨᠲᠠᠬᠤ ᠶ᠋ᠢ ᠯᠡ ᠪᠣᠳᠣᠬᠤ ᠠ᠋ᠴᠠ ᠪᠢᠰᠢ ᠥᠭᠡᠷᠡ ᠪᠣᠳᠣᠯ ᠪᠠᠢᠭᠰᠠᠨ ᠦᠭᠡᠢ᠃ ᠡᠢᠨ ᠬᠦ 《 ᠠᠯᠲᠠᠢ ᠬᠠᠩᠭᠠᠢ 》 ᠭᠡᠬᠦ ᠵᠣᠴᠢᠨ ᠮᠣᠷᠳᠠᠭᠤᠯᠬᠤ ᠳᠠᠭᠤᠤ ᠶᠢᠨ ᠠᠶᠠᠰ ᠴᠢᠬᠢᠨ ᠳ᠋ᠦ᠍ᠨᠢ ᠬᠠᠳᠠᠩᠰᠢᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠶᠠᠩᠭᠢᠨᠠᠭᠠᠳ ᠠᠷᠢᠯᠵᠤ ᠥᠭᠬᠦ ᠦᠭᠡᠢ ᠲᠡᠭᠦᠨ ᠢ᠋ ᠵᠣᠪᠠᠭᠠᠵᠤ ᠪᠠᠢᠯᠠ ᠃
– – – –
① ᠨᠤᠲᠤᠭ ᠤᠨ ᠬᠡᠯᠡᠯᠭᠡ᠂ ᠨᠡᠯᠢᠶᠡᠳ ᠰᠠᠢᠨ ᠭᠡᠰᠡᠨ ᠤᠳᠬᠠ ᠲᠠᠢ᠃
② ᠮᠢᠩᠭᠠᠨᠪᠤᠤ ᠶᠢᠨ ᠵᠠᠯᠠᠭᠤ ᠳᠤ ᠪᠠᠨ ᠨᠢᠭᠤᠴᠠᠬᠠᠢ ᠬᠠᠨᠢᠯᠠᠭᠰᠠᠨ ᠪᠦᠰᠡᠬᠦᠢ ᠬᠤᠪᠢᠯᠴᠡᠴᠡᠭ ᠢ ᠳᠦᠬᠦᠮᠴᠢᠯᠡᠭ᠍ᠰᠡᠨ ᠳᠠᠭᠤᠳᠠᠯᠭᠠ᠃
③ ᠲᠠᠪᠤ ᠶᠢᠨ ᠲᠠᠷᠤᠭᠠ᠃
④ ᠤᠷᠠᠳ ᠨᠤᠲᠤᠭ ᠲᠤ᠌ ᠬᠤᠷᠢᠮ ᠤ᠋ᠨ ᠭᠣᠣᠯ ᠨᠠᠢᠷ ᠲᠠᠷᠬᠠᠵᠤ ᠂ ᠬᠠᠷᠢ ᠬᠣᠯᠠ ᠶ᠋ᠢᠨ ᠭᠡᠢᠴᠢᠳ ᠢ᠋ᠶ᠋ᠡᠨ ᠮᠣᠷᠳᠠᠭᠤᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠂ ᠭᠡᠷ ᠦ᠋ᠨ ᠡᠵᠡᠨ ᠡᠴᠡ ᠲᠡᠷᠡ ᠣᠷᠣᠢ ᠨᠢ ᠬᠤᠷᠢᠮ ᠳ᠋ᠤ᠌ ᠦᠢᠯᠡᠴᠢᠯᠡᠭᠰᠡᠨ ᠬᠥᠮᠦᠰ ᠢ᠋ᠶ᠋ᠡᠨ ᠳᠠᠢᠯᠠᠬᠤ ᠨᠠᠢᠷ ᠢ᠋ ᠬᠡᠯᠡᠨᠡ᠃
⑤ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠮᠣᠳᠣᠨ ᠬᠤᠢ ᠲᠠᠢ ᠠᠬᠤᠷ ᠫᠤᠤ ᠶ᠋ᠢ ᠪᠡᠶᠡᠨᠽᠢ ᠭᠡᠳᠡᠭ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ <ᠬᠡᠯᠡ ᠪᠢᠴᠢᠭ> ᠬᠣᠯᠪᠣᠭᠠ