ᠵᠢᠷᠭᠤᠭᠠ᠂ ᠤᠷᠠᠨ ᠪᠦᠲᠦᠭᠡᠯ ᠳ᠋ᠡᠬᠢ ᠠᠮᠢᠨ ᠴᠢᠨᠠᠷ-ᠮᠣᠩᠭᠣᠯ ᠤ᠋ᠨ ᠭᠤᠷᠪᠠᠯ ᠣᠨᠣᠯ3-ᠨᠠ᠊᠂ ᠨᠠᠭᠠᠨᠪᠤᠤМонголын гурвал онол-На,Хаанбуу
254ᠵᠢᠷᠭᠤᠭᠠ᠂ ᠤᠷᠠᠨ ᠪᠦᠲᠦᠭᠡᠯ ᠳ᠋ᠡᠬᠢ ᠠᠮᠢᠨ ᠴᠢᠨᠠᠷ
ᠳ· ᠷᠠᠪᠵᠠᠢ ᠠᠭᠰᠠᠨ ᠤ᠋ ᠪᠦᠲᠦᠭᠡᠯ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠲᠠᠢ ᠰᠣᠯᠢᠯᠳᠤᠭᠰᠠᠨ ᠴᠤ᠌᠂ ᠭᠤᠷᠪᠠᠯ ᠤ᠋ᠨ ᠤᠯᠠᠮᠵᠢᠯᠠᠯ ᠳ᠋ᠤ᠌ ᠰᠢᠲᠦᠯᠴᠡᠭᠰᠡᠨ ᠲᠤᠯᠠ《ᠰᠣᠯᠢᠶᠠᠲᠤ》 ᠪᠣᠯᠤᠭᠰᠠᠨ ᠭᠡᠵᠦ ᠳᠤᠷᠠᠳᠤᠭᠰᠠᠨ ᠪᠢᠯᠡ᠃ ᠮᠣᠩᠭᠣᠯ ᠤᠷᠠᠨ ᠪᠦᠲᠦᠭᠡᠯᠴᠢ ᠰᠡᠳᠬᠢᠯᠭᠡ ᠰᠡᠭᠦᠯᠴᠢ ᠶ᠋ᠢᠨ ᠭᠤᠷᠪᠠᠨ ᠵᠠᠭᠤᠨ ᠤ᠋ ᠲᠤᠷᠰᠢ᠂ ᠬᠠᠷᠢ ᠤᠬᠠᠭᠠᠨ᠂ ᠣᠨᠣᠯ᠂ ᠦᠵᠡᠯ ᠦ᠋ᠳ ᠲᠦ᠍ ᠠᠪᠲᠠᠬᠤ ᠳ᠋ᠠᠭᠠᠨ《ᠱᠠᠰᠢᠨ— ᠮᠣᠩᠭᠣᠯ— ᠪᠦᠲᠦᠭᠡᠯ》 ᠪᠤᠶᠤ《ᠬᠠᠷᠢ— ᠮᠣᠩᠭᠣᠯ ᠪᠦᠲᠦᠭᠡᠯ》 ᠭᠡᠰᠡᠨ ᠲᠤᠯᠭᠠᠭᠤᠷᠢ ᠲᠠᠢ ᠪᠣᠯᠵᠠᠢ᠃ ᠲᠡᠭᠦᠨ ᠳ᠋ᠦ᠍ ᠠᠪᠲᠠᠭᠠ ᠦᠭᠡᠢ ᠪᠢᠯᠢᠭ ᠲᠠᠩᠬᠠᠢ ᠠᠪᠢᠶᠠᠰ᠂ ᠥᠪ ᠤᠯᠠᠮᠵᠢᠯᠠᠯ ᠳ᠋ᠤ᠌ ᠰᠢᠲᠦᠵᠦ ᠰᠥᠷᠦᠭᠰᠡᠨ ᠨᠢ《ᠰᠣᠯᠢᠶᠠᠲᠤ》 ᠶᠤᠮᠰᠠᠨᠵᠠᠢ᠃ ᠰᠣᠼᠢᠶᠡᠯᠢᠽᠮ ᠦ᠋ᠨ ᠦᠶᠡ ᠳ᠋ᠦ᠍ ᠤᠯᠠᠮᠵᠢᠯᠠᠯ ᠢ᠋ ᠰᠢᠲᠦᠬᠦ ᠨᠥᠬᠥᠴᠡᠯ ᠪᠦᠷᠢᠨ ᠬᠠᠭᠠᠭᠳᠠᠵᠤ᠂ ᠲᠡᠷᠡ ᠤᠯᠠᠮᠵᠢᠯᠠᠯ ᠨᠢ ᠴᠦ᠍ ᠨᠢᠭᠡᠨᠲᠡ ᠪᠦᠷᠬᠦᠭ ᠪᠣᠯᠤᠭᠰᠠᠨ ᠲᠤᠯᠠ《ᠦᠵᠡᠯ ᠰᠤᠷᠲᠠᠯ— ᠰᠡᠳᠦᠪ— ᠵᠣᠬᠢᠶᠠᠮᠵᠢ》 ᠭᠡᠰᠡᠨ ᠬᠠᠭᠤᠷᠮᠠᠴᠢ ᠠᠭᠤᠯᠭᠠ ᠬᠡᠯᠪᠡᠷᠢ ᠳ᠋ᠦ᠍ ᠪᠠᠷᠢᠭᠳᠠᠭᠰᠠᠨ ᠴᠤ᠌ ᠴᠠᠭ ᠦᠶᠡ ᠪᠡᠨ ᠳᠠᠭᠠᠵᠤ ᠤᠷᠠ ᠴᠢᠳᠠᠪᠤᠷᠢ ᠶ᠋ᠢᠨ ᠥᠰᠦᠯᠲᠡ ᠭᠠᠷᠤᠭᠰᠠᠨ ᠭᠡᠵᠦ ᠦᠵᠡᠨᠡ᠃ ᠭᠡᠪᠡᠴᠦ《ᠭᠤᠷᠪᠠᠯ ᠤᠬᠠᠭᠠᠨ》 ᠤ᠋ ᠡᠭᠦᠳᠡᠨ ᠡᠴᠡ ᠶᠠᠷᠢᠭᠳᠠᠬᠤ ᠪᠦᠲᠦᠭᠡᠯ《ᠳ᠋ᠡᠬᠢ ᠶ᠋ᠢᠨ ᠵᠣᠭᠰᠣᠭᠠᠯ》 ᠵᠡᠷᠭᠡ ᠡᠮᠦᠨᠡ ᠳᠤᠷᠠᠳᠴᠤ ᠠᠭᠰᠠᠨ ᠮᠡᠲᠦ ᠪᠠᠰᠠ ᠴᠤ᠌ ᠪᠣᠢ ᠪᠣᠯᠤᠯᠲᠠᠢ᠃ ᠠᠷᠠᠳᠴᠢᠯᠠᠯ ᠤ᠋ᠨ ᠭᠡᠭᠳᠡᠬᠦ ᠰᠡᠭᠦᠯᠴᠢ ᠶ᠋ᠢᠨ ᠵᠢᠯ ᠦ᠋ᠳ ᠲᠦ᠍《ᠰᠢᠨᠡ ᠰᠡᠳᠬᠢᠯᠭᠡ— ᠬᠠᠭᠤᠴᠢᠨᠰᠠᠭ ᠦᠵᠡᠯ— ᠤᠷᠠᠨ ᠪᠦᠲᠦᠭᠡᠯ》 ᠭᠡᠰᠡᠨ ᠬᠣᠯᠢᠴᠠᠭᠠ ᠪᠣᠢ ᠪᠣᠯᠵᠤ ᠥᠭᠡᠷᠡᠴᠢᠯᠡᠯᠲᠡ ᠭᠠᠷᠤᠭᠰᠠᠨ ᠴᠤ᠌ ᠤᠷᠠᠨ ᠪᠦᠲᠦᠭᠡᠯ ᠰᠢᠨᠡ ᠰᠡᠳᠬᠢᠯᠭᠡᠨ ᠦ᠌ ᠦᠷᠡ ᠪᠠᠢᠬᠤ ᠰᠡᠬᠡᠭᠡᠷᠡᠯ ᠥᠷᠨᠢᠵᠦ ᠡᠨᠡ ᠨᠢ ᠮᠥᠨᠥᠬᠢ ᠯᠡ《ᠦᠵᠡᠯ ᠰᠤᠷᠲᠠᠯ》 ᠪᠠᠢᠭᠰᠠᠨ ᠢ᠋ ᠤᠬᠠᠭᠠᠷᠠᠭᠰᠠᠨ ᠦᠭᠡᠢ᠃ ᠵᠢᠱ᠌ᠢᠶᠡ ᠨᠢ ᠰᠣᠼᠢᠶᠠᠯᠢᠽᠮ ᠤ᠋ᠨ ᠦᠶᠡ ᠳ᠋ᠦ᠍ ᠬᠣᠷᠢᠵᠤ ᠴᠠᠭᠳᠠᠵᠤ ᠠᠭᠰᠠᠨ ᠰᠡᠳᠦᠪ ᠢ᠋ ᠰᠡᠬᠦᠵᠦ ᠲᠠᠯᠪᠢᠬᠤ ᠵᠣᠷᠢᠯᠭᠠ ᠶ᠋ᠢ《ᠰᠢᠨᠡ ᠰᠡᠳᠬᠢᠯᠭᠡ》 ᠭᠡᠮᠡᠨ ᠬᠠᠭᠤᠴᠢᠨᠰᠠᠭ ᠢ᠋ᠶ᠋ᠠᠷ ᠤᠬᠠᠭᠠᠷᠠᠵᠤ ᠡᠮᠦᠨᠡ ᠨᠢ ᠣᠯᠤᠭᠰᠠᠨ ᠳᠠᠪᠰᠢᠯ ᠢ᠋ᠶ᠋ᠠᠨ ᠵᠠᠷᠢᠮ ᠲᠠᠯᠠ ᠪᠠᠷ ᠭᠡᠭᠡᠭᠰᠡᠨ ᠳᠤᠲᠠᠭᠳᠠᠯ ᠣᠷᠣᠰᠢᠵᠠᠢ᠃ ᠵᠦᠢ ᠨᠢ ᠤᠷᠠᠨ ᠪᠦᠲᠦᠭᠡᠯ ᠭᠡᠳᠡᠭ《ᠤᠷᠠᠨ ᠰᠠᠨᠠᠭᠠ— ᠳᠣᠲᠣᠭᠠᠳᠤ ᠰᠡᠷᠡᠮᠵᠢ — ᠤᠷᠠ ᠴᠢᠳᠠᠪᠤᠷᠢ》 ᠭᠡᠰᠡᠨ ᠭᠤᠷᠪᠠᠯ ᠤ᠋ᠨ ᠴᠣᠭᠴᠠᠯᠠᠯ ᠪᠠᠢᠬᠤ ᠶᠣᠰᠣᠲᠠᠢ ᠶ᠋ᠢ ᠮᠡᠳᠡᠷᠡᠭᠡ ᠦᠭᠡᠢ ᠡᠴᠡ ᠲᠥᠷᠥ ᠶ᠋ᠢᠨ ᠰᠣᠶᠣᠷᠬᠠᠯ ᠰᠣᠼᠢᠶᠠᠯᠢᠽᠮ ᠤ᠋ᠨ ᠦᠶᠡ ᠶ᠋ᠢᠨ ᠪᠦᠲᠦᠭᠡᠯ ᠦ᠋ᠳ ᠲᠤ ᠣᠯᠭᠣᠭᠳᠠᠵᠤ《ᠳᠤᠷᠠᠰᠬᠠᠯ ᠤ᠋ᠨ》 ᠰᠢᠨᠵᠢ ᠲᠡᠢ ᠣᠯᠤᠭᠰᠠᠨ ᠠ᠋ᠴᠠ ᠬᠠᠷᠠᠵᠤ ᠪᠣᠯᠤᠨᠠ᠃ ᠦᠨᠡᠬᠡᠷ ᠲᠡᠷᠡ ᠬᠡᠰᠡᠭ ᠲᠤ ᠨᠡᠢᠭᠡᠮ ᠦ᠋ᠨ ᠤᠬᠠᠮᠰᠠᠷ ᠤ᠋ᠨ ᠬᠤᠪᠢ ᠳ᠋ᠤ᠌ ᠴᠢᠯᠥᠭᠡᠲᠦ ᠪᠠᠢᠳᠠᠯ ᠤ᠋ᠨ ᠰᠢᠨᠵᠢ᠂ ᠰᠢᠨᠡᠯᠢᠭ ᠬᠠᠨᠳᠤᠯᠭᠠ ᠮᠥᠨ ᠪᠣᠯᠪᠠᠴᠤ ᠤᠷᠠᠨ ᠪᠦᠲᠦᠭᠡᠯ ᠳ᠋ᠦ᠍ ᠪᠣᠯᠬᠢ ᠰᠡᠳᠦᠪ ᠲᠡᠳᠦᠢ ᠦᠭᠡᠢ ᠬᠠᠭᠤᠴᠢᠨ ᠪᠠᠢᠳᠠᠯ ᠶᠤᠮ᠃ ᠵᠠᠭᠪᠤᠷᠴᠢᠯᠠᠯ ᠨᠢ ᠴᠦ᠍《ᠡᠬᠢᠯᠡᠯ— ᠥᠷᠨᠢᠯ— ᠲᠡᠭᠦᠰᠬᠡᠯ》 ᠭᠡᠰᠡᠨ ᠬᠦᠷᠢᠶᠡᠨ ᠳ᠋ᠡᠭᠡᠨ ᠬᠠᠰᠢᠭᠳᠠᠭᠰᠠᠭᠠᠷ᠃ ᠡᠨᠡ ᠠᠷᠭᠠ ᠨᠢ ᠬᠡᠯᠪᠡᠷᠢ ᠶ᠋ᠢᠨ ᠰᠢᠨᠡᠴᠢᠯᠡᠯᠲᠡ ᠬᠦᠯᠢᠶᠡᠵᠦ ᠪᠣᠢ ᠬᠣᠴᠣᠷᠤᠭᠳᠠᠯ ᠶᠤᠮ᠃ ᠤᠷᠠᠨ ᠪᠦᠲᠦᠭᠡᠯ ᠦ᠋ᠨ ᠠᠮᠢᠨ ᠴᠢᠨᠠᠷ ᠨᠢ《ᠠᠪᠢᠶᠠᠰ— ᠰᠠᠷᠠᠯ— ᠰᠡᠳᠬᠢᠮᠵᠢ》 ᠪᠥᠭᠡᠳ ᠲᠡᠷᠡ ᠨᠢ ᠰᠡᠳᠦᠪ ᠴᠦ᠍ ᠪᠠᠢ᠂ ᠴᠠᠭ ᠦᠶᠡ ᠴᠤ᠌ ᠪᠠᠢ᠂ ᠶᠠᠭᠤ ᠴᠤ᠌ ᠪᠢᠰᠢ ᠪᠠᠢ᠂ ᠬᠢᠵᠠᠭᠠᠷ ᠦᠭᠡᠢ ᠳ᠋ᠦ᠍ ᠣᠷᠣᠰᠢᠵᠤ ᠪᠠᠢᠬᠤ ᠤᠷᠠᠨ ᠪᠦᠲᠦᠭᠡᠯ ᠪᠣᠯᠬᠤ᠃ ᠮᠣᠩᠭᠣᠯ ᠤ᠋ᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠢ᠋ᠶ᠋ᠡᠨ ᠠᠮᠢᠳᠤᠷᠠᠯ ᠠ᠋ᠴᠠ ᠪᠢᠰᠢ ᠭᠤᠷᠪᠠᠯ ᠣᠨᠣᠯ ᠠ᠋ᠴᠠ ᠬᠠᠢᠬᠤ᠂ ᠤᠭ ᠤᠬᠠᠭᠠᠨ ᠢ᠋ ᠲᠡᠭᠦᠰ ᠡᠵᠡᠮᠰᠢᠬᠦ ᠱᠠᠭᠠᠷᠳᠠᠯᠭᠠ ᠦᠭᠡᠢᠯᠡᠭᠳᠡᠵᠦ ᠪᠠᠢᠨᠠ᠃ ᠤᠴᠢᠷ ᠨᠢ ᠤᠭ ᠣᠨᠣᠯ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠤᠴᠠ ᠳ᠋ᠤ᠌ ᠨᠡᠪᠲᠡᠷᠡᠬᠦ᠂ ᠰᠢᠨᠡ ᠪᠦᠲᠦᠭᠡᠯ᠂ ᠰᠡᠳᠬᠢᠯᠭᠡ᠂ ᠵᠥᠷᠢᠴᠡᠯ᠂ ᠥᠪᠡᠷᠮᠢᠴᠡ ᠰᠢᠢᠳ᠂ ᠦᠨᠡᠨ ᠢ᠋ ᠡᠷᠢᠯᠬᠢᠯᠡᠭᠴᠢ ᠪᠦᠲᠦᠭᠡᠯ ᠪᠢᠰᠢᠯᠭᠠᠯ ᠤ᠋ᠨ ᠰᠢᠨᠵᠢ ᠲᠡᠢ ᠳ᠋ᠦ᠍ ᠣᠷᠣᠰᠢᠨᠠ᠃ ᠡᠨᠡ ᠯᠡ ᠨᠥᠬᠥᠴᠡᠯ ᠳ᠋ᠦ᠍ ᠳᠡᠯᠡᠬᠡᠢ ᠳ᠋ᠦ᠍ ᠥᠪᠡᠷᠮᠢᠴᠡ ᠮᠣᠩᠭᠣᠯ ᠪᠦᠲᠦᠭᠡᠯ ᠲᠥᠷᠥᠨᠡ᠃ ᠭᠤᠷᠪᠠᠯ ᠣᠨᠣᠯ ᠤᠷᠠᠨ ᠪᠦᠲᠦᠭᠡᠯ ᠳ᠋ᠦ᠍ ᠨᠡᠪᠲᠡᠷᠡᠭᠡ ᠦᠭᠡᠢ ᠤᠴᠢᠷ ᠳᠡᠯᠡᠬᠡᠢ ᠶ᠋ᠢᠨ ᠤᠯᠤᠰ ᠣᠷᠣᠨ ᠨᠤᠭᠤᠳ ᠳᠤᠮᠳᠠ ᠲᠡᠷᠡ ᠨᠢ ᠰᠠᠢᠨ ᠳ᠋ᠠᠭᠠᠨ ᠯᠠ ᠳᠦᠷᠢ ᠳᠦᠷᠰᠦᠯᠡᠯ ᠦ᠋ᠨ ᠥᠩᠭᠡᠴᠡ ᠪᠡᠷ ᠢ᠋ᠶ᠋ᠡᠨ ᠱᠣᠬᠣᠭᠣᠷᠬᠠᠭᠳᠠᠬᠤ ᠪᠣᠯᠬᠤ ᠠ᠋ᠴᠠ ᠪᠢᠰᠢ ᠤᠷᠠ ᠴᠢᠳᠠᠪᠤᠷᠢ ᠶ᠋ᠢᠨ ᠥᠪᠡᠷᠮᠢᠴᠡ ᠳᠠᠯᠠᠢᠴᠠ ᠨᠢ ᠬᠣᠮᠰᠠ ᠦᠵᠡᠭᠦᠯᠦᠯᠲᠡ ᠳ᠋ᠦ᠍ ᠬᠦᠷᠦᠨᠡ᠃ ᠡᠨᠡ ᠨᠢ ᠰᠤᠳᠤᠯᠤᠯ᠂ ᠰᠢᠭᠦᠮᠵᠢ᠂ ᠭᠦᠢᠴᠡᠳᠬᠡᠯ ᠪᠦᠭᠦᠳᠡ ᠳ᠋ᠦ᠍ ᠨᠢ ᠬᠠᠮᠢᠶᠠ ᠲᠠᠢ ᠴᠤ᠌ ᠰᠢᠨᠡ ᠵᠣᠷᠢᠯᠭᠠ᠂ ᠥᠭᠡᠷᠡ ᠡᠷᠭᠢᠯᠲᠡ ᠬᠦᠰᠡᠬᠦ ᠪᠥᠭᠡᠳ ᠡᠨᠡ ᠳᠠᠪᠠᠭᠠᠨ ᠤ᠋ ᠡᠮᠦᠨᠡ ᠪᠢᠳᠡ ᠨᠢᠯᠬᠠ ᠪᠠᠯᠴᠢᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠭᠠ ᠪᠠᠨ ᠤᠬᠠᠭᠠᠷᠠᠬᠤ ᠶᠣᠰᠣᠲᠠᠢ᠃ ᠲᠤᠬᠠᠢᠯᠠᠪᠠᠯ ᠬᠢᠴᠡ ᠮᠠᠲ᠋ᠧᠷᠢ ᠪᠣᠯᠬᠤ ᠦᠭᠡ ᠴᠢᠬᠤᠯᠠ ᠴᠤ᠌ ᠲᠠᠩᠨᠠᠨ ᠬᠥᠭᠡᠭᠡᠴᠡᠯᠳᠦᠬᠦ ᠡᠳ᠋ ᠪᠢᠰᠢ᠃ ᠡᠭᠦᠨ ᠯᠦ᠍ᠭᠡ ᠠᠳᠠᠯᠢ ᠤᠷᠠᠨ ᠰᠠᠨᠠᠭᠠ᠂ ᠤᠷᠠ ᠴᠢᠳᠠᠪᠤᠷᠢ᠂ ᠰᠡᠳᠬᠢᠮᠵᠢ ᠴᠤ᠌ ᠥᠷᠥᠭᠡᠰᠦᠭᠡᠯ᠃ ᠴᠣᠬᠣᠮ ᠡᠨᠳᠡ ᠡᠴᠡ ᠯᠡ ᠰᠢᠨᠡ ᠰᠤᠷᠭᠠᠭᠤᠯᠢ᠂ ᠰᠤᠷᠭᠠᠯ ᠡᠬᠢᠯᠡᠬᠦ ᠶᠣᠰᠣᠲᠠᠢ᠃ ᠡᠨᠳᠡ ᠪᠢ ᠤᠷᠠᠨ ᠵᠣᠬᠢᠶᠠᠯ ᠳ᠋ᠤ᠌ ᠡᠯᠢᠭᠡ ᠲᠡᠢ ᠪᠡᠨ ᠠᠰᠠᠭᠤᠳᠠᠯ ᠢ᠋ ᠰᠡᠬᠦᠵᠦ ᠲᠠᠯᠪᠢᠬᠤ ᠬᠡ ᠥᠬᠡᠢ᠃ ᠡᠨᠡ ᠵᠣᠷᠢᠯᠭᠠ ᠪᠠᠷ ᠭᠤᠷᠪᠠᠯ ᠣᠨᠣᠯ ᠢ᠋ ᠤᠷᠠᠨ ᠵᠣᠬᠢᠶᠠᠯ ᠲᠠᠢ ᠬᠣᠯᠪᠣᠭᠠ ᠦᠭᠡᠢ ᠪᠥᠭᠡᠳ ᠣᠨᠣᠯ ᠤ᠋ᠨ ᠰᠠᠩ ᠥᠪ ᠤᠯᠠᠮᠵᠢᠯᠠᠯ ᠴᠣᠬᠣᠮ ᠡᠨᠳᠡ ᠯᠡ ᠪᠠᠢᠭᠠ ᠪᠤᠶᠤ ᠪᠠᠢᠭᠰᠠᠨ ᠤᠴᠢᠷ ᠡᠮᠵᠡᠭᠯᠡᠨ ᠦᠭᠡᠢᠯᠡᠭᠰᠡᠨ ᠬᠡᠷᠡᠭ ᠪᠢᠯᠡ᠃ ᠦᠭᠡ ᠴᠢᠬᠤᠯᠠ ᠳ᠋ᠠᠭᠠᠨ ᠪᠤᠰᠤ ᠦᠭᠡ ᠶ᠋ᠢᠨ ᠥᠪᠡᠷ ᠦ᠋ᠨ ᠭᠤᠷᠪᠠᠯ ᠢ᠋ ᠨᠡᠭᠡᠭᠡᠬᠦ ᠡᠴᠡ ᠪᠢᠳᠡᠨ ᠦ᠌ ᠠᠵᠢᠯ ᠡᠬᠢᠯᠡᠭᠦᠰᠢᠲᠡᠢ ᠭᠡᠰᠡᠨ ᠯᠡ《ᠰᠢᠭᠦᠮᠵᠢᠯᠡᠯ》 ᠪᠣᠯᠤᠨᠠ᠃
ᠶᠡᠷᠦ ᠠᠯᠢᠪᠠ ᠤᠷᠠᠨ ᠪᠦᠲᠦᠭᠡᠯᠴᠢ ᠰᠢᠨᠵᠢ ᠨᠢ ᠣᠷᠣᠰᠢᠬᠤᠢ ᠠᠬᠤᠢ(ᠪᠣᠳᠠᠲᠤ ᠪᠠᠢᠳᠠᠯ)᠂ ᠣᠶᠤᠨᠲᠤ ᠤᠬᠠᠭᠠᠷᠠᠬᠤᠢ ᠶ᠋ᠢᠨ ᠤᠷᠠᠨ ᠰᠡᠳᠬᠢᠯᠭᠡ(ᠬᠡᠢᠰᠪᠦᠷᠢᠯᠡᠯ) ᠬᠢᠭᠡᠳ ᠨᠢᠭᠡᠴᠢ ᠠᠮᠢᠨ ᠤ᠋ ᠠᠪᠢᠶᠠᠰ ᠤᠷᠠ ᠴᠢᠳᠠᠪᠤᠷᠢ ᠶ᠋ᠢᠨ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠥᠢᠯᠡᠳᠦᠯᠡᠯ(ᠠᠮᠢᠴᠢᠯᠠᠯ) ᠭᠡᠮᠡᠨ ᠳ᠋ᠦᠩᠨᠡᠵᠦ ᠪᠣᠯᠬᠤ ᠠᠵᠠᠢ᠃ ᠵᠢᠱ᠌ᠢᠶᠡ ᠨᠢ ᠬᠡᠨ ᠨᠢᠭᠡᠨ ᠢᠲᠡᠭᠡᠯᠲᠦ ᠡᠴᠡ ᠦᠶᠡ ᠦᠶᠡ ᠶ᠋ᠢᠨ ᠬᠥᠮᠦᠰ ᠲᠤ᠂ ᠲᠠᠨᠢᠯ ᠨᠢ ᠲᠤᠩᠭᠠᠯᠠᠭ ᠲᠠᠮᠢᠷ ᠤ᠋ᠨ《ᠢᠲᠡᠭᠡᠯᠲᠦ》᠃ ᠡᠨᠳᠡ ᠠᠪᠢᠶᠠᠰ ᠭᠡᠳᠡᠭ ᠢ᠋ ᠵᠥᠪᠬᠡᠨ ᠣᠶᠤᠨ ᠤᠬᠠᠭᠠᠨ ᠤ᠋ ᠲᠥᠷᠥᠯᠬᠢ ᠭᠠᠢᠬᠠᠮᠰᠢᠭ ᠮᠡᠲᠦ ᠪᠡᠷ ᠥᠷᠥᠭᠡᠰᠦᠭᠡᠯ ᠦᠵᠡᠵᠦ ᠦᠯᠦ ᠪᠣᠯᠬᠤ᠃ ᠤᠴᠢᠷ ᠨᠢ ᠮᠣᠷᠢᠨ ᠳ᠋ᠤ᠌ ᠰᠢᠨᠳᠠᠰᠤ᠂ ᠬᠥᠮᠦᠨ ᠳ᠋ᠦ᠍ ᠪᠥᠵᠢᠭᠴᠢᠨ᠂ ᠤᠷᠠᠨ ᠨᠤᠭᠤᠷᠠᠭᠠᠴᠢ᠂ ᠪᠥᠬᠡ᠁ ᠵᠡᠷᠭᠡ ᠠᠪᠢᠶᠠᠰ ᠨᠢ ᠲᠤᠬᠠᠢ ᠶ᠋ᠢᠨ ᠪᠡᠶᠡ ᠳ᠋ᠦ᠍ ᠵᠠᠶᠠᠭᠠᠭᠰᠠᠨ ᠠᠮᠢᠨ ᠭᠤᠷᠪᠠᠯ ᠶᠤᠮ᠃ ᠡᠭᠦᠨᠴᠢᠯᠡᠨ ᠵᠣᠬᠢᠶᠠᠯᠴᠢ ᠵᠢᠷᠤᠭᠠᠴᠢ᠁ ᠡᠷᠳᠡᠮᠲᠡᠳ ᠢ᠋ ᠣᠶᠤᠨ ᠲᠦᠯᠬᠢᠭᠦᠦ᠂ ᠠᠮᠢᠨ ᠭᠠᠷᠪᠠᠯᠢᠴᠢ ᠬᠡᠮᠡᠭᠦᠰᠢᠲᠡᠢ᠃ ᠭᠡᠲᠡᠯᠡ ᠵᠢᠩᠬᠢᠨᠢ ᠠᠮᠢᠨ ᠠᠪᠢᠶᠠᠰ ᠨᠢ ᠤᠷᠲᠤ ᠨᠠᠰᠤᠨ ᠳ᠋ᠤ᠌ ᠣᠷᠣᠰᠢᠬᠤ ᠤᠪᠠᠳᠢᠰ ᠰᠢᠲᠦᠯᠴᠡᠯ ᠶᠤᠮᠰᠠᠨᠵᠠᠢ᠃ ᠲᠡᠭᠦᠨ ᠦ᠌ ᠪᠦᠲᠦᠭᠡᠯ ᠨᠢ ᠴᠠᠭ ᠬᠤᠭᠤᠴᠠᠭᠠ᠂ ᠣᠷᠣᠨ ᠵᠠᠢ᠂ ᠠᠮᠢᠳᠤᠷᠠᠯ ᠡᠵᠡᠯᠡᠬᠦ ᠶᠡᠷᠦ ᠪᠤᠰᠤ ᠶ᠋ᠢᠨ ᠲᠡᠷᠡ ᠦᠷᠭᠦᠯᠵᠢᠯᠡᠯ ᠪᠥᠯᠥᠭᠡ᠃ ᠡᠭᠦᠨ ᠢ᠋ ᠭᠠᠷᠤᠭᠠ ᠦᠭᠡᠢ ᠲᠣᠮᠢᠶᠠᠨ ᠳ᠋ᠤ᠌ ᠰᠢᠢᠳ ᠨᠢ ᠣᠷᠣᠰᠢᠬᠤ《ᠶᠢᠺᠰ》 ᠢᠷᠡᠭᠡᠳᠦᠢ ᠶ᠋ᠢᠨ ᠨᠡᠭᠡᠭᠡᠯᠲᠡ ᠭᠡᠵᠦ ᠭᠦᠶᠦᠮᠡᠭ ᠣᠢᠯᠠᠭᠠᠵᠤ ᠪᠣᠯᠬᠤ ᠪᠠᠷ ᠪᠠᠢᠨᠠ᠃ ᠬᠠᠮᠤᠭ ᠤ᠋ᠨ ᠠᠯᠪᠠᠳᠠᠮᠠᠯ ᠠᠲᠠᠯᠠ ᠪᠠᠨ ᠬᠠᠮᠤᠭ ᠤ᠋ᠨ ᠵᠥᠪ ᠵᠢᠱ᠌ᠢᠶᠡ ᠨᠢ100 ᠨᠠᠰᠤᠲᠠᠨ ᠦᠷᠡ ᠪᠡᠨ ᠦᠵᠡᠭᠰᠡᠨ ᠭᠡᠷ ᠪᠦᠯᠢ ᠶᠦᠮ᠃ ᠲᠡᠷᠡ ᠠᠮᠢᠳᠤᠷᠠᠯ ᠪᠣᠯ ᠵᠢᠷᠭᠠᠯ ᠵᠣᠪᠠᠯᠠᠩ ᠵᠥᠷᠢᠴᠡᠯ ᠲᠡᠮᠡᠴᠡᠯ ᠦ᠋ᠨ ᠣᠨᠴᠠᠭᠠᠢ ᠡᠰᠡᠷᠭᠦ᠂ ᠡᠶᠡᠷᠭᠦ ᠡᠪ ᠨᠢᠭᠡᠳᠦᠭᠰᠡᠨ ᠰᠣᠨᠢᠷᠬᠠᠯ ᠲᠠᠢ ᠪᠠᠰᠠ ᠥᠨᠳᠥᠷ ᠨᠠᠰᠤᠲᠠᠢ ᠤᠷᠠᠨ ᠪᠦᠲᠦᠭᠡᠯ ᠠᠵᠠᠢ᠃ ᠡᠢᠮᠦ ᠳ᠋ᠦ᠍ ᠭᠤᠲᠤᠷᠠᠩᠭᠢ ᠦᠵᠡᠯ ᠡᠴᠡ ᠠᠩᠭᠢᠳᠠ ᠭᠤᠷᠪᠠᠯ ᠣᠨᠣᠯ ᠲᠠᠢ ᠠᠷᠠᠳ ᠲᠦᠮᠡᠨ ᠦ᠌ ᠥᠪ ᠶᠠᠨᠳᠠᠭᠠ ᠦᠭᠡᠢ ᠭᠡᠳᠡᠭ ᠢ᠋ ᠨᠤᠲᠠᠯᠠᠬᠤ ᠶᠣᠰᠣᠲᠠᠢ ᠪᠣᠯᠤᠨᠠ᠃ ᠶᠡᠬᠡ ᠷᠠᠪᠵᠠᠢ ᠴᠤ᠌ ᠡᠢᠨ ᠰᠢᠨᠠᠯᠵᠤ ᠠᠭᠰᠠᠨ ᠢ᠋ ᠡᠳᠦᠭᠡ ᠴᠦ᠍ ᠲᠡᠷᠡ ᠰᠢᠨᠡᠯᠣᠩ ᠬᠡᠪ ᠢ᠋ᠶ᠋ᠡᠷ ᠪᠣᠢ ᠶ᠋ᠢ ᠰᠢᠮᠰᠢᠷᠡᠨ ᠳᠤᠷᠠᠳᠤᠮᠠ ᠠᠪᠠᠢ᠃《ᠠᠶᠠ ᠡᠳᠦᠷ ᠦ᠋ᠨ ᠨᠠᠷᠠᠨ ᠪᠠᠷᠠᠭᠤᠨ ᠢ᠋ᠶ᠋ᠠᠨ ᠰᠢᠩᠭᠡᠬᠦ ᠯᠦ᠍ᠭᠡ ᠠᠳᠠᠯᠢ》 ᠭᠡᠰᠡᠨ ᠰᠡᠭᠦᠷᠡᠰᠦ ᠠᠯᠳᠠᠬᠤᠢᠴᠠ ᠨᠡᠷᠡ ᠲᠡᠢ ᠭᠤᠷᠪᠠᠯ ᠣᠨᠣᠯ ᠤ᠋ᠨ ᠰᠢᠯᠦᠭᠯᠡᠯ ᠳ᠋ᠡᠭᠡᠨ᠄ ᠁ ᠠᠩᠬᠠᠨ ᠳᠣᠣᠷᠠ ᠨᠢᠭᠡ ᠣᠷᠣᠨ ᠳ᠋ᠤ᠌ ᠲᠥᠷᠥᠬᠦ ᠯᠦ᠍ᠭᠡ ᠨᠢᠭᠡᠨ ᠠᠮᠢᠳᠤᠷᠠᠬᠤ ᠬᠣᠭᠣᠷᠣᠨᠳᠣ ᠰᠠᠢᠨ᠂ ᠮᠠᠭᠤ ᠲᠠᠢ ᠨᠥᠬᠥᠷᠯᠡᠬᠦ ᠬᠣᠶᠠᠷ ᠠᠳᠠᠭ ᠡᠴᠦᠰ ᠲᠦ᠍ ᠳᠡᠭᠡᠷᠡ ᠳᠣᠣᠷᠠ ᠦᠭᠡᠢ ᠦᠬᠦᠬᠦ ᠯᠦ᠍ᠭᠡ ᠭᠤᠷᠪᠠ ᠠᠯᠢᠪᠠ ᠶ᠋ᠢ ᠰᠠᠨᠠᠪᠠᠰᠤ ᠮᠥᠩᠬᠡ ᠪᠤᠰᠤ ᠨᠢᠭᠡᠨ ᠤᠷᠭᠤᠮᠤᠢ ᠁ ᠠᠷᠢᠭᠤᠨ ᠨᠣᠮ ᠤ᠋ᠨ ᠤᠳᠬᠠ ᠶ᠋ᠢ ᠠᠨᠳᠠᠭᠤ ᠭᠦᠶᠦᠮᠡᠭ ᠮᠡᠳᠡᠭᠰᠡᠨ ᠨᠢᠭᠡᠨ ᠠᠭᠠᠭ ᠶᠡᠬᠡᠳᠴᠦ ᠠᠮᠢ ᠬᠣᠭᠣᠰᠣᠨ ᠪᠠᠷᠬᠢᠷᠠᠬᠤ ᠯᠤᠭᠠ ᠬᠣᠶᠠᠷ ᠠᠩᠬᠠᠷᠤᠨ ᠠᠪᠤᠯᠭᠠ ᠦᠭᠡᠢ ᠠᠳᠠᠭ ᠮᠡᠬᠦᠰ ᠬᠣᠴᠣᠷᠤᠭᠰᠠᠨ ᠯᠤᠭᠠ ᠭᠤᠷᠪᠠ ᠠᠩᠵᠠᠭᠠᠷᠠᠵᠤ ᠰᠠᠨᠠᠪᠠᠰᠤ ᠰᠡᠳᠬᠢᠯ ᠳ᠋ᠦ᠍ ᠠᠶᠤᠮᠰᠢᠭ ᠲᠦᠷᠦᠮᠦᠢ᠃ ᠁ ᠡᠯᠢᠨ ᠬᠠᠯᠢᠬᠤ ᠶ᠋ᠢᠨ ᠴᠢᠳᠠᠯ ᠬᠦᠴᠦᠨ ᠲᠡᠭᠦᠯᠳᠡᠷ ᠯᠦ᠍ᠭᠡ ᠨᠢᠭᠡᠨ ᠡᠷᠬᠡ ᠬᠦᠴᠦᠨ ᠮᠡᠬᠦᠰ ᠢ᠋ᠶ᠋ᠡᠷ ᠤᠷᠠᠬᠠ ᠲᠣᠣᠷ ᠲᠤ᠌ ᠣᠷᠣᠬᠤ ᠯᠤᠭᠠ ᠬᠣᠶᠠᠷ ᠡᠭᠦᠷᠢᠳᠡ ᠨᠢᠰᠬᠦ ᠶ᠋ᠢ ᠬᠦᠰᠡᠪᠡᠴᠦ ᠳᠣᠣᠷᠠ ᠪᠠᠨ ᠵᠣᠪᠠᠯᠠᠩ ᠢ᠋ ᠡᠳ᠋ᠯᠡᠬᠦ ᠯᠦ᠍ᠭᠡ ᠭᠤᠷᠪᠠ ᠡᠷᠭᠢᠴᠡᠭᠦᠯᠦᠨ ᠰᠠᠨᠠᠪᠠᠰᠤ ᠰᠡᠳᠬᠢᠯ ᠳ᠋ᠦ᠍ ᠡᠨᠡᠯᠦᠯ ᠲᠥᠷᠥᠮᠦᠢ ᠁ ᠥᠪᠡᠷ ᠴᠢᠨᠠᠷ ᠬᠣᠭᠣᠰᠣᠨ ᠥᠪᠡᠷ ᠦ᠋ᠨ ᠰᠡᠳᠬᠢᠯ ᠯᠦ᠍ᠭᠡ ᠨᠢᠭᠡᠨ ᠦᠨᠡᠨ ᠳ᠋ᠦ᠍ ᠪᠠᠷᠢᠭᠴᠢ ᠶ᠋ᠢᠨ ᠠᠪᠢᠶᠠᠰ ᠢ᠋ ᠥᠷᠨᠢᠭᠦᠯᠬᠦ ᠯᠦ᠍ᠭᠡ ᠦᠷᠭᠦᠯᠵᠢᠳᠡ ᠡᠨᠳᠡᠭᠦᠷᠡᠬᠦ ᠶ᠋ᠢᠨ ᠦᠵᠡᠭᠳᠡᠯ ᠴᠢᠩᠭᠠ ᠬᠠᠲᠠᠭᠤ ᠯᠤᠭᠠ ᠭᠤᠷᠪᠠ ᠦᠭᠡᠢᠯᠡᠨ ᠰᠠᠨᠠᠪᠠᠰᠤ ᠰᠡᠳᠬᠢᠯ ᠳ᠋ᠦ᠍ ᠭᠠᠰᠠᠯᠠᠩ ᠨᠢᠭᠡᠨ ᠲᠥᠷᠥᠮᠦᠢ ᠭᠡᠮᠡᠨ ᠳᠠᠭᠤᠯᠤᠭᠰᠠᠨ ᠢ᠋ ᠦᠵᠡᠬᠦᠯᠡ《ᠡᠭᠦᠷᠢᠳᠡ ᠨᠢᠰᠬᠦ ᠶ᠋ᠢ ᠬᠦᠰᠡᠪᠡᠴᠦ ᠳᠣᠣᠷᠠ ᠵᠣᠪᠠᠯᠠᠩ ᠢ᠋ ᠡᠳ᠋ᠯᠡᠬᠦ ᠯᠦ᠍ᠭᠡ ᠭᠤᠷᠪᠠ》 ᠭᠤᠷᠪᠠᠨ ᠵᠠᠭᠤᠨ ᠤ᠋ ᠡᠴᠦᠰ ᠲᠤ ᠥᠨᠥᠳᠥᠷ ᠯᠡ ᠨᠢᠭᠡ ᠳᠣᠣᠷᠠ ᠠ᠋ᠴᠠ ᠮᠤᠯᠲᠤᠷᠠᠭᠰᠠᠨ ᠢ᠋ ᠦᠵᠡᠪᠡ᠃ ᠭᠤᠷᠪᠠᠯ ᠤ᠋ᠨ ᠤᠶᠠᠩᠭᠠ ᠮᠥᠬᠥᠭᠡ ᠦᠭᠡᠢ᠂ ᠪᠥᠬᠥᠭᠡ ᠦᠭᠡᠢ ᠪᠠᠰᠠ ᠰᠡᠭᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠨᠢ ᠦᠨᠡᠨ ᠠᠵᠤᠭᠤ᠃ ᠡᠨᠡ ᠦᠶᠡ ᠶ᠋ᠢᠨ ᠶᠡᠬᠡ ᠨᠠᠢᠷᠠᠭᠴᠢᠳ ᠤ᠋ᠨ ᠨᠢᠭᠡᠨ ᠳ· ᠫᠦᠷᠪᠦᠳᠣᠷᠵᠢ᠄ ᠠᠨᠠᠭᠠᠢ ᠭᠤᠷᠪᠠᠨ ᠰᠡᠭᠡᠷ ᠠᠵᠢᠨ ᠭᠤᠷᠪᠠᠨ ᠠ᠋ᠴᠠ ᠰᠢᠷᠢᠳᠡᠭ ᠠᠬᠠ ᠳᠡᠭᠦᠦ ᠭᠤᠷᠪᠠᠨ ᠬᠠᠭᠠᠯᠭᠠ ᠠᠮᠠᠨ ᠭᠤᠷᠪᠠᠨ ᠰᠡᠭᠡᠷ ᠠᠷᠤ ᠭᠤᠷᠪᠠᠨ ᠳᠡᠯ ᠠᠯᠠᠭ ᠭᠤᠷᠪᠠᠨ ᠱᠠᠩᠳᠠ ᠵᠠᠳᠠᠭᠠᠢ ᠭᠤᠷᠪᠠᠨ ᠬᠡᠭᠡᠷ ᠵᠠᠬᠠ ᠭᠤᠷᠪᠠᠨ ᠪᠠᠮᠪᠤᠤ ᠨᠡᠷᠡ ᠨᠢ ᠬᠦᠷᠲᠡᠯᠡ ᠨᠠᠢᠷᠠᠭ(ᠭᠦᠨ ᠤᠬᠠᠭᠠᠨ! ᠨ᠂ ᠨ) ᠨᠡᠭᠡᠷᠡᠨ ᠰᠠᠢᠬᠠᠨ ᠨᠤᠲᠤᠭ᠁ ᠭᠡᠮᠡᠨ ᠳᠠᠭᠤᠯᠠᠭᠰᠠᠨ ᠢ᠋ ᠲᠣᠬᠢᠶᠠᠯᠳᠤᠯ ᠪᠢᠰᠢ ᠬᠡᠮᠡᠵᠦ ᠣᠷᠴᠢᠨ ᠦᠶᠡ ᠭᠤᠷᠪᠠᠯ ᠤᠬᠠᠭᠠᠨ ᠢ᠋ᠶ᠋ᠠᠨ ᠮᠠᠷᠲᠠᠭᠠ ᠦᠭᠡᠢ ᠵᠠᠬᠠ ᠶ᠋ᠢᠨ ᠨᠢᠭᠡ ᠵᠢᠱ᠌ᠢᠶᠡ ᠪᠣᠯᠭᠠᠨ ᠳᠤᠷᠠᠳᠰᠤ ᠪᠢ᠃ ᠠᠭᠤᠯᠭᠠ ᠪᠡᠷᠬᠡ《ᠡᠷᠬᠡ ᠬᠦᠴᠦᠨ ᠮᠡᠬᠦᠰ ᠢ᠋ᠶ᠋ᠡᠷ ᠤᠷᠠᠬᠠ ᠲᠣᠣᠷ ᠲᠤ᠌ ᠣᠷᠣᠬᠤ ᠯᠤᠭᠠ ᠬᠣᠶᠠᠷ》 ᠴᠠᠭ ᠬᠡᠯᠪᠡᠷᠢ ᠶ᠋ᠢ ᠨᠢ ᠴᠦ᠍ ᠪᠣᠯᠲᠤᠭᠠᠢ ᠱᠣᠬᠣᠭᠣᠷᠬᠠᠨ ᠤᠶᠠᠩᠭᠠ ᠡᠢᠨ ᠬᠦ᠌ ᠬᠠᠢᠯᠠᠭᠰᠠᠨ ᠨᠢ ᠪᠠᠰᠠ ᠴᠤ ᠭᠠᠪᠢᠶᠠ ᠠᠵᠠᠢ᠃ ᠠᠷᠪᠠᠨ ᠭᠤᠷᠪᠠᠨ ᠠᠯᠲᠠᠢ᠂ ᠬᠠᠩᠭᠠᠢ ᠶ᠋ᠢᠨ ᠬᠣᠷᠢᠨ ᠭᠤᠷᠪᠠᠨ ᠣᠪᠣᠭᠠ᠂ ᠭᠤᠴᠢᠨ ᠭᠤᠷᠪᠠᠨ ᠭᠣᠪᠢ᠁ ᠭᠤᠷᠪᠠᠨ ᠶᠡᠬᠡ ᠠᠭᠤᠯᠠ ᠮᠢᠨᠦ ᠣᠩᠭᠣᠳ ᠬᠠᠢᠷᠠᠯᠠᠵᠤ ᠣᠷᠴᠢᠯᠠᠩ ᠬᠠᠢᠯᠠᠬᠤ ᠪᠣᠯᠲᠤᠭᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠰᠡᠷᠡᠩ᠂ ᠱᠠᠭᠰᠠᠯ᠂ ᠲᠣᠭᠳᠠᠭᠤᠨᠪᠠᠶᠠᠷ
ᠦᠰᠦᠭ ᠬᠢᠨᠠᠭᠴᠢ᠄ ᠲᠤᠶᠠᠭᠠ᠂ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ