ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠠᠷᠪᠠᠨ ᠨᠢᠭᠡ ᠂ ᠤᠯᠠᠭᠠᠨ ᠢᠳᠡᠭᠡᠨ ᠦ ᠪᠦᠯᠦᠭ 1 > Хөх зул – Боржигон Ванжал –" Арван нэг ᠂ Улаан идээний бүлэг 1 "
363ᠠᠷᠪᠠᠨ ᠨᠢᠭᠡ ᠂ ᠤᠯᠠᠭᠠᠨ ᠢᠳᠡᠭᠡᠨ ᠦ ᠪᠦᠯᠦᠭ –1
ᠰᠢᠭᠦᠰᠦ ᠲᠠᠯᠪᠢᠬᠤ
ᠬᠠᠮᠤᠭ ᠤ᠋ᠨ ᠰᠢᠮᠡᠲᠡᠢ ᠢᠳᠡᠭᠡᠨ ᠣᠷᠣᠭᠤᠯᠬᠤ ᠶ᠋ᠢ ᠰᠢᠭᠦᠰᠦ ᠲᠠᠯᠪᠢᠬᠤ ᠭᠡᠨᠡ ᠃ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠡᠷᠲᠡᠨ ᠡᠴᠡ ᠡᠳᠦᠭᠡ ᠪᠣᠯᠲᠠᠯᠠ ᠬᠠᠮᠤᠭ ᠤ᠋ᠨ ᠶᠡᠬᠡ ᠬᠦᠨᠳᠦᠲᠦ ᠵᠣᠴᠢᠨ ᠳ᠋ᠠᠭᠠᠨ ᠰᠢᠭᠦᠰᠦ ᠲᠠᠯᠪᠢᠳᠠᠭ ᠵᠤᠷᠰᠢᠯ ᠲᠠᠢ ᠃
ᠪᠦᠬᠦᠯᠢ ᠬᠣᠨᠢᠨ ᠰᠢᠭᠦᠰᠦ
ᠡᠪᠴᠢᠭᠦᠦ ᠂ ᠪᠣᠭᠣᠨᠢ ᠬᠠᠪᠢᠷᠭᠠ ᠂ ᠭᠡᠳᠡᠰᠦ ᠳᠣᠲᠣᠷ ᠂ ᠰᠢᠭᠢᠷᠡ ᠶ᠋ᠢ ᠠᠪᠴᠤ ᠭᠠᠷᠭᠠᠭᠠᠳ ᠪᠤᠰᠤᠳ ᠢ᠋ ᠨᠢ ᠴᠢᠨᠠᠵᠤ ᠣᠷᠣᠭᠤᠯᠬᠤ ᠶ᠋ᠢ ᠪᠦᠬᠦᠯᠢ ᠬᠣᠨᠢᠨ ᠰᠢᠭᠦᠰᠦ ᠭᠡᠨᠡ᠃
ᠶᠡᠬᠡ ᠰᠢᠭᠦᠰᠦ ᠪᠦᠬᠦᠯᠢ ᠰᠢᠭᠦᠰᠦ （ᠬᠥᠬᠡᠨᠠᠭᠤᠷ ᠲᠤ᠌ ) ᠃
ᠪᠦᠬᠦᠯᠢ ᠤᠭᠤᠴᠠ ᠪᠦᠬᠦᠯᠢ ᠰᠢᠭᠦᠰᠦ ( ᠪᠠᠶᠠᠨᠨᠠᠭᠤᠷ ᠲᠤ᠌ ) ᠃
ᠥᠳᠬᠡᠷᠡᠭᠦᠯᠦᠭᠰᠡᠨ ᠰᠢᠭᠦᠰᠦ ᠪᠦᠬᠦᠯᠢ ᠰᠢᠭᠦᠰᠦ ᠃
ᠰᠢᠷᠠᠭᠤᠰᠤ ᠪᠦᠬᠦᠯᠢ ᠰᠢᠭᠦᠰᠦ ( ᠪᠠᠷᠭᠤ ᠪᠤᠷᠢᠶᠠᠳ ᠲᠤ᠌ ) ᠃
ᠰᠢᠭᠦᠰᠦ ᠴᠢᠨᠠᠬᠤ ᠶᠣᠰᠣᠨ
ᠶᠢᠰᠦᠨ ᠲᠠᠮᠠᠭᠠᠲᠤ ᠪᠦᠳᠦᠭᠦᠨ ᠲᠣᠭᠣᠭᠠᠲᠠᠢ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠂ ᠰᠢᠭᠦᠰᠦᠨ ᠳ᠋ᠦ᠍ ᠣᠷᠣᠬᠤ ᠮᠢᠬᠠ ᠨᠤᠭᠤᠳ ᠢ᠋ᠶ᠋ᠠᠨ ᠤᠭᠤᠴᠠ ᠠ᠋ᠴᠠ ᠪᠤᠰᠤᠳ ᠢ ᠨᠢ ᠦᠶᠡᠯᠡᠬᠦ ᠶᠣᠰᠣᠭᠠᠷ ᠰᠠᠯᠭᠠᠵᠤ （ ᠵᠠᠷᠢᠮ ᠭᠠᠵᠠᠷ ᠰᠠᠯᠭᠠᠬᠤ ᠦᠭᠡᠢ ᠮᠥᠴᠢ ᠮᠥᠴᠢ ᠪᠡᠷ ᠨᠢ ) ᠬᠢᠭᠡᠳ ᠳᠠᠪᠤᠰᠤ ᠶ᠋ᠢ ᠨᠢ ᠲᠠᠭᠠᠷᠠᠭᠤᠯᠵᠤ ( ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠵᠢᠭᠠᠬᠠᠨ ᠴᠠᠭᠠ ᠬᠢᠳᠡᠭ ) ᠵᠥᠭᠡᠯᠡᠨ ᠭᠠᠯ ᠢ᠋ᠶ᠋ᠠᠷ ᠴᠢᠨᠠᠬᠤ ᠳ᠋ᠠᠭᠠᠨ ᠪᠠᠢᠨ ᠳᠠᠬᠢᠨ ᠡᠷᠭᠢᠭᠦᠯᠵᠦ ᠬᠡᠵᠢᠶᠡ ᠱᠦᠷᠬᠡᠢ ᠦᠭᠡᠢ ᠪᠣᠯᠤᠭᠰᠠᠨ ( ᠭᠡᠪᠡᠴᠦ ᠬᠡᠳᠦ ᠴᠢᠨᠠᠵᠤ ᠨᠣᠯᠳᠤᠷᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ ) ᠶ᠋ᠢᠨ ᠬᠣᠢᠨᠠ ᠭᠠᠷᠭᠠᠵᠤ ᠳᠠᠪᠬᠠᠯᠠᠵᠤ ᠲᠡᠪᠰᠢᠯᠡᠨᠡ ᠃ ᠭᠡᠳᠡᠰᠦ ᠳᠣᠲᠣᠷ ᠡᠯᠢᠭᠡ ᠪᠥᠭᠡᠷᠡ ᠶ᠋ᠢ ᠪᠤᠰᠤ ᠲᠣᠭᠣᠭᠠᠨ ᠳ᠋ᠤ᠌ ᠴᠢᠨᠠᠨᠠ ᠃ ᠭᠡᠳᠡᠰᠦ ᠳᠣᠲᠣᠷ ᠡᠯᠢᠭᠡ ᠪᠥᠭᠡᠷᠡ ᠶ᠋ᠢ ᠬᠠᠮᠲᠤ ᠴᠢᠨᠠᠪᠠᠯ ᠭᠡᠳᠡᠰᠦ ᠳᠣᠲᠣᠷ ᠤ᠋ᠨ ᠠᠮᠲᠠ ᠣᠷᠣᠵᠤ ᠮᠢᠬᠠᠨ ᠤ᠋ ᠠᠮᠲᠠ ᠶ᠋ᠢ ᠪᠠᠭᠤᠷᠠᠭᠤᠯᠤᠨᠠ ᠃ ᠮᠥᠨ ᠱᠥᠯᠥ ᠶ᠋ᠢᠨ ᠴᠢᠨᠠᠷ ᠢ᠋ ᠮᠠᠭᠤᠳᠠᠭᠤᠯᠤᠨᠠ ᠃ ᠲᠣᠯᠣᠭᠠᠢ ᠶ᠋ᠢ ᠨᠡᠩ ᠲᠤᠰ ᠲᠤᠨᠢ ᠴᠢᠨᠠᠨᠠ ᠃
ᠳᠠᠪᠠᠬᠠᠯᠠᠵᠤ ᠲᠡᠪᠰᠢᠯᠡᠬᠦ ᠶᠣᠰᠣᠨ
ᠪᠣᠯᠭᠣᠭᠰᠠᠨ ᠮᠢᠬᠠ ᠪᠠᠨ ᠭᠠᠤᠯᠢ ᠪᠤᠶᠤ ᠮᠣᠳᠣᠨ ᠲᠠᠪᠠᠭ ᠲᠡᠪᠰᠢ ᠳ᠋ᠦ᠍ ᠳᠥᠷᠪᠡᠨ ᠮᠥᠴᠢ ᠶ᠋ᠢ ᠨᠢ ᠠᠮᠢᠳᠤ ᠬᠣᠨᠢᠨ ᠤ᠋ ᠬᠡᠪᠲᠡᠭᠡ ᠪᠠᠢᠷᠢᠰᠢᠯ ᠢ᠋ᠶ᠋ᠠᠷ ᠡᠮᠦᠨᠡ ᠬᠣᠢᠨᠠ ᠂ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠢᠯᠭᠠᠵᠤ ᠲᠠᠯᠪᠢᠭᠠᠳ ᠬᠣᠶᠠᠷ ᠬᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠡᠮᠦᠨᠡ ᠨᠢ ᠰᠡᠭᠡᠷ ᠢ᠋ ᠰᠡᠷᠪᠡᠭᠡ ᠶ᠋ᠢ ᠨᠢ ᠳᠣᠲᠣᠭᠰᠢ ᠬᠠᠨᠳᠤᠭᠤᠯᠤᠨ ᠬᠥᠨᠳᠡᠯᠡᠨ ᠲᠠᠯᠪᠢᠵᠤ ᠂ ᠳᠡᠭᠡᠷᠡ ᠨᠢ ᠤᠭᠤᠴᠠ ᠪᠠᠨ ᠪᠦᠷᠬᠦᠨ ᠲᠠᠯᠪᠢᠨᠠ᠃ ᠤᠭᠤᠴᠠᠨ ᠳᠡᠭᠡᠷᠡ ᠪᠡᠨ ᠣᠳᠣ ᠲᠡᠷᠡ ᠬᠦ᠌ ᠪᠠᠶᠠᠷ ᠤ᠋ᠨ ᠮᠠᠩᠨᠠᠢ ( ᠲᠣᠨᠣᠯᠵᠢᠨ ) ᠡᠰᠬᠡᠭᠰᠡᠨ ᠬᠣᠨᠢᠨ ᠤ᠋ ᠪᠦᠬᠦᠯᠢ ᠲᠣᠯᠣᠭᠠᠢ ( ᠡᠷᠡᠦ ᠲᠡᠢ ᠲᠣᠯᠣᠭᠠᠢ ) ᠪᠠᠨ ᠲᠠᠯᠪᠢᠵᠤ ᠂ ᠰᠢᠷᠡᠭᠡᠨ ᠭᠣᠣᠯᠳᠠᠬᠢ ᠬᠥᠮᠦᠨ ᠦ᠌ ᠥᠭᠡᠳᠡ ᠲᠣᠯᠣᠭᠠᠢ ᠲᠠᠯᠠ ᠶ᠋ᠢ ᠬᠠᠨᠳᠤᠭᠤᠯᠵᠤ ᠰᠡᠭᠦᠯ ᠲᠠᠯᠠ ᠶ᠋ᠢ ᠪᠡᠶᠡ ᠵᠦᠭ ᠬᠠᠷᠠᠭᠤᠯᠵᠤ ᠲᠠᠯᠪᠢᠨᠠ ᠃ ᠡᠭᠦᠨ ᠢ᠋ ᠪᠦᠬᠦᠯᠢ ᠬᠣᠨᠢ ᠳᠡᠪᠰᠢᠭᠦᠯᠬᠦ ᠶᠣᠰᠣᠨ ᠭᠡᠨᠡ ᠃ ᠵᠠᠷᠢᠮ ᠭᠠᠵᠠᠷ ᠳᠠᠭᠠᠪᠤᠷᠢ ᠳᠠᠪᠰᠢ ( ᠵᠣᠴᠢᠨ ᠠᠷᠪᠢᠨ ᠂ ᠮᠠᠯ ᠴᠥᠭᠡᠨ ᠭᠠᠷᠭᠠᠭᠰᠠᠨ ᠪᠠᠢᠳᠠᠯ ᠳ᠋ᠤ᠌ ) ᠣᠷᠣᠭᠤᠯᠳᠠᠭ ᠃ ᠡᠨᠡ ᠨᠢ ᠲᠠᠪᠤᠨ ᠴᠤᠯᠤ ᠂ ᠴᠢᠳᠬᠤᠭᠰᠠᠨ ᠭᠡᠳᠡᠰᠦ ᠂ ᠬᠣᠰᠬᠢᠨᠠᠭ ᠵᠡᠷᠭᠡ ᠶ᠋ᠢ ᠲᠠᠪᠰᠢ ᠳ᠋ᠤ᠌ ᠥᠷᠥᠵᠦ ᠳᠣᠣᠷᠠ ᠲᠠᠯᠠ ᠶ᠋ᠢᠨ ᠰᠢᠷᠡᠭᠡᠨᠡ ᠲᠠᠯᠪᠢᠳᠠᠭ ᠃ ᠬᠠᠷᠢᠨ ᠣᠷᠣᠭᠤᠯᠤᠭᠰᠠᠨ ᠤᠭᠤᠴᠠ ᠲᠠᠢ ᠪᠠᠨ ᠬᠠᠮᠲᠤ ᠭᠡᠳᠡᠰᠦ ᠳᠣᠲᠣᠷ ᠣᠷᠣᠭᠤᠯᠬᠤ ᠶ᠋ᠢ ᠴᠢᠩᠳᠠ ᠴᠡᠭᠡᠷᠯᠡᠳᠡᠭ᠃ ᠢᠩᠭᠢᠪᠡᠯ ᠤᠭᠤᠴᠠ ᠶ᠋ᠢᠨ ᠨᠡᠷᠡ ᠬᠦᠨᠳᠦ ᠶ᠋ᠢ ᠪᠠᠷᠠᠬᠤ ᠪᠠᠷ ᠵᠣᠭᠰᠣᠬᠤ ᠦᠭᠡᠢ᠂ ᠢᠷᠡᠭᠰᠡᠨ ᠵᠣᠴᠢᠨ ᠢ᠋ ᠬᠦᠨᠳᠦᠯᠡᠭᠰᠡᠨ ᠦᠭᠡᠢ ᠳ᠋ᠦ᠍ ᠲᠣᠭᠠᠴᠠᠭᠳᠠᠨᠠ ᠃
ᠬᠠᠯᠢᠮᠨᠠᠬᠤ ᠶᠣᠰᠣᠨ
ᠵᠠᠷᠢᠮ ᠭᠠᠵᠠᠷ ᠤᠭᠤᠴᠠ ᠪᠠᠨ ᠴᠢᠨᠠᠵᠤ ᠲᠣᠭᠣᠭᠠᠨ ᠠ᠋ᠴᠠ ᠭᠠᠷᠭᠠᠭᠰᠠᠭᠠᠷ ᠤᠭᠤᠴᠠᠨ ᠤ᠋ ᠥᠩᠭᠡᠨ ᠲᠠᠯᠠ ᠶ᠋ᠢᠨ ᠨᠢᠮᠭᠡᠨ ᠮᠢᠬᠠᠨ ᠬᠠᠯᠢᠰᠤ ᠶ᠋ᠢ ᠥᠪᠴᠢᠨ ᠠᠪᠴᠤ ᠤᠭᠤᠴᠠ ᠪᠠᠨ ᠥᠩᠭᠡᠯᠡᠳᠡᠭ ᠃ ᠡᠭᠦᠨ ᠢ᠋ ᠤᠭᠤᠴᠠ ᠬᠠᠯᠢᠮᠨᠠᠬᠤ ᠶᠣᠰᠣ ᠭᠡᠨᠡ᠃
ᠪᠦᠬᠦᠯᠢ ᠰᠢᠭᠦᠰᠦᠨ ᠦ᠌ ᠬᠥᠨᠳᠡᠬᠦ ᠬᠠᠰᠢᠬᠤ ᠶᠣᠰᠣᠨ
ᠮᠣᠩᠭᠣᠯᠴᠤᠳ ᠡᠷᠲᠡ ᠳᠡᠭᠡᠷᠡ ᠦᠶᠡ ᠡᠴᠡ ᠪᠡᠨ ᠵᠤᠮᠠ ᠰᠢᠭᠦᠰᠦ ᠬᠢᠭᠡᠳ ᠪᠦᠬᠦᠯᠢ ᠰᠢᠭᠦᠰᠦ ᠪᠡᠨ ᠡᠵᠡᠨ ᠴᠢᠩᠭᠢᠰ ᠦ᠋ᠨ ᠲᠠᠬᠢᠯᠭᠠ ᠳ᠋ᠤ᠌ ᠪᠤᠶᠤ ᠦᠪᠡᠳᠡᠭᠰᠢ ᠶᠡᠬᠡ ᠨᠠᠢᠷ ᠬᠤᠷᠢᠮ ᠂ ᠣᠨᠴᠠ ᠬᠦᠨᠳᠦᠲᠦ ᠵᠣᠴᠢᠨ ᠳ᠋ᠤ᠌ ᠣᠷᠣᠭᠤᠯᠵᠤ ᠳᠠᠢᠯᠠᠬᠤ ᠳ᠋ᠠᠭᠠᠨ ᠪᠦᠷ ᠲᠣᠭᠲᠠᠭᠰᠠᠨ ᠶᠣᠰᠣ ᠵᠢᠷᠤᠮ ᠲᠠᠢ ᠪᠢᠯᠡ ᠃ ᠰᠢᠭᠦᠰᠦ ᠶ᠋ᠢ ᠲᠠᠬᠢᠯᠭᠠ ᠪᠤᠶᠤ ᠢᠷᠡᠭᠰᠡᠨ ᠵᠣᠴᠢᠳ ᠲᠤ᠌ ᠣᠷᠣᠭᠤᠯᠬᠤ ᠦᠶᠡ ᠂ ᠭᠡᠷ ᠦ᠋ᠨ ᠡᠵᠡᠨ ᠨᠢ ᠲᠤᠰᠬᠠᠢ ᠤᠭᠤᠴᠠ ᠬᠠᠰᠢᠬᠤ ( ᠵᠦᠰᠦᠬᠦ ) ᠬᠥᠮᠦᠨ ᠭᠠᠷᠭᠠᠬᠤ ᠪᠤᠶᠤ ᠡᠰᠡᠬᠦᠯᠡ ᠰᠢᠷᠡᠭᠡᠨ ᠦ᠌ ᠠᠬᠠᠯᠠᠭᠴᠢ ᠨᠢ ᠰᠢᠭᠦᠰᠦ ᠬᠥᠨᠳᠡᠬᠦ ᠬᠥᠮᠦᠨ ᠲᠣᠮᠢᠯᠠᠵᠤ ᠬᠠᠰᠢᠳᠠᠭ ᠪᠢᠯᠡ ᠃ ᠡᠭᠦᠨ ᠳ᠋ᠦ᠍ ᠰᠢᠭᠦᠰᠦ ᠬᠥᠨᠳᠡᠬᠦ ᠡᠴᠡ ᠡᠮᠦᠨᠡ ᠭᠡᠷ ᠦ᠋ᠨ ᠡᠵᠡᠨ ᠂ ᠳᠠᠶᠠᠭᠠᠷ ᠲᠤ᠌ ᠭᠡᠮ ᠰᠡᠷᠭᠦᠭᠡᠨ ᠡᠷᠭᠦᠵᠦ ᠶᠣᠰᠣ ᠭᠦᠢᠴᠡᠳᠬᠡᠭᠰᠡᠨ ᠦ᠌ ᠳᠠᠷᠠᠭᠠ ᠰᠢᠭᠦᠰᠦ ᠬᠥᠨᠳᠡᠨᠡ ᠃ ᠵᠠᠷᠢᠮ ᠶᠡᠬᠡ ᠨᠠᠢᠷ ᠲᠤ᠌ ᠲᠤᠰᠬᠠᠢ ᠢᠷᠦᠭᠡᠯᠴᠢ ᠣᠷᠣᠵᠤ ( ᠰᠠᠢᠨ ᠳᠤᠷᠠ ᠶ᠋ᠢᠨ ᠢᠷᠦᠭᠡᠯᠴᠢ ᠴᠦ᠍ ᠪᠣᠯᠤᠨᠠ ) ᠂ ᠭᠡᠮ ᠰᠡᠷᠭᠦᠭᠡᠭᠰᠡᠨ ᠦ᠌ ᠬᠣᠢᠨᠠ ᠢᠷᠦᠭᠡᠯᠴᠢ ᠰᠢᠭᠦᠰᠦᠨ ᠢᠷᠦᠭᠡᠯ ᠬᠡᠯᠡᠳᠡᠭ ᠃ ᠢᠷᠦᠭᠡᠯ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠢᠭᠦᠰᠦ ᠬᠥᠨᠳᠡᠵᠦ ᠡᠬᠢᠯᠡᠨᠡ᠃
ᠰᠢᠭᠦᠰᠦ ᠬᠥᠨᠳᠡᠬᠦ ᠶᠣᠰᠣ ᠭᠣᠷᠢᠮ ᠮᠥᠨ ᠴᠢᠩᠭᠠ ᠨᠢᠮᠪᠠᠢ᠃ ᠮᠠᠨ ᠤ᠋ ᠪᠠᠷᠠᠭᠤᠨ ᠵᠡᠭᠦᠨ ᠣᠷᠣᠨ ᠤ᠋ ᠰᠢᠭᠦᠰᠦ ᠬᠥᠨᠳᠡᠵᠦ ᠤᠭᠤᠴᠠ ᠬᠠᠰᠢᠬᠤ ᠨᠢ ᠮᠥᠨ ᠠᠳᠠᠯᠢ ᠦᠭᠡᠢ ᠂ ᠵᠢᠭᠠᠬᠠᠨ ᠵᠦᠷᠢᠶᠡᠨ ᠲᠡᠢ ᠪᠠᠢᠳᠠᠭ᠃ ᠪᠠᠷᠠᠭᠤᠨ ᠣᠷᠣᠨ ᠳ᠋ᠤ᠌ ᠠᠯᠠᠱᠠ ᠮᠡᠲᠦ ᠶ᠋ᠢᠨ ᠭᠠᠵᠠᠷ ᠰᠢᠷᠡᠭᠡᠨ ᠲᠦᠷᠦᠭᠦᠦ ᠪᠤᠶᠤ ᠤᠭᠤᠴᠠ ᠡᠪᠳᠡᠬᠦ ᠬᠥᠮᠦᠨ ᠂ ᠴᠥᠮ ᠮᠥᠩᠭᠥᠨ ᠬᠤᠢ ᠲᠠᠢ ᠮᠣᠩᠭᠣᠯ ᠬᠢᠲᠤᠭᠠ ᠪᠠᠷᠢᠵᠤ ᠂ ᠬᠣᠨᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠰᠠᠷᠠ ᠪᠤᠶᠤ ᠲᠣᠨᠣᠯᠵᠢᠨ ᠵᠢᠷᠤᠭᠠᠳ ᠰᠡᠭᠦᠯ ᠡᠴᠡ ᠨᠢ ᠨᠢᠮᠭᠡᠨ ᠬᠠᠯᠢᠵᠤ ᠂ ᠬᠣᠨᠢᠨ ᠤ᠋ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠠᠯᠪᠢᠵᠤ ᠭᠡᠷ ᠦ᠋ᠨ ᠡᠵᠡᠨ ᠳ᠋ᠦ᠍ᠨᠢ ᠪᠠᠷᠢᠳᠠᠭ᠃ ᠪᠠᠰᠠ ᠤᠭᠤᠷᠠᠭ ᠰᠡᠭᠦᠯ ᠢ᠋ ᠠᠪᠴᠤ ᠵᠥᠪ ᠲᠠᠯᠠ ᠶ᠋ᠢᠨ ᠱᠠᠭᠠᠨᠲᠤ ᠲᠠᠢ ᠲᠠᠪᠬᠠᠯᠠᠭᠠᠳ ᠲᠣᠯᠣᠭᠠᠢ ᠶ᠋ᠢ ᠳᠡᠭᠡᠷᠡ ᠨᠢ ᠲᠠᠯᠪᠢᠵᠤ ᠭᠡᠷ ᠦ᠋ᠨ ᠡᠵᠡᠨ ᠳ᠋ᠦ᠍ᠨᠢ ᠥᠭᠭᠦᠨᠡ᠃ ᠬᠡᠷᠪᠡ ᠭᠡᠷ ᠦ᠋ᠨ ᠡᠵᠡᠨ ᠨᠢ ᠨᠠᠰᠤ ᠵᠡᠷᠭᠡ ᠪᠡᠷ ᠥᠨᠳᠥᠷ ᠪᠣᠯᠪᠠᠯ ᠪᠠᠷᠠᠭᠤᠨ ᠬᠠ ᠶ᠋ᠢ ᠪᠦᠬᠦᠯᠢ ᠪᠡᠷ ᠨᠢ ᠭᠡᠷ ᠦ᠋ᠨ ᠡᠵᠡᠨ ᠳ᠋ᠦ᠍ ᠪᠠᠷᠢᠳᠠᠭ ᠶᠣᠰᠣ ᠴᠤ᠌ ᠪᠣᠢ ᠃ ᠭᠡᠷ ᠦ᠋ᠨ ᠡᠵᠡᠨ ᠲᠡᠷᠡᠬᠦ ᠬᠠ ᠠ᠋ᠴᠠ ᠬᠣᠶᠠᠷ ᠬᠠᠪᠢᠷᠭᠠ ᠶ᠋ᠢ ᠨᠢ ᠦᠯᠡᠳᠡᠭᠡᠭᠡᠳ ᠪᠤᠰᠤᠳ ᠢ᠋ ᠨᠢ ᠦᠶᠡᠯᠡᠭᠡᠳ ᠪᠤᠴᠠᠭᠠᠨ ᠲᠠᠯᠪᠢᠨᠠ᠃ ᠳᠠᠷᠠᠭᠠ ᠨᠢ ᠪᠠᠷᠠᠭᠤᠨ ᠬᠠ ᠂ ᠵᠡᠭᠦᠨ ᠭᠤᠶᠠ ᠂ ᠵᠡᠭᠦᠨ ᠬᠠ ᠂ ᠪᠠᠷᠠᠭᠤᠨ ᠭᠤᠶᠠ ᠮᠡᠲᠦᠴᠢᠯᠡᠨ ᠳᠡᠰ ᠳᠠᠷᠠᠭᠠᠯᠠ ᠵᠥᠷᠢᠭᠦᠦ ᠥᠷᠥᠭᠡᠯᠳᠡᠨ ᠮᠥᠴᠢᠯᠡᠵᠦ ᠳᠠᠭᠤᠰᠤᠭᠠᠳ ᠂ ᠤᠭᠤᠴᠠ ᠶ᠋ᠢᠨ ᠵᠥᠪ ᠲᠠᠯᠠ ᠶ᠋ᠢᠨ ᠰᠦᠪᠡᠭᠡ ᠡᠴᠡ ᠡᠬᠢᠯᠡᠨ ᠤᠷᠤᠭᠰᠢ ᠲᠠᠯᠠ ᠪᠦᠷᠢ ᠬᠣᠶᠠᠷ ᠬᠣᠶᠠᠷ ᠵᠤᠷᠪᠤᠰ ᠵᠦᠰᠦᠭᠡᠳ ᠤᠭᠤᠴᠠ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠵᠥᠷᠢᠭᠦᠯᠵᠦ ᠬᠥᠨᠳᠡᠯᠡᠨ ᠲᠠᠯᠪᠢᠳᠠᠭ᠃
ᠪᠠᠶᠠᠨᠠᠭᠤᠷ ᠠ᠋ᠴᠠ ᠵᠡᠭᠦᠨᠰᠢᠬᠢ ᠳᠤᠮᠳᠠ ᠪᠠᠢᠭᠠ ᠮᠣᠩᠭᠣᠯᠴᠤᠳ ᠂ ᠤᠭᠤᠴᠠ ᠣᠷᠣᠵᠤ ᠲᠠᠯᠪᠢᠬᠤ ᠲᠠᠢ ᠵᠡᠷᠭᠡ ᠤᠭᠤᠴᠠ ᠬᠠᠰᠢᠭᠴᠢ ᠰᠥᠬᠥᠷᠡᠵᠦ ᠰᠠᠭᠤᠨ ᠬᠢᠲᠤᠭᠠ ᠪᠠᠨ ᠭᠠᠷᠭᠠᠨ ᠪᠠᠷᠢᠭᠤᠯ ( ᠡᠰᠢ ) ᠲᠠᠯᠠ ᠪᠠᠷ ᠨᠢ ᠰᠢᠷᠡᠭᠡᠨ ᠭᠣᠣᠯ ᠳ᠋ᠤ᠌ ᠰᠠᠭᠤᠭᠰᠠᠨ ᠬᠦᠨᠳᠦᠲᠦ ᠵᠣᠴᠢᠨ ᠳ᠋ᠤ᠌ ᠭᠠᠷᠳᠠᠭᠤᠯᠤᠨᠠ᠃ ᠬᠦᠨᠳᠦᠲᠦ ᠵᠣᠴᠢᠨ ᠲᠡᠷᠡ ᠭᠢᠲᠤᠬᠠ ᠪᠠᠷ ᠤᠭᠤᠴᠠᠨ ᠤ᠋ ᠠᠯᠢ ᠨᠢᠭᠡ ᠬᠡᠰᠡᠭ ᠲᠦ᠍ ᠬᠦᠷᠭᠡᠵᠦ ᠬᠥᠨᠳᠡᠮᠡᠭᠴᠡ ᠬᠢᠲᠤᠭᠠ ᠪᠠᠨ ᠤᠭᠤᠴᠠ ᠬᠠᠰᠢᠭᠴᠢ ᠳ᠋ᠤ᠌ ᠪᠤᠴᠠᠭᠠᠨᠠ᠃ ᠡᠢᠮᠦ ᠪᠠᠢᠳᠠᠯ ᠳ᠋ᠤ᠌ ᠤᠭᠤᠴᠠ ᠬᠠᠰᠢᠭᠴᠢ ᠬᠢᠲᠤᠭᠠ ᠠᠪᠤᠮᠠᠭᠴᠠ ᠤᠷᠢᠳ ᠪᠡᠯᠡᠳᠬᠡᠭᠰᠡᠨ ᠲᠠᠪᠠᠭ ᠲᠤ᠌ ᠤᠭᠤᠷᠠᠭ ᠰᠡᠭᠦᠯ ᠢ᠋ ᠣᠭᠲᠣᠯᠵᠤ᠂ ᠱᠠᠭᠠᠨᠲᠤ ᠲᠠᠢ ᠠᠪᠴᠤ ᠳᠡᠪᠢᠰᠬᠡᠷᠯᠡᠭᠡᠳ ᠳᠡᠭᠡᠷᠡ ᠨᠢ ᠲᠣᠯᠣᠭᠠᠢ ᠶ᠋ᠢ ᠲᠠᠯᠪᠢᠵᠤ ᠂ ᠪᠤᠷᠬᠠᠨ ᠤ᠋ ᠬᠤᠪᠢ ( ᠣᠳᠣ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠬᠤᠪᠢ ) ᠭᠡᠵᠦ ᠠᠪᠴᠤ ᠥᠭᠭᠦᠭᠡᠳ ᠤᠭᠤᠴᠠ ᠪᠠᠨ ᠬᠠᠰᠢᠵᠤ ᠡᠬᠢᠯᠡᠨᠡ ᠃ ᠭᠡᠬᠦ ᠳ᠋ᠡᠭᠡᠨ ᠭᠤᠷᠪᠠᠨ ᠰᠦᠪᠡᠷᠭᠡ ᠶ᠋ᠢ ᠨᠢ ᠠᠪᠠᠴᠢᠭᠰᠠᠨ ( ᠤᠭᠤᠴᠠ ᠣᠷᠣᠭᠤᠯᠬᠤ ᠠ᠋ᠴᠠ ᠡᠮᠦᠨᠡ ᠰᠦᠪᠡᠷᠭᠡ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠬᠠᠲᠠᠵᠤ ᠪᠡᠯᠡᠳᠬᠡᠨᠡ ) ᠪᠣᠯ ᠰᠢᠭᠤᠳ ᠬᠠᠰᠢᠵᠤ ᠡᠬᠢᠯᠡᠨᠡ᠃ ᠬᠡᠷᠪᠡ ᠠᠪᠤᠭᠠ ᠦᠭᠡᠢ ᠣᠷᠣᠭᠤᠯᠤᠭᠰᠠᠨ ᠪᠣᠯ ᠤᠷᠢᠳ ᠢ᠋ᠶ᠋ᠠᠷ ᠡᠬᠢᠨ ᠨᠢᠷᠤᠭᠤᠨ ᠤ᠋ ᠨᠢᠭᠡᠨ ᠦᠶᠡ ᠲᠡᠢ ᠬᠠᠮᠲᠤ ᠭᠤᠷᠪᠠᠨ ᠰᠦᠪᠡᠷᠭᠡ ᠶ᠋ᠢ ᠦᠶᠡᠯᠡᠴᠢᠬᠡᠳ ᠰᠠᠶᠢ ᠬᠠᠰᠢᠨᠠ᠃ ᠬᠠᠰᠢᠬᠤ ᠳ᠋ᠠᠭᠠᠨ ᠬᠥᠮᠦᠨ ᠣᠯᠠᠨ ᠪᠣᠯ ᠤᠭᠤᠴᠠ ᠶ᠋ᠢᠨ ᠲᠠᠯᠠ ᠪᠦᠷᠢ ᠳ᠋ᠦ᠍ ᠭᠤᠷᠪᠠ ᠭᠤᠷᠪᠠ ᠵᠦᠰᠦᠭᠡᠳ ᠬᠠᠮᠤᠭ ᠰᠡᠭᠦᠯ ᠦ᠋ᠨ ᠵᠦᠰᠦᠮ ᠢ᠋ᠶ᠋ᠡᠨ ᠤᠭᠤᠴᠠᠨ ᠳᠡᠭᠡᠷᠡ ᠰᠣᠯᠢᠵᠤ ᠲᠠᠯᠪᠢᠨᠠ᠃ ᠵᠦᠰᠦᠬᠦ ᠳ᠋ᠡᠭᠡᠨ ᠤᠭᠤᠴᠠ ᠶ᠋ᠢᠨ ᠬᠣᠷᠮᠣᠢ ( ᠰᠡᠭᠦᠯ ᠦ᠋ᠨ ᠲᠡᠨᠳᠡ ) ᠡᠴᠡ ᠬᠢᠲᠤᠭᠠ ᠶ᠋ᠢᠨ ᠢᠷ ᠢ᠋ᠶ᠋ᠡᠨ ᠭᠠᠳᠠᠭᠰᠢ ᠬᠠᠨᠳᠤᠭᠤᠯᠤᠨ ᠪᠠᠷᠢᠵᠤ᠂ ᠤᠭᠤᠴᠠᠨ ᠤ᠋ ᠵᠥᠪ ᠲᠠᠯᠠ ᠠ᠋ᠴᠠ ᠡᠬᠢᠯᠡᠵᠦ ᠬᠠᠰᠢᠨᠠ᠃ ᠢᠩᠭᠢᠭᠡᠳ ᠤᠭᠤᠴᠠ ᠬᠠᠰᠢᠭᠴᠢ ᠭᠣᠣᠯ ᠰᠠᠭᠤᠳᠠᠯ ᠤ᠋ᠨ ᠬᠥᠮᠦᠨ ᠦ᠌ ᠥᠭᠡᠳᠡ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠳᠡᠯᠭᠡᠨ ᠡᠷᠭᠦᠵᠦ ᠰᠢᠭᠦᠰᠦ ᠵᠣᠭᠣᠭᠯᠠ ᠭᠡᠵᠦ ᠬᠦᠨᠳᠦᠯᠡᠭᠰᠡᠨ ᠣ ᠳᠠᠷᠠᠭᠠ ᠲᠦᠷᠦᠭᠦᠦ ᠰᠠᠭᠤᠳᠠᠯ ᠤ᠋ᠨ ᠬᠥᠮᠦᠨ ᠭᠠᠷ ᠤᠷᠢᠲᠠᠵᠤ ᠬᠦᠷᠦᠭᠰᠡᠨ ᠦ᠌ ᠬᠣᠢᠨᠠ ᠪᠦᠭᠦᠳᠡᠭᠡᠷ ᠢᠳᠡᠯᠴᠡᠨᠡ᠃ ᠡᠨᠡ ᠦᠶᠡ ᠤᠭᠤᠴᠠ ᠬᠠᠰᠢᠭᠴᠢ ᠲᠦᠷᠭᠡᠨ ᠭᠠᠷᠴᠤ ᠥᠨᠥᠬᠢ ᠱᠠᠭᠠᠨᠲᠤ ᠴᠢᠮᠥᠭᠡ ᠪᠡᠨ ᠰᠠᠢᠬᠠᠨ ᠮᠥᠯᠵᠢᠵᠦ ᠶᠠᠰᠤ ᠶ᠋ᠢ ᠨᠢ ᠲᠠᠰᠢᠭᠠᠳ ᠴᠢᠮᠥᠭᠡ ᠶ᠋ᠢ ᠭᠠᠷᠭᠠᠨ ᠠᠪᠴᠢᠷᠠᠵᠤ ᠰᠢᠷᠡᠬᠡᠨᠡ ᠲᠠᠯᠪᠢᠵᠤ ᠲᠣᠰᠣᠨ ᠬᠤᠷᠢᠮ ᠪᠠᠷᠢᠵᠤ ᠪᠠᠢᠨᠠ ᠭᠡᠵᠦ ᠭᠡᠮ ᠰᠡᠷᠭᠦᠭᠡᠨ ᠤᠤᠭᠤᠵᠠᠭᠠᠬᠤ ᠶ᠋ᠢᠨ ᠬᠠᠮᠲᠤ ᠴᠢᠮᠥᠭᠡ ᠠᠮᠰᠠᠭᠤᠯᠤᠨᠠ᠃ ᠵᠡᠭᠦᠨ ᠣᠷᠣᠨ ᠤ᠋ ᠪᠠᠭᠠᠷᠢᠨ ᠮᠡᠲᠦ ᠶ᠋ᠢᠨ ᠭᠠᠵᠠᠷ ᠲᠤ᠌ ᠰᠢᠷᠡᠭᠡᠨ ᠦ᠌ ᠲᠦᠷᠦᠭᠦᠦ ᠪᠤᠶᠤ ᠤᠭᠤᠴᠠ ᠬᠠᠰᠢᠭᠴᠢ ᠶᠠᠭᠤᠨ ᠤ᠋ ᠡᠮᠦᠨᠡ ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢᠨ ᠳᠤᠬᠤ ᠠ᠋ᠴᠠ ᠬᠤᠢᠬᠠ ᠶ᠋ᠢ ᠨᠢ ᠬᠥᠨᠳᠡᠵᠦ ᠭᠠᠯ ᠲᠡᠭᠷᠢ ᠳ᠋ᠦ᠍ ᠡᠷᠭᠦᠨ᠂ ᠳᠠᠬᠢᠨ ᠪᠠᠷᠠᠭᠤᠨ ᠴᠢᠬᠢᠨ ᠦ᠌ ᠠᠷᠤ ᠶ᠋ᠢ ᠪᠠᠭᠠᠬᠠᠨ ᠣᠭᠲᠣᠯᠵᠤ ᠬᠥᠨᠳᠡᠭᠡᠳ ᠲᠣᠯᠣᠭᠠᠢ ᠶ᠋ᠢ ᠨᠢ ᠪᠠᠭᠠ ᠲᠠᠪᠰᠢ ᠳ᠋ᠤ᠌ ᠠᠬᠤᠭᠤᠯᠤᠨ ᠨᠢᠭᠡ ᠲᠠᠯᠠ ᠳ᠋ᠤ᠌ ᠲᠠᠯᠪᠢᠨ ᠳᠠᠷᠠᠭᠠ ᠨᠢ ᠤᠭᠤᠷᠠᠭ ᠰᠡᠭᠦᠯ ᠢ᠋ ᠨᠢᠭᠡ ᠯᠡ ᠬᠢᠲᠤᠭᠠ ᠪᠠᠷ ᠣᠭᠲᠣᠯᠤᠨ ᠠᠪᠴᠤ ᠵᠥᠪ ᠱᠠᠭᠠᠨᠲᠤ ᠴᠢᠮᠥᠭᠡ ᠶ᠋ᠢᠨ ᠬᠠᠮᠲᠤ ᠲᠠᠬᠢᠯᠭᠠ ᠳ᠋ᠤ᠌ ᠲᠠᠯᠪᠢᠨᠠ᠃ ᠡᠭᠦᠨ ᠦ᠌ ᠳᠠᠷᠠᠭᠠ ᠤᠭᠤᠴᠠ ᠬᠠᠰᠢᠨᠠ᠃ ᠬᠠᠰᠢᠬᠤ ᠳ᠋ᠠᠭᠠᠨ ᠤᠭᠤᠴᠠᠨ ᠤ᠋ ᠬᠣᠶᠠᠷ ᠲᠠᠯᠠ ᠶ᠋ᠢ ᠠᠳᠠᠯᠢᠬᠠᠨ ᠬᠠᠰᠢᠬᠤ ᠪᠠ ᠮᠥᠨ ᠬᠢᠲᠤᠭᠠ ᠶ᠋ᠢᠨ ᠢᠷ ᠢ᠋ᠶ᠋ᠡᠨ ᠭᠠᠳᠠᠭᠰᠢ ᠬᠠᠨᠳᠤᠭᠤᠯᠤᠨ ᠭᠠᠷ ᠤ᠋ᠨ ᠵᠥᠪ ᠂ ᠤᠭᠤᠴᠠᠨ ᠤ᠋ ᠵᠥᠪ ᠲᠠᠯᠠ ᠠ᠋ᠴᠠ ᠰᠡᠭᠦᠯ ᠦ᠋ᠨ ᠪᠣᠭᠣᠮᠠ ( ᠤᠭ ) ᠠ᠋ᠴᠠ ᠡᠬᠢᠯᠡᠨ ᠵᠦᠰᠦᠨᠡ᠃ ᠡᠨᠡ ᠬᠦ ᠵᠦᠰᠦᠮ ᠢ᠋ ᠬᠠᠰᠢᠶᠠᠰᠤ ᠭᠡᠬᠦ ᠶᠦ᠍ᠮ ᠤᠤ ᠂ ᠤᠭᠤᠴᠠᠨ ᠤ᠋ ᠵᠠᠬᠠ ᠭᠡᠨᠡ ᠃ ᠶᠡᠬᠡ ᠤᠭᠤᠴᠠ ᠶ᠋ᠢ ᠬᠣᠶᠠᠷ ᠵᠠᠬᠠ ᠂ ᠪᠠᠭᠠ ᠤᠭᠤᠴᠠ ᠶ᠋ᠢ ᠨᠢᠭᠡ ᠵᠠᠬᠠ ᠲᠠᠢ ᠵᠦᠰᠦᠨᠡ᠃ ᠵᠦᠰᠦᠬᠦ ᠪᠦᠷᠢ ᠬᠤᠷᠤᠭᠤ ᠢᠯᠡᠭᠦᠦ ᠥᠷᠭᠡᠨ ᠢ᠋ᠶ᠋ᠡᠷ ᠬᠠᠰᠢᠨᠠ᠃ ᠬᠠᠰᠢᠭᠰᠠᠨ ᠬᠠᠰᠢᠶᠠᠰᠤ ᠪᠠᠨ ᠵᠥᠪ ᠲᠠᠯᠠ ᠶ᠋ᠢᠨ ᠬᠢ ᠶ᠋ᠢ ᠪᠤᠷᠤᠭᠤ ᠲᠠᠯᠠ ᠳ᠋ᠤᠨᠢ ᠂ ᠪᠤᠷᠤᠭᠤ ᠲᠠᠯᠠ ᠶ᠋ᠢᠨ ᠬᠢ ᠶ᠋ᠢ ᠨᠢ ᠵᠥᠪ ᠲᠠᠯᠠ ᠳ᠋ᠤᠨᠢ ᠰᠣᠯᠢᠵᠤ ᠲᠠᠯᠪᠢᠭᠰᠠᠨ ᠤ᠋ ᠳᠠᠷᠠᠭᠠ ᠬᠢᠲᠤᠭᠠ ᠪᠠᠨ ᠡᠰᠢ ᠪᠡᠷ ᠨᠢ ᠭᠣᠣᠯ ᠵᠣᠴᠢᠨ ᠤ᠋ ᠡᠰᠡᠷᠭᠦ ᠬᠠᠨᠳᠤᠭᠤᠯᠤᠨ ᠲᠠᠪᠠᠭ ᠲᠤ᠌ ᠲᠠᠯᠪᠢᠨᠠ᠃ ᠭᠣᠣᠯ ᠵᠣᠴᠢᠨ ᠲᠡᠷᠡ ᠬᠦ ᠬᠢᠲᠤᠭᠠ ᠪᠠᠷ ᠤᠭᠤᠴᠠᠨ ᠤ᠋ ᠡᠬᠢᠨ ᠡᠴᠡ ᠨᠢᠭᠡᠨ ᠬᠡᠰᠡᠭ ᠣᠭᠲᠣᠯᠤᠨ ᠭᠠᠯ ᠳ᠋ᠤ᠌ ᠡᠷᠭᠦᠵᠦ᠂ ᠥᠪᠡᠷ ᠢ᠋ᠶ᠋ᠡᠨ ᠠᠮᠰᠠᠭᠰᠠᠨ ᠤ᠋ ᠳᠠᠷᠠᠭᠠ ᠪᠤᠰᠤᠳ ᠵᠣᠴᠢᠳ ᠡᠬᠢᠯᠡᠨ ᠵᠣᠭᠣᠭᠯᠠᠨᠠ᠃ ᠭᠡᠲᠡᠯᠡ ᠬᠡᠰᠢᠭᠲᠡᠨ ᠵᠡᠷᠭᠡ ᠭᠠᠵᠠᠷᠠ ᠰᠢᠭᠦᠰᠦ ᠡᠪᠳᠡᠭᠴᠢ ᠨᠢ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠲᠣᠯᠣᠭᠠᠢ ᠶ᠋ᠢᠨ ᠳᠤᠬᠤ ᠂ ᠬᠣᠶᠠᠷ ᠵᠠᠪᠠᠵᠢ ( ᠬᠡᠰᠢᠭᠲᠡᠨ ᠳ᠋ᠦ᠍ ᠪᠦᠬᠦᠯᠢ ᠲᠣᠯᠣᠭᠠᠢ ᠲᠡᠪᠰᠢᠯᠡᠳᠡᠭ ) ᠬᠣᠶᠠᠷ ᠴᠢᠬᠢ ᠂ ᠬᠣᠶᠠᠷ ᠤᠬᠤᠷᠬᠠᠢ ᠂ ᠰᠢᠯᠢ ᠲᠠᠩᠨᠠᠢ ᠠ᠋ᠴᠠ ᠶᠢᠰᠦᠨ ᠬᠡᠰᠡᠭ ᠠᠪᠴᠤ ᠂ ᠲᠡᠭᠷᠢ ᠭᠠᠵᠠᠷ ᠡᠷᠭᠦᠭᠰᠡᠨ ᠦ᠌ ᠰᠡᠭᠦᠯᠡᠷ ᠲᠣᠯᠣᠭᠠᠢ ᠤᠭᠤᠷᠠᠭ ᠰᠡᠭᠦᠯ ᠂ ᠳᠥᠷᠪᠡᠨ ᠥᠨᠳᠥᠷ ᠱᠠᠭᠠᠨᠲᠤ ᠶ᠋ᠢ ᠲᠤᠰᠬᠠᠢ ᠳᠠᠪᠰᠢ ᠳ᠋ᠤ᠌ ᠬᠢᠵᠦ ᠰᠠᠭᠤᠳᠠᠯ ᠤ᠋ᠨ ᠠᠬᠠᠮᠠᠳ ᠲᠤ᠌ ᠪᠠᠷᠢᠨᠠ᠃ ᠠᠬᠠᠮᠠᠳ ᠬᠢᠲᠤᠭᠠᠨ ᠢᠷ ᠢ᠋ᠶ᠋ᠡᠨ ᠭᠠᠳᠠᠭᠰᠢ ᠬᠠᠨᠳᠤᠭᠤᠯᠤᠨ ᠪᠠᠷᠢᠵᠤ ᠰᠡᠭᠦᠯ ᠢ᠋ ᠬᠢᠲᠤᠭᠠ ᠶ᠋ᠢᠨ ᠮᠥᠷᠥ ᠬᠢᠷᠢ ᠵᠤᠵᠠᠭᠠᠨ ᠢ᠋ᠶ᠋ᠠᠷ ᠭᠤᠷᠪᠠᠨᠲᠠ ᠬᠠᠰᠢᠭᠰᠠᠨ ᠤ᠋ ᠳᠠᠷᠠᠭᠠ ᠪᠤᠰᠤᠳ ᠮᠥᠴᠢ ᠶ᠋ᠢ ᠳᠡᠰ ᠳᠠᠷᠠᠭᠠᠯᠠᠨ ᠡᠪᠳᠡᠨᠡ᠃ ᠲᠠᠪᠰᠢ ᠣᠷᠣᠭᠤᠯᠬᠤ ᠲᠠᠢ ᠵᠡᠷᠭᠡ ᠰᠢᠭᠦᠰᠦ ᠴᠢᠨᠠᠭᠰᠠᠨ ᠱᠥᠯᠦᠨ ᠳ᠋ᠦ᠍ ᠳᠠᠪᠤᠰᠤ ᠂ ᠰᠣᠩᠭᠢᠨᠠ ᠂ ᠰᠠᠷᠢᠮᠰᠠᠭ ᠬᠠᠴᠢᠷᠯᠠᠵᠤ ᠰᠢᠷᠡᠭᠡᠨ ᠳᠥᠷᠪᠡᠨ ᠥᠨᠴᠥᠭ ᠲᠦ᠍ ᠲᠠᠯᠪᠢᠵᠤ ᠮᠢᠬᠠ ᠲᠥᠷᠥᠵᠦ ᠢᠳᠡᠬᠦ ᠳ᠋ᠦ᠍ ᠪᠡᠯᠡᠳᠬᠡᠨᠡ᠃
ᠮᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠪᠠᠷᠭᠤ ᠪᠤᠷᠢᠶᠠᠳ ᠤ᠋ᠨ ᠰᠢᠭᠦᠰᠦ ᠵᠠᠰᠠᠬᠤ ᠨᠢ ᠪᠠᠰᠠ ᠲᠡᠭᠦᠨ ᠦ᠌ ᠣᠨᠴᠠᠯᠢᠭ ᠲᠠᠢ᠃ ᠪᠦᠬᠦᠯᠢ ᠬᠣᠨᠢᠨ ᠤ᠋ ᠰᠢᠭᠦᠰᠦ ᠶ᠋ᠢ ᠭᠣᠣᠯᠳᠠᠭᠤ ᠬᠤᠷᠢᠮ ᠨᠠᠢᠷ ᠳᠡᠭᠡᠷᠡ ᠵᠠᠰᠠᠬᠤ ᠪᠥᠭᠡᠳ ᠪᠦᠬᠦᠯᠢ ᠰᠢᠭᠦᠰᠦ ᠪᠡᠨ ᠳᠥᠷᠪᠡᠨ ᠲᠠᠪᠠᠭ ᠲᠤ᠌ ᠥᠷᠥᠵᠦ ᠲᠠᠯᠪᠢᠨᠠ᠃ ᠲᠦᠷᠦᠭᠦᠨ ᠦ᠌ ᠲᠠᠪᠠᠭ ᠲᠤ᠌ ᠬᠣᠨᠢᠨ ᠲᠣᠯᠣᠭᠠᠢ ( ᠲᠥᠭᠡᠯᠡᠢ ) ᠲᠠᠯᠪᠢᠨᠠ ᠃ ᠡᠨᠡ ᠨᠢ ᠬᠤᠢᠬᠠᠯᠠᠵᠤ ᠴᠢᠨᠠᠭᠰᠠᠨ ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢᠨ ᠮᠠᠩᠨᠠᠢ ᠳ᠋ᠤ᠌ ᠭᠤᠷᠪᠠᠯᠵᠢᠨ ᠵᠦᠰᠦᠵᠦ ᠂ ᠴᠢᠬᠢᠨ ᠠᠷᠤ ᠂ ᠬᠠᠵᠠᠭᠤ ᠤᠷᠤᠭᠤᠯ ᠤ᠋ᠨ ᠮᠢᠬᠠ ᠶ᠋ᠢ ᠵᠡᠷᠭᠡᠴᠡᠭᠦᠯᠦᠨ ᠬᠣᠶᠠᠷ ᠣᠭᠲᠣᠯᠵᠤ ᠳᠡᠭᠡᠷᠡ ᠨᠢ ᠨᠢᠭᠡᠨ ᠬᠠᠪᠢᠷᠭᠠ ᠲᠠᠯᠪᠢᠵᠤ ᠬᠠᠮᠤᠭ ᠤ᠋ᠨ ᠳᠡᠭᠡᠳᠦ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠭᠰᠠᠨ ᠬᠦᠨᠳᠦᠲᠦ ᠵᠣᠴᠢᠨ ᠳ᠋ᠤ᠌ ᠲᠠᠯᠪᠢᠨᠠ᠃ ᠬᠣᠶᠠᠳᠤᠭᠠᠷ ᠲᠠᠪᠠᠭ ᠲᠤ᠌ ᠬᠣᠨᠢᠨ ᠤᠭᠤᠴᠠ ᠲᠠᠯᠪᠢᠨᠠ᠃ ᠭᠤᠷᠪᠠᠳᠤᠭᠠᠷ ᠲᠠᠪᠠᠭ ᠲᠤ᠌ ᠳᠠᠯᠤ ᠲᠠᠯᠪᠢᠨᠠ᠃ ᠳᠥᠷᠪᠡᠳᠦᠭᠡᠷ ᠲᠠᠪᠠᠭ ᠲᠤ᠌ ᠱᠠᠭᠠᠨᠲᠤ ᠲᠠᠯᠪᠢᠨᠠ ᠃ ᠢᠩᠭᠢᠵᠦ ᠳᠥᠷᠪᠡᠨ ᠲᠠᠪᠠᠭ ᠢ᠋ ᠲᠤᠰ ᠲᠤᠰ ᠪᠤᠰᠤᠳ ᠮᠢᠬᠠ ᠪᠠᠷ ᠳᠡᠪᠢᠰᠬᠡᠷᠯᠡᠨ ᠳᠦᠭᠦᠷᠭᠡᠭᠰᠡᠨ ᠦ᠌ ᠳᠠᠷᠠᠭᠠ ᠵᠣᠴᠢᠯᠠᠭᠴᠢ ᠨᠢ ᠮᠠᠯᠠᠭᠠᠢ ᠪᠠᠨ ᠠᠪᠴᠤ ᠪᠡᠶᠡ ᠮᠡᠬᠦᠢᠨ ᠂ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠳᠡᠯᠭᠡᠨ 《ᠪᠠᠷᠢᠵᠤ ᠢᠳᠡᠭᠡᠯᠡᠭᠲᠦᠨ ! 》ᠭᠡᠬᠦ ᠳ᠋ᠦ᠍ ᠲᠦᠷᠦᠭᠦᠦ ᠵᠣᠴᠢᠨ ᠲᠣᠯᠣᠭᠠᠢ ᠶ᠋ᠢᠨ ᠭᠤᠷᠪᠠᠯᠵᠢᠯᠠᠭᠰᠠᠨ ᠬᠤᠢᠬᠠ ᠶ᠋ᠢ ᠬᠠᠭᠤᠯᠵᠤ ᠠᠪᠤᠭᠠᠳ ᠂ ᠣᠷᠣᠨ ᠳᠡᠯᠡᠬᠡᠢ ᠳ᠋ᠦ᠍ ᠡᠷᠭᠦᠨ ᠂ ᠴᠢᠬᠢᠨ ᠦ᠌ ᠠᠷᠤ ᠶ᠋ᠢᠨ ᠣᠭᠲᠣᠯᠤᠭᠠᠰᠤ ᠶ᠋ᠢ ᠭᠠᠯ ᠳ᠋ᠤ᠌ ᠡᠷᠭᠦᠨ ᠂ ᠤᠷᠤᠭᠤᠯ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠣᠭᠲᠣᠯᠤᠭᠠᠰᠤ ᠶ᠋ᠢ ᠥᠪᠡᠷ ᠲᠡᠭᠡᠨ ᠢᠳᠡᠭᠡᠳ ᠂ ᠲᠣᠯᠣᠭᠠᠢ ᠶ᠋ᠢ ᠬᠠᠪᠢᠷᠭᠠ ᠶ᠋ᠢᠨ ᠬᠠᠮᠲᠤ ᠵᠣᠴᠢᠯᠠᠭᠴᠢ ( ᠭᠡᠷ ᠦ᠋ᠨ ᠡᠵᠡᠨ ) ᠳ᠋ᠦ᠍ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠡᠷᠭᠦᠨ ᠭᠠᠷᠳᠠᠭᠤᠯᠤᠨᠠ᠃ ᠬᠣᠶᠠᠳᠤᠭᠠᠷ ᠲᠠᠪᠠᠭ ᠢ ᠬᠤᠳᠠᠭᠠᠢ ᠳ᠋ᠤ᠌ ᠪᠠᠷᠢᠳᠠᠭ ᠃ ᠬᠤᠳᠠᠭᠠᠢ ᠮᠥᠨ ᠤᠭᠤᠴᠠ ᠶ᠋ᠢᠨ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠵᠢᠭᠠᠬᠠᠨ ᠬᠠᠰᠢᠵᠤ ᠡᠷᠭᠦᠭᠡᠳ ᠨᠢᠭᠡ ᠬᠡᠰᠡᠭ ᠢ ᠭᠠᠯ ᠳ᠋ᠤ᠌ ᠡᠷᠭᠦᠵᠦ ᠵᠣᠴᠢᠳ ᠲᠤᠷ ᠵᠠᠯᠠᠨᠠ ᠃ ᠡᠭᠦᠨ ᠡᠴᠡ ᠳᠣᠷᠣᠭᠰᠢᠬᠢ ᠲᠠᠪᠠᠭ ᠨᠢ ᠴᠥᠮ ᠡᠨᠡ ᠵᠢᠷᠤᠮ ᠢ᠋ᠶ᠋ᠠᠷ ᠶᠠᠪᠤᠭᠳᠠᠨᠠ᠃ ᠪᠠᠷᠭᠤ ᠪᠤᠷᠢᠶᠠᠳ ᠲᠤ᠌ ᠳᠠᠢᠯᠠᠯᠭᠠ ᠪᠤᠶᠤ ᠠᠯᠪᠠᠨ ᠶᠣᠰᠣᠨ ᠤ᠋ ᠳᠠᠢᠯᠠᠯᠭᠠ ᠳ᠋ᠤ᠌ ᠬᠣᠨᠢᠨ ᠲᠣᠯᠣᠭᠠᠢ ᠲᠠᠯᠪᠢᠳᠠᠭ ᠦᠭᠡᠢ᠃
ᠳᠠᠪᠰᠢ ᠪᠠᠭᠤᠯᠭᠠᠬᠤ ᠶᠣᠰᠣ
ᠢᠷᠡᠭᠰᠡᠨ ᠵᠣᠴᠢᠨ ᠵᠣᠭᠣᠭᠯᠠᠵᠤ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠠᠬᠠᠮᠠᠳ ᠵᠣᠴᠢᠨ ᠳᠠᠯᠤ ᠴᠢᠮᠥᠭᠡ ᠶ᠋ᠢᠨ ᠶᠠᠰᠤ ᠶ᠋ᠢ ᠮᠥᠨ ᠬᠦ᠌ ᠲᠠᠪᠰᠢ ᠳ᠋ᠤ᠌ ᠶᠣᠰᠣᠴᠢᠯᠠᠨ ᠲᠠᠯᠪᠢᠭᠠᠳ ᠂ ᠵᠠᠷᠢᠮ ᠭᠠᠵᠠᠷ ᠬᠣᠨᠢᠨ ᠲᠣᠯᠣᠭᠠᠢ ᠶ᠋ᠢ ᠮᠥᠨ ᠬᠦ᠌ ᠤᠭᠤᠴᠠᠨ ᠳᠡᠭᠡᠷᠡ ᠨᠢ ᠲᠠᠯᠪᠢᠵᠤ᠂ ᠲᠠᠪᠰᠢ ᠪᠠᠭᠤᠯᠭᠠᠬᠤ ᠶ᠋ᠢ ᠮᠡᠳᠡᠭᠳᠡᠨ ᠰᠥᠩ ᠬᠠᠮᠢᠶᠠᠷᠤᠭᠴᠢ ᠪᠤᠶᠤ ᠭᠡᠷ ᠦ᠋ᠨ ᠡᠵᠡᠨ ᠳ᠋ᠦ᠍ ᠨᠠᠷᠠᠨ ᠵᠥᠪ ᠢ᠋ᠶ᠋ᠡᠷ ᠡᠷᠭᠢᠭᠦᠯᠦᠨ ᠭᠠᠷᠳᠠᠭᠤᠯᠬᠤ ᠳ᠋ᠠᠭᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠷᠭᠦᠨ ᠪᠤᠴᠠᠭᠠᠨᠠ᠃ ᠬᠦᠯᠢᠶᠡᠨ ᠠᠪᠤᠭᠴᠢ ᠨᠢ ᠳᠠᠬᠢᠨ ᠵᠥᠪ ᠢ᠋ᠶ᠋ᠡᠷ ᠬᠠᠭᠠᠰ ᠡᠷᠭᠢᠭᠦᠯᠦᠨ ᠤᠭᠤᠴᠠᠨ ᠲᠣᠯᠣᠭᠠᠢ ᠶ᠋ᠢ ᠭᠠᠳᠠᠭᠰᠢ ᠬᠠᠨᠳᠤᠭᠤᠯᠵᠤ ( ᠵᠣᠴᠢᠳ ᠵᠦᠭ ) 《ᠳᠠᠶᠠᠭᠠᠷ ᠢ᠋ᠶ᠋ᠠᠨ ᠲᠠᠪᠠ ᠪᠠᠷ ᠵᠣᠭᠣᠭᠯᠠᠵᠤ ᠬᠠᠢᠷᠠᠯᠠᠭᠲᠤᠨ !》ᠭᠡᠵᠦ ᠶᠣᠰᠣ ᠭᠦᠢᠴᠡᠳᠬᠡᠭᠡᠳ ᠠᠪᠴᠤ ᠭᠠᠷᠤᠨᠠ᠃
ᠱᠥᠯᠥ ᠪᠠᠷᠢᠬᠤ
ᠰᠢᠭᠦᠰᠦ ᠪᠠᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠵᠣᠴᠢᠳ ᠲᠤ᠌ ᠱᠥᠯᠦᠨ ᠳ᠋ᠦ᠍ ᠴᠢᠨᠠᠭᠰᠠᠨ ᠲᠤᠲᠤᠷᠭᠠ᠂ ᠨᠠᠷᠢᠮᠤ ᠪᠤᠶᠤ ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ ᠠᠶᠠᠭᠠᠯᠠᠵᠤ ᠵᠣᠴᠢᠯᠠᠨᠠ᠃ ᠡᠭᠦᠨ ᠢ᠋ ᠱᠥᠯᠥ ᠪᠠᠷᠢᠬᠤ ᠭᠡᠨᠡ ᠃ ᠪᠠᠰᠠ ᠲᠠᠲᠠᠰᠢ ᠭᠡᠨᠡ ᠃ ᠢᠩᠭᠢᠪᠡᠯ ᠪᠦᠬᠦᠯᠢ ᠰᠢᠭᠦᠰᠦ ᠶ᠋ᠢᠨ ᠳᠠᠢᠯᠠᠯᠭᠠ ᠲᠡᠭᠦᠰᠦᠨᠡ ᠃ ᠬᠠᠭᠠᠰ ᠰᠢᠭᠦᠰᠦ ᠤᠭᠤᠴᠠ ᠂ ᠬᠣᠶᠠᠷ ᠬᠠ᠂ ᠰᠡᠭᠡᠷ ᠂ ᠡᠷᠡᠦ ᠦᠭᠡᠢ ᠂ ᠲᠣᠯᠣᠭᠠᠢ ᠪᠠᠷ ᠪᠦᠷᠢᠯᠳᠦᠨᠡ᠃ ᠡᠭᠦᠨ ᠢ᠋ ᠲᠠᠪᠠᠭᠯᠠᠬᠤ ᠳ᠋ᠠᠭᠠᠨ ᠲᠦᠷᠦᠭᠦᠨ ᠳ᠋ᠦ᠍ᠨᠢ ᠰᠡᠭᠡᠷ ᠢ᠋ᠶ᠋ᠡᠨ ᠬᠥᠨᠳᠡᠯᠡᠨ ᠲᠠᠯᠪᠢᠵᠤ ᠂ ᠳᠠᠷᠠᠭᠠ ᠨᠢ ᠬᠣᠶᠠᠷ ᠬᠠ ᠪᠠᠨ ᠠᠮᠢᠳᠤ ᠶ᠋ᠢᠨ ᠪᠠᠢᠷᠢᠰᠢᠯ ᠢ᠋ᠶ᠋ᠠᠷ ᠲᠠᠯᠪᠢᠵᠤ ᠂ ᠳᠡᠭᠡᠷᠡ ᠨᠢ ᠤᠭᠤᠴᠠ ᠪᠠᠷ ᠪᠦᠲᠡᠭᠡᠨ᠂ ᠤᠭᠤᠴᠠᠨ ᠳᠡᠭᠡᠷᠡ ᠪᠡᠨ ᠲᠣᠯᠣᠭᠠᠢ ᠪᠠᠨ ᠲᠠᠯᠪᠢᠵᠤ ᠵᠠᠰᠠᠨᠠ ᠃ ᠡᠨᠡ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠬᠣᠶᠠᠳᠤᠭᠠᠷ ᠳᠡᠰ ᠦ᠋ᠨ ᠶᠣᠰᠣ ᠬᠦᠨᠳᠦᠲᠡᠢ ᠰᠢᠭᠦᠰᠦ ᠪᠣᠯᠤᠨᠠ᠃
ᠥᠷᠥᠭᠡᠯ ᠰᠢᠭᠦᠰᠦ
ᠤᠭᠤᠴᠠ ᠂ ᠵᠥᠪ ᠲᠠᠯᠠ ᠶ᠋ᠢᠨ ᠬᠠ ᠂ ᠪᠤᠷᠤᠭᠤ ᠲᠠᠯᠠ ᠶ᠋ᠢᠨ ᠭᠤᠶᠠ ᠪᠠᠷ ᠪᠦᠷᠢᠯᠳᠦᠨᠡ ᠃ ᠲᠠᠪᠠᠭᠯᠠᠬᠤ ᠶᠣᠰᠣ ᠨᠢ ᠬᠠ ᠪᠠᠨ ᠦᠶᠡᠯᠡᠵᠦ ᠡᠮᠦᠨᠡ ᠨᠢ ᠭᠤᠶᠠ ᠪᠠᠨ ᠦᠶᠡᠯᠡᠵᠦ ᠬᠣᠢᠨᠠ ᠨᠢ ᠳᠡᠪᠢᠰᠬᠡᠷᠯᠡᠭᠡᠳ ᠤᠭᠤᠴᠠ ᠪᠠᠨ ᠨᠥᠮᠥᠷᠭᠡᠨ ᠲᠠᠯᠪᠢᠨᠠ᠃
ᠣᠷᠭᠢᠯ ᠰᠢᠭᠦᠰᠦ ᠥᠷᠥᠭᠡᠯ ᠰᠢᠭᠦᠰᠦ ( ᠠᠯᠠᠱᠠ ᠂ ᠣᠷᠳᠣᠰ ᠤ᠋ᠨ ᠬᠡᠯᠡᠯᠭᠡ ) ᠃
ᠭᠦᠶᠦᠯᠭᠡ ᠤᠭᠤᠴᠠ ᠶ᠋ᠢᠨ ᠳᠠᠢᠯᠠᠯᠭᠠ
ᠤᠭᠤᠴᠠ ᠪᠠᠨ ᠪᠣᠯᠭᠣᠭᠠᠵᠤ ᠬᠠᠯᠢᠮᠨᠠᠭᠰᠠᠨ ᠤ᠋ ᠳᠠᠷᠠᠭᠠ ᠵᠢᠷᠭᠤᠭᠠᠨ ᠨᠢᠷᠤᠭᠤ ᠶ᠋ᠢ ᠠᠰᠠᠭᠤᠬᠤ ᠨᠢᠷᠤᠭᠤ ᠬᠦᠷᠲᠡᠯᠡ ᠬᠣᠶᠠᠷ ᠬᠣᠶᠠᠷ ᠢ᠋ᠶ᠋ᠠᠷ ᠦᠶᠡᠯᠡᠵᠦ ᠰᠡᠭᠦᠯ ᠦ᠋ᠨ ᠦᠵᠦᠭᠦᠷ ᠡᠴᠡ ᠲᠠᠪᠤᠨ ᠦᠶᠡ ᠬᠠᠰᠤᠵᠤ ᠂ ᠲᠣᠯᠣᠭᠠᠢ ᠲᠠᠯᠠ ᠪᠠᠷ ᠨᠢ ᠬᠠᠨᠳᠤᠭᠤᠯᠵᠤ ᠲᠠᠯᠪᠢᠨᠠ ( ᠵᠣᠴᠢᠨ ᠴᠥᠭᠡᠨ ᠂ ᠬᠣᠨᠢᠨ ᠲᠣᠯᠣᠭᠠᠢ ᠪᠡᠯᠡᠨ ᠪᠠᠢᠬᠤ ᠦᠭᠡᠢ ᠦᠶᠡ ᠢᠩᠭᠢᠨᠡ ) ᠃ ᠡᠭᠦᠨ ᠢ᠋ ᠭᠦᠶᠦᠯᠭᠡ ᠤᠭᠤᠴᠠ ᠶ᠋ᠢᠨ ᠳᠠᠢᠯᠠᠯᠭᠠ ᠭᠡᠨᠡ ᠃
ᠣᠬᠣᠷ ᠤᠭᠤᠴᠠ ᠶ᠋ᠢᠨ ᠳᠠᠢᠯᠠᠯᠭᠠ
ᠲᠤᠤᠬᠠ ᠨᠢᠷᠤᠭᠤ ᠂ ᠠᠰᠠᠭᠤᠬᠤ ᠨᠢᠷᠤᠭᠤ ᠶ᠋ᠢᠨ ᠳᠡᠭᠡᠷᠡ ᠨᠢᠭᠡᠨ ᠦᠶᠡ ᠨᠡᠮᠡᠵᠦ ᠰᠡᠭᠦᠯ ᠦ᠋ᠨ ᠦᠵᠦᠭᠦᠷ ᠡᠴᠡ ᠲᠠᠪᠤᠨ ᠦᠶᠡ ᠬᠠᠰᠤᠵᠤ᠂ ᠰᠡᠭᠡᠷ ᠱᠠᠭᠠᠨᠲᠤ ᠲᠡᠷᠢᠭᠦᠲᠡᠨ ᠢ᠋ᠶ᠋ᠡᠷ ᠬᠠᠰᠢᠵᠤ ᠲᠡᠪᠰᠢᠯᠡᠬᠦ ᠶ᠋ᠢ ᠣᠬᠣᠷ ᠤᠭᠤᠴᠠ ᠶ᠋ᠢᠨ ᠳᠠᠢᠯᠠᠯᠭᠠ ᠭᠡᠨᠡ ( ᠵᠡᠭᠦᠨ ᠣᠷᠣᠨ ) ᠃
ᠳᠠᠯᠤ ᠳᠥᠷᠪᠡᠨ ᠥᠨᠳᠥᠷ ᠦ᠋ᠨ ᠳᠠᠢᠯᠠᠯᠭᠠ
ᠴᠢᠨᠠᠵᠤ ᠪᠣᠯᠭᠣᠭᠰᠠᠨ ᠬᠠ ᠪᠠᠨ ᠦᠶᠡᠯᠡᠵᠦ ᠂ ᠳᠠᠯᠤ ᠶ᠋ᠢᠨ ᠮᠥᠭᠡᠷᠰᠦ ᠶ᠋ᠢ ᠤᠨᠠᠭᠠᠨ ᠬᠣᠲᠠ ᠶ᠋ᠢ ᠨᠢ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠂ ᠳᠥᠷᠪᠡᠨ ᠥᠨᠳᠥᠷ ᠦ᠋ᠨ ᠳᠡᠭᠡᠷᠡ ᠨᠢ ᠲᠠᠯᠪᠢᠨᠠ᠃ ᠡᠭᠦᠨ ᠢ᠋ ᠳᠠᠯᠤ ᠳᠥᠷᠪᠡᠨ ᠥᠨᠳᠥᠷ ᠦ᠋ᠨ ᠳᠠᠢᠯᠠᠯᠭᠠ ᠭᠡᠨᠡ ᠃ ᠡᠭᠦᠨ ᠳ᠋ᠦ᠍ ᠠᠩᠬᠠᠷᠬᠤ ᠵᠦᠢᠯ ᠭᠡᠪᠡᠯ : ᠨᠠᠭᠠᠴᠤ ᠵᠢᠭᠡ ᠳ᠋ᠦ᠍ ᠡᠨᠡ ᠳᠠᠢᠯᠠᠯᠭᠠ ᠶ᠋ᠢ ᠣᠷᠣᠭᠤᠯᠳᠠᠭ ᠦᠭᠡᠢ ᠃ ᠶᠣᠰᠣ ᠠᠯᠳᠠᠨᠠ ᠃ ᠤᠴᠢᠷ ᠨᠢ ᠨᠠᠭᠠᠴᠤ ᠂ ᠵᠢᠭᠡ ᠳ᠋ᠦ᠍ ᠣᠷᠣᠭᠤᠯᠪᠠᠯ ᠂ ᠲᠡᠳᠡᠨ ᠢ᠋ ᠦᠭᠡᠢᠷᠡᠨᠡ ᠭᠡᠳᠡᠭ ( ᠵᠡᠭᠦᠨ ᠣᠷᠣᠨ ) ᠃
ᠰᠡᠭᠦᠵᠢ ᠳᠤᠮᠳᠠ ᠴᠢᠮᠥᠭᠡ ᠶ᠋ᠢᠨ ᠳᠠᠢᠯᠠᠯᠭᠠ
ᠴᠢᠨᠠᠵᠤ ᠪᠣᠯᠭᠣᠭᠰᠠᠨ ᠭᠤᠶᠠ ᠪᠠᠨ ᠦᠶᠡᠯᠡᠵᠦ ᠂ ᠱᠠᠭᠠᠨᠲᠤ ᠂ ᠳᠤᠮᠳᠠ ᠴᠢᠮᠥᠭᠡ ᠶ᠋ᠢᠨ ᠳᠡᠭᠡᠷᠡ ᠰᠡᠭᠦᠵᠢ ᠪᠡᠨ ᠬᠠᠪᠲᠠᠭᠠᠢ ᠲᠣᠯᠣᠭᠠᠢ ᠲᠠᠯᠠ ᠪᠠᠷ ᠨᠢ ᠳᠠᠪᠰᠢᠯᠠᠨᠠ ᠃ ᠬᠡᠷᠪᠡ ᠵᠣᠴᠢᠨ ᠣᠯᠠᠨ ᠪᠣᠯ ᠪᠤᠰᠤᠳ ᠵᠦᠢᠯ ᠢ᠋ ᠳᠠᠭᠠᠪᠤᠷᠢ ᠳ᠋ᠤ᠌ ᠣᠷᠣᠭᠤᠯᠵᠤ ᠪᠣᠯᠤᠨᠠ ᠃ ᠣᠯᠠᠩᠬᠢ ᠳ᠋ᠠᠭᠠᠨ ᠡᠩ ᠦ᠋ᠨ ᠡᠮᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠣᠷᠣᠭᠤᠯᠳᠠᠭ ᠃ ᠪᠤᠰᠤᠳ ᠬᠥᠮᠦᠰ ᠲᠦ᠍ ᠴᠦ᠍ ᠪᠣᠯᠳᠠᠭ ᠠ᠋ !
ᠡᠪᠴᠢᠭᠦᠨ ᠳᠠᠢᠯᠠᠯᠭᠠ
ᠪᠣᠯᠭᠣᠭᠰᠠᠨ ᠡᠪᠴᠢᠭᠦᠦ ᠶ᠋ᠢᠨ ᠬᠣᠷᠮᠣᠢ ᠶ᠋ᠢ ᠲᠡᠭᠰᠢ ᠬᠡᠷᠪᠢᠨ ᠂ ᠪᠦᠳᠦᠷᠬᠡᠢ ᠶ᠋ᠢ ᠨᠢ ᠠᠪᠴᠤ ᠬᠥᠩᠬᠥᠷ ᠲᠠᠯᠠ ᠶ᠋ᠢ ᠨᠢ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠬᠣᠰᠢᠭᠤᠮᠠᠯ ᠲᠠᠯᠠ ᠶ᠋ᠢ ᠨᠢ ᠤᠷᠤᠭᠰᠢ ᠬᠠᠨᠳᠤᠭᠤᠯᠤᠨ ᠳᠠᠪᠰᠢᠯᠠᠨᠠ ᠃ ᠡᠪᠴᠢᠭᠦᠦ ᠶ᠋ᠢ ᠭᠣᠣᠯᠳᠠᠭᠤ ᠪᠦᠰᠡᠭᠦᠢ ᠬᠥᠮᠦᠨ ᠢ᠋ ᠳᠠᠢᠯᠠᠬᠤ ᠳ᠋ᠤ᠌ ᠬᠡᠷᠡᠭᠯᠡᠨᠡ ᠃ ᠡᠭᠦᠨ ᠢ ᠡᠪᠴᠢᠭᠦᠨ ᠳᠠᠢᠯᠠᠯᠭᠠ ᠭᠡᠨᠡ ᠃ ᠳᠡᠭᠡᠷᠡᠬᠢ ᠲᠠᠪᠤᠨ ᠵᠦᠢᠯ ᠨᠢ ᠭᠣᠣᠯᠳᠠᠭᠤ ᠵᠡᠭᠦᠨ ᠣᠷᠣᠨ ᠤ᠋ ᠳᠠᠢᠯᠠᠯᠭᠠ ᠳ᠋ᠤ᠌ ᠬᠠᠷᠠᠭᠳᠠᠨᠠ᠃
ᠬᠠ ᠶ᠋ᠢᠨ ᠳᠠᠢᠯᠠᠯᠭᠠ
ᠬᠠ ᠪᠠᠨ ᠦᠶᠡᠯᠡᠨ ᠡᠪᠳᠡᠵᠦ ᠂ ᠮᠥᠴᠢ ᠶ᠋ᠢᠨ ᠨᠠᠷᠢᠨ ᠲᠠᠯᠠ ᠪᠣᠯᠤᠨ ᠬᠠᠪᠢᠰᠤᠨ ᠤ᠋ ᠲᠣᠯᠣᠭᠠᠢ ᠲᠠᠯᠠ ᠶ᠋ᠢ ᠰᠢᠷᠡᠭᠡᠨ ᠦ᠌ ᠬᠣᠢᠮᠣᠷ ᠲᠠᠢᠰᠢ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠨᠠ ᠃ ᠡᠭᠦᠨ ᠢ᠋ ᠬᠠ ᠶ᠋ᠢᠨ ᠳᠠᠢᠯᠠᠯᠭᠠ ᠭᠡᠨᠡ ᠃ ᠡᠨᠡ ᠳᠠᠢᠯᠠᠯᠭᠠ ᠠᠯᠠᠱᠠ ᠳ᠋ᠤ᠌ ᠬᠠᠷᠠᠭᠳᠠᠨᠠ᠃
ᠪᠦᠬᠦᠯᠢ ᠲᠣᠯᠣᠭᠠᠢ ᠶ᠋ᠢᠨ ᠳᠠᠢᠯᠠᠯᠭᠠ
ᠬᠢᠷᠪᠤᠰᠤᠯᠠᠬᠰᠠᠨᠨ ( ᠬᠤᠢᠬᠠᠯᠠᠭᠰᠠᠨ ) ᠬᠣᠨᠢᠨ ᠤ᠋ ᠲᠣᠯᠣᠭᠠᠢ ᠪᠠᠨ ᠴᠢᠨᠠᠭᠠᠳ ᠂ ᠬᠣᠩᠰᠢᠶᠠᠷ ᠢ᠋ ᠨᠢ ᠰᠢᠷᠡᠭᠡᠨ ᠦ᠌ ᠬᠣᠢᠮᠣᠷ ᠲᠠᠢᠰᠢ ᠬᠠᠨᠳᠤᠭᠤᠯᠤᠨ ᠬᠣᠶᠠᠷ ᠲᠠᠯᠠ ᠪᠠᠷ ᠨᠢ ᠬᠣᠰ ᠵᠤᠷᠠᠮᠠ ( ᠭᠦᠵᠡᠭᠡ ᠂ ᠴᠢᠴᠠᠷᠬᠠᠢ ᠶ᠋ᠢᠨ ᠥᠭᠡᠬᠦ ᠶ᠋ᠢ ᠨᠡᠢᠯᠡᠭᠦᠯᠵᠦ ᠨᠠᠷᠢᠨ ᠭᠡᠳᠡᠰᠦ ᠪᠡᠷ ᠣᠷᠢᠶᠠᠭᠰᠠᠨ ᠮᠢᠬᠠ ) ᠶ᠋ᠢ ᠬᠠᠪᠴᠢᠨ ᠲᠡᠪᠰᠢᠯᠡᠳᠡᠭ ᠃ ᠡᠨᠡ ᠳᠠᠢᠯᠠᠯᠭᠠ ᠠᠯᠠᠱᠠ ᠳ᠋ᠤ᠌ ᠬᠠᠷᠠᠭᠳᠠᠨᠠ᠃
ᠬᠠᠰᠢᠭᠰᠠᠨ ᠰᠢᠭᠦᠰᠦ ᠶ᠋ᠢᠨ ᠳᠠᠢᠯᠠᠯᠭᠠ
ᠵᠥᠪ ᠲᠠᠯᠠ ᠶ᠋ᠢᠨ ᠬᠠ ᠂ ᠪᠤᠷᠤᠭᠤ ᠲᠠᠯᠠ ᠶ᠋ᠢᠨ ᠭᠤᠶᠠ ᠂ ᠤᠭᠤᠴᠠ ᠦᠭᠡᠢ ᠰᠡᠭᠡᠷ ᠲᠣᠯᠣᠭᠠᠢ ᠲᠠᠢ ᠴᠢᠨᠠᠭᠰᠠᠨ ᠰᠢᠭᠦᠰᠦ ᠶ᠋ᠢ ᠬᠠᠰᠢᠭᠰᠠᠨ ᠰᠢᠭᠦᠰᠦᠨ ᠲᠠᠢᠯᠠᠯᠠᠭᠠ ᠭᠡᠨᠡ ᠃ ᠡᠨᠡ ᠳᠠᠢᠯᠠᠯᠭᠠ ᠣᠷᠳᠣᠰ ᠲᠤ᠌ ᠬᠠᠷᠠᠭᠳᠠᠨᠠ ᠃
ᠳᠠᠯᠤ ᠶ᠋ᠢᠨ ᠳᠠᠢᠯᠠᠯᠭᠠ
ᠵᠥᠪ ᠲᠠᠯᠠ ᠶ᠋ᠢᠨ ᠬᠠ ᠂ ᠲᠣᠯᠣᠭᠠᠢ ᠦᠭᠡᠢ ᠪᠡᠷ ᠰᠡᠭᠡᠷ ᠲᠡᠢ ᠴᠢᠨᠠᠭᠰᠠᠨ ᠰᠢᠭᠦᠰᠦ ᠶ᠋ᠢ ᠳᠠᠯᠤ ᠶ᠋ᠢᠨ ᠳᠠᠢᠯᠠᠯᠭᠠ ᠭᠡᠨᠡ ᠃ ᠡᠨᠡ ᠪᠣᠯ ᠦᠷᠳᠦᠰ ᠨᠤᠲᠤᠭ ᠲᠤ᠌ ᠬᠠᠷᠠᠭᠳᠠᠨᠠ᠃
ᠳᠠᠯᠤ ᠳᠥᠷᠪᠡᠨ ᠥᠨᠳᠥᠷ ᠦ᠋ᠨ ᠳᠠᠢᠯᠠᠯᠭᠠ ᠃ ᠳᠠᠯᠤ ᠳᠥᠷᠪᠡᠨ ᠥᠨᠳᠥᠷ ᠂ ᠰᠡᠭᠦᠵᠢ ᠂ ᠳᠤᠮᠳᠠ ᠴᠢᠮᠥᠭᠡ ᠶ᠋ᠢᠨ ᠳᠠᠢᠯᠠᠯᠭᠠ ᠃ ᠤᠭᠤᠴᠠ ᠳᠠᠯᠤ ᠳᠥᠷᠪᠡᠨ ᠥᠨᠳᠥᠷ ᠦ᠋ᠨ ᠳᠠᠢᠯᠠᠯᠭᠠ᠃ ᠡᠪᠴᠢᠭᠦᠦ ᠳᠠᠯᠤ ᠳᠥᠷᠪᠡᠨ ᠥᠨᠳᠥᠷ ᠦ᠋ᠨ ᠳᠠᠢᠯᠠᠯᠭᠠ ᠭᠡᠵᠦ ᠪᠣᠢ ᠃ ᠡᠭᠦᠨ ᠳ᠋ᠦ᠍ ᠴᠥᠮ ᠬᠣᠰ ᠂ ᠪᠦᠳᠦᠭᠦᠨ ᠭᠡᠳᠡᠰᠦ ᠂ ᠡᠯᠢᠭᠡ ᠂ ᠵᠢᠷᠦᠬᠡ ᠶ᠋ᠢ ᠳᠠᠭᠠᠯᠳᠤᠭᠤᠯᠳᠠᠭ ᠪᠣᠢ ᠃ ᠡᠨᠡ ᠪᠣᠯ ᠰᠢᠯᠢ ᠶ᠋ᠢᠨ ᠭᠣᠣᠯ ᠂ ᠬᠡᠰᠢᠭᠲᠡᠨ ᠢ᠋ᠶ᠋ᠡᠷ ᠦᠵᠡᠭᠳᠡᠳᠡᠭ ᠳᠠᠢᠯᠠᠯᠭᠠ ᠃
ᠳᠡᠯᠡᠭᠡ ᠬᠤᠷᠠᠭᠠ ᠶ᠋ᠢᠨ ᠰᠢᠭᠦᠰᠦ
ᠥᠨᠳᠥᠷ ᠨᠠᠰᠤᠲᠠᠢ ᠬᠥᠮᠦᠨ ᠳ᠋ᠦ᠍ ᠣᠷᠣᠭᠤᠯᠳᠠᠭ ᠰᠢᠭᠦᠰᠦ ᠂ ᠬᠤᠷᠠᠭᠠᠨ ᠮᠢᠬᠠ ᠠᠮᠲᠠᠲᠠᠢ ᠪᠥᠭᠡᠳ ᠵᠥᠭᠡᠯᠡᠨ ᠃ ᠡᠨᠡ ᠪᠣᠯ ᠡᠷᠲᠡᠨ ᠡᠴᠡ ᠪᠠᠢᠵᠠᠢ᠃
ᠡᠩ ᠦ᠋ᠨ ᠬᠤᠷᠠᠭᠠ ᠶ᠋ᠢᠨ ᠰᠢᠭᠦᠰᠦ
ᠡᠨᠡ ᠨᠢ ᠮᠥᠨ ᠲᠡᠯᠡᠭᠡ ᠬᠤᠷᠠᠭᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠢᠳᠡᠳᠡᠭ ᠰᠢᠭᠦᠰᠦ ( ᠲᠡᠯᠡᠭᠡ ᠦᠭᠡᠢ ᠦᠶᠡ ) ᠃