ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠠᠷᠪᠠ ᠂ ᠴᠠᠭᠠᠨ ᠢᠳᠡᠭᠡᠨ ᠦ ᠪᠦᠯᠦᠭ > Хөх зул – Боржигон Ванжал –" Арав ᠂ Цагаан идээний бүлэг "
460ᠠᠷᠪᠠ ᠂ ᠴᠠᠭᠠᠨ ᠢᠳᠡᠭᠡᠨ ᠦ ᠪᠦᠯᠦᠭ
ᠦᠨᠢᠶᠡᠨ ᠰᠦ
ᠦᠨᠢᠶᠡᠨ ᠡᠴᠡ ᠭᠠᠷᠬᠤ ᠰᠦ᠃ ᠭᠠᠷᠤᠴᠠ ᠪᠠᠷ ᠡᠯᠪᠡᠭ᠂ ᠰᠢᠮᠡ ᠲᠡᠵᠢᠭᠡᠯ ᠢ᠋ᠶ᠋ᠡᠷ ᠲᠡᠭᠦᠰ᠂ ᠴᠠᠭᠠᠨ ᠢᠳᠡᠭᠡᠨ ᠦ᠌ ᠲᠥᠷᠥᠯ ᠵᠦᠢᠯ ᠢ᠋ ᠪᠣᠯᠪᠠᠰᠤᠷᠠᠭᠤᠯᠬᠤ ᠭᠣᠣᠯ ᠲᠦᠭᠦᠬᠡᠢ ᠡᠳ᠋᠃ ᠦᠨᠢᠶᠡᠨ ᠰᠦ ᠪᠡᠷ ᠬᠤᠷᠤᠳ᠂ ᠰᠢᠷᠠ ᠲᠣᠰᠣ᠂ ᠴᠠᠭᠠᠨ ᠲᠣᠰᠣ᠂ ᠠᠭᠠᠷᠤᠤᠯ᠂ ᠡᠭᠡᠵᠡᠭᠡᠢ᠂ ᠵᠥᠭᠡᠬᠡᠢ᠂ ᠥᠷᠥᠮᠡ᠂ ᠪᠢᠰᠢᠯᠠᠭ᠂ ᠴᠥᠴᠥᠭᠡᠢ᠂ ᠰᠦᠨ ᠲᠠᠯᠬᠠ᠂ ᠠᠢᠷᠠᠭ᠂ ᠴᠠᠭᠠ᠂ ᠠᠷᠢᠬᠢ ᠲᠡᠷᠢᠭᠦᠲᠡᠨ ᠢ᠋ ᠪᠦᠷ ᠬᠢᠳᠡᠭ᠃ ᠴᠠᠢ ᠰᠦᠯᠡᠬᠦ ᠳ᠋ᠦ᠍ ᠪᠠᠷᠤᠭᠲᠠᠢ᠃ ᠥᠩᠭᠡ ᠨᠢ ᠴᠢᠯᠳᠡᠭᠡᠷ᠂ ᠴᠠᠢ ᠶ᠋ᠢ ᠰᠢᠩᠭᠡᠷᠡᠭᠦᠯᠳᠡᠭ᠃
ᠬᠣᠨᠢᠨ ᠰᠦ
ᠬᠣᠨᠢᠨ ᠠ᠋ᠴᠠ ᠭᠠᠷᠬᠤ ᠰᠦ ᠃ ᠰᠦ ᠨᠢ ᠥᠳᠬᠡᠨ ᠪᠥᠭᠡᠳ ᠲᠣᠰᠣᠯᠢᠭ᠃ ᠭᠣᠣᠯᠳᠠᠭᠤ ᠪᠢᠰᠢᠯᠠᠭ ᠬᠢᠬᠦ ᠂ ᠲᠠᠷᠠᠭ ᠪᠦᠷᠢᠬᠦ ᠂ᠠᠢᠷᠠᠭ ᠲᠡᠵᠢᠭᠡᠬᠦ ᠂ ᠠᠷᠢᠬᠢ ᠨᠡᠷᠡᠬᠦ ᠂ ᠡᠭᠡᠵᠡᠭᠡᠢ ( ᠠᠭᠠᠷᠤᠤᠯ ) ᠬᠢᠬᠦ ᠂ ᠰᠢᠷᠠ ᠲᠣᠰᠣ ᠠᠪᠬᠤ᠂ ᠥᠷᠥᠮᠡ ᠬᠤᠷᠢᠶᠠᠨᠠ᠃ ᠭᠡᠶᠡ ᠬᠣᠨᠢᠨ ᠰᠦ ᠪᠡᠷ ᠬᠤᠷᠤᠳ ᠬᠢᠪᠡᠯ ᠭᠠᠰᠢᠯᠠᠩᠬᠠᠢ ᠠᠮᠲᠠᠲᠠᠢ ᠪᠣᠯᠳᠠᠭ ᠪᠥᠭᠡᠳ ᠡᠪᠳᠡᠷᠡᠵᠦ ᠸᠠᠯᠠᠬᠤ ᠨᠢ ᠲᠦᠷᠭᠡᠨ ᠪᠠᠢᠳᠠᠭ᠃ ᠲᠡᠢᠮᠦ ᠡᠴᠡ ᠳᠡᠢᠯᠦᠩᠭᠦᠢ ᠨᠢ ᠠᠭᠠᠷᠤᠤᠯ ( ᠴᠤᠷᠠ ) ᠬᠢᠳᠡᠭ ᠃ ᠴᠠᠢ ᠨᠡᠢᠯᠡᠭᠦᠯᠪᠡᠯ ᠥᠩᠭᠡ᠂ ᠦᠨᠦᠷ᠂ ᠠᠮᠲᠠ ᠨᠢ ᠪᠦᠷ ᠰᠠᠢᠬᠠᠨ ᠪᠣᠯᠳᠠᠭ᠃
ᠢᠮᠠᠭᠠᠨ ᠰᠦ
ᠢᠮᠠᠭᠠᠨ ᠠ᠋ᠴᠠ ᠭᠠᠷᠬᠤ ᠰᠦ᠃ ᠰᠦ ᠨᠢ ᠰᠢᠩᠭᠡᠨ ᠴᠡᠩᠬᠡᠷᠯᠢᠭ ᠥᠩᠭᠡᠲᠡᠢ᠂ ᠲᠣᠭᠰᠢᠨ ᠴᠢᠨᠠᠷᠲᠠᠢ ᠂ ᠲᠣᠰᠣᠯᠢᠭ ᠬᠢᠭᠡᠳ ᠤᠭᠤᠷᠠᠭ ᠤ᠋ᠨ ᠬᠡᠮᠵᠢᠶᠡ ᠨᠢ ᠦᠨᠢᠶᠡᠨ ᠰᠦ ᠡᠴᠡ ᠪᠠᠭᠠ ᠪᠣᠯᠬᠣᠷ ᠭᠣᠣᠯᠳᠠᠭᠤ ᠠᠢᠷᠠᠭ ᠲᠠᠷᠠᠭ ᠢᠰᠬᠡᠬᠦ ᠳ᠋ᠦ᠍ ᠰᠠᠢᠨ ᠡᠬᠡ ᠮᠠᠲᠧᠷᠢᠶᠠᠯ ᠪᠣᠯᠳᠠᠭ᠃ ᠭᠡᠶᠡ ᠪᠢᠰᠢᠯᠠᠭ᠂ ᠠᠭᠠᠷᠤᠤᠯ ( ᠴᠤᠷᠠ ) ᠂ ᠡᠭᠡᠵᠡᠭᠡᠢ ᠬᠢᠳᠡᠭ ᠬᠥᠮᠦᠰ ᠴᠦ᠍ ᠪᠣᠢ᠃ ᠴᠠᠢ ᠰᠦᠯᠡᠬᠦ ᠳ᠋ᠦ᠍ ᠬᠠᠮᠤᠭ ᠰᠠᠢᠨ᠃
ᠭᠡᠭᠦᠦ ᠶ᠋ᠢᠨ ᠰᠦ
ᠭᠡᠭᠦᠳ ᠡᠴᠡ ᠭᠠᠷᠳᠠᠭ ᠰᠦ᠃ ᠮᠣᠩᠭᠣᠯ ᠤ᠋ᠨ 《ᠨᠠᠢ᠍ᠮᠠᠨ ᠠᠮᠲᠠᠲᠠᠨ 》 ᠤ᠋ ᠨᠢᠭᠡ᠃ ᠰᠦ ᠨᠢ ᠰᠢᠮᠡ ᠲᠡᠵᠢᠭᠡᠯ ᠢ᠋ᠶ᠋ᠡᠷ ᠡᠯᠪᠡᠭ ᠂ ᠬᠠᠯᠠᠭᠤᠨ ᠴᠢᠨᠠᠷᠲᠠᠢ ᠪᠥᠭᠡᠳ ᠢᠰᠬᠦᠯᠡᠩ ᠱᠣᠷᠪᠣᠭᠯᠢᠭ ᠠᠮᠲᠠᠲᠠᠢ᠃ ᠭᠣᠣᠯᠳᠠᠭᠤ ᠴᠡᠭᠡ ᠬᠢᠳᠡᠭ᠃
ᠢᠩᠭᠡ ᠶ᠋ᠢᠨ ᠰᠦ
ᠢᠩᠭᠡᠨ ᠡᠴᠡ ᠭᠠᠷᠬᠤ ᠰᠦ᠃ ᠰᠦ ᠨᠢ ᠥᠳᠬᠡᠨ ᠮᠥᠷᠲᠡᠭᠡᠨ ᠰᠢᠮᠡ ᠲᠡᠵᠢᠭᠡᠯ ᠰᠠᠢᠲᠠᠢ᠃ ᠴᠠᠭᠠᠨ ᠲᠣᠰᠣ ᠂ ᠰᠢᠷᠠ ᠲᠣᠰᠣ ᠂ ᠠᠭᠠᠷᠤᠤᠯ ( ᠴᠤᠷᠠ ) ᠂ ᠥᠷᠥᠮᠡ ᠠᠢᠷᠠᠭ ᠢᠰᠬᠡᠨ ᠠᠪᠳᠠᠭ ᠃ ᠴᠠᠢ ᠰᠦᠯᠡᠬᠦ ᠳ᠋ᠦ᠍ ᠣᠨᠴᠠ ᠲᠣᠬᠢᠷᠠᠮᠵᠢᠲᠠᠢ᠃
ᠤᠭᠤᠷᠠᠭ ᠰᠦ
ᠰᠠᠢᠬᠠᠨ ᠲᠥᠯᠯᠡᠭᠰᠡᠨ ᠬᠣᠨᠢ ᠂ ᠢᠮᠠᠬᠠ ᠂ ᠦᠨᠢᠶᠡ ᠂ ᠭᠡᠭᠦᠦ ᠂ ᠢᠩᠭᠡᠨ ᠡᠴᠡ ᠭᠠᠷᠤᠭᠰᠠᠨ ᠥᠳᠬᠡᠨ ᠪᠥᠭᠡᠳ ᠰᠢᠷᠠ ᠥᠩᠭᠡᠲᠡᠢ ᠠᠩᠬᠠᠨ ᠤ᠋ ᠰᠦ ᠶ᠋ᠢ ᠤᠭᠤᠷᠠᠭ ᠰᠦ ᠭᠡᠨᠡ ᠃ ᠤᠭᠤᠷᠠᠭ ᠤ᠋ᠨ ᠠᠩᠬᠠᠨ ᠤ᠋ ᠥᠳᠬᠡᠪᠲᠦᠷ ᠢ᠋ ᠨᠢ ᠬᠡᠯᠡᠭᠡᠢ ᠤᠭᠤᠷᠠᠭ ᠭᠡᠨᠡ᠃
ᠰᠢᠨᠡ ᠰᠦ ① ᠤᠭᠤᠷᠠᠭ ᠤ᠋ᠨ ᠳᠠᠷᠠᠭᠠᠬᠢ ᠰᠦ ᠶ᠋ᠢ ᠰᠢᠨᠡ ᠰᠦ ᠭᠡᠨᠡ᠃ ② ᠰᠠᠶᠢ ᠰᠠᠭᠠᠭᠰᠠᠨ ᠰᠦ᠃
ᠰᠠᠭᠠᠮᠠᠯ ᠰᠦ ᠰᠠᠢᠬᠠᠨ ᠰᠠᠭᠠᠭᠰᠠᠨ ᠰᠦ ᠶ᠋ᠢ ᠰᠠᠭᠠᠮᠠᠯ ᠰᠦ ᠭᠡᠳᠡᠭ ᠃
ᠲᠦᠭᠦᠬᠡᠢ ᠰᠦ ᠪᠤᠴᠠᠯᠭᠠᠵᠤ ᠬᠥᠭᠡᠷᠦᠭᠦᠯᠦᠭᠰᠡᠨ ᠦᠭᠡᠢ ᠰᠦ ᠶ᠋ᠢ ᠲᠦᠭᠦᠬᠡᠢ ᠰᠦ ᠭᠡᠨᠡ᠃ ᠲᠦᠭᠦᠬᠡᠢ ᠰᠦ ᠳ᠋ᠦ᠍ ᠰᠢᠮᠡ ᠲᠡᠵᠢᠭᠡᠯ ᠪᠦᠷᠢᠨ᠃
ᠬᠥᠭᠡᠷᠦᠭᠦᠯᠦᠭᠰᠡᠨ ᠰᠦ ᠪᠤᠴᠠᠯᠭᠠᠨ ᠬᠥᠭᠡᠰᠦᠷᠡᠭᠦᠯᠦᠭᠰᠡᠨ ᠰᠦ ᠶ᠋ᠢ ᠬᠥᠭᠡᠷᠦᠭᠦᠯᠦᠭᠰᠡᠨ ᠭᠡᠨᠡ᠃
ᠪᠣᠯᠭᠣᠭᠰᠠᠨ ᠰᠦ
ᠪᠤᠴᠠᠯᠭᠠᠵᠤ ᠥᠷᠥᠮᠡ ᠶ᠋ᠢ ᠨᠢ ᠠᠪᠤᠭᠠᠳ ᠦᠯᠡᠳᠡᠭᠰᠡᠨ ᠲᠡᠷᠡ ᠬᠦ᠌ ᠰᠦ ᠶ᠋ᠢ ᠪᠣᠯᠭᠣᠭᠰᠠᠨ ( ᠪᠣᠯᠤᠭᠰᠠᠨ ) ᠰᠦ ᠭᠡᠨᠡ᠃
ᠡᠭᠡᠳᠡᠭᠰᠡᠨ ᠰᠦ
ᠰᠠᠭᠠᠮᠠᠯ ᠰᠦ ᠪᠡᠨ ᠰᠠᠪᠠ ᠰᠠᠭᠠᠯᠢ ᠳ᠋ᠤ᠌ ᠬᠢᠵᠦ ᠰᠡᠷᠢᠭᠦᠨ ᠭᠠᠵᠠᠷ ( ᠵᠤᠨ ᠴᠠᠭ ) ᠲᠠᠯᠪᠢᠭᠰᠠᠨ ᠤ᠋ ᠳᠠᠷᠠᠭᠠ ᠰᠦ ᠨᠢ ᠠᠭᠠᠵᠢᠮ ᠢ᠋ᠶ᠋ᠠᠷ ᠬᠥᠰᠢᠵᠦ ᠡᠯᠢᠭᠡᠰᠢᠨᠡ᠃ ᠡᠭᠦᠨ ᠢ᠋ ᠡᠭᠡᠳᠡᠭᠰᠡᠨ ᠰᠦ ᠭᠡᠨᠡ᠃
ᠪᠦᠯᠢᠭᠰᠡᠨ ᠰᠦ
ᠪᠦᠯᠢᠵᠦ ᠲᠣᠰᠣ ᠶ᠋ᠢ ᠨᠢ ᠠᠪᠤᠭᠰᠠᠨ ᠰᠦ ᠶ᠋ᠢ ᠪᠦᠯᠢᠭᠰᠡᠨ ᠰᠦ ᠭᠡᠨᠡ᠃ ᠵᠥᠭᠡᠬᠡᠢ ᠬᠣᠨᠢ ᠂ ᠢᠮᠠᠭᠠ ᠂ ᠦᠨᠢᠶᠡ ᠂ ᠢᠩᠭᠡ ᠶ᠋ᠢᠨ ᠰᠦᠨ ᠡᠴᠡ ᠪᠦᠷ ᠵᠥᠭᠡᠬᠡᠢ ᠠᠪᠳᠠᠭ᠃ ᠰᠠᠭᠠᠮᠠᠯ ᠰᠦ ᠪᠡᠨ ᠴᠢᠯᠠᠭᠤᠨ ᠰᠠᠪᠠ ᠪᠤᠶᠤ ᠸᠠᠭᠠᠷ ᠰᠠᠪᠠ ᠵᠡᠷᠭᠡ ᠳ᠋ᠦ᠍ ᠬᠢᠭᠡᠳ ᠠᠭᠤᠷ ᠠᠮᠢᠰᠬᠤᠯ ᠰᠡᠷᠢᠭᠦᠪᠲᠦᠷ ᠭᠠᠵᠠᠷ ᠂ 7 ᠂ 8 ᠴᠠᠭ ᠲᠠᠯᠪᠢᠪᠠᠯ ᠰᠦ ᠡᠯᠢᠭᠡᠰᠢᠨ ᠡᠭᠡᠳᠡᠭᠡᠳ ᠳᠡᠭᠡᠭᠦᠷ ᠨᠢ ᠰᠢᠷᠭᠠᠯ ᠥᠩᠭᠡᠲᠡᠢ ᠬᠥᠯᠮᠦᠭᠳᠡᠭᠰᠡᠨ ᠬᠥᠷᠥᠰᠥᠯᠢᠭ ᠲᠣᠰᠣᠯᠢᠭ ᠰᠦ ᠰᠠᠭᠤᠨᠠ ᠃ ᠡᠭᠦᠨ ᠢ᠋ ᠵᠥᠭᠡᠬᠡᠢ ᠭᠡᠨᠡ ᠃ ᠪᠤᠳᠠᠭᠠ ᠬᠤᠳᠬᠤᠨ ᠢᠳᠡᠬᠦ ᠳ᠋ᠦ᠍ ᠲᠤᠩ ᠠᠮᠲᠠᠲᠠᠢ᠃
ᠰᠢᠩᠭᠡ
ᠵᠥᠭᠡᠬᠡᠢ ᠪᠡᠨ ᠬᠠᠮᠤᠭᠰᠠᠨ ᠤ᠋ ᠳᠠᠷᠠᠭᠠ ᠡᠭᠡᠳᠡᠭᠰᠡᠨ ᠰᠦ ᠶ᠋ᠢᠨ ᠳᠡᠭᠡᠷᠡ ᠦᠯᠡᠳᠡᠬᠦ ᠂ ᠵᠥᠭᠡᠬᠡᠢ ᠶ᠋ᠢᠨ ᠦᠯᠡᠳᠡᠭᠡᠯ ᠪᠦᠬᠦᠢ ᠡᠭᠡᠳᠡᠭᠰᠡᠨ ᠰᠦ ᠶ᠋ᠢᠨ ᠬᠣᠯᠢᠮᠠᠭ ᠪᠠᠢᠳᠠᠭ᠃ ᠡᠭᠦᠨ ᠢ᠋ ᠨᠢ ᠰᠢᠩᠭᠡ ᠭᠡᠨᠡ᠃ ᠵᠠᠷᠢᠮ ᠨᠢ ᠱᠤᠩᠭᠠ ᠭᠡᠳᠡᠭ᠃
ᠬᠤᠷᠤᠳ
ᠭᠣᠣᠯᠳᠠᠭᠤ ᠦᠨᠢᠶᠡᠨ ᠦ᠌ ᠡᠭᠡᠳᠡᠭᠰᠡᠨ ᠰᠦ ᠪᠡᠷ ᠬᠢᠨᠡ᠃ ᠡᠭᠡᠳᠡᠭᠰᠡᠨ ᠰᠦ ᠪᠡᠨ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠭᠡᠳ ᠵᠢᠭᠠᠬᠠᠨ ᠬᠠᠯᠠᠭᠠᠪᠠᠯ ᠰᠦ ᠨᠢ ᠵᠠᠩᠭᠢᠷᠠᠵᠤ ᠰᠢᠷᠠᠰᠤ ᠨᠢ ᠢᠯᠭᠠᠷᠠᠨᠠ᠃ ᠡᠨᠡ ᠦᠶᠡ ᠰᠢᠷᠠᠰᠤ ᠶ᠋ᠢ ᠨᠢ ᠠᠪᠴᠤ ᠵᠠᠩᠭᠢᠷᠠᠭᠰᠠᠨ ᠰᠦ ᠪᠡᠨ ᠰᠢᠨᠠᠭᠠᠨ ᠳᠤᠬᠤ ᠪᠠᠷ ᠰᠠᠢᠲᠤᠷ ᠨᠤᠬᠤᠯᠠᠵᠤ ᠪᠥᠭᠡᠮᠨᠡᠷᠡᠭᠦᠯᠦᠭᠡᠳ ᠲᠣᠭᠣᠭᠠᠨ ᠳ᠋ᠤ᠌ ᠨᠠᠭᠠᠯᠳᠤᠬᠤ ᠥᠬᠡᠢ ᠂ ᠬᠣᠭᠣᠷᠣᠨᠳᠣ ᠪᠠᠨ ᠨᠢᠭᠲᠠ ᠠᠪᠤᠯᠴᠠᠭᠰᠠᠨ ᠦᠶᠡ ᠭᠠᠷᠭᠠᠵᠤ ᠪᠡᠯᠡᠳᠬᠡᠭᠰᠡᠨ ᠣᠯᠠᠨ ᠬᠡᠪ ᠲᠡᠭᠡᠨ ᠬᠢᠵᠦ ᠰᠡᠷᠢᠭᠦᠨ ᠭᠠᠵᠠᠷ ᠰᠡᠪᠡᠷᠡᠭᠡᠨᠡ ᠃ ᠡᠭᠦᠨ ᠢ ᠬᠤᠷᠤᠳ ᠭᠡᠨᠡ ᠃ ᠪᠠᠰᠠ ᠰᠦᠨ ᠬᠤᠷᠤᠳ ᠭᠡᠳᠡᠭ᠃ ᠰᠢᠯᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠨᠤᠬᠤᠯᠠᠮᠠ ᠭᠡᠨᠡ᠃
ᠰᠢᠷᠪᠦᠰᠦᠨ ᠬᠤᠷᠤᠳ
ᠡᠭᠡᠳᠡᠭᠰᠡᠨ ᠪᠤᠶᠤ ᠳᠤᠲᠠᠭᠤ ᠡᠭᠡᠳᠡᠭᠰᠡᠨ ᠰᠦ ᠳᠡᠭᠡᠷᠡ ᠪᠡᠨ ᠪᠠᠭᠠ ᠲᠦᠭᠦᠬᠡᠢ ᠰᠦ ᠬᠣᠯᠢᠭᠠᠳ ᠡᠭᠡᠳᠡᠭᠦᠯᠵᠦ ᠬᠤᠷᠤᠳ ᠬᠢᠳᠡᠭ᠃ ᠡᠭᠦᠨ ᠢ ᠰᠢᠷᠪᠦᠰᠦᠨ ᠬᠤᠷᠤᠳ ᠭᠡᠳᠡᠭ᠃ ᠡᠭᠦᠨ ᠦ᠌ ᠥᠩᠭᠡ ᠨᠢ ᠰᠢᠷᠠᠪᠲᠤᠷ ᠂ ᠰᠢᠷᠬᠡᠭ ᠨᠢ ᠨᠢᠭᠲᠠ ᠰᠢᠷᠪᠥᠰᠥᠯᠢᠭ᠂ ᠡᠪᠳᠡᠷᠡᠬᠦ ᠨᠢ ᠤᠳᠠᠭᠠᠨ᠂ ᠬᠠᠳᠠᠭᠠᠯᠠᠬᠤ ᠳ᠋ᠤ᠌ ᠰᠠᠢᠨ᠃ ᠵᠢᠩᠨᠡᠭᠦᠷ ᠲᠦ᠍ ᠵᠢᠩᠨᠡᠪᠡᠯ ᠵᠥᠭᠡᠯᠡᠷᠡᠵᠦ ᠰᠢᠨᠡ ᠬᠤᠷᠤᠳ ᠰᠢᠭ᠋ ᠪᠣᠯᠵᠤ ᠰᠠᠢᠬᠠᠨ ᠠᠮᠲᠠᠲᠠᠢ ᠪᠠᠢᠳᠠᠭ᠃
ᠴᠠᠭᠠᠨ ᠬᠤᠷᠤᠳ
ᠠᠭᠰᠢᠷᠠᠭᠰᠠᠨ ᠠᠭᠠᠷᠴᠠ ᠶ᠋ᠢ ᠵᠥᠭᠡᠭ ᠭᠠᠯ ᠳᠡᠭᠡᠷᠡ ᠨᠡᠢᠴᠡᠲᠡᠯᠡ ᠰᠠᠢᠨ ᠨᠤᠬᠤᠵᠤ᠂ ᠲᠤᠰᠬᠠᠢ ᠬᠡᠪ ᠲᠦ᠍ ᠬᠢᠵᠦ ᠬᠡᠪᠰᠢᠶᠡᠨ ᠡᠭᠰᠢᠭᠡᠭᠰᠡᠨ ᠢ᠋ ᠴᠠᠭᠠᠨ ᠬᠤᠷᠤᠳ ᠭᠡᠨᠡ᠃
ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠠᠮᠲᠠᠲᠠᠢ ᠪᠣᠯᠭᠠᠬᠤ ᠪᠣᠯᠤᠨ ᠬᠤᠷᠤᠬᠠᠢ᠌ᠳᠠᠭᠤᠯᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠵᠦ᠂ ᠮᠥᠰᠥᠨ ᠰᠢᠬᠢᠷ᠂ ᠴᠠᠭᠠᠨ ᠰᠢᠬᠢᠷ ᠪᠤᠶᠤ ᠪᠠᠯ ᠬᠢᠳᠡᠭ ᠪᠠᠢᠯᠠ ᠃ ᠢᠳᠡᠬᠦ ᠳ᠋ᠦ᠍ ᠠᠮᠲᠠᠲᠠᠢ᠂ ᠬᠠᠳᠠᠭᠠᠯᠠᠬᠤ ᠳ᠋ᠤ᠌ ᠡᠪᠳᠡᠷᠡᠬᠦ ᠦᠭᠡᠢ᠃ ᠶᠤᠸᠠᠨ ᠂ ᠴᠢᠩ ᠦ᠋ᠨ ᠦᠶᠡ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠣᠷᠣᠭᠤᠯᠳᠠᠭ ᠪᠠᠢᠵᠠᠢ᠃
ᠴᠠᠭᠠᠨ ᠲᠣᠰᠣ
ᠴᠠᠭᠠᠨ ᠲᠣᠰᠣ ᠶ᠋ᠢ ᠪᠠᠷᠠᠭᠤᠨ ᠵᠡᠭᠦᠨ ᠣᠷᠣᠨ ᠢ᠋ᠶ᠋ᠠᠷ ᠠᠳᠠᠯᠢ ᠦᠭᠡᠢ ᠠᠪᠳᠠᠭ ᠢ᠋ ᠦᠨᠳᠦᠰᠦᠯᠡᠵᠦ ᠶᠡᠬᠡ ᠲᠥᠯᠥᠪ ᠬᠣᠶᠠᠷ ᠬᠤᠪᠢᠶᠠᠵᠠᠢ᠃ ᠨᠢᠭᠡ ᠨᠢ ᠄ ᠵᠥᠭᠡᠬᠡᠢ ᠡᠴᠡ ᠠᠪᠤᠨᠠ᠃ ᠴᠤᠭᠯᠠᠭᠤᠯᠤᠭᠰᠠᠨ ᠵᠥᠭᠡᠬᠡᠢ ᠪᠡᠨ ᠱᠦᠭᠦᠮᠡᠯ ᠳ᠋ᠦ᠍ ᠬᠢᠵᠦ ᠡᠯᠭᠦᠨ᠂ ᠰᠢᠷᠠ ᠤᠰᠤ ᠶ᠋ᠢ ᠨᠢ ᠱᠦᠭᠦᠷᠡᠭᠦᠯᠦᠭᠡᠳ᠂ ᠳᠠᠷᠠᠭᠠ ᠨᠢ ᠰᠠᠪᠠᠨ ᠳ᠋ᠤ᠌ ᠬᠢᠵᠦ ᠬᠤᠳᠬᠤᠵᠤ ᠲᠣᠰᠣᠯᠢᠭ ᠢ᠋ ᠨᠢ ᠰᠢᠷᠠ ᠤᠰᠤᠨ ᠠ᠋ᠴᠠ ᠢᠯᠭᠠᠨᠠ᠃ ᠡᠭᠦᠨ ᠢ᠋ ᠴᠠᠭᠠᠨ ᠲᠣᠰᠣ ᠭᠡᠨᠡ᠃ ᠡᠭᠦᠨ ᠢ᠋ ᠵᠡᠭᠦᠨ ᠣᠷᠣᠨ ᠵᠢᠷᠢᠮ᠂ ᠵᠣᠣ ᠤᠳᠠ ᠪᠠᠷ ᠬᠢᠳᠡᠭ ᠃ ᠨᠥᠭᠦᠭᠡ ᠨᠢ : ᠠᠢᠷᠠᠭ ᠪᠦᠯᠢᠵᠦ ᠴᠠᠭᠠᠨ ᠲᠣᠰᠣ ᠠᠪᠳᠠᠭ᠃ ᠰᠠᠭᠠᠭᠰᠠᠨ ᠰᠦ ᠪᠡᠨ ᠡᠬᠡ ᠬᠥᠷᠥᠩᠭᠡ ᠳ᠋ᠦ᠍ ᠬᠢᠵᠦ᠂ ᠢᠰᠬᠦᠯᠡᠩ ᠮᠥᠷᠲᠡᠭᠡᠨ ᠠᠮᠲᠠᠲᠠᠢ ᠠᠢᠷᠠᠭ ᠬᠥᠭᠡᠰᠦᠷᠡᠬᠦ ᠦᠶᠡ 3 - 4000 ᠣᠷᠴᠢᠮ ᠪᠦᠯᠢᠬᠦ ᠳ᠋ᠦ᠍ ᠲᠣᠰᠣ ᠨᠢ ᠢᠯᠭᠠᠷᠠᠨᠠ᠃ ᠡᠭᠦᠨ ᠢ ᠴᠠᠭᠠᠨ ᠲᠣᠰᠣ ᠭᠡᠳᠡᠭ ᠃ ᠡᠭᠦᠨ ᠢ᠋ ᠭᠣᠣᠯᠳᠠᠭᠤ ᠪᠠᠷᠠᠭᠤᠨ ᠣᠷᠣᠨ ᠤ᠋ ᠠᠯᠠᠱᠠ ᠂ ᠪᠠᠶᠠᠨᠨᠠᠭᠤᠷ ᠂ ᠤᠯᠠᠭᠠᠨᠴᠠᠪ ᠢ᠋ᠶ᠋ᠠᠷ ᠬᠢᠳᠡᠭ᠃ ᠴᠠᠭᠠᠨ ᠲᠣᠰᠣ ᠪᠣᠯ ᠰᠢᠷᠠ ᠲᠣᠰᠣᠨ ᠬᠢᠬᠦ ᠡᠬᠡ ᠮᠠᠲ᠋ᠧᠷᠢᠶᠠᠯ ᠪᠣᠯᠤᠨᠠ᠃
ᠰᠢᠷᠠ ᠲᠣᠰᠣ
ᠵᠥᠭᠡᠬᠡᠢ ( ᠲᠦᠭᠦᠬᠡᠢ ᠥᠷᠥᠮᠡ ) ᠂ ᠴᠠᠭᠠᠨ ᠲᠣᠰᠣ ᠪᠠᠨ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠵᠦ ᠬᠠᠢᠯᠤᠭᠤᠯᠤᠭᠠᠳ ᠢᠯᠭᠠᠷᠠᠭᠤᠯᠵᠤ ᠠᠪᠤᠭᠰᠠᠨ ᠴᠡᠪᠡᠷ ᠲᠤᠩᠭᠠᠯᠠᠭ ᠰᠢᠷᠠ ᠥᠩᠭᠡᠲᠡᠢ ᠰᠢᠩᠭᠡᠨ ᠪᠣᠳᠠᠰ ᠢ᠋ ᠰᠢᠷᠠ ᠲᠣᠰᠣᠨ ᠬᠡᠮᠡᠮᠦᠢ᠃
ᠮᠠᠨ ᠤ᠋ ᠬᠢᠨ ᠰᠢᠷᠠ ᠲᠣᠰᠣ ᠶ᠋ᠢ ᠬᠣᠶᠠᠷ ᠵᠦᠢᠯ ᠢ᠋ᠶ᠋ᠡᠷ ᠠᠪᠳᠠᠭ᠃ ᠨᠢᠭᠡ ᠨᠢ ᠬᠣᠨᠢ ᠂ ᠢᠮᠠᠭᠠ ᠂ ᠦᠨᠢᠶᠡ ᠂ ᠢᠩᠭᠡᠨ ᠦ᠌ ᠰᠦ ᠪᠡᠷ ᠠᠢᠷᠠᠭ ᠪᠦᠯᠢᠵᠦ ᠴᠠᠭᠠᠨ ᠲᠣᠰᠣ ᠠᠪᠤᠭᠠᠳ ᠲᠡᠭᠦᠨ ᠢ᠋ᠶ᠋ᠡᠨ ᠬᠠᠢᠯᠤᠭᠤᠯᠵᠤ ᠰᠢᠷᠠ ᠲᠣᠰᠣ ᠠᠪᠳᠠᠭ᠃ ᠨᠥᠭᠦᠭᠡ ᠨᠢ : ᠭᠣᠣᠯᠳᠠᠭᠤ ᠦᠨᠢᠶᠡᠨ ᠰᠦᠨ ᠦ᠌ ᠵᠥᠭᠡᠬᠡᠢ ᠪᠡᠨ ᠡᠷᠴᠢᠭᠡᠨ ᠬᠠᠢᠯᠤᠭᠤᠯᠵᠤ ᠰᠢᠷᠠ ᠲᠣᠰᠣ ᠠᠪᠳᠠᠭ᠃ ᠦᠨᠢᠶᠡ ᠂ ᠬᠣᠨᠢ ᠂ ᠢᠮᠠᠭᠠᠨ ᠤ᠋ ᠲᠣᠰᠣ ᠨᠢ ᠰᠢᠷᠠ ᠥᠩᠭᠡᠲᠡᠢ ᠂ ᠰᠢᠮᠡ ᠲᠡᠭᠦᠰ ᠂ ᠰᠠᠢᠬᠠᠨ ᠪᠠᠢᠳᠠᠭ᠃ ᠢᠯᠠᠩᠭᠤᠶᠠ ᠦᠨᠢᠶᠡᠨ ᠦ᠌ ᠬᠢᠨᠢ ᠣᠬᠢ ᠮᠠᠩᠯᠠᠢ ᠲᠣᠰᠣ ᠪᠣᠯᠠᠢ᠃ ᠢᠩᠭᠡᠨ ᠦ᠌ ᠰᠢᠷᠠ ᠲᠣᠰᠣ ᠨᠢ ᠥᠩᠭᠡ ᠴᠠᠭᠠᠨ ᠴᠢᠨᠠᠷ ᠢ᠋ᠶ᠋ᠠᠷ ᠦᠨᠢᠶᠡᠨ ᠲᠣᠰᠣᠨ ᠳ᠋ᠤ᠌ ᠬᠦᠷᠬᠦ ᠦᠭᠡᠢ ᠪᠠᠢᠳᠠᠭ᠃
ᠴᠥᠴᠥᠭᠡᠢ
ᠰᠢᠷᠠ ᠲᠣᠰᠣ ᠶ᠋ᠢ ᠰᠢᠷᠭᠠᠭᠠᠨ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠲᠡᠭᠦᠨ ᠦ᠌ ᠳᠣᠣᠷᠠ ᠦᠯᠡᠳᠡᠭᠰᠡᠨ ᠰᠢᠷᠠᠩᠭᠤᠢ ᠥᠩᠭᠡᠲᠡᠢ ᠰᠢᠭᠠᠷᠤᠭ ᠢ᠋ ᠴᠥᠴᠥᠭᠡᠢ ᠭᠡᠨᠡ ( ᠬᠡᠰᠢᠭᠲᠡᠨ ᠳ᠋ᠦ᠍ ᠴᠠᠭᠠᠨ ᠲᠣᠰᠣ ᠭᠡᠵᠦ ᠂ ᠪᠠᠷᠭᠤ ᠳ᠋ᠤ᠌ ᠰᠦᠰᠦᠭᠡᠢ ᠭᠡᠮᠡᠨ᠂ ᠰᠥᠨᠢᠳ ᠲᠦ᠍ ᠴᠥᠪ ᠭᠡᠳᠡᠭ᠃ ᠵᠠᠷᠢᠮ ᠭᠠᠵᠠᠷ ᠰᠢᠩᠭᠡ ᠶ᠋ᠢ ᠴᠥᠴᠥᠭᠡᠢ ᠭᠡᠳᠡᠭ ) ᠃
ᠥᠷᠥᠮᠡ ᠲᠦᠭᠦᠬᠡᠢ ᠪᠠ ᠪᠣᠯᠭᠣᠭᠰᠠᠨ ᠰᠦᠨ ᠦ᠌ ᠳᠡᠭᠡᠭᠦᠷ ᠬᠦᠯᠮᠦᠭᠳᠡᠨ ᠰᠠᠭᠤᠭᠰᠠᠨ ᠰᠦᠨ ᠦ᠌ ᠬᠥᠷᠥᠰᠥ ᠶ᠋ᠢ ᠥᠷᠥᠮᠡ ᠭᠡᠨᠡ ᠃
ᠡᠷᠴᠢᠭᠡᠭᠰᠡᠨ ᠥᠷᠥᠮᠡ
ᠵᠥᠭᠡᠬᠡᠢ ᠪᠡᠨ ᠱᠦᠭᠦᠮᠡᠯ ᠳ᠋ᠦ᠍ ᠬᠢᠵᠦ ᠱᠦᠭᠦᠷᠡᠭᠦᠯᠦᠭᠡᠳ ᠳᠠᠬᠢᠨ ᠰᠠᠪᠠᠨ ᠳ᠋ᠤ᠌ ᠬᠢᠵᠦ᠂ ᠴᠡᠪᠡᠷ ᠮᠣᠳᠣ ᠪᠠᠷ ( ᠭᠤᠯᠢᠷ ᠤ᠋ᠨ ᠮᠣᠳᠣ ) ᠬᠤᠳᠬᠤᠪᠠᠯ ᠪᠠᠷᠤᠭ ᠴᠠᠭ ᠤ᠋ᠨ ᠳᠣᠲᠣᠷᠠ ᠵᠥᠭᠡᠬᠡᠢ ᠨᠢ ᠡᠷᠴᠢᠵᠦ ᠴᠠᠭᠠᠨ ᠲᠣᠰᠣ ᠤᠨᠠᠨ ᠪᠥᠭᠡᠮᠨᠡᠷᠡᠨᠡ᠃ ᠡᠭᠦᠨ ᠢ᠋ ᠡᠷᠴᠢᠭᠡᠭᠰᠡᠨ ᠥᠷᠥᠮᠡ ᠭᠡᠨᠡ ( ᠵᠢᠷᠢᠮ᠂ ᠵᠣᠣ ᠤᠳᠠ᠃ )
ᠲᠦᠭᠦᠬᠡᠢ ᠥᠷᠥᠮᠡ ᠵᠥᠭᠡᠬᠡᠢ ᠃ ᠲᠦᠭᠦᠬᠡᠢ ᠰᠦ ᠶ᠋ᠢᠨ ᠳᠡᠭᠡᠷᠡ ᠲᠣᠭᠲᠠᠭᠰᠠᠨ ᠥᠷᠥᠮᠡ᠃
ᠬᠥᠭᠡᠷᠦᠭᠦᠯᠦᠭᠰᠡᠨ ᠥᠷᠥᠮᠡ
ᠲᠦᠭᠦᠬᠡᠢ ᠰᠦ ᠪᠡᠨ ᠵᠥᠭᠡᠭ ᠭᠠᠯ ᠲᠠᠢ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠭᠡᠳ ᠣᠯᠠᠨᠲᠠ ᠰᠠᠮᠤᠷᠤᠨ ᠬᠥᠭᠡᠰᠦᠷᠡᠭᠦᠯᠦᠨ ᠴᠣᠬᠣᠷᠳᠠᠭᠤᠯᠵᠤ ᠴᠠᠷᠴᠠᠭᠠᠨ ᠠᠪᠤᠭᠰᠠᠨ ᠢ᠋ ᠬᠥᠭᠡᠷᠦᠭᠦᠯᠦᠭᠰᠡᠨ ᠥᠷᠥᠮᠡ ᠭᠡᠨᠡ᠃
ᠬᠠᠲᠠᠭᠠᠭᠰᠠᠨ ᠥᠷᠥᠮᠡ
ᠬᠥᠭᠡᠷᠦᠭᠦᠯᠦᠭᠰᠡᠨ ᠥᠷᠥᠮᠡ ᠪᠡᠨ ᠰᠡᠪᠡᠷᠡᠭᠡᠨ ᠬᠠᠲᠠᠭᠠᠵᠤ ᠠᠪᠤᠭᠰᠠᠨ ᠢ ᠨᠢ ᠬᠠᠲᠠᠭᠠᠭᠰᠠᠨ ᠥᠷᠥᠮᠡ ᠭᠡᠨᠡ᠃
ᠲᠠᠷᠬᠠᠭᠠ ᠥᠷᠥᠮᠡ ᠬᠥᠭᠡᠷᠦᠭᠦᠯᠦᠭᠰᠡᠨ ᠥᠷᠥᠮᠡ᠃
ᠬᠥᠰᠢᠭᠡᠭᠰᠡᠨ ᠥᠷᠥᠮᠡ ᠬᠥᠭᠡᠷᠦᠭᠦᠯᠦᠭᠰᠡᠨ ᠥᠷᠥᠮᠡ᠃
ᠳᠠᠷᠬᠠᠨ ᠥᠷᠥᠮᠡ
ᠬᠠᠲᠠᠭᠠᠭᠰᠠᠨ ᠥᠷᠥᠮᠡ ᠃ ᠥᠷᠥᠮᠡ ᠪᠣᠯ ᠮᠣᠩᠭᠣᠯᠴᠤᠳ ᠤ᠋ᠨ ᠴᠠᠭᠠᠨ ᠢᠳᠡᠭᠡᠨ ᠦ᠌ ᠳᠣᠲᠣᠷᠠᠬᠢ ᠥᠩᠭᠡᠲᠡᠢ᠂ ᠰᠢᠮᠡᠲᠡᠢ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠴᠠᠭᠠᠨ ᠢᠳᠡᠭᠡᠨ᠃
ᠪᠢᠰᠢᠯᠠᠭ
ᠪᠢᠰᠢᠯᠠᠭ ᠲᠤ᠌ ᠲᠦᠭᠦᠬᠡᠢ ᠰᠦᠨ ᠦ᠌ ᠪᠢᠰᠢᠯᠠᠭ ᠬᠢᠭᠡᠳ ᠪᠣᠯᠭᠣᠭᠰᠠᠨ ᠰᠦᠨ ᠦ᠌ ᠪᠢᠰᠢᠯᠠᠭ ᠭᠡᠵᠦ ᠬᠣᠶᠠᠷ ᠪᠣᠢ᠃ ᠪᠢᠰᠢᠯᠠᠭ ᠢ᠋ ᠭᠣᠣᠯᠳᠠᠭᠤ ᠬᠠᠪᠤᠷ ᠨᠠᠮᠤᠷ ᠤ᠋ᠨ ᠴᠠᠭ ᠲᠤ᠌ ᠬᠣᠨᠢ ᠢᠮᠠᠭᠠᠨ ᠤ᠋ ᠰᠦ ᠪᠡᠷ ᠬᠢᠳᠡᠭ᠃
ᠲᠦᠭᠦᠬᠡᠢ ᠰᠦᠨ ᠪᠢᠰᠢᠯᠠᠭ
ᠵᠥᠭᠡᠭ ᠭᠠᠯ ᠲᠠᠢ ᠲᠣᠭᠣᠭᠠᠨ ᠳᠡᠭᠡᠷᠡ ᠲᠦᠭᠦᠬᠡᠢ ᠰᠦ ᠪᠡᠨ ᠬᠢᠵᠦ ᠬᠥᠭᠡᠷᠦᠭᠦᠯᠦᠭᠡᠳ ᠲᠤᠰ ᠰᠦ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠪᠠᠨ ᠤ᠋ ᠨᠢᠭᠡᠨ ᠦ᠌ ᠬᠠᠷᠢᠴᠠᠯ ᠢ᠋ᠶ᠋ᠠᠷ ᠠᠢᠷᠠᠭ ᠬᠢᠪᠡᠯ ᠪᠤᠴᠠᠯᠤᠭᠰᠠᠨ ᠰᠦ ᠳᠠᠷᠤᠢ ᠡᠭᠡᠳᠡᠨᠡ᠃ ᠡᠨᠡ ᠬᠦ᠌ ᠡᠭᠡᠳᠡᠮᠡᠭ ᠢ᠋ᠶ᠋ᠡᠨ ᠱᠦᠭᠦᠮᠡᠯ ᠳ᠋ᠦ᠍ ᠬᠢᠵᠦ ᠰᠢᠷᠠᠰᠤ ᠶ᠋ᠢ ᠨᠢ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠴᠡᠪᠡᠷ ᠪᠥᠰ ᠲᠦ᠍ ᠪᠠᠭᠯᠠᠨ ᠬᠦᠨᠳᠦ ᠶᠠᠭᠤᠮᠠ ᠪᠠᠷ ᠳᠠᠷᠤᠵᠤ ᠠᠭᠢᠷᠠᠭᠠᠨᠠ ( ᠬᠡᠰᠢᠭᠲᠡᠨ ᠳ᠋ᠦ᠍ ᠡᠭᠡᠳᠡᠮ ᠭᠡᠳᠡᠭ᠃ ᠪᠠᠰᠠ ᠵᠦᠰᠦᠭᠰᠡᠨ ᠢ᠋ ᠨᠢ ᠪᠢᠰᠢᠯᠠᠭ ᠴᠤ᠌ ᠭᠡᠳᠡᠭ ) ᠃
ᠪᠣᠯᠭᠣᠭᠰᠠᠨ ᠰᠦᠨ ᠪᠢᠰᠢᠯᠠᠭ
ᠰᠦ ᠪᠡᠨ ᠬᠥᠭᠡᠷᠦᠭᠦᠯᠵᠦ ᠥᠷᠥᠮᠡ ᠪᠡᠨ ᠠᠪᠤᠭᠠᠳ᠂ ᠦᠯᠡᠳᠡᠭᠰᠡᠨ ᠰᠦ ᠪᠡᠨ ᠳᠠᠬᠢᠨ ᠪᠤᠴᠠᠯᠭᠠᠵᠤ ᠳᠡᠭᠡᠷᠡᠬᠢ ᠠᠷᠭᠠ ᠪᠠᠷ ᠬᠢᠨᠡ᠃ ᠤᠯᠠᠭᠠᠪᠤᠷ ᠰᠢᠷᠠᠪᠲᠤᠷ ᠥᠩᠭᠡᠲᠡᠢ᠃
ᠡᠭᠡᠵᠡᠭᠡᠢ
ᠰᠢᠷᠠᠰᠤ ᠶ᠋ᠢ ᠵᠦᠬᠡᠭ ᠭᠠᠯ ᠳᠡᠭᠡᠷᠡ ᠳᠥᠯᠭᠡᠬᠡᠨ ᠪᠤᠴᠠᠯᠭᠠᠵᠤ ᠠᠭᠰᠢᠷᠠᠵᠤ ᠥᠳᠬᠡᠷᠡᠭᠰᠡᠨ ᠵᠦᠢᠯ ᠢ᠋ ᠱᠦᠭᠦᠮᠡᠯ ᠳ᠋ᠦ᠍ ᠬᠢᠵᠦ ᠱᠦᠭᠦᠷᠡᠭᠦᠯᠦᠨ ᠡᠭᠰᠢᠭᠡᠵᠦ ᠠᠪᠤᠭᠠᠳ ᠮᠣᠳᠣᠨ ᠳᠠᠪᠰᠢᠨ ᠳᠡᠭᠡᠷᠡ ᠪᠥᠮᠪᠥᠭᠡᠯᠡᠬᠦ ᠪᠤᠶᠤ ᠵᠦᠰᠦᠵᠦ ᠡᠰᠡᠬᠦᠯᠡ ᠪᠠᠵᠠᠵᠤ ᠬᠠᠲᠠᠭᠠᠨ ᠠᠪᠬᠤ ᠶ᠋ᠢ ᠡᠭᠡᠵᠡᠭᠡᠢ ᠭᠡᠨᠡ᠃
ᠴᠤᠷᠠ ᠳᠡᠯᠡᠰ ᠡᠭᠡᠵᠡᠭᠡᠢ ( ᠠᠯᠠᠱᠠ ᠂ ᠬᠥᠬᠡᠨᠠᠭᠤᠷ ᠲᠤ᠌ ) ᠃
ᠠᠭᠠᠷᠤᠤᠯ ᠪᠠᠵᠠᠭᠰᠠᠨ ᠡᠭᠡᠵᠡᠭᠡᠢ ( ᠪᠠᠶᠠᠨᠨᠠᠭᠤᠷ ᠲᠤ᠌ ) ᠃
ᠱᠦᠭᠦᠮᠡᠭ ᠡᠭᠡᠵᠡᠭᠡᠢ ( ᠬᠡᠰᠢᠭᠲᠡᠨ ᠳ᠋ᠦ᠍ ) ᠬᠣᠨᠢ ᠢᠮᠠᠭᠠᠨ ᠰᠦ ᠨᠢ ᠬᠤᠷᠤᠳ ᠬᠢᠬᠦ ᠳ᠋ᠦ᠍ ᠨᠡᠢᠴᠡᠪᠦᠷᠢ ᠮᠠᠭᠤᠲᠠᠢ ᠠ᠋ᠴᠠ ᠭᠣᠣᠯᠳᠠᠭᠤ ᠠᠭᠠᠷᠤᠤᠯ ᠡᠭᠡᠵᠡᠭᠡᠢ ᠬᠢᠳᠡᠭ᠃
ᠠᠢᠷᠠᠭ
ᠢᠰᠬᠡᠭᠰᠡᠨ ᠬᠥᠷᠥᠩᠭᠡ ᠳᠡᠭᠡᠷᠡ ᠪᠡᠨ ᠥᠷᠯᠥᠭᠡ ᠦᠳᠡᠰᠢ ᠶ᠋ᠢᠨ ᠰᠦ ᠪᠡᠨ ᠬᠢᠪᠡᠯ ᠳᠠᠷᠤᠢ ᠠᠢᠷᠠᠭ ᠪᠣᠯᠤᠨᠠ᠃
ᠬᠤᠷᠢᠶᠠᠭᠰᠠᠨ ᠲᠦᠭᠦᠬᠡᠢ ᠠᠢᠷᠠᠭ ᠠᠢᠷᠠᠭ ( ᠣᠷᠳᠣᠰ ᠲᠤ᠌ )
ᠠᠢᠷᠠᠭ ᠰᠠᠭᠭᠠᠬᠤ ᠲᠠᠯᠪᠢᠭᠰᠠᠨ ᠠᠢᠷᠠᠭ ᠪᠦᠯᠢᠭᠰᠡᠨ ᠦᠭᠡᠢ ᠦᠶᠡ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠠᠭᠰᠢᠵᠤ ᠥᠳᠬᠡᠷᠡᠬᠦ᠃
ᠴᠡᠭᠡ
ᠭᠡᠭᠦᠨ ᠰᠦ ᠶ᠋ᠢ ᠢᠰᠬᠡᠭᠰᠡᠨ ᠬᠥᠷᠥᠩᠭᠡ ᠳᠡᠭᠡᠷᠡ ᠪᠡᠨ ᠬᠢᠵᠦ ᠪᠦᠯᠢᠵᠦ ᠪᠣᠯᠪᠠᠰᠤᠷᠠᠭᠤᠯᠤᠨᠠ᠃ ᠴᠡᠩᠬᠡᠷ ᠴᠠᠭᠠᠨ ᠥᠩᠭᠡᠲᠡᠢ᠃ ᠬᠥᠭᠡᠰᠦᠷᠡᠵᠦ ᠱᠤᠤᠭᠢᠭᠠᠳ ᠬᠠᠩᠬᠤᠯᠤᠭᠰᠠᠨ ᠦᠨᠦᠷ ᠭᠠᠷᠤᠨᠠ᠃ ᠬᠥᠷᠥᠩᠭᠡ ᠶ᠋ᠢ ᠨᠢᠭᠡ ᠳ᠋ᠦ᠍ ᠄ ᠦᠨᠢᠶᠡᠨ ᠰᠦ ᠪᠡᠷ ᠬᠢᠭᠰᠡᠨ ᠠᠢᠷᠠᠭ ᠤ᠋ᠨ ᠬᠥᠷᠥᠩᠭᠡ ᠳᠡᠭᠡᠷᠡ ᠭᠡᠭᠦᠨ ᠰᠦ ᠶ᠋ᠢ ᠭᠦᠢᠴᠡᠳ ᠬᠥᠷᠥᠭᠡᠵᠦ ᠬᠢᠭᠡᠳ ᠲᠤᠰᠬᠠᠢ ᠭᠠᠩ ᠳ᠋ᠤ᠌ ᠢᠰᠬᠡᠨᠡ᠃ ᠬᠣᠶᠠᠷ ᠲᠤ᠌ : ᠪᠤᠰᠤᠳ ᠤ᠋ᠨ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠴᠡᠬᠡ ᠶ᠋ᠢᠨ ᠬᠥᠷᠥᠩᠭᠡ ᠡᠴᠡ ᠵᠠᠯᠠᠬᠤ᠃ ᠭᠤᠷᠪᠠ ᠳ᠋ᠤ᠌ ᠂ ᠡᠯᠡ ᠵᠦᠢᠯ ᠦ᠋ᠨ ᠤᠭᠤᠷᠠᠭ ᠳᠡᠭᠡᠷᠡ ᠠᠢᠷᠠᠭ ᠤ᠋ᠨ ᠬᠥᠷᠥᠩᠭᠡ ᠬᠢᠵᠦ ᠢᠰᠬᠡᠨᠡ᠃ ᠳᠥᠷᠪᠡ ᠳ᠋ᠦ᠍ ᠂ 1-2 ᠯᠠᠩ ᠬᠢᠷᠢ ᠱᠦᠷᠬᠡᠢ ᠪᠣᠯᠭᠣᠭᠰᠠᠨ ᠮᠣᠩᠭᠣᠯ ᠠᠮᠤ ᠳᠡᠭᠡᠷᠡ ᠬᠠᠷᠠ ᠠᠷᠢᠬᠢ ᠪᠠᠨ ᠬᠢᠵᠦ ᠬᠤᠳᠬᠤᠭᠠᠳ ᠰᠠᠪᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠠᠰᠠᠷ ᠢ᠋ ᠰᠠᠢᠲᠤᠷ ᠴᠢᠩᠳᠠᠯᠠᠨ ᠪᠣᠭᠣᠵᠤ ᠲᠠᠯᠪᠢᠨᠠ᠃ ᠲᠠᠪᠤ ᠳ᠋ᠤ᠌ : ᠲᠠᠪᠤᠨ ᠵᠢᠩ ᠬᠡᠭᠦᠨ ᠰᠦᠨ ᠳᠡᠭᠡᠷᠡ 4-5 ᠯᠠᠩ ᠬᠠᠷᠠ ᠠᠷᠢᠬᠢ ᠬᠢᠵᠦ ᠪᠠᠢᠨ ᠪᠠᠢᠨ ᠪᠦᠯᠢᠵᠦ ᠢᠰᠬᠡᠨ ᠠᠪᠤᠨᠠ᠃
ᠲᠠᠷᠠᠭ ᠲᠦᠭᠦᠬᠡᠢ ᠂ ᠪᠣᠯᠭᠣᠭᠰᠠᠨ ᠰᠦ ᠪᠡᠷ ᠬᠢᠳᠡᠭ ᠃
ᠳᠥᠴᠢᠨ ᠬᠡᠳᠦᠨ ᠭᠷᠠᠳᠦ᠋ᠰ ᠬᠠᠯᠠᠭᠠᠭᠰᠠᠨ ᠰᠦᠨ ᠳᠡᠭᠡᠷᠡ ᠪᠡᠨ ᠵᠠᠭᠤᠨ ᠤ᠋ ᠬᠣᠶᠠᠷ᠂ ᠭᠤᠷᠪᠠ ᠶ᠋ᠢᠨ ᠬᠠᠷᠢᠴᠠᠯ ᠢ᠋ᠶ᠋ᠠᠷ ᠬᠥᠷᠥᠩᠭᠡ ᠬᠢᠵᠦ ᠰᠠᠢᠲᠤᠷ ᠬᠤᠳᠬᠤᠵᠤ ᠨᠡᠢᠴᠡᠭᠦᠯᠦᠭᠡᠳ ᠂ ᠰᠠᠪᠠᠨ ᠳ᠋ᠤ᠌ ᠬᠢᠵᠦ ᠪᠦᠷᠢᠵᠦ ᠲᠠᠯᠪᠢᠨᠠ᠃ ᠳᠤᠯᠠᠭᠠᠨ ᠢ ᠥᠭᠬᠦ ᠶ᠋ᠢᠨ ᠲᠥᠯᠥᠭᠡ ᠳᠡᠪᠡᠯ ᠪᠤᠶᠤ ᠬᠥᠪᠥᠩᠲᠡᠢ ᠬᠤᠴᠢᠯᠭᠠ ᠪᠠᠷ ᠬᠤᠴᠢᠵᠤ ᠲᠠᠯᠪᠢᠨᠠ᠃ ᠬᠠᠷᠢᠨ ᠠᠢᠷᠠᠭ ᠰᠢᠭ᠋ ᠪᠦᠯᠢᠵᠦ ᠪᠣᠯᠬᠤ ᠦᠭᠡᠢ᠃
ᠲᠡᠷᠡ ᠪᠣᠯ ᠢᠰᠬᠦᠯᠡᠩ ᠪᠥᠭᠡᠳ ᠰᠦᠨ ᠠᠮᠲᠠᠲᠠᠢ᠃ ᠢᠳᠡᠬᠦ ᠳ᠋ᠦ᠍ ᠰᠣᠨᠢᠨ ᠲᠠᠭᠠᠲᠠᠢ ᠰᠠᠨᠠᠭᠳᠠᠳᠠᠭ᠃ ᠭᠣᠣᠯᠳᠠᠭᠤ ᠡᠪᠦᠯ ᠦ᠋ᠨ ᠤᠯᠠᠷᠢᠯ ᠳ᠋ᠤ᠌ ᠬᠢᠳᠡᠭ ᠃
ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ
ᠡᠯᠡ ᠮᠠᠯ ᠤ᠋ᠨ ᠰᠦ ᠪᠡᠷ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠠᠢᠷᠠᠭ ᠢ᠋ᠶ᠋ᠠᠷ ᠨᠡᠷᠡᠵᠦ ᠭᠠᠷᠭᠠᠭᠰᠠᠨ ᠠᠷᠢᠬᠢ ᠶ᠋ᠢ ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ ᠭᠡᠳᠡᠭ᠃
ᠮᠠᠯ ᠤ᠋ᠨ ᠠᠷᠢᠬᠢ ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ᠃
ᠨᠡᠷᠡᠮᠡᠯ ᠠᠷᠢᠬᠢ ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ᠃
ᠠᠢᠷᠠᠭ ᠤ᠋ᠨ ᠠᠷᠢᠬᠢ ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ᠃
ᠮᠣᠩᠭᠣᠯ ᠠᠷᠢᠬᠢ ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ᠃
ᠲᠣᠭᠣᠭᠠ ᠨᠡᠷᠡᠬᠦ
ᠠᠢᠷᠠᠭ ᠢ᠋ᠶ᠋ᠠᠷ ᠠᠷᠢᠬᠢ ᠨᠡᠷᠡᠬᠦ ᠶᠠᠪᠤᠴᠠ ᠶ᠋ᠢ ᠲᠣᠭᠣᠭᠠ ᠨᠡᠷᠡᠬᠦ ᠭᠡᠨᠡ᠃ ᠣᠳᠣᠬᠠᠨ ᠳ᠋ᠤ᠌ ᠬᠣᠶᠠᠷ ᠵᠦᠢᠯ ᠦ᠋ᠨ ᠠᠷᠭᠠ ᠪᠠᠷ ᠨᠡᠷᠡᠳᠡᠭ ᠃
ᠪᠦᠷᠬᠦᠬᠡᠷ ᠢ᠋ᠶ᠋ᠡᠷ ᠨᠡᠷᠡᠬᠦ
ᠪᠦᠯᠢᠭᠰᠡᠨ ᠠᠢᠷᠠᠭ ᠢ᠋ᠶ᠋ᠠᠨ ᠲᠣᠭᠣᠭᠠᠨ ᠳ᠋ᠠᠭᠠᠨ ᠳᠡᠭᠡᠷᠡ ᠳᠤᠮᠳᠠᠭᠤᠷ ᠪᠤᠶᠤ ᠪᠢᠯᠬᠠᠲᠠᠯᠠ ᠬᠢᠵᠦ ᠳᠡᠭᠡᠷᠡ ᠨᠢ ᠳᠡᠭᠡᠭᠰᠢ ᠪᠡᠨ ᠱᠤᠪᠲᠤᠩ᠂ ᠳᠣᠣᠷᠠ ᠪᠠᠨ ᠰᠠᠷᠪᠠᠭᠠᠷ ᠰᠠᠭᠤᠯᠠᠭᠠᠨ ᠬᠡᠯᠪᠡᠷᠢᠲᠦ ᠬᠣᠶᠠᠷ ᠲᠣᠬᠣᠢ ᠬᠢᠷᠢ ᠥᠨᠳᠥᠷ ᠪᠦᠷᠬᠦᠬᠡᠷ ᠢ᠋ᠶ᠋ᠡᠨ ᠶᠠᠪ ᠴᠠᠪ ᠲᠠᠭᠠᠷᠠᠭᠤᠯᠵᠤ᠂ ᠬᠤᠪᠢᠩ ᠢ᠋ᠶ᠋ᠠᠨ ᠳᠡᠭᠦᠵᠢᠯᠡᠵᠦ ᠪᠦᠷᠬᠦᠭᠡᠷ ᠦ᠋ᠨ ᠳᠡᠭᠡᠳᠦ ᠠᠮᠠᠰᠠᠷ ᠳᠡᠭᠡᠷᠡ ᠵᠢᠯᠠᠪᠴᠢ ᠪᠠᠨ ᠲᠠᠯᠪᠢᠭᠠᠳ ᠵᠢᠯᠠᠪᠴᠢ᠂ ᠲᠣᠭᠣᠭᠠ᠂ ᠪᠦᠷᠬᠦᠭᠡᠷ ᠦ᠋ᠨ ᠠᠭᠤᠯᠵᠠᠷ ᠢ ᠪᠥᠰ ᠪᠤᠶᠤ ᠢᠰᠡᠭᠡᠢ ᠪᠡᠷ ᠣᠷᠢᠶᠠᠵᠤ ᠪᠡᠬᠢᠯᠡᠭᠡᠳ᠂ ᠭᠠᠯ ᠢ᠋ᠶ᠋ᠠᠨ ᠲᠦᠯᠡᠪᠡᠯ ᠠᠢᠷᠠᠭ ᠨᠢ ᠪᠤᠴᠠᠯᠵᠤ ᠠᠷᠢᠬᠢᠯᠢᠭ᠋ ᠪᠦᠷᠢᠯᠳᠦᠬᠦᠨ ᠨᠢ ᠠᠭᠤᠷᠰᠢᠨ ᠳᠡᠭᠳᠡᠵᠦ ᠬᠦᠢᠲᠡᠨ ᠤᠰᠤ ᠪᠦᠬᠦᠢ ᠵᠢᠯᠠᠪᠴᠢᠨ ᠤ᠋ ᠢᠷᠣᠭᠠᠷ ᠲᠤ᠌ ᠬᠦᠷᠦᠭᠡᠳ ᠳᠤᠰᠤᠯ ᠪᠣᠯᠤᠭᠠᠳ ᠬᠤᠪᠢᠩ ᠳ᠋ᠤ᠌ ᠣᠷᠣᠵᠤ ᠠᠷᠢᠬᠢ ᠪᠣᠯᠤᠨᠠ᠃
ᠶᠠᠷᠬᠠ ᠪᠠᠷ ᠨᠡᠷᠡᠬᠦ
ᠶᠠᠷᠬᠠ ( ᠠᠭᠤᠷᠰᠢᠬᠤ ᠠᠷᠢᠬᠢ ᠶ᠋ᠢ ᠲᠣᠰᠴᠤ ᠠᠪᠬᠤ ᠰᠠᠪᠠ ) ᠂ ᠴᠣᠷᠭᠣ ᠂ ᠬᠠᠢᠰᠤ ( ᠲᠣᠭᠣᠭᠠ ) ᠪᠣᠯᠤᠨ ᠬᠥᠯᠴᠥᠦ ᠶ᠋ᠢᠨ ᠬᠠᠢᠰᠤ ( ᠳᠣᠲᠣᠷᠠ ᠨᠢ ᠬᠦᠢᠲᠡᠨ ᠤᠰᠤ ᠬᠢᠳᠡᠭ ᠵᠢᠯᠠᠪᠴᠢ ᠶ᠋ᠢᠨ ᠦᠢᠯᠡᠳᠦᠯ ᠪᠦᠬᠦᠢ ᠲᠣᠭᠣᠭᠠ ) ᠵᠡᠷᠭᠡ ᠪᠡᠷ ᠬᠢᠨᠡ᠃
ᠰᠤᠪᠰᠤ ᠠᠩᠬᠠ ᠭᠣᠭᠣᠵᠢᠭᠰᠠᠨ ᠠᠷᠢᠬᠢ᠃ ᠰᠤᠪᠰᠤ ᠪᠠᠨ ᠳᠠᠬᠢᠨ ᠨᠡᠷᠡᠪᠡᠯ ᠠᠷᠢᠬᠢ ᠪᠣᠯᠤᠨᠠ᠃
ᠬᠠᠷᠢᠭᠤᠯᠤᠭᠰᠠᠨ ᠠᠷᠢᠬᠢ ᠰᠤᠪᠰᠤ ᠪᠠᠨ ᠳᠠᠬᠢᠨ ᠲᠣᠭᠣᠭᠠᠨ ᠳ᠋ᠤ᠌ ᠬᠢᠵᠦ ᠨᠡᠷᠡᠭᠡᠳ ᠭᠠᠷᠭᠠᠭᠰᠠᠨ ᠢ᠋ ᠬᠠᠷᠢᠭᠤᠯᠤᠭᠰᠠᠨ ᠠᠷᠢᠬᠢ ᠭᠡᠨᠡ᠃ ᠬᠡᠳᠦᠢ ᠢᠯᠡᠭᠦᠦ ᠬᠠᠷᠢᠭᠤᠯᠪᠠᠯ ᠠᠷᠢᠬᠢ ᠨᠢ ᠲᠡᠳᠦᠢ ᠬᠦᠴᠦᠲᠡᠢ ᠪᠣᠯᠳᠠᠭ᠃
ᠠᠷᠠᠵᠠ ᠬᠠᠷᠢᠭᠤᠯᠤᠭᠰᠠᠨ ᠠᠷᠢᠬᠢ᠃
ᠬᠣᠣᠷᠠᠵᠠ ᠠᠷᠠᠵᠠ ᠪᠠᠨ ᠳᠠᠬᠢᠨ ᠬᠠᠷᠢᠭᠤᠯᠵᠤ ᠨᠡᠷᠡᠭᠰᠡᠨ ᠢ᠋ ᠬᠡᠯᠡᠨᠡ᠃
ᠰᠢᠷᠠᠵᠠ ᠬᠣᠣᠷᠠᠵᠠ ᠪᠠᠨ ᠳᠠᠬᠢᠨ ᠬᠠᠷᠢᠭᠤᠯᠵᠤ ᠨᠡᠷᠡᠭᠰᠡᠨ ᠢ᠋ ᠬᠡᠯᠡᠨᠡ᠃
ᠪᠣᠷᠣᠵᠠ ᠰᠢᠷᠠᠵᠠ ᠪᠠᠨ ᠳᠠᠬᠢᠨ ᠨᠡᠷᠡᠵᠦ ᠭᠠᠷᠭᠠᠭᠰᠠᠨ᠃ ᠡᠳᠡᠭᠡᠷ ᠢ᠋ ᠬᠢᠬᠦ ᠳ᠋ᠦ᠍ ᠳᠥᠷᠪᠡᠨ ᠵᠦᠢᠯ ᠦ᠋ᠨ ᠲᠥᠬᠥᠭᠡᠷᠦᠮᠵᠢ ᠶ᠋ᠢ ᠬᠡᠷᠡᠭᠰᠡᠨᠡ᠃ ᠨᠡᠷᠡᠬᠦ ᠶᠠᠪᠤᠴᠠ ᠨᠢ ᠪᠦᠷᠬᠦᠭᠡᠷ ᠲᠡᠢ ᠠᠳᠠᠯᠢ ᠃
ᠬᠣᠷᠰᠢᠭᠠᠮᠠᠯ ᠠᠷᠢᠬᠢ ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ ᠪᠠᠨ ᠪᠣᠳᠣᠩ ᠳ᠋ᠤ᠌ ᠬᠢᠵᠦ ᠠᠮᠠ ᠶ᠋ᠢ ᠨᠢ ᠪᠡᠬᠢᠯᠡᠭᠡᠳ ᠮᠠᠯ ᠤ᠋ᠨ ᠬᠡᠪᠲᠡᠷᠢ ᠳ᠋ᠦ᠍ ᠮᠧᠲ᠋ᠷ ᠬᠢᠷᠢ ᠨᠦᠬᠡ ᠮᠠᠯᠲᠠᠨ ᠪᠤᠯᠠᠵᠤ ᠵᠢᠯ ᠥᠨᠵᠢᠭᠡᠳ ᠭᠠᠷᠭᠠᠭᠰᠠᠨ ᠠᠷᠢᠬᠢ ᠃
ᠴᠠᠭᠠ
ᠴᠠᠭᠠ ᠶ᠋ᠢ ᠬᠡᠳᠦᠨ ᠶᠠᠩᠵᠤ ᠪᠠᠷ ᠪᠣᠯᠪᠠᠰᠤᠷᠠᠭᠤᠯᠳᠠᠭ᠃ ① ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ ᠨᠡᠷᠡᠵᠦ ᠠᠪᠤᠭᠠᠳ ᠂ ᠦᠯᠡᠳᠡᠭᠰᠡᠨ ᠰᠢᠩᠭᠡᠨ ᠢ᠋ ᠨᠢ ᠴᠠᠭᠠ ᠭᠡᠳᠡᠭ ᠪᠣᠢ᠃ ᠡᠭᠦᠨ ᠢ᠋ ᠠᠯᠠᠱᠠ ᠳ᠋ᠤ᠌ ᠪᠤᠴᠠᠮᠠᠭ ᠭᠡᠨᠡ᠃ ② ᠠᠢᠷᠠᠭ ᠢ᠋ᠶ᠋ᠠᠨ ᠪᠦᠯᠢᠵᠦ ᠲᠣᠰᠣ ᠶ᠋ᠢ ᠨᠢ ᠬᠠᠮᠤᠭᠰᠠᠨ ᠤ᠋ ᠳᠠᠷᠠᠭᠠ ᠲᠡᠷᠡ ᠬᠦ᠌ ᠠᠢᠷᠠᠭ ᠢ᠋ᠶ᠋ᠠᠨ ᠪᠤᠴᠠᠯᠭᠠᠨ ᠠᠭᠤᠷ ᠢ ᠨᠢ ᠠᠭᠤᠷᠰᠢᠭᠤᠯᠤᠭᠰᠠᠨ ᠢ ᠪᠠᠰᠠ ᠴᠠᠭᠠ ᠭᠡᠳᠡᠭ ᠪᠣᠢ᠃ ③ ᠰᠦ ᠬᠤᠷᠤᠳ ᠬᠢᠭᠡᠳ ᠢᠯᠭᠠᠷᠠᠭᠰᠠᠨ ᠰᠢᠷᠠᠰᠤ ᠶ᠋ᠢ ᠳᠠᠬᠢᠨ ᠪᠤᠴᠠᠯᠭᠠᠵᠤ ᠥᠳᠬᠡᠷᠡᠭᠦᠯᠦᠭᠡᠳ ᠬᠥᠷᠥᠩᠭᠡ ᠬᠤᠷᠰᠢᠭᠠᠵᠤ ᠢᠰᠬᠡᠭᠰᠡᠨ ᠢ᠋ ᠮᠥᠨ ᠴᠠᠭᠠ ᠭᠡᠳᠡᠭ᠃
ᠪᠣᠵᠠ
ᠪᠤᠴᠠᠯᠭᠠᠭᠰᠠᠨ ᠴᠠᠭᠠ ᠳ᠋ᠤ᠌ ᠠᠢᠷᠠᠭ ᠤ᠋ᠨ ᠲᠣᠰᠣ ᠪᠤᠶᠤ ᠰᠢᠷᠠ ᠲᠣᠰᠣ ᠬᠣᠯᠢᠵᠤ ᠪᠤᠴᠠᠯᠭᠠᠨ ᠤᠤᠭᠤᠬᠤ ᠶ᠋ᠢ ᠪᠣᠵᠠ ᠭᠡᠨᠡ ᠃
ᠬᠣᠭᠣᠷᠮᠠᠭ
ᠴᠠᠭᠠ ᠪᠤᠶᠤ ᠠᠢᠷᠠᠭ ᠲᠤ᠌ ᠲᠦᠭᠦᠬᠡᠢ ᠰᠦ ᠶᠦ᠍ᠮ ᠤᠤ᠂ ᠪᠣᠯᠭᠣᠭᠰᠠᠨ ᠰᠦ ᠳᠡᠢᠯᠦᠩᠭᠦᠢ ᠬᠣᠯᠢᠵᠤ ᠲᠡᠵᠢᠭᠡᠭᠰᠡᠨ ᠢ᠋ ᠬᠣᠭᠣᠷᠮᠠᠭ ᠭᠡᠨᠡ ᠃ ᠠᠯᠠᠱᠠ ᠳ᠋ᠤ᠌ ᠬᠣᠯᠢᠮᠠᠭ ᠭᠡᠵᠦ ᠰᠥᠨᠢᠳ ᠲᠦ᠍ ᠱᠠᠯᠠᠭᠮᠠᠭ ᠭᠡᠳᠡᠭ᠃ ᠬᠣᠭᠣᠷᠮᠠᠭ ᠢ ᠡᠳᠦᠷ ᠪᠦᠷᠢ ᠨᠢᠭᠡ ᠠᠶᠠᠭᠠ ᠤᠤᠭᠤᠪᠠᠯ ᠲᠠᠮᠢᠷᠳᠠᠭᠰᠠᠨ ᠬᠥᠮᠦᠨ ᠦ᠌ ᠲᠠᠮᠢᠷ ᠢ᠋ ᠨᠥᠬᠥᠵᠦ ᠴᠢᠳᠠᠬᠤ ᠴᠢᠳᠠᠯ ᠪᠣᠢ᠃
ᠠᠭᠠᠷᠴᠠ
ᠴᠠᠭᠠ ᠪᠠᠨ ᠴᠡᠪᠡᠷᠬᠡᠨ ᠪᠥᠰ ᠤᠭᠤᠲᠠᠨ ᠳ᠋ᠤ᠌ ᠬᠢᠭᠡᠳ ᠮᠣᠳᠣᠨ ᠬᠠᠪᠲᠠᠰᠤᠨ ᠳᠡᠭᠡᠷᠡ ᠲᠠᠯᠪᠢᠵᠤ᠂ ᠳᠡᠭᠡᠷᠡ ᠡᠴᠡ ᠨᠢ ᠬᠦᠨᠳᠦ ᠶᠠᠭᠤᠮᠠ ᠪᠠᠷ ᠳᠠᠷᠤᠪᠠᠯ᠂ ᠰᠢᠷᠠ ᠤᠰᠤ ᠨᠢ ᠱᠦᠭᠦᠷᠡᠵᠦ ᠥᠳᠬᠡᠨ ᠵᠦᠢᠯ ᠨᠢ ᠦᠯᠡᠳᠡᠨᠡ᠃ ᠡᠭᠦᠨ ᠢ ᠠᠭᠠᠷᠴᠠ ᠭᠡᠨᠡ ᠃
ᠠᠭᠠᠷᠤᠤᠯ
ᠠᠭᠠᠷᠴᠠ᠂ ᠱᠦᠭᠦᠭᠰᠡᠨ ᠪᠤᠶᠤ ᠰᠢᠬᠠᠵᠤ ᠥᠳᠬᠡᠷᠡᠭᠦᠯᠦᠭᠰᠡᠨ ᠠᠭᠠᠷᠴᠠ ᠪᠠᠨ ᠬᠠᠪᠲᠠᠰᠤᠨ ᠳᠡᠭᠡᠷᠡ ᠲᠠᠯᠪᠢᠨ ᠵᠦᠰᠦᠭᠰᠡᠨ ᠪᠤᠶᠤ ᠪᠥᠮᠪᠥᠭᠡᠯᠡᠭᠰᠡᠨ᠂ ᠡᠰᠡᠬᠦᠯᠡ ᠪᠠᠵᠠᠭᠰᠠᠨ ᠢ᠋ ᠠᠭᠠᠷᠤᠤᠯ ᠭᠡᠨᠡ᠃
ᠴᠥᠷᠮᠡ ᠠ᠋ᠠᠭᠠᠷᠤᠤᠯ ( ᠣᠷᠳᠣᠰ ᠂ ᠠᠯᠠᠱᠠ ᠂ ᠬᠥᠬᠡᠨᠠᠭᠤᠷ ᠲᠤ᠌ ) ᠃
ᠦᠢᠷᠡᠮᠡᠭ ᠠᠭᠠᠷᠤᠤᠯ ᠤ᠋ᠨ ᠪᠠᠯᠪᠠᠳᠠᠭ ( ᠣᠷᠳᠣᠰ ᠲᠤ᠌ ) ᠃
ᠪᠠᠵᠠᠮᠠᠯ ᠠᠭᠠᠷᠤᠤᠯ ( ᠤᠯᠠᠭᠠᠨᠴᠠᠪ ᠳᠤ ) ᠃
ᠱᠦᠭᠦᠷᠮᠡᠭ
ᠠᠭᠠᠷᠤᠤᠯ ( ᠪᠠᠶᠠᠭᠠᠭᠤᠷ ᠲᠤ᠌ ) ᠃ ᠠᠭᠠᠷᠤᠤᠯ ᠨᠢ ᠬᠣᠳᠤᠭᠤᠳᠠᠨ ᠤ᠋ ᠰᠢᠩᠭᠡᠯᠲᠡ ᠳ᠋ᠦ᠍ ᠰᠠᠢᠨ᠃ ᠪᠤᠳᠠᠭᠠ ᠣᠷᠬᠢᠭᠰᠠᠨ ᠴᠠᠢ ᠪᠤᠶᠤ ᠬᠣᠨᠢᠨ ᠮᠢᠬᠠ ᠲᠠᠢ ᠰᠢᠩᠭᠡᠨ ᠪᠤᠳᠠᠭᠠᠨ ᠳ᠋ᠤ᠌ ᠬᠢᠵᠦ ᠢᠳᠡᠪᠡᠯ ᠱᠥᠯᠦᠷᠭᠦᠨ ᠪᠥᠭᠡᠳ ᠡᠷᠴᠢᠲᠡᠢ ᠪᠣᠯᠵᠤ ᠢᠳᠡᠬᠦ ᠳ᠋ᠦ᠍ ᠲᠠᠭᠠᠯᠠᠮᠵᠢᠲᠠᠢ ᠪᠠᠢᠳᠠᠭ᠃
ᠰᠢᠷᠠᠰᠤ ᠬᠤᠷᠤᠳ ᠬᠢᠬᠦ ᠳ᠋ᠦ᠍ ᠰᠢᠬᠠᠵᠤ ᠠᠪᠤᠭᠰᠠᠨ ᠰᠢᠩᠭᠡᠨ ᠰᠢᠷᠠ ᠤᠰᠤ ᠶ᠋ᠢ ᠰᠢᠷᠠᠰᠤ ᠭᠡᠨᠡ᠃
ᠰᠢᠷᠠ ᠤᠰᠤ
ᠰᠢᠷᠠᠰᠤ ( ᠪᠠᠭᠠᠷᠢᠨ ᠳ᠋ᠤ᠌ ) ᠃ ᠰᠢᠷᠠᠰᠤ ᠶ᠋ᠢ ᠠᠷᠢᠬᠢ ᠨᠡᠷᠡᠬᠦ ᠭᠤᠯᠢᠷ ᠢᠰᠬᠡᠬᠦ ᠳ᠋ᠦ᠍ ᠬᠡᠷᠡᠭᠯᠡᠬᠦ ᠡᠴᠡ ᠭᠠᠳᠠᠨᠠ ᠳᠣᠷᠣᠢ ᠬᠠᠲᠠᠩᠭᠢᠷ ᠮᠠᠯ ᠳ᠋ᠤ᠌ ᠤᠤᠭᠤᠯᠭᠠᠨ ᠲᠡᠩᠬᠡᠷᠡᠭᠦᠯᠦᠨᠡ ᠃ ᠪᠠᠰᠠ ᠠᠷᠠᠰᠤ ᠢᠳᠡᠭᠡᠯᠡᠬᠦ ᠳ᠋ᠦ᠍ ᠬᠡᠷᠡᠭᠯᠡᠳᠡᠭ᠃
ᠡᠭᠡᠷᠡᠮ
ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ ᠨᠡᠷᠡᠬᠦ ᠦᠶᠡ ᠲᠣᠰᠬᠣᠭᠤᠷ᠂ ᠪᠦᠷᠬᠦᠬᠡᠷ ᠦ᠋ᠨ ᠳᠣᠣᠷᠠ ᠲᠠᠯᠪᠢᠭᠤᠷ ᠲᠤ᠌ ᠨᠠᠭᠠᠯᠳᠤᠭᠰᠠᠨ ᠠᠭᠠᠷᠴᠠ ᠶ᠋ᠢ ᠨᠠᠷᠠᠨ ᠳ᠋ᠤ᠌ ᠬᠠᠲᠠᠭᠠᠭᠰᠠᠨ ᠢ᠋ ᠨᠢ ᠡᠭᠡᠷᠡᠮ ᠭᠡᠨᠡ᠃ ᠡᠭᠡᠷᠡᠮ ᠢ ᠪᠤᠳᠠᠭᠠ ᠣᠷᠬᠢᠭᠰᠠᠨ ᠴᠠᠢ ᠳ᠋ᠤ᠌ ᠬᠣᠯᠢᠴᠠ ᠪᠣᠯᠭᠠᠬᠤ ᠶᠤᠮ ᠤᠤ᠂ ᠡᠰᠡᠬᠦᠯᠡ ᠬᠤᠷᠰᠢᠭᠰᠠᠨ ᠮᠢᠬᠠᠨ ᠤ᠋ ᠱᠥᠯᠦᠨ ᠳ᠋ᠦ᠍ ᠬᠢᠵᠦ ᠪᠤᠴᠠᠯᠭᠠᠪᠠᠯ ᠮᠢᠬᠠᠨ ᠤ᠋ ᠬᠣᠷᠰᠢᠭᠰᠠᠨ ᠦᠨᠦᠷ ᠠᠮᠲᠠ ᠶ᠋ᠢ ᠳᠠᠷᠤᠳᠠᠭ᠃