ᠬᠥᠬᠡ ᠵᠤᠯᠠ – ᠪᠣᠷᠵᠢᠭᠢᠨ ᠸᠠᠩᠵᠠᠯ - < ᠶᠢᠰᠦ ᠂ ᠮᠣᠷᠢ ᠤᠷᠤᠯᠳᠤᠬᠤ ᠵᠢᠷᠤᠮ ᠤᠨ ᠪᠦᠯᠦᠭ 3 > Хөх зул – Боржигон Ванжал –" Ес᠂ Морь уралдах журмын бүлэг 3 "
361ᠶᠢᠰᠦ ᠂ ᠮᠣᠷᠢ ᠤᠷᠤᠯᠳᠤᠬᠤ ᠵᠢᠷᠤᠮ ᠤᠨ ᠪᠦᠯᠦᠭ - 3
ᠲᠡᠷᠢᠭᠦᠯᠡᠭᠰᠡᠨ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠢᠷᠦᠭᠡᠯ
ᠣᠮ ᠰᠠᠢᠨ ᠠᠮᠤᠭᠤᠯᠠᠩ ᠪᠣᠯᠲᠤᠭᠠᠢ !
ᠡᠩᠬᠡ ᠰᠠᠢᠨ ᠵᠢᠷᠭᠠᠯᠠᠩ ᠪᠣᠯᠲᠤᠭᠠᠢ !
ᠰᠦᠷᠦᠭ ᠰᠦᠷᠦᠭ ᠠᠳᠤᠭᠤᠨ ᠠ᠋ᠴᠠ
ᠰᠣᠩᠭᠣᠳᠠᠭ ᠰᠠᠢᠨ ᠢ᠋ ᠨᠢ ᠰᠢᠯᠢᠵᠦ
ᠠᠵᠢᠷᠭᠠ ᠠᠵᠢᠷᠭᠠ ᠠᠳᠤᠭᠤᠨ ᠠ᠋ᠴᠠ
ᠠᠭᠲᠠ ᠶ᠋ᠢᠨ ᠰᠠᠢᠨ ᠢ᠋ ᠰᠣᠩᠭᠣᠵᠤ
ᠵᠠᠭᠤᠨ ᠪᠠᠷᠠ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ
ᠵᠢᠷᠣᠭᠠ ᠮᠣᠷᠢᠳ ᠢ᠋ ᠤᠷᠤᠯᠳᠤᠭᠤᠯᠵᠤ
ᠵᠢᠯᠣᠭᠣ ᠳᠠᠷᠤᠨ ᠲᠡᠯᠮᠡᠭᠦᠯᠵᠦ
ᠵᠣᠯᠪᠣᠭᠠ ᠴᠣᠭ ᠢ᠋ ᠪᠠᠳᠠᠷᠠᠭᠤᠯᠵᠤ
ᠵᠠᠭᠤᠨ ᠭᠠᠵᠠᠷ ᠠ᠋ᠴᠠ ᠲᠠᠯᠪᠢᠬᠤ ᠳ᠋ᠤ᠌
ᠵᠢᠭᠦᠷᠲᠡᠨ ᠰᠢᠪᠠᠭᠤ ᠮᠡᠲᠦ
ᠨᠢᠰᠦᠮᠡ ᠬᠤᠷᠳᠤᠨ ᠵᠢᠷᠣᠭᠠᠯᠠᠳᠠᠭ
ᠨᠡᠷᠡᠲᠦ ᠡᠨᠡ ᠮᠣᠷᠢ ᠪᠣᠯ
ᠥᠩᠰᠢᠭ ᠭᠠᠵᠠᠷ ᠤᠨᠠᠭᠠᠯᠠᠭᠰᠠᠨ
ᠥᠪᠥᠷ ᠭᠠᠵᠠᠷ ᠥᠰᠦᠭᠰᠡᠨ
ᠥᠨᠳᠥᠷ ᠭᠠᠵᠠᠷ ᠰᠣᠢᠭᠰᠠᠨ
ᠥᠷᠭᠡᠨ ᠭᠠᠵᠠᠷ ᠰᠣᠷᠢᠭᠰᠠᠨ
ᠴᠢᠭᠢᠭᠲᠡᠢ ᠭᠠᠵᠠᠷ ᠪᠡᠯᠴᠢᠭᠡᠷᠯᠡᠭᠰᠡᠨ
ᠴᠡᠩᠭᠡᠭᠲᠡᠢ ᠭᠠᠵᠠᠷ ᠤᠰᠤᠯᠠᠭᠰᠠᠨ
ᠴᠡᠴᠡᠭ ᠲᠡᠢ ᠡᠪᠡᠰᠦ ᠢᠳᠡᠰᠢᠯᠡᠭᠰᠡᠨ
ᠴᠡᠪᠡᠷᠬᠡᠨ ᠵᠢᠷᠣᠭᠠ ᠣᠷᠣᠭᠰᠠᠨ
ᠲᠤᠷᠤᠭ ᠰᠠᠢᠬᠠᠨ ᠪᠡᠶᠡᠲᠡᠢ
ᠲᠤᠭ ᠰᠠᠢᠬᠠᠨ ᠰᠡᠬᠦᠯᠲᠡᠢ
ᠲᠣᠷᠭᠠᠨ ᠰᠠᠢᠬᠠᠨ ᠦᠰᠦᠲᠡᠢ
ᠲᠣᠭᠣᠰ ᠰᠠᠢᠬᠠᠨ ᠵᠢᠰᠤᠮᠲᠠᠢ
ᠴᠢᠨᠣᠠ ᠶ᠋ᠢᠨ ᠬᠣᠶᠠᠷ ᠴᠢᠬᠢᠲᠡᠢ
ᠴᠣᠯᠮᠣᠨ ᠬᠣᠶᠠᠷ ᠨᠢᠳᠦᠲᠡᠢ
ᠴᠣᠭᠲᠤ ᠶ᠋ᠢᠨ ᠰᠠᠢᠬᠠᠨ ᠳᠡᠯᠳᠡᠢ
ᠴᠣᠮᠪᠣᠩ ᠳᠥᠷᠪᠡᠨ ᠲᠤᠭᠤᠷᠠᠢᠲᠠᠢ
ᠤᠷᠲᠤ ᠰᠠᠢᠬᠠᠨ ᠵᠤ᠋ ᠲᠠᠢ
ᠠᠭᠤᠵᠢᠮ ᠰᠠᠢᠬᠠᠨ ᠲᠠᠰᠢᠶᠠᠲᠠᠢ
ᠥᠨᠳᠥᠷ ᠰᠠᠢᠬᠠᠨ ᠴᠡᠭᠡᠵᠢᠲᠡᠢ
ᠦᠵᠡᠮᠵᠢ ᠰᠠᠢᠬᠠᠨ ᠪᠡᠶᠡᠲᠡᠢ
ᠲᠠᠪᠢᠨ ᠯᠠᠩ ᠤ᠋ᠨ ᠬᠠᠵᠠᠭᠠᠷ ᠢ᠋
ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠲᠣᠬᠢᠶᠠᠭᠰᠠᠨ
ᠬᠣᠷᠢᠨ ᠯᠠᠩ ᠤ᠋ᠨ ᠬᠤᠳᠠᠷᠭᠠ ᠶ᠋ᠢ
ᠬᠣᠨᠳᠣᠯᠠᠢ ᠳᠡᠭᠡᠷᠡ ᠨᠢ ᠲᠣᠬᠣᠭᠰᠠᠨ
ᠵᠠᠭᠤᠨ ᠯᠠᠩ ᠤ᠋ᠨ ᠡᠮᠡᠭᠡᠯ ᠢ᠋
ᠵᠣ ᠳᠡᠭᠡᠷᠡ ᠨᠢ ᠳᠠᠷᠤᠭᠰᠠᠨ
ᠵᠢᠷᠠᠨ ᠯᠠᠩ ᠤ᠋ᠨ ᠳᠡᠪᠰᠡ ᠶ᠋ᠢ
ᠵᠠᠰᠠᠵᠤ ᠰᠠᠢᠬᠠᠨ ᠲᠣᠬᠢᠷᠠᠭᠤᠯᠤᠭᠰᠠᠨ
ᠨᠠᠷᠠᠨ ᠰᠠᠷᠠᠨ ᠪᠦᠭᠦᠷᠭᠡ ᠨᠢ
ᠨᠠᠭᠠᠨᠠ ᠴᠠᠭᠠᠨᠠ ᠨᠢ ᠭᠢᠯᠠᠯᠵᠠᠭᠰᠠᠨ
ᠨᠠᠢ᠍ᠮᠠᠨ ᠰᠠᠢᠬᠠᠨ ᠭᠠᠨᠵᠤᠭᠠ ᠨᠢ
ᠨᠠᠢᠭᠤᠨ ᠰᠠᠢᠬᠠᠨ ᠬᠡᠢᠰᠦᠭᠰᠡᠨ
ᠵᠠᠭᠠᠨᠠ ᠶ᠋ᠢᠨ ᠶᠠᠰᠤᠨ ᠬᠠᠪᠲᠠᠰᠤᠲᠠᠢ
ᠵᠢᠭᠠᠰᠤᠨ ᠴᠠᠪᠠᠤ ᠶ᠋ᠢᠨ ᠵᠦᠢᠳᠡᠯᠲᠡᠢ
ᠮᠡᠩ ᠦ᠋ᠨ ᠠᠷᠠᠰᠤᠨ ᠬᠤᠯᠳᠠᠭᠠᠰᠤᠲᠠᠢ
ᠮᠠᠩᠨᠤᠭ ᠲᠣᠷᠭᠠᠨ ᠲᠣᠬᠤᠮᠳᠠᠢ
ᠲᠣᠯᠢᠨ ᠮᠥᠩᠭᠥᠨ ᠬᠠᠵᠠᠭᠠᠷᠲᠠᠢ
ᠲᠣᠷᠭᠠᠨ ᠮᠢᠨᠳᠠᠰᠤᠨ ᠣᠯᠣᠩᠲᠠᠢ
ᠵᠢᠭᠵᠢᠬᠡᠷ ᠴᠣᠮᠪᠣᠩ ᠳᠥᠷᠥᠭᠡᠲᠡᠢ
ᠵᠡᠭᠡᠷᠡ ᠶ᠋ᠢᠨ ᠰᠤᠷ ᠤ᠋ᠨ ᠵᠢᠷᠢᠮᠲᠡᠢ
ᠬᠡᠪᠯᠢᠭ ᠰᠠᠢᠬᠠᠨ ᠲᠣᠪᠣᠷᠤᠤᠲᠠᠢ
ᠬᠡ ᠬᠤᠸᠠᠷ ᠬᠥᠯᠢᠮᠲᠡᠢ
ᠻᠬᠢᠪ ᠲᠣᠷᠭᠠᠨ ᠨᠣᠭᠲᠣᠲᠠᠢ
ᠬᠡᠭᠡᠨᠴᠢᠷ ᠰᠠᠢᠬᠠᠨ ᠵᠢᠯᠤᠭᠤᠲᠠᠢ
ᠬᠦᠷᠡᠩ ᠤᠯᠠᠭᠠᠨ ᠮᠣᠯᠴᠣᠭᠳᠠᠢ
ᠬᠥᠮᠥᠯᠳᠥᠷᠭᠡ ᠬᠤᠳᠠᠷᠭᠠ ᠴᠢᠮᠡᠭᠲᠡᠢ
ᠭᠥᠭᠯᠡᠪᠡᠯ ᠣᠷᠣᠭᠠᠯᠠᠳᠠᠭ
ᠬᠥᠳᠡᠯᠭᠡᠪᠡᠯ ᠵᠢᠷᠣᠭᠠᠯᠠᠳᠠᠭ
ᠲᠠᠲᠠᠪᠠᠯ ᠵᠢᠷᠣᠭᠠᠯᠠᠳᠠᠭ
ᠲᠠᠯᠪᠢᠪᠠᠯ ᠣᠷᠣᠭᠠᠯᠠᠳᠠᠭ
ᠬᠥᠯ ᠳ᠋ᠡᠭᠡᠨ ᠵᠢᠷᠤᠭᠠᠲᠠᠢ
ᠬᠦᠵᠦᠭᠦᠨ ᠳ᠋ᠡᠭᠡᠨ ᠣᠷᠣᠭᠠᠲᠠᠢ
ᠪᠣᠷᠪᠢ ᠳ᠋ᠠᠭᠠᠨ ᠵᠢᠷᠤᠭᠠᠲᠠᠢ
ᠲᠣᠢᠭ ᠲᠠᠭᠠᠨ ᠣᠷᠤᠭᠠᠲᠠᠢ
ᠦᠰᠦᠨ ᠳ᠋ᠡᠭᠡᠨ ᠲᠡᠮᠳᠡᠭᠲᠡᠢ
ᠥᠯᠮᠡᠢ ᠳ᠋ᠡᠭᠡᠨ ᠵᠢᠷᠤᠭᠠᠲᠠᠢ
ᠦᠶᠡ ᠳ᠋ᠡᠭᠡᠨ ᠥᠰᠦᠭᠲᠡᠢ
ᠥᠰᠥᠭᠡᠢ ᠳ᠋ᠡᠭᠡᠨ ᠵᠢᠷᠤᠭᠠᠲᠠᠢ
ᠡᠵᠡᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ
ᠢᠵᠢᠯᠢ ᠳ᠋ᠡᠭᠡᠨ ᠡᠭᠡᠯᠢᠲᠡᠢ
ᠡᠰᠡᠷᠸᠠ ᠳ᠋ᠠᠭᠠᠨ ᠰᠠᠷᠠ ᠲᠠᠢ
ᠡᠭᠡᠮᠦᠭ ᠲᠡᠭᠡᠨ ᠮᠣᠯᠴᠣᠭ ᠲᠠᠢ
ᠨᠠᠷᠠᠨ ᠥᠭᠡᠳᠡ ᠬᠠᠨᠳᠤᠭᠤᠯᠵᠤ
ᠨᠠᠶᠠ ᠬᠣᠨᠣᠭ ᠰᠣᠢᠵᠤ
ᠨᠠᠷᠠ ᠤᠷᠤᠭᠤ ᠬᠠᠨᠳᠤᠭᠤᠯᠵᠤ
ᠨᠠᠢ᠍ᠮᠠᠨ ᠬᠣᠨᠣᠭ ᠤᠶᠠᠵᠤ
ᠵᠢᠪᠠᠷ ᠥᠭᠡᠳᠡ ᠬᠠᠨᠳᠤᠭᠤᠯᠵᠤ
ᠵᠢᠷᠠ ᠬᠣᠨᠣᠭ ᠰᠣᠢᠵᠤ
ᠵᠢᠪᠠᠷ ᠤᠷᠤᠭᠤ ᠬᠠᠨᠳᠤᠭᠤᠯᠵᠤ
ᠵᠢᠷᠭᠤᠬᠠ ᠬᠣᠨᠣᠭ ᠤᠶᠠᠵᠤ
ᠠᠯᠲᠠᠢ ᠬᠠᠩᠭᠠᠢ ᠶ᠋ᠢ ᠵᠢᠷᠤᠭᠯᠠᠨ ᠵᠢᠷᠣᠭᠠᠯᠠᠳᠠᠭ
ᠠᠭᠠᠷ ᠳᠡᠭᠡᠭᠦᠷ ᠨᠢᠰᠦᠨ ᠵᠢᠷᠣᠭᠠᠯᠠᠳᠠᠭ
ᠠᠶᠠᠨ ᠵᠠᠮ ᠢ᠋ ᠲᠣᠪᠴᠢᠯᠠᠨ ᠵᠢᠷᠣᠭᠠᠯᠠᠳᠠᠭ
ᠠᠯᠤᠰ ᠤ᠋ᠨ ᠵᠣᠷᠢᠯᠭᠠ ᠶ᠋ᠢ ᠪᠡᠶᠡᠯᠡᠭᠦᠯᠦᠨ ᠵᠢᠷᠣᠭᠠᠯᠠᠳᠠᠭ
ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢ ᠲᠣᠭᠣᠷᠢᠨ ᠵᠢᠷᠣᠭᠠᠯᠠᠳᠠᠭ
ᠭᠠᠯᠪᠠ ᠶᠢᠷᠲᠢᠨᠴᠦ ᠶ᠋ᠢ ᠲᠣᠪᠴᠢᠯᠠᠨ ᠵᠢᠷᠣᠭᠠᠯᠠᠳᠠᠭ
ᠳᠠᠯᠠᠢ ᠲᠠᠩᠭᠢᠰ ᠲᠤ᠌ ᠱᠤᠩᠪᠠᠨ ᠵᠢᠷᠣᠭᠠᠯᠠᠳᠠᠭ
ᠳᠠᠯᠳᠠ ᠣᠷᠴᠢᠯᠠᠩ ᠢ ᠬᠣᠯᠪᠣᠨ ᠵᠢᠷᠣᠭᠠᠯᠠᠳᠠᠭ
ᠤᠷᠠᠨ ᠲᠠᠩᠨᠠᠢ ᠶ᠋ᠢᠨ ᠰᠢᠯᠢ ᠳᠡᠭᠡᠷᠡ
ᠤᠨᠠᠭᠠᠯᠠᠭᠰᠠᠨ ᠵᠢᠷᠣᠭᠠ
ᠣᠯᠠᠨ ᠤᠯᠤᠰ ᠤ᠋ᠨ ᠳᠤᠮᠳᠠ ᠠ᠋ᠴᠠ
ᠭᠠᠢᠬᠠᠭᠳᠠᠭᠰᠠᠨ ᠵᠢᠷᠣᠭᠠ
ᠬᠦᠷᠢᠶᠡᠨ ᠡᠴᠡ ᠪᠡᠨ ᠤᠨᠤᠬᠤ ᠳ᠋ᠤ᠌
ᠬᠥᠯᠮᠥᠯᠵᠡᠭᠦᠯᠦᠭᠰᠡᠨ ᠵᠢᠷᠣᠭᠠ
ᠬᠥᠮᠦᠨ ᠦ᠌ ᠭᠠᠵᠠᠷ ᠶᠠᠪᠤᠬᠤ ᠳ᠋ᠤ᠌
ᠬᠦᠯᠦᠭ ᠪᠣᠯᠤᠭᠰᠠᠨ ᠵᠢᠷᠣᠭᠠ
ᠬᠠᠶᠠᠭᠠᠨ ᠡᠴᠡ ᠪᠡᠨ ᠤᠨᠤᠬᠤ ᠳ᠋ᠤ᠌
ᠬᠠᠩᠭᠢᠨᠠᠭᠤᠯᠤᠭᠰᠠᠨ ᠵᠢᠷᠣᠭᠠ
ᠬᠠᠷᠢ ᠶ᠋ᠢᠨ ᠭᠠᠵᠠᠷ ᠶᠠᠪᠤᠬᠤ ᠳ᠋ᠤ᠌
ᠬᠠᠨᠢ ᠪᠣᠯᠤᠭᠰᠠᠨ ᠵᠢᠷᠣᠭᠠ
ᠬᠠᠷᠴᠠᠭᠠᠢ ᠨᠢᠰᠦᠭᠡᠳ ᠱᠤᠩᠪᠠᠬᠤ ᠰᠢᠭ᠋
ᠬᠠᠯᠭᠢᠯᠵᠠᠭᠤᠯᠤᠭᠰᠠᠨ ᠵᠢᠷᠣᠭᠠ
ᠬᠠᠨᠳᠠᠭᠠᠢ ᠭᠦᠶᠦᠭᠡᠳ ᠱᠤᠩᠪᠠᠬᠤ ᠰᠢᠭ᠋
ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠵᠢᠷᠣᠭᠠ
ᠬᠠᠢᠷᠠᠲᠠᠢ ᠬᠥᠮᠦᠨ ᠳ᠋ᠦ᠍
ᠬᠠᠨᠢ ᠪᠣᠯᠤᠭᠰᠠᠨ ᠵᠢᠷᠣᠭᠠ
ᠬᠣᠣᠷᠲᠠᠨ ᠳᠠᠢᠰᠤᠨ ᠳ᠋ᠤ᠌
ᠳᠠᠷᠤᠯᠭᠠ ᠪᠣᠯᠤᠭᠰᠠᠨ ᠵᠢᠷᠣᠭᠠ
ᠠᠷᠠᠳ ᠣᠯᠠᠨ ᠳ᠋ᠠᠭᠠᠨ
ᠣᠨᠣᠯᠭᠠ ᠪᠣᠯᠤᠭᠰᠠᠨ ᠬᠦᠯᠦᠭ
ᠠᠲᠠᠭᠠᠲᠠᠨ ᠳᠠᠢᠰᠤᠨ ᠳ᠋ᠤ᠌
ᠳᠠᠷᠤᠯᠭᠠ ᠪᠣᠯᠤᠭᠰᠠᠨ ᠬᠦᠯᠦᠭ
ᠡᠨᠡ ᠵᠢᠯ ᠦ᠋ᠨ ᠨᠠᠢᠷ ᠳᠡᠭᠡᠷᠡ
ᠵᠢᠷᠣᠭᠠ ᠮᠣᠷᠢᠨ ᠤ᠋ ᠤᠷᠤᠯᠳᠤᠭᠠᠨ ᠳ᠋ᠤ᠌
ᠲᠡᠷᠢᠭᠦᠨ ᠠᠪᠤᠭᠰᠠᠨ ᠡᠨᠡ ᠮᠣᠷᠢ ᠪᠣᠯ
ᠮᠢᠩᠭᠠᠨ ᠬᠥᠭᠵᠢᠯ
ᠲᠦᠮᠡᠨ ᠪᠠᠳᠠᠷᠠᠯ ᠪᠦᠷᠢᠳᠴᠦ
ᠮᠠᠩᠯᠠᠢ ᠪᠣᠯᠤᠭᠰᠠᠨ
ᠪᠢᠯᠢᠭ ᠦ᠋ᠨ ᠬᠡᠭᠡᠷ ᠭᠡᠵᠦ
ᠡᠭᠡᠰᠢᠭᠯᠡᠨ ᠮᠠᠭᠲᠠᠶᠠ ᠃
ᠠᠳᠠᠭ ᠮᠣᠷᠢᠨ ᠤ᠋ ᠴᠣᠯᠠ - 《ᠠᠯᠲᠠᠨ ᠰᠠᠨᠳᠠᠯᠢ 》 ᠬᠣᠲᠠᠯᠠ ᠪᠠᠶᠠᠰᠬᠤᠯᠠᠩ ᠤ᠋ᠨ ᠮᠠᠩᠯᠠᠢ ᠪᠣᠯᠤᠭᠰᠠᠨ ᠬᠣᠯᠠ ᠣᠢᠷᠠ ᠶ᠋ᠢᠨ ᠵᠢᠷᠭᠠᠯ ᠢ᠋ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠮᠠᠨ ᠤ᠋ ᠡᠨᠡ ᠨᠠᠭᠠᠳᠤᠮ ᠳᠡᠭᠡᠷᠡ ᠮᠣᠬᠣᠰᠢ ᠦᠭᠡᠢ ᠵᠣᠷᠢᠭ ᠢ᠋ᠶ᠋ᠠᠷ ᠮᠠᠭᠰᠢᠨ ᠮᠠᠭᠰᠢᠨ ᠭᠦᠶᠦᠭᠡᠳ ᠬᠣᠵᠢᠮ ᠤ᠋ᠨ ᠪᠠᠭᠠᠰᠤ ᠶ᠋ᠢ ᠬᠣᠷᠭᠣᠯ ᠪᠣᠯᠲᠠᠯᠠ ᠲᠡᠭᠦᠵᠦ ᠠᠭᠲᠠ ᠶ᠋ᠢᠨ ᠪᠠᠭᠠᠰᠤ ᠶ᠋ᠢ ᠠᠷᠭᠠᠯ ᠪᠣᠯᠲᠠᠯᠠ ᠬᠤᠷᠢᠶᠠᠵᠤ ᠬᠣᠵᠢᠳᠠᠵᠤ ᠢᠷᠡᠭᠰᠡᠨ ᠡᠨᠡ ᠰᠠᠢᠬᠠᠨ ᠮᠣᠷᠢ ᠶ᠋ᠢ ᠬᠥᠭᠡᠷᠦᠬᠦᠢ ᠳᠡ ᠶᠠᠭᠠᠬᠢᠭᠠᠳ ᠰᠠᠭᠠᠲᠠᠭᠰᠠᠨ ᠪᠣᠢ ᠭᠡᠪᠡᠯ ᠂ ᠤᠰᠤ ᠲᠠᠢ ᠭᠠᠵᠠᠷ ᠤᠤᠭᠤᠯᠭᠠᠵᠤ ᠶᠠᠪᠤᠵᠤ ᠡᠪᠡᠰᠦ ᠲᠡᠢ ᠭᠠᠵᠠᠷ ᠢᠳᠡᠭᠦᠯᠵᠦ ᠶᠠᠪᠤᠵᠤ ᠡᠷᠭᠢ ᠲᠡᠢ ᠭᠠᠵᠠᠷ ᠲᠣᠭᠣᠷᠢᠭᠤᠯᠵᠤ ᠶᠠᠪᠤᠵᠤ ᠡᠯᠡᠰᠦ ᠲᠡᠢ ᠭᠠᠵᠠᠷ ᠰᠠᠵᠢᠯᠠᠭᠤᠯᠵᠤ ᠶᠠᠪᠤᠵᠤ ᠂ ᠳᠡᠭᠡᠷᠡ ᠨᠢ ᠤᠨᠤᠭᠰᠠᠨ ᠬᠥᠮᠦᠨ ᠨᠢ ᠲᠤᠭ ᠨᠣᠢᠷ ᠨᠢ ᠬᠦᠷᠴᠦ ᠳᠡᠷᠭᠡᠳᠡ ᠨᠢ ᠶᠠᠪᠤᠭᠰᠠᠨ ᠬᠥᠮᠦᠨ ᠨᠢ ᠢᠨᠢᠶᠡᠳᠦ ᠨᠢ ᠬᠦᠷᠴᠦ ᠳᠠᠮ ᠠᠷᠭᠠ ᠲᠠᠢ ᠭᠦᠶᠦᠬᠦ ᠶ᠋ᠢ ᠨᠢ ᠰᠤᠳᠤᠯᠵᠤ ᠶᠠᠪᠤᠵᠤ ᠭᠡᠨᠡ ᠳᠡᠮᠡᠢ ᠴᠦ᠍ ᠪᠠᠰᠠ ᠮᠠᠭᠤ ᠳ᠋ᠠᠭᠠᠨ ᠬᠣᠴᠣᠷᠤᠭᠰᠠᠨ ᠪᠢᠰᠢ ᠭᠡᠨᠡ ᠂ ᠤᠨᠤᠭᠰᠠᠨ ᠬᠥᠮᠦᠨ ᠨᠢ ᠬᠠᠰᠬᠢᠷᠬᠤ ᠪᠠᠨ ᠮᠠᠷᠲᠠᠵᠤ ᠭᠡᠨᠡ ᠂ ᠣᠷᠣᠯᠳᠣᠭᠰᠠᠨ ᠮᠣᠷᠢ ᠨᠢ ᠬᠠᠷᠠᠢᠬᠤ ᠪᠠᠨ ᠮᠠᠷᠲᠠᠵᠤ ᠭᠡᠨᠡ ᠤᠷᠤᠯᠳᠤᠭᠠᠨ ᠤ᠋ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠳᠠᠯᠠᠢᠬᠤ ᠪᠠᠨ ᠮᠠᠷᠲᠠᠵᠤ ᠭᠡᠨᠡ ᠣᠷᠣᠭᠰᠢ ᠪᠠᠨ ᠦᠰᠦᠷᠬᠦ ᠭᠡᠳ ᠬᠣᠢᠰᠢ ᠪᠠᠨ ᠤᠬᠤᠷᠴᠢᠬᠠᠯᠠ ᠭᠡᠨᠡ ᠃ ᠪᠠᠷᠤᠭ ᠲᠥᠯᠥᠪ ᠢ᠋ ᠨᠢ ᠦᠵᠡᠵᠦ ᠪᠠᠢᠭᠠᠳ ᠪᠠᠭᠠᠨᠠ ᠪᠠᠷᠢᠭᠤᠨ ᠳᠡᠯᠡᠳᠦᠭᠰᠡᠨ ᠪᠣᠯ ᠪᠠᠰᠠ ᠴᠤ᠌ ᠮᠠᠭᠠᠳ ᠦᠭᠡᠢ ᠮᠣᠷᠢ ᠭᠡᠨᠡ ᠮᠠᠨᠠᠷᠠᠭᠰᠠᠨ ᠲᠣᠭᠣᠰᠣᠨ ᠳ᠋ᠤᠨᠢ ᠳᠠᠷᠤᠭᠳᠠᠵᠤ ᠭᠡᠨᠡ ᠮᠠᠩᠰᠢᠭᠤᠷᠠᠵᠤ ᠪᠠᠢᠭᠠᠳ ᠬᠣᠵᠢᠭᠳᠠᠵᠤ ᠯᠠ ᠭᠡᠨᠡ ᠮᠠᠭᠰᠢᠨ ᠮᠠᠭᠰᠢᠨ ᠭᠦᠶᠦᠵᠦ ᠪᠠᠢᠭᠠᠳ ᠮᠠᠭᠤᠬᠠᠢ ᠨᠢᠭᠡ ᠭᠡᠨᠡᠳᠡᠴᠢᠬᠡᠯᠡ ᠭᠡᠨᠡ ᠬᠠᠨᠳᠤᠭᠰᠠᠨ ᠵᠦᠭ ᠢ᠋ᠶ᠋ᠡᠨ ᠲᠥᠭᠡᠷᠢᠴᠢᠬᠡᠵᠦ ᠭᠡᠨᠡ ᠬᠠᠲᠠᠷᠢᠬᠤ ᠡᠷᠳᠡᠮ ᠢ᠋ᠶ᠋ᠡᠨ ᠮᠠᠷᠲᠠᠴᠢᠬᠠᠵᠤ ᠭᠡᠨᠡ ᠃ ᠬᠠᠶᠠ ᠨᠢᠭᠡ ᠣᠷᠣᠯᠳᠣᠭᠰᠠᠨ ᠪᠣᠯᠬᠣᠷ ᠬᠠᠷᠠᠮᠰᠠᠯᠲᠠᠢ ᠪᠠᠷ ᠬᠣᠢᠨᠠ ᠨᠢ ᠬᠣᠴᠣᠷᠴᠢᠬᠠᠯᠠ ᠭᠡᠨᠡ ᠃ ᠠ ！ ᠬᠥᠭᠡᠷᠦᠬᠦᠢ ！ ᠳᠠᠬᠢᠪᠠᠯ ᠣᠳᠣ ᠲᠠ ᠶᠠᠭᠠᠬᠢᠳᠠᠭ ᠪᠢᠯᠡ ᠳᠠ ？ ᠭᠡᠬᠦ ᠳ᠋ᠦ᠍ : ᠠᠭᠲᠠ ᠶ᠋ᠢᠨ ᠤᠷᠤᠯᠳᠤᠭᠠᠨ ᠢ᠋ ᠦᠵᠡᠵᠦ ᠪᠠᠢᠭᠠᠳ ᠠᠷᠭᠠ ᠲᠤᠷᠰᠢᠯᠭᠠ ᠶ᠋ᠢ ᠰᠤᠷᠤᠨᠠ ᠭᠡᠨᠡ ᠂ ᠠᠬᠢᠬᠤ ᠵᠢᠯ ᠦ᠋ᠨ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠠᠷᠭᠠ ᠰᠠᠮᠪᠠᠭᠠᠲᠠᠢ ᠣᠷᠣᠯᠳᠣᠨᠠ ᠭᠡᠨᠡ ᠂ ᠳᠠᠷᠠᠭᠠ ᠤᠳᠠᠭᠠ ᠳ᠋ᠤ᠌ ᠪᠣᠯᠤᠶᠠ ᠭᠡᠨᠡ ᠲᠠᠪᠰᠢᠵᠤ ᠪᠠᠢᠭᠠᠳ ᠭᠦᠢᠴᠡᠨᠡ ᠭᠡᠨᠡ ᠬᠣᠢᠲᠤᠨ ᠵᠢᠯ ᠮᠡᠳᠡᠶᠡ ᠭᠡᠨᠡ ᠃ ᠠ ᠬᠥᠭᠡᠷᠦᠬᠦᠢ ! ᠠᠷᠭᠠ ᠦᠭᠡᠢ ᠡᠨᠡ ᠰᠠᠢᠬᠠᠨ ᠵᠣᠷᠢᠭ ᠰᠠᠨᠠᠭᠠ ᠶ᠋ᠢ ᠨᠢ ᠮᠠᠭᠲᠠᠨ ᠰᠠᠢᠰᠢᠶᠠᠵᠤ ᠠᠷᠠᠳ ᠣᠯᠠᠨ ᠢ᠋ᠶ᠋ᠠᠷ ᠰᠡᠳᠬᠢᠯ ᠪᠠᠶᠠᠰᠬᠠᠬᠤ ᠳ᠋ᠠᠭᠠᠨ ᠠᠯᠲᠠᠨ ᠰᠠᠨᠳᠠᠯᠢ ᠭᠡᠵᠦ ᠴᠣᠯᠠ ᠱᠠᠩᠨᠠᠯᠠ ᠃