ᠰᠢᠨᠡ ᠵᠢᠯ᠂ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠬᠣᠣᠰ ᠤᠶᠠᠩᠭᠠ(ᠬᠣᠶᠠᠷ)Шинэ жил, цагаан сарын хос уянга
1117ᠰᠢᠨᠡ ᠵᠢᠯ᠂ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠬᠣᠣᠰ ᠤᠶᠠᠩᠭᠠ02
ᠰᠢᠮᠡᠳᠦ ᠰᠠᠷᠬᠤᠳ ᠰᠥᠩᠨᠡᠭᠰᠡᠨ ᠰᠢᠨᠡ ᠵᠢᠯ ᠦ᠋ᠨ ᠪᠠᠶᠠᠷ
ᠰᠠᠢᠬᠠᠨ ᠤ᠋ ᠪᠡᠯᠭᠡ ᠪᠦᠷᠢᠳᠦᠭᠰᠡᠨ ᠥᠯᠵᠡᠢᠲᠦ ᠬᠠᠪᠤᠷ ᠤ᠋ᠨ ᠢᠪᠡᠭᠡᠯ
ᠮᠣᠩᠭᠣᠯ ᠤ᠋ᠨ ᠰᠠᠢᠬᠠᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠳᠠᠭ ᠳᠡᠯᠭᠡᠨ ᠵᠣᠯᠭᠠᠯᠴᠠᠶᠠ
ᠮᠣᠷᠠᠯ ᠤ᠋ᠨ ᠰᠠᠢᠬᠠᠨ ᠶᠣᠰᠣ ᠪᠠᠷ ᠬᠦᠬᠦᠷ ᠰᠣᠯᠢᠯᠴᠠᠨ ᠮᠡᠨᠳᠦᠴᠢᠯᠡᠶᠡ
ᠠᠯᠢᠪᠠ ᠪᠦᠬᠦᠨ ᠥᠭᠡᠳᠡᠯᠡᠨ ᠳᠠᠪᠰᠢᠬᠤ ᠰᠢᠨᠡ ᠵᠢᠯ
ᠠᠮᠵᠢᠯᠲᠠ ᠪᠦᠲᠦᠭᠡᠯ ᠡᠯᠪᠡᠭᠵᠢᠨ ᠵᠤᠵᠠᠭᠠᠷᠠᠬᠤ ᠰᠢᠨᠡ ᠬᠠᠪᠤᠷ
ᠠᠮᠵᠢᠯᠲᠠ ᠶᠡᠬᠡᠲᠡᠢ ᠬᠠᠭᠤᠴᠢᠨ ᠵᠢᠯ ᠢ᠋ᠶ᠋ᠡᠨ ᠦᠳᠡᠶᠡ
ᠠᠬᠢᠨ ᠲᠠᠪᠰᠢᠬᠤ ᠰᠢᠨᠡ ᠬᠠᠪᠤᠷ ᠢ᠋ᠶ᠋ᠠᠨ ᠤᠭᠲᠤᠶᠠ
ᠬᠠᠪᠤᠷ ᠮᠦᠰᠢᠶᠡᠭᠰᠡᠨ ᠰᠢᠨᠡ ᠵᠢᠯ ᠳ᠋ᠦ᠍ ᠰᠠᠢᠨ ᠤ᠋ ᠪᠡᠯᠭᠡ ᠲᠡᠭᠦᠰ
ᠬᠠᠳᠠᠭ ᠳᠡᠯᠭᠡᠭᠰᠡᠨ ᠠᠢᠯᠴᠢᠨ ᠭᠡᠢᠴᠢᠳ ᠮᠠᠩᠨᠠᠢ ᠲᠡᠨᠢᠢᠮᠡ ᠪᠠᠶᠠᠷ
ᠲᠥᠷᠥ ᠤᠯᠤᠰ ᠲᠦᠪᠰᠢᠷᠡᠨ ᠡᠩᠬᠡᠵᠢᠭᠰᠡᠨ ᠰᠢᠨᠡ ᠵᠢᠯ ᠦ᠋ᠨ ᠪᠠᠶᠠᠷ
ᠲᠦᠮᠡᠨ ᠢᠷᠡᠭᠡᠳ ᠪᠠᠶᠠᠵᠢᠨ ᠴᠢᠨᠡᠭᠡᠯᠢᠭᠵᠢᠭᠰᠡᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠨᠠᠢᠷ
ᠦᠦᠷ ᠴᠠᠢᠮᠠᠭᠴᠠ ᠪᠠᠶᠠᠷ ᠤ᠋ᠨ ᠫᠤᠤᠵᠢᠩ ᠢ᠋ᠶ᠋ᠠᠷ ᠴᠠᠭᠠᠨ ᠰᠠᠷᠠ ᠪᠠᠨ ᠪᠡᠯᠭᠡᠯᠡᠮᠦᠢ
ᠡᠭᠦᠳᠡ ᠰᠡᠬᠦᠮᠡᠬᠴᠡ ᠪᠢᠯᠢᠭ ᠦ᠋ᠨ ᠬᠠᠳᠠᠭ ᠢ᠋ᠶ᠋ᠠᠷ ᠰᠢᠨᠡ ᠶ᠋ᠢᠨ ᠵᠣᠴᠢᠨ ᠢ᠋ᠶ᠋ᠠᠨ ᠤᠭᠲᠤᠮᠤᠢ
ᠴᠠᠭ ᠲᠥᠷᠥ ᠶ᠋ᠢᠨ ᠪᠠᠳᠠᠷᠠᠯ ᠳ᠋ᠤ᠌ ᠬᠡᠢ ᠮᠣᠷᠢ ᠲᠠᠢ ᠶᠠᠪᠤᠶᠠ
ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠪᠠᠶᠠᠷ ᠲᠤ᠌ ᠬᠡᠰᠢᠭ ᠪᠤᠶᠠᠨ ᠢ᠋ᠶ᠋ᠠᠨ ᠬᠤᠷᠤᠢᠯᠠᠶᠠ
ᠮᠣᠷᠠᠯ ᠤ᠋ᠨ ᠰᠠᠢᠬᠠᠨ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠦᠬᠦᠷ ᠰᠣᠯᠢᠯᠴᠠᠨ ᠵᠣᠯᠭᠠᠯᠴᠠᠶᠠ
ᠮᠣᠩᠭᠣᠯ ᠤ᠋ᠨ ᠡᠷᠬᠢᠮ ᠳᠠᠳᠬᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠷᠵᠢᠮ ᠡᠷᠭᠦᠨ ᠨᠠᠢᠷᠠᠯᠳᠤᠶᠠ
ᠪᠠᠶᠠᠷ ᠤ᠋ᠨ ᠬᠤᠨᠳᠠᠭᠠ ᠪᠠᠨ ᠡᠷᠭᠦᠨ ᠪᠠᠢᠵᠤ ᠴᠠᠭᠠᠨ ᠰᠠᠷᠠ ᠪᠠᠨ ᠤᠭᠲᠤᠶᠠ
ᠪᠠᠬᠠᠳᠤᠯᠲᠤ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ ᠪᠠᠢᠵᠤ ᠰᠠᠳᠤᠨ ᠲᠥᠷᠥᠯ ᠲᠡᠢ ᠪᠡᠨ ᠨᠠᠢᠷᠯᠠᠶᠠ
ᠡᠯᠪᠡᠭ ᠬᠤᠷᠢᠶᠠᠯᠲᠠ ᠪᠠᠨ ᠪᠡᠯᠭᠡᠯᠡᠨ ᠨᠠᠢᠷᠯᠠᠬᠤᠶᠠ ᠡᠷᠦᠬᠡ ᠪᠦᠷᠢ ᠪᠠᠶᠠᠷ ᠲᠠᠢ
ᠴᠠᠭᠠᠨ ᠰᠠᠷᠠ ᠪᠠᠨ ᠪᠠᠶᠠᠷᠯᠠᠨ ᠤᠭᠲᠤᠬᠤᠶᠠ ᠬᠥᠮᠦᠨ ᠪᠦᠬᠦᠨ ᠵᠢᠷᠭᠠᠯ ᠲᠠᠢ
ᠥᠭᠡᠷᠡᠴᠢᠯᠡᠯᠲᠡ ᠶ᠋ᠢᠨ ᠠᠴᠢ ᠪᠠᠷ ᠪᠠᠶᠠᠵᠢᠬᠤ ᠥᠨᠢᠷ ᠴᠠᠭᠠᠨ ᠰᠠᠷᠠ
ᠣᠳᠣᠬᠢᠴᠢᠯᠠᠯᠲᠠ ᠶ᠋ᠢᠨ ᠬᠡᠰᠢᠭ ᠢ᠋ᠶ᠋ᠡᠷ ᠳᠡᠭᠵᠢᠷᠡᠬᠦ ᠥᠯᠵᠡᠢᠲᠦ ᠰᠢᠨᠡ ᠣᠨ
ᠥᠭᠡᠷᠡᠴᠢᠯᠡᠯᠲᠡ ᠶ᠋ᠢᠨ ᠪᠦᠷᠢᠶᠡ ᠰᠢᠨᠡ ᠵᠢᠯ ᠳ᠋ᠦ᠍ ᠦᠪᠡᠳᠡᠭᠰᠢ ᠪᠠᠶᠠᠷ ᠠᠪᠴᠢᠷᠠᠨᠠᠮ
ᠣᠳᠣᠬᠢᠴᠢᠯᠠᠯᠲᠠ ᠶ᠋ᠢᠨ ᠴᠤᠤᠷᠢᠶᠠ ᠬᠣᠲᠠ ᠬᠥᠳᠡᠭᠡ ᠳ᠋ᠦ᠍ ᠠᠤᠭᠠ ᠵᠢᠷᠤᠭ ᠳᠡᠯᠭᠡᠨᠡᠮ
ᠣᠭᠲᠠᠷᠭᠤᠢ ᠴᠡᠯᠮᠡᠭᠰᠢᠵᠦ ᠨᠠᠷᠠᠨ ᠬᠡᠷᠡᠯᠳᠦᠭᠡᠳ ᠰᠢᠨᠡ ᠶ᠋ᠢᠨ ᠪᠠᠶᠠᠷ ᠬᠥᠭᠵᠢᠩᠭᠦᠢ
ᠥᠷᠭᠥᠭᠡ ᠰᠢᠨᠡᠳᠴᠦ ᠭᠡᠷ ᠰᠠᠷᠠᠭᠤᠯᠵᠢᠭᠠᠳ ᠡᠷᠢᠨ ᠦ᠌ ᠠᠮᠢᠳᠤᠷᠠᠯ ᠪᠠᠶᠠᠰᠤᠩᠭᠤᠢ
ᠮᠣᠷᠢᠨ ᠬᠤᠭᠤᠷ ᠤ᠋ᠨ ᠬᠥᠩᠭᠢᠨᠡᠯ ᠳ᠋ᠦ᠍ ᠰᠠᠭᠠᠯᠢ ᠶ᠋ᠢᠨ ᠠᠷᠢᠬᠢ ᠪᠢᠯᠬᠠᠨᠠᠮ
ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠬᠥᠭᠵᠢᠯ ᠳ᠋ᠦ᠍ ᠤᠶᠠᠩᠭᠠ ᠰᠢᠯᠦᠭ ᠤᠨᠳᠤᠷᠤᠨᠠᠮ
ᠬᠣᠲᠠ ᠳᠦᠭᠦᠷᠡᠩ ᠬᠤᠭᠤᠷ ᠬᠦᠩᠭᠢᠨᠡᠭᠰᠡᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠪᠠᠶᠠᠷ
ᠬᠤᠨᠳᠠᠭᠠ ᠳᠦᠭᠦᠷᠡᠩ ᠠᠷᠠᠵᠠ ᠪᠢᠯᠬᠠᠭᠰᠠᠨ ᠡᠯᠪᠡᠭ ᠵᠢᠯ ᠦ᠋ᠨ ᠨᠠᠢᠷ
ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠡᠷᠳᠡᠮ ᠮᠡᠷᠭᠡᠵᠢᠯ ᠢᠷᠡᠬᠦ ᠣᠨ ᠤ᠋ ᠬᠦᠯᠦᠭ
ᠰᠢᠨᠡ ᠬᠥᠭᠵᠢᠯ ᠶᠡᠬᠡ ᠮᠠᠨᠳᠤᠯ ᠤᠭᠲᠤᠬᠤ ᠵᠢᠯ ᠦ᠋ᠨ ᠪᠡᠯᠡᠭ
ᠬᠠᠳᠠᠭ ᠬᠦᠬᠦᠷ ᠰᠣᠯᠢᠯᠴᠠᠭᠰᠠᠨ ᠬᠠᠯᠠᠭᠤᠨ ᠨᠠᠢᠷ ᠲᠠᠢ ᠴᠠᠭᠠᠨ ᠰᠠᠷᠠ
ᠬᠠᠩᠭᠢᠨᠠᠮᠠ ᠳᠠᠭᠤᠤ ᠠᠶᠠᠯᠠᠭᠤᠯᠤᠭᠰᠠᠨ ᠬᠠᠪᠤ ᠴᠡᠩᠭᠡᠯᠲᠦ ᠰᠢᠨᠡ ᠣᠨ
ᠥᠯᠵᠡᠢ ᠪᠡᠯᠭᠡ ᠲᠡᠢ ᠪᠤᠶᠠᠨᠲᠤ ᠴᠠᠭᠠᠨ ᠰᠠᠷᠠ
ᠥᠭᠡᠳᠡᠯᠡᠯ ᠳᠡᠭᠵᠢᠷᠡᠯ ᠲᠡᠢ ᠪᠠᠳᠠᠷᠠᠯᠲᠤ ᠰᠢᠨᠡ ᠵᠢᠯ
ᠥᠯᠵᠡᠢ ᠪᠡᠯᠭᠡᠲᠦ ᠴᠠᠭᠠᠨ ᠰᠠᠷᠠ ᠪᠡᠯᠭᠡ ᠲᠠᠮᠪᠠᠷᠠᠯ ᠣᠯᠠᠨᠲᠠᠢ
ᠥᠭᠡᠳᠡ ᠡᠰᠡᠷᠡᠭ ᠰᠢᠨᠡ ᠵᠢᠯ ᠬᠡᠢ ᠮᠣᠷᠢ ᠰᠠᠢᠲᠠᠢ
ᠪᠦᠲᠦᠭᠡᠯ ᠰᠠᠢᠲᠠᠢ ᠬᠠᠭᠤᠴᠢᠨ ᠵᠢᠯ ᠢ᠋ᠶ᠋ᠡᠨ ᠦᠳᠡᠨᠡᠮ
ᠪᠦᠭᠦᠳᠡᠭᠡᠷ ᠮᠠᠨᠳᠤᠬᠤ ᠰᠢᠨᠡ ᠵᠢᠯ ᠢ᠋ᠶ᠋ᠡᠨ ᠤᠭᠲᠤᠨᠠᠮ
ᠮᠢᠩᠭᠠᠨ ᠪᠠᠶᠠᠷ ᠪᠢᠯᠬᠠᠭᠰᠠᠨ ᠪᠠᠶᠠᠷᠲᠤ ᠴᠠᠭᠠᠨ ᠰᠠᠷᠠ
ᠲᠦᠮᠡᠨ ᠥᠯᠵᠡᠢ ᠪᠦᠷᠢᠳᠦᠭᠰᠡᠨ ᠪᠡᠯᠭᠡᠲᠦ ᠰᠠᠢᠬᠠᠨ ᠬᠠᠪᠤᠷ
ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠢ᠋ ᠡᠷᠬᠢᠮᠯᠡᠪᠡᠰᠦ ᠣᠨ ᠣᠨ ᠥᠭᠡᠳᠡ
ᠰᠢᠳᠤᠷᠭᠤ ᠬᠥᠳᠡᠯᠮᠦᠷᠢ ᠶ᠋ᠢ ᠲᠦᠰᠢᠭᠯᠡᠪᠡᠯ ᠵᠢᠯ ᠵᠢᠯ ᠡᠰᠡᠷᠡᠭ
ᠲᠡᠭᠦᠰ ᠠᠮᠵᠢᠯᠲᠠ ᠪᠠᠷ ᠬᠠᠭᠤᠴᠢᠨ ᠵᠢᠯ ᠢ᠋ᠶ᠋ᠡᠨ ᠦᠳᠡᠨᠡᠮ
ᠲᠡᠨᠢᠭᠦᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠰᠢᠨᠡ ᠠᠮᠢᠯᠠᠯ ᠢ᠋ᠶ᠋ᠠᠨ ᠤᠭᠲᠤᠨᠠᠮ
ᠲᠡᠷᠢᠭᠦᠯᠡᠭᠴᠢ ᠴᠡᠴᠡᠭ ᠤᠷᠢᠨ ᠬᠠᠪᠤᠷ ᠢ᠋ ᠮᠡᠳᠡᠭᠡᠯᠡᠨᠡᠮ
ᠲᠦᠮᠡᠨ ᠪᠣᠳᠠᠰ ᠰᠢᠨᠡ ᠠᠮᠢᠯᠠᠯ ᠢ᠋ᠶ᠋ᠠᠨ ᠤᠭᠲᠤᠨᠠᠮ
ᠠᠮᠢᠯᠠᠬᠴᠢ᠄ ᠰ ᠳᠠᠯᠠᠨᠪᠠᠶᠠᠷ
2024.1.2