ᠨᠸᠲ ᠰᠦᠯᠵᠢᠶᠡ-ᠬᠡᠦᠬᠡᠳ ᠦ᠋ᠨ ᠬᠥᠮᠦᠵᠢᠯ ᠳ᠋ᠦ᠍ ᠭᠡᠷ ᠦ᠋ᠨ ᠠᠬᠠᠮᠠᠳ ᠤ᠋ᠨ ᠠᠩᠬᠠᠷᠬᠤ ᠵᠦᠢᠯ ᠦ᠋ᠳ-ᠮᠣᠩᠭᠣᠯᠴᠤᠳ ᠤ᠋ᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠵᠢᠯ3-04-ᠪᠣᠯᠣᠴᠢᠯᠠᠭᠤ
578ᠳᠥᠷᠪᠡ᠂ ᠨᠸᠲ ᠰᠦᠯᠵᠢᠶᠡ
ᠨᠸᠲ ᠰᠦᠯᠵᠢᠶᠡ ᠭᠡᠵᠦ ᠶᠠᠭᠤ ᠪᠣᠢ? ᠲᠣᠮᠣᠭᠠ ᠲᠠᠢ ᠤᠬᠠᠭᠠᠨ ᠲᠠᠢ ᠬᠥᠮᠦᠰ ᠲᠤ ᠪᠣᠯ ᠨᠸᠲ ᠰᠦᠯᠵᠢᠶᠡ ᠨᠢ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠶᠡᠬᠡ ᠣᠶᠤᠨ ᠤᠬᠠᠭᠠᠨ ᠤ᠋ ᠣᠷᠣᠨ ᠵᠠᠢ᠂ ᠤᠷᠠ ᠮᠡᠳᠡᠯᠭᠡ ᠶ᠋ᠢᠨ ᠪᠠᠶᠠᠨ ᠰᠠᠩ ᠮᠥᠨ᠃ ᠭᠡᠲᠡᠯᠡ ᠲᠣᠮᠣᠭᠠ ᠣᠷᠣᠭᠠ ᠦᠭᠡᠢ ᠬᠡᠦᠬᠡᠳ ᠪᠤᠶᠤ ᠪᠡᠶᠡ ᠳ᠋ᠦ᠍ ᠪᠡᠨ ᠬᠠᠷᠢᠭᠤᠴᠠᠯᠭᠠ ᠦᠭᠡᠢ ᠬᠥᠮᠦᠰ ᠲᠤ ᠪᠣᠯ ᠲᠣᠯᠣᠭᠠᠢ ᠤᠨᠠᠬᠤ ᠭᠠᠢ ᠲᠠᠢ ᠠᠶᠤᠮᠰᠢᠭᠲᠤ ᠣᠷᠴᠢᠨ ᠪᠠᠢᠭᠠ᠃ ᠰᠦᠯᠵᠢᠶᠡ ᠶ᠋ᠢᠨ ᠴᠡᠩᠬᠡᠷ ᠳᠡᠯᠭᠡᠴᠡᠨ ᠳᠡᠭᠡᠷᠡ ᠭᠡᠷᠡᠯ ᠭᠡᠭᠡ ᠲᠡᠢ ᠪᠤᠶᠠᠨ ᠤ᠋ ᠴᠠᠭᠠᠨ ᠮᠡᠳᠡᠭᠡᠯᠡᠯ ᠴᠤ᠌ ᠪᠠᠢᠨᠠ᠂ ᠬᠠᠷᠠ ᠡᠷᠴᠢ ᠬᠦᠴᠦ ᠲᠡᠢ ᠭᠠᠵᠢᠭᠤ ᠰᠣᠯᠣᠭᠠᠢ ᠮᠡᠳᠡᠭᠡᠯᠡᠯ ᠴᠦ᠍ ᠪᠠᠢᠳᠠᠭ᠂ ᠰᠦᠯᠵᠢᠶᠡ ᠶ᠋ᠢ ᠳᠥᠬᠥᠮᠬᠡᠨ ᠬᠡᠯᠡᠪᠡᠯ ᠥᠨᠥ ᠶ᠋ᠢᠨ ᠠᠬᠤᠢ ᠨᠡᠢᠭᠡᠮ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠡᠢᠰᠪᠦᠷᠢ ᠰᠦᠯᠵᠢᠶᠡᠨ ᠦ᠌ ᠶᠢᠷᠲᠢᠨᠴᠦ ᠳ᠋ᠦ᠍ ᠣᠷᠣᠴᠢᠬᠠᠵᠠᠢ᠃ ᠰᠦᠯᠵᠢᠶᠡᠨ ᠳᠡᠭᠡᠷᠡ ᠨᠣᠮ ᠦᠵᠡᠳᠡᠭ ᠨᠢ ᠨᠣᠮ ᠢ᠋ᠶ᠋ᠠᠨ ᠡᠷᠢᠵᠦ᠂ ᠵᠣᠬᠢᠶᠠᠯ ᠪᠢᠴᠢᠳᠡᠭ ᠨᠢ ᠵᠣᠬᠢᠶᠠᠯ ᠢ᠋ᠶ᠋ᠠᠨ ᠨᠡᠢᠲᠡᠯᠡᠵᠦ᠂ ᠬᠥᠮᠦᠨ ᠮᠡᠬᠡᠯᠡᠳᠡᠭ ᠨᠢ ᠬᠥᠮᠦᠨ ᠮᠡᠬᠡᠯᠡᠵᠦ᠂ ᠶᠠᠯᠠ ᠬᠢᠳᠡᠭ ᠨᠢ ᠶᠠᠯᠠᠲᠤ ᠠᠵᠢᠯᠯᠠᠭᠠ ᠪᠠᠨ ᠦᠢᠯᠡᠳᠴᠦ᠂ ᠬᠣᠭ ᠨᠣᠪᠰᠢ ᠲᠠᠷᠬᠠᠭᠠᠳᠠᠭ ᠨᠢ ᠬᠣᠭ ᠨᠣᠪᠰᠢ ᠪᠠᠨ ᠲᠠᠷᠬᠠᠭᠠᠵᠤ ᠯᠠ ᠪᠠᠢᠨᠠ᠃《ᠮᠠᠭᠤ ᠦᠭᠡ ᠮᠣᠳᠣᠨ ᠤᠯᠠᠭᠠ ᠲᠠᠢ》 ᠭᠡᠳᠡᠭ᠃ ᠬᠥᠮᠦᠰ ᠶᠡᠷᠦ ᠨᠢ ᠮᠠᠭᠤ ᠦᠭᠡ ᠮᠠᠭᠤᠬᠠᠢ ᠰᠤᠷᠠᠭ ᠢ᠋ ᠲᠠᠷᠬᠠᠭᠠᠬᠤ ᠨᠢ ᠰᠠᠢᠨ ᠴᠢᠮᠡᠭᠡ ᠳᠠᠮᠵᠢᠭᠤᠯᠬᠤ ᠠ᠋ᠴᠠ ᠳᠥᠷᠪᠡᠨ ᠳᠠᠬᠢᠨ ᠢᠯᠡᠭᠦᠦ ᠭᠡᠰᠡᠨ ᠰᠤᠳᠤᠯᠭᠠᠨ ᠪᠠᠢᠳᠠᠭ᠃ ᠡᠭᠦᠨ ᠲᠡᠢ ᠠᠳᠠᠯᠢᠬᠠᠨ ᠬᠥᠮᠦᠰ ᠮᠠᠭᠤ ᠶ᠋ᠢ ᠰᠤᠷᠬᠤ ᠳ᠋ᠤ᠌ ᠮᠥᠨ ᠲᠦᠷᠭᠡᠨ ᠪᠠᠢᠳᠠᠭ᠃ ᠲᠡᠢᠮᠦ ᠪᠣᠯᠬᠣᠷ ᠰᠦᠯᠵᠢᠶᠡ ᠪᠡᠷ ᠲᠠᠷᠬᠠᠵᠤ ᠪᠠᠢᠭᠠ ᠡᠷᠡᠭᠦᠯ ᠪᠤᠰᠤ ᠮᠡᠳᠡᠭᠡᠯᠡᠯ᠂ ᠠᠯᠠᠯᠭᠠᠨ ᠵᠣᠳᠣᠭᠠᠨ ᠲᠠᠢ ᠨᠠᠭᠠᠳᠤᠮ ᠲᠣᠭᠯᠠᠭᠠᠮ ᠮᠡᠲᠦ ᠬᠠᠷᠠ ᠡᠷᠴᠢ ᠬᠦᠴᠦ ᠲᠡᠢ ᠵᠦᠢᠯᠡᠰ ᠨᠢ ᠬᠥᠮᠦᠰ ᠢ᠋ ᠲᠤᠩ ᠬᠢᠯᠪᠠᠷᠬᠠᠨ ᠨᠥᠯᠥᠭᠡᠯᠡᠳᠡᠭ ᠢ᠋ ᠮᠡᠳᠡᠭᠦᠰᠢᠲᠡᠢ᠃ ᠬᠡᠦᠬᠡᠳ ᠪᠣᠯ ᠰᠣᠨᠢᠭᠤᠴᠢ ᠵᠠᠩ ᠲᠠᠢ᠂ ᠠᠰᠪᠤᠷ ᠴᠠᠢᠯᠭᠠᠨ ᠭᠡᠨᠡᠨ ᠨᠠᠰᠤᠨ ᠳ᠋ᠤ᠌ ᠪᠠᠢᠬᠤ ᠲᠤᠯᠠ ᠠᠯᠢ ᠪᠣᠯᠬᠤ ᠦᠭᠡᠢ ᠭᠡᠰᠡᠨ ᠬᠣᠷᠢᠭ ᠲᠠᠢ ᠡᠷᠡᠭᠦᠯ ᠪᠤᠰᠤ ᠵᠦᠢᠯ ᠢ ᠨᠢ ᠨᠡᠩ ᠢᠯᠡᠭᠦᠦ ᠰᠣᠨᠢᠷᠬᠠᠵᠤ᠂ ᠦᠵᠡᠯ ᠪᠤᠷᠤᠭᠤ ᠡᠲᠡᠭᠡᠳ ᠲᠤ ᠬᠠᠮᠤᠭ ᠬᠢᠯᠪᠠᠷᠬᠠᠨ ᠮᠡᠬᠡᠯᠡᠭᠳᠡᠵᠦ ᠬᠠᠮᠤᠭ ᠶᠡᠬᠡ ᠬᠣᠬᠢᠷᠠᠯ ᠠᠮᠰᠠᠵᠤ ᠪᠠᠢᠭᠠ ᠨᠡᠢᠭᠡᠮ ᠦ᠋ᠨ ᠪᠠᠭᠤᠷᠠᠢ ᠪᠦᠯᠦᠭᠲᠦ ᠴᠤ᠌ᠭᠴᠠ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠪᠦᠬᠦ ᠶᠠᠭᠤᠮᠠ ᠰᠦᠯᠵᠢᠶᠡᠨ ᠦ᠌ ᠮᠠᠭᠤ ᠪᠢᠰᠢ᠂ ᠠᠰᠠᠭᠤᠳᠠᠯ ᠲᠠᠢ ᠭᠡᠷ ᠪᠦᠯᠢ ᠶ᠋ᠢᠨ ᠣᠷᠴᠢᠨ ᠳ᠋ᠤ᠌ ᠥᠰᠴᠦ ᠪᠠᠢᠭᠠ ᠬᠡᠦᠬᠡᠳ ᠠᠮᠠᠷᠬᠠᠨ ᠨᠸᠲ ᠰᠦᠯᠵᠢᠶᠡᠨ ᠦ᠌ ᠰᠢᠨᠤᠯᠲᠠᠨ ᠪᠣᠯᠵᠤ᠂ ᠡᠳᠦᠷᠵᠢᠨ ᠰᠦᠯᠵᠢᠶᠡᠨ ᠲᠣᠭᠯᠠᠭᠠᠮ ᠪᠤᠶᠤ ᠰᠦᠯᠵᠢᠶᠡᠨ ᠨᠠᠢᠵᠠ ᠨᠠᠷ ᠲᠠᠢ ᠪᠠᠨ ᠬᠠᠨᠢᠯᠠᠵᠤ᠂ ᠰᠦᠯᠵᠢᠶᠡᠨ ᠦ᠌ ᠶᠢᠷᠲᠢᠨᠴᠦ ᠶ᠋ᠢᠨ ᠬᠣᠭ ᠨᠣᠪᠰᠢ ᠶ᠋ᠢᠨ ᠬᠠᠷᠠᠩᠭᠤᠢ ᠪᠤᠯᠤᠩ ᠳ᠋ᠤ᠌ ᠠᠮᠢᠳᠤᠷᠠᠵᠤ ᠪᠠᠢᠳᠠᠭ᠃ ᠢᠩᠭᠢᠵᠦ ᠰᠢᠨᠤᠯ ᠲᠠᠢ ᠪᠣᠯᠤᠭᠰᠠᠨ ᠬᠡᠦᠬᠡᠳ ᠲᠤ ᠠᠵᠢᠯ ᠰᠤᠷᠤᠯᠭᠠ ᠶ᠋ᠢᠨ ᠬᠠᠷᠢᠴᠠᠭᠤᠯᠭᠠ ᠦᠭᠡᠢ ᠪᠣᠯᠵᠤ᠂ ᠰᠦᠯᠵᠢᠶᠡᠨ ᠡᠴᠡ ᠰᠠᠯᠪᠠᠯ ᠣᠶᠤᠨ ᠰᠠᠨᠠᠭᠠ ᠨᠢ ᠬᠣᠭᠣᠰᠣᠷᠠᠵᠤ᠂ ᠠᠮᠢᠳᠤᠷᠠᠬᠤ ᠢᠲᠡᠭᠡᠯ ᠴᠤ᠌ ᠦᠭᠡᠢ ᠪᠣᠯᠳᠠᠭ᠃ ᠡᠳᠡᠭᠡᠷ ᠬᠡᠦᠬᠡᠳ ᠡᠳᠦᠷᠵᠢᠨ ᠰᠦᠯᠵᠢᠶᠡᠨ ᠳ᠋ᠦ᠍ ᠬᠣᠷᠭᠣᠳᠠᠬᠤ ᠮᠥᠩᠭᠥ ᠣᠯᠬᠤ ᠶ᠋ᠢᠨ ᠲᠥᠯᠥᠭᠡ ᠬᠤᠳᠠᠯ ᠬᠤᠯᠠᠭᠠᠢ ᠬᠢᠬᠦ ᠪᠤᠶᠤ ᠬᠣᠣᠷ ᠰᠠᠷᠢᠭᠠᠯᠠᠬᠤ ᠠ᠋ᠴᠠ ᠪᠤᠴᠠᠬᠤ ᠦᠭᠡᠢ ᠪᠠᠢᠳᠠᠭ᠂ ᠳᠥᠭᠥᠮ ᠬᠣᠭᠣᠯᠠ ᠤᠮᠳᠠᠭᠠᠨ ᠢ᠋ᠶ᠋ᠠᠷ ᠥᠯ ᠳᠠᠷᠤᠵᠤ ᠬᠡᠴᠢᠨᠡᠨ ᠡᠳᠦᠷ ᠢ᠋ᠶ᠋ᠡᠷ ᠰᠦᠯᠵᠢᠶᠡᠨ ᠳ᠋ᠦ᠍ ᠤᠶᠠᠭᠳᠠᠳᠠᠭ ᠠ᠋ᠴᠠ ᠪᠣᠯᠵᠤ ᠪᠡᠶᠡ ᠮᠠᠬᠠᠪᠣᠳ ᠤᠬᠠᠭᠠᠨ ᠮᠡᠳᠡᠷᠡᠯ ᠨᠢ ᠴᠥᠮ ᠳᠣᠷᠣᠢᠲᠠᠵᠤ ᠡᠬᠢᠯᠡᠳᠡᠭ᠃
ᠨᠸᠲ ᠰᠦᠯᠵᠢᠶᠡᠨ ᠦ᠌ ᠭᠠᠵᠠᠷ ᠨᠢ ᠡᠳᠦᠷᠵᠢᠨ ᠰᠥᠨᠢᠵᠢᠨ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠳᠠᠭ ᠮᠥᠷᠲᠡᠭᠡᠨ ᠭᠡᠷᠡᠯ ᠠᠭᠠᠷ ᠨᠡᠪᠲᠡᠷᠡᠬᠦ ᠨᠢ ᠮᠠᠭᠤ ᠪᠠᠢᠳᠠᠭ ᠪᠣᠯᠬᠣᠷ ᠣᠯᠠᠨ ᠬᠥᠮᠦᠨ ᠦ᠌ ᠲᠠᠮᠠᠬᠢᠨ ᠤᠲᠤᠭᠠ᠂ ᠬᠥᠯᠥᠰᠥᠨ ᠦᠨᠦᠷ᠂ ᠮᠠᠰᠢᠨ ᠠ᠋ᠴᠠ ᠭᠠᠷᠬᠤ ᠮᠠᠭᠤ ᠠᠭᠠᠷ᠂ ᠰᠠᠴᠤᠷᠠᠭ ᠳᠣᠯᠭᠢᠶᠠᠨ ᠨᠡᠢᠯᠡᠭᠡᠳ ᠪᠦᠭᠴᠢᠮᠡ ᠪᠣᠬᠢᠷ ᠠᠮᠢᠰᠬᠤᠯ ᠪᠣᠢ ᠪᠣᠯᠵᠤ ᠡᠪᠡᠳᠴᠢᠨ ᠬᠠᠯᠳᠠᠪᠤᠷᠢᠯᠠᠵᠤ ᠡᠭᠦᠰᠬᠦ ᠳ᠋ᠦ᠍ ᠪᠦᠷ ᠴᠦ᠍ ᠬᠢᠯᠪᠠᠷᠬᠠᠨ᠃ ᠣᠳᠣ ᠨᠸᠲ ᠰᠦᠯᠵᠢᠶᠡᠨ ᠡᠴᠡ ᠬᠦᠵᠦᠭᠦᠨ ᠦᠶᠡ᠂ ᠮᠥᠷᠥ ᠳᠠᠯᠤ᠂ ᠵᠢᠷᠦᠬᠡᠨ ᠦ᠌᠂ ᠮᠡᠳᠡᠷᠡᠯ ᠦ᠋ᠨ᠂ ᠰᠡᠳᠬᠢᠴᠡ ᠶ᠋ᠢᠨ ᠭᠡᠬᠦ ᠮᠡᠲᠦ ᠬᠣᠷᠢ ᠢᠯᠡᠭᠦᠦ ᠲᠥᠷᠥᠯ ᠦ᠋ᠨ ᠡᠪᠡᠳᠴᠢᠨ ᠢᠯᠡᠷᠡᠬᠦ ᠪᠣᠯᠤᠭᠰᠠᠨ ᠪᠥᠭᠡᠳ ᠲᠤᠰᠬᠠᠢᠯᠠᠨ ᠨᠸᠲ ᠰᠦᠯᠵᠢᠶᠡᠨ ᠦ᠌ ᠶᠡᠷᠦᠩᠬᠡᠢᠯᠡᠭᠰᠡᠨ ᠡᠪᠡᠳᠴᠢᠨ ᠭᠡᠳᠡᠭ ᠰᠢᠨᠡ ᠡᠪᠡᠳᠴᠢᠨ ᠦ᠌ ᠨᠡᠷᠡᠢᠳᠦᠯ ᠪᠣᠢ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠨᠡᠩ ᠴᠢᠬᠤᠯᠠ ᠨᠢ ᠬᠡᠦᠬᠡᠳ ᠦ᠋ᠨ ᠰᠡᠳᠬᠢᠴᠡ ᠬᠦᠨᠳᠦ ᠶ᠋ᠢ ᠨᠣᠴᠢᠲᠠᠢ ᠬᠣᠣᠷᠳᠠᠯ ᠳ᠋ᠤ᠌ ᠤᠴᠠᠷᠠᠵᠤ ᠨᠡᠢᠭᠡᠮ ᠦ᠋ᠨ ᠬᠣᠭ ᠨᠣᠪᠰᠢ ᠲᠠᠷᠢᠬᠢ ᠲᠣᠯᠣᠭᠠᠢ ᠶ᠋ᠢ ᠨᠢ ᠡᠵᠡᠯᠡᠨ ᠵᠠᠩ ᠠᠭᠠᠰᠢ ᠨᠢ ᠵᠣᠵᠢᠭ ᠵᠥᠷᠢᠭᠦᠳ ᠪᠣᠯᠵᠤ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ᠨᠢ ᠪᠤᠷᠤᠭᠤ ᠵᠠᠮ ᠢ᠋ᠶ᠋ᠠᠷ ᠣᠷᠣᠵᠤ ᠶᠠᠯᠠ ᠬᠢᠬᠦ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠴᠦ ᠪᠣᠢ᠃ ᠨᠸᠲ ᠰᠦᠯᠵᠢᠶᠡ ᠶ᠋ᠢᠨ ᠬᠡᠦᠬᠡᠳ ᠲᠤ ᠤᠴᠠᠷᠠᠭᠤᠯᠵᠤ ᠪᠠᠢᠭᠠ ᠬᠣᠣᠷ ᠭᠡᠮ ᠪᠣᠯ ᠲᠤᠩ ᠬᠦᠨᠳᠦ ᠨᠣᠴᠢᠲᠠᠢ ᠶᠤᠮ᠃ ᠣᠳᠣ ᠵᠠᠰᠠᠭ ᠤ᠋ᠨ ᠣᠷᠳᠣᠨ ᠠ᠋ᠴᠠ ᠨᠠᠰᠤᠨ ᠳ᠋ᠤ᠌ ᠬᠦᠷᠦᠭᠡ ᠦᠭᠡᠢ ᠬᠡᠦᠬᠡᠳ ᠦ᠋ᠨ ᠨᠸᠲ ᠰᠦᠯᠵᠢᠶᠡᠨ ᠳ᠋ᠦ᠍ ᠣᠷᠣᠬᠤ ᠶ᠋ᠢ ᠴᠠᠭᠠᠵᠠᠯᠠᠬᠤ ᠵᠠᠷᠯᠢᠭ ᠨᠡᠢᠲᠡᠯᠡᠭᠰᠡᠨ ᠪᠥᠭᠡᠳ ᠰᠤᠷᠭᠠᠭᠤᠯᠢ ᠣᠢᠷᠠᠯᠴᠠᠭᠠ ᠨᠸᠲ ᠰᠦᠯᠵᠢᠶᠡᠨ ᠦ᠌ ᠭᠠᠵᠠᠷ ᠭᠠᠷᠭᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠬᠣᠷᠢᠭᠯᠠᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠬᠠᠤᠯᠢ ᠪᠤᠰᠤ ᠡᠲᠡᠭᠡᠳ ᠮᠥᠨ ᠯᠡ ᠬᠤᠯᠠᠭᠠᠢ ᠬᠤᠳᠠᠯ ᠢ᠋ᠶ᠋ᠠᠷ ᠦᠢᠯᠡᠳᠴᠦ ᠬᠢᠳᠡᠭ ᠢ᠋ᠶ᠋ᠡᠨ ᠬᠢᠭᠰᠡᠭᠡᠷ ᠪᠠᠢᠨᠠ᠃ ᠡᠢᠮᠦ ᠡᠴᠡ ᠭᠡᠷ ᠦ᠋ᠨ ᠠᠬᠠᠮᠠᠳ ᠡᠨᠡ ᠲᠠᠯᠠ ᠪᠠᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠴᠢᠩᠭᠠ ᠬᠠᠮᠢᠶᠠᠷᠬᠤ ᠴᠢᠬᠤᠯᠠ ᠲᠠᠢ ᠪᠠᠢᠨᠠ᠃ ᠪᠠᠰᠠ ᠨᠸᠲ ᠰᠦᠯᠵᠢᠶᠡᠨ ᠦ᠌ ᠭᠠᠵᠠᠷ ᠭᠠᠷᠴᠤ ᠪᠠᠢᠭᠠ ᠲᠡᠳᠡᠭᠡᠷ ᠬᠠᠤᠯᠢ ᠪᠤᠰᠤ ᠡᠲᠡᠭᠡᠳ ᠦ᠋ᠨ ᠮᠡᠬᠡᠯᠡᠬᠦ᠂ ᠰᠦᠷᠳᠡᠭᠦᠯᠬᠦ᠂ ᠪᠤᠯᠢᠶᠠᠬᠤ᠂ ᠵᠣᠳᠣᠯᠳᠤᠬᠤ᠂᠂᠂ ᠵᠡᠷᠭᠡ ᠪᠣᠯᠬᠢ ᠶᠠᠪᠤᠳᠠᠯ ᠤ᠋ᠳ ᠬᠡᠦᠬᠡᠳ ᠦ᠋ᠨ ᠪᠡᠶᠡ ᠰᠡᠳᠬᠢᠴᠡ ᠳ᠋ᠦ᠍ ᠶᠡᠬᠡ ᠬᠣᠣᠷᠳᠠᠯ ᠠᠪᠴᠢᠷᠠᠵᠤ ᠪᠠᠢᠭᠠ ᠶ᠋ᠢ ᠵᠠᠪᠠᠯ ᠠᠩᠬᠠᠷᠬᠤ ᠬᠡᠷᠡᠭᠲᠡᠢ᠃ ᠶᠠᠯᠠᠲᠤ ᠡᠲᠡᠭᠡᠳ ᠬᠡᠦᠬᠡᠳ ᠦ᠋ᠨ ᠪᠡᠶᠡ ᠶ᠋ᠢᠨ ᠭᠠᠷᠤᠯ᠂ ᠭᠡᠷ ᠦ᠋ᠨ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠵᠤ ᠠᠪᠤᠭᠠᠳ᠂ ᠭᠡᠷ ᠦ᠋ᠨ ᠬᠥᠮᠦᠰ ᠡᠴᠡ ᠨᠢ ᠵᠣᠭᠣᠰ ᠮᠡᠬᠡᠯᠡᠬᠦ᠂ ᠬᠡᠦᠬᠡᠳ ᠢ᠋ ᠬᠠᠤᠯᠢ ᠪᠤᠰᠤ ᠠᠵᠢᠯᠯᠠᠭᠠ ᠳ᠋ᠤ᠌ ᠲᠠᠲᠠᠵᠤ ᠣᠷᠣᠭᠤᠯᠬᠤ ᠮᠡᠲᠦ ᠠᠯᠢ ᠪᠠᠢᠭᠰᠠᠨ ᠮᠠᠭᠤᠬᠠᠢ ᠦᠢᠯᠡ ᠶ᠋ᠢ ᠦᠢᠯᠡᠳᠬᠦ ᠪᠣᠯᠵᠠᠢ᠃ ᠲᠠᠮᠠᠬᠢ ᠲᠠᠲᠠᠳᠠᠭ ᠦᠭᠡᠢ ᠬᠡᠦᠬᠡᠳ ᠲᠠᠮᠠᠬᠢ ᠲᠠᠲᠠᠵᠤ ᠡᠴᠦᠰ ᠲᠤ ᠪᠡᠨ ᠬᠣᠣᠷ ᠴᠤ᠌ ᠲᠠᠲᠠᠬᠤ ᠪᠣᠯᠵᠤ ᠪᠠᠰᠠ ᠦᠯᠦ ᠲᠠᠨᠢᠬᠤ ᠬᠥᠮᠦᠨ ᠲᠡᠢ ᠢᠨᠠᠭᠯᠠᠬᠤ᠂ ᠲᠡᠷᠡᠴᠢᠯᠡᠨ ᠳᠠᠭᠠᠵᠤ ᠶᠠᠪᠤᠬᠤ ᠦᠵᠡᠭᠳᠡᠯ ᠢᠯᠡᠷᠡᠵᠦ᠂ ᠵᠠᠷᠢᠮ ᠠᠢᠯ ᠤ᠋ᠨ ᠬᠡᠦᠬᠡᠳ ᠨᠢ ᠭᠡᠨᠡᠳᠲᠡ ᠪᠡᠷ ᠠᠯᠠᠭᠠ ᠪᠣᠯᠵᠤ ᠪᠠᠢᠭᠠ ᠨᠢ ᠪᠦᠷ ᠯᠡ ᠨᠸᠲ ᠰᠦᠯᠵᠢᠶᠡ ᠲᠡᠢ ᠬᠣᠯᠪᠣᠭᠠ ᠲᠠᠢ᠃ ᠪᠠᠰᠠ ᠵᠠᠷᠢᠮ ᠬᠡᠦᠬᠡᠨᠴᠦᠳ ᠬᠠᠤᠯᠢ ᠪᠤᠰᠤ ᠡᠲᠡᠭᠡᠳ ᠲᠤ ᠮᠡᠬᠡᠯᠡᠭᠳᠡᠨ᠂ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠲᠠᠯᠠ ᠪᠠᠷ ᠲᠠᠮᠤᠯᠠᠭᠳᠠᠵᠤ᠂ ᠵᠠᠷᠢᠮ ᠨᠢ ᠠᠷᠭᠠ ᠪᠤᠰᠤ ᠲᠣᠭᠯᠠᠭᠠᠮ ᠤ᠋ᠨ ᠭᠠᠵᠠᠷ ᠢ᠋ᠶ᠋ᠠᠷ ᠨᠠᠭᠠᠳᠤᠮ ᠤ᠋ᠨ ᠶᠠᠭᠤᠮᠠ ᠪᠣᠯᠵᠤ ᠪᠣᠢ᠃
ᠰᠦᠯᠵᠢᠶᠡᠨ ᠡᠴᠡ ᠡᠭᠦᠰᠴᠦ ᠪᠠᠢᠭᠠ ᠡᠨᠡ ᠣᠯᠠᠨ ᠠᠰᠠᠭᠤᠳᠠᠯ ᠪᠣᠯ ᠰᠦᠯᠵᠢᠶᠡ ᠭᠡᠳᠡᠭ ᠪᠣᠯ ᠬᠠᠤᠯᠢ ᠪᠤᠰᠤ ᠡᠲᠡᠭᠡᠳ ᠦ᠋ᠨ ᠬᠥᠮᠦᠨ ᠮᠡᠬᠡᠯᠡᠵᠦ ᠶᠠᠯᠠ ᠨᠢᠭᠦᠯ ᠬᠢᠬᠦ ᠳ᠋ᠦ᠍ ᠨᠡᠩ ᠨᠢᠭᠤᠴᠠᠭᠠᠢ ᠳᠥᠭᠥᠮ ᠨᠥᠬᠥᠴᠡᠯ ᠢ᠋ ᠬᠠᠩᠭᠠᠭᠰᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠶᠤᠮ᠃ ᠮᠡᠬᠡᠯᠡᠭᠴᠢᠳ ᠶᠠᠭ ᠡᠨᠡᠬᠦ ᠨᠢᠭᠤᠴᠠᠬᠠᠨ ᠪᠠᠭ ᠤ᠋ᠨ ᠴᠠᠭᠠᠨᠠ ᠠ᠋ᠴᠠ ᠭᠡᠨᠡᠨ ᠴᠠᠢᠯᠭᠠᠨ ᠬᠡᠦᠬᠡᠳ ᠲᠤ ᠬᠠᠷᠠ ᠰᠠᠪᠠᠷ ᠢ᠋ᠶ᠋ᠠᠨ ᠰᠤᠩᠭᠠᠵᠤ ᠪᠠᠢᠳᠠᠭ᠃ ᠬᠥᠮᠦᠰ ᠦ᠋ᠨ ᠮᠣᠷᠠᠯ ᠰᠤᠷᠲᠠᠯ ᠭᠠᠵᠢᠬᠤ ᠳ᠋ᠤ᠌ ᠬᠦᠷᠪᠡᠯ ᠬᠡᠴᠢᠨᠡᠨ ᠥᠨᠳᠥᠷ ᠡᠷᠳᠡᠮ ᠮᠡᠷᠭᠡᠵᠢᠯ ᠡᠵᠡᠮᠰᠢᠯᠡ ᠴᠤ᠌ ᠭᠡᠳ ᠠᠯᠢ ᠳᠠᠪᠰᠢᠩᠭᠤᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠮᠡᠷᠭᠡᠵᠢᠯ ᠢ᠋ ᠴᠤ᠌ ᠠᠯᠢ ᠪᠤᠯᠢᠬᠠᠢ ᠮᠠᠭᠤᠬᠠᠢ ᠪᠠᠷ ᠠᠰᠢᠭᠯᠠᠳᠠᠭ ᠤ᠋ᠨ ᠵᠢᠱ᠌ᠢᠶᠡ ᠡᠨᠡ ᠪᠠᠢᠭᠠ᠃ ᠰᠦᠯᠵᠢᠶᠡᠨ ᠡᠴᠡ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠶ᠋ᠢᠨ ᠰᠤᠷᠠᠭ ᠵᠠᠩᠭᠢ᠂ ᠠᠵᠢᠯ ᠦᠢᠯᠡᠰ ᠦ᠋ᠨ ᠠᠵᠠ ᠲᠣᠬᠢᠶᠠᠯ᠂ ᠰᠤᠷᠤᠯᠴᠠᠯᠭᠠ ᠰᠤᠳᠤᠯᠭᠠᠨ ᠤ ᠮᠠᠲ᠋ᠧᠷᠢᠶᠠᠯ ᠪᠠᠷᠢᠮᠲᠠ᠂ ᠡᠷᠡᠭᠦᠯ ᠠᠭᠤᠯᠭᠠ ᠲᠠᠢ ᠺᠢᠨᠣ᠋ ᠤᠷᠠᠯᠢᠭ ᠰᠣᠨᠢᠷᠬᠠᠵᠤ ᠪᠠᠢᠪᠠᠯ ᠨᠸᠲ ᠶᠢᠷᠲᠢᠨᠴᠦ ᠶ᠋ᠢᠨ ᠴᠡᠪᠡᠷ ᠠᠭᠠᠷ ᠲᠤ ᠠᠮᠢᠳᠤᠷᠠᠵᠤ ᠪᠠᠢᠨᠠ ᠭᠡᠰᠡᠨ ᠦᠭᠡ᠃ ᠲᠡᠭᠡᠬᠦ ᠡᠴᠡ ᠭᠡᠷ ᠦ᠋ᠨ ᠠᠬᠠᠮᠠᠳ ᠮᠠᠨᠢ ᠨᠸᠲ ᠰᠦᠯᠵᠢᠶᠡ ᠶ᠋ᠢᠨ ᠭᠡᠷᠡᠯ ᠰᠡᠭᠦᠳᠡᠷ ᠬᠣᠶᠠᠷ ᠲᠠᠯᠠ ᠶ᠋ᠢ ᠭᠦᠢᠴᠡᠳ ᠲᠠᠨᠢᠵᠤ᠂ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠠᠤᠯᠢ ᠪᠤᠰᠤ ᠡᠲᠡᠭᠡᠳ ᠦ᠋ᠨ ᠬᠠᠷᠠ ᠰᠠᠪᠠᠷ ᠠ᠋ᠴᠠ ᠥᠮᠥᠭᠯᠡᠨ ᠬᠠᠮᠠᠭᠠᠯᠠᠵᠤ ᠶᠠᠪᠤᠶᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ ᠰᠡᠬᠡᠭᠡᠷᠡᠯ
ᠶᠡᠷᠦᠩᠬᠡᠢ ᠬᠢᠨᠠᠭᠴᠢ᠄ ᠵ· ᠪᠤᠶᠠᠨᠲᠣᠭᠲᠠᠬᠤ