ᠰᠤᠯᠠ ᠢᠳᠡᠭᠡᠨ-ᠬᠡᠦᠬᠡᠳ ᠦ᠋ᠨ ᠬᠥᠮᠦᠵᠢᠯ ᠳ᠋ᠦ᠍ ᠭᠡᠷ ᠦ᠋ᠨ ᠠᠬᠠᠮᠠᠳ ᠤ᠋ᠨ ᠠᠩᠬᠠᠷᠬᠤ ᠵᠦᠢᠯ ᠦ᠋ᠳ-ᠮᠣᠩᠭᠣᠯᠴᠤᠳ ᠤ᠋ᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠮᠦᠵᠢᠯ3-01-ᠪᠣᠯᠣᠴᠢᠯᠠᠭᠤ
528ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠬᠡᠦᠬᠡᠳ ᠦ᠋ᠨ ᠬᠥᠮᠦᠵᠢᠯ ᠳ᠋ᠦ᠍ ᠭᠡᠷ ᠦ᠋ᠨ ᠠᠬᠠᠮᠠᠳ ᠤ᠋ᠨ ᠠᠩᠬᠠᠷᠬᠤ ᠵᠦᠢᠯ ᠦ᠋ᠳ
ᠪᠠᠭᠠ ᠪᠤᠰᠤ ᠰᠠᠢᠬᠠᠨ ᠵᠠᠯᠠᠭᠤᠴᠤᠳ ᠨᠡᠢᠭᠡᠮ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠬᠣᠢᠨᠠ ᠪᠤᠶᠤ ᠠᠢᠯ ᠭᠡᠷ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠥᠭᠡᠳᠡ ᠨᠢ ᠲᠠᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠤᠷᠤᠭᠤᠳᠠᠵᠤ ᠶᠠᠪᠤᠬᠤ ᠨᠢ ᠬᠠᠷᠠᠭᠳᠠᠨᠠ᠂ ᠪᠦᠷ ᠯᠡ ᠠᠵᠢᠯ ᠠᠮᠢᠳᠤᠷᠠᠯ ᠤ᠋ᠨ ᠰᠤᠷᠲᠠᠯ ᠠᠵᠢᠯᠴᠢ ᠪᠣᠷᠣᠭᠵᠢᠭᠤᠨ ᠪᠢᠰᠢ᠂ ᠯᠠᠷᠵᠢᠶᠠ ᠶᠠᠩᠪᠠ ᠲᠠᠲᠠᠭᠰᠠᠭᠠᠷ ᠪᠠᠢᠵᠤ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠥᠭᠡᠢᠬᠢᠵᠦ ᠪᠠᠢᠨᠠ᠂ ᠡᠨᠡ ᠪᠣᠯ ᠶᠣᠰᠣᠲᠠᠢ ᠠᠢᠯ ᠭᠡᠷ ᠦ᠋ᠨ ᠬᠥᠮᠦᠵᠢᠯ ᠰᠤᠷᠲᠠᠯ ᠠ᠋ᠴᠠ ᠯᠠ ᠪᠣᠯᠤᠨᠠ᠃ ᠲᠡᠭᠡᠬᠦ ᠡᠴᠡ《ᠰᠤᠷᠭᠠᠨ ᠬᠥᠮᠦᠵᠢᠯ ᠣᠷᠣᠯᠭᠠ ᠪᠣᠯᠵᠤ᠂ ᠮᠠᠭᠤ ᠬᠥᠮᠦᠵᠢᠯ ᠵᠠᠷᠤᠯᠭᠠ ᠪᠣᠯᠳᠠᠭ》 ᠭᠡᠰᠡᠨ ᠬᠠᠪᠤᠲᠤ ᠦᠭᠡ ᠭᠠᠷᠤᠭᠰᠠᠨ᠃ ᠮᠠᠨ ᠤ᠋ ᠬᠥᠮᠦᠵᠢᠯ ᠦ᠋ᠨ ᠠᠷᠭᠠ ᠠᠪᠲᠠᠯ ᠪᠤᠷᠤᠭᠤᠳᠠᠬᠤ ᠳ᠋ᠤ᠌ ᠬᠦᠷᠪᠡᠯ ᠭᠡᠷ ᠪᠦᠯᠢ᠂ ᠨᠡᠢᠭᠡᠮ᠂ ᠰᠤᠷᠭᠠᠭᠤᠯᠢ ᠶ᠋ᠢᠨ ᠴᠢᠷᠮᠠᠢᠯᠭᠠ ᠵᠠᠷᠤᠯᠭᠠ ᠪᠦᠷ ᠬᠣᠭᠣᠰᠣᠳᠠᠵᠤ᠂ ᠨᠢᠭᠡ ᠠᠢᠯ ᠭᠡᠷ ᠦ᠋ᠨ ᠦᠶᠡ ᠵᠠᠯᠭᠠᠮᠵᠢ ᠳᠣᠷᠣᠢᠲᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂《ᠨᠥᠬᠥᠳ ᠦ᠋ᠨ ᠮᠠᠭᠤ ᠪᠠᠷ ᠨᠦᠬᠡᠨ ᠳ᠋ᠦ᠍ ᠤᠨᠠᠨᠠ》 ᠭᠡᠭᠴᠢ ᠪᠣᠯᠵᠤ᠂ ᠲᠡᠷᠡ ᠬᠡᠦᠬᠡᠳ ᠲᠡᠢ ᠨᠥᠬᠥᠷᠯᠡᠵᠦ ᠶᠠᠪᠤᠭᠰᠠᠨ ᠣᠯᠠᠨ ᠬᠡᠦᠬᠡᠳ ᠪᠠᠰᠠ ᠬᠥᠯ ᠠᠯᠳᠠᠬᠤ ᠪᠣᠯᠤᠨᠠ᠂ ᠨᠢᠭᠡ ᠠᠢᠯ ᠭᠡᠷ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠰᠢᠯᠢᠳᠡᠭ ᠬᠥᠮᠦᠵᠢᠭᠦᠯᠵᠦ ᠴᠢᠳᠠᠪᠠᠯ ᠲᠡᠷᠡ ᠠᠢᠯ ᠭᠡᠷ ᠢ᠋ ᠥᠭᠡᠳᠡ ᠨᠢ ᠲᠠᠲᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠨᠢᠭᠡ ᠨᠤᠲᠤᠭ ᠤᠰᠤᠨ ᠤ᠋ ᠨᠡᠷᠡ ᠬᠦᠨᠳᠦ ᠶ᠋ᠢ ᠴᠦ᠍ ᠮᠠᠨᠳᠤᠭᠤᠯᠵᠤ ᠴᠢᠳᠠᠨᠠ᠃ ᠶᠡᠷᠦ ᠨᠢ ᠨᠡᠢᠭᠡᠮ ᠦ᠋ᠨ ᠬᠥᠭᠵᠢᠯ ᠦ᠋ᠨ ᠦᠨᠳᠦᠰᠦᠨ ᠠᠰᠠᠭᠤᠳᠠᠯ ᠪᠣᠯ ᠭᠡᠷ ᠪᠦᠯᠢ ᠶ᠋ᠢᠨ ᠬᠥᠭᠵᠢᠯ ᠪᠠᠢᠨᠠ᠂ ᠤᠭᠰᠠᠭᠠ ᠶᠠᠰᠤᠲᠠᠨ ᠤ᠋ ᠰᠣᠶᠣᠯ ᠪᠣᠯᠪᠠᠰᠤᠨ ᠢ᠋ ᠠᠴᠢᠶᠠᠯᠠᠵᠤ ᠪᠠᠢᠭᠠ ᠬᠠᠮᠤᠭ ᠵᠢᠵᠢᠭ ᠨᠢᠭᠡᠴᠢ ᠪᠣᠯ ᠮᠥᠨ ᠴᠦ᠍ ᠭᠡᠷ ᠪᠦᠯᠢ ᠪᠠᠢᠭᠠ᠃ ᠲᠡᠭᠡᠬᠦ ᠪᠡᠷ ᠪᠢᠳᠡ ᠡᠭᠡᠯ ᠪᠣᠷᠣᠭᠵᠢᠭᠤᠨ ᠠᠮᠢᠳᠤᠷᠠᠯ ᠤ᠋ᠨ ᠳᠠᠳᠬᠠᠯ᠂ ᠡᠷᠡᠭᠦᠯ ᠰᠠᠷᠠᠭᠤᠯ ᠠᠢᠯ ᠭᠡᠷ ᠦ᠋ᠨ ᠠᠭᠠᠷ ᠢ᠋ ᠡᠷᠬᠢᠮᠯᠡᠵᠦ ᠶᠠᠪᠤᠪᠠᠯ ᠰᠠᠶᠢ ᠦᠷᠡ ᠬᠡᠦᠬᠡᠳ ᠮᠠᠨᠢ ᠡᠷᠡᠭᠦᠯ ᠳᠡᠭᠵᠢᠨ ᠦᠰᠦᠨ ᠪᠣᠢᠵᠢᠨᠠ ᠭᠡᠳᠡᠭ ᠲᠦ᠍ ᠢᠲᠡᠭᠡᠬᠦ ᠶᠣᠰᠣᠲᠠᠢ᠃ ᠡᠨᠳᠡ ᠪᠢ ᠮᠠᠨ ᠤ᠋ ᠠᠮᠢᠳᠤᠷᠠᠯ ᠤ᠋ᠨ ᠣᠷᠴᠢᠨ ᠳ᠋ᠤ᠌ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠲᠦᠭᠡᠮᠡᠯ ᠠᠰᠠᠭᠤᠳᠠᠯ ᠠ᠋ᠴᠠ ᠵᠢᠱ᠌ᠢᠶᠡ ᠲᠠᠲᠠᠵᠤ ᠰᠠᠨᠠᠭᠤᠯᠭᠠ ᠪᠣᠯᠭᠠᠶᠠ᠃
ᠨᠢᠭᠡ᠂ ᠰᠤᠯᠠ ᠢᠳᠡᠭᠡᠨ
ᠣᠳᠣ ᠶ᠋ᠢᠨ ᠵᠠᠬᠠ ᠵᠡᠭᠡᠯᠢ ᠳᠡᠭᠡᠷᠡ ᠬᠡᠦᠬᠡᠳ ᠦ᠋ᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠳᠠᠩᠴᠤ ᠣᠯᠠᠨ ᠪᠣᠯᠵᠠᠢ᠂ ᠡᠨᠡ ᠪᠣᠯ ᠨᠡᠢᠭᠡᠮ ᠦ᠋ᠨ ᠬᠥᠭᠵᠢᠯᠲᠡ ᠶ᠋ᠢᠨ ᠭᠠᠪᠢᠶᠠ᠃ ᠭᠡᠲᠡᠯᠡ ᠬᠡᠦᠬᠡᠳ ᠰᠤᠯᠠ ᠢᠳᠡᠭᠡᠨ ᠶᠡᠬᠡ ᠢᠳᠡᠬᠦ ᠨᠢ ᠴᠠᠭ ᠤ᠋ᠨ ᠬᠣᠭᠣᠯᠠ ᠪᠠᠨ ᠢᠳᠡᠬᠦ ᠦᠭᠡᠢ ᠪᠣᠯᠵᠤ᠂ ᠪᠡᠶᠡ ᠶ᠋ᠢᠨ ᠡᠷᠡᠭᠦᠯ ᠮᠡᠨᠳᠦ ᠪᠠ ᠬᠡᠪ ᠴᠢᠨᠠᠷ ᠢ᠋ ᠨᠢ ᠶᠡᠬᠡ ᠮᠠᠭᠤ ᠪᠠᠷ ᠨᠥᠯᠥᠭᠡᠯᠡᠬᠦ ᠮᠥᠷᠲᠡᠭᠡᠨ ᠠᠮᠠᠷᠬᠠᠨ ᠬᠣᠭᠣᠯᠠ ᠭᠣᠯᠣᠬᠤ ᠭᠡᠮ ᠲᠡᠢ ᠪᠣᠯᠳᠠᠭ᠃ ᠨᠡᠩ ᠠᠶᠤᠯ ᠲᠠᠢ ᠨᠢ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠭᠠ ᠠᠷᠪᠠᠨ ᠲᠥᠷᠥᠯ ᠦ᠋ᠨ ᠬᠣᠭ ᠤ᠋ᠨ ᠢᠳᠡᠭᠡᠨ ᠶᠠᠭ ᠮᠠᠨ ᠤ᠋ ᠬᠡᠦᠬᠡᠳ ᠦ᠋ᠨ ᠡᠳᠦᠷᠵᠢᠨ ᠡᠳ᠋ᠯᠡᠵᠦ ᠪᠠᠢᠭᠠ ᠢᠳᠡᠭᠡᠨ ᠤᠮᠳᠠᠭᠠᠨ ᠳᠤᠮᠳᠠ ᠭᠣᠣᠯᠯᠠᠵᠤ ᠪᠠᠢᠨᠠ᠃ ᠡᠳᠡᠭᠡᠷ ᠬᠣᠭ ᠤ᠋ᠨ ᠢᠳᠡᠭᠡᠨ ᠨᠢ ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠡᠷᠡᠭᠦᠯ ᠮᠡᠨᠳᠦ ᠶ᠋ᠢ ᠬᠦᠨᠳᠦ ᠨᠣᠴᠢᠲᠠᠢ ᠨᠥᠯᠥᠭᠡᠯᠡᠵᠦ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠬᠡᠪ ᠴᠢᠨᠠᠷ ᠢ᠋ ᠨᠢ ᠲᠤᠢᠯ ᠤ᠋ᠨ ᠳᠣᠷᠣᠢ ᠰᠤᠯᠠᠬᠠᠨ ᠪᠣᠯᠭᠠᠵᠤ ᠪᠣᠢ᠃ ᠭᠦᠢᠵᠧᠦ ᠶᠡᠬᠡ ᠰᠤᠷᠭᠠᠭᠤᠯᠢ2010 ᠣᠨ ᠤ᠋ ᠨᠠᠮᠤᠷ ᠤ᠋ᠨ ᠰᠤᠷᠤᠯᠭᠠ ᠡᠬᠢᠯᠡᠬᠦ ᠶᠣᠰᠣᠯᠠᠯ ᠳᠡᠭᠡᠷᠡ ᠰᠢᠨᠡ ᠣᠶᠤᠲᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠪᠣᠯᠪᠠᠰᠤᠷᠠᠯ ᠤ᠋ᠨ ᠳᠠᠢᠴᠢᠯᠠᠯᠲᠠ ᠬᠢᠵᠦ᠂ ᠬᠤᠷᠠᠯ ᠡᠬᠢᠯᠡᠭᠡᠳ ᠬᠠᠭᠠᠰ ᠴᠠᠭ ᠪᠣᠯᠬᠤ ᠬᠢᠷᠢ ᠳ᠋ᠦ᠍ ᠳᠥᠴᠢ ᠭᠠᠷᠤᠢ ᠣᠶᠤᠲᠠᠨ ᠵᠣᠭᠰᠣᠵᠤ ᠳᠡᠢᠯᠬᠦ ᠦᠭᠡᠢ ᠪᠣᠯᠵᠤ ᠮᠠᠨᠠᠷᠠᠵᠤ ᠤᠨᠠᠭᠰᠠᠨ ᠢ᠋ ᠲᠥᠪ ᠲᠧᠯᠸᠢᠰ ᠢ᠋ᠶ᠋ᠡᠷ ᠮᠡᠳᠡᠭᠡᠯᠡᠵᠦ ᠪᠠᠢᠭᠰᠠᠨ᠃ ᠡᠭᠦᠨ ᠳ᠋ᠦ᠍ ᠥᠨᠥ ᠶ᠋ᠢᠨ ᠬᠡᠦᠬᠡᠳ ᠠᠵᠢᠯ ᠬᠥᠳᠡᠯᠮᠦᠷᠢ ᠲᠠᠮᠢᠷ ᠤ᠋ᠨ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠣᠷᠣᠯᠴᠠᠬᠤ ᠨᠢ ᠳᠤᠲᠠᠭᠳᠠᠵᠤ ᠪᠠᠢᠬᠤ ᠠ᠋ᠴᠠ ᠭᠠᠳᠠᠨᠠ ᠰᠤᠯᠠ ᠢᠳᠡᠭᠡᠨ ᠶᠡᠬᠡ ᠢᠳᠡᠵᠦ ᠪᠠᠢᠬᠤ ᠲᠠᠢ ᠰᠢᠭᠤᠳ ᠬᠣᠯᠪᠣᠭᠠ ᠲᠠᠢ ᠶᠤᠮ᠃ ᠰᠤᠯᠠ ᠢᠳᠡᠭᠡᠨ ᠨᠢ ᠬᠡᠦᠬᠡᠳ ᠦ᠋ᠨ ᠡᠷᠡᠭᠦᠯ ᠮᠡᠨᠳᠦ ᠶ᠋ᠢ ᠨᠥᠯᠥᠭᠡᠯᠡᠵᠦ ᠪᠠᠢᠭᠠ ᠬᠠᠮᠤᠭ ᠤ᠋ᠨ ᠬᠡᠴᠡᠭᠦᠦ ᠨᠡᠢᠭᠡᠮ ᠦ᠋ᠨ ᠠᠰᠠᠭᠤᠳᠠᠯ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠢᠯᠠᠩᠭᠤᠶᠠ ᠭᠠᠭᠴᠠ ᠠᠰᠢᠭ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠨᠢᠳᠦ ᠤᠯᠠᠢᠵᠤ᠂ ᠬᠥᠮᠦᠨ ᠮᠥᠰᠥ ᠪᠡᠨ ᠭᠡᠭᠡᠭᠰᠡᠨ ᠮᠠᠢᠮᠠᠢᠴᠢᠨ ᠬᠤᠳᠠᠯᠳᠤᠭᠠᠴᠢᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠳ᠋ᠤ᠌ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠣᠣᠷᠲᠤ ᠡᠳ᠋ ᠢ᠋ ᠬᠣᠯᠢᠵᠤ᠂ ᠨᠢᠯᠬᠠ ᠬᠡᠦᠬᠡᠳ ᠦ᠋ᠨ ᠰᠦᠨ ᠲᠠᠯᠬᠠ ᠠ᠋ᠴᠠ ᠨᠠᠰᠤᠲᠠᠨ ᠡᠪᠡᠳᠴᠢᠲᠡᠨ ᠳ᠋ᠦ᠍ ᠵᠣᠷᠢᠭᠤᠯᠤᠭᠰᠠᠨ ᠰᠢᠮᠡ ᠲᠡᠵᠢᠭᠡᠯ ᠦ᠋ᠨ ᠵᠦᠢᠯ᠂ ᠡᠮ ᠳᠠᠩ ᠳ᠋ᠤ᠌ ᠬᠦᠷᠲᠡᠯᠡ ᠬᠠᠭᠤᠷᠮᠠᠭ ᠶᠠᠭᠤᠮᠠ ᠦᠢᠯᠡᠳᠪᠦᠷᠢᠯᠡᠬᠦ ᠪᠣᠯᠵᠠᠢ᠃ ᠬᠥᠳᠡᠭᠡ ᠵᠤᠳ ᠭᠠᠮᠰᠢᠭ ᠲᠤ᠌ ᠦᠬᠦᠭᠰᠡᠨ ᠮᠠᠯ ᠠᠳᠤᠭᠤᠰᠤᠨ ᠤ᠋ ᠦᠬᠦᠳᠡᠯ ᠵᠣᠪᠠᠯᠭᠠ ᠶ᠋ᠢ ᠲᠡᠭᠦᠬᠦ ᠪᠤᠶᠤ ᠬᠢᠮᠳᠠ ᠦᠨᠡ ᠪᠡᠷ ᠬᠤᠳᠠᠯᠳᠤᠨ ᠠᠪᠴᠤ ᠪᠠᠢᠭᠠ ᠨᠢ ᠶᠠᠭᠤ ᠬᠢᠵᠦ ᠪᠠᠢᠬᠤ ᠪᠣᠢ? ᠪᠦᠷ ᠯᠡ ᠬᠣᠭᠣᠯᠠᠨ ᠭᠡᠷ ᠲᠤ ᠵᠠᠷᠤᠬᠤ ᠪᠤᠶᠤ ᠬᠣᠭ ᠤ᠋ᠨ ᠢᠳᠡᠭᠡᠨ ᠬᠢᠵᠦ ᠪᠠᠢᠭᠠ᠃ ᠤᠬᠢᠶᠠᠳᠠᠰᠤᠨ ᠲᠣᠰᠣ ᠭᠡᠵᠦ ᠪᠦᠷ ᠠᠶᠤᠯ ᠤ᠋ᠨ ᠶᠠᠭᠤᠮᠠ ᠶ᠋ᠢ ᠵᠡᠭᠡᠯᠢ ᠶ᠋ᠢᠨ ᠰᠢᠷᠠᠮᠠᠯ ᠡᠨᠡ ᠲᠡᠷᠡ ᠬᠢᠬᠦ ᠳ᠋ᠦ᠍ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃ ᠡᠳᠡᠭᠡᠷ ᠠᠶᠤᠯᠲᠠᠢ ᠬᠣᠭ ᠤ᠋ᠨ ᠢᠳᠡᠭᠡᠨ ᠨᠢ ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠡᠷᠡᠭᠦᠯ ᠮᠡᠨᠳᠦ ᠶ᠋ᠢ ᠶᠡᠬᠡᠪᠡᠷ ᠨᠥᠯᠥᠭᠡᠯᠡᠵᠦ᠂ ᠴᠢᠰᠤ ᠴᠠᠢᠬᠤ ᠡᠪᠡᠳᠴᠢᠨ᠂ ᠬᠠᠷᠰᠢᠬᠤ ᠴᠢᠨᠠᠷᠲᠠᠢ ᠪᠣᠷᠣ ᠲᠣᠯᠪᠣ ᠮᠡᠲᠦ ᠴᠢᠰᠤᠨ ᠤ᠋ ᠬᠣᠣᠷᠳᠠᠯ ᠤ᠋ᠨ ᠠᠶᠤᠯᠲᠤ ᠡᠪᠡᠳᠴᠢᠨ ᠬᠡᠦᠬᠡᠳ ᠦ᠋ᠨ ᠳᠤᠮᠳᠠ ᠢᠯᠡᠷᠡᠬᠦ ᠪᠣᠯᠵᠠᠢ᠃ ᠵᠠᠯᠠᠭᠤᠴᠤᠳ ᠪᠠᠭᠠᠴᠤᠳ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ᠂ ᠰᠢᠭᠡᠰᠦᠨ ᠵᠠᠮ ᠤ᠋ᠨ ᠬᠣᠣᠷᠳᠠᠯ ᠣᠯᠵᠤ᠂ ᠭᠡᠷ ᠪᠦᠯᠢ ᠪᠣᠯᠤᠨ ᠨᠡᠢᠭᠡᠮ ᠳ᠋ᠦ᠍ ᠬᠦᠨᠳᠦ ᠶᠡᠬᠡ ᠳᠠᠷᠤᠭᠠᠰᠤ ᠠᠪᠴᠢᠷᠠᠵᠤ ᠪᠠᠢᠨᠠ᠃
ᠡᠷᠡᠭᠦᠯ ᠪᠡᠶᠡ ᠡᠴᠡ ᠰᠠᠷᠠᠭᠤᠯ ᠤᠬᠠᠭᠠᠨ ᠭᠡᠳᠡᠭ᠃ ᠮᠠᠨ ᠤ᠋ ᠬᠡᠦᠬᠡᠳ ᠡᠷᠡᠭᠦᠯ ᠴᠢᠭᠢᠷᠠᠭ ᠪᠡᠶᠡ ᠮᠠᠬᠠᠪᠣᠳ ᠲᠠᠢ ᠪᠠᠢᠵᠤ ᠴᠢᠳᠠᠪᠠᠯ ᠰᠠᠶᠢ ᠤᠬᠠᠭᠠᠨ ᠰᠠᠨᠠᠭᠠ ᠨᠢ ᠨᠡᠩ ᠬᠤᠷᠴᠠ ᠰᠡᠷᠭᠡᠭ ᠴᠣᠭ ᠵᠢᠪᠬᠤᠭᠠ ᠲᠠᠢ ᠪᠠᠢᠵᠤ ᠴᠢᠳᠠᠨᠠ᠃ ᠮᠠᠨᠤᠰ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠡᠪ ᠦ᠋ᠨ ᠡᠷᠡᠭᠦᠯ ᠴᠢᠭᠢᠷᠠᠭ ᠢ᠋ ᠪᠠᠲᠤᠯᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠭᠠᠳ ᠢᠷᠡᠭᠡᠳᠦᠢ ᠳ᠋ᠦ᠍ ᠲᠡᠳᠡᠨ ᠢ᠋ ᠪᠠᠰᠠ ᠶᠠᠭᠤᠨ ᠤ᠋ ᠬᠣᠰᠢᠭᠤ ᠳᠠᠷᠤᠭᠠ᠂ ᠡᠷᠳᠡᠮᠲᠡᠨ᠂ ᠢᠨᠵᠧᠨᠧᠷ ᠪᠣᠯᠭᠠᠬᠤ ᠭᠡᠵᠦ ᠶᠡᠬᠡ ᠶ᠋ᠢ ᠰᠠᠨᠠᠭᠠᠳ ᠴᠤ᠌ ᠶᠠᠭᠤ ᠬᠢᠬᠦ ᠪᠣᠢ? ᠰᠤᠯᠠ ᠢᠳᠡᠭᠡᠨ ᠦ᠌ ᠬᠣᠣᠷ ᠢ᠋ ᠡᠷᠲᠡ ᠡᠴᠡ ᠰᠡᠷᠡᠮᠵᠢᠯᠡᠵᠦ᠂ ᠬᠡᠦᠬᠡᠳ ᠲᠤ ᠪᠡᠨ ᠠᠩᠬᠠᠷᠤᠭᠤᠯᠵᠤ᠂ ᠬᠣᠣᠷ ᠨᠥᠯᠥᠭᠡ ᠶ᠋ᠢ ᠨᠢ ᠭᠦᠢᠴᠡᠳ ᠲᠠᠨᠢᠭᠤᠯᠬᠤ ᠶ᠋ᠢᠨ ᠬᠠᠮᠲᠤ ᠠᠷᠢᠭᠤᠨ ᠴᠡᠪᠡᠷ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠪᠣᠷᠣᠭᠵᠢᠭᠤᠨ ᠵᠠᠩᠰᠢᠯ ᠳ᠋ᠤ᠌ ᠬᠡᠪᠰᠢᠭᠦᠯᠬᠦ ᠪᠣᠯ ᠭᠡᠷ ᠦ᠋ᠨ ᠠᠬᠠᠮᠠᠳ ᠤ᠋ᠨ ᠴᠢᠬᠤᠯᠠ ᠠᠵᠢᠯ ᠪᠣᠯᠤᠭᠠᠳ ᠪᠠᠢᠨᠠ᠃
ᠵᠠᠷᠢᠮ ᠭᠡᠷ ᠦ᠋ᠨ ᠠᠬᠠᠮᠠᠳ ᠪᠠᠯᠭᠠᠰᠤᠨ ᠳ᠋ᠤ᠌ ᠭᠡᠷ ᠲᠦᠷᠢᠶᠡᠰᠦᠯᠡᠵᠦ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠠᠷᠠᠬᠤ ᠪᠠᠷ ᠬᠥᠳᠡᠭᠡ ᠡᠴᠡ ᠳᠠᠭᠠᠵᠤ ᠢᠷᠡᠭᠡᠳ ᠬᠢᠳᠡᠯ ᠦᠭᠡᠢᠳᠡᠵᠦ ᠂ ᠡᠳᠦᠷᠵᠢᠨ ᠨᠠᠢᠷ ᠬᠤᠷᠢᠮ ᠤ᠋ᠨ ᠰᠢᠷᠡᠭᠡ᠂ ᠮᠠᠵᠢᠶᠠᠩ ᠤ᠋ᠨ ᠰᠢᠷᠡᠭᠡ ᠲᠡᠢ ᠨᠥᠬᠥᠷᠯᠡᠭᠰᠡᠨ ᠡᠴᠡ ᠡᠴᠦᠰ ᠲᠤ ᠪᠡᠨ ᠨᠠᠭᠠᠳᠤᠮ ᠳ᠋ᠤ᠌ ᠰᠢᠨᠤᠯ ᠲᠠᠢ ᠪᠣᠯᠵᠤ᠂ ᠬᠡᠦᠬᠡᠳ ᠨᠢ ᠢᠷᠡᠬᠦ ᠳ᠋ᠦ᠍ ᠬᠣᠭᠣᠯᠠ ᠬᠤᠰᠢ ᠴᠤ᠌ ᠦᠭᠡᠢ᠂ ᠬᠠᠷᠢᠨ ᠮᠠᠵᠢᠶᠠᠩ ᠤᠬᠢᠶᠠᠵᠤ ᠪᠣᠬᠢᠷᠳᠠᠭᠰᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠬᠢᠷ ᠲᠤ ᠨᠤᠬᠤᠴᠢᠭᠳᠠᠭᠰᠠᠨ ᠬᠣᠶᠠᠷ ᠵᠣᠭᠣᠰ ᠬᠠᠶᠠᠵᠤ《 ᠮᠠᠢ! ᠠᠪᠠᠴᠢᠭᠠᠳ ᠳᠥᠭᠥᠮ ᠭᠤᠯᠢᠷ ᠠᠪᠤᠭᠠᠳ ᠢᠳᠡᠴᠢᠬᠡ》 ᠭᠡᠳᠡᠭ᠃ ᠡᠨᠡ ᠴᠢᠨᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠣᠭ ᠤ᠋ᠨ ᠣᠪᠣᠭᠠ ᠵᠦᠭ ᠠᠯᠪᠠ ᠪᠠᠷ ᠲᠦᠯᠬᠢᠵᠦ ᠪᠠᠢᠭᠠ ᠬᠡᠷᠡᠭ ᠪᠢᠰᠢ ᠤᠤ? ᠢᠩᠭᠢᠵᠦ ᠲᠦᠯᠬᠢᠭᠰᠡᠨ ᠡᠴᠡ ᠪᠣᠯᠵᠤ ᠡᠨᠳᠡᠯ ᠭᠡᠨᠡᠳᠡᠯ ᠭᠠᠷᠤᠭᠰᠠᠨ ᠵᠢᠱ᠌ᠢᠶᠡ ᠪᠠᠭᠠ ᠪᠤᠰᠤ ᠰᠢᠦ! ᠬᠡᠦᠬᠡᠳ ᠲᠦ᠍ ᠬᠣᠭᠣᠯᠠ ᠬᠢᠬᠦ ᠴᠠᠭ ᠲᠤ᠌ ᠪᠠᠨ ᠬᠣᠭᠣᠯᠠ ᠶ᠋ᠢ ᠨᠢ ᠬᠢᠵᠦ ᠳᠤᠷᠠ ᠲᠠᠢ ᠵᠦᠢᠯ ᠢ᠋ ᠨᠢ ᠴᠠᠳᠲᠠᠯᠠ ᠢᠳᠡᠭᠦᠯᠵᠦ ᠬᠡᠵᠢᠶᠡᠳᠡ ᠭᠡᠳᠡᠰᠦ ᠴᠠᠳᠬᠤᠯᠠᠩ᠂ ᠰᠡᠳᠬᠢᠯ ᠥᠶᠥᠭ ᠶᠠᠪᠤᠭᠤᠯᠬᠤ ᠪᠣᠯ ᠬᠡᠦᠬᠡᠳ ᠦ᠋ᠨ ᠦᠰᠦᠨ ᠪᠣᠢᠵᠢᠯᠲᠠ ᠳ᠋ᠤ᠌ ᠬᠣᠯᠪᠣᠭᠳᠠᠬᠤ ᠶᠡᠬᠡ ᠶᠠᠪᠤᠳᠠᠯ ᠮᠥᠷᠲᠡᠭᠡᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠢᠨ ᠦ᠌ ᠬᠠᠷᠢᠭᠤᠴᠠᠯᠭᠠ ᠪᠣᠯᠬᠤ ᠶᠤᠮ᠃ ᠡᠭᠦᠨ ᠦ᠌ ᠡᠰᠡᠷᠭᠦ ᠪᠡᠷ ᠵᠠᠷᠢᠮ ᠭᠡᠷ ᠦ᠋ᠨ ᠠᠬᠠᠮᠠᠳ ᠬᠣᠭᠣᠯᠠᠨ ᠤ᠋ ᠴᠠᠭ ᠪᠣᠯᠣᠮᠠᠭᠴᠠ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠠᠶᠠᠭᠠ ᠬᠠᠯᠪᠠᠭᠠ ᠪᠠᠷᠢᠭᠠᠳ ᠬᠣᠭᠣᠯᠠ ᠢᠳᠡᠭᠦᠯᠦᠨᠡ ᠭᠡᠮᠡᠨ ᠲᠠᠭᠤᠵᠤ ᠪᠠᠢᠳᠠᠭ᠂ ᠶᠡᠷᠦ ᠶ᠋ᠢᠨ ᠴᠠᠭ ᠲᠤ ᠰᠤᠯᠠ ᠢᠳᠡᠭᠡᠨ ᠢ᠋ ᠨᠢ ᠬᠢᠵᠠᠭᠠᠷᠯᠠᠭᠰᠠᠨ ᠦᠭᠡᠢ ᠪᠠᠢᠵᠤ ᠬᠣᠭᠣᠯᠠᠨ ᠤ᠋ ᠴᠠᠭ ᠪᠣᠯᠬᠤ ᠳ᠋ᠤ᠌ ᠥᠯᠥᠰᠦᠭᠰᠡᠨ ᠦᠭᠡᠢ ᠬᠡᠦᠬᠡᠳ ᠲᠦ᠍ ᠠᠯᠪᠠ ᠪᠠᠷ ᠢᠳᠡᠭᠦᠯᠦᠨᠡ ᠭᠡᠮᠡᠨ ᠲᠠᠮᠤᠯᠠᠵᠤ ᠪᠠᠢᠭᠰᠠᠭᠠᠷ ᠠᠮᠠᠷᠬᠠᠨ ᠬᠣᠭᠣᠯᠠ ᠭᠣᠯᠣᠬᠤ ᠭᠡᠮ ᠲᠡᠢ ᠪᠣᠯᠭᠠᠵᠤ ᠪᠠᠢᠨᠠ᠃
ᠲᠡᠢᠮᠦ ᠡᠴᠡ ᠬᠡᠦᠬᠡᠳ ᠲᠦ᠍ ᠪᠡᠨ ᠴᠠᠭ ᠤ᠋ᠨ ᠬᠣᠭᠣᠯᠠ ᠶ᠋ᠢ ᠴᠠᠭ ᠲᠤ᠌ ᠨᠢ ᠢᠳᠡᠭᠦᠯᠵᠦ ᠰᠤᠷᠭᠠᠶᠠ᠂ ᠴᠠᠭ ᠤ᠋ᠨ ᠬᠣᠭᠣᠯᠠᠨ ᠠ᠋ᠴᠠ ᠭᠠᠳᠠᠭᠤᠷ ᠰᠤᠯᠠ ᠢᠳᠡᠭᠡᠨ ᠪᠢᠲᠡᠭᠡᠢ ᠢᠳᠡᠭᠦᠯᠵᠦ ᠮᠠᠭᠤ ᠰᠤᠷᠭᠠᠶᠠ᠂ ᠠᠢᠯ ᠤ᠋ᠨ ᠬᠡᠦᠬᠡᠳ ᠲᠦ᠍ ᠳᠡᠯ ᠰᠤᠯᠠ ᠢᠳᠡᠬᠦ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠪᠡᠯᠡᠭ ᠪᠢᠲᠡᠭᠡᠢ ᠥᠭᠭᠦᠶᠡ᠂ ᠵᠢᠯ ᠴᠠᠭᠠᠨ ᠰᠠᠷᠠ ᠬᠡᠦᠬᠡᠳ ᠲᠦ᠍ ᠨᠣᠮ ᠤ᠋ᠨ ᠪᠡᠯᠡᠭ ᠭᠠᠷᠳᠠᠭᠤᠯᠬᠤ ᠪᠣᠯᠪᠠᠰᠤᠨ ᠰᠤᠷᠲᠠᠯ ᠢ᠋ ᠳᠡᠯᠭᠡᠷᠡᠭᠦᠯᠦᠶᠡ! ᠪᠢᠳᠡ ᠪᠦᠬᠦᠨ ᠬᠣᠭ ᠤ᠋ᠨ ᠢᠳᠡᠭᠡᠨ ᠡᠴᠡ ᠬᠣᠯᠠᠬᠠᠨ ᠪᠠᠢᠶᠠ᠂ ᠬᠣᠭᠣᠯᠠᠨ ᠭᠡᠷ ᠲᠦ᠍ ᠳᠤᠲᠠᠭᠤ ᠣᠷᠣᠶᠠ᠂ ᠭᠡᠷ ᠦ᠋ᠨ ᠬᠣᠭᠣᠯᠠ ᠭᠠᠷ ᠤ᠋ᠨ ᠬᠣᠭᠣᠯᠠ ᠰᠢᠮᠡ ᠱᠥᠯᠥ ᠲᠡᠢ ᠮᠣᠩᠭᠣᠯ ᠬᠣᠭᠣᠯᠠ ᠪᠠᠨ ᠡᠷᠬᠢᠮᠯᠡᠵᠦ ᠶᠠᠪᠤᠶᠠ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠵ· ᠪᠤᠶᠠᠨᠲᠣᠭᠲᠠᠬᠤ᠂ ᠪᠠᠶᠠᠨᠰᠡᠷᠡᠩ
ᠬᠢᠨᠠᠭᠴᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ