ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ- ᠦ᠌᠂ ᠤᠰᠤᠷХөдөөгийн хүн хүн-ө, уср
414ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ
ᠦ᠌᠂ ᠤᠰᠤᠷ
ᠬᠥᠯ ᠨᠢ ᠮᠠᠢᠵᠢᠭᠢ ᠴᠤ᠌ ᠰᠠᠨᠠᠭᠠ ᠨᠢ ᠰᠠᠨᠰᠠᠷ
ᠬᠥᠳᠡᠯᠬᠦ ᠨᠢ ᠬᠦᠳᠡᠭᠢ ᠴᠦ᠍ ᠪᠣᠳᠣᠯ ᠨᠢ ᠪᠤᠷᠬᠠᠨ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠬᠦᠯᠦᠭ ᠮᠣᠷᠢ ᠨᠢ ᠬᠥᠨᠳᠡᠢ ᠵᠠᠭᠠᠨ
ᠭᠡᠷᠡᠯ ᠦ᠋ᠨ ᠨᠣᠭᠲᠣ ᠪᠠᠨ ᠴᠢᠷᠵᠦ ᠳᠠᠪᠬᠢᠭᠰᠠᠨ
ᠰᠢᠷᠭᠠ ᠶ᠋ᠢᠨ ᠰᠢᠷᠭᠠ ᠨᠢ ᠨᠠᠷᠠ ᠶᠤᠮ
ᠭᠡᠷ ᠦ᠋ᠨ ᠬᠠᠶᠠᠭᠠ ᠨᠠᠯᠠᠵᠤ ᠳᠡᠯᠭᠡᠭᠰᠡᠨ
ᠰᠠᠩᠬᠠᠶᠤᠤ ᠭᠥᠯᠢᠮ ᠨᠢ ᠨᠠᠪᠴᠢ ᠶᠤᠮ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠡᠬᠢᠯᠡᠵᠦ ᠠᠭᠤᠯᠵᠠᠬᠤ ᠳ᠋ᠤ᠌ ᠰᠤᠢᠯᠠᠭᠠᠳ ᠴᠠᠭᠠᠰᠢ ᠪᠠᠨ ᠭᠦᠶᠦᠳᠡᠭ
ᠡᠶᠡᠰᠴᠦ ᠳᠠᠰᠬᠤ ᠳ᠋ᠤ᠌ ᠤᠬᠢᠯᠠᠭᠠᠳ ᠨᠠᠭᠠᠰᠢ ᠪᠠᠨ ᠢᠷᠡᠳᠡᠭ
ᠡᠪᠡᠳᠬᠦ ᠦᠶᠡ ᠳ᠋ᠦ᠍ ᠡᠯᠢᠭᠡ ᠪᠡᠨ ᠡᠮᠲᠡᠯᠦᠭᠡᠳ ᠥᠭᠳᠡᠭ
ᠡᠭᠳᠡᠭᠦᠴᠡᠬᠦ ᠴᠠᠭ ᠲᠤ᠌ ᠡᠷᠯᠢᠭ ᠪᠣᠯᠵᠤ ᠪᠣᠰᠳᠠᠭ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠭᠠᠵᠠᠷ ᠮᠠᠭᠠᠵᠢᠵᠤ ᠨᠣᠭᠣᠭᠠᠨ ᠤ᠋ ᠴᠥᠪᠥᠳᠡᠯ ᠰᠢᠮᠡᠳᠡᠭ ᠦᠭᠡᠢ
ᠭᠠᠯ ᠳ᠋ᠤ᠌ ᠬᠥᠭᠡᠷᠦᠭᠰᠡᠨ ᠴᠠᠭᠠᠨ ᠰᠦ ᠰᠢᠷᠭᠢᠳᠡᠭ ᠦᠭᠡᠢ
ᠭᠠᠳᠠᠨᠠ ᠪᠠᠨ ᠡᠪᠦᠯ ᠳᠣᠲᠣᠷᠠ ᠪᠠᠨ ᠵᠤᠨ
ᠭᠠᠷᠠᠭ ᠭᠠᠷᠠᠭ ᠤ᠋ᠨ ᠳᠣᠲᠣᠷᠠᠬᠢ ᠨᠠᠷᠠᠨ ᠭᠠᠷᠠᠭ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠬᠠᠩᠭᠠᠢ ᠲᠠᠯᠠ ᠪᠠᠷ ᠰᠦᠨᠳᠡᠷᠯᠡᠵᠦ ᠨᠡᠭᠦᠳᠡᠭ ᠠᠭᠤᠯᠠ
ᠬᠠᠲᠠᠲᠠᠢ ᠠᠭᠤᠯᠠ ᠪᠠᠷ ᠰᠦᠷᠯᠢᠭ ᠳᠡᠭᠦᠯᠢᠳᠡᠭ ᠬᠠᠷᠴᠠᠭᠠᠢ
ᠬᠠᠷᠴᠠᠭᠠᠢ ᠪᠦᠷᠭᠦᠳ ᠲᠡᠭᠡᠨ ᠰᠦᠯᠳᠡ ᠥᠨᠳᠥᠷ ᠲᠡᠭᠷᠢ
ᠬᠠᠨ ᠲᠩᠷᠢ ᠪᠡᠨ ᠲᠣᠭᠣᠨᠣ ᠪᠠᠷ ᠡᠷᠭᠦᠭᠰᠡᠨ ᠰᠢᠳᠢᠲᠡᠨ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠳᠣᠭᠰᠢᠨ ᠮᠣᠷᠢᠨ ᠤ᠋ ᠴᠢᠳᠥᠷ ᠢ᠋ᠶ᠋ᠡᠷ ᠰᠠᠯᠬᠢ ᠭᠠᠨᠵᠤᠭᠠᠯᠠᠳᠠᠭ
ᠲᠣᠰᠣᠨ ᠴᠠᠭᠠᠨ ᠵᠥᠭᠡᠬᠡᠢ ᠪᠡᠷ ᠰᠠᠷᠠ ᠳᠡᠭᠦᠷᠳᠡᠭ
ᠲᠣᠭᠲᠠᠭᠰᠠᠨ ᠪᠦᠭᠦᠳᠡ ᠪᠡᠨ ᠲᠥᠷᠥ ᠡᠴᠡ ᠪᠠᠲᠤ ᠰᠠᠬᠢᠳᠠᠭ
ᠳᠣᠬᠢᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠬᠠᠤᠯᠢ ᠠ᠋ᠴᠠ ᠴᠢᠩᠭᠠ ᠳᠠᠭᠠᠳᠠᠭ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠮᠣᠨᠳᠢ ᠭᠡᠳᠡᠭ ᠢ᠋ᠶ᠋ᠡᠨ ᠮᠠᠭᠤᠬᠠᠢ ᠬᠠᠷᠢᠶᠠᠯ ᠢ᠋ᠶ᠋ᠠᠷ ᠦᠵᠡᠳᠡᠭ
ᠮᠤᠯᠭᠤ ᠭᠡᠳᠡᠭ ᠢ᠋ᠶ᠋ᠡᠨ ᠮᠤᠨᠳᠠᠭ ᠬᠠᠭᠤᠷᠠᠭᠰᠠᠨ ᠢ᠋ᠶ᠋ᠠᠷ ᠰᠠᠨᠠᠳᠠᠭ
ᠮᠣᠷᠢᠲᠠᠢ ᠣᠴᠢᠪᠠᠯ ᠬᠡᠦᠬᠡᠳ ᠨᠢ ᠠᠪᠤᠭᠠᠢ ᠳᠠᠭᠤᠳᠠᠳᠠᠭ
ᠮᠣᠳᠣ ᠴᠢᠷᠪᠡᠯ ᠨᠣᠬᠠᠢ ᠨᠢ ᠠᠷᠬᠢᠷᠠᠵᠤ ᠲᠣᠰᠳᠠᠭ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠳᠣᠷᠣᠰᠬᠠᠨ ᠪᠠᠷᠵᠠᠭᠠᠷ ᠴᠢᠷᠠᠢ ᠨᠢ ᠲᠣᠰᠣᠨ ᠲᠣᠷᠭᠠ
ᠳᠠᠭᠤᠤ ᠬᠠᠩᠭᠢᠨᠠᠭᠤᠯᠳᠠᠭ ᠬᠣᠭᠣᠯᠠᠢ ᠨᠢ ᠰᠦᠨ ᠴᠣᠷᠭᠣ
ᠲᠣᠭᠣᠷ ᠲᠣᠮᠪᠣᠭᠣᠷ ᠰᠠᠭᠤᠳᠠᠯ ᠨᠢ ᠡᠷᠳᠡᠨᠢ ᠠᠭᠤᠢ
ᠳᠤᠭᠲᠤᠷᠴᠤ ᠠᠪᠬᠤ ᠲᠤᠷᠪᠢ ᠨᠢ ᠬᠦᠴᠦᠲᠦ ᠠᠶᠤᠩᠭᠠ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠬᠣᠲᠠ ᠶ᠋ᠢᠨ ᠬᠥᠮᠦᠨ ᠦ᠌ ᠳᠡᠷᠭᠡᠳᠡ ᠵᠢᠰᠦ ᠨᠢ ᠪᠣᠷᠣᠪᠲᠤᠷᠬᠠᠨ
ᠬᠣᠷᠸᠠ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ ᠪᠠᠭᠲᠠᠳᠠᠭ ᠴᠡᠭᠡᠵᠢ ᠨᠢ ᠠᠭᠤᠵᠢᠮᠬᠠᠨ
ᠬᠣᠯᠠ ᠶ᠋ᠢ ᠲᠣᠳᠣᠬᠠᠨ ᠬᠠᠷᠠᠳᠠᠭ ᠨᠢᠳᠦ ᠨᠢ ᠭᠡᠭᠡᠬᠡᠨ
ᠬᠣᠶᠠᠷᠯᠠᠵᠤ ᠨᠠᠷᠢᠨ ᠪᠣᠳᠣᠳᠠᠭ ᠤᠬᠠᠭᠠᠨ ᠨᠢ ᠰᠠᠷᠠᠭᠤᠯᠬᠠᠨ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠰᠦᠨ ᠳ᠋ᠦ᠍ ᠷᠠᠰᠢᠶᠠᠯᠠᠭᠰᠠᠨ ᠨᠡᠷᠡ ᠨᠢ ᠪᠢᠯᠢᠭ ᠦ᠋ᠨ ᠬᠠᠶᠠᠭ
ᠰᠦᠷᠦᠭ ᠲᠦ᠍ ᠠᠳᠢᠰᠯᠠᠭᠰᠠᠨ ᠤᠷᠭᠠ ᠨᠢ ᠬᠡᠰᠢᠭ ᠦ᠋ᠨ ᠬᠠᠳᠠᠭ
ᠰᠦᠬᠡᠨ ᠳ᠋ᠦ᠍ ᠬᠠᠭᠠᠷᠠᠳᠠᠭ ᠦᠭᠡᠢ ᠶᠠᠰᠤ ᠨᠢ ᠡᠷᠡ ᠶ᠋ᠢᠨ ᠬᠤᠶᠠᠭ
ᠰᠦᠷ ᠲᠦ᠍ ᠨᠤᠭᠤᠷᠠᠳᠠᠭ ᠦᠭᠡᠢ ᠡᠪᠦᠳᠦᠭ ᠨᠢ ᠪᠢᠷᠠ ᠶ᠋ᠢᠨ ᠲᠠᠶᠠᠭ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠬᠥᠯ ᠨᠢ ᠮᠠᠢᠵᠢᠭᠢ ᠴᠤ᠌ ᠰᠠᠨᠠᠭᠠ ᠨᠢ ᠰᠠᠨᠰᠠᠷ
ᠬᠥᠳᠡᠯᠬᠦ ᠨᠢ ᠬᠦᠳᠡᠭᠢ ᠴᠦ᠍ ᠪᠣᠳᠣᠯ ᠨᠢ ᠪᠤᠷᠬᠠᠨ
ᠬᠥᠳᠡᠭᠡ ᠶ᠋ᠢᠨ ᠬᠥᠮᠦᠨ ᠬᠥᠳᠡᠭᠡ ᠳ᠋ᠦ᠍ ᠪᠡᠨ ᠬᠠᠭᠠᠨ
ᠬᠦᠯᠦᠭ ᠮᠣᠷᠢ ᠨᠢ ᠬᠥᠨᠳᠡᠢ ᠳ᠋ᠦ᠍ ᠪᠡᠨ ᠵᠠᠭᠠᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭ᠍ᠴᠢ᠄ ᠰ ᠳᠣᠷᠣᠨᠠ