ᠢᠷᠥᠭᠡᠯᠴᠢ – ᠳ᠋ᠤᠭ ᠂ ᠳᠣᠷᠵᠢ Ерөөлч – Дог ᠂ Дорж
323ᠢᠷᠥᠭᠡᠯᠴᠢ
ᠳ᠋ᠤᠭ ᠂ ᠳᠣᠷᠵᠢ
( ᠬᠣᠱᠣᠩ ᠥᠭᠦᠯᠡᠯᠭᠡ ) ᠪᠠᠷᠢᠯᠭᠠᠴᠢᠨ ᠪᠤᠶᠠᠨ ᠤ᠋ ᠡᠬᠡ ᠂ ᠨᠠᠶᠠᠨ ᠨᠠᠰᠤᠲᠠᠢ ᠡᠮᠡᠭᠡ ᠶ᠋ᠢᠨ ᠣᠢ ᠶ᠋ᠢ ᠲᠡᠮᠳᠡᠭᠯᠡᠬᠦ ᠪᠡᠷ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠵᠤ᠂ ᠨᠠᠢᠷ ᠡᠬᠢᠯᠡᠬᠦ ᠳ᠋ᠦ᠍ ᠪᠡᠯᠡᠨ ᠪᠣᠯᠪᠠ᠃ ᠢᠮᠠᠭᠠᠨ ᠰᠠᠬᠠᠯ ᠲᠠᠢ ᠶᠠᠭᠵᠠᠭᠠᠷ ᠲᠤᠷᠠᠩᠬᠠᠢ ᠡᠪᠦᠭᠡᠨ ᠪᠣᠰᠴᠤ ᠨᠢᠳᠦ ᠪᠠᠨ ᠣᠨᠢᠢᠯᠭᠠᠵᠤ ᠨᠠᠢᠷ ᠤ᠋ᠨ ᠣᠯᠠᠨ ᠢ᠋ ᠡᠷᠡᠮᠪᠡ ᠳᠡᠰ ᠢ᠋ᠶ᠋ᠡᠷ ᠠᠵᠢᠭᠯᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠦᠨ
– ᠢᠩᠭᠢᠬᠦ ᠳ᠋ᠦ᠍ ᠲᠠ ᠮᠢᠨᠢ ᠢᠷᠦᠭᠡᠯ ᠲᠠᠯᠪᠢᠬᠤ ᠬᠥᠮᠦᠨ ᠪᠠᠢᠨᠠ ᠤᠤ ᠂ ᠨᠠᠢᠷ ᠢ᠋ᠶ᠋ᠠᠨ ᠢᠷᠦᠭᠡᠯ ᠢ᠋ᠶ᠋ᠡᠷ ᠡᠬᠢᠯᠡᠶᠡ ᠭᠡᠪᠡ᠃ ᠪᠢᠳᠠ ᠴᠥᠮ ᠢ᠋ᠶ᠋ᠡᠷ 《 ᠲᠡᠷᠡ ᠵᠥᠪ ᠠ᠋ ᠂ ᠲᠡᠷᠡ ᠵᠥᠪ 》 ᠭᠡᠵᠦ ᠳᠠᠭᠤ ᠳᠠᠭᠤ ᠪᠠᠨ ᠳᠠᠮᠵᠢᠨ ᠥᠭᠦᠯᠡᠵᠡᠭᠡᠭᠰᠡᠨ ᠪᠣᠯᠪᠠᠴᠤ ᠬᠡᠨ ᠮᠠᠨᠢ ᠴᠤ᠌ ᠢᠷᠦᠭᠡᠯ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠤᠴᠢᠷ ᠮᠠᠯ ᠭᠠᠢᠬᠠᠵᠤ ᠬᠤᠯᠤᠭᠠᠨᠠᠨ ᠰᠠᠭᠤᠵᠤ ᠪᠠᠢᠪᠠ᠃ ᠡᠮᠡᠭᠡ ᠶ᠋ᠢᠨ ᠬᠦᠦ ᠪᠤᠶᠠᠨ ᠂ ᠢᠷᠦᠭᠡᠯᠴᠢ ᠶ᠋ᠢᠨ ᠲᠠᠯᠠ ᠪᠠᠷ ᠰᠠᠨᠠᠭᠠ ᠲᠠᠯᠪᠢᠭᠠ ᠦᠭᠡᠢ ᠳ᠋ᠡᠭᠡᠨ ᠨᠡᠯᠢᠶᠡᠳ ᠭᠡᠮᠰᠢᠭᠰᠡᠨ ᠶᠠᠩᠵᠤᠲᠠᠢ ᠰᠣᠯᠣᠭᠠᠢ ᠭᠠᠷ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠪᠠᠨ ᠢᠯᠪᠢᠭᠡᠳ᠄
– ᠪᠢ ᠨᠢᠭᠡ ᠢᠷᠦᠭᠡᠯᠴᠢ ᠶ᠋ᠢ ᠰᠠᠢᠨ ᠲᠠᠨᠢᠨᠠ ᠂ ᠲᠡᠷᠡ ᠨᠥᠬᠥᠷ ᠬᠡᠨ ᠦ᠌ ᠴᠤ᠌ ᠤᠷᠢᠯᠭᠠᠨ ᠳ᠋ᠤ᠌ ᠶᠡᠷᠦ ᠴᠠᠭᠠᠷᠠᠭᠯᠠᠵᠤ ᠳᠤᠷᠠ ᠦᠭᠡᠢᠯᠡᠳᠡᠭ ᠦᠭᠡᠢ ᠶᠦᠮ ᠭᠡᠳ ᠭᠠᠷᠴᠤ ᠣᠳᠪᠠ᠃
ᠮᠠᠨ ᠤ ᠡᠨᠡ ᠨᠤᠲᠤᠭ ᠲᠤ᠌ ᠢᠷᠦᠭᠡᠯᠴᠢ ᠬᠥᠮᠦᠨ ᠲᠤᠩ ᠬᠣᠪᠣᠷ ᠭᠡᠳᠡᠭ ᠢ᠋ ᠤᠩᠰᠢᠭᠴᠢ ᠲᠠ ᠮᠡᠳᠡᠬᠦ ᠦᠭᠡᠢ ᠴᠤ᠌ ᠪᠠᠢᠵᠤ ᠪᠣᠯᠬᠤ ᠶᠤᠮ ᠃
– ᠡᠦᠲᠦ ᠴᠢᠨᠢ ᠢᠷᠦᠭᠡᠯ ᠬᠡᠯᠡᠳᠡᠭ ᠬᠥᠮᠦᠨ ᠡᠳᠦᠷ ᠦ᠋ᠨ ᠡᠦᠲᠦ ᠰᠢᠭ᠋ ᠪᠣᠯᠴᠢᠬᠠᠵᠠᠢ ᠭᠡᠵᠦ ᠨᠠᠰᠤᠲᠠᠢᠴᠤᠳ ᠤ᠋ᠨ ᠶᠠᠷᠢᠯᠴᠠᠳᠠᠭ ᠴᠤ᠌ ᠦᠨᠡᠨ ᠰᠢᠦ᠃ ᠮᠢᠨᠦ ᠯᠠ ᠮᠡᠳᠡᠬᠦ ᠡᠭᠦᠨ ᠡᠴᠡ ᠥᠭᠡᠷᠡ ᠢᠷᠦᠭᠡᠯᠴᠢ ᠠᠯᠠᠭᠠ ᠳ᠋ᠠ᠃
ᠪᠤᠶᠠᠨ ᠢ ᠣᠴᠢᠬᠤ ᠳᠤ ᠢᠷᠦᠭᠡᠯᠴᠢ ᠭᠡᠷ ᠲᠡᠭᠡᠨ ᠪᠠᠢᠭᠰᠠᠨ ᠦᠭᠡᠢ᠂ ᠨᠢᠭᠡ ᠠᠢᠯ ᠤᠨ ᠤᠬᠢᠶᠠᠯᠭᠠᠨ ᠳᠤ ᠢᠷᠦᠭᠡᠯ ᠲᠠᠯᠪᠢᠬᠤ ᠪᠠᠷ ᠶᠠᠪᠤᠭᠰᠠᠨ ᠭᠡᠨᠡ ᠃ ᠪᠢᠴᠢᠬᠠᠨ ᠥᠭᠦᠯᠡᠯᠭᠡ ᠶ᠋ᠢᠨ ᠮᠠᠨᠢ ᠪᠠᠭᠠᠲᠤᠷ ᠡᠢᠮᠦ ᠯᠡ ᠬᠦᠨᠳᠦᠲᠡᠢ ᠬᠥᠮᠦᠨ ᠳᠡ᠃ ᠵᠠᠷᠢᠮ ᠳ᠋ᠠᠭᠠᠨ ᠪᠦᠷ ᠡᠳᠦᠷ ᠰᠥᠨᠢ ᠦᠭᠡᠢ ᠨᠠᠢᠷ ᠬᠤᠷᠢᠮ ᠳ᠋ᠤ᠌ ᠡᠭᠡᠯᠵᠢᠯᠡᠨ ᠵᠠᠯᠠᠭᠳᠠᠭᠰᠠᠭᠠᠷ ᠬᠡᠳᠦ ᠬᠣᠨᠣᠭ ᠢ᠋ᠶ᠋ᠠᠷ ᠭᠡᠷ ᠲᠡᠭᠡᠨ ᠢᠷᠡᠬᠦ ᠦᠭᠡᠢ ᠪᠠᠢᠬᠤ ᠴᠤ᠌ ᠶᠠᠪᠤᠳᠠᠯ ᠪᠣᠢ᠃ ᠢᠩᠭᠢᠵᠦ ᠯᠡ ᠮᠠᠨ ᠤ᠋ ᠬᠢᠨ ᠢᠷᠦᠭᠡᠯᠴᠢ ᠶ᠋ᠢ ᠬᠦᠨᠳᠦᠯᠡᠯᠡ᠃
ᠪᠤᠶᠠᠨ ᠢ᠋ ᠨᠥᠭᠦᠭᠡ ᠠᠢᠯ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌ ᠮᠠᠨ ᠤ᠋ ᠢᠷᠦᠭᠡᠯᠴᠢ ᠨᠠᠩᠵᠢᠳ ᠵᠢᠭᠠᠬᠠᠨ ᠵᠣᠭᠣᠭᠯᠠᠴᠢᠬᠠᠭᠠᠳ ᠤᠯᠠᠭᠠᠨ ᠵᠡᠭᠡᠷᠳᠡ ᠪᠣᠯᠴᠢᠬᠠᠭᠰᠠᠨ᠂ ᠭᠡᠪᠡᠴᠦ ᠢᠷᠥᠭᠡᠬᠦ ᠠᠯᠪᠠ ᠪᠠᠨ ᠬᠠᠮᠢᠭᠠ ᠴᠤ᠌ ᠭᠡᠰᠡᠨ ᠤᠴᠢᠷ ᠲᠠᠲᠠᠭᠠᠯᠵᠠᠵᠤ ᠲᠦᠳᠡᠭᠡᠯᠵᠡᠭᠰᠡᠨ ᠦᠭᠡᠢ᠃
ᠪᠤᠶᠠᠨ ᠤ᠋ ᠳ᠋ᠤ᠌ ᠣᠷᠣᠵᠤ ᠢᠷᠡᠩᠭᠦᠲᠡ᠂ ᠨᠠᠢᠷ ᠤ᠋ᠨ ᠣᠯᠠᠨ ᠤ᠋ ᠡᠮᠦᠨᠡ ᠮᠡᠬᠦᠯᠵᠡᠨ ᠶᠣᠰᠣᠯᠠᠵᠤ᠂ ᠭᠠᠳᠠᠭᠤᠷ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠬᠤ ᠵᠠᠭᠤᠷᠠ ᠪᠦᠯᠲᠡᠭᠡᠷ ᠨᠢᠳᠦ ᠪᠡᠨ ᠵᠢᠭᠠᠬᠠᠢᠯᠭᠠᠨ᠂ ᠵᠠᠭᠵᠠᠭᠠᠷ ᠲᠣᠯᠣᠭᠠᠢ ᠪᠠᠨ ᠳᠠᠯᠵᠢᠢᠯᠭᠠᠨ ᠡᠢᠰᠢ ᠲᠡᠢᠰᠢ ᠠᠵᠢᠪᠠᠯ᠂ ᠵᠡᠭᠦᠨ ᠣᠷᠣᠨ ᠳᠡᠭᠡᠷᠡ ᠥᠯᠥᠭᠡᠢ ᠲᠡᠢ ᠨᠢᠷᠠᠢ ᠬᠡᠦᠬᠡᠳ ᠬᠠᠷᠠᠭᠳᠠᠨᠠ᠃ ᠬᠣᠢᠮᠣᠷ ᠲᠤ᠌ ᠨᠢᠭᠡ ᠡᠮᠡᠭᠡ ᠰᠠᠭᠤᠵᠤ ᠦᠵᠡᠭᠳᠡᠨᠡ᠃ ᠡᠨᠡ ᠮᠡᠲᠦ ᠪᠡᠷ ᠠᠢᠯ ᠢ᠋ ᠬᠠᠷᠠᠵᠤ ᠬᠡᠨ ᠢ᠋ ᠨᠡᠷᠡᠯᠡᠵᠤ ᠭᠦᠢᠴᠡᠬᠦ ᠪᠣᠢ ᠳᠠ ᠪᠠᠷᠤᠭ ᠰᠠᠭᠤᠵᠤ ᠠᠮᠵᠢᠭᠠ ᠦᠭᠡᠢ ᠪᠠᠢᠲᠠᠯᠠ ᠡᠮᠦᠨᠡ ᠨᠢ ᠬᠤᠨᠳᠠᠭᠠ ᠲᠠᠢ ᠰᠠᠷᠬᠤᠳ ᠮᠡᠯᠲᠡᠯᠵᠡᠪᠡ᠃
ᠮᠠᠨ ᠤ᠋ ᠢᠷᠦᠭᠡᠯᠴᠢ ᠬᠠᠯᠢᠮᠠᠭ ᠪᠠᠢᠭᠰᠠᠨ ᠰᠠᠢᠬᠠᠨ ᠭᠢᠯᠠᠭᠠᠷ ᠮᠠᠩᠨᠠᠢ ᠪᠠᠨ ᠢᠯᠠᠭᠠ ᠰᠢᠮᠠᠭᠤᠯ ᠬᠠᠯᠲᠤᠷᠢᠴᠢᠬᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠭᠰᠠᠨ ᠪᠠᠢᠳᠠᠯ ᠢᠶᠠᠷ ᠰᠠᠮ ᠵᠥᠭᠡᠯᠡᠨ ᠢᠯᠪᠢᠵᠦ ᠬᠤᠨᠳᠠᠭᠠ ᠲᠠᠢ ᠶᠠᠭᠤᠮᠠ ᠤᠷᠤᠭᠤ ᠪᠠᠨ ᠬᠦᠵᠦᠭᠦᠦ ᠭᠦᠷᠳᠡᠢᠯᠭᠡᠨ ᠪᠣᠰᠤᠭᠠᠳ ᠥᠯᠥᠭᠡᠢ ᠲᠡᠢ ᠮᠠᠮᠤᠤ ( ᠬᠡᠦᠬᠡᠳ ) ᠤᠷᠤᠭᠤ ᠵᠢᠭᠠᠵᠤ᠄
ᠬᠦᠦ ᠪᠢᠵᠡ ᠭᠡᠵᠦ ᠰᠡᠳᠬᠢᠯ ᠬᠠᠩᠬᠤᠯᠤᠨ ᠮᠢᠰᠢᠶᠡᠵᠦ ᠲᠣᠯᠣᠭᠠᠢ ᠳᠣᠬᠢᠪᠠ ᠃ ᠲᠡᠭᠡᠭᠡᠳ ᠴᠣᠬᠣᠮ ᠬᠠᠮᠢᠭᠠᠬᠢ ᠶ᠋ᠢᠨ ᠬᠡᠨ ᠦ᠌ ᠬᠡᠦᠬᠡᠳ ᠪᠣᠯᠬᠤ ᠶ᠋ᠢ ᠠᠰᠠᠭᠤᠯ ᠦᠭᠡᠢ :
ᠠᠯᠢᠶᠠ ᠬᠥᠭᠡᠷᠦᠬᠦᠨ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ
ᠠᠯᠢᠮᠠ ᠪᠣᠯᠣᠭᠰᠠᠨ ᠳᠡᠭᠦᠦ
ᠳᠠᠷᠤᠭᠠ ᠪᠠᠭᠤᠷᠢᠲᠠᠢ ( ᠪᠠᠢᠳᠠᠯ ᠲᠠᠢ ) ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ
ᠳᠠᠩᠴᠤ ᠴᠤ ᠬᠠᠢᠷᠠᠲᠠᠢ ᠬᠦᠦ ᠭᠡᠵᠦ
ᠬᠡᠦᠬᠡᠳ ᠦ᠋ᠨ ᠡᠴᠢᠭᠡ ᠵᠢᠵᠢᠭᠬᠡᠨ ᠪᠡᠶᠡ ᠲᠡᠢ ᠮᠤᠵᠢᠶᠠᠩ ᠵᠠᠯᠠᠭᠤ ᠠᠲᠠᠯᠠ ᠳᠠᠷᠤᠭᠠ ᠪᠠᠭᠤᠷᠢᠲᠠᠢ ᠨᠠᠮᠪᠠᠭᠠᠲᠠᠢ ᠭᠡᠮᠡᠨ ᠢᠯᠡᠳᠲᠡ ᠲᠠᠰᠢᠶᠠᠷᠠᠵᠤ ᠡᠬᠢᠯᠡᠭᠰᠡᠨ ᠢᠷᠦᠭᠡᠯ ᠳ᠋ᠡᠭᠡᠨ᠄
ᠰᠤᠷᠮᠤᠢᠭᠰᠠᠨ ᠨᠢᠳᠦ ᠲᠠᠶ
ᠰᠤᠲᠤᠢᠭ᠍ᠰᠠᠨ ᠴᠢᠬᠢ ᠲᠠᠶ
ᠭᠡᠬᠦ ᠮᠡᠲᠦ ᠦᠭᠡ ᠤᠷᠤᠰᠬᠠᠨᠠ᠃
ᠬᠡᠦᠬᠡᠳ ᠦ᠋ᠨ ᠨᠠᠢᠷ ᠭᠡᠵᠦ ᠡᠨᠳᠡᠭᠦᠷᠡᠵᠦ ᠭᠡᠮᠡᠨ ᠬᠥᠮᠦᠰ ᠦ᠋ᠨ ᠰᠢᠪᠡᠨᠡᠯᠳᠦᠬᠦ ᠶ᠋ᠢ ᠰᠣᠨᠣᠰᠪᠠ ᠪᠣᠯᠤᠯᠲᠠᠢ᠂ ᠢᠷᠦᠭᠡᠯ ᠢ᠋ᠶ᠋ᠡᠨ ᠪᠤᠰᠢᠭᠤᠬᠠᠨ ᠳᠠᠭᠤᠰᠬᠠᠵᠤ ᠰᠠᠷᠬᠤᠳ ᠢ᠋ᠶ᠋ᠠᠨ ᠬᠥᠨᠲᠥᠷᠪᠡ᠃
ᠪᠢᠴᠢᠬᠠᠨ ᠡᠨᠳᠡᠭᠦᠷᠡᠯ ᠭᠠᠷᠭᠠᠭᠰᠠᠨ ᠳ᠋ᠠᠭᠠᠨ ᠪᠠᠬᠠᠨ ᠡᠪ ᠦᠭᠡᠢᠷᠡᠭᠡᠳ ᠬᠡᠷᠬᠢᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠬᠥᠯᠥᠰᠥ ᠪᠡᠨ ᠪᠤᠷᠵᠢᠢᠯᠭᠠᠨ ᠬᠠᠪᠴᠢᠭᠠᠨᠠᠨ ᠰᠠᠭᠤᠭᠰᠠᠨ ᠢᠷᠦᠭᠡᠯᠴᠢ ᠳ᠋ᠦ᠍ ᠪᠤᠶᠠᠨ ᠣᠢᠷᠠᠲᠤᠨ ᠣᠴᠢᠵᠤ ᠭᠠᠷᠴᠤ ᠠᠭᠤᠯᠵᠠᠬᠤ ᠳᠣᠬᠢᠶᠠ ᠥᠭᠪᠡ᠃ ᠢᠷᠦᠭᠡᠯᠴᠢ ᠣᠷᠣᠵᠤ ᠢᠷᠡᠭᠡᠳ᠄
ᠪᠢ ᠰᠠᠶᠢ ᠪᠡᠯᠡᠭ ᠳᠡᠮᠪᠡᠷᠡᠯ ᠪᠣᠳᠣᠵᠤ ᠬᠠᠮᠤᠭ ᠤ᠋ᠨ ᠣᠳᠬᠣᠨ ᠬᠦᠦ ᠶ᠋ᠢ ᠢᠷᠦᠭᠡᠭᠰᠡᠨ ᠶᠦᠮ᠃ ᠡᠦᠲᠦ ᠨᠠᠢᠷ ᠤ᠋ᠨ ᠭᠣᠣᠯ ᠬᠥᠮᠦᠨ ᠢ᠋ᠶ᠋ᠡᠨ ᠢᠷᠥᠭᠡᠶᠡ ᠭᠡᠳ ᠥᠴᠦᠬᠡᠨ ᠪᠣᠳᠣᠯᠬᠢᠯᠠᠭᠰᠠᠨ ᠢ᠋ᠶ᠋ᠠᠨ᠄
– ᠵᠢᠵᠢᠭ ᠶᠠᠭᠤᠮᠠ ᠪᠠᠷ ᠤᠭᠤᠬᠤ ᠳ᠋ᠤ᠌᠂ ᠬᠣᠭᠣᠯᠠᠢ ᠁ ᠭᠡᠵᠦ ᠬᠡᠯᠡ ᠪᠡᠨ ᠡᠭᠡᠳᠡᠷᠡᠭᠦᠯᠦᠨ ᠥᠭᠦᠯᠡᠭᠡᠳ ᠠᠶᠠᠭᠠ ᠲᠤᠰᠬᠤ ᠳ᠋ᠤ᠌ ᠰᠥᠩᠴᠢ ᠡᠷᠡ ᠡᠷᠡᠭᠡᠯᠵᠡᠨ ᠭᠠᠢᠬᠠᠭᠰᠠᠨ ᠢᠶᠠᠨ ᠨᠢᠭᠡ ᠯᠣᠩᠬᠣᠨ ᠤ᠋ ᠪᠦᠭᠯᠡᠭᠡ ᠮᠤᠯᠲᠤᠯᠵᠤ ᠲᠠᠷᠢᠭᠠᠩᠭᠠ ᠬᠢᠴᠡᠲᠠᠢ ᠮᠥᠩᠭᠦᠨ ᠠᠶᠠᠭᠠᠨ ᠳᠤ ᠬᠠᠲᠠᠭᠤ ᠬᠦᠷᠡᠩ ᠰᠢᠷᠡᠵᠡ ᠴᠡᠯᠡᠯᠵᠡᠭᠦᠯᠪᠡ ᠃
ᠢᠷᠦᠭᠡᠯᠴᠢ ᠮᠠᠨᠢ ᠬᠠᠭᠠᠰ ᠯᠢᠲ᠋ᠷ ᠶᠠᠯᠢᠮ ᠦᠭᠡᠢ ᠪᠠᠭᠠ ᠪᠠᠭᠲᠠᠭᠠᠮᠵᠢᠲᠠᠢ ᠠᠶᠠᠭᠠᠨ ᠳ᠋ᠤ᠌ ᠴᠠᠯᠭᠢᠨ ᠪᠠᠢᠭᠠ ᠠᠷᠢᠬᠢ ᠶ᠋ᠢ ᠳᠤᠮᠳᠠ ᠠ᠋ᠴᠠ ᠨᠢ ᠬᠡᠲᠦᠷᠡᠲᠡᠯᠡ ᠠᠯᠭᠤᠷᠬᠠᠨ ᠤᠤᠭᠤᠭᠠᠳ ᠤᠷᠤᠭᠤᠯ ᠲᠠᠮᠰᠢᠶᠠᠯᠠᠨ ᠠᠶᠠᠭᠠ ᠪᠠᠨ ᠲᠠᠯᠪᠢᠪᠠ᠃ ᠠᠶᠠᠭᠠ ᠪᠠᠨ ᠳᠠᠬᠢᠨ ᠳᠦᠭᠦᠷᠭᠡᠵᠦ ᠪᠠᠢᠭᠠ ᠶ᠋ᠢ ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠰᠠᠮ ᠠᠵᠢᠵᠤ ᠪᠠᠢᠭᠰᠠᠨ ᠢᠶᠠᠨ ᠠᠮᠠᠰᠠᠷ ᠳᠡᠭᠡᠭᠦᠷ ᠬᠠᠯᠢᠬᠤ ᠳᠤ᠄
– ᠬᠡᠷᠡᠭ ᠦᠭᠡᠢ᠂ ᠬᠡᠷᠡᠭ ᠦᠭᠡᠢ ᠭᠡᠰᠡᠨ ᠢᠶᠡᠨ ᠰᠢᠭᠦᠷᠡᠨ ᠠᠪᠴᠤ ᠱᠠᠯᠠᠮᠠᠭᠠᠢᠯᠠᠨ ᠪᠣᠰᠣᠭᠠᠳ᠄
ᠨᠠᠶᠠᠨ ᠨᠠᠰᠤᠨ ᠤ᠋ ᠪᠠᠨ ᠣᠢ ᠶ᠋ᠢ ᠬᠢᠬᠦ ᠪᠠᠷ
ᠨᠠᠮᠪᠠᠭᠠ ᠲᠠᠢ ᠰᠠᠢᠬᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ
ᠨᠠᠭᠠᠰᠢ ᠪᠠᠨ ᠬᠠᠷᠠᠭᠠᠳ ᠰᠠᠭᠤᠵᠤ ᠪᠠᠢᠭᠠ
ᠨᠠᠰᠤᠨ ᠪᠤᠭᠤᠷᠤᠯ ᠡᠮᠡᠭᠡ ᠳᠠᠷᠤᠭᠠ ᠶ᠋ᠢᠨ
ᠢᠳᠡᠷ ᠵᠠᠯᠠᠭᠤ ᠦᠶᠡ ᠶ᠋ᠢᠨ ᠲᠤᠬᠠᠢ
ᠡᠬᠢᠯᠡᠭᠡᠳ ᠪᠢ ᠢᠷᠦᠭᠡᠶᠡ ᠭᠡᠪᠡ᠃
ᠡᠮᠡᠭᠡ ᠶᠢ ᠵᠠᠯᠠᠭᠤ ᠳ᠋ᠠᠭᠠᠨ ᠭᠣᠪᠢ ᠨᠤᠲᠤᠭ ᠤᠨ ᠪᠠᠷᠬᠢᠯ ᠪᠣᠷᠣ ᠬᠡᠦᠬᠡᠨ ᠪᠠᠢᠭᠰᠠᠨ ᠢ ᠢᠷᠦᠭᠡᠯᠴᠢ ᠬᠠᠮᠢᠭᠠ ᠠᠴᠠ ᠮᠡᠳᠡᠬᠦᠪ᠃
ᠵᠢᠷᠪᠢᠢᠭᠰᠡᠨ ᠬᠥᠮᠥᠰᠬᠡ ᠲᠡᠢ
ᠵᠢᠮᠢᠰᠦᠨ ᠤᠯᠠᠭᠠᠨ ᠬᠠᠴᠠᠷ ᠲᠠᠶᠠ
ᠭᠠᠩᠭᠠᠷ ᠱᠠᠭᠠᠵᠠᠩ ᠰᠢᠭ᠋ ᠴᠠᠭᠠᠨ
ᠭᠠᠩᠭᠠᠩ ᠥᠬᠢᠨ ᠁ ( ᠭᠡᠳ )
ᠡᠭᠦᠳᠡᠨ ᠲᠤᠰ ᠭᠠᠵᠠᠷ ᠰᠠᠭᠤᠭᠠ ᠴᠢᠷᠠᠢᠯᠢᠭ ᠴᠠᠭᠠᠨ ᠪᠦᠰᠡᠭᠦᠢ ᠤᠷᠤᠭᠤ ᠨᠢᠳᠦ ᠢᠷᠮᠡᠬᠦ ᠳ᠋ᠦ᠍ ᠨᠠᠢᠷ ᠤ᠋ᠨ ᠬᠢᠨ ᠲᠡᠪᠡᠳᠡᠵᠦ :
– ᠵᠠ ᠮᠥᠨ ᠰᠠᠢᠬᠠᠨ ᠢᠷᠦᠭᠡᠵᠦ ᠪᠠᠢᠨᠠ ᠠ ᠂ ᠢᠷᠦᠭᠡᠯ ᠪᠠᠲᠤ ᠣᠷᠣᠰᠢᠭ ᠭᠡᠪᠡ᠃ ᠬᠡᠳᠦᠢᠪᠡᠷ ᠡᠨᠡ ᠦᠭᠡ ᠶ᠋ᠢ ᠢᠷᠦᠭᠡᠯ ᠦ᠋ᠨ ᠲᠡᠭᠦᠰᠬᠡᠯ ᠳ᠋ᠦ᠍ ᠬᠡᠯᠡᠬᠦ ᠶᠣᠰᠣᠲᠠᠢ ᠪᠣᠯᠪᠠᠴᠤ ᠮᠡᠩᠳᠡᠭᠰᠡᠨ ᠬᠥᠮᠦᠰ ᠡᠢᠨ ᠬᠦ᠌ ᠭᠣᠷᠢᠮ ᠠᠯᠳᠠᠵᠠᠢ᠃
ᠢᠷᠦᠭᠡᠯ ᠪᠠᠲᠤ ᠣᠷᠣᠰᠢᠭ ᠭᠡᠰᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠢᠷᠦᠭᠡᠯᠴᠢ ᠮᠠᠨᠢ ᠠᠶᠠᠭᠠ ᠲᠠᠢ ᠪᠠᠨ ᠠᠶᠠᠲᠠᠢᠬᠠᠨ ᠰᠢᠮᠡᠵᠦ ᠪᠠᠢᠲᠠᠯᠠ ᠷᠠᠳᠢᠣ᠋ ᠪᠠᠷ ᠮᠣᠷᠢᠨ ᠤ᠋ ᠲᠤᠬᠠᠢ ᠨᠡᠪᠲᠡᠷᠡᠭᠦᠯᠭᠡ ᠶᠠᠪᠤᠪᠠ᠃ ᠭᠡᠲᠡᠯᠡ ᠮᠠᠨ ᠤ᠋ ᠢᠷᠦᠭᠡᠯᠴᠢ᠄
ᠬᠥᠯ ᠳ᠋ᠡᠭᠡᠨ ᠵᠢᠷᠣᠭᠠ ᠲᠠᠶᠠ
ᠬᠦᠵᠦᠭᠦᠨ ᠳ᠋ᠡᠭᠡᠨ ᠮᠣᠯᠴᠣᠭ ᠲᠠᠢ ᠁( ᠭᠡᠬᠦ ᠳ᠋ᠦ᠍ )
ᠬᠥᠮᠦᠰ ᠨᠢᠷᠬᠢᠲᠡᠯᠡ ᠢᠨᠢᠶᠡᠯᠳᠦᠪᠡ᠃ ᠢᠷᠦᠭᠡᠯᠴᠢ ᠠᠯᠳᠠᠭᠠ ᠪᠠᠨ ᠳᠣᠣᠷᠠ ᠨᠢ ᠠᠪᠬᠠᠯᠵᠢᠲᠠᠢᠶᠠ ᠵᠠᠯᠠᠷᠠᠭᠤᠯᠤᠨ᠄
ᠰᠠᠢᠨ ᠮᠣᠷᠢ ᠤᠨᠤᠳᠠᠭ
ᠰᠠᠢᠬᠠᠨ ᠪᠦᠰᠡᠭᠦᠢ ᠪᠠᠢᠭᠰᠠᠨ ᠁ ᠭᠡᠳ
ᠭᠡᠨᠡᠳᠲᠡ ᠬᠡᠯᠡ ᠨᠢ ᠡᠭᠡᠷᠡᠵᠦ ᠲᠦᠭᠳᠡᠷᠡᠨ ᠵᠣᠭᠰᠣᠭᠰᠠᠨ ᠢᠶᠠᠨ ᠠᠷᠤ ᠲᠡᠢᠰᠢ ᠯᠠᠭ ᠬᠢᠨ ᠰᠠᠭᠤᠵᠤ ᠨᠢᠳᠦ ᠪᠡᠨ ᠬᠥᠯᠥᠷᠡᠭᠦᠯᠦᠨ ᠰᠢᠷᠳᠡᠵᠦ 《ᠵᠢᠭᠠᠬᠠᠨ ᠰᠢᠷᠭᠠ》 ᠶᠢ ᠠᠶᠠᠯᠤᠮᠠᠷ ᠠᠶᠠᠳᠠᠭᠰᠠᠨ ᠢᠶᠠᠨ ᠬᠠᠵᠠᠭᠤ ᠳ᠋ᠠᠭᠠᠨ ᠰᠠᠭᠤᠭᠠ ᠬᠥᠮᠥᠨ ᠢ ᠨᠠᠯᠠᠨ ᠲᠣᠬᠣᠢᠯᠳᠤᠵᠤ᠄
ᠬᠥᠮᠥᠨ ᠦ ᠮᠢᠬᠠᠨ ᠬᠦᠨᠡᠰᠦᠲᠡᠨ ᠨᠦᠭᠦᠳ
ᠬᠦᠷᠡᠯ ᠴᠢᠯᠠᠭᠤᠨ ᠵᠢᠷᠦᠬᠡᠲᠡᠨ ᠨᠦᠭᠦᠳ᠁( ᠭᠡᠵᠦ)
ᠰᠢᠳᠦ ᠪᠡᠨ ᠬᠠᠪᠢᠷᠤᠨ ᠥᠭᠦᠯᠡᠬᠦ ᠳ᠋ᠦ᠍ ᠣᠢ ᠪᠠᠨ ᠲᠡᠮᠳᠡᠭᠯᠡᠵᠦ ᠪᠠᠢᠭᠠ ᠡᠮᠡᠭᠡ ᠲᠥᠷᠬᠦ ᠲᠡᠢ ᠬᠥᠭᠰᠢᠳ ᠨᠠᠮᠠᠨᠴᠢᠯᠠᠨ ᠵᠠᠯᠪᠠᠷᠢᠵᠤ ᠄
– ᠡ ᠪᠤᠶᠠᠨ ᠢᠶᠠᠨ ᠳᠡᠯᠭᠡᠷ ᠭᠡᠵᠦ᠂ ᠪᠠᠰᠠ ᠪᠥᠭᠡ ᠪᠠᠢᠬᠤ ᠨᠢ ᠡ ᠭᠡᠳ ᠪᠠᠯᠠᠮᠠᠭᠳᠠᠪᠠ᠃ ᠵᠠᠯᠠᠭᠤᠴᠤᠳ ᠢᠷᠦᠭᠡᠯᠴᠢ ᠶᠢᠨ ᠲᠠᠮᠪᠠᠷᠠᠯ ᠢ ᠵᠣᠭᠰᠣᠭᠠᠬᠤ ᠶᠢ ᠬᠢᠴᠢᠶᠡᠵᠦ᠄
– ᠵᠠ ᠰᠠᠢᠬᠠᠨ ᠢᠷᠦᠭᠡᠵᠦ ᠪᠠᠢᠨᠠ᠂ ᠡᠦᠲᠦ ᠨᠢᠭᠡ ᠰᠠᠯᠬᠢᠨ ᠳ᠋ᠤ᠌ ᠭᠠᠷᠤᠭᠠᠳ ᠢᠷᠡᠶᠡ ᠭᠡᠳ ᠮᠥᠷᠦᠨ ᠳᠡᠭᠡᠷᠡ ᠡᠴᠡ ᠨᠢ ᠲᠠᠲᠠᠬᠤ ᠳ᠋ᠤ᠌ ᠠᠶᠠᠭᠠ ᠲᠠᠢ ᠪᠠᠨ ᠪᠤᠰᠢᠭᠤᠬᠠᠨ ᠵᠠᠯᠭᠢᠯᠠᠭᠠᠳ ᠤᠴᠠᠭᠠᠷᠯᠠᠨ ᠤᠬᠤᠰᠬᠢᠵᠦ ᠬᠠᠵᠠᠭᠤᠳᠠᠬᠢ ᠨᠥᠬᠥᠷ ᠢ᠋ᠶ᠋ᠡᠨ ᠢᠰᠬᠦᠯᠪᠡ᠃ ᠲᠡᠷᠡ ᠨᠢ ᠨᠡᠯᠢᠶᠡᠳ ᠬᠠᠯᠠᠮᠴᠠᠭ ᠪᠠᠢᠭᠰᠠᠨ ᠠᠭᠠᠳ ᠪᠠᠰᠠ ᠴᠤ᠌ ᠶᠠᠭ ᠦᠭᠡᠢ ᠣᠮᠣᠭᠲᠠᠢᠬᠠᠨ ᠡᠷᠡ ᠲᠤᠯᠠ ᠢᠷᠦᠭᠡᠯᠴᠢ ᠶ᠋ᠢ ᠰᠢᠭᠦᠷᠡᠨ ᠠᠪᠴᠤ ᠭᠤᠯᠳᠤᠷᠠᠨ ᠳᠠᠷᠤᠪᠠ᠃
ᠮᠠᠨ ᠤ ᠢᠷᠦᠭᠡᠯᠴᠢ ᠬᠠᠶᠠ ᠨᠢᠭᠡ ᠡᠢᠮᠦᠷᠬᠦᠦ ᠪᠠᠢᠳᠠᠯ ᠭᠠᠷᠭᠠᠳᠠᠭ ᠡᠪ ᠦᠭᠡᠢᠪᠲᠦᠷ ᠵᠠᠩ ᠲᠠᠢ ᠠᠴᠠ ᠪᠢᠰᠢ ᠶᠡᠷᠦᠩᠬᠡᠢ ᠳᠡᠬᠡᠨ ᠢᠷᠦᠭᠡᠯᠴᠢ ᠶᠢᠨ ᠨᠢᠭᠡ ᠭᠡᠳᠡᠭ ᠨᠢ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠪᠢᠵᠡ᠃
《 ᠱᠣᠭ ᠬᠣᠱᠣᠩ ᠵᠣᠬᠢᠶᠠᠯ ᠤᠨ ᠳᠡᠭᠡᠵᠢ 》 ᠡᠴᠡ ᠬᠠᠭᠤᠯᠪᠠ᠃