ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ <ᠭᠤᠴᠢ ᠶᠢᠰᠦᠳᠦᠭᠡᠷ ᠪᠦᠯᠦᠭ > Хөх судар - Инжинаш <Гуч есдүгээр бүлэг >
306ᠬᠠᠭᠠᠨ ᠡᠵᠡᠨ ᠬᠠᠮᠤᠭ ᠢ᠋ ᠡᠷᠭᠦᠮᠵᠢᠯᠡᠬᠦᠶᠡ ᠬᠠᠭᠤᠴᠢᠨ ᠰᠠᠢᠳ ᠠ᠋ᠴᠠ ᠡᠬᠢᠯᠡᠪᠡ
ᠬᠠᠷᠢ ᠤᠯᠤᠰ ᠬᠠᠮᠲᠤ ᠪᠠᠷ ᠳᠠᠭᠠᠬᠤᠶᠠ ᠬᠠᠷᠴᠠᠭᠠᠢ ᠰᠢᠪᠠᠭᠤ ᠯᠤᠭᠠ ᠪᠠᠢᠭᠤᠯᠪᠠ
ᠤᠯᠠᠭᠴᠢᠨ ᠲᠠᠤᠯᠠᠢ ᠵᠢᠯ ᠂ ᠴᠢᠩᠭᠢᠰ ᠬᠠᠭᠠᠨ ᠳᠥᠴᠢᠨ ᠵᠢᠷᠭᠤᠭᠠᠨ ᠰᠡᠭᠦᠳᠡᠷ ᠲᠡᠢ ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ
ᠴᠢᠩᠭᠢᠰ ᠬᠠᠭᠠᠨ ᠤ᠋ ᠬᠣᠶᠠᠳᠤᠭᠠᠷ ᠣᠨ ᠂ ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠥ᠋ᠩ ᠬᠠᠭᠠᠨ ᠤ᠋ ᠺᠠᠢ ᠰᠢ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠣᠨ᠂
ᠪᠠᠰᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠥ᠋ᠩ ᠬᠠᠭᠠᠨ ᠤ᠋ ᠲᠠᠢ ᠾᠧ ᠶ᠋ᠢᠨ ᠳᠣᠯᠣᠳᠤᠭᠠᠷ ᠣᠨ᠂ ᠡᠨᠡ ᠵᠢᠯ ᠰᠥᠩ ᠤᠯᠤᠰ
ᠠᠯᠲᠠᠨ ᠤᠯᠤᠰ ᠬᠠᠷᠢᠯᠴᠠᠨ ᠶᠡᠬᠡᠯᠡ ᠪᠠᠢᠯᠳᠤᠪᠠ ᠂ ᠰᠥᠩ ᠤᠯᠤᠰ ᠴᠡᠷᠢᠭ ᠦ᠋ᠨ ᠠᠰᠢᠭ᠋ ᠢ᠋ ᠠᠯᠳᠠᠵᠤᠬᠤᠢ
ᠬᠠᠭᠠᠨ ᠡᠵᠡᠨ ᠬᠠᠮᠤᠭ ᠢ᠋ ᠡᠷᠭᠦᠮᠵᠢᠯᠡᠬᠦᠶᠡ ᠬᠠᠭᠤᠴᠢᠨ ᠰᠠᠢᠳ ᠠ᠋ᠴᠠ ᠡᠬᠢᠯᠡᠪᠡ
ᠬᠠᠷᠢ ᠤᠯᠤᠰ ᠬᠠᠮᠲᠤ ᠪᠠᠷ ᠳᠠᠭᠠᠬᠤᠶᠠ ᠬᠠᠷᠴᠠᠭᠠᠢ ᠰᠢᠪᠠᠭᠤ ᠯᠤᠭᠠ ᠪᠠᠢᠭᠤᠯᠪᠠ
ᠲᠡᠨᠳᠡᠴᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠬᠣᠶᠠᠳᠤᠭᠠᠷ ᠣᠨ᠂ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ᠂ ᠲᠡᠭᠷᠢ ᠶ᠋ᠢᠨ ᠪᠣᠱᠣᠭ ᠢ᠋ᠶ᠋ᠡᠷ ᠤᠯᠠᠷᠢᠯ ᠢ᠋ ᠨᠡᠭᠡᠭᠡᠭᠰᠡᠨ ᠪᠣᠭᠳᠠ ᠪᠠᠭᠠᠲᠤᠷ ᠬᠤᠸᠠᠩᠳᠢ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠬᠤᠯᠤᠭᠠᠨᠠ ᠴᠠᠭ ᠲᠤ᠌ ᠳᠡᠭᠡᠭᠰᠢᠯᠡᠵᠦ ᠪᠡᠶᠡ ᠪᠡᠨ ᠠᠷᠢᠭᠤᠳᠬᠠᠨ ᠰᠢᠨᠡ ᠬᠤᠪᠴᠠᠳ ᠡᠮᠦᠰᠴᠦ ᠲᠡᠭᠷᠢ ᠭᠠᠵᠠᠷ ᠲᠤᠷ ᠶᠣᠰᠣᠯᠠᠵᠤ᠂ ᠤᠷᠢᠳᠤᠰ ᠡᠪᠦᠭᠡᠳ ᠢ᠋ ᠳᠠᠢᠭᠠᠳ ᠡᠬᠡ ᠲᠠᠢᠬᠡᠦ ᠳ᠋ᠦ᠍ᠷ ᠮᠥᠷᠭᠥᠵᠦ᠂ ᠶᠡᠬᠡ ᠲᠥᠷᠥ ᠳ᠋ᠦ᠍ᠷ ᠵᠠᠯᠠᠷᠠᠨ ᠭᠠᠷᠬᠤᠶᠠ ᠶᠢᠰᠦᠨ ᠳᠠᠪᠬᠤᠷ ᠤ᠋ᠨ ᠨᠠᠷᠢᠨ ᠬᠥᠭᠵᠢᠮ ᠡᠭᠦᠰᠬᠡᠵᠦ᠂ ᠠᠷᠪᠠᠨ ᠠᠩᠬᠢᠯᠤᠮᠠᠯ ᠤ᠋ᠨ ᠬᠦᠵᠢ ᠽᠠᠨᠳᠠᠨ ᠰᠢᠲᠠᠭᠠᠵᠤ᠂ ᠠᠯᠲᠠᠨ ᠬᠠᠰ ᠤ᠋ᠨ ᠴᠢᠮᠡᠭᠡ ᠳᠠᠭᠤᠷᠢᠰᠴᠤ ᠵᠦᠩ ᠬᠡᠩᠭᠡᠷᠭᠡ ᠶ᠋ᠢᠨ ᠳᠣᠬᠢᠶᠠ ᠴᠣᠬᠢᠨ᠂ ᠦᠢᠮᠡᠭᠡᠨ ᠢ᠋ ᠳᠠᠷᠤᠬᠤ ᠳᠣᠬᠢᠭᠤᠷ ᠭᠤᠷᠪᠠᠨᠲᠠ ᠳᠠᠭᠤᠷᠢᠰᠴᠤ ᠰᠥᠭᠥᠳᠴᠦ ᠬᠦᠯᠢᠶᠡᠬᠦ ᠲᠡᠮᠳᠡᠭ ᠳᠣᠪᠲᠣᠯᠤᠨ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠵᠠᠯᠠᠷᠠᠨ ᠭᠠᠷᠴᠤ ᠢᠷᠡᠭᠡᠳ ᠥᠨᠳᠥᠷ ᠮᠠᠨᠳᠠᠯ ᠳ᠋ᠤᠷ ᠠᠪᠠᠷᠢᠭᠠᠳ ᠯᠤᠤ ᠶ᠋ᠢᠨ ᠰᠠᠭᠤᠳᠠᠯ ᠳ᠋ᠤᠷ ᠰᠠᠭᠤᠪᠠ᠃ ᠵᠠᠭᠤᠨ ᠲᠦᠰᠢᠮᠡᠳ ᠬᠠᠭᠠᠨ ᠤ᠋ ᠳᠣᠬᠢᠶᠠ ᠬᠠᠰᠬᠢᠷᠬᠤ ᠶᠣᠰᠣᠯᠠᠯ ᠤ᠋ᠨ ᠰᠠᠢᠳ ᠤ᠋ᠨ ᠳᠣᠬᠢᠶᠠ ᠲᠡᠮᠳᠡᠭ ᠢ᠋ᠶ᠋ᠡᠷ ᠭᠤᠷᠪᠠᠨ ᠵᠡᠷᠭᠡ ᠰᠥᠭᠥᠳᠴᠦ ᠶᠢᠰᠦᠨ ᠵᠡᠷᠭᠡ ᠮᠥᠷᠭᠥᠵᠦ ᠶᠣᠰᠣᠯᠠᠯ ᠲᠡᠭᠦᠰᠦᠭᠰᠡᠨ ᠬᠣᠢᠨᠠ᠂ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ :《ᠮᠡᠬᠦᠰ ᠪᠢ ᠦᠵᠡᠪᠡᠰᠦ ᠡᠨᠡ ᠡᠳᠦᠷ ᠦ᠋ᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠳᠣᠬᠢᠶᠠ ᠲᠡᠮᠳᠡᠭ ᠵᠢᠭᠰᠠᠭᠠᠯ ᠬᠥᠭᠵᠢᠮ ᠨᠡᠢᠲᠡ ᠪᠡᠷ ᠴᠥᠮ ᠡᠮᠦᠨᠡᠲᠦ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠬᠠᠤᠯᠢ ᠳᠦᠷᠢᠮ ᠪᠣᠯᠠᠢ᠃ ᠣᠯᠠᠨ ᠴᠢᠩ ᠰᠠᠢᠳ ᠠ᠋ᠴᠠ ᠳᠠᠷᠠᠭᠠᠯᠠᠨ ᠬᠠᠷᠢᠶᠠᠲᠤ ᠢᠷᠭᠡᠨ ᠳ᠋ᠦ᠍ᠷ ᠬᠦᠷᠲᠡᠯᠡ ᠨᠢᠭᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠮᠡᠬᠦᠰ ᠨᠠᠮᠠᠢ ᠬᠠᠭᠠᠨ ᠭᠡᠮᠡᠨ ᠡᠷᠭᠦᠭᠰᠡᠨ ᠲᠤᠯᠠ ᠡᠳᠡᠭᠡᠷ ᠵᠦᠢᠯ ᠦ᠋ᠨ ᠳᠦᠷᠢᠮ ᠳᠦᠷᠰᠦ ᠪᠠᠢᠳᠠᠯ ᠶᠠᠩᠵᠤ ᠶ᠋ᠢ ᠬᠡᠷᠡᠭᠯᠡᠬᠦᠢ ᠳ᠋ᠦ᠍ᠷ ᠬᠡᠳᠦᠢ ᠦᠯᠦ ᠪᠣᠯᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠪᠠᠴᠤ ᠡᠭᠦᠨ ᠦ᠌ ᠳᠣᠲᠣᠷᠠ ᠪᠠᠰᠠ ᠨᠢᠭᠡᠨ ᠵᠦᠢᠯ ᠦ᠋ᠨ ᠡᠭᠡᠯ ᠠᠷᠠᠳ ᠤ᠋ᠨ ᠳᠡᠭᠡᠷᠡᠩᠭᠦᠢ ᠣᠮᠣᠭ ᠢ᠋ ᠲᠥᠷᠥᠭᠦᠯᠬᠦ ᠭᠡᠮ ᠴᠢᠨᠠᠷ ᠠᠮᠤᠢ᠃ ᠶᠡᠷᠦ ᠶ᠋ᠢᠨ ᠦᠭᠡᠨ ᠳ᠋ᠦ᠍ ＜ ᠳᠡᠪᠡᠯ ᠶᠡᠬᠡᠳᠡᠪᠡᠰᠦ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠠᠴᠢᠶᠠ ᠪᠣᠯᠤᠮᠤᠢ᠂ ᠡᠮᠡᠭᠡᠯ ᠬᠦᠨᠳᠦᠳᠡᠪᠡᠰᠦ ᠲᠣᠬᠣᠭᠰᠠᠨ ᠮᠣᠷᠢᠨ ᠤ᠋ ᠨᠢᠷᠤᠭᠤᠨ ᠳ᠋ᠤᠷ ᠳᠠᠷᠤᠰᠢ ᠪᠣᠯᠤᠮᠤᠢ᠃ ᠡᠷᠬᠢᠮ ᠬᠡᠲᠦᠷᠡᠪᠡᠰᠦ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ᠷ ᠣᠰᠣᠯᠳᠠᠬᠤᠢ ᠪᠣᠯᠤᠮᠤᠢ᠂ ᠶᠠᠩᠵᠤ ᠬᠡᠲᠦᠷᠡᠪᠡᠰᠦ ᠡᠯᠡ ᠤᠯᠤᠰ ᠤ᠋ᠨ ᠳᠣᠣᠷᠠᠳᠤᠰ ᠲᠤᠷ ᠵᠦᠳᠡᠭᠦᠷᠢ ᠪᠣᠯᠤᠮᠤᠢ ＞ ᠬᠡᠮᠡᠵᠦᠬᠦᠢ᠃ ᠮᠢᠨᠦ ᠡᠵᠡᠯᠡᠬᠦ ᠡᠳᠡᠭᠡᠷ ᠮᠣᠩᠭᠣᠯ ᠤᠯᠤᠰ ᠨᠡᠢᠲᠡ ᠪᠡᠷ ᠴᠢᠩ ᠦᠨᠡᠨ ᠪᠣᠯᠤᠭᠰᠠᠨ ᠲᠤᠯᠠ ᠪᠢ ᠬᠡᠳᠦᠢ ᠪᠡᠶᠡ ᠳ᠋ᠦ᠍ ᠴᠠᠭᠠᠮᠠᠯ ᠳᠡᠪᠡᠯ ᠡᠮᠦᠰᠴᠦ ᠮᠠᠨ ᠳ᠋ᠤᠷ ᠪᠢᠲᠡᠭᠦᠨ ᠬᠥᠩᠭᠡᠯᠢᠭ ᠪᠣᠯᠪᠠᠴᠤ ᠮᠢᠨᠦ ᠤᠯᠤᠰ ᠠᠯᠪᠠᠲᠤ ᠮᠡᠬᠦᠰ ᠨᠠᠮᠠᠢ ᠬᠥᠩᠭᠡᠯᠡᠬᠦ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ᠂ ᠬᠠᠷᠢᠨ ᠭᠡᠳᠡᠷᠭᠦ ᠪᠢᠰᠢᠷᠡᠨ ᠰᠢᠲᠦᠬᠦ ᠪᠣᠯᠠᠢ᠃ ᠡᠳᠡᠭᠡᠷ ᠵᠦᠢᠯ ᠦ᠋ᠨ ᠶᠣᠰᠣᠯᠠᠯ ᠬᠥᠭᠵᠢᠮ ᠦ᠋ᠨ ᠳᠦᠷᠢᠮ ᠬᠡᠮᠵᠢᠶᠡ ᠪᠠ ᠥᠩᠭᠡ ᠪᠠᠢᠳᠠᠯ ᠰᠦᠷᠲᠡᠭᠡᠭᠦ ᠰᠣᠴᠢᠭᠠᠬᠤ ᠲᠤᠯᠠ ᠮᠠᠨ ᠤ᠋ ᠬᠣᠢᠲᠤ ᠭᠠᠵᠠᠷ ᠣᠳᠣ ᠬᠡᠷᠡᠭ ᠦᠭᠡᠢ᠃ ᠣᠨᠴᠠ ᠦᠨᠡᠨᠴᠢ ᠥᠷᠥᠰᠢᠶᠡᠯ ᠢ᠋ᠶ᠋ᠡᠷ ᠳᠣᠣᠷᠠᠳᠤᠰ ᠤ᠋ᠨ ᠰᠡᠳᠬᠢᠯ ᠢ᠋ ᠠᠪᠴᠤ ᠴᠢᠬᠡᠴᠢ ᠰᠢᠳᠤᠷᠭᠤ ᠪᠠᠷ ᠳᠡᠭᠡᠳᠦ ᠡᠵᠡᠨ ᠳ᠋ᠦ᠍ᠷ ᠢ᠋ᠶ᠋ᠡᠨ ᠵᠢᠳᠬᠦᠪᠡᠰᠦ ᠶᠣᠰᠣ ᠪᠣᠯᠠᠢ᠃ ᠡᠳᠡᠭᠡᠷ ᠬᠣᠭᠣᠰᠣᠨ ᠰᠦᠷ ᠬᠤᠳᠠᠯ ᠶᠠᠩᠵᠤ ᠣᠨ ᠤᠳᠠᠭᠰᠠᠨ ᠳ᠋ᠤᠷ ᠬᠠᠭᠠᠳ ᠡᠵᠡᠳ ᠪᠣᠭᠣᠯᠴᠤᠳ ᠤ᠋ᠨ ᠣᠮᠣᠭ ᠢ᠋ ᠨᠡᠮᠡᠭᠦᠯᠦᠨ᠂ ᠰᠠᠢᠳ ᠲᠦᠰᠢᠮᠡᠳ ᠪᠣᠭᠣᠯᠴᠤᠳ ᠤ᠋ᠨ ᠴᠡᠭᠡᠷᠯᠡᠯ ᠬᠠᠯᠬᠠᠯᠠᠯ ᠪᠣᠯᠠᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠸᠠᠩ ᠰᠠᠢᠳ᠂ ᠲᠠᠢᠰᠢ ᠲᠠᠢᠪᠤᠤ ᠣᠯᠠᠨ ᠲᠦᠰᠢᠮᠡᠯ ᠲᠦᠰᠢᠶᠡ ᠬᠠᠮᠲᠤ 《ᠲᠦᠮᠡᠨ ᠨᠠᠰᠤᠲᠤ ᠶ᠋ᠢᠨ ᠡᠨᠡ ᠵᠠᠷᠯᠢᠭ ᠴᠥᠮ ᠲᠦᠮᠡᠨ ᠦᠶᠡ ᠶ᠋ᠢᠨ ᠲᠠᠰᠤᠷᠬᠠᠢ ᠰᠤᠷᠭᠠᠯ ᠮᠥᠨ ! 》ᠭᠡᠮᠡᠨ ᠮᠥᠷᠭᠥᠵᠦ᠂ ᠳᠥᠷᠪᠡᠨ ᠸᠠᠩ᠂ ᠲᠠᠢᠰᠢ ᠲᠠᠢ ᠰᠡᠴᠡᠨ᠂ ᠥᠷᠯᠥᠭ ᠨᠣᠶᠠᠨ ᠯᠢᠳᠠᠷ ᠰᠡᠴᠡᠨ᠂ ᠲᠣᠷᠭᠠᠨ ᠰᠢᠷᠠ᠂ ᠴᠠᠭᠠᠨ ᠬᠠᠭᠠᠨ᠂ ᠲᠡᠷᠢᠭᠦᠯᠡᠭᠰᠡᠨ ᠰᠠᠢᠳ ᠳᠠᠴᠢᠩᠬᠤᠷᠯᠤ᠂ ᠢᠯᠠᠭᠤᠭᠰᠠᠨ᠂ ᠳ᠋ᠠᠳᠠᠲᠤᠩᠭᠠ ᠨᠠᠷ ᠭᠠᠷᠴᠤ ᠰᠥᠭᠥᠳᠴᠦ ᠠᠢᠯᠠᠳᠬᠠᠷᠤᠨ :《ᠪᠣᠭᠳᠠ ᠡᠵᠡᠨ ᠦ᠌ ᠬᠣᠯᠠ ᠤᠷᠲᠤ ᠭᠦᠨ ᠪᠣᠳᠣᠯᠭᠠᠲᠤ ᠵᠠᠷᠯᠢᠭ ᠦᠨᠡᠬᠡᠷ ᠦᠶᠡ ᠦᠶᠡ ᠶ᠋ᠢᠨ ᠬᠠᠭᠠᠳ ᠲᠤᠷ ᠰᠣᠶᠣᠯ ᠰᠤᠷᠭᠠᠯ ᠪᠣᠯᠤᠮᠤᠢ᠃ ᠭᠠᠭᠴᠠ ᠡᠨᠡ ᠳᠦᠷᠢᠮ ᠶᠣᠰᠣᠯᠠᠯ ᠬᠡᠳᠦᠢ ᠮᠠᠨ ᠤ᠋ ᠬᠠᠷᠢᠶᠠᠲᠤ ᠮᠣᠩᠭᠣᠯ ᠤᠯᠤᠰ ᠲᠤᠷ ᠬᠡᠷᠡᠭ ᠦᠭᠡᠢ ᠪᠣᠯᠪᠠᠴᠤ ᠣᠷᠳᠣᠨ ᠳ᠋ᠤᠷ ᠦᠯᠡᠳᠡᠭᠡᠵᠦ ᠬᠡᠷᠡᠭᠯᠡᠵᠦ ᠪᠣᠯᠤᠮᠤᠢ᠃ ᠬᠣᠯᠠ ᠬᠠᠷᠢ ᠤᠯᠤᠰ ᠤ᠋ᠨ ᠡᠵᠡᠨ ᠳᠥᠷᠪᠡᠨ ᠥᠩᠭᠡ᠂ ᠲᠠᠪᠤᠨ ᠬᠠᠷᠢ ᠬᠠᠮᠲᠤ ᠴᠥᠮ ᠴᠠᠭᠠᠯᠠᠬᠤ ᠥᠷᠯᠥᠭᠡ ᠶ᠋ᠢᠨ ᠶᠣᠰᠣᠨ ᠢ᠋ᠶ᠋ᠠᠷ ᠮᠥᠷᠭᠥᠷᠡ ᠢᠷᠡᠭᠰᠡᠨ ᠲᠤᠯᠠ ᠲᠡᠳᠡᠭᠡᠷ ᠠᠢᠮᠠᠭ ᠲᠤᠷ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠰᠦᠷ ᠳᠦᠷᠢᠮ ᠢ᠋ ᠡᠰᠡ ᠦᠵᠡᠭᠦᠯᠪᠡᠰᠦ᠂ ᠲᠡᠳᠡᠨ ᠦ᠌ ᠬᠢᠴᠢᠶᠡᠩᠭᠦᠢᠯᠡᠬᠦ ᠪᠣᠯᠭᠣᠮᠵᠢᠯᠠᠬᠤ ᠴᠢᠩ ᠦᠨᠡᠨ ᠰᠦᠰᠦᠭ ᠢ᠋ ᠤᠳᠤᠷᠢᠳᠤᠨ ᠬᠦᠨᠳᠦᠳᠬᠡᠬᠦᠶᠡ ᠪᠡᠷᠬᠡ᠃ ᠲᠡᠢᠨ ᠬᠦ᠌ ᠡᠢᠨ ᠬᠡᠷᠡᠭᠯᠡᠭᠦᠯᠦᠮᠦᠢ᠃ ᠡᠨᠡ ᠢᠨᠤ ᠵᠠᠭᠤᠨ ᠲᠦᠮᠡᠨ ᠢ᠋ ᠨᠢᠭᠡᠨ ᠡᠰᠢᠲᠦ ᠮᠡᠲᠦ᠂ ᠨᠢᠭᠡᠨ ᠣᠭᠣᠰᠣᠷᠲᠤ ᠮᠡᠲᠦ ᠪᠣᠯᠬᠤ ᠳᠦᠷᠢᠮ ᠬᠡᠮᠵᠢᠶᠡ ᠮᠥᠨ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠮᠦᠰᠢᠶᠡᠵᠦ ᠵᠥᠪᠰᠢᠶᠡᠨ ᠬᠠᠷᠢᠭᠤ ᠵᠠᠷᠯᠢᠭ ᠪᠣᠯᠤᠷᠤᠨ : 《ᠮᠢᠨᠦ ᠰᠣᠨᠣᠰᠤᠭᠰᠠᠨ ᠠᠨᠤ᠂ ᠬᠠᠭᠤᠴᠢᠨ ᠶᠡᠬᠡ ᠰᠥᠩ ᠤᠯᠤᠰ ᠬᠣᠭᠣᠰᠣᠨ ᠬᠠᠢᠳᠠᠮ ᠶᠠᠩᠵᠤ ᠳᠦᠷᠢᠮ ᠬᠡᠲᠦᠷᠡᠵᠦ᠂ ᠢᠷᠭᠡᠨ ᠢᠨᠤ ᠡᠵᠡᠨ ᠯᠣᠭᠡ ᠪᠡᠨ ᠨᠡᠪᠲᠡᠷᠡᠨ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠭᠠᠷ᠂ ᠵᠠᠯᠢᠬᠠᠢ ᠰᠠᠢᠳ ᠵᠠᠪᠰᠠᠷ ᠤ᠋ᠨ ᠵᠠᠪᠰᠢᠶᠠᠨ ᠢ᠋ ᠣᠯᠵᠤ᠂ ᠬᠣᠢᠲᠤ ᠬᠢᠵᠠᠭᠠᠷ ᠲᠤᠷ ᠯᠢᠶᠣᠤ ᠤᠯᠤᠰ ᠢ᠋ ᠮᠠᠨᠳᠤᠭᠤᠯᠬᠤᠢ ᠳ᠋ᠤᠷ ᠭᠥᠷᠥᠭᠦᠯᠪᠡ᠃ ᠲᠡᠳᠦᠢ ᠯᠢᠶᠣᠤ ᠤᠯᠤᠰ ᠪᠠᠷᠠᠭᠤᠨ ᠲᠥᠪᠡᠳ ᠦ᠋ᠨ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠢ᠋ ᠬᠢᠴᠢᠶᠡᠵᠦ ᠰᠢᠨᠤᠬᠠᠢᠷᠠᠭᠠᠳ ᠤᠯᠤᠰ ᠤ᠋ᠨ ᠬᠡᠷᠡᠭ ᠰᠠᠭᠠᠲᠠᠯ ᠪᠣᠯᠵᠤ᠂ ᠪᠠᠰᠠ ᠥᠪᠡᠷ ᠢ᠋ᠶ᠋ᠡᠨ ᠬᠡᠲᠦᠷᠬᠡᠢ ᠵᠢᠷᠭᠠᠯ ᠴᠡᠩᠭᠡᠯ ᠤᠵᠢᠳ ᠰᠠᠮᠠᠭᠤᠨ ᠬᠡᠲᠦᠷᠡᠭᠰᠡᠨ ᠢ᠋ᠶ᠋ᠡᠷ ᠬᠢᠳᠠᠨ ᠤ᠋ ᠠᠭᠦ᠋ᠳᠠ ᠡᠰᠡᠷᠭᠦᠴᠡᠯ ᠪᠣᠯᠵᠤ᠂ ᠠᠯᠲᠠᠨ ᠤᠯᠤᠰ ᠪᠠᠰᠠ ᠪᠢᠴᠢᠭ ᠦ᠋ᠨ ᠰᠤᠷᠭᠠᠯ ᠢ᠋ ᠡᠷᠭᠢᠯᠡᠮᠦᠢ ᠭᠡᠮᠡᠨ ᠬᠣᠭᠣᠰᠣᠨ ᠴᠢᠮᠡᠭᠯᠡᠬᠦ ᠦᠭᠡ ᠶᠠᠩᠵᠤᠯᠠᠬᠤ ᠪᠠᠢᠳᠠᠯ ᠬᠡᠲᠦᠷᠡᠭᠡᠳ ᠴᠡᠩᠭᠡᠯ ᠬᠣᠱᠣᠩ ᠶᠡᠬᠡᠯᠡ ᠬᠡᠲᠦᠷᠡᠭᠰᠡᠭᠡᠷ ᠡᠳᠦᠭᠡ ᠰᠢᠶᠠ ᠤᠯᠤᠰ᠂ ᠬᠢᠳᠠᠨ ᠤ᠋ ᠤᠯᠤᠰ᠂ ᠮᠠᠨ ᠤ᠋ ᠤᠷᠢᠳᠤ ᠲᠠᠲ᠋ᠠᠷ ᠤᠯᠤᠰ ᠤ᠋ᠨ ᠰᠡᠳᠬᠢᠯ ᠢ᠋ ᠠᠯᠳᠠᠵᠤ ᠲᠡᠮᠡᠴᠡᠬᠦ ᠶ᠋ᠢ ᠬᠦᠰᠡᠪᠡ᠂ ᠡᠳᠦᠭᠡ ᠮᠢᠨᠦ ᠮᠣᠩᠭᠣᠯ ᠤᠯᠤᠰ ᠰᠠᠶᠢ ᠲᠣᠭᠲᠠᠨᠢᠮᠠᠭᠴᠠ ᠪᠠᠰᠠ ᠬᠡᠲᠦᠷᠬᠡᠢ ᠡᠷᠬᠢᠯᠡᠨ ᠶᠡᠬᠡᠷᠬᠡᠪᠡᠰᠦ ᠰᠢᠨᠡ ᠳᠠᠭᠠᠭᠰᠠᠳ ᠤ᠋ᠨ ᠰᠠᠨᠠᠭᠠᠨ ᠤ᠋ ᠦᠨᠳᠦᠰᠦᠨ ᠳ᠋ᠦ᠍ᠷ ᠬᠠᠷᠰᠢᠭᠠᠳ ᠬᠣᠢᠲᠤ ᠵᠠᠯᠭᠠᠮᠵᠢᠯᠠᠬᠤ ᠬᠡᠦᠬᠡᠳ ᠠᠴᠢᠷ ᠡᠷᠬᠢᠮ ᠳ᠋ᠡᠭᠡᠨ ᠡᠷᠬᠢᠮᠰᠢᠨ ᠰᠡᠷᠡᠮᠵᠢᠯᠡᠬᠦ ᠴᠢᠷᠮᠠᠢᠬᠤ ᠰᠠᠨᠠᠭᠠᠨ ᠰᠢᠮᠳᠠᠯ ᠳ᠋ᠤᠷ ᠬᠠᠷᠰᠢᠭᠤᠵᠠᠢ ᠬᠡᠮᠡᠭᠰᠡᠨ ᠪᠥᠯᠥᠭᠡ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠭᠤᠨ ᠲᠦᠰᠢᠮᠡᠳ ᠭᠠᠢᠬᠠᠨ ᠪᠢᠰᠢᠷᠡᠵᠦ ᠰᠢᠳᠦᠨ ᠰᠦᠰᠦᠭᠯᠡᠭᠡᠳ《ᠲᠦᠮᠡᠨ ᠨᠠᠰᠤᠲᠤ ! 》 ᠭᠡᠮᠡᠨ ᠭᠤᠷᠪᠠᠨᠲᠠ ᠳᠠᠭᠤᠳᠠᠨ ᠮᠥᠷᠭᠥᠨ ᠮᠠᠭᠲᠠᠯᠴᠠᠪᠠᠢ᠃
ᠲᠡᠳᠦᠢ ᠣᠨ ᠤ᠋ ᠲᠡᠷᠢᠭᠦᠨ ᠦ᠌ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠬᠤᠢ ᠳ᠋ᠤᠷ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠬᠠᠭᠤᠴᠢᠨ ᠭᠡᠷ ᠦ᠋ᠨ ᠬᠥᠭᠰᠢᠨ ᠲᠦᠰᠢᠮᠡᠯ ᠮᠡᠩᠭᠡᠯᠢᠭ ᠢ᠋ ᠡᠮᠦᠨᠡ ᠪᠡᠨ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ᠂ ᠳᠡᠭᠡᠳᠦ ᠲᠠᠢᠹᠦ᠋ ᠲᠦᠰᠢᠮᠡᠯ ᠡᠷᠭᠦᠵᠦ ᠥᠪᠡᠷ ᠦ᠋ᠨ ᠡᠮᠦᠰᠦᠭᠰᠡᠨ ᠬᠤᠶᠠᠭ ᠢ᠋ ᠱᠠᠩᠨᠠᠨ ᠡᠮᠦᠰᠬᠡᠵᠦ᠂ ᠲᠡᠭᠦᠨ ᠦ᠌ ᠬᠣᠶᠠᠷ ᠬᠥᠪᠡᠭᠦᠨ ᠠᠯᠤᠬᠠ᠂ ᠰᠦᠬᠡ ᠶ᠋ᠢ ᠳᠤᠮᠳᠠᠳᠤ ᠲᠠᠢᠹᠦ᠋ ᠲᠦᠰᠢᠮᠡᠯ ᠡᠷᠭᠦᠮᠵᠢᠯᠡᠵᠦ᠂ ᠠᠷᠭᠠᠰᠤᠨ ᠤ᠋ ᠬᠣᠷᠭᠣᠯᠵᠢ ᠶ᠋ᠢ ᠳᠤᠮᠳᠠᠳᠤ ᠲᠠᠢᠹᠦ᠋ ᠲᠦᠰᠢᠮᠡᠯ ᠡᠷᠭᠦᠮᠵᠢᠯᠡᠨ᠂ ᠲᠥᠪ ᠦ᠋ᠨ ᠳᠡᠪᠡᠯ᠂ ᠲᠥᠷᠥ ᠶ᠋ᠢᠨ ᠮᠠᠯᠠᠭᠠ ᠰᠣᠶᠣᠷᠬᠠᠵᠤ᠂ ᠮᠡᠩᠭᠡᠯᠢᠭ ᠬᠣᠷᠭᠣᠯᠵᠢ ᠬᠣᠶᠠᠭᠤᠯᠠ ᠳ᠋ᠤᠷ ᠮᠣᠳᠣᠷ ᠢ᠋ᠶ᠋ᠠᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠡᠢᠨ ᠵᠠᠷᠯᠢᠭ ᠪᠣᠯᠤᠷᠤᠨ :
ᠡᠴᠢᠭᠡ ᠬᠠᠭᠠᠨ ᠢ᠋ ᠮᠢᠨᠦ ᠳᠠᠭᠠᠵᠤ ᠴᠢᠩ ᠦᠨᠡᠨ ᠢ᠋ᠶ᠋ᠡᠷ ᠵᠢᠳᠬᠦᠯᠦᠭᠡ
ᠡᠬᠡ ᠲᠠᠢᠬᠡᠦ ᠳ᠋ᠦ᠍ᠷ ᠮᠢᠨᠦ ᠵᠠᠷᠤᠭᠳᠠᠨ ᠡᠳᠦᠢ ᠪᠣᠯᠲᠠᠯᠠ ᠬᠢᠴᠢᠶᠡᠪᠡ᠂
ᠡᠷᠲᠡ ᠳ᠋ᠦ᠍ᠷ ᠬᠤᠸᠠᠩᠬᠡᠦ ᠶ᠋ᠢ ᠪᠠᠭᠤᠯᠭᠠᠬᠤᠶᠠ ᠥᠭᠡᠳᠡ ᠤᠷᠤᠭᠤᠭᠠᠨᠠ ᠭᠦᠶᠦᠯᠦᠭᠡ
ᠡᠳᠦᠭᠡ ᠪᠢ ᠬᠠᠭᠠᠨ ᠰᠠᠭᠤᠲᠠᠯᠠ ᠡᠨᠡ ᠪᠡᠶᠡ ᠴᠢᠨᠦ ᠬᠥᠭᠰᠢᠷᠡᠪᠡ᠃
ᠡᠷᠲᠡ ᠴᠠᠭ ᠲᠤᠷ ᠵᠣᠪᠠᠵᠤ ᠵᠦᠳᠡᠬᠦᠶᠡ ᠬᠠᠮᠲᠤ ᠭᠠᠰᠢᠭᠤᠨ ᠢ᠋ ᠠᠮᠰᠠᠪᠠ
ᠡᠯᠳᠡᠪ ᠤᠯᠤᠰ ᠤᠷᠪᠠᠵᠤ ᠡᠴᠢᠲᠡᠯᠡ ᠠᠰᠠᠷᠠᠯᠲᠤ ᠴᠢ ᠡᠰᠡ ᠬᠥᠳᠡᠯᠪᠡ᠂
ᠡᠳᠦᠭᠡ ᠣᠳᠣ ᠭᠡᠷ ᠦ᠋ᠨ ᠳᠣᠲᠣᠷᠠ ᠡᠷᠬᠢᠯᠡᠭᠰᠡᠨ ᠲᠦᠰᠢᠮᠡᠯ ᠪᠣᠯᠪᠠ
ᠡᠭᠦᠨᠴᠡ ᠣᠳᠣ ᠮᠢᠨᠦ ᠭᠡᠷ ᠦ᠋ᠨ ᠨᠡᠢᠲᠡ ᠶ᠋ᠢ ᠴᠢ ᠲᠡᠷᠢᠭᠦᠯᠡᠵᠦ ᠵᠠᠬᠢᠷ !
ᠬᠡᠮᠡᠭᠰᠡᠨ ᠡᠳᠡᠭᠡᠷ ᠵᠠᠷᠯᠢᠭ ᠲᠤᠷ ᠮᠡᠩᠬᠡᠯᠢᠭ᠂ ᠬᠣᠷᠭᠣᠯᠵᠢ ᠬᠣᠶᠠᠭᠤᠯᠠ ᠳᠣᠲᠣᠷᠠ ᠢᠭᠲᠦᠯᠦᠨ ᠵᠢᠷᠦᠬᠡ ᠰᠢᠲᠦᠵᠦ ᠬᠠᠪᠠᠷ ᠪᠤᠷᠬᠢᠷᠠᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠪᠡ᠃ ᠲᠡᠳᠦᠢ ᠨᠤᠲᠤᠭ ᠭᠣᠯᠣᠮᠲᠠ ᠶ᠋ᠢᠨ ᠨᠡᠢᠲᠡ ᠶ᠋ᠢ ᠵᠠᠬᠢᠷᠬᠤ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠡᠷᠭᠦᠮᠵᠢᠯᠡᠪᠡ᠃ ᠠᠷᠭᠠᠰᠤᠨ ᠤ᠋ ᠬᠣᠷᠭᠣᠯᠵᠢ ᠶ᠋ᠢ ᠳᠡᠳ᠋ ᠰᠠᠢᠳ᠂ ᠮᠡᠩᠬᠡᠯᠢᠭ᠂ ᠠᠯᠤᠬᠠ᠂ ᠰᠦᠬᠡ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠪᠴᠤ ᠣᠯᠠᠨ ᠸᠠᠩ ᠤ᠋ᠳ ᠲᠠᠢᠰᠢ ᠲᠠᠢᠪᠤᠤ ᠲᠠᠢᠹᠦ᠋ ᠨᠠᠷ ᠤ᠋ᠨ ᠳᠡᠰ ᠲᠡᠷᠢᠭᠦᠨ ᠰᠢᠷᠡᠭᠡᠨ ᠦ᠌ ᠬᠤᠷᠢᠮ ᠳ᠋ᠤᠷ ᠰᠠᠭᠤᠯᠭᠠ ᠬᠡᠮᠡᠪᠡ᠃
ᠲᠡᠳᠦᠢ ᠴᠢᠨᠳᠠᠭᠠᠨᠠ ᠰᠡᠴᠡᠨ᠂ ᠬᠤᠳᠠᠭᠠᠨᠠ ᠪᠡᠬᠢ᠂ ᠬᠤᠷᠴᠠ ᠪᠠᠢᠷᠢ ᠡᠨᠡ ᠭᠤᠷᠪᠠᠨ ᠰᠠᠢᠳ ᠢ᠋ ᠳᠡᠭᠡᠳᠦ ᠵᠠᠮ ᠤ᠋ᠨ ᠲᠠᠢᠹᠦ᠋ ᠲᠦᠰᠢᠮᠡᠯ᠂ ᠵᠢᠴᠢ ᠣᠶᠤᠲᠤ ᠰᠡᠴᠡᠨ᠂ ᠣᠶᠤᠨ ᠭᠤᠸᠠ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ᠂ ᠮᠤᠬᠤᠯᠢ ᠶ᠋ᠢᠨ ᠳᠡᠭᠦᠦ ᠳᠠᠢᠰᠤᠨᠳᠠᠷᠤᠭᠴᠢ᠂ ᠴᠢᠯᠠᠭᠤᠨ ᠤ᠋ ᠳᠡᠭᠦᠦ ᠲᠡᠮᠦᠷ᠂ ᠪᠣᠲ᠋ᠣ ᠶ᠋ᠢᠨ ᠠᠪᠠᠭᠠ ᠪᠤᠰᠤᠩ᠂ ᠮᠡᠩᠭᠡᠯᠢᠭ ᠦ᠋ᠨ ᠳᠡᠭᠦᠦ ᠮᠡᠩᠭᠡᠲᠦ᠂ ᠲᠡᠭᠦᠰᠴᠣᠭᠲᠤ ᠡᠨᠡ ᠨᠠᠢ᠍ᠮᠠᠨ ᠲᠦᠰᠢᠮᠡᠯ ᠢ᠋ ᠰᠢᠳᠠᠷ ᠰᠠᠢᠳ ᠤ᠋ᠨ ᠳᠤᠮᠳᠠᠳᠤ ᠵᠠᠮ ᠤ᠋ᠨ ᠲᠠᠢᠹᠦ᠋ ᠲᠦᠰᠢᠮᠡᠯ᠃ ᠠᠵᠢᠨᠠᠢ ᠮᠡᠷᠭᠡᠨ᠂ ᠬᠤᠳᠠᠷᠭᠠ ᠪᠠᠭᠠᠲᠤᠷ᠂ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠤᠷᠲᠤ ᠪᠣᠳᠣᠯᠭᠠᠲᠤ᠂ ᠤᠬᠠᠭᠠᠨᠲᠤ ᠷᠢᠨᠴᠢᠨ᠂ ᠮᠠᠢᠯᠵᠢ ᠶ᠋ᠢᠨ ᠳᠠᠷᠢᠰᠣᠨᠤᠰᠤᠭᠴᠢ᠂ ᠵᠠᠷᠤᠳ ᠤ᠋ᠨ ᠳᠣᠣᠷᠠᠲᠤ ᠵᠠᠮ ᠤ᠋ᠨ ᠲᠠᠢᠹᠦ᠋ ᠲᠦᠰᠢᠮᠡᠯ᠂ ᠬᠡᠷᠡᠢᠳ ᠦ᠋ᠨ ᠲᠤᠰᠬᠤ᠂ ᠨᠠᠢ᠍ᠮᠠᠨ ᠤ᠋ ᠠᠯᠲᠠᠨᠱᠠᠭᠠ ᠬᠣᠶᠠᠷ ᠢ᠋ ᠵᠡᠭᠦᠨ ᠪᠠᠷᠠᠭᠤᠨ ᠤ᠋ ᠪᠡᠢᠯᠡ ᠶᠡᠬᠡ ᠵᠠᠩᠵᠤᠨ ᠪᠥᠭᠡᠳ ᠲᠥᠷᠥ ᠶ᠋ᠢᠨ ᠹᠦ ᠮᠠ᠋ ᠲᠠᠪᠤᠨᠠᠩ᠂ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠥᠬᠢᠨ ᠬᠠᠰ ᠲᠤᠶᠠᠭᠠ᠂ ᠬᠡᠷᠡᠢᠳ ᠦ᠋ᠨ ᠸᠠᠩ ᠬᠠᠨ ᠤ᠋ ᠥᠬᠢᠨ ᠰᠣᠯᠤᠩᠭᠤᠸᠠ ᠬᠣᠶᠠᠭᠤᠯᠠ ᠶ᠋ᠢ ᠲᠥᠷᠥ ᠶ᠋ᠢᠨ ᠭᠦᠩᠵᠦ ᠡᠷᠭᠦᠮᠵᠢᠯᠡᠭᠡᠳ ᠵᠠᠷᠯᠢᠭ ᠣᠯᠤᠭᠰᠠᠨ ᠠᠨᠤ :《ᠬᠡᠷᠡᠢᠳ᠂ ᠨᠠᠢ᠍ᠮᠠᠨ ᠬᠡᠳᠦᠢᠪᠡᠷ ᠳᠠᠢᠯᠠᠨ ᠳᠠᠭᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠤᠭ ᠮᠢᠨᠦ ᠵᠡᠷᠭᠡᠯᠡᠳᠡᠭᠡ ᠤᠯᠤᠰ᠂ ᠲᠡᠭᠦᠨ ᠦ᠌ ᠳᠡᠭᠡᠳᠦ ᠯᠦ᠍ᠭᠡ ᠮᠠᠨ ᠤ᠋ ᠡᠴᠢᠭᠡ ᠬᠠᠭᠠᠨ ᠪᠠᠭᠠᠲᠤᠷ ᠡᠵᠡᠨ ᠦ᠌ ᠦᠶᠡ ᠳ᠋ᠦ᠍ᠷ ᠦᠷᠭᠦᠯᠵᠢ ᠵᠢᠷᠭᠠᠯᠠᠩ ᠵᠣᠪᠠᠯᠠᠩ ᠢ᠋ ᠬᠠᠮᠲᠤᠳᠬᠠᠨ ᠶᠠᠪᠤᠭᠰᠠᠨ ᠲᠤᠯᠠ ᠡᠳᠦᠭᠡ ᠡᠷᠬᠢᠮ ᠥᠨᠳᠥᠷ ᠪᠣᠯᠤᠭᠠᠳ ᠬᠠᠭᠤᠴᠢᠨ ᠳᠠᠩ ᠰᠠᠴᠠᠭᠤ ᠶ᠋ᠢᠨ ᠤᠯᠤᠰ ᠢ᠋ ᠬᠡᠲᠦᠷᠬᠡᠶᠡ ᠳᠣᠷᠣᠢ ᠪᠣᠯᠭᠠᠬᠤᠢ ᠳ᠋ᠤᠷ ᠮᠢᠨᠦ ᠮᠥᠨ ᠴᠢᠨᠠᠷ ᠠ᠋ᠴᠠ ᠦᠯᠦ ᠲᠥᠪᠳᠡᠮᠦ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ᠂ ᠲᠤᠰᠬᠤ᠂ ᠬᠣᠶᠠᠷ ᠲᠥᠷᠥ ᠶ᠋ᠢᠨ ᠭᠦᠩᠵᠦ ᠰᠣᠯᠣᠩᠭᠤᠸᠠ᠂ ᠬᠠᠰ ᠲᠤᠶᠠᠭᠠ ᠨᠠᠷ ᠨᠢᠳᠦᠨ ᠳ᠋ᠦ᠍ᠷ ᠨᠢᠯᠪᠤᠰᠤᠨ ᠬᠤᠷᠠᠲᠠᠯᠠ ᠤᠶᠠᠷᠠᠨ ᠰᠦᠰᠦᠭᠯᠡᠵᠦ᠂ ᠬᠠᠭᠠᠨ ᠤ᠋ ᠬᠦᠨᠳᠦ ᠬᠡᠰᠢᠭ ᠲᠣᠷ ᠮᠠᠯᠠᠭᠠ ᠪᠠᠨ ᠠᠪᠴᠤ ᠮᠥᠷᠭᠥᠪᠡ᠃ ᠲᠡᠳᠦᠢ ᠤᠭᠰᠠᠭᠠ ᠶ᠋ᠢᠨ ᠲᠣᠭᠲᠣᠩᠭᠣ᠌ ᠪᠠᠭᠠᠲᠤᠷ᠂ ᠵᠦᠷᠴᠢᠳ ᠦ᠋ᠨ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ᠂ ᠭᠢᠯᠦᠭᠡᠨ ᠦ᠌ ᠭᠢᠯᠦᠭᠡᠨ ᠪᠠᠭᠠᠲᠤᠷ᠂ ᠵᠥᠷᠭᠡᠨ ᠦ᠌ ᠵᠥᠭᠡᠲᠡᠢ ᠪᠠᠭᠠᠲᠤᠷ᠂ ᠮᠠᠩᠭᠤᠳ ᠤ᠋ᠨ ᠬᠤᠢᠯᠠᠲᠠᠷ ᠬᠣᠰᠢᠭᠤᠴᠢ᠂ ᠡᠨᠡ ᠲᠠᠪᠤᠨ ᠪᠠᠭᠠᠲᠤᠷ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠢ᠋ ᠳᠡᠭᠡᠳᠦ ᠲᠠᠪᠤᠨ ᠬᠦᠩ ᠶᠡᠬᠡ ᠵᠠᠩᠵᠤᠨ ᠪᠥᠭᠡᠳ ᠪᠠᠰᠠ ᠸᠠᠩᠭᠦᠪ ᠠᠢᠮᠠᠭ ᠤ᠋ᠨ ᠳᠠᠴᠢᠩᠬᠤᠷᠯᠤ᠂ ᠪᠦᠲᠦᠨᠡ ᠠᠢᠮᠠᠭ ᠤ᠋ᠨ ᠢᠯᠠᠭᠤᠭᠰᠠᠨ ᠬᠣᠶᠠᠭᠤᠯᠠ ᠶ᠋ᠢ ᠵᠡᠭᠦᠨ ᠪᠠᠷᠠᠭᠤᠨ ᠶᠡᠬᠡ ᠪᠡᠢᠯᠡ ᠪᠥᠭᠡᠳ ᠤᠯᠤᠰ ᠤ᠋ᠨ ᠵᠥᠪᠯᠡᠯ ᠦ᠋ᠨ ᠪᠢᠴᠢᠭ ᠱᠠᠰᠲᠢᠷ ᠤ᠋ᠨ ᠡᠷᠭᠢᠨ ᠰᠠᠢᠳ᠂ ᠡᠭᠦᠨ ᠡᠴᠡ ᠪᠤᠰᠤ ᠤᠷᠢᠳᠤ ᠬᠣᠢᠲᠤ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠠᠭᠰᠠᠨ ᠠᠢᠮᠠᠭ ᠤ᠋ᠳ ᠤ᠋ᠨ ᠡᠵᠡᠨ ᠲᠠᠪᠢᠭᠠᠳ ᠢᠯᠡᠭᠦᠦ ᠤᠯᠤᠰ ᠤ᠋ᠨ ᠡᠵᠡᠨ ᠢ᠋ ᠴᠥᠮ ᠬᠣᠢᠲᠤ ᠵᠠᠮ ᠤ᠋ᠨ ᠳᠡᠭᠡᠳᠦ ᠲᠠᠢᠹᠦ᠋ ᠲᠦᠰᠢᠮᠡᠯ ᠡᠷᠭᠦᠮᠵᠢᠯᠡᠵᠦ᠂ ᠳᠠᠢᠯᠠᠵᠤ ᠳᠠᠭᠠᠭᠤᠯᠤᠭᠰᠠᠨ ᠠᠷᠪᠠᠭᠠᠳ ᠠᠢᠮᠠᠭ ᠤ᠋ᠨ ᠡᠵᠡᠳ ᠢ᠋ ᠴᠥᠮ ᠭᠠᠳᠠᠭᠠᠳᠤ ᠵᠠᠮ ᠤ᠋ᠨ ᠳᠤᠮᠳᠠᠳᠤ ᠲᠠᠢᠹᠦ᠋ ᠲᠦᠰᠢᠮᠡᠯ ᠡᠷᠭᠦᠵᠦ᠂ ᠨᠢᠭᠡᠨ ᠵᠡᠷᠭᠡ ᠳᠡᠪᠰᠢᠭᠦᠯᠦᠨ ᠡᠷᠭᠦᠭᠡᠳ ᠪᠠᠭᠠ ᠵᠠᠩᠵᠤᠨ ᠨᠠᠷ ᠢ᠋ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠦ : ᠮᠤᠬᠤᠯᠢ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠪᠤᠯᠤ ᠂ ᠪᠤᠭᠤᠷᠵᠢ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠡᠭᠦᠯᠡᠨ ᠴᠡᠷᠪᠢ᠂ ᠪᠤᠭᠤᠷᠤᠯ ᠤ᠋ᠨ ᠶᠡᠬᠡ ᠬᠥᠪᠡᠭᠦᠨ ᠪᠤᠳᠣᠯᠠᠩ᠂ ᠴᠢᠯᠠᠭᠤᠨ ᠤ᠋ ᠶᠡᠬᠡ ᠬᠥᠪᠡᠭᠦᠨ ᠠᠯᠮᠠᠰ᠂ ᠵᠡᠪᠡ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠠᠨᠠᠨᠳᠠ᠂ ᠵᠠᠯᠮᠠ ᠶ᠋ᠢᠨ ᠭᠠᠭᠴᠠ ᠬᠥᠪᠡᠭᠦᠨ ᠸᠠᠩ ᠴᠡᠴᠡᠭ᠂ ᠴᠤᠤ ᠮᠡᠷᠭᠡᠨ ᠦ᠌ ᠶᠡᠬᠡ ᠬᠥᠪᠡᠭᠦᠨ ᠬᠣᠪᠤᠯᠠᠢ᠂ ᠬᠠᠷᠠ ᠬᠢᠷᠤ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠥᠳᠥ – ᠶᠢᠰᠦᠨ ᠡᠩ ᠦ᠋ᠨ ᠥᠷᠯᠥᠭ ᠨᠣᠶᠠᠳ ᠤ᠋ᠨ ᠴᠣᠯᠠ ᠵᠠᠯᠭᠠᠮᠵᠢᠯᠠᠬᠤ ᠬᠡᠦᠬᠡᠳ ᠪᠥᠭᠡᠳ ᠴᠥᠮ ᠳᠣᠣᠷᠠᠲᠤ ᠵᠠᠮ ᠤ᠋ᠨ ᠲᠠᠢᠹᠦ᠋ ᠲᠦᠰᠢᠮᠡᠯ ᠡᠷᠭᠦᠮᠵᠢᠯᠡᠪᠡ᠃ ᠵᠢᠴᠢ ᠳᠥᠷᠪᠡᠨ ᠳᠡᠭᠦᠦ ᠴᠢᠨ ᠸᠠᠩ ᠤ᠋ᠨ ᠬᠡᠦᠬᠡᠳ ᠦ᠋ᠨ ᠴᠣᠯᠠ ᠵᠠᠯᠭᠠᠮᠵᠢᠯᠠᠬᠤ ᠶ᠋ᠢ ᠲᠣᠭᠲᠠᠭᠠᠬᠤ ᠠᠨᠤ : ᠪᠠ ᠴᠢᠨ ᠸᠠᠩ ᠪᠡᠯᠭᠦᠳᠡᠢ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠲᠠᠢᠽᠢ ᠬᠤᠲᠤᠭᠲᠤ᠂ ᠬᠠ ᠴᠢᠨ ᠸᠠᠩ ᠬᠠᠰᠠᠷ ᠤ᠋ᠨ ᠶᠡᠬᠡ ᠬᠥᠪᠡᠭᠦᠨ ᠲᠠᠢᠽᠢ ᠳᠣᠶᠣ᠂ ᠭᠠ ᠴᠢᠨ ᠸᠠᠩ ᠭᠠᠴᠤᠭ ᠤ᠋ᠨ ᠶᠡᠬᠡ ᠬᠥᠪᠡᠭᠦᠨ ᠲᠠᠢᠽᠢ ᠮᠣᠩᠭᠣᠯ ᠪᠤᠭᠤ᠂ ᠣ ᠴᠢᠨ ᠸᠠᠩ ᠤ᠋ᠨ ᠶᠡᠬᠡ ᠬᠥᠪᠡᠭᠦᠨ ᠲᠠᠢᠽᠢ ᠡᠷᠳᠡᠨᠢ ᠰᠠᠷᠠᠨ᠂ ᠮᠣᠩᠭᠣᠯ ᠰᠠᠷᠠᠨ᠂ ᠡᠨᠡ ᠵᠢᠷᠭᠤᠭᠠᠨ ᠲᠠᠢᠽᠢ ᠶ᠋ᠢ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠥᠷᠪᠡᠨ ᠲᠠᠢᠽᠢ ᠨᠠᠷ ᠤ᠋ᠨ ᠶᠣᠰᠣᠭᠠᠷ ᠡᠮᠦᠰᠴᠦ ᠵᠡᠭᠦᠯᠭᠡᠨ ᠶᠠᠪᠤᠭᠤᠯ ᠭᠡᠮᠡᠨ ᠡᠷᠭᠦᠵᠦ᠂ ᠵᠢᠴᠢ ᠮᠤᠬᠤᠯᠢ ᠶ᠋ᠢᠨ ᠳᠡᠳ᠋ ᠬᠥᠪᠡᠭᠦᠨ ᠰᠦᠷᠲᠦ᠂ ᠪᠤᠭᠤᠷᠵᠢ ᠶ᠋ᠢᠨ ᠳᠡᠳ᠋ ᠬᠥᠪᠡᠭᠦᠨ ᠫᠣᠯᠢᠭᠲᠠᠢ᠂ ᠪᠤᠭᠤᠷᠤᠯ ᠤ᠋ᠨ ᠳᠡᠳ᠋ ᠬᠥᠪᠡᠭᠦᠨ ᠤᠬᠠᠭᠠᠨᠲᠠᠢ᠂ ᠴᠢᠯᠠᠭᠤᠨ ᠤ᠋ ᠵᠢᠴᠢ ᠬᠥᠪᠡᠭᠦᠨ ᠸᠴᠢᠷ᠂ ᠰᠢᠷᠢ ᠬᠤᠲᠤᠭ ᠤ᠋ᠨ ᠳᠡᠳ᠋ ᠬᠥᠪᠡᠭᠦᠨ ᠰᠤᠪᠤᠲᠠᠢ᠂ ᠵᠡᠪᠡ ᠶ᠋ᠢᠨ ᠳᠡᠳ᠋ ᠬᠥᠪᠡᠭᠦᠨ ᠳᠤᠭᠤᠯᠠᠭᠠ ᠲᠡᠮᠦᠷ᠂ ᠴᠤᠤ ᠮᠡᠷᠭᠡᠨ ᠦ᠌ ᠳᠡᠳ᠋ ᠬᠥᠪᠡᠭᠦᠨ ᠱᠣᠪᠤᠯᠤᠢ᠂ ᠬᠠᠷᠠ ᠬᠢᠷᠤ ᠶ᠋ᠢᠨ ᠳᠡᠳ᠋ ᠬᠥᠪᠡᠭᠦᠨ ᠰᠣᠳᠣ᠂ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠦ᠌ ᠬᠣᠶᠠᠷ ᠬᠥᠪᠡᠭᠦᠨ ᠸᠠᠢᠵᠢᠩ᠂ ᠠᠯᠢᠵᠠᠩ᠂ ᠬᠤᠳᠠᠭᠠᠨᠠ ᠪᠡᠬᠢ ᠶ᠋ᠢᠨ ᠬᠣᠶᠠᠷ ᠬᠥᠪᠡᠭᠦᠨ ᠬᠦᠷᠡᠯ ᠪᠦᠰᠡ᠂ ᠬᠦᠳᠡᠷ ᠪᠦᠰᠡ᠂ ᠬᠤᠷᠴᠠ ᠪᠠᠢᠷᠢ ᠶ᠋ᠢᠨ ᠬᠣᠶᠠᠷ ᠬᠥᠪᠡᠭᠦᠨ ᠪᠤᠭᠤᠲᠤ ᠬᠤᠸᠠ᠂ ᠠᠯᠠᠭ ᠲᠤᠭᠤᠯ᠂ ᠣᠶᠤᠲᠤ ᠰᠡᠴᠡᠨ ᠦ᠌ ᠭᠠᠭᠴᠠ ᠬᠥᠪᠡᠭᠦᠨ ᠶᠣᠯᠣ ᠶ᠋ᠢᠨ ᠪᠠᠭᠠᠰᠤ᠂ ᠣᠶᠤᠨ ᠭᠤᠸᠠ ᠶ᠋ᠢᠨ ᠬᠣᠶᠠᠷ ᠬᠥᠪᠡᠭᠦᠨ ᠤᠨᠵᠢᠭᠠᠢ᠂ ᠰᠤᠨᠵᠢᠭᠠᠢ᠂ ᠪᠤᠰᠦᠩ ᠦ᠋ᠨ ᠬᠥᠪᠡᠭᠦᠨ ᠲᠠᠵᠤᠨᠠᠢ᠂ ᠮᠡᠩᠭᠡᠲᠦ ᠶ᠋ᠢᠨ ᠬᠥᠪᠡᠭᠦᠨ ᠲᠠᠩᠭᠤᠳ᠂ ᠲᠡᠭᠦᠰᠴᠣᠭᠲᠤ ᠶ᠋ᠢᠨ ᠬᠥᠪᠡᠭᠦᠨ ᠨᠡᠷᠡᠭᠦᠢ᠂ ᠴᠣᠭᠲᠤ ᠶ᠋ᠢᠨ ᠬᠥᠪᠡᠭᠦᠨ ᠰᠡᠮᠦ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠶ᠋ᠢᠨ ᠳᠡᠭᠦᠦ ᠥᠨᠢ ᠤᠷᠲᠤ ᠨᠠᠷ ᠢ᠋ ᠴᠥᠮ ᠳᠣᠣᠷᠠᠲᠤ ᠵᠠᠮ ᠤ᠋ᠨ ᠲᠠᠢᠹᠦ᠋ ᠲᠦᠰᠢᠮᠡᠯ ᠪᠥᠭᠡᠳ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠲᠡᠷᠢᠭᠦᠯᠡᠭᠰᠡᠨ ᠵᠠᠩᠵᠤᠨ᠃ ᠲᠡᠳᠦᠢ ᠴᠢᠩᠭᠢᠰ ᠬᠠᠭᠠᠨ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠬᠡᠷᠡᠢᠳ ᠦ᠋ᠨ ᠪᠠᠢᠯᠳᠤᠭᠠᠨᠠ ᠦᠬᠦᠭᠰᠡᠨ ᠥᠨᠳᠥᠷ ᠰᠡᠴᠡᠨ ᠦ᠌ ᠬᠡᠦᠬᠡᠳ ᠪᠤᠯᠢᠬ᠌ᠲᠤ ᠪᠠᠷᠰ᠂ ᠰᠢᠯᠢᠭᠲᠦ ᠪᠠᠷᠰ᠂ ᠲᠡᠰᠬᠡᠯ ᠪᠠᠷᠰ ᠠᠬᠠ ᠳᠡᠭᠦᠦ ᠭᠤᠷᠪᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠨ ᠳᠡᠷᠭᠡᠳᠡ ᠪᠡᠨ ᠠᠴᠢᠷᠠᠵᠤ᠂ ᠳᠡᠪᠡᠯ ᠬᠤᠪᠴᠠᠳ ᠮᠥᠩᠭᠥ ᠲᠣᠷᠭᠠ᠂ ᠨᠤᠮᠤ ᠰᠤᠮᠤ᠂ ᠢᠯᠳᠦ ᠰᠦᠬᠡ ᠡᠮᠡᠭᠡᠯ ᠮᠣᠷᠢ ᠬᠠᠢᠷᠠᠯᠠᠵᠤ ᠵᠠᠷᠯᠢᠭ ᠪᠣᠯᠤᠷᠤᠨ :《ᠲᠠᠨ ᠤ᠋ ᠡᠴᠢᠭᠡ ᠥᠨᠳᠥᠷ ᠰᠡᠴᠡᠨ ᠡᠵᠡᠨ ᠢ᠋ᠶ᠋ᠡᠨ ᠡᠮᠦᠨᠡ ᠡᠴᠢᠭᠡ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠪᠡᠶᠡ ᠪᠡᠨ ᠭᠡᠭᠡᠵᠦ ᠡᠷᠬᠢᠮ ᠵᠢᠷᠤᠮ ᠲᠠᠢ ᠲᠤᠯᠠ ᠠᠬᠠ ᠦᠨᠡᠨ ᠢ᠋ ᠳᠠᠭᠠᠵᠤ ᠡᠰᠡ ᠤᠷᠪᠠᠭᠠᠳ ᠡᠨᠡ ᠡᠳᠦᠷ ᠲᠠ ᠭᠤᠷᠪᠠᠭᠤᠯᠠ ᠶ᠋ᠢ ᠥᠪᠡᠷᠮᠢᠴᠡ ᠡᠷᠭᠦᠵᠦ ᠱᠠᠩᠨᠠᠭᠰᠠᠨ ᠠᠨᠤ ᠡᠳᠡᠭᠡᠷ ᠴᠥᠮ ᠡᠴᠢᠭᠡ ᠶ᠋ᠢᠨ ᠴᠢᠨᠦ ᠡᠷᠬᠢᠮ ᠭᠠᠪᠢᠶᠠ ᠳ᠋ᠤᠷ ᠪᠣᠯᠠᠢ ! 》ᠭᠡᠮᠡᠨ ᠳᠥᠷᠪᠡᠨ ᠲᠠᠢᠽᠢ ᠨᠠᠷ ᠤ᠋ᠨ ᠳᠡᠭᠡᠳᠦ ᠳᠤᠮᠳᠠᠳᠤ ᠳᠣᠣᠷᠠᠲᠤ ᠭᠤᠷᠪᠠᠨ ᠡᠷᠬᠢᠯᠡᠭᠰᠡᠨ ᠰᠠᠢᠳ᠂ ᠮᠢᠨᠦ ᠠᠯᠢ ᠬᠥᠪᠡᠭᠦᠨ ᠮᠢᠨᠦ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠪᠠᠰᠤ ᠲᠠ ᠭᠤᠷᠪᠠᠨ ᠢ᠋ ᠠᠪᠴᠤ ᠲᠠᠢᠰᠢ ᠲᠠᠢᠹᠦ᠋᠂ ᠲᠠᠢᠪᠤᠤ ᠪᠣᠯᠭᠠ ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠲᠣᠭᠲᠠᠭᠠᠪᠠ᠃ ᠭᠤᠷᠪᠠᠨ ᠲᠦᠰᠢᠮᠡᠯ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠪᠠᠭᠤᠪᠠ᠃ ᠤᠭᠰᠠᠭᠠ ᠶ᠋ᠢᠨ ᠵᠠᠮᠪᠠᠯ ᠤ᠋ᠨ ᠬᠣᠶᠠᠷ ᠬᠥᠪᠡᠭᠦᠨ ᠠᠬᠠᠢ᠂ ᠶᠠᠰᠢ᠂ ᠲᠣᠭᠲᠣᠩᠭᠣ ᠶ᠋ᠢᠨ ᠬᠣᠶᠠᠷ ᠬᠥᠪᠡᠭᠦᠨ ᠲᠠᠢᠵᠢ᠂ ᠠᠨᠳᠠᠨ᠂ ᠮᠡᠩᠭᠡᠯᠢᠭ ᠦ᠋ᠨ ᠬᠣᠶᠠᠷ ᠬᠥᠪᠡᠭᠦᠨ ᠠᠯᠤᠬᠠ᠂ ᠰᠦᠬᠡ᠂ ᠳᠠᠴᠢᠩᠬᠣᠷᠯᠤ ᠶ᠋ᠢᠨ ᠬᠥᠪᠡᠭᠦᠨ ᠰᠢᠯᠢᠶᠠᠮᠪᠦ᠂ ᠢᠯᠠᠭᠤᠭᠰᠠᠨ ᠤ᠋ ᠬᠥᠪᠡᠭᠦᠨ ᠬᠠᠵᠤᠰᠢᠯ᠂ ᠳ᠋ᠠᠳᠠᠳᠤᠩᠭᠠ ᠶ᠋ᠢᠨ ᠬᠥᠪᠡᠭᠦᠨ ᠳ᠋ᠦᠩ ᠶᠦᠨ᠂ ᠡᠨᠡ ᠳᠣᠯᠣᠭᠤᠯᠠ ᠶ᠋ᠢ ᠳᠣᠯᠣᠭᠠᠨ ᠰᠡᠴᠡᠳ ᠪᠠᠭᠠᠲᠤᠳ ᠭᠡᠮᠡᠨ ᠡᠷᠭᠦᠵᠦ᠂ ᠴᠥᠮ ᠳᠤᠮᠳᠠᠳᠤ ᠲᠠᠢᠹᠦ᠋ ᠲᠦᠰᠢᠮᠡᠳ ᠡᠷᠭᠦᠨ ᠳᠡᠳ᠋ ᠰᠠᠢᠳ ᠤ᠋ᠨ ᠵᠡᠷᠭᠡ ᠳ᠋ᠦ᠍ᠷ ᠪᠣᠯᠭᠠᠨ ᠡᠷᠭᠦᠮᠵᠢᠯᠡᠪᠡ᠃ ᠵᠢᠴᠢ ᠦᠯᠡᠳᠡᠭᠰᠡᠨ ᠵᠠᠯᠠᠭᠤ ᠰᠠᠢᠳ ᠲᠦᠰᠢᠮᠡᠳ ᠢ᠋ ᠪᠠᠰᠠ ᠴᠥᠮ ᠨᠢᠭᠡᠨ ᠵᠡᠷᠭᠡ ᠳᠡᠪᠰᠢᠭᠦᠯᠦᠨ ᠡᠷᠭᠦᠮᠵᠢᠯᠡᠪᠡ᠃ ᠡᠳᠦᠭᠡ ᠲᠠᠪᠤᠨ ᠠᠩᠭᠢ ᠡᠷᠭᠦᠮᠵᠢᠯᠡᠭᠰᠡᠨ ᠰᠠᠢᠳ ᠤ᠋ᠳ ᠢ᠋ ᠲᠠᠪᠤᠨ ᠡᠳᠦᠷ ᠬᠤᠷᠢᠮᠯᠠᠨ ᠶᠡᠬᠡᠯᠡ ᠱᠠᠩᠨᠠᠪᠠ᠃ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠵᠠᠭᠤᠨ ᠲᠦᠰᠢᠮᠡᠳ ᠲᠦᠮᠡᠨ ᠨᠠᠰᠤᠲᠤ ᠭᠡᠮᠡᠨ ᠲᠡᠭᠷᠢ ᠶ᠋ᠢᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠪᠡ᠃ ᠳᠠᠭᠠᠯᠳᠤᠭᠠ ᠬᠤᠸᠠ ᠶ᠋ᠢᠨ ᠭᠦᠩᠵᠦ ᠰᠡᠴᠡᠨ ᠰᠡᠴᠢᠭᠯᠢᠭ ᠠᠪᠠᠬᠠᠢ ᠶ᠋ᠢ ᠴᠡᠴᠡᠭ ᠹᠦ ᠮᠠ᠋ ᠲᠠᠪᠤᠨᠠᠩ ᠳ᠋ᠤᠷ ᠬᠣᠯᠪᠣᠬᠤ ᠶᠡᠬᠡ ᠶᠣᠰᠣᠯᠠᠯ ᠤ᠋ᠨ ᠬᠤᠷᠢᠮ ᠲᠣᠢ ᠶ᠋ᠢ ᠡᠬᠢᠯᠡᠵᠦ᠂ ᠣᠯᠠᠨ ᠸᠠᠩ ᠤ᠋ᠳ ᠵᠠᠭᠤᠨ ᠲᠦᠰᠢᠮᠡᠳ ᠪᠠᠶᠠᠷ ᠤ᠋ᠨ ᠶᠣᠰᠣᠭᠠᠷ ᠴᠢᠮᠡᠵᠦ᠂ ᠵᠡᠯᠮᠡ ᠶᠢᠰᠦᠨ ᠶᠢᠰᠦᠨ ᠨᠠᠶᠠᠨ ᠨᠢᠭᠡᠨ ᠦ᠌ ᠶᠡᠬᠡ ᠪᠡᠯᠡᠭ ᠢ᠋ ᠡᠷᠭᠦᠵᠦ᠂ ᠶᠢᠰᠦᠨ ᠤᠳᠠᠭᠠ ᠶ᠋ᠢᠨ ᠶᠡᠬᠡ ᠪᠡᠯᠭᠡᠯᠡᠯ ᠶᠣᠰᠣᠯᠠᠯ ᠢ᠋ ᠡᠷᠭᠦᠵᠦ᠂ ᠬᠥᠪᠡᠭᠦᠨ ᠲᠠᠪᠤᠨᠠᠩ ᠴᠡᠴᠡᠭ ᠹᠦ ᠮᠠ᠋ ᠳ᠋ᠤᠷ ᠬᠤᠸᠠ ᠶ᠋ᠢᠨ ᠭᠦᠩᠵᠦ ᠶ᠋ᠢ ᠪᠠᠭᠤᠯᠭᠠᠨ ᠠᠪᠬᠤᠢ ᠳ᠋ᠤᠷ ᠣᠯᠠᠨ ᠸᠠᠩ ᠦ᠋ᠳ ᠦ᠋ᠨ ᠬᠠᠲᠤᠳ᠂ ᠵᠠᠭᠤᠨ ᠰᠠᠢᠳ ᠤ᠋ᠳ ᠤ᠋ᠨ ᠥᠬᠢᠳ ᠡᠬᠡᠨᠡᠷ ᠨᠠᠷ ᠳᠣᠲᠣᠭᠠᠳᠤ ᠣᠷᠲᠣᠨᠠ ᠡᠭᠦᠯᠡᠨ ᠮᠡᠲᠦ ᠴᠢᠭᠤᠯᠤᠨ᠂ ᠭᠠᠳᠠᠭᠠᠳᠤ ᠲᠥᠷᠥ ᠳ᠋ᠦ᠍ᠷ ᠳᠥᠷᠪᠡᠨ ᠸᠠᠩ ᠵᠢᠷᠭᠤᠭᠠᠨ ᠴᠢᠩ᠂ ᠶᠢᠰᠦᠨ ᠡᠩ᠂ ᠵᠠᠭᠤᠨ ᠰᠠᠢᠳ ᠣᠳᠣᠨ ᠮᠡᠲᠦ ᠬᠤᠷᠠᠵᠤ᠂ ᠲᠠᠪᠤᠨ ᠲᠠᠢᠰᠢ ᠲᠠᠪᠤᠨᠠᠩ ᠹᠦ ᠮᠠ᠋ ᠴᠡᠴᠡᠭ ᠢ᠋ ᠤᠳᠤᠷᠢᠳᠤᠨ ᠳᠣᠲᠣᠭᠠᠳᠤ ᠣᠷᠳᠣᠨ ᠳ᠋ᠤᠷ ᠣᠷᠣᠭᠤᠯᠵᠤ᠂ ᠳᠥᠷᠪᠡᠨ ᠸᠠᠩ ᠳᠥᠷᠪᠡᠨ ᠲᠠᠢᠽᠢ ᠨᠠᠷ ᠲᠣᠰᠴᠤ ᠤᠭᠲᠤᠨ ᠠᠪᠴᠤ ᠲᠠᠢᠬᠡᠦ ᠶ᠋ᠢᠨ ᠣᠷᠳᠣᠨᠠ ᠤᠳᠤᠷᠢᠳᠤᠨ ᠣᠷᠣᠭᠤᠯᠵᠤ ᠮᠥᠷᠭᠥᠭᠦᠯᠦᠨ᠂ ᠬᠠᠭᠠᠨ ᠤ᠋ ᠡᠮᠦᠨᠡ ᠶᠣᠰᠣᠯᠠᠭᠤᠯᠵᠤ᠂ ᠬᠤᠸᠠᠩᠬᠡᠦ ᠶ᠋ᠢᠨ ᠣᠷᠲᠣᠨᠠ ᠮᠥᠷᠭᠥᠭᠦᠯᠵᠦ᠂ ᠭᠠᠯ ᠭᠣᠯᠣᠮᠲᠠ ᠶ᠋ᠢ ᠲᠠᠬᠢᠭᠤᠯᠤᠨ᠂ ᠶᠡᠬᠡ ᠰᠦᠯᠳᠡ ᠬᠠᠯᠢᠮ ᠤ᠋ᠨ ᠬᠤᠷᠢᠮ ᠢ᠋ ᠨᠡᠭᠡᠭᠡᠵᠦ᠂ ᠵᠢᠷᠭᠤᠭᠠᠨ ᠶᠣᠰᠣᠯᠠᠯ ᠢ᠋ ᠲᠡᠭᠦᠰᠬᠡᠵᠦ᠂ ᠰᠠᠢᠨ ᠡᠳᠦᠷ ᠦ᠋ᠨ ᠰᠠᠢᠬᠠᠨ ᠥᠷᠯᠥᠭᠡ ᠪᠠᠷᠰ ᠴᠠᠭ ᠲᠤᠷ ᠶᠢᠰᠦᠨ ᠳᠠᠪᠬᠤᠷ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠨᠠᠷᠢᠨ ᠬᠥᠭᠵᠢᠮ ᠡᠭᠦᠰᠬᠡᠨ᠂ ᠠᠩᠬᠢᠯᠤᠮᠠᠯ ᠬᠦᠵᠢᠰ ᠰᠢᠲᠠᠭᠠᠵᠤ᠂ ᠰᠢᠳᠠᠷ ᠰᠠᠢᠳ ᠤ᠋ᠳ ᠮᠠᠩᠨᠤᠭ ᠬᠥᠰᠢᠭᠡ ᠶ᠋ᠢᠨ ᠡᠮᠦᠨᠡ ᠬᠣᠶᠠᠷ ᠠᠢᠮᠠᠭᠯᠠᠨ ᠵᠢᠭᠰᠠᠭᠠᠨ ᠬᠦᠵᠢ ᠪᠠᠷᠢᠨ ᠶᠠᠪᠤᠯᠴᠠᠵᠤ᠂ ᠲᠡᠷᠢᠭᠦᠯᠡᠭᠰᠡᠨ ᠰᠠᠢᠳ ᠰᠢᠷᠠ ᠯᠤᠤᠲᠤ ᠰᠤᠪᠤᠳᠯᠢᠭ ᠰᠡᠦᠬᠡ ᠶ᠋ᠢ ᠲᠦᠰᠢᠵᠦ᠂ ᠹᠦ ᠮᠠ᠋ ᠴᠡᠴᠡᠭ ᠦ᠋ᠨ ᠮᠣᠷᠢ ᠳ᠋ᠤᠷ ᠠᠯᠲᠠᠨ ᠤ᠋ ᠡᠮᠡᠭᠡᠯ ᠬᠠᠰ ᠤ᠋ᠨ ᠬᠠᠵᠠᠭᠠᠷ ᠡᠷᠳᠡᠨᠢ ᠶ᠋ᠢᠨ ᠨᠣᠭᠲᠣ᠂ ᠠᠯᠲᠠᠨ ᠤ᠋ ᠳᠥᠷᠥᠭᠡ᠂ ᠪᠡᠶᠡ ᠳ᠋ᠦ᠍ᠷ ᠯᠤᠤ ᠶ᠋ᠢᠨ ᠬᠤᠪᠴᠠᠳ ᠮᠠᠩᠨᠤᠭ ᠳᠡᠪᠡᠯ᠂ ᠡᠷᠳᠡᠨᠢ ᠶ᠋ᠢᠨ ᠰᠢᠷᠬᠡᠭᠲᠦ ᠠᠯᠲᠠᠨ ᠤ᠋ ᠬᠣᠭᠣᠯᠠᠪᠴᠢ ᠪᠠᠷᠢᠵᠤ᠂ ᠰᠡᠦᠬᠡ ᠶ᠋ᠢᠨ ᠡᠮᠦᠨᠡ ᠶᠠᠪᠤᠨ ᠬᠣᠯᠪᠣᠬᠤ ᠶᠣᠰᠣᠯᠠᠯ ᠤ᠋ᠨ ᠶᠡᠬᠡ ᠤᠷᠳᠣᠨᠠ ᠬᠦᠷᠦᠭᠰᠡᠨ ᠳ᠋ᠦ᠍ᠷ ᠭᠠᠳᠠᠭᠠᠳᠤ ᠵᠠᠭᠤᠨ ᠲᠤᠰᠢᠮᠡᠳ᠂ ᠲᠠᠪᠤᠨᠠᠩ ᠴᠡᠴᠡᠭ ᠹᠦ ᠮᠠ᠋ ᠶ᠋ᠢᠨ ᠮᠣᠷᠢ ᠶ᠋ᠢ ᠤᠨᠤᠭᠤᠯᠤᠭᠰᠠᠭᠠᠷ ᠳᠣᠲᠣᠭᠠᠳᠤ ᠣᠷᠳᠣᠨᠠ ᠬᠥᠲᠥᠯᠦᠨ ᠣᠷᠣᠭᠤᠯᠵᠤ᠂ ᠲᠡᠭᠷᠢ ᠭᠠᠵᠠᠷ ᠤ᠋ᠨ ᠲᠠᠬᠢᠯ ᠤ᠋ᠨ ᠰᠢᠷᠡᠭᠡᠨ ᠦ᠌ ᠡᠮᠦᠨᠡ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ᠂ ᠰᠢᠷᠠ ᠮᠠᠩᠨᠤᠭ ᠰᠠᠭᠠᠳᠠᠭ ᠢ᠋ ᠠᠪᠴᠤ ᠡᠮᠦᠨᠡ ᠪᠠᠷᠢᠪᠠ᠃ ᠳᠠᠭᠠᠯᠳᠤᠭᠠ ᠡᠷᠬᠢᠯᠡᠭᠰᠡᠨ ᠰᠠᠢᠳ ᠭᠦᠩᠵᠦ ᠶ᠋ᠢᠨ ᠰᠤᠪᠤᠳᠯᠢᠭ ᠰᠡᠦᠬᠡ ᠶ᠋ᠢ ᠲᠦᠰᠢᠭᠰᠡᠭᠡᠷ ᠮᠥᠨ ᠬᠦᠷᠴᠦ ᠢᠷᠡᠨ᠂ ᠣᠯᠠᠨ ᠸᠠᠩ ᠤ᠋ᠳ ᠤ᠋ᠨ ᠬᠠᠲᠤᠳ ᠬᠤᠸᠠ ᠶ᠋ᠢᠨ ᠭᠦᠩᠵᠦ ᠶ᠋ᠢ ᠰᠡᠦᠬᠡ ᠡᠴᠡ ᠳᠥᠰᠢᠨ ᠪᠠᠭᠤᠯᠭᠠᠵᠤ᠂ ᠹᠦ ᠮᠠ᠋ ᠯᠤᠭᠠ ᠲᠡᠭᠷᠢ ᠭᠠᠵᠠᠷ ᠲᠤᠷ ᠶᠣᠰᠣᠯᠠᠭᠤᠯᠤᠨ᠂ ᠬᠣᠯᠠ ᠠ᠋ᠴᠠ ᠬᠠᠭᠠᠨ ᠬᠤᠸᠠᠩᠬᠡᠦ ᠶ᠋ᠢᠨ ᠵᠦᠭ ᠮᠥᠷᠭᠥᠭᠦᠯᠵᠦ᠂ ᠬᠠᠷᠢᠯᠴᠠᠨ ᠶᠣᠰᠣ ᠬᠢᠯᠭᠡᠵᠦ᠂ ᠯᠤᠤ ᠭᠠᠷᠤᠳᠢ ᠶ᠋ᠢᠨ ᠮᠠᠩᠨᠤᠭ ᠤ᠋ᠨ ᠰᠢᠷᠠ ᠥᠷᠭᠥᠭᠡ ᠳ᠋ᠦ᠍ᠷ ᠵᠠᠯᠠᠵᠤ᠂ ᠰᠤᠪᠤᠳ ᠬᠠᠲᠠᠭᠰᠠᠨ ᠬᠥᠰᠢᠭᠡ ᠳ᠋ᠦ᠍ᠷ ᠣᠷᠣᠭᠤᠯᠵᠤ᠂ ᠠᠯᠲᠠᠨ ᠬᠣᠯᠪᠣᠭᠠ ᠶ᠋ᠢᠨ ᠬᠤᠨᠳᠠᠭᠠ ᠬᠤᠷᠢᠮ ᠢ᠋ ᠪᠠᠷᠢᠵᠤ᠂ ᠬᠥᠰᠢᠭᠡ ᠶ᠋ᠢ ᠤᠨᠠᠭᠠᠮᠠᠭᠴᠠ ᠬᠣᠯᠪᠣᠬᠤ ᠶᠣᠰᠣᠨ ᠢ᠋ ᠭᠦᠢᠴᠡᠳᠬᠡᠬᠦ ᠨᠠᠷᠢᠨ ᠬᠥᠭᠵᠢᠮ ᠬᠣᠯᠠ ᠲᠠᠭᠲᠤ ᠳ᠋ᠤᠷ ᠡᠭᠦᠰᠬᠡᠪᠡ᠃ ᠬᠠᠭᠠᠨ ᠲᠡᠷᠢᠭᠦᠯᠡᠨ ᠵᠠᠭᠤᠨ ᠲᠦᠰᠢᠮᠡᠳ ᠳᠣᠲᠣᠷᠠ ᠭᠠᠳᠠᠨᠠ ᠭᠤᠷᠪᠠᠨ ᠡᠳᠦᠷ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠪᠠ᠃ ᠳᠠᠭᠠᠯᠳᠤᠭᠠ ᠪᠠᠰᠠ ᠵᠣᠴᠢ᠂ ᠴᠠᠭᠠᠲᠠᠢ ᠬᠣᠶᠠᠷ ᠲᠠᠢᠽᠢ ᠴᠢᠨ ᠸᠠᠩ ᠤ᠋ᠨ ᠬᠠᠲᠤᠨ ᠢ᠋ ᠬᠣᠯᠪᠣᠭᠰᠠᠨ ᠶᠣᠰᠣᠨ ᠢ᠋ ᠭᠦᠢᠴᠡᠳᠬᠡᠨ ᠬᠣᠯᠪᠣᠬᠤ ᠲᠤᠯᠠ ᠵᠢᠨᠦᠩ ᠲᠠᠢᠪᠤᠤ ᠮᠤᠬᠤᠯᠢ ᠶ᠋ᠢᠨ ᠬᠣᠶᠠᠳᠤᠭᠠᠷ ᠥᠬᠢᠨ ᠰᠠᠷᠠᠨ ᠬᠥᠬᠥᠭᠡ ᠶ᠋ᠢ ᠲᠠᠢᠽᠢ ᠵᠣᠴᠢ ᠳ᠋ᠤᠷ ᠪᠠᠭᠤᠯᠭᠠᠬᠤ᠂ ᠬᠥᠯᠭᠡ ᠪᠤᠭᠤᠷᠵᠢ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠥᠬᠢᠨ ᠣᠨᠳᠣᠷᠭᠠ ᠭᠡᠷᠡᠯ ᠢ᠋ ᠬᠣᠶᠠᠳᠤᠭᠠᠷ ᠲᠠᠢᠽᠢ ᠴᠠᠭᠠᠲᠠᠢ ᠳ᠋ᠤᠷ ᠪᠠᠭᠤᠯᠭᠠᠬᠤ ᠡᠨᠡ ᠬᠣᠶᠠᠷ ᠬᠡᠷᠡᠭ ᠬᠠᠮᠲᠤ ᠵᠠᠯᠭᠠᠯᠳᠤᠭᠰᠠᠨ ᠲᠤᠯᠠ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠲᠥᠷᠥ ᠳ᠋ᠦ᠍ᠷ ᠤᠷᠤᠭ ᠤ᠋ᠨ ᠬᠣᠯᠪᠣᠭᠠ ᠶ᠋ᠢᠨ ᠬᠡᠷᠡᠭ ᠢ᠋ ᠵᠠᠯᠭᠠᠯᠳᠤᠭᠤᠯᠵᠤ᠂ ᠣᠢᠷᠠ ᠭᠡᠷ ᠦ᠋ᠨ ᠬᠠ ᠴᠢᠨ ᠸᠠᠩ ᠬᠠᠰᠠᠷ ᠤ᠋ᠨ ᠬᠥᠪᠡᠭᠦᠨ ᠲᠠᠢᠽᠢ ᠳᠣᠶᠣ ᠳ᠋ᠤᠷ ᠬᠥᠯᠭᠡ ᠪᠤᠭᠤᠷᠵᠢ ᠶ᠋ᠢᠨ ᠳᠥᠷᠪᠡᠳᠦᠭᠡᠷ ᠥᠬᠢᠨ ᠮᠢᠷᠠᠯᠵᠠᠨ ᠲᠤᠶᠠᠭᠠ ᠶ᠋ᠢ ᠪᠠᠭᠤᠯᠭᠠᠬᠤ ᠪᠠ ᠪᠠ ᠴᠢᠨ ᠸᠠᠩ ᠪᠡᠯᠭᠦᠳᠡᠢ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠲᠠᠢᠽᠢ ᠪᠣᠯᠣᠳ ᠲᠤᠷ ᠲᠠᠢᠪᠤᠤ ᠵᠡᠪᠡ ᠶ᠋ᠢᠨ ᠶᠡᠬᠡ ᠥᠬᠢᠨ ᠵᠣᠷᠢᠭᠲᠤ ᠭᠤᠸᠠ ᠶ᠋ᠢ ᠪᠠᠭᠤᠯᠭᠠᠨ ᠠᠪᠬᠤᠢ ᠳ᠋ᠤᠷ ᠡᠨᠡ ᠲᠠᠪᠤᠨ ᠵᠦᠢᠯ ᠦ᠋ᠨ ᠪᠠᠶᠠᠷ ᠬᠤᠷᠢᠮ ᠤ᠋ᠨ ᠬᠣᠯᠪᠣᠬᠤ ᠶᠣᠰᠣᠯᠠᠯ ᠨᠠᠮᠤᠷ ᠤ᠋ᠨ ᠲᠡᠷᠢᠭᠦᠨ ᠰᠠᠷᠠ ᠬᠦᠷᠲᠡᠯᠡ ᠵᠠᠯᠭᠠᠯᠳᠤᠨ ᠬᠠᠷᠢᠯᠴᠠᠵᠤ ᠮᠠᠰᠢ ᠬᠥᠷ ᠨᠠᠢᠷᠲᠠᠢ ᠪᠥᠬᠥᠶᠡ᠂ ᠯᠢ ᠴᠢᠯᠢ ᠬᠣᠷᠣᠭᠠ ᠶ᠋ᠢ ᠬᠠᠮᠢᠶᠠᠷᠬᠤ ᠳ᠋ᠦᠩ ᠵᠢᠶᠦ᠋ᠨ ᠯᠦᠸᠧ ᠽᠢ ᠴᠧᠩ ᠬᠣᠲᠠ ᠶ᠋ᠢ ᠬᠠᠮᠢᠶᠠᠷᠬᠤ ᠯᠢᠦ ᠹᠦ᠂ ᠯᠢᠦ ᠵᠦᠩ ᠯᠦ᠍ ᠨᠠᠷ ᠪᠣᠳᠣᠷᠣᠣᠯ ᠪᠢᠴᠢᠭ ᠠᠢᠯᠠᠳᠬᠠᠪᠠ᠃ ᠪᠢᠴᠢᠭ ᠲᠠᠮᠠᠭᠠ ᠶ᠋ᠢᠨ ᠰᠠᠢᠳ ᠳᠠᠴᠢᠩᠬᠤᠷᠯᠤ᠂ ᠢᠯᠠᠭᠤᠭᠰᠠᠨ᠂ ᠳ᠋ᠠᠳᠠᠳᠣᠩᠭᠠ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠨᠠᠷ ᠪᠢᠴᠢᠭ ᠢ᠋ ᠦᠵᠡᠪᠡᠰᠦ᠂ ᠦᠵᠡᠰᠡ ᠰᠢᠶᠠ ᠤᠯᠤᠰ ᠤ᠋ᠨ ᠡᠵᠡᠨ ᠯᠢ ᠠᠨ ᠴᠢᠦᠸᠠᠨ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠰᠢᠯᠭᠠᠵᠤ᠂ ᠮᠣᠩᠭᠣᠯ ᠤᠯᠤᠰ ᠠ᠋ᠴᠠ ᠦᠰ ᠠᠪᠴᠤ ᠯᠦᠸᠧ ᠽᠢ ᠴᠧᠩ ᠬᠣᠲᠠ᠂ ᠯᠢ ᠴᠢᠯᠢ ᠬᠣᠷᠣᠭᠠ ᠶ᠋ᠢ ᠪᠤᠯᠢᠶᠠᠷᠠ ᠢᠷᠡᠬᠦ ᠶ᠋ᠢ ᠭᠤᠷᠪᠠᠨ ᠵᠠᠩᠵᠤᠨ ᠰᠣᠨᠣᠰᠴᠤ ᠶᠠᠭᠠᠷᠠᠨ ᠲᠤᠰᠠᠯᠠᠬᠤ ᠴᠡᠷᠢᠭ ᠭᠤᠶᠤᠵᠤ ᠢᠯᠡᠭᠡᠭᠰᠡᠨ ᠬᠡᠷᠡᠭ ᠲᠤᠯᠠ ᠪᠢᠴᠢᠭ ᠦ᠋ᠨ ᠡᠷᠬᠢᠯᠡᠭᠰᠡᠨ ᠰᠠᠢᠳ ᠠᠶᠤᠮᠰᠢᠭ ᠦᠭᠡᠢ ᠠᠯᠭᠤᠷᠯᠠᠬᠤ ᠦᠭᠡᠢ ᠵᠢᠨᠦᠩ ᠶᠤᠸᠠᠨᠱᠤᠸᠠᠢ ᠮᠤᠬᠤᠯᠢ᠂ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠶᠤᠸᠠᠨᠱᠤᠸᠠᠢ ᠪᠤᠭᠤᠷᠵᠢ ᠨᠠᠷ ᠢ᠋ ᠠᠪᠴᠤ ᠵᠢᠴᠢ ᠡᠳᠦᠷ ᠦ᠋ᠨ ᠲᠥᠷᠥ ᠳ᠋ᠦ᠍ᠷ ᠵᠠᠭᠤᠨ ᠲᠦᠰᠢᠮᠡᠳ ᠮᠥᠷᠭᠥᠵᠦ ᠪᠠᠷᠠᠭᠰᠠᠨ ᠬᠣᠢᠨᠠ ᠲᠠᠢᠰᠢ ᠲᠠᠢᠪᠤᠤ ᠵᠢᠷᠭᠤᠭᠠᠨ ᠰᠠᠢᠳ ᠭᠠᠷᠴᠤ ᠰᠢᠶᠠ ᠤᠯᠤᠰ ᠤ᠋ᠨ ᠤᠴᠢᠷ ᠢ᠋ ᠠᠢᠯᠠᠳᠬᠠᠪᠠ᠃
ᠲᠡᠳᠦᠢ ᠬᠠᠭᠠᠨ ᠤ᠋ ᠭᠡᠭᠡᠨ ᠠᠢᠯᠠᠳᠴᠤ ᠪᠠᠷᠠᠭᠠᠳ ᠵᠠᠷᠯᠢᠭ ᠪᠣᠯᠤᠷᠤᠨ :《ᠰᠢᠶᠠ ᠤᠯᠤᠰ ᠬᠡᠳᠦᠢ ᠠᠯᠲᠠᠨ ᠤᠯᠤᠰ ᠯᠤᠭᠠ ᠰᠠᠴᠠᠭᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠪᠠᠰᠠ ᠬᠦ᠌ ᠭᠠᠳᠠᠭᠠᠳᠤ ᠪᠠᠭᠠ ᠤᠯᠤᠰ ᠪᠥᠭᠡᠳ ᠡᠷᠲᠡ ᠪᠠᠰᠠ ᠣᠨᠴᠠ ᠪᠤᠰᠤ ᠤᠯᠤᠰ ᠯᠤᠭᠠ ᠰᠦᠯᠪᠡᠭᠡᠯᠡᠨ᠂ ᠮᠡᠬᠦᠰ ᠬᠥᠮᠦᠨ ᠨᠠᠳᠠ ᠳ᠋ᠤᠷ ᠣᠰᠣᠯᠳᠠᠵᠤ᠂ ᠥᠪᠡᠷᠡ ᠤᠯᠤᠰ ᠲᠤᠷ ᠴᠡᠷᠢᠭ ᠲᠤᠰᠠᠯᠠᠭᠰᠠᠨ ᠶᠠᠯᠠ ᠳ᠋ᠤᠷ ᠪᠢ ᠰᠠᠶᠢ ᠠᠭᠤᠷᠯᠠᠵᠤ᠂ ᠲᠡᠳᠡᠨ ᠦ᠌ ᠯᠦᠸᠧ ᠽᠢ ᠴᠧᠩ᠂ ᠯᠢ ᠴᠢᠯᠢ ᠵᠡᠷᠭᠡ ᠭᠠᠵᠠᠷ ᠢ᠋ ᠠᠪᠤᠭᠰᠠᠨ ᠪᠥᠯᠥᠭᠡ᠃ ᠲᠡᠷᠡ ᠡᠳᠦᠭᠡ ᠪᠠᠰᠠ ᠪᠤᠷᠤᠭᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨ ᠪᠠᠢᠨ ᠢᠷᠡᠪᠡᠰᠦ ᠳᠠᠢᠯᠠᠬᠤ ᠦᠭᠡᠢ ᠪᠣᠯᠪᠠᠰᠤ ᠪᠣᠯᠬᠤ ᠦᠭᠡᠢ ᠲᠤᠯᠠ ᠪᠢᠴᠢᠭ ᠴᠡᠷᠢᠭ ᠦ᠋ᠨ ᠣᠯᠠᠨ ᠰᠠᠢᠳ ᠤ᠋ᠳ ᠲᠠᠨ ᠳᠠᠢᠯᠠᠵᠤ ᠠᠪᠬᠤ ᠠᠷᠭᠠ ᠶ᠋ᠢ ᠬᠢᠨᠠᠨ ᠵᠥᠪᠯᠡᠵᠦ ᠠᠢᠯᠠᠳᠬᠠ᠂ ᠮᠡᠬᠦᠰ ᠬᠥᠮᠦᠨ ᠪᠢ ᠡᠷᠬᠡᠪᠰᠢ ᠪᠡᠶᠡ ᠪᠡᠷ ᠳᠠᠢᠯᠠᠷᠠ ᠡᠴᠢᠮᠦᠢ᠃ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠡᠮᠦᠨᠡ ᠴᠢᠯᠵᠢᠱ᠌ᠢ ᠨᠡᠷᠡᠲᠦ ᠠᠢᠮᠠᠭ ᠪᠣᠢ᠂ ᠲᠡᠭᠦᠨ ᠦ᠌ ᠴᠢᠬᠡ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠣᠷ ᠢᠳᠢᠨᠡᠷ ᠠᠢᠮᠠᠭ ᠪᠣᠢ᠂ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠬᠣᠢᠲᠤ ᠬᠢᠵᠠᠭᠠᠷ ᠲᠤᠷ ᠠᠯᠠᠭ ᠳᠡᠪᠡᠯᠲᠦ ᠠᠢᠮᠠᠭ ᠪᠣᠢ᠃ ᠡᠨᠡ ᠭᠤᠷᠪᠠᠨ ᠠᠢᠮᠠᠭ ᠲᠤᠷ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠲᠠᠢᠪᠤᠤ ᠲᠦᠰᠢᠮᠡᠯ ᠪᠤᠭᠤᠷᠤᠯ ᠵᠢᠴᠢ ᠳᠤᠮᠳᠠᠳᠤ ᠵᠠᠮ ᠤ᠋ᠨ ᠲᠠᠢᠹᠦ᠋ ᠲᠦᠰᠢᠮᠡᠯ ᠲᠣᠭᠲᠣᠩᠭᠣ ᠪᠠᠭᠠᠲᠤᠷ ᠤ᠋ᠨ ᠬᠥᠪᠡᠭᠦᠨ ᠠᠨᠳᠠᠨ ᠬᠣᠶᠠᠭᠤᠯᠠ ᠡᠴᠢᠵᠦ ᠰᠢᠶᠠ ᠤᠯᠤᠰ ᠤ᠋ᠨ ᠪᠤᠷᠤᠭᠤ ᠶ᠋ᠢ ᠲᠣᠭᠠᠴᠢᠵᠤ᠂ ᠲᠡᠳᠡᠨ ᠦ᠌ ᠴᠡᠷᠢᠭ ᠬᠠᠪᠰᠤᠷᠬᠤ ᠶ᠋ᠢ ᠵᠣᠭᠰᠣᠭᠠ᠃ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠶᠤᠸᠠᠨᠱᠤᠸᠠᠢ ᠲᠠᠢᠹᠦ᠋ ᠪᠤᠭᠤᠷᠵᠢ᠂ ᠲᠠᠢᠪᠤᠤ ᠴᠢᠯᠠᠭᠤ᠂ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ᠂ ᠬᠤᠢᠯᠠᠲᠠᠷ ᠬᠣᠰᠢᠭᠤᠴᠢ ᠬᠣᠶᠠᠷ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠢ᠋ ᠠᠪᠴᠤ ᠪᠠᠭᠠ ᠵᠠᠩᠵᠤᠨ ᠨᠠᠷ ᠠ᠋ᠴᠠ ᠵᠢᠷᠭᠤᠭᠠᠨ ᠬᠥᠮᠦᠨ ᠢ᠋ ᠰᠣᠩᠭᠣᠨ ᠳᠠᠭᠠᠭᠤᠯᠵᠤ᠂ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠡᠮᠦᠨᠡ ᠡᠴᠢᠵᠦ᠂ ᠯᠦᠸᠧ ᠽᠢ ᠴᠧᠩ ᠬᠣᠲᠠ᠂ ᠯᠢ ᠴᠢᠯᠢ ᠬᠣᠷᠣᠭᠠ ᠶ᠋ᠢ ᠬᠠᠮᠠᠭᠠᠯᠠᠨ ᠰᠠᠬᠢᠵᠤ ᠬᠦᠯᠢᠶᠡ᠃ ᠮᠢᠨᠦ ᠪᠡᠶᠡ ᠵᠢᠨᠦᠩ ᠲᠠᠢᠹᠦ᠋ ᠮᠤᠬᠤᠯᠢ ᠯᠤᠭᠠ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠬᠣᠢᠨᠠ ᠮᠣᠷᠳᠠᠮᠤᠢ᠃ ᠲᠠᠢᠹᠦ᠋ ᠮᠤᠬᠤᠯᠢ ᠳᠠᠭᠠᠭᠤᠯᠬᠤ ᠣᠯᠠᠨ ᠵᠠᠩᠵᠤᠨ ᠢ᠋ ᠬᠢᠨᠠᠨ ᠲᠣᠭᠲᠠᠭᠠ᠃ 》ᠭᠡᠮᠡᠨ ᠴᠣᠬᠣᠯᠠᠨ ᠪᠠᠭᠤᠯᠭᠠᠵᠤ ᠵᠦᠩ ᠬᠡᠩᠭᠡᠷᠭᠡ ᠳᠠᠭᠤᠷᠢᠰᠤᠨ᠂ ᠠᠷᠴᠠ ᠽᠠᠨᠳᠠᠨ ᠠᠩᠬᠢᠯᠤᠨ ᠭᠠᠷᠤᠳᠢ ᠶ᠋ᠢᠨ ᠬᠠᠯᠬᠠᠪᠴᠢ ᠡᠷᠭᠢᠭᠦᠯᠦᠨ ᠬᠥᠳᠡᠯᠵᠦ᠂ ᠯᠤᠤ ᠶ᠋ᠢᠨ ᠬᠠᠨᠴᠤ ᠨᠢᠭᠡᠨᠲᠡ ᠭᠦᠪᠢᠮᠡᠭᠴᠡ ᠲᠩᠷᠢ ᠶ᠋ᠢᠨ ᠬᠥᠪᠡᠭᠦᠨ ᠳᠣᠲᠣᠭᠠᠳᠤ ᠤᠷᠲᠣᠨᠠ ᠵᠠᠯᠠᠷᠠᠨ ᠪᠠᠭᠤᠪᠠ᠃ ᠵᠠᠭᠤᠨ ᠲᠦᠰᠢᠮᠡᠳ ᠳᠥᠷᠪᠡᠨ ᠵᠦᠭ ᠲᠠᠷᠬᠠᠯᠴᠠᠬᠤᠶᠠ᠂ ᠵᠢᠨᠦᠩ ᠦ᠋ᠨ ᠲᠠᠭᠲᠤ ᠳ᠋ᠤᠷ ᠮᠣᠷᠳᠠᠬᠤ ᠰᠠᠢᠳ ᠢ᠋ ᠡᠷᠭᠦᠬᠦ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠪᠠ᠃ ᠮᠤᠬᠤᠯᠢ᠂ ᠲᠠᠢᠹᠦ᠋ ᠪᠤᠭᠤᠷᠤᠯ᠂ ᠲᠠᠢᠪᠤᠤ ᠠᠨᠳᠠᠨ᠂ ᠲᠠᠢᠪᠤᠤ ᠵᠠᠯᠮᠠ᠂ ᠲᠠᠢᠹᠦ᠋ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠳᠥᠷᠪᠡᠭᠦᠯᠡ ᠳ᠋ᠦ᠍ᠷ ᠵᠠᠭᠤᠨ ᠮᠣᠷᠢᠲᠠᠨ ᠢ᠋ ᠥᠭᠴᠦ ᠴᠢᠯᠵᠢᠱ᠌ᠢ ᠠᠢᠮᠠᠭ᠂ ᠢᠳᠢᠨᠡᠷ ᠠᠢᠮᠠᠭ᠂ ᠠᠯᠠᠭ ᠳᠡᠪᠡᠯᠲᠦ ᠠᠢᠮᠠᠭ ᠡᠨᠡ ᠭᠤᠷᠪᠠᠨ ᠠᠢᠮᠠᠭ ᠲᠤᠷ ᠡᠴᠢᠵᠦ ᠣᠯᠬᠤ ᠠᠯᠳᠠᠬᠤ ᠠᠰᠢᠭ᠋ ᠵᠣᠪᠠᠯᠠᠩ ᠢ᠋ ᠲᠣᠳᠣᠷᠬᠠᠢᠯᠠᠨ ᠲᠣᠭᠠᠴᠢᠵᠤ ᠬᠡᠯᠡᠭᠡᠳ ᠰᠡᠩᠬᠡᠷᠡᠭᠦᠯᠦᠨ ᠰᠤᠷᠭᠠᠵᠤ᠂ ᠰᠢᠶᠠ ᠤᠯᠤᠰ ᠲᠤᠷ ᠴᠡᠷᠢᠭ ᠪᠢᠲᠡᠭᠡᠢ ᠲᠤᠰᠠᠯᠠ ᠭᠡᠮᠡᠨ ᠶᠠᠪᠤᠭᠤᠯᠤᠨ᠂ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠲᠠᠢᠹᠦ᠋ ᠪᠤᠭᠤᠷᠵᠢ᠂ ᠲᠠᠢᠪᠤᠤ ᠴᠢᠯᠠᠭᠤ ᠬᠣᠶᠠᠭᠤᠯᠠ ᠳ᠋ᠤᠷ ᠰᠥᠪᠡᠭᠡᠲᠡᠢ ᠬᠣᠢᠯᠠᠳᠠᠷ ᠬᠣᠶᠠᠷ ᠶᠡᠬᠡ ᠵᠠᠩᠵᠤᠨ ᠢ᠋ ᠳᠠᠭᠠᠭᠤᠯᠤᠨ ᠥᠭᠴᠦ ᠳᠣᠣᠷᠠ ᠠᠨᠤ ᠪᠤᠯᠤ᠂ ᠡᠭᠦᠯᠡᠨ ᠴᠡᠷᠪᠢ᠂ ᠠᠨᠳᠠᠨ᠂ ᠰᠤᠪᠤᠲᠠᠢ᠂ ᠬᠣᠪᠤᠯᠠᠢ᠂ ᠱᠤᠪᠤᠯᠠᠢ᠂ ᠨᠠᠨᠰᠠᠷ᠂ ᠰᠢᠯᠢᠶᠠᠮᠪᠦ᠂ ᠵᠢᠷᠭᠤᠭᠠᠨ ᠵᠠᠩᠵᠤᠨ ᠢ᠋ ᠥᠭᠴᠦ ᠡᠨᠡ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠤᠷᠢᠳᠠ ᠯᠢ ᠴᠢᠯᠢ ᠬᠣᠷᠣᠭᠠ ᠪᠠ ᠯᠦᠸᠧ ᠽᠢ ᠴᠧᠩ ᠬᠣᠲᠠ ᠳ᠋ᠤᠷ ᠡᠴᠢᠨ ᠰᠠᠬᠢᠵᠤ᠂ ᠰᠢᠶᠠ ᠤᠯᠤᠰ ᠤ᠋ᠨ ᠢᠷᠡᠬᠦ ᠴᠡᠷᠢᠭ ᠢ᠋ ᠰᠡᠷᠭᠡᠢᠯᠡᠨ ᠪᠡᠯᠡᠳᠬᠡᠵᠦ ᠬᠦᠯᠢᠶᠡ᠃ ᠳᠠᠭᠠᠯᠳᠤᠭᠠ ᠬᠠᠭᠠᠨ ᠤ᠋ ᠭᠡᠭᠡᠨ ᠴᠡᠷᠢᠭ ᠠᠪᠴᠤ ᠰᠢᠶᠠ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠣᠷᠣᠮᠤᠢ ᠭᠡᠮᠡᠨ ᠲᠠᠪᠤᠨ ᠬᠣᠨᠣᠭ ᠤ᠋ᠨ ᠡᠴᠦᠰ ᠲᠦ᠍ᠷ ᠥᠪᠡᠷ ᠢ᠋ᠶ᠋ᠡᠨ ᠪᠤᠭᠤᠷᠵᠢ᠂ ᠴᠢᠯᠠᠭᠤ ᠨᠠᠷ ᠢ᠋ ᠨᠢᠳᠦ ᠪᠡᠷ ᠦᠵᠡᠨ ᠮᠣᠷᠳᠠᠭᠤᠯᠪᠠ᠃ ᠳᠠᠭᠠᠯᠳᠤᠭᠠ ᠳᠠᠬᠢᠨ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠭᠤᠯᠤᠨ ᠣᠯᠠᠨ ᠵᠠᠩᠵᠤᠨ ᠨᠠᠷ ᠢ᠋ ᠴᠢᠭᠤᠯᠤᠭᠤᠯᠵᠤ ᠬᠠ ᠴᠢᠨ ᠸᠠᠩ ᠬᠠᠰᠠᠷ᠂ ᠠᠯᠤᠬᠠ᠂ ᠰᠦᠬᠡ ᠬᠣᠶᠠᠷ ᠵᠠᠩᠵᠤᠨ ᠢ᠋ ᠠᠪᠴᠤ ᠬᠠᠭᠠᠨ ᠤ᠋ ᠪᠠᠷᠠᠭᠤᠨ ᠮᠥᠷᠥ ᠶ᠋ᠢᠨ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠵᠠᠬᠢᠷ᠃ ᠪᠡ ᠴᠢᠨ ᠸᠠᠩ ᠪᠡᠯᠭᠦᠳᠡᠢ᠂ ᠥᠳᠥ᠂ ᠰᠣᠳᠣ ᠬᠣᠶᠠᠷ ᠵᠠᠩᠵᠤᠨ ᠢ᠋ ᠠᠪᠴᠤ ᠬᠠᠭᠠᠨ ᠤ᠋ ᠵᠡᠭᠦᠨ ᠮᠥᠷᠥ ᠶ᠋ᠢᠨ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠵᠠᠬᠢᠷ᠃ ᠲᠠᠢᠪᠤᠤ ᠲᠣᠭᠲᠣᠩᠭᠣ᠌ ᠪᠠᠭᠠᠲᠤᠷ ᠬᠠᠭᠠᠨ ᠤ᠋ ᠬᠣᠢᠨᠠ ᠬᠠᠢᠭᠤᠯ᠂ ᠠᠬᠠᠢ᠂ ᠶᠠᠰᠢ ᠬᠣᠶᠠᠷ ᠵᠠᠩᠵᠤᠨ ᠢ᠋ ᠠᠪᠴᠤ ᠠᠵᠢᠨᠠᠢ ᠮᠣᠷᠢᠨ ᠤ᠋ ᠵᠢᠭᠰᠠᠭᠠᠯ ᠤ᠋ᠨ ᠰᠡᠭᠦᠯ ᠪᠣᠯ᠂ ᠰᠢᠷᠢ ᠬᠤᠲᠤᠭ᠂ ᠬᠠᠷᠠ ᠬᠢᠷᠤ ᠬᠣᠶᠠᠷ ᠲᠠᠢᠪᠤᠤ ᠤᠨᠵᠢᠭᠠᠢ᠂ ᠰᠤᠨᠵᠢᠭᠠᠢ᠂ ᠪᠤᠭᠤᠲᠤ ᠬᠤᠸᠠ᠂ ᠠᠯᠠᠭ ᠲᠤᠭᠤᠯ ᠡᠨᠡ ᠳᠥᠷᠪᠡᠨ ᠪᠠᠭᠠ ᠵᠠᠩᠵᠤᠨ ᠢ᠋ ᠠᠪᠴᠤ ᠠᠵᠢᠨᠠᠢ ᠮᠣᠷᠢᠨ ᠤ᠋ ᠬᠣᠢᠲᠤ ᠬᠣᠶᠠᠷ ᠬᠥᠯ ᠦ᠋ᠨ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠵᠠᠬᠢᠷᠴᠤ ᠳᠠᠭᠠ᠃ ᠥᠪᠡᠷ ᠦ᠋ᠨ ᠪᠡᠶᠡ ᠵᠦᠯᠭᠡᠲᠡᠢ ᠭᠢᠯᠦᠭᠡᠨ ᠬᠣᠶᠠᠷ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠢ᠋ ᠠᠪᠴᠤ ᠡᠵᠡᠨ ᠦ᠌ ᠡᠮᠦᠨᠡ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠠᠵᠢᠨᠠᠢ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠪᠣᠯᠵᠤ᠂ ᠬᠠᠭᠠᠨ ᠤ᠋ ᠭᠡᠭᠡᠨ᠂ ᠲᠠᠪᠤᠨᠠᠩ ᠪᠣᠲ᠋ᠣ᠂ ᠲᠠᠢᠽᠢ ᠥᠭᠡᠳᠡᠢ᠂ ᠲᠣᠯᠢ ᠬᠣᠶᠠᠷ ᠪᠠᠭᠠ ᠴᠢᠨ ᠸᠠᠩ᠂ ᠵᠡᠪᠡ᠂ ᠴᠤᠤ ᠮᠡᠷᠭᠡᠨ ᠬᠣᠶᠠᠷ ᠲᠠᠢᠪᠤᠤ᠂ ᠠᠵᠢᠨᠠᠢ ᠮᠡᠷᠭᠡᠨ᠂ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠬᠣᠶᠠᠷ ᠲᠠᠢᠹᠦ᠋᠂ ᠣᠶᠤᠲᠤ ᠰᠡᠴᠡᠨ᠂ ᠣᠶᠤᠨ ᠭᠤᠸᠠ ᠬᠣᠶᠠᠷ ᠲᠠᠢᠹᠦ᠋᠂ ᠡᠨᠡ ᠶᠢᠰᠦᠨ ᠵᠠᠩᠵᠤᠨ ᠢ᠋ ᠠᠪᠴᠤ ᠳᠤᠮᠳᠠ ᠪᠣᠯᠤᠨ ᠠᠵᠢᠨᠠᠢ ᠮᠣᠷᠢᠨ ᠤ᠋ ᠪᠡᠶᠡ ᠪᠣᠯᠵᠤ ᠬᠣᠢᠨᠠ ᠶᠡᠬᠡ ᠬᠦᠨᠡᠰᠦ ᠪᠠ ᠬᠠᠭᠠᠨ ᠤ᠋ ᠴᠠᠭᠠᠨ ᠬᠠᠷᠠ ᠶ᠋ᠢᠨ ᠳᠡᠭᠡᠳᠦ ᠶ᠋ᠢᠨ ᠬᠡᠷᠡᠭᠯᠡᠯ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠭᠣᠷᠯᠣᠰ ᠲᠠᠢᠰᠢ ᠶ᠋ᠢᠨ ᠴᠢᠨ ᠸᠠᠩ᠂ ᠳᠠᠴᠢᠩᠬᠤᠷᠯᠤ᠂ ᠢᠯᠠᠭᠤᠭᠰᠠᠨ᠂ ᠳ᠋ᠠᠳᠠᠳᠤᠩᠭᠠ ᠭᠤᠷᠪᠠᠨ ᠡᠷᠭᠢᠨ ᠰᠠᠢᠳ ᠢ᠋ ᠠᠪᠴᠤ ᠳᠠᠭᠠᠭᠠᠳ ᠬᠣᠢᠨᠠ ᠶᠠᠪᠤᠬᠤ ᠪᠠᠷ ᠲᠣᠭᠲᠠᠭᠠᠵᠤ᠂ ᠬᠡᠩᠭᠡᠷᠭᠡ ᠪᠢᠰᠬᠢᠭᠦᠷ ᠳᠠᠭᠤᠷᠢᠰᠴᠤ ᠬᠠᠭᠠᠨ ᠤ᠋ ᠵᠢᠭᠰᠠᠭᠠᠯ ᠪᠦᠷᠢᠳᠦᠭᠰᠡᠨ ᠬᠣᠢᠨᠠ᠂ ᠵᠢᠨᠦᠩ ᠲᠠᠢᠹᠦ᠋ ᠮᠤᠬᠤᠯᠢ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠪᠡᠯᠡᠨ ᠪᠣᠯᠤᠭᠰᠠᠨ ᠨᠤᠭᠤᠯᠪᠤᠷᠢ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ᠂ ᠬᠠᠭᠠᠨ ᠤ᠋ ᠭᠡᠭᠡᠨ ᠰᠢᠶᠠ ᠤᠯᠤᠰ ᠲᠤᠷ ᠮᠣᠷᠳᠠᠬᠤ ᠳᠥᠷᠪᠡᠨ ᠠᠩᠭᠢ ᠶ᠋ᠢ ᠢᠯᠭᠠᠨ ᠰᠠᠯᠭᠠᠨ᠂ ᠬᠥᠮᠦᠨ ᠢ᠋ ᠲᠡᠩᠴᠡᠭᠦᠯᠦᠨ ᠬᠡᠷᠡᠭᠯᠡᠭᠰᠡᠨ ᠢᠨᠦ ᠮᠠᠰᠢ ᠨᠡᠢᠴᠡᠭᠰᠡᠨ ᠳ᠋ᠦ᠍ᠷ ᠬᠢᠨᠠᠨ ᠠᠢᠯᠠᠳᠴᠤ ᠯᠤᠤ ᠶ᠋ᠢᠨ ᠴᠢᠷᠠᠢ ᠳ᠋ᠤᠷ ᠪᠠᠶᠠᠷ ᠤ᠋ᠨ ᠪᠠᠢᠳᠠᠯ ᠢᠯᠡᠷᠡᠨ :《ᠤᠯᠤᠰ ᠢ᠋ ᠰᠠᠬᠢᠬᠤ ᠲᠠᠪᠤᠨ ᠥᠲᠡᠭᠦᠰ᠂ ᠳᠥᠷᠪᠡᠨ ᠲᠠᠢᠰᠢ᠂ ᠬᠣᠶᠠᠷ ᠲᠠᠢᠽᠢ᠂ ᠨᠢᠭᠡᠨ ᠹᠦ ᠮᠠ᠋᠂ ᠳᠥᠷᠪᠡᠨ ᠲᠠᠢᠪᠤᠤ᠂ ᠪᠠᠭᠠ ᠵᠠᠩᠵᠤᠨ ᠨᠠᠷ ᠠᠷᠪᠠᠨ ᠬᠣᠶᠠᠷ ᠢ᠋ ᠮᠥᠨ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠬᠦᠷᠢᠶᠡ ᠪᠠᠭᠤᠯᠭᠠᠨ ᠰᠡᠷᠭᠡᠢᠯᠡᠬᠦ ᠬᠡᠷᠡᠭ ᠲᠦ᠍ᠷ ᠮᠠᠰᠢ ᠨᠡᠢᠴᠡᠵᠦᠬᠦᠢ᠃ ᠨᠡᠩ ᠪᠠᠰᠠ ᠬᠡᠷᠡᠢᠳ ᠨᠠᠢ᠍ᠮᠠᠨ ᠬᠣᠶᠠᠷ ᠢ᠋ ᠡᠵᠡᠯᠡᠭᠦᠯᠦᠨ ᠵᠠᠬᠢᠷᠤᠭᠤᠯᠵᠤ ᠬᠢᠵᠠᠭᠠᠷ ᠤ᠋ᠨ ᠭᠠᠳᠠᠨᠠ ᠴᠠᠭᠳᠠᠭᠤᠯ ᠪᠣᠯᠭᠠᠭᠰᠠᠨ ᠠᠨᠤ ᠮᠢᠨᠦ ᠰᠠᠨᠠᠭᠠᠨ ᠳ᠋ᠤᠷ ᠠᠳᠠᠪᠠᠰᠢ ᠨᠡᠢᠴᠡᠪᠡ ! 》ᠭᠡᠮᠡᠨ ᠰᠠᠢᠰᠢᠶᠠᠭᠠᠳ ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ ᠮᠣᠷᠳᠠᠮᠤᠢ ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠲᠣᠭᠲᠠᠭᠠᠳ ᠳᠠᠷᠤᠢ ᠰᠢᠷᠠ ᠰᠢᠬᠦᠷ ᠬᠥᠳᠡᠯᠵᠦ ᠴᠠᠭᠠᠨ ᠲᠤᠭ ᠢ᠋ ᠵᠠᠯᠠᠨ ᠭᠠᠷᠭᠠᠵᠤ᠂ ᠬᠠᠭᠠᠨ ᠤ᠋ ᠭᠡᠭᠡᠨ ᠪᠡᠶᠡ ᠪᠡᠷ ᠠᠷᠢᠬᠢ ᠰᠠᠴᠤᠨ ᠪᠡᠯᠭᠡᠳᠡᠨ ᠳᠠᠬᠢᠭᠠᠳ ᠠᠯᠲᠠᠨ ᠬᠠᠰ ᠬᠠᠷᠴᠢᠭᠢᠨᠠᠨ ᠬᠡᠩᠭᠡᠷᠭᠡ ᠪᠢᠰᠬᠢᠭᠦᠷ ᠳᠠᠭᠤᠷᠢᠰᠴᠤ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠤᠷᠪᠠᠨᠲᠠ ᠲᠦᠷᠭᠢᠯᠦᠮᠡᠭᠴᠡ ᠠᠷᠪᠠᠨ ᠲᠦᠮᠡᠨ ᠶᠡᠬᠡ ᠴᠡᠷᠢᠭ ᠪᠠᠷᠠᠭᠤᠨ ᠡᠮᠦᠨᠡ ᠵᠦᠭ ᠠᠭᠤᠯᠠ ᠳᠠᠯᠠᠢ ᠨᠡᠭᠦᠬᠦ ᠮᠡᠲᠦ ᠰᠢᠶᠠ ᠤᠯᠤᠰ ᠤ᠋ᠨ ᠵᠦᠭ ᠳᠠᠢᠯᠠᠷᠠ ᠮᠣᠷᠳᠠᠪᠠ᠃
ᠲᠡᠨᠳᠡᠴᠡ ᠪᠤᠭᠤᠷᠵᠢ ᠴᠢᠯᠠᠭᠤ ᠨᠠᠷ ᠤ᠋ᠨ ᠬᠣᠰᠢᠭᠤᠴᠢ ᠴᠡᠷᠢᠭ᠂ ᠯᠢ ᠴᠢᠯᠢ᠂ ᠯᠦᠸᠧ ᠽᠢ ᠴᠧᠩ ᠡᠨᠡ ᠬᠣᠶᠠᠷ ᠭᠠᠵᠠᠷ ᠲᠤᠷ ᠬᠦᠷᠲᠡᠯᠡ ᠰᠢᠶᠠ ᠤᠯᠤᠰ ᠤ᠋ᠨ ᠯᠢ ᠶᠦᠩ ᠶᠤᠸᠠᠨᠱᠤᠸᠠᠢ ᠪᠣᠯᠵᠤ᠂ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠬᠡᠳᠦᠢᠨᠡᠢ ᠢᠷᠡᠵᠦ ᠡᠨᠡ ᠬᠣᠶᠠᠷ ᠭᠠᠵᠠᠷ ᠢ᠋ ᠬᠠᠭᠠᠵᠤ ᠬᠡᠳᠦ ᠬᠡᠳᠦᠨ ᠬᠣᠨᠣᠭᠰᠠᠨ ᠳ᠋ᠤᠷ᠂ ᠡᠨᠡ ᠬᠣᠶᠠᠷ ᠭᠠᠵᠠᠷ ᠦᠬᠦᠨ ᠲᠤᠯᠪᠠᠴᠤ ᠬᠦᠴᠦᠨ ᠬᠦᠷᠬᠦ ᠦᠭᠡᠢ ᠬᠠᠷᠠᠬᠠᠨ ᠰᠢᠬᠠᠮᠳᠠᠨ ᠳᠠᠭᠠᠬᠤ ᠠᠨᠤ ᠥᠷᠯᠥᠭᠡ ᠦᠳᠡᠰᠢ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠳ᠋ᠦ᠍ᠷ ᠪᠤᠭᠤᠷᠵᠢ᠂ ᠴᠢᠯᠠᠭᠤ ᠬᠣᠶᠠᠭᠤᠯᠠ ᠴᠡᠷᠢᠭ ᠢ᠋ ᠬᠣᠶᠠᠷ ᠠᠩᠭᠢ ᠬᠠᠭᠠᠰᠯᠠᠵᠤ ᠴᠢᠯᠠᠭᠤ ᠯᠢ ᠴᠢᠯᠢ ᠬᠣᠷᠣᠭᠠ ᠶ᠋ᠢ ᠬᠠᠭᠠᠭᠰᠠᠨ ᠴᠡᠷᠢᠭ ᠢ᠋ ᠰᠥᠨᠢ ᠳᠦᠯᠢᠨ ᠬᠦᠷᠢᠶᠡ ᠶ᠋ᠢ ᠳᠠᠷᠤᠨ ᠣᠷᠣᠭᠰᠠᠨ ᠳ᠋ᠤᠷ ᠳᠣᠲᠣᠷᠠ ᠠ᠋ᠴᠠ ᠮᠣᠩᠭᠣᠯ ᠤ᠋ᠨ ᠵᠠᠩᠵᠤᠨ ᠳ᠋ᠦᠩ ᠵᠢᠶᠦ᠋ᠨ ᠲᠤᠰᠠᠯᠠᠬᠤ ᠴᠡᠷᠢᠭ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠡᠳ ᠳᠣᠲᠣᠷᠠ ᠠ᠋ᠴᠠ ᠮᠥᠨ ᠫᠤᠤ ᠲᠠᠯᠪᠢᠨ ᠠᠯᠠᠨ ᠭᠠᠷᠤᠭᠰᠠᠨ ᠳ᠋ᠤᠷ ᠰᠢᠶᠠ ᠤᠯᠤᠰ ᠤ᠋ᠨ ᠴᠡᠷᠢᠭ ᠭᠠᠭᠴᠠ ᠲᠤᠰᠠᠯᠠᠷᠠ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠨ ᠵᠦᠭ ᠳᠠᠢᠯᠠᠵᠤ ᠳᠣᠲᠣᠷᠠ ᠠ᠋ᠴᠠ ᠭᠠᠷᠤᠭᠰᠠᠨ ᠢ᠋ ᠡᠰᠡ ᠰᠡᠷᠭᠡᠢᠯᠡᠭᠰᠡᠨ ᠢ᠋ᠶ᠋ᠡᠷ ᠰᠢᠶᠠ ᠤᠯᠤᠰ ᠤ᠋ᠨ ᠴᠡᠷᠢᠭ ᠠᠷᠤ ᠠ᠋ᠴᠠ ᠰᠠᠮᠠᠭᠤᠷᠠᠨ ᠡᠭᠦᠰᠬᠡᠭᠰᠡᠨᠡ ᠴᠢᠯᠠᠭᠤ ᠭᠡᠨᠡᠳᠲᠡ ᠴᠡᠷᠢᠭ ᠢ᠋ ᠬᠤᠷᠢᠶᠠᠭᠰᠠᠨ ᠳ᠋ᠤᠷ ᠰᠢᠶᠠ ᠤᠯᠤᠰ ᠤ᠋ᠨ ᠴᠡᠷᠢᠭ ᠵᠠᠮ ᠣᠯᠵᠤ ᠰᠠᠶᠢ ᠳᠤᠲᠠᠭᠠᠵᠤ ᠰᠢᠪᠲᠤᠯᠤᠨ ᠭᠠᠷᠤᠭᠠᠳ ᠲᠠᠪᠤᠨ ᠭᠠᠵᠠᠷ ᠶᠠᠪᠤᠭᠰᠠᠨ ᠦᠭᠡᠢ᠂ ᠴᠢᠯᠠᠭᠤ ᠶ᠋ᠢᠨ ᠰᠥᠨᠢ ᠡᠷᠦᠭᠦᠯᠦᠭᠰᠡᠨ ᠤᠨᠠᠭᠤᠯᠢ ᠨᠤᠭᠤᠳ ᠲᠤᠷ ᠰᠢᠶᠠ ᠤᠯᠤᠰ ᠤ᠋ᠨ ᠵᠠᠩᠵᠤᠨ ᠴᠡᠷᠢᠭ ᠬᠥᠮᠦᠨ ᠮᠣᠷᠢᠲᠠᠢ ᠪᠠᠨ ᠳᠦᠭᠦᠷᠲᠡᠯᠡ ᠡᠤᠨᠠᠭᠰᠠᠨ ᠳ᠋ᠤᠷ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠠᠮᠲᠤ ᠨᠡᠢᠯᠡᠵᠦ ᠳᠠᠷᠤᠨ ᠣᠷᠣᠵᠤ ᠲᠤᠭ ᠬᠢᠭᠢᠷᠢ ᠵᠠᠷ ᠵᠡᠪᠰᠡᠭ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠡᠭᠡᠯ ᠬᠠᠵᠠᠭᠠᠷ ᠣᠯᠵᠠᠯᠠᠭᠰᠠᠨ ᠠᠨᠤ ᠨᠠᠢ᠍ᠮᠠᠨ ᠵᠠᠭᠤᠨ ᠢᠯᠡᠭᠦᠦ ᠲᠡᠷᠭᠡ ᠪᠣᠯᠵᠤ᠂ ᠰᠢᠶᠠ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠠᠷᠠᠬᠠᠨ ᠳᠤᠲᠠᠭᠠᠬᠤᠢ ᠳ᠋ᠤᠷ ᠪᠤᠭᠤᠷᠵᠢ ᠶ᠋ᠢᠨ ᠪᠠᠢᠯᠳᠤᠬᠤ ᠴᠢᠷᠢᠭ ᠲᠣᠷ ᠤᠴᠠᠷᠠᠵᠤ᠂ ᠨᠢᠭᠡᠨᠲᠡ ᠭᠠᠷᠴᠤ ᠳᠡᠢᠯᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠴᠥᠮ ᠰᠥᠭᠥᠳᠴᠦ ᠳᠠᠭᠠᠪᠠ᠃ ᠲᠡᠳᠦᠢ ᠪᠤᠭᠤᠷᠵᠢ᠂ ᠴᠢᠯᠠᠭᠤ ᠨᠠᠷ ᠡᠳᠡᠭᠡᠷ ᠢ᠋ ᠵᠠᠷᠤᠨ ᠰᠢᠶᠠ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠡᠪᠡᠯ ᠬᠤᠪᠴᠠᠰᠤᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠲᠤᠭ ᠬᠢᠭᠢᠷᠢ ᠮᠣᠷᠢ ᠵᠡᠪᠰᠡᠭ ᠢ᠋ ᠥᠪᠡᠷ ᠦ᠋ᠨ ᠴᠡᠷᠢᠭ ᠲᠦ᠍ᠷ ᠬᠠᠯᠠᠨ ᠥᠭᠴᠦ ᠯᠦᠸᠧ ᠽᠢ ᠴᠧᠩ ᠬᠣᠲᠠ ᠶ᠋ᠢᠨ ᠵᠦᠭ ᠡᠴᠢᠬᠦᠶᠡ ᠵᠠᠮ ᠳ᠋ᠤᠷ ᠯᠦᠸᠧ ᠽᠢ ᠴᠧᠩ ᠬᠣᠲᠠᠨ ᠢ᠋ ᠰᠠᠬᠢᠭᠰᠠᠨ᠂ ᠯᠢᠦ ᠶᠦᠩ ᠯᠦ᠍᠂ ᠯᠢᠦ ᠹᠦ ᠬᠣᠶᠠᠭᠤᠯᠠ ᠬᠣᠲᠠ ᠪᠠᠨ ᠠᠪᠲᠠᠭᠠᠳ ᠭᠤᠷᠪᠠᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠤᠴᠠᠷᠠᠭᠰᠠᠨ ᠳ᠋ᠤ᠌ ᠪᠤᠭᠤᠷᠵᠢ ᠤᠴᠢᠷ ᠢ᠋ ᠮᠡᠳᠡᠵᠦ ᠳᠠᠷᠤᠢ ᠲᠡᠭᠦᠨ ᠦ᠌ ᠪᠡᠶᠡ ᠳ᠋ᠦ᠍ᠷ ᠰᠢᠶᠠ ᠤᠯᠤᠰ ᠤ᠋ᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠶ᠋ᠢ ᠬᠠᠯᠠᠨ ᠡᠮᠦᠰᠬᠡᠵᠦ᠂ ᠬᠣᠶᠠᠷ ᠲᠦᠮᠡᠨ ᠴᠢᠷᠢᠭ ᠢ᠋ ᠭᠤᠷᠪᠠᠨ ᠠᠩᠭᠢ ᠬᠤᠪᠢᠶᠠᠵᠤ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠰᠢᠶᠠ ᠤᠯᠤᠰ ᠤ᠋ᠨ ᠳᠠᠷᠤᠭᠳᠠᠭᠰᠠᠨ ᠴᠡᠷᠢᠭ ᠪᠣᠯᠭᠠᠨ ᠰᠥᠨᠢ ᠳᠦᠯᠢᠨ ᠯᠦᠸᠧ ᠽᠢ ᠴᠧᠩ ᠬᠣᠲᠠ ᠶ᠋ᠢᠨ ᠡᠮᠦᠨᠡ ᠬᠠᠭᠠᠯᠭᠠ᠂ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠬᠠᠭᠠᠯᠭᠠ ᠡᠨᠡ ᠭᠤᠷᠪᠠᠨ ᠬᠠᠭᠠᠯᠭᠠ ᠳ᠋ᠤᠷ ᠡᠴᠢᠵᠦ᠂ ᠪᠤᠭᠤᠷᠵᠢ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠳᠠᠷᠤᠭᠳᠠᠵᠤ ᠢᠷᠡᠪᠡ ᠭᠡᠮᠡᠨ ᠬᠠᠰᠬᠢᠷᠤᠭᠰᠠᠨ ᠳ᠋ᠤᠷ ᠰᠢᠶᠠ ᠤᠯᠤᠰ ᠤ᠋ᠨ ᠯᠢ ᠴᠢᠯᠢ ᠬᠣᠷᠣᠭᠠ ᠶ᠋ᠢ ᠠᠪᠬᠤ ᠰᠢᠬᠠᠲᠠᠯᠠ ᠮᠣᠩᠭᠣᠯ ᠤ᠋ᠨ ᠲᠠᠢᠹᠦ᠋ ᠪᠤᠭᠤᠷᠵᠢ᠂ ᠲᠠᠢᠹᠦ᠋ ᠴᠢᠯᠠᠭᠤ ᠨᠠᠷ ᠢᠷᠡᠵᠦ ᠮᠠᠨ ᠤ᠋ ᠴᠡᠷᠢᠭ ᠳᠠᠷᠤᠭᠳᠠᠪᠠ ᠭᠡᠮᠡᠨ ᠮᠡᠳᠡᠭᠦᠯᠵᠦ᠂ ᠳᠠᠭᠠᠯᠳᠤᠭᠠ ᠪᠠᠷ ᠬᠣᠲᠠᠨ ᠤ᠋ ᠬᠠᠭᠠᠯᠭᠠ ᠪᠦᠷᠢ ᠳ᠋ᠦ᠍ ᠰᠢᠶᠠ ᠤᠯᠤᠰ ᠤ᠋ᠨ ᠳᠠᠷᠤᠭᠳᠠᠨ ᠪᠤᠳᠠᠷᠠᠯᠳᠤᠭᠰᠠᠨ ᠴᠡᠷᠢᠭ ᠬᠠᠷᠢᠵᠤ ᠢᠷᠡᠪᠡ᠃ ᠬᠣᠢᠨᠠ ᠠ᠋ᠴᠠ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠬᠥᠭᠡᠭᠡᠬᠦ ᠢᠨᠦ ᠮᠠᠰᠢ ᠰᠢᠬᠠᠮ ᠭᠡᠮᠡᠨ ᠤᠯᠠᠮᠵᠢᠯᠠᠨ ᠮᠡᠳᠡᠭᠦᠯᠦᠭᠰᠡᠨᠡ᠂ ᠯᠢ ᠶᠦᠩ ᠥᠭᠦᠯᠡᠷᠦᠨ:《ᠬᠡᠳᠦᠢ ᠲᠡᠢᠨ ᠪᠣᠯᠪᠠᠴᠤ ᠣᠨᠴᠠ ᠵᠤᠯᠠ ᠡᠷᠭᠦᠵᠦ ᠰᠢᠲᠠᠭᠠᠨ ᠦᠵᠡᠵᠦ ᠰᠠᠶᠢ ᠤᠷᠤᠭᠤᠯ᠂ ᠯᠢ ᠴᠢᠯᠢ ᠬᠣᠷᠣᠭᠠ ᠳ᠋ᠤᠷ ᠪᠠᠢᠯᠳᠤᠷᠠ ᠡᠴᠢᠭᠰᠡᠨ ᠵᠧᠦ ᠴᠢᠨ ᠦ᠌ ᠲᠡᠮᠳᠡᠭ ᠵᠡᠪᠡ ᠬᠡᠷᠬᠢᠪᠡ ? 》ᠭᠡᠮᠡᠨ ᠬᠠᠰᠬᠢᠷᠲᠠᠯᠠ ᠭᠠᠳᠠᠨᠠ ᠬᠣᠲᠠ ᠰᠠᠬᠢᠭᠰᠠᠨ ᠴᠡᠷᠢᠭ ᠦ᠋ᠳ ᠵᠧᠦ ᠴᠢᠨ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤᠷ ᠣᠯᠠᠨ ᠴᠡᠷᠢᠭ ᠥᠭᠦᠯᠡᠷᠦᠨ :《ᠮᠠᠨ ᠤ᠋ ᠳᠡᠭᠡᠳᠦ ᠵᠠᠩᠵᠤᠨ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠨᠦᠬᠡᠨ ᠳ᠋ᠦ᠍ ᠤᠨᠠᠵᠤ ᠦᠬᠦᠪᠡ᠃ ᠲᠡᠮᠳᠡᠭ ᠵᠡᠪᠡ ᠶ᠋ᠢ ᠪᠢᠳᠡ ᠠᠪᠴᠤ ᠢᠷᠡᠪᠡ 》ᠭᠡᠮᠡᠨ ᠳᠡᠭᠡᠰᠦᠨ ᠳ᠋ᠦ᠍ᠷ ᠤᠶᠠᠵᠤ ᠣᠷᠣᠭᠤᠯᠤᠭᠰᠠᠨ ᠢ᠋ ᠯᠢ ᠶᠦᠩ ᠠᠰᠠᠷ ᠲᠤᠷ ᠠᠪᠠᠷᠢᠵᠤ ᠦᠵᠡᠬᠦᠯᠡ ᠦᠨᠡᠬᠡᠷ ᠥᠪᠡᠷ ᠦ᠋ᠨ ᠴᠡᠷᠢᠭ ᠮᠥᠨ ᠲᠤᠯᠠ ᠶᠠᠭᠠᠷᠠᠨ ᠬᠠᠭᠠᠯᠭᠠ ᠨᠡᠭᠡᠭᠡᠵᠦ ᠣᠷᠣᠭᠤᠯᠪᠠ᠃ ᠣᠯᠠᠨ ᠴᠡᠷᠢᠭ ᠬᠠᠭᠠᠯᠭᠠ ᠨᠡᠭᠡᠭᠡᠮᠡᠭᠴᠡ ᠲᠡᠮᠡᠴᠡᠯᠳᠦᠨ ᠣᠷᠣᠵᠤ᠂ ᠰᠣᠨᠣᠰᠪᠠᠴᠤ ᠮᠣᠩᠭᠣᠯ ᠤ᠋ᠨ ᠨᠡᠬᠡᠬᠦ ᠴᠡᠷᠢᠭ ᠦ᠋ᠨ ᠬᠠᠰᠬᠢᠷᠤᠯᠳᠤᠬᠤ ᠳᠠᠭᠤᠨ ᠰᠣᠨᠣᠰᠳᠠᠬᠤᠢ ᠳ᠋ᠤᠷ ᠰᠢᠨᠡ ᠳᠤᠲᠠᠭᠠᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠢ᠋ ᠬᠤᠪᠢᠶᠠᠵᠤ ᠬᠣᠲᠠ ᠪᠠᠨ ᠰᠠᠬᠢᠭᠤᠯᠰᠤᠭᠠᠢ ᠭᠡᠮᠡᠨ ᠵᠠᠬᠢᠶᠠ ᠵᠠᠷᠯᠠᠲᠠᠯᠠ ᠭᠡᠨᠡᠳᠲᠡ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠠᠷᠴᠤ ᠬᠣᠲᠠ ᠳ᠋ᠤ᠌ ᠣᠷᠣᠭᠰᠠᠨ ᠴᠡᠷᠢᠭ ᠯᠢ ᠶᠦᠩ ᠦ᠋ᠨ ᠴᠡᠷᠢᠭ ᠢ᠋ ᠠᠯᠠᠨ ᠡᠭᠦᠰᠬᠡᠵᠦ᠂ ᠪᠤᠭᠤᠷᠵᠢ᠂ ᠳᠠᠷᠤᠢ ᠯᠢᠦ ᠶᠦᠩ ᠯᠦ᠍᠂ ᠯᠢᠦ ᠹᠦ ᠬᠣᠶᠠᠭᠤᠯᠠ ᠶ᠋ᠢ ᠡᠮᠦᠨᠡ ᠠᠰᠠᠷ ᠲᠤᠷ ᠠᠪᠠᠷᠢᠭᠤᠯᠵᠤ ᠠᠯᠠᠨ ᠭᠠᠷᠤᠭᠰᠠᠨᠠ᠂ ᠯᠢ ᠶᠦᠩ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠶᠡᠬᠡᠯᠡ ᠰᠡᠵᠢᠭᠯᠡᠨ ᠰᠠᠶᠢ ᠠᠰᠠᠷ ᠠ᠋ᠴᠠ ᠪᠠᠭᠤᠵᠤ ᠬᠢᠨᠠᠨ ᠦᠵᠡᠰᠦᠭᠡᠢ ᠬᠡᠮᠡᠵᠦ ᠠᠰᠠᠷ ᠤ᠋ᠨ ᠳᠡᠭᠲᠡᠷ ᠤᠷᠤᠭᠤ ᠶᠠᠪᠤᠬᠤᠶᠠ᠂ ᠴᠢᠪᠬᠢᠲᠡᠯᠡ ᠪᠤᠭᠤᠷᠵᠢ᠂ ᠯᠢᠦ ᠶᠦᠩ ᠯᠦ᠍᠂ ᠯᠢᠦ ᠹᠦ ᠲᠠᠨ ᠳ᠋ᠤᠷ ᠤᠴᠠᠷᠠᠵᠤ ᠯᠢ ᠶᠦᠩ ᠨᠠᠷ ᠢ᠋ ᠴᠠᠪᠴᠢᠨ ᠠᠯᠠᠭᠠᠳ ᠵᠢᠴᠢ ᠳᠠᠭᠠᠭᠰᠠᠨ ᠴᠡᠷᠢᠭ ᠢ᠋ ᠠᠯᠠᠨ ᠰᠠᠷᠨᠢᠭᠤᠯᠵᠤ᠂ ᠮᠣᠩᠭᠣᠯ ᠴᠡᠷᠢᠭ ᠳᠠᠷᠤᠢ ᠬᠣᠲᠠ ᠶ᠋ᠢ ᠪᠦᠷᠢᠨ ᠢ᠋ᠶ᠋ᠡᠷ ᠪᠤᠯᠢᠶᠠᠨ ᠠᠪᠴᠤ ᠰᠠᠮᠠᠭᠤᠷᠠᠨ ᠠᠯᠠᠵᠤ ᠡᠭᠦᠰᠬᠡᠪᠡ᠃ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ᠂ ᠬᠤᠢᠯᠠᠳᠠᠷ ᠬᠣᠰᠢᠭᠤᠴᠢ ᠬᠣᠶᠠᠭᠤᠯᠠ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠬᠠᠭᠠᠯᠭᠠ ᠶ᠋ᠢ ᠰᠠᠬᠢᠵᠤ᠂ ᠬᠣᠲᠠᠨ ᠤ᠋ ᠳᠣᠲᠣᠷᠠ ᠪᠤᠯᠤ᠂ ᠡᠭᠦᠯᠡᠨ ᠴᠡᠷᠪᠢ᠂ ᠠᠨᠠᠨᠳᠠ᠂ ᠰᠤᠪᠤᠲᠠᠢ᠂ ᠬᠣᠪᠣᠯᠠᠢ᠂ ᠱᠣᠪᠤᠯᠠᠢ᠂ ᠨᠠᠨᠰᠠᠷ᠂ ᠰᠢᠯᠢᠶᠠᠮᠪᠤ ᠡᠨᠡ ᠨᠠᠢ᠍ᠮᠠᠨ ᠵᠠᠩᠵᠤᠨ ᠳᠥᠷᠪᠡᠨ ᠵᠦᠭ ᠬᠣᠶᠠᠷ ᠬᠣᠶᠠᠷ ᠢ᠋ᠶ᠋ᠠᠷ ᠣᠯᠠᠨ ᠴᠡᠷᠢᠭ ᠢ᠋ ᠲᠡᠷᠢᠭᠦᠯᠡᠨ᠂ ᠰᠢᠶᠠ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠠᠯᠠᠬᠤᠢ ᠳ᠋ᠤᠷ ᠡᠮᠦᠨᠡ ᠬᠠᠭᠠᠯᠭᠠ ᠳ᠋ᠤᠷ ᠰᠢᠶᠠ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠡᠵᠡᠨ ᠯᠢ ᠶᠦᠩ ᠨᠢᠭᠡᠨᠲᠡ ᠠᠯᠠᠭᠳᠠᠭᠰᠠᠨ ᠲᠤᠯᠠ ᠪᠤᠭᠤᠷᠵᠢ ᠴᠠᠭᠠᠵᠠ ᠵᠠᠷᠯᠠᠨ ᠳᠠᠭᠠᠭᠰᠠᠳ ᠢ᠋ ᠪᠢᠲᠡᠭᠡᠢ ᠠᠯᠠ ᠭᠡᠮᠡᠨ ᠲᠡᠭᠷᠢ ᠭᠡᠭᠡᠷᠡᠲᠡᠯᠡ ᠯᠦᠸᠧ ᠽᠢ ᠴᠧᠩ ᠬᠣᠲᠠ ᠶ᠋ᠢ ᠲᠣᠭᠲᠠᠭᠠᠨ ᠠᠪᠴᠤ ᠰᠢᠶᠠ ᠤᠯᠤᠰ ᠤ᠋ᠨ ᠳᠠᠭᠠᠭᠰᠠᠨ ᠴᠡᠷᠢᠭ ᠦ᠋ᠨ ᠬᠤᠶᠠᠭ ᠵᠡᠪᠰᠡᠭ ᠮᠣᠷᠢ ᠡᠮᠡᠭᠡᠯ ᠢ᠋ ᠬᠣᠷᠢᠶᠠᠨ ᠠᠪᠤᠭᠠᠳ ᠴᠢᠯᠠᠭᠤ ᠶ᠋ᠢ ᠤᠳᠤᠷᠢᠳᠤᠨ ᠬᠣᠲᠠᠨ ᠳ᠋ᠤᠷ ᠣᠷᠣᠭᠤᠯᠵᠤ᠂ ᠶᠠᠮᠤᠨ ᠳ᠋ᠤᠷ ᠰᠠᠭᠤᠭᠠᠳ ᠬᠣᠲᠠᠨ ᠢ᠋ ᠠᠯᠳᠠᠭᠰᠠᠨ ᠪᠣᠯᠪᠠᠴᠤ ᠡᠳᠦᠭᠡ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠭᠡᠳᠡᠷᠭᠦ ᠣᠯᠵᠤ᠂ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ ᠨᠠᠷᠢᠪᠴᠢᠯᠠᠨ ᠨᠤᠭᠤᠯᠪᠤᠷᠢ ᠪᠢᠴᠢᠵᠦ᠂ ᠯᠢᠦ ᠶᠦᠩ ᠯᠦ᠍᠂ ᠯᠢᠦ ᠹᠦ ᠨᠠᠷ ᠤ᠋ᠨ ᠶᠠᠯᠠ ᠶ᠋ᠢ ᠬᠡᠯᠲᠦᠷᠢᠭᠦᠯᠬᠦ ᠶ᠋ᠢ ᠭᠤᠶᠤᠵᠤ᠂ ᠪᠣᠳᠣᠷᠣᠣᠯ ᠪᠢᠴᠢᠭ ᠢ᠋ ᠪᠤᠯᠤ᠂ ᠡᠭᠦᠯᠡᠨ ᠴᠡᠷᠪᠢ ᠬᠣᠶᠠᠭᠤᠯᠠ ᠳ᠋ᠤᠷ ᠪᠠᠷᠢᠭᠤᠯᠵᠤ ᠯᠢᠦ ᠶᠦᠩ ᠯᠦ᠍᠂ ᠯᠢᠦ ᠹᠦ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠠᠭᠤᠯᠤᠨ ᠠᠪᠴᠤ ᠬᠠᠭᠠᠨ ᠤ᠋ ᠴᠡᠷᠢᠭ ᠢ᠋ ᠤᠭᠲᠤᠨ ᠠᠢᠯᠠᠳᠬᠠᠷᠠ ᠶᠠᠪᠤᠭᠤᠯᠪᠠ᠃
ᠲᠡᠳᠦᠢ ᠬᠠᠭᠠᠨ ᠤ᠋ ᠭᠡᠭᠡᠨ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠰᠢᠶᠠ ᠤᠯᠤᠰ ᠤ᠋ᠨ ᠵᠠᠬᠠ ᠣᠷᠣᠲᠠᠯᠠ ᠬᠣᠯᠠ ᠲᠤᠷᠰᠢᠭᠤᠯ ᠢᠷᠡᠵᠦ ᠯᠢ ᠴᠢᠯᠢ ᠬᠣᠷᠣᠭᠠ ᠠᠪᠲᠠᠬᠤ ᠰᠢᠬᠠᠭᠰᠠᠨ ᠢ᠋ ᠴᠡᠷᠢᠭ ᠰᠠᠯᠭᠠᠵᠤ ᠪᠠᠢᠯᠳᠤᠮᠤᠢ᠂ ᠪᠠᠰᠠ ᠯᠦᠸᠧ ᠽᠢ ᠴᠧᠩ ᠬᠣᠲᠠ ᠠᠪᠲᠠᠭᠰᠠᠨ ᠳ᠋ᠤᠷ ᠲᠠᠢᠹᠦ᠋ ᠪᠤᠭᠤᠷᠵᠢ ᠶ᠋ᠢᠨ ᠴᠡᠷᠢᠭ ᠪᠠᠢᠯᠳᠤᠷᠠ ᠡᠴᠢᠭᠰᠡᠨ ᠢ᠋ ᠠᠢᠯᠠᠳᠬᠠᠲᠠᠯᠠ ᠳᠠᠭᠠᠯᠳᠤᠭᠠ ᠪᠤᠯᠤ᠂ ᠡᠭᠦᠯᠡᠨ ᠴᠡᠷᠪᠢ ᠨᠠᠷ ᠬᠦᠷᠴᠦ ᠢᠷᠡᠵᠦ ᠪᠣᠳᠣᠷᠣᠣᠯ ᠪᠢᠴᠢᠭ ᠢ᠋ ᠡᠷᠭᠦᠨ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠬᠠᠭᠠᠨ ᠭᠡᠭᠡᠨ ᠶᠡᠬᠡᠯᠡ ᠪᠡᠶᠡᠰᠦᠨ᠂ ᠶᠠᠯᠠ ᠬᠦᠯᠢᠶᠡᠷᠡ ᠢᠷᠡᠭᠰᠡᠨ ᠯᠢᠦ ᠶᠦᠩ ᠯᠦ᠍᠂ ᠯᠢᠦ ᠹᠦ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠨ ᠤᠴᠠᠷᠠᠵᠤ᠂ ᠬᠦᠯᠢᠶᠡᠰᠦᠨ ᠢ᠋ ᠲᠠᠢᠯᠤᠭᠤᠯᠵᠤ ᠵᠠᠷᠯᠢᠭ ᠪᠣᠯᠤᠷᠤᠨ : 《ᠨᠢᠭᠡᠨ ᠲᠦᠮᠡᠨ ᠦᠯᠦ ᠬᠦᠷᠬᠦ ᠴᠡᠷᠢᠭ ᠢ᠋ᠶ᠋ᠡᠷ ᠲᠠᠪᠤᠨ ᠲᠦᠮᠡᠨ ᠢ᠋ ᠬᠡᠷᠬᠢᠨ ᠲᠤᠯᠬᠤ ? ᠲᠠᠨ ᠤ᠋ ᠪᠤᠷᠤᠭᠤ ᠪᠤᠰᠤ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠡᠰᠡ ᠬᠦᠷᠦᠭᠰᠡᠨ ᠦ᠌ ᠰᠢᠯᠲᠠᠭᠠᠨ ᠪᠣᠯᠠᠢ ! 》ᠭᠡᠮᠡᠨ ᠶᠠᠯᠠ ᠶ᠋ᠢ ᠬᠡᠯᠲᠦᠷᠢᠭᠦᠯᠵᠦ᠂ ᠲᠠᠢᠹᠦ᠋ ᠮᠤᠬᠤᠯᠢ ᠳ᠋ᠤᠷ ᠡᠨᠡ ᠬᠣᠶᠠᠷ ᠲᠦᠰᠢᠮᠡᠯ ᠢ᠋ ᠤᠭ ᠲᠤᠰᠢᠶᠠᠯ ᠴᠣᠯᠠ ᠳ᠋ᠤ᠌ ᠠᠬᠤᠭᠤᠯ ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃ ᠯᠢᠦ ᠶᠦᠩ ᠯᠦ᠍᠂ ᠯᠢᠦ ᠹᠦ ᠬᠣᠶᠠᠭᠤᠯᠠ ᠦᠬᠦᠲᠡᠯᠡ ᠰᠢᠲᠦᠵᠦ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠭᠠᠷᠪᠠ᠃
ᠲᠡᠨᠳᠡᠴᠡ ᠬᠠᠭᠠᠨ ᠤ᠋ ᠭᠡᠭᠡᠨ᠂ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠯᠢ ᠴᠢᠯᠢ ᠶ᠋ᠢ ᠳᠠᠭᠠᠷᠢᠨ ᠯᠦᠸᠧ ᠽᠢ ᠴᠧᠩ ᠬᠣᠲᠠᠨ ᠳ᠋ᠤ᠌ ᠬᠦᠷᠴᠦ ᠢᠷᠡᠬᠦᠶᠡ᠂ ᠵᠠᠮ ᠤ᠋ᠨ ᠭᠣᠳᠣᠰ ᠣᠯᠠᠨ ᠢᠷᠭᠡᠨ ᠦ᠌ ᠡᠭᠡᠭᠦᠯᠦᠨ ᠬᠠᠷᠢᠭᠤᠯᠤᠭᠰᠠᠨ ᠤᠷᠢᠳᠠ ᠶ᠋ᠢᠨ ᠬᠡᠰᠢᠭ ᠢ᠋ ᠰᠠᠨᠠᠵᠤ ᠬᠦᠵᠢᠰ ᠦ᠋ᠨ ᠰᠢᠷᠡᠭᠡ ᠪᠡᠯᠡᠳᠴᠦ ᠮᠥᠷᠭᠥᠨ ᠤᠭᠲᠤᠬᠤ ᠠᠨᠤ ᠵᠠᠮ ᠵᠡᠭᠡᠯᠢ ᠳ᠋ᠦ᠍ᠷ ᠳᠦᠭᠦᠷᠴᠦᠬᠦᠢ᠃ ᠨᠡᠢᠲᠡ ᠶ᠋ᠢ ᠣᠯᠠᠨ ᠴᠡᠷᠢᠭ ᠲᠦ᠍ᠷ ᠱᠠᠩᠨᠠᠭᠰᠠᠨ ᠳ᠋ᠤᠷ ᠪᠤᠳᠠᠭᠠ ᠪᠣᠭᠣᠷᠰᠣᠭ ᠮᠠᠯᠤ ᠳ᠋ᠤᠷ ᠴᠠᠢ ᠱᠥᠯᠥ ᠬᠦᠷᠭᠡᠵᠦ ᠢᠷᠡᠨ᠂ ᠴᠡᠷᠢᠭ ᠲᠦ᠍ᠷ ᠪᠠᠷᠢᠬᠤ ᠠᠨᠤ ᠮᠠᠰᠢ ᠣᠯᠠᠨ ᠳ᠋ᠤᠷ ᠬᠠᠭᠠᠨ ᠮᠤᠬᠤᠯᠢ ᠠ᠋ᠴᠠ ᠠᠰᠠᠭᠤᠷᠤᠨ :《ᠡᠨᠡ ᠢᠷᠭᠡᠳ ᠬᠠᠷᠢᠨ ᠠᠴᠢ ᠶ᠋ᠢ ᠲᠡᠮᠳᠡᠭᠯᠡᠬᠦ ᠠᠵᠤᠭᠤ! 》ᠬᠡᠮᠡᠪᠡ᠃
ᠲᠡᠳᠦᠢ ᠪᠤᠭᠤᠷᠵᠢ᠂ ᠴᠢᠯᠠᠭᠤ᠂ ᠰᠥᠪᠡᠭᠡᠲᠡᠢ᠂ ᠬᠣᠢᠯᠠᠳᠠᠷ᠂ ᠵᠠᠯᠠᠭᠤ ᠵᠠᠩᠵᠤᠨ ᠨᠠᠢ᠍ᠮᠠᠭᠤᠯᠠ ᠶ᠋ᠢ ᠠᠪᠴᠤ ᠬᠣᠲᠠ ᠠ᠋ᠴᠠ ᠭᠠᠷᠴᠤ ᠠᠷᠪᠠᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷ ᠲᠣᠰᠴᠤ ᠬᠠᠭᠠᠨ ᠢ᠋ ᠤᠭᠲᠤᠨ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠬᠠᠭᠠᠨ ᠤ᠋ ᠭᠡᠭᠡᠨ ᠪᠤᠭᠤᠷᠵᠢ᠂ ᠴᠢᠯᠠᠭᠤ ᠬᠣᠶᠠᠭᠤᠯᠠ ᠳ᠋ᠤᠷ ᠮᠣᠳᠣᠷ ᠢ᠋ᠶ᠋ᠠᠷ ᠠᠷᠢᠬᠢ ᠬᠠᠢᠷᠠᠯᠠᠨ ᠰᠠᠢᠰᠢᠶᠠᠨ ᠮᠠᠭᠲᠠᠵᠤ ᠬᠥᠬᠢᠭᠦᠯᠪᠡ᠃ ᠲᠡᠳᠦᠢ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ᠂ ᠵᠠᠩᠵᠤᠨ ᠴᠡᠷᠢᠭ ᠦ᠋ᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠶ᠋ᠢ ᠢᠯᠭᠠᠨ ᠰᠠᠯᠭᠠᠨ ᠱᠠᠩᠨᠠᠨ ᠬᠥᠬᠢᠭᠦᠯᠪᠡ᠃
ᠲᠡᠨᠳᠡᠴᠡ ᠰᠢᠶᠠ ᠤᠯᠤᠰ ᠤ᠋ᠨ ᠡᠵᠡᠨ ᠯᠢ ᠠᠨ ᠴᠢᠤᠸᠠᠨ᠂ ᠪᠠᠭᠠᠲᠤᠷ ᠦᠭᠡᠢ ᠪᠣᠯᠪᠠᠴᠤ ᠬᠥᠮᠦᠨ ᠢᠨᠤ ᠮᠠᠰᠢ ᠰᠡᠴᠡᠨ᠃ ᠭᠠᠭᠴᠠ ᠪᠡᠶᠡ ᠡᠴᠡ ᠬᠥᠪᠡᠭᠦᠨ ᠦᠭᠡᠢ ᠲᠤᠯᠠ ᠲᠥᠷᠥᠯ ᠦ᠋ᠨ ᠬᠥᠪᠡᠭᠦᠨ ᠰᠦᠨ ᠰᠢᠦᠢ ᠶ᠋ᠢ ᠠᠪᠴᠤ ᠦᠷᠡᠴᠢᠯᠡᠭᠡᠳ ᠰᠠᠭᠤᠷᠢᠨ ᠵᠠᠯᠭᠠᠮᠵᠢᠯᠠᠬᠤ ᠬᠥᠪᠡᠭᠦᠨ ᠪᠣᠯᠭᠠᠨ᠂ ᠣᠯᠠᠨ ᠰᠠᠢᠳ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠠᠪᠴᠤ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠢ᠋ ᠲᠤᠯᠬᠤ ᠶ᠋ᠢ ᠵᠥᠪᠯᠡᠵᠦ᠂ ᠯᠢ ᠶᠦᠩ ᠢ᠋ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠪᠣᠯᠭᠠᠨ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠬᠠᠭᠤᠴᠢᠨ ᠠᠯᠳᠠᠭᠰᠠᠨ ᠬᠣᠷᠣᠭᠠ ᠬᠣᠲᠠ ᠶ᠋ᠢ ᠪᠤᠯᠢᠶᠠᠨ ᠠᠪᠴᠤ ᠲᠡᠨᠳᠡ ᠴᠡᠷᠢᠭ ᠰᠤᠷᠭᠠᠨ ᠮᠣᠩᠭᠣᠯ ᠢ᠋ ᠰᠡᠷᠭᠡᠢᠯᠡᠰᠦᠭᠡᠢ ᠬᠡᠮᠡᠲᠡᠯᠡ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠰᠠ ᠲᠣᠬᠢᠶᠠᠯ ᠪᠣᠯᠤᠨ ᠮᠣᠩᠭᠣᠯ ᠤ᠋ᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠡᠶᠡ ᠪᠡᠷ ᠰᠢᠶᠠ ᠤᠯᠤᠰ ᠢ᠋ ᠳᠠᠢᠯᠠᠷᠠ ᠢᠷᠡᠬᠦ ᠬᠣᠰᠢᠭᠤᠴᠢ ᠲᠠᠢᠹᠦ᠋ ᠪᠤᠭᠤᠷᠵᠢ᠂ ᠲᠠᠢᠪᠤᠤ ᠴᠢᠯᠠᠭᠤ ᠨᠠᠷ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠵᠤ ᠶᠡᠬᠡᠳᠡ ᠳᠠᠷᠤᠭᠳᠠᠨ ᠬᠠᠭᠠᠰ ᠬᠤᠶᠠᠭ ᠡᠭᠡᠭᠰᠡᠨ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ᠷ ᠯᠢ ᠠᠨ ᠴᠢᠣᠸᠠᠨ ᠶᠡᠬᠡᠯᠡ ᠭᠡᠯᠮᠡᠵᠦ ᠶᠠᠭᠠᠷᠠᠨ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠭᠤᠯᠵᠤ᠂ ᠵᠠᠭᠤᠨ ᠲᠦᠰᠢᠮᠡᠳ ᠢ᠋ ᠬᠤᠷᠠᠭᠠᠨ᠂ ᠮᠣᠩᠭᠣᠯ ᠢ᠋ ᠲᠤᠯᠬᠤᠢ ᠶ᠋ᠢ ᠵᠥᠪᠳᠡᠬᠦᠢ ᠳ᠋ᠦ᠍ᠷ ᠲᠥᠷᠥ ᠶ᠋ᠢᠨ ᠲᠡᠷᠢᠭᠦᠯᠡᠭᠰᠡᠨ ᠳᠥᠷᠪᠡᠨ ᠰᠠᠢᠳ ᠭᠣᠣ ᠯᠢᠩ ᠬᠦᠩ᠂ ᠸᠧᠢ ᠮᠢᠩ ᠯᠢᠩ ᠬᠦᠩ᠂ ᠵᠢᠴᠢ ᠲᠠᠢᠹᠦ᠋ ᠲᠦᠰᠢᠮᠡᠯ ᠱᠢᠪᠢᠱᠢ᠂ ᠯᠢᠦ ᠪᠦᠸᠧ ᠯᠢᠨ ᠳᠥᠷᠪᠡᠭᠦᠯᠡ ᠯᠦ᠍ᠭᠡ ᠵᠥᠪᠯᠡᠵᠦ ᠥᠭᠦᠯᠡᠷᠦᠨ :《ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠠᠰᠤᠷᠤ ᠴᠢᠭᠢᠷᠠᠭ ᠪᠥᠭᠡᠳ ᠪᠠᠭᠠᠲᠤᠷ᠂ ᠡᠳᠦᠭᠡ ᠰᠠᠨᠠᠮᠰᠠᠷ ᠦᠭᠡᠢ ᠶᠠᠯᠠ ᠠᠰᠠᠭᠤᠨ ᠦᠰ ᠠᠪᠤᠷᠠ ᠢᠷᠡᠪᠡ᠃ ᠪᠢᠳᠡ ᠬᠡᠳᠦᠢ ᠬᠠᠭᠤᠴᠢᠨ ᠤᠯᠤᠰ ᠪᠣᠯᠪᠠᠴᠤ ᠴᠡᠷᠢᠭ ᠢᠷᠭᠡᠨ ᠨᠢᠭᠡᠨᠲᠡ ᠴᠠᠯᠠᠭᠠᠢ ᠪᠣᠯᠵᠤᠬᠤᠢ᠃ ᠣᠳᠣ ᠬᠡᠷᠬᠢᠨ ᠲᠤᠯᠪᠠᠰᠤ ᠵᠣᠬᠢᠮᠤᠢ?》ᠸᠧᠢ ᠮᠢᠩ ᠯᠢᠩ ᠬᠦᠩ ᠥᠭᠦᠯᠡᠷᠦᠨ :《ᠲᠡᠷᠡ ᠨᠢᠭᠡᠨ ᠭᠠᠳᠠᠭᠠᠳᠤ ᠪᠣᠯᠬᠢ ᠪᠢᠲᠡᠭᠦᠯᠢᠭ ᠵᠡᠷᠯᠢᠭ ᠤᠯᠤᠰ ᠬᠡᠳᠦᠢ ᠪᠠᠬᠠᠨ ᠰᠢᠨᠡᠬᠡᠨ ᠪᠠᠢᠭᠤᠯᠤᠭᠰᠠᠨ ᠣᠮᠣᠭ ᠬᠦᠴᠦᠨ ᠪᠠᠢᠪᠠᠴᠤ ᠪᠢᠳᠡ ᠠᠷᠭᠠ ᠬᠡᠷᠡᠭᠯᠡᠨ ᠪᠠᠷᠢᠪᠠᠰᠤ ᠨᠢᠭᠡᠨ ᠤᠳᠠᠭᠠ ᠳ᠋ᠤᠷ ᠳᠠᠷᠤᠢ ᠵᠢᠷᠦᠬᠡ ᠬᠡᠮᠬᠡᠷᠡᠲᠡᠯᠡ ᠠᠶᠤᠬᠤ ᠪᠣᠯᠠᠢ ! 》 ᠬᠡᠮᠡᠲᠡᠯᠡ ᠭᠣᠣ ᠯᠢᠩ ᠬᠦᠩ ᠬᠠᠵᠠᠭᠤ ᠠ᠋ᠴᠠ ᠲᠣᠰᠴᠤ ᠢᠨᠢᠶᠡᠨ ᠥᠭᠦᠯᠡᠷᠦᠨ :《ᠡᠷᠭᠢᠨ ᠠᠬᠠ ᠶ᠋ᠢᠨ ᠡᠨᠡ ᠦᠭᠡ ᠴᠢᠪᠬᠢᠲᠡᠯᠡ ᠮᠢᠨᠦ ᠰᠠᠨᠠᠭᠠᠨ ᠳ᠋ᠤ᠌ ᠨᠡᠢᠴᠡᠪᠡ᠃ ᠡᠨᠡ ᠬᠡᠳᠦᠨ ᠵᠢᠯ ᠮᠠᠨ ᠤ᠋ ᠴᠡᠷᠢᠭ ᠮᠣᠩᠭᠣᠯ ᠠ᠋ᠴᠠ ᠮᠠᠰᠢ ᠠᠶᠤᠵᠤᠬᠤᠢ᠃ ᠪᠤᠰᠤ ᠰᠠᠢᠳ ᠢ᠋ ᠠᠮᠠᠯᠠᠨ ᠭᠠᠷᠭᠠᠪᠠᠰᠤ ᠴᠥᠮ ᠬᠡᠯᠪᠡᠷᠢᠨ ᠬᠡᠯᠡᠵᠦ ᠬᠡᠷᠡᠭ ᠦᠯᠦ ᠪᠦᠲᠦᠭᠡᠮᠦᠢ᠃ ᠨᠡᠩ ᠪᠠᠰᠠ ᠡᠳᠦᠭᠡ ᠯᠢ ᠶᠦᠩ ᠂ ᠵᠧᠦ ᠴᠠᠩ ᠬᠣᠶᠠᠷ ᠶᠡᠬᠡ ᠵᠠᠩᠵᠤᠨ ᠠᠯᠠᠭᠳᠠᠭᠰᠠᠨ ᠳ᠋ᠤᠷ ᠮᠠᠨ ᠤ᠋ ᠴᠡᠷᠢᠭ ᠬᠡᠲᠦᠷᠬᠡᠶᠡ ᠠᠶᠤᠵᠤᠬᠤᠢ᠃ ᠬᠠᠭᠠᠨ ᠥᠷᠥᠰᠢᠶᠡᠬᠦᠯᠡ ᠰᠠᠢᠳ ᠨᠠᠳᠠ ᠳ᠋ᠤᠷ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠲᠠᠢᠹᠦ᠋ ᠲᠦᠰᠢᠮᠡᠯ ᠱ᠌ᠢᠪᠢᠱ᠌ᠢ ᠶ᠋ᠢ ᠬᠠᠪᠰᠤᠷᠤᠭᠤᠯᠤᠨ ᠥᠭ᠃ ᠰᠠᠢᠳ ᠪᠢ ᠬᠡᠳᠦᠢ ᠮᠣᠩᠭᠣᠯ ᠢ᠋ ᠪᠦᠷᠢᠨᠡ ᠠᠯᠠᠵᠤ ᠦᠨᠳᠦᠰᠦᠨ ᠢ᠋ ᠲᠠᠰᠤᠯᠵᠤ ᠡᠰᠡ ᠴᠢᠳᠠᠪᠠᠴᠤ ᠡᠨᠡ ᠡᠳᠦᠷ ᠡᠴᠡ ᠬᠣᠢᠰᠢ ᠡᠭᠦᠷᠢᠳᠡ ᠮᠠᠨ ᠤ᠋ ᠡᠰᠡᠷᠭᠦ ᠬᠠᠨᠳᠤᠬᠤ ᠦᠭᠡᠢ ᠪᠣᠯᠭᠠᠰᠤᠭᠠᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠢᠶᠠ ᠤᠯᠤᠰ ᠤ᠋ᠨ ᠡᠵᠡᠨ ᠯᠢ ᠠᠨ ᠴᠢᠦᠸᠡᠨ ᠥᠭᠦᠯᠡᠷᠦᠨ : 《ᠣᠯᠠᠨ ᠰᠠᠢᠳ ᠲᠠᠨ ᠤ᠋ ᠮᠢᠨᠦ ᠤᠯᠤᠰ ᠲᠥᠷᠥ ᠬᠠᠭᠠᠨ ᠤᠭᠰᠠᠭᠠ ᠳ᠋ᠤᠷ ᠵᠢᠳᠬᠦᠬᠦ ᠰᠠᠨᠠᠭᠠᠨ ᠮᠠᠰᠢ ᠦᠨᠡᠨ᠃ ᠭᠠᠭᠴᠠ ᠪᠢ ᠤᠷᠲᠤᠳᠠ ᠰᠣᠨᠣᠰᠬᠤᠯᠠ ᠮᠣᠩᠭᠣᠯ ᠤ᠋ᠨ ᠡᠵᠡᠨ ᠴᠢᠩᠭᠢᠰ ᠦ᠋ᠨ ᠰᠦᠷ ᠪᠤᠶᠠᠨ ᠠᠰᠤᠷᠤ ᠬᠡᠲᠦᠷᠬᠡᠢ ᠪᠥᠭᠡᠳ ᠣᠶᠤᠨ ᠮᠠᠲᠠᠯ ᠰᠣᠨᠢᠨ ᠭᠠᠢᠬᠠᠮᠰᠢᠭᠲᠠᠢ᠃ ᠲᠡᠭᠦᠨ ᠦ᠌ ᠳᠣᠣᠷᠠᠬᠢ ᠴᠡᠷᠢᠭ ᠦ᠋ᠨ ᠡᠵᠡᠨ ᠮᠤᠬᠤᠯᠢ ᠬᠡᠮᠡᠭᠴᠢ ᠨᠡᠩ ᠰᠣᠨᠢᠨ᠂ ᠴᠡᠷᠢᠭ ᠬᠡᠷᠡᠭᠯᠡᠬᠦ ᠢᠨᠦ ᠬᠤᠪᠢᠯᠭᠠᠨ ᠮᠡᠲᠦ᠂ ᠭᠠᠳᠠᠨᠠ ᠪᠢᠲᠡᠭᠦᠯᠢᠭ ᠳᠣᠲᠣᠷᠠ ᠨᠠᠷᠢᠨ᠂ ᠨᠠᠢ᠍ᠮᠠᠨ ᠢ᠋ ᠮᠥᠬᠥᠭᠡᠨ᠂ ᠨᠠᠢ᠍ᠮᠠᠨ ᠤ᠋ ᠪᠢᠴᠢᠭ ᠲᠠᠮᠠᠭᠠ ᠶ᠋ᠢ ᠬᠠᠮᠢᠶᠠᠷᠤᠭᠰᠠᠨ ᠳ᠋ᠠᠳᠠᠳᠤᠩᠭᠠ ᠶ᠋ᠢ ᠤᠯᠤᠰ ᠠ᠋ᠴᠠ ᠴᠠᠭ ᠮᠥᠴᠡ ᠦᠯᠦ ᠰᠠᠯᠭᠠᠨ᠂ ᠡᠷᠲᠡ ᠡᠳᠦᠭᠡᠬᠢ ᠪᠢᠴᠢᠭ ᠰᠤᠳᠤᠷ ᠤ᠋ᠨ ᠤᠯᠤᠰ ᠪᠦᠷᠢ ᠶ᠋ᠢᠨ ᠠᠯᠳᠠᠵᠤ ᠣᠯᠤᠭᠰᠠᠨ ᠢ᠋ ᠰᠣᠨᠣᠰᠴᠤ ᠠᠯᠢᠨ ᠤ᠋ ᠣᠶᠤᠨ ᠭᠦᠨ ᠭᠦᠶᠦᠬᠡᠨ᠂ ᠠᠯᠢᠨ ᠤ᠋ ᠲᠣᠬᠢᠶᠠᠯ ᠠᠯᠳᠠᠵᠤ ᠣᠯᠤᠭᠰᠠᠨ ᠢ᠋ ᠬᠢᠨᠠᠬᠤ ᠮᠠᠰᠢ ᠭᠠᠢᠬᠠᠮᠰᠢᠭᠲᠠᠢ ᠬᠡᠮᠡᠮᠦᠢ᠂ ᠡᠳᠦᠭᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠡᠯᠡᠯᠴᠡᠬᠦ ᠶ᠋ᠢ ᠦᠵᠡᠬᠦᠯᠡ ᠲᠡᠭᠷᠢ ᠶ᠋ᠢᠨ ᠪᠠᠢᠳᠠᠯ ᠳ᠋ᠤ᠌ ᠬᠣᠢᠲᠤ ᠽᠢ ᠸᠧᠢ ᠣᠳᠣᠨ ᠤ᠋ ᠭᠡᠷᠡᠯ ᠤᠮᠠᠷᠠ ᠠ᠋ᠴᠠ ᠭᠠᠷᠤᠮᠤᠢ ᠬᠡᠮᠡᠮᠦᠢ᠃ ᠡᠳᠡᠭᠡᠷ ᠢ᠋ᠶ᠋ᠡᠷ ᠦᠵᠡᠬᠦᠯᠡ ᠬᠡᠷᠪᠡ ᠲᠡᠭᠷᠢ ᠶ᠋ᠢᠨ ᠴᠠᠭ ᠪᠣᠯᠪᠠᠤ ᠭᠡᠮᠡᠨ ᠡᠮᠢᠶᠡᠮᠦᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠹᠦ᠋ ᠲᠦᠰᠢᠮᠡᠯ ᠯᠢᠦ ᠪᠦᠸᠧ ᠯᠢᠨ ᠲᠠᠪᠰᠢᠵᠤ ᠥᠭᠦᠯᠡᠷᠦᠨ :《ᠡᠵᠡᠨ ᠦ᠌ ᠠᠢᠯᠠᠳᠤᠭᠰᠠᠨ ᠠᠨᠤ ᠭᠡᠭᠡᠬᠡᠨ ᠲᠠᠰᠤᠷᠬᠠᠢ᠂ ᠬᠣᠢᠲᠤ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠡᠵᠡᠨ ᠮᠠᠭᠠᠳ ᠠᠯᠲᠠᠨ ᠭᠠᠳᠠᠰᠤ ᠣᠳᠣᠨ ᠮᠥᠨ᠂ ᠲᠡᠭᠦᠨ ᠯᠦ᠍ᠭᠡ ᠲᠡᠮᠡᠴᠡᠬᠦ ᠡᠴᠡ ᠳᠠᠭᠠᠵᠤ ᠤᠯᠤᠰ ᠲᠥᠷᠥ ᠶ᠋ᠢ ᠠᠮᠤᠷ ᠢ᠋ᠶ᠋ᠠᠷ ᠰᠠᠬᠢᠨ ᠪᠦᠷᠢᠨ ᠪᠣᠯᠭᠠᠬᠤᠢ ᠳ᠋ᠤᠷ ᠦᠯᠦ ᠬᠦᠷᠦᠮᠦᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠠᠵᠠᠭᠤ ᠠ᠋ᠴᠠ ᠭᠣᠣ ᠯᠢᠩ ᠬᠦᠩ ᠶᠡᠬᠡ ᠠᠭᠤᠷᠯᠠᠨ ᠥᠭᠦᠯᠡᠷᠦᠨ :《ᠡᠷᠭᠢᠨ ᠠᠬᠠ ᠶᠠᠭᠤᠨ ᠳ᠋ᠤᠷ ᠪᠡᠶᠡ ᠠᠮᠤᠷ ᠢ᠋ ᠬᠠᠷᠠᠵᠤ ᠤᠯᠤᠰ ᠤ᠋ᠨ ᠭᠣᠲᠣᠮᠰᠢᠭ᠋ ᠢ᠋ ᠦᠯᠦ ᠪᠣᠳᠣᠮᠤᠢ ? ᠮᠠᠨ ᠤ᠋ ᠰᠢᠶᠠ ᠤᠯᠤᠰ ᠪᠠᠢᠭᠤᠯᠤᠭᠠᠳ ᠵᠠᠭᠤᠨ ᠣᠨ ᠰᠢᠬᠠᠮ ᠪᠣᠯᠪᠠ᠃ ᠠᠯᠲᠠᠨ ᠤᠯᠤᠰ ᠯᠤᠭᠠ ᠵᠢᠷᠠ ᠳᠠᠯᠠᠨ ᠵᠢᠯ ᠦ᠋ᠨ ᠨᠠᠢᠷ ᠪᠣᠢ᠂ ᠪᠠᠰᠠ ᠪᠠᠷᠠᠭᠤᠨ ᠡᠮᠦᠨᠡ ᠴᠢᠯᠵᠢᠱ᠌ᠢ ᠤᠯᠤᠰ᠂ ᠴᠢᠬᠡ ᠪᠠᠷᠠᠭᠤᠨ ᠢᠳᠢᠨᠡᠷ ᠤᠯᠤᠰ ᠪᠠᠷᠠᠭᠤᠨ ᠬᠣᠢᠲᠤ ᠠᠯᠠᠭ ᠳᠡᠪᠡᠯᠲᠦ ᠤᠯᠤᠰ᠂ ᠡᠨᠡ ᠳᠥᠷᠪᠡᠨ ᠤᠯᠤᠰ ᠴᠥᠮ ᠮᠠᠨ ᠤ᠋ ᠤᠯᠤᠰ ᠯᠤᠭᠠ ᠭᠦᠨᠡ ᠨᠠᠢᠷ ᠪᠣᠢ᠃ ᠣᠳᠣ ᠡᠳᠦᠭᠡ ᠬᠡᠳᠦᠢ ᠯᠢ ᠴᠢᠯᠢ ᠬᠣᠷᠣᠭᠠ᠂ ᠯᠦᠸᠧ ᠽᠧ ᠴᠧᠩ ᠬᠣᠲᠠ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠪᠤᠯᠢᠶᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠡᠭᠡᠨᠡᠭᠲᠡ ᠡᠰᠡ ᠪᠠᠢᠯᠳᠤᠭᠰᠠᠨ ᠠ᠋ᠴᠠ ᠪᠣᠯᠵᠤᠬᠤᠢ ᠃ ᠡᠳᠦᠭᠡ ᠠᠯᠲᠠᠨ ᠤᠯᠤᠰ ᠪᠠ ᠴᠢᠯᠵᠢᠱ᠌ᠢ ᠤᠯᠤᠰ᠂ ᠢᠳᠢᠨᠡᠷ ᠤᠯᠤᠰ᠂ ᠠᠯᠠᠭ ᠳᠡᠪᠡᠯᠲᠦ ᠤᠯᠤᠰ ᠡᠨᠡ ᠳᠥᠷᠪᠡᠨ ᠤᠯᠤᠰ ᠲᠤᠷ ᠵᠣᠪᠠᠯᠠᠩ ᠪᠣᠯᠤᠭᠰᠠᠨ ᠤᠴᠢᠷ ᠢ᠋ ᠬᠡᠯᠡᠵᠦ ᠡᠯᠴᠢ ᠢᠯᠡᠬᠡᠨ ᠴᠡᠷᠢᠭ ᠭᠤᠶᠤᠵᠤ ᠪᠣᠯᠤᠮᠤᠢ᠃ ᠮᠠᠨ ᠤ᠋ ᠴᠡᠷᠢᠭ ᠮᠥᠨ ᠭᠤᠴᠢᠨ ᠲᠦᠮᠡᠨ ᠢᠯᠡᠭᠦᠦ ᠪᠣᠢ᠃ ᠭᠠᠭᠴᠠ ᠡᠭᠦᠨ ᠦ᠌ ᠬᠠᠭᠠᠰ ᠢ᠋ ᠬᠡᠷᠡᠭᠯᠡᠨ ᠮᠠᠨ ᠤ᠋ ᠣᠯᠣᠭᠠᠢ ᠬᠣᠲᠠ ᠶ᠋ᠢᠨ ᠰᠠᠪᠠ ᠳ᠋ᠤᠷ ᠡᠴᠢᠵᠦ ᠰᠠᠬᠢᠵᠤ ᠪᠠᠢᠯᠳᠤᠨ ᠲᠤᠯᠪᠠᠰᠤ ᠬᠥᠮᠦᠨ ᠳ᠋ᠦ᠍ᠷ ᠪᠣᠭᠣᠯ ᠪᠣᠯᠤᠭᠰᠠᠨ ᠠ᠋ᠴᠠ ᠳᠡᠭᠡᠷᠡ ᠦᠭᠡᠢ ᠦᠦ ? ᠡᠷᠭᠢᠨ ᠠᠬᠠ ᠶ᠋ᠢᠨ ᠡᠨᠡ ᠦᠭᠡ – ᠡᠵᠡᠨ ᠢ᠋ ᠳᠡᠭᠡᠳᠦᠰ ᠲᠣᠷ ᠠᠨᠤ ᠵᠠᠯᠢᠬᠠᠢ ᠪᠣᠯᠭᠠᠨ᠂ ᠳᠣᠣᠷᠠᠳᠤᠰ ᠬᠡᠦᠬᠡᠳ ᠠᠴᠢᠷ ᠪᠠ ᠤᠯᠤᠰ ᠢᠷᠭᠡᠨ ᠳ᠋ᠦ᠍ᠷ ᠢᠴᠢᠭᠦᠷᠢ ᠪᠣᠯᠭᠠᠬᠤ ᠪᠣᠯᠠᠢ᠃ ᠡᠷᠭᠢᠨ ᠠᠬᠠ ᠮᠣᠩᠭᠣᠯ ᠤ᠋ᠨ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠯᠠᠪ ᠡᠵᠡᠯᠡᠬᠦ ᠶ᠋ᠢ ᠮᠡᠳᠡᠭᠰᠡᠨ ᠶᠠᠮᠪᠠᠷ ᠢᠲᠡᠭᠡᠮᠵᠢ ᠪᠣᠢ ? ᠣᠳᠣᠨ ᠭᠠᠷᠠᠭ ᠬᠡᠮᠡᠭᠴᠢ ᠴᠥᠮ ᠲᠣᠭᠲᠠᠭᠰᠠᠨ ᠡᠭᠦᠷᠢᠳᠡ ᠪᠠᠢᠬᠤ ᠬᠡᠷᠡᠭ᠂ ᠨᠡᠩ ᠪᠠᠰᠠ ᠪᠠᠬᠠᠨ ᠮᠠᠲᠠᠯ ᠪᠠᠢᠬᠤ ᠠᠷᠠᠳ ᠣᠨᠴᠠ ᠲᠩᠷᠢ ᠶ᠋ᠢᠨ ᠴᠠᠭ ᠢ᠋ ᠬᠡᠯᠡᠯᠴᠡᠮᠦᠢ ᠬᠡᠮᠡᠮᠦᠢ᠃ ᠲᠡᠳᠡᠭᠡᠷ ᠴᠥᠮ ᠪᠡᠶᠡ ᠪᠡᠨ ᠡᠷᠭᠦᠵᠦ ᠪᠤᠰᠤᠳ ᠢ᠋ ᠳᠠᠷᠤᠯᠠᠨ ᠬᠠᠭᠤᠷᠴᠤ ᠮᠡᠬᠡᠯᠡᠬᠦ ᠬᠡᠷᠡᠭ ᠪᠣᠯᠠᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠯᠢᠦ ᠪᠦᠸᠧ ᠯᠢᠨ ᠮᠥᠨ ᠮᠥᠨ ᠭᠡᠮᠡᠨ ᠳᠠᠬᠢᠵᠤ ᠦᠭᠡ ᠥᠴᠢᠨ ᠲᠡᠮᠡᠴᠡᠭᠰᠡᠨ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ ᠰᠢᠶᠠ ᠤᠯᠤᠰ ᠤ᠋ᠨ ᠡᠵᠡᠨ ᠯᠢ ᠠᠨ ᠴᠢᠤᠸᠠᠨ ᠪᠠᠢᠯᠳᠤᠬᠤ ᠰᠡᠳᠬᠢᠯ ᠲᠣᠭᠲᠠᠵᠤ᠂ ᠳᠠᠷᠤᠢ ᠳᠥᠷᠪᠡᠨ ᠲᠦᠰᠢᠮᠡᠯ ᠰᠣᠩᠭᠣᠵᠤ᠂ ᠳᠥᠷᠪᠡᠨ ᠤᠯᠤᠰ ᠠ᠋ᠴᠠ ᠴᠡᠷᠢᠭ ᠭᠤᠶᠤᠬᠤ ᠡᠯᠴᠢ ᠪᠣᠯᠭᠠᠨ ᠶᠠᠪᠤᠭᠤᠯᠵᠤ᠂ ᠭᠣᠣ ᠯᠢᠩ ᠬᠦᠩ ᠳ᠋ᠦ᠍ᠷ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠣᠯᠣᠭᠠᠢ ᠬᠣᠲᠠ ᠶ᠋ᠢᠨ ᠬᠠᠪᠴᠢᠯ ᠳ᠋ᠤᠷ ᠪᠠᠢᠯᠳᠤᠷᠠ ᠡᠴᠢᠮᠦᠢ ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃
ᠲᠡᠳᠦᠢ ᠯᠢᠦ ᠪᠦᠸᠧ ᠯᠢᠨ ᠵᠢᠬᠡᠭᠦᠨ ᠢ᠋ᠶ᠋ᠡᠷ ᠢᠨᠢᠶᠡᠨ ᠭᠠᠷᠴᠤ ᠢᠷᠡᠭᠡᠳ ᠳᠠᠷᠠᠭᠠ ᠪᠠᠷ ᠳᠥᠷᠪᠡ ᠲᠠᠪᠤᠨ ᠤᠳᠠᠭᠠ ᠬᠦᠭᠰᠦᠷᠡᠪᠡ ᠭᠡᠮᠡᠨ ᠭᠤᠶᠤᠨ ᠠᠢᠯᠠᠳᠬᠠᠵᠤ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠭᠣᠮᠣᠳᠠᠭᠠᠳ ᠭᠡᠷ ᠡᠷᠦᠬᠡ ᠪᠡᠨ ᠠᠪᠴᠤ ᠭᠦᠨᠡ ᠠᠭᠤᠯᠠᠨᠠ ᠣᠷᠣᠪᠠ᠃
ᠲᠡᠨᠳᠡᠴᠡ ᠭᠣᠣ ᠯᠢᠩ ᠬᠦᠩ᠂ ᠱᠢᠪᠢᠱᠢ ᠶ᠋ᠢ ᠠᠪᠴᠤ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠣᠯᠣᠭᠠᠢ ᠬᠣᠲᠠ ᠳ᠋ᠤᠷ ᠬᠦᠷᠴᠦ ᠢᠷᠡᠭᠡᠳ ᠲᠤᠷᠰᠢᠭᠤᠯ ᠠ᠋ᠴᠠ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠠᠮᠢᠭᠠ ᠪᠠᠢᠬᠤ ᠶ᠋ᠢ ᠠᠰᠠᠭᠤᠲᠠᠯᠠ ᠲᠤᠷᠰᠢᠭᠤᠯ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠬᠣᠰᠢᠭᠤᠴᠢ ᠠᠨᠤ᠂ ᠪᠤᠭᠤᠷᠵᠢ᠂ ᠴᠢᠯᠠᠭᠤ᠂ ᠰᠥᠪᠡᠭᠡᠲᠡᠢ᠂ ᠭᠢᠯᠥᠭᠡᠨ ᠬᠡᠮᠡᠬᠦ ᠳᠥᠷᠪᠡᠨ ᠶᠡᠬᠡ ᠵᠠᠩᠵᠤᠨ᠂ ᠨᠠᠢ᠍ᠮᠠᠨ ᠪᠠᠭᠠ ᠵᠠᠩᠵᠤᠨ᠂ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠢᠷᠡᠪᠡ᠃ 》ᠬᠡᠮᠡᠬᠦᠢ ᠳ᠋ᠦ᠍ᠷ ᠭᠣᠣ ᠯᠢᠩ ᠬᠦᠩ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠲᠡᠭᠡᠨ ᠡᠷᠳᠦᠵᠦ ᠳᠠᠷᠤᠢ ᠬᠡᠩᠭᠡᠷᠭᠡ ᠴᠣᠬᠢᠨ ᠤᠭᠲᠤᠨ ᠡᠴᠢᠭᠰᠡᠨ ᠳ᠋ᠦ᠍ᠷ ᠣᠯᠣᠭᠠᠢ ᠶ᠋ᠢᠨ ᠲᠠᠯᠠ ᠳ᠋ᠤᠷ ᠪᠠᠭᠤᠳᠠᠯᠯᠠᠭᠰᠠᠨ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠣᠢᠷᠠ ᠬᠦᠷᠴᠦ ᠰᠠᠶᠢ ᠬᠦᠷᠢᠶᠡ ᠪᠠᠭᠤᠰᠤᠭᠠᠢ ᠭᠡᠮᠡᠨ ᠵᠣᠭᠰᠣᠵᠤ ᠭᠠᠵᠠᠷ ᠢ᠋ ᠬᠡᠮᠵᠢᠨ ᠬᠦᠷᠢᠶᠡ ᠪᠠᠭᠤᠭᠠᠳ ᠬᠠᠭᠠᠰ ᠪᠠᠭᠤᠳᠠᠯᠯᠠᠲᠠᠯᠠ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠭᠡᠨᠡᠳᠲᠡ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ ᠫᠤᠤ ᠲᠠᠯᠪᠢᠨ ᠴᠡᠷᠢᠭ ᠨᠢᠭᠡᠨᠲᠡ ᠪᠤᠳᠠᠷᠠᠯᠳᠤᠨ ᠭᠠᠷᠤᠭᠠᠳ᠂ ᠬᠣᠶᠠᠷ ᠠᠩᠭᠢ ᠰᠠᠯᠵᠤ᠂ ᠳᠥᠷᠪᠡᠨ ᠵᠦᠭ ᠡᠴᠡ ᠰᠢᠪᠲᠤᠯᠤᠨ ᠠᠯᠠᠷᠠ ᠢᠷᠡᠭᠰᠡᠨ ᠳ᠋ᠦ᠍ᠷ ᠭᠣᠣ ᠯᠢᠩ ᠬᠦᠩ ᠦ᠋ᠨ ᠴᠡᠷᠢᠭ ᠬᠡᠳᠦᠢ ᠣᠯᠠᠨ ᠪᠣᠯᠪᠠᠴᠤ ᠣᠯᠠᠨ ᠠᠩᠭᠢ ᠰᠠᠯᠭᠠᠨ ᠵᠠᠪᠳᠤᠰᠢ ᠦᠭᠡᠢ ᠪᠣᠯᠵᠤ᠂ ᠶᠠᠭᠠᠷᠠᠨ ᠨᠢᠭᠡᠨ ᠭᠠᠵᠠᠷ ᠪᠥᠭᠡᠮᠨᠡᠷᠡᠨ ᠵᠣᠭᠰᠣᠵᠤ ᠭᠠᠳᠠᠭᠰᠢ ᠲᠣᠰᠰᠤᠭᠠᠢ ᠬᠡᠮᠡᠲᠡᠯᠡ ᠨᠢᠭᠡᠨ ᠵᠤᠷᠪᠤᠰ ᠤᠯᠠᠭᠠᠨ ᠲᠣᠭᠣᠰᠣ ᠲᠠᠲᠠᠵᠤ᠂ ᠮᠣᠩᠭᠣᠯ ᠤ᠋ᠨ ᠳᠥᠷᠪᠡᠨ ᠶᠡᠬᠡ ᠵᠠᠩᠵᠤᠨ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠬᠦᠷᠴᠦ ᠢᠷᠡᠭᠡᠳ ᠬᠠᠭᠠᠯᠭᠠ ᠶ᠋ᠢ ᠴᠠᠪᠴᠢᠨ ᠣᠷᠣᠭᠰᠠᠨᠠ᠂ ᠠᠷᠪᠠᠨ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠬᠠᠮᠲᠤ ᠪᠠᠷ ᠴᠠᠪᠴᠢᠯᠠᠨ ᠣᠷᠣᠭᠰᠠᠨ ᠳ᠋ᠤᠷ ᠭᠣᠣ ᠯᠢᠩ ᠬᠦᠩ ᠶᠡᠬᠡᠯᠡ ᠠᠶᠤᠵᠤ ᠰᠠᠶᠢ ᠳᠤᠲᠠᠭᠠᠰᠤᠭᠠᠢ ᠬᠡᠮᠡᠲᠡᠯᠡ ᠭᠡᠨᠡᠳᠲᠡ ᠮᠣᠩᠭᠣᠯ ᠤ᠋ᠨ ᠳᠥᠷᠪᠡᠨ ᠵᠠᠩᠵᠤᠨ ᠵᠢᠭᠰᠠᠭᠠᠯ ᠢ᠋ ᠰᠢᠪᠲᠤᠯᠤᠨ ᠭᠠᠯᠵᠠᠭᠤ ᠪᠠᠷᠰ ᠮᠡᠲᠦ ᠣᠷᠣᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠰᠢᠶᠠ ᠤᠯᠤᠰ ᠤ᠋ᠨ ᠣᠯᠠᠨ ᠴᠡᠷᠢᠭ ᠰᠥᠰᠥ ᠬᠡᠮᠬᠡᠷᠡᠵᠦ ᠰᠠᠮᠠᠭᠤᠷᠠᠨ ᠪᠤᠷᠤᠭᠤᠯᠠᠬᠤᠶᠠ᠂ ᠭᠣᠣ ᠯᠢᠩ ᠬᠦᠩ᠂ ᠱ᠌ᠢᠪᠢᠱ᠌ᠢ ᠬᠣᠶᠠᠭᠤᠯᠠ ᠠᠷᠤ ᠪᠠᠨ ᠨᠡᠢᠯᠡᠭᠦᠯᠦᠨ ᠳᠥᠷᠪᠡᠨ ᠵᠠᠩᠵᠤᠨ ᠯᠤᠭᠠ ᠪᠠᠢᠯᠳᠤᠬᠤᠢ ᠳ᠋ᠤᠷ ᠲᠡᠷᠢᠭᠦᠯᠡᠭᠰᠡᠨ ᠨᠢᠭᠡᠨ ᠥᠨᠳᠥᠷ ᠪᠡᠶᠡ ᠲᠡᠢ ᠵᠠᠩᠵᠤᠨ ᠠᠨᠤ ᠤᠷᠲᠤ ᠵᠢᠳᠠ ᠶ᠋ᠢ ᠮᠤᠰᠬᠢᠨ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠨᠢᠭᠡᠨᠲᠡ ᠵᠠᠩᠳᠠᠨ ᠬᠠᠳᠬᠤᠭᠰᠠᠨ ᠳ᠋ᠤᠷ ᠭᠣᠣ ᠯᠢᠩ ᠬᠦᠩ ᠦ᠋ᠨ ᠪᠠᠷᠠᠭᠤᠨ ᠰᠡᠭᠦᠵᠢ ᠶ᠋ᠢ ᠰᠢᠪᠲᠤ ᠵᠢᠳᠠᠯᠠᠨ ᠢᠯᠡᠭᠡᠭᠰᠡᠨᠡ ᠶᠡᠬᠡᠯᠡ ᠡᠪᠡᠷᠰᠢᠶᠡᠨ ᠬᠠᠭᠠᠰ ᠪᠠᠭᠤᠯᠭᠠᠭᠰᠠᠨ ᠬᠦᠷᠢᠶᠡ ᠪᠡᠨ ᠣᠷᠬᠢᠵᠤ ᠱ᠌ᠢᠪᠢᠱ᠌ᠢ ᠯᠦ᠍ᠭᠡ ᠲᠡᠷᠢᠭᠦᠯᠡᠨ ᠪᠤᠷᠤᠭᠤᠯᠠᠬᠤᠢ ᠳ᠋ᠤᠷ ᠱ᠌ᠢᠪᠢᠱ᠌ᠢ ᠬᠠᠷᠠᠬᠠᠨ ᠭᠠᠭᠴᠠᠭᠠᠷ ᠬᠠᠯᠠᠭᠯᠠᠨ ᠪᠠᠢᠯᠳᠤᠵᠤ ᠪᠤᠷᠤᠭᠤᠯᠠᠨ ᠡᠴᠢᠬᠦᠶᠡ᠂ ᠡᠨᠡ ᠳᠥᠷᠪᠡᠨ ᠵᠠᠩᠵᠤᠨ ᠲᠠᠯᠪᠢᠯ ᠦᠭᠡᠢ ᠨᠡᠬᠡᠪᠡ᠃ ᠡᠨᠡ ᠠᠯᠢ ᠳᠥᠷᠪᠡᠨ ᠵᠠᠩᠵᠤᠨ ᠬᠡᠮᠡᠪᠡᠰᠦ ᠲᠠᠢᠹᠦ᠋ ᠪᠤᠭᠤᠷᠵᠢ᠂ ᠲᠠᠢᠪᠤᠤ ᠴᠢᠯᠠᠭᠤ᠂ ᠰᠥᠪᠡᠭᠡᠲᠡᠢ᠂ ᠬᠤᠢᠯᠠᠳᠠᠷ ᠳᠥᠷᠪᠡᠨ ᠬᠥᠮᠦᠨ ᠠᠵᠤᠭᠤ᠃ ᠲᠡᠳᠦᠢ ᠣᠯᠠᠨ ᠵᠠᠯᠠᠭᠤ ᠵᠠᠩᠵᠤᠨ ᠨᠠᠷ ᠯᠤᠭᠠ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠳᠠᠷᠤᠭᠰᠠᠭᠠᠷ ᠣᠯᠣᠭᠠᠢ ᠬᠣᠲᠠᠨ ᠳ᠋ᠤᠷ ᠣᠷᠣᠲᠠᠯᠠ ᠬᠥᠭᠡᠭᠡᠵᠦ ᠠᠯᠠᠪᠠ᠃ ᠦᠬᠦᠭᠰᠡᠨ ᠶᠠᠰᠤ ᠲᠠᠯᠠ ᠲᠦᠭᠦᠷᠡᠨ᠂ ᠤᠯᠠᠭᠠᠨ ᠴᠢᠰᠤ ᠭᠣᠣᠯ ᠳ᠋ᠤᠷ ᠤᠷᠤᠰᠴᠤ ᠭᠤᠷᠪᠠᠨ ᠮᠢᠩᠭᠠᠨ ᠢᠯᠡᠭᠦᠦ ᠴᠡᠷᠢᠭ ᠦᠬᠦᠵᠦ᠂ ᠲᠤᠭ ᠳᠠᠯᠪᠠᠭᠠ ᠬᠤᠶᠠᠭ ᠳᠤᠭᠤᠯᠠᠭᠠ ᠵᠠᠷ ᠵᠡᠪᠰᠡᠭ ᠬᠢᠭᠡᠳ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠶᠡᠬᠡ ᠬᠠᠭᠠᠰ ᠢ᠋ ᠣᠯᠵᠤᠬᠤᠢ᠃ ᠲᠡᠳᠦᠢ ᠬᠣᠲᠠᠨ ᠢ᠋ ᠬᠠᠭᠠᠵᠤ ᠬᠠᠷᠠᠬᠠᠨ ᠪᠠᠢᠯᠳᠤᠬᠤᠢ ᠳ᠋ᠤᠷ ᠬᠠᠭᠠᠨ ᠤ᠋ ᠭᠡᠭᠡᠨ ᠶᠡᠬᠡ ᠴᠡᠷᠢᠭ ᠲᠡᠢ ᠪᠠᠰᠠ ᠬᠦᠷᠴᠦ ᠢᠷᠡᠪᠡ᠃ ᠮᠤᠬᠤᠯᠢ ᠳᠡᠢᠯᠦᠭᠰᠡᠨ ᠬᠦᠴᠦᠨ ᠳ᠋ᠦ᠍ᠷ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ ᠬᠣᠲᠠᠨ ᠢ᠋ ᠪᠠᠢᠯᠳᠤᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠴᠢᠩᠭᠢᠰ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠤᠷᠤᠨ : 《 ᠳ᠋ᠤᠷ ᠪᠠᠢᠵᠠ᠂ ᠡᠨᠡ ᠬᠣᠲᠠ ᠬᠣᠢᠲᠤ ᠪᠡᠶᠡ ᠠᠭᠤᠯᠠᠨ ᠳ᠋ᠤᠷ ᠳᠥᠰᠢᠨ ᠰᠠᠭᠤᠭᠰᠠᠨ ᠲᠤᠯᠠ ᠪᠢᠳᠡ ᠤᠷᠢᠳᠠ ᠠᠭᠤᠯᠠᠨ ᠳ᠋ᠤᠷ ᠠᠪᠠᠷᠢᠵᠤ ᠬᠣᠲᠠ ᠶ᠋ᠢᠨ ᠳᠣᠲᠣᠷᠠᠬᠢ ᠴᠡᠷᠢᠭ ᠢᠷᠭᠡᠨ ᠦ᠌ ᠪᠠᠢᠳᠠᠯ ᠢ᠋ ᠦᠵᠡᠰᠦᠭᠡᠢ ! 》ᠭᠡᠮᠡᠨ ᠬᠠᠮᠲᠤ ᠮᠣᠷᠢ ᠤᠨᠤᠵᠤ᠂ ᠠᠭᠤᠯᠠᠨ ᠤ᠋ ᠣᠷᠣᠢ ᠳ᠋ᠤᠷ ᠭᠠᠷᠪᠠᠰᠤ ᠣᠯᠣᠭᠠᠢ ᠬᠣᠲᠠᠨ ᠤ᠋ ᠳᠣᠲᠣᠷᠠ ᠬᠠᠭᠠᠨ ᠪᠢᠰᠬᠢᠭᠦᠷᠳᠡᠨ ᠵᠢᠷᠭᠠᠯᠳᠤᠬᠤᠢ ᠳ᠋ᠤᠷ ᠮᠤᠬᠤᠯᠢ ᠢᠨᠢᠶᠡᠨ ᠥᠭᠦᠯᠡᠷᠦᠨ :《ᠡᠵᠡᠨ ᠡᠨᠡ ᠶᠠᠭᠤᠮᠠ ᠶ᠋ᠢᠨ ᠠᠷᠭᠠ ᠶ᠋ᠢ ᠦᠵᠡᠪᠡ ᠦᠦ ? ᠠᠷᠭᠠ ᠪᠠᠨ ᠠᠯᠳᠠᠭᠠᠳ ᠣᠳᠣ ᠡᠷᠲᠡᠨ ᠦ᠌ ᠱᠤ᠌ ᠤᠯᠤᠰ ᠤ᠋ᠨ ᠵᠣ᠌ ᠭᠧ ᠶ᠋ᠢᠨ ᠬᠣᠭᠣᠰᠣᠨ ᠬᠣᠲᠠ ᠶ᠋ᠢᠨ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠵᠦ᠂ ᠮᠠᠨ ᠤ᠋ ᠴᠡᠷᠢᠭ ᠢ᠋ ᠠᠶᠤᠯᠭᠠᠬᠤ ᠪᠣᠯᠠᠢ᠃ ᠡᠨᠡ ᠴᠥᠮ < ᠵᠠᠭᠤᠨ ᠬᠥᠯᠲᠦ ᠬᠣᠣᠷᠠᠲᠤ ᠬᠣᠷᠣᠬᠠᠢ ᠥᠪᠡᠷ ᠦ᠋ᠨ ᠰᠡᠭᠦᠯ ᠢ᠋ ᠯᠤᠤ ᠳ᠋ᠤᠷ ᠠᠳᠠᠯᠢᠳᠬᠠᠮᠤᠢ > ᠬᠡᠮᠡᠭᠰᠡᠨᠴᠢᠯᠡᠨ᠂ ᠡᠨᠡ ᠥᠴᠦᠬᠡᠨ ᠪᠣᠭᠣᠯ ᠶᠠᠭᠠᠬᠢᠨ ᠡᠨᠡ ᠮᠡᠲᠦ ᠠᠭᠠᠰᠢᠯᠠᠵᠤ ᠪᠣᠯᠬᠤ ? 》ᠬᠠᠭᠠᠨ ᠠᠰᠠᠭᠤᠷᠤᠨ: 《ᠴᠢᠨᠦ ᠰᠠᠨᠠᠭᠠᠨ ᠡᠨᠡ ᠬᠣᠲᠠ ᠶ᠋ᠢ ᠬᠡᠷᠬᠢᠨ ᠪᠠᠢᠯᠳᠤᠰᠤᠭᠠᠢ ᠬᠡᠮᠡᠮᠦᠢ ? 》ᠮᠤᠬᠤᠯᠢ ᠠᠢᠯᠠᠳᠬᠠᠷᠤᠨ : 《ᠡᠨᠡ ᠬᠣᠲᠠ ᠶ᠋ᠢᠨ ᠠᠮᠢᠰᠬᠤᠯ ᠯᠠᠪ ᠬᠦᠴᠦᠨ ᠳ᠋ᠦ᠍ᠷ ᠳᠠᠷᠤᠭᠳᠠᠮᠤᠢ ! 》 ᠭᠡᠮᠡᠨ ᠳᠠᠷᠤᠢ ᠡᠭᠦᠯᠡᠨ ᠱᠠᠲᠤ ᠭᠤᠴᠢᠨ ᠳᠥᠷᠪᠡ ᠬᠢᠵᠦ᠂ ᠬᠣᠲᠠ ᠶ᠋ᠢ ᠴᠢᠭᠯᠡᠨ ᠳᠠᠪᠠᠬᠤ ᠶᠡᠬᠡ ᠵᠢᠷᠦᠬᠡᠲᠦ ᠨᠠᠶᠠᠨ ᠨᠠᠢ᠍ᠮᠠᠨ ᠴᠡᠷᠢᠭ ᠢ᠋ ᠰᠠᠯᠭᠠᠨ ᠭᠠᠷᠭᠠᠵᠤ᠂ ᠬᠣᠲᠠ ᠠᠪᠲᠠᠭᠰᠠᠨ ᠬᠣᠢᠨᠠ ᠬᠥᠮᠦᠨ ᠪᠦᠷᠢ ᠳ᠋ᠦ᠍ᠷ ᠮᠢᠩᠭᠠᠨ ᠬᠡᠯᠬᠢᠶᠡ ᠵᠣᠭᠣᠰ ᠱᠠᠩ ᠲᠠᠯᠪᠢᠬᠤ ᠪᠠᠷ ᠲᠣᠭᠲᠠᠵᠤ᠂ ᠣᠯᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠭᠠᠭᠴᠠ ᠡᠮᠦᠨᠡ ᠬᠠᠭᠠᠯᠭᠠ ᠶ᠋ᠢ ᠬᠦᠴᠦᠯᠡᠨ ᠪᠠᠢᠯᠳᠤᠭᠤᠯᠵᠤ᠂ ᠬᠣᠲᠠ ᠶ᠋ᠢᠨ ᠭᠤᠷᠪᠠᠨ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠴᠥᠮ ᠰᠡᠮᠡᠬᠡᠷ ᠡᠮᠦᠨᠡ ᠡᠲᠡᠭᠡᠳ ᠲᠣᠷ ᠢᠷᠡᠭᠰᠡᠨ ᠳ᠋ᠦ᠍ᠷ ᠨᠠᠷᠠ ᠤᠨᠠᠭᠰᠠᠨ ᠤ᠋ ᠬᠣᠢᠨᠠ ᠡᠨᠡ ᠪᠠᠢᠯᠳᠤᠬᠤ ᠠᠨᠤ ᠮᠠᠰᠢ ᠴᠢᠩᠭᠠ ᠳ᠋ᠤᠷ ᠣᠯᠠᠨ ᠴᠡᠷᠢᠭ ᠨᠡᠩ ᠠᠶᠤᠯᠳᠤᠨ ᠬᠣᠢᠨᠠ ᠪᠠᠢᠬᠤ ᠭᠤᠷᠪᠠᠨ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠢ᠋ ᠨᠡᠩ ᠱᠠᠭᠠᠷᠳᠠᠨ ᠡᠮᠦᠨᠡ ᠬᠠᠯᠠᠭᠯᠠᠬᠤᠢ ᠳ᠋ᠤᠷ ᠮᠤᠬᠤᠯᠢ ᠭᠡᠨᠡᠳᠲᠡ ᠲᠡᠮᠳᠡᠭ ᠭᠠᠯ ᠢ᠋ ᠰᠢᠲᠠᠭᠠᠵᠤ ᠶᠡᠬᠡ ᠫᠤᠤ ᠶ᠋ᠢ ᠲᠠᠯᠪᠢᠭᠤᠯᠤᠮᠠᠭᠴᠠ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠢᠲᠤ ᠡᠲᠡᠭᠡᠳ ᠣᠯᠠᠨ ᠴᠡᠷᠢᠭ ᠬᠦᠷᠳᠦᠲᠦ ᠡᠭᠦᠯᠡᠨ ᠱᠠᠲᠤ ᠶ᠋ᠢ ᠯᠦᠸᠧ ᠽᠢ ᠴᠧᠩ ᠡᠴᠡ ᠬᠢᠯᠭᠡᠵᠦ ᠠᠴᠢᠷᠠᠨ ᠬᠠᠮᠲᠤ ᠪᠠᠷ ᠲᠤᠷᠰᠢᠵᠤ ᠨᠢᠭᠡᠨ ᠡᠲᠡᠭᠡᠳ ᠠᠷᠪᠠᠨ ᠬᠣᠶᠠᠷ ᠱᠠᠲᠤ ᠪᠣᠰᠤᠭᠰᠠᠨ ᠳ᠋ᠤᠷ ᠲᠡᠷᠢᠭᠦᠯᠡᠭᠰᠡᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠴᠥᠮ ᠳᠠᠪᠠᠨ ᠭᠠᠷᠴᠤ ᠰᠦᠷ ᠦᠵᠡᠭᠦᠯᠬᠦ ᠬᠡᠳᠦᠨ ᠴᠡᠷᠢᠭ ᠢ᠋ ᠴᠠᠪᠴᠢᠨ ᠱᠠᠲᠤ ᠥᠭᠡᠳᠡ ᠴᠡᠷᠢᠭ ᠭᠠᠷᠬᠤ ᠠᠨᠤ ᠣᠯᠠᠨ ᠰᠢᠷᠭᠤᠯᠵᠢ ᠮᠣᠳᠣᠨ ᠳ᠋ᠤᠷ ᠠᠪᠠᠷᠢᠬᠤ ᠮᠡᠲᠦ᠃ ᠡᠭᠦᠨ ᠳ᠋ᠦ᠍ᠷ ᠣᠯᠠᠨ ᠴᠡᠷᠢᠭ ᠲᠡᠷᠡ ᠳᠤᠲᠠᠭᠤ ᠲᠤᠯᠭᠠᠭᠤᠷᠢ ᠶ᠋ᠢ ᠲᠤᠯᠵᠤ᠂ ᠭᠤᠴᠢᠨ ᠵᠢᠷᠭᠤᠭᠠᠨ ᠱᠠᠲᠤ ᠪᠠᠷ ᠬᠠᠮᠲᠤ ᠪᠠᠷ ᠭᠠᠷᠬᠤᠢ ᠳ᠋ᠤᠷ ᠤᠳᠠᠭᠰᠠᠨ ᠦᠭᠡᠢ ᠬᠡᠳᠦᠨ ᠮᠢᠩᠭᠠᠨ ᠴᠡᠷᠢᠭ ᠬᠣᠲᠠ ᠳᠣᠲᠣᠷᠠ ᠣᠷᠣᠵᠤ ᠰᠢᠭᠤᠳ ᠡᠮᠦᠨᠡ ᠬᠠᠭᠠᠯᠭᠠ ᠶ᠋ᠢᠨ ᠠᠰᠠᠷ ᠲᠤᠷ ᠮᠣᠳᠣ ᠴᠢᠯᠠᠭᠤ ᠴᠣᠬᠢᠬᠤ ᠴᠡᠷᠢᠭ ᠦ᠋ᠨ ᠠᠷᠤ ᠠ᠋ᠴᠠ ᠪᠠᠢᠯᠳᠤᠨ ᠣᠷᠣᠭᠰᠠᠨ ᠳ᠋ᠤᠷ ᠣᠯᠣᠭᠠᠢ ᠬᠣᠲᠠ ᠶ᠋ᠢᠨ ᠴᠡᠷᠢᠭ᠂ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠨᠢᠭᠡᠨᠲᠡ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ ᠦᠵᠡᠭᠡᠳ ᠰᠥᠰᠥ ᠬᠡᠮᠬᠡᠷᠡᠨ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠰᠠᠷᠨᠢᠨ ᠲᠠᠷᠬᠠᠯᠴᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠨᠡᠩᠳᠡ ᠬᠠᠷᠠᠩᠭᠤᠢ ᠪᠣᠯᠤᠭᠰᠠᠨ ᠲᠤᠯᠠ ᠬᠣᠲᠠ ᠳ᠋ᠤᠷ ᠣᠷᠣᠵᠤ ᠢᠷᠡᠭᠰᠡᠨ ᠬᠡᠳᠦᠨ ᠮᠢᠩᠭᠠᠨ ᠴᠡᠷᠢᠭ ᠶᠠᠭᠠᠷᠠᠨ ᠬᠠᠭᠠᠯᠭᠠ ᠰᠠᠬᠢᠭᠰᠠᠨ ᠴᠡᠷᠢᠭ ᠢ᠋ ᠠᠯᠠᠵᠤ᠂ ᠡᠮᠦᠨᠡ ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠵᠦ ᠶᠡᠬᠡ ᠴᠡᠷᠢᠭ ᠣᠷᠣᠪᠠ᠃ ᠡᠭᠦᠨ ᠳ᠋ᠦ᠍ᠷ ᠭᠣᠣ ᠯᠢᠩ ᠬᠦᠩ ᠶᠡᠬᠡᠯᠡ ᠠᠶᠤᠵᠤ ᠰᠢᠪᠢᠱᠢ ᠯᠦ᠍ᠭᠡ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠢ᠋ ᠠᠪᠴᠤ ᠬᠣᠢᠲᠤ ᠬᠠᠭᠠᠯᠭᠠ ᠪᠠᠷ ᠭᠠᠷᠴᠤ ᠵᠦᠩ ᠰᠢᠩ ᠹᠦ ᠶ᠋ᠢᠨ ᠵᠦᠭ ᠳᠤᠲᠠᠭᠠᠨ ᠡᠴᠢᠪᠡ᠃
ᠲᠡᠳᠦᠢ ᠮᠥᠨ ᠨᠢᠭᠡᠨ ᠰᠥᠨᠢ ᠬᠠᠭᠠᠯᠭᠠ ᠶ᠋ᠢ ᠰᠠᠬᠢᠭᠤᠯᠵᠤ᠂ ᠵᠢᠴᠢ ᠡᠳᠦᠷ ᠬᠣᠲᠠ ᠶ᠋ᠢᠨ ᠣᠯᠠᠨ ᠢ᠋ ᠲᠣᠭᠲᠠᠭᠠᠵᠤ᠂ ᠰᠠᠶᠢ ᠬᠠᠭᠠᠨ ᠤ᠋ ᠭᠡᠭᠡᠨ ᠢ᠋ ᠵᠠᠯᠠᠵᠤ ᠬᠣᠲᠠᠨ ᠳ᠋ᠤᠷ ᠣᠷᠣᠭᠤᠯᠤᠨ᠂ ᠶᠡᠬᠡ ᠶᠠᠮᠤᠨ ᠳ᠋ᠤᠷ ᠵᠠᠯᠠᠪᠠ᠃ ᠡᠨᠡ ᠬᠣᠲᠠ ᠳ᠋ᠤᠷ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠣᠯᠠᠨ ᠪᠠᠶᠠᠴᠤᠳ ᠤ᠋ᠨ ᠠᠷᠤ ᠭᠠᠵᠠᠷ ᠤ᠋ᠨ ᠵᠣᠭᠣᠰ ᠢ᠋ ᠬᠤᠷᠢᠶᠠᠬᠤ ᠶᠡᠬᠡ ᠠᠷᠠᠯᠵᠢᠶᠠ ᠪᠠᠢᠬᠤ ᠲᠤᠯᠠ ᠦᠨᠡᠬᠡᠷ ᠪᠠᠶᠠᠨ ᠡᠯᠪᠡᠭ᠂ ᠢᠷᠭᠡᠨ ᠦ᠌ ᠭᠡᠷ ᠵᠢᠷᠭᠤᠭᠠᠨ ᠲᠦᠮᠡᠨ ᠢᠯᠡᠭᠦᠦ᠂ ᠰᠠᠩ ᠬᠥᠮᠥᠷᠭᠡ ᠳᠦᠭᠦᠷᠡᠩ ᠪᠢᠯᠬᠠᠮᠠᠯ᠃ ᠵᠢᠴᠢ ᠰᠠᠩ ᠬᠥᠮᠥᠷᠭᠡ ᠶ᠋ᠢ ᠪᠠᠢᠴᠠᠭᠠᠨ ᠠᠪᠴᠤ ᠰᠠᠩ ᠤ᠋ᠨ ᠠᠮᠤ ᠶ᠋ᠢ ᠭᠠᠷᠭᠠᠵᠤ ᠣᠯᠠᠨ ᠢᠷᠭᠡᠨ ᠳ᠋ᠦ᠍ᠷ ᠲᠦᠭᠡᠭᠡᠵᠦ ᠥᠭᠪᠡ ① ᠃
– – – –
① ᠠᠷᠤ ᠭᠠᠵᠠᠷ ᠠᠮᠤ ᠲᠠᠷᠢᠶᠠᠨ ᠢ᠋ ᠬᠠᠢᠷᠠᠯᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠲᠤᠯᠠ ᠬᠠᠮᠢᠭᠠ ᠬᠦᠷᠪᠡᠰᠦ ᠳᠠᠷᠤᠢ ᠰᠠᠩ ᠤ᠋ᠨ ᠠᠮᠤ ᠶ᠋ᠢ ᠠᠨᠤ ᠢᠷᠭᠡᠨ ᠳ᠋ᠦ᠍ᠷ ᠥᠭᠴᠦ ᠲᠡᠳᠡᠨ ᠦ᠌ ᠰᠡᠳᠬᠢᠯ ᠢ᠋ ᠢᠨᠦ ᠠᠪᠳᠠᠭ ᠠᠵᠤᠭᠤ ᠃ ᠬᠣᠢᠨᠠ ᠡᠮᠦᠨᠡ ᠤᠯᠤᠰ ᠤ᠋ᠨ ᠰᠤᠯᠠ ᠢᠷᠭᠡᠨ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠢ᠋ ᠬᠦᠰᠡᠬᠦᠢ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠢᠨᠤ ᠡᠨᠡ ᠤᠴᠢᠷ ᠲᠤᠷ ᠪᠣᠯᠠᠢ ᠃
ᠲᠡᠨᠳᠡᠴᠡ ᠰᠢᠶᠠ ᠤᠯᠤᠰ ᠤ᠋ᠨ ᠭᠣᠣ ᠯᠢᠩ ᠬᠦᠩ᠂ ᠰᠢᠪᠢᠱᠢ ᠨᠠᠷ ᠳᠤᠲᠠᠭᠠᠵᠤ᠂ ᠵᠦᠩ ᠰᠢᠩ ᠹᠦ ᠳ᠋ᠦ᠍ᠷ ᠬᠦᠷᠴᠦ ᠭᠣᠣ ᠯᠢᠩ ᠬᠦᠩ ᠶᠠᠯᠠ ᠬᠦᠯᠢᠶᠡᠨ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠰᠢᠶᠠ ᠤᠯᠤᠰ ᠤ᠋ᠨ ᠡᠵᠡᠨ ᠯᠢ ᠠᠨ ᠴᠢᠦᠸᠠᠨ ᠥᠭᠦᠯᠡᠷᠦᠨ :《ᠴᠡᠷᠢᠭ ᠦ᠋ᠨ ᠲᠠᠢᠯᠤᠨ ᠳᠡᠢᠯᠦᠭᠳᠡᠬᠦ ᠬᠡᠮᠡᠭᠴᠢ ᠡᠩ ᠦ᠋ᠨ ᠬᠡᠷᠡᠭ ᠂ ᠲᠦᠰᠢᠮᠡᠯ ᠴᠢ ᠳᠡᠢᠯᠦᠭᠳᠡᠰᠦᠭᠡᠢ ᠭᠡᠮᠡᠨ ᠰᠠᠨᠠᠬᠤ ᠪᠠᠷ ᠶᠠᠭᠤᠨ ᠪᠣᠢ ? ᠭᠠᠭᠴᠠ ᠲᠡᠭᠷᠢ ᠶ᠋ᠢᠨ ᠴᠠᠭ ᠢ᠋ ᠬᠡᠷᠬᠢᠬᠦ ? ᠡᠳᠦᠭᠡ ᠳᠥᠷᠪᠡᠨ ᠵᠦᠭ ᠦ᠋ᠨ ᠳᠥᠷᠪᠡᠨ ᠤᠯᠤᠰ ᠲᠤᠷ ᠡᠴᠢᠭᠡᠳ ᠨᠢᠭᠡᠬᠡᠨ ᠴᠡᠷᠢᠭ ᠬᠠᠭᠠᠰ ᠬᠤᠶᠠᠭ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ᠃ ᠪᠠᠷᠠᠭᠤᠨ ᠡᠲᠡᠭᠡᠳ ᠦ᠋ᠨ ᠪᠠᠭᠠ ᠤᠯᠤᠰ ᠤ᠋ᠨ ᠡᠵᠡᠳ ᠨᠠᠷ ᠮᠣᠩᠭᠣᠯ ᠠ᠋ᠴᠠ ᠠᠶᠤᠵᠤ ᠮᠠᠨ ᠳ᠋ᠤᠷ ᠴᠡᠷᠢᠭ ᠦᠯᠦ ᠲᠤᠰᠠᠯᠠᠬᠤ ᠠᠨᠤ ᠵᠥᠪ ᠬᠡᠮᠡᠬᠦᠢ ᠳ᠋ᠦ᠍ᠷ᠃ ᠭᠠᠭᠴᠠ ᠠᠯᠲᠠᠨ ᠤᠯᠤᠰ ᠬᠡᠮᠡᠭᠴᠢ ᠮᠠᠨ ᠤ᠋ ᠤᠯᠤᠰ ᠯᠤᠭᠠ ᠤᠷᠤᠭᠤᠯ ᠰᠢᠳᠦ ᠮᠡᠲᠦ ᠵᠢᠷᠠᠨ ᠣᠨ ᠢᠯᠡᠭᠦᠦ ᠬᠠᠨᠢᠯᠠᠨ ᠶᠠᠪᠤᠪᠠ᠃ ᠡᠳᠦᠭᠡ ᠪᠢ ᠮᠣᠩᠭᠣᠯ ᠳ᠋ᠤᠷ ᠠᠪᠲᠠᠪᠠᠰᠤ᠂ ᠠᠯᠲᠠᠨ ᠤᠯᠤᠰ ᠪᠠᠰᠠ ᠠᠮᠤᠷ ᠢ᠋ᠶ᠋ᠠᠷ ᠥᠩᠭᠡᠷᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠲᠠᠯᠠ ᠮᠠᠨ ᠢ᠋ ᠡᠨᠡ ᠮᠡᠲᠦ ᠦᠲᠡᠭᠡᠷᠪᠡ᠃ ᠡᠭᠦᠨ ᠢ᠋ ᠣᠳᠣ ᠬᠡᠷᠬᠢᠬᠦ ? 》ᠭᠡᠮᠡᠨ ᠵᠥᠪᠳᠡᠬᠦᠢ ᠳ᠋ᠦ᠍ᠷ ᠸᠧᠢ ᠮᠢᠩ ᠯᠢᠩ ᠬᠦᠩ ᠪᠡᠶᠡ ᠪᠡᠷ ᠡᠴᠢᠰᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠯᠢ ᠠᠨ ᠴᠢᠦᠸᠠᠨ ᠠᠷᠭᠠ ᠶ᠋ᠢ ᠲᠣᠭᠲᠠᠭᠠᠵᠤ ᠥᠭᠦᠯᠡᠷᠦᠨ: 《ᠪᠢ ᠨᠢᠭᠡᠨᠲᠡ ᠪᠣᠳᠣᠨ ᠲᠣᠭᠲᠠᠪᠠ᠃ ᠮᠠᠨ ᠤ᠋ ᠴᠡᠷᠢᠭ ᠰᠣᠴᠢᠮᠠᠭ ᠪᠣᠯᠤᠭᠰᠠᠨ ᠲᠤᠯᠠ ᠡᠳᠦᠭᠡ ᠬᠡᠳᠦᠢ ᠭᠤᠴᠢᠨ ᠲᠦᠮᠡᠨ ᠴᠡᠷᠢᠭ ᠪᠣᠯᠪᠠᠴᠤ ᠪᠠᠢᠯᠳᠤᠵᠤ ᠲᠡᠩᠴᠡᠬᠦ ᠦᠭᠡᠢ ᠢᠨᠦ ᠯᠠᠪ ᠪᠣᠯᠪᠠ᠃ ᠲᠡᠷᠡ ᠮᠡᠲᠦ ᠲᠠᠯᠠᠭᠠᠷ ᠬᠦᠴᠦᠨ ᠰᠦᠢᠳᠬᠡᠬᠦ ᠡᠴᠡ ᠰᠢᠭᠤᠳ ᠵᠥᠭᠡᠯᠡᠨ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠵᠦ᠂ ᠬᠡᠳᠦᠨ ᠵᠢᠯ ᠬᠦᠴᠦᠨ ᠢ᠋ᠶ᠋ᠡᠨ ᠲᠡᠵᠢᠭᠡᠵᠦ ᠴᠢᠯᠥᠭᠡ ᠭᠠᠷᠭᠠᠰᠤᠭᠠᠢ᠃ 》ᠭᠡᠮᠡᠨ ᠳᠠᠷᠤᠢ ᠯᠢᠦ ᠪᠦᠸᠧ ᠯᠢᠨ ᠢ᠋ ᠳᠠᠭᠤᠳᠠᠨ ᠠᠴᠢᠷᠠᠵᠤ ᠠᠷᠭᠠᠯᠠᠨ ᠮᠣᠩᠭᠣᠯ ᠳ᠋ᠤᠷ ᠳᠠᠭᠠᠬᠤ ᠪᠣᠳᠣᠷᠣᠣᠯ ᠪᠠᠷᠢᠭᠤᠯᠵᠤ ᠣᠯᠣᠭᠠᠢ ᠬᠣᠲᠠᠨ ᠳ᠋ᠤᠷ ᠢᠯᠡᠭᠡᠵᠦ᠂ ᠵᠢᠯ ᠪᠦᠷᠢ ᠲᠠᠪᠤᠨ ᠲᠦᠮᠡᠨ ᠵᠢᠩ ᠲᠡᠮᠦᠷ᠂ ᠲᠠᠪᠤᠨ ᠮᠢᠩᠭᠠᠨ ᠯᠠᠩ ᠮᠥᠩᠭᠥ᠂ ᠮᠢᠩᠭᠠᠨ ᠪᠠᠭᠴᠠ ᠲᠣᠷᠭᠠ᠂ ᠲᠦᠮᠡᠨ ᠠᠯᠲᠠ ᠪᠥᠰ ᠲᠤᠰᠢᠶᠠᠨ ᠥᠭᠴᠦ ᠵᠢᠯ ᠪᠦᠷᠢ ᠡᠨᠡ ᠶᠣᠰᠣᠨ ᠢ᠋ᠶ᠋ᠠᠷ ᠪᠠᠷᠢᠬᠤ ᠠᠯᠪᠠ ᠪᠣᠯᠭᠠᠨ ᠢᠯᠡᠭᠡᠪᠡ᠃
ᠲᠡᠳᠦᠢ ᠯᠢᠦ ᠪᠦᠸᠧ ᠯᠢᠨ ᠠᠷᠭᠠ ᠦᠭᠡᠢ ᠪᠣᠳᠣᠷᠣᠣᠯ ᠪᠢᠴᠢᠭ ᠢ᠋ ᠪᠠᠷᠢᠵᠤ ᠣᠯᠣᠭᠠᠢ ᠬᠣᠲᠠᠨ ᠳ᠋ᠤᠷ ᠡᠴᠢᠵᠦ ᠵᠢᠨᠦᠩ ᠮᠤᠬᠤᠯᠢ ᠳ᠋ᠤᠷ ᠵᠣᠯᠭᠠᠵᠤ᠂ ᠬᠠᠭᠠᠨ ᠳ᠋ᠤᠷ ᠪᠠᠷᠠᠭᠠᠳᠠᠨ ᠳᠠᠭᠠᠬᠤ ᠪᠣᠳᠣᠷᠣᠯ ᠪᠢᠴᠢᠭ ᠪᠠᠷᠢᠬᠤ ᠶ᠋ᠢ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠵᠢᠨᠦᠩ ᠮᠤᠬᠤᠯᠢ ᠳᠣᠲᠣᠷᠠ ᠣᠷᠣᠵᠤ ᠬᠠᠭᠠᠨ ᠳ᠋ᠤᠷ ᠡᠳᠡᠭᠡᠷ ᠰᠠᠨᠠᠭᠠᠨ ᠢ᠋ ᠭᠠᠷᠭᠠᠵᠤ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠬᠠᠭᠠᠨ ᠤ᠋ ᠭᠡᠭᠡᠨ ᠵᠠᠷᠯᠢᠭ ᠪᠣᠯᠤᠷᠤᠨ : 《ᠲᠡᠷᠡ ᠶᠠᠭᠤᠨᠠᠢ ᠦᠨᠡᠨ ᠠᠵᠢ ? ᠯᠠᠪ ᠬᠡᠳᠦᠨ ᠣᠨ ᠢ᠋ ᠥᠩᠭᠡᠷᠡᠭᠡᠬᠦ ᠬᠡᠷᠡᠭ ᠪᠣᠯᠠᠢ᠂ ᠡᠨᠡ ᠵᠠᠪᠰᠠᠷ ᠥᠪᠡᠷ ᠦ᠋ᠨ ᠬᠦᠴᠦᠨ ᠢ᠋ᠶ᠋ᠡᠨ ᠲᠡᠵᠢᠭᠡᠵᠦ ᠪᠣᠯᠪᠠᠰᠤᠷᠠᠭᠤᠯᠬᠤ ᠬᠡᠷᠡᠭ ᠪᠤᠰᠤ ᠬᠡᠮᠡᠮᠦᠢ ᠦᠦ ? 》ᠵᠢᠨᠦᠩ ᠮᠤᠬᠤᠯᠢ ᠠᠢᠯᠠᠳᠬᠠᠷᠤᠨ : 《ᠬᠠᠭᠠᠨ ᠤ᠋ ᠠᠢᠯᠠᠳᠤᠭᠰᠠᠨ ᠡᠨᠡ ᠮᠥᠨ ᠲᠡᠢᠮᠦ᠂ ᠭᠠᠭᠴᠠ ᠡᠳᠦᠭᠡ ᠳ᠋ᠦ᠍ᠷ ᠲᠡᠳᠡᠨ ᠢ᠋ ᠲᠣᠷᠭᠠᠵᠤ ᠠᠪᠤᠭᠠᠳ ᠬᠣᠵᠢᠮ ᠤᠷᠪᠠᠪᠠᠰᠤ ᠬᠠᠲᠠᠭᠤ ᠪᠠᠷ ᠳᠠᠢᠯᠠᠬᠤᠢ ᠳ᠋ᠤᠷ ᠲᠡᠷᠡ ᠥᠴᠢᠬᠦ ᠭᠠᠵᠠᠷ ᠦᠭᠡᠢ ᠪᠣᠯᠤᠮᠤᠢ᠃ ᠲᠦᠷ ᠲᠡᠳᠡᠨ ᠦ᠌ ᠮᠡᠬᠡ ᠳ᠋ᠦ᠍ᠷ ᠮᠡᠬᠡ ᠬᠡᠷᠡᠭᠯᠡᠨ ᠳᠠᠷᠤᠢ ᠤᠷᠠᠬᠠ ᠳ᠋ᠤᠷ ᠲᠣᠷᠭᠠᠭᠠᠨ ᠠᠪᠤᠭᠠᠳ ᠵᠢᠴᠢ ᠪᠣᠳᠣᠬᠤ ᠠᠨᠤ ᠶᠡᠬᠡ ᠠᠷᠭᠠ ᠪᠣᠯᠬᠤ ᠪᠣᠯᠪᠠ ᠤᠤ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠩᠭᠢᠰ ᠬᠠᠭᠠᠨ ᠶᠡᠬᠡᠯᠡ ᠮᠦᠰᠢᠶᠡᠵᠦ ᠵᠥᠪᠰᠢᠶᠡᠭᠡᠳ ᠳᠠᠷᠤᠢ ᠲᠣᠭᠲᠠᠭᠠᠪᠠ᠃ ᠲᠡᠳᠦᠢ ᠰᠢᠶᠠ ᠤᠯᠤᠰ ᠤ᠋ᠨ ᠡᠯᠴᠢ ᠯᠢᠦ ᠪᠦᠸᠧ ᠯᠢᠨ ᠢ᠋ ᠤᠳᠤᠷᠢᠳᠤᠨ ᠣᠷᠣᠭᠤᠯᠵᠤ᠂ ᠬᠠᠭᠠᠨ ᠤ᠋ ᠡᠮᠦᠨᠡ ᠰᠥᠭᠥᠳᠬᠡᠭᠰᠡᠨ ᠳ᠋ᠦ᠍ᠷ ᠯᠢᠦ ᠪᠦᠸᠧ ᠯᠢᠨ ᠠᠶᠤᠨ ᠴᠡᠴᠡᠷᠡᠨ ᠬᠢᠴᠢᠶᠡᠨ ᠪᠣᠯᠭᠣᠮᠵᠢᠯᠠᠨ ᠪᠣᠳᠣᠷᠣᠣᠯ ᠪᠢᠴᠢᠭ ᠢ᠋ ᠡᠷᠭᠦᠨ ᠪᠠᠷᠢᠵᠤ ᠤᠯᠤᠰ ᠤ᠋ᠨ ᠵᠣᠪᠠᠯᠠᠩ ᠢ᠋ ᠲᠣᠭᠠᠴᠢᠵᠤ᠂ ᠨᠢᠭᠡᠨ ᠤᠯᠤᠰ ᠤ᠋ᠨ ᠠᠮᠢᠳᠤᠷᠠᠯ ᠢ᠋ ᠭᠣᠶᠣᠬᠤᠢ ᠳ᠋ᠤᠷ ᠬᠠᠭᠠᠨ ᠥᠷᠥᠰᠢᠶᠡᠯ ᠪᠠᠭᠤᠯᠭᠠᠨ ᠪᠣᠳᠣᠷᠣᠣᠯ ᠪᠢᠴᠢᠭ ᠢ᠋ ᠲᠣᠭᠲᠠᠭᠠᠨ ᠠᠪᠴᠤ ᠢᠷᠡᠭᠰᠡᠨ ᠡᠯᠴᠢ ᠯᠢᠦ ᠪᠦᠸᠧ ᠯᠢᠨ ᠢ᠋ ᠦᠵᠡᠵᠦ ᠥᠭᠦᠯᠡᠷᠦᠨ : 《 ᠪᠢ ᠴᠢᠮᠠᠢ ᠦᠵᠡᠪᠡᠰᠦ ᠰᠢᠳᠤᠷᠭᠤ ᠨᠣᠮᠣᠬᠠᠨ ᠵᠢᠷᠤᠮᠲᠤ ᠬᠥᠮᠦᠨ᠂ ᠭᠠᠭᠴᠠ ᠬᠣᠢᠴᠢ ᠡᠳᠦᠷ ᠴᠢᠨᠦ ᠡᠵᠡᠨ ᠯᠠᠪ ᠦᠭᠡ ᠪᠡᠨ ᠨᠢᠴᠤᠵᠤ ᠴᠢᠮᠠᠢ ᠲᠡᠭᠷᠢ ᠭᠠᠵᠠᠷ ᠲᠤᠷ ᠤᠴᠠᠷᠠᠬᠤᠶᠠ ᠪᠡᠷᠬᠡ ᠪᠣᠯᠭᠠᠮᠤᠢ᠃ ᠮᠢᠨᠦ ᠡᠨᠡ ᠦᠭᠡ ᠶ᠋ᠢ ᠴᠢ ᠬᠢᠴᠢᠶᠡᠨ ᠲᠡᠮᠳᠡᠭᠯᠡ᠃ ᠪᠢ ᠨᠢᠭᠡᠨᠲᠡ ᠬᠠᠭᠠᠨ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠡᠭᠦᠷᠦᠭᠰᠡᠨ ᠲᠤᠯᠠ ᠬᠠᠭᠠᠨ ᠬᠥᠮᠦᠨ ᠦ᠌ ᠶᠠᠪᠤᠳᠠᠯ ᠢ᠋ ᠳᠠᠭᠤᠷᠢᠶᠠᠨ ᠳᠠᠭᠠᠭᠰᠠᠨ ᠢ᠋ ᠦᠯᠦ ᠳᠠᠷᠤᠯᠠᠮᠤᠢ !》ᠭᠡᠮᠡᠨ ᠠᠯᠪᠠ ᠶ᠋ᠢ ᠳᠠᠷᠤᠢ ᠬᠦᠯᠢᠶᠡᠨ ᠠᠪᠴᠤ ᠯᠢᠦ ᠪᠦᠸᠧ ᠯᠢᠨ ᠢ᠋ ᠬᠤᠷᠢᠮᠯᠠᠨ ᠱᠠᠩᠨᠠᠵᠤ᠂ ᠶᠡᠬᠡ ᠴᠡᠷᠢᠭ ᠢ᠋ ᠡᠭᠡᠵᠦ ᠪᠠᠭᠤᠬᠤᠶᠠ ᠯᠢᠦ ᠵᠦᠩ ᠯᠦ᠍ ᠪᠡᠷ ᠣᠯᠣᠭᠠᠢ ᠬᠣᠲᠠ ᠶ᠋ᠢ ᠰᠠᠬᠢᠭᠤᠯᠪᠠ᠃
ᠲᠡᠳᠦᠢ ᠢᠷᠡᠭᠰᠡᠨ ᠴᠡᠷᠢᠭ ᠶᠡᠬᠡᠯᠡ ᠲᠠᠢᠯᠵᠤ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠬᠡᠲᠦᠷᠬᠡᠶᠡ ᠣᠯᠵᠠᠯᠠᠨ ᠡᠭᠡᠬᠦᠢ ᠳ᠋ᠡᠭᠡᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠢᠵᠠᠭᠠᠷ ᠢ᠋ᠶ᠋ᠠᠷ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠡᠭᠡᠬᠦᠶᠡ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠥ᠋ᠩ ᠬᠠᠭᠠᠨ ᠳ᠋ᠤᠷ ᠰᠢᠶᠠ ᠤᠯᠤᠰ ᠤ᠋ᠨ ᠬᠠᠭᠠᠰ ᠣᠯᠵᠠ ᠶ᠋ᠢ ᠬᠦᠷᠭᠡᠵᠦ ᠥᠭᠬᠦᠢ ᠳ᠋ᠦ᠍ᠷ ᠵᠠᠩᠽᠥ᠋ᠩ ᠬᠠᠭᠠᠨ ᠤ᠋ ᠤᠭᠰᠠᠭᠠ ᠶ᠋ᠢᠨ ᠬᠥᠪᠡᠭᠦᠨ ᠸᠧᠢ ᠸᠠᠩ ᠶᠦᠩ ᠵᠢᠢ ᠵᠢᠩ ᠵᠧᠦ ᠬᠣᠲᠠᠨ ᠳ᠋ᠤᠷ ᠤᠭᠲᠤᠨ ᠢᠷᠡᠵᠦ᠂ ᠲᠠᠢᠽᠦ ᠬᠠᠭᠠᠨ ᠳ᠋ᠤᠷ ᠵᠣᠯᠭᠠᠭᠰᠠᠨ ᠳ᠋ᠤᠷ ᠴᠢᠩᠭᠢᠰ ᠬᠠᠭᠠᠨ ᠳᠡᠷᠭᠡᠳᠡ ᠪᠡᠨ ᠰᠠᠭᠤᠳᠠᠯ ᠴᠤ᠌ ᠥᠭᠭᠦᠭᠰᠡᠨ ᠦᠭᠡᠢ ᠪᠡᠷ ᠭᠠᠷᠭᠠᠭᠰᠠᠨ ᠳ᠋ᠤᠷ ᠸᠧᠢ ᠸᠠᠩ ᠶᠦᠩ ᠶ᠋ᠢᠢ ᠶᠡᠬᠡᠯᠡ ᠬᠣᠷᠣᠰᠤᠨ ᠠᠭᠤᠷᠯᠠᠵᠤ ᠬᠠᠷᠢᠵᠤ ᠢᠷᠡᠭᠡᠳ ᠵᠠᠩᠽᠥ᠋ᠩ ᠬᠠᠭᠠᠨ ᠳ᠋ᠤᠷ《ᠴᠢᠩᠭᠢᠰ ᠬᠠᠭᠠᠨ ᠤ᠋ ᠭᠠᠳᠠᠭᠠᠳᠤ ᠡᠯᠴᠢ ᠶ᠋ᠢ ᠬᠥᠩᠭᠡᠯᠡᠵᠦ ᠳᠣᠷᠣᠮᠵᠢᠯᠠᠬᠤ ᠪᠠ ᠲᠡᠭᠦᠨ ᠦ᠌ ᠶᠠᠪᠤᠬᠤ ᠶᠠᠷᠢᠬᠤ ᠡᠯᠡ ᠵᠦᠢᠯ ᠦ᠋ᠨ ᠬᠡᠷᠡᠭᠯᠡᠯ ᠴᠥᠮ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠬᠠᠭᠠᠨ ᠯᠤᠭᠠ ᠨᠢᠭᠡᠨ ᠠᠳᠠᠯᠢ᠂ ᠡᠰᠡ ᠳᠠᠢᠯᠠᠪᠠᠰᠤ ᠪᠣᠯᠬᠤ ᠦᠭᠡᠢ ᠪᠣᠯᠪᠠ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠩᠽᠥ᠋ᠩ ᠦᠭᠡ ᠶ᠋ᠢ ᠠᠪᠤᠭᠰᠠᠨ ᠦᠭᠡᠢ ᠥᠭᠦᠯᠡᠷᠦᠨ : 《ᠬᠣᠢᠲᠤ ᠤᠯᠤᠰ ᠤᠭ ᠠ᠋ᠴᠠ ᠥᠪᠡᠷᠡ ᠠᠢᠮᠠᠭ᠂ ᠡᠷᠲᠡᠨ ᠡᠴᠡ ᠡᠮᠦᠨᠡᠲᠦ ᠤᠯᠤᠰ ᠲᠤᠷ ᠳᠠᠭᠠᠭᠰᠠᠨ ᠦᠭᠡᠢ ᠡᠳᠦᠭᠡᠬᠢ ᠴᠢᠩᠭᠢᠰ ᠬᠠᠭᠠᠨ ᠬᠠᠷᠢᠨ ᠶᠣᠰᠣᠨ ᠤ᠋ ᠪᠡᠯᠡᠭ ᠢᠯᠡᠭᠡᠬᠦ ᠢᠨᠦ ᠬᠠᠷᠢᠨ ᠳᠦᠷᠢᠮ ᠪᠣᠯᠬᠤ ᠪᠥᠭᠡᠳ ᠲᠡᠷᠡ ᠵᠢᠴᠢ ᠳ᠋ᠦ᠍ᠷ ᠪᠠᠰᠠ ᠮᠠᠰᠢ ᠴᠢᠭᠢᠷᠠᠭ᠂ ᠬᠠᠯᠳᠠᠵᠤ ᠦᠯᠦ ᠪᠣᠯᠤᠮᠤᠢ 》ᠬᠡᠮᠡᠪᠡ᠃
ᠲᠡᠳᠦᠢ ᠸᠧᠢ ᠸᠠᠩ ᠶᠦᠩ ᠶ᠋ᠢᠢ ᠮᠣᠩᠭᠣᠯ ᠤᠯᠤᠰ ᠲᠤᠷ ᠬᠣᠶᠠᠷ ᠤᠳᠠᠭᠠ ᠨᠥᠬᠥᠷ ᠪᠣᠯᠵᠤ ᠦᠰ ᠠᠪᠬᠤ ᠰᠡᠳᠬᠢᠯ ᠢ᠋ ᠡᠪᠦᠷᠯᠡᠪᠡᠢ᠃ ᠲᠡᠭᠦᠨᠴᠡ ᠣᠯᠠᠨ ᠴᠡᠷᠢᠭ ᠮᠣᠷᠢᠨ ᠤ᠋ ᠳᠥᠷᠥᠭᠡ ᠪᠡᠨ ᠴᠣᠬᠢᠨ ᠳᠦᠷᠬᠢᠷᠡᠲᠡᠯᠡ ᠳᠠᠭᠤᠯᠠᠭᠰᠠᠭᠠᠷ ᠡᠭᠡᠵᠦ ᠢᠷᠡᠨ ᠤᠯᠤᠰ ᠤ᠋ᠨ ᠵᠠᠬᠠ ᠣᠷᠣᠮᠠᠭᠴᠠ ᠶᠡᠬᠡ ᠲᠠᠢᠽᠢ ᠵᠣ ᠴᠢᠨ ᠸᠠᠩ᠂ ᠬᠣᠶᠠᠳᠤᠭᠠᠷ ᠲᠠᠢᠽᠢ ᠴᠠ ᠴᠢᠨ ᠸᠠᠩ᠂ ᠲᠠᠪᠤᠨᠠᠩ ᠴᠡᠴᠡᠭ ᠣᠯᠠᠨ ᠪᠠᠭᠠ ᠰᠠᠢᠳ ᠢ᠋ ᠠᠪᠴᠤ ᠪᠠᠶᠠᠷ ᠤ᠋ᠨ ᠶᠣᠰᠣᠭᠠᠷ ᠮᠥᠷᠭᠥᠵᠦ ᠤᠭᠲᠤᠪᠠ᠃ ᠬᠣᠶᠠᠳᠤᠭᠠᠷ ᠣᠳᠤᠯᠭᠠᠨ ᠳ᠋ᠤᠷ ᠣᠢᠲᠤ ᠣᠴᠢᠭ ᠴᠢᠨ ᠸᠠᠩ᠂ ᠭᠠᠴᠤᠭ ᠴᠢᠨ ᠸᠠᠩ᠂ ᠳᠤᠮᠳᠠᠳᠤ ᠲᠠᠢᠹᠦ᠋ ᠲᠦᠰᠢᠮᠡᠳ ᠢ᠋ ᠠᠪᠴᠤ ᠮᠥᠷᠭᠥᠨ ᠤᠭᠲᠤᠪᠠ᠃ ᠬᠣᠲᠠᠨ ᠤ᠋ ᠭᠠᠳᠠᠨᠠ᠂ ᠳᠥᠷᠪᠡᠨ ᠲᠠᠢᠰᠢ ᠲᠠᠪᠤᠨ ᠭᠦᠸᠧ ᠯᠤᠤ ᠮᠥᠷᠭᠥᠵᠦ ᠤᠭᠲᠤᠪᠠ᠃ ᠣᠷᠳᠣᠨ ᠳ᠋ᠤᠷ ᠪᠠᠭᠤᠬᠤᠢ ᠳ᠋ᠤᠷ ᠳᠣᠲᠣᠭᠠᠳᠤ ᠭᠡᠷ ᠦ᠋ᠨ ᠡᠷᠬᠢᠯᠡᠭᠰᠡᠨ ᠰᠠᠢᠳ ᠮᠡᠩᠭᠡᠯᠢᠭ᠂ ᠬᠣᠷᠭᠣᠯᠵᠢ ᠬᠣᠶᠠᠭᠤᠯᠠ ᠮᠥᠷᠭᠥᠨ ᠤᠭᠲᠤᠪᠠ᠃ ᠲᠡᠳᠦᠢ ᠳᠣᠲᠣᠭᠠᠳᠤ ᠣᠷᠳᠣᠨ ᠳ᠋ᠤᠷ ᠣᠷᠣᠵᠤ᠂ ᠲᠠᠢᠬᠡᠦ ᠶ᠋ᠢᠨ ᠠᠮᠤᠭᠤᠯᠠᠩ ᠢ᠋ ᠡᠷᠢᠵᠦ ᠰᠢᠶᠠ ᠤᠯᠤᠰ ᠤ᠋ᠨ ᠳᠠᠭᠠᠭᠰᠠᠨ ᠢ᠋ ᠮᠡᠳᠡᠭᠦᠯᠵᠦ ᠰᠠᠶᠢ ᠥᠪᠡᠷ ᠦ᠋ᠨ ᠤᠷᠳᠣᠨᠠ ᠢᠷᠡᠲᠡᠯᠡ ᠬᠤᠸᠠᠩᠬᠡᠦ᠂ ᠭᠦᠩᠵᠦ᠂ ᠣᠯᠠᠨ ᠹᠧᠢ ᠨᠠᠷ ᠤᠭᠲᠤᠨ ᠮᠥᠷᠭᠥᠪᠡ᠃ ᠵᠢᠴᠢ ᠥᠷᠯᠥᠭᠡ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠤᠯᠤᠰ ᠲᠤᠷ ᠬᠣᠴᠣᠷᠤᠭᠰᠠᠨ ᠪᠠ ᠠᠶᠠᠨᠠ ᠳᠠᠭᠠᠭᠰᠠᠨ ᠵᠠᠩᠵᠤᠨ ᠴᠡᠷᠢᠭ ᠢ᠋ ᠱᠠᠩᠨᠠᠨ ᠡᠷᠭᠦᠮᠵᠢᠯᠡᠵᠦ ᠬᠥᠬᠢᠭᠦᠯᠬᠦᠶᠡ ᠴᠢᠪᠬᠢᠲᠡᠯᠡ ᠪᠤᠭᠤᠷᠵᠢ᠂ ᠵᠠᠯᠮᠠ᠂ ᠠᠨᠳᠠᠨ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠨᠠᠷ ᠬᠡᠯᠡᠯᠴᠡᠨ ᠴᠢᠯᠵᠢᠱ᠌ᠢ ᠤᠯᠤᠰ ᠤ᠋ᠨ ᠡᠵᠡᠨ ᠴᠠᠭᠠᠨ᠂ ᠢᠳᠢᠨᠡᠷ ᠤᠯᠤᠰ ᠤ᠋ᠨ ᠡᠵᠡᠨ ᠠᠰᠢᠭᠲᠤ᠂ ᠠᠯᠠᠭ ᠳᠡᠪᠡᠯᠲᠦ ᠤᠯᠤᠰ ᠤ᠋ᠨ ᠡᠵᠡᠨ ᠨᠠᠢᠷᠠᠯᠠ᠂ ᠡᠳᠡᠭᠡᠷ ᠭᠤᠷᠪᠠᠨ ᠤᠯᠤᠰ ᠳᠤᠷᠠᠲᠠᠶᠠ ᠰᠢᠶᠠ ᠤᠯᠤᠰ ᠲᠤᠷ ᠴᠡᠷᠢᠭ ᠦᠯᠦ ᠲᠤᠰᠠᠯᠠᠬᠤ ᠪᠠᠷ ᠦᠯᠦ ᠪᠠᠷᠠᠨ᠂ ᠬᠠᠷᠢᠨ ᠰᠢᠭᠤᠳ ᠮᠣᠩᠭᠣᠯ ᠤᠯᠤᠰ ᠲᠤᠷ ᠳᠠᠭᠠᠬᠤ ᠪᠣᠳᠣᠷᠣᠣᠯ ᠪᠢᠴᠢᠭ ᠪᠢᠴᠢᠭᠦᠯᠵᠦ᠂ ᠭᠤᠷᠪᠠᠨ ᠤᠯᠤᠰ ᠨᠡᠢᠲᠡ ᠪᠡᠷ ᠡᠮᠦᠨᠡ ᠡᠴᠡ ᠪᠡᠨ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠡᠯᠴᠢ ᠪᠣᠯᠭᠠᠨ ᠬᠦᠨᠳᠦ ᠠᠯᠪᠠ ᠪᠠᠷᠢᠵᠤ ᠮᠥᠷᠭᠥᠷᠡ ᠢᠯᠡᠭᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠶᠡᠬᠡᠯᠡ ᠪᠠᠶᠠᠷᠯᠠᠨ᠂ ᠪᠤᠭᠤᠷᠵᠢ᠂ ᠵᠡᠯᠮᠡ᠂ ᠠᠨᠳᠠᠨ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠨᠠᠷ ᠯᠤᠭᠠ ᠭᠠᠳᠠᠭᠠᠳᠤ ᠰᠢᠨᠡ ᠳᠠᠭᠠᠭᠰᠠᠨ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠲᠡᠷᠢᠭᠦᠯᠡᠭᠰᠡᠨ ᠲᠠᠢᠹᠦ᠋ ᠲᠦᠰᠢᠮᠡᠳ ᠢ᠋ ᠠᠪᠴᠤ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠬᠠᠭᠠᠨ ᠳ᠋ᠤᠷ ᠪᠠᠷᠠᠯᠬᠢᠯᠠᠨ ᠮᠥᠷᠭᠥᠭᠦᠯᠵᠦ᠂ ᠤᠯᠤᠰ ᠪᠦᠷᠢ ᠶ᠋ᠢᠨ ᠡᠮᠦᠨᠡ ᠡᠴᠡ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠮᠢᠩᠭᠠᠨ ᠠᠴᠢᠶᠠ ᠪᠡᠯᠡᠭ ᠢ᠋ ᠡᠷᠭᠦᠵᠦ᠂ ᠪᠣᠳᠣᠷᠣᠣᠯ ᠪᠢᠴᠢᠭ ᠢ᠋ ᠪᠠᠷᠢᠭᠤᠯᠤᠨ ᠬᠦᠨᠳᠦ ᠪᠡᠯᠡᠭ ᠢ᠋ ᠴᠥᠮ ᠲᠡᠭᠷᠢ ᠭᠠᠵᠠᠷ᠂ ᠨᠠᠷᠠᠨ ᠰᠠᠷᠠᠨ ᠳ᠋ᠤᠷ ᠦᠵᠡᠭᠦᠯᠵᠦ ᠳᠡᠯᠭᠡᠨ ᠳᠣᠯᠣᠭᠠᠨ ᠡᠳᠦᠷ ᠪᠣᠯᠭᠠᠵᠤ ᠬᠣᠷᠢᠶᠠᠨ ᠠᠪᠤᠭᠤᠯᠪᠠ᠃ ᠢᠷᠡᠭᠰᠡᠨ ᠡᠯᠴᠢ ᠶ᠋ᠢ ᠬᠠᠭᠠᠨ ᠤ᠋ ᠭᠡᠭᠡᠨ ᠰᠠᠢᠨ ᠦᠭᠡ ᠪᠡᠷ ᠬᠥᠬᠢᠭᠡᠨ ᠰᠠᠢᠰᠢᠶᠠᠵᠤ ᠬᠦᠨᠳᠦ ᠬᠤᠷᠢᠮ ᠦᠯᠡᠮᠵᠢ ᠱᠠᠩ ᠥᠭᠪᠡ᠃ ᠢᠳᠢᠨᠡᠷ ᠤᠯᠤᠰ᠂ ᠠᠯᠠᠭ ᠳᠡᠪᠡᠯᠲᠦ ᠤᠯᠤᠰ ᠠ᠋ᠴᠠ ᠨᠡᠷᠡᠲᠦ ᠭᠠᠢᠬᠠᠮᠰᠢᠭᠲᠠᠢ ᠬᠠᠷᠴᠠᠭᠠᠢ ᠰᠢᠪᠠᠭᠤ ᠪᠠᠷᠢᠪᠠ᠃ ᠦᠵᠡᠰᠡ ᠲᠡᠷᠡ ᠬᠣᠶᠠᠷ ᠤᠯᠤᠰ ᠤ᠋ᠨ ᠠᠭᠤᠯᠠ ᠬᠠᠳᠠ ᠮᠣᠳᠣ ᠰᠢᠷᠣᠢ ᠬᠠᠲᠠᠭᠤ ᠲᠤᠯᠠ ᠨᠡᠷᠡᠲᠡᠢ ᠬᠠᠷᠴᠠᠭᠠᠢ ᠭᠠᠷᠳᠠᠭ ᠠᠵᠤᠭᠤ᠃ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠶᠡᠬᠡᠯᠡ ᠪᠡᠶᠡᠰᠴᠦ ᠬᠦᠨᠳᠦ ᠬᠠᠷᠢᠭᠤ ᠪᠡᠯᠡᠭ ᠢᠯᠡᠭᠡᠪᠡ᠃ ᠲᠡᠳᠦᠢ ᠲᠠᠪᠤᠨ ᠲᠠᠢᠰᠢ᠂ ᠳᠥᠷᠪᠡᠨ ᠲᠠᠢᠹᠦ᠋᠂ ᠵᠢᠷᠭᠤᠭᠠᠨ ᠲᠠᠢᠪᠤᠤ ᠨᠠᠷ ᠪᠠᠶᠠᠷ ᠤ᠋ᠨ ᠶᠣᠰᠣᠭᠠᠷ ᠮᠥᠷᠭᠥᠵᠦ ᠠᠢᠯᠠᠳᠬᠠᠷᠤᠨ :
ᠦᠨᠡᠨ ᠡᠵᠡᠨ ᠰᠠᠭᠤᠷᠢᠨ ᠳ᠋ᠤᠷ ᠰᠠᠭᠤᠭᠰᠠᠨ ᠤ᠋ ᠤᠴᠢᠷ ᠲᠤᠷ
ᠥᠪᠡᠷᠡ ᠤᠯᠤᠰ ᠨᠡᠷᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠡᠨᠡᠷᠢᠨ ᠳᠠᠭᠠᠵᠤ ᠢᠷᠡᠮᠦᠢ᠂
ᠡᠳᠡᠭᠡᠷ ᠴᠥᠮ ᠰᠡᠳᠬᠢᠯ ᠡᠴᠡ ᠪᠢᠰᠢᠷᠡᠨ ᠳᠠᠭᠠᠭᠰᠠᠨ ᠤ᠋ ᠲᠤᠯᠠᠳᠠ
ᠡᠷᠬᠡ ᠪᠡᠷ ᠳᠠᠭᠤᠯᠠᠨ ᠲᠠᠯᠠ ᠶ᠋ᠢᠨ ᠡᠪᠡᠰᠦᠨ ᠡᠴᠡ ᠪᠠᠲᠤ ᠪᠤᠶᠤ᠃
ᠲᠡᠳᠦᠢ ᠪᠠᠶᠠᠰᠬᠤᠯᠠᠩ ᠤ᠋ᠨ ᠬᠤᠷᠢᠮ ᠬᠤᠷᠢᠮᠯᠠᠵᠤ ᠪᠤᠭᠤᠷᠵᠢ ᠶ᠋ᠢ ᠵᠠᠯᠠᠨ᠂ ᠠᠨᠳᠠᠨ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠨᠠᠷ ᠲᠤ᠌ ᠬᠦᠨᠳᠦ ᠱᠠᠩ ᠥᠭᠴᠦ ᠬᠠᠭᠠᠨ ᠤ᠋ ᠭᠡᠭᠡᠨ ᠮᠣᠳᠣᠷ ᠢ᠋ᠶ᠋ᠠᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠬᠥᠬᠢᠭᠦᠯᠦᠨ ᠰᠠᠢᠰᠢᠶᠠᠪᠠ᠃ ᠤᠳᠠᠭᠰᠠᠨ ᠦᠭᠡᠢ ᠭᠤᠷᠪᠠᠨ ᠶᠢᠰᠦ ᠶ᠋ᠢᠨ ᠬᠦᠢᠲᠡᠨ ᠣᠷᠣᠵᠤ᠂ ᠪᠠᠰᠠ ᠰᠢᠨᠡ ᠬᠠᠪᠤᠷ ᠪᠣᠯᠤᠭᠰᠠᠨ ᠳ᠋ᠤᠷ ᠡᠨᠡ ᠬᠤᠷᠢᠮ ᠳ᠋ᠤᠷ ᠨᠠᠢ᠍ᠮᠠᠨ ᠤ᠋ ᠠᠯᠲᠠᠨᠱᠠᠭᠠ ᠮᠥᠨ ᠢᠷᠡᠵᠦ᠂ ᠲᠠᠢᠰᠢ᠂ ᠲᠠᠢᠹᠦ᠋᠂ ᠲᠠᠢᠪᠤᠤ ᠨᠠᠷ ᠢᠷᠡᠵᠦ ᠨᠢᠭᠡᠨ ᠵᠦᠢᠯ ᠦ᠋ᠨ ᠴᠢᠬᠤᠯᠠ ᠬᠡᠷᠡᠭ ᠢ᠋ ᠡᠷᠭᠦᠨ ᠠᠢᠯᠠᠳᠬᠠᠪᠠ᠃ ᠶᠠᠮᠪᠠᠷ ᠬᠡᠷᠡᠭ ᠢ᠋ ᠮᠡᠳᠡᠰᠦᠭᠡᠢ ᠬᠡᠮᠡᠪᠡᠰᠦ ᠡᠨᠡ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠭᠤᠴᠢᠨᠠ ᠬᠠᠷᠠ ᠡᠭᠦᠯᠡ ᠪᠤᠷᠬᠢᠷᠠᠨ ᠰᠠᠯᠬᠢᠨ ᠳᠡᠭᠳᠡᠵᠦ᠂ ᠲᠡᠭᠷᠢ ᠶ᠋ᠢᠨ ᠳᠠᠭᠤᠨ ᠳᠣᠯᠭᠢᠰᠤᠨ ᠶᠡᠬᠡ ᠳᠣᠭᠰᠢᠨ ᠬᠤᠷᠠ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠡᠬᠡ ᠲᠡᠢ ᠲᠡᠢ ᠶ᠋ᠢᠨ ᠰᠣᠴᠢᠬᠤ ᠶ᠋ᠢ ᠪᠣᠯᠭᠣᠮᠵᠢᠯᠠᠨ ᠳᠡᠷᠭᠡᠳᠡ ᠡᠴᠢᠵᠦ ᠡᠭᠡᠵᠦ ᠢᠷᠡᠭᠡᠳ ᠵᠠᠯᠠᠭᠠᠨ ᠪᠢᠴᠢᠭᠰᠡᠨ ᠳ᠋ᠦ᠍ᠷ ᠦᠵᠡᠭᠳᠡᠪᠡᠢ᠃
ᠰᠤᠳᠤᠷᠴᠢ ᠲᠦᠰᠢᠮᠡᠯ ᠦ᠋ᠨ ᠰᠤᠯᠠ ᠰᠢᠯᠦᠭ ᠢᠨᠤ :
ᠬᠥᠮᠦᠨ ᠦ᠌ ᠡᠵᠡᠨ ᠪᠣᠭᠳᠠ ᠬᠠᠭᠠᠨ ᠬᠥᠬᠡ ᠮᠣᠩᠭᠣᠯ ᠢ᠋ ᠮᠠᠨᠳᠤᠭᠤᠯᠤᠷᠤᠨ
ᠬᠥᠪᠡᠭᠦᠳ ᠢ᠋ ᠬᠥᠮᠦᠵᠢᠭᠦᠯᠦᠨ ᠥᠬᠢᠳ ᠢ᠋ ᠬᠣᠯᠪᠣᠵᠤ ᠬᠦᠨᠳᠦ ᠭᠠᠪᠢᠶᠠ ᠶ᠋ᠢ ᠢᠯᠡᠳᠬᠡᠮᠦᠢ᠂
ᠬᠦᠷᠦᠭᠰᠡᠨ ᠪᠦᠬᠦᠨ ᠢ᠋ ᠨᠡᠢᠭᠡᠮᠯᠡᠨ ᠬᠤᠷᠢᠶᠠᠵᠤ ᠠᠭᠤᠯᠠ ᠳᠠᠯᠠᠢ ᠶ᠋ᠢ ᠨᠢᠭᠡᠳᠬᠡᠷᠦᠨ
ᠬᠦᠴᠦᠲᠦ ᠤᠯᠤᠰ ᠲᠤᠷ ᠰᠦᠷ ᠢ᠋ ᠵᠠᠷᠯᠠᠨ ᠬᠥᠭᠡᠷᠦᠬᠦᠢ ᠠᠢᠮᠠᠭ ᠤ᠋ᠳ ᠢ᠋ ᠢᠯᠪᠢᠯᠬᠢᠯᠡᠮᠦᠢ᠃