ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ <ᠭᠤᠴᠢᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ > Хөх судар - Инжинаш <Гучин тавдугаар бүлэг >
378ᠣᠮᠣᠭᠲᠤ ᠠᠷᠰᠯᠠᠨ ᠴᠠᠰ ᠠᠭᠤᠯᠠ ᠪᠠᠨ ᠲᠡᠪᠴᠢᠵᠦ ᠤᠯᠠᠭᠠᠨ ᠨᠠᠷᠠᠨ ᠢ᠋ ᠪᠠᠷᠢᠷᠠ ᠲᠡᠪᠬᠡᠯᠡᠪᠡ
ᠣᠶᠤᠨᠲᠤ ᠮᠤᠬᠤᠯᠢ ᠬᠠᠷᠠ ᠬᠢᠭᠦᠯ ᠳ᠋ᠦ᠍ᠷ ᠪᠠᠭᠤᠳᠠᠯᠯᠠᠵᠤ ᠴᠠᠭᠠᠨ ᠴᠡᠰᠤᠨᠠ ᠪᠠᠢᠯᠳᠤᠷᠠ ᠭᠠᠷᠪᠠ
ᠭᠤᠴᠢᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ
ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠦ᠋ᠩ ᠬᠠᠭᠠᠨ ᠤ᠋ ᠵᠢᠶᠠ ᠲᠠᠢ ᠶ᠋ᠢᠨ ᠳᠥᠷᠪᠡᠳᠦᠭᠡᠷ ᠣᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠤ᠋
ᠲᠠᠢ ᠾᠧ ᠶ᠋ᠢᠨ ᠳᠥᠷᠪᠡᠳᠦᠭᠡᠷ ᠣᠨ ᠂ ᠬᠥᠬᠡ ᠬᠤᠯᠤᠭᠠᠨᠠ ᠵᠢᠯ ᠂ ᠲᠠᠢᠽᠦ ᠳᠥᠴᠢᠨ ᠭᠤᠷᠪᠠᠨ ᠰᠡᠭᠦᠳᠡᠷ ᠲᠡᠢ
ᠣᠮᠣᠭᠲᠤ ᠠᠷᠰᠯᠠᠨ ᠴᠠᠰ ᠠᠭᠤᠯᠠ ᠪᠠᠨ ᠲᠡᠪᠴᠢᠵᠦ ᠤᠯᠠᠭᠠᠨ ᠨᠠᠷᠠᠨ ᠢ᠋ ᠪᠠᠷᠢᠷᠠ ᠲᠡᠪᠬᠡᠯᠡᠪᠡ
ᠣᠶᠤᠨᠲᠤ ᠮᠤᠬᠤᠯᠢ ᠬᠠᠷᠠ ᠬᠢᠭᠦᠯ ᠳ᠋ᠦ᠍ᠷ ᠪᠠᠭᠤᠳᠠᠯᠯᠠᠵᠤ ᠴᠠᠭᠠᠨ ᠴᠡᠰᠤᠨᠠ ᠪᠠᠢᠯᠳᠤᠷᠠ ᠭᠠᠷᠪᠠ
ᠲᠡᠨᠳᠡᠴᠡ ᠠᠷᠰᠯᠠᠨ ᠬᠠᠭᠠᠨ ᠴᠠᠰ ᠠᠭᠤᠯᠠ ᠶ᠋ᠢ ᠪᠠᠢᠯᠳᠤᠭᠠᠨ ᠤ᠋ ᠪᠢᠴᠢᠭ ᠪᠠᠷᠢᠭᠤᠯᠵᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠢᠯᠡᠭᠡᠬᠦᠢ ᠳ᠋ᠦ᠍ᠷ ᠴᠠᠰ ᠠᠭᠤᠯᠠ ᠬᠦᠯᠢᠶᠡᠨ ᠠᠪᠴᠤ ᠢᠨᠢᠶᠡᠨ ᠮᠡᠳᠡᠭᠦᠯᠦᠷᠦᠨ :《 ᠡᠵᠡᠨ ᠲᠦᠰᠢᠮᠡᠯ ᠨᠠᠮᠠᠶ᠋ᠢ ᠠᠯᠠᠪᠠᠰᠤ ᠪᠠᠷᠠᠬᠤ ᠪᠣᠯᠠᠢ᠂ ᠣᠨᠴᠠ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠢᠯᠡᠭᠡᠵᠦ ᠡᠭᠡᠵᠦ ᠢᠷᠡᠭᠰᠡᠨ ᠬᠣᠢᠨᠠ ᠠᠯᠠᠬᠤ ᠠᠨᠤ ᠢᠯᠡᠭᠦᠴᠡ ᠬᠡᠷᠡᠭ᠃ ᠨᠡᠩ ᠪᠠᠰᠠ ᠬᠣᠢᠴᠢ ᠡᠳᠦᠷ ᠡᠩ ᠦ᠋ᠨ ᠬᠥᠮᠦᠨ ᠢ᠋ ᠡᠨᠡ ᠮᠡᠲᠦ ᠵᠠᠷᠤᠬᠤ ᠠᠨᠤ ᠦᠯᠦ ᠪᠣᠯᠬᠤ᠃ ᠲᠡᠷᠡ ᠬᠣᠶᠠᠷ ᠲᠡᠰᠢ ᠴᠥᠮ ᠠᠯᠠᠭᠳᠠᠬᠤ ᠲᠤᠯᠠ ᠰᠢᠭᠤᠳ ᠤᠷᠪᠠᠬᠤ ᠠᠨᠤ ᠨᠢᠭᠡᠨᠲᠡ ᠲᠣᠭᠲᠠᠭᠰᠠᠨ ᠬᠡᠷᠡᠭ᠂ ᠡᠨᠡ ᠢᠨᠦ ᠡᠵᠡᠨ ᠥᠪᠡᠷ ᠦ᠋ᠨ ᠲᠦᠰᠢᠮᠡᠯ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠰᠢᠬᠠᠮᠳᠠᠭᠤᠯᠤᠨ ᠤᠷᠪᠠᠭᠤᠯᠬᠤ ᠬᠡᠷᠡᠭ᠂ ᠡᠵᠡᠨ ᠦ᠌ ᠰᠠᠨᠠᠭᠠᠨ ᠳ᠋ᠤᠷ ᠲᠦᠰᠢᠮᠡᠯ ᠨᠠᠮᠠᠶ᠋ᠢ ᠪᠧᠲ᠋ᠠ᠋ ᠤᠯᠤᠰ ᠢ᠋ᠶ᠋ᠠᠷ ᠠᠯᠠᠭᠤᠯᠵᠤ᠂ ᠴᠡᠷᠢᠭ ᠦ᠋ᠨ ᠳᠡᠢᠯᠬᠦ ᠳᠡᠢᠯᠦᠭᠳᠡᠬᠦ ᠶ᠋ᠢ ᠪᠦᠦ ᠦᠵᠡᠭᠦᠯᠰᠦᠭᠡᠢ ᠬᠡᠮᠡᠭᠰᠡᠨ ᠰᠠᠨᠠᠭᠠᠨ᠃ ᠪᠧᠲ᠋ᠠ᠋ ᠤᠯᠤᠰ ᠬᠡᠷᠬᠢᠪᠡᠴᠦ ᠲᠦᠰᠢᠮᠡᠯ ᠨᠠᠮᠠᠶ᠋ᠢ ᠠᠯᠠᠬᠤ ᠦᠭᠡᠢ᠃ ᠲᠡᠷᠡ ᠬᠡᠮᠡᠭᠴᠢ ᠶᠡᠬᠡ ᠰᠠᠨᠠᠭᠠᠨ ᠠᠬᠤᠭᠤᠯᠬᠤ ᠤᠯᠤᠰ᠂ ᠥᠴᠦᠬᠡᠨ ᠠᠭᠤᠷ ᠢ᠋ ᠦᠯᠦ ᠲᠡᠮᠡᠴᠡᠮᠦᠢ᠂ ᠡᠭᠡᠵᠦ ᠢᠷᠡᠭᠰᠡᠨ ᠬᠣᠢᠨᠠ ᠡᠵᠡᠨ ᠴᠢ ᠠᠯᠠᠲᠤᠭᠠᠢ!》ᠭᠡᠮᠡᠨ ᠪᠢᠴᠢᠭ ᠢ᠋ ᠡᠭᠦᠷᠴᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠢᠷᠡᠪᠡ᠃ ᠦᠨᠡᠨ ᠬᠦ᠌ ᠮᠡᠷᠭᠡᠨ ᠪᠧᠲ᠋ᠠ᠋ ᠤᠯᠤᠰ ᠶᠠᠭᠠᠬᠢᠨ ᠤᠭᠲᠤᠵᠤ ᠮᠡᠳᠡᠪᠡ ? ᠬᠡᠮᠡᠪᠡᠰᠦ ᠲᠠᠢᠯᠤᠨ ᠮᠡᠳᠡᠭᠦᠯᠬᠦ ᠶ᠋ᠢ ᠰᠣᠨᠣᠰ : ᠡᠨᠡ ᠬᠠᠷᠯᠢᠭᠤᠳ ᠤᠯᠤᠰ ᠤ᠋ᠨ ᠠᠷᠰᠯᠠᠨ ᠬᠠᠭᠠᠨ ᠢ᠋ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠮᠤᠬᠤᠯᠢ ᠬᠡᠳᠦᠢᠨᠡᠢ ᠰᠡᠵᠢᠭᠯᠡᠵᠦ᠂ ᠬᠣᠶᠠᠷ ᠣᠨ ᠤ᠋ ᠤᠷᠢᠳ ᠳᠠᠷᠤᠢ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠬᠠᠷᠠᠭᠤᠯ ᠪᠠᠢᠭᠤᠯᠵᠤ᠂ ᠪᠠᠰᠠ ᠡᠳ᠋ ᠢ᠋ᠶ᠋ᠡᠷ ᠬᠠᠷᠯᠢᠭᠤᠳ ᠤᠯᠤᠰ ᠤ᠋ᠨ ᠳᠣᠲᠣᠷᠠᠬᠢ ᠬᠡᠳᠦᠨ ᠪᠠᠭᠠ ᠲᠦᠰᠢᠮᠡᠳ ᠯᠦ᠋ᠭᠡ ᠬᠠᠨᠢᠯᠠᠭᠤᠯᠤᠨ ᠶᠠᠪᠤᠯᠴᠠᠭᠤᠯᠵᠤ᠂ ᠡᠳᠦᠭᠡ ᠪᠠᠰᠠ ᠵᠡᠭᠦᠨ ᠭᠣᠷᠯᠣᠰ ᠤ᠋ᠨ ᠡᠵᠡᠨ ᠨᠠᠷᠠᠨ ᠬᠠᠭᠠᠨ ᠢ᠋ ᠤᠯᠤᠰ ᠤ᠋ᠨ ᠵᠠᠬᠠ ᠬᠠᠷᠠ ᠬᠢᠭᠦᠯ ᠳ᠋ᠦ᠍ᠷ ᠬᠠᠷᠠᠭᠤᠯ ᠪᠣᠯᠭᠠᠨ ᠰᠠᠭᠤᠯᠭᠠᠵᠤ᠂ ᠡᠭᠦᠷᠢᠳᠡ ᠬᠡᠳᠦᠨ ᠲᠡᠩᠰᠡᠭᠦᠯ ᠢ᠋ ᠬᠠᠷᠯᠢᠭᠤᠳ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠴᠢᠮᠡᠭᠡ ᠠᠪᠤᠭᠤᠯᠵᠤ ᠪᠠᠢᠭᠰᠠᠨ ᠲᠤᠯᠠ ᠡᠳᠦᠭᠡ ᠬᠠᠷᠯᠢᠭᠤᠳ ᠤᠯᠤᠰ ᠲᠠᠩᠭᠤᠳ ᠤ᠋ᠨ ᠡᠯᠴᠢ ᠶ᠋ᠢ ᠪᠠᠷᠢᠭᠰᠠᠨ ᠢ᠋ ᠰᠣᠨᠣᠰᠴᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠲᠡᠩᠰᠡᠭᠦᠯ ᠳᠠᠷᠤᠢ ᠬᠠᠷᠯᠢᠭᠤᠳ ᠤᠯᠤᠰ ᠤ᠋ᠨ ᠵᠠᠬᠠ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ ᠰᠤᠷᠠᠭᠯᠠᠨ ᠪᠥᠬᠥᠶᠡ᠂ ᠲᠠᠩᠭᠤᠳ ᠤ᠋ᠨ ᠡᠯᠴᠢ ᠶ᠋ᠢ ᠠᠯᠠᠭᠰᠠᠨ ᠦᠭᠡᠢ ᠲᠠᠯᠪᠢᠨ ᠭᠠᠷᠭᠠᠪᠠ ᠭᠡᠮᠡᠨ ᠶᠠᠭᠠᠷᠠᠨ ᠵᠠᠮ ᠲᠣᠰᠴᠤ ᠤᠴᠢᠷ ᠢ᠋ ᠠᠰᠠᠭᠤᠵᠤ ᠣᠯᠤᠭᠠᠳ ᠳᠠᠭᠠᠯᠳᠤᠭᠠ ᠴᠡᠷᠢᠭ ᠭᠠᠷᠤᠮᠤᠢ ᠭᠡᠮᠡᠨ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠪᠠᠷᠢᠭᠰᠠᠨ ᠢ᠋ ᠴᠥᠮ ᠣᠯᠵᠤ ᠰᠣᠨᠣᠰᠤᠮᠠᠭᠴᠠ ᠡᠨᠡ ᠬᠡᠷᠡᠭ ᠶᠡᠬᠡᠳᠡ ᠪᠠᠴᠢᠮ ᠢ᠋ ᠮᠡᠳᠡᠭᠡᠳ ᠳᠠᠷᠤᠢ ᠳᠣᠪᠲᠣᠯᠤᠨ ᠢᠷᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠬᠠᠭᠠᠰ ᠰᠥᠨᠢ ᠪᠣᠳᠣᠭᠠᠳ ᠠᠷᠭᠠ ᠲᠣᠭᠲᠠᠭᠠᠵᠤ᠂ ᠮᠡᠳᠡᠭᠡ ᠪᠠᠷᠢᠭᠰᠠᠨ ᠲᠤᠷᠰᠢᠭᠤᠯ ᠳ᠋ᠤᠷ ᠬᠦᠨᠳᠦ ᠱᠠᠩ ᠥᠭᠴᠦ ᠡᠭᠡᠭᠦᠯᠦᠨ ᠢᠯᠡᠭᠡᠵᠦ᠄《ᠲᠡᠳᠡᠨ ᠦ᠌ ᠴᠡᠷᠢᠭ ᠮᠣᠷᠳᠠᠨ ᠭᠠᠷᠬᠤ ᠡᠳᠦᠷ ᠢ᠋ ᠯᠠᠪᠲᠠᠢ ᠰᠣᠨᠣᠰᠴᠤ ᠤᠷᠢᠳᠠ ᠪᠠᠷ ᠢᠷᠡ᠂ ᠪᠢᠳᠡ ᠤᠭᠲᠤᠵᠤ ᠵᠣᠯᠭᠠᠭᠠᠳ ᠲᠡᠭᠦᠨ ᠦ᠌ ᠬᠡᠷᠡᠭᠯᠡᠭᠰᠡᠨ ᠠᠷᠭᠠ ᠶ᠋ᠢ ᠬᠣᠭᠣᠰᠣᠳᠠᠭᠤᠯᠤᠨ ᠵᠠᠪᠬᠠᠷᠠᠭᠤᠯᠵᠤ ᠠᠭᠤᠷ ᠢ᠋ ᠠᠨᠤ ᠬᠦᠷᠦᠭᠦᠯᠦᠨ ᠤᠳᠤᠷᠢᠳᠤᠨ ᠪᠠᠢᠯᠳᠤᠵᠤ ᠡᠪᠳᠡᠰᠦᠭᠡᠢ !》ᠭᠡᠮᠡᠨ ᠶᠠᠪᠤᠭᠤᠯᠵᠤ᠂ ᠳᠠᠷᠤᠢ ᠲᠣᠷᠭᠠᠨ ᠰᠢᠷᠠ᠂ ᠲᠠᠢ ᠰᠡᠴᠡᠨ᠂ ᠪᠤᠭᠤᠷᠵᠢ ᠨᠠᠷ ᠢ᠋ ᠬᠦᠯᠢᠶᠡᠵᠦ ᠲᠠᠢᠽᠦ ᠶ᠋ᠢᠨ ᠲᠠᠭᠲᠤ ᠳ᠋ᠤᠷ ᠢᠷᠡᠵᠦ ᠥᠷᠯᠥᠭᠡ ᠪᠠᠷᠠᠭᠠᠳᠠᠨ ᠬᠠᠷᠯᠢᠭᠤᠳ ᠤ᠋ᠨ ᠠᠷᠰᠯᠠᠨ ᠬᠠᠭᠠᠨ ᠤ᠋ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ ᠮᠡᠳᠡᠭᠦᠯᠵᠦ᠂ ᠵᠠᠬᠢᠶᠠ ᠬᠦᠯᠢᠶᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠪᠠᠬᠠᠨ ᠮᠦᠰᠢᠶᠡᠵᠦ ᠥᠭᠦᠯᠡᠷᠦᠨ :《ᠠᠷᠰᠯᠠᠨ ᠤ᠋ ᠬᠦᠴᠦᠨ ᠶᠢᠯᠸᠢ᠍ᠰ ᠬᠤᠪᠢᠯᠭᠠᠨ ᠲᠠᠢ ᠮᠡᠲᠦ ᠪᠥᠭᠡᠲᠡᠯᠡ ᠠᠷᠭᠠ ᠮᠡᠬᠡ ᠪᠡᠷ ᠢ᠋ᠶ᠋ᠡᠨ ᠠᠯᠠᠭ ᠪᠥᠮᠪᠥᠭᠡ ᠯᠦ᠋ᠭᠡ ᠨᠠᠭᠠᠳᠤᠮᠤᠢ᠃ ᠠᠭᠤᠷ ᠬᠦᠷᠪᠡᠰᠦ ᠨᠠᠷᠠᠨ ᠰᠠᠷᠠᠨ ᠢ᠋ ᠵᠠᠯᠭᠢᠮᠤᠢ ᠭᠡᠮᠡᠨ ᠦᠰᠦᠷᠦᠭᠰᠡᠭᠡᠷ ᠠᠳᠤᠭᠤᠰᠤᠨ ᠤ᠋ ᠪᠡᠶᠡ ᠪᠡᠨ ᠠᠰᠢᠳᠠ ᠪᠠᠯᠪᠠᠯᠠᠳᠠᠭ ᠪᠢᠰᠢ ᠦᠦ ? ᠨᠡᠩ ᠪᠠᠰᠠ ᠨᠢᠭᠡᠨ ᠵᠦᠢᠯ ᠦ᠋ᠨ ᠴᠢᠬᠤᠯᠠ ᠶᠡᠬᠡ ᠬᠡᠷᠡᠭ ᠪᠣᠢ᠂ ᠡᠨᠡ ᠵᠢᠯ ᠬᠥᠬᠡ ᠬᠤᠯᠤᠭᠠᠨᠠ ᠵᠢᠯ ᠵᠢᠷᠠᠨ ᠣᠨ ᠤ᠋ ᠡᠬᠢ᠂ ᠪᠢ ᠳᠥᠴᠢᠨ ᠭᠤᠷᠪᠠᠨ ᠨᠠᠰᠤᠯᠠᠪᠠ᠃ ᠮᠠᠨ ᠤ᠋ ᠤᠭ ᠨᠤᠲᠤᠭ ᠡᠨᠡᠳᠬᠡᠭ ᠪᠥᠯᠥᠭᠡ᠃ ᠲᠡᠷᠡ ᠭᠠᠵᠠᠷ ᠲᠡᠭᠷᠢ ᠶ᠋ᠢᠨ ᠳᠤᠮᠳᠠᠳᠤ ᠭᠠᠵᠠᠷ ᠪᠤᠶᠤ᠂ ᠡᠷᠲᠡᠨ ᠦ᠌ ᠱᠠᠭᠢᠮᠤᠨᠢ ᠪᠤᠷᠬᠠᠨ ᠪᠠ ᠡᠯᠡ ᠶᠡᠬᠡᠰ ᠬᠠᠭᠠᠳ ᠴᠥᠮ ᠲᠡᠷᠡ ᠭᠠᠵᠠᠷ ᠲᠥᠷᠥᠨ ᠰᠠᠭᠤᠷᠢᠨ ᠳ᠋ᠤᠷ ᠰᠠᠭᠤᠵᠤ ᠦᠢᠯᠡᠰ ᠢ᠋ ᠪᠦᠲᠦᠭᠡᠵᠦᠬᠦᠢ᠃ ᠡᠨᠡ ᠤᠳᠠᠭᠠ ᠶ᠋ᠢᠨ ᠳᠠᠢᠰᠤᠨᠠ ᠪᠢ ᠳᠠᠷᠤᠢ ᠰᠢᠭᠤᠳ ᠨᠡᠪᠲᠡᠯᠦᠨ ᠭᠠᠷᠴᠤ ᠲᠠᠩᠭᠤᠳ᠂ ᠲᠥᠪᠡᠳ ᠢ᠋ ᠳᠠᠭᠠᠷᠢᠨ᠂ ᠡᠨᠡ ᠡᠨᠡᠳᠬᠡᠭ ᠲᠣᠷ ᠬᠦᠷᠴᠦ ᠦᠵᠡᠰᠦᠭᠡᠢ᠃ ᠮᠠᠨ ᠤ᠋ ᠡᠨᠡ ᠬᠣᠢᠲᠤ ᠭᠠᠵᠠᠷ ᠨᠠᠷᠠᠨ ᠤ᠋ ᠢᠯᠴᠢ ᠬᠣᠯᠠ᠂ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠨᠢᠮᠭᠡᠨ – ᠬᠦᠴᠦᠨ ᠦᠭᠡᠢ᠂ ᠶᠡᠬᠡ ᠦᠢᠯᠡᠰ ᠦᠯᠦ ᠪᠦᠲᠦᠮᠦᠢ᠃ ᠲᠡᠢᠨ ᠬᠦ᠌ ᠪᠢ ᠨᠢᠭᠡᠨ ᠳ᠋ᠦ᠍ᠷ ᠪᠠᠷᠠᠭᠤᠨ ᠠᠢᠮᠠᠭ ᠤᠯᠤᠰ ᠤ᠋ᠨ ᠰᠠᠨᠠᠭᠠᠨ ᠢ᠋ ᠦᠵᠡᠶᠡ᠂ ᠬᠣᠶᠠᠷ ᠲᠤᠷ ᠡᠨᠡᠳᠬᠡᠭ ᠦ᠋ᠨ ᠭᠠᠵᠠᠷᠠ ᠬᠦᠷᠴᠦ ᠪᠠᠢᠳᠠᠯ ᠢ᠋ ᠰᠢᠨᠵᠢᠨ ᠲᠠᠨ ᠤ᠋ ᠣᠯᠠᠨ ᠤ᠋ ᠶᠡᠬᠡ ᠰᠠᠨᠠᠭᠠᠨ ᠢ᠋ ᠭᠦᠢᠴᠡᠭᠡᠵᠦ ᠦᠵᠡᠰᠦᠭᠡᠢ ᠬᠡᠮᠡᠮᠦᠢ᠃ ᠡᠨᠡ ᠢᠨᠤ ᠨᠢᠭᠡᠨᠲᠡ ᠲᠣᠭᠲᠠᠪᠠ᠂ ᠡᠳᠦᠭᠡ ᠳᠠᠷᠤᠢ ᠭᠡᠷ ᠴᠡᠷᠢᠭ ᠢ᠋ ᠵᠠᠷᠯᠠᠨ᠂ ᠠᠴᠢᠯᠠᠯᠲᠤ ᠰᠠᠢᠳ ᠨᠠᠷ ᠮᠢᠨᠦ ᠡᠨᠡ ᠦᠭᠡ ᠪᠡᠷ ᠶᠠᠪᠤᠲᠤᠭᠠᠢ!》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠮᠤᠬᠤᠯᠢ ᠨᠠᠷ ᠤ᠋ᠨ ᠰᠠᠨᠠᠭᠠᠨ ᠳ᠋ᠤᠷ ᠨᠡᠢᠴᠡᠵᠦ ᠪᠦᠭᠦᠳᠡᠭᠡᠷ ᠪᠠᠶᠠᠷᠯᠠᠨ ᠮᠥᠷᠭᠥᠪᠡ᠃
ᠲᠡᠳᠦᠢ ᠠᠷᠴᠠ ᠽᠠᠨᠳᠠᠨ ᠤ᠋ ᠦᠨᠦᠷ ᠠᠩᠬᠢᠯᠤᠨ᠂ ᠲᠠᠢᠽᠦ ᠣᠷᠲᠣᠨᠠ ᠡᠭᠡᠪᠡ᠃ ᠣᠯᠠᠨ ᠰᠠᠢᠳ ᠵᠢᠨᠦᠩ ᠦ᠋ᠨ ᠴᠠᠴᠠᠷ ᠲᠤᠷ ᠬᠤᠷᠠᠵᠤ᠂ ᠳᠥᠷᠪᠡᠨ ᠵᠦᠭ ᠦ᠋ᠨ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠬᠤ ᠳᠣᠬᠢᠶᠠ ᠫᠤᠤ ᠲᠠᠯᠪᠢᠭᠤᠯᠵᠤ᠂ ᠣᠯᠠᠨ ᠵᠠᠩᠵᠤᠨ ᠨᠠᠷ ᠢ᠋ ᠴᠢᠭᠤᠯᠤᠭᠤᠯᠤᠨ ᠢᠷᠡᠭᠦᠯᠵᠦ᠂ ᠬᠠᠪᠤᠲᠤ ᠬᠠᠰᠠᠷ᠂ ᠪᠦᠬᠦ ᠪᠡᠯᠭᠦᠳᠡᠢ᠂ ᠪᠤᠭᠤᠷᠤᠯ᠂ ᠴᠢᠯᠠᠭᠤ᠂ ᠵᠡᠯᠮᠡ᠂ ᠵᠡᠪᠡ᠂ ᠬᠠᠷᠠ ᠬᠢᠷᠤ᠂ ᠬᠤᠷᠴᠠ ᠪᠠᠢᠷᠢ᠂ ᠴᠢᠨᠳᠠᠭᠠᠨᠠ ᠰᠡᠴᠡᠨ᠂ ᠬᠤᠳᠠᠭᠠᠨᠠ ᠪᠡᠬᠢ ᠠᠷᠪᠠᠨ ᠵᠠᠩᠵᠤᠨ ᠤ᠋ ᠳᠣᠣᠷᠠ ᠪᠤᠯᠤ᠂ ᠡᠭᠦᠯᠡᠨ ᠴᠡᠷᠪᠢ᠂ ᠸᠴᠢᠷ᠂ ᠠᠯᠮᠠᠰ᠂ ᠰᠦᠷᠲᠦ᠂ ᠫᠣᠯᠭᠤᠲᠠᠢ᠂ ᠬᠠᠳᠤ ᠲᠡᠮᠦᠷ᠂ ᠳᠤᠭᠤᠯᠠᠭᠠ ᠲᠡᠮᠦᠷ᠂ ᠬᠣᠪᠣᠯᠠᠢ᠂ ᠱᠣᠪᠤᠯᠠᠢ᠂ ᠸᠠᠢᠵᠢᠩ᠂ ᠠᠯᠢᠵᠠᠩ᠂ ᠬᠦᠳᠡᠷ ᠪᠦᠰᠡ᠂ ᠬᠦᠷᠡᠯ ᠪᠦᠰᠡ᠂ ᠥᠳᠥ᠂ ᠰᠣᠳᠣ᠂ ᠪᠤᠭᠤᠲᠤ ᠬᠤᠸᠠ᠂ ᠠᠯᠠᠭ ᠲᠤᠭᠤᠯ ᠡᠳᠡᠭᠡᠷ ᠪᠠᠭᠠ ᠵᠠᠩᠵᠤᠨ ᠢ᠋ ᠬᠥᠮᠦᠨ ᠪᠦᠷᠢ ᠳ᠋ᠦ᠍ᠷ ᠬᠣᠰᠢᠶᠠᠳ ᠵᠠᠩᠵᠤᠨ ᠵᠠᠬᠢᠷᠤᠭᠤᠯᠵᠤ᠂ ᠭᠠᠳᠠᠭᠠᠳᠤ ᠳᠠᠭᠠᠭᠰᠠᠨ ᠠᠢᠮᠠᠭ ᠤ᠋ᠨ ᠠᠷᠪᠠᠨ ᠤᠯᠤᠰ ᠤ᠋ᠨ ᠡᠵᠡᠳ ᠯᠦ᠋ᠭᠡ ᠴᠡᠷᠢᠭ ᠢ᠋ ᠬᠥᠮᠦᠨ ᠪᠦᠷᠢ ᠨᠢᠭᠡᠨ ᠲᠦᠮᠡᠨ ᠭᠡᠷ ᠴᠡᠷᠢᠭ ① ᠢ᠋ ᠠᠪᠴᠤ ᠡᠨᠡ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠤᠯᠤᠰ ᠠ᠋ᠴᠠ ᠮᠣᠷᠳᠠᠵᠤ ᠬᠥᠳᠡᠯᠦᠨ᠂ ᠲᠠᠲ᠋ᠠᠷ᠂ ᠲᠠᠢᠴᠢᠭᠤᠳ᠂ ᠯᠠᠢᠬᠠᠳ᠂ ᠰᠠᠯᠵᠢᠭᠤᠳ᠂ ᠵᠠᠷᠤᠳ᠂ ᠭᠣᠷᠯᠣᠰ᠂ ᠰᠠᠷᠯᠠᠭ᠂ ᠲᠣᠭᠮᠤᠭ᠂ ᠬᠡᠷᠡᠢᠳ᠂ ᠨᠠᠢ᠍ᠮᠠᠨ ᠡᠨᠡᠠᠷᠪᠠᠨ ᠠᠢᠮᠠᠭ ᠴᠡᠷᠢᠭ ᠮᠣᠷᠳᠠᠵᠤ᠂ ᠮᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠬᠥᠭᠡᠭᠡᠵᠦ ᠡᠴᠢᠭᠲᠦᠨ᠃ ᠡᠨᠡ ᠤᠳᠠᠬᠠ ᠡᠨᠡ ᠠᠷᠪᠠᠨ ᠠᠢᠮᠠᠭ ᠤ᠋ᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠶ᠋ᠢ ᠮᠡᠳᠡᠰᠦᠭᠡᠢ᠃ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠲᠦᠮᠡᠨ ᠪᠣᠯᠣᠳ ᠬᠦᠴᠦᠲᠦ ᠴᠡᠷᠢᠭ ᠢ᠋ ᠠᠪᠴᠤ ᠨᠠᠳᠠ ᠯᠤᠭᠠ ᠡᠵᠡᠨ ᠢ᠋ ᠳᠠᠭᠠ᠂ ᠣᠶᠤᠲᠤ ᠰᠡᠴᠡᠨ᠂ ᠣᠶᠤᠨ ᠭᠤᠸᠠ᠂ ᠲᠡᠭᠦᠰᠴᠣᠭᠲᠤ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ᠂ ᠠᠵᠢᠨᠠᠢ ᠮᠡᠷᠭᠡᠨ᠂ ᠠᠨᠳᠠᠨ ᠴᠠᠭ᠂ ᠳᠠᠴᠢᠩᠬᠤᠷᠯᠤ ᠶ᠋ᠢᠨ ᠬᠥᠪᠡᠭᠦᠨ ᠰᠢᠯᠢᠶᠡᠮᠪᠦ᠂ ᠪᠦᠲᠦᠨᠡ ᠶ᠋ᠢᠨ ᠢᠯᠠᠭᠤᠭᠰᠠᠨ ᠤ᠋ ᠬᠥᠪᠡᠭᠦᠨ ᠬᠠᠵᠤᠰᠢᠯ᠂ ᠥᠨᠳᠥᠷ ᠰᠡᠴᠡᠨ ᠦ᠌ ᠶᠡᠬᠡ ᠬᠥᠪᠡᠭᠦᠨ ᠪᠢᠯᠢᠭᠲᠦ ᠪᠠᠷᠰ᠂ ᠬᠦᠷᠭᠡᠨ ᠪᠣᠲ᠋ᠤ ᠶ᠋ᠢᠨ ᠬᠥᠪᠡᠭᠦᠨ ᠨᠠᠨᠰᠡᠷ᠂ ᠵᠡᠯᠮᠡ ᠶ᠋ᠢᠨ ᠬᠥᠪᠡᠭᠦᠨ ᠬᠦᠷᠭᠡᠨ ᠴᠡᠴᠡᠭ᠂ ᠲᠠᠢᠽᠦ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠵᠣᠴᠢ᠂ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠴᠠᠭᠠᠲᠠᠢ ᠡᠨᠡ ᠬᠣᠶᠠᠷ ᠪᠠᠭᠠ ᠡᠵᠡᠨ ᠯᠦ᠋ᠭᠡ ᠠᠷᠪᠠᠨ ᠳᠥᠷᠪᠡᠨ ᠵᠠᠩᠵᠤᠨ᠂ ᠰᠡᠭᠦᠯ ᠦ᠋ᠨ ᠴᠡᠷᠢᠭ ᠦ᠋ᠨ ᠶᠡᠬᠡ ᠪᠠᠭᠤᠳᠠᠯ ᠢ᠋ ᠳᠠᠭᠠᠵᠤ ᠶᠠᠪᠤ᠂ ᠤᠷᠤᠭᠰᠢᠯᠠᠨ ᠶᠠᠭᠠᠷᠠᠬᠤ ᠴᠠᠭ ᠲᠤᠷ ᠡᠮᠦᠨᠡ ᠴᠡᠷᠢᠭ ᠲᠦ᠍ᠷ ᠵᠠᠷᠯᠠᠵᠤ ᠵᠠᠷᠤᠴᠠᠯᠠᠰᠤᠭᠠᠢ᠃ ᠤᠯᠤᠰ ᠲᠤᠷ ᠲᠠᠢ ᠰᠡᠴᠡᠨ᠂ ᠲᠣᠷᠭᠠᠨ ᠰᠢᠷᠠ᠂ ᠥᠷᠯᠥᠭ ᠯᠢᠳᠠᠷ᠂ ᠳᠥᠷᠪᠡᠨ ᠰᠡᠴᠡᠳ᠂ ᠪᠤᠭᠤᠷᠵᠢ᠂ ᠮᠡᠩᠬᠡᠯᠢᠭ᠂ ᠣᠢᠲᠤ ᠤᠴᠢᠭ᠂ ᠤᠷᠠᠨ ᠭᠠᠴᠤᠭ᠂ ᠴᠤᠤ ᠮᠡᠷᠭᠡᠨ᠂ ᠲᠠᠢᠰᠤᠨᠳᠠᠷᠤᠭᠴᠢ᠂ ᠬᠦᠷᠭᠡᠨ ᠪᠣᠲ᠋ᠤ᠂ ᠤᠭᠰᠠᠭᠠ ᠶ᠋ᠢᠨ ᠵᠠᠮᠪᠠᠯ᠂ ᠮᠡᠩᠭᠡᠲᠦ᠂ ᠤᠷᠲᠤ ① ᠭᠡᠷ ᠴᠡᠷᠢᠭ ᠬᠡᠮᠡᠭᠴᠢ ᠠᠵᠢᠷᠭᠠ ᠭᠡᠭᠦᠦ᠂ ᠢᠮᠠᠭᠠ ᠬᠣᠨᠢ᠂ ᠡᠬᠡᠨᠡᠷ ᠬᠡᠦᠬᠡᠳ ᠲᠣᠷ ᠬᠦᠷᠲᠡᠯᠡ ᠴᠥᠮ ᠠᠪᠴᠤ ᠶᠠᠪᠤᠬᠤ᠃ ᠪᠣᠳᠣᠯᠭᠠᠲᠤ᠂ ᠤᠬᠠᠭᠠᠨᠲᠤ ᠷᠢᠨᠴᠢᠨ᠂ ᠮᠡᠷᠭᠡᠨ᠂ ᠥᠨᠳᠥᠷ ᠰᠡᠴᠡᠨ ᠦ᠌ ᠬᠥᠪᠡᠭᠦᠨ ᠰᠢᠯᠢᠭᠲᠦ ᠪᠠᠷᠰ᠂ ᠲᠡᠰᠬᠡᠯ ᠪᠠᠷᠰ᠂ ᠳ᠋ᠠᠳᠠᠳᠤᠩᠭᠠ᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠳ᠋ᠦᠩ ᠶᠦᠨ᠂ ᠣᠶᠤᠲᠤ ᠰᠡᠴᠡᠨ ᠦ᠌ ᠬᠥᠪᠡᠭᠦᠨ ᠶᠣᠯᠣ ᠶ᠋ᠢᠨ ᠪᠠᠭᠠᠰᠤ᠂ ᠣᠶᠤᠨ ᠭᠤᠸᠠ ᠶ᠋ᠢᠨ ᠬᠥᠪᠡᠭᠦᠨ ᠤᠨᠵᠢᠭᠠᠢ ᠰᠤᠨᠵᠢᠭᠠᠢ᠂ ᠤᠷᠲᠤ ᠪᠣᠳᠣᠯᠭᠠᠲᠤ ᠶ᠋ᠢᠨ ᠬᠥᠪᠡᠭᠦᠨ ᠰᠠᠢᠨ ᠮᠣᠬᠣ᠂ ᠤᠬᠠᠭᠠᠨᠲᠤ ᠷᠢᠨᠴᠢᠨ ᠦ᠌ ᠬᠥᠪᠡᠭᠦᠨ ᠭᠢᠯᠦᠢ᠂ ᠪᠦᠰᠡᠭ᠂ ᠪᠦᠰᠡᠭ ᠦ᠋ᠨ ᠬᠥᠪᠡᠭᠦᠨ ᠲᠠᠵᠤᠨᠠᠢ᠂ ᠮᠠᠩᠨᠢᠳ ᠤ᠋ᠨ ᠲᠣᠭᠳᠢ᠂ ᠴᠡᠷᠪᠢ᠂ ᠠᠯᠤᠬᠠ᠂ ᠰᠦᠬᠡ᠂ ᠪᠤᠳᠣᠯᠠᠩ᠂ ᠤᠬᠠᠭᠠᠨᠲᠤ ᠡᠨᠡ ᠭᠤᠴᠢᠨ ᠵᠠᠩᠵᠤᠨ ᠢ᠋ ᠠᠪᠴᠤ ᠳᠥᠴᠢᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠤᠯᠤᠰ ᠢ᠋ ᠲᠠᠪᠤᠨ ᠠᠩᠭᠢ ᠪᠠᠷ ᠰᠠᠬᠢ᠃ ᠵᠢᠴᠢ ᠲᠠᠲ᠋ᠠᠷ ᠤ᠋ᠨ ᠰᠢᠷᠢ ᠬᠤᠲᠤᠭ᠂ ᠰᠤᠯᠳᠠᠰᠤᠨ ᠤ᠋ ᠴᠢᠮᠪᠠᠢ ᠳᠠᠷᠬᠠᠨ᠂ ᠭᠣᠷᠯᠣᠰ ᠤ᠋ᠨ ᠰᠡᠴᠡᠨ ᠪᠡᠬᠢ᠂ ᠵᠠᠷᠤᠳ ᠤ᠋ᠨ ᠶᠠᠪᠤᠭᠠ ᠳᠥᠷᠪᠡᠭᠦᠯᠡ ᠶ᠋ᠢ ᠲᠠᠩᠭᠤᠳ ᠪᠠ ᠬᠠᠷᠯᠢᠭᠤᠳ ᠤ᠋ᠨ ᠬᠣᠶᠠᠷ ᠠᠢᠮᠠᠭ ᠠ᠋ᠴᠠ ᠳᠠᠭᠠᠭᠰᠠᠨ ᠳᠥᠷᠪᠡᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ ᠠᠪᠴᠤ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠡᠪᠡᠯ ᠬᠤᠪᠴᠠᠳ ᠲᠤᠭ ᠬᠢᠭᠢᠷᠢ ᠶ᠋ᠢ ᠪᠠᠷᠢᠭᠤᠯᠵᠤ᠂ ᠮᠤᠬᠤᠯᠢ ᠣᠢᠷᠠ ᠪᠠᠨ ᠳᠠᠭᠠᠭᠤᠯᠵᠤ᠂ ᠲᠤᠰ ᠲᠤᠰ ᠲᠤᠷ ᠬᠤᠪᠢᠶᠠᠨ ᠪᠠᠷᠠᠵᠤ᠂ ᠳᠠᠷᠤᠢ ᠬᠠᠷᠯᠢᠭᠤᠳ ᠤ᠋ᠨ ᠴᠢᠮᠡᠭᠡ ᠶ᠋ᠢ ᠬᠦᠯᠢᠶᠡᠬᠦᠶᠡ᠂ ᠮᠥᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡᠳ ᠢ᠋ᠶ᠋ᠡᠷ ᠮᠡᠳᠡᠭᠡ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠡ ᠵᠦᠢᠯ ᠮᠠᠰᠢ ᠪᠡᠯᠡᠨ ᠪᠣᠯᠤᠭᠰᠠᠨ ᠲᠤᠯᠠ ᠮᠤᠬᠤᠯᠢ ᠰᠢᠭᠤᠳ ᠲᠦᠷᠭᠡᠨ ᠶᠡᠬᠡ ᠦᠬᠡᠷ ᠫᠤᠤ ᠶ᠋ᠢ ᠲᠠᠯᠪᠢᠭᠤᠯᠪᠠ᠃ ᠣᠯᠠᠨ ᠴᠡᠷᠢᠭ ᠮᠠᠢᠬᠠᠨ ᠢ᠋ᠶ᠋ᠠᠨ ᠤᠨᠠᠭᠠᠵᠤ᠂ ᠠᠴᠢᠶᠠ ᠬᠥᠰᠬᠡ ᠶ᠋ᠢ ᠪᠠᠭᠴᠠᠯᠠᠵᠤ ᠪᠡᠯᠡᠨ ᠪᠣᠯᠪᠠ᠃ ᠮᠤᠬᠤᠯᠢ ᠲᠠᠢᠽᠦ ᠶ᠋ᠢᠨ ᠲᠠᠭᠲᠤ ᠳ᠋ᠤᠷ ᠢᠷᠡᠪᠡᠰᠦ᠂ ᠲᠠᠢᠽᠦ ᠮᠥᠨ ᠬᠡᠳᠦᠢᠨᠡᠢ ᠭᠠᠷᠴᠤ ᠢᠷᠡᠭᠡᠳ ᠬᠠᠷᠠᠬᠠᠨ ᠮᠣᠷᠳᠠᠬᠤ ᠶ᠋ᠢ ᠬᠦᠯᠢᠶᠡᠮᠦᠢ᠃ ᠦᠵᠡᠪᠡᠰᠦ ᠶᠡᠬᠡ ᠬᠥᠰᠬᠡ ᠶ᠋ᠢᠨ ᠠᠴᠢᠶᠠ ᠬᠥᠰᠬᠡ ᠪᠡᠯᠡᠨ ᠪᠣᠯᠤᠭᠰᠠᠭᠠᠷ ᠭᠤᠷᠪᠠᠨ ᠡᠳᠦᠷ ᠪᠣᠯᠪᠠ ᠬᠡᠮᠡᠬᠦ ᠲᠤᠯᠠ ᠮᠤᠬᠤᠯᠢ ᠰᠢᠳᠠᠷ ᠠᠷᠠᠳ ᠨᠠᠢ᠍ᠮᠠᠨ ᠬᠥᠮᠦᠨ ᠢ᠋ ᠮᠣᠷᠢ ᠤᠨᠤᠭᠤᠯᠵᠤ᠂ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠪᠦᠷᠢ ᠳ᠋ᠦ᠍ᠷ ᠠᠴᠢᠶᠠ ᠬᠥᠰᠬᠡ ᠶ᠋ᠢ ᠵᠠᠪᠳᠤᠭᠰᠠᠨ ᠪᠠ ᠦᠭᠡᠢ ᠶ᠋ᠢ ᠦᠵᠡᠭᠦᠯᠪᠡᠰᠦ᠂ ᠬᠦᠷᠢᠶᠡ ᠪᠦᠷᠢ ᠴᠥᠮ ᠶᠠᠪᠠᠭᠠᠨ ᠪᠠᠭᠤᠳᠠᠯ ᠢ᠋ᠶ᠋ᠠᠷ ᠫᠤᠤ ᠶ᠋ᠢᠨ ᠳᠠᠭᠤᠨ ᠢ᠋ ᠬᠦᠯᠢᠶᠡᠬᠦ ᠠᠵᠤᠭᠤ᠃ ᠲᠡᠳᠦᠢ ᠮᠠᠰᠢ ᠪᠡᠯᠡᠨ ᠵᠠᠯᠠᠨ ᠭᠡᠮᠡᠨ ᠮᠡᠳᠡᠭᠦᠯᠦᠭᠰᠡᠨᠡ᠂ ᠬᠣᠶᠠᠳᠤᠭᠠᠷ ᠦᠬᠡᠷ ᠫᠤᠤ ᠳᠤᠤᠭᠠᠷᠪᠠ᠃ ᠣᠯᠠᠨ ᠴᠡᠷᠢᠭ ᠦ᠋ᠳ ᠴᠥᠮ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠪᠠ᠃ ᠣᠯᠠᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠵᠢᠯᠣᠭᠣ ᠪᠠ ᠮᠣᠷᠢᠨ ᠤ᠋ ᠳᠡᠯ ᠲᠡᠢ ᠪᠠᠷᠢᠨ᠂ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠠᠳᠬᠤᠵᠤ ᠵᠡᠭᠦᠨ ᠬᠥᠯ ᠢ᠋ᠶ᠋ᠡᠨ ᠳᠥᠷᠥᠭᠡ ᠳ᠋ᠦ᠍ᠷ ᠳᠥᠷᠥᠭᠡᠯᠡᠭᠡᠳ ᠮᠣᠷᠳᠠᠬᠤ ᠪᠠᠷ ᠬᠦᠯᠢᠶᠡᠪᠡ᠃ ᠮᠤᠬᠤᠯᠢ ᠥᠪᠡᠷ ᠢ᠋ᠶ᠋ᠡᠨ ᠮᠣᠷᠢᠯᠠᠨ ᠲᠠᠢᠽᠦ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤᠷ ᠢᠷᠡᠵᠦ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠮᠣᠷᠢ ᠪᠠᠨ ᠬᠥᠲᠥᠯᠵᠦ ᠲᠡᠮᠳᠡᠭ ᠦ᠋ᠨ ᠳᠠᠯᠪᠠᠭᠠ ᠪᠠᠨ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠡᠷᠭᠦᠨ ᠪᠠᠷᠢᠵᠤ᠂ ᠲᠠᠢᠽᠦ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠪᠡᠰᠦ ᠲᠠᠢᠽᠦ ᠮᠥᠨ ᠬᠦᠷᠢᠶᠡᠨ ᠦ᠌ ᠬᠠᠭᠠᠯᠭᠠ ᠶ᠋ᠢᠨ ᠭᠠᠳᠠᠨᠠ ᠠᠷᠰᠯᠠᠨ ᠣᠷᠢᠶᠠᠭᠰᠠᠨ ᠮᠣᠷᠢᠨ ᠮᠣᠳᠣᠨ ᠳ᠋ᠤᠷ ᠵᠣᠭᠰᠣᠵᠤ᠂ ᠨᠢᠭᠡᠨ ᠬᠥᠯ ᠳᠥᠷᠥᠭᠡ ᠳ᠋ᠦ᠍ᠷ ᠭᠢᠰᠬᠢᠵᠦ ᠫᠤᠤ ᠶ᠋ᠢᠨ ᠳᠠᠭᠤᠨ ᠢ᠋ ᠬᠦᠯᠢᠶᠡᠮᠦᠢ᠃ ᠮᠤᠬᠤᠯᠢ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠶ᠋ᠢ ᠡᠨᠡ ᠮᠡᠲᠦ ᠬᠦᠨᠳᠦ ᠰᠠᠬᠢᠬᠤ ᠶ᠋ᠢ ᠦᠵᠡᠭᠡᠳ ᠳᠣᠲᠣᠷᠠ ᠢᠭᠲᠦᠯᠦᠨ ᠪᠢᠰᠢᠷᠡᠵᠦ᠂ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠰᠡᠭᠡᠷ ᠭᠠᠵᠠᠷ ᠲᠤᠷ ᠰᠥᠭᠥᠳᠴᠦ ᠮᠥᠷᠭᠥᠵᠦ ᠮᠡᠳᠡᠭᠦᠯᠦᠷᠦᠨ :
ᠠᠳᠠᠪᠠᠰᠢ ᠬᠤᠪᠢ ᠪᠠᠷᠢᠯᠳᠤᠨ ᠪᠦᠷᠢᠳᠦᠭᠰᠡᠨ ᠪᠣᠭᠣᠯᠴᠤᠳ ᠪᠢᠳᠡ
ᠠᠯᠢ ᠲᠥᠷᠥᠯ ᠳ᠋ᠦ᠍ᠷ ᠣᠭᠲᠠᠷᠭᠤᠢ ᠰᠠᠴᠠᠭᠤ ᠢᠷᠦᠭᠡᠯ ᠢ᠋ᠶ᠋ᠡᠷ
ᠠᠯᠲᠠᠨ ᠥᠩᠭᠡᠲᠦ ᠡᠨᠡ ᠲᠡᠭᠷᠢ ᠴᠢᠮᠠ ᠳ᠋ᠤᠷ ᠠᠭᠤᠯᠵᠠᠨ ᠤᠴᠠᠷᠠᠵᠤ
ᠠᠳᠠᠯᠢᠳᠬᠠᠰᠢ ᠦᠭᠡᠢ ᠮᠡᠷᠭᠡᠨ ᠭᠡᠭᠡᠬᠡᠨ ᠨᠠᠷᠠᠨ ᠰᠠᠷᠠᠨ ᠮᠡᠲᠦ ᠪᠡᠷ
ᠠᠯᠪᠠᠲᠤ ᠳ᠋ᠤᠷ ᠲᠤᠰᠢᠶᠠᠭᠰᠠᠨ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠶ᠋ᠢ ᠡᠨᠡ ᠮᠡᠲᠦ ᠬᠢᠴᠢᠶᠡᠵᠦ
ᠠᠯᠲᠠᠨ ᠴᠣᠭᠴᠠ ᠬᠠᠰ ᠤ᠋ᠨ ᠪᠡᠶᠡ ᠪᠡᠨ ᠡᠨᠡ ᠮᠡᠲᠦ ᠵᠦᠳᠡᠭᠡᠬᠦ ᠢᠨᠤ᠂
ᠠᠬᠠᠢ ᠬᠠᠯᠠᠬᠠᠢ ᠴᠠᠭᠠᠵᠠ ᠶ᠋ᠢ ᠳᠠᠭᠠᠬᠤ ᠲᠦᠮᠡᠨ ᠴᠡᠷᠢᠭ ᠢ᠋ ᠣᠯᠬᠤᠶᠠ ᠬᠢᠯᠪᠠᠷ
ᠠᠪᠠᠢ ᠮᠢᠨᠦ ᠴᠠᠭᠠᠵᠠ ᠶ᠋ᠢ ᠰᠠᠬᠢᠬᠤ ᠨᠢᠭᠡᠨ ᠡᠵᠡᠨ ᠢ᠋ ᠣᠯᠬᠤᠶᠠ ᠪᠡᠷᠬᠡ !
ᠭᠡᠮᠡᠨ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠮᠦᠰᠢᠶᠡᠵᠦ ᠬᠠᠷᠢᠭᠤ ᠥᠴᠢᠷᠦᠨ :
ᠴᠠᠭᠠᠵᠠ ᠬᠡᠮᠡᠭᠴᠢ ᠡᠵᠡᠨ ᠡᠴᠡ ᠡᠭᠦᠰᠦᠨ ᠲᠦᠰᠢᠮᠡᠯ ᠢ᠋ᠶ᠋ᠡᠷ ᠵᠠᠷᠯᠠᠮᠤᠢ
ᠴᠠᠭᠠᠵᠠ ᠶ᠋ᠢ ᠳᠠᠭᠠᠬᠤ ᠡᠵᠡᠨ ᠡᠴᠡ ᠡᠬᠢᠯᠡᠨ ᠣᠯᠠᠨ ᠴᠡᠷᠢᠭ ᠲᠦ᠍ᠷ ᠬᠦᠷᠦᠮᠦᠢ᠂
ᠴᠠᠭᠠᠵᠠ ᠶ᠋ᠢ ᠴᠢᠩᠭᠠᠳᠬᠠᠬᠤᠢ ᠳ᠋ᠤᠷ ᠡᠷᠬᠡᠪᠰᠢ ᠤᠷᠢᠳᠠ ᠡᠵᠡᠨ ᠢᠨᠤ ᠰᠠᠬᠢᠮᠤᠢ
ᠴᠠᠭᠠᠵᠠ ᠪᠠᠷᠢᠭᠰᠠᠨ ᠵᠢᠨᠦᠩ ᠦ᠋ᠨ ᠳᠣᠬᠢᠶᠠ ᠶ᠋ᠢ ᠬᠡᠨ ᠠᠶᠤᠯ ᠦᠭᠡᠢ ᠵᠥᠷᠢᠴᠡᠮᠦᠢ !
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠯᠠᠨ ᠲᠦᠰᠢᠮᠡᠳ ᠬᠡᠲᠦᠷᠬᠡᠢ ᠪᠢᠰᠢᠷᠡᠨ ᠰᠢᠲᠦᠵᠦ᠂ ᠨᠢᠭᠡᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠥᠭᠥᠳᠴᠦ᠄《ᠲᠦᠮᠡᠨ ᠨᠠᠰᠤᠲᠤ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ! 》 ᠭᠡᠮᠡᠨ ᠳᠠᠭᠤᠳᠠᠯᠴᠠᠵᠤ ᠮᠥᠷᠭᠥᠬᠦ ᠳᠠᠭᠤᠨ ᠳ᠋ᠤᠷ ᠠᠭᠤᠯᠠ ᠭᠣᠣᠯ ᠠᠨᠢᠷᠯᠠᠪᠠ᠃
ᠲᠡᠳᠦᠢ ᠮᠤᠬᠤᠯᠢ ᠲᠠᠢᠽᠦ ᠶ᠋ᠢᠨ ᠬᠦᠯᠢᠶᠡᠬᠦ ᠶ᠋ᠢ ᠦᠵᠡᠭᠡᠳ ᠠᠶᠤᠮᠰᠢᠭ ᠦᠭᠡᠢ ᠤᠳᠠᠭᠠᠰᠢᠷᠠᠬᠤ ᠦᠭᠡᠢ ᠳᠠᠷᠤᠢ ᠳᠠᠬᠢᠨ ᠡᠮᠦᠨᠡ ᠳ᠋ᠦ᠍ᠷ ᠵᠣᠭᠰᠣᠵᠤ ᠲᠡᠮᠳᠡᠭ ᠳᠠᠯᠪᠠᠭᠠ ᠨᠢᠭᠡᠨᠲᠡ ᠬᠤᠷᠤᠢᠯᠠᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠶ᠋ᠢᠨ ᠠᠷᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠰᠢᠷᠤᠭ ᠲᠤᠷ ᠲᠡᠮᠳᠡᠭ ᠳᠠᠯᠪᠠᠭᠠ ᠬᠠᠯᠠᠨ ᠪᠤᠰᠬᠠᠵᠤ ᠳᠠᠬᠢᠨ ᠡᠷᠭᠢᠭᠦᠯᠦᠭᠰᠡᠨᠡ᠂ ᠦᠬᠡᠷ ᠫᠤᠤ ᠲᠡᠭᠷᠢ ᠳᠡᠯᠪᠡᠷᠡᠲᠡᠯᠡ ᠨᠢᠭᠡᠨᠲᠡ ᠳᠠᠭᠤᠷᠢᠰᠤᠭᠰᠠᠨ ᠳ᠋ᠤᠷ ᠲᠠᠢᠽᠦ ᠲᠡᠷᠢᠭᠦᠯᠡᠨ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠬᠠᠮᠲᠤ ᠪᠠᠷ ᠮᠣᠷᠢᠨ ᠳ᠋ᠤᠷ ᠮᠣᠷᠳᠠᠵᠤ᠂ ᠲᠠᠢᠽᠦ ᠡᠮᠦᠨᠡᠬᠢ ᠭᠤᠷᠪᠠᠨ ᠫᠤᠤ ᠳᠠᠭᠤᠷᠢᠰᠤᠭᠰᠠᠨ ᠳ᠋ᠤᠷ ᠵᠠᠯᠠᠷᠠᠨ ᠮᠣᠷᠳᠠᠵᠤ᠂ ᠶᠡᠬᠡ ᠴᠡᠷᠢᠭ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠠᠭᠤᠯᠠ ᠮᠥᠷᠡᠨ ᠨᠡᠭᠦᠵᠦ ᠭᠠᠵᠠᠷ ᠳᠡᠯᠡᠬᠡᠢ ᠬᠥᠳᠡᠯᠦᠮᠡᠷ ᠪᠠᠷᠠᠭᠤᠨ ᠡᠮᠦᠨᠡᠰᠢ ᠬᠠᠷᠠ ᠬᠢᠭᠦᠯ ᠦ᠋ᠨ ᠵᠦᠭ ᠮᠣᠷᠳᠠᠪᠠ᠃ ᠵᠠᠮ ᠳ᠋ᠤᠷ ᠲᠣᠭᠲᠣᠩᠭᠣ᠌ ᠪᠠᠭᠠᠲᠤᠷ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠡᠮᠦᠨᠡ ᠬᠣᠰᠢᠭᠤᠴᠢ ᠪᠣᠯᠤᠨ ᠶᠠᠪᠤᠵᠤ ᠵᠢᠷᠭᠤᠭᠠᠨ ᠡᠳᠦᠷ ᠪᠣᠯᠤᠭᠰᠠᠨ ᠦᠭᠡᠢ ᠬᠠᠷᠠ ᠬᠢᠭᠦᠯ ᠦ᠋ᠨ ᠵᠠᠬᠠ ᠳ᠋ᠤᠷ ᠬᠡᠳᠦᠨ ᠵᠠᠭᠤᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷ ᠦ᠋ᠨ ᠮᠡᠳᠡᠭᠡ ᠶ᠋ᠢᠨ ᠬᠥᠮᠦᠨ᠂ ᠬᠠᠷᠠ ᠬᠢᠭᠦᠯ ᠳ᠋ᠦ᠍ᠷ ᠬᠦᠷᠴᠦ ᠨᠠᠷᠠᠨ ᠰᠠᠢᠳ ᠬᠠᠷᠢᠶᠠᠲᠤ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠤᠭᠲᠤᠵᠤ ᠮᠥᠷᠭᠥᠭᠡᠳ ᠶᠣᠰᠣᠯᠠᠨ ᠵᠣᠯᠭᠠᠪᠠ᠃ ᠲᠠᠢᠽᠦ ᠲᠡᠭᠦᠨ ᠦ᠌ ᠲᠤᠰᠢᠶᠠᠯ ᠳ᠋ᠤᠷ ᠬᠢᠴᠢᠶᠡᠭᠰᠡᠨ ᠢ᠋ ᠰᠠᠢᠰᠢᠶᠠᠨ ᠬᠥᠬᠢᠭᠦᠯᠵᠦ ᠬᠡᠯᠡᠭᠡᠳ ᠬᠠᠷᠠ ᠬᠢᠭᠦᠯ ᠦ᠋ᠨ ᠭᠠᠵᠠᠷ ᠲᠠᠪᠤᠨ ᠶᠡᠬᠡ ᠬᠦᠷᠢᠶᠡ ᠪᠠᠭᠤᠵᠤ ᠨᠠᠷᠠᠨ ᠰᠠᠢᠳ ᠢ᠋ ᠳᠡᠪᠰᠢᠭᠦᠯᠦᠨ ᠲᠠᠢᠽᠦ ᠥᠪᠡᠷ ᠦ᠋ᠨ ᠴᠡᠷᠢᠭ ᠲᠦ᠍ᠷ ᠢ᠋ᠶ᠋ᠡᠨ ᠶᠠᠪᠤᠭᠤᠯᠪᠠ᠃ ᠲᠡᠳᠦᠢ ᠮᠤᠬᠤᠯᠢ᠂ ᠲᠠᠢᠽᠦ ᠯᠤᠭᠠ ᠬᠠᠷᠠ ᠬᠢᠭᠦᠯ ᠦ᠋ᠨ ᠠᠭᠤᠯᠠ ᠲᠠᠯᠠ ᠣᠷᠣᠨ ᠲᠠᠩᠭᠢᠰ ᠢ᠋ ᠰᠢᠨᠵᠢᠵᠦ ᠪᠠᠢᠯᠳᠤᠬᠤ ᠶ᠋ᠢ ᠲᠣᠭᠲᠠᠭᠠᠬᠤᠶᠠ᠂ ᠬᠠᠷᠠ ᠬᠢᠭᠦᠯ ᠦ᠋ᠨ ᠡᠮᠦᠨᠡ ᠨᠢᠭᠡᠬᠡᠨ ᠵᠠᠮ ᠳ᠋ᠤᠷ ᠭᠠᠯ ᠠᠭᠤᠯᠠ ᠨᠡᠷᠡᠲᠦ ᠳᠣᠪᠣ ᠳ᠋ᠤᠷ ᠭᠠᠷᠴᠤ ᠦᠵᠡᠭᠡᠳ ᠲᠠᠢᠽᠦ ᠶ᠋ᠢ ᠬᠠᠷᠠᠵᠤ ᠮᠡᠳᠡᠭᠦᠯᠦᠷᠦᠨ᠄《 ᠡᠨᠡ ᠳᠣᠪᠣ ᠶ᠋ᠢ ᠡᠵᠡᠨ ᠦ᠌ ᠲᠤᠯᠠ ᠲᠡᠭᠷᠢ ᠪᠦᠲᠦᠭᠡᠪᠡ!》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠵᠢᠨᠦᠩ ᠦ᠋ᠨ ᠠᠷᠭᠠ ᠲᠣᠭᠲᠠᠭᠰᠠᠨ ᠢ᠋ ᠮᠡᠳᠡᠵᠦ ᠳᠣᠲᠣᠷᠠ ᠰᠡᠮᠡᠬᠡᠷ ᠠᠮᠤᠷᠵᠢᠨ ᠪᠠᠶᠠᠷᠯᠠᠪᠠ᠃
ᠲᠡᠳᠦᠢ ᠲᠠᠢᠽᠦ ᠶ᠋ᠢᠨ ᠬᠥᠰᠬᠡ ᠬᠦᠷᠢᠶᠡ ᠡᠴᠡ ᠪᠤᠰᠤ ᠬᠦᠷᠢᠶᠡ ᠶ᠋ᠢ ᠨᠡᠭᠦᠯᠭᠡᠵᠦ᠂ ᠭᠠᠯ ᠠᠭᠤᠯᠠ ᠶ᠋ᠢᠨ ᠡᠮᠦᠨᠡ ᠬᠠᠭᠤᠴᠢᠨ ᠭᠠᠵᠠᠷ ᠬᠦᠷᠢᠶᠡ ᠪᠠᠭᠤᠨ ᠲᠠᠪᠤᠨ ᠡᠳᠦᠷ ᠬᠦᠯᠢᠶᠡᠵᠦ᠂ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠰᠠᠢ ᠳᠠᠮ ᠳᠠᠮ ᠢ᠋ᠶ᠋ᠠᠷ ᠬᠦᠷᠴᠦ ᠢᠷᠡᠭᠡᠳ ᠣᠯᠠᠨ ᠴᠡᠷᠢᠭ ᠡᠴᠡ ᠰᠣᠴᠢᠭᠰᠠᠨ ᠪᠠᠢᠳᠠᠯ ᠪᠣᠢ᠃ ᠮᠤᠬᠤᠯᠢ ᠳᠥᠷᠪᠡᠨ ᠠᠩᠭᠢ ᠴᠡᠷᠢᠭ ᠢ᠋ ᠠᠵᠢᠨᠠᠢ ᠮᠣᠷᠢᠨ ᠤ᠋ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠵᠤ᠂ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠮᠥᠷᠥ᠂ ᠳᠤᠮᠳᠠ ᠠᠨᠤ ᠥᠪᠡᠷ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠪᠣᠯᠵᠤ᠂ ᠲᠠᠢᠽᠦ ᠶ᠋ᠢᠨ ᠶᠡᠬᠡ ᠬᠦᠷᠢᠶᠡ ᠶ᠋ᠢ ᠬᠣᠢᠨᠠ ᠪᠣᠯᠭᠠᠨ᠂ ᠣᠶᠤᠲᠤ ᠰᠡᠴᠡᠨ᠂ ᠣᠶᠤᠨ ᠭᠤᠸᠠ ᠨᠠᠷ ᠤ᠋ᠨ ᠴᠡᠷᠢᠭ ᠬᠣᠢᠲᠤ ᠬᠥᠯ᠂ ᠬᠣᠶᠠᠷ ᠪᠠᠭᠠ ᠡᠵᠡᠨ ᠢ᠋ ᠰᠡᠭᠦᠯ ᠪᠣᠯᠭᠠᠨ ᠵᠢᠭᠰᠠᠭᠠᠭᠠᠳ ᠡᠢᠨ ᠬᠦ᠌ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠵᠤ ᠬᠦᠯᠢᠶᠡᠬᠦᠶᠡ᠂ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠬᠦᠷᠴᠦ ᠢᠷᠡᠭᠡᠳ ᠳᠥᠴᠢᠨ ᠭᠠᠵᠠᠷ ᠥᠷᠭᠡᠨ᠂ ᠵᠢᠷᠠᠨ ᠭᠠᠵᠠᠷ ᠤᠷᠲᠤ ᠬᠦᠷᠢᠶᠡ ᠪᠠᠭᠤᠵᠤ᠂ ᠳᠠᠷᠤᠢ ᠪᠠᠢᠯᠳᠤᠬᠤ ᠪᠢᠴᠢᠭ ᠬᠦᠷᠭᠡᠵᠦ ᠢᠷᠡᠪᠡ᠃ ᠮᠤᠬᠤᠯᠢ ᠶᠠᠭᠠᠷᠠᠨ ᠪᠢᠴᠢᠭ ᠢ᠋ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠡᠯᠴᠢ ᠶ᠋ᠢ ᠮᠣᠷᠢᠯᠠᠭᠤᠯᠵᠤ ᠮᠢᠨᠦ ᠴᠠᠴᠠᠷ ᠲᠤᠷ ᠠᠪᠴᠢᠷᠠ ᠬᠡᠮᠡᠭᠡᠳ ᠡᠯᠴᠢ ᠢᠷᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠥᠪᠡᠰᠦᠪᠡᠨ ᠤᠭᠲᠤᠨ ᠭᠠᠷᠴᠤ ᠭᠠᠷ ᠪᠠᠷᠢᠨ ᠵᠣᠯᠭᠠᠵᠤ᠂ ᠳᠡᠭᠡᠳᠦ ᠣᠷᠳᠣᠨ ᠳ᠋ᠤᠷ ᠨᠠᠢᠷ ᠲᠠᠯᠪᠢᠨ ᠰᠠᠭᠤᠯᠭᠠᠵᠤ ᠠᠷᠢᠬᠢ ᠪᠠᠷᠢᠵᠤ ᠬᠦᠨᠳᠦᠯᠡᠭᠰᠡᠨ ᠳ᠋ᠦ᠍ᠷ ᠬᠠᠷᠯᠢᠭᠤᠳ ᠤ᠋ᠨ ᠡᠯᠴᠢ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠪᠠᠢᠳᠠᠯ ᠢ᠋ ᠦᠵᠡᠪᠡᠰᠦ ᠬᠥᠳᠡᠯᠬᠦ ᠠᠭᠠᠰᠢᠯᠠᠬᠤ ᠠᠨᠤ ᠥᠴᠦᠬᠡᠨ ᠴᠦ᠍ ᠬᠠᠭᠤᠷᠮᠠᠭ ᠦᠭᠡᠢ ᠲᠤᠯᠠ ᠴᠠᠰ ᠠᠭᠤᠯᠠ ᠬᠣᠶᠠᠷ ᠬᠠᠳᠠ ᠶ᠋ᠢᠨ ᠵᠠᠪᠰᠠᠷ ᠬᠠᠪᠴᠢᠭᠳᠠᠵᠤ ᠳᠠᠭᠤᠨ ᠦᠭᠡᠢ ᠬᠡᠳᠦᠨ ᠳᠤᠰᠤᠯ ᠨᠢᠯᠪᠤᠰᠤᠨ ᠤᠨᠠᠭᠠᠭᠠᠳ ᠳᠠᠷᠤᠢ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡ ᠪᠢᠴᠢᠭ ᠢ᠋ ᠲᠤᠰᠢᠶᠠᠵᠤ᠂ ᠪᠡᠶᠡ ᠡᠭᠡᠵᠦ ᠥᠪᠡᠷ ᠦ᠋ᠨ ᠬᠦᠷᠢᠶᠡᠨ ᠦ᠌ ᠵᠦᠭ ᠬᠠᠨᠳᠤᠵᠤ ᠵᠢᠷᠭᠤᠭᠠᠨ ᠵᠡᠷᠭᠡ ᠮᠥᠷᠭᠥᠵᠦ᠂ ᠳᠠᠷᠤᠢ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠦ᠌ ᠢᠯᠳᠦ ᠶ᠋ᠢ ᠰᠤᠭᠤ ᠲᠡᠳᠡᠨ ᠠᠪᠴᠤ ᠬᠦᠵᠦᠭᠦᠦ ᠪᠡᠨ ᠣᠭᠲᠣᠯᠰᠤᠭᠠᠢ ᠬᠡᠮᠡᠲᠡᠯᠡ ᠣᠯᠠᠨ ᠴᠡᠷᠢᠭ ᠶᠠᠭᠠᠷᠠᠨ ᠢᠯᠳᠦᠨ ᠢ᠋ ᠪᠦᠯᠢᠶᠡᠨ ᠠᠪᠴᠤ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡ ᠠᠴᠢᠷᠠᠨ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ᠂ ᠴᠠᠰ ᠠᠭᠤᠯᠠ ᠨᠢᠭᠡᠮᠦᠰᠦᠨ ᠳᠠᠭᠤᠨ ᠦᠭᠡᠢ ᠪᠣᠯᠪᠠ᠃ ᠡᠭᠦᠨ ᠳ᠋ᠦ᠍ᠷ ᠮᠤᠬᠤᠯᠢ ᠤᠴᠢᠷ ᠢ᠋ ᠬᠡᠳᠦᠨ ᠬᠤᠪᠢ ᠮᠡᠳᠡᠵᠦ ᠥᠭᠦᠯᠡᠷᠦᠨ᠄《ᠡᠨᠡ ᠯᠠᠪ ᠪᠠᠰᠠ ᠨᠠᠢ᠍ᠮᠠᠨ ᠤ᠋ ᠴᠢᠦᠢ ᠰᠢᠦᠸᠠᠢ ᠡᠤ᠂ ᠢᠳᠡᠷ ᠳᠣᠪᠣ ᠶ᠋ᠢ ᠴᠢᠬᠤᠯᠳᠠᠭᠤᠯᠤᠭᠰᠠᠨ ᠬᠡᠷᠡᠭ ᠮᠡᠲᠦ ᠪᠣᠯᠪᠠ!》 ᠭᠡᠮᠡᠨ ᠬᠠᠷᠢᠭᠤ ᠪᠠᠢᠯᠳᠤᠬᠤ ᠪᠢᠴᠢᠭ ᠢ᠋ ᠬᠢᠵᠦ ᠮᠠᠨᠠᠭᠠᠷ ᠤ᠋ᠨ ᠮᠣᠭᠠᠢ ᠴᠠᠭ ᠭᠡᠮᠡᠨ ᠪᠢᠴᠢᠵᠦ ᠶᠠᠪᠤᠭᠤᠯᠪᠠ᠃ ᠮᠤᠬᠤᠯᠢ᠂ ᠴᠠᠰ ᠠᠭᠤᠯᠠ ᠶ᠋ᠢ ᠪᠡᠶᠡ ᠪᠡᠷ ᠦᠳᠡᠭᠰᠡᠨ ᠳ᠋ᠦ᠍ᠷ ᠴᠠᠰ ᠠᠭᠤᠯᠠ ᠨᠢᠯᠪᠤᠰᠤᠨ ᠤᠨᠠᠭᠠᠨ ᠳᠠᠭᠤᠨ ᠦᠭᠡᠢ ᠰᠠᠯᠵᠤ᠂ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠢᠷᠡᠵᠦ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠠᠷᠢᠭᠤ ᠪᠢᠴᠢᠭ ᠢ᠋ ᠲᠤᠰᠢᠶᠠᠵᠤ ᠠᠯᠠᠬᠤ ᠶ᠋ᠢ ᠬᠦᠯᠢᠶᠡᠬᠦᠢ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠥᠭᠦᠯᠡᠷᠦᠨ᠄《ᠴᠢᠨᠦ ᠡᠨᠡ ᠨᠠᠮᠠᠶ᠋ᠢ ᠢᠴᠢᠭᠡᠬᠦ ᠪᠣᠯᠠᠢ᠂ ᠤᠴᠢᠷ ᠦᠭᠡᠢ ᠶᠠᠭᠤᠨ ᠳ᠋ᠤᠷ ᠠᠯᠠᠮᠤᠢ? ᠮᠥᠨ ᠬᠦ᠌ ᠬᠡᠪ ᠢ᠋ᠶ᠋ᠡᠷ ᠠᠪᠠᠴᠢᠵᠤ ᠬᠣᠷᠢᠭᠤᠯ ᠲᠡᠷᠭᠡ ᠳ᠋ᠦ᠍ᠷ ᠬᠣᠷᠢ᠂ ᠴᠡᠷᠢᠭ ᠲᠠᠢᠯᠵᠤ ᠡᠭᠡᠬᠦᠢ ᠳ᠋ᠦ᠍ᠷ ᠳᠡᠢᠯᠦᠭᠰᠡᠨ ᠴᠡᠷᠢᠭ ᠦ᠋ᠨ ᠲᠤᠭ ᠢ᠋ ᠡᠭᠦᠨ ᠢ᠋ᠶ᠋ᠡᠷ ᠳᠠᠬᠢᠵᠤ᠂ ᠡᠭᠦᠨ ᠦ᠌ ᠠᠮᠠᠨ ᠢ᠋ ᠪᠥᠭᠯᠡᠵᠦ ᠠᠯᠠᠶᠠ!》ᠭᠡᠮᠡᠨ ᠬᠣᠷᠢᠭᠤᠯᠤᠭᠠᠳ ᠳᠠᠷᠤᠢ ᠳᠥᠷᠪᠡᠨ ᠵᠠᠩᠵᠤᠨ ᠢ᠋ᠶ᠋ᠠᠨ ᠠᠪᠴᠤ ᠵᠢᠴᠢ ᠡᠳᠦᠷ ᠬᠠᠷᠠ ᠬᠢᠭᠦᠯ ᠦ᠋ᠨ ᠶᠡᠬᠡ ᠲᠠᠯᠠ ᠳ᠋ᠤᠷ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠭᠰᠠᠨᠠ᠂ ᠠᠷᠰᠯᠠᠨ ᠬᠠᠭᠠᠨ᠂ ᠬᠠᠭᠠᠨ ᠤ᠋ ᠲᠤᠭ ᠳᠠᠯᠪᠠᠭᠠ ᠬᠠᠯᠬᠠᠪᠴᠢ ᠴᠢᠮᠡᠭ ᠰᠢᠬᠦᠷ ᠪᠠᠷᠢᠭᠤᠯᠵᠤ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠭᠠᠷᠴᠤ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ᠄《ᠡᠨᠡ ᠡᠳᠦᠷ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠬᠤᠯᠠᠭᠤᠨ ᠬᠠᠷᠪᠤᠬᠤ ᠪᠠ ᠴᠢᠯᠠᠭᠤ ᠪᠠᠷ ᠴᠣᠬᠢᠬᠤ ᠵᠦᠢᠯ ᠢ᠋ ᠬᠡᠨ ᠤᠷᠢᠳᠠ ᠦᠢᠯᠡᠳᠪᠡᠰᠦ ᠲᠡᠷᠡ ᠳᠠᠷᠤᠢ ᠲᠡᠭᠦᠨ ᠦ᠌ ᠡᠴᠢᠭᠡ ᠶ᠋ᠢᠨ ᠦᠷᠡᠰ ᠪᠤᠰᠤ᠂ ᠬᠠᠷᠯᠢᠭᠤᠳ ᠤᠯᠤᠰ ᠤ᠋ᠨ ᠬᠠᠭᠠᠨ ᠠᠷᠰᠯᠠᠨ ᠪᠢ ᠬᠠᠷᠠᠬᠠᠨ ᠬᠡᠳᠦᠢᠨᠡᠢ ᠲᠡᠮᠦᠵᠢᠨ ᠢ᠋ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠭᠡᠮᠡᠨ ᠰᠣᠨᠣᠰᠪᠠ᠃ ᠬᠠᠷᠠ ᠲᠡᠷᠢᠭᠦᠲᠦ ᠥᠴᠦᠬᠡᠨ ᠬᠥᠮᠦᠨ ᠪᠥᠭᠡᠲᠡᠯᠡ ᠬᠠᠷᠢᠶᠠ ᠦᠭᠡᠢ ᠶᠠᠭᠠᠬᠢᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠬᠡᠮᠡᠮᠦᠢ᠂ ᠬᠠᠨᠳᠤᠭᠰᠠᠨ ᠵᠦᠭ ᠡᠰᠡᠷᠭᠦᠴᠡᠯ ᠦᠭᠡᠢ ᠪᠢ᠂ ᠬᠠᠭᠠᠨ ᠴᠣᠯᠠᠲᠤ ᠲᠡᠮᠦᠵᠢᠨ ᠢ᠋ ᠠᠯᠠᠬᠤ ᠶ᠋ᠢᠨ ᠤᠷᠢᠳᠠ᠂ ᠬᠠᠢᠷᠠᠬᠠᠨ ᠪᠡᠶᠡ ᠶ᠋ᠢ ᠢᠨᠤ ᠤᠴᠠᠷᠠᠵᠤ ᠦᠵᠡᠶᠡ᠂ ᠬᠠᠮᠤᠭ ᠬᠥᠮᠦᠨ ᠦ᠌ ᠬᠡᠯᠡᠭᠰᠡᠨ ᠯᠦ᠋ᠭᠡ ᠨᠡᠢᠴᠡᠮᠦᠢ ᠦᠦ ᠦᠭᠡᠢ ᠦᠦ ?》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠪᠣᠯᠤᠮᠤᠢ ᠪᠣᠯᠤᠮᠤᠢ ᠬᠡᠮᠡᠵᠦ ᠵᠢᠭᠰᠠᠭᠠᠯ ᠳ᠋ᠤᠷ ᠣᠷᠣᠵᠤ ᠤᠳᠠᠭᠰᠠᠨ ᠦᠭᠡᠢ᠂ ᠤᠯᠠᠭᠠᠨ ᠰᠢᠬᠦᠷ ᠲᠤᠭ ᠬᠢᠭᠢᠷᠢ ᠳᠠᠯᠪᠠᠭᠠ ᠦᠵᠡᠭᠳᠡᠵᠦ᠂ ᠳᠡᠭᠡᠷᠡ ᠴᠥᠮ ᠠᠯᠲᠠᠨ ᠤ᠋ ᠠᠷᠰᠯᠠᠨ ᠢ᠋ ᠰᠡᠢᠯᠵᠦ᠂ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠨᠠᠷᠢᠨ ᠬᠥᠭᠵᠢᠮ ᠦ᠋ᠨ ᠳᠠᠭᠤᠨ ᠭᠠᠷᠴᠤ ᠰᠠᠢᠬᠠᠨ ᠦᠨᠦᠷ ᠠᠩᠬᠢᠯᠤᠨ ᠰᠠᠯᠬᠢᠨ ᠳᠣᠣᠷᠠ ᠦᠨᠦᠷᠲᠦᠵᠦ᠂ ᠭᠤᠷᠪᠠᠨ ᠵᠡᠷᠭᠡ ᠶᠡᠬᠡ ᠬᠡᠩᠭᠡᠷᠭᠡ ᠳᠤᠤᠭᠠᠷᠴᠤ ᠲᠠᠪᠤᠨ ᠳᠠᠪᠬᠤᠷ ᠪᠦᠷᠢᠶᠡ ᠦᠯᠢᠶᠡᠨ᠂ ᠶᠢᠰᠦᠨ ᠬᠠᠭᠠᠯᠭᠠ ᠶ᠋ᠢᠨ ᠲᠤᠭ ᠳᠠᠷᠠᠭᠠᠯᠠᠨ ᠭᠠᠷᠴᠤ ᠲᠠᠢᠽᠦ ᠶ᠋ᠢᠨ ᠰᠢᠳᠠᠷ ᠠᠷᠪᠠᠨ ᠳᠥᠷᠪᠡᠨ ᠪᠠᠭᠠ ᠵᠠᠩᠵᠤᠨ ᠪᠠ ᠮᠤᠬᠤᠯᠢ ᠲᠡᠷᠢᠭᠦᠯᠡᠨ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠯᠤᠭᠠ ᠬᠣᠷᠢᠨ ᠵᠠᠩᠵᠤᠨ ᠨᠠᠷ ᠴᠥᠮ ᠮᠥᠩᠭᠥᠨ ᠦ᠌ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠴᠦ ᠪᠠᠷᠰ ᠤ᠋ᠨ ᠠᠷᠠᠰᠤᠨ ᠬᠤᠶᠠᠭ᠂ ᠪᠤᠯᠠᠭᠠ ᠶ᠋ᠢᠨ ᠦᠰᠦᠨ ᠦ᠌ ᠮᠥᠷᠥᠪᠴᠢ ᠵᠡᠭᠦᠵᠦ ᠬᠣᠶᠠᠷ ᠠᠢᠮᠠᠭᠯᠠᠨ ᠭᠠᠷᠴᠤ ᠢᠷᠡᠭᠡᠳ ᠳᠠᠭᠠᠯᠳᠤᠭᠠ ᠲᠠᠪᠤᠨ ᠲᠣᠬᠣᠢ ᠶᠡᠬᠡ ᠪᠠᠮᠪᠠᠢ ᠪᠠᠷᠢᠭᠰᠠᠨ ᠪᠠᠷᠰ ᠤ᠋ᠨ ᠠᠷᠠᠰᠤᠨ ᠤ᠋ ᠳᠡᠪᠡᠯᠲᠦ ᠵᠠᠭᠤᠨ ᠴᠡᠷᠢᠭ ᠵᠢᠭᠰᠠᠭᠠᠵᠤ᠂ ᠠᠯᠲᠠᠨ ᠤ᠋ ᠫᠠᠢ᠂ ᠮᠥᠩᠭᠥᠨ ᠦ᠌ ᠵᠡᠪᠰᠡᠭ ᠨᠠᠷᠠᠨ ᠳ᠋ᠤᠷ ᠭᠢᠯᠪᠠᠰᠤᠨ ᠬᠥᠳᠡᠯᠵᠦ᠂ ᠵᠢᠷᠭᠤᠭᠠᠨ ᠬᠣᠣᠰ ᠠᠯᠲᠠ ᠤᠯᠠᠭᠠᠨ ᠠᠷᠰᠯᠠᠨᠲᠤ ᠰᠢᠭᠦᠷ ᠬᠣᠣᠰᠯᠠᠨ ᠭᠠᠷᠴᠤ ᠪᠠᠰᠠ ᠳᠥᠷᠪᠡᠨ ᠬᠣᠣᠰ ᠣᠭᠣᠰᠣᠷᠲᠤ ᠠᠯᠲᠠᠨ ᠬᠦᠯᠢᠯ ᠭᠠᠷᠴᠤ ᠢᠷᠡᠭᠡᠳ ᠳᠠᠷᠠᠭᠠ ᠨᠠᠢ᠍ᠮᠠᠨ ᠶᠡᠬᠡ ᠤᠯᠠᠭᠠᠨ ᠠᠯᠲᠠᠨ ᠠᠷᠰᠯᠠᠨᠲᠤ ᠪᠣᠰᠤᠭᠠ ᠬᠢᠭᠢᠷᠢ ᠵᠠᠪᠰᠠᠷ ᠦᠭᠡᠢ ᠨᠡᠢᠯᠡᠭᠰᠡᠭᠡᠷ ᠬᠠᠭᠠᠨ ᠢ᠋ᠶ᠋ᠠᠨ ᠳᠠᠭᠠᠯᠳᠤᠨ ᠭᠠᠷᠴᠤ ᠢᠷᠡᠮᠡᠭᠴᠡ ᠨᠠᠷᠢᠨ ᠬᠥᠭᠵᠢᠮ ᠬᠣᠶᠠᠷ ᠠᠩᠭᠢ ᠳ᠋ᠤᠷ ᠡᠭᠦᠰᠬᠡᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠤᠷᠪᠠᠨᠲᠠ ᠭᠠᠷᠤᠮᠠᠭᠴᠠ ᠠᠯᠲᠠᠨ ᠵᠦᠩ ᠭᠤᠷᠪᠠᠨᠲᠠ ᠳᠠᠭᠤᠷᠢᠰᠴᠤ ᠲᠠᠢᠽᠦ ᠶ᠋ᠢᠨ ᠪᠡᠶᠡ ᠢᠯᠡᠷᠡᠨ ᠭᠠᠷᠪᠠ᠄ ᠲᠡᠷᠢᠭᠦᠨ ᠳ᠋ᠦ᠍ᠷ ᠰᠤᠪᠤᠳ ᠤ᠋ᠨ ᠰᠢᠭᠢᠳᠭᠡᠷᠢᠲᠦ ᠠᠯᠲᠠᠨ ᠳᠤᠭᠤᠯᠠᠭᠠ᠂ ᠪᠡᠶᠡ ᠳ᠋ᠦ᠍ᠷ ᠮᠥᠨ ᠬᠦ᠌ ᠰᠤᠪᠤᠳ ᠤ᠋ᠨ ᠰᠢᠭᠢᠳᠭᠡᠷᠢᠲᠦ ᠠᠷᠠᠰᠯᠠᠨᠲᠤ ᠠᠯᠲᠠᠲᠤ ᠬᠤᠶᠠᠭ᠂ ᠥᠨᠳᠥᠷ ᠲᠣᠯᠣᠭᠠᠢᠲᠤ ᠴᠠᠭᠠᠨ ᠰᠠᠷᠠᠯ ᠯᠤᠤ ᠶ᠋ᠢᠨ ᠮᠣᠷᠢ ᠤᠨᠤᠵᠤ᠂ ᠨᠢᠭᠤᠷ ᠤ᠋ᠨ ᠥᠩᠭᠡ ᠠᠷᠢᠯᠤᠭᠰᠠᠨ ᠬᠥᠬᠡᠮᠳᠦᠭ ᠣᠭᠲᠠᠷᠭᠤᠢ ᠮᠡᠲᠦ᠂ ᠬᠦᠷᠢ ᠬᠣᠷᠣᠬᠠᠢ ᠶ᠋ᠢᠨ ᠬᠥᠮᠥᠰᠬᠡ ᠳ᠋ᠦ᠍ᠷ ᠲᠦᠮᠡᠨ ᠬᠢᠵᠠᠭᠠᠷ ᠢ᠋ ᠣᠨᠢᠰᠤᠯᠠᠵᠤ᠂ ᠭᠡᠭᠡᠨ ᠣᠳᠣᠨ ᠤ᠋ ᠨᠢᠳᠦᠨ ᠳ᠋ᠦ᠍ᠷ ᠨᠡᠢᠭᠡᠮ ᠠᠮᠢᠲᠠᠨ ᠢ᠋ ᠬᠠᠷᠠᠭᠠᠯᠵᠠᠮᠤᠢ᠃ ᠰᠠᠢᠬᠠᠨ ᠰᠠᠬᠠᠯ ᠭᠡᠷᠡᠯᠲᠦ ᠨᠢᠭᠤᠷ ᠲᠤᠷ ᠭᠤᠷᠪᠠᠨ ᠲᠥᠭᠡ ᠤᠷᠭᠤᠵᠤ᠂ ᠶᠡᠬᠡ ᠴᠢᠬᠢ ᠬᠣᠶᠠᠷ ᠮᠥᠷᠥ ᠳ᠋ᠦ᠍ᠷ ᠬᠦᠷᠴᠦᠬᠦᠢ᠃ ᠬᠣᠶᠠᠷ ᠭᠠᠷ ᠤ᠋ᠨ ᠠᠯᠠᠭᠠ ᠳ᠋ᠤᠷ ᠬᠣᠲᠠᠯᠠ ᠤᠯᠤᠰ ᠢ᠋ ᠠᠳᠬᠤᠵᠤ᠂ ᠬᠡᠬᠦᠳᠡᠭ ᠦ᠋ᠨ ᠳᠣᠲᠣᠷᠠ ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠪᠠᠭᠲᠠᠭᠠᠵᠤᠬᠤᠢ᠃ ᠠᠷᠰᠯᠠᠨ ᠬᠠᠭᠠᠨ ᠠᠩᠬᠠᠨ ᠳ᠋ᠤᠷ ᠲᠡᠭᠷᠢ ᠶ᠋ᠢᠨ ᠵᠢᠭᠰᠠᠭᠠᠯ ᠢ᠋ ᠦᠵᠡᠭᠡᠳ ᠬᠠᠪᠠᠷ ᠢ᠋ᠶ᠋ᠠᠨ ᠱᠠᠩᠨᠠᠢᠨ ᠢᠨᠢᠶᠡᠬᠦ ᠪᠣᠯᠠᠢ᠃ ᠬᠣᠢᠨᠠ ᠵᠢᠭᠰᠠᠭᠠᠯ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠢᠷᠡᠭᠰᠡᠭᠡᠷ ᠭᠡᠨᠡᠳᠲᠡ ᠶᠡᠬᠡ ᠬᠢᠭᠢᠷᠢ ᠬᠣᠶᠠᠷ ᠠᠩᠭᠢ ᠢᠷᠡᠵᠦ ᠲᠠᠢᠽᠦ ᠶ᠋ᠢᠨ ᠡᠨᠡ ᠮᠡᠲᠦ ᠰᠦᠷᠲᠦ ᠴᠣᠭᠴᠠᠰ ᠢ᠋ ᠦᠵᠡᠭᠡᠳ ᠳᠣᠲᠣᠷᠠ ᠭᠡᠨᠡᠳᠲᠡ ᠵᠢᠷᠦᠬᠡ ᠲᠦᠭᠰᠢᠵᠦ ᠠᠷᠠᠢ ᠮᠣᠷᠢᠨ ᠠ᠋ᠴᠠ ᠬᠠᠷᠠᠢᠨ ᠪᠠᠭᠤᠬᠤ ᠰᠢᠬᠠᠵᠤ ᠰᠠᠢ ᠰᠡᠬᠡᠰᠬᠢᠵᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ᠄《ᠪᠢ ᠲᠡᠭᠷᠢ ᠳ᠋ᠦ᠍ᠷ ᠭᠠᠷᠴᠤ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠢ᠋ ᠦᠵᠡᠭᠰᠡᠨ ᠦᠭᠡᠢ ᠲᠤᠯᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠪᠠᠢᠳᠠᠯ ᠲᠠᠢ ᠪᠠ ᠦᠭᠡᠢ ᠶ᠋ᠢ ᠲᠠᠨᠢᠵᠤ ᠦᠯᠦ ᠴᠢᠳᠠᠮᠤᠢ᠃ ᠭᠠᠭᠴᠠ ᠡᠨᠡ ᠳᠦᠷᠰᠦ ᠢᠨᠤ ᠬᠠᠷᠢᠨ ᠰᠦᠮᠡ ᠬᠡᠢᠳ ᠲᠦ᠍ᠷ ᠪᠦᠬᠦᠢ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠳ᠋ᠤᠷ ᠪᠠᠷᠤᠭᠲᠠᠢ᠂ ᠡᠩ ᠦ᠋ᠨ ᠵᠡᠷᠭᠡ ᠶ᠋ᠢᠨ ᠬᠥᠮᠦᠨ ᠡᠴᠡ ᠭᠠᠢᠬᠠᠮᠰᠢᠭᠲᠠᠢ ᠰᠦᠷᠲᠡᠢ ᠢᠨᠦ ᠦᠨᠡᠨ᠂ ᠦᠨᠡᠬᠡᠷ ᠮᠠᠨ ᠮᠠᠨ ᠠ᠋ᠴᠠ ᠰᠦᠷ ᠭᠡᠷᠡᠯᠲᠡᠢ᠃ ᠭᠠᠭᠴᠠ ᠲᠡᠢᠨ ᠪᠣᠯᠪᠠᠴᠤ ᠥᠪᠡᠷ ᠦ᠋ᠨ ᠤᠯᠤᠰ ᠢ᠋ᠶ᠋ᠠᠨ ᠡᠵᠡᠯᠡᠨ ᠠᠪᠤᠪᠠᠰᠤ ᠰᠠᠢ ᠲᠡᠭᠷᠢ ᠬᠡᠮᠡᠬᠦ ᠪᠣᠢ ᠶᠡ ᠂ ᠶᠠᠭᠤᠨ ᠳ᠋ᠤᠷ ᠪᠠᠰᠠ ᠬᠠᠷᠢᠶᠠ ᠦᠭᠡᠢ ᠣᠯᠠᠨ ᠤᠯᠤᠰ ᠠᠢᠮᠠᠭ ᠤ᠋ᠳ ᠢ᠋ ᠴᠥᠮ ᠳᠠᠷᠤᠯᠠᠨ ᠬᠤᠷᠢᠶᠠᠭᠰᠠᠨ ᠠᠨᠤ ᠶᠠᠭᠤᠨ?》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠮᠥᠨ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠥᠴᠢᠷᠦᠨ᠄《ᠪᠢ ᠪᠤᠰᠤᠳ ᠢ᠋ ᠡᠷᠢᠨ ᠬᠠᠯᠳᠠᠭᠰᠠᠨ ᠭᠠᠵᠠᠷ ᠨᠢᠭᠡᠨ ᠴᠦ᠍ ᠦᠭᠡᠢ᠂ ᠣᠨᠴᠠ ᠨᠠᠳᠠ ᠯᠤᠭᠠ ᠬᠠᠯᠳᠠᠷᠠ ᠢᠷᠡᠭᠰᠡᠨ ᠳ᠋ᠦ᠍ᠷ ᠡᠰᠡ ᠬᠠᠷᠢᠭᠤᠯᠪᠠᠰᠤ ᠪᠣᠯᠬᠤ ᠦᠭᠡᠢ ᠲᠤᠯᠠ ᠲᠡᠳᠡᠭᠡᠷ ᠣᠯᠠᠨ ᠠᠢᠮᠠᠭ ᠤ᠋ᠳ ᠥᠪᠡᠷᠲᠡᠭᠡᠨ ᠳᠠᠷᠤᠭᠳᠠᠵᠤ ᠣᠷᠣᠵᠤ ᠥᠭᠭᠦᠭᠰᠡᠨ ᠪᠥᠯᠥᠭᠡ᠃ ᠦᠵᠡᠲᠡᠯᠡ ᠴᠢ ᠡᠳᠦᠭᠡ ᠢᠯᠡᠷᠭᠡᠶᠡ ᠨᠠᠮᠠᠶ᠋ᠢ ᠬᠠᠯᠳᠠᠷᠠ ᠢᠷᠡᠭᠰᠡᠨ ᠪᠥᠭᠡᠲᠡᠯᠡ ᠪᠢ ᠬᠡᠷᠬᠢᠨ ᠳᠤᠲᠠᠭᠠᠵᠤ ᠡᠴᠢᠮᠦᠢ!》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠠᠮᠠ ᠪᠠᠨ ᠪᠥᠭᠯᠡᠭᠳᠡᠵᠦ᠂ ᠪᠠᠰᠠ ᠠᠰᠠᠭᠤᠷᠤᠨ᠄ 《ᠪᠢ ᠰᠣᠨᠣᠰᠪᠠᠰᠤ ᠪᠧᠲ᠋ᠠ᠋ ᠤᠯᠤᠰ ᠬᠡᠮᠡᠭᠴᠢ ᠦᠶᠡ ᠦᠶᠡ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠬᠠᠭᠠᠨ ᠰᠠᠭᠤᠭᠰᠠᠭᠠᠷ ᠢᠷᠡᠪᠡ᠂ ᠴᠢᠨᠦ ᠡᠪᠦᠭᠡ ᠬᠠᠪᠤᠯ ᠬᠠᠨ ᠳ᠋ᠤᠷ ᠬᠦᠷᠲᠡᠯᠡ ᠴᠥᠮ ᠬᠠᠭᠠᠨ ᠰᠠᠭᠤᠬᠤ ᠪᠥᠭᠡᠳ ᠴᠢ ᠡᠳᠦᠭᠡ ᠡᠨᠡ ᠮᠡᠲᠦ ᠬᠠᠭᠠᠨ ᠠ᠋ᠴᠠ ᠢᠯᠡᠭᠦᠦ ᠰᠥᠷᠯᠡᠨ ᠶᠠᠪᠤᠬᠤ ᠠᠲᠠᠯᠠ ᠬᠠᠭᠠᠨ ᠦᠯᠦ ᠰᠠᠭᠤᠬᠤ ᠠᠨᠤ ᠶᠠᠭᠤᠨ?》 ᠲᠠᠢᠽᠦ ᠥᠴᠢᠷᠦᠨ᠄《ᠬᠠᠭᠠᠨ ᠬᠥᠮᠦᠨ ᠰᠠᠢ ᠬᠠᠭᠠᠨ ᠰᠠᠭᠤᠮᠤᠢ᠃ ᠬᠠᠭᠠᠨ ᠪᠤᠰᠤ ᠬᠥᠮᠦᠨ ᠬᠡᠷᠬᠢᠨ ᠬᠠᠭᠠᠨ ᠰᠠᠭᠤᠮᠤᠢ? ᠨᠠᠳᠠ ᠳ᠋ᠤᠷ ᠬᠠᠭᠠᠨ ᠬᠥᠮᠦᠨ ᠦ᠌ ᠡᠷᠳᠡᠮ ᠦᠭᠡᠢ ᠪᠥᠭᠡᠲᠡᠯᠡ ᠪᠢ ᠬᠡᠷᠬᠢᠨ ᠬᠠᠭᠠᠨ ᠰᠠᠭᠤᠮᠤᠢ? ᠲᠠᠨ ᠤ᠋ ᠮᠡᠲᠦ ᠲᠡᠢᠮᠦ ᠬᠠᠭᠠᠨ ᠢ᠋ ᠰᠠᠭᠤᠬᠤᠢ ᠳ᠋ᠤᠷ ᠶᠠᠮᠪᠠᠷ ᠪᠡᠷᠬᠡ᠃ ᠭᠠᠭᠴᠠ ᠬᠠᠭᠠᠨ ᠤ᠋ ᠡᠷᠳᠡᠮ ᠢ᠋ᠶ᠋ᠡᠷ ᠶᠠᠪᠤᠳᠠᠯ ᠢ᠋ ᠶᠠᠪᠤᠵᠤ ᠴᠢᠳᠠᠬᠤ ᠠᠨᠤ ᠪᠡᠷᠬᠡ᠂ ᠲᠡᠢᠨ ᠬᠦ᠌ ᠪᠢ ᠠᠶᠤᠮᠰᠢᠭ ᠦᠭᠡᠢ ᠬᠠᠭᠠᠨ ᠦᠯᠦ ᠰᠠᠭᠤᠮᠤᠢ᠃ 》ᠠᠷᠰᠯᠠᠨ ᠬᠠᠭᠠᠨ ᠠᠰᠠᠭᠤᠷᠤᠨ᠄《ᠬᠠᠭᠠᠨ ᠬᠥᠮᠦᠨ ᠦ᠌ ᠶᠠᠪᠤᠳᠠᠯ ᠬᠡᠮᠡᠭᠴᠢ ᠶᠠᠭᠤᠨ ᠪᠣᠢ?》ᠲᠠᠢᠽᠦ ᠥᠴᠢᠷᠦᠨ᠄《ᠬᠠᠭᠠᠨ ᠬᠥᠮᠦᠨ ᠦ᠌ ᠶᠠᠪᠤᠳᠠᠯ ᠬᠡᠮᠡᠭᠴᠢ᠄ ᠦᠰᠦ ᠬᠢᠯᠭᠠᠰᠤᠨ ᠲᠡᠳᠦᠢ ᠬᠠᠭᠤᠷᠮᠠᠭ ᠦᠭᠡᠢ᠂ ᠦᠭᠡ ᠪᠦᠷᠢ ᠦᠨᠡᠨ ᠪᠣᠯᠪᠠᠰᠤ ᠲᠡᠷᠡ ᠰᠠᠢ ᠬᠠᠭᠠᠨ ᠤ᠋ ᠶᠠᠪᠤᠳᠠᠯ᠃ 》ᠠᠷᠰᠯᠠᠨ ᠬᠠᠭᠠᠨ ᠥᠭᠦᠯᠡᠷᠦᠨ᠄《ᠡᠳᠦᠭᠡ ᠴᠢᠨᠦ ᠦᠭᠡ ᠪᠦᠷᠢ ᠴᠥᠮ ᠬᠤᠳᠠᠯ ᠪᠤᠶᠤ!》 ᠲᠠᠢᠽᠦ ᠮᠦᠰᠢᠶᠡᠨ ᠥᠭᠦᠯᠡᠷᠦᠨ᠄《ᠬᠡᠳᠦᠢ ᠲᠡᠢᠨ ᠦᠭᠡᠢ ᠪᠣᠯᠪᠠᠴᠤ ᠥᠪᠡᠷ ᠦ᠋ᠨ ᠶᠠᠪᠤᠳᠠᠯ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠪᠠᠲᠤᠯᠠᠨ ᠦᠯᠦ ᠴᠢᠳᠠᠮᠤᠢ᠂ ᠡᠳᠦᠷ ᠪᠦᠷᠢ ᠪᠣᠳᠣᠪᠠᠰᠤ ᠤᠷᠢᠳᠤ ᠶ᠋ᠢᠨ ᠡᠳᠦᠷ ᠦ᠋ᠨ ᠶᠠᠪᠤᠭᠰᠠᠨ ᠪᠤᠷᠤᠭᠤ ᠪᠠᠨ ᠮᠡᠳᠡᠵᠦ ᠭᠡᠮᠰᠢᠬᠦ ᠰᠠᠨᠠᠭᠠᠨ ᠲᠠᠰᠤᠷᠠᠭᠠᠳᠤᠢ ᠲᠤᠯᠠ ᠲᠡᠢᠨ ᠬᠦ᠌ ᠥᠪᠡᠷ ᠦ᠋ᠨ ᠭᠡᠮ ᠠᠷᠢᠯᠤᠨ ᠳᠠᠭᠤᠰᠤᠭᠠᠳᠤᠢ ᠪᠠᠨ ᠮᠡᠳᠡᠮᠦᠢ᠃ 》ᠠᠷᠰᠯᠠᠨ ᠬᠠᠭᠠᠨ ᠠᠰᠠᠭᠤᠷᠤᠨ᠄《ᠠᠶᠤᠮᠰᠢᠭ ᠦᠭᠡᠢ ᠬᠡᠮᠡᠬᠦ ᠢᠨᠤ ᠬᠡᠨ ᠡᠴᠡ ᠠᠶᠤᠮᠰᠢᠭ ᠦᠭᠡᠢ ᠬᠡᠮᠡᠬᠦ ᠪᠣᠢ?》 ᠲᠠᠢᠽᠦ ᠥᠴᠢᠷᠦᠨ᠄《ᠳᠡᠭᠡᠳᠦ ᠲᠡᠭᠷᠢ ᠡᠴᠡ ᠠᠶᠤᠮᠰᠢᠭ ᠦᠭᠡᠢ ᠪᠤᠶᠤ!》 ᠠᠷᠰᠯᠠᠨ ᠠᠰᠠᠭᠤᠷᠤᠨ᠄《ᠲᠡᠢᠮᠦ ᠪᠣᠯᠪᠠᠰᠤ ᠮᠠᠨ ᠤ᠋ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠲᠡᠳᠡᠭᠡᠷ ᠣᠯᠠᠨ ᠬᠠᠭᠠᠳ ᠨᠠᠷ ᠬᠡᠷᠬᠢᠨ ᠴᠥᠮ ᠬᠠᠭᠠᠨ ᠰᠠᠭᠤᠪᠠ?》 ᠲᠠᠢᠽᠦ ᠮᠦᠰᠢᠶᠡᠨ ᠥᠭᠦᠯᠡᠷᠦᠨ᠄《ᠲᠡᠳᠡᠭᠡᠷ ᠬᠠᠭᠠᠨ ᠲᠡᠷᠡ ᠮᠡᠲᠦ ᠲᠡᠭᠷᠢ ᠶ᠋ᠢ ᠰᠥᠷᠦᠭᠰᠡᠨ ᠲᠤᠯᠠ ᠡᠳᠦᠭᠡ ᠴᠥᠮ ᠨᠠᠳᠠ ᠳ᠋ᠤᠷ ᠳᠠᠷᠤᠭᠳᠠᠵᠤ ᠪᠢ ᠬᠠᠭᠠᠨ ᠢ᠋ ᠠᠨᠤ ᠪᠠᠢᠯᠭᠠᠪᠠ᠃》 ᠠᠷᠰᠯᠠᠨ ᠠᠰᠠᠭᠤᠷᠤᠨ᠄《ᠪᠢ ᠡᠳᠦᠭᠡ ᠪᠠᠰᠠ ᠬᠠᠭᠠᠨ᠂ ᠴᠢ ᠨᠠᠮᠠᠶ᠋ᠢ ᠬᠡᠷᠬᠢᠮᠦᠢ?》 ᠲᠠᠢᠽᠦ ᠥᠭᠦᠯᠡᠷᠦᠨ᠄《ᠪᠢ ᠴᠢᠮᠠᠶ᠋ᠢ ᠰᠠᠢᠨ ᠢ᠋ᠶ᠋ᠠᠷ ᠤᠬᠠᠭᠤᠯᠵᠤ ᠬᠠᠭᠠᠨ ᠢ᠋ᠶ᠋ᠠᠨ ᠪᠠᠢᠭᠠᠳ ᠨᠠᠳᠠ ᠳ᠋ᠤᠷ ᠠᠯᠪᠠ ᠪᠡᠷᠢ ᠬᠡᠮᠡᠮᠦᠢ᠃ ᠬᠡᠷᠪᠡ ᠰᠠᠢᠨ ᠳ᠋ᠤᠷ ᠦᠯᠦ ᠬᠡᠰᠦᠭᠡᠳ᠂ ᠡᠰᠡᠷᠭᠦᠴᠡᠪᠡᠰᠦ ᠴᠡᠷᠢᠭ ᠢ᠋ᠶ᠋ᠡᠷ ᠪᠠᠢᠯᠳᠤᠵᠤ ᠴᠢᠮᠠᠶ᠋ᠢ ᠪᠠᠷᠢᠵᠤ ᠠᠪᠤᠭᠠᠳ ᠪᠠᠰᠠ ᠭᠡᠰᠬᠡᠮᠦᠢ᠃ ᠬᠡᠷᠪᠡ ᠪᠠᠰᠠ ᠡᠰᠡ ᠭᠡᠰᠪᠡᠰᠦ ᠣᠳᠣ ᠬᠠᠭᠠᠨ ᠲᠣᠯᠣᠭᠠᠢ ᠶ᠋ᠢ ᠴᠢᠨᠦ ᠣᠭᠲᠣᠯᠤᠮᠤᠢ!》ᠡᠭᠦᠨ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄《ᠴᠢ ᠬᠠᠭᠠᠨ ᠪᠤᠰᠤ ᠪᠥᠭᠡᠳ ᠶᠠᠭᠤᠨ ᠳ᠋ᠤᠷ ᠬᠠᠭᠠᠨ ᠪᠣᠯᠤᠭᠰᠠᠨ ᠬᠥᠮᠦᠨ ᠢ᠋ ᠠᠯᠠᠮᠤᠢ?》 ᠲᠠᠢᠽᠦ ᠥᠭᠦᠯᠡᠷᠦᠨ᠄《ᠴᠢᠨᠦ ᠲᠡᠷᠡ ᠬᠠᠭᠠᠨ ᠢ᠋ ᠭᠠᠭᠴᠠ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠤᠳᠠᠮᠤᠢ᠂ ᠪᠤᠰᠤ ᠬᠥᠮᠦᠨ ᠴᠥᠮ ᠴᠢᠮᠠᠶ᠋ᠢ ᠬᠤᠯᠠᠭᠠᠢ ᠬᠡᠮᠡᠮᠦᠢ!》 ᠠᠷᠰᠯᠠᠨ ᠠᠰᠠᠭᠤᠷᠤᠨ᠄《ᠴᠢᠮᠠᠶ᠋ᠢ ᠪᠣᠯᠪᠠᠰᠤ ᠣᠯᠠᠨ ᠠᠷᠠᠳ ᠶᠠᠭᠤᠨ ᠬᠡᠮᠡᠮᠦᠢ?》 ᠲᠠᠢᠽᠦ ᠥᠴᠢᠷᠦᠨ᠄《ᠨᠠᠮᠠᠶ᠋ᠢ ᠪᠤᠯᠪᠰᠤ ᠣᠯᠠᠨ ᠬᠥᠮᠦᠨ ᠲᠡᠮᠦᠵᠢᠨ ᠬᠡᠮᠡᠮᠦᠢ᠃ 》ᠠᠷᠰᠯᠠᠨ ᠪᠠᠰᠠ ᠠᠮᠠ ᠪᠥᠭᠯᠡᠭᠳᠡᠵᠦ ᠪᠠᠰᠠ ᠠᠰᠠᠭᠤᠷᠤᠨ:《ᠴᠢ ᠬᠡᠷᠡᠭ ᠦᠭᠡᠢ ᠣᠯᠠᠨ ᠬᠠᠭᠠᠳ ᠢ᠋ ᠠᠯᠠᠬᠤ ᠴᠢᠨᠦ ᠶᠠᠭᠤᠨ?》 ᠲᠠᠢᠽᠦ ᠥᠭᠦᠯᠡᠷᠦᠨ᠄《ᠬᠣᠢᠲᠤ ᠭᠠᠵᠠᠷ ᠶᠣᠰᠣ ᠦᠭᠡᠢ ᠬᠠᠭᠠᠨ ᠲᠣᠭᠠ ᠲᠣᠮᠰᠢ ᠦᠭᠡᠢ ᠪᠣᠯᠤᠭᠠᠳ ᠥᠪᠡᠷ ᠦ᠋ᠨ ᠡᠷᠬᠡ ᠳᠤᠷᠠ ᠪᠠᠷ ᠠᠭᠠᠰᠢᠯᠠᠨ ᠣᠯᠠᠨ ᠠᠮᠢᠲᠠᠨ ᠢ᠋ ᠵᠠᠭᠤᠨ ᠵᠦᠢᠯ ᠢ᠋ᠶ᠋ᠡᠷ ᠵᠣᠪᠠᠭᠠᠵᠤ ᠂ ᠵᠢᠯ ᠰᠠᠷᠠ ᠪᠠᠷ ᠦᠷᠭᠦᠯᠵᠢᠯᠡᠨ ᠴᠡᠷᠢᠭᠯᠡᠬᠦ ᠪᠠᠢᠯᠳᠤᠬᠤ ᠦᠯᠦ ᠵᠣᠭᠰᠣᠨ᠂ ᠣᠯᠠᠨ ᠢᠷᠭᠡᠨ ᠦ᠌ ᠦᠬᠦᠬᠦ ᠢᠨᠤ ᠡᠯᠡᠰᠦ ᠬᠤᠮᠠᠭ ᠬᠡᠢᠰᠬᠦ ᠮᠡᠲᠦ ᠲᠤᠯᠠ ᠲᠡᠢᠨ ᠬᠦ᠌ ᠪᠢ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠨᠡᠢᠲᠡ ᠶ᠋ᠢ ᠡᠩᠬᠡ ᠲᠦᠪᠰᠢᠨ ᠪᠣᠯᠭᠠᠮᠤᠢ᠃ 》ᠠᠷᠰᠯᠠᠨ ᠠᠰᠠᠭᠤᠷᠤᠨ᠄《ᠲᠡᠢᠮᠦ ᠪᠣᠯᠤᠭᠠᠳ ᠴᠢᠮᠠ ᠳ᠋ᠤᠷ ᠶᠠᠮᠪᠠᠷ ᠲᠤᠰᠠ?》ᠲᠠᠢᠽᠦ ᠥᠭᠦᠯᠡᠷᠦᠨ᠄《ᠨᠢᠭᠡᠨ ᠬᠥᠮᠦᠨ ᠲᠥᠷᠥᠭᠡᠳ ᠲᠦᠮᠡᠨ ᠭᠠᠵᠠᠷ ᠢ᠋ ᠡᠩᠬᠡᠵᠢᠭᠦᠯᠬᠦ ᠴᠥᠮ ᠬᠥᠮᠦᠨ ᠪᠣᠯᠤᠨ ᠲᠦᠷᠦᠭᠴᠢᠳ ᠦ᠋ᠨ ᠲᠤᠰᠬᠠᠢ ᠶᠠᠪᠤᠳᠠᠯ᠂ ᠬᠡᠷᠪᠡ ᠴᠢᠳᠠᠪᠠᠰᠤ ᠳᠡᠭᠡᠳᠦ ᠲᠡᠭᠷᠢ ᠳ᠋ᠦ᠍ᠷ ᠭᠠᠪᠢᠶᠠ ᠠᠵᠤ ᠳᠣᠣᠷᠠᠲᠤ ᠠᠮᠢᠲᠠᠨ ᠳ᠋ᠤᠷ ᠥᠷᠥᠰᠢᠶᠡᠯ ᠠᠮᠤᠢ!》ᠠᠷᠰᠯᠠᠨ ᠬᠠᠭᠠᠨ ᠥᠭᠦᠯᠡᠷᠦᠨ᠄《ᠴᠢ ᠲᠡᠷᠡ ᠮᠡᠲᠦ ᠪᠥᠭᠡᠳ ᠡᠳᠦᠭᠡ ᠶᠠᠭᠤᠨ ᠳ᠋ᠤᠷ ᠨᠠᠳᠠ ᠯᠤᠭᠠ ᠪᠠᠢᠯᠳᠤᠮᠤᠢ ᠭᠡᠮᠡᠨ ᠢᠷᠡᠪᠡ? ᠴᠢ ᠥᠪᠡᠷ ᠦ᠋ᠨ ᠣᠷᠣᠨ ᠳ᠋ᠤ᠌ ᠨᠠᠮᠠᠶ᠋ᠢ ᠬᠠᠭᠠᠨ ᠡᠷᠭᠦᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠮᠢᠨᠦ ᠪᠣᠭᠣᠯ ᠪᠣᠯᠪᠠᠰᠤ ᠪᠢ ᠴᠢᠮᠠᠶ᠋ᠢ ᠴᠣᠬᠣᠮ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠭᠡᠮᠡᠨ ᠰᠠᠨᠠᠮᠤᠢ!》ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠮᠦᠰᠢᠶᠡᠵᠦ ᠥᠭᠦᠯᠡᠷᠦᠨ᠄《ᠪᠢ ᠪᠡᠶᠡ ᠪᠡᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠭᠡᠮᠡᠨ ᠣᠭᠲᠣ ᠰᠠᠨᠠᠬᠤ ᠦᠭᠡᠢ᠃ ᠮᠢᠨᠦ ᠡᠳᠡᠭᠡᠷ ᠬᠡᠯᠡᠭᠰᠡᠨ ᠴᠥᠮ ᠴᠢᠮᠠᠶ᠋ᠢ ᠥᠷᠥᠰᠢᠶᠡᠯ ᠢ᠋ᠶ᠋ᠡᠷ ᠤᠳᠤᠷᠢᠳᠤᠨ ᠰᠡᠷᠭᠦᠭᠡᠰᠦᠭᠡᠢ ᠬᠡᠮᠡᠭᠰᠡᠨ ᠪᠥᠯᠥᠭᠡ᠂ ᠴᠢ ᠶᠠᠭᠤᠨ ᠳ᠋ᠤᠷ ᠮᠢᠨᠦ ᠡᠰᠡᠷᠭᠦ ᠥᠴᠦᠬᠡᠨ ᠬᠥᠮᠦᠨ ᠦ᠌ ᠴᠠᠯᠴᠢᠶᠠ ᠦᠭᠡ ᠭᠠᠷᠭᠠᠵᠤ ᠤᠴᠢᠷ ᠦᠭᠡᠢ ᠪᠡᠷ ᠴᠠᠯᠴᠢᠮᠤᠢ?》ᠠᠷᠰᠯᠠᠨ ᠥᠭᠦᠯᠡᠷᠦᠨ᠄《ᠴᠠᠯᠴᠢᠪᠠᠴᠤ ᠪᠡᠯᠴᠢᠪᠡᠴᠦ ᠪᠠᠢᠯᠳᠤᠬᠤ ᠶ᠋ᠢ ᠨᠢᠭᠡᠨᠲᠡ ᠦᠯᠦ ᠵᠣᠭᠰᠣᠮᠤᠢ᠃ ᠴᠢ ᠰᠠᠢᠨ ᠡᠷᠡ ᠪᠣᠯᠪᠠᠰᠤ ᠢᠨᠠᠭᠰᠢ ᠢᠷᠡ᠂ ᠪᠢᠳᠡ ᠬᠣᠶᠠᠭᠤᠯᠠ ᠪᠠᠢᠯᠳᠤᠵᠤ ᠦᠵᠡᠶᠡ!》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠬᠠᠵᠠᠭᠤ ᠠ᠋ᠴᠠ ᠮᠤᠬᠤᠯᠢ ᠰᠦᠷᠡᠬᠡᠢ ᠳᠠᠭᠤᠨ ᠢ᠋ᠶ᠋ᠠᠷ ᠵᠠᠩᠳᠠᠨ ᠥᠭᠦᠯᠡᠷᠦᠨ᠄《ᠠᠭᠤᠯᠠ ᠵᠡᠪᠡ ᠶ᠋ᠢᠨ ᠵᠤᠷᠠᠮᠠ ᠵᠢᠷᠦᠬᠡᠪᠴᠢ᠂ ᠪᠠᠷᠰ ᠯᠤᠭᠠ ᠵᠡᠷᠭᠡᠴᠡᠰᠦᠭᠡᠢ ᠬᠡᠮᠡᠮᠦᠢ! ᠰᠢᠷᠣᠢ ᠶ᠋ᠢᠨ ᠠᠭᠠᠯᠵᠢ ᠮᠤᠭᠤᠯᠵᠢ ᠲᠡᠭᠷᠢ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠲᠡᠮᠡᠴᠡᠭᠴᠢ᠂ ᠵᠤᠨ ᠤ᠋ ᠦᠶᠡ ᠳ᠋ᠦ᠍ᠷ ᠥᠴᠦᠬᠡᠨ ᠪᠠᠲᠠᠭᠠᠨᠠ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠦ᠌ ᠮᠥᠯᠰᠥ ᠶ᠋ᠢ ᠢᠲᠡᠭᠡᠬᠦ ᠦᠭᠡᠢ᠂ ᠭᠡᠷᠡᠯ ᠳ᠋ᠦ᠍ᠷ ᠬᠤᠷᠠᠬᠤ ᠨᠠᠭᠠᠯᠢᠩᠬᠠᠢ ᠤᠯᠠᠭᠠᠨ ᠨᠠᠷᠠᠨ ᠢ᠋ ᠵᠤᠯᠠ ᠪᠣᠯᠭᠠᠨ ᠦᠵᠡᠮᠦᠢ᠃ ᠮᠠᠨ ᠤ᠋ ᠲᠡᠭᠷᠢᠯᠢᠭ ᠡᠵᠡᠨ ᠴᠢᠨᠦ ᠵᠡᠷᠭᠡ ᠶ᠋ᠢᠨ ᠡᠵᠡᠨ ᠡᠴᠢᠭᠡ ᠪᠡᠨ ᠠᠯᠠᠭᠰᠠᠨ ᠣᠯᠢᠭ ᠭᠣᠯᠠᠭ ᠮᠡᠲᠦ ᠬᠥᠮᠦᠨ ᠦ᠌ ᠳᠦᠷᠰᠦᠲᠦ ᠥᠴᠦᠬᠡᠨ ᠠᠳᠤᠭᠤᠰᠤ ᠯᠤᠭᠠ ᠬᠡᠯᠡᠯᠴᠡᠬᠦ ᠢᠨᠦ ᠦᠨᠡᠬᠡᠷ ᠭᠤᠲᠤᠮᠰᠢᠭ!》ᠭᠡᠮᠡᠨ ᠶᠡᠬᠡ ᠬᠠᠷᠠᠩᠭᠠ ᠭᠤᠷᠪᠠᠨ ᠵᠡᠷᠭᠡ ᠳᠠᠭᠤᠷᠢᠰᠴᠤ ᠫᠤᠤ ᠲᠠᠯᠪᠢᠭᠤᠯᠤᠨ ᠬᠢᠭᠢᠷᠢ ᠳᠠᠯᠪᠠᠭᠠ ᠶ᠋ᠢ ᠬᠤᠷᠤᠢᠯᠠᠨ ᠵᠠᠩᠵᠤᠨ ᠨᠠᠷ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠬᠤᠷᠠᠵᠤ ᠢᠷᠡᠲᠡᠯᠡ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠠᠭᠤᠷᠯᠠᠵᠤ ᠳᠠᠷᠤᠢ ᠣᠷᠣᠭᠰᠢ ᠪᠠᠢᠯᠳᠤᠷᠠ ᠢᠷᠡᠬᠦᠢ ᠳ᠋ᠦ᠍ᠷ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠬᠤᠢᠯᠠᠳᠠᠷ ᠬᠣᠰᠢᠭᠤᠴᠢ ᠲᠣᠰᠴᠤ ᠠᠪᠤᠨ ᠬᠣᠶᠠᠭᠤᠯᠠ ᠭᠤᠴᠢᠨ ᠤᠳᠠᠭᠠ ᠢᠯᠡᠭᠦᠦ ᠪᠣᠯᠲᠠᠯᠠ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠠᠰ ᠮᠥᠷᠡᠨ ᠡᠵᠡᠨ ᠳ᠋ᠦ᠍ᠷ ᠢ᠋ᠶ᠋ᠡᠨ ᠲᠤᠰᠠᠯᠠᠷᠠ ᠪᠠᠢᠯᠳᠤᠨ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠢᠭᠰᠠᠭᠠᠯ ᠠ᠋ᠴᠠ ᠵᠦᠯᠭᠡᠲᠡᠢ ᠪᠠᠭᠠᠲᠤᠷ ᠭᠠᠷᠴᠤ ᠲᠤᠰᠪᠠ᠃ ᠬᠠᠷᠯᠢᠭᠤᠳ ᠤ᠋ᠨ ᠵᠢᠭᠰᠠᠭᠠᠯ ᠠ᠋ᠴᠠ ᠶᠠᠭ ᠮᠣᠳᠣ ᠪᠠᠰᠠ ᠳᠣᠪᠲᠣᠯᠤᠨ ᠭᠠᠷᠴᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠢᠭᠰᠠᠭᠠᠯ ᠠ᠋ᠴᠠ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠭᠢᠯᠥᠭᠡᠨ ᠪᠠᠭᠠᠲᠤᠷ ᠭᠠᠷᠴᠤ ᠲᠤᠯᠪᠠ᠃ ᠬᠠᠷᠯᠢᠭᠤᠳ ᠤ᠋ᠨ ᠵᠢᠭᠰᠠᠭᠠᠯ ᠠ᠋ᠴᠠ ᠮᠥᠩᠭᠥᠨ ᠰᠠᠷᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠢᠭᠰᠠᠭᠠᠯ ᠠ᠋ᠴᠠ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠭᠠᠷᠴᠤ ᠲᠤᠯᠪᠠ᠃ ᠮᠤᠬᠤᠯᠢ ᠦᠵᠡᠪᠡᠰᠦ ᠬᠤᠢᠯᠠᠳᠠᠷ ᠬᠣᠰᠢᠭᠤᠴᠢ ᠠᠷᠰᠯᠠᠨ ᠬᠠᠭᠠᠨ ᠯᠤᠭᠠ ᠪᠠᠢᠯᠳᠤᠬᠤ ᠠᠨᠤ ᠭᠠᠭᠴᠠ ᠬᠠᠯᠬᠠᠯᠠᠨ ᠲᠤᠯᠬᠤ ᠪᠣᠢ ᠶᠡ᠂ ᠬᠠᠷᠢᠭᠤᠯᠤᠨ ᠡᠰᠡᠷᠭᠦᠴᠡᠨ ᠴᠢᠳᠠᠬᠤ ᠦᠭᠡᠢ ᠳ᠋ᠦ᠍ᠷ ᠮᠤᠬᠤᠯᠢ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠲᠣᠭᠲᠣᠩᠭᠣ᠌ ᠪᠠᠭᠠᠲᠤᠷ ᠲᠤᠷ ᠥᠭᠦᠯᠡᠷᠦᠨ᠄《ᠬᠤᠢᠯᠠᠳᠠᠷ ᠤ᠋ᠨ ᠪᠠᠢᠯᠳᠤᠬᠤ ᠶ᠋ᠢ ᠦᠵᠡᠬᠦᠯᠡ ᠠᠷᠰᠯᠠᠨ ᠳ᠋ᠤᠷ ᠦᠯᠦ ᠲᠡᠩᠴᠡᠬᠦ ᠮᠡᠲᠦ᠂ ᠣᠳᠣ ᠭᠠᠭᠴᠠ ᠴᠢ ᠭᠠᠷᠴᠤ ᠬᠠᠯᠠᠨ ᠠᠪᠤᠪᠠᠰᠤ ᠵᠣᠬᠢᠮᠤᠢ᠂ ᠬᠡᠳᠦᠢᠨᠡᠢ ᠡᠴᠡ ᠡᠨᠡ ᠠᠷᠰᠯᠠᠨ ᠢ᠋ ᠬᠦᠴᠦᠨ ᠮᠠᠰᠢ ᠶᠡᠬᠡ ᠭᠡᠮᠡᠨ ᠰᠣᠨᠣᠰᠤᠭᠰᠠᠨ ᠪᠥᠯᠥᠭᠡ᠂ ᠬᠢᠯᠪᠠᠷ ᠦᠵᠡᠵᠦ ᠦᠯᠦ ᠪᠣᠯᠣᠮᠢ!》 ᠭᠡᠮᠡᠨ ᠬᠡᠯᠡᠯᠴᠡᠬᠦᠶᠡ ᠬᠠᠷᠯᠢᠭᠤᠳ ᠤ᠋ᠨ ᠵᠢᠭᠰᠠᠭᠠᠯ ᠠ᠋ᠴᠠ ᠪᠠᠰᠠ ᠰᠢᠷᠠ ᠭᠣᠣᠯ ᠳᠣᠪᠲᠣᠯᠤᠨ ᠭᠠᠷᠴᠤ ᠢᠷᠡᠬᠦᠶᠡ᠂ ᠴᠢᠪᠬᠢᠲᠡᠯᠡ ᠲᠣᠭᠲᠣᠩᠭᠣ᠌ ᠪᠠᠭᠠᠲᠤᠷ ᠤ᠋ᠨ ᠰᠠᠨᠠᠭᠠᠨ ᠳ᠋ᠤ᠌ ᠨᠡᠢᠴᠡᠵᠦ ᠶᠠᠭᠠᠷᠠᠨ ᠮᠣᠷᠢᠨ ᠳ᠋ᠠᠭᠠᠨ ᠤᠬᠤᠰᠬᠢᠨ ᠭᠠᠷᠴᠤ ᠶᠡᠬᠡ ᠳ᠋ᠠᠮ ᠢᠯᠳᠦ ᠪᠡᠨ ᠳᠠᠯᠠᠢᠵᠤ ᠰᠢᠷᠠ ᠭᠣᠣᠯ ᠢ᠋ ᠬᠡᠳᠦᠨ ᠤᠳᠠᠭᠠ ᠲᠤᠯᠵᠤ ᠨᠢᠭᠡᠨ ᠳᠡᠭᠡᠭᠦᠷ ᠪᠡᠶᠡ ᠡᠭᠡᠵᠦ ᠬᠤᠢᠯᠠᠳᠠᠷ ᠤ᠋ᠨ ᠵᠦᠭ ᠥᠭᠦᠯᠡᠷᠦᠨ᠄《 ᠬᠣᠰᠢᠭᠤᠴᠢ ᠳᠡᠭᠦᠦ ᠴᠢ ᠡᠭᠦᠨ ᠯᠦ᠋ᠭᠡ ᠪᠠᠢᠯᠳᠤ᠂ ᠪᠢ ᠲᠡᠷᠡ ᠠᠷᠰᠯᠠᠨ ᠤ᠋ ᠬᠦᠴᠦᠨ ᠢ᠋ ᠦᠵᠡᠰᠦᠭᠡᠢ 》 ᠭᠡᠮᠡᠨ ᠠᠯᠠᠨ ᠣᠷᠣᠵᠤ ᠲᠤᠯᠤᠭᠰᠠᠨ ᠳ᠋ᠤᠷ ᠬᠤᠢᠯᠠᠲᠠᠷ ᠴᠢᠯᠥᠭᠡ ᠣᠯᠵᠤ ᠰᠢᠷᠠ ᠭᠣᠣᠯ ᠢ᠋ ᠲᠣᠰᠴᠤ ᠠᠪᠤᠪᠠ᠃ ᠬᠠᠷᠠ ᠬᠢᠭᠦᠯ ᠦ᠋ᠨ ᠬᠠᠷᠠ ᠲᠣᠰᠣᠲᠤ ᠲᠠᠯᠠ ᠳ᠋ᠤᠷ ᠲᠠᠪᠤᠨ ᠬᠣᠣᠰ ᠠᠷᠪᠠᠨ ᠵᠠᠩᠵᠤᠨ ᠤ᠋ ᠪᠠᠢᠯᠳᠤᠬᠤ ᠠᠨᠤ ᠦᠨᠡᠬᠡᠷ ᠪᠠᠷᠰ ᠢᠷᠪᠢᠰ ᠯᠤᠤ ᠭᠠᠷᠤᠳᠢ ᠲᠡᠮᠡᠴᠡᠯᠳᠦᠬᠦ ᠮᠡᠲᠦ᠃ ᠲᠠᠪᠤᠨ ᠬᠣᠣᠰ ᠠᠷᠪᠠᠨ ᠵᠠᠩᠵᠤᠨ ᠨᠠᠶᠠᠨ ᠤᠳᠠᠭᠠ ᠵᠥᠷᠢᠴᠡᠯᠳᠦᠵᠦ ᠬᠠᠷᠠᠬᠠᠨ ᠢᠯᠭᠠᠷᠠᠭᠠᠳᠤᠢ ᠳ᠋ᠤᠷ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠡᠩᠭᠡᠷᠭᠡ ᠴᠠᠩ ᠢ᠋ᠶ᠋ᠠᠨ ᠴᠣᠬᠢᠵᠤ ᠡᠨᠳᠡ ᠬᠠᠰᠬᠢᠷᠤᠯᠳᠤᠬᠤ ᠠᠨᠤ ᠠᠭᠤᠯᠠ ᠲᠠᠯᠠ ᠠᠨᠢᠷᠯᠠᠵᠤᠬᠤᠢ᠃ ᠡᠭᠦᠨ ᠳ᠋ᠦ᠍ᠷ ᠲᠠᠢᠽᠦ ᠮᠥᠨ ᠥᠨᠳᠥᠷ ᠬᠠᠯᠬᠠᠰ ᠲᠤᠷ ᠠᠪᠠᠷᠢᠵᠤ ᠦᠵᠡᠭᠡᠳ ᠮᠥᠨ ᠰᠠᠢᠰᠢᠶᠠᠨ ᠮᠦᠰᠢᠶᠡᠪᠡ᠃ ᠲᠡᠳᠦᠢ ᠪᠡᠴᠢᠨ ᠴᠠᠭ ᠪᠣᠯᠲᠠᠯᠠ ᠪᠠᠢᠯᠳᠤᠵᠤ ᠬᠣᠶᠠᠷ ᠡᠲᠡᠭᠡᠳ ᠠᠳᠠᠯᠢ ᠬᠠᠷᠠᠩᠭᠠ ᠴᠣᠬᠢᠵᠤ ᠴᠡᠷᠢᠭ ᠬᠤᠷᠢᠶᠠᠪᠠ᠃ ᠠᠷᠰᠯᠠᠨ ᠬᠠᠭᠠᠨ ᠡᠭᠡᠵᠦ ᠳᠥᠷᠪᠡᠨ ᠲᠦᠰᠢᠮᠡᠯ ᠯᠦ᠋ᠭᠡ ᠪᠡᠨ ᠵᠥᠪᠯᠡᠨ ᠥᠭᠦᠯᠡᠷᠦᠨ᠄《ᠪᠢ ᠦᠵᠡᠪᠡᠰᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠪᠠᠭᠠᠲᠤᠷ ᠵᠠᠩᠵᠤᠨ ᠬᠡᠳᠦᠢ ᠣᠯᠠᠨ ᠪᠣᠯᠪᠠᠴᠤ ᠴᠡᠷᠢᠭ ᠢᠨᠦ ᠮᠠᠰᠢ ᠴᠥᠭᠡᠨ᠂ ᠡᠨᠡ ᠰᠥᠨᠢ ᠪᠢᠳᠡ ᠭᠤᠴᠢᠨ ᠬᠦᠷᠢᠶᠡᠨ ᠦ᠌ ᠵᠢᠷᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠬᠣᠷᠢ ᠬᠣᠷᠢᠨ ᠲᠦᠮᠡᠨ ᠢ᠋ᠶ᠋ᠡᠷ ᠰᠠᠯᠭᠠᠵᠤ ᠡᠳᠦᠷ ᠰᠥᠨᠢ ᠭᠤᠷᠪᠠᠨ ᠵᠢᠰᠢᠶᠠ ᠲᠣᠭᠲᠠᠭᠠᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠬᠠᠭᠠᠵᠤ ᠡᠳᠦᠷ ᠰᠥᠨᠢ ᠦᠭᠡᠢ ᠡᠭᠡᠯᠵᠢᠯᠡᠨ ᠪᠠᠢᠯᠳᠤᠰᠤᠭᠠᠢ᠂ ᠡᠢᠮᠦ ᠪᠣᠯᠪᠠᠰᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠠᠷᠪᠠᠨ ᠬᠣᠨᠣᠭ ᠤ᠋ᠨ ᠡᠴᠦᠰ ᠲᠦ᠍ ᠳᠠᠷᠤᠪᠠᠰᠤ ᠪᠣᠯᠤᠮᠤᠢ᠃ 》ᠭᠡᠮᠡᠨ ᠵᠥᠪᠯᠡᠨ ᠲᠣᠭᠲᠠᠵᠤ᠂ ᠳᠠᠷᠤᠢ ᠴᠠᠭᠠᠵᠠ ᠵᠠᠷᠯᠠᠨ ᠭᠤᠷᠪᠠᠨ ᠠᠩᠭᠢ ᠪᠠᠷ ᠬᠤᠪᠢᠶᠠᠪᠠ᠃
ᠲᠡᠨᠳᠡᠴᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠠᠷᠠᠩᠭᠠ ᠴᠣᠬᠢᠨ ᠴᠡᠷᠢᠭ ᠡᠭᠡᠵᠦ ᠬᠦᠷᠢᠶᠡ ᠳ᠋ᠦ᠍ᠷ ᠣᠷᠣᠵᠤ ᠰᠥᠨᠢ ᠵᠤᠯᠠ ᠶ᠋ᠢᠨ ᠳᠣᠣᠷᠠ ᠮᠤᠬᠤᠯᠢ᠂ ᠲᠠᠢᠽᠦ ᠶ᠋ᠢᠨ ᠴᠠᠴᠠᠷ ᠲᠤᠷ ᠢᠷᠡᠵᠦ ᠳᠣᠬᠢᠶᠠ ᠴᠣᠬᠢᠨ ᠣᠷᠣᠵᠤ ᠵᠣᠯᠭᠠᠭᠠᠳ ᠮᠡᠳᠡᠭᠦᠯᠦᠷᠦᠨ᠄《ᠡᠵᠡᠨ᠂ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠠᠭᠤᠷ ᠠᠮᠢᠰᠬᠤᠯ ᠢ᠋ ᠦᠵᠡᠵᠦ ᠭᠠᠷᠪᠠᠤ ?》ᠲᠠᠢᠽᠦ ᠥᠭᠦᠯᠡᠷᠦᠨ᠄《 ᠪᠢ ᠦᠵᠡᠪᠡᠰᠦ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠬᠦᠴᠦᠨ ᠠᠰᠤᠷᠤ ᠬᠠᠳᠠᠨ ᠪᠥᠭᠡᠳ ᠳᠣᠲᠣᠷᠠ ᠡᠭᠡᠨᠡᠭᠲᠡ ᠨᠢᠭᠡᠨ ᠵᠦᠢᠯ ᠦ᠋ᠨ ᠬᠠᠷᠠ ᠠᠭᠤᠷ ᠠᠵᠤ ᠳᠡᠢᠯᠬᠦ ᠪᠠᠢᠳᠠᠯ ᠪᠣᠢ᠃ ᠮᠠᠨ ᠤ᠋ ᠴᠡᠷᠢᠭ ᠬᠡᠳᠦᠢ ᠴᠥᠮ ᠰᠢᠯᠭᠠᠷᠠᠭᠰᠠᠨ ᠪᠠᠭᠠᠲᠤᠳ ᠪᠣᠯᠪᠠᠴᠤ ᠠᠰᠤᠷᠤ ᠴᠥᠭᠡᠨ ᠪᠣᠯᠤᠭᠠᠳ ᠲᠡᠳᠡᠨ ᠦ᠌ ᠴᠡᠷᠢᠭ ᠲᠡᠨᠡᠭ ᠴᠢᠭᠢᠷᠠᠭ ᠤ᠋ᠨ ᠳᠡᠭᠡᠷᠡ ᠪᠠᠰᠠ ᠮᠠᠰᠢ ᠤᠯᠠᠳᠠᠵᠤᠬᠤᠢ᠂ ᠪᠢ ᠦᠵᠡᠪᠡᠰᠦ ᠮᠢᠨᠦ ᠰᠦᠯᠳᠡ ᠶ᠋ᠢᠨ ᠬᠠᠷᠠ ᠲᠤᠭ ᠤ᠋ᠨ ᠮᠠᠨᠵᠢᠯᠭᠠ ᠣᠨᠴᠠ ᠰᠠᠯᠬᠢᠨ ᠡᠰᠡᠷᠭᠦ ᠪᠣᠰᠬᠤ ᠠᠨᠤ ᠡᠨᠡ ᠰᠥᠨᠢ ᠯᠠᠪ ᠬᠦᠷᠢᠶᠡ ᠶ᠋ᠢ ᠳᠠᠷᠤᠬᠤ ᠬᠤᠯᠠᠭᠠᠢ ᠴᠡᠷᠢᠭ ᠢᠷᠡᠬᠦ ᠮᠡᠲᠦ᠃ ᠲᠡᠢᠨ ᠬᠦ᠌ ᠪᠢ ᠴᠠᠭᠠᠵᠠ ᠵᠠᠷᠯᠠᠭᠠᠳ ᠳᠥᠷᠪᠡᠨ ᠵᠠᠩᠵᠤᠨ ᠢ᠋ ᠬᠣᠶᠠᠷ ᠠᠩᠭᠢ ᠪᠠᠷ ᠡᠭᠡᠯᠵᠢᠯᠡᠭᠦᠯᠦᠨ ᠬᠦᠷᠢᠶᠡ ᠶ᠋ᠢ ᠴᠠᠭᠳᠠᠭᠤᠯᠤᠮᠤᠢ᠃ 》ᠮᠤᠬᠤᠯᠢ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠮᠥᠷᠭᠥᠵᠦ ᠮᠡᠳᠡᠭᠦᠯᠦᠷᠦᠨ᠄《ᠡᠵᠡᠨ ᠦ᠌ ᠮᠢᠨᠦ ᠠᠢᠯᠠᠳᠤᠭᠰᠠᠨ ᠮᠠᠰᠢ ᠨᠡᠢᠴᠡᠵᠦᠬᠦᠢ᠃ ᠡᠵᠡᠨ ᠳᠠᠯᠤ ᠶ᠋ᠢᠨ ᠲᠥᠯᠭᠡ ᠪᠡᠷ ᠢ᠋ᠶ᠋ᠡᠨ ᠠᠢᠯᠠᠳᠤᠨ ᠦᠵᠡᠮᠦ!》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠵᠥᠪᠰᠢᠶᠡᠵᠦ᠂ ᠲᠡᠭᠦᠰᠴᠣᠭᠲᠣ ᠬᠢᠶᠡ ᠡᠴᠡ ᠰᠢᠷᠠ ᠮᠠᠩᠨᠤᠭ ᠪᠣᠭᠣᠳᠠᠯ ᠢ᠋ ᠠᠪᠴᠤ ᠭᠠᠷ ᠤᠬᠢᠶᠠᠨ ᠠᠮᠠ ᠪᠠᠨ ᠵᠠᠢᠯᠵᠤ᠂ ᠰᠦᠯᠳᠡ ᠲᠡᠭᠷᠢ ᠳ᠋ᠦ᠍ᠷ ᠬᠦᠵᠢ ᠰᠢᠲᠠᠭᠠᠵᠤ ᠵᠠᠯᠪᠠᠷᠢᠭᠠᠳ ᠵᠤᠯᠠ ᠶ᠋ᠢᠨ ᠳᠣᠣᠷᠠ ᠳᠠᠯᠤ ᠶ᠋ᠢᠨ ᠲᠥᠯᠭᠡ ᠶ᠋ᠢ ᠠᠷᠢᠭᠤᠳᠬᠠᠨ᠂ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠦ᠋ᠨ ᠳᠣᠣᠷᠠ ᠳᠠᠯᠤ ᠶ᠋ᠢᠨ ᠲᠥᠯᠭᠡ ᠶ᠋ᠢ ᠭᠡᠭᠡᠬᠡᠨ ᠭᠡᠷᠡᠯ ᠦ᠋ᠨ ᠵᠦᠭ ᠪᠠᠷᠢᠵᠤ ᠦᠵᠡᠪᠡᠰᠦ᠂ ᠲᠡᠷᠡ ᠳᠠᠯᠤ ᠶ᠋ᠢᠨ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠭᠡᠷᠡᠯ ᠴᠥᠮ ᠳᠤᠮᠳᠠ ᠬᠤᠷᠠᠵᠤ᠂ ᠲᠣᠭᠣᠷᠢᠨ ᠴᠥᠮ ᠬᠠᠷᠠ ᠰᠡᠭᠦᠳᠡᠷ ᠪᠣᠯᠤᠭᠰᠠᠨ ᠳ᠋ᠤᠷ ᠲᠠᠢᠽᠦ ᠮᠤᠬᠤᠯᠢ ᠳ᠋ᠤᠷ ᠦᠵᠡᠭᠦᠯᠵᠦ ᠥᠭᠦᠯᠡᠷᠦᠨ᠄《ᠮᠠᠨ ᠤ᠋ ᠴᠡᠷᠢᠭ ᠬᠠᠭᠠᠭᠳᠠᠨ ᠬᠣᠷᠢᠭᠳᠠᠬᠤ ᠪᠡᠷᠬᠡ ᠪᠣᠢ᠂ ᠬᠠᠷᠠ ᠰᠡᠭᠦᠳᠡᠷ ᠭᠤᠷᠪᠠᠨ ᠳᠠᠪᠬᠤᠷ ᠢ᠋ ᠦᠵᠡᠭᠦᠯᠦᠨ ᠯᠠᠪ ᠭᠤᠷᠪᠠᠨ ᠠᠩᠭᠢ ᠴᠡᠷᠢᠭ ᠪᠣᠢ ᠶᠡ᠃ ᠡᠨᠡ ᠬᠡᠷᠡᠭ ᠳᠡᠮᠡᠢ ᠬᠣᠯᠠ ᠦᠭᠡᠢ᠂ ᠬᠠᠷᠠ ᠰᠡᠭᠦᠳᠡᠷ ᠴᠠᠭ ᠵᠠᠭᠤᠷᠠ ᠪᠦᠷᠬᠦᠭᠰᠡᠨ ᠲᠤᠯᠠ ᠯᠠᠪ ᠡᠨᠡ ᠰᠥᠨᠢ ᠳᠠᠷᠤᠢ ᠢᠷᠡᠬᠦ ᠮᠡᠲᠦ᠃》 ᠵᠢᠨᠦᠩ ᠮᠤᠬᠤᠯᠢ ᠶᠠᠭᠠᠷᠠᠨ ᠲᠠᠢᠽᠦ ᠶ᠋ᠢᠨ ᠰᠠᠭᠠᠳᠠᠭ ᠤ᠋ᠨ ᠨᠤᠮᠤ ᠶ᠋ᠢ ᠰᠤᠭᠤᠯᠤᠨ ᠠᠪᠴᠤ ᠰᠦᠯᠳᠡ ᠲᠡᠭᠷᠢ ᠶ᠋ᠢ ᠬᠦᠵᠢ ᠪᠡᠷ ᠠᠷᠢᠭᠤᠯᠠᠵᠤ᠂ ᠨᠤᠮᠤ ᠶ᠋ᠢᠨ ᠬᠥᠪᠴᠢ ᠶ᠋ᠢ ᠲᠠᠮᠰᠢᠶᠠᠯᠠᠨ ᠭᠤᠷᠪᠠᠨ ᠵᠡᠷᠭᠡ ᠴᠢᠩᠨᠠᠵᠤ ᠨᠤᠮᠤ ᠶ᠋ᠢ ᠬᠣᠷᠢᠶᠠᠨ ᠮᠡᠳᠡᠭᠦᠯᠦᠷᠦᠨ᠄《ᠡᠵᠡᠨ ᠦ᠌ ᠠᠢᠯᠠᠳᠤᠭᠰᠠᠨ ᠯᠠᠪ ᠪᠣᠯᠪᠠ᠃ ᠡᠨᠡ ᠳᠠᠢᠰᠤᠨ ᠯᠠᠪ ᠮᠠᠨ ᠤ᠋ ᠴᠡᠷᠢᠭ ᠢ᠋ ᠴᠥᠭᠡᠨ ᠭᠡᠮᠡᠨ ᠬᠠᠭᠠᠷᠠ ᠢᠷᠡᠮᠦᠢ᠃ ᠡᠵᠡᠨ ᠵᠠᠢᠯᠠᠵᠤ ᠲᠤᠯᠰᠤᠭᠠᠢ ᠬᠡᠮᠡᠮᠦᠢ ᠦᠦ᠂ ᠬᠦᠯᠢᠶᠡᠨ ᠲᠤᠯᠰᠤᠭᠠᠢ ᠬᠡᠮᠡᠮᠦᠢ ᠦᠦ?》 ᠲᠠᠢᠽᠦ ᠥᠭᠦᠯᠡᠷᠦᠨ᠄《ᠡᠨᠡ ᠪᠠᠢᠳᠠᠯ ᠢ᠋ ᠦᠵᠡᠬᠦᠢ ᠳ᠋ᠦ᠍ᠷ ᠵᠠᠢᠯᠠᠵᠤ ᠵᠠᠪᠳᠤᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠳᠠᠷᠤᠢ ᠪᠡᠬᠢᠯᠡᠨ ᠬᠦᠯᠢᠶᠡᠵᠦ ᠲᠤᠯᠬᠤᠢ ᠠᠨᠤ ᠡᠷᠬᠢᠮ᠃ 》ᠮᠤᠬᠤᠯᠢ ᠥᠭᠦᠯᠡᠷᠦᠨ᠄ 《ᠡᠵᠡᠨ ᠦ᠌ ᠰᠠᠨᠠᠭᠠᠨ ᠪᠣᠭᠣᠯ ᠮᠢᠨᠦ ᠰᠠᠨᠠᠭᠠ ᠯᠤᠭᠠ ᠨᠡᠢᠴᠡᠪᠡ᠃ ᠮᠠᠨ ᠤ᠋ ᠴᠡᠷᠢᠭ ᠲᠠᠪᠤᠨ ᠲᠦᠮᠡᠨ᠂ ᠲᠡᠳᠡᠨ ᠦ᠌ ᠴᠡᠷᠢᠭ ᠵᠢᠷᠠᠨ ᠲᠦᠮᠡᠨ᠂ ᠡᠳᠦᠷ ᠤᠳᠠᠬᠤᠢ ᠳ᠋ᠤᠷ ᠲᠡᠳᠡᠨ ᠠᠰᠢᠭ ᠢ᠋ ᠠᠯᠳᠠᠮᠤᠢ᠃ ᠪᠢᠳᠡᠨ ᠦ᠌ ᠴᠡᠷᠢᠭ ᠲᠣᠷ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠬᠦᠨᠡᠰᠦ ᠪᠣᠢ᠂ ᠳ᠋ᠤᠷ ᠪᠡᠬᠢᠯᠡᠨ ᠰᠠᠬᠢᠵᠤ ᠪᠠᠢᠳᠠᠯ ᠢ᠋ ᠦᠵᠡᠨ ᠠᠷᠭᠠ ᠬᠡᠷᠡᠭᠯᠡᠰᠦᠭᠡᠢ᠃ ᠲᠡᠷᠡ ᠬᠢᠷᠢ ᠳ᠋ᠦ᠍ᠷ ᠮᠠᠨ ᠤ᠋ ᠠᠷᠪᠠᠨ ᠠᠩᠭᠢ ᠴᠡᠷᠢᠭ ᠮᠥᠨ ᠬᠦᠷᠴᠦ ᠢᠷᠡᠮᠦᠢ᠃ ᠲᠡᠷᠡ ᠴᠠᠭ ᠲᠤᠷ ᠵᠢᠴᠢ ᠵᠥᠪᠯᠡᠰᠦᠭᠡᠢ !》 ᠭᠡᠮᠡᠨ ᠳᠠᠷᠤᠢ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠭᠤᠯᠵᠤ ᠡᠵᠡᠨ ᠦ᠌ ᠡᠮᠦᠨᠡ ᠬᠣᠷᠢᠨ ᠶᠢᠰᠦᠨ ᠵᠠᠩᠵᠤᠨ ᠢ᠋ ᠳᠥᠷᠪᠡᠨ ᠰᠠᠯᠠᠭᠠ ᠬᠤᠪᠢᠶᠠᠨ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠲᠠᠪᠤᠨ ᠠᠩᠭᠢ ᠰᠠᠯᠭᠠᠵᠤ᠂ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠡᠭᠡᠯᠵᠢᠯᠡᠨ ᠡᠵᠡᠨ ᠢ᠋ ᠬᠠᠮᠠᠭᠠᠯᠠᠵᠤ᠂ ᠦᠯᠡᠳᠡᠭᠰᠡᠨ ᠳᠥᠷᠪᠡᠨ ᠲᠦᠮᠡᠨ ᠴᠡᠷᠢᠭ ᠡᠳᠦᠷ ᠬᠣᠶᠠᠷ ᠲᠦᠮᠡᠨ᠂ ᠰᠥᠨᠢ ᠬᠣᠶᠠᠷ ᠲᠦᠮᠡᠨ ᠨᠡᠢᠲᠡ ᠳᠥᠷᠪᠡᠨ ᠲᠦᠮᠡᠨ ᠢ᠋ᠶ᠋ᠡᠷ ᠳᠥᠷᠪᠡᠨ ᠬᠠᠭᠠᠯᠭᠠ ᠶ᠋ᠢ ᠰᠠᠬᠢᠵᠤ᠂ ᠨᠡᠢᠲᠡ ᠠᠷᠪᠠᠨ ᠡᠳᠦᠷ ᠳᠦᠯᠡᠢ ᠬᠥᠮᠦᠨ ᠪᠣᠯᠵᠤ᠂ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠥᠪᠡᠷ ᠦ᠋ᠨ ᠪᠡᠶᠡ ᠵᠢᠷᠭᠤᠭᠤᠯᠠ ᠳᠥᠷᠪᠡᠨ ᠬᠠᠭᠠᠯᠭᠠ ᠪᠠᠷ ᠡᠭᠡᠯᠵᠢᠯᠡᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠲᠣᠭᠣᠷᠢᠨ ᠴᠠᠭᠳᠠᠬᠤ ᠪᠠᠷ ᠲᠣᠭᠲᠠᠭᠠᠵᠤ᠂ ᠲᠠᠢᠽᠦ ᠪᠡᠶᠡ ᠪᠡᠷ ᠲᠡᠷᠢᠭᠦᠯᠡᠨ ᠴᠢᠬᠢ ᠳ᠋ᠦ᠍ᠷ ᠬᠥᠪᠥᠩ ᠴᠢᠬᠢᠵᠦ ᠠᠮᠠᠨ ᠳ᠋ᠤ᠌ ᠮᠥᠬᠥᠯᠢᠭ ᠡᠮᠬᠦᠵᠦ ᠴᠢᠨᠠᠳᠤᠰ ᠤ᠋ᠨ ᠬᠠᠷᠢᠶᠠᠬᠤ ᠶ᠋ᠢ ᠦᠯᠦ ᠰᠣᠨᠣᠰᠤᠨ᠂ ᠲᠡᠭᠦᠨ ᠦ᠌ ᠬᠠᠷᠢᠶᠠᠬᠤ ᠦᠭᠡ ᠳ᠋ᠦ᠍ᠷ ᠬᠠᠷᠢᠭᠤ ᠦᠯᠦ ᠥᠭᠦᠯᠡᠬᠦ ᠲᠡᠮᠳᠡᠭ ᠪᠣᠯᠭᠠᠨ ᠴᠡᠭᠡᠷᠯᠡᠭᠦᠯᠦᠭᠡᠳ ᠴᠡᠷᠢᠭ ᠤᠨᠠᠭᠤᠯᠢ ᠶ᠋ᠢᠨ ᠬᠥᠪᠡᠭᠡ ᠬᠦᠷᠦᠭᠰᠡᠨ ᠬᠣᠢᠨᠠ ᠰᠠᠢ ᠬᠠᠷᠪᠤ ᠭᠡᠮᠡᠨ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡ ᠴᠠᠭᠠᠵᠠ ᠶ᠋ᠢ ᠲᠣᠭᠲᠠᠭᠠᠪᠠ᠃ ᠲᠠᠢᠽᠦ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠰᠤᠯᠠ ᠴᠡᠷᠢᠭ ᠮᠡᠲᠦ ᠴᠢᠮᠡᠵᠦ ᠰᠥᠨᠢ ᠴᠠᠭᠳᠠᠨ ᠦᠵᠡᠪᠡ᠃ ᠦᠨᠡᠬᠡᠷ ᠤᠳᠠᠭᠰᠠᠨ ᠦᠭᠡᠢ ᠪᠠᠷᠠᠭᠤᠨ ᠬᠣᠢᠨᠠ ᠠ᠋ᠴᠠ ᠬᠠᠷᠠ ᠰᠠᠯᠬᠢᠨ ᠳᠡᠭᠳᠡᠵᠦ ᠲᠡᠭᠷᠢ ᠭᠠᠵᠠᠷ ᠯᠦᠪᠬᠢᠮᠡ ᠬᠠᠷᠠᠩᠭᠤᠢ ᠪᠣᠯᠵᠤ᠂ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠦᠨᠡᠬᠡᠷ ᠢᠷᠡᠵᠦ ᠭᠤᠷᠪᠠᠨ ᠳᠠᠪᠬᠤᠷ ᠬᠠᠭᠠᠵᠤ᠂ ᠭᠡᠨᠡᠳᠲᠡ ᠲᠡᠮᠳᠡᠭ ᠫᠤᠤ ᠳᠤᠤᠭᠠᠷᠤᠮᠠᠭᠴᠠ ᠬᠣᠷᠢᠨ ᠲᠦᠮᠡᠨ ᠴᠡᠷᠢᠭ ᠬᠠᠮᠲᠤ ᠪᠠᠷ ᠪᠠᠢᠯᠳᠤᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠵᠣᠷᠢᠮᠠᠭ ᠢ᠋ᠶ᠋ᠠᠷ ᠦᠯᠦ ᠮᠡᠳᠡᠭᠴᠢ ᠪᠣᠯᠤᠨ ᠬᠡᠪ ᠢ᠋ᠶ᠋ᠡᠷ ᠬᠡᠳᠦᠬᠡᠨ ᠵᠠᠭᠤᠨ ᠴᠡᠷᠢᠭ ᠰᠠᠪᠠᠭᠠ ᠦᠭᠡᠢ ᠬᠠᠰᠬᠢᠷᠤᠨ ᠶᠠᠪᠤᠮᠤᠢ᠃ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠯᠠᠪ ᠪᠡᠯᠡᠳᠬᠡᠭᠰᠡᠨ ᠦᠭᠡᠢ ᠭᠡᠮᠡᠨ ᠳᠥᠷᠪᠡᠨ ᠵᠦᠭ ᠡᠴᠡ ᠬᠠᠭᠠᠨ ᠢᠷᠡᠵᠦ ᠤᠨᠠᠭᠤᠯᠢ ᠶ᠋ᠢ ᠰᠢᠷᠣᠢ ᠵᠥᠭᠡᠭᠡᠨ ᠳᠦᠭᠦᠷᠭᠡᠵᠦ᠂ ᠬᠦᠷᠢᠶᠡᠨ ᠦ᠌ ᠡᠷᠪᠡᠭᠦᠷ ᠰᠦᠯᠵᠢᠭᠦᠷ ᠦ᠋ᠨ ᠬᠤᠷᠢᠶᠠᠨᠠ ᠬᠦᠷᠲᠡᠯᠡ ᠭᠡᠨᠡᠳᠲᠡ ᠪᠧᠲ᠋ᠠ᠋ ᠤᠯᠤᠰ ᠲᠠᠪᠤᠨ ᠬᠦᠷᠢᠶᠡ ᠬᠠᠮᠲᠤ ᠵᠠᠯᠭᠠᠯᠳᠤᠵᠤ ᠪᠠᠭᠤᠭᠰᠠᠨ ᠲᠤᠯᠠ ᠭᠡᠨᠡᠳᠲᠡ ᠨᠢᠭᠡᠨ ᠲᠡᠮᠳᠡᠭ ᠫᠤᠤ ᠳᠠᠭᠤᠷᠢᠰᠤᠮᠠᠭᠴᠠ ᠠᠩᠭᠢ ᠪᠦᠷᠢ ᠳ᠋ᠦ᠍ᠷ ᠮᠣᠳᠣ ᠲᠣᠭᠰᠢᠵᠤ ᠬᠣᠯᠬᠣᠪᠴᠢ ᠨᠤᠮᠤ ᠬᠤᠯᠠᠭᠠᠢ ᠰᠤᠮᠤ ᠬᠠᠷᠠᠩᠭᠤᠢ ᠭᠠᠵᠠᠷ ᠠ᠋ᠴᠠ ᠭᠡᠷᠡᠯᠲᠦ ᠭᠠᠵᠠᠷ ᠢ᠋ ᠬᠠᠷᠪᠤᠵᠤ ᠰᠤᠷᠬᠢᠷᠠᠬᠤ ᠰᠤᠮᠤ ᠶ᠋ᠢᠨ ᠢᠷᠡᠬᠦ ᠢᠨᠤ ᠴᠠᠷᠴᠠᠬᠠᠢ ᠮᠡᠲᠦ ᠲᠤᠯᠠ ᠤᠷᠤᠭᠰᠢᠯᠠᠭᠰᠠᠨ ᠴᠡᠷᠢᠭ ᠴᠢᠯᠠᠭᠤ ᠰᠤᠮᠤ ᠳ᠋ᠤᠷ ᠣᠨᠣᠭᠳᠠᠵᠤ ᠶᠡᠬᠡᠯᠡ ᠬᠣᠬᠢᠷᠠᠨ ᠨᠢᠭᠡᠨᠲᠡ ᠬᠠᠰᠬᠢᠷᠤᠯᠴᠠᠨ ᠡᠭᠡᠵᠦ ᠤᠬᠤᠷᠢᠪᠠ᠃ ᠬᠣᠢᠨᠠ ᠠ᠋ᠴᠠ ᠪᠠᠢᠯᠳᠤᠭᠠᠨ ᠤ᠋ ᠬᠡᠩᠭᠡᠷᠭᠡ ᠬᠡᠷᠬᠢᠨ ᠳᠡᠯᠡᠳᠪᠡᠴᠦ ᠡᠮᠦᠨᠡ ᠴᠡᠷᠢᠭ ᠣᠷᠣᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠷ ᠠᠷᠰᠯᠠᠨ ᠬᠠᠭᠠᠨ ᠤᠴᠢᠷ ᠢ᠋ ᠠᠰᠠᠭᠤᠵᠤ ᠴᠡᠷᠢᠭ ᠢ᠋ ᠲᠠᠲᠠᠵᠤ ᠬᠠᠭᠠᠵᠤ ᠪᠠᠭᠤᠯᠭᠠᠪᠠ᠃ ᠲᠡᠳᠦᠢ ᠡᠳᠦᠷ ᠪᠦᠷᠢ ᠪᠠᠢᠯᠳᠤᠷᠠ ᠢᠷᠡᠮᠦᠢ᠂ ᠡᠳᠦᠷ ᠪᠦᠷᠢ ᠬᠢᠴᠢᠶᠡᠨ ᠲᠤᠯᠤᠭᠰᠠᠭᠠᠷ ᠵᠢᠷᠭᠤᠭᠠᠨ ᠡᠳᠦᠷ ᠪᠣᠯᠵᠤ᠂ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠬᠡᠷᠬᠢᠨ ᠢᠴᠢᠭᠡᠨ ᠬᠠᠷᠢᠶᠠᠪᠠᠴᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠥᠴᠦᠬᠡᠨ ᠴᠦ᠍ ᠬᠡᠷᠡᠭᠰᠡᠬᠦ ᠦᠭᠡᠢ ᠬᠡᠪ ᠢ᠋ᠶ᠋ᠡᠷ ᠢᠨᠢᠶᠡᠯᠴᠡᠨ ᠰᠠᠬᠢᠵᠤ᠂ ᠰᠥᠨᠢ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠮᠤᠬᠤᠯᠢ ᠳ᠋ᠤᠷ ᠮᠡᠳᠡᠭᠦᠯᠦᠷᠦᠨ᠄《 ᠴᠡᠷᠢᠭ ᠦ᠋ᠨ ᠵᠡᠪᠡ ᠪᠠᠷᠠᠪᠠ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ᠄《ᠰᠥᠨᠢ ᠲᠠᠪᠤᠨ ᠵᠢᠩ ᠦ᠋ᠨ ᠴᠠᠭ ᠲᠤᠷ ᠰᠤᠮᠤ ᠠᠪᠤᠷᠠ ᠢᠷᠡ !》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠯᠠᠨ ᠵᠠᠩᠵᠤᠨ ᠨᠠᠷ ᠶᠡᠬᠡᠯᠡ ᠭᠠᠢᠬᠠᠯᠳᠤᠪᠠ᠃ ᠭᠡᠨᠡᠳᠲᠡ ᠰᠥᠨᠢ ᠠᠮᠤᠷ ᠴᠡᠷᠢᠭ ᠢ᠋ ᠬᠥᠮᠦᠨ ᠪᠦᠷᠢ ᠨᠢᠭᠡᠨ ᠪᠣᠭᠣᠳᠠᠯ ᠡᠪᠡᠰᠦ ᠠᠪᠴᠤ ᠰᠡᠮᠡᠬᠡᠷ ᠭᠠᠳᠠᠭᠰᠢ ᠭᠠᠷᠭᠠᠵᠤ ᠴᠡᠷᠢᠭ ᠢ᠋ ᠭᠣᠣ ᠳ᠋ᠤᠷ ᠵᠣᠭᠰᠣᠭᠠᠵᠤ ᠡᠪᠡᠰᠦᠨ ᠢ᠋ ᠭᠣᠣ ᠶ᠋ᠢᠨ ᠴᠢᠨᠠᠳᠤ ᠬᠥᠪᠡᠭᠡ ᠳ᠋ᠦ᠍ᠷ ᠢᠯᠡ ᠥᠨᠳᠥᠷ ᠪᠣᠰᠬᠠᠵᠤ᠂ ᠲᠡᠷᠢᠭᠦᠨ ᠫᠤᠤ ᠳ᠋ᠤᠷ ᠬᠠᠰᠬᠢᠷ᠂ ᠬᠣᠶᠠᠳᠤᠭᠠᠷ ᠫᠤᠤ ᠳ᠋ᠤᠷ ᠡᠬᠡ᠂ ᠭᠤᠷᠪᠠᠳᠤᠭᠠᠷ ᠫᠤᠤ ᠳ᠋ᠤᠷ ᠬᠠᠭᠠᠯᠭᠠ ᠳᠠᠷᠤ ᠭᠡᠮᠡᠨ ᠵᠠᠷᠯᠠᠵᠤ᠂ ᠲᠡᠷᠡ ᠰᠥᠨᠢ ᠪᠠᠰᠠ ᠬᠣᠢᠲᠤ ᠰᠠᠯᠬᠢᠨ ᠰᠠᠯᠬᠢᠯᠠᠬᠤᠢ ᠳ᠋ᠤᠢ ᠡᠯᠡᠰᠦ ᠳᠡᠭᠳᠡᠵᠦ ᠰᠠᠷᠠᠨ ᠬᠠᠭᠤᠴᠢᠳ ᠲᠤᠷ ᠮᠠᠰᠢ ᠬᠠᠪ ᠬᠠᠷᠠᠩᠭᠤᠢ ᠲᠤᠯᠠ ᠮᠥᠨ ᠶᠣᠰᠣᠭᠠᠷ ᠬᠢᠴᠢᠶᠡᠨ ᠪᠡᠯᠡᠳᠴᠦ ᠮᠤᠬᠤᠯᠢ ᠬᠦᠷᠢᠶᠡ ᠤᠨᠠᠭᠤᠯᠢ ᠳ᠋ᠤᠷ ᠵᠣᠭᠰᠣᠵᠤ ᠪᠠᠢᠴᠠᠭᠠᠨ ᠦᠵᠡᠵᠦ ᠪᠡᠯᠡᠨ ᠵᠠᠯᠠᠨ ᠪᠣᠯᠤᠭᠰᠠᠨᠠ᠂ ᠭᠡᠨᠡᠳᠲᠡ ᠲᠡᠷᠢᠭᠦᠨ ᠫᠤᠤ ᠶ᠋ᠢ ᠲᠠᠯᠪᠢᠭᠤᠯᠵᠤ᠂ ᠣᠯᠠᠨ ᠴᠡᠷᠢᠭ ᠢ᠋ ᠪᠠᠭ ᠪᠦᠷᠢ ᠬᠦᠷᠢᠶᠡ ᠶ᠋ᠢᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠴᠣᠬᠢᠨ ᠭᠠᠷ ᠭᠡᠮᠡᠨ ᠬᠠᠰᠬᠢᠷᠤᠭᠤᠯᠤᠨ ᠬᠡᠩᠭᠡᠷᠭᠡ ᠬᠠᠷᠠᠩᠭᠠ ᠪᠦᠷᠢᠶᠡ ᠴᠠᠩ ᠢ᠋ ᠬᠠᠮᠲᠤ ᠪᠠᠷ ᠴᠣᠬᠢᠭᠤᠯᠵᠤ ᠦᠢᠮᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠵᠢᠷᠭᠤᠭᠠᠨ ᠡᠳᠦᠷ ᠬᠠᠭᠠᠵᠤ ᠶᠠᠳᠠᠷᠠᠬᠤ ᠶ᠋ᠢᠨ ᠳᠡᠭᠡᠷᠡ᠂ ᠪᠧᠲ᠋ᠠ᠋ ᠤᠯᠤᠰ ᠥᠴᠦᠬᠡᠨ ᠴᠦ᠍ ᠬᠥᠳᠡᠯᠬᠦ ᠳᠦᠷᠢ ᠦᠭᠡᠢ ᠳ᠋ᠦ᠍ᠷ ᠨᠢᠭᠡᠮᠦᠰᠦᠨ ᠰᠡᠳᠬᠢᠯ ᠰᠤᠯᠠ ᠪᠣᠯᠵᠤ᠂ ᠬᠠᠷᠠᠬᠠᠨ ᠲᠠᠷᠬᠠᠯᠴᠠᠵᠤ ᠦᠷᠭᠡᠯᠡᠨ ᠪᠦᠬᠦᠢ ᠳ᠋ᠦ᠍ᠷ ᠭᠡᠨᠡᠳᠲᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠤᠯᠠᠭᠤᠨ ᠭᠠᠷᠴᠤ ᠢᠷᠡᠨ ᠬᠠᠪ ᠬᠠᠷᠠᠩᠭᠤᠢ ᠪᠠᠷ ᠪᠠᠢᠯᠳᠤᠨ ᠢᠷᠡᠬᠦᠢ ᠳ᠋ᠦ᠍ᠷ ᠳᠠᠷᠤᠢ ᠨᠢᠭᠡᠨ ᠨᠤᠮᠤ ᠳ᠋ᠤᠷ ᠬᠣᠣᠰ ᠰᠤᠮᠤ ᠣᠨᠢᠯᠠᠵᠤ ᠬᠠᠷᠪᠤᠯᠴᠠᠬᠤᠢ ᠳ᠋ᠤᠷ ᠪᠧᠲ᠋ᠠ᠋ ᠶ᠋ᠢᠨ ᠴᠡᠷᠢᠭ ᠨᠡᠩ ᠢᠯᠡᠭᠦᠦ ᠬᠠᠰᠬᠢᠷᠤᠨ ᠪᠠᠷᠬᠢᠷᠠᠯᠴᠠᠵᠤ ᠣᠢᠷᠠ ᠬᠦᠷᠴᠦ ᠢᠷᠡᠭᠰᠡᠨ ᠮᠡᠲᠦ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠤ᠋ ᠠᠷᠢᠬᠢ ᠪᠠᠰᠠ ᠰᠡᠷᠭᠦᠵᠦ ᠭᠡᠨᠡᠳᠲᠡ ᠰᠣᠴᠢᠭᠠᠳ ᠲᠦᠷᠭᠡᠨᠡ ᠬᠠᠷᠪᠤ ᠭᠡᠮᠡᠨ ᠨᠥᠬᠥᠭᠡ ᠬᠣᠶᠠᠷ ᠬᠠᠭᠠᠯᠭᠠᠨ ᠤ᠋ ᠴᠡᠷᠢᠭ ᠢ᠋ ᠮᠥᠨ ᠵᠠᠷᠯᠠᠵᠤ ᠨᠡᠮᠡᠵᠦ ᠬᠠᠷᠪᠤᠭᠤᠯᠬᠤᠢ ᠳ᠋ᠤᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠪᠠᠰᠠ ᠡᠭᠡᠭᠰᠡᠨ ᠮᠡᠲᠦ ᠳ᠋ᠦ᠍ᠷ ᠨᠡᠩ ᠬᠦᠴᠦᠨ ᠨᠡᠮᠡᠭᠦᠯᠵᠦ ᠱᠠᠭᠠᠷᠳᠠᠬᠤ ᠬᠡᠩᠭᠡᠷᠭᠡ ᠶ᠋ᠢ ᠴᠣᠬᠢᠭᠤᠯᠤᠨ᠂ ᠬᠠᠷᠠᠬᠠᠨ ᠬᠠᠷᠪᠤᠬᠤᠢ ᠳ᠋ᠤᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠡᠭᠡᠨᠡᠭᠲᠡ ᠡᠭᠡᠬᠦ ᠦᠭᠡᠢ ᠳ᠋ᠦ᠍ᠷ ᠡᠨᠡ ᠶᠠᠭᠤᠨ ᠤ᠋ ᠤᠴᠢᠷ ᠭᠡᠮᠡᠨ ᠰᠠᠢ ᠬᠠᠷᠪᠤᠬᠤ ᠶ᠋ᠢ ᠴᠠᠭᠠᠵᠠᠯᠠᠲᠠᠯᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠪᠠᠰᠠ ᠨᠢᠭᠡᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠠᠷᠴᠤ ᠴᠡᠷᠢᠭ ᠦ᠋ᠨ ᠬᠠᠰᠬᠢᠷᠬᠤ ᠳᠠᠭᠤᠨ ᠨᠡᠩ ᠨᠡᠮᠡᠭᠳᠡᠵᠦ ᠣᠢᠷᠠ ᠢᠷᠡᠬᠦ ᠲᠤᠯᠠ ᠶᠠᠭᠠᠷᠠᠨ ᠪᠠᠰᠠ ᠬᠠᠷᠪᠤ ᠭᠡᠮᠡᠨ ᠵᠠᠷᠯᠠᠨ ᠬᠠᠷᠪᠤᠭᠤᠯᠵᠤ᠂ ᠬᠠᠭᠠᠰ ᠴᠠᠭ ᠪᠣᠯᠤᠭᠰᠠᠨ ᠦᠭᠡᠢ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠪᠠᠰᠠ ᠨᠢᠭᠡᠨ ᠫᠤᠤ ᠳᠠᠭᠤᠷᠢᠰᠴᠤ ᠣᠯᠠᠨ ᠴᠡᠷᠢᠭ ᠦ᠋ᠨ ᠬᠠᠰᠬᠢᠷᠬᠤ ᠠᠨᠤ ᠲᠠᠭ ᠵᠣᠭᠰᠣᠪᠠ᠃ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠭᠠᠢᠬᠠᠵᠤ ᠶᠡᠬᠡ ᠴᠡᠷᠢᠭ ᠢ᠋ ᠱᠠᠭᠠᠷᠳᠠᠵᠤ ᠪᠠᠰᠠ ᠪᠠᠢᠯᠳᠤᠷᠠ ᠢᠷᠠᠪᠠᠰᠤ᠂ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ ᠮᠤᠬᠤᠯᠢ ᠥᠨᠳᠥᠷ ᠬᠠᠰᠠᠭ ᠲᠤ᠌ ᠵᠣᠭᠰᠣᠨ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠠᠷᠰᠯᠠᠨ ᠬᠠᠭᠠᠨ ᠤ᠋ ᠵᠦᠭ ᠥᠭᠦᠯᠡᠷᠦᠨ᠄《ᠲᠡᠨᠡᠭ ᠠᠷᠰᠯᠠᠨ ᠴᠢᠨᠦ ᠵᠡᠪᠡ ᠥᠭᠭᠦᠭᠰᠡᠨ ᠲᠠᠯᠠ ᠳ᠋ᠤ᠌ ᠶᠡᠬᠡᠯᠡ ᠪᠠᠶᠠᠷᠯᠠᠮᠤᠢ!》 ᠭᠡᠮᠡᠨ ᠡᠪᠡᠰᠦᠨ ᠦ᠌ ᠪᠣᠭᠣᠳᠠᠯ ᠠ᠋ᠴᠠ ᠣᠯᠤᠭᠰᠠᠨ ᠵᠡᠪᠡ ᠶ᠋ᠢ ᠦᠵᠡᠪᠡᠰᠦ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠤᠭ ᠵᠡᠪᠡ ᠡᠴᠡ ᠢᠯᠡᠭᠦᠦ ᠲᠠᠪᠤᠨ ᠬᠤᠪᠢ ᠣᠯᠪᠠ᠃ ᠨᠡᠩ ᠪᠠᠰᠠ ᠪᠠᠷᠠᠭᠤᠨ ᠪᠡᠶᠡ ᠶ᠋ᠢᠨ ᠰᠠᠢᠨ ᠵᠡᠪᠡ ᠮᠠᠰᠢ ᠣᠯᠠᠨ᠂ ᠪᠠᠷᠠᠭᠤᠨ ᠪᠡᠶᠡ ᠲᠡᠮᠦᠷ ᠲᠣᠷ ᠣᠢᠷᠠ ᠲᠤᠯᠠ ᠵᠡᠪᠡ ᠪᠦᠷᠢ ᠮᠠᠰᠢ ᠬᠦᠳᠡᠷ ᠪᠡᠬᠢ᠂ ᠮᠤᠬᠤᠯᠢ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠲᠦ᠍ᠷ ᠲᠦᠭᠡᠭᠡᠨ ᠥᠭᠪᠡ᠃ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠦ᠋ᠨ ᠭᠠᠢᠬᠠᠬᠤ ᠶ᠋ᠢ ᠴᠦ᠍ ᠪᠠᠢᠲᠤᠭᠠᠢ᠂ ᠲᠠᠢᠽᠦ ᠮᠥᠨ ᠮᠦᠰᠢᠶᠡᠨ ᠭᠠᠢᠬᠠᠵᠤ ᠰᠠᠢᠰᠢᠶᠠᠨ ᠥᠪᠡᠷ ᠦ᠋ᠨ ᠰᠠᠭᠠᠳᠠᠭ ᠢ᠋ ᠬᠠᠢᠷᠠᠯᠠᠪᠠ᠃ ᠠᠷᠰᠯᠠᠨ ᠬᠠᠭᠠᠨ ᠮᠡᠬᠡᠯᠡᠭᠳᠡᠭᠰᠡᠨ ᠳ᠋ᠦ᠍ᠷ ᠢ᠋ᠶ᠋ᠡᠨ ᠶᠡᠬᠡᠯᠡ ᠢᠴᠢᠩᠭᠦᠷᠡᠨ ᠭᠢᠯᠢᠭᠯᠡᠵᠦ᠂ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠭᠤᠯᠤᠨ᠂ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠢ᠋ ᠨᠡᠢᠯᠡᠭᠦᠯᠵᠦ᠂ ᠡᠨᠡ ᠤᠳᠠᠭᠠ ᠡᠷᠬᠡᠪᠰᠢ ᠬᠦᠷᠢᠶᠡ ᠶ᠋ᠢ ᠭᠢᠰᠬᠢᠯᠡᠨ᠂ ᠲᠡᠭᠰᠢᠯᠡᠮᠦᠢ ᠭᠡᠮᠡᠨ ᠢᠷᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠮᠥᠨ ᠶᠡᠬᠡ ᠬᠡᠩᠭᠡᠷᠭᠡ ᠶ᠋ᠢ ᠭᠤᠷᠪᠠᠨ ᠵᠡᠷᠭᠡ ᠴᠣᠬᠢᠭᠤᠯᠤᠨ᠂ ᠳᠥᠷᠪᠡᠨ ᠬᠠᠭᠠᠯᠭᠠᠨ ᠤ᠋ ᠵᠠᠩᠵᠤᠨ ᠴᠡᠷᠢᠭ ᠪᠠ ᠵᠢᠴᠢ ᠭᠤᠷᠪᠠᠨ ᠬᠣᠷᠢᠶᠠ ᠶ᠋ᠢᠨ ᠴᠡᠷᠢᠭ ᠬᠤᠶᠠᠭ ᠨᠠᠷ ᠢ᠋ ᠴᠥᠮ ᠬᠠᠷᠢᠶᠠᠲᠤ ᠬᠦᠷᠢᠶᠡ ᠳ᠋ᠦ᠍ᠷ ᠢᠷᠡᠭᠦᠯᠵᠦ ᠪᠡᠯᠡᠳᠦᠨ ᠬᠦᠯᠢᠶᠡᠭᠡᠳ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠣᠢᠷᠠ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ᠂ ᠳᠣᠬᠢᠶᠠ ᠴᠣᠬᠢᠭᠤᠯᠤᠨ ᠬᠠᠷᠪᠤᠭᠤᠯᠬᠤᠢ ᠳ᠋ᠤᠷ ᠰᠤᠮᠤ ᠪᠦᠷᠢ ᠬᠣᠭᠣᠰᠣᠨ ᠦᠭᠡᠢ᠂ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠭᠤᠷᠪᠠᠨ ᠵᠡᠷᠭᠡ ᠳᠡᠪᠰᠢᠭᠡᠳ ᠭᠤᠷᠪᠠᠨ ᠵᠡᠷᠭᠡ ᠬᠣᠬᠢᠷᠠᠪᠠ᠃ ᠳᠠᠷᠤᠢ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠠᠭᠤᠷᠯᠠᠨ᠂ ᠡᠰᠡ ᠣᠷᠣᠭᠴᠢᠳ ᠢ᠋ ᠠᠯᠠᠮᠤᠢ ᠭᠡᠮᠡᠨ ᠵᠠᠷᠯᠠᠭᠰᠠᠨ ᠳ᠋ᠤᠷ ᠣᠯᠠᠨ ᠴᠡᠷᠢᠭ ᠦᠬᠦᠨ ᠪᠠᠢᠯᠳᠤᠵᠤ᠂ ᠴᠡᠷᠢᠭ ᠦ᠋ᠨ ᠭᠣᠣ ᠳ᠋ᠤᠷ ᠬᠦᠷᠴᠦ ᠢᠷᠡᠬᠦᠶᠡ᠂ ᠮᠤᠬᠤᠯᠢ ᠲᠡᠳᠡᠨ ᠦ᠌ ᠵᠠᠷᠯᠠᠯ ᠢ᠋ ᠮᠡᠳᠡᠭᠡᠳ ᠭᠡᠨᠡᠳᠲᠡ ᠪᠦᠷᠢᠶᠡ ᠦᠯᠢᠶᠡᠨ ᠬᠠᠷᠪᠤᠬᠤ ᠶ᠋ᠢ ᠵᠣᠭᠰᠣᠭᠠᠭᠰᠠᠨ ᠳ᠋ᠤᠷ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠶᠡᠬᠡᠯᠡ ᠰᠡᠵᠢᠭᠯᠡᠵᠦ ᠦᠬᠦᠪᠡᠴᠦ ᠣᠢᠷᠠ ᠢᠷᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠷ ᠠᠷᠰᠯᠠᠨ ᠬᠠᠭᠠᠨ ᠬᠡᠩᠭᠡᠷᠭᠡ ᠬᠡᠷᠬᠢᠨ ᠴᠣᠬᠢᠭᠤᠯᠪᠠᠴᠤ ᠴᠡᠷᠢᠭ ᠤᠷᠤᠭᠰᠢ ᠣᠷᠣᠬᠤ ᠦᠭᠡᠢ ᠳ᠋ᠦ᠍ᠷ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠠᠷᠪᠤᠬᠤ ᠪᠠᠨ ᠨᠢᠭᠡᠮᠦᠰᠦᠨ ᠵᠣᠭᠰᠣᠵᠤ ᠮᠠᠨ ᠤ᠋ ᠴᠡᠷᠢᠭ ᠢ᠋ ᠡᠳᠦᠭᠡᠮᠦᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠰᠡᠵᠢᠭᠯᠡᠨ ᠬᠠᠷᠠᠩᠭᠠ ᠴᠣᠬᠢᠵᠤ ᠴᠡᠷᠢᠭ ᠬᠤᠷᠢᠶᠠᠵᠤ ᠬᠡᠪ ᠢ᠋ᠶ᠋ᠡᠷ ᠡᠭᠡᠵᠦ ᠪᠠᠭᠤᠳᠠᠯᠯᠠᠪᠠ᠃
ᠦᠵᠡᠰᠡ ᠡᠳᠡᠭᠡᠷ ᠴᠥᠮ ᠮᠤᠬᠤᠯᠢ ᠶ᠋ᠢᠨ ᠰᠠᠨᠳᠤᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ᠷ ᠳᠠᠢᠰᠤᠨ ᠢ᠋ ᠮᠡᠬᠡᠯᠡᠨ ᠰᠡᠵᠢᠭᠯᠡᠭᠦᠯᠬᠦ ᠠᠷᠭᠠ ᠠᠵᠤᠭᠤ᠃ ᠡᠢᠨ ᠬᠦ᠌ ᠬᠠᠷᠢᠯᠴᠠᠨ ᠲᠤᠯᠤᠯᠴᠠᠵᠤ ᠬᠠᠭᠠᠰ ᠰᠠᠷᠠ ᠪᠣᠯᠵᠤ᠂ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠬᠦᠷᠴᠦ ᠢᠷᠡᠬᠦ ᠴᠢᠮᠡᠭᠡ ᠢᠷᠡᠭᠰᠡᠨ ᠳ᠋ᠦ᠍ᠷ ᠭᠡᠨᠡᠳᠲᠡ ᠡᠮᠦᠨᠡ ᠡᠴᠡ ᠰᠠᠯᠬᠢᠯᠠᠨ ᠦᠳᠡ ᠥᠩᠭᠡᠷᠡᠮᠡᠭᠴᠡ ᠬᠠᠪᠤᠷ ᠤ᠋ᠨ ᠵᠢᠪᠡᠭᠦᠨ ᠴᠠᠰᠤ ᠡᠬᠢᠯᠡᠨ ᠣᠷᠣᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠡᠵᠡᠨ ᠳ᠋ᠦ᠍ᠷ ᠣᠷᠣᠵᠤ ᠮᠥᠷᠭᠥᠵᠦ ᠮᠣᠷᠢᠨ ᠲᠠᠰᠢᠭᠤᠷ ᠡᠷᠭᠦᠪᠡ᠃ ᠲᠠᠢᠽᠦ ᠰᠠᠨᠠᠭᠠᠨ ᠢ᠋ ᠮᠡᠳᠡᠭᠡᠳ ᠳᠠᠷᠤᠢ ᠣᠯᠠᠨ ᠴᠡᠷᠢᠭ ᠲᠦ᠍ᠷ ᠵᠠᠷᠯᠠᠭᠰᠠᠨ ᠠᠨᠤ᠄《ᠡᠨᠡ ᠤᠳᠠᠭᠠ ᠤᠷᠢᠳᠠ ᠰᠤᠮᠤ ᠵᠢᠭᠡᠯᠡᠭᠰᠡᠨ ᠠᠷᠭᠠ ᠪᠠᠷ ᠭᠠᠷᠴᠤ ᠬᠦᠷᠢᠶᠡ ᠶ᠋ᠢ ᠣᠷᠬᠢᠵᠤ ᠪᠤᠷᠤᠭᠤᠯᠠᠨ᠂ ᠬᠠᠷᠠ ᠬᠢᠭᠦᠯ ᠦ᠋ᠨ ᠭᠠᠯ ᠠᠭᠤᠯᠠ ᠶ᠋ᠢᠨ ᠳᠣᠪᠣ ᠶ᠋ᠢᠨ ᠬᠣᠢᠨᠠ ᠪᠠᠭᠤᠯᠭᠠᠨ᠂ ᠵᠠᠮ ᠳ᠋ᠤᠷ ᠠᠴᠢᠶᠠ ᠬᠥᠰᠬᠡ ᠪᠠ ᠵᠠᠷ ᠵᠡᠪᠰᠡᠭ ᠢ᠋ ᠣᠷᠬᠢᠵᠤ ᠪᠤᠷᠤᠭᠤᠯᠠᠨ᠂ ᠨᠠᠢ᠍ᠮᠠᠨ ᠵᠦᠭ ᠲᠡᠮᠡᠴᠡᠨ ᠭᠠᠷᠤᠭᠠᠳ ᠨᠢᠭᠡᠨ ᠭᠠᠵᠠᠷ ᠲᠤᠷ ᠬᠤᠷᠠᠮᠤᠢ!》 ᠭᠡᠮᠡᠨ ᠵᠠᠷᠯᠠᠭᠠᠳ ᠭᠣᠷᠯᠣᠰ ᠤ᠋ᠨ ᠨᠠᠷᠠᠨ ᠬᠠᠭᠠᠨ ᠢ᠋ ᠲᠠᠢᠽᠦ ᠶ᠋ᠢᠨ ᠶᠣᠰᠣᠭᠠᠷ ᠴᠢᠮᠡᠵᠦ᠂ ᠮᠤᠬᠤᠯᠢ ᠥᠭᠦᠯᠡᠷᠦᠨ᠄《ᠡᠨᠡ ᠤᠳᠠᠭᠠ ᠴᠢᠨᠦ ᠭᠠᠪᠢᠶᠠ ᠪᠦᠲᠦᠭᠡᠬᠦ ᠶ᠋ᠢ ᠦᠵᠡᠰᠦᠭᠡᠢ᠂ ᠤᠯᠠᠭᠠᠨ ᠬᠤᠶᠠᠭᠲᠤ ᠴᠡᠷᠢᠭ ᠨᠢᠭᠡᠨ ᠲᠦᠮᠡᠨ ᠥᠭᠴᠦ ᠰᠢᠭᠤᠳ ᠠᠷᠰᠯᠠᠨ ᠬᠠᠭᠠᠨ ᠤ᠋ ᠬᠦᠷᠢᠶᠡ ᠶ᠋ᠢ ᠰᠢᠪᠲᠤᠯᠤᠨ ᠭᠠᠷ!》 ᠭᠡᠮᠡᠨ ᠲᠤᠰᠢᠶᠠᠵᠤ᠂ ᠳᠣᠣᠷᠠ ᠠᠨᠤ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠵᠦ᠂ ᠰᠢᠷᠢ ᠬᠤᠲᠤᠭ᠂ ᠴᠢᠮᠪᠢ ᠳᠠᠷᠬᠠᠨ᠂ ᠰᠡᠴᠡᠨ ᠪᠡᠬᠢ᠂ ᠶᠠᠪᠤᠭᠠ ᠨᠠᠷ ᠢ᠋ ᠠᠪᠴᠤ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠲᠠᠢᠽᠦ ᠶ᠋ᠢ ᠬᠠᠮᠠᠭᠠᠯᠠᠭᠴᠢ ᠪᠣᠯᠤᠨ᠂ ᠪᠠᠰᠠ ᠬᠣᠶᠠᠷ ᠪᠠᠭᠠ ᠡᠵᠡᠨ᠂ ᠬᠦᠷᠭᠡᠨ ᠴᠡᠴᠡᠭ ᠨᠠᠷ ᠲᠡᠷᠢᠭᠦᠯᠡᠨ ᠠᠷᠪᠠᠨ ᠵᠠᠯᠠᠭᠤ ᠵᠠᠩᠵᠤᠨ ᠢ᠋ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ᠄《ᠲᠠ ᠨᠠᠷ ᠵᠡᠭᠦᠨ ᠵᠦᠭ ᠪᠠᠢᠯᠳᠤᠨ ᠭᠠᠷ᠂ ᠳᠥᠷᠪᠡᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠲᠠᠢᠽᠦ ᠶ᠋ᠢ ᠬᠠᠮᠠᠭᠠᠯᠠᠨ ᠬᠣᠢᠲᠤ ᠵᠦᠭ ᠪᠠᠢᠯᠳᠤᠨ ᠭᠠᠷᠴᠤ ᠭᠠᠯ ᠠᠭᠤᠯᠠᠨ ᠤ᠋ ᠶᠡᠬᠡ ᠬᠦᠷᠢᠶᠡ ᠳ᠋ᠦ᠍ᠷ ᠡᠴᠢ᠂ ᠬᠣᠢᠯᠠᠲᠠᠷ ᠬᠣᠰᠢᠭᠤᠴᠢ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠳ᠋ᠤᠷ ᠭᠠᠯ ᠲᠠᠯᠪᠢᠵᠤ ᠬᠠᠭᠤᠷᠮᠠᠭᠯᠠᠨ ᠪᠠᠢᠯᠳᠤᠨ ᠭᠠᠷᠬᠤ ᠳᠦᠷᠢᠮ ᠢ᠋ ᠭᠠᠷᠭᠠᠵᠤ᠂ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠢ᠋ ᠮᠡᠬᠡᠯᠡᠵᠦ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠳ᠋ᠤᠷ ᠦᠯᠡᠮᠵᠢ ᠴᠢᠭᠤᠯᠭᠤᠯᠤᠨ᠂ ᠡᠨᠡ ᠵᠠᠪᠰᠠᠷ ᠭᠤᠷᠪᠠᠨ ᠠᠩᠭᠢ ᠴᠡᠷᠢᠭ ᠭᠤᠷᠪᠠᠨ ᠵᠦᠭ ᠠᠯᠠᠨ ᠭᠠᠷ᠂ ᠡᠵᠡᠨ ᠦ᠌ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠭᠠᠷᠪᠠᠰᠤ ᠭᠠᠳᠠᠨᠠ ᠶᠡᠬᠡ ᠦᠬᠡᠷ ᠫᠤᠤ ᠳᠡᠯᠪᠢ᠂ ᠮᠥᠨ ᠲᠡᠮᠳᠡᠭ ᠢ᠋ᠶ᠋ᠡᠷ ᠬᠣᠢᠯᠠᠳᠠᠷ ᠵᠡᠭᠦᠨ ᠬᠠᠭᠠᠯᠭᠠ ᠪᠠᠷ ᠪᠠᠭᠠ ᠡᠵᠡᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠰᠡᠭᠦᠯ ᠢ᠋ ᠬᠠᠮᠠᠭᠠᠯᠠᠨ ᠶᠠᠪᠤᠵᠤ ᠭᠠᠷᠤᠭᠲᠤᠨ !》 ᠭᠡᠮᠡᠨ ᠵᠠᠷᠯᠠᠭᠠᠳ ᠮᠥᠨ ᠰᠥᠨᠢ ᠳᠠᠷᠤᠢ ᠰᠤᠮᠤ ᠵᠢᠭᠡᠯᠡᠭᠰᠡᠨ ᠠᠷᠭᠠ ᠪᠠᠷ ᠭᠠᠷᠴᠤ ᠫᠤᠤ ᠳᠠᠭᠤᠷᠢᠰᠴᠤ᠂ ᠬᠠᠰᠬᠢᠷᠤᠯᠳᠤᠬᠤᠢ ᠳ᠋ᠤᠷ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠪᠠᠰᠠ ᠮᠡᠬᠡᠯᠡᠷᠡ ᠢᠷᠡᠪᠡ᠂ ᠣᠢᠷᠠ ᠬᠦᠷᠴᠦ ᠢᠷᠡᠭᠰᠡᠨ ᠬᠣᠢᠨᠠ ᠭᠠᠷ ᠭᠡᠮᠡᠨ ᠬᠠᠷᠪᠤᠬᠤ ᠶ᠋ᠢ ᠨᠢᠭᠡᠮᠦᠰᠦᠨ ᠴᠠᠭᠠᠵᠠᠯᠠᠭᠰᠠᠨ ᠳ᠋ᠤᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠪᠠᠰᠠ ᠨᠢᠭᠡᠨ ᠫᠤᠤ ᠳᠤᠤᠭᠠᠷᠤᠮᠠᠭᠴᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠭᠡᠨᠡᠳᠲᠡ ᠪᠠᠷᠬᠢᠷᠠᠬᠤ ᠪᠠᠨ ᠲᠠᠭ ᠵᠣᠭᠰᠣᠭᠰᠠᠨ ᠳ᠋ᠤᠷ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠢᠨᠢᠶᠡᠯᠴᠡᠨ ᠥᠭᠦᠯᠡᠷᠦᠨ᠄《ᠲᠡᠢᠮᠦ ᠠᠷᠭᠠ ᠶ᠋ᠢ ᠬᠣᠶᠠᠷᠲᠠ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠤᠤ ?》ᠭᠡᠮᠡᠨ ᠬᠡᠯᠡᠯᠴᠡᠨ ᠦᠭᠡ ᠪᠠᠷᠠᠬᠤ ᠶ᠋ᠢᠨ ᠤᠷᠢᠳ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠭᠡᠨᠡᠳᠲᠡ ᠭᠠᠯ ᠤ᠋ᠨ ᠭᠡᠷᠡᠯ ᠭᠠᠷᠴᠤ ᠳᠥᠷᠪᠡᠨ ᠵᠦᠭ ᠴᠣᠬᠢᠨ ᠪᠠᠢᠯᠳᠤᠵᠤ ᠢᠷᠡᠬᠦ ᠢᠨᠤ ᠴᠢᠯᠠᠭᠤ ᠥᠩᠬᠥᠷᠢᠨ ᠦᠶᠡᠷ ᠪᠠᠭᠤᠬᠤ ᠮᠡᠲᠦ ᠳ᠋ᠦ᠍ᠷ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠯᠠᠪ ᠪᠠᠰᠠ ᠬᠦᠷᠢᠶᠡᠨ ᠳ᠋ᠦ᠍ᠷ ᠡᠭᠡᠮᠦᠢ ᠭᠡᠮᠡᠨ ᠰᠠᠨᠠᠭᠠᠨ ᠳ᠋ᠤᠷ ᠦᠭᠡᠢ ᠪᠥᠬᠥᠶᠡ᠂ ᠭᠡᠨᠡᠳᠲᠡ ᠪᠠᠷᠠᠭᠤᠨ ᠬᠠᠭᠠᠯᠭᠠᠨ ᠳ᠋ᠤᠷ ᠭᠠᠯ ᠬᠥᠭᠵᠢᠵᠦ ᠲᠠᠢᠽᠦ ᠶ᠋ᠢᠨ ᠰᠢᠬᠦᠷ ᠳᠠᠯᠪᠠᠭᠠ ᠶ᠋ᠢ ᠡᠷᠭᠦᠨ᠂ ᠣᠯᠠᠨ ᠴᠡᠷᠢᠭ ᠶᠡᠬᠡᠯᠡ ᠶᠠᠭᠠᠷᠠᠨ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠶ᠋ᠢ ᠪᠡᠬᠢᠯᠡᠨ ᠴᠡᠷᠢᠭ ᠢ᠋ ᠵᠤᠵᠠᠭᠠᠯᠠᠨ ᠪᠥᠬᠥᠶᠡ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠭᠤᠷᠪᠠᠨ ᠵᠦᠭ ᠦ᠋ᠨ ᠴᠡᠷᠢᠭ ᠢ᠋ ᠴᠥᠮ ᠠᠯᠠᠨ ᠰᠢᠪᠲᠤᠯᠵᠤ᠂ ᠳᠥᠷᠪᠡᠨ ᠵᠠᠮ ᠢ᠋ᠶ᠋ᠠᠷ ᠭᠠᠷᠬᠤᠶᠠ ᠮᠤᠬᠤᠯᠢ ᠵᠣᠷᠢᠮᠠᠭ ᠢ᠋ᠶ᠋ᠠᠷ ᠬᠠᠭᠤᠷᠮᠠᠭ ᠲᠠᠢᠽᠦ ᠶ᠋ᠢ ᠬᠠᠮᠠᠭᠠᠯᠠᠨ ᠶᠠᠪᠤᠬᠤᠶᠠ᠂ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡ ᠴᠠᠰᠤᠨ ᠳ᠋ᠤᠷ ᠰᠡᠳᠬᠢᠯ ᠵᠣᠪᠠᠨᠢᠨ ᠶᠡᠬᠡᠯᠡ ᠰᠣᠭᠲᠣᠵᠤ ᠤᠮᠳᠠᠬᠤᠶᠠ ᠭᠡᠨᠡᠳᠲᠡ ᠪᠠᠰᠠ ᠰᠤᠮᠤ ᠵᠢᠭᠡᠯᠡᠬᠦ ᠴᠡᠷᠢᠭ ᠭᠠᠷᠪᠠ ᠭᠡᠮᠡᠨ ᠮᠡᠳᠡᠭᠦᠯᠦᠭᠡᠳ ᠤᠳᠠᠭᠰᠠᠨ ᠦᠭᠡᠢ ᠪᠠᠰᠠ᠄ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠪᠠᠷ ᠪᠧᠲ᠋ᠠ᠋ ᠶ᠋ᠢᠨ ᠴᠡᠷᠢᠭ ᠪᠠᠢᠯᠳᠤᠷᠠ ᠭᠠᠷᠤᠮᠤᠢ ᠭᠡᠮᠡᠨ ᠭᠠᠯ ᠡᠷᠭᠦᠪᠡ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠪᠣᠰᠴᠤ ᠵᠠᠩᠵᠤᠨ ᠨᠠᠷ ᠢ᠋ ᠳᠣᠪᠲᠣᠯᠭᠠᠨ ᠵᠠᠷᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠬᠤᠶᠠᠭᠯᠠᠵᠤ ᠮᠣᠷᠢ ᠤᠨᠤᠨ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠶ᠋ᠢ ᠪᠡᠬᠢᠯᠡᠷᠡ ᠡᠴᠢᠰᠦᠭᠡᠢ ᠭᠡᠮᠡᠨ ᠭᠠᠷᠴᠤ ᠢᠷᠡᠲᠡᠯᠡ ᠴᠢᠪᠬᠢᠲᠡᠯᠡ ᠬᠠᠭᠤᠷᠮᠠᠭ ᠲᠠᠢᠽᠦ ᠰᠢᠬᠦᠷ ᠳᠠᠯᠪᠠᠭᠠ ᠶᠡᠬᠡ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠲᠡᠢ ᠥᠩᠭᠡᠷᠡᠨ ᠭᠠᠷᠬᠤᠢ ᠳ᠋ᠤᠷ ᠪᠠᠷᠠᠭᠤᠨ ᠬᠠᠭᠠᠯᠭᠠ ᠳ᠋ᠤᠷ ᠠᠷᠰᠯᠠᠨ ᠬᠠᠭᠠᠨ ᠥᠪᠡᠷ ᠦ᠋ᠨ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠨᠡᠬᠡᠵᠦ ᠢᠷᠡᠲᠡᠯᠡ ᠰᠢᠷᠢ ᠬᠤᠲᠤᠭ ᠤ᠋ᠨ ᠴᠡᠷᠢᠭ ᠦ᠋ᠨ ᠰᠡᠭᠦᠯ ᠢ᠋ ᠬᠠᠢᠭᠤᠯᠯᠠᠨ ᠪᠠᠢᠭᠰᠠᠨ ᠳ᠋ᠤᠷ ᠲᠣᠬᠢᠶᠠᠯᠳᠤᠨ ᠪᠠᠢᠯᠳᠤᠵᠤ᠂ ᠲᠠᠪᠢᠨ ᠤᠳᠠᠭᠠ ᠵᠥᠷᠢᠴᠡᠯᠳᠦᠨ ᠰᠢᠷᠢ ᠬᠤᠲᠤᠭ ᠦᠨᠡᠬᠡᠷ ᠲᠤᠯᠤᠨ ᠴᠢᠳᠠᠬᠤ ᠦᠭᠡᠢ ᠪᠤᠷᠤᠭᠤᠯᠠᠬᠤᠢ ᠳ᠋ᠤᠷ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠬᠢᠯᠢᠩᠯᠡᠵᠦ᠄《ᠠᠮᠢ ᠭᠠᠷᠬᠤ ᠶ᠋ᠢ ᠪᠢᠲᠡᠭᠡᠢ ᠰᠠᠨᠠ᠂ ᠲᠡᠮᠦᠵᠢᠨ ᠢ᠋ ᠦᠯᠡᠳᠡᠭᠡᠨ ᠦᠭᠪᠡᠰᠦ ᠲᠠ ᠣᠯᠠᠨ ᠤ᠋ ᠠᠮᠢᠨ ᠢ᠋ ᠲᠠᠯᠪᠢᠨ ᠭᠠᠷᠭᠠᠰᠤᠭᠠᠢ!》 ᠭᠡᠮᠡᠨ ᠨᠡᠬᠡᠵᠦ ᠢᠷᠡᠨ ᠠᠷᠪᠠᠭᠠᠳ ᠭᠠᠵᠠᠷ ᠶᠠᠪᠤᠭᠰᠠᠨ ᠦᠭᠡᠢ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠢ᠋ ᠨᠡᠬᠡᠵᠦ ᠭᠦᠢᠴᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠨᠠᠷ ᠬᠡᠳᠦᠨ ᠮᠢᠩᠭᠠᠨ ᠱᠠᠯᠠᠮᠠᠭᠠᠢ ᠴᠡᠷᠢᠭ ᠢ᠋ ᠠᠪᠴᠤ ᠤᠷᠤᠭᠰᠢᠯᠠᠨ ᠵᠣᠭᠵᠢᠵᠤ ᠤᠮᠠᠷᠠ ᠵᠦᠭ ᠪᠤᠷᠤᠭᠤᠯᠠᠨ ᠡᠴᠢᠬᠦᠢ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠲᠠᠯᠪᠢᠯ ᠦᠭᠡᠢ ᠮᠥᠨ ᠬᠦ᠌ ᠬᠡᠳᠦᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠨᠡᠬᠡᠵᠦ ᠡᠴᠢᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠲᠠᠢᠽᠦ ᠳᠥᠷᠪᠡᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠤ᠋ ᠴᠡᠷᠢᠭ ᠢ᠋ ᠠᠪᠴᠤ ᠬᠡᠳᠦᠢᠨᠡᠢ ᠬᠦᠷᠢᠶᠡ ᠡᠴᠡ ᠴᠣᠬᠢᠨ ᠭᠠᠷᠴᠤ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠢ᠋ ᠠᠯᠠᠨ ᠰᠠᠷᠨᠢᠭᠤᠯᠵᠤ ᠬᠣᠢᠲᠤ ᠵᠦᠭ ᠡᠴᠢᠬᠦᠶᠡ᠂ ᠪᠠᠭᠠ ᠡᠵᠡᠳ ᠠᠷᠪᠠᠨ ᠳᠥᠷᠪᠡᠨ ᠵᠠᠩᠵᠤᠨ ᠨᠠᠷ ᠨᠡᠩ ᠬᠤᠷᠴᠠ ᠴᠢᠭᠢᠷᠠᠭ᠂ ᠬᠠᠭᠠᠰ ᠰᠠᠷᠠ ᠬᠠᠭᠠᠭᠳᠠᠨ ᠬᠣᠷᠢᠭᠳᠠᠭᠰᠠᠨ ᠬᠣᠷᠣᠰᠤᠯ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠴᠠᠪᠴᠢᠨ ᠭᠠᠷᠬᠤᠢ ᠳ᠋ᠤᠷ ᠬᠠᠷᠯᠢᠭᠤᠳ ᠤ᠋ᠨ ᠵᠠᠩᠵᠤᠨ ᠰᠢᠷᠠ ᠭᠣᠣᠯ ᠢ᠋ ᠲᠠᠢᠽᠢ ᠴᠠᠭᠠᠲᠠᠢ ᠨᠢᠭᠡᠨ ᠰᠤᠮᠤ ᠳ᠋ᠤᠷ ᠳᠠᠷᠤᠢ ᠬᠣᠭᠣᠯᠠᠢ ᠶ᠋ᠢ ᠲᠠᠰᠤ ᠬᠠᠷᠪᠤᠵᠤ ᠤᠨᠠᠭᠠᠭᠰᠠᠨ ᠳ᠋ᠤᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠵᠤ ᠡᠷᠭᠦᠭᠰᠡᠨᠡ᠂ ᠴᠠᠭᠠᠲᠠᠢ ᠮᠣᠷᠢᠨ ᠤ᠋ ᠮᠣᠨᠴᠣᠭ ᠲᠤᠷ ᠤᠶᠠᠵᠤ ᠲᠡᠷᠢᠭᠦᠯᠡᠨ ᠠᠯᠠᠨ ᠭᠠᠷᠴᠤ ᠢᠷᠡᠬᠦᠢ ᠳ᠋ᠦ᠍ᠷ ᠬᠠᠷᠯᠢᠭᠤᠳ ᠤ᠋ᠨ ᠣᠯᠠᠨ ᠴᠡᠷᠢᠭ ᠡᠵᠡᠨ ᠢᠨᠤ ᠠᠯᠠᠭᠳᠠᠭᠰᠠᠨ ᠳ᠋ᠤᠷ ᠪᠠᠢᠯᠳᠤᠬᠤ ᠰᠡᠳᠬᠢᠯ ᠦᠭᠡᠢ ᠪᠤᠷᠤᠭᠤᠯᠠᠪᠠ᠃ ᠵᠡᠭᠦᠨ ᠬᠠᠭᠠᠯᠭᠠ ᠶ᠋ᠢᠨ ᠴᠡᠷᠢᠭ ᠢᠷᠡᠵᠦ ᠲᠠᠢᠽᠦ ᠳ᠋ᠦ᠍ᠷ ᠵᠣᠯᠭᠠᠨ ᠴᠠᠭᠠᠲᠠᠢ᠂ ᠰᠢᠷᠠ ᠭᠣᠣᠯ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠪᠠᠷᠢᠭᠰᠠᠨ ᠳ᠋ᠤᠷ ᠲᠠᠢᠽᠦ ᠪᠡᠶᠡᠰᠦᠨ ᠰᠠᠢᠰᠢᠶᠠᠵᠤ᠂ ᠲᠡᠳᠦᠢ ᠣᠯᠠᠨ ᠴᠡᠷᠢᠭ ᠭᠠᠷᠤᠭᠰᠠᠨ ᠢ᠋ ᠦᠵᠡᠭᠡᠳ ᠬᠤᠢᠯᠠᠳᠠᠷ ᠬᠣᠰᠢᠭᠤᠴᠢ ᠳᠠᠷᠤᠢ ᠳᠣᠬᠢᠶᠠ ᠫᠤᠤ ᠲᠠᠯᠪᠢᠭᠤᠯᠵᠤ ᠬᠠᠭᠤᠷᠮᠠᠭ ᠴᠡᠷᠢᠭ ᠢ᠋ ᠭᠡᠨᠡᠳᠲᠡ ᠤᠬᠤᠷᠢᠭᠤᠯᠤᠨ ᠮᠥᠨ ᠬᠦ᠌ ᠵᠡᠭᠦᠨ ᠬᠠᠭᠠᠯᠭᠠ ᠪᠠᠷ ᠭᠠᠷᠴᠤ ᠢᠷᠡᠬᠦᠶᠡ᠂ ᠡᠨᠡ ᠦᠶᠡ ᠳ᠋ᠦ᠍ᠷ ᠬᠠᠷᠯᠢᠭᠤᠳ ᠤ᠋ᠨ ᠮᠥᠩᠭᠥᠨ ᠰᠠᠷᠠᠨ ᠬᠣᠢᠲᠤ ᠬᠠᠭᠠᠯᠭᠠᠨ ᠤ᠋ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠳᠠᠷᠤᠭᠳᠠᠵᠤ᠂ ᠵᠡᠭᠦᠨ ᠬᠠᠭᠠᠯᠭᠠᠨ ᠳ᠋ᠤᠷ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠢᠷᠡᠬᠦᠶᠡ᠂ ᠴᠢᠪᠬᠢᠲᠡᠯᠡ ᠬᠣᠢᠯᠠᠳᠠᠷ ᠬᠣᠰᠢᠭᠤᠴᠢ ᠳ᠋ᠤᠷ ᠤᠴᠠᠷᠠᠵᠤ᠂ ᠬᠤᠢᠯᠠᠳᠠᠷ ᠬᠣᠰᠢᠭᠤᠴᠢ ᠲᠡᠨᠴᠢᠭᠦᠷᠡᠨ ᠠᠭᠤᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ᠂ ᠳᠠᠷᠤᠢ ᠮᠣᠷᠢᠨ ᠤ᠋ ᠬᠠᠪᠢᠷᠭᠠᠨ ᠳ᠋ᠤᠷ ᠢ᠋ᠶ᠋ᠠᠨ ᠬᠡᠪᠲᠡᠵᠦ ᠨᠠᠭᠠᠯᠳᠤᠭᠠᠳ ᠳᠣᠪᠲᠣᠯᠤᠨ ᠣᠷᠣᠵᠤ ᠢᠷᠡᠬᠦᠢ ᠳ᠋ᠦ᠍ᠷ ᠮᠥᠩᠭᠥᠨ ᠰᠠᠷᠠᠨ ᠶᠠᠭᠠᠷᠠᠨ ᠵᠢᠳᠠ ᠬᠤᠷᠢᠶᠠᠵᠤ ᠵᠠᠢᠯᠠᠲᠠᠯᠠ ᠬᠣᠢᠯᠠᠳᠠᠷ ᠠᠭᠤᠷ ᠬᠦᠷᠴᠦ ᠢᠷᠡᠭᠡᠳ ᠭᠡᠨᠡᠳᠲᠡ ᠪᠣᠰᠴᠤ ᠪᠢᠴᠢᠬᠠᠨ ᠤᠷᠠᠬᠠ ᠭᠠᠷᠭᠠᠵᠤ ᠮᠥᠩᠭᠥᠨ ᠰᠠᠷᠠᠨ ᠤ᠋ ᠬᠦᠵᠦᠭᠦᠨ ᠢ᠋ ᠤᠷᠠᠭᠳᠠᠵᠤ ᠨᠢᠭᠡᠨᠲᠡ ᠲᠠᠲᠠᠵᠤ ᠮᠣᠷᠢᠨ ᠠ᠋ᠴᠠ ᠤᠨᠠᠭᠠᠭᠰᠠᠨᠠ᠂ ᠠᠮᠢᠳᠤ ᠪᠠᠷᠢᠵᠤ ᠲᠡᠭᠦᠨ ᠢ᠋ᠶ᠋ᠡᠷ ᠬᠠᠯᠠᠬᠠᠪᠴᠢ ᠬᠢᠵᠦ᠂ ᠬᠦᠨᠳᠦ ᠬᠠᠭᠠᠭᠰᠠᠨ ᠭᠠᠵᠠᠷ ᠢ᠋ ᠨᠡᠪᠲᠡᠯᠦᠨ ᠭᠠᠷᠴᠤ ᠢᠷᠡᠪᠡ᠃ ᠲᠡᠳᠦᠢ ᠮᠥᠨ ᠬᠦ᠌ ᠬᠣᠢᠲᠤ ᠵᠦᠭ ᠲᠠᠢᠽᠦ ᠶ᠋ᠢ ᠨᠡᠬᠡᠮᠵᠢᠯᠡᠨ ᠢᠷᠡᠵᠦ᠂ ᠬᠠᠮᠲᠤ ᠭᠠᠯ ᠠᠭᠤᠯᠠᠨ ᠤ᠋ ᠬᠣᠢᠲᠤ ᠡᠲᠡᠭᠡᠳ ᠬᠦᠷᠲᠡᠯᠡ ᠠᠷᠰᠯᠠᠨ ᠬᠠᠭᠠᠨ ᠬᠡᠳᠦᠬᠡᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠮᠤᠬᠤᠯᠢ ᠨᠠᠷ ᠤ᠋ᠨ ᠨᠢᠭᠡᠨ ᠠᠩᠭᠢ ᠬᠠᠭᠤᠷᠮᠠᠭ ᠲᠠᠢᠽᠦ ᠶ᠋ᠢ ᠨᠡᠬᠡᠵᠦ ᠢᠷᠡᠲᠡᠯᠡ ᠬᠠᠭᠤᠷᠮᠠᠭ ᠲᠠᠢᠽᠦ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠢ᠋ ᠠᠪᠴᠤ ᠭᠠᠯ ᠠᠭᠤᠯᠠᠨ ᠤ᠋ ᠨᠡᠷᠡᠲᠦ ᠳᠣᠪᠣ ᠳ᠋ᠤᠷ ᠭᠠᠷᠲᠠᠯᠠ ᠠᠷᠰᠯᠠᠨ ᠬᠠᠭᠠᠨ ᠲᠠᠯᠪᠢᠯ ᠦᠭᠡᠢ ᠨᠡᠬᠡᠨ ᠬᠦᠷᠴᠦ ᠢᠷᠡᠭᠡᠳ ᠠᠭᠤᠯᠠᠨ ᠥᠭᠡᠳᠡ ᠭᠠᠷᠲᠠᠯᠠ ᠠᠭᠤᠯᠠᠨ ᠤ᠋ ᠳᠤᠮᠳᠠ ᠬᠠᠭᠠᠰ ᠬᠦᠷᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ᠷ ᠬᠣᠢᠲᠤ ᠬᠠᠪᠠᠷ ᠤ᠋ᠨ ᠳᠡᠭᠡᠷᠡ ᠭᠡᠨᠡᠳᠲᠡ ᠫᠤᠤ ᠳᠠᠭᠤᠷᠢᠰᠴᠤ ᠮᠤᠬᠤᠯᠢ᠂ ᠰᠢᠷᠢ ᠬᠤᠲᠤᠭ᠂ ᠴᠢᠮᠪᠢ ᠳᠠᠷᠬᠠᠨ᠂ ᠰᠡᠴᠡᠨ ᠪᠡᠬᠢ᠂ ᠶᠠᠪᠤᠭᠠ ᠲᠠᠨ ᠬᠥᠨᠳᠡᠯᠢᠳᠪᠡ᠂ ᠡᠭᠡᠵᠦ ᠦᠵᠡᠪᠡᠰᠦ ᠲᠠᠢᠽᠦ ᠶ᠋ᠢᠨ ᠣᠯᠠᠨ ᠴᠡᠷᠢᠭ ᠪᠠᠰᠠ ᠡᠭᠡᠬᠦ ᠵᠠᠮ ᠢ᠋ ᠬᠠᠭᠠᠪᠠ᠃ ᠳᠣᠪᠣ ᠶ᠋ᠢᠨ ᠣᠷᠣᠢ ᠳ᠋ᠤᠷ ᠲᠠᠢᠽᠦ ᠵᠣᠭᠰᠣᠵᠤ᠂ ᠨᠠᠷᠢᠨ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠵᠤ ᠠᠭᠤᠯᠠᠨ ᠬᠥᠲᠥᠯ ᠦ᠋ᠨ ᠪᠠᠢᠯᠳᠤᠭᠠᠨ ᠢ᠋ ᠦᠵᠡᠬᠦᠶᠡ᠂ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠴᠢᠬᠤᠯᠳᠠᠨ ᠠᠭᠤᠷᠯᠠᠵᠤ᠂ ᠠᠭᠤᠯᠠᠨ ᠬᠥᠩᠭᠢᠷᠡᠰᠲᠡᠯᠡ ᠬᠠᠰᠬᠢᠷᠤᠨ ᠪᠠᠷᠬᠢᠷᠠᠵᠤ ᠳᠠᠷᠤᠢ ᠮᠣᠷᠢ ᠪᠠᠨ ᠨᠢᠭᠡᠨᠲᠡ ᠲᠠᠰᠢᠭᠤᠷᠳᠠᠨ᠂ ᠠᠭᠤᠯᠠᠨ ᠥᠭᠡᠳᠡ ᠦᠬᠦᠨ ᠪᠠᠢᠯᠳᠤᠵᠤ ᠠᠯᠠᠨ ᠢᠷᠡᠬᠦᠶᠡ᠂ ᠶᠠᠪᠤᠭᠠ ᠲᠡᠭᠦᠨ ᠦ᠌ ᠰᠡᠷᠡᠭᠡ ᠶ᠋ᠢᠨ ᠡᠰᠢ ᠳ᠋ᠦ᠍ᠷ ᠳᠠᠭᠠᠷᠢᠭᠳᠠᠵᠤ ᠶᠡᠬᠡ ᠠᠭᠤᠯᠠᠨ ᠤ᠋ ᠭᠣᠣ ᠳ᠋ᠤᠷ ᠬᠥᠮᠦᠨ ᠮᠣᠷᠢ ᠲᠠᠢ ᠥᠩᠬᠥᠷᠢᠨ ᠣᠷᠣᠪᠠ᠃ ᠴᠢᠮᠪᠢ ᠳᠠᠷᠬᠠᠨ ᠶᠠᠭᠠᠷᠠᠨ ᠠᠭᠤᠯᠠᠨ ᠥᠭᠡᠳᠡ ᠪᠤᠷᠤᠭᠤᠯᠠᠶᠠ ᠬᠡᠮᠡᠲᠡᠯᠡ ᠠᠷᠰᠯᠠᠨ ᠬᠠᠭᠠᠨ ᠨᠡᠩᠳᠡ ᠣᠮᠣᠭᠰᠢᠨ ᠰᠡᠷᠡᠭᠡᠳᠡᠷᠡ ᠢᠷᠡᠬᠦᠢ ᠳ᠋ᠦ᠍ᠷ ᠴᠢᠮᠪᠢ ᠳᠠᠷᠬᠠᠨ ᠤ᠋ ᠪᠠᠷᠠᠭᠤᠨ ᠭᠤᠶᠠ ᠣᠨᠣᠭᠳᠠᠵᠤ ᠮᠣᠷᠢᠨ ᠠ᠋ᠴᠠ ᠤᠨᠠᠲᠠᠯᠠ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠪᠠᠷᠢᠵᠤ ᠬᠦᠯᠢᠪᠡ᠃ ᠲᠡᠳᠦᠢ ᠰᠢᠷᠢ ᠬᠤᠲᠤᠭ᠂ ᠰᠡᠴᠡᠨ ᠪᠡᠬᠢ ᠬᠣᠶᠠᠭᠤᠯᠠ ᠲᠣᠰᠴᠤ ᠪᠠᠢᠯᠳᠤᠭᠠᠳ ᠪᠠᠰᠠ ᠲᠠᠢᠯᠤᠨ ᠴᠢᠳᠠᠬᠤ ᠦᠭᠡᠢ᠂ ᠠᠷᠰᠯᠠᠨ ᠬᠠᠭᠠᠨ ᠤ᠋ ᠰᠡᠷᠡᠭᠡ ᠦᠨᠡᠬᠡᠷ ᠶᠡᠬᠡ ᠠᠪᠤᠷᠭᠤ ᠮᠣᠭᠠᠢ ᠶ᠋ᠢᠨ ᠬᠡᠯᠡ ᠮᠡᠲᠦ ᠲᠦᠷᠭᠡᠨ ᠭᠢᠯᠪᠠᠯᠵᠠᠬᠤᠢ ᠳ᠋ᠤᠷ ᠰᠡᠴᠡᠨ ᠪᠡᠬᠢ ᠰᠢᠷᠢ ᠬᠤᠲᠤᠭ ᠬᠣᠶᠠᠷ ᠳᠠᠰᠢ ᠰᠠᠯᠵᠤ ᠠᠭᠤᠯᠠᠨ ᠢ᠋ ᠬᠠᠪᠢᠷᠭᠠᠯᠠᠨ ᠪᠤᠷᠤᠭᠤᠯᠠᠬᠤᠶᠠ᠂ ᠮᠤᠬᠤᠯᠢ ᠲᠠᠢᠽᠦ ᠡᠮᠦᠨᠡ ᠬᠥᠲᠥᠯ ᠦ᠋ᠨ ᠳᠡᠭᠡᠷᠡ ᠡᠴᠡ ᠦᠵᠡᠬᠦᠢ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠤ᠋ ᠲᠡᠷᠡ ᠮᠣᠷᠢ ᠴᠤ᠌ ᠮᠥᠨ ᠬᠠᠳᠠᠨ ᠳ᠋ᠤᠷ ᠮᠠᠰᠢ ᠳᠠᠳᠤᠭᠰᠠᠨ ᠲᠤᠯᠠ ᠠᠭᠤᠯᠠᠨ ᠤ᠋ ᠥᠭᠡᠳᠡ ᠮᠠᠴᠤᠬᠤ ᠠᠨᠤ ᠦᠨᠡᠬᠡᠷ ᠲᠦᠷᠭᠡᠨ᠂ ᠳᠠᠭᠠᠭᠰᠠᠨ ᠴᠡᠷᠢᠭ ᠪᠠᠰᠠ ᠬᠦᠴᠦᠲᠡᠢ ᠲᠤᠯᠠ ᠮᠠᠰᠢ ᠬᠡᠴᠡᠭᠦᠦ ᠳ᠋ᠦ᠍ᠷ ᠮᠤᠬᠤᠯᠢ ᠪᠠᠢᠯᠳᠤᠬᠤ ᠠᠷᠭᠠ ᠶ᠋ᠢ ᠪᠣᠳᠣᠵᠤ ᠪᠥᠬᠥᠶᠡ᠂ ᠡᠨᠡ ᠬᠢᠷᠢ ᠳ᠋ᠦ᠍ᠷ ᠨᠠᠷᠠᠨ ᠭᠠᠷᠤᠭᠰᠠᠨ ᠲᠤᠯᠠ ᠵᠡᠭᠦᠨ ᠡᠲᠡᠭᠡᠳ ᠡᠴᠡ ᠴᠠᠰᠤ ᠪᠤᠲᠠᠷᠠᠨ ᠬᠡᠢᠰᠴᠦ ᠨᠠᠷᠠᠨ ᠢ᠋ ᠬᠠᠯᠠᠬᠠᠯᠠᠨ ᠶᠡᠬᠡ ᠴᠡᠷᠢᠭ ᠬᠦᠷᠴᠦ ᠢᠷᠡᠪᠡ᠃ ᠠᠷᠰᠯᠠᠨ ᠬᠠᠭᠠᠨ ᠡᠨᠡ ᠯᠠᠪ ᠮᠢᠨᠦ ᠴᠡᠷᠢᠭ ᠭᠡᠮᠡᠨ ᠪᠠᠶᠠᠷᠯᠠᠨ ᠨᠡᠩᠳᠡ ᠣᠮᠣᠭ ᠨᠡᠮᠡᠵᠦ ᠡᠷᠬᠡᠪᠰᠢ ᠲᠠᠢᠽᠦ ᠶ᠋ᠢ ᠪᠠᠷᠢᠰᠤᠭᠠᠢ ᠭᠡᠮᠡᠨ ᠥᠭᠡᠳᠡ ᠮᠠᠴᠤᠨ ᠶᠠᠪᠤᠬᠤᠶᠠ᠂ ᠳᠡᠭᠡᠷᠡ ᠨᠢᠭᠡᠨᠲᠡ ᠶᠡᠬᠡ ᠫᠤᠤ ᠳᠠᠭᠤᠷᠢᠰᠴᠤ ᠤᠯᠠᠭᠠᠨ ᠬᠢᠭᠢᠷᠢ ᠲᠤᠭ ᠨᠡᠭᠡᠭᠡᠵᠦ ᠲᠠᠢᠽᠦ ᠭᠠᠷ ᠲᠤᠷ ᠡᠷᠳᠡᠨᠢ ᠶ᠋ᠢᠨ ᠵᠢᠳᠠ ᠪᠠᠷᠢᠵᠤ ᠠᠷᠰᠯᠠᠨ ᠬᠠᠭᠠᠨ ᠢ᠋ ᠵᠢᠭᠠᠵᠤ᠂ ᠬᠠᠷᠢᠶᠠᠨ ᠪᠠᠭᠤᠵᠤ ᠢᠷᠡᠬᠦᠢ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠥᠭᠦᠯᠡᠷᠦᠨ᠄《ᠦᠨᠡᠬᠡᠷ ᠮᠢᠨᠦ ᠭᠠᠪᠢᠶᠠ ᠪᠦᠲᠦᠭᠡᠬᠦ ᠴᠠᠭ!》 ᠭᠡᠮᠡᠨ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠢᠷᠡᠬᠦᠶᠡ᠂ ᠰᠢᠷᠢ ᠬᠤᠲᠤᠭ᠂ ᠭᠣᠣ ᠳ᠋ᠤᠷ ᠤᠨᠠᠭᠰᠠᠨ ᠶᠠᠪᠤᠭᠠ ᠨᠠᠷ ᠡᠭᠡᠵᠦ ᠬᠤᠮᠪᠢᠨ ᠢᠷᠡᠬᠦᠢ ᠳ᠋ᠦ᠍ᠷ ᠵᠡᠭᠦᠨ ᠳᠡᠭᠡᠷᠡ ᠡᠴᠡ ᠮᠤᠬᠤᠯᠢ ᠭᠡᠨᠡᠳᠲᠡ ᠬᠠᠳᠠᠨ ᠤᠷᠤᠭᠤ ᠥᠩᠬᠥᠷᠢᠬᠦ ᠮᠡᠲᠦ ᠳᠣᠪᠲᠣᠯᠤᠨ ᠪᠠᠭᠤᠵᠤ ᠢᠷᠡᠭᠡᠳ ᠮᠣᠷᠢ ᠶ᠋ᠢ ᠨᠢᠭᠡᠨᠲᠡ ᠵᠣᠭᠰᠣᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠷ ᠠᠷᠰᠯᠠᠨ ᠬᠠᠭᠠᠨ ᠵᠠᠢᠯᠠᠨ ᠵᠠᠪᠳᠤᠬᠤ ᠦᠭᠡᠢ ᠰᠠᠢ ᠲᠠᠯᠲᠠᠷᠢᠲᠠᠯᠠ ᠮᠤᠬᠤᠯᠢ ᠶ᠋ᠢᠨ ᠲᠡᠮᠦᠷ ᠰᠢᠳᠡᠮ ᠠᠷᠰᠯᠠᠨ ᠬᠠᠭᠠᠨ ᠤ᠋ ᠮᠠᠩᠨᠠᠢ ᠤᠷᠤᠭᠤ ᠨᠢᠭᠡᠨᠲᠡ ᠲᠣᠰᠴᠤ ᠲᠠᠷᠢᠬᠢ ᠭᠠᠷᠴᠤ ᠬᠥᠮᠦᠨ ᠮᠣᠷᠢ ᠲᠠᠢ ᠬᠠᠮᠲᠤ ᠳᠣᠷᠣᠭᠰᠢ ᠠᠷᠪᠠᠨ ᠵᠠᠩ ᠭᠠᠵᠠᠷ ᠥᠩᠬᠥᠷᠢᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠦᠵᠡᠪᠡᠰᠦ ᠲᠡᠭᠦᠨ ᠦ᠌ ᠮᠣᠷᠢ ᠮᠥᠨ ᠵᠣᠭᠰᠣᠨ ᠴᠢᠳᠠᠬᠤ ᠦᠭᠡᠢ ᠶ᠋ᠢ ᠮᠡᠳᠡᠭᠡᠳ ᠶᠠᠭᠠᠷᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠶ᠋ᠢ ᠳᠠᠷᠤᠵᠤ᠂ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠳᠥᠷᠥᠭᠡ ᠡᠴᠡ ᠰᠤᠭᠤᠯᠤᠨ ᠬᠣᠢᠰᠢ ᠤᠬᠤᠷᠢᠨ ᠨᠢᠭᠡᠨᠲᠡ ᠳᠡᠪᠬᠡᠯᠦᠨ ᠪᠠᠭᠤᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠮᠣᠷᠢ ᠣᠷᠣᠭᠰᠢ ᠳᠣᠪᠲᠣᠯᠤᠭᠰᠠᠭᠠᠷ ᠨᠢᠭᠡᠨ ᠶᠡᠬᠡ ᠭᠣᠣ ᠶ᠋ᠢ ᠬᠠᠷᠠᠢᠵᠤ ᠭᠠᠷᠤᠭᠠᠳ ᠰᠠᠢ ᠵᠣᠭᠰᠣᠪᠠ᠃ ᠮᠤᠬᠤᠯᠢ ᠶᠠᠭᠠᠷᠠᠨ ᠢᠯᠳᠦ ᠭᠠᠷᠭᠠᠨ ᠠᠷᠰᠯᠠᠨ ᠤ᠋ ᠰᠢᠳᠠᠷ ᠠᠷᠠᠳ ᠢ᠋ ᠨᠢᠭᠡᠨ ᠵᠡᠷᠭᠡ ᠴᠠᠪᠴᠢᠨ ᠤᠨᠠᠭᠠᠨ ᠮᠣᠷᠢ ᠪᠠᠨ ᠤᠨᠤᠵᠤ᠂ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠢ᠋ ᠳᠠᠷᠤᠨ ᠣᠷᠣᠬᠤᠢ ᠳ᠋ᠤᠷ ᠬᠠᠷᠯᠢᠭᠤᠳ ᠤ᠋ᠨ ᠰᠢᠳᠠᠷ ᠪᠠᠢᠭᠰᠠᠨ ᠱᠠᠯᠠᠮᠠᠭᠠᠢ ᠴᠡᠷᠢᠭ ᠡᠵᠡᠨ ᠢᠨᠤ ᠨᠢᠭᠡᠨᠲᠡ ᠦᠬᠦᠭᠰᠡᠨ ᠢ᠋ ᠦᠵᠡᠭᠡᠳ ᠶᠠᠭᠠᠷᠠᠨ ᠳᠤᠭᠤᠯᠠᠭᠠ ᠪᠠᠨ ᠠᠪᠴᠤ ᠵᠡᠪᠰᠡᠭ ᠢ᠋ᠶ᠋ᠡᠨ ᠣᠷᠬᠢᠵᠤ ᠳᠠᠭᠠᠪᠠ᠃ ᠲᠡᠳᠦᠢ ᠮᠤᠬᠤᠯᠢ ᠠᠷᠰᠯᠠᠨ ᠬᠠᠭᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠠᠪᠴᠤ ᠲᠤᠭ ᠤ᠋ᠨ ᠣᠷᠣᠢ ᠳ᠋ᠤᠷ ᠬᠠᠳᠬᠤᠭᠠᠳ ᠬᠠᠭᠤᠷᠮᠠᠭ ᠲᠠᠢᠽᠦ ᠶ᠋ᠢ ᠠᠪᠴᠤ ᠪᠠᠭᠤᠵᠤ ᠢᠷᠡᠬᠦᠶᠡ ᠴᠢᠮᠪᠢ ᠳᠠᠷᠬᠠᠨ ᠤ᠋ ᠬᠦᠯᠢᠶᠡᠰᠦᠨ ᠢ᠋ ᠠᠯᠳᠠᠷᠠᠭᠠᠵᠤ᠂ ᠠᠭᠤᠯᠠᠨ ᠤ᠋ ᠳᠣᠲᠣᠷᠠ ᠰᠢᠷᠢ ᠬᠤᠲᠤᠭ᠂ ᠰᠡᠴᠡᠨ ᠪᠡᠬᠢ᠂ ᠶᠠᠪᠤᠭᠠ ᠭᠤᠷᠪᠠᠭᠤᠯᠠ ᠪᠠᠷ ᠣᠯᠠᠨ ᠴᠡᠷᠢᠭ ᠢ᠋ ᠲᠡᠭᠰᠢᠯᠡᠭᠦᠯᠦᠨ᠂ ᠡᠨᠡ ᠢᠷᠡᠬᠦ ᠴᠡᠷᠢᠭ ᠢ᠋ ᠦᠵᠡᠪᠡᠰᠦ ᠬᠠᠷᠢᠨ ᠠᠷᠪᠠᠨ ᠠᠩᠭᠢ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠠᠵᠤᠭᠤ᠃ ᠲᠠᠢᠽᠦ ᠮᠤᠬᠤᠯᠢ ᠨᠠᠷ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠳᠠᠷᠤᠢ ᠬᠠᠭᠤᠷᠮᠠᠭ ᠲᠠᠢᠽᠦ ᠶ᠋ᠢ ᠴᠡᠷᠢᠭ ᠦ᠋ᠨ ᠲᠡᠷᠢᠭᠦᠨ ᠳ᠋ᠦ᠍ᠷ ᠪᠣᠯᠭᠠᠨ᠂ ᠮᠥᠩᠭᠥᠨ ᠰᠠᠷᠠᠨ ᠢ᠋ ᠡᠮᠦᠨᠡ ᠬᠦᠯᠢᠭᠦᠯᠵᠦ᠂ ᠰᠢᠷᠠ ᠭᠣᠣᠯ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠪᠠᠰᠠ ᠥᠨᠳᠥᠷ ᠰᠢᠷᠤᠭ ᠲᠤᠷ ᠡᠯᠭᠦᠵᠦ ᠴᠡᠷᠢᠭ ᠡᠭᠡᠵᠦ ᠢᠷᠡᠬᠦᠢ ᠳ᠋ᠦ᠍ᠷ ᠵᠠᠮ ᠳ᠋ᠤᠷ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠡᠵᠡᠨ ᠢ᠋ᠶ᠋ᠡᠨ ᠡᠷᠢᠨ ᠢᠷᠡᠬᠦᠢ ᠳ᠋ᠦ᠍ᠷ ᠲᠡᠭᠦᠨ ᠦ᠌ ᠡᠵᠡᠨ ᠦ᠌ ᠲᠣᠯᠣᠭᠠᠢ ᠪᠦᠬᠦᠢ ᠶ᠋ᠢ ᠦᠵᠡᠭᠡᠳ ᠴᠥᠮ ᠠᠶᠤᠵᠤ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠬᠠᠭᠤᠴᠢᠨ ᠬᠦᠷᠢᠶᠡ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠡᠳ ᠦᠵᠡᠪᠡᠰᠦ᠂ ᠬᠦᠷᠢᠶᠡ ᠶ᠋ᠢ ᠮᠥᠨ ᠬᠠᠷᠯᠢᠭᠤᠳ ᠤ᠋ᠨ ᠶᠡᠬᠡ ᠴᠡᠷᠢᠭ ᠡᠵᠡᠯᠡᠵᠦ᠂ ᠬᠠᠰ ᠮᠥᠷᠡᠨ᠂ ᠵᠠᠭ ᠮᠣᠳᠣ ᠬᠣᠶᠠᠭᠤᠯᠠ ᠡᠵᠡᠨ ᠦᠭᠡᠢ ᠣᠯᠠᠨ ᠴᠡᠷᠢᠭ ᠦ᠋ᠳ ᠢ᠋ ᠪᠠᠢᠴᠠᠭᠠᠨ ᠬᠤᠷᠢᠶᠠᠬᠤᠶᠠ ᠭᠡᠨᠡᠳᠲᠡ ᠴᠡᠷᠢᠭ ᠦ᠋ᠨ ᠠᠷᠠᠳ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ᠄ 《ᠮᠠᠨ ᠤ᠋ ᠬᠠᠭᠠᠨ ᠢ᠋ ᠬᠠᠷᠠ ᠬᠢᠭᠦᠯ ᠦ᠋ᠨ ᠭᠠᠯ ᠠᠭᠤᠯᠠᠨ ᠤ᠋ ᠳᠡᠭᠡᠷᠡ ᠪᠧᠲ᠋ᠠ᠋ ᠶ᠋ᠢᠨ ᠵᠢᠨᠦᠩ ᠮᠤᠬᠤᠯᠢ ᠨᠢᠭᠡᠨ ᠰᠢᠲᠠᠮ ᠳ᠋ᠤᠷ ᠵᠠᠨᠴᠢᠨ ᠠᠯᠠᠵᠤ᠂ ᠲᠣᠯᠣᠭᠠᠢ ᠶ᠋ᠢ ᠰᠢᠷᠤᠭ ᠲᠤᠷ ᠰᠢᠷᠠ ᠭᠣᠣᠯ ᠤ᠋ᠨ ᠲᠣᠯᠣᠭᠠᠢ ᠯᠤᠭᠠ ᠬᠠᠮᠲᠤ ᠡᠯᠭᠦᠵᠦᠬᠦᠢ᠂ ᠪᠠᠰᠠ ᠮᠠᠨ ᠤ᠋ ᠪᠤᠲᠠᠷᠬᠠᠰᠠ ᠴᠡᠷᠢᠭ ᠢ᠋ ᠪᠠᠭᠠ ᠬᠠᠭᠠᠰ ᠢ᠋ ᠳᠠᠭᠠᠭᠤᠯᠵᠤ ᠠᠢᠰᠤᠢ᠃ ᠲᠡᠳᠡᠨ ᠦ᠌ ᠤᠯᠤᠰ ᠠ᠋ᠴᠠ ᠪᠠᠰᠠ ᠭᠤᠴᠢᠨ ᠶᠡᠬᠡ ᠵᠠᠩᠵᠤᠨ᠂ ᠠᠷᠪᠠᠨ ᠤᠯᠤᠰ ᠤ᠋ᠨ ᠳᠥᠴᠢᠨ ᠲᠦᠮᠡᠨ ᠴᠡᠷᠢᠭ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠤᠨ ᠬᠦᠷᠴᠦ ᠢᠷᠡᠭᠡᠳ ᠨᠡᠢᠯᠡᠵᠦ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠲᠡᠷᠢᠭᠦᠯᠡᠨ ᠨᠡᠬᠡᠨ ᠠᠯᠠᠵᠤ ᠢᠷᠡᠪᠡ!》 ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠠᠰ ᠮᠥᠷᠡᠨ ᠶᠡᠬᠡᠯᠡ ᠭᠡᠯᠮᠡᠵᠦ᠂ ᠨᠢᠭᠡᠨ ᠵᠡᠷᠭᠡ ᠪᠠᠷᠬᠢᠷᠠᠨ ᠤᠬᠢᠯᠠᠵᠤ ᠰᠢᠲᠦ ᠪᠡᠨ ᠵᠠᠭᠤᠨ ᠵᠠᠭ ᠮᠣᠳᠣ ᠣᠯᠠᠨ ᠯᠤᠭᠠ ᠴᠡᠷᠢᠭ ᠢ᠋ᠶ᠋ᠡᠨ ᠲᠡᠭᠰᠢᠯᠡᠨ᠂ ᠰᠢᠭᠤᠳ ᠡᠰᠡᠷᠭᠦ ᠢᠨᠤ ᠴᠣᠬᠢᠨ ᠢᠷᠡᠵᠦᠬᠦᠢ᠃ ᠡᠨᠡ ᠦᠶᠡ ᠳ᠋ᠦ᠍ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠶᠡᠬᠡᠯᠡ ᠲᠠᠢᠯᠵᠤ ᠬᠠᠷᠠᠬᠠᠨ ᠣᠮᠣᠭᠳᠠᠶᠠ ᠶᠠᠪᠤᠬᠤᠢ ᠳ᠋ᠤᠷ ᠬᠠᠭᠤᠷᠮᠠᠭ ᠲᠠᠢᠽᠦ ᠡᠨᠡ ᠶᠡᠬᠡ ᠵᠢᠭᠰᠠᠭᠠᠯ ᠢ᠋ ᠦᠵᠡᠭᠡᠳ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠡᠵᠡᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣᠵᠤ᠂ ᠡᠳᠦᠭᠡ ᠡᠨᠡ ᠪᠠᠢᠳᠠᠯ ᠳ᠋ᠤᠷ ᠰᠡᠳᠬᠢᠯ ᠬᠥᠳᠡᠯᠵᠦ ᠪᠥᠬᠥᠶᠡ᠂ ᠡᠮᠦᠨᠡ ᠴᠡᠷᠢᠭ ᠵᠣᠭᠰᠣᠬᠤ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠣᠶᠠᠷ ᠵᠠᠩᠵᠤᠨ ᠪᠠᠢᠯᠳᠤᠨ ᠣᠷᠣᠵᠤ ᠢᠷᠡᠪᠡ᠃ ᠡᠭᠦᠨ ᠳ᠋ᠦ᠍ᠷ ᠬᠣᠰᠢᠭᠤᠴᠢ ᠵᠠᠩᠵᠤᠨ ᠨᠠᠷ ᠲᠣᠰᠴᠤ ᠠᠪᠤᠭᠠᠳ ᠲᠤᠯᠵᠤ ᠬᠦᠴᠦᠷᠭᠦ ᠦᠭᠡᠢ ᠳ᠋ᠦ᠍ᠷ ᠨᠠᠷᠠᠨ ᠬᠠᠭᠠᠨ ᠥᠪᠡᠷ ᠦ᠋ᠨ ᠬᠡᠴᠡᠭᠦᠦ ᠪᠡᠨ ᠣᠯᠠᠨ ᠳ᠋ᠤᠷ ᠦᠵᠡᠭᠦᠯᠰᠦᠭᠡᠢ ᠭᠡᠮᠡᠨ ᠴᠣᠬᠢᠨ ᠭᠠᠷᠴᠤ ᠬᠠᠰ ᠮᠥᠷᠡᠨ ᠯᠦ᠋ᠭᠡ ᠪᠠᠢᠯᠳᠤᠵᠤ ᠲᠠᠪᠤᠨ ᠤᠳᠠᠭᠠ ᠪᠣᠯᠤᠭᠰᠠᠨ ᠦᠭᠡᠢ᠂ ᠵᠠᠭ ᠮᠣᠳᠣ ᠠᠷᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠨᠢᠭᠡᠨᠲᠡ ᠵᠢᠳᠠᠯᠠᠵᠤ ᠮᠥᠷᠥ ᠶ᠋ᠢ ᠰᠢᠷᠬᠠᠲᠤᠭᠤᠯᠤᠭᠰᠠᠨ ᠳ᠋ᠤᠷ ᠨᠠᠷᠠᠨ ᠬᠠᠭᠠᠨ ᠶᠡᠬᠡᠯᠡ ᠠᠭᠤᠷᠯᠠᠵᠤ ᠡᠷᠳᠡᠨᠢ ᠶ᠋ᠢᠨ ᠵᠢᠳᠠ ᠪᠠᠷ ᠬᠠᠰ ᠮᠥᠷᠡᠨ ᠦ᠌ ᠨᠢᠭᠤᠷ ᠢ᠋ ᠨᠡᠪᠲᠡ ᠵᠢᠳᠠᠯᠠᠵᠤ ᠤᠨᠠᠭᠠᠭᠰᠠᠨᠠ᠂ ᠵᠠᠭ ᠮᠣᠳᠣ ᠳᠠᠬᠢᠨ ᠨᠢᠭᠡᠨ ᠵᠢᠳᠠᠨ ᠳ᠋ᠤᠷ ᠨᠠᠷᠠᠨ ᠬᠠᠭᠠᠨ ᠤ᠋ ᠰᠢᠯᠢᠨ ᠬᠦᠵᠦᠭᠦᠦ ᠶ᠋ᠢ ᠮᠥᠨ ᠨᠡᠪᠲᠡ ᠵᠢᠳᠠᠯᠠᠨ ᠠᠯᠠᠪᠠ᠃ ᠳᠠᠷᠤᠢ ᠬᠣᠢᠲᠤ ᠵᠢᠭᠰᠠᠭᠠᠯ ᠠ᠋ᠴᠠ ᠠᠷᠪᠠᠨ ᠳᠥᠷᠪᠡᠨ ᠪᠠᠭᠠ ᠵᠠᠩᠵᠤᠨ ᠨᠠᠷ ᠴᠣᠬᠢᠨ ᠣᠷᠣᠵᠤ ᠢᠷᠡᠭᠡᠳ ᠵᠠᠭ ᠮᠣᠳᠣ ᠶ᠋ᠢ ᠲᠥᠭᠥᠷᠢᠭᠯᠡᠨ ᠬᠠᠭᠠᠵᠤ ᠪᠠᠢᠯᠳᠤᠬᠤᠢ ᠳ᠋ᠤᠷ ᠵᠠᠭ ᠮᠣᠳᠣ ᠮᠠᠰᠢ ᠪᠠᠭᠠᠲᠤᠷ ᠲᠤᠷ ᠳᠠᠪ ᠳᠠᠪ ᠪᠠᠷᠢᠭᠳᠠᠬᠤ ᠦᠭᠡᠢ ᠳ᠋ᠦ᠍ᠷ ᠴᠡᠴᠡᠭ ᠶᠠᠭᠠᠷᠠᠨ ᠴᠡᠷᠢᠭ ᠦ᠋ᠨ ᠠᠷᠠᠳ ᠢ᠋ ᠵᠠᠬᠢᠵᠤ ᠵᠡᠯᠡ ᠳᠡᠭᠡᠰᠦᠨ ᠦ᠌ ᠲᠣᠣᠷ ᠢ᠋ ᠲᠠᠯᠪᠢᠭᠤᠯᠤᠨ ᠮᠣᠷᠢ ᠶ᠋ᠢ ᠲᠣᠣᠷᠳᠠᠵᠤ ᠤᠨᠠᠭᠠᠨ ᠵᠠᠭ ᠮᠣᠳᠣ ᠶ᠋ᠢ ᠪᠣᠰᠬᠤ ᠶ᠋ᠢᠨ ᠤᠷᠢᠳᠠ ᠪᠢᠯᠠᠭᠤ ᠰᠢᠲᠠᠮ ᠢ᠋ᠶ᠋ᠠᠷ ᠵᠠᠨᠴᠢᠨ ᠮᠠᠭᠤᠵᠢᠷᠠᠭᠤᠯᠵᠤ ᠠᠮᠢᠳᠤ ᠪᠠᠷᠢᠵᠤ ᠬᠦᠯᠢᠪᠡ᠃ ᠳᠠᠷᠠᠭᠠ ᠪᠠᠷ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠨᠢᠭᠡᠨᠲᠡ ᠡᠵᠡᠨ ᠦᠭᠡᠢ ᠪᠣᠯᠵᠤ ᠬᠦᠷᠢᠶᠡ ᠪᠡᠨ ᠣᠷᠬᠢᠵᠤ ᠪᠤᠷᠤᠭᠤᠯᠠᠭᠰᠠᠨᠠ᠂ ᠮᠤᠬᠤᠯᠢ ᠰᠢᠨᠡ ᠢᠷᠡᠭᠰᠡᠨ ᠠᠷᠪᠠᠨ ᠠᠩᠭᠢ ᠴᠡᠷᠢᠭ ᠲᠦ᠍ᠷ ᠵᠠᠷᠯᠠᠨ ᠬᠠᠷᠯᠢᠭᠤᠳ ᠤ᠋ᠨ ᠴᠡᠷᠢᠭ ᠢ᠋ ᠳᠥᠷᠪᠡᠨ ᠵᠦᠭ ᠨᠡᠬᠡᠭᠦᠯᠵᠦ ᠡᠯᠰᠡᠨ ᠳᠠᠭᠠᠭᠤᠯᠤᠨ᠂ ᠲᠠᠪᠤᠨ ᠡᠳᠦᠷ ᠪᠣᠯᠤᠭᠰᠠᠨ ᠦᠭᠡᠢ ᠲᠠᠪᠢᠭᠠᠳ ᠲᠦᠮᠡᠨ ᠴᠡᠷᠢᠭ ᠢ᠋ ᠡᠯᠰᠡᠨ ᠣᠯᠵᠤ᠂ ᠪᠠᠰᠠ ᠰᠢᠷᠬᠠᠳᠤᠭᠰᠠᠨ ᠢ᠋ ᠠᠨᠤ ᠰᠢᠷᠬᠠ ᠶ᠋ᠢ ᠵᠠᠰᠠᠭᠤᠯᠤᠨ᠂ ᠰᠢᠨᠡ ᠠᠷᠪᠠᠨ ᠠᠩᠭᠢ ᠴᠡᠷᠢᠭ ᠢ᠋ ᠤᠷᠢᠳᠠ ᠢᠯᠡᠭᠡᠵᠦ᠂ ᠬᠠᠷᠯᠢᠭᠤᠳ ᠤ᠋ᠨ ᠭᠠᠵᠠᠷ ᠣᠷᠣᠨ ᠬᠣᠲᠠ ᠪᠠᠯᠭᠠᠳ ᠢ᠋ ᠪᠠᠢᠯᠳᠤᠯ ᠦᠭᠡᠢ ᠪᠡᠷ ᠲᠣᠭᠲᠠᠭᠠᠵᠤ᠂ ᠲᠠᠢᠽᠦ ᠠᠯᠭᠤᠷ ᠬᠣᠢᠨᠠ ᠠ᠋ᠴᠠ ᠡᠴᠢᠬᠦ ᠪᠡᠷ ᠲᠣᠭᠲᠠᠪᠠ᠃ ᠲᠠᠢᠽᠦ ᠨᠠᠷᠠᠨ ᠬᠠᠭᠠᠨ ᠤ᠋ ᠡᠨᠳᠡᠭᠰᠡᠨ ᠳ᠋ᠦ᠍ᠷ ᠶᠡᠬᠡᠯᠡ ᠡᠨᠡᠷᠢᠨ᠂ ᠠᠷᠢᠬᠢ ᠰᠠᠴᠤᠨ ᠵᠠᠭ ᠮᠣᠳᠣ ᠶ᠋ᠢ ᠠᠯᠠᠵᠤ ᠳᠠᠬᠢᠭᠤᠯᠵᠤ᠂ ᠬᠣᠷᠣᠰᠤᠯᠳᠤ ᠰᠦᠨᠡᠰᠦᠨ ᠢ᠋ ᠲᠣᠬᠣᠷᠤᠭᠤᠯᠤᠨ᠂ ᠲᠡᠭᠦᠨ ᠦ᠌ ᠨᠢᠭᠡᠨ ᠬᠥᠪᠡᠭᠦᠨ ᠢ᠋ ᠤᠯᠤᠰ ᠲᠤᠷ ᠡᠭᠡᠭᠦᠯ ᠭᠡᠮᠡᠨ ᠵᠠᠬᠢᠪᠠ᠃
ᠰᠤᠳᠤᠷᠴᠢ ᠲᠤᠰᠢᠮᠡᠯ ᠦ᠋ᠨ ᠰᠤᠯᠠ ᠰᠢᠯᠦᠭ ᠢᠨᠤ᠄
ᠠᠭᠤᠳᠠᠮ ᠲᠠᠢᠽᠦ ᠶ᠋ᠢᠨ ᠥᠴᠢᠬᠦ ᠥᠭᠦᠯᠡᠬᠦ ᠦᠨᠡᠬᠡᠷ ᠮᠠᠰᠢ ᠰᠦᠰᠦᠭᠯᠡᠯᠲᠡᠢ
ᠠᠶᠤᠮᠰᠢᠭᠲᠤ ᠮᠤᠬᠤᠯᠢ ᠶ᠋ᠢᠨ ᠵᠢᠷᠦᠬᠡ ᠰᠥᠰᠥ ᠠᠶᠠ ᠶᠠᠭᠤᠲᠠᠢ ᠲᠦᠭᠰᠢᠯᠲᠡᠢ᠂
ᠠᠷᠰᠯᠠᠨ ᠬᠠᠭᠠᠨ ᠤ᠋ ᠠᠭᠠᠯᠢ ᠵᠠᠩ ᠡᠯᠢᠭᠡ ᠬᠥᠰᠢᠲᠡᠯᠡ ᠢᠨᠢᠶᠡᠯᠲᠡᠢ
ᠠᠷᠤᠤᠬᠠᠨ ᠮᠠᠲᠠᠯᠳᠤ ᠴᠠᠰ ᠠᠭᠤᠯᠠ ᠦᠷᠦ ᠡᠪᠡᠳᠮᠡᠷ ᠬᠥᠭᠡᠷᠦᠬᠦᠢᠯᠡᠯᠲᠡᠢ !