ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ <ᠭᠤᠴᠢᠨ ᠳᠥᠷᠪᠡᠳᠦᠭᠡᠷ ᠪᠦᠯᠦᠭ > Хөх судар - Инжинаш <Гучин дөрөвдүгээр бүлэг >
305ᠪᠣᠭᠳᠠ ᠬᠥᠮᠦᠨ ᠤᠯᠤᠰ ᠪᠠᠢᠭᠤᠯᠬᠤᠢ ᠳ᠋ᠤᠷ ᠲᠥᠷᠥᠭᠰᠡᠨ ᠦᠷᠡ ᠪᠡᠷ ᠭᠠᠪᠢᠶᠠᠲᠤ ᠰᠠᠢᠳ ᠯᠤᠭᠠ ᠤᠷᠤᠭ ᠪᠠᠷᠢᠪᠠ
ᠪᠤᠷᠤᠭᠤ ᠠᠷᠰᠯᠠᠨ ᠣᠮᠣᠭ ᠲᠥᠷᠥᠬᠦᠢ ᠳ᠋ᠦ᠍ᠷ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠢᠶᠡᠨ ᠶᠠᠯᠠ ᠥᠭᠡᠶᠡ ᠦᠰ ᠡᠪᠦᠷᠯᠡᠪᠡ
ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠦ᠋ᠩ ᠬᠠᠭᠠᠨ ᠤ᠋ ᠵᠢᠶᠠ ᠲᠠᠢ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠣᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠤ᠋
ᠲᠠᠢ ᠾᠧ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠣᠨ ᠂ ᠬᠠᠷᠠᠭᠴᠢᠨ ᠭᠠᠬᠠᠢ ᠵᠢᠯ ᠂ ᠲᠠᠢᠽᠦ ᠳᠥᠴᠢᠨ ᠬᠣᠶᠠᠷ ᠰᠡᠭᠦᠳᠡᠷ ᠲᠡᠢ
ᠪᠣᠭᠳᠠ ᠬᠥᠮᠦᠨ ᠤᠯᠤᠰ ᠪᠠᠢᠭᠤᠯᠬᠤᠢ ᠳ᠋ᠤᠷ ᠲᠥᠷᠥᠭᠰᠡᠨ ᠦᠷᠡ ᠪᠡᠷ ᠭᠠᠪᠢᠶᠠᠲᠤ ᠰᠠᠢᠳ ᠯᠤᠭᠠ ᠤᠷᠤᠭ ᠪᠠᠷᠢᠪᠠ
ᠪᠤᠷᠤᠭᠤ ᠠᠷᠰᠯᠠᠨ ᠣᠮᠣᠭ ᠲᠦᠷᠦᠬᠦᠢ ᠳ᠋ᠦ᠍ᠷ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠶᠠᠯᠠ ᠥᠭᠡᠶᠡ ᠦᠰ ᠡᠪᠦᠷᠯᠡᠪᠡ
ᠲᠡᠨᠳᠡᠴᠡ ᠵᠢᠴᠢ ᠥᠷᠯᠥᠭᠡ ᠬᠠᠷᠠᠭᠴᠢᠨ ᠭᠠᠬᠠᠢ ᠵᠢᠯ ᠦ᠋ᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠦ᠌ ᠥᠷᠯᠥᠭᠡ ᠲᠠᠢᠽᠦ ᠦᠬᠡᠷ ᠴᠠᠭ ᠲᠤᠷ ᠳᠡᠭᠡᠭᠰᠢᠯᠡᠵᠦ᠂ ᠯᠤᠤ ᠴᠠᠭ ᠤ᠋ᠨ ᠬᠢᠷᠢ ᠳ᠋ᠦ᠍ᠷ ᠠᠯᠲᠠᠨ ᠤ᠋ ᠮᠠᠯᠠᠭᠠ᠂ ᠬᠠᠰ ᠤ᠋ᠨ ᠪᠦᠰᠡ ᠪᠡᠨ ᠲᠡᠭᠰᠢᠳᠬᠡᠵᠦ ᠲᠡᠭᠷᠢ ᠭᠠᠵᠠᠷ ᠲᠤᠷ ᠮᠥᠷᠭᠥᠨ᠂ ᠤᠷᠢᠳᠤᠰ ᠡᠪᠦᠭᠡᠳ ᠲᠣᠷ ᠶᠣᠰᠣᠯᠠᠨ᠂ ᠥᠵᠢᠨ ᠡᠮᠡᠭᠡ ᠳ᠋ᠦ᠍ᠷ ᠮᠥᠷᠭᠥᠵᠦ ᠰᠠᠢᠨ ᠢᠷᠦᠭᠡᠳᠦ ᠶ᠋ᠢ ᠣᠯᠵᠤ ᠳᠠᠷᠤᠢ ᠭᠠᠳᠠᠭᠠᠳᠤ ᠶᠡᠬᠡ ᠠᠷᠰᠯᠠᠨᠲᠤ ᠲᠠᠭᠲᠤ ᠳ᠋ᠤᠷ ᠭᠠᠷᠴᠤ ᠦᠵᠡᠪᠡᠰᠦ᠂ ᠳᠥᠷᠪᠡᠨ ᠰᠡᠴᠡᠳ ᠪᠠᠭᠠᠲᠤᠳ ᠣᠯᠠᠨ ᠰᠠᠢᠳ ᠲᠦᠰᠢᠮᠡᠳ ᠢᠨᠤ ᠡᠭᠦᠯᠡ ᠮᠡᠲᠦ ᠬᠤᠷᠠᠵᠤ ᠂ ᠳ᠋ᠧᠩ ᠵᠤᠯᠠ ᠭᠡᠷᠡᠯ ᠭᠠᠯ ᠳ᠋ᠤᠷ ᠲᠡᠭᠷᠢ ᠭᠠᠵᠠᠷ ᠭᠡᠢᠵᠦᠬᠦᠢ᠃ ᠬᠦᠵᠢ ᠽᠠᠨᠳᠠᠨ ᠠᠷᠴᠢ ᠳ᠋ᠤᠷ ᠬᠥᠮᠦᠨ ᠦ᠌ ᠴᠢᠷᠠᠢ ᠡᠷᠢᠶᠡᠯᠵᠢᠯᠡᠮᠦᠢ᠂ ᠶᠢᠰᠦᠨ ᠡᠬᠡᠰᠢᠭ ᠬᠤᠭᠤᠷ ᠴᠣᠭᠣᠷ ᠬᠣᠯᠠ ᠣᠢᠷᠠ ᠪᠠᠷ ᠡᠭᠦᠰᠬᠡᠵᠦ ᠵᠠᠭᠤᠨ ᠲᠦᠮᠡᠨ ᠤᠯᠤᠰ ᠠᠯᠪᠠᠲᠤ ᠠᠨᠤ ᠲᠠᠯᠠ ᠭᠠᠵᠠᠷ ᠢ᠋ ᠪᠦᠷᠬᠦᠵᠦᠬᠦᠢ᠃ ᠲᠡᠳᠦᠢ ᠣᠯᠠᠨ ᠲᠦᠰᠢᠮᠡᠳ ᠰᠢᠨᠡ ᠵᠢᠯ ᠦ᠋ᠨ ᠶᠣᠰᠣᠭᠠᠷ ᠮᠥᠷᠭᠥᠵᠦ᠂ ᠬᠦᠯᠦᠭ ᠪᠤᠭᠤᠷᠤᠯ ᠡᠢᠨ ᠪᠡᠯᠭᠡᠯᠡᠷᠦᠨ :
ᠠᠩᠬᠠᠨ ᠤ᠋ ᠣᠨ ᠬᠠᠭᠤᠴᠢᠷᠠᠨ ᠬᠣᠴᠣᠷᠴᠤ ᠡᠴᠢᠭᠡᠳ
ᠠᠰᠢᠭᠲᠤ ᠵᠢᠯ ᠰᠠᠢᠵᠢᠷᠠᠨ ᠬᠦᠷᠴᠦ ᠢᠷᠩᠰᠡᠨᠡ᠂
ᠠᠯᠲᠠᠨ ᠥᠩᠭᠡᠲᠦ ᠳᠡᠭᠷᠢᠯᠢᠭ ᠡᠵᠡᠨ ᠮᠢᠨᠦ ᠠ᠋
ᠠᠭᠤᠯᠠ ᠳᠠᠯᠠᠢ ᠶ᠋ᠢᠨ ᠨᠠᠰᠤᠨ ᠪᠤᠶᠠᠨ ᠨᠡᠮᠡᠭᠳᠡᠵᠦ᠂
ᠠᠰᠢᠳᠠ ᠬᠢᠴᠢᠶᠡᠵᠦ ᠵᠣᠪᠠᠨ ᠬᠤᠷᠢᠶᠠᠮᠵᠢᠯᠠᠭᠰᠠᠨ ᠤᠯᠤᠰ ᠤ᠋ᠨ
ᠠᠬᠤ ᠲᠦᠰᠢᠮᠡᠳ ᠬᠠᠮᠲᠤ ᠪᠠᠷ ᠴᠢᠭᠤᠯᠤᠨ ᠬᠤᠷᠠᠵᠠᠭᠠᠵᠤ᠂
ᠠᠷᠰᠯᠠᠨᠲᠤ ᠲᠠᠭᠲᠤ ᠳ᠋ᠤᠷ ᠡᠵᠡᠨ ᠴᠢᠮᠠ ᠳ᠋ᠤᠷ ᠮᠥᠷᠭᠥᠵᠦ᠂
ᠠᠰᠢᠳᠠ ᠮᠠᠨᠳᠤᠵᠤ ᠮᠢᠩᠭᠠᠨ ᠨᠠᠮᠤᠷ ᠪᠠᠲᠤᠳᠲᠤᠭᠠᠢ !
ᠠᠰᠠᠷᠠᠯ ᠨᠢᠭᠦᠯᠡᠰᠬᠦᠢ ᠪᠡᠷ ᠠᠪᠴᠤ ᠬᠤᠷᠠᠭᠰᠠᠨ ᠤᠯᠤᠰ
ᠠᠯᠢᠪᠠ ᠪᠣᠭᠳᠠ ᠰᠠᠢᠳ ᠲᠦᠰᠢᠮᠡᠳ ᠢ᠋ᠶ᠋ᠡᠷ ᠮᠥᠷᠭᠥᠮᠦᠢ᠃
ᠠᠤᠭᠠ ᠡᠵᠡᠨ ᠮᠢᠨᠦ ᠬᠠᠭᠠᠨ ᠰᠠᠭᠤᠷᠢᠨᠠ ᠰᠠᠭᠤᠪᠠᠰᠤ
ᠠᠯᠤᠰ ᠶᠡᠬᠡ ᠲᠡᠭᠷᠢ ᠭᠠᠵᠠᠷ ᠤ᠋ᠨ ᠰᠠᠨᠠᠭᠠᠨ ᠳ᠋ᠤᠷ ᠨᠡᠢᠴᠡᠭᠡᠳ᠂
ᠠᠯᠲᠠᠨ ᠳᠡᠯᠡᠬᠡᠢ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠪᠦᠭᠦᠳᠡ ᠶ᠋ᠢᠨ ᠬᠦᠰᠡᠯ
ᠠᠯᠪᠠᠲᠤ ᠤᠯᠤᠰ ᠨᠡᠢᠲᠡ ᠪᠦᠭᠦᠳᠡᠭᠡᠷ ᠪᠠᠬᠠᠳᠤᠨ ᠡᠷᠭᠦᠬᠦ ᠢᠨᠤ᠄
ᠠᠩᠬᠠ ᠡᠪᠦᠭᠡᠳ ᠦ᠋ᠨ ᠬᠠᠰ ᠰᠠᠭᠤᠷᠢᠨ ᠳ᠋ᠤᠷ ᠢ᠋ᠶ᠋ᠠᠨ ᠰᠠᠭᠤᠵᠤ ᠬᠠᠢᠷᠠᠯᠠᠭᠠᠳ
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠬᠠᠮᠲᠤ ᠪᠠᠷ ᠠᠮᠤᠭᠤᠯᠤᠨ ᠴᠡᠩᠭᠡᠲᠦᠭᠡᠢ !
ᠭᠡᠮᠡᠨ ᠪᠡᠯᠭᠡᠯᠡᠨ ᠮᠥᠷᠭᠥᠵᠦ ᠪᠠᠷᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠬᠠᠷᠢᠭᠤ ᠠᠷᠢᠬᠢ ᠬᠢᠵᠦ ᠳᠥᠷᠪᠡᠨ ᠳᠡᠭᠦᠦ ᠳᠥᠷᠪᠡᠨ ᠬᠥᠪᠡᠭᠦᠨ ᠳᠥᠷᠪᠡᠨ ᠬᠦᠯᠦᠭ ᠶᠢᠰᠦᠨ ᠡᠩ᠂ ᠣᠯᠠᠨ ᠠᠢᠮᠠᠭ ᠤ᠋ᠨ ᠡᠵᠡᠳ ᠲᠣᠷ ᠬᠠᠷᠢᠭᠤ ᠰᠠᠷᠬᠤᠳ ᠬᠦᠷᠲᠡᠭᠡᠵᠦ᠂ ᠥᠪᠡᠷ ᠢ᠋ᠶ᠋ᠡᠨ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠪᠡᠯᠡᠭᠡᠯᠡᠵᠦ ᠵᠠᠬᠢᠷᠤᠨ᠄
ᠤᠷᠢᠳᠤ ᠵᠢᠯ ᠣᠯᠭᠣᠮᠠ ᠥᠩᠭᠡᠷᠡᠵᠦ ᠡᠴᠢᠭᠡᠳ
ᠤᠴᠢᠷᠲᠤ ᠣᠨ ᠣᠷᠣᠨ ᠬᠦᠷᠴᠦ ᠢᠷᠩᠰᠡᠨᠡ᠂
ᠣᠯᠠᠨ ᠲᠦᠰᠢᠮᠡᠳ ᠤᠷᠲᠤᠳᠠ ᠪᠡᠶᠡᠰᠦᠨ ᠵᠢᠷᠭᠠᠯᠳᠤᠵᠤ
ᠤᠯᠤᠰ ᠲᠥᠷᠥ ᠶ᠋ᠢ ᠬᠠᠮᠲᠤ ᠪᠠᠷ ᠵᠠᠰᠠᠵᠤ ᠠᠮᠤᠭᠤᠯᠪᠠᠢ᠃
ᠤᠷᠢᠳᠤᠰ ᠬᠡᠳᠦᠢ ᠬᠠᠭᠠᠨ ᠰᠠᠭᠤᠭᠰᠠᠨ ᠪᠣᠯᠪᠠᠴᠤ
ᠣᠶᠤᠨ ᠭᠦᠶᠦᠭᠡᠨ ᠪᠢ ᠦᠯᠦ ᠲᠠᠡᠩᠴᠡᠮᠦᠢ᠃
ᠤᠴᠢᠷ ᠦᠭᠡᠢ ᠡᠷᠬᠢᠮ ᠨᠡᠷᠡ ᠶ᠋ᠢ ᠡᠷᠭᠦᠬᠦ ᠡᠴᠡ
ᠤᠷᠲᠤᠳᠠ ᠪᠦᠭᠦᠳᠡᠭᠡᠷ ᠡᠩᠬᠡ ᠠᠮᠤᠭᠤᠯᠠᠩ ᠢ᠋ ᠡᠷᠢᠰᠦᠭᠡᠢ ᠬᠡᠮᠡᠪᠡ᠃
ᠲᠡᠳᠦᠢ ᠵᠠᠭᠤᠨ ᠲᠦᠰᠢᠮᠡᠳ ᠳᠠᠬᠢᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ᠂ ᠶᠡᠬᠡ ᠬᠤᠷᠢᠮ ᠳ᠋ᠤᠷ ᠬᠦᠷᠲᠡᠵᠦ᠂ ᠨᠠᠷᠠᠨ ᠮᠠᠨᠳᠤᠵᠤ ᠬᠥᠭᠵᠢᠮ ᠡᠭᠦᠰᠬᠡᠨ ᠲᠠᠢᠽᠦ ᠣᠷᠳᠣᠨ ᠳ᠋ᠤᠷ ᠪᠠᠭᠤᠪᠠ᠃ ᠣᠯᠠᠨ ᠲᠦᠰᠢᠮᠡᠳ ᠲᠠᠷᠬᠠᠯᠴᠠᠵᠤ ᠭᠡᠷ ᠭᠡᠷ ᠲᠡᠭᠡᠨ ᠶᠣᠰᠣᠯᠠᠯᠴᠠᠷᠠ ᠡᠴᠢᠪᠡ᠃ ᠲᠠᠢᠽᠦ ᠳᠣᠲᠣᠷᠠ ᠣᠷᠣᠵᠤ ᠡᠴᠢᠲᠡᠯᠡ ᠵᠦᠰᠦᠨ ᠬᠠᠲᠤᠨ ᠳᠣᠲᠣᠭᠠᠳᠤ ᠣᠷᠳᠣᠨ ᠤ᠋ ᠣᠯᠠᠨ ᠢ᠋ ᠠᠪᠴᠤ ᠲᠠᠢᠽᠦ ᠯᠤᠭᠠ ᠬᠠᠷᠢᠯᠴᠠᠨ ᠭᠬᠢᠪ ᠰᠣᠯᠢᠯᠴᠠᠵᠤ ᠮᠡᠬᠦᠰᠬᠢᠨ ᠶᠣᠰᠣᠯᠠᠭᠠᠳ ᠡᠰᠡᠷᠭᠦᠯᠡᠨ ᠰᠠᠭᠤᠪᠠ᠃ ᠵᠡᠭᠦᠨ ᠪᠠᠷᠠᠭᠤᠨ ᠲᠥᠷᠥ ᠶ᠋ᠢᠨ ᠬᠠᠲᠤᠨ ᠨᠠᠷ ᠰᠢᠨᠡ ᠵᠢᠯ ᠦ᠋ᠨ ᠶᠣᠰᠣᠨ ᠢ᠋ᠶ᠋ᠠᠷ ᠮᠥᠷᠭᠥᠵᠦ ᠶᠣᠰᠣᠯᠠᠪᠠ᠃
ᠲᠡᠳᠦᠢ ᠳᠣᠲᠣᠷᠠ ᠣᠷᠳᠣᠨ ᠤ᠋ ᠦᠵᠢᠨ ᠡᠮᠡᠭᠡ ᠶ᠋ᠢᠨ ᠴᠠᠪ ᠢ᠋ ᠡᠷᠭᠦᠵᠦ᠂ ᠲᠠᠢᠽᠦ ᠬᠠᠲᠤᠨ ᠬᠣᠶᠠᠭᠤᠯᠠ ᠶᠡᠬᠡ ᠬᠤᠷᠢᠮ ᠳ᠋ᠤᠷ ᠰᠠᠭᠤᠵᠤ ᠳᠥᠷᠪᠡᠨ ᠬᠥᠪᠡᠭᠦᠨ ᠠᠷᠢᠬᠢ ᠪᠠᠷᠢᠪᠠ᠃ ᠰᠡᠴᠡᠨ ᠰᠡᠴᠢᠭᠯᠢᠭ ᠠᠪᠠᠬᠠᠢ ᠶ᠋ᠢ ᠥᠬᠢᠨ ᠬᠥᠮᠦᠨ ᠬᠡᠮᠡᠵᠦ ᠬᠠᠮᠲᠤ ᠰᠠᠭᠤᠪᠠ᠃ ᠣᠯᠠᠨ ᠲᠦᠰᠢᠮᠡᠳ ᠥᠵᠢᠨ ᠡᠮᠡᠭᠡ᠂ ᠵᠦᠰᠦᠨ ᠬᠠᠲᠤᠨ ᠨᠠᠷ ᠲᠤᠷ ᠮᠥᠷᠭᠥᠵᠦ᠂ ᠲᠡᠳᠡᠭᠡᠷ ᠲᠥᠷᠥ ᠶ᠋ᠢᠨ ᠬᠠᠲᠤᠳ ᠪᠠᠭᠠ ᠡᠵᠡᠳ ᠲᠣᠷ ᠶᠣᠰᠣᠯᠠᠭᠰᠠᠨ ᠤ᠋ ᠬᠣᠢᠨᠠ᠂ ᠲᠠᠢᠽᠦ ᠶᠡᠬᠡ ᠬᠤᠷᠢᠮ ᠬᠠᠢᠷᠠᠯᠠᠪᠠ᠃ ᠬᠣᠢᠲᠤ ᠭᠠᠵᠠᠷ ᠨᠡᠢᠭᠡᠮ ᠡᠩᠬᠡ ᠪᠣᠯᠤᠭᠰᠠᠨ ᠳ᠋ᠤᠷ ᠪᠧᠲ᠋ᠠ᠋ ᠤᠯᠤᠰ ᠠᠮᠤᠷ ᠵᠢᠷᠭᠠᠯ ᠲᠠᠢ ᠲᠤᠯᠠ ᠡᠨᠡ ᠵᠢᠯ ᠦ᠋ᠨ ᠬᠥᠷ ᠨᠠᠢᠷ ᠪᠠᠶᠠᠷ ᠴᠡᠩᠭᠡᠯ ᠢ᠋ᠶ᠋ᠡᠷ ᠪᠢᠯᠬᠠᠷᠠᠵᠤ᠂ ᠱᠠᠭᠠ ᠴᠣᠬᠢᠵᠤ᠂ ᠳᠠᠪᠠᠭ ᠢᠰᠬᠦᠯᠵᠦ᠂ ᠨᠡᠩ ᠶᠡᠬᠡ ᠲᠥᠷᠥ ᠳ᠋ᠦᠷ ᠮᠠᠭᠰᠢᠯᠭᠠ ᠮᠠᠭᠰᠢᠬᠤ᠂ ᠪᠥᠬᠡ ᠪᠠᠷᠢᠯᠳᠤᠬᠤ᠂ ᠮᠣᠷᠢ ᠣᠷᠣᠯᠳᠣᠬᠤ ᠵᠡᠷᠭᠡ ᠪᠡᠷ ᠣᠯᠠᠨ ᠲᠦᠰᠢᠮᠡᠳ ᠢ᠋ ᠬᠤᠷᠢᠮᠯᠠᠨ ᠴᠠᠭᠠᠨ ᠰᠠᠷᠠ ᠶ᠋ᠢ ᠲᠡᠭᠦᠰᠬᠡᠵᠦ᠂ ᠵᠢᠴᠢ ᠨᠠᠷᠠᠨ ᠬᠠᠭᠠᠨ ᠤ᠋ ᠬᠣᠶᠠᠷ ᠠᠪᠠᠬᠠᠢ ᠶ᠋ᠢ ᠪᠤᠭᠤᠷᠤᠯ ᠤ᠋ᠨ ᠬᠥᠪᠡᠭᠦᠨ ᠳ᠋ᠦ᠍ᠷ ᠪᠠᠭᠤᠯᠭᠠᠨ ᠠᠪᠴᠤ ᠪᠤᠭᠤᠷᠵᠢ ᠶ᠋ᠢᠨ ᠶᠡᠬᠡ ᠥᠬᠢᠨ ᠢ᠋ ᠨᠠᠷᠠᠨ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠳ᠋ᠦ᠍ᠷ ᠪᠡᠯᠡᠭ ᠲᠠᠯᠪᠢᠵᠤ ᠲᠣᠭᠲᠠᠭᠠᠳ ᠨᠠᠷᠠᠨ ᠬᠠᠭᠠᠨ ᠢ᠋ ᠰᠠᠢᠬᠠᠨ ᠡᠮᠡ ᠰᠠᠢᠬᠠᠨ ᠬᠦᠷᠢ ᠬᠣᠶᠠᠭᠤᠯᠠ ᠶ᠋ᠢ ᠭᠡᠷ ᠦ᠋ᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ ᠬᠠᠷᠠ ᠬᠢᠭᠦᠯ ᠦ᠋ᠨ ᠬᠠᠷᠠᠭᠤᠯ ᠳ᠋ᠤᠷ ᠲᠠᠪᠢᠨ ᠡᠷᠦᠬᠡ ᠭᠡᠷ ᠥᠭᠴᠦ ᠢᠯᠡᠭᠡᠬᠦᠢ ᠳ᠋ᠦ᠍ᠷ ᠨᠠᠷᠠᠨ ᠬᠠᠭᠠᠨ ᠠᠮᠢ ᠭᠡᠯᠳᠦᠷᠢᠭᠰᠡᠨ ᠬᠡᠰᠢᠭ ᠢ᠋ ᠡᠭᠦᠷᠢᠳᠡ ᠰᠢᠲᠦᠨ ᠳᠠᠷᠤᠢ ᠲᠣᠬᠢᠶᠠᠯᠲᠤ ᠭᠠᠵᠠᠷ ᠬᠠᠷᠠ ᠬᠢᠭᠦᠯ ᠦ᠋ᠨ ᠳᠠᠪᠠᠭᠠᠨ ᠤ᠋ ᠰᠡᠷᠭᠡᠢᠯᠡᠯ ᠳ᠋ᠦ᠍ᠷ ᠡᠴᠢᠪᠡ᠃
ᠲᠡᠳᠦᠢ ᠬᠡᠷᠡᠢᠳ ᠦ᠋ᠨ ᠾᠧ ᠸᠠᠩ ᠤ᠋ᠨ ᠡᠮᠡ ᠨᠠᠷᠠᠨ ᠲᠤᠶᠠᠭᠠ ᠬᠡᠳᠦᠢ ᠥᠬᠢᠨ ᠢ᠋ᠶ᠋ᠡᠨ ᠥᠭᠭᠦᠭᠰᠡᠨ ᠪᠣᠯᠪᠠᠴᠤ ᠬᠥᠪᠡᠭᠦᠨ ᠳ᠋ᠡᠭᠡᠨ ᠪᠡᠷᠢ ᠠᠪᠤᠭᠰᠠᠨ ᠲᠤᠯᠠ ᠮᠥᠨ ᠮᠠᠰᠢ ᠪᠠᠶᠠᠷᠲᠠᠢ᠃ ᠡᠨᠡ ᠨᠠᠢ᠍ᠮᠠᠨ ᠤ᠋ ᠠᠯᠲᠠᠨᠱᠠᠭᠠ ᠶ᠋ᠢᠨ ᠬᠡᠦᠬᠡᠨ ᠳᠡᠭᠦᠦ ᠬᠠᠰ ᠲᠤᠶᠠᠭᠠ ᠶ᠋ᠢᠨ ᠲᠥᠷᠥᠭᠰᠡᠨ ᠢᠨᠤ ᠬᠡᠲᠦᠷᠬᠡᠢ ᠠᠷᠢᠭᠤᠨ ᠴᠡᠪᠡᠷ ᠬᠡᠭᠡᠨᠴᠢᠷ ᠦᠵᠡᠰᠬᠦᠯᠡᠩ ᠪᠥᠭᠡᠳ ᠰᠡᠴᠡᠨ ᠰᠡᠷᠭᠦᠯᠡᠩ ᠨᠠᠮ ᠳᠥᠯᠭᠡᠨ᠂ ᠪᠢᠴᠢᠬᠠᠨ ᠨᠠᠰᠤᠨ ᠤ᠋ ᠨᠥᠬᠥᠷ ᠡᠮᠡ ᠬᠡᠲᠦᠷᠬᠡᠶᠡ ᠠᠮᠠᠷᠠᠭ ᠵᠢᠴᠢ ᠠᠯᠲᠠᠨᠱᠠᠭᠠ᠂ ᠰᠣᠯᠤᠩᠭᠤᠸᠠ ᠨᠥᠬᠥᠷ ᠡᠮᠡ ᠬᠣᠶᠠᠭᠤᠯᠠ ᠶᠡᠬᠡ ᠵᠣᠪᠠᠯᠠᠩ ᠤ᠋ᠨ ᠬᠣᠢᠨᠠ ᠶᠡᠬᠡ ᠠᠪᠤᠷᠠᠯ ᠢ᠋ᠶ᠋ᠠᠷ ᠠᠮᠢᠨ ᠬᠡᠯᠲᠦᠷᠢᠭᠰᠡᠨ ᠢ᠋ᠶ᠋ᠡᠷ ᠦᠯᠦ ᠪᠠᠷᠠᠨ᠂ ᠤᠯᠤᠰ ᠢ᠋ᠶ᠋ᠠᠨ ᠣᠯᠵᠤ ᠪᠠᠰᠠ ᠨᠥᠬᠥᠷ ᠡᠮᠡ ᠯᠦ᠋ᠭᠡ ᠪᠡᠷ ᠤᠴᠠᠷᠠᠯᠳᠤᠭᠰᠠᠨ ᠢ᠋ ᠶᠠᠭᠤᠨ ᠥᠭᠦᠯᠡᠬᠦ ? ᠲᠡᠳᠦᠢ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠥᠬᠢᠳ ᠬᠦᠷᠭᠡᠳ ᠬᠠᠮᠲᠤ ᠪᠠᠷ ᠪᠠᠯᠭᠤ ᠬᠣᠷᠣᠭᠠᠨᠠ ᠢᠷᠡᠵᠦ᠂ ᠲᠠᠢᠽᠦ ᠳ᠋ᠦ᠍ᠷ ᠰᠢᠨᠡ ᠵᠢᠯ ᠦ᠋ᠨ ᠶᠣᠰᠣᠭᠠᠷ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠪᠠᠰᠠ ᠬᠣᠶᠠᠷ ᠬᠣᠣᠰ ᠬᠥᠮᠦᠨ ᠢᠷᠡᠪᠡ᠃ ᠦᠵᠡᠪᠡᠰᠦ᠂ ᠪᠦᠬᠦ ᠪᠡᠯᠭᠦᠳᠡᠢ ᠶ᠋ᠢᠨ ᠰᠢᠯ ᠬᠠᠲᠤᠨ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠶ᠋ᠢᠨ ᠡᠮᠡ ᠬᠣᠩᠭᠣᠷ ᠵᠤᠯᠠ ᠴᠥᠮ ᠢ᠋ᠶ᠋ᠡᠷ ᠵᠦᠰᠦᠨ ᠬᠠᠲᠤᠨ ᠳ᠋ᠤᠷ ᠵᠣᠯᠭᠠᠨ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠵᠦᠰᠦᠨ ᠬᠠᠲᠤᠨ ᠳᠥᠷᠪᠡᠨ ᠰᠠᠢᠬᠠᠨ ᠬᠠᠲᠤᠳ ᠢ᠋ ᠦᠵᠡᠭᠡᠳ ᠨᠢᠳᠦ ᠰᠢᠨᠡᠷᠬᠡᠵᠦ ᠰᠡᠳᠬᠢᠯ ᠪᠠᠶᠠᠰᠤᠭᠠᠳ ᠴᠥᠮ ᠳᠡᠷᠭᠡᠳᠡ ᠪᠡᠨ ᠬᠤᠷᠢᠮ ᠬᠠᠢᠷᠠᠯᠠᠵᠤ ᠬᠡᠰᠢᠭ ᠬᠦᠷᠲᠡᠭᠡᠬᠦᠶᠡ᠂ ᠳᠠᠭᠠᠯᠳᠤᠭᠠ ᠪᠠᠰᠠ ᠲᠠᠪᠤᠨ ᠰᠠᠢᠬᠠᠨ ᠪᠡᠷᠢᠶᠡᠳ ᠮᠥᠷᠭᠥᠷᠡ ᠢᠷᠡᠪᠡ᠃ ᠦᠵᠡᠪᠡᠰᠦ ᠄ ᠨᠢᠭᠡᠨ ᠢᠨᠤ ᠪᠤᠭᠤᠷᠤᠯ ᠤ᠋ᠨ ᠪᠡᠷᠢ ᠲᠣᠭᠮᠤᠭ ᠤ᠋ᠨ ᠮᠡᠬᠡᠲᠦ ᠬᠠᠭᠠᠨ ᠤ᠋ ᠶᠡᠬᠡ ᠥᠬᠢᠨ ᠢᠬᠡᠷ᠂ ᠨᠢᠭᠡᠨ ᠢᠨᠤ ᠡᠭᠦᠯᠡᠨ ᠴᠡᠷᠪᠢ ᠶ᠋ᠢᠨ ᠪᠡᠷᠢ ᠮᠡᠬᠡᠲᠦ ᠬᠠᠭᠠᠨ ᠤ᠋ ᠬᠣᠶᠠᠳᠤᠭᠠᠷ ᠥᠬᠢᠨ᠂ ᠨᠢᠭᠡᠨ ᠢᠨᠤ ᠬᠦᠯᠦᠭ ᠪᠤᠭᠤᠷᠤᠯ ᠤ᠋ᠨ ᠬᠣᠶᠠᠷ ᠪᠡᠷᠢ᠂ ᠭᠣᠷᠯᠣᠰ ᠤ᠋ᠨ ᠨᠠᠷᠠᠨ ᠬᠠᠭᠠᠨ ᠤ᠋ ᠬᠣᠶᠠᠷ ᠥᠬᠢᠨ ᠯᠢᠩᠬᠤᠠ᠂ ᠮᠠᠨᠳᠠᠷᠠᠸᠠ᠂ ᠬᠦᠯᠦᠭ ᠴᠢᠯᠠᠭᠤᠨ ᠤ᠋ ᠶᠡᠬᠡ ᠪᠡᠷᠢ ᠰᠠᠷᠯᠠᠭ ᠤ᠋ᠨ ᠵᠠᠯᠢᠲᠤ ᠬᠠᠭᠠᠨ ᠤ᠋ ᠭᠠᠭᠴᠠ ᠥᠬᠢᠨ ᠰᠤᠪᠤᠳᠯᠢᠭ᠂ ᠡᠨᠡ ᠶᠢᠰᠦᠨ ᠬᠥᠮᠦᠨ ᠢ᠋ ᠬᠠᠮᠲᠤ ᠴᠢᠭᠤᠯᠤᠭᠰᠠᠨ ᠳ᠋ᠤᠷ ᠵᠦᠰᠦᠨ ᠬᠠᠲᠤᠨ ᠤ᠋ ᠨᠢᠳᠦᠨ ᠭᠡᠢᠵᠦ ᠪᠡᠶᠡᠰᠦᠨ ᠥᠭᠦᠯᠡᠷᠦᠨ ᠄《 ᠡᠨᠡ ᠶᠢᠰᠦᠨ ᠰᠡᠴᠡᠨ ᠦᠵᠡᠰᠬᠦᠯᠡᠩ ᠴᠥᠮ ᠮᠠᠨ ᠤ᠋ ᠬᠣᠢᠲᠤ ᠭᠠᠵᠠᠷ ᠲᠥᠷᠥᠭᠰᠡᠨ ᠪᠥᠭᠡᠳ ᠡᠮᠦᠨᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠨᠡᠷᠡᠲᠦ ᠦᠵᠡᠰᠬᠦᠯᠡᠩ ᠭᠡᠮᠡᠨ ᠡᠭᠦᠨ ᠡᠴᠡ ᠡᠰᠡ ᠬᠡᠲᠦᠷᠡᠪᠡ᠂ ᠡᠨᠡ ᠮᠥᠨ ᠨᠠᠮᠠᠶ᠋ᠢ ᠳᠠᠭᠠᠵᠤ ᠲᠥᠷᠥᠭᠰᠡᠨ ᠪᠣᠯᠠᠢ᠃ ᠮᠢᠨᠦ ᠡᠨᠡ ᠶᠢᠰᠦᠨ ᠰᠡᠴᠡᠨ ᠦᠵᠡᠰᠬᠦᠯᠡᠩ ᠡᠬᠡᠨᠡᠷ ᠰᠠᠢᠳ !》 ᠭᠡᠮᠡᠨ ᠬᠣᠱᠣᠩ ᠦᠭᠡ ᠥᠭᠦᠯᠡᠭᠰᠡᠨ ᠳ᠋ᠦ᠍ᠷ ᠶᠢᠰᠦᠭᠦᠯᠡ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠮᠥᠷᠭᠥᠪᠡ᠃ ᠲᠡᠳᠦᠢ ᠡᠭᠦᠨ ᠡᠴᠡ ᠰᠡᠳᠦᠪ ᠪᠣᠯᠵᠤ ᠪᠤᠰᠤᠳ ᠤ᠋ᠨ ᠪᠡᠷᠢᠶᠡᠳ ᠢ᠋ ᠦᠵᠡᠭᠰᠡᠭᠡᠷ ᠥᠪᠡᠷ ᠦ᠋ᠨ ᠪᠡᠷᠢ ᠰᠢᠯᠭᠠᠬᠤ ᠶ᠋ᠢ ᠰᠠᠨᠠᠭᠠᠯᠵᠠᠵᠤ᠂ ᠲᠠᠢᠽᠦ ᠳ᠋ᠦ᠍ᠷ ᠮᠡᠳᠡᠭᠦᠯᠵᠦ᠂ ᠲᠣᠷᠭᠠᠨ ᠰᠢᠷᠠ ᠳᠥᠷᠪᠡᠨ ᠬᠦᠯᠦᠭ᠂ ᠵᠢᠷᠭᠤᠭᠠᠨ ᠰᠠᠢᠳ ᠶᠢᠰᠦᠨ ᠡᠩ ᠦ᠋ᠨ ᠥᠬᠢᠳ ᠬᠡᠦᠬᠡᠳ ᠡᠴᠡ ᠪᠡᠷᠢ ᠰᠢᠯᠭᠠᠵᠤ᠂ ᠬᠦᠷᠭᠡᠨ ᠰᠣᠩᠭᠣᠮᠤᠢ ᠭᠡᠮᠡᠨ ᠵᠠᠷᠯᠠᠭᠰᠠᠨ ᠳ᠋ᠤᠷ ᠳᠥᠷᠪᠡᠨ ᠬᠦᠯᠦᠭ᠂ ᠣᠯᠠᠨ ᠲᠦᠰᠢᠮᠡᠳ ᠶᠡᠬᠡᠯᠡ ᠪᠠᠶᠠᠷᠯᠠᠨ᠂ ᠲᠡᠳᠦᠢ ᠭᠣᠷᠯᠣᠰ ᠤ᠋ᠨ ᠨᠠᠷᠠᠨ ᠰᠠᠢᠳ ᠶᠠᠯᠠ ᠦᠬᠦᠯ ᠡᠴᠡ ᠪᠡᠨ ᠭᠡᠲᠦᠯᠦᠭᠡᠳ ᠥᠪᠡᠷ ᠦ᠋ᠨ ᠤᠯᠤᠰ ᠠ᠋ᠴᠠ ᠪᠠᠨ ᠭᠡᠷ ᠦ᠋ᠨ ᠪᠦᠬᠦᠨ ᠢ᠋ᠶ᠋ᠡᠨ ᠠᠪᠴᠢᠷᠠᠵᠤ ᠥᠨᠥ ᠭᠠᠵᠠᠷᠠ ᠰᠠᠭᠤᠵᠤ ᠪᠠᠢᠲᠠᠯᠠ ᠨᠠᠷᠠᠨ ᠬᠠᠭᠠᠨ ᠡᠨᠡ ᠰᠠᠢᠬᠠᠨ ᠬᠦᠷᠢ ᠬᠠᠲᠤᠨ ᠢ᠋ᠶ᠋ᠠᠨ ᠠᠩᠬᠠ ᠪᠧᠲ᠋ᠠ᠋ ᠤᠯᠤᠰ ᠯᠤᠭᠠ ᠪᠠᠢᠯᠳᠤᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ᠷ ᠨᠠᠢ᠍ᠮᠠᠨ ᠤ᠋ ᠠᠯᠲᠠᠨᠱᠠᠭᠠ ᠯᠤᠭᠠ ᠨᠡᠢᠯᠡᠪᠡ ᠭᠡᠮᠡᠨ ᠰᠣᠨᠣᠰᠤᠭᠠᠳ ᠭᠡᠨᠡᠳᠲᠡ ᠶᠡᠬᠡᠯᠡ ᠠᠭᠤᠷ ᠲᠥᠷᠥᠵᠦ ᠰᠠᠢᠬᠠᠨ ᠬᠦᠷᠢ ᠶ᠋ᠢ ᠵᠢᠷᠤᠮ ᠦᠭᠡᠢ ᠬᠤᠶᠠᠯᠢ ᠪᠤᠵᠠᠷ ᠪᠣᠭᠣᠯ ᠭᠡᠮᠡᠨ ᠵᠠᠨᠴᠢᠵᠤ ᠠᠯᠠᠬᠤᠶᠠ ᠵᠠᠪᠳᠤᠬᠤᠢ ᠳ᠋ᠤᠷ ᠰᠠᠢᠬᠠᠨ ᠬᠦᠷᠢ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠮᠠᠰᠢ ᠰᠠᠢᠨ ᠲᠤᠯᠠ ᠶᠠᠭᠠᠷᠠᠨ ᠬᠣᠭᠣᠰᠣᠨ ᠭᠠᠷ ᠢ᠋ᠶ᠋ᠠᠷ ᠲᠡᠭᠦᠨ ᠦ᠌ ᠢᠯᠳᠦ ᠶ᠋ᠢ ᠵᠠᠢᠯᠠᠭᠤᠯᠵᠤ ᠳᠤᠲᠠᠭᠠᠨ ᠨᠢᠭᠡᠨ ᠠᠢᠷᠠᠭ ᠤ᠋ᠨ ᠪᠦᠯᠢᠭᠦᠷ ᠢ᠋ ᠣᠯᠵᠤ ᠢᠯᠳᠦᠨ ᠢ᠋ ᠳᠤᠰᠤᠭᠰᠠᠭᠠᠷ᠂ ᠠᠭᠲᠠ ᠶ᠋ᠢᠨ ᠬᠦᠷᠢᠶᠡ ᠳ᠋ᠦ᠍ᠷ ᠢᠷᠡᠵᠦ ᠵᠠᠢᠳᠠᠩ ᠮᠣᠷᠢᠨ ᠤ᠋ ᠳᠡᠯ ᠢ᠋ ᠰᠢᠭᠦᠷᠡᠨ ᠠᠳᠬᠤᠵᠤ ᠤᠨᠤᠨ ᠳᠣᠪᠲᠣᠯᠵᠤ ᠭᠠᠷᠤᠭᠠᠳ ᠳᠣᠲᠣᠷᠠ ᠪᠤᠬᠢᠨᠢᠳᠤᠵᠤ ᠰᠡᠳᠬᠢᠷᠦᠨ᠄《ᠪᠢ ᠦᠨᠡᠨ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠶ᠋ᠢ ᠬᠠᠭᠠᠭᠰᠠᠨ ᠪᠣᠢ ᠶᠠ᠂ ᠮᠠᠭᠤ ᠦᠭᠡᠢ ᠪᠥᠭᠡᠳ ᠲᠡᠭᠦᠨ ᠯᠦ᠋ᠭᠡ ᠬᠠᠮᠲᠤ ᠪᠠᠷᠢᠭᠳᠠᠵᠤ ᠬᠣᠷᠢᠭᠳᠠᠭᠰᠠᠨ ᠵᠣᠪᠠᠯᠠᠩ ᠢ᠋ ᠬᠠᠲᠠᠭᠤᠵᠢᠨ ᠠᠲᠠᠯᠠ ᠲᠡᠷᠡ ᠬᠠᠷᠢᠨ ᠡᠳᠦᠭᠡ ᠵᠢᠷᠭᠠᠯ ᠢ᠋ ᠣᠯᠤᠭᠠᠳ ᠥᠪᠡᠷᠡ ᠡᠮᠡᠰ ᠲᠣᠷ ᠢ᠋ᠶ᠋ᠠᠨ ᠤᠴᠠᠷᠠᠭᠠᠳ ᠨᠠᠮᠠᠶ᠋ᠢ ᠠᠰᠠᠭᠤᠯ ᠦᠭᠡᠢ ᠬᠢᠯᠢᠰ ᠠᠯᠠᠰᠤᠭᠠᠢ ᠬᠡᠮᠡᠬᠦ ᠢᠨᠤ ᠦᠨᠡᠬᠡᠷ ᠬᠣᠷᠣᠰᠤᠯᠲᠠᠢ᠂ ᠨᠢᠭᠡᠨᠲᠡ ᠡᠢᠮᠦ ᠪᠣᠯᠤᠭᠰᠠᠨ ᠲᠤᠯᠠ ᠪᠢ ᠳᠠᠬᠢᠨ ᠡᠴᠢᠵᠦ ᠴᠢᠮᠠ ᠯᠤᠭᠠ ᠬᠠᠷᠠᠬᠠᠨ ᠨᠢᠭᠡᠨ ᠨᠠᠰᠤᠨ ᠳ᠋ᠤᠷ ᠬᠠᠮᠲᠤ ᠠᠮᠢᠳᠤᠷᠠᠬᠤᠢ ᠳ᠋ᠤᠷ ᠲᠦᠭᠰᠢᠯᠲᠡᠢ᠃ ᠳᠠᠷᠤᠢ ᠡᠨᠡ ᠮᠠᠭᠤ ᠨᠡᠷᠡ ᠲᠡᠢ ᠪᠣᠯᠤᠭᠰᠠᠨ ᠲᠠᠰᠢᠷᠠᠮ ᠳ᠋ᠤᠷ ᠡᠨᠡ ᠨᠡᠷᠡ ᠶ᠋ᠢ ᠭᠦᠢᠴᠡᠳᠬᠡᠰᠦᠭᠡᠢ ᠭᠡᠮᠡᠨ ᠨᠠᠢ᠍ᠮᠠᠨ ᠤ᠋ ᠠᠯᠲᠠᠨᠱᠠᠭᠠ ᠳ᠋ᠤᠷ ᠭᠠᠷᠬᠤ ᠶ᠋ᠢ ᠬᠦᠷᠬᠦ ᠦᠭᠡᠢ᠂ ᠭᠠᠭᠴᠠ ᠲᠡᠷᠡ ᠥᠨᠥᠬᠡᠨ ᠾᠧ ᠸᠠᠩ ᠤ᠋ᠨ ᠥᠬᠢᠨ ᠰᠣᠯᠤᠩᠭᠤᠸᠠ ᠶ᠋ᠢ ᠠᠪᠤᠭᠰᠠᠨ ᠲᠤᠯᠠ ᠨᠠᠮᠠᠶ᠋ᠢ ᠶᠠᠭᠤᠨᠠᠢ ᠠᠪᠬᠤ ᠠᠵᠢ !》 ᠭᠡᠮᠡᠨ ᠪᠣᠳᠣᠭᠰᠠᠭᠠᠷ᠂ ᠭᠡᠨᠡᠳᠲᠡ ᠨᠢᠭᠡᠨ ᠠᠷᠭᠠ ᠣᠯᠵᠤ ᠳᠠᠷᠤᠢ ᠳᠣᠪᠲᠣᠯᠤᠨ ᠪᠠᠯᠭᠤ ᠬᠣᠷᠣᠭᠠᠨᠠ ᠢᠷᠡᠵᠦ ᠪᠤᠭᠤᠷᠤᠯ ᠤ᠋ᠨ ᠭᠡᠷ ᠲᠦ᠍ ᠣᠷᠣᠵᠤ᠂ ᠪᠤᠭᠤᠷᠤᠯ ᠤ᠋ᠨ ᠬᠣᠶᠠᠷ ᠬᠥᠪᠡᠭᠦᠨ ᠪᠤᠳᠣᠯᠠᠩ᠂ ᠤᠬᠠᠭᠠᠨᠲᠤ ᠳ᠋ᠤᠷ ᠤᠴᠠᠷᠠᠵᠤ ᠲᠡᠭᠦᠨ ᠦ᠌ ᠡᠷᠡ ᠶ᠋ᠢᠨ ᠤᠴᠢᠷ ᠢ᠋ᠶ᠋ᠠᠨ ᠬᠡᠯᠡᠵᠦ᠂ ᠪᠠᠰᠠ ᠮᠡᠬᠡᠯᠡᠨ ᠥᠭᠦᠯᠡᠷᠦᠨ᠄ 《 ᠨᠢᠳᠤᠨᠤᠨ ᠦᠨᠡᠭᠡᠨ ᠮᠥᠷᠡᠨ ᠦ᠌ ᠪᠠᠢᠯᠳᠤᠭᠠᠨ ᠳ᠋ᠤᠷ ᠪᠢ ᠬᠡᠷᠡᠢᠳ ᠦ᠋ᠨ ᠰᠣᠯᠣᠩᠭᠤᠸᠠ ᠳ᠋ᠤᠷ ᠥᠴᠦᠬᠡᠨ ᠠᠴᠢ ᠪᠣᠢ ᠲᠤᠯᠠᠳᠠ ᠡᠳᠦᠭᠡ ᠲᠡᠭᠦᠨ ᠢ᠋ ᠡᠷᠢᠨ ᠡᠴᠢᠵᠦ ᠲᠡᠭᠦᠨ ᠢ᠋ᠶ᠋ᠡᠷ ᠡᠵᠡᠨ ᠳ᠋ᠦ᠍ᠷ ᠮᠡᠳᠡᠭᠦᠯᠵᠦ ᠡᠷᠡ ᠳ᠋ᠦ᠍ᠷ ᠢᠨᠤ ᠡᠴᠢᠰᠦᠭᠡᠢ ᠬᠡᠮᠡᠮᠦᠢ᠂ ᠪᠤᠰᠤ ᠪᠣᠯᠪᠠᠰᠤ ᠲᠡᠷᠡ ᠯᠠᠪ ᠨᠠᠮᠠᠶ᠋ᠢ ᠡᠷᠲᠡ ᠣᠷᠣᠢ ᠬᠢᠯᠢᠰ ᠢ᠋ᠶ᠋ᠡᠷ ᠠᠯᠠᠮᠤᠢ᠃ 》ᠭᠡᠮᠡᠨ ᠲᠡᠷᠭᠡ ᠮᠣᠷᠢ ᠭᠤᠶᠤᠭᠰᠠᠨ ᠳ᠋ᠤᠷ ᠲᠡᠷᠡ ᠬᠣᠶᠠᠷ ᠤᠷᠤᠭ ᠤ᠋ᠨ ᠨᠠᠢᠷ ᠢ᠋ ᠦᠵᠡᠵᠦ ᠳᠡᠪᠡᠯ ᠬᠤᠪᠴᠠᠰᠤ ᠲᠡᠷᠭᠡ ᠮᠣᠷᠢ ᠬᠥᠮᠦᠨ ᠲᠡᠢ ᠥᠭᠴᠦ ᠢᠯᠡᠭᠡᠪᠡ᠃ ᠲᠡᠳᠦᠢ ᠰᠠᠢᠬᠠᠨ ᠬᠦᠷᠢ ᠨᠠᠢ᠍ᠮᠠᠨ ᠳ᠋ᠤᠷ ᠬᠦᠷᠴᠦ ᠪᠠᠭᠤᠳᠠᠯ ᠪᠠᠭᠤᠭᠠᠳ ᠰᠣᠯᠤᠩᠭᠤᠸᠠ ᠶ᠋ᠢᠨ ᠭᠠᠳᠠᠭᠰᠢ ᠭᠠᠷᠬᠤ ᠶ᠋ᠢ ᠬᠦᠯᠢᠶᠡᠵᠦ ᠵᠣᠯᠭᠠᠭᠠᠳ ᠵᠠᠮ ᠤ᠋ᠨ ᠬᠠᠵᠠᠭᠤᠳᠠ ᠰᠥᠭᠥᠳᠴᠦ ᠳᠠᠭᠤᠨ ᠦᠭᠡᠢ ᠤᠬᠢᠯᠠᠭᠰᠠᠨ ᠳ᠋ᠤᠷ ᠰᠣᠯᠣᠩᠭᠤᠸᠠ ᠯᠠᠪ ᠭᠦᠨ ᠤᠴᠢᠷ ᠪᠦᠬᠦᠢ ᠶ᠋ᠢ ᠮᠡᠳᠡᠭᠡᠳ ᠳᠠᠭᠠᠭᠰᠠᠨ ᠠᠷᠠᠳ ᠢ᠋ ᠵᠠᠢᠯᠠᠭᠤᠯᠵᠤ ᠤᠴᠢᠷ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤᠷ ᠰᠠᠢᠬᠠᠨ ᠬᠦᠷᠢ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠡᠴᠡ ᠡᠭᠡᠵᠦ ᠡᠨᠳᠡ ᠬᠦᠷᠲᠡᠯᠡ ᠨᠠᠷᠢᠪᠴᠢᠯᠠᠨ ᠲᠣᠭᠠᠴᠢᠵᠤ ᠮᠥᠷᠭᠥᠵᠦ ᠥᠭᠦᠯᠡᠷᠦᠨ᠄《 ᠵᠢᠷᠤᠮ ᠦᠭᠡᠢ ᠡᠷᠡ ᠵᠣᠪᠠᠯᠠᠩ ᠢ᠋ ᠬᠠᠮᠲᠤᠳᠬᠠᠭᠰᠠᠨ ᠨᠠᠮᠠᠶ᠋ᠢ ᠡᠨᠡ ᠮᠡᠲᠦ ᠠᠯᠠᠬᠤ ᠲᠤᠯᠠ ᠨᠠᠳᠠ ᠳ᠋ᠤᠷ ᠨᠢᠭᠡᠨᠲᠡ ᠠᠮᠢᠳᠤᠷᠠᠬᠤ ᠵᠠᠮ ᠦᠭᠡᠢ ᠪᠣᠯᠵᠤ ᠡᠭᠡᠴᠢ ᠴᠢᠮᠠᠶ᠋ᠢ ᠡᠷᠢᠵᠦ ᠢᠷᠡᠪᠡ᠃ ᠡᠬᠡᠨᠡᠷ ᠨᠠᠮᠠᠶ᠋ᠢ ᠠᠮᠢ ᠭᠠᠷᠬᠤ ᠭᠠᠵᠠᠷ ᠲᠠᠢ ᠪᠣᠯᠭᠠᠵᠤ᠂ ᠠᠷᠤ ᠬᠣᠷᠮᠣᠢ ᠳ᠋ᠠᠭᠠᠨ ᠰᠢᠷᠭᠤᠭᠤᠯᠤᠨ ᠠᠪᠤᠷᠠᠨ ᠬᠤᠷᠢᠶᠠᠮᠵᠢᠯᠠᠵᠤ ᠡᠷᠭᠢᠨ ᠡᠭᠡᠴᠢ ᠮᠥᠨ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠪᠦᠷᠢᠳᠦᠭᠰᠡᠨ ᠲᠤᠯᠠ ᠥᠴᠦᠬᠡᠨ ᠡᠬᠡᠨᠡᠷ ᠦ᠋ᠨ ᠪᠠᠬᠠᠨ ᠰᠤᠷᠤᠭᠰᠠᠨ ᠢᠯᠳᠦ ᠵᠢᠳᠠᠨ ᠢ᠋ ᠬᠡᠷᠡᠭᠯᠡᠨ ᠡᠮᠦᠨᠡ ᠬᠣᠢᠨᠠ ᠪᠠᠨ ᠵᠠᠷᠤᠴᠠᠯᠠᠵᠤ ᠳᠥᠷᠥᠭᠡ ᠳᠠᠷᠤᠭᠤᠯᠤᠨ ᠲᠠᠰᠢᠭᠤᠷ ᠡᠷᠭᠦᠭᠦᠯᠦᠮᠦ ! 》ᠭᠡᠮᠡᠨ ᠠᠰᠠᠭᠠᠨᠠᠲᠠᠯᠠ ᠣᠬᠢᠯᠠᠬᠤᠢ ᠳ᠋ᠤᠷ ᠰᠣᠯᠣᠩᠭᠤᠸᠠ ᠬᠡᠮᠡᠭᠴᠢ ᠮᠠᠰᠢ ᠨᠢᠭᠡᠨ ᠰᠡᠴᠡᠨ ᠰᠡᠷᠭᠦᠯᠡᠩ ᠠᠭᠤᠳᠠᠮ ᠪᠠᠭᠲᠠᠭᠠᠮᠵᠢ ᠲᠠᠢ ᠡᠬᠡᠨᠡᠷ ᠦ᠋ᠨ ᠳᠣᠲᠣᠷᠠᠬᠢ ᠡᠷᠡ ᠲᠤᠯᠠ ᠠᠯᠲᠠᠨᠱᠠᠭᠠ ᠶ᠋ᠢᠨ ᠲᠡᠭᠦᠨ ᠢ᠋ ᠬᠡᠲᠦᠷᠬᠡᠢ ᠬᠠᠢᠷᠠᠯᠠᠨ ᠰᠠᠨᠠᠬᠤ ᠶ᠋ᠢ ᠬᠠᠷᠢᠭᠤᠯᠠᠬᠤ ᠭᠠᠵᠠᠷ ᠦᠭᠡᠢ᠂ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠭᠤᠴᠢᠨ ᠨᠠᠰᠤᠨ ᠰᠢᠬᠠᠭᠰᠠᠨ ᠲᠤᠯᠠ ᠡᠷᠡ ᠳ᠋ᠡᠭᠡᠨ ᠣᠨᠴᠠ ᠨᠢᠭᠡᠨ ᠦᠶᠡ ᠡᠴᠡ ᠲᠠᠰᠤᠷᠬᠠᠢ ᠪᠢᠴᠢᠬᠠᠨ ᠡᠮᠡ ᠠᠪᠴᠤ ᠥᠭᠭᠦᠨ ᠠᠯᠲᠠᠨᠱᠠᠭᠠ ᠶ᠋ᠢᠨ ᠲᠤᠢᠯ ᠤ᠋ᠨ ᠰᠠᠨᠠᠭᠠᠨ ᠢ᠋ ᠭᠦᠢᠴᠡᠭᠡᠨ ᠪᠠᠰᠠ ᠣᠯᠠᠨ ᠳ᠋ᠤᠷ ᠨᠡᠷᠡ ᠭᠠᠷᠰᠤᠭᠠᠢ ᠭᠡᠮᠡᠨ ᠰᠠᠨᠠᠪᠠᠰᠤ ᠡᠷᠢᠵᠦ ᠣᠯᠬᠤ ᠦᠭᠡᠢ ᠪᠦᠬᠦᠢ ᠳ᠋ᠦ᠍ᠷ ᠡᠨᠡ ᠡᠳᠦᠷ ᠡᠢᠮᠦ ᠨᠢᠭᠡᠨ ᠬᠡᠷᠡᠭ ᠲᠣᠬᠢᠶᠠᠯᠳᠤᠵᠤ ᠡᠨᠡ ᠰᠠᠢᠬᠠᠨ ᠬᠦᠷᠢ ᠪᠠᠰᠠ ᠴᠤ᠌ ᠬᠡᠲᠦᠷᠬᠡᠢ ᠭᠤᠸᠠ ᠦᠵᠡᠰᠬᠦᠯᠡᠩ ᠬᠡᠭᠡᠨᠴᠢᠷ ᠪᠥᠭᠡᠳ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠲᠡᠢ ᠨᠠᠰᠤ ᠪᠠᠰᠠ ᠰᠠᠢ ᠠᠷᠪᠠᠨ ᠨᠠᠢ᠍ᠮᠠ ᠬᠦᠷᠦᠭᠰᠡᠨ ᠲᠤᠯᠠ ᠳᠠᠷᠤᠢ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠶᠠᠭᠠᠷᠠᠨ ᠭᠠᠷ ᠠ᠋ᠴᠠ ᠠᠨᠤ ᠪᠠᠷᠢᠵᠤ ᠲᠡᠳᠬᠦᠨ ᠪᠣᠰᠬᠠᠵᠤ᠂ ᠳᠤᠷᠠᠲᠠᠶᠠ ᠪᠠᠶᠠᠷᠯᠠᠨ ᠬᠦᠯᠢᠶᠡᠨ ᠠᠪᠴᠤ ᠣᠷᠳᠣᠨ ᠳ᠋ᠠᠭᠠᠨ ᠠᠪᠤᠨ ᠣᠷᠣᠵᠤ ᠭᠡᠷ ᠲᠦ᠍ᠷ ᠰᠠᠭᠤᠵᠤ᠂ ᠮᠥᠨ ᠰᠥᠨᠢ ᠠᠯᠲᠠᠨᠱᠠᠭᠠ ᠯᠤᠭᠠ ᠡᠪᠦᠳᠦᠭ ᠲᠤᠯᠭᠠᠯᠴᠠᠨ ᠰᠠᠭᠤᠵᠤ᠂ ᠠᠷᠢᠬᠢ ᠤᠤᠭᠤᠨ ᠴᠡᠩᠭᠡᠯᠳᠦᠬᠦ ᠵᠠᠪᠰᠠᠷ ᠲᠤᠷ ᠡᠨᠡ ᠰᠠᠢᠬᠠᠨ ᠬᠦᠷᠢ ᠶ᠋ᠢᠨ ᠬᠡᠷᠡᠭ ᠢ᠋ ᠡᠬᠢᠨ ᠡᠴᠡ ᠠᠳᠠᠭ ᠲᠤᠷ ᠬᠦᠷᠲᠡᠯᠡ ᠬᠡᠯᠡᠵᠦ᠂ ᠥᠪᠡᠷ ᠦ᠋ᠨ ᠦᠨᠡᠨ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠪᠠᠰᠠ ᠨᠢᠭᠤᠯ ᠦᠭᠡᠢ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠰᠣᠯᠤᠩᠭᠤᠸᠠ ᠶ᠋ᠢᠨ ᠭᠠᠷ ᠢ᠋ ᠪᠠᠷᠢᠵᠤ ᠥᠭᠦᠯᠡᠷᠦᠨ᠄《 ᠡᠷᠬᠢᠮ ᠬᠥᠮᠦᠨ ᠴᠢᠨᠦ ᠬᠣᠯᠠ ᠪᠣᠳᠣᠯᠭᠠ ᠬᠡᠳᠦᠢ ᠨᠡᠢᠴᠡᠬᠦ ᠮᠡᠲᠦ ᠪᠣᠯᠪᠠᠴᠤ ᠡᠭᠦᠨ ᠦ᠌ ᠳᠣᠲᠣᠷᠠ ᠪᠠᠰᠠ ᠶᠣᠰᠣᠨ ᠳ᠋ᠤᠷ ᠬᠠᠷᠰᠢᠬᠤ ᠭᠤᠷᠪᠠᠨ ᠵᠦᠢᠯ ᠪᠣᠢ᠄ ᠲᠡᠷᠢᠭᠦᠨ ᠳ᠋ᠦ᠍ᠷ ᠠᠪᠤᠭᠰᠠᠨ ᠡᠮᠡ ᠴᠢ ᠬᠠᠲᠠᠭᠤ ᠵᠣᠷᠢᠭ ᠢ᠋ᠶ᠋ᠠᠷ ᠨᠠᠮᠠᠶ᠋ᠢ ᠡᠳᠦᠢ ᠬᠦᠷᠲᠡᠯᠡ ᠰᠠᠬᠢᠨ ᠪᠥᠭᠡᠲᠡᠯᠡ ᠪᠢ ᠡᠳᠦᠭᠡ ᠴᠢᠨᠦ ᠳᠣᠣᠷᠠ ᠳᠠᠪᠬᠤᠷ ᠠᠪᠬᠤ ᠠᠨᠤ ᠵᠢᠷᠤᠮᠲᠤ ᠡᠷᠡ ᠶ᠋ᠢᠨ ᠳᠦᠷᠢᠮ ᠪᠤᠰᠤ᠃ ᠬᠣᠶᠠᠷ ᠲᠤᠷ ᠪᠢ ᠡᠳᠦᠭᠡ ᠨᠢᠭᠡᠨᠲᠡ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠳᠠᠭᠠᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠠᠭᠠᠵᠠ ᠬᠠᠤᠯᠢ ᠪᠠᠷ ᠶᠠᠪᠤᠬᠤ ᠪᠥᠭᠡᠳ ᠬᠥᠮᠦᠨ ᠦ᠌ ᠡᠮᠡ ᠶ᠋ᠢ ᠵᠣᠷᠢᠭ ᠢ᠋ᠶ᠋ᠠᠷ ᠠᠪᠴᠤ ᠪᠣᠯᠤᠮᠤᠢ ᠤᠤ? ᠬᠡᠷᠪᠡ ᠲᠡᠭᠦᠨ ᠦ᠌ ᠤᠭ ᠡᠷᠡ ᠢᠨᠤ ᠵᠠᠭᠠᠯᠲᠤᠪᠠᠰᠤ ᠪᠢ ᠶᠣᠰᠣ ᠠᠯᠳᠠᠵᠤ ᠨᠢᠭᠤᠷ ᠪᠠᠷᠠᠬᠤᠢ ᠳ᠋ᠤᠷ ᠬᠥᠷᠥᠮᠦᠢ᠃ ᠭᠤᠷᠪᠠᠨ ᠳ᠋ᠤᠷ ᠲᠡᠷᠡ ᠡᠬᠡᠨᠡᠷ ᠨᠡᠩᠳᠡ ᠤᠷᠢᠳᠤ ᠶ᠋ᠢᠨ ᠠᠪᠠᠯᠢ ᠶ᠋ᠢᠨ ᠡᠷᠡ ᠪᠡᠨ ᠲᠡᠪᠴᠢᠭᠰᠡᠨ ᠬᠥᠮᠦᠨ ᠲᠤᠯᠠ ᠬᠣᠵᠢᠮ ᠤ᠋ᠨ ᠡᠷᠡ ᠶ᠋ᠢ ᠲᠡᠪᠴᠢᠬᠦ ᠢᠨᠤ ᠨᠡᠩ ᠬᠢᠯᠪᠠᠷ᠂ ᠶᠠᠮᠪᠠᠷ ᠤᠷᠮᠠ ᠪᠠᠷ ᠲᠡᠭᠦᠨ ᠢ᠋ ᠰᠤᠯᠠ ᠲᠠᠲᠠᠪᠤᠷᠢ ᠭᠡᠮᠡᠨ ᠠᠪᠴᠤ ᠶᠠᠪᠤᠬᠤ ᠪᠣᠢ? ᠡᠢᠮᠦ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠦᠯᠦ ᠪᠣᠯᠬᠤ ᠬᠡᠷᠡᠭ ᠠᠬᠤ ᠪᠥᠭᠡᠲᠡᠯᠡ ᠡᠷᠭᠢᠨ ᠬᠠᠲᠤᠨ ᠴᠢ ᠭᠠᠭᠴᠠ ᠥᠪᠡᠷ ᠦ᠋ᠨ ᠡᠷᠳᠡᠮ ᠢ᠋ᠶ᠋ᠡᠨ ᠢᠯᠡᠷᠡᠭᠦᠯᠬᠦᠢ ᠶ᠋ᠢᠨ ᠲᠤᠯᠠ ᠨᠠᠮᠠᠶ᠋ᠢ ᠭᠤᠷᠪᠠᠨ ᠪᠤᠰᠤᠴᠢᠷ ᠢ᠋ ᠣᠯᠭᠣᠯᠤᠮᠤᠢ ᠤᠤ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄《 ᠡᠷᠭᠢᠨ ᠨᠥᠬᠥᠷ ᠴᠢ ᠮᠢᠨᠦ ᠮᠡᠳᠡᠭᠦᠯᠬᠦ ᠶ᠋ᠢ ᠰᠣᠨᠣᠰ᠂ ᠨᠠᠳᠠ ᠳ᠋ᠤᠷ ᠪᠠᠰᠠ ᠭᠤᠷᠪᠠᠨ ᠶᠠᠪᠤᠳᠠᠯ ᠪᠣᠢ᠄ ᠲᠡᠷᠢᠭᠦᠨ ᠳ᠋ᠦ᠍ᠷ ᠪᠢ ᠴᠢᠮᠠᠶ᠋ᠢ ᠰᠠᠬᠢᠪᠠ ᠬᠡᠮᠡᠬᠦᠢ ᠳ᠋ᠦ᠍ᠷ ᠴᠢ ᠪᠠᠰᠠ ᠨᠠᠮᠠᠶ᠋ᠢ ᠬᠦᠯᠢᠶᠡᠵᠦᠬᠦᠢ᠂ ᠡᠬᠡᠨᠡᠷ ᠡᠷᠡ ᠶ᠋ᠢ ᠰᠠᠬᠢᠬᠤ ᠠᠨᠤ ᠲᠣᠭᠲᠠᠭᠰᠠᠨ ᠬᠡᠷᠡᠭ᠂ ᠡᠷᠡ ᠡᠬᠡᠨᠡᠷ ᠢ᠋ ᠬᠦᠯᠢᠶᠡᠬᠦ ᠢᠨᠤ ᠴᠥᠭᠡᠨ ᠪᠣᠯᠠᠢ᠃ ᠲᠡᠢᠨ ᠬᠦ᠌ ᠲᠡᠷᠢᠭᠦᠨ ᠳ᠋ᠦ᠍ᠷ ᠪᠢ ᠴᠢᠨᠦ ᠨᠠᠮᠠᠶ᠋ᠢ ᠰᠠᠬᠢᠭᠰᠠᠨ ᠨᠡᠷᠡ ᠳ᠋ᠦ᠍ᠷ ᠨᠢᠭᠡᠨ ᠬᠡᠭᠡᠨᠴᠢᠷ ᠡᠬᠡᠨᠡᠷ ᠢ᠋ ᠠᠪᠴᠤ ᠥᠭᠭᠦᠭᠡᠳ ᠴᠢᠨᠦ ᠴᠢᠩ ᠦᠨᠡᠨ ᠢ᠋ᠶ᠋ᠡᠷ ᠨᠠᠮᠠᠶ᠋ᠢ ᠰᠠᠬᠢᠭᠰᠠᠨ ᠢ᠋ ᠬᠠᠷᠢᠭᠤᠯᠠᠰᠤᠭᠠᠢ᠃ ᠬᠣᠶᠠᠷ ᠲᠤᠷ ᠪᠠᠰᠠ ᠲᠠᠬᠢᠪᠠᠰᠤ ᠴᠢᠨᠦ ᠰᠡᠳᠬᠢᠯ ᠨᠡᠩ ᠬᠦᠨᠳᠦᠳᠴᠦ ᠴᠢᠨᠦ ᠪᠡᠶᠡ ᠶ᠋ᠢᠨ ᠠᠮᠠᠷᠠᠭ ᠢ᠋ᠶ᠋ᠠᠨ ᠨᠡᠭᠦᠯᠭᠡᠰᠦᠭᠡᠢ ᠬᠡᠮᠡᠮᠦᠢ᠃ ᠭᠤᠷᠪᠠᠨ ᠳ᠋ᠤᠷ ᠭᠠᠳᠠᠨᠠ ᠪᠠᠰᠠ ᠮᠢᠨᠦ ᠠᠭᠤᠳᠠᠮ ᠢ᠋ᠶ᠋ᠠᠨ ᠢᠯᠡᠷᠡᠭᠦᠯᠦᠨ ᠡᠷᠳᠡᠮ ᠢ᠋ᠶ᠋ᠡᠨ ᠦᠵᠡᠭᠦᠯᠵᠦ᠂ ᠰᠠᠢᠨ ᠨᠡᠷᠡ ᠰᠡᠴᠡᠨ ᠴᠣᠯᠠ ᠪᠠᠨ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠮᠡᠳᠡᠭᠳᠡᠰᠦᠭᠡᠢ ᠬᠡᠮᠡᠭᠰᠡᠨ ᠪᠥᠯᠥᠭᠡ᠃ ᠨᠡᠩ ᠪᠠᠰᠠ ᠪᠢ ᠦᠵᠡᠪᠡᠰᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠡᠮᠦᠨᠡ ᠭᠠᠵᠠᠷ ᠢ᠋ ᠬᠤᠷᠢᠶᠠᠬᠤ ᠠᠨᠤ ᠯᠠᠪ ᠲᠤᠯᠠ ᠲᠡᠭᠦᠨ ᠳ᠋ᠦ᠍ᠷ ᠪᠢ ᠪᠠᠰᠠ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠢ᠋ ᠭᠠᠷᠭᠠᠵᠤ ᠭᠠᠪᠢᠶᠠ ᠪᠠᠢᠭᠤᠯᠰᠤᠭᠠᠢ ᠬᠡᠮᠡᠮᠦᠢ᠃ ᠡᠨᠡ ᠢᠨᠤ ᠨᠥᠬᠥᠷ ᠨᠠᠳᠠ ᠳ᠋ᠤᠷ ᠡᠢᠮᠦ ᠲᠤᠰᠠ ᠪᠣᠯᠬᠤ ᠭᠤᠷᠪᠠᠨ ᠵᠦᠢᠯ ᠪᠣᠢ ᠪᠥᠭᠡᠲᠡᠯᠡ ᠠᠮᠠᠷᠠᠭ ᠨᠥᠬᠥᠷ ᠶᠠᠭᠤᠨ ᠳ᠋ᠤᠷ ᠮᠢᠨᠦ ᠦᠭᠡ ᠶ᠋ᠢ ᠦᠯᠦ ᠠᠪᠤᠮᠤᠢ ? ᠵᠢᠴᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠠᠤᠯᠢ ᠴᠠᠭᠠᠵᠠᠨ ᠤ᠋ ᠬᠡᠷᠡᠭ – ᠨᠢᠭᠡᠨ ᠥᠴᠦᠬᠡᠨ ᠶᠠᠪᠤᠳᠠᠯ᠂ ᠲᠡᠭᠦᠨ ᠦ᠌ ᠤᠭ ᠡᠷᠡ ᠡᠰᠡ ᠵᠠᠭᠠᠯᠳᠤᠬᠤ ᠴᠤ᠌ ᠪᠠᠢᠲᠤᠭᠠᠢ ᠬᠡᠳᠦᠢ ᠵᠠᠭᠠᠯᠳᠤᠪᠠᠴᠤ ᠬᠡᠯᠡᠬᠦ ᠭᠠᠵᠠᠷ ᠮᠠᠰᠢ ᠠᠷᠪᠢᠨ ᠪᠣᠢ !》ᠭᠡᠮᠡᠨ ᠠᠯᠲᠠᠨᠱᠠᠭᠠ ᠶ᠋ᠢ ᠱᠠᠭᠠᠷᠳᠠᠪᠠᠴᠤ ᠠᠯᠲᠠᠨᠱᠠᠭᠠ ᠡᠭᠡᠨᠡᠭᠲᠡ ᠪᠣᠯᠬᠤ ᠦᠭᠡᠢ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠭᠡᠨᠡᠳᠲᠡ ᠨᠢᠭᠡᠨ ᠠᠷᠭᠠ ᠣᠯᠵᠤ ᠳᠠᠷᠤᠢ ᠲᠡᠭᠦᠨ ᠦ᠌ ᠰᠠᠨᠠᠭᠠᠨ ᠢ᠋ ᠳᠠᠭᠠᠭᠤᠯᠤᠨ ᠡᠷᠬᠡᠪᠰᠢ ᠠᠪᠴᠤ ᠥᠭᠭᠦᠮᠥᠢ ᠬᠡᠮᠡᠬᠦ ᠪᠡᠨ ᠪᠠᠢᠭᠠᠳ ᠲᠡᠭᠦᠨ ᠦ᠌ ᠲᠠᠪᠠ ᠶ᠋ᠢ ᠳᠠᠭᠠᠭᠤᠯᠤᠨ ᠄《 ᠡᠨᠡ ᠴᠥᠮ ᠥᠷᠥᠰᠢᠶᠡᠯᠳᠦ ᠨᠥᠬᠥᠷ ᠴᠢᠨᠦ ᠬᠡᠲᠦᠷᠬᠡᠢ ᠨᠠᠮᠠᠶ᠋ᠢ ᠬᠠᠢᠷᠠᠯᠠᠬᠤ ᠬᠠᠷᠠᠭᠠ᠂ ᠪᠢ ᠴᠢᠮᠠᠶ᠋ᠢ ᠬᠡᠲᠦᠷᠬᠡᠶᠡ ᠮᠣᠰᠬᠢᠬᠤ ᠦᠭᠡᠢ !》ᠭᠡᠮᠡᠨ ᠳᠠᠷᠤᠢ ᠲᠠᠰᠢᠷᠠᠮ ᠳ᠋ᠤᠷ ᠨᠡᠢᠯᠡᠭᠦᠯᠦᠨ ᠠᠯᠲᠠᠨᠱᠠᠭᠠ ᠯᠤᠭᠠ ᠡᠷᠬᠡᠯᠡᠨ ᠨᠠᠭᠠᠳᠴᠤ ᠡᠪᠦᠷ ᠲᠣᠷ ᠰᠠᠭᠤᠵᠤ ᠬᠤᠨᠳᠠᠭᠠ ᠶ᠋ᠢ ᠪᠠᠷᠢᠨ ᠤᠤᠭᠤᠯᠭᠠᠭᠰᠠᠭᠠᠷ ᠶᠡᠬᠡᠳᠡ ᠰᠣᠭᠲᠣᠭᠠᠵᠤ ᠳᠠᠷᠤᠢ ᠬᠠᠮᠲᠤ ᠬᠥᠰᠢᠭᠡ ᠳ᠋ᠦ᠍ᠷ ᠣᠷᠣᠵᠤ ᠬᠤᠪᠴᠠᠰᠤ ᠲᠠᠢᠯᠤᠨ ᠳᠡᠷᠡ ᠳᠡᠪᠢᠰᠬᠡᠷ ᠲᠣᠷ ᠣᠷᠣᠵᠤ ᠨᠥᠬᠥᠷ ᠡᠮᠡ ᠬᠠᠷᠢᠯᠴᠠᠨ ᠲᠡᠪᠡᠷᠢᠯᠴᠡᠨ ᠨᠢᠭᠡᠨ ᠵᠡᠷᠭᠡ ᠶᠡᠬᠡᠯᠡ ᠴᠠᠷᠭᠢᠯᠲᠤᠨ ᠨᠠᠭᠠᠳᠴᠤ ᠤᠮᠳᠠᠪᠠ᠃ ᠰᠣᠯᠤᠩᠭᠤᠸᠠ ᠰᠠᠨᠠᠭᠠᠨ ᠪᠠᠢᠬᠤ ᠬᠥᠮᠦᠨ ᠲᠤᠯᠠ ᠠᠯᠲᠠᠨᠱᠠᠭᠠ ᠶ᠋ᠢ ᠤᠮᠳᠠᠭᠤᠯᠤᠨ ᠳᠠᠷᠤᠢ ᠰᠡᠮᠡᠬᠡᠷ ᠪᠣᠰᠴᠤ ᠬᠤᠪᠴᠠᠯᠠᠭᠠᠳ ᠬᠥᠰᠢᠭᠡ ᠡᠴᠡ ᠪᠡᠨ ᠭᠠᠷᠴᠤ ᠢᠷᠡᠨ ᠵᠤᠯᠠ ᠶ᠋ᠢᠨ ᠳᠣᠣᠷᠠ ᠦᠰᠦ ᠵᠢᠰᠦ ᠪᠡᠨ ᠪᠠᠬᠠᠨ ᠵᠠᠰᠠᠭᠠᠳ ᠳᠠᠷᠤᠢ ᠪᠠᠭᠠ ᠥᠬᠢᠳ ᠢ᠋ ᠢᠯᠡᠭᠡᠵᠦ ᠰᠠᠢᠬᠠᠨ ᠬᠦᠷᠢ ᠶ᠋ᠢ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠪᠠᠭᠠ ᠥᠬᠢᠳ ᠢ᠋ ᠵᠠᠢᠯᠠᠭᠤᠯᠤᠨ ᠥᠪᠡᠷ ᠦ᠋ᠨ ᠰᠠᠨᠠᠭᠠᠨ ᠪᠠ ᠵᠢᠴᠢ ᠠᠯᠲᠠᠨᠱᠠᠭᠠ ᠶ᠋ᠢᠨ ᠰᠠᠨᠠᠭᠠᠨ ᠤ᠋ ᠦᠭᠡᠰ ᠢ᠋ ᠡᠬᠢᠨ ᠡᠴᠡ ᠠᠳᠠᠭ ᠲᠤᠷ ᠲᠤᠯᠲᠠᠯᠠ ᠪᠦᠷᠢᠨ ᠬᠡᠯᠡᠵᠦ ᠥᠭᠦᠯᠡᠷᠦᠨ ᠄《ᠥᠬᠢᠨ ᠳᠡᠭᠦᠦ ᠴᠢ ᠨᠠᠮᠠᠶ᠋ᠢ ᠨᠢᠭᠡᠨᠲᠡ ᠦᠵᠡᠵᠦ ᠲᠠᠨᠢᠭᠰᠠᠨ ᠲᠤᠯᠠ ᠨᠠᠳᠠ ᠠ᠋ᠴᠠ ᠪᠢᠲᠡᠭᠡᠢ ᠢᠴᠢᠩᠭᠦᠷᠡ᠂ ᠪᠢ ᠴᠢᠮᠠ ᠳ᠋ᠤᠷ ᠨᠢᠭᠡᠨ ᠰᠠᠢᠨ ᠠᠷᠭᠠ ᠪᠡᠯᠡᠳᠪᠡᠢ᠃ 》ᠭᠡᠮᠡᠨ ᠴᠢᠬᠢᠨ ᠳ᠋ᠦ᠍ᠷ ᠡᠢᠮᠦ ᠲᠡᠢᠮᠦ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠰᠠᠢᠬᠠᠨ ᠬᠦᠷᠢ ᠨᠢᠭᠡᠨᠲᠡ ᠠᠷᠭᠠ ᠦᠭᠡᠢ ᠴᠢᠷᠠᠢ ᠤᠯᠠᠢᠨ᠂ ᠰᠣᠯᠤᠩᠭᠤᠸᠠ ᠶ᠋ᠢᠨ ᠣᠷᠣᠨ ᠳ᠋ᠤᠷ ᠣᠷᠣᠵᠤ ᠠᠯᠲᠠᠨᠱᠠᠭᠠ ᠶ᠋ᠢᠨ ᠪᠡᠶᠡ ᠶ᠋ᠢ ᠨᠢᠭᠡᠨᠲᠡ ᠲᠡᠪᠡᠷᠢᠵᠦ ᠦᠵᠡᠬᠦᠯᠡ ᠲᠡᠭᠦᠨ ᠦ᠌ ᠪᠡᠶᠡ ᠨᠠᠷᠠᠨ ᠬᠠᠭᠠᠨ ᠠ᠋ᠴᠠ ᠮᠠᠰᠢ ᠥᠪᠡᠷᠡ᠂ ᠬᠠᠰ ᠲᠤᠷ ᠦᠯᠢᠳᠬᠡᠪᠡᠰᠦ ᠬᠠᠰ ᠠ᠋ᠴᠠ ᠨᠡᠮᠡᠭᠦᠨ᠂ ᠣ ᠳ᠋ᠤᠷ ᠦᠯᠢᠳᠬᠡᠪᠡᠰᠦ ᠣ ᠠ᠋ᠴᠠ ᠠᠮᠢᠳᠤᠯᠢᠭ᠂ ᠬᠠᠷᠠᠬᠠᠨ ᠴᠡᠷᠢᠭ ᠪᠠᠢᠯᠳᠤᠭᠠᠨ ᠤ᠋ ᠳᠣᠲᠣᠷᠠ ᠪᠠᠢᠭᠰᠠᠨ ᠰᠠᠨᠠᠭᠠᠨ ᠰᠠᠢ ᠭᠦᠢᠴᠡᠵᠦ ᠳᠣᠲᠣᠷᠠ ᠪᠠᠨ ᠰᠣᠯᠤᠩᠭᠤᠸᠠ ᠶ᠋ᠢᠨ ᠦᠨᠡᠬᠡᠷ ᠠᠭᠤᠳᠠᠮ ᠲᠠᠯᠪᠢᠭᠤ ᠮᠡᠷᠭᠡᠨ ᠳ᠋ᠦ᠍ᠷ ᠰᠢᠲᠦᠵᠦ᠂ ᠳᠠᠷᠤᠢ ᠬᠥᠰᠢᠭᠡ ᠶ᠋ᠢᠨ ᠭᠠᠳᠠᠨᠠ ᠵᠤᠯᠠ ᠶ᠋ᠢ ᠵᠠᠢᠯᠠᠭᠤᠯᠤᠨ ᠠᠯᠲᠠᠨᠱᠠᠭᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠠᠨᠤ ᠲᠡᠪᠡᠷᠢᠵᠦ ᠬᠠᠷᠠᠬᠠᠨ ᠬᠤᠷᠢᠴᠠᠯ ᠤ᠋ᠨ ᠤᠰᠤᠨ ᠳᠡᠪᠦᠯᠬᠦᠶᠡ᠂ ᠰᠥᠨᠢ ᠳᠦᠯᠢ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠰᠡᠷᠢᠵᠦ ᠦᠵᠡᠪᠡᠰᠦ ᠡᠮᠡ ᠢᠨᠤ ᠰᠣᠯᠣᠩᠭᠤᠸᠠ ᠳᠤᠮᠳᠠ ᠠ᠋ᠴᠠ ᠠᠨᠤ ᠲᠡᠪᠡᠷᠢᠵᠦ ᠠᠮᠠᠷᠬᠠᠯᠠᠬᠤᠶᠠ᠂ ᠲᠠᠰᠢᠷᠠᠮ ᠳ᠋ᠤᠷ ᠳᠠᠷᠤᠢ ᠬᠥᠯ ᠢ᠋ ᠡᠷᠭᠦᠵᠦ ᠬᠠᠭᠠᠰ ᠰᠣᠭᠲᠣᠭᠤ ᠪᠠᠷ ᠡᠭᠦᠯᠡ ᠪᠣᠷᠣᠭᠠᠨ ᠤ᠋ ᠬᠡᠷᠡᠭ ᠢ᠋ ᠡᠭᠦᠰᠬᠡᠬᠦᠶᠡ ᠲᠡᠭᠦᠨ ᠦ᠌ ᠨᠡᠢᠯᠡᠭᠦᠯᠬᠦ ᠨᠡᠭᠦᠯᠭᠡᠬᠦ ᠢᠨᠤ ᠨᠡᠩ ᠬᠦᠰᠡᠯᠲᠡᠢ ᠳ᠋ᠦ᠍ᠷ ᠳᠠᠷᠤᠢ ᠭᠠᠯ ᠤ᠋ᠨ ᠬᠦᠴᠦᠨ ᠢ᠋ᠶ᠋ᠡᠷ ᠴᠡᠩᠭᠡᠯᠳᠦᠨ ᠦᠶᠡᠰ ᠭᠡᠰᠢᠭᠦᠨ ᠨᠡᠮᠡᠭᠦᠨ ᠪᠣᠯᠵᠤ᠂ ᠠᠮᠲᠠ ᠰᠢᠮᠡ ᠶᠡᠬᠡᠯᠡ ᠥᠪᠡᠷᠮᠢᠴᠡ ᠳ᠋ᠦ᠍ᠷ ᠳᠣᠲᠣᠷᠠ ᠪᠠᠨ ᠭᠠᠢᠬᠠᠵᠤ ᠦᠭᠡ ᠠᠰᠠᠭᠤᠪᠠᠰᠤ ᠲᠡᠷᠡ ᠭᠠᠭᠴᠠ ᠢᠨᠢᠶᠡᠵᠦ ᠦᠭᠡ ᠥᠴᠢᠬᠦ ᠦᠭᠡᠢ ᠨᠢᠭᠡᠨ ᠰᠥᠨᠢ ᠲᠡᠪᠡᠷᠢᠯᠴᠡᠨ ᠤᠮᠳᠠᠭᠠᠳ ᠵᠢᠴᠢ ᠥᠷᠯᠥᠭᠡ ᠦᠵᠡᠪᠡᠰᠦ ᠶᠠᠭᠤᠨᠠᠢ ᠰᠣᠯᠤᠩᠭᠤᠸᠠ ᠠᠵᠢ ! ᠬᠠᠷᠢᠨ ᠨᠠᠷᠠᠨ ᠬᠠᠭᠠᠨ ᠤ᠋ ᠰᠤᠯᠠ ᠬᠠᠲᠤᠨ ᠰᠠᠢᠬᠠᠨ ᠬᠦᠷᠢ ᠲᠤᠯᠠ ᠶᠡᠬᠡᠯᠡ ᠰᠣᠴᠢᠵᠤ ᠶᠠᠭᠠᠷᠠᠨ ᠪᠣᠰᠴᠤ ᠳᠡᠪᠡᠯ ᠢ᠋ᠶ᠋ᠡᠨ ᠨᠥᠮᠥᠷᠴᠦ ᠬᠥᠰᠢᠭᠡ ᠡᠴᠡ ᠭᠠᠷᠰᠤᠭᠠᠢ ᠬᠡᠮᠡᠲᠡᠯᠡ ᠰᠠᠢᠬᠠᠨ ᠬᠦᠷᠢ ᠶᠠᠭᠠᠷᠠᠨ ᠬᠠᠰ ᠮᠡᠲᠦ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠵᠤ ᠠᠯᠲᠠᠨᠱᠠᠭᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠲᠡᠪᠡᠷᠢᠵᠦ ᠰᠣᠯᠤᠩᠭᠤᠸᠠ ᠶ᠋ᠢᠨ ᠠᠷᠭᠠ ᠶ᠋ᠢ ᠪᠦᠷᠢᠨᠡ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠤᠴᠢᠷ ᠢ᠋ ᠰᠠᠢ ᠣᠯᠵᠤ ᠮᠡᠳᠡᠭᠡᠳ ᠠᠷᠭᠠ ᠦᠭᠡᠢ ᠢᠨᠢᠶᠡᠨ ᠨᠡᠢᠯᠡᠭᠦᠯᠵᠦ᠂ ᠬᠣᠶᠠᠭᠤᠯᠠ ᠬᠤᠪᠴᠠᠯᠠᠨ ᠭᠠᠷᠴᠤ ᠢᠷᠡᠭᠡᠳ ᠰᠣᠯᠤᠩᠭᠤᠸᠠ ᠶ᠋ᠢᠨ ᠭᠡᠷ ᠲᠦ᠍ᠷ ᠢᠷᠡᠵᠦ ᠬᠣᠶᠠᠭᠤᠯᠠ ᠬᠠᠮᠲᠤ ᠪᠠᠷ ᠶᠣᠰᠣᠯᠠᠵᠤ ᠴᠢᠷᠠᠢ ᠤᠯᠠᠢᠵᠤ ᠢᠨᠢᠶᠡᠯᠴᠡᠬᠦᠢ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠪᠠᠰᠠ ᠪᠠᠶᠠᠷᠯᠠᠨ ᠪᠠᠶᠠᠷ ᠤ᠋ᠨ ᠶᠣᠰᠣ ᠪᠠᠷ ᠬᠤᠷᠢᠮ ᠪᠡᠯᠡᠳᠬᠡᠨ ᠬᠤᠷᠢᠮᠯᠠᠵᠤ᠂ ᠳᠣᠣᠷᠠᠲᠤ ᠤᠯᠤᠰ ᠲᠤᠷ ᠮᠥᠨ ᠴᠥᠮ ᠬᠤᠷᠢᠮ ᠬᠠᠢᠷᠠᠯᠠᠪᠠ᠃
ᠲᠡᠳᠦᠢ ᠠᠯᠲᠠᠨᠱᠠᠭᠠ ᠰᠣᠯᠤᠩᠭᠤᠸᠠ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ᠄《 ᠴᠢ ᠨᠢᠭᠡᠨᠲᠡ ᠬᠡᠷᠡᠭ ᠢ᠋ ᠡᠨᠡ ᠮᠡᠲᠦ ᠪᠣᠯᠭᠠᠪᠠ᠂ ᠣᠳᠣ ᠶᠣᠰᠣ ᠳ᠋ᠤᠷ ᠬᠠᠷᠰᠢᠵᠤ ᠳᠡᠭᠡᠳᠦ ᠡᠴᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠶᠠᠯᠠ ᠬᠡᠯᠡᠯᠴᠡᠬᠦ᠂ ᠳᠣᠣᠷᠠᠲᠤ ᠠ᠋ᠴᠠ ᠣᠯᠠᠨ ᠲᠦᠰᠢᠮᠡᠳ ᠦ᠋ᠨ ᠰᠡᠪᠯᠡᠬᠦ ᠶ᠋ᠢ ᠬᠡᠷᠬᠢᠮᠦᠢ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄《 ᠵᠢᠷᠤᠮᠲᠤ ᠨᠥᠬᠥᠷ ᠰᠡᠳᠬᠢᠯ ᠢ᠋ᠶ᠋ᠡᠨ ᠰᠤᠯᠠ ᠳᠡᠯᠪᠢ᠂ ᠨᠠᠳᠠ ᠳ᠋ᠤᠷ ᠪᠣᠳᠣᠨ ᠲᠣᠭᠲᠠᠭᠠᠭᠰᠠᠨ ᠭᠠᠵᠠᠷ ᠪᠣᠢ᠃ 》ᠭᠡᠮᠡᠨ ᠪᠠᠰᠠ ᠵᠡᠷᠭᠡᠴᠡᠨ ᠰᠠᠭᠤᠵᠤ ᠰᠠᠢᠬᠠᠨ ᠬᠦᠷᠢ ᠪᠡᠷ ᠠᠷᠢᠬᠢ ᠬᠢᠯᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠠᠷᠢᠬᠢ ᠪᠠᠷᠢᠨ ᠪᠠᠶᠠᠷ ᠲᠤᠷ ᠨᠡᠢᠯᠡᠭᠦᠯᠵᠦ ᠬᠠᠷᠠᠬᠠᠨ ᠬᠤᠷᠢᠮᠯᠠᠵᠤ ᠪᠠᠢᠲᠠᠯᠠ ᠭᠠᠳᠠᠨᠠ ᠳᠣᠬᠢᠶᠠ ᠴᠣᠬᠢᠵᠤ ᠠᠯᠲᠠᠨᠱᠠᠭᠠ ᠶ᠋ᠢ ᠵᠠᠯᠠᠬᠤᠢ ᠳ᠋ᠤᠷ ᠠᠯᠲᠠᠨᠱᠠᠭᠠ ᠬᠡᠦᠬᠡᠳ ᠭᠠᠷᠭᠠᠵᠤ ᠤᠴᠢᠷ ᠢ᠋ ᠲᠤᠷᠰᠢᠭᠤᠯᠪᠠᠰᠤ᠂ ᠢᠳᠡᠷ ᠳᠣᠪᠣ ᠠᠯᠲᠠᠨᠱᠠᠭᠠ ᠶ᠋ᠢ ᠪᠠᠭᠠ ᠡᠮᠡ ᠠᠪᠴᠤ ᠰᠣᠯᠤᠩᠭᠤᠸᠠ ᠶ᠋ᠢᠨ ᠵᠢᠷᠤᠮ ᠢ᠋ ᠤᠮᠠᠷᠲᠠᠪᠠ ᠭᠡᠮᠡᠨ ᠰᠣᠨᠣᠰᠴᠤ ᠵᠢᠷᠤᠮ ᠤ᠋ᠨ ᠠᠭᠤᠷ ᠡᠭᠦᠯᠡᠨᠡ ᠲᠤᠯᠲᠠᠯᠠ ᠮᠠᠨᠳᠤᠵᠤ᠂ ᠶᠠᠭᠠᠷᠠᠨ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠠᠯᠲᠠᠨᠱᠠᠭᠠ ᠯᠤᠭᠠ ᠬᠡᠷᠡᠯᠳᠦᠷᠡ ᠢᠷᠡᠭᠰᠡᠨ ᠠᠵᠤᠭᠤ᠃
ᠲᠡᠳᠦᠢ ᠠᠯᠲᠠᠨᠱᠠᠭᠠ ᠤᠴᠢᠷ ᠢ᠋ ᠮᠡᠳᠡᠵᠦ ᠰᠣᠯᠤᠩᠭᠤᠸᠠ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ᠄《 ᠶᠠᠮᠪᠠᠷ ᠪᠣᠢ !ᠦᠵᠡᠲᠡᠯᠡ ᠪᠠᠷᠠᠭᠤᠨ ᠮᠥᠷᠥ ᠶ᠋ᠢᠨ ᠶᠡᠬᠡ ᠵᠠᠩᠵᠤᠨ ᠢᠳᠡᠷ ᠳᠣᠪᠣ ᠨᠠᠮᠠᠶ᠋ᠢ ᠪᠤᠷᠤᠭᠤᠰᠢᠶᠠᠷᠠ ᠢᠷᠡᠪᠡ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄《 ᠡᠨᠡ ᠢᠨᠤ ᠮᠢᠨᠦ ᠰᠠᠨᠠᠭᠠᠨ ᠳ᠋ᠤᠷ ᠨᠡᠢᠴᠡᠪᠡ ! 》ᠭᠡᠮᠡᠨ ᠳᠠᠷᠤᠢ ᠥᠪᠡᠷ ᠢ᠋ᠶ᠋ᠡᠨ ᠭᠠᠳᠠᠭᠠᠳᠤ ᠬᠠᠷᠰᠢ ᠳ᠋ᠤᠷ ᠭᠠᠷᠴᠤ ᠳᠣᠬᠢᠶᠠ ᠴᠣᠬᠢᠭᠤᠯᠤᠨ ᠲᠥᠷᠥ ᠶ᠋ᠢᠨ ᠣᠯᠠᠨ ᠲᠦᠰᠢᠮᠡᠳ ᠢ᠋ ᠳᠣᠲᠣᠭᠠᠳᠤ ᠣᠷᠳᠣᠨ ᠳ᠋ᠤᠷ ᠣᠷᠣᠭᠤᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠤᠷ ᠤᠴᠠᠷᠠᠵᠤ ᠥᠪᠡᠷ ᠦ᠋ᠨ ᠦᠨᠡᠨ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠠᠯᠲᠠᠨᠱᠠᠭᠠ ᠳ᠋ᠤᠷ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠢᠭᠡᠨ ᠵᠡᠷᠭᠡ ᠬᠡᠯᠡᠵᠦ ᠥᠭᠦᠯᠡᠷᠦᠨ᠄《 ᠣᠯᠠᠨ ᠲᠦᠰᠢᠮᠡᠳ ᠲᠠ ᠡᠭᠦᠨ ᠦ᠌ ᠮᠠᠭᠤ ᠶ᠋ᠢ ᠮᠢᠨᠦ ᠨᠥᠬᠥᠷ ᠡᠵᠡᠨ ᠡᠴᠡ ᠡᠷᠢᠵᠦ ᠦᠯᠦ ᠪᠣᠯᠤᠮᠤᠢ !》 ᠭᠡᠮᠡᠨ ᠠᠯᠲᠠᠨᠱᠠᠭᠠ ᠶ᠋ᠢᠨ ᠭᠤᠷᠪᠠᠨ ᠦᠯᠦ ᠪᠣᠯᠬᠤ ᠦᠭᠡ ᠶ᠋ᠢ ᠴᠥᠮ ᠬᠡᠯᠡᠵᠦ᠂ ᠵᠢᠴᠢ ᠥᠪᠡᠷ ᠦ᠋ᠨ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠤᠴᠢᠷ ᠢ᠋ᠶ᠋ᠠᠨ ᠬᠡᠯᠡᠵᠦ ᠭᠠᠷᠭᠠᠭᠰᠠᠨᠠ ᠣᠯᠠᠨ ᠲᠦᠰᠢᠮᠡᠳ ᠴᠢᠩᠨᠠᠭᠰᠠᠭᠠᠷ ᠰᠣᠯᠤᠩᠭᠤᠸᠠ ᠶ᠋ᠢᠨ ᠠᠭᠤᠳᠠᠮ ᠡᠷᠳᠡᠮ ᠢ᠋ ᠪᠢᠰᠢᠷᠡᠨ ᠢᠳᠡᠷ ᠳᠣᠪᠣ ᠶᠠᠭᠠᠷᠠᠨ ᠤᠷᠢᠳᠠ ᠰᠥᠭᠥᠳᠴᠦ ᠮᠥᠷᠭᠥᠵᠦ ᠥᠭᠦᠯᠡᠷᠦᠨ᠄《 ᠮᠠᠨ ᠤ᠋ ᠨᠠᠢ᠍ᠮᠠᠨ ᠠᠢᠮᠠᠭ ᠲᠤᠷ ᠦᠨᠡᠬᠡᠷ ᠶᠡᠬᠡ ᠮᠡᠷᠭᠡᠨ ᠬᠠᠲᠤᠨ ᠢ᠋ ᠣᠯᠪᠠ ! 》ᠭᠡᠮᠡᠨ ᠣᠯᠠᠨ ᠢ᠋ᠶ᠋ᠠᠷ ᠮᠥᠷᠭᠥᠵᠦ ᠭᠠᠷᠬᠤᠶᠠ ᠰᠣᠯᠤᠩᠭᠤᠸᠠ ᠥᠭᠦᠯᠡᠷᠦᠨ᠄《 ᠡᠨᠡ ᠪᠠᠰᠠ ᠦᠯᠦ ᠪᠣᠯᠬᠤ᠂ ᠪᠢ ᠳᠠᠷᠤᠢ ᠪᠠᠯᠭᠤ ᠬᠣᠷᠣᠭᠠᠨᠠ ᠡᠴᠢᠵᠦ ᠡᠵᠡᠨ ᠡᠴᠢᠭᠡ ᠡᠬᠡ ᠬᠠᠳᠤᠨᠠ ᠤᠴᠢᠷ ᠢ᠋ ᠮᠡᠳᠡᠭᠦᠯᠦᠮᠦᠢ᠂ ᠲᠠ ᠳᠠᠭᠠᠬᠤ ᠪᠠᠨ ᠪᠡᠯᠡᠳᠭᠡ 》ᠬᠡᠮᠡᠪᠡ᠃ ᠲᠡᠳᠦᠢ ᠡᠭᠡᠵᠦ ᠣᠷᠣᠭᠠᠳ ᠬᠡᠳᠦᠨ ᠡᠳᠦᠷ ᠬᠤᠷᠢᠮᠯᠠᠨ ᠵᠢᠷᠭᠠᠵᠤ᠂ ᠳᠠᠷᠤᠢ ᠢᠳᠡᠷ ᠳᠣᠪᠣ᠂ ᠰᠥᠷᠦᠯᠬᠡᠭ ᠨᠠᠷ ᠢ᠋ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠯᠭᠠᠨ ᠰᠠᠢᠬᠠᠨ ᠬᠦᠷᠢ ᠶ᠋ᠢ ᠠᠪᠴᠤ ᠪᠠᠯᠭᠤ ᠬᠣᠷᠣᠭᠠᠨ ᠳ᠋ᠤᠷ ᠢᠷᠡᠵᠦ ᠲᠠᠢᠽᠦ ᠪᠠ ᠵᠦᠰᠦᠨ ᠬᠠᠲᠤᠨ ᠳ᠋ᠤᠷ ᠮᠥᠷᠭᠥᠨ ᠵᠤᠯᠭᠤᠵᠤ ᠮᠡᠳᠡᠭᠦᠯᠦᠷᠦᠨ᠄ 《 ᠥᠴᠦᠬᠡᠨ ᠠᠯᠪᠠᠲᠤ ᠪᠢᠳᠡᠨ ᠦ᠌ ᠨᠥᠬᠥᠷ ᠡᠮᠡ ᠡᠵᠡᠨ ᠦ᠌ ᠬᠡᠰᠢᠭ ᠲᠣᠷ ᠠᠮᠤᠷ ᠰᠤᠯᠠ ᠵᠢᠷᠭᠠᠵᠤ᠂ ᠴᠣᠭᠣᠨᠳᠠᠢ ᠠᠭᠤᠯᠠᠨᠠ ᠠᠪᠠᠯᠠᠵᠤ ᠪᠦᠬᠦᠢ ᠳ᠋ᠦ᠍ᠷ ᠵᠣᠪᠠᠯᠠᠩ ᠠ᠋ᠴᠠ ᠵᠠᠢᠯᠠᠭᠰᠠᠨ ᠨᠢᠭᠡᠨ ᠥᠬᠢᠨ ᠢ᠋ ᠣᠯᠪᠠ᠂ ᠠᠯᠪᠠᠲᠤ ᠥᠬᠢᠨ ᠤᠭ ᠠ᠋ᠴᠠ ᠨᠥᠬᠥᠷ ᠠᠯᠲᠠᠨᠱᠠᠭᠠ ᠶ᠋ᠢᠨ ᠵᠢᠷᠤᠮ ᠰᠠᠨᠠᠭᠠᠨ ᠤ᠋ ᠭᠦᠨᠡ ᠳ᠋ᠦ᠍ᠷ ᠬᠠᠷᠢᠭᠤᠯᠠᠬᠤ ᠭᠠᠵᠠᠷ ᠦᠭᠡᠢ ᠲᠤᠯᠠ ᠳᠣᠣᠷᠠ ᠪᠠᠨ ᠪᠠᠰᠠ ᠭᠤᠸᠠ ᠦᠵᠡᠰᠬᠦᠯᠡᠩ ᠰᠡᠴᠡᠨ ᠮᠡᠷᠭᠡᠨ ᠬᠣᠣᠰ ᠪᠦᠷᠢᠳᠦᠭᠰᠡᠨ ᠨᠢᠭᠡᠨ ᠢ᠋ ᠠᠪᠴᠤ ᠥᠭᠭᠦᠨ᠂ ᠲᠡᠷᠢᠭᠦᠨ ᠳ᠋ᠦ᠍ᠷ ᠵᠢᠷᠤᠮᠲᠤ ᠡᠷᠡ ᠶ᠋ᠢᠨ ᠠᠴᠢ ᠳ᠋ᠤᠷ ᠬᠠᠷᠢᠭᠤᠯᠠᠰᠤᠭᠠᠢ᠃ ᠬᠣᠶᠠᠷ ᠲᠤᠷ ᠠᠯᠪᠠᠲᠤ ᠥᠬᠢᠨ ᠥᠪᠡᠷ ᠦ᠋ᠨ ᠰᠠᠢᠨ ᠢ᠋ᠶ᠋ᠠᠨ ᠣᠯᠠᠨ ᠳ᠋ᠤᠷ ᠮᠡᠳᠡᠭᠳᠡᠶᠡ ᠭᠡᠮᠡᠨ ᠬᠠᠷᠠᠬᠠᠨ ᠡᠷᠢᠬᠦᠢ ᠳ᠋ᠦ᠍ᠷ ᠡᠨᠡ ᠥᠬᠢᠨ ᠢ᠋ ᠣᠯᠤᠭᠠᠳ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠡᠷᠡ ᠠᠯᠲᠠᠨᠱᠠᠭᠠ ᠳ᠋ᠤᠷ ᠠᠪᠴᠤ ᠦᠭᠪᠡᠰᠦ ᠲᠡᠷᠡ ᠦᠯᠦ ᠪᠤᠯᠬᠤᠢ ᠳ᠋ᠤᠷ ᠠᠯᠪᠠᠲᠤ ᠥᠬᠢᠨ ᠠᠷᠢᠬᠢ ᠤᠤᠭᠤᠯᠭᠠᠨ ᠰᠣᠭᠲᠣᠭᠠᠵᠤ ᠤᠮᠳᠠᠭᠠ ᠪᠠᠷ ᠬᠣᠯᠪᠣᠵᠤ ᠶᠣᠰᠣᠨ ᠢ᠋ ᠲᠡᠭᠦᠰᠬᠡᠯᠭᠡᠵᠦ᠂ ᠵᠢᠴᠢ ᠡᠳᠦᠷ ᠶᠣᠰᠣ ᠲᠡᠭᠦᠰᠦᠭᠡᠳ ᠪᠠᠰᠠ ᠲᠡᠭᠦᠨ ᠡᠴᠡ ᠬᠢᠨᠠᠨ ᠠᠰᠠᠭᠤᠪᠠᠰᠤ ᠡᠨᠡ ᠥᠬᠢᠨ ᠦᠵᠡᠰᠡ ᠭᠣᠷᠯᠣᠰ ᠤ᠋ᠨ ᠨᠠᠷᠠᠨ ᠰᠠᠢᠳ ᠤ᠋ᠨ ᠰᠤᠯᠠ ᠡᠬᠡᠨᠡᠷ᠂ ᠡᠵᠡᠨ ᠠᠮᠢᠨ ᠢ᠋ ᠬᠡᠯᠲᠦᠷᠢᠭᠦᠯᠵᠦ ᠬᠠᠷᠠ ᠬᠢᠭᠦᠯ ᠦ᠋ᠨ ᠲᠤᠰᠢᠶᠠᠯ ᠳ᠋ᠤᠷ ᠢᠯᠡᠭᠡᠭᠰᠡᠨ ᠳ᠋ᠦ᠍ᠷ ᠲᠡᠷᠡ ᠪᠤᠰᠤ ᠡᠮᠡᠰ ᠦ᠋ᠨ ᠢ᠋ᠶ᠋ᠡᠨ ᠮᠠᠭᠤ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠨᠢᠭᠡᠨ ᠭᠢᠨᠳᠠᠨ ᠳ᠋ᠤᠷ ᠵᠣᠪᠠᠯᠠᠩ ᠢ᠋ ᠬᠠᠮᠲᠤᠳᠬᠠᠭᠰᠠᠨ ᠡᠨᠡ ᠡᠮᠡ ᠪᠡᠨ ᠠᠯᠠᠬᠤᠶᠠ ᠵᠠᠪᠳᠤᠭᠰᠠᠨ ᠳ᠋ᠤᠷ ᠡᠨᠡ ᠰᠠᠢᠬᠠᠨ ᠬᠦᠷᠢ ᠳᠤᠲᠠᠭᠠᠨ ᠭᠠᠷᠴᠤ ᠪᠠᠰᠠ ᠨᠡᠬᠡᠵᠦ ᠠᠯᠠᠬᠤ ᠠ᠋ᠴᠠ ᠠᠶᠤᠵᠤ ᠥᠬᠢᠨ ᠳᠦᠷᠢ ᠪᠡᠷ ᠴᠢᠮᠡᠵᠦ ᠶᠠᠪᠤᠬᠤᠢ ᠳ᠋ᠤᠷ ᠮᠠᠨ ᠳ᠋ᠤᠷ ᠤᠴᠠᠷᠠᠵᠤ ᠬᠡᠵᠢᠶᠡ ᠶᠡᠬᠡ ᠶᠣᠰᠣ ᠲᠡᠭᠦᠰᠦᠭᠰᠡᠨ ᠬᠣᠢᠨᠠ ᠰᠠᠢ ᠤᠴᠢᠷ ᠢ᠋ ᠣᠯᠪᠠ᠃ ᠲᠡᠢᠨ ᠬᠦ᠌ ᠮᠢᠨᠦ ᠨᠥᠬᠥᠷ ᠡᠵᠡᠨ ᠦ᠌ ᠶᠠᠯᠠ ᠠ᠋ᠴᠠ ᠠᠶᠤᠵᠤ ᠮᠡᠳᠡᠭᠦᠯᠦᠷᠡ ᠢᠷᠡᠬᠦᠶᠡ᠂ ᠵᠠᠮ ᠳ᠋ᠤᠷ ᠡᠪᠡᠳᠴᠢᠨ ᠣᠯᠵᠤ ᠡᠭᠡᠭᠰᠡᠨ ᠲᠤᠯᠠ ᠠᠯᠪᠠᠲᠤ ᠥᠬᠢᠨ ᠲᠡᠭᠦᠨ ᠦ᠌ ᠲᠥᠯᠥᠭᠡ ᠢᠷᠡᠵᠦ ᠶᠠᠯᠠ ᠬᠦᠯᠢᠶᠡᠮᠦᠢ᠃ ᠬᠡᠳᠦᠢ ᠭᠣᠷᠯᠣᠰ ᠤ᠋ᠨ ᠨᠠᠷᠠᠨ ᠰᠠᠢᠳ ᠵᠢᠷᠤᠮ ᠦᠭᠡᠢ᠂ ᠵᠣᠪᠠᠯᠠᠩ ᠢ᠋ ᠬᠠᠮᠲᠤᠳᠬᠠᠭᠰᠠᠨ ᠡᠮᠡ ᠪᠡᠨ ᠠᠯᠠᠬᠤ ᠳ᠋ᠤᠷ ᠬᠦᠷᠴᠦ ᠤᠷᠭᠤᠨ ᠭᠠᠷᠤᠭᠰᠠᠨ ᠪᠣᠯᠪᠠᠴᠤ ᠡᠳᠦᠭᠡ ᠤᠴᠢᠷ ᠢ᠋ ᠮᠡᠳᠡᠵᠦ ᠪᠠᠢᠭᠠᠳ ᠡᠰᠡ ᠲᠣᠳᠣᠷᠬᠠᠢᠯᠠᠨ ᠮᠡᠳᠡᠭᠦᠯᠪᠡᠰᠦ ᠳᠠᠪᠬᠤᠷ ᠶᠠᠯᠠ ᠪᠣᠯᠬᠤ ᠲᠤᠯᠠ ᠠᠷᠭᠠ ᠦᠭᠡᠢ ᠲᠣᠳᠣᠷᠬᠠᠢᠯᠠᠨ ᠮᠡᠳᠡᠭᠦᠯᠵᠦ ᠵᠠᠬᠢᠶᠠ ᠬᠦᠯᠢᠶᠡᠮᠦᠢ !》ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠤᠴᠢᠷ ᠢ᠋ ᠰᠣᠨᠣᠰᠴᠤ ᠵᠠᠬᠢᠷᠤᠨ᠄《 ᠭᠣᠷᠯᠣᠰ ᠤ᠋ᠨ ᠨᠠᠷᠠᠨ ᠡᠮᠡ ᠪᠡᠨ ᠠᠯᠠᠬᠤ ᠠᠨᠤ ᠨᠡᠢᠴᠡᠬᠦ ᠦᠭᠡᠢ ᠬᠡᠮᠡᠬᠦᠯᠡ᠂ ᠰᠠᠢᠬᠠᠨ ᠬᠦᠷᠢ ᠥᠪᠡᠷ ᠡᠷᠡ ᠳ᠋ᠦ᠍ᠷ ᠭᠠᠷᠬᠤ ᠠᠨᠤ ᠪᠠᠰᠠ ᠡᠰᠡ ᠨᠡᠢᠯᠡᠵᠡᠬᠦᠢ᠃ ᠲᠡᠢᠨ ᠬᠦ᠌ ᠬᠣᠶᠠᠷ ᠡᠲᠡᠭᠡᠳ ᠲᠣᠷ ᠴᠥᠮ ᠨᠠᠢᠷ ᠵᠢᠷᠤᠮ ᠦᠭᠡᠢ ᠶ᠋ᠢᠨ ᠶᠠᠯᠠ ᠬᠢᠵᠦ ᠲᠣᠷᠭᠠᠨ ᠵᠠᠯᠬᠠᠭᠠ!》ᠭᠡᠮᠡᠨ ᠪᠤᠭᠤᠷᠵᠢ ᠳ᠋ᠤᠷ ᠲᠤᠰᠢᠶᠠᠨ ᠭᠠᠷᠭᠠᠪᠠ᠃ ᠳᠠᠭᠠᠯᠳᠤᠭᠠ ᠪᠤᠭᠤᠷᠵᠢ ᠨᠠᠷᠠᠨ ᠰᠠᠢᠳ ᠪᠠ ᠰᠠᠢᠬᠠᠨ ᠬᠦᠷᠢ ᠬᠣᠶᠠᠷ ᠢ᠋ ᠬᠢᠨᠠᠨ ᠪᠠᠢᠴᠠᠭᠠᠵᠤ ᠦᠨᠡᠨ ᠤᠴᠢᠷ ᠢ᠋ ᠣᠯᠵᠤ ᠳᠠᠷᠤᠢ᠄《 ᠨᠠᠷᠠᠨ ᠰᠠᠢᠳ ᠢ᠋ ᠡᠨᠡ ᠠᠮᠠᠷᠠᠭ ᠲᠤᠷ ᠵᠢᠷᠤᠮ ᠦᠭᠡᠢ᠂ ᠬᠥᠮᠦᠨ ᠦ᠌ ᠬᠡᠯᠬᠢᠶᠡ ᠶ᠋ᠢ ᠦᠲᠡᠭᠡᠷᠪᠡ ᠭᠡᠮᠡᠨ ᠨᠢᠭᠡᠨ ᠵᠠᠭᠤᠨ ᠬᠣᠨᠢ ᠲᠣᠷᠭᠠᠵᠤ᠂ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠲᠦᠭᠡᠭᠡᠯᠭᠡᠵᠦ᠂ ᠰᠠᠢᠬᠠᠨ ᠬᠦᠷᠢ ᠬᠡᠳᠦᠢ ᠵᠠᠨᠴᠢᠭᠳᠠᠭᠰᠠᠨ ᠭᠡᠪᠡᠴᠦ ᠡᠭᠡᠨᠡᠭᠲᠡ ᠵᠣᠷᠢᠭᠲᠤ ᠡᠬᠡᠨᠡᠷ ᠪᠤᠰᠤ ᠲᠤᠯᠠ ᠤᠭ ᠡᠷᠡ ᠳ᠋ᠦ᠍ᠷ ᠢᠨᠤ ᠲᠤᠰᠢᠶᠠᠨ ᠥᠭᠰᠦᠭᠡᠢ᠂ ᠭᠠᠭᠴᠠ ᠨᠠᠷᠠᠨ ᠰᠠᠢᠳ ᠤᠴᠢᠷ ᠦᠭᠡᠢ ᠵᠣᠪᠠᠭᠠᠬᠤ ᠪᠠ ᠠᠯᠠᠵᠤ ᠪᠣᠯᠬᠤ ᠦᠭᠡᠢ !》ᠭᠡᠮᠡᠨ ᠲᠣᠭᠲᠠᠭᠠᠵᠤ᠂ ᠨᠠᠷᠠᠨ ᠰᠠᠢᠳ ᠪᠠ ᠰᠠᠢᠬᠠᠨ ᠬᠦᠷᠢ ᠶ᠋ᠢ ᠵᠡᠷᠭᠡᠴᠡᠭᠦᠯᠵᠦ ᠬᠣᠶᠠᠭᠤᠯᠠ ᠶ᠋ᠢᠨ ᠳᠤᠷᠠ ᠶ᠋ᠢ ᠠᠰᠠᠭᠤᠭᠰᠠᠨ ᠳ᠋ᠤᠷ ᠨᠠᠷᠠᠨ ᠰᠠᠢᠳ ᠮᠡᠳᠡᠭᠦᠯᠦᠷᠦᠨ᠄《 ᠪᠢ ᠨᠢᠭᠡᠨᠲᠡ ᠡᠭᠦᠨ ᠢ᠋ ᠠᠯᠠᠵᠤ ᠡᠰᠡ ᠴᠢᠳᠠᠨ ᠡᠨᠡ ᠬᠠᠷᠢᠨ ᠵᠠᠪᠳᠤᠵᠤ ᠡᠷᠡ ᠣᠯᠤᠭᠰᠠᠨ ᠲᠤᠯᠠ ᠡᠳᠦᠭᠡ ᠨᠠᠳᠠ ᠳ᠋ᠤᠷ ᠲᠤᠰᠢᠶᠠᠪᠠᠴᠤ ᠪᠢ ᠪᠠᠰᠠ ᠲᠡᠭᠦᠨ ᠢ᠋ ᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠬᠡᠷᠪᠡ ᠬᠠᠮᠲᠤ ᠠᠮᠢᠳᠤᠷᠠᠨ ᠭᠡᠨᠡᠳᠲᠡ ᠡᠨᠳᠡᠭᠦᠷᠡᠨ ᠵᠠᠨᠴᠢᠪᠠᠰᠤ ᠪᠠᠰᠠ ᠡᠵᠡᠨ ᠦ᠌ ᠴᠠᠭᠠᠵᠠ ᠠ᠋ᠴᠠ ᠬᠠᠷᠰᠢᠬᠤ ᠠ᠋ᠴᠠ ᠠᠶᠤᠮᠤᠢ᠂ ᠪᠢ ᠬᠦᠯᠢᠶᠡᠨ ᠠᠪᠬᠤ ᠶ᠋ᠢ ᠪᠠᠢᠰᠤᠭᠠᠢ᠃ ᠣᠯᠳᠠᠬᠤᠯᠠ ᠮᠢᠨᠦ ᠬᠡᠯᠬᠢᠶᠡ ᠦᠭᠡᠢ ᠲᠣᠷᠭᠠᠭᠤᠯᠢ ᠶ᠋ᠢ ᠲᠡᠷᠡ ᠵᠢᠷᠤᠮ ᠦᠭᠡᠢ ᠡᠬᠡᠨᠡᠷ ᠢ᠋ᠶ᠋ᠡᠷ ᠭᠠᠷᠭᠠᠯᠭᠠᠵᠤ᠂ ᠲᠡᠭᠦᠨ ᠦ᠌ ᠵᠣᠷᠢᠭ ᠢ᠋ᠶ᠋ᠠᠷ ᠪᠣᠯᠲᠤᠭᠠᠢ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠪᠤᠭᠤᠷᠵᠢ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ᠄《 ᠡᠨᠡ ᠮᠠᠰᠢ ᠵᠦᠢ !》 ᠬᠡᠮᠡᠭᠡᠳ ᠳᠠᠷᠤᠢ ᠨᠠᠷᠠᠨ ᠰᠠᠢᠳ ᠤ᠋ᠨ ᠵᠠᠭᠤᠨ ᠬᠣᠨᠢᠨ ᠤ᠋ ᠲᠣᠷᠭᠠᠭᠤᠯᠢ ᠶ᠋ᠢ ᠭᠡᠭᠡᠵᠦ ᠥᠭᠭᠦᠭᠰᠡᠨ ᠡᠮᠡ ᠰᠠᠢᠬᠠᠨ ᠬᠦᠷᠢ ᠳ᠋ᠦ᠍ᠷ ᠨᠥᠮᠥᠷᠭᠡᠵᠦ᠂ ᠪᠠᠰᠠ ᠠᠯᠲᠠᠨᠱᠠᠭᠠ ᠰᠣᠯᠤᠩᠭᠤᠸᠠ ᠬᠣᠶᠠᠭᠤᠯᠠ ᠬᠢᠨᠠᠯ ᠦᠭᠡᠢ ᠡᠷᠡ ᠲᠡᠢ ᠡᠮᠡ ᠶ᠋ᠢ ᠠᠪᠤᠭᠰᠠᠨ ᠡᠰᠡ ᠨᠡᠢᠴᠡᠭᠰᠡᠨ ᠲᠤᠯᠠ ᠰᠠᠢᠬᠠᠨ ᠬᠦᠷᠢ ᠶ᠋ᠢᠨ ᠵᠠᠭᠤᠨ ᠬᠣᠨᠢ ᠶ᠋ᠢ ᠠᠯᠲᠠᠨᠱᠠᠭᠠ᠂ ᠰᠣᠯᠤᠩᠭᠤᠸᠠ ᠬᠣᠶᠠᠭᠤᠯᠠ ᠪᠠᠷ ᠭᠠᠷᠭᠠᠯᠭᠠᠵᠤ᠂ ᠪᠠᠰᠠ ᠬᠥᠮᠦᠨ ᠢ᠋ ᠲᠠ ᠣᠯᠬᠤ ᠲᠤᠯᠠ ᠵᠠᠭᠤᠨ ᠬᠣᠨᠢᠨ ᠤ᠋ ᠳᠡᠭᠡᠷᠡ ᠪᠠᠰᠠ ᠵᠠᠭᠤᠨ ᠬᠣᠨᠢ ᠭᠠᠷᠭᠠᠵᠤ᠂ ᠨᠠᠷᠠᠨ ᠰᠠᠢᠳ ᠤ᠋ᠨ ᠳᠣᠣᠷᠠᠲᠤ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠱᠠᠩᠨᠠ ᠭᠡᠮᠡᠨ ᠳᠥᠷᠪᠡᠨ ᠬᠥᠮᠦᠨ ᠦ᠌ ᠶᠠᠯᠠ ᠶ᠋ᠢ ᠬᠡᠮᠨᠡᠨ ᠲᠣᠭᠲᠠᠭᠠᠵᠤ᠂ ᠲᠠᠢᠽᠦ ᠳ᠋ᠦ᠍ᠷ ᠡᠷᠭᠦᠨ ᠮᠡᠳᠡᠭᠦᠯᠵᠦ᠂ ᠰᠢᠳᠬᠡᠭᠰᠡᠨ ᠶᠣᠰᠣᠭᠠᠷ ᠲᠣᠭᠲᠠᠭᠠᠭᠰᠠᠨ ᠳ᠋ᠤᠷ ᠳᠠᠷᠤᠢ ᠨᠡᠢᠭᠡᠮ ᠲᠤᠩᠬᠠᠭᠯᠠᠨ ᠵᠠᠷᠯᠠᠪᠠ᠃
ᠲᠡᠳᠦᠢ ᠰᠤᠯᠤᠩᠭᠤᠸᠠ ᠶ᠋ᠢᠨ ᠡᠷᠳᠡᠮ ᠢ᠋ ᠶᠡᠬᠡ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠭᠠᠢᠬᠠᠯᠳᠤᠪᠠ᠃ ᠰᠣᠯᠤᠩᠭᠤᠸᠠ ᠵᠦᠰᠦᠨ ᠬᠠᠲᠤᠨ ᠳ᠋ᠤᠷ ᠵᠣᠯᠭᠠᠵᠤ ᠰᠠᠢᠬᠠᠨ ᠬᠦᠷᠢ ᠶ᠋ᠢ ᠵᠣᠯᠭᠠᠭᠤᠯᠤᠨ ᠮᠥᠷᠭᠥᠭᠦᠯᠵᠦ᠂ ᠶᠢᠰᠦᠨ ᠦᠵᠡᠰᠬᠦᠯᠡᠩ ᠡᠬᠡᠨᠡᠷ ᠰᠠᠢᠳ ᠤ᠋ᠨ ᠲᠣᠭᠠᠨ ᠳ᠋ᠤᠷ ᠣᠷᠣᠭᠤᠯᠵᠤ ᠴᠣᠯᠠ ᠬᠠᠢᠷᠠᠯᠠᠮᠤ ᠭᠡᠮᠡᠨ ᠮᠡᠳᠡᠭᠦᠯᠬᠦᠢ ᠳ᠋ᠦ᠍ᠷ ᠵᠦᠰᠦᠨ ᠬᠠᠲᠤᠨ ᠮᠦᠰᠢᠶᠡᠨ ᠥᠴᠢᠷᠦᠨ᠄《 ᠲᠡᠷᠡ ᠰᠠᠢᠬᠠᠨ ᠬᠦᠷᠢ ᠶ᠋ᠢᠨ ᠵᠢᠰᠦ ᠥᠩᠭᠡ ᠦᠵᠡᠰᠬᠦᠯᠡᠩ ᠪᠣᠯᠪᠠᠴᠤ ᠵᠢᠷᠦᠬᠡ ᠢᠨᠤ ᠦᠨᠡᠨᠴᠢ ᠦᠭᠡᠢ᠂ ᠮᠢᠨᠦ ᠶᠢᠰᠦᠨ ᠦᠵᠡᠰᠬᠦᠯᠡᠩ ᠰᠡᠴᠡᠨ ᠡᠬᠡᠨᠡᠷ ᠰᠠᠢᠳ ᠲᠤᠷ ᠣᠷᠣᠵᠤ ᠦᠯᠦ ᠪᠣᠯᠤᠮᠤᠢ᠃ ᠮᠢᠨᠦ ᠰᠠᠢᠰᠢᠶᠠᠯ ᠢ᠋ ᠣᠯᠤᠭᠰᠠᠨ ᠶᠢᠰᠦᠨ ᠡᠬᠡᠨᠡᠷ ᠰᠠᠢᠳ ᠬᠡᠮᠡᠭᠴᠢ ᠡᠬᠡᠨᠡᠷ ᠦ᠋ᠨ ᠶᠣᠰᠣ ᠰᠠᠬᠢᠯ ᠢ᠋ ᠡᠰᠡ ᠠᠯᠳᠠᠭᠰᠠᠨ ᠠᠷᠠᠳ᠂ ᠡᠨᠡ ᠰᠠᠢᠬᠠᠨ ᠬᠦᠷᠢ ᠬᠡᠮᠡᠭᠴᠢ ᠡᠬᠡᠨᠡᠷ ᠬᠥᠮᠦᠨ ᠦ᠌ ᠶᠣᠰᠣ ᠰᠠᠬᠢᠯ ᠤ᠋ᠨ ᠲᠡᠷᠢᠭᠦᠨ ᠨᠢᠭᠡᠨ ᠢ᠋ ᠠᠯᠳᠠᠭᠰᠠᠨ ᠡᠬᠡᠨᠡᠷ᠂ ᠬᠡᠷᠬᠢᠨ ᠮᠢᠨᠦ ᠰᠠᠢᠰᠢᠶᠠᠯ ᠴᠣᠯᠠ ᠳ᠋ᠤᠷ ᠬᠦᠷᠲᠡᠵᠦ ᠪᠣᠯᠬᠤ ? ᠬᠣᠭᠣᠰᠣᠨ ᠴᠢᠨᠦ ᠰᠡᠳᠬᠢᠯ ᠢ᠋ ᠪᠣᠳᠣᠵᠤ ᠪᠢ ᠪᠤᠰᠤ ᠵᠦᠢᠯ ᠢ᠋ᠶ᠋ᠡᠷ ᠥᠷᠥᠰᠢᠶᠡᠰᠦᠭᠡᠢ !》ᠭᠡᠮᠡᠨ ᠰᠣᠯᠤᠩᠭᠤᠸᠠ ᠶ᠋ᠢ ᠠᠭᠤᠳᠠᠮ ᠮᠡᠷᠭᠡᠨ ᠭᠡᠮᠡᠨ ᠮᠠᠯᠠᠭᠠ ᠬᠣᠭᠣᠯᠠᠪᠴᠢ ᠡᠷᠢᠭᠡ ᠱᠠᠩᠨᠠᠭᠰᠠᠨ ᠳ᠋ᠤᠷ ᠰᠣᠯᠤᠩᠭᠤᠸᠠ ᠤᠴᠢᠷ ᠢ᠋ ᠤᠬᠠᠵᠤ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠬᠦᠯᠢᠶᠡᠨ ᠠᠪᠴᠤ ᠭᠠᠷᠴᠤ ᠢᠷᠡᠭᠡᠳ ᠡᠨᠡ ᠱᠠᠩᠨᠠᠭᠰᠠᠨ ᠢ᠋ ᠰᠠᠢᠬᠠᠨ ᠬᠦᠷᠢ ᠳ᠋ᠦ᠍ᠷ ᠥᠭᠴᠦ ᠭᠠᠳᠠᠨᠠ ᠠ᠋ᠴᠠ ᠮᠥᠷᠭᠥᠭᠦᠯᠦᠨ ᠬᠠᠷᠢᠵᠤ ᠢᠷᠡᠪᠡ᠃ ᠲᠡᠳᠦᠢ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠵᠦᠰᠦᠨ ᠬᠠᠲᠤᠨ ᠢ᠋ ᠦᠨᠡᠬᠡᠷ ᠲᠦᠮᠡᠨ ᠦ᠌ ᠡᠬᠡ ᠭᠡᠮᠡᠨ ᠭᠠᠢᠬᠠᠯᠳᠤᠪᠠ᠃ ᠳᠠᠷᠤᠢ ᠰᠣᠯᠤᠩᠭᠤᠸᠠ ᠬᠥᠰᠬᠡ ᠲᠡᠷᠭᠡ ᠪᠠ ᠰᠠᠢᠨ ᠨᠡᠷᠡ ᠪᠡᠨ ᠪᠦᠷᠢᠨᠡ ᠣᠯᠵᠤ ᠠᠢᠮᠠᠭ ᠲᠤᠷ ᠢ᠋ᠶ᠋ᠠᠨ ᠡᠭᠡᠵᠦ᠂ ᠨᠥᠬᠥᠷ ᠡᠮᠡ ᠭᠤᠷᠪᠠᠨ ᠬᠥᠮᠦᠨ ᠶᠡᠬᠡᠯᠡ ᠪᠠᠶᠠᠷᠯᠠᠯᠴᠠᠵᠤ᠂ ᠠᠯᠲᠠᠨᠱᠠᠭᠠ ᠶ᠋ᠢᠨ ᠠᠮᠠᠷᠠᠭ ᠰᠡᠳᠬᠢᠯ ᠨᠡᠩ ᠬᠦᠨᠳᠦᠳᠴᠦ ᠨᠡᠮᠡᠭᠰᠡᠨ ᠢ᠋ ᠴᠦ᠍ ᠪᠠᠢᠲᠤᠭᠠᠢ᠂ ᠰᠠᠢᠬᠠᠨ ᠬᠦᠷᠢ ᠮᠥᠨ ᠰᠣᠯᠤᠩᠭᠤᠸᠠ ᠶ᠋ᠢ ᠡᠬᠡ ᠮᠡᠲᠦ ᠦᠵᠡᠪᠡ᠃ ᠰᠤᠳᠤᠷᠴᠢ ᠲᠦᠰᠢᠮᠡᠯ ᠪᠢ ᠦᠵᠡᠭᠰᠡᠭᠡᠷ ᠡᠨᠡ ᠨᠢᠭᠡᠨ ᠠᠩᠭᠢ ᠬᠡᠷᠡᠭ ᠲᠦ᠍ᠷ ᠬᠦᠷᠴᠦ ᠢᠨᠢᠶᠡᠳᠦᠨ ᠲᠥᠷᠥᠵᠦ ᠰᠢᠯᠦᠭ ᠪᠢᠴᠢᠵᠦ ᠲᠡᠮᠳᠡᠭᠯᠡᠭᠰᠡᠨ ᠢᠨᠤ ᠄
ᠵᠢᠷᠤᠮ ᠦᠭᠡᠢ ᠡᠷᠡ ᠳ᠋ᠦ᠍ᠷ ᠵᠣᠷᠢᠭ ᠦᠭᠡᠢ ᠡᠮᠡ ᠬᠣᠣᠰᠯᠠᠭᠰᠠᠨ ᠢ᠋ᠶ᠋ᠠᠷ
ᠵᠢᠳᠠ ᠢᠯᠳᠦᠲᠦ ᠰᠢᠩᠭᠡᠯᠢᠭ ᠭᠢᠨᠳᠠᠨ ᠳ᠋ᠤᠷ ᠵᠣᠪᠠᠯᠠᠩ ᠢ᠋ ᠬᠠᠲᠠᠭᠤᠵᠢᠨ ᠠᠲᠠᠯᠠ
ᠵᠢᠷᠭᠠᠯ ᠢ᠋ ᠣᠯᠤᠮᠠᠭᠴᠠ ᠠᠯᠠᠬᠤ ᠳ᠋ᠤᠷ ᠬᠦᠷᠴᠦ ᠬᠠᠷᠢᠯᠴᠠᠨ ᠬᠠᠭᠠᠴᠠᠵᠤ ᠰᠠᠯᠤᠭᠠᠳ
ᠵᠢᠯᠣᠭᠣᠳᠬᠤ ᠮᠡᠬᠡᠲᠦ ᠰᠣᠯᠣᠩᠭᠣᠸ᠋ᠠ ᠶ᠋ᠢᠨ ᠡᠷᠡ ᠪᠡᠨ ᠠᠮᠠᠷᠠᠭᠯᠠᠬᠤ ᠶᠡᠷᠦᠨᠳᠡᠭ ᠪᠣᠯᠭᠠᠪᠠ !
ᠲᠡᠳᠦᠢ ᠰᠣᠯᠣᠩᠭᠣᠸ᠋ᠠ ᠶ᠋ᠢ ᠡᠭᠡᠵᠦ ᠢᠷᠡᠮᠡᠭᠴᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠤᠨ ᠬᠠᠯᠵᠢᠨ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠳ᠋ᠦ᠍ᠷ ᠶᠡᠬᠡ ᠴᠢᠭᠤᠯᠭᠠᠨ ᠴᠢᠭᠤᠯᠵᠤ᠂ ᠤᠯᠤᠰ ᠤ᠋ᠨ ᠰᠠᠢᠳ ᠲᠤᠰᠢᠮᠡᠳ ᠦ᠋ᠨ ᠥᠬᠢᠳ ᠬᠡᠦᠬᠡᠳ ᠢ᠋ ᠴᠤᠭᠯᠠᠭᠤᠯᠵᠤ ᠥᠭᠡᠯᠦᠨ ᠦᠵᠢᠨ᠂ ᠵᠦᠰᠦᠨ ᠬᠠᠲᠤᠨ ᠲᠠᠨ᠂ ᠳᠥᠷᠪᠡᠨ ᠬᠦᠯᠦᠭ᠂ ᠶᠢᠰᠦᠨ ᠰᠠᠢᠳ ᠲᠦᠰᠢᠮᠡᠳ ᠦ᠋ᠨ ᠬᠡᠦᠬᠡᠳ ᠢ᠋ ᠦᠵᠡᠵᠦ ᠥᠬᠢᠳ ᠢ᠋ ᠰᠣᠩᠭᠣᠬᠤᠶᠠ᠂ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠬᠣᠶᠠᠳᠤᠭᠠᠷ ᠥᠬᠢᠨ ᠰᠠᠷᠠᠨ ᠬᠥᠬᠥᠭᠡ ᠶ᠋ᠢ ᠲᠠᠢᠽᠦ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠵᠣᠴᠢ ᠳ᠋ᠤᠷ ᠵᠢᠭᠠᠪᠠ᠃ ᠪᠤᠭᠤᠷᠵᠢ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠥᠬᠢᠨ ᠤᠨᠳᠤᠷᠭᠠ ᠭᠡᠷᠡᠯ ᠢ᠋ ᠲᠠᠢᠽᠦ ᠶ᠋ᠢᠨ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠴᠠᠭᠠᠲᠠᠢ ᠳ᠋ᠤᠷ ᠵᠢᠭᠠᠪᠠ᠃ ᠬᠣᠩᠭᠢᠷᠠᠳ ᠤ᠋ᠨ ᠲᠠᠢ ᠰᠡᠴᠡᠨ ᠦ᠌ ᠶᠡᠬᠡ ᠬᠥᠪᠡᠭᠦᠨ ᠵᠦᠰᠦᠨ ᠬᠠᠲᠤᠨ ᠤ᠋ ᠳᠡᠭᠦᠦ ᠠᠵᠢᠨᠠᠢ ᠮᠡᠷᠭᠡᠨ ᠦ᠌ ᠭᠠᠭᠴᠠ ᠥᠬᠢᠨ ᠬᠤᠨ ᠨᠠᠭᠤᠷ ᠢ᠋ ᠲᠠᠢᠽᠦ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠬᠥᠪᠡᠭᠦᠨ ᠥᠭᠡᠳᠡᠢ ᠳ᠋ᠦ᠍ᠷ ᠵᠢᠭᠠᠪᠠ᠃ ᠲᠡᠢ ᠰᠡᠴᠡᠨ ᠦ᠌ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠵᠦᠰᠦᠨ ᠬᠠᠲᠤᠨ ᠤ᠋ ᠬᠣᠶᠠᠳᠤᠭᠠᠷ ᠳᠡᠭᠦᠦ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠤ᠋ᠨ ᠶᠡᠬᠡ ᠥᠬᠢᠨ ᠣᠭ᠌ᠶᠤ ᠶ᠋ᠢᠨ ᠵᠦᠯᠭᠡ ᠶ᠋ᠢ ᠲᠠᠢᠽᠦ ᠶ᠋ᠢᠨ ᠳᠥᠷᠪᠡᠳᠦᠭᠡᠷ ᠬᠥᠪᠡᠭᠦᠨ ᠲᠣᠯᠢ ᠳ᠋ᠤᠷ ᠵᠢᠭᠠᠪᠠ᠃ ᠬᠦᠯᠦᠭ ᠪᠤᠭᠤᠷᠵᠢ ᠶ᠋ᠢᠨ ᠳᠥᠷᠪᠡᠳᠦᠭᠡᠷ ᠥᠬᠢᠨ ᠮᠢᠷᠠᠯᠵᠠᠨ ᠲᠤᠶᠠᠭᠠ ᠶ᠋ᠢ ᠬᠠᠰᠠᠷ ᠤ᠋ᠨ ᠶᠡᠬᠡ ᠬᠥᠪᠡᠭᠦᠨ ᠲᠣᠭᠲᠠᠬᠤ ᠳ᠋ᠤᠷ ᠵᠢᠭᠠᠪᠠ᠃ ᠬᠦᠯᠦᠭ ᠴᠢᠯᠠᠭᠤᠨ ᠤ᠋ ᠭᠠᠭᠴᠠ ᠥᠬᠢᠨ ᠲᠥᠯᠥᠪᠲᠦ ᠶ᠋ᠢ ᠬᠠᠰᠠᠷ ᠤ᠋ᠨ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠬᠤᠲᠤᠭᠲᠤ ᠳ᠋ᠤᠷ ᠵᠢᠭᠠᠪᠠ᠃ ᠰᠢᠷᠢ ᠬᠤᠲᠤᠭ ᠤ᠋ᠨ ᠭᠤᠷᠪᠠᠳᠤᠭᠠᠷ ᠥᠬᠢᠨ ᠲᠣᠭᠣᠷᠤᠤ ᠰᠡᠴᠢᠭ ᠢ᠋ ᠪᠦᠬᠦ ᠪᠡᠯᠭᠦᠳᠡᠢ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠪᠣᠯᠣᠳ ᠲᠤᠷ ᠵᠢᠭᠠᠪᠠ᠃ ᠵᠡᠪᠡ ᠶ᠋ᠢᠨ ᠶᠡᠬᠡ ᠥᠬᠢᠨ ᠵᠣᠷᠢᠭᠲᠤ ᠭᠣᠸ᠋ᠠ ᠶ᠋ᠢ ᠤᠷᠠᠨ ᠭᠠᠴᠤᠭ ᠤ᠋ᠨ ᠭᠠᠭᠴᠠ ᠬᠥᠪᠡᠭᠦᠨ ᠨᠠᠷᠠᠨ ᠭᠣᠸ᠋ᠠ ᠳ᠋ᠤ᠌ ᠵᠢᠭᠠᠪᠠ᠃ ᠴᠤᠤ ᠮᠡᠷᠭᠡᠨ ᠦ᠌ ᠭᠠᠭᠴᠠ ᠥᠬᠢᠨ ᠰᠢᠯᠢᠨ ᠪᠤᠯᠠᠭ ᠢ᠋ ᠣᠢᠲᠤ ᠣᠴᠢᠭ ᠤ᠋ᠨ ᠭᠠᠭᠴᠠ ᠬᠥᠪᠡᠭᠦᠨ ᠵᠤᠨ ᠤ᠋ ᠪᠤᠭᠤ ᠳ᠋ᠤᠷ ᠵᠢᠭᠠᠪᠠ᠃ ᠵᠡᠯᠮᠡ ᠶ᠋ᠢᠨ ᠭᠠᠭᠴᠠ ᠬᠥᠪᠡᠭᠦᠨ ᠴᠡᠴᠡᠭ ᠢ᠋ ᠲᠠᠢᠽᠦ ᠶ᠋ᠢᠨ ᠭᠠᠭᠴᠠ ᠠᠪᠠᠬᠠᠢ ᠰᠡᠴᠡᠨ ᠰᠡᠴᠢᠭᠯᠢᠭ ᠦ᠋ᠨ ᠬᠦᠷᠭᠡᠨ ᠭᠡᠮᠡᠨ ᠵᠢᠭᠠᠵᠤ᠂ ᠶᠢᠰᠦᠨ ᠥᠷᠯᠥᠭ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠨ᠂ ᠶᠢᠰᠦᠨ ᠡᠩ ᠦ᠋ᠨ ᠲᠦᠰᠢᠮᠡᠳ ᠤᠷᠤᠭ ᠪᠠᠷᠢᠭᠰᠠᠨ ᠬᠦᠨᠳᠦ ᠬᠡᠰᠢᠭ ᠦ᠋ᠨ ᠲᠣᠯᠣᠭᠠᠢ ᠮᠥᠷᠭᠥᠵᠦ ᠡᠬᠢᠨ ᠦ᠌ ᠭᠬᠢᠪ ᠲᠠᠲᠠᠬᠤ ᠶᠣᠰᠣᠯᠠᠯ ᠢ᠋ ᠲᠣᠭᠲᠠᠭᠠᠪᠠ᠃ ᠳᠠᠭᠠᠯᠳᠤᠭᠠ ᠪᠠᠰᠠ ᠬᠠᠪᠤᠲᠤ ᠬᠠᠰᠠᠷ ᠪᠦᠬᠦ ᠪᠡᠯᠭᠦᠳᠡᠢ ᠣᠢᠲᠤ ᠣᠴᠢᠭ ᠤᠷᠠᠨ ᠭᠠᠴᠤᠭ ᠨᠠᠷ ᠤ᠋ᠨ ᠠᠪᠠᠬᠠᠢ ᠨᠠᠷ ᠢ᠋ ᠭᠠᠳᠠᠭᠠᠳᠤ ᠳᠠᠭᠠᠭᠰᠠᠨ ᠬᠠᠳ ᠤ᠋ᠨ ᠬᠡᠦᠬᠡᠳ ᠲᠣᠷ ᠵᠢᠭᠠᠬᠤ ᠶ᠋ᠢ ᠵᠠᠷᠯᠠᠵᠤ ᠶᠠᠪᠤᠭᠤᠯᠪᠠ᠃ ᠡᠭᠦᠨᠴᠡ ᠶᠢᠰᠦᠨ ᠡᠩ ᠯᠠᠪ ᠤᠷᠤᠭ ᠪᠠᠷᠢᠬᠤ ᠶ᠋ᠢ ᠲᠣᠭᠲᠠᠪᠠ᠃ ᠣᠯᠠᠨ ᠲᠦᠰᠢᠮᠡᠳ ᠶᠠᠰᠤ ᠴᠢᠮᠦᠭᠡᠨ ᠡᠴᠡ ᠰᠢᠲᠦᠵᠦ ᠮᠡᠳᠡᠭᠦᠯᠦᠷᠦᠨ᠄《 ᠴᠣᠬᠣᠮ ᠭᠠᠳᠠᠭᠠᠳᠤ ᠬᠠᠳ ᠨᠣᠶᠠᠳ ᠳᠠᠭᠠᠭᠰᠠᠨ ᠠᠨᠤ ᠮᠠᠰᠢ ᠣᠯᠠᠨ᠂ ᠡᠵᠡᠨ ᠦ᠌ ᠠᠪᠠᠬᠠᠢ ᠶ᠋ᠢ ᠲᠡᠭᠦᠨ ᠯᠦ᠋ᠭᠡ ᠤᠷᠤᠭ ᠪᠠᠷᠢᠪᠠᠰᠤ ᠵᠣᠬᠢᠬᠤ ᠪᠥᠭᠡᠲᠡᠯᠡ ᠡᠳᠦᠭᠡ ᠣᠨᠴᠠ ᠮᠠᠨ ᠤ᠋ ᠠᠯᠪᠠᠲᠤ ᠪᠣᠭᠣᠯ ᠯᠤᠭᠠ ᠪᠠᠨ ᠤᠷᠤᠭ ᠪᠠᠷᠢᠯᠴᠠᠭᠰᠠᠨ ᠳᠣᠲᠣᠨᠠ ᠦᠵᠡᠭᠰᠡᠨ ᠥᠷᠥᠰᠢᠶᠡᠯ ᠠᠰᠤᠷᠤ ᠬᠡᠲᠦᠢᠳᠪᠡ᠃ ᠨᠡᠩ ᠪᠠᠰᠠ ᠥᠨᠥ ᠭᠠᠭᠴᠠ ᠠᠪᠠᠬᠠᠢ ᠶ᠋ᠢ ᠮᠥᠨ ᠪᠠᠷᠠᠭᠤᠨ ᠰᠠᠢᠳ ᠤ᠋ᠨ ᠲᠣᠭᠠᠨ ᠳ᠋ᠤᠷ ᠣᠷᠣᠭᠰᠠᠨ ᠵᠡᠯᠮᠡ ᠶ᠋ᠢᠨ ᠬᠥᠪᠡᠭᠦᠨ ᠳ᠋ᠦ᠍ᠷ ᠬᠣᠯᠪᠣᠬᠤ ᠶ᠋ᠢ ᠲᠣᠭᠲᠠᠭᠰᠠᠨ ᠡᠨᠡ ᠥᠷᠥᠰᠢᠶᠡᠯ᠂ ᠮᠠᠨ ᠤ᠋ ᠶᠢᠰᠦᠨ ᠡᠩ ᠦ᠋ᠨ ᠲᠦᠰᠢᠮᠡᠳ ᠨᠡᠢᠲᠡ ᠳ᠋ᠦ᠍ᠷ ᠲᠦᠭᠡᠮᠡᠯ ᠭᠡᠷᠡᠯ ᠲᠡᠢ ᠪᠣᠯᠵᠤ᠂ ᠭᠠᠳᠠᠭᠠᠳᠤ ᠳᠠᠭᠠᠭᠰᠠᠨ ᠬᠠᠳ ᠠ᠋ᠴᠠ ᠳᠠᠪᠠᠵᠤᠬᠤᠢ᠃ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠮᠦᠰᠢᠶᠡᠵᠦ ᠵᠠᠷᠯᠢᠭ ᠪᠣᠯᠤᠷᠤᠨ᠄《 ᠪᠢ ᠭᠠᠭᠴᠠ ᠬᠡᠦᠬᠡᠨ ᠢ᠋ᠶ᠋ᠡᠨ ᠵᠡᠯᠮᠡ ᠶ᠋ᠢᠨ ᠬᠥᠪᠡᠭᠦᠨ ᠳ᠋ᠦ᠍ᠷ ᠬᠣᠯᠪᠣᠬᠤ ᠠᠨᠤ ᠣᠨᠴᠠ ᠵᠠᠯᠮᠠ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠰᠦᠷᠲᠡᠢ ᠭᠡᠷᠡᠯ ᠲᠡᠢ᠂ ᠰᠡᠴᠡᠨ ᠰᠡᠷᠭᠦᠯᠡᠩ ᠳ᠋ᠦ᠍ᠷ ᠠᠨᠤ ᠪᠠᠬᠠᠷᠬᠠᠵᠤ ᠬᠣᠯᠪᠣᠭᠰᠠᠨ ᠠᠨᠤ ᠪᠤᠰᠤ᠂ ᠡᠨᠡ ᠢᠨᠤ ᠰᠠᠷᠯᠠᠭ ᠤ᠋ᠨ ᠲᠠᠪᠤᠨ ᠮᠣᠵᠢ ᠶ᠋ᠢ ᠳᠠᠭᠠᠭᠤᠯᠬᠤ ᠲᠤᠬᠠᠢ ᠵᠠᠯᠮᠠ ᠡᠴᠢᠭᠡ ᠡᠬᠡ ᠡᠴᠡ ᠪᠡᠨ ᠲᠥᠷᠥᠭᠰᠡᠨ ᠮᠢᠬᠠ ᠪᠠᠨ ᠡᠪᠳᠡᠵᠦ ᠮᠥᠷᠥ ᠪᠡᠨ ᠴᠠᠪᠴᠢᠭᠰᠠᠨ ᠭᠠᠪᠢᠶᠠ ᠳ᠋ᠤᠷ ᠪᠢ ᠮᠥᠨ ᠪᠡᠶᠡ ᠡᠴᠡ ᠪᠡᠨ ᠰᠢᠮᠡᠳᠦᠭᠰᠡᠨ ᠴᠢᠰᠤ ᠰᠢᠮᠡ ᠪᠡᠨ ᠥᠭᠴᠦ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠳ᠋ᠦ᠍ᠷ ᠢᠨᠤ ᠬᠥᠬᠢᠭᠦᠯᠵᠦ᠂ ᠤᠯᠤᠰ ᠲᠥᠷᠥ ᠡᠳᠦᠵᠦ ᠪᠦᠲᠦᠬᠦ ᠶ᠋ᠢᠨ ᠶᠡᠬᠡ ᠶᠣᠰᠣ ᠳ᠋ᠤᠷ ᠨᠡᠢᠴᠡᠭᠦᠯᠪᠡ᠃ ᠲᠡᠢᠨ ᠬᠦ᠌ ᠬᠦᠷᠭᠡᠨ ᠪᠣᠯᠭᠠᠨ ᠵᠢᠭᠠᠭᠰᠠᠨ ᠴᠡᠴᠡᠭ ᠦ᠋ᠨ ᠡᠯᠡ ᠶ᠋ᠢ ᠴᠥᠮ ᠮᠢᠨᠦ ᠳᠥᠷᠪᠡᠨ ᠬᠥᠪᠡᠭᠦᠨ ᠯᠦ᠋ᠭᠡ ᠠᠳᠠᠯᠢ ᠰᠠᠴᠠᠭᠤ ᠪᠣᠯᠭᠠ᠃ ᠣᠳᠣᠨ ᠬᠦᠷᠢᠶᠡ ᠳ᠋ᠦ᠍ᠷ ᠬᠠᠮᠲᠤ ᠪᠢᠴᠢᠭ ᠴᠡᠷᠢᠭ ᠢ᠋ ᠪᠣᠯᠪᠠᠰᠤᠷᠠᠭᠤᠯ ! 》ᠭᠡᠮᠡᠨ ᠵᠠᠬᠢᠪᠠ᠃ ᠡᠭᠦᠨ ᠳ᠋ᠦ᠍ᠷ ᠶᠢᠰᠦᠨ ᠡᠩ ᠦ᠋ᠨ ᠲᠦᠰᠢᠮᠡᠳ ᠲᠣᠷᠭᠠᠨ ᠰᠢᠷᠠ᠂ ᠮᠤᠬᠤᠯᠢ ᠠ᠋ᠴᠠ ᠲᠡᠷᠢᠭᠦᠯᠡᠨ ᠲᠠᠢᠽᠦ ᠶ᠋ᠢᠨ ᠦᠨᠡᠨ ᠥᠷᠥᠰᠢᠶᠡᠯ ᠢ᠋ ᠰᠢᠲᠦᠵᠦ ᠨᠢᠳᠦᠨ ᠦ᠌ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠮᠠᠭᠲᠠᠯᠴᠠᠪᠠ᠃ ᠲᠡᠳᠦᠢ ᠵᠠᠯᠮᠠ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠪᠴᠤ ᠭᠤᠷᠪᠠᠨ ᠦᠶᠡ ᠪᠡᠷ ᠶᠢᠰᠦ ᠶᠢᠰᠦᠨ ᠦ᠌ ᠪᠡᠯᠡᠭ ᠪᠠᠷᠢᠵᠤ ᠬᠦᠨᠳᠦ ᠬᠡᠰᠢᠭ ᠲᠣᠷ ᠮᠥᠷᠭᠥᠪᠡ ᠃ ᠡᠭᠦᠨ ᠡᠴᠡ ᠵᠠᠯᠮᠠ ᠶ᠋ᠢᠨ ᠨᠢᠭᠡᠨ ᠠᠢᠮᠠᠭ ᠲᠣᠷᠭᠠᠨ ᠰᠢᠷᠠ ᠮᠤᠬᠤᠯᠢ ᠨᠠᠷ ᠯᠤᠭᠠ ᠵᠡᠷᠭᠡᠴᠡᠵᠦ᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠴᠡᠴᠡᠭ ᠢ᠋ ᠣᠯᠠᠨ ᠲᠦᠰᠢᠮᠡᠳ ᠨᠠᠷ ᠪᠠᠭᠠ ᠡᠵᠡᠳ ᠦ᠋ᠨ ᠶᠣᠰᠣᠭᠠᠷ ᠬᠦᠨᠳᠦᠯᠡᠪᠡ᠃
ᠲᠡᠳᠦᠢ ᠲᠠᠢᠽᠦ ᠰᠢᠯᠭᠠᠵᠤ ᠲᠣᠭᠲᠠᠭᠰᠠᠨ ᠳᠥᠷᠪᠡᠨ ᠪᠡᠷᠢ ᠪᠡᠨ ᠵᠠᠷᠴᠢᠭᠤᠲᠠᠢ ᠡᠪᠦᠭᠡᠨ ᠢ᠋ ᠠᠴᠢᠷᠠᠵᠤ ᠰᠢᠨᠵᠢᠭᠦᠯᠦᠭᠰᠡᠨ ᠳ᠋ᠦ᠍ᠷ ᠵᠠᠷᠴᠢᠭᠤᠲᠠᠢ ᠡᠨᠡ ᠦᠶᠡ ᠳ᠋ᠦ᠍ᠷ ᠨᠠᠶᠠᠨ ᠨᠠᠰᠤ ᠭᠠᠷᠴᠤ ᠮᠠᠰᠢ ᠬᠥᠭᠰᠢᠷᠡᠨ ᠬᠢᠷᠢ ᠠᠪᠤᠷᠢ ᠮᠠᠰᠢ ᠶᠡᠬᠡ ᠪᠣᠯᠤᠭᠰᠠᠨ ᠤ᠋ ᠳᠡᠭᠡᠷᠡ᠂ ᠨᠡᠩ ᠪᠠᠰᠠ ᠠᠴᠢ ᠠᠨᠤ ᠤᠯᠤᠰ ᠤ᠋ᠨ ᠬᠦᠷᠭᠡᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠴᠥᠮ ᠬᠦᠨᠳᠦᠯᠡᠮᠦᠢ᠃ ᠲᠡᠳᠦᠢ ᠲᠠᠢᠽᠦ ᠶ᠋ᠢᠨ ᠵᠠᠬᠢᠶᠠ ᠪᠠᠷ ᠮᠤᠬᠤᠯᠢ ᠶ᠋ᠢᠨ ᠬᠣᠶᠠᠳᠤᠭᠠᠷ ᠥᠬᠢᠨ ᠰᠠᠷᠠᠨ ᠬᠥᠬᠥᠭᠡ᠂ ᠪᠤᠭᠤᠷᠵᠢ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠥᠬᠢᠨ ᠤᠨᠳᠤᠷᠭᠠ ᠭᠡᠷᠡᠯ᠂ ᠠᠵᠢᠨᠠᠢ ᠮᠡᠷᠭᠡᠨ ᠦ᠌ ᠭᠠᠭᠴᠠ ᠥᠬᠢᠨ ᠬᠳ ᠨᠠᠭᠤᠷ᠂ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠤ᠋ᠨ ᠶᠡᠬᠡ ᠥᠬᠢᠨ ᠣᠭ᠌ᠶᠤ ᠶ᠋ᠢᠨ ᠵᠦᠯᠭᠡ ᠳᠥᠷᠪᠡᠨ ᠠᠪᠠᠬᠠᠢ ᠶ᠋ᠢ ᠰᠢᠨᠵᠢᠵᠦ ᠦᠵᠡᠭᠡᠳ ᠲᠠᠢᠽᠦ ᠶ᠋ᠢᠨ ᠰᠣᠶᠣᠷᠬᠠᠭᠰᠠᠨ ᠠᠯᠲᠠᠨ ᠰᠢᠪᠠᠭᠠ ᠰᠢᠷᠠ ᠰᠠᠴᠤᠭᠲᠤ ᠲᠠᠶᠠᠭ ᠢ᠋ ᠲᠤᠯᠤᠭᠰᠠᠭᠠᠷ ᠢᠷᠡᠵᠦ ᠂ ᠲᠠᠶᠠᠭ ᠢ᠋ᠶ᠋ᠠᠨ ᠬᠥᠮᠦᠨ ᠳ᠋ᠦ᠍ᠷ ᠪᠠᠷᠢᠭᠤᠯᠵᠤ ᠥᠪᠡᠷ ᠢ᠋ᠶ᠋ᠡᠨ ᠠᠯᠭᠤᠷ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ᠄《 ᠵᠦᠰᠦᠨ ᠡᠬᠡ ᠶ᠋ᠢᠨ ᠬᠣᠶᠠᠷ ᠠᠴᠢ ᠥᠬᠢᠳ ᠠᠵᠢᠨᠠᠢ ᠶ᠋ᠢᠨ ᠠᠪᠠᠬᠠᠢ ᠬᠠᠭᠠᠨ ᠤ᠋ ᠬᠠᠲᠤᠨ ᠤ᠋ ᠪᠤᠶᠠᠨ ᠮᠠᠭᠠᠳ ᠪᠣᠢ᠂ ᠭᠠᠭᠴᠠ ᠬᠠᠭᠠᠨ ᠤ᠋ ᠡᠬᠡ ᠪᠣᠯᠬᠤ ᠰᠢᠨᠵᠢ ᠦᠭᠡᠢ᠃ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠤ᠋ᠨ ᠠᠪᠠᠬᠠᠢ ᠠᠨᠤ ᠬᠠᠭᠠᠨ ᠤ᠋ ᠬᠠᠲᠤᠨ ᠤ᠋ ᠪᠠᠢᠳᠠᠯ ᠲᠣᠳᠣᠷᠬᠠᠢ ᠦᠭᠡᠢ ᠪᠣᠯᠪᠠᠴᠤ ᠮᠠᠭᠠᠳ ᠯᠠᠪ ᠪᠣᠭᠳᠠ ᠬᠠᠭᠠᠨ ᠢ᠋ ᠮᠡᠨᠳᠦᠯᠡᠵᠦ ᠳᠥᠷᠪᠡᠨ ᠳᠠᠯᠠᠢ ᠶ᠋ᠢᠨ ᠡᠬᠡ ᠪᠣᠯᠬᠤ ᠰᠢᠨᠵᠢ ᠲᠡᠭᠦᠰᠴᠦᠬᠦᠢ᠂ ᠪᠤᠰᠤᠳ ᠠᠨᠤ ᠴᠥᠮ ᠬᠠᠭᠠᠨ ᠤ᠋ ᠬᠠᠮᠠᠭᠠᠯᠠᠯ ᠳ᠋ᠤᠷ ᠪᠠᠭᠲᠠᠵᠤ ᠪᠣᠯᠤᠮᠤᠢ᠃ 》ᠭᠡᠮᠡᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠠᠭᠠᠷᠠᠨ ᠰᠢᠳᠠᠷ ᠰᠠᠢᠳ ᠤ᠋ᠳ ᠢ᠋ᠶ᠋ᠠᠷ ᠲᠦᠰᠢᠭᠦᠯᠦᠨ ᠪᠤᠰᠬᠠᠯᠭᠠᠵᠤ ᠳᠡᠷᠭᠡᠳᠡ ᠪᠡᠨ ᠰᠠᠭᠤᠳᠠᠯ ᠬᠠᠢᠷᠠᠯᠠᠨ᠂ ᠲᠣᠷᠭᠠᠨ ᠰᠢᠷᠠ᠂ ᠮᠤᠬᠤᠯᠢ᠂ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ ᠨᠠᠷ ᠢ᠋ ᠮᠥᠨ ᠰᠠᠭᠤᠯᠭᠠᠵᠤ ᠬᠤᠷᠢᠮ ᠬᠠᠢᠷᠠᠯᠠᠭᠰᠠᠨᠠ᠂ ᠲᠦᠰᠢᠮᠡᠳ ᠨᠠᠷ ᠮᠥᠷᠭᠥᠵᠦ ᠬᠤᠷᠢᠮ ᠳ᠋ᠤᠷ ᠰᠠᠭᠤᠪᠠ᠃ ᠲᠡᠢᠨ ᠬᠦ᠌ ᠬᠤᠷᠢᠮᠯᠠᠬᠤ ᠵᠠᠪᠰᠠᠷ ᠮᠤᠬᠤᠯᠢ᠂ ᠪᠤᠭᠤᠷᠵᠢ ᠨᠠᠷ ᠭᠠᠳᠠᠭᠠᠳᠤ ᠤᠯᠤᠰ ᠠᠢᠮᠠᠭ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠠᠭᠰᠠᠨ᠂ ᠬᠡᠯᠡᠯᠴᠡᠵᠦ ᠳᠠᠭᠠᠭᠤᠯᠤᠭᠰᠠᠨ᠂ ᠵᠢᠷᠤᠮ ᠢ᠋ᠶ᠋ᠠᠷ ᠳᠠᠭᠠᠭᠤᠯᠤᠭᠰᠠᠨ᠂ ᠳᠠᠢᠯᠠᠵᠤ ᠳᠠᠭᠠᠭᠤᠯᠤᠭᠰᠠᠨ ᠣᠯᠠᠨ ᠠᠢᠮᠠᠭ ᠤᠯᠤᠰ ᠢ᠋ ᠬᠢᠨᠠᠨ ᠵᠠᠯᠭᠠᠨ ᠪᠠᠢᠴᠠᠭᠠᠵᠤ ᠳᠡᠰ ᠵᠡᠷᠭᠡ ᠶ᠋ᠢ ᠲᠣᠭᠲᠠᠭᠠᠨ ᠬᠠᠷᠢᠯᠴᠠᠨ ᠴᠢᠷᠮᠠᠢᠯᠴᠠᠬᠤ ᠶ᠋ᠢ ᠬᠥᠭᠵᠢᠭᠦᠯᠵᠦ᠂ ᠣᠳᠣ ᠡᠮᠦᠨᠡ ᠳᠣᠷᠣᠨᠠ ᠶ᠋ᠢ ᠳᠠᠢᠯᠠᠬᠤ ᠶ᠋ᠢ ᠵᠥᠪᠳᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠪᠡᠶᠡᠰᠦᠨ ᠵᠠᠬᠢᠷᠤᠨ᠄《 ᠨᠠᠳᠠ ᠳ᠋ᠤᠷ ᠮᠥᠨ ᠡᠢᠮᠦ ᠰᠠᠨᠠᠭᠠᠨ ᠠᠮᠤᠢ᠂ ᠭᠠᠭᠴᠠ ᠣᠯᠠᠨ ᠴᠡᠷᠢᠭ ᠬᠡᠲᠦᠷᠬᠡᠢ ᠴᠢᠯᠡᠭᠡᠷᠡᠭᠰᠡᠨ ᠪᠣᠯᠭᠤᠵᠠᠢ ᠭᠡᠮᠡᠨ ᠳᠠᠭᠤᠨ ᠭᠠᠷᠤᠭᠠᠳᠤᠢ᠂ ᠰᠠᠢᠳ ᠤ᠋ᠳ ᠲᠠᠨ ᠤ᠋ ᠦᠵᠡᠬᠦᠢ ᠳ᠋ᠦ᠍ᠷ ᠮᠠᠨ ᠤ᠋ ᠬᠣᠢᠲᠤ ᠭᠠᠵᠠᠷ ᠢ᠋ ᠮᠠᠭᠠᠳ ᠲᠦᠪᠰᠢᠨ ᠪᠣᠯᠪᠠ ᠭᠡᠮᠡᠨ ᠪᠠᠲᠤᠯᠠᠵᠤ ᠪᠣᠯᠬᠤᠢ ᠤᠤ ? 》ᠲᠣᠷᠭᠠᠨ ᠰᠢᠷᠠ᠂ ᠵᠠᠷᠴᠢᠭᠤᠲᠠᠢ᠂ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ ᠳᠥᠷᠪᠡᠭᠦᠯᠡ ᠮᠡᠳᠡᠭᠦᠯᠦᠷᠦᠨ᠄《 ᠡᠨᠡ ᠨᠡᠢᠭᠡᠮ ᠲᠦᠪᠰᠢᠨ ᠪᠣᠯᠤᠭᠰᠠᠨ ᠠᠨᠤ ᠭᠠᠭᠴᠠ ᠡᠵᠡᠨ ᠦ᠌ ᠰᠦᠷ ᠵᠡᠷᠭᠡ ᠪᠡᠷ ᠣᠷᠣᠭᠤᠯᠤᠭᠰᠠᠨ ᠠᠨᠤ ᠪᠤᠰᠤ᠂ ᠶᠡᠬᠡ ᠬᠠᠭᠠᠰ ᠴᠥᠮ ᠥᠷᠥᠰᠢᠶᠡᠯ ᠡᠷᠳᠡᠮ ᠢ᠋ᠶ᠋ᠡᠷ ᠰᠡᠳᠬᠢᠯ ᠢ᠋ ᠪᠢᠰᠢᠷᠡᠭᠦᠯᠦᠭᠰᠡᠨ ᠲᠤᠯᠠ ᠯᠠᠪ ᠥᠪᠡᠷᠡ ᠬᠤᠪᠢᠰᠬᠠᠯ ᠦᠯᠦ ᠳᠡᠭᠳᠡᠮᠦᠢ ᠢᠠ᠃ 》 ᠮᠤᠬᠤᠯᠢ ᠥᠭᠦᠯᠡᠷᠦᠨ᠄《 ᠲᠡᠢᠨ ᠥᠭᠦᠯᠡᠵᠦ ᠦᠯᠦ ᠪᠣᠯᠤᠮᠤᠢ᠃ ᠤᠯᠤᠰ ᠲᠥᠷᠥ ᠶ᠋ᠢ ᠨᠡᠢᠭᠡᠮ ᠡᠩᠬᠡ ᠪᠣᠯᠭᠠᠮᠤᠢ ᠬᠡᠮᠡᠭᠴᠢ ᠴᠠᠭ ᠭᠱᠠᠨ ᠠᠯᠤᠰᠯᠠᠵᠤ ᠦᠯᠦ ᠪᠣᠯᠤᠮᠤᠢ᠃ ᠨᠢᠭᠡᠨ ᠭᠠᠵᠠᠷ ᠢ᠋ ᠥᠴᠦᠬᠡᠨ ᠣᠰᠣᠯᠳᠠᠪᠠᠰᠤ ᠲᠡᠷᠡ ᠭᠠᠵᠠᠷ ᠳᠠᠷᠤᠢ ᠠᠯᠳᠠᠰᠢ ᠭᠠᠷᠤᠮᠤᠢ᠃ ᠡᠳᠦᠭᠡ ᠪᠠᠷᠠᠭᠤᠨ ᠡᠮᠦᠨᠡ ᠬᠠᠷᠯᠢᠭᠤᠳ ᠠᠢᠮᠠᠭ ᠤ᠋ᠨ ᠬᠠᠷᠠ ᠶᠡᠬᠡᠲᠦ ᠠᠷᠰᠯᠠᠨ ᠬᠠᠭᠠᠨ ᠪᠣᠢ᠃ ᠵᠡᠭᠦᠨ ᠡᠮᠦᠨᠡᠲᠦ ᠳ᠋ᠦ᠍ᠷ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠠᠪᠠᠭᠠ ᠪᠤᠯᠤᠤ ᠬᠢᠭᠡᠳ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠴᠢᠦᠢ ᠴᠦ᠍ ᠯᠢᠦᠢ ᠪᠣᠢ᠃ ᠵᠡᠭᠦᠨ ᠬᠣᠢᠲᠤ ᠮᠠᠢᠯᠵᠢ ᠠᠢᠮᠠᠭ ᠬᠡᠳᠦᠢ ᠮᠠᠨ ᠢ᠋ ᠳᠠᠭᠠᠭᠰᠠᠨ ᠪᠣᠯᠪᠠᠴᠤ ᠡᠵᠡᠨ ᠢᠨᠦ ᠲᠣᠳᠣ ᠪᠠᠰᠠ ᠠᠭᠰᠠᠭᠠᠷ᠃ ᠡᠨᠡ ᠭᠤᠷᠪᠠ ᠪᠣᠯᠪᠠᠰᠤ ᠮᠠᠨ ᠤ᠋ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠥᠷᠭᠡᠰᠦ ᠰᠤᠨᠳᠤᠤ ᠮᠥᠨ᠃ ᠡᠳᠦᠭᠡ ᠨᠠᠢ᠍ᠮᠠᠨ ᠤ᠋ ᠪᠤᠯᠤᠤ᠂ ᠴᠢᠦᠢ ᠴᠦ᠍ ᠯᠢᠦᠢ ᠡᠴᠢᠭᠡ ᠬᠥᠪᠡᠭᠦᠨ ᠪᠠ ᠮᠠᠢᠯᠵᠢ ᠠᠢᠮᠠᠭ ᠤ᠋ᠨ ᠲᠣᠳᠣ ᠬᠡᠳᠦᠢ ᠤᠯᠤᠰ ᠠᠢᠮᠠᠭ ᠦᠭᠡᠢ ᠭᠡᠪᠡᠴᠦ ᠶᠠᠭᠤᠨᠠᠢ ᠵᠦᠭᠡᠷ ᠵᠣᠭᠰᠣᠬᠤ ᠪᠣᠢ ! ᠪᠠᠷᠠᠭᠤᠨ ᠡᠮᠦᠨᠡ ᠬᠠᠷᠯᠢᠭᠤᠳ ᠤᠯᠤᠰ ᠤ᠋ᠨ ᠠᠷᠰᠯᠠᠨ ᠬᠠᠭᠠᠨ ᠤ᠋ ᠤᠯᠤᠰ ᠪᠠᠶᠠᠨ᠂ ᠴᠡᠷᠢᠭ ᠴᠢᠭᠢᠷᠠᠭ᠂ ᠭᠠᠵᠠᠷ ᠠᠭᠤᠳᠠᠮ ᠮᠣᠵᠢ ᠣᠯᠠᠨ ᠡᠨᠡ ᠢᠨᠤ ᠨᠢᠳᠦᠨ ᠦ᠌ ᠡᠮᠦᠨᠡ ᠪᠠᠢᠬᠤ ᠳᠠᠢᠰᠤᠨ ᠪᠣᠯᠠᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ᠂ ᠮᠤᠬᠤᠯᠢ ᠶ᠋ᠢ᠄《 ᠤᠭᠲᠤᠵᠤ ᠮᠡᠳᠡᠬᠦ ᠢᠨᠤ ᠬᠣᠣᠰ ᠦᠭᠡᠢ ! 》 ᠭᠡᠮᠡᠨ ᠠᠷᠢᠬᠢ ᠰᠣᠶᠣᠷᠬᠠᠵᠤ ᠲᠠᠪᠤᠨ ᠲᠦᠰᠢᠮᠡᠳ ᠦ᠋ᠨ ᠬᠤᠷᠢᠮ ᠲᠠᠷᠬᠠᠭᠰᠠᠨ ᠬᠣᠢᠨᠠ᠂ ᠣᠯᠠᠨ ᠠᠢᠮᠠᠭ ᠢ᠋ ᠢᠯᠭᠠᠨ ᠰᠠᠯᠭᠠᠨ ᠳᠡᠰ ᠵᠡᠷᠭᠡ ᠶ᠋ᠢ ᠲᠣᠭᠲᠠᠭᠠᠮᠤᠢ ᠭᠡᠮᠡᠨ ᠵᠠᠷᠯᠠᠵᠤ᠂ ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠤ᠋ ᠡᠳᠦᠷ ᠶᠡᠬᠡ ᠴᠢᠭᠤᠯᠭᠠᠨ ᠴᠢᠭᠤᠯᠤᠮᠤᠢ ᠭᠡᠮᠡᠨ ᠵᠠᠷᠯᠠᠪᠠ᠃ ᠤᠳᠠᠭᠰᠠᠨ ᠦᠭᠡᠢ ᠵᠤᠨ ᠥᠩᠭᠡᠷᠡᠨ ᠨᠠᠮᠤᠷ ᠤ᠋ᠨ ᠳᠤᠮᠳᠠᠳᠤ ᠰᠠᠷᠠ ᠪᠣᠯᠤᠭᠰᠠᠨ ᠳ᠋ᠤᠷ ᠲᠠᠢᠽᠦ ᠳᠦᠭᠦᠯᠡ ᠮᠥᠷᠡᠨ ᠦ᠌ ᠶᠡᠬᠡ ᠲᠠᠯᠠ ᠶ᠋ᠢᠨ ᠥᠨᠳᠥᠷ ᠳᠣᠪᠣ ᠶ᠋ᠢᠨ ᠵᠠᠬᠠ ᠳ᠋ᠤᠷ ᠮᠥᠩᠭᠥᠨ ᠦ᠌ ᠣᠷᠣᠢᠲᠤ ᠠᠷᠰᠯᠠᠨᠲᠤ ᠲᠠᠭᠲᠤ ᠳ᠋ᠤᠷ ᠰᠠᠭᠤᠵᠤ᠂ ᠣᠯᠠᠨ ᠰᠡᠴᠡᠳ ᠪᠠᠭᠠᠲᠤᠳ ᠰᠠᠢᠳ ᠲᠦᠰᠢᠮᠡᠳ ᠢᠨᠤ ᠬᠤᠷᠠᠵᠤ ᠂ ᠭᠠᠳᠠᠭᠠᠳᠤ ᠣᠯᠠᠨ ᠠᠢᠮᠠᠭ ᠤ᠋ᠨ ᠡᠵᠡᠳ ᠪᠠ ᠡᠵᠡᠯᠡᠭᠴᠢᠳ ᠢ᠋ ᠳᠣᠪᠣ ᠶ᠋ᠢᠨ ᠳᠣᠣᠷᠠ ᠵᠢᠭᠰᠠᠭᠠᠪᠠ᠃
ᠲᠡᠳᠦᠢ ᠮᠤᠬᠤᠯᠢ ᠣᠯᠠᠨ ᠠᠢᠮᠠᠭ ᠤ᠋ᠳ ᠤ᠋ᠨ ᠨᠡᠷᠡᠰ ᠢ᠋ ᠪᠢᠴᠢᠭᠯᠡᠵᠦ ᠲᠠᠢᠽᠦ ᠳ᠋ᠦ᠍ᠷ ᠡᠷᠭᠦᠪᠡ᠃ ᠲᠡᠭᠦᠨ ᠢ᠋ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠳ᠋ᠤᠷ ᠥᠭᠴᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠳᠠᠭᠤᠳᠠᠭᠤᠯᠪᠠ᠃ ᠲᠡᠭᠦᠨ ᠦ᠌ ᠦᠭᠡ᠄《 ᠡᠷᠢᠵᠦ ᠳ᠋ᠡᠭᠡᠨ ᠴᠠᠭ ᠢ᠋ ᠮᠡᠳᠡᠭᠰᠡᠨ ᠶᠡᠬᠡ ᠪᠠᠭᠠ ᠤᠯᠤᠰ ᠠᠢᠮᠠᠭ ᠤ᠋ᠨ ᠨᠡᠷᠡᠰ ᠢᠨᠦ᠄ ᠬᠣᠩᠭᠢᠷᠠᠳ᠂ ᠮᠡᠷᠭᠢᠳ᠂ ᠮᠠᠩᠨᠣᠭᠲᠤ᠂ ᠵᠤᠯᠠᠢ᠂ ᠦᠯᠬᠦ᠂ ᠭᠣᠷᠯᠤᠰᠤᠨ᠂ ᠭᠤᠷᠪᠠᠨ ᠲᠣᠷᠭᠤᠳ᠂ ᠬᠠᠲᠠᠭᠢᠨ᠂ ᠴᠢᠮᠡᠳ᠂ ᠢᠵᠢᠯᠵᠢ᠂ ᠴᠢᠵᠢᠯᠵᠢ᠂ ᠵᠠᠯᠠᠢᠳ᠂ ᠬᠠᠯᠬᠠ᠂ ᠴᠠᠬᠠᠷ᠂ ᠠᠩᠬᠡᠷᠢᠭ᠋᠂ ᠣᠢᠷᠠᠳ᠂ ᠥᠭᠡᠯᠦᠨ᠂ ᠰᠡᠮᠦ᠂ ᠦᠦᠰᠢᠨ᠂ ᠬᠠᠷᠠ ᠴᠡᠷᠢᠭ᠂ ᠰᠠᠯᠴᠤᠳ᠂ ᠣᠷᠢᠶᠠᠩᠬᠠᠨ᠂ ᠪᠢᠳᠢᠭᠦᠳ᠂ ᠬᠢᠯᠦᠭᠡᠳ᠂ ᠮᠢᠭᠠᠰ᠂ ᠣᠷᠣᠩᠭᠠ᠂ ᠤᠷᠠᠳ᠂ ᠰᠥᠨᠢᠳ᠂ ᠳᠥᠷᠪᠡᠳ᠂ ᠴᠣᠯᠳᠠᠨ᠂ ᠬᠣᠩᠬᠢᠨ᠂ ᠣᠢᠷᠠᠳ᠂ ᠲᠦᠮᠡᠳ᠂ ᠣᠵᠣᠩᠭᠠ᠂ ᠬᠣᠢᠴᠢ᠂ ᠡᠳ᠋᠂ ᠽᠢ᠂ ᠵᠤᠳ᠂ ᠬᠠᠰᠠᠭ᠂ ᠠᠤᠬᠠᠨ᠂ ᠪᠠᠰᠤᠳ᠂ ᠪᠢᠷᠯᠡᠰ᠂ ᠪᠠᠭᠠᠷᠢᠨ᠂ ᠸᠠᠩᠬᠦᠪ᠂ ᠪᠦᠲᠦᠨᠡ᠂ ᠪᠦᠷᠦᠳ᠂ ᠤᠨᠠᠢ᠍ᠳ᠂ ᠭᠡᠴᠦᠳ᠂ ᠦᠵᠢᠶᠡᠳ᠂ ᠵᠦᠬᠡᠨ᠂ ᠵᠤᠤᠰ ᠮᠢᠩᠭᠠᠨ᠂ ᠵᠠᠯᠠᠢᠳ᠂ ᠲᠤᠭᠤᠴᠢᠨ᠂ ᠬᠣᠷᠢ᠂ ᠶᠦᠢᠷᠡᠳ᠂ ᠵᠥᠷᠭᠡᠨ᠂ ᠬᠠᠲᠠᠭᠢ᠂ ᠰᠠᠯᠴᠤᠭ᠂ ᠣᠯᠬᠤᠨᠤᠳ᠂ ᠮᠠᠩᠭᠤᠳ ᠡᠨᠡ ᠵᠢᠷᠠᠨ ᠨᠢᠭᠡᠨ ᠠᠢᠮᠠᠭ ᠤᠯᠤᠰ ᠂ ᠡᠭᠦᠨ ᠡᠴᠡ ᠭᠠᠳᠠᠨᠠ ᠴᠡᠷᠢᠭ ᠢ᠋ᠶ᠋ᠡᠷ ᠳᠠᠢᠯᠠᠨ ᠬᠤᠷᠢᠶᠠᠮᠵᠢᠯᠠᠭᠰᠠᠨ ᠣᠯᠠᠨ ᠠᠢᠮᠠᠭ ᠤᠯᠤᠰ ᠤ᠋ᠨ ᠨᠡᠷᠡ ᠢᠨᠤ᠄ ᠲᠠᠲ᠋ᠠᠷ᠂ ᠲᠠᠢᠴᠢᠭᠤᠳ᠂ ᠯᠠᠢᠬᠠᠳ᠂ ᠬᠠᠷᠠᠯᠳᠠᠢ᠂ ᠲᠠᠷᠭᠠᠳ᠂ ᠮᠠᠢᠯᠵᠢ᠂ ᠭᠣᠷᠯᠣᠰ᠂ ᠭᠣᠷᠯᠣᠳ᠂ ᠱᠠᠯᠵᠢᠭᠤᠳ᠂ ᠱᠠᠯᠵᠢᠲᠠᠢ᠂ ᠰᠠᠴᠤᠭᠠ᠂ ᠲᠤᠵᠢ᠂ ᠬᠣᠩᠵᠢᠯᠠ᠂ ᠬᠡᠷᠡᠢᠳ᠂ ᠵᠦᠷᠴᠢᠳ᠂ ᠪᠢᠳᠡᠭᠦᠳ᠂ ᠶᠦᠮ᠂ ᠰᠣᠯᠤᠩᠭᠤᠳ᠂ ᠰᠠᠷᠯᠠᠭ᠂ ᠲᠣᠭᠮᠤᠭ᠂ ᠡᠩᠭᠦᠳ᠂ ᠬᠠᠷᠯᠢᠭ᠂ ᠵᠠᠷᠤᠳ᠂ ᠨᠠᠢ᠍ᠮᠠᠨ ᠡᠨᠡ ᠬᠣᠷᠢᠨ ᠳᠥᠷᠪᠡᠨ ᠠᠢᠮᠠᠭ ᠤᠯᠤᠰ – ᠲᠡᠢᠨ ᠬᠦ᠌ ᠲᠠᠢᠽᠦ ᠵᠠᠬᠢᠶᠠ ᠪᠠᠭᠤᠯᠭᠠᠵᠤ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠠᠭᠰᠠᠨ ᠢ᠋ ᠳᠡᠭᠡᠳᠦ ᠪᠠᠭ᠂ ᠬᠡᠯᠡᠯᠴᠡᠵᠦ ᠳᠠᠭᠠᠭᠰᠠᠨ ᠢ᠋ ᠠᠨᠤ ᠳᠤᠮᠳᠠᠳᠤ ᠪᠠᠭ᠂ ᠳᠠᠢᠯᠠᠵᠤ ᠳᠠᠭᠠᠭᠤᠯᠤᠭᠰᠠᠨ ᠢ᠋ ᠳᠣᠣᠷᠠᠲᠤ ᠪᠠᠭ᠂ ᠡᠭᠦᠨ ᠡᠴᠡ ᠭᠠᠳᠠᠨᠠ ᠡᠵᠡᠨ ᠢᠨᠤ ᠦᠬᠦᠵᠦ ᠡᠵᠡᠯᠡᠭᠴᠢ ᠲᠡᠷᠢᠭᠦᠨ ᠦᠭᠡᠢ ᠠᠢᠮᠠᠭ ᠤ᠋ᠳ ᠢ᠋ ᠬᠤᠪᠢᠶᠠᠵᠤ ᠣᠯᠠᠨ ᠭᠠᠪᠢᠶᠠᠲᠤ ᠳᠡᠭᠦᠦ ᠨᠠᠷ ᠪᠠ ᠬᠦᠯᠦᠭ ᠪᠠᠭᠠᠲᠤᠳ ᠲᠤᠷ ᠬᠤᠪᠢᠶᠠᠨ ᠥᠭᠴᠦ ᠵᠠᠬᠢᠷᠤᠭᠤᠯᠵᠤ ᠨᠤᠲᠤᠭ ᠦᠨᠳᠦᠰᠦ ᠪᠣᠯᠭᠠᠪᠠ᠃ ᠲᠡᠢᠨ ᠬᠦ᠌ ᠮᠤᠬᠤᠯᠢ᠂ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ᠂ ᠴᠢᠯᠠᠭᠤᠨ ᠳᠥᠷᠪᠡᠭᠦᠯᠡ ᠶ᠋ᠢ ᠳᠥᠷᠪᠡᠨ ᠵᠣᠪᠬᠢᠰ ᠤ᠋ᠨ ᠥᠨᠴᠥᠭ ᠲᠣᠷ ᠭᠠᠷᠭᠠᠵᠤ ᠳᠥᠷᠪᠡᠨ ᠶᠡᠬᠡ ᠴᠢᠭᠤᠯᠭᠠᠨ ᠴᠢᠭᠤᠯᠭᠤᠯᠵᠤ᠂ ᠨᠡᠢᠲᠡ ᠤᠯᠤᠰ ᠤ᠋ᠨ ᠳᠣᠲᠣᠷᠠᠬᠢ ᠡᠷᠡᠰᠢᠭᠰᠡᠨ ᠴᠡᠷᠢᠭ ᠢᠷᠭᠡᠨ ᠦ᠌ ᠳᠣᠲᠣᠷᠠ ᠴᠣᠯᠭᠣᠷᠠᠭᠰᠠᠨ ᠪᠠᠭᠠᠲᠤᠷ ᠬᠦᠴᠦᠲᠡᠨ ᠪᠠ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠳ᠋ᠦ᠍ᠷ ᠰᠢᠯᠭᠠᠷᠠᠭᠰᠠᠨ ᠬᠤᠷᠴᠠ ᠤᠷᠠᠨ ᠠᠷᠠᠳ ᠢ᠋ ᠰᠣᠩᠭᠣᠨ ᠰᠢᠯᠭᠠᠷᠠ ᠭᠠᠷᠭᠠᠪᠠ᠃ ᠪᠠᠰᠠ ᠵᠡᠯᠮᠡ᠂ ᠣᠶᠤᠨ ᠭᠤᠸᠠ᠂ ᠣᠶᠤᠲᠤ ᠰᠡᠴᠡᠨ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠲᠠᠨ ᠢ᠋ ᠮᠥᠨ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠭᠠᠷᠭᠠᠵᠤ᠂ ᠤᠯᠤᠰ ᠤ᠋ᠨ ᠳᠣᠲᠣᠷᠠᠬᠢ ᠰᠡᠴᠡᠨ ᠰᠡᠷᠭᠦᠯᠡᠩ ᠡᠷᠡᠰᠢᠭᠰᠡᠨ ᠠᠷᠠᠳ ᠢ᠋ ᠰᠣᠩᠭᠣᠵᠤ ᠠᠢᠮᠠᠭ ᠪᠦᠷᠢ ᠳ᠋ᠦ᠍ᠷ ᠰᠤᠷᠭᠠᠯ ᠤ᠋ᠨ ᠪᠠᠭᠤᠳᠠᠯ ᠪᠠᠢᠭᠤᠯᠵᠤ ᠤᠢᠭᠤᠷ ᠦᠰᠦᠭ ᠪᠠ ᠸᠧᠢ ᠡᠦ ᠦᠰᠦᠭ ᠢ᠋ ᠰᠤᠷᠭᠠᠯᠭᠠᠪᠠ᠃ ᠲᠡᠳᠦᠢ ᠪᠢᠴᠢᠭ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢᠯᠠᠯ ᠰᠢᠯᠭᠠᠭᠤᠯᠢ ᠳ᠋ᠤᠷ ᠣᠷᠣᠭᠰᠠᠨ ᠭᠤᠷᠪᠠᠨ ᠲᠦᠮᠡᠨ ᠢᠯᠡᠭᠦᠦ ᠨᠡᠷᠡ ᠪᠣᠢ᠃ ᠳᠠᠭᠠᠯᠳᠤᠭᠠ ᠨᠣᠬᠠᠢ ᠶ᠋ᠢᠨ ᠲᠣᠯᠣᠭᠠᠢᠲᠤ ᠤᠯᠤᠰ᠂ ᠬᠣᠢᠲᠤ ᠣᠷᠣᠰ ᠤᠯᠤᠰ᠂ ᠭᠠᠭᠴᠠ ᠬᠥᠯᠲᠦ ᠤᠯᠤᠰ᠂ ᠤᠢᠭᠤᠷ ᠤᠯᠤᠰ᠂ ᠪᠠᠷᠠᠭᠤᠨ ᠬᠣᠢᠲᠤ ᠥᠬᠢᠨ ᠤᠯᠤᠰ ᠴᠥᠮ ᠪᠡᠯᠡᠭ ᠬᠦᠷᠭᠡᠵᠦ ᠠᠯᠪᠠ ᠪᠠᠷᠢᠷᠠ ᠢᠷᠡᠪᠡ᠃ ᠲᠠᠢᠽᠦ ᠴᠥᠮ ᠪᠡᠶᠡ ᠪᠡᠷ ᠵᠣᠯᠭᠠᠵᠤ ᠰᠤᠷᠭᠠᠯ ᠥᠭᠴᠦ ᠬᠤᠷᠢᠮ ᠬᠠᠢᠷᠠᠯᠠᠨ ᠬᠠᠷᠢᠭᠤ ᠪᠡᠯᠡᠭ ᠥᠭᠴᠦ ᠡᠭᠡᠭᠦᠯᠪᠡ᠃ ᠳᠠᠭᠠᠯᠳᠤᠭᠠ ᠲᠠᠩᠭᠤᠳ ᠤ᠋ᠨ ᠰᠢᠳᠤᠷᠭᠤ ᠬᠠᠭᠠᠨ ᠮᠥᠨ ᠬᠦ᠌ ᠳᠤᠷᠳᠤᠩ ᠢ᠋ ᠡᠯᠴᠢ ᠵᠠᠷᠤᠵᠤ ᠶᠠᠯᠠ ᠬᠦᠯᠢᠶᠡᠨ᠂ ᠲᠠᠪᠤᠨ ᠵᠠᠭᠤᠨ ᠠᠴᠢᠶᠠ ᠬᠦᠨᠳᠦ ᠪᠡᠯᠡᠭ ᠪᠠᠷᠢᠭᠤᠯᠤᠭᠰᠠᠨ ᠳ᠋ᠤᠷ ᠲᠠᠢᠽᠦ ᠮᠦᠰᠢᠶᠡᠨ ᠥᠭᠦᠯᠡᠷᠦᠨ᠄《 ᠢᠲᠡᠭᠡᠯ ᠦᠭᠡᠢ ᠬᠠᠷᠠ ᠲᠠᠩᠭᠤᠳ ᠭᠤᠷᠪᠠᠨ ᠦᠭᠡᠨ ᠳ᠋ᠦ᠍ᠷ ᠬᠣᠶᠠᠷᠲᠠ ᠬᠤᠪᠢᠯᠤᠭᠴᠢ᠂ ᠭᠤᠲᠤᠮᠰᠢᠭ ᠠᠢᠮᠠᠭ᠂ ᠡᠷᠢᠨ ᠭᠤᠶᠤᠬᠤ ᠲᠤᠯᠠ ᠶᠠᠯᠠ ᠶ᠋ᠢ ᠬᠡᠯᠲᠦᠷᠢᠭᠦᠯᠦᠨ ᠪᠡᠯᠡᠭ ᠢ᠋ ᠢᠨᠤ ᠬᠣᠷᠢᠶᠠᠨ ᠠᠪ ! 》 ᠭᠡᠮᠡᠨ ᠳᠤᠷᠳᠤᠩ ᠢ᠋ ᠬᠦᠨᠳᠦ ᠬᠡᠰᠢᠭ ᠬᠦᠷᠲᠡᠭᠡᠪᠡ᠃ ᠲᠡᠳᠦᠢ ᠳᠤᠷᠳᠤᠩ ᠮᠥᠨ ᠬᠦ᠌ ᠶᠠᠪᠤᠭᠠ ᠶ᠋ᠢᠨ ᠭᠡᠷ ᠲᠦ᠍ᠷ ᠪᠠᠭᠤᠳᠠᠯᠯᠠᠵᠤ ᠰᠤᠯᠠ ᠦᠭᠡ ᠬᠡᠯᠡᠯᠴᠡᠭᠰᠡᠭᠡᠷ ᠥᠭᠦᠯᠡᠷᠦᠨ᠄《 ᠮᠠᠨ ᠤ᠋ ᠬᠠᠭᠠᠨ ᠬᠠᠲᠤᠨ ᠤ᠋ ᠦᠭᠡ ᠳ᠋ᠦ᠍ᠷ ᠣᠷᠣᠵᠤ ᠨᠠᠮᠠᠶ᠋ᠢ ᠬᠠᠵᠠᠭᠠᠢ ᠰᠡᠳᠬᠢᠯ ᠲᠡᠢ ᠪᠣᠯᠪᠠ ᠭᠡᠮᠡᠨ ᠪᠠᠭᠤᠷᠠᠭᠤᠯᠵᠤ᠂ ᠡᠳᠦᠭᠡ ᠲᠠᠢᠽᠦ ᠶ᠋ᠢᠨ ᠨᠡᠷᠡ ᠰᠦᠷ ᠶᠡᠬᠡ ᠪᠣᠯᠵᠤ ᠲᠣᠭᠣᠷᠢᠭᠰᠠᠨ ᠣᠯᠠᠨ ᠠᠢᠮᠠᠭ ᠢ᠋ ᠴᠥᠮ ᠬᠤᠷᠢᠶᠠᠮᠵᠢᠯᠠᠭᠰᠠᠨ ᠳ᠋ᠤᠷ ᠠᠷᠭᠠ ᠦᠭᠡᠢ ᠪᠠᠰᠠ ᠨᠠᠮᠠᠶ᠋ᠢ ᠳᠠᠬᠢᠨ ᠤᠭ ᠵᠡᠷᠭᠡ ᠳ᠋ᠦ᠍ᠷ ᠡᠭᠡᠭᠦᠯᠵᠦ ᠡᠷᠭᠦᠭᠡᠳ ᠡᠳᠦᠭᠡ ᠡᠯᠴᠢ ᠢᠯᠡᠭᠡᠪᠡ᠃ 》 ᠭᠡᠮᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠶᠠᠪᠤᠭᠠ ᠥᠭᠦᠯᠡᠷᠦᠨ :《ᠴᠢ ᠣᠳᠣ ᠲᠠᠨ ᠤ᠋ ᠤᠯᠤᠰ ᠤ᠋ᠨ ᠬᠡᠷᠡᠭ ᠢ᠋ᠶ᠋ᠡᠨ ᠳᠤᠷᠠᠳᠬᠤᠢ ᠪᠠᠨ ᠪᠠᠢᠭᠠ᠂ ᠪᠢ ᠠᠩᠬᠠ ᠤᠳᠠᠭᠠ ᠲᠠᠨ ᠤ᠋ ᠤᠴᠢᠷ ᠢ᠋ ᠬᠡᠯᠡᠵᠦ ᠲᠠᠨ ᠤ᠋ ᠬᠠᠭᠠᠨ ᠤ᠋ ᠬᠠᠲᠤᠨ ᠤ᠋ ᠨᠢᠭᠤᠷ ᠠ᠋ᠴᠠ ᠭᠡᠷᠡᠯ ᠭᠠᠷᠤᠮᠤᠢ ᠭᠡᠮᠡᠨ ᠬᠡᠯᠡᠭᠡᠳ ᠱᠠᠯᠢᠭ ᠦᠭᠡ ᠵᠥᠭᠡᠭᠡᠪᠡ ᠭᠡᠮᠡᠨ ᠨᠠᠮᠠᠶ᠋ᠢ ᠳᠡᠷᠭᠡᠳᠡ ᠡᠴᠡ ᠦᠯᠳᠡᠨ ᠭᠠᠷᠭᠠᠵᠤ᠂ ᠡᠳᠦᠭᠡ ᠪᠣᠯᠲᠠᠯᠠ ᠤᠭ ᠣᠷᠣᠨ ᠳ᠋ᠤᠷ ᠲᠠᠪᠰᠢᠨ ᠴᠢᠳᠠᠭᠠᠳᠤᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠳᠤᠷᠳᠤᠩ ᠶᠡᠬᠡᠯᠡ ᠭᠠᠢᠬᠠᠵᠤ ᠥᠭᠦᠯᠡᠷᠦᠨ᠄《 ᠡᠨᠡ ᠦᠨᠡᠬᠡᠷ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠠᠵᠤᠭᠤ᠂ ᠭᠠᠭᠴᠠ ᠭᠠᠳᠠᠭᠠᠳᠤ ᠰᠦᠷ ᠢᠨᠤ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠰᠦᠷ ᠢᠨᠤ ᠪᠤᠰᠤ᠂ ᠳᠣᠲᠣᠭᠠᠳᠤ ᠰᠦᠯᠳᠡ ᠮᠥᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠰᠡᠳᠬᠢᠯᠳᠦ ᠪᠠᠢᠨᠠᠮ᠂ ᠡᠳᠦᠭᠡ ᠮᠠᠨ ᠤ᠋ ᠬᠠᠲᠤᠨ ᠲᠠᠪᠤᠨ ᠵᠠᠭᠤᠨ ᠪᠡᠯᠪᠡᠰᠦᠨ ᠡᠬᠡᠨᠡᠷ ᠢ᠋ ᠬᠤᠷᠢᠶᠠᠵᠤ ᠰᠣᠯᠣᠭᠠᠢ ᠤᠪᠠᠳᠢᠰ ᠰᠤᠷᠭᠠᠵᠤ ᠪᠣᠢ᠂ ᠡᠨᠡ ᠡᠵᠡᠨ ᠡᠨᠡ ᠮᠡᠲᠦ ᠲᠡᠭᠷᠢ ᠶ᠋ᠢᠨ ᠰᠠᠨᠠᠭᠠᠨ ᠠᠬᠤᠢ ᠳ᠋ᠤᠷ ᠮᠠᠨ ᠤ᠋ ᠤᠯᠤᠰ ᠬᠡᠷᠬᠢᠨ ᠴᠢᠳᠠᠬᠤ ?》 ᠶᠠᠪᠤᠭᠠ ᠠᠰᠠᠭᠤᠷᠤᠨ :《ᠤᠪᠠᠳᠢᠰ ᠰᠤᠷᠴᠤ ᠬᠡᠷᠬᠢᠮᠦᠢ ? 》 ᠳᠤᠷᠳᠤᠩ ᠥᠭᠦᠯᠡᠷᠦᠨ :《ᠤᠯᠤᠰ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠮᠤᠢ 》ᠬᠡᠮᠡᠪᠡ᠃ ᠶᠠᠪᠤᠭᠠ ᠡᠨᠡ ᠦᠭᠡ ᠶ᠋ᠢ ᠬᠢᠨᠠᠨ ᠰᠣᠨᠣᠰᠴᠤ ᠰᠥᠨᠢ ᠪᠡᠷ ᠮᠤᠬᠤᠯᠢ ᠳ᠋ᠤᠷ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ :《 ᠡᠨᠡ ᠲᠠᠩᠭᠤᠳ ᠤᠯᠤᠰ ᠡᠭᠡᠨᠡᠭᠲᠡ ᠰᠠᠢᠨ ᠰᠠᠨᠠᠭᠠ ᠦᠭᠡᠢ᠂ ᠰᠣᠨᠣᠰᠬᠤᠯᠠ ᠡᠳᠦᠭᠡ ᠲᠡᠭᠦᠨ ᠦ᠌ ᠤᠯᠤᠰ ᠲᠤᠷ ᠲᠠᠪᠤᠨ ᠵᠠᠭᠤᠨ ᠪᠡᠯᠪᠡᠰᠦᠨ ᠡᠬᠡᠨᠡᠷ ᠢ᠋ ᠴᠤᠭᠯᠠᠭᠤᠯᠵᠤ ᠤᠪᠠᠳᠢᠰ ᠰᠤᠷᠭᠠᠮᠤᠢ ᠬᠡᠮᠡᠮᠦ ! 》 ᠭᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄《 ᠭᠠᠵᠢᠭᠤ ᠰᠣᠯᠣᠭᠠᠢ ᠲᠥᠪ ᠴᠢᠬᠡ ᠶ᠋ᠢ ᠬᠡᠷᠬᠢᠨ ᠴᠢᠳᠠᠬᠤ ? ᠰᠤᠯᠠ ᠦᠭᠡ ᠬᠡᠷᠡᠭ ᠦᠭᠡᠢ᠂ ᠡᠳᠦᠭᠡ ᠳᠠᠭᠠᠪᠠᠰᠤ ᠳᠠᠷᠤᠢ ᠳᠠᠭᠠᠵᠤ ᠪᠠᠢᠭᠲᠤᠨ᠂ ᠤᠷᠪᠠᠭᠰᠠᠨ ᠴᠠᠭ ᠲᠤ᠌ ᠵᠢᠴᠢ ᠬᠡᠯᠡᠯᠴᠡᠶᠡ᠂ ᠳᠠᠭᠠᠭᠰᠠᠨ ᠢ᠋ ᠳᠠᠢᠯᠠᠪᠠᠰᠤ ᠣᠯᠠᠨ ᠳᠠᠭᠠᠬᠤ ᠠᠷᠠᠳ ᠲᠤᠷ ᠬᠣᠷᠣᠮᠵᠢ ᠪᠣᠯᠤᠮᠤᠢ᠃ 》ᠭᠡᠮᠡᠨ ᠡᠭᠡᠭᠦᠯᠦᠭᠰᠡᠨᠡ᠂ ᠶᠠᠪᠤᠭᠠ ᠬᠣᠶᠠᠷ ᠤᠳᠠᠭᠠ ᠬᠣᠩᠰᠢᠶᠠᠷ ᠵᠥᠭᠡᠭᠡᠭᠡᠳ ᠬᠣᠣᠰ ᠭᠤᠲᠤᠮᠰᠢᠭ ᠪᠣᠯᠵᠤ ᠢᠴᠢᠩᠭᠦᠷᠡᠨ ᠭᠡᠮᠰᠢᠪᠡᠢ᠃
ᠲᠡᠨᠳᠡᠴᠡ ᠮᠤᠬᠤᠯᠢ ᠨᠡᠢᠲᠡ ᠴᠡᠷᠢᠭ ᠦ᠋ᠨ ᠲᠣᠭᠠ ᠶ᠋ᠢ ᠪᠠᠢᠴᠠᠭᠠᠵᠤ ᠦᠵᠡᠪᠡᠰᠦ᠂ ᠤᠭ ᠤᠯᠤᠰ ᠤ᠋ᠨ ᠳᠥᠴᠢᠨ ᠲᠦᠮᠡᠨ ᠴᠡᠷᠢᠭ᠂ ᠳᠠᠭᠠᠭᠰᠠᠨ ᠣᠯᠠᠨ ᠠᠢᠮᠠᠭ ᠤ᠋ᠳ ᠤ᠋ᠨ ᠴᠡᠷᠢᠭ ᠨᠠᠶᠠᠨ ᠲᠦᠮᠡᠨ ᠢᠯᠡᠭᠦᠦ ᠯᠤᠭᠠ ᠨᠡᠢᠯᠡᠭᠦᠯᠵᠦ ᠨᠢᠭᠡᠨ ᠵᠠᠭᠤᠨ ᠬᠣᠷᠢᠨ ᠲᠦᠮᠡᠨ ᠰᠢᠯᠭᠠᠳᠠᠭ ᠴᠡᠷᠢᠭ ᠪᠣᠯᠤᠭᠰᠠᠨ ᠳ᠋ᠤᠷ ᠮᠤᠬᠤᠯᠢ᠂ ᠲᠠᠢᠽᠦ ᠶ᠋ᠢᠨ ᠤᠯᠤᠰ ᠤ᠋ᠨ ᠬᠡᠷᠡᠭ ᠮᠡᠳᠡᠭᠦᠯᠬᠦ ᠲᠠᠭᠲᠤ ᠳ᠋ᠤᠷ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ᠄《 ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠨᠡᠢᠭᠡᠮ ᠴᠡᠷᠢᠭ ᠦ᠋ᠨ ᠲᠣᠭᠠ ᠰᠠᠢᠨ ᠮᠠᠭᠤ ᠲᠠᠢ ᠬᠣᠶᠠᠷ ᠵᠠᠭᠤᠨ ᠲᠦᠮᠡᠨ ᠢᠯᠡᠭᠦᠦ᠂ ᠰᠢᠯᠭᠠᠵᠤ ᠭᠠᠷᠭᠠᠭᠰᠠᠨ ᠠᠨᠤ ᠨᠢᠭᠡᠨ ᠵᠠᠭᠤᠨ ᠬᠣᠷᠢᠨ ᠲᠦᠮᠡᠨ ᠢᠯᠡᠭᠦᠦ᠂ ᠡᠭᠦᠨ ᠡᠴᠡ ᠵᠠᠭᠤᠨ ᠠ᠋ᠴᠠ ᠨᠢᠭᠡᠨ ᠢ᠋ ᠰᠣᠩᠭᠣᠵᠤ ᠭᠠᠷᠭᠠᠭᠰᠠᠨ ᠴᠡᠷᠢᠭ ᠡᠳᠦᠭᠡ ᠲᠠᠪᠤᠨ ᠲᠦᠮᠡᠨ ᠭᠤᠷᠪᠠᠨ ᠮᠢᠩᠭᠠᠨ ᠢᠯᠡᠭᠦᠦ ᠪᠣᠢ᠃ ᠲᠦᠰᠢᠮᠡᠯ ᠪᠢ ᠪᠣᠳᠣᠪᠠᠰᠤ᠂ ᠮᠠᠨ ᠤ᠋ ᠠᠷᠤ ᠭᠠᠵᠠᠷ ᠤ᠋ᠨ ᠴᠡᠷᠢᠭ ᠬᠡᠳᠦᠢ ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠴᠡᠷᠢᠭ ᠮᠡᠲᠦ ᠬᠦᠨᠡᠰᠦ ᠬᠦᠴᠦᠨ ᠬᠡᠲᠦᠷᠬᠡᠢ ᠡᠰᠡ ᠰᠦᠢᠳᠬᠡᠪᠡᠴᠦ ᠬᠡᠷᠪᠡ ᠴᠡᠷᠢᠭ ᠢ᠋ ᠬᠥᠳᠡᠯᠭᠡᠪᠡᠰᠦ ᠡᠷᠬᠡᠪᠰᠢ ᠬᠦᠨᠡᠰᠦ ᠣᠷᠣᠬᠤ ᠪᠣᠯᠤᠮᠤᠢ᠃ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠴᠢᠭᠢᠷᠠᠭ ᠪᠣᠯᠤᠭᠰᠠᠨ ᠠᠨᠤ ᠴᠡᠷᠢᠭ ᠦ᠋ᠨ ᠠᠷᠠᠳ ᠢ᠋ ᠥᠷᠥᠰᠢᠶᠡᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠳᠡᠪᠡᠯ ᠬᠤᠪᠴᠠᠰᠤ ᠶ᠋ᠢ ᠪᠤᠰᠤ ᠠᠢᠮᠠᠭ ᠤ᠋ᠳ ᠤ᠋ᠨ ᠴᠡᠷᠢᠭ ᠡᠴᠡ ᠢᠯᠡᠭᠦᠦ ᠲᠠᠪᠤᠨ ᠬᠤᠪᠢ ᠪᠠᠷ ᠲᠡᠵᠢᠭᠡᠭᠰᠡᠭᠡᠷ ᠰᠠᠢ ᠣᠯᠠᠨ ᠭᠠᠳᠠᠭᠠᠳᠤ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠳᠠᠭᠠᠵᠤ ᠦᠬᠦᠨ ᠵᠢᠳᠬᠦᠮᠦᠢ᠃ ᠡᠳᠦᠭᠡ ᠬᠦᠨᠡᠰᠦ ᠢᠳᠡᠭᠡᠨ ᠳᠡᠪᠡᠯ ᠬᠤᠪᠴᠠᠳ ᠡᠨᠡ ᠮᠡᠲᠦ ᠥᠭᠬᠦᠢ ᠳ᠋ᠦ᠍ᠷ ᠣᠨ ᠤᠳᠠᠪᠠᠰᠤ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠬᠦᠴᠦᠨ ᠬᠦᠷᠦᠯᠴᠡᠬᠦ ᠦᠭᠡᠢ ᠪᠣᠯᠤᠮᠤᠢ᠂ ᠬᠦᠴᠦᠨ ᠮᠣᠬᠣᠪᠠᠰᠤ ᠴᠡᠷᠢᠭ ᠶᠠᠳᠠᠩᠭᠢ᠂ ᠴᠡᠷᠢᠭ ᠶᠠᠳᠠᠭᠤᠷᠠᠪᠠᠰᠤ ᠰᠦᠷ ᠪᠠᠭᠤᠷᠠᠵᠤ ᠬᠡᠰᠢᠭ ᠵᠠᠢᠳᠠᠭᠠᠳ ᠤᠯᠤᠰ ᠲᠤᠷ ᠬᠣᠣᠷ ᠪᠣᠯᠤᠮᠤᠢ᠂ ᠲᠦᠰᠢᠮᠡᠯ ᠮᠢᠨᠦ ᠪᠣᠳᠣᠯᠭᠠᠨ ᠳ᠋ᠤᠷ ᠶᠠᠮᠪᠠᠷᠪᠠ ᠴᠡᠷᠢᠭ ᠬᠤᠷᠴᠠ ᠴᠢᠭᠢᠷᠠᠭ ᠤᠷᠠᠨ ᠣᠨᠣᠪᠴᠢᠲᠠᠢ ᠳ᠋ᠤᠷ ᠪᠠᠢᠬᠤ ᠪᠣᠢ ᠊ᠶᠠ᠂ ᠣᠯᠠᠨ ᠠᠷᠪᠢᠨ ᠳ᠋ᠤᠷ ᠦᠭᠡᠢ᠃ ᠮᠠᠨ ᠤ᠋ ᠡᠵᠡᠨ ᠲᠦᠰᠢᠮᠡᠯ ᠬᠠᠷᠠᠬᠠᠨ ᠠᠷᠪᠠᠨ ᠬᠡᠳᠦᠨ ᠨᠠᠰᠤᠨ ᠠ᠋ᠴᠠ ᠴᠡᠷᠢᠭ ᠪᠠᠢᠭᠤᠯᠵᠤ ᠳᠥᠷᠪᠡᠨ ᠵᠦᠭ ᠪᠠᠢᠯᠳᠤᠨ ᠳᠠᠢᠯᠠᠵᠤ ᠶᠠᠪᠤᠭᠰᠠᠨ ᠠ᠋ᠴᠠ ᠡᠳᠦᠭᠡ ᠬᠦᠷᠲᠡᠯᠡ ᠴᠥᠮ ᠴᠥᠭᠡᠨ ᠢ᠋ᠶ᠋ᠡᠷ ᠣᠯᠠᠨ ᠢ᠋ ᠳᠠᠢᠯᠠᠭᠰᠠᠨ ᠪᠣᠢ ᠊ᠶᠠ᠂ ᠣᠯᠠᠨ ᠢ᠋ᠶ᠋ᠠᠷ ᠴᠥᠭᠡᠨ ᠢ᠋ ᠳᠠᠷᠤᠭᠰᠠᠨ ᠶᠠᠪᠤᠳᠠᠯ ᠣᠭᠲᠣ ᠭᠠᠷᠤᠭᠰᠠᠨ ᠦᠭᠡᠢ᠂ ᠪᠤᠰᠤ ᠠᠢᠮᠠᠭ ᠤ᠋ᠳ ᠤ᠋ᠨ ᠣᠯᠠᠨ ᠮᠠᠨ ᠤ᠋ ᠴᠥᠭᠡᠨ ᠳ᠋ᠦ᠍ᠷ ᠳᠠᠷᠤᠭᠳᠠᠭᠰᠠᠨ ᠠᠨᠤ ᠴᠥᠮ ᠢ᠋ᠶ᠋ᠡᠷ ᠮᠠᠨ ᠤ᠋ ᠤᠷᠠᠨ ᠭᠠᠢᠬᠠᠮᠰᠢᠭ ᠬᠤᠷᠴᠠ ᠣᠨᠣᠪᠴᠢᠲᠠᠢ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠭᠰᠡᠨ ᠦ᠌ ᠲᠤᠰᠠ ᠪᠣᠯᠠᠢ᠂ ᠲᠡᠢᠨ ᠬᠦ᠌ ᠡᠳᠦᠭᠡ ᠴᠡᠷᠢᠭ ᠦ᠋ᠨ ᠳᠤᠷᠠ ᠶ᠋ᠢ ᠠᠰᠠᠭᠤᠵᠤ ᠴᠥᠭᠡᠴᠢᠯᠡᠭᠡᠳ ᠳᠤᠷᠠᠲᠠᠢ ᠶ᠋ᠢ ᠴᠡᠷᠢᠭ ᠪᠣᠯᠭᠠᠨ᠂ ᠳᠤᠷᠠ ᠦᠭᠡᠢ ᠶ᠋ᠢ ᠢᠨᠤ ᠠᠵᠤ ᠲᠥᠷᠥᠭᠦᠯᠵᠦ ᠮᠠᠯ ᠦᠷᠡᠵᠢᠭᠦᠯᠦᠭᠡᠳ ᠠᠯᠪᠠ ᠣᠯᠰᠤᠭᠠᠢ᠃ ᠡᠢᠨ ᠪᠣᠯᠪᠠᠰᠤ ᠤᠯᠤᠰ ᠤ᠋ᠨ ᠦᠨᠳᠦᠰᠦᠨ ᠪᠠᠲᠤ ᠪᠣᠯᠤᠭᠠᠳ ᠬᠣᠢᠴᠢ ᠡᠳᠦᠷ ᠡᠵᠡᠨ ᠬᠡᠳᠦᠢ ᠬᠣᠯᠠ ᠬᠠᠷᠢ ᠤᠯᠤᠰ ᠲᠤᠷ ᠠᠶᠠᠯᠠᠪᠠᠴᠤ ᠤᠯᠤᠰ ᠲᠤᠷ ᠲᠦᠭᠰᠢᠭᠦᠷᠢ ᠦᠭᠡᠢ ᠪᠣᠯᠤᠮᠤᠢ᠂ ᠨᠢᠭᠡᠨ ᠳ᠋ᠦ᠍ᠷ ᠤᠯᠤᠰ ᠪᠠᠶᠠᠵᠢᠵᠤ᠂ ᠬᠣᠶᠠᠷ ᠲᠤᠷ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠨᠡᠮᠡᠮᠦᠢ᠂ ᠬᠣᠯᠠ ᠤᠯᠤᠰ ᠲᠤᠷ ᠣᠯᠠᠨ ᠴᠡᠷᠢᠭ ᠮᠣᠷᠳᠠᠪᠠᠰᠤ ᠠᠰᠢᠭ ᠦᠭᠡᠢ᠂ ᠥᠪᠡᠷ ᠦ᠋ᠨ ᠤᠯᠤᠰ ᠲᠤᠷ ᠠᠪᠠᠰᠤ ᠰᠦᠢᠳᠬᠡᠯ ᠬᠦᠨᠳᠦ ᠪᠣᠯᠤᠮᠤᠢ᠃ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ᠂ ᠲᠠᠢ ᠰᠡᠴᠡᠨ᠂ ᠥᠷᠯᠥᠭ ᠰᠡᠴᠡᠨ᠂ ᠲᠣᠷᠭᠠᠨ ᠰᠢᠷᠠ᠂ ᠯᠢᠳᠠᠷ ᠰᠡᠴᠡᠨ᠂ ᠮᠤᠬᠤᠯᠢ᠂ ᠪᠤᠭᠤᠷᠵᠢ ᠨᠠᠷ ᠢ᠋ ᠬᠢᠨᠠᠨ ᠲᠣᠭᠲᠠᠭᠠ ᠭᠡᠮᠡᠨ ᠵᠠᠬᠢᠪᠠ᠃
ᠲᠡᠳᠦᠢ ᠵᠢᠷᠭᠤᠭᠠᠨ ᠰᠠᠢᠳ ᠤᠯᠤᠰ ᠤ᠋ᠨ ᠡᠩ ᠦ᠋ᠨ ᠬᠡᠷᠡᠭ ᠵᠥᠪᠯᠡᠬᠦ ᠴᠠᠴᠠᠷ ᠲᠤᠷ ᠢᠷᠡᠵᠦ ᠵᠠᠯᠮᠠ᠂ ᠴᠢᠨᠳᠠᠭᠠᠨᠠ ᠰᠡᠴᠡᠨ᠂ ᠬᠤᠳᠠᠭᠠᠨᠠ ᠪᠡᠬᠢ᠂ ᠣᠶᠤᠲᠤ ᠰᠡᠴᠡᠨ᠂ ᠣᠶᠤᠨ ᠭᠤᠸᠠ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ᠂ ᠰᠡᠴᠡᠨ ᠪᠡᠬᠢ᠂ ᠪᠠᠶᠠᠨ ᠡᠳᠡᠭᠡᠷ ᠰᠡᠴᠡᠳ ᠢ᠋ ᠳᠥᠷᠪᠡᠨ ᠵᠦᠭ ᠦ᠋ᠨ ᠤᠯᠤᠰ ᠤᠯᠤᠰ ᠲᠤᠷ ᠵᠠᠷᠤᠵᠤ ᠴᠡᠷᠢᠭ ᠦ᠋ᠨ ᠳᠤᠷᠠ ᠶ᠋ᠢ ᠠᠰᠠᠭᠤᠵᠤ ᠴᠥᠭᠡᠳᠬᠡᠷᠡ ᠢᠯᠡᠭᠡᠪᠡ᠃ ᠪᠠᠰᠠ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠲᠣᠭᠲᠣᠩᠭᠣ᠂ ᠰᠥᠪᠡᠭᠡᠲᠡᠢ᠂ ᠭᠢᠯᠦᠭᠡᠨ᠂ ᠵᠦᠯᠭᠡᠲᠡᠢ᠂ ᠬᠤᠢᠯᠠᠳᠠᠷ ᠡᠨᠡ ᠲᠠᠪᠤᠭᠤᠯᠠ ᠳ᠋ᠤᠷ ᠲᠠᠪᠤᠨ ᠲᠦᠮᠡᠨ ᠪᠣᠯᠣᠳ ᠬᠦᠴᠦᠲᠦ ᠴᠡᠷᠢᠭ ᠢ᠋ ᠪᠣᠯᠪᠠᠰᠤᠷᠠᠭᠤᠯᠤᠨ ᠲᠡᠵᠢᠭᠡᠯ ᠬᠦᠨᠡᠰᠦ ᠶ᠋ᠢ ᠨᠡᠮᠡᠭᠦᠯᠪᠡ᠃
ᠡᠨᠡ ᠵᠠᠪᠰᠠᠷ ᠲᠠᠩᠭᠤᠳ ᠤ᠋ᠨ ᠡᠯᠴᠢ ᠳᠤᠷᠳᠤᠩ ᠡᠭᠡᠬᠦ ᠵᠠᠮ ᠳ᠋ᠤᠷ ᠪᠠᠷᠠᠭᠤᠨ ᠡᠮᠦᠨᠡ ᠬᠠᠷᠯᠢᠭ ᠤ᠋ᠨ ᠵᠡᠭᠦᠨ ᠡᠮᠦᠨᠡ ᠵᠣᠪᠬᠢᠰ ᠢ᠋ᠶ᠋ᠠᠷ ᠳᠠᠭᠠᠷᠢᠨ ᠭᠠᠷᠬᠤᠢ ᠳ᠋ᠤᠷ ᠂ ᠬᠠᠷᠯᠢᠭᠤᠳ ᠤᠯᠤᠰ ᠤ᠋ᠨ ᠡᠵᠡᠨ ᠢᠨᠤ ᠠᠷᠰᠯᠠᠨ ᠬᠠᠭᠠᠨ ᠬᠥᠮᠦᠨ ᠢᠨᠤ ᠮᠠᠰᠢ ᠣᠮᠣᠷᠬᠠᠭ ᠳᠡᠭᠡᠷᠡᠩᠭᠦᠢ ᠪᠥᠭᠡᠳ ᠬᠦᠴᠦᠨ ᠢᠨᠤ ᠬᠡᠲᠦᠷᠬᠡᠢ᠂ ᠤᠭ ᠲᠤᠷ ᠲᠡᠭᠦᠨ ᠦ᠌ ᠤᠯᠤᠰ ᠤ᠋ᠨ ᠡᠵᠡᠨ ᠮᠠᠢᠳᠠᠷ ᠬᠡᠮᠡᠭᠴᠢ ᠶ᠋ᠢ ᠭᠠᠭᠴᠠᠭᠠᠷ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠯᠦ᠋ᠭᠡ ᠪᠠᠢᠯᠳᠤᠵᠤ ᠳᠠᠷᠤᠭᠠᠳ ᠳᠠᠷᠤᠢ ᠤᠯᠤᠰ ᠢ᠋ ᠠᠨᠤ ᠡᠵᠡᠯᠡᠭᠰᠡᠨ ᠠᠵᠤᠭᠤ᠂ ᠮᠠᠢᠳᠠᠷ ᠤ᠋ᠨ ᠬᠥᠮᠦᠨ ᠢᠨᠤ ᠥᠷᠥᠰᠢᠶᠡᠩᠭᠦᠢ᠂ ᠡᠨᠡ ᠦᠶᠡ ᠳ᠋ᠦ᠍ᠷ ᠮᠥᠨ ᠤᠯᠤᠰ ᠲᠤᠷ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠪᠣᠯᠤᠭᠰᠠᠨ ᠳ᠋ᠤᠷ᠂ ᠡᠳᠦᠭᠡᠬᠢ ᠮᠠᠨ ᠤ᠋ ᠮᠣᠩᠭᠣᠯ ᠤᠯᠤᠰ ᠲᠤᠷ ᠳᠡᠯᠭᠡᠷᠡᠭᠰᠡᠨ ᠮᠡᠲᠦ ᠬᠡᠲᠦᠷᠬᠡᠢ ᠳᠡᠯᠭᠡᠷᠡᠵᠦ᠂ ᠡᠨᠡ ᠮᠠᠢᠳᠠᠷ ᠳᠠᠷᠤᠢ ᠳᠣᠣᠷᠠᠬᠢ ᠠᠷᠰᠯᠠᠨ ᠬᠡᠮᠡᠬᠦ ᠶᠡᠬᠡ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠳ᠋ᠤᠷ ᠢ᠋ᠶ᠋ᠠᠨ ᠤᠯᠤᠰ ᠢ᠋ᠶ᠋ᠠᠨ ᠲᠤᠰᠢᠶᠠᠭᠰᠠᠨ ᠳ᠋ᠤᠷ ᠡᠨᠡ ᠠᠷᠰᠯᠠᠨ ᠪᠠᠢᠳᠠᠯ ᠢ᠋ ᠦᠵᠡᠪᠡᠰᠦ ᠲᠥᠷᠥ ᠶ᠋ᠢ ᠢᠨᠦ ᠪᠤᠯᠢᠶᠠᠵᠤ ᠪᠣᠯᠬᠤ ᠲᠤᠯᠠ ᠳᠠᠷᠤᠢ ᠬᠥᠳᠡᠯᠦᠨ ᠬᠠᠭᠠᠨ ᠢ᠋ᠶ᠋ᠠᠨ ᠠᠯᠠᠭᠰᠠᠨ ᠳ᠋ᠤᠷ ᠮᠠᠢᠳᠠᠷ ᠤ᠋ᠨ ᠰᠢᠳᠠᠷ ᠴᠡᠷᠢᠭ ᠭᠠᠷ ᠬᠥᠳᠡᠯᠦᠭᠰᠡᠨ ᠢ᠋ ᠴᠥᠮ ᠴᠠᠪᠴᠢᠨ ᠠᠯᠠᠵᠤ ᠳᠠᠷᠤᠭᠠᠳ ᠰᠠᠭᠤᠷᠢᠨ ᠢ᠋ ᠪᠤᠯᠢᠶᠠᠨ ᠠᠪᠴᠤ ᠲᠡᠳᠦᠢ ᠣᠯᠠᠨ ᠬᠥᠮᠦᠨ ᠲᠡᠭᠦᠨ ᠦ᠌ ᠬᠦᠴᠦᠨ ᠡᠴᠡ ᠠᠶᠤᠵᠤ ᠲᠡᠮᠡᠴᠡᠭᠰᠡᠨ ᠦᠭᠡᠢ ᠳᠠᠭᠠᠭᠰᠠᠨ ᠠᠵᠤᠭᠤ᠃ ᠡᠨᠡ ᠠᠷᠰᠯᠠᠨ ᠬᠦᠴᠦᠨ ᠳ᠋ᠦ᠍ᠷ ᠢ᠋ᠶ᠋ᠡᠨ ᠡᠷᠡᠮᠰᠢᠵᠦ ᠬᠠᠭᠠᠨ ᠰᠠᠭᠤᠭᠰᠠᠨ ᠲᠤᠯᠠ ᠲᠡᠭᠦᠨ ᠦ᠌ ᠣᠮᠣᠭ ᠰᠠᠨᠠᠭᠠᠨ ᠨᠡᠩ ᠴᠢᠭᠢᠷᠠᠭ ᠬᠠᠳᠠᠨ᠂ ᠲᠡᠭᠦᠨ ᠦ᠌ ᠴᠡᠷᠢᠭ ᠢᠨᠦ ᠪᠠᠰᠠ ᠮᠠᠰᠢ ᠬᠡᠴᠡᠭᠦᠦ᠂ ᠲᠡᠢᠨ ᠬᠦ᠌ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠣᠢᠲᠤ ᠭᠠᠵᠠᠷ ᠢ᠋ ᠨᠡᠢᠭᠡᠮᠯᠡᠭᠰᠡᠨ ᠢ᠋ ᠰᠣᠨᠣᠰᠴᠤ ᠬᠠᠷᠠᠬᠠᠨ ᠠᠮᠤᠷ ᠦᠭᠡᠢ ᠪᠦᠬᠦᠢ ᠳ᠋ᠦ᠍ᠷ ᠡᠳᠦᠭᠡ ᠲᠡᠭᠦᠨ ᠦ᠌ ᠡᠮᠦᠨᠡ ᠲᠠᠩᠭᠤᠳ ᠤ᠋ᠨ ᠶᠡᠬᠡ ᠤᠯᠤᠰ ᠪᠠᠰᠠ ᠳᠠᠭᠠᠷᠠ ᠡᠯᠴᠢ ᠵᠠᠷᠤᠪᠠ ᠭᠡᠮᠡᠨ ᠰᠣᠨᠣᠰᠴᠤ ᠵᠠᠮ ᠳ᠋ᠤᠷ ᠴᠡᠷᠢᠭ ᠳᠠᠩᠨᠠᠭᠤᠯᠵᠤ᠂ ᠲᠠᠩᠭᠤᠳ ᠤ᠋ᠨ ᠡᠯᠴᠢ ᠳᠤᠷᠳᠤᠩ ᠢ᠋ ᠪᠠᠷᠢᠵᠤ ᠠᠴᠢᠷᠠᠭᠠᠳ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠠᠭᠤᠷᠯᠠᠵᠤ ᠥᠭᠦᠯᠡᠷᠦᠨ᠄ 《 ᠴᠢᠨᠦ ᠡᠵᠡᠨ ᠰᠢᠳᠤᠷᠭᠤ ᠪᠣᠭᠣᠯ ᠰᠠᠢᠬᠠᠨ ᠰᠢᠮᠨᠤ ᠡᠮᠡ ᠶ᠋ᠢᠨ ᠦᠭᠡᠨ ᠳ᠋ᠦ᠍ᠷ ᠣᠷᠣᠵᠤ᠂ ᠬᠡᠨ ᠬᠥᠮᠦᠨ ᠬᠦᠴᠦᠲᠡᠢ ᠪᠣᠯᠪᠠᠰᠤ ᠲᠡᠷᠡ ᠬᠥᠮᠦᠨ ᠢ᠋ ᠪᠢᠯᠳᠠᠤᠴᠢᠯᠠᠨ ᠳᠠᠭᠠᠬᠤ ᠶᠠᠭᠤᠨ? 》 ᠳᠤᠷᠳᠤᠩ ᠥᠭᠦᠯᠡᠷᠦᠨ᠄ 《 ᠮᠠᠨ ᠤ᠋ ᠡᠵᠡᠨ ᠳᠤᠷᠠᠲᠠᠶᠠ ᠳᠠᠭᠠᠭᠰᠠᠨ ᠠᠨᠤ ᠪᠤᠰᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠡᠴᠡᠭᠦᠦ ᠡᠴᠡ ᠠᠶᠤᠬᠤ ᠳ᠋ᠠᠭᠠᠨ ᠳᠠᠭᠠᠭᠰᠠᠨ ᠪᠥᠯᠥᠭᠡ᠃ 》ᠠᠷᠰᠯᠠᠨ ᠬᠠᠭᠠᠨ ᠥᠭᠦᠯᠡᠷᠦᠨ᠄ 《 ᠪᠢ ᠪᠠᠰᠠ ᠬᠡᠴᠡᠭᠦᠦ ᠠᠲᠠᠯᠠ ᠲᠠ ᠶᠠᠭᠤᠨ ᠳ᠋ᠤᠷ ᠨᠠᠳᠠ ᠳ᠋ᠤᠷ ᠦᠯᠦ ᠳᠠᠭᠠᠮᠤᠢ ?》ᠳᠤᠷᠳᠤᠩ ᠥᠭᠦᠯᠡᠷᠦᠨ᠄《 ᠪᠢ ᠡᠭᠡᠵᠦ ᠡᠴᠢᠮᠡᠭᠴᠡ ᠡᠵᠡᠨ ᠳ᠋ᠦ᠍ᠷ ᠢ᠋ᠶ᠋ᠡᠨ ᠠᠢᠯᠠᠳᠬᠠᠵᠤ ᠶᠡᠬᠡ ᠬᠠᠭᠠᠨ ᠳ᠋ᠤᠷ ᠳᠠᠭᠠᠵᠤ ᠠᠯᠪᠠ ᠪᠠᠷᠢᠰᠤᠭᠠᠢ !》ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠬᠦᠯᠢᠶᠡᠰᠦᠨ ᠢ᠋ ᠲᠠᠯᠪᠢᠵᠤ ᠤᠯᠤᠰ ᠲᠤᠷ ᠶᠠᠪᠤᠭᠤᠯᠪᠠ᠃ ᠲᠡᠳᠦᠢ ᠲᠥᠷᠥ ᠶ᠋ᠢᠨ ᠳᠥᠷᠪᠡᠨ ᠲᠦᠰᠢᠮᠡᠯ – ᠲᠡᠷᠢᠭᠦᠨ ᠲᠦᠰᠢᠮᠡᠯ ᠴᠠᠰ ᠠᠭᠤᠯᠠ᠂ ᠬᠣᠶᠠᠳᠤᠭᠠᠷ ᠲᠦᠰᠢᠮᠡᠯ ᠬᠠᠰ ᠮᠥᠷᠡᠨ᠂ ᠭᠤᠷᠪᠠᠳᠤᠭᠠᠷ ᠲᠦᠰᠢᠮᠡᠯ ᠵᠠᠭᠠᠨ ᠬᠣᠷᠣᠭᠠ᠂ ᠳᠥᠷᠪᠡᠳᠦᠭᠡᠷ ᠲᠦᠰᠢᠮᠡᠯ ᠠᠯᠲᠠᠨ ᠮᠠᠷᠠᠯ ᠳᠥᠷᠪᠡᠭᠦᠯᠡ ᠶ᠋ᠢ ᠳᠠᠭᠤᠳᠠᠵᠤ ᠥᠭᠦᠯᠡᠷᠦᠨ᠄《ᠡᠳᠦᠭᠡ ᠡᠨᠡ ᠬᠡᠳᠦᠨ ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠳᠥᠷᠪᠡᠨ ᠵᠦᠭ ᠳᠠᠢᠯᠠᠨ ᠶᠠᠪᠤᠵᠤ᠂ ᠮᠠᠨ ᠤ᠋ ᠳᠠᠩ ᠰᠠᠴᠠᠭᠤ ᠤᠯᠤᠰ ᠢ᠋ ᠠᠷᠪᠠᠨ ᠬᠡᠳᠦᠨ ᠢ᠋ ᠬᠤᠷᠢᠶᠠᠵᠤᠬᠤᠢ᠃ ᠡᠷᠲᠡᠨ ᠦ᠌ ᠦᠭᠡ ᠳ᠋ᠦ᠍ᠷ ᠡᠷᠡ ᠬᠥᠮᠦᠨ < ᠬᠠᠨᠠ ᠶ᠋ᠢᠨ ᠢᠷᠣᠭᠠᠷ ᠲᠥᠷᠥᠵᠦ ᠬᠠᠳᠠ ᠶ᠋ᠢᠨ ᠢᠷᠣᠭᠠᠷ ᠦᠬᠦᠬᠦ > ᠬᠡᠮᠡᠳᠡᠭ᠂ ᠪᠢ ᠡᠳᠦᠭᠡ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠳᠠᠷᠤᠵᠤ ᠬᠣᠯᠠ ᠣᠢᠷᠠ ᠤᠯᠤᠰ ᠲᠤᠷ ᠡᠷᠡ ᠪᠡᠨ ᠮᠡᠳᠡᠭᠦᠯᠰᠦᠭᠡᠢ᠃ ᠮᠢᠨᠦ ᠲᠠᠪᠢᠨ ᠲᠦᠮᠡᠨ ᠰᠢᠯᠭᠠᠳᠠᠭ ᠴᠡᠷᠢᠭ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠣᠷᠢᠨ ᠲᠦᠮᠡᠨ ᠡᠴᠡ ᠠᠶᠤᠬᠤ ᠤᠤ᠃ 》ᠬᠡᠮᠡᠬᠦᠢ ᠳ᠋ᠦ᠍ᠷ ᠴᠠᠰ ᠠᠭᠤᠯᠠ ᠥᠭᠦᠯᠡᠷᠦᠨ᠄《 ᠡᠵᠡᠨ ᠮᠢᠨᠦ ᠡᠨᠡ ᠤᠳᠠᠭᠠ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠭᠠᠷᠬᠤ ᠶ᠋ᠢ ᠵᠣᠭᠰᠣᠮᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠬᠡᠮᠡᠭᠴᠢ ᠥᠲᠡᠯᠡ ᠬᠥᠮᠦᠨ ᠪᠤᠰᠤ᠂ ᠨᠡᠩ ᠪᠠᠰᠠ ᠶᠡᠷᠦ ᠶ᠋ᠢᠨ ᠦᠭᠡᠨ ᠳ᠋ᠦ᠍ᠷ᠄ ᠪᠠᠷᠰ ᠪᠠᠯᠠᠷ ᠠᠭᠤᠯᠠᠨ ᠠ᠋ᠴᠠ ᠦᠯᠦ ᠰᠠᠯᠤᠮᠤᠢ᠂ ᠪᠠᠷᠰ ᠪᠠᠯᠠᠷ ᠭᠠᠵᠠᠷ ᠠ᠋ᠴᠠ ᠰᠠᠯᠵᠤ ᠶᠠᠪᠤᠪᠠᠰᠤ ᠵᠤᠷᠠᠮᠠ ᠲᠠᠤᠯᠠᠢ ᠶ᠋ᠢᠨ ᠡᠯᠡᠭᠯᠡᠯ ᠪᠣᠯᠤᠮᠤᠢ᠃ 》ᠡᠭᠦᠨ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠥᠭᠦᠯᠡᠷᠦᠨ᠄《ᠪᠢᠳᠡ ᠲᠡᠭᠦᠨ ᠢ᠋ ᠬᠠᠯᠳᠠᠷᠠ ᠡᠰᠡ ᠡᠴᠢᠪᠡᠴᠦ ᠲᠡᠷᠡ ᠮᠠᠨ ᠢ᠋ ᠵᠦᠭᠡᠷ ᠣᠷᠬᠢᠬᠤ ᠶᠣᠰᠣ ᠦᠭᠡᠢ᠂ ᠯᠠᠪ ᠬᠠᠯᠳᠠᠷᠠ ᠢᠷᠡᠮᠦᠢ᠃ 》ᠴᠠᠰ ᠠᠭᠤᠯᠠ ᠥᠭᠦᠯᠡᠷᠦᠨ᠄《 ᠲᠡᠷᠡ ᠪᠢᠳᠡᠨ ᠢ᠋ ᠬᠠᠯᠳᠠᠷᠠ ᠢᠷᠠᠪᠠᠰᠤ ᠲᠡᠷᠡ ᠴᠠᠭ ᠲᠤᠷ ᠪᠢᠳᠡ ᠪᠠᠢᠯᠳᠤᠬᠤᠢ ᠳ᠋ᠤᠷ ᠣᠷᠣᠢᠲᠠᠬᠤ ᠦᠭᠡᠢ᠂ ᠯᠤᠤ ᠳᠠᠯᠠᠢ ᠡᠭᠦᠯᠡ ᠡᠴᠡ ᠦᠯᠦ ᠰᠠᠯᠤᠮᠤᠢ᠂ ᠪᠠᠷᠰ ᠲᠦᠯᠡᠭᠡ ᠰᠠᠯᠬᠢᠨ ᠠ᠋ᠴᠠ ᠦᠯᠦ ᠠᠯᠤᠰᠯᠠᠮᠤᠢ᠃ ᠲᠡᠷᠡ ᠴᠥᠮ ᠪᠡᠶᠡ ᠪᠡᠨ ᠳᠠᠯᠳᠠᠯᠠᠨ ᠰᠦᠷ ᠢ᠋ᠶ᠋ᠡᠨ ᠨᠢᠭᠤᠨ ᠶᠠᠪᠤᠬᠤᠢ ᠶ᠋ᠢᠨ ᠠᠷᠭᠠ᠂ ᠡᠵᠡᠨ ᠡᠳᠦᠭᠡ ᠴᠡᠷᠢᠭ ᠪᠠᠢᠭᠤᠯᠤᠨ᠂ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠳᠠᠢᠯᠠᠷᠠ ᠡᠴᠢᠪᠡᠰᠦ ᠲᠡᠷᠢᠭᠦᠨ ᠳ᠋ᠦ᠍ᠷ ᠪᠢᠳᠡ ᠭᠠᠵᠠᠷ ᠠ᠋ᠴᠠ ᠰᠠᠯᠵᠤ ᠪᠠᠷᠰ ᠭᠦᠨ ᠠᠭᠤᠯᠠᠨ ᠠ᠋ᠴᠠ ᠰᠠᠯᠤᠭᠰᠠᠨ ᠮᠡᠲᠦ ᠪᠣᠯᠤᠮᠤᠢ᠃ ᠬᠣᠶᠠᠳᠤᠭᠠᠷ ᠲᠤᠷ ᠴᠡᠷᠢᠭ ᠦ᠋ᠨ ᠬᠦᠨᠡᠰᠦ ᠬᠦᠴᠦᠨ ᠬᠡᠲᠦᠷᠬᠡᠢ ᠣᠷᠣᠮᠤᠢ᠃ ᠭᠤᠷᠪᠠᠨ ᠳ᠋ᠤᠷ ᠬᠥᠮᠦᠨ ᠢ᠋ ᠬᠠᠯᠳᠠᠭᠰᠠᠨ ᠪᠤᠷᠤᠭᠤ ᠮᠠᠨ ᠳ᠋ᠤᠷ ᠪᠣᠯᠤᠮᠤᠢ᠃ ᠡᠢᠨ ᠬᠦ᠌ ᠭᠤᠷᠪᠠᠨ ᠵᠦᠢᠯ ᠦᠯᠦ ᠪᠣᠯᠬᠤ ᠶᠠᠪᠤᠳᠠᠯ ᠪᠠᠢᠬᠤ ᠲᠤᠯᠠ ᠡᠵᠡᠨ ᠡᠨᠡ ᠤᠳᠠᠭᠠ ᠶ᠋ᠢᠨ ᠴᠡᠷᠢᠭ ᠢ᠋ ᠵᠣᠭᠰᠣᠪᠠᠰᠤ ᠰᠠᠢᠨ !》 ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠠᠰ ᠮᠥᠷᠡᠨ ᠥᠭᠦᠯᠡᠷᠦᠨ᠄《 ᠮᠠᠨ ᠤ᠋ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠡᠭᠡᠨᠡᠭᠲᠡ ᠥᠪᠡᠷ ᠦ᠋ᠨ ᠰᠦᠷ ᠢ᠋ ᠪᠠᠭᠤᠷᠠᠭᠤᠯᠵᠤ ᠬᠥᠮᠦᠨ ᠦ᠌ ᠬᠦᠴᠦᠨ ᠢ᠋ ᠮᠠᠨᠳᠤᠭᠤᠯᠤᠮᠤᠢ᠃ ᠬᠡᠷᠪᠡ ᠡᠵᠡᠨ ᠡᠴᠢᠵᠦ ᠴᠡᠷᠢᠭ ᠳᠡᠢᠯᠪᠡᠰᠦ ᠬᠡᠷᠬᠢᠮᠦᠢ ?》ᠴᠠᠰ ᠠᠭᠤᠯᠠ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄ 《 ᠡᠨᠡ ᠮᠠᠰᠢ ᠬᠢᠯᠪᠠᠷ ᠬᠡᠷᠡᠭ᠂ ᠮᠢᠨᠦ ᠨᠢᠭᠡᠨ ᠭᠡᠷ ᠢ᠋ ᠤᠯᠤᠰ ᠲᠤᠷ ᠬᠣᠷᠢᠭᠠᠳ ᠨᠠᠮᠠᠶ᠋ᠢ ᠪᠠᠷᠢᠵᠤ ᠴᠡᠷᠢᠭ ᠲᠦ᠍ᠷ ᠠᠪᠠᠴᠢ᠂ ᠬᠡᠷᠪᠡ ᠴᠡᠷᠢᠭ ᠳᠡᠢᠯᠪᠡᠰᠦ ᠨᠠᠮᠠᠶ᠋ᠢ ᠳᠠᠷᠤᠢ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠠᠯᠠᠭᠠᠳ ᠡᠭᠡᠬᠦ ᠲᠤᠭ ᠢ᠋ ᠳᠠᠬᠢᠵᠤ ᠬᠠᠷᠢᠵᠤ ᠢᠷᠡᠭᠡᠳ ᠮᠢᠨᠦ ᠰᠠᠨᠠᠭᠠᠨ ᠢ᠋ᠶ᠋ᠠᠷ ᠭᠠᠵᠠᠷ ᠢ᠋ᠶ᠋ᠠᠨ ᠰᠠᠬᠢᠰᠤᠭᠠᠢ !》ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠠᠭᠤᠷᠯᠠᠵᠤ᠄ 《 ᠳᠠᠷᠤᠢ ᠮᠥᠨ ᠶᠣᠰᠣᠭᠠᠷ ᠪᠣᠯᠲᠤᠭᠠᠢ!》 ᠭᠡᠮᠡᠨ ᠴᠠᠰ ᠠᠭᠤᠯᠠ ᠶ᠋ᠢ ᠨᠢᠭᠡᠨ ᠭᠡᠷ ᠢ᠋ ᠪᠠᠷᠢᠵᠤ᠂ ᠳᠠᠷᠤᠢ ᠲᠡᠭᠦᠨ ᠢ᠋ ᠬᠣᠷᠢᠭᠤᠯ ᠲᠡᠷᠭᠡ ᠳ᠋ᠦ᠍ᠷ ᠬᠣᠷᠢᠭᠤᠯᠵᠤ ᠣᠯᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠰᠢᠯᠭᠠᠪᠠᠰᠤ ᠲᠠᠪᠢᠨ ᠶᠢᠰᠦᠨ ᠲᠦᠮᠡᠨ ᠪᠣᠯᠤᠭᠰᠠᠨ ᠳ᠋ᠤᠷ ᠳᠠᠬᠢᠨ ᠨᠡᠮᠡᠵᠦ ᠪᠠᠢᠭᠤᠯᠤᠨ ᠵᠢᠷᠠᠨ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠴᠡᠷᠢᠭ ᠦ᠋ᠨ ᠰᠡᠭᠦᠯ ᠳ᠋ᠦ᠍ᠷ ᠴᠠᠰ ᠠᠭᠤᠯᠠ ᠶ᠋ᠢᠨ ᠬᠣᠷᠢᠭᠤᠯ ᠲᠡᠷᠭᠡ ᠶ᠋ᠢ ᠶᠠᠪᠤᠭᠤᠯᠵᠤ᠂ ᠴᠠᠰ ᠠᠭᠤᠯᠠ ᠶ᠋ᠢᠨ ᠣᠷᠣᠨ ᠳ᠋ᠤᠷ ᠬᠠᠰ ᠮᠥᠷᠡᠨ ᠢ᠋ ᠣᠷᠣᠭᠤᠯᠵᠤ᠂ ᠬᠠᠰ ᠮᠥᠷᠡᠨ ᠦ᠌ ᠣᠷᠣᠨ ᠳ᠋ᠤᠷ ᠰᠢᠷᠠ ᠭᠣᠣᠯ ᠬᠡᠮᠡᠭᠴᠢ ᠶ᠋ᠢ ᠳᠡᠪᠰᠢᠭᠦᠯᠵᠦ᠂ ᠵᠢᠷᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠲᠠᠪᠤᠨ ᠠᠩᠭᠢ ᠬᠤᠪᠢᠶᠠᠵᠤ᠂ ᠬᠠᠷᠠᠭᠴᠢᠨ ᠭᠠᠬᠠᠢ ᠵᠢᠯ ᠢ᠋ ᠥᠩᠭᠡᠷᠡᠵᠦ᠂ ᠳᠠᠷᠤᠢ ᠬᠥᠬᠡ ᠬᠤᠯᠤᠭᠠᠨᠠ ᠵᠢᠯ ᠦ᠋ᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠦᠭ ᠮᠣᠷᠳᠠᠪᠠ᠃ ᠬᠠᠰ ᠮᠥᠷᠡᠨ ᠢ᠋ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠤᠭᠤᠯᠵᠤ᠂ ᠬᠣᠰᠢᠭᠤᠴᠢ ᠪᠣᠯᠭᠠᠨ ᠤᠰᠤ ᠤᠴᠠᠷᠠᠪᠠᠰᠤ ᠬᠥᠭᠥᠷᠭᠡ ᠳᠡᠯᠪᠢ᠂ ᠠᠭᠤᠯᠠ ᠤᠴᠠᠷᠠᠪᠠᠰᠤ ᠵᠠᠮ ᠨᠡᠬᠡᠭᠡ᠂ ᠪᠣᠷᠣᠭᠠᠨ ᠤᠴᠠᠷᠠᠪᠠᠰᠤ ᠥᠨᠳᠥᠷ ᠪᠠᠭᠤᠳᠠᠯ ᠪᠡᠯᠡᠳᠭᠡ ᠭᠡᠮᠡᠨ ᠭᠤᠷᠪᠠᠨ ᠵᠡᠷᠭᠡ ᠶᠡᠬᠡ ᠦᠬᠡᠷ ᠫᠤᠤ ᠲᠠᠯᠪᠢᠵᠤ᠂ ᠵᠢᠷᠠᠨ ᠲᠦᠮᠡᠨ ᠶᠡᠬᠡ ᠴᠡᠷᠢᠭ ᠳᠠᠯᠠᠢ ᠶ᠋ᠢᠨ ᠳᠠᠪᠠᠯᠭᠠᠨ ᠮᠡᠲᠦ ᠬᠥᠳᠡᠯᠦᠨ ᠬᠠᠭᠠᠰ ᠰᠠᠷᠠ ᠰᠢᠬᠠᠮ ᠶᠠᠪᠤᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠠᠬᠠ ᠬᠠᠷᠠ ᠬᠢᠭᠦᠯ ᠳ᠋ᠦ᠍ᠷ ᠬᠦᠷᠪᠡᠰᠦ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠡᠳᠦᠢᠨᠡᠢ ᠤᠭᠲᠤᠨ ᠢᠷᠡᠵᠦ ᠲᠡᠨᠳᠡ ᠭᠦᠨ ᠤᠨᠠᠭᠤᠯᠢ ᠤᠬᠤᠵᠤ ᠪᠡᠯᠡᠳᠦᠨ ᠬᠦᠯᠢᠶᠡᠵᠦᠬᠦᠢ᠃ ᠠᠷᠰᠯᠠᠨ ᠬᠠᠭᠠᠨ ᠶᠡᠬᠡᠯᠡ ᠠᠶᠤᠵᠤ ᠥᠭᠦᠯᠡᠷᠦᠨ᠄《 ᠡᠨᠡ ᠪᠧᠲ᠋ᠠ᠋ ᠤᠯᠤᠰ ᠬᠡᠷᠬᠢᠨ ᠣᠯᠵᠤ ᠮᠡᠳᠡᠭᠡᠳ ᠡᠨᠡ ᠮᠡᠲᠦ ᠡᠷᠲᠡ ᠡᠴᠡ ᠪᠡᠯᠡᠳᠦᠨ ᠵᠠᠪᠳᠤᠭᠰᠠᠨ ᠪᠣᠢ ? ᠮᠠᠨ ᠤ᠋ ᠴᠡᠷᠢᠭ ᠡᠳᠦᠵᠦ ᠠᠷᠪᠠᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡᠬᠡᠨ ᠮᠣᠷᠳᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠪᠥᠭᠡᠲᠡᠯᠡ ᠡᠳᠡ ᠬᠡᠷᠬᠢᠨ ᠣᠯᠵᠤ ᠮᠡᠳᠡᠪᠡ ? ᠯᠠᠪ ᠴᠠᠰ ᠠᠭᠤᠯᠠ ᠠ᠋ᠴᠠ ᠬᠡᠯᠡᠨ ᠭᠠᠷᠤᠭᠰᠠᠨ ᠪᠣᠯᠠᠢ !》 ᠭᠡᠮᠡᠨ᠂ ᠴᠠᠰ ᠠᠭᠤᠯᠠ ᠶ᠋ᠢ ᠬᠣᠷᠢᠭᠤᠯ ᠲᠡᠷᠭᠡ ᠡᠴᠡ ᠭᠠᠷᠭᠠᠵᠤ ᠠᠪᠴᠢᠷᠠᠭᠠᠳ ᠪᠠᠢᠴᠠᠭᠠᠨ ᠠᠰᠠᠭᠤᠪᠠᠰᠤ᠂ ᠴᠠᠰ ᠠᠭᠤᠯᠠ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄《ᠡᠵᠡᠨ ᠣᠨᠴᠠ ᠨᠠᠮᠠᠶ᠋ᠢ ᠠᠯᠠᠰᠤᠭᠠᠢ ᠬᠡᠮᠡᠪᠡᠰᠦ ᠳᠠᠷᠤᠢ ᠠᠯᠠᠪᠠᠰᠤ ᠪᠠᠷᠠᠪᠠᠢ ᠢᠠ᠂ ᠡᠨᠡ ᠲᠡᠷᠡ ᠭᠡᠮᠡᠨ ᠶᠠᠯᠠ ᠵᠣᠬᠢᠶᠠᠬᠤ ᠶᠠᠭᠤᠨ ? ᠴᠡᠷᠢᠭ ᠲᠠᠢᠯᠵᠤ ᠳᠡᠢᠯᠦᠭᠳᠡᠪᠡᠴᠦ ᠲᠦᠰᠢᠮᠡᠯ ᠪᠢ ᠨᠢᠭᠡᠨᠲᠡ ᠦᠬᠦᠬᠦ ᠬᠥᠮᠦᠨ᠃ ᠮᠠᠨ ᠤ᠋ ᠴᠡᠷᠢᠭ ᠲᠠᠢᠯᠪᠠᠰᠤ ᠤᠭ ᠬᠡᠯᠡᠯᠴᠡᠭᠡᠨ ᠶᠣᠰᠣᠭᠠᠷ ᠨᠠᠮᠠᠶ᠋ᠢ ᠠᠯᠠᠵᠤ ᠡᠵᠡᠨ ᠦ᠌ ᠵᠠᠬᠢᠶᠠ ᠶ᠋ᠢ ᠣᠯᠠᠨ ᠳ᠋ᠤᠷ ᠵᠠᠷᠯᠠᠵᠤ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠢ᠋ ᠠᠶᠤᠯᠭᠠᠨ ᠪᠢᠰᠢᠷᠡᠭᠦᠯᠬᠦ᠂ ᠬᠡᠷᠪᠡ ᠴᠡᠷᠢᠭ ᠳᠡᠢᠯᠦᠭᠳᠡᠪᠡᠰᠦ ᠢᠴᠢᠭᠦᠷᠢ ᠳ᠋ᠦ᠍ᠷ ᠢ᠋ᠶ᠋ᠡᠨ ᠤᠷᠢᠳᠠ ᠨᠠᠮᠠᠶ᠋ᠢ ᠠᠯᠠᠵᠤ ᠳᠠᠷᠠᠭᠠ ᠮᠢᠨᠦ ᠭᠡᠷ ᠡᠷᠦᠬᠡ ᠶ᠋ᠢ ᠠᠯᠠᠬᠤ ᠪᠣᠯᠠᠢ᠂ ᠬᠠᠮᠢᠭᠠᠰᠢ ᠪᠣᠯᠪᠠᠴᠤ ᠨᠢᠭᠡᠨᠲᠡ ᠦᠬᠦᠬᠦ ᠪᠥᠭᠡᠳ ᠪᠢ ᠲᠡᠷᠡ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠶᠠᠭᠤᠨ ᠤ᠋ ᠤᠴᠢᠷ ᠲᠤᠷ ᠮᠡᠳᠡᠭᠡ ᠢᠯᠡᠭᠡᠮᠦᠢ ? ᠵᠢᠴᠢ ᠳ᠋ᠦ᠍ᠷ ᠲᠠᠩᠭᠤᠳ ᠤ᠋ᠨ ᠡᠯᠴᠢ ᠶ᠋ᠢ ᠲᠠᠯᠪᠢᠵᠤ ᠭᠠᠷᠭᠠᠭᠰᠠᠨ ᠠᠨᠤ ᠲᠡᠷᠡ ᠳᠠᠷᠤᠢ ᠦᠭᠡ ᠵᠠᠳᠠᠷᠠᠭᠤᠯᠬᠤ ᠲᠡᠷᠢᠭᠦᠨ ᠨᠢᠭᠡᠨ ᠳᠣᠪᠲᠣᠯᠭᠠ ᠪᠥᠭᠡᠲᠡᠯᠡ ᠲᠦᠰᠢᠮᠡᠯ ᠪᠢ ᠦᠭᠡ ᠬᠦᠷᠭᠡᠬᠦ ᠬᠡᠷᠡᠭᠲᠡᠢ ᠦᠦ ? ᠨᠡᠩ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠢᠨᠤ ᠮᠠᠭᠠᠳ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠪᠥᠭᠡᠳ ᠲᠦᠰᠢᠮᠡᠳ ᠢᠨᠦ ᠴᠥᠮ ᠭᠠᠵᠠᠷ ᠤ᠋ᠨ ᠭᠠᠷᠠᠭ ᠤ᠋ᠳ ᠮᠥᠨ᠃ ᠵᠢᠴᠢ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠮᠤᠬᠤᠯᠢ ᠬᠡᠮᠡᠭᠴᠢ ᠪᠠᠭᠠᠲᠤᠷ ᠪᠣᠳᠣᠯᠭᠠ ᠬᠣᠣᠰ ᠪᠦᠷᠢᠳᠦᠭᠰᠡᠨ ᠪᠥᠭᠡᠳ ᠵᠢᠰᠦ ᠳ᠋ᠦ᠍ᠷ ᠴᠢᠭᠢᠷᠠᠭ᠂ ᠵᠢᠷᠦᠬᠡ ᠳ᠋ᠦ᠍ᠷ ᠰᠡᠴᠡᠨ᠂ ᠲᠡᠭᠦᠨ ᠦ᠌ ᠴᠠᠨᠳᠠᠭᠤᠯ ᠮᠠᠨᠠᠭᠤᠯ ᠬᠡᠮᠡᠭᠴᠢ ᠬᠣᠯᠠ ᠣᠢᠷᠠ ᠤᠯᠤᠰ ᠲᠤᠷ ᠨᠢᠭᠡᠨᠲᠡ ᠳᠦᠭᠦᠷᠴᠦᠬᠦᠢ᠃ ᠡᠨᠡ ᠮᠡᠲᠦ ᠳ᠋ᠦ᠍ᠷ ᠲᠦᠰᠢᠮᠡᠯ ᠮᠢᠨᠦ ᠮᠡᠳᠡᠭᠡ ᠶ᠋ᠢ ᠶᠠᠭᠤᠨᠠᠢ ᠬᠦᠯᠢᠶᠡᠬᠦ ? ᠨᠡᠩ ᠪᠠᠰᠠ ᠮᠢᠨᠦ ᠪᠡᠶᠡ ᠶ᠋ᠢ ᠳᠠᠷᠤᠢ ᠲᠥᠷᠥ ᠡᠴᠡ ᠪᠠᠷᠢᠵᠤ ᠬᠠᠳᠠᠭᠠᠯᠠᠪᠠ᠃ ᠮᠢᠨᠦ ᠭᠡᠷ ᠡᠷᠦᠬᠡ ᠶ᠋ᠢ ᠮᠥᠨ ᠨᠠᠳᠠ ᠯᠤᠭᠠ ᠬᠠᠮᠲᠤ ᠪᠠᠷᠢᠪᠠ᠃ ᠲᠦᠰᠢᠮᠡᠯ ᠪᠢ ᠠᠯᠢ ᠴᠢᠯᠥᠭᠡ ᠪᠡᠷ ᠡᠢᠮᠦ ᠬᠣᠯᠠ ᠮᠡᠳᠡᠭᠡ ᠢᠯᠡᠭᠡᠮᠦᠢ ? ᠦᠨᠡᠬᠡᠷ ᠮᠡᠳᠡᠭᠡ ᠢᠯᠡᠭᠡᠪᠡᠴᠦ ᠮᠢᠨᠦ ᠠᠮᠢᠳᠤᠷᠠᠬᠤᠢ ᠳ᠋ᠤᠷ ᠶᠠᠮᠪᠠᠷ ᠬᠠᠷᠢᠶᠠ᠂ ᠬᠠᠷᠢᠨ ᠮᠠᠨ ᠤ᠋ ᠴᠡᠷᠢᠭ ᠲᠠᠢᠯᠪᠠᠰᠤ ᠡᠵᠡᠨ ᠬᠠᠷᠢᠨ ᠭᠡᠨᠡᠳᠲᠡ ᠪᠠᠶᠠᠷᠯᠠᠯ ᠳ᠋ᠤᠷ ᠨᠠᠮᠠᠶ᠋ᠢ ᠬᠡᠯᠲᠦᠷᠢᠭᠦᠯᠬᠦ ᠴᠦ᠍ ᠮᠠᠭᠠᠳ ᠦᠭᠡᠢ᠂ ᠳᠡᠢᠯᠦᠭᠳᠡᠪᠡᠰᠦ ᠮᠢᠨᠦ ᠦᠬᠦᠬᠦ ᠨᠡᠩ ᠲᠦᠷᠭᠡᠨ ᠪᠣᠯᠠᠢ᠂ ᠨᠠᠮᠠᠶ᠋ᠢ ᠰᠡᠵᠢᠭᠯᠡᠬᠦ ᠢᠨᠤ ᠢᠯᠡᠭᠦᠴᠡ ᠬᠡᠷᠡᠭ!》ᠭᠡᠮᠡᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠠᠷᠰᠯᠠᠨ ᠬᠠᠭᠠᠨ ᠠᠭᠤᠷᠯᠠᠨ ᠥᠭᠦᠯᠡᠷᠦᠨ᠄《 ᠥᠴᠦᠬᠡᠨ ᠪᠣᠭᠣᠯ ᠨᠠᠳᠠ ᠯᠤᠭᠠ ᠦᠭᠡ ᠣᠷᠣᠯᠳᠣᠬᠤ ᠬᠡᠷᠡᠭ ᠦᠭᠡᠢ᠂ ᠪᠠᠢᠯᠳᠤᠬᠤ ᠪᠢᠴᠢᠭ ᠢ᠋ ᠴᠢ ᠬᠦᠷᠭᠡᠵᠦ ᠠᠪᠠᠴᠢᠭᠠᠳ ᠲᠡᠮᠦᠵᠢᠨ ᠢ᠋ ᠰᠠᠢᠲᠤᠷ ᠬᠠᠷᠢᠶᠠᠨ ᠢᠷᠡ᠂ ᠲᠡᠷᠡ ᠴᠢᠮᠠᠶ᠋ᠢ ᠦᠯᠦ ᠠᠯᠠᠮᠤᠢ !》ᠭᠡᠮᠡᠨ ᠭᠤᠲᠤᠭᠠᠬᠤ ᠦᠭᠡᠰ ᠦ᠋ᠨ ᠪᠠᠢᠯᠳᠤᠭᠠᠨ ᠤ᠋ ᠪᠢᠴᠢᠭ ᠢ᠋ ᠪᠠᠷᠢᠭᠤᠯᠵᠤ᠂ ᠴᠠᠰ ᠠᠭᠤᠯᠠ ᠶ᠋ᠢ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠢᠯᠡᠭᠡᠪᠡ᠃ ᠬᠥᠭᠡᠷᠦᠬᠦᠢ ᠴᠠᠰ ᠠᠭᠤᠯᠠ ᠶ᠋ᠢᠨ ᠬᠠᠮᠢᠭᠠᠰᠢ ᠪᠣᠯᠬᠤ ᠶ᠋ᠢ ᠮᠡᠳᠡᠰᠦᠭᠡᠢ ᠬᠡᠮᠡᠪᠡᠰᠦ ᠰᠤᠳᠤᠷᠴᠢ ᠲᠦᠰᠢᠮᠡᠯ ᠮᠢᠨᠦ ᠵᠣᠴᠢᠨ ᠳ᠋ᠤᠷ ᠵᠣᠯᠭᠠᠵᠤ᠂ ᠪᠣᠭᠳᠠ ᠪᠠᠭᠠᠲᠤᠷ ᠬᠤᠸᠠᠩᠳᠢ ᠴᠢᠩᠭᠢᠰ ᠬᠠᠭᠠᠨ ᠡᠪᠦᠭᠡ ᠶ᠋ᠢᠨ ᠭᠡᠭᠡᠨ ᠮᠣᠩᠭᠣᠨ ᠨᠠᠢ᠍ᠮᠠᠨ ᠴᠠᠭᠠᠨ ᠣᠷᠳᠣᠨ ᠤ᠋ ᠲᠠᠬᠢᠯᠭᠠ ᠪᠠ ᠬᠣᠵᠢᠮ ᠤ᠋ᠨ ᠬᠣᠲᠣᠩ ᠤᠯᠤᠰ ᠤ᠋ᠨ ᠬᠤᠯᠠᠭᠠᠢ ᠶ᠋ᠢ ᠰᠡᠷᠭᠡᠢᠯᠡᠬᠦ ᠲᠡᠮᠳᠡᠭ ᠭᠠᠷᠤᠭᠰᠠᠨ ᠢ᠋ ᠲᠣᠳᠣᠷᠬᠠᠢᠯᠠᠨ ᠰᠣᠨᠣᠰᠴᠤ ᠮᠡᠳᠡᠭᠡᠳ ᠵᠠᠯᠭᠠᠨ ᠪᠢᠴᠢᠭᠰᠡᠨ ᠳᠣᠣᠷᠠᠲᠤ ᠪᠦᠯᠦᠭ ᠲᠣᠷ ᠦᠵᠡᠭᠳᠡᠬᠦᠢ᠃
ᠰᠤᠳᠤᠷᠴᠢ ᠲᠦᠰᠢᠮᠡᠯ ᠦ᠋ᠨ ᠰᠤᠯᠠ ᠰᠢᠯᠦᠭ :
ᠠᠯᠲᠠᠨ ᠶᠠᠰᠤᠲᠠᠨ ᠮᠢᠬᠠ ᠴᠢᠰᠤ ᠪᠠᠷ ᠭᠠᠪᠢᠶᠠᠲᠤ ᠰᠠᠢᠳ ᠢ᠋ ᠢᠨᠠᠭᠯᠠᠷᠤᠨ
ᠠᠰᠠᠷᠠᠯᠲᠤ ᠪᠣᠭᠳᠠ ᠶ᠋ᠢᠨ ᠠᠬᠤᠢ ᠶᠡᠬᠡ ᠴᠢᠩ ᠦᠨᠡᠨ ᠥᠷᠥᠰᠢᠶᠡᠯ᠂
ᠠᠷᠢᠭᠤᠨ ᠰᠣᠯᠤᠩᠭᠤᠸᠠ ᠰᠤᠯᠠ ᠲᠠᠲᠠᠪᠤᠷᠢ ᠪᠠᠷ ᠠᠮᠠᠷᠠᠭᠯᠠᠭᠰᠠᠨ ᠡᠷᠡ ᠪᠡᠨ ᠬᠦᠨᠳᠦᠯᠡᠷᠦᠨ
ᠠᠯᠤᠰᠳᠠᠬᠤ ᠮᠡᠳᠡᠭᠰᠡᠨ ᠮᠡᠷᠭᠡᠨ ᠡᠬᠡᠨᠡᠷ ᠦ᠋ᠨ ᠴᠣᠬᠣᠮ ᠴᠣᠯᠭᠣᠷᠠᠭᠰᠠᠨ ᠪᠣᠳᠣᠯᠭᠠ !