ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠬᠣᠷᠢᠨ ᠵᠢᠷᠭᠤᠳᠤᠭᠠᠷ ᠪᠦᠯᠦᠭ > Хөх судар - Инжинаш <Хорин зургадугаар бүлэг >
214ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨᠠ ᠲᠠᠢᠽᠦ ᠪᠣᠭᠳᠠ ᠥᠷᠥᠰᠢᠶᠡᠯ ᠨᠤᠲᠠ ᠪᠠᠷ ᠪᠠᠢᠯᠳᠤᠵᠤ ᠮᠡᠷᠭᠡᠨ ᠢ᠋ᠶ᠋ᠡᠨ ᠦᠵᠡᠭᠦᠯᠪᠡ
ᠭᠠᠯᠵᠠᠭᠤ ᠮᠦᠷᠡᠨᠡ ᠥᠨᠳᠥᠷ ᠰᠡᠴᠡᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠᠷ ᠤᠷᠤᠭᠰᠢᠯᠠᠵᠤ ᠵᠢᠷᠤᠮ ᠢ᠋ᠶ᠋ᠠᠨ ᠭᠦᠢᠴᠡᠳᠬᠡᠪᠡ
ᠬᠣᠷᠢᠨ ᠵᠢᠷᠭᠤᠳᠤᠭᠠᠷ ᠪᠦᠯᠦᠭ
ᠰᠥᠩ ᠨᠢᠩᠽᠦ᠋ᠩ ᠦ᠋ᠨ ᠴᠢᠩ ᠶᠤᠸᠠᠨ ᠤ᠋ ᠳᠥᠷᠪᠡᠳᠦᠭᠡᠷ ᠣᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠤ᠋ ᠴᠧᠩ ᠠᠨ ᠤ᠋
ᠭᠤᠷᠪᠠᠳᠤᠭᠠᠷ ᠣᠨ᠂ ᠲᠠᠢᠽᠦ ᠭᠤᠴᠢᠨ ᠳᠣᠯᠣᠭᠠᠨ ᠰᠡᠭᠦᠳᠡᠷ ᠲᠡᠢ᠂ ᠰᠢᠷᠠ ᠮᠣᠷᠢᠨ ᠵᠢᠯ ᠢ᠋ᠶ᠋ᠡᠷ ᠪᠠᠢᠭᠰᠠᠭᠠᠷ᠂ ᠡᠨᠡ ᠵᠢᠯ ᠦ᠋ᠨ ᠬᠡᠷᠡᠭ ᠣᠯᠠᠨ
ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨᠠ ᠲᠠᠢᠽᠦ ᠪᠣᠭᠳᠠ ᠥᠷᠥᠰᠢᠶᠡᠯ ᠨᠤᠲᠠ ᠪᠠᠷ ᠪᠠᠢᠯᠳᠤᠵᠤ ᠮᠡᠷᠭᠡᠨ ᠢ᠋ᠶ᠋ᠡᠨ ᠦᠵᠡᠭᠦᠯᠪᠡ
ᠭᠠᠯᠵᠠᠭᠤ ᠮᠦᠷᠡᠨᠡ ᠥᠨᠳᠥᠷ ᠰᠡᠴᠡᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠᠷ ᠤᠷᠤᠭᠰᠢᠯᠠᠵᠤ ᠵᠢᠷᠤᠮ ᠢ᠋ᠶ᠋ᠠᠨ ᠭᠦᠢᠴᠡᠳᠬᠡᠪᠡ
ᠪᠦᠲᠦᠬᠦ ᠤᠯᠤᠰ ᠤ᠋ᠨ ᠡᠵᠡᠨ ᠰᠠᠢᠳ ᠯᠤᠤ ᠪᠠᠷᠰ ᠮᠡᠲᠦ
ᠪᠦᠷᠢᠯᠬᠦ ᠲᠥᠷᠥ ᠶ᠋ᠢᠨ ᠡᠴᠢᠭᠡ ᠬᠥᠪᠡᠭᠦᠨ ᠣᠯᠢᠭ ᠭᠣᠯᠢᠭ ᠠᠳᠠᠯᠢ ᠂
ᠪᠥᠬᠥᠢᠵᠦ ᠤᠷᠤᠭᠰᠢᠯᠠᠭᠰᠠᠨ ᠥᠨᠳᠥᠷ ᠰᠡᠴᠡᠨ ᠦᠶᠡ ᠤᠯᠠᠷᠢᠨ ᠵᠢᠷᠤᠮᠲᠠᠢ
ᠪᠥᠭᠰᠢᠵᠦ ᠤᠬᠤᠷᠢᠭᠰᠠᠨ ᠦᠯᠬᠦ ᠶ᠋ᠢᠨ ᠵᠦᠨᠳᠠᠢ ᠦᠨᠡᠨ ᠢ᠋ᠶ᠋ᠡᠷ ᠠᠯᠠᠯᠲᠠᠢ !
ᠲᠡᠨᠳᠡᠴᠡ ᠲᠠᠢᠽᠦ ᠶ᠋ᠢᠨ ᠴᠢᠰᠤ ᠳᠥᠷᠪᠡᠨ ᠳᠡᠭᠦᠦ ᠨᠠᠷ ᠤ᠋ᠨ ᠴᠢᠰᠤ ᠯᠤᠭᠠ ᠦᠯᠦ ᠨᠡᠢᠯᠡᠬᠦ ᠶ᠋ᠢ ᠦᠵᠡᠭᠡᠳ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠰᠠᠶᠢ ᠵᠡᠭᠦᠳᠦᠨ ᠦ᠌ ᠪᠠᠳᠠᠷᠠᠩᠭᠤᠢ ᠴᠠᠭᠠᠨ ᠲᠡᠭᠷᠢ ᠡᠴᠡ ᠣᠯᠪᠠ ᠬᠡᠮᠡᠬᠦ ᠶ᠋ᠢ ᠰᠡᠵᠢᠭ ᠦᠭᠡᠢ ᠦᠨᠡᠮᠰᠢᠶᠡᠨ ᠢᠲᠡᠭᠡᠮᠵᠢᠯᠡᠵᠦ᠂ ᠰᠡᠵᠢᠭ ᠢ᠋ᠶ᠋ᠡᠨ ᠲᠠᠰᠤᠯᠵᠤ᠂ ᠣᠯᠠᠨ ᠤ᠋ ᠳᠤᠷᠠᠳᠬᠠᠭᠰᠠᠨ ᠶᠣᠰᠣᠭᠠᠷ ᠣᠶᠤᠲᠤ ᠰᠡᠴᠡᠨ ᠦ᠌ ᠣᠯᠠᠨ ᠦᠵᠦᠭ ᠢ᠋ᠶ᠋ᠡᠷ ᠬᠥᠬᠡ ᠰᠤᠳᠤᠷ ᠲᠤᠷ ᠲᠡᠮᠳᠡᠭᠯᠡᠭᠡᠳ ᠵᠣᠭᠰᠣᠯ ᠦᠭᠡᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠭᠠᠯᠠᠭᠤᠲᠤ ᠠᠭᠤᠯᠠᠨᠠ ᠳᠣᠪᠲᠣᠯᠤᠨ ᠬᠦᠷᠪᠡᠰᠦ᠂ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠬᠠᠰᠠᠷ ᠤ᠋ᠨ ᠬᠠᠲᠤᠳ ᠬᠥᠪᠡᠭᠦᠳ ᠪᠠ ᠬᠠᠮᠤᠭ ᠪᠦᠬᠦᠨ ᠢ᠋ ᠠᠪᠴᠤ ᠳᠡᠨᠵᠢ ᠪᠣᠯᠭᠠᠷᠠ ᠠᠪᠠᠴᠢᠵᠤ ᠴᠡᠷᠢᠭ ᠡᠭᠡᠭᠰᠡᠭᠡᠷ ᠲᠠᠪᠤᠨ ᠡᠳᠦᠷ ᠪᠣᠯᠪᠠ ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠲᠡᠷᠢᠭᠦᠯᠡᠨ ᠬᠥᠯ ᠳᠡᠪᠰᠡᠨ ᠭᠠᠰᠠᠯᠤᠯᠴᠠᠵᠤ᠂ ᠨᠡᠬᠡᠵᠦ ᠡᠴᠢᠰᠦᠭᠡᠢ ᠭᠡᠮᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠲᠡᠭᠰᠢᠯᠡᠪᠡ᠃ ᠬᠣᠯᠠᠳᠠᠬᠢ ᠠᠳᠤᠭᠤᠨ ᠤ᠋ ᠲᠠᠭᠠᠮᠠᠯ ᠴᠠᠭᠯᠠᠰᠢ ᠨᠡᠷᠡᠲᠦ ᠲᠤᠷᠰᠢᠭᠤᠯ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠵᠠᠬᠠ ᠳ᠋ᠤᠷ ᠢ᠋ᠶ᠋ᠠᠨ ᠣᠷᠣᠲᠠᠯᠠ ᠴᠠᠭᠠᠨᠠ ᠠ᠋ᠴᠠ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠬᠤᠸᠠᠩ ᠲᠠᠢᠽᠢ ᠰᠢᠨᠡ ᠸᠠᠩ ᠠᠨᠤ ᠠᠪᠴᠤ ᠤᠴᠠᠷᠠᠭᠠᠳ ᠡᠭᠡᠵᠦ ᠠᠢᠰᠤᠢ᠂ ᠬᠠᠰᠠᠷ ᠨᠣᠶᠠᠨ ᠤ᠋ ᠭᠡᠷ ᠦ᠋ᠨ ᠠᠮᠠ ᠶ᠋ᠢ ᠨᠤᠲᠤᠭ ᠲᠠᠭᠠᠨ ᠬᠦᠷᠭᠡᠭᠦᠯᠪᠡ᠂ ᠰᠣᠨᠣᠰᠬᠤᠯᠠ ᠲᠡᠳᠡᠨ ᠦ᠌ ᠰᠣᠯᠤᠩᠭᠤᠸᠠ ᠭᠦᠩᠵᠦ ᠢᠨᠣ ᠳᠠᠯᠳᠠᠭᠤᠷ ᠫᠣᠯᠭᠣᠳᠠᠢ ᠶ᠋ᠢ ᠢᠯᠡᠭᠡᠵᠦ ᠬᠠᠷᠠᠭᠠᠯᠵᠠᠭᠤᠯᠤᠨ ᠬᠠᠮᠠᠭᠠᠯᠠᠭᠰᠠᠨ ᠢ᠋ᠶ᠋ᠠᠷ ᠲᠡᠳᠡᠨ ᠦ᠌ ᠣᠯᠢᠨᠲᠠᠢ ᠭᠣᠯᠢᠨᠲᠠᠢ ᠲᠠᠢᠰᠢ ᠲᠠᠢᠪᠤᠤ ᠠᠨᠤ ᠬᠠᠯᠳᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠬᠡᠮᠡᠮᠦ᠃ ᠲᠡᠳᠡᠨ ᠦ᠌ ᠡᠪᠡᠳᠴᠦ ᠬᠣᠴᠣᠷᠤᠭᠰᠠᠨ ᠴᠡᠷᠢᠭ ᠡᠴᠡ ᠣᠯᠵᠤ ᠰᠣᠨᠣᠰᠪᠠ᠃ ᠸᠠᠩ ᠬᠠᠭᠠᠨ ᠠᠨᠤ ᠠᠷᠪᠠᠨ ᠲᠦᠮᠡᠨ ᠦ᠌ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠬᠣᠢᠨᠠ ᠠᠨᠤ ᠶᠠᠪᠤᠮᠤᠢ ᠬᠡᠮᠡᠮᠦᠢ᠃ 》
ᠦᠵᠡᠰᠡ ᠸᠠᠩ ᠬᠠᠭᠠᠨ ᠤ᠋ ᠪᠡᠶᠡ ᠡᠰᠡ ᠭᠠᠷᠪᠠᠰᠤ ᠣᠯᠠᠨ ᠠᠢᠮᠠᠭ ᠤ᠋ᠳ ᠤ᠋ᠨ ᠴᠡᠷᠢᠭ ᠬᠦᠴᠦᠯᠡᠬᠦ ᠦᠭᠡᠢ ᠲᠤᠯᠠ ᠵᠠᠮᠤᠬᠠ ᠠᠷᠭᠠ ᠭᠠᠷᠭᠠᠵᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠸᠠᠨ ᠶᠠᠨ ᠵᠢᠩ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠪᠡᠨ ᠢᠴᠢᠭᠡᠭᠰᠡᠨ ᠳ᠋ᠦ᠍ᠷ ᠦᠰ ᠪᠣᠯᠵᠤ᠂ ᠾᠧ ᠸᠠᠩ ᠤ᠋ᠨ ᠵᠠᠩᠵᠤᠨ ᠴᠡᠷᠢᠭ ᠲᠦ᠍ᠷ ᠢᠨᠣ ᠵᠠᠬᠠ ᠶ᠋ᠢᠨ ᠭᠠᠳᠠᠨᠠ ᠱᠠᠩᠨᠠᠵᠤ᠂ ᠾᠧ ᠸᠠᠩ ᠢ᠋ ᠬᠠᠭᠠᠨ ᠡᠷᠭᠦᠮᠵᠢᠯᠡᠨ ᠪᠠᠰᠠ ᠵᠣᠣ ᠲᠤᠤ ᠱᠢ ᠶ᠋ᠢᠨ ᠲᠠᠮᠠᠭᠠ ᠴᠠᠴᠤᠭ ᠥᠭᠴᠦ ᠡᠷᠭᠦᠮᠵᠢᠯᠡᠵᠦ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠰᠡᠷᠭᠡᠢᠯᠡᠭᠦᠯᠦᠮᠦᠢ ᠭᠡᠮᠡᠨ ᠮᠡᠬᠡᠯᠡᠨ ᠠᠪᠤᠨ ᠭᠠᠷᠴᠤ ᠢᠷᠡᠬᠦᠢ ᠳ᠋ᠦ᠍ᠷ ᠾᠧ ᠸᠠᠩ ᠤ᠋ᠨ ᠥᠬᠢᠨ ᠢᠨᠦ ᠰᠣᠯᠤᠩᠭᠤᠸᠠ ᠯᠠᠪ ᠪᠠᠰᠠ ᠵᠠᠮᠤᠬᠠ ᠶ᠋ᠢᠨ ᠠᠷᠭᠠ ᠪᠣᠢ ᠊ᠶᠠ ᠬᠡᠮᠡᠵᠦ ᠡᠴᠢᠭᠡ ᠪᠡᠨ ᠳᠠᠬᠢᠨ ᠳᠠᠪᠲᠠᠨ ᠬᠣᠷᠢᠭᠯᠠᠲᠠᠯᠠ ᠸᠠᠩ ᠬᠠᠭᠠᠨ ᠤ᠋ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠷᠭᠦᠮᠵᠢᠯᠡᠯ ᠢ᠋ ᠬᠦᠰᠡᠬᠦ ᠰᠡᠳᠬᠢᠯ ᠶᠡᠬᠡᠳᠡᠵᠦ᠂ ᠡᠭᠦᠨ ᠳ᠋ᠦ᠍ᠷ ᠣᠭᠲᠣ ᠰᠡᠵᠢᠭᠯᠡᠬᠦ ᠭᠠᠵᠠᠷ ᠦᠭᠡᠢ ᠪᠣᠯᠠᠢ ᠭᠡᠮᠡᠨ ᠭᠠᠷᠴᠤ ᠢᠷᠡᠬᠦᠶᠡ᠂ ᠰᠣᠯᠤᠩᠭᠤᠸᠠ ᠶ᠋ᠢᠨ ᠳᠣᠲᠣᠷᠠ ᠡᠲᠡᠭᠡᠳ ᠨᠢᠭᠡᠨ ᠵᠦᠢᠯ ᠦ᠋ᠨ ᠤᠶᠠᠷᠠᠯ ᠲᠥᠷᠥᠭᠳᠡᠵᠦ᠂ ᠰᠠᠨᠠᠮᠰᠠᠷ ᠦᠭᠡᠶᠡ ᠡᠴᠢᠭᠡ ᠥᠬᠢᠨ ᠬᠣᠶᠠᠭᠤᠯᠠ ᠴᠥᠮ ᠨᠢᠯᠪᠤᠰᠤ ᠤᠨᠠᠭᠠᠨ ᠰᠠᠯᠤᠯᠴᠠᠪᠠ᠃ ᠵᠠᠮᠤᠬᠠ᠂ ᠸᠠᠩ ᠬᠠᠭᠠᠨ ᠢ᠋ ᠠᠪᠤᠨ ᠭᠠᠷᠴᠤ ᠢᠷᠡᠭᠡᠳ ᠲᠠᠢᠽᠢ ᠢᠯᠠᠭᠤ ᠳ᠋ᠤᠷ ᠥᠭᠦᠯᠡᠷᠦᠨ : 《ᠬᠠᠭᠠᠨ ᠤ᠋ ᠪᠡᠶᠡ ᠨᠢᠭᠡᠨᠲᠡ ᠭᠠᠷᠴᠤ ᠢᠷᠠᠪᠠᠰᠤ ᠣᠳᠣ ᠮᠠᠨ ᠤ᠋ ᠵᠣᠷᠢᠭ ᠪᠣᠯᠪᠠ᠂ ᠭᠠᠭᠴᠠ ᠳ᠋ᠤᠷ ᠬᠣᠢᠨᠠ ᠶᠠᠪᠤᠭᠤᠯᠵᠤ ᠪᠢᠳᠡ ᠤᠷᠤᠭᠰᠢᠯᠠᠨ ᠣᠷᠣᠰᠤᠭᠠᠢ᠂ ᠳᠥᠷᠪᠡᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠨᠠᠷ ᠣᠯᠠᠨ ᠢ᠋ ᠠᠪᠴᠤ ᠴᠥᠮ ᠪᠸᠲ᠋ᠠ᠋ ᠤᠯᠤᠰ ᠲᠤᠷ ᠬᠦᠷᠴᠦ ᠡᠴᠢᠮᠦᠢ ᠭᠡᠮᠡᠨ ᠰᠢᠬᠠᠮᠳᠠᠭᠤᠯᠪᠠᠰᠤ᠂ ᠮᠠᠨ ᠤ᠋ ᠠᠶᠠ ᠶ᠋ᠢ ᠳᠠᠭᠠᠬᠤ ᠦᠭᠡᠢ ᠬᠠᠮᠢᠭᠠᠰᠢ ᠡᠴᠢᠮᠦᠢ ? 》 ᠭᠡᠮᠡᠨ ᠵᠥᠪᠳᠡᠵᠦ ᠲᠣᠭᠲᠠᠭᠠᠳ ᠤᠷᠤᠭᠰᠢᠯᠠᠨ ᠢᠷᠡᠬᠦ ᠠᠵᠤᠭᠤ᠃
ᠲᠡᠳᠦᠢ ᠲᠠᠢᠽᠦ ᠶ᠋ᠢᠨ ᠭᠠᠯᠠᠭᠤᠲᠤ ᠠᠭᠤᠯᠠᠨ ᠳ᠋ᠤᠷ ᠢᠷᠡᠭᠰᠡᠨ ᠢ᠋ ᠰᠣᠨᠣᠰᠴᠤ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠴᠥᠭᠡᠨ ᠢ᠋ ᠮᠡᠳᠡᠵᠦ ᠰᠢᠭᠤᠳ ᠴᠣᠬᠢᠨ ᠢᠷᠡᠬᠦᠶᠡ᠂ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠪᠦᠭᠦᠳᠡ ᠶ᠋ᠢ ᠨᠡᠢᠯᠡᠭᠦᠯᠦᠭᠡᠳ ᠭᠤᠷᠪᠠᠨ ᠲᠦᠮᠡᠨ ᠳ᠋ᠦ᠍ᠷ ᠬᠦᠷᠬᠦ ᠦᠭᠡᠢ᠂ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠠᠷᠪᠠᠨ ᠭᠤᠷᠪᠠᠨ ᠲᠦᠮᠡᠨ ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠶᠡᠬᠡᠯᠡ ᠠᠶᠤᠨ᠂ ᠵᠠᠩᠵᠤᠨ ᠨᠠᠷ ᠤ᠋ᠨ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠰᠢᠷᠣᠢ ᠮᠡᠲᠦ ᠪᠣᠯᠪᠠ᠃ ᠡᠨᠡ ᠵᠠᠪᠰᠠᠷ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠬᠠᠲᠤᠳ ᠬᠥᠪᠡᠭᠦᠳ ᠢ᠋ ᠰᠣᠯᠤᠩᠭᠤᠸᠠ᠂ ᠫᠤᠯᠭᠣᠳᠠᠢ ᠪᠠᠷ ᠬᠠᠷᠠᠭᠠᠯᠵᠠᠭᠤᠯᠤᠨ ᠰᠠᠬᠢᠭᠤᠯᠵᠤ᠂ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠬᠦᠷᠦᠭᠰᠡᠨ ᠳ᠋ᠦ᠍ᠷ ᠰᠤᠯᠤᠩᠭᠤᠸᠠ ᠤᠭᠲᠤᠵᠤ᠂ ᠬᠠᠯᠠᠰᠢᠷᠠᠨ ᠭᠠᠰᠠᠯᠵᠤ ᠵᠠᠮᠤᠬᠠ ᠶ᠋ᠢ ᠬᠠᠷᠢᠶᠠᠵᠤ ᠥᠭᠦᠯᠡᠷᠦᠨ : 《ᠬᠠᠭᠤᠴᠢᠨ ᠰᠠᠢᠬᠠᠨ ᠢ᠋ ᠡᠪᠳᠡᠭᠦᠯᠵᠦ ᠰᠢᠨᠡ ᠥᠰᠢᠶᠡ ᠵᠠᠩᠭᠢᠳᠤᠭᠤᠯᠤᠭᠰᠠᠨ ᠬᠠᠷᠭᠢᠰ ᠵᠢᠰᠤᠷ ᠵᠠᠮᠤᠬᠠ ᠪᠣᠭᠣᠯ᠂ ᠬᠠᠯᠠᠭᠤ ᠵᠠᠩᠲᠤ ᠠᠬᠠ ᠶ᠋ᠢ ᠮᠢᠨᠦ ᠬᠠᠳᠬᠤᠨ ᠬᠥᠬᠢᠭᠡᠵᠦ᠂ ᠬᠠᠰᠠᠷ ᠠᠬᠠ ᠯᠤᠭᠠ ᠬᠠᠯᠳᠠᠬᠤ ᠶ᠋ᠢ ᠬᠠᠯᠲᠤ ᠮᠥᠯᠲᠥ ᠰᠣᠨᠣᠰᠤᠮᠠᠭᠴᠠ ᠪᠢ ᠬᠠᠭᠠᠵᠤ ᠬᠣᠷᠢᠭᠯᠠᠪᠠᠴᠤ ᠪᠣᠯᠬᠤ ᠦᠭᠡᠢ᠂ ᠬᠠᠯᠳᠠᠬᠤ ᠴᠡᠷᠢᠭ ᠨᠢᠭᠡᠨᠲᠡ ᠮᠣᠷᠳᠠᠭᠰᠠᠨ ᠲᠤᠯᠠ ᠬᠠᠮᠠᠭᠠᠯᠠᠨ ᠥᠮᠥᠭᠯᠡᠬᠦ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠨ ᠬᠠᠭᠤᠴᠢᠨ ᠲᠦᠰᠢᠮᠡᠯ ᠫᠣᠯᠭᠣᠳᠠᠢ ᠶ᠋ᠢ ᠬᠠᠮᠤᠭ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠳᠣᠪᠲᠣᠯᠭᠠᠨ ᠢᠯᠡᠭᠡᠵᠦ᠂ ᠬᠠᠲᠤᠳ ᠬᠥᠪᠡᠭᠦᠳ ᠢ᠋ ᠬᠠᠯᠠ ᠬᠦᠷᠭᠡᠪᠡᠰᠦ ᠬᠠᠷᠠᠭᠠᠯᠵᠠᠵᠤ ᠶᠠᠪᠤ ᠭᠡᠮᠡᠨ ᠢᠯᠡᠭᠡᠭᠰᠡᠨ ᠪᠥᠯᠥᠭᠡ᠂ ᠬᠠᠯᠬᠠᠢ ᠬᠤᠬᠠᠢ ᠬᠠᠷᠢᠨ ᠰᠡᠵᠢᠭᠯᠡᠭᠰᠡᠨ ᠭᠠᠵᠠᠷᠠ ᠤᠲᠤᠭᠠᠲᠠᠢ ᠪᠣᠯᠵᠤ᠂ ᠬᠠᠲᠤᠳ ᠬᠥᠪᠡᠭᠦᠳ ᠢ᠋ ᠦᠨᠡᠬᠡᠷ ᠬᠠᠯᠠᠰᠢᠷᠠᠭᠤᠯᠤᠨ ᠪᠠᠢᠬᠤᠢ ᠳ᠋ᠤᠷ ᠬᠦᠷᠪᠡ᠂ ᠬᠠᠷᠭᠢᠰ ᠬᠡᠲᠦᠷᠡᠭᠰᠡᠨ ᠵᠠᠮᠤᠬᠠ ᠬᠠᠭᠠᠴᠠᠯ ᠦᠭᠡᠢ ᠰᠠᠢᠨ ᠢ᠋ᠶ᠋ᠠᠷ ᠦᠯᠦ ᠶᠠᠪᠤᠮᠤᠢ !》ᠬᠡᠮᠡᠵᠦ᠂ ᠬᠠᠰᠠᠷ ᠤ᠋ᠨ ᠬᠠᠭᠤᠴᠢᠨ ᠦᠶᠡ ᠶ᠋ᠢᠨ ᠬᠠᠷᠠᠭᠠᠯᠵᠠᠭᠰᠠᠨ ᠰᠠᠢᠨ ᠢ᠋ ᠪᠣᠳᠣᠵᠤ᠂ ᠥᠪᠡᠷ ᠦ᠋ᠨ ᠪᠠᠭᠤᠳᠠᠯ ᠤ᠋ᠨ ᠬᠠᠵᠠᠭᠤᠳᠠ ᠰᠠᠢᠨ ᠥᠷᠭᠥᠭᠡ ᠪᠠᠢᠭᠤᠯᠵᠤ ᠪᠠᠭᠤᠯᠭᠠᠭᠠᠳ ᠥᠷᠯᠥᠭᠡ ᠦᠳᠡᠰᠢ ᠬᠠᠷᠠᠭᠠᠯᠵᠠᠨ ᠬᠠᠮᠠᠭᠠᠯᠠᠵᠤ᠂ ᠡᠷᠲᠡ ᠵᠢᠯ ᠪᠸᠲ᠋ᠠ᠋ ᠤᠯᠤᠰ ᠲᠤᠷ ᠰᠠᠭᠤᠭᠰᠠᠨ ᠦᠶᠡ ᠳ᠋ᠦ᠍ᠷ ᠬᠠᠰᠠᠷ ᠤ᠋ᠨ ᠬᠠᠷᠠᠭᠠᠯᠵᠠᠭᠰᠠᠨ ᠠᠴᠢ ᠶ᠋ᠢᠨ ᠬᠠᠷᠢᠭᠤ ᠬᠠᠷᠢᠭᠤᠯᠠᠨ᠂ ᠬᠠᠭᠠᠴᠠᠰᠢ ᠦᠭᠡᠢ ᠬᠠᠨᠢᠯᠠᠪᠠᠢ 》ᠬᠡᠮᠡᠪᠡ᠃ ᠡᠨᠡ ᠮᠡᠳᠡᠭᠡ ᠶ᠋ᠢ ᠬᠡᠷᠡᠢᠳ ᠦ᠋ᠨ ᠣᠯᠣᠩᠬᠤ ᠭᠣᠣᠷᠬᠢ ᠬᠣᠶᠠᠷ ᠬᠡᠳᠦᠢᠨᠡᠢ ᠪᠢᠴᠢᠵᠦ᠂ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠬᠦᠷᠭᠡᠭᠦᠯᠵᠦ ᠢᠯᠡᠭᠡᠪᠡ᠃ ᠡᠭᠦᠨ ᠳ᠋ᠦ᠍ᠷ ᠬᠠᠰᠠᠷ ᠪᠠ ᠲᠠᠢᠽᠦ ᠶ᠋ᠢᠨ ᠰᠡᠳᠬᠢᠯ ᠰᠠᠶᠢ ᠪᠠᠬᠠᠨ ᠠᠮᠤᠷ ᠪᠣᠯᠵᠤ᠂ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠠᠪᠴᠤ ᠰᠥᠨᠢ ᠪᠡᠷ ᠳᠣᠪᠲᠣᠯᠤᠨ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠠᠷᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠤᠷᠤᠭᠰᠢ ᠨᠢᠭᠡᠨ ᠵᠡᠷᠭᠡ ᠬᠥᠭᠡᠭᠡᠵᠦ ᠪᠠᠢᠯᠳᠤᠬᠤᠢ ᠳ᠋ᠤᠷ ᠵᠠᠮᠤᠬᠠ ᠪᠠᠰᠠ ᠶᠡᠬᠡᠯᠡ ᠰᠡᠵᠢᠭᠯᠡᠵᠦ᠂ ᠸᠠᠩ ᠬᠠᠭᠠᠨ ᠢ᠋ ᠠᠪᠴᠤ ᠰᠠᠶᠢ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠵᠦᠭ ᠡᠴᠢᠬᠦᠶᠡ ᠵᠠᠮ ᠳ᠋ᠤᠷ ᠵᠡᠯᠮᠡ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠵᠤ᠂ ᠨᠡᠩ ᠰᠡᠵᠢᠭᠯᠡᠯ ᠲᠥᠷᠥᠭᠡᠳ ᠸᠠᠩ ᠬᠠᠭᠠᠨ ᠳ᠋ᠤᠷ : 《ᠪᠸᠲ᠋ᠠ᠋ ᠤᠯᠤᠰ ᠮᠠᠨ ᠤ᠋ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠱᠠᠩ ᠣᠯᠤᠷᠠ ᠡᠴᠢᠬᠦ ᠴᠡᠷᠢᠭ ᠢ᠋ ᠲᠤᠰᠪᠠ᠃ 》 ᠭᠡᠮᠡᠨ ᠮᠡᠬᠡᠯᠡᠵᠦ᠂ ᠶᠡᠬᠡ ᠴᠡᠷᠢᠭ ᠬᠡᠷᠦᠯᠦᠨ ᠮᠥᠷᠡᠨ ᠦ᠌ ᠤᠮᠠᠷᠠᠲᠤ ᠬᠥᠪᠡᠭᠡ ᠦᠬᠡᠷ ᠦ᠋ᠨ ᠬᠣᠩᠰᠢᠶᠠᠷ ᠬᠡᠮᠡᠬᠦ ᠶᠡᠬᠡ ᠬᠠᠢᠷᠬᠠᠨ ᠤ᠋ ᠪᠡᠷᠬᠡ ᠶ᠋ᠢ ᠡᠵᠡᠯᠡᠨ᠂ ᠭᠡᠷ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠪᠠᠭᠤᠵᠤ᠂ ᠲᠠᠢᠰᠢ ᠲᠠᠢᠪᠤᠤ ᠬᠣᠶᠠᠭᠤᠯᠠ ᠪᠠᠷ ᠤᠯᠤᠰ ᠢ᠋ ᠰᠠᠬᠢᠭᠤᠯᠵᠤ ᠴᠠᠭᠳᠠᠭᠤᠯᠪᠠ᠃ ᠡᠭᠦᠨ ᠳ᠋ᠦ᠍ᠷ ᠲᠠᠢᠽᠦ ᠴᠡᠷᠢᠭ ᠢ᠋ ᠪᠠᠰᠠ ᠡᠭᠡᠭᠦᠯᠵᠦ᠂ ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠳᠣᠣᠷᠠ ᠴᠡᠷᠢᠭ ᠢ᠋ ᠪᠠᠭᠤᠯᠭᠠᠵᠤ᠂ ᠴᠡᠷᠢᠭ ᠢ᠋ ᠠᠷᠪᠠᠨ ᠠᠩᠭᠢ ᠰᠠᠯᠭᠠᠵᠤ᠂ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠠᠷᠪᠠᠨ ᠬᠦᠷᠢᠶᠡ ᠪᠠᠭᠤᠯᠭᠠᠵᠤ ᠲᠤᠯᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃ ᠪᠸᠲ᠋ᠠ᠋ ᠬᠡᠷᠡᠢᠳ ᠬᠣᠶᠠᠷ ᠤᠯᠤᠰ ᠨᠢᠭᠡᠨ ᠢᠨᠣ ᠣᠷᠣᠪᠠᠰᠤ ᠨᠢᠭᠡᠨ ᠢᠨᠣ ᠤᠬᠤᠷᠢᠵᠤ ᠂ ᠨᠢᠭᠡᠨ ᠢᠨᠣ ᠥᠳᠥᠭᠡᠪᠡᠰᠦ ᠨᠢᠭᠡᠨ ᠢᠨᠣ ᠪᠡᠬᠢᠯᠡᠵᠦ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠬᠣᠯᠠᠳᠠᠬᠢ ᠴᠡᠷᠢᠭ ᠦ᠋ᠳ ᠴᠥᠮ ᠴᠤᠭᠯᠠᠨ ᠬᠦᠷᠴᠦ ᠢᠷᠡᠭᠰᠡᠨ ᠲᠤᠯᠠ ᠪᠠᠰᠠ ᠠᠷᠪᠠᠨ ᠲᠠᠪᠤᠨ ᠲᠦᠮᠡᠨ ᠪᠣᠯᠵᠤ᠂ ᠨᠢᠭᠡᠨ ᠵᠤᠨ ᠨᠢᠭᠡᠨ ᠨᠠᠮᠤᠷ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠢ᠋ ᠳᠠᠷᠠᠭᠠ ᠪᠠᠷ ᠭᠤᠷᠪᠠᠨ ᠵᠡᠷᠭᠡ ᠳᠠᠷᠤᠵᠤ᠂ ᠬᠣᠶᠠᠷ ᠤᠳᠠᠭᠠ ᠤᠬᠤᠷᠢᠵᠤ ᠬᠣᠶᠠᠷ ᠡᠲᠡᠭᠡᠳ ᠬᠠᠷᠢᠯᠴᠠᠨ ᠲᠤᠯᠤᠯᠴᠠᠭᠰᠠᠭᠠᠷ ᠡᠪᠦᠯ ᠦ᠋ᠨ ᠰᠡᠭᠦᠯ ᠰᠠᠷᠠ ᠪᠣᠯᠵᠤ᠂ ᠮᠤᠬᠤᠯᠢ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠵᠡᠭᠦᠨ ᠬᠣᠢᠲᠤ ᠬᠣᠩᠵᠢᠯᠠ ᠶ᠋ᠢᠨ ᠵᠡᠷᠭᠡ ᠶ᠋ᠢᠨ ᠳᠣᠯᠣᠭᠠ ᠨᠠᠢ᠍ᠮᠠᠨ ᠪᠠᠭᠠ ᠠᠢᠮᠠᠭ ᠢ᠋ ᠳᠠᠢᠯᠠᠨ ᠳᠠᠭᠠᠭᠤᠯᠵᠤ᠂ ᠤᠯᠤᠰ ᠤᠯᠤᠰ ᠤ᠋ᠨ ᠡᠵᠡᠳ ᠦ᠋ᠳ ᠢ᠋ ᠢᠨᠣ ᠴᠥᠮ ᠳᠠᠭᠠᠭᠤᠯᠤᠨ ᠠᠪᠴᠤ ᠪᠠᠰᠠ ᠬᠣᠢᠲᠤ ᠣᠷᠣᠰ ᠤᠯᠤᠰ ᠤ᠋ᠨ ᠵᠡᠭᠦᠨ ᠡᠮᠦᠨᠡ ᠵᠠᠬᠠ ᠳ᠋ᠤᠷ ᠪᠦᠬᠦᠢ ᠬᠦᠵᠦᠬᠦ ᠵᠢᠶᠠ ᠵᠧᠦ ᠬᠡᠮᠡᠬᠦ ᠨᠢᠭᠡᠨ ᠶᠡᠬᠡ ᠤᠯᠤᠰ ᠢ᠋ ᠮᠥᠨ ᠳᠠᠢᠯᠠᠨ ᠳᠠᠭᠠᠭᠤᠯᠤᠭᠠᠳ ᠬᠦᠷᠴᠦ ᠢᠷᠡᠬᠦᠶᠡ᠂ ᠲᠠᠢᠽᠦ ᠳᠥᠷᠪᠡᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠢᠯᠡᠭᠡᠵᠦ᠂ ᠠᠷᠢᠬᠢ ᠪᠠᠷᠢᠨ ᠭᠤᠷᠪᠠᠨ ᠤᠳᠤᠯᠭᠠ ᠤᠭᠲᠤᠭᠤᠯᠪᠠ᠃ ᠲᠡᠳᠦᠢ ᠢᠨᠣ ᠲᠠᠩᠭᠠᠷᠢᠭᠯᠠᠵᠤ᠂ ᠬᠠᠰᠠᠷ ᠤ᠋ᠨ ᠭᠡᠷ ᠦ᠋ᠨ ᠠᠮᠠᠨ ᠢ᠋ ᠡᠭᠡᠭᠦᠯᠵᠦ ᠣᠯᠣᠯ ᠦᠭᠡᠢ ᠪᠡᠷ ᠨᠤᠲᠤᠭ ᠲᠤᠷ ᠣᠷᠣᠬᠤ ᠦᠭᠡᠢ ᠭᠡᠮᠡᠨ ᠭᠠᠳᠠᠨᠠ ᠰᠢᠨᠠᠯᠠᠪᠠ᠃ ᠡᠨᠡ ᠵᠢᠯ ᠦ᠋ᠨ ᠬᠡᠷᠡᠭ ᠮᠠᠰᠢ ᠣᠯᠠᠨ ᠲᠤᠯᠠ ᠲᠣᠪᠴᠢᠯᠠᠨ ᠬᠤᠷᠢᠶᠠᠵᠤ ᠂ ᠲᠥᠭᠦᠭᠡᠲᠡᠢᠬᠡᠨ ᠢ᠋ ᠢᠨᠣ ᠲᠡᠭᠦᠵᠦ ᠴᠥᠯᠪᠡᠭᠡᠳ ᠬᠡᠷᠡᠭ ᠦᠭᠡᠢ ᠣᠯᠤᠨ ᠲᠤᠯᠤᠨ ᠢ᠋ ᠠᠨᠤ ᠪᠥᠭᠡᠮ ᠢ᠋ᠶ᠋ᠡᠷ ᠭᠠᠷᠭᠠᠪᠠᠢ᠃
ᠠᠩᠬᠠ ᠪᠦᠯᠦᠭ ᠦ᠋ᠨ ᠰᠢᠷᠠ ᠮᠣᠷᠢᠨ ᠵᠢᠯ ᠡᠨᠳᠡ ᠲᠡᠭᠦᠰᠴᠦ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠣᠯᠠᠨ ᠰᠠᠢᠳ᠂ ᠭᠡᠷ ᠪᠠ ᠬᠡᠭᠡᠷᠡ ᠬᠣᠶᠠᠷ ᠲᠡᠰᠢ ᠰᠢᠨᠡᠯᠡᠪᠡᠢ᠃ ᠰᠢᠷᠬᠠᠴᠢᠨ ᠬᠣᠨᠢᠨ ᠵᠢᠯ ᠡᠭᠦᠨ ᠡᠴᠡ ᠡᠬᠢᠯᠡᠵᠦ᠂ ᠬᠠᠪᠤᠷ ᠤ᠋ᠨ ᠳᠤᠮᠳᠠᠳᠤ ᠰᠠᠷᠠ ᠳ᠋ᠤ᠌ ᠲᠠᠢᠽᠦ ᠮᠤᠬᠤᠯᠢ ᠰᠠᠶᠢ ᠵᠥᠪᠳᠡᠨ ᠬᠡᠷᠡᠢᠳ ᠯᠦ᠍ᠭᠡ ᠲᠠᠢᠯᠤᠨ ᠳᠡᠢᠯᠦᠭᠳᠡᠬᠦ ᠶ᠋ᠢ ᠲᠠᠰᠤᠯᠰᠤᠭᠠᠢ ᠬᠡᠮᠡᠲᠡᠯᠡ ᠭᠡᠨᠡᠳᠲᠡ ᠪᠠᠷᠠᠭᠤᠨ ᠬᠣᠢᠲᠤ ᠬᠣᠯᠠᠳᠠᠬᠢ ᠲᠤᠷᠰᠢᠭᠤᠯ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《 ᠬᠡᠷᠡᠢᠳ ᠦ᠋ᠨ ᠸᠠᠩ ᠬᠠᠭᠠᠨ ᠤ᠋ ᠡᠮᠦᠨᠡ ᠡᠴᠡ ᠵᠠᠮᠤᠬᠠ ᠶ᠋ᠢ ᠡᠯᠴᠢ ᠪᠣᠯᠭᠠᠨ ᠬᠣᠢᠲᠤ ᠢᠯᠳᠡᠰᠢ ᠮᠥᠷᠡᠨ ᠦ᠌ ᠵᠡᠭᠦᠨᠲᠡ ᠪᠦᠬᠦᠢ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠲᠣᠳᠣ ᠳ᠋ᠤᠷ ᠬᠦᠨᠳᠦ ᠪᠡᠯᠡᠭ ᠥᠭᠴᠦ ᠮᠠᠨ ᠤ᠋ ᠤᠯᠤᠰ ᠢ᠋ ᠲᠡᠭᠰᠢ ᠬᠤᠪᠢᠶᠠᠯᠴᠠᠰᠤᠭᠠᠢ ᠭᠡᠮᠡᠨ ᠭᠤᠶᠤᠭᠰᠠᠨᠠ᠂ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠲᠣᠳᠣ᠂ ᠵᠠᠮᠤᠬᠠ ᠯᠤᠭᠠ ᠨᠠᠢ᠍ᠮᠠᠨ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠨᠢᠰᠦᠨ ᠳᠣᠪᠲᠣᠯᠤᠭᠰᠠᠭᠠᠷ ᠠᠢᠰᠤᠢ᠂ ᠮᠠᠨ ᠤ᠋ ᠵᠠᠬᠠ ᠳ᠋ᠤᠷ ᠣᠷᠣᠵᠤ ᠢᠷᠡᠬᠦ ᠣᠢᠷᠠᠲᠤᠪᠠ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠰᠥᠨᠢ ᠲᠠᠢᠽᠦ ᠶ᠋ᠢᠨ ᠳᠡᠷᠭᠡᠳᠡ ᠣᠷᠣᠵᠤ :《ᠡᠵᠡᠨ ᠡᠨᠳᠡ ᠭᠠᠭᠴᠠ ᠪᠥᠭᠡᠯᠵᠢᠬᠦ ᠪᠠᠷᠰ ᠤ᠋ᠨ ᠮᠡᠬᠡ ᠶ᠋ᠢ ᠬᠡᠷᠡᠭᠯᠡᠵᠦ ᠳᠠᠢᠰᠤᠨ ᠢ᠋ ᠳᠠᠷᠤᠲᠤᠭᠠᠢ᠂ ᠲᠦᠰᠢᠮᠡᠯ ᠪᠢ ᠮᠣᠭᠠᠢ ᠶ᠋ᠢᠨ ᠬᠠᠷᠪᠤᠯ ᠢ᠋ᠶ᠋ᠠᠷ ᠲᠣᠳᠣ ᠶ᠋ᠢ ᠲᠤᠯᠰᠤᠭᠠᠢ ! 》ᠭᠡᠮᠡᠨ ᠮᠡᠳᠡᠭᠦᠯᠦᠭᠡᠳ ᠵᠠᠩᠵᠤᠨ ᠴᠡᠷᠢᠭ ᠢ᠋ ᠬᠠᠭᠠᠰᠯᠠᠵᠤ ᠮᠣᠷᠳᠠᠬᠤᠶᠠ ᠪᠤᠭᠤᠷᠤᠯ ᠢ᠋ ᠠᠪᠴᠤ ᠡᠴᠢᠪᠡ᠃ ᠪᠤᠭᠤᠷᠵᠢ᠂ ᠴᠢᠯᠠᠭᠤᠨ ᠬᠣᠶᠠᠭᠤᠯᠠ ᠳ᠋ᠤᠷ ᠤᠯᠤᠰ ᠢ᠋ ᠰᠠᠬᠢᠬᠤ ᠪᠠᠷ ᠲᠤᠰᠢᠶᠠᠪᠠ᠃ ᠲᠣᠭᠲᠣᠩᠭᠣ᠌ ᠪᠠᠭᠠᠲᠤᠷ ᠤᠯᠤᠰ ᠢ᠋ ᠴᠠᠭᠳᠠᠨ ᠰᠡᠷᠡᠮᠵᠢᠯᠡᠵᠦ᠂ ᠰᠥᠪᠡᠭᠡᠲᠡᠢ᠂ ᠵᠦᠯᠭᠡᠲᠡᠢ ᠬᠣᠶᠠᠷ ᠪᠠᠭᠠᠲᠤᠷ ᠲᠠᠢᠽᠦ ᠶ᠋ᠢᠨ ᠳᠡᠷᠭᠡᠳᠡ ᠬᠣᠴᠣᠷᠴᠤ ᠭᠢᠯᠦᠭᠡᠨ᠂ ᠬᠣᠢᠯᠠᠳᠠᠷ ᠬᠣᠶᠠᠷ ᠪᠠᠭᠠᠲᠤᠷ ᠢ᠋ ᠮᠤᠬᠤᠯᠢ ᠠᠪᠴᠤ ᠡᠴᠢᠪᠡᠢ᠃
ᠲᠡᠭᠦᠨᠴᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠭᠤᠷᠪᠠᠨ ᠠᠩᠭᠢ ᠬᠠᠭᠠᠰᠯᠠᠵᠤ ᠡᠴᠢᠭᠰᠡᠨ ᠲᠤᠯᠠ ᠲᠠᠢᠽᠦ ᠶ᠋ᠢᠨ ᠡᠨᠳᠡ ᠴᠡᠷᠢᠭ ᠴᠥᠭᠡᠨ ᠪᠣᠯᠵᠤ᠂ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠦ᠋ᠨ ᠭᠤᠷᠪᠠᠨ ᠬᠤᠪᠢ ᠳ᠋ᠤᠷ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠨᠢᠭᠡᠨ ᠬᠤᠪᠢ ᠴᠤ᠌ ᠦᠭᠡᠢ ᠳ᠋ᠦ᠍ᠷ ᠬᠠᠰᠠᠷ᠂ ᠵᠡᠯᠮᠡ᠂ ᠪᠡᠯᠭᠦᠳᠡᠢ᠂ ᠰᠥᠪᠡᠭᠡᠲᠡᠢ ᠡᠴᠡ ᠲᠡᠷᠢᠭᠦᠯᠡᠨ ᠴᠥᠮ ᠵᠢᠷᠦᠬᠡ ᠲᠦᠭᠰᠢᠨ ᠴᠢᠷᠠᠢ ᠠᠯᠲᠠᠨ ᠠᠶᠤᠬᠤᠶᠠ᠂ ᠲᠠᠢᠽᠦ ᠬᠠᠷᠢᠨ ᠥᠴᠦᠬᠡᠨ ᠴᠦ᠍ ᠬᠡᠷᠡᠭᠰᠡᠬᠦ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ᠂ ᠨᠡᠩ ᠬᠠᠷᠢᠨ ᠪᠡᠶᠡᠰᠦᠨ ᠮᠦᠰᠢᠶᠡᠵᠦ᠂ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠷᠪᠠᠨ ᠪᠠᠭ ᠪᠣᠯᠭᠠᠨ ᠬᠤᠪᠢᠶᠠᠨ᠂ ᠲᠡᠷᠢᠭᠦᠨ ᠪᠠᠭ ᠢ᠋ ᠲᠠᠢᠽᠦ ᠪᠡᠶᠡ ᠪᠡᠷ ᠲᠡᠷᠢᠭᠦᠯᠡᠨ᠂ ᠵᠡᠪᠡ᠂ ᠵᠡᠯᠮᠡ᠂ ᠣᠶᠤᠨ ᠭᠤᠸᠠ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠶ᠋ᠢ ᠠᠪᠴᠤ ᠵᠠᠬᠢᠷᠤᠭᠠᠳ ᠬᠣᠶᠠᠳᠤᠭᠠᠷ ᠪᠠᠭ ᠢ᠋ ᠪᠦᠬᠦ ᠪᠡᠯᠭᠦᠳᠡᠢ᠂ ᠤᠷᠠᠨ ᠭᠠᠴᠤᠭ ᠵᠠᠬᠢᠷᠪᠠ᠃ ᠭᠤᠷᠪᠠᠳᠤᠭᠠᠷ ᠪᠠᠭ ᠢ᠋ ᠬᠠᠪᠤᠲᠤ ᠬᠠᠰᠠᠷ᠂ ᠣᠢᠲᠤ ᠣᠴᠢᠭ ᠵᠠᠬᠢᠷᠪᠠ᠃ ᠳᠥᠷᠪᠡᠳᠦᠭᠡᠷ ᠪᠠᠭ ᠢ᠋ ᠬᠦᠷᠭᠡᠨ ᠪᠣᠲ᠋ᠣ ᠬᠢᠭᠡᠳ ᠲᠣᠬᠣᠢᠲᠤ ᠶ᠋ᠢᠨ ᠪᠤᠰᠤᠩ ᠵᠠᠬᠢᠷᠪᠠ᠃ ᠲᠠᠪᠤᠳᠤᠭᠠᠷ ᠠᠩᠭᠢ ᠶ᠋ᠢ ᠴᠢᠨᠳᠠᠭᠠᠨᠠ ᠰᠡᠴᠡᠨ᠂ ᠬᠤᠳᠠᠭᠠᠨᠠ ᠪᠡᠬᠢ ᠵᠠᠬᠢᠷᠪᠠ᠃ ᠵᠢᠷᠭᠤᠳᠤᠭᠠᠷ ᠪᠠᠭ ᠢ᠋ ᠰᠢᠷᠢ ᠬᠤᠲᠤᠭ᠂ ᠬᠠᠷᠠ ᠬᠢᠷᠤ ᠲᠠᠨ ᠵᠠᠬᠢᠷᠪᠠ᠃ ᠳᠣᠯᠣᠳᠤᠭᠠᠷ ᠪᠠᠭ ᠢ᠋ ᠰᠥᠪᠡᠭᠡᠲᠡᠢ ᠵᠦᠯᠭᠡᠲᠡᠢ ᠬᠣᠶᠠᠷ ᠪᠠᠭᠠᠲᠤᠷ ᠵᠠᠬᠢᠷᠪᠠ᠃ ᠨᠠᠢ᠍ᠮᠠᠳᠤᠭᠠᠷ ᠪᠠᠭ ᠢ᠋ ᠤᠷᠲᠤ ᠪᠣᠳᠣᠯᠭᠠᠲᠤ᠂ ᠤᠬᠠᠭᠠᠨᠲᠤ ᠷᠢᠨᠴᠢᠨ ᠲᠠᠨ ᠵᠠᠬᠢᠷᠪᠠ᠃ ᠶᠢᠰᠦᠳᠦᠭᠡᠷ ᠪᠠᠭ ᠢ᠋ ᠠᠯᠤᠬᠠ᠂ ᠰᠦᠬᠡ ᠲᠠᠨ ᠵᠠᠬᠢᠷᠪᠠ᠃ ᠠᠷᠪᠠᠳᠤᠭᠠᠷ ᠪᠠᠭ ᠢ᠋ ᠥᠨᠳᠥᠷ ᠰᠡᠴᠡᠨ᠂ ᠦᠯᠬᠦ ᠶ᠋ᠢᠨ ᠵᠦᠨᠲᠡᠢ ᠨᠠᠷ ᠵᠠᠬᠢᠷᠪᠠ᠃ ᠪᠠᠭ ᠪᠦᠷᠢ ᠲᠠᠪᠤᠨ ᠮᠢᠩᠭᠠᠨ ᠲᠠᠪᠤᠨ ᠬᠥᠮᠦᠨ ᠲᠠᠪᠢᠨ ᠮᠣᠷᠢ ᠢᠯᠡᠭᠦᠦ᠂ ᠴᠥᠮ ᠶᠠᠪᠠᠭᠠᠨ ᠪᠠᠭᠤᠳᠠᠯ ᠢ᠋ᠶ᠋ᠡᠷ ᠪᠠᠢᠭᠰᠠᠨ ᠲᠤᠯᠠ ᠮᠠᠰᠢ ᠪᠡᠯᠡᠬᠡᠨ᠃ ᠲᠡᠳᠦᠢ ᠵᠡᠯᠮᠡ ᠲᠠᠢᠽᠦ ᠶ᠋ᠢᠨ ᠴᠠᠭᠠᠵᠠᠨ ᠤ᠋ ᠵᠡᠪᠡ ᠶ᠋ᠢ ᠪᠠᠷᠢᠵᠤ ᠵᠠᠷᠯᠠᠨ ᠲᠣᠭᠲᠠᠭᠠᠭᠰᠠᠨ ᠠᠨᠤ : 《 ᠡᠨᠡ ᠠᠷᠪᠠᠨ ᠠᠩᠭᠢ ᠶ᠋ᠢᠨ ᠴᠡᠷᠢᠭ ᠰᠥᠨᠢ ᠪᠡᠷ ᠭᠡᠨᠡᠳᠲᠡ ᠭᠠᠯᠠᠭᠤᠲᠤ ᠠᠭᠤᠯᠠᠨᠠ ᠬᠦᠷᠦᠮᠡᠭᠴᠡ ᠲᠡᠨᠳᠡᠴᠡ ᠡᠵᠡᠨ ᠢ᠋ ᠳᠠᠭᠠᠵᠤ᠂ ᠭᠤᠴᠢ ᠭᠤᠴᠢᠨ ᠭᠠᠵᠠᠷ ᠢ᠋ᠶ᠋ᠠᠷ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠳᠠᠷᠠᠭᠠᠯᠠᠨ ᠵᠠᠯᠭᠠᠯᠳᠤᠵᠤ ᠪᠠᠭᠤᠭᠰᠠᠭᠠᠷ᠂ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠦ᠋ᠨ ᠥᠨᠳᠥᠷ ᠰᠡᠴᠡᠨ᠂ ᠦᠯᠬᠦ ᠶ᠋ᠢᠨ ᠵᠦᠨᠲᠡᠢ ᠶ᠋ᠢᠨ ᠴᠡᠷᠢᠭ ᠬᠠᠷᠠ ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠡᠨᠡᠲᠡᠭᠡ᠂ ᠭᠠᠯᠵᠠᠭᠤ ᠮᠥᠷᠡᠨ ᠦ᠌ ᠴᠠᠭᠠᠨᠠ ᠭᠤᠴᠢᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷᠡ ᠵᠣᠭᠰᠣᠵᠤ ᠬᠦᠯᠢᠶᠡ᠂ ᠲᠡᠭᠦᠰᠴᠣᠭᠲᠤ᠂ ᠣᠶᠤᠲᠤ ᠰᠡᠴᠡᠨ ᠬᠣᠶᠠᠭᠤᠯᠠ ᠨᠢᠭᠡᠨ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠪᠠ ᠡᠵᠡᠨ ᠦ᠌ ᠶᠡᠬᠡ ᠪᠠᠭᠤᠳᠠᠯ ᠢ᠋ ᠰᠢᠭᠤᠳ ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠣᠷᠣᠢ ᠳ᠋ᠤᠷ ᠪᠠᠭᠤᠵᠤ᠂ ᠲᠤᠭ ᠬᠢᠭᠢᠷᠢ ᠰᠢᠭᠦᠷ ᠳᠠᠯᠪᠠᠭᠠ ᠶᠡᠬᠡᠳᠡ ᠪᠤᠰᠬᠠᠵᠤ᠂ ᠡᠵᠡᠨ ᠦ᠌ ᠬᠦᠷᠬᠦ ᠶ᠋ᠢ ᠪᠡᠯᠡᠳᠬᠡᠵᠦ᠂ ᠨᠢᠭᠡᠨ ᠵᠠᠭᠤᠨ ᠪᠢᠲᠡᠭᠦᠦ ᠲᠤᠯᠤᠮ ᠢ᠋ᠶ᠋ᠠᠷ ᠤᠰᠤ ᠠᠴᠢᠵᠤ ᠳᠠᠪᠠᠭᠠᠨ ᠤ᠋ ᠣᠷᠣᠢ ᠳ᠋ᠤᠷ ᠪᠡᠯᠡᠳᠭᠡ᠂ ᠡᠳᠦᠭᠡ ᠳᠠᠷᠤᠢ ᠶᠠᠪᠤ ! 》ᠭᠡᠮᠡᠨ ᠶᠠᠪᠤᠭᠤᠯᠤᠭᠠᠳ 《ᠡᠭᠦᠨ ᠡᠴᠡ ᠭᠠᠳᠠᠨᠠ ᠂ ᠪᠠᠭ ᠪᠦᠷᠢ ᠵᠤᠤᠬᠠ ᠵᠣᠭᠣᠷᠢ ᠴᠥᠭᠡᠳᠬᠡᠬᠦ ᠪᠡᠷ ᠶᠠᠪᠤᠬᠤ ᠠᠨᠤ᠂ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠦ᠌ ᠡᠵᠡᠨ ᠦ᠌ ᠪᠠᠭ ᠲᠤᠷ ᠲᠠᠪᠤᠨ ᠬᠥᠮᠦᠨ ᠨᠢᠭᠡᠨ ᠭᠣᠯᠣᠮᠲᠠ ᠲᠤᠯᠬᠤ ᠪᠥᠭᠡᠰᠦ᠂ ᠡᠷᠬᠡᠪᠰᠢ ᠲᠠᠪᠤᠨ ᠬᠥᠮᠦᠨ ᠲᠠᠪᠤᠨ ᠲᠤᠯᠭᠠ ᠲᠤᠯᠲᠤᠭᠠᠢ᠂ ᠡᠰᠡ ᠬᠡᠷᠡᠭᠯᠡᠪᠡᠴᠦ ᠦᠨᠡᠰᠦ ᠶ᠋ᠢ ᠰᠠᠴᠤᠵᠤ ᠲᠤᠯᠭᠠ ᠶ᠋ᠢᠨ ᠭᠠᠳᠠᠰᠤᠨ ᠤ᠋ ᠣᠷᠣ ᠶ᠋ᠢ ᠭᠠᠷᠭᠠᠬᠤ ᠬᠡᠷᠡᠭᠲᠡᠢ᠂ ᠡᠭᠦᠨᠴᠡ ᠪᠠᠭ ᠪᠦᠷᠢ ᠨᠢᠭᠡᠨ ᠭᠣᠯᠣᠮᠲᠠ ᠶ᠋ᠢ ᠬᠤᠷᠢᠶᠠᠭᠰᠠᠭᠠᠷ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠦ᠋ᠨ ᠪᠠᠭ ᠲᠤᠷ ᠬᠦᠷᠲᠡᠯᠡ ᠠᠷᠪᠠᠨ ᠬᠥᠮᠦᠨ ᠨᠢᠭᠡᠬᠡᠨ ᠲᠤᠯᠭᠠ ᠲᠤᠯᠤᠭᠲᠤᠨ᠃ ᠡᠳᠦᠭᠡ ᠪᠢᠳᠡ ᠭᠡᠨᠡᠳᠲᠡ ᠤᠷᠭᠤᠵᠤ ᠡᠭᠡᠭᠰᠡᠨ ᠢ᠋ᠶ᠋ᠡᠷ ᠶᠠᠪᠤᠭᠠᠳ ᠬᠣᠢᠲᠤ ᠵᠠᠮ ᠢ᠋ᠶ᠋ᠠᠷ ᠲᠡᠳᠡᠨ ᠢ᠋ ᠥᠳᠥᠭᠡᠷᠡ ᠡᠴᠢᠮᠦᠢ᠂ ᠡᠨᠡ ᠠᠷᠪᠠᠨ ᠠᠩᠭᠢ ᠴᠡᠷᠢᠭ ᠬᠡᠮᠡᠭᠴᠢ ᠳᠠᠢᠰᠤᠨ ᠢ᠋ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠥᠳᠥᠭᠡᠵᠦ᠂ ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨᠠ ᠠᠪᠠᠴᠢᠬᠤ ᠴᠡᠷᠢᠭ ᠲᠤᠯᠠ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠣᠢᠷᠠ ᠬᠦᠷᠴᠦ ᠢᠷᠡᠮᠡᠭᠴᠡ ᠳᠠᠷᠤᠢ ᠪᠦᠭᠭᠦᠭᠰᠡᠨ ᠡᠴᠡ ᠪᠡᠨ ᠭᠠᠷᠴᠤ ᠥᠳᠥᠭᠡᠵᠦ ᠳᠤᠲᠠᠭᠠ᠂ ᠪᠠᠭ ᠪᠦᠷᠢ ᠰᠢᠭᠤᠳ ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠳᠣᠣᠷᠠ ᠡᠵᠡᠨ ᠦ᠌ ᠳᠡᠷᠭᠡᠳᠡ ᠬᠥᠷᠥᠭᠲᠦᠨ᠂ ᠳᠤᠲᠠᠭᠠᠬᠤ ᠪᠦᠷᠢ ᠲᠤᠭ ᠳᠠᠯᠪᠠᠭᠠ ᠬᠡᠩᠭᠡᠷᠭᠡ ᠪᠦᠷᠢᠶᠡ ᠶ᠋ᠢ ᠶᠡᠬᠡᠯᠡ ᠭᠡᠭᠡᠵᠦ᠂ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠬᠦᠷᠴᠦ ᠢᠷᠡᠬᠦᠢ ᠳ᠋ᠦ᠍ᠷ ᠵᠠᠩᠵᠤᠨ ᠭᠠᠷᠴᠤ ᠪᠠᠢᠯᠳᠤᠮᠠᠭᠴᠠ ᠳᠠᠷᠤᠢ ᠳᠠᠷᠤᠭᠳᠠᠵᠤ ᠪᠤᠷᠤᠭᠤᠯᠠ᠂ ᠬᠡᠷᠬᠢᠪᠡᠴᠦ ᠬᠠᠭᠤᠷᠴᠤ ᠪᠤᠷᠤᠭᠤᠯᠠᠬᠤ ᠪᠠᠨ ᠮᠡᠳᠡᠭᠳᠡᠵᠦ ᠪᠣᠯᠬᠤ ᠦᠭᠡᠢ᠃ ᠦᠯᠬᠦ ᠰᠠᠢᠳ᠂ ᠪᠠᠶᠠᠨ ᠬᠢᠶᠡ ᠬᠣᠶᠠᠭᠤᠯᠠ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ ᠭᠠᠯᠵᠠᠭᠤ ᠮᠥᠷᠡᠨᠡ ᠡᠴᠢᠵᠦ ᠳᠡᠭᠡᠳᠦ ᠣᠯᠣᠮ ᠢ᠋ ᠡᠯᠡᠰᠦᠨ ᠲᠤᠯᠤᠮ ᠢ᠋ᠶ᠋ᠠᠷ ᠪᠥᠭᠯᠡᠵᠦ᠂ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠬᠠᠯᠵᠢᠨᠠ ᠠᠭᠤᠯᠠᠨᠠ ᠮᠠᠨ ᠤ᠋ ᠴᠡᠷᠢᠭ ᠲᠦ᠍ᠷ ᠳᠠᠷᠤᠭᠳᠠᠵᠤ᠂ ᠡᠭᠡᠨ ᠳᠤᠲᠠᠭᠠᠵᠤ ᠭᠠᠯᠵᠠᠭᠤ ᠮᠥᠷᠡᠨ ᠢ᠋ ᠭᠡᠲᠦᠯᠬᠦ ᠦᠶᠡ ᠳ᠋ᠦ᠍ᠷ ᠪᠥᠭᠯᠡᠭᠰᠡᠨ ᠲᠤᠯᠤᠮ ᠢ᠋ ᠠᠪᠤᠭᠤᠯᠵᠤ᠂ ᠪᠦᠭᠦᠳᠡᠭᠡᠷ ᠢ᠋ ᠤᠷᠤᠰᠬᠠᠵᠤ ᠴᠠᠴᠠᠭᠠ ! ᠡᠭᠡᠬᠦ ᠦᠶᠡ ᠳ᠋ᠦ᠍ᠷ ᠪᠠᠭ ᠪᠦᠷᠢ ᠡᠵᠡᠨ ᠦ᠌ ᠲᠡᠮᠳᠡᠭᠲᠦ ᠤᠯᠠᠭᠠᠨ ᠰᠢᠭᠦᠷ ᠢ᠋ ᠤᠯᠠᠮᠵᠢᠯᠠᠨ ᠥᠭᠭᠦᠭᠰᠡᠭᠡᠷ ᠶᠠᠪᠤᠭᠲᠤᠨ !》 ᠭᠡᠮᠡᠨ ᠲᠤᠰ ᠲᠤᠰ ᠲᠤᠷ ᠴᠥᠮ ᠵᠠᠷᠯᠠᠨ ᠪᠠᠷᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠵᠡᠯᠮᠡ ᠶ᠋ᠢ ᠳᠠᠭᠤᠳᠠᠵᠤ ᠵᠠᠬᠢᠷᠤᠨ : 《ᠥᠪᠡᠷᠡ ᠵᠦᠢᠯ ᠴᠥᠮ ᠪᠣᠯᠤᠮᠤᠢ᠂ ᠭᠠᠭᠴᠠ ᠲᠡᠷᠡ ᠤᠰᠤ ᠪᠥᠭᠯᠡᠬᠦ ᠶ᠋ᠢ ᠪᠠᠢᠭᠠ᠂ ᠲᠡᠷᠡ ᠤᠳᠠᠭᠠ ᠰᠠᠷᠯᠠᠭ ᠮᠥᠷᠡᠨ ᠳ᠋ᠦ᠍ ᠲᠡᠳᠡ ᠪᠥᠭᠯᠡᠭᠡᠳ ᠮᠠᠨ ᠤ᠋ ᠵᠢᠨᠦᠩ ᠡᠭᠡᠭᠦᠯᠵᠦ ᠬᠡᠷᠡᠭᠯᠡᠭᠰᠡᠨ ᠲᠤᠯᠠ ᠬᠥᠮᠦᠨ ᠦ᠌ ᠠᠮᠢᠨ ᠢ᠋ ᠠᠰᠤᠷᠤ ᠬᠡᠲᠦᠷᠬᠡᠢ ᠪᠦᠷᠢᠯᠭᠡᠪᠡᠢ᠂ ᠴᠡᠷᠢᠭ ᠬᠡᠮᠡᠭᠴᠢ ᠣᠯᠠᠨ ᠢ᠋ ᠠᠯᠠᠬᠤᠢ ᠳ᠋ᠤᠷ ᠦᠭᠡᠢ᠂ ᠣᠯᠠᠨ ᠢ᠋ ᠪᠢᠰᠢᠷᠡᠭᠦᠯᠬᠦᠢ ᠳ᠋ᠦ᠍ᠷ ᠪᠣᠢ 》ᠬᠡᠮᠡᠪᠡ᠃ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠬᠡᠷᠡᠭᠯᠡᠬᠦ ᠬᠠᠷᠢᠨ ᠡᠷᠲᠡᠨ ᠦ᠌ ᠶᠣᠰᠣ ᠳᠦᠷᠢᠮ ᠪᠣᠢ ᠪᠤᠰᠤ ᠤᠤ ! ᠲᠡᠳᠦᠢ ᠵᠠᠯᠮᠠ ᠨᠠᠷ ᠲᠠᠢᠽᠦ ᠶ᠋ᠢᠨ ᠦᠨᠡᠨ ᠥᠷᠥᠰᠢᠶᠡᠯ ᠢ᠋ ᠭᠠᠢᠬᠠᠯᠳᠤᠨ ᠮᠥᠷᠭᠥᠵᠦ ᠤᠰᠤ ᠬᠣᠷᠢᠬᠤ ᠶ᠋ᠢ ᠵᠣᠭᠰᠣᠪᠠ᠃ ᠪᠡᠯᠭᠦᠳᠡᠢ᠂ ᠬᠠᠰᠠᠷ ᠨᠠᠷ ᠣᠨᠴᠠ ᠤᠰᠤ ᠪᠥᠭᠯᠡᠬᠦ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠰᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠵᠠᠬᠢᠷᠤᠨ : 《ᠠᠮᠢᠨ ᠳ᠋ᠤᠷ ᠡᠰᠡ ᠬᠦᠷᠪᠡᠰᠦ ᠠᠷᠪᠢᠨ ᠬᠥᠮᠦᠨ ᠦ᠌ ᠠᠮᠢᠨ ᠢ᠋ ᠪᠢᠲᠡᠭᠡᠢ ᠬᠣᠣᠷᠯᠠ ᠬᠡᠮᠡᠵᠦᠬᠦᠢ᠃ ᠬᠡᠳᠦᠢᠪᠡᠷ ᠠᠯᠠᠯᠳᠤᠨ ᠪᠠᠢᠯᠳᠤᠬᠤ ᠲᠡᠢᠨ ᠳᠠᠢᠰᠤᠨ ᠪᠣᠯᠪᠠᠴᠤ ᠢᠯᠡᠷᠭᠡᠶᠡ ᠳᠣᠲᠣᠷᠬᠠᠶᠠ ᠪᠠᠢᠯᠳᠤᠨ ᠳᠠᠷᠤᠪᠠᠰᠤ ᠬᠡᠳᠦᠢ ᠣᠯᠠᠨ ᠦᠬᠦᠪᠡᠴᠦ ᠬᠢᠯᠢᠨᠴᠡ ᠢᠨᠣ ᠬᠥᠩᠭᠡᠨ᠂ ᠳᠠᠯᠳᠠ ᠨᠢᠭᠤᠴᠠ ᠪᠠᠷ ᠮᠡᠬᠡᠯᠡᠨ ᠭᠡᠨᠡᠳᠡᠭᠦᠯᠵᠦ ᠦᠬᠦᠭᠦᠯᠪᠡᠰᠦ ᠬᠢᠯᠢᠨᠴᠡ ᠨᠢᠭᠦᠯ ᠢᠨᠣ ᠭᠦᠨ ᠪᠣᠯᠠᠢ ! ᠪᠢ ᠬᠠᠷᠠᠬᠠᠨ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠨᠢᠭᠡᠳᠬᠡᠨ ᠡᠩᠬᠡᠵᠢᠭᠦᠯᠰᠦᠭᠡᠢ ᠭᠡᠮᠡᠨ ᠵᠢᠳᠬᠦᠬᠦᠶᠡ᠂ ᠡᠬᠢᠯᠡᠮᠡᠭᠴᠡ ᠡᠨᠡ ᠮᠡᠲᠦ ᠬᠠᠷᠠᠲᠠᠢ ᠪᠠᠷ ᠶᠠᠪᠤᠪᠠᠰᠤ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠵᠢᠭᠰᠢᠭᠦᠵᠡᠢ ! ᠪᠢ ᠭᠠᠭᠴᠠ ᠢᠯᠡᠷᠬᠡᠢ ᠪᠡᠷ ᠲᠡᠭᠦᠨ ᠢ᠋ ᠳᠠᠷᠤᠬᠤ ᠠᠷᠭᠠ ᠪᠣᠢ᠂ ᠳᠠ ᠬᠠᠷᠢᠨ ᠲᠡᠳᠡᠨ ᠦ᠌ ᠴᠡᠷᠢᠭ ᠦ᠋ᠨ ᠣᠯᠠᠨ ᠠ᠋ᠴᠠ ᠪᠢᠲᠡᠭᠡᠢ ᠠᠶᠤᠭᠲᠤᠨ᠃ ᠮᠢᠨᠦ ᠳᠡᠢᠯᠬᠦ ᠶ᠋ᠢ ᠦᠵᠡ ! 》 ᠬᠡᠮᠡᠭᠡᠳ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠨᠢᠭᠡᠨ ᠦ᠌ ᠨᠢᠭᠡᠬᠡᠨ ᠰᠥᠨᠢ ᠪᠡᠷ ᠪᠠᠭᠤᠳᠠᠯ ᠨᠡᠭᠦᠳᠡᠯ ᠴᠥᠮ ᠳᠠᠪᠰᠢᠵᠤ ᠵᠠᠢᠯᠠᠪᠠᠢ᠃
ᠰᠢᠷᠬᠠᠴᠢᠨ ᠬᠣᠨᠢᠨ ᠵᠢᠯ ᠦ᠋ᠨ ᠬᠠᠪᠤᠷ ᠤ᠋ᠨ ᠰᠡᠭᠦᠯ ᠪᠥᠯᠥᠭᠡ᠂ ᠲᠠᠢᠽᠦ ᠭᠤᠴᠢᠨ ᠨᠠᠢ᠍ᠮᠠᠨ ᠰᠡᠭᠦᠳᠡᠷ ᠲᠡᠢ ᠪᠣᠯᠪᠠ᠃ ᠡᠮᠦᠨᠡ ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠦ᠋ᠩ ᠬᠠᠭᠠᠨ ᠵᠣᠣ ᠺᠦᠸᠧ ᠶ᠋ᠢᠨ ᠴᠢᠩ ᠶᠤᠸᠠᠨ ᠤ᠋ ᠲᠠᠪᠤᠳᠤᠭᠠᠷ ᠣᠨ᠂ ᠳᠤᠮᠳᠠᠳᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠸᠠᠨ ᠶᠠᠨ ᠵᠢᠩ ᠴᠧᠩ ᠠᠨ ᠤ᠋ ᠳᠥᠷᠪᠡᠳᠦᠭᠡᠷ ᠣᠨ ᠪᠥᠯᠥᠭᠡ᠃
ᠲᠡᠳᠦᠢ ᠬᠡᠷᠡᠢᠳ ᠦ᠋ᠨ ᠢᠯᠠᠭᠤ᠂ ᠲᠠᠢᠽᠦ ᠶ᠋ᠢ ᠤᠷᠭᠤᠪᠠ ᠭᠡᠮᠡᠨ ᠰᠠᠶᠢ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠬᠥᠳᠡᠯᠭᠡᠵᠦ ᠨᠡᠬᠡᠰᠦᠭᠡᠢ ᠬᠡᠮᠡᠲᠡᠯᠡ ᠵᠠᠮᠤᠬᠠ ᠮᠥᠨ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠢ᠋ ᠬᠥᠳᠡᠯᠭᠡᠭᠡᠳ ᠤᠷᠤᠭᠰᠢᠯᠠᠨ ᠳᠣᠪᠲᠣᠯᠵᠤ ᠮᠡᠳᠡᠭᠡ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠲᠤᠯᠠ ᠳᠠᠷᠤᠢ ᠡᠮᠦᠨᠡ ᠵᠠᠮ ᠤᠳᠤᠷᠢᠳᠤᠨ ᠶᠡᠬᠡ ᠴᠡᠷᠢᠭ ᠢ᠋ ᠴᠤᠭᠠᠷ ᠬᠥᠳᠡᠯᠭᠡᠨ᠂ ᠸᠠᠩ ᠬᠠᠭᠠᠨ ᠢ᠋ᠶ᠋ᠠᠨ ᠠᠪᠴᠤ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠴᠢᠯᠠᠭᠤ ᠥᠩᠬᠥᠷᠢᠨ ᠠᠭᠤᠯᠠ ᠨᠤᠷᠠᠬᠤ ᠠᠳᠠᠯᠢ ᠮᠥᠷᠳᠡᠵᠦ ᠢᠷᠡᠬᠦᠶᠡ᠂ ᠤᠯᠠᠭᠠᠨ ᠴᠠᠪ ᠬᠡᠮᠡᠬᠦ ᠭᠠᠵᠠᠷᠠ ᠬᠦᠷᠲᠡᠯᠡ ᠭᠡᠨᠡᠳᠲᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠨᠢᠭᠡᠨ ᠰᠠᠯᠠᠭᠠᠨ ᠤ᠋ ᠴᠡᠷᠢᠭ ᠵᠠᠮ ᠢ᠋ ᠬᠥᠨᠳᠡᠯᠢᠳᠪᠡ᠃ ᠵᠠᠮᠤᠬᠠ ᠥᠨᠳᠥᠷ ᠬᠠᠰᠠᠭ ᠲᠤᠷ ᠭᠠᠷᠴᠤ ᠦᠵᠡᠬᠦᠯᠡ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠮᠠᠰᠢ ᠴᠥᠭᠡᠨ ᠪᠥᠭᠡᠳ ᠬᠥᠨᠳᠡᠢ ᠬᠠᠭᠤᠷᠮᠠᠭ᠂ ᠲᠤᠭ ᠬᠢᠭᠢᠷᠢ ᠣᠯᠠᠨ ᠳ᠋ᠤᠷ᠂ ᠵᠠᠮᠤᠬᠠ ᠢᠯᠠᠭᠤ ᠶ᠋ᠢᠨ ᠵᠦᠭ ᠶᠠᠭᠰᠢᠨ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ : 《ᠡᠨᠡ ᠯᠠᠪ ᠲᠡᠮᠦᠵᠢᠨ ᠦ᠌ ᠮᠠᠨ ᠢ᠋ ᠰᠡᠵᠢᠭᠯᠡᠭᠦᠯᠬᠦ ᠠᠷᠭᠠ ᠮᠥᠨ᠂ ᠣᠨᠴᠠ ᠡᠨᠡ ᠠᠷᠭᠠ ᠶ᠋ᠢᠨ ᠲᠡᠰᠢᠷᠠᠮᠡ ᠠᠯᠠᠵᠤ ᠠᠷᠢᠯᠭᠠᠶᠠ᠂ ᠪᠢ ᠦᠵᠡᠪᠡᠰᠦ ᠲᠡᠮᠦᠵᠢᠨ ᠦ᠌ ᠲᠡᠮᠳᠡᠭᠲᠦ ᠲᠤᠭ ᠰᠢᠭᠦᠷ ᠪᠠᠢᠬᠤ ᠪᠠᠷ ᠦᠵᠡᠬᠦᠯᠡ ᠲᠡᠷᠡ ᠯᠠᠪ ᠢᠷᠡᠵᠦᠬᠦᠢ᠃ ᠲᠡᠮᠦᠵᠢᠨ ᠲᠦᠷᠦᠯᠬᠦ ᠳᠡᠭᠡᠷᠡᠩᠭᠦᠢ ᠣᠮᠣᠭ ᠲᠠᠢ ᠳ᠋ᠤᠷ᠂ ᠣᠯᠠᠨ ᠬᠥᠮᠦᠨ ᠪᠠᠰᠠ ᠤᠪᠣᠩᠴᠢᠯᠠᠨ ᠠᠶᠤᠭᠰᠠᠭᠠᠷ ᠲᠡᠷᠡ ᠨᠢᠭᠡᠨᠲᠡ ᠣᠮᠣᠭᠰᠢᠨ ᠡᠷᠡᠮᠰᠢᠵᠦᠬᠦᠢ᠃ ᠡᠨᠡ ᠤᠳᠠᠭᠠ ᠣᠳᠣᠬᠠᠨ ᠴᠤ᠌ ᠣᠮᠣᠭ ᠳᠡᠭᠡᠷᠡᠩᠭᠦᠢ ᠶ᠋ᠢᠨ ᠭᠡᠮ ᠢ᠋ᠶ᠋ᠡᠨ ᠢᠳᠡᠵᠦ᠂ ᠣᠬᠣᠷ ᠵᠠᠭᠤᠷᠮᠠ ᠪᠠᠷ ᠦᠬᠦᠮᠦᠢ ᠊ᠶᠠ᠂ ᠲᠡᠷᠡ ᠬᠡᠳᠦᠬᠡᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠮᠠᠨ ᠢ᠋ ᠰᠦᠷᠲᠡᠭᠡᠵᠦ ᠬᠡᠷᠬᠢᠨ ᠪᠣᠯᠬᠤ ? 《ᠣᠮᠣᠭᠰᠢᠭᠰᠠᠨ ᠬᠥᠮᠦᠨ ᠤᠷᠲᠤ ᠦᠭᠡᠢ ᠂ ᠣᠷᠣᠢᠲᠠᠭᠰᠠᠨ ᠬᠥᠮᠦᠨ ᠣᠯᠵᠠ ᠦᠭᠡᠢ 》 ᠬᠡᠮᠡᠭ᠍ᠰᠡᠨᠴᠢᠯᠡᠨ᠂ ᠮᠠᠷᠭᠠᠲᠠ ᠲᠡᠷᠡ ᠯᠠᠪ ᠡᠷᠡᠮᠡᠬᠡᠢ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠰᠡᠷᠭᠦᠴᠡᠮᠦᠢ᠃ ᠪᠢᠳᠡ ᠰᠠᠢᠨ ᠬᠠᠷᠪᠤᠭᠠᠴᠢ ᠵᠠᠭᠤᠨ ᠬᠥᠮᠦᠨ ᠢ᠋ ᠰᠣᠩᠭᠣᠵᠤ᠂ ᠲᠡᠭᠦᠨ ᠢ᠋ ᠪᠠᠢᠯᠳᠤᠷᠠ ᠢᠷᠡᠬᠦᠢ ᠳ᠋ᠦ᠍ᠷ ᠨᠢᠭᠤᠨ ᠬᠠᠷᠪᠤᠭᠤᠯᠰᠤᠭᠠᠢ᠂ ᠵᠠᠭᠤᠨ ᠬᠥᠮᠦᠨ ᠨᠢᠭᠡᠨ ᠬᠥᠮᠦᠨ ᠢ᠋ ᠣᠨᠢᠯᠠᠵᠤ ᠬᠠᠷᠪᠤᠭᠰᠠᠨ ᠠ᠋ᠴᠠ ᠲᠡᠷᠡ ᠬᠡᠷᠬᠢᠨ ᠬᠡᠯᠲᠦᠷᠢᠨ ᠴᠢᠳᠠᠮᠤᠢ ? ᠲᠡᠮᠦᠵᠢᠨ ᠨᠢᠭᠡᠨ ᠬᠥᠮᠦᠨ ᠤᠨᠠᠪᠠᠰᠤ᠂ ᠪᠸᠲ᠋ᠠ᠋ ᠤᠯᠤᠰ ᠳᠠᠷᠤᠢ ᠪᠠᠷᠠᠬᠤ ᠪᠣᠯᠠᠢ ! 》 ᠭᠡᠮᠡᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠲᠦᠮᠡᠨ ᠡᠴᠡ ᠮᠢᠩᠭᠠᠨ᠂ ᠮᠢᠩᠭᠠᠨ ᠠ᠋ᠴᠠ ᠵᠠᠭᠤᠨ ᠰᠢᠯᠭᠠᠵᠤ᠂ ᠵᠠᠭᠤᠨ ᠢᠯᠡᠭᠦᠦ ᠰᠠᠢᠨ ᠬᠠᠷᠪᠤᠭᠠᠴᠢ ᠰᠣᠩᠭᠣᠨ ᠠᠪᠴᠤ ᠭᠤᠷᠪᠠᠨ ᠠᠢᠮᠠᠭ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠪᠠᠨ ᠨᠢᠭᠤᠵᠤ ᠮᠠᠷᠭᠠᠲᠠ ᠪᠠᠢᠯᠳᠤᠬᠤ ᠪᠠᠷ ᠲᠣᠭᠲᠠᠪᠠᠢ᠃
ᠡᠨᠡ ᠸᠠᠩ ᠬᠠᠭᠠᠨ ᠶᠠᠭᠠᠬᠢᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠪᠣᠯᠪᠠ ? ᠬᠡᠮᠡᠪᠡᠰᠦ : ᠲᠡᠭᠦᠨ ᠦ᠌ ᠡᠷᠬᠡ ᠪᠤᠰᠤ ᠪᠣᠯᠤᠭᠰᠠᠨ ᠢ᠋ ᠪᠠᠰᠠ ᠲᠠᠢᠯᠤᠨ ᠬᠡᠯᠡᠬᠦᠢ ᠳ᠋ᠦ᠍ᠷ ᠬᠦᠷᠪᠡ᠃ ᠤᠭ ᠠ᠋ᠴᠠ ᠸᠠᠩ ᠬᠠᠭᠠᠨ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠲᠠᠮᠠᠭᠠ ᠴᠠᠴᠤᠭ ᠥᠭᠴᠦ ᠡᠷᠭᠦᠮᠵᠢᠯᠡᠬᠦ ᠪᠡᠷ ᠮᠡᠬᠡᠯᠡᠵᠦ ᠠᠴᠢᠷᠠᠭᠰᠠᠨ ᠲᠤᠯᠠ ᠡᠳᠦᠭᠡ ᠮᠥᠨ ᠥᠪᠡᠷᠡ ᠦᠭᠡ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠬᠤᠸᠠᠩ ᠲᠠᠢᠽᠢ ᠥᠭᠦᠯᠡᠷᠦᠨ : 《 ᠣᠳᠣ ᠬᠠᠭᠠᠨ ᠡᠴᠢᠭᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠨᠡᠬᠡᠵᠦ ᠥᠭᠬᠦ ᠦᠭᠡᠢ ᠪᠣᠯᠪᠠᠰᠤ ᠬᠡᠷᠬᠢᠮᠦᠢ ? 》 ᠬᠡᠮᠡᠭᠰᠡᠨᠡ᠂ ᠵᠠᠮᠤᠬᠠ ᠥᠭᠦᠯᠡᠷᠦᠨ : 《ᠡᠨᠡ ᠶᠠᠮᠪᠠᠷ ᠪᠡᠷᠬᠡ ᠭᠠᠵᠠᠷ ᠪᠣᠢ ? ᠡᠭᠦᠨ ᠢ᠋ ᠣᠯᠠᠨ ᠦᠭᠡ ᠬᠡᠷᠡᠭ ᠦᠭᠡᠢ᠃ 》ᠬᠡᠮᠡᠭᠡᠳ ᠢᠯᠠᠭᠤ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ᠷ ᠡᠢᠮᠦ ᠲᠡᠢᠮᠦ ᠭᠡᠮᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠢᠯᠠᠭᠤ ᠠᠯᠠᠭᠠ ᠪᠠᠨ ᠲᠡᠰᠢᠵᠦ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《ᠡᠨᠡ ᠠᠷᠭᠠ ᠮᠠᠰᠢ ᠵᠦᠢ 》ᠬᠡᠮᠡᠵᠦ᠂ ᠳᠠᠷᠤᠢ ᠬᠣᠢᠲᠤ ᠶᠡᠬᠡ ᠬᠦᠷᠢᠶᠡ ᠳ᠋ᠦ᠍ᠷ ᠸᠠᠩ ᠬᠠᠭᠠᠨ ᠳ᠋ᠤᠷ ᠠᠢᠯᠠᠳᠬᠠᠷᠤᠨ : 《ᠬᠠᠭᠠᠨ ᠡᠴᠢᠭᠡ ᠪᠠᠢᠨ ᠪᠠᠢᠨ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠲᠡᠮᠦᠵᠢᠨ ᠢ᠋ ᠥᠮᠥᠭᠯᠡᠨ ᠬᠥᠪᠡᠭᠦᠨ ᠨᠠᠮᠠᠶ᠋ᠢ ᠪᠤᠷᠤᠭᠤᠰᠢᠶᠠᠨ ᠤᠨᠲᠤᠭᠤᠴᠠᠮᠤᠢ᠂ ᠡᠳᠦᠭᠡ ᠶᠠᠮᠪᠠᠷ ᠪᠠᠢᠨᠠ ? 》 ᠸᠠᠩ ᠬᠠᠭᠠᠨ : 《 ᠬᠡᠷᠬᠢᠪᠡ ? 》 ᠭᠡᠮᠡᠨ ᠠᠰᠠᠭᠤᠬᠤᠢ ᠳ᠋ᠤᠷ ᠲᠠᠢᠽᠢ ᠢᠯᠠᠭᠤ ᠠᠢᠯᠠᠳᠬᠠᠷᠤᠨ : 《ᠮᠠᠨ ᠤ᠋ ᠶᠡᠬᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠥᠪᠡᠷ ᠦ᠋ᠨ ᠲᠥᠷᠥᠯ ᠦ᠋ᠨ ᠸᠠᠨ ᠶᠠᠨ ᠱᠸᠦ ᠨᠡᠷᠡᠲᠦ ᠽᠠᠢᠰᠢᠶᠠᠩ ᠢ᠋ᠶ᠋ᠠᠨ ᠵᠠᠷᠤᠵᠤ᠂ ᠬᠠᠭᠠᠨ ᠡᠴᠢᠭᠡ ᠳ᠋ᠦ᠍ᠷ ᠤᠮᠠᠷᠠ ᠭᠠᠵᠠᠷ ᠤ᠋ᠨ ᠬᠠᠭᠠᠨ ᠤ᠋ ᠴᠣᠯᠠ ᠪᠠ ᠬᠠᠰ ᠤ᠋ᠨ ᠲᠠᠮᠠᠭᠠ ᠴᠠᠴᠤᠭ ᠢ᠋ ᠡᠷᠭᠦᠵᠦ᠂ ᠮᠠᠨ ᠤ᠋ ᠴᠡᠷᠢᠭ ᠢ᠋ ᠦᠵᠡᠷᠡ ᠢᠷᠡᠭᠰᠡᠨ ᠢ᠋ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠡᠳᠦᠢ ᠪᠣᠯᠲᠠᠯᠠ ᠬᠠᠯᠬᠠᠯᠠᠨ ᠴᠡᠷᠢᠭᠯᠡᠵᠦ ᠪᠥᠬᠥᠶᠡ᠂ ᠠᠯᠲᠠᠨ ᠤᠯᠤᠰ ᠭᠤᠴᠢᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠨᠤᠲᠤᠭ ᠢ᠋ ᠲᠡᠭᠰᠢᠯᠡᠷᠡ ᠢᠷᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ᠂ ᠪᠤᠭᠤᠷᠵᠢ ᠨᠠᠷ ᠢ᠋ᠶ᠋ᠠᠨ ᠢᠯᠡᠭᠡᠵᠦ᠂ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠷᠯᠠᠭ᠂ ᠳᠤᠭᠮᠤᠭ ᠲᠤᠷ ᠢᠯᠡᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠬᠡᠳᠦᠬᠡᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠪᠠᠰᠠ ᠬᠦ᠌ ᠮᠠᠨ ᠤ᠋ ᠵᠠᠮ ᠢ᠋ ᠬᠠᠯᠬᠠᠯᠠᠵᠤ᠂ ᠡᠭᠡᠨᠡᠭᠲᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠷᠭᠦᠮᠵᠢᠯᠡᠯ ᠢ᠋ ᠠᠪᠤᠭᠤᠯᠬᠤ ᠦᠭᠡᠢ᠂ ᠠᠲᠠᠭᠠᠲᠤ ᠰᠡᠳᠬᠢᠯ ᠠᠰᠤᠷᠤ ᠬᠡᠲᠦᠷᠬᠡᠢ ᠠᠭᠤᠷᠯᠠᠯᠲᠠᠢ ᠪᠠᠢᠨᠠᠮ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠣᠭᠲᠠᠭᠤᠷᠢ ᠦᠭᠡᠢ ᠲᠤᠭᠤᠷᠢᠯ ᠤ᠋ᠨ ᠲᠣᠯᠣᠭᠠᠢ ᠠᠨᠤ ᠡᠷᠭᠢᠨ᠂ ᠳᠣᠲᠣᠷᠠ ᠠᠨᠤ ᠡᠷᠭᠢᠭᠦᠳᠡᠵᠦ᠂ ᠲᠣᠭᠣᠭᠠ ᠪᠤᠴᠠᠯᠬᠤ ᠠᠳᠠᠯᠢ ᠪᠣᠯᠲᠠᠯᠠ ᠠᠭᠤᠷᠰᠠᠵᠤ ᠥᠭᠦᠯᠡᠷᠦᠨ : 《ᠪᠸᠲ᠋ᠠ᠋ ᠶ᠋ᠢᠨ ᠡᠵᠡᠨ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠷᠭᠦᠮᠵᠢᠯᠡᠬᠦ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠦᠯᠦ ᠬᠦᠯᠢᠶᠡᠬᠦ ᠪᠥᠭᠡᠳ ᠨᠠᠮᠠᠶ᠋ᠢ ᠡᠷᠭᠦᠮᠵᠢᠯᠡᠬᠦ ᠶ᠋ᠢ ᠲᠡᠷᠡ ᠬᠠᠯᠠᠠᠭᠯᠠᠬᠤ ᠠᠨᠤ ᠶᠠᠭᠤᠨ ? ᠡᠢᠮᠦ ᠪᠥᠭᠡᠳ ᠨᠠᠮᠠᠶ᠋ᠢ ᠪᠠᠰᠠ ᠡᠯᠴᠢ ᠢᠯᠡᠭᠡᠵᠦ ᠢᠴᠢᠭᠡᠪᠡᠢ ᠂ ᠳᠠᠬᠢᠨ ᠲᠥᠷᠥᠵᠦ ᠳᠠᠯᠠᠢ ᠶ᠋ᠢᠨ ᠤᠰᠤᠨ ᠢ᠋ᠶ᠋ᠠᠷ ᠤᠬᠢᠶᠠᠪᠠᠴᠤ ᠲᠡᠭᠦᠨ ᠳ᠋ᠦ᠍ᠷ ᠰᠠᠢᠨ ᠪᠣᠯᠬᠤᠶᠠ ᠪᠡᠷᠬᠡ ᠪᠣᠯᠪᠠ !》ᠬᠡᠮᠡᠭᠡᠳ ᠲᠥᠷᠥᠯ ᠳᠥᠷᠪᠢᠯ ᠥᠭᠡᠶᠡ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠰᠢᠪᠲᠤᠯᠤᠨ ᠭᠠᠷᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠢ ᠢᠯᠠᠭᠤ ᠳᠠᠬᠢᠨ ᠰᠥᠭᠥᠳᠴᠦ ᠠᠢᠯᠠᠳᠬᠠᠷᠤᠨ : 《ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠰᠢᠪᠲᠤᠯᠤᠨ ᠠᠯᠠᠨ ᠭᠠᠷᠬᠤ ᠠᠨᠤ ᠴᠣᠬᠣᠮ ᠳ᠋ᠤᠷ ᠵᠦᠢ ᠪᠣᠯᠠᠢ ! 》ᠸᠠᠩ ᠬᠠᠭᠠᠨ ᠪᠠᠰᠠ ᠠᠰᠠᠭᠤᠷᠤᠨ : 《ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦᠨᠡᠬᠡᠷ ᠬᠡᠳᠦᠢ ᠪᠣᠢ ? ᠦᠨᠡᠨ ᠢ᠋ ᠣᠯᠪᠠᠤ ? 》ᠲᠠᠢᠽᠢ ᠢᠯᠠᠭᠤ ᠠᠢᠯᠠᠳᠬᠠᠷᠤᠨ : 《 ᠲᠤᠷᠰᠢᠭᠤᠯ ᠬᠡᠳᠦᠢᠨᠡᠢ ᠢᠷᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠢᠨᠦ᠂ ᠬᠡᠳᠦᠨ ᠮᠢᠩᠭᠠᠨ ᠠ᠋ᠴᠠ ᠬᠡᠲᠦᠷᠡᠬᠦ ᠦᠭᠡᠢ᠂ ᠴᠥᠮ ᠢ᠋ᠶ᠋ᠠᠷ ᠬᠠᠭᠤᠷᠮᠠᠭ ᠰᠦᠷ ᠲᠠᠯᠪᠢᠨ ᠰᠥᠷᠴᠦ ᠲᠤᠯᠤᠮᠤᠢ ᠭᠡᠮᠡᠨ ᠥᠴᠢᠬᠦ ᠢᠨᠦ ᠮᠠᠰᠢ ᠦᠨᠡᠨ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠸᠠᠩ ᠬᠠᠭᠠᠨ ᠰᠢᠪᠲᠤᠯᠵᠤ ᠠᠯᠠᠨ ᠭᠠᠷᠲᠤᠭᠠᠢ ᠬᠡᠮᠡᠪᠡ ᠃
ᠲᠡᠭᠦᠨᠴᠡ ᠢᠯᠠᠭᠤ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠭᠠᠷᠴᠤ ᠢᠷᠡᠭᠡᠳ ᠵᠠᠮᠤᠬᠠ ᠶ᠋ᠢᠨ ᠳᠡᠷᠭᠡᠳᠡ ᠢᠷᠠᠪᠠᠰᠤ᠂ ᠵᠠᠮᠤᠬᠠ ᠪᠸᠲ᠋ᠠ᠋ ᠤᠯᠤᠰ ᠠ᠋ᠴᠠ ᠳᠠᠭᠠᠵᠤ ᠢᠷᠡᠭᠰᠡᠨ ᠠᠷᠳᠠ᠂ ᠬᠤᠰᠠᠭᠤᠷ ᠯᠤᠭᠠ ᠠᠷᠢᠬᠢ ᠤᠤᠭᠤᠵᠤ ᠬᠠᠷᠠᠬᠠᠨ ᠲᠡᠮᠦᠵᠢᠨ ᠦ᠌ ᠵᠠᠩ ᠠᠨᠤ ᠡᠢᠮᠦ ᠪᠤᠰᠤ ᠤᠤ ? ᠠᠭᠠᠰᠢ ᠠᠨᠤ ᠲᠡᠢᠮᠦ ᠪᠤᠰᠤ ᠤᠤ ? ᠭᠡᠮᠡᠨ ᠶᠡᠬᠡᠯᠡ ᠢᠨᠢᠶᠡᠨ᠂ ᠶᠡᠬᠡᠯᠡ ᠬᠡᠯᠡᠯᠴᠡᠵᠦ ᠨᠠᠢᠷᠠᠯᠳᠤᠵᠤ ᠪᠥᠬᠥᠶᠡ᠂ ᠬᠤᠸᠠᠩ ᠲᠠᠢᠽᠢ ᠢ ᠰᠢᠨᠡ ᠭᠡᠨᠡᠳᠲᠡ ᠣᠷᠣᠵᠤ ᠡᠴᠢᠭᠰᠡᠨ ᠳ᠋ᠦ᠍ᠷ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠵᠠᠮᠤᠬᠠ᠂ ᠲᠠᠢᠰᠢ᠂ ᠲᠠᠢᠪᠤᠤ᠂ ᠠᠷᠳᠠ᠂ ᠬᠤᠰᠠᠭᠤᠷ ᠶᠡᠬᠡᠯᠡ ᠠᠶᠤᠭᠰᠠᠨ ᠳᠦᠷᠢ ᠪᠡᠷ ᠭᠦᠶᠦᠯᠴᠡᠨ ᠪᠣᠰᠴᠤ ᠶᠡᠬᠡ ᠲᠠᠢᠽᠢ ᠶᠠᠭᠤᠨ ᠳ᠋ᠤᠷ ᠡᠢᠨ ᠬᠦ᠌ ᠦᠴᠦᠭᠦᠷᠬᠡᠨ ᠶᠠᠪᠤᠮᠤᠢ ? 》ᠬᠡᠮᠡᠬᠦᠶᠡ᠂ ᠢᠯᠠᠭᠤ ᠢᠷᠵᠠᠢᠨ ᠢᠨᠢᠶᠡᠵᠦ ᠢᠪᠠᠭᠠᠨᠠᠳᠠᠨ ᠥᠭᠦᠯᠡᠷᠦᠨ : 《ᠪᠣᠳᠣᠯᠭᠠ ᠪᠠᠭᠠᠲᠤᠷᠲᠤ ᠶᠤᠸᠠᠨᠱᠤᠸᠠᠢ ᠶ᠋ᠢᠨ ᠪᠣᠳᠣᠭᠰᠠᠨ ᠠ᠋ᠴᠠ ᠭᠠᠷᠤᠭᠰᠠᠨ ᠦᠭᠡᠢ ! 》 ᠬᠡᠮᠡᠲᠡᠯᠡ ᠵᠠᠮᠤᠬᠠ ᠶᠠᠭᠠᠷᠠᠨ ᠠᠰᠠᠭᠤᠷᠤᠨ : 《 ᠶᠠᠮᠪᠠᠷ ᠪᠣᠢ ? ᠬᠠᠭᠠᠨ ᠡᠵᠡᠨ ᠶᠠᠭᠤ ᠬᠡᠮᠡᠪᠡ ? 》ᠢᠯᠠᠭᠤ ᠥᠴᠢᠷᠦᠨ : 《 ᠬᠠᠭᠠᠨ ᠡᠴᠢᠭᠡ ᠰᠢᠪᠲᠤᠯᠤᠨ ᠭᠠᠷᠤᠮᠤᠢ ᠬᠡᠮᠡᠪᠡ᠂ ᠪᠤᠰᠤ ᠵᠠᠮ ᠢ᠋ᠶ᠋ᠠᠷ ᠡᠴᠢᠪᠡᠰᠦ ᠬᠤᠳᠠᠷᠭᠠᠯᠠᠨ ᠠᠯᠠᠬᠤ ᠶ᠋ᠢ ᠪᠠᠰᠠ ᠮᠡᠳᠡᠪᠡ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠮᠤᠬᠠ᠂ ᠠᠷᠳᠠ᠂ ᠬᠤᠰᠠᠭᠤᠷ ᠭᠤᠷᠪᠠᠭᠤᠯᠠ ᠴᠤᠭᠠᠷ ᠠᠯᠠᠭᠠ ᠪᠠᠨ ᠲᠠᠰᠢᠵᠤ ᠶᠡᠬᠡᠯᠡ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ :《ᠡᠨᠡ ᠡᠳᠦᠷ ᠪᠢᠳᠡ ᠵᠠᠵᠠᠭᠢᠶᠠᠨᠲᠤ ᠨᠡᠷᠡ ᠲᠡᠢ ᠠᠭᠤᠯᠠᠨ ᠢ᠋ ᠥᠩᠭᠡᠷᠡᠨ ᠭᠠᠷᠴᠤ ᠢᠷᠡᠬᠦᠶᠡ᠂ ᠰᠠᠶᠢ ᠵᠤᠨ ᠤ᠋ ᠡᠬᠢ ᠣᠷᠣᠮᠠᠭᠴᠠ ᠠᠭᠤᠯᠠ ᠲᠠᠯᠠ ᠶ᠋ᠢᠨ ᠵᠠᠵᠢᠭᠢᠨᠠᠬᠤ ᠬᠣᠷᠣᠬᠠᠢ ᠴᠥᠮ ᠳᠠᠭᠤᠨ ᠭᠠᠷᠴᠤ ᠠᠭᠤᠯᠠ ᠳᠦᠭᠦᠷᠡᠩ ᠵᠢᠷᠭᠢᠨ ᠳᠤᠤᠭᠠᠷᠴᠤ ᠪᠣᠢ᠂ ᠮᠠᠨ ᠤ᠋ ᠡᠨᠳᠡ ᠬᠡᠵᠢᠶᠡ ᠳᠣᠯᠣᠭᠠᠨ ᠰᠠᠷᠠ ᠡᠬᠢᠯᠡᠪᠡᠰᠦ ᠰᠠᠶᠢ ᠳᠤᠤᠭᠠᠷᠬᠤ ᠪᠥᠭᠡᠲᠡᠯᠡ ᠡᠢᠮᠦ ᠡᠷᠲᠡ ᠲᠠᠯᠠ ᠶ᠋ᠢᠨ ᠴᠠᠯᠴᠢᠬᠠᠢ ᠬᠣᠷᠣᠬᠠᠢ ᠳᠠᠭᠤᠨ ᠭᠠᠷᠤᠭᠰᠠᠨ ᠠᠨᠤ ᠦᠵᠡᠰᠡ ᠮᠠᠨ ᠤ᠋ ᠡᠵᠡᠨ ᠬᠠᠭᠠᠨ ᠬᠣᠢᠲᠤ ᠭᠠᠵᠠᠷ ᠢ᠋ ᠨᠡᠢᠭᠡᠮᠯᠡᠬᠦ ᠶᠡᠬᠡ ᠪᠠᠶᠠᠷ ᠢ᠋ ᠪᠡᠯᠭᠡᠯᠡᠬᠦ ᠠᠵᠤᠭᠤ ! ᠮᠠᠨ ᠤ᠋ ᠬᠠᠭᠠᠨ ᠡᠵᠡᠨ ᠦ᠌ ᠡᠮᠦᠨᠡ ᠵᠢᠳᠬᠦᠵᠦ ᠦᠬᠦᠪᠡᠴᠦ ᠭᠦᠢᠴᠡᠬᠦ ᠦᠭᠡᠢ ᠢᠨᠣ ᠴᠥᠮ ᠬᠤᠸᠠᠩ ᠲᠠᠢᠽᠢ ᠸᠠᠩ ᠡᠵᠡᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠲᠦᠮᠡᠨ ᠤᠯᠤᠰ ᠢ᠋ ᠬᠤᠷᠢᠶᠠᠵᠤ ᠥᠭᠭᠦᠭᠡᠳ ᠲᠦᠮᠡᠨ ᠢ᠋ ᠲᠡᠷᠢᠭᠦᠯᠡᠬᠦ ᠲᠦᠰᠢᠮᠡᠯ ᠪᠣᠯᠰᠤᠭᠠᠢ ᠬᠡᠮᠡᠬᠦ ᠶ᠋ᠢᠨ ᠲᠤᠯᠠ ᠪᠣᠯᠠᠢ ! 》 ᠬᠡᠮᠡᠵᠦ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠢᠯᠠᠭᠤ ᠢᠨᠴᠢᠷᠬᠠᠳᠠᠶᠠ ᠢᠨᠢᠶᠡᠵᠦ᠂ ᠲᠡᠳᠬᠦᠨ ᠪᠣᠰᠬᠠᠭᠠᠳ ᠳᠥᠷᠪᠡᠨ ᠬᠥᠮᠦᠨ ᠬᠠᠮᠲᠤ ᠰᠠᠭᠤᠵᠤ ᠰᠣᠭᠲᠣᠲᠠᠯᠠ ᠠᠷᠢᠬᠢᠳᠠᠵᠤ᠂ ᠢᠯᠠᠭᠤ ᠪᠠᠭᠤᠳᠠᠯ ᠳ᠋ᠠᠭᠠᠨ ᠡᠭᠡᠬᠦᠶᠡ ᠵᠠᠮᠤᠬᠠ ᠶ᠋ᠢᠨ ᠭᠠᠷ ᠠ᠋ᠴᠠ ᠪᠠᠷᠢᠵᠤ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《 ᠪᠢ ᠠᠯᠢ ᠡᠳᠦᠷ ᠪᠸᠲ᠋ᠠ᠋ ᠤᠯᠤᠰ ᠢ᠋ ᠪᠠᠷᠠᠲᠠᠯᠠ ᠠᠷᠢᠯᠭᠠᠭᠠᠳ ᠠᠬᠠ ᠴᠢᠨᠦ ᠰᠢᠨᠡ ᠠᠪᠤᠭᠰᠠᠨ ᠲᠡᠷᠡ ᠬᠡᠳᠦᠨ ᠲᠠᠲᠠᠪᠤᠷᠢ ᠪᠡᠷᠭᠡᠳ ᠦ᠋ᠨ ᠮᠡᠲᠦ ᠰᠠᠢᠬᠠᠨ ᠡᠮᠡ ᠣᠯᠵᠤ ᠠᠪᠬᠤ ᠪᠣᠯᠪᠠ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠮᠤᠬᠠ ᠢᠬᠢᠷ ᠢ᠋ᠶ᠋ᠡᠷ ᠢᠨᠢᠶᠡᠵᠦ᠂ ᠳᠣᠲᠣᠷᠠ ᠪᠠᠨ ᠶᠠᠰᠤᠨ ᠳ᠋ᠤᠷ ᠬᠦᠷᠲᠡᠯᠡ ᠬᠣᠷᠣᠰᠴᠤ ᠰᠡᠵᠢᠭᠯᠡᠪᠡᠢ᠂ ᠡᠨᠡ ᠦᠨᠡᠬᠡᠷ :
ᠣᠶᠤᠲᠠᠨ ᠮᠡᠷᠭᠡᠳ ᠦ᠋ᠨ ᠬᠠᠨᠢᠯᠠᠬᠤ ᠠᠨᠤ
ᠤᠰᠤᠨ ᠮᠡᠲᠦ ᠵᠥᠭᠡᠭ ᠤᠷᠲᠤ᠂
ᠤᠷᠰᠢᠭᠲᠤ ᠠᠷᠠᠳ ᠤ᠋ᠨ ᠨᠥᠬᠥᠷᠯᠡᠬᠦ ᠠᠨᠤ
ᠤᠷᠢᠳᠠ ᠡᠯ ᠬᠣᠢᠨᠠ ᠳᠠᠢᠰᠤᠨ !
ᠬᠡᠮᠡᠭᠴᠢ ᠴᠣᠬᠣᠮ ᠡᠭᠦᠨ ᠢ᠋ ᠬᠡᠯᠡᠭᠰᠡᠨ ᠪᠣᠯᠠᠢ᠃ ᠵᠠᠮᠤᠬᠠ ᠭᠠᠭᠴᠠ ᠾᠧ ᠸᠠᠩ ᠲᠤᠭᠤᠷᠢᠯ ᠳ᠋ᠤᠷ ᠬᠣᠷᠣᠰᠤᠭᠰᠠᠨ ᠠᠨᠤ ᠪᠤᠰᠤ᠂ ᠭᠦᠨ ᠬᠣᠷᠣᠰᠤᠯ ᠰᠡᠵᠢᠭᠯᠡᠯ ᠢᠯᠠᠭᠤ ᠳ᠋ᠤᠷ ᠪᠣᠢ ᠪᠣᠯᠠᠢ᠃ ᠦᠵᠡᠬᠦ ᠮᠡᠷᠭᠡᠳ ᠳᠠᠷᠠᠭᠠ ᠪᠦᠯᠦᠭ ᠲᠣᠷ ᠰᠠᠢᠬᠠᠨ ᠦᠵᠡᠭᠳᠡᠬᠦᠢ᠃ ᠡᠬᠡᠨᠡᠷ ᠦ᠋ᠨ ᠡᠯᠦ ᠳ᠋ᠦ᠍ᠷ ᠢᠴᠡᠭᠡᠯᠡᠭᠰᠡᠨ ᠠᠷᠠᠳ ᠲᠤᠷ ᠶᠠᠭᠤᠨᠠᠢ ᠡᠷᠬᠢᠮ ᠶᠡᠬᠡ ᠰᠠᠨᠠᠭᠠᠨ ᠪᠠᠢᠬᠤ ᠠᠵᠢ ? ᠡᠨᠡ ᠰᠠᠢᠬᠠᠨ ᠢ᠋ ᠡᠭᠡᠭᠦᠯᠦᠨ ᠴᠢᠳᠠᠭᠴᠢᠳ ᠢ᠋ ᠡᠷᠳᠡᠮᠲᠡᠨ ᠬᠡᠮᠡᠬᠦ ᠪᠣᠯᠠᠢ !
ᠵᠢᠴᠢ ᠥᠷᠯᠥᠭᠡ ᠪᠠᠢᠯᠳᠤᠬᠤ ᠡᠯᠴᠢ ᠢᠯᠡᠭᠡᠵᠦ᠂ ᠮᠠᠷᠭᠠᠲᠠ ᠶ᠋ᠢᠨ ᠯᠤᠤ ᠴᠠᠭ ᠲᠤᠷ ᠲᠤᠯᠭᠠᠯᠴᠠᠮᠤᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠡᠯᠴᠢ ᠯᠣᠭᠡ ᠪᠡᠶᠡ ᠪᠡᠷ ᠵᠣᠯᠭᠠᠨ ᠱᠠᠩ ᠬᠤᠷᠢᠮ ᠥᠭᠴᠦ ᠦᠭᠡ ᠶ᠋ᠢᠨ ᠶᠣᠰᠣᠭᠠᠷ ᠬᠦᠯᠢᠶᠡᠵᠦ ᠡᠭᠡᠭᠦᠯᠪᠡ᠃ ᠵᠢᠴᠢ ᠥᠷᠯᠥᠭᠡ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠬᠠᠯᠠᠭᠠᠢᠲᠤ ᠬᠡᠮᠡᠬᠦ ᠠᠭᠤᠯᠠᠨ ᠤ᠋ ᠠᠷᠤ ᠳ᠋ᠤ᠌ ᠵᠢᠭᠰᠠᠭᠠᠭᠰᠠᠨ ᠳ᠋ᠤᠷ ᠶᠤᠸᠠᠨᠱᠤᠸᠠᠢ ᠵᠠᠮᠤᠬᠠ ᠣᠯᠠᠨ ᠵᠠᠩᠵᠤᠨ ᠨᠠᠷ ᠤ᠋ᠨ ᠵᠦᠭ ᠠᠰᠠᠭᠤᠷᠤᠨ : 《ᠬᠡᠨ ᠭᠠᠷᠴᠤ ᠲᠡᠮᠦᠵᠢᠨ ᠢ᠋ ᠪᠠᠷᠢᠮᠤᠢ ? 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠪᠤᠤ ᠭᠣᠯᠢᠨᠲᠠᠢ ᠭᠠᠷᠴᠤ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《 ᠪᠣᠷᠵᠢᠭᠢᠳ ᠤ᠋ᠨ ᠰᠦᠷ ᠢ᠋ ᠳᠠᠷᠤᠵᠤ ᠬᠠᠰᠠᠷ ᠢ᠋ ᠠᠨᠤ ᠬᠤᠪᠴᠢᠭᠰᠠᠨ ᠢ᠋ᠶ᠋ᠠᠷ ᠮᠥᠨ ᠬᠦ᠌ ᠲᠠᠢᠪᠤᠤ ᠪᠢ ᠭᠠᠷᠴᠤ ᠬᠦᠨᠳᠦ ᠭᠠᠪᠢᠶᠠ ᠪᠠᠢᠭᠤᠯᠬᠤ ᠪᠣᠢ ᠊ᠶᠠ! 》 ᠵᠠᠮᠤᠬᠠ ᠰᠤᠷᠭᠠᠨ ᠥᠭᠦᠯᠡᠷᠦᠨ : 《ᠲᠡᠮᠦᠵᠢᠨ ᠦ᠌ ᠠᠳᠬᠠᠭ ᠬᠦᠴᠦᠨ ᠪᠠ ᠠᠷᠭᠠ ᠤᠬᠠᠭᠠᠨ ᠢ᠋ ᠡᠩ ᠦ᠋ᠨ ᠠᠷᠠᠳ ᠲᠤᠷ ᠦᠯᠢᠳᠬᠡᠵᠦ ᠦᠯᠦ ᠪᠣᠯᠤᠮᠤᠢ ! ᠪᠢ ᠤᠷᠢᠳᠤ ᠡᠳᠦᠷ ᠲᠡᠭᠦᠨ ᠯᠣᠭᠡ ᠨᠥᠬᠥᠷᠯᠡᠵᠦ ᠪᠦᠬᠦᠢ ᠴᠠᠭ ᠲᠤᠷ ᠰᠠᠢᠬᠠᠨ ᠮᠡᠳᠡᠮᠦᠢ᠃ ᠴᠢ ᠭᠠᠷᠪᠠᠰᠤ ᠰᠠᠢᠬᠠᠨ ᠬᠢᠴᠢᠶᠡ ᠂ ᠠᠯᠳᠠᠰᠢ ᠭᠠᠷᠭᠠᠬᠤᠢ ᠳ᠋ᠤᠷ ᠪᠢᠲᠡᠭᠡᠢ ᠬᠦᠷᠭᠦᠯ᠃ ᠪᠸᠲ᠋ᠠ᠋ ᠤᠯᠤᠰ ᠬᠣᠶᠠᠷ ᠵᠠᠮ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠬᠠᠪᠴᠢᠭᠳᠠᠵᠤ ᠬᠠᠷᠠᠬᠠᠨ ᠶᠠᠭᠠᠷᠠᠬᠤ ᠴᠠᠭ᠂ ᠲᠡᠷᠢᠭᠦᠨ ᠤᠳᠠᠭᠠ ᠳ᠋ᠤᠷ ᠮᠠᠨ ᠤ᠋ ᠴᠡᠷᠢᠭ ᠲᠦ᠍ᠷ ᠳᠠᠷᠤᠭᠳᠠᠪᠠᠰᠤ᠂ ᠪᠸᠲ᠋ᠠ᠋ ᠶ᠋ᠢᠨ ᠴᠡᠷᠢᠭ ᠳᠠᠷᠤᠢ ᠰᠦᠷ ᠪᠠᠭᠤᠷᠠᠬᠤ ᠪᠣᠯᠠᠢ !》ᠭᠡᠮᠡᠨ ᠰᠠᠢᠲᠤᠷ ᠰᠤᠷᠭᠠᠨ ᠬᠡᠩᠭᠡᠷᠭᠡ ᠴᠣᠬᠢᠭᠤᠯᠵᠤ ᠭᠠᠷᠲᠠᠯᠠ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠲᠤᠭ ᠪᠠᠰᠠ ᠬᠥᠳᠡᠯᠵᠦ ᠵᠢᠭ᠍ᠰᠠᠭᠠᠯ ᠬᠥᠳᠡᠯᠦᠮᠡᠭᠴᠡ ᠶᠡᠬᠡ ᠵᠠᠩᠵᠤᠨ ᠵᠡᠯᠮᠡ ᠵᠡᠭᠡᠷᠳᠡ ᠮᠣᠷᠢ ᠤᠨᠤᠵᠤ ᠵᠢᠳᠠ ᠪᠠᠷᠢᠨ ᠭᠠᠷᠴᠤ ᠢᠷᠡᠪᠡ᠃ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠵᠠᠩᠵᠤᠨ ᠬᠠᠷᠢᠯᠴᠠᠨ ᠨᠡᠷᠡ ᠣᠪᠣᠭ ᠢ᠋ᠶ᠋ᠠᠨ ᠠᠰᠠᠭᠤᠯᠴᠠᠵᠤ᠂ ᠭᠣᠯᠢᠨᠳᠠᠢ ᠭᠠᠤᠯᠢᠨ ᠪᠢᠯᠠᠭᠤ ᠪᠠᠨ ᠭᠣᠣᠯ ᠳᠤᠮᠳᠠ ᠠ᠋ᠴᠠ ᠪᠠᠷᠢᠵᠤ ᠭᠣᠳᠣᠯᠢ ᠮᠡᠲᠦ ᠡᠷᠭᠢᠭᠦᠯᠵᠦ ᠣᠷᠣᠭᠰᠠᠨᠠ᠂ ᠵᠠᠯᠮᠠ ᠶ᠋ᠢᠨ ᠰᠠᠷᠠᠲᠤ ᠵᠢᠳᠠ ᠠᠨᠤ ᠭᠣᠯᠢᠨᠲᠠᠢ ᠶ᠋ᠢᠨ ᠰᠠᠭᠠᠯᠳᠤᠷᠭᠠ ᠠ᠋ᠴᠠ ᠠᠨᠤ ᠰᠠᠯᠬᠤ ᠦᠭᠡᠢ ᠴᠢᠴᠢᠯᠬᠢᠯᠠᠨ ᠣᠷᠣᠵᠤ᠂ ᠳᠡᠮᠡᠢ ᠠᠷᠪᠠᠨ ᠤᠳᠠᠭᠠ ᠪᠣᠯᠤᠭᠰᠠᠨ ᠦᠭᠡᠢ ᠭᠣᠯᠢᠨᠲᠠᠢ ᠶ᠋ᠢᠨ ᠬᠣᠶᠠᠷ ᠮᠥᠷᠥ ᠬᠡᠳᠦ ᠬᠡᠳᠦᠨᠲᠡ ᠰᠡᠳᠡ ᠰᠡᠳᠡ ᠵᠢᠳᠠᠯᠠᠭᠳᠠᠵᠤ᠂ ᠭᠣᠯᠢᠨᠲᠠᠢ ᠠᠷᠠᠬᠠᠨ ᠵᠡᠯᠮᠡ ᠶ᠋ᠢᠨ ᠶ᠋ᠢᠳᠠ ᠶ᠋ᠢ ᠭᠤᠷᠪᠠᠨ ᠳᠥᠷᠪᠡᠨ ᠤᠳᠠᠭᠠ ᠵᠠᠢᠯᠠᠭᠤᠯᠤᠮᠠᠭᠴᠠ ᠨᠢᠭᠡᠮᠦᠰᠦᠨ ᠲᠤᠯᠤᠨ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ᠂ ᠨᠢᠭᠡᠨᠲᠡ ᠪᠥᠬᠥᠢᠮᠡᠭᠴᠡ ᠵᠠᠯᠮᠠ ᠶ᠋ᠢᠨ ᠵᠢᠳᠠᠨ ᠤ᠋ ᠳᠣᠣᠭᠤᠷ ᠰᠢᠷᠭᠤᠵᠤ᠂ ᠳᠠᠷᠤᠢ ᠵᠢᠭᠰᠠᠭᠠᠯ ᠳ᠋ᠤᠷ ᠢ᠋ᠶ᠋ᠠᠨ ᠳᠣᠪᠲᠣᠯᠤᠨ ᠣᠷᠣᠵᠤ ᠢᠷᠡᠭᠰᠡᠨᠡ᠂ ᠵᠠᠮᠤᠬᠠ ᠶᠡᠬᠡᠯᠡ ᠪᠠᠴᠢᠮᠳᠠᠨ ᠲᠠᠢᠽᠦ ᠶ᠋ᠢ ᠥᠳᠥᠭᠡᠷᠡ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠰᠠᠷᠠᠨ ᠰᠦᠬᠡ ᠡᠷᠭᠢᠭᠦᠯᠦᠨ ᠭᠠᠷᠴᠤ ᠢᠷᠡᠭᠰᠡᠨᠡ ᠵᠠᠯᠮᠠ ᠲᠣᠰᠴᠤ ᠠᠪᠲᠠᠯᠠ ᠵᠠᠮᠤᠬᠠ ᠣᠨᠴᠠ ᠲᠠᠢᠽᠦ ᠶ᠋ᠢ ᠭᠠᠷ ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠠᠯᠮᠠ : 《ᠰᠠᠪᠠᠭᠠ ᠦᠭᠡᠢ ᠰᠠᠮᠠᠭᠤᠨ ᠣᠷᠭᠣᠳᠣᠣᠯ ᠤ᠋ᠨ ᠰᠠᠨᠠᠭᠠᠨ ᠤ᠋ ᠶᠡᠬᠡ ᠶ᠋ᠢ ᠦᠵᠡ ! 》 ᠬᠡᠮᠡᠭᠡᠳ ᠵᠢᠳᠠᠯᠠᠨ ᠣᠷᠣᠵᠤ ᠢᠷᠡᠭᠡᠳ ᠠᠷᠪᠠᠨ ᠤᠳᠠᠭᠠ ᠢᠯᠡᠭᠦᠦ ᠪᠣᠯᠵᠤ᠂ ᠵᠠᠮᠤᠬᠠ ᠲᠤᠯᠤᠨ ᠬᠦᠴᠦᠷᠡᠬᠦ ᠦᠭᠡᠢ ᠪᠥᠬᠥᠶᠡ᠂ ᠲᠠᠢᠽᠦ ᠵᠠᠮᠤᠬᠠ ᠶ᠋ᠢ ᠦᠵᠡᠮᠡᠭᠴᠡ ᠭᠠᠯ ᠮᠡᠲᠦ ᠬᠢᠯᠢᠩᠯᠡᠵᠦ᠂ ᠭᠠᠩ ᠵᠢᠳᠠ ᠪᠠᠨ ᠮᠤᠰᠬᠢᠵᠦ ᠭᠠᠷᠰᠤᠭᠠᠢ ᠭᠡᠮᠡᠨ ᠦᠵᠡᠬᠦᠯᠡ ᠰᠢᠳᠠᠷ ᠲᠦᠰᠢᠮᠡᠳ ᠬᠡᠳᠦᠢᠨᠡᠢ ᠲᠠᠢᠽᠦ ᠶ᠋ᠢᠨ ᠤᠨᠤᠬᠤ ᠰᠠᠯᠬᠢᠨ ᠴᠠᠪ ᠬᠡᠮᠡᠬᠦ ᠮᠣᠷᠢᠨ ᠤ᠋ ᠬᠠᠵᠠᠭᠠᠷ ᠤ᠋ᠨ ᠬᠣᠶᠠᠷ ᠠᠮᠠᠭᠠ ᠠ᠋ᠴᠠ ᠰᠢᠷᠭᠢᠲᠡᠯᠡ ᠠᠳᠬᠤᠵᠤ᠂ ᠰᠢᠷᠢᠯᠳᠦᠨ ᠰᠥᠭᠦᠳᠦᠯᠴᠡᠨ ᠦᠬᠦᠪᠡᠴᠦ ᠲᠠᠯᠪᠢᠬᠤ ᠦᠭᠡᠢ : 《ᠡᠵᠡᠨ ᠤᠭ ᠠᠷᠭᠠ ᠪᠠᠷ ᠢ᠋ᠶ᠋ᠠᠨ ᠶᠠᠪᠤᠮᠤ !》ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠬᠢᠯᠢᠩ ᠢ᠋ᠶ᠋ᠡᠨ ᠬᠣᠪ ᠲᠡᠳᠡᠨ ᠡᠭᠡᠭᠦᠯᠵᠦ ᠪᠡᠶᠡᠰᠴᠦ ᠵᠠᠬᠢᠷᠤᠨ : 《ᠵᠠᠶᠠᠭᠠᠲᠤ ᠵᠢᠨᠦᠩ ᠦ᠋ᠨ ᠮᠢᠨᠦ ᠵᠢᠪᠬᠤᠯᠠᠩᠲᠤ ᠴᠠᠭᠠᠵᠠ᠂ ᠵᠢᠭᠠᠭᠰᠠᠨ ᠭᠠᠵᠠᠷᠠ ᠰᠤᠮᠤ ᠮᠡᠲᠦ ᠬᠤᠷᠴᠠ ! 》 ᠬᠡᠮᠡᠭᠡᠳ ᠳᠠᠷᠤᠢ ᠬᠠᠷᠠᠩᠭᠠ ᠴᠣᠬᠢᠭᠤᠯᠵᠤ ᠴᠡᠷᠢᠭ ᠢ᠋ᠶ᠋ᠡᠨ ᠬᠤᠷᠢᠶᠠᠬᠤᠶᠠ᠂ ᠵᠠᠯᠮᠠ ᠵᠠᠮᠤᠬᠠ ᠶ᠋ᠢᠨ ᠳᠤᠭᠤᠯᠠᠭᠠ ᠶ᠋ᠢᠨ ᠮᠠᠩᠨᠠᠢᠪᠴᠢ ᠶ᠋ᠢ ᠰᠡᠳᠡ ᠵᠢᠳᠠᠯᠠᠵᠤ᠂ ᠵᠠᠮᠤᠬᠠ ᠶᠡᠬᠡᠯᠡ ᠠᠶᠤᠵᠤ ᠶᠠᠭᠠᠷᠠᠨ ᠵᠠᠢ ᠡᠷᠢᠵᠦ ᠪᠤᠷᠤᠭᠤᠯᠠᠶᠠ ᠬᠡᠮᠡᠲᠡᠯᠡ ᠪᠸᠲ᠋ᠠ᠋ ᠤᠯᠤᠰ ᠴᠡᠷᠢᠭ ᠢ᠋ᠶ᠋ᠡᠨ ᠬᠤᠷᠢᠶᠠᠭᠰᠠᠨ ᠳ᠋ᠤᠷ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠵᠢᠭᠰᠠᠭᠠᠯ ᠳ᠋ᠠᠭᠠᠨ ᠡᠭᠡᠪᠡ᠃ ᠵᠡᠯᠮᠡ ᠮᠥᠨ ᠴᠠᠭᠠᠵᠠ ᠠ᠋ᠴᠠ ᠵᠥᠷᠢᠴᠡᠵᠦ ᠨᠡᠬᠡᠭᠰᠡᠨ ᠦᠭᠡᠢ᠃ ᠬᠣᠶᠠᠷ ᠴᠡᠷᠢᠭ ᠴᠥᠮ ᠬᠦᠷᠢᠶᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠣᠷᠣᠪᠠ᠂ ᠡᠭᠦᠨ ᠳ᠋ᠦ᠍ᠷ ᠢᠯᠠᠭᠤ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠵᠠᠮᠤᠬᠠ ᠳ᠋ᠤᠷ ᠠᠷᠢᠬᠢ ᠪᠠᠷᠢᠵᠤ᠂ ᠮᠠᠭᠲᠠᠨ ᠥᠭᠦᠯᠡᠷᠦᠨ : 《ᠮᠠᠨ ᠤ᠋ ᠬᠡᠷᠡᠢᠳ ᠤᠯᠤᠰ ᠪᠸᠲ᠋ᠠ᠋ ᠤᠯᠤᠰ ᠢ᠋ ᠳᠠᠷᠤᠪᠠ ᠬᠡᠮᠡᠭᠴᠢ ᠰᠠᠶᠢ ᠭᠠᠷᠪᠠ᠂ ᠪᠠᠭᠠᠲᠤᠷ ᠪᠣᠳᠣᠯᠭᠠ ᠬᠣᠣᠰ ᠪᠦᠷᠢᠳᠦᠭᠰᠡᠨ ᠮᠠᠨ ᠤ᠋ ᠶᠤᠸᠠᠨᠱᠤᠸᠠᠢ ᠠᠬᠠ ᠶ᠋ᠢᠨ ᠰᠠᠢᠨ ᠪᠣᠯᠠᠢ ! 》 ᠭᠡᠮᠡᠨ ᠮᠠᠭᠲᠠᠨ ᠰᠠᠢᠰᠢᠶᠠᠬᠤᠶᠠ᠂ ᠵᠠᠮᠤᠬᠠ ᠣᠮᠣᠷᠬᠠᠨ ᠥᠭᠦᠯᠡᠷᠦᠨ : 《 ᠣᠳᠣ ᠪᠠᠬᠠᠨ ᠤᠳᠠᠭᠰᠠᠨ ᠪᠥᠭᠡᠰᠦ ᠵᠡᠯᠮᠡ ᠶ᠋ᠢᠨ ᠵᠠᠶᠠᠭᠠᠨ ᠢ᠋ ᠲᠡᠭᠦᠰᠬᠡᠵᠦ᠂ ᠲᠡᠮᠦᠵᠢᠨ ᠢ᠋ ᠲᠦᠮᠡᠨ ᠵᠡᠪᠡ ᠶ᠋ᠢᠨ ᠳᠣᠣᠷᠠ ᠦᠬᠦᠭᠦᠯᠬᠦ ᠪᠥᠯᠥᠭᠡ ! 》ᠭᠡᠮᠡᠨ ᠭᠤᠷᠪᠠᠨ ᠪᠠᠭ ᠤ᠋ᠨ ᠴᠡᠷᠢᠭ ᠢ᠋ᠶ᠋ᠡᠨ ᠱᠠᠩᠨᠠᠵᠤ᠂ ᠦᠬᠦᠨ ᠵᠢᠳᠬᠦᠭᠲᠦᠨ ᠭᠡᠮᠡᠨ ᠵᠠᠷᠯᠠᠪᠠ ᠃
ᠵᠢᠴᠢ ᠥᠷᠯᠥᠭᠡ ᠭᠡᠭᠡᠷᠡᠮᠡᠭᠴᠡ ᠪᠸᠲ᠋ᠠ᠋ ᠤᠯᠤᠰ ᠬᠦᠷᠢᠶᠡ ᠪᠡᠨ ᠡᠪᠳᠡᠵᠦ ᠪᠤᠷᠤᠭᠤᠯᠠᠭᠰᠠᠨ ᠳ᠋ᠤᠷ ᠵᠠᠮᠤᠬᠠ ᠨᠡᠩ ᠶᠡᠬᠡ ᠨᠢᠭᠤᠷ ᠣᠯᠵᠤ᠂ ᠬᠤᠷᠳᠤᠨ ᠶᠡᠬᠡ ᠬᠡᠩᠭᠡᠷᠭᠡ ᠴᠣᠬᠢᠵᠤ : 《ᠦᠨᠡᠨ ᠪᠠᠢᠳᠠᠯ ᠠᠨᠤ ᠢᠯᠡᠷᠡᠪᠡ᠂ ᠪᠸᠲ᠋ᠠ᠋ ᠤᠯᠤᠰ ᠢ᠋ ᠪᠠᠷᠠᠭᠳᠠᠭᠤᠯᠬᠤ ᠠᠨᠤ ᠡᠨᠡ ᠤᠳᠠᠬᠠ ᠳ᠋ᠤᠷ ᠪᠣᠯᠠᠢ ! 》 ᠭᠡᠮᠡᠨ ᠶᠡᠬᠡ ᠫᠤᠤ ᠲᠠᠯᠪᠢᠭᠤᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠨ ᠨᠡᠬᠡᠵᠦ ᠡᠴᠢᠬᠦᠶᠡ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠪᠠᠭᠤᠳᠠᠯ ᠢ᠋ᠶ᠋ᠠᠷ ᠲᠠᠭᠠᠷᠢᠬᠤᠶᠠ᠂ ᠲᠤᠯᠭᠠ ᠶ᠋ᠢᠨ ᠣᠷᠣ ᠶ᠋ᠢ ᠪᠠᠢᠴᠠᠭᠠᠪᠠᠰᠤ᠂ ᠴᠡᠷᠢᠭ ᠬᠣᠶᠠᠷ ᠲᠦᠮᠡᠨ ᠲᠠᠪᠤᠨ ᠮᠢᠩᠭᠠᠨ ᠠ᠋ᠴᠠ ᠬᠡᠲᠦᠷᠡᠬᠦ ᠦᠭᠡᠢ᠂ ᠵᠠᠷᠢᠮ ᠵᠣᠭᠣᠷᠢ ᠳ᠋ᠤᠷ ᠦᠨᠡᠰᠦ ᠮᠥᠨ ᠦᠭᠡᠢ ᠳ᠋ᠦ᠍ᠷ ᠵᠠᠮᠤᠬᠠ ᠲᠡᠭᠷᠢ ᠶ᠋ᠢᠨ ᠵᠦᠭ ᠬᠠᠨᠳᠤᠵᠤ ᠬᠠᠳᠠᠭᠠᠨᠠᠨ ᠢᠨᠢᠶᠡᠭᠰᠡᠭᠡᠷ ᠮᠣᠷᠢ ᠠ᠋ᠴᠠ ᠪᠠᠨ ᠬᠠᠨᠳᠠᠷᠤᠨ ᠤᠨᠠᠬᠤ ᠰᠢᠬᠠᠭᠰᠠᠨ ᠳ᠋ᠤᠷ ᠢᠯᠠᠭᠤ ᠤᠴᠢᠷ ᠢ᠋ ᠠᠰᠠᠭᠤᠭᠰᠠᠨᠠ᠂ ᠵᠠᠮᠤᠬᠠ ᠶᠠᠭᠰᠢᠨ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ : 《ᠪᠢ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠦ᠌ ᠬᠥᠮᠦᠨ ᠪᠦᠬᠦᠨ ᠢ᠋ ᠬᠡᠦᠬᠡᠳ ᠮᠡᠲᠦ ᠦᠵᠡᠬᠦᠢ ᠳ᠋ᠦ᠍ᠷ ᠢᠨᠢᠶᠡᠮᠦᠢ᠃ ᠲᠡᠷᠡ ᠡᠳᠦᠷ ᠲᠡᠳᠡᠨ ᠦ᠌ ᠴᠡᠷᠢᠭ ᠢ᠋ ᠦᠵᠡᠪᠡᠰᠦ ᠲᠦᠮᠡᠨ ᠴᠡᠷᠢᠭ ᠮᠥᠨ ᠬᠦᠷᠬᠦ ᠦᠭᠡᠢ ᠪᠥᠭᠡᠲᠡᠯᠡ ᠡᠨᠡ ᠡᠳᠦᠷ ᠬᠣᠶᠠᠷ ᠲᠦᠮᠡᠨ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠦ᠋ᠨ ᠲᠤᠯᠭᠠ ᠲᠤᠯᠭᠠᠭᠤᠯᠤᠭᠰᠠᠨ ᠠᠨᠤ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠰᠦᠷ ᠲᠠᠯᠪᠢᠬᠤ ᠠᠨᠤ ᠨᠢᠭᠡᠨᠲᠡ ᠢᠯᠡᠷᠡᠪᠡ᠃ ᠬᠡᠳᠦᠢ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠪᠠᠢᠪᠠᠴᠤ ᠮᠥᠨ ᠮᠠᠨ ᠤ᠋ ᠢᠳᠡᠬᠦᠢ ᠳ᠋ᠦ᠍ᠷ ᠴᠦ᠍ ᠭᠦᠢᠴᠡᠬᠦ ᠦᠭᠡᠢ ᠪᠣᠯᠠᠢ᠂ ᠡᠨᠡ ᠤᠳᠠᠭᠠ ᠣᠳᠣᠬᠠᠨ ᠴᠤ᠌ ᠰᠡᠷᠡᠭᠳᠡᠪᠡ ! ᠲᠦᠷᠭᠡᠨ ᠨᠡᠬᠡ᠃ 》ᠬᠡᠮᠡᠵᠦ ᠰᠠᠶᠢ ᠭᠤᠴᠢᠨ ᠭᠠᠵᠠᠷ ᠶᠠᠪᠤᠲᠠᠯᠠ ᠪᠦᠬᠦ ᠪᠡᠯᠭᠦᠳᠡᠢ ᠶ᠋ᠢᠨ ᠴᠡᠷᠢᠭ ᠤᠭᠲᠤᠵᠤ ᠭᠠᠷᠪᠠ᠃ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠪᠠᠰᠠ ᠲᠠᠢᠽᠦ ᠶ᠋ᠢᠨ ᠲᠡᠮᠳᠡᠭᠲᠦ ᠤᠯᠠᠭᠠᠨ ᠠᠷᠰᠯᠠᠨᠲᠤ ᠰᠢᠬᠦᠷ ᠳᠠᠯᠪᠠᠭᠠ ᠪᠣᠢ ᠢᠨᠣ ᠦᠵᠡᠰᠡ ᠳᠠᠢᠰᠤᠨ ᠢ᠋ ᠥᠳᠥᠭᠡᠬᠦ ᠠᠷᠭᠠ ᠠᠵᠤᠭᠤ ! ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠬᠡᠳᠦᠢᠨᠡᠢ ᠭᠠᠯᠵᠠᠭᠤ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ᠂ ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨᠠ ᠡᠴᠢᠭᠰᠡᠨ ᠪᠣᠯᠠᠢ᠃ ᠲᠡᠭᠦᠨᠴᠡ ᠵᠠᠮᠤᠬᠠ ᠰᠡᠵᠢᠭᠯᠡᠭᠰᠡᠨ ᠪᠣᠯᠪᠠᠴᠤ ᠠᠷᠭᠠ ᠦᠭᠡᠢ ᠭᠠᠷᠴᠤ ᠲᠠᠢᠰᠢ ᠭᠣᠯᠢᠨᠳᠠᠢ ᠶ᠋ᠢ ᠭᠠᠷᠭᠠᠵᠤ ᠢᠯᠡᠭᠡᠲᠡᠯᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠵᠢᠭᠰᠠᠭᠠᠯ ᠠ᠋ᠴᠠ ᠪᠡᠯᠭᠦᠳᠡᠢ ᠭᠡᠨᠡᠳᠲᠡ ᠮᠣᠷᠢᠨ ᠢ᠋ᠶ᠋ᠠᠨ ᠬᠠᠪᠢᠷᠭᠠ ᠳ᠋ᠤᠷ ᠶᠠᠭ ᠨᠠᠭᠠᠯᠳᠤᠵᠤ ᠳᠣᠪᠲᠣᠯᠤᠨ ᠭᠠᠷᠴᠤ ᠰᠤᠮᠤ ᠬᠠᠷᠪᠤᠬᠤ ᠮᠡᠲᠦ ᠬᠦᠷᠴᠦ ᠢᠷᠡᠭᠡᠳ ᠭᠣᠯᠢᠨᠲᠠᠢ ᠶ᠋ᠢᠨ ᠵᠡᠭᠦᠨ ᠬᠥᠯ ᠡᠴᠡ ᠰᠢᠭᠦᠷᠡᠨ ᠠᠪᠴᠤ ᠨᠢᠭᠡᠨᠲᠡ ᠳᠤᠭᠲᠤᠷᠤᠨ ᠡᠷᠭᠦᠵᠦ᠂ ᠲᠡᠷᠢᠭᠦᠨ ᠦ᠌ ᠳᠡᠭᠡᠷᠡ ᠬᠡᠳᠦᠨᠲᠡ ᠰᠣᠢᠯᠠᠨ ᠡᠷᠭᠢᠭᠦᠯᠵᠦ᠂ ᠵᠠᠮᠤᠬᠠ ᠶ᠋ᠢ ᠴᠣᠬᠢᠨ ᠢᠯᠡᠭᠡᠵᠦ᠂ ᠳᠠᠷᠤᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠪᠤᠷᠤᠭᠤᠯᠠᠪᠠ᠃ ᠭᠣᠯᠢᠨᠳᠠᠢ ᠬᠣᠭᠣᠰᠣᠨ ᠭᠠᠵᠠᠷ ᠬᠥᠨᠳᠡᠯᠡᠨ ᠢ᠋ᠶ᠋ᠡᠷ ᠡᠷᠭᠢᠭᠰᠡᠭᠡᠷ ᠡᠴᠢᠵᠦ ᠵᠠᠮᠤᠬᠠ ᠶ᠋ᠢᠨ ᠬᠡᠬᠦᠳᠡᠭ ᠴᠡᠭᠡᠵᠢ ᠳ᠋ᠦ᠍ᠷ ᠬᠥᠨᠳᠡᠯᠡᠨ ᠢ᠋ᠶ᠋ᠡᠷ ᠲᠣᠰᠴᠤ ᠬᠣᠶᠠᠭᠤᠯᠠ ᠬᠠᠮᠲᠤ ᠥᠩᠬᠥᠷᠢᠳᠦᠨ ᠪᠥᠮᠪᠥᠷᠢᠳᠡᠵᠦ᠂ ᠮᠣᠷᠢᠨ ᠯᠤᠭᠠ ᠭᠤᠷᠪᠠᠭᠤᠯᠠ ᠵᠢᠭᠤᠷᠠᠯᠳᠤᠨ ᠤᠨᠠᠭᠰᠠᠨ ᠳ᠋ᠤᠷ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠳᠠᠭᠤᠨ ᠠᠯᠳᠠᠯᠴᠠᠨ ᠢᠨᠢᠶᠡᠯᠴᠡᠵᠦ᠂ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠠᠮᠠ ᠪᠠᠨ ᠪᠠᠷᠢᠵᠤ ᠶᠠᠭᠠᠷᠠᠯᠴᠠᠨ ᠲᠡᠳᠬᠦᠨ ᠪᠣᠰᠬᠠᠪᠠ᠃ ᠵᠠᠮᠤᠬᠠ ᠶᠡᠬᠡᠯᠡ ᠢᠴᠢᠩᠭᠦᠷᠡᠨ ᠬᠣᠷᠣᠰᠴᠤ ᠦᠬᠦᠨ ᠨᠡᠬᠡᠵᠦ ᠣᠷᠣᠪᠠ᠃ ᠳᠡᠮᠡᠢ ᠭᠤᠴᠢᠨ ᠭᠠᠵᠠᠷ ᠶᠠᠪᠤᠭᠰᠠᠨ ᠦᠭᠡᠢ ᠬᠠᠰᠠᠷ ᠤ᠋ᠨ ᠴᠡᠷᠢᠭ ᠭᠠᠷᠴᠤ ᠲᠤᠰᠤᠭᠰᠠᠨ ᠳ᠋ᠤᠷ ᠵᠠᠮᠤᠬᠠ ᠦᠨᠡᠬᠡᠷ ᠪᠠᠬᠠᠨ ᠰᠡᠵᠢᠭᠯᠡᠵᠦ᠂ ᠥᠨᠳᠥᠷ ᠭᠠᠵᠠᠷ ᠲᠤᠷ ᠭᠠᠷᠴᠤ ᠦᠵᠡᠪᠡᠰᠦ ᠲᠡᠷᠢᠭᠦᠯᠡᠭᠰᠡᠨ ᠵᠠᠩᠵᠤᠨ ᠠᠨᠤ ᠬᠠᠯᠠᠭᠰᠠᠨ ᠪᠣᠯᠪᠠᠴᠤ ᠴᠡᠷᠢᠭ ᠢᠨᠣ ᠮᠥᠨ ᠬᠦ᠌ ᠲᠡᠷᠡ ᠴᠡᠷᠢᠭ᠂ ᠲᠠᠢᠽᠦ ᠶ᠋ᠢᠨ ᠰᠢᠭᠦᠷ ᠳᠠᠯᠪᠠᠭᠠ ᠤᠭ ᠬᠡᠪ ᠢ᠋ᠶ᠋ᠡᠷ ᠪᠣᠢ ᠲᠤᠯᠠ ᠡᠨᠡ ᠯᠠᠪ ᠲᠡᠷᠡ ᠬᠡᠳᠦᠨ ᠴᠡᠷᠢᠭ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠭᠰᠡᠨ ᠴᠡᠷᠢᠭ ᠪᠠ ᠵᠠᠩᠵᠤᠨ ᠢ᠋ᠶ᠋ᠠᠨ ᠬᠠᠯᠠᠨ᠂ ᠮᠡᠳᠡᠷᠭᠦᠦ ᠴᠡᠷᠢᠭ ᠢ᠋ᠶ᠋ᠡᠨ ᠡᠭᠡᠭᠦᠯᠦᠨ ᠲᠤᠯᠵᠤ᠂ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠪᠣᠢ ᠭᠡᠮᠡᠨ ᠮᠠᠨ ᠢ᠋ ᠠᠶᠤᠯᠭᠠᠨ ᠰᠡᠵᠢᠭᠯᠡᠭᠦᠯᠵᠦ ᠡᠭᠡᠭᠦᠯᠰᠦᠭᠡᠢ ᠬᠡᠮᠡᠬᠦ ᠥᠴᠦᠬᠡᠨ ᠠᠷᠭᠠ ᠪᠣᠯᠠᠢ ! ᠭᠡᠮᠡᠨ ᠲᠠᠢᠰᠢ ᠣᠯᠢᠨᠲᠠᠢ ᠶ᠋ᠢ ᠭᠠᠷᠭᠠᠭᠰᠠᠨᠠ ᠬᠠᠰᠠᠷ ᠬᠠᠴᠢᠷ ᠥᠳᠥᠲᠦ ᠰᠤᠮᠤ ᠪᠠᠷ ᠢ᠋ᠶ᠋ᠠᠨ ᠨᠢᠭᠡᠨᠲᠡ ᠬᠠᠷᠪᠤᠵᠤ ᠣᠯᠢᠨᠲᠠᠢ ᠶ᠋ᠢᠨ ᠤᠷᠤᠭᠤᠯ ᠢ᠋ ᠰᠡᠳᠡ᠂ ᠡᠭᠦᠳᠡ ᠶ᠋ᠢᠨ ᠰᠢᠲᠦᠨ ᠢ᠋ ᠪᠣᠯᠭᠣ ᠬᠠᠷᠪᠤᠵᠤ ᠤᠨᠠᠭᠠᠭᠠᠳ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠪᠤᠷᠤᠭᠤᠯᠠᠪᠠ᠃ ᠵᠠᠮᠤᠬᠠ ᠶᠠᠰᠤᠨ ᠰᠢᠲᠦ ᠪᠡᠨ ᠬᠠᠭᠠ ᠵᠠᠭᠤᠵᠤ ᠨᠡᠬᠡᠨ ᠢᠷᠡᠬᠦᠶᠡ᠂ ᠨᠡᠭᠦᠳᠡᠯ ᠪᠠᠢᠴᠠᠭᠠᠬᠤ ᠴᠡᠷᠢᠭ ᠦ᠋ᠨ ᠠᠷᠠᠳ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《ᠴᠢᠨᠠᠳᠤᠰ ᠤ᠋ᠨ ᠣᠳᠤᠭᠰᠠᠨ ᠴᠡᠷᠢᠭ ᠦ᠋ᠨ ᠵᠣᠭᠣᠷᠢ᠂ ᠤᠷᠢᠳᠠ ᠶ᠋ᠢᠨ ᠡᠴᠡ ᠬᠣᠶᠠᠷ ᠬᠤᠪᠢ ᠳᠤᠲᠠᠭᠤ ᠪᠣᠯᠪᠠ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠮᠤᠬᠠ ᠡᠨᠡ ᠬᠠᠭᠤᠷᠮᠠᠭ ᠠᠨᠤ ᠯᠠᠪ ᠪᠣᠯᠪᠠ᠂ ᠰᠡᠵᠢᠭ ᠦᠭᠡᠢ ᠨᠡᠬᠡᠵᠦ ᠠᠯᠠ ᠭᠡᠮᠡᠨ ᠪᠠᠰᠠ ᠴᠡᠷᠢᠭ ᠢ᠋ᠶ᠋ᠡᠨ ᠬᠥᠳᠡᠯᠭᠡᠵᠦ ᠨᠡᠬᠡᠨ ᠡᠴᠢᠭᠡᠳ ᠪᠠᠰᠠ ᠭᠤᠴᠢᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷ ᠬᠦᠷᠲᠡᠯᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠳᠥᠷᠪᠡᠳᠦᠭᠡᠷ ᠪᠠᠭ ᠤ᠋ᠨ ᠪᠣᠲ᠋ᠣ ᠪᠤᠰᠦᠩ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠭᠠᠳ ᠪᠣᠲ᠋ᠣ ᠤᠭᠲᠤᠨ ᠭᠠᠷᠴᠤ ᠪᠠᠢᠯᠳᠤᠮᠤᠢ᠃ ᠪᠤᠰᠤᠩ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠲᠣᠯᠣᠭᠠᠢ ᠡᠷᠭᠢᠰᠢ ᠦᠭᠡᠢ ᠪᠤᠷᠤᠭᠤᠯᠠᠪᠠ᠃ ᠪᠣᠲ᠋ᠣ ᠨᠢᠭᠡᠬᠡᠨ ᠰᠤᠮᠤ ᠪᠠᠷ ᠭᠣᠯᠢᠨᠲᠠᠢ ᠶ᠋ᠢᠨ ᠪᠠᠷᠠᠭᠤᠨ ᠨᠢᠳᠦ ᠶ᠋ᠢ ᠪᠦᠯᠲᠡ ᠬᠠᠷᠪᠤᠵᠤ ᠤᠨᠠᠭᠠᠭᠠᠳ ᠮᠣᠷᠢ ᠪᠠᠨ ᠡᠷᠭᠢᠭᠦᠯᠦᠨ ᠨᠢᠰᠬᠦ ᠮᠡᠲᠦ ᠡᠭᠡᠵᠦ ᠳᠣᠪᠲᠣᠯᠪᠠ᠃ ᠡᠭᠦᠨ ᠳ᠋ᠦ᠍ᠷ ᠲᠠᠢᠽᠢ ᠢᠯᠠᠭᠤ 《 ᠪᠡᠯᠡᠭ ᠡᠰᠡ ᠵᠣᠬᠢᠪᠠ ! 》 ᠭᠡᠮᠡᠨ ᠰᠡᠵᠢᠭᠯᠡᠬᠦᠢ ᠳ᠋ᠦ᠍ᠷ ᠵᠠᠮᠤᠬᠠ ᠶᠡᠷᠪᠡᠢᠵᠦ ᠥᠭᠦᠯᠡᠷᠦᠨ : 《ᠲᠠᠢᠽᠢ ᠸᠠᠩ ᠶᠠᠭᠤᠨ ᠳ᠋ᠤᠷ ᠬᠠᠷᠢᠨ ᠡᠮᠡᠭᠴᠢᠨ ᠪᠣᠯᠪᠠ ? ᠡᠨᠡ ᠬᠡᠪᠴᠢᠶᠡᠨ ᠢ᠋ ᠠᠯᠳᠠᠪᠠᠰᠤ ᠲᠦᠮᠡᠨ ᠳ᠋ᠦ᠍ᠷ ᠳᠠᠬᠢᠨ ᠨᠢᠭᠡᠨᠲᠡ ᠦᠯᠦ ᠲᠣᠬᠢᠶᠠᠯᠳᠤᠮᠤᠢ! 》 ᠬᠡᠮᠡᠵᠦ ᠪᠠᠰᠠ ᠨᠡᠬᠡᠵᠦ ᠢᠷᠡᠭᠡᠳ ᠬᠠᠷᠠᠩᠭᠤᠢ ᠪᠣᠯᠵᠤ ᠭᠤᠴᠢᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷ ᠬᠦᠷᠲᠡᠯᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠲᠠᠪᠤᠳᠤᠭᠠᠷ ᠪᠠᠭ ᠤ᠋ᠨ ᠴᠢᠨᠳᠠᠭᠠᠨᠠ ᠰᠡᠴᠡᠨ᠂ ᠬᠤᠳᠠᠭᠠᠨᠠ ᠪᠡᠬᠢ ᠶ᠋ᠢᠨ ᠴᠡᠷᠢᠭ ᠭᠠᠷᠴᠤ ᠲᠤᠰᠪᠠ᠃ ᠰᠥᠨᠢ ᠪᠣᠯᠪᠠ ᠭᠡᠮᠡᠨ ᠪᠠᠢᠯᠳᠤᠭᠰᠠᠨ ᠦᠭᠡᠢ᠂ ᠵᠢᠴᠢ ᠥᠷᠯᠥᠭᠡ ᠦᠵᠡᠪᠡᠰᠦ ᠲᠡᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠬᠡᠳᠦᠢᠨᠡᠢ ᠡᠭᠡᠵᠦᠬᠦᠢ᠃ ᠲᠤᠯᠭᠠ ᠵᠣᠭᠣᠷᠢ ᠳᠥᠷᠪᠡᠨ ᠬᠤᠪᠢ ᠪᠠᠭᠤᠷᠠᠪᠠ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠮᠤᠬᠠ: 《ᠶᠠᠮᠪᠠᠷ ᠪᠠᠢᠨᠠ ᠂ ᠡᠭᠦᠨ ᠳ᠋ᠦ᠍ᠷ ᠣᠭᠲᠣ ᠰᠡᠵᠢᠭᠯᠡᠬᠦ ᠭᠠᠵᠠᠷ ᠦᠭᠡᠢ ᠪᠣᠯᠠᠢ ! 》ᠬᠡᠮᠡᠵᠦ᠂ ᠰᠡᠳᠬᠢᠯ ᠠᠮᠤᠷ ᠢ᠋ᠶ᠋ᠠᠷ ᠪᠠᠰᠠ ᠨᠡᠬᠡᠵᠦ ᠡᠴᠢᠭᠰᠡᠭᠡᠷ᠂ ᠨᠠᠷᠠᠨ ᠮᠠᠨᠳᠤᠬᠤ ᠦᠶᠡ ᠳ᠋ᠦ᠍ᠷ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠵᠢᠷᠭᠤᠳᠤᠭᠠᠷ ᠪᠠᠭ ᠤ᠋ᠨ ᠰᠢᠷᠢ ᠬᠤᠲᠤᠭ᠂ ᠬᠠᠷᠠ ᠬᠢᠷᠤ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠵᠤ᠂ ᠬᠠᠷᠠ ᠬᠢᠷᠤ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠡᠴᠢᠭᠡᠳ ᠰᠢᠷᠢ ᠬᠤᠲᠤᠭ ᠮᠥᠨ ᠬᠡᠳᠦᠨᠲᠡ ᠪᠠᠢᠯᠳᠤᠮᠠᠭᠴᠠ ᠪᠠᠰᠠ ᠪᠤᠷᠤᠭᠤᠯᠠᠪᠠ᠃ ᠡᠭᠦᠨ ᠳ᠋ᠦ᠍ᠷ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠠᠷᠠᠳ ᠴᠤ᠌ ᠰᠡᠳᠬᠢᠯ ᠰᠤᠯᠠ ᠪᠣᠯᠵᠤ᠂ ᠳᠡᠮᠡᠢ ᠠᠵᠢᠭ ᠦᠭᠡᠢ ᠨᠡᠬᠡᠵᠦ ᠡᠴᠢᠬᠦᠢ ᠳ᠋ᠦ᠍ᠷ ᠪᠠᠭᠠ ᠦᠳᠡ ᠥᠩᠭᠡᠷᠡᠮᠡᠭᠴᠡ ᠪᠠᠰᠠ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠳᠣᠯᠣᠳᠤᠭᠠᠷ ᠪᠠᠭ ᠤ᠋ᠨ ᠰᠥᠪᠡᠭᠡᠲᠡᠢ᠂ ᠵᠦᠯᠭᠡᠲᠡᠢ ᠬᠣᠶᠠᠷ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠭᠠᠳ ᠴᠡᠷᠢᠭ ᠢ᠋ᠶ᠋ᠡᠨ ᠬᠡᠳᠦᠢᠨᠡᠢ ᠡᠭᠡᠭᠦᠯᠦᠭᠡᠳ ᠰᠥᠪᠡᠭᠡᠲᠡᠢ ᠵᠦᠯᠭᠡᠲᠡᠢ ᠬᠣᠶᠠᠭᠤᠯᠠ ᠬᠣᠴᠣᠷᠴᠤ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠲᠦ᠍ᠷ ᠮᠣᠷᠢᠨ ᠲᠣᠯᠣᠭᠠᠢ ᠨᠡᠢᠯᠡᠭᠦᠯᠦᠨ ᠳᠣᠪᠲᠣᠯᠤᠨ ᠣᠷᠣᠵᠤ᠂ ᠲᠡᠳᠡᠨ ᠦ᠌ ᠲᠠᠢᠰᠢ ᠣᠯᠢᠨᠲᠠᠢ ᠶ᠋ᠢ ᠠᠮᠢᠳᠤ ᠪᠠᠷᠢᠭᠠᠳ ᠰᠥᠪᠡᠭᠡᠲᠡᠢ ᠰᠦᠢᠷᠡᠵᠦ ᠵᠦᠯᠭᠡᠲᠡᠢ ᠬᠠᠮᠠᠭᠠᠯᠠᠨ ᠳᠣᠪᠲᠣᠯᠵᠤ ᠡᠭᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠭᠦᠢᠴᠡᠵᠦ ᠢᠷᠡᠲᠡᠯᠡ ᠣᠯᠢᠨᠲᠠᠢ ᠲᠠᠢᠰᠢ ᠠᠨᠤ ᠦᠬᠦᠳᠬᠢᠵᠦᠬᠦᠢ᠃ ᠰᠥᠪᠡᠭᠡᠲᠡᠢ ᠰᠡᠭᠦᠷᠡᠰᠦ ᠠᠯᠳᠠᠵᠤ ᠥᠭᠦᠯᠡᠷᠦᠨ : 《ᠡᠨᠡ ᠵᠡᠷᠭᠡ ᠶ᠋ᠢᠨ ᠬᠥᠮᠦᠨ ᠢ᠋ ᠬᠡᠳᠦᠨ ᠭᠠᠵᠠᠷ ᠬᠠᠪᠴᠢᠭᠰᠠᠨ ᠠᠨᠤ ᠬᠠᠢᠷᠠᠬᠠᠨ ᠬᠦᠴᠦᠨ ᠬᠡᠮᠡᠭᠡᠳ ᠲᠠᠯᠠ ᠳ᠋ᠤᠷ ᠲᠠᠶᠠᠭᠳᠠᠨ ᠭᠡᠭᠡᠵᠦ ᠡᠴᠢᠪᠡ᠃ ᠡᠭᠦᠨ ᠳ᠋ᠦ᠍ᠷ ᠡᠨᠡ ᠣᠯᠢᠨᠲᠠᠢ ᠦᠵᠡᠰᠡ ᠦᠬᠦᠭᠰᠡᠨ ᠢ᠋ᠶ᠋ᠡᠷ ᠠᠷᠭᠠᠯᠠᠨ ᠬᠡᠯᠡᠨ ᠢ᠋ᠶ᠋ᠡᠨ ᠬᠠᠵᠠᠵᠤ᠂ ᠴᠢᠰᠤ ᠭᠠᠷᠭᠠᠨ ᠠᠮᠠᠨ ᠬᠠᠪᠠᠷ ᠠ᠋ᠴᠠ ᠴᠢᠰᠤ ᠭᠠᠷᠲᠠᠯᠠ ᠬᠠᠪᠴᠢᠭᠳᠠᠨ ᠦᠬᠦᠭᠰᠡᠨ ᠪᠠᠢᠳᠠᠯ ᠢ᠋ ᠭᠠᠷᠭᠠᠭᠰᠠᠨ ᠠᠵᠤᠭᠤ᠃ ᠲᠡᠳᠦᠢ ᠡᠪᠡᠰᠦᠨ ᠳ᠋ᠦ᠍ᠷ ᠰᠠᠭᠤᠵᠤ ᠰᠥᠪᠡᠭᠡᠲᠡᠢ ᠶ᠋ᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠬᠣᠢᠨᠠ᠂ ᠪᠣᠰᠴᠤ ᠰᠠᠭᠤᠭᠠᠳ ᠰᠡᠷᠪᠡᠯᠵᠡᠨ ᠪᠥᠬᠥᠶᠡ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠢᠨᠣ ᠨᠢᠰᠬᠦ ᠮᠡᠲᠦ ᠨᠡᠬᠡᠵᠦ ᠢᠷᠡᠭᠰᠡᠨᠡ᠂ ᠣᠯᠢᠨᠲᠠᠢ ᠣᠷᠪᠣᠢᠵᠤ ᠥᠭᠦᠯᠡᠷᠦᠨ : 《ᠪᠢ ᠲᠡᠳᠡ ᠬᠣᠶᠠᠭᠤᠯᠠ ᠶ᠋ᠢ ᠪᠠᠢᠯᠳᠤᠵᠤ ᠳᠠᠷᠤᠭᠠᠳ ᠳᠤᠲᠠᠭᠠᠯᠭᠠᠪᠠ ! 》 ᠭᠡᠮᠡᠨ ᠮᠣᠷᠢ ᠤᠨᠤᠵᠤ ᠨᠡᠬᠡᠨ ᠡᠴᠢᠭᠰᠡᠭᠡᠷ ᠭᠤᠴᠢᠨ ᠭᠠᠵᠠᠷ ᠭᠠᠷᠴᠤ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠨᠠᠢ᠍ᠮᠠᠳᠤᠭᠠᠷ ᠪᠠᠭ ᠤ᠋ᠨ ᠤᠷᠲᠤ ᠪᠣᠳᠣᠯᠭᠠᠲᠤ ᠤᠬᠠᠭᠠᠨᠲᠤ ᠷᠢᠨᠴᠢᠨ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠭᠠᠳ ᠵᠠᠮᠤᠬᠠ ᠬᠠᠰᠬᠢᠷᠴᠤ ᠥᠭᠦᠯᠡᠷᠦᠨ : 《ᠡᠨᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠨᠡ ᠬᠡᠳᠦᠨ ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣ ᠬᠠᠮᠢᠭᠠ ᠠ᠋ᠴᠠ ᠡᠳᠦᠢᠴᠢᠨᠡᠭᠡᠨ ᠪᠣᠭᠲᠣ ᠰᠢᠭᠢᠷᠡ ᠶ᠋ᠢ ᠴᠢᠭᠤᠯᠤᠭᠤᠯᠵᠤ᠂ ᠡᠨᠡ ᠮᠡᠲᠦ ᠭᠤᠴᠢᠨ ᠭᠠᠵᠠᠷ ᠲᠤᠷ ᠬᠣᠶᠠᠷ ᠢ᠋ ᠭᠠᠷᠭᠠᠵᠤ ᠭᠠᠢᠬᠠᠭᠤᠯᠤᠮᠤᠢ ? 》 ᠬᠡᠮᠡᠵᠦ ᠴᠡᠷᠢᠭ ᠢ᠋ᠶ᠋ᠡᠷ ᠳᠠᠷᠤᠨ ᠣᠷᠣᠵᠤ ᠡᠴᠢᠭᠰᠡᠨ ᠳ᠋ᠦ᠍ᠷ ᠤᠷᠲᠤ᠂ ᠷᠢᠨᠴᠢᠨ ᠬᠣᠶᠠᠭᠤᠯᠠ ᠬᠡᠳᠦᠢᠨᠡᠢ ᠡᠭᠡᠵᠦ ᠪᠤᠷᠤᠭᠤᠯᠠᠪᠠ᠃ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠲᠤᠭ ᠳᠠᠯᠪᠠᠭᠠ ᠬᠡᠩᠭᠡᠷᠭᠡ ᠵᠡᠪᠰᠡᠭ ᠢ᠋ ᠤᠳᠠᠭᠠ ᠪᠦᠷᠢ ᠣᠯᠵᠠᠯᠠᠭᠰᠠᠭᠠᠷ ᠪᠠᠶᠠᠷᠲᠠᠶᠠ ᠨᠡᠬᠡᠵᠦ ᠭᠤᠴᠢᠨ ᠭᠠᠵᠠᠷ ᠭᠠᠷᠲᠠᠯᠠ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠶᠢᠰᠦᠳᠦᠭᠡᠷ ᠪᠠᠭ ᠤ᠋ᠨ ᠠᠯᠤᠬᠠ᠂ ᠰᠦᠬᠡ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠭᠠᠷᠴᠤ ᠳᠡᠮᠡᠢᠯᠡ ᠬᠠᠷᠢᠶᠠᠵᠤ ᠳᠤᠲᠠᠭᠠᠮᠤᠢ᠂ ᠳᠣᠲᠣᠷᠠ ᠪᠠᠰᠠ ᠬᠦ᠌ ᠲᠠᠢᠽᠦ ᠶ᠋ᠢᠨ ᠲᠤᠭ ᠳᠠᠯᠪᠠᠭᠠ ᠪᠣᠢ ᠲᠤᠯᠠ ᠨᠢᠭᠡᠨᠲᠡ ᠰᠡᠵᠢᠭ ᠦᠭᠡᠢ ᠪᠡᠷ ᠬᠥᠭᠡᠭᠡᠵᠦ ᠡᠴᠢᠪᠡ᠃ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠲᠤᠯᠭᠠ ᠵᠣᠭᠣᠷᠢ ᠪᠠᠢᠴᠠᠭᠠᠭᠰᠠᠨ ᠠᠷᠠᠳ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠡᠳᠦᠨ ᠮᠢᠩᠭᠠᠨ ᠠ᠋ᠴᠠ ᠬᠡᠲᠦᠷᠡᠬᠦ ᠦᠭᠡᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠨᠡᠬᠡᠵᠦ ᠭᠠᠯᠵᠠᠭᠤ ᠮᠥᠷᠡᠨ ᠦ᠌ ᠬᠥᠪᠡᠭᠡ ᠳ᠋ᠦ᠍ᠷ ᠬᠦᠷᠲᠡᠯᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠡᠳᠦᠢᠨᠡᠢ ᠭᠠᠯᠵᠠᠭᠤ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ ᠡᠴᠢᠭᠰᠡᠨ ᠲᠤᠯᠠ ᠵᠠᠮᠤᠬᠠ ᠶᠡᠬᠡ ᠪᠠᠭᠤᠳᠠᠯ ᠪᠠᠭᠤᠵᠤ ᠰᠥᠨᠢ ᠳᠦᠯᠢᠨ ᠴᠡᠷᠢᠭ ᠲᠦ᠍ᠷ ᠵᠠᠷᠯᠠᠵᠤ ᠥᠭᠦᠯᠡᠷᠦᠨ : 《ᠪᠸᠲ᠋ᠠ᠋ ᠤᠯᠤᠰ ᠲᠦᠮᠡᠨ ᠢᠯᠡᠭᠦᠦ ᠴᠡᠷᠢᠭ ᠢ᠋ᠶ᠋ᠡᠷ ᠬᠣᠶᠠᠷ ᠪᠠᠭᠤᠳᠠᠯ ᠢ᠋ᠶ᠋ᠠᠷ ᠡᠭᠡᠯᠵᠢᠯᠡᠨ ᠰᠣᠯᠢᠵᠤ ᠪᠠᠭᠤᠳᠠᠯ ᠪᠠᠭᠤᠵᠤ᠂ ᠮᠠᠨ ᠤ᠋ ᠨᠡᠬᠡᠬᠦ ᠶ᠋ᠢ ᠵᠣᠭᠰᠣᠭᠠᠰᠤᠭᠠᠢ ᠬᠡᠮᠡᠬᠦ ᠢᠨᠦ ᠨᠢᠭᠡᠨᠲᠡ ᠢᠯᠡᠷᠡᠵᠦ ᠭᠠᠷᠪᠠᠢ᠃ ᠲᠡᠮᠦᠵᠢᠨ ᠯᠠᠪ ᠡᠨᠡ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠳ᠋ᠦ᠍ᠷ ᠢᠨᠦ ᠪᠣᠢ᠂ ᠲᠡᠳᠡᠨ ᠦ᠌ ᠴᠡᠷᠢᠭ ᠬᠥᠩᠭᠡᠨ ᠰᠤᠪᠠᠢ ᠶᠠᠪᠤᠬᠤ ᠠᠨᠤ ᠲᠦᠷᠭᠡᠨ᠂ ᠮᠠᠨ ᠤ᠋ ᠴᠡᠷᠢᠭ ᠬᠦᠨᠳᠦ ᠨᠦᠰᠡᠷ ᠲᠤᠯᠠ ᠶᠠᠪᠤᠬᠤ ᠠᠨᠤ ᠤᠳᠠᠭᠠᠨ ᠶᠡᠬᠡ ᠬᠦᠷᠢᠶᠡ ᠪᠠ ᠬᠦᠨᠳᠦ ᠬᠥᠰᠬᠡ ᠶ᠋ᠢ ᠴᠥᠮ ᠮᠥᠷᠡᠨ ᠦ᠌ ᠡᠨᠡᠲᠡᠭᠡ ᠦᠯᠡᠳᠡᠭᠡᠭᠡᠳ ᠭᠠᠭᠴᠠ ᠶᠠᠪᠠᠭᠠᠨ ᠪᠠᠭᠤᠳᠠᠯ ᠢ᠋ᠶ᠋ᠠᠷ ᠮᠠᠷᠭᠠᠲᠠ ᠶ᠋ᠢᠨ ᠦᠷ ᠦ᠋ᠨ ᠬᠢᠷᠠᠭᠠ ᠳ᠋ᠤᠷ ᠮᠥᠷᠡᠨ ᠢ᠋ ᠭᠡᠲᠦᠯᠦᠮᠡᠭᠴᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠨᠡ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠢ᠋ ᠡᠷᠬᠡᠪᠰᠢ ᠬᠠᠮᠲᠤ ᠪᠠᠷ ᠬᠥᠭᠡᠭᠡᠵᠦ ᠭᠦᠢᠴᠡᠨ ᠳᠠᠷᠤᠵᠤ ᠠᠪᠰᠤᠭᠠᠢ᠂ ᠬᠡᠨ ᠬᠥᠮᠦᠨ ᠤᠳᠠᠵᠤ ᠠᠯᠭᠤᠷᠯᠠᠪᠠᠰᠤ ᠲᠡᠭᠦᠨ ᠢ᠋ ᠴᠠᠪᠴᠢᠨ ᠠᠯᠠᠮᠤᠢ ! 》 ᠭᠡᠮᠡᠨ ᠴᠢᠩᠳᠠ ᠵᠠᠷᠯᠠᠭᠠᠳ ᠵᠢᠴᠢ ᠥᠷᠯᠥᠭᠡ ᠦᠷ ᠦ᠋ᠨ ᠬᠢᠷᠠᠭᠠ ᠳ᠋ᠤᠷ ᠬᠦᠨᠳᠦ ᠨᠦᠰᠡᠷ ᠲᠤᠭ ᠳᠠᠯᠪᠠᠭᠠ ᠶ᠋ᠢ ᠴᠥᠮ ᠣᠷᠬᠢᠵᠤ᠂ ᠶᠠᠪᠠᠭᠠᠨ ᠪᠠᠭᠤᠳᠠᠯ ᠢ᠋ᠶ᠋ᠠᠷ ᠤᠷᠢᠳᠠ ᠸᠠᠩ ᠬᠠᠭᠠᠨ ᠢ᠋ᠶ᠋ᠠᠨ ᠮᠥᠷᠡᠨ ᠢ᠋ ᠭᠡᠲᠦᠯᠦᠭᠦᠯᠦᠭᠡᠳ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠬᠣᠣᠷᠭᠣᠰ ᠲᠤᠷ ᠨᠢᠭᠡᠨ ᠮᠢᠩᠭᠠᠨ ᠴᠡᠷᠢᠭ ᠥᠭᠭᠦᠨ ᠶᠡᠬᠡ ᠬᠦᠷᠢᠶᠡ ᠶ᠋ᠢ ᠰᠠᠬᠢᠭᠤᠯᠤᠭᠠᠳ ᠪᠤᠰᠤ ᠴᠡᠷᠢᠭ ᠳᠣᠪᠲᠣᠯᠤᠨ ᠮᠥᠷᠡᠨ ᠢ᠋ ᠭᠡᠲᠦᠯᠦᠨ ᠮᠥᠷ ᠮᠥᠰᠬᠢᠵᠦ ᠡᠴᠢᠬᠦᠶᠡ᠂ ᠰᠡᠭᠦᠯ ᠦ᠋ᠨ ᠴᠡᠷᠢᠭ ᠥᠭᠦᠯᠡᠷᠦᠨ : 《ᠮᠥᠷᠡᠨ ᠦ᠌ ᠡᠨᠡᠲᠡᠭᠡ ᠮᠢᠩᠭᠠᠨ ᠪᠤᠷᠭᠠᠰᠤᠲᠠᠢ ᠶ᠋ᠢᠨ ᠲᠠᠯᠠ ᠳ᠋ᠤᠷ ᠮᠣᠷᠢᠨ ᠤ᠋ ᠢᠨᠴᠠᠭᠠᠬᠤ ᠳᠠᠭᠤᠨ ᠭᠠᠷᠴᠤ ᠪᠣᠢ ! 》 ᠬᠡᠮᠡᠲᠡᠯᠡ ᠡᠮᠦᠨᠡ ᠴᠡᠷᠢᠭ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《 ᠪᠠᠷᠠᠭᠤᠨ ᠪᠣᠷᠣ ᠪᠣᠢᠪᠣᠷ ᠤ᠋ᠨ ᠰᠥᠭᠡᠭ ᠡᠴᠡ ᠪᠠᠰᠠ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠭᠠᠷᠴᠤ ᠫᠤᠤ ᠳᠠᠭᠤᠷᠢᠰᠴᠤ ᠰᠣᠨᠣᠰᠳᠠᠮᠤᠢ !》ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠠᠮᠤᠬᠠ ᠥᠭᠦᠯᠡᠷᠦᠨ : 《ᠲᠡᠳᠡᠭᠡᠷ ᠴᠥᠮ ᠰᠡᠵᠢᠭᠯᠡᠭᠦᠯᠬᠦ ᠰᠡᠮᠵᠡᠨ ᠠᠷᠭᠠ᠂ ᠣᠯᠠᠨ ᠦᠭᠡ ᠬᠡᠷᠡᠭ ᠦᠭᠡᠢ᠂ ᠲᠦᠷᠭᠡᠨᠡ ᠣᠷᠣᠭᠰᠢ ᠨᠡᠬᠡᠵᠦ ᠳᠣᠪᠲᠣᠯᠤᠨ ᠶᠠᠪᠤ ! 》 ᠭᠡᠮᠡᠨ ᠬᠠᠷᠠᠬᠠᠨ ᠬᠠᠲᠠᠷᠢᠭᠤᠯᠬᠤᠶᠠ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠠᠷᠪᠠᠳᠤᠭᠠᠷ ᠠᠩᠭᠢ ᠶ᠋ᠢᠨ ᠥᠨᠳᠥᠷ ᠰᠡᠴᠡᠨ᠂ ᠦᠯᠬᠦ ᠶ᠋ᠢᠨ ᠵᠦᠨᠲᠡᠢ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠵᠤ ᠬᠠᠷᠠᠬᠠᠨ ᠰᠡᠭᠦᠯ ᠳᠠᠷᠤᠨ ᠨᠡᠬᠡᠭᠰᠡᠭᠡᠷ᠂ ᠬᠠᠷᠠ ᠬᠠᠯᠵᠢᠨᠠ ᠶ᠋ᠢᠨ ᠳᠣᠣᠷᠠ ᠬᠦᠷᠴᠦ ᠢᠷᠡᠭᠡᠳ ᠨᠢᠭᠡᠨ ᠨᠠᠷᠢᠨ ᠵᠡᠪᠡ ᠠᠮᠠᠨ ᠳ᠋ᠤᠷ ᠣᠷᠣᠵᠤ ᠡᠴᠢᠭᠡᠳ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠷ ᠪᠦᠭᠦᠳᠡᠭᠡᠷ ᠳᠡᠰ ᠠᠭᠤᠯᠠᠨ ᠤ᠋ ᠬᠡᠷᠡᠭ ᠢ᠋ ᠰᠠᠨᠠᠭᠠᠯᠵᠠᠨ ᠶᠡᠬᠡᠯᠡ ᠠᠶᠤᠯᠳᠤᠨ ᠵᠣᠭᠰᠣᠪᠠ᠃
ᠲᠡᠳᠦᠢ ᠵᠠᠮᠤᠬᠠ ᠰᠡᠵᠢᠭᠯᠡᠨ ᠰᠢᠨᠵᠢᠯᠡᠨ ᠦᠵᠡᠪᠡᠰᠦ᠂ ᠳᠠᠪᠠᠭᠠᠨ ᠤ᠋ ᠣᠷᠣᠢ ᠳ᠋ᠤᠷ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠦ᠌ ᠨᠢᠭᠡᠨ ᠬᠦᠷᠢᠶᠡ ᠪᠣᠢ᠂ ᠲᠤᠭ ᠳᠠᠯᠪᠠᠭᠠ ᠣᠯᠠᠨ ᠪᠣᠯᠪᠠᠴᠤ ᠬᠥᠮᠦᠨ ᠢᠨᠣ ᠦᠵᠡᠭᠳᠡᠬᠦ ᠦᠭᠡᠢ᠂ ᠬᠥᠨᠳᠡᠢ ᠬᠣᠭᠣᠰᠣᠨ ᠬᠦᠷᠢᠶᠡ ᠪᠣᠢ ᠲᠤᠯᠠ ᠵᠠᠮᠤᠬᠠ ᠠᠯᠠᠭᠠ ᠪᠠᠨ ᠳᠡᠯᠡᠳᠦᠨ ᠢᠨᠢᠶᠡᠨ ᠥᠭᠦᠯᠡᠷᠦᠨ :《ᠡᠨᠡ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠦ᠌ ᠲᠣᠭᠠ ᠠᠨᠤ ᠲᠡᠭᠦᠰᠪᠡ᠂ ᠡᠨᠡ ᠳᠠᠪᠠᠭᠠᠨ ᠤ᠋ ᠳᠡᠭᠡᠷᠡ ᠤᠰᠤ ᠦᠭᠡᠢ ᠬᠡᠳᠦᠬᠡᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠮᠢᠨᠦ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠲᠦ᠍ᠷ ᠬᠠᠭᠠᠭᠳᠠᠪᠠᠰᠤ᠂ ᠬᠠᠷᠠᠭᠰᠠᠭᠠᠷ ᠬᠠᠲᠠᠵᠤ ᠦᠬᠦᠬᠦ ᠪᠣᠯᠠᠢ !》ᠬᠡᠮᠡᠵᠦ ᠶᠡᠬᠡ ᠬᠡᠩᠭᠡᠷᠭᠡ ᠳᠡᠯᠡᠳᠦᠭᠦᠯᠵᠦ᠂ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠡᠯᠭᠡᠨ ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨ ᠢ᠋ ᠬᠠᠭᠠᠵᠤ ᠪᠠᠭᠤᠳᠠᠯᠯᠠᠪᠠᠢ᠃ ᠸᠠᠩ ᠬᠠᠭᠠᠨ᠂ ᠭᠦᠷᠡᠯᠵᠡᠭᠡᠨᠡ ᠵᠢᠶᠦ᠋ᠨ ᠱᠢ᠂ ᠠᠷᠳᠠ ᠲᠠᠢᠰᠢ ᠭᠤᠷᠪᠠᠭᠤᠯᠠ ᠬᠣᠢᠲᠤ ᠪᠡᠶᠡ ᠶ᠋ᠢ ᠬᠠᠭᠠᠪᠠ᠃ ᠲᠠᠢᠽᠢ ᠢᠯᠠᠭᠤ᠂ ᠲᠠᠢᠪᠤᠤ ᠭᠣᠯᠢᠨᠲᠠᠢ᠂ ᠲᠠᠢᠰᠢ ᠬᠤᠰᠠᠭᠤᠷ ᠢ᠋ ᠠᠪᠴᠤ ᠡᠮᠦᠨᠡ ᠡᠲᠡᠭᠡᠳ ᠢ᠋ ᠵᠠᠬᠢᠷᠪᠠ᠃ ᠶᠤᠸᠠᠨᠱᠤᠸᠠᠢ ᠵᠠᠮᠤᠬᠠ᠂ ᠲᠠᠢᠰᠢ ᠣᠯᠢᠨᠲᠠᠢ᠂ ᠲᠠᠢᠪᠤᠤ ᠳᠡᠯᠵᠢᠲᠠᠢ ᠭᠤᠷᠪᠠᠭᠤᠯᠠ ᠵᠡᠭᠦᠨ ᠬᠣᠷᠮᠣᠢ ᠶ᠋ᠢ ᠬᠤᠮᠪᠢᠪᠠ᠃ ᠭᠤᠷᠪᠠᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠱᠤᠮᠪᠤᠨ᠂ ᠪᠥᠭᠰᠡᠷ᠂ ᠪᠠᠲ᠋ᠠ ᠭᠤᠷᠪᠠᠭᠤᠯᠠ ᠪᠠᠷᠠᠭᠤᠨ ᠴᠢᠬᠤᠯᠠ ᠵᠠᠮ ᠢ᠋ ᠪᠥᠭᠯᠡᠪᠡ᠃ ᠶᠡᠬᠡ ᠴᠡᠷᠢᠭ ᠮᠠᠢᠬᠠᠨ ᠵᠠᠯᠭᠠᠯᠳᠤᠵᠤ ᠭᠤᠷᠪᠠᠨ ᠳᠠᠪᠬᠤᠷ ᠪᠦᠰᠡᠯᠡᠵᠦ ᠪᠠᠭᠤᠪᠠ᠃ ᠲᠡᠳᠦᠢ ᠪᠠᠰᠠ ᠪᠠᠢᠨ ᠪᠠᠢᠨ ᠬᠠᠰᠬᠢᠷᠤᠨ ᠬᠠᠷᠢᠶᠠᠯᠭᠠᠭᠰᠠᠭᠠᠷ ᠨᠠᠷᠠᠨ ᠰᠢᠩᠭᠡᠵᠦ ᠬᠠᠷᠠᠩᠭᠤᠢ ᠪᠣᠯᠪᠠ᠃ ᠵᠠᠮᠤᠬᠠ ᠪᠡᠶᠡ ᠪᠡᠷ ᠳᠥᠷᠪᠡᠨ ᠡᠲᠡᠭᠡᠳ ᠢ᠋ ᠴᠠᠭᠳᠠᠨ ᠶᠠᠪᠤᠪᠠᠴᠤ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠣᠯᠠᠨ ᠳ᠋ᠤᠷ ᠡᠷᠳᠦᠵᠦ ᠳᠠᠷᠠᠭᠠ ᠪᠠᠷ ᠳᠡᠢᠯᠦᠭᠰᠡᠨᠡ ᠰᠥᠰᠥ ᠶᠡᠬᠡᠳᠦᠨ᠂ ᠪᠠᠰᠠ ᠬᠥᠮᠦᠨ ᠶᠠᠳᠠᠵᠤ ᠮᠣᠷᠢ ᠵᠦᠳᠡᠭᠰᠡᠨ ᠲᠤᠯᠠ ᠴᠠᠭᠳᠠᠨ ᠥᠩᠭᠡᠷᠡᠮᠡᠭᠴᠡ ᠲᠠᠩᠭᠠᠢᠨ ᠬᠡᠪᠲᠡᠵᠦ ᠤᠮᠳᠠᠮᠤᠢ᠃
ᠲᠡᠨᠳᠡᠴᠡ ᠲᠠᠢᠽᠦ ᠶ᠋ᠢᠨ ᠠᠷᠪᠠᠨ ᠠᠩᠭᠢ ᠴᠡᠷᠢᠭ ᠡᠴᠡ ᠰᠥᠪᠡᠬᠡᠲᠡᠢ᠂ ᠵᠦᠯᠭᠡᠲᠡᠢ ᠬᠣᠶᠠᠷ ᠪᠠᠭᠠᠲᠤᠷ ᠪᠠ ᠠᠯᠤᠬᠠ᠂ ᠰᠦᠬᠡ ᠬᠣᠶᠠᠭᠤᠯᠠ ᠶ᠋ᠢᠨ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠴᠥᠮ ᠭᠠᠯᠵᠠᠭᠤ ᠮᠥᠷᠡᠨ ᠦ᠌ ᠮᠢᠩᠭᠠᠨ ᠪᠤᠷᠭᠠᠰᠤᠲᠠᠢ ᠬᠡᠮᠡᠬᠦ ᠲᠠᠯᠠ ᠳ᠋ᠤᠷ ᠪᠦᠭᠭᠦᠵᠦ᠂ ᠡᠭᠡᠬᠦ ᠴᠡᠷᠢᠭ ᠪᠠ ᠬᠡᠷᠡᠢᠳ ᠦ᠋ᠨ ᠶᠡᠬᠡ ᠪᠠᠭᠤᠳᠠᠯ ᠢ᠋ ᠡᠭᠡᠵᠦ ᠠᠪᠬᠤᠶᠠ ᠪᠦᠭᠭᠦᠭᠰᠡᠨ ᠲᠤᠯᠠ ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨᠠ ᠨᠠᠢ᠍ᠮᠠᠨ ᠠᠩᠭᠢ ᠴᠡᠷᠢᠭ ᠬᠡᠳᠦᠢᠨᠡᠢ ᠴᠥᠮ ᠳᠣᠬᠢᠶᠠ ᠲᠡᠮᠳᠡᠭ ᠢ᠋ᠶ᠋ᠡᠨ ᠵᠥᠪᠯᠡᠨ ᠲᠣᠭᠲᠠᠭᠰᠠᠨ ᠲᠤᠯᠠ ᠴᠤᠭᠠᠷ ᠪᠡᠯᠡᠳᠬᠡᠵᠦ ᠪᠥᠬᠥᠶᠡ᠂ ᠡᠨᠡ ᠬᠡᠳᠦᠨ ᠡᠳᠦᠷ ᠦ᠋ᠨ ᠡᠮᠦᠨᠡᠲᠦ ᠰᠠᠯᠬᠢᠨ ᠳ᠋ᠤᠷ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠬᠠᠷᠠᠬᠠᠨ ᠪᠡᠶᠡ ᠰᠤᠯᠠᠷᠠᠨ ᠠᠯᠵᠢᠶᠠᠨ ᠴᠢᠯᠡᠭᠡᠷᠬᠡᠵᠦ᠂ ᠨᠢᠳᠦ ᠨᠡᠬᠡᠭᠡᠱᠢ ᠦᠭᠡᠢ ᠤᠮᠳᠠᠯᠴᠠᠬᠤᠶᠠ᠂ ᠭᠡᠨᠡᠳᠲᠡ ᠳᠠᠪᠠᠭᠠᠨ ᠤ᠋ ᠣᠷᠣᠢ ᠳ᠋ᠤᠷ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠠᠷᠤᠮᠠᠭᠴᠠ ᠳᠠᠪᠠᠭᠠᠨ ᠢ᠋ ᠲᠣᠭᠣᠷᠢᠵᠤ ᠵᠦᠭ ᠪᠦᠷᠢ ᠳ᠋ᠦ᠍ᠷ ᠪᠠᠰᠠ ᠴᠥᠮ ᠫᠤᠤ ᠶ᠋ᠢᠨ ᠳᠠᠭᠤᠨ ᠳᠦᠴᠢᠭᠢᠨᠡᠵᠦ ᠭᠠᠷᠤᠮᠠᠭᠴᠠ ᠠᠭᠤᠯᠠᠨ ᠤ᠋ ᠣᠷᠣᠢ ᠳ᠋ᠤᠷ ᠭᠠᠯ ᠨᠣᠴᠣᠵᠤ ᠳᠠᠪᠠᠭᠠ ᠳᠦᠭᠦᠷᠡᠩ ᠬᠠᠰᠬᠢᠷᠤᠯᠳᠤᠨ᠂ ᠨᠠᠢ᠍ᠮᠠᠨ ᠠᠩᠭᠢ ᠪᠠᠷ ᠳᠡᠭᠡᠷᠡ ᠡᠴᠡ ᠤᠷᠤᠭᠤ ᠥᠩᠬᠥᠷᠢᠬᠦ ᠴᠢᠯᠠᠭᠤ ᠮᠡᠲᠦ ᠪᠠᠭᠤᠨ ᠢᠷᠡᠬᠦᠢ ᠳ᠋ᠦ᠍ᠷ ᠡᠨᠡ ᠰᠥᠨᠢ ᠪᠠᠰᠠ ᠡᠭᠦᠯᠡᠲᠦᠵᠦ ᠫᠠᠳ ᠬᠠᠷᠠᠩᠭᠤᠢ᠂ ᠡᠮᠦᠨᠡ ᠰᠠᠯᠬᠢᠨ ᠪᠠᠰᠠ ᠨᠡᠩ ᠨᠡᠮᠡᠭᠳᠡᠨ ᠨᠢᠳᠦ ᠴᠢᠴᠢᠮᠡ ᠬᠠᠷᠠᠩᠭᠤᠢ ᠳ᠋ᠤᠷ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠨᠠᠢ᠍ᠮᠠᠨ ᠵᠠᠮ ᠤ᠋ᠨ ᠴᠡᠷᠢᠭ ᠴᠤᠭᠠᠷ ᠴᠣᠬᠢᠵᠤ ᠳᠠᠪᠠᠭᠠᠨ ᠠ᠋ᠴᠠ ᠪᠠᠭᠤᠭᠠᠳ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠭᠠᠳᠠᠨᠠ ᠰᠢᠪᠲᠤᠯᠤᠨ ᠭᠠᠷᠴᠤ ᠬᠠᠯᠵᠢᠨᠠ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠡᠮᠦᠨᠡ ᠬᠣᠷᠮᠣᠢ ᠠ᠋ᠴᠠ ᠭᠠᠯ ᠨᠣᠴᠣᠵᠤ᠂ ᠰᠠᠯᠬᠢᠨ ᠳ᠋ᠤᠷ ᠭᠠᠯ ᠬᠥᠭᠵᠢᠵᠦ᠂ ᠭᠠᠯ ᠤ᠋ᠨ ᠴᠤᠷᠮᠠᠳᠠᠰᠤ ᠳ᠋ᠤᠷ ᠲᠦᠯᠡᠭᠡ ᠨᠣᠴᠣᠵᠤ᠂ ᠬᠦᠷᠴᠢᠭᠢᠨᠡᠨ ᠬᠥᠭᠵᠢᠬᠦ ᠴᠢᠮᠡᠭᠡ ᠲᠡᠭᠷᠢ ᠯᠦ᠍ᠭᠡ ᠦᠷᠭᠦᠯᠵᠢᠯᠡᠨ᠂ ᠭᠠᠯ ᠤ᠋ᠨ ᠭᠡᠷᠡᠯ ᠭᠢᠯᠪᠢᠯᠭᠡᠨ ᠦ᠌ ᠭᠡᠷᠡᠯ ᠯᠦ᠍ᠭᠡ ᠵᠠᠯᠭᠠᠯᠳᠤᠨ᠂ ᠠᠭᠤᠯᠠᠨ ᠤ᠋ ᠣᠷᠣᠢ ᠠ᠋ᠴᠠ ᠵᠡᠯᠮᠡ ᠪᠠᠰᠠ ᠬᠡᠳᠦᠨ ᠵᠠᠭᠤᠨ ᠮᠣᠷᠢᠨ ᠤ᠋ ᠰᠡᠭᠦᠯ ᠳ᠋ᠦ᠍ᠷ ᠬᠠᠭᠤᠷᠠᠢ ᠡᠪᠡᠰᠦᠨ ᠢ᠋ ᠤᠶᠠᠭᠤᠯᠵᠤ᠂ ᠳᠣᠲᠣᠷᠠ ᠴᠥᠮ ᠬᠣᠨᠢᠨ ᠳᠠᠪᠤᠰᠠᠩ ᠤ᠋ᠨ ᠲᠣᠰᠣ ᠪᠣᠢ ᠲᠤᠯᠠ ᠭᠠᠯ ᠤ᠋ᠨ ᠬᠥᠭᠵᠢᠬᠦ ᠢᠨᠦ ᠨᠡᠩ ᠬᠦᠴᠦᠲᠡᠢ ᠳ᠋ᠦ᠍ᠷ ᠡᠭᠦᠨ ᠢ᠋ ᠴᠥᠮ ᠨᠣᠴᠣᠭᠠᠵᠤ᠂ ᠰᠠᠯᠬᠢᠨ ᠤᠷᠤᠭᠤ ᠸᠠᠩ ᠬᠠᠭᠠᠨ ᠤ᠋ ᠬᠦᠷᠢᠶᠡ ᠶ᠋ᠢᠨ ᠵᠦᠭ ᠳᠣᠪᠲᠣᠯᠭᠠᠨ ᠣᠷᠣᠭᠤᠯᠵᠤ᠂ ᠬᠣᠢᠨᠠ ᠠ᠋ᠴᠠ ᠠᠯᠠᠨ ᠪᠠᠭᠤᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠸᠠᠩ ᠬᠠᠭᠠᠨ ᠬᠠᠷᠠᠬᠠᠨ ᠰᠡᠵᠢᠭᠯᠡᠵᠦ ᠬᠠᠷᠠᠨ ᠬᠠᠷᠠᠨ ᠦᠵᠡᠬᠦᠶᠡ᠂ ᠭᠠᠯ ᠤ᠋ᠨ ᠨᠥᠯᠡ ᠲᠡᠭᠷᠢ ᠡᠴᠡ ᠪᠠᠭᠤᠵᠤ᠂ ᠬᠠᠳᠠᠨ ᠬᠠᠭᠤᠷᠠᠢ ᠡᠪᠡᠰᠦ ᠰᠢᠷᠠᠯᠵᠢ ᠴᠥᠮ ᠰᠢᠳᠡᠵᠦ᠂ ᠲᠡᠭᠦᠨ ᠦ᠌ ᠬᠦᠷᠢᠶᠡ ᠳ᠋ᠦ᠍ᠷ ᠭᠠᠯ ᠤ᠋ᠨ ᠯᠤᠤ ᠬᠡᠳᠦᠨ ᠮᠢᠩᠭᠠᠨ ᠵᠤᠷᠪᠤᠰ ᠢ᠋ᠶ᠋ᠠᠷ ᠭᠤᠷᠠᠪᠠᠯᠵᠠᠨ ᠣᠷᠣᠵᠤ ᠢᠷᠡᠬᠦᠶᠡ᠂ ᠭᠠᠯ ᠤ᠋ᠨ ᠭᠡᠷᠡᠯ ᠳᠣᠣᠷᠠ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠥᠭᠡᠳᠡ ᠡᠴᠡ ᠦᠵᠡᠪᠡᠰᠦ ᠴᠥᠮ ᠬᠡᠳᠦᠨ ᠠᠯᠲᠠ ᠥᠨᠳᠥᠷ ᠦᠵᠡᠭᠳᠡᠵᠦ᠂ ᠴᠥᠮ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠪᠠᠭᠤᠵᠤ ᠢᠷᠡᠪᠡ ᠬᠡᠮᠡᠯᠳᠦᠵᠦ᠂ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠪᠠᠭᠤᠳᠠᠯ ᠢ᠋ᠶ᠋ᠠᠨ ᠣᠷᠬᠢᠵᠤ ᠵᠡᠭᠦᠨ ᠬᠣᠢᠲᠤ ᠵᠦᠭ ᠪᠤᠷᠤᠭᠤᠯᠠᠬᠤᠶᠠ᠂ ᠸᠠᠩ ᠬᠠᠭᠠᠨ ᠭᠠᠯ ᠤ᠋ᠨ ᠠᠶᠤᠯ ᠳ᠋ᠤᠷ ᠵᠢᠷᠦᠬᠡ ᠬᠡᠮᠬᠡᠷᠡᠭᠰᠡᠨ ᠲᠤᠯᠠ ᠳᠡᠪᠡᠯ ᠮᠠᠯᠠᠭᠠ ᠪᠠᠨ ᠲᠠᠢᠯᠤᠨ ᠴᠣᠬᠢᠮᠠᠭᠴᠠ ᠳᠠᠷᠤᠢ ᠪᠤᠷᠤᠭᠤᠯᠠᠪᠠ᠃ ᠬᠠᠪᠤᠷ ᠤ᠋ᠨ ᠬᠠᠭᠤᠷᠠᠢ ᠡᠪᠡᠰᠦ ᠰᠢᠷᠠᠯᠵᠢ ᠬᠡᠮᠡᠭᠴᠢ ᠭᠠᠯ ᠢ᠋ ᠦᠵᠡᠵᠦ ᠦᠯᠦ ᠴᠢᠳᠠᠬᠤ ᠶ᠋ᠢᠨ ᠳᠡᠭᠡᠷᠡ ᠪᠠᠰᠠ ᠶᠡᠬᠡ ᠰᠠᠯᠬᠢᠨᠠ ᠲᠣᠬᠢᠶᠠᠯᠳᠤᠵᠤ᠂ ᠨᠢᠳᠦᠨ ᠴᠠᠪᠴᠢᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠴᠥᠮ ᠲᠦᠢᠮᠡᠷ ᠰᠢᠳᠡᠵᠦ᠂ ᠨᠡᠩ ᠡᠨᠡ ᠭᠠᠯ ᠮᠣᠷᠢᠨ ᠠ᠋ᠴᠠ ᠤᠷᠢᠳ ᠬᠡᠳᠦᠢᠨᠡᠢ ᠴᠥᠮ ᠳᠣᠪᠲᠣᠯᠤᠨ ᠲᠠᠯᠠ ᠳ᠋ᠤᠷ ᠬᠦᠷᠦᠭᠰᠡᠨ ᠲᠤᠯᠠ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠨᠡᠢᠲᠡ ᠪᠡᠷ ᠨᠣᠴᠣᠬᠤ ᠭᠠᠯ ᠤ᠋ᠨ ᠳᠤᠮᠳᠠ ᠣᠷᠣᠵᠤ᠂ ᠪᠸᠲ᠋ᠠ᠋ ᠶ᠋ᠢᠨ ᠴᠡᠷᠢᠭ ᠭᠠᠯ ᠤ᠋ᠨ ᠦᠨᠡᠰᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠠᠯᠠᠵᠤ ᠶᠠᠪᠤᠬᠤ ᠠᠨᠤ ᠠᠷᠭᠠᠯ ᠲᠡᠭᠦᠬᠦ ᠮᠡᠲᠦ ᠳ᠋ᠦ᠍ᠷ ᠸᠠᠩ ᠬᠠᠭᠠᠨ ᠤ᠋ ᠴᠠᠭᠠᠨ ᠪᠤᠭᠤᠷᠤᠯ ᠰᠠᠬᠠᠯ ᠦᠰᠦ ᠢᠨᠣ ᠴᠥᠮ ᠰᠢᠷᠬᠠᠲᠤᠵᠤ ᠰᠢᠪ ᠰᠢᠷᠠ ᠪᠣᠯᠤᠨ᠂ ᠪᠡᠶᠡ ᠪᠠᠰᠠ ᠴᠢᠷᠠᠮᠠ ᠨᠢᠴᠦᠭᠦᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠰᠢᠭᠤᠳ ᠨᠢᠭᠡᠨ ᠬᠥᠭᠰᠢᠨ ᠰᠠᠷᠮᠠᠭᠴᠢᠨ ᠪᠣᠯᠵᠤ᠂ ᠬᠥᠮᠥᠰᠬᠡ ᠪᠡᠨ ᠬᠤᠢᠬᠠᠯᠠᠭᠳᠠᠨ ᠰᠢᠷᠠᠮᠠᠳᠠᠵᠣ᠂ ᠬᠣᠶᠠᠷ ᠨᠢᠳᠦ ᠬᠢᠯᠠᠩ ᠭᠠᠯᠠᠩ ᠬᠢᠵᠦ᠂ ᠮᠣᠷᠢ ᠪᠠᠰᠠ ᠳᠡᠯ ᠰᠡᠭᠦᠯ ᠴᠥᠮ ᠰᠢᠲᠠᠭᠰᠠᠨ ᠢ᠋ᠶ᠋ᠠᠷ ᠦᠨᠡᠬᠡᠷ ᠬᠥᠭᠰᠢᠨ ᠪᠡᠴᠢᠨ ᠬᠣᠨᠢ ᠬᠥᠯᠭᠡᠯᠡᠵᠦ᠂ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠭᠦᠷᠡᠯᠵᠡᠭᠡᠨᠡ ᠵᠢᠶᠦ᠋ᠨ ᠱᠢ ᠠᠨᠤ ᠪᠠᠰᠠ ᠨᠢᠭᠡᠨ ᠡᠴᠡᠩᠬᠡᠷ ᠰᠠᠷᠮᠠᠭᠴᠢᠨ ᠪᠣᠯᠵᠤ ᠣᠪᠣᠩ ᠣᠪᠣᠩ ᠰᠡᠭ ᠰᠡᠭ ᠳᠠᠭᠠᠯᠳᠤᠵᠤ᠂ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠠᠮᠢ ᠪᠠᠨ ᠠᠳᠬᠤᠵᠤ ᠳᠤᠲᠠᠭᠠᠬᠤ ᠪᠥᠭᠡᠳ ᠡᠨᠡ ᠪᠠᠢᠳᠠᠯ ᠳ᠋ᠤᠷ ᠪᠠᠰᠠ ᠲᠡᠰᠴᠦ ᠴᠢᠳᠠᠬᠤ ᠦᠭᠡᠢ ᠠᠮᠠᠨ ᠬᠠᠪᠠᠷ ᠢ᠋ᠶ᠋ᠠᠨ ᠪᠥᠭᠯᠡᠯᠴᠡᠨ ᠢᠨᠢᠶᠡᠯᠴᠡᠵᠦ ᠳᠤᠲᠠᠭᠠᠭᠰᠠᠭᠠᠷ ᠰᠠᠶᠢ ᠲᠠᠯᠠ ᠳ᠋ᠤᠷ ᠪᠠᠭᠤᠲᠠᠯᠠ ᠠᠭᠤᠯᠠᠨ ᠤ᠋ ᠬᠣᠶᠠᠷ ᠰᠤᠵᠠᠭᠠ ᠠ᠋ᠴᠠ ᠪᠡᠯᠭᠦᠳᠡᠢ᠂ ᠬᠠᠰᠠᠷ ᠤ᠋ᠨ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠬᠠᠪᠴᠢᠨ ᠠᠯᠠᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠸᠠᠩ ᠬᠠᠭᠠᠨ ᠤ᠋ ᠴᠡᠷᠢᠭ ᠭᠤᠷᠪᠠᠨ ᠡᠲᠡᠭᠡᠳ ᠴᠡᠷᠢᠭ ᠲᠦ᠍ᠷ ᠬᠠᠭᠠᠭᠳᠠᠵᠤ᠂ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠵᠡᠯᠮᠡ ᠲᠡᠷᠢᠭᠦᠯᠡᠨ ᠬᠣᠢᠨᠠ ᠠ᠋ᠴᠠ ᠳᠠᠷᠤᠨ ᠣᠷᠣᠭᠰᠠᠨ ᠳ᠋ᠤᠷ ᠵᠡᠭᠦᠨ ᠬᠣᠢᠲᠤ ᠵᠦᠭ ᠢ᠋ ᠵᠦᠭᠯᠡᠵᠦ ᠲᠡᠷᠢᠭᠦᠨ ᠡᠷᠭᠢᠯ ᠦᠭᠡᠢ ᠪᠤᠷᠤᠭᠤᠯᠠᠨ ᠡᠴᠢᠪᠡ᠃ ᠡᠨᠡ ᠨᠢᠭᠡᠨ ᠦᠢᠮᠡᠭᠡᠨ ᠳ᠋ᠦ᠍ᠷ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠨᠢᠭᠡᠨᠲᠡ ᠰᠠᠯᠪᠠᠷᠠᠵᠤ᠂ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠢ᠋ ᠪᠠᠰᠠ ᠮᠡᠳᠡᠬᠦ ᠦᠭᠡᠢ ᠲᠤᠯᠠ ᠭᠣᠣ ᠵᠡᠪᠡ ᠳ᠋ᠦ᠍ᠷ ᠬᠥᠮᠦᠨ ᠮᠣᠷᠢ ᠲᠠᠢ ᠥᠩᠬᠥᠷᠢᠨ ᠤᠨᠠᠭᠰᠠᠭᠠᠷ ᠳᠦᠭᠦᠷᠴᠦ ᠶᠡᠬᠡᠯᠡ ᠰᠠᠮᠠᠭᠤᠷᠠᠵᠤ ᠰᠠᠮᠪᠠᠢ ①ᠡᠷᠭᠦᠪᠡᠢ ᠃
– – – –
① ᠰᠠᠮᠪᠠᠢ ᠬᠡᠮᠡᠭᠴᠢ ᠭᠠᠯ ᠢ᠋ᠶ᠋ᠠᠨ ᠲᠠᠬᠢᠬᠤᠢ ᠳ᠋ᠤᠷ ᠰᠠᠮᠪᠠᠢ ᠪᠤᠳᠠᠭᠠ ᠬᠡᠮᠡᠵᠦ ᠂ ᠰᠢᠨᠡ ᠪᠡᠷᠢ ᠠᠪᠤᠪᠠᠰᠤ ᠲᠡᠷᠡ ᠰᠠᠮᠪᠠᠢ ᠪᠤᠳᠠᠭᠠ ᠪᠠᠨ ᠪᠠᠷᠢᠭᠤᠯᠵᠤ ᠃ ᠭᠣᠯᠣᠮᠲᠠ ᠪᠠᠨ ᠲᠣᠭᠣᠷᠢᠭᠤᠯᠵᠤ ᠡᠷᠭᠢᠭᠦᠯᠬᠦᠢ ᠳ᠋ᠦ᠍ᠷ ᠮᠠᠰᠢ ᠰᠠᠮᠠᠭᠤᠷᠠᠳᠠᠭ ᠠᠵᠤᠭᠤ ᠂ ᠲᠡᠷᠡ ᠬᠦ᠌ ᠦᠢᠮᠡᠭᠡᠨ ᠲᠦᠢᠮᠡᠭᠡᠨ ᠢ᠋ ᠦᠵᠡᠪᠡᠰᠦ ᠰᠠᠮᠪᠠᠢ ᠡᠷᠭᠢᠭᠦᠯᠦᠭᠰᠡᠨ ᠮᠡᠲᠦ ᠶᠡᠷᠦ ᠶ᠋ᠢᠨ ᠦᠭᠡ ᠠᠵᠤᠭᠤ ᠃
ᠲᠡᠭᠦᠨᠴᠡ ᠸᠠᠩ ᠬᠠᠭᠠᠨ ᠬᠠᠷᠠᠬᠠᠨ ᠳᠤᠲᠠᠭᠠᠵᠤ ᠶᠠᠪᠤᠬᠤᠶᠠ᠂ ᠡᠯᠡᠰᠦᠨ ᠦ᠌ ᠵᠠᠩᠭᠤᠤ ᠶ᠋ᠢᠨ ᠳᠣᠲᠣᠷᠠ ᠪᠠᠰᠠ ᠤᠯᠠᠭᠠᠨ ᠮᠠᠩᠬᠠ ᠠ᠋ᠴᠠ ᠥᠨᠳᠥᠷ ᠰᠡᠴᠡᠨ᠂ ᠦᠯᠬᠦ ᠶ᠋ᠢᠨ ᠵᠦᠨᠲᠠᠢ ᠶ᠋ᠢᠨ ᠴᠡᠷᠢᠭ ᠭᠡᠨᠡᠳᠲᠡ ᠪᠣᠰᠴᠤ ᠬᠠᠰᠬᠢᠷᠤᠨ ᠣᠷᠣᠪᠠ᠃ ᠣᠯᠠᠨ ᠴᠡᠷᠢᠭ ᠶᠡᠬᠡᠯᠡ ᠠᠶᠤᠵᠤ᠂ ᠵᠠᠷᠢᠮ ᠠᠨᠤ ᠶᠠᠪᠠᠭᠠᠨ ᠢ᠋ᠶ᠋ᠠᠷ ᠳᠤᠲᠠᠭᠠᠵᠤ᠂ ᠬᠡᠷᠡᠢᠳ ᠦ᠋ᠨ ᠶᠡᠬᠡ ᠴᠡᠷᠢᠭ ᠠᠯᠠᠩ ᠰᠠᠯᠠᠩ ᠢ᠋ᠶ᠋ᠠᠷ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠰᠠᠷᠨᠢᠪᠠ᠃ ᠲᠡᠳᠦᠢ ᠵᠡᠯᠮᠡ᠂ ᠥᠨᠳᠥᠷ ᠰᠡᠴᠡᠨ᠂ ᠦᠯᠬᠦ ᠶ᠋ᠢᠨ ᠵᠦᠨᠲᠡᠢ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠢ᠋ ᠠᠪᠴᠤ ᠸᠠᠩ ᠬᠠᠭᠠᠨ ᠢ᠋ ᠨᠢᠰᠬᠦ ᠮᠡᠲᠦ ᠨᠡᠬᠡᠵᠦ ᠡᠴᠢᠪᠡ᠃ ᠳᠠᠭᠠᠯᠳᠤᠭᠠ ᠪᠡᠯᠭᠦᠳᠡᠢ᠂ ᠬᠠᠰᠠᠷ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠭᠦᠢᠴᠡᠨ ᠢᠷᠡᠭᠰᠡᠨ ᠳ᠋ᠦ᠍ᠷ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠶᠢᠰᠦᠨ ᠰᠦᠨᠡᠰᠦ ᠵᠠᠪᠬᠠᠷᠠᠵᠤ᠂ ᠮᠣᠷᠢ ᠣᠷᠣᠯᠳᠣᠬᠤ ᠮᠡᠲᠦ ᠳᠤᠲᠠᠭᠠᠨ ᠡᠴᠢᠬᠦ ᠢᠨᠣ ᠰᠠᠯᠬᠢᠨ ᠭᠠᠯ ᠠ᠋ᠴᠠ ᠲᠦᠷᠭᠡᠨ ᠳ᠋ᠦ᠍ᠷ ᠵᠡᠯᠮᠡ ᠤᠷᠤᠭᠰᠢ ᠴᠣᠬᠢᠨ ᠣᠷᠣᠰᠤᠭᠠᠢ ᠭᠡᠮᠡᠨ ᠱᠠᠭᠠᠷᠳᠠᠪᠠᠰᠤ᠂ ᠦᠯᠬᠦ ᠶ᠋ᠢᠨ ᠵᠦᠨᠲᠡᠢ ᠡᠭᠡᠨᠡᠭᠲᠡ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠢ᠋ ᠣᠯᠠᠨ ᠭᠡᠮᠡᠨ ᠪᠣᠳᠣᠭᠰᠠᠨ ᠲᠤᠯᠠ ᠬᠣᠢᠰᠢ ᠴᠠᠪᠬᠤᠭᠤᠷᠠᠨ ᠶᠠᠳᠠᠵᠤ ᠦᠬᠦᠪᠡᠴᠦ ᠤᠷᠤᠭᠰᠢᠯᠠᠬᠤ ᠦᠭᠡᠢ ᠳ᠋ᠦ᠍ᠷ ᠥᠨᠳᠥᠷ ᠰᠡᠴᠡᠨ ᠶᠡᠬᠡᠯᠡ ᠲᠠᠴᠢᠶᠠᠳᠠᠵᠤ ᠤᠷᠤᠭᠰᠢᠯᠠᠨ ᠡᠴᠢᠬᠦ ᠪᠥᠭᠡᠳ ᠪᠡᠶᠡ ᠡᠭᠡᠵᠦ ᠦᠯᠬᠦ ᠶ᠋ᠢᠨ ᠵᠦᠨᠳᠡᠢ ᠶ᠋ᠢ ᠵᠢᠭᠠᠵᠤ ᠥᠭᠦᠯᠡᠷᠦᠨ : 《ᠡᠵᠡᠨ ᠦ᠌ ᠡᠮᠦᠨᠡ ᠡᠨᠡ ᠮᠡᠲᠦ ᠬᠦᠴᠦᠨ ᠥᠭᠬᠦ ᠶᠣᠰᠣ ᠪᠠᠢᠳᠠᠭ ᠭᠡᠵᠢ ᠦᠦ ? ᠴᠢᠮᠡᠳ ᠠᠢᠮᠠᠭ ᠤ᠋ᠨ ᠦᠯᠬᠦ ᠰᠠᠢᠳ᠂ ᠴᠢᠮᠠᠢ ᠲᠠᠯᠠᠭᠠᠷ ᠡᠷᠭᠦᠭᠰᠡᠨ ᠦᠭᠡᠢ ᠦᠦ ? ᠴᠢ ᠴᠢᠮᠡᠳ ᠦ᠋ᠨ ᠪᠣᠭᠣᠯ ᠪᠥᠭᠡᠳ ᠴᠢᠮᠡᠳ ᠦ᠋ᠨ ᠬᠡᠰᠢᠭ ᠢ᠋ᠶ᠋ᠡᠷ ᠬᠥᠮᠦᠨ ᠪᠣᠯᠵᠤ᠂ ᠦᠯᠬᠦ ᠰᠠᠢᠳ ᠠ᠋ᠴᠠ ᠤᠷᠪᠠᠵᠤ᠂ ᠳᠡᠭᠡᠳᠦ ᠶ᠋ᠢ ᠡᠷᠢᠵᠦ ᠡᠨᠡ ᠵᠡᠷᠭᠡ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠪᠥᠭᠡᠳ ᠡᠵᠡᠨ ᠦ᠌ ᠡᠮᠦᠨᠡ ᠪᠠᠰᠠ ᠡᠨᠡ ᠮᠡᠲᠦ ᠶᠠᠪᠤᠬᠤ ᠠᠵᠤᠭᠤ ! ᠪᠠᠢᠲᠤᠭᠠᠢ ! 》ᠭᠡᠮᠡᠨ ᠮᠣᠷᠢ ᠪᠠᠨ ᠲᠠᠰᠤ ᠭᠤᠶᠠᠳᠠᠵᠤ ᠬᠠᠮᠤᠭ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠭᠠᠷᠴᠤ ᠲᠡᠷᠢᠭᠦᠨ ᠡᠭᠡᠵᠦ ᠥᠭᠦᠯᠡᠷᠦᠨ : 《ᠬᠡᠷᠡᠢᠳ ᠦ᠋ᠨ ᠲᠣᠭᠣᠷᠢᠯ᠂ ᠡᠵᠡᠨ ᠢ᠋ ᠮᠢᠨᠦ ᠳᠣᠯᠣᠭᠠᠨ ᠵᠡᠷᠭᠡ ᠦᠲᠡᠭᠡᠷᠪᠡ᠃ ᠪᠢ ᠡᠷᠬᠡᠪᠰᠢ ᠡᠨᠡ ᠵᠢᠷᠤᠮ ᠦᠭᠡᠢ ᠪᠣᠭᠣᠯ ᠢ᠋ ᠨᠢᠭᠡᠨᠲᠡ ᠵᠢᠳᠠᠯᠠᠵᠤ ᠬᠣᠷᠣᠰᠤᠯ ᠢ᠋ ᠭᠠᠷᠭᠠᠰᠤᠭᠠᠢ᠂ ᠬᠡᠳᠦᠢ ᠲᠡᠢᠨ ᠪᠣᠯᠪᠠᠴᠤ ᠣᠯᠠᠨ ᠳᠡᠭᠡᠳᠦ ᠲᠦᠰᠢᠮᠡᠳ ᠪᠠ ᠠᠳᠠᠯᠢ ᠠᠬᠠ ᠳᠡᠭᠦᠦ ᠪᠡᠷ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠰᠠᠢᠲᠤᠷ ᠬᠠᠰᠬᠢᠷᠤᠨ ᠣᠷᠣᠵᠤ᠂ ᠪᠢ ᠲᠤᠭᠤᠷᠢᠯ ᠢ᠋ ᠱᠠᠭᠠᠷᠳᠠᠭᠤᠯᠬᠤ ᠶ᠋ᠢ ᠮᠡᠳᠡᠶᠡ᠂ ᠲᠠ ᠲᠡᠭᠦᠨ ᠢ᠋ ᠪᠠᠷᠢᠬᠤ ᠶ᠋ᠢ ᠮᠡᠳᠡ᠂ ᠪᠢ ᠪᠡᠶᠡ ᠪᠡᠨ ᠠᠪᠤᠷᠠᠬᠤ ᠶ᠋ᠢ ᠲᠤᠯᠠ ᠪᠤᠰᠤ᠂ ᠭᠠᠭᠴᠠ ᠶᠡᠬᠡ ᠦᠢᠯᠡ ᠶ᠋ᠢ ᠪᠦᠲᠦᠭᠡᠬᠦᠢ ᠶ᠋ᠢᠨ ᠲᠤᠯᠠ ᠪᠣᠯᠠᠢ ! ᠦᠯᠢᠳᠬᠡᠪᠡᠰᠦ ᠮᠢᠨᠦ ᠪᠡᠶᠡ ᠬᠡᠮᠡᠭᠴᠢ ᠮᠣᠳᠣᠴᠢ ᠶ᠋ᠢᠨ ᠮᠣᠳᠣ ᠴᠣᠭᠣᠯᠬᠤ ᠴᠦᠴᠡ ᠪᠤᠶᠤ᠃ ᠦᠯᠬᠦ ᠶ᠋ᠢᠨ ᠵᠦᠨᠲᠡᠢ ᠠᠬᠠᠢ ᠬᠡᠮᠡᠭᠴᠢ ᠴᠦᠴᠡ ᠶ᠋ᠢ ᠳᠡᠯᠡᠳᠬᠦ ᠰᠦᠬᠡ ᠮᠡᠲᠦ ᠪᠤᠶᠤ᠂ ᠴᠦᠴᠡ ᠶ᠋ᠢᠨ ᠢᠷ ᠬᠡᠳᠦᠢ ᠬᠤᠷᠴᠠ ᠪᠣᠯᠪᠠᠴᠤ ᠲᠠᠯᠡᠲᠤᠯ ᠥᠭᠡᠶᠡ ᠦᠯᠦ ᠳᠠᠭᠠᠮᠤᠢ᠂ ᠪᠢ ᠬᠡᠳᠦᠢ ᠤᠷᠤᠭᠰᠢ ᠣᠷᠣᠪᠠᠴᠤ ᠮᠢᠨᠦ ᠪᠠᠭ ᠤ᠋ᠨ ᠴᠡᠷᠢᠭ ᠰᠢᠷᠭᠤᠨ ᠡᠰᠡ ᠣᠷᠣᠪᠠᠰᠤ ᠬᠡᠷᠡᠭ ᠪᠦᠲᠦᠬᠦᠶᠡ ᠪᠡᠷᠬᠡ !》 ᠬᠡᠮᠡᠵᠦ ᠣᠯᠣᠩ ᠴᠠᠪᠢᠯᠤᠤᠷ ᠢ᠋ᠶ᠋ᠡᠨ ᠴᠢᠩᠭᠠᠳᠬᠠᠵᠤ᠂ ᠣᠯᠠᠨ ᠴᠡᠷᠢᠭ ᠦ᠋ᠨ ᠵᠦᠭ ᠥᠭᠦᠯᠡᠷᠦᠨ : 《ᠪᠢ ᠣᠷᠣᠭᠠᠳ ᠲᠤᠭᠤᠷᠢᠯ ᠢ᠋ ᠰᠢᠪᠲᠤᠯᠤᠨ ᠣᠷᠣᠵᠤ ᠵᠢᠳᠠᠯᠠᠵᠤ ᠤᠨᠠᠭᠠᠶᠠ᠂ ᠲᠠ ᠪᠠᠷᠢᠵᠤ ᠠᠪᠬᠤ ᠪᠠᠨ ᠬᠢᠴᠢᠶᠡ᠂ ᠪᠢ ᠬᠡᠷᠪᠡ ᠦᠬᠦᠪᠡᠰᠦ᠂ ᠮᠢᠨᠦ ᠨᠢᠭᠡᠨ ᠬᠡᠪᠡᠯᠢ ᠡᠴᠡ ᠬᠠᠮᠲᠤ ᠲᠥᠷᠥᠭᠰᠡᠨ ᠰᠢᠷᠠ ᠲᠣᠯᠣᠭᠠᠢᠲᠤ ᠭᠤᠷᠪᠠᠨ ᠬᠥᠪᠡᠭᠦᠨ ᠪᠣᠢ᠂ ᠲᠡᠭᠦᠨ ᠢ᠋ ᠡᠵᠡᠨ ᠦ᠌ ᠮᠢᠨᠦ ᠬᠥᠲᠥᠴᠢ ᠪᠣᠯᠭᠠ ! 》 ᠬᠡᠮᠡᠭᠡᠳ ᠰᠢᠳᠦ ᠪᠡᠨ ᠵᠠᠭᠤᠵᠤ ᠬᠤᠶᠠᠭ ᠢ᠋ᠶ᠋ᠠᠨ ᠲᠠᠢᠯᠤᠨ ᠴᠣᠬᠢᠭᠠᠳ ᠶ᠋ᠢᠳᠡ ᠪᠡᠨ ᠠᠪᠴᠤ ᠲᠡᠷᠢᠭᠦᠨ ᠡᠷᠭᠢᠰᠢ ᠦᠭᠡᠢ ᠨᠢᠭᠡᠨᠲᠡ ᠬᠠᠰᠬᠢᠷᠤᠨ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠬᠡᠪᠲᠡᠵᠦ ᠱᠤᠩᠭᠤᠨ ᠳᠣᠪᠲᠣᠯᠵᠤ ᠣᠷᠣᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠵᠡᠭᠦᠨ ᠡᠲᠡᠭᠡᠳ ᠬᠥᠭᠡᠭᠡᠴᠡᠯᠳᠦᠵᠦ᠂ ᠬᠡᠷᠡᠢᠳ ᠦ᠋ᠨ ᠨᠥᠬᠥᠭᠡ ᠳᠥᠷᠪᠡᠨ ᠡᠲᠡᠭᠡᠳ ᠦ᠋ᠨ ᠳᠠᠷᠤᠭᠳᠠᠭᠰᠠᠨ ᠴᠡᠷᠢᠭ ᠴᠥᠮ ᠬᠦᠷᠴᠦ ᠢᠷᠡᠭᠡᠳ ᠬᠠᠮᠲᠤ ᠳᠣᠪᠲᠣᠯᠬᠤᠶᠠ᠂ ᠥᠨᠳᠥᠷ ᠰᠡᠴᠡᠨ ᠨᠢᠳᠦ ᠬᠠᠷᠠᠯᠠᠵᠤ ᠬᠣᠢᠰᠢ ᠬᠠᠨᠳᠤᠯ ᠦᠭᠡᠢ᠂ ᠨᠢᠭᠡᠨᠲᠡ ᠨᠢᠳᠦ ᠪᠡᠨ ᠠᠨᠢᠨ ᠬᠡᠷᠡᠢᠳ ᠦ᠋ᠨ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠲᠦ᠍ᠷ ᠠᠯᠠᠨ ᠣᠷᠣᠵᠤ ᠡᠴᠢᠪᠡ᠃ ᠡᠭᠦᠨ ᠳ᠋ᠦ᠍ᠷ ᠥᠨᠳᠥᠷ ᠰᠡᠴᠡᠨ ᠦ᠌ ᠰᠢᠳᠠᠷ ᠴᠡᠷᠢᠭ ᠪᠦᠭᠦᠳᠡᠭᠡᠷ ᠦᠬᠦᠨ ᠰᠢᠭᠦᠷᠡᠨ ᠡᠵᠡᠨ ᠢ᠋ᠶ᠋ᠡᠨ ᠳᠠᠭᠠᠵᠤ ᠦᠢᠮᠡᠯᠳᠦᠵᠦ ᠣᠷᠣᠬᠤᠶᠠ᠂ ᠪᠡᠯᠭᠦᠳᠡᠢ᠂ ᠬᠠᠰᠠᠷ᠂ ᠵᠠᠯᠮᠠ ᠨᠠᠷ ᠲᠡᠭᠦᠨ ᠦ᠌ ᠴᠡᠷᠢᠭ ᠡᠴᠡ ᠡᠳᠡᠭᠡᠷ ᠢ᠋ ᠰᠣᠨᠣᠰᠴᠤ ᠶᠡᠬᠡᠯᠡ ᠶᠠᠭᠠᠷᠠᠨ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠳᠣᠪᠲᠣᠯᠤᠯᠴᠠᠨ ᠣᠷᠣᠵᠤ ᠡᠴᠢᠪᠡᠢ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠰᠠᠯᠬᠢᠨ ᠵᠣᠭᠰᠣᠵᠤ ᠨᠢᠭᠡᠨ ᠵᠡᠷᠭᠡ ᠳᠠᠭᠠᠷᠢᠯᠭᠠ ᠶ᠋ᠢᠨ ᠬᠤᠷᠠ ᠱᠠᠭᠢᠨ ᠥᠩᠭᠡᠷᠡᠪᠡ᠃ ᠨᠠᠷᠠᠨ ᠪᠠᠰᠠ ᠮᠠᠨᠳᠤᠨ ᠭᠠᠷᠤᠭᠰᠠᠨ ᠲᠤᠯᠠ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠰᠠᠶᠢ ᠭᠠᠯᠵᠠᠭᠤ ᠮᠦᠷᠡᠨᠡ ᠳᠣᠪᠲᠣᠯᠤᠨ ᠬᠠᠭᠠᠰ ᠣᠷᠣᠲᠠᠯᠠ ᠳᠡᠭᠡᠷᠡ ᠡᠴᠡ ᠶᠡᠬᠡ ᠦᠶᠡᠷ ᠲᠠᠪᠤᠨ ᠲᠣᠬᠣᠢ ᠥᠨᠳᠥᠷ ᠡᠷᠭᠢᠯᠳᠦᠵᠦ ᠪᠠᠭᠤᠨ ᠢᠷᠡᠭᠡᠳ ᠣᠯᠠᠨ ᠴᠡᠷᠢᠭ ᠶᠡᠬᠡᠯᠡ ᠠᠪᠲᠠᠭᠰᠠᠨᠠ᠂ ᠸᠠᠩ ᠬᠠᠭᠠᠨ ᠤᠰᠤᠨ ᠳ᠋ᠤᠷ ᠬᠣᠷᠢᠭᠳᠠᠵᠤ᠂ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠥᠨᠳᠥᠷ ᠰᠡᠴᠡᠨ ᠦ᠌ ᠨᠡᠬᠡᠬᠦ ᠢᠨᠦ ᠴᠠᠬᠢᠯᠭᠠᠨ ᠮᠡᠲᠦ ᠳ᠋ᠦ᠍ᠷ ᠳᠠᠷᠤᠢ ᠤᠰᠤ ᠤᠷᠤᠭᠤᠳᠠᠨ ᠳᠤᠲᠠᠭᠠᠪᠠ᠃ ᠢᠯᠠᠭᠤ᠂ ᠵᠠᠮᠤᠬᠠ ᠶ᠋ᠢᠨ ᠴᠡᠷᠢᠭ ᠣᠯᠣᠮ ᠢ᠋ ᠥᠭᠡᠳᠡᠯᠡᠵᠦ ᠳᠤᠲᠠᠭᠠᠪᠠ᠃ ᠡᠨᠡ ᠬᠢᠷᠢ ᠳ᠋ᠦ᠍ᠷ ᠠᠯᠤᠬᠠ᠂ ᠰᠦᠬᠡ ᠬᠣᠶᠠᠭᠤᠯᠠ ᠪᠠ ᠰᠥᠪᠡᠭᠡᠲᠡᠢ᠂ ᠵᠦᠯᠭᠡᠲᠡᠢ ᠶ᠋ᠢᠨ ᠴᠡᠷᠢᠭ ᠥᠴᠥᠭᠡᠳᠦᠷ ᠰᠥᠨᠢ ᠪᠡᠷ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ᠂ ᠭᠡᠭᠡᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ᠷ ᠨᠢᠭᠡᠨᠲᠡ ᠬᠠᠰᠬᠢᠷᠤᠮᠠᠭᠴᠠ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠬᠡᠳᠦᠢᠨᠡᠢ ᠠᠪᠴᠤᠬᠤᠢ᠃ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠪᠠᠰᠠ ᠭᠠᠯᠵᠠᠭᠤ ᠮᠥᠷᠡᠨ ᠦ᠌ ᠬᠥᠪᠡᠭᠡ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠡᠳ ᠪᠠᠭᠤᠳᠠᠯᠯᠠᠵᠤ᠂ ᠥᠭᠡᠳᠡ ᠤᠷᠤᠭᠤ ᠬᠣᠶᠠᠷ ᠲᠡᠰᠢ ᠴᠡᠷᠢᠭ ᠬᠤᠪᠢᠶᠠᠨ ᠶᠠᠪᠤᠭᠤᠯᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠥᠨᠳᠥᠷ ᠰᠡᠴᠡᠨ ᠭᠠᠪ ᠭᠠᠭᠴᠠᠭᠠᠷ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠲᠦ᠍ᠷ ᠰᠢᠪᠲᠤᠯᠤᠨ ᠣᠷᠣᠵᠤ᠂ ᠵᠠᠷ ᠵᠡᠪᠰᠡᠭ ᠦ᠋ᠨ ᠳᠣᠣᠭᠤᠷ ᠰᠢᠷᠭᠤᠯᠠᠨ ᠾᠧ ᠸᠠᠩ ᠢ᠋ ᠨᠡᠬᠡᠨ ᠭᠦᠢᠴᠡᠭᠡᠳ ᠬᠣᠢᠨᠠ ᠠ᠋ᠴᠠ ᠨᠢᠭᠡᠨᠲᠡ ᠵᠢᠳᠠᠯᠠᠵᠤ᠂ ᠪᠠᠷᠠᠭᠤᠨ ᠰᠡᠭᠦᠵᠢᠨ ᠦ᠌ ᠵᠤᠵᠠᠭᠠᠨ ᠮᠢᠬᠠ ᠶ᠋ᠢ ᠰᠡᠳᠡ ᠵᠢᠳᠠᠯᠠᠵᠤ ᠤᠨᠠᠭᠠᠲᠠᠯᠠ ᠭᠦᠷᠡᠯᠵᠡᠭᠡᠨᠡ ᠨᠢᠭᠡᠨᠲᠡ ᠠᠶᠤᠨ ᠪᠠᠷᠬᠢᠷᠠᠭᠰᠠᠨᠠ᠂ ᠸᠠᠩ ᠬᠠᠭᠠᠨ ᠤ᠋ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠬᠠᠮᠲᠤ ᠪᠠᠷ ᠭᠠᠷ ᠬᠥᠳᠡᠯᠦᠨ ᠲᠦᠮᠡᠨ ᠢᠯᠳᠦ ᠮᠢᠩᠭᠠᠨ ᠵᠢᠳᠠ ᠥᠨᠳᠥᠷ ᠰᠡᠴᠡᠨ ᠢ᠋ ᠴᠣᠬᠢᠨ ᠮᠣᠷᠢᠨ ᠠ᠋ᠴᠠ ᠤᠨᠠᠭᠠᠲᠠᠯᠠ ᠵᠠᠯᠮᠠ ᠲᠠᠨ ᠮᠥᠨ ᠭᠦᠢᠴᠡᠨ ᠬᠦᠷᠴᠦ ᠢᠷᠡᠭᠡᠳ ᠥᠨᠳᠥᠷ ᠰᠡᠴᠡᠨ ᠢ᠋ ᠪᠤᠯᠢᠶᠠᠨ ᠠᠪᠤᠪᠠ᠃ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠾᠧ ᠸᠠᠩ ᠢ᠋ ᠲᠡᠳᠬᠦᠨ ᠠᠪᠴᠤ ᠪᠤᠷᠤᠭᠤᠯᠠᠪᠠ᠃ ᠲᠡᠳᠦᠢ ᠨᠠᠷᠠᠨ ᠲᠠᠰᠢᠭᠰᠠᠨᠠ᠂ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠬᠦᠷᠴᠦ ᠢᠷᠡᠲᠡᠯᠡ ᠭᠠᠭᠴᠠ ᠥᠨᠳᠥᠷ ᠰᠡᠴᠡᠨ ᠵᠠᠯᠮᠠ ᠲᠠᠨ ᠢᠷᠡᠬᠦ ᠦᠭᠡᠶᠡ᠂ ᠲᠠᠢᠽᠦ ᠳᠠᠬᠢᠨ ᠡᠷᠢᠭᠦᠯᠦᠷᠡ ᠢᠯᠡᠭᠡᠲᠡᠯᠡ ᠰᠥᠨᠢ ᠳᠦᠯᠢ ᠳ᠋ᠦ᠍ᠷ ᠪᠡᠯᠭᠦᠳᠡᠢ᠂ ᠬᠠᠰᠠᠷ᠂ ᠵᠠᠯᠮᠠ᠂ ᠥᠨᠳᠥᠷ ᠰᠡᠴᠡᠨ ᠢ᠋ ᠲᠡᠪᠡᠷᠢᠵᠦ ᠦᠯᠬᠦ ᠶ᠋ᠢᠨ ᠵᠦᠨᠲᠡᠢ ᠶ᠋ᠢ ᠬᠦᠯᠢᠭᠦᠯᠵᠦ ᠬᠦᠷᠴᠦ ᠢᠷᠡᠪᠡ᠃ ᠲᠠᠢᠽᠦ ᠦᠵᠡᠪᠡᠰᠦ ᠥᠨᠳᠥᠷ ᠰᠡᠴᠡᠨ ᠦ᠌ ᠲᠣᠯᠣᠭᠠᠢ ᠳ᠋ᠤᠷ ᠶ᠋ᠢᠳᠠ ᠶ᠋ᠢᠨ ᠰᠢᠷᠬᠠ ᠭᠠᠷᠴᠤᠬᠤᠢ᠃ ᠲᠠᠢᠽᠦ ᠶᠡᠬᠡᠯᠡ ᠰᠣᠴᠢᠵᠤ ᠤᠴᠢᠷ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤᠷ ᠵᠠᠯᠮᠠ ᠵᠦᠢ ᠵᠦᠢ ᠪᠡᠷ ᠮᠡᠳᠡᠭᠦᠯᠵᠦ᠂ ᠦᠯᠬᠦ ᠶ᠋ᠢᠨ ᠵᠦᠨᠳᠡᠢ ᠶ᠋ᠢ ᠲᠦᠯᠬᠢᠨ ᠭᠠᠷᠭᠠᠭᠰᠠᠨᠠ᠂ ᠲᠠᠢᠽᠦ ᠶᠡᠬᠡᠯᠡ ᠬᠢᠯᠢᠩᠯᠡᠨ ᠵᠣᠯᠪᠢᠨ ᠮᠠᠭᠤ ᠵᠦᠨᠲᠡᠢ᠂ ᠦᠨᠡᠨᠴᠢ ᠦᠭᠡᠢ ᠪᠣᠭᠣᠯ᠂ ᠴᠢᠮᠡᠳ ᠡᠴᠡ ᠪᠡᠨ ᠴᠡᠩᠬᠡᠷᠯᠡᠭᠰᠡᠨ᠂ ᠡᠵᠡᠨ ᠯᠦ᠍ᠭᠡ ᠪᠡᠨ ᠲᠡᠮᠡᠴᠡᠭᠰᠡᠨ ᠪᠣᠭᠣᠯ ᠢ᠋ ᠲᠥᠷᠭᠡᠨᠡ ᠴᠢᠷᠦᠨ ᠭᠠᠷᠭᠠᠵᠤ ᠴᠠᠪᠴᠢᠨ ᠠᠯᠠᠭᠠᠳ ᠣᠯᠠᠨ ᠳ᠋ᠤᠷ ᠦᠵᠡᠭᠦᠯ ! 》 ᠭᠡᠮᠡᠨ ᠴᠢᠬᠢᠨ ᠦ᠌ ᠤᠭ ᠲᠤᠷ ᠴᠠᠭᠠᠵᠠᠨ ᠤ᠋ ᠵᠡᠪᠡ ᠬᠠᠳᠬᠤᠵᠤ᠂ ᠵᠠᠯᠮᠠ ᠳ᠋ᠤᠷ ᠲᠤᠰᠢᠶᠠᠨ ᠥᠭᠴᠦ ᠠᠯᠠ ᠭᠡᠮᠡᠨ ᠵᠠᠬᠢᠭᠰᠠᠨᠠ᠂ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠢᠯᠳᠦ ᠰᠦᠬᠡ ᠪᠠᠷᠢᠭ᠍ᠰᠠᠨ ᠠᠷᠠᠳ ᠵᠦᠨᠳᠡᠢ ᠶ᠋ᠢ ᠬᠡᠳᠦᠢᠨᠡᠢ ᠲᠦᠯᠬᠢᠨ ᠠᠪᠠᠴᠢᠵᠤ ᠲᠣᠯᠣᠭᠠᠢ ᠶ᠋ᠢ ᠲᠠᠰᠤ ᠴᠠᠪᠴᠢᠨ ᠠᠪᠴᠤ ᠢᠷᠡᠭᠡᠳ ᠡᠷᠭᠦᠨ ᠦᠵᠡᠭᠦᠯᠵᠦ᠂ ᠥᠨᠳᠥᠷ ᠰᠡᠴᠡᠨ ᠢ᠋ ᠦᠷᠦ ᠡᠪᠡᠳᠴᠦ ᠥᠪᠡᠷ ᠦ᠋ᠨ ᠥᠷᠭᠥᠭᠡ ᠭᠡᠷ ᠲᠦ᠍ᠷ ᠬᠡᠪᠲᠡᠭᠦᠯᠵᠦ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠮ ᠤᠤᠭᠤᠯᠭᠠᠵᠤ᠂ ᠰᠢᠷᠬᠠ ᠳ᠋ᠤᠷ ᠡᠮ ᠬᠢᠵᠦ ᠰᠤᠪᠢᠯᠠᠬᠤᠶᠠ᠂ ᠠᠷᠪᠠᠨ ᠬᠦᠷᠢᠶᠡᠨ ᠦ᠌ ᠴᠡᠷᠢᠭ ᠬᠤᠶᠠᠭ ᠲᠠᠢᠽᠦ ᠶ᠋ᠢᠨ ᠰᠦᠷ ᠬᠡᠰᠢᠭ᠂ ᠱᠠᠩ ᠬᠣᠣᠷ ᠤ᠋ᠨ ᠢᠯᠡᠷᠬᠡᠢ ᠲᠣᠳᠣᠷᠬᠠᠢ ᠪᠠ ᠬᠤᠷᠴᠠ ᠭᠡᠭᠡᠬᠡᠨ ᠢ᠋ ᠶᠡᠬᠡᠯᠡ ᠪᠢᠰᠢᠷᠡᠨ ᠢᠭᠲᠦᠯᠵᠦ ᠨᠢᠳᠦᠨ ᠡᠴᠡ ᠪᠡᠨ ᠨᠢᠯᠪᠤᠰᠤᠨ ᠤᠨᠠᠭᠠᠯᠴᠠᠪᠠᠢ᠃ ᠥᠨᠳᠥᠷ ᠰᠡᠴᠡᠨ ᠦ᠌ ᠪᠡᠶᠡ ᠶ᠋ᠢ ᠲᠠᠢᠽᠦ ᠪᠡᠶᠡ ᠪᠡᠷ ᠰᠤᠪᠢᠯᠠᠨ ᠲᠡᠵᠢᠭᠡᠵᠦ ᠪᠠᠢᠲᠠᠯᠠ ᠪᠣᠯᠤᠭᠰᠠᠨ ᠦᠭᠡᠢ ᠪᠡᠶᠡ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠯᠡ ᠭᠠᠰᠢᠭᠤᠳᠠᠨ ᠬᠠᠢᠯᠵᠤ᠂ ᠮᠣᠳᠣᠷ ᠢ᠋ᠶ᠋ᠠᠷ ᠠᠷᠢᠬᠢ ᠰᠠᠴᠤᠵᠤ ᠡᠢᠨ ᠭᠡᠮᠡᠨ ᠥᠴᠢᠷᠦᠨ :
ᠡᠴᠢᠭᠡ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠪᠡᠶᠡ ᠪᠡᠨ ᠡᠵᠡᠨ ᠦ᠌ ᠲᠥᠯᠥᠭᠡ ᠭᠡᠭᠡᠪᠡ
ᠡᠯᠪᠡᠷᠢᠯ ᠲᠠᠬᠢᠮᠳᠠᠭᠤ ᠶᠣᠰᠣ ᠵᠢᠷᠤᠮ ᠠᠨᠤ ᠪᠡᠶᠡ ᠳ᠋ᠦ᠍ᠷ ᠪᠦᠷᠢᠳᠪᠡ᠂
ᠡᠵᠡᠨ ᠪᠣᠯᠤᠭᠰᠠᠨ ᠲᠡᠮᠦᠵᠢᠨ ᠪᠢ ᠡᠯᠢᠭᠡ ᠠᠭᠤᠰᠬᠢ ᠮᠢᠨᠦ ᠡᠪᠡᠷᠰᠢᠶᠡᠪᠡ
ᠡᠮᠡ ᠦᠷᠡ ᠴᠢᠨᠦ ᠡᠭᠦᠷᠢ ᠮᠢᠨᠦ ᠡᠷᠬᠢᠮ ᠲᠦᠰᠢᠮᠡᠯ ᠪᠣᠯᠲᠤᠭᠠᠢ !
ᠬᠡᠮᠡᠵᠦ ᠶᠠᠰᠤᠨ ᠢ᠋ ᠠᠨᠤ ᠮᠥᠩᠭᠥᠨ ᠦ᠌ ᠬᠠᠭᠤᠷᠴᠠᠭ ᠲᠤᠷ ᠬᠢᠵᠦ ᠨᠤᠲᠤᠭ ᠲᠤᠷ ᠬᠦᠷᠭᠡᠭᠦᠯᠵᠦ᠂ ᠲᠡᠭᠦᠨ ᠦ᠌ ᠭᠤᠷᠪᠠᠨ ᠬᠥᠪᠡᠭᠦᠨ ᠪᠣᠯᠢᠭ᠍ᠲᠦ ᠪᠠᠷᠰ᠂ ᠰᠢᠯᠢᠭᠲᠦ ᠪᠠᠷᠰ᠂ ᠲᠡᠰᠬᠡᠯ ᠪᠠᠷᠰ ᠭᠤᠷᠪᠠᠭᠤᠯᠠ ᠶ᠋ᠢ ᠴᠥᠮ ᠵᠠᠭᠤᠨ ᠡᠷᠦᠬᠡ ᠶ᠋ᠢᠨ ᠨᠣᠶᠠᠨ ᠡᠷᠭᠦᠮᠵᠢᠯᠡᠵᠦ᠂ ᠮᠢᠩᠭᠠᠨ ᠠᠳᠤᠭᠤ ᠱᠠᠩᠨᠠᠵᠤ᠂ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠤ᠋ ᠬᠤᠪᠢ ᠳ᠋ᠤᠷ ᠣᠷᠣᠭᠤᠯᠵᠤ᠂ ᠴᠥᠮ ᠪᠠᠷᠰ ᠤ᠋ᠨ ᠲᠤᠭ᠂ ᠪᠠᠷᠰ ᠤ᠋ᠨ ᠣᠯᠪᠣᠭ① ᠪᠠᠷᠰ ᠤ᠋ᠨ ᠳᠡᠪᠢᠰᠬᠡᠷ ᠱᠠᠩᠨᠠᠵᠤ᠂ ᠡᠬᠡ ᠢᠨᠣ ᠪᠠᠰᠠ ᠨᠥᠭᠴᠢᠭᠰᠡᠨ ᠲᠤᠯᠠ ᠰᠡᠴᠡᠨ ᠵᠦᠰᠦᠨ ᠬᠠᠲᠤᠨ ᠳ᠋ᠤᠷ ᠲᠤᠰᠢᠶᠠᠨ ᠲᠡᠵᠢᠭᠡᠯᠭᠡᠪᠡᠢ᠃ ᠡᠭᠦᠨᠴᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠴᠢᠩᠭᠠᠷᠠᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠂ ᠣᠯᠠᠨ ᠢ᠋ᠶ᠋ᠠᠷ ᠳᠠᠢᠰᠤᠨᠠ ᠪᠡᠶᠡ ᠦᠷᠡᠬᠦ ᠶ᠋ᠢ ᠬᠦᠰᠡᠯᠴᠡᠪᠡᠢ ᠃
ᠬᠤᠷᠴᠠ ᠭᠠᠯ ᠮᠡᠲᠦ ᠴᠠᠭᠠᠵᠠ ᠬᠠᠤᠯᠢ ᠳ᠋ᠤᠷ ᠬᠡᠨ ᠦᠯᠦ ᠰᠢᠷᠪᠡᠭᠡᠲᠦᠮᠦᠢ ? ᠬᠤᠷᠠ ᠤᠰᠤ ᠠᠳᠠᠯᠢ ᠱᠠᠩ ᠬᠡᠰᠢᠭ ᠲᠣᠷ ᠠᠯᠢᠨ ᠦᠯᠦ ᠰᠢᠲᠦᠮᠦᠢ ?
ᠡᠨᠡ ᠥᠨᠳᠥᠷ ᠰᠡᠴᠡᠨ ᠦ᠌ ᠬᠡᠷᠡᠭ ᠢ᠋ ᠮᠣᠩᠭᠣᠯ ᠰᠤᠳᠤᠷᠴᠤᠳ ᠲᠤᠷ ᠰᠠᠢᠬᠠᠨ ᠲᠡᠮᠳᠡᠭᠯᠡᠭᠰᠡᠨ ᠢ᠋ ᠴᠦ᠍ ᠪᠠᠢᠲᠤᠭᠠᠢ᠂ ᠬᠡᠳᠦᠢ ᠬᠢᠲᠠᠳ ᠤ᠋ᠨ 《ᠵᠣ᠌ ᠽᠢ ᠲᠤᠩ ᠢ᠋ᠶᠠᠨ ᠭᠠᠩ ᠮᠦ᠍ ᠪᠢᠴᠢᠭ 》 ᠦ᠋ᠨ ᠠᠷᠪᠠᠨ ᠨᠠᠢ᠍ᠮᠠᠳᠤᠭᠠᠷ ᠲᠣᠭᠳᠣᠢ ᠶ᠋ᠢᠨ ᠳᠡᠳ᠋ ᠳᠡᠪᠲᠡᠷ ᠦ᠋ᠨ ᠲᠠᠪᠢᠨ ᠵᠢᠷᠭᠤᠳᠤᠭᠠᠷ ᠴᠠᠭᠠᠰᠤᠨ ᠤ᠋ ᠠᠷᠤ ᠪᠡᠶᠡ ᠶ᠋ᠢᠨ ᠲᠠᠢᠽᠦ ᠶ᠋ᠢᠨ ᠬᠠᠭᠠᠨ ᠰᠠᠭᠤᠭᠰᠠᠨ ᠢ᠋ ᠲᠣᠭᠠᠴᠢᠭᠰᠠᠨ ᠳ᠋ᠤᠷ ᠡᠭᠦᠨ ᠢ᠋ ᠪᠠᠰᠠ ᠪᠥᠭᠡᠮ ᠢ᠋ᠶ᠋ᠡᠷ ᠬᠡᠳᠦᠨ ᠦᠰᠦᠭ ᠲᠣᠭᠠᠴᠢᠵᠤᠬᠤᠢ᠃ ᠭᠠᠭᠴᠠ ᠨᠡᠷᠡ ᠶ᠋ᠢ ᠢᠨᠦ ᠬᠠᠯᠭᠤᠷᠠᠵᠤ 《 ᠸᠧᠢ ᠳᠧ ᠡᠯ 》 ᠭᠡᠮᠡᠨ ᠪᠢᠴᠢᠵᠦᠬᠦᠢ᠃ ᠡᠨᠡ ᠳᠠᠷᠤᠢ ᠥᠨᠳᠥᠷ ᠬᠡᠮᠡᠭᠰᠡᠨ ᠢ᠋ ᠸᠧᠢ ᠳᠧ ᠡᠯ ᠬᠡᠮᠡᠭᠰᠡᠨ ᠪᠤᠶᠤ᠃ ᠡᠨᠡ ᠥᠨᠳᠥᠷ ᠰᠡᠴᠡᠨ ᠮᠣᠩᠭᠣᠯ ᠤ᠋ᠨ ᠲᠡᠷᠢᠭᠦᠨ ᠨᠢᠭᠡᠨ ᠰᠢᠳᠤᠷᠭᠤ ᠵᠢᠷᠤᠮᠲᠤ ᠮᠡᠷᠭᠡᠨ ᠭᠡᠭᠡᠬᠡᠨ ᠰᠠᠢᠳ ᠪᠤᠶᠤ᠃ ᠴᠣᠬᠣᠮ ᠲᠦᠮᠡᠨ ᠦᠶᠡ ᠢᠯᠵᠠᠷᠠᠰᠢ ᠦᠭᠡᠢ ᠵᠢᠷᠤᠮᠲᠠᠨ ᠪᠣᠯᠠᠢ᠃ ᠤᠭ ᠲᠤᠷ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠪᠥᠯᠥᠭᠡ᠃ ᠲᠠᠢᠽᠦ ᠶ᠋ᠢᠨ ᠡᠴᠢᠭᠡ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠥᠩᠭᠡᠷᠡᠵᠦ᠂ ᠣᠯᠠᠨ ᠠᠢᠮᠠᠭ ᠤ᠋ᠳ ᠤᠷᠭᠤᠵᠤ ᠤᠷᠪᠠᠨ ᠡᠴᠢᠬᠦᠶᠡ᠂ ᠡᠨᠡ ᠥᠨᠳᠥᠷ ᠦ᠋ᠨ ᠠᠬᠠ ᠠᠨᠤ ᠨᠡᠷᠡ ᠥᠨᠢ ᠬᠡᠮᠡᠭᠴᠢ ᠴᠠᠢᠯᠵᠢ ᠠᠢᠮᠠᠭ ᠢ᠋ᠶ᠋ᠡᠨ ᠠᠪᠴᠤ ᠤᠷᠪᠠᠨ ᠣᠳᠬᠤᠢ ᠳ᠋ᠤᠷ ᠳᠡᠭᠦᠦ ᠥᠨᠳᠥᠷ ᠭᠤᠷᠪᠠᠨ ᠮᠥᠷᠡᠨ ᠢ᠋ ᠭᠠᠷᠲᠠᠯᠠ ᠬᠣᠷᠢᠭᠯᠠᠪᠠᠰᠤ ᠦᠭᠡ ᠳᠠᠭᠠᠭᠰᠠᠨ ᠦᠭᠡᠢ ᠡᠴᠢᠭᠰᠡᠨᠡ᠂ ᠳᠡᠭᠦᠦ ᠢᠨᠦ ᠡᠭᠡᠵᠦ ᠢᠷᠡᠭᠡᠳ ᠲᠠᠢᠽᠦ ᠳ᠋ᠦ᠍ᠷ ᠳᠠᠭᠠᠬᠤᠢ ᠳ᠋ᠤᠷ ᠲᠡᠭᠦᠨ ᠦ᠌ ᠥᠴᠢᠭᠰᠡᠨ ᠢᠨᠣ《ᠦᠨᠡᠨ ᠡᠵᠡᠨ ᠢ᠋ ᠦᠬᠦᠲᠡᠯᠡ ᠳᠠᠭᠠᠬᠤᠢ ᠳ᠋ᠤᠷ ᠶᠠᠭᠤᠨ ᠪᠣᠢ !》ᠭᠡᠮᠡᠨ ᠰᠤᠮᠤ ᠬᠤᠭᠤᠯᠵᠤ ᠲᠠᠩᠭᠠᠷᠢᠭᠯᠠᠭᠰᠠᠨᠠ᠂ ᠲᠠᠢᠽᠦ ᠰᠡᠴᠡᠨ ᠴᠣᠯᠠ ᠬᠠᠢᠷᠠᠯᠠᠭᠰᠠᠨ ᠪᠥᠯᠥᠭᠡ᠃ ᠠᠬᠠ ᠠᠨᠤ ᠥᠨᠢ ᠳᠣᠣᠷᠠᠬᠢ ᠲᠣᠳᠣ ᠬᠡᠮᠡᠭᠴᠢ ᠳ᠋ᠦ᠍ᠷ ᠠᠯᠠᠭᠳᠠᠵᠤ᠂ ᠴᠠᠢᠯᠵᠢ ᠠᠢᠮᠠᠭ ᠢ᠋ᠶ᠋ᠠᠨ ᠪᠤᠯᠢᠶᠠᠭᠳᠠᠵᠤᠬᠤᠢ᠃ ᠡᠨᠡ ᠪᠦᠯᠦᠭ ᠲᠣᠷ ᠭᠠᠷᠤᠭᠰᠠᠨ ᠲᠣᠳᠣ ᠭᠡᠭᠴᠢ ᠳᠠᠷᠤᠢ ᠮᠥᠨ ᠃
ᠠᠴᠢᠯᠠᠯᠲᠤ ᠬᠥᠪᠡᠭᠦᠨ ᠰᠢᠳᠤᠷᠭᠤ ᠰᠠᠢᠳ ᠦᠶᠡ ᠳ᠋ᠦ᠍ᠷ ᠶᠠᠭᠤᠲᠠᠢ ᠴᠤᠬᠠᠭ ?
ᠠᠪᠤᠷᠠᠯᠲᠤ ᠡᠵᠡᠨ ᠭᠡᠭᠡᠬᠡᠨ ᠵᠠᠰᠠᠭ ᠴᠥᠭᠡᠨ ᠪᠣᠯᠤᠭᠰᠠᠨ ᠤ᠋ ᠭᠡᠮ᠂
ᠠᠰᠠᠷᠠᠯᠲᠤ ᠪᠣᠭᠳᠠ ᠲᠠᠢᠽᠦ ᠲᠤᠯᠠ ᠦᠬᠦᠨ ᠵᠢᠳᠬᠦᠭᠴᠢᠳ ᠭᠠᠷᠤᠮᠤᠢ
ᠠᠪᠤᠷᠢ ᠮᠠᠭᠤ ᠲᠣᠭᠣᠷᠢᠯ ᠪᠠᠢᠨᠠ ᠬᠡᠨ ᠤᠷᠤᠭᠰᠢᠯᠠᠬᠤ ᠪᠣᠢ ?
– – – –
① ᠬᠤᠶᠠᠭ ᠤᠨ ᠳᠡᠭᠡᠭᠦᠷ ᠡᠮᠦᠰᠬᠦ ᠬᠦᠷᠮᠡ ᠶᠢ ᠬᠡᠯᠡᠭ᠍ᠰᠡᠨ ᠪᠣᠢ᠃
ᠴᠣᠬᠣᠯᠠᠭᠰᠠᠨ ᠠᠨᠤ
ᠡᠨᠡ ᠪᠦᠯᠦᠭ ᠲᠣᠷ ᠤᠴᠢᠷ ᠲᠠᠢ ᠶᠠᠪᠤᠳᠠᠯ ᠴᠥᠭᠡᠨ ᠦᠭᠡᠢ ᠲᠤᠯᠠ ᠣᠯᠠᠨᠲᠠ ᠳᠡᠯᠭᠡᠵᠦ ᠴᠣᠬᠣᠯᠠᠨ ᠴᠢᠳᠠᠬᠤ ᠦᠭᠡᠢ᠂ ᠤᠴᠢᠷ ᠤᠴᠢᠷ ᠢ᠋ ᠣᠢᠷᠠ ᠣᠢᠷᠠᠬᠠᠨ ᠢ᠋ᠶ᠋ᠠᠷ ᠤᠬᠤᠴᠢᠯᠠᠰᠤᠭᠠᠢ᠃ ᠤᠭ ᠠ᠋ᠴᠠ ᠲᠠᠢᠽᠦ ᠶ᠋ᠢ ᠥᠪᠡᠷᠡ ᠶᠠᠰᠤ ᠲᠡᠭᠷᠢ ᠶ᠋ᠢᠨ ᠰᠢᠮᠡ ᠦᠷᠡ ᠬᠡᠮᠡᠭᠰᠡᠨ ᠢᠨᠣ ᠡᠨᠡ ᠪᠦᠯᠦᠭ ᠦ᠋ᠨ ᠡᠬᠢᠨ ᠳ᠋ᠦ᠍ᠷ ᠢᠯᠡᠷᠬᠡᠢ ᠲᠣᠳᠣᠷᠬᠠᠢ ᠪᠠᠷ ᠢᠯᠡᠷᠡᠵᠦᠬᠦᠢ᠃ ᠡᠨᠡ ᠢᠨᠣ ᠶᠢᠷᠲᠢᠨᠴᠦ ᠶ᠋ᠢᠨ ᠢᠯᠡ ᠭᠡᠷᠡᠴᠢ ᠪᠤᠶᠤ᠃ ᠳᠡᠳ᠋ ᠲᠣᠷ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠭᠡᠷ ᠦ᠋ᠨ ᠠᠮᠠᠨ ᠢ᠋ ᠬᠡᠷᠡᠢᠳ ᠦ᠋ᠨ ᠰᠣᠯᠣᠩᠭᠤᠸᠠ ᠥᠬᠢᠨ ᠦ᠌ ᠬᠠᠷᠠᠭᠠᠯᠵᠠᠭᠤᠯᠤᠭᠰᠠᠨ ᠠᠨᠤ᠂ ᠡᠷᠲᠡᠨ ᠦ᠌ ᠴᠦᠨ ᠴᠢᠦ ᠶ᠋ᠢᠨ ᠦᠶᠡ᠂ ᠶ᠋ᠢᠨ ᠸᠸᠨ ᠬᠦᠩ ᠲᠣᠭᠣᠷᠢᠵᠤ ᠶᠠᠪᠤᠬᠤ ᠦᠶᠡ ᠳ᠋ᠦ᠍ᠷ ᠼᠤᠤ ᠤᠯᠤᠰ ᠲᠤᠷ ᠬᠦᠷᠴᠦ ᠼᠤᠤ ᠬᠦᠩ ᠬᠦᠨᠳᠦᠯᠡᠭᠰᠡᠨ ᠦᠭᠡᠢ ᠳ᠋ᠦ᠍ᠷ ᠳᠣᠣᠷᠠᠬᠢ ᠴᠢᠩ ᠲᠦᠰᠢᠮᠡᠯ ᠢᠨᠦ ᠭᠡᠷ ᠲᠡᠭᠡᠨ ᠵᠠᠯᠠᠭᠰᠠᠨ ᠳ᠋ᠤᠷ ᠲᠡᠭᠦᠨ ᠦ᠌ ᠭᠡᠷᠭᠡᠢ᠂ ᠴᠥᠩ ᠡᠯ ᠢ᠋ ᠦᠵᠡᠵᠦ ᠲᠠᠨᠢᠭᠠᠳ ᠡᠷᠡ ᠳ᠋ᠡᠭᠡᠨ ᠰᠤᠷᠭᠠᠵᠤ ᠂ ᠴᠥᠩ ᠡᠯ ᠢ᠋ ᠬᠦᠨᠳᠦᠯᠡᠨ ᠠᠯᠲᠠᠨ ᠰᠤᠪᠤᠳ ᠢ᠋ᠶ᠋ᠠᠷ ᠲᠤᠰᠠᠯᠠᠭᠤᠯᠵᠤ ᠂ ᠬᠣᠢᠨᠠ ᠶ᠋ᠢᠨ ᠸᠸᠨ ᠬᠦᠩ ᠤᠯᠤᠰ ᠢ᠋ᠶ᠋ᠠᠨ ᠣᠯᠵᠤ᠂ ᠠᠴᠢ ᠥᠰᠢᠶᠡ ᠶ᠋ᠢ ᠬᠠᠷᠢᠭᠤᠯᠠᠬᠤ ᠦᠶᠡ ᠳ᠋ᠦ᠍ᠷ ᠼᠤᠤ ᠤᠯᠤᠰ ᠡᠪᠳᠡᠷᠡᠭᠰᠡᠨ ᠠᠲᠠᠯᠠ ᠰᠢ ᠹᠦ ᠶ᠋ᠢᠨ ᠡᠮᠡ ᠡᠰᠡ ᠦᠬᠦᠵᠦᠬᠦᠢ᠃ ᠬᠣᠢᠨᠠ ᠬᠡᠪ ᠢ᠋ᠶ᠋ᠡᠷ ᠶᠡᠬᠡ ᠪᠠᠶᠠᠨ ᠡᠷᠬᠢᠮ ᠢ᠋ ᠡᠵᠡᠯᠡᠪᠡ᠃ ᠡᠨᠡ ᠰᠣᠯᠤᠩᠭᠤᠸᠠ ᠥᠬᠢᠨ ᠲᠡᠷᠡ ᠰᠢ ᠹᠦ ᠶ᠋ᠢᠨ ᠡᠮᠡ ᠡᠴᠡ ᠳᠣᠣᠷᠠ ᠦᠭᠡᠢ᠃ ᠭᠤᠲᠠᠭᠠᠷ ᠲᠤᠷ ᠮᠤᠬᠤᠯᠢ ᠶ᠋ᠢᠨ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠢ᠋ ᠰᠣᠨᠣᠰᠴᠤ ᠢᠨᠢᠶᠡᠨ ᠪᠠᠶᠠᠷᠯᠠᠭᠰᠠᠨ ᠠᠨᠤ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠮᠤᠬᠤᠯᠢ ᠶ᠋ᠢ ᠶᠠᠪᠤᠪᠠ ᠭᠡᠮᠡᠨ ᠰᠣᠨᠣᠰᠤᠮᠠᠭᠴᠠ ᠯᠠᠪ ᠰᠥᠰᠥ ᠶᠡᠬᠡ ᠰᠡᠵᠢᠭ ᠦᠭᠡᠢ ᠪᠣᠯᠵᠤ ᠠᠷᠭᠠ ᠳ᠋ᠤᠷ ᠤᠨᠠᠬᠤ ᠶ᠋ᠢ ᠮᠡᠳᠡᠭᠰᠡᠨ ᠪᠣᠯᠠᠢ᠃ ᠪᠠᠰᠠ ᠪᠠᠷᠰ ᠪᠥᠭᠡᠯᠵᠢᠬᠦ ᠠᠷᠭᠠ ᠬᠡᠮᠡᠭᠴᠢ ᠶᠡᠬᠡ ᠠᠭᠤᠯᠠᠨ ᠤ᠋ ᠪᠠᠷᠰ ᠰᠥᠨᠢ ᠠᠢᠯ ᠳ᠋ᠤᠷ ᠪᠠᠭᠤᠵᠤ ᠂ ᠬᠥᠮᠦᠨ ᠦ᠌ ᠪᠥᠭᠡᠯᠵᠢᠬᠦ ᠪᠡᠷ ᠳᠤᠤᠭᠠᠷᠴᠤ ᠠᠢᠯ ᠤ᠋ᠨ ᠨᠣᠬᠠᠢ ᠶ᠋ᠢ ᠴᠤᠭᠯᠠᠭᠤᠯᠤᠨ ᠠᠴᠢᠷᠠᠵᠤ ᠪᠠᠷᠢᠵᠤ ᠢᠳᠡᠬᠦ ᠲᠤᠯᠠ ᠲᠠᠢᠽᠦ ᠶ᠋ᠢ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠢ᠋ ᠤᠳᠤᠷᠢᠳᠤᠨ ᠠᠴᠢᠷᠠᠵᠤ ᠳᠠᠷᠤᠭᠲᠤᠨ ᠬᠡᠮᠡᠭᠰᠡᠨ ᠦᠭᠡ ᠪᠤᠶᠤ᠂ ᠰᠣᠨᠢᠨ ᠪᠣᠯᠠᠢ ! ᠡᠷᠲᠡᠨ ᠦ᠌ ᠱᠤ᠌ ᠤᠯᠤᠰ ᠤ᠋ᠨ ᠵᠣ᠌ ᠭᠧ ᠯᠢᠶᠠᠩ ᠳ᠋ᠤᠷ ᠮᠠᠩᠨᠤᠭ ᠬᠠᠪᠲᠠᠭᠠ ᠶ᠋ᠢᠨ ᠠᠷᠭᠠ ᠪᠣᠢ ᠬᠡᠮᠡᠬᠦᠯᠡ᠂ ᠡᠨᠡ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠮᠤᠬᠤᠯᠢ ᠳ᠋ᠤᠷ ᠪᠠᠰᠠ ᠪᠢᠲᠡᠭᠦᠦ ᠦᠭᠡᠰ ᠦ᠋ᠨ ᠲᠣᠪᠴᠢᠶᠠ ᠪᠣᠢ ᠠᠨᠤ᠂ ᠪᠦᠲᠦᠬᠦ ᠤᠯᠤᠰ ᠤ᠋ᠨ ᠲᠡᠭᠷᠢ ᠶ᠋ᠢᠨ ᠲᠥᠷᠥᠭᠦᠯᠦᠭᠰᠡᠨ ᠠᠨᠤ ᠪᠣᠯᠠᠢ᠃ ᠳᠥᠲᠥᠭᠡᠷ ᠲᠣᠷ ᠲᠠᠢᠽᠦ ᠥᠷᠥᠰᠢᠶᠡᠯ ᠵᠢᠷᠤᠮ ᠤ᠋ᠨ ᠴᠡᠷᠢᠭ ᠢ᠋ ᠶᠠᠪᠤᠭᠤᠯᠵᠤ᠂ ᠵᠠᠯᠮᠠ ᠶ᠋ᠢᠨ ᠤᠰᠤ ᠪᠠᠷ ᠴᠠᠴᠠᠭᠠᠬᠤ ᠶ᠋ᠢ ᠬᠣᠷᠢᠭᠯᠠᠨ ᠪᠠᠢᠯᠭᠠᠬᠤ ᠪᠥᠭᠡᠳ ᠶᠠᠭᠤᠨ ᠳ᠋ᠤᠷ ᠵᠡᠯᠮᠡ ᠶ᠋ᠢᠨ ᠭᠠᠯ ᠳ᠋ᠤᠷ ᠬᠤᠢᠬᠠᠯᠠᠬᠤ ᠶ᠋ᠢ ᠡᠰᠡ ᠵᠣᠭᠰᠣᠭᠠᠭᠰᠠᠨ ᠠᠵᠢ ! ᠡᠭᠦᠨ ᠢ᠋ ᠬᠡᠷᠬᠢᠨ ᠥᠷᠥᠰᠢᠶᠡᠯ ᠵᠢᠷᠤᠮᠲᠤ ᠴᠡᠷᠢᠭ ᠬᠡᠮᠡᠵᠦ ᠪᠣᠯᠬᠤ ? ᠠᠶᠠ ! ᠦᠵᠡᠬᠦ ᠮᠡᠷᠭᠡᠳ ᠮᠢᠨᠦ ᠲᠠᠢᠯᠤᠨ ᠮᠡᠳᠡᠭᠦᠯᠬᠦ ᠶ᠋ᠢ ᠰᠣᠨᠣᠰ : ᠴᠣᠬᠣᠮ ᠥᠷᠥᠰᠢᠶᠡᠯ ᠵᠢᠷᠤᠮᠲᠤ ᠴᠡᠷᠢᠭ ᠪᠣᠯᠵᠤᠬᠤᠢ᠃ ᠶᠠᠭᠤᠨ ? ᠬᠡᠮᠡᠪᠡᠰᠦ : ᠵᠠᠢᠯᠠᠨ ᠭᠠᠷᠴᠤ ᠦᠯᠦ ᠪᠣᠯᠬᠤ ᠠᠨᠤ ᠮᠤᠬᠤᠷ ᠬᠡᠮᠡᠮᠦᠢ᠂ ᠮᠤᠬᠤᠷ ᠪᠢᠲᠡᠭᠦᠦ ᠪᠡᠷ ᠴᠥᠮ ᠪᠦᠷᠢᠯᠭᠡᠪᠡᠰᠦ ᠰᠠᠶᠢ ᠬᠣᠣᠷᠲᠠᠢ ᠬᠡᠮᠡᠮᠦᠢ᠃ ᠲᠠᠯᠠ ᠶ᠋ᠢᠨ ᠲᠦᠢᠮᠡᠷ ᠡᠴᠡ ᠳᠤᠲᠠᠭᠠᠵᠤ ᠭᠠᠷᠬᠤ ᠬᠤᠪᠠᠬᠠᠢ ᠭᠠᠵᠠᠷ ᠪᠣᠢ᠂ ᠭᠣᠣᠯ ᠤ᠋ᠨ ᠦᠶᠡᠷ ᠲᠣᠷ ᠨᠢᠭᠡᠨᠲᠡ ᠤᠷᠤᠰᠠᠬᠠᠭᠳᠠᠪᠠᠰᠤ ᠬᠡᠷᠬᠢᠨ ᠭᠡᠲᠦᠯᠬᠦ ᠠᠵᠢ ? ᠲᠡᠢᠨ ᠬᠦ᠌ ᠲᠦᠢᠮᠡᠷ ᠦ᠋ᠨ ᠭᠠᠯ ᠢ᠋ᠶ᠋ᠠᠷ ᠰᠦᠷᠲᠡᠭᠡᠵᠦ᠂ ᠲᠡᠭᠷᠢ ᠶ᠋ᠢᠨ ᠬᠤᠷᠠ ᠳ᠋ᠤᠷ ᠲᠣᠬᠢᠶᠠᠯᠳᠤᠵᠤᠬᠤᠢ? ᠲᠠᠩᠬᠠᠢ ᠲᠣᠭᠣᠵᠢ ᠳ᠋ᠤᠷ ᠡᠨᠡ ᠪᠠᠢᠯᠳᠤᠭᠠᠨ ᠢ᠋ ᠲᠡᠭᠷᠢ ᠶ᠋ᠢᠨ ᠴᠡᠷᠢᠭ ᠪᠠᠭᠤᠵᠤ ᠬᠡᠷᠡᠢᠳ ᠢ᠋ ᠳᠠᠷᠤᠪᠠ ᠭᠡᠵᠦ ᠪᠣᠢ᠃ ᠡᠭᠦᠯᠡ ᠰᠠᠯᠬᠢᠨ ᠪᠣᠷᠣᠭᠠᠨ ᠦᠶᠡᠷ ᠲᠤᠰᠠ ᠪᠣᠯᠤᠭᠰᠠᠨ ᠠᠨᠤ ᠦᠨᠡᠨ ᠪᠣᠢ ᠊ᠶᠠ᠂ ᠶᠠᠭᠤᠨᠠᠢ ᠲᠡᠭᠷᠢ ᠡᠴᠡ ᠴᠡᠷᠢᠭ ᠪᠠᠭᠤᠬᠤ ᠠᠵᠢ ! ᠲᠡᠢᠨ ᠬᠦ᠌ ᠥᠷᠥᠰᠢᠶᠡᠯᠲᠦ ᠴᠡᠷᠢᠭ ᠬᠡᠮᠡᠪᠡ᠃ ᠲᠠᠪᠤᠳᠤᠭᠠᠷ ᠲᠤᠷ ᠬᠡᠷᠡᠢᠳ ᠦ᠋ᠨ ᠵᠠᠮᠤᠬᠠ ᠾᠧ ᠸᠠᠩ ᠢ᠋ ᠮᠡᠬᠡᠯᠡᠭᠦᠯᠬᠦᠶᠡ ᠣᠨᠴᠠ ᠬᠥᠪᠡᠭᠦᠨ ᠢ᠋ᠶ᠋ᠡᠷ ᠢᠨᠣ ᠮᠡᠬᠡᠯᠡᠭᠦᠯᠵᠦ᠂ ᠬᠥᠪᠡᠭᠦᠨ ᠢ᠋ ᠢᠨᠣ ᠬᠥᠭᠵᠢᠭᠡᠬᠦᠢ ᠳ᠋ᠦ᠍ ᠥᠭᠡᠷᠡ ᠪᠠᠰᠠ ᠭᠠᠵᠢᠭᠤ ᠪᠠᠷ ᠤᠳᠤᠷᠢᠳᠴᠤ ᠤᠯᠠᠮ ᠢ᠋ᠶ᠋ᠠᠷ ᠥᠪᠡᠷ ᠦ᠋ᠨ ᠡᠮᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠳᠤᠷᠠᠯᠠᠭᠤᠯᠬᠤᠢ ᠳ᠋ᠤᠷ ᠬᠦᠷᠦᠭᠰᠡᠨ ᠢᠨᠣ᠂ ᠡᠨᠡ ᠦᠶᠡ ᠶ᠋ᠢᠨ ᠠᠬᠠ ᠳᠡᠭᠦᠦ ᠪᠠᠷᠢᠵᠤ ᠡᠮᠡ ᠥᠬᠢᠳ ᠢ᠋ ᠲᠤᠭᠤᠷᠪᠢᠬᠤᠢ ᠳ᠋ᠤᠷ ᠠᠳᠠᠯᠢ ᠪᠣᠯᠤᠭᠰᠠᠨ ᠠᠨᠤ ᠠᠶᠠ ᠬᠣᠬᠣᠢ ! ᠥᠴᠦᠬᠡᠨ ᠠᠷᠠᠳ ᠤ᠋ᠨ ᠡᠮᠡ ᠪᠠ ᠥᠬᠢᠨ ᠢ᠋ᠶ᠋ᠡᠨ ᠡᠷᠭᠦᠵᠦ ᠠᠯᠠ ᠶ᠋ᠢᠨ ᠳᠣᠣᠷᠠᠬᠢ ᠨᠠᠢᠷ ᠢ᠋ᠶ᠋ᠠᠷ ᠪᠠᠶᠠᠨ ᠡᠷᠬᠢᠮ ᠢ᠋ ᠡᠷᠢᠬᠦ ᠮᠡᠷᠭᠡᠳ ᠪᠣᠯᠪᠠᠴᠤ ᠳᠣᠲᠣᠷᠠ ᠪᠠᠨ ᠵᠠᠮᠤᠬᠠ ᠶ᠋ᠢᠨ ᠠᠳᠠᠯᠢ ᠬᠣᠷᠣᠰᠬᠤ ᠠᠨᠤ ᠮᠠᠭᠠᠳ ᠪᠣᠯᠠᠢ ! ᠲᠡᠷᠡ ᠵᠢᠭᠰᠠᠭᠠᠯ ᠳ᠋ᠤᠷ ᠠᠭ᠍ᠴᠢᠳ ᠬᠢᠴᠢᠶᠡᠨ ᠰᠡᠷᠡᠪᠡᠰᠦ ᠵᠣᠬᠢᠮᠤᠢ᠃ ᠨᠢᠭᠡᠨ ᠥᠷᠯᠥᠭᠡ ᠶ᠋ᠢᠨ ᠡᠳ᠋ ᠪᠠ ᠡᠷᠬᠡ ᠢᠨᠣ ᠳᠠᠭᠤᠰᠪᠠᠰᠤ᠂ ᠲᠡᠳᠡᠭᠡᠷ ᠴᠥᠮ ᠡᠰᠡᠷᠭᠦᠴᠡᠯ ᠪᠣᠯᠠᠢ !ᠡᠰᠡ ᠬᠢᠨᠠᠪᠠᠰᠤ ᠪᠣᠯᠤᠮᠤᠢ ᠤᠤ? ᠵᠢᠷᠭᠤᠳᠤᠭᠠᠷ ᠲᠤᠷ ᠾᠧ ᠸᠠᠩ ᠲᠤᠭᠤᠷᠢᠯ ᠤ᠋ᠨ ᠦᠬᠦᠪᠡᠰᠦ ᠵᠣᠬᠢᠬᠤ ᠨᠢᠭᠡᠨᠲᠡ ᠲᠣᠭᠲᠠᠭᠰᠠᠨ ᠭᠤᠷᠪᠠᠨ ᠵᠦᠢᠯ ᠪᠣᠢ᠂ ᠲᠡᠷᠢᠭᠦᠨ ᠳ᠋ᠦ᠍ᠷ ᠲᠠᠰᠢᠮᠠᠭᠠᠢ ᠪᠢᠯᠳᠠᠤᠴᠢ᠂ ᠬᠣᠶᠠᠷ ᠲᠤᠷ ᠮᠤᠩᠬᠠᠭ ᠬᠠᠷᠠᠩᠭᠤᠢ᠂ ᠭᠤᠷᠪᠠᠨ ᠳ᠋ᠤᠷ ᠬᠣᠪᠳᠣᠭ ᠠᠪᠯᠢᠭᠠᠴᠢ᠃ ᠡᠭᠦᠨ ᠢ᠋ ᠬᠠᠷᠢᠨ ᠶᠤᠸᠠᠨ ᠱᠣᠣ᠂ ᠶᠤᠸᠠᠨ ᠱᠤ᠌᠂ ᠯᠢᠦ ᠪᠢᠶᠣᠤ᠂ ᠬᠤᠸᠠᠩ ᠽᠦ᠍ ᠨᠠᠷ ᠤ᠋ᠨ ᠲᠦᠰᠢᠮᠡᠯ ᠪᠣᠯᠭᠠᠨ ᠤᠴᠠᠷᠠᠭᠤᠯᠪᠠᠰᠤ ᠮᠠᠰᠢ ᠵᠣᠬᠢᠷᠠᠬᠤ ᠪᠥᠯᠥᠭᠡ ! ᠬᠡᠳᠦᠢ ᠴᠡᠷᠢᠭ ᠦ᠋ᠨ ᠬᠡᠷᠡᠭ ᠲᠦ᠍ᠷ ᠲᠤᠰᠠ ᠶ᠋ᠢ ᠡᠷᠢᠬᠦ ᠪᠣᠯᠪᠠᠴᠤ ᠴᠢᠰᠤ ᠮᠢᠬᠠ ᠪᠠᠨ ᠲᠡᠪᠴᠢᠵᠦ᠂ ᠤᠯᠤᠰ ᠠᠢᠮᠠᠭ ᠠ᠋ᠴᠠ ᠪᠠᠨ ᠤᠷᠪᠠᠭᠰᠠᠨ ᠵᠠᠮᠤᠬᠠ᠂ ᠠᠷᠳᠠ᠂ ᠬᠤᠰᠠᠭᠤᠷ᠂ ᠳᠡᠯᠵᠢᠲᠠᠢ ᠡᠨᠡ ᠳᠥᠷᠪᠡᠨ ᠢ᠋ ᠬᠡᠷᠡᠭᠯᠡᠭᠰᠡᠨ ᠢᠨᠣ ᠳᠠᠷᠤᠢ ᠦᠬᠦᠯ ᠦ᠋ᠨ ᠡᠭᠦᠳᠡ ᠮᠥᠨ ᠪᠤᠶᠤ ! ᠳᠣᠯᠣᠳᠤᠭᠠᠷ ᠲᠤᠷ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠭᠦᠰᠬᠡᠯ ᠦ᠋ᠨ ᠦᠶᠡ ᠶ᠋ᠢᠨ ᠥᠨᠳᠥᠷ ᠰᠡᠴᠡᠨ ᠦᠨᠡᠬᠡᠷ ᠡᠷᠬᠢᠮ ᠪᠥᠭᠡᠳ ᠰᠡᠴᠡᠨ ᠭᠡᠭᠡᠬᠡᠨ ᠪᠣᠯᠠᠢ ! ᠲᠡᠭᠦᠨ ᠦ᠌ ᠨᠡᠷᠡ ᠬᠥᠬᠡ ᠰᠤᠳᠤᠷ ᠲᠤᠷ ᠡᠩ ᠲᠡᠷᠢᠭᠦᠨ ᠭᠠᠷᠬᠤᠢ ᠥᠪᠡᠷᠮᠢᠴᠡ ᠵᠢᠷᠤᠮᠲᠤ ᠠᠮᠢᠰᠬᠤᠯ ᠲᠠᠢ ᠪᠥᠯᠥᠭᠡ᠃ ᠡᠳᠦᠭᠡ ᠡᠴᠦᠰ ᠦ᠋ᠨ ᠦᠶᠡ ᠳ᠋ᠦ᠍ᠷ ᠡᠭᠡᠨᠡᠭᠲᠡ ᠰᠢᠳᠤᠷᠭᠤ ᠶ᠋ᠢᠨ ᠲᠤᠢᠯ ᠢ᠋ᠶ᠋ᠡᠷ ᠦᠬᠦᠵᠦ᠂ ᠨᠢᠭᠡᠨ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠲᠦᠭ ᠲᠦᠮᠡᠨ ᠰᠢᠳᠤᠷᠭᠤ ᠰᠠᠢᠳ ᠤ᠋ᠳ ᠤ᠋ᠨ ᠡᠩ ᠲᠡᠷᠢᠭᠦᠨ ᠣᠬᠢ ᠮᠠᠩᠯᠠᠢ ᠪᠣᠯᠵᠤᠬᠤᠢ᠃ ᠬᠠᠨ ᠠᠭᠤᠯᠠᠨ ᠮᠡᠲᠦ ᠬᠦᠨᠳᠦ ᠦᠬᠦᠯ ᠬᠡᠮᠡᠭᠴᠢ ᠳᠠᠷᠤᠢ ᠡᠨᠡ ᠪᠣᠢ ᠊ᠶᠠ !ᠨᠠᠢ᠍ᠮᠠᠳᠤᠭᠠᠷ ᠲᠤᠷ ᠲᠠᠢᠽᠦ ᠶ᠋ᠢᠨ ᠥᠨᠳᠥᠷ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠰᠤᠪᠢᠯᠠᠵᠤ᠂ ᠦᠷᠡ ᠶ᠋ᠢ ᠬᠠᠲᠤᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠷᠠᠭᠠᠯᠵᠠᠭᠤᠯᠵᠤ᠂ ᠵᠦᠨᠳᠡᠢ ᠶ᠋ᠢ ᠵᠣᠭᠰᠣᠭᠠ ᠪᠠᠷ ᠴᠠᠪᠴᠢᠭᠤᠯᠵᠤ᠂ ᠵᠣᠪᠠᠯᠠᠩ ᠵᠢᠷᠭᠠᠯᠠᠩ ᠢ᠋ ᠡᠨᠡ ᠮᠡᠲᠦ ᠬᠠᠮᠲᠤᠳᠬᠠᠬᠤ ᠪᠠᠷ ᠵᠠᠭᠤᠨ ᠲᠦᠰᠢᠮᠡᠳ ᠦ᠋ᠨ ᠰᠡᠳᠬᠢᠯ ᠬᠡᠷᠬᠢᠨ ᠦᠯᠦ ᠴᠢᠭᠤᠯᠤᠯᠳᠤᠮᠤᠢ ? ᠵᠤᠵᠠᠭᠠᠨ ᠤᠯᠤᠰ ᠢ᠋ ᠬᠡᠷᠬᠢᠨ ᠪᠦᠲᠦᠯ ᠦᠭᠡᠢ ᠤᠯᠤᠰ ᠴᠢᠳᠠᠮᠤᠢ ? ᠬᠡᠳᠦᠢ ᠲᠡᠭᠷᠢ ᠲᠥᠷᠥᠭᠦᠯᠪᠡᠴᠦ ᠥᠪᠡᠷ ᠢ᠋ᠶ᠋ᠡᠨ ᠡᠰᠡ ᠵᠢᠳᠬᠦᠪᠡᠰᠦ ᠪᠣᠯᠤᠮᠤᠢ ᠤᠤ ? ᠡᠷᠲᠡᠨ ᠦ᠌ ᠴᠢᠨ ᠤᠯᠤᠰ ᠤ᠋ᠨ ᠱᠢ ᠬᠤᠸᠠᠩ ᠲᠡᠭᠷᠢ ᠶ᠋ᠢᠨ ᠲᠥᠷᠥᠭᠦᠯᠦᠭᠰᠡᠨ ᠪᠤᠰᠤ ᠤᠤ ? ᠶᠠᠪᠤᠭᠰᠠᠨ ᠠᠨᠤ ᠬᠠᠷᠭᠢᠰ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠲᠡᠷᠡ ᠮᠡᠲᠦ ᠴᠢᠨ ᠤᠯᠤᠰ ᠬᠡᠳᠦᠬᠡᠨ ᠵᠢᠯ ᠪᠣᠯᠪᠠ ? ᠶᠡᠬᠡ ᠶᠤᠸᠠᠨ ᠤᠯᠤᠰ ᠨᠢᠭᠡᠨ ᠵᠠᠭᠤᠨ ᠵᠢᠷᠠᠨ ᠬᠣᠶᠠᠷ ᠣᠨ ᠪᠣᠯᠵᠤᠬᠤᠢ ᠃