ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠬᠣᠷᠢᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ > Хөх судар - Инжинаш <Хорин тавдугаар бүлэг >
266ᠬᠠᠨᠤᠯᠳᠤ ᠲᠠᠢᠽᠦ ᠬᠠᠮᠤᠭ ᠢ᠋ ᠡᠷᠭᠦᠬᠦ ᠬᠠᠭᠠᠨ ᠰᠠᠭᠤᠷᠢᠨ ᠳ᠋ᠤᠷ ᠮᠠᠷᠭᠤᠵᠤ ᠡᠰᠡ ᠰᠠᠭᠤᠪᠠ
ᠬᠠᠪᠤᠲᠤ ᠬᠠᠰᠠᠷ ᠨᠠᠷ ᠬᠠᠮᠲᠤ ᠪᠠᠷ ᠬᠠᠯᠠᠭᠤᠨ ᠴᠢᠰᠤᠨ ᠢ᠋ᠶ᠋ᠠᠨ ᠨᠡᠢᠯᠡᠭᠦᠯᠦᠨ ᠰᠠᠴᠤᠵᠤ ᠲᠠᠩᠭᠠᠷᠢᠭᠯᠠᠪᠠ
ᠬᠣᠷᠢᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ
ᠰᠥᠩ ᠨᠢᠭᠽᠦ᠋ᠩ ᠦ᠋ᠨ ᠴᠢᠩ ᠶᠤᠸᠠᠨ ᠤ᠋ ᠳᠥᠷᠪᠡᠳᠦᠭᠡᠷ ᠣᠨ ᠂
ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠤ᠋ ᠴᠧᠩ ᠠᠨ ᠤ᠋ ᠭᠤᠷᠪᠠᠳᠤᠭᠠᠷ ᠣᠨ ᠂
ᠪᠣᠭᠳᠠ ᠲᠠᠢᠽᠦ ᠭᠤᠴᠢᠨ ᠳᠣᠯᠣᠭᠠᠨ ᠰᠡᠭᠦᠳᠡᠷ ᠲᠡᠢ ᠪᠣᠯᠪᠠ ᠂ ᠰᠢᠷᠠ ᠮᠣᠷᠢᠨ ᠵᠢᠯ
ᠬᠠᠨᠤᠯᠳᠤ ᠲᠠᠢᠽᠦ ᠬᠠᠮᠤᠭ ᠢ᠋ ᠡᠷᠭᠦᠬᠦ ᠬᠠᠭᠠᠨ ᠰᠠᠭᠤᠷᠢᠨ ᠳ᠋ᠤᠷ ᠮᠠᠷᠭᠤᠵᠤ ᠡᠰᠡ ᠰᠠᠭᠤᠪᠠ
ᠬᠠᠪᠤᠲᠤ ᠬᠠᠰᠠᠷ ᠨᠠᠷ ᠬᠠᠮᠲᠤ ᠪᠠᠷ ᠬᠠᠯᠠᠭᠤᠨ ᠴᠢᠰᠤᠨ ᠢ᠋ᠶ᠋ᠠᠨ ᠨᠡᠢᠯᠡᠭᠦᠯᠦᠨ ᠰᠠᠴᠤᠵᠤ ᠲᠠᠩᠭᠠᠷᠢᠭᠯᠠᠪᠠ
ᠠᠴᠢ ᠶ᠋ᠢᠨ ᠬᠠᠷᠢᠭᠤ ᠥᠰᠢᠶᠡ ᠪᠡᠷ ᠬᠠᠷᠢᠭᠤᠯᠬᠠᠴᠢᠳ ᠣᠷᠴᠢᠯᠠᠩ ᠳ᠋ᠤᠷ ᠶᠠᠭᠤᠲᠠᠢ ᠣᠯᠠᠨ ?
ᠠᠭᠤᠷ ᠢ᠋ ᠬᠠᠷᠢᠨ ᠢᠨᠢᠶᠡᠳᠦᠮ ᠢ᠋ᠶ᠋ᠡᠷ ᠥᠩᠭᠡᠷᠡᠭᠦᠯᠦᠭᠰᠡᠳ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠦᠨᠡᠬᠡᠷ ᠴᠥᠭᠡᠨ !
ᠠᠢᠳᠠᠩᠭᠤᠢ ᠾᠧ ᠸᠠᠩ ᠤ᠋ᠨ ᠠᠷᠤᠤᠬᠠᠨ ᠰᠢᠮᠡ ᠢᠨᠤ ᠬᠠᠷᠢᠨ ᠥᠬᠢᠨ ᠪᠣᠯᠤᠭᠠᠳ
ᠠᠯᠠᠯᠲᠠᠢ ᠲᠤᠭᠤᠷᠢᠯ ᠤ᠋ᠨ ᠠᠳᠠᠭ ᠤ᠋ᠨ ᠰᠢᠭᠡᠰᠦ ᠢᠨᠤ ᠭᠡᠳᠡᠷᠭᠦ ᠬᠥᠪᠡᠭᠦᠨ ᠪᠣᠯᠵᠤᠬᠤᠢ ᠃
ᠲᠡᠨᠳᠡᠴᠡ ᠰᠢᠷᠠ ᠮᠣᠷᠢᠨ ᠵᠢᠯ ᠦ᠋ᠨ ᠬᠤᠪᠢ ᠪᠤᠶᠠᠨᠲᠤ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠦ᠌ ᠴᠠᠭᠠᠯᠠᠬᠤ ᠥᠷᠯᠥᠭᠡ ᠦᠬᠡᠷ ᠴᠠᠭ ᠲᠤᠷ ᠲᠠᠢᠽᠦ ᠲᠡᠭᠷᠢ ᠭᠠᠵᠠᠷ ᠢ᠋ ᠳᠠᠬᠢᠵᠤ᠂ ᠤᠷᠢᠳᠤᠰ ᠳᠡᠭᠡᠳᠦᠰ ᠲᠣᠷ ᠮᠥᠷᠭᠥᠵᠦ᠂ ᠥᠵᠢᠨ ᠡᠬᠡ ᠳ᠋ᠡᠭᠡᠨ ᠶᠣᠰᠣᠯᠠᠵᠤ ᠪᠡᠯᠡᠭ ᠢᠷᠦᠭᠡᠳ ᠬᠦᠷᠲᠡᠵᠦ᠂ ᠵᠦᠰᠦᠨ ᠬᠠᠲᠤᠨ ᠯᠤᠬᠠ ᠪᠠᠨ ᠪᠡᠯᠭᠡᠯᠡᠨ ᠵᠣᠯᠭᠠᠯᠳᠤᠵᠤ᠂ ᠶᠡᠬᠡ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠰᠠᠢᠳ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠮᠥᠷᠭᠥᠬᠦ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠥᠯᠵᠡᠢ ᠪᠡᠯᠭᠡᠲᠦ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠪᠠ᠃ ᠨᠠᠷᠠᠨ ᠮᠠᠨᠳᠤᠬᠤ ᠦᠶᠡ ᠳ᠋ᠦ᠍ᠷ ᠭᠠᠳᠠᠭᠠᠳᠤ ᠬᠠᠷᠢᠶᠠᠲᠤ ᠠᠢᠮᠠᠭ ᠤ᠋ᠨ ᠣᠯᠠᠨ ᠡᠵᠡᠳ ᠲᠡᠷᠢᠭᠦᠯᠡᠨ ᠳᠣᠲᠣᠭᠠᠳᠤ ᠬᠣᠶᠠᠷ ᠤᠷᠤᠭ ᠪᠠ ᠲᠣᠷᠭᠠᠨ ᠰᠢᠷᠠ ᠪᠦᠭᠦᠳᠡᠭᠡᠷ ᠰᠥᠭᠥᠳᠴᠦ ᠲᠠᠢᠽᠦ ᠳ᠋ᠦ᠍ᠷ ᠤᠷᠢᠳᠤᠰ ᠤ᠋ᠨ ᠬᠠᠭᠠᠨ ᠰᠠᠭᠤᠷᠢᠨ ᠢ᠋ᠶ᠋ᠠᠨ ᠵᠠᠯᠭᠠᠮᠵᠢᠯᠠᠨ ᠬᠠᠭᠠᠨ ᠰᠠᠭᠤᠮᠤ ᠭᠡᠮᠡᠨ ᠳᠤᠷᠠᠳᠬᠠᠵᠤ᠂ ᠨᠢᠭᠡᠨ ᠡᠪᠬᠡᠮᠡᠯᠲᠦ ᠪᠢᠴᠢᠭ ᠡᠷᠭᠦᠨ ᠪᠠᠷᠢᠪᠠ᠃ ᠲᠠᠢᠽᠦ ᠪᠢᠴᠢᠭ ᠢ᠋ ᠠᠪᠴᠤ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠳ᠋ᠤᠷ ᠥᠭᠴᠦ ᠤᠩᠰᠢᠭᠤᠯᠪᠠᠰᠤ ᠪᠢᠴᠢᠭ ᠦ᠋ᠨ ᠦᠭᠡ :
ᠳᠣᠲᠣᠭᠠᠳᠤ ᠭᠠᠳᠠᠭᠠᠳᠤ᠂ ᠬᠠᠷᠢᠶᠠᠲᠤ ᠰᠠᠢᠳ ᠲᠦᠰᠢᠮᠡᠳ᠂ ᠲᠥᠷᠥᠯ ᠲᠥᠷᠥᠭᠰᠡᠨ ᠤᠷᠤᠭ ᠰᠠᠳᠤᠨ᠂ ᠠᠯᠪᠠᠲᠤ ᠬᠠᠷᠠᠴᠤᠰ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠠᠶᠤᠨ ᠡᠮᠢᠶᠡᠨ ᠰᠥᠭᠥᠳᠴᠦ ᠠᠢᠯᠠᠳᠬᠠᠨ ᠮᠡᠳᠡᠭᠦᠯᠬᠦ ᠢᠨᠤ : ᠡᠷᠲᠡᠨ ᠦ᠌ ᠡᠩ ᠲᠡᠷᠢᠭᠦᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠪᠥᠷᠲᠡ ᠴᠢᠨᠣᠠ ᠠ᠋ᠴᠠ ᠠᠷᠪᠠᠨ ᠦᠶᠡ ᠳ᠋ᠦ᠍ᠷ ᠳᠡᠳ᠋ ᠤᠳᠠᠭᠠ ᠶ᠋ᠢᠨ ᠲᠡᠭᠷᠢ ᠶ᠋ᠢᠨ ᠦᠷᠡᠰ ᠪᠣᠳᠣᠨᠴᠠᠷ ᠪᠣᠭᠳᠠ ᠶ᠋ᠢ ᠮᠡᠨᠳᠦᠯᠡᠵᠦ ᠂ ᠪᠣᠷᠵᠢᠭᠢᠳ ᠣᠪᠣᠭᠲᠤ ᠬᠢᠶᠦᠳ ᠶᠠᠰᠤᠲᠠᠨ ᠪᠣᠯᠤᠭᠠᠳ ᠳᠣᠯᠣᠳᠤᠭᠠᠷ ᠦᠶᠡ ᠳ᠋ᠦ᠍ᠷ ᠡᠩ ᠣᠯᠠᠨ ᠤᠯᠤᠰ ᠠᠢᠮᠠᠭ ᠨᠢᠳᠦᠨ ᠢ᠋ᠶ᠋ᠡᠷ ᠦᠵᠡᠨ ᠴᠢᠬᠢᠨ ᠳ᠋ᠦ᠍ᠷ ᠰᠣᠨᠣᠰᠲᠠᠯᠠ ᠳᠡᠭᠡᠷᠡ ᠲᠡᠭᠷᠢ ᠡᠴᠡ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠪᠡᠯᠭᠡ ᠲᠡᠮᠳᠡᠭ ᠪᠠᠭᠤᠯᠭᠠᠨ᠂ ᠴᠠᠭᠠᠨ ᠭᠡᠷᠡᠯ ᠡᠴᠡ ᠡᠵᠡᠨ ᠦ᠌ ᠪᠡᠶᠡ ᠶ᠋ᠢ ᠬᠤᠪᠢᠯᠤᠨ ᠮᠡᠨᠳᠦᠯᠡᠵᠦᠬᠦᠢ᠃ ᠡᠩ ᠲᠡᠷᠢᠭᠦᠨ ᠲᠡᠭᠷᠢ ᠶ᠋ᠢᠨ ᠦᠷᠡᠰ ᠪᠥᠷᠲᠡ ᠴᠢᠨᠣᠠ ᠶ᠋ᠢᠨ ᠪᠡᠶᠡ ᠡᠴᠡ ᠡᠵᠡᠨ ᠴᠢᠨᠦ ᠪᠡᠶᠡ ᠶ᠋ᠢᠨ ᠭᠡᠭᠡᠨ ᠳ᠋ᠦ᠍ᠷ ᠬᠦᠷᠲᠡᠯᠡ ᠬᠣᠷᠢᠨ ᠲᠠᠪᠤᠨ ᠦᠶᠡ ᠪᠣᠯᠲᠠᠯᠠ ᠪᠧᠲ᠋ᠠ᠋ ᠤᠯᠤᠰ ᠲᠠᠭᠠᠨ ᠤᠯᠠᠮ ᠤᠯᠠᠮ ᠢ᠋ᠶ᠋ᠠᠷ ᠬᠠᠭᠠᠨ ᠰᠠᠭᠤᠭᠰᠠᠭᠠᠷ ᠢᠷᠡᠯᠦᠭᠡ᠃ ᠡᠳᠦᠭᠡ ᠡᠵᠡᠨ ᠦ᠌ ᠭᠡᠭᠡᠨ ᠢ᠋ ᠦᠵᠡᠲᠡᠯᠡ ᠳᠡᠭᠡᠳᠦ ᠪᠠᠳᠠᠷᠠᠩᠭᠤᠢ ᠴᠠᠭᠠᠨ ᠰᠦᠯᠳᠡ ᠲᠡᠭᠷᠢ ᠲᠡᠳᠬᠦᠨ ᠲᠥᠷᠥᠭᠦᠯᠵᠦ᠂ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠨ ᠰᠡᠭᠦᠳᠡᠷ ᠡᠴᠡ ᠡᠬᠢᠯᠡᠨ ᠡᠴᠢᠭᠡ ᠪᠠᠭᠠᠲᠤᠷ ᠡᠵᠡᠨ ᠦ᠌ ᠦᠰ ᠢ᠋ ᠨᠡᠬᠡᠵᠦ᠂ ᠴᠡᠷᠢᠭ ᠪᠠᠢᠭᠤᠯᠤᠨ ᠥᠰᠢᠶᠡ ᠬᠠᠷᠢᠭᠤᠯᠠᠵᠤ ᠴᠢᠳᠠᠭᠰᠠᠨ ᠠ᠋ᠴᠠ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠵᠠᠭᠤᠨ ᠵᠦᠢᠯ ᠦ᠋ᠨ ᠭᠠᠰᠢᠭᠤᠨ ᠢ᠋ ᠠᠮᠰᠠᠵᠤ᠂ ᠤᠨᠤᠭᠰᠠᠨ ᠮᠣᠷᠢ ᠠ᠋ᠴᠠ ᠪᠠᠨ ᠪᠠᠭᠤᠨ ᠪᠤᠰᠤᠳ ᠲᠤᠷ ᠤᠨᠤᠭᠤᠯᠵᠤ᠂ ᠡᠮᠦᠰᠦᠭᠰᠡᠨ ᠳᠡᠪᠡᠯ ᠢ᠋ᠶ᠋ᠡᠨ ᠲᠠᠢᠯᠤᠨ ᠪᠤᠰᠤᠳ ᠲᠤᠷ ᠡᠮᠦᠰᠬᠡᠵᠦ᠂ ᠵᠣᠪᠠᠯᠠᠩ ᠵᠢᠷᠭᠠᠯᠠᠩ ᠢ᠋ ᠬᠠᠮᠲᠤᠳᠬᠠᠨ ᠶᠠᠪᠤᠵᠤ᠂ ᠣᠯᠠᠨ ᠴᠡᠷᠢᠭ ᠲᠦᠰᠢᠮᠡᠳ ᠢ᠋ ᠴᠤᠭᠯᠠᠭᠤᠯᠤᠨ ᠤᠯᠤᠰ ᠠᠢᠮᠠᠭ ᠢ᠋ ᠬᠤᠷᠢᠶᠠᠮᠵᠢᠯᠠᠵᠤ᠂ ᠶᠡᠬᠡ ᠲᠥᠷᠥ ᠶ᠋ᠢ ᠲᠡᠭᠰᠢᠷᠡᠭᠦᠯᠵᠦ᠂ ᠲᠡᠢᠨ ᠳᠠᠢᠰᠤᠨᠠ ᠳᠡᠭᠡᠳᠦ ᠲᠡᠭᠷᠢ ᠶ᠋ᠢᠨ ᠢᠪᠡᠭᠡᠯ ᠬᠠᠷᠠᠭᠠᠯᠵᠠᠯᠭᠠ ᠳᠠᠬᠢᠨ ᠳᠠᠪᠲᠠᠨ ᠢᠯᠡᠷᠡᠵᠦ᠂ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠲᠤᠷ ᠮᠡᠳᠡᠭᠦᠯᠵᠦ᠂ ᠬᠣᠯᠠ ᠣᠢᠷᠠ ᠮᠢᠩᠭᠠᠨ ᠭᠠᠵᠠᠷ ᠢ᠋ ᠬᠤᠷᠢᠶᠠᠯᠭᠠᠨ᠂ ᠬᠡᠳᠦᠢᠪᠡᠷ ᠣᠢᠷᠠᠯᠴᠠᠭᠠ ᠬᠡᠷᠡᠢᠳ᠂ ᠨᠠᠢ᠍ᠮᠠᠨ ᠤ᠋ ᠵᠡᠷᠭᠡ ᠶ᠋ᠢᠨ ᠬᠡᠳᠦᠨ ᠥᠴᠦᠬᠡᠨ ᠤᠯᠤᠰ ᠠᠢᠮᠠᠭ ᠤ᠋ᠳ ᠪᠣᠢ ᠪᠣᠯᠪᠠᠴᠤ ᠡᠵᠡᠨ ᠦ᠌ ᠡᠷᠬᠡ ᠪᠤᠶᠠᠨ ᠳ᠋ᠤᠷ ᠡᠴᠦᠰ ᠲᠦ᠍ᠷ ᠮᠥᠨ ᠬᠤᠷᠢᠶᠠᠭᠳᠠᠬᠤ ᠲᠤᠯᠠ ᠣᠯᠳᠠᠬᠤᠯᠠ ᠳᠡᠭᠷᠢᠯᠢᠭ ᠡᠵᠡᠨ ᠤᠷᠢᠳᠤᠰ ᠡᠪᠦᠭᠡᠳ ᠦ᠋ᠨ ᠬᠠᠭᠠᠨ ᠰᠠᠭᠤᠷᠢᠨ ᠢ᠋ᠶ᠋ᠠᠨ ᠵᠠᠯᠭᠠᠮᠵᠢᠯᠠᠨ ᠰᠠᠭᠤᠪᠠᠰᠤ᠂ ᠦᠯᠡᠵᠦ ᠲᠤᠰᠤᠭᠰᠠᠨ ᠥᠴᠦᠬᠡᠨ ᠠᠢᠮᠠᠭ ᠤ᠋ᠳ᠂ ᠣᠷᠬᠢᠵᠤ ᠭᠡᠭᠡᠭᠳᠡᠭᠰᠡᠨ ᠣᠯᠠᠨ ᠤᠯᠤᠰ ᠤ᠋ᠳ ᠢ᠋ ᠬᠤᠷᠢᠶᠠᠮᠵᠢᠯᠠᠬᠤ ᠳ᠋ᠤᠷ ᠬᠢᠯᠪᠠᠷ ᠪᠣᠯᠤᠭᠠᠳ ᠶᠡᠬᠡ ᠲᠥᠷᠥ ᠨᠡᠢᠭᠡᠮ ᠦᠪᠡᠳᠡᠭᠰᠢ ᠪᠣᠯᠤᠮᠤᠢ᠃ ᠡᠢᠮᠦ ᠪᠣᠯᠪᠠᠰᠤ ᠤᠷᠢᠳᠤ ᠶ᠋ᠢᠨ ᠬᠠᠭᠠᠨ ᠡᠪᠦᠭᠡᠳ ᠦ᠋ᠨ ᠰᠠᠨᠠᠭᠠᠨ ᠢ᠋ ᠵᠠᠯᠭᠠᠮᠵᠢᠯᠠᠵᠤ᠂ ᠳᠡᠭᠡᠭᠰᠢᠳᠡ ᠪᠠᠭᠠᠲᠤᠷ ᠡᠵᠡᠨ ᠦ᠌ ᠮᠤᠭᠣᠨ ᠢ᠋ ᠭᠡᠷᠡᠯᠲᠦᠭᠦᠯᠦᠨ ᠬᠣᠢᠰᠢᠳᠠ ᠦᠷᠡ ᠠᠴᠢᠷ ᠰᠠᠭᠤᠷᠢᠨ ᠬᠣᠴᠣᠷᠤᠭᠤᠯᠤᠨ ᠳᠣᠷᠣᠭᠰᠢᠳᠠ ᠤᠯᠤᠰ ᠠᠯᠪᠠᠲᠤ ᠨᠡᠷᠡ ᠢᠪᠡᠭᠡᠯ ᠲᠡᠢ ᠪᠣᠯᠬᠤ ᠣᠯᠳᠠᠬᠤᠯᠠ ᠤᠷᠢᠳᠤᠰ ᠡᠪᠦᠭᠡᠳ ᠦ᠋ᠨ ᠬᠠᠭᠠᠨ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠨ᠂ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠶᠢᠰᠦᠨ ᠡᠷᠳᠡᠨᠢᠰ ᠦ᠋ᠨ ᠥᠨᠳᠥᠷ ᠰᠢᠷᠡᠭᠡᠨ ᠳ᠋ᠡᠭᠡᠨ ᠰᠠᠭᠤᠵᠤ᠂ ᠳᠡᠭᠡᠷᠡ ᠲᠡᠭᠷᠢ ᠳᠣᠣᠷᠠ ᠭᠠᠵᠠᠷ᠂ ᠳᠠᠯᠳᠠ ᠰᠦᠯᠳᠡ ᠰᠠᠬᠢᠭᠤᠯᠰᠤᠨ᠂ ᠢᠯᠡ ᠬᠥᠮᠦᠨ ᠠᠮᠢᠲᠠᠨ ᠨᠡᠢᠲᠡ ᠪᠡᠷ ᠦ᠋ᠨ ᠰᠠᠨᠠᠭᠠᠨ ᠳ᠋ᠤᠷ ᠨᠡᠢᠴᠡᠭᠦᠯᠦᠨ ᠬᠦᠰᠡᠬᠦ ᠶ᠋ᠢ ᠢᠨᠤ ᠭᠦᠢᠴᠡᠭᠡᠵᠦ᠂ ᠠᠭᠯᠠᠭ ᠶᠡᠬᠡ ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢᠨ ᠠᠯᠢᠪᠠ ᠪᠦᠬᠦᠨ ᠢ᠋ ᠨᠡᠢᠭᠡᠮᠯᠡᠨ ᠡᠵᠡᠯᠡᠵᠦ᠂ ᠠᠮᠢ ᠲᠠᠢ ᠪᠦᠬᠦᠨ ᠠᠮᠢᠲᠠᠨ ᠢ᠋ ᠠᠮᠤᠭᠤᠯᠤᠨ ᠵᠢᠷᠭᠠᠭᠤᠯᠵᠤ ᠠᠢᠯᠠᠳᠤᠨ ᠰᠣᠶᠣᠷᠬᠠ! ᠠᠯᠢᠪᠠ ᠪᠦᠭᠦᠳᠡᠭᠡᠷ ᠠᠶᠤᠨ ᠴᠡᠴᠡᠷᠡᠨ ᠬᠦᠰᠡᠨ ᠪᠠᠢᠮᠤᠢ ᠬᠡᠮᠡᠵᠦᠬᠦᠢ᠃
ᠲᠠᠢᠽᠦ ᠰᠣᠨᠣᠰᠴᠤ ᠪᠠᠷᠠᠭᠠᠳ ᠪᠠᠬᠠᠨ ᠲᠡᠳᠦᠢ ᠪᠠᠰᠤᠮᠵᠢᠯᠠᠨ ᠮᠦᠰᠢᠶᠡᠭᠡᠳ ᠣᠶᠤᠲᠤ ᠰᠡᠴᠡᠨ ᠢ᠋ᠶ᠋ᠡᠷ ᠤᠯᠠᠭᠠᠨ ᠦᠵᠦᠭ ᠪᠠᠷᠢᠭᠤᠯᠵᠤ᠂ ᠥᠪᠡᠷ ᠦ᠋ᠨ ᠦᠭᠡ ᠪᠡᠷ ᠬᠡᠳᠦᠨ ᠪᠠᠳᠠᠭ ᠴᠣᠬᠣᠯᠠᠨ ᠪᠢᠴᠢᠵᠦ ᠪᠠᠭᠤᠯᠭᠠᠭᠠᠳ ᠬᠥᠭᠵᠢᠮ ᠡᠭᠦᠰᠬᠡᠨ ᠬᠡᠩᠭᠡᠷᠭᠡ ᠳᠠᠭᠤᠷᠢᠰᠴᠤ ᠲᠠᠢᠽᠦ ᠶ᠋ᠢᠨ ᠪᠡᠶᠡ ᠲᠠᠪᠠᠲᠠᠢ ᠣᠷᠳᠣᠨ ᠳ᠋ᠠᠭᠠᠨ ᠵᠠᠯᠠᠷᠠᠨ ᠪᠠᠭᠤᠪᠠᠢ᠃ ᠡᠭᠦᠨ ᠳ᠋ᠦ᠍ᠷ ᠲᠥᠷᠥ ᠶ᠋ᠢᠨ ᠣᠯᠠᠨ ᠲᠦᠰᠢᠮᠡᠳ ᠰᠠᠢᠳ ᠪᠠ ᠤᠯᠤᠰ ᠬᠠᠷᠢᠶᠠᠲᠤ ᠨᠤᠭᠤᠳ ᠪᠦᠭᠦᠳᠡᠭᠡᠷ ᠡᠭᠦᠯᠡᠨ ᠮᠡᠲᠦ ᠨᠡᠭᠦᠯᠡᠨ ᠢᠷᠡᠵᠦ ᠴᠤᠭᠯᠠᠨ ᠦᠵᠡᠪᠡᠰᠦ᠂ ᠴᠣᠬᠣᠯᠠᠭᠰᠠᠨ ᠦᠭᠡᠰ ᠢᠨᠤ :
ᠬᠠᠭᠠᠨ ᠰᠠᠭᠤᠵᠤ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠪᠣᠯᠤᠮᠤᠢ ᠬᠡᠮᠡᠭᠴᠢ
ᠬᠠᠮᠤᠭ ᠪᠦᠬᠦᠨ ᠦ᠌ ᠡᠴᠢᠭᠡ ᠡᠬᠡ ᠪᠣᠯᠬᠤ ᠠᠨᠤ ᠪᠤᠶᠤ᠂
ᠬᠠᠮᠤᠭ ᠪᠦᠬᠦᠨ ᠢ᠋ ᠥᠪᠡᠷ ᠦ᠋ᠨ ᠦᠷᠡ ᠮᠡᠲᠦ ᠥᠷᠥᠰᠢᠶᠡᠵᠦ
ᠬᠠᠯᠠᠬᠠᠢ ᠪᠢ ᠦᠨᠡᠬᠡᠷ ᠴᠢᠳᠠᠭᠠᠳᠤᠢ ᠶ᠋ᠢᠨ ᠲᠤᠯᠠᠳᠠ
ᠬᠣᠭᠣᠰᠣᠨ ᠨᠡᠷᠡ ᠶ᠋ᠢᠨ ᠲᠡᠳᠦᠢ ᠲᠡᠷᠡ ᠬᠦ᠌ ᠬᠠᠭᠠᠨ ᠢ᠋
ᠬᠠᠯᠭᠤ ᠪᠢ ᠦᠨᠡᠬᠡᠷ ᠦᠢᠯᠡᠳᠬᠦ ᠦᠭᠡᠢ ᠪᠤᠶᠤ᠃
ᠬᠠᠯᠠᠭᠤᠨ ᠰᠠᠨᠠᠭᠠᠲᠤ ᠰᠠᠢᠳ ᠡᠷᠳᠡᠮᠲᠡᠨ ᠲᠦᠰᠢᠮᠡᠳ ᠲᠠ ᠪᠠᠷ
ᠬᠠᠷᠰᠢᠯᠳᠤ ᠡᠨᠡ ᠬᠡᠷᠡᠭ ᠢ᠋ ᠳᠠᠬᠢᠵᠤ ᠪᠢᠲᠡᠭᠡᠢ ᠳᠤᠷᠠᠳᠬᠠ ᠬᠡᠮᠡᠵᠦᠬᠦᠢ᠃
ᠵᠢᠨᠦᠩ ᠮᠤᠬᠤᠯᠢ ᠦᠵᠡᠭᠡᠳ ᠣᠯᠠᠨ ᠤ᠋ ᠵᠦᠭ ᠥᠭᠦᠯᠡᠷᠦᠨ᠄ 《 ᠶᠠᠮᠪᠠᠷ ᠪᠠᠢᠨᠠ? ᠮᠢᠨᠦ ᠬᠡᠯᠡᠭᠰᠡᠨ ᠡᠴᠡ ᠭᠠᠷᠪᠠᠤ ? 》 ᠬᠡᠮᠡᠪᠡᠢ᠃ ᠤᠭ ᠠ᠋ᠴᠠ ᠡᠨᠡ ᠬᠡᠷᠡᠭ ᠢ᠋ ᠵᠥᠪᠯᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠶ᠋ᠢᠨ ᠬᠡᠯᠡᠭᠰᠡᠨ ᠢᠨᠤ : 《 ᠡᠨᠡ ᠬᠡᠷᠡᠭ ᠬᠡᠷᠬᠢᠪᠡᠴᠦ ᠦᠯᠦ ᠪᠦᠲᠦᠮᠦᠢ᠂ ᠮᠠᠨ ᠤ᠋ ᠡᠵᠡᠨ ᠤᠭ ᠠ᠋ᠴᠠ ᠲᠡᠳᠡᠭᠡᠷ ᠬᠠᠭᠠᠨ ᠨᠡᠷᠡᠯᠡᠭᠰᠡᠨ ᠪᠦᠬᠦᠨ ᠢ᠋ ᠴᠥᠮ ᠮᠠᠰᠢᠳᠠ ᠪᠠᠰᠤᠮᠵᠢᠯᠠᠳᠠᠭ ᠪᠥᠯᠥᠭᠡ᠃ ᠲᠡᠢᠨ ᠬᠦ᠌ ᠡᠨᠡ ᠬᠠᠭᠠᠨ ᠢ᠋ ᠬᠡᠷᠬᠢᠪᠡᠴᠦ ᠦᠯᠦ ᠰᠠᠭᠤᠬᠤ ᠶ᠋ᠢ ᠣᠯᠵᠤ ᠮᠡᠳᠡᠪᠡ᠃ 》 ᠲᠡᠳᠦᠢ ᠣᠯᠠᠨ ᠢ᠋ᠶ᠋ᠠᠷ ᠲᠠᠢᠽᠦ ᠶ᠋ᠢᠨ ᠦᠨᠡᠨᠴᠢ ᠶ᠋ᠢ ᠭᠠᠢᠬᠠᠨ ᠪᠢᠰᠢᠷᠡᠭᠡᠳ ᠬᠠᠳᠠᠨ ᠬᠤᠷᠴᠠ ᠠ᠋ᠴᠠ ᠠᠶᠤᠨ ᠰᠢᠷᠪᠡᠭᠡᠲᠦᠪᠡᠢ᠃ ᠳᠠᠭᠠᠯᠳᠤᠭᠠ ᠥᠨᠳᠥᠷ ᠰᠡᠴᠡᠨ ᠢᠷᠡᠵᠦ ᠡᠵᠡᠨ ᠦ᠌ ᠵᠠᠬᠢᠶᠠ ᠶ᠋ᠢ ᠤᠯᠠᠮᠵᠢᠯᠠᠨ ᠵᠠᠬᠢᠷᠤᠨ : 《 ᠡᠵᠡᠨ ᠦ᠌ ᠵᠠᠬᠢᠶᠠ : ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠬᠡᠷᠡᠢᠳ ᠦ᠋ᠨ ᠲᠡᠢᠨ ᠡᠴᠡ ᠬᠤᠷᠢᠶᠠᠮᠵᠢᠯᠠᠭᠰᠠᠨ ᠬᠠᠭᠠᠨ ᠬᠥᠮᠦᠨ ᠦ᠌ ᠭᠡᠷ ᠤᠷᠲᠤ᠂ ᠥᠷᠭᠥᠭᠡ ᠮᠠᠢᠬᠠᠨ᠂ ᠰᠢᠭᠦᠷ ᠬᠠᠯᠬᠠᠪᠴᠢ᠂ ᠲᠤᠭ ᠳᠠᠯᠪᠠᠭᠠ ᠪᠠ ᠴᠠᠴᠤᠭ ᠴᠢᠮᠡᠭ᠂ ᠳ᠋ᠠᠳᠠᠷ ᠪᠥᠭᠲᠥᠭᠡ᠂ ᠲᠡᠷᠭᠡ ᠵᠢᠭᠰᠠᠭᠠᠯ᠂ ᠰᠦᠬᠡ ᠪᠢᠯᠠᠭᠤ ᠶ᠋ᠢᠨ ᠵᠦᠢᠯ ᠦ᠋ᠨ ᠵᠠᠭᠤᠨ ᠢᠯᠡᠭᠦᠦ ᠲᠡᠷᠭᠡ ᠶ᠋ᠢᠨ ᠡᠳ᠋ ᠲᠠᠸᠠᠷ ᠰᠠᠪᠠ ᠵᠡᠪᠰᠡᠭ ᠢ᠋ ᠨᠡᠢᠲᠡ ᠪᠡᠷ ᠴᠥᠮ ᠬᠣᠷᠢᠶᠠᠨ ᠲᠠᠯᠪᠢᠵᠤ᠂ ᠰᠠᠩ ᠬᠥᠮᠥᠷᠭᠡ ᠳ᠋ᠦ᠍ᠷ ᠳᠠᠷᠤᠵᠤ ᠬᠤᠷᠢᠶᠠᠭᠲᠤᠨ᠃ ᠮᠢᠨᠦ ᠵᠢᠭᠰᠠᠭᠠᠯ ᠪᠥᠭᠲᠥᠭᠡ ᠳ᠋ᠦ᠍ᠷ ᠲᠡᠳᠡᠭᠡᠷ ᠵᠡᠷᠭᠡ ᠶ᠋ᠢᠨ ᠰᠢᠷᠠ ᠯᠤᠤᠲᠤ ᠬᠠᠭᠠᠨ ᠬᠥᠮᠦᠨ ᠦ᠌ ᠬᠡᠷᠡᠭᠯᠡᠯ ᠢ᠋ ᠬᠡᠷᠬᠢᠪᠡᠴᠦ ᠣᠷᠣᠭᠤᠯᠤᠨ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠦᠭᠡᠢ᠂ ᠦᠨᠡᠨ ᠬᠠᠭᠠᠨ ᠪᠤᠰᠤ ᠪᠥᠭᠡᠳ ᠬᠠᠭᠠᠨ ᠮᠡᠲᠦ ᠠᠭᠠᠰᠢᠯᠠᠬᠤᠢ ᠶ᠋ᠢ ᠦᠢᠯᠡᠳᠴᠦ ᠪᠣᠯᠬᠤ ᠦᠭᠡᠢ᠃ ᠪᠢ ᠥᠪᠡᠷ ᠦ᠋ᠨ ᠰᠡᠳᠬᠢᠯ ᠡᠴᠡ ᠪᠡᠨ ᠰᠢᠷᠪᠡᠭᠡᠲᠦᠮᠦᠢ ! 》 ᠬᠡᠮᠡᠵᠦᠬᠦᠢ᠃
ᠲᠡᠭᠦᠨᠴᠡ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠲᠠᠢᠽᠦ ᠶ᠋ᠢᠨ ᠬᠣᠯᠠ ᠲᠠᠲᠠᠪᠰᠢ ᠲᠠᠢ ᠶ᠋ᠢ ᠭᠠᠢᠬᠠᠯᠳᠤᠨ ᠰᠦᠰᠦᠭᠯᠡᠪᠡᠢ᠃ ᠳᠡᠳ᠋ ᠡᠳᠦᠷ ᠤᠯᠤᠰ ᠤ᠋ᠨ ᠶᠡᠬᠡ ᠬᠤᠷᠢᠮ ᠳ᠋ᠦᠷ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠲᠣᠷᠭᠠᠨ ᠰᠢᠷᠠ ᠥᠯᠵᠡᠢᠲᠦ ᠰᠠᠷᠬᠤᠳ ᠪᠠᠷᠢᠵᠤ ᠪᠡᠯᠭᠡᠯᠡᠨ ᠮᠥᠷᠭᠥᠵᠦ ᠪᠠᠷᠠᠭᠰᠠᠨ ᠤ᠋ ᠬᠣᠢᠨᠠ᠂ ᠡᠵᠡᠨ ᠰᠠᠢᠳ ᠬᠤᠨᠳᠠᠭᠠ ᠡᠷᠭᠦᠨ ᠬᠤᠷᠢᠮᠯᠠᠯᠴᠠᠨ ᠨᠠᠢᠷᠯᠠᠬᠤᠶᠠ᠂ ᠲᠣᠷᠭᠠᠨ ᠰᠢᠷᠠ ᠴᠥᠭᠥᠴᠡ ᠪᠡᠨ ᠡᠷᠭᠦᠵᠦ᠂ ᠲᠠᠢᠽᠦ ᠶ᠋ᠢᠨ ᠨᠢᠳᠤᠨᠤᠨ ᠵᠢᠯ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠡᠭᠡᠬᠦ ᠲᠤᠬᠠᠢ ᠳ᠋ᠤᠷ ᠵᠢᠨᠦᠩ ᠰᠥᠨᠢ ᠵᠣᠯᠭᠠᠷᠠ ᠣᠷᠣᠭᠠᠳ ᠮᠠᠯᠠᠭᠠ ᠪᠠᠨ ᠠᠪᠴᠤ ᠮᠠᠭᠰᠢᠵᠤ ᠮᠥᠷᠭᠥᠨ᠂ ᠪᠦᠰᠡ ᠪᠡᠨ ᠪᠠᠷᠢᠵᠤ ᠪᠥᠬᠥᠢᠨ ᠰᠥᠭᠥᠳᠴᠦ ᠬᠣᠷᠮᠣᠢ ᠪᠠᠨ ᠬᠤᠷᠢᠶᠠᠵᠤ ᠬᠣᠶᠠᠷᠲᠠ ᠮᠥᠷᠭᠥᠭᠡᠳ ᠬᠣᠢᠰᠢ ᠤᠬᠤᠷᠢᠭᠠᠳ ᠣᠷᠣᠭᠰᠢ ᠲᠠᠪᠰᠢᠵᠤ ᠵᠣᠭᠰᠣᠭᠰᠠᠨ ᠢ᠋ ᠠᠨᠤ ᠠᠰᠠᠭᠤᠭᠰᠠᠨ ᠳ᠋ᠤᠷ ᠲᠠᠢᠽᠦ ᠮᠦᠰᠢᠶᠡᠵᠦ ᠵᠠᠬᠢᠷᠤᠨ : 《 ᠵᠢᠨᠦᠩ ᠦ᠋ᠨ ᠮᠠᠯᠠᠭᠠ ᠪᠠᠨ ᠠᠪᠴᠤ ᠮᠠᠭᠰᠢᠵᠤ ᠮᠥᠷᠭᠥᠭᠰᠡᠨ ᠢᠨᠤ ᠮᠢᠨᠦ ᠪᠡᠶᠡ ᠶ᠋ᠢ ᠲᠡᠷᠢᠭᠦᠯᠡᠨ ᠮᠠᠰᠢᠳᠠ ᠠᠶᠤᠭᠰᠠᠨ ᠮᠡᠲᠦ ᠠᠭᠠᠰᠢᠯᠠᠨ ᠳᠤᠲᠠᠭᠠ ᠬᠡᠮᠡᠭᠰᠡᠨ ᠦᠭᠡ ᠃ ᠪᠦᠰᠡ ᠪᠡᠨ ᠪᠠᠷᠢᠵᠤ ᠪᠥᠬᠥᠢᠨ ᠰᠥᠭᠥᠳᠦᠭᠰᠡᠨ ᠢᠨᠤ ᠪᠦᠭᠦᠳᠡ ᠲᠦᠰᠢᠮᠡᠳ ᠢ᠋ ᠪᠦᠷᠢᠨᠡ ᠳᠠᠭᠠᠭᠤᠯᠵᠤ ᠶᠠᠪᠤ ᠬᠡᠮᠡᠭᠰᠡᠨ ᠰᠠᠨᠠᠭᠠᠨ᠂ ᠬᠣᠷᠮᠣᠢ ᠪᠠᠨ ᠬᠤᠷᠢᠶᠠᠵᠤ ᠬᠣᠶᠠᠷᠲᠠ ᠮᠥᠷᠭᠥᠭᠰᠡᠨ ᠢᠨᠦ ᠬᠣᠷᠣᠭᠠ ᠬᠦᠷᠢᠶᠡ ᠪᠡᠨ ᠬᠤᠮᠪᠢᠨ ᠠᠪᠴᠤ ᠡᠴᠢᠶᠡ ᠬᠡᠮᠡᠬᠦ ᠦᠭᠡ᠂ ᠬᠣᠢᠰᠢ ᠤᠬᠤᠷᠢᠭᠠᠳ ᠣᠷᠣᠭᠰᠢ ᠳᠡᠪᠰᠢᠭᠰᠡᠨ ᠢᠨᠤ ᠬᠠᠭᠤᠷᠴᠤ ᠳᠤᠲᠠᠭᠠᠭᠠᠳ ᠬᠡᠮᠵᠢᠵᠦ ᠬᠥᠭᠡᠭᠡᠶᠡ ᠬᠡᠮᠡᠭᠰᠡᠨ ᠰᠠᠨᠠᠭᠠᠨ ᠪᠣᠯᠠᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠮᠤᠭ ᠲᠥᠷᠥ ᠶ᠋ᠢᠨ ᠬᠣᠲᠠᠯᠠᠭᠠᠷ ᠬᠠᠷᠢᠯᠴᠠᠨ ᠶᠡᠬᠡᠯᠡ ᠭᠠᠢᠬᠠᠯᠳᠤᠪᠠᠢ᠃
ᠤᠳᠠᠭᠰᠠᠨ ᠦᠭᠡᠢ ᠬᠠᠪᠤᠷ ᠤ᠋ᠨ ᠠᠭᠤᠷ ᠣᠷᠣᠵᠤ ᠬᠠᠢᠯᠤᠨ ᠭᠡᠰᠴᠦ ᠤᠷᠤᠰᠬᠤ ᠰᠢᠬᠠᠭᠰᠠᠨᠠ᠂ ᠬᠠᠷᠠᠭᠤᠯ ᠤ᠋ᠨ ᠬᠥᠮᠦᠨ ᠢᠷᠡᠵᠦ : 《 ᠬᠠᠷᠰᠢᠯᠳᠤ ᠨᠠᠢ᠍ᠮᠠᠨ ᠤᠯᠤᠰ ᠬᠠᠷᠠᠳᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠰᠢᠯᠭᠠᠵᠤ᠂ ᠬᠠᠮᠢᠭᠠᠰᠢ ᠮᠣᠷᠳᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠢᠨᠦᠩ ᠮᠤᠬᠤᠯᠢ ᠰᠡᠵᠢᠭᠯᠡᠨ ᠵᠠᠶᠠᠭᠠᠲᠤ ᠡᠵᠡᠨ ᠳ᠋ᠦ᠍ᠷ ᠮᠡᠳᠡᠭᠦᠯᠵᠦ᠂ ᠵᠡᠯᠮᠡ ᠵᠡᠪᠡ ᠶ᠋ᠢ ᠠᠪᠴᠤ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠴᠡᠷᠢᠭ ᠰᠢᠯᠭᠠᠵᠤ᠂ ᠵᠠᠬᠠ ᠬᠢᠵᠠᠭᠠᠷ ᠢ᠋ᠶ᠋ᠠᠨ ᠰᠡᠷᠭᠡᠢᠯᠡᠨ ᠰᠠᠬᠢᠷᠠ ᠮᠣᠷᠳᠠᠪᠠᠢ᠃ ᠪᠠᠰᠠ ᠶᠠᠭᠠᠬᠢᠨ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠬᠥᠳᠡᠯᠪᠡ ? ᠬᠡᠮᠡᠪᠡᠰᠦ : ᠦᠵᠡᠰᠡ ᠨᠢᠳᠤᠨᠤᠨ ᠵᠢᠯ ᠵᠠᠮᠤᠬᠠ ᠳᠠᠯᠳᠠᠭᠤᠷ ᠨᠠᠢ᠍ᠮᠠᠨ ᠳ᠋ᠤᠷ ᠡᠯᠴᠢ ᠢᠯᠡᠭᠡᠭᠡᠳ ᠬᠡᠷᠪᠡ ᠴᠡᠷᠢᠭ ᠲᠤᠰᠠᠯᠠᠪᠠᠰᠤ ᠰᠣᠯᠤᠩᠭᠤᠸᠠ ᠶ᠋ᠢ ᠥᠭᠴᠦ ᠤᠷᠤᠭ ᠪᠠᠷᠢᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠨᠠᠢ᠍ᠮᠠᠨ ᠤ᠋ ᠠᠯᠲᠠᠨᠱᠠᠭᠠ ᠶᠠᠭᠤᠨ ᠳ᠋ᠤᠷ ᠤᠷᠤᠭ ᠢ᠋ ᠨᠢᠴᠤᠬᠤ ᠦᠭᠡ ᠭᠠᠷᠪᠠ ᠭᠡᠮᠡᠨ ᠴᠢᠦᠢ ᠱᠢ ᠯᠢ ᠶ᠋ᠢ ᠵᠠᠯᠠᠵᠤ ᠵᠥᠪᠳᠡᠭᠡᠳ ᠴᠡᠷᠢᠭ ᠢ᠋ᠶ᠋ᠡᠷ ᠤᠷᠤᠭ ᠢ᠋ᠶ᠋ᠠᠨ ᠨᠡᠬᠡᠷᠡ ᠡᠴᠢᠬᠦᠶᠡ᠂ ᠲᠠᠢᠶᠠᠩ ᠬᠠᠭᠠᠨ ᠳ᠋ᠤᠷ ᠬᠡᠷᠡᠢᠳ ᠦ᠋ᠨ ᠤᠷᠢᠳᠤ ᠶ᠋ᠢᠨ ᠦᠰ ᠢ᠋ ᠨᠡᠬᠡᠵᠦ᠂ ᠡᠨᠡ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠡᠪᠳᠡᠭᠳᠡᠭᠰᠡᠨ ᠦᠶᠡᠰ ᠲᠣᠷ ᠤᠬᠢᠶᠠᠨ ᠠᠷᠢᠯᠭᠠᠰᠤᠭᠠᠢ ᠭᠡᠮᠡᠨ ᠰᠢᠯᠲᠠᠭᠯᠠᠵᠤ᠂ ᠴᠢᠦᠢ ᠱᠢ ᠯᠢ ᠬᠣᠯᠠᠰᠤᠪᠴᠢ᠂ ᠢᠳᠡᠷ ᠳᠣᠪᠣ ᠬᠣᠶᠠᠭᠤᠯᠠ ᠶ᠋ᠢ ᠠᠪᠴᠤ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠰᠢᠯᠭᠠᠨ ᠰᠠᠶ᠋ᠢ ᠬᠡᠷᠡᠢᠳ ᠦ᠋ᠨ ᠵᠠᠬᠠ ᠬᠦᠷᠲᠡᠯᠡ ᠵᠠᠮᠤᠬᠠ ᠬᠡᠳᠦᠢᠨᠡᠢ ᠲᠤᠷᠰᠢᠵᠤ ᠮᠡᠳᠡᠭᠡᠳ ᠪᠠᠰᠠ ᠳᠠᠯᠳᠠᠭᠤᠷ ᠤᠭᠲᠤᠨ ᠡᠴᠢᠵᠦ : ᠶᠠᠭᠤᠨ ᠳ᠋ᠤᠷ ᠰᠠᠢᠬᠠᠨ ᠢ᠋ᠶ᠋ᠠᠷ ᠤᠷᠤᠭ ᠦᠯᠦ ᠪᠠᠷᠢᠮᠤᠢ ? ᠡᠨᠡ ᠨᠠᠮᠤᠷ ᠢ᠋ᠶ᠋ᠠᠷ ᠬᠦᠷᠭᠡᠵᠦ ᠡᠴᠢᠨ ᠬᠥᠷ ᠨᠠᠢᠷ ᠲᠠᠢ ᠪᠠᠷ ᠤᠷᠤᠭ ᠪᠠᠷᠢᠰᠤᠭᠠᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠦᠢ ᠱᠢ ᠯᠢ ᠨᠠᠷ ᠢᠲᠡᠭᠡᠵᠦ ᠡᠭᠡᠬᠦ ᠵᠠᠮ ᠳ᠋ᠤᠷ ᠢ᠋ᠶ᠋ᠠᠨ ᠴᠢᠦᠢ ᠱᠢ ᠯᠢ ᠡᠴᠢᠭᠡ ᠴᠢᠦᠢ ᠰᠢᠦᠸᠠᠢ ᠡᠥ ᠶ᠋ᠢᠨ ᠬᠣᠷᠣᠰᠤᠯ ᠢ᠋ ᠰᠠᠨᠠᠵᠤ᠂ ᠪᠡᠯᠡᠨ ᠪᠦᠬᠦᠢ ᠴᠡᠷᠢᠭ ᠢ᠋ᠶ᠋ᠡᠷ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠢᠬᠤ ᠳ᠋ᠤᠨᠢ ᠭᠡᠨᠡᠳᠡᠭᠦᠯᠦᠨ ᠣᠷᠣᠵᠤ ᠨᠢᠭᠡᠨ ᠵᠡᠷᠭᠡ ᠰᠠᠢᠲᠤᠷ ᠲᠠᠪᠴᠢᠯᠠᠰᠤᠭᠠᠢ ᠭᠡᠮᠡᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠨᠤᠲᠤᠭᠯᠠᠬᠤ ᠭᠠᠯᠠᠭᠤᠲᠤ ᠠᠭᠤᠯᠠᠨ ᠳ᠋ᠤᠷ ᠬᠦᠷᠴᠦ ᠢᠷᠡᠲᠡᠯᠡ ᠠᠭᠤᠯᠠᠨ ᠤ᠋ ᠠᠷᠤ ᠠ᠋ᠴᠠ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠲᠠᠪᠤᠨ ᠠᠩᠭᠢ ᠪᠠᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠢ᠋ ᠬᠠᠮᠵᠢᠵᠤ ᠠᠪᠤᠭᠰᠠᠨ ᠳ᠋ᠤᠷ ᠴᠢᠦᠢ ᠱᠢ ᠯᠢ ᠶᠡᠬᠡᠯᠡ ᠰᠣᠴᠢᠵᠤ᠂ ᠪᠠᠰᠠ ᠮᠤᠬᠤᠯᠢ ᠶ᠋ᠢᠨ ᠮᠤᠬᠤᠷ ᠠᠷᠭᠠ ᠳ᠋ᠤᠷ ᠤᠨᠠᠪᠠ ᠭᠡᠮᠡᠨ ᠬᠠᠷᠠᠩᠭᠠ ᠴᠣᠬᠢᠵᠤ ᠴᠡᠷᠢᠭ ᠪᠤᠴᠠᠲᠠᠯᠠ ᠴᠢᠪᠬᠢᠲᠡᠯᠡ ᠬᠠᠰᠠᠷ ᠤ᠋ᠨ ᠬᠣᠢᠲᠤ ᠭᠣᠣᠯ ᠳ᠋ᠤᠷ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠭᠠᠳ ᠲᠣᠯᠣᠭᠠᠢ ᠰᠡᠭᠦᠯ ᠰᠠᠮᠠᠭᠤᠷᠠᠵᠤ᠂ ᠨᠢᠭᠡᠨ ᠵᠡᠷᠭᠡ ᠳᠠᠷᠤᠭᠳᠠᠨ ᠳᠤᠲᠠᠭᠠᠨ ᠳᠣᠪᠲᠣᠯᠵᠤ ᠲᠠᠪᠢᠨ ᠭᠠᠵᠠᠷ ᠭᠠᠷᠲᠠᠯᠠ ᠭᠡᠨᠡᠳᠲᠡ ᠬᠠᠭᠤᠷᠠᠢ ᠬᠤᠯᠤᠰᠤ ᠡᠪᠡᠰᠦᠨ ᠦ᠌ ᠳᠣᠲᠣᠷᠠ ᠫᠤᠤ ᠳᠠᠭᠤᠷᠢᠰᠴᠤ ᠵᠡᠯᠮᠡ ᠵᠡᠪᠡ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠬᠣᠶᠠᠷ ᠡᠲᠡᠭᠡᠳ ᠡᠴᠡ ᠬᠠᠪᠴᠢᠨ ᠠᠯᠠᠵᠤ᠂ ᠡᠮᠦᠨᠡ ᠡᠴᠡ ᠪᠠᠰᠠ ᠴᠢᠯᠠᠭᠤᠨ ᠤ᠋ ᠴᠡᠷᠢᠭ ᠴᠣᠬᠢᠨ ᠣᠷᠣᠭᠰᠠᠨ ᠳ᠋ᠤᠷ ᠴᠢᠦᠢ ᠱᠢ ᠯᠢ ᠶᠡᠬᠡᠯᠡ ᠭᠡᠯᠮᠡᠵᠦ᠂ ᠴᠡᠷᠢᠭ ᠢ᠋ ᠰᠠᠶ᠋ᠢ ᠪᠤᠯᠭᠢᠭᠤᠯᠤᠨ ᠡᠭᠡᠭᠦᠯᠲᠡᠯᠡ ᠬᠣᠢᠨᠠ ᠠ᠋ᠴᠠ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠴᠡᠷᠢᠭ ᠪᠠᠰᠠ ᠭᠦᠢᠴᠡᠨ ᠬᠦᠷᠴᠦ ᠢᠷᠡᠭᠡᠳ ᠰᠡᠭᠦᠯ ᠳᠠᠷᠤᠨ ᠬᠤᠳᠠᠷᠭᠠᠯᠠᠨ ᠠᠯᠠᠨ ᠡᠭᠦᠰᠬᠡᠪᠡ᠃ ᠴᠢᠦᠢ ᠱᠢ ᠯᠢ ᠬᠠᠭᠠᠨᠲᠠᠨ ᠬᠠᠷᠠᠬᠠᠨ ᠴᠢᠬᠤᠯᠳᠠᠵᠤ᠂ ᠠᠯᠢ ᠠᠯᠢᠨ ᠳ᠋ᠤᠷ ᠵᠠᠪᠳᠤᠬᠤ ᠦᠭᠡᠢ ᠪᠥᠬᠥᠶᠡ᠂ ᠪᠠᠰᠠ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠨᠡᠮᠡᠨ ᠲᠦᠷᠴᠢᠭᠢᠨᠡᠵᠦ᠂ ᠮᠤᠬᠤᠯᠢ ᠶ᠋ᠢᠨ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠤ᠋ ᠶᠡᠬᠡ ᠴᠡᠷᠢᠭ ᠪᠠᠰᠠ ᠡᠪᠬᠡᠨ ᠬᠦᠷᠴᠦ ᠢᠷᠡᠭᠡᠳ ᠴᠢᠦᠢ ᠱᠢ ᠯᠢ ᠶ᠋ᠢᠨ ᠴᠡᠷᠢᠭ ᠢ᠋ ᠶᠡᠬᠡ ᠭᠠᠯᠠᠭᠤᠲᠤ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠳ᠋ᠦ᠍ᠷ ᠭᠡᠯᠢᠨ ᠠᠪᠠᠴᠢᠵᠤ᠂ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨᠡ ᠰᠢᠷᠢᠯᠳᠦᠵᠦ ᠬᠦᠢᠦᠯᠡᠭᠰᠡᠨ ᠬᠤᠯᠤᠰᠤ ᠡᠪᠡᠰᠦᠨ ᠦ᠌ ᠦᠨᠳᠦᠰᠦᠨᠡ ᠮᠣᠷᠢᠨ ᠤ᠋ ᠬᠥᠯ ᠢ᠋ ᠰᠢᠭᠢᠳᠦᠷᠡᠭᠦᠯᠵᠦ ᠤᠨᠠᠭᠠᠮᠠᠭᠴᠠ ᠳᠡᠭᠡᠭᠡ ᠭᠣᠬᠠ ᠪᠠᠷᠢᠭᠰᠠᠨ ᠠᠷᠠᠳ ᠭᠠᠷᠴᠤ ᠴᠢᠦᠢ ᠱᠢ ᠯᠢ ᠶ᠋ᠢ ᠳᠠᠷᠤᠵᠤ ᠬᠦᠯᠢᠭᠡᠳ ᠠᠮᠢᠳᠤ ᠪᠠᠷᠢᠪᠠ᠃ ᠬᠤᠯᠠᠰᠤᠪᠴᠢ᠂ ᠢᠳᠡᠷ ᠳᠣᠪᠣ ᠬᠣᠶᠠᠭᠤᠯᠠ ᠦᠬᠦᠨ ᠪᠠᠢᠯᠳᠤᠵᠤ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠬᠦᠨᠳᠦ ᠬᠠᠭᠠᠭᠰᠠᠨ ᠢ᠋ ᠰᠢᠪᠲᠤᠯᠤᠨ ᠭᠠᠷᠴᠤ ᠳᠤᠲᠠᠭᠠᠪᠠ᠃ ᠮᠤᠬᠤᠯᠢ ᠨᠡᠬᠡᠭᠰᠡᠨ ᠦᠭᠡᠢ᠂ ᠭᠠᠭᠴᠠ ᠴᠢᠦᠢ ᠱᠢ ᠯᠢ ᠶ᠋ᠢᠨ ᠬᠦᠯᠢᠶᠡᠰᠦᠨ ᠢ᠋ ᠢᠨᠤ ᠥᠪᠡᠷ ᠢ᠋ᠶ᠋ᠡᠨ ᠲᠠᠢᠯᠵᠤ ᠬᠦᠨᠳᠦᠯᠡᠨ ᠬᠤᠷᠢᠮᠯᠠᠵᠤ ᠬᠦᠨᠳᠦ ᠪᠡᠯᠡᠭ ᠥᠭᠴᠦ ᠲᠠᠯᠪᠢᠨ ᠡᠭᠡᠭᠦᠯᠪᠡ᠃ ᠴᠢᠦᠢ ᠱᠢ ᠯᠢ ᠥᠴᠦᠬᠡᠨ ᠴᠦ᠍ ᠲᠠᠯᠠᠷᠬᠠᠬᠤ ᠦᠭᠡᠢ ᠪᠡᠷ ᠴᠡᠷᠢᠭ ᠢ᠋ᠶ᠋ᠡᠨ ᠨᠡᠬᠡᠵᠦ ᠢᠷᠡᠭᠡᠳ ᠨᠢᠭᠡᠨ ᠰᠥᠨᠢ ᠳᠣᠪᠲᠣᠯᠵᠤ᠂ ᠳᠡᠳ᠋ ᠥᠷᠯᠥᠭᠡ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠢᠴᠠᠭᠠᠨ ᠦᠵᠡᠪᠡᠰᠦ ᠠᠷᠪᠠᠨ ᠬᠤᠪᠢ ᠠ᠋ᠴᠠ ᠬᠣᠶᠠᠷ ᠬᠤᠪᠢ ᠬᠣᠬᠢᠷᠠᠵᠤ᠂ ᠪᠠᠰᠠ ᠭᠤᠷᠪᠠᠨ ᠬᠤᠪᠢ ᠰᠢᠷᠬᠠᠲᠤᠵᠤ ᠪᠣᠢ᠃ ᠲᠡᠳᠦᠢ ᠠᠷᠭᠠ ᠦᠭᠡᠢ ᠬᠥᠯ ᠳᠡᠪᠰᠡᠨ ᠭᠠᠰᠢᠭᠤᠳᠠᠵᠤ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠡᠭᠡᠵᠦ᠂ ᠬᠡᠷᠡᠢᠳ ᠡᠴᠡ ᠠᠯᠪᠠ ᠪᠠᠷᠢᠪᠠ ᠭᠡᠮᠡᠨ ᠡᠳ᠋ ᠭᠠᠷᠭᠠᠵᠤ ᠪᠠᠷᠢᠭᠠᠳ ᠵᠢᠴᠢ ᠪᠧᠲ᠋ᠠ᠋ ᠤᠯᠤᠰ ᠵᠠᠮ ᠲᠣᠰᠴᠤ ᠪᠠᠢᠯᠳᠤᠨ ᠴᠡᠷᠢᠭ ᠢ᠋ ᠬᠣᠬᠢᠷᠠᠭᠤᠯᠪᠠ ᠭᠡᠮᠡᠨ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠠᠢᠯᠠᠳᠬᠠᠭᠰᠠᠨᠠ᠂ ᠲᠠᠢᠶᠠᠩ ᠬᠠᠭᠠᠨ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠪᠠᠰᠠ ᠦᠰ ᠵᠠᠩᠭᠢᠳᠴᠤ ᠥᠰᠢᠶᠡ ᠠᠪᠬᠤ ᠶ᠋ᠢ ᠰᠡᠳᠬᠢᠪᠡᠢ᠃ ᠴᠢᠦᠢ ᠱᠢ ᠯᠢ᠂ ᠡᠴᠢᠭᠡ ᠴᠢᠦᠢ ᠰᠢᠦᠸᠠᠢ ᠡᠦ ᠳ᠋ᠦ᠍ᠷ ᠦᠨᠡᠬᠡᠷ ᠬᠣᠯᠠ ᠬᠦᠷᠬᠦ ᠦᠭᠡᠢ ᠢᠨᠤ ᠡᠨᠡ ᠨᠢᠭᠡᠨ ᠬᠡᠷᠡᠭ ᠲᠦ᠍ᠷ ᠢᠯᠡᠷᠡᠵᠦᠬᠦᠢ᠃ ᠰᠠᠢᠨ ᠡᠷᠡ ᠪᠥᠭᠡᠳ ᠶᠠᠭᠤᠨ ᠳ᠋ᠤᠷ ᠬᠤᠳᠠᠯ ᠬᠡᠯᠡᠪᠡ᠃
ᠲᠡᠨᠳᠡᠴᠡ ᠵᠢᠨᠦᠩ ᠮᠤᠬᠤᠯᠢ ᠨᠠᠢ᠍ᠮᠠᠨ ᠢ᠋ ᠨᠢᠭᠡᠨ ᠵᠡᠷᠭᠡ ᠳᠠᠷᠤᠵᠤ ᠡᠭᠡᠭᠦᠯᠦᠭᠡᠳ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠰᠠᠭᠤᠬᠤ ᠭᠠᠵᠠᠷ ᠢ᠋ ᠰᠢᠨᠵᠢᠵᠦ ᠦᠵᠡᠭᠡᠳ ᠰᠤᠷᠭᠠᠨ ᠥᠭᠦᠯᠡᠷᠦᠨ : 《 ᠡᠨᠡ ᠭᠠᠵᠠᠷ ᠬᠡᠷᠡᠢᠳ ᠤᠯᠤᠰ ᠲᠤᠷ ᠣᠢᠷᠠ᠂ ᠮᠠᠨ ᠤ᠋ ᠤᠯᠤᠰ ᠠ᠋ᠴᠠ ᠪᠠᠯᠴᠢᠭ ᠰᠢᠪᠠᠷᠲᠤ ᠪᠠᠵᠤᠨᠠᠢ ᠮᠥᠷᠡᠨ ᠠᠯᠤᠰ᠂ ᠮᠠᠰᠢ ᠲᠦᠭᠰᠢᠯᠲᠡᠢ ᠪᠠᠢᠨᠠᠮ ᠂ ᠬᠢᠴᠢᠶᠡᠨ ᠰᠡᠷᠡᠮᠵᠢᠯᠡᠪᠡᠰᠦ ᠵᠣᠬᠢᠮᠤᠢ᠃ 》 ᠭᠡᠮᠡᠨ ᠰᠡᠷᠭᠦᠭᠡᠨ ᠬᠡᠯᠡᠭᠡᠳ ᠳᠡᠢᠯᠦᠭᠰᠡᠨ ᠵᠠᠩᠵᠤᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠪᠤᠷᠬᠠᠨ ᠭᠠᠯᠳᠤᠨᠠ ᠳ᠋ᠤᠷ ᠡᠭᠡᠵᠦ ᠢᠷᠡᠪᠡᠰᠦ ᠲᠠᠢᠽᠦ ᠬᠣᠷᠣᠭᠠᠨᠠ ᠦᠭᠡᠢ᠃ ᠦᠵᠡᠰᠡ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠪᠴᠤ ᠬᠠᠳᠠᠮ ᠬᠣᠩᠭᠢᠷᠠᠳ ᠤ᠋ᠨ ᠬᠣᠩᠵᠢᠯᠠ ᠠᠢᠮᠠᠭ ᠲᠤᠷ ᠬᠠᠭᠠᠭᠳᠠᠭᠰᠠᠨ ᠢ᠋ ᠲᠡᠩᠬᠡᠷᠡᠭᠦᠯᠦᠷᠡ ᠳᠣᠪᠲᠣᠯᠤᠭᠰᠠᠨ ᠠᠵᠤᠭᠤ᠃
ᠲᠡᠳᠦᠢ ᠮᠤᠬᠤᠯᠢ ᠨᠠᠢ᠍ᠮᠠᠨ ᠤ᠋ ᠣᠯᠵᠠ ᠶ᠋ᠢ ᠬᠠᠭᠠᠰᠯᠠᠵᠤ ᠬᠠᠰᠠᠷ ᠲᠤᠷ ᠨᠢᠭᠡᠨ ᠬᠤᠪᠢ ᠥᠭᠴᠦ ᠢᠯᠡᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠴᠡᠷᠢᠭ ᠨᠡᠮᠡᠵᠦ ᠰᠢᠯᠭᠠᠨ ᠲᠠᠢᠽᠦ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠨᠡᠬᠡᠵᠦ ᠳᠣᠪᠲᠣᠯᠪᠠ᠃ ᠡᠨᠡ ᠪᠠᠰᠠ ᠶᠠᠭᠤᠨ ᠠ᠋ᠴᠠ ᠪᠣᠯᠪᠠ ᠬᠡᠮᠡᠪᠡᠰᠦ : ᠪᠠᠰᠠ ᠤᠭ ᠤᠴᠢᠷ ᠢ᠋ ᠲᠣᠭᠠᠴᠢᠨ ᠭᠠᠷᠭᠠᠬᠤ ᠬᠡᠷᠡᠭ ᠲᠡᠢ ᠪᠣᠯᠵᠤᠬᠤᠢ᠃ ᠬᠠᠷᠠᠬᠠᠨ ᠨᠢᠳᠤᠨᠤᠨ ᠵᠢᠯ ᠬᠡᠷᠡᠢᠳ ᠤᠯᠤᠰ ᠬᠢᠷᠢ ᠪᠡᠨ ᠮᠡᠳᠡᠬᠦ ᠦᠭᠡᠢ ᠬᠡᠴᠡᠭᠦᠦ ᠪᠡᠷ ᠠᠭᠠᠰᠢᠯᠠᠨ᠂ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠡᠷᠢᠨ ᠬᠠᠯᠳᠠᠭᠠᠳ ᠸᠠᠩ ᠬᠠᠭᠠᠨ ᠲᠤᠭᠤᠷᠢᠯ ᠪᠣᠢ ᠪᠦᠬᠦᠢ ᠪᠡᠨ ᠪᠦᠷᠢᠨ ᠢ᠋ᠶ᠋ᠡᠷ ᠪᠣᠯᠢᠶᠠᠬᠠᠳᠠᠭᠠᠳ ᠪᠤᠭᠤᠷᠤᠯ ᠪᠡᠶᠡ ᠨᠢᠭᠡᠨ ᠵᠡᠷᠭᠡ ᠪᠠᠷᠢᠭᠳᠠᠵᠤ ᠪᠤᠬᠤᠷ ᠪᠥᠭᠰᠡ ᠪᠡᠨ ᠪᠣᠷᠣᠯᠠᠲᠠᠯᠠ ᠱᠦᠷᠭᠦᠭᠡᠨ ᠬᠣᠯᠭᠣᠵᠤ ᠵᠢᠴᠢ ᠬᠤᠸᠠᠩ ᠲᠠᠢᠽᠢ ᠢᠯᠠᠭᠤ ᠬᠠᠪᠠᠷ ᠢ᠋ᠶ᠋ᠠᠨ ᠬᠠᠭᠠ ᠬᠠᠷᠪᠤᠭᠳᠠᠵᠤ᠂ ᠳᠣᠯᠣᠭᠠᠨ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠬᠤᠪᠢ ᠬᠣᠬᠢᠷᠠᠵᠤ ᠬᠠᠭᠠᠰ ᠬᠤᠪᠢ ᠰᠢᠷᠬᠠᠲᠤᠭᠠᠳ ᠦᠯᠡᠭᠰᠡᠨ ᠲᠠᠪᠤᠨ ᠬᠤᠪᠢ ᠴᠥᠮ ᠪᠡᠶᠡ ᠨᠢᠴᠦᠭᠦᠨ ᠮᠣᠷᠢ ᠵᠠᠢᠳᠠᠩ ᠢ᠋ᠶ᠋ᠠᠷ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠳᠤᠲᠠᠭᠠᠨ ᠣᠷᠣᠬᠤᠶᠠ᠂ ᠣᠯᠠᠨ ᠴᠡᠷᠢᠭ ᠡᠴᠢᠬᠦ ᠢᠷᠡᠬᠦᠢ ᠳ᠋ᠦ᠍ᠷ ᠴᠥᠮ ᠰᠡᠭᠡᠭᠡ ᠦᠭᠡᠢ ᠳᠣᠪᠲᠣᠯᠤᠯᠴᠠᠨ ᠨᠢᠭᠡᠨᠲᠡ ᠲᠡᠩᠬᠡᠭᠡ ᠲᠠᠰᠤᠷᠠᠵᠤ ᠰᠢᠷᠪᠥᠰᠥ ᠰᠤᠨᠤᠭᠰᠠᠨ ᠲᠤᠯᠠ ᠳᠠᠢᠪᠠᠯᠵᠠᠨ ᠲᠤᠢᠪᠠᠯᠵᠠᠵᠤ ᠶᠣᠢᠯᠠᠵᠤ ᠶᠣᠪᠰᠢᠨ᠂ ᠸᠠᠩ ᠬᠠᠭᠠᠨ ᠤ᠋ ᠪᠡᠶᠡ ᠵᠠᠢᠳᠠᠩ ᠮᠣᠷᠢᠨ ᠳ᠋ᠤᠷ ᠢ᠋ᠶ᠋ᠠᠨ ᠤᠷᠤᠭᠰᠢ ᠬᠣᠢᠰᠢ ᠭᠡᠬᠢᠵᠦ ᠰᠠᠵᠢᠯᠠᠨ ᠣᠢᠯᠠᠵᠤ ᠳᠠᠭᠤᠯᠠᠭᠰᠠᠭᠠᠷ ᠤᠯᠤᠰ ᠲᠤᠷ ᠣᠷᠣᠭᠰᠠᠨ ᠳ᠋ᠤᠷ ᠥᠬᠢᠨ ᠢᠨᠤ ᠰᠡᠷᠭᠦᠯᠡᠩ ᠭᠦᠩᠵᠦ ᠰᠣᠯᠤᠩᠭᠤᠸᠠ ᠲᠥᠷᠥ ᠶ᠋ᠢᠨ ᠲᠦᠰᠢᠯᠭᠡ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠠᠪᠴᠤ ᠠᠮᠤᠷ ᠴᠡᠷᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠭᠲᠤᠨ ᠵᠣᠯᠭᠠᠵᠤ᠂ ᠲᠡᠷᠡ ᠮᠡᠲᠦ ᠦᠵᠡᠰᠢ ᠦᠭᠡᠢ ᠪᠠᠢᠳᠠᠯ ᠳᠦᠷᠢ ᠶ᠋ᠢ ᠦᠵᠡᠭᠡᠳ ᠡᠪᠦᠳᠦᠭ ᠢ᠋ ᠢᠨᠤ ᠲᠡᠪᠡᠷᠢᠵᠦ ᠤᠬᠢᠯᠠᠯᠴᠠᠨ ᠵᠣᠯᠭᠠᠯᠳᠤᠵᠤ ᠰᠠᠶ᠋ᠢ ᠳᠡᠪᠡᠯ ᠡᠮᠦᠰᠬᠡᠨ ᠮᠣᠷᠢ ᠬᠠᠯᠠᠭᠤᠯᠵᠤ᠂ ᠨᠤᠲᠤᠭ ᠲᠤᠷ ᠢ᠋ᠶ᠋ᠠᠨ ᠬᠦᠷᠪᠡᠢ᠃ ᠬᠠᠢᠷᠠᠬᠠᠨ ᠬᠡᠴᠢᠨᠡᠨ ᠵᠢᠯ ᠬᠡᠳᠦᠢᠴᠢᠨᠡᠭᠡᠨ ᠲᠦᠮᠡᠨ ᠦ᠌ ᠠᠳᠤᠭᠤ ᠪᠠᠷ ᠠᠷᠠᠯᠵᠢᠵᠤ ᠠᠴᠢᠷᠠᠭᠰᠠᠨ ᠬᠠᠨ ᠤ᠋ ᠭᠡᠷ ᠬᠦᠷᠢᠶᠡ᠂ ᠡᠳ᠋ ᠠᠭᠤᠷᠠᠰᠤᠨ ᠨᠢᠭᠡᠨ ᠭᠱᠠᠨᠠ ᠨᠢᠭᠡᠨᠲᠡ ᠬᠡᠢᠰᠦᠨ ᠵᠠᠪᠬᠠᠵᠤ᠂ ᠸᠠᠩ ᠬᠠᠭᠠᠨ ᠤ᠋ ᠪᠡᠶᠡ ᠬᠠᠪᠲᠠᠰᠤ ᠮᠡᠲᠦ ᠴᠢᠷᠠᠮᠠ ᠨᠢᠴᠦᠭᠦᠨ ᠪᠣᠯᠵᠤ ᠡᠭᠡᠭᠰᠡᠨᠡ᠂ ᠬᠠᠮᠤᠭ ᠪᠦᠭᠦᠳᠡᠭᠡᠷ ᠬᠠᠷᠬᠢᠷᠠᠨ ᠬᠤᠷᠬᠢᠷᠠᠨ ᠰᠡᠭᠦᠷᠡᠰᠦ ᠠᠯᠳᠠᠯᠴᠠᠬᠤᠶᠠ᠂ ᠬᠠᠭᠠᠨ ᠪᠣᠯᠤᠭᠰᠠᠨ ᠲᠤᠭᠤᠷᠢᠯ ᠬᠠᠪᠲᠠᠢᠲᠠᠯᠠ ᠢᠴᠢᠩᠭᠦᠷᠡᠨ᠂ ᠬᠠᠷᠢᠶᠠᠯ ᠵᠦᠬᠡᠯ ᠢ᠋ᠶ᠋ᠡᠨ ᠲᠠᠯᠪᠢᠵᠤ᠂ ᠬᠠᠷᠭᠢᠰ ᠮᠠᠭᠤ ᠵᠠᠮᠤᠬᠠ ᠶ᠋ᠢᠨ ᠬᠣᠩᠰᠢᠶᠠᠷ ᠠᠮᠠᠨ ᠳ᠋ᠤᠷ ᠣᠷᠣᠵᠤ᠂ ᠬᠠᠮᠤᠭ ᠪᠦᠬᠦᠢ ᠪᠡᠨ ᠠᠯᠳᠠᠵᠤ᠂ ᠬᠠᠯᠠᠭᠤᠨ ᠠᠮᠢᠨ ᠠ᠋ᠴᠠ ᠪᠠᠨ ᠬᠠᠭᠠᠴᠠ ᠠᠯᠳᠠᠪᠠ᠂ ᠬᠠᠪᠢᠷᠭᠠ ᠪᠠᠨ ᠳᠠᠭᠠᠷᠢᠭᠰᠠᠨ ᠵᠠᠮᠤᠬᠠ ᠶ᠋ᠢ ᠠᠯᠠᠵᠤ ᠣᠭᠲᠣᠴᠢᠶᠠ ᠭᠡᠮᠡᠨ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠶ᠋ᠢᠨ ᠳᠡᠭᠡᠷᠡ ᠪᠡᠨ ᠮᠣᠷᠢᠨ ᠤ᠋ ᠳᠡᠯ ᠢ᠋ᠶ᠋ᠡᠨ ᠲᠠᠰᠤ ᠲᠠᠰᠤ ᠴᠠᠪᠴᠢᠵᠤ ᠲᠠᠩᠭᠠᠷᠢᠭᠯᠠᠠᠬᠤᠶᠠ᠂ ᠰᠣᠯᠤᠩᠭᠤᠸᠠ ᠰᠣᠴᠢᠨ ᠢᠳᠬᠠᠵᠤ ᠥᠭᠦᠯᠡᠷᠦᠨ : 《 ᠰᠤᠳᠠᠯ ᠮᠠᠭᠤᠲᠤ ᠬᠥᠮᠦᠨ ᠦ᠌ ᠰᠣᠨᠣᠷ ᠴᠢᠬᠢ ᠬᠡᠴᠡᠭᠦᠦ᠂ ᠰᠤᠯᠠ ᠦᠭᠡ ᠶ᠋ᠢ ᠬᠡᠯᠡᠭᠡᠳ ᠰᠤᠨᠳᠠᠯᠠᠨ ᠬᠣᠷᠣᠰᠬᠠᠬᠤ ᠠᠨᠤ ᠰᠤᠮᠤ ᠮᠡᠲᠦ ᠬᠡᠴᠡᠭᠦᠦ᠂ ᠰᠣᠨᠢᠨ ᠬᠤᠪᠢᠰᠬᠠᠯ ᠳᠡᠭᠳᠡᠭᠦᠵᠡᠢ ! 》 ᠭᠡᠮᠡᠨ ᠬᠣᠷᠢᠭᠯᠠᠨ ᠵᠣᠭᠰᠣᠭᠠᠵᠤ᠂ ᠦᠯᠡᠳᠡᠭᠰᠡᠨ ᠥᠷᠭᠥᠭᠡ ᠪᠠᠭᠤᠳᠠᠯ ᠳ᠋ᠤᠷ ᠪᠠᠭᠤᠯᠭᠠᠵᠤ᠂ ᠥᠷᠯᠥᠭᠡ ᠦᠳᠡᠰᠢ ᠲᠣᠬᠣᠷᠤᠭᠤᠯᠤᠨ ᠰᠤᠪᠢᠯᠠᠮᠤᠢ᠃ ᠡᠭᠦᠨ ᠳ᠋ᠦ᠍ᠷ ᠬᠤᠸᠠᠩ ᠲᠠᠢᠽᠢ ᠢᠯᠠᠭᠤ ᠶ᠋ᠢᠨ ᠬᠣᠷᠣᠰᠤᠯ ᠢᠴᠢᠩᠭᠦᠷᠢ ᠨᠡᠩ ᠶᠡᠬᠡᠳᠴᠦ ᠬᠣᠣᠷ ᠬᠦᠷᠳᠦ ᠵᠠᠮᠤᠬᠠ ᠯᠤᠬᠠ ᠪᠠᠨ ᠵᠥᠪᠯᠡᠪᠡᠰᠦ᠂ ᠵᠠᠮᠤᠬᠠ ᠬᠣᠶᠠᠷ ᠭᠤᠷᠪᠠᠨᠲᠠ ᠵᠢᠬᠡᠭᠦᠨ ᠢ᠋ᠶ᠋ᠡᠷ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《 ᠵᠣᠷᠢᠭ ᠦᠭᠡᠢ ᠡᠷᠡ ᠶ᠋ᠢ ᠵᠤᠷᠠᠮᠠ ᠵᠢᠷᠦᠬᠡᠪᠴᠢ ᠮᠡᠲᠦ ᠬᠡᠮᠡᠵᠦᠬᠦᠢ ᠂ ᠵᠣᠭᠰᠣᠯ ᠦᠭᠡᠢ ᠴᠢᠷᠮᠠᠢᠪᠠᠰᠤ ᠵᠠᠭᠤᠨ ᠬᠡᠷᠡᠭ ᠪᠦᠲᠦᠮᠦᠢ ᠬᠡᠮᠡᠵᠦᠬᠦᠢ ! 》 ᠬᠡᠮᠡᠭᠡᠳ ᠪᠠᠰᠠ ᠨᠢᠭᠡᠨ ᠠᠷᠭᠠ ᠭᠠᠷᠭᠠᠵᠤ ᠥᠭᠦᠯᠡᠷᠦᠨ : 《 ᠡᠭᠦᠨ ᠢ᠋ ᠣᠳᠣ ᠲᠡᠳᠡᠨ ᠦ᠌ ᠬᠦᠴᠦᠨ ᠢ᠋ ᠢᠨᠤ ᠰᠠᠯᠭᠠᠵᠤ ᠬᠠᠭᠠᠴᠠᠭᠤᠯᠤᠨ ᠭᠡᠨᠡᠳᠲᠡ ᠣᠷᠣᠵᠤ ᠭᠡᠨᠡᠳᠡᠭᠦᠯᠦᠨ ᠪᠠᠢᠯᠳᠤᠰᠤᠭᠠᠢ᠃ ᠬᠣᠩᠵᠢᠯᠠ ᠠᠢᠮᠠᠭ ᠤ᠋ᠨ ᠡᠵᠡᠨ ᠭᠣᠨᠴᠣᠭ ᠬᠡᠮᠡᠭᠴᠢ ᠬᠣᠩᠭᠢᠷᠠᠳ ᠠᠢᠮᠠᠭ ᠲᠤᠷ ᠳᠠᠷᠤᠭᠳᠠᠨ ᠬᠣᠷᠣᠰᠴᠤ ᠰᠠᠭᠤᠪᠠᠴᠤ ᠬᠦᠴᠦ ᠬᠦᠷᠦᠯᠴᠡᠬᠦ ᠦᠭᠡᠢ ᠲᠤᠯᠠ ᠤᠷᠪᠠᠨ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ᠂ ᠪᠢᠳᠡ ᠱᠤᠤᠪᠦᠣ ᠦᠬᠡᠷ ᠪᠠᠳᠤᠨᠠ ᠳ᠋ᠤᠷ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠬᠣᠩᠭᠢᠷᠠᠳ ᠢ᠋ ᠬᠠᠭᠠᠯᠭᠠᠶᠠ᠃ ᠮᠤᠬᠤᠯᠢ ᠡᠳᠦᠭᠡ ᠨᠠᠢ᠍ᠮᠠᠨ ᠤ᠋ ᠵᠠᠬᠠ ᠳ᠋ᠤᠷ ᠪᠣᠢ ᠲᠤᠯᠠ ᠯᠠᠪ ᠲᠡᠮᠦᠵᠢᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠬᠠᠳᠠᠮ ᠢ᠋ᠶ᠋ᠠᠨ ᠲᠤᠰᠠᠯᠠᠷᠠ ᠡᠴᠢᠮᠦᠢ᠃ ᠡᠨᠡ ᠵᠠᠪᠰᠠᠷ ᠲᠠᠢᠰᠢ ᠲᠠᠢᠪᠤᠤ ᠳ᠋ᠤᠷ ᠪᠠᠰᠠ ᠨᠢᠭᠡᠨ ᠰᠠᠯᠠᠭᠠᠨ ᠤ᠋ ᠴᠡᠷᠢᠭ ᠥᠭᠴᠦ ᠭᠠᠯᠠᠭᠤᠲᠤ ᠠᠭᠤᠯᠠᠨ ᠤ᠋ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠪᠠᠭᠤᠳᠠᠯ ᠢ᠋ ᠬᠠᠭᠠᠪᠠᠰᠤ᠂ ᠯᠠᠪ ᠣᠳᠣ ᠪᠤᠭᠤᠷᠵᠢ ᠨᠠᠷ ᠬᠠᠮᠠᠭᠠᠯᠠᠷᠠ ᠢᠷᠡᠮᠦᠢ᠃ ᠡᠢᠮᠦ ᠪᠣᠯᠪᠠᠰᠤ ᠪᠢ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠢ᠋ ᠠᠪᠤᠨ ᠳᠣᠪᠲᠣᠯᠤᠨ ᠣᠷᠣᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠭᠦᠷ ᠢ᠋ ᠡᠪᠳᠡᠯᠡᠭᠡᠳ ᠥᠨᠳᠡᠭᠡ ᠶ᠋ᠢ ᠬᠠᠭᠠᠯᠤᠭᠠᠳ ᠡᠮᠡ ᠦᠷᠡ ᠶ᠋ᠢ ᠢᠨᠤ ᠴᠥᠮ ᠠᠯᠠᠵᠤ᠂ ᠳᠠᠬᠢᠨ ᠲᠡᠮᠦᠵᠢᠨ ᠦ᠌ ᠡᠭᠡᠬᠦᠢ ᠳ᠋ᠦ᠍ᠷ ᠵᠠᠮ ᠲᠣᠰᠴᠤ ᠠᠯᠠᠰᠤᠭᠠᠢ ! 》 ᠭᠡᠮᠡᠨ ᠵᠥᠪᠳᠡᠨ ᠲᠣᠭᠲᠠᠭᠠᠳ ᠳᠠᠷᠤᠢ ᠦᠬᠡᠷ ᠪᠠᠳᠤᠨᠠ ᠳ᠋ᠤᠷ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠬᠣᠩᠭᠢᠷᠠᠳ ᠢ᠋ ᠬᠠᠭᠠᠭᠠᠳ ᠡᠨᠳᠡ ᠪᠡᠨ ᠬᠣᠶᠠᠷ ᠰᠠᠯᠠᠭᠠᠨ ᠤ᠋ ᠴᠡᠷᠢᠭ ᠪᠡᠯᠡᠳᠬᠡᠵᠦ ᠳᠣᠪᠲᠣᠯᠤᠨ ᠣᠷᠣᠬᠤᠢ ᠶ᠋ᠢ ᠪᠦᠷᠢᠨᠡ ᠪᠡᠯᠡᠳᠬᠡᠭᠰᠡᠨ ᠠᠵᠤᠭᠤ᠃ ᠲᠡᠢᠨ ᠬᠦ᠌ ᠬᠣᠩᠭᠢᠷᠠᠳ ᠲᠤᠷ ᠲᠡᠢᠨ ᠳᠡᠭᠳᠡᠭᠰᠡᠨᠡ ᠲᠡᠢ ᠰᠡᠴᠡᠨ ᠬᠣᠶᠠᠷ ᠬᠥᠪᠡᠭᠦᠨ ᠠᠵᠢᠨᠠᠢ ᠮᠡᠷᠭᠡᠨ᠂ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠲᠤᠷ ᠢ᠋ᠶ᠋ᠠᠨ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠭᠠᠷ ᠤ᠋ᠨ ᠴᠡᠷᠢᠭ ᠢ᠋ ᠵᠠᠬᠢᠷᠤᠭᠤᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠳᠤᠮᠳᠠᠳᠤ ᠴᠡᠷᠢᠭ ᠢ᠋ ᠠᠪᠴᠤ ᠲᠤᠯᠤᠭᠠᠳ ᠪᠠᠰᠠ ᠬᠦᠴᠦᠨ ᠮᠡᠬᠦᠰᠳᠡᠭᠦᠵᠡᠢ ᠭᠡᠮᠡᠨ ᠳᠡᠭᠦᠦ ᠪᠡᠨ ᠸᠴᠢᠷ ᠰᠡᠴᠡᠨ ᠢ᠋ ᠲᠠᠢᠽᠦ ᠳ᠋ᠦ᠍ᠷ ᠢᠯᠡᠬᠡᠨ ᠲᠤᠰᠠᠯᠠᠬᠤ ᠶ᠋ᠢ ᠭᠤᠶᠤᠭᠰᠠᠨ ᠳ᠋ᠤᠷ ᠲᠠᠢᠽᠦ : 《 ᠮᠢᠨᠦ ᠥᠷᠥᠭᠡᠰᠦᠨ ᠪᠡᠶᠡ ᠶ᠋ᠢᠨ ᠮᠢᠨᠦ ᠡᠴᠢᠭᠡ ᠪᠠᠢᠨᠠᠮ ! 》 ᠭᠡᠮᠡᠨ ᠦᠳᠲᠡᠷ ᠲᠦᠷᠭᠡᠨᠡ ᠰᠢᠳᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠮᠣᠷᠳᠠᠭᠰᠠᠨᠠ᠂ ᠦᠬᠡᠷ ᠪᠠᠳᠤᠨᠠ᠂ ᠭᠣᠨᠴᠣᠭ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠲᠠᠢᠽᠦ ᠶ᠋ᠢᠨ ᠡᠴᠢᠬᠦ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠰᠦᠨᠡᠰᠦ ᠰᠠᠷᠨᠢᠵᠤ ᠰᠥᠰᠥ ᠬᠡᠮᠬᠡᠷᠡᠨ᠂ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠪᠤᠳᠠᠷᠠᠯᠳᠤᠨ ᠡᠭᠦᠰᠬᠡᠭᠰᠡᠨ ᠳ᠋ᠦ᠍ᠷ ᠦᠬᠡᠷ ᠪᠠᠳᠤᠨᠠ᠂ ᠭᠣᠨᠴᠣᠭ ᠬᠣᠶᠠᠭᠤᠯᠠ ᠨᠢᠭᠡᠨᠲᠡ ᠴᠠᠭᠠᠵᠠᠯᠠᠨ ᠪᠠᠷᠢᠮᠲᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠪᠠᠰᠠ ᠪᠤᠷᠤᠭᠤᠯᠠᠨ ᠡᠴᠢᠬᠦᠶᠡ᠂ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠬᠣᠩᠭᠢᠷᠠᠳ ᠤ᠋ᠨ ᠴᠡᠷᠢᠭ ᠬᠠᠮᠲᠤ ᠨᠡᠢᠯᠡᠵᠦ ᠨᠢᠭᠡᠨ ᠵᠡᠷᠭᠡ ᠬᠥᠭᠡᠭᠡᠵᠦ ᠠᠯᠠᠨ ᠶᠡᠬᠡᠳᠡ ᠳᠡᠢᠯᠦᠭᠰᠡᠨᠡ᠂ ᠦᠬᠡᠷ ᠪᠠᠳᠤᠨᠠ ᠳᠠᠷᠤᠢ ᠳᠤᠲᠠᠭᠠᠵᠤ ᠭᠣᠨᠴᠣᠭ ᠢ᠋ ᠳᠠᠭᠠᠨ ᠬᠣᠩᠵᠢᠯᠠ ᠠᠢᠮᠠᠭ ᠤ᠋ᠳ ᠲᠤᠷ ᠳᠤᠲᠠᠭᠠᠨ ᠡᠴᠢᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠲᠠᠯᠪᠢᠯ ᠦᠭᠡᠢ ᠨᠡᠬᠡᠨ ᠬᠦᠷᠴᠦ ᠬᠣᠩᠵᠢᠯᠠ ᠠᠢᠮᠠᠭ ᠤ᠋ᠨ ᠵᠠᠬᠠ ᠳ᠋ᠤᠷ ᠣᠷᠣᠵᠤ ᠡᠴᠢᠭᠰᠡᠨ ᠳ᠋ᠦ᠍ᠷ ᠭᠣᠨᠴᠣᠭ ᠤ᠋ᠨ ᠳᠡᠭᠦᠦ ᠢᠨᠤ ᠷᠢᠨᠴᠢᠨ ᠬᠡᠮᠡᠭᠴᠢ ᠤᠭ ᠲᠠᠭᠠᠨ ᠯᠢᠶᠣᠤ ᠤᠯᠤᠰ ᠲᠤᠷ ᠲᠦᠰᠢᠮᠡᠯ ᠪᠣᠯᠤᠭᠰᠠᠨ ᠪᠥᠯᠥᠭᠡ᠂ ᠯᠢᠶᠣᠤ ᠤᠯᠤᠰ ᠲᠤᠷ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠳᠡᠯᠭᠡᠷᠡᠭᠰᠡᠨ ᠢ᠋ᠶ᠋ᠡᠷ ᠲᠥᠪᠡᠳ ᠨᠡᠷᠡ ᠣᠯᠠᠨ ᠪᠥᠯᠥᠭᠡ ᠃ ᠲᠡᠳᠦᠢ ᠡᠨᠡ ᠷᠢᠨᠴᠢᠨ ᠲᠠᠢᠽᠦ ᠶ᠋ᠢ ᠦᠵᠡᠨ ᠪᠢᠰᠢᠷᠡᠵᠦ᠂ ᠬᠠᠭᠠᠰ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠢ᠋ᠶ᠋ᠠᠨ ᠠᠪᠴᠤ ᠤᠭᠲᠤᠵᠤ ᠳᠠᠭᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠲᠡᠭᠦᠨ ᠳ᠋ᠦ᠍ᠷ ᠤᠬᠠᠭᠠᠲᠤ ᠴᠣᠯᠠ ᠬᠠᠢᠷᠠᠯᠠᠭᠠᠳ ᠲᠡᠭᠦᠨ ᠢ᠋ ᠬᠣᠰᠢᠭᠤᠴᠢ ᠪᠣᠯᠭᠠᠨ ᠰᠠᠶ᠋ᠢ ᠤᠷᠤᠭᠰᠢ ᠣᠷᠣᠰᠤᠭᠠᠢ ᠬᠡᠮᠡᠲᠡᠯᠡ ᠵᠢᠨᠦᠩ ᠮᠤᠬᠤᠯᠢ ᠬᠦᠷᠴᠦ ᠢᠷᠡᠭᠰᠡᠨᠡ᠂ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ᠂ ᠵᠡᠪᠡ᠂ ᠴᠢᠯᠠᠭᠤᠨ᠂ ᠰᠥᠪᠡᠭᠡᠲᠡᠢ᠂ ᠵᠦᠯᠭᠡᠲᠡᠢ᠂ ᠭᠢᠯᠥᠭᠡᠨ᠂ ᠬᠣᠢᠯᠠᠳᠠᠷ ᠨᠠᠢ᠍ᠮᠠᠭᠤᠯᠠ ᠶ᠋ᠢ ᠠᠪᠴᠤ ᠳᠥᠷᠪᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠬᠤᠩᠵᠢᠯᠠ ᠠᠢᠮᠠᠭ ᠪᠠ ᠣᠢᠷᠠᠯᠴᠠᠭᠠ ᠰᠦᠯᠪᠡᠭᠡᠯᠡᠭᠰᠡᠨ ᠠᠢᠮᠠᠭ ᠤ᠋ᠳ ᠢ᠋ ᠪᠠᠷᠠᠲᠠᠯᠠ ᠳᠠᠢᠯᠠᠵᠤ ᠳᠠᠭᠠᠭᠤᠯ ᠭᠡᠮᠡᠨ ᠮᠣᠷᠳᠠᠭᠤᠯᠤᠭᠠᠳ ᠪᠠᠰᠠ ᠮᠡᠩᠭᠡᠯᠢᠭ ᠦ᠋ᠨ ᠬᠣᠶᠠᠷ ᠬᠥᠪᠡᠭᠦᠨ ᠠᠯᠤᠬᠠ ᠰᠦᠬᠡ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠶ᠋ᠢ ᠬᠡᠷᠡᠢᠳ ᠦ᠋ᠨ ᠣᠯᠠᠨ ᠬᠠᠷᠭᠢᠰ ᠢ᠋ ᠲᠣᠭᠠᠴᠢᠨ ᠶᠠᠯᠠ ᠠᠰᠠᠭᠤᠯᠭᠠᠷᠠ ᠢᠯᠡᠭᠡᠭᠡᠳ ᠲᠠᠢᠽᠦ ᠰᠠᠶ᠋ᠢ ᠰᠢᠳᠠᠷ ᠵᠠᠩᠵᠤᠨ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠠᠪᠴᠤ ᠭᠤᠷᠪᠠᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠡᠭᠡᠵᠦ ᠢᠷᠡᠬᠦᠶᠡ᠂ ᠵᠠᠮ ᠳ᠋ᠤᠷ ᠭᠡᠨᠡᠳᠲᠡ ᠨᠤᠲᠤᠭ ᠠ᠋ᠴᠠ ᠪᠡᠯᠭᠦᠳᠡᠢ ᠬᠥᠮᠦᠨ ᠵᠠᠷᠤᠵᠤ : 《 ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠰᠠᠭᠤᠭᠰᠠᠨ ᠭᠠᠯᠠᠭᠤᠲᠤ ᠠᠭᠤᠯᠠ ᠶ᠋ᠢ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠬᠠᠭᠠᠵᠤ ᠪᠠᠢᠯᠳᠤᠨ ᠥᠷᠯᠥᠭᠡ ᠦᠳᠡᠰᠢ ᠠᠪᠲᠠᠬᠤ ᠰᠢᠬᠠᠪᠠ ! 》 ᠭᠡᠮᠡᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠯᠡ ᠰᠣᠴᠢᠵᠤ᠂ ᠳᠠᠷᠤᠢ ᠲᠦᠷᠭᠡᠨ ᠬᠥᠯ ᠰᠤᠭᠤᠯᠤᠯ ᠦᠭᠡᠢ ᠪᠡᠷ ᠭᠠᠯᠠᠭᠤᠲᠤ ᠠᠭᠤᠯᠠᠨ ᠤ᠋ ᠵᠦᠭ ᠳᠣᠪᠲᠣᠯᠤᠨ ᠡᠴᠢᠬᠦᠶᠡ᠂ ᠨᠢᠭᠡᠨ ᠳᠡᠭᠡᠭᠦᠷ ᠪᠦᠬᠦ ᠪᠡᠯᠭᠦᠳᠡᠢ᠂ ᠣᠢᠲᠤ ᠣᠴᠢᠭ᠂ ᠤᠷᠠᠨ ᠭᠠᠴᠤᠭ᠂ ᠶᠡᠬᠡ ᠬᠥᠪᠡᠭᠦᠨ ᠵᠣᠴᠢ᠂ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠴᠠᠭᠠᠲᠠᠢ ᠨᠠᠷ ᠤᠯᠤᠰ ᠤ᠋ᠨ ᠶᠡᠬᠡ ᠴᠡᠷᠢᠭ ᠪᠠ ᠬᠦᠨᠡᠰᠦ ᠶ᠋ᠢ ᠠᠪᠴᠤ ᠬᠣᠢᠨᠠ ᠠ᠋ᠴᠠ ᠨᠡᠬᠡᠵᠦ ᠳᠣᠪᠲᠣᠯᠤᠨ ᠭᠦᠢᠴᠡ ᠬᠡᠮᠡᠭᠡᠳ ᠴᠢᠳᠠᠭᠠᠨᠠ ᠰᠡᠴᠡᠨ᠂ ᠬᠤᠳᠠᠭᠠᠨᠠ ᠪᠡᠬᠢ ᠬᠣᠶᠠᠭᠤᠯᠠ ᠬᠣᠯᠠ ᠪᠦᠬᠦᠢ ᠴᠡᠷᠢᠭ ᠢ᠋ ᠠᠪᠴᠤ ᠪᠠᠰᠠ ᠭᠦᠢᠴᠡᠵᠦ ᠢᠷᠡ ᠭᠡᠮᠡᠨ ᠳᠣᠪᠲᠣᠯᠭᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠭᠤᠷᠪᠠᠨ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ ᠰᠢᠭᠤᠳ ᠭᠠᠯᠠᠭᠤᠲᠤ ᠠᠭᠤᠯᠠ ᠶ᠋ᠢᠨ ᠵᠦᠭ ᠡᠴᠢᠬᠦᠶᠡ᠂ ᠵᠠᠮ ᠳ᠋ᠤᠷ ᠭᠤᠷᠪᠠᠨ ᠳᠡᠭᠦᠦ᠂ ᠬᠣᠶᠠᠷ ᠬᠥᠪᠡᠭᠦᠨ ᠶᠡᠬᠡ ᠴᠡᠷᠢᠭ ᠢ᠋ ᠵᠡᠯᠮᠡ ᠲᠣᠭᠲᠣᠩᠭᠣ᠌ ᠬᠣᠶᠠᠭᠤᠯᠠ ᠪᠠᠷ ᠪᠠᠭᠴᠠᠯᠠᠨ ᠬᠦᠷᠭᠡᠬᠦ ᠪᠡᠷ ᠬᠡᠯᠡᠯᠴᠡᠵᠦ ᠲᠣᠭᠲᠠᠭᠠᠳ ᠲᠠᠢᠽᠦ ᠶ᠋ᠢᠨ ᠵᠠᠬᠢᠶᠠ ᠬᠦᠷᠬᠦ ᠶ᠋ᠢᠨ ᠤᠷᠢᠳ ᠭᠠᠷᠴᠤ ᠢᠷᠡᠭᠡᠳ ᠲᠠᠢᠽᠦ ᠳ᠋ᠦ᠍ᠷ ᠵᠣᠯᠭᠠᠵᠤ ᠤᠴᠢᠷ ᠢ᠋ ᠮᠡᠳᠡᠭᠦᠯᠦᠭᠡᠳ ᠬᠠᠮᠲᠤ ᠨᠡᠢᠯᠡᠵᠦ ᠭᠠᠯᠠᠭᠤᠲᠤ ᠠᠭᠤᠯᠠ ᠶ᠋ᠢᠨ ᠵᠦᠭ ᠰᠡᠬᠦᠭᠦᠯᠪᠡ ᠃ ᠡᠭᠦᠨ ᠢ ᠲᠦᠷ ᠬᠡᠯᠡᠬᠦ ᠦᠭᠡᠢ᠃
ᠵᠢᠴᠢ ᠬᠡᠷᠡᠢᠳ ᠦ᠋ᠨ ᠤᠴᠢᠷ ᠢ᠋ ᠬᠡᠯᠡᠬᠦ ᠢᠨᠤ᠄ ᠲᠡᠭᠦᠨᠴᠡ ᠬᠤᠸᠠᠩ ᠲᠠᠢᠽᠢ ᠢᠯᠠᠭᠤ ᠦᠬᠡᠷ ᠪᠠᠳᠤᠨᠠ ᠳ᠋ᠤᠷ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠬᠠᠪᠤᠲᠤ ᠬᠠᠰᠠᠷ ᠢ᠋ ᠬᠠᠭᠠᠯᠭᠠᠷᠠ ᠢᠯᠡᠭᠡᠭᠡᠳ ᠪᠠᠰᠠ ᠳᠤᠮᠳᠠᠳᠤ ᠶᠡᠬᠡ ᠠᠯᠲᠠᠨ ᠤᠯᠤᠰ ᠲᠤᠷ ᠨᠡᠷᠡ ᠲᠡᠢ ᠰᠠᠢᠨ ᠮᠣᠷᠢ ᠲᠠᠪᠤᠨ ᠵᠠᠭᠤᠨ ᠪᠠᠷᠢᠭᠤᠯᠵᠤ᠂ ᠪᠠᠭᠠ ᠰᠠᠭᠠ ᠲᠡᠭᠷᠢ ᠶ᠋ᠢᠨ ᠴᠡᠷᠢᠭ ᠬᠠᠢᠷᠠᠯᠠᠨ ᠢᠯᠡᠭᠡᠵᠦ᠂ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠮᠥᠬᠥᠭᠡᠨ ᠲᠡᠷᠡ ᠵᠢᠯ ᠦ᠋ᠨ ᠲᠡᠭᠷᠢ ᠶ᠋ᠢᠨ ᠡᠯᠴᠢ ᠶ᠋ᠢ ᠢᠴᠢᠭᠡᠭᠰᠡᠨ ᠥᠰᠢᠶᠡ ᠶ᠋ᠢ ᠠᠪᠴᠤ ᠬᠣᠢᠲᠤ ᠭᠠᠵᠠᠷ ᠢ᠋ ᠲᠦᠪᠰᠢᠳᠬᠡᠵᠦ ᠬᠤᠷᠢᠶᠠᠮᠵᠢᠯᠠᠨ ᠠᠪᠤᠮᠤ ᠭᠡᠮᠡᠨ ᠡᠯᠴᠢ ᠢᠯᠡᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠪᠠᠰᠠ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠳᠠᠬᠢᠨ ᠴᠡᠷᠢᠭ ᠡᠯᠰᠡᠵᠦ ᠨᠡᠮᠡᠨ ᠪᠠᠢᠭᠤᠯᠵᠤ᠂ ᠪᠠᠰᠠ ᠲᠡᠷᠡ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠬᠣᠣᠷᠠᠭᠤᠰ ᠪᠥᠭᠰᠡᠷ ᠬᠣᠶᠠᠭᠤᠯᠠ ᠳ᠋ᠤᠷ ᠪᠡᠯᠡᠭ ᠪᠠᠷᠢᠭᠤᠯᠤᠨ ᠵᠡᠭᠦᠨ ᠯᠢᠶᠣᠤ ᠤᠯᠤᠰ ᠤ᠋ᠨ ᠦᠯᠡᠳᠡᠪᠦᠷᠢ ᠲᠥᠷᠥᠯ ᠦ᠋ᠨ ᠶᠧ ᠯᠢᠦᠢ ᠯᠢᠦ ᠭᠧ ᠵᠢᠴᠢ ᠬᠢᠳᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠬᠠᠢ ᠪᠦᠸᠧ ᠵᠢᠶᠦ᠋ᠨ᠂ ᠪᠠᠰᠠ ᠰᠢᠶᠠ ᠤᠯᠤᠰ ᠤ᠋ᠨ ᠡᠵᠡᠨ ᠯᠢ ᠼᠦᠨ ᠰᠢᠦᠢ᠂ ᠪᠠᠰᠠ ᠰᠢ ᠢᠦᠢ ᠤᠯᠤᠰ ᠤ᠋ᠨ ᠡᠵᠡᠨ ᠪᠠᠪᠠᠫᠦ ᠳ᠋ᠦ᠍ᠷ ᠨᠡᠷᠡ ᠪᠡᠯᠡᠭ ᠪᠠᠷᠢᠭᠤᠯᠵᠤ᠂ ᠴᠡᠷᠢᠭ ᠭᠤᠶᠤᠨ ᠨᠡᠯᠢᠶᠡᠳ ᠣᠯᠵᠤ ᠢᠷᠡᠭᠡᠳ ᠣᠳᠣ ᠬᠠᠷᠠᠬᠠᠨ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠳᠠᠬᠢᠨ ᠨᠢᠭᠡᠨ ᠤᠳᠠᠭᠠ ᠠᠯᠠᠨ ᠣᠷᠣᠵᠤ ᠦᠬᠦᠨ ᠪᠠᠢᠯᠳᠤᠬᠤ ᠪᠠᠷ ᠲᠣᠭᠲᠠᠵᠤ᠂ ᠠᠷᠭᠠ ᠪᠠᠨ ᠵᠥᠪᠳᠡᠨ ᠪᠥᠬᠥᠶᠡ᠂ ᠭᠡᠨᠡᠳᠲᠡ ᠪᠧᠲ᠋ᠠ᠋ ᠤᠯᠤᠰ ᠠ᠋ᠴᠠ ᠠᠯᠤᠬᠠ ᠰᠦᠬᠡ ᠬᠡᠮᠡᠭᠴᠢ ᠬᠣᠶᠠᠷ ᠡᠯᠴᠢ ᠢᠷᠡᠵᠦ᠂ ᠸᠠᠩ ᠬᠠᠭᠠᠨ ᠳ᠋ᠤᠷ ᠵᠣᠯᠭᠠᠵᠤ ᠳᠠᠭᠠᠬᠤ ᠪᠢᠴᠢᠭ ᠪᠠᠷᠢᠵᠤ ᠡᠶᠡᠳᠡᠮᠦᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠢᠯᠠᠭᠤ᠂ ᠵᠠᠮᠤᠬᠠ ᠨᠠᠷ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ᠂ ᠢᠯᠠᠭᠤ ᠴᠢᠷᠠᠢ ᠳᠦᠭᠦᠷᠡᠩ ᠣᠮᠣᠷᠬᠠᠭ ᠥᠩᠭᠡ ᠭᠠᠷᠭᠠᠵᠤ᠂ ᠸᠠᠩ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠢᠨᠤ ᠣᠷᠣᠵᠤ ᠮᠡᠳᠡᠭᠦᠯᠦᠷᠦᠨ : 《 ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠮᠠᠨ ᠤ᠋ ᠡᠮᠦᠨᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠡᠷᠭᠡ ᠶ᠋ᠢᠨ ᠲᠠᠪᠤᠨ ᠤᠯᠤᠰ ᠯᠤᠬᠠ ᠨᠢᠭᠡᠳᠦᠭᠰᠡᠨ ᠢ᠋ ᠰᠣᠨᠣᠰᠴᠤ ᠰᠥᠰᠥ ᠬᠡᠮᠬᠡᠷᠡᠨ ᠡᠷᠢᠨ ᠳᠠᠭᠠᠬᠤ ᠡᠯᠴᠢ ᠢᠯᠡᠭᠡᠪᠡ !》 ᠭᠡᠮᠡᠨ ᠬᠡᠩᠭᠡᠷᠭᠡ ᠳᠡᠯᠡᠳᠦᠭᠦᠯᠦᠨ ᠣᠯᠠᠨ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠴᠤᠭᠯᠠᠭᠤᠯᠵᠤ᠂ ᠪᠠᠰᠠ ᠬᠠᠷᠠᠩᠭᠠ ᠴᠣᠬᠢᠭᠤᠯᠵᠤ ᠬᠠᠮᠤᠭ ᠴᠡᠷᠢᠭ ᠢ᠋ ᠬᠤᠷᠢᠶᠠᠵᠤ᠂ ᠶᠡᠬᠡᠯᠡ ᠰᠦᠷ ᠲᠠᠯᠪᠢᠨ᠂ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠠᠯᠤᠬᠠ ᠰᠦᠬᠡ ᠬᠣᠶᠠᠭᠤᠯᠠ ᠶ᠋ᠢ ᠪᠠᠷᠠᠲᠠᠯᠠ ᠨᠡᠩᠵᠢᠭᠦᠯᠵᠦ ᠳᠠᠭᠠᠭᠤᠯᠤᠨ ᠣᠷᠣᠭᠤᠯᠤᠭᠰᠠᠨ ᠳ᠋ᠤᠷ ᠠᠯᠤᠬᠠ ᠠᠵᠢᠭ ᠦᠭᠡᠢ ᠰᠠᠭᠤᠭᠠᠳ 《 ᠠᠯᠠᠲᠤᠭᠠᠢ ᠠᠯᠠᠲᠤᠭᠠᠢ !》 ᠭᠡᠮᠡᠨ ᠪᠠᠷᠬᠢᠷᠠᠬᠤᠢ ᠳ᠋ᠤᠷ ᠸᠠᠩ ᠬᠠᠭᠠᠨ ᠠᠰᠠᠭᠤᠷᠤᠨ : 《 ᠠᠯᠢᠪᠠ ᠤᠯᠤᠰ ᠡᠯᠴᠢ ᠶ᠋ᠢ ᠠᠯᠠᠬᠤ ᠶᠣᠰᠣ ᠪᠣᠢ ᠤᠤ ? 》 ᠠᠯᠤᠬᠠ ᠥᠴᠢᠷᠦᠨ : 《 ᠠᠯᠤᠬᠠ ᠪᠢ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠠᠯᠠᠭᠳᠠᠬᠤ ᠶᠠᠯᠠ ᠲᠠᠢ ᠪᠣᠯᠵᠤ ᠲᠤᠬᠠᠢᠯᠠᠨ ᠲᠠᠨ ᠳ᠋ᠤᠷ ᠠᠯᠠᠭᠳᠠᠷᠠ ᠢᠷᠡᠪᠡ᠂ ᠡᠰᠡ ᠠᠯᠠᠪᠠᠰᠤ ᠠᠪᠴᠤ ᠢᠷᠡᠭᠰᠡᠨ ᠵᠠᠬᠢᠶᠠ ᠪᠠᠨ ᠬᠡᠯᠡᠵᠦ ᠪᠠᠷᠠᠭᠠᠳ ᠠᠯᠠᠭᠳᠠᠶᠠ᠂ ᠠᠯᠤᠬᠠ ᠨᠠᠮᠠᠶ᠋ᠢ ᠡᠵᠡᠨ ᠮᠢᠨᠦ ᠵᠠᠷᠤᠭᠰᠠᠨ ᠠᠨᠤ ᠬᠠᠮᠲᠤ ᠬᠦᠴᠦᠨ ᠨᠢᠭᠡᠨ ᠡᠶᠡ ᠪᠡᠷ ᠪᠣᠯᠵᠤ᠂ ᠲᠠᠨ ᠤ᠋ ᠡᠨᠡ ᠨᠢᠭᠡᠨ ᠤᠳᠠᠭᠠ ᠶ᠋ᠢᠨ ᠶᠠᠯᠠ ᠶ᠋ᠢ ᠬᠡᠯᠲᠦᠷᠢᠭᠦᠯᠦᠨ ᠠᠭᠤᠴᠢᠯᠠᠰᠤᠭᠠᠢ ᠬᠡᠮᠡᠬᠦ ᠶ᠋ᠢᠨ ᠤᠴᠢᠷ᠂ ᠲᠠᠨ ᠤ᠋ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠶᠠᠯᠠ ᠶ᠋ᠢ ᠪᠦᠷᠢᠳᠬᠡᠨ ᠲᠣᠭᠠᠴᠢᠵᠤ ᠠᠰᠠᠭᠤᠭᠠᠳ ᠬᠡᠷᠪᠡ ᠮᠡᠳᠡᠪᠡᠰᠦ ᠮᠡᠳᠡᠭᠰᠡᠨ ᠢ᠋ᠶ᠋ᠡᠷ ᠬᠡᠯᠡᠯᠴᠡᠶᠡ᠂ ᠡᠰᠡ ᠮᠡᠳᠡᠪᠡᠰᠦ ᠡᠰᠡ ᠮᠡᠳᠡᠭᠰᠡᠨ ᠢ᠋ᠶ᠋ᠡᠷ ᠬᠡᠯᠡᠯᠴᠡᠶᠡ ᠬᠡᠮᠡᠮᠦᠢ᠃ ᠲᠠ ᠪᠦᠭᠦᠳᠡᠭᠡᠷ ᠰᠠᠢᠬᠠᠨ ᠰᠣᠨᠣᠰ! ᠮᠢᠨᠦ ᠡᠵᠡᠨ ᠦ᠌ ᠵᠠᠬᠢᠶᠠ: ᠡᠩ ᠲᠡᠷᠢᠭᠦᠨ ᠸᠠᠩ ᠬᠠᠨ ᠤ᠋ ᠴᠢᠨᠦ ᠪᠡᠶᠡ ᠠᠪᠠᠭᠠ ᠳ᠋ᠠᠭᠠᠨ ᠵᠦᠷᠡ ᠳ᠋ᠦ᠍ᠷ ᠠᠯᠢᠪᠠ ᠤᠯᠤᠰ ᠠᠯᠪᠠᠲᠤ ᠬᠠᠷᠢᠶᠠᠲᠤ ᠨᠡᠢᠲᠡ ᠪᠦᠬᠦᠨ ᠢ᠋ᠶ᠋ᠡᠨ ᠴᠥᠮ ᠪᠤᠯᠢᠶᠠᠭᠳᠠᠵᠤ᠂ ᠠᠮᠢᠳᠤᠷᠠᠯ ᠦᠭᠡᠢ ᠪᠣᠯᠤᠭᠠᠳ ᠮᠢᠨᠦ ᠡᠴᠢᠭᠡ ᠪᠠᠭᠠᠲᠤᠷ ᠡᠵᠡᠨ ᠳ᠋ᠦ᠍ᠷ ᠮᠥᠯᠬᠥᠨ ᠬᠦᠷᠴᠦ ᠮᠥᠷᠭᠥᠨ ᠤᠬᠢᠯᠠᠭᠰᠠᠨᠠ᠂ ᠮᠢᠨᠦ ᠡᠴᠢᠭᠡ ᠴᠡᠷᠢᠭ ᠠᠪᠴᠤ ᠬᠤᠰᠢ ᠨᠡᠷᠡᠲᠦ ᠭᠠᠵᠠᠷ ᠤ᠋ᠨ ᠭᠠᠯᠠᠭᠤ ᠨᠡᠷᠡᠲᠦ ᠠᠭᠤᠯᠠᠨᠠ ᠠᠪᠠᠭᠠ ᠶ᠋ᠢᠨ ᠴᠢᠨᠦ ᠵᠦᠷᠡ ᠶ᠋ᠢᠨ ᠴᠡᠷᠢᠭ ᠢ᠋ ᠳᠠᠷᠤᠵᠤ᠂ ᠴᠢᠨᠦ ᠤᠯᠤᠰ ᠠᠯᠪᠠᠲᠤ᠂ ᠡᠮᠡ ᠦᠷᠡ᠂ ᠭᠠᠵᠠᠷ ᠣᠷᠣᠨ ᠢ᠋ ᠪᠦᠷᠢᠨ ᠴᠥᠮ ᠪᠤᠯᠢᠶᠠᠨ ᠠᠪᠴᠤ ᠴᠢᠮᠠ ᠳ᠋ᠤᠷ ᠡᠵᠡᠯᠡᠭᠦᠯᠦᠨ᠂ ᠴᠢᠮᠠᠶ᠋ᠢ ᠡᠮᠡ ᠦᠷᠡ ᠪᠡᠨ ᠡᠪᠦᠷᠯᠡᠬᠦ ᠭᠡᠷ ᠲᠡᠢ᠂ ᠡᠮᠨᠢᠭ ᠮᠣᠷᠢ ᠪᠠᠨ ᠪᠡᠯᠴᠢᠭᠡᠬᠦ ᠪᠡᠯᠴᠢᠭᠡᠷ ᠲᠡᠢ ᠪᠣᠯᠭᠠᠵᠤ᠂ ᠤᠭ ᠦᠨᠳᠦᠰᠦᠨ ᠢ᠋ ᠴᠢᠨᠦ ᠪᠠᠢᠭᠤᠯᠵᠤ ᠥᠭᠭᠦᠭᠰᠡᠨ ᠡᠨᠡ ᠬᠦ᠌ ᠶᠡᠬᠡ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠡᠨᠡ ᠨᠢᠭᠡ᠃ ᠬᠣᠢᠨᠠ ᠮᠢᠨᠦ ᠦᠶᠡ ᠳ᠋ᠦ᠍ᠷ ᠴᠢᠨᠦ ᠪᠡᠶᠡ ᠲᠡᠷᠢᠭᠦᠨ ᠤᠳᠠᠭᠠ ᠮᠠᠢᠯᠵᠢ ᠠᠢᠮᠠᠭ ᠪᠠ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠨᠢᠭᠡᠮᠦᠰᠦᠨ ᠳᠠᠷᠤᠭᠳᠠᠨ ᠤᠯᠤᠰ ᠴᠢᠨᠦ ᠤᠷᠤᠰᠴᠤ ᠠᠢᠮᠠᠭ ᠴᠢᠨᠦ ᠠᠯᠳᠠᠷᠠᠵᠤ᠂ ᠶᠠᠰᠤ ᠮᠢᠬᠠ ᠴᠢᠨᠦ ᠵᠦᠭ ᠵᠦᠭ ᠲᠡᠭᠡᠨ ᠪᠤᠲᠠᠷᠠᠯᠴᠠᠨ ᠰᠠᠯᠤᠯᠴᠠᠵᠤ᠂ ᠴᠢᠨᠦ ᠪᠡᠶᠡ ᠰᠢᠶᠠ ᠤᠯᠤᠰ ᠲᠤᠷ ᠤᠷᠭᠤᠨ ᠡᠴᠢᠵᠦ᠂ ᠴᠢᠨᠦ ᠳᠡᠭᠦᠦ ᠰᠠᠢᠨ ᠤᠬᠠᠭᠠᠨᠲᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠡᠷᠡᠮ ᠦ᠋ᠨ ᠭᠠᠳᠠᠨᠠ ᠬᠢᠲᠠᠳ ᠬᠥᠮᠦᠨ ᠦ᠌ ᠪᠣᠭᠣᠯ ᠪᠣᠯᠵᠤ ᠪᠠᠢᠭᠰᠠᠨ ᠢ᠋ ᠪᠢ ᠵᠦᠭ ᠵᠦᠭ ᠲᠦ᠍ᠷ ᠬᠥᠮᠦᠨ ᠭᠠᠷᠭᠠᠵᠤ ᠴᠤᠭᠯᠠᠭᠤᠯᠤᠨ ᠠᠪᠴᠢᠷᠠᠭᠤᠯᠵᠤ᠂ ᠪᠦᠭᠦᠳᠡᠭᠡᠷ ᠢ᠋ ᠨᠡᠢᠯᠡᠭᠦᠯᠦᠨ᠂ ᠪᠠᠰᠠ ᠴᠢᠨᠦ ᠲᠡᠷᠢᠭᠦᠨ ᠥᠰᠲᠦ ᠮᠠᠢᠯᠵᠢ ᠠᠢᠮᠠᠭ ᠢ᠋ ᠳᠠᠬᠢᠨ ᠢᠷᠡᠵᠦ ᠲᠠᠪᠴᠢᠯᠠᠬᠤᠢ ᠳ᠋ᠤᠷ ᠪᠢ ᠪᠠᠰᠠ ᠠᠬᠠ ᠳᠡᠭᠦᠦ ᠮᠡᠲᠦ ᠬᠠᠨᠢᠯᠠᠭᠰᠠᠨ ᠤᠯᠤᠰ ᠤ᠋ᠨ ᠰᠠᠢᠨ ᠪᠥᠬᠡ ᠬᠠᠭᠠᠨ ᠤ᠋ ᠰᠠᠷᠠᠨ ᠪᠥᠷᠭᠡ᠂ ᠰᠠᠢᠠᠳᠠᠮᠲᠤ ᠬᠣᠶᠠᠭᠤᠯᠠ ᠳ᠋ᠤᠷ ᠴᠡᠷᠢᠭ ᠥᠭᠴᠦ ᠮᠠᠢᠯᠵᠢ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠢ᠋ ᠳᠠᠷᠤᠵᠤ᠂ ᠲᠡᠭᠦᠨ ᠦ᠌ ᠬᠠᠭᠠᠰ ᠠᠢᠮᠠᠭ ᠢ᠋ ᠪᠤᠯᠢᠶᠠᠨ ᠠᠪᠴᠤ ᠴᠢᠮᠠ ᠳ᠋ᠤᠷ ᠥᠭᠴᠦ ᠬᠡᠦᠬᠡᠳ ᠡᠮᠡ ᠴᠢᠨᠦ ᠥᠯᠥᠰᠴᠦ ᠬᠥᠪᠡᠭᠦᠨ ᠥᠬᠢᠳ ᠴᠢᠨᠦ ᠥᠯᠪᠡᠷᠬᠦ ᠶᠡᠬᠡ ᠵᠣᠪᠠᠯᠠᠩ ᠠ᠋ᠴᠠ ᠠᠪᠤᠷᠠᠭᠰᠠᠨ ᠡᠨᠡ ᠬᠦ᠌ ᠶᠡᠬᠡ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠡᠨᠡ ᠬᠣᠶᠠᠷ᠃ ᠪᠠᠰᠠ ᠴᠢᠨᠦ ᠬᠡᠲᠦᠷᠬᠡᠶᠡ ᠣᠯᠠᠨ ᠪᠣᠯᠤᠭᠠᠳ ᠤᠷᠭᠤᠵᠤ ᠪᠣᠰᠤᠭᠰᠠᠨ᠂ ᠴᠢᠨᠦ ᠠᠰᠤᠷᠤ ᠣᠯᠠᠨ ᠪᠣᠯᠵᠤ ᠠᠮᠢᠳᠤᠷᠠᠬᠤᠶᠠ ᠮᠡᠩᠳᠡᠨᠢᠨ ᠪᠦᠬᠦᠢ ᠳ᠋ᠦ᠍ᠷ ᠪᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠴᠡᠷᠢᠭ ᠠᠪᠴᠤ ᠭᠠᠷᠤᠨ᠂ ᠤᠷᠭᠤᠭᠰᠠᠨ ᠤᠷᠪᠠᠭᠰᠠᠨ ᠢ᠋ ᠴᠢᠨᠦ ᠨᠡᠢᠲᠡ ᠪᠡᠷ ᠬᠣᠷᠢᠶᠠᠨ ᠠᠴᠢᠷᠠᠵᠤ ᠴᠢᠮᠠ ᠳ᠋ᠤᠷ ᠵᠠᠬᠢᠷᠤᠭᠤᠯᠤᠭᠰᠠᠨ ᠳ᠋ᠤᠷ ᠴᠢ ᠬᠡᠳᠦᠬᠡᠨ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠥᠯᠪᠡᠷᠦᠭᠰᠡᠳ ᠴᠢᠨᠦ ᠴᠠᠳᠬᠤᠯᠠᠩ ᠪᠣᠯᠵᠤ᠂ ᠡᠴᠡᠭᠰᠡᠳ ᠴᠢᠨᠦ ᠲᠠᠷᠭᠤᠨ ᠪᠣᠯᠤᠭᠠᠳ ᠡᠮᠡ ᠭᠡᠷᠭᠡᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠰᠡᠷᠭᠦ ᠢᠨᠢᠶᠡᠨ᠂ ᠬᠡᠦᠬᠡᠳ ᠱᠤᠤᠬᠠᠳ ᠢ᠋ᠶ᠋ᠠᠨ ᠲᠠᠭᠠᠯᠠᠨ ᠢᠨᠢᠶᠡᠬᠦ ᠪᠣᠯᠤᠭᠰᠠᠨ᠂ ᠡᠨᠡ ᠬᠦ᠌ ᠶᠡᠬᠡ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠡᠨᠡ ᠭᠤᠷᠪᠠ᠃ ᠪᠠᠰᠠ ᠴᠢᠨᠦ ᠤᠯᠤᠰ ᠠᠢᠮᠠᠭ ᠭᠠᠵᠠᠷ ᠨᠤᠲᠤᠭ ᠨᠡᠢᠲᠡ ᠪᠦᠬᠦᠨ ᠢ᠋ ᠮᠥᠨ ᠬᠦ᠌ ᠴᠢᠨᠦ ᠭᠤᠲᠠᠭᠠᠷ ᠳᠡᠭᠦᠦ ᠢᠯᠡᠭᠦᠦ ᠬᠠᠷᠠ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠠᠪᠴᠤ ᠢᠷᠡᠨ ᠴᠥᠮ ᠪᠤᠯᠢᠶᠠᠨ ᠡᠵᠡᠯᠡᠭᠰᠡᠨ ᠢ᠋ ᠴᠢ ᠪᠡᠶᠡ ᠪᠡᠷ ᠲᠡᠮᠡᠭᠡᠨ ᠦ᠌ ᠪᠦᠬᠦ ᠪᠡᠨ ᠴᠠᠪᠴᠢᠵᠤ ᠴᠢᠰᠤᠨ ᠢ᠋ ᠤᠤᠭᠤᠵᠤ᠂ ᠬᠣᠨᠢ ᠢᠮᠠᠭᠠ ᠶ᠋ᠢᠨ ᠰᠦ᠍ ᠶ᠋ᠢ ᠰᠠᠭᠠᠵᠤ ᠢᠳᠡᠭᠰᠡᠭᠡᠷ ᠭᠤᠶᠤᠵᠤ ᠲᠡᠭᠦᠨ᠂ ᠮᠢᠨᠦ ᠤᠯᠤᠰ ᠲᠤᠷ ᠬᠦᠷᠦᠭᠰᠡᠨ ᠢ᠋ ᠪᠢ ᠳᠥᠭᠦᠯᠡ ᠮᠥᠷᠡᠨ ᠦ᠌ ᠵᠠᠬᠠ ᠳ᠋ᠤᠷ ᠭᠠᠵᠠᠷ ᠣᠷᠣᠨ ᠥᠭᠴᠦ ᠪᠠᠰᠠ ᠤᠯᠤᠰ ᠠᠯᠪᠠᠲᠤ ᠵᠠᠬᠢᠷᠤᠭᠤᠯᠤᠨ ᠴᠢᠨᠦ ᠥᠷᠥᠪ ᠴᠥᠷᠣᠪ ᠢ᠋ ᠴᠢᠨᠦ ᠪᠦᠪᠡᠢᠯᠡᠨ ᠲᠡᠵᠢᠭᠡᠵᠦ᠂ ᠴᠢᠨᠦ ᠡᠮᠡ ᠦᠷᠡ ᠶ᠋ᠢ ᠴᠢᠨᠦ ᠥᠷᠥᠰᠢᠶᠡᠨ ᠦᠷᠡᠵᠢᠭᠦᠯᠦᠨ ᠬᠡᠳᠦᠨ ᠵᠢᠯ ᠵᠢᠷᠭᠠᠭᠤᠯᠤᠭᠰᠠᠨ ᠡᠨᠡ ᠬᠦ᠌ ᠶᠡᠬᠡ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠡᠨᠡ ᠳᠥᠷᠪᠡ᠃ ᠳᠠᠭᠠᠯᠳᠤᠭᠠ ᠪᠠᠷ ᠨᠠᠢ᠍ᠮᠠᠨ ᠤᠯᠤᠰ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠲᠠᠨ ᠢ᠋ ᠨᠡᠬᠡᠨ᠂ ᠦᠨᠳᠦᠰᠦᠨ ᠢ᠋ ᠴᠢᠨᠦ ᠲᠠᠰᠤᠯᠵᠤ᠂ ᠦᠨᠡᠰᠦᠨ ᠢ᠋ ᠴᠢᠨᠦ ᠬᠡᠢᠰᠬᠡᠷᠡ ᠢᠷᠡᠵᠦ ᠨᠢᠭᠡᠨᠲᠡ ᠬᠠᠭᠠᠭᠰᠠᠨ ᠢ᠋ ᠪᠢ ᠳᠥᠷᠪᠡᠨ ᠬᠦᠯᠦᠭ ᠲᠣᠷ ᠢ᠋ᠶ᠋ᠠᠨ ᠴᠡᠷᠢᠭ ᠥᠭᠴᠦ ᠢᠯᠡᠬᠡᠨ᠂ ᠴᠢᠨᠦ ᠥᠨᠳᠡᠭᠡ ᠵᠤᠯᠵᠠᠭᠠ ᠶ᠋ᠢᠨ ᠬᠡᠮᠬᠡᠷᠡᠨ ᠪᠦᠷᠢᠯᠵᠦ᠂ ᠥᠷᠥᠪ ᠴᠥᠷᠣᠪ ᠴᠢᠨᠦ ᠪᠢᠯᠴᠠᠷᠠᠨ ᠲᠠᠯᠠᠭᠳᠠᠵᠤ ᠰᠠᠷᠨᠢᠬᠤ ᠠ᠋ᠴᠠ ᠠᠪᠤᠷᠠᠵᠤ᠂ ᠪᠠᠰᠠ ᠴᠢᠨᠦ ᠬᠠᠭᠤᠴᠢᠨ ᠨᠤᠲᠤᠭ ᠤ᠋ᠨ ᠬᠡᠷᠡᠢᠳ ᠠᠢᠮᠠᠭ ᠢ᠋ ᠴᠢᠨᠦ ᠢᠯᠡᠭᠦᠦ ᠬᠠᠷᠠ ᠠ᠋ᠴᠠ ᠪᠤᠯᠢᠶᠠᠨ ᠠᠪᠴᠤ ᠮᠥᠨ ᠬᠦ᠌ ᠴᠢᠮᠠ ᠳ᠋ᠤ᠌ ᠥᠭᠴᠦ᠂ ᠴᠢᠮᠠᠶ᠋ᠢ ᠬᠠᠭᠤᠴᠢᠨ ᠤᠯᠤᠰ ᠲᠤ᠌ ᠴᠢᠨᠦ ᠡᠵᠡᠨ ᠪᠣᠯᠭᠠᠵᠤ᠂ ᠬᠠᠮᠤᠭ ᠢ᠋ ᠴᠢᠨᠦ ᠡᠵᠡᠯᠡᠭᠦᠯᠦᠨ᠂ ᠴᠢᠨᠦ ᠪᠡᠶᠡ ᠶ᠋ᠢ ᠡᠷᠬᠢᠮ ᠦᠪᠡᠳᠡᠭᠰᠢ ᠪᠣᠯᠭᠠᠨ᠂ ᠭᠠᠷ ᠭᠠᠵᠠᠷ ᠬᠥᠯ ᠬᠥᠰᠡᠷ ᠠᠮᠤᠷ ᠵᠢᠷᠭᠠᠯᠠᠩ ᠢ᠋ ᠣᠯᠭᠣᠭᠰᠠᠨ ᠡᠨᠡ ᠬᠦ᠌ ᠶᠡᠬᠡ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠡᠨᠡ ᠲᠠᠪᠤ᠃ ᠪᠠᠰᠠ ᠪᠢ ᠭᠣᠷᠯᠣᠳ ᠤ᠋ᠨ ᠣᠯᠵᠠ ᠪᠠ ᠯᠠᠬᠠᠢᠳ ᠤ᠋ᠨ ᠣᠯᠵᠠ ᠶ᠋ᠢ ᠴᠥᠮ ᠴᠢᠮᠠ ᠳ᠋ᠤᠷ ᠬᠤᠪᠢᠶᠠᠨ ᠥᠭᠴᠦ ᠴᠢᠨᠦ ᠤᠯᠤᠰ ᠠᠢᠮᠠᠭ ᠤ᠋ᠨ ᠥᠯᠥᠨ ᠳᠣᠷᠭᠣᠨ ᠢ᠋ ᠲᠡᠩᠬᠡᠷᠡᠭᠦᠯᠦᠨ ᠲᠡᠵᠢᠭᠡᠵᠦ᠂ ᠤᠯᠤᠰ ᠲᠥᠷᠥ ᠶ᠋ᠢ ᠴᠢᠨᠦ ᠡᠩᠬᠡᠵᠢᠭᠦᠯᠵᠦ ᠥᠭᠭᠦᠭᠰᠡᠨ ᠡᠨᠡ ᠬᠦ᠌ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠡᠨᠡ ᠵᠢᠷᠭᠤᠬᠠ᠃ ᠪᠠᠰᠠ ᠮᠢᠨᠦ ᠪᠡᠶᠡ ᠶ᠋ᠢ ᠠᠯᠠᠷᠠ ᠠᠪᠠᠴᠢᠭᠠᠳ ᠴᠢᠨᠦ ᠪᠡᠶᠡ ᠶ᠋ᠢ ᠮᠢᠨᠦ ᠲᠦᠰᠢᠮᠡᠳ ᠪᠠᠷᠢᠵᠤ ᠠᠴᠢᠷᠠᠲᠠᠯᠠ ᠪᠢ ᠠᠯᠠᠭᠰᠠᠨ ᠦᠭᠡᠢ ᠪᠥᠭᠡᠳ ᠠᠯᠲᠠ ᠲᠣᠷᠭᠠ ᠪᠠᠷ ᠬᠠᠷᠢᠭᠤ ᠬᠦᠷᠭᠡᠭᠰᠡᠨ ᠪᠠᠢᠲᠠᠯᠠ ᠬᠠᠷᠢᠨ ᠴᠡᠷᠢᠭ ᠠᠪᠤᠨ ᠨᠠᠮᠠᠶ᠋ᠢ ᠠᠯᠠᠷᠠ ᠢᠷᠡᠭᠡᠳ ᠪᠠᠰᠠ ᠪᠠᠷᠢᠭᠳᠠᠭᠰᠠᠨ ᠳ᠋ᠤᠷ ᠠᠯᠠᠭᠰᠠᠨ ᠦᠭᠡᠢ ᠬᠠᠷᠢᠭᠤᠯᠪᠠ᠂ ᠡᠨᠡ ᠬᠦ᠌ ᠶᠡᠬᠡ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠳᠣᠯᠣᠭᠠ᠃ ᠮᠢᠨᠦ ᠡᠳᠡᠭᠡᠷ ᠠᠰᠤᠷᠤ ᠶᠡᠬᠡ ᠠᠴᠢ ᠲᠤᠰᠠ ᠶ᠋ᠢ ᠴᠢᠨᠦ ᠪᠡᠶᠡ ᠮᠡᠳᠡᠬᠦ ᠶ᠋ᠢ ᠴᠦ᠍ ᠪᠠᠢᠲᠤᠭᠠᠢ᠂ ᠮᠠᠨ ᠤ᠋ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠨᠡᠢᠲᠡ ᠪᠦᠭᠦᠳᠡᠭᠡᠷ ᠲᠣᠪ ᠳᠣᠲᠣᠷᠬᠠᠶᠠ ᠮᠡᠳᠡᠬᠦ ᠢᠨᠤ ᠪᠣᠯᠠᠢ! ᠮᠢᠨᠦ ᠡᠳᠡᠭᠡᠷ ᠵᠡᠷᠭᠡ ᠶ᠋ᠢᠨ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠢ᠋ ᠴᠢ ᠨᠢᠭᠡᠬᠡᠨ ᠴᠦ᠍ ᠬᠠᠷᠢᠭᠤᠯᠠᠭᠰᠠᠨ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ᠂ ᠭᠡᠳᠡᠷᠭᠦ ᠬᠠᠷᠢᠨ ᠤᠳᠠᠭᠠ ᠳᠠᠷᠠᠭᠠ ᠲᠡᠷᠰᠯᠡᠨ ᠤᠷᠪᠠᠵᠤ ᠥᠰᠢᠶᠡᠯᠡᠨ ᠶᠠᠪᠤᠬᠤ ᠠᠨᠤ ᠶᠠᠭᠤᠨ ᠠᠵᠢ ? ᠲᠠᠨ ᠤ᠋ ᠮᠠᠨ ᠢ᠋ ᠳᠠᠷᠤᠯᠠᠭᠰᠠᠨ ᠶᠠᠯᠠ ᠶ᠋ᠢ ᠬᠤᠷᠤᠭᠤ ᠳᠠᠷᠤᠨ ᠲᠣᠭᠠᠯᠠᠪᠠᠰᠤ : ᠲᠡᠷᠢᠭᠦᠨ ᠳ᠋ᠦ᠍ᠷ ᠮᠠᠨ ᠳ᠋ᠤᠷ ᠳᠠᠭᠠᠭᠰᠠᠨ ᠮᠡᠷᠭᠡᠨ ᠠᠢᠮᠠᠭ ᠤ᠋ᠨ ᠮᠠᠩᠨᠣᠭᠲᠤ ᠶ᠋ᠢᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠣᠯᠠᠨ ᠢ᠋ ᠳᠠᠪᠴᠢᠯᠠᠪᠠ᠃ ᠲᠠᠨ ᠤ᠋ ᠰᠥᠷᠴᠦ ᠲᠡᠷᠰᠯᠡᠭᠰᠡᠨ ᠶᠠᠪᠤᠳᠠᠯ ᠡᠨᠡ ᠨᠢᠭᠡᠳᠦᠭᠡᠷ᠃ ᠪᠢᠳᠡ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠵᠠᠮᠤᠬᠠ ᠲᠡᠷᠡ ᠤᠴᠢᠷ ᠲᠤᠷ ᠤᠷᠪᠠᠵᠤ ᠤᠷᠭᠤᠭᠰᠠᠨ ᠪᠥᠯᠥᠭᠡ᠂ ᠳᠠᠷᠠᠭᠠ ᠪᠠᠷ ᠭᠣᠷᠯᠣᠳ ᠢ᠋ ᠪᠠᠢᠯᠳᠤᠬᠤ ᠤᠳᠠᠭᠠ ᠴᠢ ᠲᠠᠩᠭᠠᠷᠢᠭ ᠠ᠋ᠴᠠ ᠨᠣᠴᠣᠵᠤ᠂ ᠭᠣᠷᠯᠣᠳ ᠤ᠋ᠨ ᠬᠠᠬᠤᠤᠯᠢ ᠶ᠋ᠢ ᠢᠳᠡᠵᠦ᠂ ᠴᠡᠷᠢᠭ ᠢ᠋ᠶ᠋ᠡᠨ ᠲᠠᠲᠠᠵᠤ ᠰᠡᠮᠡᠬᠡᠷ ᠤᠷᠭᠤᠵᠤ ᠪᠢᠳᠡᠨ ᠢ᠋ ᠭᠡᠨᠡᠳᠡᠭᠦᠯᠪᠡ᠃ ᠡᠨᠡ ᠰᠥᠷᠴᠦ ᠲᠡᠷᠰᠯᠡᠭᠰᠡᠨ ᠶᠠᠪᠤᠳᠠᠯ ᠡᠨᠡ ᠬᠣᠶᠠᠷ᠃ ᠪᠢᠳᠡ ᠪᠠᠰᠠ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠪᠠᠰᠠ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠴᠢᠦᠢ ᠰᠢᠦᠸᠠᠢ ᠡᠦ ᠴᠡᠷᠢᠭ ᠠᠪᠤᠨ ᠮᠠᠨ ᠢ᠋ ᠳᠠᠷᠤᠯᠠᠵᠤ᠂ ᠳᠠᠯᠠᠭᠠᠳ ᠨᠡᠷᠡᠲᠦ ᠭᠠᠵᠠᠷᠠ ᠶᠡᠬᠡ ᠪᠠᠢᠯᠳᠤᠭᠠᠨ ᠪᠣᠯᠵᠤ ᠪᠠᠢᠲᠠᠯᠠ ᠳᠠ ᠰᠣᠨᠣᠰᠴᠤ ᠪᠠᠢᠭᠠᠳ ᠲᠤᠰᠠᠯᠠᠬᠤ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ᠂ ᠬᠠᠷᠢᠨ ᠬᠤᠯᠠᠭᠠᠢ ᠴᠡᠷᠢᠭ ᠢ᠋ᠶ᠋ᠡᠷ ᠬᠤᠯᠠᠭᠤᠵᠤ ᠣᠯᠵᠠᠯᠠᠪᠠ᠃ ᠡᠨᠡ ᠵᠢᠷᠤᠮ ᠦᠭᠡᠢ ᠲᠡᠷᠰᠯᠡᠭᠦᠦ ᠡᠨᠡ ᠭᠤᠷᠪᠠ᠃ ᠪᠢᠳᠡ ᠪᠠᠰᠠ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠳᠠᠭᠠᠯᠳᠤᠭᠠ ᠮᠢᠨᠦ ᠤᠷᠤᠭᠤᠳᠠᠯ ᠪᠣᠭᠣᠯ ᠵᠠᠮᠤᠬᠠ ᠲᠡᠭᠷᠢ ᠶ᠋ᠢ ᠰᠥᠷᠴᠦ ᠬᠠᠭᠠᠨ ᠨᠡᠷᠡᠢᠳᠴᠦ ᠪᠢ ᠳᠠᠢᠯᠠᠨ ᠳᠠᠷᠤᠭᠳᠠᠭᠤᠯᠤᠭᠰᠠᠨ ᠢ᠋ ᠲᠠ ᠪᠠᠷᠢᠭᠰᠠᠨ ᠪᠥᠭᠡᠳ ᠨᠠᠳᠠ ᠳ᠋ᠤᠷ ᠡᠰᠡ ᠲᠤᠰᠢᠶᠠᠬᠤ ᠪᠠᠷ ᠦᠯᠦ ᠪᠠᠷᠠᠨ᠂ ᠲᠡᠷᠡ ᠨᠣᠬᠠᠢ ᠪᠠᠷ ᠨᠠᠳᠠ ᠳ᠋ᠤᠷ ᠬᠠᠯᠳᠠᠵᠤ ᠶᠠᠪᠤᠬᠤ ᠡᠨᠡ ᠵᠢᠷᠤᠮ ᠦᠭᠡᠢ ᠲᠡᠷᠰᠯᠡᠭᠦᠦ ᠶᠠᠪᠤᠳᠠᠯ ᠳᠥᠷᠪᠡ᠃ ᠪᠢᠳᠡ ᠪᠠᠰᠠ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠳᠠᠷᠠᠭᠠ ᠪᠠᠰᠠ ᠮᠢᠨᠦ ᠲᠤᠰ ᠥᠰᠢᠶᠡᠲᠡᠨ ᠢ᠋ ᠲᠠᠯᠪᠢᠨ ᠢᠯᠡᠭᠡᠵᠦ᠂ ᠮᠢᠨᠦ ᠳᠦᠭᠦᠯᠡ ᠮᠥᠷᠡᠨ ᠦ᠌ ᠡᠮᠦᠨᠡ ᠪᠦᠬᠦᠢ ᠡᠪᠦᠯᠵᠢᠶᠡᠨ ᠦ᠌ ᠨᠤᠲᠤᠭ ᠢ᠋ ᠮᠢᠨᠦ ᠭᠠᠯ ᠲᠠᠯᠪᠢᠭᠤᠯᠤᠨ᠂ ᠮᠢᠨᠦ ᠤᠯᠤᠰ ᠠᠯᠪᠠᠲᠤ ᠶ᠋ᠢᠨ ᠭᠡᠷ ᠨᠤᠲᠤᠭ ᠡᠳ᠋ ᠮᠠᠯ ᠢ᠋ ᠳᠠᠪᠴᠢᠯᠠᠭᠰᠠᠨ ᠡᠨᠡ ᠵᠢᠷᠤᠮ ᠦᠭᠡᠢ ᠶᠠᠪᠤᠳᠠᠯ ᠲᠠᠪᠤ᠃ ᠪᠠᠰᠠ ᠥᠨᠥᠬᠡᠨ ᠮᠢᠨᠦ ᠪᠡᠶᠡ ᠶ᠋ᠢ ᠬᠠᠭᠤᠷᠤᠨ ᠠᠪᠠᠴᠢᠵᠤ᠂ ᠵᠥᠭᠡᠯᠡᠨ ᠬᠣᠣᠷ ᠤ᠋ᠨ ᠭᠤᠷᠪᠠᠨ ᠵᠢᠭᠰᠠᠭᠠᠯ᠂ ᠬᠠᠲᠠᠭᠤ ᠳᠠᠢᠰᠤᠨ ᠤ᠋ ᠭᠤᠷᠪᠠᠨ ᠵᠢᠭᠰᠠᠭᠠᠯ ᠪᠡᠯᠡᠳᠬᠡᠵᠦ᠂ ᠵᠢᠷᠭᠤᠭᠠᠨ ᠳᠠᠪᠬᠤᠷ ᠬᠣᠷᠣ ᠬᠠᠷᠠ ᠶ᠋ᠢ ᠪᠡᠯᠡᠳᠴᠦ ᠨᠠᠮᠠᠶ᠋ᠢ ᠠᠯᠠᠰᠤᠭᠠᠢ ᠬᠡᠮᠡᠭᠰᠡᠨ ᠡᠨᠡ ᠵᠢᠷᠤᠮ ᠦᠭᠡᠢ ᠲᠡᠷᠰᠯᠡᠭᠦᠦ ᠶᠠᠪᠤᠳᠠᠯ ᠵᠢᠷᠭᠤᠬᠠ᠃ ᠪᠢᠳᠡ ᠪᠠᠰᠠ ᠬᠦ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠡᠳᠦᠭᠡ ᠴᠢ ᠪᠡᠶᠡ ᠪᠡᠨ ᠬᠠᠭᠠᠨ ᠭᠡᠮᠡᠨ ᠡᠷᠭᠦᠭᠡᠳ ᠬᠠᠷᠢᠨ ᠭᠡᠳᠡᠷᠭᠦ ᠠᠴᠢᠲᠠᠨ ᠤ᠋ ᠬᠠᠷᠢᠭᠤ ᠠᠯᠠᠬᠤ ᠪᠠᠷ ᠬᠠᠷᠢᠭᠤᠯᠠᠵᠤ᠂ ᠳᠤᠲᠠᠭᠠᠵᠤ ᠪᠠᠢᠬᠤ ᠪᠢᠳᠡᠨ ᠢ᠋ ᠳᠡᠰ ᠠᠭᠤᠯᠠᠨᠠ ᠨᠡᠬᠡᠨ ᠬᠦᠷᠴᠦ ᠡᠷᠢᠨ ᠠᠯᠠᠷᠠ ᠡᠴᠢᠭᠰᠡᠨ᠂ ᠡᠨᠡ ᠵᠢᠷᠤᠮ ᠦᠭᠡᠢ ᠶᠠᠪᠤᠳᠠᠯ ᠳᠣᠯᠣᠭᠠ᠃ ᠡᠢᠨ ᠬᠦ᠌ ᠤᠳᠠᠭᠠ ᠳᠠᠷᠠᠭᠠ ᠳᠣᠯᠣᠭᠠᠨ ᠵᠡᠷᠭᠡ ᠶ᠋ᠢᠨ ᠶᠡᠬᠡ ᠠᠴᠢ ᠲᠤᠰᠠ ᠶ᠋ᠢ ᠲᠠ ᠨᠢᠭᠡᠨ ᠤᠳᠠᠭᠠ ᠴᠤ᠌ ᠬᠠᠷᠢᠭᠤᠯᠠᠬᠤ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ᠂ ᠭᠡᠳᠡᠷᠭᠦ ᠬᠠᠷᠢᠨ ᠤᠳᠠᠭᠠ ᠪᠦᠷᠢ ᠬᠠᠷᠭᠢᠰ ᠰᠥᠷᠭᠡᠦ ᠪᠡᠷ ᠳᠣᠯᠣᠭᠠᠨ ᠵᠡᠷᠭᠡ ᠬᠠᠯᠳᠠᠨ ᠲᠡᠷᠰᠯᠡᠬᠦ ᠢᠨᠤ ᠡᠭᠡᠨᠡᠭᠲᠡ ᠶᠠᠭᠤᠨ ᠤ᠋ ᠦᠰ ᠥᠰᠢᠶᠡ ᠪᠠᠢᠬᠤ ᠠᠵᠢ ? ᠮᠣᠷᠢ ᠪᠣᠯᠪᠠᠴᠤ ᠡᠵᠡᠨ ᠳ᠋ᠡᠭᠡᠨ ᠡᠭᠡᠯᠢᠲᠡᠢ ᠭᠠᠵᠠᠷ ᠪᠣᠢ᠂ ᠨᠣᠬᠠᠢ ᠪᠣᠯᠪᠠᠴᠤ ᠡᠷᠦᠬᠡ ᠳ᠋ᠡᠭᠡᠨ ᠡᠯᠢᠭᠡᠰᠢᠶᠡᠬᠦ ᠰᠡᠳᠬᠢᠯ ᠪᠣᠢ ᠪᠥᠭᠡᠲᠡᠯᠡ ᠡᠵᠡᠨ ᠬᠠᠭᠠᠨ ᠭᠡᠮᠡᠨ ᠨᠡᠷᠡᠢᠳᠦᠭᠡᠳ ᠢᠩᠭᠢᠵᠦ ᠶᠠᠪᠤᠳᠠᠭ ᠬᠠᠤᠯᠢ ᠪᠣᠢ ᠤᠤ ? ᠡᠳᠦᠭᠡ ᠪᠠᠰᠠ ᠬᠦ᠌ ᠡᠯᠳᠡᠪ ᠭᠠᠵᠠᠷ ᠡᠯᠡ ᠤᠯᠤᠰ ᠠ᠋ᠴᠠ ᠴᠡᠷᠢᠭ ᠲᠠᠲᠠᠵᠤ ᠡᠭᠡᠨᠡᠭᠲᠡ ᠬᠡᠷᠬᠢᠰᠦᠭᠡᠢ ᠬᠡᠮᠡᠬᠦ ᠠᠵᠢ !ᠡᠷᠬᠡᠪᠰᠢ ᠨᠠᠮᠠᠶ᠋ᠢ ᠶᠡᠬᠡ ᠴᠡᠷᠢᠭ ᠬᠥᠳᠡᠯᠭᠡᠵᠦ ᠨᠤᠲᠤᠭ ᠢ᠋ᠶ᠋ᠠᠨ ᠤᠯᠠᠢᠲᠠᠯᠠ ᠦᠨᠡᠰᠦᠨ ᠢ᠋ᠶ᠋ᠡᠨ ᠬᠡᠢᠰᠲᠡᠯᠡ ᠦᠷᠡ ᠪᠡᠨ ᠲᠠᠰᠤᠷᠠᠲᠠᠯᠠ ᠦᠨᠳᠦᠰᠦᠨ ᠢ᠋ᠶ᠋ᠡᠨ ᠳᠡᠢᠯᠦᠭᠳᠡᠨ ᠮᠥᠬᠥᠭᠡᠭᠳᠡᠬᠦ ᠶ᠋ᠢ ᠬᠦᠯᠢᠶᠡᠮᠦᠢ ᠦᠦ ? ᠡᠳᠦᠭᠡ ᠬᠡᠲᠦᠷᠬᠡᠶᠡ ᠮᠤᠩᠬᠠᠭ ᠲᠤᠷ ᠴᠢᠨᠦ ᠡᠨᠡ ᠮᠡᠲᠦ ᠬᠡᠯᠡᠭᠦᠯᠦᠨ ᠢᠯᠡᠬᠡᠨ ᠪᠢᠴᠢᠭ ᠥᠭᠴᠦ ᠪᠠᠢᠲᠠᠯᠠ ᠪᠠᠰᠠ ᠬᠦ᠌ ᠰᠡᠩᠬᠡᠷᠡᠨ ᠮᠡᠳᠡᠬᠦ ᠦᠭᠡᠢ᠂ ᠮᠥᠷᠭᠥᠵᠦ ᠳᠠᠭᠠᠷᠠ ᠢᠷᠡᠬᠦ ᠦᠭᠡᠢ ᠪᠣᠯᠪᠠᠰᠤ ᠬᠣᠢᠴᠢ ᠡᠳᠦᠷ ᠬᠠᠮᠤᠭ ᠪᠦᠬᠦᠨ ᠢ᠋ᠶ᠋ᠡᠨ ᠴᠥᠮ ᠪᠦᠷᠢᠯᠭᠡᠭᠡᠳ ᠬᠠᠯᠠᠭᠤᠨ ᠠᠮᠢᠨ ᠠ᠋ᠴᠠ ᠬᠠᠭᠠᠴᠠᠨ ᠰᠠᠯᠬᠤ ᠲᠡᠷᠡ ᠴᠠᠭ ᠲᠤᠷ ᠬᠠᠯᠠᠰᠢᠷᠠᠨ ᠭᠡᠮᠰᠢᠵᠦ ᠬᠠᠷᠪᠢᠰᠤ ᠮᠡᠲᠦ ᠬᠠᠷᠭᠢᠰ ᠬᠥᠪᠡᠭᠦᠨ ᠳ᠋ᠡᠭᠡᠨ ᠲᠦᠯᠬᠢᠯᠡᠨ᠂ ᠪᠢᠲᠡᠭᠡᠢ ᠬᠠᠲᠤᠭᠲᠠᠢ ᠬᠥᠮᠦᠨ ᠦ᠌ ᠠᠭᠠᠰᠢ ᠵᠠᠩ ᠭᠠᠷᠭᠠ ᠭᠡᠮᠡᠨ ᠠᠯᠤᠬᠠ ᠨᠠᠮᠠᠶ᠋ᠢ ᠵᠠᠷᠤᠵᠤ ᠢᠯᠡᠭᠡᠪᠡ᠃ ᠤᠷᠢᠳᠠ ᠲᠠᠨ ᠳ᠋ᠤᠷ ᠳᠠᠭᠠᠬᠤ ᠪᠢᠴᠢᠭ ᠪᠢᠴᠢᠮᠦᠢ ᠬᠡᠮᠡᠭᠰᠡᠨ ᠪᠠ ᠪᠢ ᠣᠷᠣᠵᠤ ᠢᠷᠡᠮᠡᠭᠴᠡ ᠲᠠᠨ ᠢ᠋ ᠲᠡᠩᠰᠡᠵᠦ ᠮᠡᠳᠡᠶᠡ ᠬᠡᠮᠡᠭᠰᠡᠨ ᠮᠢᠨᠦ ᠡᠭᠡᠨᠡᠭᠲᠡ ᠡᠳᠡᠭᠡᠷ ᠦᠭᠡ ᠶ᠋ᠢ ᠬᠡᠯᠡᠵᠦ ᠪᠦᠷᠢᠳᠬᠡᠬᠦ ᠴᠢᠯᠥᠭᠡ ᠶ᠋ᠢ ᠡᠷᠢᠭᠰᠡᠨ ᠬᠡᠷᠡᠭ ᠪᠥᠯᠥᠭᠡ᠂ ᠡᠨᠡ ᠪᠢᠴᠢᠭ ᠶᠠᠭᠠᠬᠢᠭᠰᠠᠨ ᠲᠠᠨ ᠳ᠋ᠤᠷ ᠳᠠᠭᠠᠬᠤ ᠪᠢᠴᠢᠭ᠂ ᠭᠡᠳᠡᠷᠭᠦ ᠬᠠᠷᠢᠨ ᠲᠠᠨ ᠢ᠋ ᠳᠠᠭᠠᠭᠤᠯᠬᠤ ᠪᠢᠴᠢᠭ ᠪᠣᠯᠠᠢ᠃ ᠦᠭᠡ ᠪᠠᠷᠠᠭᠰᠠᠨ ᠬᠣᠢᠨᠠ ᠲᠠᠨ ᠤ᠋ ᠠᠯᠠᠬᠤ ᠠ᠋ᠴᠠ ᠶᠠᠭᠤᠨ ᠠᠶᠤᠬᠤ ? ᠮᠢᠨᠦ ᠡᠵᠡᠨ ᠬᠠᠭᠠᠨ ᠴᠢᠮᠠᠶ᠋ᠢ ᠳᠣᠯᠣᠭᠠᠨ ᠤᠳᠠᠬᠠ ᠠᠪᠤᠷᠠᠭᠰᠠᠨ ᠠᠴᠢ ᠳ᠋ᠤᠷ ᠬᠠᠨ ᠴᠢ ᠣᠳᠣ ᠨᠠᠮᠠᠶ᠋ᠢ ᠨᠢᠭᠡᠬᠡᠨ ᠤᠳᠠᠭᠠ ᠠᠯᠠᠵᠤ ᠬᠠᠷᠢᠭᠤᠯᠠᠭᠳᠠᠬᠤᠢ ! ᠪᠢ ᠬᠡᠮᠡᠭᠴᠢ ᠪᠧᠲ᠋ᠠ᠋ ᠤᠯᠤᠰ ᠲᠠᠭᠠᠨ ᠠᠯᠠᠭᠳᠠᠬᠤ ᠶᠠᠯᠠ ᠲᠠᠢ ᠲᠤᠯᠠ ᠲᠤᠬᠠᠢᠯᠠᠨ ᠡᠨᠡ ᠭᠠᠵᠠᠷᠠ ᠠᠯᠠᠨᠳᠠᠷᠠ ᠢᠷᠡᠪᠡᠢ ᠪᠢ ! 》 ᠭᠡᠮᠡᠨ ᠬᠡᠯᠡᠭᠡᠳ ᠦᠵᠡᠪᠡᠰᠦ ᠲᠠᠢᠽᠦ ᠠ᠋ᠴᠠ ᠤᠷᠪᠠᠭᠰᠠᠨ ᠠᠷᠳᠠ᠂ ᠬᠤᠰᠠᠭᠤᠷ᠂ ᠳᠡᠯᠵᠢᠲᠠᠢ ᠭᠤᠷᠪᠠᠭᠤᠯᠠ ᠪᠠᠰᠠ ᠸᠠᠩ ᠬᠠᠭᠠᠨ ᠤ᠋ ᠬᠠᠵᠠᠭᠤᠳᠠ ᠲᠦᠰᠢᠮᠡᠯ ᠦ᠋ᠨ ᠶᠣᠰᠣᠭᠠᠷ ᠵᠣᠭᠰᠣᠵᠤ ᠪᠣᠢ ᠲᠤᠯᠠ ᠠᠯᠤᠬᠠ ᠳᠠᠷᠤᠢ ᠬᠤᠷᠤᠭᠤ ᠪᠠᠷ ᠵᠢᠭᠠᠵᠤ ᠥᠭᠦᠯᠡᠷᠦᠨ : 《 ᠡᠵᠡᠨ ᠦ᠌ ᠵᠠᠬᠢᠶᠠ᠂ ᠲᠠ ᠭᠤᠷᠪᠠᠭᠤᠯᠠ ᠳ᠋ᠤᠷ ᠵᠠᠬᠢᠵᠤ ᠥᠭ ᠬᠡᠮᠡᠭᠰᠡᠨ ᠢᠨᠤ : ᠡᠷᠲᠡ ᠮᠠᠨ ᠤ᠋ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠡᠵᠡᠨ ᠡᠬᠢ ᠦᠭᠡᠢ ᠪᠦᠬᠦᠢ ᠴᠠᠭ ᠲᠤᠷ ᠣᠯᠠᠨ ᠢ᠋ᠶ᠋ᠠᠷ ᠨᠠᠮᠠᠶ᠋ᠢ ᠭᠣᠣᠯ ᠰᠠᠯᠠᠬᠠ ᠴᠣᠬᠣᠮ ᠦᠨᠳᠦᠰᠦ ᠭᠡᠮᠡᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠪᠣᠯᠭᠠᠨ ᠮᠥᠷᠭᠥᠬᠦ ᠴᠠᠭ ᠲᠤᠷ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠠᠬᠠ ᠳᠡᠭᠦᠦ ᠪᠣᠯᠬᠤ ᠰᠠᠷᠠᠨ ᠪᠥᠷᠭᠡ᠂ ᠰᠠᠢᠠᠳᠠᠮᠲᠤ ᠨᠠᠷ ᠢ᠋ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠬᠠᠪᠰᠤᠷᠤᠨ ᠵᠠᠬᠢᠷᠤᠶᠠ ᠭᠡᠮᠡᠨ ᠬᠡᠯᠡᠬᠦᠯᠡ ᠲᠡᠳᠡ ᠦᠯᠦ ᠪᠣᠯᠬᠤ ᠶ᠋ᠢᠨ ᠲᠤᠯᠠ ᠪᠢ ᠲᠠᠨ ᠤ᠋ ᠭᠤᠷᠪᠠᠭᠤᠯᠠ ᠶ᠋ᠢ ᠮᠢᠨᠦ ᠲᠥᠷᠥᠯ ᠦ᠋ᠨ ᠶᠠᠰᠤ ᠤᠭᠰᠠᠭᠠ ᠭᠡᠮᠡᠨ ᠬᠡᠯᠡᠬᠦᠯᠡ ᠲᠠᠨ ᠤ᠋ ᠭᠤᠷᠪᠠᠭᠤᠯᠠ ᠲᠡᠮᠡᠭᠡ ᠶ᠋ᠢᠨ ᠠᠴᠢᠶᠠ ᠬᠦᠨᠳᠦ ᠭᠡᠮᠡᠨ ᠡᠰᠡ ᠪᠣᠯᠪᠠ᠃ ᠡᠭᠦᠨ ᠳ᠋ᠦ᠍ᠷ ᠤᠯᠤᠰ ᠲᠤᠷ ᠡᠵᠡᠨ ᠦᠭᠡᠢ ᠦᠯᠦ ᠪᠣᠯᠬᠤ ᠲᠤᠯᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠣᠯᠠᠨ ᠢ᠋ᠶ᠋ᠠᠷ ᠪᠢᠴᠢᠬᠠᠨ ᠠᠲᠠᠯᠠ ᠨᠠᠮᠠᠶ᠋ᠢ ᠭᠣᠣᠯ ᠰᠠᠯᠠᠭᠠ ᠭᠡᠮᠡᠨ ᠡᠷᠭᠦᠵᠦ ᠡᠵᠡᠯᠡᠭᠦᠯᠦᠭᠰᠡᠨ ᠪᠣᠢ ᠶᠡ ᠂ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠪᠤᠯᠢᠶᠠᠵᠤ ᠡᠵᠡᠯᠡᠭᠰᠡᠨ ᠢᠨᠤ ᠪᠤᠰᠤ ᠶ᠋ᠢ ᠲᠠ ᠴᠥᠮ ᠮᠡᠳᠡᠬᠦ ᠪᠤᠰᠤ ᠤᠤ ? ᠲᠡᠢᠨ ᠬᠦ᠌ ᠬᠣᠢᠨᠠ ᠪᠢ ᠵᠠᠰᠠᠭ ᠴᠠᠭᠠᠵᠠ ᠶ᠋ᠢ ᠲᠡᠭᠰᠢᠳᠬᠡᠵᠦ᠂ ᠴᠡᠷᠢᠭ ᠬᠤᠶᠠᠭ ᠢ᠋ ᠪᠢᠰᠢᠷᠡᠭᠦᠯᠦᠨ ᠬᠡᠷᠡᠭᠯᠡᠬᠦᠶᠡ᠂ ᠲᠠ ᠭᠤᠷᠪᠠᠭᠤᠯᠠ ᠮᠢᠨᠦ ᠲᠥᠷᠥᠯ ᠦ᠋ᠨ ᠠᠬᠠᠮᠠᠳ ᠬᠥᠪᠡᠭᠦᠨ ᠪᠥᠭᠡᠳ ᠮᠢᠨᠦ ᠵᠠᠰᠠᠭ ᠴᠠᠭᠠᠵᠠ ᠶ᠋ᠢ ᠰᠥᠷᠬᠦᠢ ᠳ᠋ᠦ᠍ᠷ ᠪᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠬᠥᠮᠦᠨ ᠢ᠋ ᠬᠡᠷᠬᠢᠨ ᠵᠠᠰᠠᠭᠯᠠᠨ ᠴᠠᠭᠠᠵᠠᠯᠠᠬᠤ ᠠᠵᠢ ? ᠲᠡᠢᠨ ᠠᠲᠠᠯᠠ ᠲᠠ ᠮᠢᠨᠦ ᠵᠠᠰᠠᠭ ᠴᠠᠭᠠᠵᠠ ᠠ᠋ᠴᠠ ᠳᠠᠪᠠᠵᠤ᠂ ᠣᠯᠠᠨ ᠴᠡᠷᠢᠭ ᠯᠦ᠍ᠭᠡ ᠬᠠᠮᠲᠤ ᠣᠯᠵᠠᠯᠠᠭᠰᠠᠨ ᠢ᠋ ᠳᠠᠭᠠ ᠳᠠᠭᠠ ᠪᠠᠷ ᠥᠮᠴᠢᠯᠡᠨ ᠡᠵᠡᠷᠬᠡᠬᠦᠢ ᠳ᠋ᠦ᠍ᠷ ᠪᠠᠰᠠ ᠪᠢ ᠲᠠᠨ ᠢ᠋ ᠢᠯᠡ ᠵᠠᠰᠠᠭ ᠤ᠋ᠨ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠵᠤ ᠰᠢᠳᠬᠡᠪᠡᠰᠦ ᠵᠣᠬᠢᠬᠤ ᠠᠲᠠᠯᠠ ᠲᠡᠢᠨ ᠠᠪᠠᠴᠢᠪᠠᠰᠤ ᠲᠥᠷᠥᠯ ᠳ᠋ᠡᠭᠡᠨ ᠲᠥᠷᠥᠯᠰᠡᠭ᠂ ᠡᠯᠢᠭᠡ ᠳ᠋ᠡᠭᠡᠨ ᠡᠶᠡᠯᠰᠡᠭ ᠦᠭᠡᠢ ᠪᠣᠯᠭᠤᠵᠠᠢ ᠭᠡᠮᠡᠨ ᠲᠠᠨ ᠢ᠋ ᠠᠯᠠᠬᠤ ᠶᠠᠯᠠ ᠠ᠋ᠴᠠ ᠠᠪᠤᠷᠠᠨ᠂ ᠬᠡᠯᠪᠡᠢᠭᠦᠦ ᠶᠠᠯᠠ ᠠ᠋ᠴᠠ ᠬᠡᠯᠲᠦᠷᠢᠭᠦᠯᠦᠨ ᠭᠠᠷᠭᠠᠭᠰᠠᠨ ᠪᠥᠭᠡᠲᠡᠯᠡ ᠲᠠ ᠬᠠᠷᠢᠨ ᠰᠢᠲᠦᠬᠦ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ᠂ ᠰᠢᠲᠦ ᠵᠠᠭᠤᠨ ᠨᠠᠮᠠᠶ᠋ᠢ ᠠᠯᠠᠬᠤ ᠳᠠᠢᠰᠤᠨ ᠯᠤᠬᠠ ᠳᠣᠲᠣᠭᠤᠷ ᠵᠥᠪᠯᠡᠯ ᠨᠡᠢᠴᠡᠵᠦ ᠪᠠᠢᠲᠠᠯᠠ ᠪᠢ ᠪᠠᠰᠠ ᠬᠦ᠌ ᠬᠡᠷᠡᠭᠰᠡᠭᠰᠡᠨ ᠦᠭᠡᠢ ᠪᠥᠬᠥᠶᠡ᠂ ᠡᠳᠦᠭᠡ ᠢᠯᠡᠷᠭᠡᠶᠡ ᠤᠷᠪᠠᠨ ᠣᠳᠬᠤᠢ ᠳ᠋ᠤᠷ ᠬᠦᠷᠦᠭᠰᠡᠨ ᠢᠨᠦ ᠪᠢ ᠲᠠᠨ ᠢ᠋ ᠦᠲᠡᠭᠡᠷᠦᠨ ᠬᠣᠷᠣᠰᠬᠠᠭᠰᠠᠨ ᠶᠠᠮᠪᠠᠷ ᠭᠠᠵᠠᠷ ᠪᠣᠢ ᠠᠮᠤᠢ ? ᠡᠳᠦᠭᠡ ᠠᠷᠤ ᠭᠠᠵᠠᠷ ᠤ᠋ᠨ ᠡᠨᠡᠬᠦ ᠭᠤᠷᠪᠠᠨ ᠮᠥᠷᠡᠨ ᠬᠡᠮᠡᠭᠴᠢ ᠮᠠᠨ ᠤ᠋ ᠤᠷᠢᠳᠤᠰ ᠡᠪᠦᠭᠡᠳ ᠦ᠋ᠨ ᠬᠠᠭᠠᠨ ᠰᠠᠭᠤᠷᠢᠨ ᠪᠠᠢᠭᠤᠯᠤᠭᠰᠠᠨ ᠠᠭᠤᠯᠠ ᠤᠰᠤ ᠪᠤᠶᠤ᠂ ᠲᠠ ᠲᠡᠭᠦᠨ ᠢ᠋ ᠬᠢᠲᠠᠳ ᠲᠤᠷ ᠪᠢᠲᠡᠭᠡᠢ ᠡᠵᠡᠯᠡᠭᠦᠯ᠂ ᠲᠠ ᠭᠤᠷᠪᠠᠭᠤᠯᠠ ᠸᠠᠩ ᠬᠠᠭᠠᠨ ᠳ᠋ᠤᠷ ᠢ᠋ᠶ᠋ᠠᠨ ᠦᠨᠡᠨ ᠬᠦᠴᠦ ᠪᠡᠨ ᠪᠠᠷᠢᠲᠤᠭᠠᠢ᠂ ᠪᠢᠲᠡᠭᠡᠢ ᠭᠠᠳᠠᠭᠠᠳᠤ ᠤᠯᠤᠰ ᠲᠤᠷ ᠠᠢᠮᠠᠭ ᠢ᠋ ᠠᠨᠤ ᠠᠪᠲᠠᠬᠤᠢ ᠳ᠋ᠤᠷ ᠬᠦᠷᠦᠭᠦᠯᠦᠭᠲᠦᠨ᠂ ᠪᠠᠰᠠ ᠣᠳᠣ ᠬᠡᠷᠬᠢᠪᠡᠴᠦ ᠲᠡᠳᠡᠨ ᠡᠴᠡ ᠤᠷᠪᠠᠵᠤ ᠣᠷᠭᠣᠭᠠᠳ ᠪᠤᠰᠤ ᠬᠢᠲᠠᠳ ᠤᠯᠤᠰ ᠲᠤᠷ ᠪᠣᠭᠣᠯ ᠰᠢᠪᠡᠭᠴᠢᠨ ᠪᠣᠯᠤᠭᠳᠠᠬᠤᠢ ! ᠤᠷᠢᠳᠤᠰ ᠳᠡᠭᠡᠳᠦᠰ ᠦ᠋ᠨ ᠪᠣᠷᠵᠢᠭᠢᠳ ᠠᠢᠮᠠᠭ ᠤ᠋ᠨ ᠬᠢᠶᠦᠳ ᠶᠠᠰᠤᠨ ᠢ᠋ᠶ᠋ᠠᠨ ᠭᠤᠲᠤᠭᠠᠬᠤᠢ ᠳ᠋ᠤᠷ ᠪᠦᠦ ᠬᠦᠷᠭᠦᠯ ! ᠸᠠᠩ ᠬᠠᠭᠠᠨ ᠳ᠋ᠤᠷ ᠬᠠᠷᠢᠨ ᠭᠠᠢᠭᠤᠢ᠂ ᠤᠭ ᠠ᠋ᠴᠠ ᠮᠥᠨ ᠤᠷᠤᠭ ᠰᠠᠳᠤᠨ ᠪᠠᠷᠢᠯᠴᠠᠵᠤ ᠶᠠᠪᠤᠭᠰᠠᠭᠠᠷ ᠪᠥᠯᠥᠭᠡ᠃ ᠭᠠᠭᠴᠠ ᠸᠠᠩ ᠬᠠᠭᠠᠨ ᠤ᠋ ᠬᠥᠮᠦᠨ ᠢᠨᠦ ᠮᠠᠰᠢ ᠢᠲᠡᠭᠡᠮᠵᠢ ᠦᠭᠡᠢ᠂ ᠲᠠᠰᠢᠮᠠᠭᠠᠢ ᠬᠡᠯᠪᠡᠢᠭᠦᠦ᠂ ᠲᠣᠭᠲᠠᠭᠤᠷᠢ ᠦᠭᠡᠢ᠂ ᠠᠮᠲᠠ ᠦᠭᠡᠢ ᠬᠥᠮᠦᠨ ᠪᠠᠢᠨᠠᠮ! ᠳᠣᠯᠣᠭᠠᠨ ᠵᠡᠷᠭᠡ ᠠᠴᠢ ᠲᠤᠰᠠᠲᠤ ᠨᠠᠮᠠᠶ᠋ᠢ ᠴᠤ᠌ ᠦᠲᠡᠭᠡᠷᠦᠨ ᠰᠥᠷᠴᠦ ᠬᠠᠷᠢᠨ ᠳᠣᠯᠣᠭᠠᠨ ᠵᠡᠷᠭᠡ ᠬᠣᠷᠣ ᠬᠠᠷᠠ ᠪᠠᠷ ᠬᠠᠷᠢᠭᠤᠯᠠᠭᠰᠠᠨ ᠬᠥᠮᠦᠨ᠂ ᠲᠠᠨ ᠢ᠋ ᠨᠡᠩ ᠶᠠᠭᠤᠨ ᠥᠭᠦᠯᠡᠬᠦ ? ᠨᠡᠩ ᠪᠠᠰᠠ ᠮᠢᠨᠦ ᠠᠤᠭᠠ ᠬᠦᠴᠦᠨ ᠲᠡᠭᠦᠨ ᠯᠦ᠍ᠭᠡ ᠲᠡᠩᠴᠡᠬᠦ ᠪᠥᠭᠡᠲᠡᠯᠡ ᠪᠠᠰᠠ ᠬᠦ᠌ ᠡᠨᠡ ᠮᠡᠲᠦ ᠳᠠᠷᠤᠯᠠᠨ ᠲᠠᠪᠴᠢᠯᠠᠵᠤ ᠪᠠᠢᠲᠠᠯᠠ ᠲᠠᠨ ᠤ᠋ ᠲᠡᠷᠡ ᠮᠡᠲᠦ ᠠᠮᠠᠨ ᠤᠷᠤᠭᠤᠯ ᠠ᠋ᠴᠠ ᠥᠪᠡᠷᠡ ᠶᠠᠭᠤᠮᠠ ᠦᠭᠡᠢ ᠬᠥᠮᠦᠰ ᠢ᠋ ᠣᠳᠣ ᠨᠡᠩᠳᠡ ᠶᠠᠭᠤᠨ ᠥᠭᠦᠯᠡᠬᠦ ᠠᠵᠢ ? ᠬᠡᠮᠡᠪᠡ᠃ 》 ᠬᠡᠮᠡᠭᠰᠡᠨ ᠨᠢᠭᠡᠨ ᠵᠡᠷᠭᠡ ᠶ᠋ᠢᠨ ᠦᠭᠡᠨ ᠳ᠋ᠦ᠍ᠷ ᠠᠷᠳᠠ᠂ ᠬᠤᠰᠠᠭᠤᠷ᠂ ᠳᠡᠯᠵᠢᠲᠠᠢ ᠨᠢᠭᠡᠬᠡᠨ ᠴᠦ᠍ ᠬᠠᠷᠢᠭᠤ ᠦᠭᠡ ᠦᠭᠡᠢ᠂ ᠠᠯᠤᠬᠠ ᠪᠠᠰᠠ ᠥᠭᠦᠯᠡᠷᠦᠨ :《 ᠡᠵᠡᠨ ᠦ᠌ ᠵᠠᠬᠢᠶᠠ᠂ ᠲᠠᠨ ᠤ᠋ ᠡᠮᠡ ᠦᠷᠡᠰ ᠦ᠋ᠨ ᠲᠥᠯᠥᠭᠡ ᠰᠡᠳᠬᠢᠯ ᠪᠦᠦ ᠵᠣᠪᠠ ᠬᠡᠮᠡᠪᠡ᠂ ᠰᠠᠢᠨ ᠡᠷᠡ ᠡᠮᠡ ᠬᠡᠦᠬᠡᠳ ᠢ᠋ᠶ᠋ᠡᠷ ᠦᠰ ᠦᠯᠦ ᠠᠪᠤᠮᠤᠢ᠂ ᠪᠢ ᠪᠠᠰᠠ ᠪᠠᠭᠠ ᠪᠤᠰᠤ᠂ ᠬᠡᠷᠬᠢᠪᠡᠰᠦ ᠤᠷᠤᠭᠤᠯ ᠤ᠋ᠨ ᠠᠳᠠᠯᠢ ᠦᠯᠦ ᠦᠢᠯᠡᠳᠦᠮᠦᠢ᠂ ᠲᠡᠷᠡ ᠪᠥᠭᠡᠰᠦ ᠡᠴᠢᠭᠡ ᠶ᠋ᠢᠨ ᠦᠰ ᠲᠤᠯᠠ ᠨᠢᠭᠡᠨ ᠲᠡᠭᠷᠢ ᠶ᠋ᠢ ᠰᠢᠲᠦᠬᠦ ᠦᠭᠡᠢ᠃ ᠲᠠ ᠬᠡᠮᠡᠭᠴᠢ ᠶᠠᠰᠤ ᠮᠢᠬᠠ᠂ ᠬᠡᠷᠬᠢᠪᠡᠴᠦ ᠦᠯᠦ ᠭᠤᠲᠤᠭᠠᠨ ᠳᠠᠷᠤᠯᠠᠮᠢ᠃ ᠲᠠ ᠬᠡᠷᠪᠡ ᠠᠴᠢᠷᠠᠰᠤᠭᠠᠢ ᠬᠡᠮᠡᠪᠡᠰᠦ ᠪᠠᠰᠠ ᠢᠯᠡᠭᠡᠰᠦᠭᠡᠢ᠂ ᠬᠡᠷᠪᠡ ᠡᠨᠡ ᠭᠠᠵᠠᠷ ᠪᠠᠭᠲᠠᠵᠤ ᠠᠮᠢᠳᠤᠷᠠᠨ ᠡᠰᠡ ᠴᠢᠳᠠᠪᠠᠰᠤ᠂ ᠪᠠᠰᠠ ᠡᠭᠡᠵᠦ ᠠᠮᠢᠳᠤᠷᠠᠬᠤᠢ ᠳ᠋ᠤᠷ ᠰᠠᠢᠨ ᠦᠭᠡᠢ ᠦᠦ ? ᠬᠡᠮᠡᠪᠡ᠃ 》 ᠬᠡᠮᠡᠭᠡᠳ ᠲᠠᠢᠽᠦ ᠶ᠋ᠢᠨ ᠪᠢᠴᠢᠭ ᠢ᠋ ᠦᠵᠡᠵᠦ ᠥᠭᠦᠯᠡᠷᠦᠨ : 《 ᠪᠢᠴᠢᠭ ᠲᠣᠷ ᠮᠥᠨ ᠡᠨᠡ ᠦᠭᠡ᠂ ᠵᠠ ᠣᠳᠣ ᠮᠢᠨᠦ ᠬᠡᠷᠡᠭ ᠲᠡᠭᠦᠰᠪᠡ᠂ ᠬᠤᠷᠳᠤᠨ ᠠᠯᠠ᠂ ᠬᠤᠷᠳᠤᠨ ᠠᠯᠠ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠢ ᠢᠯᠠᠭᠤ ᠵᠥᠷᠢᠭᠦᠦ ᠬᠠᠨᠳᠤᠵᠤ᠂ ᠬᠠᠪᠠᠷ ᠢ᠋ᠶ᠋ᠠᠨ ᠱᠠᠩᠨᠠᠢᠨ ᠠᠭᠤᠷᠯᠠᠨ ᠥᠭᠦᠯᠡᠷᠦᠨ :《 ᠶᠠᠭᠤᠨ ᠬᠡᠯᠡᠵᠦ᠂ ᠶᠠᠭᠠᠬᠢᠨ ᠠᠭᠠᠰᠢᠯᠠᠪᠠᠴᠤ ᠨᠢᠭᠡᠨᠲᠡ ᠦᠢᠯᠡᠳᠦᠨ ᠲᠡᠭᠦᠰᠴᠦ ᠬᠢᠵᠦ ᠪᠠᠷᠠᠪᠠ᠂ ᠲᠡᠳᠦᠢᠴᠢᠨᠡᠭᠡᠨ ᠣᠯᠠᠨᠲᠠ ᠶᠠᠩᠰᠢᠵᠤ ᠶᠠᠭᠤ ᠬᠢᠬᠦ ? ᠶᠠᠭᠤᠲᠠᠢ ᠨᠢᠭᠤᠷ ᠦᠭᠡᠢ ᠠᠳᠤᠭᠤᠰᠤᠨ ᠠᠵᠢ ! ᠡᠳᠦᠭᠡ ᠨᠢᠭᠡᠨᠲᠡ ᠪᠠᠢᠵᠤ ᠦᠯᠦ ᠪᠣᠯᠬᠤ ᠳ᠋ᠤᠷ ᠬᠦᠷᠪᠡ᠃ ᠭᠠᠭᠴᠠ ᠮᠢᠨᠦ ᠵᠣᠷᠢᠭ ᠢ᠋ᠶ᠋ᠠᠷ ᠪᠠᠰᠠ ᠬᠦ᠌ ᠳᠠᠢᠯᠠᠷᠠ ᠡᠴᠢᠮᠦᠢ᠃ ᠪᠢᠳᠡ ᠲᠠᠢᠯᠪᠠᠰᠤ ᠲᠠᠨ ᠢ᠋ ᠪᠢᠳᠡ ᠠᠪᠰᠤᠭᠠᠢ᠃ ᠲᠠ ᠳᠡᠢᠯᠪᠡᠰᠦ ᠮᠠᠨ ᠢ᠋ ᠠᠪᠲᠤᠭᠠᠢ᠂ ᠣᠯᠠᠨ ᠦᠭᠡ ᠬᠡᠷᠡᠭ ᠦᠭᠡᠢ ! 》 ᠬᠡᠮᠡᠭᠡᠳ ᠸᠠᠩ ᠬᠠᠭᠠᠨ ᠤ᠋ ᠡᠮᠦᠨᠡ ᠪᠠᠢᠬᠤ ᠲᠠᠢᠽᠦ ᠶ᠋ᠢᠨ ᠢᠯᠡᠭᠡᠭᠰᠡᠨ ᠪᠢᠴᠢᠭ ᠢ᠋ ᠠᠪᠴᠤ ᠵᠡᠮᠳᠡᠭ ᠪᠣᠯᠲᠠᠯᠠ ᠤᠷᠠᠭᠠᠳ ᠬᠣᠶᠠᠷ ᠬᠠᠵᠠᠭᠤ ᠶ᠋ᠢᠨ ᠢᠯᠳᠦ ᠰᠦᠬᠡ ᠪᠠᠷᠢᠭᠰᠠᠨ ᠠᠷᠠᠳ ᠢ᠋ ᠵᠠᠩᠳᠠᠵᠤ : 《 ᠡᠨᠡ ᠬᠣᠶᠠᠷ ᠡᠯᠴᠢ ᠶ᠋ᠢ ᠴᠢᠷᠦᠨ ᠭᠠᠷᠭᠠᠵᠤ ᠴᠠᠪᠴᠢᠵᠤ ᠠᠯᠬᠠᠳᠤᠨ ! 》ᠬᠡᠮᠡᠪᠡ ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠬᠡᠷᠡᠢᠳ ᠦ᠋ᠨ ᠰᠡᠷᠭᠦᠯᠡᠩ ᠭᠦᠩᠵᠦ ᠰᠣᠯᠤᠩᠭᠤᠸᠠ ᠳᠠᠯᠠᠢ ᠰᠢᠷᠠ ᠬᠡᠮᠡᠬᠦ ᠶᠡᠬᠡ ᠴᠠᠴᠠᠷ ᠤ᠋ᠨ ᠬᠣᠢᠨᠠ ᠵᠣᠭᠰᠣᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠳᠡᠭᠡᠷ ᠲᠣᠭᠠᠴᠢᠭᠰᠠᠨ ᠠᠴᠢ ᠲᠤᠰᠠ ᠪᠠ ᠪᠠᠰᠠ ᠬᠠᠷᠭᠢᠰ ᠲᠡᠷᠰ ᠢ᠋ ᠰᠣᠨᠣᠰᠤᠭᠰᠠᠭᠠᠷ ᠳᠣᠲᠣᠷᠠ ᠢᠭᠲᠦᠯᠵᠦ᠂ ᠬᠠᠪᠠᠷ ᠪᠤᠷᠬᠢᠷᠠᠨ ᠨᠢᠯᠪᠤᠰᠤᠨ ᠤᠨᠠᠭᠠᠵᠤ ᠪᠥᠬᠥᠶᠡ᠂ ᠡᠳᠦᠭᠡ ᠪᠠᠰᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢ ᠴᠢᠷᠦᠨ ᠭᠠᠷᠭᠠᠵᠤ ᠠᠯᠠᠨ ᠬᠡᠮᠡᠬᠦᠢ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠲᠡᠭᠦᠨ ᠦ᠌ ᠡᠴᠢᠭᠡ ᠶ᠋ᠢ ᠬᠣᠶᠠᠷ ᠤᠳᠠᠭᠠ ᠡᠰᠡ ᠠᠯᠠᠭᠰᠠᠨ ᠠᠴᠢ ᠶ᠋ᠢ ᠰᠠᠨᠠᠭᠠᠯᠵᠠᠵᠤ᠂ ᠬᠡᠷᠬᠢᠵᠦ ᠭᠡᠲᠦᠯᠭᠡᠰᠦᠭᠡᠢ ᠭᠡᠮᠡᠨ ᠭᠡᠨᠡᠳᠲᠡ ᠨᠢᠭᠡᠨ ᠵᠥᠭᠡᠯᠡᠨ ᠠᠷᠭᠠ ᠣᠯᠵᠤ᠂ ᠶᠠᠭᠠᠷᠠᠨ ᠪᠡᠶᠡ ᠪᠡᠨ ᠡᠵᠡᠯᠡᠰᠢ ᠦᠭᠡᠢ ᠡᠴᠢᠭᠡ ᠶᠦ᠍ᠭᠡᠨ ᠥᠨᠳᠥᠷ ᠬᠠᠭᠠᠨ ᠰᠢᠷᠡᠭᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠭᠠᠷᠴᠤ ᠢᠷᠡᠨ᠂ ᠠᠬᠠ ᠪᠠᠨ ᠬᠣᠷᠢᠭᠯᠠᠨ ᠥᠭᠦᠯᠡᠷᠦᠨ :《 ᠲᠠᠢᠽᠢ ᠠᠬᠠ ᠶᠠᠭᠤᠨ ᠳ᠋ᠦᠷ ᠡᠢᠮᠦ ᠶᠡᠬᠡ ᠬᠠᠭᠠᠨ ᠰᠠᠭᠤᠷᠢᠨ ᠢ᠋ᠶ᠋ᠠᠨ ᠭᠤᠲᠤᠭᠠᠵᠤ᠂ ᠢᠯᠳᠦ ᠪᠡᠨ ᠪᠤᠵᠠᠷᠯᠠᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠶᠠᠯᠠᠲᠠᠨ ᠢ᠋ ᠠᠯᠠᠵᠤ ᠥᠭᠬᠦ ᠪᠣᠢ ? 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠢᠯᠠᠭᠤ ᠪᠣᠳᠣᠪᠠᠰᠤ ᠦᠭᠡ ᠮᠥᠨ ᠵᠦᠢ ᠲᠤᠯᠠ ᠠᠯᠠᠬᠤ ᠶ᠋ᠢ ᠪᠠᠢᠯᠭᠠᠵᠤ ᠦᠯᠳᠡᠨ ᠭᠠᠷᠭᠠᠬᠤᠶᠠ᠂ ᠠᠯᠤᠬᠠ ᠶᠡᠬᠡᠯᠡ ᠢᠨᠢᠶᠡᠨ ᠥᠭᠦᠯᠡᠷᠦᠨ :《 ᠨᠠᠮᠠᠶ᠋ᠢ ᠵᠦᠭᠡᠷ ᠠᠯᠠᠵᠤ ᠦᠯᠦ ᠴᠢᠳᠠᠮᠤᠢ ᠶᠡ ᠂ ᠲᠠᠨ ᠤ᠋ ᠢᠯᠴᠠᠭ ᠬᠡᠮᠡᠭᠴᠢ ᠶ᠋ᠢ ᠪᠢ ᠢᠯᠪᠡᠠ᠋ ᠴᠣᠬᠢᠭᠰᠠᠨ ᠢ᠋ ᠡᠰᠡ ᠰᠣᠨᠣᠰᠪᠠᠤ ? ᠲᠠᠨ ᠤ᠋ ᠲᠡᠷᠡ ᠪᠠᠢᠬᠤ ᠢᠯᠳᠦ ᠰᠦᠬᠡ ᠬᠡᠨ ᠦ᠌ ᠬᠢ ᠪᠣᠯᠬᠤ ᠶ᠋ᠢ ᠬᠡᠨ ᠮᠡᠳᠡᠨᠡ ? 》 ᠬᠡᠮᠡᠭᠰᠡᠭᠡᠷ ᠭᠠᠷᠴᠤ ᠢᠷᠡᠭᠡᠳ ᠰᠣᠯᠤᠩᠭᠤᠸᠠ ᠶ᠋ᠢᠨ ᠥᠩᠭᠡ ᠡᠷᠳᠡᠮ ᠬᠣᠣᠰ ᠪᠦᠷᠢᠳᠦᠭᠰᠡᠨ ᠢ᠋ ᠰᠡᠮᠡᠬᠡᠷ ᠰᠢᠳᠦᠨ ᠭᠠᠢᠬᠠᠪᠠ ᠃
ᠲᠡᠳᠦᠢ ᠰᠠᠶᠢ ᠪᠣᠭᠣᠳᠠᠯ ᠢ᠋ᠶ᠋ᠠᠨ ᠠᠪᠴᠤ ᠡᠭᠡᠰᠦᠭᠡᠢ ᠬᠡᠮᠡᠲᠡᠯᠡ ᠰᠡᠷᠭᠦᠯᠡᠩ ᠭᠦᠩᠵᠦ ᠰᠣᠯᠤᠩᠭᠤᠸᠠ ᠠᠬᠠ ᠠ᠋ᠴᠠ ᠪᠠᠨ ᠳᠠᠯᠳᠠᠭᠤᠷ ᠫᠤᠯᠭᠤᠲᠠᠢ ᠳ᠋ᠤᠷ ᠴᠠᠯᠮᠠ ᠲᠠᠷᠮᠠ ᠪᠠᠷᠢᠭᠤᠯᠵᠤ᠂ ᠠᠯᠤᠬᠠ᠂ ᠰᠦᠬᠡ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠳ᠋ᠤᠷ ᠥᠭᠭᠦᠨ ᠠᠳᠠᠪᠠᠰᠢ ᠲᠠᠯᠠᠷᠬᠠᠨ ᠬᠡᠯᠡᠪᠡ᠃ ᠲᠡᠳᠡ ᠨᠠᠷ ᠭᠱᠠᠨᠠ ᠳᠣᠪᠲᠣᠯᠤᠯᠴᠠᠨ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠬᠦᠷᠴᠦ ᠢᠷᠡᠪᠡᠰᠦ᠂ ᠲᠠᠢᠽᠦ ᠳᠡᠭᠦᠦ ᠶᠦ᠍ᠭᠡᠨ ᠬᠠᠪᠤᠲᠤ ᠬᠠᠰᠠᠷ ᠤ᠋ᠨ ᠬᠠᠭᠠᠭᠳᠠᠭᠰᠠᠨ ᠢ᠋ ᠲᠡᠩᠬᠡᠷᠡᠭᠦᠯᠦᠷᠡ ᠮᠣᠷᠢᠨ ᠳᠡᠭᠡᠭᠦᠷ ᠨᠢᠰᠦᠨ ᠳᠣᠪᠲᠣᠯᠪᠠ᠃ ᠰᠤᠪᠠᠢ ᠴᠡᠷᠢᠭ ᠬᠦᠨᠡᠰᠦ ᠮᠥᠨ ᠦᠭᠡᠢ ᠬᠡᠮᠡᠬᠦᠶᠡ᠂ ᠬᠣᠢᠨᠠ ᠠ᠋ᠴᠠ ᠰᠥᠨᠢ ᠳᠦᠯᠢᠨ ᠳᠣᠪᠲᠣᠯᠤᠨ ᠨᠡᠬᠡᠪᠡ᠃
ᠡᠭᠦᠨ ᠢ᠋ ᠲᠦᠷ ᠬᠡᠯᠡᠬᠦ ᠦᠭᠡᠢ᠂ ᠣᠳᠣ ᠭᠠᠭᠴᠠ ᠬᠠᠰᠠᠷ ᠤ᠋ᠨ ᠬᠠᠭᠠᠭᠳᠠᠭᠰᠠᠨ ᠢ᠋ ᠬᠡᠯᠡᠬᠦ ᠢᠨᠤ : ᠬᠠᠰᠠᠷ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠡᠭᠡᠭᠰᠡᠨ ᠬᠣᠢᠨᠠ ᠣᠯᠵᠠ ᠣᠮᠣᠭ ᠲᠠᠢ ᠪᠥᠬᠥᠶᠡ᠂ ᠭᠡᠨᠡᠳᠲᠡ ᠰᠠᠨᠠᠭᠠᠨ ᠳ᠋ᠤᠷ ᠦᠭᠡᠢ ᠪᠡᠷ ᠬᠡᠷᠡᠢᠳ ᠦ᠋ᠨ ᠲᠠᠢᠰᠢ ᠲᠠᠢᠪᠤᠤ ᠣᠯᠢᠨᠲᠠᠢ᠂ ᠭᠣᠯᠢᠨᠲᠠᠢ ᠬᠣᠶᠠᠷ ᠤ᠋ᠨ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠲᠦ᠍ᠷ ᠬᠠᠭᠠᠭᠳᠠᠵᠤ᠂ ᠭᠤᠷᠪᠠᠨ ᠡᠳᠦᠷ ᠴᠦ᠍ ᠪᠣᠯᠤᠭᠰᠠᠨ ᠦᠭᠡᠢ ᠪᠡᠷ ᠨᠢᠭᠡᠨᠲᠡ ᠪᠠᠢᠯᠳᠤᠵᠤ ᠳᠠᠷᠤᠭᠳᠠᠭᠠᠳ ᠨᠤᠲᠤᠭ ᠪᠠᠭᠤᠳᠠᠯ᠂ ᠡᠳ᠋ ᠮᠠᠯ ᠪᠤᠯᠲᠤ ᠪᠦᠬᠦᠨᠡ ᠪᠡᠨ ᠴᠥᠮ ᠪᠤᠯᠢᠶᠠᠭᠳᠠᠭᠠᠳ ᠭᠠᠭᠴᠠ ᠲᠤᠵᠣ᠌ ᠨᠡᠷᠡᠲᠦ ᠠᠬᠠᠮᠠᠳ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠰᠤᠨᠳᠠᠯᠠᠨ ᠤᠨᠤᠭᠤᠯᠤᠭᠠᠳ ᠬᠣᠪᠤᠳ ᠳᠦᠭᠦᠷᠡᠩ ᠰᠤᠮᠤ ᠠᠪᠴᠤ ᠭᠠᠭᠴᠠᠭᠠᠷ ᠬᠠᠷᠪᠤᠵᠤ᠂ ᠬᠦᠨᠳᠦ ᠬᠠᠭᠠᠭᠰᠠᠨ ᠢ᠋ ᠰᠢᠪᠲᠤᠯᠤᠨ ᠭᠠᠷᠴᠤ ᠢᠷᠡᠭᠡᠳ ᠡᠴᠢᠭᠡ ᠬᠥᠪᠡᠭᠦᠨ ᠬᠣᠶᠠᠭᠤᠯᠠ ᠳᠠᠩ ᠮᠣᠷᠢ ᠪᠠᠷ ᠪᠤᠷᠬᠠᠨ ᠭᠠᠯᠳᠤᠨᠠ ᠶ᠋ᠢᠨ ᠵᠦᠭ ᠳᠣᠪᠲᠣᠯᠬᠤᠶᠠ᠂ ᠵᠠᠮ ᠳ᠋ᠤᠷ ᠬᠦᠨᠡᠰᠦ ᠦᠭᠡᠢ ᠲᠤᠯᠠ ᠰᠢᠨᠡ ᠵᠤᠰᠠᠯᠠᠩ ᠤ᠋ᠨ ᠭᠠᠯᠠᠭᠤ ᠶ᠋ᠢᠨ ᠥᠨᠳᠡᠭᠡ ᠶ᠋ᠢ ᠲᠡᠭᠦᠵᠦ ᠭᠠᠯ ᠳ᠋ᠦᠷ ᠪᠤᠯᠠᠵᠤ᠂ ᠬᠥᠪᠡᠭᠦᠨ ᠬᠣᠶᠠᠭᠤᠯᠠ ᠪᠠᠨ ᠢᠳᠡᠭᠰᠡᠭᠡᠷ ᠪᠤᠷᠬᠠᠨ ᠭᠠᠯᠳᠤᠨᠠ ᠶ᠋ᠢᠨ ᠵᠦᠭ ᠢᠷᠡᠪᠡ᠃ ᠵᠢᠴᠢ ᠵᠠᠮ ᠳ᠋ᠤ᠌ ᠬᠠᠷᠢᠨ ᠪᠠᠯᠴᠢᠭ ᠰᠢᠪᠠᠷ ᠲᠤᠷ ᠮᠣᠷᠢ ᠰᠢᠪᠠᠷᠳᠠᠨ᠂ ᠪᠠᠵᠤᠨᠠᠢ ᠬᠡᠮᠡᠬᠦ ᠮᠦᠷᠡᠨᠡ ᠬᠦᠷᠴᠦ ᠢᠷᠡᠭᠡᠳ ᠲᠠᠢᠽᠦ ᠶ᠋ᠢᠨ ᠬᠡᠳᠦᠬᠡᠨ ᠵᠠᠭᠤᠨ ᠮᠣᠷᠢᠲᠠᠨ ᠢ᠋ᠶ᠋ᠠᠨ ᠠᠪᠴᠤ ᠳᠣᠪᠲᠣᠯᠤᠨ ᠢᠷᠡᠬᠦᠢ ᠳ᠋ᠦ᠍ ᠤᠴᠠᠷᠠᠭᠠᠳ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠪᠴᠤ ᠮᠣᠷᠢᠨ ᠠ᠋ᠴᠠ ᠪᠠᠭᠤᠭᠠᠳ ᠭᠠᠵᠠᠷ ᠲᠤᠷ ᠰᠥᠭᠥᠳᠴᠦ ᠨᠢᠯᠪᠤᠰᠤᠨ ᠴᠤᠪᠤᠷᠢᠭᠤᠯᠵᠤ ᠮᠥᠷᠭᠥᠨ ᠮᠡᠳᠡᠭᠦᠯᠦᠷᠦᠨ : ᠡᠵᠡᠨ ᠠᠬᠠ ᠶᠤᠭᠠᠨ ᠡᠷᠳᠡᠰᠡ ᠮᠡᠳᠡᠵᠦ ᠵᠠᠬᠢᠭᠰᠠᠨ ᠵᠠᠬᠢᠶᠠ ᠶ᠋ᠢ ᠡᠷᠬᠢᠯᠡᠨ ᠦᠵᠡᠵᠦ ᠬᠢᠴᠢᠶᠡᠨ ᠡᠰᠡ ᠳᠠᠭᠠᠭᠰᠠᠨ ᠢ᠋ᠶ᠋ᠠᠷ ᠪᠢ᠂ ᠡᠮᠡ ᠦᠷᠡ ᠪᠡᠨ ᠴᠦ᠍ ᠬᠠᠮᠠᠭᠠᠯᠠᠨ ᠡᠰᠡ ᠴᠢᠳᠠᠵᠤ ᠡᠷᠡᠮᠡᠬᠡᠢ ᠬᠠᠷᠭᠢᠰ ᠬᠡᠷᠡᠢᠳ ᠲᠣᠷ ᠴᠥᠮ ᠠᠪᠲᠠᠪᠠ ᠪᠢ᠃ ᠠᠬᠠ ᠡᠵᠡᠨ ᠢ᠋ᠶ᠋ᠡᠨ ᠠᠯᠤᠰᠳᠠᠬᠤ ᠮᠡᠳᠡᠵᠦ ᠵᠠᠬᠢᠭᠰᠠᠨ ᠢ᠋ ᠠᠯᠵᠠᠭᠤᠷᠠᠨ ᠵᠠᠯᠬᠠᠭᠤᠷᠠᠵᠤ ᠬᠢᠴᠢᠶᠡᠨ ᠡᠰᠡ ᠳᠠᠭᠠᠭᠰᠠᠨ ᠢ᠋ᠶ᠋ᠠᠷ ᠪᠢ᠂ ᠠᠯᠪᠠᠲᠤ ᠬᠠᠷᠠᠴᠤᠰ ᠢ᠋ᠶ᠋ᠠᠨ ᠴᠤ᠌ ᠬᠠᠮᠠᠭᠠᠯᠠᠨ ᠡᠰᠡ ᠴᠢᠳᠠᠵᠤ ᠠᠶᠤᠯᠲᠠᠢ ᠬᠠᠷᠭᠢᠰ ᠬᠡᠷᠡᠢᠳ ᠲᠦ᠍ ᠴᠥᠮ ᠠᠪᠲᠠᠪᠠ ᠪᠢ᠃ ᠣᠶᠤᠲᠤ ᠡᠵᠡᠨ ᠢ᠋ᠶ᠋ᠡᠨ ᠤᠭᠲᠤᠵᠤ ᠮᠡᠳᠡᠭᠡᠳ ᠵᠠᠬᠢᠭᠰᠠᠨ ᠵᠠᠬᠢᠶᠠ ᠶ᠋ᠢ ᠤᠬᠠᠮᠵᠢᠯᠠᠯ ᠦᠭᠡᠢ ᠪᠡᠷ ᠬᠢᠴᠢᠶᠡᠨ ᠡᠰᠡ ᠳᠠᠭᠠᠭᠰᠠᠨ ᠢ᠋ᠶ᠋ᠠᠷ ᠪᠢ᠂ ᠤᠯᠤᠰ ᠠᠯᠪᠠᠲᠤ ᠪᠠᠨ ᠴᠤ᠌ ᠬᠠᠮᠠᠭᠠᠯᠠᠨ ᠡᠰᠡ ᠴᠢᠳᠠᠵᠤ ᠤᠳᠤᠮ ᠮᠠᠭᠤᠲᠤ ᠬᠡᠷᠡᠢᠳ ᠲᠣᠷ ᠴᠥᠮ ᠠᠪᠲᠠᠪᠠ ᠪᠢ᠃ ᠬᠡᠰᠢᠭᠲᠦ ᠡᠵᠡᠨ ᠢ᠋ᠶ᠋ᠡᠨ ᠬᠡᠳᠦᠢᠨᠡᠢ ᠮᠡᠳᠡᠭᠡᠳ ᠵᠠᠬᠢᠭᠰᠠᠨ ᠵᠠᠬᠢᠶᠠ ᠶ᠋ᠢ ᠬᠢᠴᠢᠶᠡᠩᠬᠦᠢᠯᠡᠯ ᠦᠭᠡᠢ ᠪᠡᠷ ᠬᠢᠴᠢᠶᠡᠨ ᠡᠰᠡ ᠳᠠᠭᠠᠭᠰᠠᠨ ᠢ᠋ᠶ᠋ᠠᠷ ᠪᠢ᠂ ᠬᠡᠨ ᠪᠦᠬᠦᠨ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠨ ᠡᠰᠡ ᠴᠢᠳᠠᠵᠤ ᠬᠡᠷᠴᠡᠭᠡᠢ ᠮᠠᠭᠤ ᠬᠡᠷᠡᠢᠳ ᠲᠣᠷ ᠴᠥᠮ ᠢ᠋ᠶ᠋ᠡᠷ ᠠᠪᠲᠠᠪᠠ ᠪᠢ᠃ ᠬᠡᠮᠡᠵᠦ ᠤᠬᠢᠯᠠᠨ ᠮᠥᠷᠭᠥᠬᠦᠶᠡ᠂ ᠲᠠᠢᠽᠦ ᠳᠡᠭᠦᠦ ᠪᠡᠨ ᠬᠡᠲᠦᠷᠬᠡᠶᠡ ᠦᠷᠦ ᠡᠪᠡᠳᠴᠦ ᠬᠡᠷᠡᠢᠳ ᠢ᠋ ᠬᠡᠷᠬᠢᠪᠡᠴᠦ ᠬᠡᠷᠪᠢᠯ ᠦᠭᠡᠢ ᠦᠯᠦ ᠪᠣᠯᠬᠤ ᠭᠡᠮᠡᠨ ᠬᠢᠯᠢᠩ ᠦ᠋ᠨ ᠭᠠᠯ ᠲᠡᠭᠷᠢ ᠳ᠋ᠦ᠍ᠷ ᠲᠤᠯᠵᠤ᠂ ᠢᠯᠳᠦᠨ ᠦ᠌ ᠡᠷᠳᠡᠨᠢᠰ ᠦ᠋ᠨ ᠬᠤᠢ ᠶ᠋ᠢ ᠪᠠᠯᠪᠠ ᠬᠡᠮᠬᠡ ᠠᠳᠬᠤᠵᠤ᠂ ᠮᠣᠷᠢᠨ ᠠ᠋ᠴᠠ ᠬᠠᠷᠠᠢᠨ ᠪᠠᠭᠤᠬᠤᠢ ᠳ᠋ᠤᠷ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠳᠤᠮᠳᠠ ᠬᠤᠷᠤᠭᠤᠨ ᠤ᠋ ᠥᠨᠳᠡᠭᠡ ᠶ᠋ᠢ ᠥᠴᠦᠬᠡᠨ ᠡᠰᠬᠡᠵᠦ ᠴᠢᠰᠤ ᠭᠠᠷᠤᠭᠰᠠᠨᠠ᠂ ᠶᠠᠭᠠᠷᠠᠨ ᠴᠡᠷᠢᠭ ᠦ᠋ᠨ ᠠᠷᠠᠳ ᠤ᠋ᠨ ᠡᠭᠦᠷᠦᠨ ᠶᠠᠪᠤᠬᠤ ᠠᠷᠠᠴᠠ ᠶ᠋ᠢ ᠡᠷᠳᠡᠨᠢᠰᠲᠦ ᠠᠶᠠᠭᠠᠨ ᠳ᠋ᠤ᠌ ᠬᠢᠯᠭᠡᠵᠦ᠂ ᠳᠡᠭᠡᠷᠡ ᠢᠨᠤ ᠬᠤᠷᠤᠭᠤᠨ ᠤ᠋ ᠴᠢᠰᠤ ᠶ᠋ᠢ ᠲᠤᠰᠠᠭᠠᠵᠤ᠂ ᠲᠡᠭᠷᠢ ᠭᠠᠵᠠᠷ ᠤ᠋ᠨ ᠡᠵᠡᠳ ᠠᠭᠤᠯᠠ ᠮᠥᠷᠡᠨ ᠦ᠌ ᠰᠠᠬᠢᠭᠤᠯᠰᠤᠨ ᠳ᠋ᠦᠷ ᠰᠠᠴᠤᠯᠢ ᠰᠠᠴᠤᠵᠤ ᠲᠠᠩᠭᠠᠷᠢᠭᠯᠠᠭᠠᠳ ᠳᠠᠷᠤᠢ ᠪᠠᠵᠤᠨᠠᠢ ᠮᠥᠷᠡᠨ ᠦ᠌ ᠬᠣᠢᠲᠤ ᠬᠥᠪᠡᠭᠡ ᠳ᠋ᠦ᠍ᠷ ᠪᠠᠭᠤᠳᠠᠯ ᠪᠠᠭᠤᠵᠤ ᠬᠣᠴᠣᠷᠤᠭᠰᠠᠨ ᠴᠡᠷᠢᠭ ᠢ᠋ ᠬᠦᠯᠢᠭᠡᠯᠵᠡᠬᠦᠶᠡ ᠬᠦᠨᠡᠰᠦ ᠬᠡᠳᠦᠢᠨᠡᠢ ᠲᠠᠰᠤᠷᠠᠭᠠᠳ ᠴᠡᠷᠢᠭ ᠦ᠋ᠨ ᠠᠷᠠᠳ ᠨᠢᠭᠡᠨ ᠡᠳᠦᠷ᠂ ᠨᠢᠭᠡᠨ ᠰᠥᠨᠢ ᠰᠢᠯᠡᠮᠡ ᠵᠠᠯᠭᠢᠭᠠᠳᠤᠢ ᠪᠡᠶᠡ ᠳ᠋ᠦ᠍ᠷ ᠠᠪᠴᠤ ᠶᠠᠪᠤᠬᠤ ᠪᠠᠭᠠ ᠰᠠᠭᠠ ᠬᠠᠭᠤᠷᠠᠢ ᠬᠦᠨᠡᠰᠦ ᠴᠦ᠍ ᠬᠡᠳᠦᠢᠨᠡᠢ ᠲᠡᠭᠦᠰᠦᠭᠰᠡᠨ ᠪᠥᠭᠡᠳ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠨᠡᠰᠦᠨ ᠦ᠌ ᠠᠴᠢᠶᠠ ᠮᠥᠨ ᠮᠠᠰᠢ ᠬᠣᠯᠠ ᠣᠷᠬᠢᠭᠳᠠᠭᠠᠳ ᠡᠨᠡ ᠣᠷᠴᠢᠮ ᠤ᠋ᠨ ᠤᠰᠤ ᠡᠪᠡᠰᠦ ᠪᠠᠰᠠ ᠠᠰᠤᠷᠤ ᠮᠠᠭᠤ᠂ ᠠᠳᠤᠭᠤ ᠮᠠᠯ ᠳ᠋ᠦᠷ ᠣᠭᠲᠣ ᠲᠠᠷᠭᠤ ᠦᠭᠡᠢ᠂ ᠨᠡᠭᠦᠳᠡᠯ ᠪᠠᠭᠤᠳᠠᠯ ᠮᠥᠨ ᠣᠭᠲᠣ ᠦᠭᠡᠢ᠂ ᠠᠩ ᠬᠦᠷᠦᠭᠡᠳ ᠴᠦ᠍ ᠠᠰᠤᠷᠤ ᠴᠤᠬᠠᠭ ᠲᠤᠯᠠ ᠲᠠᠢᠽᠦ ᠶ᠋ᠢ ᠳᠠᠭᠠᠵᠤ ᠳᠦᠯᠢᠨ ᠳᠣᠪᠲᠣᠯᠵᠤ ᠢᠷᠡᠭᠰᠡᠨ ᠵᠠᠩᠵᠤᠨ ᠴᠡᠷᠢᠭ ᠴᠥᠮ ᠶᠠᠳᠠᠩᠭᠢᠷᠠᠨ ᠥᠯᠪᠡᠷᠴᠦ ᠠᠩᠭᠠᠵᠤᠬᠤᠢ᠃
ᠲᠡᠳᠦᠢ ᠣᠯᠠᠨ ᠢ᠋ᠶ᠋ᠠᠷ ᠠᠷᠭᠠ ᠦᠭᠡᠢ ᠳᠠᠷᠤᠢ ᠡᠨᠡ ᠪᠠᠵᠤᠨᠠᠢ ᠮᠥᠷᠡᠨ ᠦ᠌ ᠪᠤᠯᠠᠩᠭᠢᠷ ᠰᠢᠪᠠᠷᠲᠤ ᠤᠰᠤᠨ ᠢ᠋ ᠤᠤᠭᠤᠯᠴᠠᠵᠤ ᠥᠯᠥᠰᠬᠦᠢ ᠶ᠋ᠢ ᠰᠠᠭᠠᠲᠠᠭᠤᠯᠵᠤ᠂ ᠬᠦᠨᠡᠰᠦᠨ ᠦ᠌ ᠠᠴᠢᠶᠠ ᠬᠦᠷᠴᠦ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠯᠴᠡᠬᠦᠶᠡ᠂ ᠲᠠᠢᠽᠦ ᠡᠭᠦᠨ ᠢ᠋ ᠦᠵᠡᠭᠡᠳ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠢ᠋ᠶ᠋ᠡᠨ ᠶᠡᠬᠡᠯᠡ ᠡᠨᠡᠷᠢᠨ ᠥᠷᠥᠰᠢᠶᠡᠵᠦ᠂ ᠳᠣᠲᠣᠷᠠ ᠠᠨᠤ ᠲᠡᠰᠳᠡᠰᠢ ᠦᠭᠡᠢ ᠬᠠᠯᠠᠰᠢᠷᠠᠨ ᠵᠣᠪᠠᠨᠢᠵᠤ᠂ ᠨᠢᠭᠡᠬᠡᠨ ᠠᠳᠬᠤ ᠪᠣᠯᠵᠤ ᠰᠡᠳᠬᠢᠯ ᠶᠡᠬᠡᠳᠡ ᠴᠢᠯᠡᠵᠦ᠂ ᠲᠡᠭᠷᠢ ᠶ᠋ᠢᠨ ᠵᠦᠭ ᠠᠯᠠᠭᠠ ᠪᠠᠨ ᠬᠠᠮᠲᠤᠳᠬᠠᠵᠤ ᠨᠠᠮᠠᠨᠴᠢᠯᠠᠨ ᠰᠡᠭᠦᠷᠡᠰᠦ ᠠᠯᠳᠠᠵᠤ ᠥᠴᠢᠷᠦᠨ᠂ ᠲᠡᠭᠦᠨ ᠦ᠌ ᠦᠭᠡ :
ᠲᠡᠭᠷᠢ ᠡᠴᠢᠭᠡ ᠲᠡᠮᠦᠵᠢᠨ ᠨᠠᠮᠠᠶ᠋ᠢ ᠲᠡᠳᠬᠦᠨ ᠲᠥᠷᠥᠭᠦᠯᠦᠭᠰᠡᠨ ᠪᠥᠭᠡᠳ
ᠲᠡᠵᠢᠭᠡᠨ ᠠᠮᠢᠳᠤᠷᠠᠭᠤᠯᠬᠤ ᠶ᠋ᠢ ᠪᠠᠬᠠᠨ ᠦᠯᠡᠮᠵᠢᠬᠡᠨ ᠦᠯᠡᠳᠡᠭᠡᠬᠦ ᠪᠣᠯᠬᠤᠨᠠ ᠴᠢ!
ᠲᠡᠰᠬᠡᠯ ᠦᠭᠡᠢ ᠤᠯᠤᠰ ᠠᠯᠪᠠᠲᠤ ᠮᠢᠨᠦ ᠥᠯᠪᠡᠷᠦᠨ ᠥᠯᠥᠰᠬᠦ ᠪᠠᠢᠳᠠᠯ ᠢ᠋
ᠲᠡᠮᠦᠵᠢᠨ ᠪᠢ ᠦᠨᠡᠬᠡᠷ ᠦᠵᠡᠵᠦ ᠦᠯᠦ ᠲᠦᠪᠳᠡᠨ ᠦᠭᠰᠢᠷᠡᠨᠡᠮ ᠪᠢ!
ᠠᠶᠠ ᠠᠯᠤ ᠳ᠋ᠠᠭᠠᠨ ᠤᠨᠤᠵᠤ ᠠᠮᠢ ᠪᠡᠶᠡ ᠪᠡᠨ ᠭᠠᠷᠤᠭᠴᠢ ᠂
ᠠᠨᠳᠠ ᠮᠣᠷᠢᠳ ᠢ᠋ᠶ᠋ᠠᠨ ᠪᠢ ᠠᠪᠠᠢ ᠬᠡᠷᠬᠢᠵᠦ ᠠᠯᠠᠵᠤ ᠢᠳᠡᠭᠦᠯᠦᠶᠡ
ᠬᠡᠮᠡᠬᠦ ᠦᠭᠡ ᠬᠡᠯᠡᠵᠦ ᠪᠠᠷᠠᠬᠤ ᠶ᠋ᠢᠨ ᠤᠷᠢᠳᠠ ᠠᠯᠲᠠᠢ ᠬᠠᠷᠠ ᠬᠡᠮᠡᠬᠦ ᠠᠭᠤᠯᠠᠨ ᠤ᠋ ᠠᠷᠤ ᠶ᠋ᠢᠨ ᠬᠣᠢᠨᠠ ᠠᠯᠠᠭᠠ ᠶ᠋ᠢᠨ ᠲᠡᠳᠦᠢ ᠪᠢᠴᠢᠬᠠᠨ ᠡᠭᠦᠯᠡ ᠳ᠋ᠦ᠍ᠷ ᠲᠡᠭᠷᠢ ᠥᠴᠦᠭᠦᠬᠡᠨ ᠳᠣᠩᠭᠣᠳᠤᠮᠠᠭᠴᠠ ᠭᠡᠨᠡᠳᠲᠡ ᠲᠡᠷᠡ ᠠᠭᠤᠯᠠᠨ ᠤ᠋ ᠠᠷᠤ ᠶ᠋ᠢᠨ ᠬᠣᠢᠨᠠ ᠲᠦᠯᠡᠭᠡ ᠡᠴᠡ ᠠᠯᠠᠭ ᠪᠤᠯᠠᠭ ᠲᠠᠪᠤ ᠵᠢᠷᠭᠤᠭᠠᠨ ᠴᠢᠬᠢᠲᠡᠢ ① ᠲᠡᠭᠷᠢ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠨᠠᠳᠬᠤᠵᠤ᠂ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠵᠦᠭ ᠬᠡᠢᠰᠦᠨ ᠨᠢᠰᠬᠦ ᠮᠡᠲᠦ ᠲᠣᠭᠣᠰᠣ ᠪᠤᠲᠠᠷᠠᠭᠤᠯᠤᠨ ᠳᠣᠭᠳᠣᠯᠤᠨ ᠢᠷᠡᠪᠡᠢ᠃ ᠲᠡᠭᠷᠢ ᠴᠥᠮ ᠬᠠᠷᠠᠭᠠᠯᠵᠠᠪᠠ ᠬᠡᠮᠡᠮᠦᠢ᠃ ᠲᠡᠭᠦᠨᠴᠡ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠦᠵᠡᠭᠡᠳ ᠶᠡᠬᠡᠯᠡ ᠪᠠᠶᠠᠷᠯᠠᠯᠴᠠᠵᠤ᠂ ᠬᠠᠪᠤᠲᠤ ᠬᠠᠰᠠᠷ ᠪᠡᠯᠭᠦᠳᠡᠢ ᠨᠠᠷ ᠲᠡᠷᠢᠭᠦᠯᠡᠨ ᠪᠦᠭᠦᠳᠡᠭᠡᠷ ᠣᠷᠣᠵᠤ᠂ ᠡᠨᠡ ᠴᠢᠬᠢᠲᠡᠢ ᠶ᠋ᠢ ᠬᠠᠮᠵᠢᠨ ᠰᠤᠮᠤᠳᠠᠵᠤ ᠤᠨᠠᠭᠠᠭᠠᠳ ᠲᠠᠯᠠ ᠶ᠋ᠢᠨ ᠡᠪᠡᠰᠦᠨ ᠢ᠋ ᠢᠯᠳᠦᠨ ᠢ᠋ᠶ᠋ᠡᠷ ᠬᠠᠳᠤᠵᠤ ᠶᠡᠬᠡ ᠭᠠᠯ ᠨᠣᠴᠣᠭᠠᠨ᠂ ᠡᠳᠡᠭᠡᠷ ᠴᠢᠬᠢᠲᠡᠢ ᠶ᠋ᠢ ᠪᠦᠬᠦᠯᠢ ᠪᠡᠷ ᠭᠠᠯ ᠳ᠋ᠤᠷ ᠪᠤᠯᠠᠵᠤ ᠠᠷᠠᠰᠤᠨ ᠤ᠋ ᠳᠣᠲᠣᠷᠠ ᠬᠣᠷᠬᠣᠭᠯᠠᠵᠤ ᠪᠣᠯᠭᠣᠪᠠᠢ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠴᠡᠷᠢᠭ ᠦ᠋ᠨ ᠲᠣᠭᠣᠬᠠ᠂ ᠲᠤᠯᠭᠠ ᠴᠥᠮ ᠬᠦᠷᠴᠦ ᠢᠷᠡᠭᠡᠳᠦᠢ᠂ ᠭᠠᠭᠴᠠ ᠲᠠᠢᠽᠦ ᠶ᠋ᠢᠨ ᠴᠠᠢ ᠰᠠᠷᠬᠤᠳ ᠢ᠋ ᠳᠠᠭᠠᠭᠠᠭᠰᠠᠨ ᠬᠢᠶᠡ ᠲᠡᠭᠦᠰᠴᠤᠭᠲᠤ ᠶ᠋ᠢᠨ ᠠᠪᠴᠤ ᠶᠠᠪᠤᠬᠤ ᠠᠷᠢᠭᠤᠨ ᠤᠰᠤ᠂ ᠬᠠᠭᠤᠷᠠᠢ ᠢᠳᠡᠰᠢ ᠳᠠᠭᠠᠵᠤ ᠳᠣᠪᠲᠣᠯᠤᠨ ᠢᠷᠡᠭᠰᠡᠨ ᠲᠤᠯᠠ ᠰᠢᠳᠠᠷ ᠲᠦᠰᠢᠮᠡᠳ ᠲᠠᠢᠽᠦ ᠳ᠋ᠦ᠍ᠷ ᠠᠷᠢᠭᠤᠨ ᠴᠠᠢ᠂ ᠬᠠᠭᠤᠷᠠᠢ ᠬᠤᠷᠤᠳ ᠢ᠋ ᠡᠷᠭᠦᠨ ᠪᠠᠷᠢᠭ᠍ᠰᠠᠨ ᠳ᠋ᠤᠷ ᠲᠠᠢᠽᠦ ᠵᠣᠭᠣᠭᠯᠠᠬᠤ ᠦᠭᠡᠢ ᠪᠡᠷ ᠵᠠᠬᠢᠷᠤᠨ :
ᠠᠬᠠ ᠳᠡᠭᠦᠦ ᠰᠠᠢᠳ ᠲᠦᠰᠢᠮᠡᠯ ᠵᠠᠩᠵᠤᠨ ᠴᠡᠷᠢᠭ ᠤᠯᠤᠰ
ᠠᠯᠪᠠᠲᠤ ᠠᠯᠢᠪᠠ ᠪᠦᠭᠦᠳᠡᠭᠡᠷ ᠦ᠋ᠨ ᠠᠮᠢᠨ ᠳ᠋ᠤᠷ ᠬᠦᠷᠴᠦ ᠥᠯᠪᠡᠷᠦᠨ ᠥᠯᠦᠰᠬᠦᠢ ᠳ᠋ᠡᠭᠡᠨ
ᠠᠷᠭᠠ ᠦᠭᠡᠢ ᠠᠭᠤᠯᠠᠨ ᠤ᠋ ᠴᠢᠬᠢᠲᠡᠢ ᠶ᠋ᠢ ᠠᠷᠠᠰᠤᠨ ᠳ᠋ᠤᠷ ᠬᠣᠷᠬᠣᠭᠯᠠᠵᠤ ᠢᠳᠡᠬᠦᠶᠡ
ᠠᠳᠠᠪᠠᠰᠢ ᠪᠢ ᠭᠠᠭᠴᠠᠭᠠᠷ ᠠᠷᠢᠭᠤᠨ ᠴᠠᠢ ᠠᠮᠲᠠᠲᠤ ᠢᠳᠡᠭᠡᠨ ᠢ᠋ ᠭᠡᠷ ᠢᠳᠡᠬᠦ᠂
ᠠᠪᠠᠴᠢ ᠴᠢᠨᠠᠭᠰᠢ ᠠᠮᠤᠭᠤᠯᠠᠩ ᠵᠢᠷᠭᠠᠯᠠᠩ ᠢ᠋ ᠬᠠᠮᠲᠤᠳᠬᠠᠨ ᠡᠰᠡ ᠴᠢᠳᠠᠪᠠᠰᠤ
ᠠᠬᠤ ᠪᠦᠭᠦᠳᠡᠭᠡᠷ ᠦ᠋ᠨ ᠡᠵᠡᠨ ᠭᠡᠮᠡᠨ ᠬᠡᠷᠬᠢᠨ ᠶᠠᠪᠤᠵᠤ ᠪᠣᠯᠬᠤ ᠠᠵᠢ ?
ᠠᠪᠠᠴᠢᠷᠠ ᠲᠡᠭᠦᠨ ᠢ᠋ ᠠᠳᠠᠯᠢ ᠬᠠᠮᠲᠤ ᠪᠠᠷ ᠴᠢᠬᠢᠲᠡᠢ ᠶ᠋ᠢᠨ ᠮᠢᠬᠠ ᠶ᠋ᠢ ᠢᠳᠡᠮᠦᠢ ᠪᠢ ᠠᠶᠤᠬᠤ ᠪᠠᠶᠠᠷᠯᠠᠬᠤ ᠳ᠋ᠤ᠌ ᠣᠯᠠᠨ ᠯᠤᠬᠠ ᠪᠠᠨ ᠨᠢᠭᠡᠨ ᠴᠤᠭᠠᠷ ᠡᠳ᠋ᠯᠡᠮᠦᠢ ᠃
ᠴᠠᠢ ᠬᠤᠷᠤᠤᠳ ᠢ᠋ ᠢᠳᠡᠬᠦ ᠦᠭᠡᠢ ᠬᠡᠮᠡᠭᠡᠳ ᠮᠣᠳᠣᠷ ᠢ᠋ᠶ᠋ᠠᠷ ᠬᠢᠲᠤᠭᠠ ᠪᠠᠷᠢᠵᠤ ᠮᠠᠭᠤ ᠮᠢᠬᠠ ᠶ᠋ᠢ ᠬᠥᠰᠬᠥᠯᠡᠵᠦ᠂ ᠮᠣᠬᠣᠭᠰᠠᠨ ᠴᠡᠷᠢᠭ ᠮᠢᠨᠦ ᠰᠠᠢᠨ ᠢ᠋ ᠠᠨᠤ ᠢᠳᠡᠯᠴᠡ ᠭᠡᠮᠡᠨ ᠮᠤᠬᠤᠯᠴᠠᠷ ᠴᠢᠬᠢᠲᠡᠢ ᠶ᠋ᠢᠨ ᠮᠢᠬᠠ ᠶ᠋ᠢ ᠴᠠᠳᠲᠠᠯᠠ ᠵᠣᠭᠣᠭᠯᠠᠭᠠᠳ ᠮᠣᠷᠢᠨ ᠤ᠋ ᠰᠢᠯᠪᠢᠭᠰᠡᠨ ᠪᠠᠵᠤᠨᠠᠢ ᠮᠥᠷᠡᠨ ᠦ᠌ ᠪᠤᠯᠠᠩᠭᠢᠷ ᠰᠢᠪᠠᠷᠲᠤ ᠤᠰᠤᠨ ᠢ᠋ ᠬᠠᠨᠲᠠᠯᠠ ᠤᠤᠭᠤᠭᠠᠳ ᠠᠮᠠ ᠪᠠᠨ ᠵᠠᠢᠯᠵᠤ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠲᠠᠯᠠ ᠤᠯᠤᠰ ᠤ᠋ᠨ ᠶᠡᠬᠡ ᠴᠡᠷᠢᠭ ᠴᠥᠮ ᠬᠦᠷᠴᠦ ᠢᠷᠡᠪᠡ᠃ ᠴᠡᠷᠢᠭ ᠦ᠋ᠨ ᠬᠦᠨᠡᠰᠦ ᠰᠠᠶᠢ ᠭᠦᠢᠴᠡᠪᠡᠢ᠃ ᠲᠡᠳᠦᠢ ᠲᠠᠢᠽᠦ ᠳᠠᠷᠤᠢ ᠪᠠᠵᠤᠨᠠᠢ ᠮᠥᠷᠡᠨ ᠦ᠌ ᠬᠣᠢᠲᠤ ᠬᠥᠪᠡᠭᠡ ᠳ᠋ᠦ᠍ᠷ ᠡᠮᠦᠨᠡᠰᠢ ᠬᠠᠲᠤᠨ ᠰᠥᠭᠥᠳᠴᠦ ᠠᠯᠠᠭᠠ ᠪᠠᠨ ᠬᠠᠮᠲᠤᠳᠬᠠᠨ ᠳᠡᠭᠡᠳᠦ ᠲᠡᠭᠷᠢ ᠶ᠋ᠢᠨ ᠵᠦᠭ ᠨᠠᠮᠠᠨᠴᠢᠯᠠᠨ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠡᠢᠨ ᠭᠡᠮᠡᠨ ᠠᠮᠠᠯᠳᠠᠷᠤᠨ :
ᠡᠷᠬᠡᠲᠦ ᠳᠡᠭᠡᠳᠦ ᠲᠡᠭᠷᠢ ᠡᠴᠢᠭᠡ ᠮᠢᠨᠦ ᠲᠡᠷᠢᠭᠦᠯᠡᠵᠦ
ᠡᠩᠭᠡᠷᠡᠯᠲᠦ ᠳᠣᠣᠷᠠᠲᠤ ᠭᠠᠵᠠᠷ ᠡᠬᠡ ᠪᠢᠳᠡᠨ ᠲᠠᠨ ᠢ᠋ᠶ᠋ᠠᠷ᠂
ᠡᠯᠪᠡᠷᠢᠯᠲᠦ ᠰᠡᠳᠬᠢᠯᠳᠦ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠮᠢᠨᠦ
ᠡᠨᠡᠷᠢᠯᠲᠦ ᠦᠨᠡᠨᠴᠢ ᠪᠡᠷ ᠠᠮᠠᠯᠳᠠᠬᠤ ᠶ᠋ᠢ ᠠᠢᠯᠠᠳᠤᠭᠲᠤᠨ :
ᠠᠯᠲᠠᠨ ᠦᠷᠡᠰᠲᠦ ᠬᠢᠶᠦᠳ ᠶᠠᠰᠤᠲᠤ ᠪᠣᠷᠵᠢᠭᠢᠳ ᠠᠢᠮᠠᠭ ᠤ᠋ᠨ
ᠠᠪᠤᠷᠠᠯ ᠢᠪᠡᠭᠡᠯᠳᠦ ᠪᠠᠳᠠᠷᠠᠩᠭᠤᠢ ᠲᠡᠭᠷᠢ ᠶ᠋ᠢᠨ ᠦᠷᠡ ᠲᠡᠮᠦᠵᠢᠨ ᠪᠢ᠂
ᠠᠰᠠᠷᠠᠭᠴᠢ ᠲᠭ᠌ᠷᠢ ᠶ᠋ᠢᠨ ᠬᠠᠷᠠᠭᠠᠯᠵᠠᠯᠭᠠ ᠪᠠᠷ
ᠠᠯᠢᠪᠠ ᠪᠦᠬᠦᠨ ᠢ᠋ ᠠᠭᠠᠵᠢᠮ ᠳ᠋ᠠᠭᠠᠨ ᠠᠯᠠᠭᠠ ᠳ᠋ᠤᠷ ᠠᠳᠬᠤᠵᠤ᠂
ᠠᠷᠤ ᠥᠪᠥᠷ ᠢ᠋ ᠠᠤᠭᠠ ᠰᠦᠷ ᠢ᠋ᠶ᠋ᠡᠷ ᠬᠣᠷᠢᠶᠠᠨ ᠠᠪᠴᠤ
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠨᠢᠭᠡᠨᠡ ᠬᠠᠮᠲᠤ ᠨᠡᠢᠲᠡ ᠶ᠋ᠢ ᠡᠵᠡᠯᠡᠬᠦ ᠡᠵᠡᠨ᠂
ᠠᠭᠤᠤ ᠣᠷᠴᠢᠯᠠᠩ ᠢ᠋ ᠬᠠᠮᠲᠤ ᠪᠠᠷ ᠢ᠋ ᠬᠠᠮᠠᠭᠠᠯᠠᠬᠤ ᠬᠠᠭᠠᠨ ᠤ᠋
ᠠᠮᠤᠭᠤᠯᠠᠩ ᠬᠠᠰ ᠶᠡᠬᠡ ᠲᠥᠷᠥ ᠶ᠋ᠢ ᠵᠢᠳᠬᠦᠨ ᠪᠦᠲᠦᠭᠡᠬᠦ ᠪᠣᠯᠬᠤᠯᠠ᠂
ᠠᠳᠠᠪᠠᠰᠢ ᠵᠢᠳᠬᠦᠯᠳᠦ ᠰᠠᠢᠳ ᠲᠦᠰᠢᠮᠡᠳ ᠡᠴᠡ ᠲᠡᠷᠢᠭᠦᠯᠡᠵᠦ
ᠠᠯᠪᠠᠲᠤ ᠤᠯᠤᠰ ᠬᠠᠷᠠᠴᠤᠰ ᠢᠷᠭᠡᠨ ᠳ᠋ᠡᠭᠡᠨ ᠬᠦᠷᠲᠡᠯᠡ ᠪᠢ᠂
ᠠᠮᠢ ᠪᠠᠨ ᠨᠢᠭᠡᠳᠬᠡᠨ ᠪᠠᠶᠠᠨ ᠦᠪᠡᠳᠡᠭᠰᠢ ᠶ᠋ᠢ ᠬᠠᠮᠲᠤᠳᠬᠠᠵᠤ
ᠠᠮᠠᠯᠳᠠᠨ ᠲᠠᠩᠭᠠᠷᠢᠭᠯᠠᠵᠤ ᠪᠠᠶᠠᠷ ᠴᠡᠩᠭᠡᠯ ᠢ᠋ ᠴᠤᠭᠠᠷ ᠡᠳ᠋ᠯᠡᠰᠦᠭᠡᠢ ᠪᠢ᠂
ᠠᠶᠠ ᠬᠡᠷᠪᠡ ᠲᠠᠩᠭᠠᠷᠢᠭᠯᠠᠭᠰᠠᠨ ᠦᠭᠡᠰ ᠡᠴᠡ ᠪᠡᠨ ᠵᠥᠷᠢᠴᠡᠪᠡᠰᠦ
ᠠᠰᠢᠳᠠ ᠪᠤᠯᠠᠩᠭᠢᠷ ᠡᠨᠡ ᠬᠦ᠌ ᠮᠥᠷᠡᠨ ᠦ᠌ ᠤᠰᠤ ᠮᠡᠲᠦ ᠱᠠᠯᠴᠢᠭᠳᠠᠳᠤᠭᠠᠢ᠃
ᠠᠳᠠᠪᠠᠰᠢ ᠵᠢᠭᠰᠢᠯᠲᠡᠢ ᠡᠨᠡ ᠬᠦ᠌ ᠤᠰᠤᠨ ᠮᠡᠲᠦ ᠱᠠᠯᠪᠠᠭᠳᠠᠲᠤᠭᠠᠢ
ᠠᠷᠠᠰᠤᠨᠠ ᠬᠣᠷᠬᠣᠭᠯᠠᠭᠤᠯᠤᠭᠰᠠᠨ ᠡᠨᠡ ᠴᠢᠬᠢᠲᠡᠢ ᠠᠳᠠᠯᠢ ᠠᠯᠠᠭᠳᠠᠲᠤᠭᠠᠢ᠃
ᠡᠨᠡ ᠬᠦ᠌ ᠤᠰᠤᠨ ᠢ᠋ ᠤᠤᠭᠤᠭᠰᠠᠨ ᠪᠦᠭᠦᠳᠡᠭᠡᠷ ᠴᠡᠷᠢᠭ ᠮᠢᠨᠦ
ᠡᠷᠬᠡᠪᠰᠢ ᠨᠠᠳᠠ ᠳ᠋ᠤᠷ ᠡᠭᠦᠷᠢᠳᠡ ᠦᠨᠡᠨ ᠬᠦᠴᠦᠨ ᠢ᠋ᠶ᠋ᠡᠨ ᠥᠭᠲᠡᠬᠦᠢ!
ᠡᠨᠡ ᠮᠥᠷᠡᠨ ᠢ᠋ ᠭᠡᠲᠦᠯᠦᠭᠰᠡᠨ ᠪᠦᠬᠦ ᠣᠯᠠᠨ ᠢ᠋ᠶ᠋ᠠᠷ ᠲᠠ
ᠡᠭᠡᠨᠡᠭᠲᠡ ᠨᠠᠳᠠ ᠳ᠋ᠤᠷ ᠡᠴᠦᠰᠲᠡᠯᠡ ᠦᠨᠡᠨ ᠬᠦᠴᠦᠨ ᠢ᠋ᠶ᠋ᠡᠨ ᠥᠭᠲᠡᠬᠦᠢ!
ᠭᠡᠮᠡᠨ ᠠᠯᠲᠠᠨ ᠠᠮᠠᠨ ᠢ᠋ᠶ᠋ᠠᠷ ᠠᠮᠠᠯᠠᠵᠤ᠂ ᠠᠯᠤᠰ ᠲᠡᠭᠷᠢ ᠳ᠋ᠦ᠍ᠷ ᠳᠠᠬᠢᠨ ᠮᠥᠷᠭᠥᠵᠦ᠂ ᠠᠬᠤ ᠪᠦᠭᠦᠳᠡᠭᠡᠷ ᠬᠦᠯᠢᠶᠡᠨ ᠡᠳ᠋ᠯᠡᠶᠡ ᠭᠡᠮᠡᠨ ᠥᠴᠢᠭᠰᠡᠨ ᠳ᠋ᠦ᠍ᠷ ᠠᠯᠢᠪᠠ ᠪᠦᠭᠦᠳᠡᠭᠡᠷ ᠰᠠᠢᠳ ᠲᠦᠰᠢᠮᠡᠳ ᠵᠠᠩᠵᠤᠨ ᠴᠡᠷᠢᠭ ᠲᠠᠢᠽᠦ ᠶ᠋ᠢᠨ ᠡᠨᠡ ᠮᠡᠲᠦ ᠪᠠᠲᠤ ᠰᠡᠳᠬᠡᠯ ᠢ᠋ᠶ᠋ᠡᠷ ᠦᠨᠡᠮᠴᠢᠯᠡᠨ ᠥᠷᠥᠰᠢᠶᠡᠬᠦ ᠶ᠋ᠢ ᠦᠵᠡᠭᠡᠳ ᠰᠠᠨᠠᠭᠠᠨ ᠢᠭᠲᠦᠯᠵᠦ ᠳᠣᠲᠣᠷᠠ ᠬᠥᠳᠡᠯᠦᠨ᠂ ᠬᠠᠰᠠᠷ᠂ ᠪᠡᠯᠭᠦᠳᠡᠢ᠂ ᠣᠴᠢᠭ᠂ ᠭᠠᠴᠤᠭ ᠳᠥᠷᠪᠡᠭᠦᠯᠡ ᠴᠥᠮ ᠬᠠᠪᠠᠷ ᠪᠤᠷᠬᠢᠷᠠᠨ ᠨᠢᠯᠪᠤᠰᠤᠨ ᠴᠤᠪᠤᠷᠢᠭᠤᠯᠵᠤ᠂ ᠲᠠᠯᠠ ᠳᠦᠭᠦᠷᠡᠩ ᠰᠥᠭᠥᠳᠴᠦ ᠬᠠᠰᠠᠷ ᠲᠡᠷᠢᠭᠦᠯᠡᠨ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠠᠮᠠᠯᠳᠠᠷᠤᠨ᠂ ᠲᠡᠭᠦᠨ ᠦ᠌ ᠦᠭᠡ :
ᠡᠴᠢᠭᠡ ᠲᠡᠭᠷᠢ ᠶ᠋ᠢᠨ ᠪᠠᠭᠤᠯᠭᠠᠵᠤ ᠲᠥᠷᠥᠭᠦᠯᠦᠭᠰᠡᠨ ᠡᠷᠬᠡᠲᠦ ᠡᠵᠡᠨ ᠮᠢᠨᠦ
ᠡᠬᠡ ᠭᠠᠵᠠᠷ ᠤ᠋ᠨ ᠬᠠᠷᠠᠭᠠᠯᠵᠠᠵᠤ ᠬᠠᠪᠰᠤᠷᠤᠭᠰᠠᠨ ᠬᠠᠮᠠᠭᠠᠯᠠᠯᠲᠤ ᠬᠠᠨ ᠮᠢᠨᠦ᠂
ᠡᠩᠭᠡᠷ ᠨᠡᠢᠲᠡ ᠶ᠋ᠢᠨ ᠡᠵᠡᠳ ᠰᠠᠬᠢᠭᠤᠯᠰᠤᠨ ᠯᠤᠭᠠ ᠡᠨᠡ ᠪᠦᠭᠦᠳᠡᠭᠡᠷ
ᠡᠨᠡᠷᠢᠵᠦ ᠲᠠᠩᠭᠠᠷᠢᠭᠯᠠᠬᠤ ᠮᠠᠨ ᠤ᠋ ᠣᠯᠠᠨ ᠢ᠋ ᠦᠵᠡᠵᠦ ᠠᠢᠯᠠᠳᠤᠨ ᠰᠣᠶᠣᠷᠬᠠ !
ᠠᠯᠲᠠᠨ ᠥᠩᠭᠡᠲᠦ ᠪᠠᠳᠠᠷᠠᠩᠭᠤᠢ ᠴᠠᠭᠠᠨ ᠲᠡᠭᠷᠢ ᠡᠴᠢᠭᠡ ᠪᠡᠷ
ᠠᠷᠢᠭᠤᠨ ᠳᠡᠭᠡᠳᠦ ᠣᠷᠳᠣᠨ ᠴᠠᠭᠠᠨ ᠭᠡᠷ ᠲᠦ᠍ᠷ ᠵᠠᠯᠠᠷᠠᠨ ᠪᠠᠭᠤᠵᠤ ᠢᠷᠡᠭᠡᠳ
ᠠᠰᠠᠷᠠᠯ ᠶᠡᠬᠡᠲᠦ ᠥᠭᠡᠯᠦᠨ ᠦᠵᠢᠨ ᠦ᠌ ᠰᠢᠷᠡᠭᠡ ᠰᠠᠨᠳᠠᠯᠢ ᠶ᠋ᠢ ᠪᠦᠷᠬᠦᠭᠰᠡᠨ ᠢ᠋ᠶ᠋ᠡᠷ
ᠠᠰᠤᠷᠤ ᠭᠠᠢᠬᠠᠮᠰᠢᠭᠲᠤ ᠲᠡᠭᠷᠢᠯᠢᠭ᠌ ᠡᠵᠡᠨ ᠴᠢᠮᠠᠶ᠋ᠢ ᠮᠡᠨᠳᠦᠯᠡᠭᠰᠡᠨ ᠲᠤᠯᠠ᠂
ᠠᠷᠪᠠᠨ ᠵᠦᠭ ᠦ᠋ᠨ ᠡᠵᠡᠳ ᠬᠤᠪᠢᠯᠭᠠᠨ ᠠᠯᠲᠠᠨ ᠤ᠋ ᠯᠤᠤ ᠪᠠᠷ ᠬᠠᠷᠠᠭᠠᠯᠵᠠᠮᠤᠢ
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢᠨ ᠬᠥᠮᠦᠨ ᠠᠮᠢᠲᠠᠨ ᠰᠦᠰᠦᠭᠯᠡᠨ ᠪᠢᠰᠢᠷᠡᠵᠦᠬᠦᠢ᠃
ᠠᠴᠢ ᠵᠢᠷᠤᠮᠲᠤ ᠰᠠᠢᠳ ᠲᠦᠰᠢᠮᠡᠳ ᠠᠮᠢ ᠪᠠᠨ ᠲᠠᠯᠪᠢᠵᠤ ᠵᠢᠳᠬᠦᠯᠴᠡᠶᠡ
ᠠᠰᠠᠷᠬᠠᠳᠠᠨ ᠥᠷᠥᠰᠢᠶᠡᠭᠳᠡᠬᠦᠢ ᠠᠯᠪᠠᠲᠤ ᠤᠯᠤᠰ ᠮᠠᠳᠠᠯᠢ ᠬᠠᠮᠲᠤ ᠵᠢᠳᠬᠦᠶᠡ᠂
ᠠᠶᠠ ᠬᠡᠨ ᠠᠮᠠᠯᠳᠠᠭᠰᠠᠨ ᠦᠭᠡ ᠡᠴᠡ ᠪᠡᠨ ᠠᠷᠠᠢ ᠲᠡᠳᠦᠢ ᠵᠥᠷᠢᠴᠡᠪᠡᠰᠦ
ᠠᠮᠢᠳᠠᠨᠠ ᠭᠢᠰᠬᠢᠯᠡᠭᠳᠡᠬᠦ ᠡᠨᠡ ᠮᠥᠷᠡᠨ ᠦ᠌ ᠰᠢᠪᠡᠷ ᠮᠡᠲᠦ ᠰᠢᠯᠵᠠ ᠪᠣᠯᠲᠤᠭᠠᠢ!
ᠠᠪᠠᠢ ᠬᠡᠨ ᠲᠠᠩᠭᠠᠷᠢᠭᠯᠠᠭᠰᠠᠨ ᠦᠭᠡᠰ ᠡᠴᠡ ᠪᠡᠨ ᠠᠶᠤᠨ ᠡᠮᠢᠶᠡᠨ ᠨᠢᠴᠤᠪᠠᠰᠤ
ᠠᠳᠤᠭᠤᠨ ᠳ᠋ᠦᠷ ᠭᠢᠰᠬᠢᠯᠡᠭᠳᠡᠬᠦ ᠡᠨᠡ ᠮᠥᠷᠡᠨ ᠦ᠌ ᠤᠰᠤᠨ ᠮᠡᠲᠦ ᠱᠠᠯᠪᠡᠷᠠᠬᠤ ᠪᠣᠯᠲᠤᠭᠠᠢ !
ᠠᠭᠴᠢ ᠨᠡᠢᠲᠡ ᠪᠡᠷ ᠠᠮᠠᠨ ᠠᠪᠤᠭᠰᠠᠨ ᠡᠨᠡ ᠦᠭᠡᠰ ᠡᠴᠡ ᠪᠡᠨ ᠨᠢᠴᠤᠪᠠᠰᠤ
ᠠᠷᠠᠰᠤ ᠪᠠᠨ ᠱᠠᠭᠠᠯᠠᠭᠳᠠᠭᠰᠠᠨ ᠴᠢᠬᠢᠲᠡᠢ ᠮᠡᠲᠦ ᠠᠰᠢᠳᠠ ᠠᠯᠠᠭᠳᠠᠬᠤ ᠪᠣᠯᠲᠤᠭᠠᠢ !
ᠠᠬᠤᠢ ᠪᠦᠭᠦᠳᠡ ᠪᠡᠷ ᠠᠮᠠ ᠪᠠᠷ ᠥᠴᠢᠭᠰᠡᠨ ᠦᠨᠡᠨ ᠦᠭᠡᠰ ᠡᠴᠡ ᠪᠡᠨ ᠨᠢᠴᠤᠪᠠᠰᠤ
ᠠᠷᠠᠰᠤ ᠲᠠᠢ ᠬᠣᠷᠬᠣᠭᠯᠠᠭᠳᠠᠭᠰᠠᠨ ᠴᠢᠬᠢᠲᠡᠢ ᠠᠳᠠᠯᠢ ᠮᠢᠬᠠ ᠪᠠᠨ ᠢᠳᠡᠭᠳᠡᠬᠦ ᠪᠣᠯᠲᠤᠭᠠᠢ!
ᠡᠯᠪᠡᠷᠢᠯ ᠶᠡᠬᠡᠲᠦ ᠡᠵᠡᠨ ᠴᠢᠨᠦ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠣᠲᠠᠯᠠ ᠪᠦᠭᠦᠳᠡᠭᠡᠷ
ᠡᠩᠭᠡᠷ ᠨᠡᠢᠲᠡ ᠪᠡᠷ ᠡᠭᠦᠷᠢᠳᠡ ᠶ᠋ᠢᠨ ᠬᠦᠴᠦᠨ ᠢ᠋ᠶ᠋ᠡᠨ ᠪᠠᠷᠢᠵᠤ ᠵᠢᠳᠬᠦᠯᠴᠡᠶᠡ ᠪᠢᠳᠡ᠂
ᠡᠷᠲᠡ ᠶ᠋ᠢᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠲᠤᠰᠤᠭᠰᠠᠨ ᠭᠠᠵᠠᠷ ᠪᠦᠬᠦᠨ ᠦ᠌ ᠬᠥᠮᠦᠨ ᠨᠡᠢᠲᠡ ᠪᠡᠷ
ᠡᠷᠳᠡᠨᠢ ᠶ᠋ᠢᠨ ᠲᠥᠷᠥ ᠶ᠋ᠢ ᠴᠢᠨᠦ ᠡᠷᠬᠡᠪᠰᠢ ᠵᠢᠳᠬᠦᠵᠦ ᠪᠦᠲᠦᠭᠡᠮᠦᠢ ᠶᠠ!
ᠭᠡᠮᠡᠨ ᠲᠠᠩᠭᠠᠷᠢᠭᠯᠠᠯᠴᠠᠨ ᠮᠥᠷᠭᠥᠪᠡᠢ᠃ ᠡᠨᠡ ᠲᠤᠬᠠᠢ ᠴᠢᠨᠳᠠᠭᠠᠨᠠ ᠰᠡᠴᠡᠨ᠂ ᠬᠤᠳᠠᠭᠠᠨᠠ ᠪᠡᠬᠢ ᠲᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠪᠠ ᠰᠢᠨᠡ ᠳᠠᠭᠠᠭᠰᠠᠨ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠤᠷᠲᠤ ᠪᠣᠳᠣᠯᠭᠠᠲᠤ᠂ ᠪᠠᠰᠠ ᠬᠣᠩᠵᠢᠯᠠ ᠠᠢᠮᠠᠭ ᠤ᠋ᠨ ᠤᠬᠠᠭᠠᠨᠲᠤ ᠷᠢᠨᠴᠢᠨ᠂ ᠬᠠᠭᠤᠴᠢᠨ ᠤᠷᠤᠭ ᠢᠵᠢᠯᠵᠢ ᠠᠢᠮᠠᠭ ᠤ᠋ᠨ ᠬᠦᠷᠭᠡᠨ ᠪᠤᠲ᠋ᠤ᠂ ᠪᠠᠰᠠ ᠲᠡᠭᠦᠨ ᠦ᠌ ᠣᠢᠷᠠ ᠲᠥᠷᠥᠯ ᠦ᠋ᠨ ᠠᠪᠠᠭᠠ᠂ ᠲᠣᠬᠣᠢᠲᠤ ᠬᠡᠮᠡᠬᠦ ᠠᠢᠮᠠᠭ ᠢ᠋ ᠡᠵᠡᠯᠡᠵᠦ ᠪᠠᠢᠭᠰᠠᠨ ᠪᠤᠰᠤᠩ ᠬᠡᠮᠡᠭᠴᠢ ᠶ᠋ᠢ ᠴᠡᠷᠢᠭ ᠯᠦ᠍ᠭᠡ ᠢᠨᠤ ᠳᠠᠭᠠᠭᠤᠯᠤᠨ ᠠᠪᠴᠤ ᠴᠥᠮ ᠬᠦᠷᠴᠦ ᠢᠷᠡᠭᠰᠡᠨ ᠲᠤᠯᠠ ᠡᠨᠡ ᠲᠠᠩᠭᠠᠷᠢᠭ ᠲᠤᠷ ᠬᠠᠮᠲᠤ ᠪᠠᠷ ᠴᠥᠮ ᠣᠷᠣᠵᠤ ᠲᠠᠩᠭᠠᠷᠢᠭᠯᠠᠵᠤᠬᠤᠢ᠃ ᠡᠭᠦᠨ ᠳ᠋ᠦ᠍ᠷ ᠣᠯᠠᠨ ᠢ᠋ᠶ᠋ᠠᠷ ᠪᠠᠰᠠ ᠰᠡᠳᠬᠢᠯ ᠭᠦᠢᠴᠡᠬᠦ ᠦᠭᠡᠢ᠂ ᠴᠥᠮ ᠬᠤᠷᠤᠭᠤᠨ ᠤ᠋ ᠴᠢᠰᠤᠨ ᠢ᠋ᠶ᠋ᠠᠨ ᠠᠷᠢᠭᠤᠨ ᠰᠠᠷᠬᠤᠳ ᠲᠤᠷ ᠳᠤᠰᠤᠭᠠᠵᠤ᠂ ᠲᠡᠭᠷᠢ ᠭᠠᠵᠠᠷ᠂ ᠮᠥᠷᠡᠨ ᠠᠭᠤᠯᠠ ᠲᠠᠯᠠ ᠳ᠋ᠤᠷ ᠰᠠᠴᠤᠯᠢ ᠡᠷᠭᠦᠨ ᠲᠡᠮᠳᠡᠭᠯᠡᠬᠦᠶᠡ᠂ ᠲᠠᠢᠽᠦ ᠳᠥᠷᠪᠡᠨ ᠳᠡᠭᠦᠦ ᠶᠦ᠍ᠭᠡᠨ ᠴᠢᠰᠤ ᠲᠣᠰᠤᠭᠠᠭᠰᠠᠨ ᠠᠶᠠᠭᠠᠲᠤ ᠠᠷᠢᠬᠢ ᠶ᠋ᠢ ᠠᠴᠢᠷᠠᠭᠤᠯᠵᠤ᠂ ᠥᠨᠥᠬᠡᠨ ᠦ᠌ ᠡᠰᠬᠡᠭᠰᠡᠨ ᠳᠤᠮᠳᠠ ᠬᠤᠷᠤᠭᠤ ᠶ᠋ᠢᠨ ᠣᠷᠢᠶᠠᠭᠰᠠᠨ ᠢ᠋ ᠠᠯᠳᠠᠷᠠᠭᠠᠨ ᠴᠢᠰᠤ ᠶ᠋ᠢ ᠰᠢᠪᠬᠠᠨ ᠭᠠᠷᠭᠠᠵᠤ᠂ ᠲᠡᠷᠡ ᠬᠦ᠌ ᠠᠶᠠᠭᠠᠲᠤ ᠠᠷᠢᠬᠢᠨᠠ ᠳᠤᠰᠤᠭᠠᠪᠠᠰᠤ᠂ ᠲᠠᠢᠽᠦ ᠶ᠋ᠢᠨ ᠴᠢᠰᠤᠨ ᠤ᠋ ᠥᠩᠭᠡ ᠭᠡᠭᠡᠬᠡᠨ ᠬᠡᠢᠪᠠᠩ᠂ ᠬᠤᠷᠴᠠ ᠤᠯᠠᠭᠠᠨ ᠴᠢᠰᠤᠨ ᠤ᠋ ᠳᠤᠰᠤᠯ ᠣᠷᠢᠶᠠᠯᠳᠤᠨ ᠪᠥᠮᠪᠥᠷᠢᠵᠦ᠂ ᠠᠷᠢᠬᠢᠨ ᠤ᠋ ᠳᠣᠲᠣᠷᠠ ᠥᠪᠡᠷᠡ ᠥᠩᠭᠡᠯᠡᠵᠦ᠂ ᠳᠥᠷᠪᠡᠨ ᠳᠡᠭᠦᠦ ᠶ᠋ᠢᠨ ᠴᠢᠰᠤ ᠯᠤᠭᠠ ᠬᠡᠷᠬᠢᠪᠡᠴᠦ ᠨᠡᠢᠯᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠦᠷ ᠲᠠᠢᠽᠦ ᠭᠠᠢᠬᠠᠨ ᠦᠵᠡᠬᠦᠶᠡ᠂ ᠣᠯᠠᠨ ᠢ᠋ᠶ᠋ᠠᠷ ᠴᠤᠭᠯᠠᠵᠤ ᠦᠵᠡᠭᠡᠳ ᠶᠡᠬᠡᠯᠡ ᠭᠠᠢᠬᠠᠯᠳᠤᠵᠤ᠂ ᠵᠠᠩᠵᠤᠨ ᠴᠡᠷᠢᠭ ᠬᠠᠮᠲᠤ ᠪᠠᠷ ᠦᠵᠡᠯᠴᠡᠵᠦ᠂ ᠰᠦᠰᠦᠭᠯᠡᠨ ᠪᠢᠰᠢᠷᠡᠵᠦ ᠮᠥᠷᠭᠥᠨ ᠮᠡᠳᠡᠭᠦᠯᠦᠷᠦᠨ :
ᠲᠡᠭᠷᠢᠯᠢᠭ᠌ ᠦ᠋ᠨ ᠴᠢᠰᠤ ᠬᠥᠮᠦᠨ ᠦ᠌ ᠴᠢᠰᠤ ᠲᠠᠢ ᠬᠡᠷᠬᠢᠪᠡᠴᠦ ᠦᠯᠦ ᠨᠡᠢᠯᠡᠬᠦ ᠶ᠋ᠢ
ᠲᠡᠮᠳᠡᠭᠲᠡᠶᠡ ᠪᠢᠳᠡ ᠡᠨᠡ ᠡᠳᠦᠷ ᠨᠢᠳᠦ ᠪᠡᠷ ᠣᠯᠵᠤ ᠦᠵᠡᠪᠡ᠂
ᠲᠡᠭᠦᠰ ᠲᠠᠰᠤᠷᠬᠠᠢ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠤ᠋ ᠦᠷᠡ ᠰᠢᠮᠡᠰ ᠮᠥᠨ ᠢ᠋
ᠲᠡᠮᠳᠡᠭᠯᠡᠨ ᠪᠢᠴᠢᠵᠦ ᠡᠭᠦᠷᠢᠳᠡ ᠬᠣᠴᠣᠷᠤᠭᠤᠯᠪᠠᠰᠤ ᠵᠣᠬᠢᠮᠤᠢ ᠬᠡᠮᠡᠯᠳᠦᠪᠡᠢ᠃
ᠡᠨᠡ ᠮᠡᠲᠦ ᠶᠠᠰᠤ ᠰᠢᠮᠡ ᠬᠣᠶᠠᠷ ᠥᠪᠡᠷᠡ ᠤᠴᠢᠷ ᠢ᠋ ᠡᠳᠦᠭᠡᠬᠢ ᠬᠥᠮᠦᠨ ᠡᠰᠡ ᠮᠡᠳᠡᠭᠴᠢᠳ ᠮᠠᠰᠢ ᠣᠯᠠᠨ ᠠᠮᠤᠢ᠂ ᠡᠷᠬᠡᠪᠰᠢ ᠣᠨᠴᠠ ᠡᠷᠬᠢᠮ ᠳᠣᠣᠷᠠᠲᠤ ᠬᠡᠮᠡᠭᠰᠡᠨ ᠢᠨᠤ ᠪᠤᠰᠤ᠂ ᠡᠭᠡᠨᠡᠭᠲᠡ ᠲᠡᠭᠦᠨ ᠦ᠌ ᠦᠨᠡᠨ ᠤᠴᠢᠷ ᠢ᠋ ᠮᠡᠳᠡᠬᠦ ᠬᠡᠷᠡᠭᠲᠡᠢ ᠪᠣᠯᠠᠢ᠃
– – – –
①ᠡᠨᠡ ᠴᠢᠬᠢᠲᠡᠢ ᠶ᠋ᠢ ᠵᠠᠷᠢᠮ ᠰᠤᠳᠤᠷ ᠲᠤᠷ ᠵᠡᠷᠯᠢᠭ ᠮᠣᠷᠢᠨ ᠬᠡᠮᠡᠭᠡᠳ ᠵᠠᠷᠢᠮ ᠰᠤᠳᠤᠷ ᠲᠤᠷ ᠰᠠᠢ ᠴᠣᠬᠣᠮ ᠨᠡᠷᠡ ᠪᠡᠷ ᠴᠢᠬᠢᠲᠡᠢ ᠭᠡᠮᠡᠨ ᠪᠢᠴᠢᠵᠦᠬᠦᠢ᠃
ᠴᠣᠬᠣᠯᠠᠭᠰᠠᠨ ᠠᠨᠤ
ᠡᠨᠡ ᠪᠦᠯᠦᠭ ᠲᠣᠷ ᠢᠨᠢᠶᠡᠳᠦᠮ ᠲᠥᠷᠦᠯᠲᠡᠢ ᠬᠣᠶᠠᠷ ᠬᠡᠰᠡᠭ᠂ ᠪᠠᠰᠠ ᠰᠡᠭᠦᠷᠡᠰᠦᠨ ᠠᠯᠳᠠᠯᠲᠠᠢ ᠬᠣᠶᠠᠷ ᠬᠡᠰᠡᠭ᠂ ᠭᠠᠢᠬᠠᠨ ᠪᠢᠰᠢᠷᠡᠭᠦᠱᠢᠲᠡᠢ ᠬᠣᠶᠠᠷ ᠬᠡᠰᠡᠭ ᠂ ᠪᠠᠰᠠ ᠠᠶᠤᠵᠤ ᠰᠣᠴᠢᠮᠠᠷ ᠬᠣᠶᠠᠷ ᠬᠡᠰᠡᠭ ᠪᠣᠢ᠃ ᠨᠢᠭᠡᠨ ᠢᠨᠢᠶᠡᠯᠲᠡᠢ ᠢᠨᠦ : ᠾᠧ ᠸᠠᠩ ᠲᠣᠭᠣᠷᠢᠯ ᠤ᠋ᠨ ᠨᠢᠭᠡᠬᠡᠨ ᠭᠦᠷᠡᠯᠵᠡᠭᠡᠨᠡ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠬᠦᠯᠢᠴᠡᠨ ᠡᠰᠡ ᠴᠢᠳᠠᠭᠠᠳ ᠵᠠᠭᠤᠨ ᠵᠦᠢᠯ ᠦ᠋ᠨ ᠠᠶᠤᠯ ᠰᠣᠴᠢᠯ ᠢ᠋ ᠠᠮᠰᠠᠵᠤ᠂ ᠠᠮᠢᠨ ᠪᠡᠶᠡ ᠪᠡᠨ ᠠᠷᠠᠢ ᠡᠰᠡ ᠠᠯᠳᠠᠵᠤ ᠡᠭᠡᠭᠰᠡᠨ ᠢᠨᠤ ᠠᠶᠠ ᠶᠠᠭᠤᠲᠠᠢ ᠪᠢᠴᠢᠬᠠᠨ ᠬᠡᠦᠬᠡᠳ ᠮᠡᠲᠦ ᠲᠡᠨᠡᠭ ᠬᠥᠭᠡᠷᠳᠡᠭ ᠴᠦᠯᠢᠰ ᠥᠴᠦᠬᠡᠨ ᠠᠵᠢ ? ᠬᠣᠶᠠᠳᠤᠭᠠᠷ ᠢᠨᠢᠶᠡᠯᠲᠡᠢ ᠢᠨᠤ : ᠪᠦᠳᠦᠭᠦᠨ ᠦᠭᠡᠨ ᠳ᠋ᠦ᠍ᠷ ᠤᠮᠪᠠᠴᠢ ᠶ᠋ᠢᠨ ᠬᠥᠪᠡᠭᠦᠨ ᠱᠤᠩᠪᠠᠴᠢ ᠬᠡᠮᠡᠭᠰᠡᠨᠴᠢᠯᠡᠨ᠂ ᠴᠦᠯᠢᠰ ᠦ᠋ᠨ ᠬᠥᠪᠡᠭᠦᠨ ᠴᠢᠯᠲᠠ ᠲᠡᠷᠡ ᠢᠯᠠᠭᠤ ᠶ᠋ᠢᠨ ᠠᠯᠤᠬᠠ ᠶ᠋ᠢᠨ ᠲᠤᠰᠠ ᠲᠤᠱᠠ ᠬᠣᠶᠠᠷ ᠳᠣᠯᠣᠭᠠ ᠶ᠋ᠢ ᠲᠡᠷᠡ ᠮᠡᠲᠦ ᠠᠰᠠᠭᠤᠵᠤ ᠪᠥᠬᠥᠶᠡ ᠢᠴᠢᠩᠭᠦᠷᠡᠨ ᠭᠤᠲᠤᠬᠤ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ᠂ 《 ᠶᠠᠭᠤᠨ ᠪᠣᠯᠪᠠᠴᠤ ᠬᠢᠵᠦ ᠪᠠᠷᠠᠪᠠ᠂ ᠲᠡᠭᠦᠰᠦᠨ ᠳᠦᠭᠦᠷᠪᠡᠢ ! 》 ᠭᠡᠮᠡᠨ ᠴᠢᠷᠦᠨ ᠭᠠᠷᠭᠠᠵᠤ ᠠᠯᠠ ᠬᠡᠮᠡᠭᠰᠡᠨ ᠢᠨᠤ ᠦᠨᠡᠬᠡᠷ ᠶᠠᠭᠤᠲᠠᠢ ᠬᠠᠪᠲᠠᠰᠤ ᠮᠡᠲᠦ ᠨᠢᠭᠤᠷ ᠦᠭᠡᠢ ᠪᠥᠭᠡᠳ ᠴᠢᠨᠣᠠ ᠠᠳᠠᠯᠢ ᠡᠯᠢᠭᠡ ᠵᠢᠷᠦᠬᠡᠲᠡᠢ ᠪᠣᠢ ! ᠵᠢᠴᠢ ᠨᠢᠭᠡᠨ ᠰᠡᠭᠦᠷᠡᠰᠦᠨ ᠠᠯᠳᠠᠯᠲᠠᠢ ᠠᠨᠤ ᠡᠨᠡ ᠵᠠᠮᠤᠬᠠ ᠪᠣᠭᠣᠯ ᠶᠠᠭᠤᠨ ᠳ᠋ᠤᠷ ᠲᠡᠢᠮᠦ ᠴᠥᠬᠥᠷᠡᠰᠢ ᠦᠭᠡᠢ ᠮᠠᠭᠤ ᠰᠡᠳᠬᠢᠯ ᠲᠡᠢ ᠳ᠋ᠦ᠍ᠷ ᠲᠡᠷᠡ ᠢᠯᠠᠭᠤ ᠪᠠᠷᠠᠭᠠ ᠴᠤ᠌ ᠪᠠᠰᠠ ᠶᠠᠭᠤᠲᠠᠢ ᠲᠡᠢᠮᠦ ᠬᠠᠰᠢᠷᠠᠰᠢ ᠦᠭᠡᠢ ᠭᠠᠵᠢᠭᠤ ᠰᠠᠨᠠᠭᠠᠲᠤ ᠠᠵᠢ ? ᠬᠡᠮᠡᠪᠡᠰᠦ᠂ ᠠᠶᠠ ᠠᠷᠭᠠ ᠦᠭᠡᠢ ᠪᠣᠯᠠᠢ᠃ ᠠᠩᠬᠠᠨ ᠳ᠋ᠤᠷ ᠨᠢᠭᠡᠨ ᠤᠯᠤᠰ ᠢ᠋ ᠡᠵᠡᠯᠡᠨ ᠪᠠᠢᠭᠰᠠᠨ ᠬᠥᠮᠦᠨ ᠪᠤᠰᠤᠳ ᠲᠤᠷ ᠪᠣᠭᠣᠯ ᠪᠣᠯᠰᠤᠭᠠᠢ ᠭᠡᠮᠡᠨ ᠰᠠᠨᠠᠭᠴᠢᠳ ᠦᠭᠡᠢ ᠪᠣᠯᠠᠢ᠃ ᠡᠭᠦᠨ ᠳ᠋ᠦ᠍ᠷ ᠰᠡᠭᠦᠷᠡᠰᠦᠨ ᠠᠯᠳᠠᠯ ᠦᠭᠡᠢ ᠪᠣᠯᠤᠮᠤᠢ ᠤᠤ ? ᠬᠣᠶᠠᠳᠤᠭᠠᠷ ᠰᠡᠭᠦᠷᠡᠰᠦᠨ ᠠᠯᠳᠠᠯᠲᠠᠢ ᠠᠨᠤ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠴᠢᠦᠢ ᠰᠢᠦᠸᠠᠢ ᠡᠦ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠪᠡᠶᠡ ᠪᠠᠷᠠᠭᠠᠳ ᠬᠥᠪᠡᠭᠦᠨ ᠴᠢᠦᠢ ᠱᠢ ᠯᠢ ᠡᠴᠢᠭᠡ ᠶ᠋ᠢᠨ ᠦᠰ ᠢ᠋ ᠦᠯᠦ ᠤᠮᠠᠷᠲᠠᠨ᠂ ᠬᠦᠴᠦᠨ ᠡᠰᠡ ᠬᠦᠷᠦᠯᠴᠡᠪᠡᠴᠦ ᠬᠦᠴᠦᠯᠡᠨ ᠠᠯᠠᠯᠳᠤᠬᠤ ᠶ᠋ᠢ ᠡᠷᠢᠬᠦ ᠢᠨᠤ ᠬᠥᠪᠡᠭᠦᠨ ᠪᠣᠯᠤᠭᠰᠠᠨ ᠬᠥᠮᠦᠨ ᠦ᠌ ᠬᠥᠭᠡᠭᠡᠵᠦ ᠶᠠᠪᠤᠬᠤ ᠶᠠᠪᠤᠳᠠᠯ ᠪᠣᠯᠠᠢ᠂ ᠬᠦᠯᠢᠶᠡᠵᠦ ᠪᠠᠷᠢᠬᠤ ᠶ᠋ᠢ ᠴᠦ᠍ ᠪᠠᠢᠲᠤᠭᠠᠢ ᠬᠦᠵᠦᠭᠦᠨ ᠢ᠋ ᠣᠭᠲᠣᠯᠪᠠᠴᠤ ᠦᠯᠦ ᠮᠤᠷᠤᠢᠬᠤ ᠠᠨᠤ ᠬᠥᠪᠡᠭᠦᠨ ᠦ᠌ ᠶᠣᠰᠣ ᠪᠣᠯᠠᠢ᠂ ᠰᠡᠭᠦᠷᠡᠰᠦᠨ ᠠᠯᠳᠠᠯ ᠦᠭᠡᠢ ᠪᠣᠯᠤᠮᠤᠢ ᠤᠤ ? ᠨᠢᠭᠡᠨ ᠭᠠᠢᠬᠠᠯᠲᠠᠢ ᠠᠨᠤ ᠬᠡᠷᠡᠢᠳ ᠦ᠋ᠨ ᠰᠣᠯᠤᠩᠭᠤᠸᠠ ᠥᠬᠢᠨ ᠶᠠᠭᠤᠲᠠᠢ ᠰᠡᠴᠡᠨ ᠭᠡᠭᠡᠬᠡᠨ ᠠᠵᠢ ! ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠠᠭ ᠲᠤᠷ ᠮᠠᠨᠳᠤᠭᠰᠠᠨ ᠢ᠋ ᠨᠢᠭᠡᠨᠲᠡ ᠮᠡᠳᠡᠵᠦ ᠭᠠᠷᠤᠭᠠᠳ ᠡᠯᠴᠢ ᠶ᠋ᠢ ᠢᠨᠤ ᠠᠪᠤᠷᠠᠬᠤᠶᠠ᠂ ᠠᠬᠠ ᠶᠤᠭᠠᠨ ᠣᠮᠣᠷᠬᠠᠭ ᠰᠠᠨᠠᠭᠠᠨ ᠢ᠋ ᠳᠠᠭᠠᠭᠤᠯᠤᠨ ᠬᠡᠳᠦᠬᠡᠨ ᠦᠭᠡ ᠪᠡᠷ ᠠᠯᠤᠬᠠ ᠶ᠋ᠢᠨ ᠠᠮᠢᠨ ᠪᠡᠶᠡ ᠶ᠋ᠢ ᠠᠪᠤᠷᠠᠨ ᠭᠠᠷᠭᠠᠭᠰᠠᠨ ᠠᠨᠤ᠂ ᠤᠰᠤᠨ ᠴᠢᠨᠠᠷᠲᠤ ᠨᠢᠭᠡᠨ ᠬᠡᠦᠬᠡᠨ ᠬᠥᠮᠦᠨ ᠪᠥᠭᠡᠳ ᠶᠡᠬᠡ ᠡᠷᠡ ᠶ᠋ᠢᠨ ᠴᠢᠬᠡᠴᠢ ᠦᠨᠡᠨᠴᠢ ᠵᠢᠷᠤᠮᠲᠤ ᠰᠠᠨᠠᠭᠠᠨ ᠢ᠋ ᠪᠠᠷᠢᠵᠤ᠂ ᠡᠴᠢᠭᠡ ᠪᠠ ᠠᠬᠠ ᠶᠤᠭᠠᠨ ᠰᠠᠨᠠᠭᠠᠨ ᠢ᠋ ᠬᠡᠯᠪᠡᠷᠢᠨ ᠦᠯᠦ ᠳᠠᠭᠠᠬᠤ ᠠᠨᠤ ᠭᠠᠢᠬᠠᠯᠲᠠᠢ ᠪᠤᠰᠤ ᠤᠤ ? ᠬᠣᠶᠠᠳᠤᠭᠠᠷ ᠪᠢᠰᠢᠷᠡᠯᠲᠡᠢ ᠠᠨᠤ ᠲᠠᠢᠽᠦ ᠳᠡᠭᠦᠦ ᠶᠦ᠍ᠭᠡᠨ ᠬᠠᠰᠠᠷ ᠤ᠋ᠨ ᠬᠠᠭᠠᠭᠳᠠᠭᠰᠠᠨ ᠢ᠋ ᠰᠣᠨᠣᠰᠤᠮᠠᠭᠴᠠ ᠶᠠᠳᠠᠵᠤ ᠴᠢᠯᠡᠭᠰᠡᠨ ᠪᠡᠶᠡ ᠪᠡᠨ ᠤᠮᠠᠷᠲᠠᠵᠤ᠂ ᠮᠣᠷᠢᠨ ᠤ᠋ ᠳᠥᠷᠥᠭᠡ ᠡᠴᠡ ᠬᠥᠯ ᠰᠤᠭᠤᠯᠤᠯ ᠦᠭᠡᠢ ᠪᠡᠷ ᠡᠳᠦᠷ ᠰᠥᠨᠢ ᠦᠭᠡᠢ ᠳᠣᠪᠲᠣᠯᠤᠨ᠂ ᠬᠦᠨᠡᠰᠦ ᠪᠡᠨ ᠤᠮᠠᠷᠲᠠᠨ ᠪᠠᠵᠤᠨᠠᠢ ᠮᠥᠷᠡᠨᠡ ᠤᠷᠤᠭᠰᠢᠯᠠᠨ ᠬᠦᠷᠦᠭᠰᠡᠨ ᠢᠨᠤ ᠭᠠᠷ ᠬᠥᠯ ᠦ᠋ᠨ ᠠᠬᠠ ᠳᠡᠭᠦᠦ ᠶ᠋ᠢᠨ ᠨᠠᠢᠷ ᠵᠢᠷᠤᠮ ᠢ᠋ ᠦᠨᠡᠮᠴᠢᠯᠡᠨ ᠰᠠᠬᠢᠵᠤ᠂ ᠶᠠᠰᠤ ᠴᠢᠮᠥᠭᠡ ᠮᠡᠲᠦ ᠥᠴᠦᠬᠡᠨ ᠴᠦ᠍ ᠬᠠᠭᠤᠷᠮᠠᠭ ᠦᠭᠡᠢ ᠨᠢᠭᠡᠨ ᠭᠱᠠᠨᠠ ᠭᠠᠯ ᠤᠯᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠳᠡᠭᠦᠦ ᠪᠡᠨ ᠲᠡᠩᠬᠡᠷᠡᠭᠦᠯᠦᠷᠡ ᠡᠴᠢᠭᠰᠡᠨ ᠢᠨᠤ ᠪᠣᠭᠳᠠ ᠬᠥᠮᠦᠨ ᠦ᠌ ᠡᠯᠢᠭᠡᠰᠡᠭ᠂ ᠢᠨᠠᠭ ᠬᠥᠮᠦᠨ ᠦ᠌ ᠬᠡᠯᠬᠢᠶᠡ ᠶ᠋ᠢ ᠪᠠᠳᠠᠷᠠᠭᠤᠯᠤᠭᠰᠠᠨ ᠳ᠋ᠤᠷ ᠬᠡᠨ ᠦᠯᠦ ᠪᠢᠰᠢᠷᠡᠮᠦᠢ ? ᠥᠴᠦᠬᠡᠨ ᠴᠦ᠍ ᠬᠠᠭᠤᠷᠮᠠᠭ ᠦᠭᠡᠢ ᠳ᠋ᠦ᠍ᠷ ᠪᠣᠯᠠᠢ᠂ ᠵᠢᠴᠢ ᠨᠢᠭᠡᠨ ᠠᠶᠤᠯᠲᠠᠢ ᠠᠨᠤ ᠠᠯᠤᠬᠠ ᠡᠯᠴᠢ ᠪᠣᠯᠤᠨ ᠬᠡᠷᠡᠢᠳ ᠦ᠋ᠨ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ ᠬᠡᠳᠦᠢᠪᠡᠷ ᠦᠭᠡ ᠡᠬᠢᠯᠡᠬᠦ ᠦᠶᠡ ᠳ᠋ᠦ᠍ᠷ ᠦᠭᠡ ᠬᠡᠯᠡᠬᠦ ᠵᠠᠢ ᠶ᠋ᠢ ᠦᠯᠡᠳᠡᠭᠡᠨ᠂ ᠵᠥᠪᠯᠡᠨ ᠲᠡᠩᠰᠡᠵᠦ ᠮᠡᠳᠡᠶᠡ ᠬᠡᠮᠡᠭᠰᠡᠨ ᠪᠣᠯᠪᠠᠴᠤ ᠬᠡᠯᠡᠭᠰᠡᠭᠡᠷ ᠰᠡᠭᠦᠯ ᠳ᠋ᠦ᠍ᠷ ᠬᠦᠷᠴᠦ ᠳᠣᠯᠣᠭᠠᠨ ᠵᠡᠷᠭᠡ ᠶ᠋ᠢᠨ ᠵᠢᠷᠤᠮ ᠦᠭᠡᠢ ᠶ᠋ᠢ ᠲᠣᠭᠠᠴᠢᠬᠤ ᠦᠶᠡ ᠳ᠋ᠦ᠍ᠷ ᠮᠠᠰᠢ ᠲᠦᠭᠰᠢᠯᠲᠡᠢ ᠠᠶᠤᠯᠲᠠᠢ ᠭᠠᠵᠠᠷ ᠪᠣᠯᠠᠢ ! ᠰᠠᠷᠯᠠᠭ ᠤ᠋ᠨ ᠬᠠᠨ ᠢ᠋ ᠠᠯᠠᠭᠰᠠᠨ ᠮᠡᠲᠦ ᠬᠣᠢᠨᠠ ᠠ᠋ᠴᠠ ᠠᠨᠤ ᠳᠠᠭᠠᠵᠤ ᠣᠷᠣᠬᠤ ᠵᠠᠩᠵᠤᠨ ᠴᠡᠷᠢᠭ ᠪᠠᠢᠬᠤ ᠪᠤᠰᠤ ᠪᠥᠭᠡᠲᠡᠯᠡ ᠲᠡᠷᠡ ᠮᠡᠲᠦ ᠬᠠᠲᠠᠭᠤ ᠪᠠᠷ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠠᠨᠤ ᠲᠡᠭᠦᠨ ᠦ᠌ ᠪᠡᠶᠡ ᠠᠶᠤᠯᠲᠠᠢ ᠶ᠋ᠢᠨ ᠳᠡᠭᠡᠷᠡ ᠲᠡᠭᠦᠨ ᠦ᠌ ᠵᠢᠷᠦᠬᠡ ᠰᠥᠰᠥ ᠲᠡᠭᠦᠨ ᠡᠴᠡ ᠨᠡᠩ ᠢᠯᠡᠭᠦᠦ ᠠᠶᠤᠯᠲᠠᠢ ᠬᠠᠳᠠᠨ ᠴᠢᠭᠢᠷᠠᠭ ᠪᠣᠯᠪᠠᠢ᠃ ᠡᠨᠡ ᠬᠣᠶᠠᠷ ᠠᠶᠤᠯᠲᠠᠢ ᠳᠠᠪᠬᠤᠷᠯᠠᠭᠰᠠᠨ ᠳ᠋ᠤᠷ ᠴᠣᠬᠣᠮ ᠠᠶᠤᠯᠲᠠᠢ ᠪᠣᠯᠵᠣᠬᠠᠢ᠃ ᠬᠣᠶᠠᠳᠤᠭᠠᠷ ᠰᠣᠴᠢᠯᠲᠠᠢ ᠠᠨᠤ᠂ ᠡᠨᠡ ᠤᠳᠠᠭᠠ ᠶ᠋ᠢᠨ ᠬᠡᠷᠡᠢᠳ ᠦ᠋ᠨ ᠴᠡᠷᠢᠭ ᠪᠠᠢᠭᠤᠯᠤᠭᠰᠠᠨ ᠠᠨᠤ ᠤᠷᠢᠳᠤ ᠶ᠋ᠢᠨ ᠴᠡᠷᠢᠭ ᠪᠠᠢᠭᠤᠯᠬᠤ ᠠ᠋ᠴᠠ ᠥᠪᠡᠷᠡ ᠪᠣᠯᠵᠤ᠂ ᠡᠮᠦᠨᠡ ᠠᠯᠲᠠᠨ ᠤᠯᠤᠰ᠂ ᠬᠢᠳᠠᠨ ᠤᠯᠤᠰ᠂ ᠬᠠᠭᠤᠴᠢᠨ ᠯᠢᠶᠣᠤ ᠤᠯᠤᠰ᠂ ᠪᠠᠷᠠᠭᠤᠨ ᠰᠢᠶᠠ ᠤᠯᠤᠰ᠂ ᠬᠣᠲᠣᠩ ᠤ᠋ᠨ ᠰᠢ ᠢᠦᠢ ᠤᠯᠤᠰ ᠢ᠋ ᠴᠥᠮ ᠲᠠᠲᠠᠵᠤ ᠬᠥᠳᠡᠯᠭᠡᠨ ᠴᠥᠮ ᠪᠠᠭᠠ ᠰᠠᠭᠠ ᠴᠡᠷᠢᠭ ᠢᠷᠡᠪᠡ᠂ ᠪᠠᠰᠠ ᠵᠠᠮᠤᠬᠠ ᠶ᠋ᠢᠨ ᠬᠡᠷᠡᠭᠯᠡᠭᠰᠡᠨ ᠠᠷᠬᠠ ᠪᠠᠷ ᠪᠧᠲ᠋ᠠ᠋ ᠤᠯᠤᠰ ᠮᠥᠷᠳᠡᠵᠦ ᠶᠠᠪᠤᠬᠤ ᠪᠠ ᠪᠠᠰᠠ ᠦᠵᠡᠲᠡᠯᠡ ᠬᠠᠰᠠᠷ ᠤ᠋ᠨ ᠵᠦᠭ ᠬᠡᠷᠡᠭᠯᠡᠭᠰᠡᠨ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠵᠢᠭᠠᠭᠰᠠᠨ ᠶᠣᠰᠣᠭᠠᠷ ᠬᠡᠷᠡᠭ ᠪᠦᠲᠦᠵᠦ᠂ ᠬᠠᠰᠠᠷ ᠤ᠋ᠨ ᠨᠢᠭᠡᠨ ᠠᠢᠮᠠᠭ ᠤ᠋ᠳ ᠴᠥᠮ ᠠᠪᠲᠠᠭᠰᠠᠨ ᠠᠨᠤ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠰᠣᠴᠢᠯᠲᠠᠢ ᠶ᠋ᠢ ᠴᠦ᠍ ᠪᠠᠢᠲᠤᠭᠠᠢ᠂ ᠡᠨᠡ ᠦᠶᠡ ᠶ᠋ᠢᠨ ᠴᠥᠯᠪᠡᠨ ᠪᠢᠴᠢᠭᠴᠢ ᠰᠤᠳᠤᠷᠴᠢ ᠲᠦᠰᠢᠮᠡᠯ ᠲᠠᠢᠵᠢ ᠢᠨᠵᠠᠨᠨᠠᠰᠢ ᠪᠢ ᠴᠦ᠍ ᠮᠥᠨ ᠰᠣᠴᠢᠨ ᠲᠦᠭᠰᠢᠮᠦᠢ᠃ ᠦᠵᠡᠬᠦ ᠮᠡᠷᠭᠡᠳ ᠦ᠋ᠨ ᠰᠣᠴᠢᠬᠤ ᠶ᠋ᠢ ᠬᠡᠷᠬᠢᠨ ᠦᠭᠡᠢ ᠪᠣᠯᠭᠠᠨ ᠴᠢᠳᠠᠮᠤᠢ ? ᠡᠨᠡ ᠪᠦᠯᠦᠭ ᠦ᠋ᠨ ᠭᠠᠰᠢᠭᠤᠨ ᠠᠨᠤ ᠬᠠᠰᠠᠷ᠂ ᠬᠠᠯᠠᠭᠤᠨ ᠠᠨᠤ ᠲᠠᠢᠽᠦ᠂ ᠢᠰᠬᠦᠯᠡᠩ ᠢᠨᠤ ᠬᠡᠷᠡᠢᠳ᠂ ᠠᠮᠲᠠᠢᠬᠠᠨ ᠠᠨᠤ ᠬᠣᠩᠭᠢᠷᠠᠳ᠂ ᠡᠨᠡ ᠳᠥᠷᠪᠡᠨ ᠵᠦᠢᠯ ᠬᠠᠮᠲᠤ ᠪᠠᠷ ᠨᠢᠭᠡᠨ ᠪᠦᠯᠦᠭ ᠲᠣᠷ ᠴᠤᠭᠯᠠᠷᠠᠭᠰᠠᠨᠠ᠂ ᠴᠣᠬᠣᠯᠠᠭᠴᠢ ᠨᠠᠮᠠᠶ᠋ᠢ ᠪᠢᠷ ᠳᠠᠷᠤᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠲᠠᠯᠠ ᠴᠢᠬᠤᠯᠳᠠᠭᠤᠯᠪᠠ᠂ ᠬᠣᠢᠴᠢ ᠡᠳᠦᠷ ᠦ᠋ᠨ ᠮᠡᠷᠭᠡᠳ ᠰᠠᠢᠳ ᠪᠠᠬᠠᠨ ᠦᠷᠦ ᠡᠪᠡᠳᠪᠡᠰᠦ ᠵᠣᠬᠢᠮᠤᠢ !