ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠬᠣᠷᠢᠨ ᠭᠤᠷᠪᠠᠳᠤᠭᠠᠷ ᠪᠦᠯᠦᠭ > Хөх судар - Инжинаш <Хорин гуравдугаар бүлэг >
302ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠦᠰᠢᠮᠡᠯ ᠡᠷᠢᠭᠡ ᠰᠣᠶᠣᠭᠠ ᠪᠠᠷ ᠡᠷᠬᠢᠮ ᠰᠣᠶᠣᠯ ᠢ᠋ ᠵᠠᠷᠯᠠᠮᠤᠢ
ᠬᠡᠷᠡᠢᠳ ᠠᠢᠮᠠᠭ ᠤ᠋ᠨ ᠡᠴᠢᠭᠡ ᠬᠥᠪᠡᠭᠦᠨ ᠡᠷᠡᠮᠡᠬᠡᠢ ᠰᠦᠷᠭᠡᠦ ᠪᠡᠷ ᠡᠷᠬᠡ ᠰᠦᠷ ᠢ᠋ ᠪᠠᠳᠠᠷᠠᠭᠤᠯᠤᠮᠤᠢ
ᠬᠣᠷᠢᠨ ᠭᠤᠷᠪᠠᠳᠤᠭᠠᠷ ᠪᠦᠯᠦᠭ
ᠰᠥᠩ ᠨᠢᠩᠽᠦ᠋ᠩ ᠦ᠋ᠨ ᠴᠢᠩ ᠶᠤᠸᠠᠨ ᠤ᠋ ᠬᠣᠶᠠᠳᠤᠭᠠᠷ ᠣᠨ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠤ᠋
ᠴᠧᠩ ᠠᠨ ᠤ᠋ ᠲᠡᠷᠢᠭᠦᠨ ᠣᠨ᠂ᠲᠠᠢᠽᠦ ᠭᠤᠴᠢᠨ ᠲᠠᠪᠤᠨ ᠰᠡᠭᠦᠳᠡᠷ ᠲᠡᠢ᠂ᠤᠯᠠᠭᠠᠨ ᠯᠤᠤ ᠵᠢᠯ ᠪᠠᠢᠭᠰᠠᠭᠠᠷ ᠪᠣᠢ
ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠦᠰᠢᠮᠡᠯ ᠡᠷᠢᠭᠡ ᠰᠣᠶᠣᠭᠠ ᠪᠠᠷ ᠡᠷᠬᠢᠮ ᠰᠣᠶᠣᠯ ᠢ᠋ ᠵᠠᠷᠯᠠᠮᠤᠢ
ᠬᠡᠷᠡᠢᠳ ᠠᠢᠮᠠᠭ ᠤ᠋ᠨ ᠡᠴᠢᠭᠡ ᠬᠥᠪᠡᠭᠦᠨ ᠡᠷᠡᠮᠡᠬᠡᠢ ᠰᠥᠷᠭᠡᠦ ᠪᠡᠷ ᠡᠷᠬᠡ ᠰᠦᠷ ᠢ᠋ ᠪᠠᠳᠠᠷᠠᠭᠤᠯᠤᠮᠤᠢ
ᠠᠯᠲᠠᠨ ᠰᠠᠯᠠᠭᠠᠨ ᠥᠭᠴᠦ ᠬᠥᠮᠦᠵᠢᠭᠰᠡᠨᠡ ᠠᠯᠢᠪᠠ ᠲᠤᠰᠢᠮᠡᠳ ᠦ᠋ᠨ ᠪᠠᠶᠠᠰᠤᠯ
ᠠᠷᠪᠠᠨ ᠨᠠᠢ᠍ᠮᠠᠨ ᠤ᠋ ᠣᠭ᠌ᠶᠤ ᠡᠷᠢᠭᠡ ᠠᠬᠤ ᠰᠠᠢᠳ ᠨᠠᠷ ᠤ᠋ᠨ ᠢᠳᠬᠠᠯ᠂
ᠠᠰᠠᠷᠠᠯ ᠰᠣᠶᠣᠯᠲᠤ ᠪᠤᠭᠤ ᠶ᠋ᠢᠨ ᠰᠣᠶᠣᠭᠠ ᠠᠰᠢᠳᠠ ᠡᠭᠦᠷᠢᠳᠡ ᠶ᠋ᠢᠨ ᠰᠤᠷᠭᠠᠯ
ᠠᠪᠠᠬᠠᠢ ᠰᠣᠯᠣᠩᠭᠠ ᠶ᠋ᠢᠨ ᠥᠭᠦᠯᠡᠬᠦ ᠥᠴᠢᠬᠦ ᠠᠳᠠᠪᠠᠰᠢ ᠦᠨᠡᠨ ᠶᠣᠰᠣᠯᠠᠯ
ᠲᠡᠨᠳᠡᠴᠡ ᠣᠯᠠᠨ ᠲᠦᠰᠢᠮᠡᠳ ᠦ᠋ᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠶ᠋ᠢ ᠢᠯᠭᠠᠬᠤᠶᠠ᠂ ᠬᠣᠶᠠᠷ ᠳᠡᠭᠦᠦ᠂ ᠳᠥᠷᠪᠡᠨ ᠬᠦᠯᠦᠭ᠂ ᠲᠠᠪᠤᠨ ᠪᠠᠭᠠᠲᠤᠳ ᠢ᠋ ᠵᠡᠯᠮᠡ ᠶ᠋ᠢᠨ ᠨᠢᠭᠡᠨ ᠤᠷᠤᠭ ᠲᠠᠢ ᠬᠠᠮᠲᠤ ᠳᠡᠭᠡᠳᠦ ᠰᠠᠭᠤᠳᠠᠯ ᠳ᠋ᠤᠷ ᠰᠠᠭᠤᠯᠭᠠᠬᠤᠶᠠ᠂ ᠣᠯᠠᠨ ᠭᠠᠪᠢᠶᠠᠲᠠᠨ ᠪᠦᠭᠦᠳᠡᠭᠡᠷ ᠣᠨᠴᠠ ᠲᠠᠢᠽᠦ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠵᠣᠴᠢ ᠶ᠋ᠢ ᠲᠡᠷᠢᠭᠦᠨ ᠰᠠᠭᠤᠳᠠᠯ ᠳ᠋ᠤᠷ ᠰᠠᠭᠤᠯᠭᠠᠵᠤ᠂ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠢ᠋ ᠱᠠᠭᠠᠷᠳᠠᠰᠤᠭᠠᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠠᠷᠭᠠ ᠦᠭᠡᠢ ᠭᠤᠶᠤᠳᠠᠯ ᠢ᠋ ᠠᠪᠴᠤ ᠵᠠᠬᠢᠷᠤᠨ :
ᠠᠬᠠᠮᠠᠳ ᠬᠥᠪᠡᠭᠦᠨ ᠵᠣᠴᠢ ᠶ᠋ᠢᠨ ᠠᠤᠭᠠ ᠬᠦᠴᠦᠨ ᠰᠠᠢᠰᠢᠶᠠᠯᠲᠠᠢ ᠠᠨᠤ
ᠠᠨᠳᠠ ᠪᠠᠭ᠍ᠰᠢ ᠨᠠᠷ ᠤ᠋ᠨ ᠠᠰᠤᠷᠤ ᠬᠢᠴᠢᠶᠡᠭᠰᠡᠨ ᠦ᠌ ᠰᠠᠢᠨ ᠳ᠋ᠤᠷ ᠪᠣᠯᠠᠢ᠂
ᠠᠷᠪᠠᠨ ᠬᠡᠲᠦᠲᠡᠢᠬᠡᠨ ᠵᠣᠴᠢ ᠶ᠋ᠢᠨ ᠠᠶᠠᠨ ᠳᠠᠢᠰᠤᠨᠠ ᠪᠡᠯᠭᠡᠲᠡᠢ ᠢᠨᠦ
ᠠᠪᠠᠭᠠ ᠪᠠᠭᠠᠲᠤᠳ ᠤ᠋ᠨ ᠠᠩᠬᠠᠷᠤᠨ ᠰᠤᠷᠭᠠᠭᠰᠠᠨ ᠤ᠋ ᠰᠠᠢᠨ ᠳ᠋ᠤᠷ ᠪᠣᠯᠠᠢ᠃
ᠠᠳᠠᠪᠠᠰᠢ ᠪᠢᠲᠡᠭᠡᠢ ᠡᠷᠭᠦᠵᠦ ᠮᠠᠭᠳᠠᠯᠬᠢᠯᠠ
ᠠᠩᠬᠠ ᠳᠠᠢᠰᠤᠨᠠ ᠮᠢᠨᠦ ᠵᠠᠬᠢᠶᠠ ᠶ᠋ᠢ ᠠᠯᠳᠠᠵᠤ᠂
ᠠᠰᠤᠷᠠᠯ ᠦᠭᠡᠢ ᠪᠡᠷ ᠳᠤᠬ᠍ᠮᠣᠭ ᠤ᠋ᠨ ᠬᠠᠭᠠᠨ ᠢ᠋ ᠠᠨᠤ ᠠᠯᠠᠪᠠ᠃
ᠬᠣᠢᠴᠢ ᠡᠳᠦᠷ ᠲᠠ ᠴᠥᠮ ᠭᠠᠵᠠᠷ ᠣᠷᠣᠨ ᠤ᠋ ᠡᠵᠡᠨ ᠪᠣᠯᠤᠭᠴᠢᠳ ᠪᠥᠭᠡᠲᠡᠯᠡ
ᠬᠣᠷᠣᠮᠬᠠᠨ ᠵᠠᠭᠤᠷᠠ ᠤᠯᠤᠰ ᠡᠵᠡᠯᠡᠭᠴᠢᠳ ᠢ᠋ ᠠᠯᠠᠵᠤ ᠰᠥᠨᠥᠭᠡᠬᠦᠢ ᠳ᠋ᠦ᠍ᠷ ᠪᠢᠲᠡᠭᠡᠢ ᠬᠦᠷᠭᠦᠯ !
ᠬᠡᠮᠡᠵᠦ ᠮᠡᠬᠡᠲᠦ ᠬᠠᠭᠠᠨ ᠤ᠋ ᠲᠣᠯᠣᠭᠠᠢ ᠪᠡᠶᠡ ᠶ᠋ᠢ ᠬᠠᠮᠲᠤᠳᠬᠠᠨ ᠣᠶᠣᠭᠤᠯᠵᠤ᠂ ᠴᠠᠭᠠᠲᠠᠢ ᠶ᠋ᠢ ᠢᠯᠡᠬᠡᠨ ᠠᠷᠢᠬᠢ ᠰᠠᠴᠤᠭᠤᠯᠵᠤ᠂ ᠳᠣᠬ᠍ᠮᠣᠭ ᠠ᠋ᠴᠠ ᠳᠠᠭᠠᠭᠰᠠᠨ ᠪᠣᠷᠣ ᠠᠷᠰᠯᠠᠨ ᠳ᠋ᠤᠷ ᠲᠤᠰᠢᠶᠠᠨ ᠥᠭᠴᠦ ᠭᠡᠷ ᠦ᠋ᠨ ᠠᠮᠠᠨ ᠢ᠋ ᠠᠨᠤ ᠠᠪᠴᠤ ᠶᠠᠰᠤᠨ ᠢ᠋ ᠰᠢᠳᠬᠡᠯᠭᠡᠪᠡ᠃ ᠡᠨᠡ ᠢᠨᠦ ᠬᠥᠪᠡᠭᠦᠨ ᠦ᠌ ᠠᠯᠠᠭᠰᠠᠨ ᠡᠨᠳᠡᠭᠦᠦ ᠶ᠋ᠢ ᠡᠴᠢᠭᠡ ᠦᠯᠦ ᠬᠦᠯᠢᠶᠡᠮᠦᠢ ᠭᠡᠮᠡᠨ ᠳᠡᠭᠦᠦ ᠴᠠᠭᠠᠲᠠᠢ ᠪᠠᠷ ᠠᠷᠢᠬᠢ ᠰᠠᠴᠤᠭᠤᠯᠵᠤᠬᠤᠢ᠃
ᠲᠡᠭᠦᠨᠴᠡ ᠮᠤᠬᠤᠯᠢ ᠳᠤᠬ᠍ᠮᠣᠭ ᠤᠯᠤᠰ ᠤ᠋ᠨ ᠬᠣᠲᠠ ᠪᠠ ᠮᠣᠵᠢ ᠶ᠋ᠢ ᠬᠣᠷᠢᠶᠠᠨ ᠪᠠᠢᠴᠠᠭᠠᠪᠠᠰᠤ᠂ ᠳᠣᠯᠣᠭᠠᠨ ᠬᠣᠲᠠ᠂ ᠶᠢᠰᠦᠨ ᠮᠣᠵᠢ᠂ ᠬᠣᠢᠲᠤ ᠵᠠᠬᠠ ᠣᠷᠣᠰ ᠤᠯᠤᠰ ᠲᠤᠷ ᠵᠠᠬᠠ ᠨᠡᠢᠯᠡᠭᠰᠡᠨ ᠢ᠋ᠶ᠋ᠡᠷ ᠬᠣᠲᠠ ᠪᠠᠯᠭᠠᠳ ᠮᠠᠰᠢ ᠤᠷᠠᠨ ᠨᠠᠷᠢᠨ ᠪᠠᠲᠤ ᠪᠡᠬᠢ᠂ ᠠᠯᠲᠠᠨ ᠮᠥᠩᠭᠥᠨ ᠶᠡᠬᠡᠯᠡ ᠡᠯᠪᠡᠭ ᠪᠠᠶᠠᠨ ᠴᠠᠳᠬᠤᠯᠠᠩ ᠲᠤᠯᠠ ᠮᠤᠬᠤᠯᠢ ᠰᠥᠨᠢ ᠲᠠᠢᠽᠦ ᠶ᠋ᠢᠨ ᠳᠡᠷᠭᠡᠳᠡ ᠣᠷᠣᠵᠤ ᠮᠡᠳᠡᠭᠦᠯᠦᠷᠦᠨ : 《ᠡᠨᠡ ᠭᠠᠵᠠᠷ ᠮᠠᠰᠢ ᠡᠷᠬᠢᠮ ᠴᠢᠬᠤᠯᠠ ᠭᠠᠵᠠᠷ ᠪᠠᠢᠨᠠᠮ᠂ ᠡᠵᠡᠨ ᠠᠢᠯᠠᠳᠪᠠᠤ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠷᠡ ᠲᠤᠬᠠᠢ ᠲᠠᠢᠽᠦ ᠶ᠋ᠢᠨ ᠦᠳᠡᠰᠢ ᠶ᠋ᠢᠨ ᠵᠣᠭᠣᠭ ᠵᠣᠭᠣᠭᠯᠠᠬᠤ ᠴᠠᠭ᠂ ᠭᠠᠷ ᠲᠤᠷ ᠢ᠋ᠶ᠋ᠠᠨ ᠣᠷᠣᠰ ᠤᠯᠤᠰ ᠤ᠋ᠨ ᠬᠢᠲᠤᠭᠠ ᠪᠠᠷᠢᠵᠤ ᠂ ᠮᠢᠬᠠ ᠬᠥᠰᠬᠥᠯᠡᠵᠦ ᠵᠣᠭᠣᠭᠯᠠᠨ ᠪᠠᠢᠭᠰᠠᠨ ᠲᠤᠯᠠ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠪᠡᠶᠡᠰᠦᠨ ᠮᠦᠰᠢᠶᠡᠭᠡᠳ ᠳᠠᠷᠤᠢ ᠲᠡᠷᠡ ᠬᠢᠲᠤᠭᠠ ᠪᠠᠷ ᠬᠠᠭᠠᠰ ᠤᠭᠤᠴᠠ ᠶ᠋ᠢ ᠳᠠᠷᠤᠵᠤ ᠰᠠᠯᠭᠠᠭᠠᠳ ᠣᠷᠣᠰ ᠭᠢᠲᠤᠬᠠ ᠲᠠᠢ ᠬᠠᠮᠲᠤ ᠪᠠᠷ ᠮᠤᠬᠤᠯᠢ ᠳ᠋ᠤᠷ ᠱᠠᠩᠨᠠᠨ ᠥᠭᠭᠦᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠥᠴᠢᠷᠦᠨ :《ᠡᠵᠡᠨ ᠬᠡᠳᠦᠢᠨᠡᠢ ᠮᠡᠳᠡᠵᠦ ᠠᠢᠯᠠᠳᠤᠭᠰᠠᠨ ᠠᠵᠢ !》ᠭᠡᠮᠡᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠪᠠᠷᠠᠲᠠᠯᠠ ᠬᠦᠷᠲᠡᠭᠡᠳ ᠭᠠᠷᠴᠤ ᠡᠴᠢᠪᠡ᠃ ᠡᠨᠡ ᠢᠨᠦ ᠡᠵᠡᠨ ᠲᠦᠰᠢᠮᠡᠯ ᠬᠣᠶᠠᠭᠤᠯᠠ ᠣᠷᠣᠰ ᠤᠯᠤᠰ ᠤ᠋ᠨ ᠬᠢᠲᠤᠭᠠ ᠪᠠᠷ ᠳᠣᠬᠢᠶᠠ ᠪᠣᠯᠭᠠᠨ ᠂ ᠣᠷᠣᠰ ᠤᠯᠤᠰ ᠢ᠋ ᠠᠪᠰᠤᠭᠠᠢ ᠬᠡᠮᠡᠭᠰᠡᠨ ᠪᠢᠲᠡᠭᠦᠦ ᠵᠥᠪᠯᠡᠯ ᠠᠵᠤᠭᠤ ! ᠰᠢᠳᠠᠷ ᠠᠷᠠᠳ ᠴᠥᠮ ᠡᠰᠡ ᠮᠡᠳᠡᠪᠡ᠃
ᠲᠡᠳᠦᠢ ᠳᠣᠬ᠍ᠮᠣᠭ ᠤ᠋ᠨ ᠮᠡᠬᠡᠲᠦ ᠬᠠᠭᠠᠨ ᠤ᠋ ᠡᠮᠡ ᠦᠷᠡ ᠶ᠋ᠢ ᠪᠠᠢᠴᠠᠭᠠᠪᠠᠰᠤ ᠮᠡᠬᠡᠲᠦ ᠬᠠᠭᠠᠨ ᠤ᠋ ᠶᠡᠬᠡ ᠡᠮᠡ ᠮᠦᠩᠭᠦᠨᠬᠡᠦ ᠬᠡᠳᠦᠢᠨᠡᠢ ᠠᠳᠬᠠᠭ ᠬᠠᠷᠠᠮ ᠵᠠᠩ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠮᠡᠬᠡᠲᠦ ᠬᠠᠭᠠᠨ ᠳ᠋ᠤᠷ ᠠᠯᠠᠭᠳᠠᠭᠰᠠᠨ ᠠᠵᠤᠭᠤ ᠃ ᠲᠡᠭᠦᠨᠴᠡ ᠲᠥᠷᠥᠭᠰᠡᠨ ᠵᠢᠭᠡᠷ ᠵᠢᠷᠬᠡ ᠬᠡᠮᠡᠬᠦ ᠬᠣᠶᠠᠷ ᠥᠬᠢᠨ ᠲᠥᠷᠥᠭᠰᠡᠨ ᠢᠨᠦ ᠲᠣᠰᠣᠲᠤ ᠭᠠᠷ ᠢ᠋ᠶ᠋ᠠᠷ ᠪᠠᠷᠢᠰᠢ ᠦᠭᠡᠢ ᠰᠠᠢᠬᠠᠨ᠂ ᠨᠠᠰᠤᠨ ᠴᠥᠮ ᠠᠷᠪᠠᠨ ᠲᠠᠪᠤ ᠵᠢᠷᠭᠤᠭᠠ ᠬᠦᠷᠦᠭᠰᠡᠨ ᠲᠤᠯᠠ ᠲᠠᠢᠽᠦ ᠪᠠᠰᠠ ᠳᠡᠭᠦᠦ ᠪᠡᠯᠭᠦᠳᠡᠢ ᠳ᠋ᠦ᠍ᠷ ᠠᠪᠴᠤ ᠥᠭᠰᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠪᠡᠯᠭᠦᠳᠡᠢ ᠮᠡᠳᠡᠭᠦᠯᠦᠷᠦᠨ :《ᠨᠢᠳᠤᠨᠤᠨ ᠪᠤᠭᠤᠷᠵᠢ ᠲᠠᠢᠯᠪᠠ᠂ ᠡᠨᠡ ᠵᠢᠯ ᠮᠤᠬᠤᠯᠢ ᠣᠯᠪᠠ᠂ ᠡᠵᠡᠨ ᠠᠬᠠ ᠲᠡᠳᠡ ᠬᠣᠶᠠᠭᠤᠯᠠ ᠳ᠋ᠤᠷ ᠱᠠᠩᠨᠠᠵᠤ ᠪᠠᠢ ᠂ ᠤᠯᠤᠰ ᠲᠥᠷᠥ ᠳ᠋ᠦ᠍ᠷ ᠲᠤᠰᠠᠲᠠᠢ᠂ ᠮᠢᠨᠦ ᠠᠴᠢ ᠲᠡᠭᠦᠨ ᠦ᠌ ᠡᠴᠢᠭᠡ ᠶ᠋ᠢ ᠠᠯᠠᠭᠰᠠᠨ ᠲᠤᠯᠠ ᠪᠢ ᠬᠡᠷᠬᠢᠨ ᠥᠬᠢᠨ ᠢ᠋ ᠢᠨᠦ ᠠᠪᠴᠤ ᠪᠣᠯᠬᠤ ᠪᠣᠢ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠰᠣᠴᠢᠨ ᠰᠠᠢᠰᠢᠶᠠᠵᠤ᠂ ᠵᠢᠬᠡᠷ ᠬᠡᠦᠬᠡᠨ ᠢ᠋ ᠪᠤᠭᠤᠷᠵᠢ ᠶ᠋ᠢᠨ ᠬᠥᠪᠡᠭᠦᠨ ᠡᠭᠦᠯᠡᠨ ᠴᠡᠷᠪᠢ ᠳ᠋ᠦ᠍ᠷ ᠵᠢᠭᠠᠵᠤ᠂ ᠵᠢᠷᠬᠡ ᠬᠡᠦᠬᠡᠨ ᠢ᠋ ᠮᠤᠬᠤᠯᠢ ᠶ᠋ᠢᠨ ᠬᠥᠪᠡᠭᠦᠨ ᠪᠤᠯᠤ ᠳ᠋ᠤᠷ ᠵᠢᠭᠠᠵᠤ᠂ ᠪᠣᠷᠣ ᠠᠷᠰᠯᠠᠨ ᠢ᠋ᠶ᠋ᠠᠷ ᠤᠷᠤᠭ ᠬᠡᠯᠡᠯᠴᠡᠭᠦᠯᠦᠨ ᠂ ᠪᠡᠯᠡᠭ ᠰᠢᠭᠦᠰᠦ ᠣᠷᠭᠢᠭᠤᠯᠵᠤ ᠪᠠᠭᠤᠯᠭᠠᠨ ᠠᠪᠤᠭᠤᠯᠪᠠ ᠃
ᠲᠡᠭᠦᠨᠴᠡ ᠳᠣᠬ᠍ᠮᠣᠭ ᠤᠯᠤᠰ ᠤ᠋ᠨ ᠶᠢᠰᠦᠨ ᠪᠠᠭᠠ ᠮᠣᠵᠢ᠂ ᠲᠠᠪᠤᠨ ᠶᠡᠬᠡ ᠬᠣᠲᠠ ᠶ᠋ᠢᠨ ᠰᠠᠩ ᠬᠥᠮᠥᠷᠭᠡ ᠶ᠋ᠢ ᠪᠠᠢᠴᠠᠭᠠᠵᠤ᠂ ᠡᠳ᠋ ᠠᠮᠤ ᠶ᠋ᠢ ᠶᠡᠬᠡᠯᠡ ᠭᠠᠷᠭᠠᠨ ᠤᠷᠢᠳᠠ ᠥᠪᠡᠷ ᠦ᠋ᠨ ᠭᠠᠪᠢᠶᠠᠳᠠᠨᠠ ᠱᠠᠩᠨᠠᠵᠤ᠂ ᠳᠠᠭᠠᠯᠳᠤᠭᠠ ᠰᠠᠶᠢ ᠰᠠᠷᠯᠠᠭ ᠤ᠋ᠨ ᠴᠡᠷᠢᠭ᠂ ᠲᠣᠬ᠍ᠮᠣᠭ ᠤ᠋ᠨ ᠢᠷᠭᠡᠨᠡ ᠲᠦᠭᠡᠭᠡᠨ ᠬᠥᠬᠢᠭᠦᠯᠬᠦ ᠶ᠋ᠢ ᠦᠵᠡᠭᠦᠯᠪᠡ ᠃
ᠡᠢᠨ ᠬᠦ᠌ ᠡᠪᠦᠯ ᠦ᠋ᠨ ᠲᠡᠷᠢᠭᠦᠨ ᠰᠠᠷᠠ ᠪᠣᠯᠤᠭᠰᠠᠨᠠ ᠣᠷᠣᠰ ᠤᠯᠤᠰ ᠠ᠋ᠴᠠ ᠳᠣᠬ᠍ᠮᠣᠭ ᠰᠠᠷᠯᠠᠭ ᠬᠣᠶᠠᠷ ᠤᠯᠤᠰ ᠤ᠋ᠨ ᠤᠬᠠᠭᠠᠨ ᠲᠣᠮᠣᠭᠣ ᠦᠭᠡᠢ ᠲᠡᠨᠡᠭ ᠰᠡᠬᠦᠳᠡᠭ ᠲᠦᠭᠦᠬᠡᠢ ᠬᠦᠴᠦᠨ ᠡᠴᠡ ᠮᠠᠰᠢ ᠠᠶᠤᠳᠠᠭ ᠳᠡᠭᠡᠷᠡ᠂ ᠡᠳᠦᠭᠡ ᠲᠡᠭᠦᠨᠴᠡ ᠬᠦᠴᠦᠲᠡᠢ ᠪᠸᠲ᠋ᠠ᠋ ᠤᠯᠤᠰ ᠴᠥᠮ ᠠᠪᠤᠭᠰᠠᠨ ᠳ᠋ᠤᠷ ᠶᠡᠬᠡ ᠠᠶᠤᠵᠤ᠂ ᠣᠷᠣᠰ ᠤ᠋ᠨ ᠡᠵᠡᠨ ᠢᠨᠦ ᠬᠡᠦᠬᠡᠨ ᠴᠣᠯᠠᠲᠤ ᠬᠠᠭᠠᠨ ᠡᠯᠴᠢ ᠢᠯᠡᠭᠡᠵᠦ᠂ ᠡᠯᠳᠡᠪ ᠵᠦᠢᠯ ᠦ᠋ᠨ ᠰᠣᠨᠢᠨ ᠡᠳ᠋ ᠫᠤᠤ ᠵᠡᠪᠰᠡᠭ ᠦ᠋ᠨ ᠬᠦᠨᠳᠦ ᠪᠠᠯᠠᠩ ᠬᠥᠷᠭᠡᠯᠭᠡᠵᠦ ᠡᠶᠡᠲᠡᠢ ᠶᠠᠪᠤᠰᠤᠭᠠᠢ ᠬᠡᠮᠡᠭᠰᠡᠨᠡ ᠲᠠᠢᠽᠦ ᠮᠥᠨ ᠵᠡᠯᠮᠡ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠨᠠᠷ ᠢ᠋ᠶ᠋ᠠᠷ ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠦᠨᠡ ᠲᠡᠢ ᠡᠳ᠋ ᠢ᠋ᠶ᠋ᠡᠷ ᠪᠡᠯᠡᠭ ᠬᠦᠷᠭᠡᠯᠭᠡᠨ ᠥᠭᠪᠡ᠃ ᠡᠨᠡ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠵᠠᠪᠰᠠᠷᠡ ᠳᠣᠬ᠍ᠮᠣᠭ ᠠ᠋ᠴᠠ ᠪᠠᠰᠠ ᠬᠡᠳᠦᠨ ᠮᠢᠩᠭᠠᠨ ᠰᠢᠯᠭᠠᠷᠠᠭᠰᠠᠨ ᠬᠦᠴᠦᠲᠦ ᠴᠡᠷᠢᠭ ᠰᠣᠩᠭᠣᠨ ᠠᠪᠴᠤ ᠤᠷᠢᠳᠤ ᠬᠣᠢᠲᠤᠬᠢ ᠲᠠᠢ ᠨᠢᠭᠡᠨ ᠲᠦᠮᠡᠨ ᠬᠣᠶᠠᠷ ᠮᠢᠩᠭᠠᠨ ᠪᠣᠯᠤᠭᠰᠠᠨ ᠳ᠋ᠤᠷ ᠵᠢᠨᠦᠩ ᠮᠤᠬᠤᠯᠢ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ᠂ ᠲᠠᠢᠽᠦ ᠳ᠋ᠦ᠍ᠷ ᠮᠡᠳᠡᠭᠦᠯᠦᠷᠦᠨ :《ᠶᠠᠮᠠᠷᠪᠠ ᠴᠡᠷᠢᠭ ᠣᠯᠠᠨ ᠳ᠋ᠤᠷ ᠦᠭᠡᠢ ᠬᠤᠷᠴᠠ ᠳ᠋ᠤᠷ ᠪᠣᠢ᠂ ᠠᠯᠢᠪᠠ ᠵᠠᠩᠵᠤᠨ ᠬᠦᠴᠦᠨ ᠳ᠋ᠦ᠍ᠷ ᠦᠭᠡᠢ ᠮᠡᠷᠭᠡᠨ ᠳ᠋ᠦ᠍ᠷ ᠪᠣᠢ ! 》ᠲᠠᠢᠽᠦ ᠮᠥᠨ ᠭᠡᠮᠡᠨ ᠰᠠᠢᠰᠢᠶᠠᠵᠤ ᠡᠭᠦᠯᠡ ᠴᠡᠷᠪᠢ ᠪᠤᠯᠤ ᠬᠣᠶᠠᠷ ᠢ᠋ᠶ᠋ᠠᠷ ᠳᠣᠬ᠍ᠮᠣᠭ ᠢ᠋ ᠳ᠋ᠦ᠍ᠷ ᠰᠠᠬᠢᠭᠤᠯᠵᠤ᠂ ᠮᠡᠬᠡᠲᠦ ᠬᠠᠭᠠᠨ ᠤ᠋ ᠾᠧᠷ ᠵᠦᠷ ᠬᠡᠮᠡᠬᠦ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ ᠡᠭᠦᠯᠡ ᠴᠡᠷᠪᠢ ᠪᠤᠯᠤ ᠬᠣᠶᠠᠭᠤᠯᠠ ᠳ᠋ᠤᠷ ᠲᠤᠰᠢᠶᠠᠨ ᠥᠭᠴᠦ ᠡᠳᠡᠨ ᠦ᠌ ᠰᠡᠳᠬᠢᠯ ᠢ᠋ ᠰᠠᠢᠬᠠᠨ ᠠᠪ᠂ ᠡᠨᠡ ᠭᠠᠵᠠᠷ ᠬᠣᠢᠴᠢ ᠡᠳᠦᠷ ᠬᠡᠷᠡᠭ ᠲᠡᠢ ᠬᠡᠮᠡᠭᠡᠳ ᠶᠡᠬᠡ ᠲᠤᠭ ᠢ᠋ ᠡᠭᠡᠭᠦᠯᠵᠦ ᠳᠠᠬᠢᠭᠠᠳ ᠴᠡᠷᠢᠭ ᠡᠭᠡᠵᠦ ᠡᠪᠦᠯ ᠦ᠋ᠨ ᠰᠡᠭᠦᠯ ᠰᠠᠷᠠ ᠳ᠋ᠤᠷ ᠤᠯᠤᠰ ᠲᠤᠷ ᠬᠦᠷᠴᠦ ᠢᠷᠡᠬᠦᠢ ᠵᠠᠮ ᠳ᠋ᠤᠷ ᠥᠭᠡᠳᠡᠢ᠂ ᠲᠣᠯᠢ᠂ ᠤᠴᠢᠭ᠂ ᠭᠠᠴᠤᠭ ᠬᠣᠶᠠᠷ ᠬᠥᠪᠡᠭᠦᠨ᠂ ᠬᠣᠶᠠᠷ ᠳᠡᠭᠦᠦ ᠳᠥᠷᠪᠡᠭᠦᠯᠡ ᠳᠥᠷᠪᠡᠨ ᠤᠭᠲᠤᠯᠭᠠ ᠳ᠋ᠤᠷ ᠤᠭᠲᠤᠪᠠ᠃
ᠲᠡᠳᠦᠢ ᠲᠠᠢᠽᠦ ᠣᠷᠲᠣᠨᠠ ᠪᠠᠭᠤᠵᠤ᠂ ᠤᠯᠤᠰ ᠢ᠋ ᠰᠠᠬᠢᠭ᠍ᠰᠠᠨ ᠨᠡᠢᠲᠡ ᠳ᠋ᠦ᠍ᠷ ᠬᠦᠨᠳᠦ ᠬᠤᠷᠢᠮ ᠬᠦᠷᠲᠡᠭᠡᠨ ᠱᠠᠩ ᠲᠠᠯᠪᠢᠪᠠ᠃ ᠰᠥᠨᠢ ᠵᠢᠨᠦᠩ ᠮᠤᠬᠤᠯᠢ ᠲᠠᠢᠽᠦ ᠳ᠋ᠦ᠍ᠷ ᠵᠣᠯᠭᠠᠵᠤ ᠬᠡᠳᠦᠨ ᠪᠢᠲᠡᠭᠦᠦ ᠦᠭᠡ ᠬᠡᠯᠡᠯᠴᠡᠵᠦ ᠭᠠᠷᠭᠠᠭᠠᠳ ᠵᠢᠴᠢ ᠥᠷᠯᠥᠭᠡ ᠳᠥᠷᠪᠡᠨ ᠵᠦᠭ ᠡᠴᠡ ᠶᠡᠬᠡ ᠳᠣᠬᠢᠶᠠ ᠳᠠᠭᠤᠷᠢᠰᠴᠤ ᠣᠯᠠᠨ ᠵᠠᠩᠵᠤᠨ ᠪᠠᠭᠠᠲᠤᠳ ᠴᠥᠮ ᠵᠢᠨᠦᠩ ᠦ᠋ᠨ ᠴᠠᠴᠠᠷ ᠤ᠋ᠨ ᠳᠣᠣᠷᠠ ᠬᠤᠷᠠᠵᠤ ᠭᠤᠷᠪᠠᠨ ᠶᠡᠬᠡ ᠫᠤᠤ ᠳᠠᠭᠤᠷᠢᠰᠤᠨ᠂ ᠵᠢᠷᠭᠤᠭᠠᠨ ᠵᠡᠷᠭᠡ ᠬᠡᠩᠭᠡᠷᠭᠡ ᠳᠡᠯᠡᠳᠴᠦ ᠶᠢᠰᠦᠨ ᠦᠶᠡ ᠬᠠᠯᠵᠠᠨ ᠪᠦᠷᠢᠶᠡ ᠦᠯᠢᠶᠡᠨ᠂ ᠶᠡᠬᠡ ᠵᠢᠨᠦᠩ ᠴᠠᠴᠠᠷ ᠲᠤᠷ ᠰᠠᠭᠤᠮᠠᠭᠴᠠ ᠵᠠᠩᠵᠤᠨ ᠨᠠᠷ ᠤ᠋ᠨ ᠨᠡᠷᠡ ᠪᠢᠴᠢᠭᠰᠡᠨ ᠰᠤᠮᠤᠨ ᠤ᠋ ᠬᠠᠪᠤᠳ ᠠ᠋ᠴᠠ ᠨᠢᠭᠡᠨ ᠠᠳᠬᠤ ᠰᠤᠮᠤ ᠶ᠋ᠢ ᠠᠪᠴᠤ ᠴᠠᠴᠠᠷ ᠤ᠋ᠨ ᠳᠣᠣᠷᠠ ᠴᠣᠬᠢᠵᠤ ᠪᠠᠭᠤᠯᠭᠠᠪᠠ᠃ ᠣᠯᠠᠨ ᠵᠠᠩᠵᠤᠨ ᠨᠠᠷ ᠴᠢᠷᠠᠢ ᠠᠯᠳᠠᠵᠤ ᠠᠪᠴᠤ ᠳᠠᠭᠤᠳᠠᠪᠠᠰᠤ᠂ ᠵᠡᠯᠮᠡ᠂ ᠵᠡᠪᠡ᠂ ᠰᠢᠷᠢ ᠬᠤᠲᠤᠭ᠂ ᠬᠠᠷᠠ ᠬᠢᠷᠤ᠂ ᠴᠤᠤ ᠮᠡᠷᠭᠡᠨ᠂ ᠬᠤᠷᠴᠠ ᠪᠠᠢᠷᠢ᠂ ᠥᠨᠳᠥᠷ ᠰᠡᠴᠡᠨ᠂ ᠦᠨᠡᠨ ᠲᠥᠷᠥ᠂ ᠣᠶᠤᠲᠤ ᠰᠡᠴᠡᠨ᠂ ᠣᠶᠤᠨ ᠭᠤᠸᠠ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ᠂ ᠲᠡᠭᠦᠰᠴᠦᠭ᠍ᠲᠦ᠂ ᠦᠯᠬᠦ ᠰᠠᠢᠳ᠂ ᠪᠠᠶᠠᠨ ᠬᠢᠶᠡ ᠡᠨᠡ ᠠᠷᠪᠠᠨ ᠳᠥᠷᠪᠡᠭᠦᠯᠡ ᠲᠤᠯᠠ ᠳᠡᠰ ᠵᠡᠷᠭᠡ ᠪᠡᠷ ᠴᠥᠮ ᠴᠠᠴᠠᠷ ᠲᠤᠷ ᠭᠠᠷᠴᠤ ᠵᠢᠭ᠍ᠰᠠᠭᠠᠨ ᠵᠣᠭᠰᠣᠵᠠᠭᠠᠪᠠ᠃ ᠵᠢᠨᠦᠩ ᠮᠤᠬᠤᠯᠢ ᠥᠭᠦᠯᠡᠷᠦᠨ :《ᠲᠠ ᠪᠦᠭᠦᠳᠡᠭᠡᠷ ᠰᠣᠨᠣᠰ :ᠡᠵᠡᠨ ᠬᠡᠮᠡᠭᠴᠢ ᠨᠢᠭᠡᠨ ᠤᠯᠤᠰ ᠤ᠋ᠨ ᠲᠣᠯᠣᠭᠠᠢ ᠲᠡᠷᠢᠭᠦᠨ᠂ ᠰᠠᠢᠳ ᠬᠡᠮᠡᠭᠴᠢ ᠨᠢᠭᠡᠨ ᠤᠯᠤᠰ ᠤ᠋ᠨ ᠭᠠᠷ ᠬᠥᠯ ᠂ ᠴᠡᠷᠢᠭ ᠬᠡᠮᠡᠭᠴᠢ ᠨᠢᠭᠡᠨ ᠤᠯᠤᠰ ᠤ᠋ᠨ ᠬᠤᠶᠠᠭ ᠵᠡᠪᠰᠡᠭ᠂ ᠠᠷᠠᠳ ᠬᠡᠮᠡᠭᠴᠢ ᠨᠢᠭᠡᠨ ᠤᠯᠤᠰ ᠤ᠋ᠨ ᠢᠳᠡᠭᠡᠨ ᠬᠤᠪᠴᠠᠰᠤᠨ ᠪᠥᠭᠡᠲᠡᠯᠡ ᠲᠠᠨ ᠤ᠋ ᠠᠷᠪᠠᠨ ᠳᠥᠷᠪᠡᠭᠦᠯᠡ ᠪᠠᠢᠭᠠᠳ ᠶᠠᠭᠤᠨ ᠳ᠋ᠤᠷ ᠡᠵᠡᠨ ᠢ᠋ ᠳᠣᠬ᠍ᠮᠣᠭ ᠤᠯᠤᠰ ᠤ᠋ᠨ ᠮᠤᠬᠤᠷ ᠣᠯᠣᠭᠠᠢ ᠠᠭᠤᠯᠠᠨᠠ ᠣᠷᠣᠭᠤᠯᠵᠤ᠂ ᠲᠡᠢᠮᠦ ᠶᠡᠬᠡ ᠠᠶᠤᠯ ᠳ᠋ᠤᠷ ᠲᠦᠪᠡᠭᠳᠡᠭᠦᠯᠪᠡ ? 》 ᠣᠯᠠᠨ ᠢ᠋ᠶ᠋ᠠᠷ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ :《ᠪᠢᠳᠡ ᠬᠣᠷᠢᠭ᠍ᠯᠠᠵᠤ ᠪᠠᠢᠲᠠᠯᠠ ᠬᠦᠴᠦᠷᠡᠭᠰᠡᠨ ᠦᠭᠡᠢ᠃ 》 ᠮᠤᠬᠤᠯᠢ ᠠᠭᠤᠷᠰᠠᠨ ᠥᠭᠦᠯᠡᠷᠦᠨ :《ᠪᠡᠶᠡ ᠪᠦᠬᠥᠢᠯ ᠦᠭᠡᠢ ᠪᠡᠷ ᠲᠡᠷᠢᠭᠦᠨ ᠭᠠᠵᠠᠷ ᠲᠤᠷ ᠦᠯᠦ ᠭᠥᠷᠥᠮᠦᠢ᠂ ᠬᠥᠯ ᠠᠯᠬᠤᠯ ᠦᠭᠡᠢ ᠪᠡᠷ ᠪᠡᠶᠡ ᠦᠯᠦ ᠲᠠᠪᠰᠢᠮᠤᠢ᠂ ᠡᠵᠡᠨ ᠦ᠌ ᠳᠡᠭᠦᠦ ᠨᠠᠷ ᠨᠢᠭᠡᠬᠡᠨ ᠴᠠᠭ ᠪᠠᠢᠭᠰᠠᠨ ᠦᠭᠡᠢ ᠬᠣᠭᠣᠷᠣᠨᠳᠣ ᠲᠠᠨ ᠤ᠋ ᠡᠳᠦᠢᠴᠢᠨᠡᠭᠡᠨ ᠬᠠᠭᠤᠴᠢᠨ ᠰᠠᠢᠳ ᠪᠠᠢᠭᠰᠠᠭᠠᠷ ᠦᠵᠡᠵᠦ ᠪᠠᠢᠲᠠᠯᠠ ᠡᠵᠡᠨ ᠢ᠋ ᠦᠬᠦᠯᠭᠡᠨ ᠦ᠌ ᠭᠠᠵᠠᠷ ᠣᠷᠣᠭᠤᠯᠬᠤ ᠠᠨᠤ ᠶᠠᠭᠤᠨ? ᠨᠢᠭᠡᠨ ᠬᠣᠶᠠᠷ ᠠᠨᠤ ᠡᠵᠡᠨ ᠳ᠋ᠦ᠍ᠷ ᠴᠠᠪᠴᠢᠭ᠍ᠳᠠᠬᠤ ᠶ᠋ᠢ ᠪᠣᠯᠬᠤ ᠪᠣᠢ ᠶᠠ᠂ ᠡᠵᠡᠨ ᠦ᠌ ᠪᠡᠶᠡ ᠶ᠋ᠢ ᠲᠦᠭᠰᠢᠯᠲᠡᠢ ᠭᠠᠵᠠᠷ ᠣᠷᠣᠭᠤᠯᠵᠤ ᠪᠣᠯᠤᠮᠤᠢ ᠤᠤ ? ᠦᠵᠡᠬᠦᠯᠡ ᠵᠡᠯᠮᠡ ᠴᠢ ᠰᠠᠷᠯᠠᠭ ᠤᠯᠤᠰ ᠢ᠋ ᠰᠦᠢᠷᠡᠭᠦᠯᠬᠦᠢ ᠳ᠋ᠦ᠍ᠷ ᠮᠥᠷᠥ ᠪᠡᠨ ᠴᠠᠪᠴᠢᠭ᠍ᠰᠠᠨ ᠲᠤᠯᠠ ᠡᠳᠦᠭᠡ ᠰᠠᠢᠨ ᠪᠣᠯᠵᠤᠬᠤᠢ᠃ ᠬᠡᠷᠪᠡ ᠲᠣᠯᠣᠭᠠᠢ ᠪᠠᠨ ᠣᠭᠲᠣᠯᠤᠭᠰᠠᠨ ᠪᠥᠭᠡᠰᠦ ᠳᠠᠬᠢᠨ ᠠᠮᠢᠳᠤᠷᠠᠵᠤ ᠪᠣᠯᠤᠮᠤᠢ ᠤᠤ ? ᠲᠡᠷᠡ ᠤᠳᠠᠬᠠ ᠡᠵᠡᠨ ᠦ᠌ ᠪᠡᠶᠡ ᠡᠨᠳᠡᠭᠰᠡᠨ ᠪᠥᠭᠡᠰᠦ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠪᠡᠶᠡ ᠪᠠᠷᠠᠭᠳᠠᠬᠤ ᠪᠣᠯᠠᠢ ! ᠬᠡᠨ ᠳ᠋ᠦ᠍ᠷ ᠲᠦᠰᠢᠵᠦ ᠢᠲᠡᠭᠡᠬᠦ ᠠᠵᠢ ! ᠲᠠ ᠪᠠᠰᠠ ᠬᠦᠴᠦᠷᠦᠭᠰᠡᠨ ᠦᠭᠡᠢ ᠭᠡᠮᠡᠨ ᠰᠢᠯᠲᠠᠭ ᠬᠡᠯᠡᠮᠦᠢ ᠦᠦ ? ᠡᠵᠡᠨ ᠦ᠌ ᠳᠥᠷᠪᠡᠨ ᠳᠡᠭᠦᠦ ᠂ ᠭᠤᠷᠪᠠᠨ ᠬᠦᠯᠦᠭ ᠦᠳᠲᠡᠷ ᠡᠳᠡᠨ ᠢ᠋ ᠲᠦᠯᠬᠢᠨ ᠭᠠᠷᠭᠠᠵᠤ᠂ ᠵᠢᠷᠭᠤᠭᠠᠨ ᠰᠠᠢᠳ ᠤ᠋ᠨ ᠰᠠᠢᠰᠢᠶᠠᠯ ᠳ᠋ᠤᠷ ᠣᠷᠣᠵᠤ ᠠᠯᠠᠬᠤᠢ ᠳ᠋ᠤᠷ ᠦᠯᠦ ᠭᠥᠷᠦᠭᠦᠯᠬᠦ ᠶ᠋ᠢ ᠢᠨᠦ ᠦᠰᠦᠨ ᠢ᠋ ᠴᠠᠪᠴᠢᠵᠤ ᠣᠯᠠᠨ ᠳ᠋ᠤᠷ ᠦᠵᠡᠭᠦᠯ ! ᠪᠤᠰᠤᠳ ᠢ᠋ ᠠᠨᠤ ᠴᠥᠮ ᠴᠠᠪᠴᠢᠨ ᠠᠯᠠᠵᠤ ᠴᠠᠭᠠᠵᠠ ᠶ᠋ᠢ ᠴᠢᠩᠭᠠᠳᠬᠠ ! ᠬᠡᠨ ᠬᠥᠮᠦᠨ ᠬᠥᠨᠳᠡᠯᠢᠳᠦᠨ ᠬᠣᠷᠢᠭ᠍ᠯᠠᠪᠠᠰᠤ ᠵᠢᠨᠦᠩ ᠦ᠋ᠨ ᠢᠯᠳᠦᠨ ᠳ᠋ᠦ᠍ᠷ ᠵᠠᠶᠠᠭᠠ ᠪᠠᠨ ᠮᠡᠳᠡ !》ᠭᠡᠮᠡᠨ ᠠᠶᠤᠩᠭᠠ ᠮᠡᠲᠦ ᠪᠠᠷᠬᠢᠷᠠᠨ ᠰᠢᠷᠡᠭᠡ ᠪᠡᠨ ᠬᠡᠮᠬᠡ ᠢᠰᠬᠦᠯᠵᠦ᠂ ᠵᠢᠨᠦᠩ ᠦ᠋ᠨ ᠢᠯᠳᠦᠨ ᠢ᠋ᠶ᠋ᠠᠨ ᠰᠤᠭ ᠲᠠᠲᠠᠵᠤ ᠠᠪᠤᠭᠰᠠᠨᠠ᠂ ᠴᠠᠴᠠᠷ ᠤ᠋ᠨ ᠳᠣᠣᠷᠠ ᠵᠣᠭᠰᠣᠵᠤ ᠢᠯᠳᠦ ᠰᠦᠬᠡ ᠪᠠᠷᠢᠭ᠍ᠰᠠᠨ ᠠᠷᠠᠳ ᠬᠦᠷᠴᠢᠭᠢᠨᠡᠲᠡᠯᠡ ᠭᠦᠶᠦᠯᠳᠦᠵᠦ ᠭᠠᠷᠤᠨ ᠢᠷᠡᠭᠡᠳ ᠠᠷᠪᠠᠨ ᠳᠥᠷᠪᠡᠭᠦᠯᠡ ᠶ᠋ᠢ ᠴᠥᠮ ᠳᠠᠷᠤᠨ ᠬᠦᠯᠢᠵᠦ ᠲᠦᠯᠬᠢᠯᠡᠨ ᠠᠪᠠᠴᠢᠪᠠ᠃ ᠲᠠᠯᠠᠪᠤᠷ ᠳᠦᠭᠦᠷᠡᠩ ᠵᠠᠩᠵᠤᠨ ᠪᠠᠭᠠᠲᠤᠳ ᠴᠥᠮ ᠠᠶᠤᠵᠤ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠴᠥᠮ ᠰᠢᠷᠣᠢ ᠮᠡᠲᠦ ᠪᠣᠯᠵᠤ ᠥᠴᠦᠬᠡᠨ ᠴᠦ᠍ ᠠᠷᠭᠠ ᠦᠭᠡᠢ ᠪᠥᠬᠥᠶᠡ᠂ ᠡᠨᠡ ᠦᠶᠡ ᠳ᠋ᠦ᠍ ᠲᠠᠢᠽᠦ ᠶ᠋ᠢᠨ ᠳᠥᠷᠪᠡᠨ ᠬᠥᠪᠡᠭᠦᠨ ᠴᠥᠮ ᠴᠡᠷᠢᠭ ᠦ᠋ᠨ ᠴᠠᠴᠠᠷ ᠲᠤᠷ ᠵᠠᠷ ᠰᠣᠨᠣᠰᠬᠤ ᠲᠤᠰᠢᠶᠠᠯᠲᠠᠢ ᠪᠣᠯᠤᠭᠰᠠᠨ ᠲᠤᠯᠠ ᠭᠤᠷᠪᠠᠨ ᠬᠦᠯᠦᠭ ᠳᠥᠷᠪᠡᠨ ᠳᠡᠭᠦᠦ ᠳᠥᠷᠪᠡᠨ ᠪᠠᠭᠠ ᠡᠵᠡᠳ ᠲᠠᠪᠤᠨ ᠪᠠᠷᠰ ᠤ᠋ᠨ ᠪᠠᠭᠠᠲᠤᠳ ᠬᠠᠮᠲᠤ ᠪᠠᠷ ᠵᠢᠨᠦᠩ ᠦ᠋ᠨ ᠴᠠᠴᠠᠷ ᠤ᠋ᠨ ᠳᠣᠣᠷᠠ ᠰᠦᠷᠦᠭᠯᠡᠨ ᠰᠥᠭᠥᠳᠴᠦ ᠭᠤᠶᠤᠴᠢᠯᠠᠬᠤᠶᠠ᠂ ᠮᠤᠬᠤᠯᠢ ᠡᠭᠦᠨ ᠢ᠋ ᠦᠵᠡᠭᠡᠳ ᠵᠢᠨᠦᠩ ᠦ᠋ᠨ ᠳᠤᠭᠤᠯᠠᠭᠠ ᠳᠠᠯᠪᠠᠭᠠ ᠪᠠᠨ ᠴᠥᠮ ᠠᠪᠴᠤ ᠡᠮᠦᠨᠡ ᠰᠢᠷᠡᠭᠡᠨ ᠳ᠋ᠦ᠍ᠷ ᠲᠠᠯᠪᠢᠭᠠᠳ:《ᠡᠢᠮᠦ ᠪᠣᠯᠪᠠᠰᠤ ᠪᠢ ᠡᠨᠡ ᠵᠢᠨᠦᠩ ᠦ᠋ᠨ ᠲᠤᠰᠢᠶᠠᠯ ᠢ᠋ ᠲᠦᠯᠬᠢᠮᠦᠢ !》ᠭᠡᠮᠡᠨ ᠬᠠᠷᠠᠬᠠᠨ ᠴᠢᠷᠭᠠᠯᠳᠤᠬᠤᠶᠠ᠂ ᠡᠨᠡ ᠦᠶᠡ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠲᠠᠢᠽᠦ ᠪᠡᠶᠡ ᠪᠡᠷ ᠵᠢᠯ ᠦ᠋ᠨ ᠰᠡᠭᠦᠯ ᠦ᠋ᠨ ᠶᠣᠰᠣᠭᠠᠷ ᠠᠭᠤᠯᠠ ᠶ᠋ᠢᠨ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠭᠰᠡᠨᠡ ᠲᠣᠬᠢᠶᠠᠯᠳᠤᠵᠤ ᠶᠠᠭᠠᠷᠠᠨ ᠮᠥᠨ ᠬᠦ᠌ ᠲᠣᠷᠭᠠᠨ ᠰᠢᠷᠠ ᠪᠠᠷ ᠵᠠᠬᠢᠶᠠ ᠢᠯᠡᠭᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠯᠭᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠴᠤᠭᠠᠷ ᠲᠣᠷᠭᠠᠨ ᠰᠢᠷᠠ ᠶ᠋ᠢᠨ ᠮᠣᠷᠢᠨ ᠤ᠋ ᠬᠥᠯ ᠳ᠋ᠦ᠍ᠷ ᠰᠢᠷᠭᠤᠯᠴᠠᠨ ᠵᠢᠭᠤᠷᠠᠯᠴᠠᠮᠠᠷ ᠰᠥᠭᠥᠳᠦᠯᠴᠡᠨ :《ᠵᠢᠨᠦᠩ ᠦ᠋ᠨ ᠴᠠᠭᠠᠵᠠ ᠴᠢᠩᠭᠠ᠂ ᠡᠵᠡᠨ ᠦ᠌ ᠡᠯᠴᠢ ᠳ᠋ᠦ᠍ᠷ ᠮᠡᠳᠡᠭᠦᠯᠬᠦ ᠶ᠋ᠢ ᠬᠦᠯᠢᠶᠡ ! 》ᠭᠡᠮᠡᠨ ᠬᠡᠩᠭᠡᠷᠭᠡ ᠴᠣᠬᠢᠵᠤ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠳᠣᠲᠣᠷᠠ ᠠ᠋ᠴᠠ ᠪᠤᠭᠤᠷᠵᠢ ᠭᠠᠷᠴᠤ ᠡᠵᠡᠨ ᠦ᠌ ᠡᠯᠴᠢ ᠶ᠋ᠢ ᠤᠭᠲᠤᠨ ᠣᠷᠣᠭᠤᠯᠵᠤ ᠂ ᠵᠢᠨᠦᠩ ᠰᠠᠭᠤᠳᠠᠯ ᠠ᠋ᠴᠠ ᠪᠣᠰᠴᠤ ᠬᠣᠢᠰᠢ ᠬᠠᠨᠳᠤᠨ ᠰᠥᠭᠥᠳᠪᠡ᠃ ᠲᠣᠷᠭᠠᠨ ᠰᠢᠷᠠ ᠳᠣᠪᠣᠴᠠᠭ ᠤ᠋ᠨ ᠳᠣᠣᠷᠠ ᠮᠣᠷᠢᠨ ᠳᠡᠭᠡᠷᠡ ᠡᠵᠡᠨ ᠦ᠌ ᠵᠠᠬᠢᠶᠠ ᠶ᠋ᠢ ᠤᠯᠠᠮᠵᠢᠯᠠᠨ ᠵᠠᠬᠢᠷᠤᠨ:《ᠠᠷᠪᠠᠨ ᠳᠥᠷᠪᠡᠨ ᠵᠠᠩᠵᠤᠨ ᠲᠦᠰᠢᠮᠡᠳ ᠦ᠋ᠨ ᠬᠣᠷᠢᠭ᠍ᠯᠠᠯ ᠢ᠋ ᠠᠯᠳᠠᠭᠰᠠᠨ ᠶᠠᠯᠠ ᠠᠨᠤ ᠴᠥᠮ ᠮᠢᠨᠦ ᠥᠪᠡᠷ ᠦ᠋ᠨ ᠰᠠᠨᠠᠭᠠ ᠴᠢᠬᠤᠯ ᠬᠢᠯᠢᠩ ᠲᠦᠷᠭᠡᠨ ᠡᠴᠡ ᠪᠣᠯᠵᠤᠬᠤᠢ᠃ ᠪᠢ ᠳᠤᠷᠠᠲᠠᠶᠠ ᠠᠮᠠᠨ ᠠᠯᠳᠠᠵᠤ ᠡᠭᠦᠨ ᠡᠴᠡ ᠬᠣᠢᠰᠢ ᠲᠦᠷᠭᠡᠨ ᠲᠦᠭᠦᠬᠡᠢ ᠲᠦᠭᠰᠢᠯ ᠠᠶᠤᠯᠲᠤ ᠭᠠᠵᠠᠷ ᠲᠤᠷ ᠰᠢᠪᠲᠤᠯᠤᠨ ᠣᠷᠣᠬᠤ ᠶ᠋ᠢ ᠪᠠᠢᠰᠤᠭᠠᠢ᠂ ᠮᠥᠨ ᠬᠦ᠌ ᠲᠡᠷᠡ ᠠᠷᠪᠠᠨ ᠳᠥᠷᠪᠡᠭᠦᠯᠡ ᠪᠡᠷ ᠪᠠᠲᠤᠯᠠᠭᠤᠯᠰᠤᠭᠠᠢ᠃ ᠳᠠᠬᠢᠨ ᠣᠰᠣᠯᠳᠠᠭᠰᠠᠨ ᠴᠠᠭ ᠲᠤᠷ ᠲᠡᠳᠡᠨ ᠳ᠋ᠦ᠍ᠷ ᠳᠠᠪᠬᠤᠷ ᠶᠠᠯᠠ ᠤᠨᠠᠭᠠᠲᠤᠭᠠᠢ᠂ ᠡᠨᠡ ᠤᠳᠠᠭᠠ ᠶ᠋ᠢᠨ ᠲᠡᠳᠡᠨ ᠦ᠌ ᠶᠠᠯᠠ ᠳ᠋ᠤᠷ ᠪᠢ ᠳᠤᠷᠠᠲᠠᠶᠠ ᠮᠥᠨ ᠬᠦ᠌ ᠮᠢᠩᠭᠠᠨ ᠠᠭᠲᠠ ᠶ᠋ᠢᠨ ᠲᠣᠷᠭᠠᠭᠤᠯᠢ ᠭᠠᠷᠭᠠᠵᠤ᠂ ᠲᠡᠳᠡᠨ ᠦ᠌ ᠶᠠᠯᠠ ᠶ᠋ᠢ ᠵᠣᠯᠢᠰᠤᠭᠠᠢ᠃ ᠵᠢᠨᠦᠩ ᠬᠡᠷᠬᠢᠪᠡᠴᠦ ᠬᠡᠯᠲᠦᠷᠢᠭᠦᠯᠦᠨ ᠠᠪᠠᠴᠢ !》ᠭᠡᠮᠡᠨ ᠵᠠᠬᠢᠵᠤ ᠪᠠᠷᠠᠭᠠᠳ ᠰᠠᠶᠢ ᠮᠣᠷᠢᠨ ᠠ᠋ᠴᠠ ᠪᠠᠭᠤᠪᠠ᠃ ᠵᠢᠨᠦᠩ ᠮᠥᠨ ᠪᠣᠰᠴᠤ ᠡᠵᠡᠨ ᠦ᠌ ᠵᠠᠬᠢᠶᠠ ᠪᠠᠷ ᠣᠯᠠᠨ ᠢ᠋ ᠭᠡᠯᠳᠦᠷᠢᠭᠦᠯᠵᠦ᠂ ᠶᠠᠯᠠ ᠲᠣᠷᠭᠠᠭᠤᠯᠢ ᠶ᠋ᠢ ᠢᠯᠭᠠᠨ ᠰᠠᠯᠭᠠᠭᠰᠠᠨ ᠠᠨᠤ :ᠡᠨᠡ ᠠᠯᠳᠠᠰᠢ ᠶ᠋ᠢ ᠵᠢᠨᠦᠩ ᠪᠢ ᠤᠷᠢᠳᠠᠰᠠ ᠡᠰᠡ ᠰᠡᠷᠡᠮᠵᠢᠯᠡᠨ ᠤᠬᠠᠭᠰᠠᠨ ᠶᠠᠯᠠ ᠳ᠋ᠤᠷ ᠵᠠᠭᠤᠨ ᠠᠭᠲᠠ᠂ ᠪᠡᠯᠭᠦᠳᠡᠢ ᠬᠠᠰᠠᠷ ᠢ᠋ ᠲᠤᠰᠬᠠᠢᠯᠠᠨ ᠡᠵᠡᠨ ᠢ᠋ ᠬᠣᠷᠢᠭ᠍ᠯᠠᠨ ᠬᠠᠮᠠᠭᠠᠯᠠᠬᠤᠢ ᠳ᠋ᠤᠷ ᠶᠠᠪᠤᠭᠤᠯᠤᠭᠰᠠᠨ ᠪᠥᠭᠡᠳ ᠬᠣᠶᠠᠭᠤᠯᠠ ᠴᠥᠮ ᠡᠵᠡᠨ ᠡᠴᠡ ᠰᠠᠯᠵᠤ᠂ ᠲᠤᠰ ᠲᠤᠰᠢᠶᠠᠯ ᠢ᠋ ᠠᠯᠳᠠᠭᠰᠠᠨ ᠲᠤᠯᠠ ᠬᠥᠮᠦᠨ ᠪᠦᠷᠢ ᠲᠠᠪᠢᠨ ᠠᠭᠲᠠ᠂ ᠡᠨᠡ ᠠᠷᠪᠠᠨ ᠳᠥᠷᠪᠡᠭᠦᠯᠡ ᠬᠡᠳᠦᠢᠪᠡᠷ ᠡᠵᠡᠨ ᠲᠣᠷᠭᠠᠭᠤᠯᠢ ᠭᠠᠷᠭᠠᠭᠰᠠᠨ ᠪᠣᠯᠪᠠᠴᠤ ᠵᠢᠷᠭᠤᠭᠠᠨ ᠵᠠᠩᠵᠤᠨ᠂ ᠬᠥᠮᠦᠨ ᠪᠦᠷᠢ ᠶᠢᠰᠦᠨ ᠠᠭᠲᠠ᠂ ᠦᠯᠡᠭᠰᠡᠨ ᠨᠠᠢ᠍ᠮᠠᠨ ᠰᠢᠳᠠᠷ ᠲᠦᠰᠢᠮᠡᠳ ᠬᠥᠮᠦᠨ ᠪᠦᠷᠢ ᠳᠣᠯᠣᠭᠠᠨ ᠠᠭᠲᠠ᠂ ᠪᠦᠭᠦᠳᠡ ᠶ᠋ᠢ ᠨᠡᠢᠯᠡᠭᠦᠯᠵᠦ᠂ ᠭᠠᠪᠢᠶᠠᠲᠤ ᠵᠠᠩᠵᠤᠨ ᠴᠡᠷᠢᠭ ᠲᠦ᠍ᠷ ᠳᠠᠪᠬᠤᠷ ᠱᠠᠩᠨᠠᠬᠤ ᠪᠠᠷ ᠲᠣᠭᠲᠠᠭᠠᠵᠤ᠂ ᠪᠠᠰᠠ ᠨᠡᠢᠲᠡ ᠳ᠋ᠦ᠍ᠷ ᠵᠠᠷᠯᠠᠭᠰᠠᠨ ᠠᠨᠤ :《ᠡᠵᠡᠨ ᠦ᠌ ᠳᠥᠷᠪᠡᠨ ᠳᠡᠭᠦᠦ᠂ ᠳᠥᠷᠪᠡᠨ ᠬᠦᠯᠦᠭ᠂ ᠳᠥᠷᠪᠡᠨ ᠬᠥᠪᠡᠭᠦᠨ ᠬᠢᠭᠡᠳ ᠵᠢᠷᠭᠤᠭᠠᠨ ᠰᠠᠢᠳ᠂ ᠶᠢᠰᠦᠨ ᠡᠩ᠂ ᠲᠠᠪᠤᠨ ᠪᠠᠭᠠᠲᠤᠳ ᠠ᠋ᠴᠠ ᠲᠡᠷᠢᠭᠦᠯᠡᠨ᠂ ᠣᠯᠠᠨ ᠵᠠᠩᠵᠤᠨ ᠰᠤᠯᠠ ᠴᠡᠷᠢᠭ ᠦ᠋ᠳ ᠲᠣᠷ ᠬᠦᠷᠲᠡᠯᠡ ᠬᠡᠨ ᠬᠥᠮᠦᠨ ᠡᠵᠡᠨ ᠢ᠋ ᠳᠠᠭᠠᠵᠤ ᠪᠠᠢᠭᠠᠳ ᠲᠦᠭᠰᠢᠯ ᠠᠶᠤᠯ ᠲᠠᠢ ᠭᠠᠵᠠᠷ ᠲᠤᠷ ᠬᠣᠷᠢᠭ᠍ᠯᠠᠯ ᠢ᠋ ᠠᠯᠳᠠᠵᠤ ᠡᠵᠡᠨ ᠢ᠋ ᠣᠷᠣᠭᠤᠯᠤᠭᠠᠳ ᠡᠵᠡᠨ ᠦ᠌ ᠪᠡᠶᠡ ᠶ᠋ᠢ ᠲᠦᠭᠰᠢᠭᠦᠷᠢᠲᠡᠢ ᠪᠣᠯᠭᠠᠪᠠᠰᠤ᠂ ᠲᠡᠷᠡ ᠬᠥᠮᠦᠨ ᠢ᠋ ᠨᠠᠶᠠᠨ ᠮᠠᠨᠴᠤᠷᠭᠠ ᠵᠠᠨᠴᠢᠮᠤᠢ᠃ ᠬᠡᠷᠪᠡ ᠡᠵᠡᠨ ᠦ᠌ ᠪᠡᠶᠡ ᠰᠢᠩᠬᠤᠯᠠᠪᠠᠰᠤ ᠲᠡᠷᠡ ᠬᠥᠮᠦᠨ ᠢ᠋ ᠴᠠᠪᠴᠢᠨ ᠠᠯᠠᠮᠤᠢ᠃ ᠬᠡᠷᠪᠡ ᠡᠵᠡᠨ ᠦ᠌ ᠪᠡᠶᠡ ᠶ᠋ᠢ ᠪᠡᠷᠲᠡᠭᠡᠨ ᠮᠠᠬᠠᠪᠣᠳ ᠡᠪᠳᠡᠷᠡᠬᠦᠢ ᠳ᠋ᠦ᠍ᠷ ᠬᠦᠷᠦᠭᠦᠯᠪᠡᠰᠦ ᠲᠡᠷᠡ ᠬᠥᠮᠦᠨ ᠦ᠌ ᠨᠢᠭᠡᠨ ᠭᠡᠷ ᠢ᠋ ᠴᠥᠮ ᠠᠯᠠᠮᠤᠢ᠃ ᠬᠡᠷᠪᠡ ᠡᠵᠡᠨ ᠦ᠌ ᠠᠮᠢᠨ ᠨᠠᠰᠤᠨ ᠳ᠋ᠤᠷ ᠬᠦᠷᠦᠭᠦᠯᠪᠡᠰᠦ᠂ ᠲᠡᠷᠡ ᠬᠥᠮᠦᠨ ᠦ᠌ ᠶᠢᠰᠦᠨ ᠤᠭᠰᠠᠭᠠ ᠶ᠋ᠢ ᠬᠦᠢᠰᠦ ᠲᠡᠮᠲᠡᠷᠢᠨ ᠠᠷᠢᠯᠭᠠᠮᠤᠢ᠃ ᠵᠢᠨᠦᠩ ᠮᠢᠨᠦ ᠪᠡᠶᠡ ᠡᠴᠡ ᠲᠡᠷᠢᠭᠦᠯᠡᠨ ᠰᠤᠯᠠ ᠴᠡᠷᠢᠭ ᠶᠡᠷᠦ ᠶ᠋ᠢᠨ ᠠᠷᠠᠳ ᠲᠤᠷ ᠬᠦᠷᠲᠡᠯᠡ ᠨᠢᠭᠡᠨ ᠠᠳᠠᠯᠢ ᠪᠠᠷ ᠠᠪᠠᠴᠢᠮᠤᠢ᠃ ᠣᠭᠲᠣ ᠢᠯᠭᠠᠯ ᠦᠭᠡᠢ ᠴᠥᠮ ᠡᠩᠭᠡᠷ ᠲᠣᠷ ᠲᠡᠮᠳᠡᠭ ᠵᠡᠭᠦᠵᠦ ᠤᠢᠯᠠᠨ ᠲᠡᠮᠳᠡᠭᠯᠡᠵᠦ ᠠᠪ ! 》ᠭᠡᠮᠡᠨ ᠴᠢᠩᠳᠠ ᠵᠠᠷᠯᠠᠨ ᠲᠣᠭᠲᠠᠭᠠᠭᠠᠳ ᠵᠢᠴᠢ ᠪᠠᠰᠠ ᠳᠥᠷᠪᠡᠨ ᠳᠡᠭᠦᠦ ᠳᠥᠷᠪᠡᠨ ᠬᠦᠯᠦᠭ ᠳᠥᠷᠪᠡᠨ ᠰᠠᠢᠰᠢᠶᠠᠯ ① ᠳᠥᠷᠪᠡᠨ ᠤᠷᠤᠭ ② ᠡᠨᠡ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠥᠮᠦᠨ ᠡᠴᠡ ᠬᠥᠮᠦᠨ ᠪᠦᠷᠢ ᠰᠦᠨᠡᠰᠦᠨ ᠢ᠋ ᠰᠠᠬᠢᠬᠤ ᠨᠣᠭᠣᠭᠠᠨ ᠣᠭ᠌ᠶᠤ ᠨᠢᠭᠡᠨ ᠮᠥᠬᠥᠯᠢᠭ᠂ ᠵᠢᠴᠢ ᠳᠥᠷᠪᠡᠨ ᠬᠥᠪᠡᠭᠦᠳ ᠲᠣᠷ ᠢᠨᠦ ᠲᠣᠭᠣᠰᠣᠨ ᠢ᠋ ᠵᠠᠢᠯᠠᠭᠤᠯᠬᠤ ᠭᠡᠷᠡᠯᠲᠦ ᠰᠤᠪᠤᠳ ᠳᠥᠷᠪᠡᠨ ᠮᠥᠬᠥᠯᠢᠭ ᠥᠭᠴᠦ ᠲᠠᠪᠤᠨ ᠳᠥᠷᠪᠡ ᠨᠡᠢᠲᠡ ᠬᠣᠷᠢᠨ ᠮᠥᠬᠥᠯᠢᠭ ᠢ᠋ ᠠᠪᠴᠤ ᠳᠥᠷᠪᠡᠨ ᠳᠡᠭᠦᠦ᠂ ᠳᠥᠷᠪᠡᠨ ᠤᠷᠤᠭ ᠢ᠋ ᠳᠥᠷᠪᠡᠨ ᠰᠤᠪᠤᠳ ᠢ᠋ᠶ᠋ᠠᠷ ᠰᠠᠯᠭᠠᠨ᠂ ᠳᠥᠷᠪᠡᠨ ᠡᠪᠦᠳᠦᠭ ᠪᠣᠯᠭᠠᠨ ᠬᠡᠯᠬᠢᠵᠦ᠂ ᠪᠠᠰᠠ ᠲᠠᠢᠽᠦ ᠶ᠋ᠢᠨ ᠪᠠᠭᠠ ᠠ᠋ᠴᠠ ᠪᠡᠶᠡ ᠬᠠᠮᠠᠭᠠᠯᠠᠨ ᠵᠡᠭᠦᠵᠦ ᠪᠠᠢᠭᠰᠠᠨ ᠡᠷᠳᠡᠨᠢᠲᠦ ᠪᠤᠭᠤ ᠶ᠋ᠢᠨ ᠰᠣᠶᠣᠭᠠ ᠠ᠋ᠴᠠ ᠨᠢᠭᠡᠨ ᠠᠯᠮᠠᠰ ᠡᠷᠳᠡᠨᠢ ᠶ᠋ᠢᠨ ᠮᠥᠬᠥᠯᠢᠭ ᠢ᠋ ᠠᠪᠴᠤ ᠳᠤᠮᠳᠠᠳᠤ ᠡᠪᠦᠳᠦᠭ ᠦ᠋ᠨ ᠳᠡᠭᠡᠷᠡ ᠳᠠᠪᠬᠤᠷ ᠵᠠᠩᠭᠢᠳᠴᠤ ᠸᠴᠢᠷ ᠬᠦᠢᠰᠦ ᠪᠣᠯᠭᠠᠭᠠᠳ ᠲᠡᠭᠦᠨ ᠢ᠋ ᠲᠠᠢᠽᠦ ᠶ᠋ᠢᠨ ᠪᠡᠶᠡ ᠳ᠋ᠦ᠍ᠷ ᠤᠷᠠᠯᠠᠵᠤ ᠨᠡᠢᠲᠡ ᠬᠣᠷᠢᠨ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠪᠢᠴᠢᠵᠦ ᠪᠦᠭᠦᠳᠡᠭᠡᠷ ᠢᠷᠡᠵᠦ᠂ ᠲᠠᠢᠽᠦ ᠳ᠋ᠦ᠍ᠷ ᠢᠳᠬᠠᠯ ᠡᠷᠭᠦᠵᠦ ᠮᠡᠳᠡᠭᠦᠯᠦᠷᠦᠨ : 《ᠠᠷᠪᠠᠨ ᠨᠠᠢ᠍ᠮᠠᠨ ᠵᠦᠢᠯ ᠦ᠋ᠨ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠬᠡᠮᠡᠭᠴᠢ ᠡᠷᠡ ᠬᠥᠮᠦᠨ ᠦ᠌ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠬᠤ ᠴᠢᠬᠤᠯᠠ ᠰᠤᠷᠲᠠᠯ᠂ ᠠᠷᠪᠠᠨ ᠨᠠᠢ᠍ᠮᠠᠨ ᠣᠭ᠌ᠶᠤ ᠡᠷᠳᠡᠨᠢ ᠬᠡᠮᠡᠭᠴᠢ ᠰᠦᠨᠡᠰᠦᠨ ᠢ᠋ ᠰᠠᠬᠢᠬᠤ ᠰᠠᠢᠬᠠᠨ ᠴᠢᠯᠠᠭᠤ ᠂ ᠳᠥᠷᠪᠡᠨ ᠳᠡᠭᠦᠦ᠂ ᠳᠥᠷᠪᠡᠨ ᠤᠷᠤᠭ᠂ ᠳᠥᠷᠪᠡᠨ ᠬᠥᠪᠡᠭᠦᠨ᠂ ᠳᠥᠷᠪᠡᠨ ᠬᠦᠯᠦᠭ᠂ ᠳᠥᠷᠪᠡᠨ ᠰᠠᠢᠳ ᠬᠡᠮᠡᠭᠴᠢ ᠪᠦᠭᠦᠳᠡᠭᠡᠷ ᠴᠥᠮ ᠠᠯᠮᠠᠰ ᠡᠷᠳᠡᠨᠢ ᠮᠡᠲᠦ ᠠᠯᠲᠠᠨ ᠶᠠᠰᠤᠲᠤ ᠡᠵᠡᠨ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠬᠤ ᠪᠣᠯᠠᠢ᠃ ᠡᠵᠡᠨ ᠦ᠌ ᠨᠢᠭᠡᠨ ᠪᠡᠶᠡ ᠡᠨᠳᠡᠪᠡᠰᠦ ᠡᠳᠡᠭᠡᠷ ᠴᠥᠮ ᠬᠡᠯᠬᠢᠶᠡ ᠲᠠᠰᠤᠷᠠᠬᠤ ᠮᠡᠲᠦ᠂ ᠡᠵᠡᠨ ᠮᠢᠨᠦ ᠡᠭᠦᠨ ᠢ᠋ ᠡᠩᠭᠡᠷ ᠲᠡᠭᠡᠨ ᠵᠡᠭᠦᠵᠦ᠂ ᠡᠳᠡᠭᠡᠷ ᠪᠦᠬᠦᠨ ᠦ᠌ ᠢᠳᠬᠠᠯ ᠢ᠋ ᠰᠡᠳᠬᠢᠵᠦ᠂ ᠡᠯᠡ ᠲᠦᠭᠰᠢᠯᠳᠦ ᠭᠠᠵᠠᠷᠠ ᠡᠷᠬᠢᠮ ᠪᠡᠶᠡ ᠪᠡᠨ ᠬᠥᠩᠭᠡᠯᠡᠨ ᠦᠯᠦ ᠣᠷᠣᠮᠤ ! ᠡᠨᠡ ᠬᠡᠮᠡᠭᠴᠢ ᠶ᠋ᠢ ᠦᠯᠢᠳᠬᠡᠪᠡᠰᠦ᠂ ᠡᠨᠡ ᠡᠷᠢᠭᠡ ᠶ᠋ᠢᠨ ᠪᠦᠭᠦᠳᠡᠭᠡᠷ ᠦ᠋ᠨ ᠣᠭᠣᠰᠣᠷ ᠬᠡᠯᠬᠢᠶᠡ ᠶ᠋ᠢ ᠨᠡᠢᠲᠡ ᠪᠡᠷ ᠴᠥᠮ ᠡᠨᠡ ᠸᠴᠢᠷ ᠬᠦᠢᠰᠦ ᠳ᠋ᠦ᠍ᠷ ᠵᠠᠩᠭᠢᠳᠴᠤ ᠪᠠᠢᠬᠤ ᠲᠤᠯᠠ ᠸᠴᠢᠷ ᠬᠦᠢᠰᠦ ᠬᠡᠮᠬᠡᠷᠡᠪᠡᠰᠦ ᠡᠷᠢᠭᠡ ᠳᠠᠷᠤᠢ ᠬᠡᠯᠬᠢᠶᠡ ᠦᠭᠡᠢ᠂ ᠲᠣᠪᠴᠢᠶᠠ ᠦᠭᠡᠢ ᠪᠣᠯᠵᠤ᠂ ᠠᠯᠳᠠᠷᠠᠨ ᠰᠠᠯᠪᠠᠷᠠᠬᠤᠢ ᠳ᠋ᠤᠷ ᠬᠦᠷᠬᠦ ᠮᠡᠲᠦ᠃ ᠡᠷᠢᠭᠡ ᠳ᠋ᠦ᠍ᠷ ᠸᠴᠢᠷ ᠬᠦᠢᠰᠦ ᠦᠭᠡᠢ ᠪᠥᠭᠡᠰᠦ ᠡᠷᠢᠭᠡ ᠭᠡᠮᠡᠨ ᠨᠡᠷᠡᠯᠡᠵᠦ ᠦᠯᠦ ᠪᠣᠯᠤᠮᠤᠢ᠂ ᠳᠥᠷᠪᠡᠨ ᠰᠤᠪᠤᠳ ᠤ᠋ᠨ ᠡᠪᠦᠳᠦᠭ ᠬᠡᠮᠡᠭᠴᠢ ᠡᠵᠡᠨ ᠴᠢᠨᠦ ᠳᠥᠷᠪᠡᠨ ᠬᠥᠪᠡᠭᠦᠨ ᠴᠢᠨᠦ ᠪᠤᠶᠤ᠂ ᠬᠣᠢᠴᠢ ᠡᠳᠦᠷ ᠠᠯᠢ ᠠᠨᠤ ᠡᠵᠡᠨ ᠴᠢᠨᠦ ᠡᠷᠳᠡᠮ ᠰᠤᠷᠲᠠᠯ ᠤᠬᠠᠭᠠᠨ ᠴᠢᠳᠠᠯ ᠢ᠋ ᠳᠠᠭᠤᠷᠢᠶᠠᠨ ᠴᠢᠳᠠᠪᠠᠰᠤ ᠳᠠᠷᠤᠢ ᠡᠨᠡ ᠮᠡᠲᠦ ᠡᠪᠦᠳᠦᠭ ᠦ᠋ᠨ ᠠᠯᠢᠨᠠ ᠪᠣᠯᠪᠠᠴᠤ ᠡᠨᠡ ᠸᠴᠢᠷ ᠢ᠋ ᠠᠨᠤ ᠳᠡᠭᠡᠷᠡ ᠨᠡᠮᠡᠪᠡᠰᠦ ᠳᠠᠷᠤᠢ ᠸᠴᠢᠷ ᠬᠦᠢᠰᠦ ᠪᠣᠯᠵᠤ᠂ ᠡᠵᠡᠨ ᠦ᠌ ᠪᠡᠶᠡ ᠮᠡᠲᠦ ᠪᠡᠷ ᠨᠢᠭᠡᠨ ᠤᠯᠤᠰ ᠤ᠋ᠨ ᠲᠣᠪᠴᠢᠶᠠ ᠬᠡᠯᠬᠢᠶᠡ ᠶ᠋ᠢ ᠪᠠᠷᠢᠵᠤ᠂ ᠡᠵᠡᠨ ᠡᠷᠢᠭᠡ ᠪᠣᠯᠬᠤ ᠪᠣᠯᠠᠢ᠃ ᠡᠵᠡᠨ ᠮᠢᠨᠦ ᠠᠢᠯᠠᠳᠤᠨᠠᠮ ᠪᠣᠯᠪᠠᠤ !》ᠭᠡᠮᠡᠨ ᠡᠷᠭᠦᠨ ᠪᠠᠷᠢᠭ᠍ᠰᠠᠨᠠ᠂ ᠲᠠᠢᠽᠦ ᠮᠠᠰᠢᠳᠠ ᠪᠡᠶᠡᠰᠦᠨ ᠮᠦᠰᠢᠶᠡᠨ ᠮᠠᠭᠲᠠᠨ ᠰᠠᠢᠰᠢᠶᠠᠵᠤ ᠠᠪᠴᠤ ᠡᠩᠭᠡᠷ ᠲᠣᠷ ᠢ᠋ᠶ᠋ᠠᠨ ᠵᠡᠭᠦᠭᠡᠳ ᠰᠡᠭᠦᠵᠢᠨ ᠡᠴᠡ ᠪᠡᠨ ᠮᠣᠷᠢ ᠤᠨᠤᠬᠤ ᠶ᠋ᠢᠨ ᠳᠠᠷᠤᠯᠭᠠ ᠪᠣᠯᠭᠠᠭᠰᠠᠨ ᠶᠢᠰᠦᠨ ᠵᠦᠢᠯ ᠦ᠋ᠨ ᠡᠷᠳᠡᠨᠢ ᠳᠦᠭᠦᠷᠦᠭᠰᠡᠨ ᠪᠤᠭᠤ ᠶ᠋ᠢᠨ ᠰᠣᠶᠣᠭᠠ᠂ ᠬᠢᠲᠤᠭᠠ ᠪᠠ ᠲᠤᠤᠬᠠᠢ ᠯᠤᠭᠠ ᠬᠠᠮᠲᠤ ᠠᠪᠴᠤ ᠬᠠᠷᠢᠭᠤ ᠠᠨᠤ ᠱᠠᠩᠨᠠᠨ ᠥᠭᠭᠦᠭᠦᠶᠡ ᠡᠢᠨ ᠭᠡᠮᠡᠨ ᠲᠠᠢᠯᠤᠨ ᠬᠡᠯᠡᠵᠦ ᠵᠠᠬᠢᠷᠤᠨ :《ᠶᠢᠰᠦᠨ ᠡᠷᠳᠡᠨᠢ ᠬᠡᠮᠡᠭᠴᠢ ᠡᠷᠡ ᠬᠥᠮᠦᠨ ᠦ᠌ ᠶᠢᠰᠦᠨ ᠡᠷᠳᠡᠮ ᠪᠤᠶᠤ᠂ ᠶᠢᠰᠦᠨ ᠡᠷᠳᠡᠮ ᠠᠯᠢ ᠪᠣᠢ ? ᠬᠡᠮᠡᠪᠡᠰᠦ : ᠲᠡᠷᠢᠭᠦᠨ ᠳ᠋ᠦ᠍ᠷ ᠪᠤᠰᠤᠳ ᠤ᠋ᠨ ᠵᠣᠪᠠᠯᠠᠩ ᠢ᠋ ᠪᠡᠶᠡ ᠳ᠋ᠦ᠍ᠷ ᠡᠷᠭᠢᠴᠡᠭᠦᠯᠵᠦ᠂ ᠬᠣᠶᠠᠷ ᠲᠤᠷ ᠪᠤᠷᠤᠭᠤ ᠲᠡᠷᠰᠯᠡᠭᠦᠦ ᠪᠡᠷ ᠬᠡᠷᠬᠢᠪᠡᠴᠦ ᠦᠯᠦ ᠶᠠᠪᠤᠬᠤ᠂ ᠭᠤᠷᠪᠠᠨ ᠳ᠋ᠤᠷ ᠪᠤᠯᠲᠤ ᠬᠥᠮᠦᠨ ᠢ᠋ ᠡᠷᠭᠦᠨ ᠬᠦᠨᠳᠦᠯᠡᠵᠦ ᠬᠢᠴᠢᠶᠡᠩᠭᠦᠢᠯᠡᠬᠦ᠂ ᠳᠥᠷᠪᠡᠨ ᠳ᠋ᠦ᠍ᠷ ᠪᠣᠳᠣᠬᠤ ᠰᠢᠨᠵᠢᠬᠦ ᠪᠣᠳᠣᠯᠭᠠ ᠤᠬᠠᠭᠠᠨ ᠢ᠋ ᠨᠠᠷᠢᠪᠴᠢᠯᠠᠬᠤ᠂ ᠲᠠᠪᠤᠨ ᠳ᠋ᠤᠷ ᠪᠤᠴᠠᠬᠤ ᠪᠤᠯᠭᠢᠬᠤ ᠶ᠋ᠢ ᠦᠬᠦᠪᠡᠴᠦ ᠦᠯᠦ ᠦᠢᠯᠡᠳᠬᠦ᠂ ᠵᠢᠷᠭᠤᠭᠠᠨ ᠳ᠋ᠤᠷ ᠪᠤᠵᠠᠷ ᠤᠵᠢᠳ ᠲᠤᠷ ᠰᠣᠭᠲᠣᠭᠤᠷᠠᠨ ᠦᠯᠦ ᠵᠢᠪᠬᠦ᠂ ᠳᠣᠯᠣᠭᠠᠨ ᠳ᠋ᠤᠷ ᠪᠤᠰᠤᠳ ᠤ᠋ᠨ ᠡᠳ᠋ ᠲᠣᠷ ᠬᠣᠪᠳᠣᠭᠯᠠᠨ ᠦᠯᠦ ᠭᠣᠷᠢᠯᠠᠬᠤ᠂ ᠨᠠᠢ᠍ᠮᠠ ᠳ᠋ᠤᠷ ᠪᠤᠷᠤᠭᠤ ᠪᠠᠨ ᠡᠭᠡᠭᠦᠯᠵᠦ ᠢᠴᠢᠬᠦ ᠡᠮᠢᠶᠡᠬᠦ ᠶ᠋ᠢ ᠮᠡᠳᠡᠬᠦ᠂ ᠶᠢᠰᠦ ᠳ᠋ᠦ᠍ᠷ ᠪᠤᠰᠤᠴᠢᠷ ᠢ᠋ ᠵᠠᠰᠠᠬᠤᠢ ᠳ᠋ᠤᠷ ᠵᠣᠷᠢᠭ ᠦᠯᠦ ᠰᠢᠨᠲᠠᠷᠠᠬᠤ – ᠡᠨᠡ ᠶᠢᠰᠦᠭᠦᠯᠡ ᠶ᠋ᠢ ᠮᠠᠭᠠᠳ ᠪᠦᠷᠢᠳᠬᠡᠨ ᠴᠢᠳᠠᠪᠠᠰᠤ᠂ ᠡᠭᠦᠨ ᠢ᠋ ᠴᠣᠬᠣᠮ ᠠᠴᠢᠯᠠᠯᠲᠠᠢ ᠬᠥᠪᠡᠭᠦᠳ᠂ ᠪᠠᠭᠠᠲᠤᠷ ᠡᠷᠡ ᠬᠡᠮᠡᠮᠦᠢ᠃ ᠪᠤᠭᠤ ᠶ᠋ᠢᠨ ᠰᠣᠶᠣᠭᠠ ᠶ᠋ᠢ ᠬᠡᠷᠡᠭᠯᠡᠭᠰᠡᠨ ᠢᠨᠦ᠂ ᠡᠷᠡ ᠬᠥᠮᠦᠨ ᠢ᠋ ᠲᠦᠮᠡᠨ ᠦᠢᠯᠡ ᠳ᠋ᠦ᠍ᠷ ᠦᠵᠦᠭᠦᠷ ᠭᠠᠷᠭᠠᠵᠤ ᠶᠠᠪᠤᠭᠲᠤᠨ ᠬᠡᠮᠡᠭᠰᠡᠨ ᠬᠤᠷᠴᠠ ᠴᠢᠭᠢᠷᠠᠭ ᠬᠠᠳᠠᠨ ᠪᠠᠭᠠᠲᠤᠷ ᠰᠠᠨᠠᠭᠠᠨ ᠪᠤᠶᠤ᠃ ᠡᠷᠳᠡᠨᠢ ᠶ᠋ᠢᠨ ᠭᠠᠳᠠᠭᠤᠷ ᠡᠪᠡᠷ ᠢ᠋ᠶ᠋ᠡᠷ ᠭᠠᠳᠠᠷᠯᠠᠭᠰᠠᠨ ᠢᠨᠦ ᠡᠷᠳᠡᠮ ᠴᠢᠳᠠᠯ ᠢ᠋ᠶ᠋ᠠᠨ ᠳᠣᠲᠣᠷᠠ ᠪᠠᠨ ᠨᠢᠭᠤᠵᠤ᠂ ᠡᠷᠬᠡ ᠪᠠᠭᠠᠲᠤᠷ ᠢ᠋ᠶ᠋ᠠᠷ ᠪᠠᠭᠯᠠᠵᠤ ᠬᠠᠯᠬᠠᠯᠠᠨ᠂ ᠭᠠᠳᠠᠨᠠ ᠪᠠᠨ ᠪᠢᠲᠡᠭᠦᠯᠢᠭ ᠂ ᠳᠣᠲᠣᠷᠠ ᠪᠠᠨ ᠨᠠᠷᠢᠯᠠᠭ ᠪᠣᠯᠵᠤ᠂ ᠡᠷᠳᠡᠮ ᠪᠠᠢᠪᠠᠴᠤ ᠪᠢᠲᠡᠭᠡᠢ ᠭᠠᠢᠬᠠᠭᠤᠯ ᠬᠡᠮᠡᠭᠰᠡᠨ ᠰᠠᠨᠠᠭᠠᠨ ᠪᠤᠶᠤ᠃ ᠲᠠᠨ ᠤ᠋ ᠣᠯᠠᠨ ᠰᠡᠴᠡᠳ ᠪᠠᠭᠠᠲᠤᠳ ᠰᠠᠢᠳ ᠲᠦᠰᠢᠮᠡᠳ ᠪᠠ ᠲᠥᠷᠥᠯ ᠤᠷᠤᠭ ᠠᠯᠪᠠᠲᠤ ᠤᠯᠤᠰ ᠪᠦᠭᠦᠳᠡᠭᠡᠷ ᠵᠠᠬᠢᠶᠠ ᠶ᠋ᠢ ᠮᠢᠨᠦ ᠳᠠᠭᠠᠵᠤ ᠶᠠᠪᠤᠭᠲᠤᠨ᠃ ᠠᠳᠠᠭ ᠲᠠᠭᠠᠨ ᠨᠢᠭᠡᠨ ᠬᠣᠶᠠᠷ ᠵᠦᠢᠯ ᠢ᠋ ᠠᠨᠤ ᠪᠣᠯᠪᠠᠴᠤ ᠴᠢᠩᠳᠠ ᠪᠠᠷᠢᠮᠲᠠᠯᠠᠵᠤ ᠳ᠋ᠠᠭᠠᠨ ᠶᠠᠪᠤᠵᠤ ᠴᠢᠳᠠᠪᠠᠰᠤ᠂ ᠡᠵᠡᠨ ᠴᠢᠨᠦ ᠪᠢ ᠡᠨᠡ ᠠᠷᠪᠠᠨ ᠨᠠᠢ᠍ᠮᠠᠨ ᠵᠦᠢᠯ ᠦ᠋ᠨ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠢ᠋ᠶ᠋ᠡᠷ ᠦᠯᠢᠳᠬᠡᠭᠰᠡᠨ ᠪᠡᠶᠡ ᠶ᠋ᠢᠨ ᠬᠠᠮᠠᠭᠠᠯᠠᠯ ᠢ᠋ ᠮᠠᠭᠠᠳ ᠬᠢᠴᠢᠶᠡᠨ ᠰᠠᠬᠢᠨ ᠶᠠᠪᠤᠰᠤᠭᠠᠢ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠣᠯᠠᠨ ᠲᠦᠰᠢᠮᠡᠳ ᠰᠣᠨᠣᠰᠤᠭᠰᠠᠭᠠᠷ ᠴᠥᠮ ᠳᠣᠲᠣᠷᠠ ᠢᠭᠲᠦᠯᠦᠨ ᠪᠡᠶᠡᠰᠦᠨ ᠪᠢᠰᠢᠷᠡᠭᠡᠳ ᠳᠤᠷᠠᠲᠠᠶᠠ ᠬᠦᠯᠢᠶᠡᠯᠴᠡᠨ ᠮᠥᠷᠭᠥᠵᠦ ᠭᠠᠷᠤᠨ ᠢᠷᠡᠭᠡᠳ ᠮᠤᠬᠤᠯᠢ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠲᠤᠷ ᠡᠨᠡ ᠶᠢᠰᠦᠨ ᠰᠤᠷᠭᠠᠯ ᠤ᠋ᠨ ᠵᠠᠬᠢᠶᠠ ᠶ᠋ᠢ ᠵᠠᠷᠯᠠᠭᠤᠯᠵᠤ᠂ ᠡᠨᠡ ᠰᠤᠷᠭᠠᠯ ᠢ᠋ ᠲᠡᠮᠳᠡᠭᠯᠡᠭᠦᠯᠬᠦᠢ ᠶ᠋ᠢᠨ ᠲᠤᠯᠠ ᠪᠡᠶᠡ ᠡᠴᠡ ᠪᠡᠨ ᠲᠡᠷᠢᠭᠦᠯᠡᠨ ᠳᠣᠷᠣᠭ᠍ᠰᠢ ᠰᠤᠯᠠ ᠴᠡᠷᠢᠭ ᠬᠤᠶᠠᠭ ᠪᠠ ᠠᠷᠠᠳ ᠠᠯᠪᠠᠲᠤ ᠳ᠋ᠤᠷ ᠬᠦᠷᠲᠡᠯᠡ ᠡᠨᠡ ᠶᠢᠰᠦᠨ ᠡᠷᠳᠡᠮᠲᠦ ᠰᠣᠶᠣᠭᠠ ᠶ᠋ᠢ ᠬᠢᠲᠤᠭᠠ ᠯᠤᠭᠠ ᠬᠣᠯᠪᠣᠨ ᠵᠡᠭᠦᠯᠭᠡᠵᠦ᠂ ᠡᠨᠡ ᠶᠢᠰᠦᠨ ᠰᠤᠷᠭᠠᠯ ᠢ᠋ ᠬᠠᠷᠢᠯᠴᠠᠨ ᠪᠣᠯᠪᠠᠰᠤᠷᠠᠭᠤᠯᠤᠨ ᠤᠩᠰᠢᠵᠤ ᠤᠯᠠᠮᠵᠢᠯᠠᠨ ᠰᠤᠷᠤᠯᠴᠠᠭᠤᠯᠪᠠ᠃ ᠡᠭᠦᠨᠴᠡ ᠠᠷᠪᠠᠨ ᠨᠠᠢ᠍ᠮᠠᠨ ᠮᠥᠬᠥᠯᠢᠭ ᠡᠷᠢᠭᠡ᠂ ᠶᠢᠰᠦᠨ ᠰᠣᠶᠣᠯᠲᠤ ᠪᠤᠭᠤ ᠶ᠋ᠢᠨ ᠰᠣᠶᠣᠭᠠ ᠵᠡᠭᠦᠯᠴᠡᠬᠦ ᠰᠤᠷᠲᠠᠯ ᠬᠣᠴᠣᠷᠪᠠ᠃ ᠡᠨᠡ ᠦᠶᠡ《ᠱᠢ ᠪᠠ ᠯᠦᠸᠧ ᠬᠠᠨ 》ᠬᠡᠮᠡᠬᠦ ᠡᠷᠢᠭᠡ ᠪᠠ ᠵᠢᠴᠢ ᠬᠢᠲᠤᠭᠠ ᠯᠤᠭᠠ ᠨᠣᠭᠣᠭᠠᠨ ᠪᠤᠭᠤ ᠶ᠋ᠢᠨ ᠰᠣᠶᠣᠭᠠ ᠵᠡᠭᠦᠬᠦ ᠢᠨᠦ ᠲᠡᠷᠡ ᠦᠶᠡ ᠶ᠋ᠢᠨ ᠰᠤᠷᠲᠠᠯ ᠠᠵᠤᠭᠤ᠃
ᠲᠡᠭᠦᠨᠴᠡ ᠣᠯᠠᠨ ᠤ᠋ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠶ᠋ᠢ ᠢᠯᠭᠠᠵᠤ ᠤᠷᠢᠳᠤ ᠪᠦᠯᠦᠭ ᠦ᠋ᠨ ᠤᠯᠠᠭᠠᠨ ᠯᠤᠤ ᠵᠢᠯ ᠡᠨᠳᠡ ᠲᠡᠭᠦᠰᠴᠦ ᠵᠢᠯ ᠦ᠋ᠨ ᠰᠡᠭᠦᠯ ᠦ᠋ᠨ ᠶᠣᠰᠣᠭᠠᠷ ᠲᠠᠢᠵᠤ ᠲᠠᠪᠢᠭ᠍ᠯᠠᠨ ᠱᠠᠩ ᠬᠤᠷᠢᠮ ᠲᠦᠭᠡᠭᠡᠵᠦ᠂ ᠤᠯᠠᠭᠴᠢᠨ ᠮᠣᠭᠠᠢ ᠵᠢᠯ ᠡᠭᠦᠨ ᠡᠴᠡ ᠡᠬᠢᠯᠡᠵᠦ ᠰᠢᠨᠡ ᠵᠢᠯ ᠦ᠋ᠨ ᠪᠠᠯᠠᠩ ᠢ᠋ᠶ᠋ᠡᠷ ᠮᠥᠷᠭᠥᠵᠦ ᠶᠣᠰᠣᠯᠠᠨ ᠪᠡᠯᠭᠡᠯᠡᠯᠴᠡᠨ ᠬᠤᠷᠢᠮᠯᠠᠵᠤ ᠂ ᠬᠣᠢᠲᠤ ᠵᠢᠯ ᠦ᠋ᠨ ᠬᠤᠪᠢᠲᠤ ᠰᠠᠷᠠ ᠳ᠋ᠤᠷ ᠬᠣᠯᠠ ᠣᠢᠷᠠ ᠪᠠᠷ ᠬᠤᠷᠠᠵᠤ ᠬᠣᠣᠰ ᠰᠠᠢᠬᠠᠨ ᠨᠠᠢᠷ ᠬᠤᠷᠢᠮ ᠬᠢᠪᠡ᠃
– – – –
① ᠵᠡᠯᠮᠡ ᠂ ᠵᠡᠪᠡ ᠂ ᠴᠤᠤ ᠮᠡᠷᠭᠡᠨ ᠂ ᠰᠢᠷᠢ ᠬᠤᠲᠤᠭ ᠂ ᠨᠥᠬᠥᠭᠡ ᠬᠣᠶᠠᠷ ᠠᠨᠤ ᠳᠥᠷᠪᠡᠨ ᠬᠦᠯᠦᠭ ᠲᠣᠷ ᠪᠣᠢ᠃
② ᠣᠯᠭᠤᠨᠤᠳ ᠬᠣᠩᠭᠢᠷᠠᠳ ᠂ ᠰᠣᠯᠣᠩᠭᠣᠰ ᠂ ᠢᠯᠭᠦᠨᠡ ᠂ ᠨᠢᠭᠡᠨ ᠨᠠᠭᠠᠴᠤ ᠬᠣᠶᠠᠷ ᠬᠠᠳᠠᠮ ᠂ ᠡᠨᠡ ᠳᠥᠷᠪᠡᠨ᠃
ᠡᠨᠡ ᠵᠢᠯ ᠡᠮᠦᠨᠡ ᠰᠥᠩ ᠤᠯᠤᠰ ᠤ᠋ᠨ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠡᠵᠡᠨ ᠰᠥᠩ ᠨᠢᠩᠽᠦ᠋ᠩ ᠵᠣᠣ ᠺᠦᠸᠧ ᠶ᠋ᠢᠨ ᠴᠢᠩ ᠶᠤᠸᠠᠨ ᠬᠡᠮᠡᠬᠦ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠣᠨ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠢᠷᠭᠤᠳᠤᠭᠠᠷ ᠡᠵᠡᠨ ᠵᠠᠩᠽᠦ᠋ᠩ ᠸᠠᠨ ᠶᠠᠨ ᠵᠢᠩ ᠦ᠋ᠨ ᠴᠧᠩ ᠠᠨ ᠬᠡᠮᠡᠬᠦ ᠶ᠋ᠢᠨ ᠬᠣᠶᠠᠳᠤᠭᠠᠷ ᠣᠨ ᠪᠣᠯᠪᠠᠢ᠃ ᠲᠠᠢᠽᠦ ᠭᠤᠴᠢᠨ ᠵᠢᠷᠭᠤᠭᠠᠨ ᠰᠡᠭᠦᠳᠡᠷ ᠲᠡᠢ ᠪᠣᠯᠪᠠ᠃ ᠲᠡᠳᠦᠢ ᠪᠸᠲ᠋ᠠ᠋ ᠤᠯᠤᠰ ᠲᠤᠷ ᠳᠡᠮᠡᠢ ᠬᠡᠷᠡᠭ ᠦᠭᠡᠢ ᠠᠮᠤᠷ ᠰᠤᠯᠠ ᠵᠢᠷᠭᠠᠬᠤ ᠲᠤᠯᠠ ᠪᠠᠰᠠ ᠤᠳᠠᠯ ᠦᠭᠡᠢ ᠵᠤᠨ ᠪᠣᠯᠵᠤ ᠢᠷᠡᠭᠰᠡᠨᠡ ᠂ ᠵᠡᠭᠦᠨ ᠬᠡᠷᠡᠢᠳ ᠦ᠋ᠨ ᠲᠡᠷᠡ ᠤᠯᠠᠭᠠᠨ ᠥᠩᠭᠡ ᠵᠥᠭᠡᠯᠡᠨ ᠭᠡᠳᠡᠰᠦᠲᠦ ᠬᠥᠭᠡᠷᠦᠬᠦᠢ ᠬᠡᠦᠬᠡᠨ ᠰᠣᠯᠤᠩᠭᠤᠸᠠ ᠪᠠᠰᠠ ᠬᠦ᠌ ᠰᠡᠷᠢᠭᠦᠨ ᠰᠢᠭᠤᠢ ᠶ᠋ᠢᠨ ᠲᠤᠩᠭᠠᠯᠠᠭ ᠪᠤᠯᠠᠭ ᠤ᠋ᠨ ᠬᠥᠬᠡ ᠵᠦᠯᠭᠡ ᠳ᠋ᠦ᠍ᠷ ᠠᠯᠬᠤᠯᠠᠵᠤ ᠂ ᠬᠠᠰ ᠤ᠋ᠨ ᠵᠢᠰᠦ ᠪᠡᠨ ᠣᠰᠤᠨᠠ ᠦᠵᠡᠵᠦ ᠠᠯᠲᠠᠨ ᠭᠤᠷᠭᠤᠤᠯᠳᠠᠢ ᠶ᠋ᠢᠨ ᠡᠭᠡᠰᠢᠭ ᠢ᠋ ᠴᠢᠩᠨᠠᠭᠰᠠᠭᠠᠷ ᠪᠠᠰᠠ ᠲᠡᠷᠡ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠨᠠᠢᠷᠠᠮᠳᠠᠭᠤ ᠰᠠᠢᠬᠠᠨ ᠲᠥᠷᠥᠭᠰᠡᠨ ᠠᠯᠲᠠᠨᠱᠠᠭᠠ ᠶ᠋ᠢ ᠮᠥᠷᠥᠭᠡᠳᠴᠦ ᠤᠰᠤᠨ ᠤ᠋ ᠢᠷᠮᠡᠭ ᠲᠣᠷ ᠬᠡᠪᠲᠡᠭᠡ ᠤᠷᠭᠤᠭᠰᠠᠨ ᠪᠤᠷᠭᠠᠰᠤ ᠮᠣᠲᠣᠨᠠ ᠡᠯᠢᠭᠡᠳᠡᠵᠦ ᠂ ᠲᠤᠩᠭᠠᠯᠠᠭ ᠣᠰᠤᠨᠠ ᠥᠩᠭᠡᠢᠵᠦ ᠬᠥᠷᠥᠭ ᠳᠦᠷᠰᠦ ᠪᠡᠨ ᠣᠰᠤᠨᠠ ᠦᠵᠡᠪᠡᠰᠦ ᠂ ᠨᠣᠭᠣᠭᠠᠨ ᠣᠢ ᠶ᠋ᠢᠨ ᠪᠢᠳᠦᠷᠶᠡ ᠶ᠋ᠢᠨ ᠲᠤᠶᠠᠭᠠ ᠳ᠋ᠤᠷ ᠴᠠᠭᠠᠨ ᠬᠠᠰ ᠤ᠋ᠨ ᠬᠤᠪᠢᠯᠭᠠᠨ ᠥᠬᠢᠨ ᠡᠷᠡᠦ ᠪᠡᠨ ᠲᠤᠯᠵᠤ ᠵᠣᠭᠰᠣᠭᠠᠳ ᠬᠥᠬᠡ ᠤᠨᠢᠶᠠᠷ ᠤ᠋ᠨ ᠮᠤᠷᠤᠢ ᠬᠥᠮᠥᠰᠬᠡ ᠳ᠋ᠦ᠍ᠷ ᠳᠠᠭᠠᠵᠤ ᠢᠯᠠᠰᠢ ᠦᠭᠡᠢ ᠵᠣᠪᠠᠯᠠᠩ ᠢ᠋ ᠣᠨᠢᠰᠤᠯᠠᠨ ᠂ ᠰᠢᠯ ᠪᠣᠯᠣᠷ ᠤ᠋ᠨ ᠨᠠᠢᠷᠠᠮᠳᠠᠭᠤ ᠲᠤᠩᠭᠠᠯᠠᠭ ᠬᠣᠶᠠᠷ ᠨᠢᠳᠦᠨᠡ ᠂ ᠤᠮᠠᠷᠲᠠᠵᠤ ᠴᠢᠳᠠᠰᠢ ᠦᠭᠡᠢ ᠨᠠᠢᠷ ᠰᠡᠳᠬᠢᠯᠭᠡ ᠶ᠋ᠢ ᠠᠬᠤᠭᠤᠯᠵᠤ ᠂ ᠯᠢᠩᠬ᠍ᠦᠠ ᠶ᠋ᠢᠨ ᠦᠨᠳᠦᠰᠦᠨ ᠮᠡᠲᠦ ᠰᠣᠭᠳᠠᠮ ᠭᠠᠷ ᠭᠬᠢᠪ ᠦ᠋ᠨ ᠬᠠᠨᠴᠤ ᠠ᠋ᠴᠠ ᠬᠠᠭᠠᠰ ᠭᠠᠷᠴᠤ ᠪᠤᠷᠭᠠᠰᠤᠨ ᠤ᠋ ᠨᠠᠢᠯᠵᠠᠭᠤᠷ ᠤ᠋ᠨ ᠠᠳᠠᠯᠢ ᠬᠢᠩᠭᠠᠯᠬᠠᠨ ᠪᠡᠶᠡ ᠂ ᠬᠥᠬᠡᠮᠳᠦᠭ ᠰᠡᠭᠦᠳᠡᠷ ᠲᠣᠷ ᠤᠢᠳᠤᠨ ᠭᠡᠩᠭᠡᠷᠡᠵᠦᠬᠦᠢ ᠃ ᠡᠨᠡ ᠪᠡᠶᠡ ᠪᠠᠰᠠ ᠬᠣᠷᠢ ᠭᠠᠷᠴᠤ ᠡᠪᠴᠢᠭᠦᠨ ᠳ᠋ᠦ᠍ᠷ ᠪᠠᠰᠠ ᠮᠥᠷᠥᠭᠡᠳᠦᠯ ᠭᠡᠩᠭᠡᠷᠡᠯ ᠢ᠋ ᠡᠪᠦᠷᠯᠡᠨ ᠂ ᠠᠯᠭᠤᠷ ᠡᠰᠬᠢᠷᠦᠨ ᠂ ᠠᠯᠲᠠᠨᠱᠠᠭᠠ ᠶ᠋ᠢᠨ ᠠᠭᠠᠰᠢ ᠳᠦᠷᠢ ᠶ᠋ᠢ ᠪᠣᠳᠣᠭᠰᠠᠭᠠᠷ ᠰᠠᠨᠠᠮᠰᠠᠷ ᠦᠭᠡᠢ ᠲᠡᠭᠦᠨ ᠦ᠌ ᠰᠠᠯᠬᠤ ᠦᠶᠡ ᠳ᠋ᠦ᠍ᠷ ᠰᠠᠢᠬᠠᠨ ᠬᠥᠮᠥᠰᠬᠡ ᠪᠡᠨ ᠠᠲᠤᠷᠢᠭᠤᠯᠵᠤ ᠂ ᠰᠠᠯᠤᠨ ᠲᠦᠪᠳᠡᠬᠦ ᠦᠭᠡᠢ ᠪᠠᠢᠳᠠᠯ ᠢ᠋ ᠰᠠᠨᠠᠭᠠᠯᠵᠠᠵᠤ ᠂ ᠪᠠᠰᠠ ᠭᠡᠨᠡᠳᠲᠡ ᠲᠡᠭᠦᠨ ᠦ᠌ ᠡᠨᠡ ᠨᠠᠰᠤᠨ ᠳ᠋ᠤᠷ ᠡᠭᠡᠴᠢ ᠴᠢᠮᠠᠴᠠ ᠥᠪᠡᠷᠡ ᠬᠣᠯᠪᠣᠭᠠᠨ ᠢ᠋ ᠡᠷᠢᠪᠡᠰᠦ ᠡᠨᠡ ᠰᠤᠮᠤ ᠮᠡᠲᠦ ᠪᠣᠯᠰᠤᠭᠠᠢ ᠬᠡᠮᠡᠬᠦ ᠦᠶᠡ ᠳ᠋ᠦ᠍ᠷ ᠬᠦᠷᠦᠭᠡᠳ ᠬᠣᠶᠠᠷ ᠨᠢᠳᠦᠨ ᠦ᠌ ᠨᠢᠯᠪᠤᠰᠤᠨ ᠰᠣᠯᠢᠯᠴᠠᠯᠳᠤᠨ ᠤᠨᠠᠵᠤ ᠢᠷᠡᠭᠡᠳ ᠬᠥᠮᠦᠨ ᠦᠭᠡᠢ ᠰᠡᠯᠡᠭᠦᠨ ᠭᠠᠵᠠᠷᠠ ᠰᠢᠭᠤᠳ ᠱᠣᠭᠰᠢᠨ ᠤᠬᠢᠯᠠᠬᠤᠢ ᠳ᠋ᠤᠷ ᠬᠦᠷᠪᠡ ᠃
ᠠᠶᠠ ᠶᠠᠭᠤᠲᠠᠢ ᠪᠡᠷᠬᠡ ᠥᠬᠢᠳ ᠬᠡᠦᠬᠡᠳ ᠦ᠋ᠨ ᠤᠯᠠᠭᠠᠨ ᠴᠢᠰᠤᠲᠤ ᠰᠡᠳᠬᠢᠯ ᠠᠵᠢ ?
ᠠᠪᠠᠢ ᠬᠡᠷᠬᠢᠬᠦ ᠪᠣᠯᠬᠤᠯᠠ ᠵᠥᠭᠡᠯᠡᠨ ᠨᠡᠮᠡᠭᠦᠨ ᠦ᠌ ᠬᠠᠯᠠᠭᠤᠨ ᠠᠮᠠᠷᠠᠭ ᠰᠠᠨᠠᠭᠠᠨ ᠬᠦᠷᠬᠦ ᠪᠣᠯᠪᠠ !
ᠬᠡᠮᠡᠭᠰᠡᠨᠴᠢᠯᠡᠨ᠂ ᠬᠥᠭᠡᠷᠦᠬᠦᠢ ᠨᠢᠭᠡᠨ ᠨᠠᠬᠢᠯᠤᠨ ᠤᠬᠢᠯᠠᠬᠤ ᠰᠠᠢᠬᠠᠨ ᠥᠬᠢᠨ᠂ ᠭᠦᠨ ᠰᠢᠭᠤᠢ᠂ ᠮᠣᠳᠣᠨ ᠤ᠋ ᠳᠠᠯᠳᠠ ᠨᠢᠭᠤᠵᠤ ᠤᠬᠢᠯᠠᠨ ᠪᠦᠲᠡᠵᠦ ᠬᠠᠬᠠᠬᠤᠢ ᠳ᠋ᠤᠷ ᠬᠡᠨ ᠢᠨᠦ ᠦᠷᠦ ᠦᠯᠦ ᠡᠪᠡᠳᠦᠮᠦᠢ ᠶᠠ ! ᠲᠡᠭᠦᠨᠴᠡ ᠰᠣᠯᠤᠩᠭᠤᠸᠠ ᠡᠢᠨ ᠭᠡᠮᠡᠨ ᠬᠡᠩᠰᠢᠨ ᠤᠬᠢᠯᠠᠷᠤᠨ ᠂ ᠲᠡᠭᠦᠨ ᠦ᠌ ᠦᠭᠡᠰ ᠢᠨᠦ ᠄
ᠠᠯᠲᠠᠨ ᠬᠥᠪᠡᠭᠦᠨ ᠠᠯᠢ ᠲᠥᠷᠥᠯ ᠳ᠋ᠦ᠍ᠷ
ᠠᠪᠠᠬᠠᠢ ᠨᠠᠳᠠ ᠳ᠋ᠤᠷ ᠬᠤᠪᠢ ᠪᠠᠢᠬᠤ ᠪᠣᠯᠪᠠ ?
ᠠᠮᠠᠷᠠᠭ ᠰᠡᠳᠬᠢᠯ ᠭᠦᠨ ᠨᠠᠢᠷ ᠲᠤᠷ
ᠠᠪᠠᠬᠠᠢ ᠪᠡᠶᠡ ᠬᠦᠯᠢᠶᠡᠭᠰᠡᠭᠡᠷ ᠬᠥᠭᠰᠢᠷᠡᠬᠦ ᠰᠢᠬᠠᠪᠠ ᠃
ᠠᠯᠭᠠᠰᠠᠯᠰᠢ ᠦᠭᠡᠢ ᠪᠡᠷ ᠰᠠᠨᠠᠭᠰᠠᠭᠠᠷ ᠪᠢ
ᠠᠪᠠᠬᠠᠢ ᠪᠡᠶᠡ ᠪᠡᠨ ᠭᠡᠭᠡᠵᠦ ᠤᠷᠭᠢᠰᠤᠭᠠᠢ ᠃
ᠠᠮᠢᠳᠤ ᠪᠡᠶᠡ ᠦᠬᠦᠪᠡᠴᠦ ᠰᠡᠳᠬᠢᠯ ᠦᠯᠦ ᠴᠥᠬᠥᠷᠡᠮᠦᠢ
ᠠᠪᠠᠬᠠᠢ ᠮᠢᠨᠦ ᠶᠠᠰᠤ ᠴᠠᠢᠪᠠᠴᠤ ᠪᠠᠷ
ᠠᠮᠠ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠦᠯᠦ ᠬᠠᠯᠠᠮᠤᠢ
ᠠᠶᠠ ᠮᠢᠨᠦ ᠳᠣᠲᠣᠷᠠ ᠲᠡᠰᠬᠦᠶᠡ ᠪᠡᠷᠬᠡ ᠠᠮᠤᠢ ᠃
ᠠᠪᠤᠭᠠᠢ ᠴᠢ ᠶᠠᠭᠠᠬᠢᠨ ᠬᠠᠷᠠᠲᠠᠢ ᠪᠣᠢ ?
ᠠᠮᠤᠷ ᠵᠢᠷᠭᠠᠯ ᠤ᠋ᠨ ᠮᠠᠩᠯᠠᠢ ᠶ᠋ᠢ ᠡᠳ᠋ᠯᠡᠵᠦ ᠰᠠᠭᠤᠭᠠᠳ ᠴᠢ
ᠠᠮ ᠬᠢᠯᠳᠦ ① ᠥᠬᠢᠨ ᠪᠡᠶᠡ ᠶ᠋ᠢ ᠮᠢᠨᠦ
ᠠᠷᠤ ᠶ᠋ᠢᠨ ᠬᠣᠢᠨᠠ ᠪᠠᠨ ᠣᠷᠬᠢᠭ᠍ᠰᠠᠨ ᠪᠣᠢ ᠶᠠ ᠴᠢ
ᠠᠶᠤᠤᠯᠢᠬᠠᠢ ᠮᠢᠨᠦ ᠳᠡᠯᠪᠡᠷᠡᠬᠦ ᠰᠢᠬᠠᠪᠠ ᠪᠢ !
ᠠᠯᠢ ᠡᠳᠦᠷ ᠦᠬᠦᠵᠦ ᠡᠴᠢᠶᠡ ᠪᠢ
ᠭᠡᠮᠡᠨ ᠪᠤᠷᠭᠠᠰᠤᠨ ᠤ᠋ ᠮᠣᠲᠣᠨᠠ ᠡᠯᠢᠭᠡᠳᠡᠨ ᠬᠡᠪᠲᠡᠵᠦ ᠭᠡᠩᠬᠡᠷᠡᠨ᠂ ᠪᠤᠯᠠᠭ ᠤ᠋ᠨ ᠤᠷᠤᠰᠬᠠᠯ ᠳ᠋ᠤᠷ ᠨᠢᠯᠪᠤᠰᠤᠨ ᠢ᠋ᠶ᠋ᠠᠷ ᠨᠡᠮᠡᠷᠢᠯᠡᠵᠦ᠂ ᠪᠣᠳᠣᠨ ᠪᠣᠳᠣᠨ ᠪᠤᠷᠬᠢᠷᠠᠨ ᠤᠶᠠᠷᠠᠵᠤ ᠤᠬᠢᠯᠠᠭᠠᠳ ᠪᠣᠮᠪᠣᠷᠳᠠᠬᠤ ᠨᠢᠯᠪᠤᠰᠤ ᠳ᠋ᠤᠷ ᠡᠩᠭᠡᠷ ᠡᠪᠴᠢᠭᠦᠦ ᠨᠣᠷᠪᠠᠢ᠃
– – – –
① ᠠᠮ ᠬᠢᠯᠳᠦ－ᠬᠡᠯᠡ ᠦᠭᠡᠢ ᠬᠥᠮᠦᠨ᠃
ᠲᠡᠳᠦᠢ ᠬᠠᠷᠠᠬᠠᠨ ᠭᠡᠩᠭᠡᠷᠡᠨ ᠣᠷᠢᠳᠬᠠᠷᠯᠠᠵᠤ ᠨᠢᠯᠪᠤᠰᠤᠨ ᠤᠨᠠᠭᠠᠬᠤᠶᠠ᠂ ᠳᠠᠭᠠᠭᠰᠠᠨ ᠢᠨᠵᠢ ᠳᠠᠭᠠᠯᠲᠠ ᠪᠠᠷ ᠡᠷᠢᠨ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠶᠠᠭᠠᠷᠠᠨ ᠪᠤᠷᠤᠭᠤ ᠬᠠᠨᠳᠤᠵᠤ᠂ ᠪᠤᠯᠠᠭ ᠤ᠋ᠨ ᠤᠰᠤᠨ ᠢ᠋ᠶ᠋ᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠵᠤ ᠰᠠᠭᠤᠪᠠᠢ᠃ ᠳᠠᠭᠠᠯᠲᠠ ᠥᠬᠢᠳ ᠮᠡᠳᠡᠭᠦᠯᠦᠷᠦᠨ:《ᠬᠠᠭᠤᠴᠢᠨ ᠠᠨᠳᠠ ᠲᠦᠰᠢᠮᠡᠯ ᠠᠨᠳᠠ ᠂ ᠬᠣᠷᠣᠭᠠ ᠂ ᠺᠠᠯᠪᠠ ᠂ ᠫᠣᠯᠭᠤᠳᠠᠢ ᠳᠥᠷᠪᠡᠭᠦᠯᠡ ᠭᠦᠩᠵᠦ ᠠᠪᠠᠬᠠᠢ ᠳ᠋ᠤᠷ ᠵᠣᠯᠭᠠᠰᠤᠭᠠᠢ ᠭᠡᠮᠡᠨ ᠬᠦᠯᠢᠶᠡᠵᠦᠬᠦᠢ᠂ ᠮᠡᠳᠡᠭᠦᠯᠬᠦ ᠴᠢᠬᠤᠯᠠ ᠬᠡᠷᠡᠭ ᠪᠣᠢ ᠬᠡᠮᠡᠮᠦᠢ᠃》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠭᠠᠢᠬᠠᠵᠤ ᠲᠡᠷᠢᠭᠦᠨ ᠨᠢᠭᠤᠷ ᠢ᠋ᠶ᠋ᠠᠨ ᠰᠢᠨᠡᠳᠬᠡᠵᠦ᠂ ᠳᠡᠳ᠋ ᠴᠠᠴᠠᠷ ᠭᠡᠷ ᠲᠦ᠍ᠷ ᠭᠠᠷᠴᠤ ᠵᠣᠯᠭᠠᠪᠠᠰᠤ᠂ ᠲᠡᠳᠡ ᠳᠥᠷᠪᠡᠭᠦᠯᠡ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ:《ᠮᠠᠨ ᠤ᠋ ᠪᠠᠭᠠ ᠸᠠᠩ ᠡᠵᠡᠨ ᠣᠨᠴᠠ ᠪᠸᠲ᠋ᠠ᠋ ᠤᠯᠤᠰ ᠢ᠋ ᠪᠠᠢᠯᠳᠤᠮᠤᠢ ᠭᠡᠮᠡᠨ ᠨᠢᠭᠡᠨᠲᠡ ᠪᠡᠯᠡᠳᠬᠡᠵᠦᠬᠦᠢ᠃ ᠡᠨᠡ ᠢᠯᠵᠠᠷᠠᠰᠢ ᠦᠭᠡᠢ ᠶᠠᠩᠰᠢᠶᠠ ᠬᠡᠯᠡᠲᠦ ᠵᠠᠮᠤᠬᠠ ᠪᠣᠭᠣᠯ ᠶᠠᠪᠠᠷᠲᠠᠵᠤ ᠶᠠᠪᠤᠭᠰᠠᠭᠠᠷ ᠬᠡᠳᠦ ᠬᠡᠳᠦᠨ ᠤᠯᠤᠰ ᠤ᠋ᠨ ᠦᠨᠡᠰᠦᠨ ᠢ᠋ ᠢᠨᠦ ᠬᠡᠢᠰᠬᠡᠵᠦ ᠡᠭᠡᠵᠦ ᠢᠷᠡᠭᠡᠳ ᠶᠠᠭᠠᠬᠢᠨ ᠶᠠᠭᠠᠬᠢᠨ ᠬᠡᠯᠡᠭᠰᠡᠭᠡᠷ ᠪᠠᠰᠠ ᠶᠠᠷᠰᠢᠭ᠋ ᠳᠡᠭᠳᠡᠭᠡᠨ᠂ ᠪᠸᠲ᠋ᠠ᠋ ᠤᠯᠤᠰ ᠯᠤᠭᠠ ᠰᠢᠭᠤᠳ ᠬᠠᠯᠳᠠᠵᠤ ᠪᠠᠢᠯᠳᠤᠷᠠ ᠡᠴᠢᠬᠦ ᠪᠡᠷ ᠲᠣᠭᠲᠠᠪᠠ᠃ ᠡᠨᠡ ᠬᠡᠷᠡᠭ ᠬᠡᠷᠬᠢᠪᠡᠴᠦ ᠪᠣᠯᠬᠤ ᠬᠡᠷᠡᠭ ᠪᠤᠰᠤ᠂ ᠮᠠᠨ ᠳ᠋ᠤᠷ ᠥᠴᠦᠬᠡᠨ ᠴᠦ᠍ ᠶᠣᠰᠣ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ ᠂ ᠬᠡᠳᠦᠢ ᠪᠠᠢᠯᠳᠤᠪᠠᠴᠤ ᠪᠸᠲ᠋ᠠ᠋ ᠤᠯᠤᠰ ᠢ᠋ ᠲᠠᠢᠯᠵᠤ ᠪᠣᠯᠬᠤ ᠬᠠᠤᠯᠢ ᠦᠭᠡᠢ ᠂ ᠪᠸᠲ᠋ᠠ᠋ ᠤᠯᠤᠰ ᠬᠢᠵᠠᠭᠠᠷ ᠤᠯᠤᠰ ᠢ᠋ ᠴᠥᠮ ᠪᠠᠢᠯᠳᠤᠨ ᠣᠷᠣᠭᠤᠯᠵᠤ ᠠᠪᠬᠤ ᠪᠥᠭᠡᠳ ᠮᠠᠨ ᠤ᠋ ᠤᠯᠤᠰ ᠢ᠋ ᠦᠯᠦ ᠬᠠᠯᠳᠠᠬᠤ ᠠᠨᠤ ᠲᠡᠷᠡ ᠪᠠᠰᠠ ᠮᠠᠨ ᠢ᠋ ᠬᠠᠭᠤᠴᠢᠨ ᠨᠠᠢᠷᠲᠤ ᠤᠯᠤᠰ ᠭᠡᠮᠡᠨ ᠲᠡᠢᠨ ᠬᠦ᠌ ᠦᠵᠡᠵᠦ ᠦᠯᠦ ᠬᠠᠯᠳᠠᠬᠤ ᠪᠣᠯᠠᠢ᠃ ᠡᠨᠡ ᠳᠠᠷᠤᠢ ᠮᠠᠨ ᠳ᠋ᠤᠷ ᠪᠠᠷᠠᠰᠢ ᠦᠭᠡᠢ ᠬᠡᠰᠢᠭ ᠪᠥᠭᠡᠲᠡᠯᠡ ᠪᠢᠳᠡ ᠭᠡᠳᠡᠷᠭᠦ ᠬᠥᠮᠦᠨ ᠯᠦ᠍ᠭᠡ ᠬᠡᠷᠬᠢᠨ ᠬᠠᠯᠳᠠᠵᠤ ᠪᠣᠯᠬᠤ ? ᠡᠨᠡ ᠦᠶᠡ ᠶ᠋ᠢᠨ ᠰᠢᠨᠡ ᠡᠷᠭᠦᠮᠵᠢᠯᠡᠭᠰᠡᠨ ᠲᠦᠰᠢᠮᠡᠳ ᠨᠢᠭᠡᠨ ᠳ᠋ᠦ᠍ᠷ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠮᠠᠨ ᠳ᠋ᠤᠷ ᠭᠦᠨ ᠠᠴᠢ ᠲᠠᠢ ᠶ᠋ᠢ ᠮᠡᠳᠡᠬᠦ ᠦᠭᠡᠢ᠂ ᠬᠣᠶᠠᠷ ᠲᠤᠷ ᠡᠨᠡ ᠬᠣᠶᠠᠷ ᠵᠢᠯ ᠦ᠋ᠨ ᠡᠯᠡᠰᠡᠭᠰᠡᠨ ᠴᠡᠷᠢᠭ ᠲᠦ᠍ᠷ ᠢ᠋ᠶ᠋ᠠᠨ ᠨᠢᠭᠡᠮᠦᠰᠦᠨ ᠡᠷᠡᠮᠰᠢᠵᠦ ᠣᠮᠣᠷᠬᠠᠭᠯᠠᠨ ᠪᠠᠷᠳᠠᠩ ᠰᠠᠨᠠᠮᠤᠢ᠃ ᠲᠡᠳᠡ ᠶᠠᠭᠤᠨᠠᠢ ᠪᠢᠳᠡᠨ ᠦ᠌ ᠤᠯᠤᠰ ᠤ᠋ᠨ ᠭᠦᠨ ᠬᠣᠯᠠ ᠶ᠋ᠢ ᠪᠣᠳᠣᠬᠤ ᠪᠣᠢ ! ᠵᠢᠴᠢ ᠭᠠᠳᠠᠨᠠ ᠠ᠋ᠴᠠ ᠢᠷᠡᠭᠰᠡᠨ ᠲᠡᠳᠡᠭᠡᠷ < ᠴᠠᠩ ᠳ᠋ᠤᠷ ᠴᠠᠮ ᠂ ᠬᠡᠩᠭᠡᠷᠭᠡ ᠳ᠋ᠦ᠍ᠷ ᠭᠡᠮ > ᠭᠡᠬᠦ ᠥᠴᠦᠬᠡᠨ ᠠᠢᠮᠠᠭ ᠤ᠋ᠳ ᠶᠠᠭᠤᠨᠠᠢ ᠮᠠᠨ ᠳ᠋ᠤᠷ ᠦᠬᠦᠨ ᠵᠢᠳᠬᠦᠬᠦ ᠠᠵᠢ ! ᠪᠸᠲ᠋ᠠ᠋ ᠤᠯᠤᠰ ᠢ᠋ ᠬᠠᠯᠳᠠᠨ ᠬᠠᠯᠳᠠᠭᠰᠠᠭᠠᠷ ᠬᠠᠢᠷᠠᠬᠠᠨ ᠮᠠᠨ ᠤ᠋ ᠬᠡᠷᠡᠢᠳ ᠬᠠᠭᠠ ᠬᠡᠮᠬᠡ ᠡᠴᠢᠬᠦ ᠪᠣᠯᠠᠢ ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠬᠠᠭᠠᠨ ᠡᠵᠡᠨ ᠡᠴᠡ ᠳᠠᠯᠳᠠᠭᠤᠷ ᠭᠦᠩᠵᠦ ᠠᠪᠠᠬᠠᠢ ᠳ᠋ᠤᠷ ᠮᠡᠳᠡᠭᠦᠯᠵᠦ᠂ ᠬᠠᠭᠠᠨ ᠢ᠋ ᠬᠣᠷᠢᠭ᠍ᠯᠠᠵᠤ ᠂ ᠬᠠᠷᠠᠳᠠᠨ ᠲᠡᠢᠨ ᠢ᠋ ᠦᠯᠦ ᠡᠳᠦᠭᠦᠯᠦᠮᠦ ᠬᠡᠮᠡᠮᠦᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠡᠷᠭᠦᠯᠡᠩ ᠭᠦᠩᠵᠦ ᠰᠣᠯᠤᠩᠭᠤᠸᠠ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ᠂ ᠳᠥᠷᠪᠡᠨ ᠲᠦᠰᠢᠮᠡᠯ ᠢ᠋ ᠪᠣᠰᠬᠠᠵᠤ ᠥᠭᠦᠯᠡᠷᠦᠨ :《ᠬᠠᠭᠠᠨ ᠡᠴᠢᠭᠡ ᠭᠡᠨᠡᠳᠲᠡ ᠪᠠᠢᠭᠰᠠᠭᠠᠷ ᠪᠠᠰᠠ ᠶᠠᠭᠤᠨ ᠳ᠋ᠤᠷ ᠡᠢᠮᠦ ᠰᠠᠨᠠᠭᠠᠨ ᠣᠷᠣᠪᠠ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠠᠨᠳᠤ ᠮᠡᠳᠡᠭᠦᠯᠦᠷᠦᠨ :《ᠬᠠᠮᠤᠭ ᠡᠨᠡ ᠦᠶᠡ ᠶ᠋ᠢᠨ ᠰᠢᠨᠡ ᠲᠠᠢᠰᠢ ᠭᠦᠷᠡᠯᠵᠡᠭᠡᠨᠡ ᠶ᠋ᠢᠨ ᠦᠭᠡᠨ ᠳ᠋ᠦ᠍ᠷ ᠡᠢᠮᠦ ᠪᠣᠯᠪᠠ ᠃ ᠤᠭ ᠠᠷᠭᠠ ᠴᠥᠮ ᠵᠠᠮᠤᠬᠠ ᠪᠣᠭᠣᠯ ᠠ᠋ᠴᠠ ᠭᠠᠷᠤᠭᠰᠠᠨ ᠬᠡᠷᠡᠭ ᠪᠣᠯᠠᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠭᠤᠨᠢᠶᠠᠵᠤ ᠥᠭᠦᠯᠡᠷᠦᠨ:《ᠴᠣᠬᠣᠮ ᠳ᠋ᠤᠷ ᠬᠡᠦᠬᠡᠨ ᠬᠥᠮᠦᠨ ᠨᠠᠳᠠ ᠳ᠋ᠤᠷ ᠬᠠᠷᠢᠶᠠ ᠦᠭᠡᠢ ᠪᠣᠯᠠᠢ ᠂ ᠬᠡᠳᠦᠢ ᠲᠡᠢᠮᠦ ᠪᠣᠯᠪᠠᠴᠤ ᠬᠥᠭᠰᠢᠨ ᠡᠴᠢᠭᠡ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠲᠥᠯᠥᠭᠡ ᠡᠰᠡ ᠪᠣᠳᠣᠪᠠᠰᠤ ᠪᠠᠰᠠ ᠪᠣᠯᠬᠤ ᠦᠭᠡᠢ᠃ ᠪᠢ ᠠᠯᠭᠤᠷ ᠪᠠᠢᠵᠤ᠂ ᠨᠢᠭᠡᠨ ᠪᠠᠢᠳᠠᠯ ᠢ᠋ ᠦᠵᠡᠵᠦ ᠬᠣᠷᠢᠭ᠍ᠯᠠᠨ ᠬᠡᠯᠡᠰᠦᠭᠡᠢ᠂ ᠲᠡᠷᠡ ᠴᠠᠭ ᠲᠤᠷ ᠲᠠ ᠳᠥᠷᠪᠡᠭᠦᠯᠡ ᠮᠥᠨ ᠨᠠᠳᠠ ᠳ᠋ᠤᠷ ᠪᠠᠬᠠᠨ ᠲᠤᠰᠠᠯᠠᠲᠤᠭᠠᠢ 》ᠬᠡᠮᠡᠪᠡᠢ᠃ ᠡᠨᠡ ᠬᠡᠷᠡᠢᠳ ᠦ᠋ᠨ ᠸᠠᠩ ᠬᠠᠭᠠᠨ ᠲᠤᠭᠤᠷᠢᠯ ᠪᠠᠰᠠ ᠬᠡᠷᠬᠢᠨ ᠪᠸᠲ᠋ᠠ᠋ ᠤᠯᠤᠰ ᠯᠤᠭᠠ ᠲᠡᠢᠨ ᠳᠡᠭᠳᠡᠭᠡᠬᠦᠢ ᠶ᠋ᠢ ᠡᠭᠦᠰᠬᠡᠪᠡ ? ᠬᠡᠮᠡᠪᠡᠰᠦ : ᠦᠭᠡ ᠶ᠋ᠢ ᠪᠠᠰᠠ ᠬᠣᠢᠰᠢ ᠬᠡᠳᠦᠨ ᠵᠢᠯ ᠡᠭᠡᠭᠦᠯᠵᠦ ᠂ ᠾᠧ ᠸᠠᠩ ᠤ᠋ᠨ ᠬᠠᠭᠠᠨ ᠰᠠᠭᠤᠭᠰᠠᠨ ᠠ᠋ᠴᠠ ᠡᠬᠢᠯᠡᠨ ᠬᠡᠯᠡᠰᠦᠭᠡᠢ᠃
ᠲᠡᠷᠡ ᠵᠢᠯ ᠢᠯᠠᠭᠤ ᠂ ᠵᠠᠮᠤᠬᠠ ᠬᠠᠲᠠᠭᠤ ᠵᠥᠭᠡᠯᠡᠨ ᠵᠢᠷᠭᠤᠭᠠᠨ ᠵᠦᠢᠯ ᠦ᠋ᠨ ᠵᠢᠭ᠍ᠰᠠᠭᠠᠯ ᠪᠡᠯᠡᠳᠴᠦ ᠲᠠᠢᠽᠦ ᠶ᠋ᠢ ᠭᠡᠨᠡᠳᠡᠭᠦᠯᠰᠦᠭᠡᠢ ᠬᠡᠮᠡᠭᠰᠡᠭᠡᠷ ᠭᠡᠳᠡᠷᠭᠦ ᠬᠠᠷᠢᠨ ᠾᠧ ᠸᠠᠩ ᠢ᠋ᠶ᠋ᠠᠨ ᠪᠠᠷᠢᠭ᠍ᠳᠠᠨ ᠠᠪᠠᠴᠢᠭ᠍ᠳᠠᠭᠠᠳ ᠬᠠᠷᠭᠢᠰ ᠲᠦᠰᠢᠮᠡᠯ ᠵᠠᠮᠤᠬᠠ ᠶ᠋ᠢᠨ ᠦᠭᠡ ᠳ᠋ᠦ᠍ᠷ ᠣᠷᠣᠵᠤ᠂ ᠰᠥᠷᠬᠦ ᠬᠥᠪᠡᠭᠦᠨ ᠢᠯᠠᠭᠤ ᠡᠴᠢᠭᠡ ᠶ᠋ᠢᠨ ᠰᠠᠭᠤᠷᠢᠨ ᠢ᠋ ᠪᠤᠯᠢᠶᠠᠨ ᠸᠠᠩ ᠪᠣᠯᠤᠭᠠᠳ ᠭᠡᠨᠡᠳᠲᠡ ᠡᠴᠢᠭᠡ ᠢᠨᠦ ᠾᠧ ᠸᠠᠩ ᠠᠯᠠᠭᠳᠠᠭᠰᠠᠨ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠨ᠂ ᠠᠳᠠᠪᠠᠰᠢ ᠣᠯᠵᠠ ᠣᠮᠣᠭ ᠲᠠᠢ ᠪᠠᠷ ᠡᠭᠡᠵᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠢᠯᠠᠭᠤ ᠨᠠᠷ ᠠᠮᠲᠠ ᠰᠢᠮᠳᠠ ᠠᠯᠳᠠᠷᠠᠵᠤ᠂ ᠠᠷᠭᠠ ᠦᠭᠡᠢ ᠡᠴᠢᠭᠡ ᠪᠡᠨ ᠸᠠᠩ ᠬᠠᠭᠠᠨ ᠭᠡᠮᠡᠨ ᠬᠡᠲᠦᠷᠬᠡᠢ ᠶᠡᠬᠡ ᠨᠡᠷᠡ ᠡᠷᠭᠦᠮᠵᠢᠯᠡᠵᠦ᠂ ᠬᠡᠮᠵᠢᠶᠡ ᠦᠭᠡᠢ ᠥᠩᠭᠡ ᠭᠡᠷᠡᠯ ᠭᠢᠯᠪᠠᠰᠤᠭᠤᠯᠤᠨ ᠭᠡᠷ ᠲᠡᠷᠭᠡ ᠪᠡᠨ ᠬᠢᠷᠢ ᠡᠴᠡ ᠪᠡᠨ ᠬᠡᠲᠦᠷᠡᠲᠡᠯᠡ ᠵᠠᠰᠠᠨ᠂ ᠭᠠᠷᠴᠤ ᠣᠷᠣᠬᠤ ᠳ᠋ᠠᠭᠠᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠶᠡᠬᠡ ᠵᠢᠭ᠍ᠰᠠᠭᠠᠯ ᠢ᠋ ᠵᠢᠭ᠍ᠰᠠᠭᠠᠵᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠬᠡᠪ ᠶᠠᠩᠵᠤ ᠶ᠋ᠢ ᠳᠠᠭᠤᠷᠢᠶᠠᠨ᠂ ᠡᠮᠦᠨᠡ ᠤᠯᠤᠰ ᠤ᠋ᠨ ᠨᠠᠷᠢᠨ ᠬᠥᠭᠵᠢᠮ ᠪᠠ ᠦᠵᠡᠮᠵᠢᠲᠦ ᠰᠠᠪᠠ ᠵᠡᠪᠰᠡᠭ ᠢ᠋ ᠶᠡᠬᠡᠳᠡ ᠵᠥᠭᠡᠭᠡᠵᠦ᠂ ᠲᠡᠷᠭᠡ ᠰᠡᠦᠬᠡ ᠶ᠋ᠢ ᠣᠯᠠᠨᠲᠠ ᠠᠪᠴᠢᠷᠠᠨ᠂ ᠪᠠᠰᠠ ᠰᠢᠷᠠ ᠥᠩᠭᠡᠲᠦ ᠲᠠᠵᠢ ᠮᠠᠩᠨᠤᠭ ᠲᠣᠷᠭᠠ ᠲᠥᠷᠭᠡ ᠶ᠋ᠢ ᠬᠡᠳᠦᠢᠴᠢᠨᠡᠭᠡᠨ ᠱᠠᠷ ᠠᠴᠢᠵᠤ ᠠᠴᠢᠷᠠᠭᠠᠳ ᠪᠦᠷᠢᠯᠭᠡᠵᠦ ᠴᠢᠮᠡᠭᠰᠡᠨ ᠳ᠋ᠦ᠍ᠷ ᠠᠷᠤ ᠭᠠᠵᠠᠷ ᠤ᠋ᠨ ᠪᠢᠴᠢᠬᠠᠨ ᠠᠢᠮᠠᠭ ᠤ᠋ᠨ ᠨᠢᠳᠦ ᠨᠡᠬᠡᠭᠡᠳᠦᠢ ᠪᠡᠯᠡᠩᠴᠢ ᠠᠷᠠᠳ ᠤ᠋ᠨ ᠨᠢᠳᠦᠨ ᠵᠡᠷᠭᠡᠯᠡᠵᠦ᠂ ᠰᠡᠳᠬᠢᠯ ᠬᠥᠳᠡᠯᠦᠭᠡᠳ ᠬᠣᠭᠣᠰᠣᠨ ᠥᠩᠭᠡ ᠳ᠋ᠦ᠍ᠷ ᠮᠡᠬᠡᠯᠡᠭᠳᠡᠨ᠂ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠠ᠋ᠴᠠ ᠥᠴᠦᠬᠡᠨ ᠠᠢᠮᠠᠭ ᠪᠢᠴᠢᠬᠠᠨ ᠪᠦᠯᠦᠭ ᠦ᠋ᠳ ᠪᠠ ᠭᠡᠭᠡᠭᠳᠡᠵᠦ ᠣᠷᠭᠢᠭ᠍ᠳᠠᠭᠰᠠᠨ ᠤᠯᠤᠰ ᠤ᠋ᠳ᠂ ᠢᠬᠢᠷ ᠰᠢᠬᠢᠷ ᠠᠢᠮᠠᠭ ᠤ᠋ᠳ᠂ ᠪᠤᠲᠠᠷᠠᠵᠤ ᠰᠠᠷᠨᠢᠭ᠍ᠰᠠᠨ ᠰᠦᠷᠦᠭ᠂ ᠪᠣᠰᠴᠤ ᠤᠷᠭᠤᠭᠰᠠᠨ ᠪᠠᠭ ᠤ᠋ᠳ ᠬᠡᠷᠡᠢᠳ ᠦ᠋ᠨ ᠬᠠᠭᠠᠨ ᠴᠣᠯᠠ ᠪᠠ ᠬᠣᠭᠣᠰᠣᠨ ᠨᠡᠷᠡ ᠶ᠋ᠢ ᠰᠣᠨᠣᠰᠴᠤ ᠪᠠᠰᠠ ᠲᠡᠭᠦᠨ ᠦ᠌ ᠬᠣᠮᠣᠭᠠᠢ ᠭᠡᠷᠡᠯ ᠬᠣᠭᠣᠰᠣᠨ ᠦᠭᠡ ᠶ᠋ᠢ ᠦᠵᠡᠭᠡᠳ ᠬᠤᠷᠠᠵᠤ ᠢᠷᠡᠨ ᠪᠢᠯᠳᠠᠤᠴᠢᠯᠠᠨ ᠳᠠᠭᠠᠭᠰᠠᠨ ᠠᠨᠤ ᠢᠯᠠᠭᠠ ᠪᠠᠲᠠᠭᠠᠨᠠ ᠮᠡᠲᠦ ᠣᠯᠠᠨ ᠪᠣᠯᠵᠤ᠂ ᠬᠡᠳᠦᠬᠡᠨ ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣ ᠰᠦᠷ ᠬᠦᠴᠦᠨ ᠨᠡᠯᠢᠶᠡᠳ ᠴᠢᠭᠢᠷᠠᠭ ᠪᠣᠯᠤᠭᠰᠠᠨ ᠳ᠋ᠤᠷ ᠢᠯᠠᠭᠤ ᠶ᠋ᠢᠨ ᠦᠮᠡᠬᠡᠢ ᠣᠮᠣᠭ ᠨᠡᠩᠳᠡ ᠨᠡᠮᠡᠭᠳᠡᠵᠦ᠂ ᠡᠳᠦᠷ ᠰᠥᠨᠢ ᠦᠭᠡᠢ ᠴᠡᠷᠢᠭ ᠴᠢᠭᠤᠯᠤᠭᠤᠯᠤᠨ ᠬᠤᠶᠠᠭ ᠡᠯᠰᠡᠵᠦ᠂ ᠡᠮᠦᠨᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠢᠲᠠᠳ ᠲᠦᠰᠢᠮᠡᠯ ᠦ᠋ᠨ ᠨᠡᠷᠡ ᠪᠡᠷ ᠲᠥᠬᠥᠭᠡ ᠲᠣᠮᠣᠭᠣ ᠦᠭᠡᠢ ᠪᠡᠷ ᠵᠡᠷᠭᠡ ᠲᠠᠯᠪᠢᠵᠤ᠂ ᠲᠦᠰᠢᠮᠡᠯ ᠡᠷᠭᠦᠮᠵᠢᠯᠡᠭᠰᠡᠨ ᠢᠨᠦ᠂ ᠥᠪᠡᠷ ᠦ᠋ᠨ ᠪᠡᠶᠡ ᠬᠤᠸᠠᠩ ᠲᠠᠢᠽᠢ᠂ ᠢ ᠰᠢᠨᠡ ᠸᠠᠩ ᠪᠥᠭᠡᠳ ᠪᠦᠭᠦᠳᠡ ᠴᠡᠷᠢᠭ ᠦ᠋ᠨ ᠳ᠋ᠦᠳᠦ᠋ ᠶᠤᠸᠠᠨᠱᠤᠸᠠᠢ᠂ ᠵᠠᠮᠤᠬᠠ ᠶ᠋ᠢ ᠪᠢᠴᠢᠭ ᠴᠡᠷᠢᠭ ᠢ᠋ ᠬᠠᠮᠲᠤᠳᠬᠠᠨ ᠵᠠᠬᠢᠷᠬᠤ – ᠭ᠍ᠡᠷᠪᠠᠰᠤ ᠶᠤᠸᠠᠨᠱᠤᠸᠠᠢ ᠂ ᠣᠷᠣᠪᠠᠰᠤ ᠴᠧᠩᠰᠢᠶᠠᠩ᠂ ᠬᠠᠳᠠᠮ ᠠᠪᠠᠭᠠ ᠲᠠᠲ᠋ᠠᠷ ᠠᠢᠮᠠᠭ ᠤ᠋ᠨ ᠭᠦᠷᠡᠯᠵᠡᠭᠡᠨᠡ ᠡᠪᠦᠭᠡᠨ ᠢ᠋ ᠤᠯᠤᠰ ᠭᠡᠷ ᠦ᠋ᠨ ᠬᠦᠨᠳᠦ ᠴᠢᠬᠤᠯᠠ ᠪᠠ ᠴᠡᠷᠢᠭ ᠢᠷᠭᠡᠨ ᠦ᠌ ᠬᠡᠷᠡᠭ ᠂ ᠰᠠᠩ ᠬᠥᠮᠥᠷᠭᠡ ᠪᠦᠭᠦᠳᠡᠭᠡᠷ ᠢ᠋ ᠨᠡᠢᠭᠡᠮᠯᠡᠨ ᠵᠠᠬᠢᠷᠬᠤ ᠂ ᠤᠯᠤᠰ ᠲᠤᠷ ᠪᠣᠯᠪᠠᠰᠤ ᠽᠠᠢᠰᠢᠶᠠᠩ ᠂ ᠴᠡᠷᠢᠭ ᠲᠦ᠍ᠷ ᠭ᠍ᠡᠷᠪᠡᠰᠤ ᠵᠢᠶᠦ᠋ᠨ ᠱᠢ ᠂ ᠪᠠᠰᠠ ᠲᠠᠲ᠋ᠠᠷ ᠠᠢᠮᠠᠭ ᠤ᠋ᠨ ᠲᠡᠮᠡᠯᠵᠢᠭᠡᠨᠡ ᠡᠪᠦᠭᠡᠨ ᠦ᠌ ᠬᠣᠶᠠᠷ ᠬᠥᠪᠡᠭᠦᠨ – ᠢᠯᠠᠭᠤ ᠶ᠋ᠢᠨ ᠡᠮᠡ ᠶ᠋ᠢᠨ ᠬᠣᠶᠠᠷ ᠳᠡᠭᠦᠦ ᠂ ᠨᠢᠭᠡᠨ ᠦ᠌ ᠨᠡᠷᠡ ᠣᠯᠢᠨᠲᠠᠢ ᠂ ᠨᠢᠭᠡᠨ ᠦ᠌ ᠨᠡᠷᠡ ᠭᠣᠯᠢᠨᠳᠠᠢ ᠂ ᠣᠯᠢᠨᠲᠠᠢ ᠶ᠋ᠢ ᠲᠠᠢᠰᠢ ᠂ ᠭᠣᠯᠢᠨᠳᠠᠢ ᠶ᠋ᠢ ᠲᠠᠢᠪᠤᠤ ᠂ ᠵᠢᠴᠢ ᠪᠠᠭᠠ ᠡᠮᠡ ᠶ᠋ᠢᠨ ᠠᠬᠠ ᠲᠠᠢᠴᠢᠭᠤᠳ ᠤ᠋ᠨ ᠤᠷᠠᠨ ᠵᠠᠳᠠᠤᠯᠢ ᠬᠡᠮᠡᠭᠴᠢ ᠶ᠋ᠢ ᠱᠤᠤᠱ᠌ᠢ ᠂ ᠵᠢᠴᠢ ᠸᠠᠢᠯᠠ ᠬᠡᠮᠡᠬᠦ ᠪᠢᠴᠢᠬᠠᠨ ᠠᠢᠮᠠᠭ ᠤ᠋ᠨ ᠡᠵᠡᠨ ᠦᠬᠡᠷ ᠪᠠᠳᠤᠨᠠ ᠬᠡᠮᠡᠭᠴᠢ ᠶ᠋ᠢ ᠱᠣᠣᠪᠣᠣ ᠂ ᠡᠭᠦᠨ ᠡᠴᠡ ᠭᠠᠳᠠᠨᠠ ᠪᠠᠰᠠ ᠰᠢᠨᠡ ᠳᠠᠭᠠᠭᠰᠠᠨ ᠵᠣᠯᠢᠶᠠ ᠠᠢᠮᠠᠭ ᠤ᠋ᠨ ᠡᠵᠡᠨ ᠬᠤᠷᠭᠤᠤᠰ ᠂ ᠪᠠᠰᠠ ᠲᠤᠩᠨᠠᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠱᠤᠮᠪᠣᠯ ᠂ ᠪᠠᠰᠠ ᠬᠣᠯᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠢᠯᠴᠠᠭ ᠂ ᠪᠠᠰᠠ ᠰᠢᠯᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠪᠠᠲ᠋ᠠ ᠂ ᠪᠠᠰᠠ ᠵᠢᠷᠮᠡ ᠠᠢᠮᠠᠭ ᠤ᠋ᠨ ᠡᠵᠡᠨ ᠪᠥᠭᠡᠰᠢᠷ ᠂ ᠡᠨᠡ ᠲᠠᠪᠤᠭᠤᠯᠠ ᠶ᠋ᠢ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠡᠷᠭᠦᠮᠵᠢᠯᠡᠭᠡᠳ ᠪᠠᠰᠠ ᠭᠡᠷ ᠦ᠋ᠨ ᠬᠠᠭᠤᠴᠢᠨ ᠲᠦᠰᠢᠮᠡᠳ ᠠᠨᠳᠠ ᠂ ᠬᠣᠷᠣᠭᠠ ᠂ ᠪᠤᠯᠭᠣᠳᠠᠢ ᠂ ᠺᠠᠯᠪᠠ ᠳᠥᠷᠪᠡᠭᠦᠯᠡ ᠶ᠋ᠢ ᠲᠥᠷᠥ ᠶ᠋ᠢᠨ ᠳᠥᠷᠪᠡᠨ ᠲᠦᠰᠢᠯᠭᠡ ᠲᠤᠰᠢᠮᠡᠯ ᠭᠡᠮᠡᠨ ᠡᠷᠭᠦᠮᠵᠢᠯᠡᠵᠦ᠂ ᠪᠠᠰᠠ ᠰᠢᠳᠠᠷ ᠪᠠᠢᠭᠰᠠᠨ ᠪᠢᠯᠳᠠᠷ ᠬᠡᠮᠡᠭᠴᠢ ᠶ᠋ᠢ ᠶᠡᠬᠡ ᠬᠣᠰᠢᠭᠤᠴᠢ ᠭᠡᠮᠡᠨ ᠡᠷᠭᠦᠮᠵᠢᠯᠡᠭᠡᠳ ᠪᠠᠰᠠ ᠢᠲᠡᠭᠡᠯᠲᠡᠢ ᠭᠣᠴᠣᠭ ᠣᠯᠤᠩᠬᠤ᠂ ᠭᠣᠣᠷᠬᠢ ᠬᠡᠮᠡᠭᠴᠢ ᠬᠣᠶᠠᠷ ᠢ᠋ ᠬᠠᠭᠠᠨ ᠤ᠋ ᠵᠠᠭᠤᠴᠢ ᠲᠦᠰᠢᠮᠡᠯ ᠭᠡᠮᠡᠨ ᠡᠷᠭᠦᠮᠵᠢᠯᠡᠪᠡᠢ᠃ ᠡᠨᠡ ᠬᠣᠶᠠᠷ ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣ ᠡᠢᠨ ᠬᠦ᠌ ᠪᠠᠴᠢᠯᠠᠭᠰᠠᠨ ᠢ᠋ᠶ᠋ᠠᠷ ᠠᠷᠤ ᠭᠠᠵᠠᠷ ᠤ᠋ᠨ ᠣᠯᠢᠬᠠᠢ ᠲᠣᠯᠢᠬᠠᠢ ᠤᠪᠣᠩᠴᠢ ᠪᠢᠯᠳᠠᠤᠴᠢ ᠵᠠᠩ ᠢ᠋ᠶ᠋ᠡᠷ ᠣᠯᠠᠨ ᠠᠢᠮᠠᠭ ᠤ᠋ᠳ ᠠ᠋ᠴᠠ ᠢᠷᠡᠵᠦ ᠳᠠᠭᠠᠭᠰᠠᠨ ᠢ᠋ᠶ᠋ᠠᠷ ᠰᠠᠨᠠᠭᠠᠨ ᠶᠡᠬᠡᠳᠴᠦ ᠣᠮᠣᠭ ᠥᠰᠦᠭᠡᠳ ᠡᠷᠬᠡᠪᠰᠢ ᠪᠸᠲ᠋ᠠ᠋ ᠤᠯᠤᠰ ᠢ᠋ ᠳᠠᠢᠯᠠᠵᠤ ᠠᠷᠢᠯᠭᠠᠰᠤᠭᠠᠢ ᠬᠡᠮᠡᠵᠦ ᠬᠡᠳᠦ ᠬᠡᠳᠦᠨ ᠡᠲᠡᠭᠡᠳ ᠦ᠋ᠨ ᠤᠯᠤᠰ ᠲᠤᠷ ᠵᠠᠮᠤᠬᠠ ᠶ᠋ᠢ ᠢᠯᠡᠭᠡᠵᠦ ᠡᠲᠦᠭᠡᠨ ᠴᠡᠷᠢᠭᠯᠡᠭᠦᠯᠦᠭᠡᠳ ᠭᠡᠳᠡᠷᠭᠦ ᠴᠥᠮ ᠪᠸᠲ᠋ᠠ᠋ ᠤᠯᠤᠰ ᠲᠤᠷ ᠠᠪᠲᠠᠭᠳᠠᠭᠤᠯᠤᠭᠠᠳ ᠵᠠᠮᠤᠬᠠ ᠪᠠᠰᠠ ᠳᠣᠬ᠍ᠮᠣᠭ ᠤ᠋ᠨ ᠨᠢᠭᠡᠨ ᠤᠯᠤᠰ ᠢ᠋ ᠲᠣᠪᠣᠷᠴᠣᠭ ᠢ᠋ ᠠᠨᠤ ᠭᠠᠷᠭᠠᠭᠠᠳ ᠳᠤᠲᠠᠭᠠᠨ ᠬᠠᠷᠢᠵᠤ ᠢᠷᠡᠭᠡᠳ ᠥᠴᠦᠬᠡᠨ ᠴᠦ᠍ ᠢᠴᠢᠩᠭᠦᠷᠡᠬᠦ ᠦᠭᠡᠢ ᠪᠡᠷ ᠢᠨᠢᠶᠡᠨ ᠥᠭᠦᠯᠡᠷᠦᠨ:《ᠰᠠᠷᠯᠠᠭ ᠤ᠋ᠨ ᠰᠠᠷᠮᠠᠭ᠍ᠴᠢᠨ ᠂ ᠲᠣᠬ᠍ᠮᠣᠭ ᠤ᠋ᠨ ᠲᠠᠤᠯᠠᠢ ᠨᠠᠷ ᠡᠭᠡᠨᠡᠭᠲᠡ ᠬᠡᠷᠡᠭ ᠦᠭᠡᠢ ᠠᠮᠢᠲᠠᠨ ᠨᠤᠭᠤᠳ ᠂ ᠡᠴᠦᠰ ᠲᠦ᠍ᠷ ᠪᠢᠳᠡ ᠥᠪᠡᠷ ᠢ᠋ᠶ᠋ᠡᠨ ᠡᠰᠡ ᠬᠦᠴᠦᠯᠡᠪᠡᠰᠦ ᠪᠣᠯᠬᠤ ᠦᠭᠡᠢ ᠪᠣᠯᠪᠠ ᠃ ᠪᠤᠰᠤᠳ ᠤ᠋ᠨ ᠪᠤᠶᠠᠨ ᠢ᠋ᠶ᠋ᠠᠷ ᠪᠣᠭᠣᠮᠲᠠ ᠬᠢᠵᠦ ᠪᠣᠯᠬᠤ ᠦᠭᠡᠢ ᠂ ᠪᠤᠭᠤ ᠶ᠋ᠢᠨ ᠡᠪᠡᠷ ᠢ᠋ᠶ᠋ᠡᠷ ᠪᠤᠭᠤᠯᠠᠭᠠ ᠬᠢᠵᠦ ᠪᠣᠯᠬᠤ ᠦᠭᠡᠢ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠢᠯᠠᠭᠤ ᠪᠸᠲ᠋ᠠ᠋ ᠤᠯᠤᠰ ᠢ᠋ ᠪᠠᠢᠯᠳᠤᠬᠤ ᠠᠷᠭᠠ ᠶ᠋ᠢ ᠠᠰᠠᠭᠤᠭᠰᠠᠨᠠ ᠵᠠᠮᠤᠬᠠ ᠳᠠᠷᠤᠢ ᠴᠢᠬᠢᠨ ᠦ᠌ ᠳᠡᠷᠭᠡᠳᠡ ᠢᠨᠦ ᠡᠢᠮᠦ ᠲᠡᠢᠮᠦ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠢᠯᠠᠭᠤ ᠶᠡᠬᠡᠳᠡ ᠪᠠᠶᠠᠷᠯᠠᠵᠤ ᠂ ᠳᠠᠷᠤᠢ ᠣᠯᠣᠩᠬᠤ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠳ᠋ᠤᠷ ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠥᠩᠭᠡᠲᠦ ᠲᠣᠷᠭᠠ ᠂ ᠥᠪᠡᠷ ᠦ᠋ᠨ ᠭᠠᠵᠠᠷ ᠤ᠋ᠨ ᠨᠠᠷᠢᠨ ᠦᠰᠦᠲᠦ ᠪᠠ ᠴᠠᠭᠠᠨ ᠮᠥᠩᠭᠥᠨ ᠦ᠌ ᠥᠯᠥᠭᠡᠢ ᠂ ᠰᠢᠵᠢᠷ ᠠᠯᠲᠠᠨ ᠤ᠋ ᠵᠢᠰᠦᠪᠦᠷᠢ ᠶ᠋ᠢᠨ ᠵᠦᠢᠯ ᠢ᠋ ᠪᠠᠷᠢᠭᠤᠯᠵᠤ ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠲᠠᠢᠽᠦ ᠶ᠋ᠢᠨ ᠲᠥᠷᠥᠯ ᠦ᠋ᠨ ᠬᠥᠮᠦᠨ ᠠᠷᠳᠠ ᠂ ᠬᠤᠰᠠᠭᠤᠷ ᠂ ᠳᠡᠯᠵᠢᠲᠠᠢ ᠭᠤᠷᠪᠠᠭᠤᠯᠠ ᠳ᠋ᠤᠷ ᠬᠤᠯᠠᠭᠤᠨ ᠢᠯᠡᠭᠡᠵᠦ ᠬᠡᠯᠡᠭᠦᠯᠦᠷᠦᠨ : 《ᠡᠨᠳᠡ ᠬᠠᠷᠠᠬᠠᠨ ᠰᠠᠭᠤᠷᠢᠨ ᠢ᠋ ᠪᠠᠢᠭᠤᠯᠤᠭᠰᠠᠭᠠᠷ ᠂ ᠲᠠ ᠭᠤᠷᠪᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠲᠠᠢᠰᠢ ᠂ ᠲᠠᠢᠪᠤᠤ ᠂ ᠱᠣᠣᠱᠢ ᠶ᠋ᠢᠨ ᠭᠤᠷᠪᠠᠨ ᠣᠷᠣ ᠶ᠋ᠢ ᠦᠯᠡᠳᠡᠭᠡᠭᠰᠡᠭᠡᠷ ᠪᠣᠢ ᠃ ᠡᠳᠦᠭᠡ ᠢᠷᠡᠪᠡᠰᠦ ᠡᠷᠬᠢᠮ ᠲᠦᠰᠢᠮᠡᠯ ᠪᠣᠯᠠᠢ ᠂ ᠡᠰᠡᠬᠦᠯᠡ ᠡᠳᠦᠭᠡ ᠪᠢ ᠳᠠᠷᠤᠢ ᠲᠠᠢᠯᠠᠶᠠ ᠡᠴᠢᠬᠦ ᠲᠤᠯᠠ ᠲᠡᠨᠳᠡ ᠴᠢᠬᠤᠯᠠ ᠦᠶᠡ ᠳ᠋ᠦ᠍ᠷ ᠳᠣᠲᠣᠷᠠ ᠠ᠋ᠴᠠ ᠲᠤᠰᠠᠯᠠᠪᠠᠴᠤ ᠮᠥᠨ ᠶᠡᠬᠡ ᠭᠠᠪᠢᠶᠠ ᠪᠣᠯᠠᠢ᠃ 》 ᠭᠡᠮᠡᠨ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠶᠠᠩᠵᠤ ᠪᠠᠷ ᠴᠢᠮᠡᠭᠯᠡᠭᠦᠯᠵᠦ ᠂ ᠲᠣᠷᠭᠠ ᠵᠠᠬᠠ ᠂ ᠠᠯᠲᠠᠨ ᠮᠥᠩᠭᠥᠨ ᠢ᠋ ᠨᠢᠭᠲᠠ ᠨᠢᠭᠤᠯᠭᠠᠵᠤ ᠂ ᠴᠠᠭᠠ ᠮᠥᠭᠥ ① ᠠᠷᠠᠯᠵᠢᠨ ᠠᠪᠬᠤ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠶᠠᠩᠵᠤ ᠪᠠᠷ ᠴᠢᠮᠡᠭᠯᠡᠵᠦ ᠶᠠᠪᠤᠭᠤᠯᠪᠠ ᠃
– – – –
① ᠴᠠᠭᠠᠨ ᠮᠥᠭᠥ ᠬᠡᠮᠡᠭᠴᠢ ᠡᠳᠦᠭᠡᠬᠢ ᠨᠠᠷᠢᠨ ᠨᠣᠭᠣᠭᠠ ᠳ᠋ᠤ᠌ ᠣᠷᠣᠬᠤ ᠪᠠᠢ ᠮᠦᠸᠧ ᠶ᠋ᠢ ᠬᠡᠯᠡᠮᠦᠢ᠃
ᠲᠡᠭᠦᠨᠴᠡ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠨ ᠬᠦᠷᠦᠭᠰᠡᠨ ᠡᠴᠡ ᠡᠬᠢᠯᠡᠵᠦ᠂ ᠵᠢᠷᠠᠨ ᠲᠠᠪᠤᠨ ᠵᠢᠷᠭᠤᠭᠠᠨ ᠨᠠᠰᠤᠨ ᠳ᠋ᠤᠷ ᠲᠤᠯᠲᠠᠯᠠ ᠴᠡᠷᠢᠭ ᠲᠦ᠍ᠷ ᠲᠣᠭᠠᠴᠠᠵᠤ ᠡᠯᠰᠡᠭᠰᠡᠭᠡᠷ ᠥᠪᠡᠷ ᠪᠠ ᠪᠤᠰᠤᠳ ᠤ᠋ᠨ ᠴᠡᠷᠢᠭ ᠲᠡᠢ ᠨᠡᠢᠲᠡ ᠳᠣᠯᠣᠭᠠᠨ ᠲᠦᠮᠡ ᠨᠠᠢ᠍ᠮᠠᠨ ᠮᠢᠩᠭᠠ ᠪᠣᠯᠭᠠᠵᠤ ᠂ ᠠᠷᠪᠠᠨ ᠲᠦᠮᠡ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠪᠠ ᠃ ᠡᠨᠡ ᠴᠡᠷᠢᠭ ᠲᠦ᠍ᠷ ᠥᠨᠥᠴᠢᠨ ᠨᠢᠯᠬᠠ ᠪᠠᠨ ᠳᠠᠭᠠᠵᠤ ᠭᠠᠷᠤᠭᠰᠠᠨ ᠡᠬᠡ ᠂ ᠡᠭᠡᠴᠢ ᠪᠠ ᠡᠬᠡᠨᠡᠷ ᠥᠬᠢᠳ ᠨᠡᠯᠢᠶᠡᠳ ᠪᠣᠢ ᠃ ᠭᠠᠭᠴᠠ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠳᠠᠭᠠᠭᠰᠠᠨ ᠡᠬᠡᠨᠡᠷ ᠂ ᠥᠨᠥᠴᠢᠨ ᠳᠡᠭᠦᠦ ᠪᠡᠨ ᠳᠠᠭᠠᠭᠰᠠᠨ ᠥᠬᠢᠳ ᠢ᠋ ᠬᠡᠯᠡᠭᠰᠡᠨ ᠪᠣᠯᠠᠢ᠃
ᠲᠡᠷᠡ ᠲᠤᠬᠠᠢ ᠾᠧ ᠸᠠᠩ ᠬᠠᠭᠠᠨ ᠰᠠᠭᠤᠭᠰᠠᠨ ᠳ᠋ᠤᠷ ᠦᠨᠡᠬᠡᠷ ᠰᠦᠷᠲᠡᠢ ᠭᠡᠷᠡᠯᠲᠡᠢ ᠪᠣᠯᠤᠭᠰᠠᠨᠠ ᠂ ᠡᠭᠡᠨᠡᠭᠲᠡ ᠰᠡᠳᠬᠢᠯ ᠡᠴᠡ ᠪᠠᠶᠠᠰᠬᠤ ᠪᠠ ᠨᠡᠩ ᠡᠴᠢᠭᠡ ᠪᠣᠯᠤᠭᠰᠠᠨ ᠬᠥᠮᠦᠨ ᠦ᠌ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠰᠠᠨᠠᠬᠤ ᠶ᠋ᠢ ᠦᠭᠡᠢ ᠪᠣᠯᠭᠠᠨ ᠴᠢᠳᠠᠬᠤ ᠦᠭᠡᠢ ᠲᠤᠯᠠ ᠬᠠᠷᠠᠬᠠᠨ ᠪᠸᠲ᠋ᠠ᠋ ᠤᠯᠤᠰ ᠯᠤᠭᠠ ᠪᠠᠢᠯᠳᠤᠬᠤ ᠪᠠ ᠪᠠᠢᠬᠤ ᠶ᠋ᠢ ᠲᠣᠭᠲᠠᠭᠠᠨ ᠴᠢᠳᠠᠬᠤ ᠦᠭᠡᠢ ᠬᠡᠯᠪᠡᠯᠵᠡᠨ᠂ ᠬᠥᠪᠡᠭᠦᠨ ᠦ᠌ ᠰᠠᠨᠠᠭᠠᠨ ᠪᠠ ᠥᠬᠢᠨ ᠦ᠌ ᠦᠭᠡ ᠶ᠋ᠢ ᠴᠥᠮ ᠭᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠥᠬᠥᠶᠡ ᠂ ᠵᠠᠮᠤᠬᠠ ᠢᠯᠠᠭᠤ ᠳ᠋ᠤᠷ ᠰᠡᠮᠡᠬᠡᠷ ᠥᠭᠦᠯᠡᠷᠦᠨ :《ᠬᠠᠭᠠᠨ ᠡᠵᠡᠨ ᠦ᠌ ᠲᠠᠰᠤᠯᠤᠨ ᠦᠯᠦ ᠠᠪᠠᠴᠢᠬᠤ ᠠᠨᠤ ᠂ ᠬᠡᠦᠬᠡᠨ ᠳᠡᠭᠦᠦ ᠰᠡᠷᠭᠦᠯᠡᠩ ᠭᠦᠩᠵᠦ ᠂ ᠲᠥᠷᠥ ᠶ᠋ᠢᠨ ᠲᠦᠰᠢᠯᠭᠡ ᠳᠥᠷᠪᠡᠨ ᠲᠦᠰᠢᠮᠡᠯ ᠨᠠᠷ ᠤ᠋ᠨ ᠨᠢᠭᠤᠴᠠ ᠪᠠᠷ ᠢᠳᠬᠠᠬᠤ ᠠ᠋ᠴᠠ ᠢᠷᠡᠮᠦᠢ᠃ ᠡᠷᠭᠢᠨ ᠸᠠᠩ ᠳᠡᠭᠦᠦ ᠴᠢ ᠡᠷᠬᠡᠪᠰᠢ ᠭᠦᠷᠡᠯᠵᠡᠭᠡᠨᠡ ᠴᠧᠩᠰᠢᠶᠠᠩ ᠢ᠋ ᠡᠢᠮᠦ ᠲᠡᠢᠮᠦ ᠶᠠᠪᠤᠭᠤᠯᠪᠠᠰᠤ ᠡᠨᠡ ᠬᠡᠷᠡᠭ ᠮᠠᠭᠠᠳ ᠪᠦᠲᠦᠮᠦᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠢᠯᠠᠭᠤ ᠨᠢᠭᠡᠨ ᠡᠳᠦᠷ ᠶᠡᠬᠡ ᠬᠤᠷᠢᠮ ᠪᠡᠯᠡᠳᠬᠡᠵᠦ᠂ ᠳᠡᠭᠡᠷᠡ ᠡᠲᠡᠭᠡᠳ ᠲᠣᠷ ᠭᠦᠷᠡᠯᠵᠡᠭᠡᠨᠡ ᠲᠠᠢᠰᠢ ᠪᠠᠨ ᠰᠠᠭᠤᠯᠭᠠᠨ ᠪᠠᠶᠠᠷᠯᠠᠲᠠᠯᠠ ᠬᠦᠨᠳᠦᠯᠡᠵᠦ ᠂ ᠲᠡᠭᠦᠨ ᠦ᠌ ᠴᠢᠬᠢᠨ ᠦ᠌ ᠳᠡᠷᠭᠡᠳᠡ ᠡᠢᠮᠦ ᠲᠡᠢᠮᠦ ᠭᠡᠮᠡᠨ ᠰᠤᠷᠭᠠᠵᠤ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠭᠦᠷᠡᠯᠵᠡᠭᠡᠨᠡ ᠡᠪᠦᠭᠡᠨ ᠳᠤᠷᠠᠲᠠᠶᠠ ᠬᠦᠯᠢᠶᠡᠨ ᠠᠪᠴᠤ ᠳᠡᠳ᠋ ᠡᠳᠦᠷ ᠲᠡᠮᠳᠡᠭ ᠳᠣᠬᠢᠶᠠ ᠴᠣᠬᠢᠭᠤᠯᠤᠨ᠂ ᠳᠣᠲᠣᠭᠠᠳᠤ ᠤᠷᠳᠣᠨᠠ ᠣᠷᠣᠵᠤ ᠸᠠᠩ ᠬᠠᠭᠠᠨ ᠳ᠋ᠤᠷ ᠮᠥᠷᠭᠥᠨ ᠵᠣᠯᠭᠠᠵᠤ ᠬᠠᠵᠠᠭᠤᠳᠠ ᠵᠣᠭᠰᠣᠭᠰᠠᠨ ᠳ᠋ᠤᠷ ᠸᠠᠩ ᠬᠠᠭᠠᠨ ᠤᠷᠤᠭ ᠤ᠋ᠨ ᠨᠠᠢᠷ ᠢ᠋ ᠦᠵᠡᠵᠦ ᠰᠠᠭᠤᠳᠠᠯ ᠬᠠᠢᠷᠠᠯᠠᠨ ᠰᠠᠭᠤᠯᠭᠠᠵᠤ ᠵᠠᠷᠯᠢᠭ ᠪᠣᠯᠤᠨ ᠠᠰᠠᠭᠤᠷᠤᠨ : 《ᠡᠷᠭᠢᠨ ᠬᠣᠲᠠ ᠴᠢᠩ ᠂ ᠴᠢᠮᠠ ᠳ᠋ᠤᠷ ᠤᠯᠤᠰ ᠲᠥᠷᠥ ᠳ᠋ᠦ᠍ᠷ ᠶᠠᠮᠪᠠᠷ ᠴᠢᠬᠤᠯᠠ ᠬᠡᠷᠡᠭ ᠠᠵᠤ ᠢᠷᠡᠪᠡ ? 》 ᠭᠦᠷᠡᠯᠵᠡᠭᠡᠨᠡ ᠠᠢᠯᠠᠳᠬᠠᠷᠤᠨ :《ᠬᠠᠭᠠᠨ ᠡᠵᠡᠨ ᠦ᠌ ᠲᠦᠮᠡᠨ ᠣᠨ ᠵᠠᠭᠤᠨ ᠦᠶᠡ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠰᠠᠭᠤᠷᠢᠨ ᠢ᠋ ᠡᠵᠡᠯᠡᠬᠦ ᠶ᠋ᠢᠨ ᠲᠤᠯᠠ ᠪᠣᠳᠣᠭᠰᠠᠨ ᠬᠡᠳᠦᠨ ᠦᠭᠡ ᠪᠡᠨ ᠮᠡᠳᠡᠭᠦᠯᠬᠦ ᠨᠢᠭᠡᠨ ᠵᠦᠢᠯ ᠦ᠋ᠨ ᠤᠴᠢᠷ ᠪᠣᠢ : ᠬᠤᠸᠠᠩ ᠲᠠᠢᠽᠢ ᠢ ᠰᠢᠨᠡ ᠸᠠᠩ ᠤ᠋ᠨ ᠤᠷᠢᠳᠤᠰ ᠳᠡᠭᠡᠳᠦᠰ ᠢ᠋ᠶ᠋ᠡᠨ ᠥᠨᠳᠥᠷ ᠦᠪᠡᠳᠡᠭᠰᠢ ᠪᠣᠯᠭᠠᠶᠠ᠂ ᠦᠷᠡ ᠠᠴᠢ ᠳ᠋ᠤᠷ ᠦᠯᠡᠮᠵᠢ ᠡᠯᠪᠡᠭ ᠦᠯᠡᠳᠡᠭᠡᠶᠡ ᠬᠡᠮᠡᠬᠦ ᠶ᠋ᠢᠨ ᠲᠤᠯᠠᠳᠠ ᠡᠳᠦᠷ ᠰᠥᠨᠢ ᠦᠭᠡᠢ ᠴᠢᠷᠮᠠᠢᠭᠰᠠᠨ ᠢ᠋ᠶ᠋ᠠᠷ ᠳᠡᠭᠡᠷᠡ ᠲᠡᠭᠷᠢ ᠠᠢᠯᠠᠳᠴᠤ ᠢᠪᠡᠭᠡᠨ ᠲᠤᠰᠠᠯᠠᠵᠤ᠂ ᠬᠡᠳᠦᠬᠡᠨ ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣ ᠬᠠᠭᠠᠨ ᠰᠠᠭᠤᠷᠢᠨ ᠪᠦᠲᠦᠵᠦ᠂ ᠬᠠᠮᠤᠭ ᠪᠦᠭᠦᠳᠡᠭᠡᠷ ᠬᠤᠷᠠᠭᠠᠳ ᠨᠢᠭᠡᠨ ᠬᠣᠰᠢᠭᠤᠴᠢ ᠂ ᠬᠣᠶᠠᠷ ᠵᠠᠭᠤᠴᠢ ᠂ ᠳᠥᠷᠪᠡᠨ ᠲᠦᠰᠢᠯᠭᠡ ᠂ ᠲᠠᠪᠤᠨ ᠪᠠᠷᠰ ᠂ ᠵᠢᠷᠭᠤᠭᠠᠨ ᠵᠥᠪᠯᠡᠯ ᠦ᠋ᠨ ᠵᠡᠷᠭᠡ ᠶ᠋ᠢᠨ ᠣᠯᠠᠨ ᠰᠠᠢᠳ ᠲᠦᠰᠢᠮᠡᠳ ᠴᠥᠮ ᠪᠦᠷᠢᠳᠴᠦ ᠬᠠᠭᠠᠨ ᠢ᠋ ᠬᠠᠮᠠᠭᠠᠯᠠᠬᠤ ᠭᠤᠷᠪᠠᠨ ᠲᠦᠮᠡᠨ ᠭᠣᠴᠣᠭ ᠴᠡᠷᠢᠭ ᠂ ᠬᠠᠮᠤᠭ ᠢ᠋ ᠬᠤᠷᠢᠶᠠᠬᠤ ᠠᠷᠪᠠᠨ ᠲᠦᠮᠡᠨ ᠬᠤᠷᠴᠠ ᠬᠤᠶᠠᠭ ᠲᠠᠢ ᠴᠤᠭᠠᠷ ᠪᠦᠷᠢᠳᠴᠦᠬᠦᠢ᠃ ᠣᠳᠣ ᠡᠨᠡ ᠮᠡᠲᠦ ᠴᠢᠬᠤᠯᠠ ᠬᠡᠪᠴᠢᠶᠡᠨ ᠢ᠋ ᠣᠯᠬᠤᠶᠠ ᠪᠡᠷᠬᠡ ᠲᠣᠬᠢᠶᠠᠯ ᠳ᠋ᠤᠷ ᠪᠠᠢᠭᠰᠠᠨ ᠢ᠋ ᠪᠠᠷᠠᠭᠳᠠᠭᠤᠯᠤᠭᠰᠠᠨ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠪᠤᠯᠲᠤ ᠪᠤᠲᠠᠷᠠᠭᠤᠯᠤᠭᠰᠠᠨ ᠪᠣᠷᠵᠢᠭᠢᠳ ᠠᠢᠮᠠᠭ ᠤ᠋ᠨ ᠪᠤᠰᠤᠳ ᠢ᠋ ᠪᠣᠭᠣᠯᠴᠢᠯᠠᠭᠤᠯᠤᠭᠰᠠᠨ᠂ ᠪᠤᠷᠬᠠᠨ ᠭᠠᠯᠳᠤᠨᠠ ᠶ᠋ᠢᠨ ᠲᠡᠰᠬᠦ ᠶ᠋ᠢ ᠠᠯᠳᠠᠭᠤᠯᠤᠭᠰᠠᠨ ᠲᠡᠮᠦᠵᠢᠨ ᠬᠥᠪᠡᠭᠦᠨ ᠢ᠋ ᠠᠷᠢᠯᠭᠠᠬᠤ ᠦᠭᠡᠢ ᠶᠠᠮᠪᠠᠷ ᠴᠠᠭ ᠢ᠋ ᠬᠦᠯᠢᠶᠡᠮᠦᠢ ? ᠬᠠᠭᠠᠨ ᠡᠵᠡᠨ ᠴᠢ ᠬᠡᠷᠪᠡ ᠬᠠᠮᠲᠤᠳᠴᠤ ᠬᠠᠰ ᠠᠪᠠᠬᠠᠢ ᠭᠦᠩᠵᠦ ᠪᠡᠨ ᠲᠡᠭᠦᠨ ᠦ᠌ ᠳᠡᠭᠦᠦ ᠪᠡᠯᠭᠦᠳᠡᠢ ᠳ᠋ᠦ᠍ᠷ ᠥᠭᠴᠦ ᠤᠷᠤᠭ ᠪᠤᠯᠬᠤᠢ ᠳ᠋ᠤᠷ ᠬᠦᠷᠪᠡᠰᠦ᠂ ᠡᠴᠦᠰ ᠲᠦ᠍ᠷ ᠲᠡᠭᠦᠨ ᠦ᠌ ᠰᠢᠷᠡᠭᠡᠨ ᠦ᠌ ᠳᠣᠣᠷᠠ ᠰᠥᠭᠥᠳᠴᠦ ᠮᠥᠷᠭᠥᠬᠦ ᠲᠦᠰᠢᠮᠡᠯ ᠪᠣᠯᠬᠤ ᠠ᠋ᠴᠠ ᠬᠡᠯᠲᠦᠷᠢᠨ ᠦᠯᠦ ᠴᠢᠳᠠᠮᠤᠢ᠃ ᠡᠳᠦᠭᠡ ᠮᠠᠨ ᠤ᠋ ᠪᠡᠶᠡ ᠡᠵᠡᠨ ᠸᠠᠩ ᠬᠡᠳᠦᠢ ᠮᠠᠭᠤ ᠪᠣᠯᠪᠠᠴᠤ ᠬᠠᠭᠠᠨ ᠡᠵᠡᠨ ᠦ᠌ ᠪᠡᠶᠡ ᠴᠢᠨᠦ ᠯᠤᠤ ᠶ᠋ᠢᠨ ᠣᠯᠪᠣᠭᠲᠤ ᠽᠠᠨᠳᠠᠨ ᠰᠢᠷᠡᠬᠡᠨᠡ ᠰᠠᠭᠤᠵᠤ᠂ ᠠᠯᠲᠠᠨ ᠤ᠋ ᠣᠷᠣᠢᠲᠤ ᠮᠠᠩᠨᠤᠭ ᠣᠷᠲᠣᠨᠠ ᠣᠷᠣᠰᠢᠨ᠂ ᠭᠠᠷᠪᠠᠰᠤ ᠰᠢᠬᠦᠷ ᠬᠠᠯᠬᠠᠪᠴᠢ ᠨᠠᠷᠠᠨ ᠢ᠋ ᠬᠠᠯᠬᠠᠭᠯᠠᠵᠤ᠂ ᠣᠷᠣᠪᠠᠰᠤ ᠱ᠌ᠢᠷᠦ ᠰᠤᠪᠤᠳ ᠨᠢᠳᠦᠨ ᠢ᠋ ᠴᠢᠨᠦ ᠰᠡᠷᠭᠦᠭᠡᠵᠦ ᠂ ᠴᠠᠭ ᠤ᠋ᠨ ᠪᠤᠳᠠᠭᠠ ᠳ᠋ᠤᠷ ᠱᠠᠪᠠᠩ ᠬᠥᠭᠵᠢᠮ ᠡᠭᠦᠰᠬᠡᠨ ᠂ ᠰᠥᠨᠢ ᠶ᠋ᠢᠨ ᠨᠣᠢᠷ ᠲᠤᠷ ᠽᠠᠨᠳᠠᠨ ᠬᠥᠬᠥᠯ ᠰᠢᠲᠠᠭᠠᠵᠤ᠂ ᠶᠢᠰᠦᠨ ᠬᠠᠭᠠᠯᠭᠠ ᠨᠠᠶᠠᠨ ᠨᠢᠭᠡᠨ ᠪᠥᠭᠲᠥᠭᠡ ᠲᠠᠲᠠᠵᠤ᠂ ᠠᠷᠪᠠᠨ ᠵᠦᠭ ᠡᠴᠡ ᠵᠠᠭᠤᠨ ᠲᠦᠮᠡᠨ ᠤᠯᠤᠰ ᠪᠦᠷᠢᠳᠴᠦᠬᠦᠢ᠃ ᠡᠨᠡ ᠮᠡᠲᠦ ᠠᠴᠢᠯᠠᠯ ᠡᠷᠭᠦᠮᠵᠢᠯᠡᠯᠲᠦ ᠲᠠᠢᠽᠢ ᠶᠤᠭᠠᠨ ᠡᠭᠦᠷᠢ ᠤᠷᠲᠤ ᠡᠷᠬᠢᠮ ᠦᠪᠡᠳᠡᠭᠰᠢ ᠪᠣᠯᠬᠤ ᠶ᠋ᠢ ᠦᠯᠦ ᠰᠠᠨᠠᠨ ᠂ ᠡᠷᠡᠦᠯᠡᠨ ᠬᠦᠯᠢᠵᠦ ᠠᠴᠢᠵᠤ ᠠᠪᠠᠴᠢᠭ᠍ᠰᠠᠨ ᠡᠢᠨ ᠬᠦ᠌ ᠡᠷᠡᠮᠡᠬᠡᠢ ᠬᠠᠷᠭᠢᠰ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ᠂ ᠪᠣᠮᠣᠷᠲᠠᠯᠠ ᠬᠦᠯᠢᠵᠦ ᠪᠤᠯᠢᠶᠠᠵᠤ ᠠᠪᠠᠴᠢᠭ᠍ᠰᠠᠨ ᠪᠣᠷᠵᠢᠭᠢᠳ ᠠᠢᠮᠠᠭ ᠤ᠋ᠨ ᠲᠡᠮᠦᠵᠢᠨ ᠢ᠋ ᠥᠮᠥᠭᠯᠡᠬᠦ ᠢᠨᠦ ᠬᠠᠭᠠᠨ ᠡᠵᠡᠨ ᠴᠢᠮᠠ ᠳ᠋ᠤᠷ ᠡᠴᠦᠰᠲᠡᠯᠡ ᠶᠠᠭᠤᠨ ᠤ᠋ ᠲᠤᠰᠠ ᠪᠣᠯᠬᠤ ᠭᠠᠵᠠᠷ ᠪᠣᠢ ᠠᠵᠢ ! ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠬᠡᠳᠦᠢᠪᠡᠷ ᠴᠡᠷᠢᠭ ᠲᠤᠰᠠᠯᠠᠵᠤ ᠬᠡᠳᠦᠨ ᠤᠳᠠᠭᠠ ᠠᠪᠤᠷᠠᠭᠰᠠᠨ ᠴᠤ᠌ ᠪᠠᠰᠠ ᠴᠠᠪᠴᠢᠲᠠᠯᠠ ᠬᠦᠯᠢᠵᠦ ᠴᠢᠷᠦᠨ ᠠᠪᠠᠴᠢᠭᠠᠳ ᠠᠯᠠᠯ ᠦᠭᠡᠢ ᠪᠡᠷ ᠠᠯᠲᠠᠨ ᠲᠣᠷᠭᠠ ᠪᠠᠷ ᠴᠢᠮᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠠᠨᠤ᠂ ᠡᠴᠦᠰ ᠲᠦ᠍ᠷ ᠬᠠᠭᠠᠨ ᠡᠵᠡᠨ ᠴᠢᠮᠠᠢ ᠬᠠᠲᠠᠭᠤ ᠪᠠᠷ ᠬᠠᠲᠠᠷᠠᠭᠠᠳ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠵᠦᠯᠭᠦᠵᠦ᠂ ᠤᠷᠠᠨ ᠠᠭᠠᠰᠢ ᠪᠠᠷ ᠢ᠋ᠶ᠋ᠠᠨ ᠬᠠᠭᠤᠷᠴᠤ ᠠᠷᠭᠠ ᠳ᠋ᠤᠷ ᠢ᠋ᠶ᠋ᠠᠨ ᠣᠷᠣᠭᠤᠯᠵᠤ ᠠᠪᠤᠭᠠᠳ ᠪᠣᠭᠣᠯ ᠢ᠋ᠶ᠋ᠠᠨ ᠪᠣᠯᠭᠠᠵᠤ ᠪᠣᠷᠪᠢ ᠳ᠋ᠤᠷ ᠢ᠋ᠶ᠋ᠠᠨ ᠭᠢᠰᠬᠢᠰᠦᠭᠡᠢ ᠬᠡᠮᠡᠬᠦ ᠠᠷᠭᠠ ᠪᠣᠯᠠᠢ ᠃ ᠡᠨᠡ ᠬᠠᠰ ᠬᠠᠳᠠ ᠮᠡᠲᠦ ᠬᠠᠭᠠᠨ ᠲᠥᠷᠥ ᠪᠡᠨ ᠪᠠᠷᠢᠵᠤ ᠪᠠᠷᠢᠭᠠᠳ ᠬᠠᠷᠠᠳᠠᠨ ᠳᠠᠢᠰᠤᠨ ᠤ᠋ ᠬᠠᠭᠤᠷᠬᠤ ᠠᠷᠭᠠ ᠳ᠋ᠤᠷ ᠣᠷᠣᠵᠤ᠂ ᠬᠠᠮᠢᠶᠠ ᠦᠭᠡᠢ ᠪᠣᠷᠵᠢᠭᠢᠳ ᠲᠤᠷ ᠪᠣᠭᠣᠯ ᠪᠣᠯᠬᠤ ᠠᠨᠤ ᠬᠠᠢᠷᠠᠬᠠᠨ ᠦᠭᠡᠢ ᠦᠦ ? ᠲᠡᠭᠦᠨ ᠦ᠌ ᠡᠨᠡ ᠲᠠᠯᠪᠢᠨ ᠬᠡᠷᠡᠭᠯᠡᠬᠦ ᠠᠷᠭᠠ ᠶ᠋ᠢ ᠦᠯᠢᠳᠬᠡᠪᠡᠰᠦ᠂ ᠬᠣᠩᠭᠣ ᠳ᠋ᠤᠷ ᠢ᠋ᠶ᠋ᠠᠨ ᠬᠦᠷᠦᠭᠰᠡᠨ ᠬᠤᠷᠢᠴᠠᠯ ᠶᠡᠬᠡᠲᠦ ᠥᠬᠢᠳ ᠡᠬᠡᠨᠡᠷ ᠢ᠋ ᠬᠣᠩᠭᠣᠯᠵᠠᠨ ᠬᠣᠷᠪᠣᠬᠠᠨ ᠡᠲᠦᠭᠡᠨ ᠬᠥᠭᠵᠢᠭᠡᠵᠦ ᠪᠠᠢᠭᠠᠳ ᠬᠣᠷᠮᠣᠢ ᠳ᠋ᠠᠭᠠᠨ ᠣᠷᠣᠭᠤᠯᠵᠤ᠂ ᠳᠣᠣᠷᠠ ᠪᠠᠨ ᠬᠡᠪᠲᠡᠭᠦᠯᠬᠦ ᠮᠡᠲᠦ ᠪᠤᠶᠤ !ᠬᠠᠭᠠᠨ ᠡᠵᠡᠨ ᠮᠢᠨᠦ ᠬᠠᠮᠲᠤᠳᠲᠠᠯᠠ ᠪᠣᠳᠣᠵᠤ ᠠᠢᠯᠠᠳ᠂ ᠬᠠᠷᠠ ᠬᠦᠷᠳᠦ ᠲᠡᠮᠦᠵᠢᠨ ᠬᠠᠭᠠᠨ ᠴᠢᠮᠠᠢ ᠬᠠᠯᠠᠭᠤᠨ ᠢ᠋ᠶ᠋ᠠᠷ ᠰᠠᠨᠠᠵᠤ᠂ ᠦᠨᠡᠨ ᠢ᠋ᠶ᠋ᠡᠷ ᠥᠷᠥᠰᠢᠶᠡᠭᠰᠡᠨ ᠪᠥᠭᠡᠰᠦ᠂ ᠲᠡᠷᠡᠬᠡᠨ ᠵᠢᠯ ᠬᠠᠭᠠᠨ ᠡᠵᠡᠨ ᠴᠢᠨᠦ ᠪᠡᠶᠡ ᠶ᠋ᠢ ᠴᠢᠨᠦ ᠥᠯᠥᠭᠴᠢᠨ ᠨᠣᠬᠠᠢ ᠶ᠋ᠢᠨ ᠵᠤᠯᠵᠠᠭᠠ ᠮᠡᠲᠦ ᠥᠩᠬᠥᠷᠢᠵᠦ ᠳᠤᠭᠤᠢᠷᠠᠲᠠᠯᠠ ᠬᠦᠯᠢᠵᠦ ᠠᠪᠠᠴᠢᠭᠠᠳ ᠠᠪᠤ ᠡᠵᠢ ᠡᠴᠡ ᠲᠥᠷᠥᠭᠰᠡᠨ ᠪᠡᠶᠡ ᠶ᠋ᠢ ᠴᠢᠨᠦ ᠠᠪᠠ ᠳ᠋ᠤᠷ ᠠᠯᠠᠭᠰᠠᠨ ᠲᠠᠤᠯᠠᠢ ᠬᠢᠷᠭᠤᠯ ᠠᠳᠠᠯᠢ ᠪᠠᠷ ᠠᠷᠠᠰᠤ ᠮᠢᠬᠠ ᠶ᠋ᠢ ᠴᠢᠨᠦ ᠴᠢᠷᠠᠮᠠ ᠨᠢᠴᠦᠭᠦᠯᠡᠭᠦᠯᠵᠦ᠂ ᠠᠯᠢᠪᠠ ᠪᠦᠭᠦᠳᠡᠭᠡᠷ ᠲᠣᠷ ᠡᠯᠡᠭ ᠪᠣᠯᠭᠠᠭᠰᠠᠨ ᠠᠵᠢ ! ᠠᠳᠠᠪᠠᠰᠢ ᠰᠠᠨᠠᠵᠤ ᠬᠦᠨᠳᠦᠯᠡᠭᠰᠡᠨ ᠢᠨᠦ ᠬᠠᠮᠢᠭᠠ ᠪᠣᠢ ? ᠦᠵᠡᠬᠦᠢ ᠳ᠋ᠦ᠍ᠷ ᠬᠡᠳᠦᠢ ᠴᠢᠨᠦ ᠬᠦᠯᠢᠶᠡᠰᠦᠨ ᠢ᠋ ᠠᠯᠳᠠᠷᠠᠭᠠᠵᠤ᠂ ᠡᠮᠦᠰᠦᠭᠰᠡᠨ ᠳᠡᠪᠡᠯ ᠢ᠋ᠶ᠋ᠡᠨ ᠲᠠᠢᠯᠤᠨ ᠡᠮᠦᠰᠬᠡᠭᠰᠡᠨ ᠪᠣᠯᠪᠠᠴᠤ ᠬᠦᠨᠳᠦ ᠬᠠᠭᠠᠨ ᠡᠵᠡᠨ ᠴᠢᠮᠠᠢ ᠬᠥᠮᠦᠨ ᠪᠤᠰᠤ ᠪᠠᠷ ᠳᠠᠷᠤᠯᠠᠭᠰᠠᠨ ᠪᠤᠰᠤ ᠤᠤ ? ᠲᠡᠭᠦᠨ ᠦ᠌ ᠲᠦᠰᠢᠮᠡᠳ ᠬᠠᠭᠠᠨ ᠴᠢᠮᠠᠢ ᠬᠦᠯᠢᠵᠦ ᠶᠠᠪᠤᠬᠤ ᠶ᠋ᠢ ᠲᠡᠳᠡ ᠦᠨᠡᠬᠡᠷ ᠣᠭᠲᠣ ᠡᠰᠡ ᠦᠵᠡᠪᠡ ᠬᠡᠮᠡᠮᠦᠢ ᠦᠦ ? ᠬᠥᠪᠴᠢᠨ ᠪᠡᠶᠡ ᠶ᠋ᠢ ᠴᠢᠨᠦ ᠴᠢᠷᠠᠮᠠ ᠨᠢᠴᠦᠭᠦᠯᠡᠵᠦ ᠬᠦᠯᠢᠨ ᠪᠠᠷᠢᠵᠤ ᠰᠤᠨᠳᠠᠯᠠᠵᠤ ᠠᠴᠢᠭ᠍ᠰᠠᠨ ᠢ᠋ ᠲᠡᠮᠦᠵᠢᠨ ᠦᠨᠡᠬᠡᠷ ᠡᠰᠡ ᠮᠡᠳᠡᠪᠡ ᠬᠡᠮᠡᠮᠤᠶᠤ ? ᠦᠯᠢᠭᠡᠷᠯᠡᠪᠡᠰᠦ ᠬᠥᠨᠵᠢᠯᠡ ᠶ᠋ᠢᠨ ᠳᠣᠲᠣᠷᠠ ᠬᠥᠷᠪᠡᠭᠦᠯᠦᠭᠰᠡᠨ ᠬᠡᠦᠬᠡᠨ ᠢ᠋ ᠬᠥᠪᠴᠢᠨ ᠪᠢᠲᠡᠭᠦᠦ ᠪᠦᠲᠦᠨ ᠥᠬᠢᠨ ᠪᠣᠯᠭᠠᠵᠤ ᠪᠣᠯᠤᠮᠤᠢ ᠤᠤ ? ᠬᠠᠭᠠᠨ ᠡᠵᠡᠨ ᠮᠢᠨᠦ ᠬᠠᠯᠬᠠᠯᠠᠭᠳᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠢᠷᠠᠯᠠᠨ ᠬᠠᠷᠢᠭᠤᠯᠵᠤ ᠬᠠᠢᠷᠠᠯᠠ᠂ ᠬᠠᠭᠠᠭᠳᠠᠭᠰᠠᠨ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠨᠡᠭᠡᠭᠡᠵᠦ ᠬᠠᠢᠷᠠᠯᠠ᠂ ᠬᠠᠭᠤᠷᠮᠠᠭ ᠠᠭᠠᠰᠢᠲᠤ ᠲᠡᠮᠦᠵᠢᠨ ᠭᠦᠪᠡᠭᠦᠨᠡ ᠬᠠᠭᠤᠷᠲᠠᠵᠤ ᠦᠯᠦ ᠳᠠᠭᠠᠮᠤ ! 》ᠭᠡᠮᠡᠨ ᠰᠥᠭᠥᠳᠦᠨ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠾᠧ ᠸᠠᠩ ᠬᠡᠮᠡᠭᠴᠢ ᠤᠭ ᠠ᠋ᠴᠠ ᠲᠣᠭᠲᠠᠭᠤᠷᠢ ᠦᠭᠡᠢ ᠰᠠᠨᠠᠭᠠ ᠲᠠᠢ ᠶ᠋ᠢᠨ ᠳᠡᠭᠡᠷᠡ ᠪᠠᠰᠠ ᠡᠨᠡ ᠨᠢᠭᠡᠨ ᠵᠡᠷᠭᠡ ᠶ᠋ᠢᠨ ᠤᠷᠠᠨ ᠦᠭᠡᠰ ᠲᠣᠷ ᠢᠴᠢᠩᠭᠦᠷᠡᠨ ᠪᠥᠭᠡᠳ ᠬᠣᠷᠣᠰᠴᠤ ᠬᠣᠷᠣᠰᠬᠤ ᠪᠥᠭᠡᠳ ᠠᠭᠤᠷᠯᠠᠵᠤ᠂ ᠶᠠᠭᠤᠨ ᠢ᠋ ᠲᠡᠷᠡ ᠦᠶᠡ ᠶ᠋ᠢᠨ ᠲᠠᠢᠽᠦ ᠶ᠋ᠢᠨ ᠡᠰᠡ ᠠᠯᠠᠭᠰᠠᠨ ᠲᠦᠮᠡᠨ ᠬᠡᠰᠢᠭ ᠢ᠋ ᠰᠠᠨᠠᠬᠤ ᠪᠣᠢ ! ᠨᠢᠭᠡᠬᠡᠨ ᠴᠠᠭ ᠤ᠋ᠨ ᠤᠷᠠᠯᠠᠨ ᠵᠣᠬᠢᠶᠠᠭᠰᠠᠨ ᠦᠭᠡᠰ ᠲᠣᠷ ᠰᠡᠳᠬᠢᠯ ᠪᠤᠯᠢᠶᠠᠭᠳᠠᠵᠤ ᠬᠢᠯᠢᠩ ᠪᠠᠳᠠᠷᠠᠭᠠᠳ ᠵᠡᠭᠦᠭᠰᠡᠨ ᠢᠯᠳᠦ ᠪᠡᠨ ᠰᠤᠭ ᠲᠡᠳᠡᠨ ᠠᠪᠤᠭᠠᠳ ᠭᠦᠷᠡᠯᠵᠡᠭᠡᠨᠡ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ: 《ᠭᠦᠨ ᠪᠣᠳᠣᠯᠭᠠᠲᠤ ᠭᠦᠷᠡᠯᠵᠡᠭᠡᠨᠡ ᠴᠢ ᠂ ᠴᠢᠬᠡ ᠰᠠᠨᠠᠭᠠᠲᠤ ᠴᠧᠩᠰᠢᠶᠠᠩ ᠮᠢᠨᠦ ᠴᠢ᠂ ᠤᠮᠳᠠᠭᠰᠠᠨ ᠢ᠋ ᠮᠢᠨᠦ ᠰᠡᠷᠢᠭᠡᠵᠦ᠂ ᠤᠮᠠᠷᠲᠠᠭᠰᠠᠨ ᠢ᠋ ᠮᠢᠨᠦ ᠰᠠᠨᠠᠭᠠᠯᠵᠠᠭᠤᠯᠪᠠ᠃ ᠤᠴᠢᠷᠲᠤ ᠡᠨᠡ ᠦᠭᠡ ᠶ᠋ᠢ ᠡᠨᠳᠡ ᠬᠦᠷᠲᠡᠯᠡ ᠡᠰᠡ ᠬᠡᠯᠡᠭᠰᠡᠨ ᠪᠥᠭᠡᠰᠦ᠂ ᠤᠬᠠᠮᠠᠢ ᠦᠭᠡᠢ ᠮᠡᠬᠦᠰ ᠪᠢ᠂ ᠡᠴᠦᠰᠲᠡᠯᠡ ᠲᠡᠳᠡᠨ ᠳ᠋ᠦ᠍ᠷ ᠮᠡᠬᠡᠯᠡᠭᠳᠡᠬᠦ ᠪᠥᠯᠥᠭᠡ ᠪᠢ᠂ ᠤᠬᠠᠵᠤ ᠣᠯᠤᠭᠰᠠᠨ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠤᠷᠠᠨ ᠮᠡᠬᠡᠲᠦ ᠲᠡᠮᠦᠵᠢᠨ ᠢ᠋ ᠳᠠᠢᠯᠠᠵᠤ ᠡᠰᠡ ᠠᠷᠢᠯᠭᠠᠪᠠᠰᠤ᠂ ᠤᠷᠢᠳᠠᠰᠠ ᠪᠠᠢᠬᠤ ᠡᠨᠡ ᠠᠶᠠᠭᠠ ᠮᠡᠲᠦ ᠪᠣᠯᠲᠤᠭᠠᠢ ᠬᠡᠮᠡᠭᠡᠳ ᠡᠮᠦᠨᠡ ᠪᠡᠨ ᠲᠠᠯᠪᠢᠬᠤ ᠴᠠᠢ ᠤᠤᠭᠤᠭᠰᠠᠨ ᠶᠢᠰᠦᠨ ᠡᠷᠳᠡᠨᠢᠲᠦ ᠠᠯᠲᠠᠨ ᠳᠣᠲᠣᠷᠲᠤ ᠵᠠᠪᠢᠶᠠ ᠨᠡᠷᠡᠲᠦ ᠯᠠᠭᠤᠷ ᠠᠶᠠᠬᠠ ᠪᠠᠨ ᠰᠠᠯᠪᠠᠷᠠᠵᠤ ᠳᠡᠯᠪᠡᠷᠡᠲᠡᠯᠡ ᠪᠠᠯᠪᠠ ᠬᠡᠮᠬᠡ ᠴᠠᠪᠴᠢᠨ ᠲᠠᠩᠭᠠᠷᠢᠭ᠍ᠯᠠᠭᠠᠳ ᠡᠳᠦᠭᠡ ᠳᠠᠷᠤᠢ ᠴᠡᠷᠢᠭ ᠦ᠋ᠨ ᠰᠢᠪᠠᠭᠠ ᠪᠠᠭᠤᠯᠭᠠ ᠬᠡᠮᠡᠪᠡ ᠃
ᠲᠡᠳᠦᠢ ᠭᠦᠷᠡᠯᠵᠡᠭᠡᠨᠡ ᠭᠠᠷᠴᠤ ᠢᠷᠡᠭᠡᠳ ᠡᠳᠡᠭᠡᠷ ᠤᠴᠢᠷ ᠢ᠋ ᠪᠦᠷᠢᠨᠡ ᠬᠡᠯᠡᠵᠦ᠂ ᠵᠠᠮᠤᠬᠠ ᠶ᠋ᠢ ᠮᠠᠭᠲᠠᠵᠤ ᠥᠭᠦᠯᠡᠷᠦᠨ :《ᠵᠠᠮᠤᠬᠠ ᠴᠧᠩᠰᠢᠶᠠᠩ ᠤ᠋ᠨ ᠰᠤᠷᠭᠠᠭᠰᠠᠨ ᠦᠭᠡ ᠦᠨᠡᠬᠡᠷ ᠬᠠᠭᠠᠨ ᠡᠵᠡᠨ ᠦ᠌ ᠵᠢᠷᠦᠬᠡ ᠶ᠋ᠢ ᠣᠨᠣᠪᠠ᠃ ᠪᠢ ᠲᠡᠳᠡᠭᠡᠷ ᠬᠠᠲᠠᠭᠤ ᠦᠭᠡ ᠶ᠋ᠢ ᠬᠡᠯᠡᠬᠦᠢ ᠳ᠋ᠦ᠍ᠷ ᠨᠡᠯᠢᠶᠡᠳ ᠢ᠋ᠶ᠋ᠡᠷ ᠬᠠᠯᠳᠠᠭᠰᠠᠨ ᠪᠥᠯᠥᠭᠡ ᠃ ᠭᠠᠭᠴᠠ ᠴᠢᠨᠦ ᠳᠠᠬᠢᠨ ᠳᠠᠪᠲᠠᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠠᠷᠭᠠ ᠦᠭᠡᠢ ᠬᠡᠯᠡᠪᠡ ᠃ ᠲᠡᠭᠦᠨ ᠢ᠋ ᠡᠰᠡ ᠬᠡᠯᠡᠭᠰᠡᠨ ᠪᠥᠭᠡᠰᠦ ᠡᠨᠡ ᠬᠡᠷᠡᠭ ᠦᠨᠡᠬᠡᠷ ᠡᠢᠮᠦ ᠣᠭᠴᠣ ᠲᠠᠰᠤ ᠪᠠᠷ ᠦᠯᠦ ᠪᠦᠲᠦᠮᠦᠢ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠠᠮᠤᠬᠠ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《ᠲᠡᠭᠦᠨ ᠢ᠋ ᠡᠰᠡ ᠠᠭᠤᠷᠯᠠᠭᠤᠯᠪᠠᠰᠤ ᠬᠡᠷᠬᠢᠪᠡᠴᠦ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠭᠠᠷᠬᠤ ᠦᠭᠡᠢ᠂ ᠲᠡᠭᠦᠨ ᠦ᠌ ᠪᠡᠶᠡ ᠡᠰᠡ ᠭ᠍ᠡᠷᠪᠠᠰᠤ ᠣᠯᠠᠨ ᠠᠢᠮᠠᠭ ᠤ᠋ᠳ ᠬᠦᠴᠦᠯᠡᠬᠦ ᠦᠭᠡᠢ ᠪᠣᠯᠤᠮᠤᠢ᠃ ᠲᠡᠢᠨ ᠬᠦ᠌ ᠪᠢ ᠰᠠᠶᠢ ᠡᠨᠡ ᠮᠡᠲᠦ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠭᠰᠡᠨ ᠪᠣᠯᠠᠢ !》ᠬᠡᠮᠡᠪᠡ ᠃ ᠵᠢᠴᠢ ᠥᠷᠯᠥᠭᠡ ᠵᠠᠭᠤᠨ ᠲᠦᠰᠢᠮᠡᠳ ᠪᠦᠭᠦᠳᠡᠭᠡᠷ ᠲᠥᠷᠥ ᠳ᠋ᠦ᠍ᠷ ᠭᠠᠷᠴᠤ 《ᠬᠠᠭᠠᠨ ᠡᠵᠡᠨ ᠦ᠌ ᠬᠠᠯᠬᠠᠯᠠᠭᠳᠠᠯ ᠠᠷᠢᠯᠵᠤ ᠂ ᠪᠣᠭᠳᠠ ᠡᠵᠡᠨ ᠦ᠌ ᠪᠣᠯᠢᠭ᠍ᠳᠠᠯ ᠨᠡᠭᠡᠭᠡᠭᠳᠡᠪᠡ ! 》 ᠭᠡᠮᠡᠨ ᠪᠠᠶᠠᠷ ᠤ᠋ᠨ ᠶᠣᠰᠣᠭᠠᠷ ᠮᠥᠷᠭᠥᠲᠡᠯᠡ ᠲᠥᠷᠥ ᠶ᠋ᠢᠨ ᠲᠦᠰᠢᠯᠭᠡ ᠳᠥᠷᠪᠡᠨ ᠲᠦᠰᠢᠮᠡᠯ ᠭᠠᠷᠤᠭᠰᠠᠨ ᠦᠭᠡᠢ ᠳ᠋ᠦ᠍ᠷ ᠢᠯᠠᠭᠤ ᠶᠡᠬᠡᠯᠡ ᠵᠠᠨᠤᠨ ᠬᠣᠷᠣᠰᠤᠭᠰᠠᠨᠠ ᠺᠠᠯᠪᠠ ᠰᠣᠨᠣᠰᠴᠤ ᠭᠠᠭᠴᠠᠭᠠᠷ ᠭᠠᠷᠴᠤ ᠮᠥᠷᠭᠥᠪᠡ ᠂ ᠡᠳᠡᠭᠡᠷ ᠠᠷᠭᠠ ᠵᠠᠯᠢ ᠦᠭᠡ ᠰᠠᠨᠠᠭᠠᠨ ᠭᠠᠭᠴᠠ ᠵᠠᠮᠤᠬᠠ ᠨᠢᠭᠡᠬᠡᠨ ᠬᠥᠮᠦᠨ ᠦ᠌ ᠡᠭᠦᠰᠦᠭᠰᠡᠨ ᠢᠨᠦ ᠪᠤᠶᠤ᠃
ᠲᠡᠳᠦᠢ ᠬᠠᠷᠠᠬᠠᠨ ᠶᠠᠭᠠᠷᠠᠨ ᠮᠡᠩᠳᠡᠭᠦᠷᠡᠨ ᠴᠡᠷᠢᠭ ᠬᠤᠶᠠᠭ ᠴᠢᠭᠤᠯᠤᠯᠴᠠᠨ ᠦᠢᠮᠡᠯᠳᠦᠬᠦᠶᠡ ᠂ ᠡᠮᠦᠨᠡ ᠨᠠᠢ᠍ᠮᠠᠨ ᠤᠯᠤᠰ ᠠ᠋ᠴᠠ ᠢᠳᠡᠷ ᠳᠣᠪᠣ ᠪᠠᠰᠠ ᠢᠷᠡᠵᠦ ᠤᠷᠤᠭ ᠢ᠋ᠶ᠋ᠠᠨ ᠱᠠᠭᠠᠷᠳᠠᠬᠤᠢ ᠳ᠋ᠤᠷ ᠠᠨᠳᠠ ᠪᠣᠯᠭᠣᠲᠠᠢ ᠨᠠᠷ ᠡᠳᠡᠭᠡᠷ ᠤᠴᠢᠷ ᠢ᠋ ᠬᠡᠯᠡᠵᠦ ᠥᠭᠦᠯᠡᠷᠦᠨ :《ᠡᠳᠦᠭᠡ ᠴᠢᠪᠬᠢᠲᠡᠯᠡ ᠡᠨᠡ ᠪᠣᠷᠭᠢᠯᠳᠤᠭᠠᠨ ᠳ᠋ᠤᠷ ᠲᠣᠬᠢᠶᠠᠯᠳᠤᠵᠤᠬᠤᠢ᠃ ᠣᠳᠣ ᠶᠠᠭᠤᠨ ᠳ᠋ᠤᠷ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠬᠡᠷᠡᠭ ᠢᠯᠭᠠᠷᠠᠬᠤ ᠶ᠋ᠢ ᠦᠯᠦ ᠬᠦᠯᠢᠶᠡᠮᠦᠢ ? 》 ᠭᠡᠮᠡᠨ ᠪᠡᠯᠡᠭ ᠦᠯᠡᠳᠡᠭᠡᠨ ᠠᠪᠴᠤ ᠡᠭᠡᠭᠦᠯᠪᠡ ᠃
ᠲᠡᠭᠦᠨᠴᠡ ᠬᠡᠷᠡᠢᠳ ᠦ᠋ᠨ ᠵᠠᠭᠤᠨ ᠲᠦᠰᠢᠮᠡᠳ ᠮᠥᠷᠭᠥᠵᠦ ᠭᠠᠷᠤᠭᠰᠠᠨ ᠤ᠋ ᠬᠣᠢᠨᠠ ᠂ ᠾᠧ ᠸᠠᠩ ᠳᠣᠲᠣᠭᠠᠳᠤ ᠣᠷᠳᠣᠨᠠ ᠣᠷᠣᠭᠰᠠᠨ ᠳ᠋ᠤᠷ ᠥᠬᠢᠨ ᠰᠡᠷᠭᠦᠯᠡᠩ ᠭᠦᠩᠵᠦ ᠰᠣᠯᠤᠩᠭᠤᠸᠠ ᠂ ᠠᠨᠳᠠ ᠂ ᠬᠣᠷᠣᠭᠠ ᠂ ᠪᠣᠯᠭᠣᠲᠠᠢ ᠨᠠᠷ ᠢ᠋ ᠠᠪᠴᠤ ᠮᠥᠷᠭᠥᠨ ᠢᠳᠬᠠᠵᠤ ᠥᠭᠦᠯᠡᠷᠦᠨ : 《ᠪᠸᠲ᠋ᠠ᠋ ᠤᠯᠤᠰ ᠮᠠᠨ ᠤ᠋ ᠤᠯᠤᠰ ᠲᠤᠷ ᠳᠠᠷᠠᠭᠠ ᠳᠠᠷᠠᠭᠠ ᠲᠤᠰᠠ ᠪᠣᠯᠤᠭᠰᠠᠨ ᠭᠠᠵᠠᠷ ᠪᠣᠢ᠂ ᠬᠠᠷᠢᠨ ᠪᠢᠴᠢᠬᠠᠨ ᠴᠤ᠌ ᠦᠰ ᠪᠣᠯᠤᠭᠰᠠᠨ ᠭᠠᠵᠠᠷ ᠦᠭᠡᠢ ᠪᠥᠭᠡᠲᠡᠯᠡ ᠶᠠᠭᠠᠬᠢᠨ ᠬᠥᠮᠦᠨ ᠢ᠋ ᠬᠠᠯᠳᠠᠮᠤᠢ ? ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠮᠡᠷᠭᠡᠨ ᠂ ᠰᠠᠢᠳ ᠰᠢᠳᠤᠷᠭᠤ ᠂ ᠵᠠᠩᠵᠤᠨ ᠪᠠᠭᠠᠲᠤᠷ ᠂ ᠴᠡᠷᠢᠭ ᠴᠢᠭᠢᠷᠠᠭ ᠲᠤᠯᠠ ᠬᠢᠯᠪᠠᠷ ᠢ᠋ᠶ᠋ᠠᠷ ᠳᠡᠢᠯᠦᠭᠳᠡᠬᠦ ᠦᠭᠡᠢ᠂ ᠬᠡᠳᠦᠢ ᠲᠠᠢᠯᠪᠠᠴᠤ ᠪᠠᠷ ᠣᠭᠲᠣ ᠤᠴᠢᠷ ᠦᠭᠡᠢ ᠪᠡᠷ ᠡᠷᠢᠨ ᠬᠠᠯᠳᠠᠭᠰᠠᠨ ᠶᠠᠯᠠ ᠪᠤᠷᠤᠭᠤ ᠮᠠᠨ ᠳ᠋ᠤᠷ ᠪᠣᠯᠤᠮᠤᠢ᠃ ᠡᠴᠢᠭᠡ ᠬᠠᠭᠠᠨ ᠬᠢᠨᠠᠪᠠᠰᠤ ᠵᠣᠬᠢᠮᠤᠢ !》ᠭᠡᠮᠡᠨ ᠭᠠᠰᠢᠭᠤᠨᠠ ᠢᠳᠬᠠᠭᠰᠠᠨ ᠳ᠋ᠤᠷ ᠸᠠᠩ ᠬᠠᠭᠠᠨ ᠪᠠᠰᠠ ᠪᠠᠬᠠᠨ ᠬᠡᠯᠪᠡᠯᠵᠡᠬᠦ ᠪᠠᠢᠳᠠᠯ ᠣᠷᠣᠭᠰᠠᠨ ᠳ᠋ᠤ᠌ ᠰᠢᠨᠡ ᠸᠠᠩ ᠶᠡᠬᠡᠯᠡ ᠭᠡᠯᠮᠡᠵᠦ ᠶᠠᠭᠠᠷᠠᠨ ᠲᠣᠰᠴᠤ ᠥᠭᠦᠯᠡᠷᠦᠨ :《ᠬᠡᠦᠬᠡᠨ ᠳᠡᠭᠦᠦ ᠴᠢ ᠶᠠᠭᠤᠨ ᠳ᠋ᠤᠷ ᠪᠸᠲ᠋ᠠ᠋ ᠤᠯᠤᠰ ᠢ᠋ ᠡᠨᠡ ᠮᠡᠲᠦ ᠥᠮᠥᠭᠯᠡᠮᠦᠢ ? ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠬᠠᠭᠠᠨ ᠡᠴᠢᠭᠡ ᠶ᠋ᠢ ᠮᠢᠨᠦ ᠪᠠᠴᠢᠯᠠᠵᠤ ᠠᠪᠠᠴᠢᠭ᠍ᠰᠠᠨ ᠢ᠋ ᠬᠡᠦᠬᠡᠨ ᠳᠡᠭᠦᠦ ᠶᠠᠭᠤᠨ ᠦᠯᠦ ᠬᠡᠯᠡᠮᠦᠢ ? ᠲᠡᠷᠡ ᠢᠨᠦ ᠮᠠᠨ ᠢ᠋ ᠲᠤᠢᠯ ᠳ᠋ᠤᠷ ᠬᠦᠷᠲᠡᠯᠡ ᠳᠠᠷᠤᠯᠠᠭᠰᠠᠨ ᠠᠨᠤ ᠪᠤᠰᠤ ᠤᠤ ? 》 ᠰᠣᠯᠤᠩᠭᠤᠸᠠ ᠥᠴᠢᠷᠦᠨ :《ᠲᠡᠷᠡ ᠢᠨᠦ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠦᠬᠦᠬᠦᠢ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠲᠤᠯᠠ ᠡᠴᠢᠭᠡ ᠬᠠᠭᠠᠨ ᠢ᠋ᠶ᠋ᠠᠷ ᠠᠮᠢ ᠪᠠᠨ ᠬᠠᠯᠬᠠᠯᠠᠬᠤ ᠪᠠᠷ ᠠᠪᠠᠴᠢᠭ᠍ᠰᠠᠨ ᠪᠥᠯᠥᠭᠡ ᠃ ᠡᠷᠢᠵᠦ ᠬᠠᠯᠳᠠᠭᠰᠠᠨ ᠬᠡᠷᠡᠭ ᠪᠤᠰᠤ ᠪᠣᠯᠠᠢ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠢᠯᠠᠭᠤ ᠠᠮᠠ ᠪᠥᠭᠯᠡᠭᠳᠡᠭᠡᠳ ᠢᠴᠢᠩᠭᠦᠷᠡᠬᠦ ᠳ᠋ᠡᠭᠡᠨ ᠭᠡᠳᠡᠷᠭᠦ ᠲᠠᠢᠯᠵᠤ ᠥᠭᠦᠯᠡᠷᠦᠨ :《ᠠᠢ! ᠬᠡᠦᠬᠡᠨ ᠳᠡᠭᠦᠦ ᠴᠢ ᠣᠨᠴᠠ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠲᠡᠮᠦᠵᠢᠨ ᠢ᠋ ᠲᠡᠷᠡ ᠮᠡᠲᠦ ᠥᠮᠥᠭᠯᠡᠬᠦ ᠢᠨᠦ ᠦᠨᠡᠬᠡᠷ ᠲᠡᠮᠦᠵᠢᠨ ᠦ᠌ ᠳᠡᠭᠦᠦ ᠪᠡᠯᠭᠦᠳᠡᠢ ᠳ᠋ᠦ᠍ᠷ ᠭᠠᠷᠰᠤᠭᠠᠢ ᠬᠡᠮᠡᠮᠦᠢ ᠦᠦ ? ᠪᠡᠯᠭᠦᠳᠡᠢ ᠪᠡᠬᠡ ᠮᠡᠲᠦ ᠬᠠᠷᠠ ᠴᠢᠷᠠᠢ ᠲᠠᠢ ᠂ ᠪᠡᠷᠬᠡ ᠮᠠᠭᠤᠬᠠᠢ ᠰᠦᠷᠡᠬᠡᠢ ᠵᠢᠰᠦᠲᠡᠢ ᠂ ᠪᠡᠯᠴᠢᠷᠲᠤ ᠮᠣᠳᠣᠨ ᠮᠡᠲᠦ ᠬᠠᠴᠠᠷ ᠲᠠᠢ ᠂ ᠪᠡᠯᠡᠭ ᠦᠭᠡᠢ ᠪᠠᠢᠳᠠᠯ ᠳᠦᠷᠢ ᠲᠡᠢ ᠪᠣᠯᠠᠢ ᠃ ᠪᠢᠳᠦᠷᠶᠡ ᠮᠡᠲᠦ ᠰᠠᠢᠬᠠᠨ ᠲᠥᠷᠥᠭᠰᠡᠨ ᠪᠦᠸᠧ ᠵᠣ ᠬᠡᠦᠬᠡᠨ ᠳᠡᠭᠦᠦ ᠮᠢᠨᠦ ᠂ ᠴᠢ ᠲᠡᠭᠦᠨ ᠳ᠋ᠦ᠍ᠷ ᠬᠡᠷᠬᠢᠨ ᠬᠣᠯᠪᠣᠵᠤ ᠪᠣᠯᠬᠤ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠡᠨᠡ ᠨᠢᠭᠡᠨ ᠵᠡᠷᠭᠡ ᠶ᠋ᠢᠨ ᠪᠤᠳᠤᠩᠭᠤᠢ ᠮᠤᠩᠬᠠᠭ ᠤᠴᠢᠷ ᠦᠭᠡᠢ ᠦᠭᠡᠨ ᠳ᠋ᠦ᠍ᠷ ᠪᠣᠭᠣᠭᠳᠠᠨ ᠬᠠᠭᠠᠭᠳᠠᠵᠤ ᠂ ᠢᠴᠢᠩᠭᠦᠷᠡᠨ ᠲᠡᠨᠴᠢᠭᠦᠷᠡᠵᠦ ᠲᠡᠰᠬᠡᠯ ᠦᠭᠡᠢ ᠴᠢᠷᠠᠢ ᠤᠯᠠᠢᠵᠤ ᠂ ᠬᠣᠷᠣᠰᠴᠤ ᠤᠬᠢᠯᠠᠭᠰᠠᠭᠠᠷ ᠬᠣᠢᠲᠤ ᠴᠠᠴᠠᠷ ᠲᠤᠷ ᠡᠭᠡᠵᠦ ᠡᠴᠢᠪᠡ᠃ ᠠᠨᠳᠤ ᠨᠠᠷ ᠤ᠋ᠨ ᠭᠤᠷᠪᠠᠨ ᠲᠦᠰᠢᠮᠡᠯ ᠡᠨᠡ ᠪᠠᠢᠳᠠᠯ ᠢ᠋ ᠦᠵᠡᠭᠡᠳ ᠠᠶᠤᠮᠰᠢᠭ᠋ ᠦᠭᠡᠢ ᠦᠭᠡ ᠳᠠᠭᠤᠨ ᠡᠰᠡ ᠭᠠᠷᠪᠠᠢ ᠃
ᠲᠡᠳᠦᠢ ᠸᠠᠩ ᠬᠠᠭᠠᠨ ᠬᠡᠦᠬᠡᠨ ᠦ᠌ ᠦᠭᠡᠨ ᠳ᠋ᠦ᠍ᠷ ᠬᠡᠳᠦᠢ ᠪᠠᠬᠠᠨ ᠰᠡᠩᠬᠡᠷᠡᠨ ᠰᠡᠬᠡᠭᠡᠷᠡᠪᠡᠴᠦ ᠨᠢᠭᠡᠨᠲᠡ ᠠᠮᠠ ᠠᠯᠳᠠᠵᠤ ᠲᠠᠩᠭᠠᠷᠢᠭ᠍ᠯᠠᠨ ᠠᠶᠠᠭᠠ ᠶᠤᠭᠠᠨ ᠬᠠᠭᠠ ᠴᠠᠪᠴᠢᠭ᠍ᠰᠠᠨ ᠲᠤᠯᠠ ᠠᠷᠭᠠ ᠦᠭᠡᠢ ᠠᠯᠠᠯᠳᠤᠬᠤ ᠴᠡᠷᠢᠭ ᠲᠡᠭᠰᠢᠯᠡᠵᠦ ᠂ ᠶᠢᠰᠦ ᠶᠢᠰᠦᠨ ᠰᠢᠷᠠ ᠪᠥᠭᠲᠡᠭᠡᠳᠦ ᠬᠣᠲᠠ ᠬᠦᠷᠢᠶᠡᠲᠦ ᠪᠠᠭᠤᠳᠠᠯ ᠭᠡᠷ ᠪᠠ ᠠᠯᠲᠠᠨ ᠣᠷᠣᠢᠲᠤ ᠮᠠᠩᠨᠤᠭ ᠥᠷᠭᠥᠭᠡ ᠬᠢᠭᠡᠳ ᠨᠠᠷᠠᠨ ᠤ᠋ ᠬᠠᠯᠬᠠᠪᠴᠢ ᠯᠤᠤᠲᠤ ᠰᠢᠭᠦᠷ ᠂ ᠨᠠᠷᠠᠨ ᠰᠠᠷᠠᠨ ᠤ᠋ ᠲᠤᠭ ᠬᠢᠭᠢᠷᠢ ᠂ ᠭᠠᠷᠤᠳᠢ ᠭᠠᠯᠪᠢᠩᠭᠠ ᠶ᠋ᠢᠨ ᠳᠠᠯᠪᠠᠭᠠ ᠵᠤᠷᠪᠠᠳᠠᠰᠤ ᠶ᠋ᠢᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠶᠡᠬᠡ ᠵᠢᠭ᠍ᠰᠠᠭᠠᠯ ᠢ᠋ᠶ᠋ᠠᠷ ᠳᠤᠮᠳᠠᠳᠤ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠷᠤᠵᠤ ᠶᠡᠬᠡ ᠪᠠᠭᠤᠳᠠᠯ ᠪᠠᠭᠤᠪᠠ᠃ ᠶᠤᠸᠠᠨᠱᠤᠸᠠᠢ ᠵᠠᠮᠤᠬᠠ ᠶ᠋ᠢᠨ ᠠᠩᠭᠢ ᠪᠠᠭ ᠢ᠋ ᠢᠯᠭᠠᠭᠰᠠᠨ ᠠᠨᠤ : ᠺᠠᠯᠪᠠ ᠶ᠋ᠢ ᠪᠤᠰᠣᠴᠠᠷ ᠰᠡᠳᠬᠢᠯ ᠪᠠᠷᠢᠪᠠ ᠭᠡᠮᠡᠨ ᠲᠡᠷᠢᠭᠦᠨ ᠦ᠌ ᠲᠡᠷᠢᠭᠦᠨ ᠳ᠋ᠦ᠍ᠷ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ ᠠᠩᠬᠠ ᠬᠣᠰᠢᠭᠤᠴᠢ ᠪᠣᠯᠭᠠᠵᠤ ᠂ ᠠᠭᠤᠯᠠ ᠤᠴᠠᠷᠠᠪᠠᠰᠤ ᠵᠠᠮ ᠨᠡᠬᠡᠭᠡ ᠂ ᠤᠰᠤ ᠤᠴᠠᠷᠠᠪᠠᠰᠤ ᠬᠥᠭᠥᠷᠭᠡ ᠳᠡᠯᠪᠢ ᠂ ᠠᠢᠯ ᠤᠴᠠᠷᠠᠪᠠᠰᠤ ᠪᠠᠭᠤᠳᠠᠯ ᠪᠡᠯᠡᠳᠭᠡ ᠂ ᠴᠡᠷᠢᠭ ᠤᠴᠠᠷᠠᠪᠠᠰᠤ ᠲᠡᠷᠢᠭᠦᠯᠡᠭᠰᠡᠨ ᠢ᠋ ᠪᠡᠷᠢ ᠂ ᠭᠠᠭᠴᠠ ᠤᠷᠤᠭ᠍ᠰᠢ ᠣᠷᠣᠪᠠᠰᠤ ᠪᠣᠯᠬᠤ ᠪᠣᠢ ᠶᠠ ᠂ ᠬᠣᠢᠰᠢ ᠤᠬᠤᠷᠢᠪᠠᠰᠤ ᠴᠠᠪᠴᠢᠨ ᠠᠯᠠᠮᠤᠢ ᠭᠡᠮᠡᠨ ᠮᠠᠩᠯᠠᠢᠯᠠᠨ ᠪᠠᠢᠯᠳᠤᠬᠤ ᠵᠠᠩᠵᠤᠨ ᠪᠣᠯᠭᠠᠵᠤ ᠂ ᠮᠣᠷᠢᠨ ᠳᠡᠭᠡᠭᠦᠷ ᠲᠤᠪᠳᠤᠯᠭᠠᠪᠠᠷ ᠮᠣᠷᠳᠠᠭᠤᠯᠤᠭᠠᠳ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠬᠣᠣᠷᠭᠣᠰ ᠂ ᠱᠤᠮᠪᠣᠯ ᠂ ᠢᠯᠴᠠᠭ ᠂ ᠪᠠᠲ᠋ᠠ ᠂ ᠪᠥᠭᠡᠰᠢᠷ ᠲᠠᠪᠤᠭᠤᠯᠠ ᠳ᠋ᠤᠷ ᠮᠥᠨ ᠲᠠᠪᠤᠭᠠᠳ ᠲᠠᠪᠤᠭᠠᠳ ᠮᠢᠩᠭᠠᠨ ᠴᠡᠷᠢᠭ ᠵᠠᠬᠢᠷᠤᠭᠤᠯᠵᠤ ᠂ ᠳᠠᠢᠰᠤᠨᠠ ᠤᠴᠠᠷᠠᠭᠰᠠᠨ ᠴᠠᠭ ᠲᠤ᠌ ᠂ ᠬᠤᠪᠢᠰᠬᠠᠯ ᠢ᠋ ᠳᠠᠭᠠᠵᠤ ᠬᠡᠷᠡᠭᠯᠡᠬᠦ ᠶ᠋ᠢ ᠬᠦᠯᠢᠶᠡ ᠭᠡᠮᠡᠨ ᠮᠥᠨ ᠬᠦ᠌ ᠳᠣᠪᠳᠤᠯᠭᠠᠪᠠᠷ ᠮᠣᠷᠳᠠᠭᠤᠯᠵᠤ ᠂ ᠵᠠᠮᠤᠬᠠ ᠶ᠋ᠢᠨ ᠪᠡᠶᠡ ᠣᠯᠢᠨᠲᠠᠢ ᠂ ᠭᠣᠯᠢᠨᠲᠠᠢ ᠬᠣᠶᠠᠭᠤᠯᠠ ᠂ ᠲᠠᠢᠰᠢ ᠲᠠᠢᠪᠤᠤ ᠶ᠋ᠢ ᠠᠪᠴᠤ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠵᠠᠬᠢᠷᠤᠨ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠮᠥᠷᠥ ᠶ᠋ᠢᠨ ᠵᠠᠩᠵᠤᠨ ᠪᠣᠯᠵᠤ᠂ ᠲᠠᠢᠽᠦ ᠢᠯᠠᠭᠤ ᠢ ᠰᠢᠨᠡ ᠸᠠᠩ ᠂ ᠱᠤᠤᠱ᠌ᠢ ᠤᠷᠠᠨ ᠵᠠᠳᠠᠤᠯᠠᠢ᠂ ᠱᠤᠣᠪᠣᠣ ᠦᠬᠡᠷ ᠪᠦᠲᠦᠨᠡ ᠬᠣᠶᠠᠭᠤᠯᠠ ᠶ᠋ᠢ ᠠᠪᠴᠤ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠵᠠᠬᠢᠷᠤᠨ ᠪᠠᠷᠠᠭᠤᠨ ᠡᠲᠡᠭᠡᠳ ᠦ᠋ᠨ ᠮᠥᠷᠥ ᠶ᠋ᠢᠨ ᠵᠠᠩᠵᠤᠨ ᠪᠣᠯᠵᠤ ᠂ ᠸᠠᠩ ᠬᠠᠭᠠᠨ ᠪᠡᠶᠡ ᠪᠡᠷ ᠽᠠᠢᠰᠢᠶᠠᠩ ᠭᠦᠷᠡᠯᠵᠡᠭᠡᠨᠡ ᠂ ᠰᠢᠶᠠᠨ ᠹᠸᠩ ᠪᠠᠯᠳᠠᠷ ᠨᠠᠷ ᠢ᠋ ᠠᠪᠴᠤ ᠳᠤᠮᠳᠠᠳᠤ ᠴᠡᠷᠢᠭ ᠢ᠋ ᠨᠡᠢᠭᠡᠮᠯᠡᠨ ᠵᠠᠬᠢᠷᠴᠤ ᠭᠤᠷᠪᠠᠨ ᠬᠦᠷᠢᠶᠡᠨ ᠦ᠌ ᠲᠣᠪᠴᠢ ᠴᠠᠭᠠᠵᠠᠨ ᠤ᠋ ᠲᠤᠭ ᠢ᠋ ᠡᠮᠦᠨᠡ ᠪᠣᠯᠭᠠᠵᠤ ᠂ ᠥᠯᠵᠡᠢᠲᠦ ᠪᠤᠯᠠᠭᠠ ᠶ᠋ᠢᠨ ᠰᠡᠭᠦᠯ ᠦ᠋ᠨ ᠬᠢᠭᠢᠷᠢ ᠶ᠋ᠢ ᠬᠣᠢᠨᠠ ᠳᠠᠭᠠᠭᠤᠯᠤᠨ ᠂ ᠬᠡᠳᠦᠨ ᠠᠷᠪᠠᠨ ᠰᠢᠷᠠ ᠰᠢᠭᠦᠷ ᠳᠠᠯᠪᠠᠭᠠ ᠲᠤᠭ ᠬᠠᠯᠬᠠᠪᠴᠢ ᠨᠠᠷᠠᠨ ᠢ᠋ ᠬᠠᠯᠠᠭᠯᠠᠵᠤ ᠂ ᠬᠡᠳᠦᠨ ᠬᠣᠣᠰ ᠣᠭᠣᠰᠣᠷᠲᠤ ᠬᠦᠯᠢᠰ ᠵᠠᠮ ᠳ᠋ᠤᠷ ᠠᠩᠬᠢᠯᠵᠤ᠂ ᠮᠣᠷᠢᠨ ᠤ᠋ ᠳᠡᠭᠡᠷᠡ ᠬᠥᠭᠵᠢᠮ ᠳᠠᠭᠤᠷᠢᠰᠴᠤ ᠨᠢᠳᠦᠨ ᠦ᠌ ᠡᠮᠦᠨᠡ ᠴᠢᠮᠡᠭ ᠳᠡᠷᠪᠡᠯᠵᠡᠵᠦ ᠂ ᠡᠨᠡ ᠴᠠᠭ ᠤ᠋ᠨ ᠰᠦᠷ ᠳᠦᠷᠢᠮ ᠪᠠᠷᠠᠭᠤᠨ ᠵᠣᠣ ᠶ᠋ᠢᠨ ᠳᠠᠯᠠᠢ ᠪᠠᠯᠮᠠ᠂ ᠪᠡᠴᠢᠨ ᠡᠷᠳᠡᠨᠢ ᠡᠴᠡ ᠴᠦ᠍ ᠬᠡᠲᠦᠷᠬᠡᠢ᠃ ᠦᠨᠡᠬᠡᠷ ᠨᠢᠳᠦᠨ ᠢ᠋ ᠭᠢᠯᠠᠰᠬᠠᠵᠤ ᠰᠡᠳᠬᠢᠯ ᠢ᠋ ᠬᠥᠪᠬᠡᠯᠵᠡᠭᠦᠯᠵᠦ᠂ ᠰᠠᠨᠠᠭᠠᠨ ᠢ᠋ ᠰᠡᠷᠭᠦᠭᠡᠨ ᠣᠮᠣᠭ ᠢ᠋ ᠳᠦᠷᠦᠭᠦᠯᠦᠮᠦᠢ᠃ ᠲᠤᠭ ᠬᠢᠭᠢᠷᠢ ᠨᠠᠷᠠᠨ ᠢ᠋ ᠬᠠᠯᠬᠠᠭᠯᠠᠵᠤ᠂ ᠵᠠᠷ ᠵᠡᠪᠰᠡᠭ ᠲᠠᠯᠠ ᠶ᠋ᠢ ᠪᠦᠷᠬᠦᠵᠦ᠂ ᠬᠥᠮᠦᠨ ᠮᠣᠷᠢᠨ ᠲᠡᠰᠦᠷᠡᠰᠢ ᠦᠭᠡᠢ ᠂ ᠴᠡᠷᠢᠭ ᠬᠤᠶᠠᠭ ᠨᠢᠳᠦᠨ ᠦ᠌ ᠦᠵᠦᠭᠦᠷ ᠦᠨᠡᠬᠡᠷ ᠬᠠᠨ ᠠᠭᠤᠯᠠ ᠪᠠᠷ ᠥᠨᠳᠡᠭᠡ ᠶ᠋ᠢ ᠳᠠᠷᠤᠵᠤ ᠂ ᠬᠠᠲᠤᠨ ᠮᠥᠷᠡᠨ ᠢ᠋ᠶ᠋ᠡᠷ ᠨᠠᠪᠴᠢ ᠶ᠋ᠢ ᠤᠷᠤᠰᠬᠠᠬᠤ ᠮᠡᠲᠦ ᠪᠡᠷ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠭᠠᠵᠠᠷ ᠳᠡᠯᠪᠡᠷᠡᠨ ᠂ ᠴᠡᠷᠢᠭ ᠦ᠋ᠨ ᠲᠣᠭᠣᠰᠣᠨ ᠲᠡᠭᠷᠢ ᠳ᠋ᠦ᠍ᠷ ᠲᠤᠯᠵᠤ ᠂ ᠠᠯᠠᠬᠤ ᠠᠭᠤᠷ ᠡᠭᠦᠯᠡ ᠶ᠋ᠢ ᠨᠡᠪᠲᠡᠯᠦᠨ ᠂ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠰᠦᠨᠡᠰᠦᠨ ᠢ᠋ ᠰᠠᠷᠨᠢᠭᠤᠯᠵᠤ ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠵᠦᠭ ᠳᠠᠯᠠᠢ ᠲᠦᠯᠬᠢᠨ ᠮᠥᠷᠡᠨ ᠪᠢᠯᠬᠠᠬᠤ ᠮᠡᠲᠦ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠲᠣᠪᠠᠲᠣᠯᠤᠨ ᠣᠷᠣᠪᠠ ᠃
ᠡᠨᠡ ᠦᠶᠡ ᠳ᠋ᠦ᠍ᠷ ᠬᠡᠷᠡᠢᠳ ᠦ᠋ᠨ ᠡᠯᠴᠢ ᠶᠠᠪᠤᠵᠤ ᠪᠠᠢᠭᠰᠠᠨ ᠠᠰᠤᠷᠢ ᠂ ᠵᠠᠮᠤᠬᠠ ᠶ᠋ᠢᠨ ᠡᠷᠬᠡ ᠪᠠᠷᠢᠭ᠍ᠰᠠᠨ ᠢ᠋ ᠦᠵᠡᠭᠡᠳ ᠯᠠᠪ ᠲᠡᠭᠦᠨ ᠦ᠌ ᠬᠠᠭᠤᠴᠢᠨ ᠦᠰ ᠢ᠋ ᠨᠡᠬᠡᠵᠦ ᠂ ᠨᠠᠮᠠᠢ ᠤᠨᠠᠭᠠᠮᠤᠢ ᠬᠡᠮᠡᠭᠡᠳ ᠮᠣᠷᠢᠨ ᠳ᠋ᠤᠷ ᠢᠰᠬᠦᠯᠦᠭᠳᠡᠵᠦ ᠬᠡᠬᠦᠳᠡᠭ ᠦ᠋ᠨ ᠶᠠᠰᠤ ᠭᠡᠮ ᠪᠣᠯᠪᠠ ᠭᠡᠮᠡᠨ ᠰᠢᠯᠲᠠᠭᠯᠠᠵᠤ ᠲᠤᠰᠢᠶᠠᠯ ᠢ᠋ᠶ᠋ᠡᠨ ᠪᠠᠢᠵᠤ ᠭᠡᠷ ᠲᠡᠭᠡᠨ ᠰᠤᠯᠠ ᠰᠠᠭᠤᠵᠤ ᠪᠠᠢᠭᠰᠠᠨ ᠲᠤᠯᠠ ᠥᠨᠥᠬᠡᠨ ᠡᠮᠦᠨᠡ ᠵᠦᠭ ᠬᠡᠳᠦᠨ ᠮᠢᠩᠭᠠᠨ ᠠᠭᠲᠠ ᠭᠡᠯᠢᠵᠦ ᠂ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠭᠠᠳᠠᠨᠠ ᠪᠦᠬᠦᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠡᠭᠦᠨ ᠬᠣᠢᠲᠤ ᠪᠦᠬᠦᠢ ᠬᠣᠢᠲᠤ ᠨᠡᠢᠰᠯᠡᠯ ᠦ᠋ᠨ ᠰᠢᠩ ᠵᠦᠩ ᠹᠦ ᠂ ᠰᠢᠩ ᠵᠦᠩ ᠰᠢᠶᠠᠨ ᠂ ᠶᠦᠩ ᠳᠧ ᠰᠢᠶᠠᠨ ᠂ ᠳ᠋ᠦᠩ ᠪᠠ ᠰᠢᠶᠠᠨ ᠤ᠋ ᠵᠡᠷᠭᠡ ᠶ᠋ᠢᠨ ᠭᠠᠵᠠᠷ ① ᠮᠣᠷᠢᠨ ᠠᠷᠠᠯᠵᠢᠨ ᠶᠠᠪᠤᠬᠤᠶᠠ ᠂ ᠡᠭᠡᠬᠦ ᠵᠠᠮ ᠳ᠋ᠤᠷ ᠾᠧ ᠸᠠᠩ ᠤ᠋ᠨ ᠪᠸᠲ᠋ᠠ᠋ ᠤᠯᠤᠰ ᠯᠤᠭᠠ ᠲᠡᠢᠨ ᠳᠡᠭᠳᠡᠭᠡᠬᠦ ᠶ᠋ᠢ ᠰᠣᠨᠣᠰᠴᠤ ᠳᠣᠲᠣᠷᠠ ᠪᠠᠨ ᠰᠡᠮᠡᠬᠡᠷ ᠵᠢᠬᠡᠭᠦᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ ᠂ ᠡᠮᠦᠨᠡ ᠵᠦᠭ ᠡᠴᠡ ᠠᠴᠢᠷᠠᠭᠰᠠᠨ ᠨᠠᠷᠢᠨ ᠵᠥᠭᠡᠯᠡᠨ ᠠᠷᠠᠯᠵᠢᠶᠠ ᠪᠠᠨ ᠲᠡᠳᠡᠨ ᠳ᠋ᠦ᠍ᠷ ᠬᠤᠳᠠᠯᠳᠤᠨ ᠥᠭᠰᠦᠭᠡᠢ ᠭᠡᠮᠡᠨ ᠬᠡᠷᠡᠢᠳ ᠦ᠋ᠨ ᠵᠡᠭᠦᠨ ᠵᠠᠬᠠ ᠳ᠋ᠤᠷ ᠬᠦᠷᠦᠮᠡᠭᠴᠡ ᠣᠯᠠᠨ ᠠᠢᠮᠠᠭ ᠤ᠋ᠨ ᠠᠷᠠᠳ ᠴᠤᠭᠠᠷ ᠂ ᠬᠤᠷᠠᠨ ᠢᠷᠡᠵᠦ ᠂ ᠠᠷᠠᠯᠵᠢᠶᠠ ᠬᠢᠬᠦᠢ ᠳ᠋ᠦ᠍ᠷ ᠬᠡᠷᠡᠢᠳ ᠦ᠋ᠨ ᠬᠤᠯᠠᠭᠠᠢ ᠡᠯᠴᠢ ᠂ ᠥᠨᠳᠡᠭᠡᠨ ᠮᠥᠭᠥ ᠶ᠋ᠢᠨ ᠠᠷᠠᠯᠵᠢᠶᠠ ᠶᠠᠪᠤᠬᠤ ᠣᠯᠣᠩᠬᠤ ᠂ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠳ᠋ᠤᠷ ᠤᠴᠠᠷᠠᠵᠤ ᠲᠠᠨᠢᠯᠴᠠᠭᠠᠳ ᠰᠡᠮᠡᠬᠡᠷ ᠬᠡᠯᠡᠯᠴᠡᠬᠦᠢ ᠶ᠋ᠢ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠵᠡᠭᠦᠨᠳᠡᠬᠢ ᠲᠤᠷᠰᠢᠭᠤᠯ ᠤ᠋ᠨ ᠬᠥᠮᠦᠨ ᠂ ᠲᠣᠭᠲᠣᠩᠭᠣ᠌ ᠪᠠᠭᠠᠲᠤᠷ ᠤ᠋ᠨ ᠬᠥᠪᠡᠭᠦᠨ ᠂ ᠠᠨᠳᠠᠨ ᠴᠢᠩ ᠴᠥᠮ ᠣᠯᠵᠤ ᠰᠣᠨᠣᠰᠤᠭᠠᠳ ᠶᠡᠬᠡᠯᠡ ᠭᠢᠷᠲ᠌ᠬᠢᠵᠦ ᠂ ᠠᠷᠠᠯᠵᠢᠶᠠ ᠬᠢᠬᠦ ᠪᠡᠨ ᠪᠠᠢᠭᠠᠳ ᠲᠡᠷᠡ ᠬᠣᠶᠠᠷ ᠮᠥᠭᠥ ᠠᠪᠬᠤ ᠬᠤᠳᠠᠯᠳᠤᠭᠠᠴᠢᠨ ᠢ᠋ ᠬᠣᠯᠠᠭᠤᠷ ᠬᠠᠢᠮᠤᠰᠤᠨ ᠳᠠᠭᠠᠵᠤ ᠶᠠᠪᠤᠭᠰᠠᠭᠠᠷ ᠂ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠪᠤᠷᠬᠠᠨ ᠭᠠᠯᠳᠤᠨᠠ ᠶ᠋ᠢᠨ ᠣᠢᠷᠠ ᠬᠦᠷᠦᠮᠡᠭᠴᠡ ᠰᠥᠨᠢ ᠪᠡᠷ ᠣᠷᠣᠵᠤ ᠂ ᠣᠯᠣᠩᠬᠤ ᠭᠣᠣᠷᠬᠢ ᠬᠣᠶᠠᠭᠤᠯᠠ ᠶ᠋ᠢ ᠪᠠᠷᠢᠮᠲᠠᠯᠠᠨ ᠵᠢᠨᠦᠩ ᠮᠤᠬᠤᠯᠢ ᠳ᠋ᠤᠷ ᠬᠦᠷᠭᠡᠪᠡ ᠃ ᠮᠤᠬᠤᠯᠢ ᠠᠨᠳᠠᠨ ᠴᠢᠩ ᠳ᠋ᠦ᠍ᠷ ᠬᠦᠨᠳᠦ ᠱᠠᠩ ᠥᠭᠴᠦ ᠬᠥᠬᠢᠭᠦᠯᠦᠭᠡᠳ ᠰᠠᠢᠰᠢᠶᠠᠨ ᠥᠭᠦᠯᠡᠷᠦᠨ:《ᠰᠣᠯᠣᠩᠭᠣᠰ ᠤ᠋ᠨ ᠦᠨᠡᠭᠡ ᠶ᠋ᠢᠨ ᠮᠥᠷᠡᠨ ᠢ᠋ ᠰᠤᠮᠤ ᠮᠡᠲᠦ ᠭᠡᠲᠦᠯᠦᠭᠰᠡᠨ ᠢ᠋ ᠰᠣᠨᠣᠰᠤᠮᠠᠭᠴᠠ ᠰᠡᠳᠬᠢᠯ ᠲᠠᠯᠪᠢᠵᠤ ᠬᠡᠷᠡᠢᠳ ᠦ᠋ᠨ ᠭᠡᠮ ᠢ᠋ ᠮᠡᠳᠡᠭᠰᠡᠨ ᠰᠤᠷᠲᠠᠯ ᠰᠣᠶᠣᠯᠲᠤ ᠢᠵᠠᠭᠤᠷᠲᠠᠨ ᠤ᠋ ᠦᠷᠡ ᠠᠨᠳᠠᠨ ᠴᠢᠩ ᠰᠢᠳᠤᠷᠭᠤ ᠦᠨᠡᠨᠴᠢ ᠬᠡᠲᠦᠢᠳᠴᠦᠬᠦᠢ !》ᠭᠡᠮᠡᠨ ᠬᠤᠷᠢᠮ ᠥᠭᠴᠦ ᠳᠠᠬᠢᠨ ᠲᠤᠷᠰᠢᠭᠤᠯᠤᠷᠠ ᠢᠯᠡᠭᠡᠭᠡᠳ ᠬᠣᠶᠠᠷ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠣᠨᠣᠯᠭᠠ ᠬᠥᠰᠬᠡ ᠲᠡᠢ ᠴᠥᠮ ᠨᠡᠩᠵᠢᠭᠦᠯᠵᠦ ᠂ ᠮᠥᠩᠭᠥ ᠂ ᠲᠣᠷᠭᠠ ᠂ ᠵᠠᠬᠠ ᠶ᠋ᠢ ᠴᠥᠮ ᠣᠯᠵᠤ ᠂ ᠭᠠᠭᠴᠠ ᠠᠯᠲᠠᠨ ᠪᠠ ᠪᠢᠴᠢᠭ ᠢ᠋ ᠣᠯᠤᠭᠰᠠᠨ ᠦᠭᠡᠢ ᠳ᠋ᠦ᠍ᠷ ᠮᠤᠬᠤᠯᠢ ᠳᠣᠲᠣᠭᠠᠳᠤ ᠴᠠᠴᠠᠷ ᠲᠤᠷ ᠰᠠᠭᠤᠵᠤ ᠪᠦᠭᠦᠳᠡᠭᠡᠷ ᠢ᠋ ᠠᠪᠠᠴᠢᠵᠤ ᠂ ᠰᠢᠳᠠᠷ ᠠᠷᠠᠳ ᠲᠤᠷ ᠵᠠᠬᠢᠵᠤ ᠨᠡᠩᠵᠢᠭᠦᠯᠵᠦ ᠂ ᠡᠮᠡᠭᠡᠯ ᠦ᠋ᠨ ᠳᠡᠪᠢᠰ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠪᠢᠴᠢᠭ ᠢ᠋ ᠣᠯᠤᠭᠠᠳ ᠰᠤᠯᠠ ᠠᠷᠠᠳ ᠢ᠋ ᠴᠥᠮ ᠵᠠᠢᠯᠠᠭᠤᠯᠵᠤ ᠂ ᠰᠠᠶᠢ ᠲᠡᠷᠡ ᠮᠥᠭᠥ ᠠᠪᠬᠤ ᠬᠥᠮᠦᠨ ᠦ᠌ ᠮᠥᠷᠥ ᠳ᠋ᠦ᠍ᠷ ᠢᠯᠳᠦ ᠲᠠᠯᠪᠢᠵᠤ ᠦᠨᠡᠨ ᠢ᠋ᠶ᠋ᠡᠨ ᠪᠦᠷᠢᠨ ᠮᠡᠳᠡᠭᠦᠯ ᠂ ᠨᠢᠭᠡᠨ ᠦᠰᠦᠭ ᠳᠠᠯᠳᠠᠯᠠᠪᠠᠰᠤ ᠲᠠ ᠬᠣᠶᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠴᠢᠨᠦ ᠠᠪᠤᠮᠤᠢ ᠬᠡᠮᠡᠪᠡ ᠂ ᠡᠨᠡ ᠬᠣᠶᠠᠷ ᠵᠣᠴᠢᠳ ᠤ᠋ᠨ ᠮᠥᠬᠥᠬᠦ ᠪᠠ ᠮᠥᠯᠲᠥᠷᠡᠬᠦ ᠬᠠᠮᠢᠭᠠᠰᠢ ᠪᠣᠯᠬᠤ ᠶ᠋ᠢ ᠮᠡᠳᠡᠰᠦᠭᠡᠢ ᠬᠡᠮᠡᠪᠡᠰᠦ ᠰᠤᠳᠤᠷᠴᠢ ᠲᠦᠰᠢᠮᠡᠯ ᠲᠠᠢᠵᠢ ᠢᠨᠵᠠᠨᠨᠠᠰᠢ ᠮᠢᠨᠦ ᠵᠦᠩ ᠰᠢᠨ ᠂ ᠴᠧᠩ ᠰᠢᠨ ᠬᠣᠶᠠᠷ ᠹᠦ ᠶ᠋ᠢᠨ ᠠᠭᠡ ᠨᠠᠷ ᠭᠡᠭᠡ ᠨᠠᠷ ᠤ᠋ᠨ ᠤᠰᠤᠨ ᠳᠠᠷᠬᠠᠢ ᠥᠬᠢᠨ ② ᠂ ᠦᠬᠡᠷᠲᠦ ᠦᠭᠡᠨᠴᠡ ᠬᠥᠪᠡᠭᠦᠨ ᠦ᠌ ᠬᠡᠩᠭᠡᠷᠭᠡ ᠂ ᠬᠡᠳᠡᠷᠭᠡ ᠬᠣᠶᠠᠷ ᠣᠳᠣᠨ ᠢ᠋ ᠲᠠᠬᠢᠬᠤ ᠤᠷᠠᠨ ᠭᠤᠶᠤᠬᠤ ᠨᠠᠭᠠᠳᠤᠮ ᠢ᠋ ᠪᠠᠬᠠᠨ ᠦᠵᠡᠵᠦ ᠢᠨᠢᠶᠡᠭᠡᠳ ᠵᠢᠴᠢ ᠵᠠᠯᠭᠠᠵᠤ ᠴᠥᠯᠪᠡᠭᠰᠡᠨ ᠳᠣᠣᠷᠠᠲᠤ ᠪᠦᠯᠦᠭ ᠢ᠋ ᠦᠵᠡᠭᠳᠡᠬᠦᠢ ᠃
– – – –
① ᠡᠳᠡᠭᠡᠷ ᠭᠠᠵᠠᠷ ᠴᠥᠮ ᠪᠠᠷᠠᠭᠤᠨ ᠳᠣᠬ᠍ᠮᠣᠭ ᠤ᠋ᠨ ᠭᠠᠵᠠᠷ ᠮᠥᠨ᠂ᠠᠯᠲᠠᠨ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ᠷ ᠡᠳᠦᠭᠡᠬᠢ ᠭᠤᠷᠪᠠᠨ ᠰᠤᠪᠤᠷᠭᠠ ᠪᠦᠬᠦᠢ ᠴᠤᠤ ᠶᠠᠩ ᠰᠢᠶᠠᠨ ᠤ᠋ ᠭᠠᠵᠠᠷ ᠢ᠋ ᠰᠢᠩ ᠵᠦᠭ ᠹᠦ ᠬᠡᠮᠡᠵᠦᠬᠦᠢ ᠂ ᠬᠠᠷᠠ ᠬᠣᠲᠠ ᠶ᠋ᠢᠨ ᠨᠡᠷᠡ ᠴᠢᠶᠠᠨ ᠵᠧᠦ ᠬᠡᠮᠡᠬᠦ ᠠᠵᠤᠭᠤ᠃
② ᠨᠧᠦ ᠯᠠᠩ᠂ ᡁᠢ ᠨᠢᠦᠢ ᠬᠣᠶᠠᠷ ᠣᠳᠣᠨ ᠪᠤᠶᠤ ᠃
ᠴᠣᠬᠣᠯᠠᠭᠰᠠᠨ ᠠᠨᠤ
ᠡᠨᠡ ᠪᠦᠯᠦᠭ ᠢ᠋ ᠮᠡᠷᠭᠡᠳ ᠢ᠋ᠶ᠋ᠡᠷ ᠰᠠᠢᠬᠠᠨ ᠨᠠᠷᠢᠪᠴᠢᠯᠠᠨ ᠰᠢᠨᠵᠢᠪᠡᠦ ? ᠲᠡᠷᠢᠭᠦᠨ ᠬᠡᠰᠡᠭ ᠲᠣᠷ ᠲᠠᠢᠽᠦ ᠶ᠋ᠢᠨ ᠣᠯᠠᠨ ᠵᠠᠩᠵᠤᠨ ᠨᠠᠷ ᠲᠠᠢᠽᠦ ᠶ᠋ᠢᠨ ᠠᠬᠠᠮᠠᠳ ᠬᠥᠪᠡᠭᠦᠨ ᠵᠣᠴᠢ ᠶ᠋ᠢᠨ ᠡᠷᠡᠯᠬᠡᠭ ᠪᠠᠭᠠᠲᠤᠷ ᠢ᠋ ᠱᠠᠭᠠᠷᠳᠠᠨ ᠬᠥᠬᠢᠭᠦᠯᠬᠦᠢ ᠶ᠋ᠢᠨ ᠲᠤᠯᠠ ᠬᠤᠷᠢᠮ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ᠷ ᠰᠠᠭᠤᠯᠭᠠᠵᠤ ᠬᠦᠨᠳᠦᠯᠡᠯ ᠢ᠋ ᠦᠵᠡᠭᠦᠯᠦᠶᠡ ᠭᠡᠮᠡᠨ ᠭᠤᠶᠤᠭᠰᠠᠨ ᠳ᠋ᠤᠷ ᠲᠠᠢᠽᠦ ᠶ᠋ᠢᠨ ᠠ ᠲᠣᠯᠣᠭᠠᠢ ᠪᠠᠷ ᠬᠣᠯᠪᠣᠵᠤ ᠵᠠᠬᠢᠭ᠍ᠰᠠᠨ – ᠠᠪᠠᠭᠠ ᠠᠨᠳᠠ ᠨᠠᠷ ᠢ᠋ ᠠᠨᠤ ᠰᠠᠢᠰᠢᠶᠠᠭᠰᠠᠨ ᠨᠢᠭᠡᠨ ᠬᠡᠷᠡᠭ ᠂ ᠡᠷᠲᠡᠨ ᠦ᠌ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠰᠡᠭᠦᠯ ᠦ᠋ᠨ ᠦᠶᠡ ᠶ᠋ᠢᠨ ᠤᠯᠤᠰ ᠤ᠋ᠨ ᠦᠨᠳᠦᠰᠦᠨ ᠢ᠋ ᠪᠠᠢᠭᠤᠯᠤᠭᠰᠠᠨ ᠰᠧ ᠮᠠ᠋ ᠢ ᠶ᠋ᠢᠨ ᠬᠣᠶᠠᠷ ᠬᠥᠪᠡᠭᠦᠨ ᠰᠧ ᠮᠠ᠋ ᠱᠢ ᠂ ᠰᠧ ᠮᠠ᠋ ᠵᠣᠣ ᠬᠣᠶᠠᠭᠤᠯᠠ ᠶ᠋ᠢ ᠮᠠᠭᠲᠠᠭᠰᠠᠨ ᠳ᠋ᠤᠷ ᠦᠯᠢᠳᠬᠡᠪᠡᠰᠦ ᠶᠠᠮᠪᠠᠷ ᠪᠣᠢ ? ᠼᠤᠤ ᠼᠤᠤ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠮᠠᠭᠲᠠᠬᠤᠢ ᠳ᠋ᠤᠷ ᠮᠢᠨᠦ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠤᠨᠠᠭᠠ ᠳᠠᠭᠠ ᠬᠡᠮᠡᠵᠦᠬᠦᠢ ᠂ ᠰᠧ ᠮᠠ᠋ ᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠮᠠᠭᠲᠠᠬᠤᠢ ᠳ᠋ᠤᠷ ᠮᠢᠨᠦ ᠰᠠᠷᠠᠪᠴᠢᠨᠠ ᠡᠭᠦᠷᠯᠡᠭᠰᠡᠨ ᠭᠡᠷ ᠦ᠋ᠨ ᠪᠣᠯᠵᠣᠮᠣᠷ ᠬᠡᠮᠡᠵᠦᠬᠦᠢ ᠃ ᠼᠤᠤ ᠼᠤᠤ ᠪᠣᠯᠪᠠᠰᠤ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠪᠠᠭᠠᠲᠤᠷ ᠢ᠋ ᠮᠠᠭᠲᠠᠵᠤᠬᠤᠢ ᠂ ᠰᠧ ᠮᠠ᠋ ᠢ ᠪᠣᠯᠪᠠᠰᠤ ᠬᠡᠦᠬᠡᠳ ᠢ᠋ᠶ᠋ᠡᠨ ᠤᠬᠠᠭᠠᠨᠲᠠᠢ ᠶ᠋ᠢ ᠮᠠᠭᠲᠠᠵᠤᠬᠤᠢ ᠃ ᠨᠢᠭᠡᠨ ᠢᠨᠦ ᠸᠧᠢ ᠤᠯᠤᠰ ᠤ᠋ᠨ ᠲᠠᠢᠽᠦ ᠂ ᠨᠢᠭᠡᠨ ᠢᠨᠦ ᠶ᠋ᠢᠨ ᠤᠯᠤᠰ ᠤ᠋ᠨ ᠲᠠᠢᠽᠦ ᠂ ᠡᠨᠡ ᠬᠣᠶᠠᠷ ᠲᠠᠢᠽᠦ ᠶᠠᠭᠤᠨᠠᠢ ᠡᠨᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠲᠠᠢᠽᠦ ᠳ᠋ᠦ᠍ᠷ ᠬᠦᠷᠴᠦ ᠴᠢᠳᠠᠮᠤᠢ? ᠡᠨᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠲᠠᠢᠽᠦ ᠬᠡᠳᠦᠢᠪᠡᠷ ᠬᠥᠮᠦᠵᠢᠭᠦᠯᠬᠦ ᠶ᠋ᠢ ᠦᠵᠡᠭᠦᠯᠪᠡᠴᠦ ᠠᠮᠠ ᠨᠡᠭᠡᠭᠡᠮᠡᠭᠴᠡ ᠠᠪᠠᠭᠠ ᠠᠨᠳᠠ ᠨᠠᠷ ᠢ᠋ ᠰᠠᠢᠰᠢᠶᠠᠬᠤ ᠪᠥᠭᠡᠳ ᠠᠯᠤᠰ ᠴᠠᠭᠠᠨᠠ ᠵᠣᠴᠢ ᠶ᠋ᠢᠨ ᠠᠰᠠᠷᠠᠯ ᠦᠭᠡᠢ ᠶ᠋ᠢ ᠵᠢᠭᠰᠢᠬᠦ ᠪᠤᠰᠤ ᠤᠤ ? ᠡᠭᠦᠨ ᠢ᠋ ᠰᠠᠶᠢ ᠬᠡᠯᠪᠡᠢᠭᠦᠦ ᠦᠭᠡᠢ ᠠᠰᠠᠷᠠᠯ ᠬᠡᠮᠡᠮᠦᠢ ᠃ ᠠᠩᠬᠠ ᠪᠦᠯᠦᠭ ᠲᠣᠷ ᠵᠠᠮᠤᠬᠠ ᠶ᠋ᠢᠨ ᠪᠡᠯᠡᠳᠬᠡᠭᠰᠡᠨ ᠥᠩᠬᠥᠷᠢᠬᠦ ᠬᠠᠳᠠ ᠶ᠋ᠢᠨ ᠠᠷᠭᠠ ᠳ᠋ᠤᠷ ᠣᠷᠣᠭᠠᠳ ᠨᠢᠭᠡᠨᠲᠡ ᠵᠠᠢᠯᠠᠰᠢ ᠦᠭᠡᠢ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠳᠤᠲᠠᠭᠠᠵᠤ ᠬᠡᠮᠬᠡᠷᠡᠬᠦ ᠡᠴᠡ ᠲᠤᠯᠵᠤ ᠬᠡᠮᠬᠡᠷᠡᠰᠦᠭᠡᠢ ᠬᠡᠮᠡᠭᠰᠡᠨ ᠲᠡᠷᠡ ᠰᠠᠨᠠᠭᠠᠨ ᠴᠣᠬᠣᠮ ᠲᠦᠮᠡᠨ ᠦᠶᠡ ᠶ᠋ᠢᠨ ᠲᠤᠢᠯ ᠤ᠋ᠨ ᠪᠠᠭᠠᠲᠤᠷ ᠪᠣᠯᠠᠢ ᠃ ᠡᠭᠦᠨ ᠢ᠋ ᠳᠠᠷᠤᠢ ᠲᠤᠯᠭᠠᠭᠤᠷᠢᠲᠤ ᠡᠷᠡ ᠂ ᠲᠤᠯᠵᠤ ᠢᠷᠡᠭᠰᠡᠨ ᠦᠬᠦᠯ ᠳ᠋ᠦ᠍ᠷ ᠤᠴᠠᠷᠠᠪᠠᠰᠤ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠬᠦᠯᠢᠶᠡᠨ ᠠᠪᠬᠤ ᠠᠨᠤ ᠲᠤᠢᠯ ᠤ᠋ᠨ ᠴᠢᠬᠢᠷᠡᠭ ᠪᠤᠰᠤ ᠤᠤ ? ᠬᠡᠷᠪᠡ ᠲᠤᠯᠵᠤ ᠡᠰᠡ ᠢᠷᠡᠭᠰᠡᠨ ᠢ᠋ ᠡᠢᠨ ᠬᠦ᠌ ᠡᠷᠢᠭᠰᠡᠨ ᠪᠥᠭᠡᠰᠦ ᠲᠡᠭᠦᠨ ᠢ᠋ ᠭᠠᠭᠴᠠ ᠨᠢᠭᠡᠨ ᠭᠠᠨᠢ ᠡᠷᠡ ᠬᠡᠮᠡᠬᠦ ᠪᠣᠢ ᠶᠠ ᠂ ᠭᠠᠢᠬᠠᠮᠰᠢᠭ᠍ᠲᠤ ᠪᠠᠭᠠᠲᠤᠷ ᠲᠤᠷ ᠬᠡᠷᠬᠢᠨ ᠲᠣᠭᠠᠴᠠᠵᠤ ᠪᠣᠯᠬᠤ ᠪᠣᠢ ! ᠡᠷᠲᠡ ᠭᠤᠸᠠᠨ ᠯᠣᠣᠶᠧ ᠵᠡᠭᠦᠨ ᠦ ᠤᠯᠤᠰ ᠲᠤᠷ ᠰᠠᠬᠢᠭᠤᠯᠰᠤᠨ ᠪᠣᠯᠬᠤ ᠦᠶᠡ ᠳ᠋ᠦ᠍ᠷ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠴᠢᠪ ᠴᠢᠬᠡ ᠲᠤᠯᠵᠤ ᠬᠦᠯᠢᠶᠡᠭᠰᠡᠨ ᠢᠨᠦ ᠮᠥᠨ ᠬᠦ᠌ ᠡᠨᠡ ᠴᠠᠭ ᠤ᠋ᠨ ᠲᠤᠢᠯ ᠤ᠋ᠨ ᠪᠠᠭᠠᠲᠤᠷ ᠪᠣᠯᠠᠢ ᠃ ᠤᠷᠢᠳᠠ ᠼᠤᠤ ᠼᠤᠤ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠬᠣᠷᠢᠭ᠍ᠳᠠᠭᠠᠳ ᠮᠥᠨ ᠬᠦ᠌ ᠲᠤᠯᠤᠭᠰᠠᠨ ᠦᠬᠦᠯ ᠭᠡᠮᠡᠨ ᠵᠠᠩ ᠯᠢᠶᠣᠤ ᠶ᠋ᠢᠨ ᠬᠡᠳᠦᠨ ᠤᠳᠠᠭᠠ ᠶ᠋ᠢᠨ ᠦᠭᠡ ᠶ᠋ᠢ ᠡᠭᠡᠭᠦᠯᠵᠦ ᠂ ᠬᠣᠢᠨᠠ ᠬᠣᠶᠠᠷ ᠪᠡᠷᠭᠡᠨ ᠢ᠋ᠶ᠋ᠡᠨ ᠰᠢᠪᠠᠷᠳᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠵᠤ ᠠᠷᠭᠠ ᠦᠭᠡᠢ ᠠᠮᠢᠳᠤᠷᠠᠪᠠ ᠂ ᠪᠤᠰᠤ ᠪᠣᠯᠪᠠᠰᠤ ᠲᠡᠷᠡ ᠤᠳᠠᠭᠠ ᠳᠠᠷᠤᠢ ᠦᠬᠦᠬᠦ ᠪᠥᠯᠥᠭᠡ᠃ ᠲᠡᠭᠦᠨᠴᠢᠯᠡᠨ ᠲᠠᠢᠽᠦ ᠶ᠋ᠢᠨ ᠨᠢᠭᠡᠨᠲᠡ ᠲᠤᠯᠤᠭᠰᠠᠨ ᠠ᠋ᠴᠠ ᠡᠰᠡ ᠵᠠᠢᠯᠠᠬᠤ ᠠᠨᠤ ᠭᠤᠸᠠᠨ ᠯᠣᠣᠶᠧ ᠶ᠋ᠢᠨ ᠪᠠᠭᠠᠲᠤᠷ ᠠ᠋ᠴᠠ ᠥᠴᠦᠬᠡᠨ ᠴᠦ᠍ ᠳᠣᠣᠷᠠ ᠦᠭᠡᠢ ᠪᠣᠯᠠᠢ ᠃ ᠲᠡᠢᠨ ᠪᠥᠭᠡᠳ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠵᠣᠴᠢ ᠶ᠋ᠢᠨ ᠮᠡᠬᠡᠲᠦ ᠬᠠᠭᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠡᠷᠭᠦᠬᠦ ᠶ᠋ᠢ ᠦᠵᠡᠭᠡᠳ ᠴᠢᠷᠠᠢ ᠳ᠋ᠤᠷ ᠪᠠᠶᠠᠰᠤᠯ ᠢ᠋ ᠦᠵᠡᠭᠦᠯᠦᠭᠰᠡᠨ ᠢᠨᠦ ᠣᠯᠠᠨ ᠰᠠᠢᠳ ᠤ᠋ᠨ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠲᠡᠳᠬᠦᠨ ᠶᠠᠪᠤᠬᠤᠢ ᠳ᠋ᠤᠷ ᠪᠣᠢ ᠶᠠ ᠂ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠪᠠᠭᠠᠲᠤᠷ ᠬᠡᠴᠡᠭᠦᠦ ᠳ᠋ᠦ᠍ᠷ ᠪᠤᠰᠤ ᠃ ᠲᠡᠢᠨ ᠬᠦ᠌ ᠠᠮᠠᠨ ᠳ᠋ᠤᠷ ᠴᠢ ᠪᠠᠰᠠ ᠮᠢᠨᠦ ᠤᠭ ᠰᠠᠨᠠᠭᠠᠨ ᠢ᠋ ᠠᠯᠳᠠᠵᠤ ᠪᠠᠰᠠ ᠤᠯᠤᠰ ᠡᠵᠡᠯᠡᠭᠴᠢ ᠡᠵᠡᠨ ᠢ᠋ ᠠᠯᠠᠬᠤᠢ ᠳ᠋ᠤᠷ ᠭᠥᠷᠥᠭᠦᠯᠪᠡᠦ ? ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠢᠯᠡᠷᠡᠭᠰᠡᠨ ᠪᠤᠰᠤ ᠤᠤ ? ᠡᠨᠡ ᠢᠨᠦ ᠲᠤᠢᠯ ᠤ᠋ᠨ ᠪᠠᠭᠠᠲᠤᠷ ᠪᠤᠰᠤ ᠪᠣᠯᠪᠠᠰᠤ ᠲᠤᠢᠯ ᠤ᠋ᠨ ᠥᠷᠥᠰᠢᠶᠡᠯ ᠢ᠋ᠶ᠋ᠡᠷ ᠶᠠᠪᠤᠨ ᠦᠯᠦ ᠴᠢᠳᠠᠮᠤᠢ ᠬᠡᠮᠡᠭᠴᠢ ᠪᠣᠯᠠᠢ ᠃ ᠳᠡᠳ᠋ ᠬᠡᠰᠡᠭ ᠲᠣᠷ ᠳᠠᠷᠤᠢ ᠥᠷᠥᠰᠢᠶᠡᠯ ᠢ᠋ ᠦᠨᠡᠮᠴᠢᠯᠡᠵᠦ ᠂ ᠠᠷᠪᠠᠨ ᠳᠥᠷᠪᠡᠨ ᠰᠠᠢᠳ ᠤ᠋ᠨ ᠶᠠᠯᠠ ᠶ᠋ᠢ ᠭᠤᠶᠤᠵᠤ ᠥᠪᠡᠷ ᠦ᠋ᠨ ᠬᠢᠯᠢᠩ ᠴᠢᠬᠤᠯ ᠢ᠋ ᠴᠢᠬᠡ ᠦᠨᠡᠨ ᠢ᠋ᠶ᠋ᠡᠷ ᠬᠦᠯᠢᠶᠡᠨ ᠠᠪᠴᠤ ᠲᠣᠷᠭᠠᠭᠤᠯᠢ ᠭᠠᠷᠭᠠᠨ ᠂ ᠪᠠᠰᠠ ᠠᠷᠪᠠᠨ ᠨᠠᠢ᠍ᠮᠠᠨ ᠦᠯᠢᠳᠬᠡᠯᠳᠦ ᠡᠷᠢᠭᠡ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠬᠠᠷᠢᠭᠤ ᠶᠢᠰᠦᠨ ᠡᠷᠳᠡᠮᠲᠦ ᠪᠤᠭᠤ ᠶ᠋ᠢᠨ ᠰᠣᠶᠣᠭᠠ ᠶ᠋ᠢ ᠰᠣᠶᠣᠷᠬᠠᠨ ᠬᠠᠢᠷᠠᠯᠠᠵᠤ ᠂ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠲᠤᠷ ᠵᠠᠷᠯᠠᠭᠰᠠᠨ ᠠᠨᠤ ᠦᠨᠡᠬᠡᠷ ᠲᠦᠮᠡᠨ ᠦᠶᠡ ᠶ᠋ᠢᠨ ᠮᠡᠷᠭᠡᠨ ᠭᠡᠭᠡᠬᠡᠨ ᠡᠵᠡᠨ ᠪᠣᠯᠠᠢ ᠃ ᠵᠢᠴᠢ ᠡᠨᠡ ᠮᠡᠲᠦ ᠡᠵᠡᠨ ᠳ᠋ᠦ᠍ᠷ ᠪᠠᠰᠠ ᠮᠤᠬᠤᠯᠢ ᠶ᠋ᠢᠨ ᠲᠡᠷᠡ ᠮᠡᠲᠦ ᠰᠢᠳᠤᠷᠭᠤ ᠬᠢᠴᠢᠶᠡᠯᠲᠡᠢ ᠭᠦᠨ ᠬᠣᠯᠠᠪᠴᠢ ᠲᠦᠰᠢᠮᠡᠯ ᠤᠴᠠᠷᠠᠵᠤ ᠂ ᠡᠵᠡᠨ ᠦ᠌ ᠪᠡᠨ ᠲᠥᠯᠥᠭᠡ ᠦᠶᠡ ᠤᠯᠠᠷᠢᠨ ᠪᠣᠳᠣᠵᠤ ᠡᠷᠢᠭᠡ ᠶ᠋ᠢ ᠪᠠᠷᠢᠬᠤᠶᠠ ᠂ ᠸᠴᠢᠷ ᠬᠦᠢᠰᠦ ᠶ᠋ᠢ ᠠᠯᠢ ᠡᠪᠦᠳᠦᠭ ᠲᠣᠷ ᠨᠡᠮᠡᠪᠡᠰᠦ ᠂ ᠳᠥᠷᠪᠡᠨ ᠪᠠᠭᠠ ᠡᠵᠡᠳ ᠂ ᠡᠵᠡᠨ ᠦ᠌ ᠤᠬᠠᠭᠠᠨ ᠡᠷᠳᠡᠮ ᠢ᠋ ᠰᠤᠷᠤᠭᠰᠠᠨ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠬᠡᠮᠡᠭᠰᠡᠨ ᠢᠨᠦ ᠂ ᠡᠷᠲᠡᠨ ᠦ᠌ ᠳᠠᠩ ᠤᠯᠤᠰ ᠤ᠋ᠨ ᠸᠧᠢ ᠵᠧᠩ ᠡᠴᠡ ᠬᠡᠲᠦᠢᠳᠴᠦᠬᠦᠢ ᠃ ᠭᠤᠲᠠᠭᠠᠷ ᠠᠩᠭᠢ ᠣᠷᠣᠰ ᠤᠯᠤᠰ ᠢ᠋ ᠠᠪᠰᠤᠭᠠᠢ ᠭᠡᠮᠡᠨ ᠬᠡᠯᠡᠯᠴᠡᠮᠡᠭᠴᠡ ᠦᠨᠡᠬᠡᠷ ᠣᠷᠣᠰ ᠤᠯᠤᠰ ᠠ᠋ᠴᠠ ᠪᠡᠯᠡᠭ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠢᠨᠦ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠠᠮᠠᠨ ᠠ᠋ᠴᠠ ᠦᠭᠡ ᠭᠠᠷᠤᠮᠠᠭᠴᠠ ᠬᠡᠷᠡᠭ ᠲᠡᠳᠦᠢ ᠰᠡᠳᠦᠯᠭᠡᠷ ᠭᠠᠷᠬᠤ ᠠᠨᠤ ᠲᠡᠭᠷᠢ ᠶ᠋ᠢᠨ ᠰᠠᠨᠠᠭᠠᠨ ᠪᠤᠶᠤ ᠃ ᠳᠥᠲᠥᠭᠡᠷ ᠠᠩᠭᠢ ᠳ᠋ᠤᠷ ᠰᠣᠯᠤᠩᠭᠤᠸᠠ ᠥᠬᠢᠨ ᠨᠠᠢᠷ ᠢ᠋ ᠮᠥᠷᠥᠭᠡᠳᠦᠭᠰᠡᠨ ᠢᠨᠦ ᠦᠵᠡᠬᠦᠢ ᠳ᠋ᠦ᠍ᠷ ᠬᠡᠳᠦᠢ ᠥᠴᠦᠬᠡᠨ ᠮᠡᠲᠦ ᠪᠣᠯᠪᠠᠴᠤ ᠦᠨᠡᠮᠴᠢᠯᠡᠨ ᠬᠡᠯᠡᠪᠡᠰᠦ ᠵᠣᠷᠢᠭ ᠵᠢᠷᠤᠮᠲᠤ ᠥᠬᠢᠨ ᠪᠥᠭᠡᠳ ᠡᠴᠢᠭᠡ ᠪᠡᠨ ᠬᠣᠷᠢᠭ᠍ᠯᠠᠭᠰᠠᠨ ᠠᠨᠤ ᠨᠡᠩ ᠮᠡᠷᠭᠡᠨ ᠭᠡᠭᠡᠬᠡᠨ ᠪᠣᠯᠠᠢ ᠃ ᠬᠠᠷᠠᠬᠠᠨ ᠾᠧ ᠸᠠᠩ ᠭᠦᠷᠡᠯᠵᠡᠭᠡᠨᠡ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠰᠡᠳᠬᠢᠯ ᠠᠭᠤᠷᠯᠠᠵᠤ ᠂ ᠵᠠᠮᠤᠬᠠ ᠶ᠋ᠢᠨ ᠠᠷᠭᠠ ᠳ᠋ᠤᠷ ᠤᠨᠠᠵᠤ ᠂ ᠨᠢᠭᠡᠨ ᠠᠯᠬᠤᠮ ᠳ᠋ᠤᠷ ᠶᠡᠬᠡ ᠡᠨᠳᠡᠭᠦᠦ ᠳ᠋ᠦ᠍ᠷ ᠳᠠᠪᠰᠢᠪᠠᠢ ᠃ ᠬᠥᠭᠡᠷᠦᠬᠦᠢ ᠨᠢᠭᠡᠨᠲᠡ ᠲᠤᠯᠭᠠᠭᠤᠷᠢ ᠦᠭᠡᠢ ᠶ᠋ᠢᠨ ᠡᠷᠬᠡ ᠪᠡᠷ ᠨᠢᠭᠡᠬᠡᠨ ᠭᠦᠷᠡᠯᠵᠡᠭᠡᠨᠡ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠰᠡᠳᠬᠢᠯ ᠠᠯᠮᠠᠢᠳᠠᠨ ᠂ ᠨᠢᠭᠡᠨ ᠨᠠᠰᠤᠨᠠ ᠵᠢᠷᠤᠮ ᠦᠭᠡᠢ ᠶ᠋ᠢ ᠡᠭᠦᠰᠬᠡᠪᠡ ᠃ ᠲᠡᠢᠨ ᠬᠦ᠌ ᠡᠷᠲᠡᠨ ᠦ᠌ ᠦᠭᠡᠰ ᠲᠣᠷ ᠨᠢᠭᠡᠬᠡᠨ ᠵᠣᠭᠣᠰ ᠤ᠋ᠨ ᠲᠡᠳᠦᠢᠬᠡᠨ ᠬᠡᠯᠲᠡᠰ ᠡᠴᠢᠭᠰᠡᠨ ᠳ᠋ᠦ᠍ᠷ ᠴᠠᠷᠠ ᠳᠦᠭᠦᠷᠡᠩ ᠴᠥᠮ ᠴᠢᠳᠬᠤᠮᠤᠢ ᠬᠡᠮᠡᠭᠴᠢ ᠡᠭᠦᠨ ᠢ᠋ ᠬᠡᠯᠡᠭᠰᠡᠨ ᠪᠤᠶᠤ᠃