ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠬᠣᠷᠢᠨ ᠬᠣᠶᠠᠳᠤᠭᠠᠷ ᠪᠦᠯᠦᠭ > Хөх судар - Инжинаш <Хорин хоёрдугаар бүлэг >
325ᠥᠩᠬᠥᠷᠢᠬᠦ ᠬᠠᠳᠠ ᠶ᠋ᠢᠨ ᠶᠡᠬᠡ ᠠᠶᠤᠯ ᠳ᠋ᠤᠷ ᠦᠨᠡᠨ ᠡᠵᠡᠨ ᠦ ᠠᠯᠲᠠᠨ ᠤ᠋ ᠯᠤᠤ ᠢᠯᠡᠷᠡᠪᠡᠢ
ᠦᠯᠡᠮᠵᠢ ᠮᠡᠬᠡᠲᠦ ᠶ᠋ᠢᠨ ᠦᠬᠦᠯ ᠢᠷᠡᠭᠰᠡᠨᠡ ᠥᠰᠪᠥᠷᠢ ᠵᠣᠴᠢ ᠶ᠋ᠢᠨ ᠡᠷᠳᠡᠨᠢ ᠶ᠋ᠢᠨ ᠢᠯᠲᠦᠨᠡ ᠠᠯᠠᠭᠳᠠᠪᠠᠢ
ᠬᠣᠷᠢᠨ ᠬᠣᠶᠠᠳᠤᠭᠠᠷ ᠪᠦᠯᠦᠭ
ᠰᠥᠩ ᠨᠢᠩᠽᠦ᠋ᠩ ᠦ᠋ᠨ ᠴᠢᠩ ᠶᠤᠸᠠᠨ ᠤ᠋ ᠬᠣᠶᠠᠳᠤᠭᠠᠷ ᠣᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠤ᠋
ᠴᠧᠩ ᠠᠨ ᠤ᠋ ᠲᠡᠷᠢᠭᠦᠨ ᠣᠨ᠂ ᠲᠠᠢᠽᠦ ᠭᠤᠴᠢᠨ ᠲᠠᠪᠤᠨ ᠰᠡᠭᠦᠳᠡᠷ ᠲᠡᠢ ᠪᠣᠯᠪᠠ ᠂ ᠤᠯᠠᠭᠠᠨ ᠯᠤᠤ ᠵᠢᠯ ᠪᠤᠶᠤ
ᠥᠩᠬᠥᠷᠢᠬᠦ ᠬᠠᠳᠠ ᠶ᠋ᠢᠨ ᠶᠡᠬᠡ ᠠᠶᠤᠯ ᠳ᠋ᠤᠷ ᠦᠨᠡᠨ ᠡᠵᠡᠨ ᠦ᠌ ᠠᠯᠲᠠᠨ ᠤ᠋ ᠯᠤᠤ ᠢᠯᠡᠷᠡᠪᠡᠢ
ᠦᠯᠡᠮᠵᠢ ᠮᠡᠬᠡᠲᠦ ᠶ᠋ᠢᠨ ᠦᠬᠦᠯ ᠢᠷᠡᠭᠰᠡᠨᠡ ᠥᠰᠪᠥᠷᠢ ᠵᠣᠴᠢ ᠶ᠋ᠢᠨ ᠡᠷᠳᠡᠨᠢ ᠶ᠋ᠢᠨ ᠢᠯᠲᠦᠨᠡ ᠠᠯᠠᠭᠳᠠᠪᠠᠢ
ᠦᠨᠡᠨ ᠲᠡᠭᠷᠢᠯᠢᠭ ᠲᠤᠷ ᠯᠤᠤ ᠳᠠᠭᠠᠯᠴᠠᠬᠤ ᠶ᠋ᠢ ᠤᠯᠤᠰ ᠤᠯᠤᠰ ᠲᠤᠷ ᠲᠣᠭᠠᠴᠢᠵᠤᠬᠤᠢ
ᠥᠨᠳᠥᠷ ᠴᠢᠩᠭᠢᠰ ᠲᠣᠷ ᠬᠤᠪᠢᠯᠭᠠᠨ ᠠᠬᠤ ᠶ᠋ᠢ ᠦᠶᠡ ᠦᠶᠡ ᠳ᠋ᠦ᠍ᠷ ᠬᠡᠯᠡᠯᠴᠡᠵᠦᠬᠦᠢ ᠂
ᠥᠮᠥᠭ ᠰᠠᠳᠤᠨ ᠳ᠋ᠤᠷ ᠰᠠᠬᠢᠭᠤᠯᠰᠤᠨ ᠲᠤᠰᠠᠯᠠᠬᠤ ᠶ᠋ᠢ ᠪᠠᠢᠨ ᠪᠠᠢᠨ ᠭᠠᠷᠭᠠᠵᠤᠬᠤᠢ
ᠦᠷᠡ ᠠᠴᠢ ᠳ᠋ᠤᠷ ᠦᠯᠡᠳᠡᠪᠦᠷᠢ ᠬᠣᠴᠣᠷᠬᠤ ᠶ᠋ᠢ ᠳᠠᠬᠢᠨ ᠳᠠᠬᠢᠨ ᠵᠠᠬᠢᠵᠤᠬᠤᠢ ᠃
ᠲᠡᠨᠳᠡᠴᠡ ᠲᠠᠢᠽᠦ ᠰᠠᠷᠯᠠᠭ ᠤ᠋ᠨ ᠰᠤᠷᠤᠨᠴᠤᠭ ᠬᠣᠲᠠ ᠶ᠋ᠢ ᠣᠯᠵᠤ᠂ ᠵᠠᠯᠮᠠ ᠶ᠋ᠢ ᠲᠡᠷᠢᠭᠦᠨ ᠦ᠌ ᠲᠡᠷᠢᠭᠦᠨ ᠢ᠋ᠶ᠋ᠡᠷ ᠲᠠᠪᠤᠨ ᠵᠠᠭᠤᠨ ᠯᠠᠩ ᠴᠠᠭᠠᠨ ᠮᠥᠩᠭᠥ ᠱᠠᠩᠨᠠᠵᠤ᠂ ᠳᠣᠷᠣᠭᠰᠢ ᠬᠤᠳᠠᠭᠠᠨᠠ ᠪᠡᠬᠢ ᠪᠠ ᠠᠯᠤᠬᠠ ᠰᠦᠬᠡ ᠵᠢᠴᠢ ᠲᠠᠪᠤᠨ ᠪᠠᠷᠰ ᠤ᠋ᠨ ᠵᠠᠩᠵᠤᠨ᠂ ᠪᠣᠯᠣᠳ ᠬᠦᠴᠦᠲᠦ ᠴᠡᠷᠢᠭ ᠪᠦᠬᠦᠨ ᠳ᠋ᠦ᠍ᠷ ᠴᠥᠮ ᠢᠯᠭᠠᠨ ᠱᠠᠩᠨᠠᠵᠤ᠂ ᠨᠢᠭᠡᠨ ᠵᠤᠨ ᠰᠠᠷᠯᠠᠭ ᠤᠯᠤᠰ ᠢ᠋ ᠲᠡᠭᠰᠢᠳᠬᠡᠨ ᠬᠤᠷᠢᠶᠠᠮᠵᠢᠯᠠᠬᠤ ᠴᠢᠯᠦᠭᠡᠨᠡ ᠪᠠᠰᠠ ᠶᠡᠬᠡ ᠨᠤᠮᠤ ᠬᠦᠨᠳᠦ ᠢᠯᠳᠦ ᠪᠡᠷ ᠰᠢᠯᠭᠠᠵᠤ᠂ ᠡᠨᠡ ᠰᠠᠷᠯᠠᠭ ᠠ᠋ᠴᠠ ᠪᠠᠰᠠ ᠬᠣᠶᠠᠷ ᠮᠢᠩᠭᠠᠨ ᠢᠯᠡᠭᠦᠦ ᠪᠣᠯᠣᠳ ᠬᠦᠴᠦᠲᠦ ᠴᠡᠷᠢᠭ ᠣᠯᠵᠤ ᠵᠢᠴᠢ ᠳᠡᠭᠦᠦ ᠬᠦᠷᠭᠡᠨ ᠢᠯᠭᠦᠨᠡ ᠶ᠋ᠢᠨ ᠲᠠᠪᠤᠨᠠᠩ ᠂ ᠪᠤᠲ᠋ᠤ ᠶ᠋ᠢᠨ ᠠᠪᠠᠭᠠ ᠶᠠᠪᠤᠴᠢᠲᠠᠢ ᠨᠣᠶᠠᠨ ᠢ᠋ ᠵᠠᠯᠮᠠ ᠶ᠋ᠢᠨ ᠡᠴᠢᠭᠡ ᠵᠠᠷᠴᠢᠭᠤᠲᠠᠢ ᠥᠲᠡᠭᠦᠰ ᠨᠣᠶᠠᠨ ᠳ᠋ᠤᠷ ᠬᠠᠪᠰᠤᠷᠤᠭᠤᠯᠤᠨ ᠥᠭᠴᠦ ᠳᠣᠣᠷᠠ ᠠᠨᠤ ᠪᠠᠶᠠᠨ ᠬᠥᠪᠡᠭᠦᠨ ᠢ᠋ ᠲᠥᠪ ᠂ ᠬᠠᠨᠳᠠᠭᠠᠢ ᠲᠦᠰᠢᠮᠡᠯ ᠢ᠋ ᠲᠠᠰᠢᠯᠠᠭᠤᠯᠤᠨ᠂ ᠰᠠᠷᠯᠠᠭ ᠤ᠋ᠨ ᠴᠡᠷᠢᠭ ᠢ᠋ ᠵᠣᠯᠢᠬᠤ ᠠᠯᠪᠠ ᠶ᠋ᠢ ᠬᠤᠷᠢᠶᠠᠬᠤ ᠶ᠋ᠢ ᠲᠤᠰᠢᠶᠠᠭᠠᠳ ᠰᠠᠷᠯᠠᠭ ᠤ᠋ᠨ ᠵᠠᠯᠢᠲᠤ ᠬᠠᠭᠠᠨ ᠤ᠋ ᠭᠡᠷ ᠦ᠋ᠨ ᠠᠮᠠᠨ ᠢ᠋ ᠪᠠᠶᠠᠨ ᠢ᠋ᠶ᠋ᠠᠷ ᠬᠠᠷᠠᠭᠠᠯᠵᠠᠭᠤᠯᠤᠨ᠂ ᠨᠢᠭᠤᠷ ᠲᠤᠷ ᠬᠦᠨᠳᠦᠲᠡᠢ ᠪᠡᠷ ᠪᠦᠭᠦᠳᠡᠭᠡᠷ ᠢ᠋ ᠠᠪᠴᠤ ᠨᠠᠮᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠳ᠋ᠤᠷ ᠰᠠᠶᠢ ᠡᠭᠡᠰᠦᠭᠡᠢ ᠬᠡᠮᠡᠲᠡᠯᠡ ᠬᠣᠢᠲᠤ ᠡᠲᠡᠭᠡᠳ ᠦ᠋ᠨ ᠬᠣᠯᠠᠳᠠᠬᠢ ᠲᠤᠷᠰᠢᠭᠤᠯ ᠤ᠋ᠨ ᠬᠥᠮᠦᠨ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ:《ᠬᠣᠢᠲᠤ ᠳᠤᠬᠮᠣᠭ ᠤᠯᠤᠰ ᠤ᠋ᠨ ᠮᠡᠬᠡᠲᠦ ᠰᠦᠯᠳᠡ ᠬᠠᠭᠠᠨ ᠬᠡᠷᠡᠢᠳ ᠦ᠋ᠨ ᠵᠠᠮᠤᠬᠠ ᠶ᠋ᠢᠨ ᠴᠡᠷᠢᠭ ᠯᠦ᠍ᠭᠡ ᠨᠡᠢᠯᠡᠵᠦ ᠂ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠬᠣᠢᠲᠤ ᠵᠠᠬᠠ ᠶ᠋ᠢ ᠬᠠᠯᠳᠠᠪᠠ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡ ᠲᠤᠭ ᠢ᠋ᠶ᠋ᠠᠨ ᠳᠠᠬᠢᠭᠠᠳ ᠲᠦᠷᠭᠡᠯᠡᠨ ᠡᠭᠡᠵᠦ ᠮᠣᠷᠢᠯᠠᠨ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠬᠦᠷᠲᠡᠯᠡ ᠳᠡᠭᠦᠦ ᠤᠷᠠᠨ ᠭᠠᠴᠤᠭ ᠂ ᠵᠣᠴᠢ ᠂ ᠴᠠᠭᠠᠲᠠᠢ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ ᠢᠨᠤ ᠠᠪᠴᠤ ᠲᠡᠷᠢᠭᠦᠨ ᠤᠲᠤᠯᠭᠠᠨᠠ ᠤᠭᠲᠤᠪᠠ ᠃ ᠤᠯᠤᠰ ᠤ᠋ᠨ ᠳᠤᠮᠳᠠ ᠬᠦᠷᠲᠡᠯᠡ ᠳᠡᠭᠦᠦ ᠣᠢᠲᠤ ᠤᠴᠢᠭ ᠂ ᠲᠠᠢᠽᠦ ᠶ᠋ᠢᠨ ᠬᠣᠶᠠᠷ ᠪᠠᠭᠠ ᠬᠥᠪᠡᠭᠦᠨ ᠥᠭᠡᠳᠡᠢ ᠲᠣᠯᠢ ᠬᠣᠶᠠᠭᠤᠯᠠ ᠶ᠋ᠢ ᠠᠪᠴᠤ ᠳᠡᠳ᠋ ᠤᠲᠤᠯᠭᠠᠨᠠ ᠤᠭᠲᠤᠵᠤ ᠂ ᠪᠤᠷᠬᠠᠨ ᠭᠠᠯᠳᠤᠨᠠ ᠶ᠋ᠢᠨ ᠵᠠᠬᠠ ᠳ᠋ᠤᠷ ᠬᠦᠷᠴᠦ ᠢᠷᠡᠲᠡᠯᠡ ᠲᠣᠷᠭᠠᠨ ᠰᠢᠷᠠ ᠂ ᠮᠡᠩᠭᠡᠯᠢᠭ ᠨᠠᠷ ᠲᠥᠷᠥᠯ ᠤᠷᠤᠭ ᠂ ᠤᠯᠤᠰ ᠠᠯᠪᠠᠲᠤ ᠪᠦᠭᠦᠳᠡᠭᠡᠷ ᠢ᠋ ᠠᠪᠴᠤ ᠪᠠᠶᠠᠷ ᠤ᠋ᠨ ᠶᠣᠰᠣᠭᠠᠷ ᠮᠥᠷᠭᠥᠨ ᠤᠭᠲᠤᠵᠤ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠪᠠ᠃ ᠬᠤᠷᠢᠮ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ᠷ ᠵᠡᠯᠮᠡ ᠮᠤᠬᠤᠯᠢ ᠶ᠋ᠢ ᠰᠠᠭᠤᠯᠭᠠᠪᠠ ᠃
ᠡᠨᠡ ᠦᠶᠡ ᠳ᠋ᠦ᠍ᠷ ᠬᠦᠯᠦᠭ ᠪᠤᠭᠤᠷᠵᠢ ᠰᠢᠷᠢ ᠬᠤᠲᠤᠭ ᠂ ᠬᠠᠷᠠ ᠬᠢᠷᠤ ᠂ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠂ ᠬᠤᠷᠴᠠ ᠪᠠᠢᠷᠢ ᠂ ᠴᠤᠤ ᠮᠡᠷᠭᠡᠨ ᠂ ᠦᠯᠬᠦ ᠰᠠᠢᠳ ᠪᠠ ᠪᠤᠰᠤ ᠪᠠᠭᠠ ᠵᠠᠩᠵᠤᠨ ᠨᠠᠷ ᠵᠡᠪᠡ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠬᠠᠲᠠᠭᠤ ᠲᠡᠮᠦᠷ ᠂ ᠴᠤᠤ ᠮᠡᠷᠭᠡᠨ ᠦ᠌ ᠶᠡᠬᠡ ᠬᠥᠪᠡᠭᠦᠨ ᠬᠣᠪᠤᠯᠠᠢ ᠂ ᠬᠠᠷᠠ ᠬᠢᠷᠤ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠥᠳᠥ ᠂ ᠰᠢᠷᠢ ᠬᠤᠲᠤᠭ ᠤ᠋ᠨ ᠶᠡᠬᠡ ᠬᠥᠪᠡᠭᠦᠨ ᠠᠨᠳᠠ ᠨᠠᠷ ᠢ᠋ ᠠᠪᠴᠤ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠳᠤᠬᠮᠣᠭ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠤᠭᠲᠤᠨ ᠡᠴᠢᠵᠦ ᠂ ᠬᠣᠶᠠᠷᠬᠠᠨ ᠤᠳᠠᠭᠠ ᠪᠠᠢᠯᠳᠤᠵᠤ ᠂ ᠳᠣᠬᠮᠣᠭ ᠤᠯᠤᠰ ᠤ᠋ᠨ ᠲᠠᠪᠤᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠶᠡᠬᠡᠯᠡ ᠳᠠᠷᠤᠵᠤ ᠂ ᠭᠤᠷᠪᠠᠨ ᠬᠣᠨᠣᠭ ᠬᠥᠭᠡᠭᠡᠭᠡᠳ ᠮᠣᠷᠢ ᠡᠮᠡᠭᠡᠯ ᠂ ᠬᠤᠶᠠᠭ ᠳᠤᠭᠤᠯᠠᠭᠠ ᠂ ᠵᠠᠷ ᠵᠡᠪᠰᠡᠭ ᠂ ᠥᠷᠭᠥᠭᠡ ᠮᠠᠢᠬᠠᠨ ᠬᠡᠳᠦᠨ ᠵᠠᠭᠤᠨ ᠲᠡᠷᠭᠡ ᠣᠯᠵᠠᠯᠠᠨ ᠂ ᠳᠠᠷᠤᠢ ᠡᠭᠡᠵᠦ ᠢᠷᠡᠭᠰᠡᠨᠡ ᠂ ᠲᠠᠢᠽᠦ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠳᠥᠷᠪᠡᠨ ᠬᠥᠪᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠭᠲᠤᠭᠤᠯᠤᠨ ᠂ ᠬᠦᠨᠳᠦ ᠱᠠᠩ ᠬᠤᠷᠢᠮ ᠢ᠋ᠶ᠋ᠠᠷ ᠬᠥᠬᠢᠭᠦᠯᠵᠦ ᠂ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠦ᠋ᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠶ᠋ᠢ ᠬᠣᠶᠠᠷ ᠰᠠᠷᠠ ᠢᠯᠡᠭᠦᠦ ᠢᠯᠭᠠᠵᠤ ᠱᠠᠩᠨᠠᠪᠠᠢ ᠃
ᠤᠷᠢᠳᠤ ᠪᠦᠯᠦᠭ ᠦ᠋ᠨ ᠡᠨᠡ ᠬᠥᠬᠡᠭᠴᠢᠨ ᠲᠠᠤᠯᠠᠢ ᠵᠢᠯ ᠲᠡᠭᠦᠰᠴᠦ ᠰᠢᠨᠡ ᠶ᠋ᠢᠨ ᠶᠣᠰᠣᠭᠠᠷ ᠶᠡᠬᠡᠳᠡ ᠪᠡᠯᠭᠡᠯᠡᠨ ᠰᠢᠨᠡᠯᠡᠭᠡᠳ ᠤᠯᠠᠭᠠᠨ ᠯᠤᠤ ᠵᠢᠯ ᠡᠭᠦᠨ ᠡᠴᠡ ᠡᠬᠢᠯᠡᠪᠡ ᠃ ᠡᠨᠡ ᠵᠢᠯ ᠡᠮᠦᠨᠡ ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠦ᠋ᠩ ᠬᠠᠭᠠᠨ ᠤ᠋ ᠴᠢᠩ ᠶᠤᠸᠠᠨ ᠤ᠋ ᠬᠣᠶᠠᠳᠤᠭᠠᠷ ᠣᠨ ᠃ ᠵᠢᠴᠢ ᠡᠨᠡ ᠵᠢᠯ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠬᠠᠭᠠᠨ ᠸᠠᠨ ᠶᠠᠨ ᠵᠢᠩ ᠂ ᠣᠨ ᠤ᠋ ᠴᠣᠯᠠ ᠪᠠᠨ ᠬᠠᠯᠠᠵᠤ ᠂ ᠴᠧᠩ ᠠᠨ ᠤ᠋ ᠲᠡᠷᠢᠭᠦᠨ ᠣᠨ ᠬᠡᠮᠡᠪᠡᠢ ᠃ ᠪᠡᠶᠡ ᠦᠬᠦᠭᠰᠡᠨ ᠴᠦ᠍ ᠪᠤᠰᠤ ᠂ ᠥᠪᠡᠷᠡ ᠬᠠᠭᠠᠨ ᠰᠠᠭᠤᠭᠰᠠᠨ ᠴᠤ᠌ ᠪᠤᠰᠤ ᠂ ᠴᠠᠭ ᠣᠨ ᠮᠠᠭᠤ ᠭᠡᠮᠡᠨ ᠣᠨ ᠤ᠋ ᠨᠡᠷᠡ ᠪᠡᠨ ᠬᠠᠯᠠᠵᠤᠬᠤᠢ ᠃ ᠲᠠᠢᠽᠦ ᠡᠨᠡ ᠵᠢᠯ ᠭᠤᠴᠢᠨ ᠲᠠᠪᠤᠨ ᠰᠡᠭᠦᠳᠡᠷ ᠲᠡᠢ ᠪᠣᠯᠪᠠ ᠃
ᠲᠡᠭᠦᠨᠴᠡ ᠲᠠᠢᠽᠦ ᠲᠤᠭᠮᠤᠭ ᠤᠯᠤᠰ ᠢ᠋ ᠡᠷᠬᠡᠪᠰᠢ ᠲᠠᠢᠯᠠᠰᠤᠭᠠᠢ ᠭᠡᠮᠡᠨ ᠮᠤᠬᠤᠯᠢ ᠪᠤᠭᠤᠷᠵᠢ ᠯᠤᠭᠠ ᠵᠥᠪᠯᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠮᠡᠳᠡᠭᠦᠯᠦᠷᠦᠨ :《ᠲᠦᠰᠢᠮᠡᠯ ᠪᠢ ᠲᠤᠭᠮᠤᠭ ᠤᠯᠤᠰ ᠮᠠᠨ ᠤ᠋ ᠵᠠᠬᠠ ᠶ᠋ᠢ ᠬᠠᠯᠳᠠᠪᠠ ᠬᠡᠮᠡᠭᠰᠡᠨ ᠡᠴᠡ ᠪᠣᠳᠣᠭᠰᠠᠭᠠᠷ ᠪᠥᠯᠥᠭᠡ ᠂ ᠴᠡᠷᠢᠭ ᠬᠡᠷᠡᠭᠯᠡᠬᠦᠢ ᠳ᠋ᠦ᠍ᠷ ᠦᠨᠡᠨ ᠬᠡᠮᠡᠲᠡᠯᠡ ᠬᠤᠳᠠᠯ ᠂ ᠬᠤᠳᠠᠯ ᠬᠡᠮᠡᠲᠡᠯᠡ ᠦᠨᠡᠨ᠂ ᠳᠠᠢᠰᠤᠨ ᠤ᠋ ᠡᠲᠡᠭᠡᠳ ᠲᠣᠷ ᠤᠬᠠᠭᠠᠨ ᠢ᠋ᠶ᠋ᠠᠨ ᠡᠰᠡ ᠪᠠᠷᠢᠭ᠍ᠳᠠᠪᠠᠰᠤ ᠡᠨᠡ ᠳᠠᠷᠤᠢ ᠲᠡᠷᠢᠭᠦᠨ ᠨᠢᠭᠡᠨ ᠵᠣᠭᠰᠣᠯᠲᠠ ᠲᠤᠯᠭᠠᠭᠤᠷᠢ ᠮᠥᠨ ᠃ ᠨᠢᠳᠤᠨᠤᠨ ᠰᠠᠷᠯᠠᠭ ᠢ᠋ ᠰᠠᠯᠪᠠᠷᠠᠭᠤᠯᠤᠭᠰᠠᠨ ᠠᠨᠤ ᠬᠤᠳᠠᠯ ᠤ᠋ᠨ ᠳᠣᠲᠣᠷᠠ ᠦᠨᠡᠨ ᠢ᠋ ᠨᠢᠭᠤᠵᠤ ᠡᠪᠳᠡᠭᠰᠡᠨ ᠲᠤᠯᠠᠳᠠ ᠡᠨᠡ ᠤᠳᠠᠭᠠ ᠲᠤᠭᠮᠤᠭ ᠢ᠋ ᠲᠣᠭᠲᠠᠭᠠᠬᠤᠢ ᠳ᠋ᠤᠷ ᠦᠨᠡᠨ ᠦ᠌ ᠳᠣᠲᠣᠷᠠ ᠬᠤᠳᠠᠯ ᠢ᠋ ᠠᠬᠤᠭᠤᠯᠵᠤ ᠪᠠᠢᠯᠳᠤᠰᠤᠭᠠᠢ᠃ ᠡᠢᠨ ᠬᠦ᠌ ᠤᠷᠪᠠᠭᠤᠯᠤᠨ ᠬᠥᠷᠪᠡᠭᠦᠯᠵᠦ ᠬᠡᠷᠡᠭᠯᠡᠪᠡᠰᠦ ᠳᠠᠢᠰᠤᠨ ᠢ᠋ ᠦᠯᠦ ᠳᠡᠢᠯᠬᠦ ᠶᠣᠰᠣ ᠦᠭᠡᠢ ᠃ ᠲᠦᠰᠢᠮᠡᠯ ᠪᠢ ᠨᠢᠳᠤᠨᠤᠨ ᠵᠢᠯ ᠰᠠᠷᠯᠠᠭ ᠢ᠋ ᠳᠠᠢᠯᠠᠬᠤᠢ ᠳ᠋ᠤᠷ ᠦᠵᠡᠪᠡᠰᠦ᠂ ᠰᠠᠷᠯᠠᠭ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠮᠠᠰᠢ ᠴᠢᠭᠢᠷᠠᠭ ᠪᠥᠭᠡᠲᠡᠯᠡ ᠵᠠᠯᠢᠲᠤ ᠬᠠᠭᠠᠨ ᠬᠡᠷᠡᠭᠯᠡᠨ ᠡᠰᠡ ᠴᠢᠳᠠᠭᠰᠠᠨ ᠳ᠋ᠤᠷ ᠲᠡᠢᠮᠦ ᠪᠣᠯᠵᠤᠬᠤᠢ᠃ ᠡᠳᠦᠭᠡ ᠪᠤᠭᠤᠷᠵᠢ ᠠᠬᠠᠢ ᠠ᠋ᠴᠠ ᠰᠣᠨᠣᠰᠬᠤᠯᠠ ᠲᠤᠭᠮᠤᠭ ᠤᠯᠤᠰ ᠤ᠋ᠨ ᠴᠡᠷᠢᠭ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠴᠡᠷᠢᠭ ᠡᠴᠡ ᠣᠭᠲᠣ ᠳᠣᠣᠷᠠ ᠦᠭᠡᠢ ᠬᠡᠮᠡᠮᠦᠢ᠃ ᠲᠡᠢᠨ ᠬᠦ᠌ ᠲᠦᠰᠢᠮᠡᠯ ᠪᠢ ᠪᠤᠭᠤᠷᠵᠢ ᠠᠬᠠ ᠯᠤᠭᠠ ᠰᠠᠷᠯᠠᠭ ᠤᠯᠤᠰ ᠲᠤᠷ ᠬᠦᠷᠴᠦ ᠣᠯᠠᠨ ᠢ᠋ ᠠᠨᠤ ᠡᠯᠰᠡᠵᠦ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠢ᠋ ᠪᠡᠯᠡᠨ ᠵᠠᠯᠠᠨ ᠰᠢᠯᠭᠠᠵᠤ᠂ ᠡᠵᠡᠨ ᠳ᠋ᠦ᠍ᠷ ᠮᠡᠳᠡᠭᠡ ᠪᠠᠷᠢᠰᠤᠭᠠᠢ᠃ ᠯᠠᠪ ᠪᠡᠯᠡᠨ ᠵᠠᠯᠠᠨ ᠮᠠᠰᠢ ᠪᠣᠯᠪᠠᠰᠤᠨ ᠪᠣᠯᠲᠠᠯᠠ ᠬᠡᠷᠬᠢᠪᠡᠴᠦ ᠨᠠᠮᠤᠷ ᠤ᠋ᠨ ᠲᠡᠷᠢᠭᠦᠨ ᠰᠠᠷᠠ ᠪᠣᠯᠤᠮᠤᠢ᠃ ᠰᠠᠷᠯᠠᠭ ᠤ᠋ᠨ ᠡᠪᠡᠰᠦ ᠲᠠᠷᠭᠤᠲᠠᠢ᠂ ᠤᠰᠤ ᠤᠮᠲᠠᠲᠠᠢ ᠲᠤᠯᠠ ᠨᠠᠮᠤᠷ ᠤ᠋ᠨ ᠮᠣᠷᠢ ᠮᠠᠭᠠᠳ ᠬᠦᠴᠦᠲᠡᠢ᠃ ᠡᠨᠡ ᠤᠳᠠᠭᠠ ᠲᠤᠭᠮᠤᠭ ᠤᠯᠤᠰ ᠢ᠋ ᠲᠠᠢᠯᠠᠬᠤᠢ ᠳ᠋ᠤᠷ ᠳᠠᠷᠤᠢ ᠡᠨᠡ ᠰᠠᠷᠯᠠᠭ ᠢ᠋ᠶ᠋ᠠᠷ ᠬᠦᠴᠦᠯᠡᠰᠦᠭᠡᠢ᠃ ᠵᠢᠴᠢ ᠡᠨᠳᠡ ᠪᠣᠯᠪᠠᠰᠤ ᠡᠵᠡᠨ᠂ ᠬᠣᠶᠠᠷ ᠪᠠᠭᠠ ᠡᠵᠡᠨ ᠢ᠋ ᠮᠥᠨ ᠪᠠᠬᠠᠨ ᠴᠡᠷᠢᠭ ᠲᠡᠢᠨ ᠳ᠋ᠦ᠍ᠷ ᠪᠣᠯᠪᠠᠰᠤᠷᠠᠭᠤᠯᠤᠨ ᠰᠤᠷᠭᠠᠪᠠᠰᠤ ᠵᠣᠬᠢᠮᠤᠢ ᠂ ᠴᠥᠮ ᠠᠷᠪᠠᠨ ᠲᠠᠪᠤ ᠵᠢᠷᠭᠤᠭᠠᠨ ᠨᠠᠰᠤᠯᠠᠵᠤ ᠠᠤᠭᠠ ᠬᠦᠴᠦᠨ ᠲᠡᠭᠦᠰᠦᠭᠰᠡᠨ ᠴᠠᠭ ᠂ ᠠᠯᠢᠪᠠ ᠬᠡᠷᠡᠭ ᠢ᠋ ᠤᠬᠠᠬᠤ ᠪᠣᠯᠪᠠ ᠂ ᠡᠵᠡᠨ ᠳᠠᠷᠤᠢ ᠪᠢᠴᠢᠭ ᠴᠡᠷᠢᠭ ᠦ᠋ᠨ ᠬᠣᠶᠠᠷ ᠪᠠᠭᠰᠢ ᠵᠠᠮᠪᠠᠯ ᠂ ᠲᠣᠭᠲᠣᠩᠭᠣ᠌ ᠬᠣᠶᠠᠭᠤᠯᠠ ᠳ᠋ᠤᠷ ᠪᠠᠬᠠ ᠡᠵᠡᠨ ᠢ᠋ ᠨᠥᠬᠥᠳ ᠰᠡᠯᠲᠡ ᠲᠡᠢ ᠢᠨᠦ ᠬᠠᠮᠲᠤ ᠲᠤᠰᠢᠶᠠᠨ ᠥᠭᠴᠦ ᠳᠣᠣᠷᠠ ᠠᠨᠤ ᠰᠦᠪᠡᠭᠡᠲᠡᠢ ᠂ ᠭᠢᠯᠥᠭᠡᠨ ᠬᠣᠶᠠᠷ ᠪᠠᠭᠠᠲᠤᠷ ᠲᠤᠷ ᠬᠣᠶᠠᠷ ᠲᠦᠮᠡᠨ ᠰᠢᠨᠡ ᠡᠯᠰᠡᠭᠰᠡᠨ ᠴᠡᠷᠢᠭ ᠦ᠋ᠳ ᠢ᠋ ᠵᠠᠬᠢᠷᠤᠭᠤᠯᠤᠨ ᠲᠤᠰᠢᠶᠠᠵᠤ ᠥᠭᠭᠦᠭᠡᠳ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠬᠣᠢᠲᠤ ᠵᠠᠬᠠ ᠂ ᠲᠤᠭᠮᠤᠭ ᠤᠯᠤᠰ ᠤ᠋ᠨ ᠡᠮᠦᠨᠡ ᠬᠥᠪᠡᠭᠡ ᠳ᠋ᠦ᠍ᠷ ᠥᠭᠡᠳᠡ ᠤᠷᠤᠭᠤ ᠪᠡᠯᠴᠢᠭᠦᠯᠵᠦ ᠂ ᠴᠡᠷᠢᠭ ᠢ᠋ ᠪᠣᠯᠪᠠᠰᠤᠷᠠᠭᠤᠯᠤᠨ ᠮᠣᠷᠢ ᠶ᠋ᠢ ᠪᠣᠷᠳᠣᠵᠤ ᠂ ᠨᠢᠭᠡᠨ ᠬᠠᠪᠤᠷ ᠂ ᠨᠢᠭᠡᠨ ᠵᠤᠨ ᠰᠤᠷᠭᠠᠬᠤᠶᠠ ᠂ ᠬᠡᠳᠦ ᠬᠡᠳᠦᠨ ᠪᠠᠭ ᠵᠣᠬᠢᠶᠠᠨ ᠠᠷᠪᠠᠨ ᠲᠦᠮᠡᠨ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠵᠤ ᠂ ᠪᠠᠭᠠ ᠡᠵᠡᠳ ᠲᠣᠷ ᠡᠵᠡᠨ ᠦ᠌ ᠤᠯᠠᠭᠠᠨ ᠠᠷᠰᠯᠠᠨᠲᠤ ᠲᠡᠮᠳᠡᠭᠲᠦ ᠲᠤᠭ ᠬᠢᠭᠢᠷᠢ ᠂ ᠰᠢᠬᠦᠷ ᠳᠠᠯᠪᠢᠭᠠᠨ ᠢ᠋ ᠣᠷᠣᠭᠤᠯᠵᠤ ᠪᠠᠷᠢᠭᠤᠯᠤᠭᠠᠳ ᠡᠨᠡ ᠡᠳᠦᠷ ᠲᠤᠭᠮᠤᠭ ᠢ᠋ ᠪᠠᠢᠯᠳᠤᠮᠤᠢ ᠂ ᠮᠠᠷᠭᠠᠲᠠ ᠲᠤᠭᠮᠤᠭ ᠢ᠋ ᠪᠠᠢᠯᠳᠤᠮᠤᠢ ᠭᠡᠮᠡᠨ ᠴᠤᠤ ᠠᠯᠳᠠᠷᠰᠢᠭᠤᠯᠤᠭᠠᠳ ᠲᠤᠭᠮᠤᠭ ᠤ᠋ᠨ ᠴᠡᠷᠢᠭ ᠬᠦᠷᠴᠦ ᠢᠷᠠᠪᠠᠰᠤ ᠪᠠᠰᠠ ᠤᠬᠤᠷᠢᠭᠠᠳ ᠴᠡᠷᠢᠭ ᠢ᠋ᠶ᠋ᠡᠨ ᠪᠡᠯᠴᠢᠭᠦᠯᠦᠨ ᠰᠤᠷᠭᠠᠵᠤ᠂ ᠲᠡᠳᠡᠨ ᠦ᠌ ᠴᠡᠷᠢᠭ ᠪᠠᠬᠠᠨ ᠵᠥᠭᠡᠭ ᠪᠣᠯᠣᠮᠠᠭᠴᠠ ᠪᠠᠰᠠ ᠭᠡᠨᠡᠳᠲᠡ ᠬᠦᠷᠴᠦ ᠲᠡᠳᠡᠨ ᠢ᠋ ᠰᠣᠴᠢᠭᠠᠨ ᠴᠢᠭᠤᠯᠤᠭᠤᠯᠤᠭᠠᠳ ᠪᠠᠰᠠ ᠤᠬᠤᠷᠢᠵᠤ ᠡᠭᠡᠲᠦᠭᠡᠢ᠃ ᠲᠡᠷᠡ ᠡᠲᠡᠭᠡᠳ ᠲᠣᠷ ᠪᠤᠭᠤᠷᠵᠢ ᠠᠬᠠᠢ ᠪᠢᠳᠡ ᠬᠣᠶᠠᠭᠤᠯᠠ ᠰᠠᠷᠯᠠᠭ ᠤ᠋ᠨ ᠴᠡᠷᠢᠭ ᠢ᠋ ᠠᠪᠴᠤ ᠪᠠᠰᠠ ᠬᠦ᠌ ᠡᠨᠡ ᠶᠣᠰᠣᠭᠠᠷ ᠲᠡᠳᠡᠨ ᠦ᠌ ᠪᠠᠷᠠᠭᠤᠨ ᠡᠲᠡᠭᠡᠳ ᠡᠴᠡ ᠠᠶᠤᠯᠭᠠᠵᠤ᠂ ᠪᠢᠳᠡᠨ ᠦ᠌ ᠬᠣᠶᠠᠷ ᠡᠲᠡᠭᠡᠳ ᠬᠣᠶᠠᠷ ᠪᠡᠶᠡ ᠡᠴᠡ ᠨᠢᠭᠡᠨ ᠢᠨᠦ ᠡᠭᠡᠪᠡᠰᠦ ᠨᠢᠭᠡᠨ ᠢᠨᠦ ᠣᠷᠣᠭᠠᠳ ᠨᠢᠭᠡᠨ ᠬᠠᠪᠤᠷ ᠨᠢᠭᠡᠨ ᠵᠤᠨ ᠡᠢᠨ ᠬᠦ᠌ ᠲᠦᠢᠪᠡᠭᠡᠪᠡᠰᠦ ᠲᠣᠬᠮᠣᠭ ᠤ᠋ᠨ ᠴᠡᠷᠢᠭ ᠶᠠᠷᠠᠭᠳᠠᠭᠠᠨ ᠶᠠᠳᠠᠩᠭᠢᠷᠠᠨ ᠮᠣᠬᠣᠵᠤ ᠂ ᠰᠡᠳᠬᠢᠯ ᠰᠤᠯᠠ ᠴᠡᠷᠢᠭ ᠣᠰᠣᠯ ᠪᠣᠯᠤᠮᠤᠢ ᠃ ᠡᠢᠨ ᠬᠦ᠌ ᠨᠢᠭᠡᠨᠲᠡ ᠵᠦᠳᠡᠷᠡᠭᠡᠵᠦ ᠳᠣᠯᠭᠢᠰᠤᠭᠤᠯᠤᠭᠠᠳ ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ ᠡᠵᠡᠨ ᠦ᠌ ᠪᠡᠶᠡ ᠰᠢᠭᠤᠳ ᠰᠢᠳᠠᠷ ᠵᠠᠩᠵᠤᠨ ᠰᠢᠯᠭᠠᠭᠰᠠᠨ ᠴᠡᠷᠢᠭ ᠢ᠋ ᠠᠪᠴᠤ ᠭᠠᠷᠤᠭᠠᠳ ᠠᠯᠭᠤᠷᠬᠠᠨ ᠶᠠᠪᠤᠵᠤ᠂ ᠲᠤᠭᠮᠤᠭ ᠤ᠋ᠨ ᠵᠠᠬᠠ ᠳ᠋ᠤᠷ ᠬᠦᠷᠦᠭᠡᠳ ᠰᠠᠢ ᠳᠦᠯᠢᠢᠨ ᠳᠣᠪᠲᠣᠯᠵᠤ ᠴᠣᠬᠢᠨ ᠣᠷᠣᠵᠤ ᠂ ᠬᠣᠲᠠ ᠶ᠋ᠢ ᠠᠨᠤ ᠬᠠᠭᠠᠵᠤ ᠠᠪᠤᠪᠠᠰᠤ ᠪᠣᠯᠬᠤ ᠲᠤᠯᠠ ᠡᠵᠡᠨ ᠦ᠌ ᠪᠡᠶᠡ ᠪᠠᠬᠠᠨ ᠬᠣᠢᠰᠢᠯᠠᠵᠤ ᠂ ᠰᠥᠪᠡᠬᠡᠲᠡᠢ ᠂ ᠲᠣᠭᠲᠣᠩᠭᠣ᠌ ᠬᠣᠶᠠᠷ ᠪᠠᠭᠠᠲᠤᠷ ᠲᠤᠷ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠤᠷᠤᠭᠰᠢᠯᠠᠨ ᠳᠣᠪᠲᠣᠯᠤᠨ ᠣᠷᠣᠭᠤᠯᠵᠤ᠂ ᠲᠤᠬᠮᠣᠭ ᠤ᠋ᠨ ᠬᠣᠲᠠ ᠶ᠋ᠢ ᠬᠠᠭᠠᠯᠭᠠ᠂ ᠲᠦᠰᠢᠮᠡᠯ ᠪᠢ ᠪᠤᠭᠤᠷᠵᠢ ᠴᠢᠯᠠᠭᠤᠨ ᠬᠣᠶᠠᠷ ᠠᠬᠠᠢ ᠪᠠ ᠵᠢᠴᠢ ᠵᠦᠯᠭᠡᠲᠡᠢ ᠬᠤᠢᠯᠠᠳᠠᠷ ᠬᠣᠶᠠᠷ ᠪᠠᠭᠠᠲᠤᠷ ᠲᠠᠢ ᠰᠠᠷᠯᠠᠭ ᠤ᠋ᠨ ᠴᠡᠷᠢᠭ ᠢ᠋ ᠠᠪᠴᠤ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠢ᠋ᠶ᠋ᠠᠷ ᠲᠤᠬᠮᠣᠭ ᠤ᠋ᠨ ᠤᠯᠤᠰ ᠤ᠋ᠨ ᠪᠠᠷᠠᠭᠤᠨ ᠡᠮᠦᠨᠡ ᠡᠴᠡ ᠪᠠᠢᠯᠳᠤᠨ ᠣᠷᠣᠰᠤᠭᠠᠢ᠃ ᠡᠢᠮᠦ ᠪᠣᠯᠪᠠᠰᠤ ᠲᠤᠭᠮᠤᠭ ᠤ᠋ᠨ ᠮᠣᠷᠢ ᠶᠠᠳᠠᠵᠤ ᠴᠡᠷᠢᠭ ᠮᠣᠬᠣᠭᠠᠳ ᠰᠠᠨᠠᠭᠠᠨ ᠠᠯᠳᠠᠭᠳᠠᠵᠤ ᠂ ᠰᠡᠳᠬᠢᠯ ᠠᠯᠮᠠᠢᠳᠠᠭᠠᠳ ᠮᠠᠭᠠᠳ ᠳᠡᠢᠯᠦᠭᠳᠡᠮᠦᠢ᠃ ᠵᠢᠴᠢ ᠲᠣᠷᠭᠠᠨ ᠰᠢᠷᠠ ᠠᠬᠠᠢ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠤᠯᠤᠰ ᠢ᠋ ᠰᠠᠬᠢᠵᠤ ᠬᠡᠷᠡᠢᠳ ᠠᠢᠮᠠᠭ ᠪᠠ ᠨᠠᠢ᠍ᠮᠠᠨ ᠤᠯᠤᠰ ᠢ᠋ ᠰᠠᠬᠢᠨ ᠰᠡᠷᠭᠡᠢᠯᠡᠲᠦᠭᠡᠢ ᠂ ᠰᠠᠢᠨ ᠪᠣᠯᠪᠠᠰᠤ ᠲᠤᠭᠮᠤᠭ ᠤᠯᠤᠰ ᠢ᠋ ᠨᠢᠭᠡᠨ ᠵᠢᠯ ᠳ᠋ᠦ᠍ᠷ ᠳᠠᠷᠤᠢ ᠲᠦᠪᠰᠢᠳᠬᠡᠨ ᠬᠤᠷᠢᠶᠠᠮᠵᠢᠯᠠᠪᠠᠰᠤ ᠪᠣᠯᠤᠮᠤᠢ ᠃ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠪᠡᠶᠡᠰᠦᠨ ᠰᠠᠢᠰᠢᠶᠠᠵᠤ ᠵᠥᠪᠰᠢᠶᠡᠪᠡ᠃ ᠲᠡᠭᠦᠨᠴᠡ ᠮᠥᠨ ᠰᠠᠷᠠ ᠳ᠋ᠤᠷ ᠵᠢᠨᠦᠩ ᠮᠤᠬᠤᠯᠢ ᠂ ᠪᠤᠭᠤᠷᠵᠢ ᠂ ᠴᠢᠯᠠᠭᠤᠨ ᠂ ᠪᠤᠭᠤᠷᠤᠯ ᠭᠤᠷᠪᠠᠨ ᠬᠦᠯᠦᠭ ᠂ ᠵᠦᠯᠭᠡᠲᠡᠢ ᠂ ᠬᠣᠢᠯᠠᠲᠠᠷ ᠬᠣᠶᠠᠷ ᠪᠠᠭᠠᠲᠤᠷ ᠢ᠋ ᠠᠪᠴᠤ ᠰᠠᠷᠯᠠᠭ ᠤᠯᠤᠰ ᠲᠤᠷ ᠴᠡᠷᠢᠭ ᠡᠯᠰᠡᠷᠡ ᠡᠴᠢᠪᠡ ᠃ ᠵᠣᠴᠢ ᠂ ᠴᠠᠭᠠᠲᠠᠢ ᠂ ᠬᠣᠶᠠᠷ ᠪᠠᠭᠠ ᠡᠵᠡᠨ ᠂ ᠵᠠᠮᠪᠠᠯ ᠂ ᠲᠣᠭᠲᠣᠩᠭᠣ᠌ ᠂ ᠰᠥᠪᠡᠭᠡᠲᠡᠢ ᠂ ᠭᠢᠯᠦᠭᠡᠨ ᠪᠠᠭᠠᠲᠤᠷ ᠤ᠋ᠳ ᠢ᠋ ᠠᠪᠴᠤ ᠬᠣᠶᠠᠷ ᠲᠦᠮᠡᠨ ᠰᠢᠨᠡ ᠴᠡᠷᠢᠭ ᠢ᠋ ᠵᠠᠬᠢᠷᠤᠨ᠂ ᠲᠤᠭᠮᠤᠭ ᠤᠯᠤᠰ ᠢ᠋ ᠪᠠᠢᠯᠳᠤᠮᠤᠢ ᠭᠡᠮᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠰᠤᠷᠭᠠᠨ ᠮᠣᠷᠢ ᠪᠠᠨ ᠪᠡᠯᠴᠢᠭᠡᠷᠯᠡᠭᠦᠯᠬᠦ ᠪᠡᠷ ᠮᠣᠷᠳᠠᠪᠠ ᠃
ᠲᠡᠭᠦᠨᠴᠡ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠲᠠᠪᠤᠨ ᠮᠣᠵᠢ ᠶ᠋ᠢᠨ ᠠᠷᠠᠳ ᠨᠢᠳᠤᠨᠤᠨ ᠵᠢᠯ ᠮᠤᠬᠤᠯᠢ ᠶ᠋ᠢᠨ ᠬᠡᠰᠢᠭ ᠲᠣᠷ ᠶᠡᠬᠡᠯᠡ ᠰᠢᠲᠦᠨ ᠰᠦᠰᠦᠭᠯᠡᠭᠰᠡᠨ ᠲᠤᠯᠠ ᠡᠨᠡ ᠤᠳᠠᠭᠠ ᠮᠤᠬᠤᠯᠢ ᠢᠷᠡᠬᠦᠢ ᠳ᠋ᠦ᠍ᠷ ᠡᠴᠢᠭᠡ ᠡᠬᠡ ᠪᠡᠨ ᠢᠷᠡᠬᠦ ᠮᠡᠲᠦ ᠪᠠᠶᠠᠰᠤᠯᠴᠠᠨ ᠤᠭᠲᠤᠵᠤ᠂ ᠵᠠᠷᠴᠢᠭᠤᠲᠠᠢ ᠥᠲᠡᠭᠦᠰ ᠨᠣᠶᠠᠨ ᠪᠠ ᠶᠠᠪᠤᠴᠢᠲᠠᠢ ᠲᠠᠨ ᠯᠤᠭᠠ ᠬᠠᠪᠰᠤᠷᠤᠨ ᠤᠭᠲᠤᠵᠤ ᠂ ᠴᠡᠷᠢᠭ ᠡᠯᠰᠡᠵᠦ ᠬᠠᠭᠤᠴᠢᠨ ᠢ᠋ ᠰᠤᠷᠭᠠᠨ ᠵᠠᠰᠠᠬᠤᠶᠠ᠂ ᠮᠤᠬᠤᠯᠢ ᠭᠠᠪᠢᠶᠠ ᠲᠠᠢ ᠳ᠋ᠤᠷ ᠬᠦᠨᠳᠦ ᠱᠠᠩ ᠂ ᠣᠰᠣᠯ ᠳ᠋ᠤᠷ ᠬᠤᠷᠴᠠ ᠴᠠᠭᠠᠵᠠ ᠪᠠᠷ ᠶᠠᠯᠠᠯᠠᠭᠰᠠᠨᠠ ᠰᠠᠷᠯᠠᠭ ᠤ᠋ᠨ ᠴᠡᠷᠢᠭ ᠮᠤᠬᠤᠯᠢ ᠶ᠋ᠢ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠮᠡᠲᠦ ᠭᠠᠢᠬᠠᠨ ᠪᠢᠰᠢᠷᠡᠵᠦ ᠂ ᠬᠡᠳᠦᠬᠡᠨ ᠰᠠᠷᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠰᠤᠷᠤᠭᠰᠠᠨ ᠠᠨᠤ ᠬᠠᠷᠢᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠡᠴᠡ ᠬᠤᠷᠴᠠ ᠱᠠᠯᠠᠮᠠᠭᠠᠢ ᠪᠣᠯᠵᠤᠬᠤᠢ᠃ ᠨᠡᠩ ᠪᠠᠰᠠ ᠰᠠᠷᠯᠠᠭ ᠤ᠋ᠨ ᠬᠥᠮᠦᠨ ᠦ᠌ ᠪᠡᠶᠡ ᠶᠡᠬᠡ ᠬᠦᠴᠦᠨ ᠴᠢᠳᠠᠯ ᠦᠯᠡᠮᠵᠢ ᠲᠤᠯᠠ ᠰᠠᠷᠯᠠᠭ ᠤ᠋ᠨ ᠰᠢᠨᠡ ᠬᠠᠭᠤᠴᠢᠨ ᠲᠠᠢ ᠨᠡᠢᠯᠡᠭᠦᠯᠵᠦ᠂ ᠬᠥᠭᠰᠢᠨ ᠵᠡᠮᠳᠡᠭ ᠢ᠋ ᠴᠥᠮ ᠢᠯᠭᠠᠨ ᠭᠠᠷᠭᠠᠭᠠᠳ ᠭᠠᠭᠴᠠ ᠴᠢᠭᠢᠷᠠᠭ ᠬᠦᠴᠦᠲᠡᠢ ᠶ᠋ᠢ ᠢᠨᠦ ᠨᠡᠢᠲᠡ ᠨᠠᠢ᠍ᠮᠠᠨ ᠲᠦᠮᠡᠨ ᠳᠣᠯᠣᠭᠠᠨ ᠮᠢᠩᠭᠠᠨ ᠣᠯᠵᠤ᠂ ᠨᠠᠢ᠍ᠮᠠᠨ ᠣᠷᠣᠳ ᠤ᠋ᠨ ᠴᠡᠷᠢᠭ ᠪᠣᠯᠭᠠᠨ ᠵᠣᠬᠢᠶᠠᠵᠤ᠂ ᠬᠤᠪᠢᠯᠬᠤ ᠤᠷᠪᠠᠬᠤ ᠡᠭᠡᠬᠦ ᠤᠬᠤᠷᠢᠬᠤ ᠵᠣᠭᠰᠣᠬᠤ ᠰᠣᠩᠬᠤ ᠠᠭᠳᠤᠢᠬᠤ ᠡᠨᠡ ᠨᠠᠢ᠍ᠮᠠᠨ ᠵᠦᠢᠯ ᠢ᠋ ᠪᠣᠯᠪᠠᠰᠤᠷᠠᠭᠤᠯᠵᠤ ᠰᠤᠷᠭᠠᠭᠠᠳ ᠮᠠᠰᠢ ᠲᠡᠭᠰᠢ ᠴᠡᠷᠢᠭ ᠪᠣᠯᠭᠠᠵᠤᠬᠤᠢ᠃
ᠡᠭᠦᠨ ᠢ᠋ ᠲᠦᠷ ᠵᠣᠭᠰᠣᠵᠤ ᠣᠳᠣ ᠲᠤᠭᠮᠤᠭ ᠤᠯᠤᠰ ᠤ᠋ᠨ ᠬᠠᠭᠠᠨ ᠢ᠋ ᠬᠡᠯᠡᠬᠦ ᠢᠨᠦ ᠡᠨᠡ ᠶᠢᠰᠦᠨ ᠮᠣᠵᠢ ᠶ᠋ᠢᠨ ᠳᠤᠬᠠᠮᠣᠭ ᠤᠯᠤᠰ ᠤ᠋ᠨ ᠡᠵᠡᠨ ᠦ᠌ ᠨᠡᠷᠡ ᠢᠨᠦ ᠮᠡᠩᠭᠡᠯᠠ᠂ ᠴᠣᠯᠠ ᠠᠨᠤ ᠰᠦᠯᠳᠡ᠂ ᠨᠠᠰᠤᠨ ᠳᠥᠴᠢᠨ ᠢ᠋ ᠰᠢᠬᠠᠵᠤ ᠳᠦᠷᠢ ᠠᠪᠤᠷᠢ ᠮᠠᠰᠢ ᠳᠣᠭᠰᠢᠨ ᠳᠣᠯᠭᠢᠨ ᠤᠵᠢᠳ ᠨᠥᠷᠢ ᠠᠰᠤᠷᠤ ᠬᠤᠷᠢᠴᠠᠯ ᠨᠢᠰᠸᠠᠨᠢᠰ ᠲᠠᠢ ᠂ ᠪᠠᠷᠠᠭᠤᠨ ᠬᠠᠴᠠᠷ ᠲᠤᠷ ᠥᠨᠳᠡᠭᠡ ᠶ᠋ᠢᠨ ᠴᠢᠨᠡᠭᠡᠨ ᠨᠢᠭᠡᠨ ᠬᠡᠰᠡᠭ ᠬᠥᠬᠡ ᠮᠡᠩᠭᠡ ᠲᠡᠢ ᠂ ᠲᠡᠷᠡ ᠮᠡᠩᠭᠡ ᠶ᠋ᠢᠨ ᠳᠡᠭᠡᠷᠡ ᠨᠢᠭᠡᠨ ᠰᠥᠭᠡᠮ ᠬᠢᠷᠢ ᠬᠠᠷᠠ ᠦᠰᠦ ᠲᠡᠢ ᠲᠤᠯᠠ ᠣᠯᠠᠨ ᠢ᠋ᠶ᠋ᠠᠷ ᠲᠡᠭᠦᠨ ᠢ᠋ ᠮᠡᠩᠭᠡᠲᠦ ᠬᠠᠭᠠᠨ ᠭᠡᠮᠡᠨ ᠳᠠᠭᠤᠳᠠᠮᠤᠢ ᠂ ᠪᠠᠰᠠ ᠴᠤ᠌ ᠮᠡᠬᠡᠲᠦ ᠬᠠᠭᠠᠨ ᠭᠡᠮᠡᠨ ᠳᠠᠭᠤᠳᠠᠮᠤᠢ ᠂ ᠲᠡᠷᠡ ᠢᠨᠦ ᠡᠬᠡᠨᠡᠷ ᠥᠬᠢᠳ ᠢ᠋ ᠣᠷᠣᠭᠤᠯᠤᠨ ᠠᠪᠬᠤ ᠮᠡᠬᠡ ᠶ᠋ᠢ ᠬᠡᠯᠡᠵᠦᠬᠦᠢ᠃ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠪᠡᠷ ᠥᠩᠭᠡᠷᠡᠭᠰᠡᠨ ᠥᠬᠢᠳ ᠡᠬᠡᠨᠡᠷ ᠬᠡᠳᠦᠨ ᠵᠠᠭᠤᠨ ᠳ᠋ᠤᠷ ᠬᠦᠷᠦᠭᠰᠡᠨ ᠠᠵᠤᠭᠤ ᠃ ᠨᠢᠳᠤᠨᠤᠨ ᠬᠠᠪᠤᠷ ᠰᠠᠷᠯᠠᠭ ᠤ᠋ᠨ ᠵᠠᠯᠢᠲᠤ ᠬᠠᠭᠠᠨ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠪᠠᠢᠯᠳᠤᠬᠤᠢ ᠳ᠋ᠤᠷ ᠡᠭᠦᠨ ᠦ᠌ ᠤᠯᠤᠰ ᠠ᠋ᠴᠠ ᠡᠴᠢᠭᠰᠡᠨ ᠴᠡᠷᠢᠭ ᠢ᠋ ᠬᠡᠷᠡᠢᠳ ᠤᠯᠤᠰ ᠤ᠋ᠨ ᠵᠠᠮᠤᠬᠠ ᠥᠪᠡᠷ ᠦ᠋ᠨ ᠴᠡᠷᠢᠭ ᠪᠠ ᠲᠤᠭᠮᠤᠭ ᠤ᠋ᠨ ᠴᠡᠷᠢᠭ ᠯᠦ᠍ᠭᠡ ᠬᠣᠬᠢᠷᠠᠭᠤᠯᠤᠭᠰᠠᠨ ᠦᠭᠡᠢ ᠪᠡᠷ ᠠᠪᠤᠨ ᠭᠠᠷᠴᠤ ᠢᠷᠡᠭᠰᠡᠨᠡ ᠂ ᠮᠡᠬᠡᠲᠦ ᠬᠠᠭᠠᠨ ᠵᠠᠮᠤᠬᠠ ᠶ᠋ᠢ ᠮᠠᠰᠢ ᠤᠬᠠᠭᠠᠨᠲᠠᠢ ᠬᠥᠮᠦᠨ ᠪᠠᠢᠨᠠᠮ ᠭᠡᠮᠡᠨ ᠳᠠᠷᠤᠢ ᠪᠡᠶᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠬᠠᠪᠰᠤᠷᠤᠭᠤᠯᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠠᠷᠢᠯᠭᠠᠰᠤᠭᠠᠢ ᠭᠡᠮᠡᠨ ᠳᠠᠢᠯᠠᠬᠤ ᠠᠷᠭᠠ ᠶ᠋ᠢ ᠵᠥᠪᠯᠡᠭᠰᠡᠨᠡ ᠵᠠᠮᠤᠬᠠ : 《 ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠨᠡ ᠬᠣᠭᠣᠰᠣᠨ ᠴᠢᠯᠥᠭᠡᠨ ᠳ᠋ᠦ᠍ᠷ ᠣᠷᠣᠵᠤ ᠪᠠᠢᠯᠳᠤᠪᠠᠯ᠂ ᠦᠨᠳᠦᠰᠦᠨ ᠢ᠋ ᠡᠪᠳᠡᠵᠦ᠂ ᠬᠦᠴᠦᠨ ᠢ᠋ ᠪᠠᠭᠤᠷᠠᠭᠤᠯᠤᠭᠠᠳ ᠳᠠᠬᠢᠨ ᠪᠠᠢᠯᠳᠤᠵᠤ ᠡᠪᠳᠡᠬᠦᠢ ᠳ᠋ᠦ᠍ᠷ ᠬᠢᠯᠪᠠᠷ ᠪᠣᠯᠠᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ : 《ᠡᠨᠡ ᠴᠣᠬᠣᠮ ᠬᠡᠪᠴᠢᠶᠡᠨ ᠮᠥᠨ ! 》ᠬᠡᠮᠡᠵᠦ ᠥᠪᠡᠷ ᠦ᠋ᠨ ᠳᠣᠣᠷᠠᠬᠢ ᠴᠡᠷᠢᠭ ᠦ᠋ᠨ ᠳᠥᠷᠪᠡᠨ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠳᠠᠭᠤᠳᠠᠪᠠ ᠃ ᠨᠢᠭᠡᠨ ᠦ᠌ ᠨᠡᠷᠡ ᠪᠣᠷᠣ ᠠᠷᠰᠯᠠᠨ᠂ ᠨᠢᠭᠡᠨ ᠦ᠌ ᠨᠡᠷᠡ ᠰᠣᠳᠣ ᠭᠠᠷᠤᠳᠢ᠂ ᠨᠢᠭᠡᠨ ᠦ᠌ ᠨᠡᠷᠡ ᠭᠠᠯᠵᠠᠭᠤ ᠪᠠᠷᠰ ᠂ ᠨᠢᠭᠡ ᠶ᠋ᠢᠨ ᠨᠡᠷᠡ ᠰᠣᠭᠲᠣᠭᠤ ᠯᠤᠤ – ᠡᠢᠮᠦ ᠳᠥᠷᠪᠡᠨ ᠲᠦᠰᠢᠮᠡᠯ ᠪᠥᠯᠥᠭᠡ ᠃ ᠡᠨᠡ ᠳᠥᠷᠪᠡᠨ ᠲᠦᠰᠢᠮᠡᠯ ᠯᠦ᠍ᠭᠡ ᠪᠡᠨ ᠵᠥᠪᠯᠡᠯᠳᠦᠵᠦ ᠂ ᠲᠠᠪᠤᠨ ᠲᠦᠮᠡᠨ ᠰᠢᠯᠭᠠᠭᠰᠠᠨ ᠴᠡᠷᠢᠭ ᠠᠪᠴᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠬᠠᠯᠳᠠᠷᠠ ᠢᠷᠡᠭᠡᠳ ᠰᠠᠨᠠᠮᠰᠠᠷ ᠦᠭᠡᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠰᠡᠷᠭᠡᠢᠯᠡᠨ ᠴᠠᠭᠳᠠᠬᠤ ᠪᠤᠭᠤᠷᠵᠢ ᠂ ᠪᠤᠭᠤᠷᠤᠯ ᠨᠠᠷ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠵᠤ᠂ ᠨᠢᠭᠡᠨ ᠵᠡᠷᠭᠡ ᠶᠡᠬᠡᠯᠡ ᠳᠠᠷᠤᠭᠳᠠᠵᠤ ᠡᠭᠡᠵᠦ ᠬᠠᠷᠢᠭ᠍ᠰᠠᠨ ᠠᠵᠤᠭᠤ ᠃
ᠲᠡᠳᠦᠢ ᠮᠡᠬᠡᠲᠦ ᠬᠠᠭᠠᠨ ᠶᠡᠬᠡᠯᠡ ᠠᠭᠤᠷᠯᠠᠵᠤ᠂ ᠨᠢᠭᠡᠨ ᠡᠪᠦᠯ ᠢ᠋ ᠬᠦᠯᠢᠶᠡᠨ ᠥᠩᠭᠡᠷᠡᠵᠦ᠂ ᠡᠨᠡ ᠬᠠᠪᠤᠷ ᠭᠠᠷᠴᠤ ᠢᠷᠡᠭᠡᠳ ᠬᠠᠷᠠᠬᠠᠨ ᠴᠡᠷᠢᠭ ᠪᠠᠢᠭᠤᠯᠤᠨ ᠦᠰ ᠠᠪᠰᠤᠭᠠᠢ ᠬᠡᠮᠡᠵᠦ ᠪᠠᠢᠲᠠᠯᠠ ᠴᠢᠪᠬᠢᠲᠡᠯᠡ ᠡᠮᠦᠨᠡ ᠬᠠᠷᠠᠭᠤᠯ ᠠ᠋ᠴᠠ ᠲᠤᠷᠰᠢᠭᠤᠯ ᠤ᠋ᠨ ᠬᠥᠮᠦᠨ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《ᠡᠮᠦᠨᠡ ᠡᠯᠡᠰᠦᠨ ᠦ᠌ ᠪᠧᠲ᠋ᠠ᠋ ᠤᠯᠤᠰ ᠬᠣᠷᠢᠨ ᠲᠦᠮᠡᠨ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠢᠷᠡᠮᠦᠢ ᠭᠡᠮᠡᠨ ᠲᠡᠳᠡᠨ ᠦ᠌ ᠬᠣᠢᠲᠤ ᠵᠠᠬᠠ ᠳ᠋ᠤᠷ ᠶᠡᠬᠡ ᠪᠠᠭᠤᠳᠠᠯ ᠪᠡᠯᠡᠳᠬᠡᠵᠦ ᠬᠦᠯᠢᠶᠡᠮᠦᠢ᠃ 》 ᠬᠡᠮᠡᠲᠡᠯᠡ ᠪᠠᠷᠠᠭᠤᠨ ᠡᠮᠦᠨᠡ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠪᠦᠬᠦᠢ ᠲᠤᠷᠰᠢᠭᠤᠯ ᠪᠠᠰᠠ ᠳᠣᠪᠲᠣᠯᠤᠨ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠦᠯᠦᠭ ᠪᠠᠭᠠᠲᠤᠳ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠨᠢᠳᠤᠨᠤᠨ ᠤ᠋ ᠦᠰ ᠢ᠋ᠶ᠋ᠡᠨ ᠠᠪᠤᠷᠠ ᠣᠳᠤᠮᠤᠢ ᠭᠡᠮᠡᠨ ᠨᠢᠭᠡᠨᠲᠡ ᠪᠡᠯᠡᠨ ᠪᠣᠯᠪᠠ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠶᠡᠬᠡᠯᠡ ᠭᠡᠯᠮᠡᠵᠦ᠂ ᠣᠯᠠᠨ ᠡᠮᠡᠰ ᠰᠤᠯᠠᠴᠤᠳ ᠢ᠋ᠶ᠋ᠠᠨ ᠣᠷᠬᠢᠵᠤ᠂ ᠥᠪᠡᠷ ᠦ᠋ᠨ ᠬᠦᠷᠦ ᠨᠡᠷᠡᠲᠦ ᠬᠣᠲᠠ ᠶ᠋ᠢᠨ ᠡᠮᠦᠨᠡ ᠪᠡᠨ ᠥᠪᠡᠷ ᠦ᠋ᠨ ᠶᠢᠰᠦᠨ ᠮᠣᠵᠢ ᠤᠯᠤᠰ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠷᠠᠲᠠᠯᠠ ᠪᠠᠢᠭᠤᠯᠤᠨ ᠠᠷᠪᠠᠨ ᠲᠦᠮᠡᠨ ᠪᠣᠯᠭᠠᠵᠤ᠂ ᠶᠡᠬᠡ ᠵᠠᠩᠵᠤᠨ ᠪᠣᠷᠣ ᠠᠷᠰᠯᠠᠨ᠂ ᠰᠣᠳᠣ ᠭᠠᠷᠤᠳᠢ ᠬᠣᠶᠠᠭᠤᠯᠠ ᠳ᠋ᠤᠷ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠲᠤᠯᠤᠷᠠ ᠢᠯᠡᠭᠡᠵᠦ᠂ ᠬᠡᠷᠡᠢᠳ ᠦ᠋ᠨ ᠵᠠᠮᠤᠬᠠ᠂ ᠰᠣᠭᠲᠣᠭᠤ ᠯᠤᠤ ᠂ ᠭᠠᠯᠵᠠᠭᠤ ᠪᠠᠷᠰ ᠭᠤᠷᠪᠠᠭᠤᠯᠠ ᠳ᠋ᠤᠷ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠠᠬᠠ ᠪᠠ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠵᠠᠪᠰᠠᠷ ᠲᠤᠷ ᠪᠦᠬᠦᠢ ᠭᠠᠯ ᠬᠠᠢᠷᠬᠠᠨ ᠬᠡᠮᠡᠬᠦ ᠠᠭᠤᠯᠠᠨᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠲᠤᠯᠤᠷᠠ ᠢᠯᠡᠭᠡᠪᠡ᠃ ᠥᠪᠡᠷ ᠦ᠋ᠨ ᠪᠡᠶᠡ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠤᠨ ᠬᠣᠶᠠᠷ ᠴᠡᠷᠢᠭ ᠦ᠋ᠨ ᠳᠤᠮᠳᠠ ᠪᠠᠭᠤᠳᠠᠯᠯᠠᠵᠤ ᠂ ᠬᠣᠶᠠᠷ ᠡᠲᠡᠭᠡᠳ ᠲᠣᠷ ᠲᠤᠰᠠᠯᠠᠬᠤ ᠪᠠᠷ ᠪᠡᠯᠡᠳᠬᠡᠪᠡ ᠃ ᠤᠳᠠᠭᠰᠠᠨ ᠦᠭᠡᠢ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠬᠠᠭᠤᠴᠢᠳ ᠢ᠋ᠶ᠋ᠠᠷ ᠪᠣᠷᠣ ᠠᠷᠰᠯᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ :《 ᠰᠠᠷᠯᠠᠭ ᠤ᠋ᠨ ᠴᠡᠷᠢᠭ ᠠᠰᠤᠷᠤ ᠬᠦᠴᠦᠲᠡᠢ ᠬᠡᠮᠡᠮᠦᠢ᠃ ᠨᠡᠩ ᠪᠠᠰᠠ ᠴᠡᠷᠢᠭ ᠦ᠋ᠨ ᠲᠣᠭᠠ ᠠᠷᠪᠠᠨ ᠲᠠᠪᠤᠨ ᠲᠦᠮᠡᠨ ᠡᠴᠡ ᠴᠦ᠍ ᠳᠠᠪᠠᠵᠤᠬᠤᠢ᠃ ᠡᠵᠡᠨ ᠲᠤᠰᠠᠯᠠᠷᠠ ᠢᠷᠡᠮᠦ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠡᠨᠡᠲᠡᠭᠡ ᠡᠲᠡᠭᠡᠳ ᠳᠡᠮᠡᠢ ᠴᠢᠮᠡᠭᠡ ᠦᠭᠡᠢ ᠲᠤᠯᠠ ᠳᠠᠷᠤᠢ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠤᠨ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠵᠦᠭ ᠮᠣᠷᠳᠠᠵᠤ ᠲᠡᠨᠳᠡ ᠬᠦᠷᠪᠡᠰᠦ᠂ ᠪᠣᠷᠣ ᠠᠷᠰᠯᠠᠨ ᠤᠭᠲᠤᠵᠤ ᠮᠡᠳᠡᠭᠦᠯᠦᠷᠦᠨ: 《ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠡᠵᠡᠨ ᠦ᠌ ᠢᠷᠡᠬᠦ ᠶ᠋ᠢ ᠰᠣᠨᠣᠰᠴᠤ ᠬᠡᠳᠦᠢᠨᠡᠢ ᠡᠭᠡᠪᠡ᠃ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠲᠠᠪᠠ ᠦᠭᠡᠢ ᠪᠥᠬᠥᠶᠡ ᠂ ᠡᠮᠦᠨᠡ ᠵᠠᠬᠠ ᠳ᠋ᠤᠷ ᠰᠠᠭᠤᠵᠤ ᠪᠠᠢᠬᠤ ᠵᠠᠮᠤᠬᠠ ᠶ᠋ᠢᠨ ᠡᠮᠦᠨᠡ ᠡᠴᠡ ᠡᠯᠴᠢ ᠢᠷᠡᠵᠦ ᠲᠤᠰᠠᠯᠠᠬᠤ ᠴᠡᠷᠢᠭ ᠭᠤᠶᠤᠮᠤᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠪᠡᠶᠡ ᠪᠡᠷ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠳᠣᠪᠲᠣᠯᠤᠨ ᠢᠷᠡᠲᠡᠯᠡ ᠵᠠᠮᠤᠬᠠ ᠮᠥᠷᠭᠥᠨ ᠤᠭᠲᠤᠵᠤ ᠮᠡᠳᠡᠭᠦᠯᠦᠷᠦᠨ : 《 ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠠᠭᠠᠨ ᠡᠵᠡᠨ ᠦ᠌ ᠪᠡᠶᠡ ᠪᠡᠷ ᠢᠷᠡᠬᠦ ᠶ᠋ᠢ ᠰᠣᠨᠣᠰᠴᠤ ᠶᠡᠬᠡ ᠰᠦᠷ ᠡᠴᠡ ᠠᠶᠤᠨ ᠭᠡᠨᠡᠳᠲᠡ ᠡᠭᠡᠪᠡ᠃ 》ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠰᠠᠶᠢ ᠪᠠᠬᠠᠨ ᠠᠮᠠᠷᠠᠰᠤᠭᠠᠢ ᠬᠡᠮᠡᠲᠡᠯᠡ ᠪᠠᠷᠠᠭᠤᠨ ᠵᠠᠬᠠ ᠶ᠋ᠢᠨ ᠪᠣᠷᠣ ᠠᠷᠰᠯᠠᠨ ᠤ᠋ ᠲᠡᠨᠳᠡ ᠡᠴᠡ ᠪᠠᠰᠠ ᠡᠯᠴᠢ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《ᠡᠵᠡᠨ ᠦ᠌ ᠡᠭᠡᠭᠰᠡᠨ ᠢ᠋ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠰᠣᠨᠣᠰᠤᠮᠠᠭᠴᠠ ᠪᠠᠰᠠ ᠡᠭᠡᠵᠦ ᠢᠷᠡᠪᠡ ᠬᠡᠮᠡᠮᠦᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠪᠠᠰᠠ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠵᠠᠮ ᠶᠠᠪᠤᠲᠠᠯᠠ ᠪᠣᠷᠣ ᠠᠷᠰᠯᠠᠨ ᠤ᠋ ᠡᠮᠦᠨᠡ ᠡᠴᠡ ᠪᠠᠰᠠ ᠬᠥᠮᠦᠨ ᠤᠭᠲᠤᠨ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《 ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠪᠠᠰᠠ ᠡᠭᠡᠵᠦ ᠳᠤᠲᠠᠭᠠᠪᠠ ! 》 ᠬᠡᠮᠡᠲᠡᠯᠡ ᠵᠠᠮᠤᠬᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠡᠴᠡ ᠰᠣᠭᠲᠣᠭᠤ ᠯᠤᠤ ᠳᠣᠪᠲᠣᠯᠤᠨ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《 ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠪᠡᠶᠡ ᠪᠡᠷ ᠠᠷᠪᠠᠨ ᠲᠦᠮᠡᠨ ᠦ᠌ ᠶᠡᠬᠡ ᠴᠡᠷᠢᠭ ᠠᠪᠴᠤ ᠬᠣᠢᠲᠤ ᠵᠠᠬᠠ ᠳ᠋ᠤᠷ ᠢ᠋ᠶ᠋ᠠᠨ ᠪᠠᠭᠤᠳᠠᠯᠯᠠᠪᠠ ᠃ ᠲᠤᠭ ᠰᠢᠭᠦᠷ ᠢ᠋ ᠳᠣᠳᠣᠷᠬᠠᠶᠠ ᠦᠵᠡᠪᠡ᠃ 》ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠮᠠᠲᠠᠷ ᠳᠣᠣᠷᠠ ᠪᠠᠨ ᠠᠶᠤᠩᠭᠠ ᠮᠡᠲᠦ ᠬᠢᠯᠢᠩᠯᠡᠨ ᠦᠰᠦᠷᠦᠨ ᠪᠣᠰᠴᠤ ᠰᠢᠭᠤᠳ ᠬᠣᠢᠨᠠ ᠠ᠋ᠴᠠ ᠠᠨᠤ ᠨᠡᠬᠡᠵᠦ ᠠᠯᠠᠰᠤᠭᠠᠢ ᠭᠡᠮᠡᠨ ᠳᠣᠪᠲᠣᠯᠤᠨ ᠬᠦᠷᠴᠦ ᠢᠷᠡᠲᠡᠯᠡ ᠵᠠᠮᠤᠬᠠ ᠨᠢᠭᠡᠨ ᠡᠳᠦᠷ ᠦ᠋ᠨ ᠵᠠᠮ ᠠ᠋ᠴᠠ ᠤᠭᠲᠤᠵᠤ ᠮᠡᠳᠡᠭᠦᠯᠦᠷᠦᠨ : 《ᠡᠵᠡᠨ ᠦ᠌ ᠰᠦᠷ ᠪᠤᠶᠠᠨ ᠬᠡᠮᠡᠭᠴᠢ ᠡᠵᠡᠳ ᠰᠠᠬᠢᠭᠤᠯᠰᠤᠨ ᠮᠡᠲᠦ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠰᠣᠨᠣᠰᠤᠮᠠᠭᠴᠠ ᠬᠡᠳᠦᠢᠨᠡᠢ ᠳᠤᠲᠠᠭᠠᠪᠠᠢ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠨᠡᠩ ᠬᠢᠯᠢᠩᠯᠡᠵᠦ᠂ ᠬᠣᠢᠨᠠ ᠠ᠋ᠴᠠ ᠠᠨᠤ ᠨᠡᠬᠡᠵᠦ ᠠᠯᠠᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠠᠮᠤᠬᠠ ᠮᠡᠳᠡᠭᠦᠯᠦᠷᠦᠨ : 《ᠬᠡᠳᠦᠢ ᠨᠡᠬᠡᠪᠡᠴᠦ ᠭᠦᠢᠴᠡᠬᠦ ᠦᠭᠡᠢ ᠪᠣᠯᠪᠠ ! 》 ᠭᠡᠮᠡᠨ ᠬᠠᠷᠠᠬᠠᠨ ᠴᠢᠷᠠᠭᠠᠯᠠᠯᠳᠤᠨ ᠪᠥᠬᠥᠶᠡ᠂ ᠪᠣᠷᠣ ᠠᠷᠰᠯᠠᠨ ᠤ᠋ ᠲᠡᠨᠳᠡ ᠡᠴᠡ ᠪᠠᠰᠠ ᠳᠣᠪᠲᠣᠯᠤᠨ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠡᠨᠳᠡ ᠢᠷᠡᠭᠡᠳ ᠡᠵᠡᠨ ᠦ᠌ ᠮᠡᠳᠡᠭᠡ ᠶ᠋ᠢ ᠣᠯᠵᠤ᠂ ᠠᠳᠡᠬᠢ ᠶ᠋ᠢ ᠣᠷᠬᠢᠭᠠᠳ ᠪᠠᠷᠠᠭᠤᠨ ᠰᠠᠷᠯᠠᠭ ᠢ᠋ᠶ᠋ᠠᠷ ᠣᠷᠣᠪᠠ᠂ ᠣᠯᠳᠠᠬᠤᠯᠠ ᠡᠵᠡᠨ ᠡᠷᠬᠡᠪᠰᠢ ᠲᠡᠨᠳᠡ ᠡᠴᠢᠬᠦ ᠪᠣᠯᠪᠠᠤ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠶᠡᠬᠡᠯᠡ ᠠᠭᠤᠷᠯᠠᠵᠤ : 《ᠡᠨᠡ ᠶᠠᠮᠪᠠᠷ ᠶᠠᠪᠤᠳᠠᠯ ᠬᠡᠮᠡᠭᠴᠢ ᠪᠣᠢ᠂ ᠡᠨᠡ ᠵᠤᠨ ᠤ᠋ ᠶᠡᠬᠡ ᠬᠠᠯᠠᠭᠤᠨᠠ ᠲᠠᠨ ᠤ᠋ ᠬᠣᠶᠠᠷ ᠡᠲᠡᠭᠡᠳ ᠮᠢᠨᠦ ᠪᠡᠶᠡ ᠪᠡᠷ ᠨᠠᠭᠠᠳᠤᠮ ᠬᠢᠬᠦ ᠪᠤᠶᠤ ! 》ᠭᠡᠮᠡᠨ ᠦᠰᠦᠷᠬᠢᠯᠡᠨ ᠳᠡᠪᠬᠡᠴᠡᠬᠦᠢ ᠳ᠋ᠦ᠍ᠷ ᠵᠠᠮᠤᠬᠠ ᠬᠠᠵᠠᠭᠤ ᠠ᠋ᠴᠠ ᠳᠠᠬᠢᠨ ᠳᠠᠬᠢᠨ ᠮᠥᠷᠭᠥᠵᠦ ᠮᠡᠩᠳᠡᠯᠬᠢᠯᠡᠨ ᠬᠣᠷᠢᠭᠯᠠᠭᠰᠠᠨᠠ᠂ ᠮᠡᠬᠡᠲᠦ ᠬᠠᠭᠠᠨ ᠠᠷᠭᠠ ᠦᠭᠡᠢ ᠪᠠᠰᠠ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠰᠠᠷᠯᠠᠭ ᠤ᠋ᠨ ᠵᠦᠭ ᠳᠣᠪᠲᠣᠯᠪᠠ᠃
ᠡᠨᠡ ᠨᠢᠭᠡᠨ ᠬᠠᠪᠤᠷ ᠨᠢᠭᠡᠨ ᠵᠤᠨ ᠮᠢᠩᠭᠠᠨ ᠰᠢᠬᠠᠮ ᠭᠠᠵᠠᠷ ᠢ᠋ ᠥᠭᠡᠳᠡ ᠤᠷᠤᠭᠤ ᠬᠡᠳᠦᠨᠲᠡ ᠶᠠᠪᠤᠵᠤ ᠬᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠷ ᠮᠣᠷᠢᠨ ᠤ᠋ ᠨᠢᠷᠤᠭᠤ ᠴᠥᠮ ᠳᠠᠭᠠᠷᠢᠲᠤᠵᠤ᠂ ᠬᠥᠮᠦᠨ ᠦ᠌ ᠪᠥᠭᠰᠡ ᠴᠥᠮ ᠬᠣᠯᠭᠣᠨ᠂ ᠴᠡᠷᠢᠭ ᠬᠤᠶᠠᠭ ᠶᠠᠳᠠᠩᠭᠢᠷᠠᠵᠤ᠂ ᠠᠭᠲᠠ ᠮᠣᠷᠢᠳ ᠲᠤᠷᠠᠵᠤᠬᠤᠢ᠃ ᠨᠡᠩᠳᠡ ᠮᠡᠬᠡᠲᠦ ᠬᠠᠭᠠᠨ ᠴᠤ᠌ ᠮᠠᠨᠠᠷᠠᠨ ᠴᠥᠬᠥᠵᠦ᠂ ᠰᠥᠨᠢ ᠡᠳᠦᠷ ᠥᠭᠡᠶᠡ ᠳᠣᠪᠲᠣᠯᠤᠨ ᠬᠦᠷᠴᠦ ᠢᠷᠠᠪᠠᠰᠤ ᠪᠣᠷᠣ ᠠᠷᠰᠯᠠᠨ ᠪᠠᠰᠠ ᠤᠭᠲᠤᠨ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ :《ᠡᠨᠡ ᠤᠳᠠᠭᠠ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠡᠭᠡᠭᠰᠡᠨ ᠦᠭᠡᠢ᠂ ᠰᠠᠷᠯᠠᠭ ᠮᠥᠷᠡᠨ ᠦ᠌ ᠴᠠᠭᠠᠨᠠ ᠪᠠᠭᠤᠳᠠᠯᠯᠠᠵᠤ ᠪᠣᠢ᠃ 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠶᠡᠬᠡᠯᠡ ᠬᠢᠯᠢᠩᠯᠡᠵᠦ᠂ ᠡᠯᠴᠢ ᠢᠯᠡᠭᠡᠵᠦ ᠪᠠᠢᠯᠳᠤᠬᠤ ᠶ᠋ᠢ ᠪᠣᠯᠵᠣᠷᠠ ᠢᠯᠡᠭᠡᠭᠰᠡᠨ ᠳ᠋ᠦ᠍ᠷ ᠡᠯᠴᠢ ᠮᠥᠷᠡᠨ ᠢ᠋ ᠭᠡᠲᠦᠯᠦᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠳ᠋ᠦ᠍ᠷ ᠡᠴᠢᠪᠡᠰᠦ᠂ ᠶᠠᠭᠤᠨᠠᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠠᠵᠢ !ᠦᠵᠡᠰᠡ ᠵᠢᠨᠦᠩ ᠮᠤᠬᠤᠯᠢ ᠠᠨᠤ ᠣᠯᠠᠨ ᠴᠡᠷᠢᠭ ᠦ᠋ᠨ ᠮᠣᠷᠢᠳ ᠢ᠋ ᠤᠰᠤ ᠡᠪᠡᠰᠦᠨ ᠦ᠌ ᠰᠠᠢᠨ ᠢ᠋ ᠡᠷᠢᠵᠦ ᠪᠡᠯᠴᠢᠭᠡᠷᠯᠡᠭᠦᠯᠦᠨ ᠶᠠᠪᠤᠬᠤ ᠠᠵᠤᠭᠤ᠃
ᠡᠯᠴᠢ᠂ ᠮᠤᠬᠤᠯᠢ ᠳ᠋ᠤᠷ ᠵᠣᠯᠭᠠᠵᠤ ᠪᠠᠢᠯᠳᠤᠬᠤ ᠪᠢᠴᠢᠭ ᠢ᠋ᠶ᠋ᠡᠨ ᠪᠠᠷᠢᠭ᠍ᠰᠠᠨᠠ᠂ ᠮᠤᠬᠤᠯᠢ ᠪᠢᠴᠢᠭ ᠢ᠋ ᠦᠵᠡᠵᠦ ᠢᠨᠢᠶᠡᠨ ᠥᠭᠦᠯᠡᠷᠦᠨ : 《ᠡᠨᠡ ᠪᠠᠰᠠ ᠰᠣᠨᠢᠨ ᠪᠢᠰᠢ ᠦᠦ ? ᠪᠢᠳᠡ ᠶᠡᠷᠦ ᠲᠠᠨ ᠯᠤᠭᠠ ᠬᠠᠯᠳᠠᠭᠰᠠᠨ ᠭᠠᠵᠠᠷ ᠣᠭᠲᠣ ᠦᠭᠡᠢ᠂ ᠮᠠᠨ ᠤ᠋ ᠡᠨᠡ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠬᠡᠮᠡᠭᠴᠢ ᠪᠢᠳᠡᠨ ᠦ᠌ ᠰᠢᠨᠡ ᠣᠯᠤᠭᠰᠠᠨ ᠰᠠᠷᠯᠠᠭ ᠤ᠋ᠨ ᠴᠡᠷᠢᠭ ᠢ᠋ᠶ᠋ᠡᠨ ᠰᠤᠷᠭᠠᠵᠤ᠂ ᠠᠭᠲᠠ ᠮᠣᠷᠢᠳ ᠢ᠋ᠶ᠋ᠠᠨ ᠪᠡᠯᠴᠢᠭᠡᠷᠯᠡᠭᠦᠯᠵᠦ ᠪᠣᠷᠳᠣᠬᠤ ᠭᠠᠵᠠᠷ ᠪᠣᠢ ᠶᠠ᠂ ᠲᠠᠨ ᠳ᠋ᠤᠷ ᠣᠭᠲᠣ ᠬᠠᠷᠢᠶᠠ ᠦᠭᠡᠢ ᠪᠣᠯᠠᠢ᠃ ᠴᠢ ᠡᠰᠡ ᠢᠲᠡᠭᠡᠪᠡᠰᠦ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠲᠣᠭᠣᠷᠢᠵᠤ ᠪᠠᠢᠴᠠᠭᠠᠨ ᠦᠵᠡ᠂ ᠴᠡᠷᠢᠭ ᠲᠦ᠍ᠷ ᠮᠣᠷᠳᠠᠬᠤ ᠪᠠᠢᠳᠠᠯ ᠪᠣᠢ ᠤᠤ ? ᠲᠠ ᠶᠠᠭᠤᠨ ᠳ᠋ᠤᠷ ᠡᠢᠨ ᠬᠦ᠌ ᠴᠦᠯᠢᠰᠳᠡᠨ ᠣᠷᠬᠢᠭ᠍ᠰᠠᠨ ᠠᠵᠢ ! ᠲᠠ ᠬᠡᠷᠪᠡ ᠮᠠᠨ ᠤ᠋ ᠴᠡᠷᠢᠭ ᠢ᠋ ᠲᠠᠨ ᠤ᠋ ᠵᠠᠬᠠ ᠶ᠋ᠢᠨ ᠣᠢᠷᠠ ᠪᠢᠲᠡᠭᠡᠢ ᠪᠡᠯᠴᠢᠭᠡᠷᠯᠡ ᠬᠡᠮᠡᠪᠡᠰᠦ ᠪᠢᠳᠡ ᠳᠠᠷᠤᠢ ᠶᠠᠪᠤᠪᠠᠰᠤ ᠪᠠᠷᠠᠪᠠᠢ ᠶᠠ᠂ ᠡᠭᠦᠨ ᠳ᠋ᠦ᠍ᠷ ᠮᠥᠨ ᠠᠯᠠᠯᠳᠤᠨ ᠪᠠᠢᠯᠳᠤᠬᠤ ᠬᠡᠷᠡᠭ ᠦᠭᠡᠢ ᠪᠣᠯᠠᠢ᠃ ᠠᠩᠬᠠᠨ ᠤ᠋ ᠬᠡᠳᠦᠨ ᠤᠳᠠᠭᠠ ᠢᠷᠡᠭᠰᠡᠨ ᠢᠨᠤ ᠪᠠᠰᠠ ᠴᠤ᠌ ᠴᠡᠷᠢᠭ ᠮᠣᠷᠢᠨ ᠢ᠋ᠶ᠋ᠠᠨ ᠰᠠᠢᠨ ᠤᠰᠤ ᠡᠪᠡᠰᠦᠨ ᠢ᠋ ᠡᠷᠢᠨ ᠪᠡᠯᠴᠢᠭᠡᠷᠯᠡᠭᠰᠡᠨ ᠬᠡᠷᠡᠭ ᠪᠥᠯᠥᠭᠡ᠂ ᠡᠭᠦᠨ ᠳ᠋ᠦ᠍ᠷ ᠴᠦ᠍ ᠲᠠᠨ ᠤ᠋ ᠤᠯᠤᠰ ᠮᠥᠨ ᠡᠨᠡ ᠮᠡᠲᠦ ᠴᠦᠯᠢᠰᠳᠡᠨ ᠰᠠᠮᠠᠭᠤᠷᠠᠵᠤ᠂ ᠥᠪᠡᠷ ᠦ᠋ᠨ ᠬᠦᠴᠦᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠬᠣᠪ ᠬᠣᠭᠣᠰᠣᠭᠠᠷ ᠰᠦᠢᠳᠬᠡᠭᠰᠡᠨ ᠢᠨᠤ ᠶᠠᠭᠤᠲᠠᠢ ᠢᠨᠢᠶᠡᠳᠦᠯᠲᠡᠢ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠤᠭᠮᠤᠭ ᠤ᠋ᠨ ᠡᠯᠴᠢ ᠪᠠᠰᠠ ᠥᠭᠦᠯᠡᠷᠦᠨ : 《ᠪᠢᠳᠡᠨ ᠦ᠌ ᠤᠯᠤᠰ ᠬᠠᠷᠠᠬᠠᠨ ᠨᠢᠭᠡᠨ ᠵᠤᠨ ᠥᠩᠭᠡᠷᠡᠭᠡᠳ ᠨᠠᠮᠤᠷ ᠡᠬᠢᠯᠡᠲᠡᠯᠡ ᠣᠭᠲᠣ ᠵᠣᠭᠰᠣᠭᠠᠳᠤᠢ ᠪᠠᠷ ᠳᠣᠪᠲᠣᠯᠤᠨ ᠶᠠᠪᠤᠭᠰᠠᠭᠠᠷ ᠪᠤᠶᠤ !》ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠶᠡᠬᠡᠯᠡ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ : 《ᠮᠠᠨ ᠤ᠋ ᠬᠣᠢᠲᠤ ᠵᠠᠬᠠ ᠳ᠋ᠤᠷ ᠪᠠᠰᠠ ᠴᠡᠷᠢᠭ ᠪᠡᠯᠴᠢᠵᠦ ᠪᠣᠢ᠂ ᠲᠠ ᠡᠳᠦᠭᠡ ᠲᠡᠭᠦᠨ ᠢ᠋ ᠪᠠᠰᠠ ᠶᠠᠭᠤᠨ ᠬᠡᠮᠡᠮᠦᠢ ? ᠲᠠᠨ ᠤ᠋ ᠤᠯᠤᠰ ᠴᠥᠮ ᠵᠠᠮᠤᠬᠠ ᠶ᠋ᠢᠨ ᠤᠷᠠᠨ ᠬᠡᠯᠡᠨ ᠳ᠋ᠦ᠍ᠷ ᠮᠡᠬᠡᠯᠡᠭᠳᠡᠵᠦ ᠡᠢᠮᠦ ᠪᠣᠯᠤᠭᠰᠠᠨ ᠪᠣᠯᠠᠢ᠃ ᠪᠢᠳᠡ ᠴᠦ᠍ ᠮᠥᠨ ᠲᠠᠨ ᠤ᠋ ᠤᠯᠤᠰ ᠲᠤᠷ ᠬᠣᠷᠣᠰᠬᠤ ᠦᠭᠡᠢ ᠃ ᠭᠠᠭᠴᠠ ᠭᠡᠷᠡᠢ᠍ᠢᠳ ᠦ᠋ᠨ ᠵᠠᠮᠤᠬᠠ ᠳ᠋ᠤᠷ ᠬᠣᠷᠣᠰᠬᠤ ᠪᠣᠯᠠᠢ᠃ ᠵᠢᠴᠢ ᠳ᠋ᠦ᠍ᠷ ᠮᠠᠨ ᠤ᠋ ᠤᠯᠤᠰ ᠨᠢᠳᠤᠨᠤᠨ ᠵᠢᠯ ᠰᠠᠷᠯᠠᠭ ᠤᠯᠤᠰ ᠢ᠋ ᠤᠯᠬᠤᠢ ᠳ᠋ᠤᠷ ᠴᠡᠷᠢᠭ ᠲᠤᠯᠭᠠᠯᠴᠠᠬᠤᠶᠠ᠂ ᠲᠠᠨ ᠤ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠪᠢᠳᠡ ᠪᠠᠰᠠ ᠣᠭᠲᠣ ᠠᠯᠠᠭᠰᠠᠨ ᠦᠭᠡᠢ᠂ ᠶᠠᠭᠤᠨ ᠤ᠋ ᠥᠰᠢᠶᠡ ᠪᠣᠢ ? ᠭᠠᠭᠴᠠ ᠣᠯᠤᠭᠰᠠᠨ ᠰᠠᠷᠯᠠᠭ ᠤᠯᠤᠰ ᠤ᠋ᠨ ᠴᠡᠷᠢᠭ ᠮᠣᠷᠢᠨ ᠢ᠋ ᠪᠡᠯᠴᠢᠭᠡᠷᠯᠡᠭᠦᠯᠵᠦ ᠲᠡᠵᠢᠭᠡᠬᠦᠢ ᠳ᠋ᠦ᠍ᠷ ᠶᠠᠭᠤ ᠪᠣᠢ ? ᠲᠠᠨ ᠤ᠋ ᠡᠵᠡᠨ ᠤᠯᠤᠰ ᠤ᠋ᠨ ᠣᠢᠷᠠ ᠪᠠᠨ ᠮᠠᠨ ᠤ᠋ ᠤᠯᠤᠰ ᠢ᠋ ᠪᠢᠲᠡᠭᠡᠢ ᠪᠡᠯᠴᠢ ᠬᠡᠮᠡᠪᠡᠰᠦ ᠪᠢᠳᠡᠨ ᠳᠠᠷᠤᠢ ᠶᠠᠪᠤᠮᠤᠢ ᠶᠠ ᠂ ᠡᠭᠦᠨ ᠳ᠋ᠦ᠍ᠷ ᠶᠠᠮᠪᠠᠷ ᠬᠣᠷᠣᠰᠤᠯ ᠠᠵᠤ ᠠᠯᠠᠯᠳᠤᠨ ᠪᠠᠢᠯᠳᠤᠬᠤ ᠬᠡᠷᠡᠭ ᠪᠣᠢ ! 》 ᠬᠡᠮᠡᠭᠡᠳ ᠢᠷᠡᠭᠰᠡᠨ ᠡᠯᠴᠢ ᠶ᠋ᠢ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠪᠡᠨ ᠲᠣᠭᠣᠷᠢᠭᠤᠯᠤᠨ ᠬᠤᠶᠠᠭ ᠵᠡᠪᠰᠡᠭ ᠦᠭᠡᠢ ᠪᠡᠨ ᠴᠥᠮ ᠪᠠᠢᠴᠠᠭᠠᠯᠭᠠᠨ ᠦᠵᠡᠭᠦᠯᠦᠨ ᠬᠦᠨᠳᠦᠳᠡ ᠬᠤᠷᠢᠮᠯᠠᠵᠤ᠂ ᠪᠠᠰᠠ ᠶᠡᠬᠡ ᠱᠠᠩ ᠥᠭᠴᠦ ᠡᠭᠡᠭᠦᠯᠦᠮᠡᠭᠴᠡ ᠮᠥᠨ ᠰᠥᠨᠢ ᠳ᠋ᠦ᠍ᠷ ᠳᠠᠷᠤᠢ ᠬᠦᠷᠢᠶᠡ ᠪᠡᠨ ᠡᠪᠳᠡᠵᠦ᠂ ᠠᠯᠠᠭᠠ ᠲᠠᠯᠠᠭᠠ ᠦᠭᠡᠢ ᠪᠣᠯᠤᠨ ᠡᠴᠢᠪᠡ᠃
ᠳᠣᠭᠮᠣᠭ ᠤ᠋ᠨ ᠡᠯᠴᠢ ᠡᠭᠡᠵᠦ᠂ ᠡᠳᠡᠭᠡᠷ ᠤᠴᠢᠷ ᠢ᠋ ᠨᠠᠷᠢᠪᠴᠢᠯᠠᠨ ᠮᠡᠳᠡᠭᠦᠯᠬᠦᠢ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠬᠠᠷᠠᠬᠠᠨ ᠠᠷᠢᠬᠢᠳᠠᠵᠤ ᠪᠠᠢᠬᠤᠶᠠ ᠲᠣᠬᠢᠶᠠᠯᠳᠤᠭᠠᠳ ᠡᠳᠡᠭᠡᠷ ᠤᠴᠢᠷ ᠢ᠋ ᠰᠣᠨᠣᠰᠴᠤ ᠶᠡᠬᠡᠯᠡ ᠢᠴᠢᠩᠭᠦᠷᠡᠨ ᠠᠭᠤᠷᠯᠠᠵᠤ᠂ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠢ᠋ ᠮᠡᠬᠡᠯᠡᠭᠳᠡᠨ ᠮᠣᠬᠣᠭᠠᠭᠰᠠᠨ ᠠᠭᠤᠷ ᠢ᠋ᠶ᠋ᠠᠨ ᠭᠠᠷᠭᠠᠬᠤ ᠭᠠᠵᠠᠷ ᠣᠯᠬᠤ ᠦᠭᠡᠢ ᠪᠣᠯᠤᠭᠠᠳ ᠬᠡᠳᠦᠨ ᠠᠶᠠᠭᠠ ᠠᠷᠠᠵᠠ ᠭᠡᠳᠡᠰᠦᠨ ᠳ᠋ᠦ᠍ᠷ ᠣᠷᠣᠮᠠᠭᠴᠠ ᠠᠪᠤᠷᠢ ᠵᠠᠩ ᠨᠡᠩ ᠳᠣᠭᠰᠢᠷᠠᠵᠤ᠂ ᠪᠣᠷᠣ ᠠᠷᠰᠯᠠᠨ ᠢ᠋ ᠪᠣᠮᠣᠷᠲᠠᠯᠠ ᠳᠠᠷᠤᠨ ᠤᠨᠠᠭᠠᠵᠤ᠂ ᠪᠤᠷᠤᠭᠤ ᠵᠥᠪ ᠢ᠋ ᠢᠯᠭᠠᠯ ᠦᠭᠡᠢ ᠪᠡᠷ ᠪᠤᠬᠤᠷ ᠪᠥᠭᠰᠡ ᠶ᠋ᠢ ᠢᠨᠦ ᠪᠣᠭᠣᠮ ᠪᠣᠯᠲᠠᠯᠠ ᠳᠥᠴᠢᠨ ᠰᠢᠳᠠᠮ ᠵᠠᠨᠴᠢᠵᠤ ᠴᠢᠷᠦᠨ ᠭᠠᠷᠭᠠᠭᠠᠳ ᠥᠪᠡᠷ ᠦ᠋ᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠰᠠᠶᠢ ᠡᠭᠡᠰᠦᠭᠡᠢ ᠬᠡᠮᠡᠲᠡᠯᠡ ᠵᠠᠮᠤᠬᠠ ᠶ᠋ᠢᠨ ᠲᠡᠨᠳᠡ ᠡᠴᠡ ᠪᠠᠰᠠ ᠬᠥᠮᠦᠨ ᠢᠷᠡᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠠᠢᠰᠤᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠶᠡᠬᠡᠯᠡ ᠬᠢᠯᠢᠩᠯᠡᠨ ᠵᠠᠮᠤᠬᠠ ᠶ᠋ᠢ ᠬᠠᠷᠢᠶᠠᠨ ᠥᠭᠦᠯᠡᠷᠦᠨ : ᠡᠨᠡ ᠶᠠᠩᠰᠢᠶᠠ ᠬᠤᠢᠬᠤᠷ ᠵᠠᠮᠤᠬᠠ ᠪᠣᠭᠣᠯ ᠢᠮᠠᠭᠠ ᠶ᠋ᠢᠨ ᠢᠰᠢᠭᠡ ᠮᠡᠲᠦ ᠶᠠᠮᠠᠷᠪᠠ ᠪᠠᠨ ᠴᠥᠮ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠪᠠᠷᠠᠭᠳᠠᠭᠤᠯᠤᠭᠠᠳ ᠶᠠᠭᠤᠨ ᠳ᠋ᠤᠷ ᠬᠠᠷᠢᠨ ᠮᠠᠨ ᠢ᠋ᠶ᠋ᠠᠷ ᠬᠢᠲᠤᠭᠠ ᠶ᠋ᠢᠨ ᠦᠵᠦᠭᠦᠷ ᠪᠣᠯᠭᠠᠵᠤ ᠂ ᠮᠠᠨ ᠤ᠋ ᠴᠡᠷᠢᠭ ᠢ᠋ ᠶᠠᠳᠠᠭᠠᠨ ᠮᠣᠬᠣᠭᠠᠪᠠ ? 》ᠬᠡᠮᠡᠭᠡᠳ ᠡᠭᠡᠵᠦ ᠶᠠᠪᠤᠲᠠᠯᠠ ᠵᠠᠮ ᠳ᠋ᠤᠷ ᠪᠠᠰᠠ ᠬᠡᠳᠦ ᠬᠡᠳᠦᠨ ᠬᠥᠮᠦᠨ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ : 《 ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠣᠢᠲᠤ ᠵᠠᠬᠠ ᠳ᠋ᠠᠭᠠᠨ ᠪᠡᠯᠴᠢᠬᠦ ᠴᠡᠷᠢᠭ ᠭᠡᠨᠡᠳᠲᠡ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠳᠠᠷᠤᠵᠤ᠂ ᠬᠤᠶᠠᠭ ᠳᠤᠭᠤᠯᠠᠭᠠ ᠵᠠᠷ ᠵᠡᠪᠰᠡᠭ ᠢ᠋ ᠬᠡᠳᠦ ᠬᠡᠳᠦᠨ ᠲᠡᠷᠭᠡ ᠪᠤᠯᠢᠶᠠᠪᠠ᠃ 》ᠬᠡᠮᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠶᠡᠬᠡᠯᠡ ᠬᠢᠯᠢᠩᠯᠡᠵᠦ᠂ ᠶᠠᠭᠠᠷᠠᠨ ᠳᠣᠪᠲᠣᠯᠤᠨ ᠡᠮᠦᠨᠡ ᠴᠡᠷᠢᠭ ᠲᠦ᠍ᠷ ᠬᠦᠷᠴᠦ ᠢᠷᠡᠲᠡᠯᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠡᠭᠡᠭᠰᠡᠭᠡᠷ ᠬᠠᠭᠠᠰ ᠰᠠᠷᠠ ᠰᠢᠬᠠᠮ ᠪᠣᠯᠪᠠ ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠮᠠᠰᠢᠳᠠ ᠲᠡᠨᠴᠢᠭᠦᠷᠡᠨ ᠠᠭᠤᠷᠯᠠᠵᠤ ᠂ ᠵᠠᠮᠤᠬᠠ ᠳ᠋ᠤᠷ ᠥᠴᠦᠬᠡᠨ ᠴᠦ᠍ ᠨᠢᠭᠤᠷ ᠥᠭᠭᠦᠭᠰᠡᠨ ᠦᠭᠡᠢ ᠳᠤᠭᠲᠤᠷᠤᠨ ᠰᠡᠭᠰᠦᠷᠴᠦ ᠡᠭᠡᠵᠦ ᠣᠳᠪᠠᠢ᠃ ᠡᠭᠦᠨ ᠳ᠋ᠦ᠍ᠷ ᠵᠠᠮᠤᠬᠠ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ ᠥᠭᠦᠯᠡᠷᠦᠨ: 《ᠵᠣᠷᠢᠭ ᠦᠭᠡᠢ ᠡᠮᠨᠢᠭ ᠤᠷᠭᠠ ᠳ᠋ᠤᠷ ᠣᠷᠣᠬᠤᠶᠠ ᠬᠢᠯᠪᠠᠷ ᠂ ᠵᠣᠭᠰᠣᠯ ᠦᠭᠡᠢ ᠳᠣᠪᠲᠣᠯᠪᠠᠴᠤ ᠵᠣᠪᠠᠯᠠᠩ ᠠ᠋ᠴᠠ ᠭᠡᠯᠳᠦᠷᠢᠬᠦᠶᠡ ᠪᠡᠷᠬᠡ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠵᠠᠭᠤ ᠠ᠋ᠴᠠ ᠭᠠᠯᠵᠠᠭᠤ ᠪᠠᠷᠰ ᠥᠭᠦᠯᠡᠷᠦᠨ:《ᠴᠢᠨᠦ ᠡᠨᠡ ᠦᠭᠡ ᠪᠡᠷ ᠦᠵᠡᠪᠡᠰᠦ ᠴᠢ ᠯᠠᠪ ᠰᠡᠳᠬᠢᠯ ᠤᠢᠳᠴᠤ ᠬᠡᠷᠡᠢᠳ ᠲᠣᠷ ᠢ᠋ᠶ᠋ᠠᠨ ᠬᠠᠷᠢᠰᠤᠭᠠᠢ ᠬᠡᠮᠡᠬᠦ ᠪᠣᠢ ᠶᠠ !》ᠵᠠᠮᠤᠬᠠ ᠪᠠᠰᠠ ᠰᠡᠭᠦᠷᠡᠰᠦ ᠠᠯᠳᠠᠵᠤ ᠥᠭᠦᠯᠡᠷᠦᠨ :《ᠶᠡᠷᠦ ᠶ᠋ᠢᠨ ᠦᠭᠡᠰ ᠲᠣᠷ ᠲᠣᠭᠰᠢᠨ ᠦᠨᠢᠶᠡ ᠶ᠋ᠢᠨ ᠨᠢᠭᠡᠨ ᠤᠳᠠᠭᠠ ᠲᠡᠢᠷᠦᠭᠰᠡᠨ ᠢ᠋ᠶ᠋ᠡᠷ ᠲᠤᠤᠰᠢᠨ ᠪᠡᠶᠡ ᠶ᠋ᠢᠨ ᠳᠠᠯᠠᠩ ᠢ᠋ ᠢᠨᠤ ᠪᠢᠲᠡᠭᠡᠢ ᠢᠰᠬᠦᠯᠦᠭᠲᠦᠨ ᠬᠡᠮᠡᠵᠦᠬᠦᠢ᠃ ᠲᠠᠨ ᠤ᠋ ᠡᠵᠡᠨ ᠦ᠌ ᠨᠢᠭᠡᠬᠡᠨ ᠴᠠᠭ ᠤ᠋ᠨ ᠮᠠᠭᠤ ᠠᠭᠠᠰᠢ ᠳ᠋ᠤᠷ ᠲᠠᠰᠤᠷᠬᠠᠢ ᠶᠡᠬᠡ ᠴᠡᠷᠢᠭ ᠲᠡᠢᠨ ᠦ᠌ ᠬᠡᠷᠡᠭ ᠢ᠋ ᠶᠠᠭᠠᠬᠢᠨ ᠣᠷᠬᠢᠵᠤ ᠪᠣᠯᠬᠤ ᠪᠣᠢ ! ᠪᠢ ᠪᠠᠰᠠ ᠴᠤ᠌ ᠲᠠᠨ ᠤ᠋ ᠪᠡᠯᠡᠨ ᠬᠦᠴᠦᠨ ᠢ᠋ᠶ᠋ᠡᠷ ᠲᠠᠩᠰᠤᠷᠬᠠᠭ ᠠᠶᠤᠯᠲᠤ ᠲᠡᠮᠦᠵᠢᠨ ᠢ᠋ ᠠᠷᠢᠯᠭᠠᠵᠤ᠂ ᠲᠠᠪᠠ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠶᠠᠪᠤᠰᠤᠭᠠᠢ ᠭᠡᠮᠡᠨ ᠰᠠᠨᠠᠬᠤ ᠪᠣᠯᠠᠢ᠂ ᠶᠠᠭᠤᠨ ᠳ᠋ᠤᠷ ᠡᠭᠡᠵᠦ ᠡᠴᠢᠬᠦ ᠠᠵᠢ ! 》 ᠬᠡᠮᠡᠪᠡ ᠃
ᠲᠡᠭᠦᠨᠴᠡ ᠮᠡᠬᠡᠲᠦ ᠬᠠᠭᠠᠨ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠡᠭᠡᠵᠦ ᠬᠠᠭᠠᠷᠢᠭᠠᠳ ᠥᠪᠡᠷ ᠦ᠋ᠨ ᠰᠠᠭᠤᠬᠤ ᠬᠦᠷᠦ ᠨᠡᠷᠡᠲᠦ ᠬᠣᠲᠠ ᠳ᠋ᠠᠭᠠᠨ ᠣᠷᠣᠵᠤ᠂ ᠳᠣᠲᠣᠭᠠᠳᠤ ᠣᠷᠳᠣᠨ ᠳ᠋ᠠᠭᠠᠨ ᠪᠠᠭᠤᠮᠠᠭᠴᠠ ᠣᠯᠠᠨ ᠬᠠᠲᠤᠳ ᠰᠣᠯᠠᠴᠤᠳ ᠠᠨᠤ ᠪᠦᠭᠦᠳᠡᠭᠡᠷ ᠤᠭᠲᠤᠨ ᠮᠥᠷᠭᠥᠨ᠂ ᠵᠠᠭᠤᠨ ᠵᠦᠢᠯ ᠢ᠋ᠶ᠋ᠡᠷ ᠪᠠᠴᠢᠯᠠᠨ ᠡᠭᠦᠰᠬᠡᠵᠦ᠂ ᠡᠨᠡ ᠢᠨᠦ ᠰᠠᠨᠠᠪᠠ ᠬᠡᠮᠡᠲᠡᠯᠡ ᠲᠡᠷᠡ ᠢᠨᠦ ᠮᠥᠷᠥᠭᠡᠳᠪᠡ ᠭᠡᠮᠡᠨ ᠪᠠᠰᠠ ᠨᠢᠭᠡᠨ ᠢᠨᠦ ᠰᠡᠳᠬᠢᠭᠰᠡᠭᠡᠷ ᠡᠪᠡᠳᠴᠢᠲᠡᠢ ᠪᠣᠯᠬᠤ ᠰᠢᠬᠠᠪᠠ ᠬᠡᠮᠡᠲᠡᠯᠡ ᠲᠡᠷᠡ ᠢᠨᠦ ᠬᠠᠷᠠᠭᠰᠠᠭᠠᠷ ᠬᠠᠷᠠ ᠨᠢᠳᠦ ᠬᠠᠲᠠᠪᠠᠢ ᠬᠡᠮᠡᠵᠦ᠂ ᠨᠥᠭᠥᠭᠡ ᠨᠢᠭᠡᠨ ᠢᠨᠦ ᠭᠠᠷ ᠠ᠋ᠴᠠ ᠪᠠᠨ ᠪᠠᠷᠢᠲᠠᠯᠠ ᠨᠢᠭᠡᠨ ᠢᠨᠦ ᠬᠦᠵᠦᠭᠦᠨ ᠡᠴᠡ ᠲᠡᠪᠡᠷᠢᠵᠦ᠂ ᠨᠢᠭᠡᠨ ᠢᠨᠤ ᠡᠪᠦᠳᠦᠭ ᠦ᠋ᠨ ᠳᠡᠭᠡᠷᠡ ᠰᠠᠭᠤᠲᠠᠯᠠ ᠨᠢᠭᠡᠨ ᠢᠨᠤ ᠬᠥᠯ ᠡᠴᠡ ᠲᠠᠲᠠᠵᠤ ᠁ ᠡᠨᠡ ᠮᠡᠲᠦ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠬᠠᠷᠠᠬᠠᠨ ᠨᠢᠭᠡᠨ ᠬᠠᠪᠤᠷ᠂ ᠨᠢᠭᠡ ᠵᠤᠨ ᠳᠣᠪᠲᠣᠯᠵᠤ ᠬᠠᠯᠠᠰᠢᠷᠠᠨ ᠴᠢᠯᠡᠭᠰᠡᠨ ᠦ᠌ ᠲᠤᠯᠠ ᠤᠮᠳᠠᠭᠠᠰᠤᠭᠰᠠᠨ ᠭᠥᠷᠥᠭᠡᠰᠦ ᠶ᠋ᠢ ᠭᠣᠣᠯ ᠳ᠋ᠤᠷ ᠲᠠᠯᠪᠢᠭ᠍ᠰᠠᠨ ᠮᠡᠲᠦ᠂ ᠬᠣᠷᠢᠭᠰᠠᠨ ᠪᠤᠭᠤ ᠠᠵᠢᠷᠭᠠᠨ ᠳ᠋ᠤᠷ ᠭᠠᠷᠬᠤ ᠠᠳᠠᠯᠢ ᠪᠠᠷ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠤᠯᠤᠰ ᠤ᠋ᠨ ᠦᠢᠯᠡ ᠪᠡᠨ ᠨᠢᠭᠡᠮᠦᠰᠦᠨ ᠨᠢᠭᠡᠨ ᠲᠡᠰᠢ ᠣᠷᠬᠢᠵᠤ᠂ ᠣᠯᠠᠨ ᠡᠮᠡᠰ ᠦ᠋ᠨ ᠰᠢᠭᠤᠢ ᠳ᠋ᠤᠷ ᠤᠨᠠᠨ ᠬᠡᠪᠲᠡᠵᠦ᠂ ᠳᠠᠷᠠᠭᠠ ᠪᠠᠷ ᠬᠠᠭᠠᠰ ᠰᠠᠷᠠ ᠰᠢᠬᠠᠮ ᠠᠷᠢᠬᠢ ᠤᠤᠭᠤᠨ ᠬᠤᠷᠢᠮ ᠬᠤᠷᠢᠮᠯᠠᠵᠤ᠂ ᠬᠥᠭᠵᠢᠮ ᠱᠠᠪᠠᠩ ᠡᠭᠦᠰᠬᠡᠯᠭᠡᠨ ᠵᠢᠷᠭᠠᠨ ᠴᠡᠩᠭᠡᠯᠳᠦᠵᠦ᠂ ᠴᠡᠷᠢᠭ ᠲᠡᠢᠨ ᠦ᠌ ᠶᠠᠮᠪᠠᠷ ᠴᠢᠬᠤᠯᠠ ᠬᠡᠷᠡᠭ ᠢ᠋ ᠴᠥᠮ ᠰᠣᠨᠣᠰᠬᠤ ᠦᠭᠡᠢ ᠪᠣᠯᠵᠤ᠂ ᠡᠬᠡᠨᠡᠷ ᠥᠬᠢᠳ ᠢ᠋ᠶ᠋ᠡᠷ ᠳᠡᠷᠡ ᠲᠦᠰᠢᠯᠭᠡ ᠬᠢᠵᠦ᠂ ᠠᠮᠢᠳᠤ ᠮᠢᠬᠠᠨ ᠰᠢᠭᠤᠢ ᠳ᠋ᠤᠷ ᠰᠣᠭᠲᠣᠭᠤᠷᠠᠨ ᠤᠨᠠᠨ ᠬᠡᠪᠲᠡᠪᠡᠢ᠃ ᠡᠨᠡ ᠦᠨᠡᠬᠡᠷ
ᠡᠷᠬᠡ ᠠᠭ᠍ᠴᠢᠳ ᠡᠷᠳᠡᠮ ᠦᠭᠡᠢ ᠡᠬᠡᠨᠡᠷ ᠲᠣᠷ ᠡᠨᠳᠡᠭᠴᠢᠳ ᠣᠯᠠᠨ
ᠡᠪᠯᠡᠨ ᠴᠢᠳᠠᠭᠴᠢᠳ ᠡᠷᠭᠦᠮᠵᠢ ᠦᠭᠡᠢ ᠡᠷᠬᠢᠮ ᠳ᠋ᠦ᠍ᠷ ᠳᠠᠪᠰᠢᠭᠴᠢᠳ ᠴᠥᠭᠡᠨ ᠃
ᠲᠡᠨᠳᠡᠴᠡ ᠣᠳᠣ ᠥᠭᠦᠯᠡᠬᠦ ᠢᠨᠤ ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠣᠢᠲᠤ ᠵᠠᠬᠠ ᠳ᠋ᠤᠷ ᠪᠣᠯᠪᠠᠰᠤᠷᠠᠭᠤᠯᠤᠨ ᠪᠡᠯᠴᠢᠬᠦ ᠵᠣᠴᠢ ᠂ ᠴᠠᠭᠠᠲᠠᠢ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠲᠤᠭᠮᠤᠭ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠦᠢᠮᠡᠭᠡᠨ ᠵᠦᠳᠡᠷᠡᠭᠦᠯᠵᠦ᠂ ᠨᠠᠮᠤᠷ ᠤ᠋ᠨ ᠲᠡᠷᠢᠭᠦᠨ ᠰᠠᠷᠠ ᠪᠣᠯᠵᠤ ᠴᠡᠷᠢᠭ ᠦ᠋ᠨ ᠮᠣᠷᠢᠳ ᠮᠠᠰᠢ ᠲᠠᠷᠭᠤᠯᠠᠵᠤ᠂ ᠴᠡᠷᠢᠭ ᠬᠤᠶᠠᠭ ᠤ᠋ᠳ ᠴᠤ᠌ ᠨᠢᠭᠡᠨᠲᠡ ᠪᠣᠯᠪᠠᠰᠤᠷᠠᠭᠠᠳ ᠬᠠᠷᠠᠬᠠᠨ ᠬᠡᠳᠦᠨ ᠤᠳᠠᠭᠠ ᠢᠷᠡᠵᠦ ᠡᠴᠢᠭᠡᠳ ᠲᠤᠭᠮᠤᠭ ᠤ᠋ᠨ ᠴᠡᠷᠢᠭ ᠣᠰᠣᠯ ᠰᠤᠯᠠ ᠪᠣᠯᠤᠭᠰᠠᠨᠠ᠂ ᠭᠡᠨᠡᠳᠲᠡ ᠪᠠᠷᠠᠭᠤᠨ ᠰᠠᠷᠯᠠᠭ ᠠ᠋ᠴᠠ ᠡᠯᠴᠢ ᠢᠷᠡᠵᠦ ᠵᠣᠴᠢ ᠂ ᠴᠠᠭᠠᠲᠠᠢ ᠨᠠᠷ ᠲᠤᠷ ᠮᠥᠷᠭᠥᠨ ᠵᠣᠯᠭᠠᠵᠤ ᠂ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠪᠡᠯᠡᠭ ᠢ᠋ ᠪᠠᠷᠢᠭ᠍ᠰᠠᠨ ᠳ᠋ᠤᠷ ᠠᠪᠴᠤ ᠦᠵᠡᠪᠡᠰᠦ ᠨᠢᠭᠡᠨ ᠤᠯᠠᠪᠴᠢ ᠲᠡᠮᠦᠷ ᠦᠭᠡᠢ᠂ ᠭᠠᠭᠴᠠ ᠬᠣᠭᠣᠰᠣᠨ ᠮᠠᠰᠢ ᠶᠡᠬᠡ ᠬᠡᠲᠡ ᠶ᠋ᠢ ᠢᠯᠡᠭᠡᠵᠦᠬᠦᠢ ᠃ ᠨᠡᠭᠡᠭᠡᠵᠦ ᠦᠵᠡᠪᠡᠰᠦ ᠂ ᠬᠡᠲᠡ ᠶ᠋ᠢᠨ ᠲᠡᠮᠦᠷ ᠪᠠ ᠴᠠᠬᠢᠭᠤᠷ ᠢ᠋ ᠴᠥᠮ ᠳᠣᠲᠣᠷᠠ ᠠᠨᠤ ᠬᠢᠵᠦᠬᠦᠢ᠃ ᠡᠭᠦᠨ ᠳ᠋ᠦ᠍ᠷ ᠵᠣᠴᠢ ᠂ ᠴᠠᠭᠠᠲᠠᠢ ᠬᠣᠶᠠᠭᠤᠯᠠ ᠪᠢᠴᠢᠭ ᠴᠡᠷᠢᠭ ᠦ᠋ᠨ ᠬᠣᠶᠠᠷ ᠪᠠᠭᠰᠢ ᠵᠠᠮᠪᠠᠯ ᠂ ᠲᠣᠭᠲᠣᠩᠭᠣ᠌ ᠪᠠ ᠨᠥᠬᠥᠳ ᠪᠠᠭᠠᠲᠤᠳ ᠢ᠋ᠶ᠋ᠠᠨ ᠴᠢᠭᠤᠯᠤᠭᠤᠯᠤᠨ᠂ ᠵᠢᠨᠦᠩ ᠦ᠋ᠨ ᠡᠭᠦᠨ ᠢ᠋ ᠢᠯᠡᠭᠡᠭᠰᠡᠨ ᠰᠠᠨᠠᠭᠠᠨ ᠢ᠋ ᠠᠰᠠᠭᠤᠪᠠᠰᠤ ᠵᠠᠮᠪᠠᠯ ᠥᠭᠦᠯᠡᠷᠦᠨ : 《ᠡᠨᠡ ᠯᠠᠪ ᠪᠢᠳᠡᠨ ᠦ᠌ ᠴᠡᠷᠢᠭ ᠬᠡᠳᠦᠨ ᠤᠳᠠᠭᠠ ᠲᠤᠭᠮᠤᠭ ᠤ᠋ᠨ ᠵᠠᠬᠠ ᠬᠦᠷᠦᠭᠡᠳ ᠡᠰᠡ ᠪᠠᠢᠯᠳᠤᠭᠰᠠᠨ ᠲᠤᠯᠠ ᠲᠡᠳᠡ ᠯᠠᠪ ᠪᠢᠳᠡᠨ ᠢ᠋ ᠲᠡᠮᠦᠷ ᠦᠭᠡᠢ ᠬᠡᠲᠡ ᠪᠡᠷ ᠮᠡᠳᠡᠪᠡ᠂ ᠲᠡᠢᠨ ᠬᠦ᠌ ᠬᠡᠲᠡ ᠲᠡᠮᠦᠷ ᠪᠠ ᠴᠠᠬᠢᠭᠤᠷ ᠢ᠋ ᠳᠣᠲᠣᠷᠠ ᠠᠨᠤ ᠬᠠᠮᠲᠤ ᠪᠠᠷ ᠬᠢᠭᠰᠡᠨ ᠢᠨᠤ ᠮᠠᠨ ᠢ᠋ ᠭᠠᠯ ᠦᠭᠡᠢ ᠭᠡᠮᠡᠨ ᠪᠣᠳᠣᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠭᠠᠯ ᠭᠠᠷᠴᠤ ᠢᠷᠡᠭᠦᠯ ᠬᠡᠮᠡᠭᠰᠡᠨ ᠰᠠᠨᠠᠭᠠᠨ᠂ ᠯᠠᠪ ᠪᠢᠳᠡᠨ ᠢ᠋ ᠳᠣᠭᠮᠣᠭ ᠤ᠋ᠨ ᠣᠰᠣᠯ ᠰᠤᠯᠠ ᠰᠡᠷᠡᠮᠵᠢ ᠦᠭᠡᠢ ᠪᠣᠯᠤᠭᠰᠠᠨ ᠦᠶᠡ ᠳ᠋ᠦ᠍ᠷ ᠭᠡᠨᠡᠳᠲᠡ ᠣᠷᠣᠵᠤ ᠂ ᠨᠢᠭᠡᠨ ᠤᠳᠠᠭᠠ ᠪᠠᠢᠯᠳᠤᠵᠤ ᠦᠵᠡ ᠬᠡᠮᠡᠵᠦᠬᠦᠢ᠃ 》ᠬᠡᠮᠡᠭᠡᠳ ᠳᠠᠷᠤᠢ ᠨᠢᠭᠡᠨ ᠰᠥᠨᠢ ᠳᠣᠪᠲᠣᠯᠤᠨ ᠣᠷᠣᠵᠤ᠂ ᠵᠠᠮᠤᠬᠠ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠨᠢᠭᠡᠨ ᠤᠳᠠᠭᠠ ᠳᠠᠷᠤᠵᠤ ᠶᠡᠬᠡᠯᠡ ᠣᠯᠵᠠᠯᠠᠨ ᠡᠭᠡᠭᠡᠳ ᠵᠢᠨᠦᠩ ᠦ᠋ᠨ ᠡᠯᠴᠢ ᠳ᠋ᠦ᠍ᠷ ᠬᠦᠨᠳᠦᠳᠡ ᠱᠠᠩᠨᠠᠨ ᠡᠭᠡᠭᠦᠯᠦᠭᠰᠡᠨᠡ ᠵᠢᠨᠦᠩ ᠮᠤᠬᠤᠯᠢ ᠰᠣᠨᠣᠰᠴᠤ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠪᠤᠰᠤ ᠭᠤᠷᠪᠠᠨ ᠬᠦᠯᠦᠭ ᠦ᠋ᠨ ᠵᠦᠭ ᠥᠭᠦᠯᠡᠷᠦᠨ : 《 ᠪᠠᠭᠠ ᠡᠵᠡᠳ ᠦ᠋ᠨ ᠡᠨᠡ ᠮᠡᠲᠦ ᠳ᠋ᠦ᠍ᠷ ᠬᠣᠢᠴᠢ ᠡᠳᠦᠷ ᠦ᠋ᠨ ᠲᠥᠯᠥᠭᠡ ᠶᠠᠭᠤᠨ ᠵᠣᠪᠠᠨᠢᠬᠤ ᠭᠠᠵᠠᠷ ᠪᠣᠢ ? 》ᠬᠡᠮᠡᠪᠡ ᠃
ᠲᠡᠨᠳᠡᠴᠡ ᠨᠠᠮᠤᠷ ᠤ᠋ᠨ ᠳᠤᠮᠳᠠᠳᠤ ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠦ᠌ ᠪᠣᠯᠵᠣᠭᠠᠲᠤ ᠡᠳᠦᠷ ᠲᠣᠷ ᠲᠠᠢᠽᠦ ᠪᠦᠬᠦ ᠪᠡᠯᠭᠦᠳᠡᠢ ᠂ ᠬᠠᠪᠤᠲᠤ ᠬᠠᠰᠠᠷ ᠂ ᠵᠠᠯᠮᠠ ᠂ ᠵᠡᠪᠡ ᠂ ᠰᠢᠷᠢ ᠬᠤᠲᠤᠭ ᠂ ᠬᠠᠷᠠ ᠬᠢᠷᠤ ᠂ ᠴᠤᠤ ᠮᠡᠷᠭᠡᠨ ᠂ ᠬᠤᠷᠴᠠ ᠪᠠᠢᠷᠢ ᠵᠢᠴᠢ ᠰᠢᠳᠠᠷ ᠰᠠᠢᠳ ᠥᠨᠳᠥᠷ ᠰᠡᠴᠡᠨ ᠂ ᠦᠨᠡᠨ ᠲᠥᠷᠥ ᠂ ᠣᠶᠤᠲᠤ ᠰᠡᠴᠡᠨ ᠂ ᠣᠶᠤᠨ ᠭᠤᠸᠠ ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠂ ᠲᠡᠭᠦᠰᠴᠤᠭᠲᠤ ᠂ ᠦᠯᠬᠦ ᠰᠠᠢᠳ ᠂ ᠪᠠᠶᠠᠨ ᠬᠢᠶᠡ ᠂ ᠪᠢᠴᠢᠭ ᠴᠡᠷᠢᠭ ᠦ᠋ᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠲᠦᠰᠢᠮᠡᠳ ᠵᠠᠩᠵᠤᠨ ᠢ᠋ᠶ᠋ᠠᠨ ᠠᠪᠴᠤ ᠲᠤᠭᠮᠤᠭ ᠤᠯᠤᠰ ᠤ᠋ᠨ ᠵᠦᠭ ᠮᠣᠷᠳᠠᠪᠠ᠃ ᠤᠯᠤᠰ ᠢ᠋ ᠲᠣᠷᠭᠠᠨ ᠰᠢᠷᠠ ᠲᠡᠷᠢᠭᠦᠯᠡᠨ ᠨᠠᠭᠠᠴᠤ ᠨᠣᠶᠠᠨ ᠂ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠂ ᠬᠦᠷᠭᠡᠨ ᠨᠣᠶᠠᠨ ᠪᠤᠲ᠋ᠤ ᠨᠠᠷ ᠢ᠋ ᠠᠪᠴᠤ ᠰᠠᠬᠢᠭᠠᠳ ᠭᠠᠳᠠᠨᠠ ᠠ᠋ᠴᠠ ᠰᠣᠯᠣᠩᠭᠣᠰ ᠤ᠋ᠨ ᠪᠤᠬᠠ ᠴᠠᠭᠠᠨ ᠬᠠᠨ ᠂ ᠵᠢᠴᠢ ᠸᠠᠩᠴᠤᠭ ᠨᠠᠷ ᠢ᠋ᠶ᠋ᠠᠷ ᠬᠢᠵᠠᠭᠠᠷ ᠢ᠋ ᠰᠡᠷᠭᠡᠢᠯᠡᠭᠦᠯᠦᠨ ᠂ ᠵᠠᠪᠰᠠᠷ ᠲᠤᠷ ᠮᠠᠩᠨᠣᠭᠲᠤ ᠢᠷᠥᠬᠡᠷ ᠥᠭᠡᠳᠡ ᠤᠷᠤᠭᠤ ᠴᠠᠭᠳᠠᠨ ᠪᠠᠢᠴᠠᠭᠠᠪᠠ᠃
ᠲᠡᠭᠦᠨᠴᠡ ᠬᠣᠢᠲᠤ ᠵᠠᠬᠠ ᠶ᠋ᠢᠨ ᠰᠢᠨᠡ ᠰᠤᠷᠭᠠᠭᠰᠠᠨ ᠴᠡᠷᠢᠭ ᠦ᠋ᠨ ᠡᠵᠡᠨ ᠵᠣᠴᠢ ᠂ ᠴᠠᠭᠠᠲᠠᠢ ᠨᠠᠷ ᠮᠡᠳᠡᠭᠡ ᠣᠯᠵᠤ᠂ ᠪᠠᠭᠰᠢ ᠠᠨᠳᠠ ᠂ ᠪᠠᠭᠠᠲᠤᠳ ᠵᠠᠩᠵᠤᠨ ᠨᠤᠭᠤᠳ ᠢ᠋ᠶ᠋ᠠᠨ ᠠᠪᠴᠤ ᠲᠠᠢᠽᠦ ᠶ᠋ᠢ ᠮᠥᠷᠭᠥᠨ ᠤᠭᠲᠤᠵᠤ᠂ ᠶᠡᠬᠡ ᠬᠦᠷᠢᠶᠡ ᠪᠠᠭᠤᠭᠠᠳ ᠭᠤᠷᠪᠠᠨ ᠬᠦᠷᠢᠶᠡ ᠰᠠᠯᠭᠠᠵᠤ᠂ ᠳᠤᠮᠳᠠᠳᠤ ᠴᠡᠷᠢᠭ ᠢ᠋ ᠲᠠᠢᠽᠦ ᠂ ᠵᠡᠯᠮᠡ ᠂ ᠵᠡᠪᠡ ᠨᠠᠷ ᠢ᠋ ᠠᠪᠴᠤ ᠵᠠᠬᠢᠷᠤᠭᠠᠳ ᠪᠠᠷᠠᠭᠤᠨ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠢ᠋ ᠪᠦᠬᠦ ᠪᠡᠯᠭᠦᠳᠡᠢ ᠂ ᠵᠣᠴᠢ ᠠᠴᠢ ᠠᠪᠠᠭᠠ ᠬᠣᠶᠠᠭᠤᠯᠠ ᠵᠠᠮᠪᠠᠯ ᠂ ᠰᠥᠪᠡᠭᠡᠲᠡᠢ ᠬᠣᠶᠠᠷ ᠢ᠋ ᠠᠪᠴᠤ ᠵᠠᠬᠢᠷᠤᠭᠠᠳ ᠶᠠᠪᠠᠭᠠᠨ ᠪᠠᠭᠤᠳᠠᠯ ᠢ᠋ᠶ᠋ᠠᠷ ᠳᠣᠪᠲᠣᠯᠤᠨ ᠣᠷᠣᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃
ᠲᠡᠳᠦᠢ ᠲᠠᠢᠽᠦ ᠬᠣᠢᠲᠤ ᠥᠯᠥᠩ ᠮᠥᠷᠡᠨ ᠦ᠌ ᠬᠥᠪᠡᠭᠡ ᠳ᠋ᠦ᠍ᠷ ᠰᠢᠨᠡ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠢᠴᠠᠭᠠᠨ ᠦᠵᠡᠪᠡᠰᠦ ᠂ ᠮᠣᠷᠢ ᠲᠠᠷᠭᠤᠨ ᠂ ᠨᠤᠮᠤ ᠬᠠᠲᠠᠭᠤ ᠂ ᠴᠡᠷᠢᠭ ᠬᠠᠳᠠᠨ ᠂ ᠵᠠᠩᠵᠤᠨ ᠪᠠᠭᠠᠲᠤᠷ ᠂ ᠡᠭᠡᠬᠦ ᠣᠷᠣᠬᠤ ᠂ ᠤᠷᠪᠠᠬᠤ ᠬᠥᠷᠪᠡᠬᠦ ᠢᠨᠤ ᠦᠨᠡᠬᠡᠷ ᠱᠣᠩᠬᠣᠷ ᠰᠢᠪᠠᠭᠤ ᠶ᠋ᠢᠨ ᠪᠤᠴᠠᠬᠤ ᠪᠤᠯᠭᠢᠬᠤ ᠮᠡᠲᠦ ᠬᠤᠷᠴᠠ ᠲᠦᠷᠭᠡᠨ ᠲᠤᠯᠠ ᠪᠡᠶᠡᠰᠦᠨ ᠰᠠᠢᠰᠢᠶᠠᠵᠤ ᠂ ᠪᠠᠭᠰᠢ ᠰᠡᠯᠲᠡ ᠡᠴᠡ ᠢᠨᠤ ᠲᠡᠷᠢᠭᠦᠯᠡᠵᠦ ᠂ ᠵᠣᠴᠢ ᠂ ᠴᠠᠭᠠᠲᠠᠢ ᠪᠠ ᠨᠥᠬᠥᠳ ᠪᠠᠭᠠᠲᠤᠳ ᠂ ᠵᠠᠩᠵᠤᠨ ᠴᠡᠷᠢᠭ ᠲᠦ᠍ᠷ ᠬᠦᠷᠲᠡᠯᠡ ᠬᠤᠷᠢᠮ ᠬᠠᠢᠷᠠᠯᠠᠨ ᠱᠠᠩ ᠬᠦᠷᠲᠡᠭᠡᠵᠦ ᠬᠥᠬᠢᠭᠦᠯᠪᠡ᠃
ᠵᠢᠴᠢ ᠪᠠᠷᠠᠭᠤᠨ ᠤᠯᠤᠰ ᠰᠠᠷᠯᠠᠭ ᠤᠯᠤᠰ ᠲᠤᠷ ᠰᠤᠷᠭᠠᠭᠰᠠᠨ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠢᠨᠦ ᠂ ᠮᠣᠷᠢᠨ ᠠᠨᠤ ᠥᠨᠳᠡᠭᠡ ᠮᠡᠲᠦ ᠲᠠᠷᠭᠤᠯᠠᠵᠤ ᠂ ᠬᠥᠮᠦᠨ ᠢᠨᠦ ᠪᠠᠷᠰ ᠠᠳᠠᠯᠢ ᠰᠤᠷᠴᠤᠬᠤᠢ᠃ ᠲᠤᠭ ᠬᠢᠭᠢᠷᠢ ᠶ᠋ᠢᠨ ᠲᠡᠮᠳᠡᠭ ᠢ᠋ ᠳᠠᠭᠠᠬᠤ᠂ ᠬᠡᠩᠭᠡᠷᠭᠡ ᠪᠦᠷᠢᠶᠡ ᠶ᠋ᠢᠨ ᠳᠣᠬᠢᠶᠠ ᠶ᠋ᠢ ᠮᠥᠷᠳᠡᠬᠦ ᠢᠨᠦ ᠦᠨᠡᠬᠡᠷ ᠰᠠᠯᠬᠢᠨ ᠭᠠᠯ ᠮᠡᠲᠦ ᠂ ᠱᠠᠯᠠᠮᠠᠭᠠᠢ ᠬᠤᠷᠳᠤᠨ ᠰᠣᠷᠭᠣᠭ ᠂ ᠭᠠᠭᠴᠠ ᠴᠡᠷᠢᠭ ᠦ᠋ᠨ ᠲᠤᠭ ᠤ᠋ᠨ ᠳᠠᠯᠠᠯᠤᠨ ᠣᠷᠣᠬᠤ ᠶ᠋ᠢ ᠬᠦᠯᠢᠶᠡᠵᠦ ᠂ ᠪᠦᠭᠦᠳᠡᠭᠡᠷ ᠰᠢᠯᠭᠦᠭᠳᠡᠨ ᠶᠠᠭᠠᠷᠠᠵᠤ ᠂ ᠭᠠᠷ ᠬᠥᠯ ᠪᠦᠵᠢᠭᠴᠡᠮᠦᠢ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠲᠤᠭᠮᠤᠭ ᠤᠯᠤᠰ ᠤ᠋ᠨ ᠴᠡᠷᠢᠭ ᠨᠢᠭᠡᠨ ᠬᠠᠪᠤᠷ ᠂ ᠨᠢᠭᠡᠨ ᠵᠤᠨ ᠥᠴᠦᠬᠡᠨ ᠴᠦ᠍ ᠠᠮᠤᠭᠰᠠᠨ ᠦᠭᠡᠢ ᠥᠭᠡᠳᠡ ᠤᠷᠤᠭᠤ ᠳᠣᠪᠲᠣᠯᠤᠭᠰᠠᠭᠠᠷ ᠮᠣᠷᠢᠳ ᠤ᠋ᠨ ᠪᠥᠭᠰᠡ ᠰᠠᠭᠠᠭ ᠮᠡᠲᠦ ᠪᠣᠯᠵᠤ᠂ ᠬᠥᠮᠦᠨ ᠦ᠌ ᠨᠢᠳᠦ ᠲᠡᠷᠭᠡᠨ ᠦ᠌ ᠬᠤᠩᠬᠠ ᠠᠳᠠᠯᠢ ᠬᠥᠩᠭᠢᠭᠡᠳ ᠵᠣᠷᠢᠭ ᠰᠤᠯᠠᠷᠠᠵᠤ᠂ ᠰᠠᠨᠠᠭᠠᠨ ᠴᠢᠯᠡᠪᠡᠢ᠃
ᠲᠡᠭᠦᠨᠴᠡ ᠲᠠᠢᠽᠦ ᠰᠢᠨᠡ ᠰᠤᠷᠭᠠᠭᠰᠠᠨ ᠴᠡᠷᠢᠭ ᠪᠠ ᠬᠠᠭᠤᠴᠢᠨ ᠰᠢᠯᠭᠠᠭᠰᠠᠨ ᠬᠤᠶᠠᠭ ᠤ᠋ᠳ ᠲᠠᠢ ᠨᠡᠢᠲᠡ ᠵᠢᠷᠭᠤᠭᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠭᠤᠷᠪᠠᠨ ᠠᠩᠭᠢ ᠪᠠᠷ ᠲᠤᠭᠮᠤᠭ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠭᠡᠨᠡᠳᠲᠡ ᠳᠣᠪᠲᠣᠯᠤᠨ ᠣᠷᠣᠵᠤ᠂ ᠲᠤᠭᠮᠤᠭ ᠤ᠋ᠨ ᠡᠮᠦᠨᠡᠲᠦ ᠶᠡᠬᠡ ᠬᠥᠨᠳᠡᠯᠡᠨ ᠠᠭᠤᠯᠠᠨ ᠢ᠋ ᠬᠦᠳᠡᠭᠡᠰᠦᠨ ᠣᠷᠣᠬᠤᠶᠠ᠂ ᠲᠤᠭᠮᠤᠭ ᠤ᠋ᠨ ᠲᠠᠪᠤᠨ ᠲᠦᠮᠡᠨ ᠦ᠌ ᠬᠠᠷᠠᠭᠤᠯ ᠴᠡᠷᠢᠭ ᠶᠡᠬᠡᠯᠡ ᠰᠣᠴᠢᠵᠤ᠂ ᠵᠠᠮᠤᠬᠠ ᠂ ᠰᠣᠭᠲᠣᠭᠤ ᠯᠤᠤ ᠂ ᠭᠠᠯᠵᠠᠭᠤ ᠪᠠᠷᠰ ᠭᠤᠷᠪᠠᠭᠤᠯᠠ ᠴᠡᠷᠢᠭ ᠢ᠋ᠶ᠋ᠡᠨ ᠮᠥᠨ ᠬᠦ᠌ ᠭᠤᠷᠪᠠᠨ ᠠᠩᠭᠢ ᠲᠡᠭᠰᠢᠯᠡᠵᠦ᠂ ᠵᠠᠮᠤᠬᠠ ᠳᠤᠮᠳᠠᠳᠤ ᠴᠡᠷᠢᠭ ᠢ᠋ ᠠᠪᠴᠤ ᠲᠠᠢᠽᠦ ᠶ᠋ᠢ ᠲᠤᠯᠪᠠ᠃ ᠰᠣᠭᠲᠣᠭᠤ ᠯᠤᠤ ᠪᠠᠷᠠᠭᠤᠨ ᠠᠩᠭᠢ ᠶ᠋ᠢ ᠠᠪᠴᠤ ᠪᠡᠯᠭᠦᠳᠡᠢ ᠶ᠋ᠢ ᠲᠤᠯᠪᠠ ᠃ ᠭᠠᠯᠵᠠᠭᠤ ᠪᠠᠷᠰ ᠵᠡᠭᠦᠨ ᠠᠩᠭᠢ ᠶ᠋ᠢ ᠠᠪᠴᠤ ᠬᠠᠰᠠᠷ ᠢ᠋ ᠲᠤᠯᠪᠠ ᠃
ᠲᠡᠳᠦᠢ ᠲᠠᠢᠽᠦ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠡᠮᠦᠨᠡ ᠵᠠᠮᠤᠬᠠ ᠢᠷᠡᠵᠦ ᠮᠠᠭᠤ ᠦᠭᠡ ᠪᠡᠷ ᠬᠠᠷᠢᠶᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠵᠠᠮᠤᠬᠠ ᠶ᠋ᠢ ᠦᠵᠡᠮᠡᠭᠴᠡ ᠶᠡᠬᠡᠯᠡ ᠬᠢᠯᠢᠩᠯᠡᠵᠦ᠂ ᠶᠡᠬᠡ ᠦᠬᠡᠷ ᠫᠤᠤ ᠶ᠋ᠢ ᠨᠢᠭᠡᠨᠲᠡ ᠲᠠᠯᠪᠢᠭᠤᠯᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠶᠡᠬᠡ ᠬᠡᠩᠭᠡᠷᠭᠡ ᠳᠡᠯᠡᠳᠴᠦ ᠭᠤᠷᠪᠠᠨ ᠠᠩᠭᠢ ᠬᠠᠮᠲᠤ ᠪᠠᠷ ᠣᠷᠣᠵᠤ ᠴᠣᠬᠢᠨ ᠪᠠᠢᠯᠳᠤᠵᠤ ᠂ ᠯᠤᠤ ᠴᠠᠭ ᠠ᠋ᠴᠠ ᠮᠣᠷᠢᠨ ᠴᠠᠭ ᠪᠣᠯᠲᠠᠯᠠ ᠵᠡᠪᠰᠡᠭ ᠠᠭᠤᠯᠵᠠᠭᠤᠯᠤᠨ ᠲᠡᠮᠡᠴᠡᠵᠦ ᠲᠤᠭᠮᠤᠭ ᠤ᠋ᠨ ᠴᠡᠷᠢᠭ ᠳᠠᠷᠤᠭᠳᠠᠨ᠂ ᠤᠯᠠᠮ ᠤᠯᠠᠮ ᠲᠤᠯᠤᠨ ᠴᠢᠳᠠᠬᠤ ᠦᠭᠡᠢ ᠤᠬᠤᠷᠢᠨ ᠡᠭᠦᠰᠬᠡᠪᠡ᠃ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠪᠣᠯᠣᠳ ᠬᠦᠴᠦᠲᠦ ᠴᠡᠷᠢᠭ ᠬᠡᠮᠡᠭᠴᠢ ᠨᠢᠭᠡᠨ ᠬᠠᠭᠠᠯᠭᠠ ᠳ᠋ᠤᠷ ᠭᠤᠷᠪᠠᠨ ᠬᠥᠮᠦᠨ ᠢᠳᠡᠬᠦ ᠤᠤᠭᠤᠬᠤ᠂ ᠤᠮᠳᠠᠬᠤ ᠠᠮᠠᠷᠠᠬᠤ ᠴᠢᠯᠥᠭᠡ ᠲᠡᠢ ᠪᠡᠷ ᠪᠣᠯᠪᠠᠰᠤᠷᠠᠭᠤᠯᠤᠨ ᠲᠣᠭᠲᠠᠭᠰᠠᠨ ᠪᠥᠭᠡᠳ ᠬᠥᠮᠦᠨ ᠬᠦᠴᠦᠲᠡᠢ ᠂ ᠮᠣᠷᠢ ᠳᠠᠳᠮᠠᠭᠠᠢ ᠂ ᠬᠤᠶᠠᠭ ᠨᠢᠭᠲᠠ ᠂ ᠵᠡᠪᠰᠡᠭ ᠬᠤᠷᠴᠠ ᠂ ᠨᠡᠩᠳᠡ ᠲᠡᠷᠢᠭᠦᠯᠡᠭᠰᠡᠨ ᠵᠠᠩᠵᠤᠨ ᠨᠠᠷ ᠴᠥᠮ ᠰᠢᠯᠭᠠᠷᠠᠭᠰᠠᠨ ᠪᠠᠭᠠᠲᠤᠳ ᠲᠤᠯᠠ ᠲᠤᠭᠮᠤᠭ ᠤ᠋ᠨ ᠴᠡᠷᠢᠭ ᠶᠠᠭᠤᠨᠠᠢ ᠲᠤᠯᠤᠨ ᠴᠢᠳᠠᠬᠤ ᠠᠵᠢ ! ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠠᠩᠬᠠ ᠬᠠᠭᠠᠯᠭᠠᠨ ᠤ᠋ ᠴᠡᠷᠢᠭ ᠲᠦ᠍ᠷ ᠳᠠᠷᠤᠢ ᠳᠠᠷᠤᠭᠳᠠᠨ ᠡᠭᠦᠰᠬᠡᠵᠦ᠂ ᠮᠣᠷᠢᠨ ᠴᠠᠭ ᠤ᠋ᠨ ᠰᠡᠭᠦᠯ ᠢ᠋ᠶ᠋ᠡᠷ ᠳᠠᠷᠤᠢ ᠪᠤᠲᠠᠷᠠᠯᠳᠤᠨ ᠪᠤᠷᠤᠭᠤᠯᠠᠪᠠ᠃ ᠨᠡᠩᠳᠡ ᠵᠠᠮᠤᠬᠠ ᠶ᠋ᠢᠨ ᠳᠤᠮᠳᠠᠳᠤ ᠴᠡᠷᠢᠭ ᠬᠠᠮᠤᠭ ᠤ᠋ᠨ ᠡᠬᠢᠨ ᠳ᠋ᠦ᠍ᠷ ᠲᠡᠷᠢᠭᠦᠯᠡᠨ ᠳᠤᠲᠠᠭᠠᠪᠠ᠃ ᠲᠡᠳᠦᠢ ᠬᠣᠷᠢᠨ ᠭᠠᠵᠠᠷ ᠭᠠᠷᠴᠤ ᠭᠡᠨᠡᠳᠲᠡ ᠫᠤᠤ ᠲᠠᠯᠪᠢᠭᠤᠯᠵᠤ᠂ ᠤᠭ ᠶᠣᠰᠣᠭᠠᠷ ᠭᠤᠷᠪᠠᠨ ᠪᠠᠭ ᠢ᠋ᠶ᠋ᠠᠷ ᠵᠢᠭ᠍ᠰᠠᠭᠠᠨ ᠬᠦᠯᠢᠶᠡᠪᠡ᠃ ᠤᠳᠠᠭᠰᠠᠨ ᠦᠭᠡᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠪᠠᠰᠠ ᠭᠦᠢᠴᠡᠨ ᠬᠦᠷᠴᠦ ᠢᠷᠡᠭᠡᠳ ᠲᠠᠢᠽᠦ ᠲᠡᠳᠡᠨ ᠦ᠌ ᠪᠠᠰᠠ ᠡᠭᠡᠵᠦ ᠪᠠᠢᠷᠢᠯᠠᠭᠰᠠᠨ ᠢ᠋ ᠦᠵᠡᠭᠡᠳ ᠥᠪᠡᠷ ᠦ᠋ᠨ ᠭᠤᠷᠪᠠᠨ ᠠᠩᠭᠢ ᠴᠡᠷᠢᠭ ᠲᠦ᠍ᠷ ᠢ᠋ᠶ᠋ᠡᠨ ᠵᠠᠷᠯᠠᠷᠤᠨ : 《ᠪᠢᠳᠡᠨ ᠦ᠌ ᠭᠤᠷᠪᠠᠨ ᠠᠩᠭᠢ ᠴᠡᠷᠢᠭ ᠵᠢᠷᠭᠤᠭᠠᠨ ᠬᠠᠭᠠᠯᠭᠠ ᠂ ᠶᠢᠰᠦᠨ ᠡᠭᠡᠯᠵᠢᠯᠡᠭᠡ ᠪᠡᠷ ᠲᠡᠳᠡᠨ ᠦ᠌ ᠭᠤᠷᠪᠠᠨ ᠠᠩᠭᠢ ᠶ᠋ᠢ ᠡᠳᠦᠷ ᠰᠥᠨᠢ ᠵᠣᠭᠰᠣᠯ ᠦᠭᠡᠢ ᠪᠡᠷ ᠪᠠᠢᠯᠳᠤᠨ ᠨᠡᠬᠡᠰᠦᠭᠡᠢ᠃ ᠬᠡᠨ ᠬᠥᠮᠦᠨ ᠣᠰᠤᠯᠳᠤᠪᠠᠰᠤ ᠶᠠᠯᠠ ᠬᠡᠯᠡᠯᠴᠡᠮᠦᠢ ! 》 ᠭᠡᠮᠡᠨ ᠪᠠᠰᠠ ᠫᠤᠤ ᠲᠠᠯᠪᠢᠨ ᠬᠡᠩᠭᠡᠷᠭᠡ ᠳᠡᠯᠡᠳᠴᠦ ᠠᠯᠠᠨ ᠣᠷᠣᠪᠠ᠃ ᠳᠤᠮᠳᠠᠳᠤ ᠴᠡᠷᠢᠭ ᠡᠴᠡ ᠵᠠᠮᠤᠬᠠ ᠳᠣᠪᠲᠣᠯᠤᠨ ᠭᠠᠷᠴᠤ᠂ ᠣᠨᠴᠠ ᠲᠠᠢᠽᠦ ᠶ᠋ᠢ ᠭᠠᠷᠴᠤ ᠪᠠᠢᠯᠳᠤ ᠂ ᠪᠤᠰᠤ ᠪᠣᠯᠪᠠᠰᠤ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠥᠪᠡᠭᠦᠨ ᠪᠤᠰᠤ ! ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠭᠠᠯ ᠮᠡᠲᠦ ᠭᠢᠯᠢᠭᠯᠡᠵᠦ᠂ ᠣᠯᠠᠨ ᠲᠦᠰᠢᠮᠡᠳ ᠦ᠋ᠨ ᠬᠣᠷᠢᠭ᠍ᠯᠠᠯ ᠢ᠋ ᠠᠪᠬᠤ ᠦᠭᠡᠢ ᠰᠢᠭᠤᠳ ᠰᠢᠪᠲᠤᠯᠤᠨ ᠭᠠᠷᠴᠤ ᠵᠠᠮᠤᠬᠠ ᠶ᠋ᠢ ᠣᠨᠢᠯᠠᠨ ᠣᠷᠣᠭᠰᠠᠨ ᠳ᠋ᠤᠷ ᠠᠷᠪᠠᠨ ᠨᠠᠢ᠍ᠮᠠᠨ ᠵᠠᠩᠵᠤᠨ ᠲᠦᠰᠢᠮᠡᠳ ᠢᠨᠤ ᠬᠣᠷᠢᠭᠯᠠᠨ ᠵᠠᠪᠳᠤᠭᠰᠠᠨ ᠦᠭᠡᠢ ᠲᠤᠯᠠ ᠪᠦᠭᠦᠳᠡᠭᠡᠷ ᠶᠡᠬᠡᠯᠡ ᠠᠶᠤᠯᠳᠤᠵᠤ᠂ ᠠᠷᠪᠠᠨ ᠨᠠᠢ᠍ᠮᠠᠭᠤᠯᠠ ᠬᠠᠮᠲᠤ ᠪᠠᠷ ᠳᠣᠪᠲᠣᠯᠤᠨ ᠣᠷᠣᠭᠰᠠᠨ ᠳ᠋ᠤᠷ ᠵᠠᠮᠤᠬᠠ ᠲᠠᠢᠽᠦ ᠯᠤᠭᠠ ᠲᠠᠪᠤᠨ ᠤᠳᠠᠭᠠ ᠪᠠᠢᠯᠳᠤᠭᠰᠠᠨ ᠦᠭᠡᠢ᠂ ᠶᠠᠭᠠᠷᠠᠨ ᠲᠠᠢᠽᠦ ᠶ᠋ᠢᠨ ᠭᠠᠩ ᠤ᠋ᠨ ᠶ᠋ᠢᠳᠠ ᠶ᠋ᠢᠨ ᠳᠣᠣᠭᠤᠷ ᠰᠢᠷᠭᠤᠵᠤ ᠭᠠᠷᠤᠮᠠᠭᠴᠠ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠪᠤᠷᠤᠭᠤᠯᠠᠪᠠ᠃ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠳᠤᠮᠳᠠᠳᠤ ᠴᠡᠷᠢᠭ ᠢ᠋ᠶ᠋ᠡᠨ ᠪᠤᠷᠤᠭᠤᠯᠠᠭᠰᠠᠨ ᠢ᠋ ᠦᠵᠡᠭᠡᠳ ᠬᠣᠶᠠᠷ ᠮᠥᠷᠥ ᠶ᠋ᠢᠨ ᠴᠡᠷᠢᠭ ᠮᠥᠨ ᠬᠣᠶᠠᠷ ᠲᠡᠰᠢ ᠵᠠᠮ ᠬᠤᠪᠢᠶᠠᠨ ᠪᠤᠷᠤᠭᠤᠯᠠᠪᠠ᠃ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠳᠠᠷᠠᠭᠠ ᠪᠠᠷ ᠬᠣᠶᠠᠷ ᠵᠡᠷᠭᠡ ᠳᠡᠢᠯᠦᠭᠰᠡᠨ ᠲᠤᠯᠠ ᠣᠯᠠᠨ ᠴᠡᠷᠢᠭ ᠨᠡᠩ ᠣᠮᠣᠭᠰᠢᠵᠤ ᠨᠡᠬᠡᠨ ᠳᠣᠪᠲᠣᠯᠤᠭᠰᠠᠨᠠ ᠳᠤᠮᠳᠠᠳᠤ ᠴᠡᠷᠢᠭ ᠡᠴᠡ ᠵᠡᠯᠮᠡ ᠶᠠᠭᠠᠷᠠᠨ ᠶᠡᠬᠡ ᠲᠤᠭ ᠢ᠋ ᠬᠠᠯᠠᠭᠯᠠᠨ ᠵᠣᠭᠰᠣᠭᠠᠵᠤ : 《ᠡᠨᠡ ᠬᠡᠷᠡᠭ ᠰᠡᠵᠢᠭᠯᠡᠯ ᠲᠡᠢ ᠂ ᠡᠵᠡᠨ ᠨᠡᠬᠡᠬᠦ ᠶ᠋ᠢ ᠲᠦᠷ ᠪᠠᠢᠵᠠ ! 》ᠬᠡᠮᠡᠲᠡᠯᠡ ᠵᠠᠮᠤᠬᠠ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠵᠣᠭᠰᠣᠵᠤ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠢ᠋ᠶ᠋ᠡᠷ ᠬᠠᠷᠢᠶᠠᠯᠭᠠᠬᠤᠢ ᠳ᠋ᠤᠷ ᠵᠠᠯᠮᠠ᠂ ᠲᠠᠢᠽᠦ ᠶ᠋ᠢ ᠨᠡᠩ ᠬᠣᠷᠢᠭ᠍ᠯᠠᠨ ᠵᠣᠭᠰᠣᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠪᠠᠰᠠ ᠨᠡᠬᠡᠭᠰᠡᠭᠡᠷ ᠳᠡᠮᠡᠢ ᠳᠣᠯᠣᠭᠠᠨ ᠨᠠᠢ᠍ᠮᠠᠨ ᠭᠠᠵᠠᠷ ᠶᠠᠪᠤᠭᠰᠠᠨ ᠦᠭᠡᠢ᠂ ᠵᠠᠮᠤᠬᠠ ᠶ᠋ᠢᠨ ᠴᠡᠷᠢᠭ ᠨᠢᠭᠡᠨ ᠭᠣᠣᠯ ᠤ᠋ᠨ ᠠᠮᠠᠨ ᠢ᠋ ᠥᠭᠡᠳᠡᠯᠡᠨ ᠡᠴᠢᠭᠡᠳ ᠬᠡᠳᠦᠨᠲᠡ ᠮᠤᠰᠬᠢᠮᠠᠭᠴᠠ ᠶᠠᠯᠠᠭ ᠲᠠᠯᠠᠭ ᠦᠭᠡᠢ ᠪᠣᠯᠵᠤᠬᠤᠢ᠃ ᠲᠠᠢᠽᠦ ᠭᠠᠯ ᠠᠭᠤᠷ ᠢ᠋ᠶ᠋ᠠᠷ ᠲᠠᠯᠪᠢᠯ ᠦᠭᠡᠢ ᠨᠡᠬᠡᠵᠦ ᠣᠷᠣᠭᠰᠠᠨ ᠳ᠋ᠤᠷ ᠵᠠᠯᠮᠠ ᠶᠡᠬᠡᠯᠡ ᠰᠢᠬᠠᠮᠳᠠᠨ ᠶᠠᠭᠠᠷᠠᠨ ᠢᠷᠡᠵᠦ ᠲᠠᠢᠽᠦ ᠶ᠋ᠢᠨ ᠮᠣᠷᠢᠨ ᠤ᠋ ᠬᠠᠵᠠᠭᠠᠷ ᠤ᠋ᠨ ᠠᠮᠠᠭᠠ ᠠ᠋ᠴᠠ ᠠᠳᠬᠠᠨ ᠪᠠᠷᠢᠵᠤ : 《ᠡᠵᠡᠨ ! ᠡᠨᠡ ᠬᠡᠷᠡᠭ ᠶᠡᠬᠡᠯᠡ ᠰᠡᠵᠢᠭᠯᠡᠯᠲᠡᠢ ᠪᠣᠯᠪᠠ᠂ ᠯᠠᠪ ᠨᠠᠷᠢᠨ ᠠᠷᠭᠠ ᠮᠤᠬᠤᠷ ᠭᠡᠮ ᠪᠣᠢ᠂ ᠬᠡᠷᠬᠢᠪᠡᠴᠦ ᠬᠥᠩᠭᠡᠯᠡᠨ ᠨᠡᠬᠡᠵᠦ ᠪᠣᠯᠬᠤ ᠦᠭᠡᠢ ! 》 ᠭᠡᠮᠡᠨ ᠣᠯᠠᠨ ᠢ᠋ ᠠᠪᠴᠤ ᠲᠠᠢᠽᠦ ᠶ᠋ᠢ ᠰᠠᠶᠢ ᠬᠣᠷᠢᠭ᠍ᠯᠠᠵᠤ ᠵᠣᠭᠰᠣᠭᠠᠲᠠᠯᠠ ᠵᠠᠮᠤᠬᠠ ᠵᠡᠪᠡ ᠶ᠋ᠢᠨ ᠦ᠌ ᠠᠮᠠᠨ ᠤ᠋ ᠳᠣᠲᠣᠷᠠ ᠨᠢᠭᠡᠨ ᠳᠣᠪᠣ ᠳ᠋ᠤᠷ ᠵᠣᠭᠰᠣᠵᠤ᠂ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠲᠠᠢᠽᠦ ᠶ᠋ᠢ : 《ᠴᠢ ᠦᠨᠡᠬᠡᠷ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠬᠥᠪᠡᠭᠦᠨ ᠪᠥᠭᠡᠰᠦ ᠰᠢᠭᠡᠰᠦ ᠪᠡᠨ ᠭᠠᠷᠭᠠᠵᠤ ᠨᠠᠳᠠ ᠯᠤᠬᠠ ᠡᠨᠡ ᠭᠠᠵᠠᠷ ᠨᠢᠭᠡᠨ ᠤᠳᠠᠭᠠ ᠪᠠᠢᠯᠳᠤᠵᠤ ᠦᠵᠡᠮᠦ ! 》ᠭᠡᠮᠡᠨ ᠬᠠᠷᠢᠶᠠᠬᠤᠢ ᠳ᠋ᠤᠷ ᠲᠠᠢᠽᠦ ᠭᠡᠨᠡᠳᠲᠡ ᠪᠠᠰᠠ ᠭᠠᠯ ᠤ᠋ᠨ ᠳᠡᠭᠡᠷᠡ ᠲᠣᠰᠣ ᠴᠢᠳᠬᠤᠭᠰᠠᠨ ᠮᠡᠲᠦ ᠬᠢᠯᠢᠩᠯᠡᠵᠦ᠂ ᠨᠢᠭᠡᠨᠲᠡ ᠬᠠᠰᠬᠢᠷᠤᠨ ᠵᠡᠯᠮᠡ ᠨᠠᠷ ᠤ᠋ᠨ ᠭᠠᠷ ᠢ᠋ ᠠᠯᠳᠠᠭᠤᠯᠵᠤ᠂ ᠭᠠᠭᠴᠠ ᠪᠡᠶᠡ ᠭᠠᠵᠠᠷ ᠨᠡᠷᠡᠲᠦ ᠮᠣᠷᠢ ᠪᠠᠨ ᠲᠠᠯᠪᠢᠵᠤ ᠵᠡᠪᠡ ᠶ᠋ᠢᠨ ᠠᠮᠠᠨ ᠳ᠋ᠤᠷ ᠳᠣᠪᠲᠣᠯᠤᠨ ᠣᠷᠣᠭᠰᠠᠨᠠ᠂ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠪᠡᠶᠡ ᠶ᠋ᠢᠨ ᠰᠦᠨᠡᠰᠦ ᠪᠡᠶᠡ ᠳ᠋ᠦ᠍ᠷ ᠦᠭᠡᠢ ᠶᠠᠭᠠᠷᠠᠨ ᠳᠣᠪᠲᠣᠯᠤᠯᠴᠠᠨ ᠳᠠᠭᠠᠵᠤ ᠣᠷᠣᠪᠠᠰᠤ᠂ ᠵᠠᠮᠤᠬᠠ ᠪᠠᠰᠠ ᠬᠡᠳᠦᠢᠨᠡᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠪᠠ᠃ ᠲᠡᠳᠦᠢ ᠣᠯᠠᠨ ᠴᠡᠷᠢᠭ ᠨᠢᠭᠡᠨᠲᠡ ᠵᠡᠪᠡ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠣᠷᠣᠵᠤ ᠡᠴᠢᠭᠡᠳ ᠬᠠᠷᠠᠬᠠᠨ ᠰᠡᠵᠢᠭᠯᠡᠯᠴᠡᠨ ᠦᠵᠡᠪᠡᠰᠦ᠂ ᠪᠠᠷᠠᠭᠤᠨ ᠬᠣᠢᠲᠤ ᠭᠣᠣᠯ ᠤ᠋ᠨ ᠡᠷᠭᠢ ᠳ᠋ᠦ᠍ᠷ ᠴᠡᠷᠢᠭ ᠦ᠋ᠨ ᠪᠠᠭᠤᠳᠠᠯ ᠮᠡᠲᠦ ᠲᠤᠭ ᠬᠢᠭᠢᠷᠢ ᠦᠵᠡᠭᠳᠡᠬᠦ ᠲᠤᠯᠠ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠲᠠᠢᠽᠦ ᠶ᠋ᠢ ᠠᠪᠴᠤ ᠲᠡᠨᠳᠡ ᠳᠣᠪᠲᠣᠯᠤᠨ ᠬᠦᠷᠪᠡᠰᠦ᠂ ᠦᠵᠡᠰᠡ ᠬᠣᠭᠣᠰᠣᠨ ᠬᠦᠷᠢᠶᠡ ᠲᠤᠯᠠ ᠣᠯᠠᠨ ᠴᠡᠷᠢᠭ ᠶᠡᠬᠡᠯᠡ ᠠᠶᠤᠵᠤ ᠲᠠᠢᠽᠦ ᠶ᠋ᠢ ᠠᠪᠴᠤ ᠡᠭᠡᠨ ᠢᠷᠡᠲᠡᠯᠡ ᠵᠡᠪᠡ ᠶ᠋ᠢᠨ ᠠᠮᠠ ᠶ᠋ᠢ ᠲᠠᠭ ᠪᠥᠭᠯᠡᠵᠦ ᠬᠣᠶᠠᠷ ᠡᠲᠡᠭᠡᠳ ᠡᠴᠡ ᠬᠠᠷᠪᠤᠬᠤ ᠠᠨᠤ ᠪᠣᠷᠣᠭᠠᠨ ᠣᠷᠣᠬᠤ ᠮᠡᠲᠦ ᠂ ᠨᠢᠭᠡᠨᠲᠡ ᠭᠠᠷᠴᠤ ᠪᠣᠯᠬᠤ ᠦᠭᠡᠢ ᠪᠣᠯᠪᠠ᠃
ᠲᠡᠳᠦᠢ ᠲᠠᠢᠽᠦ ᠶᠠᠭᠠᠷᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠡᠭᠡᠭᠦᠯᠵᠦ ᠬᠠᠪᠴᠢᠯ ᠭᠠᠵᠠᠷ ᠠ᠋ᠴᠠ ᠵᠠᠢᠯᠠᠵᠤ ᠠᠭᠤᠳᠠᠮ ᠬᠣᠭᠣᠷᠣᠨᠳᠣ ᠡᠴᠢᠵᠦ ᠵᠣᠭᠰᠣᠲᠠᠯᠠ ᠪᠠᠷᠠᠭᠤᠨ ᠪᠡᠶᠡ ᠶ᠋ᠢᠨ ᠨᠡᠬᠦᠢᠭᠰᠡᠨ ᠳᠡᠯ ᠬᠠᠳᠠᠲᠤ ᠨᠢᠭᠡᠨ ᠠᠭᠤᠯᠠᠨ ᠤ᠋ ᠳᠡᠭᠡᠷᠡ ᠬᠠᠳᠠ ᠶ᠋ᠢᠨ ᠴᠠᠭᠠᠨᠠ ᠵᠠᠮᠤᠬᠠ ᠭᠠᠭᠴᠠ ᠪᠡᠶᠡ ᠳᠠᠩ ᠮᠣᠷᠢ ᠪᠠᠷ ᠵᠣᠭᠰᠣᠵᠤ ᠲᠠᠢᠽᠦ ᠶ᠋ᠢ ᠶ᠋ᠢᠳᠡ ᠪᠡᠷ ᠵᠢᠭᠠᠵᠤ᠂ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠰᠬᠢᠷᠤᠨ ᠥᠭᠦᠯᠡᠷᠦᠨ : 《ᠲᠡᠩᠴᠡᠰᠢ ᠦᠭᠡᠢ ᠲᠡᠭᠷᠢᠯᠢᠭ ᠬᠡᠮᠡᠭᠴᠢ ᠲᠡᠮᠦᠵᠢᠨ ᠴᠢ ᠲᠡᠩᠬᠡᠭᠡ ᠠᠪᠠᠰᠤ ᠡᠨᠳᠡ ᠭᠠᠷᠴᠤ ᠢᠷᠡ ! ᠲᠡᠢᠮᠦ ᠪᠣᠯᠪᠠᠰᠤ ᠰᠠᠶᠢ ᠪᠦᠷᠵᠢᠭᠢᠳ ᠤ᠋ᠨ ᠵᠤᠯᠵᠠᠭᠠ ᠮᠥᠨ᠂ ᠲᠡᠮᠡᠦᠯᠦᠨ ᠮᠠᠴᠤᠵᠤ ᠲᠡᠩᠰᠡᠵᠦ ᠦᠵᠡᠭᠳᠡᠬᠦᠢ ᠴᠢ ! 》 ᠭᠡᠮᠡᠨ ᠮᠠᠭᠤ ᠦᠭᠡ ᠪᠡᠷ ᠭᠤᠲᠤᠭᠠᠨ ᠬᠠᠷᠢᠶᠠᠬᠤᠢ ᠳ᠋ᠤᠷ ᠲᠠᠢᠽᠦ ᠶ᠋ᠢᠨ ᠨᠢᠳᠦᠨ ᠡᠴᠡ ᠭᠠᠯ ᠭᠠᠷᠲᠠᠯᠠ ᠬᠢᠯᠢᠩᠯᠡᠵᠦ᠂ ᠲᠡᠭᠷᠢ ᠡᠴᠢᠭᠡ ᠮᠡᠳᠡᠲᠦᠭᠡᠢ ! ᠭᠡᠮᠡᠨ ᠨᠢᠭᠡᠨᠲᠡ ᠬᠠᠰᠬᠢᠷᠴᠤ ᠮᠣᠷᠢ ᠪᠠᠨ ᠲᠠᠰᠤ ᠭᠤᠶᠠᠳᠠᠨ ᠠᠭᠤᠯᠠ ᠥᠭᠡᠳᠡ ᠬᠠᠷᠠᠢᠯᠭᠠᠨ ᠳᠣᠪᠲᠣᠯᠵᠤ ᠭᠠᠷᠲᠠᠯᠠ ᠳᠡᠭᠡᠷᠡ ᠡᠴᠡ ᠵᠠᠮᠤᠬᠠ ᠠᠯᠠᠭᠠ ᠪᠠᠨ ᠲᠡᠰᠢᠵᠦ ᠶᠡᠬᠡᠯᠡ ᠢᠨᠢᠶᠡᠨ : 《ᠲᠡᠮᠦᠵᠢᠨ ᠬᠥᠪᠡᠭᠦᠨ ᠣᠳᠣ ᠴᠤ᠌ ᠲᠡᠭᠦᠰᠪᠡᠢ ! ᠣᠳᠣ ᠴᠤ᠌ ᠲᠡᠭᠦᠰᠪᠡᠢ ! 》 ᠭᠡᠮᠡᠨ ᠨᠢᠭᠡᠨᠲᠡ ᠬᠠᠰᠬᠢᠷᠤᠨ ᠳᠠᠭᠤᠳᠠᠬᠤᠶᠠ᠂ ᠠᠭᠤᠯᠠᠨ ᠤ᠋ ᠣᠷᠣᠢ ᠳ᠋ᠤᠷ ᠨᠢᠭᠡᠨ ᠶᠡᠬᠡ ᠦᠬᠡᠷ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠠᠷᠤᠮᠠᠭᠴᠠ ᠲᠡᠷᠡ ᠨᠡᠬᠦᠢᠭᠰᠡᠨ ᠬᠠᠳᠠ ᠬᠠᠮᠲᠤ ᠪᠠᠷ ᠢᠪ ᠡᠴᠢᠵᠦ ᠰᠠᠯᠪᠠᠷᠠᠭᠠᠳ ᠦᠬᠡᠷ ᠦ᠋ᠨ ᠴᠢᠨᠡᠭᠡᠨ ᠭᠡᠷ ᠦ᠋ᠨ ᠴᠢᠨᠡᠭᠡᠨ ᠬᠣᠶᠠᠷ ᠬᠡᠰᠡᠭ ᠴᠢᠯᠠᠭᠤ ᠠᠨᠤ ᠴᠢᠪ ᠴᠢᠬᠡ ᠲᠠᠢᠽᠦ ᠶ᠋ᠢ ᠳᠠᠭᠠᠷᠢᠨ ᠢᠷᠡᠬᠦᠶᠡ ᠂ ᠲᠠᠢᠽᠦ ᠶ᠋ᠢᠨ ᠣᠯᠠᠨ ᠵᠠᠩᠵᠤᠨ ᠨᠠᠷ ᠪᠡᠶᠡ ᠶ᠋ᠢᠨ ᠰᠦᠨᠡᠰᠦ ᠪᠡᠶᠡ ᠳ᠋ᠦ᠍ᠷ ᠦᠭᠡᠢ ᠪᠢᠯᠢᠭ ᠦ᠋ᠨ ᠤᠬᠠᠭᠠᠨ ᠴᠡᠭᠡᠵᠢᠨ ᠳ᠋ᠦ᠍ᠷ ᠦᠭᠡᠢ ᠪᠣᠯᠵᠤ 《ᠠᠶᠠ ᠪᠠᠷᠠᠪᠠ ᠪᠠᠷᠠᠪᠠ ! 》 ᠭᠡᠮᠡᠨ ᠬᠠᠰᠬᠢᠷᠤᠯᠳᠤᠬᠤᠶᠠ ᠂ ᠲᠠᠢᠽᠦ ᠦᠵᠡᠪᠡᠰᠦ ᠥᠩᠬᠥᠷᠢᠬᠦ ᠬᠠᠳᠠ ᠨᠢᠭᠡᠨᠲᠡ ᠨᠢᠳᠦᠨ ᠦ᠌ ᠡᠮᠦᠨᠡ ᠬᠦᠷᠴᠦ ᠢᠷᠡᠭᠡᠳ ᠵᠠᠢᠯᠠᠪᠠᠰᠤ ᠵᠠᠪᠳᠤᠰᠢ ᠦᠭᠡᠢ ᠲᠤᠯᠠ ᠨᠢᠭᠡᠨ ᠦᠬᠦᠬᠦ ᠪᠡᠶᠡ ᠦᠯᠡᠳᠡᠬᠦ ᠨᠡᠷᠡ ᠳᠤᠲᠠᠭᠠᠵᠤ ᠳᠠᠭᠠᠷᠢᠭ᠍ᠳᠠᠬᠤ ᠠ᠋ᠴᠠ ᠲᠤᠯᠵᠤ ᠳᠠᠭᠠᠷᠢᠭᠳᠠᠰᠤᠭᠠᠢ ᠭᠡᠮᠡᠨ : 《ᠲᠡᠭᠷᠢ ᠡᠴᠢᠭᠡ ᠮᠡᠳᠡᠲᠦᠭᠡᠢ !》ᠭᠡᠮᠡᠨ ᠨᠢᠭᠡᠨᠲᠡ ᠵᠠᠩᠳᠠᠵᠤ᠂ ᠴᠢᠯᠠᠭᠤᠨ ᠤ᠋ ᠡᠰᠡᠷᠭᠦ ᠳᠣᠪᠲᠣᠯᠤᠨ ᠡᠴᠢᠭᠰᠡᠨᠡ ᠂ ᠲᠡᠷᠡ ᠴᠢᠯᠠᠭᠤ ᠦᠰᠦᠷᠬᠢᠯᠡᠨ ᠥᠩᠬᠥᠷᠢᠭᠰᠡᠭᠡᠷ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡ ᠬᠡᠳᠦᠬᠡᠨ ᠠᠯᠲᠠ ᠶ᠋ᠢᠨ ᠭᠠᠵᠠᠷ ᠬᠦᠷᠴᠦ ᠢᠷᠡᠭᠡᠳ ᠨᠢᠭᠡᠨ ᠪᠢᠴᠢᠬᠠᠨ ᠤᠷᠭᠤᠮᠠᠯ ᠬᠠᠳᠠ ᠶ᠋ᠢᠨ ᠳᠡᠭᠡᠷᠡ ᠂ ᠲᠤᠰᠤᠮᠠᠭᠴᠠ ᠬᠣᠶᠠᠷ ᠴᠢᠯᠠᠭᠤᠨ ᠤ᠋ ᠵᠠᠪᠰᠠᠷ ᠠ᠋ᠴᠠ ᠤᠯᠠᠭᠠᠨ ᠭᠡᠷᠡᠯ ᠰᠠᠴᠤᠷᠠᠨ ᠭᠠᠷᠴᠤ ᠬᠣᠭᠣᠰᠣᠨ ᠭᠠᠵᠠᠷ ᠨᠢᠭᠡᠨᠲᠡ ᠠᠶᠤᠩᠭᠠᠯᠠᠵᠤ ᠂ ᠲᠡᠷᠡ ᠭᠡᠷ ᠦ᠋ᠨ ᠴᠢᠨᠡᠭᠡᠨ ᠶᠡᠬᠡ ᠬᠡᠰᠡᠭᠲᠦ ᠬᠠᠳᠠ ᠶ᠋ᠢᠨ ᠴᠢᠯᠠᠭᠤ ᠲᠡᠭ ᠬᠢᠲᠡᠯᠡ ᠦᠰᠦᠷᠦᠭᠡᠳ ᠳᠠᠷᠤᠢ ᠲᠡᠷᠡ ᠤᠯᠠᠭᠠᠨ ᠭᠡᠷᠡᠯ ᠦ᠋ᠨ ᠳᠡᠭᠡᠭᠦᠷ ᠭᠤᠷᠪᠠᠨ ᠠᠯᠲᠠ ᠥᠨᠳᠥᠷ ᠢ᠋ᠶ᠋ᠡᠷ ᠦᠰᠦᠷᠦᠨ ᠭᠠᠷᠴᠤ ᠢᠷᠡᠭᠡᠳ ᠠᠭᠤᠯᠠᠨ ᠤ᠋ ᠬᠡᠳᠦ ᠬᠡᠳᠦᠨ ᠮᠣᠳᠣ ᠶ᠋ᠢ ᠬᠤᠭᠤ ᠳᠠᠭᠠᠷᠢᠵᠤ᠂ ᠨᠢᠭᠡᠨ ᠪᠦᠳᠦᠭᠦᠨ ᠮᠣᠳᠣᠨ ᠳ᠋ᠤᠷ ᠲᠣᠷᠪᠠᠢ ᠃ ᠡᠨᠡ ᠴᠢᠯᠠᠭᠤᠨ ᠤ᠋ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠨᠢᠭᠡᠨ ᠬᠡᠳᠦᠨ ᠠᠯᠲᠠ ᠤᠷᠲᠤ᠂ ᠠᠯᠲᠠ ᠢᠯᠡᠭᠦᠦ ᠪᠦᠳᠦᠭᠦᠨ ᠨᠢᠭᠡᠨ ᠬᠡᠰᠡᠭ ᠴᠢᠯᠠᠭᠤᠨ ᠤᠷᠲᠤ ᠪᠤᠯᠤ ᠮᠡᠲᠦ ᠬᠥᠨᠳᠡᠯᠡᠨ ᠢ᠋ᠶ᠋ᠡᠷ ᠥᠩᠬᠥᠷᠢᠨ ᠬᠦᠷᠴᠦ ᠢᠷᠡᠭᠡᠳ ᠡᠨᠡ ᠠᠶᠤᠩᠭᠠ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠳᠤᠮᠳᠠᠭᠤᠷ ᠢ᠋ᠶ᠋ᠠᠷ ᠳᠡᠯᠪᠡ ᠡᠴᠢᠵᠦ ᠬᠣᠶᠠᠷ ᠠᠩᠭᠢ ᠪᠣᠯᠤᠭᠠᠳ ᠲᠠᠢᠽᠦ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠳᠣᠷᠣᠭᠰᠢ ᠥᠩᠬᠥᠷᠢᠨ ᠥᠩᠭᠡᠷᠡᠵᠦ᠂ ᠮᠣᠳᠣ ᠴᠢᠯᠠᠭᠤ ᠳ᠋ᠤᠷ ᠮᠥᠷᠭᠥᠭᠰᠡᠭᠡᠷ ᠪᠤᠰᠤ ᠵᠡᠪᠡ ᠳ᠋ᠦ᠍ᠷ ᠣᠷᠣᠵᠤ ᠡᠴᠢᠪᠡ᠃ ᠡᠨᠡ ᠤᠯᠠᠭᠠᠨ ᠭᠡᠷᠡᠯ ᠪᠠ ᠠᠶᠤᠩᠭᠠ ᠳ᠋ᠤᠷ ᠲᠠᠢᠽᠦ ᠶ᠋ᠢᠨ ᠠᠷᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠮᠣᠩᠭᠣᠯ ᠭᠡᠷ ᠦ᠋ᠨ ᠴᠢᠨᠡᠭᠡᠨ ᠪᠦᠳᠦᠭᠦᠨ ᠬᠡᠳᠦᠨ ᠠᠷᠪᠠᠨ ᠠᠯᠲᠠ ᠤᠷᠲᠤ ᠨᠢᠭᠡᠨ ᠶᠡᠬᠡ ᠠᠯᠲᠠᠨ ᠯᠤᠤ ᠢᠯᠡᠷᠡᠨ ᠭᠠᠷᠴᠤ ᠡᠮᠦᠨᠡᠲᠦ ᠬᠣᠶᠠᠷ ᠬᠥᠯ ᠦ᠋ᠨ ᠲᠠᠪᠤᠨ ᠬᠢᠮᠤᠰᠤᠨ ᠢ᠋ᠶ᠋ᠠᠷ ᠲᠡᠷᠡ ᠶᠡᠬᠡ ᠴᠢᠯᠠᠭᠤ ᠶ᠋ᠢᠨ ᠳᠤᠮᠳᠠᠭᠤᠷ ᠠᠨᠤ ᠲᠠᠰᠤ ᠪᠠᠵᠠᠵᠤ᠂ ᠬᠣᠶᠠᠷ ᠠᠩᠭᠢ ᠪᠣᠯᠭᠠᠵᠤ ᠢᠯᠡᠭᠡᠭᠰᠡᠨ ᠢ᠋ ᠳᠡᠭᠡᠷᠡ ᠳᠣᠣᠷᠠ ᠪᠦᠬᠦᠢ ᠥᠪᠡᠷ ᠪᠤᠰᠤᠳ ᠤ᠋ᠨ ᠵᠠᠩᠵᠤᠨ ᠴᠡᠷᠢᠭ ᠪᠦᠭᠦᠳᠡᠭᠡᠷ ᠴᠥᠮ ᠲᠣᠪ ᠲᠣᠳᠣᠷᠬᠠᠢ ᠦᠵᠡᠪᠡ᠃ ᠭᠠᠭᠴᠠ ᠲᠠᠢᠽᠦ ᠶ᠋ᠢᠨ ᠪᠡᠶᠡ ᠮᠡᠳᠡᠭᠰᠡᠨ ᠦᠭᠡᠢ᠃ ᠡᠨᠡ ᠬᠣᠭᠣᠰᠣᠨ ᠭᠠᠵᠠᠷ ᠤ᠋ᠨ ᠭᠠᠯ ᠤ᠋ᠨ ᠠᠶᠤᠩᠭᠠ ᠳ᠋ᠤᠷ ᠡᠨᠡ ᠭᠣᠣᠯ ᠤ᠋ᠨ ᠳᠣᠲᠣᠷᠠ ᠬᠦᠬᠦᠷ ᠡᠮ ᠦ᠋ᠨ ᠦᠨᠦᠷᠲᠦ ᠬᠥᠬᠡ ᠤᠲᠤᠭᠠ ᠲᠤᠨᠤᠷᠠᠪᠠᠢ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠵᠠᠮᠤᠬᠠ ᠶᠡᠬᠡᠯᠡ ᠠᠶᠤᠨ ᠶᠠᠭᠠᠷᠠᠨ ᠳᠣᠪᠲᠣᠯᠵᠤ ᠂ ᠵᠡᠪᠡ ᠶ᠋ᠢᠨ ᠠᠮᠠᠨ ᠤ᠋ ᠪᠠᠭᠤᠳᠠᠯ ᠳ᠋ᠤᠷ ᠢ᠋ᠶ᠋ᠠᠨ ᠡᠴᠢᠵᠦ ᠪᠠᠲᠤᠯᠠᠨ ᠰᠠᠬᠢᠪᠠᠢ᠃ ᠲᠠᠢᠽᠦ ᠠᠭᠤᠯᠠᠨ ᠤ᠋ ᠳᠡᠭᠡᠷᠡ ᠳᠣᠪᠲᠣᠯᠤᠨ ᠭᠠᠷᠲᠠᠯᠠ ᠬᠡᠳᠦᠢᠨᠡᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠪᠠᠢ᠃ ᠡᠭᠡᠵᠦ ᠦᠵᠡᠪᠡᠰᠦ ᠲᠠᠢᠽᠦ ᠶ᠋ᠢᠨ ᠣᠯᠠᠨ ᠵᠠᠩᠵᠤᠨ ᠨᠠᠷ ᠠᠭᠤᠯᠠᠨ ᠥᠭᠡᠳᠡ ᠤᠨᠠᠨ ᠲᠣᠰᠣᠨ ᠠᠪᠠᠷᠢᠨ ᠢᠷᠡᠬᠦᠶᠡ ᠂ ᠵᠠᠯᠮᠠ ᠲᠠᠢᠽᠦ ᠶ᠋ᠢᠨ ᠮᠣᠷᠢᠨ ᠤ᠋ ᠰᠡᠭᠦᠯ ᠢ᠋ ᠳᠠᠷᠤᠨ ᠬᠦᠷᠴᠦ ᠢᠷᠡᠭᠰᠡᠨ ᠲᠤᠯᠠ ᠲᠠᠢᠽᠦ ᠶ᠋ᠢᠨ ᠮᠣᠷᠢᠨ ᠤ᠋ ᠬᠦᠵᠦᠭᠦᠦ ᠶ᠋ᠢ ᠲᠡᠪᠡᠷᠢᠵᠦ ᠨᠢᠳᠦᠨ ᠡᠴᠡ ᠪᠡᠨ ᠨᠢᠯᠪᠤᠰᠤᠨ ᠴᠤᠪᠤᠷᠢᠭᠤᠯᠤᠨ ᠤᠬᠢᠯᠠᠨ ᠥᠭᠦᠯᠡᠷᠦᠨ : 《ᠳᠡᠭᠷᠢᠯᠢᠭ ᠡᠵᠡᠨ ᠮᠢᠨᠦ ᠬᠢᠯᠢᠩ ᠢ᠋ᠶ᠋ᠡᠨ ᠲᠣᠬᠣᠷᠤᠭᠤᠯ᠂ ᠲᠡᠩᠴᠡᠰᠢ ᠦᠭᠡᠢ ᠬᠦᠨᠳᠦ ᠪᠡᠶᠡ ᠪᠡᠨ ᠬᠦᠨᠳᠦᠳᠬᠡᠮᠦ !ᠲᠡᠷᠡ ᠬᠦ᠌ ᠨᠢᠭᠡᠨ ᠵᠠᠮᠤᠬᠠ ᠪᠣᠭᠣᠯ ᠶᠠᠮᠪᠠᠷ ᠬᠡᠷᠡᠭ ᠪᠣᠢ ? ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠡᠷᠳᠡᠨᠢ ᠶ᠋ᠢᠨ ᠪᠡᠶᠡ ᠴᠢᠬᠤᠯᠠ ᠬᠡᠮᠡᠵᠦ ᠠᠭᠤᠳᠠᠮ ᠲᠠᠯᠠ ᠳ᠋ᠤᠷ ᠪᠠᠭᠤᠳᠠᠯᠯᠠᠵᠤ᠂ ᠳᠥᠷᠪᠡᠨ ᠵᠦᠭ ᠵᠠᠮ ᠡᠷᠢᠭᠦᠯᠪᠡᠰᠦ ᠴᠥᠮ ᠴᠠᠪᠴᠢᠮᠠ ᠪᠣᠰᠤᠭᠠ ᠠᠭᠤᠯᠠ ᠬᠠᠳᠠ ᠰᠡᠬᠦᠢᠵᠦ᠂ ᠠᠷᠢᠶᠠᠲᠠᠨ ᠵᠢᠭᠦᠷᠲᠡᠨ ᠴᠦ᠍ ᠭᠡᠲᠦᠯᠦᠨ ᠭᠠᠷᠬᠤᠶᠠ ᠪᠡᠷᠬᠡ᠂ ᠵᠡᠪᠡ ᠶ᠋ᠢᠨ ᠠᠮᠠᠨ ᠢ᠋ ᠵᠠᠮᠤᠬᠠ ᠴᠢᠩᠳᠠ ᠪᠡᠬᠢᠯᠡᠨ ᠬᠠᠳᠠᠭᠠᠯᠠᠪᠠᠢ᠃ ᠦᠵᠡᠰᠡ ᠵᠠᠮᠤᠬᠠ ᠡᠨᠡ ᠠᠷᠭᠠ ᠶ᠋ᠢ ᠬᠡᠳᠦᠢᠨᠡᠢ ᠪᠡᠯᠡᠳᠬᠡᠵᠦᠬᠦᠢ᠃ ᠡᠨᠡ ᠭᠣᠣᠯ ᠤ᠋ᠨ ᠨᠡᠷᠡ ᠶ᠋ᠢ ᠮᠤᠬᠤᠷ ᠣᠯᠣᠭᠠᠢ ᠭᠣᠣᠯ ᠬᠡᠮᠡᠮᠦᠢ᠃ ᠠᠮᠠᠰᠠᠷ ᠪᠢᠴᠢᠬᠠᠨ ᠬᠠᠪᠴᠢᠭᠠᠢ᠃ ᠲᠡᠳᠦᠢ ᠡᠨᠡ ᠳᠡᠯ ᠬᠠᠳᠠ ᠶ᠋ᠢᠨ ᠴᠢᠯᠠᠭᠤ ᠶ᠋ᠢ ᠴᠠᠪᠴᠢᠨ᠂ ᠴᠢᠯᠠᠭᠤ ᠶ᠋ᠢ ᠠᠨᠤ ᠴᠥᠮ ᠰᠢᠷᠢ ᠳᠡᠭᠡᠰᠦᠨ ᠢ᠋ᠶ᠋ᠡᠷ ᠡᠯᠲᠡᠯᠦᠨ ᠪᠠᠢᠵᠤ ᠴᠠᠪᠴᠢᠵᠤ ᠰᠠᠯᠭᠠᠭᠠᠳ ᠳᠡᠭᠡᠰᠦ ᠶ᠋ᠢ ᠴᠠᠪᠴᠢᠮᠠᠭᠴᠠ ᠴᠥᠮ ᠥᠩᠬᠥᠷᠢᠨ ᠤᠨᠠᠬᠤ ᠪᠠᠷ ᠪᠡᠯᠡᠳᠬᠡᠵᠦ᠂ ᠲᠠᠢᠽᠦ ᠶ᠋ᠢᠨ ᠬᠢᠯᠢᠩ ᠢ᠋ ᠲᠥᠷᠥᠭᠦᠯᠵᠦ ᠡᠲᠦᠭᠡᠨ ᠠᠴᠢᠷᠠᠵᠤ᠂ ᠡᠳᠡᠭᠡᠷ ᠴᠢᠯᠠᠭᠤᠨ ᠢ᠋ᠶ᠋ᠠᠷ ᠳᠠᠭᠠᠷᠢᠭᠤᠯᠤᠨ ᠠᠯᠠᠰᠤᠭᠠᠢ᠃ ᠬᠡᠷᠪᠡ ᠡᠭᠦᠨ ᠡᠴᠡ ᠭᠡᠯᠳᠦᠷᠢᠪᠡᠰᠦ ᠭᠣᠣᠯ ᠤ᠋ᠨ ᠠᠮᠠ ᠶ᠋ᠢ ᠪᠥᠭᠯᠡᠵᠦ᠂ ᠡᠨᠡ ᠭᠣᠣᠯ ᠪᠠᠰᠠ ᠮᠠᠰᠢ ᠬᠠᠭᠤᠷᠠᠢ ᠥᠴᠦᠬᠡᠨ ᠴᠦ᠍ ᠪᠤᠯᠠᠭ ᠤᠷᠤᠰᠬᠠᠯ ᠦᠭᠡᠢ ᠲᠤᠯᠠ ᠣᠯᠠᠨ ᠴᠡᠷᠢᠭ ᠢ᠋ ᠢᠨᠦ ᠬᠠᠲᠠᠭᠠᠨ ᠠᠯᠠᠰᠤᠭᠠᠢ ᠭᠡᠮᠡᠨ ᠲᠤᠰᠬᠠᠢᠯᠠᠨ ᠲᠠᠢᠽᠦ ᠶ᠋ᠢᠨ ᠨᠢᠭᠡᠨ ᠰᠠᠯᠠᠭᠠᠨ ᠤ᠋ ᠴᠡᠷᠢᠭ ᠢ᠋ ᠤᠳᠤᠷᠢᠳᠤᠨ ᠣᠷᠣᠭᠤᠯᠤᠭᠰᠠᠨ ᠠᠵᠤᠭᠤ᠃ ᠲᠡᠳᠦᠢ ᠬᠡᠳᠦᠢᠪᠡᠷ ᠲᠠᠢᠽᠦ ᠶ᠋ᠢᠨ ᠪᠤᠶᠠᠨ ᠢ᠋ᠶ᠋ᠠᠷ ᠨᠤᠷᠠᠬᠤ ᠬᠠᠳᠠ ᠶ᠋ᠢᠨ ᠶᠡᠬᠡ ᠠᠶᠤᠯ ᠠ᠋ᠴᠠ ᠭᠡᠲᠦᠯᠦᠭᠰᠡᠨ ᠪᠣᠯᠪᠠᠴᠤ ᠬᠠᠳᠠᠨ ᠬᠠᠭᠤᠷᠠᠢ ᠮᠤᠬᠤᠷ ᠣᠯᠣᠭᠠᠢ ᠭᠣᠣᠯ ᠳ᠋ᠤᠷ ᠨᠢᠭᠡᠨᠲᠡ ᠬᠠᠭᠠᠭᠳᠠᠨ ᠬᠣᠷᠢᠭ᠍ᠳᠠᠵᠤ ᠪᠥᠭᠯᠡᠭᠳᠡᠨ ᠲᠠᠭᠯᠠᠭᠳᠠᠪᠠᠢ᠃ ᠬᠠᠰᠠᠷ ᠪᠡᠯᠭᠦᠳᠡᠢ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠲᠤᠭᠮᠤᠭ ᠤ᠋ᠨ ᠯᠤᠤ ᠪᠠᠷᠰ ᠬᠣᠶᠠᠷ ᠤ᠋ᠨ ᠴᠡᠷᠢᠭ ᠢ᠋ ᠶᠡᠬᠡᠯᠡ ᠳᠠᠷᠤᠵᠤ ᠂ ᠨᠡᠬᠡᠵᠦ ᠰᠢᠭᠤᠳ ᠬᠦᠷᠦ ᠬᠣᠲᠠ ᠶ᠋ᠢᠨ ᠵᠦᠭ ᠠᠯᠠᠨ ᠡᠴᠢᠪᠡ᠃
ᠡᠭᠦᠨ ᠢ᠋ ᠲᠦᠷ ᠵᠣᠭᠰᠣᠵᠤ ᠂ ᠣᠳᠣ ᠪᠠᠷᠠᠭᠤᠨ ᠰᠠᠷᠯᠠᠭ ᠤ᠋ᠨ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠢ᠋ ᠬᠡᠯᠡᠬᠦ ᠢᠨᠦ : ᠬᠠᠷᠠᠬᠠᠨ ᠲᠡᠷᠡ ᠤᠳᠠᠭᠠ ᠮᠡᠬᠡᠲᠦ ᠬᠠᠭᠠᠨ ᠢ᠋ ᠢᠴᠢᠭᠡᠵᠦ᠂ ᠪᠣᠷᠣ ᠠᠷᠰᠯᠠᠨ ᠢ᠋ ᠵᠠᠨᠴᠢᠭᠤᠯᠤᠨ᠂ ᠮᠡᠬᠡᠲᠦ ᠬᠠᠭᠠᠨ ᠤ᠋ ᠴᠡᠷᠢᠭ ᠡᠭᠡᠵᠦ ᠡᠴᠢᠭᠰᠡᠨ ᠦ᠌ ᠳᠠᠷᠠᠭᠠ ᠪᠠᠷ᠂ ᠳᠡᠮᠡᠢ ᠠᠷᠪᠠᠨ ᠬᠣᠨᠣᠭ ᠪᠣᠯᠤᠭᠰᠠᠨ ᠦᠭᠡᠢ ᠳᠥᠷᠪᠡᠨ ᠬᠦᠯᠦᠭ ᠴᠡᠷᠢᠭ ᠢ᠋ᠶ᠋ᠡᠨ ᠲᠡᠭᠰᠢᠯᠡᠨ ᠰᠥᠨᠢ ᠪᠡᠷ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ᠂ ᠭᠡᠭᠡᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ᠷ ᠪᠣᠷᠣ ᠠᠷᠰᠯᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠰᠣᠴᠢᠮᠠᠲᠠᠭᠠᠢ ᠳᠠᠷᠤᠵᠤ ᠣᠷᠣᠭᠰᠠᠨᠠ ᠪᠣᠷᠣ ᠠᠷᠰᠯᠠᠨ ᠪᠤᠬᠤᠷ ᠤ᠋ᠨ ᠰᠢᠷᠬᠠ ᠪᠠᠨ ᠲᠡᠮᠲᠡᠷᠢᠵᠦ ᠪᠠᠢᠲᠠᠯᠠ ᠰᠣᠳᠣ ᠭᠠᠷᠤᠳᠢ ᠰᠣᠴᠢᠵᠤ ᠭᠠᠷᠲᠠᠯᠠ ᠴᠢᠪᠬᠢᠲᠡᠯᠡ ᠪᠤᠭᠤᠷᠵᠢ ᠳ᠋ᠤᠷ ᠤᠴᠠᠷᠠᠵᠤ᠂ ᠴᠠᠪᠴᠢᠭ᠍ᠲᠠᠨ ᠬᠣᠶᠠᠷ ᠠᠩᠭᠢ ᠪᠣᠯᠪᠠ᠃ ᠪᠤᠭᠤᠷᠤᠯ ᠴᠢᠯᠠᠭᠤ ᠬᠠᠮᠲᠤ ᠪᠠᠷ ᠣᠷᠣᠵᠤ ᠂ ᠪᠣᠷᠣ ᠠᠷᠰᠯᠠᠨ ᠢ᠋ ᠬᠠᠭᠠᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠣᠷᠣ ᠠᠷᠰᠯᠠᠨ ᠬᠠᠷᠠᠬᠠᠨ ᠡᠵᠡᠨ ᠳ᠋ᠡᠭᠡᠨ ᠬᠣᠷᠣᠰᠬᠤ ᠴᠠᠭ ᠲᠤᠯᠠ ᠳᠠᠷᠤᠢ ᠳᠤᠭᠤᠯᠠᠭᠠ ᠪᠠᠨ ᠠᠪᠴᠤ ᠮᠥᠷᠭᠥᠨ ᠳᠠᠭᠠᠪᠠ ᠃
ᠲᠡᠳᠦᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠠᠷᠪᠤᠭᠰᠠᠨ ᠰᠤᠮᠤ ᠮᠡᠲᠦ ᠥᠴᠦᠬᠡᠨ ᠴᠦ᠍ ᠬᠠᠯᠬᠠᠯᠠᠭᠳᠠᠯ ᠦᠭᠡᠢ ᠲᠤᠭᠮᠤᠭ ᠤᠯᠤᠰ ᠤ᠋ᠨ ᠬᠦᠷᠦ ᠬᠣᠲᠠ ᠶ᠋ᠢᠨ ᠣᠢᠷᠠ ᠬᠦᠷᠴᠦ ᠢᠷᠡᠭᠡᠳ ᠰᠠᠢ ᠨᠢᠭᠡᠨ ᠡᠳᠦᠷ ᠦ᠋ᠨ ᠵᠠᠮ ᠦᠯᠡᠭᠰᠡᠨ ᠲᠤᠯᠠ ᠮᠤᠬᠤᠯᠢ ᠪᠣᠷᠣ ᠠᠷᠰᠯᠠᠨ ᠳ᠋ᠤᠷ : ᠬᠦᠷᠦ ᠬᠣᠲᠠᠨ ᠢ᠋ ᠣᠯᠤᠭᠰᠠᠨ ᠴᠠᠭ ᠲᠤᠷ ᠴᠢᠮᠠ ᠪᠠᠷ ᠡᠵᠡᠯᠡᠭᠦᠯᠦᠮᠦᠢ᠂ ᠴᠢ ᠤᠷᠢᠳᠠ ᠥᠪᠡᠷ ᠦ᠋ᠨ ᠴᠡᠷᠢᠭ ᠬᠠᠭᠠᠰ ᠂ ᠮᠢᠨᠦ ᠴᠡᠷᠢᠭ ᠬᠠᠭᠠᠰ ᠂ ᠴᠢᠯᠠᠭᠤᠨ ᠂ ᠪᠤᠭᠤᠷᠤᠯ ᠬᠣᠶᠠᠭᠤᠯᠠ ᠶ᠋ᠢᠨ ᠬᠠᠮᠲᠤ ᠡᠴᠢᠵᠦ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠠᠪᠴᠢᠷᠠᠪᠠ ᠭᠡᠮᠡᠨ ᠬᠣᠲᠠ ᠳ᠋ᠤᠷ ᠣᠷᠣᠨ ᠳᠠᠭᠠᠯᠳᠤᠭᠠ ᠪᠠᠷ ᠮᠢᠨᠦ ᠪᠡᠶᠡ ᠪᠤᠭᠤᠷᠵᠢ ᠠᠬᠠᠢ ᠯᠤᠬᠠ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠬᠣᠲᠠ ᠳ᠋ᠤᠷ ᠣᠷᠣᠮᠤᠢ ᠭᠡᠮᠡᠨ ᠶᠠᠪᠤᠭᠤᠯᠤᠭᠠᠳ ᠰᠠᠶᠢ ᠴᠡᠷᠢᠭ ᠬᠥᠳᠡᠯᠲᠡᠯᠡ ᠭᠡᠨᠡᠳᠲᠡ ᠴᠢᠬᠡ ᠡᠮᠦᠨᠡ ᠡᠴᠡ ᠨᠢᠭᠡᠨ ᠬᠣᠣᠰ ᠬᠠᠳᠠ ᠶ᠋ᠢᠨ ᠴᠠᠭᠠᠨ ᠱᠠᠭᠠᠵᠠᠭᠠᠢ ᠨᠢᠰᠦᠨ ᠢᠷᠡᠵᠦ ᠶᠡᠬᠡ ᠴᠠᠴᠠᠷ ᠲᠤᠷ ᠰᠠᠭᠤᠵᠤ᠂ ᠮᠤᠬᠤᠯᠢ ᠶ᠋ᠢᠨ ᠵᠦᠭ ᠳᠠᠬᠢᠨ ᠳᠠᠬᠢᠨ ᠱᠠᠭᠰᠢᠬᠤᠢ ᠳ᠋ᠤᠷ᠂ ᠮᠤᠬᠤᠯᠢ ᠶᠡᠬᠡᠯᠡ ᠰᠡᠵᠢᠭᠯᠡᠵᠦ᠂ ᠨᠤᠮᠤ ᠶ᠋ᠢᠨ ᠬᠥᠪᠴᠢ ᠶ᠋ᠢ ᠴᠢᠪᠬᠠᠳᠠᠨ ᠴᠢᠩᠨᠠᠵᠤ ᠲᠥᠯᠭᠡᠯᠡᠨ ᠦᠵᠡᠪᠡᠰᠦ᠂ ᠬᠥᠪᠴᠢ ᠶ᠋ᠢᠨ ᠳᠠᠭᠤᠨ ᠭᠠᠤᠯᠢᠨ ᠤᠲᠠᠰᠤ ᠮᠡᠲᠦ ᠴᠠᠪᠬᠠᠢ ᠳᠦᠩᠭᠢᠨᠡᠨ ᠳᠠᠭᠤᠷᠢᠰᠬᠤ ᠲᠤᠯᠠ ᠴᠢᠷᠠᠢ ᠠᠯᠳᠠᠵᠤ᠂ ᠪᠤᠭᠤᠷᠵᠢ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ : 《ᠡᠨᠡ ᠯᠠᠪ ᠡᠵᠡᠨ ᠦ᠌ ᠪᠡᠶᠡ ᠳ᠋ᠦ᠍ᠷ ᠵᠠᠮ ᠤ᠋ᠨ ᠵᠠᠭᠤᠷᠠ ᠴᠢᠬᠤᠯᠠ ᠭᠠᠴᠢᠭ᠍ᠳᠠᠯ ᠪᠣᠯᠪᠠ᠂ ᠠᠬᠠᠢ ᠴᠢ ᠬᠤᠢᠯᠠᠲᠠᠷ ᠬᠣᠰᠢᠭᠤᠴᠢ ᠂ ᠵᠦᠯᠭᠡᠲᠡᠢ ᠪᠠᠭᠠᠲᠤᠷ ᠯᠤᠭᠠ ᠲᠤᠭᠮᠤᠭ ᠤ᠋ᠨ ᠬᠦᠷᠦ ᠬᠣᠲᠠ ᠶ᠋ᠢ ᠠᠪᠴᠤ ᠬᠠᠭᠠᠨ ᠢ᠋ ᠠᠨᠤ ᠪᠡᠷᠢ᠂ ᠪᠢ ᠬᠠᠭᠠᠰ ᠴᠡᠷᠢᠭ ᠢ᠋ᠶ᠋ᠡᠷ ᠡᠵᠡᠨ ᠢ᠋ ᠤᠭᠲᠤᠷᠠ ᠡᠴᠢᠰᠦᠭᠡᠢ ! 》ᠭᠡᠮᠡᠨ ᠮᠡᠩᠳᠡᠨ ᠰᠡᠩᠳᠡᠨ ᠴᠡᠷᠢᠭ ᠬᠠᠭᠠᠰᠯᠠᠵᠤ᠂ ᠮᠤᠬᠤᠯᠢ ᠡᠮᠦᠨᠡ ᠵᠦᠭ ᠳᠣᠪᠲᠣᠯᠪᠠ᠃ ᠲᠡᠭᠦᠨᠴᠡ ᠮᠤᠬᠤᠯᠢ ᠡᠮᠦᠨᠡ ᠵᠦᠭ ᠰᠠᠶᠢ ᠨᠢᠭᠡᠨ ᠬᠣᠨᠣᠭ ᠤ᠋ᠨ ᠵᠠᠮ ᠭᠠᠷᠲᠠᠯᠠ ᠵᠠᠮᠤᠬᠠ ᠶ᠋ᠢᠨ ᠴᠡᠷᠢᠭ ᠲᠠᠢᠽᠦ ᠶ᠋ᠢ ᠪᠢᠲᠡᠭᠦᠦ ᠮᠤᠬᠤᠷ ᠣᠯᠣᠭᠠᠢ ᠭᠣᠣᠯ ᠳ᠋ᠤᠷ ᠬᠣᠷᠢᠵᠤ ᠠᠪᠤᠭᠠᠳ ᠮᠡᠬᠡᠲᠦ ᠬᠠᠭᠠᠨ ᠳ᠋ᠤᠷ ᠪᠠᠶᠠᠷ ᠤ᠋ᠨ ᠮᠡᠳᠡᠭᠡ ᠪᠠᠷᠢᠵᠤ ᠂ ᠪᠠᠰᠠ ᠴᠡᠷᠢᠭ ᠨᠡᠮᠡᠬᠦ ᠶ᠋ᠢ ᠭᠤᠶᠤᠨ ᠮᠡᠳᠡᠭᠦᠯᠬᠦ ᠪᠡᠷ ᠢᠯᠡᠭᠡᠭᠰᠡᠨ ᠭᠤᠷᠪᠠᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠳ᠋ᠦ᠍ᠷ ᠤᠴᠠᠷᠠᠭᠠᠳ ᠴᠥᠮ ᠪᠠᠷᠢᠭᠤᠯᠵᠤ᠂ ᠤᠴᠢᠷ ᠢ᠋ ᠣᠯᠵᠤ ᠰᠣᠨᠣᠰᠤᠭᠠᠳ ᠮᠤᠬᠤᠯᠢ ᠲᠡᠭᠷᠢ ᠶ᠋ᠢᠨ ᠵᠦᠭ ᠠᠯᠠᠭᠠ ᠪᠠᠨ ᠬᠠᠮᠲᠤᠳᠬᠠᠨ ᠥᠭᠦᠯᠡᠷᠦᠨ : 《ᠲᠡᠭᠷᠢ ᠦᠨᠡᠬᠡᠷ ᠡᠵᠡᠨ ᠢ᠋ ᠮᠢᠨᠦ ᠦᠯᠦ ᠮᠥᠬᠥᠭᠡᠮᠦᠢ ! 》 ᠬᠡᠮᠡᠭᠡᠳ ᠪᠠᠷᠢᠭ᠍ᠰᠠᠨ ᠭᠤᠷᠪᠠᠨ ᠴᠡᠷᠢᠭ ᠲᠦ᠍ᠷ ᠥᠨᠥᠬᠡᠨ ᠳᠠᠭᠠᠭᠰᠠᠨ ᠪᠣᠷᠣ ᠠᠷᠰᠯᠠᠨ ᠤ᠋ ᠳᠠᠭᠠᠭᠰᠠᠨ ᠴᠡᠷᠢᠭ ᠢ᠋ ᠦᠵᠡᠭᠦᠯᠵᠦ ᠥᠭᠦᠯᠡᠷᠦᠨ : 《ᠪᠢᠳᠡ ᠬᠡᠳᠦᠢᠨᠡᠢ ᠲᠠᠨ ᠤ᠋ ᠬᠣᠲᠠ ᠶ᠋ᠢ ᠠᠪᠴᠤ ᠬᠠᠭᠠᠨ ᠢ᠋ ᠴᠢᠨᠦ ᠠᠯᠠᠵᠤ᠂ ᠴᠡᠷᠢᠭ ᠴᠢᠨᠦ ᠴᠥᠮ ᠳᠠᠭᠠᠭᠰᠠᠨ ᠢ᠋ ᠦᠵᠡᠬᠦ ᠦᠭᠡᠢ ᠦᠦ ? ᠲᠠ ᠴᠥᠮ ᠬᠣᠲᠠ ᠶ᠋ᠢᠨ ᠳᠣᠲᠣᠷᠠᠬᠢ ᠬᠥᠮᠦᠨ ᠂ ᠲᠠᠨ ᠤ᠋ ᠡᠮᠡ ᠦᠷᠡ ᠪᠠᠰᠠ ᠴᠥᠮ ᠬᠣᠲᠠ ᠳᠣᠲᠣᠷᠠ ᠪᠣᠢ ᠶ᠋ᠢᠨ ᠣᠴᠢᠷᠠ᠂ ᠴᠢ ᠳᠠᠷᠤᠢ ᠡᠭᠡᠵᠦ ᠵᠠᠮᠤᠬᠠ ᠳ᠋ᠤᠷ ᠢ᠋ᠶ᠋ᠠᠨ ᠬᠡᠯᠡ᠂ ᠮᠠᠨ ᠤ᠋ ᠬᠠᠭᠠᠨ ᠪᠡᠶᠡ ᠪᠡᠷ ᠴᠡᠷᠢᠭ ᠠᠪᠴᠤ ᠲᠤᠰᠠᠯᠠᠷᠠ ᠠᠢᠰᠤᠢ᠂ ᠵᠠᠮ ᠳ᠋ᠤᠷ ᠤᠴᠠᠷᠠᠪᠠ ᠬᠡᠮᠡᠭᠲᠦᠨ ᠂ ᠬᠡᠷᠪᠡ ᠵᠠᠮᠤᠬᠠ ᠶ᠋ᠢ ᠣᠯᠵᠤ ᠪᠠᠷᠢᠭ᠍ᠰᠠᠨ ᠴᠠᠭ ᠲᠤᠷ ᠲᠠ ᠭᠤᠷᠪᠠᠭᠤᠯᠠ ᠶ᠋ᠢ ᠬᠦᠨᠳᠦᠳᠡ ᠡᠷᠭᠦᠰᠦᠭᠡᠢ᠃ ᠬᠡᠷᠪᠡ ᠦᠭᠡ ᠵᠠᠳᠠᠷᠠᠪᠠᠰᠤ ᠂ ᠲᠠᠨ ᠤ᠋ ᠡᠮᠡ ᠦᠷᠡ ᠶ᠋ᠢ ᠴᠥᠮ ᠬᠦᠢᠰᠦ ᠲᠠᠮᠲᠠᠷᠢᠮᠤᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠭᠤᠷᠪᠠᠨ ᠬᠥᠮᠦᠨ ᠶᠡᠬᠡᠯᠡ ᠦᠨᠡᠮᠰᠢᠵᠦ ᠳᠤᠷᠠᠲᠠᠶᠠ ᠲᠠᠩᠭᠠᠷᠢᠭ᠍ᠯᠠᠨ ᠬᠦᠯᠢᠶᠡᠵᠦ ᠡᠭᠡᠵᠦ ᠳᠣᠪᠲᠣᠯᠪᠠ᠃ ᠳᠠᠭᠠᠯᠳᠤᠬᠠ ᠮᠤᠬᠤᠯᠢ ᠲᠤᠭᠮᠤᠭ ᠤ᠋ᠨ ᠲᠤᠭ ᠬᠢᠭᠢᠷᠢ ᠶ᠋ᠢ ᠡᠮᠦᠨᠡ ᠪᠡᠨ ᠪᠠᠷᠢᠭᠤᠯᠵᠤ ᠂ ᠰᠥᠨᠢ ᠳᠦᠯᠢ ᠳ᠋ᠦ᠍ᠷ ᠮᠤᠬᠤᠷ ᠣᠯᠣᠭᠠᠢ ᠠᠭᠤᠯᠠᠨ ᠳ᠋ᠤᠷ ᠳᠣᠪᠲᠣᠯᠤᠨ ᠬᠦᠷᠴᠦ ᠠᠭᠤᠯᠠᠨ ᠤ᠋ ᠬᠥᠮᠦᠭᠡ ᠥᠭᠡᠳᠡ ᠶᠠᠪᠤᠬᠤᠶᠠ᠂ ᠵᠠᠮᠤᠬᠠ ᠬᠡᠳᠦᠢᠨᠡᠢ ᠶᠡᠬᠡ ᠭᠠᠯ ᠬᠥᠭᠵᠢᠭᠡᠵᠦ᠂ ᠭᠡᠷᠡᠯ ᠭᠠᠷᠭᠠᠭᠠᠳ ᠤᠭᠲᠤᠨ ᠢᠷᠡᠬᠦᠶᠡ᠂ ᠮᠤᠬᠤᠯᠢ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠨᠤᠮᠤ ᠰᠤᠮᠤ ᠪᠠᠨ ᠰᠤᠭᠤᠯᠵᠤ ᠤᠷᠤᠭᠰᠢᠯᠠᠨ ᠵᠣᠭᠰᠣᠵᠤ ᠬᠦᠯᠢᠶᠡᠨ ᠠᠲᠠᠯᠠ ᠵᠠᠮᠤᠬᠠ ᠶ᠋ᠢᠨ ᠡᠮᠦᠨᠡᠭᠦᠷ ᠨᠢᠭᠡᠨ ᠣᠭᠣᠯᠢ ᠰᠢᠪᠠᠭᠤ ᠵᠠᠵᠢᠭᠢᠨᠠᠨ ᠢᠨᠢᠶᠡᠵᠦ᠂ ᠬᠥᠨᠳᠡᠯᠡᠨ ᠢ᠋ᠶ᠋ᠡᠷ ᠨᠢᠰᠦᠨ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ᠷ ᠵᠠᠮᠤᠬᠠ ᠬᠡᠮᠡᠭᠴᠢ ᠮᠠᠰᠢ ᠰᠡᠷᠭᠡᠢ ᠵᠠᠯᠢᠬᠠᠢ ᠬᠥᠮᠦᠨ ᠲᠤᠯᠠ ᠶᠠᠭᠠᠷᠠᠨ ᠵᠣᠭᠰᠣᠵᠤ᠂ ᠣᠢᠷᠠ ᠶᠠᠪᠤᠬᠤ ᠨᠢᠭᠡᠨ ᠬᠥᠮᠦᠨ ᠢ᠋ᠶ᠋ᠡᠨ ᠤᠷᠢᠳᠠ ᠦᠵᠡᠭᠦᠯᠦᠷᠡ ᠵᠠᠷᠤᠪᠠ᠃ ᠲᠡᠷᠡ ᠬᠥᠮᠦᠨ ᠲᠡᠨᠳᠡ ᠬᠦᠷᠦᠮᠡᠭᠴᠡ ᠮᠠᠭᠤ ᠳᠠᠭᠤᠨ ᠭᠠᠷᠴᠤ ᠡᠭᠡᠵᠦ ᠳᠤᠲᠠᠭᠠᠲᠠᠯᠠ ᠮᠤᠬᠤᠯᠢ ᠬᠡᠳᠦᠢᠨᠡᠢ ᠬᠠᠷᠪᠤᠵᠤ ᠤᠨᠠᠭᠠᠭᠠᠳ ᠦᠵᠡᠪᠡᠰᠦ ᠶᠠᠭᠤᠨᠠᠢ ᠵᠠᠮᠤᠬᠠ ᠠᠵᠢ ᠂ ᠨᠢᠭᠡᠨ ᠰᠤᠯᠠ ᠴᠡᠷᠢᠭ ᠠᠵᠤᠭᠤ ! ᠡᠭᠦᠨ ᠳ᠋ᠦ᠍ᠷ ᠵᠠᠮᠤᠬᠠ ᠶᠡᠬᠡᠯᠡ ᠠᠶᠤᠵᠤ ᠡᠭᠡᠵᠦ ᠳᠤᠲᠠᠭᠠᠬᠤᠶᠠ᠂ ᠮᠤᠬᠤᠯᠢ ᠳᠠᠷᠤᠢ ᠫᠤᠤ ᠲᠠᠯᠪᠢᠭᠤᠯᠵᠤ᠂ ᠶᠡᠬᠡ ᠴᠡᠷᠢᠭ ᠳᠠᠷᠤᠨ ᠣᠷᠣᠵᠤ ᠵᠠᠮᠤᠬᠠ ᠶ᠋ᠢᠨ ᠬᠦᠷᠢᠶᠡᠨ ᠢ᠋ ᠪᠤᠯᠢᠶᠠᠨ ᠠᠪᠤᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠵᠠᠮᠤᠬᠠ ᠵᠠᠮ ᠦᠭᠡᠢ ᠪᠡᠷᠬᠡ ᠭᠠᠵᠠᠷ ᠢ᠋ᠶ᠋ᠠᠷ ᠰᠢᠪᠳᠤᠷᠤᠨ ᠣᠷᠣᠵᠤ ᠵᠠᠪ ᠡᠷᠢᠨ ᠶᠠᠪᠤᠬᠤᠶᠠ᠂ ᠥᠪᠡᠷ ᠦ᠋ᠨ ᠨᠢᠭᠡᠨ ᠰᠦᠷᠦᠭ ᠪᠤᠲᠠᠷᠠᠭᠰᠠᠨ ᠴᠡᠷᠢᠭ ᠲᠦ᠍ᠷ ᠢ᠋ᠶ᠋ᠡᠨ ᠤᠴᠠᠷᠠᠵᠤ᠂ ᠬᠦᠷᠢᠶᠡ ᠨᠢᠭᠡᠨᠲᠡ ᠠᠪᠲᠠᠪᠠ ᠭᠡᠮᠡᠨ ᠰᠣᠨᠣᠰᠴᠤ ᠰᠥᠨᠢ ᠳᠦᠯᠢᠨ ᠬᠡᠷᠡᠢᠳ ᠤᠯᠤᠰ ᠤ᠋ᠨ ᠵᠦᠭ ᠬᠤᠯᠤᠭᠠᠨᠠ ᠮᠡᠲᠦ ᠪᠤᠷᠤᠭᠤᠯᠠᠨ ᠡᠴᠢᠪᠡ᠃ ᠲᠡᠭᠦᠨᠴᠡ ᠮᠤᠬᠤᠯᠢ ᠵᠠᠮᠤᠬᠠ ᠶ᠋ᠢ ᠡᠷᠢᠬᠦ ᠶ᠋ᠢ ᠶᠠᠭᠠᠷᠠᠬᠤ ᠦᠭᠡᠢ᠂ ᠤᠷᠢᠳᠠ ᠵᠡᠪᠡ ᠶ᠋ᠢᠨ ᠠᠮᠠᠨ ᠢ᠋ ᠪᠥᠭᠯᠡᠭᠰᠡᠨ ᠢ᠋ ᠡᠪᠳᠡᠯᠡᠭᠦᠯᠦᠨ ᠥᠪᠡᠷ ᠢ᠋ᠶ᠋ᠡᠨ ᠳᠣᠪᠲᠣᠯᠵᠤ᠂ ᠲᠠᠢᠽᠦ ᠶ᠋ᠢᠨ ᠬᠠᠭᠠᠭᠳᠠᠭᠰᠠᠨ ᠭᠠᠵᠠᠷ ᠲᠤᠷ ᠬᠦᠷᠴᠦ ᠮᠥᠷᠭᠥᠨ ᠵᠣᠯᠭᠠᠵᠤ᠂ ᠲᠠᠢᠽᠦ ᠤᠰᠤ ᠦᠭᠡᠢ ᠬᠠᠭᠤᠷᠠᠢ ᠭᠣᠣᠯ ᠳ᠋ᠤᠷ ᠬᠣᠷᠢᠭ᠍ᠳᠠᠨ ᠬᠠᠭᠠᠭᠳᠠᠵᠤ᠂ ᠰᠢᠳᠠᠷ ᠠᠷᠠᠳ ᠤ᠋ᠨ ᠠᠪᠴᠤ ᠶᠠᠪᠤᠬᠤ ᠤᠰᠤᠨ ᠤ᠋ ᠬᠣᠪᠤᠳ ᠪᠠᠢᠪᠠᠴᠤ ᠬᠡᠷᠬᠢᠪᠡᠴᠦ ᠤᠤᠭᠤᠬᠤ ᠦᠭᠡᠢ᠂ ᠣᠯᠠᠨ ᠴᠡᠷᠢᠭ ᠯᠦ᠍ᠭᠡ ᠨᠢᠭᠡᠨ ᠠᠳᠠᠯᠢ ᠵᠢᠷᠭᠡᠨ ᠬᠡᠮᠡᠬᠦ ᠢᠰᠬᠦᠯᠡᠩ ᠡᠪᠡᠰᠦ ᠶ᠋ᠢ ᠲᠡᠭᠦᠵᠦ ᠵᠠᠵᠢᠯᠤᠨ ᠤᠮᠳᠠ ᠬᠠᠷᠢᠭᠤᠯᠵᠤ᠂ ᠬᠣᠶᠠᠷ ᠡᠳᠦᠷ ᠬᠣᠶᠠᠷ ᠰᠥᠨᠢ ᠪᠣᠯᠪᠠ᠃ ᠡᠭᠦᠨ ᠳ᠋ᠦ᠍ᠷ ᠮᠤᠬᠤᠯᠢ ᠲᠠᠢᠽᠦ ᠶ᠋ᠢᠨ ᠡᠪᠦᠳᠦᠭ ᠢ᠋ ᠲᠡᠪᠡᠷᠢᠨ ᠤᠬᠢᠯᠠᠨ ᠮᠥᠷᠭᠥᠵᠦ ᠡᠢᠨ ᠭᠡᠮᠡᠨ ᠮᠡᠳᠡᠭᠦᠯᠦᠷᠦᠨ : 《ᠡᠵᠡᠨ ᠮᠢᠨᠦ ᠡᠨᠡ ᠮᠡᠲᠦ ᠴᠡᠷᠢᠭ ᠢ᠋ᠶ᠋ᠡᠨ ᠡᠨᠡᠷᠢᠬᠦᠢ ᠳ᠋ᠦ᠍ᠷ ᠡᠮᠦᠨᠡ ᠶᠠᠪᠤᠭᠴᠢ ᠪᠣᠭᠣᠯ ᠪᠢᠳᠡ ᠶᠠᠮᠪᠠᠷ ᠵᠣᠪᠠᠬᠤ ᠭᠠᠵᠠᠷ ᠪᠣᠢ ! ᠡᠳᠡᠭᠡᠷ ᠶᠠᠪᠤᠳᠠᠯ ᠳ᠋ᠤᠷ ᠡᠵᠡᠨ ᠦ᠌ ᠲᠥᠷᠥ ᠶᠠᠷᠠᠭᠳᠠᠭᠠᠨ ᠪᠦᠲᠦᠮᠦᠢ᠂ ᠡᠭᠦᠨ ᠡᠴᠡ ᠤᠯᠠᠮ ᠰᠢᠮᠳᠠᠵᠤ ᠳᠠᠪᠲᠠᠨ ᠰᠢᠨᠡᠳᠬᠡᠪᠡᠰᠦ ᠵᠣᠬᠢᠮᠤᠢ !》 ᠬᠡᠮᠡᠵᠦ᠂ ᠪᠦᠭᠦᠳᠡᠭᠡᠷ ᠵᠡᠪᠡ ᠶ᠋ᠢᠨ ᠠᠮᠠᠨ ᠠ᠋ᠴᠠ ᠭᠠᠷᠴᠤ ᠴᠡᠷᠢᠭ ᠮᠣᠷᠢᠨ ᠢ᠋ ᠠᠯᠭᠤᠷ ᠤᠰᠤᠯᠠᠵᠤ ᠰᠠᠶᠢ ᠪᠤᠳᠠᠬᠠ ᠴᠢᠨᠠᠵᠤ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠬᠠᠮᠲᠤ ᠪᠠᠷ ᠪᠤᠳᠠᠭᠠᠯᠠᠵᠤ᠂ ᠵᠢᠴᠢ ᠥᠷᠯᠥᠭᠡ ᠳᠠᠷᠤᠢ ᠲᠤᠭᠮᠤᠭ ᠤ᠋ᠨ ᠬᠦᠷᠦ ᠬᠣᠲᠠ ᠶ᠋ᠢᠨ ᠵᠦᠭ ᠣᠷᠣᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠪᠤᠭᠤᠷᠤᠯ ᠂ ᠴᠢᠯᠠᠭᠤ ᠨᠠᠷ ᠪᠣᠷᠣ ᠠᠷᠰᠯᠠᠨ ᠢ᠋ ᠠᠪᠴᠤ ᠬᠦᠷᠦ ᠬᠣᠲᠠ ᠳ᠋ᠤᠷ ᠣᠷᠣᠵᠤ᠂ ᠳᠠᠭᠠᠯᠳᠤᠭᠠ ᠪᠤᠭᠤᠷᠵᠢ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠮᠥᠨ ᠴᠢᠪ ᠴᠢᠮᠡᠭᠡ ᠦᠭᠡᠢ ᠪᠡᠷ ᠬᠦᠷᠴᠦ ᠬᠣᠲᠠ ᠳ᠋ᠤᠷ ᠣᠷᠣᠵᠤ ᠡᠴᠢᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠮᠡᠬᠡᠲᠦ ᠬᠠᠭᠠᠨ ᠮᠠᠨᠠᠷᠠᠨ ᠰᠣᠭᠲᠣᠵᠤ ᠤᠯᠤᠰ ᠲᠥᠷᠥ ᠶ᠋ᠢᠨ ᠶᠠᠮᠪᠠᠷᠪᠠ ᠬᠡᠷᠡᠭ ᠢ᠋ ᠴᠦ᠍ ᠨᠢᠭᠡᠮᠦᠰᠦᠨ ᠰᠣᠨᠣᠰᠬᠤ ᠦᠭᠡᠢ ᠪᠣᠯᠤᠭᠠᠳ ᠡᠳᠦᠷ ᠰᠥᠨᠢ ᠦᠭᠡᠢ ᠣᠯᠠᠨ ᠡᠮᠡᠰ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠦᠷᠢᠶᠡᠯᠡᠭᠦᠯᠦᠨ ᠬᠤᠷᠢᠮᠯᠠᠵᠤ᠂ ᠰᠠᠭ ᠮᠣᠳᠣᠨ ᠤ᠋ ᠭᠦᠨ ᠰᠢᠭᠤᠢ ᠳ᠋ᠤᠷ ᠴᠢᠷᠠᠮᠠ ᠨᠢᠴᠦᠭᠦᠯᠡᠯᠴᠡᠨ ᠠᠷᠢᠬᠢ ᠤᠤᠭᠤᠨ ᠴᠡᠩᠭᠡᠯᠳᠦᠬᠦᠶᠡ᠂ ᠭᠡᠨᠡᠳᠲᠡ ᠬᠣᠲᠠᠨ ᠤ᠋ ᠳᠣᠲᠣᠷᠠ ᠫᠤᠤ ᠲᠤᠤᠭᠠᠷᠤᠨ᠂ ᠬᠡᠩᠭᠡᠷᠭᠡ ᠳᠦᠴᠢᠭᠢᠨᠡᠨ ᠴᠡᠷᠢᠭ ᠬᠠᠰᠬᠢᠷᠤᠨ ᠬᠥᠮᠦᠨ ᠦᠢᠮᠡᠯᠴᠡᠨ ᠲᠣᠭᠣᠭᠠᠨ ᠤ᠋ ᠤᠰᠤ ᠪᠤᠴᠠᠯᠬᠤ ᠮᠡᠲᠦ ᠪᠤᠷᠬᠢᠷᠠᠯᠳᠤᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠪᠣᠷᠣ ᠠᠷᠰᠯᠠᠨ ᠯᠤᠭᠠ ᠬᠣᠲᠠ ᠳ᠋ᠤᠷ ᠣᠷᠣᠪᠠ ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠤ᠋ ᠮᠡᠬᠡ ᠢᠨᠦ ᠨᠢᠭᠡᠨᠲᠡ ᠵᠠᠪᠬᠠᠵᠤ᠂ ᠨᠢᠴᠦᠭᠦᠨ ᠪᠡᠶᠡ ᠳ᠋ᠦ᠍ᠷ ᠬᠤᠶᠠᠭ ᠡᠮᠦᠰᠴᠦ ᠬᠡᠳᠦᠬᠡᠨ ᠵᠠᠭᠤᠨ ᠰᠢᠳᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠳᠣᠲᠣᠭᠠᠳᠤ ᠬᠣᠲᠠ ᠶ᠋ᠢᠨ ᠬᠣᠢᠲᠤ ᠬᠠᠭᠠᠯᠭᠠ ᠪᠠᠷ ᠭᠠᠷᠤᠨ ᠶᠡᠬᠡ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠬᠠᠭᠠᠯᠭᠠ ᠪᠠᠷ ᠳᠤᠲᠠᠭᠠᠪᠠ᠃ ᠪᠤᠭᠤᠷᠵᠢ ᠨᠢᠭᠡᠨᠲᠡᠭᠡᠭᠦᠷ ᠬᠣᠲᠠ ᠶ᠋ᠢ ᠬᠤᠷᠢᠶᠠᠮᠵᠢᠯᠠᠨ ᠲᠣᠭᠲᠠᠭᠠᠵᠤ᠂ ᠨᠢᠭᠡᠨᠲᠡᠭᠡᠭᠦᠷ ᠲᠠᠢᠽᠦ ᠶ᠋ᠢᠨ ᠮᠡᠳᠡᠭᠡ ᠶ᠋ᠢ ᠠᠪᠤᠭᠤᠯᠤᠷᠠ ᠵᠥᠯᠭᠡᠲᠡᠢ ᠪᠠᠭᠠᠲᠤᠷ ᠢ᠋ ᠳᠣᠪᠲᠣᠯᠭᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠪᠡᠯᠭᠦᠳᠡᠢ᠂ ᠬᠠᠰᠠᠷ ᠬᠣᠶᠠᠷ ᠨᠣᠶᠠᠨ ᠤ᠋ ᠴᠡᠷᠢᠭ ᠲᠤᠭᠮᠤᠭ ᠤ᠋ᠨ ᠯᠤᠤ ᠪᠠᠷᠰ ᠬᠣᠶᠠᠭᠤᠯᠠ ᠶ᠋ᠢ ᠲᠠᠯᠪᠢᠯ ᠦᠭᠡᠢ ᠨᠡᠬᠡᠭᠰᠡᠭᠡᠷ ᠬᠣᠶᠠᠷ ᠴᠡᠷᠢᠭ ᠢ᠋ ᠬᠠᠮᠲᠤ ᠪᠠᠷ ᠠᠨᠢᠷ ᠤᠰᠤ ᠬᠡᠮᠡᠬᠦ ᠭᠣᠣᠯ ᠳ᠋ᠤᠷ ᠬᠠᠭᠠᠵᠤ ᠠᠪᠤᠭᠠᠳ ᠰᠥᠪᠡᠬᠡᠲᠡᠢ ᠪᠠᠭᠠᠲᠤᠷ ᠠᠨᠤ ᠭᠠᠯᠵᠠᠭᠤ ᠪᠠᠷᠰ ᠢ᠋ ᠠᠮᠢᠳᠤ ᠪᠠᠷᠢᠭᠠᠳ ᠭᠢᠯᠦᠭᠡᠨ ᠪᠠᠭᠠᠲᠤᠷ ᠰᠣᠭᠲᠣᠭᠤ ᠯᠤᠤ ᠶ᠋ᠢ ᠴᠠᠪᠴᠢᠨ ᠠᠯᠠᠵᠤ᠂ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠢ᠋ ᠴᠥᠮ ᠳᠠᠭᠠᠭᠤᠯᠵᠤ᠂ ᠳᠠᠷᠤᠢ ᠲᠤᠭᠮᠤᠭ ᠤ᠋ᠨ ᠲᠤᠭ ᠬᠢᠭᠢᠷᠢ ᠶ᠋ᠢ ᠪᠠᠷᠢᠭᠤᠯᠵᠤ ᠬᠣᠲᠠ ᠶ᠋ᠢ ᠠᠨᠤ ᠠᠪᠤᠷᠠ ᠡᠴᠢᠬᠦᠶᠡ᠂ ᠬᠦᠷᠦ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠡᠲᠡᠭᠡᠳ ᠲᠠᠪᠢᠨ ᠭᠠᠵᠠᠷ ᠤ᠋ᠨ ᠡᠴᠦᠰ ᠲᠦ᠍ᠷ ᠪᠠᠰᠠ ᠨᠢᠭᠡᠨ ᠰᠠᠯᠠᠭᠠᠨ ᠤ᠋ ᠲᠤᠭᠮᠤᠭ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠪᠠ᠃ ᠴᠡᠷᠢᠭ ᠬᠡᠳᠦᠢ ᠣᠯᠠᠨ ᠦᠭᠡᠢ ᠪᠣᠯᠪᠠᠴᠤ ᠴᠥᠮ ᠥᠩᠭᠡᠲᠦ ᠬᠤᠶᠠᠭ ᠰᠠᠢᠨ ᠮᠣᠷᠢᠳ ᠲᠤᠯᠠ ᠬᠠᠰᠠᠷ ᠂ ᠪᠡᠯᠭᠦᠳᠡᠢ ᠶ᠋ᠢᠨ ᠬᠣᠶᠠᠷ ᠬᠣᠰᠢᠭᠤᠴᠢ ᠰᠥᠪᠡᠭᠡᠲᠡᠢ ᠭᠢᠯᠦᠭᠡᠨ ᠬᠣᠶᠠᠷ ᠪᠠᠭᠠᠲᠤᠷ ᠭᠠᠢᠬᠠᠨ ᠦᠵᠡᠬᠦᠶᠡ ᠂ ᠴᠢᠨᠠᠳᠤ ᠡᠲᠡᠭᠡᠳ ᠲᠣᠷ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠲᠤᠭ ᠲᠡᠮᠳᠡᠭ ᠪᠠᠢᠬᠤ ᠶ᠋ᠢ ᠣᠯᠵᠤ ᠦᠵᠡᠭᠡᠳ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠳᠣᠪᠲᠣᠯᠤᠨ ᠬᠦᠷᠴᠦ ᠢᠷᠡᠨ᠂ ᠰᠥᠪᠡᠭᠡᠲᠡᠢ ᠭᠢᠯᠦᠭᠡᠨ ᠬᠣᠶᠠᠭᠤᠯᠠ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠪᠤᠯᠢᠶᠠᠯᠳᠤᠨ ᠣᠷᠣᠵᠤ ᠪᠠᠢᠯᠳᠤᠲᠠᠯᠠ ᠬᠣᠢᠯᠠᠳᠠᠷ ᠬᠣᠰᠢᠭᠤᠴᠢ ᠲᠡᠷᠡ ᠴᠡᠷᠢᠭ ᠦ᠋ᠨ ᠰᠡᠭᠦᠯ ᠢ᠋ ᠳᠠᠷᠤᠨ ᠨᠡᠬᠡᠨ ᠬᠦᠷᠴᠦ ᠢᠷᠡᠭᠡᠳ ᠭᠤᠷᠪᠠᠨ ᠡᠲᠡᠭᠡᠳ ᠮᠡᠬᠡᠲᠦ ᠬᠠᠭᠠᠨ ᠢ᠋ ᠪᠤᠯᠢᠶᠠᠯᠳᠤᠨ ᠪᠠᠢᠯᠳᠤᠬᠤᠶᠠ ᠂ ᠬᠠᠰᠠᠷ ᠂ ᠪᠡᠯᠭᠦᠳᠡᠢ ᠂ ᠵᠣᠴᠢ ᠂ ᠴᠠᠭᠠᠲᠠᠢ ᠂ ᠠᠴᠢ ᠠᠪᠠᠭᠠ ᠨᠠᠷ ᠤ᠋ᠨ ᠴᠡᠷᠢᠭ ᠪᠠᠰᠠ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠮᠡᠬᠡᠲᠦ ᠬᠠᠭᠠᠨ ᠭᠡᠳᠡᠷᠭᠦ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠮᠡᠬᠡᠯᠡᠭᠳᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠵᠦ᠂ ᠰᠠᠶᠢ ᠵᠠᠮ ᠡᠷᠢᠨ ᠰᠢᠷᠭᠤᠯᠠᠨ ᠭᠠᠷᠲᠠᠯᠠ ᠴᠢᠪᠬᠢᠲᠡᠯᠡ ᠵᠣᠴᠢ ᠳ᠋ᠤᠷ ᠤᠴᠠᠷᠠᠵᠤ᠂ ᠵᠣᠴᠢ ᠲᠡᠭᠦᠨ ᠢ᠋ ᠨᠢᠭᠡᠬᠡᠨ ᠰᠤᠮᠤ ᠪᠠᠷ ᠥᠩᠭᠡᠯᠦᠦᠷ ᠢ᠋ᠶ᠋ᠡᠷ ᠢᠨᠦ ᠬᠠᠷᠪᠤᠵᠤ ᠤᠨᠠᠭᠠᠭᠠᠳ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠤᠨ ᠠᠪᠴᠤ ᠥᠨᠳᠥᠷ ᠲᠤᠭ ᠲᠤᠷ ᠤᠶᠠᠭᠤᠯᠪᠠ᠃ ᠲᠤᠭᠮᠤᠭ ᠤ᠋ᠨ ᠴᠡᠷᠢᠭ ᠮᠡᠩᠭᠡᠯᠠ ᠬᠠᠭᠠᠨ ᠢ᠋ᠶ᠋ᠠᠨ ᠮᠡᠩᠭᠡᠲᠡᠢ ᠴᠢᠷᠠᠢ ᠶ᠋ᠢ ᠦᠵᠡᠮᠡᠭᠴᠡ ᠴᠥᠮ ᠮᠥᠷᠭᠥᠵᠦ ᠳᠠᠭᠠᠪᠠ ᠃
ᠲᠡᠳᠦᠢ ᠬᠦᠷᠦ ᠬᠣᠲᠠ ᠶ᠋ᠢᠨ ᠵᠦᠭ ᠡᠴᠢᠬᠦᠢ ᠳ᠋ᠦ᠍ᠷ ᠵᠠᠮ ᠳ᠋ᠤᠷ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠳᠤᠲᠠᠭᠠᠬᠤ ᠠᠷᠠᠳ ᠠ᠋ᠴᠠ ᠰᠣᠨᠣᠰᠪᠠᠰᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠨᠢᠭᠡᠨᠲᠡ ᠬᠣᠲᠠ ᠶ᠋ᠢ ᠠᠪᠴᠤ ᠡᠵᠡᠨ ᠢᠨᠦ ᠮᠥᠨ ᠬᠦᠷᠴᠦ ᠢᠷᠡᠪᠡ ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠣᠴᠢ ᠮᠡᠩᠭᠡᠯᠠ ᠬᠠᠭᠠᠨ ᠤ᠋ ᠮᠡᠩᠭᠡᠲᠡᠢ ᠲᠡᠷᠢᠭᠦᠨ ᠢ᠋ ᠢᠨᠦ ᠦᠵᠡᠭᠦᠯᠵᠦ : ᠲᠠᠨ ᠤ᠋ ᠬᠣᠲᠠ ᠶ᠋ᠢ ᠠᠪᠤᠭᠰᠠᠨ ᠢ᠋ ᠴᠦ᠍ ᠪᠠᠢᠲᠤᠭᠠᠢ ᠂ ᠬᠠᠭᠠᠨ ᠢ᠋ ᠴᠢᠨᠦ ᠮᠥᠨ ᠬᠡᠳᠦᠢᠨᠡᠢ ᠠᠯᠠᠪᠠ ᠭᠡᠮᠡᠨ ᠴᠥᠮ ᠳᠠᠭᠠᠭᠤᠯᠵᠤ ᠠᠪᠤᠭᠠᠳ ᠬᠣᠲᠠ ᠳ᠋ᠤᠷ ᠣᠷᠣᠵᠤ᠂ ᠪᠦᠭᠦᠳᠡᠭᠡᠷ ᠵᠣᠯᠭᠠᠯᠳᠤᠵᠤ ᠪᠠᠶᠠᠰᠤᠯᠴᠠᠬᠤᠶᠠ᠂ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡ ᠶᠠᠪᠤᠬᠤ ᠵᠠᠩᠵᠤᠨ ᠨᠠᠷ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠳᠣᠪᠲᠣᠯᠤᠯᠴᠠᠨ ᠳᠠᠷᠠᠭᠠ ᠪᠠᠷ ᠠᠷᠪᠠᠨ ᠬᠣᠣᠰ ᠳᠣᠪᠲᠣᠯᠤᠨ ᠣᠷᠣᠵᠤ ᠢᠷᠡᠪᠡ᠃ ᠳᠠᠷᠤᠢ ᠣᠯᠠᠨ ᠢ᠋ᠶ᠋ᠠᠷ ᠵᠣᠴᠢ ᠶ᠋ᠢ ᠡᠮᠦᠨᠡ ᠪᠣᠯᠭᠠᠨ᠂ ᠮᠡᠩᠭᠡᠯᠡ ᠬᠠᠭᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠪᠠᠷᠢᠭᠤᠯᠵᠤ ᠂ ᠬᠣᠲᠠ ᠶ᠋ᠢᠨ ᠭᠠᠳᠠᠨᠠ ᠭᠠᠷᠴᠤ ᠲᠠᠢᠽᠦ ᠳ᠋ᠦ᠍ᠷ ᠮᠥᠷᠭᠥᠨ ᠤᠭᠲᠤᠪᠠ᠃ ᠲᠠᠢᠽᠦ ᠶᠡᠬᠡ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠵᠣᠴᠢ ᠶ᠋ᠢᠨ ᠮᠡᠩᠭᠡᠯᠡ ᠬᠠᠭᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠡᠷᠭᠦᠨ ᠪᠠᠷᠢᠭ᠍ᠰᠠᠨ ᠢ᠋ ᠦᠵᠡᠭᠡᠳ ᠪᠠᠷᠰ ᠤ᠋ᠨ ᠴᠢᠷᠠᠢ ᠳ᠋ᠤᠷ ᠪᠠᠶᠠᠷ ᠤ᠋ᠨ ᠪᠠᠢᠳᠠᠯ ᠢᠯᠡᠷᠡᠵᠦ : 《ᠤᠯᠤᠰ ᠢ᠋ ᠡᠵᠡᠯᠡᠭᠴᠢᠳ ᠢ᠋ ᠪᠦᠦ ᠠᠯᠠᠬᠤᠢ ᠳ᠋ᠤᠷ ᠬᠦᠷᠭᠦᠯ ᠬᠡᠮᠡᠲᠡᠯᠡ ᠤᠨᠳᠣᠭᠣᠲᠤ ᠬᠥᠪᠡᠭᠦᠨ ᠮᠢᠨᠦ ᠴᠢ ᠪᠠᠰᠠ ᠨᠢᠭᠡᠨ ᠢ᠋ ᠠᠯᠠᠪᠠᠤ ? 》 ᠭᠡᠮᠡᠨ ᠬᠣᠲᠠ ᠳ᠋ᠤᠷ ᠣᠷᠣᠵᠤ ᠳᠣᠯᠣᠭᠠᠨ ᠳᠠᠪᠬᠤᠷ ᠤᠷᠲᠤ ᠬᠠᠷᠰᠢ ᠳ᠋ᠤᠷ ᠠᠨᠤ ᠭᠠᠷᠴᠤ ᠰᠠᠭᠤᠪᠠ᠃ ᠳᠡᠭᠦᠦ ᠨᠠᠷ ᠪᠠ ᠬᠦᠯᠦᠭ ᠦ᠋ᠳ ᠵᠠᠩᠵᠤᠨ ᠪᠠᠭᠠᠲᠤᠷ ᠤ᠋ᠳ ᠪᠦᠭᠦᠳᠡᠭᠡᠷ ᠬᠤᠷᠠᠵᠤ ᠂ ᠪᠠᠰᠠ ᠨᠢᠭᠡᠨ ᠶᠢᠰᠦᠨ ᠮᠣᠵᠢᠲᠤ ᠶᠡᠬᠡ ᠤᠯᠤᠰ ᠢ᠋ ᠣᠯᠤᠭᠰᠠᠨ ᠪᠠᠶᠠᠷ ᠤ᠋ᠨ ᠶᠣᠰᠣᠭᠠᠷ ᠮᠥᠷᠭᠥᠵᠦ ᠪᠡᠯᠭᠡᠯᠡᠪᠡ᠃
ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠳ ᠦ᠋ᠨ ᠲᠡᠳᠡᠭᠡᠷ ᠰᠣᠨᠢᠨ ᠤᠯᠤᠰ ᠤᠯᠤᠰ ᠲᠤᠷ ᠭᠠᠷᠤᠮᠤᠢ᠂
ᠲᠡᠭᠷᠢᠯᠢᠭ ᠦ᠋ᠨ ᠦᠷᠡᠰ ᠦ᠋ᠨ ᠡᠳᠡᠭᠡᠷ ᠭᠠᠢᠬᠠᠮᠰᠢᠭ ᠢ᠋ ᠦᠶᠡ ᠦᠶᠡ ᠳ᠋ᠦ᠍ᠷ ᠬᠡᠯᠡᠯᠴᠡᠮᠦᠢ᠂
ᠲᠡᠮᠳᠡᠭ ᠦᠭᠡᠢ ᠬᠤᠳᠠᠯ ᠬᠣᠮᠣᠭᠠᠢ ᠭᠡᠮᠡᠨ ᠪᠢᠴᠢᠬᠦ ᠶ᠋ᠢ ᠪᠠᠢᠰᠤᠭᠠᠢ ᠭᠡᠬᠦᠯᠡ
ᠲᠡᠢᠮᠦ ᠶᠠᠪᠤᠳᠠᠯ ᠡᠷᠲᠡᠨ ᠡᠴᠡ ᠭᠠᠷᠤᠭᠰᠠᠭᠠᠷ ᠢᠷᠡᠭᠰᠡᠨ ᠢ᠋ ᠬᠡᠷᠬᠢᠰᠦ !
ᠴᠣᠬᠣᠯᠠᠭᠰᠠᠨ ᠠᠨᠤ
ᠡᠨᠡ ᠪᠦᠯᠦᠭ ᠦ᠋ᠨ ᠲᠤᠭᠮᠤᠭ ᠢ᠋ ᠳᠠᠢᠯᠠᠭᠰᠠᠨ ᠨᠢᠭᠡᠨ ᠬᠡᠷᠡᠭ ᠂ ᠤᠷᠢᠳᠤ ᠪᠦᠯᠦᠭ ᠦ᠋ᠨ ᠰᠠᠷᠯᠠᠭ ᠢ᠋ ᠳᠠᠢᠯᠠᠭᠰᠠᠨ ᠨᠢᠭᠡᠨ ᠦᠢᠯᠡ ᠯᠦ᠍ᠭᠡ ᠠᠷᠭᠠ ᠪᠢᠯᠢᠭ ᠪᠣᠯᠵᠤᠬᠤᠢ᠃ ᠰᠠᠷᠯᠠᠭ ᠢ᠋ ᠲᠠᠢᠯᠠᠬᠤᠢ ᠳ᠋ᠤᠷ ᠤᠷᠢᠳᠠᠰᠠ ᠭᠠᠭᠴᠠ ᠵᠥᠭᠡᠯᠡᠨ ᠢ᠋ ᠬᠡᠷᠡᠭᠯᠡᠨ ᠠᠶᠤᠬᠤ ᠶ᠋ᠢ ᠦᠵᠡᠭᠦᠯᠵᠦ ᠴᠡᠷᠢᠭ ᠦ᠋ᠨ ᠰᠡᠳᠬᠢᠯ ᠢ᠋ ᠴᠠᠯᠠᠭᠠᠢᠷᠠᠭᠤᠯᠵᠤᠬᠠᠢ᠃ ᠡᠨᠡ ᠤᠳᠠᠭᠠ ᠲᠤᠭᠮᠤᠭ ᠢ᠋ ᠲᠠᠢᠯᠠᠬᠤᠢ ᠳ᠋ᠦᠷ ᠤᠷᠢᠳᠠᠰᠠ ᠭᠠᠭᠴᠠ ᠬᠠᠲᠠᠭᠤ ᠶ᠋ᠢ ᠬᠡᠷᠡᠭᠯᠡᠵᠦ ᠠᠶᠤᠯᠭᠠᠬᠤ ᠶ᠋ᠢ ᠦᠵᠡᠭᠦᠯᠵᠦ ᠳᠠᠢᠰᠤᠨ ᠤ᠋ ᠰᠡᠳᠬᠢᠯ ᠢ᠋ ᠬᠠᠰᠢᠷᠠᠭᠠᠵᠤᠬᠤᠢ᠃ ᠠᠩᠬᠠ ᠤᠳᠠᠭᠠ ᠰᠠᠷᠯᠠᠭ ᠤ᠋ᠨ ᠪᠡᠯᠡᠳᠬᠡᠭᠰᠡᠨ ᠪᠡᠯᠡᠨ ᠠᠷᠭᠠ ᠶ᠋ᠢ ᠵᠢᠭᠡᠯᠡᠵᠦ ᠡᠭᠡᠭᠦᠯᠦᠨ ᠬᠡᠷᠡᠭᠯᠡᠪᠡᠢ᠃ ᠡᠨᠡ ᠤᠳᠠᠭᠠ ᠲᠤᠭᠮᠤᠭ ᠤ᠋ᠨ ᠬᠠᠰᠢᠷᠠᠭᠰᠠᠨ ᠲᠠᠰᠢᠷᠠᠮ ᠳ᠋ᠤᠷ ᠭᠠᠷ ᠰᠤᠩᠭᠠᠮᠠᠭᠴᠠ ᠳᠡᠢᠯᠵᠦᠬᠦᠢ᠃ ᠠᠩᠬᠠ ᠤᠳᠠᠭᠠ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠪᠣᠢ ᠶ᠋ᠢ ᠡᠪᠳᠡᠭᠡᠳ ᠡᠨᠡ ᠤᠳᠠᠭᠠ ᠪᠦᠬᠦᠨ ᠢ᠋ ᠡᠪᠳᠡᠵᠦᠬᠦᠢ᠃ ᠠᠩᠬᠠ ᠤᠳᠠᠭᠠ ᠵᠡᠯᠮᠡ ᠨᠠᠷ ᠤ᠋ᠨ ᠵᠠᠭᠤᠭᠠᠳ ᠬᠥᠮᠦᠨ ᠦ᠌ ᠬᠡᠷᠡᠭ ᠬᠡᠳᠦᠢ ᠥᠴᠦᠬᠡᠨ ᠮᠡᠲᠦ ᠪᠣᠯᠪᠠᠴᠤ ᠲᠦᠭᠰᠢᠭᠦᠷᠢ ᠢᠨᠤ ᠶᠡᠬᠡ᠂ ᠡᠨᠡ ᠤᠳᠠᠭᠠ ᠶ᠋ᠢᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠠᠷᠪᠠᠨ ᠲᠦᠮᠡᠨ ᠦ᠌ ᠦᠢᠮᠡᠭᠡᠨ ᠬᠡᠳᠦᠢ ᠶᠡᠬᠡ ᠪᠣᠯᠪᠠᠴᠤ ᠲᠦᠭᠰᠢᠭᠦᠷᠢ ᠢᠨᠦ ᠪᠠᠭᠠ᠃ ᠠᠩᠬᠠ ᠤᠳᠠᠭᠠ ᠶ᠋ᠢᠨ ᠪᠤᠰᠤᠳ ᠠ᠋ᠴᠠ ᠠᠶᠤᠬᠤ ᠪᠠᠷ ᠡᠬᠢᠯᠡᠵᠦ ᠰᠠᠷᠯᠠᠭ ᠤᠯᠤᠰ ᠢ᠋ ᠠᠪᠤᠪᠠ᠂ ᠡᠨᠡ ᠤᠳᠠᠭᠠ ᠪᠤᠰᠤᠳ ᠢ᠋ ᠠᠶᠤᠯᠭᠠᠬᠤ ᠪᠠᠷ ᠡᠬᠢᠯᠡᠵᠦ ᠲᠤᠭᠮᠤᠭ ᠤᠯᠤᠰ ᠢ᠋ ᠪᠠᠰᠠ ᠠᠪᠤᠪᠠ ᠃ ᠡᠨᠡ ᠴᠣᠬᠣᠮ ᠴᠡᠷᠢᠭ ᠦ᠋ᠨ ᠪᠢᠴᠢᠭ ᠦ᠋ᠨ ᠦᠨᠡᠨ ᠪᠥᠭᠡᠳ ᠬᠤᠳᠠᠯ ᠂ ᠪᠠᠰᠠ ᠬᠤᠳᠠᠯ ᠪᠥᠭᠡᠳ ᠦᠨᠡᠨ ᠂ ᠪᠠᠰᠠ ᠦᠨᠡᠨ ᠦ᠌ ᠳᠣᠲᠣᠷᠠ ᠦᠨᠡᠨ ᠢ᠋ ᠬᠡᠷᠡᠭᠯᠡᠵᠦ ᠂ ᠭᠡᠨᠡᠳᠲᠡ ᠤᠷᠪᠠᠭᠤᠯᠵᠤ ᠬᠤᠳᠠᠯ ᠪᠣᠯᠭᠠᠬᠤ᠂ ᠪᠠᠰᠠ ᠬᠤᠳᠠᠯ ᠤ᠋ᠨ ᠳᠡᠭᠡᠷᠡ ᠬᠤᠳᠠᠯ ᠢ᠋ ᠬᠡᠷᠡᠭᠯᠡᠵᠦ ᠂ ᠭᠡᠨᠡᠳᠲᠡ ᠤᠷᠪᠠᠭᠤᠯᠵᠤ ᠦᠨᠡᠨ ᠪᠣᠯᠭᠠᠬᠤ ᠂ ᠮᠠᠰᠢ ᠭᠦᠨ ᠨᠠᠷᠢᠨ ᠨᠢᠭᠲᠠ ᠳᠠᠯᠳᠠ ᠤᠬᠠᠭᠠᠨ ᠪᠣᠯᠠᠢ ! ᠠᠶᠠ ᠡᠭᠦᠪᠡᠷ ᠦᠵᠡᠬᠦᠯᠡ ᠬᠡᠷᠡᠭ ᠪᠦᠲᠦᠭᠡᠵᠦ ᠦᠢᠯᠡ ᠶ᠋ᠢ ᠴᠢᠳᠠᠬᠤ ᠠᠷᠠᠳ ᠣᠨᠴᠠ ᠰᠤᠷᠲᠠᠯ ᠠᠰᠠᠭᠤᠯᠲᠠ ᠪᠠᠷ ᠪᠣᠯᠬᠤ ᠪᠤᠰᠤ ᠂ ᠡᠭᠡᠨᠡᠭᠲᠡ ᠲᠡᠭᠷᠢ ᠶ᠋ᠢᠨ ᠲᠥᠷᠥᠯᠬᠢ ᠣᠶᠤᠨ ᠠᠨᠤ ᠬᠡᠷᠡᠭ ᠠᠵᠢ ! ᠮᠤᠬᠤᠯᠢ ᠦᠨᠡᠬᠡᠷ ᠠᠯᠲᠠᠨ ᠭᠠᠳᠠᠰᠤ ᠣᠳᠣᠨ ᠢ᠋ ᠳᠠᠭᠠᠵᠤ ᠲᠥᠷᠥᠭᠰᠡᠨ ᠵᠠᠩᠵᠤᠨ ᠤ᠋ ᠭᠠᠷᠠᠭ ᠮᠥᠨ ᠪᠤᠰᠤ ᠪᠣᠯᠪᠠᠰᠤ ᠡᠳᠡᠭᠡᠷ ᠳᠠᠬᠢᠨ ᠳᠠᠪᠲᠠᠨ ᠤᠷᠪᠠᠭᠤᠯᠤᠨ ᠬᠥᠷᠪᠡᠭᠦᠯᠦᠨ ᠬᠡᠷᠡᠭᠯᠡᠬᠦ ᠠᠷᠭᠠ ᠶ᠋ᠢ ᠪᠠᠰᠠ ᠶᠠᠮᠪᠠᠷ ᠴᠡᠷᠢᠭ ᠦ᠋ᠨ ᠪᠢᠴᠢᠭ ᠲᠣᠷ ᠦᠵᠡᠪᠡ ᠬᠡᠮᠡᠮᠦ᠃ ᠡᠷᠲᠡᠨ ᠦ᠌ ᠲᠥᠷᠥᠯᠬᠢ ᠣᠶᠤᠨᠲᠤ ᠪᠥᠭᠡᠳ ᠪᠠᠰᠠ ᠰᠤᠷᠲᠠᠯ ᠪᠢᠰᠢᠯᠭᠠᠯ ᠪᠦᠷᠢᠳᠦᠭᠰᠡᠨ ᠭᠤᠸᠠᠨ ᠵᠦᠩ ᠂ ᠶᠤᠸᠠᠢ ᠢ ᠂ ᠰᠦᠨ ᠡᠦ ᠽᠢ ᠂ ᠵᠠᠩ ᠽᠢ ᠹᠠᠩ ᠂ ᠵᠣ᠌ ᠬᠢ ᠯᠢᠶᠠᠩ ᠡᠳᠡᠭᠡᠷ ᠮᠡᠷᠭᠡᠳ ᠠᠯᠢᠨ ᠠᠨᠤ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠨᠡ ᠮᠡᠲᠦ ᠬᠥᠨᠳᠡᠯᠡᠨ ᠭᠤᠯᠳᠤ ᠪᠠᠷ ᠰᠢᠪᠲᠤᠯᠤᠨ ᠳᠠᠢᠯᠠᠵᠤ᠂ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠮᠡᠲᠦ ᠨᠡᠢᠭᠡᠮ ᠪᠣᠯᠭᠠᠵᠤ ᠴᠢᠳᠠᠪᠠ ? ᠡᠨᠡ ᠮᠤᠬᠤᠯᠢ ᠬᠡᠮᠡᠭᠴᠢ ᠨᠢᠭᠡᠨ ᠦᠬᠡᠷ ᠬᠦᠴᠦᠲᠦ ᠪᠣᠯᠬᠢ ᠪᠢᠲᠡᠭᠦᠯᠢᠭ ᠡᠭᠡᠯ ᠬᠠᠷᠠ ᠡᠷᠡ ᠪᠥᠭᠡᠳ ᠶᠠᠭᠤᠲᠠᠢ ᠡᠨᠡ ᠮᠡᠲᠦ ᠰᠣᠨᠢᠨ ᠭᠠᠢᠬᠠᠯᠲᠠᠢ ᠠᠵᠢ ! ᠠᠶᠠ ᠡᠷᠲᠡᠨ ᠦ᠌ ᠦᠭᠡᠰ ᠲᠣᠷ 《ᠪᠠᠷᠰ ᠢᠷᠪᠢᠰ ᠦ᠋ᠨ ᠰᠦᠷ ᠶᠡᠬᠡ ᠪᠥᠭᠡᠳ ᠬᠦᠴᠦᠨ ᠪᠠᠰᠠ ᠦᠯᠡᠮᠵᠢ ᠠᠲᠠᠯᠠ ᠪᠠᠰᠠ ᠮᠢᠷᠠᠬᠤ ᠲᠡᠪᠬᠡᠯᠡᠬᠦ ᠵᠠᠢᠯᠠᠬᠤ ᠭᠤᠯᠭᠤᠬᠤ ᠳ᠋ᠤᠷ ᠬᠡᠴᠡᠭᠦᠦ ᠬᠡᠮᠡᠬᠦ ᠢᠨᠦ ᠡᠭᠡᠨᠡᠭᠲᠡ ᠶᠡᠬᠡ ᠠᠮᠢᠲᠠᠨ ᠤ᠋ ᠲᠤᠢᠯ ᠤ᠋ᠨ ᠴᠢᠳᠠᠯ ᠂ ᠮᠢᠭᠤᠢ ᠂ ᠬᠤᠯᠤᠩᠰᠤ ᠂ ᠦᠨᠡᠭᠡ ᠂ ᠰᠢᠷᠠᠨᠤᠳ ᠤ᠋ᠨ ᠤᠷᠠᠨ ᠬᠡᠳᠦᠢ ᠬᠡᠲᠦᠷᠬᠡᠢ ᠪᠣᠯᠪᠠᠴᠤ ᠡᠭᠡᠨᠡᠭᠲᠡ ᠥᠴᠦᠬᠡᠨ ᠠᠳᠤᠭᠤᠰᠤ ᠂ ᠬᠡᠷᠡᠭ ᠦᠯᠦ ᠪᠦᠲᠦᠮᠦᠢ 》ᠬᠡᠮᠡᠵᠦᠬᠦᠢ᠃ ᠲᠡᠭᠦᠨᠴᠢᠯᠡᠬᠦ ᠡᠨᠡ ᠮᠤᠬᠤᠯᠢ ᠶ᠋ᠢᠨ ᠠᠷᠭᠠ ᠮᠡᠬᠡ ᠪᠠ ᠲᠤᠯᠭᠤᠷ ᠴᠢᠳᠠᠯ ᠢ᠋ ᠬᠡᠳᠦᠢ ᠭᠠᠳᠠᠭᠠᠳᠤ ᠤᠯᠤᠰ ᠣᠯᠵᠤ ᠮᠡᠳᠡᠬᠦᠶᠡ ᠪᠡᠷᠬᠡ ᠶ᠋ᠢ ᠴᠦ᠍ ᠪᠠᠢᠲᠤᠭᠠᠢ ᠂ ᠠᠳᠠᠭ ᠲᠠᠭᠠᠨ ᠥᠪᠡᠷ ᠦ᠋ᠨ ᠵᠠᠩᠵᠤᠨ ᠴᠡᠷᠢᠭ ᠴᠦ᠍ ᠤᠬᠠᠵᠤ ᠮᠥᠨ ᠲᠥᠰᠦᠭᠡᠯᠡᠬᠦ ᠦᠭᠡᠢ ᠪᠣᠯᠠᠢ᠃ ᠦᠨᠡᠭᠡ ᠰᠢᠷᠠᠨᠤᠳ ᠮᠡᠲᠦ ᠡᠭᠡᠯ ᠤᠳᠠᠭᠠᠨ ᠠᠷᠠᠳ ᠬᠡᠷᠬᠢᠨ ᠲᠤᠯᠵᠤ ᠪᠣᠯᠬᠤ ? ᠨᠡᠩ ᠪᠠᠰᠠ ᠨᠢᠭᠡᠨ ᠵᠦᠢᠯ ᠦ᠋ᠨ ᠰᠣᠨᠢᠨ ᠪᠠᠢᠬᠤ ᠠᠨᠤ ᠮᠤᠬᠤᠯᠢ ᠶᠡᠷᠦ ᠪᠢᠰᠢᠯᠭᠠᠯ ᠪᠠ ᠪᠠᠭᠰᠢ ᠶ᠋ᠢ ᠳᠠᠭᠠᠭᠰᠠᠨ ᠵᠦᠢᠯ ᠣᠭᠲᠣ ᠭᠠᠷᠤᠭᠰᠠᠨ ᠦᠭᠡᠢ ᠪᠥᠭᠡᠳ ᠨᠤᠮᠤ ᠶ᠋ᠢᠨ ᠬᠥᠪᠴᠢ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ ᠲᠥᠯᠭᠡᠯᠡᠨ ᠦᠵᠡᠬᠦ ᠶ᠋ᠢ ᠠᠯᠢ ᠵᠠᠪ ᠲᠤᠷ ᠰᠤᠷᠤᠭᠰᠠᠨ ᠪᠣᠯᠪᠠ ! ᠡᠨᠡ ᠳᠠᠷᠤᠢ ᠶᠡᠬᠡ ᠰᠠᠪᠠ ᠰᠤᠷᠤᠭᠰᠠᠨ ᠢ᠋ ᠡᠰᠡ ᠬᠠᠷᠠᠭᠤᠯᠬᠤ ᠠ᠋ᠴᠠ ᠪᠣᠯᠵᠤᠬᠤᠢ ᠃ ᠲᠡᠷᠡ ᠬᠡᠷᠪᠡ ᠲᠠᠢᠽᠦ ᠶ᠋ᠢᠨ ᠡᠨᠡ ᠤᠳᠠᠭᠠ ᠶ᠋ᠢᠨ ᠤᠴᠢᠯ ᠢ᠋ ᠡᠰᠡ ᠮᠡᠳᠡᠭᠰᠡᠨ ᠪᠥᠭᠡᠰᠦ ᠶᠠᠭᠤᠨ ᠳ᠋ᠤᠷ ᠣᠨᠴᠠ ᠬᠣᠷᠢᠭᠯᠠᠵᠤ ᠢᠯᠠᠬᠤ ᠬᠣᠶᠠᠷ ᠳᠡᠭᠦᠦ ᠶ᠋ᠢ ᠢᠨᠤ ᠳᠠᠭᠠᠭᠤᠯᠪᠠ ? ᠲᠡᠢᠨ ᠬᠦ᠌ ᠡᠨᠡ ᠮᠤᠬᠤᠯᠢ ᠮᠤᠬᠤᠷ ᠣᠯᠣᠭᠠᠢ ᠭᠣᠣᠯ ᠤ᠋ᠨ ᠠᠶᠤᠯ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠭᠰᠡᠨ ᠢᠨᠤ ᠢᠯᠡᠷᠡᠪᠡ᠂ ᠡᠨᠡ ᠤᠳᠠᠭᠠ ᠬᠡᠷᠪᠡ ᠮᠤᠬᠤᠯᠢ ᠲᠠᠢᠽᠦ ᠶ᠋ᠢᠨ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠪᠥᠭᠡᠰᠦ᠂ ᠲᠦᠮᠡᠯᠡᠪᠡᠴᠦ ᠲᠠᠢᠽᠦ ᠶ᠋ᠢ ᠲᠡᠷᠡ ᠭᠣᠣᠯ ᠳ᠋ᠤᠷ ᠣᠷᠣᠭᠤᠯᠬᠤ ᠦᠭᠡᠢ ᠪᠣᠯᠠᠢ ! ᠲᠡᠢᠨ ᠬᠦ᠌ ᠯᠤᠤ ᠪᠠᠷᠰ ᠡᠭᠦᠯᠡ ᠰᠠᠯᠬᠢᠨ ᠠ᠋ᠴᠠ ᠦᠯᠦ ᠠᠩᠭᠢᠵᠢᠷᠠᠮᠤᠢ ᠬᠡᠮᠡᠵᠦᠬᠦᠢ᠃ ᠪᠢᠴᠢᠭᠴᠢ ᠪᠢ ᠤᠭ ᠲᠤᠷ ᠡᠨᠡ ᠮᠡᠬᠡᠲᠦ ᠵᠠᠯᠢᠲᠤ ᠬᠡᠮᠡᠬᠦ ᠴᠣᠯᠠ ᠶ᠋ᠢ ᠦᠵᠡᠭᠡᠳ ᠯᠠᠪ ᠬᠥᠮᠦᠨ ᠳ᠋ᠦ᠍ᠷ ᠮᠡᠬᠡ ᠵᠠᠯᠢ ᠬᠡᠷᠡᠭᠯᠡᠬᠦᠢ ᠳ᠋ᠦ᠍ᠷ ᠡᠷᠭᠦᠪᠡᠢ ᠶᠠ ᠬᠡᠮᠡᠭᠰᠡᠨ ᠪᠥᠯᠥᠭᠡ ᠂ ᠭᠡᠳᠡᠷᠭᠦ ᠬᠠᠷᠢᠨ ᠬᠥᠮᠦᠨ ᠦ᠌ ᠮᠡᠬᠡ ᠵᠠᠯᠢ ᠳ᠋ᠤᠷ ᠮᠥᠬᠥᠭᠰᠡᠨᠡ ᠡᠷᠭᠦᠭᠰᠡᠨ ᠴᠣᠯᠠ ᠠᠵᠤᠭᠤ ! ᠵᠢᠴᠢ ᠲᠠᠢᠽᠦ ᠶ᠋ᠢᠨ ᠴᠢᠬᠤᠯ ᠪᠠᠴᠢᠮ ᠠᠶᠤᠯ ᠳ᠋ᠤᠷ ᠠᠯᠲᠠᠨ ᠯᠤᠤ ᠂ ᠭᠠᠯ ᠠᠶᠤᠩᠭᠠ ᠢᠯᠡᠷᠡᠭᠰᠡᠨ ᠡᠨᠡ ᠬᠡᠷᠡᠭ ᠢ᠋ ᠪᠦᠦ ᠢᠲᠡᠭᠡᠰᠦᠭᠡᠢ ᠬᠡᠮᠡᠬᠦᠯᠡ ᠂ ᠡᠷᠲᠡᠨ ᠦ᠌ ᠳ᠋ᠦᠩ ᠵᠦᠸᠧ ᠶ᠋ᠢ ᠠᠯᠠᠬᠤ ᠰᠢᠬᠠᠭᠰᠠᠨ ᠳ᠋ᠤᠷ ᠪᠠᠰᠠ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠮᠠᠭᠤ ᠢᠷᠣᠠ ᠵᠢᠭᠠᠵᠤ ᠬᠣᠷᠢᠭ᠍ᠯᠠᠪᠠ᠃ ᠡᠳᠦᠭᠡ ᠶ᠋ᠢᠨ ᠵᠠᠮᠤᠬᠠ ᠪᠠᠷᠢᠭᠳᠠᠬᠤ ᠰᠢᠬᠠᠲᠠᠯᠠ ᠪᠠᠰᠠ ᠣᠭᠣᠯᠢ ᠰᠡᠷᠭᠦᠭᠡᠵᠦ᠂ ᠮᠣᠷᠢ ᠪᠦᠳᠦᠷᠢᠵᠦ ᠠᠪᠤᠷᠠᠨ ᠭᠠᠷᠭᠠᠪᠠ᠃ ᠡᠳᠡᠭᠡᠷ ᠥᠴᠦᠬᠡᠨ ᠮᠠᠭᠤ ᠠᠷᠠᠳ ᠲᠤᠷ ᠪᠠᠰᠠ ᠨᠢᠭᠡᠨ ᠵᠦᠢᠯ ᠦ᠋ᠨ ᠬᠠᠮᠠᠭᠠᠯᠠᠯ ᠪᠠᠢᠬᠤ ᠲᠤᠯᠠ ᠨᠢᠭᠡᠨ ᠶᠡᠬᠡ ᠤᠯᠤᠰ ᠨᠡᠭᠡᠭᠡᠵᠦ ᠳᠡᠯᠡᠬᠡᠢ ᠳ᠋ᠠᠬᠢᠨ ᠪᠠᠢᠭᠤᠯᠬᠤ ᠪᠣᠭᠳᠠ ᠬᠠᠳ ᠢ᠋ ᠡᠷᠬᠡᠪᠰᠢ ᠪᠠᠰᠠ ᠨᠢᠭᠡᠨ ᠵᠦᠢᠯ ᠦ᠋ᠨ ᠡᠵᠡᠳ ᠰᠠᠬᠢᠭᠤᠯᠰᠤᠨ ᠲᠠᠭᠠᠯᠴᠠᠨ ᠬᠠᠮᠠᠭᠠᠯᠠᠬᠤ ᠶ᠋ᠢ ᠬᠡᠷᠬᠢᠨ ᠦᠭᠡᠢ ᠪᠣᠯᠭᠠᠵᠤ ᠪᠣᠯᠤᠮᠤᠢ ! ᠲᠡᠢᠨ ᠬᠦ᠌ ᠡᠷᠲᠡᠨ ᠦ᠌ ᠪᠣᠭᠳᠠ ᠸᠧᠨ ᠸᠠᠩ ᠠᠶᠤᠩᠭᠠ ᠶ᠋ᠢᠨ ᠭᠡᠷᠡᠯ ᠡᠴᠡ ᠯᠧᠢ ᠵᠧᠨ ᠽᠢ ᠶ᠋ᠢ ᠣᠯᠵᠤ ᠠᠪᠴᠤᠬᠤᠢ᠃