ᠣᠷᠣᠢ ᠦᠭᠡᠢ ᠰᠦᠮᠡ – ᠶᠢᠰᠦ ᠂ ᠵᠣᠯᠢᠶᠠᠰᠤᠨ ᠳᠤ ᠭᠠᠷᠤᠭᠰᠠᠨ ᠰᠦᠵᠢᠭᠲᠡᠨ Оройгүй сүм – Ес ᠂ Зольнйсэнд гарсан сүжигтэн - Oroigui sum 9
880ᠶᠢᠰᠦ ᠂ ᠵᠣᠯᠢᠶᠠᠰᠤᠨ ᠳᠤ ᠭᠠᠷᠤᠭᠰᠠᠨ ᠰᠦᠵᠢᠭᠲᠡᠨ
ᠬᠤᠷᠢᠮ ᠳ᠋ᠤ᠌ ᠬᠤᠪᠴᠠᠰᠤ ᠦᠭᠡᠢ ᠬᠡᠦᠬᠡᠨ ᠦᠨᠡ ᠦᠭᠡᠢ
ᠬᠤᠷᠠᠯ ᠳ᠋ᠤ᠌ ᠨᠣᠮ ᠦᠭᠡᠢ ᠪᠠᠨᠳᠢ ᠦᠨᠡ ᠦᠭᠡᠢ
ᠬᠤᠳᠠᠯᠳᠤᠭᠠᠨ ᠳ᠋ᠤ᠌ ᠰᠢᠳᠦ ᠦᠭᠡᠢ ᠲᠡᠮᠡᠭᠡ ᠦᠨᠡ ᠦᠭᠡᠢ
ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠱᠠᠪᠲᠠᠩ ᠪᠠᠲᠤᠳᠬᠠᠬᠤ ᠶᠣᠰᠣᠯᠠᠯ ᡀᠠᠰᠠ ᠵᠣᠣ ᠳ᠋ᠤ᠌ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠰᠠᠷᠠ ᠶᠢᠨ ᠢ᠋ᠶ᠋ᠠᠨ ᠨᠢᠭᠤᠷ ᠦᠵᠡᠵᠦ ᠣᠨ ᠤ᠋ ᠲᠡᠷᠢᠭᠦᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠶᠢᠰᠦᠨ ᠦ᠌ ᠡᠳᠦᠷ ᠲᠡᠢ ᠵᠣᠯᠭᠠᠯᠠ᠃ ᠡᠨᠡ ᠡᠳᠦᠷ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠠᠮᠢᠨ ᠤ᠋ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠥᠭᠡᠷᠡ ᠨᠢᠭᠡᠨ ᠬᠥᠮᠦᠨ ᠢ ᠲᠥᠯᠦᠭᠡᠯᠡᠭᠦᠯᠦᠨ ᠵᠣᠯᠢᠭ ᠲᠤ᠌ ᠭᠠᠷᠭᠠᠳᠠᠭ ᠤᠯᠠᠮᠵᠢᠯᠠᠯ ᠲᠠᠢ ᠠᠵᠢ᠃
ᠲᠡᠷᠡ ᠥᠷᠯᠥᠭᠡ ᠭᠡᠰᠦᠯ ᠰᠠᠩᠵᠠᠢ ᠶᠢ ᠭᠡᠯᠦᠩ ᠪᠠᠭᠰᠢ ᠨᠢ ᠦᠷ ᠴᠦᠷ ᠢ᠋ᠶ᠋ᠡᠷ ᠡᠷᠲᠡᠯᠡᠨ ᠪᠤᠰᠬᠠᠵᠠᠢ᠃ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨ ᠳ᠋ᠤ᠌ ᠶᠠᠭᠠᠷᠠᠭᠰᠠᠨ ᠪᠣᠯᠤᠯᠲᠠᠢ᠃
– ᠵᠠ ᠥᠨᠥᠳᠥᠷ ᠰᠢᠨᠡ ᠶ᠋ᠢᠨ ᠬᠣᠷᠢᠨ ᠶᠢᠰᠦᠨ᠃ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠨᠠᠰᠤ ᠶ᠋ᠢ ᠤᠷᠲᠤᠰᠬᠠᠬᠤ ᠶᠢᠨ ᠪᠡᠯᠭᠡᠳᠡᠯ ᠪᠣᠯᠭᠠᠵᠤ ᠰᠦᠵᠢᠭᠳᠡᠨ ᠣᠯᠠᠨ ᠤ᠋ ᠳᠣᠲᠣᠷᠠ ᠠ᠋ᠴᠠ ᠬᠡᠨ ᠨᠢᠭᠡᠨ ᠢ᠋ ᠵᠣᠯᠢᠭ ᠲᠤ᠌ ᠭᠠᠷᠭᠠᠳᠠᠭ ᠪᠤᠶᠠᠨ ᠲᠠᠢ ᠡᠳᠦᠷ᠃ ᠭᠣᠣᠯ ᠲᠥᠯᠥᠪ ᠨᠢᠭᠦᠯ ᠲᠡᠢ ᠶᠠᠳᠠᠭᠤᠰ ᠠ᠋ᠴᠠ ᠵᠣᠯᠢᠭ ᠲᠤ᠌ ᠭᠠᠷᠭᠠᠳᠠᠭ ᠶᠤᠮ᠃ ᠶᠡᠬᠡ ᠪᠤᠶᠠᠨᠲᠤ ᠦᠢᠯᠡᠰ ᠰᠢᠦ! ᠭᠡᠵᠦ ᠶᠠᠷᠢᠪᠠ᠃ ᠡᠨᠡ ᠡᠳᠦᠷ ᠦ᠋ᠳ ᠲᠦ᠍ ᠭᠡᠯᠦᠩ ᠪᠠᠭᠰᠢ ᠨᠢ ᠨᠢᠭᠡ ᠯᠡ ᠭᠠᠢᠬᠠᠮᠠᠷ ᠪᠠᠢᠳᠠᠯ ᠲᠠᠢ ᠪᠣᠯᠤᠭᠰᠠᠨ ᠢ᠋ ᠰᠠᠩᠵᠢ ᠭᠡᠰᠦᠯ ᠬᠡᠳᠦᠢ ᠨᠢ ᠠᠵᠢᠵᠤ ᠮᠡᠳᠡᠭᠰᠡᠨ ᠪᠢᠯᠡ᠃ ᠪᠠᠭᠰᠢ ᠯᠠᠮᠠ ᠨᠢ ᠰᠢᠲᠦᠭᠡᠨ ᠦ᠌ ᠭᠠᠵᠠᠷ ᠤ᠋ᠳ ᠢ᠋ ᠴᠥᠮ ᠢ᠋ ᠲᠣᠭᠣᠷᠢᠨ ᠭᠦᠢᠴᠡᠭᠡᠵᠦ ᠡᠷᠭᠢᠯ ᠮᠥᠷᠭᠥᠯ ᠬᠢᠵᠦ ᠪᠠᠢᠳᠠᠭ ᠮᠥᠩᠭᠥ ᠪᠡᠨ ᠡᠷᠭᠦᠵᠦ ᠭᠦᠢᠴᠡᠵᠡᠢ᠃ ᠲᠡᠭᠡᠭᠡᠳ ᠥᠴᠥᠭᠡᠳᠦᠷ ᠣᠷᠣᠢ ᠭᠡᠰᠦᠯ ᠰᠠᠩᠵᠢ ᠳ᠋ᠤ᠌ ᠬᠡᠳᠦᠨ ᠯᠠᠩ ᠮᠥᠩᠭᠥ ᠥᠭᠴᠦ᠂
– ᠵᠠ ᠪᠠᠭᠰᠢ ᠳ᠋ᠤ᠌ ᠨᠢ ᠪᠠᠷᠤᠭ ᠮᠥᠩᠭᠥ ᠦᠯᠡᠳᠡᠭᠰᠡᠨ ᠦᠭᠡᠢ᠃ ᠪᠤᠶᠠᠨ ᠤ᠋ ᠦᠢᠯᠡᠰ ᠲᠦ᠍ ᠥᠭᠭᠦᠭᠰᠡᠭᠡᠷ ᠪᠠᠢᠭᠠᠳ ᠱᠠᠪᠢ ᠳᠠᠭᠠᠨ ᠶᠠᠭᠤᠮᠠ ᠦᠭᠡᠢ ᠰᠢᠬᠠᠮ ᠦᠯᠡᠲᠡᠯᠡ᠃ ᠭᠡᠬᠦ ᠳ᠋ᠡᠭᠡᠨ ᠱᠠᠪᠢ ᠮᠠᠨᠢ ᠬᠦᠰᠡᠭᠰᠡᠨ ᠳ᠋ᠠᠴᠠᠩ ᠳᠠᠭᠠᠨ ᠵᠣᠬᠢᠬᠤ ᠵᠢᠩᠳᠠᠭᠠᠨ ᠳ᠋ᠠᠭᠠᠨ ᠣᠷᠣᠵᠤ ᠱᠠᠪᠢᠯᠠᠨ ᠰᠠᠭᠤᠭᠰᠠᠨ ᠪᠣᠯᠬᠣᠷ ᠥᠭᠡᠷᠡ ᠶᠠᠭᠤ ᠬᠦᠰᠡᠬᠦ ᠪᠣᠢ? ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠪᠴᠤ ᠥᠭᠭᠦᠭᠰᠡᠨ ᠬᠠᠰᠢᠶᠠ ᠪᠠᠢᠰᠢᠩ ᠳ᠋ᠤ᠌ ᠡᠵᠡᠨ ᠪᠣᠯᠵᠤ ᠲᠤᠬᠠᠲᠠᠢ ᠰᠠᠭᠤᠭᠠᠳ ᠨᠣᠮ ᠤ᠋ᠨ ᠮᠥᠷ ᠬᠥᠭᠡᠭᠡᠵᠦ ᠡᠷᠳᠡᠮ ᠦ᠋ᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠨᠡ ᠪᠢᠵᠡ! ᠭᠡᠵᠡᠢ᠃
– ᠪᠠᠭᠰᠢ ᠪᠠᠨ᠂ ᠲᠠ ᠶᠠᠭᠠᠬᠢᠭᠠᠳ ᠡᠢᠮᠦ ᠦᠭᠡ ᠬᠡᠯᠡᠵᠦ ᠪᠠᠢᠭᠠ ᠶᠤᠮ ᠪᠣᠢ? ᠨᠠᠮᠢ᠋ᠢ ᠣᠷᠬᠢᠭᠠᠳ ᠨᠤᠲᠤᠭ ᠲᠤ᠌ ᠪᠠᠨ ᠪᠤᠴᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠤᠤ? ᠭᠡᠵᠦ ᠰᠠᠩᠵᠢ ᠶᠢ ᠭᠠᠢᠬᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠭᠡᠯᠦᠩ ᠲᠦᠭᠳᠡᠷᠡᠭᠰᠡᠨ ᠢ᠋ᠶ᠋ᠡᠨ᠂
– ᠦᠭᠡᠢ ᠯᠠ ᠳᠠ ᠁ ᠨᠤᠲᠤᠭ ᠪᠤᠴᠠᠬᠤ ᠦᠭᠡᠢ ᠁ ᠭᠡᠬᠦ ᠳ᠋ᠡᠭᠡᠨ ᠱᠠᠪᠢ ᠴᠢᠮᠢ᠋ᠢ ᠪᠠᠨ ᠪᠤᠷᠬᠠᠨ ᠤ᠋ ᠬᠣᠲᠠᠨ ᠳ᠋ᠦ᠍ ᠣᠷᠭᠢᠨᠠ ! ᠁ ᠭᠡᠵᠦ ᠬᠡᠯᠡᠭᠡᠳ ᠬᠣᠭᠣᠯᠠᠢ ᠨᠢ ᠦᠯᠦ ᠮᠡᠳᠡᠭ ᠴᠡᠴᠡᠷᠭᠡᠨᠡᠭᠰᠡᠨ ᠪᠣᠯᠪᠠᠴᠤ ᠪᠡᠶᠡ ᠪᠡᠨ ᠪᠠᠷᠢᠯᠠ᠃
– ᠪᠢ ᠲᠠᠨ ᠠ᠋ᠴᠠ ᠬᠣᠯᠠᠳᠠᠮᠠᠷ ᠦᠭᠡᠢ ᠪᠠᠢᠨᠠ! ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠬᠡᠯᠡᠬᠦ ᠳ᠋ᠦ᠍ ᠭᠡᠯᠦᠩ᠂
– ᠬᠣᠯᠠᠳᠠᠨᠠ ᠴᠤ᠌ ᠭᠡᠵᠦ ᠬᠣᠯᠠᠳᠠᠳᠠᠭ ᠦᠭᠡᠢ ᠶᠦᠮ᠃ ᠬᠣᠶᠠᠷ ᠵᠠᠮ ᠤ᠋ᠨ ᠡᠷᠬᠡ ᠪᠡᠷ ᠯᠠ ᠬᠣᠯᠠᠳᠠᠳᠠᠭ ᠶᠤᠮ᠃ ᠣᠳᠣ ᠴᠢ ᠬᠥᠮᠦᠨ ᠦ᠌ ᠵᠡᠷᠭᠡ ᠳ᠋ᠦ᠍ ᠬᠦᠷᠴᠡᠢ᠃ ᠪᠡᠶᠡ ᠪᠡᠨ ᠳᠠᠭᠠᠭᠠᠨ ᠡᠷᠳᠡᠮ ᠦ᠋ᠨ ᠮᠥᠷ ᠬᠥᠭᠡᠭᠡᠨᠡ ᠪᠢᠵᠡ᠃ ᠮᠠᠭᠤ ᠡᠵᠢ᠂ ᠠᠪᠤ ᠴᠢᠨᠢ ᠴᠢᠮᠢ᠋ᠢ ᠰᠠᠢᠨ ᠯᠠᠮᠠ ᠪᠣᠯᠪᠠᠯ ᠪᠦᠬᠦᠢ ᠯᠡ ᠰᠠᠨᠠᠭᠰᠠᠨ ᠰᠠᠨᠠᠭᠠ ᠪᠠᠨ ᠪᠦᠲᠦᠭᠡᠯᠡ ᠭᠡᠵᠦ ᠠᠮᠢᠳᠤ ᠶ᠋ᠢᠨ ᠵᠢᠷᠭᠠᠯ ᠡᠳ᠋ᠯᠡᠨᠡ᠃ ᠪᠤᠷᠬᠠᠨ ᠤ᠋ ᠦᠨᠡᠨᠴᠢ ᠱᠠᠪᠢ ᠨᠠᠷ ᠤ᠋ᠨ ᠲᠣᠭᠠ ᠶᠢ ᠨᠢᠭᠡ ᠪᠡᠷ ᠨᠡᠮᠡᠭᠳᠡᠭᠦᠯᠪᠡᠯ ᠶᠠᠳᠠᠭᠤ ᠡᠷᠡ ᠡᠮᠡ ᠬᠣᠶᠠᠷ ᠤ᠋ᠨ ᠦᠢᠯᠡᠰ ᠪᠦᠲᠦᠬᠦ ᠨᠢ ᠲᠡᠷᠡ ᠠ᠋᠃ ᠡᠢᠮᠦ ᠳ᠋ᠦ᠍ ᠴᠢ ᠰᠠᠶᠢᠨ ᠯᠠᠮᠠ ᠪᠣᠯᠬᠤ ᠶᠣᠰᠣᠲᠠᠢ᠃ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠢᠷᠡᠭᠰᠡᠨ ᠪᠣᠯᠬᠣᠷ ᠪᠤᠷᠬᠠᠨ ᠤ᠋ ᠨᠣᠮ ᠰᠤᠷᠭᠠᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠃ ᠬᠢᠴᠢᠶᠡᠵᠦ ᠦᠵᠡ! ᠴᠢ ᠰᠠᠢᠨ ᠯᠠᠮᠠ ᠪᠣᠯᠣᠨᠠ᠃ ᠡᠬᠡ ᠡᠴᠡ ᠲᠥᠷᠥᠬᠦ ᠳ᠋ᠦ᠍ ᠴᠢᠨᠢ ᠨᠣᠮ ᠨᠡᠭᠡᠭᠡᠵᠦ ᠦᠵᠡᠬᠦ ᠳ᠋ᠦ᠍ ᠰᠠᠢᠨ ᠯᠠᠮᠠ ᠪᠣᠯᠬᠤ ᠲᠥᠭᠡᠷᠭᠡ ᠲᠣᠳᠣᠷᠠᠭᠰᠠᠨ᠃ ᠭᠡᠬᠦ ᠳ᠋ᠡᠭᠡᠨ ᠰᠠᠭᠠᠳ ᠪᠠᠷᠴᠠᠳ ᠪᠤᠢ᠃ ᠴᠢᠨᠠᠳᠤ ᠶᠢᠨ ᠵᠤᠳ᠋ ᠨᠢᠮᠪᠠ ᠵᠢᠩᠳᠠᠭᠠ ᠶ᠋ᠢ ᠳᠦᠭᠦᠷᠭᠡᠬᠦ ᠦᠶᠡ ᠳᠡᠬᠡᠨ ᠪᠤᠰᠤᠳ ᠤ᠋ᠨ ᠠᠲᠠᠭᠠ ᠬᠣᠷᠣᠰᠤᠯ ᠳᠤ ᠬᠥᠨᠦᠭᠡᠭᠳᠡᠬᠦ ᠦᠭᠡᠢ ᠶ᠋ᠢ ᠪᠣᠳᠣᠵᠤ ᠪᠣᠯᠭᠣᠮᠵᠢ ᠲᠠᠢ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠵᠠ ᠥᠭᠡᠷᠡ ᠪᠢ ᠶᠠᠭᠤ ᠵᠠᠬᠢᠬᠤ ᠪᠤᠢ? ᠢᠩᠭᠢᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠶᠠᠪᠤᠵᠤ ᠯᠤᠭᠤᠨ ᠦᠵᠡᠶᠡ! ᠭᠡᠵᠦ ᠬᠡᠯᠡᠵᠡᠢ᠃
ᠰᠠᠩᠵᠢ ᠭᠡᠰᠦᠯ ᠲᠡᠭᠦᠨ ᠦ᠌ ᠶᠠᠷᠢᠭᠠ ᠶ᠋ᠢ ᠲᠣᠭᠲᠠᠭᠠᠨ ᠰᠣᠨᠣᠰᠤᠭᠠᠳ ᠮᠥᠨ ᠯᠡ ᠭᠠᠢᠬᠠᠨ ᠡᠷᠡᠭᠡᠯᠵᠡᠭᠰᠡᠭᠡᠷ ᠪᠠᠢᠯᠠ᠃ 《ᠠᠲᠠᠭᠠ ᠬᠣᠣᠷᠯᠠᠯ ᠭᠡᠵᠦ ᠶᠠᠭᠤ ᠶᠠᠷᠢᠪᠠ ᠠ?》 ᠭᠡᠵᠦ ᠰᠠᠩᠵᠢ ᠪᠣᠳᠣᠪᠠ᠃
ᠯᠤᠭᠤᠨ ᠭᠡᠳᠡᠭ ᠪᠣᠯ ᠠᠪᠤᠷᠠᠭᠴᠢ ᠶᠡᠬᠡ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠠᠮᠢ ᠨᠠᠰᠤᠨ ᠤ᠋ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠬᠡᠨ ᠨᠢᠭᠡᠨ ᠢ᠋ ᠭᠠᠷᠭᠠᠬᠤ ᠶᠣᠰᠣᠯᠠᠯ ᠪᠠᠢᠯᠠ᠃ ᠪᠤᠳᠠᠯᠠᠩ ᠤ᠋ᠨ ᠣᠷᠳᠣᠨ ᠤ᠋ ᠡᠮᠦᠨᠡ ᠲᠠᠯᠠᠪᠠᠢ ᠳᠡᠭᠡᠷᠡ ᠯᠣᠭᠣᠨ ᠦᠵᠡᠬᠦ ᠪᠡᠷ ᠣᠯᠠᠨ ᠮᠢᠩᠭᠠᠨ ᠮᠥᠷᠭᠥᠯᠴᠢᠳ ᠯᠠᠮᠠ ᠨᠠᠷ ᠴᠤᠭᠯᠠᠷᠠᠭᠰᠠᠨ ᠪᠠᠢᠯᠠ᠃ ᠯᠠᠮᠠ ᠨᠠᠷ ᠲᠠᠷᠨᠢ ᠶ᠋ᠢᠨ ᠶᠣᠰᠣᠨ ᠤ᠋ ᠬᠤᠪᠴᠠᠰᠤ ᠪᠠᠷ ᠥᠪᠴᠢ ᠪᠦᠷᠢᠨ ᠡᠮᠦᠰᠬᠡᠯ ᠲᠡᠢ ᠪᠠᠢᠯᠠ᠃
ᠲᠠᠪᠴᠠᠩ ᠳᠡᠭᠡᠷᠡ ᠯᠤᠭᠤᠨ ᠪᠤᠶᠤ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠭᠠᠷᠬᠤ ᠬᠥᠮᠦᠨ ᠢ᠋ ᠠᠪᠴᠢᠷᠠᠪᠠ᠃ ᠴᠠᠭᠠᠨ ᠢᠮᠠᠭᠠᠨ ᠤ᠋ ᠠᠷᠠᠰᠤᠨ ᠳᠡᠪᠡᠯ ᠦ᠋ᠨ ᠦᠰᠦ ᠶ᠋ᠢ ᠭᠠᠳᠠᠭᠰᠢ ᠡᠷᠭᠢᠭᠦᠯᠦᠨ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠨᠢᠭᠤᠷ ᠤᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢ ᠴᠠᠭᠠᠨ᠂ ᠵᠡᠭᠦᠨ ᠲᠠᠯᠠ ᠶ᠋ᠢ ᠬᠠᠷᠠ ᠪᠣᠳᠣᠭ ᠢ᠋ᠶ᠋ᠠᠷ ᠪᠣᠳᠣᠵᠠᠢ᠃ᠲᠣᠯᠣᠭᠠᠢ ᠳ᠋ᠤ᠌ ᠨᠢ ᠵᠢᠵᠢᠭᠬᠡᠨ ᠳᠤᠭᠤᠯᠠᠭᠠ ᠡᠮᠦᠰᠬᠡᠵᠡᠢ᠃ ᠭᠠᠷ ᠲᠤ᠌ ᠨᠢ ᠰᠠᠷᠯᠤᠭ ᠤ᠋ᠨ ᠬᠠᠷᠠ ᠰᠡᠭᠦᠯ ᠪᠠᠷᠢᠭᠤᠯᠵᠠᠢ᠃ ᠱᠣᠳᠯᠠᠭᠠ ᠬᠢᠬᠦ ᠪᠡᠷ ᠨᠢᠭᠡᠨ ᠯᠠᠮᠠ ᠶ᠋ᠢ ᠪᠠᠰᠠ ᠲᠡᠷᠡ ᠬᠦ᠌ ᠵᠣᠯᠢᠭ ᠲᠤ᠌ ᠭᠠᠷᠭᠠᠬᠤ ᠬᠦᠮᠦᠨ ᠲᠡᠢ ᠬᠠᠮᠲᠤ ᠲᠠᠪᠴᠠᠩ ᠳ᠋ᠤ᠌ ᠵᠣᠭᠰᠣᠭᠠᠭᠠᠳ ᠴᠠᠭᠠᠨ ᠨᠦᠬᠡ ᠲᠡᠢ ᠳᠡᠰ ᠬᠠᠷᠠ ᠱᠣ ᠶ᠋ᠢ ᠠᠪᠴᠢᠷᠠᠯᠠ᠃ ᠯᠤᠭᠤᠨ ᠪᠣᠯᠬᠤ ᠬᠥᠮᠦᠨ ᠱᠣᠳᠤᠭᠴᠢ ᠯᠠᠮᠠ ᠬᠣᠶᠠᠷ ᠱᠣ ᠶ᠋ᠢ ᠡᠭᠡᠯᠵᠢᠯᠡᠨ ᠣᠷᠬᠢᠵᠤ ᠡᠬᠢᠯᠡᠪᠡ᠃ ᠭᠤᠷᠪᠠ ᠳᠠᠬᠢᠨ ᠱᠣ ᠣᠷᠬᠢᠬᠤ ᠳ᠋ᠤ᠌ ᠯᠤᠭᠤᠨ ᠪᠣᠯᠬᠤ ᠬᠦᠮᠦᠨ ᠤ ᠬᠢ ᠴᠥᠭᠡᠨ ᠨᠦᠬᠡ ᠲᠡᠢ᠂ ᠡᠰᠡᠷᠭᠦ ᠯᠠᠮᠠ ᠶ᠋ᠢᠨ ᠬᠢ ᠨᠢ ᠣᠯᠠᠨ ᠨᠦᠬᠡ ᠲᠡᠢ ᠪᠡᠷ ᠢ᠋ᠶ᠋ᠡᠨ ᠲᠠᠭᠠᠷᠠᠵᠤ ᠪᠠᠢᠯᠠ᠃
ᠭᠤᠷᠪᠠᠨᠲᠠ ᠣᠷᠬᠢᠭᠰᠠᠨ ᠱᠣ ᠶᠢᠨ ᠨᠡᠢᠯᠡᠪᠦᠷᠢ ᠨᠦᠬᠡᠨ ᠦ᠌ ᠲᠣᠭᠠ ᠪᠠᠷ ᠠᠷᠭᠠ ᠦᠭᠡᠢ ᠯᠡ ᠯᠤᠭᠤᠨ ᠪᠣᠯᠬᠤ ᠬᠥᠮᠥᠨ ᠢᠯᠠᠭᠳᠠᠯᠠ᠃ ᠲᠡᠭᠡᠬᠦ ᠳ᠋ᠦ᠍ ᠲᠡᠷᠡ ᠪᠡᠷ ᠠᠭᠤᠷᠯᠠᠬᠤ ᠳᠦᠷᠢ ᠦᠵᠡᠭᠦᠯᠵᠦ ᠤᠤᠯ ᠱᠣ ᠶᠢ ᠠᠭᠤᠷᠲᠠᠶᠠ ᠳᠡᠪᠰᠡᠪᠡ᠃ ᠡᠨᠡ ᠨᠢ ᠢᠯᠠᠭᠳᠠᠯ ᠢ᠋ᠶ᠋ᠠᠨ ᠬᠦᠯᠢᠶᠡᠭᠰᠡᠨ ᠦ᠌ ᠳᠣᠬᠢᠶᠠ ᠶᠤᠮ᠃ ᠱᠣ ᠶ᠋ᠢ ᠠᠭᠤᠷᠯᠠᠨ ᠳᠡᠪᠰᠡᠴᠢᠬᠡᠭᠡᠳ ᠯᠤᠭᠤᠨ ᠪᠣᠯᠬᠤ ᠬᠥᠮᠦᠨ ᠪᠠᠷᠠᠭᠤᠨ ᠤᠷᠤᠭᠰᠢ ᠪᠠᠨ ᠵᠢᠭᠤᠲᠠᠨ ᠭᠦᠶᠦᠯᠡ᠃ ᠲᠠᠷᠨᠢ ᠶᠢᠨ ᠨᠣᠮ ᠤᠷᠢᠵᠤ ᠪᠠᠢᠭᠰᠠᠨ ᠯᠠᠮᠠ ᠨᠠᠷ ᠳᠤᠨᠢᠯᠭᠠᠨ ᠬᠥᠭᠡᠭᠡᠬᠦ ᠶ᠋ᠢ ᠪᠡᠯᠭᠡᠳᠡᠭᠰᠡᠨ ᠪᠥᠵᠢᠭ ᠬᠢᠵᠦ ᠭᠠᠷ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠯᠳᠡᠪ ᠳᠣᠬᠢᠶᠠ ᠵᠠᠩᠭᠠᠭᠠ ᠦᠵᠡᠭᠦᠯᠦᠨ ᠴᠣᠪᠬᠣᠴᠢᠵᠤ ᠡᠬᠢᠯᠡᠪᠡ᠃ ᠲᠡᠳᠡᠨ ᠦ ᠳᠦᠪᠴᠢᠭᠢᠨᠡᠵᠦ ᠡᠬᠢᠯᠡᠬᠦ ᠦᠶᠡ ᠪᠡᠷ ᠲᠣᠬᠣᠢ ᠥᠨᠳᠥᠷ ᠰᠤᠷ᠂ ᠮᠥᠨ ᠲᠡᠢᠮᠦ ᠪᠡᠷ ᠬᠢᠭᠰᠡᠨ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠳᠦᠷᠰᠦ ᠬᠣᠶᠠᠷ ᠢ᠋ ᠲᠤᠰᠬᠠᠢ ᠲᠠᠪᠠᠭ ᠲᠤ ᠲᠠᠯᠪᠢᠭᠠᠳ ᠠᠪᠴᠤ ᠢᠷᠡᠵᠡᠢ᠃ ᠴᠠᠮᠨᠠᠨ ᠪᠦᠵᠢᠭᠯᠡᠵᠦ ᠳᠠᠭᠤᠰᠤᠭᠰᠠᠨ ᠯᠠᠮᠠ ᠨᠠᠷ ᠵᠢᠭᠤᠲᠠᠭᠠᠵᠤ ᠶᠠᠪᠤᠭᠠ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠭᠠᠷᠬᠤ ᠬᠥᠮᠦᠨ ᠦ ᠬᠣᠢᠨᠠ ᠠ᠋ᠴᠠ ᠬᠥᠭᠡᠭᠡᠵᠦ ᠡᠬᠢᠯᠡᠪᠡ᠃ ᠦᠢ ᠮᠥᠷᠡᠨ ᠦ᠌ ᠬᠥᠪᠡᠭᠡ ᠬᠦᠷᠲᠡᠯᠡ ᠲᠡᠳᠡ ᠬᠥᠭᠡᠭᠡᠴᠡᠯᠳᠦᠪᠡ᠃ ᠲᠡᠭᠡᠲᠡᠯᠡ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠭᠠᠷᠬᠤ ᠡᠷᠡ ᠭᠠᠳᠠᠭᠤᠷ ᠬᠠᠴᠢᠨ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠵᠤ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠬᠠᠶᠠᠭᠠᠳ ᠵᠠᠪᠢᠨ ᠳ᠋ᠤ᠌ ᠰᠠᠭᠤᠵᠤ ᠭᠣᠣᠯ ᠤᠷᠤᠭᠤᠳᠠᠨ ᠲᠡᠮᠡᠦᠯᠪᠡ᠃
ᠢᠩᠭᠢᠵᠦ ᠪᠠᠰᠠ ᠨᠢᠭᠡᠨ ᠡᠩ ᠦ᠋ᠨ ᠯᠠᠮᠠ ᠶ᠋ᠢ ᠪᠣᠭᠳᠠ ᠡᠵᠡᠨ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠱᠠᠪᠲᠠᠩ ᠪᠠᠲᠤᠳᠬᠠᠬᠤ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠭᠠᠷᠭᠠᠪᠠ᠃ ᠣᠷᠣ ᠶᠢᠨ ᠨᠢ ᠬᠥᠮᠦᠨ ᠢ᠋ ᠡᠷᠯᠢᠭ ᠲᠦ᠍ ᠶᠠᠪᠤᠭᠤᠯᠴᠢᠬᠠᠭᠰᠠᠨ ᠪᠣᠯᠬᠣᠷ ᠲᠡᠳᠡᠨ ᠦ᠌ ᠨᠠᠰᠤ ᠤᠷᠲᠤᠳᠴᠤ᠂ ᠥᠯᠮᠡᠢ ᠨᠢ ᠪᠠᠲᠤ ᠣᠷᠣᠰᠢᠵᠤ ᠬᠣᠢᠲᠤᠨ ᠵᠢᠯ ᠦᠨ ᠡᠳᠦᠢ ᠬᠦᠷᠲᠡᠯᠡ ᠶᠠᠮᠠᠷ ᠴᠤ᠌ ᠠᠲᠤᠭᠠᠢ ᠭᠠᠢ ᠵᠣᠪᠠᠯᠠᠩ ᠲᠣᠬᠢᠶᠠᠯᠳᠤᠬᠤ ᠦᠭᠡᠢ ᠭᠡᠵᠦ ᠰᠦᠵᠢᠭᠲᠡᠨ ᠣᠯᠠᠨ ᠴᠥᠮ ᠢᠲᠡᠭᠡᠯ ᠳᠦᠭᠦᠷᠡᠩ ᠪᠣᠯᠤᠭᠠᠳ ᠪᠠᠶᠠᠷᠲᠠᠢ ᠪᠠᠷ ᠲᠠᠷᠠᠯᠠ᠃ ᠡᠳᠡᠭᠡᠷ ᠬᠦᠮᠦᠰ ᠥᠴᠥᠭᠡᠳᠦᠷ ᠰᠠᠷᠯᠤᠭ ᠤ᠋ᠨ ᠬᠠᠷᠠ ᠰᠡᠭᠦᠯ ᠪᠠᠷᠢᠵᠤ 《ᠮᠠᠷᠭᠠᠰᠢ ᠵᠣᠯᠢᠭ ᠲᠤ᠌ ᠭᠠᠷᠬᠤ ᠲᠤᠯᠠ ᠥᠭᠬᠦ ᠶᠣᠰᠣᠲᠠᠢ ᠥᠭᠯᠢᠭᠡ ᠪᠡᠨ ᠥᠭ》 ᠭᠡᠵᠦ ᠨᠡᠬᠡᠨ ᠶᠠᠪᠤᠭᠰᠠᠨ ᠲᠡᠷᠡ ᠡᠷᠡ ᠳ᠋ᠦ᠍ ᠲᠠᠯᠠ ᠵᠣᠭᠣᠰᠤᠨ ᠤ᠋ ᠲᠠᠢᠲᠠᠢ ᠶᠠᠭᠤᠮᠠ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠥᠭᠭᠦᠭᠰᠡᠨ ᠲᠤᠯᠠ ᠪᠠᠰᠠ ᠰᠡᠳᠬᠢᠯ ᠪᠠᠷᠳᠠᠮ ᠪᠠᠢᠯᠠ᠃ ᠵᠣᠯᠢᠭ ᠲᠤ᠌ ᠭᠠᠷᠤᠭᠰᠠᠨ ᠡᠷᠡ ᠤᠤᠭᠠᠯ ᠨᠤᠲᠤᠭ ᠲᠤ᠌ ᠪᠠᠨ ᠪᠠᠷᠠ ᠨᠢ ᠬᠠᠷᠠᠭᠳᠠᠬᠤ ᠶᠣᠰᠣ ᠦᠭᠡᠢ ᠪᠠᠢᠯᠠ᠃ ᠲᠡᠢᠮᠦ ᠪᠣᠯᠬᠣᠷ ᠬᠡᠳᠦᠢ ᠠᠮᠢ ᠨᠠᠰᠤ ᠨᠢ ᠪᠦᠲᠦᠨ ᠴᠦ᠍ ᠭᠡᠰᠡᠨ ᠬᠥᠮᠦᠨ ᠦ᠌ ᠳᠠᠩᠰᠠᠨ ᠠ᠋ᠴᠠ ᠬᠠᠰᠤᠭᠳᠠᠵᠤ ᠠᠯᠤᠰ ᠬᠣᠯᠠ ᠭᠠᠵᠠᠷ ᠴᠥᠯᠡᠭᠳᠡᠨ ᠵᠠᠢᠯᠠᠭᠤᠯᠤᠭᠳᠠᠭᠰᠠᠨ ᠲᠠᠢ ᠶᠠᠮᠠᠷ ᠴᠤ᠌ ᠢᠯᠭᠠᠭᠠ ᠦᠭᠡᠢ ᠬᠤᠪᠢ ᠲᠠᠪᠢᠯᠠᠩ ᠲᠠᠢ ᠪᠣᠯᠵᠤ ᠪᠠᠢᠭᠠ ᠨᠢ ᠲᠡᠷᠡ ᠠᠵᠢ᠃
ᠨᠢᠭᠡ ᠲᠠᠯᠠ ᠠ᠋ᠴᠠ ᠬᠥᠮᠦᠨ ᠦ᠌ ᠲᠣᠭᠠᠨ ᠠ᠋ᠴᠠ ᠬᠠᠰᠤᠭᠳᠠᠵᠤ ᠵᠣᠯᠢᠭ ᠲᠤ᠌ ᠭᠠᠷᠴᠤ ᠪᠠᠢᠭᠠ ᠲᠤᠩ ᠴᠤ᠌ ᠭᠤᠨᠢᠭ ᠲᠠᠢ ᠵᠦᠢᠯ ᠪᠣᠯᠪᠠᠴᠤ ᠨᠥᠭᠥᠭᠡ ᠲᠠᠯᠠ ᠠ᠋ᠴᠠ ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠪᠡᠶᠡ ᠲᠥᠯᠥᠭᠡᠯᠡᠭᠴᠢ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠠᠮᠢ ᠨᠠᠰᠤᠨ ᠤ᠋ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠪᠡᠶᠡ ᠪᠡᠨ ᠥᠭᠬᠦ ᠨᠢ ᠪᠤᠶᠠᠨ ᠤ᠋ ᠳᠡᠭᠡᠳᠦ ᠪᠤᠶᠠᠨᠲᠤ ᠦᠢᠯᠡᠰ ᠭᠡᠵᠦ ᠵᠣᠯᠢᠶᠠᠨ ᠤ᠋ ᠬᠥᠮᠦᠨ ᠪᠦᠷᠢᠨ ᠢᠲᠡᠭᠡᠳᠡᠭ ᠲᠤᠯᠠ ᠡᠢᠮᠦ ᠬᠤᠪᠢ ᠲᠠᠪᠢᠯᠠᠩ ᠣᠯᠳᠠᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠵᠤ ᠳᠤᠷᠠᠲᠠᠶᠠ ᠵᠣᠯᠢᠭ ᠪᠣᠯᠳᠠᠭ ᠠᠵᠢ᠃ ᠳᠡᠭᠡᠷᠡ ᠴᠠᠭ ᠲᠤ᠌ ᠪᠣᠯ ᠠᠮᠢᠳᠤ ᠴᠤ᠌ ᠦᠯᠡᠳᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠣᠳᠣ ᠪᠣᠯ ᠠᠮᠢ ᠨᠠᠰᠤ ᠶ᠋ᠢ ᠦᠯᠡᠳᠡᠭᠡᠵᠦ᠂ ᠭᠠᠭᠴᠠᠬᠦ ᠨᠤᠲᠤᠭ ᠣᠷᠣᠨ ᠠ᠋ᠴᠠ ᠨᠢ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠳᠠᠭ ᠪᠣᠯᠵᠠᠢ᠃
– ᠥᠨᠳᠥᠷ ᠭᠡᠭᠡᠨᠲᠡᠨ ᠢ᠋ ᠡᠪᠡᠳᠴᠢᠯᠡᠬᠦ ᠳ᠋ᠦ᠍ ᠲᠠᠪᠢᠨ ᠡᠷᠦᠬᠡ ᠠᠢᠯ ᠢ᠋ ᠭᠠᠢ ᠳ᠋ᠤ᠌ ᠭᠠᠷᠭᠠᠭᠰᠠᠨ ᠶᠤᠮ ᠭᠡᠨᠡ ᠯᠠᠢ᠃ ᠤᠨᠤᠨ ᠭᠣᠣᠯ ᠤ᠋ᠨ ᠡᠬᠢᠨ ᠡᠴᠡ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠭᠠᠷᠳᠠᠭ ᠦᠭᠡᠢ ᠰᠠᠭᠤᠵᠠᠭᠠᠵᠤ ᠪᠠᠢᠳᠠᠭ ᠶᠤᠮ ᠭᠡᠳᠡᠭ᠃ ᠭᠠᠭᠴᠠ ᠨᠢᠭᠡ ᠬᠥᠮᠦᠨ ᠢ᠋ ᠭᠠᠢ ᠳ᠋ᠤ᠌ ᠭᠠᠷᠭᠠᠭᠠᠳ ᠪᠠᠷᠴᠠᠳ ᠨᠢ ᠠᠷᠢᠯᠳᠠᠭ ᠦᠭᠡᠢ ᠲᠡᠢᠮᠦ ᠲᠣᠮᠣ ᠭᠠᠢ ᠲᠦᠢᠳᠬᠡᠷ ᠴᠦ᠍ ᠲᠣᠬᠢᠶᠠᠯᠳᠤᠳᠠᠭ ᠶᠤᠮᠰᠠᠨ᠃ ᠲᠠᠪᠢᠨ ᠡᠷᠦᠬᠡ ᠶ᠋ᠢ ᠵᠣᠯᠢᠭ ᠲᠤ᠌ ᠭᠠᠷᠭᠠᠭᠰᠠᠨ ᠤ᠋ ᠬᠦᠴᠦᠨ ᠳ᠋ᠤ᠌ ᠡᠠᠩᠬᠠᠳᠤᠭᠠᠷ ᠪᠣᠭᠳᠠᠲᠠᠨ ᠤᠷᠲᠤ ᠨᠠᠰᠤᠯᠠᠭᠰᠠᠨ ᠶᠤᠮ ᠭᠡᠵᠦ ᠶᠠᠷᠢᠳᠠᠭ ᠥᠭᠡ ᠳᠡᠢ ᠳ᠋ᠡ ᠭᠡᠮᠡᠨ ᠭᠡᠪ ᠭᠡᠨᠡᠳᠲᠡ ᠭᠡᠯᠦᠩ ᠴᠤᠢᠮᠴᠤᠭ ᠪᠠᠭᠰᠢ ᠶ᠋ᠢ ᠪᠡᠨ ᠶᠠᠷᠢᠬᠤ ᠳ᠋ᠤ᠌ ᠰᠠᠩᠵᠢ ᠭᠡᠰᠦᠯ ᠴᠣᠴᠢᠵᠤ᠂
– ᠲᠡᠢᠮᠦ ᠶᠡᠬᠡ ᠣᠯᠠᠨ ᠠᠢᠯ ᠢ᠋ ᠦᠦ? ᠮᠠᠨ ᠤ᠋ ᠳ᠋ᠤ᠌ ᠪᠠᠰᠠ ᠡᠨᠡ ᠵᠣᠯᠢᠭ ᠲᠤ᠌ ᠭᠠᠷᠭᠠᠬᠤ ᠶᠣᠰᠣ ᠪᠠᠢᠭᠠ ᠶᠤᠮ ᠤᠤ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠭᠡᠯᠦᠩ ᠳᠤᠷᠠ ᠦᠭᠡᠢᠴᠡᠵᠦ ᠂
– ᠳᠤᠭᠤᠢ! ᠠᠯᠳᠠᠰ ᠪᠣᠯᠤᠨᠠ᠃ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠳᠡᠯᠭᠡᠷᠡᠭᠰᠡᠨ ᠭᠠᠵᠠᠷ ᠬᠠᠮᠢᠭᠠ ᠪᠣᠯᠪᠠᠴᠤ ᠵᠠᠢᠭ ᠶᠣᠰᠣ ᠮᠥᠨ ᠨᠢᠭᠡᠨ ᠠᠳᠠᠯᠢ ᠪᠠᠢᠳᠠᠭ ᠪᠣᠯᠤᠨᠠ᠃ ᠬᠦᠮᠦᠨ ᠨᠢ ᠲᠣᠮᠣ ᠪᠠᠢᠬᠤ ᠲᠣᠰᠤᠮ ᠭᠠᠢ ᠳ᠋ᠤ᠌ ᠭᠠᠷᠭᠠᠬᠤ ᠶᠠᠭᠤᠮᠠ ᠶᠡᠬᠡᠰᠴᠦ ᠲᠠᠭᠠᠷᠠᠨᠠ ᠪᠢᠵᠡ ᠳᠡ ᠭᠡᠵᠦ ᠭᠡᠯᠦᠩ ᠵᠠᠮ ᠵᠠᠭᠤᠷᠠ ᠶᠠᠷᠢᠯᠠ᠃ ᠰᠠᠩᠵᠢ ᠭᠡᠰᠦᠯ᠄
– ᠲᠡᠷᠡ ᠵᠣᠯᠢᠭ ᠲᠤ᠌ ᠭᠠᠷᠤᠭᠰᠠᠨ ᠬᠥᠮᠦᠨ ᠵᠢᠭᠤᠲᠠᠭᠠᠳ ᠶᠠᠪᠤᠴᠢᠯᠠ᠃ ᠲᠡᠭᠡᠭᠡᠳ ᠴᠠᠰᠢ ᠪᠠᠨ ᠶᠠᠭᠠᠬᠢᠳᠠᠭ ᠶᠤᠮ ᠪᠣᠢ?ᠭᠡᠪᠡ᠃
– ᠲᠡᠷᠡ ᠤᠤ? ᠦᠢ ᠮᠥᠷᠡᠨ ᠢ᠋ ᠳᠠᠭᠠᠵᠤ ᠶᠠᠪᠤᠭᠰᠠᠭᠠᠷ ᠰᠠᠮᠠᠶᠢ ᠬᠡᠢᠳ ᠲᠦ᠍ ᠣᠴᠢᠭᠠᠳ ᠡᠷᠭᠦᠯ ᠪᠠᠷᠢᠴᠠ ᠥᠭᠴᠦ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠳᠠᠭᠠᠳᠬᠠᠭᠤᠯᠵᠤ ᠭᠦᠷᠢᠮ ᠬᠢᠯᠭᠡᠳᠡᠭ ᠶᠦᠮ᠃ ᠲᠡᠭᠡᠭᠡᠳ ᠡᠨᠡ ᠨᠤᠲᠤᠭ ᠠ᠋ᠴᠠ ᠬᠣᠯᠠᠳᠠᠵᠤ ᠳᠠᠬᠢᠨ ᠬᠡᠵᠢᠶᠡ ᠴᠦ᠍ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠪᠡᠷ ᠬᠠᠮᠢᠭᠠ ᠨᠢᠭᠡᠨ ᠭᠠᠵᠠᠷ ᠠᠮᠢᠳᠤᠷᠠᠨᠠ ᠪᠢᠵᠡ ᠳᠡ ᠭᠡᠵᠦ ᠴᠤᠢᠮᠴᠤᠭ ᠭᠤᠨᠢᠭᠲᠠᠶᠠ ᠥᠭᠦᠯᠡᠪᠡ᠃
ᠲᠡᠷᠡ ᠬᠣᠶᠠᠷ ᠤ᠋ᠨ ᠬᠠᠵᠠᠭᠤ ᠪᠠᠷ ᠬᠤᠯᠤᠰᠤᠨ ᠬᠥ᠋ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠴᠦ᠂ ᠨᠤᠮᠤ ᠰᠤᠮᠤ᠂ ᠪᠠᠮᠪᠠᠢ ᠰᠡᠯᠡᠮᠡ ᠠᠭᠰᠠᠨ ᠵᠡᠭᠦᠭᠰᠡᠨ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ ᠫᠢᠷ ᠫᠦᠷ ᠬᠢᠲᠡᠯᠡ ᠠᠯᠬᠤᠯᠠᠨ ᠥᠩᠭᠡᠷᠡᠯᠡ᠃ ᠠᠷᠤ ᠠ᠋ᠴᠠ ᠨᠢ ᠪᠠᠰᠠ ᠬᠡᠰᠡᠭ ᠮᠣᠷᠢᠨ ᠴᠡᠷᠢᠭ ᠶᠠᠪᠤᠪᠠ᠃ ᡀᠠᠰᠠ ᠮᠣᠩᠯᠠᠮ ᠬᠤᠷᠠᠬᠤ ᠬᠥᠳᠡᠭᠡ ᠲᠣᠰᠬᠣᠨ ᠠ᠋ᠴᠠ ᠲᠡᠳᠡᠨ ᠢ᠋ ᠴᠤᠭᠯᠠᠷᠠᠭᠤᠯᠤᠨ ᠢᠷᠡᠭᠦᠯᠵᠦ ᠲᠦᠭᠵᠢᠪᠡ ᠰᠢᠲᠠᠭᠠᠬᠤ᠂ ᠰᠤᠷ ᠵᠠᠯᠠᠬᠤ ᠵᠡᠷᠭᠡ ᠵᠠᠩ ᠦᠢᠯᠡ ᠳ᠋ᠦ᠍ ᠣᠷᠣᠯᠴᠠᠭᠤᠯᠳᠠᠭ ᠶᠤᠮ ᠪᠠᠢᠵᠠᠢ᠃ ᠮᠢᠩᠭᠠᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠨᠢ ᠳ᠋ᠠᠪᠤᠨᠢ ᠂ ᠵᠠᠭᠤᠨ ᠴᠡᠷᠢᠭ ᠶᠦᠮ ᠦᠦ ᠮᠣᠵᠢ ᠶ᠋ᠢᠨ ᠴᠡᠷᠢᠭ ᠢ᠋ ᠳ᠋ᠸᠪᠠ ᠵᠠᠬᠢᠷᠳᠠᠭ ᠪᠠᠢᠨᠠ᠃ ᠮᠣᠩᠯᠠᠮ ᠪᠤᠶᠤ ᠢᠷᠦᠭᠡᠯ ᠦ᠋ᠨ ᠶᠡᠬᠡ ᠬᠤᠷᠠᠯ ᠤ᠋ᠨ ᠦᠶᠡ ᠪᠡᠷ ᠳ᠋ᠠᠪᠤᠨᠢ ᠳ᠋ᠤ᠌ ᠵᠠᠬᠢᠷᠤᠭᠤᠯᠬᠤ ᠲᠡᠶᠢᠮᠦ ᠣᠯᠠᠨ ᠴᠡᠷᠢᠭ ᠴᠤᠭᠯᠠᠷᠠᠵᠤ ᠢᠷᠡᠳᠡᠭ ᠦᠭᠡᠢ ᠪᠣᠯᠤᠯᠲᠠᠢ᠃
ᠰᠢᠨᠡ ᠶ᠋ᠢᠨ ᠰᠠᠷᠠ ᠶ᠋ᠢᠨ ᠪᠤᠵᠢᠭᠢᠨᠠᠭᠠᠨ ᠲᠠᠢ ᠵᠠᠩ ᠦᠢᠯᠡ ᠳᠠᠭᠤᠰᠬᠤ ᠲᠠᠰᠢ ᠪᠠᠨ ᠬᠠᠨᠳᠤᠵᠤ᠂ ᠥᠨᠥᠳᠥᠷ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠢ ᠨᠠᠰᠤᠨ ᠤ᠋ ᠡᠮᠦᠨᠡ ᠡᠴᠡ ᠰᠦᠵᠢᠭᠲᠡᠨ ᠨᠦ᠍ᠭᠦᠳ ᠨᠢ ᠵᠣᠯᠢᠭ ᠲᠤ ᠭᠠᠷᠴᠤ᠂ ᠶᠡᠬᠡ ᠶᠣᠰᠣᠯᠠᠯ ᠬᠢᠵᠦ ᠲᠡᠭᠦᠰᠦᠯᠡ᠃ ᠬᠥᠮᠦᠨ ᠦ᠌ ᠡᠮᠦᠨᠡ ᠡᠴᠡ ᠬᠥᠮᠦᠨ ᠢ᠋ ᠭᠠᠷᠭᠠᠭᠤᠨ ᠳ᠋ᠤ᠌ ᠭᠠᠷᠭᠠᠳᠠᠭ ᠲᠡᠷᠡ ᠬᠠᠴᠢᠨ ᠶᠣᠰᠣᠯᠠᠯ ᠭᠠᠭᠴᠠᠬᠦ ᠡᠨᠡ ᠭᠠᠵᠠᠷ᠂ ᠬᠡᠲᠦᠷᠬᠡᠢ ᠰᠦᠵᠢᠭ ᠦ᠋ᠨ ᠦᠷᠡ ᠪᠡᠷ ᠳᠡᠯᠭᠡᠷᠡᠵᠡᠢ᠃
ᠭᠡᠷ ᠦ᠋ᠨ ᠵᠦᠭ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠭᠡᠯᠦᠩ ᠴᠤᠢᠮᠴᠤᠭ ᠱᠠᠪᠢ ᠳᠠᠭᠠᠨ ᠶᠡᠬᠡ ᠯᠡ ᠡᠯᠢᠭᠡᠰᠡᠭ ᠢ᠋ᠶ᠋ᠡᠷ᠄
– ᠪᠠᠭᠰᠢ ᠨᠢ ᠴᠦ᠍ ᠭᠡᠰᠡᠨ ᠥᠨᠥᠳᠥᠷ ᠭᠠᠷᠤᠯᠭᠠᠨ ᠳ᠋ᠤ᠌ ᠭᠠᠷᠤᠨᠠ! ᠭᠡᠵᠦ ᠬᠡᠯᠡᠪᠡ᠃ ᠡᠭᠦᠨ ᠳ᠋ᠦ᠍ ᠰᠠᠩᠵᠢ ᠭᠡᠰᠦᠯ ᠮᠠᠰᠢ ᠶᠡᠬᠡ ᠭᠠᠢᠬᠠᠨ ᠪᠥᠱᠥᠭᠦᠷᠬᠡᠵᠦ᠄
– ᠲᠠ ᠶᠠᠭᠠᠬᠢᠯᠠ ᠭᠡᠵᠦ ᠭᠠᠷᠤᠯᠭᠠᠨ ᠳ᠋ᠤ᠌ ᠭᠠᠷᠬᠤ ᠶᠤᠮ ᠪᠣᠢ? ᠭᠡᠵᠦ ᠰᠠᠨᠳᠤᠷᠤᠭᠰᠠᠨ ᠳᠠᠭᠤ ᠪᠠᠷ ᠠᠰᠠᠭᠤᠯᠠ᠃ ᠮᠠᠭᠤ ᠶᠠᠭᠤᠮᠠ ᠵᠥᠩᠨᠡᠵᠦ ᠰᠡᠳᠬᠢᠯ ᠨᠢ ᠳᠣᠩᠰᠣᠯᠵᠠᠢ᠃
– ᠪᠢ ᠭᠠᠷᠤᠯᠭᠠᠨ ᠳ᠋ᠤ᠌ ᠭᠠᠷᠬᠤ ᠵᠢᠷᠤᠭ ᠲᠠᠪᠢᠯᠠᠩ ᠲᠠᠢ ᠶᠤᠮ᠃ ᠲᠡᠷᠡ ᠶᠣᠰᠣᠭᠠᠷ ᠥᠨᠥᠳᠥᠷ ᠣᠷᠣᠢ ᠶᠠᠪᠤᠬᠤ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠭᠰᠢ ᠨᠢ ᠶᠠᠪᠤᠨᠠ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠰᠠᠨᠠᠭᠠ ᠠᠮᠤᠷᠯᠢᠩᠭᠤᠢ ᠲᠠᠢᠪᠤᠩ ᠶᠠᠷᠢᠪᠠ᠃
– ᠶᠠᠭᠠᠬᠢᠯᠠ ᠭᠡᠵᠦ ᠳᠡ! ᠲᠠ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠶᠤᠮ ᠪᠣᠢ? ᠭᠡᠵᠦ ᠰᠠᠩᠵᠢ ᠬᠣᠭᠣᠯᠠᠢ ᠴᠡᠴᠡᠷᠡᠨ ᠠᠰᠠᠭᠤᠲᠠᠯᠠ᠄
– ᠳᠠᠭᠤ ᠪᠠᠨ ᠠᠶᠠᠳᠠ᠃ ᠭᠤᠳᠤᠮᠵᠢᠨ ᠳ᠋ᠤ᠌ ᠡᠢᠮᠦ ᠶᠠᠭᠤᠮᠠ ᠶᠠᠷᠢᠳᠠᠭ ᠦᠭᠡᠢ᠃ ᠭᠡᠷ ᠲᠦ᠍ ᠪᠡᠨ ᠣᠴᠢᠭᠠᠳ ᠪᠢ ᠴᠢᠮᠠ ᠳᠤ ᠬᠡᠯᠡᠨᠡ ᠭᠡᠵᠦ ᠭᠡᠯᠦᠩ ᠲᠡᠷᠡᠬᠦ ᠲᠦᠭᠰᠢᠭᠦᠷᠢᠲᠡᠢ ᠶᠠᠷᠢᠭᠠ ᠶ᠋ᠢ ᠨᠠᠮᠵᠢᠭᠠᠯᠠ᠃
ᠠᠲᠢᠺᠠ ᠳ᠋ᠸᠠᠵᠢᠨ ᠵᠡᠸᠡᠲᠡᠨ
ᠵᠦᠲ᠋ᠪᠸᠷ ᠵᠠᠶ᠋ᠢᠪᠢ ᠪᠠᠯᠲᠠᠨ
ᠯᠠᠮᠠ ᠳ᠋ᠠᠮᠪᠠ ᠨᠠᠮᠯᠠ
ᠵᠠᠫᠰᠤᠴᠥ᠋ᠪᠣᠣ !
ᠭᠡᠵᠦ ᠪᠠᠭᠰᠢ ᠨᠢ ᠠᠮᠠᠨ ᠳ᠋ᠠᠭᠠᠨ ᠰᠢᠯᠦᠭ ᠮᠠᠨᠢ᠂ ᠨᠣᠮ ᠤ᠋ᠨ ᠲᠦᠯᠬᠢᠭᠦᠷ ᠢ᠋ ᠤᠩᠰᠢᠬᠤ ᠳ᠋ᠤ᠌ ᠰᠠᠩᠵᠢ ᠳᠠᠪᠲᠠᠨ᠄
– ᠪᠢ ᠲᠡᠷᠢᠭᠦᠲᠡᠨ᠄ ᠡᠬᠡ ᠪᠣᠯᠤᠭᠰᠠᠨ ᠬᠠᠮᠤᠭ ᠠᠮᠢᠲᠠᠨ᠂ ᠠᠷᠪᠠᠨ ᠵᠦᠭ ᠦ᠋ᠨ ᠭᠤᠷᠪᠠᠨ ᠴᠠᠭ ᠤᠨ ᠬᠠᠮᠤᠭ ᠬᠤᠲᠤᠭᠲᠠᠨ᠂ ᠬᠤᠸᠠᠷᠠᠭ ᠤ᠋ᠳ᠂ ᠡᠵᠡᠨ ᠢᠯ ᠳ᠋ᠦ᠍ ᠠᠴᠢᠲᠤ ᠦᠨᠳᠦᠰᠦᠨ ᠯᠠᠮᠠ ᠨᠠᠷ ᠲᠤ᠌ ᠢᠲᠡᠭᠡᠮᠦᠢ!ᠭᠡᠵᠦ ᠳᠠᠭᠤᠷᠢᠶᠠᠨ ᠤᠩᠰᠢᠯᠠ᠃ ᠲᠡᠭᠡᠭᠡᠳ ᠲᠡᠳᠡ ᠬᠡᠰᠡᠭ ᠳᠠᠭᠤ ᠦᠭᠡᠢ ᠶᠠᠪᠤᠬᠤ ᠳ᠋ᠠᠭᠠᠨ ᠤᠤᠯ ᠨᠣᠮ ᠢ᠋ ᠴᠠᠰᠢ ᠨᠢ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨ ᠤᠩᠰᠢᠬᠤ ᠤᠴᠢᠷᠲᠠᠢ ᠪᠣᠯᠪᠠᠴᠤ ᠲᠡᠭᠡᠭᠰᠡᠨ ᠦᠭᠡᠢ ᠬᠡᠢ ᠯᠠ ᠠᠮᠠ ᠪᠠᠨ ᠬᠥᠳᠡᠯᠭᠡᠵᠦ ᠥᠭᠡᠷᠡ ᠥᠭᠡᠷᠡ ᠶᠠᠭᠤᠮᠠ ᠪᠤᠳᠤᠵᠠᠭᠠᠵᠤ ᠪᠠᠢᠵᠠᠢ᠃
《ᠪᠠᠭᠰᠢᠲᠠᠨ ᠭᠠᠷᠤᠯᠭᠠᠨ ᠳ᠋ᠤ᠌ ᠭᠠᠷᠤᠨᠠ ᠭᠡᠵᠦ ᠶᠠᠭᠤ ᠶᠠᠷᠢᠵᠤ ᠪᠠᠢᠭᠠ ᠶᠤᠮ ᠪᠣᠢ? ᠥᠨᠥᠳᠥᠷ ᠦᠨ ᠵᠣᠯᠢᠭ ᠲᠤ᠌ ᠭᠠᠷᠤᠭᠰᠠᠨ ᠬᠥᠮᠦᠨ ᠦ᠌ ᠠᠳᠠᠯᠢ ᠭᠠᠷᠬᠤ ᠭᠡᠵᠦ ᠦᠦ? ᠲᠡᠭᠡᠪᠡᠯ ᠥᠷᠯᠥᠭᠡ ᠯᠡ ᠲᠡᠷᠡ ᠬᠥᠮᠦᠨ ᠦ᠌ ᠬᠠᠮᠲᠤ ᠭᠠᠷᠬᠤ ᠶᠣᠰᠣᠲᠠᠢ ᠪᠠᠢᠭᠰᠠᠨ ᠪᠢᠰᠢ ᠦᠦ? ᠪᠢ ᠯᠡ ᠪᠠᠭᠰᠢ ᠶ᠋ᠢᠨ ᠦᠭᠡ ᠶ᠋ᠢ ᠪᠤᠷᠤᠭᠤ ᠣᠢᠯᠠᠭᠠᠬᠤ ᠰᠢᠭ᠋ ᠪᠣᠯᠤᠯᠠ᠃ ᠲᠡᠭᠡᠪᠡᠯ ᠴᠦ᠍ ᠨᠢᠭᠦᠯ ᠠᠯᠳᠠᠰ ᠪᠣᠯᠤᠨᠠ ᠰᠢᠦ》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠭᠡᠨᠡᠳᠲᠡ ᠪᠣᠳᠣᠭᠠᠳ ᠡᠪ ᠦᠭᠡᠢᠷᠬᠡᠬᠦ ᠳ᠋ᠡᠭᠡᠨ ᠳᠤᠬᠤᠨ ᠤ᠋ ᠨᠢ ᠬᠥᠯᠥᠰᠥ ᠴᠢᠬᠠᠷᠠᠬᠤ ᠮᠡᠲᠦ ᠪᠣᠯᠤᠯᠠ᠃
《 ᠬᠥᠭᠡᠷᠦᠬᠦᠢ ᠭᠡᠰᠦᠯ ᠭᠡᠨᠡᠨ ᠪᠠᠯᠴᠢᠷ ᠪᠠᠢᠨᠠ᠃ ᠨᠠᠮᠢ᠋ᠢ ᠠᠮᠢᠨ ᠵᠣᠯᠢᠶᠠᠰᠤᠨ ᠳ᠋ᠤ᠌ ᠭᠠᠷᠤᠨᠠ ᠭᠡᠳᠡᠭ ᠲᠦ᠍ ᠣᠭᠲᠣ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠨᠠ᠃ ᠴᠣᠬᠣᠮ ᠶᠠᠭᠠᠬᠢᠵᠤ ᠴᠤ᠌ ᠮᠡᠳᠡᠬᠦ ᠶᠦᠮ ᠪᠢᠯᠡ ᠳᠠ》 ᠭᠡᠵᠦ ᠭᠡᠯᠦᠩ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃ ᠲᠡᠷᠡ ᠬᠣᠶᠠᠷ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠭᠡᠷ ᠲᠦ᠍ ᠪᠡᠨ ᠢᠷᠡᠪᠡ᠃ ᠪᠠᠭᠰᠢ ᠨᠢ ᠥᠨᠥᠳᠥᠷ ᠪᠡᠬᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠯᠠ ᠭᠤᠶᠤ ᠬᠤᠪᠴᠠᠰᠤᠯᠠᠵᠤ ᠶᠡᠬᠡ ᠭᠠᠮᠪᠠᠭᠠᠷ ᠪᠠᠢᠳᠠᠯ ᠲᠠᠢ ᠪᠠᠢᠪᠠ᠃
– ᠪᠠᠭᠰᠢ ᠨᠢ ᠥᠨᠥ ᠣᠷᠣᠢ ᠶᠡᠬᠡ ᠴᠢᠬᠤᠯᠠ ᠠᠵᠢᠯ ᠲᠠᠢ᠃ ᠲᠡᠭᠦᠨ ᠳ᠋ᠡᠭᠡᠨ ᠶᠠᠪᠤᠬᠤ ᠶ᠋ᠢᠨ ᠡᠮᠦᠨᠡ ᠰᠠᠢᠬᠠᠨ ᠱᠥᠯᠥ ᠬᠢᠵᠦ ᠢᠳᠡᠪᠡᠯ ᠵᠦᠭᠡᠷ ᠪᠠᠢᠨᠠ ᠭᠡᠵᠦ ᠭᠡᠯᠦᠩ ᠬᠡᠯᠡᠪᠡ᠃ ᠰᠠᠩᠵᠢ ᠭᠡᠰᠦᠯ ᠱᠠᠯᠠᠮᠠᠭᠬᠠᠨ ᠬᠥᠳᠡᠯᠵᠦ ᠪᠠᠭᠰᠢ ᠳ᠋ᠠᠭᠠᠨ ᠵᠣᠷᠢᠭᠤᠯᠤᠨ ᠬᠠᠷᠠ ᠱᠥᠯᠥ ᠬᠢᠯᠡ᠃ ᠰᠠᠷᠯᠤᠭ ᠤ᠋ᠨ ᠮᠢᠬᠠ ᠲᠤᠯᠠ ᠶᠡᠬᠡ ᠬᠠᠲᠠᠭᠤ ᠶᠤᠮ᠃ ᠪᠠᠭᠰᠢ ᠨᠢ ᠵᠢᠵᠢᠭᠬᠡᠨ ᠬᠥᠰᠬᠥᠯᠡᠬᠦ ᠶᠢ ᠳᠤᠷᠠᠯᠠᠳᠠᠭ ᠶᠣᠰᠣᠭᠠᠷ ᠬᠢᠴᠢᠶᠡᠩᠭᠦᠢᠯᠡᠨ ᠬᠢᠯᠡ᠃
– ᠵᠠ ᠪᠠᠭᠰᠢ ᠶ᠋ᠢ ᠪᠡᠨ ᠬᠡᠵᠢᠶᠡ ᠪᠣᠯᠪᠠᠴᠤ ᠮᠠᠷᠲᠠᠩᠨᠠᠭᠤᠵᠠᠢ᠃ ᠥᠨᠥᠳᠥᠷ ᠦ᠋ᠨ ᠪᠤᠶᠠᠨᠲᠤ ᠰᠠᠢᠬᠠᠨ ᠡᠳᠦᠷ ᠪᠠᠭᠰᠢ ᠨᠢ ᠬᠤᠪᠢ ᠲᠥᠭᠡᠷᠭᠡ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠣᠳᠬᠤ ᠪᠣᠯᠤᠨᠠ᠃ ᠮᠠᠷᠭᠠᠰᠢ ᠠ᠋ᠴᠠ ᠡᠬᠢᠯᠡᠭᠡᠳ ᠱᠠᠪᠢ ᠴᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠠᠮᠢᠳᠤᠷᠠᠨᠠ᠃ ᠡᠷᠭᠢᠵᠦ ᠪᠠᠭᠰᠢ ᠨᠢ ᠢᠷᠡᠬᠦ ᠦᠭᠡᠢ᠃ ᠢᠷᠡᠪᠡᠴᠦ ᠲᠥᠷᠥᠯ ᠠᠷᠠᠯᠵᠢᠨ ᠢᠷᠡᠨᠡ ᠭᠡᠵᠦ ᠪᠠᠭᠰᠢ ᠶ᠋ᠢ ᠪᠡᠨ ᠶᠠᠷᠢᠬᠤ ᠳ᠋ᠤ᠌ ᠭᠡᠰᠦᠯ ᠰᠠᠩᠵᠢ ᠶᠠᠭᠤ ᠴᠤ᠌ ᠬᠡᠯᠡᠬᠦ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠭᠰᠠᠨ ᠦᠭᠡᠢ᠃ ᠪᠦᠯᠡᠬᠡ ᠡᠮᠬᠦᠭᠰᠡᠨ ᠮᠡᠲᠦ ᠭᠥᠯᠢᠷᠡᠨ᠂ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠤᠨ ᠵᠣᠭᠰᠣᠯᠠ᠃ ᠪᠠᠭᠰᠢ ᠶ᠋ᠢᠨ ᠦᠭᠡ ᠨᠢᠭᠤᠴᠠ ᠤᠳᠬᠠ ᠪᠠᠷ ᠢ᠋ᠶ᠋ᠠᠨ ᠠᠶᠤᠮᠠᠷ ᠪᠠᠢᠪᠠ᠃
– ᠪᠠᠭᠰᠢ ᠨᠢ ᠪᠦᠬᠦ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌ ᠰᠦᠰᠦᠭ᠍ᠯᠡᠨ ᠬᠢᠴᠢᠶᠡᠩᠭᠦᠢᠯᠡᠵᠦ ᠬᠣᠶᠠᠷ ᠵᠠᠭᠤᠨ ᠲᠠᠪᠢᠨ ᠭᠤᠷᠪᠠᠨ ᠰᠠᠬᠢᠯ ᠠ᠋ᠴᠠ ᠨᠢᠭᠡ ᠡᠴᠡ ᠪᠤᠰᠤᠳ ᠢ᠋ ᠴᠥᠮ ᠢ᠋ ᠲᠠᠪᠢ ᠭᠠᠷᠤᠢ ᠵᠢᠯ ᠬᠠᠲᠠᠭᠤ ᠰᠠᠬᠢᠭᠰᠠᠨ᠃ ᠨᠢᠭᠡ ᠶᠢ ᠨᠢ ᠨᠠᠰᠤᠨ ᠤ᠋ ᠡᠷᠬᠡ ᠪᠡᠷ ᠰᠠᠬᠢᠵᠤ ᠴᠢᠳᠠᠭᠠ ᠦᠭᠡᠢ᠃ ᠲᠡᠷᠡ ᠮᠢᠨᠢ ᠨᠥᠬᠥᠰᠢ ᠦᠭᠡᠢ ᠶᠡᠬᠡ ᠨᠢᠭᠦᠯ᠃ ᠲᠡᠷᠡ ᠨᠢᠭᠦᠯ ᠢ᠋ᠶ᠋ᠡᠨ ᠪᠢ ᠨᠠᠮᠠᠨᠴᠢᠯᠠᠨ ᠵᠠᠯᠪᠠᠷᠢᠵᠤ ᠶᠠᠪᠤᠬᠤ ᠶᠣᠰᠣᠲᠠᠢ᠃ ᠮᠢᠨᠦ ᠲᠡᠷᠡ ᠨᠢᠭᠦᠯ ᠬᠣᠶᠠᠷ ᠵᠠᠭᠤᠨ ᠲᠠᠪᠢᠨ ᠬᠣᠶᠠᠷ ᠰᠠᠬᠢᠯ ᠢ᠋ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠷᠠᠭᠠᠨᠲᠤᠭᠤᠯᠵᠤ ᠴᠢᠳᠠᠬᠤ ᠨᠤᠬᠤᠴᠠᠲᠠᠢ ᠨᠢᠭᠡᠨ ᠪᠣᠢ᠃ ᠭᠡᠪᠡᠴᠦ ᠪᠤᠶᠠᠨ ᠨᠢᠭᠦᠯ ᠬᠣᠶᠠᠷ ᠳ᠋ᠦᠭ ᠱᠠᠭ ᠪᠣᠯᠤᠨᠠ ᠪᠢᠵᠡ ᠳᠡ᠃ ᠢᠩᠭᠢᠭᠡᠳ ᠪᠠᠭᠰᠢ ᠨᠢ ᠁ ᠭᠡᠲᠡᠯᠡ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠬᠣᠶᠠᠷ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠪᠥᠮᠪᠥᠷᠢᠨ ᠴᠢᠮᠡᠭᠡ ᠦᠭᠡᠢ ᠪᠡᠷ ᠮᠡᠯᠮᠡᠷᠡᠵᠦ ᠪᠠᠢᠬᠤ ᠶ᠋ᠢ ᠭᠡᠯᠦᠩ ᠴᠤᠢᠮᠴᠤᠭ ᠬᠠᠷᠠᠴᠢᠬᠠᠭᠠᠳ ᠳᠠᠭᠤ ᠦᠭᠡᠢ ᠪᠣᠯᠪᠠ᠃
– ᠪᠡᠶᠡ ᠪᠡᠨ ᠪᠡᠷᠢ! ᠪᠢ ᠶᠠᠮᠠᠷ ᠲᠠᠮᠤ ᠳ᠋ᠤ᠌ ᠶᠠᠪᠤᠬᠤ ᠭᠡᠵᠦ ᠪᠠᠢᠭᠠ ᠪᠢᠰᠢ! ᠭᠡᠵᠦ ᠪᠠᠭᠰᠢ ᠯᠠᠮᠠ ᠨᠢ ᠠᠭᠤᠷ ᠲᠠᠢ ᠰᠢᠪᠡᠨᠡᠪᠡ᠃ ᠲᠡᠳᠡ ᠬᠣᠭᠣᠯᠠ ᠪᠠᠨ ᠢᠳᠡᠵᠦ ᠳᠠᠭᠤᠰᠤᠯᠠ᠃ ᠭᠡᠯᠦᠩ ᠴᠤᠢᠮᠴᠤᠭ ᠨᠢᠳᠦ ᠪᠠᠨ ᠠᠨᠢᠰᠬᠢᠨ ᠬᠡᠰᠡᠭ ᠵᠠᠭᠤᠷᠠ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ᠄
– ᠵᠠ ᠢᠩᠭᠢᠭᠡᠳ ᠪᠠᠭᠰᠢ ᠨᠢ ᠶᠠᠪᠤᠨᠠ᠃ ᠴᠢ ᠨᠠᠳᠠ ᠲᠠᠢ ᠬᠠᠮᠲᠤ ᠶᠠᠪᠤᠬᠤ ᠬᠡᠷᠡᠭ ᠪᠠᠢᠨᠠ ᠤᠤ ᠳᠠ ᠭᠡᠪᠡ᠃
– ᠬᠠᠮᠲᠤ ᠶᠠᠪᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ᠃ ᠶᠠᠭᠠᠬᠢᠪᠠᠴᠤ ᠬᠠᠮᠲᠤ ᠶᠠᠪᠤᠨᠠ ᠭᠡᠵᠦ ᠰᠠᠩᠵᠢ ᠵᠠᠯᠪᠠᠷᠢᠨ ᠭᠤᠶᠤᠯᠠ᠃
– ᠵᠠ ᠶᠠᠭᠠᠬᠢᠬᠤ ᠪᠣᠢ᠃ ᠪᠢ ᠴᠢᠮᠠᠢ ᠳᠠᠭᠠᠭᠤᠯᠤᠭᠠᠳ ᠶᠠᠪᠤᠶᠠ᠃ ᠬᠠᠷᠢᠨ ᠴᠢ ᠲᠡᠷᠡ ᠭᠠᠵᠠᠷ ᠣᠴᠢᠭᠠᠳ ᠠᠶᠤᠵᠤ ᠪᠥᠱᠥᠭᠦᠷᠬᠡᠵᠦ ᠪᠣᠯᠬᠤ ᠦᠭᠡᠢ᠃ ᠲᠡᠭᠡᠪᠡᠯ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠪᠤᠬᠤ ᠵᠠᠮ ᠮᠥᠷ ᠲᠦ᠍ ᠶᠡᠬᠡ ᠬᠠᠷᠠ ᠰᠠᠭᠠᠳ ᠪᠣᠯᠤᠨᠠ᠃ ᠴᠢ ᠠᠮᠢᠨ ᠳ᠋ᠤ᠌ ᠴᠢᠨᠢ ᠬᠦᠷᠴᠦ ᠪᠠᠢᠪᠠ ᠴᠢᠭ᠋ ᠬᠦᠯᠢᠴᠡᠵᠦ ᠴᠢᠳᠠᠬᠤ ᠤᠤ? ᠭᠡᠵᠦ ᠭᠡᠰᠦᠯ ᠡᠴᠡ ᠪᠠᠭᠰᠢ ᠨᠢ ᠠᠰᠠᠭᠤᠵᠠᠢ᠃
– ᠪᠢ ᠴᠢᠳᠠᠬᠤ ᠠᠮᠠᠯᠠᠯᠲᠠ ᠥᠭᠬᠦᠶᠡ᠂ ᠪᠠᠭᠰᠢ ᠡ! ᠬᠡᠪ᠃
– ᠴᠢ ᠪᠠᠰᠠ ᠠᠮᠢᠨ ᠳ᠋ᠤ᠌ ᠴᠢᠨᠢ ᠬᠦᠷᠪᠡᠴᠦ ᠦᠵᠡᠭᠰᠡᠨ ᠶᠠᠭᠤᠮᠠ ᠪᠠᠨ ᠨᠢᠭᠤᠵᠤ ᠴᠢᠳᠠᠬᠤ ᠤᠤ? ᠭᠡᠵᠦ ᠪᠠᠭᠰᠢ ᠠᠰᠠᠭᠤᠯᠠ᠃ ᠬᠠᠷᠠᠴᠠ ᠠᠢᠬᠤᠪᠲᠤᠷ ᠲᠥᠪᠯᠡᠷᠡᠵᠡᠢ᠃
– ᠴᠢᠳᠠᠨᠠ᠃ ᠭᠠᠭᠴᠠᠬᠦ ᠡᠭᠦᠨ ᠳ᠋ᠦ᠍ ᠢᠲᠡᠭᠡᠵᠦ ᠪᠣᠯᠤᠨᠠ᠃ ᠪᠢ ᠥᠭᠡᠷᠡ ᠬᠡᠨ ᠳ᠋ᠦ᠍ ᠠᠮᠠ ᠲᠠᠩᠭᠠᠷᠢᠭ ᠥᠭᠬᠦ ᠪᠢᠯᠡ᠃ ᠪᠠᠭᠰᠢ ᠶ᠋ᠢᠨ ᠡᠮᠦᠨᠡ ᠥᠭᠭᠦᠭᠰᠡᠨ ᠲᠠᠩᠭᠠᠷᠢᠭ ᠠᠨᠳᠠᠭᠠᠢ ᠪᠢᠰᠢ ᠦᠦ? ᠭᠡᠵᠦ ᠭᠡᠰᠦᠯ ᠠᠨᠳᠠᠭᠠᠢᠯᠠᠪᠠ᠃
– ᠥᠨᠥ ᠰᠥᠨᠢ ᠪᠠᠭᠰᠢ ᠨᠢ ᠵᠤᠯᠠ ᠡᠷᠭᠦᠬᠦ ᠵᠠᠩ ᠦᠢᠯᠡ ᠳ᠋ᠦ᠍ ᠣᠷᠣᠯᠴᠠᠨᠠ᠃ ᠣᠷᠣᠯᠴᠠᠬᠤ ᠴᠤ᠌ ᠭᠡᠵᠦ ᠳ᠋ᠡ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠵᠤ ᠵᠢᠷᠭᠠᠨᠠ᠃ ᠮᠢᠨᠦ ᠴᠢᠮᠠ ᠳ᠋ᠤ᠌ ᠣᠭᠲᠣ ᠶᠠᠷᠢᠵᠤ ᠥᠭᠭᠦᠭᠡ ᠦᠭᠡᠢ ᠦᠯᠡᠳᠡᠭᠰᠡᠨ ᠵᠦᠢᠯ ᠡᠨᠡ ᠶᠠᠭᠤᠮᠠ ᠳ᠋ᠠᠭ᠃ ᠪᠤᠷᠬᠠᠨ ᠱᠠᠭᠢᠮᠦᠨᠢ ᠶ᠋ᠢᠨ ᠠᠷᠢᠭᠤᠨ ᠦᠢᠯᠡᠰ ᠲᠦ᠍ ᠪᠡᠶᠡ ᠪᠡᠨ ᠥᠭᠬᠦ ᠲᠡᠷᠡ ᠦᠢᠯᠡᠰ ᠪᠣᠯ ᠬᠣᠶᠠᠷ ᠭᠦᠯ ᠳᠡᠢ ᠬᠥᠮᠥᠨ ᠳᠦ ᠬᠣᠪᠣᠷ ᠲᠣᠬᠢᠶᠠᠯᠳᠤᠳᠠᠭ ᠵᠠᠶᠠᠭᠠ᠃ ᠶᠡᠬᠡ ᠠᠷᠭᠠ ᠪᠢᠯᠢᠭ ᠤ᠋ᠨ ᠬᠦᠴᠦᠨ ᠳᠦ ᠪᠠᠭᠰᠢ ᠨᠢ ᠡᠢᠮᠦ ᠡᠷᠬᠡ ᠣᠯᠵᠤ ᠠᠪᠤᠯᠠ᠃ ᠣᠳᠣ ᠲᠡᠷᠡ ᠵᠣᠯ ᠵᠠᠶᠠᠭᠠᠨ ᠠ᠋ᠴᠠ ᠪᠠᠨ ᠭᠡᠭᠡᠭᠳᠡᠵᠦ ᠣᠭᠲᠣ ᠪᠣᠯᠬᠤ ᠦᠭᠡᠢ᠃ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠵᠤ ᠮᠢᠨᠦ ᠰᠢᠲᠠᠬᠤ ᠨᠢ ᠪᠦᠬᠦ ᠨᠠᠰᠤ ᠪᠠᠨ ᠵᠣᠷᠢᠭᠤᠯᠤᠭᠰᠠᠨ ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠦᠢᠯᠡᠰ ᠲᠦ᠍ ᠰᠡᠭᠦᠯᠴᠢ ᠶ᠋ᠢᠨ ᠥᠮᠴᠢ ᠬᠥᠷᠥᠩᠭᠡ ᠪᠡᠨ ᠡᠷᠭᠦᠭᠰᠡᠨ ᠦ ᠲᠡᠮᠳᠡᠭ ᠶᠦᠮ᠃ ᠪᠡᠶᠡ ᠶᠠᠭᠤ ᠴᠤ᠌ ᠪᠢᠰᠢ᠃ ᠭᠠᠭᠴᠠᠬᠦ ᠰᠡᠳᠬᠢᠯ ᠦ᠋ᠨ ᠮᠥᠩᠬᠡᠵᠢᠷᠡᠯ ᠦᠵᠡᠬᠦ ᠨᠢ ᠮᠢᠨᠦ ᠳᠡᠭᠡᠳᠦ ᠲᠠᠪᠢᠯᠠᠩ᠃ ᠬᠢᠭᠰᠡᠭᠡᠷ ᠢᠷᠡᠭᠰᠡᠨ ᠪᠦᠬᠦ ᠪᠤᠶᠠᠨ ᠤ᠋ ᠮᠢᠨᠢ ᠲᠢᠲᠢᠮ ᠲᠡᠷᠡ ᠪᠣᠯᠤᠨᠠ᠃ᠬᠢᠭᠰᠡᠨ ᠨᠢᠭᠦᠯ ᠨᠠᠳᠠ ᠪᠠᠢᠳᠠᠭ ᠪᠣᠯᠵᠤ ᠭᠡᠮ ᠳᠡᠷᠡᠨ ᠦ᠌ ᠮᠢᠨᠢ ᠴᠠᠭᠠᠳᠬᠠᠯ ᠨᠢ ᠪᠠᠰᠠ ᠲᠡᠷᠡ ᠮᠥᠨ᠃ ᠬᠡᠷᠪᠡ ᠪᠢ ᠡᠨᠡ ᠦᠶᠡ ᠳ᠋ᠦ᠍ ᠯᠡ ᠵᠣᠭᠰᠣᠭᠠᠬᠤ ᠦᠭᠡᠢ ᠪᠣᠯ ᠨᠢᠭᠦᠯ ᠮᠢᠨᠢ ᠤᠯᠠᠮ ᠦᠷᠭᠦᠯᠵᠢᠯᠡᠵᠦ ᠨᠡᠮᠡᠭᠳᠡᠬᠦ ᠨᠢ ᠯᠠᠪᠲᠠᠢ ᠬᠡᠷᠡᠭ᠃ ᠲᠡᠷᠡ ᠪᠠᠭᠠ ᠳᠡᠭᠡᠷᠡ ᠪᠡᠨ ᠲᠡᠭᠦᠰᠬᠡᠯ ᠪᠣᠯᠬᠤ ᠤᠴᠢᠷᠲᠠᠢ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠥᠪᠡᠷᠲᠡᠭᠡᠨ ᠶᠠᠷᠢᠵᠤ ᠪᠠᠢᠭᠠ ᠮᠡᠲᠦ ᠪᠥᠪᠥᠲᠥᠨᠡᠨ ᠬᠡᠯᠡᠪᠡ᠃ ᠭᠡᠰᠦᠯ ᠰᠠᠩᠵᠢ ᠰᠡᠳᠬᠢᠯ ᠦ᠋ᠨ ᠶᠡᠬᠡ ᠬᠢᠮᠤᠷᠠᠯ ᠠ᠋ᠴᠠ ᠪᠣᠯᠵᠤ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃
– ᠵᠤᠯᠠ ᠡᠷᠭᠦᠬᠦ ᠳ᠋ᠦ᠍ ᠭᠠᠳᠠᠨᠠ ᠶ᠋ᠢᠨ ᠬᠥᠮᠦᠨ ᠣᠷᠣᠭᠤᠯᠳᠠᠭ ᠦᠭᠡᠢ ᠶᠦᠮ᠃ ᠭᠠᠭᠴᠠ ᠨᠢᠭᠡ ᠬᠥᠮᠦᠨ ᠣᠷᠣᠭᠤᠯᠪᠠᠯ ᠲᠡᠳᠡ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠥᠪᠡᠷᠲᠡᠭᠡᠨ ᠯᠡ ᠪᠢᠰᠢᠯᠭᠠᠬᠤ ᠤᠴᠢᠷᠲᠠᠢ᠃ ᠪᠢ ᠬᠣᠷᠸᠠ ᠳᠡᠭᠡᠷᠡ ᠭᠠᠭᠴᠠ ᠱᠠᠪᠢ ᠲᠠᠢ ᠬᠥᠮᠦᠨ᠃ ᠲᠡᠭᠦᠨ ᠢ᠋ᠶ᠋ᠡᠨ ᠣᠷᠣᠭᠤᠯᠵᠤ ᠪᠣᠯᠤᠨᠠ᠃ ᠬᠠᠷᠢᠨ ᠮᠢᠨᠦ ᠨᠢᠭᠡᠨ ᠵᠢᠩᠳᠠᠭᠠᠨ ᠤ ᠨᠥᠬᠥᠷ ᠲᠦ᠍ ᠪᠢ ᠴᠢᠮᠢ᠋ᠢ ᠵᠠᠬᠢᠵᠤ ᠬᠡᠯᠡᠭᠰᠡᠨ᠃ ᠲᠡᠷᠡ ᠴᠢᠮᠢ᠋ᠢ ᠵᠤᠯᠠ ᠡᠷᠭᠦᠯ ᠦ᠋ᠨ ᠭᠠᠵᠠᠷ ᠠᠴᠠ ᠭᠠᠷᠭᠠᠵᠤ ᠭᠡᠷ ᠲᠦ᠍ ᠪᠡᠨ ᠠᠪᠠᠴᠢᠨᠠ᠃ ᠥᠨᠥ ᠰᠥᠨᠢ ᠳ᠋ᠡᠭᠡᠨ ᠲᠡᠳᠡᠨ ᠦ᠌ ᠳ᠋ᠦ᠍ ᠤᠨᠲᠠᠭᠰᠠᠨ ᠨᠢ ᠳᠡᠭᠡᠷᠡ ᠪᠠᠢᠬᠤ!ᠭᠡᠵᠦ ᠪᠠᠭᠰᠢ ᠨᠢ ᠶᠠᠷᠢᠪᠠ᠃ ᠡᠴᠦᠰ ᠦ᠋ᠨ ᠵᠠᠬᠢᠶᠠ ᠮᠡᠲᠦ ᠰᠠᠨᠠᠭᠳᠠᠪᠠ᠃
ᠰᠠᠩᠵᠢ ᠭᠡᠰᠦᠯ ᠪᠠᠭᠰᠢ ᠳ᠋ᠠᠭᠠᠨ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠪᠡᠨ ᠤᠲᠠᠲᠠᠯᠠ ᠣᠯᠤᠭᠰᠠᠨ ᠦᠭᠡᠢ᠃ ᠲᠡᠭᠡᠲᠡᠯᠡ ᠪᠠᠭᠰᠢ ᠨᠢ᠄
– ᠪᠠᠭᠰᠢ ᠨᠢ ᠶᠡᠬᠡ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠵᠤ ᠰᠢᠲᠠᠬᠤ ᠪᠣᠯᠤᠨᠠ᠃ ᠲᠡᠭᠡᠯᠡ ᠭᠡᠳ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠢᠲᠡᠭᠡᠢ ᠵᠣᠪᠠ᠃ ᠭᠤᠷᠪᠠᠨ ᠮᠢᠩᠭᠠ᠂ ᠶᠡᠬᠡ ᠮᠢᠩᠭᠠᠨ ᠶᠢᠷᠲᠢᠨᠴᠦ ᠶ᠋ᠢᠨ ᠴᠠᠭᠠᠨᠠ ᠲᠥᠷᠥᠬᠦ ᠪᠡᠷ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠨᠢ ᠵᠣᠪᠠᠬᠤ ᠪᠢᠯᠡ᠃ ᠰᠡᠳᠬᠢᠯ ᠦ᠋ᠨ ᠭᠡᠮ ᠨᠠᠳᠠ ᠳ᠋ᠤ᠌ ᠪᠠᠢᠬᠤ ᠦᠭᠡᠢ ᠭᠡᠵᠦ ᠨᠡᠮᠡᠨ ᠬᠡᠯᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠯᠡ ᠰᠠᠩᠵᠢ ᠭᠡᠰᠦᠯ ᠰᠠᠶᠢ ᠤᠴᠢᠷ ᠢ᠋ ᠣᠯᠪᠠ᠃ 《ᠶᠡᠬᠡ ᠨᠢᠭᠦᠯ ᠲᠡᠢ ᠶᠤᠮ ᠤᠤ᠂ ᠶᠡᠬᠡ ᠪᠤᠶᠠᠨ ᠲᠠᠢ ᠬᠦᠮᠦᠨ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠤᠨ ᠬᠥᠪᠥᠩ ᠢ᠋ᠶ᠋ᠡᠷ ᠣᠷᠢᠶᠠᠯᠭᠠᠵᠤ ᠬᠠᠢᠯᠠᠨ ᠣᠳᠳᠠᠭ ᠶᠤᠮ》 ᠭᠡᠵᠦ ᠪᠦᠦᠷ ᠲᠥᠦᠷᠬᠡᠨ ᠰᠣᠨᠣᠰᠤᠭᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠵᠠᠢ᠃
᠁ ᠭᠠᠳᠠᠭᠠ ᠳ᠋ᠢᠩᠱᠠᠭ ᠳᠤᠤᠭᠠᠷᠬᠤ ᠰᠢᠭ᠋ ᠴᠢᠮᠡᠭᠡ ᠭᠠᠷᠤᠯᠠ᠃ ᠭᠡᠯᠦᠩ ᠴᠤᠢᠮᠴᠤᠭ ᠴᠣᠴᠢᠭ᠌ᠰᠠᠨ ᠢᠶᠠᠨ᠄
– ᠵᠠ ᠶᠠᠪᠤᠬᠤ ᠴᠠᠭ ᠪᠣᠯᠤᠯᠠ᠃ ᠬᠥᠮᠦᠨ ᠢᠷᠡᠯᠡ ᠭᠠᠷᠤᠶᠠ ᠳᠠ ᠬᠣᠶᠠᠭᠤᠯᠠ ᠪᠠᠨ! ᠭᠡᠵᠦ ᠱᠠᠪᠢ ᠳᠠᠭᠠᠨ ᠬᠡᠯᠡᠯᠡ᠃ ᠲᠡᠷᠡ ᠬᠣᠶᠠᠷ ᠬᠤᠪᠴᠠᠰᠤ ᠪᠠᠨ ᠪᠦᠷᠢᠨ ᠡᠮᠦᠰᠦᠭᠡᠳ ᠭᠠᠷᠬᠤ ᠪᠣᠯᠬᠤ ᠳ᠋ᠤ᠌ ᠄
– ᠵᠠ ᠰᠠᠢᠨ ᠯᠠᠮᠠ ᠪᠣᠯᠤᠭᠠᠷᠠᠢ᠃ ᠪᠢ ᠴᠢᠮᠠ ᠳ᠋ᠤ᠌ ᠰᠠᠬᠢᠭᠤᠰᠤ ᠪᠠᠨ ᠦᠭᠬᠦᠶᠡ ᠭᠡᠳ ᠬᠦᠵᠦᠭᠦᠨ ᠡᠴᠡ ᠰᠠᠬᠢᠭᠤᠰᠤ ᠪᠠᠨ ᠪᠠᠭᠰᠢ ᠨᠢ ᠠᠪᠴᠤ ᠰᠠᠩᠵᠢ ᠶ᠋ᠢᠨ ᠬᠦᠵᠦᠭᠦᠨ ᠳ᠋ᠦ᠍ ᠵᠡᠭᠦᠵᠦ ᠥᠭ᠍ᠭᠦᠯᠡ᠃ ᠬᠥᠯᠥᠰᠥ ᠲᠡᠢ᠂ ᠬᠠᠯᠠᠭᠤ ᠳᠠᠭᠠᠭᠠᠭᠰᠠᠨ ᠲᠡᠷᠡ ᠰᠠᠬᠢᠭᠤᠰᠤ ᠨᠢ ᠰᠠᠩᠵᠢ ᠶ᠋ᠢᠨ ᠨᠢᠴᠦᠭᠦᠨ ᠲᠥᠪᠥᠩᠬᠡᠢ ᠶ᠋ᠢᠨ ᠲᠤᠰᠢᠶᠠ᠂ ᠲᠥᠭᠡᠨᠡᠨ ᠨᠣᠶᠢᠲᠠ ᠣᠷᠭᠢᠭᠤᠯᠬᠤ ᠳ᠋ᠤ᠌ ᠰᠠᠩᠵᠢ ᠵᠣᠯ ᠲᠠᠢ ᠯᠠ ᠤᠬᠢᠯᠠᠴᠢᠬᠠᠭᠰᠠᠨ ᠦᠭᠡᠢ᠃ ᠭᠡᠯᠦᠩ ᠡᠪᠦᠷ ᠡᠴᠡ ᠪᠡᠨ ᠪᠠᠰᠠ ᠨᠢᠭᠡ ᠪᠦᠢᠯᠠᠩ ᠰᠢᠭ᠋ ᠶᠠᠭᠤᠮᠠ ᠭᠠᠷᠭᠠᠵᠤ ᠢᠷᠡᠭᠡᠳ ᠄
– ᠴᠢᠮᠢ᠋ᠢ ᠰᠠᠢᠨ ᠯᠠᠮᠠ ᠪᠣᠯᠤᠭᠠᠳ ᠨᠤᠲᠤᠭ ᠲᠤ᠌ ᠪᠠᠨ ᠡᠷᠭᠢᠵᠦ ᠬᠠᠷᠢᠬᠤ ᠶ᠋ᠢᠨ ᠴᠠᠭ ᠲᠤ᠌ ᠨᠠᠮᠢ᠋ᠢ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠰᠤᠷᠠᠭᠯᠠᠵᠤ ᠢᠷᠡᠪᠡᠯ ᠡᠭᠦᠨ ᠢ᠋ ᠥᠭᠭᠦᠭᠡᠷᠡᠢ᠃ ᠥᠭᠡᠷᠡ ᠶᠠᠭᠤᠮᠠ ᠪᠢᠲᠡᠭᠡᠢ ᠬᠡᠯᠡᠭᠡᠷᠡᠢ! ᠭᠡᠵᠦ ᠵᠠᠬᠢᠪᠠ᠃ ᠰᠠᠩᠵᠢ ᠲᠡᠭᠦᠨ ᠢ᠋ ᠬᠣᠶᠠᠷ ᠭᠠᠷᠳᠠᠨ ᠠᠪᠬᠤ ᠳ᠋ᠤ᠌ ᠲᠡᠷᠡ ᠪᠦᠢᠯᠠᠩ ᠳ᠋ᠤ᠌ ᠵᠢᠵᠢᠭᠬᠡᠨ ᠬᠠᠲᠠᠭᠤᠯᠢᠭ ᠵᠢᠩ ᠲᠡᠢ ᠶᠠᠭᠤᠮᠠ ᠪᠠᠢᠯᠠ᠃
– ᠬᠡᠨ ᠭᠡᠭᠴᠢ ᠬᠥᠮᠦᠨ ᠪᠣᠢ᠂ ᠪᠠᠭᠰᠢ ᠡ ? ᠭᠡᠵᠦ ᠰᠠᠩᠵᠢ ᠳᠡᠮᠡᠢ ᠯᠡ ᠠᠰᠠᠭᠤᠭᠰᠠᠨ ᠨᠢ ᠪᠠᠭᠰᠢ ᠶᠢᠨ ᠰᠡᠳᠬᠢᠯ ᠳ᠋ᠦ᠍ ᠣᠭᠲᠣ ᠨᠡᠢᠴᠡᠭᠰᠡᠨ ᠦᠭᠡᠢ᠃ ᠪᠠᠭᠰᠢ ᠨᠢ ᠤᠨᠲᠤᠭᠤᠴᠠᠵᠤ᠄
– ᠬᠡᠨ ᠨᠢ ᠬᠠᠮᠢᠶᠠ ᠦᠭᠡᠢ᠃ ᠠᠶᠠᠨᠳᠠᠭᠠᠨ ᠮᠡᠳᠡᠭᠳᠡᠨᠡ᠃ ᠬᠡᠷᠪᠡ ᠬᠡᠨ ᠴᠦ᠍ ᠨᠠᠮᠢ᠋ᠢ ᠰᠤᠷᠠᠭᠯᠠᠬᠤ ᠦᠭᠡᠢ ᠪᠣᠯ ᠶᠠᠭᠠᠬᠢᠬᠤ ᠪᠤᠢ᠂ ᠴᠢᠮᠠ ᠳ᠋ᠤ᠌ ᠪᠠᠢᠵᠤ ᠯᠠ ᠪᠠᠢᠭ᠃ ᠵᠠ ᠣᠳᠣ ᠭᠠᠷᠴᠠᠭᠠᠶᠠ ᠭᠡᠪᠡ᠃ ᠪᠠᠭᠰᠢ ᠱᠠᠪᠢ ᠬᠣᠶᠠᠷ ᠭᠠᠳᠠᠭᠠ ᠭᠠᠷᠤᠯᠠ᠃ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠮᠣᠷᠢᠨ ᠲᠡᠷᠭᠡ ᠲᠡᠢ ᠬᠦᠮᠦᠨ ᠢᠷᠡᠭᠰᠡᠨ ᠬᠦᠯᠢᠶᠡᠵᠦ ᠪᠠᠢᠯᠠ᠃ ᠭᠡᠯᠦᠩ ᠴᠤᠢᠮᠴᠤᠭ ᠨᠠᠮᠪᠠᠲᠠᠢᠬᠠᠨ ᠠᠯᠬᠤᠯᠠᠵᠤ ᠮᠣᠷᠢᠨ ᠲᠡᠷᠭᠡᠨ ᠳ᠋ᠦ᠍ ᠣᠷᠣᠵᠤ ᠰᠠᠭᠤᠯᠠ᠃ ᠰᠡᠦᠬᠡ ᠮᠠᠶ᠋ᠢᠭ ᠢ᠋ᠶ᠋ᠠᠷ ᠵᠠᠰᠠᠭᠰᠠᠨ ᠲᠡᠷᠭᠡ ᠠᠵᠢ᠃ ᠰᠠᠩᠵᠢ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠣᠷᠣᠵᠤ ᠳᠡᠷᠭᠡᠳᠡ ᠨᠢ ᠰᠠᠭᠤᠪᠠ᠃ ᠲᠡᠷᠭᠡᠴᠢ ᠠᠶᠠᠷᠬᠠᠨ ᠲᠤᠬᠢᠷᠴᠦ ᠮᠣᠷᠢ ᠪᠠᠨ ᠬᠥᠳᠡᠯᠭᠡᠪᠡ᠃ ᠵᠠᠮ ᠤ᠋ᠨ ᠵᠠᠭᠤᠷᠠ ᠪᠠᠭᠰᠢ ᠯᠠᠮᠠ ᠨᠢ ᠥᠴᠦᠬᠡᠨ ᠴᠦ᠍ ᠳᠠᠭᠤ ᠦᠭᠡᠢ ᠪᠣᠳᠣᠯᠭᠠᠰᠢᠷᠠᠨ ᠶᠠᠪᠤᠵᠤ ᠪᠠᠢᠯᠠ᠃ ᠲᠠᠭ ᠴᠢᠮᠡᠭᠡ ᠦᠭᠡᠢ ᠲᠡᠷᠡ ᠪᠠᠢᠳᠠᠯ ᠢ᠋ ᠡᠪᠳᠡᠯᠡᠬᠦ ᠵᠢᠷᠦᠬᠡ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠴᠦ᠍ ᠦᠭᠡᠢ ᠪᠠᠢᠯᠠ᠃ ᠴᠣᠬᠣᠮ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠵᠤ ᠪᠠᠢᠭᠠ ᠨᠢ ᠴᠦ᠍ ᠮᠡᠳᠡᠭᠳᠡᠭᠰᠡᠨ ᠦᠭᠡᠢ᠃ ᠣᠯᠠᠨ ᠴᠠᠢ ᠴᠢᠨᠠᠬᠤ ᠬᠤᠭᠤᠴᠠᠭᠠ ᠥᠩᠭᠡᠷᠡᠵᠡᠢ᠃ ᠭᠡᠨᠡᠳᠲᠡ ᠲᠡᠷᠭᠡ ᠵᠣᠭᠰᠣᠯᠠ᠃ ᠳᠡᠯᠪᠡᠭᠡᠴᠢ ᠨᠢ ᠤᠷᠢᠳᠤ ᠳᠠᠯᠠ ᠶ᠋ᠢᠨ ᠥᠨᠳᠥᠷ ᠰᠠᠭᠤᠳᠠᠯ ᠳᠡᠭᠡᠷᠡ ᠡᠴᠡ ᠪᠡᠨ ᠪᠠᠭᠤᠵᠤ ᠬᠠᠭᠠᠯᠭᠠ ᠶ᠋ᠢ ᠣᠩᠭᠣᠢᠯᠭᠠᠵᠤ ᠦᠭᠬᠦᠯᠡ᠃ ᠬᠠᠷᠠᠩᠭᠤᠢ ᠳᠤᠮᠳᠠ ᠠ᠋ᠴᠠ ᠨᠢᠭᠡᠨ ᠠᠪᠰᠠᠷᠬᠠᠨ ᠳᠤᠭᠠᠩ ᠤᠨ ᠰᠡᠷᠡᠢᠵᠦ ᠰᠠᠷᠠᠢᠭᠰᠠᠨ ᠳᠡᠭᠡᠪᠦᠷ ᠨᠢ ᠪᠦᠳᠡᠭᠢ ᠪᠠᠳᠠᠭᠢ ᠢᠯᠭᠠᠷᠠᠨ ᠦᠵᠡᠭᠳᠡᠯᠡ᠃ ᠭᠡᠯᠦᠩ ᠲᠡᠷᠭᠡᠨ ᠡᠴᠡ ᠳᠠᠭᠤ ᠦᠭᠡᠢᠬᠡᠨ ᠪᠠᠭᠤᠭᠠᠳ ᠳᠣᠭᠠᠩ ᠤᠨ ᠡᠭᠦᠳᠡ ᠶ᠋ᠢ ᠴᠢᠭᠯᠡᠨ ᠶᠠᠪᠤᠯᠠ᠃ ᠠᠷᠤ ᠠ᠋ᠴᠠ ᠨᠢ ᠮᠣᠷᠢᠨ ᠲᠡᠷᠭᠡᠴᠢ᠂ ᠲᠡᠭᠡᠭᠡᠳ ᠰᠠᠩᠵᠢ ᠭᠡᠰᠦᠯ ᠳᠠᠭᠠᠨ ᠶᠠᠪᠤᠪᠠ᠃ ᠳᠤᠭᠠᠩ ᠳ᠋ᠤ᠌ ᠣᠷᠣᠪᠠᠯ ᠪᠦᠳᠡᠭᠢᠬᠡᠨ ᠬᠡᠳᠦᠨ ᠵᠤᠯᠠ ᠲᠡᠷᠲᠡᠭᠡ ᠬᠠᠷᠠᠩᠭᠤᠢ ᠳ᠋ᠤ᠌ ᠰᠦᠮᠡᠯᠵᠡᠵᠦ ᠪᠠᠢᠪᠠ᠃ ᠪᠠᠷᠤᠭᠠᠷ ᠭᠤᠨᠢᠭᠲᠠᠢ ᠪᠠᠢᠳᠠᠯ ᠢᠯᠡᠷᠬᠡᠢ᠃
ᠰᠦᠮᠡ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠬᠥᠮᠦᠨ ᠦ᠌ ᠮᠥᠷᠥ᠍ ᠲᠡᠢ ᠴᠢᠴᠠᠤ ᠥᠨᠳᠥᠷ ᠠᠮᠠᠰᠠᠷ ᠲᠠᠢ ᠠᠰᠤᠷᠤ ᠲᠣᠮᠣ ᠬᠦᠷᠡᠯ ᠴᠥᠭᠥᠴᠡ ᠵᠣᠭᠣᠯᠭᠠ ᠲᠠᠢ ᠪᠠᠢᠬᠤ ᠰᠢᠭ᠋ ᠬᠠᠷᠠᠭᠳᠠᠯᠠ᠃ ᠰᠠᠶᠢᠬᠠᠨ ᡀᠠᠰᠠ ᠮᠣᠩᠯᠠᠮ ᠳ᠋ᠤ᠌ ᠮᠠᠩᠵᠠ ᠴᠢᠨᠠᠵᠤ ᠪᠠᠢᠭᠰᠠᠨ ᠬᠦᠷᠡᠯ ᠲᠣᠭᠣᠭᠠ ᠶ᠋ᠢ ᠪᠡᠨ ᠰᠠᠩᠵᠢ ᠭᠡᠰᠦᠯ ᠳᠤᠷᠠᠰᠤᠨ ᠪᠣᠳᠣᠯᠠ᠃ ᠳᠤᠭᠠᠩ ᠳᠣᠲᠣᠷᠠ ᠬᠣᠶᠠᠷ ᠭᠤᠷᠪᠠᠬᠠᠨ ᠯᠠᠮᠠ ᠪᠠᠢᠯᠠ᠃ ᠲᠡᠳᠡᠨ ᠦ᠌ ᠨᠢᠭᠤᠷ ᠴᠢᠷᠠᠢ ᠪᠠᠷᠤᠭ ᠢᠯᠭᠠᠭᠳᠠᠬᠤ ᠦᠭᠡᠢ ᠲᠡᠢᠮᠦ ᠪᠦᠳᠡᠭᠢ ᠭᠡᠷᠡᠯ ᠲᠡᠢ ᠪᠠᠢᠪᠠ᠃
ᠶᠠᠮᠠᠷ ᠨᠢᠭᠡᠨ ᠤᠩᠰᠢᠯᠭᠠ ᠡᠬᠢᠯᠡᠪᠡ᠃ ᠲᠡᠷᠡ ᠤᠩᠰᠢᠯᠭᠠ ᠶ᠋ᠢᠨ ᠤᠳᠬᠠ ᠶ᠋ᠢ ᠰᠠᠩᠵᠢ ᠭᠡᠰᠦᠯ ᠰᠠᠢᠨ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠯᠠ᠃ ᠤᠷᠢᠳᠤ ᠡᠮᠦᠨᠡ ᠴᠦ᠍ ᠲᠡᠢᠮᠦ ᠶᠠᠭᠤᠮᠠ ᠰᠣᠨᠣᠰᠤᠭᠠ ᠦᠭᠡᠢ ᠪᠢᠯᠡ᠃ ᠨᠢᠭᠡᠨ ᠯᠠᠮᠠ ᠢᠷᠡᠵᠦ ᠲᠡᠷᠡ ᠭᠤᠷᠪᠠ ᠶ᠋ᠢ ᠳᠠᠭᠠᠭᠤᠯᠤᠨ ᠱᠠᠲᠤ ᠪᠠᠷ ᠳᠡᠭᠡᠭᠰᠢ ᠭᠠᠷᠤᠯᠠ᠃ ᠨᠢᠭᠡᠨ ᠲᠠᠪᠴᠠᠩ ᠳᠤ ᠲᠡᠳᠡ ᠭᠠᠷᠴᠤ ᠢᠷᠡᠵᠡᠢ᠃ ᠲᠠᠪᠴᠠᠩ ᠳᠡᠭᠡᠷᠡ ᠡᠴᠡ ᠡᠷᠭᠢᠨ ᠬᠠᠷᠠᠬᠤ ᠳ᠋ᠤ᠌ ᠳᠤᠭᠠᠩ ᠤᠨ ᠭᠣᠣᠯ ᠳᠤᠮᠳᠠ ᠠᠰᠠᠷᠤ ᠲᠣᠮᠣ ᠵᠤᠯᠠ ᠶ᠋ᠢᠨ ᠴᠥᠭᠥᠴᠡ ᠪᠠᠢᠭᠠ ᠬᠠᠷᠠᠭᠳᠠᠪᠠ᠃ ᠲᠡᠷᠡ ᠴᠥᠭᠥᠴᠡ ᠤᠷᠤᠭᠤ ᠳᠡᠭᠦᠵᠢᠩ ᠱᠠᠲᠤ ᠰᠢᠭ᠋ ᠣᠯᠣᠰᠤᠨ ᠱᠠᠲᠤ ᠤᠨᠵᠢᠭᠤᠯᠵᠠᠢ᠃ ᠨᠢᠭᠡ ᠯᠠᠮᠠ ᠡᠬᠢᠯᠡᠭᠡᠳ ᠲᠡᠷᠡ ᠱᠠᠲᠤ ᠪᠡᠷ ᠳᠣᠭᠣᠭᠰᠢ ᠪᠠᠭᠤᠵᠤ ᠵᠤᠯᠠ ᠶ᠋ᠢᠨ ᠢᠷᠣᠭᠠᠷ ᠲᠤ ᠣᠴᠢᠪᠠ᠃ ᠬᠣᠢᠨᠠ ᠠ᠋ᠴᠠ ᠨᠢ ᠭᠡᠯᠦᠩ ᠴᠤᠢᠮᠴᠤᠭ ᠣᠷᠣᠯᠠ᠃ ᠮᠥᠨ ᠠᠷᠤ ᠠ᠋ᠴᠠ ᠨᠢ ᠥᠭᠡᠷᠡ ᠨᠢᠭᠡᠨ ᠯᠠᠮᠠ ᠤᠷᠤᠪᠠ᠃ ᠬᠣᠶᠠᠷ ᠯᠠᠮᠠ ᠭᠡᠯᠦᠩ ᠴᠤᠢᠮᠴᠤᠭ ᠤ᠋ᠨ ᠭᠠᠷ ᠠ᠋ᠴᠠ ᠬᠥᠲᠥᠯᠦᠨ ᠵᠤᠯᠠ ᠶ᠋ᠢᠨ ᠴᠥᠭᠦᠴᠡᠨ ᠦ᠌ ᠭᠣᠣᠯ ᠳᠠᠬᠢ ᠨᠦᠬᠡᠨ ᠳ᠋ᠦ᠍ ᠲᠡᠭᠦᠨ ᠢ᠋ ᠣᠷᠣᠭᠤᠯᠵᠤ ᠵᠣᠭᠰᠣᠭᠠᠯᠠ᠃ ᠡᠪᠦᠳᠦᠭ ᠢ᠋ᠶ᠋ᠡᠷ ᠨᠢ ᠲᠠᠲᠠᠵᠤ ᠪᠠᠢᠪᠠ᠃ ᠭᠡᠷ ᠦ᠋ᠨ ᠬᠠᠶᠠᠭᠠᠪᠴᠢ ᠰᠢᠭ᠋ ᠬᠡᠯᠪᠡᠷᠢ ᠲᠡᠢ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠬᠥᠪᠥᠩ ᠢ᠋ ᠴᠥᠭᠥᠴᠡ ᠤᠷᠤᠭᠤ ᠪᠠᠰᠠ ᠨᠢᠭᠡ ᠯᠠᠮᠠ ᠰᠢᠲᠠᠵᠤ ᠥᠭ᠍ᠭᠦᠯᠡ᠃ ᠬᠣᠶᠠᠷ ᠯᠠᠮᠠ ᠲᠡᠭᠦᠨ ᠢ᠋ ᠳᠣᠣᠷᠠ ᠠ᠋ᠴᠠ ᠨᠢ ᠲᠣᠰᠣᠨ ᠠᠪᠤᠭᠠᠳ ᠭᠡᠯᠦᠩ ᠴᠤᠢᠮᠴᠤᠭ ᠤ᠋ᠨ ᠡᠪᠦᠳᠦᠭ ᠡᠴᠡ ᠨᠢ ᠳᠡᠭᠡᠭᠰᠢ ᠣᠷᠢᠶᠠᠵᠤ ᠡᠬᠢᠯᠡᠪᠡ᠃ ᠬᠠᠶᠠᠭᠠᠪᠴᠢ ᠠᠳᠠᠯᠢ ᠤᠷᠲᠤ ᠭᠣᠨᠵᠣᠭᠣᠷ ᠲᠡᠷᠡ ᠬᠥᠪᠥᠩ ᠳ᠋ᠦ᠍ ᠲᠣᠰᠣ ᠰᠢᠩᠭᠡᠭᠡᠭᠰᠡᠨ ᠮᠡᠲᠦ ᠪᠠᠢᠯᠠ᠃ ᠭᠡᠯᠦᠩ ᠴᠤᠢᠮᠴᠤᠭ ᠬᠣᠶᠠᠷ ᠭᠠᠷ ᠤ᠋ᠨ ᠠᠯᠠᠭᠠ ᠶ᠋ᠢ ᠬᠠᠪᠰᠤᠷᠤᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠡᠷᠭᠦᠨ ᠵᠠᠯᠪᠠᠷᠢᠵᠤ ᠪᠠᠢᠭᠠ ᠮᠡᠲᠦ ᠵᠣᠭᠰᠣᠭᠠᠳ ᠠᠮᠠᠨ ᠳ᠋ᠠᠭᠠᠨ ᠮᠠᠨᠢ ᠤᠩᠰᠢᠵᠤ ᠪᠠᠢᠬᠤ ᠰᠢᠭ᠋ ᠬᠠᠷᠠᠭᠳᠠᠯᠠ᠃ ᠨᠢᠳᠦ ᠪᠡᠨ ᠪᠢᠰᠢᠯᠭᠠᠭᠴᠢ ᠶᠢᠨ ᠳᠦᠷᠢ ᠪᠡᠷ ᠠᠨᠢᠵᠠᠢ᠃ ᠬᠣᠶᠠᠷ ᠯᠠᠮᠠ ᠭᠡᠯᠦᠩ ᠴᠤᠢᠮᠴᠤᠭ ᠢ᠋ ᠬᠥᠪᠥᠩ ᠢ᠋ᠶ᠋ᠡᠷ ᠣᠷᠢᠶᠠᠨ ᠣᠷᠢᠶᠠᠭᠰᠠᠭᠠᠷ ᠮᠥᠷᠦᠨ ᠲᠤᠰᠢᠶᠠ ᠨᠢ ᠬᠦᠷᠴᠦ ᠣᠴᠢᠯᠠ᠃ ᠲᠡᠭᠡᠭᠡᠳ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠶ᠋ᠢ ᠭᠡᠯᠦᠩ ᠳᠦ ᠦᠨᠦᠷᠲᠦᠭᠦᠯᠪᠡ᠃ ᠲᠡᠭᠦᠨ ᠢ᠋ ᠦᠨᠦᠷᠲᠦᠭᠡᠳ ᠭᠡᠯᠦᠩ ᠴᠤᠢᠮᠴᠤᠭ ᠣᠭᠲᠣ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠣᠯᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠤᠨ ᠡᠷᠭᠦᠭᠰᠡᠨ ᠭᠠᠷ ᠢ᠋ᠶ᠋ᠠᠨ ᠪᠠᠭᠤᠯᠭᠠᠭᠰᠠᠨ ᠦᠭᠡᠢ ᠬᠡᠪ ᠢ᠋ᠶ᠋ᠡᠷ ᠪᠠᠢᠯᠠ᠃ ᠬᠣᠶᠠᠷ ᠯᠠᠮᠠ ᠲᠡᠷᠡ ᠳᠠᠷᠤᠢ ᠤᠯᠠᠮ ᠱᠠᠯᠠᠮᠠᠭᠠᠢᠯᠠᠨ ᠬᠥᠳᠡᠯᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠤ᠋ᠨ ᠪᠡᠶᠡ ᠶ᠋ᠢ ᠬᠦᠨᠵᠢᠳ ᠦ᠋ᠨ ᠲᠣᠰᠣ ᠲᠠᠢ ᠬᠥᠪᠥᠩ ᠢ᠋ᠶ᠋ᠡᠷ ᠣᠷᠢᠶᠠᠨ ᠣᠷᠢᠶᠠᠭᠰᠠᠭᠠᠷ ᠲᠣᠯᠣᠭᠠᠢ ᠶ᠋ᠢ ᠨᠢ ᠳᠠᠯᠳᠠ ᠣᠷᠣᠭᠤᠯᠪᠠ᠃ ᠲᠡᠷᠡ ᠮᠥᠴᠡ ᠳ᠋ᠦ᠍ ᠰᠠᠩᠵᠢ ᠭᠡᠰᠦᠯ ᠵᠤᠯᠠ ᠶ᠋ᠢᠨ ᠭᠣᠣᠯ ᠤᠷᠤᠭᠤ ᠬᠠᠷᠠᠢᠨ ᠣᠷᠣᠬᠤ ᠶ᠋ᠢ ᠵᠠᠪᠳᠤᠬᠤ ᠳ᠋ᠤ᠌ ᠳᠡᠷᠭᠡᠳᠡ ᠶ᠋ᠢᠨ ᠯᠠᠮᠠ ᠨᠢ ᠤᠬᠤᠰᠬᠢᠨ ᠪᠠᠷᠢᠵᠤ ᠵᠣᠭᠰᠣᠭᠠᠯᠠ᠃ ᠲᠡᠷᠡ ᠭᠱᠠᠨ ᠳ᠋ᠦ᠍ ᠬᠣᠶᠠᠷ ᠯᠠᠮᠠ ᠭᠡᠯᠦᠩ ᠴᠤᠢᠮᠴᠤᠭ ᠤ᠋ᠨ ᠨᠠᠮᠠᠨᠴᠢᠯᠠᠭᠰᠠᠨ ᠬᠣᠶᠠᠷ ᠭᠠᠷ ᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠲᠠᠯᠠ ᠣᠷᠢᠶᠠᠵᠠᠢ᠃ ᠰᠠᠶᠢᠬᠠᠨ ᠬᠥᠮᠦᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠲᠡᠷᠡ ᠭᠠᠵᠠᠷ ᠣᠳᠣ ᠬᠥᠪᠥᠩ ᠢ᠋ᠶ᠋ᠡᠷ ᠣᠷᠢᠶᠠᠵᠤ ᠬᠢᠭᠰᠡᠨ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠤᠭᠰᠠᠨ ᠦᠵᠡᠭᠳᠡᠪᠡ᠃ ᠢᠰᠡᠭᠡᠢ ᠶᠢᠨ ᠪᠤᠯᠤ ᠪᠤᠯᠠᠭᠠᠳ ᠲᠠᠯᠪᠢᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠵᠠᠯᠠᠭᠤ ᠭᠡᠰᠦᠯ ᠦ᠋ᠨ ᠰᠡᠳᠬᠢᠯ ᠬᠠᠴᠢᠨ ᠡᠪ ᠦᠭᠡᠢ ᠪᠣᠯᠵᠤ ᠮᠠᠭᠤᠵᠢᠷᠠᠬᠤ ᠰᠢᠬᠠᠪᠠ᠃ ᠲᠡᠭᠦᠨ ᠢ᠋ ᠮᠡᠳᠡᠭᠡᠳ ᠳᠡᠷᠭᠡᠳᠡᠬᠢ ᠯᠠᠮᠠ ᠨᠢ ᠨᠠᠪᠰᠢ ᠦᠨᠦᠷᠲᠦᠭᠦᠯᠦᠭᠰᠡᠨ ᠳ᠋ᠦ᠍ ᠨᠢᠳᠦ ᠨᠢ ᠪᠠᠭᠠ ᠵᠡᠷᠭᠡ ᠰᠡᠷᠭᠦᠵᠦ᠂ ᠠᠮᠢᠰᠬᠤᠭᠠ ᠠᠪᠴᠠᠢ᠃ ᠴᠤᠢᠮᠴᠤᠭ ᠭᠡᠯᠦᠩ ᠢ ᠭᠦᠨᠵᠢᠳ ᠦ᠋ᠨ ᠲᠣᠰᠣ ᠲᠠᠢ ᠬᠥᠪᠥᠩ ᠢ᠋ᠶ᠋ᠡᠷ ᠣᠷᠢᠶᠠᠵᠤ ᠳᠠᠭᠤᠰᠤᠭᠰᠠᠨ ᠬᠣᠶᠠᠷ ᠯᠠᠮᠠ ᠣᠯᠣᠰᠤᠨ ᠱᠠᠲᠤ ᠪᠠᠷ ᠰᠠᠷᠮᠠᠭᠴᠢᠨ ᠠᠳᠠᠯᠢ ᠱᠠᠯᠠᠮᠠᠭᠠᠢᠯᠠᠨ ᠠᠪᠠᠷᠢᠵᠤ ᠵᠤᠯᠠ ᠶ᠋ᠢᠨ ᠳᠣᠲᠣᠷᠠ ᠠ᠋ᠴᠠ ᠭᠠᠳᠠᠭᠰᠢ ᠭᠠᠷᠤᠭᠠᠳ ᠱᠠᠲᠤ ᠪᠠᠨ ᠲᠡᠳᠡᠨ ᠬᠤᠷᠢᠶᠠᠵᠤ ᠠᠪᠤᠪᠠ᠃ ᠲᠡᠷᠡ ᠮᠥᠴᠡ ᠳ᠋ᠦ᠍ ᠵᠤᠯᠠ ᠶ᠋ᠢᠨ ᠨᠢᠭᠡ ᠠᠮᠠᠰᠠᠷ ᠳᠡᠭᠡᠭᠦᠷ ᠲᠠᠯᠪᠢᠭᠰᠠᠨ ᠮᠣᠳᠣᠨ ᠴᠣᠷᠭᠣ ᠪᠠᠷ ᠬᠠᠢᠯᠤᠮᠠᠭ ᠰᠢᠷᠠ ᠲᠣᠰᠣ ᠤᠷᠤᠰᠤᠨ ᠴᠥᠭᠥᠴᠡ ᠤᠷᠤᠭᠤ ᠣᠷᠣᠵᠤ ᠡᠬᠢᠯᠡᠯᠡ᠃ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠭᠡᠯᠦᠩ ᠴᠤᠢᠮᠴᠤᠭ ᠣᠭᠲᠣᠬᠠᠨ ᠴᠤ᠌ ᠬᠥᠳᠡᠯᠬᠦ ᠦᠭᠡᠢ ᠪᠠᠢᠯᠠ᠃ ᠭᠠᠳᠠᠨᠠ ᠠ᠋ᠴᠠ ᠨᠢ ᠬᠠᠷᠠᠬᠤ ᠳᠤ ᠳᠣᠲᠣᠷᠠ ᠨᠢ ᠬᠥᠮᠦᠨ ᠪᠠᠢᠭᠠ ᠭᠡᠳᠡᠭ ᠢ᠋ ᠴᠦ᠍ ᠲᠥᠰᠦᠭᠡᠯᠡᠬᠦ ᠠᠷᠭᠠ ᠦᠭᠡᠢ ᠠᠵᠢ᠃ ᠬᠥᠪᠥᠩ ᠢ᠋ᠶ᠋ᠡᠷ ᠠᠰᠠᠷᠦ ᠲᠣᠮᠣ ᠵᠤᠯᠠ ᠶ᠋ᠢᠨ ᠭᠣᠣᠯ ᠢ᠋ ᠢᠮᠡᠷᠦᠨ ᠬᠢᠵᠦ ᠵᠣᠭᠣᠭᠰᠠᠨ ᠶᠤᠮ ᠰᠢᠭ᠋ ᠯᠡ ᠠᠮᠤᠷᠯᠢᠩᠭᠤᠢ᠂ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠴᠢᠮᠡᠭᠡ ᠦᠭᠡᠢ ᠪᠠᠢᠯᠠ᠃ ᠮᠣᠳᠣᠨ ᠴᠣᠷᠭᠣ ᠪᠠᠷ ᠣᠷᠣᠵᠤ ᠪᠠᠢᠭᠠ ᠰᠢᠷᠠ ᠲᠣᠰᠣ ᠤᠰᠤ ᠰᠢᠭ᠋ ᠳᠠᠭᠤ ᠴᠢᠮᠡᠭᠡ ᠭᠠᠷᠭᠠᠭᠰᠠᠨ ᠦᠭᠡᠢ ᠬᠠᠷᠢᠨ ᠵᠤᠯᠠ ᠶ᠋ᠢᠨ ᠬᠥᠪᠥᠩ ᠭᠣᠣᠯ ᠢ᠋ ᠳᠡᠯᠡᠰᠦᠨ᠂ ᠢᠯᠪᠢᠨ ᠪᠤᠴᠠᠬᠤ ᠮᠡᠲᠦ ᠭᠤᠯᠠᠰᠴᠤ ᠴᠥᠭᠦᠴᠡᠨ ᠦ᠌ ᠢᠷᠣᠭᠠᠷ ᠲᠤ᠌ ᠲᠤᠨᠵᠤ ᠪᠠᠢᠯᠠ᠃ ᠲᠡᠷᠲᠡᠭᠡ ᠪᠦᠷᠦᠭ ᠬᠠᠷᠠᠩᠭᠤᠢ ᠥᠨᠴᠥᠭ ᠲᠦ᠍ ᠬᠡᠳᠦᠨ ᠯᠠᠮᠠ ᠶᠠᠮᠠᠷ ᠨᠢᠭᠡᠨ ᠤᠩᠰᠢᠯᠭᠠ ᠬᠢᠵᠦ ᠳᠦᠩᠭᠡᠷ ᠳᠦᠩᠭᠡᠷ ᠳᠤᠤᠭᠠᠷᠴᠠᠭᠠᠵᠤ ᠪᠠᠢᠯᠠ᠃ ᠤᠳᠠᠵᠤ ᠲᠦᠳᠡᠭ᠍ᠰᠡᠨ ᠦᠭᠡᠢ ᠵᠤᠯᠠ ᠶ᠋ᠢᠨ ᠴᠥᠭᠦᠴᠡᠨ ᠦ᠌ ᠲᠠᠯᠠ ᠳ᠋ᠤ᠌ ᠬᠦᠷᠲᠡᠯᠡ ᠳᠦᠭᠦᠷᠦᠭᠡᠳ ᠢᠷᠡᠯᠡ᠃ ᠬᠠᠵᠠᠭᠤ ᠶ᠋ᠢᠨ ᠥᠷᠥᠭᠡᠨ ᠳ᠋ᠦ᠍ ᠲᠣᠮᠣ ᠵᠤᠤᠬᠠᠨ ᠳᠡᠭᠡᠷᠡ ᠬᠠᠢᠯᠵᠤ ᠪᠠᠢᠭᠠ ᠲᠣᠰᠣ ᠮᠣᠳᠣᠨ ᠴᠣᠷᠭᠣ ᠪᠠᠷ ᠤᠷᠤᠰᠴᠤ ᠳᠤᠭᠠᠩ ᠤᠨ ᠭᠣᠣᠯ ᠳᠠᠬᠢ ᠴᠥᠭᠥᠴᠡ ᠤᠷᠤᠭᠤ ᠣᠷᠣᠳᠠᠭ ᠪᠣᠯᠤᠯᠲᠠᠢ᠃
ᠰᠠᠩᠵᠢ ᠡᠨᠡᠬᠦ ᠬᠦᠨᠳᠦ ᠮᠥᠴᠡ ᠳ᠋ᠦ᠍ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠶᠠᠭᠤ ᠴᠤ᠌ ᠪᠣᠳᠣᠵᠤ ᠰᠠᠨᠠᠬᠤ ᠦᠭᠡᠢ ᠪᠠᠢᠯᠠ᠃ ᠭᠡᠨᠡᠳᠲᠡ ᠬᠡᠩᠭᠡᠷᠭᠡ ᠬᠣᠩᠬᠣ ᠲᠠᠮᠠᠷᠦ ᠳᠤᠤᠭᠠᠷᠤᠪᠠ᠃ ᠨᠢᠭᠡᠨ ᠯᠠᠮᠠ ᠤᠷᠲᠤ ᠡᠰᠢ ᠲᠡᠢ ᠴᠤᠴᠢᠯ ᠪᠠᠷᠢᠵᠤ ᠢᠷᠡᠭᠡᠳ ᠵᠤᠯᠠ ᠶ᠋ᠢᠨ ᠭᠣᠣᠯ ᠢ᠋ ᠠᠰᠠᠭᠠᠯᠠ᠃ ᠲᠣᠰᠣ ᠰᠢᠩᠭᠡᠭᠰᠡᠨ ᠬᠥᠪᠥᠩ ᠳᠦᠷᠡᠰᠬᠢᠨ ᠠᠰᠠᠯᠠ᠃ ᠳᠤᠭᠠᠩ ᠳᠣᠲᠣᠷᠠ ᠭᠡᠷᠡᠯ ᠭᠡᠭᠡ ᠲᠡᠢ ᠪᠣᠯᠪᠠ᠃ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠡᠨ ᠨᠢᠭᠡᠨ ᠬᠥᠮᠦᠨ ᠲᠠᠲᠠᠬᠤ ᠳ᠋ᠤ᠌ ᠰᠠᠩᠵᠢ ᠡᠷᠭᠢᠨ ᠬᠠᠷᠠᠪᠠᠯ ᠲᠡᠭᠦᠨ ᠢ ᠪᠠᠭᠰᠢ ᠲᠠᠢ ᠨᠢ ᠬᠠᠮᠲᠤ ᠮᠣᠷᠢᠨ ᠲᠡᠷᠭᠡ ᠪᠡᠷ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠲᠥᠪᠡᠳ ᠯᠠᠮᠠ ᠠᠵᠢ᠃
– ᠣᠳᠣ ᠦᠢᠯᠡ ᠭᠦᠢᠴᠡᠯᠡ᠃ ᠶᠠᠪᠤᠶᠠ᠃ ᠡᠭᠦᠨ ᠡᠴᠡ ᠴᠠᠰᠢ ᠡᠨᠳᠡ ᠬᠥᠮᠦᠨ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠲᠡᠷᠡ ᠬᠥᠮᠦᠨ ᠲᠥᠪᠡᠳ ᠢ᠋ᠶ᠋ᠡᠷ ᠬᠡᠯᠡᠬᠦ ᠳ᠋ᠦ᠍ ᠰᠠᠩᠵᠢ ᠭᠡᠰᠦᠯ ᠲᠤᠢᠷᠠᠨ ᠮᠠᠩᠭᠤᠷᠠᠵᠤ᠂ ᠠᠯᠮᠠᠢᠷᠠᠨ ᠭᠠᠢᠬᠠᠭᠰᠠᠨ ᠲᠣᠯᠣᠭᠠᠢ ᠪᠡᠨ ᠤᠨᠵᠢᠭᠤᠯᠤᠭᠰᠠᠭᠠᠷ ᠲᠡᠷᠡᠬᠦ ᠲᠥᠪᠡᠳ ᠦ᠋ᠨ ᠠᠷᠤ ᠠ᠋ᠴᠠ ᠳ᠋ᠠᠭᠠᠨ ᠶᠠᠪᠤᠯᠠ᠃ᠰᠡᠭᠦᠳᠡᠷ ᠨᠢ ᠶᠡᠬᠡ ᠤᠷᠲᠤ᠂ ᠠᠶᠤᠮᠠᠷ ᠦᠵᠡᠭᠳᠡᠯᠡ᠃ ᠴᠣᠴᠢᠬᠤ ᠰᠢᠭ᠋ ᠪᠣᠯᠪᠠ᠃
《ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠵᠤᠯᠠ ᠶ᠋ᠢᠨ ᠭᠣᠣᠯ ᠪᠣᠯᠵᠤ ᠨᠠᠰᠤ ᠶᠡᠭᠦᠯᠡᠭᠰᠡᠨ》 ᠭᠡᠵᠦ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠲᠦ ᠪᠠᠢᠬᠤ ᠳ᠋ᠠᠭᠠᠨ ᠪᠦᠳᠡᠭᠢ ᠪᠠᠳᠠᠬᠢ ᠰᠣᠨᠣᠰᠤᠭᠰᠠᠨ ᠨᠢᠭᠡ ᠬᠠᠴᠢᠨ ᠶᠠᠷᠢᠶᠠᠨ ᠤ᠋ ᠤᠳᠬᠠ ᠶᠠᠭᠤ ᠪᠠᠢᠭᠰᠠᠨ ᠢ᠋ ᠰᠠᠩᠵᠢ ᠣᠳᠣ ᠯᠠ ᠤᠬᠠᠭᠠᠷᠠᠨ ᠣᠢᠯᠠᠭᠠᠵᠠᠢ᠃《ᠪᠠᠭᠰᠢᠲᠠᠨ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠬᠠᠴᠢᠨ ᠪᠠᠢᠳᠠᠯ ᠲᠠᠢ ᠪᠣᠯᠤᠭᠰᠠᠨ ᠨᠢ ᠡᠢᠮᠦ ᠤᠴᠢᠷᠲᠠᠢ ᠪᠠᠢᠵᠠᠢ᠃ ᠪᠠᠭᠰᠢ ᠳ᠋ᠤ᠌ ᠢᠩᠭᠢᠵᠦ ᠴᠠᠭᠠᠳᠬᠠᠬᠤ ᠲᠡᠢᠮᠦ ᠶᠡᠬᠡ ᠨᠢᠭᠦᠯ ᠪᠠᠢᠮᠠᠷ ᠦᠭᠡᠢ ᠶᠦᠮ᠃ ᠲᠡᠭᠡᠪᠡᠯ ᠪᠤᠶᠠᠨ ᠬᠢᠭᠰᠡᠨ ᠬᠡᠷᠡᠭ ᠦᠦ?》 ᠭᠡᠵᠦ ᠰᠠᠩᠵᠢ ᠡᠷᠡᠭᠡᠯᠵᠡᠨ ᠪᠣᠳᠣᠯᠠ᠃
ᠮᠣᠷᠢᠨ ᠲᠡᠷᠭᠡ ᠲᠠᠨᠲᠠᠯᠵᠠᠨ ᠳᠣᠩᠰᠣᠯᠤᠭᠰᠠᠭᠠᠷ ᠤᠷᠤᠭᠰᠢ ᠪᠠᠨ ᠬᠥᠳᠡᠯᠪᠡ᠃ ᠰᠠᠩᠵᠢ ᠶ᠋ᠢᠨ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠵᠤ ᠨᠢᠳᠦᠨ ᠡᠴᠡ ᠨᠢ ᠨᠢᠯᠪᠤᠰᠤ ᠭᠠᠷᠤᠯᠠ᠃ ᠠᠶᠠᠷᠬᠠᠨ ᠮᠡᠭᠰᠢᠨ ᠤᠬᠢᠯᠠᠪᠠ᠃ ᠭᠡᠨᠡᠳᠲᠡ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠬᠢᠭᠰᠠᠨ ᠢ᠋ ᠰᠠᠨᠠᠵᠤ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠯᠠ᠃ ᠬᠣᠢᠨᠠ ᠠ᠋ᠴᠠ ᠨᠢ ᠨᠢᠯᠪᠤᠰᠤ ᠭᠠᠷᠭᠠᠬᠤ᠂ ᠭᠠᠰᠢᠭᠤᠳᠠᠬᠤ ᠬᠡᠷᠡᠭ ᠦᠭᠡᠢ ᠭᠡᠵᠦ ᠪᠠᠭᠰᠢ ᠨᠢ ᠵᠠᠬᠢᠭᠰᠠᠨ ᠪᠢᠯᠡ᠃ ᠨᠢᠯᠪᠤᠰᠤ ᠪᠠᠷ ᠰᠠᠭᠠᠳ ᠬᠢᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢ ᠲᠡᠷᠡ ᠶᠡᠬᠡ ᠯᠡ ᠠᠮᠢᠨᠴᠢᠯᠠᠨ ᠵᠠᠬᠢᠵᠤ ᠪᠠᠢᠭᠰᠠᠨ ᠁᠃ ᠰᠠᠩᠵᠢ ᠤᠬᠢᠯᠠᠬᠤ ᠪᠠᠨ ᠪᠣᠯᠢᠪᠠ᠃