ᠣᠷᠣᠢ ᠦᠭᠡᠢ ᠰᠦᠮᠡ – ᠨᠠᠢ᠍ᠮᠠ ᠂ ᠬᠣᠷᠢᠨ ᠮᠢᠩᠭᠠᠲᠤ ᠶᠢᠨ ᠢᠷᠥᠭᠡᠯ Оройгүй сүм – Найм ᠂ Хорин мянгатын ерөөл - Oroigui sum 8
886ᠨᠠᠢ᠍ᠮᠠ ᠂ ᠬᠣᠷᠢᠨ ᠮᠢᠩᠭᠠᠲᠤ ᠶᠢᠨ ᠢᠷᠥᠭᠡᠯ
ᠣᠷᠴᠢᠯᠠᠩ ᠭᠠᠰᠠᠯᠠᠩ ᠠ᠋ᠴᠠ ᠨᠥᠭᠴᠢᠭᠰᠡᠳ ᠲᠦ᠍ ᠠᠯᠠᠭᠳᠠᠨᠠ
ᠵᠣᠪᠠᠯᠠᠩ ᠶᠡᠬᠡ ᠠᠮᠤᠭᠤᠯᠠᠩ ᠰᠠᠬᠢᠯ ᠳ᠋ᠤ᠌ ᠠᠯᠠᠭᠳᠠᠨᠠ
ᠠᠮᠤᠭᠤᠯᠠᠩ ᠪᠢᠯᠢᠭ ᠰᠡᠳᠬᠢᠯ ᠳ᠋ᠦ᠍ ᠠᠯᠠᠭᠳᠠᠨᠠ
ᠯᠣᠰᠠᠷ ᠪᠤᠶᠤ ᠰᠢᠨᠡ ᠵᠢᠯ ᠣᠢᠷᠠᠳᠴᠤ ᠪᠠᠢᠯᠠ᠃ ᠠᠢᠯ ᠤ᠋ᠳ ᠴᠢᠮᠡᠷᠡ ᠬᠢᠵᠡᠭᠡᠵᠦ᠂ ᠰᠦᠮᠡ ᠬᠡᠢᠳ ᠦ᠋ᠳ ᠶᠡᠬᠡ᠂ ᠪᠠᠭᠠ ᠮᠣᠩᠯᠠᠮ ᠪᠡᠯᠡᠳᠬᠡᠵᠦ ᠪᠠᠢᠪᠠ᠃ ᠴᠠᠭᠠᠨ ᠰᠠᠷᠠ ᠳᠥᠭᠥᠭᠡᠳ ᠢᠷᠡᠬᠦ ᠳ᠋ᠦ᠍ ᠲᠥᠪᠡᠳ ᠠᠢᠯ ᠤ᠋ᠳ ᠵᠠᠮᠪᠠᠭᠠᠨ ᠭᠤᠯᠢᠷ᠂ ᠠᠷᠪᠠᠢ ᠶ᠋ᠢᠨ ᠨᠡᠷᠡᠮᠡᠯ ᠠᠷᠢᠬᠢ ᠪᠡᠯᠡᠳᠬᠡᠵᠦ ᠡᠬᠢᠯᠡᠳᠡᠭ ᠵᠠᠩᠰᠢᠯ ᠲᠦᠭᠡᠮᠡᠯ ᠪᠢᠯᠡ᠃ ᠵᠡᠰ ᠴᠠᠷᠠ ᠲᠠᠪᠠᠭ᠂ ᠵᠠᠮᠪᠠᠭᠠᠨ ᠭᠤᠯᠢᠷ ᠳᠣᠪᠣᠢᠯᠭᠠᠨ ᠴᠠᠫ ᠬᠡᠯᠪᠡᠷᠢᠲᠡᠢ ᠪᠡᠷ ᠣᠪᠣᠭᠠᠯᠠᠵᠤ᠂ ᠳᠡᠭᠡᠷᠡ ᠨᠢ ᠰᠢᠷᠠ ᠲᠣᠰᠣ ᠪᠠᠷ ᠤᠷᠠᠯᠠᠵᠤ ᠬᠢᠭᠰᠡᠨ ᠴᠡᠴᠡᠭ ᠲᠡᠢ ᠳᠠᠷᠠᠰᠤ ᠬᠠᠳᠬᠤᠵᠤ ᠪᠡᠯᠡᠳᠬᠡᠭᠰᠡᠨ ᠢᠳᠡᠭᠡ ᠶ᠋ᠢ ᠴᠢᠮᠠᠷ ᠭᠡᠨᠡ᠃ ᠰᠢᠨᠡ ᠵᠢᠯ ᠦ᠋ᠨ ᠢᠳᠡᠭᠡ ᠶᠦᠮ᠃ ᠰᠦᠮᠡ ᠬᠡᠢᠳ ᠦ᠋ᠳ ᠶᠡᠬᠡ᠂ ᠪᠠᠭᠠ ᠮᠣᠩᠯᠠᠮ ᠭᠡᠳᠡᠭ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠱᠠᠪᠳᠠᠩ ᠪᠠᠲᠤᠳᠬᠠᠬᠤ ᠢᠷᠦᠭᠡᠯ ᠦ᠋ᠨ ᠬᠤᠷᠠᠯ ᠳ᠋ᠤ᠌ ᠤᠷᠢᠳᠠ ᠠ᠋ᠴᠠ ᠪᠡᠯᠡᠳᠬᠡᠳᠡᠭ ᠪᠥᠭᠡᠳ ᠬᠣᠷᠢᠨ ᠮᠢᠩᠭᠠᠨ ᠯᠠᠮᠠ ᠣᠷᠣᠯᠴᠠᠨᠠ᠃
ᠭᠡᠯᠦᠩ ᠴᠤᠢᠮᠴᠤᠭ ᡀᠠᠰᠠ ᠮᠣᠩᠯᠠᠮ ᠳ᠋ᠤ᠌ ᠣᠷᠣᠯᠴᠠᠵᠤ ᠬᠤᠷᠠᠬᠤ ᠶ᠋ᠢᠨ ᠲᠤᠯᠠᠳᠠ ᠣᠯᠠᠨ ᠬᠣᠨᠣᠭ ᠬᠥᠭᠡᠭᠡᠴᠡᠯᠳᠦᠵᠦ ᠶᠡᠬᠡ ᠴᠦ᠍ ᠮᠥᠩᠭᠥ ᠵᠠᠷᠤᠵᠠᠢ᠃ ᠲᠡᠭᠦᠨ ᠦ᠌ ᠨᠢᠭᠡ ᠲᠣᠮᠣ ᠬᠦᠰᠡᠯ ᠲᠡᠷᠡ ᠪᠠᠢᠪᠠ᠃
– ᠡᠨᠡ ᠵᠢᠯ ᠦ᠋ᠨ ᡀᠠᠰᠠ ᠮᠣᠩᠯᠠᠮ ᠳ᠋ᠤ᠌ ᠵᠠᠪᠠᠯ ᠣᠷᠣᠯᠴᠠᠬᠤ ᠶᠣᠰᠣᠲᠠᠢ᠃ ᠳᠠᠯᠠᠢ ᠪᠯᠠᠮᠠ ᠶ᠋ᠢᠨ ᠱᠠᠪᠳᠠᠩ ᠪᠠᠲᠤᠳᠬᠠᠬᠤ ᠶᠡᠬᠡ ᠢᠷᠦᠭᠡᠯ ᠦ᠋ᠨ ᠬᠤᠷᠠᠯ ᠳ᠋ᠤ᠌ ᠪᠢ ᠳᠠᠬᠢᠭᠠᠳ ᠣᠷᠣᠯᠴᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠶᠠᠮᠠᠷ ᠪᠣᠯᠪᠠᠴᠤ ᠬᠣᠷᠢᠨ ᠮᠢᠩᠭᠠᠲᠤ ᠶ᠋ᠢᠨ ᠲᠣᠭᠠᠨ ᠳ᠋ᠤ᠌ ᠣᠷᠣᠯ ᠦᠭᠡᠢ ᠭᠣᠷᠢ ᠦᠭᠡᠢ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠳ᠋ᠠᠭᠠᠨ ᠵᠠᠬᠢᠵᠠᠢ᠃
ᠨᠤᠲᠤᠭ ᠠ᠋ᠴᠠ ᠪᠠᠨ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ ᠮᠥᠷᠭᠥᠯᠴᠢᠳ ᠢ᠋ ᠨᠠᠮᠤᠷ ᠪᠤᠴᠠᠭᠠᠵᠠᠢ᠃ ᠣᠳᠬᠣᠨ ᠬᠡᠦᠬᠡᠨ ᠢ᠋ ᠪᠦᠬᠡᠮᠠᠩᠯᠠᠢ ᠶ᠋ᠢᠨ ᠬᠠᠮᠠᠭᠠᠯᠠᠯᠲᠠ ᠳ᠋ᠤ᠌ ᠥᠭᠴᠦ ᠥᠭᠡᠷᠡ ᠨᠢᠭᠡ ᠬᠡᠰᠡᠭ ᠮᠥᠷᠭᠥᠯᠴᠢᠳ ᠦ᠋ᠨ ᠭᠠᠯ ᠲᠠᠢ ᠨᠡᠢᠯᠡᠭᠦᠯᠦᠨ ᠨᠤᠲᠤᠭ ᠤᠷᠤᠭᠤ ᠨᠢ ᠴᠠᠭ ᠤ᠋ᠨ ᠡᠷᠲᠡ᠂ ᠨᠠᠷᠠᠨ ᠤ᠋ ᠭᠣᠣᠯ ᠲᠠᠢ᠂ ᠨᠣᠭᠣᠭᠠᠨ ᠤ᠋ ᠰᠥᠯ ᠲᠡᠢ ᠳ᠋ᠦ᠍ ᠪᠤᠴᠠᠭᠠᠭᠰᠠᠨ ᠨᠢ ᠰᠠᠢᠨ ᠪᠣᠯᠵᠠᠢ᠃ ᠲᠥᠪᠡᠳ ᠲᠦ᠍ ᠡᠨᠡ ᠵᠢᠯ ᠶᠡᠬᠡ ᠬᠦᠢᠲᠡᠷᠡᠵᠦ ᠪᠠᠢᠯᠠ᠃ ᠮᠥᠷᠭᠥᠯᠴᠢᠳ ᠪᠤᠴᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠰᠠᠩᠵᠢ ᠭᠡᠰᠦᠯ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠨᠠᠮᠳᠡᠯ ᠬᠠᠳᠠᠭ ᠵᠢᠩᠳᠠᠭᠠᠨ ᠳ᠋ᠠᠭᠠᠨ ᠨᠣᠮ ᠢ᠋ᠶ᠋ᠠᠨ ᠦᠵᠡᠵᠦ᠂ ᠴᠤᠢᠮᠴᠤᠭ ᠭᠡᠯᠦᠩ ᠪᠤᠶᠠᠨ ᠤ᠋ ᠦᠢᠯᠡᠰ ᠦ᠋ᠨ ᠢ᠋ᠶ᠋ᠡᠨ ᠮᠥᠷ ᠬᠥᠭᠡᠭᠡᠵᠦ᠂ ᠶᠡᠬᠡᠰ ᠯᠠᠮᠠ ᠨᠠᠷ ᠲᠠᠢ ᠠᠭᠤᠯᠵᠠᠨ᠂ ᠪᠤᠷᠬᠠᠨ ᠤ᠋ ᠠᠷᠢᠭᠤᠨ ᠰᠢᠲᠦᠭᠡᠨ ᠨᠦ᠍ᠭᠦᠳ ᠢ᠋ᠶ᠋ᠡᠷ ᠶᠠᠪᠤᠵᠤ ᠡᠷᠭᠢᠯ ᠮᠥᠷᠭᠥᠯ ᠦᠢᠯᠡᠳᠴᠦ ᠪᠠᠢᠭᠰᠠᠭᠠᠷ ᠣᠳᠣ ᠶ᠋ᠢ ᠬᠦᠷᠴᠡᠢ᠃ ᠪᠠᠭᠰᠢ ᠯᠠᠮᠠ ᠨᠢ ᠪᠦᠬᠦ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠤᠭᠰᠠᠨ ᠬᠥᠷᠥᠩᠭᠡ ᠪᠡᠨ ᠠᠯᠲᠠ ᠮᠥᠩᠭᠥ ᠪᠣᠯᠭᠠᠭᠠᠳ ᠡᠪᠦᠷᠯᠡᠵᠦ ᠢᠷᠡᠭᠰᠡᠨ ᠲᠤᠯᠠ ᠪᠤᠶᠠᠨ ᠤ᠋ ᠦᠢᠯᠡ ᠳ᠋ᠦ᠍ ᠪᠠᠷᠠᠭᠤᠨ ᠵᠡᠭᠦᠨ ᠦᠭᠡᠢ ᠵᠠᠷᠤᠭᠰᠠᠭᠠᠷ ᠯᠠ ᠪᠠᠢᠯᠠ᠃ ᠴᠤᠢᠮᠴᠤᠭ ᠭᠡᠯᠦᠩ᠄
– ᡀᠠᠰᠠ ᠮᠣᠩᠯᠠᠮ ᠤ᠋ᠨ ᠭᠡᠰᠬᠦᠢ ᠪᠣᠯᠬᠤ ᠳ᠋ᠤ᠌ ᠳᠥᠷᠪᠡᠨ ᠮᠢᠩᠭᠠᠨ ᠯᠠᠩ ᠮᠥᠩᠭᠥ ᠪᠡᠷ ᠭᠠᠷ ᠴᠠᠢᠯᠭᠠᠳᠠᠭ ᠶᠤᠮ᠃ ᠪᠢ ᠵᠥᠪᠬᠡᠨ ᠤᠩᠰᠢᠯᠭᠠ ᠶ᠋ᠢᠨ ᠯᠠᠮᠠ ᠪᠠᠷ ᠣᠷᠣᠬᠤ ᠲᠤᠯᠠ ᠲᠡᠢᠮᠦ ᠶᠡᠬᠡ ᠮᠥᠩᠭᠥ ᠠᠷᠠᠢ ᠱᠠᠭᠠᠷᠳᠠᠭᠳᠠᠬᠤ ᠦᠭᠡᠢ ᠪᠢᠵᠡ ᠭᠡᠵᠦ ᠨᠢᠭᠡ ᠡᠳᠦᠷ ᠱᠠᠪᠢ ᠳ᠋ᠠᠭᠠᠨ ᠬᠡᠯᠡᠵᠡᠢ᠃
– ᠪᠢ ᠰᠢᠨᠡ ᠪᠠᠭᠰᠢ ᠠ᠋ᠴᠠ ᠪᠠᠨ ᠭᠤᠶᠤᠬᠤ ᠤᠤ? ᠮᠠᠨ ᠤ᠋ ᠰᠢᠨᠡ ᠪᠠᠭᠰᠢ ᠨᠠᠮᠠᠶ᠋ᠢ ᠵᠢᠩᠳᠠᠭᠠᠨ ᠳ᠋ᠠᠭᠠᠨ ᠭᠠᠭᠴᠠᠬᠠᠨ ᠮᠣᠩᠭᠣᠯ ᠭᠡᠳ ᠶᠡᠬᠡ ᠯᠡ ᠬᠠᠢᠷᠠᠯᠠᠵᠤ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠳᠠᠭ ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠬᠡᠯᠡᠬᠦ ᠳ᠋ᠦ᠍᠄
– ᠦ᠂ ᠶᠠᠭᠤ ᠬᠢᠬᠦ ᠪᠣᠢ? ᠪᠠᠭᠰᠢ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠠᠷᠭᠠᠯᠠᠬᠤ ᠶ᠋ᠢ ᠪᠣᠳᠣᠨᠠ᠃ ᠪᠢ ᠡᠨᠳᠡᠬᠢ ᠶ᠋ᠢᠨ ᠯᠠᠮᠠ᠂ ᠬᠠᠷᠠ᠂ ᠵᠠᠷᠤᠴᠠ ᠲᠤᠤᠴᠠᠢ ᠨᠠᠷ ᠢ᠋ ᠠᠯᠢ ᠠᠯᠢ ᠶ᠋ᠢ ᠰᠠᠢᠨ ᠮᠡᠳᠡᠳᠡᠭ ᠶᠦᠮ᠃ ᠠᠷᠭᠠ ᠶ᠋ᠢ ᠨᠢ ᠣᠯᠬᠤ ᠪᠠᠢᠯᠭᠦᠢ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠲᠠᠢᠪᠤᠩ ᠢ᠋ᠶ᠋ᠠᠷ ᠶᠠᠷᠢᠪᠠ᠃ ᠲᠡᠭᠦᠨ ᠡᠴᠡ ᠬᠡᠳᠦ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠪᠠᠭᠰᠢ ᠯᠠᠮᠠ ᠨᠢ ᡀᠠᠰᠠ ᠮᠣᠩᠯᠠᠮ ᠳ᠋ᠤ᠌ ᠬᠤᠷᠠᠬᠤ ᠡᠷᠬᠡ ᠣᠯᠵᠤ ᠠᠪᠴᠠᠢ᠃ ᠴᠣᠬᠣᠮ ᠶᠠᠮᠠᠷ ᠠᠷᠭᠠ ᠪᠠᠷ ᠣᠯᠤᠭᠰᠠᠨ ᠢ᠋ᠶ᠋ᠠᠨ ᠱᠠᠪᠢ ᠭᠡᠰᠦᠯ ᠳ᠋ᠡᠭᠡᠨ ᠬᠡᠯᠡᠭᠰᠡᠨ ᠦᠭᠡᠢ᠃ ᠭᠡᠰᠦᠯ ᠴᠦ᠍ ᠠᠰᠠᠭᠤᠭᠰᠠᠨ ᠦᠭᠡᠢ᠃ ᠪᠠᠭᠰᠢ ᠶ᠋ᠢᠨ ᠬᠡᠷᠡᠭ ᠱᠠᠪᠢ ᠳ᠋ᠤ᠌ ᠬᠠᠮᠢᠶᠠ ᠦᠭᠡᠢ᠃
ᠯᠡ ᠰᠠᠷᠠ ᠶ᠋ᠢᠨ ᠡᠬᠢᠨ ᠦ᠌ ᠬᠣᠷᠢ ᠬᠣᠨᠣᠭ ᠲᠤ᠌ ᡀᠠᠰᠠ ᠶ᠋ᠢᠨ ᠶᠡᠬᠡ ᠮᠣᠩᠯᠠᠮ ᠭᠡᠳᠡᠭ ᠢᠷᠦᠭᠡᠯ ᠦ᠋ᠨ ᠬᠤᠷᠠᠯ᠂ ᠬᠣᠶᠠᠳᠠᠬᠢ ᠪᠠᠭᠠ ᠮᠣᠩᠯᠠᠮ ᠨᠢ ᠣᠨ ᠤ᠋ ᠲᠡᠷᠢᠭᠦᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠳᠥᠷᠪᠡᠨ ᠦ᠌ ᠡᠳᠦᠷ ᠡᠴᠡ ᠠᠷᠪᠠ ᠬᠣᠨᠣᠭ ᠬᠤᠷᠠᠳᠠᠭ ᠠᠵᠠᠢ᠃ ᠶᠡᠬᠡ ᠮᠣᠩᠯᠠᠮ ᠡᠵᠡᠨ ᠬᠠᠭᠠᠨ ᠤ᠋ ᠱᠠᠪᠳᠠᠩ ᠪᠠᠲᠤᠳᠬᠠᠬᠤ ᠳ᠋ᠤ᠌᠂ ᠪᠠᠭᠠ ᠮᠣᠩᠯᠠᠮ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠨᠠᠰᠤ ᠰᠡᠭᠦᠳᠡᠷ ᠢ᠋ ᠤᠷᠲᠤᠰᠬᠠᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠳᠠᠭ ᠶᠤᠮ᠃
ᠶᠡᠬᠡ ᠮᠣᠩᠯᠠᠮ ᠢ᠋ ᠬᠤᠷᠠᠭᠤᠯᠬᠤ ᠠᠵᠢᠯ ᠢ᠋ ᠤᠳᠤᠷᠢᠳᠤᠨ ᠬᠢᠯᠭᠡᠬᠦ ᠶ᠋ᠢᠨ ᠲᠤᠯᠠᠳᠠ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠬᠣᠶᠠᠷ ᠴᠣᠭᠴᠢᠨ ᠱᠠᠮᠤ᠂ ᠲᠡᠳᠡᠨ ᠦ᠌ ᠲᠤᠰᠯᠠᠬᠤ ᠬᠣᠶᠠᠷ ᠱᠠᠪᠳᠠᠭ᠍ᠮᠡ᠂ ᠨᠢᠭᠡ ᠠᠵᠤ ᠠᠬᠤᠢ ᠲᠦᠯᠡᠭᠡ ᠲᠦᠯᠡᠰᠢᠨ ᠦ᠌ ᠨᠢᠷᠪᠠ᠂ ᠲᠡᠭᠦᠨ ᠳ᠋ᠦ᠍ ᠵᠠᠬᠢᠷᠤᠭᠳᠠᠬᠤ ᠬᠣᠷᠢᠨ ᠨᠢᠭᠡᠨ ᠬᠡᠷᠡᠭ ᠪᠤᠶᠤ ᠭᠡᠰᠬᠦᠢ ᠶ᠋ᠢ ᠰᠣᠩᠭᠣᠵᠤ ᠳᠥᠷᠪᠡ ᠳ᠋ᠦ᠍ᠨᠢ ᠲᠡᠮᠦᠷ ᠪᠠᠷᠢᠶᠠ ᠣᠯᠭᠣᠳᠠᠭ ᠠᠵᠢ᠃ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠰᠢᠨᠡ ᠪᠠᠭᠰᠢ ᠨᠢ ᠲᠡᠷᠡ ᠬᠦ᠌ ᠬᠣᠷᠢᠨ ᠨᠢᠭᠡᠨ ᠭᠡᠰᠬᠦᠢ ᠶ᠋ᠢᠨ ᠲᠣᠭᠠᠨ ᠳ᠋ᠤ᠌ ᠣᠷᠣᠵᠠᠢ᠃ ᠲᠡᠭᠡᠭᠡᠳ ᠱᠠᠪᠢ ᠭᠡᠰᠦᠯ ᠢ᠋ ᠪᠡᠨ ᡀᠠᠰᠠ ᠮᠣᠩᠯᠠᠮ ᠤ᠋ᠨ ᠳ᠋ᠤᠩᠭᠤᠴᠢᠨ ᠪᠣᠯᠭᠠᠬᠤ ᠪᠠᠷ ᠭᠤᠶᠤᠵᠤ ᠪᠠᠰᠠ ᠪᠦᠷᠢᠳᠬᠡᠭᠦᠯᠵᠦ ᠠᠮᠵᠢᠵᠠᠢ᠃ ᠳ᠋ᠤᠩᠭᠤᠴᠢᠨ ᠭᠡᠳᠡᠭ ᠨᠢ ᠮᠠᠩᠵᠠ᠂ ᠴᠠᠪ ᠵᠥᠭᠡᠭᠡᠳᠡᠭ ᠨᠢᠭᠡ ᠶᠣᠰᠣᠨ ᠤ᠋ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠶᠦᠮ᠃
– ᠪᠤᠶᠠᠨ ᠲᠠᠢ ᠦᠢᠯᠡ᠂ ᠵᠥᠪ᠃ ᠲᠡᠭᠦᠨ ᠳ᠋ᠦ᠍ ᠣᠷᠣᠯᠴᠠᠪᠠᠯ ᠵᠣᠬᠢᠨᠠ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠱᠠᠪᠢ ᠳ᠋ᠠᠭᠠᠨ ᠵᠠᠬᠢᠯᠠ᠃ ᠲᠡᠷᠡ ᠶᠣᠰᠣᠭᠠᠷ ᠭᠡᠰᠦᠯ ᠰᠠᠩᠵᠢ ᡀᠠᠰᠠ ᠮᠣᠩᠯᠠᠮ ᠤ᠋ᠨ ᠳ᠋ᠤᠩᠭᠤᠴᠢᠨ ᠤ᠋ ᠲᠣᠭᠠᠨ ᠳ᠋ᠤ᠌ ᠣᠷᠣᠯᠠ᠃ ᠪᠠᠭᠰᠢ ᠯᠠᠮᠠ ᠨᠢ ᠴᠦ᠍ ᠪᠠᠶᠠᠷᠲᠠᠢ ᠪᠠᠢᠯᠠ᠃
ᠬᠣᠷᠢᠨ ᠮᠢᠩᠭᠠᠨ ᠯᠠᠮᠠ ᠳ᠋ᠤ᠌ ᠨᠢᠭᠡᠨ ᠵᠡᠷᠭᠡ ᠮᠠᠩᠵᠠ᠂ ᠴᠠᠪ ᠪᠠᠷᠢᠬᠤ ᠲᠤᠯᠠ ᠣᠯᠠᠨ ᠲᠣᠭᠠᠨ ᠤ᠋ ᠳ᠋ᠤᠩᠭᠤᠴᠢ ᠱᠠᠭᠠᠷᠳᠠᠭᠳᠠᠳᠠᠭ ᠪᠠᠢᠵᠠᠢ᠃
ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠡᠳᠦᠷ ᠦ᠋ᠳ ᠲᠦ᠍ ᠣᠢᠷᠠᠳᠬᠤ ᠳ᠋ᠤ᠌ ᠳ᠋ᠤᠩᠭᠤᠴᠢ ᠨᠠᠷ ᠢ᠋ ᠳᠠᠭᠤᠳᠠᠨ ᠴᠤᠭᠯᠠᠭᠤᠯᠵᠤ ᠥᠪᠡᠷ ᠥᠪᠡᠷᠰᠡᠳ ᠦ᠋ᠨ ᠨᠢ ᠲᠣᠭᠣᠭᠠᠨ ᠤ᠋ ᠭᠠᠵᠠᠷ ᠢ᠋ ᠵᠢᠭᠠᠵᠤ ᠥᠭᠪᠡ᠃ ᠲᠡᠭᠡᠲᠡᠯᠡ ᠵᠠᠮᠠ ᠶ᠋ᠢᠨ ᠯᠠᠮᠠ ᠳᠤᠲᠠᠭᠰᠠᠨ ᠲᠤᠯᠠ ᠰᠠᠩᠵᠢ ᠶ᠋ᠢ ᠵᠠᠮᠠ ᠪᠣᠯᠭᠠᠪᠠ᠃ ᠵᠠᠮᠠ ᠭᠡᠳᠡᠭ ᠨᠢ ᠲᠣᠭᠣᠭᠠᠴᠢ ᠶᠤᠮ᠃ ᠨᠢᠭᠡ ᠲᠣᠭᠣᠭᠠᠨ ᠳ᠋ᠤ᠌ ᠳᠥᠷᠪᠡᠨ ᠵᠠᠮᠠ ᠣᠨᠣᠭᠳᠠᠯᠠ᠃ ᠠᠰᠤᠷᠤ ᠲᠣᠮᠣ ᠬᠦᠷᠡᠯ ᠲᠣᠭᠣᠭᠠ ᠶ᠋ᠢ ᠠᠰᠤᠷᠤ ᠳᠣᠲᠣᠷᠠ ᠭᠠᠵᠠᠷ ᠵᠤᠭᠤᠵᠠᠢ᠃ ᠨᠢᠭᠡ ᠲᠣᠭᠣᠭᠠ ᠬᠣᠶᠠᠷ ᠮᠢᠩᠭᠠᠨ ᠯᠠᠮᠠ ᠶ᠋ᠢ ᠬᠣᠭᠣᠯᠠᠯᠠᠬᠤ ᠶᠤᠮ ᠭᠡᠨᠡ᠃ ᠪᠦᠭᠦᠳᠡ ᠠᠷᠪᠠᠨ ᠲᠣᠮᠣ ᠬᠦᠷᠡᠯ ᠲᠣᠭᠣᠭᠠ ᠡᠩᠨᠡᠭᠦᠯᠦᠨ ᠵᠣᠭᠣᠭᠰᠠᠨ ᠲᠣᠮᠣ ᠮᠣᠳᠣᠨ ᠠᠰᠠᠷ ᠳᠣᠲᠣᠷᠠᠬᠢ ᠲᠠᠯᠠᠪᠠᠢ ᠨᠢ ᡀᠠᠰᠠ ᠮᠣᠩᠯᠠᠮ ᠤ᠋ᠨ ᠭᠠᠯ ᠲᠣᠭᠣᠭᠠᠨ ᠤ᠋ ᠭᠠᠵᠠᠷ ᠪᠠᠢᠯᠠ᠃
ᠮᠠᠷᠭᠠᠰᠢ ᠪᠢᠲᠡᠭᠦᠨ ᠦ᠌ ᠡᠳᠦᠷ ᠪᠣᠯᠤᠨᠠ ᠭᠡᠵᠦ ᠪᠠᠢᠭᠠ ᠲᠤᠯᠠ ᠲᠣᠭᠣᠭᠠᠴᠢ ᠨᠠᠷ ᠠᠵᠢᠯ ᠳ᠋ᠠᠭᠠᠨ ᠣᠷᠣᠵᠠᠢ᠃ ᠬᠣᠶᠠᠷ ᠮᠢᠩᠭᠠᠨ ᠯᠠᠮᠠ ᠶ᠋ᠢᠨ ᠬᠣᠭᠣᠯᠠ ᠪᠠᠭᠲᠠᠬᠤ ᠲᠡᠢᠮᠦ ᠲᠣᠮᠣ ᠲᠣᠭᠣᠭᠠ ᠶ᠋ᠢ ᠵᠥᠪᠬᠡᠨ ᠤᠰᠤ ᠪᠠᠷ ᠳᠦᠭᠦᠷᠭᠡᠬᠦ ᠳ᠋ᠦ᠍ ᠯᠡ ᠬᠣᠷᠢ ᠬᠣᠨᠣᠭ ᠣᠷᠣᠮᠠᠷ ᠰᠠᠨᠠᠭᠳᠠᠬᠤ ᠲᠤᠯᠠ ᠰᠠᠩᠵᠢ ᠭᠡᠰᠦᠯ ᠶᠡᠬᠡᠬᠡᠨ ᠵᠣᠪᠠᠨᠢᠯᠠ᠃ ᠭᠡᠲᠡᠯᠡ ᠲᠣᠭᠣᠭᠠ ᠪᠦᠷᠢ ᠶ᠋ᠢᠨ ᠠᠮᠠᠰᠠᠷ ᠤᠷᠤᠭᠤ ᠴᠢᠯᠠᠭᠤ ᠪᠠᠷ ᠳᠣᠲᠣᠷᠯᠠᠭᠠᠳ ᠠᠰᠠᠷ ᠤ᠋ᠨ ᠬᠠᠶᠠᠭᠠ ᠪᠠᠷ ᠨᠦᠬᠡᠯᠡᠨ ᠣᠷᠣᠭᠤᠯᠤᠭᠰᠠᠨ ᠰᠤᠪᠠᠭ ᠱᠤᠤᠳᠤᠤ ᠲᠠᠲᠠᠭᠰᠠᠨ ᠪᠠᠢᠯᠠ᠃ ᠲᠣᠭᠣᠭᠠ ᠶ᠋ᠢ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠲᠡᠢ ᠠᠮᠠᠰᠠᠷ ᠨᠢ ᠪᠠᠷᠤᠭ ᠴᠠᠴᠠᠦ ᠪᠠᠢᠬᠤ ᠪᠠᠷ ᠭᠠᠵᠠᠷ ᠵᠤᠤᠬᠠᠨ ᠳ᠋ᠤ᠌ ᠵᠣᠭᠣᠵᠤ ᠰᠢᠭᠢᠳᠬᠡᠵᠡᠢ᠃ ᠱᠤᠤᠳᠤᠤ ᠪᠠᠷ ᠤᠰᠤ ᠭᠦᠶᠦᠯᠭᠡᠬᠦ ᠳ᠋ᠦ᠍ ᠲᠡᠷᠡ ᠨᠢ ᠬᠦᠷᠡᠯ ᠲᠣᠭᠣᠭᠠᠨ ᠤ᠋ ᠠᠮᠠᠰᠠᠷ ᠤᠷᠤᠭᠤ ᠳᠠᠭᠤ ᠱᠤᠤᠭᠢᠶᠠᠨ ᠲᠠᠢ ᠤᠷᠤᠰᠤᠨ ᠣᠷᠣᠵᠤ ᠡᠬᠢᠯᠡᠪᠡ᠃ ᠤᠰᠤ ᠭᠦᠶᠦᠯᠭᠡᠬᠦ ᠡᠴᠡ ᠡᠮᠦᠨᠡ ᠮᠣᠳᠣᠨ ᠱᠠᠲᠤ ᠲᠠᠯᠪᠢᠵᠤ ᠲᠣᠭᠣᠭᠠᠨ ᠳᠣᠲᠣᠷᠠ ᠣᠷᠣᠭᠠᠳ ᠢᠷᠣᠭᠠᠷ ᠲᠠᠬᠢ ᠰᠢᠭᠠᠷᠤ ᠶ᠋ᠢ ᠴᠡᠪᠡᠷᠯᠡᠪᠡ᠃ ᠲᠣᠭᠣᠭᠠᠨ ᠳ᠋ᠤ᠌ ᠤᠰᠤ ᠶ᠋ᠢ ᠤᠷᠤᠰᠬᠠᠨ ᠣᠷᠣᠭᠤᠯᠵᠤ ᠵᠢᠭᠠᠭᠰᠠᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠨᠢ ᠬᠦᠷᠭᠡᠭᠡᠳ ᠪᠤᠳᠠᠭᠠ ᠪᠠᠨ ᠬᠢᠯᠡ᠃ ᠡᠰᠢᠨ ᠡᠴᠡ ᠨᠢ ᠤᠷᠲᠤ ᠣᠯᠣᠰᠣ ᠤᠶᠠᠭᠰᠠᠨ ᠬᠣᠶᠠᠷ ᠬᠦᠷᠵᠡ ᠶ᠋ᠢ ᠲᠡᠭᠦᠨ ᠳ᠋ᠦ᠍ ᠲᠠᠯᠪᠢᠵᠤ ᠣᠷᠣᠭᠤᠯᠵᠠᠢ᠃ ᠬᠠᠯᠪᠠᠭᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠬᠦᠷᠵᠡ ᠪᠡᠷ ᠲᠡᠷᠡ ᠪᠤᠳᠠᠭᠠ ᠶ᠋ᠢ ᠬᠤᠳᠬᠤᠬᠤ ᠶᠣᠰᠣᠲᠠᠢ ᠭᠡᠨᠡ᠃
《ᠡᠨᠡ ᠲᠣᠮᠣ ᠲᠣᠭᠣᠭᠠ ᠲᠠᠢ ᠶᠠᠭᠤᠮᠠ ᠬᠡᠴᠢᠨᠡᠨ ᠬᠣᠨᠣᠵᠤ ᠪᠠᠢᠵᠤ ᠪᠤᠴᠠᠯᠬᠤ ᠪᠣᠯ? ᠳᠡᠮᠡᠢ ᠯᠡ ᠲᠣᠭᠣᠭᠠᠴᠢ ᠪᠣᠯᠤᠯᠠ᠃ ᠠᠩᠬᠠᠨ ᠠ᠋ᠴᠠ ᠪᠠᠨ ᠲᠡᠷᠡ ᠴᠠᠢ ᠵᠥᠭᠡᠭᠡᠭᠴᠢ ᠨᠢ ᠳᠡᠭᠡᠷᠡ ᠪᠠᠢᠵᠠᠢ᠃ ᠣᠳᠣ ᠶᠠᠭᠠᠬᠢᠵᠤ ᠡᠢᠮᠦ ᠶᠡᠬᠡ ᠬᠣᠭᠣᠯᠠ ᠶ᠋ᠢ ᠪᠡᠯᠡᠳᠬᠡᠨᠡ ᠳᠡ》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠰᠠᠨᠠᠭᠠᠰᠢᠷᠠᠵᠠᠢ᠃ ᠭᠡᠪᠡᠴᠦ ᠨᠥᠭᠥᠭᠡᠳᠡᠭᠦᠯᠡ ᠨᠢ ᠤᠷᠢᠳᠤ ᠪᠠᠰᠠ ᠵᠠᠮᠠ ᠪᠠᠷ ᠠᠵᠢᠯᠯᠠᠵᠤ ᠪᠠᠢᠭᠰᠠᠨ ᠲᠤᠷᠰᠢᠯᠭᠠ ᠲᠠᠢ ᠵᠠᠯᠠᠭᠤᠰ ᠪᠠᠢᠪᠠ᠃ ᠬᠡᠳᠦ ᠬᠣᠨᠣᠭ ᠴᠠᠳᠬᠤᠯᠠᠩ ᠪᠠᠢᠬᠤ ᠶ᠋ᠢ ᠲᠡᠳᠡ ᠬᠦᠰᠡᠵᠡᠢ᠃
– ᠤᠳᠠᠬᠤ ᠦᠭᠡᠢ ᠣᠷᠣᠢ ᠲᠠᠰᠢ ᠪᠠᠨ ᠪᠤᠴᠠᠯᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠨᠠᠭᠠᠯᠳᠤᠭᠤᠯᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠ ᠨᠢᠭᠡ ᠬᠣᠶᠠᠷ ᠢ᠋ᠶ᠋ᠠᠷ ᠬᠤᠳᠬᠤᠵᠤ ᠪᠠᠢᠯᠭᠦᠢ ᠪᠣᠯᠬᠤ ᠦᠭᠡᠢ ᠭᠡᠵᠦ ᠠᠬᠠᠯᠠᠬᠤ ᠲᠣᠭᠣᠭᠠᠴᠢ ᠬᠡᠯᠡᠪᠡ᠃ ᠶᠠᠭᠠᠬᠢᠵᠤ ᠬᠤᠳᠬᠤᠳᠠᠭ ᠶᠤᠮ ᠪᠣᠯ ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠭᠠᠢᠬᠠᠵᠤ ᠪᠠᠢᠭᠰᠠᠨ ᠴᠢᠨᠢ ᠲᠣᠭᠣᠭᠠᠨ ᠤ᠋ ᠭᠣᠣᠯ ᠤᠷᠤᠭᠤ ᠬᠣᠶᠠᠷ ᠬᠦᠷᠵᠡ ᠪᠡᠨ ᠪᠣᠰᠤᠭᠠ ᠵᠣᠭᠣᠭᠠᠳ ᠬᠣᠶᠠᠷ ᠨᠢ ᠪᠠᠷᠢᠵᠤ ᠨᠥᠬᠥᠭᠡ ᠬᠣᠶᠠᠷ ᠨᠢ ᠬᠦᠷᠵᠡᠨ ᠦ᠌ ᠡᠰᠢᠨ ᠡᠴᠡ ᠪᠡᠬᠢᠯᠡᠭᠡᠲᠡᠢ ᠣᠯᠤᠭᠰᠠᠨ ᠠ᠋ᠴᠠ ᠬᠣᠶᠠᠷ ᠲᠡᠰᠢ ᠲᠠᠲᠠᠵᠤ ᠨᠠᠰᠢ ᠴᠠᠰᠢ ᠨᠢ ᠴᠢᠩᠭᠠᠭᠠᠵᠤ ᠬᠣᠭᠣᠯᠠ ᠪᠠᠨ ᠬᠤᠳᠬᠤᠳᠠᠭ ᠶᠤᠮ ᠪᠠᠢᠵᠠᠢ᠃ ᠲᠡᠷᠡᠴᠢᠯᠡᠨ ᠢ᠋ᠶ᠋ᠡᠷ ᠦᠶᠡ ᠦᠶᠡ ᠬᠤᠳᠬᠤᠬᠤ ᠶ᠋ᠢᠨ ᠬᠠᠮᠲᠤ ᠰᠠᠷᠯᠤᠭ ᠤ᠋ᠨ ᠮᠢᠬᠠ ᠶ᠋ᠢ ᠲᠣᠮᠣ ᠲᠣᠮᠣ ᠬᠡᠷᠴᠢᠵᠦ ᠪᠤᠳᠠᠭᠠᠨ ᠳ᠋ᠤ᠌ ᠨᠡᠮᠡᠭᠡᠳ ᠪᠤᠴᠠᠯᠬᠤ ᠠ᠋ᠴᠠ ᠨᠢ ᠡᠮᠦᠨᠡᠬᠡᠨ ᠦᠵᠦᠮ᠂ ᠡᠯᠡᠰᠦᠨ ᠰᠢᠬᠢᠷ ᠬᠣᠯᠢᠵᠠᠢ᠃ ᠲᠡᠭᠡᠭᠡᠳ ᠬᠠᠷᠤᠢ ᠪᠦᠷᠦᠢ ᠪᠣᠯᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠥᠭᠥᠭᠡᠬᠢ ᠪᠤᠳᠠᠭᠠ ᠪᠤᠴᠠᠯᠬᠤ ᠰᠢᠨᠵᠢ ᠣᠷᠣᠪᠠ᠃
– ᠵᠠ ᠣᠳᠣ ᠯᠠ ᠠᠶᠤᠯ ᠲᠠᠢ᠃ ᠬᠠᠮᠤᠭ ᠤ᠋ᠨ ᠶᠡᠬᠡ ᠬᠤᠳᠬᠤᠨ ᠬᠣᠯᠢᠬᠤ ᠴᠠᠭ ᠢᠷᠡᠯᠡ ᠭᠡᠵᠦ ᠠᠬᠠᠯᠠᠬᠤ ᠲᠣᠭᠣᠭᠠᠴᠢ ᠵᠢᠭᠠᠪᠤᠷᠢᠯᠠᠪᠠ᠃
ᠬᠣᠶᠠᠷ ᠨᠢ ᠬᠦᠷᠵᠡ ᠶ᠋ᠢ ᠲᠣᠭᠣᠭᠠᠨ ᠤ᠋ ᠢᠷᠣᠭᠠᠷ ᠬᠦᠷᠲᠡᠯᠡ ᠰᠢᠭᠠᠵᠤ᠂ ᠬᠣᠶᠠᠷ ᠨᠢ ᠣᠯᠣᠰᠣ ᠪᠠᠷ ᠨᠠᠰᠢ ᠴᠠᠰᠢ ᠲᠠᠲᠠᠵᠤ ᠰᠡᠯᠢᠭᠦᠷᠳᠡᠬᠦ ᠮᠡᠲᠦ ᠪᠡᠷ ᠬᠤᠳᠬᠤᠵᠤ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠠᠵᠢᠯᠯᠠᠪᠠ᠃ ᠬᠥᠯᠥᠰᠥ ᠪᠡᠨ ᠴᠤᠪᠤᠷᠠᠭᠤᠯᠤᠨ ᠠᠭᠠᠬᠢᠯᠵᠠᠭᠠᠵᠤ ᠲᠣᠭᠣᠭᠠ ᠲᠠᠢ ᠪᠤᠳᠠᠭᠠᠨ ᠳ᠋ᠤ᠌ ᠵᠠᠪ ᠴᠢᠯᠥᠭᠡ ᠥᠭᠬᠦ ᠦᠭᠡᠢ ᠪᠡᠷ ᠬᠤᠳᠬᠤᠵᠤ ᠪᠠᠢᠯᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠰᠢᠷᠠ ᠲᠣᠰᠣ ᠠᠪᠴᠤ ᠢᠷᠡᠪᠡ ᠃ ᠰᠢᠷᠠ ᠲᠣᠰᠣ ᠶ᠋ᠢ ᠪᠤᠳᠠᠭᠠᠨ ᠳ᠋ᠤ᠌ ᠵᠢᠭᠳᠡ ᠰᠢᠩᠭᠡᠭᠡᠬᠦ ᠶ᠋ᠢᠨ ᠲᠤᠯᠠᠳᠠ ᠳᠠᠬᠢᠭᠠᠳ ᠯᠠ ᠬᠦᠷᠵᠡᠳᠡᠨ ᠬᠤᠳᠬᠤᠬᠤ ᠠᠵᠢᠯ ᠢ᠋ᠶ᠋ᠠᠨ ᠰᠡᠷᠭᠦᠭᠡᠨ ᠵᠣᠭᠰᠣᠭᠠ ᠵᠠᠢ ᠦᠭᠡᠢ ᠠᠵᠢᠯᠯᠠᠯᠠ᠃ ᠪᠤᠰᠤᠳ ᠲᠣᠭᠣᠭᠠᠴᠢ ᠨᠠᠷ ᠮᠥᠨ ᠯᠡ ᠠᠳᠠᠯᠢᠬᠠᠨ ᠪᠠᠢᠯᠠ᠃ ᠬᠠᠷᠢᠨ ᠲᠡᠳᠡᠨ ᠡᠴᠡ ᠬᠣᠯᠠᠬᠠᠨ ᠥᠭᠡᠷᠡ ᠨᠢᠭᠡ ᠮᠣᠳᠣᠨ ᠭᠡᠷ ᠲᠦ᠍ ᠪᠠᠢᠭᠠ ᠴᠠᠢᠴᠢ ᠨᠠᠷ ᠤ᠋ᠨ ᠠᠵᠢᠯ ᠠᠷᠠᠢ ᠬᠥᠩᠭᠡᠨ ᠪᠣᠯᠬᠤ ᠶ᠋ᠢ ᠭᠡᠰᠦᠯ ᠰᠠᠩᠵᠢ ᠮᠡᠳᠡᠵᠦ ᠠᠪᠤᠪᠠ᠃ ᠴᠠᠢ ᠪᠣᠯ ᠪᠤᠳᠠᠭᠠ ᠲᠠᠢ ᠬᠣᠭᠣᠯᠠ ᠰᠢᠭ᠋ ᠬᠣᠯᠢᠵᠤ ᠬᠤᠳᠬᠤᠬᠤ ᠱᠠᠭᠠᠷᠳᠠᠯᠭᠠ ᠦᠭᠡᠢ ᠶᠦᠮ ᠪᠠᠢᠯᠠ᠃
ᠥᠷᠯᠥᠭᠡ ᠦᠷ ᠢ᠋ᠶ᠋ᠡᠷ ᠲᠡᠳᠡᠨ ᠦ᠌ ᠬᠣᠭᠣᠯᠠ ᠴᠠᠢ ᠪᠡᠯᠡᠨ ᠪᠣᠯᠤᠯᠠ᠃ ᠬᠣᠭᠣᠯᠠ᠂ ᠴᠠᠢ ᠶ᠋ᠢᠨ ᠠᠮᠲᠠ ᠶ᠋ᠢ ᠰᠢᠯᠭᠠᠬᠤ ᠠᠵᠢᠯ ᠢ᠋ᠶ᠋ᠠᠷ ᠬᠣᠶᠠᠷ ᠱᠠᠪᠳᠡᠭᠮᠡ ᠦᠷ ᠢ᠋ᠶ᠋ᠡᠷ ᠢᠷᠡᠭᠡᠳ ᠲᠣᠭᠣᠭᠠ ᠪᠦᠷᠢ ᠡᠴᠡ ᠭᠤᠷᠪᠠᠨ ᠲᠠᠯᠠ ᠠ᠋ᠴᠠ ᠨᠢᠭᠡ ᠨᠢᠭᠡ ᠬᠠᠯᠪᠠᠭᠠ ᠠᠪᠬᠠᠭᠤᠯᠵᠤ ᠠᠮᠰᠠᠨ ᠦᠵᠡᠵᠡᠭᠡᠪᠡ᠃ ᠲᠡᠳᠡ ᠲᠠᠮᠰᠢᠶᠠᠯᠠᠨ ᠦᠵᠡᠵᠦ᠂ ᠢᠷᠪᠠᠯᠵᠠᠨ ᠮᠠᠢᠭᠯᠠᠵᠤ ᠲᠣᠭᠣᠭᠠ ᠪᠦᠷᠢ ᠶ᠋ᠢ ᠰᠢᠯᠭᠠᠭᠠᠳ ᠳᠤᠮᠳᠠᠬᠢ ᠶᠡᠬᠡ ᠲᠣᠭᠣᠭᠠᠨ ᠤ᠋ ᠬᠣᠭᠣᠯᠠ ᠶ᠋ᠢ ᠭᠣᠯᠣᠵᠤ ᠬᠣᠶᠠᠷ ᠴᠤ᠌ ᠵᠠᠯᠠᠭᠤᠬᠠᠨ ᠵᠠᠮᠠ ᠶ᠋ᠢ ᠲᠣᠭᠣᠭᠠᠨ ᠤ᠋ ᠨᠢ ᠳᠡᠷᠭᠡᠳᠡ ᠨᠡᠪᠰᠢᠷᠡᠲᠡᠯᠡ ᠵᠣᠳᠣᠪᠠ᠃ ᠠᠰᠢᠭᠦᠢ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠲᠣᠭᠣᠭᠠ ᠲᠠᠢ ᠬᠣᠭᠣᠯᠠ ᠭᠣᠯᠣᠭᠳᠠᠭᠰᠠᠨ ᠦᠭᠡᠢ᠃ ᠳᠥᠷᠪᠡᠭᠦᠯᠡ ᠪᠡᠨ ᠶᠡᠬᠡᠳᠡ ᠪᠠᠶᠠᠷᠯᠠᠵᠤ ᠬᠣᠭᠣᠯᠠᠨ ᠠ᠋ᠴᠠ ᠪᠠᠨ ᠨᠢᠭᠡ ᠨᠢᠭᠡ ᠠᠶᠠᠭᠠ ᠢᠳᠡᠪᠡ᠃
᠁ ᡀᠠᠰᠠ ᠬᠣᠲᠠ ᠶ᠋ᠢᠨ ᠬᠢᠨ ᠭᠤᠳᠤᠮᠵᠢ ᠪᠠᠨ ᠴᠡᠪᠡᠷᠯᠡᠨ ᠬᠣᠭ ᠨᠣᠪᠰᠢ ᠠ᠋ᠴᠠ ᠪᠠᠨ ᠰᠠᠯᠵᠤ᠂ ᠠᠢᠯ ᠤ᠋ᠳ ᠭᠡᠷ ᠲᠦ᠍ ᠪᠡᠨ ᠮᠥᠨ ᠯᠡ ᠴᠡᠪᠡᠷᠯᠡᠭᠡ ᠬᠢᠵᠦ ᡀᠠᠰᠠ ᠮᠣᠩᠯᠠᠮ ᠤ᠋ᠨ ᠵᠠᠬᠢᠷᠭᠠ ᠶ᠋ᠢ ᠬᠣᠲᠠᠨ ᠳ᠋ᠤ᠌ ᠮᠣᠷᠢᠯᠠᠨ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠡᠭᠡᠵᠦ ᠪᠠᠢᠯᠠ᠃ ᠵᠠᠷᠢᠮ ᠭᠤᠳᠤᠮᠵᠢ ᠠᠰᠤᠷᠤ ᠶᠡᠬᠡ ᠬᠣᠭ ᠲᠠᠢ ᠲᠤᠯᠠ ᠴᠡᠪᠡᠷᠯᠡᠵᠦ ᠪᠠᠷᠠᠭᠠᠳᠤᠢ ᠪᠠᠢᠲᠠᠯᠠ ᠮᠣᠩᠯᠠᠮ ᠴᠧᠩᠮᠤ ᠶ᠋ᠢᠨ ᠵᠠᠬᠢᠷᠤᠭᠰᠠᠳ ᠬᠦᠷᠦᠯᠴᠡᠨ ᠢᠷᠡᠯᠡ᠃ ᠠᠯᠠᠭ ᠡᠷᠢᠶᠡᠨ ᠭᠣᠶᠣᠮᠰᠣᠭ ᠬᠤᠳᠠᠷᠭᠠ᠂ ᠴᠢᠮᠡᠭ ᠤᠨᠵᠢᠯᠭᠠ ᠲᠠᠢ ᠮᠣᠷᠢᠳ ᠤᠨᠠᠭᠰᠠᠨ ᠴᠣᠭᠴᠢᠨ ᠱᠠᠮᠤ᠂ ᠲᠡᠳᠡᠨ ᠦ᠌ ᠲᠤᠰᠠᠯᠠᠬᠤ ᠱᠠᠪᠲᠡᠭᠮᠡ ᠨᠦ᠍ᠭᠦᠳ᠂ ᠬᠡᠶᠡᠭ᠂ ᠭᠡᠰᠬᠦᠢ ᠬᠠᠮᠲᠤ ᠪᠠᠷ ᠮᠣᠷᠢᠯᠠᠨ ᠢᠷᠡᠵᠡᠭᠡᠯᠡ᠃ ᠠᠯᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠤᠶᠤᠭᠰᠠᠨ ᠲᠡᠳᠡ ᠪᠤᠳᠠᠯᠠᠩ ᠤ᠋ᠨ ᠣᠷᠳᠣᠨ ᠢ᠋ᠶ᠋ᠠᠷ ᠶᠠᠭᠤᠨ ᠤ᠋ ᠲᠦᠷᠦᠭᠦᠨ ᠣᠷᠣᠵᠤ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠠᠮᠤᠷ ᠢ᠋ ᠠᠢᠯᠠᠳᠬᠠᠵᠤ᠂ ᠮᠥᠷᠭᠥᠯ ᠦᠢᠯᠡᠳᠪᠡ᠃ ᠳᠠᠷᠠᠭᠠ ᠨᠢ ᠣᠷᠳᠣᠨ ᠠ᠋ᠴᠠ ᠭᠠᠷᠴᠤ ᠬᠣᠲᠠ ᠶ᠋ᠢ ᠡᠷᠭᠢᠬᠦ ᠪᠡᠷ ᠶᠠᠪᠤᠵᠠᠭᠠᠯᠠ᠃ ᠬᠣᠶᠠᠷ ᠱᠠᠮᠤ ᠂ ᠱᠠᠪᠲᠡᠭᠮᠡ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠪᠠᠷ ᠮᠣᠷᠢᠨ ᠳᠡᠭᠡᠷᠡ ᠪᠤᠰᠤᠳ ᠨᠢ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠰᠠᠪᠠᠭᠠ ᠪᠠᠷᠢᠵᠠᠭᠠᠵᠤ ᠬᠣᠢᠨᠠ ᠡᠮᠦᠨᠡ ᠪᠡᠨ ᠣᠷᠣᠵᠠᠭᠠᠨ ᠶᠠᠪᠤᠵᠠᠭᠠᠬᠤ ᠳ᠋ᠠᠭᠠᠨ ᠶᠡᠬᠡ ᠯᠡ ᠰᠦᠷᠲᠡᠢ ᠪᠡᠷ᠄
– ᠫᠠᠵᠤᠤᠵᠢᠢ! ᠫᠠᠵᠤᠤᠵᠢᠢ! ᠭᠡᠵᠦ ᠬᠠᠰᠬᠢᠷᠤᠯᠳᠠᠵᠤ ᠪᠠᠢᠯᠠ᠃
ᠵᠠᠮ ᠠ᠋ᠴᠠ ᠵᠠᠢᠯᠠᠵᠠᠭᠠ! ᠭᠡᠰᠡᠨ ᠲᠡᠷᠡ ᠰᠦᠷᠲᠡᠢ ᠲᠤᠰᠢᠶᠠᠯ ᠢ᠋ ᠰᠣᠨᠣᠰᠤᠭᠰᠠᠨ ᠬᠥᠮᠦᠰ ᠭᠣᠳᠬᠢᠨ ᠵᠢᠭᠤᠲᠠᠵᠤ ᠪᠠᠢᠪᠠ᠃ ᠡᠳᠡ ᠨᠠᠷ ᡀᠠᠰᠠ ᠬᠣᠲᠠ ᠳ᠋ᠤ᠌ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠡᠳᠦᠷ ᠦ᠋ᠳ ᠲᠦ᠍ ᠬᠣᠷᠢ ᠬᠣᠨᠣᠭ ᠮᠥᠨ ᠭᠤᠷᠪᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠪᠡᠷ ᠠᠷᠪᠠᠨ ᠨᠢᠭᠡ ᠬᠣᠨᠣᠭ ᠤ᠋ᠨ ᠲᠣᠷᠰᠢ ᡀᠠᠰᠠ ᠶ᠋ᠢᠨ ᠪᠦᠷᠢᠨ ᠡᠷᠬᠡᠲᠦ ᠡᠵᠡᠳ ᠨᠢ ᠪᠣᠯᠳᠠᠭ ᠤᠴᠢᠷ ᠡᠪ ᠦᠭᠡᠢᠬᠡᠨ ᠲᠣᠬᠢᠶᠠᠯᠳᠤᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠪᠠ ᠰᠢᠳᠬᠡᠯ ᠲᠣᠬᠣᠭᠠᠵᠤ ᠣᠷᠬᠢᠳᠠᠭ ᠡᠷᠬᠡ ᠲᠡᠢ ᠶᠦᠮ ᠰᠠᠨᠵᠠᠢ᠃ ᠲᠡᠳᠡ ᠬᠣᠲᠠ ᠳᠤᠮᠳᠠᠭᠤᠷ ᠡᠷᠭᠢᠭᠦᠯ ᠮᠠᠶ᠋ᠢᠭ᠌ᠲᠠᠢ ᠶᠠᠪᠤᠵᠤ ᠬᠥᠮᠦᠰ ᠲᠦ᠍ ᠰᠤᠷᠭᠠᠯ ᠥᠭᠴᠦ᠂ ᠵᠠᠪᠲ᠋ᠢ ᠬᠦᠷᠲᠡᠭᠡᠵᠦ᠂ ᠪᠠᠷᠤᠭ ᠡᠳᠦᠷᠵᠢᠨ ᠶᠠᠪᠤᠭᠠᠳ ᠣᠷᠣᠢ ᠪᠤᠴᠠᠨᠠ᠃ ᠢᠩᠭᠢᠵᠦ ᡀᠠᠰᠠ ᠮᠣᠩᠯᠠᠮ ᠭᠡᠳᠡᠭ ᠢᠷᠦᠭᠡᠯ ᠦ᠋ᠨ ᠶᠡᠬᠡ ᠴᠢᠭᠤᠯᠭᠠᠨ ᠡᠬᠢᠯᠡᠳᠡᠭ ᠠᠵᠢ᠃
ᠡᠬᠢᠨ ᠦ᠌ ᠡᠳᠦᠷ ᠪᠤᠳᠠᠯᠠᠩ ᠤ᠋ᠨ ᠣᠷᠳᠣᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠡᠴᠡ ᠭᠤᠷᠪᠠᠨ ᠱᠠᠯᠠᠮᠠᠭ ᠯᠠᠮᠠ ᠶ᠋ᠢ ᠣᠯᠣᠰᠣ ᠪᠠᠷ ᠳᠠᠮᠵᠢᠭᠤᠯᠤᠨ ᠭᠠᠵᠠᠷ ᠪᠠᠭᠤᠯᠭᠠᠬᠤ ᠶᠣᠰᠣᠯᠠᠯ ᠪᠣᠯᠳᠠᠭ ᠲᠤᠯᠠ ᠰᠠᠩᠵᠢ ᠭᠡᠰᠦᠯ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠪᠤᠳᠠᠯᠠᠩ ᠤ᠋ᠨ ᠣᠷᠳᠣᠨ ᠤ᠋ ᠡᠮᠦᠨᠡᠲᠦ ᠲᠠᠯᠠᠪᠠᠢ ᠳ᠋ᠤ᠌ ᠣᠴᠢᠪᠠ᠃ ᠲᠡᠨᠳᠡ ᠣᠯᠠᠨ ᠵᠠᠭᠤᠨ ᠬᠥᠮᠦᠨ ᠴᠤᠭᠯᠠᠷᠠᠵᠠᠢ᠃ ᠪᠤᠳᠠᠯᠠᠩ ᠤ᠋ᠨ ᠣᠷᠳᠣᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠡᠴᠡ ᠳᠣᠭᠣᠭᠰᠢ ᠨᠢ ᠪᠦᠳᠦᠭᠦᠨ ᠣᠯᠣᠰᠣ ᠶ᠋ᠢ ᠤᠨᠵᠢᠭᠤᠯᠤᠨ ᠲᠠᠲᠠᠵᠤ ᠣᠷᠳᠣᠨ ᠤ᠋ ᠡᠭᠦᠳᠡᠨ ᠲᠤᠰᠢᠶᠠ ᠭᠠᠵᠠᠷ ᠲᠤ᠌ ᠪᠠᠢᠭᠠ ᠴᠢᠯᠠᠭᠤᠨ ᠪᠠᠭᠠᠨᠠᠨ ᠳ᠋ᠤ᠌ ᠨᠥᠭᠥᠭᠡ ᠦᠵᠦᠭᠦᠷ ᠢ᠋ ᠪᠡᠬᠢᠯᠡᠵᠡᠢ᠃ ᠢᠯᠭᠢᠨ ᠬᠣᠷᠮᠣᠢᠪᠴᠢ ᠡᠮᠦᠰᠴᠦ᠂ ᠭᠦᠮ ᠪᠡᠭᠡᠯᠡᠢ ᠭᠠᠷ ᠲᠠᠭᠠᠨ ᠬᠢᠭᠰᠡᠨ ᠭᠤᠷᠪᠠᠨ ᠵᠠᠯᠠᠭᠤᠬᠠᠨ ᠡᠷᠡ ᠪᠤᠳᠠᠯᠠᠩ ᠤ᠋ᠨ ᠣᠷᠣᠢ ᠠ᠋ᠴᠠ ᠣᠯᠣᠰᠣ ᠶ᠋ᠢ ᠳ᠋ᠡᠭᠡᠨ ᠭᠡᠳᠡᠰᠦ ᠪᠡᠷ ᠢ᠋ᠶ᠋ᠡᠨ ᠳᠣᠭᠣᠭᠰᠢ ᠭᠤᠯᠭᠤᠵᠤ ᠡᠬᠢᠯᠡᠪᠡ᠃ ᠬᠥᠮᠦᠰ ᠠᠮᠢᠰᠬᠤᠭᠠ ᠳᠠᠷᠤᠨ ᠰᠢᠷᠲᠡᠵᠦ ᠪᠠᠢᠯᠠ᠃ ᠳᠣᠷᠣᠭᠰᠢᠯᠠᠬᠤ ᠲᠣᠰᠤᠮ ᠤᠯᠠᠮ ᠬᠤᠷᠳᠤᠯᠠᠭᠰᠠᠭᠠᠷ ᠭᠠᠵᠠᠷ ᠫᠢᠷ ᠬᠢᠬᠦ ᠴᠢᠮᠡᠭᠡ ᠭᠠᠷᠭᠠᠵᠤ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠲᠡᠳᠡ ᠪᠠᠭᠤᠵᠤ ᠢᠷᠡᠪᠡ᠃ ᠡᠯᠢᠭᠡᠳᠡᠨ ᠭᠤᠯᠭᠤᠭᠰᠠᠨ ᠲᠤᠯᠠ ᠲᠡᠳᠡᠨ ᠦ᠌ ᠬᠤᠷᠮᠤᠢᠪᠴᠢᠨ ᠠ᠋ᠴᠠ ᠬᠡᠩᠰᠢᠭᠦᠦ ᠬᠠᠩᠬᠤᠯᠵᠤ ᠪᠠᠢᠯᠠ᠃
– ᠢᠩᠭᠢᠵᠦ ᠪᠠᠭᠤᠭᠰᠠᠨ ᠬᠥᠮᠦᠰ ᠨᠢᠭᠡᠨ ᠵᠢᠯ ᠦ᠋ᠨ ᠠᠯᠪᠠ ᠲᠠᠲᠠᠪᠤᠷᠢ ᠠ᠋ᠴᠠ ᠴᠢᠯᠥᠭᠡᠯᠡᠭᠳᠡᠳᠡᠭ ᠶᠦᠮ! ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠨᠥᠬᠥᠳ ᠨᠢ ᠲᠠᠢᠯᠪᠤᠷᠢᠯᠠᠪᠠ᠃
– ᠭᠣᠣᠯᠳᠠᠭᠤ ᠵᠠᠩ ᠮᠣᠵᠢ ᠶ᠋ᠢᠨ ᠬᠢᠨ ᠯᠡ ᠡᠭᠦᠨ ᠢ᠋ ᠬᠢᠳᠡᠭ ᠶᠦ᠍ᠮ ᠳᠡ ᠭᠡᠵᠦ ᠪᠠᠰᠠ ᠨᠢᠭᠡ ᠨᠢ ᠰᠣᠨᠢᠷᠬᠠᠭᠤᠯᠤᠨ ᠬᠡᠯᠡᠪᠡ᠃
᠁ ᠮᠠᠷᠭᠠᠰᠢ ᠡᠳᠦᠷ ᠨᠢ ᠬᠣᠷᠢᠨ ᠮᠢᠩᠭᠠᠨ ᠯᠠᠮᠠ ᠶᠡᠬᠡ ᠵᠣᠣ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠵᠢᠭᠳᠡᠷᠡᠨ ᠴᠤᠭᠯᠠᠷᠠᠵᠠᠢ᠃ ᠪᠦᠭᠦᠳᠡ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠡᠵᠡᠯᠡᠭᠰᠡᠨ ᠨᠢ ᠤᠯᠠᠭᠠᠨ ᠳᠣᠯᠭᠢᠶᠠᠨ ᠲᠠᠢ ᠰᠢᠷᠠ ᠳᠠᠯᠠᠢ ᠰᠢᠭ᠋ ᠶᠡᠷᠦ ᠪᠤᠰᠤ ᠶ᠋ᠢᠨ ᠰᠣᠨᠢᠨ ᠠᠵᠠᠢ᠃ ᠮᠠᠩᠵᠠ ᠵᠥᠭᠡᠭᠡᠬᠦ ᠵᠠᠮ ᠢ᠋ᠶ᠋ᠠᠨ ᠵᠢᠭᠠᠯᠭᠠᠵᠤ ᠶᠠᠪᠤᠭᠠᠳ ᠰᠠᠩᠵᠢ ᠭᠡᠰᠦᠯ ᠲᠡᠭᠦᠨ ᠢ᠋ ᠬᠠᠷᠠᠵᠤ ᠮᠠᠰᠢᠳᠠ ᠰᠡᠳᠬᠢᠯ ᠳᠣᠭᠳᠣᠯᠵᠤ᠂ ᠬᠡᠵᠢᠶᠡ ᠡᠨᠡ ᠬᠣᠷᠢᠨ ᠮᠢᠩᠭᠠᠨ ᠯᠠᠮᠠ ᠨᠠᠷ ᠤ᠋ᠨ ᠳᠤᠮᠳᠠ ᠥᠪᠡᠷ ᠦ᠋ᠨ ᠰᠠᠭᠤᠳᠠᠯ ᠢ᠋ ᠣᠯᠵᠤ ᠡᠵᠡᠯᠡᠨ ᠰᠠᠭᠤᠬᠤ ᠪᠣᠯ᠂ ᠲᠡᠢᠮᠦ ᠴᠠᠭ ᠢᠷᠡᠬᠦ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠯᠠ᠃
ᠵᠢᠷᠤᠮ ᠰᠠᠬᠢᠭᠤᠯᠤᠭᠴᠢ ᠭᠡᠰᠦᠯ ᠨᠠᠷ ᠪᠣᠯᠤᠨ ᠱᠠᠮᠤ ᠨᠤᠭᠤᠳ ᠲᠥᠪ ᠰᠠᠭᠤᠳᠠᠯ ᠤ᠋ᠨ ᠡᠩᠨᠡᠭᠡᠨ ᠦ᠌ ᠬᠣᠭᠣᠷᠣᠨᠳᠣᠭᠤᠷ ᠨᠠᠰᠢ ᠴᠠᠰᠢ ᠶᠠᠪᠤᠨᠠ᠃
ᠨᠢᠭᠡᠨ ᠰᠦᠷᠯᠢᠭ ᠱᠠᠮᠤ ᡀᠠᠰᠠ ᠮᠣᠩᠯᠠᠮ ᠬᠤᠷᠠᠬᠤ ᠵᠠᠢᠭ ᠢ᠋ ᠥᠨᠳᠥᠷ ᠳᠠᠭᠤ ᠪᠠᠷ ᠤᠩᠰᠢᠨ ᠰᠣᠨᠣᠰᠬᠠᠪᠠ᠃ ᠵᠠᠢᠭ ᠵᠥᠷᠢᠴᠡᠪᠡᠰᠦ ᠬᠠᠲᠠᠭᠤ ᠰᠢᠳᠬᠡᠬᠦ ᠲᠤᠬᠠᠢ ᠳᠠᠬᠢᠨ ᠰᠠᠨᠠᠭᠤᠯᠪᠠ᠃ ᠶᠡᠬᠡ ᠵᠣᠣ ᠶ᠋ᠢᠨ ᠪᠠᠷᠠᠭᠤᠨ ᠬᠠᠭᠠᠯᠭᠠᠨ ᠤ᠋ ᠲᠣᠲᠣᠭᠣᠨ ᠳᠡᠭᠡᠷᠡ ᠠᠰᠤᠷᠤ ᠬᠦᠨᠳᠦ ᠴᠤᠯᠤ ᠲᠡᠮᠦᠷ ᠪᠠᠷᠢᠶᠠ ᠲᠠᠯᠪᠢᠭᠠᠰᠤᠲᠠᠢ ᠪᠠᠢᠳᠠᠭ᠃ ᠨᠢᠭᠦᠯ ᠬᠢᠯᠢᠨᠴᠡ ᠲᠠᠢ ᠶᠤᠮ ᠤᠤ ᠡᠰᠡᠪᠡᠯ ᠵᠠᠢᠭ ᠠᠯᠳᠠᠭᠳᠠᠭᠤᠯᠤᠭᠰᠠᠨ ᠯᠠᠮᠠ ᠶ᠋ᠢ ᠬᠠᠭᠠᠯᠭᠠ ᠪᠠᠷ ᠭᠠᠷᠬᠤ ᠭᠡᠵᠦ ᠶᠠᠪᠤᠬᠤ ᠦᠶᠡ ᠳ᠋ᠦ᠍ ᠨᠢ ᠲᠡᠷᠡ ᠪᠠᠷᠢᠶᠠ ᠭᠡᠨᠡᠳᠲᠡ ᠬᠥᠳᠡᠯᠦᠨ ᠳᠣᠭᠣᠭᠰᠢ ᠤᠨᠠᠵᠤ ᠨᠢᠭᠦᠯᠲᠦ ᠡᠷᠡ ᠶ᠋ᠢᠨ ᠭᠠᠪᠠᠯᠠ ᠶ᠋ᠢ ᠬᠠᠭᠠᠯᠤᠨ ᠴᠡᠭᠡᠷᠯᠡᠭᠦᠯᠳᠡᠭ ᠭᠡᠳᠡᠭ ᠢ᠋ ᠴᠦ᠍ ᠳᠠᠬᠢᠨ ᠪᠠᠰᠠ ᠰᠠᠨᠠᠭᠤᠯᠪᠠ᠃ ᠦᠨᠡᠬᠡᠷ ᠬᠣᠶᠠᠷ ᠬᠥᠮᠦᠨ ᠳᠠᠮᠵᠢᠯᠠᠨ ᠡᠷᠭᠦᠬᠦ ᠪᠡᠷ ᠬᠦᠨᠳᠦ ᠴᠤᠯᠤ ᠲᠡᠮᠦᠷ ᠲᠡᠷᠡ ᠪᠠᠷᠢᠶᠠ ᠨᠢ ᠮᠣᠩᠯᠠᠮ ᠤ᠋ᠨ ᠦᠶᠡ ᠪᠡᠷ ᠲᠣᠲᠣᠭᠣᠨ ᠳᠡᠭᠡᠷᠡ ᠡᠴᠡ ᠣᠢᠴᠢᠭᠠᠳ ᠭᠠᠷᠬᠤ ᠭᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠨ ᠦ᠌ ᠳᠠᠭᠵᠠ ᠶ᠋ᠢ ᠬᠠᠭᠠᠯᠤᠭᠰᠠᠨ ᠤᠳᠠᠭᠠ ᠬᠡᠳᠦ ᠬᠡᠳᠦ ᠭᠠᠷᠴᠠᠢ᠃ ᠪᠠᠰᠠ ᠮᠣᠩᠯᠠᠮ ᠲᠠᠷᠠᠬᠤ ᠳ᠋ᠤ᠌ ᠬᠣᠷᠢᠨ ᠮᠢᠩᠭᠠᠨ ᠯᠠᠮᠠ ᠨᠠᠷ ᠭᠠᠳᠠᠭᠰᠢ ᠭᠠᠷᠬᠤ ᠭᠡᠵᠦ ᠴᠢᠬᠢᠯᠳᠦᠨ ᠶᠠᠪᠤᠬᠤ ᠳ᠋ᠠᠭᠠᠨ ᠪᠡᠶᠡ ᠪᠡᠶᠡ ᠪᠡᠨ ᠳᠠᠷᠤᠵᠤ ᠠᠮᠢ ᠨᠠᠰᠤ ᠶ᠋ᠢ ᠨᠢ ᠳᠠᠭᠤᠰᠬᠠᠳᠠᠭ ᠴᠤ᠌ ᠬᠡᠷᠡᠭ ᠡᠨᠳᠡ ᠨᠢᠭᠡ ᠪᠤᠰᠤ ᠤᠳᠠᠭᠠ ᠭᠠᠷᠴᠠᠢ᠃ ᠡᠢᠮᠦ ᠳ᠋ᠦ᠍ ᠵᠠᠢᠭ ᠰᠠᠬᠢᠭᠤᠯᠬᠤ ᠶ᠋ᠢ ᠶᠡᠬᠡ ᠴᠢᠬᠤᠯᠠ ᠳ᠋ᠤ᠌ ᠦᠵᠡᠳᠡᠭ ᠪᠠᠢᠯᠠ᠃
ᡀᠠᠰᠠ ᠮᠣᠩᠯᠠᠮ ᠡᠬᠢᠯᠡᠵᠦ ᠬᠣᠶᠠᠷ ᠲᠦᠮᠡᠨ ᠯᠠᠮᠠ ᠨᠢᠭᠡᠨ ᠵᠡᠷᠭᠡ ᠤᠩᠰᠢᠯᠭᠠ ᠳᠦᠩᠭᠢᠨᠡᠭᠦᠯᠬᠦ ᠳ᠋ᠦ᠍ ᠶᠡᠬᠡ ᠵᠣᠣ ᠶ᠋ᠢᠨ ᠬᠥᠨᠳᠡᠢ ᠳᠡᠭᠡᠪᠦᠷᠲᠦ ᠥᠷᠭᠡᠨ ᠲᠠᠩᠬᠢᠮ ᠳ᠋ᠤ᠌ ᠲᠩᠷᠢ ᠠᠭᠠᠵᠢᠮ ᠢ᠋ᠶ᠋ᠠᠷ ᠨᠦᠷᠭᠢᠯᠡᠨ ᠳᠤᠤᠭᠠᠷᠬᠤ ᠰᠢᠭ᠋᠂ ᠡᠰᠡᠪᠡᠯ ᠣᠯᠠᠨ ᠠᠷᠰᠯᠠᠨ ᠪᠠᠷᠰ ᠴᠡᠭᠡᠵᠢᠨ ᠳ᠋ᠡᠭᠡᠨ ᠬᠦᠷᠴᠢᠭᠢᠨᠡᠨ ᠬᠦᠷᠬᠢᠷᠡᠬᠦ ᠮᠡᠲᠦ ᠰᠦᠷᠲᠡᠢ ᠳᠠᠭᠤᠨ ᠳᠡᠭᠳᠡᠯᠡ᠃ ᠯᠠᠮᠠ ᠨᠠᠷ ᠢ᠋ ᠶᠠᠩ ᠲᠠᠲᠠᠬᠤ ᠳ᠋ᠤ᠌ ᠪᠡᠶᠡ ᠳᠣᠷᠭᠢᠮᠠᠷ ᠶᠡᠬᠡ ᠳᠠᠭᠤ ᠭᠠᠷᠴᠤ ᠪᠠᠢᠯᠠ᠃ ᠡᠨᠡ ᠰᠦᠷᠯᠢᠭ ᠦᠵᠡᠭᠳᠡᠯ ᠭᠡᠰᠦᠯ ᠰᠠᠩᠵᠢ ᠳ᠋ᠤ᠌ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠰᠡᠳᠬᠢᠭᠳᠡᠯ ᠲᠥᠷᠥᠭᠦᠯᠪᠡ᠃ ᠯᠠᠮᠠ ᠨᠠᠷ ᠲᠤ᠌ ᠮᠠᠩᠵᠠ ᠵᠥᠭᠡᠭᠡᠬᠦ ᠪᠡᠷ ᠭᠦᠶᠦᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠬᠣᠶᠠᠷ ᠲᠦᠮᠡᠨ ᠯᠠᠮᠠ ᠶ᠋ᠢᠨ ᠬᠣᠭᠣᠯᠠᠢ ᠨᠡᠢᠯᠡᠭᠦᠯᠦᠭᠰᠡᠨ ᠢᠷᠦᠭᠡᠯ ᠦ᠋ᠨ ᠦᠭᠡᠨ ᠳ᠋ᠦ᠍ ᠭᠠᠵᠠᠷ ᠳᠡᠯᠡᠬᠡᠢ ᠳᠣᠷᠭᠢᠵᠤ ᠪᠠᠢᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠢ᠋ ᠲᠡᠷᠡ ᠠᠵᠢᠭᠯᠠᠨ ᠮᠡᠳᠡᠷᠡᠵᠡᠢ᠃ ᠡᠢᠮᠦ ᠣᠯᠠᠨ ᠯᠠᠮᠠ ᠨᠢᠭᠡᠨ ᠳᠣᠣᠷᠠ ᠬᠤᠷᠠᠨ ᠴᠤᠭᠯᠠᠷᠠᠵᠤ ᠤᠩᠰᠢᠯᠭᠠ ᠦᠢᠯᠡᠳᠴᠦ ᠪᠠᠢᠬᠤ ᠶ᠋ᠢ ᠬᠡᠵᠢᠶᠡ ᠴᠦ᠍ ᠦᠵᠡᠭᠡ ᠦᠭᠡᠢ ᠵᠠᠯᠠᠭᠤ ᠭᠡᠰᠦᠯ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠵᠠᠩ ᠦᠢᠯᠡ ᠶ᠋ᠢᠨ ᠠᠭᠤᠤ ᠳᠠᠯᠠᠢᠴᠠ ᠶ᠋ᠢ ᠮᠡᠳᠡᠷᠡᠬᠦ ᠳ᠋ᠡᠭᠡᠨ ᠭᠠᠢᠬᠠᠨ ᠪᠠᠬᠠᠷᠬᠠᠵᠠᠢ᠃
ᠲᠡᠢᠨ ᠬᠦ᠌ ᠬᠣᠷᠢ ᠬᠣᠨᠣᠭ ᠤ᠋ᠨ ᠤᠩᠰᠢᠯᠭᠠ ᠬᠢᠵᠦ᠂ ᠬᠣᠷᠢᠨ ᠮᠢᠩᠭᠠᠨ ᠯᠠᠮᠠ ᠶ᠋ᠢᠨ ᠢᠷᠦᠭᠡᠯ ᠠᠪᠬᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠡᠵᠡᠨ ᠬᠠᠭᠠᠨ ᠤ᠋ ᠪᠣᠯᠤᠨ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠱᠠᠪᠳᠠᠩ ᠪᠠᠲᠤᠳᠠ ᠣᠷᠣᠰᠢᠨᠠ ᠭᠡᠳᠡᠭ ᠲᠦ᠍ ᠪᠠᠰᠠ ᠯᠠ ᠪᠦᠷᠢᠨ ᠢᠲᠡᠭᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠡᠢᠮᠦ ᠳ᠋ᠦ᠍ ᠮᠥᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠳᠥᠷᠪᠡᠨ ᠦ᠌ ᠡᠳᠦᠷ ᠬᠣᠶᠠᠷ ᠳ᠋ᠦᠭᠵᠥᠪ ᠪᠤᠶᠤ ᠵᠢᠷᠠᠨ ᠢᠷᠮᠡᠭᠲᠦ ᠲᠣᠮᠣ ᠰᠤᠷ ᠵᠠᠯᠠᠬᠤ ᠶᠣᠰᠣᠯᠠᠯ ᠬᠢᠳᠡᠭ ᠠᠵᠢ᠃ ᠬᠣᠷᠢ ᠬᠣᠨᠣᠭ ᠤ᠋ᠨ ᠤᠩᠰᠢᠯᠭᠠ ᠨᠢ ᠯᠠᠮᠠ ᠨᠠᠷ ᠢ᠋ ᠪᠠᠢᠲᠤᠭᠠᠢ ᠴᠠᠢ᠂ ᠬᠣᠭᠣᠯᠠ ᠵᠥᠭᠡᠭᠡᠭᠴᠢᠳ ᠢ᠋ ᠶᠠᠳᠠᠷᠠᠭᠠᠵᠤ ᠣᠷᠬᠢᠵᠠᠢ᠃ ᠯᠠᠮᠠ ᠨᠠᠷ ᠪᠣᠯᠬᠣᠷ ᠢᠷᠦᠭᠡᠯ ᠦ᠋ᠨ ᠬᠠᠭᠠᠨ ᠤᠩᠰᠢᠵᠤ ᠵᠠᠯᠬᠠᠭᠠᠳ ᠮᠤᠩᠯᠠᠮ ᠤ᠋ᠨ ᠬᠠᠲᠠᠭᠤ ᠳᠢᠭᠯᠢᠮ ᠳ᠋ᠦ᠍ ᠶᠠᠳᠠᠷᠠᠵᠠᠢ᠃ ᠮᠠᠩᠵᠠᠴᠢ᠂ ᠴᠠᠢᠴᠢ ᠨᠠᠷ ᠪᠣᠯᠬᠣᠷ ᠡᠩᠨᠡᠨ ᠰᠠᠭᠤᠭᠰᠠᠨ ᠯᠠᠮᠠ ᠨᠠᠷ ᠤ᠋ᠨ ᠬᠣᠭᠣᠷᠣᠨᠳᠣᠭᠤᠷ ᠳᠣᠮᠪᠣ᠂ ᠳᠠᠩᠬᠤ ᠪᠠᠷᠢᠨ ᠭᠦᠶᠦᠵᠦ᠂ ᠱᠠᠮᠤ ᠭᠡᠰᠬᠦᠢ ᠨᠠᠷ ᠲᠤ᠌ ᠪᠦᠷᠢᠶᠡᠳᠡᠭᠦᠯᠴᠢᠬᠡᠬᠦ ᠡᠴᠡ ᠠᠶᠤᠵᠤ ᠲᠤᠩ ᠶᠠᠳᠠᠷᠠᠵᠤ ᠪᠠᠢᠵᠤ ᠬᠣᠷᠢ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠨᠢᠭᠡᠨ ᠠᠶᠠᠯᠭᠤᠲᠤ ᠳᠦᠩᠭᠢᠨᠡᠭᠡᠨ ᠳᠤᠮᠳᠠ ᠳᠥᠵᠢᠷᠡᠵᠦ ᠭᠦᠢᠴᠡᠵᠡᠢ᠃
ᠠᠰᠢᠭᠦᠢ ᠬᠤᠷᠠᠯ ᠤ᠋ᠨ ᠥᠩᠭᠡ ᠠᠶᠠᠰ ᠥᠭᠡᠷᠡᠴᠢᠯᠡᠭᠳᠡᠵᠦ ᠳ᠋ᠦᠭᠵᠥᠪ ᠵᠠᠯᠠᠬᠤ ᠶᠣᠰᠣᠯᠠᠯ ᠡᠬᠢᠯᠡᠬᠦ ᠳ᠋ᠦ᠍ ᠯᠠᠮᠠ᠂ ᠵᠠᠮᠠ ᠂ ᠮᠠᠩᠵᠠᠴᠢ ᠨᠠᠷ ᠴᠥᠮ ᠯᠡ ᠪᠠᠶᠠᠷᠯᠠᠵᠠᠭᠠᠯᠠ᠃ ᠭᠤᠷᠪᠠᠯᠵᠢᠨ ᠥᠨᠳᠥᠷ ᠪᠣᠰᠤᠭᠠ ᠴᠡᠴᠡ ᠬᠡᠯᠪᠡᠷᠢ ᠲᠡᠢ ᠰᠤᠷ ᠢ᠋ ᠪᠡᠯᠡᠳᠬᠡᠭᠡᠳ ᠰᠤᠷᠴᠢ ᠶᠦᠭᠵᠥᠷ ᠨᠠᠷ ᠡᠷᠭᠦᠨ ᠭᠠᠳᠠᠭᠠ ᠭᠠᠷᠴᠤ ᠠᠰᠠᠵᠤ ᠪᠠᠢᠭᠠ ᠲᠦᠳᠡᠭ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠣᠴᠢᠬᠤ ᠳ᠋ᠤ᠌ ᠬᠣᠢᠨᠠ ᠠ᠋ᠴᠠ ᠨᠢ ᠣᠯᠠᠨ ᠮᠢᠩᠭᠠᠨ ᠯᠠᠮᠠ ᠨᠠᠷ ᠴᠤᠪᠤᠷᠠᠨ ᠠᠮᠠᠨ ᠳ᠋ᠠᠭᠠᠨ ᠰᠤᠷ ᠤ᠋ᠨ ᠤᠩᠰᠢᠯᠭᠠ ᠳᠦᠩᠭᠢᠨᠡᠲᠡᠯᠡ ᠪᠤᠪᠲᠤᠨᠠᠵᠠᠭᠠᠨ ᠶᠠᠪᠤᠪᠠ᠃ ᠳ᠋ᠦᠭᠵᠥᠪ ᠵᠠᠯᠠᠬᠤ ᠶᠣᠰᠣᠯᠠᠯ ᠨᠢ ᠱᠠᠰᠢᠨ ᠤ᠋ ᠡᠯᠳᠡᠪ ᠳᠠᠢᠰᠤᠨ᠂ ᠪᠤᠷᠤᠭᠤ ᠨᠣᠮᠲᠠᠨ᠂ ᠯᠠᠯᠤ ᠨᠤᠭᠤᠳ ᠢ᠋ ᠳᠠᠷᠤᠬᠤ ᠵᠠᠩ ᠦᠢᠯᠡ ᠶᠦᠮ᠃ ᠲᠣᠰᠣ᠂ ᠭᠤᠷᠢᠯ ᠢ᠋ᠶ᠋ᠠᠷ ᠴᠢᠮᠡᠭᠯᠡᠵᠦ ᠣᠷᠣᠢ ᠶ᠋ᠢᠨ ᠱᠣᠪᠬᠣ ᠦᠵᠦᠭᠦᠷ ᠲᠦ᠍ ᠬᠣᠬᠢᠮᠠᠢ ᠲᠣᠯᠣᠭᠠᠢ ᠶ᠋ᠢᠨ ᠳᠦᠷᠰᠦ ᠳᠣᠣᠷᠠᠲᠤ ᠲᠠᠯᠠ ᠶ᠋ᠢᠨ ᠭᠤᠷᠪᠠᠨ ᠥᠨᠴᠥᠭ ᠲᠦ᠍ ᠮᠥᠨ ᠬᠣᠬᠢᠮᠠᠢ ᠳᠦᠷᠰᠦᠯᠡᠭᠰᠡᠨ ᠲᠡᠢᠮᠦ ᠰᠤᠷ ᠪᠠᠢᠯᠠ᠃ ᠳᠡᠭᠡᠢ ᠳᠤᠮᠳᠠᠭᠤᠷ ᠨᠢ ᠬᠠᠳᠠᠭ ᠵᠡᠭᠦᠭᠰᠡᠨ ᠰᠤᠮᠤ ᠬᠠᠳᠬᠠᠵᠠᠢ᠃ ᠰᠤᠮᠤᠨ ᠤ᠋ ᠪᠠᠨ ᠥᠲᠥᠨ ᠵᠠᠯᠠᠭᠤᠷ ᠲᠤᠰᠢᠶᠠ ᠪᠢᠴᠢᠬᠠᠨ ᠬᠦᠷᠳᠦᠨ ᠦ᠌ ᠳᠦᠷᠰᠦ ᠪᠡᠬᠢᠯᠡᠵᠡᠢ᠃ ᠱᠠᠰᠢᠨ ᠤ᠋ ᠳᠠᠢᠰᠤᠨ᠂ ᠯᠠᠯᠤ ᠭᠡᠭᠴᠢ ᠪᠤᠷᠤᠭᠤ ᠨᠣᠮᠲᠠᠨ᠂ ᠠᠯᠪᠢᠨ ᠴᠢᠳᠬᠥᠷ ᠢ᠋ ᠲᠥᠯᠥᠭᠡᠯᠡᠵᠦ ᠡᠢᠮᠦ ᠰᠤᠷ ᠪᠡᠯᠡᠳᠬᠡᠳᠡᠭ ᠠᠵᠠᠢ᠃
– ᠶᠦᠭᠵᠥᠷ ᠰᠤᠷ ᠵᠠᠯᠠᠰᠤᠭᠠᠢ! ᠠᠶᠤᠮᠰᠢᠭᠲᠤ ᠡᠨᠡ ᠬᠦ᠌ ᠰᠤᠷ ᠪᠣᠯᠪᠠᠯ ᠸᠴᠢᠷ ᠦ᠋ᠨ ᠰᠤᠮᠤᠨ ᠠ᠋ᠴᠠ ᠬᠤᠷᠴᠠ᠂ ᠸᠴᠢᠷ ᠦ᠋ᠨ ᠪᠣᠯᠴᠤᠤ ᠠ᠋ᠴᠠ ᠪᠠᠲᠤ᠂ ᠶᠡᠭᠦᠳᠬᠡᠭᠴᠢ ᠬᠦᠴᠦ ᠨᠢ ᠴᠠᠬᠢᠯᠭᠠᠨ ᠠ᠋ᠴᠠ ᠬᠡᠴᠡᠭᠦᠦ ᠁ ᠭᠡᠵᠦ ᠶᠦᠭᠵᠥᠷ ᠯᠠᠮᠠ ᠭᠣᠩᠰᠢᠨ ᠤᠩᠰᠢᠵᠤ ᠡᠬᠢᠯᠡᠪᠡ᠃
ᠢᠩᠭᠢᠵᠦ ᠤᠩᠰᠢᠬᠤ ᠳ᠋ᠤᠨᠢ ᠰᠣᠷᠴᠢ ᠯᠠᠮᠠ ᠨᠠᠷ ᠰᠤᠷ ᠢ᠋ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠡᠷᠭᠦᠨ ᠬᠤᠷᠤᠢᠯᠠᠨ ᠡᠷᠭᠢᠭᠦᠯᠪᠡ᠃
– ᠶᠦᠭᠵᠥᠷ ᠪᠢ ᠰᠤᠷ ᠵᠠᠯᠠᠰᠤᠭᠠᠢ! ᠳᠡᠭᠡᠷᠡᠬᠢ ᠲᠩᠷᠢ᠂ ᠳᠣᠣᠷᠠᠬᠢ ᠯᠤᠤᠰ᠂ ᠭᠠᠵᠠᠷ ᠲᠩᠷᠢ ᠶ᠋ᠢᠨ ᠰᠠᠪᠰᠠᠯᠭᠠ ᠳ᠋ᠠᠬᠢ ᠠᠯᠪᠢᠨ ᠨᠤᠭᠤᠳ ᠲᠤ᠌ ᠭᠠᠵᠠᠷ ᠤᠰᠤᠨ ᠤ᠋ ᠡᠵᠡᠳ ᠲᠦ᠍ ᠡᠨᠡ ᠰᠤᠷ ᠢ᠋ ᠵᠠᠯᠠᠵᠤ ᠪᠠᠢᠭᠠ ᠶᠤᠮ ᠪᠢᠰᠢ ᠠ᠋! ᠭᠡᠵᠦ ᠶᠦᠭᠵᠥᠷ ᠯᠠᠮᠠ ᠳᠠᠬᠢᠨ ᠰᠦᠷᠳᠡᠶᠡ ᠠᠢᠯᠠᠳᠬᠤ ᠳ᠋ᠤ᠌ ᠰᠤᠷᠴᠢ ᠯᠠᠮᠠ ᠨᠠᠷ ᠰᠤᠷ ᠢ᠋ᠶ᠋ᠠᠨ ᠳᠠᠬᠢᠨ ᠡᠷᠭᠢᠭᠦᠯᠵᠡᠭᠡᠯᠡ᠃
– ᠶᠦᠭᠵᠥᠷ ᠪᠢ ᠠᠶᠤᠮᠰᠢᠭᠲᠤ ᠰᠤᠷ ᠢ᠋ ᠵᠠᠯᠠᠰᠤᠭᠠᠢ! ᠠᠶᠤᠮᠰᠢᠭᠲᠤ ᠡᠨᠡ ᠬᠦ᠌ ᠰᠤᠷ ᠢ᠋ ᠰᠡᠳᠬᠢᠯ ᠦᠢᠮᠡᠭᠦᠯᠦᠭᠴᠢ ᠪᠤᠭ᠂ ᠭᠠᠢ᠂ ᠲᠦᠢᠳᠬᠡᠷ᠂ ᠬᠣᠣᠷᠲᠤ ᠯᠠᠯᠤ ᠨᠤᠭᠤᠳ ᠲᠤ᠌ ᠵᠣᠷᠢᠭᠤᠯᠤᠨ ᠵᠠᠯᠠᠵᠤ ᠪᠠᠢᠨᠠᠮ! ᠭᠡᠵᠦ ᠶᠦᠭᠵᠥᠷ ᠯᠠᠮᠠ ᠶ᠋ᠢ ᠬᠠᠰᠬᠢᠷᠬᠤ ᠳ᠋ᠤ᠌ ᠰᠤᠷᠴᠢ ᠯᠠᠮᠠ ᠨᠠᠷ ᠬᠡᠳᠦᠨᠲᠡ ᠴᠣᠪᠬᠣᠷᠴᠠᠭᠠᠭᠠᠳ ᠰᠤᠷ ᠢ᠋ ᠡᠷᠭᠢᠭᠦᠯᠦᠨ ᠣᠷᠣᠢ ᠪᠠᠷ ᠨᠢ ᠭᠠᠯ ᠤᠷᠤᠭᠤ ᠴᠢᠭᠯᠡᠭᠦᠯᠦᠨ ᠳᠣᠭᠰᠢᠨ ᠠᠭᠤᠷᠲᠠᠢ ᠪᠠᠷ ᠰᠢᠲᠠᠯᠠ᠃
– ᠶᠦᠭᠵᠥᠷ ᠪᠢ ᠠᠶᠤᠮᠰᠢᠭᠲᠤ ᠰᠤᠷ ᠢ᠋ ᠵᠠᠯᠠᠰᠤᠭᠠᠢ! ᠠᠶᠤᠮᠰᠢᠭᠲᠤ ᠡᠨᠡᠬᠦ ᠰᠤᠷ ᠢ᠋ ᠪᠢ ᠵᠠᠯᠠᠨ ᠣᠷᠬᠢᠯᠠ! ᠬᠠᠭᠠᠯᠭᠠᠴᠢᠳ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠵᠡᠭᠡ! ᠬᠠᠭᠠᠯᠭᠠᠴᠢᠳ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠵᠦ ᠯᠠᠯᠤ ᠶ᠋ᠢᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠪᠦᠬᠦᠨ ᠢ᠋ ᠣᠷᠣᠭᠤᠯᠤᠨ ᠲᠦᠭᠵᠢᠯᠡ᠃ ᠬᠠᠭᠠᠯᠭᠠᠴᠢ ᠨᠠᠷ ᠬᠠᠮᠤᠭ ᠪᠦᠬᠦ ᠨᠦᠬᠡ ᠰᠦᠪᠡ ᠶ᠋ᠢ ᠬᠠᠭᠠᠭᠲᠤᠨ! ᠬᠠᠭᠠᠯᠭᠠᠴᠢ ᠨᠠᠷ ᠬᠠᠮᠤᠭ ᠪᠦᠬᠦ ᠳᠦᠷᠰᠦ ᠦᠭᠡᠢ ᠭᠠᠢ ᠲᠦᠢᠳᠬᠡᠷ ᠢ᠋ ᠲᠦᠭᠵᠢᠨ ᠬᠠᠭᠠᠵᠤ ᠥᠴᠦᠬᠡᠨ ᠨᠦᠬᠡ ᠰᠦᠪᠡ ᠶ᠋ᠢ ᠴᠦ᠍ ᠪᠥᠭᠯᠡᠯᠡ! ᠭᠡᠵᠦ ᠶᠦᠭᠵᠥᠷ ᠯᠠᠮᠠ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠰᠢᠯᠦᠭᠯᠡᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠰᠤᠷ ᠵᠠᠯᠠᠬᠤ ᠶᠣᠰᠣᠯᠠᠯ ᠳᠠᠭᠤᠰᠤᠯᠠ᠃
ᠲᠡᠭᠡᠲᠡᠯᠡ ᠰᠤᠷ ᠵᠠᠯᠠᠬᠤ ᠶ᠋ᠢ ᠦᠵᠡᠬᠦ ᠪᠡᠷ ᠢᠷᠡᠵᠦ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠶᠠᠳᠠᠭᠤᠰ᠂ ᠮᠥᠷᠭᠥᠯᠴᠢᠳ᠂ ᠪᠠᠳᠢᠷᠴᠢᠳ ᠪᠤᠵᠢᠭᠢᠨᠠᠯᠳᠤᠵᠤ ᠰᠤᠷ ᠤ᠋ᠨ ᠰᠢᠳᠡᠵᠦ ᠪᠠᠢᠭᠠ ᠲᠦᠳᠡᠭ ᠭᠠᠯ ᠤᠷᠤᠭᠤ ᠤᠬᠤᠰᠬᠢᠨ ᠲᠠᠭᠠᠷᠢᠵᠠᠭᠠᠯᠠ᠃ ᠰᠤᠷ ᠰᠢᠲᠠᠭᠠᠭᠰᠠᠨ ᠦᠨᠡᠰᠦ ᠴᠢᠨᠳᠠᠷᠤᠤ᠂ ᠦᠯᠡᠳᠡᠭᠳᠡᠯ ᠡᠴᠡ ᠣᠯᠵᠤ ᠠᠪᠬᠤ ᠶᠤᠮ ᠪᠣᠯ ᠠᠮᠢ ᠨᠠᠰᠤᠨ ᠳ᠋ᠤ᠌ ᠥᠯᠵᠡᠢ ᠲᠡᠢ᠂ ᠠᠯᠢᠪᠠ ᠡᠪᠡᠳᠴᠢᠨ ᠳ᠋ᠦ᠍ ᠬᠡᠷᠡᠭ ᠪᠣᠯᠤᠨᠠ ᠭᠡᠵᠦ ᠢᠲᠡᠭᠡᠵᠡᠭᠡᠳᠡᠭ ᠪᠣᠯᠬᠣᠷ ᠠᠳᠬᠤ ᠴᠢᠮᠬᠢ ᠦᠨᠡᠰᠦᠨ ᠦ᠌ ᠲᠥᠯᠥᠭᠡ ᠲᠡᠭᠡᠵᠦ ᠤᠯᠠᠢᠷᠠᠨ ᠳᠠᠭᠠᠷᠢᠵᠠᠭᠠᠳᠠᠭ ᠠᠵᠢ᠃ ᠴᠢᠮᠬᠢ ᠦᠨᠡᠰᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠪᠥᠭᠡᠮ ᠬᠥᠯ ᠬᠥᠭᠡᠷᠴᠦᠭ ᠳᠡᠭᠳᠡᠵᠦ᠂ ᠰᠡᠭᠦᠯ ᠳ᠋ᠡᠭᠡᠨ ᠵᠣᠳᠣᠭᠠᠨ ᠡᠭᠦᠰᠬᠡᠵᠦ ᠦᠨᠡᠰᠦ᠂ ᠴᠤᠴᠠᠯᠢ ᠪᠤᠵᠢᠭᠢᠨᠠᠨ᠂ ᠶᠠᠳᠠᠭᠤᠰ ᠳᠡᠭᠡᠷᠡ ᠳᠣᠣᠷᠠ ᠪᠠᠨ ᠣᠷᠣᠵᠤ ᠤᠴᠢᠷ ᠢ᠋ ᠨᠢ ᠣᠯᠬᠤ ᠳ᠋ᠤ᠌ ᠪᠡᠷᠬᠡ ᠶᠠᠭᠤᠮᠠ ᠳᠡᠭᠳᠡᠯᠡ᠃ ᠰᠤᠷ ᠤ᠋ᠨ ᠭᠠᠯ ᠴᠤ᠌ ᠤᠨᠲᠠᠷᠠᠵᠤ ᠤᠲᠤᠭᠠ ᠮᠠᠨᠠᠨ ᠤᠭᠤᠭᠢᠯᠠ᠃ ᠳᠣᠷᠣᠢ ᠶᠠᠳᠠᠭᠤ ᠮᠥᠷᠭᠥᠯᠴᠢᠳ ᠦ᠋ᠨ ᠵᠠᠷᠢᠮ ᠨᠢ ᠣᠯᠠᠨ ᠤ᠋ ᠬᠥᠯ ᠳᠣᠣᠷᠠ ᠳᠠᠷᠤᠭᠳᠠᠨ ᠭᠢᠰᠬᠢᠭᠳᠡᠬᠦ ᠶ᠋ᠢ ᠬᠠᠷᠠᠭᠠᠳ ᠭᠡᠰᠦᠯ ᠰᠠᠩᠵᠢ ᠶ᠋ᠢᠨ ᠵᠢᠷᠦᠬᠡ ᠡᠪᠡᠳᠬᠦ ᠰᠢᠭ ᠪᠣᠯᠤᠯᠠ᠃ ᠨᠢᠭᠡ ᠶᠠᠳᠠᠭᠤ ᠮᠥᠷᠭᠥᠯᠴᠢ ᠬᠠᠲᠠᠩᠭᠢᠷ ᠭᠠᠷ ᠲᠤ᠌ ᠪᠠᠨ ᠴᠢᠮᠬᠢ ᠦᠨᠡᠰᠦ ᠠᠳᠬᠤᠭᠠᠳ ᠣᠯᠠᠨ ᠤ᠋ ᠬᠥᠯ ᠡᠴᠡ ᠵᠠᠢᠯᠠᠬᠤ ᠭᠡᠲᠡᠯᠡ ᠥᠭᠡᠷᠡ ᠨᠢᠭᠡ ᠬᠥᠮᠦᠨ ᠲᠡᠭᠦᠨ ᠦ᠌ ᠥᠭᠡᠳᠡ ᠡᠴᠡ ᠳᠠᠭᠠᠷᠢᠵᠤ᠂ ᠭᠠᠷ ᠠ᠋ᠴᠠ ᠨᠢ ᠵᠠᠭᠤᠷᠠᠯᠳᠤᠪᠠ᠃ ᠲᠡᠭᠡᠲᠡᠯᠡ ᠭᠤᠶᠤᠯᠭᠠᠴᠢᠨ ᠠᠳᠬᠤᠭᠰᠠᠨ ᠦᠨᠡᠰᠦ ᠪᠡᠨ ᠠᠮᠠ ᠤᠷᠤᠭᠤ ᠪᠠᠨ ᠬᠢᠵᠦ ᠬᠠᠬᠠᠵᠤ ᠴᠡᠴᠡᠨ ᠨᠢᠯᠪᠤᠰᠤ ᠪᠠᠨ ᠠᠰᠬᠠᠷᠠᠭᠤᠯᠬᠤ ᠶ᠋ᠢ ᠰᠠᠩᠵᠢ ᠭᠡᠰᠦᠯ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠪᠡ᠃ ᠲᠡᠭᠦᠨ ᠢ᠋ ᠪᠠᠷᠤᠭ ᠯᠠ ᠬᠠᠬᠠᠵᠤ ᠦᠬᠦᠳᠡᠭ ᠦ᠋ᠨ ᠳᠠᠪᠠᠭᠠᠨ ᠳᠡᠭᠡᠷᠡ 《 ᠫᠦᠩ ᠫᠦᠩ》 ᠭᠡᠰᠡᠨ ᠠᠰᠤᠷᠤ ᠶᠡᠬᠡ ᠳᠠᠭᠤ ᠴᠢᠮᠡᠭᠡ ᠭᠠᠷᠴᠤ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠣᠴᠢᠨ ᠳᠠᠪᠠᠲᠠᠯᠠ᠃ ᠦᠬᠡᠷ ᠫᠤᠤ ᠪᠠᠷ ᠫᠤᠤᠳᠠᠵᠤ ᠪᠠᠢᠭᠠ ᠠᠵᠠᠢ᠃
ᠦᠢ ᠮᠥᠷᠡᠨ ᠦ᠌ ᠴᠠᠭᠠᠳᠤ ᠲᠠᠯᠠ ᠳ᠋ᠤ᠌ ᠪᠤᠳᠠᠯᠠᠩ ᠤ᠋ᠨ ᠣᠷᠳᠣᠨ ᠤ᠋ ᠡᠰᠡᠷᠭᠦ ᠣᠷᠣᠰᠢᠬᠤ ᠬᠠᠷᠠ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠳᠡᠭᠡᠷᠡ ᠰᠠᠷᠯᠤᠭ ᠤ᠋ᠨ ᠬᠢᠯᠭᠠᠰᠤ ᠪᠠᠷ ᠨᠡᠬᠡᠭᠰᠡᠨ ᠥᠷᠮᠥᠭ ᠢ᠋ᠶ᠋ᠡᠷ ᠬᠢᠭᠰᠡᠨ ᠬᠠᠷᠠ ᠮᠠᠢᠬᠠᠨ ᠳᠡᠷᠪᠡᠵᠦ ᠪᠠᠢᠪᠠ᠃ ᠲᠡᠷᠡ ᠮᠠᠢᠬᠠᠨ ᠢ᠋ ᠫᠠᠢ ᠪᠣᠯᠭᠠᠨ ᠴᠢᠭᠯᠡᠭᠦᠯᠦᠭᠡᠳ ᠪᠤᠳᠠᠯᠠᠩ ᠤ᠋ᠨ ᠣᠷᠳᠣᠨ ᠤ᠋ ᠡᠮᠦᠨᠡ ᠡᠲᠡᠭᠡᠳ ᠡᠴᠡ ᠵᠡᠰ ᠭᠤᠨᠠᠨ ᠫᠤᠤ ᠪᠠᠷ ᠫᠤᠤᠳᠠᠵᠤ ᠪᠠᠢᠭᠠ ᠨᠢ ᠡᠨᠡ᠃ ᠲᠡᠷᠡ ᠠᠭᠤᠯᠠᠨ ᠳ᠋ᠤ᠌ ᠯᠠᠩᠳᠡᠷᠮᠠ ᠬᠠᠭᠠᠨ ᠤ᠋ ᠪᠤᠯᠠᠰᠢ ᠪᠠᠢᠳᠠᠭ ᠶᠤᠮ᠃ ᠪᠤᠳᠠᠯᠠᠩ ᠤ᠋ᠨ ᠱᠠᠰᠢᠨ ᠢ᠋ ᠲᠥᠪᠡᠳ ᠡᠴᠡ ᠤᠯᠠ ᠦᠨᠳᠦᠰᠦ ᠦᠭᠡᠢ ᠪᠣᠯᠭᠠᠨ ᠤᠰᠠᠳᠬᠠᠵᠤ ᠠᠷᠢᠯᠭᠠᠬᠤ ᠪᠠᠷ ᠣᠷᠣᠯᠳᠣᠭᠰᠠᠨ ᠲᠡᠷᠡ ᠯᠠᠩᠳᠡᠷᠮᠠ ᠬᠠᠭᠠᠨ ᠢ᠋ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠱᠠᠰᠢᠨᠲᠠᠨ ᠨᠤᠭᠤᠳ ᠦᠵᠡᠨ ᠶᠠᠳᠠᠳᠠᠭ ᠪᠣᠯᠵᠠᠢ᠃ ᠤᠤᠯ ᠨᠡᠷᠡ ᠨᠢ ᠳ᠋ᠠᠷᠮᠠ ᠪᠣᠯᠪᠠᠴᠤ《 ᠯᠠᠩ》 ᠭᠡᠳᠡᠭ ᠬᠠᠷᠢᠶᠠᠯ ᠤ᠋ᠨ ᠦᠭᠡ ᠶ᠋ᠢ ᠨᠡᠷᠡ ᠶ᠋ᠢᠨ ᠨᠢ ᠤᠷᠢᠳᠤ ᠵᠠᠯᠭᠠᠵᠤ ᠯᠠᠩᠳᠡᠷᠮᠠ ᠪᠤᠶᠤ ᠳ᠋ᠠᠷᠮᠠ – ᠮᠠᠯ ᠭᠡᠰᠡᠨ ᠤᠳᠬᠠ ᠲᠠᠢ ᠪᠣᠯᠵᠠᠢ᠃ ᠮᠠᠯ ᠭᠡᠵᠦ ᠬᠣᠴᠢᠯᠠᠭᠳᠠᠭᠰᠠᠨ ᠲᠡᠷᠡ ᠬᠠᠭᠠᠨ ᠢ᠋ ᠲᠥᠪᠡᠳ ᠦ᠋ᠳ ᠬᠣᠣᠷᠯᠠᠵᠤ ᠠᠯᠠᠵᠠᠢ᠃ ᠲᠡᠭᠡᠭᠡᠳ ᠱᠠᠷᠢᠯ ᠢ᠋ ᠡᠨᠡ ᠠᠭᠤᠯᠠᠨ ᠳ᠋ᠤ᠌ ᠣᠷᠣᠰᠢᠭᠤᠯᠤᠭᠰᠠᠨ ᠶᠤᠮ᠃ ᠲᠡᠭᠡᠲᠡᠯᠡ ᠣᠷᠣᠰᠢᠭᠤᠯᠤᠭᠰᠠᠨ ᠬᠣᠢᠨᠠ ᠴᠤ᠌ ᠯᠠᠩᠳᠡᠷᠮᠠ ᠬᠠᠭᠠᠨ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠱᠠᠰᠢᠨ ᠳ᠋ᠤ᠌ ᠵᠠᠨᠤᠯᠬᠢᠯᠠᠭᠰᠠᠭᠠᠷ ᠪᠠᠢᠳᠠᠭ ᠶᠤᠮ ᠰᠠᠨᠵᠠᠢ᠃ ᠲᠡᠭᠡᠭᠡᠳ ᠯᠡ ᠵᠢᠯ ᠪᠦᠷᠢ ᠲᠡᠷᠡ ᠯᠠᠩᠳᠡᠷᠮᠠ ᠶ᠋ᠢᠨ ᠱᠠᠷᠢᠯ ᠲᠠᠢ ᠠᠭᠤᠯᠠ ᠶ᠋ᠢ ᠦᠬᠡᠷ ᠫᠤᠤ ᠪᠠᠷ ᠫᠤᠤᠳᠠᠳᠠᠭ ᠪᠣᠯᠵᠠᠢ᠃
– ᠪᠢ ᠴᠢᠮᠠ ᠳ᠋ᠤ᠌ ᠶᠠᠷᠢᠳᠠᠭ ᠪᠠᠢᠭᠰᠠᠨ᠃ ᠲᠡᠷᠡ ᠠᠭᠤᠯᠠᠨ ᠳ᠋ᠤ᠌ ᠪᠠᠢᠭᠠ ᠬᠠᠷᠠ ᠮᠠᠢᠬᠠᠨ ᠳᠣᠲᠣᠷᠠ ᠴᠠᠭᠠᠨ ᠢᠮᠠᠭᠠ ᠤᠶᠠᠭᠠᠲᠠᠢ ᠪᠠᠢᠳᠠᠭ ᠶᠤᠮ᠃ ᠢᠮᠠᠭᠠᠨ ᠤ᠋ ᠬᠦᠵᠦᠭᠦᠨ ᠳ᠋ᠦ᠍ ᠲᠠᠷᠨᠢᠳᠠᠭᠰᠠᠨ ᠰᠠᠬᠢᠭᠤᠰᠤ ᠵᠡᠭᠦᠯᠭᠡᠲᠠᠢ ᠪᠣᠢ᠃ ᠦᠬᠡᠷ ᠫᠤᠤ ᠪᠠᠷ ᠲᠡᠷᠡ ᠮᠠᠢᠬᠠᠨ ᠢ᠋ ᠤᠨᠤᠬᠤ ᠭᠡᠵᠦ ᠫᠤᠤᠳᠠᠵᠤ ᠪᠠᠢᠭᠠ ᠬᠡᠷᠡᠭ᠃ ᠤᠨᠤᠪᠠᠯ ᠰᠠᠢᠨ᠃ ᠤᠨᠤᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠮᠠᠭᠤ ᠦᠭᠡᠢ ᠭᠡᠳᠡᠭ ᠶᠦᠮ᠃ ᠠᠭᠤᠯᠠ ᠶ᠋ᠢ ᠨᠢ ᠴᠦ᠍ ᠭᠡᠰᠡᠨ ᠤᠨᠤᠬᠤ ᠤᠴᠢᠷ ᠲᠠᠢ ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠳ᠋ᠦ᠍ ᠪᠠᠭᠰᠢ ᠭᠡᠯᠦᠩ ᠴᠤᠢᠮᠴᠤᠭ ᠨᠢ ᠰᠢᠪᠡᠨᠡᠨ ᠶᠠᠷᠢᠪᠠ᠃ ᠬᠠᠴᠢᠨ ᠲᠡᠷᠡ ᠦᠢᠯᠡᠳᠦᠯ ᠳ᠋ᠦ᠍ ᠭᠠᠢᠬᠠᠭᠰᠠᠨ ᠰᠠᠩᠵᠢ᠄
– ᠪᠠᠭᠰᠢ ᠠ᠋᠂ ᠶᠠᠭᠠᠬᠢᠭᠠᠳ ᠠᠭᠤᠯᠠ ᠶ᠋ᠢ ᠤᠨᠤᠬᠤ ᠳ᠋ᠤ᠌ ᠰᠠᠢᠨ ᠶᠤᠮ ᠪᠣᠢ? ᠭᠡᠮᠡᠨ ᠠᠰᠠᠭᠤᠪᠠ᠃
– ᠯᠠᠩᠳᠡᠷᠮᠠ ᠶ᠋ᠢᠨ ᠱᠠᠷᠢᠯ ᠲᠠᠢ ᠡᠨᠡ ᠠᠭᠤᠯᠠ ᠦᠢ ᠮᠥᠷᠡᠨ ᠤᠷᠤᠭᠤ ᠠᠭᠠᠵᠢᠮ ᠢ᠋ᠶ᠋ᠠᠷ ᠣᠢᠷᠠᠲᠤᠨ ᠰᠢᠬᠠᠵᠤ ᠪᠠᠢᠳᠠᠭ ᠶᠤᠮ ᠭᠡᠨᠡ ᠯᠠᠢ᠃ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠢ᠋ ᠬᠥᠨᠳᠡᠯᠢᠰᠦᠨ ᠬᠠᠭᠠᠬᠤ ᠪᠠᠷ ᠲᠡᠭᠡᠵᠦ ᠣᠢᠷᠠᠲᠤᠳᠠᠭ ᠠᠭᠤᠯᠠ ᠶᠤᠮ᠃ ᠬᠡᠷᠪᠡ ᠦᠢ ᠮᠥᠷᠡᠨ ᠦ᠌ ᠤᠷᠤᠰᠬᠠᠯ ᠢ᠋ ᠲᠡᠷᠡ ᠠᠭᠤᠯᠠ ᠬᠠᠭᠠᠴᠢᠬᠠᠪᠠᠯ ᠭᠣᠣᠯ ᠡᠷᠭᠢᠵᠦ ᡀᠠᠰᠠ ᠬᠣᠲᠠ ᠶ᠋ᠢ ᠪᠤᠷᠬᠠᠨ ᠰᠢᠲᠦᠭᠡᠨ ᠢ᠋ ᠵᠢᠪᠦᠭᠦᠯᠦᠨ ᠶᠡᠭᠦᠳᠬᠡᠵᠦ ᠬᠥᠨᠥᠭᠡᠬᠦ ᠤᠴᠢᠷ ᠲᠠᠢ ᠶᠠᠭᠤᠮᠠ ᠭᠡᠨᠡ ᠯᠠᠢ᠃ ᠲᠡᠭᠦᠨ ᠡᠴᠡ ᠪᠣᠯᠵᠤ ᠵᠢᠯ ᠪᠦᠷᠢ ᠯᠠᠩᠳᠡᠷᠮᠠ ᠶ᠋ᠢᠨ ᠠᠭᠤᠯᠠ ᠶ᠋ᠢ ᠦᠬᠡᠷ ᠫᠤᠤ ᠪᠠᠷ ᠭᠤᠷᠪᠠᠨ ᠤᠳᠠᠭᠠ ᠰᠤᠮᠤ ᠦᠭᠡᠢ᠂ ᠳᠥᠷᠪᠡᠨ ᠤᠳᠠᠭᠠ ᠰᠤᠮᠤ ᠲᠠᠢ ᠫᠤᠤᠳᠠᠵᠤ ᠵᠠᠩᠰᠢᠭᠰᠠᠨ ᠪᠠᠢᠨᠠ᠃ ᠰᠤᠮᠤ ᠶ᠋ᠢ ᠨᠢ ᠠᠭᠤᠯᠠᠨ ᠳ᠋ᠤ᠌ ᠣᠢᠴᠢᠭᠰᠠᠨ ᠤ᠋ ᠳᠠᠷᠠᠭᠠ ᠬᠥᠮᠦᠨ ᠶᠠᠪᠤᠭᠤᠯᠵᠤ ᠠᠪᠴᠢᠷᠠᠭᠤᠯᠳᠠᠭ ᠶᠤᠮ᠃ ᠫᠤᠤᠳᠠᠭᠤᠯᠤᠭᠰᠠᠨ ᠤ᠋ ᠬᠦᠴᠦᠨ ᠳ᠋ᠦ᠍ ᠯᠠᠩᠳᠡᠷᠮᠠ ᠶ᠋ᠢᠨ ᠠᠭᠤᠯᠠ ᠤᠬᠤᠷᠢᠵᠤ ᠬᠠᠭᠤᠴᠢᠨ ᠪᠠᠢᠷᠢᠨ ᠳ᠋ᠠᠭᠠᠨ ᠣᠴᠢᠳᠠᠭ ᠭᠡᠵᠦ ᠶᠠᠷᠢᠯᠴᠠᠳᠠᠭ ᠤᠴᠢᠷ ᠲᠡᠢᠮᠦ ᠭᠡᠮᠡᠨ ᠪᠠᠭᠰᠢ ᠯᠠᠮᠠ ᠶ᠋ᠢ ᠪᠡᠨ ᠶᠠᠷᠢᠬᠤ ᠳ᠋ᠤ᠌ ᠰᠠᠩᠵᠢ ᠭᠡᠰᠦᠯ ᠶᠡᠬᠡᠳᠡ ᠭᠠᠢᠬᠠᠪᠠ᠃ ᠬᠤᠳᠠᠯ ᠭᠡᠯᠲᠡᠢ ᠪᠢᠰᠢ᠂ ᠬᠠᠴᠢᠨ ᠯᠠ ᠶᠤᠮ᠃
ᠭᠠᠵᠠᠷ ᠪᠤᠯᠠᠵᠤ ᠵᠣᠭᠣᠭᠰᠠᠨ ᠨᠢᠭᠡᠨ ᠶᠡᠬᠡ ᠬᠦᠷᠡᠯ ᠴᠢᠳᠬᠤᠮᠠᠯ ᠫᠤᠤ ᠪᠠᠷ ᠭᠤᠷᠪᠠᠨᠲᠠ ᠬᠡᠢ ᠫᠤᠤᠳᠠᠭᠠᠳ ᠳᠠᠷᠠᠭᠠ ᠨᠢ ᠬᠦᠷᠡᠯ ᠪᠥᠭᠡᠷᠡᠨᠴᠡᠭ ᠢ᠋ ᠫᠤᠤ ᠶ᠋ᠢᠨ ᠠᠮᠠ ᠤᠷᠤᠭᠤ ᠬᠢᠵᠦ ᠴᠢᠬᠢᠨ ᠳ᠋ᠡᠬᠢ ᠳᠠᠷᠢ ᠶ᠋ᠢ ᠤᠷᠲᠤ ᠡᠰᠢ ᠲᠡᠢ ᠴᠤᠴᠠᠯᠢ ᠪᠠᠷ ᠲᠥᠭᠡᠨᠡᠵᠦ ᠨᠦᠰᠡᠷ ᠶᠡᠬᠡ ᠳᠠᠭᠤ ᠭᠠᠷᠭᠠᠨ ᠫᠤᠤ ᠲᠠᠯᠪᠢᠯᠠ᠃ ᠬᠦᠷᠡᠯ ᠪᠥᠭᠡᠷᠡᠨᠴᠡᠭ ᠢᠰᠬᠡᠷᠦᠨ ᠨᠢᠰᠴᠦ ᠯᠠᠩᠳᠡᠷᠮᠠ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠲᠣᠭᠣᠰᠣ ᠮᠠᠨᠠᠷᠠᠭᠠᠨ ᠲᠣᠰᠤᠯᠠ᠃ ᠰᠤᠮᠤ ᠲᠤᠰᠤᠭᠰᠠᠨ ᠭᠠᠵᠠᠷ ᠥᠭᠡᠳᠡ ᠳᠥᠷᠪᠡᠨ ᠬᠥᠮᠦᠨ ᠪᠡᠶᠡ ᠪᠡᠶᠡ ᠡᠴᠡ ᠪᠡᠨ ᠥᠷᠢᠰᠦᠯᠳᠦᠨ ᠭᠦᠶᠦᠵᠦ ᠬᠠᠷᠠᠭᠳᠠᠯᠠ᠃
– ᠲᠡᠷᠡ ᠰᠤᠮᠤ ᠶ᠋ᠢ ᠣᠯᠵᠤ ᠨᠠᠰᠢ ᠨᠢ ᠠᠪᠴᠢᠷᠠᠭᠰᠠᠨ ᠬᠥᠮᠦᠨ ᠨᠢᠭᠡᠨ ᠵᠢᠯ ᠦ᠋ᠨ ᠲᠤᠷᠰᠢ ᠠᠯᠪᠠᠨ ᠭᠤᠪᠴᠢᠭᠤᠷ ᠠ᠋ᠴᠠ ᠴᠢᠯᠥᠭᠡᠯᠡᠭᠳᠡᠳᠡᠭ ᠶᠦᠮ᠃ ᠤᠤᠯ ᠨᠢ ᠬᠥᠩᠭᠡᠨ ᠠᠵᠢᠯ ᠳᠠ ᠭᠡᠵᠦ ᠪᠠᠭᠰᠢ ᠭᠡᠯᠦᠩ ᠢ᠋ᠶ᠋ᠡᠨ ᠶᠠᠷᠢᠬᠤ ᠳ᠋ᠤ᠌ ᠰᠠᠩᠵᠢ ᠭᠡᠰᠦᠯ ᠰᠤᠮᠤ ᠡᠷᠢᠭᠴᠢᠳ ᠢ᠋ ᠠᠵᠢᠭᠯᠠᠨ ᠰᠠᠢᠲᠤᠷ ᠬᠠᠷᠠᠵᠤ ᠠᠪᠤᠯᠠ᠃ ᠲᠡᠳᠡ ᠪᠠᠰᠠ ᠯᠠ ᠰᠤᠷ ᠰᠢᠲᠠᠭᠰᠠᠨ ᠭᠠᠵᠠᠷ ᠦᠨᠡᠰᠦ ᠪᠤᠯᠢᠶᠠᠯᠳᠤᠭᠴᠢᠳ ᠤ᠋ᠨ ᠠᠳᠠᠯᠢ ᠵᠡᠰ ᠪᠥᠭᠡᠷᠡᠨᠴᠡᠭ ᠪᠤᠯᠢᠶᠠᠯᠳᠤᠵᠤ ᠪᠠᠢᠭᠠ ᠬᠠᠷᠠᠭᠳᠠᠪᠠ᠃
《ᠬᠠ ᠶᠠ ᠦᠭᠡᠢ ᠯᠡ ᠪᠤᠯᠢᠶᠠᠯᠳᠤᠭᠠᠨ᠂ ᠬᠠ ᠶᠠ ᠦᠭᠡᠢ ᠯᠡ ᠠᠯᠬᠢᠯᠳᠤᠭᠠᠨ! ᠶᠠᠭᠠᠬᠢᠭᠰᠠᠨ ᠴᠤ᠌ ᠠᠢᠬᠤᠪᠲᠤᠷ ᠬᠥᠮᠦᠰ ᠶᠦᠮ ᠪᠢᠯᠡ ᠳᠠ!》 ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠪᠣᠳᠣᠯᠠ᠃
– ᠡᠵᠡᠨ ᠬᠠᠭᠠᠨ ᠤ᠋ ᠪᠣᠯᠣᠳ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠱᠠᠪᠳᠠᠩ ᠢ᠋ ᠪᠠᠲᠤᠳᠬᠠᠬᠤ ᠶ᠋ᠢᠨ ᠲᠤᠯᠠᠳᠠ ᠲᠥᠪᠡᠳ ᠬᠥᠮᠦᠰ ᠪᠦᠬᠦᠢᠯᠡ ᠠᠷᠭᠠ ᠰᠢᠷᠬᠡ ᠪᠡᠨ ᠣᠨ ᠤ᠋ ᠡᠬᠢᠨ ᠳ᠋ᠦ᠍ ᠡᠢᠨ ᠬᠦ᠌ ᠬᠡᠷᠡᠭᠯᠡᠳᠡᠭ ᠪᠣᠯᠪᠠᠴᠤ ᠣᠯᠠᠨ ᠣᠯᠠᠨ ᠳᠠᠯᠠᠢ ᠯᠠᠮᠠ ᠳ᠋ᠤ᠌ ᠲᠡᠷᠡ ᠪᠦᠬᠦᠨ ᠨᠢ ᠲᠤᠰᠠ ᠪᠣᠯᠤᠭᠠ ᠦᠭᠡᠢ ᠠᠵᠠᠢ᠃ ᠭᠡᠪᠡᠴᠦ ᠲᠡᠭᠦᠨ ᠢ᠋ ᠬᠠᠢᠬᠤᠷᠳᠠᠭ ᠦᠭᠡᠢ ᠪᠠᠢᠯᠠ᠃
– ᠪᠠᠭᠰᠢ ᠠ᠋᠂ ᠣᠨ ᠤ᠋ ᠲᠡᠷᠢᠭᠦᠨ ᠰᠠᠷᠠ ᠶ᠋ᠢᠨ ᠵᠠᠩ ᠦᠢᠯᠡ ᠣᠳᠣ ᠡᠭᠦᠪᠡᠷ ᠲᠡᠭᠦᠰᠴᠦ ᠪᠠᠢᠭᠠ ᠪᠢᠵᠡ ᠳᠡ ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠪᠠᠭᠰᠢ ᠠ᠋ᠴᠠ ᠪᠠᠨ ᠠᠰᠠᠭᠤᠪᠠ᠃
– ᠬᠣᠷᠢᠨ ᠶᠢᠰᠦᠨ ᠳ᠋ᠦ᠍ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠲᠥᠯᠥᠭᠡ ᠵᠣᠯᠢᠭ ᠲᠤ᠌ ᠭᠠᠷᠭᠠᠬᠤ ᠶᠣᠰᠣᠯᠠᠯ ᠪᠣᠯᠳᠠᠭ ᠶᠤᠮ᠃ ᠲᠡᠷᠡ ᠶ᠋ᠢ ᠵᠠᠪᠠᠯ ᠦᠵᠡᠪᠡᠯ ᠲᠠᠭᠠᠷᠠᠨᠠ ᠭᠡᠵᠦ ᠪᠠᠭᠰᠢ ᠬᠡᠯᠡᠪᠡ᠃《ᠪᠠᠰᠠ ᠲᠡᠢᠮᠦ ᠶᠣᠰᠣᠯᠠᠯ ᠪᠠᠢᠳᠠᠭ ᠶᠤᠮ ᠭᠡᠵᠦ ᠦᠦ? ᠶᠡᠬᠡ ᠯᠡ ᠣᠯᠠᠨ ᠠᠷᠭᠠ ᠰᠢᠷᠬᠡ ᠬᠡᠷᠡᠭᠯᠡᠳᠡᠭ ᠶᠦᠮ ᠪᠠᠢᠨᠠ ᠳᠠ᠃ ᠳᠠᠯᠠᠢ ᠯᠠᠮᠠᠳᠠᠨ ᠤ᠋ ᠯᠠᠭᠱᠠᠨ ᠲᠤᠩᠭᠠᠯᠠᠭ ᠣᠷᠣᠰᠢᠬᠤ ᠨᠢ ᠯᠠᠪᠲᠠᠢ ᠶᠤᠮ ᠳᠠ》ᠭᠡᠵᠦ ᠰᠠᠩᠵᠢ ᠭᠡᠰᠦᠯ ᠪᠣᠳᠣᠯᠠ᠃
ᠰᠤᠷ ᠤ᠋ᠨ ᠭᠠᠯ ᠳᠡᠭᠡᠷᠡ ᠨᠣᠴᠣᠯᠳᠤᠵᠤ ᠪᠠᠢᠭᠰᠠᠨ ᠣᠯᠠᠨ ᠮᠥᠷᠭᠥᠯᠴᠢᠳ ᠰᠠᠶ᠋ᠢᠬᠠᠨ ᠲᠦᠳᠡᠭ ᠭᠠᠯ ᠨᠣᠴᠣᠵᠤ᠂ ᠰᠤᠷ ᠰᠢᠲᠠᠭᠰᠠᠨ ᠲᠡᠷᠡ ᠭᠠᠵᠠᠷ ᠢ᠋ ᠶᠠᠮᠠᠷ ᠴᠤ᠌ ᠤᠯᠠ ᠮᠥᠷ ᠦᠭᠡᠢ ᠪᠣᠯᠲᠠᠯᠠ ᠨᠢ ᠬᠤᠪᠠᠬᠠᠢᠯᠠᠨ ᠬᠣᠭᠣᠰᠣᠯᠠᠵᠤ ᠴᠡᠪᠡᠷᠯᠡᠵᠦ ᠠᠪᠤᠭᠰᠠᠨ ᠬᠠᠷᠠᠭᠳᠠᠯᠠ᠃
ᠦᠬᠡᠷ ᠫᠤᠤ ᠶ᠋ᠢᠨ ᠳᠠᠭᠤ ᠳᠥᠷᠪᠡᠨᠲᠡ ᠫᠡᠷ ᠬᠢᠵᠦ ᠰᠣᠨᠣᠰᠳᠠᠭᠠᠳ ᠴᠢᠮᠡᠭᠡ ᠦᠭᠡᠢ ᠪᠣᠯᠤᠯᠠ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠬᠡᠢ ᠫᠤᠤᠳᠠᠭᠰᠠᠨ ᠲᠠᠢ ᠨᠡᠢᠯᠡᠭᠡᠳ ᠳᠣᠯᠣᠭᠠᠨ ᠤᠳᠠᠭᠠ ᡀᠠᠰᠠ ᠶ᠋ᠢᠨ ᠲᠩᠷᠢ᠂ ᠭᠠᠵᠠᠷ ᠢ᠋ ᠳᠣᠷᠭᠢᠭᠤᠯᠤᠨ ᠳᠤᠤᠭᠠᠷᠤᠭᠰᠠᠨ ᠲᠡᠷᠡ ᠬᠦᠷᠡᠯ ᠭᠤᠨᠠᠨ ᠫᠤᠤ ᠳᠠᠬᠢᠭᠠᠳ ᠪᠦᠲᠦᠨ ᠵᠢᠯ ᠦ᠋ᠨ ᠲᠤᠷᠰᠢ ᠳᠠᠭᠤ ᠦᠭᠡᠢ ᠬᠡᠪᠲᠡᠬᠦ ᠠᠮᠠᠷᠠᠯᠲᠠ ᠪᠠᠨ ᠠᠪᠤᠯᠠ᠃
ᠦᠢ ᠮᠥᠷᠡᠨ ᠢ᠋ ᠪᠣᠭᠣᠵᠤ᠂ ᠦᠶᠡᠷ ᠤᠰᠤ ᠪᠠᠭᠤᠯᠭᠠᠬᠤ ᠪᠠᠷ ᠲᠡᠮᠡᠦᠯᠳᠡᠭ ᠭᠡᠭᠳᠡᠳᠡᠭ ᠯᠠᠩᠳᠠᠷᠮᠠ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠤᠶᠠᠭᠰᠠᠨ ᠴᠠᠭᠠᠨ ᠢᠮᠠᠭᠠ᠂ ᠬᠠᠷᠠ ᠥᠷᠮᠥᠭ ᠮᠠᠢᠬᠠᠨ ᠶᠠᠭᠤᠨ ᠳ᠋ᠤ᠌ ᠴᠤ᠌ ᠣᠨᠣᠭᠳᠠᠭᠰᠠᠨ ᠦᠭᠡᠢ ᠡᠰᠡᠨ ᠮᠡᠨᠳᠦ ᠦᠯᠡᠲᠡᠯᠡ᠃
ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠱᠠᠪᠳᠠᠩ ᠪᠠᠲᠤᠳᠠ ᠣᠷᠣᠰᠢᠬᠤ ᠪᠠᠢᠬᠤ ᠭᠡᠵᠦ ᠬᠥᠮᠦᠰ ᠢᠲᠡᠭᠡᠯᠡ᠃ ᠳᠠᠯᠠᠢ ᠯᠠᠮᠠ ᠯᠠ ᠠᠮᠤᠷ ᠮᠡᠨᠳᠦ ᠪᠠᠢᠪᠠᠯ ᠮᠥᠷᠭᠥᠯᠴᠢᠨ᠂ ᠰᠦᠵᠢᠭᠳᠡᠨ᠂ ᠱᠠᠪᠢ ᠨᠠᠷ ᠨᠢ ᠪᠠᠰᠠ ᠠᠮᠤᠭᠤᠯᠠᠩ ᠠᠵᠤ ᠲᠥᠷᠥᠬᠦ ᠤᠴᠢᠷ ᠲᠠᠢ ᠭᠡᠵᠦ ᠵᠤᠨ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠲᠡᠭᠡᠳᠡᠭ ᠪᠠᠢᠯᠠ᠃
– ᠣᠳᠣ ᠱᠠᠪᠢ ᠴᠢᠮᠠ ᠳ᠋ᠤ᠌ ᠡᠨᠡᠬᠦ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠪᠣᠯᠳᠠᠭ ᠶᠣᠰᠣᠯᠠᠯ ᠢ᠋ ᠦᠵᠡᠭᠦᠯᠵᠦ ᠳᠠᠭᠤᠰᠬᠠᠯᠠ᠃ ᠵᠢᠯ ᠦ᠋ᠨ ᠪᠤᠰᠤᠳ ᠡᠳᠦᠷ ᠦ᠋ᠳ ᠲᠦ᠍ ᠥᠭᠡᠷᠡ ᠨᠢᠭᠡ ᠶᠡᠬᠡ ᠣᠨᠴᠠᠭᠠᠢ ᠶᠠᠭᠤᠮᠠ ᠪᠣᠯᠬᠤ ᠦᠭᠡᠢ᠃ ᠶᠠᠭ ᠯᠠ ᠡᠨᠡ ᠮᠠᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠢᠯ ᠡᠴᠡ ᠵᠢᠯ ᠳ᠋ᠦ᠍ ᠳᠠᠪᠲᠠᠭᠳᠠᠨ ᠬᠡᠳᠦᠨ ᠠᠷᠪᠠᠨ ᠦᠶᠡ ᠤᠯᠠᠷᠢᠨ ᠥᠩᠭᠡᠷᠡᠭᠰᠡᠭᠡᠷ ᠪᠠᠢᠳᠠᠭ ᠶᠤᠮ᠃ ᠬᠦᠷᠳᠦ ᠡᠷᠭᠢᠭᠦᠯᠬᠦ ᠲᠠᠢ ᠯᠠ ᠢᠵᠢᠯᠬᠡᠨ ᠰᠠᠨᠠᠭᠳᠠᠨᠠ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠳ᠋ᠠᠭᠠᠨ ᠬᠡᠯᠡᠯᠡ᠃ ᠡᠭᠦᠪᠡᠷ ᠲᠡᠷᠡ ᠡᠳᠦᠷ ᠦ᠋ᠨ ᠱᠤᠤᠭᠢᠶᠠᠨᠲᠤ ᠶᠣᠰᠣᠯᠠᠯ ᠴᠤ᠌ ᠳᠠᠭᠤᠰᠴᠤ᠂ ᠰᠠᠩᠵᠢ ᠭᠡᠰᠦᠯ ᠦ᠋ᠨ ᠪᠠᠭᠰᠢ ᠯᠠᠮᠠ ᠲᠠᠢ ᠪᠠᠨ ᠬᠠᠮᠲᠤ ᠪᠤᠷᠬᠠᠨ ᠤ᠋ ᠬᠣᠲᠠᠨ ᠳ᠋ᠤ᠌ ᠠᠯᠢᠪᠠ ᠵᠠᠩ ᠦᠢᠯᠡ ᠰᠣᠨᠢᠭᠤᠴᠢᠯᠠᠵᠤ ᠶᠠᠪᠤᠬᠤ ᠴᠠᠭ ᠨᠢ ᠴᠦ᠍ ᠲᠡᠭᠦᠰᠦᠭᠰᠡᠨ ᠪᠣᠯᠬᠤ ᠶ᠋ᠢ ᠰᠠᠩᠵᠢ ᠠᠩᠵᠠᠭᠠᠷᠠᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠪᠠᠭᠰᠢ ᠯᠠᠮᠠ ᠨᠢ ᠪᠠᠷᠤᠭ ᠯᠠ ᠢᠩᠭᠢᠵᠦ ᠬᠡᠯᠡᠭᠡᠳ ᠪᠠᠢᠯᠠ᠃ ᠨᠠᠰᠤᠨ ᠤ᠋ ᠵᠠᠯᠠᠭᠤ᠂ ᠠᠮᠢᠳᠤᠷᠠᠯ ᠤ᠋ᠨ ᠨᠢᠮᠭᠡᠨ ᠨᠢ ᠰᠠᠩᠵᠢ ᠳ᠋ᠤ᠌ ᠰᠡᠪᠳᠡᠭᠡ ᠴᠤᠬᠤᠢᠯᠭᠠᠭᠰᠠᠨ ᠦᠭᠡᠢ᠃