ᠣᠷᠣᠢ ᠦᠭᠡᠢ ᠰᠦᠮᠡ – ᠳᠣᠯᠣᠭᠠ ᠂ ᠨᠠᠰᠤ ᠶᠡᠭᠦᠯᠡᠵᠦ ᠵᠠᠭᠤᠷᠠᠲᠤ ᠪᠠᠷ ᠤᠳᠪᠠ Оройгүй сүм – Долоо ᠂ Нас юүлж зуурдаар одов - Oroigui sum 7
967ᠳᠣᠯᠣᠭᠠ ᠂ ᠨᠠᠰᠤ ᠶᠡᠭᠦᠯᠡᠵᠦ ᠵᠠᠭᠤᠷᠠᠲᠤ ᠪᠠᠷ ᠤᠳᠪᠠ
ᠣᠷᠣᠨ ᠳ᠋ᠤ᠌ ᠣᠷᠣᠰᠢᠬᠤ ᠪᠠᠷᠢᠳ ᠬᠣᠷᠣᠬᠠᠢ
ᠪᠡᠶᠡ ᠳ᠋ᠦ᠍ ᠣᠷᠣᠰᠢᠬᠤ ᠦᠬᠦᠯ ᠦ᠋ᠨ ᠡᠵᠡᠨ
ᠰᠡᠳᠬᠢᠯ ᠳ᠋ᠦ᠍ ᠣᠷᠣᠰᠢᠬᠤ ᠨᠢᠰᠸᠠᠨᠢᠰ
ᠦᠢ ᠮᠥᠷᠡᠨ ᠪᠠᠷᠠᠭᠠᠨᠲᠤᠨ ᠳᠠᠪᠠᠯᠭᠠᠯᠠᠵᠤ᠂ ᠲᠠᠢᠪᠤᠩ ᠦᠭᠡᠢ ᠪᠠᠢᠯᠠ᠃ ᠰᠠᠷᠯᠤᠭ ᠤ᠋ᠨ ᠠᠷᠠᠰᠤ ᠪᠠᠷ ᠪᠦᠷᠢᠵᠦ ᠬᠢᠭᠰᠡᠨ ᠭᠤᠷᠪᠠᠨ ᠬᠠᠷᠠ ᠵᠠᠪᠢ ᠦᠢ ᠮᠥᠷᠡᠨ ᠦ᠌ ᠬᠠᠷᠠ ᠪᠠᠷᠠᠭᠠᠨ ᠳᠣᠯᠭᠢᠶᠠᠨ ᠳᠡᠭᠡᠷᠡ ᠳᠠᠯᠪᠢᠯᠵᠠᠨ ᠬᠦᠪᠦᠵᠦ᠂ ᠳᠡᠭᠡᠷᠡ ᠨᠢ ᠬᠣᠶᠠᠷ ᠬᠣᠶᠠᠷ ᠢ᠋ᠶ᠋ᠠᠷ ᠰᠠᠭᠤᠭᠰᠠᠨ ᠮᠥᠷᠭᠥᠯᠴᠢᠳ ᠵᠤᠪᠠᠭᠤᠷᠢ ᠲᠠᠢ ᠪᠠᠷ ᠢᠷᠪᠠᠢᠵᠠᠭᠠᠵᠠᠢ᠃ ᠳᠠᠪᠠᠯᠭᠠᠨ ᠳ᠋ᠤ᠌ ᠵᠠᠪᠢ ᠳᠠᠯᠪᠢᠯᠵᠠᠨ᠂ ᠤᠷᠤᠰᠬᠠᠯ ᠰᠥᠷᠬᠦ ᠳ᠋ᠦ᠍ ᠳᠡᠭᠡᠷᠡ ᠨᠢ ᠰᠠᠭᠤᠭᠰᠠᠨ ᠮᠥᠷᠭᠥᠯᠴᠢᠳ ᠦ᠋ᠨ ᠲᠣᠯᠣᠭᠠᠢ ᠡᠷᠭᠢᠵᠦ᠂ ᠳᠣᠲᠣᠷᠠ ᠡᠪᠭᠦᠢᠷᠬᠡᠵᠦ ᠪᠠᠢᠯᠠ᠃ ᠥᠯᠵᠡᠢ᠂ ᠤᠳᠬᠤᠨ ᠬᠣᠶᠠᠷ ᠨᠢᠭᠡ ᠵᠠᠪᠢ ᠳ᠋ᠤ᠌ ᠰᠠᠭᠤᠭᠰᠠᠨ ᠲᠤᠯᠠ ᠪᠡᠶᠡ ᠮᠠᠭᠤ ᠲᠠᠢ᠂ ᠠᠶᠤᠮᠠᠬᠠᠢ ᠨᠢ ᠨᠡᠷᠮᠡᠭᠡᠰᠦ ᠪᠣᠯᠵᠤ ᠵᠠᠪᠢᠨ ᠤ᠋ ᠬᠣᠶᠠᠷ ᠲᠠᠯᠠ ᠤᠷᠤᠭᠤ ᠪᠠᠢᠨ ᠪᠠᠢᠨ ᠪᠥᠭᠡᠯᠵᠢᠵᠦ ᠪᠠᠢᠪᠠ᠃ ᠪᠦᠬᠡᠮᠠᠩᠯᠠᠢ ᠬᠦᠷᠲᠡᠯᠡ ᠢᠷᠪᠠᠢᠴᠢᠬᠠᠭᠰᠠᠨ ᠶᠡᠬᠡ ᠯᠡ ᠲᠠᠪᠠ ᠦᠭᠡᠢ ᠶᠠᠪᠤᠪᠠ᠃ ᠶᠡᠬᠡ ᠤᠰᠤᠨ ᠳᠡᠭᠡᠭᠦᠷ ᠵᠠᠪᠢ ᠪᠠᠷ ᠶᠠᠪᠤᠵᠤ ᠪᠠᠢᠭᠠ ᠦᠭᠡᠢ ᠪᠣᠯᠬᠣᠷ ᠲᠡᠳᠡ ᠠᠷᠭᠠ ᠦᠭᠡᠢ ᠰᠠᠨᠳᠤᠷᠤᠨ ᠪᠠᠯᠠᠮᠠᠭᠳᠠᠵᠠᠢ᠃ ᠬᠠᠷᠢᠨ ᠴᠤᠢᠮᠴᠤᠭ ᠭᠡᠯᠦᠩ᠂ ᠰᠠᠩᠵᠢ ᠭᠡᠰᠦᠯ ᠬᠣᠶᠠᠷ ᠨᠢᠭᠡ ᠶᠡᠬᠡ ᠵᠣᠪᠠᠯᠠᠩ ᠦᠭᠡᠢ ᠠᠵᠤ᠃
– ᠡᠢᠮᠦ ᠶᠠᠭᠤᠮᠠ ᠪᠠᠷ ᠶᠠᠪᠤᠳᠠᠭ ᠢ᠋ ᠨᠢ ᠮᠡᠳᠡᠭᠰᠡᠨ ᠰᠠᠨ ᠪᠣᠯ ᠭᠠᠯᠳᠠᠨ ᠬᠡᠢᠳ ᠡᠴᠡ ᡀᠠᠰᠠ ᠤᠷᠤᠭᠤ ᠵᠦᠭᠯᠡᠳᠡᠭ ᠦᠭᠡᠢ ᠯᠡ ᠪᠠᠢᠵᠠᠢ᠃ ᠲᠣᠭᠠ ᠦᠭᠡᠢ ᠶᠠᠭᠤᠮᠠ ᠪᠣᠯᠤᠯᠠ ᠭᠡᠵᠦ ᠤᠳᠬᠤᠨ ᠬᠡᠦᠬᠡᠨ ᠦᠭᠡᠯᠡᠵᠦ ᠶᠠᠪᠤᠯᠠ᠃ ᠥᠯᠵᠡᠢ ᠳᠤᠤᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠡᠯᠢᠭᠡ ᠪᠡᠨ ᠳᠠᠷᠤᠭᠠᠳ ᠵᠠᠪᠢᠨ ᠤ᠋ ᠢᠷᠮᠡᠭ ᠡᠴᠡ ᠵᠠᠭᠤᠷᠠᠵᠤ ᠰᠠᠭᠤᠨᠠ᠃ ᠭᠠᠯᠳᠠᠨ ᠬᠡᠢᠳ ᠡᠴᠡ ᡀᠠᠰᠠ ᠬᠦᠷᠲᠡᠯᠡ ᠨᠢᠭᠡᠨ ᠰᠠᠢᠨ ᠥᠷᠲᠡᠭᠡ ᠭᠠᠵᠠᠷ ᠲᠤᠯᠠ ᠮᠥᠷᠭᠥᠯᠴᠢᠳ ᠭᠣᠣᠯ ᠢ᠋ᠶ᠋ᠠᠷ ᠶᠠᠪᠤᠪᠠᠯ ᠲᠦᠳᠡ ᠭᠡᠵᠡᠭᠡᠵᠦ ᠡᠢᠨ ᠬᠦᠦ ᠲᠠᠯᠠ ᠵᠣᠭᠣᠰᠤᠨ ᠤ᠋ ᠬᠥᠯᠥᠰᠥ ᠲᠡᠢ ᠠᠷᠠᠰᠤᠨ ᠵᠠᠪᠢ ᠪᠠᠷ ᠶᠠᠪᠤᠬᠤ ᠪᠠᠷ ᠰᠢᠢᠳᠴᠡᠢ᠃ ᠥᠨᠳᠥᠷ ᠠᠭᠤᠯᠠᠨ ᠠ᠋ᠴᠠ ᠪᠠᠭᠤᠭᠰᠠᠨ ᠦᠢ ᠮᠥᠷᠡᠨ ᠤᠷᠤᠰᠬᠠᠯ ᠲᠣᠭᠰᠢᠨ ᠲᠤᠯᠠ ᠪᠦᠷ ᠴᠦ᠍ ᠨᠡᠷᠮᠡᠭᠡᠰᠦ ᠪᠣᠯᠵᠠᠢ᠃ 《ᠪᠷᠤᠭᠷᠢ ᠭᠠᠯᠳᠠᠨ ᠨᠠᠮᠪᠠᠷ ᠵᠠᠯᠪᠢᠯᠢᠩ》 ᠪᠤᠶᠤ ᠠᠯᠤᠰ ᠬᠣᠯᠠ ᠶ᠋ᠢᠨ ᠠᠮᠤᠷ ᠪᠠᠶᠠᠰᠬᠤᠯᠠᠩᠲᠤ ᠲᠡᠭᠦᠰ ᠢᠯᠠᠭᠤᠭᠰᠠᠨ ᠬᠡᠢᠳ ᠭᠡᠭᠴᠢ ᠳ᠋ᠦ᠍ ᠮᠥᠷᠭᠥᠯᠴᠢᠳ ᠣᠴᠢᠵᠠᠢ᠃
– ᠰᠸᠷᠳᠦᠨ ᠴᠢᠩᠮᠤ ᠶ᠋ᠢᠨ ᠠᠯᠲᠠᠨ ᠰᠤᠪᠤᠷᠭᠠᠨ ᠳ᠋ᠤ᠌ ᠮᠥᠷᠭᠥᠵᠦ ᠠᠳᠢᠰ ᠠᠪᠤᠪᠠᠯ ᠭᠠᠢ ᠵᠡᠳᠬᠡᠷ ᠴᠢᠨᠢ ᠨᠢᠮᠭᠡᠷᠡᠨᠡ ᠪᠣᠢ! ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠥᠯᠵᠡᠢ ᠳ᠋ᠦ᠍ ᠬᠡᠯᠡᠭᠰᠡᠨ ᠪᠢᠯᠡ᠃ ᠤᠴᠢᠷ ᠨᠢ ᠭᠡᠪᠡᠯ ᠰᠸᠷᠳᠦᠨ ᠴᠢᠩᠮᠤ ᠰᠤᠪᠤᠷᠭᠠ ᠪᠣᠯ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠢ᠋ ᠰᠢᠨᠡᠳᠬᠡᠨ ᠪᠠᠳᠠᠷᠠᠭᠤᠯᠤᠭᠴᠢ ᠽᠤᠩᠭᠡᠸᠠ ᠪᠠᠭᠰᠢ ᠶ᠋ᠢᠨ ᠱᠠᠷᠢᠯᠳᠤ ᠰᠤᠪᠤᠷᠭᠠ ᠪᠠᠢᠯᠠ᠃ ᠲᠡᠷᠡᠴᠢᠯᠡᠨ ᠽᠤᠩᠭᠡᠸᠠ ᠪᠠᠭᠰᠢ ᠶ᠋ᠢᠨ ᠣᠷᠳᠣᠨ ᠤᠳ᠋ᠰᠠᠷᠫᠤᠭ ᠭᠡᠳᠡᠭ ᠠᠯᠲᠠᠨ ᠣᠷᠣᠢ ᠲᠠᠢ ᠦᠵᠡᠰᠬᠦᠯᠡᠩᠲᠦ ᠰᠦᠮᠡ ᠪᠠᠢᠳᠠᠭ ᠶᠤᠮ ᠰᠠᠨᠵᠠᠢ᠃ ᠲᠡᠷᠡᠴᠢᠯᠡᠨ ᠲᠡᠭᠦᠨ ᠡᠴᠡ ᠳᠤᠲᠠᠭᠤ ᠦᠭᠡᠢ ᠤᠷᠲᠤ ᠬᠠᠷᠰᠢ ᠣᠯᠠᠨ᠃ ᠭᠡᠯᠦᠩ ᠴᠤᠢᠮᠴᠤᠭ ᠤ᠋ᠨ ᠦᠭᠡᠨ ᠡᠴᠡ ᠭᠠᠷᠬᠤ ᠶ᠋ᠢ ᠥᠯᠵᠡᠢ ᠨᠢᠭᠦᠯ ᠭᠡᠵᠦ ᠪᠣᠳᠣᠭᠰᠠᠨ ᠲᠤᠯᠠ ᠭᠠᠯᠳᠠᠨ ᠬᠡᠢᠳ ᠲᠦ᠍ ᠣᠴᠢᠬᠤ ᠪᠠᠷ ᠪᠣᠯᠵᠠᠢ᠃ ᠮᠥᠷᠭᠥᠯᠴᠢᠳ ᠭᠠᠯᠳᠠᠨ ᠬᠡᠢᠳ ᠲᠦ᠍ ᠬᠥᠯᠥᠰᠥᠨ ᠦ᠌ ᠰᠠᠷᠯᠤᠭ ᠤᠨᠤᠵᠤ ᠢᠷᠡᠭᠡᠳ ᠬᠣᠶᠠᠷ ᠬᠣᠨᠣᠭ ᠥᠩᠭᠡᠷᠡᠭᠦᠯᠵᠡᠢ᠃ ᠶᠠᠭᠤᠨ ᠤ᠋ ᠲᠦᠷᠦᠭᠦᠨ ᠽᠤᠩᠭᠡᠸᠠ ᠪᠠᠭᠰᠢ ᠶ᠋ᠢᠨ ᠱᠠᠷᠢᠯᠲᠦ ᠰᠸᠷᠳᠦᠨ ᠴᠢᠩᠮᠤ ᠰᠤᠪᠤᠷᠭᠠ᠂ ᠲᠡᠭᠦᠨ ᠦ᠌ ᠤᠳ᠋ᠰᠠᠷᠫᠤᠭ ᠦᠷᠭᠦᠭᠡᠨ ᠳ᠋ᠦ᠍ ᠣᠴᠢᠪᠠ᠃ ᠭᠠᠯᠳᠠᠨ ᠬᠡᠢᠳ ᠪᠠᠰᠠ ᠢᠳᠢ ᠰᠢᠳᠢ ᠲᠡᠢ ᠮᠠᠨᠢ ᠷᠢᠯ ᠫᠤᠤ ᠬᠢᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠯᠳᠠᠷ ᠲᠠᠢ ᠪᠣᠯᠬᠣᠷ ᠮᠥᠷᠭᠥᠯᠴᠢᠳ ᠬᠥᠮᠦᠨ ᠪᠦᠷᠢ ᠪᠠᠬᠠᠨ ᠮᠠᠨᠢ ᠶ᠋ᠢᠨ ᠦᠷᠢᠯ ᠬᠤᠳᠠᠯᠳᠤᠵᠤ ᠠᠪᠴᠠᠢ᠃ ᠤᠳ᠋ᠰᠠᠷᠫᠤᠭ ᠣᠷᠳᠣᠨ ᠤ᠋ ᠨᠢᠭᠡ ᠥᠷᠥᠭᠡᠨ ᠳ᠋ᠦ᠍ ᠽᠤᠩᠭᠡᠸᠠ ᠪᠠᠭᠰᠢᠲᠠᠨ ᠨᠠᠰᠤᠨ ᠥᠭᠡᠳᠡ ᠪᠣᠯᠵᠠᠢ᠃ ᠲᠡᠷᠡ ᠥᠷᠥᠭᠡᠨ ᠦ᠌ ᠬᠠᠨᠠᠨ ᠳᠡᠭᠡᠷᠡ ᠽᠤᠩᠭᠡᠸᠠ ᠪᠠᠭᠰᠢ ᠶ᠋ᠢᠨ ᠵᠢᠷᠤᠭ ᠪᠠᠢᠯᠠ᠃ ᠥᠪᠡᠷ ᠢ᠋ᠶ᠋ᠡᠨ ᠲᠣᠳᠣᠷᠠᠨ ᠭᠠᠷᠤᠭᠰᠠᠨ ᠭᠡᠳᠡᠭ ᠳᠣᠮᠣᠭ ᠲᠠᠢ ᠠᠵᠠᠢ᠃
– ᠪᠤᠷᠬᠠᠨ ᠪᠠᠭᠰᠢ ᠶ᠋ᠢ ᠨᠠᠰᠤ ᠶᠡᠭᠦᠯᠡᠬᠦ ᠳ᠋ᠦ᠍ ᠡᠨᠡ ᠥᠷᠥᠭᠡᠨ ᠳ᠋ᠦ᠍ ᠱᠠᠪᠢ ᠨᠠᠷ ᠨᠢ ᠭᠠᠰᠢᠭᠤᠳᠠᠵᠤ《ᠪᠠᠭᠰᠢᠲᠠᠨ ᠮᠢᠨᠢ ᠲᠠ ᠬᠠᠮᠢᠭᠠ ᠣᠴᠢᠪᠠ ᠠ᠋?》 ᠭᠡᠵᠦ ᠤᠬᠢᠯᠠᠵᠠᠭᠠᠵᠠᠢ᠃ ᠲᠡᠭᠡᠲᠡᠯᠡ ᠡᠨᠡ ᠬᠠᠨᠠᠨ ᠳᠡᠭᠡᠷᠡ ᠽᠤᠩᠭᠡᠸᠠ ᠪᠠᠭᠰᠢ ᠶ᠋ᠢᠨ ᠳᠦᠷᠢ ᠥᠪᠡᠷ ᠢ᠋ᠶ᠋ᠡᠨ ᠠᠶᠠᠨᠳᠠᠭᠠᠨ ᠲᠣᠳᠣᠷᠠᠨ ᠭᠠᠷᠴᠤ ᠢᠷᠡᠭᠡᠳ 《ᠪᠢ ᠡᠨᠳᠡ ᠪᠠᠢᠨᠠ》ᠭᠡᠵᠦ ᠳᠤᠤᠭᠠᠷᠤᠭᠰᠠᠨ ᠶᠤᠮ ᠭᠡᠳᠡᠭ ᠭᠡᠮᠡᠨ ᠴᠤᠢᠮᠴᠤᠭ ᠭᠡᠯᠦᠩ ᠲᠡᠳᠡᠨ ᠳ᠋ᠦ᠍ ᠲᠠᠢᠯᠪᠤᠷᠢᠯᠠᠵᠤ ᠥᠭᠴᠡᠢ᠃ ᠥᠪᠡᠷ ᠢ᠋ᠶ᠋ᠡᠨ ᠲᠣᠳᠣᠷᠠᠨ ᠭᠠᠷᠤᠭᠰᠠᠨ ᠲᠡᠷᠡ ᠬᠦ᠌ ᠰᠢᠳᠢᠲᠦ ᠳᠦᠷᠰᠦ ᠡᠴᠡ ᠠᠳᠢᠰ ᠠᠪᠴᠤ ᠪᠠᠢᠲᠠᠯᠠ ᠥᠯᠵᠡᠢ ᠶ᠋ᠢᠨ ᠪᠡᠶᠡ ᠶᠡᠬᠡ ᠮᠠᠭᠤᠳᠠᠵᠤ ᠦᠬᠦᠳᠬᠢᠨ ᠤᠨᠠᠵᠠᠢ᠃ ᠮᠥᠷᠭᠥᠯᠴᠢᠳ ᠴᠥᠮ ᠰᠠᠨᠳᠤᠷᠴᠤ ᠥᠯᠵᠡᠢ ᠶ᠋ᠢ ᠳᠠᠮᠵᠢᠯᠠᠨ ᠬᠣᠩᠭᠢᠯ ᠳ᠋ᠤ᠌ ᠭᠠᠷᠭᠠᠬᠤ ᠳ᠋ᠤ᠌᠄
– ᠨᠠᠭᠠᠳᠤᠬᠢ ᠪᠠᠨ ᠭᠠᠳᠠᠭᠠ ᠭᠠᠷᠭᠠ᠃ ᠮᠠᠨᠢ ᠶ᠋ᠢᠨ ᠦᠷᠢᠯ ᠢ᠋ᠶ᠋ᠡᠷ ᠣᠳᠣ! ᠭᠠᠵᠠᠷ ᠤ᠋ᠨ ᠰᠦᠷ ᠲᠦ᠍ ᠳᠠᠷᠤᠭᠳᠠᠵᠤ ᠪᠠᠢᠬᠤ ᠰᠢᠭ᠋ ᠪᠣᠢ? ᠭᠡᠵᠦ ᠨᠢᠭᠡᠨ ᠦᠯᠦ ᠲᠠᠨᠢᠬᠤ ᠮᠣᠩᠭᠣᠯ ᠯᠠᠮᠠ ᠮᠥᠷᠭᠥᠯᠴᠢᠳ ᠲᠦ᠍ ᠵᠥᠪᠯᠡᠵᠡᠢ᠃ ᠢᠩᠭᠢᠨᠡ ᠭᠡᠵᠦ ᠲᠡᠳᠡ ᠪᠠᠰᠠ ᠰᠠᠨᠠᠬᠤ ᠪᠠᠷ ᠴᠦ᠍ ᠦᠭᠡᠢ ᠪᠠᠢᠪᠠ᠃
– ᠨᠡᠭᠡᠷᠡᠨ ᠲᠡᠢᠮᠦ ᠪᠠᠢᠬᠠ᠃ ᠡᠨᠡ ᠭᠠᠯᠳᠠᠨ ᠬᠡᠢᠳ ᠶᠡᠬᠡ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠪᠠᠢᠳᠠᠭ ᠪᠣᠯᠬᠣᠷ ᠠᠮᠢᠰᠬᠤᠭᠠ ᠳᠠᠪᠬᠤᠴᠠᠭᠠᠳ ᠡᠬᠢᠯᠡᠳᠡᠭ ᠶᠦᠮ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠬᠡᠯᠡᠭᠡᠳ ᠲᠡᠳᠡ ᠴᠥᠮ ᠢ᠋ᠶ᠋ᠡᠷ ᠭᠠᠳᠠᠭᠠ ᠭᠠᠷᠴᠠᠢ᠃ ᠭᠠᠳᠠᠭᠠ ᠬᠡᠰᠡᠭ ᠪᠠᠢᠯᠭᠠᠭᠠᠳ ᠮᠠᠨᠢ ᠶ᠋ᠢᠨ ᠦᠷᠢᠯ ᠢ᠋ᠶ᠋ᠡᠷ ᠤᠳᠤᠭᠰᠠᠨ ᠳ᠋ᠤ᠌ ᠥᠯᠵᠡᠢ ᠰᠡᠭᠡᠨ ᠳᠡᠭᠡᠷᠡᠳᠡᠵᠦ ᠠᠮᠢᠰᠬᠤᠭᠠ ᠨᠢ ᠳᠠᠪᠬᠤᠴᠠᠬᠤ ᠪᠠᠨ ᠪᠣᠯᠢᠵᠠᠢ᠃
ᠡᠮᠦᠨᠡᠲᠦ ᠣᠷᠭᠢᠯ ᠪᠤᠶᠤ ᠱᠠᠷᠴᠠᠢ ᠤᠮᠠᠷᠠᠲᠤ ᠣᠷᠣᠢ ᠪᠤᠶᠤ ᠵᠠᠨᠴᠠᠢ ᠳ᠋ᠠᠴᠠᠩ ᠳ᠋ᠤ᠌ ᠮᠥᠷᠭᠥᠯᠴᠢᠳ ᠣᠴᠢᠵᠤ ᠦᠵᠡᠪᠡ᠃ ᠽᠤᠩᠭᠡᠸᠠ ᠪᠠᠭᠰᠢ ᠶ᠋ᠢᠨ ᠬᠣᠯᠪᠣᠭᠳᠠᠯ ᠲᠠᠢ ᠪᠦᠬᠦᠨ ᠢ᠋ ᠣᠷᠭᠢᠯ ᠦᠭᠡᠢ ᠦᠵᠡᠵᠦ ᠡᠷᠭᠦᠯ ᠡᠷᠭᠦᠭᠡᠳ ᠴᠥᠮ ᠢ᠋ᠶ᠋ᠡᠷ ᠦ᠋ᠨ ᠰᠡᠳᠬᠢᠯ ᠬᠠᠨᠵᠤ ᠪᠤᠴᠠᠬᠤ ᠪᠣᠯᠬᠤ ᠪᠠᠷ ᠦᠢ ᠮᠥᠷᠡᠨ ᠢ᠋ᠶ᠋ᠡᠷ ᠵᠠᠪᠢ ᠬᠥᠯᠥᠰᠥᠯᠡᠨ ᠶᠠᠪᠤᠬᠤ ᠰᠠᠨᠠᠯ ᠭᠠᠷᠴᠠᠢ᠃ ᠲᠡᠭᠡᠭᠡᠳ ᠯᠡ ᠦᠢ ᠮᠥᠷᠡᠨ ᠦ᠌ ᠳᠠᠪᠠᠯᠭᠠᠨ ᠳᠡᠭᠡᠷᠡ ᠦᠢᠯᠡ ᠪᠡᠨ ᠦᠵᠡᠵᠦ ᠶᠠᠪᠤᠭᠠ ᠨᠢ ᠡᠨᠡ᠃ ᠭᠠᠯᠳᠠᠨ ᠬᠡᠶᠢᠳ ᠽᠤᠩᠭᠡᠸᠠ ᠪᠠᠭᠰᠢ ᠶ᠋ᠢᠨ ᠨᠤᠲᠤᠭ᠂ ᠡᠨᠳᠡᠬᠢ ᠶ᠋ᠢᠨ ᠬᠠᠮᠤᠭ ᠶᠣᠰᠣ ᠶ᠋ᠢ ᠬᠠᠯᠬᠠ ᠮᠣᠩᠭᠣᠯ ᠳ᠋ᠤ᠌ ᠳᠠᠭᠤᠷᠢᠶᠠᠵᠤ ᠪᠠᠢᠳᠠᠭ ᠪᠣᠯᠪᠠᠴᠤ ᠡᠳᠡᠨ ᠦ᠌ ᠬᠠᠮᠪᠤ ᠯᠠᠮᠠ ᠪᠠᠷ ᠮᠣᠩᠭᠣᠯ ᠯᠠᠮᠠ ᠰᠠᠭᠤᠬᠤ ᠬᠣᠷᠢᠭᠠ ᠲᠠᠢ ᠠᠵᠠᠢ᠃ ᠪᠤᠰᠤᠳ ᠬᠡᠢᠳ ᠦ᠋ᠳ ᠲᠦ᠍ ᠮᠣᠩᠭᠣᠯ ᠬᠠᠮᠪᠤ ᠨᠢᠭᠡ ᠪᠤᠰᠤ ᠤᠳᠠᠭᠠ ᠰᠠᠭᠤᠵᠤ ᠪᠠᠢᠯᠠ᠃ ᠶᠠᠭᠠᠬᠢᠭᠠᠳ ᠭᠠᠯᠳᠠᠨ ᠬᠡᠢᠳ ᠲᠦ᠍ ᠮᠣᠩᠭᠣᠯ ᠬᠠᠮᠪᠤ ᠬᠣᠷᠢᠭᠠ ᠲᠠᠢ ᠪᠣᠯᠤᠭᠰᠠᠨ ᠪᠣᠢ ᠭᠡᠪᠡᠯ ᠤᠷᠢᠳᠤ ᠴᠠᠭ ᠲᠤ᠌ ᠭᠠᠯᠳᠠᠨ ᠪᠣᠱᠣᠭᠲᠤ ᠡᠴᠢᠭᠡ ᠪᠡᠨ ᠬᠥᠨᠥᠭᠡᠭᠰᠡᠨ ᠳ᠋ᠦ᠍ ᠬᠣᠷᠣᠰᠴᠤ ᠲᠥᠪᠡᠳ ᠢ᠋ ᠣᠷᠬᠢᠵᠤ ᠶᠠᠪᠤᠭᠰᠠᠨ ᠠᠵᠠᠢ᠃ ᠡᠭᠦᠨ ᠳ᠋ᠦ᠍ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠭᠠᠵᠠᠷ ᠤ᠋ᠨ ᠰᠦᠯᠳᠡ ᠮᠣᠩᠭᠣᠯ ᠬᠥᠮᠦᠨ ᠢ᠋ ᠭᠠᠯᠳᠠᠨ ᠬᠡᠢᠳ ᠦ᠋ᠨ ᠬᠠᠮᠪᠤ ᠶ᠋ᠢᠨ ᠰᠢᠷᠡᠭᠡᠨ ᠳ᠋ᠦ᠍ ᠣᠢᠷᠠᠲᠤᠭᠤᠯᠳᠠᠭ ᠦᠭᠡᠢ ᠭᠡᠳᠡᠭ ᠳᠣᠮᠣᠭ ᠲᠠᠢ ᠪᠣᠯᠵᠠᠢ᠃
ᠦᠢ ᠮᠥᠷᠡᠨ ᠦ᠌ ᠤᠷᠤᠰᠬᠠᠯ ᠤᠯᠠᠮ ᠰᠢᠷᠦᠭᠦᠰᠴᠤ ᠰᠠᠯᠬᠢ ᠭᠠᠷᠪᠠ᠃ ᠵᠠᠪᠢᠨ ᠤ᠋ ᠳᠠᠪᠠᠯᠭᠠᠨ ᠳ᠋ᠤ᠌ ᠴᠣᠬᠢᠭᠳᠠᠬᠤ ᠨᠢ ᠨᠡᠮᠡᠭᠳᠡᠯᠡ᠃ ᠲᠡᠭᠡᠲᠡᠯᠡ ᠥᠯᠵᠡᠢ ᠶ᠋ᠢᠨ ᠪᠡᠶᠡ ᠤᠯᠠᠮ ᠮᠠᠭᠤᠳᠠᠵᠤ ᠵᠠᠪᠢᠨ ᠳᠣᠲᠣᠷᠠ ᠪᠠᠨ ᠭᠤᠯᠳᠤᠢᠨ ᠬᠡᠪᠲᠡᠭᠡᠳ ᠠᠮᠠ ᠪᠠᠨ ᠠᠩᠭᠠᠯᠵᠠᠭᠤᠯᠤᠨᠠ᠃
– ᠠᠯᠲᠠᠨ ᠣᠷᠣᠢᠲᠤ ᠳ᠋ᠠᠴᠠᠩ ᠮᠢᠨᠢ!ᠭᠡᠵᠦ ᠬᠡᠯᠡᠭᠡᠳ ᠠᠮᠢᠰᠬᠤᠯ ᠬᠤᠷᠢᠶᠠᠵᠠᠢ᠃ ᠳᠡᠷᠭᠡᠳᠡ ᠨᠢ ᠪᠠᠢᠭᠰᠠᠨ ᠤᠳᠬᠤᠨ ᠠᠶᠤᠨ ᠰᠠᠨᠳᠤᠷᠴᠤ᠄
– ᠲᠠ ᠮᠢᠨᠢ ᠠ᠋! ᠶᠠᠭᠠᠬᠢᠨᠠ!ᠥᠯᠵᠡᠢ ᠠᠮᠢ ᠲᠠᠯᠪᠢᠴᠢᠬᠠᠯᠠ᠃ ᠵᠣᠭᠰᠣᠭᠠᠴᠢ ᠠ᠋! ᠭᠡᠵᠦ ᠬᠠᠰᠬᠢᠷᠤᠯᠠ᠃ ᠭᠡᠪᠡᠴᠦ ᠤᠷᠤᠰᠬᠠᠯ ᠤ᠋ᠨ ᠬᠦᠴᠦ ᠪᠡᠷ ᠶᠠᠪᠤᠵᠤ ᠪᠠᠢᠭᠠ ᠵᠡᠪᠢ ᠢ᠋ ᠵᠤᠭᠰᠤᠭᠠᠬᠤ ᠠᠷᠭᠠ ᠪᠠᠢᠭᠰᠠᠨ ᠦᠭᠡᠢ᠃ ᠭᠠᠵᠠᠷᠴᠢ ᠲᠥᠪᠡᠳ᠄
– ᠭᠦᠱᠦᠦ᠂ ᠭᠦᠱᠦᠦ! ᠵᠣᠭᠰᠣᠬᠤ ᠠᠷᠭᠠ ᠦᠭᠡᠢ ᠠ᠋᠃ ᠪᠠᠷᠢᠭᠠᠨ ᠤ᠋ ᠭᠠᠵᠠᠷ ᠵᠣᠭᠰᠣᠨᠠ᠃ ᠯᠠᠭᠰᠤᠤ᠂ ᠯᠠᠭᠰᠤᠤ! ᠭᠡᠵᠦ ᠬᠡᠯᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ᠃ ᠥᠯᠵᠡᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠯᠠᠯᠵᠤ᠂ ᠠᠶᠤᠭᠰᠠᠨ ᠠ᠋ᠴᠠ ᠪᠣᠯᠵᠤ ᠨᠢᠳᠦ ᠪᠡᠨ ᠲᠣᠮᠣ ᠪᠠᠷ ᠪᠦᠯᠲᠡᠢᠯᠭᠡᠭᠡᠳ ᠦᠬᠦᠵᠦ ᠣᠷᠬᠢᠯᠠ᠃ ᠤᠳᠬᠤᠨ ᠪᠤᠷᠤᠭᠤ ᠬᠠᠷᠠᠭᠠᠳ ᠮᠡᠭᠰᠢᠨ ᠤᠬᠢᠯᠠᠭᠰᠠᠭᠠᠷ ᠪᠠᠢᠯᠠ᠃ ᠨᠥᠬᠥᠭᠡ ᠵᠠᠪᠢᠨ ᠳᠡᠭᠡᠷᠡ ᠰᠠᠭᠤᠭᠰᠠᠨ ᠴᠤᠢᠮᠴᠤᠭ ᠭᠡᠯᠦᠩ ᠬᠡᠷᠡᠭ ᠨᠢᠭᠡᠨᠲᠡ ᠪᠢᠰᠢ ᠪᠣᠯᠵᠤ ᠥᠯᠵᠡᠢ ᠶ᠋ᠢᠨ ᠪᠡᠶᠡ ᠮᠠᠭᠤᠳᠠᠵᠤ ᠠᠮᠢ ᠪᠡᠶᠡ ᠬᠠᠭᠠᠴᠠᠭᠰᠠᠨ ᠢ᠋ ᠮᠡᠳᠡᠮᠡᠭᠴᠡ ᠠᠮᠠᠨ ᠳᠣᠲᠣᠷᠠ ᠪᠠᠨ《ᠵᠠᠭᠤᠷᠠᠳᠤ ᠶ᠋ᠢᠨ ᠰᠤᠳᠤᠷ》 ᠴᠡᠭᠡᠵᠢ ᠪᠡᠷ ᠤᠩᠰᠢᠵᠤ ᠡᠬᠢᠯᠡᠪᠡ᠃ ᠭᠡᠰᠦᠯ ᠰᠠᠩᠵᠢ ᠪᠠᠭᠰᠢ ᠶ᠋ᠢ ᠪᠡᠨ ᠳᠠᠭᠠᠯᠳᠤᠵᠠᠢ᠃ ᠨᠠᠰᠤ ᠪᠠᠷᠠᠭᠰᠠᠳ ᠲᠤ᠌ ᠵᠣᠷᠢᠭᠤᠯᠤᠭᠰᠠᠨ ᠤᠩᠰᠢᠯᠭᠠ ᠮᠥᠨ᠃ ᠪᠦᠬᠡᠮᠠᠩᠯᠠᠢ ᠭᠠᠵᠠᠷᠴᠢ ᠤᠰᠤᠴᠢ᠂ ᠲᠥᠪᠡᠳ ᠦ᠋ᠨ ᠬᠠᠮᠲᠤ ᠨᠢᠭᠡᠨ ᠵᠠᠪᠢ ᠪᠠᠷ ᠲᠦᠷᠦᠭᠦᠯᠡᠨ ᠶᠠᠪᠤᠵᠤ ᠪᠠᠢᠯᠠ᠃ ᠭᠡᠯᠦᠩ ᠴᠤᠢᠮᠴᠤᠭ ᠤ᠋ᠨ ᠰᠡᠳᠬᠢᠯ ᠶᠡᠬᠡ ᠯᠡ ᠭᠤᠨᠢᠭ ᠭᠠᠰᠠᠯᠠᠩ ᠳ᠋ᠤ᠌ ᠵᠢᠪᠴᠡᠢ ᠃ ᠲᠡᠭᠦᠨ ᠦ ᠨᠤᠲᠤᠭ ᠠ᠋ᠴᠠ ᠪᠠᠨ ᠳᠠᠭᠠᠭᠤᠯᠤᠨ ᠭᠠᠷᠤᠭᠰᠠᠨ ᠮᠥᠷᠭᠥᠯᠴᠢᠨ ᠦ᠌ ᠪᠠᠭ ᠠ᠋ᠴᠠ ᠬᠣᠶᠠᠳᠠᠬᠢ ᠬᠥᠮᠦᠨ ᠡᠢᠨ ᠬᠦ᠌ ᠶᠢᠷᠲᠢᠨᠴᠦ ᠡᠴᠡ ᠬᠠᠭᠠᠴᠠᠪᠠ᠃ ᠤᠤᠯ ᠨᠢ ᠲᠡᠳᠡ ᠪᠤᠷᠬᠠᠨ ᠤ᠋ ᠣᠷᠣᠨ ᠢ᠋ᠶ᠋ᠠᠨ ᠣᠴᠢᠵᠤ ᠨᠠᠨᠳᠢᠨ ᠳᠡᠭᠡᠳᠦ ᠰᠢᠲᠦᠭᠡᠨ ᠨᠦ᠍ᠭᠦᠳ ᠲᠦ᠍ ᠮᠥᠷᠭᠥᠵᠦ ᠠᠪᠤᠷᠠᠯ᠂ ᠪᠤᠶᠠᠨ ᠡᠷᠢᠯᠬᠢᠯᠡᠵᠦ ᠶᠠᠪᠤᠭᠠ ᠤᠯᠤᠰ ᠶᠤᠮ᠃ ᠭᠡᠲᠡᠯᠡ ᠡᠢᠨ ᠬᠦ᠌ ᠵᠠᠭᠤᠷᠠᠳᠤ ᠶ᠋ᠢᠨ ᠬᠠᠭᠠᠴᠠᠯ ᠦᠵᠡᠪᠡ᠃ ᠴᠤᠢᠮᠴᠤᠭ ᠭᠡᠯᠦᠩ ᠢ᠋ 《ᠵᠠᠭᠤᠷᠠᠳᠤ ᠶ᠋ᠢᠨ ᠰᠤᠳᠤᠷ 》 ᠢ᠋ ᠴᠡᠭᠡᠵᠢ ᠪᠡᠷ ᠤᠩᠰᠢᠵᠤ ᠳᠠᠭᠤᠰᠬᠤ ᠦᠶᠡ ᠳ᠋ᠦ᠍ ᡀᠠᠰᠠ ᠬᠣᠲᠠ ᠶ᠋ᠢᠨ ᠪᠠᠷᠠ ᠬᠠᠷᠠᠭᠳᠠᠯᠠ᠃ ᠭᠣᠣᠯ ᠤ᠋ᠨ ᠡᠷᠭᠢ ᠳ᠋ᠦ᠍ ᠭᠠᠷᠤᠮᠠᠭᠴᠠ ᠴᠤᠢᠮᠴᠤᠭ ᠭᠡᠯᠦᠩ᠂ ᠰᠠᠩᠵᠢ ᠭᠡᠰᠦᠯ ᠬᠣᠶᠠᠷ ᠨᠠᠰᠤ ᠪᠠᠷᠠᠭᠴᠢ ᠶ᠋ᠢᠨ ᠪᠠᠢᠭᠠ ᠵᠠᠪᠢᠨ ᠳᠡᠭᠡᠷᠡ ᠣᠴᠢᠪᠠ᠃ 《ᠨᠢᠳᠦ ᠪᠠᠨ ᠠᠨᠢᠯ ᠦᠭᠡᠢ ᠪᠡᠷ᠂ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠳᠠᠯᠠᠯᠤᠨ ᠳᠠᠭᠤᠳᠠᠬᠤ ᠮᠡᠲᠦ ᠪᠠᠢᠳᠠᠯ ᠳ᠋ᠤ᠌ ᠨᠠᠰᠤ ᠡᠴᠦᠰᠯᠡᠭᠰᠡᠨ ᠢ᠋ᠶ᠋ᠡᠨ᠂ ᠪᠠᠰᠠ ᠠᠮᠠ ᠪᠠᠨ ᠶᠡᠬᠡᠳᠡ ᠠᠩᠭᠠᠢᠵᠠᠢ᠃ ᠨᠡᠩ ᠮᠠᠭᠤ ᠢᠷᠣᠠ ᠶ᠋ᠢᠨ ᠰᠢᠨᠵᠢ ᠲᠡᠮᠳᠡᠭ ᠪᠠᠢᠨᠠ》 ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠪᠣᠳᠣᠭᠠᠳ ᠠᠰᠤᠷᠤ ᠶᠡᠬᠡ ᠴᠡᠭᠡᠷᠯᠡᠪᠡ᠃ ᠲᠡᠭᠡᠭᠡᠳ ᠤᠯᠴᠠᠩ ᠨᠢᠳᠦ ᠲᠡᠢ ᠪᠣᠯᠲᠠᠯᠠ ᠪᠠᠨ ᠤᠬᠢᠯᠠᠭᠰᠠᠨ ᠤᠳᠬᠤᠨ ᠠ᠋ᠴᠠ ᠴᠤᠢᠮᠴᠤᠭ ᠭᠡᠯᠦᠩ᠄
– ᠠᠮᠢ ᠠᠯᠳᠠᠬᠤ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠬᠡᠯᠡᠭᠰᠡᠨ ᠦᠦ? ᠠᠵᠢᠭᠯᠠᠪᠠ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃ ᠰᠡᠭᠦᠯᠴᠢ ᠶ᠋ᠢᠨ ᠦᠭᠡ ᠨᠢ ᠦᠬᠦᠬᠦ ᠬᠦᠨᠳᠦ ᠶᠡᠬᠡ ᠤᠴᠢᠷ ᠤᠳᠬᠠ ᠲᠠᠢ ᠠᠵᠠᠢ᠃
– ᠮᠡᠳᠡᠬᠦ ᠦᠭᠡᠢ ᠁ ᠭᠡᠵᠦ ᠣᠳᠬᠤᠨ ᠡᠬᠡᠷ ᠲᠠᠲᠠᠭᠰᠠᠨ ᠢ᠋ᠶ᠋ᠠᠨ᠄
– ᠠ᠋ ᠲᠡᠢᠮᠦ᠃ ᠠᠯᠲᠠᠨ ᠣᠷᠣᠢᠲᠤ ᠳ᠋ᠠᠴᠠᠩ ᠮᠢᠨᠢ! ᠭᠡᠬᠦ ᠰᠢᠭ ᠪᠣᠯᠤᠭᠠᠳ ᠠᠮᠢᠰᠬᠤᠯ ᠬᠤᠷᠢᠶᠠᠭᠰᠠᠨ ᠭᠡᠪᠡ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠪᠠᠰᠠ ᠡᠷᠡᠭᠡᠯᠵᠡᠯᠡ᠃ 《ᠮᠥᠨ ᠬᠠᠴᠢᠨ ᠶᠤᠮ ᠳᠠ᠃ ᠶᠡᠬᠡᠬᠡᠨ ᠮᠠᠭᠤ ᠢᠷᠣᠠ ᠶ᠋ᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠭᠡᠳᠡ ᠪᠣᠯᠤᠭᠰᠠᠨ ᠪᠠᠢᠳᠠᠭ᠃ ᠭᠡᠲᠡᠯᠡ !<ᠠᠯᠲᠠᠨ ᠣᠷᠣᠢ ᠲᠠᠢ ᠳ᠋ᠠᠴᠠᠩ ᠮᠢᠨᠢ> ᠭᠡᠵᠦ ᠰᠡᠭᠦᠯᠴᠢ ᠶ᠋ᠢᠨ ᠦᠭᠡ ᠪᠡᠨ ᠬᠡᠯᠡᠭᠰᠡᠨ ᠨᠢ ᠰᠠᠢᠨ ᠤ᠋ ᠢᠷᠦᠭᠡᠯ ᠪᠠᠢᠳᠠᠭ》 ᠭᠡᠵᠦ ᠭᠡᠯᠦᠩ ᠡᠷᠭᠢᠴᠡᠭᠦᠯᠦᠨ ᠪᠤᠳᠤᠭᠰᠠᠨ ᠢ᠋ᠶ᠋ᠠᠨ᠄
– ᠬᠡᠦᠬᠡᠨ᠂ ᠤᠳᠬᠤᠨ ᠴᠢ ᠠᠨᠳᠠᠭᠤ ᠰᠣᠨᠣᠰᠤᠭᠠ ᠦᠭᠡᠢ ᠪᠢᠵᠡ?ᠭᠡᠬᠦ ᠳ᠋ᠦ᠍ ᠲᠡᠷᠡ ᠲᠣᠯᠣᠭᠠᠢ ᠪᠠᠨ ᠵᠠᠢᠯᠠᠨ ᠰᠡᠭᠰᠦᠷᠴᠤ᠄
– ᠶᠠᠭ ᠯᠠ ᠲᠡᠭᠡᠵᠦ ᠬᠡᠯᠡᠭᠰᠡᠨ ᠳᠡ ! ᠭᠡᠪᠡ᠃ 《ᠬᠡᠷᠪᠡ ᠡᠷᠳᠡᠨᠢ ᠶ᠋ᠢᠨ ᠴᠢᠮᠡᠭ ᠲᠡᠢ ᠤᠷᠲᠤ ᠬᠠᠷᠰᠢ ᠦᠵᠡᠪᠡᠯ ᠲᠩᠷᠢ ᠨᠠᠷ ᠲᠤ᠌ ᠳᠠᠬᠢᠨ ᠲᠥᠷᠥᠨᠡ ᠭᠡᠵᠦ ᠨᠤᠮ ᠳ᠋ᠤ᠌ ᠪᠣᠢ᠃ ᠡᠨᠡ ᠥᠯᠵᠡᠢ ᠠᠯᠲᠠᠨ ᠣᠷᠣᠢᠲᠤ ᠳ᠋ᠠᠴᠠᠩ ᠦᠵᠡᠭᠰᠡᠨ ᠪᠣᠯ ᠲᠩᠷᠢ ᠨᠠᠷ ᠲᠤ᠌ ᠲᠥᠷᠥᠬᠦ ᠪᠢᠵᠡ᠃ ᠲᠡᠢᠮᠦ ᠪᠣᠯ ᠴᠤ᠌ ᠪᠢᠳᠡᠨ ᠢ᠋ ᠬᠣᠢᠨᠠ ᠠ᠋ᠴᠠ ᠪᠠᠨ ᠳᠠᠯᠠᠯᠤᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠲᠠᠯᠢᠢᠭᠠᠴᠢ ᠪᠣᠯᠳᠠᠭ ᠨᠢ ᠮᠠᠭᠤ ᠦᠭᠡᠢ ᠬᠡᠷᠡᠭ᠃ ᠪᠠᠰᠠ ᠴᠤ᠌ ᠤᠴᠢᠷ ᠪᠣᠢ》ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠪᠣᠳᠣᠪᠠ᠃ 《ᠡᠰᠡᠪᠡᠯ ᠬᠠᠷᠠ ᠪᠠᠢᠰᠢᠩ᠂ ᠤᠯᠠᠭᠠᠨ ᠳ᠋ᠠᠴᠠᠩ᠂ ᠴᠦᠯ ᠭᠠᠵᠠᠷ᠂ ᠬᠠᠷᠠ ᠪᠠᠷᠲᠠᠭᠠᠲᠤ ᠵᠠᠮ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠠᠨᠳᠠᠭᠤᠷᠠᠵᠤ ᠠᠯᠲᠠᠨ ᠣᠷᠣᠢᠲᠤ ᠳ᠋ᠠᠴᠠᠩ ᠭᠡᠰᠡᠨ ᠶᠦᠮ ᠪᠢᠰᠢ ᠪᠠᠢᠭᠠ! ᠲᠡᠢᠮᠦ ᠶᠠᠭᠤᠮᠠ ᠦᠵᠡᠭᠰᠡᠨ ᠪᠣᠯ ᠲᠩᠷᠢ ᠨᠠᠷ ᠲᠤ᠌ ᠪᠢᠰᠢ ᠬᠠᠷᠢᠨ ᠁ ᠲᠠᠮᠤ ᠳ᠋ᠤ᠌ ᠲᠥᠷᠥᠬᠦ ᠶᠣᠰᠣᠲᠠᠢ ᠭᠡᠵᠦ ᠨᠣᠮ ᠳ᠋ᠤ᠌ ᠪᠢᠴᠢᠭᠡᠰᠦᠲᠡᠢ ᠪᠣᠢ᠃ ᠲᠡᠭᠡᠪᠡᠯ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠵᠦ᠂ ᠭᠠᠷ ᠢ᠋ᠶ᠋ᠠᠷ ᠳᠠᠯᠠᠯᠤᠨ ᠦᠬᠦᠭᠰᠡᠨ ᠨᠢ ᠦᠯᠡᠳᠡᠭᠰᠡᠨ ᠪᠢᠳᠡᠨ ᠳ᠋ᠦ᠍ ᠠᠢᠬᠤᠪᠲᠤᠷ ᠮᠠᠭᠤ ᠢᠷᠣᠠ ᠪᠣᠯᠤᠨᠠ》 ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠪᠠᠰᠠ ᠡᠷᠡᠭᠡᠯᠵᠡᠨ ᠪᠣᠳᠣᠯᠠ᠃ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠶᠢᠷᠲᠢᠨᠴᠦ ᠡᠢᠮᠦ ᠯᠡ ᠤᠯᠠᠮᠵᠢᠯᠠᠯ ᠲᠠᠢ ᠪᠢᠯᠡ᠃ 《ᠮᠠᠭᠤ ᠶᠠᠭᠤᠮᠠ ᠪᠣᠳᠣᠬᠤ ᠬᠡᠷᠡᠭ ᠦᠭᠡᠢ᠃ ᠰᠠᠢᠨ ᠢ᠋ᠶ᠋ᠠᠷ ᠪᠣᠳᠣᠪᠠᠯ ᠵᠣᠬᠢᠨᠠ᠃ ᠵᠠ ᠪᠠᠢᠵᠠ ᠥᠭᠡᠷᠡ ᠶᠠᠭᠤ ᠭᠡᠵᠦ ᠲᠥᠭᠡᠷᠭᠡ ᠶ᠋ᠢᠨ ᠨᠣᠮ ᠳ᠋ᠤ᠌ ᠪᠣᠢ ᠪᠢᠯᠡ? ᠠ ᠲᠡᠢᠮᠦ ᠰᠠᠢᠬᠠᠨ ᠬᠣᠲᠠ ᠶ᠋ᠢᠨ ᠪᠠᠷᠠ ᠦᠵᠡᠪᠡᠯ ᠽᠠᠮᠪᠤᠳᠢᠪ ᠲᠤ᠌ ᠳᠠᠬᠢᠨ ᠵᠠᠶᠠᠭᠠᠬᠤ ᠶ᠋ᠢᠨ ᠳᠣᠬᠢᠶᠠ ᠭᠡᠵᠦ ᠪᠠᠢᠳᠠᠭ᠃ ᠡᠨᠡ ᠲᠠᠯᠢᠢᠭᠠᠴᠢ ᠠᠷᠠᠢ ᠬᠣᠲᠠ ᠶ᠋ᠢᠨ ᠪᠠᠷᠠ ᠶ᠋ᠢ ᠬᠠᠷᠠᠴᠢᠬᠠᠭᠠᠳ ᠠᠯᠲᠠᠨ ᠣᠷᠣᠢᠳ᠋ᠤ᠌ ᠳ᠋ᠠᠴᠠᠩ ᠮᠢᠨᠢ》 ᠭᠡᠰᠡᠨ ᠶᠠᠭᠤᠮᠠ ᠪᠢᠰᠢ ᠪᠠᠢᠭᠠ? ᠲᠡᠭᠡᠪᠡᠯ ᠦᠯᠡᠳᠡᠭᠰᠡᠨ ᠪᠢᠳᠡᠨ ᠳ᠋ᠡᠭᠠᠨ ᠴᠦ᠍ ᠨᠢᠭᠡ ᠶᠡᠬᠡ ᠬᠠᠯᠠ ᠲᠠᠢ ᠶᠠᠭᠤᠮᠠ ᠠᠯᠠᠭᠠ》 ᠭᠡᠵᠦ ᠴᠤᠢᠮᠴᠤᠭ ᠪᠠᠰᠠ ᠴᠠᠰᠢ ᠨᠢ ᠪᠢᠰᠢᠯᠭᠠᠪᠠ᠃
ᠪᠦᠬᠡᠮᠠᠩᠯᠠᠢ ᠴᠢᠳᠠᠯ ᠲᠡᠩᠬᠡᠭᠡ ᠲᠡᠢ᠂ ᠬᠡᠨᠡᠭ ᠦᠭᠡᠢ ᠡᠷᠡ ᠪᠣᠯᠬᠣᠷ ᠢ᠋ᠶ᠋ᠠᠨ ᠠᠮᠢ ᠦᠭᠡᠢ ᠪᠣᠯᠤᠭᠰᠠᠨ ᠥᠯᠵᠡᠢ ᠶ᠋ᠢ ᠠᠮᠢ ᠲᠠᠢ ᠶᠤᠮ ᠰᠢᠭ᠋ ᠡᠭᠦᠷᠦᠭᠡᠳ ᠬᠥᠯᠥᠰᠥᠨ ᠦ᠌ ᠰᠢᠪᠠᠷ ᠰᠠᠭᠤᠴᠠᠨ ᠤ᠋ ᠪᠠᠨ ᠵᠦᠭ ᠱᠠᠯᠠᠮᠠᠭᠠᠢᠯᠠᠨ ᠠᠯᠬᠤᠯᠠᠪᠠ᠃ ᠪᠤᠰᠤᠳ ᠨᠢ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠳᠠᠭᠤ ᠦᠭᠡᠢᠬᠡᠨ ᠳᠠᠭᠠᠯᠳᠤᠯᠠ᠃《ᠪᠤᠶᠠᠨᠴᠢ (ᠶᠠᠰᠤ ᠪᠠᠷᠢᠭᠴᠢ) ᠣᠯᠳᠠᠬᠤ ᠦᠭᠡᠢ ᠪᠠᠢᠬᠠ ᠳᠠ᠂ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌᠃ ᠣᠳᠣ ᠲᠡᠭᠡᠬᠦ ᠪᠡᠷ ᠶᠠᠭᠠᠬᠢᠬᠤ ᠪᠢᠯᠡ᠃ ᠡᠨᠡ ᠲᠠᠯᠢᠢᠭᠠᠴᠢ ᠮᠣᠷᠢᠨ ᠵᠢᠯ ᠲᠡᠢ ᠪᠠᠢᠬᠠ᠃ ᠲᠡᠭᠡᠬᠦᠯᠡᠷ ᠯᠤᠤ ᠲᠠᠢ ᠬᠥᠮᠦᠨ ᠢ᠋ᠶ᠋ᠡᠷ ᠪᠤᠶᠠᠨ ᠬᠢᠯᠭᠡᠬᠦ ᠦᠭᠡᠢ ᠪᠣᠯᠬᠤ ᠦᠭᠡᠢ᠃ ᠡᠨᠡ ᠪᠦᠬᠡᠮᠠᠩᠯᠠᠢ ᠪᠠᠷᠰ ᠲᠠᠢ ᠬᠥᠮᠦᠨ ᠭᠡᠳᠡᠭ᠃ ᠶᠠᠭᠠᠬᠢᠪᠠᠴᠤ ᠡᠭᠦᠨ ᠦ᠌ ᠪᠤᠶᠠᠨᠴᠢ ᠬᠢᠵᠦ ᠵᠣᠬᠢᠯᠳᠤᠬᠤ ᠦᠭᠡᠢ᠃ ᠶᠠᠭᠠᠬᠢᠳᠠᠭ ᠶᠤᠮ ᠪᠢᠯᠡ?》 ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠵᠠᠮ ᠤ᠋ᠨ ᠵᠠᠭᠤᠷᠠ ᠣᠯᠠᠨ ᠢ᠋ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠪᠠ᠃ ᠪᠦᠬᠡᠮᠠᠩᠯᠠᠢ ᠥᠯᠵᠡᠢ ᠶ᠋ᠢ ᠬᠡᠦᠬᠡᠳ ᠡᠭᠦᠷᠴᠦ ᠶᠠᠪᠤᠭᠠ ᠶᠤᠮ ᠰᠢᠭ᠋ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠷᠤ ᠨᠢᠷᠤᠭᠤᠨ ᠳ᠋ᠠᠭᠠᠨ ᠰᠢᠬᠠᠨ ᠨᠠᠭᠠᠯᠳᠤᠭᠤᠯᠤᠭᠠᠳ ᠪᠠᠷᠤᠭ ᠪᠥᠬᠥᠢᠬᠦ ᠦᠭᠡᠢ ᠪᠡᠷ ᠬᠤᠷᠳᠤᠨ ᠬᠤᠷᠳᠤᠨ ᠠᠯᠬᠤᠯᠠᠵᠤ ᠣᠳᠬᠣᠨ᠂ ᠴᠤᠢᠮᠴᠤᠭ ᠭᠡᠯᠦᠩ ᠬᠣᠶᠠᠷ ᠲᠡᠭᠦᠨ ᠢ᠋ ᠭᠦᠢᠴᠡᠬᠦ ᠦᠭᠡᠢ ᠪᠠᠢᠯᠠ᠃ ᠰᠠᠩᠵᠢ ᠭᠡᠰᠦᠯ ᠪᠦᠬᠡᠮᠠᠩᠯᠠᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠵᠡᠷᠭᠡᠴᠡᠨ ᠶᠠᠪᠤᠬᠤ ᠳ᠋ᠠᠭᠠᠨ ᠲᠡᠭᠦᠨ ᠦ᠌ ᠡᠷᠡᠭᠡ ᠴᠡᠭᠡᠷ ᠦᠭᠡᠢ ᠭᠦᠳᠦᠰ ᠰᠢᠯᠤᠭᠤᠨ᠂ ᠪᠠᠰᠠ ᠬᠠᠴᠢᠨ ᠶᠡᠬᠡ ᠲᠡᠩᠬᠡᠭᠡ ᠲᠡᠢ ᠳ᠋ᠦ᠍ᠨᠢ ᠪᠠᠬᠠᠷᠬᠠᠵᠤ ᠪᠠᠢᠯᠠ᠃ 《ᠲᠠᠯᠢᠢᠭᠠᠴᠢ ᠶ᠋ᠢ ᠶᠠᠮᠠᠷ ᠮᠠᠬᠠᠪᠣᠳ ᠲᠤ᠌ ᠥᠭᠳᠡᠭ ᠶᠦᠮ ᠪᠢᠯᠡ? ᠭᠠᠵᠠᠷ ᠤᠰᠤ᠂ ᠭᠠᠯ᠂ ᠬᠡᠢ᠂ ᠮᠣᠳᠣ ᠲᠠᠪᠤ ᠳ᠋ᠤ᠌ ᠯᠠ ᠥᠭᠬᠦ ᠶᠣᠰᠣᠲᠠᠢ ᠳᠠ᠃ ᠮᠣᠩᠭᠣᠯ ᠬᠥᠮᠦᠨ ᠪᠣᠯᠬᠣᠷ ᠭᠠᠵᠠᠷ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠᠨ ᠳ᠋ᠤ᠌ ᠵᠣᠬᠢᠯᠳᠤᠬᠤ ᠦᠭᠡᠢ ᠪᠣᠯᠪᠠ ᠤᠤ?》 ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠰᠢᠨᠠᠯᠤᠨ ᠪᠣᠳᠣᠵᠤ ᠡᠬᠢᠯᠡᠪᠡ᠃ ᠭᠠᠵᠠᠷ ᠪᠤᠯᠠᠬᠤ᠂ ᠤᠰᠤᠨ ᠳ᠋ᠤ᠌ ᠬᠢᠵᠦ ᠵᠢᠪᠦᠭᠦᠯᠬᠦ᠂ ᠬᠡᠢ ᠠᠭᠠᠷ ᠲᠤ᠌ ᠳᠡᠭᠦᠵᠢᠯᠡᠨ ᠰᠠᠯᠬᠢ ᠪᠠᠷ ᠢᠳᠡᠭᠦᠯᠬᠦ᠂ ᠡᠰᠡᠪᠡᠯ ᠮᠣᠳᠣᠨ ᠤ᠋ ᠬᠣᠩᠭᠢᠯ ᠳ᠋ᠤ᠌ ᠬᠢᠵᠦ ᠣᠷᠬᠢᠬᠤ ᠡᠢᠮᠦ ᠲᠠᠪᠤᠨ ᠶᠠᠩᠵᠤ ᠶ᠋ᠢᠨ ᠣᠷᠣᠰᠢᠭᠤᠯᠭᠠ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠳᠡᠯᠭᠡᠷᠡᠭᠰᠡᠨ ᠪᠠᠢᠯᠠ᠃ ᠮᠣᠩᠭᠣᠯᠴᠤᠳ ᠭᠠᠭᠴᠠᠬᠦ ᠭᠠᠵᠠᠷ ᠲᠤ᠌ ᠣᠷᠣᠰᠢᠬᠤ ᠶ᠋ᠢ ᠡᠷᠬᠢᠮᠯᠡᠨᠡ᠃ ᠤᠰᠤᠨ ᠳ᠋ᠤ᠌ ᠪᠤᠵᠠᠷ ᠣᠷᠣᠭᠤᠯᠬᠤ ᠦᠭᠡᠢ ᠭᠡᠵᠦ ᠤᠰᠤᠨ ᠠ᠋ᠴᠠ ᠪᠠᠰᠠ ᠴᠡᠷᠪᠡᠨᠡ᠃ ᠬᠠᠶᠠ ᠭᠠᠯ ᠳ᠋ᠤ᠌ ᠬᠠᠢᠯᠠᠭᠤᠯᠬᠤ ᠨᠢ ᠪᠣᠢ᠃ ᠠᠭᠠᠷ ᠲᠤ᠌ ᠳᠡᠭᠦᠵᠢᠯᠡᠬᠦ ᠶ᠋ᠢ ᠣᠭᠲᠣ ᠦᠯᠦ ᠲᠡᠪᠴᠢᠨᠡ᠃ ᠮᠣᠳᠣ ᠦᠭᠡᠢ ᠲᠠᠯᠠ ᠨᠤᠲᠤᠭ ᠲᠤ᠌ ᠮᠣᠳᠣᠨ ᠤ᠋ ᠲᠤᠬᠠᠢ ᠪᠠᠰᠠ ᠶᠠᠷᠢᠳᠠᠭ ᠦᠭᠡᠢ ᠪᠠᠢᠯᠠ᠃
– ᠣᠯᠵᠠ ᠲᠠᠢ ᠡᠳᠦᠷ ᠪᠠᠢᠨᠠ! ᠭᠡᠵᠦ ᠫᠠᠷᠵᠢᠭᠢᠨᠠᠭᠰᠠᠨ ᠮᠠᠭᠤᠬᠠᠢ ᠳᠠᠭᠤ ᠲᠠᠢ ᠬᠥᠮᠦᠨ ᠲᠥᠪᠡᠳ ᠢ᠋ᠶ᠋ᠡᠷ ᠶᠠᠷᠢᠬᠤ ᠳ᠋ᠤ᠌ ᠭᠡᠨᠡᠳᠲᠡ ᠴᠣᠴᠢᠵᠤ ᠭᠦᠨ ᠪᠣᠳᠣᠯ ᠠ᠋ᠴᠠ ᠪᠠᠨ ᠬᠠᠭᠠᠴᠠᠭᠠᠳ ᠴᠤᠢᠮᠴᠤᠭ ᠭᠡᠯᠦᠩ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠯᠠᠪᠠᠯ ᠬᠠᠷᠠ ᠪᠠᠷᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠭᠤᠷᠪᠠᠨ ᠳ᠋ᠤᠨᠵᠤᠨᠫᠠ ᠨᠠᠷ ᠶᠠᠪᠤᠵᠤ ᠪᠠᠢᠯᠠ᠃ ᠲᠡᠳᠡ ᠪᠦᠬᠡᠮᠠᠩᠯᠠᠢ ᠶ᠋ᠢᠨ ᠡᠭᠦᠷᠴᠤ ᠶᠠᠪᠤᠭᠠ ᠬᠥᠮᠦᠨ ᠢ᠋ ᠬᠡᠳᠦᠢ ᠨᠢ ᠦᠬᠦᠳᠡᠯ ᠪᠣᠯᠵᠠᠢ ᠭᠡᠳᠡᠭ ᠢ᠋ ᠬᠠᠷᠠᠭᠠᠳ ᠯᠠ ᠮᠡᠳᠡᠵᠡᠢ᠃ ᠠᠷᠭᠠ ᠦᠭᠡᠢ ᠮᠡᠷᠭᠡᠵᠢᠭᠰᠡᠨ ᠨᠢᠳᠦ ᠪᠡᠷ ᠬᠠᠷᠠᠵᠠᠢ᠃ ᠳ᠋ᠤᠨᠵᠤᠨᠫᠠ ᠭᠡᠳᠡᠭ ᠪᠣᠯ ᠲᠥᠪᠡᠳ ᠦ᠋ᠨ ᠶᠡᠬᠡ ᠬᠣᠲᠠ ᠨᠤᠭᠤᠳ᠂ ᠰᠦᠮᠡ ᠬᠡᠢᠳ ᠦ᠋ᠳ ᠲᠦ᠍ ᠡᠯᠪᠡᠭ ᠪᠣᠯᠤᠭᠰᠠᠨ ᠣᠷᠣᠰᠢᠭᠤᠯᠤᠭᠴᠢ ᠨᠠᠷ ᠶᠤᠮ᠃ ᠲᠡᠳᠡ ᠦᠬᠦᠭᠰᠡᠨ ᠬᠥᠮᠦᠨ ᠢ᠋ ᠨᠣᠬᠠᠢ᠂ ᠰᠢᠪᠠᠭᠤᠨ ᠳ᠋ᠤ᠌ ᠬᠤᠪᠢᠶᠠᠵᠤ ᠥᠭᠬᠦ᠂ ᠣᠷᠣᠰᠢᠭᠤᠯᠬᠤ ᠠᠵᠢᠯ ᠲᠠᠢ ᠤᠯᠤᠰ᠃ ᠦᠬᠦᠭᠰᠡᠳ ᠢ᠋ ᠨᠤᠲᠤᠭᠯᠠᠭᠤᠯᠬᠤ ᠡᠳᠦᠷ ᠦ᠋ᠳ ᠲᠦ᠍ ᠲᠡᠳᠡ ᠪᠦᠷᠢᠨ ᠠᠵᠢᠯ ᠲᠠᠢ᠂ ᠪᠤᠰᠤᠳ ᠭᠠᠷᠠᠭ ᠲᠤ᠌ ᠠᠵᠢᠯ ᠦᠭᠡᠢ ᠲᠤᠯᠠ ᠪᠦᠯᠦᠭᠯᠡᠨ ᠶᠠᠪᠤᠵᠤ ᠶᠠᠭᠤᠮᠠ ᠭᠤᠶᠤᠬᠤ ᠵᠡᠷᠭᠡ ᠪᠡᠷ ᠠᠮᠢᠳᠤᠷᠠᠨᠠ᠃ ᠬᠡᠷᠪᠡ ᠳ᠋ᠤᠨᠵᠤᠨᠫᠠ ᠨᠠᠷ ᠲᠤ᠌ ᠶᠠᠭᠤᠮᠠ ᠥᠭᠬᠦ ᠦᠭᠡᠢ ᠪᠣᠯ ᠲᠡᠳᠡ ᠶᠡᠬᠡᠳᠡ ᠠᠭᠤᠷᠯᠠᠨ᠂ ᠥᠭᠭᠦᠭᠡ ᠦᠭᠡᠢ ᠬᠥᠮᠦᠨ ᠢ᠋ ᠦᠬᠦᠳᠡᠯ ᠪᠣᠯᠤᠭᠠᠳ ᠲᠡᠳᠡᠨ ᠦ᠌ ᠭᠠᠷ ᠲᠤ᠌ ᠣᠴᠢᠬᠤ ᠦᠶᠡ ᠳ᠋ᠦ᠍ ᠥᠰᠢᠶᠡ ᠪᠡᠨ ᠠᠪᠤᠨᠠ ᠭᠡᠵᠦ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠳᠡᠭ ᠠᠢᠬᠤᠪᠲᠤᠷ ᠬᠡᠴᠡᠭᠦᠦ ᠤᠯᠤᠰ ᠠᠵᠠᠢ᠃
《ᠳ᠋ᠤᠨᠵᠤᠨᠫᠠ ᠨᠠᠷ ᠭᠡᠵᠦ ᠨᠢᠭᠡ ᠤᠯᠤᠰ ᠪᠠᠢᠳᠠᠭ ᠰᠢᠦ᠃ ᠵᠠ ᠡᠢᠮᠦ ᠠᠷᠭᠠ ᠪᠠᠷ ᠯᠠ ᠲᠠᠯᠢᠢᠭᠠᠴᠢ ᠶ᠋ᠢ ᠣᠷᠣᠰᠢᠭᠤᠯᠳᠠᠭ ᠨᠢ ᠵᠥᠪ᠃ ᠶᠠᠷᠪᠠᠯᠾᠠ ᠳ᠋ᠠᠴᠠᠩ ᠳ᠋ᠤ᠌ ᠣᠴᠢᠳᠠᠭ ᠶᠤᠮ ᠤᠤ ᠡᠰᠡᠪᠡᠯ ᠰᠸᠷᠠ ᠳ᠋ᠤ᠌ ᠣᠴᠢᠬᠤ ᠨᠢ ᠳᠡᠭᠡᠷᠡ ᠦᠦ ? ᠰᠸᠷᠠ ᠳ᠋ᠤ᠌ ᠣᠴᠢᠬᠤ ᠨᠢ ᠳᠡᠭᠡᠷᠡ᠃ ᠭᠡᠲᠡᠯᠡ ᠶᠡᠬᠡ ᠮᠥᠩᠭᠥ ᠲᠥᠯᠥᠨᠡ ᠳᠡ᠃ ᠲᠡᠨᠳᠡ ᠶᠠᠮᠠᠷ ᠵᠢᠷ ᠦ᠋ᠨ ᠬᠠᠷᠠᠴᠤᠤᠯ ᠢ᠋ ᠬᠠᠪᠢᠳᠠᠭᠤᠯᠬᠤ ᠪᠢᠰᠢ᠃ ᠵᠠ ᠶᠠᠭᠠᠬᠢᠬᠤ ᠪᠣᠢ ᠮᠥᠩᠭᠥ ᠨᠢ ᠴᠦ᠍ ᠬᠠᠮᠢᠶᠠ ᠠᠯᠠᠭᠠ᠃ ᠲᠡᠷᠡ ᠲᠡᠢ ᠲᠡᠷᠡ ᠦᠭᠡᠢ ᠯᠡ ᠪᠤᠶᠠᠨ ᠬᠢᠵᠦ ᠪᠠᠷᠠᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠬᠡᠳᠦᠨ ᠵᠣᠭᠣᠰ ᠨᠠᠳᠠ ᠳ᠋ᠤ᠌ ᠪᠣᠢ》 ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃
ᠲᠡᠳᠡᠨ ᠦ᠌ ᠠᠷᠤ ᠠ᠋ᠴᠠ ᠭᠤᠷᠪᠠᠨ ᠳ᠋ᠤᠨᠵᠤᠨᠫᠠ ᠳᠠᠭᠠᠭᠠᠳ ᠡᠬᠢᠯᠡᠪᠡ᠃ ᠭᠡᠰᠦᠯ ᠰᠠᠩᠵᠢ᠂ ᠤᠳᠬᠤᠨ ᠬᠡᠦᠬᠡᠨ ᠠᠯᠢ ᠨᠢ ᠴᠦ᠍ ᠳ᠋ᠤᠨᠵᠤᠨᠫᠠ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠲᠤᠯᠠ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠶᠠᠪᠤᠵᠤ ᠪᠠᠢᠯᠠ᠃ ᠦᠬᠦᠭᠰᠡᠳ ᠢ᠋ ᠲᠡᠳᠡ ᠬᠠᠢᠵᠤ ᠣᠯᠵᠠ ᠣᠯᠳᠠᠭ ᠪᠠᠢᠪᠠ᠃
– ᠡᠬᠦᠨ ᠢ᠋ ᠬᠡᠵᠢᠶᠡ ᠭᠠᠷᠭᠠᠬᠤ ᠪᠣᠯ? ᠮᠠᠷᠭᠠᠰᠢ ᠪᠢᠵᠡ ᠳᠡ! ᠭᠡᠵᠦ ᠳ᠋ᠤᠨᠵᠤᠨᠫᠠ ᠨᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠬᠤ ᠶ᠋ᠢ ᠭᠡᠯᠦᠩ ᠴᠤᠢᠮᠴᠤᠭ ᠰᠣᠨᠣᠰᠤᠭᠠᠳ ᠰᠡᠳᠬᠢᠯ ᠨᠢ ᠲᠠᠪᠠ ᠦᠭᠡᠢ ᠪᠣᠯᠵᠠᠢ᠃ ᠮᠠᠰᠢ ᠬᠤᠷᠳᠤᠨ ᠳ᠋ᠤᠨᠵᠤᠨᠫᠠ ᠳ᠋ᠤ᠌ ᠮᠡᠳᠡᠭᠳᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠴᠣᠴᠢᠵᠠᠢ᠃ ᠤᠳᠠᠯ ᠦᠭᠡᠢ ᠭᠡᠷ ᠦ᠋ᠨ ᠭᠠᠳᠠᠭᠠ ᠲᠡᠳᠡ ᠬᠦᠷᠴᠦ ᠢᠷᠡᠪᠡ᠃ ᠭᠡᠲᠡᠯᠡ ᠳ᠋ᠤᠨᠵᠤᠨᠫᠠ ᠨᠠᠷ ᠲᠡᠳᠡᠨ ᠢ᠋ ᠮᠥᠷᠳᠡᠨ ᠳᠠᠭᠠᠵᠤ ᠪᠠᠰᠠ ᠯᠠ ᠭᠠᠳᠠᠭᠠ ᠨᠢ ᠢᠷᠡᠪᠡ᠃ ᠲᠡᠭᠡᠬᠦ ᠪᠡᠷ ᠨᠢ ᠴᠤᠢᠮᠴᠤᠭ ᠭᠡᠯᠦᠩ ᠲᠡᠳᠡᠨ ᠳ᠋ᠦ᠍ ᠣᠢᠷᠠᠲᠤᠵᠤ ᠲᠥᠪᠡᠳ ᠬᠡᠯᠡ ᠪᠡᠷ᠄
– ᠲᠠ ᠨᠠᠷ ᠶᠠᠷᠪᠠᠯᠾᠠ ᠶ᠋ᠢᠨ ᠬᠢ ᠦᠦ? ᠰᠸᠷᠠ ᠶ᠋ᠢᠨ ᠬᠢ ᠦᠦ? ᠭᠡᠵᠦ ᠠᠰᠠᠭᠤᠪᠠ᠃ ᠲᠡᠳᠡ ᠠᠮᠠ ᠪᠤᠯᠢᠶᠠᠯᠳᠤᠨ᠄
– ᠰᠸᠷᠠ ᠶ᠋ᠢᠨ ᠬᠢ᠂ ᠰᠸᠷᠠ ᠶ᠋ᠢᠨ ᠭᠦᠱᠦᠦ ᠮᠢᠨᠢ ᠭᠡᠵᠦ ᠮᠣᠩᠭᠣᠯ ᠢ᠋ᠶ᠋ᠠᠷ ᠬᠡᠯᠡᠬᠦ ᠳ᠋ᠦ᠍ ᠭᠡᠯᠦᠩ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ ᠴᠢᠷᠠᠢ ᠪᠠᠨ ᠪᠠᠷᠤᠢᠯᠭᠠᠵᠤ ᠄
– ᠵᠠ ᠲᠡᠭᠡᠪᠡᠯ ᠲᠠ ᠨᠠᠷ ᠮᠠᠷᠭᠠᠰᠢ ᠥᠷᠯᠥᠭᠡ ᠮᠣᠷᠢᠨ ᠴᠠᠭ ᠠ᠋ᠴᠠ ᠡᠮᠦᠨᠡ ᠢᠷᠡ! ᠣᠳᠣ ᠶᠠᠪᠤᠵᠠᠭᠠ ᠭᠡᠵᠦ ᠮᠡᠳᠡᠳᠡᠭ ᠪᠣᠯᠤᠯᠠ ᠭᠡᠵᠦ ᠲᠡᠳᠡᠨ ᠳ᠋ᠦ᠍ ᠬᠡᠯᠡᠬᠦ ᠳ᠋ᠦ᠍ ᠳ᠋ᠤᠨᠵᠤᠨᠫᠠ ᠨᠠᠷ᠄
– ᠯᠠᠭᠰᠤᠤ᠂ ᠯᠠᠭᠰᠤᠤ! ᠭᠡᠵᠡᠭᠡᠭᠡᠳ ᠭᠡᠳᠡᠷᠭᠦ ᠪᠤᠴᠠᠪᠠ᠃ ᠲᠡᠳᠡᠨ ᠦ᠌ ᠶᠠᠷᠢᠯᠴᠠᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠰᠠᠩᠵᠢ᠄
– ᠡᠨᠡ ᠶᠠᠭᠤᠨ ᠤᠯᠤᠰ ᠪᠣᠢ᠂ ᠪᠠᠭᠰᠢ ᠡ ? ᠭᠡᠪᠡ᠃
– ᠡᠨᠡ ᠤᠴᠢᠷ ᠲᠠᠢ ᠤᠯᠤᠰ ᠠ᠃ ᠵᠠ ᠪᠢ ᠣᠷᠣᠵᠤ ᠪᠠᠢᠭᠠᠳ ᠴᠢᠮᠠ ᠳ᠋ᠤ᠌ ᠶᠠᠷᠢᠨᠠ ᠭᠡᠵᠦ ᠪᠠᠭᠰᠢ ᠨᠢ ᠵᠠᠶᠢᠮᠤᠴᠠᠭᠤᠯᠪᠠ᠃ ᠲᠠᠢᠯᠪᠤᠷᠢᠯᠠᠬᠤ ᠴᠠᠭ ᠪᠢᠰᠢ ᠪᠠᠢᠯᠠ᠃ ᠲᠡᠳᠡ ᠪᠠᠢᠰᠢᠩ ᠳ᠋ᠠᠭᠠᠨ ᠣᠷᠣᠵᠤ᠂ ᠳᠡᠭᠡᠪᠦᠷ ᠳᠡᠭᠡᠷᠡᠬᠢ ᠲᠠᠷᠢᠶᠠ ᠬᠠᠳᠠᠭᠠᠯᠠᠬᠤ ᠭᠠᠵᠠᠷ ᠲᠠᠯᠢᠢᠭᠠᠴᠢ ᠶᠢ ᠬᠣᠨᠣᠭᠤᠯᠬᠤ ᠪᠠᠷ ᠰᠢᠢᠳᠴᠡᠢ᠃ ᠲᠥᠪᠡᠳ ᠪᠠᠢᠰᠢᠩ ᠳᠡᠭᠡᠪᠦᠷ ᠳᠡᠭᠡᠷᠡ ᠪᠡᠨ ᠲᠠᠷᠢᠶᠠ ᠬᠠᠳᠠᠭᠠᠯᠠᠬᠤ ᠳᠥᠷᠪᠡᠯᠵᠢᠨ ᠬᠣᠩᠬᠣᠷᠬᠠᠢ ᠵᠠᠢᠲᠠᠢ ᠪᠠᠢᠳᠠᠭ ᠠᠵᠢ᠃ ᠲᠡᠨᠳᠡ ᠲᠠᠯᠢᠢᠭᠠᠴᠢ ᠶ᠋ᠢ ᠪᠠᠢᠷᠢᠯᠠᠭᠤᠯᠬᠤ ᠪᠠᠷ ᠪᠡᠯᠡᠳᠬᠡᠵᠦ᠂ ᠲᠡᠷᠡ ᠬᠡᠳᠦ ᠰᠢᠮᠠᠬᠠᠨ ᠳ᠋ᠠᠭᠠᠨ ᠴᠤᠭᠯᠠᠷᠠᠨ ᠶᠠᠭᠠᠬᠢᠵᠤ ᠮᠠᠷᠭᠠᠰᠢ ᠲᠡᠭᠦᠨ ᠢ᠋ ᠣᠷᠣᠰᠢᠭᠤᠯᠬᠤ ᠲᠤᠬᠠᠢ ᠶᠠᠷᠢᠵᠠᠭᠠᠯᠠ᠃
– ᠡᠢᠮᠦ ᠠᠮᠠᠷᠬᠠᠨ ᠥᠭᠡᠳᠡ ᠪᠣᠯᠴᠢᠬᠠᠨᠠ ᠭᠡᠵᠦ ᠰᠠᠨᠠᠭᠰᠠᠨ ᠦᠭᠡᠢ ᠭᠡᠮᠡᠨ ᠣᠳᠬᠣᠨ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠬᠤ ᠳ᠋ᠤ᠌᠄
– ᠨᠢᠭᠡᠨᠲᠡ ᠶᠢᠷᠲᠢᠨᠴᠦ ᠶ᠋ᠢᠨ ᠮᠥᠩᠬᠡ ᠪᠤᠰᠤ ᠶ᠋ᠢ ᠦᠵᠡᠭᠦᠯᠦᠭᠰᠡᠨ ᠲᠤᠯᠠ ᠤᠰᠤᠨ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠵᠠᠮ ᠮᠥᠷ ᠲᠦ᠋ᠨᠢ ᠰᠠᠭᠠᠳ ᠪᠣᠯᠤᠭᠠᠳ ᠶᠠᠭᠤ ᠬᠢᠨᠡ᠃ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌᠂ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠽᠤᠩᠭᠡᠸᠠ ᠪᠠᠭᠰᠢ ᠶ᠋ᠢᠨ ᠬᠥᠷᠥᠭ ᠦᠨ ᠡᠮᠦᠨᠡ ᠨᠠᠰᠤ ᠶᠡᠭᠦᠯᠡᠭᠰᠡᠨ ᠨᠢ ᠡᠨᠡ ᠬᠥᠮᠦᠨ ᠦ᠌ ᠳᠡᠭᠡᠳᠦ ᠬᠤᠪᠢ ᠲᠠᠪᠢᠯᠠᠩ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ᠂《ᠠᠯᠲᠠᠨ ᠣᠷᠣᠢ ᠳ᠋ᠤ᠌ ᠳ᠋ᠠᠴᠠᠩ ᠮᠢᠨᠢ》 ᠭᠡᠰᠡᠨ ᠦᠭᠡ ᠰᠡᠭᠦᠯᠴᠢ ᠶ᠋ᠢᠨ ᠬᠢ ᠨᠢ ᠪᠠᠢᠭᠰᠠᠨ ᠪᠣᠯ ᠲᠩᠷᠢ ᠨᠠᠷ ᠲᠤ᠌ ᠴᠤ᠌ ᠡᠨᠡ ᠬᠥᠮᠦᠨ ᠲᠥᠷᠥᠯ ᠠᠷᠠᠯᠵᠢᠨ ᠲᠥᠷᠥᠵᠦ ᠪᠣᠯᠤᠨᠠ᠃ ᠡᠢᠮᠦ ᠳ᠋ᠦ᠍ ᠮᠠᠷᠭᠠᠰᠢ ᠶᠣᠰᠣ ᠲᠥᠷᠥ ᠲᠡᠢ ᠣᠷᠣᠰᠢᠭᠤᠯᠪᠠᠯ ᠲᠠᠭᠠᠷᠠᠨᠠ ᠁ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠥᠪᠡᠷ ᠦ᠋ᠨ ᠰᠦᠵᠢᠭᠯᠡᠳᠡᠭ ᠨᠣᠮ ᠤ᠋ᠨ ᠢ᠋ᠶ᠋ᠠᠨ ᠦᠭᠡ ᠪᠡᠷ ᠶᠠᠷᠢᠬᠤ ᠳ᠋ᠤ᠌ ᠴᠥᠮ ᠯᠡ ᠴᠢᠮᠡᠭᠡ ᠦᠭᠡᠢ ᠪᠣᠯᠤᠯᠠ᠃
– ᠪᠦᠬᠦ ᠶᠠᠭᠤᠮᠠ ᠰᠠᠢᠨ ᠢᠷᠣᠠ ᠵᠦᠩᠯᠠᠵᠤ ᠪᠠᠢᠨᠠ ᠁ ᠭᠡᠵᠦ ᠭᠡᠯᠦᠩ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠳᠠᠭᠤ ᠪᠠᠨ ᠨᠠᠮ ᠪᠣᠯᠭᠠᠵᠤ ᠬᠡᠯᠡᠭᠰᠡᠨ ᠨᠢ᠄
– ᠬᠠᠷᠢᠨ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ ᠲᠠᠯᠢᠢᠭᠠᠴᠢ ᠪᠣᠯᠤᠭᠰᠠᠨ ᠨᠢ ᠪᠠᠵᠠᠭᠠᠬᠤ ᠦᠭᠡᠢ ᠬᠡᠷᠡᠭ᠃ ᠡᠢᠮᠦ ᠳ᠋ᠦ᠍ ᠤᠳᠬᠤᠨ ᠴᠢᠮᠠ ᠳ᠋ᠤ᠌ ᠬᠠᠷᠠ ᠲᠠᠪᠤᠤ᠂ ᠲᠣᠷᠭᠠᠨ ᠤ᠋ ᠥᠭᠡᠳᠡᠰᠦ ᠪᠠᠢᠨᠠ ᠤᠤ? ᠵᠡᠭᠦᠦ ᠤᠲᠠᠰᠤ ᠪᠠᠢᠨᠠ ᠤᠤ?ᠤᠳᠬᠤᠨ ᠡᠨᠡ ᠦᠭᠡᠨ ᠳ᠋ᠦ᠍ ᠴᠣᠴᠢᠬᠤ ᠰᠢᠭ᠋ ᠪᠣᠯᠵᠤ᠄
– ᠪᠠᠢᠨᠠ ᠠ᠋᠂ ᠪᠠᠭᠰᠢᠲᠠᠨ ᠮᠢᠨᠢ ᠭᠡᠪᠡ᠃
– ᠲᠡᠭᠡᠪᠡᠯ ᠨᠡᠰᠢ ᠨᠢ ᠠᠪᠤᠭᠠᠳ ᠢᠷᠡ! ᠭᠡᠵᠦ ᠪᠠᠭᠰᠢ ᠯᠠᠮᠠ ᠲᠤᠰᠢᠶᠠᠩᠭᠤᠢ ᠬᠡᠯᠡᠯᠡ᠃ ᠤᠳᠬᠤᠨ ᠪᠤᠢᠯᠠᠩ ᠢ᠋ᠶ᠋ᠠᠨ ᠠᠭᠤᠳᠠᠯᠤᠨ ᠬᠠᠷᠠ ᠲᠣᠷᠭᠠᠨ ᠤ᠋ ᠥᠭᠡᠳᠡᠰᠦ᠂ ᠮᠥᠨ ᠤᠲᠠᠰᠤ ᠵᠡᠭᠦᠦ ᠭᠠᠷᠭᠠᠵᠤ ᠢᠷᠡᠪᠡ᠃ ᠭᠡᠯᠦᠩ ᠲᠡᠭᠦᠨ ᠢ᠋ ᠠᠪᠤᠭᠠᠳ ᠭᠤᠷᠪᠠᠭᠤᠯᠠ ᠷᠤᠩᠬᠤᠨ ᠳ᠋ᠤ᠌ ᠬᠠᠨᠵᠤᠨ ᠳᠡᠭᠡᠷᠡ ᠪᠠᠢᠭᠠ ᠲᠠᠯᠢᠢᠭᠠᠴᠢ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠪᠠ᠃ ᠴᠤᠢᠮᠴᠤᠭ ᠭᠡᠯᠦᠩ ᠲᠠᠯᠢᠢᠭᠠᠴᠢ ᠶ᠋ᠢᠨ ᠪᠦᠯᠲᠡᠢᠲᠡᠯᠡ ᠨᠡᠭᠡᠭᠡᠯᠲᠡᠲᠡᠢ ᠪᠠᠢᠭᠠ ᠨᠢᠳᠦᠨ ᠦ᠌ ᠠᠨᠢᠰᠬᠠ ᠶ᠋ᠢ ᠳᠣᠯᠣᠪᠣᠷ ᠬᠤᠷᠤᠭᠤ ᠪᠠᠷ ᠳᠣᠭᠣᠭᠰᠢ ᠳᠠᠷᠤᠵᠤ ᠬᠣᠶᠠᠷ ᠵᠣᠪᠬᠢ ᠶ᠋ᠢ ᠨᠡᠢᠯᠡᠭᠦᠯᠬᠦ ᠶ᠋ᠢ ᠣᠷᠣᠯᠳᠣᠪᠠ᠃ ᠬᠡᠳᠦᠨᠲᠡ ᠣᠷᠣᠯᠳᠣᠪᠠᠴᠤ ᠵᠣᠪᠬᠢ ᠨᠢ ᠳᠠᠬᠢᠭᠠᠳ ᠯᠠ ᠨᠡᠭᠡᠭᠡᠭᠳᠡᠴᠢᠬᠡᠭᠡᠳ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠭᠡᠯᠦᠩ ᠤᠲᠠᠰᠤ ᠵᠡᠭᠦᠦ ᠶ᠋ᠢ ᠠᠪᠴᠤ ᠲᠠᠯᠢᠢᠭᠠᠴᠢ ᠶ᠋ᠢᠨ ᠬᠣᠶᠠᠷ ᠵᠣᠪᠬᠢ ᠶ᠋ᠢ ᠬᠣᠭᠣᠷᠣᠨᠳᠣ ᠨᠢ ᠲᠣᠣᠷᠯᠠᠨ ᠣᠶᠣᠵᠤ ᠨᠡᠢᠯᠡᠭᠦᠯᠪᠡ᠃ ᠲᠡᠭᠡᠭᠡᠳ ᠤᠳᠬᠤᠨ ᠤ᠋ ᠥᠭᠭᠦᠭᠰᠡᠨ ᠬᠠᠷᠠ ᠲᠣᠷᠭᠠᠨ ᠤ᠋ ᠥᠭᠡᠳᠡᠰᠦ ᠪᠡᠷ ᠨᠢᠳᠦ ᠶ᠋ᠢ ᠲᠠᠭᠯᠠᠨ ᠪᠣᠭᠣᠵᠠᠢ᠃
– ᠨᠢᠳᠦ ᠪᠡᠨ ᠨᠡᠭᠡᠭᠡᠯᠲᠡᠲᠡᠢ ᠪᠡᠷ᠂ ᠭᠠᠷ ᠢ᠋ᠶ᠋ᠠᠨ ᠳᠠᠯᠠᠯᠤᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠶᠤᠮ ᠤᠤ ᠡᠰᠡᠪᠡᠯ ᠠᠮᠠ ᠪᠠᠨ ᠠᠩᠭᠠᠢᠵᠤ ᠳᠠᠯᠠᠢᠭᠠᠴᠢ ᠪᠣᠯᠪᠠᠯ ᠮᠠᠭᠤ ᠢᠷᠣᠠ᠃ ᠡᠢᠮᠦ ᠳ᠋ᠦ᠍ ᠲᠡᠭᠦᠨ ᠢ᠋ ᠥᠭᠡᠷᠡ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠭᠤᠯᠬᠤ ᠤᠴᠢᠷ ᠲᠠᠢ᠃ 《 ᠪᠢᠳᠠᠷᠭᠠᠷᠠᠪ》 ᠤᠨ ᠬᠣᠷᠢᠨ ᠶᠢᠰᠦᠳᠦᠭᠡᠷ ᠪᠦᠯᠦᠭ ᠲᠦ᠍ ᠪᠣᠢ ᠰᠢᠦ ᠳᠡ ᠭᠡᠵᠦ ᠬᠡᠯᠡᠨ ᠴᠤᠢᠮᠴᠤᠭ ᠱᠠᠪᠢ ᠰᠠᠩᠵᠢ ᠳ᠋ᠠᠭᠠᠨ ᠲᠥᠪᠡᠳ ᠬᠡᠯᠡ ᠪᠡᠷ ᠰᠤᠷᠭᠠᠨ ᠵᠠᠭᠠᠭᠰᠠᠨ ᠳ᠋ᠤ᠌ ᠶᠠᠭᠤ ᠶᠠᠷᠢᠵᠤ ᠪᠠᠢᠭᠠ ᠶ᠋ᠢ ᠣᠳᠬᠣᠨ ᠬᠡᠦᠬᠡᠨ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃ ᠮᠥᠨ ᠸᠴᠢᠷ ᠵᠠᠩᠭᠢᠳᠤᠨ ᠵᠢᠷᠤᠭᠰᠠᠨ ᠴᠠᠭᠠᠰᠤ ᠪᠠᠷ ᠠᠮᠠ ᠶ᠋ᠢ ᠲᠠᠭᠯᠠᠨ ᠨᠠᠭᠠᠪᠠ᠃
– ᠣᠳᠣ ᠲᠠᠯᠢᠢᠭᠠᠴᠢ ᠶ᠋ᠢ ᠳᠡᠭᠡᠪᠦᠷ ᠲᠦ᠍ ᠪᠠᠢᠷᠢᠯᠠᠭᠤᠯᠤᠶᠠ! ᠭᠡᠵᠦ ᠭᠡᠯᠦᠩ ᠬᠡᠯᠡᠬᠦ ᠳ᠋ᠦ᠍ ᠪᠦᠬᠡᠮᠠᠩᠯᠠᠢ ᠲᠠᠯᠢᠢᠭᠠᠴᠢ ᠶ᠋ᠢ ᠰᠡᠪᠬᠢᠲᠡᠯᠡ ᠡᠷᠭᠦᠭᠡᠳ ᠳᠡᠭᠡᠪᠦᠷ ᠲᠦ᠍ ᠭᠠᠷᠭᠠᠯᠠ᠃ ᠳᠡᠭᠡᠪᠦᠷ ᠦ᠋ᠨ ᠬᠣᠩᠬᠣᠷᠬᠠᠢ ᠳ᠋ᠤ᠌ ᠢᠰᠡᠭᠡᠢ ᠳᠡᠪᠢᠰᠦᠭᠡᠳ ᠲᠡᠭᠦᠨ ᠳᠡᠭᠡᠷᠡ ᠲᠠᠯᠢᠢᠭᠠᠴᠢ ᠶ᠋ᠢ ᠬᠡᠪᠲᠡᠭᠦᠯᠪᠡ᠃ ᠭᠡᠯᠦᠩ ᠴᠤᠢᠮᠴᠤᠭ᠂ ᠭᠡᠰᠦᠯ ᠰᠠᠩᠵᠢ ᠬᠣᠶᠠᠷ ᠲᠠᠯᠢᠢᠭᠠᠴᠢ ᠶ᠋ᠢ ᠪᠠᠷᠠᠭᠤᠨ ᠰᠦᠪᠡᠭᠡ ᠪᠡᠷ ᠨᠢ ᠬᠡᠪᠲᠡᠭᠦᠯᠵᠦ ᠪᠠᠷᠠᠭᠤᠨ ᠬᠠᠴᠠᠷ ᠳᠣᠣᠷᠠ ᠭᠠᠷ ᠢ᠋ ᠨᠢ ᠣᠷᠣᠭᠤᠯᠵᠤ ᠳᠡᠷᠡᠯᠡᠭᠦᠯᠦᠭᠡᠳ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠰᠢᠭᠡᠵᠡᠢ ᠬᠤᠷᠤᠭᠤ ᠪᠠᠷ ᠪᠠᠷᠠᠭᠤᠨ ᠬᠠᠮᠠᠷ ᠤ᠋ᠨ ᠨᠦᠬᠡ ᠤᠷᠤᠭᠤ ᠲᠠᠭᠯᠠᠬᠤ ᠮᠠᠶ᠋ᠢᠭ᠌ᠲᠠᠢ ᠰᠢᠷᠭᠤᠭᠤᠯᠤᠭᠠᠳ ᠪᠠᠷᠠᠭᠤᠨ ᠬᠥᠯ ᠢ᠋ ᠰᠤᠩᠭᠠᠵᠤ᠂ ᠵᠡᠭᠦᠨ ᠢ᠋ ᠡᠪᠦᠳᠦᠭ ᠢ᠋ᠶ᠋ᠡᠷ ᠨᠢ ᠨᠤᠭᠤᠯᠤᠨ᠂ ᠵᠡᠭᠦᠨ ᠭᠠᠷ ᠢ᠋ ᠰᠤᠩᠭᠠᠵᠤ ᠡᠭᠡᠷᠴᠡᠭ ᠳᠡᠭᠡᠷᠡ ᠲᠠᠯᠪᠢᠵᠤ ᠪᠠᠢᠷᠢᠯᠠᠭᠤᠯᠤᠯᠠ᠃ ᠭᠡᠯᠦᠩ ᠴᠤᠢᠮᠴᠤᠭ᠄
– ᠡᠷᠡ ᠬᠥᠮᠦᠨ ᠶᠦᠮ ᠪᠠᠢᠨᠠ᠃ ᠢᠩᠭᠢᠵᠦ ᠣᠷᠣᠰᠢᠭᠤᠯᠬᠤ ᠤᠴᠢᠷ ᠲᠠᠢ᠃ ᠪᠤᠷᠬᠠᠨ ᠱᠠᠭᠢᠮᠤᠨᠢ ᠡᠢᠮᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠭᠡᠳᠡ ᠪᠣᠯᠤᠭᠰᠠᠨ ᠶᠤᠮ᠃ ᠠᠷᠰᠯᠠᠨ ᠬᠡᠪᠲᠡᠯᠭᠡ ᠭᠡᠵᠦ ᠡᠭᠦᠨ ᠢ᠋ ᠬᠡᠯᠡᠨᠡ ᠭᠡᠮᠡᠨ ᠲᠥᠪᠡᠳ ᠬᠡᠯᠡ ᠪᠡᠷ ᠱᠠᠪᠢ ᠳᠠᠭᠠᠨ ᠰᠤᠷᠭᠠᠨ ᠵᠢᠭᠠᠵᠠᠢ᠃
᠁ ᠮᠠᠷᠭᠠᠰᠢ ᠨᠢ ᠵᠢᠭᠠᠭᠰᠠᠨ ᠴᠠᠭ ᠲᠤ᠌ ᠳ᠋ᠤᠨᠵᠤᠨᠫᠠ ᠨᠠᠷ ᠮᠣᠳᠣᠨ ᠲᠡᠷᠭᠡ ᠲᠦᠷᠢᠭᠰᠡᠭᠡᠷ ᠬᠦᠷᠴᠦ ᠢᠷᠡᠯᠡ᠃ ᠲᠠᠯᠢᠢᠭᠠᠴᠢ ᠶ᠋ᠢ ᠮᠣᠳᠣᠨ ᠲᠡᠷᠭᠡᠨ ᠳᠡᠭᠡᠷᠡ ᠢᠰᠡᠭᠡᠢ ᠳᠡᠪᠢᠰᠦᠨ ᠲᠠᠯᠪᠢᠵᠤ᠂ ᠥᠷᠮᠥᠭ ᠢ᠋ᠶ᠋ᠡᠷ ᠪᠦᠲᠡᠭᠡᠭᠡᠳ ᠰᠸᠷᠠ ᠬᠡᠢᠳ ᠦ᠋ᠨ ᠵᠦᠭ ᠶᠠᠪᠤᠵᠠᠭᠠᠯᠠ᠃
– ᠰᠸᠷᠠ ᠬᠡᠢᠳ ᠦ᠋ᠨ ᠵᠡᠭᠦᠨ ᠤᠷᠲᠤ ᠲᠣᠯᠣᠭᠠᠢ ᠳᠡᠭᠡᠷᠡᠬᠢ ᠠᠷᠢᠭᠤᠨ ᠴᠢᠯᠠᠭᠤᠨᠠ ᠠᠪᠠᠴᠢᠵᠤ ᠳᠡᠰ ᠰᠢᠪᠠᠭᠤᠨ ᠳ᠋ᠤ᠌ ᠲᠦᠭᠡᠭᠡᠬᠦ ᠡᠴᠡ ᠪᠢᠰᠢ᠃ ᠴᠢ ᠲᠡᠢᠮᠦ ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠲᠤᠬᠠᠢ ᠮᠡᠳᠡᠨᠡ ᠰᠢᠦ ᠳᠡ᠃ ᠪᠢ ᠴᠢᠮᠡ ᠳ᠋ᠦ᠍ ᠶᠠᠷᠢᠵᠤ ᠪᠠᠢᠭᠰᠠᠨ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠰᠠᠩᠵᠢ ᠳ᠋ᠠᠭᠠᠨ ᠲᠥᠪᠡᠳ ᠢ᠋ᠶ᠋ᠡᠷ ᠶᠠᠷᠢᠪᠠ᠃ ᠰᠠᠩᠵᠢ ᠲᠡᠭᠦᠨ ᠢ᠋ ᠣᠢᠯᠠᠭᠠᠯᠠ᠃
– ᠪᠠᠭᠰᠢ ᠮᠢᠨᠢ ᠲᠡᠨᠳᠡ ᠴᠢᠨᠢ ᠶᠡᠬᠡᠰ ᠳᠡᠭᠡᠳᠦᠰ᠂ ᠪᠠᠶᠠᠴᠤᠳ ᠢ᠋ ᠠᠪᠳᠠᠭ᠃ ᠶᠠᠳᠠᠭᠤ ᠬᠥᠮᠦᠨ ᠦ᠌ ᠬᠥᠷᠥᠩᠭᠡ ᠪᠤᠶᠠᠨ ᠬᠦᠷᠳᠡᠭ ᠦᠭᠡᠢ ᠭᠡᠰᠡᠨ ᠪᠢᠵᠡ ᠳᠡ᠃ ᠮᠥᠩᠭᠥ ᠲᠠᠨᠢ ᠬᠦᠷᠬᠦ ᠶᠦᠮ ᠦᠦ? ᠭᠡᠵᠦ ᠰᠠᠩᠵᠢ ᠪᠠᠭᠰᠢ ᠠ᠋ᠴᠠ ᠪᠠᠨ ᠠᠰᠠᠭᠤᠪᠠ᠃ ᠲᠡᠷᠡ ᠬᠣᠶᠠᠷ ᠲᠥᠪᠡᠳ ᠢ᠋ᠶ᠋ᠡᠷ ᠶᠠᠷᠢᠵᠤ ᠪᠠᠢᠯᠠ᠃
– ᠮᠥᠩᠭᠥ ᠶᠡᠬᠡ ᠲᠥᠯᠥᠨᠡ᠃ ᠭᠡᠪᠡᠴᠦ ᠶᠠᠭᠠᠬᠢᠬᠤ ᠪᠣᠢ? ᠪᠠᠭᠰᠢ ᠨᠢ ᠲᠡᠷᠡ ᠲᠡᠢ ᠲᠡᠷᠡ ᠦᠭᠡᠢ ᠪᠤᠶᠠᠨ ᠬᠢᠬᠦ ᠭᠡᠵᠦ ᠯᠡ ᠭᠠᠷᠤᠭᠰᠠᠨ ᠶᠤᠮ᠃ ᠡᠨᠡ ᠲᠠᠯᠢᠢᠭᠠᠴᠢ ᠳ᠋ᠤ᠌ ᠵᠣᠷᠢᠭᠤᠯᠤᠭᠠᠳ ᠴᠠᠭᠠᠨᠠ ᠨᠢ ᠪᠠᠰᠠ ᠴᠤ᠌ ᠶᠠᠭᠤᠮᠠ ᠦᠯᠡᠳᠡᠬᠦ ᠪᠣᠢ? ᠭᠡᠵᠦ ᠪᠠᠭᠰᠢ ᠱᠠᠪᠢ ᠪᠠᠨ ᠲᠠᠢᠳᠬᠤᠷᠠᠭᠤᠯᠪᠠ᠃ ᠤᠷᠢᠳᠤ ᠰᠥᠨᠢ ᠪᠠᠭᠰᠢ ᠱᠠᠪᠢ ᠬᠣᠶᠠᠷ ᠲᠡᠷᠡ ᠬᠦ᠌ ᠲᠠᠯᠢᠢᠭᠠᠴᠢ ᠶ᠋ᠢᠨ ᠣᠷᠣᠰᠢᠭᠤᠯᠭᠠ ᠲᠠᠢ ᠬᠣᠯᠪᠣᠭᠳᠠᠭᠰᠠᠨ ᠶᠠᠭᠤᠮᠠᠰ ᠢ᠋ ᠶᠠᠷᠢᠯᠴᠠᠵᠤ ᠣᠢᠯᠠᠭᠠᠯᠴᠠᠵᠠᠢ᠃ ᠪᠣᠯᠵᠣᠭᠰᠠᠨ ᠴᠠᠭ ᠠ᠋ᠴᠠ ᠪᠠᠨ ᠡᠮᠦᠨᠡᠬᠡᠨ ᠲᠡᠳᠡ ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠭᠠᠵᠠᠷ ᠢᠷᠡᠯᠡ᠃ ᠪᠢᠴᠢᠬᠠᠨ ᠪᠣᠯᠳᠤᠭ ᠳᠡᠭᠡᠷᠡ ᠳᠥᠷᠪᠡᠨ ᠳᠠᠪᠬᠤᠷ ᠣᠯᠪᠣᠭ ᠲᠠᠯᠪᠢᠭᠰᠠᠨ ᠮᠡᠲᠦ ᠦᠶᠡᠲᠦᠭᠰᠡᠨ ᠵᠤᠵᠠᠭᠠᠨ ᠬᠠᠪᠲᠠᠭᠠᠢ ᠴᠢᠯᠠᠭᠤ ᠪᠠᠢᠯᠠ᠃ ᠥᠷᠯᠥᠭᠡ ᠡᠷᠲᠡ ᠪᠠᠢᠭᠰᠠᠨ ᠪᠣᠯᠬᠣᠷ ᠬᠥᠮᠦᠨ ᠴᠥᠭᠡᠨ ᠪᠣᠯᠤᠯᠲᠠᠢ᠃ ᠳ᠋ᠤᠨᠵᠤᠨᠫᠠ ᠨᠠᠷ ᠲᠡᠷᠭᠡ ᠪᠡᠨ ᠲᠦᠷᠢᠭᠰᠡᠭᠡᠷ ᠴᠢᠯᠠᠭᠤᠨ ᠳ᠋ᠤ᠌ ᠣᠢᠷᠠᠲᠤᠨ ᠣᠴᠢᠯᠠ᠃ ᠲᠡᠭᠡᠲᠡᠯᠡ ᠲᠡᠷᠡ ᠴᠢᠯᠠᠭᠤᠨ ᠳᠡᠭᠡᠷᠡ ᠨᠢᠭᠡᠨ ᠴᠢᠷᠠᠮᠠᠨ ᠨᠢᠴᠦᠭᠦᠨ ᠬᠥᠮᠦᠨ ᠥᠭᠡᠳᠡ ᠤᠷᠤᠭᠤ ᠪᠠᠨ ᠥᠩᠬᠥᠷᠢᠨ ᠬᠥᠷᠪᠡᠵᠦ ᠪᠠᠢᠪᠠ᠃ ᠤᠳᠬᠤᠨ ᠲᠡᠭᠦᠨ ᠡᠴᠡ ᠢᠴᠢᠵᠦ ᠨᠢᠳᠦ ᠪᠡᠨ ᠲᠠᠭᠯᠠᠪᠠ᠃
– ᠵᠦᠭᠡᠷ᠂ ᠵᠦᠭᠡᠷ᠃ ᠡᠨᠡ ᠠᠷᠢᠭᠤᠨ ᠴᠢᠯᠠᠭᠤᠨ ᠳᠡᠭᠡᠷᠡ ᠲᠠᠯᠢᠢᠭᠠᠴᠢ ᠶ᠋ᠢ ᠬᠡᠰᠡᠭᠯᠡᠵᠦ ᠲᠠᠰ ᠰᠢᠪᠠᠭᠤᠨ ᠳ᠋ᠤ᠌ ᠬᠤᠪᠢᠶᠠᠵᠤ ᠥᠭᠳᠡᠭ ᠶᠦᠮ᠃ ᠠᠮᠢᠳᠤ ᠬᠥᠮᠦᠨ ᠨᠢᠴᠦᠭᠦᠨ ᠪᠡᠶᠡ ᠪᠡᠷ ᠡᠨᠡ ᠳᠡᠭᠡᠷᠡ ᠬᠥᠷᠪᠡᠬᠦ ᠨᠢ ᠪᠤᠤ ᠬᠡᠯᠡ᠂ ᠦᠬᠦᠭᠰᠡᠨ ᠬᠣᠢᠨᠠ ᠪᠠᠨ ᠴᠤ᠌ ᠡᠨᠡ ᠳᠡᠭᠡᠷᠡ ᠬᠡᠷᠴᠢᠭᠦᠯᠬᠦ ᠬᠤᠪᠢ ᠲᠠᠪᠢᠯᠠᠩ ᠣᠯᠳᠠᠳᠠᠭ ᠦᠭᠡᠢ ᠶᠠᠭᠤᠮᠠ᠃ ᠳᠠᠯᠠᠢ ᠯᠠᠮᠠ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠡᠨᠡ ᠴᠢᠯᠠᠭᠤᠨ ᠳᠡᠭᠡᠷᠡ ᠨᠢᠴᠦᠭᠦᠨ ᠬᠥᠷᠪᠡᠵᠦ ᠢᠷᠡᠭᠰᠡᠨ ᠤᠯᠠᠮᠵᠢᠯᠠᠯ ᠪᠣᠢ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠲᠠᠢᠯᠪᠤᠷᠢᠯᠠᠵᠤ ᠤᠳᠬᠤᠨ ᠬᠡᠦᠬᠡᠨ ᠢ᠋ ᠲᠠᠢᠪᠤᠰᠢᠷᠠᠭᠤᠯᠤᠯᠠ᠃ ᠭᠡᠪᠡᠴᠦ ᠲᠡᠷᠡ ᠨᠢᠭᠤᠷ ᠢ᠋ᠶ᠋ᠠᠨ ᠲᠠᠭᠯᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ᠃
ᠣᠯᠠᠨ ᠲᠦᠮᠡᠨ ᠬᠥᠮᠦᠨ ᠦ᠌ ᠮᠢᠬᠠ᠂ ᠴᠢᠰᠤ ᠬᠤᠪᠢᠶᠠᠭᠰᠠᠨ ᠡᠨᠡ ᠴᠢᠯᠠᠭᠤᠨ ᠤ᠋ ᠳᠡᠭᠡᠳᠦ ᠲᠠᠪᠴᠠᠩ ᠨᠢ ᠭᠥᠯᠢᠢᠲᠡᠯᠡ ᠡᠯᠡᠭᠳᠡᠵᠦ᠂ ᠲᠣᠰᠣ ᠨᠡᠪᠴᠢᠭᠡᠳ ᠭᠢᠯᠲᠠᠭᠠᠨᠠᠭᠰᠠᠨ ᠬᠠᠷᠠ ᠬᠦᠷᠢᠨ ᠥᠩᠭᠡ ᠲᠡᠢ ᠪᠣᠯᠴᠢᠬᠠᠵᠠᠢ᠃ ᠢᠷᠣᠭᠠᠯ ᠬᠠᠪᠢ ᠶ᠋ᠢᠨ ᠭᠠᠵᠠᠷ ᠴᠢᠰᠤ᠂ ᠥᠭᠡᠬᠦᠨ ᠳ᠋ᠦ᠍ ᠨᠡᠪᠴᠢᠭᠡᠳ ᠬᠠᠷᠠ ᠬᠦᠷᠡᠩ ᠥᠩᠭᠡᠲᠡᠢ ᠬᠦᠳᠡᠷ ᠰᠢᠭ ᠪᠠᠮᠪᠠᠯᠵᠠᠭᠤᠷ ᠪᠣᠯᠵᠠᠢ᠃
– ᠡᠨᠡ ᠴᠢᠯᠠᠭᠤ ᠵᠠᠭᠠᠷ ᠤ᠋ᠨ ᠣᠷᠣᠨ ᠠ᠋ᠴᠠ ᠥᠪᠡᠷ ᠢ᠋ᠶ᠋ᠡᠨ ᠨᠢᠰᠦᠨ ᠢᠷᠡᠵᠦ ᠡᠨᠳᠡ ᠪᠠᠢᠷᠢᠯᠠᠭᠰᠠᠨ ᠭᠡᠳᠡᠭ ᠳᠣᠮᠣᠭ ᠲᠠᠢ ᠶᠤᠮ᠃ ᠡᠨᠡ ᠬᠠᠪᠢ ᠳ᠋ᠤ᠌ ᠥᠭᠡᠷᠡ ᠴᠢᠯᠠᠭᠤ ᠪᠠᠢᠬᠤ ᠦᠭᠡᠢ ᠶ᠋ᠢ ᠦᠵᠡᠪᠡᠯ ᠣᠷᠣ ᠲᠠᠢ ᠯᠠ ᠳᠣᠮᠣᠭ ᠪᠢᠵᠡ᠃ ᠶᠠᠷᠪᠠᠯᠾᠠ ᠳ᠋ᠠᠴᠠᠩ ᠳ᠋ᠤ᠌ ᠪᠠᠰᠠ ᠡᠢᠮᠦ ᠴᠢᠯᠠᠭᠤ ᠪᠣᠢ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠡᠭᠦᠨ ᠡᠴᠡ ᠪᠠᠭᠠ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠤᠳᠬᠤᠨ ᠳ᠋ᠤ᠌ ᠶᠠᠷᠢᠪᠠ᠃ ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠴᠢᠯᠠᠭᠤᠨ ᠳᠡᠭᠡᠷᠡ ᠬᠥᠷᠪᠡᠭᠴᠢ ᠨᠢᠴᠦᠭᠦᠨ ᠡᠷᠡ ᠬᠡᠨᠡᠭ ᠴᠦ᠍ ᠦᠭᠡᠢ ᠪᠣᠰᠤᠭᠠᠳ ᠣᠯᠠᠨ ᠤ᠋ ᠨᠢᠳᠦᠨ ᠳᠡᠭᠡᠷᠡ ᠬᠤᠪᠴᠠᠰᠤᠯᠠᠪᠠ᠃ ᠰᠢᠷᠤ ᠰᠤᠪᠤᠳ ᠵᠡᠭᠦᠭᠰᠡᠨ ᠬᠤᠷᠭᠤᠢ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠶ᠋ᠢ ᠪᠣᠳᠣᠪᠠᠯ ᠶᠡᠬᠡ ᠯᠡ ᠪᠠᠶᠠᠨ ᠬᠥᠮᠦᠨ ᠪᠣᠯᠤᠯᠲᠠᠢ᠃ ᠴᠢᠯᠠᠭᠤ ᠲᠡᠢᠨ ᠬᠦ᠌ ᠴᠢᠯᠥᠭᠡᠲᠡᠢ ᠪᠣᠯᠬᠤ ᠳ᠋ᠤ᠌ ᠭᠡᠯᠦᠩ ᠴᠤᠢᠮᠴᠤᠭ ᠤᠷᠢᠳᠠ ᠠ᠋ᠴᠠ ᠮᠥᠩᠭᠥ ᠲᠥᠯᠥᠵᠦ᠂ ᠵᠥᠪᠰᠢᠶᠡᠷᠡᠯ᠂ ᠳ᠋ᠤᠭᠠᠷ ᠠᠪᠤᠭᠰᠠᠨ ᠶᠣᠰᠣᠭᠠᠷ ᠲᠠᠯᠢᠢᠭᠠᠴᠢ ᠶ᠋ᠢ ᠪᠡᠨ ᠬᠤᠪᠢᠶᠠᠭᠴᠢ ᠳ᠋ᠤᠨᠵᠤᠨᠫᠠ ᠳ᠋ᠤ᠌ ᠲᠤᠰᠢᠶᠠᠬᠤ ᠪᠣᠯᠪᠠ᠃ ᠳ᠋ᠤᠨᠵᠤᠨᠫᠠ ᠨᠠᠷ ᠤ᠋ᠨ ᠠᠬᠠᠯᠠᠭᠴᠢ ᠨᠢ ᠤᠷᠲᠤ ᠡᠰᠢ ᠲᠡᠢ ᠰᠦᠷᠲᠡᠢ ᠲᠣᠮᠣ ᠪᠠᠯᠢᠤᠰᠤ ᠬᠢᠲᠤᠭᠠ ᠪᠠᠷᠢᠵᠠᠢ᠃ ᠲᠡᠭᠦᠨ ᠦ᠌ ᠡᠰᠢᠨ ᠦ᠌ ᠣᠩᠭᠢ ᠠ᠋ᠴᠠ ᠣᠯᠠᠨ ᠠᠷᠪᠠᠨ ᠬᠠᠳᠠᠭ ᠵᠡᠭᠦᠭᠰᠡᠨ ᠨᠢ ᠬᠥᠬᠡ ᠰᠠᠷᠯᠤᠭ ᠤ᠋ᠨ ᠰᠡᠭᠦᠯ ᠰᠢᠭ ᠰᠠᠭᠯᠠᠭᠠᠷ ᠶᠠᠭᠤᠮᠠ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠭᠡᠯᠦᠩ ᠴᠤᠢᠮᠴᠤᠭ ᠪᠠᠰᠠ ᠨᠢᠭᠡ ᠬᠠᠳᠠᠭ ᠲᠡᠭᠦᠨ ᠳ᠋ᠦ᠍ ᠤᠶᠠᠵᠤ ᠥᠭᠴᠡᠢ᠃
ᠳ᠋ᠦᠷᠲ᠋ᠤᠳ᠋ ᠤ᠋ᠨ ᠣᠷᠣᠨ ᠪᠤᠶᠤ ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠡᠨᠡ ᠭᠠᠵᠠᠷ ᠵᠠᠭᠠᠷ ᠣᠷᠣᠨ ᠠ᠋ᠴᠠ ᠥᠪᠡᠷ ᠢ᠋ᠶ᠋ᠡᠨ ᠨᠢᠰᠴᠦ ᠢᠷᠡᠭᠰᠡᠨ ᠭᠡᠳᠡᠭ ᠳᠣᠮᠣᠭᠲᠤ ᠴᠢᠯᠠᠭᠤᠨ ᠳᠡᠭᠡᠷᠡ ᠪᠡᠶᠡ ᠪᠡᠨ ᠬᠡᠷᠴᠢᠭᠦᠯᠦᠨ ᠴᠠᠰᠤᠲᠤ ᠶ᠋ᠢᠨ ᠣᠷᠣᠨ ᠤ᠋ ᠳᠡᠰ ᠦ᠋ᠨ ᠬᠣᠭᠣᠯᠠ ᠪᠣᠯᠬᠤ ᠶ᠋ᠢ ᠬᠥᠮᠦᠨ ᠪᠦᠷᠢ ᠬᠦᠰᠡᠳᠡᠭ ᠲᠤᠯᠠ ᠵᠠᠪ ᠵᠠᠢ ᠦᠭᠡᠢ ᠪᠠᠢᠳᠠᠭ ᠠᠵᠢ᠃ ᠰᠡᠭᠦᠯ ᠳ᠋ᠡᠭᠡᠨ ᠶᠡᠬᠡ ᠵᠠᠷᠤᠯᠭᠠ᠂ ᠥᠨᠳᠥᠷ ᠦᠨᠡ᠂ ᠲᠤᠰᠬᠠᠢ ᠳ᠋ᠤᠭᠠᠷ ᠲᠠᠢ ᠪᠣᠯᠤᠭᠰᠠᠨ ᠲᠤᠯᠠ ᠬᠢᠷᠢ ᠪᠠᠷᠤᠭ ᠤ᠋ᠨ ᠬᠥᠮᠦᠨ ᠴᠦ᠍ ᠡᠨᠳᠡ ᠵᠠᠮ ᠢ᠋ᠶ᠋ᠠᠨ ᠲᠡᠭᠦᠰᠬᠡᠬᠦ ᠪᠣᠯᠤᠯᠴᠠᠭᠠ ᠦᠭᠡᠢ ᠳ᠋ᠦ᠍ ᠬᠦᠷᠴᠡᠢ᠃ ᠳ᠋ᠤᠨᠵᠤᠨᠫᠠ ᠶ᠋ᠢᠨ ᠠᠬᠠᠯᠠᠭᠴᠢ ᠴᠢᠯᠠᠭᠤᠨ ᠭᠠᠮᠵᠢᠭ᠌ ᠤ᠋ᠨ ᠢ᠋ᠶ᠋ᠠᠨ ᠳᠡᠷᠭᠡᠳᠡ ᠬᠢᠲᠤᠭᠠ ᠪᠠᠨ ᠪᠠᠷᠢᠨ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠠᠯᠴᠠᠢᠯᠭᠠᠨ ᠰᠦᠷᠲᠡᠢ ᠵᠣᠭᠰᠣᠵᠤ᠂ ᠲᠤᠰᠯᠠᠬᠤ ᠳ᠋ᠤᠨᠵᠤᠨᠫᠠᠨ ᠨᠤᠭᠤᠳ ᠨᠢ ᠲᠠᠯᠢᠢᠭᠠᠴᠢ ᠥᠯᠵᠡᠢ ᠶ᠋ᠢ ᠬᠥᠯ ᠭᠠᠷ ᠠ᠋ᠴᠠ ᠨᠢ ᠳᠠᠮᠵᠢᠯᠠᠨ ᠴᠢᠯᠠᠭᠤᠨ ᠳᠡᠭᠡᠷᠡ ᠲᠠᠯᠪᠢᠪᠠ᠃ ᠪᠠᠰᠠ ᠨᠢᠭᠡ ᠳ᠋ᠤᠨᠵᠤᠨᠫᠠ ᠠᠰᠤᠷᠤ ᠶᠡᠬᠡ ᠤᠲᠤᠭᠠ ᠪᠠᠭᠠᠭᠢᠭᠤᠯᠤᠨ ᠰᠠᠩ ᠲᠠᠯᠪᠢᠯᠠ᠃ ᠲᠡᠷᠡ ᠤᠲᠤᠭᠠ ᠪᠠᠷ ᠳᠡᠰ ᠰᠢᠪᠠᠭᠤ ᠨᠤᠭᠤᠳ ᠨᠢᠰᠦᠨ ᠢᠷᠡᠳᠡᠭ ᠠᠵᠠᠢ᠃ ᠳᠡᠰ ᠢᠷᠡᠮᠡᠭᠴᠡ ᠦᠬᠦᠳᠡᠯ ᠢ᠋ ᠬᠤᠪᠢᠶᠠᠵᠤ ᠥᠭᠭᠦᠨᠡ᠃
ᠠᠬᠠᠯᠠᠬᠤ ᠳ᠋ᠤᠨᠵᠤᠨᠫᠠ ᠨᠢᠳᠦ ᠢᠷᠮᠡᠬᠦ ᠵᠠᠭᠤᠷᠠ ᠬᠢᠲᠤᠭᠠ ᠪᠠᠨ ᠭᠢᠯᠠᠯᠵᠠᠭᠤᠯᠤᠨ ᠥᠯᠵᠡᠢ ᠶ᠋ᠢᠨ ᠱᠠᠷᠢᠯ ᠢ᠋ ᠲᠠᠰᠤᠴᠢᠵᠤ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠨᠢ ᠲᠩᠷᠢ ᠥᠭᠡᠳᠡ ᠰᠢᠳᠡᠵᠦ ᠡᠬᠢᠯᠡᠪᠡ᠃ ᠲᠣᠮᠣ ᠵᠢᠵᠢᠭ᠂ ᠪᠣᠷᠣᠴᠠᠭᠠᠨ ᠥᠩᠭᠡ ᠲᠡᠢ ᠳᠡᠰ ᠦ᠋ᠳ ᠲᠡᠭᠦᠨ ᠢ᠋ ᠭᠠᠵᠠᠷ ᠤᠨᠠᠭᠠᠯ ᠦᠭᠡᠢ ᠰᠢᠭᠦᠷᠡᠨ ᠠᠪᠴᠤ ᠨᠢᠰᠦᠨ ᠣᠳᠴᠤ ᠪᠠᠢᠯᠠ᠃ ᠵᠠᠷᠢᠮ ᠳᠡᠰ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠪᠤᠯᠢᠶᠠᠯᠴᠠᠯᠳᠤᠨ ᠢᠨᠴᠠᠭᠠᠬᠤ ᠮᠡᠲᠦ ᠳᠠᠭᠤᠤ ᠭᠠᠷᠭᠠᠨᠠ᠃ ᠡᠭᠦᠨ ᠳ᠋ᠦ᠍ ᠤᠳᠬᠤᠨ ᠤ᠋ ᠪᠡᠶᠡ ᠠᠷᠵᠠᠰᠬᠢᠵᠦ ᠪᠠᠢᠯᠠ᠃ ᠥᠭᠡᠷᠡ ᠨᠢᠭᠡ ᠳ᠋ᠤᠨᠵᠤᠨᠫᠠ ᠪᠠᠯᠲᠠ ᠰᠦᠬᠡ ᠪᠠᠷᠢᠵᠤ ᠲᠠᠯᠢᠢᠭᠠᠴᠢ ᠶ᠋ᠢᠨ ᠶᠠᠰᠤᠨ ᠨᠤᠭᠤᠳ ᠢ᠋ ᠴᠢᠯᠠᠭᠤᠨ ᠳᠡᠭᠡᠷᠡ ᠲᠠᠷ ᠨᠢᠷ ᠬᠢᠯᠭᠡᠨ ᠨᠢᠴᠠᠯᠵᠤ ᠥᠭᠭᠦᠨᠡ᠃ ᠳᠡᠭᠡᠭᠰᠢ ᠨᠢ ᠰᠢᠳᠡᠭᠰᠡᠨ ᠶᠠᠰᠤ ᠶ᠋ᠢ ᠴᠦ᠍ ᠳᠠᠰᠢᠨ ᠨᠤᠭᠤᠳ ᠰᠢᠭᠦᠷᠡᠨ ᠠᠪᠴᠤ ᠤᠲᠤᠵᠤ ᠪᠠᠢᠯᠠ᠃ ᠲᠥᠪᠡᠳ ᠣᠷᠣᠨ ᠤ᠋ ᡀᠠᠰᠠ ᠵᠣᠣ ᠶ᠋ᠢᠨ ᠳᠡᠰ ᠪᠣᠯ ᠢᠩᠭᠢᠵᠦ ᠣᠯᠠᠨ ᠠᠷᠪᠠᠨ ᠵᠢᠯ ᠬᠥᠮᠦᠨ ᠦ᠌ ᠮᠢᠬᠠ ᠪᠠᠷ ᠬᠣᠭᠣᠯᠠᠯᠠᠭᠰᠠᠭᠠᠷ ᠪᠠᠢᠭᠠᠳ ᠭᠡᠷ ᠦ᠋ᠨ ᠲᠡᠵᠢᠭᠡᠮᠡᠯ ᠰᠢᠪᠠᠭᠤ ᠰᠢᠭ᠋ ᠪᠣᠯᠴᠢᠬᠠᠵᠠᠢ᠃ ᠴᠣᠬᠣᠮ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠤᠬᠠᠭᠠᠷᠠᠵᠤ ᠠᠮᠵᠢᠭᠠ ᠦᠭᠡᠢ ᠪᠠᠢᠬᠤ ᠬᠣᠭᠣᠷᠣᠨᠳᠣ ᠳᠠᠯᠠᠢᠭᠠᠴᠢ ᠥᠯᠵᠡᠢ ᠶ᠋ᠢᠨ ᠪᠡᠶᠡ ᠶ᠋ᠢ ᠳ᠋ᠤᠨᠵᠤᠨᠫᠠ ᠨᠠᠷ ᠬᠤᠪᠢᠶᠠᠨ ᠲᠦᠭᠡᠭᠡᠵᠦ ᠳᠡᠰ ᠰᠢᠪᠠᠭᠤᠨ ᠤ᠋ ᠬᠣᠭᠣᠯᠠ ᠪᠣᠯᠭᠠᠯᠠ᠃ ᠴᠢᠯᠠᠭᠤᠨ ᠳᠡᠭᠡᠷᠡ ᠪᠠᠷᠤᠭ ᠶᠠᠭᠤ ᠴᠤ᠌ ᠦᠯᠡᠳᠡᠭᠰᠡᠨ ᠦᠭᠡᠢ᠃ ᠲᠡᠨᠳᠡ ᠪᠢᠯᠳᠠᠭᠰᠠᠨ ᠴᠢᠰᠤ ᠶ᠋ᠢ ᠠᠬᠠᠯᠠᠬᠤ ᠳ᠋ᠤᠨᠵᠤᠨᠫᠠ ᠬᠢᠲᠤᠭᠠᠨ ᠤ᠋ ᠪᠠᠨ ᠡᠰᠢᠨ ᠦ᠌ ᠠᠷᠤ ᠣᠩᠭᠢᠨ ᠠ᠋ᠴᠠ ᠵᠡᠭᠦᠭᠰᠡᠨ ᠬᠠᠳᠠᠭ ᠶᠡᠨᠳᠡᠷ ᠤᠨ ᠦᠵᠦᠭᠦᠷ ᠢ᠋ᠶ᠋ᠡᠷ ᠠᠷᠴᠢᠨ ᠴᠡᠪᠡᠷᠯᠡᠭᠡᠳ ᠳᠠᠭᠤᠰᠪᠤᠷᠢ ᠪᠣᠯᠭᠠᠵᠤ ᠴᠢᠯᠠᠭᠤᠨ ᠠ᠋ᠴᠠ ᠬᠣᠯᠠᠳᠴᠤ ᠴᠤᠢᠮᠴᠤᠭ ᠭᠡᠯᠦᠩ ᠤᠷᠤᠭᠤ ᠠᠢᠰᠤᠢ ᠶᠠᠪᠤᠯᠠ᠃ ᠲᠡᠳᠡᠨ ᠦ᠌ ᠣᠷᠣ ᠶ᠋ᠢ ᠥᠭᠡᠷᠡ ᠨᠢᠭᠡᠨ ᠳᠠᠯᠠᠢᠭᠠᠴᠢ ᠡᠵᠡᠯᠡᠵᠦ᠂ ᠥᠭᠡᠷᠡ ᠳ᠋ᠤᠨᠵᠤᠨᠫᠠᠨ ᠨᠤᠭᠤᠳ ᠠᠵᠢᠯ ᠳ᠋ᠠᠭᠠᠨ ᠣᠷᠣᠯᠠ᠃ ᠳ᠋ᠤᠷᠲ᠋ᠤᠳ᠋ ᠤ᠋ᠨ ᠲᠡᠷᠡ ᠭᠠᠵᠠᠷ ᠲᠡᠢᠨ ᠳ᠋ᠦ᠍ ᠪᠡᠯᠡᠳᠬᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠣᠯᠠᠨ ᠲᠣᠭᠠᠨ ᠤ᠋ ᠮᠣᠳᠣᠨ ᠲᠡᠷᠭᠡ ᠢᠷᠠᠢᠨ ᠡᠩᠨᠡᠵᠦ ᠡᠭᠡᠯᠵᠢ ᠪᠡᠨ ᠬᠦᠯᠢᠶᠡᠵᠡᠭᠡᠵᠦ ᠪᠠᠢᠭᠠ ᠬᠠᠷᠠᠭᠳᠠᠯᠠ. 《ᠬᠡᠳᠦᠢ ᠳ᠋ᠡᠭᠡᠨ ᠡᠢᠮᠦ ᠶᠡᠬᠡ ᠣᠯᠠᠨ ᠠᠮᠢᠲᠠᠨ ᠴᠤᠭᠯᠠᠷᠠᠴᠢᠬᠠᠳᠠᠭ ᠶᠤᠮ ᠪᠣᠢ? ᠠᠶᠤᠮᠠᠷ ᠵᠣᠯᠢᠭ ᠠ᠋!》ᠭᠡᠵᠦ ᠶᠠᠭᠤᠨ ᠳ᠋ᠤ᠌ ᠴᠤ᠌ ᠬᠡᠨᠡᠭ ᠦᠭᠡᠢ ᠪᠠᠢᠳᠠᠭ ᠪᠦᠬᠡᠮᠠᠩᠯᠠᠢ ᠡᠨᠡ ᠤᠳᠠᠭᠠ ᠠᠷᠭᠠ ᠦᠭᠡᠢ ᠰᠡᠳᠬᠢᠯ ᠭᠠᠩᠰᠠᠷᠠᠨ ᠪᠣᠳᠣᠵᠠᠢ᠃ ᠳ᠋ᠤᠨᠵᠤᠨᠫᠠ ᠨᠠᠷ ᠲᠤ᠌ ᠬᠥᠯᠥᠰᠥ ᠪᠡᠨ ᠲᠥᠯᠥᠭᠡᠳ ᠲᠣᠭᠲᠠᠭᠰᠠᠨ ᠵᠠᠩᠰᠢᠯ ᠶᠣᠰᠣᠭᠠᠷ ᠳᠣᠮᠪᠣ ᠴᠠᠢ᠂ ᠰᠢᠷᠠ ᠲᠣᠰᠣᠲᠠᠢ ᠠᠷᠪᠠᠢ ᠶ᠋ᠢᠨ ᠭᠤᠯᠢᠷ ᠨᠢᠭᠡᠨ ᠵᠠᠮᠫᠣᠷ ᠳᠦᠭᠦᠷᠡᠩ ᠢ᠋ ᠥᠭᠬᠦ ᠳ᠋ᠦ᠍ ᠲᠡᠳᠡ ᠪᠠᠷᠤᠭ ᠭᠠᠷ ᠢ᠋ᠶ᠋ᠠᠨ ᠴᠤ᠌ ᠤᠬᠢᠶᠠᠭᠰᠠᠨ ᠶᠠᠭᠤᠮᠠ ᠦᠭᠡᠢ ᠰᠢᠭᠤᠳ ᠯᠠ ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠲᠠᠯᠠᠪᠠᠢ ᠳᠡᠭᠡᠷᠡ ᠵᠠᠪᠢᠯᠠᠨ ᠰᠠᠭᠤᠵᠠᠭᠠᠵᠤ ᠭᠤᠯᠢᠷ ᠵᠢᠭᠤᠷᠠᠨ ᠢᠳᠡᠵᠦ ᠴᠠᠢ ᠠ᠋ᠴᠠ ᠤᠤᠭᠤᠵᠠᠭᠠᠵᠤ ᠡᠬᠢᠯᠡᠪᠡ᠃
ᠴᠤᠢᠮᠴᠤᠭ ᠭᠡᠯᠦᠩ ᠣᠳᠬᠣᠨ ᠬᠡᠦᠬᠡᠨ ᠦ᠌ ᠰᠡᠳᠬᠢᠯ ᠢ᠋ ᠵᠠᠰᠠᠵᠤ᠄
– ᠳᠡᠰ ᠪᠣᠯ ᠲᠩᠷᠢ ᠶ᠋ᠢᠨ ᠰᠢᠪᠠᠭᠤ ᠪᠣᠯᠬᠣᠷ ᠣᠳᠣ ᠮᠠᠨ ᠤ᠋ ᠲᠠᠯᠢᠢᠭᠠᠴᠢ ᠥᠯᠵᠡᠢ ᠲᠩᠷᠢ ᠳ᠋ᠦ᠍ ᠣᠳᠬᠤ ᠨᠢ ᠡᠨᠡ ᠪᠣᠯᠤᠯᠠ᠃ ᠣᠮ ᠮᠠ᠋ ᠨᠢ ᠪᠠᠳ ᠮᠧ ᠬᠣᠮ! ᠬᠡᠪ᠃ ᠣᠳᠬᠣᠨ ᠬᠡᠦᠬᠡᠨ ᠤᠷᠢᠳᠤ ᠡᠮᠦᠨᠡ ᠨᠢ ᠡᠢᠮᠦ ᠬᠠᠴᠢᠨ ᠣᠷᠣᠰᠢᠭᠤᠯᠭᠠ ᠦᠵᠡᠭᠡ ᠦᠭᠡᠢ ᠪᠣᠯᠬᠣᠷ ᠰᠡᠳᠬᠢᠯ ᠶᠡᠬᠡ ᠯᠡ ᠭᠠᠩᠰᠠᠷᠠᠨ ᠭᠤᠨᠢᠵᠤ ᠶᠠᠭᠤ ᠴᠤ᠌ ᠭᠡᠵᠦ ᠬᠡᠯᠡᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ᠂ ᠳᠠᠭᠤ ᠪᠠᠨ ᠬᠤᠷᠢᠶᠠᠭᠰᠠᠨ ᠪᠠᠢᠯᠠ᠃ ᠬᠠᠷᠢᠨ ᠪᠦᠬᠡᠮᠠᠩᠯᠠᠢ ᠳ᠋ᠤ᠌ ᠪᠣᠯ ᠢᠩᠭᠢᠵᠦ ᠠᠮᠢᠲᠠᠨ ᠤ᠋ ᠬᠣᠭᠣᠯᠠ ᠪᠣᠯᠤᠨ ᠬᠡᠷᠴᠢᠭᠦᠯᠵᠦ ᠳᠠᠭᠤᠰᠬᠤ ᠨᠢ ᠠᠶᠤᠮᠠᠷ ᠡᠪ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠯᠠ᠃ ᠭᠠᠵᠠᠷ ᠭᠠᠵᠠᠷ ᠤ᠋ᠨ ᠶᠣᠰᠣ ᠵᠠᠩᠰᠢᠯ ᠥᠭᠡᠷᠡ ᠪᠣᠯᠬᠣᠷ 《ᠰᠣᠬᠣᠷ ᠤ᠋ᠨ ᠭᠠᠵᠠᠷ ᠰᠣᠬᠣᠷ᠂ ᠳᠣᠭᠣᠯᠠᠩ ᠤ᠋ᠨ ᠭᠠᠵᠠᠷ ᠳᠣᠭᠣᠯᠠᠩ》 ᠭᠡᠰᠡᠨ ᠠᠷᠠᠳ ᠤ᠋ᠨ ᠰᠤᠷᠭᠠᠯ ᠭᠠᠷᠴᠠᠢ᠃ ᠳᠡᠰ ᠰᠢᠪᠠᠭᠤᠨ ᠳ᠋ᠤ᠌ ᠬᠡᠷᠴᠢᠵᠦ ᠥᠭᠬᠦ ᠶ᠋ᠢ ᠲᠩᠷᠢ ᠳ᠋ᠦ᠍ ᠭᠠᠷᠬᠤ ᠲᠦᠳᠡ ᠵᠠᠮ ᠭᠡᠵᠦ ᠲᠥᠪᠡᠳ ᠦ᠋ᠳ ᠢᠳᠡᠭᠡᠨ ᠪᠢᠰᠢᠷᠡᠳᠡᠭ ᠡᠴᠡ ᠡᠢᠮᠦ ᠵᠠᠩᠰᠢᠯ ᠳᠡᠯᠭᠡᠷᠡᠵᠡᠢ᠃ ᠬᠢᠲᠠᠳ ᠤ᠋ᠳ ᠪᠣᠯᠬᠣᠷ ᠠᠮᠠ ᠶ᠋ᠢ ᠨᠢ ᠪᠠᠷᠠᠵᠤ ᠦᠬᠦᠭᠦᠯᠪᠡᠯ ᠰᠦᠨᠡᠰᠦ ᠨᠢ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠭᠠᠷᠤᠨ ᠵᠠᠢᠯᠬᠤ ᠦᠭᠡᠢ ᠰᠠᠢᠨ ᠭᠡᠵᠦ ᠬᠥᠮᠦᠨ ᠦ᠌ ᠠᠮᠠ ᠶ᠋ᠢ ᠪᠠᠷᠢᠵᠤ ᠠᠯᠠᠬᠤ ᠶᠠᠯᠠ ᠪᠣᠢ ᠪᠣᠯᠭᠠᠵᠠᠢ᠃ ᠭᠡᠪᠡᠴᠦ ᠡᠴᠦᠰ ᠦ᠋ᠨ ᠳ᠋ᠦᠩ ᠨᠢᠭᠡ ᠭᠡᠳᠡᠭ ᠢ᠋ ᠴᠤᠢᠮᠴᠤᠭ ᠭᠡᠯᠦᠩ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃