ᠣᠷᠣᠢ ᠦᠭᠡᠢ ᠰᠦᠮᠡ – ᠵᠢᠷᠭᠤᠭᠠ᠂ ᠪᠠᠷᠠᠪᠠᠩ ᠭᠡᠢᠳ ᠦᠨ ᠱᠠᠪᠢ Оройгүй сүм – Зургаа ᠂ Бэрээвэн гийдийн шавь - Oroigui sum 6
1023ᠵᠢᠷᠭᠤᠭᠠ᠂ ᠪᠠᠷᠠᠪᠠᠩ ᠭᠡᠢᠳ ᠦᠨ ᠱᠠᠪᠢ
ᠡᠷᠳᠡᠨᠢ ᠳ᠋ᠦ᠍ ᠠᠯᠲᠠ ᠨᠢᠭᠡ ᠰᠢᠷᠠ
ᠡᠳᠡᠨ ᠳ᠋ᠦ᠍ ᠵᠠᠩᠴᠢ ᠨᠢᠭᠡ ᠰᠢᠷᠠ
ᠢᠳᠡᠭᠡᠨ ᠳ᠋ᠦ᠍ ᠤᠭᠤᠷᠠᠭ ᠨᠢᠭᠡ ᠰᠢᠷᠠ
ᠲᠥᠪᠡᠳ ᠲᠦ᠍ ᠨᠣᠮ ᠤ᠋ᠨ ᠮᠥᠷ ᠬᠥᠭᠡᠭᠡᠵᠦ ᠣᠴᠢᠭᠰᠠᠨ ᠮᠣᠩᠭᠣᠯᠴᠤᠳ ᠪᠠᠷᠠᠪᠠᠩ ᠶᠤᠮ ᠤᠤ ᠰᠸᠷᠠ ᠬᠡᠢᠳ ᠲᠦ᠍ ᠰᠠᠭᠤᠵᠤ ᠨᠣᠮ ᠦᠵᠡᠳᠡᠭ ᠵᠠᠩᠰᠢᠯ ᠣᠯᠠᠨ ᠣᠨ ᠢ᠋ ᠳᠠᠮᠵᠢᠨ ᠲᠣᠭᠲᠠᠵᠠᠢ᠃ ᠲᠡᠷᠡ ᠶᠣᠰᠣᠭᠠᠷ ᠭᠡᠰᠦᠯ ᠰᠡᠩᠵᠢ ᠶ᠋ᠢ ᠪᠠᠷᠠᠪᠠᠩ ᠬᠡᠢᠳ ᠲᠦ᠍ ᠰᠠᠭᠤᠯᠭᠠᠬᠤ ᠪᠠᠷ ᠪᠣᠯᠪᠠ᠃
- ᠪᠠᠷᠠᠪᠠᠩ ᠬᠡᠢᠳ ᠲᠦ᠍ ᠰᠠᠭᠤᠬᠤ ᠨᠢ ᠳᠡᠭᠡᠷᠡ ᠪᠢᠵᠡ ᠳᠡ᠃ ᠪᠣᠭᠳᠠ ᠭᠡᠭᠡᠨ ᠦ᠌ ᠮᠠᠨᠢ ᠬᠤᠪᠢᠯᠭᠠᠨ ᠠᠩᠬᠠ ᠠᠷᠠᠪᠨᠠᠶᠢᠯᠠᠭᠰᠠᠨ ᠬᠡᠢᠳ ᠶᠦᠮ᠃ ᠲᠡᠭᠡᠭᠡᠳ ᠮᠢᠨᠦ ᠪᠠᠭᠠ ᠳ᠋ᠠᠭᠠᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠭᠠᠵᠠᠷ! ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠳ᠋ᠠᠭᠠᠨ ᠵᠥᠪᠯᠡᠵᠦ ᠬᠡᠯᠡᠵᠡᠢ᠃ ᠪᠠᠭᠰᠢ ᠶ᠋ᠢᠨ ᠦᠭᠡ ᠲᠡᠭᠦᠨ ᠳ᠋ᠦ᠍ ᠬᠠᠤᠯᠢ ᠪᠣᠯᠬᠣᠷ ᠰᠡᠩᠵᠢ ᠭᠡᠰᠦᠯ ᠳᠠᠭᠤ ᠦᠭᠡᠢ ᠵᠥᠪᠰᠢᠶᠡᠷᠡᠵᠡᠢ᠃ ᠮᠥᠷᠭᠥᠯᠴᠢᠳ ᠴᠦ᠍ ᠪᠠᠷᠠᠪᠠᠩ ᠬᠡᠢᠳ ᠣᠷᠣᠵᠤ ᠲᠡᠨᠳᠡᠬᠢ ᠶ᠋ᠢᠨ ᠨᠠᠨᠳᠢᠨ ᠰᠢᠲᠦᠭᠡᠨ ᠨᠦ᠍ᠭᠦᠳ ᠲᠦ᠍ ᠮᠥᠷᠭᠥᠬᠦ ᠴᠠᠭ ᠪᠣᠯᠤᠭᠰᠠᠨ ᠲᠤᠯᠠ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠮᠲᠤ ᠶᠠᠪᠤᠬᠤ ᠪᠣᠯᠵᠠᠢ᠃
ᠪᠠᠷᠠᠪᠠᠩ ᠬᠡᠢᠳ ᡀᠠᠰᠠ ᠠ᠋ᠴᠠ ᠨᠡᠯᠢᠶᠡᠳ ᠬᠡᠳᠦᠨ ᠰᠠᠭᠠᠬᠠᠯᠲᠠ ᠶ᠋ᠢᠨ ᠬᠣᠯᠠ ᠵᠠᠢᠲᠠᠢ ᠭᠡᠨᠫᠠᠯ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠲᠦ᠍ ᠣᠷᠣᠰᠢᠳᠠᠭ ᠪᠠᠢᠯᠠ᠃ ᠲᠡᠷᠡ ᠬᠡᠢᠳ ᠦ᠋ᠨ ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠭᠣᠣᠯ ᠲᠥᠯᠥᠪ ᠪᠣᠭᠳᠠ ᠶ᠋ᠢᠨ ᠱᠠᠪᠢ ᠨᠠᠷ ᠰᠠᠭᠤᠨᠠ᠃ ᠬᠠᠯᠬᠠ ᠠ᠋ᠴᠠ ᠢᠷᠡᠭᠰᠡᠨ ᠬᠥᠮᠦᠰ ᠰᠠᠮᠠᠯᠤ ᠺᠠᠮᠴᠠᠩ（ ᠵᠢᠰᠠ） ᠳ᠋ᠤ᠌ ᠬᠠᠮᠢᠶᠠᠷᠳᠠᠭ ᠪᠠᠢᠵᠠᠢ᠃ ᠲᠡᠳᠡ ᠪᠠᠰᠠ ᠬᠠᠯᠬᠠ ᠮᠢᠴᠠᠩ ᠪᠣᠯᠤᠨᠠ᠃ ᠪᠤᠰᠤᠳ ᠮᠣᠩᠭᠣᠯᠴᠤᠳ ᠲᠤᠰ ᠲᠤᠰ ᠲᠠᠭᠠᠨ ᠥᠪᠡᠷ ᠥᠪᠡᠷ ᠮᠠᠴᠠᠨ ᠳ᠋ᠤ᠌ ᠬᠤᠪᠢᠶᠠᠭᠳᠠᠳᠠᠭ ᠲᠤᠯᠠ ᠲᠣᠷᠭᠤᠳ ᠤ᠋ᠳ ᠲᠣᠷᠭᠤᠳ᠂ ᠥᠭᠡᠯᠡᠳ ᠦ᠋ᠳ ᠴᠤᠾᠠᠨ᠂ ᠥᠪᠥᠷ ᠮᠣᠩᠭᠣᠯᠴᠤᠳ ᠵᠤᠷᠴᠤᠳ ᠮᠢᠴᠠᠩ ᠭᠡᠬᠦᠴᠢᠯᠡᠨ ᠬᠤᠪᠢᠶᠠᠷᠢᠯᠠᠭᠳᠠᠳᠠᠭ ᠪᠠᠢᠵᠠᠢ᠃
ᠪᠠᠷᠠᠪᠠᠩ ᠬᠡᠢᠳ ᠲᠦ᠍ ᠮᠥᠷᠭᠥᠯᠴᠢᠳ ᠥᠷᠯᠥᠭᠡ ᠡᠷᠲᠡᠯᠡᠨ ᠣᠴᠢᠪᠠ᠃ ᠵᠢᠩᠬᠢᠨᠢ ᠨᠡᠷᠡ ᠨᠢ ᠪᠠᠯᠳᠠᠨ ᠪᠠᠷᠠᠪᠠᠩ ᠪᠤᠶᠤ ᠦᠷᠡ ᠵᠢᠮᠢᠰ ᠦ᠋ᠨ ᠭᠢᠯᠠᠯᠵᠠᠭᠰᠠᠨ ᠣᠪᠣᠭᠠ ᠭᠡᠳᠡᠭ ᠡᠨᠡ ᠬᠡᠢᠳ ᠲᠦ᠍ ᠵᠢᠮᠢᠰ ᠮᠣᠳᠣ ᠶᠡᠬᠡ ᠯᠡ ᠣᠯᠠᠨ ᠢ᠋ᠶ᠋ᠠᠷ ᠤᠷᠭᠤᠳᠠᠭ ᠪᠠᠢᠯᠠ᠃ ᠭᠡᠨᠫᠠᠯ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠲᠦ᠍ ᠳᠤᠭᠤᠢᠷᠠᠨ ᠣᠷᠣᠰᠢᠬᠤ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠪᠠᠷᠠᠭᠤᠨ ᠤᠷᠢᠲᠤ ᠤᠷᠤᠭᠤ ᠠᠯᠲᠠᠨ ᠣᠷᠣᠢ ᠲᠠᠢ ᠴᠣᠭᠴᠢᠨ ᠳᠤᠭᠠᠩ᠂ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠵᠠᠯᠠᠷᠠᠳᠠᠭ ᠭᠠᠯᠳᠠᠨ ᠫᠤᠪᠷᠠᠩ ᠬᠡᠢᠳ ᠪᠦᠬᠦᠨ ᠡᠴᠡ ᠥᠨᠳᠥᠷ ᠲᠦ᠍ ᠰᠦᠷᠯᠢᠭ ᠰᠠᠢᠬᠠᠨ ᠬᠠᠷᠠᠭᠳᠠᠨᠠ᠃ ᠵᠡᠭᠦᠨ ᠤᠷᠢᠳᠤ ᠤᠷᠤᠭᠤ ᠤᠬᠠᠭᠠᠨ ᠲᠡᠵᠢᠭᠡᠭᠴᠢ ᠣᠷᠴᠢᠯᠠᠩ ᠪᠤᠶᠤ ᠯᠤᠰᠠᠯᠯᠢᠩ ᠳ᠋ᠠᠴᠠᠩ ᠳᠡᠷᠡᠨ ᠡᠴᠡ ᠬᠣᠯᠠ ᠦᠭᠡᠢ ᠲᠢᠶᠠᠨ᠂ ᠭᠣᠮᠠᠨ ᠳ᠋ᠠᠴᠠᠩ ᠨᠤᠭᠤᠳ ᠰᠢᠯᠢ ᠰᠢᠯᠢ ᠪᠡᠨ ᠬᠠᠷᠠᠨ ᠣᠷᠣᠰᠢᠳᠠᠭ ᠠᠵᠢ᠃
- ᠲᠡᠷᠡ ᠰᠢᠷᠭᠠᠯ ᠪᠠᠢᠰᠢᠩ ᠪᠣᠭᠳᠠ ᠭᠡᠭᠡᠨ ᠦ᠌ ᠮᠣᠷᠢᠯᠠᠨ ᠢᠷᠡᠬᠦ ᠳ᠋ᠡᠭᠡᠨ ᠵᠠᠯᠠᠷᠠᠳᠠᠭ ᠭᠠᠵᠠᠷ᠂ ᠬᠤᠲᠤᠭᠲᠤ ᠮᠠᠨᠢ ᠰᠢᠷᠠ ᠬᠠᠢᠰᠤ᠂ ᠰᠢᠷᠠ ᠥᠷᠭᠥᠭᠡ ᠲᠡᠢ ᠪᠠᠢᠬᠤ ᠤᠴᠢᠷ ᠲᠠᠢ ᠪᠣᠯᠬᠣᠷ ᠪᠠᠷᠠᠪᠠᠩ ᠬᠡᠢᠳ ᠲᠦ᠍ ᠲᠡᠭᠦᠨ ᠳ᠋ᠦ᠍ ᠵᠣᠷᠢᠭᠤᠯᠤᠭᠰᠠᠨ ᠥᠷᠭᠥᠭᠡ ᠶ᠋ᠢ ᠰᠢᠷᠠ ᠥᠩᠭᠡ ᠪᠡᠷ ᠪᠣᠳᠣᠭᠰᠠᠨ ᠶᠤᠮ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠳ᠋ᠠᠭᠠᠨ ᠬᠡᠯᠡᠭᠡᠳ ᠨᠠᠮᠬᠠᠨ ᠰᠢᠷᠠ ᠪᠠᠢᠰᠢᠩ ᠢ᠋ ᠵᠢᠭᠠᠯᠠ᠃ ᠭᠡᠰᠦᠯ ᠰᠡᠩᠵᠢ ᠲᠡᠷᠡ ᠪᠦᠬᠦᠨ ᠢ᠋ ᠭᠣᠴᠣ ᠰᠣᠨᠢᠭᠤᠴᠢ ᠨᠢᠳᠦ ᠪᠡᠷ ᠠᠵᠢᠭᠯᠠᠨ ᠬᠠᠷᠠᠵᠤ ᠲᠣᠭᠲᠠᠭᠠᠵᠤ ᠠᠪᠴᠤ ᠪᠠᠢᠯᠠ᠃ ᠣᠨᠴᠠᠭᠠᠢ ᠰᠣᠨᠢᠨ᠂ ᠦᠨᠡᠮᠰᠢᠮᠡᠷ ᠦᠭᠡᠢ ᠬᠠᠴᠢᠨ ᠠᠵᠢ᠃
ᠮᠥᠷᠭᠥᠯᠴᠢᠳ ᠢ᠋ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠬᠢᠨ ᠶᠡᠬᠡ ᠯᠡ ᠨᠠᠢᠷᠰᠠᠭ ᠤᠭᠲᠤᠯᠠ᠃ ᠬᠠᠯᠬᠠ ᠵᠢᠰᠠ ᠶ᠋ᠢᠨ ᠰᠠᠩ ᠠ᠋ᠴᠠ ᠬᠣᠨᠢᠨ ᠤ᠋ ᠭᠦᠯᠦᠦᠰᠡ ᠮᠢᠬᠠ ᠨᠢᠭᠡ᠂ ᠠᠷᠪᠠᠭᠠᠳ ᠰᠢᠷᠬᠡᠭ ᠪᠡᠯᠸ ᠪᠤᠶᠤ ᠮᠠᠨᠲᠠᠤ᠂ ᠨᠢᠭᠡ ᠳᠣᠮᠪᠣ ᠲᠠᠷᠠᠭ ᠮᠥᠷᠭᠥᠯᠴᠢᠳ ᠲᠦ᠍ ᠬᠠᠳᠠᠭ ᠤ᠋ᠨ ᠬᠠᠮᠲᠤ ᠡᠷᠭᠦᠨ ᠪᠠᠷᠢᠭᠠᠳ᠄
- ᠬᠠᠯᠬᠠ ᠵᠢᠰᠠ ᠮᠥᠷᠭᠥᠯᠴᠢᠳ ᠲᠠ ᠪᠦᠬᠦᠨ ᠢ᠋ ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠰᠠᠢᠨ ᠶᠠᠪᠤᠵᠤ ᠢᠷᠡᠭᠰᠡᠨ ᠢ᠋ ᠪᠡᠯᠭᠡᠳᠡᠵᠦ ᠡᠨᠡ ᠬᠡᠰᠢᠭ ᠢ᠋ ᠡᠷᠭᠦᠨ ᠪᠠᠷᠢᠵᠤ ᠪᠠᠢᠨᠠ᠃ ᠬᠦᠯᠢᠶᠡᠨ ᠠᠪᠴᠤ ᠰᠣᠶᠣᠷᠬᠠᠨᠠ ᠤᠤ︖ ᠭᠡᠵᠦ ᠪᠥᠬᠥᠯᠵᠡᠨ ᠶᠣᠰᠣᠯᠠᠪᠠ᠃ ᠴᠤᠢᠮᠴᠤᠭ ᠭᠡᠯᠦᠩ ᠮᠥᠷᠭᠥᠯᠴᠢᠳ ᠦ᠋ᠨ ᠪᠠᠭ ᠤ᠋ᠨ ᠠᠬᠠᠯᠠᠭᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠲᠡᠷᠡ ᠪᠡᠯᠡᠭ ᠢ᠋ ᠬᠣᠶᠠᠷ ᠭᠠᠷᠳᠠᠨ ᠠᠪᠤᠯᠠ᠃ ᠲᠡᠷᠡ ᠪᠡᠯᠡᠭ ᠢ᠋ ᠭᠠᠷᠳᠠᠨ ᠠᠪᠤᠭᠰᠠᠨ ᠪᠣᠯ ᠬᠠᠯᠬᠠ ᠵᠢᠰᠠ ᠶ᠋ᠢᠨ ᠬᠢᠨ ᠳ᠋ᠦ᠍ ᠬᠠᠷᠢᠭᠤ ᠡᠷᠭᠦᠯ ᠪᠠᠷᠢᠨᠠ ᠭᠡᠰᠡᠨ ᠳᠣᠬᠢᠶᠠ ᠶᠤᠮ᠃ ᠡᠭᠦᠨ ᠢ᠋ ᠭᠡᠰᠦᠯ ᠰᠡᠩᠵᠢ ᠳ᠋ᠦ᠍ ᠪᠠᠭᠰᠢ ᠨᠢ ᠥᠴᠥᠭᠡᠳᠦᠷ ᠣᠷᠣᠢ ᠶᠠᠷᠢᠵᠤ ᠥᠭᠴᠡᠢ᠃ ᠬᠡᠷᠪᠡ ᠲᠡᠷᠡ ᠪᠡᠯᠡᠭ ᠢ᠋ ᠠᠪᠬᠤ ᠦᠭᠡᠢ ᠪᠣᠯ ᠨᠢᠷᠪᠠ ᠨᠠᠷ ᠨᠢ ᠬᠡᠨᠡᠭ ᠴᠦ᠍ ᠦᠭᠡᠢ ᠪᠤᠴᠠᠭᠠᠭᠠᠳ ᠠᠪᠴᠤ ᠶᠠᠪᠤᠳᠠᠭ ᠠᠵᠢ᠃ ᠴᠤᠢᠮᠴᠤᠭ ᠭᠡᠯᠦᠩ ᠨᠤᠲᠤᠭ ᠠ᠋ᠴᠠ ᠪᠠᠨ ᠭᠠᠷᠬᠤ ᠳ᠋ᠠᠭᠠᠨ ᠨᠡᠯᠢᠶᠡᠳ ᠪᠠᠨᠴᠢᠨ ᠲᠠᠢ ᠪᠡᠯᠡᠳᠬᠡᠯ ᠰᠠᠢᠲᠠᠢ ᠪᠠᠢᠵᠠᠢ᠃ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠨᠢᠭᠡ ᠡᠴᠡ ᠳᠣᠭᠣᠭᠰᠢ ᠦᠭᠡᠢ ᠵᠣᠭᠣᠰ ᠲᠦᠭᠡᠭᠡᠨ ᠥᠭᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠲᠦᠷᠡᠢᠪᠴᠢ ᠬᠣᠲᠣᠢᠬᠤ ᠦᠭᠡᠢ ᠭᠡᠳᠡᠭ ᠢ᠋ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠴᠤᠢᠮᠴᠤᠭ ᠭᠡᠯᠦᠩ ᠰᠡᠳᠬᠢᠯ ᠥᠶᠥᠭ᠂ ᠪᠠᠷᠳᠠᠮ ᠠᠵᠢ.᠃ 《ᠥᠭᠡᠷᠡ ᠶᠠᠭᠤᠨ ᠳ᠋ᠤ᠌ ᠵᠠᠷᠤᠬᠤ ᠪᠣᠢ》 ᠭᠡᠵᠦ ᠲᠡᠷᠡ ᠪᠣᠳᠣᠵᠠᠢ᠃
ᠬᠠᠯᠬᠠ ᠵᠢᠰᠠ ᠶ᠋ᠢᠨ ᠬᠢᠨ ᠰᠢᠨᠡ ᠮᠥᠷᠭᠥᠯᠴᠢᠳ ᠲᠦ᠍ ᠮᠠᠩᠵᠠ ᠪᠠᠷᠢᠵᠤ ᠠᠭᠰᠢᠭᠠᠭᠰᠠᠨ ᠪᠤᠳᠠᠭᠠ᠂ ᠲᠠᠷᠠᠭ᠂ ᠡᠯᠡᠰᠦᠨ ᠰᠢᠬᠢᠷ᠂ ᠲᠣᠰᠣ ᠪᠠᠷ ᠳᠠᠢᠯᠠᠵᠠᠢ᠃ ᠮᠥᠷᠭᠥᠯᠴᠢᠨ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠨᠠᠨᠳᠢᠨ ᠰᠢᠲᠦᠭᠡᠨ ᠨᠦ᠍ᠭᠦᠳ ᠲᠦ᠍ ᠲᠣᠯᠣᠭᠠᠢ ᠲᠠᠷᠠᠭᠠᠯᠠᠨ ᠮᠥᠷᠭᠥᠵᠦ ᠡᠳᠦᠷᠵᠢᠨ ᠶᠠᠪᠤᠵᠠᠭᠠᠵᠤ ᠡᠴᠡᠵᠦ ᠶᠠᠳᠠᠷᠠᠵᠠᠢ᠃ ᠭᠡᠪᠡᠴᠦ ᠰᠡᠳᠬᠢᠯ ᠰᠠᠨᠠᠭᠠ ᠥᠭᠡᠳᠡᠷᠡᠭ ᠪᠣᠯᠤᠭᠰᠠᠨ ᠪᠠᠢᠪᠠ᠃
ᠣᠷᠣᠢ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠰᠡᠩᠵᠢ ᠶ᠋ᠢᠨ ᠬᠠᠮᠲᠤ ᠪᠠᠷᠠᠪᠠᠩ ᠳ᠋ᠤ᠌ ᠦᠯᠡᠳᠡᠵᠦ ᠪᠤᠰᠤᠳ ᠨᠢ ᡀᠠᠰᠠ ᠥᠭᠡᠳᠡ ᠶᠠᠪᠤᠵᠠᠭᠠᠪᠠ᠃ ᠲᠠᠨᠢᠯ ᠯᠠᠮᠠ ᠶ᠋ᠢᠨ ᠳ᠋ᠡᠭᠠᠨ ᠴᠤᠢᠮᠴᠤᠭ ᠱᠠᠪᠢ ᠶ᠋ᠢᠨ ᠬᠠᠮᠲᠤ ᠬᠣᠨᠣᠭᠯᠠᠪᠠ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠲᠡᠭᠦᠨ ᠢ᠋ ᠱᠠᠪᠢᠯᠠᠭᠤᠯᠬᠤ ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠠᠪᠠᠴᠢᠬᠤ ᠪᠠᠷ ᠪᠣᠯᠵᠠᠢ᠃ ᠰᠡᠩᠵᠢ ᠶ᠋ᠢᠨ ᠨᠣᠢᠷ ᠬᠦᠷᠬᠦ ᠦᠭᠡᠢ ᠶᠡᠬᠡ ᠤᠳᠠᠲᠠᠯᠠ ᠬᠥᠷᠪᠡᠵᠦ ᠰᠡᠷᠢᠭᠦᠨ ᠪᠠᠢᠯᠠ᠃ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠥᠯᠥᠰᠬᠦᠯᠡᠩ ᠨᠣᠬᠠᠳ ᠰᠥᠨᠢ ᠳᠦᠯᠢ ᠪᠣᠯᠲᠠᠯᠠ ᠣᠯᠢᠨ ᠪᠣᠷᠭᠣᠵᠤ ᠦᠶᠡ ᠦᠶᠡ ᠬᠣᠭᠣᠷᠣᠨᠳᠣ ᠪᠠᠨ ᠠᠭᠰᠤᠷᠤᠨ ᠠᠷᠬᠢᠷᠠᠯᠳᠤᠬᠤ ᠨᠢ ᠲᠣᠳᠣᠬᠠᠨ ᠰᠣᠨᠣᠰᠳᠠᠵᠤ ᠪᠠᠢᠯᠠ᠃ ᠰᠡᠩᠵᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠶᠡᠷᠦ ᠪᠤᠰᠤ ᠶ᠋ᠢᠨ ᠪᠣᠳᠣᠯ ᠡᠷᠭᠢᠯᠳᠦᠨᠡ᠃ ᠲᠡᠷᠲᠡᠭᠡ ᠬᠣᠯᠠ ᠶ᠋ᠢᠨ ᠮᠢᠩᠭᠠᠨ ᠤ᠋ ᠭᠠᠵᠠᠷ ᠢ᠋ ᠲᠤᠭᠤᠯᠵᠤ ᠪᠤᠷᠬᠠᠨ ᠤ᠋ ᠣᠷᠣᠨ ᠭᠡᠭᠳᠡᠭᠰᠡᠨ ᠲᠥᠪᠡᠳ ᠭᠠᠵᠠᠷ ᠢᠷᠡᠬᠦ ᠳ᠋ᠡᠭᠡᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠶᠠᠭᠤᠮᠠ ᠦᠵᠡᠵᠡᠢ᠃ ᠠᠯᠲᠠᠨ ᠣᠷᠣᠢᠲᠤ ᠰᠦᠮᠡ ᠳᠤᠭᠠᠩ ᠤ᠋ᠳ᠂ ᠮᠢᠨᠳᠠᠭ ᠲᠤᠰᠢᠶᠠᠯᠳᠤ ᠶᠡᠬᠡᠰ ᠯᠠᠮᠠ ᠨᠠᠷ᠂ ᠪᠥᠭᠡᠰᠦ ᠪᠡᠨ ᠢᠳᠡᠳᠡᠭ ᠭᠤᠶᠤᠯᠭᠠᠴᠢᠨ ᠨᠤᠭᠤᠳ ᠴᠥᠮ ᠢ᠋ ᠲᠡᠷᠡ ᠬᠠᠷᠠᠯᠠ᠃ ᠪᠦᠬᠦ ᠶᠠᠭᠤᠮᠠ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠲᠥᠯᠥᠭᠡ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠢ᠋ ᠴᠦ᠍ ᠮᠥᠨ ᠬᠠᠷᠠᠵᠠᠢ᠃ ᠶᠡᠬᠡᠩᠬᠢ ᠨᠢ ᠦᠯᠦ ᠮᠡᠳᠡᠭᠬᠡᠨ ᠮᠠᠨᠠᠨ ᠳ᠋ᠤ᠌ ᠬᠤᠴᠢᠭᠠᠰᠤᠲᠠᠢ ᠡᠨᠡ ᠣᠷᠴᠢᠯᠠᠩ ᠤ᠋ᠨ ᠮᠥᠨ ᠴᠢᠨᠠᠷ ᠢ᠋ ᠨᠡᠪᠲᠡ ᠣᠢᠯᠠᠭᠠᠬᠤ ᠶ᠋ᠢ ᠰᠡᠩᠵᠢ ᠭᠡᠰᠦᠯ ᠬᠦᠰᠡᠵᠦ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠦᠵᠡᠭᠰᠡᠨ᠂ ᠰᠣᠨᠣᠰᠤᠭᠰᠠᠨ ᠳ᠋ᠤ᠌ ᠣᠢᠯᠠᠭᠠᠨ ᠤᠬᠠᠭᠠᠷᠠᠬᠤ ᠠᠷᠭᠠ ᠦᠭᠡᠢ ᠪᠢᠲᠡᠭᠦᠯᠢᠭ ᠵᠦᠢᠯ ᠠᠰᠤᠷᠤ ᠶᠡᠬᠡ ᠪᠠᠢᠪᠠ᠃ ᠡᠭᠦᠨ ᠦ᠌ ᠴᠠᠭᠠᠨᠠ ᠭᠠᠷᠬᠤ ᠶ᠋ᠢᠨ ᠲᠤᠯᠠᠳᠠ ᠭᠠᠭᠴᠠ ᠬᠦ᠌ ᠶᠡᠬᠡ ᠡᠷᠳᠡᠮ ᠲᠡᠢ ᠬᠥᠮᠦᠨ ᠪᠣᠯᠬᠤ᠂ ᠨᠣᠮ ᠤ᠋ᠨ ᠮᠥᠷ ᠢ᠋ ᠬᠣᠶᠠᠷ ᠦᠭᠡᠢ ᠴᠠᠭ ᠢ᠋ᠶ᠋ᠠᠷ ᠬᠥᠭᠡᠭᠡᠬᠦ ᠶ᠋ᠢ ᠲᠡᠷᠡ ᠥᠪᠡᠷ ᠲᠡᠭᠡᠨ ᠠᠨᠳᠠᠭᠠᠢᠯᠠᠵᠠᠢ᠃
᠁ ᠥᠷᠯᠥᠭᠡ ᠪᠣᠯᠤᠯᠠ᠃ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠣᠷᠣᠢ ᠳᠡᠭᠡᠷᠡᠬᠢ ᠲᠠᠪᠴᠠᠩ ᠠ᠋ᠴᠠ :
- ᠫᠸᠪ᠂ ᠫᠸᠪ᠂ ᠫᠸᠪ ᠁ ! ᠭᠡᠵᠦ ᠴᠠᠩᠭᠢᠨᠠᠭᠰᠠᠨ ᠳᠠᠭᠤᠤ ᠲᠠᠢ ᠵᠢᠭᠠᠯ ᠬᠦᠦ ᠤᠶᠠᠩᠭᠠᠯᠠᠨ ᠬᠠᠰᠬᠢᠷᠴᠤ ᠡᠬᠢᠯᠡᠯᠡ᠃ ᠥᠷᠯᠥᠭᠡᠨ ᠦ᠌ ᠤᠩᠰᠢᠯᠭᠠᠨ ᠳ᠋ᠤ᠌ ᠯᠠᠮᠠ ᠨᠠᠷ ᠢ᠋ ᠳᠠᠭᠤᠳᠠᠵᠤ ᠪᠠᠢᠭᠠ ᠨᠢ ᠡᠨᠡ ᠶᠦᠮ᠃ ᠫᠸᠪ ᠭᠡᠳᠡᠭ ᠪᠣᠯ 《ᠮᠣᠷᠢᠯᠠᠭᠲᠤᠨ》 ᠭᠡᠰᠡᠨ ᠤᠳᠬᠠ ᠲᠠᠢ᠃
- ᠫᠸᠪ᠂ ᠫᠸᠪ᠂ ᠫᠸᠪ ᠁ ! ᠭᠡᠰᠡᠨ ᠪᠦᠳᠦᠭᠦᠨ ᠬᠥᠮᠦᠨ ᠦ᠌ ᠳᠠᠭᠤᠨ ᠰᠸᠷᠠ ᠬᠡᠢᠳ ᠦ᠋ᠨ ᠴᠣᠭᠴᠢᠨ ᠳᠡᠭᠡᠷᠡ ᠡᠴᠡ ᠮᠥᠨ ᠯᠡ ᠤᠶᠠᠩᠭᠠᠯᠠᠵᠤ ᠪᠠᠢᠯᠠ᠃ ᠬᠣᠶᠠᠷ ᠳ᠋ᠠᠴᠠᠩ ᠬᠣᠭᠣᠷᠣᠨᠳᠣ ᠪᠠᠨ ᠬᠣᠯᠠ ᠪᠣᠯᠪᠠᠴᠤ ᠪᠡᠶᠡ ᠪᠡᠶᠡ ᠶ᠋ᠢᠨ ᠴᠤᠤᠷᠢᠶᠠ ᠶ᠋ᠢ ᠪᠦᠳᠡᠭᠢ ᠪᠠᠳᠠᠭᠢ ᠰᠣᠨᠣᠰᠬᠤ ᠪᠠᠷ ᠪᠢᠯᠡ᠃ ᠡᠳᠡᠭᠡᠷ ᠬᠡᠢᠳ ᠦ᠋ᠨ ᠳ᠋ᠠᠴᠠᠩ ᠤ᠋ᠳ ᠬᠡᠦᠬᠡᠳ᠂ ᠡᠪᠦᠭᠡᠳ ᠬᠣᠶᠠᠷ ᠢ᠋ᠶ᠋ᠠᠷ ᠳᠠᠭᠤᠳᠠᠯᠭᠠ ᠪᠠᠨ ᠶᠠᠪᠤᠭᠤᠯᠳᠠᠭ ᠪᠣᠯ ᠭᠠᠯᠳᠠᠨ ᠬᠡᠢᠳ ᠦ᠋ᠨ ᠬᠢ ᠴᠣᠭᠴᠢᠨ ᠤ᠋ ᠪᠠᠨ ᠣᠷᠣᠢ ᠳᠡᠭᠡᠷᠡᠬᠢ ᠪᠦᠷᠢᠶᠡᠨ ᠱᠠᠲᠤᠨ ᠳ᠋ᠤ᠌ ᠵᠤᠭᠤᠭᠠᠭᠰᠠᠨ ᠲᠣᠮᠣ ᠬᠡᠩᠭᠡᠷᠭᠡ ᠶ᠋ᠢ ᠲᠦᠩ ᠲᠦᠩ ᠬᠢᠯᠭᠡᠨ ᠳᠡᠯᠡᠳᠴᠦ ᠯᠠᠮᠠ ᠨᠠᠷ ᠢ᠋ᠶ᠋ᠠᠨ ᠬᠤᠷᠠᠯ ᠳ᠋ᠤ᠌ ᠤᠷᠢᠨᠠ᠃
ᠲᠡᠷᠡ ᠳᠠᠭᠤᠳᠠᠯᠭᠠ ᠪᠠᠷ ᠯᠠᠮᠠ ᠨᠠᠷ ᠭᠡᠷ᠂ ᠬᠠᠰᠢᠶᠠᠨ ᠠ᠋ᠴᠠ ᠪᠠᠨ ᠭᠠᠷᠴᠤ ᠵᠦᠭ ᠵᠦᠭ ᠡᠴᠡ ᠴᠤᠭᠯᠠᠷᠠᠨᠠ᠃ ᠥᠨᠥᠳᠥᠷ ᠴᠦ᠍ ᠮᠥᠨ ᠲᠡᠢᠨ ᠬᠦ᠌ ᠯᠠᠮᠠ ᠨᠠᠷ ᠴᠤᠭᠯᠠᠷᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠲᠡᠳᠡᠨ ᠦ᠌ ᠳᠤᠮᠳᠠ ᠭᠡᠰᠦᠯ ᠰᠡᠩᠵᠢ ᠪᠠᠭᠰᠢ ᠯᠠᠮᠠ ᠶ᠋ᠢ ᠪᠡᠨ ᠳᠠᠭᠠᠭᠠᠳ ᠶᠠᠪᠤᠵᠤ ᠪᠠᠢᠯᠠ᠃ ᠪᠠᠭᠰᠢ ᠯᠠᠮᠠ ᠴᠤᠢᠮᠴᠤᠭ ᠨᠢ ᠲᠡᠭᠦᠨ ᠳ᠋ᠦ᠍ ᠪᠦᠬᠦᠢᠯᠡ ᠵᠠᠮ ᠢ᠋ ᠨᠢ ᠵᠢᠭᠠᠵᠤ᠂ ᠨᠣᠮ ᠤ᠋ᠨ ᠰᠢᠷᠡᠭᠡᠨ ᠳ᠋ᠦ᠍ ᠨᠢ ᠰᠠᠭᠤᠯᠭᠠᠵᠤ ᠥᠭᠬᠦ ᠤᠴᠢᠷ ᠲᠠᠢ ᠪᠠᠢᠯᠠ᠃
ᠬᠦᠷᠡᠩ ᠤᠯᠠᠭᠠᠨ ᠣᠷᠬᠢᠮᠵᠢ᠂ ᠰᠢᠷᠠ ᠳᠡᠪᠡᠯ ᠲᠡᠢ ᠯᠠᠮᠠ ᠨᠠᠷ ᠥᠩᠭᠡ ᠬᠣᠣᠰᠯᠠᠨ ᠠᠭᠠᠵᠢᠮ ᠵᠤᠭᠤᠬᠠᠨ ᠨᠠᠮᠪᠠ ᠲᠠᠢ ᠠᠯᠬᠤᠵᠠᠭᠠᠵᠤ ᠂ ᠡᠷᠢᠭᠡ ᠪᠡᠨ ᠭᠠᠷ ᠲᠠᠭᠠᠨ ᠢᠮᠡᠷᠦᠨ ᠶᠠᠪᠤᠵᠠᠭᠠᠨᠠ᠃ ᠴᠣᠭᠴᠢᠨ ᠳᠤᠭᠠᠩ ᠤᠨ ᠡᠭᠦᠳᠡᠨ ᠳ᠋ᠦ᠍ ᠣᠴᠢᠵᠤ᠂ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠢᠭᠳᠡᠷᠡᠨ ᠵᠣᠭᠰᠣᠯᠠ᠃ ᠳᠤᠭᠠᠩ ᠤ᠋ᠨ ᠣᠷᠣᠢ ᠳᠡᠭᠡᠷᠡᠬᠢ ᠲᠠᠪᠴᠠᠩ ᠳᠡᠭᠡᠷᠡ ᠡᠴᠡ ᠨᠢᠭᠡ ᠯᠠᠮᠠ ᠽᠤᠩᠭᠡᠸᠠ ᠶ᠋ᠢᠨ ᠮᠡᠭᠵᠡᠮ ᠢ᠋ ᠭᠤᠷᠪᠠᠨᠲᠠ ᠤᠩᠰᠢᠯᠠ᠃ ᠡᠭᠦᠳᠡᠨ ᠳ᠋ᠦ᠍ ᠴᠤᠭᠯᠠᠷᠠᠭᠰᠠᠨ ᠯᠠᠮᠠ ᠨᠠᠷ ᠮᠥᠨ ᠯᠡ ᠲᠡᠭᠦᠨ ᠢ᠋ ᠳᠠᠪᠲᠠᠨ ᠤᠩᠰᠢᠵᠠᠭᠠᠵᠤ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠲᠠᠷᠭᠤᠨ ᠯᠤᠬᠠᠭᠠᠷ ᠪᠡᠶᠡ ᠲᠡᠢ᠂ ᠵᠡᠰ ᠬᠦᠷᠡᠩ ᠴᠢᠷᠠᠢ ᠲᠠᠢ ᠴᠣᠭᠴᠢᠨ ᠤᠩᠵᠠᠳ ᠬᠣᠶᠠᠷ ᠱᠠᠮᠤ ᠶ᠋ᠢᠨ ᠬᠠᠮᠲᠤ ᠬᠦᠷᠦᠯᠴᠡᠨ ᠢᠷᠡᠪᠡ᠃ ᠡᠭᠦᠪᠡᠷ ᠴᠥᠮ ᠪᠦᠷᠢᠳᠦᠯ ᠪᠣᠯᠤᠭᠰᠠᠨ ᠲᠤᠯᠠ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠬᠠᠭᠠᠯᠭᠠ ᠴᠠᠯᠠᠰᠬᠢᠨ ᠨᠡᠭᠡᠭᠡᠭᠳᠡᠵᠦ ᠯᠠᠮᠠ ᠨᠠᠷ ᠳᠣᠲᠣᠭᠰᠢ ᠣᠷᠣᠵᠠᠢ᠃
ᠭᠡᠰᠦᠯ ᠰᠡᠩᠵᠢ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠲᠦ᠍ ᠠᠷᠪᠠ ᠭᠠᠷᠤᠢ ᠵᠢᠯ ᠰᠠᠭᠤᠵᠤ ᠭᠡᠰᠦᠯ ᠦ᠋ᠨ ᠰᠠᠬᠢᠯ ᠬᠦᠷᠲᠡᠭᠰᠡᠨ ᠲᠤᠯᠠ ᠴᠣᠭᠴᠢᠨ ᠬᠤᠷᠠᠯ ᠳ᠋ᠤ᠌ ᠰᠠᠭᠤᠬᠤ ᠡᠷᠬᠡ ᠲᠡᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠭᠡᠪᠡᠴᠦ ᠪᠤᠷᠬᠠᠨ ᠤ᠋ ᠨᠣᠮ ᠢ᠋ ᠨᠠᠷᠢᠨ ᠪᠢᠰᠢᠯᠭᠠᠵᠤ ᠪᠦᠷᠢᠨ ᠡᠷᠳᠡᠮ ᠲᠡᠭᠦᠰ ᠯᠠᠮᠠ ᠪᠣᠯᠬᠤ ᠶ᠋ᠢ ᠲᠡᠷᠡ ᠯᠠ ᠬᠦᠰᠡᠵᠡᠢ᠃ ᠵᠠᠷᠢᠮ ᠵᠦᠢᠯ ᠢ᠋ ᠳᠠᠪᠲᠠᠨ ᠰᠤᠷᠠᠬᠤ ᠳ᠋ᠤ᠌ ᠴᠤ᠌ ᠮᠠᠭᠤ ᠦᠭᠡᠢ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠱᠠᠪᠢ ᠳ᠋ᠠᠭᠠᠨ ᠰᠤᠷᠭᠠᠵᠠᠢ᠃ ᠶᠡᠷᠦ ᠨᠢ ᠴᠦ᠍ ᠡᠬᠢᠨ ᠡᠴᠡ ᠨᠢ ᠡᠬᠢᠯᠡᠳᠡᠭ ᠵᠢᠮᠡ ᠲᠡᠢ ᠠᠵᠢ᠃
ᠴᠢᠨᠠᠳᠤ ᠶ᠋ᠢᠨ ᠨᠣᠮ ᠦᠵᠡᠵᠦ ᠲᠡᠭᠦᠰᠦᠭᠰᠡᠨ ᡀᠠᠷᠠᠮᠪᠠ ᠪᠣᠯᠬᠤ ᠶ᠋ᠢᠨ ᠲᠤᠯᠠᠳᠠ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠬᠡᠷᠡᠭ ᠲᠡᠢ ᠪᠠᠢᠵᠠᠢ᠃ ᠰᠡᠩᠵᠢ ᠠᠷᠪᠠᠨ ᠬᠡᠳᠦᠨ ᠨᠠᠰᠤᠨ ᠠ᠋ᠴᠠ ᠨᠣᠮ ᠤ᠋ᠨ ᠮᠥᠷ ᠬᠥᠭᠡᠭᠡᠵᠦ ᠴᠢᠨᠠᠳᠤ ᠶ᠋ᠢᠨ ᠠᠩᠬᠠᠨ ᠤ᠋ ᠮᠡᠳᠡᠯᠭᠡ ᠨᠢᠭᠡᠨᠲᠡ ᠣᠯᠵᠤ ᠠᠪᠤᠭᠠᠳ ᠪᠠᠢᠭᠠ ᠪᠣᠯᠪᠠᠴᠤ ᠴᠢᠨᠠᠳᠤ ᠶ᠋ᠢᠨ ᠨᠣᠮ ᠢ᠋ ᠳᠠᠬᠢᠨ ᠡᠬᠢᠯᠡᠵᠦ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠦᠵᠡᠭᠡᠳ ᠭᠠᠷᠬᠤ ᠳ᠋ᠤ᠌ ᠲᠡᠳᠦᠢ ᠯᠡ ᠥᠨᠳᠥᠷ ᠨᠠᠰᠤᠲᠠᠢ ᠪᠣᠯᠴᠢᠬᠠᠮᠠᠷ ᠦᠭᠡᠢ ᠪᠠᠢᠬᠤ ᠲᠤᠯᠠ ᠶᠠᠭᠤᠮᠠᠨ ᠤ᠋ ᠵᠠᠬᠠ ᠳ᠋ᠤ᠌ ᠬᠦᠷᠦᠭᠰᠡᠨ ᠦ᠌ ᠬᠢ ᠡᠬᠢᠨ ᠡᠴᠡ ᠨᠢ ᠲᠤᠬᠠᠲᠠᠢ ᠦᠵᠡᠬᠦ ᠶ᠋ᠢ ᠪᠣᠳᠣᠵᠠᠢ᠃ ᠰᠤᠷᠪᠠᠯ ᠰᠤᠷᠤᠭᠰᠠᠨ ᠶᠤᠮ ᠰᠢᠭ᠋ ᠣᠷᠣᠯᠳᠣᠬᠤ ᠶ᠋ᠢ ᠤᠷᠢᠳᠠᠯ ᠪᠣᠯᠭᠠᠪᠠ᠃
ᠴᠢᠨᠠᠳᠤ ᠶ᠋ᠢᠨ ᠨᠣᠮ ᠲᠠᠪᠤᠨ ᠠᠢᠮᠠᠭ ᠰᠠᠪᠠ ᠠ᠋ᠴᠠ ᠪᠦᠷᠢᠳᠳᠡᠭ᠃ ᠨᠠᠮᠳᠡᠯ ᠪᠤᠶᠤ ᠰᠠᠨᠰᠺᠷᠢᠲ ᠢ᠋ᠶ᠋ᠠᠷ ᠫᠠᠷᠠᠮᠠᠨᠠ ᠸᠠᠷᠲ᠋ᠢᠺᠠ ᠰᠤᠳᠤᠯᠵᠤ ᠶᠣᠰᠣ ᠰᠤᠷᠲᠠᠬᠤᠨ ᠤ᠋ ᠤᠬᠠᠭᠠᠨ ᠰᠠᠭᠤᠨᠠ᠃ ᠤᠮᠠ ᠪᠤᠶᠤ ᠰᠠᠨᠰᠺᠷᠢᠲ ᠢ᠋ᠶ᠋ᠠᠷ ᠮᠠᠳ᠋ᠶ᠋ᠮᠢᠺᠠ ᠰᠤᠳᠤᠯᠵᠤ ᠭᠦᠨ ᠤᠬᠠᠭᠠᠨ ᠲᠠᠢ ᠪᠣᠯᠤᠨᠠ᠃ ᠵᠤᠳ᠋ ᠪᠤᠶᠤ ᠰᠠᠨᠰᠺᠷᠢᠲ ᠢ᠋ᠶ᠋ᠠᠷ ᠠᠪᠢᠳᠠᠷᠮᠠ ᠰᠤᠳᠤᠯᠵᠤ ᠣᠷᠴᠢᠯᠠᠩ ᠤ᠋ᠨ ᠮᠡᠳᠡᠯᠭᠡ ᠲᠡᠢ ᠪᠣᠯᠤᠨᠠ᠃ ᠲᠣᠯᠢᠪᠠ ᠪᠤᠶᠤ ᠰᠠᠨᠰᠺᠷᠢᠲ ᠢ᠋ᠶ᠋ᠠᠷ ᠸᠠᠨᠠᠢ ᠰᠤᠳᠤᠯᠵᠤ ᠯᠠᠮᠠ ᠶ᠋ᠢᠨ ᠰᠤᠷᠭᠠᠯ ᠳ᠋ᠤ᠌ ᠨᠡᠪᠲᠡᠷᠬᠡᠢ ᠪᠣᠯᠤᠨᠠ᠃ ᠴᠢᠨᠠᠳᠤ ᠶ᠋ᠢᠨ ᠡᠨᠡ ᠬᠦ᠌ ᠲᠠᠪᠤᠨ ᠠᠢᠮᠠᠭ ᠰᠠᠪᠠ ᠤᠬᠠᠭᠠᠨ ᠢ᠋ ᠰᠤᠳᠤᠯᠵᠤ ᠥᠪᠡᠷ ᠦ᠋ᠨ ᠣᠶᠤᠨ ᠤ᠋ ᠰᠠᠪᠠᠨ ᠳ᠋ᠤ᠌ ᠪᠠᠭᠲᠠᠭᠠᠵᠤ ᠠᠪᠬᠤ ᠶ᠋ᠢᠨ ᠲᠤᠯᠠ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠢ᠋ ᠵᠠᠷᠤᠴᠠᠭᠤᠯᠵᠤ ᠬᠡᠳᠦᠨ ᠲᠦᠮᠡᠨ ᠮᠥᠷ ᠰᠢᠯᠦᠭ ᠴᠡᠭᠡᠵᠢᠯᠡᠨᠡ᠃ ᠡᠳᠡᠭᠡᠷ ᠨᠣᠮᠯᠠᠯ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠯᠦᠭᠯᠡᠵᠦ ᠪᠢᠴᠢᠭᠰᠡᠨ ᠵᠦᠢᠯ ᠲᠤᠯᠠ ᠴᠡᠭᠡᠵᠢᠯᠡᠬᠦ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ᠃ ᠪᠠᠰᠠ ᠴᠡᠭᠡᠵᠢᠯᠡᠪᠡᠴᠦ ᠤᠳᠬᠠ ᠰᠠᠨᠠᠭᠠ ᠶ᠋ᠢ ᠤᠬᠠᠭᠠᠷᠠᠬᠤ ᠳ᠋ᠤ᠌ ᠠᠮᠠᠷ ᠦᠭᠡᠢ᠃ ᠡᠢᠮᠦ ᠳ᠋ᠦ᠍ ᠴᠢᠨᠠᠳᠤ ᠶ᠋ᠢᠨ ᠶᠤᠭᠴᠠᠭᠠ ᠪᠤᠶᠤ ᠲᠠᠢᠯᠪᠤᠷᠢ ᠶ᠋ᠢ ᠰᠤᠳᠤᠯᠤᠨᠠ᠃
ᠲᠠᠪᠤᠨ ᠤᠬᠠᠭᠠᠨ ᠤ᠋ ᠨᠣᠮᠯᠠᠯ ᠪᠦᠷᠢ ᠶ᠋ᠢ ᠰᠤᠳᠤᠯᠬᠤ ᠳ᠋ᠤ᠌ ᠨᠠᠮᠳᠡᠯ ᠳ᠋ᠦ᠍ ᠳᠥᠷᠪᠡᠨ ᠵᠢᠩᠳᠠᠭᠠ ᠫᠠᠷᠴᠢᠨ ᠳ᠋ᠤ᠌ ᠲᠠᠪᠤᠨ ᠵᠢᠩᠳᠠᠭᠠ᠂ ᠤᠮᠠ ᠳ᠋ᠤ᠌ ᠬᠣᠶᠠᠷ ᠵᠢᠩᠳᠠᠭᠠ᠂ ᠵᠤᠳ᠋ ᠬᠣᠶᠠᠷ ᠵᠢᠩᠳᠠᠭᠠ ᠳᠦᠭᠦᠷᠭᠡᠬᠦ ᠤᠴᠢᠷ ᠲᠠᠢ ᠠᠵᠢ᠃ ᠰᠡᠩᠵᠢ ᠭᠡᠰᠦᠯ ᠨᠠᠮᠳᠡᠯ ᠦ᠋ᠨ ᠬᠠᠳᠠᠭ᠂ ᠵᠤᠮᠪᠷᠠᠢ᠂ ᠰᠢᠳᠤᠪ ᠵᠢᠩᠳᠠᠭᠠ ᠶ᠋ᠢ ᠨᠢᠭᠡᠨᠲᠡ ᠨᠤᠲᠤᠭ ᠲᠠᠭᠠᠨ ᠳᠦᠭᠦᠷᠭᠡᠭᠰᠡᠨ ᠪᠠᠢᠯᠠ᠃ ᠬᠡᠷᠪᠡ ᠬᠦᠰᠡᠪᠡᠯ ᠡᠳᠡᠭᠡᠷ ᠢ᠋ ᠰᠢᠯᠭᠠᠭᠤᠯᠤᠭᠠᠳ ᠰᠢᠭᠤᠳ ᠶᠣᠯᠴᠠᠨ ᠵᠢᠩᠳᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠪᠣᠯᠬᠤ ᠶᠤᠮ᠃ ᠭᠡᠪᠡᠴᠦ ᠲᠡᠭᠡᠬᠦ ᠶ᠋ᠢ ᠰᠡᠩᠵᠢ ᠭᠡᠰᠦᠯ ᠬᠦᠰᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠨᠢ ᠴᠦ᠍ ᠵᠥᠪ ᠪᠣᠯᠵᠠᠢ᠃
ᠭᠡᠰᠦᠯ ᠰᠡᠩᠵᠢ ᠶ᠋ᠢᠨ ᠵᠢᠩᠳᠠᠭᠠᠨ ᠳ᠋ᠤ᠌ ᠠᠷᠪᠠᠨ ᠳᠥᠷᠪᠡᠨ ᠭᠡᠰᠦᠯ ᠣᠷᠣᠵᠠᠢ᠃ ᠭᠠᠭᠴᠠᠬᠠᠨ ᠮᠣᠩᠭᠣᠯ᠂ ᠬᠥᠬᠡᠨᠠᠭᠤᠷ ᠤ᠋ᠨ ᠥᠭᠡᠯᠡᠳ ᠨᠢᠭᠡ᠂ ᠬᠣᠪᠣᠭᠰᠠᠶᠢᠷ ᠤ᠋ᠨ ᠲᠣᠷᠭᠤᠳ ᠨᠢᠭᠡ᠂ ᠪᠤᠰᠤᠳ ᠨᠢ ᠲᠥᠪᠡᠳ ᠦ᠋ᠳ ᠪᠠᠢᠯᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠪᠣᠳᠫᠠ ᠪᠤᠶᠤ ᡀᠠᠰᠠ ᠶ᠋ᠢᠨ ᠲᠥᠪᠡᠳ ᠦ᠋ᠳ ᠳᠡᠢᠯᠦᠩᠭᠢ ᠠᠵᠢ᠃ ᠬᠡᠳᠦᠨ ᠠᠮᠳᠣᠪᠠ ᠂ ᠺᠠᠮᠪᠠ᠂ ᠵᠣᠨᠪᠠ ᠨᠠᠷ ᠪᠠᠢᠪᠠ᠃ ᠡᠨᠡ ᠨᠢ ᠪᠠᠰᠠ ᠯᠠ ᠲᠥᠪᠡᠳ ᠬᠥᠮᠦᠰ ᠪᠥᠭᠡᠳ ᠭᠠᠭᠴᠠ ᠬᠦ᠌ ᠠᠮᠳᠤᠤ (ᠠᠨᠳᠤᠤ) ᠵᠠᠩ᠂ ᠭᠡᠮ ᠨᠤᠲᠤᠭ ᠤ᠋ᠨ ᠬᠢ ᠭᠡᠳᠡᠭ ᠢ᠋ᠶ᠋ᠡᠨ ᠢᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠲᠡᠢᠨ ᠬᠦ᠌ ᠥᠪᠡᠷᠰᠡᠳ ᠢ᠋ ᠪᠡᠨ ᠨᠡᠷᠡᠯᠡᠳᠡᠭ ᠪᠠᠢᠵᠠᠢ᠃ ᠨᠢᠭᠡ ᠬᠠᠴᠧ ᠭᠡᠳᠡᠭ ᠨᠢ ᠶᠡᠬᠡ ᠠᠮᠠᠲᠤ ᠭᠡᠮᠡᠨ ᠺᠠᠱᠮᠢᠷ ᠬᠥᠮᠦᠰ ᠢ᠋ ᠲᠥᠪᠡᠳ ᠦ᠋ᠳ ᠬᠣᠴᠢᠯᠠᠳᠠᠭ ᠦᠭᠡ ᠪᠣᠯᠠᠢ᠃ ᠥᠭᠡᠷᠡ ᠳ᠋ᠠᠴᠠᠩ ᠳ᠋ᠤ᠌ ᠬᠠᠷᠢᠨ ᠬᠠᠴᠧ ᠨᠠᠷ ᠣᠯᠠᠨ ᠪᠠᠢᠪᠠ᠃
ᠴᠢᠨᠠᠳᠤ ᠶ᠋ᠢᠨ ᠨᠠᠮᠳᠡᠯ ᠦᠵᠡᠬᠦ ᠵᠤᠮᠪᠷᠠᠢ ᠵᠢᠩᠳᠠᠭᠠᠨ ᠳ᠋ᠤ᠌ ᠶᠡᠬᠡᠩᠬᠢ ᠨᠢ ᠮᠣᠩᠭᠣᠯᠴᠤᠳ ᠪᠠᠢᠬᠤ ᠶ᠋ᠢ ᠰᠡᠩᠵᠢ ᠣᠯᠵᠤ ᠮᠡᠳᠡᠭᠡᠳ ᠲᠡᠨᠳᠡ ᠣᠷᠣᠳᠠᠭ ᠪᠠᠢᠵᠤ ᠤᠤ ᠭᠡᠵᠦ ᠡᠷᠡᠭᠡᠯᠵᠡᠭᠰᠡᠨ ᠪᠣᠯᠪᠠᠴᠤ ᠲᠥᠪᠡᠳ ᠬᠡᠯᠡ ᠪᠡᠨ ᠰᠠᠢᠨ ᠰᠤᠷᠬᠤ ᠳ᠋ᠤ᠌ ᠳᠥᠭᠥᠮ ᠭᠡᠮᠡᠨ ᠤᠤᠯ ᠰᠣᠩᠭᠣᠭᠰᠠᠨ ᠵᠢᠩᠳᠠᠭᠠᠨ ᠳ᠋ᠠᠭᠠᠨ ᠰᠤᠷᠬᠤ ᠪᠠᠷ ᠬᠠᠲᠠᠭᠤ ᠰᠢᠢᠳᠴᠡᠢ᠃
ᠴᠣᠭᠴᠢᠨ ᠳᠤᠭᠠᠩ ᠳ᠋ᠤ᠌ ᠬᠣᠷᠢᠨ ᠲᠠᠪᠤᠨ ᠲᠣᠬᠣᠢ ᠥᠨᠳᠥᠷ ᠮᠠᠢᠳᠠᠷ ᠪᠤᠷᠬᠠᠨ ᠢ᠋ ᠪᠠᠯᠪᠤ ᠶ᠋ᠢᠨ ᠳᠠᠷᠬᠠᠨ ᠤᠷᠠᠯᠠᠨ ᠪᠦᠲᠦᠭᠡᠵᠡᠢ᠃ ᠮᠥᠨ ᠽᠤᠩᠭᠡᠸᠠ ᠶ᠋ᠢᠨ ᠥᠪᠡᠷ ᠢ᠋ᠶ᠋ᠡᠨ ᠠᠷᠠᠪᠨᠠᠶᠢᠯᠠᠭᠰᠠᠨ ᠭᠡᠳᠡᠭ ᠶᠠᠮᠠᠨᠳᠠᠭ ᠪᠤᠷᠬᠠᠨ ᠤ᠋ ᠬᠥᠷᠥᠭ ᠪᠠᠢᠯᠠ᠃ ᠭᠡᠰᠦᠯ ᠰᠡᠩᠵᠢ ᠴᠠᠢ ᠶ᠋ᠢᠨ ᠴᠠᠮ ᠪᠤᠶᠤ ᠵᠠᠪᠰᠠᠷᠯᠠᠭᠠ ᠪᠣᠯᠬᠤ ᠳ᠋ᠤ᠌ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠲᠡᠷᠡ ᠬᠦ᠌ ᠨᠠᠨᠳᠢᠨ ᠰᠢᠲᠦᠭᠡᠨ ᠢ᠋ ᠰᠣᠨᠢᠷᠬᠠᠨ ᠦᠵᠡᠯᠡ᠃
- ᠡᠨᠡ ᠶᠠᠮᠠᠨᠳᠠᠭ ᠤ᠋ᠨ ᠳᠣᠲᠣᠷᠠ ᠨᠢ ᠡᠪᠡᠷᠲᠦ ᠬᠡᠯᠡᠮᠦᠷᠴᠢ ᠷᠤᠯᠤᠤᠴᠠᠪ ᠤ᠋ᠨ ᠱᠠᠷᠢᠯ ᠪᠠᠢᠳᠠᠭ ᠶᠤᠮ᠃ ᠡᠨᠡ ᠷᠤᠯᠤᠤᠴᠠᠪ ᠬᠡᠯᠡᠮᠦᠷᠴᠢ ᠨᠢᠮᠪᠠ ᠬᠢᠵᠦ ᠣᠯᠠᠨ ᠵᠢᠯ ᠦ᠋ᠨ ᠨᠢᠮᠪᠠ ᠳ᠋ᠠᠭᠠᠨ ᠶᠠᠮᠠᠨᠳᠠᠭ ᠱᠦᠭᠯᠡᠵᠦ ᠲᠣᠯᠣᠭᠠᠢ ᠳ᠋ᠤᠨᠢ ᠡᠪᠡᠷ ᠣᠷᠭᠣᠲᠠᠯᠠ ᠰᠠᠭᠤᠭᠰᠠᠨ ᠶᠤᠮ ᠭᠡᠮᠡᠨ ᠭᠡᠯᠦᠩ ᠴᠤᠢᠮᠴᠤᠭ ᠱᠠᠪᠢ ᠳ᠋ᠠᠭᠠᠨ ᠰᠡᠮᠬᠡᠨ ᠲᠠᠢᠯᠪᠤᠷᠢᠯᠠᠪᠠ᠃
《 ᠷᠤᠯᠤᠤᠴᠠᠪ ᠰᠢᠭ᠋ ᠨᠢᠮᠪᠠᠯᠠᠨ ᠬᠢᠴᠢᠶᠡᠩᠭᠦᠢᠯᠡᠵᠦ ᠰᠤᠷᠤᠯᠴᠠ》 ᠭᠡᠰᠡᠨ ᠵᠠᠬᠢᠶᠠᠰᠤ ᠪᠣᠯᠭᠠᠨ ᠲᠡᠭᠦᠨ ᠢ᠋ ᠭᠡᠰᠦᠯ ᠰᠡᠩᠵᠢ ᠤᠬᠠᠭᠠᠷᠠᠵᠠᠢ᠃
ᠴᠣᠭᠴᠢᠨ ᠳ᠋ᠤ᠌ ᠨᠡᠢᠲᠡ ᠶ᠋ᠢᠨ ᠬᠤᠷᠠᠯ ᠥᠨᠳᠥᠷᠯᠡᠮᠡᠭᠴᠡ ᠭᠡᠰᠦᠯ ᠰᠡᠩᠵᠢ ᠰᠣᠩᠭᠣᠵᠤ ᠠᠪᠤᠭᠰᠠᠨ ᠴᠢᠨᠠᠳᠤ ᠨᠣᠮ ᠢ᠋ᠶ᠋ᠠᠨ ᠦᠵᠡᠬᠦ ᠪᠡᠷ ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠣᠴᠢᠪᠠ᠃ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠡᠭᠦᠳᠡᠨ ᠳᠡᠭᠡᠷᠡ ᠭᠤᠷᠪᠠᠨ ᠱᠣᠩ ᠪᠠᠢᠯᠠ᠃ ᠲᠡᠳᠡᠨ ᠦ᠌ ᠨᠢᠭᠡ ᠨᠢ ᠬᠣᠭᠣᠰᠣᠨ᠂ ᠬᠣᠶᠠᠷ ᠲᠤ᠌ ᠨᠢ ᠨᠢᠭᠡ ᠨᠢᠭᠡ ᠪᠠᠨᠳᠢ ᠶ᠋ᠢ ᠪᠠᠷᠢᠵᠤ ᠬᠦᠯᠢᠭᠡᠳ ᠪᠥᠭᠰᠡ ᠶ᠋ᠢ ᠨᠢ ᠭᠠᠷᠭᠠᠨ ᠭᠤᠪᠤᠷᠤᠤᠲᠤᠲᠠᠯᠠ ᠨᠢ ᠲᠣᠷᠯᠣᠭᠳᠠᠵᠤ ᠪᠠᠢᠭᠠ ᠲᠠᠢ ᠭᠡᠰᠦᠯ ᠲᠣᠬᠢᠶᠠᠯᠳᠤᠵᠤ ᠰᠦᠷᠳᠡᠨ ᠠᠶᠤᠪᠠ᠃ ᠬᠤᠷᠠᠯ ᠤ᠋ᠨ ᠦᠶᠡ ᠪᠡᠷ ᠰᠠᠬᠢᠯᠭᠠ ᠠᠯᠳᠠᠭᠰᠠᠨ ᠪᠠᠨᠳᠢ ᠨᠠᠷ ᠢ᠋ ᠲᠡᠭᠡᠵᠦ᠂ ᠴᠡᠭᠡᠷᠯᠡᠯ ᠦᠵᠡᠭᠦᠯᠳᠡᠭ ᠠᠵᠢ᠃ ᠲᠡᠪᠡᠷᠢ ᠰᠢᠬᠠᠮ ᠪᠦᠳᠦᠭᠦᠨ ᠱᠣᠩ ᠤ᠋ᠳ ᠰᠢᠷᠭᠠᠯ ᠥᠩᠭᠡ ᠪᠡᠷ ᠭᠢᠯᠲᠠᠭᠠᠨᠠᠲᠠᠯᠠ ᠪᠠᠨ ᠵᠦᠯᠭᠦᠭᠳᠡᠭᠰᠡᠨ ᠢ᠋ ᠪᠣᠳᠣᠪᠠᠯ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠬᠤᠸᠠᠷᠠᠭ ᠤ᠋ᠳ ᠣᠯᠠᠨ ᠣᠨ ᠢ᠋ ᠳᠠᠮᠵᠢᠭᠰᠠᠨ ᠤᠯᠠᠮᠵᠢᠯᠠᠯ ᠲᠠᠢ ᠨᠢ ᠢᠯᠡᠷᠬᠡᠢ᠃ ᠪᠠᠰᠠ ᠲᠡᠭᠡᠭᠡᠳ ᠡᠳᠡᠭᠡᠷ ᠱᠣᠩ ᠤ᠋ᠳ ᠢ᠋ ᠲᠡᠪᠡᠷᠢᠵᠤ᠋ ᠪᠠᠷᠬᠢᠷᠠᠭᠰᠠᠨ ᠨᠢ ᠲᠣᠭᠠᠯᠠᠪᠠᠴᠤ ᠪᠠᠷᠠᠰᠢ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ᠃ ᠱᠣᠩ ᠤ᠋ᠨ ᠢᠷᠣᠭᠠᠷ ᠲᠤ᠌ ᠭᠠᠵᠠᠷ ᠨᠢ ᠬᠦᠷᠲᠡᠯᠡ ᠬᠣᠩᠬᠣᠢᠵᠠᠢ᠃
- ᠰᠠᠬᠢᠯ ᠢ᠋ᠶ᠋ᠠᠨ ᠪᠠᠲᠤ ᠰᠠᠬᠢᠵᠤ ᠪᠠᠢᠪᠠᠯ ᠡᠢᠮᠦ ᠶᠠᠭᠤᠮᠠ ᠬᠦᠷᠲᠡᠬᠦ ᠦᠭᠡᠢ ᠯᠡ ᠳᠡ᠃ ᠱᠣᠩ ᠤᠶᠠᠭᠤᠯᠵᠤ ᠲᠣᠷᠯᠣᠭᠳᠠᠭᠤᠯᠬᠤ ᠴᠤ᠌ ᠭᠠᠢᠭᠤᠢ ᠵᠦᠢᠯ᠃ ᠬᠠᠷᠢᠨ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠲᠢᠭᠪᠠᠷᠠᠨᠵᠠ ᠲᠠᠢ ᠱᠣᠷᠣᠩ ᠳ᠋ᠤ᠌ ᠣᠷᠣᠪᠠᠯ ᠤᠤ ᠲᠡᠷᠡ ᠯᠠ ᠠᠶᠤᠯ ᠲᠠᠢ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠱᠠᠪᠢ ᠳ᠋ᠠᠭᠠᠨ ᠵᠠᠬᠢᠯᠠ᠃ ᠲᠢᠭᠪᠠᠷᠠᠨᠵᠠ ᠲᠠᠢ ᠱᠣᠷᠣᠩ ᠲᠥᠪᠡᠳ ᠭᠠᠵᠠᠷ ᠴᠥᠭᠡᠨ ᠪᠢᠰᠢ ᠶᠦᠮ ᠰᠠᠨᠵᠠᠢ᠃《ᠠᠷᠢᠭᠤᠨ ᠶᠡᠬᠡ ᠬᠤᠲᠤᠭᠲᠤ ᠪᠤᠷᠬᠠᠳ᠂ ᠲᠡᠳᠡᠨ ᠦ᠌ ᠣᠷᠣᠢ ᠶ᠋ᠢᠨ ᠳᠡᠭᠡᠳᠦ ᠨᠢ ᠪᠣᠯᠤᠭᠰᠠᠨ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠵᠠᠯᠠᠷᠠᠨ ᠰᠠᠭᠤᠵᠤ᠂ ᠪᠤᠷᠬᠠᠨ ᠤ᠋ ᠦᠢᠯᠡ ᠪᠦᠲᠦᠭᠡᠳᠡᠭ ᠪᠤᠳᠠᠯᠠᠩ ᠤ᠋ᠨ ᠶᠡᠬᠡ ᠣᠷᠳᠣᠨ ᠤ᠋ ᠵᠡᠭᠦᠨ ᠳᠣᠣᠷᠠᠲᠤ ᠳᠠᠪᠬᠤᠷ ᠲᠤ᠌ ᠬᠦᠷᠲᠡᠯᠡ ᠲᠢᠭᠪᠠᠷᠠᠨᠵᠠ ᠲᠠᠢ ᠨᠦᠬᠡᠨ ᠬᠠᠷᠠᠩᠭᠤᠢ ᠱᠣᠷᠣᠩ ᠪᠠᠢᠳᠠᠭ ᠭᠡᠳᠡᠭ ᠢ᠋ ᠱᠠᠪᠢ ᠳ᠋ᠠᠭᠠᠨ ᠬᠡᠯᠡᠶᠡ ᠪᠠᠢᠵᠠ》 ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠪᠣᠳᠣᠭᠠᠳ ᠬᠡᠯᠡᠨ ᠳᠡᠭᠡᠷᠡ ᠨᠢ ᠲᠡᠷᠡ ᠦᠭᠡ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ ᠳ᠋ᠦ᠍ᠷ ᠲᠦᠳᠡᠭᠡᠯᠵᠡᠨ ᠳᠠᠭᠤ ᠪᠠᠨ ᠬᠤᠷᠢᠶᠠᠵᠠᠢ᠃
ᠪᠤᠳᠠᠯᠠᠩ ᠤ᠋ᠨ ᠣᠷᠳᠣᠨ ᠤ᠋ ᠲᠡᠷᠡ ᠬᠦ᠌ ᠱᠣᠷᠣᠩ ᠤ᠋ᠨ ᠬᠠᠮᠤᠭ ᠤ᠋ᠨ ᠠᠶᠤᠮᠰᠢᠭᠲᠠᠢ ᠨᠢ ᠢᠮᠠᠭᠠᠨ ᠤ᠋ ᠤᠭᠤᠴᠠ᠂ ᠲᠢᠭᠪᠠᠷᠠᠨᠵᠠ ᠬᠣᠷᠣᠬᠠᠢ ᠪᠠᠷ ᠲᠦᠭᠦᠷᠡᠭᠰᠡᠨ ᠬᠠᠷᠠᠩᠭᠤᠢ ᠬᠠᠷᠠ ᠨᠦᠬᠡ ᠶᠦᠮ᠃ ᠲᠡᠭᠦᠨ ᠤᠷᠤᠭᠤ ᠶᠠᠯᠠᠲᠠᠨ ᠬᠥᠮᠦᠨ ᠢ᠋ ᠨᠢᠴᠦᠭᠦᠯᠡᠭᠡᠳ ᠰᠢᠳᠡᠵᠦ ᠣᠷᠬᠢᠳᠠᠭ᠃ ᠥᠯᠥᠰᠬᠦᠯᠡᠩ ᠬᠣᠷᠣᠬᠠᠢ ᠨᠤᠭᠤᠳ ᠲᠡᠷᠡ ᠳᠣᠣᠷᠠ ᠪᠠᠨ ᠨᠥᠭᠥᠭᠡᠬᠢ ᠨᠢᠴᠦᠭᠦᠨ ᠬᠥᠮᠦᠨ ᠢ᠋ ᠲᠠᠯᠠ ᠲᠠᠯᠠ ᠠ᠋ᠴᠠ ᠨᠢ ᠰᠢᠪᠡᠵᠤ ᠠᠪᠤᠭᠠᠳ ᠢᠳᠡᠵᠦ᠂ ᠵᠤᠯᠭᠠᠭᠠᠵᠤ ᠭᠠᠷᠳᠠᠭ᠃ ᠬᠥᠮᠦᠨ ᠲᠡᠢᠨ ᠬᠦ᠌ ᠳᠢᠭᠪᠠᠷᠠᠨᠵᠠ ᠳ᠋ᠤ᠌ ᠰᠢᠪᠠᠭᠤᠯᠤᠭᠠᠳ ᠲᠤᠩ ᠴᠤ᠌ ᠶᠡᠬᠡ ᠤᠳᠠᠯ ᠦᠭᠡᠢ ᠠᠮᠠ ᠪᠠᠷ ᠨᠢ ᠬᠥᠭᠡᠰᠦ ᠴᠢᠬᠠᠷᠠᠨ ᠠᠮᠢᠰᠬᠤᠯ ᠬᠤᠷᠢᠶᠠᠳᠠᠭ ᠠᠵᠢ᠃ ᠲᠡᠷᠡ ᠪᠣᠯ ᠦᠬᠦᠯ ᠦ᠋ᠨ ᠮᠠᠭᠤ ᠦᠬᠦᠯ ᠪᠠᠢᠳᠠᠭ ᠪᠣᠯᠠᠢ᠃ ᠭᠡᠯᠦᠩ ᠴᠤᠢᠮᠴᠤᠭ ᠮᠡᠳᠡᠳᠡᠭ ᠪᠦᠬᠦᠨ ᠢ᠋ᠶ᠋ᠡᠨ ᠱᠠᠪᠢ ᠳ᠋ᠠᠭᠠᠨ ᠶᠠᠷᠢᠵᠤ ᠥᠭᠴᠦ ᠪᠠᠢᠭᠠ ᠪᠣᠯᠪᠠᠴᠤ ᠡᠨᠡ ᠲᠤᠬᠠᠢ ᠶᠠᠷᠢᠬᠤ ᠠ᠋ᠴᠠ ᠲᠦᠪᠡᠭᠰᠢᠶᠡᠵᠡᠢ᠃
ᠭᠣᠮᠠᠨ ᠳ᠋ᠠᠴᠠᠩ ᠳ᠋ᠤ᠌ ᠭᠡᠰᠦᠯ ᠰᠡᠩᠵᠢ ᠶ᠋ᠢᠨ ᠠᠩᠬᠠᠨ ᠤ᠋ ᠴᠣᠢᠳᠣᠭ ᠡᠬᠢᠯᠡᠪᠡ᠃ ᠨᠠᠮᠳᠡᠯ ᠦ᠋ᠨ ᠬᠠᠳᠠᠭ ᠵᠢᠩᠳᠠᠭᠠᠨ ᠤ᠋ ᠴᠣᠢᠳᠣᠭ ᠪᠤᠶᠤ ᠬᠢᠴᠢᠶᠡᠯ ᠦ᠋ᠨ ᠨᠢ ᠴᠠᠭ ᠡᠳᠦᠷ ᠲᠦ᠍ ᠳᠥᠷᠪᠡᠨ ᠤᠳᠠᠭᠠ ᠶᠤᠮ᠃ ᠳᠤᠮᠳᠠ ᠪᠠᠨ ᠬᠣᠶᠠᠷ ᠤᠳᠠᠭᠠ ᠶ᠋ᠢᠨ ᠴᠣᠢᠨᠳᠠᠮ (ᠵᠠᠪᠰᠠᠷᠯᠠᠭᠠ) ᠲᠠᠢ᠂ ᠥᠷᠯᠥᠭᠡᠭᠦᠷ ᠱᠤᠭᠠ ᠴᠣᠢᠷᠣᠠ᠂ ᠳᠠᠷᠠᠭᠠ ᠦᠳᠡ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠭᠦᠩᠴᠢᠭ ᠴᠣᠢᠷᠣᠠ᠂ ᠣᠷᠣᠢ ᠭᠦᠷᠢᠮ ᠴᠣᠢᠷᠣᠠ ᠪᠣᠯᠤᠨᠠ ᠃ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠴᠥᠮ ᠨᠢᠭᠡᠨ ᠢᠵᠢᠯ ᠬᠤᠪᠴᠠᠰᠤ ᠲᠠᠢ ᠪᠠᠢᠯᠠ᠃ ᠯᠾᠠᠮᠠᠭᠤᠢ ᠭᠡᠳᠡᠭ ᠲᠠᠪᠰᠢᠭᠠᠷ ᠭᠤᠲᠤᠯ᠂ ᠮᠠᠳᠢᠶᠠᠭ ᠭᠡᠳᠡᠭ ᠳᠣᠲᠣᠭᠤᠷ ᠪᠠᠩᠵᠠᠯ᠂ ᠳ᠋ᠤᠳ᠋ᠭᠤᠢ ᠭᠡᠳᠡᠭ ᠴᠡᠭᠡᠵᠢᠪᠴᠢ᠂ ᠱᠠᠨᠲᠠᠪ ᠭᠡᠳᠡᠭ ᠭᠠᠳᠠᠭᠤᠷ ᠪᠠᠩᠵᠠᠯ᠂ ᠳ᠋ᠠᠭᠠᠮ ᠭᠡᠳᠡᠭ ᠬᠦᠷᠢᠨ ᠤᠯᠠᠭᠠᠨ ᠣᠷᠬᠢᠮᠵᠢ᠂ ᠳᠠᠩᠪᠠ ᠡᠷᠢᠭᠡ ᠴᠠᠪᠢᠷ ᠲᠡᠷᠢᠭᠦᠲᠡᠨ ᠱᠠᠰᠧᠷ ᠮᠠᠯᠠᠭᠠᠢ᠂ ᠰᠸᠨᠢ ᠭᠡᠳᠡᠭ ᠨᠥᠮᠥᠷᠭᠡ ᠡᠳᠡᠭᠡᠷ ᠢ᠋ ᠴᠥᠮ ᠢ᠋ ᠴᠦ᠍ ᠰᠢᠨᠡ ᠪᠡᠷ ᠬᠢᠯᠭᠡᠨ ᠡᠮᠦᠰᠦᠭᠰᠡᠨ ᠠᠷᠪᠠᠨ ᠬᠡᠳᠦᠨ ᠨᠠᠰᠤᠨ ᠤ᠋ ᠵᠠᠯᠠᠭᠤᠬᠠᠨ ᠭᠡᠰᠦᠯ ᠨᠠᠷ ᠵᠠᠪᠳᠤᠩ ᠳ᠋ᠤ᠌ ᠡᠩᠨᠡᠨ ᠰᠠᠭᠤᠵᠠᠭᠠᠴᠠᠢ᠃ ᠡᠬᠢᠨ ᠦ᠌ ᠡᠩᠨᠡᠭᠡᠨ ᠳ᠋ᠦ᠍ ᠰᠡᠩᠵᠢ ᠰᠠᠭᠤᠯᠠ᠃ ᠣᠳᠣ ᠡᠳᠡᠨᠠᠷ ᠢ᠋ ᠭᠡᠰᠦᠯ ᠪᠢᠰᠢ ᠬᠠᠷᠢᠨ ᠯᠤᠪᠨᠠᠷᠪᠠ ᠨᠠᠷ ᠭᠡᠵᠦ ᠨᠡᠷᠡᠯᠡᠨᠡ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠰᠤᠷᠤᠭᠴᠢᠳ ᠭᠡᠰᠡᠨ ᠦᠭᠡ᠃ ᠬᠡᠷᠪᠡ ᠣᠯᠢᠭᠲᠠᠢ ᠶᠠᠭᠤᠮᠠ ᠰᠤᠷᠬᠤ ᠦᠭᠡᠢ ᠮᠠᠩᠭᠤᠤ ᠬᠥᠮᠦᠨ ᠪᠣᠯᠬᠤ ᠨᠢ ᠮᠡᠳᠡᠭᠳᠡᠪᠡᠯ ᠲᠡᠢᠮᠦ ᠭᠡᠰᠦᠯ ᠢ᠋ ᠳ᠋ᠤᠪᠳᠠᠭᠠ ᠪᠣᠯᠭᠠᠨᠠ᠃ ᠳ᠋ᠤᠪᠳᠠᠭᠠ ᠪᠣᠯ ᠨᠣᠮ ᠦᠭᠡᠢ᠂ ᠮᠠᠩᠭᠤᠤ ᠲᠣᠯᠣᠭᠠᠢᠲᠠᠨ ᠨᠤᠭᠤᠳ ᠤᠴᠢᠷ ᠬᠠᠷᠠ ᠠᠵᠢᠯ ᠳ᠋ᠤ᠌ ᠭᠣᠣᠯᠴᠢᠯᠠᠨ ᠵᠠᠷᠤᠭᠳᠠᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠯᠠᠮᠠ ᠶ᠋ᠢᠨ ᠬᠤᠪᠴᠠᠰᠤ ᠪᠠᠷ ᠬᠤᠪᠴᠠᠰᠤᠯᠠᠵᠤ ᠶᠠᠪᠤᠨᠠ᠃
- ᠮᠢᠨᠦ ᠱᠠᠪᠢ ᠴᠤ᠌ ᠠᠷᠠᠢ ᠨᠢᠭᠡ ᠳ᠋ᠤᠪᠳᠠᠭᠠ ᠪᠣᠯᠬᠤ ᠬᠥᠮᠦᠨ ᠪᠢᠰᠢ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠰᠡᠩᠵᠢ ᠶ᠋ᠢ ᠵᠠᠪᠳᠤᠩ ᠳ᠋ᠤᠨᠢ ᠰᠠᠭᠤᠯᠭᠠᠬᠤ ᠳ᠋ᠠᠭᠠᠨ ᠴᠢᠬᠢᠨ ᠳ᠋ᠦ᠍ᠨᠢ ᠰᠢᠪᠡᠨᠡᠬᠦ ᠳ᠋ᠦ᠍ ᠮᠠᠨᠢ ᠡᠷᠡ ᠶ᠋ᠢᠨ ᠰᠡᠳᠬᠢᠯ ᠬᠥᠭᠡᠷᠴᠦ ᠵᠣᠷᠢᠭ ᠣᠷᠣᠵᠠᠢ᠃
ᠪᠠᠷᠠᠪᠠᠩ ᠬᠡᠢᠳ ᠪᠣᠯ ᠢᠷᠡᠭᠡᠳᠦᠢ ᠳ᠋ᠦ᠍ ᠰᠢᠨᠵᠢᠭᠴᠢ ᠲᠥᠷᠥᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠯᠳᠠᠷᠰᠢᠭᠰᠠᠨ ᠪᠢᠯᠡ᠃ ᠪᠠᠰᠠ ᠡᠨᠡ ᠬᠡᠢᠳ ᠦ᠋ᠨ ᠭᠡᠰᠬᠦᠢ ᠨᠠᠷ ᠶᠡᠬᠡ ᠪᠠᠶᠠᠨ ᠶᠤᠮ᠃ ᠤᠴᠢᠷ ᠨᠢ ᡀᠠᠰᠠ ᠮᠣᠩᠯᠠᠮ ᠭᠡᠳᠡᠭ ᠢᠷᠦᠭᠡᠯ ᠤᠩᠰᠢᠬᠤ ᠯᠠᠮᠠ ᠨᠠᠷ ᠤ᠋ᠨ ᠳᠡᠭᠡᠳᠦ ᠴᠢᠭᠤᠯᠭᠠᠨ ᠢ᠋ ᠵᠢᠯ ᠪᠦᠷᠢ ᠶ᠋ᠢᠨ ᠲᠡᠷᠢᠭᠦᠨ ᠰᠠᠷᠠ ᠶ᠋ᠢᠨ ᠭᠤᠷᠪᠠᠨ ᠠ᠋ᠴᠠ ᠬᠣᠷᠢᠨ ᠭᠤᠷᠪᠠᠨ ᠬᠦᠷᠲᠡᠯᠡ ᠬᠤᠷᠠᠭᠤᠯᠬᠤ ᠳ᠋ᠤ᠌ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠭᠡᠰᠬᠦᠢ ᠨᠠᠷ ᠢ᠋ᠶ᠋ᠠᠷ ᠵᠢᠷᠤᠮ ᠰᠠᠬᠢᠭᠤᠯᠳᠠᠭ᠃ ᠲᠡᠷᠡ ᠣᠯᠠᠨ ᠮᠢᠩᠭᠠᠨ ᠯᠠᠮᠠ ᠨᠠᠷ ᠤ᠋ᠨ ᠴᠤᠭᠯᠠᠷᠠᠬᠤ ᠦᠶᠡ ᠳ᠋ᠦ᠍ ᠵᠥᠷᠢᠴᠡᠯ᠂ ᠠᠯᠳᠠᠰ ᠶᠡᠬᠡ ᠭᠠᠷᠳᠠᠭ ᠲᠤᠯᠠ ᠭᠡᠰᠬᠦᠢ ᠨᠠᠷ ᠢᠳᠡᠪᠬᠢᠲᠡᠢ ᠠᠵᠢᠯᠯᠠᠵᠤ ᠪᠦᠬᠦᠢᠯᠡ ᠲᠣᠷᠭᠠᠭᠤᠯᠢ ᠰᠢᠳᠬᠡᠯ ᠦ᠋ᠨ ᠬᠤᠷᠢᠶᠠᠮᠵᠢ ᠶ᠋ᠢ ᠠᠪᠳᠠᠭ ᠶᠤᠮ ᠰᠠᠨᠵᠠᠢ᠃ ᡀᠠᠰᠠ ᠮᠣᠩᠯᠠᠮ ᠤ᠋ᠨ ᠭᠡᠰᠬᠦᠢ ᠪᠣᠯᠬᠤ ᠶ᠋ᠢᠨ ᠲᠤᠯᠠᠳᠠ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠯᠠᠮᠠ ᠨᠠᠷ ᠠᠷᠪᠠᠨ ᠭᠤᠷᠪᠠᠨ ᠮᠡᠬᠡ ᠪᠡᠨ ᠭᠠᠷᠭᠠᠳᠠᠭ᠃ ᠵᠠᠷᠢᠮ ᠳ᠋ᠠᠭᠠᠨ ᠭᠡᠰᠬᠦᠢ ᠶ᠋ᠢᠨ ᠲᠤᠰᠢᠶᠠᠯ ᠢ᠋ ᠳᠥᠷᠪᠡᠨ ᠮᠢᠩᠭᠠᠨ ᠯᠠᠩ ᠮᠥᠩᠭᠥ ᠪᠡᠷ ᠴᠦ᠍ ᠬᠤᠳᠠᠯᠳᠤᠵᠤ ᠠᠪᠳᠠᠭ ᠪᠠᠢᠵᠠᠢ᠃ ᠭᠡᠪᠡᠴᠦ ᠣᠷᠣᠯᠭᠠ ᠬᠠᠪᠢ ᠦᠭᠡᠢ ᠢᠯᠡᠭᠦᠦ ᠪᠣᠯᠳᠠᠭ ᠨᠢ ᠯᠠᠪᠲᠠᠢ᠃ ᠬᠣᠷᠢᠨ ᠮᠢᠩᠭᠠᠨ ᠯᠠᠩ ᠲᠣᠰᠪᠣᠷᠢ ᠠ᠋ᠴᠠ ᠭᠠᠭᠴᠠ ᠯᠠᠩ ᠮᠥᠩᠭᠥ ᠠᠪᠬᠤ ᠳ᠋ᠤ᠌ ᠯᠠ ᠵᠠᠷᠤᠯᠭᠠ ᠪᠠᠨ ᠣᠷᠣᠯᠭᠠ ᠨᠢ ᠲᠠᠪᠤ ᠳᠠᠬᠢᠨ ᠳᠠᠪᠠᠨᠠ᠃ ᠢᠯᠠᠩᠭᠤᠶᠠ ᠭᠡᠯᠦᠩ ᠰᠠᠬᠢᠯ ᠦᠭᠡᠢ ᠯᠠᠮᠠ ᠨᠠᠷ ᠡᠭᠦᠨ ᠳ᠋ᠦ᠍ ᠶᠡᠬᠡ ᠳᠤᠷᠠᠯᠠᠨᠠ᠃ ᠤᠴᠢᠷ ᠨᠢ ᠭᠡᠯᠦᠩ ᠰᠠᠬᠢᠯ ᠦᠭᠡᠢ ᠭᠡᠰᠬᠦᠢ ᠪᠣᠯ ᠶᠠᠯᠠ ᠰᠢᠳᠬᠡᠯ ᠣᠨᠣᠭᠠᠬᠤ ᠡᠷᠬᠡ ᠲᠡᠢ᠃ ᠭᠡᠯᠦᠩ ᠰᠠᠬᠢᠯ ᠲᠠᠢ ᠭᠡᠰᠬᠦᠢ ᠰᠢᠳᠬᠡᠯ ᠣᠨᠣᠭᠠᠵᠤ ᠪᠣᠯᠳᠠᠭ ᠦᠭᠡᠢ ᠠᠵᠢ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠵᠠᠷᠢᠮ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠴᠠᠭᠠᠵᠠ ᠪᠠᠷ ᠠᠪᠬᠤ ᠶᠠᠯᠠ ᠣᠨᠣᠭᠠᠵᠤ ᠪᠣᠯᠤᠨᠠ᠃ ᠲᠡᠭᠡᠪᠡᠯ ᠭᠡᠯᠦᠩ ᠰᠠᠬᠢᠯ ᠵᠥᠷᠢᠴᠡᠵᠦ ᠠᠮᠢᠲᠠᠨ ᠤ᠋ ᠠᠮᠢ ᠪᠤᠰᠠᠨᠢᠭᠤᠯᠵᠤ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠠᠵᠢ᠃ ᠵᠠᠯᠠᠭᠤ ᠳ᠋ᠠᠭᠠᠨ ᠴᠤᠢᠮᠴᠤᠭ ᠭᠡᠯᠦᠩ ᠪᠠᠷᠠᠪᠠᠩ ᠬᠡᠢᠳ ᠲᠦ᠍ ᠰᠤᠷᠴᠤ ᠪᠠᠢᠬᠤ ᠳ᠋ᠠᠭᠠᠨ ᠰᠡᠷᠭᠦᠯᠡᠩ ᠵᠠᠩ ᠭᠠᠷᠭᠠᠵᠤ ᠨᠢᠭᠡ ᠤᠳᠠᠭᠠ ᡀᠠᠰᠠ ᠶ᠋ᠢᠨ ᠪᠠᠭᠠ ᠮᠣᠩᠯᠠᠮ ᠳ᠋ᠤ᠌ ᠭᠡᠰᠬᠦᠢ ᠪᠡᠷ ᠲᠣᠮᠢᠯᠠᠭᠳᠠᠵᠤ ᠣᠪᠣᠭᠠ ᠪᠠᠶᠠᠵᠢᠭᠰᠠᠨ ᠪᠢᠯᠡ᠃ ᠡᠨᠡ ᠲᠤᠬᠠᠢ ᠶ᠋ᠢ ᠪᠡᠨ ᠴᠦ᠍ ᠱᠠᠪᠢ ᠰᠡᠩᠵᠢ ᠳ᠋ᠡᠭᠠᠨ ᠪᠠᠰᠠ ᠶᠠᠷᠢᠭᠰᠠᠨ ᠦᠭᠡᠢ᠃
ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠲᠡᠷᠢᠭᠦᠨ ᠲᠢᠪ ᠯᠠᠮᠠ ᠨᠢ ᠪᠤᠶᠤ ᠰᠢᠷᠡᠭᠡᠲᠦ ᠯᠠᠮᠠ ᠨᠢ ᠰᠢᠨᠡ ᠢᠷᠡᠭᠰᠡᠨ ᠱᠠᠪᠢ ᠨᠠᠷ ᠢ᠋ᠶ᠋ᠠᠨ ᠠᠢᠬᠤᠪᠲᠤᠷ ᠨᠣᠴᠢᠲᠠᠢ ᠰᠢᠨᠵᠢᠨ ᠬᠠᠷᠠᠳᠠᠭ ᠲᠡᠢᠮᠦ ᠵᠠᠩᠰᠢᠯ ᠲᠠᠢ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠷᠡ ᠶᠣᠰᠣᠭᠠᠷ ᠪᠦᠬᠦ ᠯᠡ ᠱᠠᠪᠢ ᠨᠠᠷ ᠢ᠋ᠶ᠋ᠠᠨ ᠥᠷᠥᠮᠳᠡᠨ ᠴᠣᠷᠭᠢᠬᠤ ᠮᠡᠲᠦ ᠬᠠᠷᠠᠴᠠ ᠪᠠᠷ ᠳᠠᠷᠠᠭᠠᠯᠠᠨ ᠠᠵᠢᠵᠤ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠬᠠᠷᠠᠴᠠᠨ ᠠ᠋ᠴᠠ ᠳᠠᠯᠳᠢᠷᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠲᠡᠷᠡ ᠶᠡᠬᠡ ᠳᠤᠷᠠ ᠦᠭᠡᠢ ᠠᠵᠢ᠃ ᠲᠡᠷᠡ ᠲᠤᠬᠠᠢ ᠰᠡᠩᠵᠢ ᠭᠡᠰᠦᠯ ᠪᠠᠭᠰᠢ ᠠ᠋ᠴᠠ ᠪᠠᠨ ᠰᠣᠨᠣᠰᠴᠤ ᠮᠡᠳᠡᠭᠰᠡᠨ ᠲᠤᠯᠠ ᠲᠢᠪ ᠯᠠᠮᠠ ᠲᠠᠢ ᠬᠠᠷᠠᠴᠠ ᠮᠥᠷᠭᠥᠯᠳᠦᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠵᠦ ᠪᠠᠢᠪᠠ᠃ ᠭᠡᠪᠡᠴᠦ ᠠᠷᠭᠠ ᠪᠤᠶᠤ ᠨᠢᠭᠡ ᠤᠳᠠᠭᠠ ᠬᠠᠷᠠᠴᠠ ᠲᠤᠯᠭᠠᠷᠠᠪᠠ᠃ ᠰᠡᠩᠵᠢ ᠨᠢᠳᠦ ᠴᠠᠪᠴᠢᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠵᠦ ᠲᠢᠪ ᠯᠠᠮᠠ ᠶ᠋ᠢᠨ ᠰᠣᠷᠮᠤᠤᠰᠤᠨ ᠤ᠋ ᠦᠰᠦ ᠶ᠋ᠢ ᠲᠣᠭᠠᠯᠠᠬᠤ ᠭᠡᠵᠦ ᠣᠷᠣᠯᠳᠣᠪᠠ᠃ ᠨᠢᠭᠡ ᠪᠥᠷᠢᠴᠢᠯᠡᠨ ᠲᠣᠭᠠᠯᠠᠬᠤ ᠪᠠᠷ ᠲᠣᠳᠣ ᠬᠠᠷᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠣᠭᠠᠯᠠᠬᠤ ᠶ᠋ᠢ ᠣᠷᠣᠯᠳᠣᠪᠠ᠃ ᠨᠢᠭᠡᠪᠦᠷᠢᠴᠢᠯᠡᠨ ᠲᠣᠭᠠᠯᠠᠬᠤ ᠪᠠᠷ ᠲᠣᠳᠣ ᠬᠠᠷᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠲᠣᠭᠠᠯᠠᠬᠤ ᠶ᠋ᠢ ᠤᠷᠤᠯᠳᠤᠨ ᠨᠢᠳᠦ ᠤᠷᠤᠭᠤ ᠨᠢ ᠰᠢᠷᠳᠡᠵᠦ ᠪᠠᠢᠲᠠᠯᠠ ᠲᠢᠪ ᠯᠠᠮᠠ ᠥᠪᠡᠷ ᠢ᠋ᠶ᠋ᠡᠨ ᠲᠡᠰᠦᠭᠰᠡᠨ ᠦᠭᠡᠢ ᠬᠠᠷᠠᠴᠠ ᠪᠠᠨ ᠪᠤᠷᠤᠭᠤᠯᠠᠨ ᠥᠭᠡᠷᠡ ᠬᠥᠮᠦᠨ ᠤᠷᠤᠭᠤ ᠬᠠᠷᠠᠵᠠᠢ᠃
《ᠶᠠᠮᠠᠷ ᠴᠤ᠌ ᠭᠡᠰᠡᠨ ᠬᠠᠷᠠᠴᠠ ᠪᠠᠨ ᠳᠠᠯᠳᠢᠴᠢᠭᠤᠯᠤᠭᠰᠠᠨ ᠦᠭᠡᠢ᠃ ᠮᠢᠨᠦ ᠲᠤᠬᠠᠢ ᠮᠠᠭᠤ ᠶᠠᠭᠤᠮᠠ ᠯᠠ ᠰᠠᠨᠠᠬᠤ ᠦᠭᠡᠢ ᠪᠠᠢᠬᠠ!》 ᠭᠡᠵᠦ ᠰᠡᠩᠵᠢ ᠭᠡᠰᠦᠯ ᠪᠣᠳᠣᠪᠠ᠃
ᠠᠷᠰᠯᠠᠭᠲᠤ ᠲᠠᠪᠴᠠᠩ ᠳᠡᠭᠡᠷᠡ ᠪᠡᠨ ᠲᠢᠪ ᠯᠠᠮᠠ ᠰᠦᠷᠯᠢᠭ ᠶᠡᠬᠡᠮᠰᠦᠭ ᠰᠠᠭᠤᠬᠤ ᠨᠢ ᠦᠨᠡᠬᠡᠷ ᠠᠢᠳᠠᠰ ᠬᠦᠷᠦᠮᠡᠷ ᠃ ᠴᠠᠭᠠᠨ ᠦᠰᠦᠲᠡᠢ᠂ ᠤᠯᠠᠪᠢᠷ ᠰᠢᠷᠠ ᠵᠣᠭᠳᠣᠷ ᠲᠠᠢ ᠳᠥᠷᠪᠡᠨ ᠴᠠᠭᠠᠨ ᠠᠷᠰᠯᠠᠨ ᠪᠠᠷᠠᠭᠤᠨ ᠤᠷᠢᠳᠤ ᠬᠥᠯ ᠢ᠋ᠶ᠋ᠡᠨ ᠳᠡᠭᠡᠭᠰᠢ ᠡᠷᠭᠦᠭᠰᠡᠨ ᠪᠤᠰᠤᠳ ᠬᠥᠯ ᠨᠢ ᠳᠣᠭᠣᠭᠰᠢ ᠪᠠᠨ ᠲᠤᠯᠵᠤ ᠪᠠᠢᠭᠠ ᠶ᠋ᠢᠨ ᠳᠡᠭᠡᠷᠡᠬᠢ ᠳᠥᠷᠪᠡᠯᠵᠢᠨ ᠲᠠᠪᠴᠠᠩ ᠨᠢ ᠭᠤᠷᠪᠠᠨ ᠰᠠᠭᠯᠠᠭᠠᠷ ᠶᠡᠨᠳᠡᠷ ᠲᠠᠢ ᠰᠡᠨᠳᠡᠢ᠂ ᠪᠠᠩᠷᠢᠮ ᠢ᠋ᠶ᠋ᠠᠷ ᠴᠢᠮᠡᠭᠯᠡᠭᠳᠡᠵᠡᠢ᠃ ᠲᠡᠭᠦᠨ ᠳᠡᠭᠡᠷᠡ ᠲᠢᠪ ᠯᠠᠮᠠ ᠠᠯᠲᠠᠳᠠᠭᠰᠠᠨ ᠱᠤᠪᠤᠤᠳᠤᠢ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠴᠦ᠂ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠵᠠᠪᠢᠯᠠᠨ ᠰᠠᠭᠤᠨᠠ᠃ ᠴᠠᠰᠤᠲᠤ ᠶ᠋ᠢᠨ ᠴᠠᠭᠠᠨ ᠠᠷᠰᠯᠠᠨ ᠭᠠᠵᠠᠷ᠂ ᠲᠩᠷᠢ ᠶ᠋ᠢᠨ ᠵᠠᠪᠰᠠᠷ ᠲᠤ᠌ ᠱᠠᠰᠢᠨ ᠤ᠋ ᠠᠯᠢᠪᠠ ᠳᠠᠢᠰᠤᠨ ᠢ᠋ ᠰᠦᠷᠳᠡᠭᠦᠯᠦᠨ᠂ ᠣᠮᠣᠭ ᠢ᠋ ᠨᠢ ᠦᠬᠦᠭᠦᠯᠵᠦ᠂ ᠯᠠᠯᠤ ᠪᠣᠯᠤᠨ ᠰᠢᠮᠨᠤᠰ ᠲᠡᠷᠢᠭᠦᠲᠡᠨ ᠢ᠋ ᠨᠣᠮᠣᠬᠠᠳᠬᠠᠨ ᠳᠠᠷᠤᠵᠤ ᠪᠠᠢᠭᠠ ᠶ᠋ᠢ ᠪᠡᠯᠭᠡᠳᠡᠵᠦ ᠡᠢᠮᠦ ᠠᠷᠰᠯᠠᠲᠦ ᠲᠠᠪᠴᠠᠩ ᠵᠠᠰᠠᠵᠤ ᠥᠭᠳᠡᠭ ᠢ᠋ ᠭᠡᠰᠦᠯ ᠰᠡᠩᠵᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠪᠠ᠃
《ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠰᠢᠷᠡᠭᠡᠲᠦ ᠯᠠᠮᠠ ᠶ᠋ᠢᠨ ᠰᠡᠨᠳᠡᠢ ᠪᠠᠰᠠ ᠯᠠ ᠡᠢᠮᠦᠷᠬᠦ ᠪᠢᠯᠡ᠃ ᠠᠷᠭᠠ ᠦᠭᠡᠢ ᠯᠡ ᠡᠨᠡ ᠭᠠᠵᠠᠷ ᠠ᠋ᠴᠠ ᠳᠡᠯᠭᠡᠷᠡᠭᠰᠡᠨ ᠱᠠᠵᠢᠨ ᠶᠤᠮ》 ᠭᠡᠵᠦ ᠰᠡᠩᠵᠢ ᠭᠡᠰᠦᠯ ᠪᠣᠳᠣᠵᠤ ᠪᠠᠢᠯᠠ᠃
ᠳᠤᠭᠠᠩ ᠳ᠋ᠤ᠌ ᠽᠠᠳᠢ ᠶ᠋ᠢᠨ ᠦᠨᠦᠷᠲᠦ ᠬᠦᠵᠢ ᠣᠩᠭᠣᠳᠴᠤ ᠬᠥᠬᠡᠮᠳᠦᠭ ᠴᠡᠩᠬᠡᠷ ᠤᠲᠤᠭᠠ ᠨᠢ ᠲᠢᠪ ᠯᠠᠮᠠ ᠶ᠋ᠢᠨ ᠡᠮᠦᠨᠡᠭᠦᠷ ᠰᠤᠭᠤᠨᠠᠭᠯᠠᠵᠤ ᠪᠠᠢᠯᠠ᠃ ᠽᠠᠳᠢ ᠶ᠋ᠢᠨ ᠦᠨᠦᠷ ᠡᠴᠡ ᠮᠣᠭᠠᠢ ᠶᠡᠬᠡ ᠠᠶᠤᠳᠠᠭ ᠪᠣᠯᠬᠣᠷ ᠳᠤᠭᠠᠩ ᠳ᠋ᠤ᠌ ᠮᠣᠭᠠᠢ ᠣᠷᠣᠭᠤᠯᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠽᠠᠳᠢ ᠬᠣᠯᠢᠭᠰᠠᠨ ᠬᠦᠵᠢ ᠬᠡᠷᠡᠭᠯᠡᠳᠡᠭ ᠶᠦᠮ ᠰᠠᠨᠵᠠᠢ᠃ ᠭᠦᠵᠢ ᠳ᠋ᠦ᠍ ᠬᠣᠯᠢᠭᠰᠠᠨ ᠽᠠᠳᠢ ᠶ᠋ᠢᠨ ᠦᠨᠦᠷ ᠬᠠᠩᠬᠤᠯᠬᠤ ᠳ᠋ᠤ᠌ ᠥᠴᠥᠭᠡᠳᠦᠷ ᠮᠥᠷᠭᠥᠯ ᠢ᠋ᠶ᠋ᠡᠷ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠰᠡᠩᠵᠢ ᠭᠡᠰᠦᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠠᠨᠠᠯᠠ᠃ ᠮᠥᠷᠭᠥᠯᠴᠢᠳ ᠦ᠋ᠨ ᠵᠠᠮ ᠤ᠋ᠨ ᠬᠠᠵᠠᠭᠤᠬᠠᠨ ᠲᠠᠯᠠ ᠳᠠᠬᠢ ᠨᠢᠭᠡᠨ ᠲᠣᠮᠣ ᠰᠠᠷᠠᠯ ᠪᠤᠯᠤ ᠴᠢᠯᠠᠭᠤᠨ ᠤ᠋ ᠢᠷᠣᠭᠠᠷ ᠲᠤ᠌ ᠮᠣᠭᠠᠢ᠂ ᠬᠦᠷᠪᠡᠯ ᠬᠣᠶᠠᠷ ᠨᠣᠴᠣᠯᠳᠤᠵᠤ ᠪᠠᠢᠭᠰᠠᠨ᠃ ᠬᠦᠷᠪᠡᠯ ᠨᠦᠬᠡ ᠤᠷᠤᠭᠤ ᠭᠦᠶᠦᠨ ᠣᠷᠣᠬᠤ ᠳ᠋ᠤ᠌ ᠬᠣᠢᠨᠠ ᠠ᠋ᠴᠠ ᠨᠢ ᠮᠣᠭᠠᠢ ᠬᠥᠭᠡᠭᠡᠵᠦ ᠲᠠᠯᠠ ᠪᠡᠶᠡ ᠨᠢ ᠳᠠᠯᠳᠠᠷᠠᠭᠰᠠᠨ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠰᠡᠭᠦᠯ ᠦ᠋ᠨ ᠲᠠᠯᠠ ᠨᠢ ᠬᠡᠢ ᠭᠣᠵᠣᠯᠵᠠᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨ ᠳ᠋ᠤ᠌ ᠬᠠᠵᠠᠭᠤᠯᠤᠨ ᠵᠣᠪᠠᠬᠤ ᠰᠢᠭ᠋ ᠳᠠᠪᠴᠢᠳᠠᠨ ᠰᠠᠨᠳᠤᠷᠴᠤ ᠶᠡᠬᠡ ᠯᠡ ᠤᠲᠠᠵᠤ ᠪᠠᠢᠵᠤ ᠪᠤᠴᠠᠵᠤ ᠭᠠᠷᠴᠤ ᠢᠷᠡᠭᠡᠳ ᠴᠢᠯᠠᠭᠤᠨ ᠳᠣᠣᠭᠤᠷ ᠰᠢᠷᠭᠤᠭᠰᠠᠨ᠃
- ᠬᠦᠷᠪᠡᠯ ᠶᠡᠬᠡ ᠵᠠᠯᠢ ᠲᠠᠢ ᠠᠮᠢᠲᠠᠨ᠃ ᠨᠦᠬᠡᠨ ᠳᠣᠲᠣᠷᠠ ᠪᠠᠨ ᠳᠡᠭᠡᠭᠰᠢ ᠪᠡᠨ ᠡᠭᠴᠡ ᠭᠠᠷᠤᠭᠰᠠᠨ ᠬᠣᠷᠭᠣᠳᠠᠬᠤ ᠭᠠᠵᠠᠷ ᠣᠬᠣᠳᠠᠭ ᠶᠤᠮ᠃ ᠲᠡᠷᠡ ᠳᠣᠲᠣᠷᠠ ᠪᠠᠨ ᠨᠢᠭᠤᠭᠳᠠᠵᠤ ᠪᠠᠢᠭᠠᠳ ᠥᠪᠡᠷ ᠢ᠋ ᠪᠡᠨ ᠬᠥᠭᠡᠭᠡᠵᠦ ᠨᠦᠬᠡ ᠤᠷᠤᠭᠤ ᠣᠷᠣᠵᠤ ᠶᠠᠪᠤᠭᠠ ᠮᠣᠭᠠᠢ ᠶ᠋ᠢ ᠨᠢᠷᠤᠭᠤ ᠠ᠋ᠴᠠ ᠨᠢ ᠬᠠᠵᠠᠵᠤ ᠵᠠᠯᠬᠠᠭᠠᠳᠠᠭ᠃ ᠮᠣᠭᠠᠢ ᠶᠠᠭᠠᠬᠢᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠬᠠᠵᠠᠭᠤᠯᠵᠤ᠂ ᠬᠠᠵᠠᠭᠤᠯᠵᠤ ᠠᠪᠤᠭᠠᠳ ᠪᠤᠴᠠᠵᠤ ᠠᠮᠢ ᠲᠡᠮᠡᠴᠡᠨ ᠭᠠᠷᠴᠤ ᠵᠠᠢᠯᠠᠳᠠᠭ ᠶᠤᠮ᠃ ᠲᠡᠭᠦᠨ ᠡᠴᠡ ᠪᠢᠰᠢ ᠨᠦᠬᠡ ᠦᠭᠡᠢ ᠭᠠᠵᠠᠷ ᠮᠣᠭᠠᠢ᠂ ᠬᠦᠷᠪᠡᠯ ᠬᠣᠶᠠᠷ ᠨᠣᠴᠣᠯᠳᠤᠪᠠᠯ ᠤᠷᠲᠤ ᠬᠠᠢᠷᠬᠠᠨ ᠯᠠ ᠠᠮᠠ ᠲᠠᠢ ᠶᠤᠮ ᠰᠢᠭ᠋ ᠳᠡᠢᠯᠳᠡᠭ ᠯᠡ ᠳᠡ᠃ ᠡᠨᠡᠦᠬᠡᠨ ᠰᠸᠷᠠ ᠳ᠋ᠠᠴᠠᠩ ᠣᠷᠣᠬᠤ ᠵᠠᠮ ᠳ᠋ᠤ᠌ ᠬᠦᠷᠪᠡᠯ᠂ ᠮᠣᠭᠠᠢ ᠬᠣᠶᠠᠷ ᠶᠡᠬᠡ ᠪᠠᠢᠳᠠᠭ᠃ ᠬᠣᠭᠣᠷᠣᠨᠳᠣ ᠪᠠᠨ ᠴᠤ᠌ ᠶᠡᠬᠡ ᠡᠪ ᠲᠦᠨᠵᠢᠨ ᠦᠭᠡᠢ ᠠᠮᠢᠲᠠᠳ᠃ ᠬᠦᠷᠪᠡᠯ ᠦ᠋ᠨ ᠮᠢᠬᠠ ᠡᠮ ᠳ᠋ᠦ᠍ ᠣᠷᠣᠳᠠᠭ ᠪᠣᠯᠬᠣᠷ ᠤᠷᠢᠳᠤ ᠴᠠᠭ ᠲᠤ᠌ ᠪᠠᠭᠰᠢ ᠮᠠᠨᠢ ᠶᠡᠬᠡ ᠵᠠᠬᠢᠳᠠᠭ ᠰᠠᠨ᠃ ᠲᠡᠭᠡᠭᠡᠳ ᠯᠡ ᠪᠢ ᠪᠠᠭᠰᠢ ᠳ᠋ᠠᠭᠠᠨ ᠬᠦᠷᠪᠡᠯ ᠦ᠋ᠨ ᠮᠢᠬᠠ ᠣᠯᠵᠤ ᠥᠭᠬᠦ ᠭᠡᠵᠦ ᠶᠠᠪᠤᠵᠤ ᠯᠠ ᠡᠨᠡ ᠮᠣᠭᠠᠢ᠂ ᠬᠦᠷᠪᠡᠯ ᠬᠣᠶᠠᠷ ᠤ᠋ᠨ ᠴᠢᠨᠢ ᠲᠠᠭᠠᠷᠠᠮᠵᠢ ᠦᠭᠡᠢ ᠶ᠋ᠢ ᠮᠡᠳᠡᠵᠦ ᠠᠪᠤᠭᠰᠠᠨ ᠶᠤᠮ᠃ ᠬᠦᠷᠪᠡᠯ ᠦ᠋ᠨ ᠮᠢᠬᠠ ᠲᠠᠮᠢᠷᠵᠢᠭᠤᠯᠬᠤ ᠳ᠋ᠤ᠌ ᠰᠠᠢᠨ ᠪᠣᠯᠬᠣᠷ ᠮᠣᠭᠠᠢ ᠳᠤᠷᠠᠯᠠᠳᠠᠭ ᠪᠠᠢᠵᠤ ᠪᠣᠯᠬᠤ ᠶᠤᠮ ᠭᠡᠵᠦ ᠥᠴᠥᠭᠡᠳᠦᠷ ᠪᠠᠭᠰᠢ ᠴᠤᠢᠮᠴᠤᠭ ᠭᠡᠯᠦᠩ ᠨᠢ ᠶᠠᠷᠢᠭᠰᠠᠨ ᠢ᠋ ᠰᠡᠩᠵᠢ ᠭᠡᠰᠦᠯ ᠡᠷᠭᠢᠨ ᠰᠠᠨᠠᠯᠠ᠃ ᠲᠡᠭᠡᠲᠡᠯᠡ ᠬᠥᠨᠳᠡᠯᠡᠨ ᠦ᠌ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠭᠠ ᠶ᠋ᠢ ᠨᠢ ᠳᠠᠭᠠᠵᠤ ᠮᠡᠳᠡᠭᠰᠡᠨ ᠰᠢᠭ ᠲᠢᠪ ᠯᠠᠮᠠ ᠨᠢᠳᠦ ᠪᠡᠨ ᠣᠨᠢᠢᠯᠭᠠᠨ ᠰᠡᠩᠵᠢ ᠭᠡᠰᠦᠯ ᠤᠷᠤᠭᠤ ᠮᠠᠭᠤᠬᠠᠢ ᠬᠠᠷᠠᠪᠠ᠃ ᠰᠡᠩᠵᠢ ᠬᠠᠷᠠᠴᠠ ᠪᠠᠨ ᠪᠤᠷᠤᠭᠤᠯᠠᠵᠤ ᠠᠮᠵᠢᠭᠰᠠᠨ ᠦᠭᠡᠢ᠃
《ᠶᠡᠬᠡ ᠡᠷᠳᠡᠮᠲᠦ ᠯᠠᠮᠠ ᠭᠡᠰᠡᠨ᠃ ᠬᠥᠮᠦᠨ ᠦ᠌ ᠪᠣᠳᠣᠵᠤ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠮᠡᠳᠡᠳᠡᠭ ᠶᠦᠮ ᠪᠢᠰᠢ ᠪᠢᠵᠡ᠃ ᠶᠡᠷᠦ ᠨᠢ ᠠᠯᠳᠠᠰ ᠪᠣᠯᠬᠣ ᠨᠢ᠃ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠬᠤ ᠪᠠᠨ ᠪᠣᠯᠢᠶᠠ》 ᠭᠡᠵᠦ ᠭᠡᠰᠦᠯ ᠰᠡᠩᠵᠢ ᠪᠣᠳᠣᠵᠤ ᠪᠡᠶᠡ ᠪᠡᠨ ᠪᠠᠷᠢᠪᠠ᠃ ᠲᠡᠭᠡᠭᠡᠳ ᠪᠤᠰᠤᠳ ᠤ᠋ᠨ ᠠᠳᠠᠯᠢ ᠨᠢᠳᠦ ᠪᠡᠨ ᠬᠠᠭᠠᠰ ᠠᠨᠢᠵᠤ ᠤᠩᠰᠢᠯᠭᠠ ᠶ᠋ᠢ ᠦᠷᠭᠦᠯᠵᠢᠯᠡᠭᠦᠯᠦᠯᠡ᠃ ᠲᠡᠷᠡ ᠤᠩᠰᠢᠯᠭᠠ ᠶ᠋ᠢ ᠰᠡᠩᠵᠢ ᠭᠡᠰᠦᠯ ᠠᠯᠢ ᠡᠷᠲᠡ ᠴᠡᠭᠡᠵᠢ ᠪᠡᠷ ᠮᠡᠳᠡᠬᠦ ᠲᠤᠯᠠ ᠲᠡᠢᠨ ᠬᠦ᠌ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠬᠤ ᠵᠠᠢ ᠴᠢᠯᠥᠭᠡ ᠭᠠᠷᠴᠤ ᠪᠠᠢᠵᠠᠢ᠃ ᠭᠡᠲᠡᠯᠡ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠨᠢ ᠶᠡᠬᠡᠩᠬᠢ ᠳ᠋ᠡᠭᠡᠨ ᠲᠡᠷᠡ ᠤᠩᠰᠢᠯᠭᠠ ᠳ᠋ᠤ᠌ ᠮᠠᠭᠤ ᠪᠠᠢᠭᠠ ᠶ᠋ᠢ ᠰᠡᠩᠵᠢ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠮᠠᠲᠠᠷᠠᠵᠤ᠋᠂ ᠳᠣᠲᠣᠷᠠ ᠪᠠᠨ ᠭᠣᠯᠣᠬᠤ ᠰᠡᠳᠬᠢᠯ ᠲᠥᠷᠥᠵᠡᠢ᠃
ᠪᠠᠭᠰᠢ ᠭᠡᠯᠦᠩ ᠴᠤᠢᠮᠴᠤᠭ ᠨᠢ ᠵᠥᠭᠡᠯᠡᠨ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠪᠣᠯᠪᠠᠴᠤ ᠰᠡᠩᠵᠢ ᠭᠡᠰᠦᠯ ᠳ᠋ᠦ᠍ ᠨᠣᠮ ᠵᠢᠭᠠᠬᠤ ᠳ᠋ᠠᠭᠠᠨ ᠠᠢᠬᠤᠪᠲᠤᠷ ᠬᠠᠲᠠᠭᠤ᠂ ᠶᠠᠭᠤᠮᠠ ᠯᠠ ᠪᠣᠯᠪᠠᠯ ᠨᠢᠰᠠᠯᠵᠤ᠂ ᠲᠣᠷᠯᠣᠭᠳᠠᠵᠤ᠂ ᠱᠤᠭᠤᠮᠳᠠᠵᠤ ᠰᠢᠳᠬᠡᠳᠡᠭ ᠪᠠᠢᠭᠰᠠᠨ ᠲᠤᠯᠠ ᠰᠠᠢᠨ ᠴᠡᠭᠡᠵᠢᠯᠡᠵᠦ᠂ ᠲᠢᠭ ᠵᠢᠷᠤᠮ ᠳ᠋ᠤ᠌ ᠰᠤᠷᠤᠭᠰᠠᠨ ᠪᠠᠢᠯᠠ᠃ ᠤᠩᠰᠢᠯᠭᠠ᠂ ᠲᠡᠢᠨ ᠬᠦ᠌ ᠥᠨᠳᠥᠷᠯᠡᠬᠦ ᠳᠥᠭᠥᠵᠦ ᠪᠠᠢᠲᠠᠯᠠ ᠭᠠᠳᠠᠨᠠ ᠠ᠋ᠴᠠ ᠵᠡᠰ ᠳᠣᠮᠪᠣ ᠨᠤᠭᠤᠳ ᠪᠠᠷᠢᠭᠰᠠᠨ ᠳᠤᠮᠪᠤᠳᠠ ᠨᠤᠭᠤᠳ ᠣᠷᠣᠵᠤ ᠢᠷᠡᠯᠡ᠃ ᠳ᠋ᠠᠵᠠ ᠭᠡᠳᠡᠭ ᠲᠠᠩᠬᠢᠮ ᠤ᠋ᠨ ᠴᠠᠢ ᠣᠷᠣᠵᠤ ᠢᠷᠡᠵᠦ ᠪᠠᠢᠭᠠ ᠨᠢ ᠡᠨᠡ᠃ ᠳ᠋ᠠᠵᠠ ᠥᠩᠭᠡᠷᠡᠲᠡᠯᠡ ᠭᠡᠯᠦᠩ ᠴᠤᠢᠮᠴᠤᠭ ᠱᠠᠪᠢ ᠪᠠᠨ ᠠᠯᠤᠰ ᠠ᠋ᠴᠠ ᠬᠠᠷᠠᠵᠤ ᠪᠠᠢᠭᠠᠳ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠬᠤ ᠪᠠᠷ ᠶᠠᠪᠤᠯᠠ᠃
ᠢᠩᠭᠢᠵᠦ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠡᠴᠡ ᠢᠷᠡᠭᠰᠡᠨ ᠭᠡᠰᠦᠯ ᠰᠡᠩᠵᠢ ᠪᠤᠷᠬᠠᠨ ᠤ᠋ ᠶᠡᠬᠡ ᠬᠣᠲᠠ ᡀᠠᠰᠠ ᠶ᠋ᠢᠨ ᠰᠸ᠋ᠮᠪᠠᠷᠠᠭᠡᠰᠦᠮ ᠭᠡᠳᠡᠭ ᠭᠤᠷᠪᠠᠨ ᠶᠡᠬᠡ ᠬᠡᠢᠳ ᠦ᠋ᠨ ᠨᠢᠭᠡᠨ ᠪᠠᠷᠠᠪᠠᠩ ᠬᠡᠢᠳ ᠲᠦ᠍ ᠴᠢᠨᠠᠳᠤ ᠶ᠋ᠢᠨ ᠨᠣᠮ ᠪᠤᠶᠤ ᠪᠢᠯᠢᠭ ᠴᠢᠨᠠᠷ ᠤ᠋ᠨ ᠤᠬᠠᠭᠠᠨ ᠰᠤᠳᠤᠯᠬᠤ ᠪᠠᠷ ᠢᠷᠡᠵᠦ ᠭᠣᠮᠠᠨ ᠳ᠋ᠠᠴᠠᠩ ᠤ᠋ᠨ ᠨᠠᠮᠳᠡᠯ ᠦ᠋ᠨ ᠬᠠᠳᠠᠭ ᠵᠢᠩᠳᠠᠭᠠᠨ ᠳ᠋ᠤ᠌ ᠱᠠᠪᠢᠯᠠᠨ ᠰᠠᠭᠤᠯᠠ᠃ ᠮᠡᠳᠡᠭᠡ ᠣᠷᠣᠭᠰᠠᠨ ᠴᠠᠭ ᠠ᠋ᠴᠠ ᠨᠢ ᠡᠬᠢᠯᠡᠨ ᠡᠨᠡᠷᠢᠯᠲᠦ ᠡᠴᠢᠭᠡ ᠰᠠᠢᠨᠴᠣᠭᠲᠣ᠂ ᠡᠯᠪᠡᠷᠢᠯᠲᠦ ᠡᠬᠡ ᠴᠠᠨᠳᠠ ᠨᠠᠷ ᠰᠡᠩᠵᠢ ᠬᠦᠦ ᠳ᠋ᠦ᠍ ᠡᠷᠳᠡᠮᠲᠦ ᠰᠠᠢᠨ ᠯᠠᠮᠠ ᠪᠣᠯᠬᠤ ᠶ᠋ᠢ ᠮᠥᠷᠥᠭᠡᠳᠦᠨ ᠢᠮᠠᠭᠲᠠ ᠰᠠᠨᠠᠭᠤᠯᠤᠨ ᠬᠡᠯᠡᠵᠦ ᠢᠳᠬᠠᠭᠰᠠᠭᠠᠷ ᠤᠪᠠᠰᠢ᠂ ᠪᠠᠨᠳᠢ ᠰᠠᠬᠢᠯ ᠢ᠋ ᠬᠠᠷᠠ ᠪᠠᠭᠠ ᠠ᠋ᠴᠠ ᠨᠢ ᠬᠦᠷᠲᠡᠭᠡᠯᠭᠡᠵᠦ ᠤᠯᠠᠮ ᠢ᠋ᠶ᠋ᠠᠷ ᠬᠡᠢᠳ ᠲᠦ᠍ ᠰᠠᠭᠤᠯᠭᠠᠨ ᠭᠡᠰᠦᠯ ᠦ᠋ᠨ ᠰᠠᠬᠢᠯ ᠬᠦᠷᠲᠡᠭᠡᠵᠦ ᠪᠢᠯᠡ᠃ ᠲᠡᠢᠨ ᠬᠦ᠌ ᠲᠡᠳᠡᠨ ᠦ᠌ ᠰᠠᠨᠠᠭᠠ ᠠᠮᠤᠷᠠᠭᠰᠠᠨ ᠦᠭᠡᠢ᠃ ᠵᠠᠭᠠᠷ᠂ ᠲᠥᠪᠡᠳ ᠦ᠋ᠨ ᠣᠷᠣᠨ ᠳ᠋ᠤ᠌ ᠬᠦᠦ ᠪᠡᠨ ᠶᠠᠪᠤᠭᠤᠯᠵᠤ ᠯᠠᠮᠠ ᠶ᠋ᠢᠨ ᠳᠡᠭᠡᠳᠦ ᠯᠠᠮᠠ ᠪᠣᠯᠭᠠᠬᠤ ᠶ᠋ᠢ ᠡᠳᠦᠷ᠂ ᠰᠦᠨᠢ ᠦᠭᠡᠢ ᠮᠥᠷᠥᠭᠡᠳᠴᠦ ᠪᠠᠢᠪᠠ᠃ ᠬᠥᠭᠡᠷᠦᠬᠦᠢ ᠡᠴᠢᠭᠡ᠂ ᠡᠬᠡ ᠬᠣᠶᠠᠷ ᠨᠢ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠰᠢᠲᠦᠯᠭᠡ ᠦᠭᠡᠢ᠂ ᠶᠠᠳᠠᠭᠤ ᠬᠠᠷᠠᠴᠤᠤᠯ ᠪᠣᠯᠪᠠᠴᠤ ᠯᠠᠮᠠ ᠬᠦᠦ ᠲᠡᠢ ᠪᠣᠯᠬᠤ ᠨᠢ ᠨᠢᠭᠡᠨ ᠨᠠᠰᠤᠨ ᠤ᠋ ᠨᠢ ᠠᠷᠢᠭᠤᠨ ᠳᠡᠭᠡᠳᠦ ᠬᠦᠰᠡᠯᠡᠩ ᠪᠠᠢᠵᠠᠢ᠃ ᠨᠡᠭᠡᠷᠡᠨ ᠴᠦ᠍ ᠯᠠᠮᠠ ᠨᠠᠷ ᠯᠠ ᠬᠥᠮᠦᠨ ᠠᠷᠠᠳ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠡᠷᠬᠢᠮ ᠳᠡᠭᠡᠳᠦᠰ ᠭᠡᠭᠳᠡᠵᠦ᠂ ᠯᠠᠮᠠ ᠲᠠᠢ ᠲᠥᠷᠦᠵᠢ᠂ ᠯᠠᠮᠠ ᠲᠠᠢ ᠦᠬᠦᠬᠦ ᠨᠢ ᠠᠵᠠ ᠵᠠᠶᠠᠭᠠ ᠪᠣᠯᠵᠤ ᠪᠠᠢᠳᠠᠭ ᠪᠣᠯᠬᠣᠷ ᠡᠴᠢᠭᠡ ᠡᠬᠡ ᠶ᠋ᠢᠨ ᠳᠡᠭᠡᠳᠦ ᠮᠥᠷᠥᠭᠡᠳᠦᠯ ᠲᠡᠷᠡ ᠪᠠᠢᠵᠠᠢ᠃ ᠣᠳᠣ ᠭᠡᠰᠦᠯ ᠰᠡᠩᠵᠢ ᠡᠴᠢᠭᠡ ᠡᠬᠡ ᠶ᠋ᠢᠨ ᠡᠯᠪᠡᠷᠢᠯ ᠬᠠᠢᠷᠠ᠂ ᠠᠴᠢ ᠶ᠋ᠢ ᠬᠠᠷᠢᠭᠤᠯᠬᠤ ᠵᠠᠮ ᠳ᠋ᠤ᠌ ᠰᠢᠯᠤᠭᠤᠳᠤᠨ ᠣᠷᠣᠭᠰᠠᠨ ᠳ᠋ᠠᠭᠠᠨ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷ ᠲᠠᠢ ᠪᠠᠢᠯᠠ᠃
ᠡᠨᠡᠳᠬᠡᠭ ᠭᠠᠵᠠᠷ ᠠ᠋ᠴᠠ ᠵᠢᠭᠡᠯᠡᠳᠦᠨ ᠠᠪᠴᠢᠷᠠᠭᠰᠠᠨ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠰᠤᠷᠭᠠᠯ ᠢ᠋ ᠲᠥᠪᠡᠳ ᠦ᠋ᠨ ᠯᠠᠮᠠ ᠨᠠᠷᠠ ᠣᠯᠠᠨ ᠦᠶᠡ ᠳᠠᠮᠵᠢᠭᠤᠯᠤᠨ ᠪᠠᠶᠠᠵᠢᠭᠤᠯᠬᠤ ᠶ᠋ᠢ ᠨᠢ ᠪᠠᠶᠠᠵᠢᠭᠤᠯᠵᠤ᠂ ᠭᠡᠭᠡᠬᠦ ᠶ᠋ᠢ ᠨᠢ ᠭᠡᠭᠡᠵᠦ ᠶᠠᠪᠤᠭᠰᠠᠭᠠᠷ ᠥᠨᠥ ᠶ᠋ᠢ ᠬᠦᠷᠬᠦ ᠳ᠋ᠦ᠍ ᠣᠯᠠᠨ ᠣᠨ ᠤ᠋ ᠥᠩᠭᠡ ᠠᠶᠠᠰ ᠵᠢᠭᠠᠰᠤᠨ ᠤ᠋ ᠬᠠᠢᠷᠰᠤ ᠮᠡᠲᠦ ᠳᠠᠪᠬᠤᠷᠯᠠᠨ ᠠᠯᠠᠭᠯᠠᠭᠰᠠᠭᠠᠷ ᠵᠠᠷᠢᠮ ᠲᠠᠯᠠ ᠪᠠᠷ ᠲᠠᠨᠢᠭᠳᠠᠬᠤ ᠦᠭᠡᠢ ᠥᠭᠡᠷᠡᠴᠢᠯᠡᠭᠳᠡᠵᠦ᠂ ᠵᠠᠷᠢᠮ ᠵᠦᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠢᠯᠠᠭᠤᠵᠢᠭᠰᠠᠨ ᠠᠮᠢᠲᠠᠨ ᠤ᠋ ᠶᠠᠰᠤ ᠰᠢᠭ᠋ ᠪᠣᠯᠵᠠᠢ᠃ ᠰᠦᠵᠢᠭᠳᠡᠨ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠡᠵᠡᠮᠳᠡᠨ ᠪᠠᠷᠢᠵᠤ ᠪᠠᠢᠬᠤ ᠰᠢᠨᠡ ᠰᠢᠨᠡ ᠵᠢᠷᠤᠮ ᠭᠣᠷᠢᠮ ᠲᠣᠭᠲᠠᠵᠤ᠂ ᠪᠤᠷᠬᠠᠨ ᠤ᠋ ᠨᠣᠮ ᠤ᠋ᠨ ᠦᠭᠡ ᠦᠰᠦᠭ ᠢ᠋ ᠴᠦ᠍ ᠬᠦᠷᠲᠡᠯᠡ ᠠᠢᠬᠤᠪᠲᠤᠷ ᠨᠠᠷᠢᠰᠬᠠᠨ ᠪᠠᠰᠠ ᠴᠤ᠌ ᠲᠥᠭᠡᠷᠢᠯᠳᠦᠬᠦ ᠡᠴᠡ ᠠᠷᠭᠠ ᠦᠭᠡᠢ ᠲᠡᠢᠮᠦ ᠪᠦᠷᠬᠦᠭ ᠶᠠᠭᠤᠮᠠᠰ ᠢ᠋ᠶ᠋ᠠᠷ ᠴᠢᠬᠢᠨ ᠳᠦᠭᠦᠷᠭᠡᠭᠰᠡᠨ ᠠᠵᠢ᠃ ᠰᠤᠳᠤᠯᠪᠠᠴᠤ ᠪᠠᠷᠠᠭᠳᠠᠬᠤ ᠦᠭᠡᠢ ᠲᠡᠷᠡ ᠳᠠᠯᠠᠢ ᠶᠡᠬᠡ ᠨᠣᠮ ᠤ᠋ᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠰᠡᠩᠵᠢ ᠭᠡᠰᠦᠯ ᠰᠡᠯᠢᠨ ᠣᠷᠣᠯᠠ᠃