ᠣᠷᠣᠢ ᠦᠭᠡᠢ ᠰᠦᠮᠡ – ᠳᠦᠷᠪᠡ ᠂ ᠪᠤᠷᠬᠠᠨ ᠤ ᠬᠣᠲᠠ ᠶ᠋ᠢᠨ ᠦᠢᠮᠡᠭᠡᠨ ᠳᠤᠮᠳᠠ Оройгүй сүм – Дөрөв ᠂ Бурхны хотын үймээн дунд - Oroigui sum 4
1240ᠪᠤᠷᠬᠠᠨ ᠤ ᠬᠣᠲᠠ ᠶ᠋ᠢᠨ ᠦᠢᠮᠡᠭᠡᠨ ᠳᠤᠮᠳᠠ
ᠠᠯᠠᠭᠠᠨ ᠳ᠋ᠠᠭᠠᠨ ᠬᠥᠬᠥ ᠲᠡᠢ ᠪᠠᠢᠳᠠᠭ ᠠᠷᠰᠯᠠᠨ ᠨᠢᠭᠡ ᠬᠠᠴᠢᠨ
ᠠᠮᠠ ᠪᠠᠨ ᠪᠠᠢᠲᠠᠯᠠ ᠰᠢᠯᠢ ᠪᠡᠷ ᠢ᠋ᠶ᠋ᠡᠨ ᠳᠤᠤᠭᠠᠷᠳᠠᠭ ᠭᠣᠯᠢᠶᠠ ᠨᠢᠭᠡ ᠬᠠᠴᠢᠨ
ᠠᠮᠠ ᠨᠢ ᠬᠡᠩᠬᠦᠳᠡᠭ ᠲᠡᠭᠡᠨ ᠪᠠᠢᠳᠠᠭ ᠵᠠᠭᠠᠨ ᠨᠢᠭᠡ ᠬᠠᠴᠢᠨ
ᠲᠡᠷᠡ ᠥᠷᠯᠥᠭᠡ ᠮᠥᠷᠭᠥᠯᠴᠢᠳ ᠡᠷᠲᠡ ᠪᠣᠰᠴᠠᠢ᠃ ᠤᠤᠯ ᠨᠢ ᠰᠥᠨᠢ ᠳ᠋ᠡᠭᠡᠨ ᠣᠷᠣᠢᠲᠠᠵᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠪᠤᠷᠬᠠᠨ ᠤ᠋ ᠬᠣᠲᠠ ᠳ᠋ᠤ᠌ ᠠᠩᠬᠠᠨ ᠤ᠋ ᠪᠠᠨ ᠥᠷᠯᠥᠭᠡ ᠲᠠᠢᠪᠤᠩ ᠤᠨᠲᠠᠵᠤ ᠠᠭᠠᠵᠢᠮ ᠪᠣᠰᠬᠤ ᠳᠤᠷᠠᠲᠠᠢ ᠬᠥᠮᠦᠨ ᠦᠭᠡᠢ ᠪᠠᠢᠵᠠᠢ᠃ ᠵᠠᠰᠠᠭᠲᠤ ᠬᠠᠭᠠᠨ ᠠᠢᠮᠠᠭ ᠠ᠋ᠴᠠ ᠭᠠᠷᠤᠭᠰᠠᠨ ᠮᠥᠷᠭᠥᠯᠴᠢᠳ ᠬᠡᠳᠦ ᠬᠡᠳᠦᠨ ᠭᠠᠯ ᠪᠣᠯᠤᠨ ᠬᠤᠪᠢᠶᠠᠭᠳᠠᠭᠠᠳ ᡀᠠᠰᠠ ᠬᠣᠲᠠ ᠶᠢᠨ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠬᠠᠯᠬᠠ ᠮᠢᠴᠠᠩ ᠭᠡᠳᠡᠭ ᠮᠣᠩᠭᠣᠯᠴᠤᠳ ᠤ᠋ᠨ ᠬᠡᠷᠡᠭ ᠢ᠋ ᠵᠠᠬᠢᠷᠤᠨ ᠰᠢᠳᠬᠡᠬᠦ ᠭᠠᠵᠠᠷ ᠤ᠋ᠨ ᠬᠤᠪᠢᠶᠠᠷᠢᠯᠠᠭᠰᠠᠨ ᠢ᠋ᠶ᠋ᠠᠷ ᠵᠠᠷᠢᠮ ᠨᠢ ᠠᠢᠯ ᠤ᠋ᠳ ᠲᠤ᠌᠂ ᠵᠠᠷᠢᠮ ᠨᠢ ᠨᠡᠢᠲᠡ ᠶ᠋ᠢᠨ ᠳ᠋ᠢᠶᠠᠨ ᠪᠤᠶᠤ ᠲᠠᠢ ᠶ᠋ᠢᠨ ᠭᠠᠵᠠᠷ ᠲᠤ᠌ ᠪᠠᠭᠣᠵᠠᠭᠠᠵᠠᠢ᠃ ᠬᠠᠷᠢᠨ ᠴᠤᠢᠮᠴᠤᠭ ᠭᠡᠯᠦᠩ ᠪᠣᠯ ᠪᠠᠷᠠᠪᠠᠩ ᠬᠡᠢᠳ ᠲᠦ᠍ ᠪᠠᠭᠠ ᠳ᠋ᠠᠭᠠᠨ ᠨᠣᠮ ᠦᠵᠡᠵᠦ᠂ ᠬᠣᠵᠢᠮ ᠣᠯᠠᠨ ᠳᠠᠬᠢᠨ ᠢᠷᠡᠵᠦ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠠᠨᠢᠯ ᠶᠡᠬᠡᠲᠡᠢ᠂ ᠪᠠᠰᠠ ᠴᠤ᠌ ᠨᠢᠭᠡ ᠵᠢᠩᠳᠠᠭᠠᠨ ᠤ᠋ ᠬᠢᠨ ᠡᠯᠪᠡᠭ ᠲᠡᠢ ᠪᠠᠢᠯᠠ᠃ ᠲᠡᠭᠡᠭᠡᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ ᠨᠢᠭᠡ ᠭᠠᠯ ᠤ᠋ᠨ ᠬᠥᠮᠦᠰ ᠢ᠋ ᠡᠨᠳᠡ ᠡᠴᠡ ᠪᠤᠴᠠᠲᠠᠯᠠ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠠᠭᠠᠨᠠ ᠭᠡᠵᠦ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠣᠷᠣᠩᠨᠠᠬᠤ ᠭᠠᠵᠠᠷ ᠣᠯᠵᠤ ᠥᠭᠴᠡᠢ᠃ ᠲᠡᠷᠡ ᠨᠢ ᠬᠣᠶᠠᠷ ᠥᠷᠥᠭᠡ ᠲᠡᠢ ᠨᠠᠮᠬᠠᠨ ᠰᠢᠪᠡᠷ ᠲᠠᠭᠠᠵᠠ ᠪᠠᠢᠯᠠ᠃ ᠬᠠᠭᠤᠴᠢᠨ ᠲᠠᠨᠢᠯ ᠤ᠋ᠨ ᠨᠢ ᠬᠠᠰᠢᠶᠠᠨ ᠳ᠋ᠤ᠌ ᠪᠠᠢᠳᠠᠭ ᠲᠡᠷᠡ ᠲᠠᠭᠠᠵᠠ ᠶ᠋ᠢ ᠬᠣᠵᠢᠮ ᠱᠠᠪᠢ ᠰᠡᠩᠵᠢ ᠭᠡᠰᠦᠯ ᠳ᠋ᠡᠭᠡᠨ ᠬᠤᠳᠠᠯᠳᠤᠵᠤ ᠠᠪᠴᠤ ᠥᠭᠬᠦ ᠰᠠᠨᠠᠭᠠ ᠲᠠᠢ ᠶᠤᠮ ᠰᠠᠨᠵᠠᠢ᠃
ᠲᠠᠭᠠᠵᠠᠨ ᠳ᠋ᠤ᠌ ᠥᠭᠡᠷᠡ ᠬᠥᠮᠦᠨ ᠦᠭᠡᠢ ᠪᠠᠢᠯᠠ᠃ ᠨᠢᠭᠡ ᠥᠷᠥᠭᠡ ᠨᠢ ᠤᠲᠤᠭᠠ ᠢᠰᠦᠨ ᠳ᠋ᠦ᠍ ᠬᠠᠷᠠᠯᠠᠵᠤ ᠮᠠᠭᠤᠬᠠᠢ ᠥᠩᠭᠡ ᠲᠡᠢ ᠪᠣᠯᠵᠠᠢ᠃ ᠨᠥᠬᠥᠭᠡ ᠨᠢ ᠲᠡᠭᠦᠨ ᠡᠴᠡ ᠪᠡᠨ ᠠᠷᠠᠢ ᠲᠣᠮᠣ ᠪᠥᠭᠡᠳ ᠬᠣᠢᠮᠣᠷ ᠲᠠᠯᠠ ᠳ᠋ᠠᠭᠠᠨ ᠪᠤᠷᠬᠠᠨ ᠲᠠᠢ᠂ ᠬᠠᠨᠵᠤᠨ ᠣᠷᠣ ᠲᠠᠢ᠂ ᠣᠷᠣᠨ ᠳᠡᠭᠡᠷᠡ ᠪᠡᠨ ᠪᠤᠢᠳᠠᠩ (ᠳᠡᠷᠡ) ᠲᠠᠢ ᠠᠷᠠᠢ ᠲᠣᠬᠢᠯᠢᠭ ᠶᠤᠮ᠃
- ᠰᠢᠮᠬᠠᠨ (ᠤᠨᠲᠠᠯᠭᠠ ᠶ᠋ᠢᠨ ᠥᠷᠥᠭᠡ) ᠳ᠋ᠤ᠌ ᠱᠠᠪᠢ ᠪᠢᠳᠡ ᠬᠣᠶᠠᠷ ᠣᠷᠣᠨᠠ᠃ ᠲᠠ ᠨᠠᠷ ᠲᠤᠷ ᠵᠠᠭᠤᠷᠠ ᠶ᠋ᠢᠨ ᠤᠯᠤᠰ ᠷᠤᠩᠬᠠᠨ ᠳ᠋ᠤ᠌ (ᠭᠠᠯ ᠵᠤᠤᠬᠠ) ᠯᠠ ᠰᠠᠭᠤᠵᠤ ᠪᠠᠢᠬᠤ ᠠ᠋ᠴᠠ ᠪᠢᠰᠢ ᠳᠡ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠬᠡᠯᠡᠬᠦ ᠳ᠋ᠦ᠍᠂
- ᠦ ᠲᠡᠭᠡᠶᠡ ᠲᠡᠭᠡᠶᠡ᠃ ᠲᠣᠯᠣᠭᠠᠢ ᠬᠣᠷᠭᠣᠳᠠᠬᠤ ᠯᠠ ᠶᠠᠭᠤᠮᠠ ᠣᠯᠳᠠᠵᠤ ᠪᠠᠢᠪᠠᠯ ᠬᠠᠮᠢᠭᠠ ᠴᠤ᠌ ᠬᠠᠮᠢᠶᠠ ᠠᠯᠠᠭᠠ ᠭᠡᠵᠦ ᠥᠯᠵᠡᠢ ᠪᠡᠶᠡ ᠶ᠋ᠢᠨ ᠰᠢᠨᠠᠯᠭᠠᠨ ᠳ᠋ᠠᠭᠠᠨ ᠢᠷᠪᠠᠢᠨ ᠬᠡᠯᠡᠪᠡ᠃ ᠪᠤᠰᠤᠳ ᠨᠢ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠵᠡᠢ᠃
- ᠰᠠᠷᠯᠤᠭ ᠤ᠋ᠨ ᠮᠢᠬᠠᠨ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠠᠯᠠᠭᠠ! ᠭᠡᠵᠦ ᠭᠠᠳᠠᠨᠠ ᠠ᠋ᠴᠠ ᠨᠢᠭᠡ ᠯᠠᠮᠠ ᠣᠷᠣᠵᠤ ᠢᠷᠡᠭᠡᠳ ᠬᠡᠯᠡᠬᠦ ᠳ᠋ᠦ᠍᠄
- ᠶᠠᠭᠠᠬᠢᠬᠤ ᠪᠣᠢ᠂ ᠶᠠᠭᠠᠬᠢᠬᠤ ᠪᠣᠢ᠃ ᠠᠪᠤᠭᠠᠳ ᠢᠷᠡ! ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠬᠡᠯᠡᠪᠡ᠃ ᠡᠨᠡ ᠯᠠᠮᠠ ᠲᠡᠳᠡᠨ ᠢ᠋ ᠥᠴᠥᠭᠡᠳᠦᠷ ᡀᠠᠰᠠ ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠤᠭᠲᠤᠵᠤ ᠲᠣᠰᠴᠤ ᠣᠴᠢᠵᠠᠢ᠃ ᠮᠣᠩᠭᠣᠯ ᠭᠠᠵᠠᠷ ᠠ᠋ᠴᠠ ᠮᠥᠷᠭᠥᠯᠴᠢᠳ ᠢᠷᠡᠬᠦ ᠳ᠋ᠦ᠍ ᠪᠠᠷᠠᠪᠠᠩ ᠬᠡᠢᠳ ᠦ᠋ᠨ ᠬᠠᠯᠬᠠ ᠮᠢᠴᠠᠩ ᠭᠡᠳᠡᠭ ᠡᠴᠡ ᠲᠤᠰᠬᠠᠢ ᠬᠥᠮᠦᠨ ᠶᠠᠪᠤᠭᠤᠯᠤᠨ ᠤᠭᠲᠤᠵᠤ ᠠᠪᠳᠠᠭ ᠪᠠᠢᠵᠠᠢ᠃ ᠪᠠᠰᠠ ᡀᠠᠰᠠ ᠬᠣᠲᠠ ᠤᠷᠤᠭᠤ ᠮᠣᠷᠢ ᠲᠡᠮᠡᠭᠡ ᠣᠷᠣᠭᠤᠯᠳᠠᠭ ᠦᠭᠡᠢ ᠬᠠᠤᠯᠢ ᠲᠠᠢ ᠲᠤᠯᠠ ᠵᠠᠮ ᠳ᠋ᠤᠨᠢ ᠤᠭᠲᠤᠭᠰᠠᠨ ᠲᠥᠪᠡᠳ ᠫᠠᠨᠽᠠᠴᠢᠨ ᠨᠤᠭᠤᠳ ᠰᠢᠭᠤᠳ ᠦᠨᠡ ᠬᠠᠶᠠᠯᠴᠠᠨ ᠬᠤᠳᠠᠯᠳᠤᠨ ᠠᠪᠴᠤ ᠣᠷᠣᠨ ᠳ᠋ᠤᠨᠢ ᠰᠠᠷᠯᠤᠭ ᠬᠥᠯᠥᠰᠥᠯᠡᠨ ᠥᠭᠳᠡᠭ ᠪᠠᠢᠵᠠᠢ᠃ ᠡᠨᠡ ᠲᠤᠬᠠᠢ ᠪᠠᠭᠰᠢ ᠯᠠᠮᠠ ᠨᠢ ᠤᠷᠢᠳᠤ ᠠ᠋ᠴᠠ ᠲᠠᠢᠯᠪᠤᠷᠢᠯᠠᠵᠤ ᠬᠡᠯᠡᠭᠡ ᠦᠭᠡᠢ ᠪᠣᠯ ᠭᠠᠢᠬᠠᠮᠠᠷ ᠶᠠᠭᠤᠮᠠ ᠪᠣᠯᠬᠤ ᠪᠠᠢᠯᠠ᠃ ᠮᠥᠷᠭᠥᠯᠴᠢᠳ ᠢ᠋ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠤᠪᠴᠠᠰᠤ ᠲᠠᠢ᠂ ᠬᠢᠲᠤᠭᠠ᠂ ᠫᠤᠤ ᠬᠦᠷᠲᠡᠯᠡ ᠵᠡᠭᠦᠵᠦ᠂ ᠪᠠᠷᠠᠭᠤᠨ ᠭᠠᠷ ᠢ᠋ ᠰᠤᠭᠤᠯᠳᠤᠷᠭᠠᠯᠠᠨ ᠬᠠᠨᠴᠤᠢ ᠶ᠋ᠢ ᠤᠨᠵᠢᠭᠤᠯᠤᠭᠰᠠᠨ ᠵᠣᠷᠢᠮᠠᠭ᠂ ᠲᠣᠭᠰᠢᠨ ᠴᠢᠷᠠᠢ ᠲᠠᠢ ᠲᠠᠩᠭᠤᠳ᠂ ᠲᠥᠪᠡᠳ ᠬᠥᠮᠦᠰ ᠤᠭᠲᠤᠨ ᠣᠷᠣᠵᠤ ᠰᠢᠭᠤᠳ ᠯᠠ ᠮᠣᠷᠢᠨ ᠤ᠋ ᠨᠢ ᠵᠢᠯᠣᠭᠣ ᠲᠡᠮᠡᠭᠡᠨ ᠦ᠌ ᠨᠢ ᠪᠤᠷᠠᠨᠲᠠᠭ ᠠ᠋ᠴᠠ ᠠᠳᠬᠤᠨ ᠪᠠᠷᠢᠵᠤ᠄
- ᠵᠤᠱᠸ᠂ ᠵᠤᠱᠸ! ᠭᠡᠵᠦ ᠬᠠᠰᠬᠢᠷᠤᠯᠳᠤᠭᠰᠠᠨ ᠪᠢᠯᠡ.᠃ 《ᠪᠤᠷᠬᠠᠨ ᠮᠡᠳᠡᠵᠦ ᠪᠠᠢᠭᠠ》 ᠭᠡᠰᠡᠨ ᠦᠭᠡ ᠲᠤᠯᠠ ᠭᠡᠰᠦᠯ ᠰᠡᠩᠵᠢ ᠭᠠᠢᠬᠠᠵᠤ ᠪᠠᠭᠰᠢ ᠠ᠋ᠴᠠ ᠪᠠᠨ᠄
- ᠶᠠᠭᠤ ᠶ᠋ᠢ ᠪᠤᠷᠬᠠᠨ ᠮᠡᠳᠡᠨᠡ ᠭᠡᠳ ᠪᠠᠢᠭᠠ ᠶᠤᠮ ᠪᠣᠢ︖ ᠭᠡᠵᠦ ᠠᠰᠠᠭᠤᠪᠠᠯ ᠴᠤᠢᠮᠴᠤᠭ ᠭᠡᠯᠦᠩ᠄
- ᠦᠨᠡ ᠬᠠᠶᠠᠯᠴᠠᠵᠤ ᠮᠣᠷᠢ ᠮᠠᠯ ᠬᠤᠳᠠᠯᠳᠤᠨ ᠠᠪᠬᠤ ᠭᠡᠵᠦ ᠪᠠᠢᠭᠠ ᠶᠤᠮ᠃ ᠲᠡᠭᠡᠭᠡᠳ 《ᠪᠤᠷᠬᠠᠨ ᠮᠡᠳᠡᠨᠡ᠂ ᠪᠢ ᠨᠢᠭᠦᠯ ᠬᠢᠬᠦ ᠦᠭᠡᠢ》 ᠭᠡᠵᠦ ᠲᠠᠩᠭᠠᠷᠢᠭᠯᠠᠵᠤ ᠪᠠᠢᠭᠠ ᠨᠢ ᠲᠡᠷᠡ ᠳᠠ᠃ ᠪᠤᠷᠬᠠᠨ ᠤ᠋ ᠨᠡᠷᠡ ᠶᠡᠬᠡ ᠪᠠᠷᠢᠳᠠᠭ ᠤᠯᠤᠰ ᠭᠡᠪᠡ᠃
ᠮᠥᠷᠭᠥᠯᠴᠢᠳ ᠦ᠋ᠨ ᠤᠨᠤᠭᠠ ᠶ᠋ᠢ ᠬᠤᠳᠠᠯᠳᠤᠭᠠᠴᠢᠳ ᠦᠨᠡ ᠬᠠᠶᠠᠯᠴᠠᠨ ᠬᠤᠪᠢᠶᠠᠵᠤ ᠠᠪᠤᠭᠠᠳ ᠶᠠᠭᠤ ᠴᠤ᠌ ᠦᠭᠡᠢ ᠶᠠᠪᠠᠭᠠᠯᠠᠵᠠᠢ᠃ ᠭᠠᠭᠴᠠ ᠬᠦ᠌ ᠬᠠᠰᠢᠷ ᠵᠠᠷᠢᠮ ᠨᠢᠭᠡ ᠨᠢ ᠤᠷᠢᠳᠤ ᠠ᠋ᠴᠠ ᠬᠡᠯᠡ ᠶᠠᠪᠤᠭᠤᠯᠵᠤ ᠲᠣᠬᠢᠷᠠᠯᠴᠠᠭᠰᠠᠨ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠨᠤᠲᠤᠭᠰᠢᠨ ᠰᠠᠭᠤᠵᠤ ᠪᠠᠢᠭᠠ ᠮᠣᠩᠭᠣᠯᠴᠤᠳ ᠲᠤ᠌ ᠮᠣᠷᠢ ᠤᠨᠠᠭᠠ ᠪᠠᠨ ᠲᠤᠰᠢᠶᠠᠭᠠᠳ᠂ ᠣᠷᠣᠨ ᠳ᠋ᠤ᠌ ᠨᠢ ᠰᠠᠷᠯᠤᠭ ᠠᠪᠴᠤ ᠮᠣᠷᠢ ᠪᠠᠨ ᠶᠡᠭᠦᠯᠡᠪᠡ᠃ ᠭᠡᠲᠡᠯᠡ ᠪᠥᠬᠡᠮᠠᠩᠨᠠᠢ ᠮᠣᠷᠢ ᠪᠠᠨ ᠬᠡᠨ ᠳ᠋ᠦ᠍ ᠴᠦ᠍ ᠥᠭᠬᠦ ᠬᠥᠮᠦᠨ ᠦᠭᠡᠢ᠂ ᠪᠠᠰᠠ ᠬᠤᠳᠠᠯᠳᠤᠬᠤ ᠳᠤᠷᠠ ᠦᠭᠡᠢ ᠲᠤᠯᠠ ᠵᠣᠯ ᠲᠠᠢ ᠯᠠ ᠵᠣᠳᠣᠭᠠᠨ ᠭᠠᠷᠭᠠᠴᠢᠬᠠᠭᠰᠠᠨ ᠦᠭᠡᠢ᠃ ᠭᠡᠯᠦᠩ ᠴᠤᠢᠮᠴᠤᠭ ᠤᠭᠲᠤᠵᠤ ᠢᠷᠡᠭᠰᠡᠨ ᠯᠠᠮᠠ ᠲᠠᠢ ᠪᠠᠨ ᠶᠠᠷᠢᠯᠴᠠᠵᠤ ᠲᠣᠬᠢᠷᠠᠭᠠᠳ ᠪᠥᠬᠡᠮᠠᠩᠨᠠᠢ ᠶ᠋ᠢᠨ ᠮᠣᠷᠢ ᠶ᠋ᠢ ᠨᠢᠭᠡ ᠬᠥᠮᠦᠨ ᠳ᠋ᠦ᠍ ᠮᠠᠯᠯᠠᠨ ᠠᠳᠤᠭᠤᠯᠠᠵᠤ ᠪᠠᠶᠢᠬᠤ ᠪᠠᠷ ᠥᠭᠴᠡᠢ᠃
ᠮᠥᠷᠭᠥᠯᠴᠢᠳ ᠦ᠋ᠨ ᠡᠨᠡ ᠴᠤᠪᠤᠭᠠᠨ ᠤ᠋ ᠰᠡᠭᠦᠯᠴᠢ ᠶ᠋ᠢᠨ ᠬᠡᠰᠡᠭ ᠨᠢ ᠬᠥᠬᠡ ᠲᠣᠭᠣᠨᠣ ᠶ᠋ᠢᠨ ᠳᠠᠪᠠᠭᠠ ᠪᠠᠷ ᠳᠠᠪᠠᠬᠤ ᠠ᠋ᠴᠠ ᠵᠢᠷᠦᠬᠡᠰᠢᠶᠡᠵᠦ ᠪᠤᠴᠠᠵᠤ ᠬᠡᠰᠡᠭ ᠶᠠᠪᠤᠭᠠᠳ ᠪᠤᠷᠬᠠᠨ ᠪᠤᠤᠳᠠᠢ ᠶ᠋ᠢᠨ ᠳᠠᠪᠠᠭᠠ ᠪᠠᠷ ᠳᠠᠪᠠᠭᠰᠠᠨ ᠲᠤᠯᠠ ᠬᠡᠳᠦᠨ ᠲᠡᠮᠡᠭᠡ ᠲᠡᠢ ᠢᠷᠡᠵᠡᠢ᠃ ᠭᠡᠪᠡᠴᠦ ᠳᠡᠭᠡᠷᠡᠮᠴᠢᠨ ᠳ᠋ᠦ᠍ ᠲᠣᠨᠣᠭᠤᠯᠵᠤ ᠪᠠᠷᠤᠭ ᠨᠢᠴᠦᠭᠦᠨ ᠢᠷᠡᠵᠡᠭᠡᠵᠢ᠃ . 《ᠳᠡᠭᠡᠷᠡᠮᠴᠢᠨ ᠡᠴᠡ ᠠᠶᠤᠯᠭᠦᠢ ᠯᠡ ᠲᠡᠷᠡ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠳᠠᠭ ᠪᠠᠢᠵᠠᠢ᠃ ᠲᠡᠭᠡᠪᠡᠯ ᠡᠳ᠋ ᠦ᠋ᠨ ᠬᠣᠬᠢᠷᠠᠯ ᠦᠵᠡᠬᠦ ᠡᠴᠡ ᠬᠥᠮᠦᠨ ᠦ᠌ ᠭᠠᠷᠤᠵᠠ ᠦᠭᠡᠢ ᠪᠠᠢᠬᠤ ᠰᠠᠨ》 ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠬᠠᠷᠠᠮᠰᠠᠨ ᠪᠣᠳᠣᠵᠤ ᠬᠥᠬᠡ ᠲᠣᠭᠣᠨᠣ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠬᠠᠨᠠᠨ ᠬᠠᠯᠢᠯ ᠠ᠋ᠴᠠ ᠬᠥᠯ ᠠᠯᠳᠠᠵᠤ ᠨᠠᠢᠴᠠᠵᠤᠤ ᠮᠥᠷᠡᠨ ᠳ᠋ᠦ᠍ ᠣᠢᠵᠤ ᠦᠷᠡᠭᠳᠡᠭᠰᠡᠨ ᠬᠠᠷᠠᠬᠦᠦ ᠶ᠋ᠢᠨ ᠲᠤᠬᠠᠢ ᠳᠤᠷᠠᠰᠤᠨ ᠭᠠᠰᠠᠯᠵᠤ᠄
- ᠡᠨᠡ ᠬᠥᠭᠡᠷᠦᠬᠦᠢ ᠪᠦᠰᠡᠭᠦᠢ ᠤᠳᠬᠤᠨ ᠤ ᠰᠠᠨᠠᠭᠠ ᠶ᠋ᠢ ᠨᠢ ᠵᠠᠰᠠᠵᠤ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠶᠠᠭᠤ ᠦᠵᠡᠬᠦ ᠭᠡᠰᠡᠨ ᠢ᠋ ᠨᠢ ᠦᠵᠡᠭᠦᠯᠦᠭᠡᠳ ᠪᠤᠴᠠᠭᠠᠶᠠ ᠭᠡᠵᠦ ᠱᠠᠪᠢ ᠳ᠋ᠠᠭᠠᠨ ᠬᠡᠯᠡᠭᠰᠡᠨ ᠪᠠᠢᠵᠠᠢ᠃ ᠡᠨᠡ ᠦᠭᠡ ᠶ᠋ᠢ ᠰᠠᠨᠠᠭᠰᠠᠭᠠᠷ ᠪᠤᠷᠬᠠᠨ ᠤ᠋ ᠬᠣᠲᠠ ᠶ᠋ᠢᠨ ᠠᠩᠬᠠᠨ ᠤ᠋ ᠥᠷᠯᠥᠭᠡ ᠲᠡᠢ ᠰᠡᠩᠵᠢ ᠭᠡᠰᠦᠯ ᠵᠣᠯᠭᠠᠪᠠ᠃
- ᠰᠠᠷᠯᠤᠭ ᠤ᠋ᠨ ᠮᠢᠬᠠᠨ ᠠ᠋ᠴᠠ ᠥᠭᠡᠷᠡ ᠶᠠᠭᠤᠮᠠ ᠠᠯᠠᠭᠠ! ᠭᠡᠵᠦ ᠥᠷᠯᠥᠭᠡ ᠪᠠᠰᠠ ᠯᠠ ᠳᠠᠬᠢᠭᠠᠳ ᠨᠥᠭᠥᠭᠡ ᠯᠠᠮᠠ ᠵᠡᠰ ᠲᠠᠪᠠᠭ ᠳᠡᠭᠡᠷᠡ ᠬᠡᠳᠦᠨ ᠬᠡᠷᠴᠢᠮ ᠬᠣᠷᠴᠢᠢᠭᠰᠠᠨ ᠬᠠᠷᠠ ᠮᠢᠬᠠ ᠲᠠᠯᠪᠢᠭᠰᠠᠭᠠᠷ ᠣᠷᠣᠵᠤ ᠢᠷᠡᠯᠡ᠃ ᠬᠥᠭᠰᠢᠨ ᠰᠠᠷᠯᠤᠭ ᠤ᠋ᠨ ᠮᠢᠬᠠ ᠪᠠᠢᠭᠰᠠᠨ ᠲᠤᠯᠠ ᠰᠢᠳᠦᠨ ᠳ᠋ᠦ᠍ ᠪᠠᠢᠲᠤᠭᠠᠢ ᠬᠢᠲᠤᠭᠠᠨ ᠳ᠋ᠤ᠌ ᠳᠠᠭᠠᠭᠠᠭᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠪᠣᠷᠴᠠ ᠮᠠᠢᠭᠲᠠᠢ ᠪᠣᠯᠵᠤ ᠤᠷᠢ ᠢᠳᠡᠵᠡᠢ᠃
- ᠵᠠ ᠪᠢ ᠴᠦ᠍ ᠪᠤᠬᠠᠰᠢᠷᠢᠬᠢ ᠵᠤᠯᠭᠠᠭᠠᠭᠰᠠᠨ ᠬᠥᠭᠰᠢᠨ ᠰᠠᠷᠯᠤᠭ ᠰᠢᠭ᠋ ᠶᠠᠭᠤᠮᠠ ᠪᠣᠯᠬᠤ ᠨᠢ ᠠ᠋᠃ ᠡᠭᠦᠨ ᠳ᠋ᠦ᠍ ᠣᠷᠣᠪᠠᠯ ᠵᠠᠮᠪᠠᠭᠠ ᠵᠢᠭᠤᠷᠠᠶᠠ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠱᠣᠭᠯᠠᠬᠤ ᠠᠶᠠᠰ ᠲᠠᠢ ᠬᠡᠯᠡᠬᠦ ᠳ᠋ᠦ᠍ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠨᠢᠶᠡᠯᠳᠦᠪᠡ᠃ ᠶᠠᠭᠤ ᠭᠡᠪᠡᠯ᠄ ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠᠰ ᠤ᠋ᠨ ᠡᠩᠭᠡᠷ ᠬᠣᠷᠮᠣᠢ ᠳ᠋ᠤ᠌ ᠶᠡᠬᠡᠬᠡᠨ ᠬᠠᠲᠠᠭᠤ ᠡᠰᠢ ᠲᠡᠢ ᠤᠷᠭᠤᠮᠠᠯ ᠤᠷᠭᠤᠳᠠᠭ ᠲᠤᠯᠠ ᠲᠡᠭᠦᠨ ᠢ᠋ ᠪᠤᠬᠠᠴᠢᠷᠢᠬᠢ ᠪᠤᠶᠤ ᠪᠤᠬᠠᠰᠢᠷᠢᠬᠢ ᠭᠡᠳᠡᠭ ᠶᠦᠮ᠃ ᠪᠤᠬᠠᠰᠢᠷᠢᠬᠢ ᠶ᠋ᠢ ᠬᠥᠭᠰᠢᠨ ᠰᠠᠷᠯᠤᠭ ᠳᠠᠭᠠᠭᠠᠬᠤ ᠦᠭᠡᠢ ᠲᠤᠯᠠ ᠢᠳᠡᠬᠦ ᠭᠡᠵᠦ ᠶᠡᠬᠡ ᠰᠠᠨᠳᠤᠷᠳᠠᠭ ᠠᠵᠠᠢ᠃ ᠬᠥᠬᠡ ᠲᠣᠭᠣᠨᠣ ᠶ᠋ᠢᠨ ᠳᠠᠪᠠᠭᠠᠨ ᠳ᠋ᠤ᠌ ᠲᠡᠢᠮᠦ ᠨᠢᠭᠡ ᠬᠥᠭᠰᠢᠨ ᠰᠠᠷᠯᠤᠭ ᠲᠠᠢ ᠲᠡᠳᠡ ᠳᠠᠭᠠᠷᠢᠯᠳᠤᠭᠰᠠᠨ ᠪᠢᠯᠡ᠃ ᠥᠯᠥᠰᠬᠦᠯᠡᠩ ᠰᠠᠷᠯᠤᠭ ᠳᠠᠭᠠᠭᠠᠬᠤ ᠦᠭᠡᠢ ᠰᠢᠷᠢᠭᠢ ᠬᠣᠶᠠᠷ ᠠᠭᠤᠯᠵᠠᠵᠤ ᠶᠡᠬᠡ ᠯᠡ ᠬᠥᠭᠲᠡᠢ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠭᠰᠠᠨ ᠢ᠋ ᠭᠡᠯᠦᠩ ᠡᠢᠨ ᠬᠦ᠌ ᠳᠤᠷᠠᠰᠤᠨ ᠰᠠᠨᠠᠵᠠᠢ᠃
- ᠪᠤᠬᠠᠰᠢᠷᠢᠬᠢ ᠵᠤᠯᠭᠠᠭᠠᠭᠰᠠᠨ ᠰᠠᠷᠯᠤᠭ ᠭᠡᠬᠦ ᠡᠴᠡ ᠥᠴᠥᠭᠡᠳᠦᠷ ᠪᠢᠳᠡᠨ ᠢ᠋ ᠮᠥᠨ ᠪᠠᠯᠠᠯᠬᠤ ᠰᠢᠬᠠᠪᠠ ᠠ? ᠪᠢ ᠤᠭ ᠠ᠋ᠴᠠ ᠪᠠᠨ ᠰᠠᠷᠯᠤᠭ ᠤᠨᠤᠬᠤ ᠳᠤᠷᠠ ᠦᠭᠡᠢ᠃ ᠭᠡᠲᠡᠯᠡ ᠪᠠᠰᠠ ᠳᠦᠦᠭᠡᠦᠷᠳᠡᠭᠦᠯᠬᠦ ᠳ᠋ᠦ᠍ ᠮᠥᠨ ᠯᠡ ᠠᠶᠠ ᠦᠭᠡᠢ ᠪᠠᠢᠳᠠᠭ ᠰᠢᠦ ᠭᠡᠵᠦ ᠪᠥᠬᠡᠮᠠᠩᠨᠠᠢ ᠶᠠᠷᠢᠪᠠ᠃
- ᠬᠠᠷᠢᠨ ᠲᠡᠢᠮᠦ ᠠ᠋! ᠭᠡᠵᠦ ᠥᠯᠵᠡᠢ ᠵᠠᠯᠪᠠᠷᠢᠪᠠ᠃
ᠥᠴᠥᠭᠡᠳᠦᠷ ᠲᠡᠳᠡᠨ ᠦ᠌ ᠤᠨᠤᠭᠠ ᠤᠨᠤᠰᠢ ᠶ᠋ᠢ ᠦᠨᠡ ᠬᠠᠶᠠᠯᠴᠠᠨ ᠬᠤᠪᠢᠶᠠᠵᠤ ᠠᠪᠤᠭᠠᠳ ᠲᠥᠪᠡᠳ ᠦ᠋ᠳ ᠣᠷᠣᠨ ᠳ᠋ᠤᠨᠢ ᠰᠡᠯᠡᠮᠡᠨ ᠡᠪᠡᠷᠳᠡᠢ ᠰᠠᠷᠯᠤᠭ ᠨᠤᠭᠤᠳ ᠲᠤ᠌ ᠠᠴᠢᠶᠠ ᠶ᠋ᠢ ᠨᠢ ᠠᠴᠢᠵᠤ᠂ ᠥᠪᠡᠷᠰᠡᠳ ᠢ᠋ ᠨᠢ ᠰᠠᠭᠤᠯᠭᠠᠭᠠᠳ᠂ ᠲᠥᠷᠥ ᠶ᠋ᠢ ᠨᠢ ᠰᠠᠷᠯᠤᠭ ᠤᠨ ᠢ᠋ᠶ᠋ᠠᠨ ᠲᠣᠯᠣᠭᠠᠢ ᠳ᠋ᠤ᠌ ᠡᠪᠬᠡᠵᠦ ᠰᠤᠯᠠ ᠲᠠᠯᠪᠢᠭᠠᠳ ᠬᠠᠮᠲᠤᠷᠠᠭᠤᠯᠤᠨ ᠬᠥᠭᠡᠭᠡᠵᠦ ᡀᠠᠰᠠ ᠣᠷᠣᠭᠤᠯᠵᠠᠢ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠮᠠᠭᠤᠬᠠᠢ ᠬᠠᠰᠭᠢᠷᠤᠯᠳᠡᠨ᠂ ᠰᠤᠷ ᠳᠦᠦᠭᠡᠦᠷ ᠢᠶᠠᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠡᠷᠭᠢᠭᠦᠯᠵᠦ᠂ ᠭᠣᠨᠵᠣᠭᠣᠢ ᠬᠥᠬᠡ ᠴᠢᠯᠠᠭᠤ ᠪᠠᠷ ᠭᠠᠯᠵᠠᠭᠤᠷᠠᠭᠰᠠᠨ ᠮᠡᠲᠦ ᠳᠦᠦᠭᠡᠦᠷᠳᠡᠨ᠂ ᠰᠠᠷᠯᠤᠭ ᠤ᠋ᠳ ᠴᠤ᠌ ᠲᠡᠭᠦᠨ ᠡᠴᠡ ᠠᠶᠤᠵᠤ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠭᠦᠶᠦᠯᠳᠦᠪᠡ᠃
ᠳᠦᠦᠭᠡᠦᠷ ᠦ᠋ᠨ ᠴᠢᠯᠠᠭᠤ ᠨᠢ ᠠᠶᠤᠮᠰᠢᠭᠲᠠᠢ ᠮᠠᠭᠤᠬᠠᠢ ᠣᠯᠢᠨ ᠱᠤᠩᠭᠢᠨᠠᠯᠳᠤᠵᠤ᠂ ᠮᠣᠩᠭᠣᠯᠴᠤᠳ ᠤ᠋ᠨ ᠤᠨᠤᠵᠤ ᠶᠠᠪᠤᠭᠠ ᠰᠠᠷᠯᠤᠭ ᠤ᠋ᠨ ᠰᠢᠷᠠ ᠨᠤᠭᠤᠳ ᠤ᠋ᠨ ᠵᠦᠭ ᠪᠣᠷᠣᠭᠠ ᠮᠥᠨᠳᠥᠷ ᠰᠢᠭ ᠣᠯᠠᠨ ᠢ᠋ᠶ᠋ᠠᠷ ᠡᠷᠴᠢᠯᠡᠨ ᠢᠷᠡᠵᠦ ᠮᠣᠩᠭᠣᠯᠴᠤᠳ ᠲᠡᠭᠦᠨ ᠡᠴᠡ ᠠᠶᠤᠵᠤ ᠤᠤᠯᠭᠠ ᠠᠯᠲᠠᠨ ᠲᠣᠯᠣᠭᠠᠢ ᠪᠠᠨ ᠭᠠᠷ ᠢ᠋ᠶ᠋ᠠᠷ ᠳᠠᠷᠤᠵᠠᠭᠠᠵᠤ ᠪᠠᠢᠯᠠ᠃
ᠪᠢᠲᠡᠭᠡᠢ ᠠᠶᠤᠵᠠᠭᠠ! ᠲᠥᠪᠡᠳ ᠦ᠋ᠳ ᠦ᠋ᠨ ᠭᠠᠭᠴᠠ ᠴᠢᠳᠠᠳᠠᠭ ᠶᠤᠮ ᠨᠢ ᠳᠦᠦᠭᠡᠦᠷ ᠪᠠᠢᠳᠠᠭ᠃ ᠰᠠᠷᠯᠤᠭ ᠤ᠋ᠨ ᠢ᠋ᠶ᠋ᠠᠨ ᠡᠪᠡᠷ ᠢ᠋ ᠶᠠᠮᠠᠷ ᠴᠤ᠌ ᠮᠡᠷᠭᠡᠨ ᠫᠤᠤᠴᠢ ᠠ᠋ᠴᠠ ᠳᠤᠲᠠᠬᠤ ᠦᠭᠡᠢ ᠤᠨᠤᠨᠠ᠃ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠣᠭᠲᠣ ᠬᠦᠷᠭᠡᠬᠦ ᠦᠭᠡᠢ᠃ ᠪᠢᠲᠡᠭᠡᠢ ᠰᠠᠨᠳᠤᠷ! ᠲᠠᠢᠪᠤᠩ ᠶᠠᠪᠤᠵᠠᠭᠠ! ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠲᠡᠳᠡᠨ ᠳ᠋ᠦ᠍ ᠵᠠᠬᠢᠪᠠ᠃
ᠦᠨᠡᠬᠡᠷ ᠲᠥᠪᠡᠳ ᠦ᠋ᠳ ᠳᠦᠦᠭᠡᠦᠷᠳᠡᠬᠦ ᠳ᠋ᠡᠭᠡᠨ ᠮᠡᠷᠭᠡᠨ ᠠᠵᠠᠢ᠃ ᠳᠦᠦᠭᠡᠦᠷ ᠦ᠋ᠨ ᠴᠢᠯᠠᠭᠤ ᠨᠢ ᠥᠭᠡᠷᠡ ᠶᠠᠭᠤ ᠶ᠋ᠢ ᠴᠦ᠍ ᠪᠢᠰᠢ ᠭᠠᠭᠴᠠ ᠬᠦ᠌ ᠰᠠᠷᠯᠤᠭ ᠤ᠋ᠨ ᠡᠪᠡᠷ ᠳᠡᠭᠡᠷᠡ ᠮᠡᠷᠭᠡᠨ ᠲᠤᠰᠴᠢ ᠪᠠᠢᠯᠠ᠃ ᠡᠪᠡᠷ ᠳᠡᠭᠡᠷᠡ ᠨᠢ ᠳᠦᠦᠭᠡᠦᠷ ᠦ᠋ᠨ ᠴᠢᠯᠠᠭᠤ ᠪᠠᠭᠤᠬᠤ ᠳ᠋ᠤ᠌ ᠰᠠᠷᠯᠤᠭ ᠤ᠋ᠨ ᠰᠢᠷᠠ ᠨᠤᠭᠤᠳ ᠰᠦᠨᠡᠰᠦ ᠰᠡᠭᠦᠳᠡᠷ ᠦᠭᠡᠢ ᠠᠶᠤᠵᠤ ᠬᠠᠷᠠ ᠬᠤᠷᠳᠤ ᠪᠠᠷ ᠢ᠋ᠶ᠋ᠠᠨ ᠭᠦᠶᠦᠵᠦ ᠪᠠᠢᠯᠠ᠃ ᠢᠩᠭᠢᠵᠦ ᠲᠡᠳᠡ ᠳᠦᠦᠭᠡᠦᠷ ᠦ᠋ᠨ ᠴᠢᠯᠠᠭᠤ᠂ ᠰᠠᠷᠯᠤᠭ ᠤ᠋ᠨ ᠰᠢᠷᠠ ᠶ᠋ᠢᠨ ᠨᠢᠷᠤᠭᠤᠨ ᠳ᠋ᠤ᠌᠂ ᠲᠥᠪᠡᠳ ᠦ᠋ᠳ ᠦ᠋ᠨ ᠬᠠᠰᠢᠬᠢᠷᠤᠯᠳᠤᠭᠠᠨ ᠳᠤᠮᠳᠠ ᠪᠤᠷᠬᠠᠨ ᠤ᠋ ᠣᠷᠣᠨ ᡀᠠᠰᠠ ᠵᠣᠣ ᠶ᠋ᠢᠨ ᠭᠤᠷᠢᠯᠤᠮ ᠤᠷᠤᠭᠤ ᠣᠷᠣᠵᠤ ᠢᠷᠡᠭᠰᠡᠨ ᠪᠢᠯᠡ᠃
- ᠵᠠ ᠶᠠᠪᠤᠵᠠᠭᠠᠶᠠ᠃ ᠶᠠᠭᠤᠨ ᠤ᠋ ᠤᠷᠢᠳ ᠶᠡᠬᠡ ᠵᠣᠣ ᠣᠷᠣᠵᠠᠭᠠᠶᠠ᠃ ᠲᠡᠭᠡᠭᠡᠳ ᠪᠤᠰᠤᠳ ᠠᠷᠢᠭᠤᠨ ᠰᠢᠲᠦᠭᠡᠨ ᠨᠦ᠍ᠭᠦᠳ ᠢ᠋ ᠡᠳᠦᠷ ᠲᠠᠷᠠᠭᠠᠯᠠᠨ ᠦᠵᠡᠨᠡ᠃ ᠴᠥᠮ ᠢ᠋ ᠦᠵᠡᠬᠦ ᠳ᠋ᠦ᠍ ᠶᠡᠬᠡ ᠴᠠᠭ ᠬᠡᠷᠡᠭ ᠲᠡᠢ᠃ ᠭᠣᠣᠯ ᠭᠣᠣᠯ ᠰᠢᠲᠦᠭᠡᠨ ᠳ᠋ᠡᠭᠡᠨ ᠡᠬᠢᠯᠡᠭᠡᠳ ᠮᠥᠷᠭᠥᠵᠡᠭᠡᠶᠡ! ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠰᠠᠨᠠᠭᠤᠯᠪᠠ᠃
ᠮᠥᠷᠭᠥᠯᠴᠢᠳ ᠬᠠᠮᠤᠭ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠤᠶᠤᠵᠠᠢ᠃
ᠬᠠᠮᠲᠤ ᠶᠠᠪᠤᠶᠠ᠃ ᠱᠠᠪᠢᠯᠠᠨ ᠰᠠᠭᠤᠴᠢᠬᠠᠪᠠᠯ ᠵᠠᠪ ᠣᠯᠳᠠᠬᠤ ᠦᠭᠡᠢ᠃ ᠡᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠵᠤ᠂ ᠪᠢ ᠴᠢᠮᠠ ᠳ᠋ᠤ᠌ ᠡᠨᠡ ᠭᠠᠵᠠᠷ ᠤ᠋ᠨ ᠪᠠᠢᠳᠠᠯ ᠢ᠋ ᠮᠡᠳᠡᠭᠦᠯᠦᠶᠡ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠱᠠᠪᠢ ᠰᠡᠩᠵᠢ ᠳ᠋ᠡᠭᠡᠨ ᠬᠡᠯᠡᠯᠡ᠃
᠁ ᠤᠨᠢᠶᠠᠷ ᠮᠠᠨᠠᠨ᠂ ᠲᠣᠭᠣᠰᠣᠨ ᠳ᠋ᠤ᠌ ᠤᠮᠪᠠᠭᠰᠠᠨ ᡀᠠᠰᠠ ᠬᠣᠲᠠ ᠶ᠋ᠢᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠮᠣᠩᠭᠣᠯ ᠮᠥᠷᠭᠥᠯᠴᠢᠳ ᠭᠠᠷᠤᠯᠠ᠃ ᠤᠶᠢᠴᠦᠦ ᠪᠤᠶᠤ ᠳᠤᠮᠳᠠ ᠭᠣᠣᠯ ᠤᠷᠳᠤᠭᠤᠷ ᠲᠤᠨᠤᠯᠵᠠᠨ ᠤᠷᠤᠰᠴᠤ᠂ ᠮᠠᠷᠪᠤᠷᠢ ᠲᠣᠯᠣᠭᠠᠢ.ᠳᠡᠭᠡᠷᠡ ᠪᠤᠳᠠᠯᠠᠩ ᠤ᠋ᠨ ᠠᠪᠤᠷᠭᠤ ᠣᠷᠳᠣᠨ ᠲᠩᠷᠢ ᠪᠠᠭᠠᠨᠠᠳᠠᠭᠰᠠᠨ ᠰᠤᠪᠤᠷᠭᠠ ᠮᠡᠲᠦ ᠵᠣᠰᠣᠨ ᠥᠩᠭᠡ ᠪᠡᠷ ᠠᠯᠠᠭᠯᠠᠨ ᠠᠯᠲᠠᠨ ᠭᠠᠨᠵᠢᠷᠠ᠂ ᠵᠠᠩᠴᠠᠩ ᠢ᠋ᠶ᠋ᠠᠨ ᠭᠢᠯᠠᠯᠵᠠᠭᠤᠯᠤᠨ ᠰᠦᠨᠳᠡᠷᠯᠡᠵᠦ ᠬᠠᠷᠠᠭᠳᠠᠯᠠ᠃
ᠶᠡᠬᠡ ᠵᠣᠣ ᠬᠦᠷᠲᠡᠯᠡ ᠮᠥᠷᠭᠥᠯᠴᠢᠳ ᠶᠠᠪᠠᠭᠠᠨ ᠶᠠᠪᠤᠯᠠ᠃ ᠭᠤᠳᠤᠮᠵᠢ ᠪᠠᠷ ᠬᠠᠴᠢᠨ ᠶᠠᠩᠵᠤ ᠶ᠋ᠢᠨ ᠬᠤᠪᠴᠠᠰᠤ ᠲᠠᠢ ᠲᠠᠩᠭᠤᠳ᠂ ᠲᠥᠪᠡᠳ᠂ ᠮᠣᠩᠭᠣᠯ᠂ ᠪᠠᠯᠪᠤ᠂ ᠵᠠᠭᠠᠷ᠂ ᠲᠠᠪᠤᠨ ᠬᠡᠯᠡ ᠶ᠋ᠢᠨ ᠬᠥᠮᠦᠨ ᠠᠮᠢᠲᠠᠨ ᠨᠡᠰᠢ ᠴᠠᠰᠢ ᠬᠥᠯᠬᠢᠵᠦ ᠪᠠᠢᠯᠠ᠃ ᠦᠰᠦ ᠪᠡᠨ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠪᠡᠨ ᠭᠣᠵᠣᠢᠯᠭᠠᠨ ᠣᠪᠣᠭᠠᠯᠠᠵᠤ᠂ ᠠᠯᠲᠠ ᠮᠥᠩᠭᠥᠨ ᠴᠢᠮᠡᠭ ᠲᠡᠢ ᠭᠣᠣ ᠨᠤᠭᠤᠳ ᠢ᠋ᠶ᠋ᠠᠷ ᠬᠠᠰᠢᠵᠤ ᠭᠤᠶᠤᠭᠰᠠᠨ ᠳᠡᠭᠡᠳᠦᠰ ᠦ᠋ᠳ᠂ ᠦᠰᠦ ᠪᠡᠨ ᠰᠦᠯᠵᠢᠵᠦ ᠠᠷᠤ ᠨᠢᠷᠤᠭᠤ ᠤᠷᠤᠭᠤ ᠤᠨᠵᠢᠭᠤᠯᠤᠭᠰᠠᠨ ᠴᠢᠨᠡᠭᠡᠯᠢᠭ ᠦ᠋ᠳ᠂ ᠦᠰᠦ ᠪᠡᠨ ᠣᠭᠲᠣ ᠦᠯᠦ ᠰᠠᠮᠨᠠᠬᠤ ᠰᠠᠭᠯᠠᠭᠠᠷ ᠰᠠᠩᠭᠠᠰᠪᠠ ᠮᠡᠲᠦ ᠶᠠᠳᠠᠭᠤᠰ ᠡᠮᠦᠨᠡ ᠬᠣᠢᠨᠠ ᠪᠠᠨ ᠣᠷᠣᠵᠤ ᠨᠡᠰᠢ ᠴᠠᠰᠢ ᠶᠠᠪᠤᠨᠠ᠃ ᠤᠯᠠᠭᠠᠨ ᠴᠠᠴᠤᠭ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤᠨᠢ ᠤᠨᠵᠢᠭᠤᠯᠵᠤ ᠬᠢᠭᠰᠡᠨ ᠳᠤᠭᠤᠢ ᠬᠦᠷᠢᠶᠡ ᠲᠡᠢ ᠣᠷᠣᠢ ᠨᠢ ᠴᠠᠭᠠᠨ ᠪᠥᠭᠡᠳ ᠳᠤᠮᠳᠠ ᠪᠠᠨ ᠤᠯᠠᠭᠠᠨ ᠵᠠᠭᠠᠯᠮᠠᠢ ᠴᠢᠮᠡᠭ ᠲᠡᠢ ᠨᠤᠭᠤᠯᠤᠭᠤᠷ ᠰᠢᠭ᠋ ᠬᠠᠴᠢᠨ ᠮᠠᠯᠠᠭᠠᠢ ᠡᠮᠦᠰᠦᠭᠰᠡᠨ ᠪᠠᠷᠯᠤᠭ ᠤ᠋ᠳ ᠣᠯᠠᠨ ᠢ᠋ᠶ᠋ᠠᠷ ᠶᠠᠪᠤᠨᠠ᠃ ᠭᠡᠮ ᠯᠡ ᠬᠢᠪᠡᠯ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠤᠨᠠ ᠭᠡᠰᠡᠨ ᠦ᠌ ᠲᠡᠮᠳᠡᠭ ᠪᠣᠯᠭᠠᠵᠤ ᠲᠡᠢᠮᠦ ᠮᠠᠯᠠᠭᠠᠢ ᠶ᠋ᠢ ᠨᠣᠶᠠᠳ ᠤ᠋ᠳ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠡᠮᠦᠰᠦᠭᠦᠯᠳᠡᠭ ᠠᠵᠢ᠃ ᠬᠦᠵᠦᠭᠦᠦ ᠪᠡᠨ ᠳᠡᠰ ᠴᠠᠪᠴᠢᠭᠤᠯᠤᠭᠠᠳ ᠴᠢᠰᠤ ᠨᠢ ᠳᠣᠭᠣᠭᠰᠢ ᠭᠣᠭᠣᠵᠢᠵᠤ ᠪᠠᠢᠭᠠ ᠶ᠋ᠢ ᠤᠯᠠᠭᠠᠨ ᠵᠠᠭᠠᠯᠮᠠᠢ ᠲᠡᠮᠳᠡᠭ᠂ ᠳᠣᠭᠣᠭᠰᠢ ᠪᠠᠨ ᠤᠨᠵᠢᠭᠰᠠᠨ ᠤᠯᠠᠭᠠᠨ ᠴᠠᠴᠤᠭ ᠨᠢ ᠦᠭᠡ ᠳᠠᠭᠤ ᠦᠭᠡᠢ ᠥᠭᠦᠯᠡᠵᠦ ᠪᠠᠢᠭᠠ ᠶ᠋ᠢᠨ ᠪᠢᠯᠢᠭᠳᠡᠯ ᠪᠣᠯᠤᠭᠰᠠᠨ ᠲᠡᠷᠡ ᠮᠠᠯᠠᠭᠠᠢ ᠶ᠋ᠢ ᠭᠡᠯᠦᠩ ᠴᠤᠢᠮᠴᠤᠭ ᠲᠠᠢᠯᠪᠤᠷᠢᠯᠠᠵᠤ ᠥᠭᠬᠦ ᠳ᠋ᠦ᠍ ᠪᠥᠬᠡᠮᠠᠩᠯᠠᠢ ᠮᠠᠰᠢ ᠶᠡᠬᠡ ᠭᠠᠢᠬᠠᠵᠠᠢ᠃
ᠬᠡᠦᠬᠡᠨ ᠨᠦ᠍ᠭᠦᠳ ᠪᠠᠷᠠᠭᠤᠨ ᠪᠠᠭᠤᠤ ᠳ᠋ᠠᠭᠠᠨ ᠲᠤᠩ ᠢ᠋ᠶ᠋ᠠᠷ ᠴᠢᠮᠡᠭᠯᠡᠭᠰᠡᠨ ᠴᠤᠯᠤ ᠮᠥᠩᠭᠥᠨ ᠪᠠᠭᠤᠪᠴᠢ ᠵᠡᠭᠦᠭᠰᠡᠨ ᠨᠢ ᠣᠯᠠᠨ ᠪᠠᠢᠬᠤ ᠪᠥᠭᠡᠳ ᠨᠢᠭᠤᠷ ᠨᠢ ᠪᠠᠷᠤᠭ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠵᠢᠯ ᠬᠠᠷᠠ ᠬᠦᠷᠡᠩ ᠥᠩᠭᠡ ᠲᠡᠢ ᠪᠠᠢᠯᠠ᠃
- ᠪᠠᠭᠤᠪᠴᠢ ᠨᠢ ᠪᠠᠭᠠᠳᠠᠴᠢᠬᠠᠭᠰᠠᠨ ᠮᠥᠷᠲᠡᠭᠡᠨ ᠠᠮᠠ ᠦᠭᠡᠢ ᠰᠢᠭ ᠪᠠᠢᠬᠤ ᠶᠤᠮ᠃ ᠪᠠᠰᠠ ᠲᠡᠭᠡᠭᠡᠳ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠷᠠ ᠬᠦᠷᠡᠩ ᠡᠯᠢᠭᠡ ᠰᠢᠭ ᠵᠢᠰᠦ ᠴᠢᠷᠠᠢᠲᠠᠢ ᠤᠯᠤᠰ ᠶᠤᠮ ᠠ᠋ ᠭᠡᠵᠦ ᠣᠳᠬᠤᠨ ᠬᠡᠦᠬᠡᠨ ᠭᠡᠨᠡᠳᠲᠡ ᠭᠡᠯᠦᠩ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠶᠠᠭᠤ ᠪᠠᠷ ᠵᠠᠰᠠᠬᠤ ᠲᠤᠬᠠᠢ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠴᠤᠢᠮᠴᠤᠭ᠄
- ᠲᠥᠪᠡᠳ ᠬᠡᠦᠬᠡᠨ ᠵᠠᠪᠠᠯ ᠪᠢᠲᠡᠭᠦᠦ ᠪᠠᠭᠤᠪᠴᠢ ᠵᠡᠭᠦᠬᠦ ᠤᠴᠢᠷ ᠲᠠᠢ᠃ ᠠᠷᠪᠠᠭᠠᠳ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠤ᠌ ᠨᠢ ᠥᠬᠢᠳ ᠴᠤᠯᠤ ᠪᠠᠭᠤᠪᠴᠢ ᠵᠡᠭᠦᠵᠦ ᠥᠭᠳᠡᠭ᠃ ᠨᠠᠰᠤᠨ ᠳ᠋ᠤ᠌ ᠬᠦᠷᠬᠦ ᠦᠶᠡ ᠳ᠋ᠡᠭᠡᠨ ᠲᠡᠷᠡ ᠪᠠᠭᠤᠪᠴᠢ ᠶ᠋ᠢ ᠳᠦᠭᠦᠷᠲᠡᠯᠡ ᠮᠢᠷᠢᠶᠠᠯᠠᠵᠤ ᠰᠠᠯᠭᠠᠵᠤ ᠠᠪᠬᠤ ᠠᠷᠭᠠ ᠦᠭᠡᠢ ᠪᠣᠯᠳᠠᠭ ᠶᠤᠮ᠃ ᠲᠥᠪᠡᠳ ᠬᠡᠦᠬᠡᠨ ᠨᠦ᠍ᠭᠦᠳ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠷᠠ ᠴᠠᠢ ᠶ᠋ᠢᠨ ᠥᠳᠬᠡᠨ ᠬᠠᠨᠳᠠ ᠪᠠᠷ ᠪᠣᠳᠣᠳᠠᠭ ᠵᠢᠷᠤᠮ ᠲᠠᠢ᠃ ᠭᠣᠳᠣᠮᠵᠢᠨ ᠳ᠋ᠤ᠌ ᠨᠢᠭᠤᠷ ᠤ᠋ᠨ ᠳᠦᠷᠭᠢᠯᠭᠡ ᠦᠭᠡᠢ ᠭᠠᠷᠴᠤ ᠶᠠᠪᠤᠬᠤ ᠨᠢ ᠮᠠᠭᠤ ᠶᠠᠪᠤᠳᠠᠯ ᠲᠠᠢ ᠶ᠋ᠢᠨ ᠰᠢᠨᠵᠢ ᠭᠡᠵᠦ ᠶᠠᠷᠢᠪᠠ᠃ ᠤᠳᠬᠤᠨ ᠲᠡᠭᠦᠨ ᠳ᠋ᠦ᠍ ᠶᠡᠬᠡ ᠭᠠᠢᠬᠠᠯᠠ᠃
ᠲᠡᠳᠡ ᠶᠡᠬᠡ ᠵᠣᠣ ᠶ᠋ᠢᠨ ᠬᠡᠷᠡᠮ ᠦᠨ ᠭᠣᠣᠯ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠢᠷᠡᠪᠡ᠃ ᠬᠠᠭᠠᠯᠭᠠᠨ ᠤ᠋ ᠬᠠᠴᠠᠪᠴᠢ ᠬᠠᠨᠠᠨ ᠤ ᠳᠠᠭᠠᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠶᠠᠳᠠᠭᠤ ᠲᠥᠪᠡᠳ ᠦ᠋ᠳ ᠪᠠᠷᠤᠭ ᠵᠡᠷᠭᠡ ᠰᠢᠬᠠᠮ ᠤᠬᠤᠰᠬᠢᠨ ᠪᠣᠰᠤᠭᠠᠳ ᠬᠡᠯᠡ ᠪᠡᠨ ᠭᠠᠷᠭᠠᠨ᠂ ᠬᠣᠶᠠᠷ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠰᠠᠷᠪᠠᠭᠤ ᠶ᠋ᠢ ᠵᠠᠩᠭᠢᠳᠤᠨ ᠵᠥᠪᠬᠡᠨ ᠡᠷᠡᠬᠡᠢ ᠬᠤᠷᠤᠭᠤ ᠨᠤᠭᠤᠳ ᠢ᠋ᠶ᠋ᠠᠨ ᠭᠣᠵᠣᠢᠯᠭᠠᠵᠤ ᠵᠣᠭᠰᠣᠵᠠᠭᠠᠭᠠᠳ᠄
- ᠬᠦᠱᠥᠥ᠂ ᠬᠦᠱᠥᠥ! ᠭᠡᠵᠡᠭᠡᠬᠦ ᠳ᠋ᠦ᠍ ᠤᠳᠬᠤᠨ ᠴᠣᠴᠢᠵᠤ᠄
- ᠫᠠᠬᠠ ᠶᠠᠭᠠᠬᠢᠨᠠ! ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠣᠯ ᠠ᠋? ᠭᠡᠬᠦ ᠳ᠋ᠦ᠍ ᠴᠤᠢᠮᠴᠤᠭ ᠭᠡᠯᠦᠩ ᠬᠠᠵᠠᠭᠤ ᠠ᠋ᠴᠠ ᠨᠢ ᠶᠣᠪᠣᠷᠴᠤ᠄
- ᠵᠦᠭᠡᠷ᠂ ᠵᠦᠭᠡᠷ᠃ ᠲᠥᠪᠡᠳ ᠬᠥᠮᠦᠨ ᠢᠩᠭᠢᠵᠦ ᠬᠡᠯᠡ ᠪᠡᠨ ᠭᠠᠷᠭᠠᠵᠤ ᠡᠷᠡᠬᠡᠢ ᠪᠡᠨ ᠭᠣᠵᠣᠢᠯᠭᠠᠵᠤ ᠮᠡᠨᠳᠦᠯᠡᠳᠡᠭ ᠶᠦᠮ᠃ ᠠᠮᠠᠨ ᠳ᠋ᠠᠭᠠᠨ ᠬᠣᠣᠷᠲᠤ ᠦᠭᠡ ᠠᠭᠤᠯᠤᠭᠠ ᠦᠭᠡᠢ᠂ ᠭᠠᠷ ᠲᠠᠭᠠᠨ ᠢᠷᠲᠦ ᠵᠡᠪᠰᠡᠭ ᠪᠠᠷᠢᠭᠠ ᠦᠭᠡᠢ ᠭᠡᠰᠡᠨ ᠳᠣᠬᠢᠶᠠ ᠬᠡᠪᠡ᠃
- ᠬᠦᠱᠥᠥ ᠭᠡᠳᠡᠭ ᠨᠢ 《ᠳᠡᠭᠡᠳᠦᠰ》 ᠭᠡᠮᠡᠨ ᠳᠡᠭᠡᠳᠦᠯᠡᠵᠦ ᠪᠠᠢᠭᠠ ᠦᠭᠡ ᠭᠡᠵᠦ ᠰᠡᠩᠵᠢ ᠭᠡᠰᠦᠯ ᠤᠳᠬᠤᠨ ᠳ᠋ᠤ᠌ ᠲᠠᠢᠯᠪᠤᠷᠢᠯᠠᠪᠠ᠃ ᠭᠡᠰᠦᠯ ᠪᠣᠯ ᠨᠣᠮ ᠤ᠋ᠨ ᠮᠥᠷ ᠬᠥᠭᠡᠭᠡᠵᠦ ᠳᠣᠯᠣᠭᠠᠨ ᠵᠢᠯ ᠬᠡᠢᠳ ᠲᠦ᠍ ᠰᠠᠭᠤᠵᠤ ᠲᠥᠪᠡᠳ ᠬᠡᠯᠡ ᠶ᠋ᠢ ᠨᠢᠭᠡᠨᠲᠡ ᠰᠠᠢᠲᠤᠷ ᠰᠤᠷᠠᠭᠰᠠᠨ ᠡᠷᠳᠡᠮ ᠢ᠋ᠶ᠋ᠡᠨ ᠣᠳᠣ ᠠᠮᠢᠳᠤᠷᠠᠯ ᠳ᠋ᠤ᠌ ᠰᠢᠯᠭᠠᠵᠤ ᠪᠠᠢᠭᠠ ᠨᠢ ᠡᠨᠡ᠃
ᠮᠥᠷᠭᠥᠯᠴᠢᠳ ᠶᠡᠬᠡ ᠵᠣᠣ ᠳ᠋ᠤ᠌ ᠣᠷᠣᠬᠤ ᠶ᠋ᠢᠨ ᠲᠤᠯᠠᠳᠠ ᠬᠡᠳᠦᠨ ᠵᠣᠭᠣᠰ ᠬᠠᠶᠠᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ ᠲᠥᠪᠡᠳ ᠦ᠋ᠳ᠄
- ᠯᠠᠭᠰᠤᠤ᠂ ᠯᠠᠭᠰᠤᠤ! ᠭᠡᠵᠦ ᠪᠠᠶᠠᠷᠯᠠᠭᠰᠠᠨ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠨ ᠰᠢᠯᠢ ᠪᠡᠨ ᠮᠠᠭᠠᠵᠢᠵᠤ ᠵᠠᠷᠢᠮ ᠨᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠠᠷᠤ ᠦᠭᠡᠵᠡᠩ ᠳ᠋ᠡᠭᠡᠨ ᠠᠯᠠᠭᠠᠳᠠᠪᠠ᠃
- ᠯᠠᠭᠰᠤᠤ ᠭᠡᠵᠦ ᠰᠠᠢᠨ ᠰᠠᠢᠨ ᠭᠡᠰᠡᠨ ᠦᠭᠡ᠃ ᠰᠢᠯᠢ ᠪᠠᠨ ᠮᠠᠭᠠᠵᠢᠬᠤ ᠨᠢ ᠡᠰᠡᠪᠡᠯ ᠦᠭᠡᠵᠡᠩ ᠢ᠋ᠶ᠋ᠡᠨ ᠠᠯᠠᠭᠠᠳᠠᠬᠤ ᠨᠢ ᠬᠦᠨᠳᠦᠳᠬᠡᠵᠦ ᠪᠠᠢᠭᠠ ᠬᠡᠷᠡᠭ ᠭᠡᠵᠦ ᠰᠡᠩᠵᠢ ᠣᠳᠬᠣᠨ ᠳ᠋ᠤ᠌ ᠲᠠᠢᠯᠪᠤᠷᠢᠯᠠᠪᠠ᠃
ᠶᠡᠬᠡ ᠵᠣᠣ ᠶ᠋ᠢᠨ ᠳᠠᠪᠬᠤᠷ ᠬᠠᠰᠢᠶᠠᠨ ᠤ᠋ ᠭᠣᠩᠬᠣᠨ ᠳᠣᠲᠣᠷᠠ ᠳᠥᠷᠪᠡᠨ ᠶᠡᠬᠡ ᠮᠠᠬᠠᠷᠠᠨᠽᠠ ᠶ᠋ᠢᠨ ᠳᠦᠷᠰᠦ ᠬᠣᠣᠰ ᠢ᠋ᠶ᠋ᠠᠷ ᠪᠠᠢᠬᠤ ᠶ᠋ᠢ ᠪᠣᠱᠣᠭᠠ ᠪᠠᠷ ᠠᠯᠬᠤᠩᠭᠤᠲᠠ ᠬᠠᠷᠠᠭᠠᠳ ᠰᠡᠩᠵᠢ ᠭᠡᠰᠦᠯ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠢ᠋ ᠳᠤᠷᠠᠰᠤᠨ ᠰᠠᠨᠠᠯᠠ᠃ ᠪᠠᠷᠤᠭ ᠠᠳᠠᠯᠢᠬᠠᠨ ᠠᠵᠢ᠃ ᠪᠣᠭᠳᠠ ᠶ᠋ᠢᠨ ᠬᠠᠭᠠᠯᠭᠠ ᠭᠡᠵᠦ ᠡᠢᠮᠦ ᠳᠥᠷᠪᠡᠨ ᠰᠠᠬᠢᠭᠤᠰᠤ ᠲᠠᠢ ᠭᠣᠩᠬᠣᠨ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠲᠦ᠍ ᠪᠠᠢᠳᠠᠭ ᠶᠤᠮ᠃ ᠰᠦᠮᠪᠦᠷ ᠠᠭᠤᠯᠠ ᠶ᠋ᠢᠨ ᠳᠥᠷᠪᠡᠨ ᠵᠦᠭ ᠦ᠋ᠨ ᠠᠮᠤᠭᠤᠯᠠᠩ ᠢ᠋ ᠰᠠᠬᠢᠭᠤᠯᠤᠭᠴᠢ ᠭᠡᠵᠦ ᠡᠨᠡ ᠳᠥᠷᠪᠡ ᠶ᠋ᠢ ᠦᠵᠡᠳᠡᠭ ᠪᠥᠭᠡᠳ ᠬᠥᠬᠡ ᠴᠢᠷᠠᠢᠲᠠᠢ᠂ ᠪᠠᠷᠠᠭᠤᠨ ᠮᠣᠳᠣᠷ ᠲᠤ᠌ ᠰᠡᠯᠡᠮᠡ᠂ ᠵᠡᠭᠦᠨ ᠳ᠋ᠡᠭᠡᠨ ᠲᠤᠩ ᠪᠠᠷᠢᠭᠰᠠᠨ ᠰᠦᠷᠯᠢᠭ ᠪᠠᠭᠠᠲᠤᠷ ᠢ᠋ ᠸᠠᠷᠤᠳᠡᠾ ᠮᠠᠬᠠᠷᠡᠨᠽᠡ᠂ ᠤᠯᠠᠭᠠᠨ ᠵᠢᠰᠦᠲᠡᠢ᠂ ᠮᠣᠳᠣᠷ ᠲᠤ᠌ ᠡᠷᠴᠢᠯᠡᠭᠰᠡᠨ ᠮᠣᠭᠠᠢ ᠪᠠᠷᠢᠭᠰᠠᠨ ᠢ᠋ ᠪᠢᠷᠤᠷᠠᠺᠢᠱ ᠮᠠᠬᠠᠷᠡᠽᠡ᠂ ᠰᠢᠷᠠ ᠥᠩᠭᠡᠲᠡᠢ᠂ ᠪᠠᠷᠠᠭᠤᠨ ᠮᠣᠳᠣᠷ ᠲᠤ᠌ ᠵᠣᠭᠪᠠ ᠵᠡᠭᠦᠨ ᠳ᠋ᠡᠭᠡᠨ ᠬᠤᠯᠤᠭᠠᠨᠠ ᠪᠠᠷᠢᠭᠰᠠᠨ ᠢ᠋ ᠳ᠋ᠷᠢᠲᠷᠢ ᠷᠠᠰᠢᠲᠡᠷᠡ ᠮᠠᠬᠠᠷᠡᠽᠡ᠂ ᠬᠦᠷᠡᠩ ᠵᠢᠰᠦᠲᠡᠢ ᠫᠢᠴᠠ ᠬᠥᠭᠵᠢᠮ ᠳᠠᠷᠤᠵᠤ ᠪᠠᠢᠭᠠ ᠶ᠋ᠢ ᠸᠠᠶᠢᠰᠷᠠᠸᠠᠨᠢ ᠮᠠᠬᠠᠷᠡᠽᠡ ᠭᠡᠳᠡᠭ ᠢ᠋ ᠰᠡᠩᠵᠢ ᠠᠨᠳᠠᠬᠤ ᠦᠭᠡᠢ ᠮᠡᠳᠡᠵᠦ ᠪᠠᠢᠯᠠ᠃
ᠪᠣᠭᠳᠠ ᠶ᠋ᠢᠨ ᠬᠠᠭᠠᠯᠭᠠ ᠶ᠋ᠢ ᠥᠩᠭᠡᠷᠡᠵᠦ ᠴᠢᠮᠷᠠ ᠭᠡᠳᠡᠭ ᠬᠠᠰᠢᠶᠠᠨ ᠳ᠋ᠤ᠌ ᠮᠥᠷᠭᠥᠯᠴᠢᠳ ᠣᠷᠣᠵᠠᠢ᠃ ᠲᠡᠨᠳᠡ ᠬᠤᠷᠤᠢ᠂ ᠮᠥᠷᠭᠥᠯ ᠪᠣᠯᠳᠠᠭ ᠠᠵᠢ᠃ ᠡᠰᠡᠷᠭᠦ ᠲᠠᠯᠠ ᠶ᠋ᠢᠨ ᠬᠠᠨᠠᠨ ᠳ᠋ᠤ᠌ ᠶᠡᠬᠡ ᠰᠠᠬᠠᠯ ᠲᠠᠢ ᠪᠠᠭᠠᠲᠤᠷ ᠡᠷᠡ᠂ ᠡᠬᠡᠨᠡᠷ ᠬᠡᠦᠬᠡᠳ ᠦ᠋ᠨ ᠬᠠᠮᠲᠤ ᠵᠣᠭᠰᠣᠵᠤ ᠪᠠᠢᠭᠠ ᠵᠢᠷᠤᠭ ᠬᠠᠷᠠᠭᠳᠠᠪᠠ᠃
- ᠰᠥᠭᠥᠳᠦᠨ ᠵᠠᠯᠪᠢᠷᠤᠭᠲᠤᠨ! ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠰᠢᠪᠡᠭᠡᠨᠡᠭᠡᠳ ᠭᠠᠵᠠᠷ ᠰᠥᠭᠥᠳᠦᠨ ᠵᠠᠯᠪᠠᠷᠢᠪᠠ᠃ ᠪᠤᠰᠤᠳ ᠮᠥᠷᠭᠥᠯᠴᠢᠳ ᠮᠥᠨ ᠯᠡ ᠳᠠᠭᠤᠷᠢᠶᠠᠨ ᠦᠢᠯᠡᠳᠪᠡ᠃
- ᠡᠨᠡ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠵᠢᠷᠤᠭ ᠪᠤᠰᠤ ᠤᠤ? ᠭᠡᠵᠦ ᠥᠯᠵᠡᠢ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠭᠡᠯᠦᠩ ᠴᠣᠶᠢᠮᠴᠤᠭ᠂
- ᠡᠨᠡ ᠪᠣᠯ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠭᠦᠦᠰᠢ ᠬᠠᠭᠠᠨ ᠤ᠋ ᠳᠦᠷᠢ ᠪᠣᠯᠤᠨᠠ᠃ ᠲᠥᠪᠡᠳ ᠲᠦ᠍ ᠶᠡᠬᠡ ᠪᠤᠶᠠᠨ ᠬᠢᠵᠦ ᠥᠭᠭᠦᠭᠰᠡᠨ ᠬᠠᠭᠠᠨ ᠶᠤᠮ ᠳ᠋ᠠᠭ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠪᠥᠬᠡᠮᠠᠩᠯᠠᠢ᠄
- ᠮᠣᠩᠭᠣᠯ ᠬᠠᠭᠠᠨ ᠲᠠᠢ ᠪᠠᠢᠭᠰᠠᠨ ᠶᠤᠮ ᠭᠡᠵᠢ ᠦᠦ᠂ ᠲᠥᠪᠡᠳ? ᠭᠡᠵᠦ ᠮᠠᠰᠢ ᠭᠠᠢᠬᠠᠨ ᠠᠰᠠᠭᠤᠪᠠ᠃ ᠭᠡᠯᠦᠩ ᠴᠤᠢᠮᠴᠤᠭ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠬᠠᠨᠠᠨ ᠳᠡᠭᠡᠷᠡᠬᠢ ᠶᠡᠬᠡ ᠰᠠᠬᠠᠯᠲᠤ ᠪᠠᠭᠠᠲᠤᠷ᠂ ᠲᠡᠭᠦᠨ ᠲᠡᠢ ᠶᠠᠷᠢᠯᠴᠠᠵᠤ ᠪᠠᠢᠭᠠ ᠪᠡᠴᠢᠨ - ᠷᠢᠨᠪᠦᠴᠢ ᠶ᠋ᠢᠨ ᠢ᠋ ᠵᠢᠷᠤᠭ ᠥᠭᠡᠳᠡ ᠪᠢᠰᠢᠷᠡᠭᠰᠡᠨ ᠨᠢᠳᠦ ᠪᠡᠷ ᠰᠢᠷᠳᠡᠵᠦ ᠠᠮᠠᠨ ᠳ᠋ᠠᠭᠠᠨ ᠶᠠᠭᠤᠮᠠ ᠤᠩᠰᠢᠵᠤ ᠳ᠋ᠤᠷ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠭᠡᠯᠦᠩ ᠴᠤᠢᠮᠴᠤᠭ᠄
- ᠮᠣᠩᠭᠣᠯ ᠬᠠᠭᠠᠨ ᠢ᠋ ᠭᠤᠷᠪᠠᠨ ᠤᠳᠠᠭᠠ ᠵᠠᠯᠠᠵᠤ ᠰᠢᠷᠡᠭᠡᠨ ᠳ᠋ᠡᠭᠡᠨ ᠡᠷᠭᠦᠮᠵᠢᠯᠡᠭᠰᠡᠨ ᠠᠢᠯ ᠳᠠ! ᠭᠡᠵᠦ ᠬᠡᠯᠡᠭᠡᠳ ᠪᠣᠰᠴᠤ ᠬᠠᠨᠠᠨ ᠳᠡᠭᠡᠷᠡᠬᠢ ᠵᠢᠷᠤᠭ ᠥᠭᠡᠳᠡ ᠠᠯᠬᠤᠯᠠᠪᠠ᠃
ᠦᠨᠡᠬᠡᠷ ᠴᠢᠮᠡᠷᠡ ᠣᠷᠳᠣᠨ ᠤ᠋ ᠡᠨᠡᠬᠡᠨ ᠬᠠᠨᠠᠨ ᠳᠡᠭᠡᠷᠡ ᠮᠣᠩᠭᠣᠯ ᠤ᠋ᠨ ᠭᠦᠦᠰᠢ ᠬᠠᠭᠠᠨ ᠤ᠋ ᠬᠥᠷᠥᠭ ᠵᠢᠷᠤᠭᠠᠰᠤᠲᠠᠢ ᠪᠠᠢᠵᠠᠢ᠃ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠵᠢᠯ ᠦ᠋ᠨ ᠲᠡᠷᠲᠡᠭᠡ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ᠃ ᠲᠠᠪᠤᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠠᠩᠸᠠᠩᠯᠤᠪᠰᠠᠩᠵᠠᠮᠰᠤ ᠬᠤᠱᠤᠤᠲᠤ ᠶ᠋ᠢᠨ ᠭᠦᠦᠰᠢ ᠬᠠᠭᠠᠨ ᠳ᠋ᠤ᠌ ᠡᠯᠴᠢ ᠵᠠᠷᠤᠨ ᠢᠯᠡᠭᠡᠵᠦ ᠲᠥᠪᠡᠳ ᠣᠷᠣᠨ ᠳ᠋ᠤ᠌ ᠴᠡᠷᠢᠭ ᠵᠡᠪᠰᠡᠭ ᠠᠭᠰᠠᠵᠤ ᠬᠦᠷᠦᠯᠴᠡᠨ ᠣᠴᠢᠬᠤ ᠶ᠋ᠢ ᠵᠠᠯᠠᠵᠤ ᠭᠣᠶᠣᠴᠠᠢ᠃ ᠭᠡᠪᠡᠴᠦ ᠭᠦᠦᠰᠢ ᠬᠠᠭᠠᠨ ᠴᠡᠷᠢᠭ᠂ ᠵᠡᠪᠰᠡᠭ ᠠᠭᠰᠠᠵᠤ ᠲᠥᠪᠡᠳ ᠲᠦ᠍ ᠣᠴᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠶᠡᠷᠦ ᠶ᠋ᠢᠨ ᠮᠥᠷᠭᠥᠯᠴᠢᠨ ᠪᠣᠯᠵᠤ ᠶᠠᠪᠤᠵᠠᠢ᠃ ᠲᠡᠢᠨ ᠬᠦ᠌ ᠳᠠᠯᠠᠢ ᠯᠠᠮᠠ ᠲᠠᠢ ᠠᠭᠤᠯᠵᠠᠵᠤ ᠰᠡᠮᠬᠡᠨ ᠬᠡᠯᠡᠯᠴᠡᠨ ᠲᠣᠬᠢᠷᠠᠵᠠᠢ᠃ ᠭᠤᠷᠪᠠᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠭᠦᠦᠰᠢ ᠬᠠᠭᠠᠨ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠲᠣᠯᠣᠭᠠᠶᠢᠯᠠᠨ ᠢᠷᠡᠵᠦ᠂ ᠰᠢᠾᠡᠡ ᠬᠣᠲᠠ ᠶ᠋ᠢ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠲᠣᠷᠰᠢ ᠪᠦᠰᠡᠯᠡᠨ ᠪᠠᠢᠯᠳᠤᠵᠤ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠡᠰᠡᠷᠭᠦ ᠲᠠᠯᠠ ᠶ᠋ᠢᠨ ᠬᠢᠨ ᠢ᠋ ᠳᠡᠢᠯᠦᠭᠡᠳ ᠽᠤᠩᠭᠡᠸᠠ ᠶ᠋ᠢᠨ ᠱᠠᠰᠢᠨ ᠢ᠋ ᠮᠠᠨᠳᠤᠭᠤᠯᠵᠤ ᠱᠠᠰᠢᠨ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠳᠠᠯᠠᠢ ᠯᠠᠮᠠ ᠳ᠋ᠤ᠌ ᠰᠢᠯᠵᠢᠭᠦᠯᠵᠡᠢ᠃ ᠭᠡᠪᠡᠴᠦ ᠥᠪᠡᠷ ᠢ᠋ᠶ᠋ᠡᠨ ᠲᠥᠷᠥ ᠪᠠᠷᠢᠵᠤ ᠰᠠᠭᠤᠵᠠᠢ᠃ ᠲᠡᠭᠡᠭᠡᠳ ᠬᠦᠦ ᠳᠠᠶᠠᠩ ᠳ᠋ᠠᠭᠠᠨ ᠸᠴᠢᠷᠲᠦ ᠬᠠᠭᠠᠨ ᠴᠣᠯᠠ ᠥᠭᠴᠦ ᠲᠥᠪᠡᠳ ᠦ᠋ᠨ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠰᠢᠯᠵᠢᠭᠦᠯᠵᠦ ᠲᠡᠷᠡ ᠨᠢ ᠬᠣᠷᠢ ᠭᠠᠷᠤᠢ ᠵᠢᠯ ᠲᠥᠪᠡᠳ ᠢ᠋ ᠵᠠᠬᠢᠷᠤᠭᠠᠳ ᠨᠠᠰᠤ ᠶᠡᠭᠦᠯᠡᠵᠦ᠂ ᠬᠦᠦ ᠫᠤᠩᠰᠤᠭ ᠨᠢ ᠳᠠᠯᠠᠢ ᠬᠠᠭᠠᠨ ᠴᠣᠯᠠ ᠬᠦᠷᠲᠡᠭᠡᠳ ᠮᠥᠨ ᠬᠣᠷᠢ ᠭᠠᠷᠤᠢ ᠵᠢᠯ ᠥᠩᠭᠡᠷᠡᠮᠡᠭᠴᠡ ᠲᠡᠭᠦᠨ ᠦ᠌ ᠬᠦᠦ ᡀᠠᠰᠠᠩ ᠬᠡᠷᠬᠡᠮ ᠢ᠋ ᠨᠢ ᠵᠠᠯᠭᠠᠮᠵᠢᠯᠠᠵᠤ ᠮᠣᠩᠭᠣᠯ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠬᠠᠭᠠᠨ ᠪᠣᠯᠤᠨ ᠣᠳᠬᠣᠯᠠᠵᠤ᠂ ᠵᠡᠭᠦᠨᠭᠠᠷ ᠤ᠋ᠨ ᠴᠡᠷᠢᠭ ᠲᠦ᠍ ᠳᠡᠢᠯᠦᠭᠳᠡᠨ ᠪᠤᠳᠠᠯᠠᠩ ᠤ᠋ᠨ ᠣᠷᠳᠣᠨ ᠳ᠋ᠤ᠌ ᠠᠮᠢ ᠠᠯᠳᠠᠵᠠᠢ᠃
ᠲᠡᠦᠬᠡ ᠶ᠋ᠢᠨ ᠳᠤᠷᠠᠨ ᠢ᠋ᠶ᠋ᠠᠷ ᠴᠠᠰᠢ ᠰᠤᠩᠭᠠᠨ ᠬᠠᠷᠠᠪᠠᠯ ᠭᠦᠦᠰᠢ ᠬᠠᠭᠠᠨ ᠠ᠋ᠴᠠ ᠡᠮᠦᠨᠡ ᠳᠥᠷᠪᠡᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠡᠷᠲᠡᠭᠡ ᠴᠢᠩᠭᠢᠰ ᠦ᠋ᠨ ᠵᠠᠩᠵᠤᠨ ᠮᠤᠬᠤᠷ ᠭᠡᠭᠴᠢ ᠬᠠᠲᠤᠨ ᠭᠣᠣᠯ ᠪᠤᠶᠤ ᠰᠢᠷᠠ ᠮᠥᠷᠡᠨ ᠢ᠋ ᠭᠠᠲᠤᠯᠤᠨ ᠭᠠᠷᠴᠤ ᠲᠠᠩᠭᠤᠳ ᠢ᠋ ᠪᠠᠢᠯᠳᠤᠨ ᠳᠠᠭᠠᠭᠤᠯᠵᠤ ᠬᠣᠢᠨᠠ ᠠ᠋ᠴᠠ ᠨᠢ ᠴᠢᠩᠭᠢᠰ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠴᠡᠷᠢᠭ ᠬᠥᠳᠡᠯᠭᠡᠨ ᠢᠷᠡᠵᠦ ᠲᠠᠩᠭᠤᠳ ᠤ᠋ᠨ ᠤᠯᠤᠰ ᠢ᠋ ᠦᠨᠳᠦᠰᠦ ᠪᠡᠷ ᠨᠢ ᠮᠥᠬᠥᠭᠡᠵᠡᠢ᠃
ᠲᠡᠦᠬᠡ ᠶ᠋ᠢᠨ ᠳᠤᠷᠠᠨ ᠢ᠋ᠶ᠋ᠠᠷ ᠳᠠᠬᠢᠨ ᠴᠢᠨᠠᠭᠰᠢ ᠰᠤᠩᠭᠠᠨ ᠬᠠᠷᠠᠪᠠᠯ ᠮᠠᠨ ᠤ᠋ ᠲᠣᠭᠠᠯᠠᠯ ᠤ᠋ᠨ ᠡᠮᠦᠨᠡᠬᠢ ᠭᠤᠷᠪᠠᠨ ᠵᠠᠭᠤᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠣᠨ ᠳ᠋ᠤ᠌ ᠮᠣᠩᠭᠣᠯ ᠲᠣᠭᠣᠨ ᠵᠠᠩᠵᠤᠨ ᠬᠥᠬᠡᠨᠠᠭᠤᠷ ᠤ᠋ᠨ ᠠᠭᠤᠳᠠᠮ ᠨᠤᠲᠤᠭ ᠢ᠋ ᠡᠵᠡᠯᠡᠭᠰᠡᠨ ᠬᠠᠭᠠᠨᠴᠢᠯᠠᠯ ᠲᠣᠭᠲᠠᠭᠠᠭᠰᠠᠨ ᠨᠢ ᠭᠤᠷᠪᠠᠨ ᠵᠠᠭᠤᠨ ᠲᠠᠪᠢᠨ ᠨᠢᠭᠡᠨ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠭᠰᠡᠨ ᠪᠢᠯᠡ᠃ ᠲᠣᠭᠣᠨ ᠬᠠᠭᠠᠨ ᠢ᠋ ᠳᠡᠭᠦᠦ ᠵᠤᠵᠤᠤᠭᠦᠢ ᠨᠢ ᠬᠠᠪᠴᠢᠨ ᠵᠠᠢᠯᠠᠭᠤᠯᠵᠤ᠂ ᠰᠡᠭᠦᠯ ᠳ᠋ᠦ᠍ᠨᠢ ᠲᠡᠭᠦᠨ ᠳ᠋ᠡᠭᠡᠨ ᠭᠡᠮᠰᠢᠨ ᠭᠤᠨᠢᠵᠤ 《ᠠᠬᠠ ᠳᠡᠭᠦᠦᠰ ᠠ᠋》 ᠭᠡᠳᠡᠭ ᠳᠠᠭᠤᠤ ᠵᠣᠬᠢᠶᠠᠭᠰᠠᠨ ᠠᠵᠢ᠃
ᠡᠨᠡ ᠪᠦᠬᠦᠨ ᠢ᠋ ᠴᠤᠢᠮᠴᠤᠭ ᠭᠡᠯᠦᠩ ᠨᠣᠮ ᠰᠤᠳᠤᠷ ᠠ᠋ᠴᠠ ᠤᠩᠰᠢᠵᠤ ᠮᠡᠳᠡᠭᠰᠡᠨ ᠪᠠᠢᠯᠠ᠃ ᠭᠡᠪᠡᠴᠦ ᠮᠥᠷᠭᠥᠯᠴᠢᠳ ᠲᠦ᠍ ᠡᠭᠦᠨ ᠢ᠋ ᠶᠠᠷᠢᠬᠤ ᠵᠠᠪ ᠪᠠᠢᠭᠰᠠᠨ ᠦᠭᠡᠢ᠃
ᠪᠥᠬᠡᠮᠠᠩᠯᠠᠢ ᠰᠣᠨᠢᠷᠬᠠᠭᠠᠳ ᠪᠠᠢᠪᠠᠯ ᠣᠷᠣᠢ ᠬᠠᠷᠢᠭᠠᠳ ᠪᠠᠨᠠᠭ ᠲᠠᠭᠠᠨ ᠴᠢᠮᠠ ᠳ᠋ᠤ᠌ ᠶᠠᠷᠢᠵᠤ ᠥᠭᠬᠦᠶᠡ! ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠠᠮᠠᠯᠠᠪᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠭᠡᠰᠦᠯ ᠰᠡᠩᠵᠢ ᠳ᠋ᠦ᠍ ᠬᠠᠨᠳᠤᠵᠤ ᠭᠡᠯᠦᠩ ᠪᠠᠭᠰᠢ ᠨᠢ᠄
- ᠭᠦᠦᠰᠢ ᠬᠠᠭᠠᠨ ᠤ᠋ ᠵᠢᠷᠤᠭ ᠡᠨᠳᠡ ᠠᠩᠬᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠡᠲᠡᠯᠡ ᠨᠢᠭᠡ ᠤᠳᠠᠭᠠ ᠵᠢᠷᠤᠭ ᠠᠮᠢ ᠣᠷᠣᠵᠤ 《ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠤᠢᠳᠬᠠᠷᠯᠠᠵᠤ ᠪᠠᠢᠨᠠ᠃ ᠦᠭᠡ ᠰᠣᠯᠢᠯᠴᠠᠬᠤ ᠬᠠᠨᠢ ᠥᠭᠭᠦᠭᠡᠴᠢ》 ᠭᠡᠵᠦ ᠳᠤᠤᠭᠠᠷᠤᠭᠰᠠᠨ ᠶᠤᠮ ᠭᠡᠳᠡᠭ᠃ ᠲᠡᠭᠡᠬᠦ ᠪᠡᠷ ᠨᠢ ᠪᠠᠨᠴᠢᠨ ᠤ᠋ ᠬᠥᠷᠥᠭ ᠨᠡᠮᠡᠵᠦ ᠵᠢᠷᠤᠵᠠᠢ᠃ ᠲᠡᠭᠡᠲᠡᠯᠡ ᠨᠡᠯᠢᠶᠡᠳ ᠪᠠᠢᠵᠤ ᠪᠠᠢᠭᠠᠳ ᠭᠦᠦᠰᠢ ᠬᠠᠭᠠᠨ ᠤ᠋ ᠬᠥᠷᠥᠭ ᠪᠠᠰᠠ ᠳᠤᠤᠭᠠᠷᠴᠤ ᠳᠠ᠃ 《ᠳᠠᠯᠠᠢ ᠯᠠᠮᠠ ᠶ᠋ᠢ ᠵᠠᠯᠠᠷᠠᠬᠤ ᠪᠣᠯᠭᠠᠨ ᠳ᠋ᠤ᠌ ᠪᠠᠢᠨ ᠪᠠᠢᠨ ᠪᠣᠰᠬᠤ ᠶᠤᠮ ᠳᠠ》 ᠭᠡᠵᠦ ᠲᠡᠷᠡ ᠬᠡᠯᠡᠭᠰᠡᠨ ᠭᠡᠳᠡᠭ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠳᠠᠯᠠᠢ ᠯᠠᠮᠠ ᠭᠣᠣᠯ ᠬᠠᠭᠠᠯᠭᠠ ᠪᠠᠷ ᠪᠢᠰᠢ ᠬᠠᠷᠢᠨ ᠪᠠᠷᠠᠭᠤᠨ ᠬᠠᠴᠠᠷ ᠤ᠋ᠨ ᠬᠣᠶᠠᠷ ᠲᠠᠬᠢ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠴᠢᠮᠷᠠ ᠣᠷᠳᠣᠨ ᠢ᠋ ᠰᠢᠩᠷᠡ ᠣᠷᠳᠣᠨ ᠲᠠᠢ ᠬᠣᠯᠪᠣᠭᠰᠠᠨ ᠬᠣᠩᠭᠢᠯ ᠢ᠋ᠶ᠋ᠠᠷ ᠶᠠᠪᠤᠳᠠᠭ ᠪᠣᠯᠤᠭᠰᠠᠨ ᠶᠤᠮ ᠭᠡᠨᠡ ᠯᠠᠢ᠃
ᠡᠨᠡ ᠦᠭᠡ ᠶ᠋ᠢ ᠮᠥᠷᠭᠥᠯᠴᠢᠳ ᠰᠣᠨᠣᠰᠤᠭᠠᠳ ᠭᠦᠦᠰᠢ ᠬᠠᠭᠠᠨ ᠤ᠋ ᠬᠥᠷᠥᠭ ᠦ᠋ᠨ ᠡᠮᠦᠨᠡ ᠴᠣᠬᠣ ᠵᠣᠭᠣᠰ᠂ ᠬᠠᠳᠠᠭ ᠲᠡᠷᠢᠭᠦᠲᠡᠨ ᠡᠷᠭᠦᠪᠡ᠃ ᠲᠡᠨᠳᠡ ᠡᠴᠡ ᠪᠡᠨ ᠮᠥᠷᠭᠥᠯᠴᠢᠳ ᠶᠡᠬᠡ ᠵᠣᠣ ᠳ᠋ᠤ᠌ ᠰᠢᠯᠵᠢᠨ ᠣᠷᠣᠵᠠᠢ᠃ ᠶᠡᠬᠡ ᠵᠣᠣ ᠪᠣᠯ ᠬᠠᠮᠢᠭᠠᠰᠢ ᠬᠠᠮᠢᠭᠠᠰᠢ ᠪᠠᠨ ᠬᠣᠷᠢᠨ ᠠᠯᠲᠠ ᠶ᠋ᠢᠨ ᠳᠥᠷᠪᠡᠯᠵᠢᠨ ᠰᠦᠮᠡ ᠶᠦᠮ᠃ ᠲᠡᠨᠳᠡ ᠢᠷᠡᠬᠦ ᠭᠠᠯᠪᠠ ᠶ᠋ᠢᠨ ᠪᠤᠷᠬᠠᠨ ᠮᠠᠢᠳᠠᠷ᠂ ᠶᠡᠬᠡ ᠨᠢᠭᠦᠯᠡᠰᠬᠦᠢ ᠪᠤᠷᠬᠠᠨ ᠠᠷᠢᠶᠠᠪᠠᠯᠤ᠂ ᠪᠦᠬᠦᠨ ᠢ᠋ ᠦᠵᠡᠭᠴᠢ ᠪᠤᠷᠬᠠᠨ ᠵᠠᠩᠷᠠᠢᠰᠠᠭ᠂ ᠽᠤᠩᠭᠡᠸᠠ ᠶ᠋ᠢᠨ ᠳᠦᠷᠢ ᠪᠣᠯᠤᠨ ᠱᠠᠰᠢᠨ ᠤ᠋ ᠠᠮᠤᠷᠯᠢᠩᠭᠤᠢ ᠲᠣᠭᠰᠢᠨ ᠳᠦᠷᠢᠲᠦ ᠪᠤᠷᠬᠠᠳ ᠤ᠋ᠨ ᠬᠥᠷᠥᠭ ᠲᠤᠰ ᠲᠤᠰ ᠤ᠋ᠨ ᠳᠦᠷᠢᠮ ᠵᠠᠢᠭ ᠢ᠋ᠶ᠋ᠠᠷ ᠪᠠᠢᠷᠢᠯᠠᠭᠳᠠᠵᠠᠢ᠃ ᠲᠡᠷᠡ ᠪᠦᠬᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠣᠨᠴᠠ ᠡᠷᠬᠢᠮᠯᠡᠬᠦ ᠨᠢ ᠪᠤᠷᠬᠠᠨ ᠱᠠᠭᠢᠮᠤᠨᠢ ᠶ᠋ᠢᠨ ᠬᠥᠷᠥᠭ ᠶᠦᠮ᠃ ᠮᠥᠷᠭᠥᠯᠴᠢᠳ ᠲᠡᠨᠳᠡ ᠣᠷᠣᠵᠤ ᠮᠥᠷᠭᠥᠬᠦ ᠶ᠋ᠢ ᠶᠡᠬᠡᠳᠡ ᠬᠦᠰᠡᠨᠡ᠃ ᠡᠢᠮᠦ ᠳ᠋ᠦ᠍ ᠴᠤᠢᠮᠴᠤᠭ ᠭᠡᠯᠦᠩ ᠥᠪᠡᠷ ᠦ᠋ᠨ ᠪᠠᠭ ᠢ᠋ ᠳᠠᠭᠠᠭᠤᠯᠤᠨ ᠶᠠᠭᠤᠨ ᠤ᠋ ᠤᠷᠢᠳ ᠱᠠᠭᠢᠮᠤᠨᠢ ᠪᠤᠷᠬᠠᠨ ᠳ᠋ᠤ᠌ ᠮᠥᠷᠭᠥᠭᠦᠯᠬᠦ ᠶ᠋ᠢ ᠵᠣᠷᠢᠵᠠᠢ᠃
- ᠲᠡᠷᠡ ᠵᠢᠵᠢᠭᠬᠡᠨ ᠬᠣᠩᠬᠣ ᠶ᠋ᠢ ᠳᠡᠷᠭᠡᠳᠡᠭᠦᠷ ᠨᠢ ᠣᠴᠢᠬᠤ ᠳ᠋ᠠᠭᠠᠨ ᠳᠤᠤᠤᠭᠠᠷᠭᠠᠳᠠᠭ ᠶᠤᠮ᠃ ᠬᠥᠮᠦᠨ ᠢᠷᠡᠵᠦ ᠶᠠᠪᠤᠭᠠ ᠶ᠋ᠢ ᠮᠡᠳᠡᠭᠳᠡᠬᠦ᠂ ᠪᠠᠰᠠ ᠪᠤᠷᠬᠠᠨ ᠪᠠᠭᠰᠢ ᠶ᠋ᠢ ᠬᠥᠭᠵᠢᠮ ᠦ᠋ᠨ ᠡᠬᠡᠰᠢᠭ ᠢ᠋ᠶ᠋ᠡᠷ ᠪᠠᠶᠠᠰᠤᠭᠤᠯᠬᠤ ᠪᠤᠶᠠᠨ ᠤ᠋ ᠲᠡᠮᠳᠡᠭ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠰᠤᠷᠭᠠᠨ ᠬᠡᠯᠡᠪᠡ᠃
ᠵᠢᠵᠢᠭ ᠲᠠᠯᠠᠪᠠᠢ ᠳᠡᠭᠡᠷᠡ ᠬᠣᠶᠠᠷ ᠭᠠᠤᠯᠢᠨ ᠬᠣᠩᠬᠣ ᠳᠡᠭᠦᠵᠢᠯᠡᠭᠦᠷ ᠲᠦ᠍ ᠵᠡᠭᠦᠭᠰᠡᠨ ᠪᠠᠢᠯᠠ᠃ ᠬᠣᠩᠬᠣᠨ ᠤ᠋ ᠬᠡᠯᠡ ᠨᠢ ᠮᠣᠳᠣ ᠠᠵᠢ᠃ ᠭᠡᠰᠦᠯ ᠰᠡᠩᠵᠢ ᠡᠬᠢᠯᠡᠭᠡᠳ ᠲᠡᠷᠡ ᠬᠣᠩᠬᠣᠨ ᠤ᠋ ᠬᠡᠯᠡ ᠶ᠋ᠢ ᠬᠥᠳᠡᠯᠭᠡᠪᠡ᠃ ᠮᠣᠳᠣ ᠤᠴᠢᠷ ᠠ᠋ᠴᠠ ᠪᠢᠲᠡᠭᠦᠪᠲᠦᠷ ᠵᠥᠭᠡᠯᠡᠬᠡᠨ ᠴᠢᠮᠡᠭᠡ ᠭᠠᠷᠴᠤ ᠠᠭᠠᠵᠢᠮ ᠢ᠋ᠶ᠋ᠠᠷ ᠵᠠᠮᠬᠠᠷᠠᠯᠠ᠃ ᠮᠥᠷᠭᠥᠯᠴᠢᠳ ᠠᠮᠢᠰᠬᠤᠭᠠ ᠳᠠᠷᠤᠨ ᠠᠶᠠᠷᠬᠠᠨ ᠠᠯᠬᠤᠯᠠᠭᠰᠠᠭᠠᠷ ᠪᠤᠳ᠋ᠳ᠋ᠾᠠ ᠱᠠᠭᠢᠮᠤᠨᠢ ᠶ᠋ᠢᠨ ᠰᠢᠲᠦᠭᠡᠨ ᠦ᠌ ᠭᠠᠵᠠᠷ ᠣᠴᠢᠵᠠᠭᠠᠯᠠ᠃ ᠭᠤᠷᠪᠠᠨ ᠲᠠᠯᠠ ᠠ᠋ᠴᠠ ᠪᠠᠨ ᠣᠩᠭᠣᠷᠬᠠᠢ ᠭᠣᠶᠣᠮᠰᠣᠭ ᠰᠡᠭᠦᠭᠡᠪᠴᠢᠨ ᠯᠠᠪᠷᠢ ᠳᠣᠲᠣᠷᠠ ᠰᠠᠭᠤᠭᠠ ᠪᠠᠷ ᠨᠢ ᠱᠤᠭᠤᠵᠤ ᠬᠢᠭᠰᠡᠨ ᠪᠤᠳ᠋ᠳ᠋ᠾᠠ ᠪᠤᠷᠬᠠᠨ ᠤ᠋ ᠠᠯᠲᠠ ᠲᠦᠷᠬᠢᠮᠡᠯ ᠳᠦᠷᠢ ᠶ᠋ᠢ ᠮᠥᠷᠭᠥᠯᠴᠢᠳ ᠬᠠᠷᠠᠮᠠᠭᠴᠠ ᠴᠥᠮ ᠯᠡ ᠨᠠᠮᠠᠨᠴᠢᠯᠠᠨ ᠵᠠᠯᠪᠠᠷᠠᠵᠠᠭᠠᠪᠠ᠃ ᠯᠠᠪᠷᠢ ᠨᠢ ᠯᠤᠤ ᠣᠷᠢᠶᠠᠵᠤ ᠭᠣᠶᠣᠮᠰᠣᠭ ᠢ᠋ᠶ᠋ᠠᠷ ᠰᠡᠢᠯᠦᠭᠰᠡᠨ ᠪᠠᠭᠠᠨᠠ ᠶ᠋ᠢᠨ ᠳᠡᠭᠡᠷᠡ ᠲᠣᠭᠲᠠᠭᠠᠭᠰᠠᠨ᠂ ᠠᠯᠲᠠᠨ ᠲᠤᠭ ᠪᠦᠬᠦᠢ ᠦᠵᠡᠰᠬᠦᠯᠡᠩᠲᠡᠢ ᠪᠠᠢᠳᠠᠯ ᠲᠠᠢ ᠪᠥᠭᠡᠳ ᠬᠣᠶᠠᠷ ᠡᠩᠨᠡᠭᠡ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠠᠯᠲᠠᠳᠠᠭᠰᠠᠨ ᠰᠸ᠋ᠷᠭᠤᠨ ᠪᠤᠶᠤ ᠠᠯᠲᠠ᠂ ᠲᠠᠬᠢᠯ ᠤ᠋ᠨ ᠴᠥᠭᠥᠴᠡ ᠦᠷᠦᠭᠡᠰᠦᠲᠡᠢ ᠠᠵᠢ᠃ ᠮᠥᠷᠭᠥᠯᠴᠢᠳ ᠪᠤᠳ᠋ᠳ᠋ᠾᠠ ᠪᠤᠷᠬᠠᠨ ᠤ᠋ ᠰᠢᠲᠦᠭᠡᠨ ᠢ᠋ ᠨᠠᠷᠠ ᠵᠥᠪ ᠡᠷᠭᠢᠨ ᠭᠣᠷᠢᠶᠠ ᠬᠢᠵᠦ ᠡᠷᠭᠦᠯ ᠪᠠᠷᠢᠴᠠ ᠪᠠᠨ ᠣᠷᠬᠢᠭᠠᠳ ᠶᠡᠬᠡᠳᠡ ᠰᠦᠰᠦᠭᠯᠡᠨ ᠪᠤᠷᠬᠠᠨ ᠤ᠋ ᠵᠦᠭ ᠪᠥᠭᠰᠡ ᠪᠡᠨ ᠬᠠᠷᠠᠭᠤᠯᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠵᠦ ᠠᠷᠤᠭᠰᠢ ᠪᠠᠨ ᠤᠬᠤᠷᠢᠨ ᠭᠠᠷᠴᠠᠭᠠᠯᠠ᠃
- ᠬᠠᠮᠤᠭ ᠨᠢᠭᠦᠯ ᠮᠢᠨᠢ ᠠᠷᠢᠭᠤᠳᠤᠭᠰᠠᠨ ᠪᠠᠢᠬᠠ ᠠ᠋! ᠭᠡᠵᠦ ᠰᠢᠲᠦᠭᠡᠨ ᠦ᠌ ᠥᠷᠥᠭᠡᠨ ᠡᠴᠡ ᠭᠠᠷᠬᠤ ᠳ᠋ᠠᠭᠠᠨ ᠥᠯᠵᠡᠢ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠴᠤᠢᠮᠴᠤᠭ ᠭᠡᠯᠦᠩ ᠳᠤᠷᠠ ᠦᠭᠡᠢᠴᠡᠵᠦ᠄
- ᠨᠢᠭᠦᠯ ᠨᠢ ᠠᠷᠢᠭᠤᠳᠬᠤ ᠬᠥᠮᠦᠨ ᠭᠡᠵᠦ ᠪᠠᠷᠤᠭ ᠦᠭᠡᠢ ᠪᠢᠵᠡ ᠳᠡ! ᠭᠡᠵᠦ ᠬᠡᠯᠡᠪᠡ᠃
- ᠶᠡᠬᠡ ᠵᠣᠣ ᠶ᠋ᠢᠨ ᠥᠷᠯᠥᠭᠡᠨ ᠦ᠌ ᠮᠥᠷᠭᠥᠯ ᠥᠨᠳᠥᠷᠯᠡᠬᠦ ᠴᠠᠭ ᠪᠣᠯᠵᠤ ᠪᠠᠢᠨᠠ᠃ ᠲᠦᠷᠡᠭᠡᠯᠵᠡᠭᠡ! ᠭᠡᠵᠦ ᠮᠥᠷᠭᠥᠯᠴᠢᠳ ᠢ᠋ ᠵᠣᠬᠢᠴᠠᠭᠤᠯᠤᠭᠴᠢ ᠴᠠᠬᠠᠷ ᠬᠥᠮᠦᠨ ᠬᠡᠯᠡᠪᠡ᠃
ᠶᠡᠬᠡ ᠵᠣᠣ ᠥᠷᠯᠥᠭᠡ ᠡᠷᠲᠡ᠂ ᠦᠳᠡ ᠳᠤᠮᠳᠠ᠂ ᠦᠳᠡᠰᠢ ᠭᠤᠷᠪᠠᠨ ᠤᠳᠠᠭᠠ ᠮᠥᠷᠭᠥᠯᠴᠢᠳ ᠲᠦ᠍ ᠵᠣᠷᠢᠭᠤᠯᠤᠨ ᠨᠡᠭᠡᠭᠡᠭᠳᠡᠳᠡᠭ ᠪᠠᠢᠯᠠ᠃ ᠴᠤᠢᠮᠴᠤᠭ ᠭᠡᠯᠦᠩ ᠪᠠᠭ ᠤ᠋ᠨ ᠬᠢᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠪᠠᠯᠳᠠᠨᠯᠾᠡᠮᠤ ᠪᠤᠷᠬᠠᠨ ᠤ᠋ ᠥᠷᠥᠭᠡ ᠪᠡᠷ ᠳᠠᠮᠵᠢᠨ ᠭᠠᠳᠠᠭᠰᠢ ᠭᠠᠷᠬᠤ ᠪᠠᠷ ᠶᠠᠭᠠᠷᠠᠪᠴᠢᠯᠠᠪᠠ᠃
ᠪᠠᠯᠳᠠᠨᠯᠾᠡᠮᠤ ᠪᠤᠷᠬᠠᠨ ᠤ᠋ ᠥᠷᠥᠭᠡᠨ ᠳ᠋ᠦ᠍ ᠳᠥᠩᠭᠡᠵᠢ ᠣᠷᠣᠲᠠᠯᠠ ᠤᠳᠬᠤᠨ ᠬᠡᠦᠬᠡᠨ ᠵᠣᠯ ᠲᠠᠢ ᠯᠠ ᠬᠠᠰᠬᠢᠷᠴᠢᠬᠠᠭᠰᠠᠨ ᠦᠭᠡᠢ᠃ ᠬᠠᠨᠴᠤᠢ ᠪᠠᠷ ᠠᠮᠠ ᠪᠠᠨ ᠲᠠᠭᠯᠠᠨ ᠠᠶᠤᠵᠤ ᠪᠢᠰᠢᠭᠦᠷᠬᠡᠭᠰᠡᠨ ᠢ᠋ᠶ᠋ᠡᠨ ᠨᠢᠭᠤᠵᠤ ᠶᠠᠪᠤᠯᠠ᠃ ᠶᠠᠭᠤᠨ ᠭᠡᠪᠡᠯ᠄ ᠪᠠᠯᠳᠠᠨᠯᠾᠡᠮᠤ ᠪᠤᠷᠬᠠᠨ ᠤ᠋ ᠥᠷᠥᠭᠡ ᠪᠡᠷ ᠠᠮᠠ ᠴᠠᠭᠠᠨ ᠬᠤᠯᠤᠭᠠᠨᠠ ᠱᠠᠯᠠ ᠳᠡᠭᠡᠭᠦᠷ ᠨᠠᠰᠢ ᠴᠠᠰᠢ ᠭᠦᠶᠦᠯᠳᠦᠵᠦ ᠪᠠᠢᠯᠠ᠃ ᠪᠤᠷᠬᠠᠨ ᠰᠢᠲᠦᠭᠡᠨ ᠦ᠌ ᠭᠠᠵᠠᠷ ᠬᠤᠯᠤᠭᠠᠨᠠ ᠭᠦᠶᠦᠵᠦ ᠶᠠᠪᠤᠨᠠ ᠭᠡᠵᠦ ᠰᠠᠨᠠᠭᠠ ᠦᠭᠡᠢ ᠲᠤᠯᠠ ᠤᠳᠬᠤᠨ ᠪᠠᠢᠲᠤᠭᠠᠢ ᠰᠡᠩᠵᠢ ᠭᠡᠰᠦᠯ ᠭᠠᠢᠬᠠᠨ ᠡᠷᠡᠭᠡᠯᠵᠡᠪᠡ᠃ ᠬᠥᠯ ᠳ᠋ᠦ᠍ ᠥᠷᠳᠡᠭᠡᠳ ᠭᠢᠰᠬᠢᠭᠳᠡᠴᠢᠬᠡᠮᠡᠷ ᠣᠯᠠᠨ ᠠᠵᠢ᠃
- ᠪᠠᠭᠰᠢ ᠠ᠋᠂ ᠬᠤᠯᠤᠭᠠᠨᠠ ᠶ᠋ᠢ ᠶᠠᠭᠠᠬᠢᠨᠠ ᠡ ᠭᠡᠵᠦ ? ᠭᠡᠵᠦ ᠰᠡᠩᠵᠢ ᠰᠢᠪᠡᠭᠡᠨᠡᠪᠡ᠃ ᠲᠡᠭᠡᠬᠦ ᠳ᠋ᠦ᠍ ᠴᠤᠢᠮᠴᠤᠭ ᠭᠡᠯᠦᠩ ᠰᠠᠢ ᠯᠠ ᠤᠬᠠᠭᠠ ᠣᠷᠣᠭᠰᠠᠨ ᠮᠡᠲᠦ ᠡᠷᠭᠢᠨ ᠬᠠᠷᠠᠵᠤ᠄
- ᠪᠢ ᠬᠡᠯᠡᠬᠦ ᠪᠡᠨ ᠮᠠᠷᠲᠠᠴᠢᠬᠠᠵᠠᠢ᠃ ᠶᠡᠬᠡ ᠵᠣᠣ ᠶ᠋ᠢᠨ ᠪᠠᠯᠳᠠᠨᠯᠾᠡᠮᠤ ᠪᠤᠷᠬᠠᠨ ᠤ᠋ ᠥᠷᠥᠭᠡᠨ ᠳ᠋ᠦ᠍ ᠠᠮᠠ ᠴᠠᠭᠠᠨ ᠬᠤᠯᠤᠭᠠᠨᠠ ᠭᠦᠶᠦᠯᠳᠦᠵᠦ ᠪᠠᠢᠳᠠᠭ ᠶᠤᠮ᠃ ᠥᠯᠵᠡᠢ ᠲᠡᠢ ᠠᠮᠢᠲᠠᠨ ᠭᠡᠵᠦ ᠰᠢᠲᠦᠳᠡᠭ᠃ ᠰᠢᠲᠦᠯᠭᠡᠲᠡᠨ ᠨᠦ᠍ᠭᠦᠳ ᠬᠤᠳᠠᠯᠳᠤᠵᠤ ᠠᠪᠳᠠᠭ.᠃ᠲᠠ ᠨᠠᠷ ᠠ᠋ᠴᠠ ᠬᠤᠯᠤᠭᠠᠨᠠ ᠠᠪᠬᠤ ᠬᠥᠮᠦᠨ ᠪᠠᠢᠪᠠᠯ ᠠᠪ ᠠᠪ᠃ ᠨᠢᠭᠡ ᠨᠢ ᠠᠷᠪᠠᠨ ᠴᠣᠬᠣ ᠪᠠᠢᠳᠠᠭ ᠭᠡᠵᠦ ᠬᠡᠯᠡᠪᠡ᠃
ᠮᠥᠷᠭᠥᠯᠴᠢᠳ ᠮᠡᠯᠲᠡᠢᠨ ᠭᠠᠢᠬᠠᠵᠠᠭᠠᠵᠠᠢ᠃
- ᠨᠢᠭᠡ ᠬᠤᠯᠤᠭᠠᠨᠠ ᠠᠪᠤᠶᠠ ᠪᠠᠢᠵᠠ! ᠭᠡᠵᠦ ᠥᠯᠵᠡᠢ ᠡᠪᠦᠷ ᠢ᠋ᠶ᠋ᠡᠨ ᠠᠭᠤᠳᠠᠯᠪᠠ᠃
- ᠥᠯᠵᠡᠢ ᠴᠢ ᠠᠪᠤᠮᠠᠷ ᠪᠠᠢᠨᠠ ᠤᠤ? ᠵᠠ ᠲᠡᠭᠡᠪᠡᠯ ᠪᠢ ᠠᠪᠴᠤ ᠥᠭᠬᠦᠶᠡ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠬᠡᠯᠡᠭᠡᠳ ᠠᠷᠪᠠᠨ ᠴᠣᠬᠣ ᠵᠣᠭᠣᠰ ᠭᠣᠴᠣᠭ ᠬᠦᠦ ᠳ᠋ᠦ᠍ ᠠᠪᠴᠤ ᠥᠭᠬᠦ ᠳ᠋ᠦ᠍ ᠲᠡᠷᠡ ᠬᠦᠦ ᠡᠪᠦᠷ ᠡᠴᠡ ᠪᠡᠨ ᠨᠢᠭᠡ ᠬᠤᠯᠤᠭᠠᠨᠠ ᠭᠠᠷᠭᠠᠵᠤ ᠭᠡᠯᠦᠩ ᠦ᠋ᠨ ᠠᠯᠠᠭᠠᠨ ᠳᠡᠭᠡᠷᠡ ᠲᠠᠯᠪᠢᠪᠠ᠃
- ᠮᠠᠢ! ᠭᠡᠵᠦ ᠴᠤᠢᠮᠴᠤᠭ ᠲᠡᠷᠡ ᠬᠤᠯᠤᠭᠠᠨᠠ ᠶ᠋ᠢ ᠥᠯᠵᠡᠢ ᠳ᠋ᠦ᠍ ᠳᠠᠮᠵᠢᠭᠤᠯᠤᠯᠠ᠃ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠭᠰᠡᠨ ᠥᠯᠵᠡᠢ ᠶᠡᠬᠡ ᠯᠡ ᠪᠡᠯᠭᠡᠰᠢᠶᠡᠨ ᠪᠠᠶᠠᠷᠯᠠᠵᠤ᠂ ᠨᠢᠳᠦᠨ ᠳᠡᠭᠡᠭᠦᠷ ᠨᠢ ᠨᠢᠯᠪᠤᠰᠤ ᠭᠦᠢᠯᠭᠡᠨᠡᠨ᠂ ᠲᠣᠯᠣᠭᠠᠢ ᠳᠣᠬᠢᠨ ᠨᠠᠬᠢᠯᠵᠠᠵᠤ 《ᠭᠢᠯᠠᠢᠯᠠ᠂ ᠭᠢᠯᠠᠢᠯᠠ》 ᠭᠡᠭᠰᠡᠭᠡᠷ ᠲᠡᠳᠡ ᠪᠠᠯᠳᠠᠨᠯᠾᠡᠮᠤ ᠶ᠋ᠢᠨ ᠥᠷᠥᠭᠡᠨ ᠡᠴᠡ ᠭᠠᠷᠤᠯᠠ᠃
ᠶᠡᠬᠡ ᠵᠣᠣ ᠶ᠋ᠢᠨ ᠭᠠᠵᠠᠷ ᠣᠷᠣᠭᠰᠠᠨ ᠮᠥᠷᠭᠥᠯᠴᠢᠳ ᠨᠠᠢ᠍ᠮᠠᠨ ᠶᠠᠩᠵᠤ ᠪᠠᠷ ᠮᠥᠷᠭᠥᠯ ᠦᠢᠯᠡᠳᠴᠦ ᠪᠣᠯᠳᠠᠭ ᠠᠵᠢ᠃ ᠪᠤᠷᠬᠠᠳ ᠤ᠋ᠨ ᠱᠤᠭᠤᠮᠠᠯ ᠳᠦᠷᠰᠦ ᠶ᠋ᠢᠨ ᠪᠠᠷᠠᠭᠤᠨ ᠡᠪᠦᠳᠦᠭ ᠲᠦ᠍ ᠳᠤᠬᠤ ᠪᠠᠨ ᠬᠦᠷᠭᠡᠨ ᠪᠥᠬᠥᠯᠵᠡᠵᠦ ᠮᠥᠷᠭᠥᠨᠡ᠃ ᠡᠨᠡ ᠨᠢ ᠬᠠᠮᠤᠭ ᠤ᠋ᠨ ᠲᠦᠭᠡᠮᠡᠯ ᠪᠣᠯᠬᠣᠷ ᠶᠡᠬᠡ ᠵᠣᠣ ᠶ᠋ᠢᠨ ᠪᠤᠷᠬᠠᠳ ᠤ᠋ᠨ ᠪᠠᠷᠠᠭᠤᠨ ᠡᠪᠦᠳᠦᠭ ᠨᠢ ᠭᠥᠯᠢᠢᠲᠡᠯᠡ ᠵᠦᠯᠭᠦᠭᠳᠡᠭᠡᠳ ᠵᠠᠷᠢᠮ ᠤ᠋ᠨ ᠨᠢ ᠭᠠᠤᠯᠢ ᠨᠢ ᠴᠤᠬᠤᠢᠴᠢᠬᠠᠭᠰᠠᠨ ᠪᠠᠢᠳᠠᠭ ᠠᠵᠢ᠃ ᠭᠠᠤᠯᠢ ᠨᠢ ᠴᠤᠬᠤᠢᠭᠰᠠᠨ ᠪᠤᠷᠬᠠᠳ ᠢ᠋ ᠦᠶᠡ ᠦᠶᠡ ᠠᠯᠲᠠ ᠲᠦᠷᠬᠢᠵᠦ ᠰᠡᠷᠭᠦᠭᠡᠳᠡᠭ ᠪᠣᠯᠪᠠᠴᠤ ᠣᠯᠠᠨ ᠲᠦᠮᠡᠨ ᠮᠥᠷᠭᠥᠯᠴᠢᠳ ᠦ᠋ᠨ ᠳᠤᠬᠤ ᠶᠠᠭᠤ ᠲᠠᠢ ᠴᠤ᠌ ᠵᠦᠢᠷᠯᠡᠰᠢ ᠦᠭᠡᠢ ᠰᠢᠷᠦᠭᠦᠨ ᠦᠷᠦᠪᠲᠦᠯ ᠠᠵᠠᠢ᠃ ᠭᠡᠪᠡᠴᠦ ᠪᠠᠰᠠ ᠪᠤᠷᠬᠠᠳ ᠤ᠋ᠨ ᠵᠡᠭᠦᠨ ᠡᠪᠦᠳᠦᠭ ᠮᠥᠨ ᠯᠡ ᠬᠠᠯᠴᠠᠷᠠᠭᠰᠠᠨ ᠦᠵᠡᠭᠳᠡᠨᠡ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ ᠮᠥᠷᠭᠥᠯᠴᠢᠳ ᠪᠤᠷᠬᠠᠳ ᠤ᠋ᠨ ᠵᠡᠭᠦᠨ ᠡᠪᠦᠳᠦᠭ ᠡᠴᠡ ᠠᠳᠢᠰ ᠠᠪᠤᠪᠠᠯ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠢ᠋ᠶ᠋ᠡᠨ ᠰᠡᠮᠬᠡᠨ ᠰᠢᠪᠡᠨᠡᠨ ᠶᠠᠷᠢᠳᠠᠭ ᠪᠠᠢᠯᠠ᠃ ᠬᠥᠮᠦᠨ ᠦ᠌ ᠬᠦᠰᠡᠯ ᠳ᠋ᠦ᠍ ᠲᠡᠭᠦᠰᠬᠡᠯ ᠪᠠᠢᠬᠤ ᠦᠭᠡᠢ ᠪᠣᠯᠬᠣᠷ ᠭᠠᠤᠯᠢᠨ ᠪᠤᠷᠬᠠᠳ ᠤ᠋ᠨ ᠵᠡᠭᠦᠨ ᠡᠪᠦᠳᠦᠭ ᠪᠠᠰᠠ ᠯᠠ ᠠᠮᠤᠰᠬᠢᠬᠦ ᠶ᠋ᠢᠨ ᠵᠠᠶᠠᠭᠠ ᠦᠭᠡᠢ ᠪᠠᠢᠯᠠ᠃ ᠬᠦᠰᠡᠬᠦ ᠦᠭᠡᠢ ᠶᠠᠭᠤᠮᠠ ᠭᠡᠵᠦ ᠬᠥᠮᠦᠨ ᠳ᠋ᠦ᠍ ᠬᠠᠮᠢᠭᠠ ᠪᠠᠢᠬᠤ ᠪᠣᠢ?
ᠴᠢᠨᠡᠭᠡᠯᠢᠭᠳᠡᠭᠦᠬᠡᠨ ᠮᠥᠷᠭᠥᠯᠴᠢᠳ ᠵᠤᠯᠠ ᠪᠠ ᠰᠢᠷᠠ ᠲᠣᠰᠣ ᠠᠪᠴᠢᠷᠠᠵᠤ ᠪᠤᠷᠬᠠᠳ ᠲᠤ᠌ ᠡᠷᠭᠦᠬᠦ᠂ ᠵᠠᠷᠢᠮ ᠨᠢ ᠶᠡᠬᠡ ᠵᠣᠣ ᠶ᠋ᠢᠨ ᠣᠯᠠᠨ ᠵᠠᠭᠤᠨ ᠵᠤᠯᠠ ᠶᠢᠨ ᠰᠢᠷᠭᠢᠨ ᠳᠤᠮᠳᠠ ᠣᠷᠣᠵᠤ ᠪᠠᠢᠭᠠ ᠲᠣᠰᠣ ᠶ᠋ᠢ ᠳᠦᠭᠦᠷᠭᠡᠨ ᠰᠡᠷᠭᠦᠭᠡᠵᠦ ᠪᠤᠶᠠᠨ ᠦᠢᠯᠡᠳᠦᠨᠡ᠃ ᠡᠨᠡ ᠶᠣᠰᠣ ᠶ᠋ᠢ ᠳᠠᠭᠠᠵᠤ ᠣᠳᠬᠣᠨ ᠨᠢᠭᠡ ᠳᠠᠩᠬᠤ ᠪᠤᠴᠠᠯᠤᠭᠰᠠᠨ ᠰᠢᠷᠠ ᠲᠣᠰᠣ ᠲᠠᠢ ᠢᠷᠡᠭᠰᠡᠨ ᠪᠢᠯᠡ᠃ ᠭᠡᠪᠡᠴᠦ ᠲᠡᠷᠡ ᠳᠠᠩᠬᠤ ᠰᠢᠷᠠ ᠲᠣᠰᠣ ᠶᠡᠬᠡ ᠵᠣᠣ ᠶ᠋ᠢᠨ ᠣᠯᠠᠨ ᠵᠤᠯᠠ ᠶ᠋ᠢ ᠳᠦᠭᠦᠷᠭᠡᠨ ᠰᠡᠷᠭᠦᠭᠡᠬᠦ ᠳ᠋ᠦ᠍ ᠬᠠᠮᠢᠭᠠ ᠨᠢ ᠴᠦ᠍ ᠬᠦᠷᠦᠭᠡ ᠦᠭᠡᠢ᠃ ᠡᠭᠦᠨ ᠳ᠋ᠡᠭᠡᠨ ᠤᠳᠬᠠᠨ ᠤ᠋ ᠰᠡᠳᠬᠢᠯ ᠳᠤᠮᠳᠠᠭᠤᠷ ᠪᠠᠢᠯᠠ᠃ ᠲᠡᠭᠦᠨ ᠢ᠋ ᠴᠤᠢᠮᠴᠤᠭ ᠭᠡᠯᠦᠩ ᠠᠵᠢᠭᠯᠠᠭᠠᠳ᠄
- ᠵᠠᠵᠤᠳ ᠤ᠋ᠨ ᠡᠷᠭᠦᠯ ᠪᠡᠯᠡᠳᠬᠡᠵᠦ ᠦᠭᠭᠦᠮᠴᠡ᠃ ᠵᠠᠭᠤᠨ ᠵᠤᠯᠠ᠂ ᠵᠠᠭᠤᠨ ᠪᠠᠯᠢᠩ ᠣᠷᠣᠳᠠᠭ ᠶᠤᠮ᠃ ᠶᠠᠭᠠᠬᠢᠬᠤ ᠪᠣᠢ ᠪᠢ ᠪᠡᠯᠡᠳᠬᠡᠭᠦᠯᠵᠦ ᠥᠭᠭᠦᠨᠡ᠃ ᠨᠠᠳᠠ ᠬᠡᠳᠦᠨ ᠵᠣᠭᠣᠰ ᠪᠣᠢ ᠭᠡᠵᠦ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠰᠢᠪᠡᠨᠡᠵᠡᠢ᠃ ᠤᠳᠬᠤᠨ ᠲᠡᠭᠦᠨ ᠳ᠋ᠦ᠍ ᠲᠣᠩ ᠶᠡᠬᠡ ᠪᠠᠶᠠᠷᠯᠠᠪᠠ᠃ ᠲᠡᠷᠡ ᠨᠢ ᠨᠢᠳᠦᠨ ᠳᠡᠭᠡᠷᠡ ᠪᠡᠨ ᠲᠣᠳᠣᠬᠠᠨ ᠪᠠᠢᠯᠠ᠃ ᠴᠤᠢᠮᠴᠤᠭ ᠭᠡᠯᠦᠩ ᠪᠠᠰᠠ᠄
- ᠲᠤᠨᠴᠤᠳ ᠪᠤᠶᠤ ᠮᠢᠩᠭᠠᠨ ᠵᠤᠯᠠ᠂ ᠮᠢᠩᠭᠠᠨ ᠪᠠᠯᠢᠩ ᠤ᠋ᠨ ᠡᠷᠭᠦᠯ ᠪᠠᠢᠳᠠᠭ ᠶᠤᠮ᠃ ᠲᠡᠭᠦᠨ ᠡᠴᠡ ᠶᠡᠬᠡ ᠡᠷᠭᠦᠯ ᠦᠭᠡᠢ᠃ ᠭᠡᠪᠡᠴᠦ ᠲᠡᠭᠦᠨ ᠳ᠋ᠦ᠍ ᠲᠦᠷᠡᠢᠪᠴᠢ ᠪᠠᠭᠠᠳᠠᠬᠤ ᠪᠠᠢᠬᠤ ᠭᠡᠵᠦ ᠶᠠᠷᠢᠵᠠᠢ᠃ ᠲᠡᠳᠡᠨ ᠢ᠋ ᠪᠤᠴᠠᠬᠤ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠯᠠ ᠮᠥᠷᠭᠥᠯᠴᠢᠳ ᠬᠠᠰᠤᠭᠳᠠᠭᠰᠠᠨ ᠰᠢᠨᠵᠢ ᠦᠭᠡᠢ᠃
ᠶᠡᠬᠡ ᠵᠣᠣ ᠶ᠋ᠢᠨ ᠬᠠᠰᠢᠶᠠᠨ ᠳ᠋ᠤ᠌ ᠮᠥᠷᠭᠥᠯᠴᠢᠳ ᠰᠤᠨᠵᠤ ᠮᠥᠷᠭᠥᠨ᠂ ᠨᠢᠭᠡ ᠪᠣᠰᠴᠤ᠂ ᠨᠢᠭᠡ ᠬᠡᠪᠲᠡᠵᠦ ᠬᠡᠳᠦᠨ ᠵᠠᠭᠤᠨ ᠴᠡᠷᠢᠭ ᠪᠠᠢᠯᠳᠤᠭᠠᠨ ᠤ᠋ ᠰᠤᠷᠭᠠᠭᠤᠯᠢ ᠬᠢᠵᠦ ᠪᠠᠢᠬᠤ ᠰᠢᠭ᠋ ᠬᠠᠷᠠᠭᠳᠠᠯᠠ᠃ ᠬᠤᠪᠢ ᠲᠠᠪᠢᠯᠠᠩ ᠳ᠋ᠠᠭᠠᠨ ᠰᠠᠢᠨ ᠰᠠᠢᠬᠠᠨ ᠤ᠋ ᠪᠤᠶᠠᠨ ᠥᠯᠵᠡᠢ ᠭᠣᠷᠢᠳᠠᠭᠰᠠᠨ ᠲᠡᠷᠡ ᠣᠯᠠᠨ ᠮᠥᠷᠭᠥᠯᠴᠢᠳ ᠭᠠᠵᠠᠷ ᠭᠠᠵᠠᠷ ᠠ᠋ᠴᠠ ᠴᠤᠭᠯᠠᠷᠠᠨ ᠢᠷᠡᠭᠰᠡᠨ ᠠᠵᠢ᠃ ᠲᠡᠳᠡᠨ ᠦ᠌ ᠳᠤᠮᠳᠠ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠬᠥᠮᠦᠨ ᠨᠢᠭᠡᠬᠡᠨ ᠴᠦ᠍ ᠦᠭᠡᠢ ᠪᠠᠢᠭᠠ ᠶ᠋ᠢ ᠠᠵᠢᠭᠯᠠᠨ ᠬᠠᠷᠠᠭᠠᠳ ᠰᠡᠩᠵᠢ 《ᠪᠠᠶᠠᠨ ᠬᠥᠮᠦᠨ ᠡᠨᠡ ᠨᠠᠰᠤᠨ ᠤ᠋ ᠵᠢᠷᠭᠠᠯ᠂ ᠴᠢᠨᠡᠭᠡᠯᠢᠭ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠴᠠᠳᠪᠠᠯ ᠡᠷᠭᠢᠯ ᠮᠥᠷᠭᠥᠯ ᠬᠢᠬᠦ ᠨᠢ ᠬᠣᠪᠣᠷ ᠪᠠᠢᠳᠠᠭ ᠶᠤᠮ ᠤᠤ ᠳᠠ! ᠭᠡᠲᠡᠯᠡ ᠬᠣᠢᠲᠤ ᠨᠠᠰᠤ ᠭᠡᠵᠦ ᠶᠠᠭᠤᠮᠠᠨ ᠤ᠋ ᠲᠤᠬᠠᠢ ᠰᠠᠨᠠᠭᠠ ᠵᠣᠪᠠᠳᠠᠭ ᠦᠭᠡᠢ ᠬᠡᠷᠡᠭ ᠦᠦ? ᠨᠢᠭᠡ ᠪᠣᠳᠣᠬᠤ ᠳ᠋ᠤ᠌ ᠵᠥᠪ ᠴᠦ᠍ ᠶᠦᠮ ᠦᠦ? ᠡᠨᠡ ᠯᠡ ᠶᠠᠪᠤᠭᠠ ᠨᠠᠰᠤᠨ ᠳ᠋ᠠᠭᠠᠨ ᠵᠢᠷᠭᠠᠯ ᠲᠠᠢ ᠪᠠᠢᠬᠤ ᠨᠢ ᠡᠷᠬᠢᠮ ᠶᠦᠮ ᠰᠠᠨ ᠤᠤ ᠳᠠ!》 ᠭᠡᠵᠦ ᠪᠣᠳᠣᠵᠤ ᠶᠠᠪᠤᠯᠠ᠃