ᠣᠷᠣᠢ ᠦᠭᠡᠢ ᠰᠦᠮᠡ – ᠬᠣᠶᠠᠷ ᠂ ᠡᠷᠢᠯ ᠳᠦ ᠭᠠᠷᠤᠭᠰᠠᠨ ᠮᠥᠷᠭᠥᠯᠴᠢᠳ Оройгүй сүм – Хоёр ᠂ Эрэлд гарсан мөргөлчид - Oroigui sum 2
1347ᠬᠣᠶᠠᠷ ᠂ ᠡᠷᠢᠯ ᠳᠦ ᠭᠠᠷᠤᠭᠰᠠᠨ ᠮᠥᠷᠭᠥᠯᠴᠢᠳ
ᠠᠭᠤᠯᠠ ᠪᠦᠰᠡᠯᠡᠭᠦᠷ ᠦᠭᠡᠢ ᠨᠢᠭᠡ ᠳᠤᠲᠠᠭᠤ
ᠳᠠᠯᠠᠢ ᠪᠦᠯᠢᠭᠦᠷ ᠦᠭᠡᠢ ᠨᠢᠭᠡ ᠳᠤᠲᠠᠭᠤ
ᠠᠯᠤᠰ ᠲᠤ᠌ ᠰᠦᠷᠯᠢᠭ ᠥᠨᠳᠥᠷ ᠠᠭᠤᠯᠠᠰ ᠬᠥᠬᠡᠮᠳᠦᠭ ᠮᠠᠨᠠᠨ ᠳᠤᠮᠳᠠ ᠠ᠋ᠴᠠ ᠰᠦᠨᠳᠡᠷᠯᠡᠨ ᠱᠣᠪᠣᠯᠵᠠᠵᠤ ᠬᠠᠷᠠᠭᠳᠠᠯᠠ᠃ ᠶᠡᠬᠡ ᠵᠠᠮ ᠳᠠᠭᠠᠭᠰᠠᠨ ᠮᠥᠷᠭᠥᠯᠴᠢᠳ ᠦ᠋ᠨ ᠤᠷᠲᠤ ᠴᠤᠪᠤᠭᠠᠨ ᠤ᠋ ᠮᠠᠩᠨᠠᠢ ᠶ᠋ᠢᠨ ᠲᠡᠮᠡᠭᠡ ᠶ᠋ᠢ ᠬᠥᠲᠥᠯᠵᠦ ᠶᠠᠪᠤᠭᠰᠠᠨ ᠪᠠᠷᠤᠭᠠᠷ ᠴᠢᠷᠠᠢ ᠲᠠᠢ ᠬᠥᠮᠦᠨ ᠵᠣᠭ ᠲᠣᠰᠴᠤ ᠡᠷᠭᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
– ᠠᠯᠠᠱᠠᠨ ᠶᠠᠮᠤᠨ ᠬᠠᠷᠠᠭᠳᠠᠵᠤ ᠪᠠᠢᠨᠠ᠃ ᠶᠠᠭᠤᠮᠠ ᠪᠠᠨ ᠴᠡᠭᠴᠡᠲᠡᠢ ᠶᠠᠪᠤᠵᠠᠭᠠ! ᠭᠡᠵᠦ ᠬᠡᠯᠡᠪᠡ᠃ ᠮᠥᠷᠭᠥᠯᠴᠢᠳ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠪᠤᠪᠲᠤᠨᠠᠨ ᠱᠤᠤᠭᠢᠯᠳᠤᠵᠤ ᠲᠤᠷᠯᠢᠶᠠᠬᠠ ᠶ᠋ᠢᠨ ᠰᠦᠷᠦᠭ ᠴᠣᠴᠢᠨ ᠨᠢᠰᠬᠦ ᠳ᠋ᠡᠭᠡᠨ ᠭᠤᠸᠠᠭᠯᠠᠯᠳᠤᠬᠤ ᠶ᠋ᠢᠨ ᠠᠳᠠᠯᠢ ᠪᠥᠭᠡᠮ ᠱᠤᠤᠭᠢᠶᠠᠨ ᠪᠣᠯᠤᠯᠠ᠃
– ᠱᠤᠤᠭᠢᠯᠳᠤᠨ ᠰᠣᠨᠢᠭᠤᠴᠢᠯᠠᠵᠤ ᠪᠠᠢᠬᠤ ᠶ᠋ᠢ ᠨᠢ ᠬᠠᠷᠠᠭᠠᠴᠢ᠃ ᠶᠡᠷᠦ ᠶᠡᠬᠡᠩᠬᠢ ᠨᠢ ᠠᠩᠬᠠ ᠤᠳᠠᠭᠠ ᠯᠠ ᠡᠨᠡ ᠵᠠᠮ ᠳ᠋ᠤ᠌ ᠭᠠᠷᠤᠭᠰᠠᠨ ᠤᠯᠤᠰ ᠪᠣᠯᠤᠯᠲᠠᠢ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠳ᠋ᠠᠭᠠᠨ ᠬᠡᠯᠡᠪᠡ᠃
– ᠨᠠᠳᠠ ᠰᠢᠭ᠋ ᠦᠦ? ᠭᠡᠵᠦ ᠰᠡᠩᠵᠢ ᠭᠡᠰᠦᠯ ᠠᠰᠠᠭᠤᠬᠤ ᠳ᠋ᠤ᠌ ᠴᠤᠢᠮᠴᠤᠭ ᠲᠣᠯᠣᠭᠠᠢ ᠳᠣᠬᠢᠭᠰᠠᠨ ᠢ᠋ᠶ᠋ᠠᠨ᠂
– ᠪᠢ ᠴᠢᠮᠠ ᠳ᠋ᠤ᠌ ᠵᠠᠮ ᠵᠠᠭᠤᠷᠠ ᠶ᠋ᠢᠨ ᠪᠦᠬᠦᠢᠯᠡ ᠰᠣᠨᠢᠨ ᠢ᠋ ᠶᠠᠷᠢᠵᠤ ᠥᠭᠭᠦᠨᠡ᠃ ᠬᠠᠷᠢᠨ ᠮᠢᠨᠦ ᠳᠤᠲᠠᠭᠤ ᠣᠷᠬᠢᠬᠤ ᠶᠤᠮ ᠤᠤ᠂ ᠠᠵᠢᠭᠯᠠᠭᠠ ᠦᠭᠡᠢ ᠵᠦᠢᠯ ᠭᠠᠷᠪᠠᠯ ᠠᠰᠠᠭᠤᠵᠤ ᠠᠪᠴᠤ ᠪᠠᠢᠭᠠᠷᠠᠢ᠃ ᠨᠠᠳᠠ ᠳᠠᠬᠢᠭᠠᠳ ᠴᠢᠮᠠ ᠳ᠋ᠤ᠌ ᠲᠡᠭᠡᠵᠦ ᠶᠠᠷᠢᠵᠤ ᠥᠭᠬᠦ ᠪᠣᠯᠤᠮᠵᠢ ᠪᠠᠢᠬᠤ ᠦᠭᠡᠢ ᠪᠣᠯᠤᠨᠠ ᠰᠢᠦ ᠭᠡᠵᠦ ᠬᠡᠯᠡᠪᠡ᠃ ᠲᠡᠷᠡ ᠰᠡᠵᠢᠭ ᠲᠡᠢ ᠦᠭᠡᠨ ᠳ᠋ᠦ᠍ ᠰᠡᠩᠵᠢ ᠴᠣᠴᠢᠷᠲᠠᠯᠠ᠃
– ᠶᠠᠭᠠᠬᠢᠭᠠᠳ ᠪᠣᠯᠤᠮᠵᠢ ᠦᠭᠡᠢ ᠭᠡᠵᠦ? ᠪᠢᠳᠡ ᠴᠢᠨᠢ ᠬᠠᠮᠲᠤ ᠪᠤᠴᠠᠬᠤ ᠪᠢᠵᠡ ᠳᠡ? ᠭᠡᠵᠦ ᠰᠡᠩᠵᠢ ᠭᠡᠰᠦᠯ ᠭᠠᠢᠬᠠᠨ ᠠᠰᠠᠭᠤᠵᠠᠢ ᠃ ᠪᠠᠭᠰᠢ ᠨᠢ ᠲᠡᠷᠡ ᠠᠰᠠᠭᠤᠯᠲᠠ ᠶ᠋ᠢ ᠰᠣᠨᠣᠰᠤᠭᠠᠳ ᠴᠢᠷᠠᠢ ᠨᠢ ᠦᠯᠦ ᠮᠡᠳᠡᠭ ᠬᠤᠪᠢᠰᠬᠢᠭᠰᠡᠨ ᠢ᠋ᠶ᠋ᠡᠨ ᠪᠡᠶᠡ ᠪᠡᠨ ᠪᠠᠷᠢᠵᠤ᠂
– ᠶᠠᠭᠠᠬᠢᠬᠤ ᠪᠣᠢ᠃ ᠬᠣᠷᠸᠠ ᠶ᠋ᠢᠨ ᠠᠮᠢᠳᠤᠷᠠᠯ ᠡᠷᠢᠶᠡᠨ ᠲᠡᠢ ᠪᠠᠷᠠᠭᠠᠨ ᠲᠠᠢ᠃ ᠬᠣᠵᠢᠮ ᠤ᠋ᠨ ᠶᠠᠪᠤᠳᠠᠯ ᠢ᠋ ᠳᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ᠃ ᠪᠠᠭᠰᠢ ᠨᠢ ᠴᠢᠮᠠ ᠰᠢᠭ᠋ ᠵᠠᠯᠠᠭᠤ ᠰᠠᠨ ᠪᠣᠯ ᠭᠡᠵᠦ ᠬᠡᠯᠡᠭᠡᠳ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ᠂
– ᠵᠠ ᠵᠠ᠂ ᠬᠡᠷᠡᠭ ᠲᠦ᠍ ᠳᠤᠷᠠᠲᠠᠢ ᠭᠡᠳᠡᠭ ᠨᠢ ! ᠣᠳᠣ ᠮᠥᠳᠳᠥᠬᠡᠨ ᠠᠯᠠᠱᠠᠨ ᠶᠠᠮᠤᠨ ᠳ᠋ᠤ᠌ ᠪᠠᠭᠤᠨᠠ᠂ ᠡᠷᠭᠦᠯ᠂ ᠪᠠᠷᠢᠴᠠ᠂ ᠭᠠᠢᠯᠢ ᠲᠥᠯᠥᠭᠡᠰᠦ ᠪᠠᠨ ᠯᠠ ᠪᠣᠳᠣ ᠭᠡᠪᠡ᠃
ᠰᠡᠩᠵᠢ ᠭᠡᠰᠦᠯ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡᠨ ᠳ᠋ᠦ᠍ ᠰᠡᠵᠢᠭ ᠲᠥᠷᠥᠭᠰᠡᠨ ᠪᠣᠯᠪᠠᠴᠤ ᠠᠶᠠᠨ ᠤ᠋ ᠵᠠᠮ ᠤ᠋ᠨ ᠦᠵᠦᠭᠦᠷ ᠲᠦ᠍ ᠠᠯᠠᠱᠠ ᠶ᠋ᠢᠨ ᠰᠦᠷᠯᠢᠭ ᠠᠭᠤᠯᠠᠰ ᠤ᠋ᠨ ᠡᠩᠭᠡᠷ ᠲᠦᠰᠢᠭᠰᠡᠨ ᠤᠷᠤᠭ ᠰᠠᠷᠠᠯ ᠬᠣᠲᠠ ᠶ᠋ᠢᠨ ᠪᠠᠷᠠ ᠶ᠋ᠢ ᠬᠠᠷᠠᠭᠠᠳ ᠲᠡᠷᠡ ᠵᠦᠭ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠴᠢᠭᠯᠡᠭᠦᠯᠪᠡ᠃
ᠮᠥᠷᠭᠥᠯᠴᠢᠳ ᠦ᠋ᠨ ᠡᠨᠡ ᠤᠷᠲᠤ ᠴᠤᠪᠤᠭᠠ ᠬᠠᠯᠬᠠ ᠶ᠋ᠢᠨ ᠵᠠᠰᠠᠭᠲᠤ ᠬᠠᠭᠠᠨ ᠤ᠋ ᠨᠤᠲᠤᠭ ᠠ᠋ᠴᠠ ᠭᠠᠷᠤᠭᠰᠠᠭᠠᠷ ᠬᠣᠶᠠᠷ ᠰᠠᠷᠠ ᠭᠠᠷᠤᠢ ᠶᠠᠪᠤᠵᠤ ᠪᠠᠢᠭᠠ ᠠᠵᠢ᠃ ᠭᠡᠯᠦᠩ ᠴᠤᠢᠮᠴᠤᠭ ᠱᠠᠪᠢ ᠰᠡᠩᠵᠢ ᠪᠡᠨ ᠳᠠᠭᠠᠭᠤᠯᠤᠨ ᠪᠠᠰᠠ ᠪᠤᠰᠤ ᠬᠡᠳᠦᠨ ᠮᠥᠷᠭᠥᠯᠴᠢᠨ ᠦ᠌ ᠬᠠᠮᠲᠤ ᠨᠢᠭᠡᠨ ᠭᠠᠯ ᠪᠣᠯᠵᠤ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠡᠴᠡ ᠭᠠᠷᠤᠭᠠᠳ ᠴᠣᠨᠵᠢ ᠶ᠋ᠢᠨ ᠵᠠᠮ ᠳ᠋ᠤ᠌ ᠡᠨᠡᠬᠦ ᠤᠷᠲᠤ ᠴᠤᠪᠤᠭᠠ ᠲᠠᠢ ᠨᠢᠭᠡᠳᠦᠨ ᠨᠡᠢᠯᠡᠭᠰᠡᠨ ᠠᠵᠢ᠃ ᠬᠡᠳᠦ ᠶ᠋ᠢᠨ ᠬᠡᠷᠡᠭ ᠵᠣᠷᠢᠭ ᠨᠢ ᠭᠡᠪᠡᠯ ᠱᠠᠰᠢᠨ ᠤ᠋ ᠠᠷᠢᠭᠤᠨ ᠳᠡᠭᠡᠳᠦ ᠣᠷᠣᠨ ᡀᠠᠰᠠ ᠵᠣᠣ ᠣᠷᠣᠵᠤ ᠡᠷᠭᠦᠯ᠂ ᠮᠥᠷᠭᠥᠯ ᠦ᠋ᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠢᠵᠡᠭᠡᠬᠦ ᠶ᠋ᠢ ᠬᠦᠰᠡᠭᠰᠡᠨ ᠤᠯᠤᠰ ᠶᠤᠮ᠃ ᠭᠡᠰᠦᠯ ᠰᠡᠩᠵᠢ ᠪᠣᠯ ᠪᠤᠷᠬᠠᠨ ᠤ᠋ ᠨᠣᠮ ᠭᠦᠨᠵᠡᠭᠡᠢᠷᠡᠭᠦᠯᠦᠨ ᠦᠵᠡᠬᠦ ᠱᠠᠰᠢᠨ ᠤ᠋ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠬᠤ ᠪᠠᠷ ᡀᠠᠰᠠ ᠵᠣᠣ ᠶ᠋ᠢ ᠵᠣᠷᠢᠵᠠᠢ᠃
– ᠴᠣᠪᠣᠭᠣ ᠰᠡᠷᠭᠦᠯᠡᠩ᠂ ᠤᠬᠠᠭᠠᠨ ᠲᠤᠩᠭᠠᠯᠠᠭ᠂ ᠠᠭᠠᠰᠢ ᠡᠶᠡᠯᠳᠡᠭ᠂ ᠰᠠᠨᠠᠭᠠ ᠠᠷᠢᠭᠤᠨ᠂ ᠵᠢᠷᠤᠭ ᠲᠠᠪᠢᠯᠠᠩ ᠪᠤᠶᠠᠨ ᠲᠠᠢ᠂ ᠵᠢᠰᠦ ᠴᠢᠷᠠᠢ ᠨᠠᠮᠪᠠᠯᠢᠭ ᠲᠤᠯᠠ ᠡᠨᠡ ᠬᠥᠪᠡᠭᠦᠨ ᠢ᠋ ᡀᠠᠰᠠ ᠵᠣᠣ ᠳ᠋ᠤ᠌ ᠶᠠᠪᠤᠭᠤᠯᠵᠤ ᠨᠣᠮ ᠳ᠋ᠤ᠌ ᠮᠡᠷᠭᠡᠨ ᠪᠣᠯᠭᠠᠪᠠᠯ ᠱᠠᠰᠢᠨ ᠲᠥᠷᠥ ᠳ᠋ᠦ᠍ ᠬᠡᠷᠡᠭ ᠲᠡᠢ ᠪᠢᠵᠡ᠃ ᠡᠴᠢᠭᠡ ᠰᠠᠢᠨᠴᠣᠭᠲᠣ ᠴᠢ ᠶᠠᠭᠤ ᠭᠡᠵᠦ ᠪᠣᠳᠣᠨᠠ ᠪᠢᠯᠡ? ᠭᠡᠮᠡᠨ ᠨᠢᠭᠡᠨ ᠡᠳᠦᠷ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠬᠠᠮᠪᠤ ᠯᠠᠮᠠ ᠰᠡᠩᠵᠢ ᠭᠡᠰᠦᠯ ᠢ᠋ ᠰᠠᠢᠨᠴᠣᠭᠲᠣ ᠡᠴᠢᠭᠡ ᠲᠡᠢ ᠨᠢ ᠨᠢᠭᠤᠷᠳᠤᠭᠤᠯᠤᠨ ᠠᠰᠠᠭᠤᠵᠠᠢ᠃ ᠡᠴᠢᠭᠡ ᠨᠢ ᠦᠨᠡᠮᠰᠢᠬᠦ ᠪᠡᠷ ᠦᠭᠡᠢ ᠶᠡᠬᠡ ᠪᠡᠷ ᠪᠠᠶᠠᠷᠯᠠᠨ ᠰᠡᠳᠬᠢᠯ ᠳᠣᠭᠳᠣᠯᠵᠤ ᠬᠡᠯᠡᠬᠦ ᠦᠭᠡ ᠪᠡᠨ ᠣᠯᠵᠤ ᠶᠠᠳᠠᠨ᠂ ᠠᠮᠢᠰᠬᠤᠭᠠᠳᠠᠵᠤ᠄
– ᠯᠠᠮᠠ ᠭᠤᠷᠪᠠᠨ ᠡᠷᠳᠡᠨᠢ ᠮᠢᠨᠢ! ᠯᠠᠮᠠ ᠭᠤᠷᠪᠠᠨ... ᠭᠡᠵᠦ ᠪᠠᠢᠭᠰᠠᠨ ᠢ᠋ ᠰᠡᠩᠵᠢ ᠭᠡᠰᠦᠯ ᠣᠳᠣ ᠴᠤ᠌ ᠰᠡᠳᠬᠢᠯ ᠳ᠋ᠡᠭᠡᠨ ᠲᠣᠳᠣ ᠰᠠᠨᠠᠵᠤ᠂ ᠨᠢᠳᠦᠨ ᠳ᠋ᠡᠭᠡᠨ ᠬᠥᠭᠡᠷᠦᠬᠦᠢ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠶᠠᠷᠯᠠᠭᠰᠠᠨ ᠴᠢᠷᠠᠢ ᠶ᠋ᠢ ᠬᠠᠷᠠᠬᠤ ᠰᠢᠭ᠋ ᠪᠣᠯᠵᠤ ᠪᠠᠢᠯᠠ᠃
– ᠡᠴᠢᠭᠡ ᠰᠠᠢᠨᠴᠣᠭᠲᠣ ᠴᠢ ᠭᠠᠭᠴᠠ ᠬᠦᠦ ᠪᠡᠨ ᠪᠤᠷᠬᠠᠨ ᠤ᠋ ᠱᠠᠪᠢ ᠨᠠᠷ ᠤ᠋ᠨ ᠲᠣᠭᠠᠨ ᠳ᠋ᠤ᠌ ᠣᠷᠣᠭᠤᠯᠵᠤ᠂ ᡀᠠᠰᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠢᠯᠡᠭᠡᠬᠦ ᠳ᠋ᠦ᠍ ᠴᠠᠭᠠᠷᠭᠤᠯᠠᠬᠤ ᠦᠭᠡᠢ ᠶᠦᠮ ᠰᠢᠭ ᠪᠣᠢ ᠳᠠ? ᠭᠡᠵᠦ ᠬᠠᠮᠪᠤ ᠶᠢ ᠳᠠᠬᠢᠨ ᠯᠠᠪᠯᠠᠬᠤ ᠳ᠋ᠤ᠌᠄
– ᠯᠠᠮᠠ ᠭᠤᠷᠪᠠᠨ ᠡᠷᠳᠡᠨᠢ ᠮᠢᠨᠢ ! ᠭᠠᠭᠴᠠ ᠬᠦᠦ ᠮᠢᠨᠢ ᠠᠷᠢᠭᠤᠨ ᠱᠠᠰᠢᠨ ᠤ᠋ ᠦᠢᠯᠡ ᠳ᠋ᠦ᠍ ᠬᠡᠷᠡᠭ ᠪᠣᠯᠪᠠᠯ ᠡᠴᠢᠭᠡ ᠮᠢᠨᠦ ᠡᠨᠡ ᠶᠠᠪᠤᠭᠠ ᠨᠠᠰᠤ ᠪᠤᠯᠤᠳ ᠡᠮᠦᠨᠡ᠂ ᠬᠣᠢᠨᠠ ᠶ᠋ᠢᠨ ᠬᠤᠪᠢ ᠲᠠᠪᠢᠯᠠᠩ ᠤ᠋ᠨ ᠪᠦᠬᠦᠢ ᠯᠡ ᠬᠡᠷᠡᠭ ᠪᠦᠲᠦᠨᠡ᠃ ᠲᠩᠷᠢ ᠬᠦᠷᠲᠡᠯᠡ ᠪᠠᠭᠠᠨᠠ ᠪᠠᠷ ᠳᠤᠲᠠᠳᠠᠭ ᠶᠤᠮ᠃ ᠥᠷᠥᠰᠢᠶᠡᠵᠦ ᠰᠣᠶᠣᠷᠬᠠ! ᠭᠡᠵᠦ ᠡᠴᠢᠭᠡ ᠨᠢ ᠬᠠᠮᠪᠤ ᠶ᠋ᠢᠨ ᠡᠮᠦᠨᠡ ᠡᠪᠦᠳᠦᠭ ᠰᠥᠬᠥᠷᠡᠨ ᠭᠠᠵᠠᠷ ᠬᠦᠷᠲᠡᠯᠡ ᠪᠥᠬᠥᠢᠰᠬᠢᠨ ᠨᠠᠮᠠᠨᠴᠢᠯᠠᠨ ᠵᠠᠯᠪᠠᠷᠢᠵᠠᠢ᠃
ᠢᠩᠭᠢᠵᠦ ᠰᠡᠩᠵᠢ ᠭᠡᠰᠦᠯ ᠦ᠋ᠨ ᠬᠤᠪᠢ ᠵᠠᠶᠠᠭᠠᠨ ᠳ᠋ᠤ᠌ ᠰᠢᠨᠡ ᠵᠠᠮ ᠡᠬᠢᠯᠡᠵᠡᠢ᠃ ᠣᠳᠣ ᠲᠡᠷᠡ ᠵᠠᠮ ᠢ᠋ᠶ᠋ᠠᠷ ᠬᠣᠶᠠᠳᠠᠬᠢ ᠰᠠᠷᠠ ᠳ᠋ᠠᠭᠠᠨ ᠶᠠᠪᠤᠵᠤ ᠪᠠᠢᠨᠠ᠃ ᠭᠡᠰᠦᠯ ᠦ᠋ᠨ ᠤᠬᠠᠭᠠᠨ ᠰᠡᠷᠭᠦᠯᠡᠩ᠂ ᠠᠪᠢᠶᠠᠰᠯᠢᠭ ᠢ᠋ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠯᠠᠮᠠ ᠨᠠᠷ ᠠᠵᠢᠵᠤ ᠮᠡᠳᠡᠭᠡᠳ ᠲᠥᠪᠡᠳ ᠲᠦ᠍ ᠰᠠᠭᠤᠯᠭᠠᠵᠤ ᠨᠣᠮ ᠦᠵᠡᠭᠦᠯᠵᠦ ᠥᠪᠡᠷᠰᠡᠳ ᠦ᠋ᠨ ᠬᠠᠯᠠᠭᠠ ᠶ᠋ᠢ ᠪᠡᠯᠡᠳᠬᠡᠬᠦ ᠪᠡᠷ ᠰᠢᠢᠳᠦᠭᠰᠡᠨ ᠨᠢ ᠡᠢᠮᠦ ᠳ᠋ᠦ᠍ ᠬᠦᠷᠭᠡᠵᠡᠢ᠃ ᠭᠡᠰᠦᠯ ᠰᠡᠩᠵᠢ ᠶ᠋ᠢ ᠪᠠᠭᠰᠢ ᠭᠡᠯᠦᠩ ᠴᠤᠢᠮᠴᠤᠭ ᠲᠤᠨᠢ ᠳᠠᠭᠠᠭᠤᠯᠵᠤ᠂ ᡀᠠᠰᠠ ᠬᠣᠲᠠ ᠳ᠋ᠤ᠌ ᠬᠦᠷᠭᠡᠭᠦᠯᠵᠦ᠂ ᠱᠠᠰᠢᠨ ᠤ᠋ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠭᠤᠯᠬᠤ ᠪᠠᠷ ᠪᠣᠯᠤᠭᠰᠠᠨ ᠠᠵᠢ᠃ ᠨᠥᠭᠦᠭᠡᠲᠡᠶᠢᠭᠦᠷ ᠴᠤᠢᠮᠴᠤᠭ ᠭᠡᠯᠦᠩ ᠴᠦ᠍ ᠪᠠᠰᠠ ᡀᠠᠰᠠ ᠤᠷᠤᠬᠤ ᠲᠤᠰᠬᠠᠢ ᠵᠣᠷᠢᠯᠭᠠ ᠲᠠᠢ ᠪᠠᠢᠯᠠ᠃
ᠠᠯᠠᠱᠠ ᠶ᠋ᠢᠨ ᠰᠦᠷᠯᠢᠭ ᠠᠭᠤᠯᠠᠨ ᠠ᠋ᠴᠠ ᠪᠠᠭᠤᠭᠰᠠᠨ ᠲᠦᠷᠭᠡᠨ ᠤᠷᠤᠰᠬᠠᠯᠲᠤ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳᠡᠭᠡᠷᠡ ᠠᠯᠠᠱᠠᠨ ᠶᠠᠮᠤᠨ ᠭᠡᠳᠡᠭ ᠭᠠᠢᠯᠢ ᠶ᠋ᠢᠨ ᠬᠣᠲᠠ ᠪᠠᠢᠷᠢᠯᠠᠵᠠᠢ᠃ ᠠᠷᠪᠠᠨ ᠳᠡᠯᠢᠮ ᠥᠨᠳᠥᠷ᠂ ᠵᠤᠵᠠᠭᠠᠨ ᠠ᠋ᠴᠠ ᠵᠤᠵᠠᠭᠠᠨ ᠰᠢᠪᠠᠷ ᠬᠡᠷᠡᠮ ᠦ᠋ᠨ ᠴᠠᠭᠠᠨᠠ ᠰᠦᠮᠡ ᠳᠤᠭᠠᠩ᠂ ᠤᠷᠲᠤ ᠬᠠᠷᠰᠢ᠂ ᠮᠤᠬᠤᠯᠠᠭ ᠳᠡᠯᠭᠡᠭᠦᠷ ᠦ᠋ᠳ ᠪᠠᠢᠷᠢᠯᠠᠵᠠᠢ᠃ ᠬᠡᠷᠡᠮ ᠡᠴᠡ ᠳᠣᠲᠣᠭᠰᠢ ᠮᠥᠷᠭᠥᠯᠴᠢᠨ᠂ ᠶᠠᠳᠠᠭᠤᠰ ᠡᠩ ᠦ᠋ᠨ ᠢᠷᠭᠡᠳ ᠦ᠋ᠨ ᠨᠠᠪᠲᠠᠭᠠᠷ ᠰᠢᠪᠡᠷ ᠲᠠᠭᠠᠵᠠ᠂ ᠵᠠᠢᠵᠠᠭ ᠮᠤᠷᠤᠢ ᠬᠠᠰᠢᠶᠠ ᠨᠤᠭᠤᠳ ᠨᠠᠪᠰᠠᠢᠲᠠᠯᠠ ᠰᠢᠪᠠᠭᠠᠷᠠᠯᠳᠤᠭᠰᠠᠨ ᠪᠤ᠌ᠷᠤᠴᠤᠤᠯ ᠤ᠋ᠨ ᠬᠤᠷᠤᠭᠠᠯᠠᠯ ᠪᠠᠢᠨᠠ᠃ ᠠᠨᠳᠤᠤ᠂ ᠲᠥᠪᠡᠳ ᠦ᠋ᠨ ᠣᠷᠣᠨᠠ ᠬᠦᠷᠬᠦ ᠵᠠᠮ ᠤ᠋ᠨ ᠬᠠᠮᠤᠭ ᠤ᠋ᠨ ᠬᠥᠯ ᠲᠡᠢ ᠬᠣᠲᠠ ᠶ᠋ᠢᠨ ᠨᠢᠭᠡᠨ ᠪᠣᠯᠬᠤ ᠲᠤᠯᠠ ᠠᠯᠠᠱᠠᠨ ᠶᠠᠮᠤᠨ ᠳ᠋ᠤ᠌ ᠮᠣᠩᠭᠣᠯᠴᠤᠳ ᠪᠠᠭᠤᠵᠤ ᠲᠠᠲᠠᠪᠤᠷᠢ ᠲᠥᠯᠥᠵᠦ᠂ ᠬᠣᠭᠣᠯᠠ ᠬᠦᠨᠡᠰᠦ ᠰᠡᠯᠪᠢᠵᠦ᠂ ᠨᠠᠢ᠍ᠮᠠᠭᠠ ᠬᠢᠳᠡᠭ ᠵᠠᠩᠰᠢᠯ ᠲᠠᠢ ᠪᠣᠯᠠᠢ᠃ ᠤᠴᠢᠷ ᠨᠢ ᠠᠯᠠᠱᠠ ᠶ᠋ᠢᠨ ᠣᠷᠣᠰᠢᠨ ᠰᠠᠭᠤᠭᠴᠢᠳ ᠶᠡᠬᠡᠩᠬᠢ ᠳ᠋ᠡᠭᠡᠨ ᠥᠭᠡᠯᠡᠳ ᠦ᠋ᠳ ᠶᠦᠮ᠃ ᠥᠭᠡᠯᠡᠳ ᠦ᠋ᠨ ᠬᠣᠰᠢᠭᠤ ᠶ᠋ᠢ ᠲᠡᠨᠳᠡ ᠠᠩᠬᠠ ᠴᠢᠨ ᠸᠠᠩ ᠯᠤᠪᠰᠠᠩᠳᠣᠷᠵᠢ ᠭᠡᠭᠴᠢ ᠬᠥᠮᠦᠨ ᠵᠠᠭᠤ ᠭᠠᠷᠤᠢ ᠵᠢᠯ ᠦ᠋ᠨ ᠡᠮᠦᠨᠡ ᠪᠠᠢᠭᠤᠯᠤᠨ ᠵᠠᠬᠢᠷᠴᠠᠢ᠃ ᠴᠢᠩ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠭᠦᠩᠵᠦ ᠲᠡᠢ ᠰᠠᠭᠤᠵᠤ᠂ ᠬᠦᠷᠭᠡᠨ ᠨᠢ ᠪᠣᠯᠤᠭᠰᠠᠨ ᠤ᠋ ᠤᠴᠢᠷ ᠬᠣᠱᠣᠢ ᠵᠠᠬᠢᠷᠬᠤ ᠴᠢᠨ ᠸᠠᠩ ᠤ᠋ᠨ ᠵᠡᠷᠭᠡ ᠬᠦᠷᠲᠡᠵᠡᠢ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠠᠯᠠᠱᠠ ᠶ᠋ᠢᠨ ᠥᠭᠡᠯᠡᠳ ᠨᠣᠶᠠᠳ ᠡᠵᠡᠨ ᠬᠠᠭᠠᠨ ᠤ᠋ ᠬᠠᠭᠤᠷᠮᠠᠴᠢ ᠬᠦᠷᠭᠡᠨ ᠪᠣᠯᠵᠤ᠂ ᠠᠪᠤᠭᠰᠠᠨ ᠡᠬᠡᠨᠡᠷ ᠪᠣᠯᠭᠠᠨ ᠢ᠋ ᠪᠡᠨ ᠬᠠᠭᠠᠨ ᠤ᠋ ᠡᠷᠭᠦᠮᠡᠯ ᠥᠬᠢᠨ ᠭᠡᠵᠦ ᠵᠠᠷᠯᠠᠳᠠᠭ ᠤᠯᠠᠮᠵᠢᠯᠠᠯ ᠲᠣᠭᠲᠠᠵᠠᠢ᠃
– ᠮᠢᠨᠦ ᠲᠠᠨᠢᠬᠤ ᠨᠢᠭᠡ ᠥᠭᠡᠯᠡᠳ ᠠᠢᠯ ᠡᠨᠳᠡ ᠪᠣᠢ᠃ ᠬᠣᠶᠠᠭᠤᠯᠠ ᠪᠠᠨ ᠲᠡᠳᠡᠨ ᠦ᠌ ᠬᠠᠰᠢᠶᠠᠨ ᠳ᠋ᠤ᠌ ᠬᠣᠨᠣᠨᠠ᠃ ᠲᠡᠭᠡᠭᠡᠳ ᠮᠠᠷᠭᠠᠰᠢ ᠴᠠᠰᠢ ᠶᠠᠪᠤᠨᠠ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠳ᠋ᠠᠭᠠᠨ ᠬᠡᠯᠡᠬᠦ ᠳ᠋ᠦ᠍ ᠰᠡᠩᠵᠢ ᠳᠠᠭᠤ ᠦᠭᠡᠢ ᠲᠣᠯᠣᠭᠠᠢ ᠳᠣᠬᠢᠪᠠ᠃ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡᠨ ᠳ᠋ᠦ᠍ ᠢᠲᠡᠭᠡᠵᠦ ᠪᠠᠢᠯᠠ᠃ ᠤᠴᠢᠷ ᠨᠢ ᠴᠤᠢᠮᠴᠤᠭ ᠭᠡᠯᠦᠩ ᠪᠠᠭᠠ ᠵᠠᠯᠠᠭᠤ ᠠ᠋ᠴᠠ ᠪᠠᠨ ᠲᠥᠪᠡᠳ ᠲᠦ᠍ ᠣᠯᠠᠨ ᠳᠠᠬᠢᠨ ᠠᠶᠠᠯᠠᠵᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠲᠤᠯᠠ ᠵᠠᠮ ᠪᠤᠯᠤᠳ ᠬᠥᠮᠦᠨ ᠲᠠᠨᠢᠬᠤ ᠳ᠋ᠠᠭᠠᠨ ᠰᠠᠢᠨ ᠠᠵᠠᠢ᠃ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠳ᠋ᠠᠭᠠᠨ ᠵᠠᠮ ᠵᠠᠭᠤᠷᠠ ᠲᠣᠬᠢᠶᠠᠯᠳᠤᠬᠤ ᠰᠣᠨᠢᠨ ᠬᠠᠴᠢᠨ ᠶᠠᠭᠤᠮᠠ ᠪᠣᠯᠭᠠᠨ ᠢ᠋ ᠡᠷᠡᠦ ᠬᠠᠮᠬᠢᠯ ᠦᠭᠡᠢ ᠶᠠᠷᠢᠵᠤ ᠥᠭᠳᠡᠭ ᠶᠣᠰᠣᠭᠠᠷ ᠢ᠋ᠶ᠋ᠠᠨ᠃
– ᠡᠨᠡ ᠠᠯᠠᠱᠠ ᠶᠠᠮᠤᠨ ᠳ᠋ᠤ᠌ ᠰᠠᠷᠯᠤᠭ ᠤ᠋ᠨ ᠬᠢᠯᠭᠠᠰᠤ ᠪᠠᠷ ᠥᠷᠮᠥᠭ ᠲᠠᠭᠠᠷ ᠨᠡᠬᠡᠳᠡᠭ ᠶᠦᠮ᠃ ᠥᠷᠮᠥᠭ ᠢ᠋ᠶ᠋ᠡᠷ ᠱᠤᠤᠳᠠᠢ᠂ ᠭᠥᠯᠢᠮ ᠬᠢᠳᠡᠭ ᠪᠣᠯᠬᠣᠷ ᠮᠣᠩᠭᠣᠯ ᠬᠥᠮᠦᠨ ᠠᠪᠬᠤ ᠳᠤᠷᠠᠲᠠᠢ ᠪᠠᠢᠳᠠᠭ᠃ ᠪᠠᠰᠠ ᠵᠠᠬᠠ ᠳᠡᠭᠡᠷᠡ ᠨᠢ ᠰᠠᠢᠬᠠᠨ ᠬᠡᠪᠢᠰ ᠡᠯᠪᠡᠭ ᠵᠠᠷᠤᠳᠠᠭ᠃ ᠡᠨᠡ ᠠᠯᠠᠱᠠ ᠶ᠋ᠢᠨ ᠠᠭᠤᠯᠠ ᠶ᠋ᠢᠨ ᠨᠠᠭᠠᠳᠤ ᠪᠠᠯ ᠳ᠋ᠤ᠌ ᠬᠠᠳᠤᠨ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠪᠠᠢᠳᠠᠭ ᠢᠷᠭᠠᠢ ᠬᠣᠲᠠ ᠠ᠋ᠴᠠ ᠬᠡᠪᠢᠰᠴᠢᠨ ᠨᠦ᠍ᠭᠦᠳ ᠢᠷᠡᠵᠦ ᠡᠨᠳᠡ ᠫᠠᠨᠽᠠ ᠬᠢᠳᠡᠭ᠃ ᠶᠠᠭᠠᠬᠢᠭᠠ ᠪᠣᠢ᠂ ᠮᠠᠨ ᠤ᠋ ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠪᠠᠭᠠᠨᠠ ᠶ᠋ᠢ ᠣᠷᠢᠶᠠᠵᠤ ᠪᠦᠷᠢᠭᠰᠡᠨ ᠬᠡᠪᠢᠰ ᠴᠢᠨᠢ ᠡᠨᠡ ᠢᠷᠭᠠᠢ ᠬᠣᠲᠠ ᠳ᠋ᠤ᠌ ᠵᠠᠬᠢᠵᠤ ᠬᠢᠯᠭᠡᠭᠰᠡᠨ ᠶᠦᠮ ᠰᠢᠦ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠰᠣᠨᠢᠨ ᠪᠣᠯᠭᠠᠨ ᠱᠠᠪᠢ ᠳ᠋ᠠᠭᠠᠨ ᠶᠠᠷᠢᠪᠠ᠃ ᠨᠡᠭᠡᠷᠡᠨ ᠴᠦ᠍ ᠶᠠᠷᠢᠵᠤ ᠥᠭᠭᠦᠭᠡ ᠦᠭᠡᠢ ᠪᠣᠯ ᠮᠡᠳᠡᠬᠦ ᠪᠡᠷ ᠦᠭᠡᠢ ᠵᠦᠢᠯ᠃
ᠪᠤᠶᠠᠨᠵᠠᠯᠪᠠᠷᠢᠬᠤ ᠬᠡᠢᠳ ᠦ᠋ᠨ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠭᠣᠣᠯ ᠳᠥᠷᠪᠡᠨ ᠪᠠᠭᠠᠨᠠ ᠶ᠋ᠢ ᠡᠷᠢᠶᠡᠨ ᠬᠡᠪᠢᠰ ᠢ᠋ᠶ᠋ᠡᠷ ᠣᠷᠢᠶᠠᠭᠰᠠᠨ ᠢ᠋ ᠪᠠᠨᠳᠢ ᠪᠠᠢᠬᠤ ᠴᠠᠭ ᠠ᠋ᠴᠠ ᠰᠡᠩᠵᠢ ᠶᠡᠬᠡ ᠯᠡ ᠭᠠᠢᠬᠠᠵᠤ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠯᠢᠵᠦ ᠦᠵᠡᠳᠡᠭ ᠰᠠᠨ᠃ ᠨᠢᠭᠡ ᠤᠳᠠᠭᠠ ᠲᠡᠢᠨ ᠬᠦ᠌ ᠰᠣᠨᠢᠭᠤᠴᠢᠯᠠᠵᠤ ᠪᠠᠢᠭᠠᠳ ᠴᠣᠷᠵᠢ ᠯᠠᠮᠠ ᠳ᠋ᠤ᠌ ᠴᠢᠬᠢ ᠪᠡᠨ ᠮᠤᠰᠬᠢᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠯᠠ᠃
– ᠠᠯᠠᠱᠠ ᠶ᠋ᠢᠨ ᠠᠭᠤᠯᠠ ᠰᠦᠷ ᠲᠠᠷᠤᠭᠳᠠᠮᠠᠷ ᠭᠤᠷᠪᠠᠨ ᠥᠨᠳᠥᠷ ᠣᠷᠭᠢᠯ ᠲᠠᠢ᠃ ᠲᠡᠷᠡ ᠤᠷᠤᠭᠰᠢ ᠪᠠᠨ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠶ᠋ᠢ ᠪᠠᠶᠠᠨᠰᠦᠮᠪᠦᠷ ᠠᠭᠤᠯᠠ ᠭᠡᠳᠡᠭ ᠶᠦᠮ᠃ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠰᠤᠭᠤᠨ ᠳ᠋ᠤ᠌ ᠪᠠᠷᠠᠭᠤᠨ ᠬᠡᠢᠳ ᠭᠡᠵᠦ ᠠᠯᠳᠠᠷ ᠲᠠᠢ ᠭᠠᠵᠠᠷ ᠪᠣᠢ ᠭᠡᠮᠡᠨ ᠭᠡᠯᠦᠩ ᠴᠤᠢᠮᠴᠤᠭ ᠲᠠᠢᠯᠪᠤᠷᠢᠯᠠᠬᠤ ᠳ᠋ᠤ᠌ ᠰᠡᠩᠵᠢ ᠭᠡᠰᠦᠯ ᠭᠠᠢᠬᠠᠵᠤ᠄
– ᠡᠨᠳᠡᠬᠢ ᠶ᠋ᠢᠨ ᠴᠢᠨᠢ ᠠᠭᠤᠯᠠ ᠤᠰᠤ ᠶᠡᠬᠡᠩᠬᠢ ᠳ᠋ᠡᠭᠡᠨ ᠮᠣᠩᠭᠣᠯ ᠨᠡᠷᠡ ᠲᠡᠢ ᠶᠦᠮ ᠭᠡᠵᠦ ᠦᠦ? ᠭᠡᠬᠦ ᠳ᠋ᠦ᠍᠂
– ᠲᠡᠭᠡᠯᠭᠦᠢ ᠶᠠᠭᠠᠬᠢᠬᠤ ᠪᠣᠢ᠂ ᠮᠠᠨ ᠤ᠋ ᠥᠭᠡᠯᠡᠳ ᠦ᠋ᠳ ᠦ᠋ᠨ ᠯᠡ ᠨᠤᠲᠤᠭ ᠶᠤᠮ᠃ ᠳᠡᠭᠡᠷᠡ ᠴᠠᠭ ᠲᠤ᠌ ᠡᠨᠳᠡ ᠬᠢᠲᠠᠳ ᠬᠥᠮᠦᠨ ᠶᠡᠬᠡ ᠬᠣᠪᠣᠷ ᠪᠠᠢᠭᠰᠠᠨ᠃ ᠬᠠᠷᠢᠨ ᠣᠳᠣ ᠯᠠ ᠣᠯᠠᠰᠢᠷᠠᠭᠠᠳ ᠪᠠᠢᠭᠠ ᠰᠠᠨᠠᠭᠳᠠᠬᠤ ᠶᠤᠮ᠃ ᠬᠢᠲᠠᠳ ᠤ᠋ᠳ ᠴᠤ᠌ ᠪᠠᠰᠠ ᠡᠨᠳᠡᠬᠢ ᠶ᠋ᠢᠨ ᠵᠠᠷᠢᠮ ᠠᠭᠤᠯᠠ ᠤᠰᠤ ᠶ᠋ᠢ ᠥᠪᠡᠷ ᠦ᠋ᠨ ᠬᠢ ᠪᠡᠷ ᠢ᠋ᠶ᠋ᠡᠨ ᠨᠡᠷᠡᠯᠡᠭᠡᠳ ᠪᠠᠢᠳᠠᠭ᠃ ᠡᠨᠡ ᠠᠯᠠᠱᠠ ᠶᠠᠮᠤᠨ ᠢ᠋ ᠬᠢᠲᠠᠳ ᠤ᠋ᠳ ᠳ᠋ᠸᠡᠭ ᠶᠠᠩ ᠹᠦ ᠭᠡᠳ ᠯᠡ ᠪᠠᠢᠳᠠᠭ ᠶᠤᠮ᠃ ᠢᠷᠭᠠᠢ ᠬᠣᠲᠠ ᠶ᠋ᠢ ᠴᠦ᠍ ᠭᠡᠰᠡᠨ ᠨᠢᠩ ᠰᠢ ᠹᠦ ᠭᠡᠳᠡᠭ ᠯᠡ ᠳᠡ᠃ ᠮᠣᠩᠭᠣᠯ ᠨᠡᠷᠡ ᠪᠠᠢᠬᠤ ᠳ᠋ᠤ᠌ ᠲᠡᠷᠡ ᠨᠢᠭᠡ ᠹᠦ ᠮᠦ᠍ ᠭᠡᠳ ᠯᠡ ᠱᠤᠯᠤᠭᠠᠨᠠᠭᠠᠳ ᠶᠠᠭᠤ ᠶ᠋ᠢ ᠪᠡᠨ ᠬᠢᠨᠡ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠢ᠋ᠶ᠋ᠡᠨ᠄
– ᠪᠠᠷᠠᠭᠤᠨ ᠬᠡᠢᠳ ᠦ᠋ᠨ ᠲᠤᠬᠠᠢ ᠪᠢ ᠶᠠᠷᠢᠵᠤ ᠪᠠᠢᠭᠰᠠᠨ ᠳᠠ᠃ ᠲᠡᠨᠳᠡ ᠶᠡᠬᠡ ᠨᠠᠨᠳᠢᠨ ᠰᠢᠲᠦᠭᠡᠨ ᠪᠣᠢ᠃ ᠵᠢᠷᠭᠤᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠽᠠᠩᠳᠠᠨᠵᠠᠮᠰᠦ ᠶ᠋ᠢᠨ ᠪᠤᠷᠬᠠᠨ ᠪᠠᠢᠳᠠᠭ᠃ ᠵᠠ ᠴᠢ ᠪᠢᠳᠡ ᠬᠣᠶᠠᠷ ᠲᠡᠭᠦᠪᠡᠷ ᠵᠠᠪᠠᠯ ᠣᠴᠢᠵᠤ ᠠᠳᠢᠰ ᠠᠪᠬᠤ ᠶᠤᠮ ᠰᠢᠦ ᠭᠡᠵᠦ ᠶᠠᠷᠢᠪᠠ᠃
ᠮᠣᠩᠭᠣᠯ ᠨᠤᠲᠤᠭ ᠠ᠋ᠴᠠ ᠭᠠᠷᠤᠭᠰᠠᠨ ᠮᠥᠷᠭᠥᠯᠴᠢᠳ ᠶᠡᠬᠡᠪᠴᠢᠯᠡᠨ ᠡᠨᠡ ᠬᠦ᠌ ᠠᠯᠠᠱᠠᠨ ᠶᠠᠮᠤᠨ ᠭᠡᠵᠦ ᠲᠡᠳᠡᠨ ᠦ᠌ ᠳᠤᠮᠳᠠ ᠠᠯᠳᠠᠷᠰᠢᠭᠰᠠᠨ ᠬᠣᠲᠠ ᠳ᠋ᠤ᠌ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠨᠡᠢᠯᠡᠵᠦ᠂ ᠡᠨᠳᠡ ᠡᠴᠡ ᠴᠠᠰᠢ ᠬᠠᠮᠲᠤᠷᠠᠬᠤ ᠶᠤᠮ ᠤᠤ ᠡᠰᠡᠪᠡᠯ ᠬᠠᠨᠢ ᠪᠠᠷᠠ ᠳ᠋ᠠᠭᠠᠨ ᠶᠠᠪᠤᠵᠠᠭᠠᠵᠤ ᠵᠠᠩᠰᠢᠵᠠᠢ᠃ ᠵᠠᠮ ᠲᠤᠰᠤᠭᠰᠠᠨ ᠲᠥᠪᠡᠳ᠂ ᠬᠢᠲᠠᠳ ᠲᠦᠮᠡᠨ ᠬᠡᠯᠡ ᠶ᠋ᠢᠨ ᠠᠮᠢᠲᠠᠳ ᠠᠯᠤᠰ ᠪᠠᠷᠠᠭᠤᠨ ᠬᠣᠢᠨᠠ ᠠ᠋ᠴᠠ ᠮᠥᠷᠭᠥᠯ ᠦ᠋ᠨ ᠮᠥᠷ ᠬᠥᠭᠡᠭᠡᠵᠦ ᠢᠷᠡᠳᠡᠭ ᠮᠣᠩᠭᠣᠯᠴᠤᠳ ᠢ᠋ ᠣᠯᠠᠨ ᠠᠷᠪᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠠᠵᠢᠭᠯᠠᠨ ᠳᠡᠩᠳᠡᠵᠦ ᠨᠠᠷᠢᠨ ᠰᠤᠳᠤᠯᠵᠠᠢ᠃ ᠲᠡᠢᠨ ᠬᠦ᠌ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠬᠠᠪᠰᠤ ᠤᠷᠤᠭᠤᠨ ᠲᠤᠨᠤᠭᠰᠠᠭᠠᠷ ᡀᠠᠰᠠ ᠣᠷᠣᠲᠠᠯᠠ ᠵᠠᠮ ᠳ᠋ᠠᠭᠠᠨ ᠮᠣᠩᠭᠣᠯᠴᠤᠳ ᠪᠠᠷᠤᠭ ᠯᠠ ᠨᠢᠴᠦᠭᠦᠷᠡᠭᠡᠳ ᠣᠴᠢᠳᠠᠭ ᠪᠠᠢᠵᠠᠢ᠃
– ᠬᠥᠮᠦᠨ ᠪᠦᠷᠢ ᠡᠴᠡ ᠵᠠᠭᠤ ᠶᠤᠮ ᠤᠤ ᠬᠣᠶᠠᠷ ᠵᠠᠭᠤᠨ ᠴᠣᠬᠣ ᠵᠣᠭᠣᠰ ᠭᠠᠢᠯᠢ ᠶ᠋ᠢᠨ ᠲᠦᠷᠢᠶᠡᠰᠦᠨ ᠳ᠋ᠦ᠍ ᠠᠪᠴᠤ ᠪᠠᠢᠵᠤ ᠯᠠ ᠡᠨᠡ ᠠᠯᠠᠱᠠᠨ ᠶᠠᠮᠤᠨ ᠤ᠋ ᠭᠠᠷ ᠠ᠋ᠴᠠ ᠮᠤᠯᠲᠤᠷᠠᠨᠠ ᠰᠢᠦ ᠳᠡ᠂ ᠭᠡᠰᠦᠯ ᠮᠢᠨᠢ! ᠭᠡᠵᠦ ᠪᠠᠭᠰᠢ ᠨᠢ ᠠᠮᠠᠨ ᠳ᠋ᠠᠭᠠᠨ ᠪᠤᠪᠲᠤᠨᠠᠭᠠᠳ ᠵᠣᠭᠣᠰ ᠲᠠᠢ ᠬᠠᠭᠤᠷᠴᠠᠭ ᠢ᠋ᠶ᠋ᠠᠨ ᠲᠡᠮᠲᠡᠷᠢᠵᠦ ᠦᠵᠡᠪᠡ᠃ ᠰᠡᠩᠵᠢ ᠭᠡᠰᠦᠯ ᠭᠠᠢᠬᠠᠵᠤ᠄
– ᠭᠠᠭᠴᠠᠬᠠᠨ ᠬᠣᠲᠠ ᠳ᠋ᠤ᠌ ᠲᠡᠢᠮᠦ ᠶᠡᠬᠡ ᠮᠥᠩᠭᠥ ᠲᠥᠯᠥᠬᠦ ᠬᠡᠷᠡᠭ ᠦᠦ? ᠭᠡᠪᠡ᠃ ᠴᠤᠢᠮᠴᠤᠭ ᠭᠡᠰᠦᠯ ᠬᠥᠬᠡ ᠪᠡᠷ ᠢᠨᠢᠶᠡᠮᠰᠦᠭᠯᠡᠭᠡᠳ ᠨᠠᠮᠬᠠᠨ ᠳᠠᠭᠤᠤ ᠪᠠᠷ᠄
– ᠲᠡᠷᠡ ᠶᠠᠭᠤ ᠴᠤ᠌ ᠪᠢᠰᠢ᠃ ᠬᠠᠮᠤᠭ ᠤ᠋ᠨ ᠠᠮᠠᠷᠬᠠᠨ ᠠᠷᠭᠠ ᠪᠠᠷ ᠣᠯᠠᠨ ᠤ ᠨᠢᠳᠦᠨ ᠳᠡᠭᠡᠷᠡ ᠳᠡᠭᠡᠷᠡᠮᠳᠡᠭᠦᠯᠵᠦ ᠪᠠᠢᠭᠠ ᠨᠢ ᠲᠡᠷᠡ᠃ ᠴᠠᠰᠢᠯᠠᠬᠤ ᠲᠣᠰᠤᠮ ᠶᠠᠭᠤ ᠪᠣᠯᠤᠨᠠ ᠭᠡᠭᠡᠴᠢ ? ᠶᠡᠷᠦ ᠨᠢ ᠲᠠᠩᠭᠤᠳ ᠤ᠋ᠳ ᠶᠡᠬᠡ ᠲᠠᠩᠬᠠᠢ᠂ ᠳᠡᠭᠡᠷᠡᠮᠴᠢᠨ ᠤᠯᠤᠰ ᠰᠢᠦ᠃ ᠮᠡᠳᠡᠭᠡ ᠲᠡᠢ ᠶᠠᠪᠤᠬᠤ ᠤᠴᠢᠷᠲᠠᠢ᠃ ᠥᠨᠥ ᠰᠥᠨᠢ ᠠᠯᠠᠱᠠᠨ ᠬᠣᠲᠠ ᠳ᠋ᠤ᠌ ᠵᠠᠪᠠᠯ ᠠᠢᠯ ᠤ᠋ᠨ ᠬᠠᠰᠢᠶᠠ ᠪᠠᠷᠠᠭᠠᠳᠠᠵᠤ ᠬᠣᠨᠣᠬᠤ ᠦᠭᠡᠢ ᠪᠣᠯ ᠬᠣᠶᠠᠷ ᠵᠠᠭᠤᠨ ᠵᠣᠭᠣᠰ ᠪᠠᠢᠲᠤᠭᠠᠢ ᠬᠣᠶᠠᠷ ᠭᠤᠲᠤᠯ ᠦᠭᠡᠢ ᠴᠦ᠍ ᠪᠣᠯᠵᠤ ᠮᠡᠳᠡᠨᠡ᠃ ᠠᠪᠤᠭᠠᠳ ᠴᠠᠳᠳᠠᠭ ᠦᠭᠡᠢ ᠤᠯᠤᠰ᠃ ᠠᠭᠤᠯᠠ ᠪᠦᠰᠡᠯᠡᠭᠦᠷ ᠦᠭᠡᠢ ᠨᠢᠭᠡ ᠳᠤᠲᠠᠭᠤ ᠭᠡᠳᠡᠭ ᠶᠦᠮ᠃ ᠤᠤᠯ ᠨᠢ ᠪᠢ ᠴᠢᠮᠠ ᠳ᠋ᠤ᠌ ᠡᠢᠮᠦ ᠮᠠᠭᠤ ᠶᠠᠭᠤᠮᠠ ᠶᠠᠷᠢᠬᠤ ᠶᠣᠰᠣ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠠᠶᠠᠨ ᠵᠠᠮ ᠤ᠋ᠨ ᠰᠠᠢᠨ ᠮᠠᠭᠤ ᠠᠯᠢᠨ ᠴᠤ᠌ ᠴᠢᠮᠠ ᠳ᠋ᠤ᠌ ᠪᠠᠭᠰᠢ ᠪᠣᠯᠤᠨᠠ ᠭᠡᠵᠦ ᠪᠢ ᠪᠣᠳᠣᠭᠠᠳ ᠶᠠᠷᠢᠵᠤ ᠪᠠᠢᠨᠠ᠃ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠵᠦ ᠪᠣᠯᠳᠠᠭ ᠦᠭᠡᠢ ᠶᠦᠮ ᠰᠢᠦ ᠳᠡ ᠭᠡᠪᠡ᠃
ᠮᠥᠷᠭᠥᠯᠴᠢᠳ ᠦ᠋ᠨ ᠴᠤᠪᠤᠭᠠ ᠶᠡᠬᠡ ᠤᠷᠲᠤ᠂ ᠪᠠᠰᠠ ᠲᠡᠭᠡᠭᠡᠳ ᠠᠯᠠᠭ ᠡᠷᠢᠶᠡᠨ ᠪᠠᠢᠯᠠ᠃ ᠪᠤᠷᠬᠠᠨ ᠤ᠋ ᠣᠷᠣᠨ ᠦᠵᠡᠬᠦ ᠭᠡᠰᠡᠨ ᠰᠣᠨᠢᠭᠤᠴᠢ ᠨᠣᠶᠠᠳ᠂ ᠬᠠᠲᠤᠳ ᠠ᠋ᠴᠠ ᠡᠬᠢᠯᠡᠭᠡᠳ ᠱᠠᠰᠢᠨ ᠤ᠋ ᠮᠢᠨᠳᠠᠭ ᠴᠣᠯᠠ ᠡᠷᠢᠯᠬᠢᠯᠡᠭᠰᠡᠨ ᠯᠠᠮᠠ ᠨᠠᠷ ᠢ᠋ ᠬᠦᠷᠲᠡᠯᠡ ᠨᠢᠭᠦᠯ ᠢ᠋ᠶ᠋ᠡᠨ ᠨᠠᠮᠠᠨᠴᠢᠯᠠᠵᠤ᠂ ᠬᠢᠯᠢᠨᠴᠡ ᠪᠡᠨ ᠨᠢᠮᠭᠡᠯᠡᠬᠦ ᠭᠡᠰᠡᠨ ᠡᠯᠳᠡᠪ ᠶᠠᠪᠤᠳᠠᠯᠲᠠᠨ ᠠ᠋ᠴᠠ ᠡᠬᠢᠯᠡᠭᠡᠳ ᠬᠣᠯᠠ ᠶᠠᠪᠤᠵᠤ᠂ ᠶᠠᠭᠤᠮᠠ ᠦᠵᠡᠵᠦ᠂ ᠨᠢᠳᠦ ᠲᠠᠢᠯᠬᠤ ᠭᠡᠰᠡᠨ ᠪᠠᠳᠢᠷᠴᠢᠨ᠂ ᠱᠠᠪᠢᠷᠢᠶᠠᠴᠢᠨ ᠨᠤᠭᠤᠳ᠂ ᠠᠶᠠᠨ ᠤ᠋ ᠬᠢᠨ ᠢ᠋ ᠳᠠᠭᠠᠵᠤ ᠭᠡᠳᠡᠰᠦ ᠪᠡᠨ ᠲᠡᠵᠢᠭᠡᠭᠴᠢ ᠶᠠᠳᠠᠭᠤ ᠭᠤᠶᠤᠯᠭᠠᠴᠢᠨ ᠤ᠋ᠳ᠂ ᠪᠤᠰᠤᠳ ᠲᠤ᠌ ᠵᠠᠷᠤᠭᠳᠠᠨ ᠶᠠᠪᠤᠭᠴᠢ ᠪᠠᠷᠯᠤᠭ ᠤ᠋ᠳ᠂ ᠮᠥᠷᠭᠥᠯᠴᠢᠨ ᠦ᠌ ᠳᠦᠷᠢ ᠪᠡᠷ ᠬᠤᠪᠴᠠᠰᠤᠯᠠᠭᠰᠠᠨ ᠬᠤᠯᠠᠭᠠᠢᠴᠢ ᠳᠡᠭᠡᠷᠡᠮᠴᠢᠨ ᠬᠦᠷᠲᠡᠯᠡ ᠲᠡᠷᠡ ᠴᠤᠪᠤᠭᠠᠨ ᠳ᠋ᠤ᠌ ᠨᠢᠭᠡᠳᠦᠨ ᠨᠡᠢᠯᠡᠵᠡᠢ᠃
ᠭᠡᠯᠦᠩ ᠴᠤᠢᠮᠴᠤᠭ ᠤ᠋ᠨ ᠪᠠᠭ ᠵᠢᠷᠭᠤᠭᠠᠨ ᠬᠥᠮᠦᠨ ᠡᠴᠡ ᠪᠦᠷᠢᠯᠳᠦᠵᠦ ᠪᠠᠢᠯᠠ᠃ ᠴᠤᠢᠮᠴᠤᠭ ᠥᠪᠡᠷ ᠢ᠋ᠶ᠋ᠡᠨ ᠲᠠᠪᠢ ᠭᠠᠷᠤᠢ ᠨᠠᠰᠤᠨ ᠤ᠋ ᠪᠣᠯᠪᠠᠴᠤ ᠬᠥᠩᠭᠡᠨ ᠱᠠᠯᠠᠮᠠᠭ ᠬᠥᠮᠦᠨ᠂ ᠴᠣᠬᠣᠮ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠶᠠᠪᠤᠳᠠᠭ ᠢ᠋ᠶ᠋ᠠᠨ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠭᠡ ᠦᠭᠡᠢ᠃ ᠬᠥᠮᠦᠰ ᠪᠣᠳᠣᠬᠤ ᠳ᠋ᠠᠭᠠᠨ ᠭᠡᠯᠦᠩ ᠰᠡᠩᠵᠢ ᠵᠢ ᡀᠠᠰᠠ ᠵᠣᠣ ᠣᠷᠣᠭᠤᠯᠵᠤ ᠨᠣᠮ ᠡᠷᠳᠡᠮ ᠦ᠋ᠨ ᠮᠥᠷ ᠬᠥᠭᠡᠭᠡᠯᠭᠡᠬᠦ ᠪᠡᠷ ᠶᠠᠪᠤᠭᠠ ᠭᠡᠵᠦ ᠦᠵᠡᠭᠰᠡᠨ᠃ ᠭᠣᠣᠯ ᠬᠡᠷᠡᠭ ᠵᠣᠷᠢᠭ ᠨᠢ ᠦᠨᠡᠬᠡᠷ ᠴᠦ᠍ ᠲᠡᠢᠮᠦ ᠪᠣᠯᠤᠯᠲᠠᠢ᠃ ᠭᠡᠰᠦᠯ ᠰᠡᠩᠵᠢ ᠶ᠋ᠢᠨ ᠲᠤᠬᠠᠢ ᠳ᠋ᠤ᠌ ᠪᠣᠯ ᠢᠯᠡᠭᠦᠦ ᠳᠤᠲᠠᠭᠤ ᠪᠣᠳᠣᠯ ᠪᠠᠢᠭᠰᠠᠨ ᠦᠭᠡᠢ᠃ ᡀᠠᠰᠠ ᠬᠣᠲᠠ ᠳ᠋ᠤ᠌ ᠱᠠᠰᠢᠨ ᠤ᠋ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠵᠤ ᠶᠡᠬᠡ ᠡᠷᠳᠡᠮ ᠰᠤᠷᠴᠤ ᠡᠴᠢᠭᠡ᠂ ᠡᠬᠡ ᠶ᠋ᠢᠨ ᠵᠠᠬᠢᠶᠠ᠂ ᠯᠠᠮᠠ ᠪᠠᠭᠰᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠨᠠᠢᠳᠠᠯᠭᠠ ᠶ᠋ᠢ ᠪᠡᠶᠡᠯᠡᠭᠦᠯᠵᠦ ᠰᠠᠢᠨ ᠯᠠᠮᠠ ᠪᠣᠯᠬᠤ ᠶ᠋ᠢ ᠵᠣᠷᠢᠵᠠᠢ᠃ ᠪᠠᠭ ᠤᠨ ᠭᠤᠷᠪᠠᠳᠠᠬᠢ ᠬᠥᠮᠦᠨ ᠨᠢ ᠤᠯᠢᠶᠠᠰᠤᠲᠠᠢ ᠶ᠋ᠢᠨ ᠱᠣᠷᠣᠩ ᠠ᠋ᠴᠠ ᠤᠷᠭᠤᠭᠰᠠᠨ ᠨᠤᠲᠤᠭ ᠤ᠋ᠨ ᠰᠠᠢᠨ ᠡᠷᠡ ᠪᠥᠬᠡᠮᠠᠩᠯᠠᠢ ᠪᠠᠢᠯᠠ᠃ ᠲᠡᠭᠦᠨ ᠳ᠋ᠦ᠍ ᠣᠨᠴᠠᠭᠠᠢ ᠬᠡᠷᠡᠭ ᠵᠣᠷᠢᠭ ᠪᠠᠢᠭᠰᠠᠨ ᠦᠭᠡᠢ᠃ ᠭᠠᠭᠴᠠᠬᠠᠨ ᠶᠢᠰᠦᠨ ᠡᠷᠡᠭᠦᠦ ᠰᠢᠭᠦᠭᠳᠡᠬᠦ ᠡᠴᠡ ᠵᠠᠢᠯᠠᠵᠤ ᠠᠯᠤᠰ ᠵᠠᠮ ᠳ᠋ᠤ᠌ ᠭᠠᠷᠴᠤ ᠡᠷᠬᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠠᠶᠠᠯᠠᠵᠤ ᠶᠠᠭᠤᠮᠠ ᠦᠵᠡᠬᠦ ᠶ᠋ᠢ ᠬᠦᠰᠡᠵᠡᠢ᠃ ᠪᠥᠬᠡᠮᠠᠩᠯᠠᠢ ᠪᠣᠯ ᠪᠢᠷᠠ ᠴᠢᠳᠠᠯ ᠶᠡᠬᠡᠲᠡᠢ᠂ ᠵᠣᠷᠢᠭᠲᠠᠢ ᠰᠡᠷᠭᠦᠯᠡᠩ ᠬᠥᠮᠦᠨ ᠲᠤᠯᠠ ᠴᠤᠢᠮᠴᠤᠭ ᠭᠡᠯᠦᠩ ᠲᠡᠭᠦᠨ ᠢ᠋ ᠥᠪᠡᠷ ᠦ᠋ᠨ ᠭᠠᠯ ᠳ᠋ᠤ᠌ ᠳᠤᠷᠠᠲᠠᠶᠠ ᠨᠡᠢᠯᠡᠭᠦᠯᠵᠦ ᠠᠪᠴᠠᠢ᠃ ᠶᠡᠷᠦᠨᠢ ᠤᠲᠠᠢ ᠭᠦᠮᠪᠦᠮ᠂ ᡀᠠᠰᠠ ᠵᠣᠭᠣᠭ ᠢ᠋ ᠵᠣᠷᠢᠭᠰᠠᠨ ᠮᠣᠩᠭᠣᠯ ᠮᠥᠷᠭᠥᠯᠴᠢᠳ ᠦ᠋ᠨ ᠭᠠᠯ᠂ ᠣᠲᠣᠭ ᠪᠦᠷᠢ ᠳ᠋ᠦ᠍ ᠨᠢᠭᠡ ᠬᠣᠶᠠᠷ ᠰᠠᠢᠨ ᠡᠷᠡ ᠶᠠᠪᠤᠳᠠᠭ ᠪᠠᠢᠯᠠ᠃ ᠲᠡᠷᠡ ᠨᠢ ᠪᠡᠶᠡ ᠬᠠᠮᠠᠭᠠᠯᠠᠭᠴᠢ ᠶ᠋ᠢᠨ ᠡᠭᠦᠷᠭᠡ ᠲᠡᠢ ᠪᠢᠯᠡ᠃ ᠴᠤᠢᠮᠴᠤᠭ ᠭᠡᠯᠦᠩ ᡀᠠᠰᠠ ᠬᠣᠲᠠ ᠳ᠋ᠤ᠌ ᠣᠯᠠᠨ ᠤᠳᠠᠭᠠ ᠠᠶᠠᠯᠠᠭᠰᠠᠨ ᠲᠤᠷᠰᠢᠯᠭᠠ ᠲᠠᠢ ᠬᠥᠮᠦᠨ ᠪᠣᠯᠬᠣᠷ ᠢ᠋ᠶ᠋ᠠᠨ ᠵᠠᠮ ᠵᠠᠭᠤᠷᠠ ᠶ᠋ᠢᠨ ᠪᠦᠬᠦᠢᠯᠡ ᠪᠠᠷᠴᠠᠳ ᠢ᠋ ᠮᠡᠳᠡᠳᠡᠭ᠂ ᠲᠡᠭᠦᠨ ᠡᠴᠡ ᠶᠠᠭᠠᠬᠢᠵᠤ ᠮᠤᠯᠲᠤᠷᠠᠵᠤ ᠭᠠᠷᠬᠤ ᠪᠠᠨ ᠲᠣᠭᠠᠴᠠᠭᠠᠯᠠᠳᠠᠭ ᠠᠵᠠᠢ᠃ ᠪᠥᠬᠡᠮᠠᠩᠯᠠᠢ ᠪᠠᠰᠠ ᠴᠤᠢᠮᠴᠤᠭ ᠭᠡᠯᠦᠩ ᠦ᠋ᠨ ᠬᠣᠯᠠ ᠶ᠋ᠢᠨ ᠰᠠᠳᠤᠨ ᠶᠤᠮ᠃ ᠪᠠᠭ ᠤ᠋ᠨ ᠳᠥᠷᠪᠡᠳᠡᠬᠢ ᠲᠠᠪᠤᠳᠠᠬᠢ ᠬᠥᠮᠦᠨ ᠨᠢ ᠡᠬᠡᠨᠡᠷ᠂ ᠨᠥᠬᠥᠷ ᠬᠣᠶᠠᠷ᠂ ᠨᠡᠷᠡ ᠨᠢ ᠬᠠᠷᠠᠬᠦᠦ᠂ ᠤᠳᠬᠤᠨ᠃ ᠬᠣᠶᠠᠭᠤᠯᠠ ᠳᠤᠮᠳᠠ ᠵᠡᠷᠭᠡ ᠶ᠋ᠢᠨ ᠴᠢᠨᠡᠭᠡᠯᠢᠭ ᠠᠢᠯ ᠠ᠋ᠴᠠ ᠲᠠᠰᠤᠷᠠᠵᠤ ᠭᠡᠷ ᠪᠦᠯᠢ ᠪᠣᠯᠤᠭᠰᠠᠨ᠃ ᠭᠡᠪᠡᠴᠦ ᠡᠬᠡᠨᠡᠷ ᠤᠳᠬᠣᠨ ᠳ᠋ᠤ᠌ ᠦᠷᠡ ᠵᠠᠶᠠᠬᠤ ᠦᠭᠡᠢ ᠤᠳᠠᠵᠠᠢ᠃ ᠯᠠᠮᠠ ᠪᠠᠭᠰᠢ ᠠ᠋ᠴᠠ ᠪᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠲᠥᠪᠡᠳ ᠣᠷᠣᠵᠤ ᠪᠠᠯᠳᠠᠨ ᠪᠠᠷᠠᠪᠠᠩ ᠪᠤᠶᠤ ᠲᠡᠭᠦᠰᠦᠴᠣᠭᠲᠤ ᠦᠷᠡ ᠵᠢᠮᠢᠰᠦᠨ ᠦ᠌ ᠣᠪᠣᠭᠠᠯᠠᠭᠠ ᠬᠢᠳᠡᠭ ᠬᠡᠢᠳ ᠲᠦ᠍ ᠮᠥᠷᠭᠥᠯ ᠬᠢᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠵᠥᠪᠯᠡᠪᠡ᠃ ᠲᠡᠷᠡ ᠶᠣᠰᠣᠭᠠᠷ ᠡᠬᠡᠨᠡᠷ ᠨᠥᠬᠥᠷ ᠬᠣᠶᠠᠷ ᠵᠠᠮ ᠳ᠋ᠤ᠌ ᠭᠠᠷᠴᠠᠢ᠃ ᠪᠠᠭ ᠤ᠋ᠨ ᠵᠢᠷᠭᠤᠳᠠᠬᠢ ᠬᠥᠮᠦᠨ ᠨᠢ ᠪᠡᠶᠡ ᠮᠠᠭᠤ ᠲᠠᠢ ᠶᠠᠳᠠᠭᠤ ᠬᠠᠷᠠ ᠬᠥᠮᠦᠨ᠃ ᠬᠠᠲᠠᠩᠭᠢᠷ ᠴᠡᠭᠡᠵᠢ ᠲᠡᠢ ᠂ ᠴᠣᠬᠣᠷ ᠨᠢᠭᠤᠷ ᠲᠠᠢ᠃ ᠮᠥᠨ ᠯᠡ ᠯᠠᠮᠠ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠤᠷᠭᠠᠨ ᠵᠢᠭᠠᠭᠰᠠᠨ ᠢ᠋ᠶ᠋ᠠᠷ ᡀᠠᠰᠠ ᠵᠣᠣ ᠣᠷᠣᠵᠤ ᠪᠤᠶᠠᠨ ᠦᠢᠯᠡᠳᠴᠦ ᠡᠪᠡᠳᠴᠢᠨ ᠡᠴᠡ ᠰᠠᠯᠠᠬᠤ ᠶ᠋ᠢ ᠵᠣᠷᠢᠵᠠᠢ᠃ ᠨᠡᠷᠡ ᠨᠢ ᠥᠯᠵᠡᠢ ᠭᠡᠨᠡ᠃ ᠳᠤᠮᠳᠠ ᠬᠢᠷᠢ ᠶ᠋ᠢᠨ ᠨᠠᠰᠤᠨ ᠤ᠋᠂ ᠪᠠᠭᠠ ᠳ᠋ᠠᠭᠠᠨ ᠯᠠᠮᠠ ᠪᠣᠯᠬᠤ ᠭᠡᠵᠦ ᠰᠠᠬᠢᠯ ᠬᠦᠷᠲᠡᠬᠦ ᠳ᠋ᠦ᠍ᠨᠢ ᠪᠠᠭᠰᠢ ᠯᠠᠮᠠ ᠨᠢ᠄
– ᠬᠦᠵᠦᠭᠦᠨ ᠦ᠌ ᠰᠢᠷᠬᠠ᠂ ᠬᠠᠮᠠᠭᠤ᠂ ᠬᠠᠲᠠᠭᠢ᠂ ᠰᠡᠪᠬᠡ᠂ ᠢᠯᠲᠠ᠂ ᠬᠤᠯᠤᠭᠠᠨᠠ ᠶᠠᠷᠠ᠂ ᠤᠰᠤᠨ ᠤ᠋ ᠡᠪᠡᠳᠴᠢᠨ᠂ ᠬᠠᠨᠢᠶᠠᠯᠭᠠ᠂ ᠭᠥᠭᠦᠯᠭᠡ᠂ ᠤᠨᠠᠬᠤ᠂ ᠬᠡᠨᠭᠭᠦᠭᠯᠡᠬᠦ ᠭᠡᠭᠴᠢᠯᠡᠨ ᠡᠪᠡᠳᠴᠢᠨ ᠴᠢᠮᠠ ᠳ᠋ᠤ᠌ ᠪᠣᠢ ᠪᠤᠶᠤ᠃ ᠭᠠᠭᠴᠠ ᠬᠦ᠌ ᠦᠨᠡᠨ ᠢ᠋ ᠬᠡᠯᠡ ᠭᠡᠵᠦ ᠳᠥᠴᠢᠭᠡᠳ ᠡᠪᠡᠳᠴᠢᠨ ᠦ᠌ ᠨᠡᠷᠡ ᠲᠣᠭᠠᠴᠢᠨ ᠠᠰᠠᠭᠤᠬᠤ ᠳ᠋ᠤ᠌ ᠨᠢ ᠥᠯᠵᠡᠢ᠄
– ᠢᠯᠳᠦ᠂ ᠬᠠᠨᠢᠶᠠᠯᠭᠠ᠂ ᠤᠰᠤᠨ ᠤ᠋ ᠡᠪᠡᠳᠴᠢᠨ ᠨᠠᠳᠠ ᠳ᠋ᠤ᠌ ᠪᠣᠢ ᠭᠡᠳ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠦ ᠣᠷᠬᠢᠵᠠᠢ᠃ ᠲᠡᠭᠡᠭᠰᠡᠨ ᠰᠠᠬᠢᠯ ᠬᠦᠷᠲᠡᠭᠡᠬᠦ ᠨᠢ ᠫᠤᠤ ᠬᠡᠯᠡ ᠬᠡᠢᠳ ᠦ᠋ᠨ ᠭᠤᠷᠢᠯᠤᠮ ᠳᠤ ᠣᠷᠣᠭᠤᠯᠬᠤ ᠦᠭᠡᠢ ᠪᠡᠷ ᠲᠡᠭᠦᠨ ᠢ᠋ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠤᠭᠰᠠᠨ ᠪᠢᠯᠡ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠥᠯᠵᠡᠢ ᠰᠦᠮᠡ ᠳᠤᠭᠠᠩ ᠳ᠋ᠤ᠌ ᠴᠤ᠌ ᠪᠠᠷᠤᠭ ᠣᠷᠣᠬᠤ ᠦᠭᠡᠢ ᠲᠡᠨᠦᠭᠦᠴᠢᠯᠡᠨ ᠶᠠᠪᠤᠳᠠᠭ ᠪᠣᠯᠤᠭᠰᠠᠨ ᠶᠤᠮ᠃ ᠨᠠᠰᠤ ᠠᠭᠢᠬᠤ ᠲᠣᠰᠤᠮ ᠡᠪᠡᠳᠴᠢᠨ ᠨᠢ ᠨᠡᠮᠡᠭᠳᠡᠬᠦ ᠲᠤᠯᠠ ᠪᠤᠷᠬᠠᠨ ᠤ᠋ ᠣᠷᠣᠨ ᠢ᠋ ᠵᠣᠷᠢᠬᠤ ᠠ᠋ᠴᠠ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ ᠰᠠᠨᠵᠠᠢ᠃
ᠡᠢᠮᠦ ᠵᠢᠷᠭᠤᠭᠠᠨ ᠬᠥᠮᠦᠨ ᠨᠢᠭᠡ ᠭᠠᠯ ᠪᠣᠯᠵᠤ ᠬᠠᠮᠲᠤᠷᠠᠨ ᠭᠠᠷᠤᠭᠠᠳ ᠣᠳᠣ ᠰᠠᠷᠠ ᠭᠠᠷᠤᠢ ᠨᠢᠭᠡ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠠᠢᠭᠠ ᠨᠢ ᠡᠨᠡ᠃
《ᠳᠥᠷᠥᠭᠡ ᠨᠡᠢᠯᠡᠮᠡᠷ ᠵᠢᠷᠤᠭ ᠲᠥᠭᠡᠷᠭᠡ ᠲᠡᠢ ᠤᠯᠤᠰ ᠬᠠᠮᠲᠤ ᠭᠠᠷᠴᠠᠢ᠂ ᠠᠱᠢᠭᠦᠢ ᠃ ᠠᠯᠢᠪᠠ ᠭᠠᠢ ᠲᠦᠢᠳᠬᠡᠷ ᠲᠣᠬᠢᠶᠠᠯᠳᠤᠬᠤ ᠦᠭᠡᠢ ᠯᠡ ᠶᠠᠪᠤᠨᠠ᠂ ᠣᠮ ᠮᠠ ᠨᠢ ᠰᠤᠤᠬᠠ》 ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠨᠢᠭᠡ ᠪᠤᠰᠤ ᠤᠳᠠᠭᠠ ᠵᠠᠮ ᠤ᠋ᠨ ᠵᠠᠭᠤᠷᠠ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠨᠡᠵᠡᠢ᠃
– ᠶᠠᠷᠢᠯᠴᠠᠵᠤ ᠲᠣᠬᠢᠷᠠᠭᠰᠠᠨ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠠᠯᠠᠱᠠᠨ ᠶᠠᠮᠤᠨ ᠤ᠋ ᠬᠠᠷᠠᠴᠤᠤᠯ ᠤ᠋ᠨ ᠬᠣᠷᠢᠶᠠᠨ ᠳ᠋ᠤ᠌ ᠪᠠᠭᠤᠵᠤ ᠬᠣᠨᠣᠭᠯᠠᠭᠠᠳ ᠥᠷᠯᠥᠭᠡ ᠮᠣᠷᠢᠨ ᠴᠠᠭ ᠲᠤ᠌ ᠨᠡᠢᠯᠡᠨ ᠴᠠᠰᠢ ᠬᠥᠳᠡᠯᠦᠨᠡ ᠰᠢᠦ! ᠭᠡᠵᠦ ᠴᠤᠪᠤᠭᠠᠨ ᠤ᠋ ᠳᠠᠭᠠᠭᠠᠮᠠᠯ ᠪᠠᠷᠤᠭᠠᠷ ᠴᠢᠷᠠᠢᠲᠤ ᠬᠥᠮᠦᠨ ᠨᠡᠢᠲᠡ ᠳ᠋ᠦ᠍ ᠵᠠᠷᠯᠠᠨ ᠬᠠᠰᠬᠢᠷᠤᠯᠠ᠃
ᠮᠥᠷᠭᠥᠯᠴᠢᠳ ᠦ᠋ᠨ ᠴᠤᠪᠤᠭᠠ ᠬᠣᠲᠠ ᠶ᠋ᠢᠨ ᠬᠠᠷᠠᠴᠤᠤᠯ ᠤ᠋ᠨ ᠬᠣᠷᠢᠶᠠᠨ ᠤ᠋ ᠵᠠᠬᠠ ᠣᠷᠤᠭᠤ ᠣᠷᠣᠯᠠ᠃ ᠲᠡᠭᠡᠲᠡᠯᠡ ᠡᠮᠦᠨᠡ ᠡᠴᠡ ᠨᠢ ᠬᠤᠳᠠᠯᠳᠤᠭᠠᠴᠢᠨ᠂ ᠵᠢᠭᠤᠯᠴᠢᠳ᠂ ᠣᠯᠵᠠ ᠡᠷᠢᠭᠰᠡᠳ᠂ ᠳᠠᠭᠤᠴᠢ ᠡᠮᠡᠰ᠂ ᠰᠣᠨᠢᠭᠤᠴᠢ ᠬᠡᠦᠬᠡᠳ ᠦ᠋ᠳ ᠪᠠᠰᠠ ᠵᠣᠯᠪᠢᠩ ᠨᠣᠬᠠᠳ ᠲᠡᠷᠢᠭᠦᠲᠡᠨ ᠤᠭᠲᠤᠯᠠ᠃
ᠬᠡᠨ ᠳ᠋ᠦ᠍ ᠨᠢ ᠴᠦ᠍ ᠪᠢᠲᠡᠭᠡᠢ ᠨᠢᠭᠤᠷ ᠥᠭᠭᠦᠭᠡᠷᠡᠢ! ᠨᠢᠭᠦᠯ ᠪᠣᠯᠤᠨᠠ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠳ᠋ᠠᠭᠠᠨ ᠵᠠᠬᠢᠯᠠ᠃ ᠰᠠᠷᠯᠤᠭ ᠤ᠋ᠨ ᠬᠢᠯᠭᠠᠰᠤ ᠪᠠᠷ ᠰᠦᠯᠵᠢᠵᠦ ᠬᠢᠭᠰᠡᠨ ᠬᠠᠷᠠ ᠥᠷᠮᠥᠭ ᠦ᠋ᠳ ᠢ᠋ ᠨᠠᠪᠰᠠᠢᠲᠠᠯᠠ ᠳᠠᠪᠬᠤᠷᠯᠠᠨ ᠡᠭᠦᠷᠦᠭᠰᠡᠨ ᠨᠠᠢ᠍ᠮᠠᠭᠠᠴᠢᠳ ᠬᠣᠶᠠᠷ ᠭᠤᠷᠪᠠᠨ ᠲᠠᠯᠠ ᠳ᠋ᠤᠨᠢ ᠬᠠᠷᠠᠭᠳᠠᠪᠠ᠃
– ᠦᠯᠮᠦᠭ ᠠᠪᠠ ᠪᠠ! ᠭᠡᠵᠦ ᠬᠠᠰᠬᠢᠷᠬᠤ ᠶ᠋ᠢ ᠪᠣᠳᠣᠪᠠᠯ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠨ ᠨᠤᠭᠤᠳ ᠪᠣᠯᠤᠯᠲᠠᠢ᠃ ᠪᠠᠰᠠ ᠮᠣᠩᠭᠣᠯ ᠢ᠋ᠶ᠋ᠠᠷ ᠬᠠᠯᠲᠤᠴᠢᠭᠤᠯᠤᠭᠠᠳ ᠪᠠᠢᠭᠠ᠃
ᠳᠣᠯᠳᠣᠢ ᠮᠡᠲᠦ ᠵᠡᠰ ᠰᠠᠪᠠ ᠲᠠᠢ ᠶᠠᠭᠤᠮᠠ ᠤᠷᠲᠤ ᠡᠰᠢ ᠡᠴᠡ ᠨᠢ ᠪᠠᠷᠢᠵᠤ ᠱᠠᠷᠵᠢᠭᠢᠨᠠᠭᠤᠯᠤᠨ ᠶᠠᠪᠤᠭᠠ ᠬᠡᠳᠦᠨ ᠬᠥᠮᠦᠨ ᠢ᠋ ᠭᠡᠰᠦᠯ ᠰᠡᠩᠵᠢ ᠣᠯᠵᠤ ᠬᠠᠷᠠᠪᠠ᠃
– ᠳ᠋ᠢᠶᠠᠨ ᠪᠠᠭᠤᠳᠠᠯ ᠳ᠋ᠤ᠌ ᠣᠴᠢᠬᠤ ᠤᠤ ᠭᠡᠵᠦ ᠴᠡᠪᠡᠷᠬᠡᠨ ᠮᠣᠩᠭᠣᠯ ᠬᠡᠯᠡ ᠪᠡᠷ ᠲᠡᠳᠡ ᠠᠰᠠᠭᠤᠨᠠ᠃ ᠥᠭᠡᠯᠡᠳ ᠦ᠋ᠳ ᠪᠣᠯᠤᠯᠲᠠᠢ᠃ ᠲᠡᠭᠡᠲᠡᠯᠡ ᠪᠠᠰᠠ ᠠᠯᠠᠭ ᠡᠷᠢᠶᠡᠨ ᠲᠤᠤᠰᠢᠩ ᠢ᠋ᠶ᠋ᠠᠷ ᠦᠰᠦ ᠭᠡᠵᠢᠭᠡ ᠪᠡᠨ ᠴᠢᠮᠡᠵᠦ᠂ ᠬᠣᠷᠭᠣᠢ ᠱᠠ ᠬᠠᠨᠴᠤᠢ ᠪᠠᠨ ᠣᠷᠢᠶᠠᠨ ᠣᠶᠣᠵᠤ ᠭᠤᠶᠤᠭᠰᠠᠨ ᠬᠡᠦᠬᠡᠨ ᠨᠦ᠍ᠭᠦᠳ ᠨᠢᠳᠤᠷᠭᠠ ᠪᠠᠷ ᠢ᠋ᠶ᠋ᠠᠨ ᠬᠠᠮᠠᠷ ᠠᠮᠠ ᠪᠠᠨ ᠨᠢᠭᠡ ᠲᠠᠭᠯᠠᠵᠤ᠂ ᠨᠢᠭᠡ ᠪᠣᠯᠢᠵᠤ᠂ ᠵᠤᠤᠮᠠᠯᠵᠠᠨ ᠢᠨᠢᠶᠡᠵᠡᠭᠡᠵᠦ᠂ ᠨᠢᠳᠦ ᠪᠠᠨ ᠢᠷᠮᠡᠨ ᠮᠥᠷᠭᠥᠯᠴᠢᠳ ᠦ᠋ᠨ ᠡᠨᠳᠡ ᠲᠡᠨᠳᠡ ᠭᠠᠷᠴᠤ ᠦᠵᠡᠭᠳᠡᠪᠡ᠃ ᠲᠡᠳᠡᠨ ᠡᠴᠡ ᠬᠣᠶᠠᠷ ᠵᠠᠯᠠᠭᠤᠪᠲᠤᠷᠬᠠᠨ ᠨᠢ ᠢᠯᠭᠠᠷᠴᠦ ᠭᠡᠰᠦᠯ ᠰᠡᠩᠵᠢ ᠶ᠋ᠢ ᠴᠢᠭᠯᠡᠨ᠂ ᠮᠤᠷᠤᠯᠵᠠᠨ ᠮᠤᠰᠢᠯᠵᠠᠨ ᠠᠢᠰᠤᠢ ᠪᠠᠢᠬᠤ ᠶ᠋ᠢ ᠴᠤᠢᠮᠴᠤᠭ ᠭᠡᠯᠦᠩ ᠬᠠᠷᠠᠮᠠᠭᠴᠠ᠂
– ᠳᠠᠭᠤᠴᠢ ᠡᠮᠡᠰ ᠢᠷᠡᠵᠦ ᠶᠠᠪᠤᠨᠠ! ᠵᠠ ᠴᠢ ᠲᠡᠳᠡᠨ ᠤᠷᠤᠭᠤ ᠬᠠᠷᠠᠵᠤ ᠴᠤ᠌ ᠪᠣᠯᠬᠤ ᠦᠭᠡᠢ᠃ ᠨᠢᠳᠦ ᠪᠠᠨ ᠠᠨᠢᠭᠠᠳ ᠶᠠᠮᠠᠨᠳᠠᠭ ᠠ᠋ᠴᠠ ᠤᠩᠰᠢᠭᠠᠳ ᠶᠠᠪᠤᠭᠠᠳ ᠪᠠᠢ᠃ ᠵᠠᠮ ᠢ᠋ᠶ᠋ᠠᠨ ᠬᠠᠷᠠᠬᠤ ᠬᠡᠷᠡᠭ ᠦᠭᠡᠢ᠃ ᠪᠢ ᠵᠠᠮᠴᠢᠯᠠᠨᠠ᠃ ᠡᠨᠡ ᠨᠢᠭᠦᠯ᠂ ᠴᠢᠪᠢᠯᠲᠦ ᠡᠮᠡᠰ ᠤᠷᠤᠭᠤ ᠬᠠᠷᠠᠬᠤ ᠳ᠋ᠤ᠌ ᠯᠠ ᠠᠯᠳᠠᠰ ᠪᠣᠯᠤᠨᠠ ᠭᠡᠵᠦ ᠰᠢᠪᠡᠭᠡᠨᠡᠨ ᠲᠤᠰᠢᠶᠠᠯᠠ᠃
ᠭᠡᠰᠦᠯ ᠰᠡᠩᠵᠢ ᠰᠠᠬᠢᠯ ᠬᠦᠷᠲᠡᠭᠰᠡᠨ ᠢ᠋ᠶ᠋ᠡᠨ ᠪᠠᠲᠤ ᠰᠠᠨᠠᠵᠤ᠂ ᠲᠡᠷᠡ ᠳᠠᠷᠤᠢ ᠬᠣᠶᠠᠷ ᠨᠢᠳ᠋ᠦ ᠪᠠᠨ ᠲᠠᠰᠤ ᠠᠨᠢᠭᠠᠳ ᠶᠠᠮᠠᠨᠳᠠᠭ ᠠ᠋ᠴᠠ ᠤᠩᠰᠢᠵᠤ ᠡᠬᠢᠯᠡᠯᠡ᠃
– ᠵᠠᠮ ᠠ᠋ᠴᠠ ᠵᠠᠢᠯᠠ᠂ ᠪᠤᠵᠠᠷ ᠡᠮᠡᠰ! ᠭᠡᠵᠦ ᠨᠢᠭᠡᠨ ᠤᠳᠠᠭᠠ ᠪᠠᠭᠰᠢ ᠯᠠᠮᠠ ᠨᠢ ᠴᠢᠩᠭᠠ ᠵᠠᠩᠳᠤᠷᠬᠤ ᠶ᠋ᠢ ᠵᠠᠯᠠᠭᠤ ᠭᠡᠰᠦᠯ ᠰᠣᠨᠣᠰᠪᠠ᠃ ᠨᠡᠯᠢᠶᠡᠳ ᠬᠤᠭᠤᠴᠠᠭᠠ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠬᠡᠦᠬᠡᠨ ᠨᠦ᠍ᠭᠦᠳ ᠦ᠋ᠨ 《ᠬᠢ᠂ ᠬᠢ》 ᠭᠡᠵᠦ ᠵᠢᠭ ᠵᠣᠭ ᠢᠨᠢᠶᠡᠨ ᠳᠠᠭᠠᠯᠳᠤᠬᠤ ᠨᠢ ᠥᠩᠭᠡᠷᠡᠪᠡ ᠪᠣᠯᠤᠯᠲᠠᠢ᠃ ᠲᠡᠳᠡᠨ ᠦ᠌ ᠬᠠᠷᠠᠴᠠ ᠶ᠋ᠢ ᠰᠡᠩᠵᠢ ᠮᠡᠳᠡᠷᠡᠵᠦ ᠪᠠᠢᠯᠠ᠃
– ᠰᠣᠬᠣᠷ ᠪᠠᠨᠳᠢ ᠪᠠᠢᠨᠠ᠂ ᠶᠠᠪᠤᠶᠠ ᠭᠡᠵᠦ ᠮᠣᠩᠭᠣᠯ ᠢ᠋ᠶ᠋ᠠᠷ ᠬᠡᠦᠬᠡᠨ ᠦ᠌ ᠨᠢᠭᠡ ᠨᠢ ᠬᠡᠯᠡᠬᠦ ᠶ᠋ᠢ ᠪᠠᠰᠠ ᠵᠠᠯᠠᠭᠤ ᠭᠡᠰᠦᠯ ᠰᠣᠨᠣᠰᠤᠯᠠ᠃ ᠭᠡᠪᠡᠴᠦ ᠨᠢᠳᠦ ᠪᠠᠨ ᠨᠡᠭᠡᠭᠡᠭᠰᠡᠨ ᠦᠭᠡᠢ᠃
ᠶᠠᠮᠠᠨᠳᠠᠭ ᠤᠩᠰᠢᠵᠤ ᠳᠠᠭᠤᠰᠬᠤ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ ᠪᠠᠢᠨᠠ᠃ ᠬᠡᠦᠬᠡᠨ ᠨᠦ᠍ᠭᠦᠳ ᠦ᠋ᠨ ᠳᠠᠭᠤ ᠠᠭᠠᠵᠢᠮ ᠢ᠋ᠶ᠋ᠠᠷ ᠵᠠᠮᠬᠠᠷᠠᠪᠠ᠃ ᠠᠯᠤᠰ ᠲᠤ᠌ ᠳᠡᠰ ᠳᠡᠰ ᠢᠨᠢᠶᠡᠯᠳᠦᠬᠦ ᠨᠢ ᠪᠦᠳᠡᠭᠢᠬᠡᠨ ᠰᠣᠨᠣᠰᠲᠠᠯᠠ᠃
– ᠴᠢᠪᠢᠯᠲᠦ ᠡᠮᠡᠰ ᠦ᠋ᠳ ᠠᠱᠢᠭᠦᠢ ᠬᠣᠯᠠᠳᠠᠯᠠ᠃ ᠵᠠ ᠨᠢᠳᠦ ᠪᠡᠨ ᠨᠡᠬᠡ ᠨᠡᠬᠡ ᠭᠡᠵᠦ ᠪᠠᠭᠰᠢ ᠯᠠᠮᠠ ᠶ᠋ᠢ ᠪᠡᠨ ᠳᠤᠤᠭᠠᠷᠬᠤ ᠳ᠋ᠤ᠌ ᠰᠡᠩᠵᠢ ᠭᠡᠰᠦᠯ ᠰᠠᠢ ᠯᠠ ᠰᠠᠨᠠᠭᠠ ᠠᠮᠤᠷᠴᠤ ᠬᠣᠷᠸᠠ ᠶ᠋ᠢ ᠬᠠᠷᠠᠪᠠ᠃ ᠨᠠᠮᠬᠠᠨ ᠰᠢᠪᠠᠷ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠪᠠᠢᠵᠠᠢ᠃
ᠳᠥᠷᠪᠡᠯᠵᠢᠨ ᠣᠷᠣᠢ ᠲᠠᠢ ᠰᠢᠪᠡᠷ ᠲᠠᠭᠠᠵᠠ ᠨᠤᠭᠤᠳ ᠲᠠᠢ ᠲᠣᠮᠣ ᠬᠠᠰᠢᠶᠠᠨ ᠳ᠋ᠤ᠌ ᠲᠡᠳᠡ ᠬᠣᠨᠣᠭᠯᠠᠬᠤ ᠪᠠᠷ ᠪᠠᠭᠤᠵᠠᠢ᠃ ᠥᠭᠡᠯᠡᠳ ᠠᠪᠠᠭᠠᠢ ᠲᠠᠢ ᠲᠥᠪᠡᠳ ᠬᠥᠮᠦᠨ ᠲᠡᠷᠡ ᠬᠠᠰᠢᠶᠠᠨ ᠤ᠋ ᠡᠵᠡᠨ ᠶᠦᠮ ᠰᠠᠨᠵᠠᠢ᠃ ᠴᠤᠢᠮᠴᠤᠭ ᠭᠡᠯᠦᠩ ᠱᠠᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠴᠣᠩᠬᠣ ᠦᠭᠡᠢ ᠰᠢᠬᠠᠮ ᠬᠠᠷᠠᠩᠭᠤᠢ ᠬᠠᠪᠴᠢᠭ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠪᠠ᠃ ᠮᠣᠳᠣᠨ ᠬᠠᠨᠵᠤᠨ ᠳᠡᠭᠡᠷᠡ ᠰᠠᠷᠯᠤᠭ ᠤ᠋ᠨ ᠰᠡᠪᠡᠭ ᠢ᠋ᠶ᠋ᠡᠷ ᠨᠡᠬᠡᠭᠰᠡᠨ ᠥᠷᠮᠥᠭ ᠦ᠋ᠳ ᠳᠡᠯᠭᠡᠨ ᠬᠠᠶᠠᠵᠠᠢ᠃ ᠳᠡᠪᠢᠰᠬᠡᠷ ᠬᠢᠳᠡᠭ ᠪᠣᠯᠤᠯᠲᠠᠢ ᠪᠠᠢᠯᠠ᠃
– ᠡᠨᠳᠡ ᠪᠠᠭᠰᠢ ᠨᠢ ᠣᠯᠠᠨ ᠤᠳᠠᠭᠠ ᠬᠣᠨᠣᠭ ᠲᠥᠭᠡᠷᠢᠭᠦᠯᠦᠭᠰᠡᠨ ᠶᠦᠮ᠃ ᠬᠠᠰᠢᠶᠠ ᠨᠢ ᠪᠠᠲᠤ ᠬᠠᠭᠠᠯᠭᠠ ᠲᠠᠢ ᠨᠠᠢᠳᠠᠪᠤᠷᠢᠲᠠᠢ ᠭᠠᠵᠠᠷ᠃ ᠭᠡᠷ ᠦ᠋ᠨ ᠡᠵᠡᠨ ᠴᠦ᠍ ᠰᠠᠢᠨ ᠬᠥᠮᠦᠨ ᠪᠠᠢᠭᠠ ᠶᠤᠮ᠃ ᠲᠤᠬᠠᠲᠠᠢ ᠤᠨᠲᠠᠭᠠᠳ ᠮᠠᠷᠭᠠᠰᠢ ᠡᠷᠲᠡᠯᠡᠨ ᠶᠠᠪᠤᠨᠠ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠱᠠᠪᠢ ᠳ᠋ᠠᠭᠠᠨ ᠶᠠᠷᠢᠭᠠᠳ ᠬᠠᠨᠵᠤᠨ ᠳᠡᠭᠡᠷᠡ ᠰᠢᠭᠤᠳ ᠯᠠ ᠣᠷᠣ ᠪᠠᠨ ᠵᠠᠰᠠᠵᠦ ᠡᠬᠢᠯᠡᠪᠡ᠃ ᠨᠢᠭᠡᠨᠲᠡ ᠨᠠᠷᠠ ᠵᠢᠷᠭᠠᠭᠰᠠᠨ ᠪᠣᠯᠬᠣᠷ ᠪᠠᠢᠰᠢᠩ ᠴᠤ᠌ ᠬᠠᠷᠤᠢ ᠪᠦᠷᠦᠢ ᠪᠠᠢᠯᠠ᠃ ᠢᠰᠦ ᠲᠣᠷᠲᠣᠭ ᠪᠣᠯᠤᠭᠰᠠᠨ ᠬᠠᠨᠠ ᠲᠠᠢ ᠨᠢᠭᠡᠨ ᠥᠨᠴᠥᠭ ᠲᠤᠨᠢ ᠭᠣᠣ ᠲᠠᠢ ᠪᠤᠷᠬᠠᠨ ᠵᠡᠭᠦᠯᠲᠡᠲᠡᠢ᠂ ᠲᠡᠭᠦᠨ ᠦ᠌ ᠳᠣᠣᠷᠠᠬᠢ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠭᠠᠭᠴᠠ ᠵᠤᠯᠠ ᠰᠦᠮᠡᠯᠵᠡᠵᠦ ᠪᠠᠢᠨᠠ᠃
– ᠢᠩᠭᠢᠰᠬᠢᠭᠡᠳ ᠪᠢᠳᠡᠨ ᠳ᠋ᠦ᠍ ᠪᠤᠴᠠᠯᠤᠭᠰᠠᠨ ᠬᠠᠷᠠ ᠴᠠᠢ ᠠᠪᠴᠢᠷᠠᠵᠤ ᠥᠭᠬᠦ ᠪᠠᠢᠬᠠ᠃ ᠲᠡᠭᠦᠨ ᠳ᠋ᠦ᠍ ᠬᠠᠲᠠᠭᠰᠠᠨ ᠪᠣᠭᠣᠷᠰᠣᠭ ᠳᠡᠪᠲᠦᠭᠡᠵᠦ ᠢᠳᠡᠭᠡᠳ ᠤᠨᠲᠠᠶᠠ᠃ ᠡᠳᠡᠭᠡᠷ ᠶᠠᠭᠤᠮᠠ ᠭᠣᠷᠢᠳᠠᠯᠲᠠ ᠦᠭᠡᠢ ᠭᠡᠵᠦ ᠭᠡᠯᠦᠩ ᠬᠡᠯᠡᠪᠡ᠃ ᠦᠨᠡᠬᠡᠷ ᠣᠳᠠᠭᠰᠠᠨ ᠴᠤ᠌ ᠦᠭᠡᠢ᠂ ᠡᠭᠦᠳᠡ ᠴᠢᠬᠠᠷᠠᠨ ᠨᠡᠭᠡᠭᠡᠭᠳᠡᠵᠦ ᠭᠠᠤᠯᠢᠨ ᠳᠠᠩᠬᠤ ᠲᠠᠢ ᠴᠠᠢ ᠪᠠᠷᠢᠭᠰᠠᠭᠠᠷ ᠰᠢᠷᠢᠯᠳᠦᠭᠰᠡᠨ ᠬᠠᠷᠠ ᠦᠰᠦ ᠪᠡᠨ ᠰᠡᠭᠰᠡᠢᠯᠭᠡᠭᠰᠡᠨ᠂ ᠪᠠᠷᠤᠭᠠᠷ ᠴᠢᠷᠠᠢ ᠲᠠᠢ ᠠᠪᠤᠭᠠᠢ ᠣᠷᠣᠵᠤ ᠢᠷᠡᠭᠡᠳ ᠦᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠪᠡᠷ ᠳᠦᠷ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠳᠠᠩᠬᠤ ᠶ᠋ᠢ ᠣᠷᠬᠢᠭᠠᠳ ᠪᠤᠴᠠᠵᠤ ᠡᠷᠭᠢᠪᠡ᠃ ᠥᠭᠯᠢᠭᠡ ᠨᠢ ᠡᠭᠦᠪᠡᠷ ᠳᠠᠭᠤᠰᠴᠠᠢ᠃
ᠪᠠᠭᠰᠢ ᠱᠠᠪᠢ ᠬᠣᠶᠠᠷ ᠪᠣᠭᠣᠷᠰᠣᠭ ᠲᠠᠢ ᠬᠠᠷᠠ ᠴᠠᠢ ᠤᠤᠭᠤᠵᠤ ᠬᠠᠨᠤᠭᠠᠳ ᠤᠨᠲᠠᠬᠤ ᠪᠠᠷ ᠬᠠᠵᠠᠭᠤᠯᠠᠳᠠᠪᠠ᠃ ᠭᠡᠪᠡᠴᠦ ᠭᠡᠯᠦᠩ ᠦ᠋ᠨ ᠨᠣᠢᠷ ᠲᠡᠢᠮᠦ ᠠᠮᠠᠷᠬᠠᠨ ᠬᠦᠷᠦᠭᠰᠡᠨ ᠦᠭᠡᠢ᠃
– ᠮᠠᠷᠭᠠᠰᠢ ᠪᠠᠷᠠᠭᠤᠨ ᠬᠡᠢᠳ ᠢ᠋ᠶ᠋ᠡᠷ ᠳᠠᠭᠠᠷᠢᠵᠤ ᠵᠢᠷᠭᠤᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠱᠠᠷᠢᠯ ᠠ᠋ᠴᠠ ᠠᠳᠢᠰ ᠠᠪᠤᠭᠠᠳ ᠴᠠᠭᠠᠱᠢ ᠶᠠᠪᠤᠨᠠ᠃ ᠤᠷᠢᠳᠤ ᠨᠢ ᠪᠢ ᠲᠡᠭᠦᠨ ᠡᠴᠡ ᠠᠳᠢᠰ ᠠᠪᠳᠠᠭ ᠦᠭᠡᠢ ᠪᠠᠢᠭᠰᠠᠨ ᠶᠤᠮ᠃ ᠣᠳᠣ ᠵᠠᠪᠠᠯ ᠠᠳᠢᠰ ᠠᠪᠤᠨᠠ ᠭᠡᠵᠦ ᠭᠡᠯᠦᠩ ᠠᠶᠠᠷᠬᠠᠨ ᠰᠢᠪᠡᠨᠡᠨ ᠶᠠᠷᠢᠬᠤ ᠳ᠋ᠤ᠌ ᠭᠡᠰᠦᠯ ᠭᠠᠢᠬᠠᠨ ᠡᠷᠡᠭᠡᠯᠵᠡᠵᠦ᠂
– ᠲᠠ ᠤᠷᠢᠳᠤ ᠨᠢ ᠶᠠᠭᠠᠬᠢᠭᠠᠳ ᠠᠳᠢᠰ ᠠᠪᠳᠠᠭ ᠦᠭᠡᠢ ᠪᠠᠢᠭᠰᠠᠨ᠂ ᠣᠳᠣ ᠶᠠᠭᠤᠨ ᠳ᠋ᠤ᠌ ᠠᠪᠬᠤ ᠪᠣᠯᠪᠠ? ᠭᠡᠵᠦ ᠮᠥᠨ ᠯᠡ ᠰᠢᠪᠡᠨᠡᠨ ᠠᠰᠠᠭᠤᠯᠠ᠃
– ᠤᠷᠢᠳᠤ ᠪᠢ ᠵᠢᠷᠭᠤᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠶ᠋ᠢ ᠰᠠᠬᠢᠯ ᠢ᠋ᠶ᠋ᠠᠨ ᠰᠠᠬᠢᠵᠤ ᠴᠢᠳᠠᠭᠠ ᠦᠭᠡᠢ ᠠᠯᠳᠠᠰ ᠬᠢᠭᠰᠡᠨ ᠭᠡᠵᠦ ᠮᠡᠳᠡᠬᠦ ᠪᠣᠯᠬᠣᠷ ᠨᠢᠭᠡ ᠶᠡᠬᠡ ᠰᠦᠵᠢᠭᠯᠡᠳᠡᠭ ᠦᠭᠡᠢ ᠪᠠᠢᠯᠠ᠃ ᠣᠳᠣ ᠪᠣᠯ ᠪᠢᠳᠡ ᠬᠣᠶᠠᠷ ᠤ᠋ᠨ ᠢᠯᠭᠠᠭᠠ ᠦᠭᠡᠢ ᠪᠣᠯᠵᠤ ᠁ ᠭᠡᠵᠦ ᠭᠡᠯᠦᠩ ᠰᠠᠨᠠᠭᠠ ᠠᠯᠳᠠᠪᠠ᠃
– ᠲᠠ ᠰᠠᠬᠢᠯ ᠢ᠋ᠶ᠋ᠠᠨ ᠰᠠᠬᠢᠭᠰᠠᠭᠠᠷ ᠯᠠ ᠪᠠᠢᠭᠠ ᠰᠢᠦ ᠳᠡ᠂ ᠪᠠᠭᠰᠢ ᠮᠢᠨᠢ! ᠭᠡᠵᠦ ᠭᠡᠰᠦᠯ ᠰᠠᠨᠠᠭᠤᠯᠪᠠ᠃ ᠴᠤᠢᠮᠴᠤᠭ ᠭᠡᠯᠦᠩ ᠬᠡᠰᠡᠭ ᠵᠠᠭᠤᠷᠠ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ ᠳᠠᠭᠤ ᠦᠭᠡᠢ ᠬᠡᠪᠲᠡᠭᠰᠡᠭᠡᠷ ᠪᠠᠢᠬᠤ ᠳ᠋ᠤ᠌ ᠰᠡᠩᠵᠢ ᠲᠡᠭᠦᠨ ᠢ᠋ ᠨᠣᠢᠷᠰᠤᠵᠤ ᠡᠬᠢᠯᠡᠪᠡ ᠭᠡᠵᠦ ᠪᠣᠳᠣᠭᠠᠳ ᠮᠥᠨ ᠥᠪᠡᠷ ᠢ᠋ᠶ᠋ᠡᠨ ᠵᠡᠭᠦᠷᠮᠡᠭᠯᠡᠨ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠪᠠᠭᠰᠢ ᠨᠢ ᠠᠶᠠᠷ ᠳᠠᠭᠤ ᠪᠠᠷ᠂
– ᠵᠢᠷᠭᠤᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠽᠠᠩᠶᠠᠩᠵᠠᠮᠰᠤᠳᠠᠨ ᠶᠡᠬᠡ ᠤᠶᠠᠨ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ ᠭᠡᠳᠡᠭ᠃ ᠨᠢᠭᠡ ᠪᠦᠰᠡᠭᠦᠢ ᠲᠡᠢ ᠦᠶᠡᠷᠬᠡᠵᠦ ᠪᠠᠢᠭᠠᠳ ᠲᠡᠷᠡ ᠨᠢ ᠪᠡᠶᠡ ᠳᠠᠪᠬᠤᠷ ᠪᠣᠯᠤᠭᠰᠠᠨ ᠶᠤᠮ ᠭᠡᠳᠡᠭ᠃ ᠲᠡᠭᠡᠲᠡᠯᠡ ᠬᠢᠲᠠᠳ ᠵᠢᠷᠤᠬᠠᠢᠴᠢ ᠨᠠᠷ ᠲᠡᠷᠡ ᠬᠡᠦᠬᠡᠳ ᠲᠥᠷᠥᠪᠡᠯ ᠽᠠᠮᠪᠤᠲᠢᠢᠪ ᠤ᠋ᠨ ᠡᠵᠡᠨ ᠰᠠᠭᠤᠬᠤ ᠬᠤᠪᠢ ᠢᠷᠦᠭᠡᠯ ᠲᠡᠢ ᠶᠦᠮ ᠪᠠᠢᠨᠠ ᠭᠡᠳ ᠶᠠᠷᠢᠶᠠ ᠲᠠᠷᠠᠭᠠᠴᠢᠬᠠᠵᠤ ᠯᠠ ᠳᠠ᠃ ᠲᠡᠭᠦᠨ ᠢ ᠨᠢ ᠪᠡᠭᠡᠵᠢᠩ ᠳ᠋ᠦ᠍ ᠰᠣᠨᠣᠰᠴᠢᠬᠠᠵᠠᠢ᠃ ᠲᠡᠭᠡᠭᠡᠳ ᠡᠵᠡᠨ ᠬᠠᠭᠠᠨ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠳᠠᠯᠠᠢ ᠯᠠᠮᠠ ᠶ᠋ᠢ ᠥᠪᠡᠷ ᠢ᠋ ᠨᠢ ᠪᠡᠭᠡᠵᠢᠩ ᠳ᠋ᠦ᠍ ᠶᠠᠭᠠᠷᠠᠯᠲᠠᠢ ᠳᠠᠭᠤᠳᠠᠵᠤ᠂ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢ ᠨᠢ ᠳᠠᠷᠤᠢᠬᠠᠨ ᠶᠡᠭᠦᠳᠬᠡᠵᠦ ᠬᠥᠨᠥᠭᠡᠬᠦ ᠶ᠋ᠢ ᠲᠤᠰᠢᠶᠠᠵᠠᠢ᠃ ᠪᠡᠭᠡᠵᠢᠩ ᠣᠷᠣᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠲᠠᠯᠠ ᠣᠳᠣ ᠪᠢᠳᠡᠨ ᠦ᠌ ᠡᠨᠡ ᠬᠣᠨᠣᠭᠯᠠᠬᠤ ᠪᠠᠷ ᠢᠷᠡᠭᠰᠡᠨ ᠠᠯᠠᠱᠠᠨ ᠶᠠᠮᠤᠨ ᠳ᠋ᠤ᠌ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠨᠢᠭᠡ ᠳᠠᠭᠠᠭᠤᠯᠢ ᠨᠢ ᠥᠭᠡᠳᠡ ᠪᠣᠯᠴᠢᠬᠠᠵᠤ ᠯᠠ ᠳᠠ᠃ ᠲᠡᠭᠡᠭᠡᠳ ᠳᠠᠯᠠᠢ ᠯᠠᠮᠠ ᠲᠡᠷᠡ ᠦᠬᠦᠭᠰᠡᠨ ᠵᠠᠷᠤᠴᠠ ᠳ᠋ᠠᠭᠠᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠤᠪᠴᠠᠰᠤ ᠪᠠᠷᠢᠨᠲᠠᠭ ᠢ᠋ ᠡᠮᠦᠰᠦᠭᠦᠯᠦᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠦ᠌ ᠬᠤᠪᠴᠠᠰᠤ ᠶ᠋ᠢ ᠡᠮᠦᠰᠴᠦ ᠲᠡᠨᠦᠭᠦᠯᠴᠢᠨ ᠪᠣᠯᠤᠭᠠᠳ ᠬᠠᠯᠬᠠ ᠮᠣᠩᠭᠣᠯ ᠤᠷᠤᠭᠤ ᠣᠷᠭᠣᠴᠢᠬᠠᠭᠰᠠᠨ ᠶᠤᠮ ᠭᠡᠳᠡᠭ᠃ ᠪᠠᠰᠠ ᠣᠪᠣᠭᠠ ᠰᠡᠭᠡᠭᠡ ᠭᠠᠷᠭᠠᠭᠰᠠᠨ ᠬᠡᠷᠡᠭ ᠯᠡ ᠳᠡ ᠭᠡᠵᠦ ᠴᠤᠢᠮᠴᠤᠭ ᠭᠡᠯᠦᠩ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠠᠭᠤ ᠦᠭᠡᠢ ᠪᠣᠯᠪᠠ᠃ ᠱᠠᠪᠢ ᠪᠠᠨ ᠤᠨᠲᠠᠭᠠᠳ ᠥᠭᠴᠡᠢ ᠭᠡᠵᠦ ᠪᠣᠳᠣᠵᠠᠢ᠃
– ᠲᠡᠭᠡᠭᠡᠳ ᠶᠠᠭᠠᠬᠢᠭᠰᠡᠨ ᠪᠣᠢ᠂ ᠪᠠᠭᠰᠢ ᠠ ᠭᠡᠵᠦ ᠰᠡᠩᠵᠢ ᠭᠡᠰᠦᠯ ᠭᠡᠨᠡᠳᠲᠡ ᠠᠰᠠᠭᠤᠭᠰᠠᠨ ᠳ᠋ᠤ᠌᠄
– ᠦ ᠴᠢ ᠤᠨᠲᠠᠭᠠ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠵᠦ ᠪᠠᠭᠰᠢ ᠨᠢ ᠯᠠᠪᠯᠠᠭᠠᠳ ᠴᠠᠰᠢ ᠦᠷᠭᠦᠯᠵᠢᠯᠡᠭᠦᠯᠦᠨ᠄
– ᠬᠠᠯᠬᠠ ᠮᠣᠩᠭᠣᠯ ᠢ᠋ᠶ᠋ᠠᠷ ᠪᠠᠬᠠᠨ ᠲᠡᠨᠦᠭᠦᠴᠢᠯᠡᠵᠦ ᠶᠠᠪᠤᠭᠠᠳ ᠪᠤᠴᠠᠭᠠᠳ ᠲᠥᠪᠡᠳ ᠭᠠᠵᠠᠷ ᠢ᠋ᠶ᠋ᠠᠨ ᠢᠷᠡᠭᠡᠳ ᠲᠡᠨᠳᠡ ᠡᠴᠡ ᠪᠡᠨ ᠡᠨᠡᠳᠬᠡᠭ ᠣᠷᠣᠨ ᠳ᠋ᠤ᠌ ᠣᠳᠴᠤ ᠣᠯᠠᠨ ᠣᠨ ᠢ᠋ ᠥᠩᠭᠡᠷᠡᠭᠦᠯᠦᠭᠰᠡᠨ ᠶᠦᠮ ᠭᠡᠳᠡᠭ᠃ ᠲᠡᠭᠡᠭᠡᠳ ᠠᠮᠢ ᠨᠠᠰᠤᠨ ᠳ᠋ᠤ᠌ ᠨᠢ ᠢᠪᠡᠭᠡᠯ ᠲᠡᠢ ᠪᠣᠯᠤᠭᠰᠠᠨ ᠡᠨᠡ ᠠᠯᠠᠱᠠᠨ ᠨᠤᠲᠤᠭ ᠲᠤ᠌ ᠡᠷᠭᠢᠨ ᠢᠷᠡᠵᠦ ᠰᠠᠭᠤᠷᠢᠰᠢᠭᠠᠳ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠢᠳᠡ ᠰᠢᠳᠢ ᠦᠵᠡᠭᠦᠯᠦᠭᠰᠡᠨ ᠶᠦᠮ ᠭᠡᠳᠡᠭ᠃ ᠲᠡᠭᠦᠨ ᠢ ᠨᠢ ᠠᠯᠠᠱᠠᠨ ᠸᠠᠩ ᠤ᠋ᠨ ᠡᠵᠡᠭᠲᠡᠢ ᠰᠡᠵᠢᠭᠯᠡᠨ ᠳᠠᠩᠨᠠᠭᠠᠳ ᠳᠠᠯᠠᠢ ᠯᠠᠮᠠ ᠮᠥᠨ ᠭᠡᠵᠦ ᠲᠠᠨᠢᠭᠰᠠᠨ ᠭᠡᠳᠡᠭ᠃ ᠲᠡᠷᠡ ᠡᠵᠡᠭᠲᠡᠢ ᠳᠠᠯᠠᠢ ᠯᠠᠮᠠ ᠶ᠋ᠢ ᠰᠢᠲᠦᠳᠡᠭ ᠪᠣᠯᠤᠭᠰᠠᠨ ᠶᠤᠮ ᠪᠢᠯᠡ᠃ ᠡᠨᠡ ᠠᠯᠠᠱᠠᠨ ᠶᠠᠮᠤᠨ ᠳ᠋ᠤ᠌ ᠳᠠᠯᠠᠢ ᠯᠠᠮᠠ ᠬᠡᠳᠦ ᠬᠡᠳᠦᠨ ᠰᠦᠮᠡ ᠳᠤᠭᠠᠩ ᠪᠠᠢᠭᠤᠯᠤᠭᠰᠠᠨ ᠶᠤᠮ ᠰᠠᠨᠵᠠᠢ ᠁ ᠭᠡᠵᠦ ᠥᠭᠦᠯᠡᠲᠡᠯᠡ ᠱᠠᠪᠢ ᠭᠡᠰᠦᠯ ᠨᠢ ᠨᠣᠢᠷ ᠲᠠᠭᠠᠨ ᠳᠠᠷᠤᠭᠳᠠᠭᠠᠳ ᠦᠯᠦ ᠮᠡᠳᠡᠭ ᠬᠤᠷᠬᠢᠷᠠᠵᠤ ᠡᠬᠢᠯᠡᠪᠡ᠃
– ᠬᠥᠭᠡᠷᠦᠬᠦᠢ ᠵᠠᠯᠠᠭᠤ ᠶᠤᠮ ᠪᠣᠯᠬᠣᠷ ᠢ᠋ᠶ᠋ᠠᠨ ᠨᠣᠢᠷ ᠶᠡᠬᠡ ᠲᠠᠢ ᠶᠤᠮ ᠳᠠ᠂ ᠵᠠᠢᠯᠠᠭᠤᠯ ᠭᠡᠵᠦ ᠭᠡᠯᠦᠩ ᠴᠤᠢᠮᠴᠤᠭ ᠠᠮᠠᠨ ᠳ᠋ᠠᠭᠠᠨ ᠪᠤᠪᠲᠤᠨᠠᠭᠠᠳ ᠪᠤᠷᠤᠭᠤ ᠬᠠᠷᠠᠨ ᠬᠡᠪᠲᠡᠪᠡ᠃
ᠴᠤᠢᠮᠴᠤᠭ ᠭᠡᠯᠦᠩ ᠦ᠋ᠨ ᠨᠣᠢᠷ ᠨᠢ ᠬᠦᠷᠬᠦ ᠦᠭᠡᠢ ᠪᠠᠢᠯᠠ᠃ ᠨᠢᠳᠦᠨ ᠦ᠌ ᠡᠮᠦᠨᠡᠭᠦᠷ ᠨᠢ ᠥᠪᠡᠷ ᠦ᠋ᠨ ᠨᠢ ᠰᠡᠳᠬᠢᠯ ᠢ᠋ ᠰᠢᠨᠠᠯᠭᠠᠭᠰᠠᠨ ᠳᠦᠷᠢ ᠵᠢᠷᠤᠭ ᠪᠦᠷᠦᠯᠵᠡᠨ ᠦᠵᠡᠭᠳᠡᠬᠦ ᠰᠢᠭ ᠪᠣᠯᠵᠤ ᠭᠡᠯᠦᠩ ᠤᠲᠠᠲᠠᠯᠠ ᠰᠢᠨᠠᠯᠤᠨ ᠵᠣᠪᠠᠪᠠ᠃
ᠲᠠᠪᠤᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠤᠶᠠᠩᠭᠠ ᠶ᠋ᠢᠨ ᠰᠢᠯᠦᠭ ᠦᠨ ᠮᠥᠷ ᠪᠠᠳᠠᠭ ᠤ᠋ᠳ ᠰᠠᠨᠠᠭᠠᠨ ᠳ᠋ᠤᠨᠢ ᠤᠷᠭᠤᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠴᠤᠢᠮᠴᠤᠭ ᠭᠡᠯᠦᠩ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠪᠠᠨ ᠪᠥᠮᠪᠥᠷᠢᠭᠦᠯᠦᠨ ᠤᠶᠠᠷᠠᠵᠤ ᠬᠡᠪᠲᠡᠯᠡ᠃ ᠦᠵᠡᠰᠬᠦᠯᠡᠩᠲᠦ ᠪᠦᠰᠡᠭᠦᠢ ᠬᠥᠮᠦᠨ ᠳ᠋ᠦ᠍ ᠵᠣᠷᠢᠭᠤᠯᠤᠨ ᠪᠢᠴᠢᠭᠰᠡᠨ ᠲᠡᠷᠡ ᠬᠦ᠌ ᠰᠢᠯᠦᠭ ᠦ᠋ᠳ ᠬᠣᠵᠢᠮ ᠳᠠᠭᠤᠤ ᠪᠣᠯᠤᠨ ᠣᠯᠠᠨ ᠤ᠋ ᠳᠤᠮᠳᠠ ᠲᠦᠭᠡᠵᠦ ᠪᠢᠯᠡ᠃ ᠴᠤᠢᠮᠴᠤᠭ ᠭᠡᠯᠦᠩ ᠵᠠᠯᠠᠭᠤ ᠳ᠋ᠠᠭᠠᠨ ᠲᠡᠷᠡ ᠶ᠋ᠢ ᠳᠠᠭᠤᠯᠠᠬᠤ ᠳᠤᠷᠠ ᠲᠠᠢ ᠰᠠᠨ ᠁