ᠣᠷᠣᠢ ᠦᠭᠡᠢ ᠰᠦᠮᠡ – ᠯ ᠂ ᠲᠦᠳᠦᠪ Оройгүй сүм – Л ᠂ Түдэв-Oroigui sum00
3947ᠠᠷᠭᠠ ᠦᠭᠡᠢ ᠶᠢᠨ ᠡᠷᠬᠡᠨ ᠳᠦ ᠲᠢᠶᠠᠨᠴᠢ ᠪᠤᠶᠤ ᠡᠬᠢᠯᠡᠯ
ᠤᠷᠢᠳᠤ ᠶ᠋ᠢᠨ ᠪᠠᠶᠠᠨ ᠬᠣᠵᠢᠮ ᠦᠭᠡᠢᠷᠡᠪᠡᠯ ᠬᠥᠭᠡᠷᠦᠬᠦᠢ
ᠤᠷᠢᠳᠤ ᠶ᠋ᠢᠨ ᠨᠣᠶᠠᠨ ᠬᠣᠵᠢᠮ ᠪᠠᠭᠤᠷᠠᠪᠠᠯ ᠬᠥᠭᠡᠷᠦᠬᠦᠢ
ᠤᠷᠢᠨ ᠲᠡᠨᠡᠭ ᠦ᠋ᠳ ᠦ᠋ᠨ ᠳᠤᠮᠳᠠ ᠭᠠᠭᠴᠠ ᠰᠡᠴᠡᠨ ᠬᠥᠭᠡᠷᠦᠬᠦᠢ
ᠳᠡᠭᠡᠷᠡ ᠡᠴᠡ ᠨᠠᠷᠠ᠂ ᠳᠣᠣᠷᠠ ᠠ᠋ᠴᠠ ᠡᠯᠡᠰᠦ ᠲᠥᠭᠡᠨᠡᠵᠦ ᠢᠩᠭᠢᠨᠡ ᠤᠰᠤᠨ ᠤ᠋ ᠭᠣᠪᠢ ᠳ᠋ᠤ᠌ ᠵᠢᠩ ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠪᠣᠯᠤᠯᠠ᠃ ᠠᠮᠢᠲᠠᠨ ᠪᠦᠬᠦᠨ ᠰᠡᠭᠦᠳᠡᠷ ᠬᠠᠢᠵᠤ ᠲᠠᠷᠴᠢᠯᠠᠨᠠ᠃ ᠬᠠᠯᠠᠭᠤᠨ ᠡᠯᠡᠰᠦᠨ ᠳ᠋ᠦ᠍ ᠠᠮᠢᠳᠤᠷᠠᠬᠤ ᠵᠠᠶᠠᠭᠠ ᠲᠠᠢ ᠬᠣᠨᠢᠨ ᠬᠦᠷᠪᠡᠯ ᠬᠦᠷᠲᠡᠯᠡ ᠳᠡᠰᠴᠤ ᠶᠠᠳᠠᠨ᠂ ᠠᠮᠠ ᠪᠠᠨ ᠠᠩᠭᠠᠢᠨ᠂ ᠪᠥᠭᠡᠷᠡ ᠪᠡᠨ ᠲᠦᠩᠬᠦᠯᠵᠡᠭᠦᠯᠦᠨ᠂ ᠵᠠᠭ ᠤ᠋ᠨ ᠬᠣᠵᠤᠤᠯᠠ ᠳᠣᠣᠭᠤᠷ ᠰᠡᠭᠦᠳᠡᠷ ᠳᠠᠭᠠᠨ ᠠᠭᠠᠬᠢᠯᠠᠵᠤ ᠪᠠᠢᠯᠠ᠃ ᠶᠡᠬᠡ ᠭᠣᠪᠢ ᠶ᠋ᠢᠨ ᠵᠡᠯᠢᠭᠦᠳ ᠬᠢᠵᠠᠭᠠᠷ ᠲᠤ᠌ ᠲᠣᠷᠣᠢᠬᠤ ᠪᠠᠷᠠ ᠦᠭᠡᠢ᠂ ᠠᠨᠢᠷ ᠴᠢᠮᠡᠭᠡ ᠦᠭᠡᠢ ᠳᠦᠩᠰᠦᠭᠡᠷ ᠠᠵᠢ᠃ ᠭᠠᠭᠴᠠ ᠬᠦ᠌ ᠴᠠᠷᠴᠠ᠂ ᠭᠣᠯᠢᠶᠠ ᠶ᠋ᠢᠨ ᠴᠠᠰᠬᠢᠬᠦ ᠳᠠᠭᠤᠨ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠦᠯᠦ ᠰᠣᠨᠣᠰᠤᠭᠳᠠᠬᠤ᠂ ᠳᠦᠯᠡᠢ ᠰᠢᠷᠠ ᠡᠯᠡᠰᠦᠨ ᠳᠤᠮᠳᠠ ᠬᠡᠪ ᠭᠡᠨᠡᠳᠲᠡ ᠨᠢᠭᠡᠨ ᠬᠠᠷᠠ ᠶᠠᠭᠤᠮᠠ ᠪᠥᠷᠲᠥᠯᠵᠡᠨ ᠦᠵᠡᠭᠳᠡᠯᠡ᠃ ᠭᠡᠪᠡᠴᠦ ᠲᠡᠭᠦᠨ ᠢ᠋ ᠰᠣᠨᠢᠷᠬᠠᠬᠤ ᠡᠰᠡᠪᠡᠯ ᠲᠡᠭᠦᠨ ᠡᠴᠡ ᠴᠣᠴᠢᠨ ᠪᠥᠱᠥᠭᠦᠷᠬᠡᠬᠦ ᠨᠢᠭᠡᠬᠡᠨ ᠴᠦ᠍ ᠠᠮᠢᠲᠠᠨ ᠡᠨᠡᠬᠦ ᠡᠯᠴᠢᠯ ᠦᠭᠡᠢ ᠶᠡᠬᠡ ᠴᠦᠯ ᠦ᠋ᠨ ᠳᠤᠮᠳᠠ ᠣᠭᠲᠣᠬᠠᠨ ᠴᠤ᠌ ᠪᠠᠢᠭᠰᠠᠨ ᠦᠭᠡᠢ᠃ ᠪᠥᠷᠲᠥᠯᠵᠡᠨ ᠱᠣᠪᠣᠰᠬᠢᠭᠰᠡᠨ ᠲᠡᠷᠡ ᠨᠢᠭᠡᠨ ᠨᠢ ᠵᠠᠭ ᠤ᠋ᠨ ᠦᠵᠢᠷ ᠦᠨᠳᠦᠰᠦ ᠪᠡᠷ ᠲᠠᠶᠠᠭ ᠬᠢᠵᠦ ᠲᠤᠯᠤᠭᠰᠠᠨ᠂ ᠬᠢᠵᠢᠶᠡᠯ ᠨᠠᠰᠤᠨ ᠤ᠋ ᠰᠣᠬᠣᠷ ᠬᠥᠮᠦᠨ ᠪᠠᠢᠯᠠ᠃ ᠨᠢᠳᠦ ᠨᠢ ᠰᠢᠷᠠᠪᠲᠤᠷ ᠪᠥᠭᠡᠳ ᠴᠢᠯᠳᠡᠩ ᠮᠡᠲᠦ ᠥᠩᠭᠡ ᠲᠡᠢ᠂ ᠬᠠᠷᠠᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠠᠵᠢ᠃ ᠵᠢᠰᠦ ᠴᠢᠷᠠᠢ ᠨᠢ ᠲᠡᠳᠦᠢ ᠯᠡ ᠳᠣᠷᠣᠢᠲᠠᠭᠠ ᠦᠭᠡᠢ ᠮᠥᠷᠲᠡᠯᠡ ᠰᠡᠳᠬᠢᠯ ᠦ᠋ᠨ ᠶᠡᠬᠡ ᠵᠠᠪᠠᠭᠤᠷᠢ ᠲᠠᠢ ᠨᠢ ᠢᠯᠡᠷᠬᠡᠢ ᠦᠵᠡᠭᠳᠡᠨᠡ᠃ ᠵᠠᠯᠠᠭᠤ ᠳ᠋ᠠᠭᠠᠨ ᠴᠡᠪᠡᠷ᠂ ᠴᠡᠮᠴᠡᠭᠡᠷ ᠶᠠᠪᠤᠭᠰᠠᠨ ᠬᠥᠮᠦᠨ ᠦ᠌ ᠰᠢᠨᠵᠢ ᠶ᠋ᠢ ᠬᠠᠳᠠᠭᠠᠯᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠠᠵᠢ᠃
ᠵᠢᠩ ᠦᠳᠡ ᠶ᠋ᠢᠨ ᠬᠠᠯᠠᠭᠤᠨ ᠳ᠋ᠤ᠌ ᠳᠤᠬᠤᠨ ᠳᠡᠭᠡᠭᠦᠷᠬᠢ ᠭᠤᠷᠪᠠᠨ ᠭᠦᠨ ᠠᠲᠤᠷᠢᠶᠠᠨ ᠤ᠋ ᠨᠢ ᠳᠠᠭᠠᠤ ᠦᠯᠦ ᠮᠡᠳᠡᠭ ᠬᠥᠯᠥᠰᠥ ᠴᠢᠬᠠᠷᠠᠨ ᠭᠠᠷᠴᠤ ᠪᠠᠢᠬᠤ ᠪᠣᠯᠪᠠᠴᠤ ᠤᠷᠤᠭᠤᠯ ᠨᠢ ᠬᠠᠲᠠᠵᠤ ᠤᠮᠳᠠᠭᠠᠰᠤᠭᠰᠠᠨ ᠨᠢ ᠢᠯᠡᠷᠬᠡᠢ᠃ ᠡᠯᠡᠰᠦᠨ ᠳᠣᠪᠣᠴᠠᠭ ᠳᠤᠮᠳᠠᠭᠤᠷ ᠭᠠᠪ ᠭᠠᠭᠴᠠᠭᠠᠷ ᠲᠡᠮᠲᠡᠴᠢᠨ ᠶᠠᠪᠤᠭᠠ ᠲᠡᠷᠡ ᠬᠥᠮᠦᠨ ᠥᠭᠢᠷᠡᠰᠢᠵᠦ ᠮᠤᠷᠤᠢᠭᠰᠠᠨ ᠵᠠᠭ ᠮᠣᠳᠣᠨ ᠤ᠋ ᠪᠠᠬᠢᠮ ᠤᠷᠲᠤ ᠦᠨᠳᠦᠰᠦᠨ ᠲᠠᠶᠠᠭ ᠢ᠋ᠶ᠋ᠠᠨ ᠤᠷᠢᠳᠤ ᠪᠠᠨ ᠪᠠᠷᠢᠵᠤ ᠲᠡᠭᠦᠨ ᠢᠶᠠᠷ ᠢ᠋ᠶ᠋ᠡᠨ ᠦᠶᠡ ᠦᠶᠡ ᠭᠠᠵᠠᠷ ᠬᠠᠳᠬᠤᠨ ᠦᠵᠡᠵᠦ ᠨᠢᠳᠦ ᠲᠡᠢ ᠬᠥᠮᠦᠨ ᠡᠴᠡ ᠪᠠᠷᠤᠭ ᠳᠤᠲᠠᠬᠤ ᠦᠭᠡᠢ ᠪᠡᠷ ᠰᠠᠭᠠᠳ ᠪᠡᠷᠬᠡᠰᠢᠶᠡᠯ ᠢ᠋ ᠮᠡᠳᠡᠷᠡᠵᠦ ᠲᠣᠭᠣᠷᠢᠨ ᠶᠠᠪᠤᠵᠤ ᠪᠠᠢᠯᠠ᠃
ᠨᠢᠳᠦᠨ ᠪᠠᠯᠠᠢ ᠪᠣᠯᠤᠭᠰᠠᠨ ᠲᠡᠷᠡ ᠬᠥᠮᠦᠨ ᠦᠶᠡ ᠦᠶᠡ ᠵᠣᠭ ᠲᠣᠰᠴᠤ᠂ ᠬᠠᠷᠠᠭᠠ ᠲᠠᠢ ᠬᠥᠮᠦᠨ ᠰᠢᠭ ᠠᠯᠤᠰ ᠢ᠋ ᠥᠯᠢᠢᠨ ᠰᠢᠷᠳᠡᠵᠦ᠂ ᠤᠷᠲᠤ ᠠᠮᠢᠰᠬᠤᠭᠠ ᠠᠪᠤᠨᠠ᠃ ᠤᠷᠤᠭᠤᠯ ᠳᠡᠭᠡᠭᠦᠷ ᠨᠢ ᠡᠨᠳᠡ ᠲᠡᠨᠳᠡ ᠭᠠᠭᠴᠠ ᠬᠣᠶᠠᠷ ᠱᠥᠷᠪᠥᠭᠡᠷ ᠰᠠᠬᠠᠯ ᠤᠷᠭᠤᠵᠠᠢ᠃ ᠦᠰᠦ ᠨᠢ ᠶᠡᠬᠡ ᠤᠷᠭᠤᠵᠤ᠂ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠡᠪᠬᠡᠷᠡᠨ ᠭᠣᠭᠴᠣᠭᠠᠷᠠᠵᠠᠢ᠃ ᠭᠣᠭᠴᠣᠭᠠᠷᠠᠭᠰᠠᠨ ᠬᠠᠷᠠ ᠦᠰᠦᠨ ᠳ᠋ᠦ᠍ ᠨᠢ ᠴᠠᠢᠵᠤ ᠪᠤᠭᠤᠷᠤᠯᠲᠤᠭᠰᠠᠨ ᠬᠢᠷᠠᠭᠤ ᠠᠳᠠᠯᠢ ᠥᠩᠭᠡ ᠨᠢᠭᠡᠨᠲᠡ ᠰᠠᠭᠤᠵᠠᠢ᠃ ᠳᠢᠶᠠᠨᠴᠢ ᠡᠷᠡ ᠶᠦᠮ ᠦᠦ ᠭᠡᠵᠦ ᠲᠠᠭᠠᠮᠠᠭᠯᠠᠵᠤ ᠪᠣᠯᠬᠤ ᠪᠣᠯᠪᠠᠴᠤ ᠳᠢᠶᠠᠨᠴᠢ ᠶ᠋ᠢᠨ ᠬᠡᠷᠡᠭᠯᠡᠯ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠡᠯᠡᠰᠦᠨ ᠳᠣᠪᠣ ᠶ᠋ᠢᠨ ᠬᠣᠭᠣᠷᠣᠨᠳᠣᠭᠤᠷ ᠬᠠᠷᠭᠠᠨᠠ᠂ ᠵᠠᠭ᠂ ᠬᠠᠷᠮᠠᠭ ᠬᠣᠯᠢᠯᠳᠤᠨ ᠤᠷᠭᠤᠭᠰᠠᠨ ᠭᠣᠪᠢ ᠶ᠋ᠢᠨ ᠡᠨᠡᠬᠡᠨ ᠬᠣᠲᠣᠭᠣᠷ ᠲᠤ᠌ ᠭᠠᠭᠴᠠ ᠬᠥᠮᠦᠨ ᠬᠥᠮᠦᠨ ᠪᠣᠯᠤᠨᠠ ᠭᠡᠵᠦ ᠢᠲᠡᠭᠡᠬᠦ ᠳ᠋ᠦ᠍ ᠪᠡᠷᠬᠡᠲᠡᠢ ᠪᠢᠯᠡ᠃ ᠠᠭᠯᠠᠭ ᠵᠡᠯᠢᠭᠦᠳ ᠦ᠋ᠨ ᠲᠤᠢᠯ ᠪᠣᠯᠴᠢᠬᠠᠭᠰᠠᠨ ᠡᠨᠡ ᠬᠣᠩᠬᠣᠷ ᠲᠤ᠌ ᠴᠣᠬᠣᠮ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ᠂ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠭᠠᠭᠴᠠ ᠪᠡᠶᠡ ᠰᠣᠬᠣᠷ ᠬᠥᠮᠦᠨ᠂ ᠲᠠᠶᠠᠭ ᠢ᠋ᠶ᠋ᠠᠷ ᠮᠣᠷᠢ ᠬᠢᠵᠦ ᠲᠡᠨᠦᠭᠦᠴᠢᠯᠡᠨ ᠶᠠᠪᠤᠭᠠ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠬᠡᠨ ᠦ᠌ ᠴᠦ᠍ ᠭᠠᠢᠬᠠᠰᠢ ᠲᠥᠷᠥᠨᠡ᠃ ᠣᠢᠷᠠ ᠬᠠᠪᠢ ᠳ᠋ᠤ᠌ ᠨᠢ ᠬᠡᠳᠦᠨ ᠠᠷᠪᠠᠨ ᠪᠠᠷᠠ ᠶ᠋ᠢᠨ ᠭᠠᠵᠠᠷ ᠲᠤ᠌ ᠠᠢᠯ ᠠᠮᠢᠲᠠᠨ ᠪᠠᠢᠬᠤ ᠦᠭᠡᠢ᠂ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠠᠮᠠᠨ ᠤ᠋ ᠤᠰᠤ ᠴᠤ᠌ ᠪᠠᠷᠤᠭ ᠦᠭᠡᠢ᠃ ᠢᠩᠭᠢᠨᠡ ᠤᠰᠤᠨ ᠤ᠋ ᠴᠦᠯ ᠳ᠋ᠦ᠍ ᠶᠠᠪᠠᠭᠠᠨ᠂ ᠰᠣᠬᠣᠷ ᠭᠠᠭᠴᠠ ᠬᠥᠮᠦᠨ ᠪᠠᠢᠲᠤᠭᠠᠢ ᠮᠣᠷᠢ᠂ ᠲᠡᠮᠡᠭᠡ ᠲᠡᠢ ᠬᠥᠮᠦᠨ ᠴᠦ᠍ ᠳᠠᠩ ᠪᠡᠶᠡ ᠪᠡᠷ ᠵᠢᠷᠦᠬᠡᠯᠡᠨ ᠶᠠᠪᠤᠬᠤ ᠤᠴᠢᠷ ᠦᠭᠡᠢ ᠪᠢᠯᠡ᠃ ᠭᠠᠭᠴᠠ ᠬᠦ᠌ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠤᠪᠢ ᠲᠠᠪᠢᠯᠠᠩ ᠤ᠋ᠨ ᠬᠦᠴᠦᠨ ᠳ᠋ᠦ᠍ ᠯᠡ ᠡᠢᠮᠦ ᠪᠠᠢᠳᠠᠯ ᠳ᠋ᠤ᠌ ᠬᠥᠮᠦᠨ ᠣᠷᠣᠵᠤ ᠪᠣᠯᠬᠤ ᠶᠤᠮ᠃
ᠰᠣᠬᠣᠷ ᠡᠷᠡ ᠦᠶᠡ ᠦᠶᠡ ᠵᠣᠭ ᠲᠣᠰᠴᠤ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠳᠡᠭᠡᠭᠰᠢ ᠡᠷᠭᠦᠵᠦ ᠡᠷᠭᠢᠨ ᠲᠣᠭᠣᠷᠢᠨ ᠬᠢᠵᠠᠭᠠᠷ ᠬᠢᠷᠬᠠᠭ ᠦᠭᠡᠢ ᠴᠡᠯᠡᠢᠨ ᠰᠢᠷᠭᠠᠯᠲᠤᠬᠤ ᠭᠣᠪᠢ ᠨᠤᠲᠤᠭ ᠢ᠋ ᠨᠢᠳᠦ ᠲᠡᠢ ᠬᠥᠮᠦᠨ ᠠᠵᠢᠨ ᠬᠠᠷᠠᠬᠤ ᠮᠡᠲᠦ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤ᠌ ᠨᠢᠭᠤᠷ ᠢ᠋ ᠬᠠᠨᠳᠤᠭᠤᠯᠤᠨ ᠤᠳᠠᠲᠠᠯᠠ ᠳᠠᠭᠤ ᠦᠭᠡᠢ ᠵᠣᠭᠰᠣᠨ ᠴᠢᠮᠡᠭᠡ ᠴᠢᠩᠨᠠᠵᠤ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠳᠡᠯᠳᠡᠬᠡᠷ ᠪᠣᠯᠪᠠᠴᠤ ᠣᠮᠣᠭ ᠨᠢ ᠳᠣᠭᠣᠭᠰᠢ ᠪᠠᠨ ᠤᠷᠤᠰᠤᠨ ᠵᠠᠮᠬᠠᠷᠠᠭᠰᠠᠨ ᠶᠤᠮ ᠰᠢᠭ᠋ ᠨᠠᠷᠢᠰᠴᠤ ᠡᠷᠡᠦ ᠶ᠋ᠢᠨ ᠤᠭᠯᠠᠭᠤᠷᠭᠠᠨ ᠠ᠋ᠴᠠ ᠬᠣᠶᠠᠷ ᠬᠤᠷᠤᠭᠤ ᠲᠡᠭᠡᠭᠡᠨᠡ ᠭᠠᠵᠠᠷ ᠲᠤ᠌ ᠬᠠᠴᠠᠷ ᠲᠠᠢ ᠪᠠᠨ ᠨᠡᠢᠯᠡᠭᠰᠡᠨ ᠬᠣᠶᠠᠷ ᠴᠢᠬᠢ ᠶᠢᠷᠲᠢᠨᠴᠦ ᠶ᠋ᠢᠨ ᠲᠦᠮᠡᠨ ᠠᠶᠠᠯᠭᠤ᠂ ᠮᠢᠩᠭᠠᠨ ᠠᠪᠢᠶᠠ ᠶᠢ ᠠᠯᠠᠭᠠ ᠪᠠᠷ ᠲᠤᠰᠬᠤ ᠶ᠋ᠢᠨ ᠠᠳᠠᠯᠢ ᠰᠢᠨᠤᠯ ᠲᠠᠢ ᠪᠠᠷ ᠡᠷᠢᠨ ᠬᠠᠢᠵᠤ ᠬᠦᠯᠢᠶᠡᠨ ᠠᠪᠴᠤ ᠴᠤᠭᠯᠠᠷᠠᠭᠤᠯᠤᠨ ᠨᠥᠭᠡᠴᠢᠯᠡᠵᠦ ᠪᠠᠢᠬᠤ ᠰᠢᠭ᠋ ᠬᠠᠷᠠᠭᠳᠠᠨᠠ᠃
ᠮᠣᠩᠬᠣᠷᠳᠠᠭᠤ ᠬᠠᠪᠴᠢᠭ ᠬᠥᠬᠡᠯᠪᠡᠢ ᠬᠠᠮᠠᠷ ᠤ᠋ᠨ ᠬᠣᠶᠠᠷ ᠨᠦᠬᠡ ᠮᠥᠨ ᠯᠡ ᠬᠣᠷᠸᠠ ᠶ᠋ᠢᠨ ᠰᠠᠢᠨ ᠮᠠᠭᠤ ᠦᠨᠦᠷ ᠲᠠᠨᠢᠷ ᠢ᠋ ᠬᠣᠪᠳᠣᠭ ᠢ᠋ᠶ᠋ᠠᠷ ᠰᠣᠷᠣᠨ ᠲᠠᠲᠠᠬᠤ ᠠᠳᠠᠯᠢ ᠪᠠᠢᠨ ᠪᠠᠢᠨ ᠰᠠᠷᠲᠠᠯᠵᠠᠵᠤ ᠦᠵᠡᠭᠳᠡᠨᠡ᠃
– ᠠᠱᠢᠭᠦᠢ ᠥᠨᠥᠳᠥᠷ ᠮᠢᠨᠦ ᠬᠡᠳᠦᠨ ᠬᠠᠪᠲᠠᠭᠠᠢ ᠥᠭᠯᠢᠭᠡ ᠪᠡᠨ ᠨᠠᠳᠠ ᠳ᠋ᠠᠭᠠᠨ ᠬᠦᠷᠲᠡᠭᠡᠬᠦ ᠪᠡᠷ ᠰᠢᠢᠳᠴᠢ ᠳᠡ᠃ ᠪᠤᠶᠠᠨᠲᠠ ᠨᠤᠭᠤᠳ᠂ ᠠᠢ ᠳᠠ᠂ ᠪᠤᠶᠠᠨᠲᠠᠨ ᠨᠤᠭᠤᠳ ᠮᠢᠨᠢ! ᠭᠡᠵᠦ ᠰᠣᠬᠣᠷ ᠡᠷᠡ ᠬᠡᠨ ᠨᠢᠭᠡᠨ ᠬᠥᠮᠦᠨ ᠳ᠋ᠦ᠍ ᠬᠠᠨᠳᠤᠬᠤ ᠮᠡᠲᠦ ᠭᠡᠨᠡᠳᠲᠡ ᠴᠢᠩᠭᠠ ᠪᠠᠷ ᠶᠠᠷᠢᠪᠠ᠃ ᠬᠡᠴᠢᠨᠡᠨ ᠥᠨᠳᠥᠷ ᠳᠠᠭᠤ ᠪᠠᠷ ᠶᠠᠭᠤ ᠭᠡᠵᠦ ᠬᠡᠯᠡᠪᠡᠴᠦ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠰᠣᠨᠣᠰᠴᠤ᠂ ᠣᠢᠯᠠᠭᠠᠬᠤ ᠠᠮᠢᠲᠠᠨ ᠢᠩᠭᠢᠨᠡ ᠤᠰᠤᠨ ᠤ᠋ ᠭᠣᠪᠢ ᠳ᠋ᠤ᠌ ᠪᠠᠢᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠰᠣᠬᠣᠷ ᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠲᠡᠢ ᠪᠡᠨ ᠶᠠᠷᠢᠵᠤ ᠵᠠᠩᠰᠢᠭᠰᠠᠨ ᠪᠠᠢᠵᠠᠢ᠃
ᠰᠣᠬᠣᠷ ᠡᠷᠡ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠪᠠᠶᠠᠷᠯᠠᠬᠤ ᠰᠢᠨᠵᠢ ᠢᠯᠡᠬᠡᠨ ᠲᠣᠳᠣᠷᠠᠵᠤ᠂ ᠮᠠᠩᠨᠠᠢ ᠶ᠋ᠢᠨ ᠦᠷᠴᠢᠯᠡᠭᠡᠰᠦ ᠳᠡᠯᠭᠡᠭᠳᠡᠨ᠂ ᠤᠷᠤᠭᠤᠯ ᠨᠢ ᠦᠯᠦ ᠮᠡᠳᠡᠭ ᠴᠢᠴᠢᠭᠡᠨᠡᠪᠡ᠃ ᠭᠡᠪᠡᠴᠦ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠢ᠋ ᠢᠯᠡᠷᠬᠡᠢᠯᠡᠬᠦ ᠲᠣᠯᠢ ᠪᠣᠯᠤᠭᠰᠠᠨ ᠨᠢᠳᠦ ᠨᠢ ᠨᠢᠭᠡᠨᠲᠡ ᠭᠡᠭᠡ ᠦᠭᠡᠢ ᠶ᠋ᠢᠨ ᠤᠯᠠᠮ ᠠ᠋ᠴᠠ ᠲᠡᠭᠦᠨ ᠦ᠌ ᠪᠠᠶᠠᠷᠯᠠᠭᠰᠠᠨ ᠤ᠋ ᠰᠢᠨᠵᠢ ᠲᠡᠮᠳᠡᠭ ᠲᠤᠩ ᠦᠯᠦ ᠮᠡᠳᠡᠭ ᠠᠵᠢ᠃
– ᠵᠠ ᠂ ᠡᠭᠦᠯᠡᠨ ᠪᠣᠷᠣ ᠮᠢᠨᠢ᠂ ᠵᠢᠯᠣᠭᠣ ᠪᠠᠨ ᠰᠤᠩᠭᠠᠶᠠ᠃ ᠨᠠᠢ᠍ᠮᠠᠨ ᠰᠢᠷᠭᠠ ᠶ᠋ᠢᠨ ᠳ᠋ᠡᠭᠠᠨ ᠣᠴᠢᠶᠠ᠃ ᠲᠡᠳᠡ ᠴᠢ ᠪᠢᠳᠡ ᠬᠣᠶᠠᠷ ᠲᠤ᠌ ᠢᠳᠡᠭᠡ ᠪᠡᠨ ᠵᠡᠬᠡᠭᠰᠡᠨ ᠪᠠᠢᠨᠠ᠃ ᠬᠤᠷᠳᠤᠨ ᠣᠴᠢᠬᠤ ᠦᠭᠡᠢ ᠪᠣᠯ ᠭᠣᠮᠣᠳᠠᠴᠢᠬᠠᠨᠠ᠃ ᠳᠤᠮᠳᠠ ᠰᠢᠷᠭᠠ ᠶ᠋ᠢᠨ ᠪᠤᠶᠠᠨ ᠳᠡᠯᠭᠡᠷᠡᠭ! ᠭᠡᠵᠦ ᠰᠣᠬᠣᠷ ᠡᠷᠡ ᠲᠠᠶᠠᠭ ᠲᠠᠭᠠᠨ ᠬᠠᠨᠳᠤᠨ ᠪᠠᠰᠠ ᠯᠠ ᠴᠢᠩᠭᠠ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠲᠠᠶᠠᠭ ᠢ᠋ᠶ᠋ᠠᠨ ᠡᠭᠦᠯᠡᠨ ᠪᠣᠷᠣ ᠲᠠᠢ ᠵᠦᠢᠷᠯᠡᠨ ᠬᠡᠯᠡᠭᠰᠡᠨ ᠪᠣᠯᠤᠯᠲᠠᠢ᠃ ᠭᠡᠲᠡᠯᠡ ᠪᠠᠰᠠ ᠨᠠᠢ᠍ᠮᠠᠨ ᠰᠢᠷᠭᠠ ᠶ᠋ᠢᠨ ᠬᠢ ᠭᠡᠵᠦ ᠶᠠᠭᠤ ᠶ᠋ᠢ ᠬᠡᠯᠡᠵᠦ ᠪᠠᠢᠭᠠ ᠶᠤᠮ ᠪᠣᠯ ᠳᠠ! ᠨᠢᠭᠡᠨ ᠪᠣᠳᠣᠬᠤ ᠳ᠋ᠤ᠌ ᠡᠨᠡ ᠬᠥᠮᠦᠨ ᠰᠣᠬᠣᠷ ᠲᠡᠳᠦᠢ ᠦᠭᠡᠢ ᠪᠠᠰᠠ ᠤᠬᠠᠭᠠᠨ ᠭᠠᠵᠢᠭᠰᠠᠨ ᠮᠡᠲᠦ ᠠᠵᠢ᠃
ᠰᠣᠬᠣᠷ ᠡᠷᠡ ᠲᠡᠢᠨ ᠬᠦ᠌ ᠲᠠᠶᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠤᠰᠠᠯᠠᠮᠵᠢ ᠪᠠᠷ ᠰᠠᠭᠠᠳ ᠪᠦᠬᠦᠨ ᠢ᠋ ᠴᠢᠳᠠᠮᠠᠭᠠᠢ ᠲᠣᠭᠣᠷᠢᠵᠤ ᠶᠠᠪᠤᠭᠰᠠᠭᠠᠷ ᠨᠣᠭᠣᠭᠠᠨ ᠬᠥᠪᠡᠭᠡ ᠲᠡᠢ ᠪᠢᠴᠢᠬᠠᠨ ᠪᠤᠯᠠᠭ ᠤ᠋ᠨ ᠳᠡᠷᠭᠡᠳᠡ ᠢᠷᠡᠪᠡ᠃ ᠡᠨᠡ ᠨᠢ ᠲᠡᠷᠡᠬᠡᠨ ᠬᠠᠪᠢ ᠳ᠋ᠠᠭᠠᠨ ᠪᠠᠢᠳᠠᠭ ᠴᠣᠷ ᠤ᠋ᠨ ᠭᠠᠭᠴᠠ ᠪᠤᠯᠠᠭ ᠶᠤᠮ᠃ ᠢᠩᠭᠢᠨᠡ ᠤᠰᠤ ᠭᠡᠳᠡᠭ ᠨᠡᠷᠡ ᠲᠡᠢ ᠪᠢᠯᠡ᠃ ᠵᠢᠯ ᠦ᠋ᠨ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠬᠠᠳᠠᠳᠠᠭ ᠦᠭᠡᠢ ᠶᠦᠮ᠃
– ᠨᠠᠢ᠍ᠮᠠᠨ ᠰᠢᠷᠭᠠ ᠮᠠᠨᠢ ᠥᠨᠥᠳᠥᠷ ᠥᠷᠯᠥᠭᠡ ᠡᠷᠲᠡ ᠢᠷᠡᠵᠢ ᠳᠠ᠃ ᠠᠷᠭᠠ ᠦᠭᠡᠢ ᠶᠡᠬᠡ ᠬᠠᠯᠠᠭᠤᠨ ᠡᠳᠦᠷ ᠪᠣᠯᠬᠤ ᠶ᠋ᠢ ᠲᠡᠳᠡ ᠮᠡᠳᠡᠭᠡᠳ ᠷᠠᠰᠢᠶᠠᠨ ᠳ᠋ᠠᠭᠠᠨ ᠡᠷᠲᠡᠯᠡᠨ ᠢᠷᠡᠵᠡᠢ ᠭᠡᠵᠦ ᠰᠣᠬᠣᠷ ᠡᠷᠡ ᠪᠠᠰᠠ ᠯᠠ ᠬᠡᠨ ᠨᠢᠭᠡᠨ ᠳ᠋ᠦ᠍ ᠬᠠᠨᠳᠤᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠬᠡᠯᠡᠯᠡ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠪᠤᠯᠠᠭ ᠤ᠋ᠨ ᠵᠡᠭᠦᠨ ᠤᠷᠢᠳᠤ ᠲᠠᠯᠠ ᠳ᠋ᠤ᠌ ᠡᠮᠵᠢᠶᠡᠷᠢᠯᠡᠨ ᠰᠢᠷᠭᠠᠯᠲᠤᠬᠤ ᠡᠯᠡᠰᠦᠨ ᠳᠤᠮᠳᠠᠬᠢ ᠪᠤᠲᠠ ᠨᠤᠭᠤᠳ ᠤᠷᠤᠭᠤ ᠬᠦᠷᠴᠦ ᠣᠴᠢᠯᠠ᠃ ᠵᠣᠭ ᠲᠣᠰᠴᠤ ᠬᠠᠮᠠᠷ ᠢ᠋ᠶ᠋ᠠᠷ ᠰᠢᠩᠰᠢᠯᠡᠬᠦ ᠮᠡᠲᠦ ᠦᠨᠦᠷ ᠬᠥᠭᠡᠭᠡᠵᠦ ᠪᠥᠭᠲᠥᠭᠡᠨᠡᠭᠰᠡᠨ ᠢ᠋ᠶ᠋ᠡᠨ ᠰᠣᠬᠣᠷ ᠡᠷᠡ ᠲᠠᠶᠠᠭ ᠢ᠋ᠶ᠋ᠠᠨ ᠭᠠᠵᠠᠷ ᠣᠷᠬᠢᠵᠤ᠂ ᠡᠯᠡᠰᠦᠨ ᠳᠤᠮᠳᠠ ᠰᠥᠬᠥᠷᠡᠨ ᠰᠠᠭᠤᠯᠠ᠃ ᠰᠥᠬᠥᠷᠡᠭᠰᠡᠨ ᠲᠡᠷᠡ ᠭᠠᠵᠠᠷ ᠨᠢ ᠡᠯᠡᠰᠦᠨ ᠳᠡᠭᠡᠷᠡ ᠡᠭᠡᠵᠡᠭᠡᠢ ᠰᠢᠭ ᠰᠢᠷᠭᠠᠯ ᠥᠩᠭᠡᠲᠡᠢ ᠶᠠᠭᠤᠮᠠ ᠲᠤᠨᠤᠷᠠᠨ ᠪᠠᠢᠬᠤ ᠠᠵᠢ᠃ ᠰᠣᠬᠣᠷ ᠡᠷᠡ ᠲᠡᠷᠡ ᠬᠦ᠌ ᠡᠭᠡᠵᠡᠭᠡᠢᠷᠡᠨ ᠲᠤᠨᠤᠷᠠᠵᠤ ᠰᠢᠪᠠᠷ ᠠᠳᠠᠯᠢ ᠬᠠᠭᠠᠷᠠᠨ ᠬᠠᠳᠠᠵᠤ ᠪᠠᠢᠭᠠ ᠶᠠᠭᠤᠮᠠᠨ ᠠ᠋ᠴᠠ ᠠᠪᠴᠤ ᠨᠠᠭᠠᠯᠳᠤᠭᠰᠠᠨ ᠡᠯᠡᠰᠦ ᠶ᠋ᠢ ᠨᠢ ᠭᠠᠷ ᠢ᠋ᠶ᠋ᠠᠷ ᠲᠡᠮᠲᠡᠷᠢᠨ ᠠᠷᠢᠯᠭᠠᠭᠠᠳ ᠠᠮᠲᠠᠷᠬᠠᠨ ᠢᠳᠡᠵᠦ ᠡᠬᠢᠯᠡᠪᠡ᠃ ᠥᠷᠯᠥᠭᠡ ᠦᠦᠷ ᠢ᠋ᠶ᠋ᠡᠷ ᠡᠨᠳᠡ ᠢᠷᠡᠵᠦ ᠤᠰᠤ ᠤᠤᠭᠤᠭᠠᠳ ᠪᠤᠯᠠᠭ ᠤ᠋ᠨ ᠵᠠᠬᠠ ᠳ᠋ᠤ᠌ ᠠᠮᠠᠷᠠᠨ ᠬᠡᠪᠲᠡᠵᠦ ᠪᠠᠢᠬᠤ ᠳ᠋ᠠᠭᠠᠨ ᠬᠠᠪᠲᠠᠭᠠᠢ ᠶ᠋ᠢᠨ ᠢᠩᠭᠡ ᠳᠠᠯᠠᠩ ᠨᠢ ᠴᠢᠨᠦᠷᠡᠨ ᠡᠯᠡᠰᠦᠨ ᠳᠡᠭᠡᠷᠡ ᠰᠦ ᠪᠡᠨ ᠭᠣᠭᠣᠵᠢᠭᠤᠯᠤᠭᠰᠠᠨ ᠨᠢ ᠡᠳᠦᠷ ᠦ᠋ᠨ ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌ ᠲᠡᠢᠨ ᠬᠦ᠌ ᠬᠠᠲᠠᠵᠤ ᠪᠠᠢᠵᠠᠢ᠃ ᠠᠭᠠᠵᠢᠮ ᠢ᠋ᠶ᠋ᠠᠷ ᠡᠭᠡᠵᠡᠭᠡᠢ ᠪᠣᠯᠤᠨ ᠬᠤᠪᠢᠷᠠᠳᠠᠭ᠃
– ᠠ᠋ ᠳᠠ᠂ ᠡᠨᠡ ᠬᠠᠪᠲᠠᠭᠠᠢ ᠰᠦ ᠶᠡᠬᠡ ᠲᠡᠢ ᠪᠤᠶᠠᠨ ᠲᠠᠢ ᠠᠮᠢᠲᠠᠨ ᠶᠤᠮ ᠳᠠ᠃ ᠪᠣᠲᠣᠭᠣ ᠨᠢ ᠬᠥᠬᠥᠭᠡᠳ ᠪᠠᠢᠬᠤ ᠳ᠋ᠤ᠌ ᠯᠠ ᠪᠠᠷᠠᠭᠳᠠᠬᠤ ᠦᠭᠡᠢ ᠴᠢᠨᠦᠷᠡᠭᠡᠳ ᠬᠡᠪᠲᠡᠭᠰᠡᠨ ᠭᠠᠵᠠᠷ ᠪᠣᠯᠭᠠᠨ ᠳ᠋ᠤ᠌ ᠠᠶᠠᠨᠳᠠᠭᠠᠨ ᠰᠦ ᠨᠢ ᠲᠤᠨᠤᠷᠠᠨ ᠭᠣᠭᠣᠵᠢᠭᠰᠠᠨ ᠪᠠᠢᠳᠠᠭ ᠮᠥᠨ ᠴᠦ᠍ ᠰᠢᠮᠡ ᠰᠠᠢᠲᠠᠢ ᠪᠤᠶᠠᠨ ᠲᠡᠭᠦᠰ ᠠᠮᠢᠲᠠᠨ ᠰᠢᠦ᠃ ᠮᠢᠨᠦ ᠮᠠᠭᠤ ᠡᠭᠦᠯᠡᠨ ᠬᠥᠬᠡ ᠮᠣᠷᠢᠨ ᠳ᠋ᠤ᠌ ᠡᠢᠮᠦ ᠰᠢᠮᠡ ᠶᠠᠭᠠᠬᠢᠵᠤ ᠪᠠᠢᠬᠤ ᠪᠣᠢ? ᠭᠡᠬᠦ ᠳ᠋ᠡᠭᠡᠨ ᠬᠥᠯ ᠦ᠋ᠨ ᠣᠷᠣᠨ ᠳ᠋ᠤ᠌ ᠬᠥᠯ᠂ ᠨᠢᠳᠦᠨ ᠦ᠌ ᠣᠷᠣᠨ ᠳ᠋ᠤ᠌ ᠨᠢᠳᠦ ᠪᠣᠯᠵᠤ ᠨᠠᠳᠠ ᠳ᠋ᠠᠭᠠᠨ ᠶᠡᠬᠡ ᠲᠤᠰᠠᠯᠠᠳᠠᠭ ᠪᠠᠰᠠ ᠯᠠ ᠪᠤᠶᠠᠨ ᠲᠠᠢ ᠮᠣᠳᠣ ᠳᠠ ᠭᠡᠵᠦ ᠰᠣᠬᠣᠷ ᠡᠷᠡ ᠭᠠᠵᠠᠷ ᠬᠠᠶᠠᠭᠰᠠᠨ ᠲᠠᠶᠠᠭ ᠢ᠋ᠶ᠋ᠠᠨ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠲᠡᠮᠲᠡᠷᠢᠨ ᠣᠯᠵᠤ ᠠᠪᠬᠤ ᠵᠠᠭᠤᠷᠠ ᠶᠠᠷᠢᠵᠠᠢ᠃
ᠵᠡᠷᠯᠢᠭ ᠲᠡᠮᠡᠭᠡ ᠰᠦ ᠶᠡᠬᠡᠲᠡᠢ ᠤᠴᠢᠷ ᠬᠥᠬᠥᠭᠦᠯ ᠪᠠᠢᠬᠤ ᠦᠶᠡ ᠳ᠋ᠡᠭᠡᠨ ᠬᠡᠪᠲᠡᠭᠰᠡᠨ ᠭᠠᠵᠠᠷ ᠢ᠋ᠶ᠋ᠠᠷ ᠨᠢ ᠢᠯᠡᠭᠦᠳᠡᠯ ᠰᠦ ᠨᠢ ᠭᠣᠭᠣᠵᠢᠵᠤ ᠲᠤᠨᠤᠷᠠᠨ ᠦᠯᠡᠳᠡᠭᠡᠳ ᠭᠣᠪᠢ ᠶ᠋ᠢᠨ ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌ ᠡᠭᠡᠵᠡᠭᠡᠢ ᠪᠣᠯᠤᠨ ᠬᠠᠳᠠᠳᠠᠭ ᠢ᠋ ᠰᠣᠬᠣᠷ ᠡᠷᠡ ᠪᠦᠷ ᠪᠠᠭᠠ ᠵᠠᠯᠠᠭᠤ ᠳ᠋ᠠᠭᠠᠨ ᠮᠥᠷᠭᠥᠯᠴᠢᠨ ᠦ᠌ ᠤᠷᠲᠤ ᠵᠠᠮ ᠲᠤᠭᠤᠯᠵᠤ ᠭᠤᠷᠪᠠᠨ ᠶᠡᠬᠡ ᠭᠣᠪᠢ ᠶ᠋ᠢ ᠭᠠᠲᠤᠯᠵᠤ ᠶᠠᠪᠤᠬᠤ ᠴᠠᠭ ᠲᠤ᠌ ᠣᠯᠵᠤ ᠮᠡᠳᠡᠭᠰᠡᠨ ᠶᠦᠮ ᠪᠠᠢᠵᠠᠢ᠃ ᠰᠣᠬᠣᠷ ᠡᠷᠡ ᠬᠠᠪᠲᠠᠭᠠᠢ ᠶ᠋ᠢᠨ ᠦᠯᠡᠳᠡᠭᠡᠭᠰᠡᠨ ᠰᠦ ᠡᠴᠡ ᠴᠠᠳᠲᠠᠯᠠ ᠪᠠᠨ ᠢᠳᠡᠭᠡᠳ᠄
– ᠠᠮᠲᠠ ᠴᠢᠨᠠᠷ ᠰᠠᠢᠲᠠᠢ᠂ ᠠᠷᠭᠠ ᠦᠭᠡᠢ ᠯᠡ ᠨᠢᠭᠡ ᠶᠡᠬᠡ ᠭᠣᠪᠢ ᠶ᠋ᠢᠨ ᠬᠦᠴᠦᠲᠦ ᠤᠷᠭᠤᠮᠠᠯ ᠪᠦᠷ ᠢ᠋ ᠲᠡᠭᠦᠵᠦ ᠢᠳᠡᠳᠡᠭ ᠠᠮᠢᠲᠠᠨ ᠤ᠋ ᠰᠦ ᠶᠦᠮ ᠳᠡ᠃ ᠬᠤᠷᠤᠭᠤᠨ ᠴᠢᠨᠡᠭᠡ ᠶ᠋ᠢ ᠯᠡ ᠠᠮᠰᠠᠭᠠᠳ ᠣᠷᠬᠢᠬᠤ ᠳ᠋ᠤ᠌ ᠯᠠ ᠬᠠᠮᠤᠭ ᠪᠡᠶᠡ ᠳᠠᠯᠪᠢᠷᠠᠵᠤ᠂ ᠲᠡᠩᠬᠡᠭᠡ ᠤᠷᠤᠬᠤ ᠰᠢᠭ᠋ ᠪᠣᠯᠬᠤ ᠶᠤᠮ᠃ ᠠᠢ ᠳᠠ᠂ ᠡᠢᠮᠦ ᠰᠦ ᠪᠠᠢᠳᠠᠭ ᠢ᠋ ᠲᠡᠷᠲᠡᠭᠡ ᠳᠥᠴᠢᠭᠡᠳ ᠵᠢᠯ ᠦ᠋ᠨ ᠡᠮᠦᠨᠡ ᠪᠠᠨᠳᠢ ᠪᠠᠢᠬᠤ ᠳ᠋ᠠᠭᠠᠨ ᠣᠯᠵᠤ ᠮᠡᠳᠡᠭᠡ ᠦᠭᠡᠢ ᠰᠠᠨ ᠪᠣᠯ ᠴᠤ᠌ ᠪᠢ ᠡᠨᠡ ᠴᠥᠯᠡᠯᠭᠡ ᠶ᠋ᠢᠨ ᠭᠠᠵᠠᠷ ᠨᠢᠭᠡ ᠬᠣᠨᠣᠭ ᠴᠤ᠌ ᠠᠮᠢᠳᠤ ᠶᠠᠪᠤᠬᠤ ᠦᠭᠡᠢ ᠪᠠᠢᠬᠠ ᠡ ᠃ ᠬᠥᠭᠡᠷᠦᠬᠦᠢ᠂ ᠬᠠᠪᠲᠠᠭᠠᠢ ᠴᠢᠨᠦ ᠪᠤᠶᠠᠨ ᠢ᠋ ᠪᠢ ᠶᠠᠭᠤ ᠪᠠᠷ ᠬᠠᠷᠢᠭᠤᠯᠬᠤ ᠪᠣᠢ ᠳᠠ᠃ ᠬᠣᠭᠣᠰᠣᠨ ᠮᠠᠨᠢ ᠤᠩᠰᠢᠯᠲᠠᠢ ᠪᠢᠰᠢ ᠳᠡ ᠭᠡᠵᠦ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠷᠢᠵᠤ ᠬᠡᠰᠡᠭ ᠰᠠᠭᠤᠯᠠ᠃
ᠭᠣᠪᠢ ᠶ᠋ᠢᠨ ᠲᠡᠷᠲᠡᠭᠡ ᠠᠯᠤᠰ ᠬᠠᠶᠠᠭᠠᠨ ᠳ᠋ᠤ᠌ ᠰᠢᠷᠭᠠᠯ ᠬᠥᠬᠡᠮᠳᠦᠭ ᠵᠢᠰᠦᠮ ᠦ᠋ᠨ ᠲᠠᠪᠤᠨ ᠬᠠᠪᠲᠠᠭᠠᠢ ᠭᠤᠷᠪᠠᠨ ᠪᠣᠲᠣᠭᠣ ᠶ᠋ᠢᠨ ᠬᠠᠮᠲᠤ ᠪᠡᠯᠴᠢᠨ ᠶᠠᠪᠤᠭᠠ ᠨᠢ ᠵᠡᠷᠭᠡᠯᠭᠡ ᠤᠨᠢᠶᠠᠷ ᠤ᠋ᠨ ᠳᠤᠮᠳᠠ ᠨᠢᠭᠡ ᠨᠠᠮ᠂ ᠨᠢᠭᠡ ᠥᠨᠳᠥᠷ ᠪᠣᠯᠵᠤ᠂ ᠳᠠᠯᠠᠯᠤᠨ ᠳᠠᠭᠤᠳᠠᠬᠤ ᠠᠳᠠᠯᠢ ᠦᠵᠡᠰᠬᠦᠯᠡᠩ ᠲᠡᠢ ᠰᠠᠢᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠳᠡᠨ ᠢ᠋ ᠰᠣᠬᠣᠷ ᠡᠷᠡ ᠶᠠᠭᠠᠬᠢᠨ ᠣᠯᠵᠤ ᠬᠠᠷᠠᠬᠤ ᠪᠢᠯᠡ᠃
– ᠦᠨᠦᠷ ᠨᠢ ᠪᠠᠷᠤᠭ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠣᠯᠲᠠᠯᠠ ᠪᠠᠨ ᠵᠠᠮᠬᠠᠷᠠᠭᠰᠠᠨ ᠢ᠋ ᠪᠣᠳᠣᠪᠠᠯ ᠨᠠᠢ᠍ᠮᠠᠨ ᠰᠢᠷᠭᠠ ᠮᠠᠨᠢ ᠥᠨᠥ ᠥᠷᠯᠥᠭᠡ ᠲᠤᠩ ᠡᠷᠲᠡᠯᠡᠵᠦ ᠤᠰᠤᠨ ᠳ᠋ᠤ᠌ ᠢᠷᠡᠵᠢ ᠳᠠ᠃ ᠣᠳᠣ ᠯᠠᠪ ᠳᠣᠯᠣᠭᠠ ᠬᠣᠨᠣᠭ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠪᠠᠢᠬᠠ ᠠ᠋᠃ ᠬᠠᠢᠷᠠᠯᠠᠵᠤ ᠦᠯᠡᠳᠡᠭᠡᠭᠰᠡᠨ ᠬᠡᠰᠢᠭ ᠪᠤᠶᠠᠨ ᠢ ᠨᠢ ᠬᠠᠮᠤᠵᠤ ᠬᠣᠷᠮᠣᠢᠯᠠᠵᠤ ᠠᠪᠤᠶᠠ ᠭᠡᠵᠦ ᠰᠣᠬᠣᠷ ᠡᠷᠡ ᠬᠡᠯᠡᠭᠡᠳ ᠮᠥᠯᠬᠥᠨ ᠤᠷᠤᠭᠰᠢᠯᠠᠵᠤ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠰᠢᠩᠰᠢᠯᠡᠨ ᠦᠨᠦᠷ ᠲᠠᠲᠠᠵᠤ ᠬᠠᠪᠲᠠᠭᠠᠢ ᠶ᠋ᠢᠨ ᠬᠡᠪᠲᠡᠰᠢ ᠶ᠋ᠢ ᠲᠡᠮᠲᠡᠷᠢᠵᠦ ᠡᠬᠢᠯᠡᠪᠡ᠃
– ᠨᠢᠭᠡ ᠪᠤᠤᠷᠠ ᠲᠠᠢ ᠶᠤᠮ ᠳ᠋ᠠᠭ᠃ ᠲᠡᠷᠡ ᠭᠠᠢᠬᠠᠯ ᠡᠨᠳᠡ ᠬᠡᠪᠲᠡᠭᠰᠡᠨ ᠪᠠᠢᠨᠠ᠃ ᠰᠢᠭᠡᠭ᠂ ᠵᠠᠭᠠᠷ ᠨᠢ ᠬᠠᠮᠠᠷ ᠰᠡᠲᠡᠯᠴᠢᠬᠡᠬᠦ ᠭᠡᠳ ᠶᠠᠭ ᠯᠠ ᠮᠥᠨ ᠳᠡ᠃ ᠪᠤᠤᠷᠠ ᠡᠨᠳᠡ ᠬᠡᠪᠲᠡᠭᠰᠡᠨ ᠪᠣᠯ ᠲᠡᠭᠦᠨ ᠡᠴᠡ ᠴᠠᠰᠢ ᠢᠩᠭᠡ ᠪᠠᠢᠭᠠ ᠦᠭᠡᠢ ᠪᠢᠵᠡ ᠭᠡᠵᠦ ᠰᠣᠬᠣᠷ ᠡᠷᠡ ᠠᠮᠠᠨ ᠳ᠋ᠠᠭᠠᠨ ᠪᠤᠪᠲᠤᠨᠠᠨ ᠶᠠᠷᠢᠵᠤ ᠨᠥᠭᠥᠭᠡ ᠳᠠᠰᠢ ᠡᠷᠭᠢᠨ ᠮᠥᠯᠬᠥᠬᠦ ᠵᠠᠭᠤᠷᠠ ᠮᠥᠨ ᠯᠡ ᠭᠠᠵᠠᠷ ᠰᠢᠩᠰᠢᠯᠡᠨ ᠲᠡᠮᠲᠡᠷᠢᠵᠦ᠂ ᠬᠣᠶᠠᠳᠠᠬᠢ ᠢᠩᠭᠡᠨ ᠦ ᠬᠡᠪᠲᠡᠰᠢ ᠶ᠋ᠢ ᠤᠳᠠᠵᠤ ᠲᠦᠳᠡᠯ ᠦᠭᠡᠢ ᠣᠯᠵᠠᠢ᠃ ᠲᠡᠭᠦᠨ ᠦ᠌ ᠢᠯᠡᠭᠦᠳᠡᠯ ᠰᠦ ᠪᠠᠰᠠ ᠯᠠ ᠡᠯᠡᠰᠦᠨ ᠳᠡᠭᠡᠷᠡ ᠭᠣᠭᠣᠵᠢᠵᠤ᠂ ᠵᠠᠬᠠ ᠠ᠋ᠴᠠ ᠪᠠᠨ ᠬᠠᠲᠠᠭᠠᠳ ᠭᠣᠣᠯ ᠬᠡᠰᠡᠭ ᠲᠦ᠋ᠨᠢ ᠪᠦᠷᠢᠨ ᠬᠠᠲᠠᠵᠤ ᠠᠮᠵᠢᠭᠠ ᠦᠭᠡᠢ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠯᠡᠳᠡᠵᠡᠢ᠃ ᠰᠣᠬᠣᠷ ᠡᠷᠡ ᠲᠡᠭᠦᠨ ᠢ᠋ ᠡᠯᠡᠰᠦ ᠲᠡᠢ ᠨᠢ ᠬᠠᠮᠤᠨ ᠠᠪᠴᠤ ᠬᠣᠷᠮᠣᠢᠯᠠᠪᠠ᠃ ᠲᠡᠢᠨ ᠬᠦ᠌ ᠮᠥᠯᠬᠥᠭᠰᠡᠭᠡᠷ ᠭᠤᠷᠪᠠᠨ ᠢᠩᠭᠡᠨ ᠦ᠌ ᠬᠡᠪᠲᠡᠰᠢ ᠶ᠋ᠢ ᠣᠯᠵᠤ᠂ ᠦᠯᠡᠳᠡᠭᠡᠭᠰᠡᠨ ᠰᠦ ᠶ᠋ᠢᠨ ᠬᠠᠲᠠᠮᠠᠯ ᠢ᠋ ᠬᠠᠮᠤᠨ ᠠᠪᠴᠤ ᠳᠠᠭᠤᠰᠪᠠ᠃ ᠲᠡᠭᠡᠭᠡᠳ ᠰᠣᠨᠳᠤᠤᠯᠠ ᠰᠠᠨᠳᠠᠢᠯᠠᠨ ᠲᠦᠷ ᠠᠮᠤᠰᠬᠢᠨ ᠰᠠᠭᠤᠯᠠ᠃
– ᠠᠢ ᠳᠠ᠂ ᠬᠣᠷᠸᠠ ᠭᠡᠳᠡᠭ ᠪᠦᠭᠡᠷᠡᠨᠭᠬᠡᠢ ᠶᠦᠮ ᠳᠡ᠃ ᠨᠠᠮᠠᠶ᠋ᠢ ᠬᠥᠮᠦᠰ ᠴᠦᠯᠡᠵᠦ ᠬᠠᠲᠠᠭᠠᠨ ᠥᠯᠦᠰᠬᠡᠵᠦ ᠠᠯᠠᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠪᠠᠢᠳᠠᠭ᠃ ᠭᠡᠲᠡᠯᠡ ᠬᠥᠮᠦᠨ ᠦ᠌ ᠬᠡᠯᠡ ᠦᠯᠦ ᠮᠡᠳᠡᠬᠦ ᠵᠡᠷᠯᠢᠭ ᠲᠡᠮᠡᠭᠡ ᠪᠣᠲᠣᠭᠣᠨ ᠤ᠋ ᠪᠠᠨ ᠪᠣᠷᠣ ᠭᠡᠳᠡᠰᠦᠨ ᠳ᠋ᠦ᠍ ᠪᠠᠭᠲᠠᠭᠠ ᠦᠭᠡᠢ ᠰᠦ ᠪᠡᠷ ᠢ᠋ᠶ᠋ᠡᠨ ᠠᠮᠢ ᠭᠣᠣᠯ ᠢ᠋ ᠮᠢᠨᠢ ᠵᠣᠭᠣᠵᠤ᠂ ᠨᠠᠰᠤ ᠬᠠᠢᠷᠯᠠᠵᠦ ᠪᠠᠢᠳᠠᠭ᠃ ᠰᠠᠶᠢᠬᠠᠨ ᠯᠠ ᠪᠢ ᠴᠢᠨᠢ ᠲᠡᠮᠡᠭᠡ ᠶ᠋ᠢ ᠰᠡᠲᠡᠷᠬᠡᠢ ᠤᠷᠤᠭᠤᠯ ᠲᠠᠢ ᠬᠦᠢᠲᠡᠨ ᠬᠣᠰᠢᠭᠤ ᠲᠠᠢ ᠠᠮᠢᠲᠠᠨ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠵᠢ ᠳᠠ᠃ ᠰᠠᠶᠢᠬᠠᠨ ᠯᠠ ᠪᠢ ᠴᠢᠨᠢ《 ᠱᠠᠰᠢᠨ ᠤ᠋ ᠪᠤᠯᠤᠳ ᠬᠥᠮᠦᠨ ᠳ᠋ᠦ᠍ ᠬᠣᠣᠷ ᠢ᠋ ᠬᠦᠷᠭᠡᠭᠴᠢ ᠬᠥᠯᠴᠢᠨ ᠴᠢᠳᠬᠥᠷ ᠪᠦᠭᠦᠳᠡ ᠶᠢᠰᠦ᠂ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠳ᠋ᠤ᠌ ᠳᠣᠷᠣᠢᠲᠠᠭᠤᠯᠤᠭᠴᠢ ᠬᠥᠯᠴᠢᠨ ᠬᠠᠯᠵᠠᠨ ᠲᠡᠮᠡᠭᠡ ᠤᠨᠤᠨᠠ》 ᠭᠡᠵᠦ ᠢᠷᠡᠭᠡᠳ ᠯᠡ ᠨᠣᠮ ᠪᠠᠭᠤᠯᠭᠠᠳᠠᠭ ᠪᠠᠢᠭᠰᠠᠨ ᠪᠢᠯᠡ ᠤᠤ᠃ ᠬᠠ ᠬᠠ ᠬᠠ! ᠮᠥᠨ ᠴᠦ᠍ ᠪᠤᠷᠠᠵᠤ ᠪᠠᠢᠵᠢ ᠳᠠ᠃ ᠣᠳᠣ ᠴᠢ ᠰᠣᠬᠣᠷ ᠳᠢᠶᠠᠨᠴᠢ ᡀᠠᠷᠠᠮᠪᠠ ᠰᠠᠩᠵᠢᠳᠤᠯᠪᠢᠴᠤᠢᠵᠠᠮᠰᠤᠳ᠋ᠠᠨ ᠪᠣᠯᠤᠭᠠᠳ ᠶᠢᠰᠦᠨ ᠤᠯᠪᠤᠭᠲᠤ ᠰᠠᠭᠤᠳᠠᠯ ᠳᠡᠭᠡᠷᠡ ᠡᠴᠡ ᠪᠡᠨ 《 ᠳᠣᠷᠣᠢᠲᠠᠭᠤᠯᠤᠭᠴᠢ ᠬᠥᠯᠴᠢᠨ ᠬᠠᠯᠵᠠᠨ ᠲᠡᠮᠡᠭᠡ ᠤᠨᠤᠭᠠ ᠲᠠᠢ》 ᠭᠡᠳ ᠨᠣᠮᠯᠠᠭᠠᠳ ᠦᠵᠡᠯ ᠳᠡ᠃ ᠰᠣᠬᠣᠷ ᠳᠢᠶᠠᠨᠴᠢ ᠪᠢ ᠡᠮᠦᠨᠡ ᠡᠴᠡ ᠴᠢᠨᠢ 《 ᠪᠢᠲᠡᠭᠡᠢ ᠪᠤᠷᠠ᠃ ᠬᠠᠯᠵᠠᠨ ᠲᠡᠮᠡᠭᠡ ᠪᠣᠯ ᠳᠣᠷᠣᠢᠲᠠᠭᠤᠯᠤᠭᠴᠢ ᠬᠥᠯᠴᠢᠨ ᠦ᠌ ᠤᠨᠤᠭᠠ ᠪᠢᠰᠢ ᠬᠠᠷᠢᠨ ᠲᠡᠭᠬᠡᠷᠡᠭᠦᠯᠦᠭᠴᠢ ᠪᠤᠶᠠᠨᠲᠠᠨ!》 ᠭᠡᠵᠦ ᠬᠡᠯᠡᠬᠦ ᠪᠠᠢᠨᠠ᠃ ᠬᠠ᠂ ᠬᠠ᠂ ᠬᠠ! ᠭᠡᠵᠦ ᠰᠣᠬᠣᠷ ᠡᠷᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠷᠢᠪᠠ᠃ ᠲᠡᠷᠡ ᠮᠥᠴᠡ ᠳ᠋ᠦ᠍ ᠳᠡᠷᠭᠡᠳᠡ ᠨᠢ ᠭᠣᠯᠢᠶᠠ ᠨᠥᠮᠥᠷᠭᠡ ᠳᠤᠭ᠍ᠭᠤᠳᠬᠤ ᠳ᠋ᠤ᠌ ᠰᠣᠬᠣᠷ ᠡᠷᠡ ᠠᠭᠳᠤᠰᠬᠢᠨ ᠴᠣᠴᠢᠭᠰᠠᠨ ᠢ᠋ᠶ᠋ᠠᠨ᠄
– ᠭᠣᠯᠢᠶᠠ ᠴᠢᠨᠦ ᠳᠤᠤᠭᠠᠷᠳᠠᠭ ᠰᠠᠢᠨ ᠪᠣᠯᠤᠨᠠ ᠃ ᠮᠥᠳᠳᠥᠬᠡᠨ ᠴᠠᠭ ᠤ᠋ᠨ ᠲᠣᠯᠣᠭᠠᠢ ᠴᠠᠰᠢ ᠡᠷᠭᠢᠵᠦ ᠬᠠᠪᠲᠠᠭᠠᠢ ᠶ᠋ᠢᠨ ᠰᠦ ᠰᠢᠷᠭᠢᠵᠦ ᠪᠣᠲᠣᠭᠣ ᠨᠢ ᠪᠣᠷᠪᠢ ᠪᠠᠨ ᠲᠡᠨᠡᠢᠯᠭᠡᠨᠡ᠃ ᠲᠡᠷᠡ ᠴᠠᠭ ᠲᠤ᠌ ᠶᠠᠭᠤ ᠪᠠᠷ ᠠᠮᠢ ᠵᠣᠭᠣᠬᠤ ᠪᠠᠨ ᠳᠢᠶᠠᠨᠴᠢ ᠮᠢᠨᠢ ᠪᠣᠳᠣᠬᠤ ᠦᠭᠡᠢ ᠦᠦ? ᠭᠡᠵᠦ ᠥᠪᠡᠷ ᠲᠡᠭᠡᠨ ᠬᠡᠯᠡᠭᠡᠳ ᠥᠨᠳᠡᠢᠨ ᠪᠤᠰᠠᠬᠤ ᠭᠡᠳ ᠴᠢᠳᠠᠯ ᠦᠭᠡᠢ ᠰᠠᠭᠯᠠᠭᠠᠷ ᠪᠤᠲᠠᠨ ᠳᠡᠭᠡᠷᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠷᠤᠵᠤ ᠬᠠᠵᠠᠭᠤᠯᠠᠲᠠᠯᠠ ᠃
– ᠠ ᠲᠡᠢᠮᠦ᠂ ᠡᠨᠡ ᠭᠠᠷ ᠲᠤ᠌ ᠮᠢᠨᠢ ᠬᠠᠷᠮᠠᠭ ᠤ᠋ᠨ ᠪᠤᠲᠠ ᠳᠠᠭᠠᠷᠢᠯᠳᠤᠪᠠ ᠪᠣᠯᠤᠯᠲᠠᠢ᠃ ᠤᠳᠠᠬᠤ ᠦᠭᠡᠢ ᠬᠠᠷᠮᠠᠭ ᠵᠢᠮᠢᠰᠯᠡᠨᠡ᠃ ᠭᠣᠶᠣᠣ ᠤᠷᠭᠤᠨᠠ᠃ ᠠᠱᠢᠭᠦᠢ ᠡᠬᠡ ᠪᠣᠯᠤᠭᠰᠠᠨ ᠳᠡᠯᠡᠬᠡᠢ ᠮᠢᠨᠢ ᠨᠠᠮᠤᠷᠵᠢᠨ ᠨᠠᠮᠠᠶ᠋ᠢ ᠪᠠᠨ ᠲᠡᠵᠢᠭᠡᠨᠡ᠃ ᠰᠢᠷᠡᠭᠡᠲᠦ ᠯᠠᠮᠠ ᠳ᠋ᠤ᠌ ᠡᠷᠭᠦᠳᠡᠭ ᠦᠭᠡᠢ ᠡᠷᠭᠦᠯ ᠢ ᠡᠯᠡᠰᠦᠨ ᠭᠣᠪᠢ ᠨᠠᠳᠠ ᠳ᠋ᠤ᠌ ᠬᠠᠢᠷᠠᠯᠠᠨᠠ ᠡ᠂ ᠭᠠᠢᠭᠤᠢ! ᠭᠡᠵᠦ ᠰᠣᠬᠣᠷ ᠡᠷᠡ ᠪᠠᠶᠠᠷᠯᠠᠨ ᠬᠠᠰᠬᠢᠷᠤᠯᠠ᠃
ᠲᠡᠷᠡᠬᠡᠨ ᠮᠥᠴᠡ ᠳ᠋ᠦ᠍ ᠰᠣᠬᠣᠷ ᠡᠷᠡ ᠶ᠋ᠢᠨ ᠰᠣᠨᠣᠷ ᠴᠢᠬᠢᠨ ᠳ᠋ᠦ᠍ ᠶᠠᠮᠠᠷ ᠨᠢᠭᠡᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠴᠢᠮᠡᠭᠡ ᠳᠡᠯᠡᠳᠦᠨ ᠰᠣᠨᠣᠰᠳᠠᠬᠤ ᠰᠢᠭ᠋ ᠪᠣᠯᠵᠠᠢ᠃ ᠰᠣᠬᠣᠷ ᠡᠷᠡ ᠴᠢᠮᠡᠭᠡ ᠭᠠᠷᠤᠭᠰᠠᠨ ᠵᠦᠭ ᠴᠢᠬᠢ ᠪᠡᠨ ᠬᠠᠨᠳᠤᠭᠤᠯᠤᠨ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠷ ᠬᠠᠭᠠᠯᠲᠠ ᠪᠣᠯᠭᠠᠨ ᠴᠢᠭᠨᠡᠪᠡᠯ ᠦᠨᠡᠬᠡᠷ ᠠᠭᠤᠵᠢᠮ ᠶᠡᠬᠡ ᠴᠦᠯ ᠳ᠋ᠦ᠍ ᠴᠢᠮᠡᠭᠡ ᠭᠠᠷᠤᠭᠰᠠᠨ ᠢ᠋ ᠲᠡᠷᠡ ᠣᠯᠵᠤ ᠰᠣᠨᠣᠰᠤᠯᠠ᠃
– ᠬᠡᠳᠦᠨ ᠬᠤᠯᠠᠨ ᠤᠰᠤᠨ ᠳ᠋ᠤ᠌ ᠢᠷᠡᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠨᠠᠮᠠᠶ᠋ᠢ ᠦᠵᠡᠭᠡᠳ ᠪᠤᠴᠠᠭᠠᠳ ᠳᠠᠯᠠᠢᠵᠤ ᠥᠭᠬᠦ ᠶ᠋ᠢ ᠨᠢ ᠬᠠᠷᠠᠭᠠᠴᠢ! ᠨᠠᠳᠠ ᠠ᠋ᠴᠠ ᠶᠠᠭᠤᠨ ᠳ᠋ᠠᠭᠠᠨ ᠠᠶᠤᠭᠠ ᠪᠣᠢ ᠳᠠ᠃ ᠵᠠ ᠵᠠ᠂ ᠪᠢ ᠴᠦ᠍ ᠪᠤᠯᠠᠭ ᠳᠡᠭᠡᠷᠡ ᠡᠴᠡ ᠲᠦᠷᠭᠡᠨ ᠵᠠᠢᠯᠠᠵᠤ ᠬᠠᠳᠠᠨ ᠭᠡᠷ ᠲᠡᠭᠡᠨ ᠣᠴᠢᠶᠠ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠤᠰᠤ ᠡᠭᠡᠷᠡᠭᠰᠡᠨ ᠠᠮᠢᠲᠠᠳ ᠲᠤ᠌ ᠰᠠᠭᠠᠳ ᠲᠤᠤᠬᠠᠷ ᠪᠣᠯᠵᠤ ᠵᠣᠪᠠᠯᠠᠩ ᠲᠠᠷᠢᠭᠠᠳ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠰᠣᠬᠣᠷ ᠡᠷᠡ ᠶᠠᠷᠢᠭᠠᠳ ᠪᠣᠰᠴᠤ ᠪᠤᠯᠠᠭ ᠳᠡᠭᠡᠷᠡ ᠣᠴᠢᠭᠠᠳ ᠡᠪᠦᠷ ᠡᠴᠡ ᠪᠡᠨ ᠮᠦᠨᠭᠭᠦᠨ ᠠᠶᠠᠭᠠ ᠭᠠᠷᠭᠠᠵᠤ ᠤᠰᠤᠨ ᠠ᠋ᠴᠠ ᠬᠤᠳᠬᠤᠨ ᠠᠪᠴᠤ ᠵᠠᠯᠭᠢᠯᠠᠪᠠ᠃
– ᠤᠷᠢᠳᠤ ᠶ᠋ᠢᠨ ᠡᠨᠡ ᠮᠠᠭᠤ ᠠᠶᠠᠭᠠ ᠮᠢᠨᠢ ᠯᠡ ᠦᠯᠡᠳᠡᠪᠡ ᠰᠢᠪ ᠳᠡ ᠭᠡᠵᠦ ᠤᠰᠤ ᠤᠤᠭᠤᠵᠤ ᠳᠠᠭᠤᠰᠤᠭᠠᠳ ᠠᠶᠠᠭᠠ ᠪᠠᠨ ᠡᠪᠦᠷᠲᠦᠯᠡᠬᠦ ᠳ᠋ᠡᠭᠡᠨ ᠰᠣᠬᠣᠷ ᠡᠷᠡ ᠬᠡᠯᠡᠪᠡ᠃
ᠨᠡᠭᠡᠷᠡᠨ ᠴᠦ᠍ ᠬᠡ ᠤᠭᠠᠯᠵᠠ ᠭᠠᠷᠭᠠᠨ ᠴᠤᠭᠤᠯᠪᠤᠷᠢᠲᠠᠵᠤ ᠢᠷᠤᠭᠠᠷ ᠲᠤᠨᠢ ᠠᠯᠲᠠᠨ ᠬᠣᠷᠯᠣ ᠪᠠᠢᠷᠢᠯᠠᠭᠤᠯᠵᠤ ᠬᠢᠭᠰᠡᠨ ᠶᠡᠬᠡ ᠭᠠᠷ ᠤ᠋ᠨ ᠮᠦᠨᠭᠭᠦᠨ ᠪᠠᠳᠢᠷ ᠠᠶᠠᠭᠠ ᠨᠢ ᠭᠣᠪᠢ ᠶ᠋ᠢᠨ ᠬᠤᠷᠴᠠ ᠨᠠᠷᠠᠨ ᠳ᠋ᠤ᠌ ᠭᠢᠯᠠᠰᠬᠢᠨ ᠭᠡᠷᠡᠯᠳᠦᠵᠦ ᠰᠣᠬᠣᠷ ᠡᠷᠡ ᠶ᠋ᠢᠨ ᠬᠤᠯᠴᠤᠷᠤᠤᠲᠤ ᠴᠢᠷᠠᠢ ᠶ᠋ᠢ ᠲᠤᠶᠠᠭᠠᠷᠠᠭᠤᠯᠬᠠᠤ ᠶ᠋ᠢ ᠦᠵᠡᠪᠡᠰᠦ ᠠᠶᠠᠭᠠᠨ ᠤ᠋ ᠡᠵᠡᠨ ᠴᠠᠭ ᠲᠠᠭᠠᠨ ᠴᠠᠯᠭᠢᠵᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠰᠢᠦ ᠭᠡᠬᠦ ᠠᠵᠢ᠃
ᠰᠠᠶᠢᠬᠠᠨ ᠯᠠ ᠡᠨᠡ ᠬᠥᠮᠦᠨ ᠦ᠌ ᠡᠮᠦᠨᠡ ᠵᠢᠷᠠᠨ ᠮᠢᠩᠭᠠᠨ ᠱᠠᠪᠢ ᠨᠢ ᠰᠤᠨᠵᠤ ᠮᠥᠷᠭᠥᠨ ᠵᠠᠯᠪᠢᠷᠠᠵᠦ ᠵᠠᠭᠠᠷ᠂ ᠲᠥᠪᠡᠳ ᠦ᠋ᠨ ᠣᠷᠣᠨ ᠳ᠋ᠤ᠌ ᠬᠦᠷᠲᠡᠯᠡ ᠨᠡᠷᠡ ᠠᠯᠳᠠᠷ ᠨᠢ ᠴᠤᠤᠷᠢᠶᠠᠲᠤᠵᠤ ᠂ ᠵᠠᠭᠤᠨ ᠠᠮᠲᠠᠲᠠᠨ ᠢ᠋ ᠨᠠᠢᠷᠠᠭᠤᠯᠤᠭᠰᠠᠨ ᠨᠤᠬᠤᠮᠠᠯ ᠢ᠋ᠶ᠋ᠠᠷ ᠵᠣᠭᠣᠭ ᠪᠠᠷᠢᠵᠤ ᠪᠠᠢᠭᠰᠠᠨ ᠠᠵᠢ᠃ ᠭᠡᠪᠡᠴᠦ ᠥᠨᠥᠳᠥᠷ ᠠᠷᠭᠠ ᠦᠭᠡᠢ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠳᠢᠶᠠᠨᠴᠢ ᠪᠣᠯᠤᠭᠠᠳ ᠡᠵᠡᠭᠦᠢ ᠵᠡᠯᠢᠭᠦᠳ ᠴᠦᠯ ᠦ᠋ᠨ ᠬᠢᠵᠠᠭᠠᠷ ᠦᠭᠡᠢ ᠬᠠᠶᠠᠭᠠᠨ ᠳ᠋ᠤ᠌ ᠴᠣᠷᠢ ᠶ᠋ᠢᠨ ᠭᠠᠭᠴᠠᠭᠠᠷ ᠬᠥᠬᠡ ᠴᠢᠯᠠᠭᠤ ᠪᠠᠷ ᠳᠡᠷᠡ ᠬᠢᠵᠦ᠂ ᠬᠦᠢᠲᠡᠨ ᠭᠠᠵᠠᠷ ᠢ᠋ᠶ᠋ᠠᠷ ᠳᠡᠪᠢᠰᠬᠡᠷ ᠬᠢᠵᠦ ᠶᠠᠪᠤᠭᠠ ᠶ᠋ᠢᠨ ᠤᠴᠢᠷ ᠶᠠᠭᠤᠬᠠᠨ ᠪᠢᠯᠡ!
– ᠳᠥᠴᠢᠨ ᠵᠢᠯ ᠦ᠋ᠨ ᠡᠮᠦᠨᠡ ᠵᠥᠪ ᠡᠬᠢᠯᠡᠬᠦ ᠶᠣᠰᠣᠲᠠᠢ ᠪᠠᠢᠭᠰᠠᠨ ᠵᠠᠮ ᠢ᠋ ᠭᠠᠵᠢᠭᠤ ᠡᠬᠢᠯᠡᠭᠡᠳ ᠤᠯᠠᠮ ᠢ᠋ᠶ᠋ᠠᠷ ᠨᠠᠰᠤᠨ ᠤ᠋ ᠪᠥᠭᠰᠡᠨ ᠳ᠋ᠦ᠍ ᠂ ᠴᠢᠰᠤᠨ ᠤ᠋ ᠴᠡᠷᠴᠡᠭᠭᠬᠢ ᠳ᠋ᠦ᠍ ᠡᠨᠡ ᠬᠠᠷᠭᠤᠢ ᠳ᠋ᠤ᠌ ᠭᠠᠷᠴᠤ ᠳᠠ᠂ ᠬᠥᠭᠰᠢᠨ ᠲᠣᠯᠣᠭᠠᠢ! ᠭᠡᠵᠦ ᠶᠠᠷᠢᠭᠠᠳ ᠰᠣᠬᠣᠷ ᠡᠷᠡ ᠵᠠᠭ ᠤ᠋ᠨ ᠦᠨᠳᠦᠰᠦᠨ ᠲᠠᠶᠠᠭ ᠢ᠋ᠶ᠋ᠠᠨ ᠲᠤᠯᠵᠤ ᠪᠤᠯᠠᠭ ᠤ᠋ᠨ ᠬᠥᠪᠡᠭᠡ ᠳᠠᠭᠠᠨ᠂ ᠨᠦᠬᠡᠨ ᠤᠷᠦᠴᠡᠨ ᠳ᠋ᠡᠭᠠᠨ ᠣᠴᠢᠬᠤ ᠪᠠᠷ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠤᠷᠤᠯᠠ᠃
ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠤᠢᠳᠬᠤ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠲᠡᠷᠡ ᠥᠪᠡᠷ ᠲᠡᠢ ᠪᠡᠨ ᠶᠠᠷᠢᠳᠠᠭ ᠪᠣᠯᠵᠠᠢ᠃ ᠰᠣᠬᠣᠷ ᠲᠠᠭᠠᠨ ᠭᠤᠨᠢᠬᠤ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠲᠡᠷᠡ ᠴᠢᠬᠢ ᠬᠠᠮᠠᠷ ᠢ᠋ᠶ᠋ᠠᠨ ᠨᠢᠳᠦ ᠪᠣᠯᠭᠠᠵᠠᠢ᠃ ᠥᠰᠬᠦ ᠡᠴᠡ ᠰᠤᠷᠤᠭᠰᠠᠨ ᠬᠡᠯᠡ ᠪᠡᠨ ᠮᠠᠷᠲᠠᠬᠤ ᠦᠭᠡᠢ ᠶ᠋ᠢ ᠡᠷᠬᠢᠮᠯᠡᠵᠦ ᠲᠠᠶᠠᠭ ᠲᠠᠢ ᠪᠠᠨ᠂ ᠡᠰᠡᠪᠡᠯ ᠪᠤᠳᠤᠷᠭᠠᠨᠠ ᠲᠠᠢ ᠵᠠᠪ ᠵᠠᠢ ᠦᠭᠡᠢ ᠶᠠᠷᠢᠳᠠᠭ ᠪᠣᠯᠵᠠᠢ ᠃ ᠰᠠᠨᠰᠺᠷᠢᠲ᠂ ᠲᠥᠪᠡᠳ ᠂ ᠪᠠᠮᠭᠠᠯ᠂ ᠰᠢᠩᠭᠠᠯ ᠬᠡᠯᠡ ᠪᠡᠷ ᠲᠡᠷᠡ ᠢᠷᠠᠭᠤ ᠨᠠᠢᠷᠠᠭ ᠪᠢᠴᠢᠵᠦ᠂ ᠤᠷᠠᠨ ᠢᠷᠠᠭᠤ ᠶᠠᠷᠢᠳᠠᠭ ᠪᠣᠯᠪᠠᠴᠤ ᠴᠦᠯᠡᠯᠭᠡ ᠶ᠋ᠢᠨ ᠡᠳᠦᠷ ᠦ᠋ᠳ ᠲᠦ᠍ ᠭᠠᠭᠴᠠ ᠬᠦ᠌ ᠮᠣᠩᠭᠣᠯ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠲᠡᠢ ᠪᠡᠨ ᠶᠠᠷᠢᠵᠤ ᠪᠠᠢᠯᠠ᠃ ᠨᠢᠳᠦ ᠪᠡᠷ ᠦᠵᠡᠬᠦ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠴᠢᠬᠢ ᠪᠡᠷ ᠰᠣᠨᠣᠰᠬᠤ ᠶ᠋ᠢ ᠴᠢᠷᠮᠠᠢᠭᠰᠠᠭᠠᠷ ᠪᠠᠢᠲᠠᠯᠠ ᠲᠡᠭᠦᠨ ᠦ᠌ ᠰᠣᠨᠣᠰᠬᠠᠯ ᠨᠢ ᠬᠡᠳᠦ ᠳᠠᠬᠢᠨ ᠨᠠᠷᠢᠰᠴᠤ ᠶᠡᠷᠦ ᠶ᠋ᠢᠨ ᠬᠥᠮᠦᠨ ᠦ᠌ ᠬᠢ ᠲᠡᠢ ᠵᠦᠢᠷᠯᠡᠰᠢ ᠦᠭᠡᠢ ᠰᠤᠨᠤᠷ ᠪᠣᠯᠵᠠᠢ᠃ ᠴᠢᠬᠢ ᠪᠡᠷ ᠰᠣᠨᠣᠰᠬᠤ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠬᠠᠮᠠᠷ ᠢ᠋ᠶ᠋ᠠᠷ ᠮᠡᠳᠡᠷᠡᠬᠦ ᠶ᠋ᠢ ᠬᠢᠴᠢᠶᠡᠭᠰᠡᠭᠡᠷ ᠪᠠᠢᠲᠠᠯᠠ ᠲᠡᠭᠦᠨ ᠦ᠌ ᠦᠨᠦᠷᠯᠡᠬᠦ ᠴᠢᠳᠠᠪᠤᠷᠢ ᠠᠢᠬᠤᠪᠲᠤᠷ ᠰᠠᠢᠵᠢᠷᠠᠵᠤ ᠬᠥᠮᠦᠨ ᠪᠤᠰᠤ ᠶ᠋ᠢᠨ ᠶᠡᠬᠡ ᠦᠨᠦᠷᠴᠢ ᠪᠣᠯᠵᠠᠢ᠃ ᠬᠥᠮᠦᠨ ᠳ᠋ᠦ᠍ ᠵᠠᠶᠠᠭᠠᠭᠳᠠᠭᠰᠠᠨ ᠲᠠᠪᠤᠨ ᠠᠨᠱᠠᠢ ᠰᠡᠷᠡᠬᠦᠢ ᠶ᠋ᠢᠨ ᠡᠷᠬᠡᠲᠡᠨ ᠡᠴᠡ ᠬᠠᠮᠤᠭ ᠤ᠋ᠨ ᠡᠷᠬᠢᠮ ᠪᠤᠯᠬᠤ ᠮᠡᠯᠮᠡᠢ ᠡᠴᠡ ᠪᠡᠨ ᠰᠠᠯᠤᠭᠰᠠᠨ ᠴᠤ᠌ ᠭᠡᠰᠡᠨ ᠲᠡᠭᠦᠨ ᠢ᠋ ᠣᠷᠣᠯᠠᠬᠤ ᠶᠠᠭᠤᠮᠠ ᠲᠠᠢ ᠦᠯᠡᠳᠡᠭᠰᠡᠨ ᠳ᠋ᠡᠭᠡᠨ ᠰᠣᠬᠣᠷ ᠡᠷᠡ ᠪᠠᠶᠠᠷ ᠲᠠᠢ ᠪᠠᠢᠯᠠ᠃ ᠴᠢᠨᠠᠳᠤ ᠶ᠋ᠢᠨ ᠪᠤᠶᠤ ᠪᠢᠯᠢᠭ ᠴᠢᠨᠠᠷ ᠤ᠋ᠨ ᠤᠬᠠᠭᠠᠨ ᠤ᠋ ᡀᠠᠷᠠᠮᠪᠠ ᠪᠣᠯᠲᠠᠯᠠ ᠪᠠᠨ ᠡᠨᠡ ᠬᠥᠮᠦᠨ ᠦ᠌ ᠲᠤᠭᠤᠯᠵᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠵᠠᠮ ᠤᠷᠲᠤ ᠪᠥᠭᠡᠳ ᠰᠤᠷᠭᠠᠮᠵᠢ ᠲᠠᠢ ᠶᠤᠮ ᠰᠠᠨᠵᠠᠢ᠃
– ᠦᠨᠡᠮᠯᠡᠬᠦᠢ ᠶ᠋ᠢᠨ ᠮᠥᠷ ᠢ᠋ᠶ᠋ᠡᠷ ᠶᠠᠪᠤᠭᠴᠢ ᠪᠣᠯᠬᠤ ᠤᠤ? ᠭᠡᠵᠦ ᠲᠡᠷᠲᠡᠭᠡ ᠳᠥᠴᠢᠨ ᠵᠢᠯ ᠦ᠋ᠨ ᠡᠮᠦᠨᠡ ᠪᠠᠭᠰᠢ ᠶ᠋ᠢ ᠠᠰᠠᠭᠤᠬᠤ ᠳ᠋ᠤᠨᠢ ᠰᠠᠭᠠᠷᠳᠠᠭᠠᠮ ᠤ᠋ᠨ ᠵᠠᠮ ᠬᠥᠭᠡᠭᠡᠨᠡ ᠭᠡᠴᠢᠬᠡᠭᠰᠡᠨ ᠮᠢᠨᠢ ᠰᠡᠳᠬᠢᠯ ᠦ᠋ᠨ ᠭᠡᠮ ᠪᠣᠯᠤᠭᠠ ᠦᠭᠡᠢ ᠯᠡ ᠪᠠᠢᠬᠠ᠃ ᠭᠡᠪᠡᠴᠦ ᠪᠢ ᠡᠴᠦᠰ ᠲᠡᠭᠡᠨ ᠦᠨᠡᠮᠯᠡᠬᠦᠢ ᠶ᠋ᠢᠨ ᠮᠥᠷ ᠢ᠋ᠶ᠋ᠡᠷ ᠣᠷᠣᠵᠤ ᠳᠢᠶᠠᠨᠴᠢ ᠶ᠋ᠢᠨ ᠵᠡᠷᠭᠡ ᠳ᠋ᠦ᠍ ᠬᠦᠷᠦᠯᠡ᠃ ᠤᠤᠯ ᠨᠢ ᠪᠢ ᠬᠥᠮᠥᠨ ᠡᠴᠡ ᠳᠠᠢᠵᠢᠬᠤ ᠦᠭᠡᠢ ᠶᠦᠮ ᠰᠠᠨ ᠭᠡᠵᠦ ᠬᠦᠰᠡᠭᠰᠡᠨ ᠶᠦᠮ ᠰᠠᠨ᠃ ᠨᠠᠰᠤᠨ ᠤ᠋ ᠡᠴᠦᠰ ᠲᠦ᠍ ᠬᠥᠮᠦᠨ ᠡᠴᠡ ᠳᠠᠢᠵᠢᠬᠤ ᠪᠠᠢᠭᠰᠠᠨ ᠪᠣᠯ ᠠᠩᠬᠠᠨ ᠠ᠋ᠴᠠ ᠪᠠᠨ ᠯᠠ ᠳᠢᠶᠠᠨᠴᠢ ᠶ᠋ᠢᠨ ᠮᠥᠷ ᠬᠥᠭᠡᠭᠡᠬᠦ ᠪᠠᠢᠵᠠᠢ᠃ ᠣᠳᠣ ᠬᠥᠭᠰᠢᠨ ᠲᠣᠯᠣᠭᠠᠢ ᠪᠢ ᠳᠢᠶᠠᠨᠴᠢ ᠶ᠋ᠢᠨ ᠨᠠᠢ᠍ᠮᠠᠨ ᠰᠠᠬᠢᠯ ᠢ᠋ ᠰᠠᠬᠢᠵᠤ ᠶᠠᠪᠤᠭᠠ ᠠ᠋ᠴᠠ ᠢᠯᠭᠠᠭᠠ ᠶᠠᠭᠤ ᠪᠠᠢᠨᠠ? ᠭᠡᠵᠦ ᠰᠣᠬᠣᠷ ᠡᠷᠡ ᠠᠮᠠᠨ ᠳ᠋ᠠᠭᠠᠨ ᠪᠥᠪᠲᠥᠨᠡᠵᠦ ᠪᠤᠰᠤᠳ ᠬᠡᠨ ᠳ᠋ᠦ᠍ ᠴᠦ᠍ ᠳᠣᠭᠣᠯᠳᠠᠭᠤᠯᠬᠤ ᠦᠭᠡᠢ ᠭᠡᠰᠡᠨ ᠶᠦᠮ ᠰᠢᠭ ᠪᠦᠳᠡᠭᠢᠬᠡᠨ ᠶᠠᠷᠢᠵᠤ ᠶᠠᠪᠤᠯᠠ᠃ ᠢᠩᠭᠢᠨᠡ ᠤᠰᠤᠨ ᠠ᠋ᠴᠠ ᠭᠠᠭᠴᠠᠬᠠᠨ ᠰᠠᠭᠠᠬᠠᠯᠲᠠ ᠶ᠋ᠢᠨ ᠵᠠᠢᠲᠠᠢ ᠭᠠᠵᠠᠷ ᠲᠡᠭᠦᠨ ᠦ᠌ ᠣᠷᠣᠴᠠ ᠪᠠᠢᠳᠠᠭ ᠠᠵᠢ᠃ ᠦᠨᠡᠮᠯᠡᠬᠦᠢ ᠶ᠋ᠢᠨ ᠮᠥᠷ ᠢ᠋ᠶ᠋ᠡᠷ ᠶᠠᠪᠤᠭᠴᠢ ᠪᠤᠶᠤ ᠳᠢᠶᠠᠨᠴᠢ ᠪᠣᠯᠬᠤ ᠬᠥᠮᠦᠨ ᠶᠠᠭᠤᠨ ᠤ᠋ ᠤᠷᠢᠳᠤ ᠬᠠᠳᠠ ᠴᠢᠯᠠᠭᠤ ᠪᠠᠷ ᠭᠡᠷ ᠬᠢᠬᠦ ᠶᠣᠰᠣᠲᠠᠢ ᠪᠠᠢᠯᠠ᠃ ᠡᠭᠦᠨ ᠳ᠋ᠦ᠍ ᠰᠣᠬᠣᠷ ᠡᠷᠡ ᠶ᠋ᠢᠨ ᠪᠠᠢᠳᠠᠯ ᠣᠳᠣ ᠲᠣᠬᠢᠷᠠᠵᠤ ᠪᠠᠢᠨᠠ᠃ ᠲᠡᠷᠡ ᠪᠡᠷ ᠠᠰᠤᠷᠤ ᠲᠣᠮᠣ ᠬᠠᠷᠮᠠᠭ ᠤ᠋ᠨ ᠪᠤᠲᠠ ᠰᠢᠪᠠᠭᠠᠷᠠᠯᠳᠤᠨ ᠤᠷᠭᠤᠭᠰᠠᠨ ᠲᠣᠪᠴᠣᠭ ᠳᠣᠣᠭᠤᠷ ᠨᠦᠬᠡᠯᠡᠵᠦ ᠭᠠᠷᠭᠠᠭᠰᠠᠨ ᠤᠷᠤᠴᠠᠨ ᠳ᠋ᠤ᠌ ᠠᠮᠢᠳᠤᠷᠠᠵᠤ ᠪᠠᠢᠨᠠ᠃ ᠳᠢᠶᠠᠨᠴᠢ ᠬᠥᠮᠦᠨ ᠬᠥᠬᠡ ᠴᠢᠯᠠᠭᠤ ᠪᠠᠷ ᠳᠡᠷᠡ ᠬᠢᠵᠦ᠂ ᠬᠦᠢᠲᠡᠨ ᠭᠠᠵᠠᠷ ᠢ᠋ᠶ᠋ᠠᠷ ᠳᠡᠪᠢᠰᠬᠡᠷ ᠬᠢᠬᠦ ᠤᠴᠢᠷ ᠲᠠᠢ᠃ ᠪᠢ ᠬᠠᠨᠠᠨ ᠭᠡᠷ ᠲᠦ᠍ ᠣᠷᠣᠬᠤ ᠦᠭᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠤᠨᠤᠭᠠ ᠦᠭᠡᠢ ᠰᠣᠬᠣᠷ ᠡᠪᠦᠭᠡᠨ ᠳ᠋ᠦ᠍ ᠡᠨᠡ ᠶᠡᠬᠡ ᠴᠦᠯ ᠳ᠋ᠦ᠍ ᠬᠠᠳᠠ ᠴᠢᠯᠠᠭᠤᠨ ᠠ᠋ᠴᠠ ᠥᠭᠡᠷᠡ ᠶᠠᠮᠠᠷ ᠥᠮᠴᠢ ᠪᠠᠢᠬᠤ ᠪᠣᠢ? ᠬᠠᠨᠠᠨ ᠭᠡᠷ ᠲᠦ᠍ ᠬᠦᠷᠬᠦ ᠶᠠᠮᠠᠷ ᠲᠡᠩᠬᠡᠭᠡ ᠪᠠᠢᠬᠤ ᠪᠣᠢ? ᠳᠢᠶᠠᠨᠴᠢ ᠬᠥᠮᠦᠨ ᠥᠩᠭᠡ᠂ ᠳᠠᠭᠤᠤ᠂ ᠦᠨᠦᠷ᠂ ᠠᠮᠲᠠ᠂ ᠬᠦᠷᠦᠯᠴᠡᠬᠦᠢ ᠶ᠋ᠢᠨ ᠲᠠᠪᠤᠨ ᠬᠦᠰᠡᠯ ᠢᠶᠡᠨ ᠬᠠᠵᠠᠭᠠᠷᠯᠠᠵᠤ᠂ ᠵᠡᠷᠯᠢᠭ ᠠᠷᠢᠶᠠᠲᠠᠨ ᠠᠮᠠ ᠪᠠᠨ ᠠᠩᠭᠠᠢᠨ ᠳᠠᠭᠠᠷᠢᠯᠠ ᠴᠤ᠌᠂ ᠬᠣᠣᠷᠲᠤ ᠮᠣᠭᠠᠢ ᠥᠰᠥᠭᠡᠢ ᠤᠷᠤᠭᠤ ᠨᠢ ᠬᠠᠳᠬᠤᠵᠤ ᠪᠠᠢᠭᠰᠠᠨ ᠴᠤ᠌ ᠪᠢᠰᠢᠯᠭᠠᠯ ᠢ᠋ᠶ᠋ᠠᠨ ᠬᠢᠵᠦ᠂ ᠰᠠᠬᠢᠯ ᠰᠠᠬᠢᠵᠤ ᠪᠠᠢᠬᠤ ᠤᠴᠢᠷ ᠲᠠᠢ᠃ ᠰᠣᠬᠣᠷ ᠡᠷᠡ ᠡᠭᠦᠨ ᠢ᠋ ᠰᠠᠬᠢᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠪᠠᠢᠪᠠᠴᠤ ᠥᠭᠡᠷᠡ ᠠᠵᠢᠯ ᠲᠡᠭᠦᠨ ᠳ᠋ᠦ᠍ ᠣᠯᠳᠠᠬᠤ ᠦᠭᠡᠢ ᠪᠢᠯᠡ᠃ ᠳᠢᠶᠠᠨᠴᠢ ᠬᠥᠮᠦᠨ ᠨᠣᠮᠲᠤ ᠬᠤᠪᠴᠠᠰᠤᠨ ᠠ᠋ᠴᠠ ᠥᠭᠡᠷᠡ ᠬᠤᠪᠴᠠᠰᠤ ᠡᠮᠦᠰᠬᠦ ᠶᠣᠰᠣ ᠦᠭᠡᠢ᠃ ᠲᠡᠭᠡᠪᠡᠯ ᠰᠣᠬᠣᠷ ᠡᠷᠡ ᠶ᠋ᠢᠨ ᠨᠣᠮᠲᠤ ᠬᠤᠪᠴᠠᠰᠤ ᠶ᠋ᠢ ᠨᠢᠭᠡᠨᠲᠡ ᠱᠡᠯᠲᠡᠨᠭᠯᠡᠨ ᠬᠤᠷᠢᠶᠠᠵᠤ ᠠᠪᠤᠭᠠᠳ ᠬᠠᠷᠠ ᠬᠥᠮᠦᠨ ᠦ᠌ ᠳᠡᠪᠡᠯ ᠡᠮᠦᠰᠬᠡᠨ ᠴᠦᠯᠡᠭᠰᠡᠨ ᠪᠣᠯᠬᠣᠷ ᠡᠨᠡ ᠰᠠᠬᠢᠯ ᠠᠯᠳᠠᠭᠳᠠᠵᠠᠢ᠃ ᠰᠣᠬᠣᠷ ᠡᠷᠡ ᠨᠣᠮᠲᠤ ᠬᠤᠪᠴᠠᠰᠤ ᠶ᠋ᠢ ᠳᠠᠬᠢᠨ ᠡᠮᠦᠰᠬᠦ ᠶ᠋ᠢ ᠴᠦ᠍ ᠥᠪᠡᠷ ᠢ᠋ᠶ᠋ᠡᠨ ᠬᠦᠰᠡᠬᠦ ᠦᠭᠡᠢ ᠪᠠᠢᠯᠠ᠃ ᠳᠢᠶᠠᠨᠴᠢ ᠶ᠋ᠢᠨ ᠪᠠᠰᠠ ᠨᠢᠭᠡ ᠰᠠᠬᠢᠯ ᠰᠣᠬᠣᠷ ᠡᠷᠡ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠣᠳᠣ ᠶᠡᠬᠡ ᠨᠡᠢᠴᠡᠬᠦ ᠪᠣᠯᠵᠠᠢ᠃
– ᠬᠣᠣᠷᠲᠠᠨ ᠳᠠᠢᠰᠤᠨ ᠢ᠋ᠶ᠋ᠠᠷ ᠨᠥᠬᠥᠷ ᠬᠢᠬᠦ ᠭᠡᠳᠡᠭ ᠢ᠋ ᠴᠢᠨᠢ ᠯᠡ ᠪᠢ ᠳᠠᠭᠠᠶᠠ ᠭᠡᠵᠦ ᠰᠣᠬᠣᠷ ᠡᠷᠡ ᠨᠢᠭᠡ ᠪᠢᠰᠢ ᠤᠳᠠᠭᠠ ᠥᠪᠡᠷ ᠲᠡᠭᠡᠨ ᠬᠡᠯᠡᠵᠡᠢ᠃ ᠳᠢᠶᠠᠨᠴᠢ ᠬᠥᠮᠦᠨ ᠬᠠᠮᠤᠭ ᠤ᠋ᠨ ᠵᠠᠨᠤᠯᠲᠤ ᠳᠠᠢᠰᠤᠨ ᠢ᠋ᠶ᠋ᠠᠨ ᠪᠠᠢᠯᠠ ᠴᠤ᠌ ᠨᠥᠬᠥᠷ ᠭᠡᠵᠦ ᠲᠣᠭᠠᠴᠠᠬᠤ ᠲᠡᠢᠮᠦ ᠪᠣᠳᠢ ᠰᠡᠳᠬᠢᠯ ᠲᠡᠢ ᠪᠠᠢᠬᠤ ᠤᠴᠢᠷᠲᠠᠢ ᠠᠵᠢ᠃ ᠰᠣᠬᠣᠷ ᠡᠷᠡ ᠳ᠋ᠦ᠍ ᠥᠨᠥᠳᠥᠷ ᠳᠠᠢᠰᠤᠨ ᠣᠯᠠᠨ ᠪᠣᠯᠵᠠᠢ᠃ ᠲᠡᠳᠡ ᠰᠣᠬᠣᠷ ᠡᠷᠡ ᠶ᠋ᠢ ᠢᠩᠭᠢᠨᠡ ᠤᠰᠤᠨ ᠤ᠋ ᠭᠣᠪᠢ ᠳ᠋ᠤ᠌ ᠴᠦᠯᠡᠭᠰᠡᠨ᠃ ᠴᠥᠯᠡᠬᠦ ᠳ᠋ᠡᠭᠡᠨ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠯ ᠦᠭᠡᠢ ᠨᠢᠭᠤᠴᠠ ᠪᠠᠷ ᠠᠪᠴᠢᠷᠠᠵᠤ ᠭᠠᠭᠴᠠᠭᠠᠷ ᠢ᠋ ᠨᠢ ᠢᠳᠡᠬᠦ ᠬᠣᠭᠣᠯᠠ᠂ ᠤᠤᠭᠤᠬᠤ ᠤᠰᠤ᠂ ᠡᠮᠦᠰᠬᠦ ᠬᠤᠪᠴᠠᠰᠤ ᠦᠭᠡᠢ ᠪᠡᠷ ᠣᠷᠬᠢᠭᠰᠠᠨ᠃
ᠲᠡᠭᠡᠬᠦ ᠳ᠋ᠡᠭᠡᠨ ᠲᠥᠷᠥᠭᠰᠡᠨ ᠡᠳᠦᠷ ᠢ᠋ ᠨᠢ᠂ ᠲᠣᠬᠢᠶᠠᠯᠳᠤᠭᠰᠠᠨ ᠣᠳᠣ ᠶ᠋ᠢ ᠨᠢ ᠲᠠᠭᠠᠷᠠᠭᠤᠯᠤᠨ ᠠᠪᠴᠢᠷᠠᠵᠤ ᠴᠦᠯ ᠳ᠋ᠦ᠍ ᠬᠠᠶᠠᠵᠠᠢ᠃《ᠨᠢᠭᠡ ᠪᠣᠳᠣᠬᠤ ᠳ᠋ᠤ᠌ ᠴᠤ᠌ ᠰᠢᠨᠡ ᠠᠮᠢᠳᠤᠷᠠᠯ ᠡᠬᠢᠯᠡᠵᠦ ᠡᠭᠦᠰᠬᠡᠬᠦ ᠶ᠋ᠢ ᠰᠠᠨᠠᠭᠤᠯᠤᠭᠰᠠᠨ ᠶᠤᠮ ᠰᠢᠭ᠋᠃ ᠨᠢᠭᠡ ᠪᠣᠳᠣᠬᠤ ᠳ᠋ᠤ᠌ ᠡᠢᠮᠦ ᠬᠥᠮᠦᠨ ᠳᠥᠷᠥᠭᠡ ᠦᠭᠡᠢ ᠨᠢ ᠳᠡᠭᠡᠷᠡ ᠭᠡᠵᠦ ᠬᠡᠯᠡᠭᠰᠡᠨ ᠮᠡᠲᠦ᠃ ᠭᠡᠪᠡᠴᠦ ᠪᠢ ᠲᠥᠷᠥᠭᠰᠡᠨ᠂ ᠠᠮᠢᠳᠤᠷᠠᠭᠰᠠᠨ᠂ ᠬᠢᠭᠰᠡᠨ᠂ ᠪᠦᠲᠦᠭᠡᠭᠰᠡᠨ᠃ ᠬᠡᠳᠦᠢᠪᠡᠷ ᠨᠠᠰᠤᠨ ᠤ᠋ ᠦᠳᠡ ᠬᠡᠪᠡᠢᠵᠦ ᠵᠠᠯᠠᠭᠤ ᠨᠠᠰᠤ ᠠᠯᠤᠰ ᠲᠤ᠌ ᠥᠩᠭᠡᠷᠡᠭᠰᠡᠨ ᠴᠦ᠍ ᠰᠢᠨᠡ ᠵᠠᠮ ᠡᠬᠢᠯᠡᠬᠦ ᠳ᠋ᠦ᠍ ᠶᠠᠭᠤᠨ ᠬᠣᠵᠢᠭᠳᠠᠬᠤ ᠪᠢᠯᠡ᠃ ᠭᠠᠢᠭᠤᠢ ᠮᠢᠨᠦ ᠡᠨᠡ ᠵᠠᠮ ᠢ᠋ᠶ᠋ᠠᠷ ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠣᠯᠠᠨ ᠵᠢᠯ ᠶᠠᠪᠤᠬᠤ ᠦᠭᠡᠢ ᠪᠢᠵᠡ᠃ ᠮᠢᠨᠦ ᠠᠷᠤ ᠠ᠋ᠴᠠ ᠵᠠᠪᠠᠯ ᠬᠥᠮᠦᠰ ᠢᠷᠡᠨᠡ》 ᠭᠡᠵᠦ ᠬᠠᠪᠤᠷ ᠤ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠲᠡᠷᠡ ᠨᠢᠭᠡ ᠡᠳᠦᠷ᠂ ᠴᠦᠯᠡᠯᠭᠡᠨ ᠦ᠌ ᠠᠩᠬᠠᠨ ᠤ᠋ ᠡᠳᠦᠷ ᠰᠣᠬᠣᠷ ᠡᠷᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠢᠰᠢᠯᠭᠠᠨ ᠪᠣᠳᠣᠵᠠᠢ᠃
ᠴᠣᠬᠣᠮ ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠢᠲᠡᠭᠡᠯ ᠲᠡᠢ ᠪᠣᠯᠤᠭᠰᠠᠨ ᠶᠤᠮ ᠪᠣᠢ? ᠴᠣᠬᠣᠮ ᠶᠠᠭᠠᠬᠢᠭᠠᠳ ᠡᠨᠡ ᠬᠥᠮᠦᠨ ᠢ᠋ ᠡᠵᠡᠭᠦᠢ ᠭᠣᠪᠢ ᠳ᠋ᠤ᠌ ᠶᠠᠮᠠᠷ ᠬᠥᠮᠦᠰ᠂ ᠶᠠᠭᠠᠬᠢᠬᠤ ᠰᠠᠨᠠᠭᠠ ᠲᠠᠢ ᠪᠠᠷ ᠭᠠᠭᠴᠠᠭᠠᠷ ᠢ᠋ ᠨᠢ ᠴᠦᠯᠡᠭᠰᠡᠨ ᠶᠦᠮ ᠪᠣᠢ?
ᠰᠠᠭᠠᠷᠳᠠᠭᠠᠮ ᠤ᠋ᠨ ᠪᠤᠶᠤ ᠦᠨᠡᠨᠴᠢ᠂ ᠰᠢᠳᠤᠷᠭᠤ ᠶᠣᠰᠣᠨ ᠤ᠋ ᠮᠥᠷ ᠬᠥᠭᠡᠭᠡᠭᠰᠡᠨ ᠮᠢᠨᠢ ᠨᠠᠮᠠᠶ᠋ᠢ ᠠᠳᠠ ᠬᠦᠷᠭᠡᠵᠢ ᠳᠡ ᠬᠥ᠋᠃ ᠣᠳᠣ ᠡᠨᠡ ᠵᠠᠮ ᠤ᠋ᠨ ᠲᠡᠭᠦᠰᠬᠡᠯ ᠬᠦᠷᠲᠡᠯᠡ ᠴᠢ ᠪᠢᠳᠡ ᠬᠣᠶᠠᠷ ᠶᠠᠪᠤᠭᠠᠳ ᠪᠠᠢᠨᠠ ᠭᠡᠵᠦ ᠰᠣᠬᠣᠷ ᠡᠷᠡ ᠭᠠᠵᠠᠷ ᠣᠷᠤᠴᠠᠨ ᠤ᠋ ᠪᠠᠨ ᠡᠭᠦᠳᠡᠨ ᠳ᠋ᠦ᠍ ᠣᠴᠢᠬᠤ ᠳ᠋ᠠᠭᠠᠨ ᠲᠠᠶᠠᠭ ᠲᠠᠢ ᠪᠠᠨ ᠶᠠᠷᠢᠯᠠ᠃ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠡᠭᠦᠨ ᠦ᠌ ᠰᠠᠭᠠᠷᠳᠠᠭᠠᠮ ᠤ᠋ᠨ ᠪᠤᠶᠤ ᠨᠢᠭᠡᠨᠲᠡ ᠬᠠᠷᠢᠨ ᠢᠷᠡᠭᠴᠢ ᠶ᠋ᠢᠨ ᠮᠥᠷ ᠶᠠᠭᠠᠬᠢᠵᠤ ᠡᠬᠢᠯᠡᠭᠰᠡᠨ ᠢ᠋ ᠳᠠᠷᠠᠭᠠᠬᠢ ᠪᠦᠯᠦᠭ ᠦ᠋ᠳ ᠲᠦ᠍ ᠥᠭᠦᠯᠡᠰᠦᠭᠡᠢ᠃