ᠬᠤᠭᠤᠷᠠᠭᠠ ᠦᠭᠡᠢ ᠨᠣᠶᠠᠨ ᠨᠢᠷᠤᠭᠤ - ᠴ ᠯᠣᠳᠣᠢᠳᠠᠮᠪᠠ Хугараагүй ноён нуруу - Ч᠂Лодойдамба II
890ᠬᠤᠭᠤᠷᠠᠭᠠ ᠦᠭᠡᠢ ᠨᠣᠶᠠᠨ ᠨᠢᠷᠤᠭᠤ
ᠴ ᠯᠣᠳᠤᠢᠳᠠᠮᠪᠠ
ᠦᠷᠭᠦᠯᠵᠢᠯᠡᠯ
- ᠠᠪᠤ᠋ ᠠ᠋ ᠂ ᠪᠢ ᠶᠠᠪᠤᠬᠤ ᠦᠭᠡᠢ ᠂ ᠴᠢᠮᠠ ᠲᠠᠢ ᠴᠣᠭ ᠪᠠᠢᠨᠠ ᠭᠡᠳ ᠯᠡ ᠬᠦᠴᠦᠭᠦᠨ ᠡᠴᠡ ᠵᠠᠭᠤᠷᠠᠴᠢᠬᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠨᠢ ᠪᠢ ᠲᠠᠯᠪᠢᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠂ ᠪᠠᠢᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠡᠮᠡᠭᠲᠡᠢᠴᠦᠳ ᠬᠦᠴᠦ ᠪᠡᠷ ᠰᠠᠯᠭᠠᠵᠤ ᠠᠪᠤᠭᠠᠳ ᠶᠠᠪᠤᠭᠰᠠᠨ ᠶᠤᠮ ᠰᠠᠨ ᠃ ᠬᠥᠭᠡᠷᠦᠬᠦᠢ ᠬᠦᠦ ᠪᠡᠨ ᠦᠨᠦᠰᠴᠦ ᠴᠢᠳᠠᠭᠠ ᠦᠭᠡᠢ ᠳ᠋ᠦ᠍ ᠪᠡᠨ ᠣᠳᠣ ᠬᠦᠷᠲᠡᠯᠡ ᠭᠣᠮᠣᠳᠠᠳᠠᠭ ᠶᠤᠮ ᠃ ᠪᠢ ᠲᠡᠭᠦᠨ ᠲᠡᠢ ᠪᠡᠨ ᠳᠠᠬᠢᠨ ᠠᠭᠤᠯᠵᠠᠬᠤ ᠦᠭᠡᠢ ᠂ ᠡᠴᠦᠰ ᠦ᠋ᠨ ᠤᠳᠠᠭᠠ ᠬᠠᠷᠠᠵᠤ ᠪᠠᠢᠭᠠ ᠪᠠᠨ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠳᠠ ᠭᠡᠳ ᠳᠣᠷᠵᠢ ᠭᠤᠸᠠᠢ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠩᠨᠠᠢ ᠪᠠᠨ ᠲᠤᠯᠤᠨ ᠨᠢᠳᠦ ᠪᠡᠨ ᠬᠠᠯᠬᠠᠯᠠᠵᠤ ᠳᠣᠷᠣᠭᠰᠢ ᠬᠠᠷᠠᠨ ᠲᠦᠷ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠪᠣᠰᠬᠤ ᠳ᠋ᠤ᠌ ᠨᠢ ᠪᠦᠬᠦ ᠪᠡᠶᠡ ᠨᠢ ᠴᠡᠴᠡᠷᠡᠵᠦ ᠪᠠᠢᠪᠠ ᠃ ᠨᠠᠳᠠ ᠲᠠᠢ ᠡᠳᠦᠷ ᠠᠭᠤᠯᠵᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠳᠠᠢᠯᠤᠭᠠ ᠦᠭᠡᠢ ᠪᠠᠢᠭᠰᠠᠨ ᠬᠣᠭᠣᠯᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠪᠴᠢ ᠶ᠋ᠢ ᠲᠠᠢᠯᠵᠤ ᠂ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠮᠢᠨᠦ ᠲᠠᠮᠠᠬᠢᠨ ᠠ᠋ᠴᠠ ᠨᠢᠭᠡ ᠰᠢᠷᠬᠡᠭ ᠢ ᠠᠪᠴᠤ ᠲᠠᠮᠠᠬᠢ ᠪᠠᠷ ᠨᠢ ᠵᠠᠭᠤᠬᠤ ᠭᠡᠬᠦ ᠳ᠋ᠦ᠍ ᠨᠢ ᠪᠢ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠳ᠋ᠦ᠍ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠯ ᠦᠭᠡᠢ ᠡᠷᠭᠢᠭᠦᠯᠦᠨ ᠵᠠᠭᠤᠵᠤ ᠠᠰᠠᠭᠠᠭᠰᠠᠨ ᠪᠢᠯᠡ ᠃
ᠳᠥᠷᠪᠡ
ᠴᠢᠭᠯᠡᠭᠰᠡᠨ ᠶᠠᠭᠤᠮᠠ ᠦᠭᠡᠢ ᠰᠢᠷᠳᠡᠨ ᠭᠥᠯᠢᠷᠡᠭᠡᠳ ᠵᠣᠭᠰᠣᠵᠤ ᠪᠠᠢᠭᠠ ᠳᠣᠷᠵᠢ ᠭᠤᠸᠠᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠭᠠᠰᠠᠯᠠᠩ ᠭᠤᠨᠢᠭᠯᠠᠯ ᠲᠣᠳᠣᠷᠠᠭᠠᠳ ᠬᠠᠶᠠ ᠬᠠᠮᠠᠷ ᠠᠮᠠ ᠪᠠᠷ ᠨᠢ ᠲᠠᠮᠠᠬᠢᠨ ᠤ᠋ ᠤᠲᠤᠭᠠ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠲᠠᠰᠤᠯᠳᠠᠨ ᠭᠠᠷᠴᠤ ᠪᠠᠢᠪᠠ ᠃
- ᠬᠠᠯᠬᠠ ᠭᠣᠣᠯ ᠳ᠋ᠤ᠌ ᠮᠠᠨ ᠤ᠋ ᠠᠩᠭᠢ ᠪᠠᠢᠯᠳᠤᠭᠰᠠᠨ ᠃ ᠶᠠᠫᠣᠨ ᠤ᠋ ᠰᠠᠯᠠᠭᠠ ᠴᠡᠷᠢᠭ ᠮᠠᠨ ᠤ᠋ ᠬᠢᠨ ᠦ᠌ ᠬᠢᠯᠢ ᠶ᠋ᠢᠨ ᠵᠢᠵᠢᠭ ᠠᠩᠭᠢ ᠶ᠋ᠢ ᠬᠠᠯᠬᠠ ᠭᠣᠣᠯ ᠤᠷᠤᠭᠤ ᠰᠢᠬᠠᠵᠤ ᠪᠠᠢᠯᠠ ᠃ ᠮᠠᠨ ᠤ᠋ ᠰᠠᠯᠠᠭᠠ ᠲᠡᠷᠡ ᠵᠢᠵᠢᠭ ᠠᠩᠭᠢ ᠳ᠋ᠤ᠌ ᠲᠤᠰᠠᠯᠠᠬᠤ ᠪᠠᠷ ᠭᠣᠣᠯ ᠭᠠᠲᠤᠯᠵᠤ ᠰᠢᠭᠤᠳ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠣᠷᠣᠯᠠ ᠃ ᠳᠠᠢᠰᠤᠨ ᠤ᠋ ᠬᠦᠴᠦ ᠳᠠᠪᠠᠭᠤ ᠪᠠᠢᠭᠰᠠᠨ ᠤᠴᠢᠷ ᠪᠢ ᠨᠡᠮᠡᠯᠲᠡ ᠬᠦᠴᠦ ᠢᠷᠡᠭᠦᠯᠬᠦ ᠪᠡᠷ ᠤᠲᠠᠰᠤ ᠪᠠᠷ ᠭᠤᠶᠤᠬᠤ ᠳ᠋ᠤ᠌ ᠰᠤᠮᠤᠨ ᠤ᠋ ᠳᠠᠷᠤᠭᠠ ᠄《 ᠨᠡᠮᠡᠯᠲᠡ ᠬᠦᠴᠦ ᠥᠷᠯᠥᠭᠡ ᠪᠣᠯᠲᠠᠯᠠ ᠥᠭᠴᠦ ᠴᠢᠳᠠᠬᠤ ᠦᠭᠡᠢ ᠃ ᠳᠠᠢᠰᠤᠨ ᠢ᠋ ᠪᠠᠢᠭᠠ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠲᠣᠭᠲᠠᠭᠠᠵᠤ ᠪᠠᠢ ᠃ ᠴᠥᠮᠥᠷᠡᠭᠦᠯᠪᠡᠯ ᠬᠠᠲᠠᠭᠤ ᠰᠢᠢᠳᠬᠡᠨᠡ 》ᠭᠡᠵᠡᠢ ᠃ ᠮᠥᠨᠳᠥᠷ ᠰᠢᠭ ᠪᠠᠭᠤᠵᠤ ᠪᠠᠢᠭᠠ ᠰᠤᠮᠤᠨ ᠤ ᠳᠤᠮᠳᠠ ᠬᠡᠵᠢᠶᠡ ᠶᠠᠭᠤ ᠪᠣᠯᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠂ ᠰᠠᠨᠠᠭᠠ ᠰᠢᠢᠳᠦᠭᠡᠳ ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠵᠤ ᠪᠠᠢᠭᠠ ᠪᠢᠳᠡᠨ ᠢ᠋《 ᠰᠢᠢᠳᠬᠡᠨᠡ 》ᠭᠡᠵᠦ ᠰᠦᠷᠳᠡᠭᠦᠯᠦᠭᠡᠳ ᠶᠠᠭᠠᠬᠢᠬᠤ ᠪᠢᠯᠡ ᠳᠠ ᠃ ᠴᠡᠷᠢᠭ ᠦ᠋ᠨ ᠴᠠᠭᠠᠵᠠ ᠬᠠᠲᠠᠭᠤ ᠭᠡᠪᠡᠴᠦ ᠲᠡᠢᠮᠦ ᠬᠠᠲᠠᠭᠤ ᠦᠶᠡ ᠳ᠋ᠦ᠍《 ᠰᠢᠢᠳᠬᠡᠨᠡ 》ᠭᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠰᠡᠳᠬᠢᠯ ᠵᠣᠷᠢᠭ ᠳᠡᠮᠵᠢᠭᠰᠡᠨ ᠦᠭᠡ ᠬᠡᠯᠡᠭᠰᠡᠨ ᠪᠣᠯ ᠳᠡᠭᠡᠷᠡ ᠪᠠᠢᠭᠰᠠᠨ ᠃《 ᠰᠢᠢᠳᠬᠡᠨᠡ 》ᠭᠡᠰᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠵᠢᠪᠡᠭᠦᠦ ᠴᠦ᠍ ᠬᠦᠷᠬᠦ ᠰᠢᠭ ᠂ ᠭᠣᠮᠣᠳᠠᠬᠤ ᠴᠤ᠌ ᠰᠢᠭ᠋ ᠪᠣᠯᠵᠤ ᠄《 ᠥᠷᠯᠥᠭᠡ ᠨᠠᠷᠠ ᠭᠠᠷᠬᠤ ᠳ᠋ᠤ᠌ ᠡᠰᠡᠪᠡᠯ ᠶᠠᠫᠣᠨ ᠤ᠋ ᠴᠡᠷᠢᠭ ᠭᠣᠣᠯ ᠠ᠋ᠴᠠ ᠤᠰᠤ ᠤᠤᠭᠤᠵᠤ ᠪᠠᠢᠨᠠ ᠂ ᠡᠰᠡᠪᠡᠯ ᠪᠢᠳᠡ ᠬᠢᠯᠢ ᠱᠤᠭᠤᠮ ᠤ᠋ᠨ ᠳᠡᠭᠡᠷᠡ ᠣᠴᠢᠭᠠᠳ ᠪᠠᠢᠬᠤ ᠪᠣᠢ 》ᠭᠡᠳ ᠤᠲᠠᠰᠤ ᠪᠠᠨ ᠲᠠᠰᠤᠯᠵᠤ ᠂ ᠳᠠᠢᠰᠤᠨ ᠤ᠋ ᠬᠡᠳᠦᠨ ᠤᠳᠠᠭᠠ ᠶ᠋ᠢᠨ ᠳᠠᠭᠠᠷᠢᠯᠲᠠ ᠶ᠋ᠢ ᠪᠤᠴᠠᠭᠠᠵᠤ᠂ ᠥᠥᠷ ᠰᠥᠨᠢ ᠬᠠᠭᠠᠴᠠᠬᠤ ᠶ᠋ᠢᠨ ᠦᠶᠡ ᠳᠦ ᠭᠠᠭᠴᠠ ᠦᠯᠡᠳᠡᠭᠰᠡᠨ ᠬᠥᠩᠭᠡᠨ ᠪᠦᠯᠧᠮᠶᠧᠣᠲ ᠤ᠋ᠨ ᠢ᠋ᠶ᠋ᠠᠨ ᠭᠠᠯ ᠳᠣᠣᠭᠤᠷ ᠳᠠᠪᠰᠢᠬᠤ ᠲᠤᠰᠢᠶᠠᠯ ᠥᠭᠪᠡ ᠃ ᠢᠩᠭᠢᠭᠡᠳ ᠪᠢᠳᠡ ᠪᠣᠰᠴᠤ ᠳᠠᠪᠰᠢᠪᠠ ᠃ ᠭᠡᠲᠡᠯᠡ ᠳᠠᠢᠰᠤᠨ ᠤ᠋ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠪᠠᠢᠭᠰᠠᠨ ᠬᠦᠨᠳᠦ ᠫᠦᠯᠧᠮᠶᠣᠲ ᠠᠵᠢᠯᠯᠠᠵᠤ ᠮᠠᠨ ᠤ᠋ ᠳᠡᠪᠰᠢᠯᠲᠡ ᠵᠣᠭᠰᠣᠪᠠ ᠃ ᠠᠰᠢᠭᠦᠢ ᠥᠨᠳᠥᠷ ᠤᠷᠭᠤᠭᠰᠠᠨ ᠳᠡᠷᠡᠰᠦᠨ ᠳ᠋ᠦ᠍ ᠣᠷᠣᠵᠤ ᠠᠮᠵᠢᠭᠰᠠᠨ ᠮᠠᠨ ᠤ᠋ ᠨᠢᠭᠡ ᠴᠡᠷᠢᠭ ᠭᠠᠵᠠᠷ ᠤ᠋ᠨ ᠥ ( ᠪᠠᠷᠲᠠᠭᠠ ) ᠳᠠᠭᠠᠵᠤ ᠣᠢᠷᠠᠲᠤᠭᠠᠳ ᠂ ᠬᠣᠶᠠᠷ ᠭᠠᠷ ᠪᠥᠮᠪᠥᠭᠡ ᠪᠡᠷ ᠳᠠᠢᠰᠤᠨ ᠤ᠋ ᠫᠦᠯᠧᠮᠶᠣᠲ ᠢ᠋ ᠤᠰᠠᠳᠬᠠᠵᠤ ᠪᠠᠰᠠ ᠳᠠᠬᠢᠨ ᠳᠠᠪᠰᠢᠪᠠ ᠃ ᠢᠩᠭᠢᠭᠡᠳ ᠨᠠᠷᠠ ᠭᠠᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠭᠠᠷᠳᠠᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠣᠷᠣᠵᠤ ᠰᠠᠯᠠᠭᠠᠨ ᠳ᠋ᠤ᠌ ᠪᠠᠨ ᠦᠯᠡᠳᠡᠭᠰᠡᠨ ᠬᠦᠨᠳᠦ ᠬᠥᠩᠭᠡᠨ ᠰᠢᠷᠬᠠ ᠲᠠᠢ ᠠᠷᠪᠠᠨ ᠬᠣᠶᠠᠷ ᠬᠥᠮᠦᠨ ᠤᠯᠤᠰ ᠤ᠋ᠨ ᠬᠢᠯᠢ ᠶ᠋ᠢᠨ ᠱᠤᠭᠤᠮ ᠳᠡᠭᠡᠷᠡ ᠣᠴᠢᠭᠠᠳ ᠫᠤᠤ ᠶ᠋ᠢᠨ ᠰᠤᠮᠤᠨ ᠳ᠋ᠤ᠌ ᠰᠢᠪᠡᠭᠳᠡᠭᠰᠡᠨ ᠲᠡᠷᠡ ᠭᠠᠵᠠᠷ ᠢ᠋ ᠦᠨᠦᠰᠴᠦ ᠪᠠᠢᠭᠰᠠᠨ ᠶᠤᠮ ᠰᠠᠨ ᠃ ᠰᠢᠷᠬᠠᠲᠤᠭᠰᠠᠨ ᠠᠷᠪᠠᠨ ᠨᠢᠭᠡᠨ ᠨᠥᠬᠥᠳ ᠲᠡᠢ ᠪᠡᠨ ᠶᠠᠮᠠᠷ ᠴᠤ᠌ ᠳᠠᠢᠰᠤᠨ ᠠ᠋ᠴᠠ ᠬᠠᠮᠠᠭᠠᠯᠠᠵᠤ ᠴᠢᠳᠠᠨᠠ ᠭᠡᠳᠡᠭ ᠤᠨ ᠤᠴᠢᠷ ᠢ᠋ ᠣᠢᠯᠠᠭᠠᠭᠰᠠᠨ ᠶᠤᠮ ᠃ ᠪᠠᠭᠠ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠶᠠᠫᠣᠨ ᠰᠢᠨᠡ ᠬᠦᠴᠦ ᠬᠤᠷᠠᠯᠳᠤᠭᠤᠯᠵᠤ ᠡᠬᠢᠯᠡᠭᠡᠳ ᠪᠥᠮᠪᠥᠭᠡ ᠰᠢᠲᠠᠭᠴᠢ ᠪᠠᠷ ᠫᠤᠤᠳᠠᠵᠤ ᠮᠠᠨ ᠤ᠋ ᠳᠥᠷᠪᠡᠨ ᠬᠥᠮᠦᠨ ᠢ᠋ ᠠᠯᠠᠵᠤ ᠬᠥᠩᠭᠡᠨ ᠫᠦ᠋ᠯᠧᠮᠶᠣᠲ ᠢ᠋ ᠮᠢᠨᠢ ᠤᠰᠠᠳᠬᠠᠭᠠᠳ ᠳᠠᠪᠰᠢᠵᠤ ᠡᠬᠢᠯᠡᠪᠡ ᠃
- ᠵᠠ ᠨᠥᠬᠥᠳ ᠮᠢᠨᠢ ! ᠴᠢᠰᠤ ᠪᠠᠷ ᠢ᠋ᠶ᠋ᠠᠨ ᠳᠡᠪᠲᠦᠭᠡᠭᠰᠡᠨ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠠᠮᠢ ᠪᠠᠨ ᠥᠭᠴᠡᠭᠡᠶᠡ ! ᠨᠢᠭᠡᠨᠲᠡ ᠡᠢᠮᠦ ᠪᠣᠯᠤᠭᠰᠠᠨ ᠬᠣᠢᠨᠠ ᠨᠢᠭᠡ ᠶ᠋ᠢ ᠠᠯᠪᠠ ᠳ᠋ᠤ᠌ ᠰᠣᠯᠢᠶᠠ ᠂ ᠬᠣᠶᠠᠷ ᠢ᠋ ᠠᠯᠠᠪᠠᠯ ᠬᠣᠨᠵᠢᠶᠠ ᠭᠡᠵᠦ ᠬᠡᠯᠡᠭᠡᠳ ᠫᠤᠤᠳᠠᠵᠤ ᠡᠬᠢᠯᠡᠪᠡ ᠃
- ᠨᠥᠬᠥᠳ ᠮᠢᠨᠢ ᠡᠨᠳᠡ ᠡᠴᠡ ᠵᠠᠢᠯᠠᠵᠠᠭᠠᠶᠠ!ᠠᠮᠢᠳᠤ ᠭᠠᠷᠬᠤ ᠨᠠᠢᠳᠠᠪᠤᠷᠢ ᠦᠭᠡᠢ ᠪᠣᠯᠤᠯᠠ ᠭᠡᠵᠦ ᠨᠢᠭᠡ ᠬᠥᠮᠦᠨ ᠴᠢᠩᠭᠠ ᠬᠠᠰᠬᠢᠷᠠᠬᠤ ᠳ᠋ᠤ᠌ ᠨᠢ ᠬᠠᠷᠠᠪᠠᠯ ᠴᠢᠯᠠᠭᠤᠨ ᠪᠠᠢᠪᠠ ᠃ ᠨᠥᠬᠥᠭᠡ ᠮᠠᠨᠠᠭᠠᠨ ᠳ᠋ᠤ᠌ ᠭᠠᠷᠤᠭᠠᠳ ᠤᠨᠲᠠᠵᠤ ᠣᠷᠬᠢᠳᠠᠭ ᠴᠢᠯᠠᠭᠤᠨ ᠰᠢᠦ ᠳ᠋ᠠ ᠬᠡᠳᠦ ᠳᠣᠷᠵᠢ ᠭᠤᠸᠠᠢ ᠰᠦᠮᠡᠯᠵᠡᠨ ᠠᠰᠠᠵᠤ ᠪᠠᠢᠭᠠ ᠯᠠ ᠶ᠋ᠢᠨ ᠭᠡᠷᠡᠯ ᠤᠷᠤᠭᠤ ᠬᠠᠷᠠᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠦ᠍ ᠨᠢ ᠣᠯᠠᠨ ᠵᠢᠯ ᠨᠥᠭᠡᠴᠡᠯᠡᠭᠳᠡᠭᠰᠡᠨ ᠬᠣᠷᠣ ᠬᠣᠷᠣᠰᠤᠯ ᠲᠣᠳᠣᠷᠠᠵᠤ ᠂ ᠰᠢᠨᠡ ᠶ᠋ᠢᠨ ᠪᠤᠯᠴᠢᠩ ᠨᠢ ᠡᠷᠴᠢᠯᠡᠨ ᠵᠠᠩᠭᠢᠷᠠᠵᠤ ᠪᠠᠢᠪᠠ ᠃
- ᠲᠤᠰᠢᠶᠠᠯ ᠵᠥᠷᠢᠴᠡᠭᠰᠡᠨ ᠬᠥᠮᠦᠨ ᠢ᠋ ᠡᠬᠡ ᠣᠷᠣᠨ ᠠ᠋ᠴᠠ ᠪᠠᠨ ᠤᠷᠪᠠᠭᠰᠠᠨ ᠭᠡᠵᠦ ᠵᠣᠭᠰᠣᠭᠠ ᠪᠠᠷ ᠫᠤᠤᠳᠠᠨᠠ ᠰᠢᠦ ᠬᠡᠦ ᠪᠢ ᠬᠠᠰᠬᠢᠷᠪᠠ ᠃ ᠵᠠᠢᠯᠠᠰᠢ ᠦᠭᠡᠢ ᠦᠬᠦᠯ ᠦ᠋ᠨ ᠬᠠᠷᠠ ᠴᠠᠯᠮᠠ ( ᠤᠷᠠᠬᠠ ᠂ ᠪᠤᠭᠤᠢᠯᠢ ) ᠬᠦᠵᠦᠭᠦᠨ ᠳ᠋ᠦ᠍ ᠮᠠᠨᠢ ᠣᠷᠣᠭᠰᠠᠨ ᠲᠡᠷᠡ ᠴᠠᠭ ᠲᠤ᠌ ᠵᠥᠪᠯᠡᠯᠲᠦ ᠶ᠋ᠢᠨ ᠠᠷᠮᠢ ᠲᠤᠰᠠᠯᠠᠵᠤ ᠠᠪᠤᠷᠠᠭᠰᠠᠨ ᠶᠤᠮ ᠰᠠᠨ ᠭᠡᠳ ᠳᠣᠷᠵᠢ ᠭᠤᠸᠠᠢ ᠦᠭᠡ ᠪᠡᠨ ᠲᠠᠰᠤᠯᠪᠠ ᠃ ᠪᠢ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠄
- ᠲᠡᠭᠡᠭᠡᠳ ᠶᠠᠭᠤ ᠪᠣᠯᠤᠭᠰᠠᠨ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ ᠃
- ᠶᠠᠭᠠᠬᠢᠬᠤ ᠪᠣᠢ ᠳᠠ ᠂ ᠪᠢᠳᠡ ᠠᠷᠤ ᠳ᠋ᠤ᠌ ᠭᠠᠷᠴᠤ ᠡᠮᠨᠡᠭᠦᠯᠦᠨ ᠳᠠᠬᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠃ ᠪᠢ ᠰᠢᠨᠡ ᠰᠠᠯᠠᠭᠠ ᠬᠦᠯᠢᠶᠡᠵᠦ ᠠᠪᠤᠭᠠᠳ ᠪᠠᠶᠠᠨᠴᠠᠭᠠᠨ ᠤ᠋ ᠳᠣᠪᠲᠣᠯᠭᠠᠨ ᠳ᠋ᠤ᠌ ᠣᠪᠣᠭᠠ ᠪᠠᠢᠯᠳᠤᠭᠰᠠᠨ ᠃ ᠬᠠᠯᠬᠠ ᠭᠣᠣᠯ ᠤ᠋ᠨ ᠲᠡᠢᠨ ᠳᠠᠭᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠶᠠᠭᠤᠨ ᠤ᠋ ᠡᠮᠦᠨᠡ ᠪᠠᠶᠠᠨᠳ᠋ᠦ᠋ᠮᠠᠨ ᠣᠷᠣᠵᠤ ᠂ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠪᠠᠷ ᠶᠠᠪᠤᠯᠠ ᠃ ᠮᠠᠨ ᠤ᠋ ᠠᠩᠭᠢ ᠶ᠋ᠢᠨ ᠠᠷᠤ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠢᠷᠢᠨ ᠳ᠋ᠤ᠌ ᠪᠥᠭᠡᠮ ᠢᠶᠠᠷ ᠢ᠋ᠶ᠋ᠡᠨ ᠪᠠᠢᠭᠰᠠᠨ ᠲᠤᠯᠠ ᠲᠡᠨᠳᠡ ᠰᠢᠭᠤᠳ ᠣᠴᠢᠪᠠ ᠃
ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠣᠷᠣᠪᠠᠯ ᠲᠠᠨᠢᠳᠠᠭ ᠬᠥᠲᠥᠨ ᠡᠮᠡᠭᠲᠡᠢ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠨᠢ ᠱᠣᠭᠰᠢᠬᠤ ᠰᠢᠬᠠᠮ ᠣᠢᠷᠠᠳᠪᠠᠯ ᠲᠡᠳᠡ ᠨᠠᠮᠠ ᠶ᠋ᠢ ᠬᠠᠷᠠᠮᠠᠭᠴᠠ ᠮᠠᠢᠬᠠᠨ ᠭᠡᠷ ᠲᠦ᠍ ᠪᠡᠨ ᠦᠷᠭᠦᠭᠰᠡᠨ ᠲᠠᠷᠪᠠᠭᠠ ᠰᠢᠭ᠋ ᠭᠦᠶᠦᠯᠳᠦᠨ ᠣᠷᠣᠵᠠᠭᠠᠪᠠ᠃ ᠬᠡᠦᠬᠡᠨ ᠨᠦᠭᠥᠳ ᠦ᠋ᠨ ᠮᠠᠶᠢᠭᠲᠠᠢ ᠭᠡᠳᠡᠭ ᠨᠢ ᠭᠡᠵᠦ ᠪᠣᠳᠣᠭᠰᠠᠭᠠᠷ ᠵᠠᠬᠠ ᠶ᠋ᠢᠨ ᠭᠡᠷ ᠲᠦ᠍ ᠣᠷᠣᠪᠠᠯ ᠮᠠᠨ ᠤ᠋ ᠬᠢᠨ ᠦ᠌ ᠳᠠᠷᠤᠭᠠ ᠨᠠᠷ ᠤ᠋ᠨ ᠭᠡᠷ ᠪᠦᠯᠢ ᠶ᠋ᠢᠨ ᠳᠥᠷᠪᠡᠨ ᠡᠮᠡᠭᠲᠡᠢ ᠪᠠᠢᠭᠰᠠᠨ ᠤ᠋ ᠳᠣᠲᠣᠷᠠ ᠬᠦᠦ ᠪᠡᠨ ᠣᠨᠴᠠᠯᠠᠨ ᠵᠠᠬᠢᠵᠤ ᠥᠭᠭᠥᠭᠰᠡᠨ ᠲᠤᠯᠭᠤᠷ ᠭᠡᠳᠡᠭ ᠡᠮᠡᠭᠲᠡᠢ ᠴᠦ᠍ ᠪᠠᠰᠠ ᠪᠠᠢᠪᠠ ᠃ ᠲᠡᠳᠡᠨ ᠦ᠌ ᠮᠡᠨᠳᠦ ᠶ᠋ᠢ ᠮᠡᠳᠡᠪᠡᠯ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠂ ᠬᠠᠷᠢᠨ ᠵᠠᠷᠢᠮ ᠤ᠋ᠨ ᠬᠢᠨᠢ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠭᠠᠷᠴᠤ ᠪᠠᠢᠪᠠ ᠃ ᠭᠡᠨᠡᠳᠲᠡ ᠮᠠᠭᠤ ᠶᠠᠭᠤᠮᠠ ᠰᠡᠳᠬᠢᠯ ᠳ᠋ᠦ᠍ ᠣᠷᠣᠵᠤ ᠢᠷᠡᠭᠡᠳ ᠄《 ᠬᠦᠦ ᠮᠢᠨᠢ ᠂ ᠪᠠᠭᠠᠲᠤᠷ ᠮᠢᠨᠢ ᠬᠠᠮᠢᠭᠠ ᠪᠠᠢᠨᠠ? 》 ᠭᠡᠵᠦ ᠲᠡᠳᠡᠨ ᠡᠴᠡ ᠠᠰᠠᠭᠤᠪᠠ ᠃ ᠬᠣᠶᠠᠷ ᠬᠡᠦᠬᠡᠨ ᠪᠣᠰᠴᠤ ᠂ ᠨᠠᠮᠠ ᠶ᠋ᠢ ᠰᠤᠭᠤᠳᠠᠨ ᠨᠢᠳᠦᠨ ᠡᠴᠡ ᠪᠡᠨ ᠨᠢᠯᠪᠤᠰᠤ ᠳᠤᠰᠤᠯᠠᠭᠤᠯᠤᠨ᠄ 《 ᠳᠣᠷᠵᠢ ᠮᠢᠨᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ ᠃ ᠬᠦᠦ ᠴᠢᠨᠢ ᠪᠥᠮᠪᠦᠭᠡᠨ ᠳ᠋ᠦ᠍ ᠁》 ᠭᠡᠵᠦ ᠬᠡᠯᠡᠭᠡᠳ ᠴᠠᠭᠠᠱᠢ ᠶᠠᠭᠤ ᠭᠡᠵᠦ ᠶᠠᠷᠢᠭᠰᠠᠨ ᠢ᠋ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠃ ᠭᠡᠷ ᠡᠷᠭᠢᠯᠳᠦᠵᠦ ᠬᠠᠷᠠᠩᠭᠤᠢᠯᠠᠨ ᠳᠡᠭᠡᠷᠡ ᠡᠴᠡ ᠲᠦᠮᠡᠨ ᠵᠢᠩ ᠦ᠋ᠨ ᠬᠠᠷᠠ ᠴᠢᠯᠠᠭᠤ ᠤᠨᠠᠬᠤ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠪᠢ ᠭᠡᠷ ᠦ᠋ᠨ ᠪᠠᠭᠠᠨᠠ ᠠ᠋ᠴᠠ ᠪᠠᠷᠢᠵᠤ ᠨᠢᠳᠦ ᠪᠡᠨ ᠠᠨᠢᠪᠠ ᠃ ᠣᠯᠠᠨ ᠡᠮᠡᠭᠲᠡᠢ ᠰᠡᠳᠬᠢᠯ ᠢ᠋ ᠮᠢᠨᠢ ᠵᠠᠰᠠᠬᠤ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠴᠢᠬᠢᠨ ᠳ᠋ᠦ᠍ ᠮᠢᠨᠢ ᠬᠡᠳᠡᠭᠡᠨᠡ ᠶ᠋ᠢᠨ ᠳᠠᠭᠤ ᠰᠢᠭ᠋ ᠳᠦᠩᠭᠢᠨᠡᠵᠦ ᠪᠠᠢᠪᠠ ᠃ ᠬᠡᠰᠡᠭ ᠪᠠᠢᠭᠰᠠᠨ ᠤ᠋ ᠳᠠᠷᠠᠭᠠ ᠤᠬᠠᠭᠠᠨ ᠣᠷᠣᠵᠤ ᠄《 ᠲᠡᠭᠡᠭᠡᠳ ᠮᠢᠨᠦ ᠬᠦᠦ ᠶᠠᠭᠠᠬᠢᠭᠰᠠᠨ ᠪᠣᠢ? 》 ᠭᠡᠵᠦ ᠬᠠᠰᠬᠢᠷᠪᠠ ᠃
- ᠪᠢ ᠪᠠᠭᠠᠲᠤᠷ ᠢ᠋ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠣᠷᠣᠰᠢᠭᠤᠯᠤᠭᠰᠠᠨ ᠭᠡᠵᠦ ᠨᠢᠭᠡ ᠡᠮᠡᠭᠲᠡᠢ ᠬᠡᠯᠡᠪᠡ ᠃
- ᠳᠣᠯᠵᠢᠨ ᠠ᠋ᠴᠠ ᠮᠢᠨᠢ ᠦᠯᠡᠳᠡᠭᠰᠡᠨ ᠭᠠᠭᠴᠠ ᠦᠷᠡ ᠡᠴᠡ ᠪᠡᠨ ᠰᠠᠯᠵᠠᠢ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠡᠷᠦᠬᠡ ᠶ᠋ᠢ ᠨᠢ ᠲᠠᠲᠠᠵᠤ ᠬᠠᠶᠠᠭᠠ ᠶ᠋ᠢ ᠨᠢ ᠰᠢᠭᠤᠭᠰᠠᠨ ᠭᠡᠷ ᠪᠠᠢᠨ ᠪᠠᠢᠨ ᠬᠠᠷᠠᠩᠭᠤᠢᠯᠠᠨ ᠪᠦᠷᠬᠦᠵᠦ ᠪᠠᠢᠪᠠ ᠃ ᠨᠢᠳᠦᠨ ᠡᠴᠡ ᠮᠢᠨᠢ ᠨᠢᠯᠪᠤᠰᠤ ᠪᠤᠯᠠᠭ ᠤ᠋ᠨ ᠤᠰᠤ ᠮᠡᠲᠦ ᠠᠰᠬᠠᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠲᠤᠯᠭᠤᠷ ᠳᠡᠷᠭᠡᠳᠡ ᠮᠢᠨᠢ ᠢᠷᠡᠭᠡᠳ ᠨᠢᠭᠤᠷ ᠤᠷᠤᠭᠤ ᠤᠨᠵᠢᠭᠰᠠᠨ ᠦᠰᠦ ᠶ᠋ᠢ ᠮᠢᠨᠢ ᠢᠯᠢᠵᠦ ᠵᠠᠰᠠᠭᠠᠳ ᠄《 ᠳᠣᠷᠵᠢ ᠮᠢᠨᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ ᠃ ᠬᠠᠲᠠᠭᠤ ᠲᠡᠢᠨ ᠪᠣᠯᠵᠤ ᠴᠢᠮᠠ ᠶ᠋ᠢ ᠬᠦᠦ ᠡᠴᠡ ᠴᠢᠨᠢ ᠂ ᠨᠠᠮᠠ ᠶ᠋ᠢ ᠨᠥᠬᠥᠷ ᠡᠴᠡ ᠮᠢᠨᠢ ᠂ ᠣᠯᠠᠨ ᠡᠬᠡ ᠡᠴᠢᠭᠡ ᠶ᠋ᠢ ᠦᠷᠡ ᠡᠴᠡ ᠨᠢ ᠰᠠᠯᠭᠠᠭᠰᠠᠨ ᠰᠢᠦ ᠳᠠ 》ᠭᠡᠵᠦ ᠬᠡᠯᠡᠭᠡᠳ ᠠᠯᠴᠢᠭᠤᠷ ᠭᠠᠷᠭᠠᠵᠤ ᠨᠢᠯᠪᠤᠰᠤ ᠶ᠋ᠢ ᠮᠢᠨᠢ ᠠᠷᠴᠢᠭᠰᠠᠨ ᠶᠤᠮ ᠰᠠᠨ ᠭᠡᠵᠦ ᠬᠡᠯᠡᠭᠡᠳ ᠳᠣᠷᠵᠢ ᠭᠤᠸᠠᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠩᠨᠠᠢ ᠪᠠᠨ ᠲᠤᠯᠵᠤ ᠳᠣᠷᠣᠭᠰᠢ ᠬᠠᠷᠠᠪᠠ ᠃ ᠢᠩᠭᠢᠵᠦ ᠬᠡᠰᠡᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠠᠳᠠ ᠥᠭᠡᠳᠡ ᠬᠠᠷᠠᠬᠤ ᠳ᠋ᠤ᠌ ᠨᠢ ᠨᠢᠳᠦ ᠨᠢ ᠭᠢᠯᠲᠠᠭᠠᠨᠠᠨ ᠭᠥᠯᠢᠷᠡᠵᠦ ᠂ ᠤᠷᠤᠭᠤᠯ ᠨᠢ ᠨᠡᠢᠯᠡᠵᠦ ᠶᠠᠳᠠᠨ ᠳᠠᠳᠠᠭᠠᠨᠠᠵᠤ ᠂ ᠨᠢᠯᠪᠤᠰᠤ ᠲᠣᠰᠤᠯᠠᠭᠠ ᠦᠭᠡᠢ ᠪᠣᠯᠪᠠᠴᠤ ᠵᠢᠷᠦᠬᠡ ᠨᠢ ᠭᠠᠰᠠᠯᠤᠨ ᠤᠬᠢᠯᠠᠵᠤ ᠪᠠᠢᠭᠠ ᠨᠢ ᠲᠣᠳᠣᠷᠬᠠᠢ ᠮᠡᠳᠡᠭᠳᠡᠵᠦ ᠪᠢᠯᠡ ᠃
ᠶᠠᠮᠠᠷ ᠴᠤ᠌ ᠴᠢᠮᠡᠭᠡ ᠦᠭᠡᠢ ᠨᠡᠯᠢᠶᠡᠳ ᠬᠡᠳᠦᠨ ᠮᠢᠨᠦ᠋ᠲ ᠪᠠᠢᠪᠠ ᠃ ᠳᠣᠷᠵᠢ ᠭᠤᠸᠠᠢ ᠶᠠᠷᠢᠶᠠ ᠪᠠᠨ ᠦᠷᠭᠦᠯᠵᠢᠯᠡᠭᠦᠯᠬᠦ ᠭᠡᠵᠦ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠭᠠᠳ ᠳᠠᠭᠤ ᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠃ ᠭᠡᠪᠡᠴᠦ ᠬᠡᠰᠡᠭ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠱᠠᠯ ᠥᠭᠡᠷᠡ ᠬᠥᠭᠲᠡᠢ ᠨᠠᠮᠤᠭᠤᠨ ᠳᠠᠭᠤ ᠪᠠᠷ ᠄
- ᠬᠣᠵᠢᠮ ᠰᠣᠨᠣᠰᠪᠠᠯ ᠪᠠᠶᠠᠨᠳ᠋ᠦ᠋ᠮᠠᠨ ᠢ᠋ ᠶᠠᠫᠣᠨ ᠤ᠋ ᠣᠩᠭᠣᠴᠠ ᠪᠥᠮᠪᠥᠭᠡᠳᠡᠬᠦ ᠳ᠋ᠦ᠍ ᠬᠦᠦ ᠮᠢᠨᠢ ᠨᠢᠭᠡ ᠡᠮᠡᠭᠲᠡᠢ ᠶ᠋ᠢᠨ ᠬᠠᠮᠲᠤ ᠣᠺᠣᠫ ( ᠫᠤᠤ ᠶ᠋ᠢᠨ ᠰᠤᠮᠤᠨ ᠠ᠋ᠴᠠ ᠬᠠᠯᠬᠠᠯᠠᠨ ᠣᠬᠣᠭᠰᠠᠨ ᠨᠦᠬᠡ ) ᠳ᠋ᠦ᠍ ᠣᠷᠣᠭᠰᠠᠨ ᠪᠣᠯᠪᠠᠴᠤ ᠶᠠᠭ ᠳᠡᠭᠡᠷᠡ ᠡᠴᠡ ᠨᠢ ᠪᠥᠮᠪᠥᠭᠡ ᠪᠠᠭᠤᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ ᠁ ᠪᠣᠳᠣᠬᠤ ᠲᠣᠰᠤᠮ ᠯᠠ ᠮᠢᠨᠦ ᠪᠠᠭᠠᠲᠤᠷ ᠠᠮᠢᠳᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠭᠠᠳ ᠪᠠᠶᠠᠨᠳ᠋ᠦ᠋ᠮᠠᠨ ᠦ᠌ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠬᠠᠷᠠᠭᠳᠠᠭᠰᠠᠨ ᠬᠡᠦᠬᠡᠳ ᠪᠦᠬᠦᠨ ᠢ᠋ ᠠᠵᠢᠭᠯᠠᠨ ᠶᠠᠪᠤᠵᠤ ᠪᠢᠯᠡ ᠃ ᠠᠮᠢᠳᠤᠷᠠᠯ ᠭᠡᠳᠡᠭ ᠬᠡᠴᠡᠭᠦᠦ ᠶᠦ᠍ᠮ ᠰᠢᠦ ᠬᠦᠦ ᠮᠢᠨᠢ ᠃ ᠭᠠᠭᠴᠠ ᠯᠠ ᠨᠠᠳᠠ ᠤᠴᠠᠷᠠᠭᠰᠠᠨ ᠬᠠᠲᠠᠭᠤ ᠵᠣᠪᠠᠯᠠᠩ ᠪᠤᠰᠤᠳ ᠲᠤ᠌ ᠪᠦᠦ ᠲᠣᠬᠢᠶᠠᠯᠳᠤᠭᠠᠰᠠᠢ ᠭᠡᠵᠦ ᠪᠢ ᠬᠦᠰᠡᠳᠡᠭ ᠶᠦ᠍ᠮ ᠭᠡᠳ ᠳᠣᠷᠵᠢ ᠭᠤᠸᠠᠢ ᠯᠠ ᠶ᠋ᠢᠨ ᠤᠷᠤᠰᠤᠭᠰᠠᠨ ᠲᠣᠰᠣ ᠶ᠋ᠢ ᠶᠠᠮᠠᠷ ᠴᠤ᠌ ᠵᠣᠷᠢᠯᠭᠠ ᠦᠭᠡᠢ ᠂ ᠬᠢᠮᠤᠰᠤ ᠪᠠᠷ ᠢ᠋ᠶ᠋ᠠᠨ ᠤᠷᠤᠯᠳᠤᠵᠤ ᠪᠠᠢᠪᠠ ᠃
ᠪᠢᠳᠡ ᠬᠣᠶᠠᠷ ᠳᠠᠭᠤ ᠦᠭᠡᠢ ᠨᠡᠯᠢᠶᠡᠳ ᠤᠳᠠᠭᠠᠨ ᠰᠠᠭᠤᠪᠠ ᠃ ᠪᠢ ᠶᠠᠭᠤ ᠬᠢᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠵᠥᠪᠬᠡᠨ ᠯᠡ ᠡᠨᠡ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠢ᠋ ᠶᠠᠭᠠᠬᠢᠪᠠᠯ ᠬᠤᠪᠢᠶᠠᠯᠴᠠᠵᠤ ᠪᠣᠯᠬᠤ ᠪᠣᠯ ᠭᠡᠵᠦ ᠪᠣᠳᠣᠵᠤ ᠪᠠᠢᠯᠠ ᠃ ᠲᠡᠭᠡᠭᠡᠳ ᠠᠷᠭᠠ ᠪᠠᠷᠠᠭᠳᠠᠬᠤ ᠳ᠋ᠤ᠌ ᠪᠠᠨ ᠬᠣᠶᠠᠷ ᠠᠶᠠᠭᠠᠨ ᠳ᠋ᠤ᠌ ᠪᠠᠨ ᠠᠷᠢᠬᠢ ᠬᠢᠵᠦ ᠄
- ᠳᠣᠷᠵᠢ ᠭᠤᠸᠠᠢ ᠤᠤᠭᠤᠭᠠᠴᠢ ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠠᠯᠭᠤᠷᠬᠠᠨ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠪᠡ ᠃ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠭᠠᠩᠳᠠᠭᠰᠠᠨ ᠲᠡᠭᠦᠨ ᠦ᠌ ᠬᠦᠷᠡᠩ ᠴᠢᠷᠠᠢ ᠪᠠᠷᠵᠠᠢᠵᠤ ᠂ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠨᠢ ᠥᠷᠴᠢᠯᠡᠨ ᠵᠠᠩᠭᠢᠷᠠᠵᠤ ᠨᠢᠳᠦᠨ ᠳ᠋ᠦ᠍ ᠨᠢ ᠪᠠᠢᠨ ᠪᠠᠢᠨ ᠨᠢᠯᠪᠤᠰᠤ ᠲᠤᠨᠤᠷᠠᠨ ᠢᠷᠡᠪᠡᠴᠦ ᠲᠡᠨᠳᠡ ᠪᠡᠨ ᠰᠢᠩᠭᠡᠨ ᠠᠯᠠᠭᠠ ᠪᠣᠯᠵᠤ ᠪᠠᠢᠪᠠ ᠃ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠬᠥᠮᠦᠨ ᠦ᠌ ᠨᠢᠯᠪᠤᠰᠤ ᠪᠡᠶᠡ ᠳ᠋ᠦ᠍ ᠪᠡᠨ ᠰᠢᠩᠭᠡᠵᠦ ᠰᠤᠷᠤᠭᠰᠠᠨ ᠪᠠᠢᠳᠠᠭ ᠭᠡᠳᠡᠭ ᠦᠨᠡᠨ ᠠᠵᠠᠢ ᠃
ᠲᠠᠪᠤ
- ᠵᠠ ᠲᠡᠭᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ ᠳᠠ ᠃ ᠭᠣᠩ ᠪᠡᠶᠡ ᠭᠣᠵᠣᠩ ᠲᠣᠯᠣᠭᠠᠢ ᠪᠣᠯᠵᠤ ᠦᠯᠡᠳᠡᠭᠡᠳ ᠬᠣᠲᠠ ᠳ᠋ᠤ᠌ ᠢᠷᠡᠯᠡ ᠃ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠢ ᠪᠡᠨ ᠵᠢᠷᠭᠠᠯᠲᠠᠢ ᠶᠠᠪᠤᠵᠤ ᠪᠠᠢᠭᠠ ᠬᠥᠮᠦᠨ ᠢ᠋ ᠬᠠᠷᠠᠬᠤ ᠪᠦᠷᠢ ᠨᠠᠳᠠ ᠡᠨᠡ ᠪᠦᠬᠦᠨ ᠪᠠᠢᠭᠰᠠᠨ ᠰᠢᠦ ᠳᠠ ᠭᠡᠵᠦ ᠪᠣᠳᠣᠭᠳᠠᠭᠠᠳ ᠰᠡᠳᠬᠢᠯ ᠬᠠᠷᠠᠯᠠᠵᠤ ᠶᠠᠪᠤᠳᠠᠭ ᠪᠣᠯᠪᠠ ᠃ ᠰᠠᠢᠨ ᠪᠠᠢᠯᠳᠤᠭᠰᠠᠨ ᠭᠡᠵᠦ ᠱᠠᠩᠨᠠᠯ ᠴᠤ᠌ ᠬᠦᠷᠲᠡᠯᠡ ᠃ ᠴᠣᠯᠠ ᠲᠤᠰᠢᠶᠠᠯ ᠴᠤ᠌ ᠲᠠᠪᠰᠢᠯᠠ ᠃ ᠬᠣᠲᠠ ᠶ᠋ᠢᠨ ᠨᠢᠭᠡ ᠬᠣᠷᠢᠶᠠᠨ ᠤ ᠳᠠᠷᠤᠭᠠ ᠪᠣᠯᠵᠤ ᠨᠢᠭᠡ ᠬᠠᠩᠬᠠᠢ ᠪᠠᠢᠷᠢᠨ ᠳ᠋ᠤ᠌ ᠣᠷᠣᠪᠠ ᠃ ᠡᠳᠦᠷ ᠲᠦ᠍ ᠨᠢ ᠠᠵᠢᠯ ᠢ᠋ᠶ᠋ᠠᠨ ᠬᠢᠵᠦ ᠰᠥᠨᠢ ᠳ᠋ᠦ᠍ ᠨᠢ ᠳᠤᠯᠵᠢᠨ ᠂ ᠪᠠᠭᠠᠲᠤᠷ ᠬᠣᠶᠠᠷ ᠢ᠋ ᠪᠡᠨ ᠪᠣᠳᠣᠨ ᠭᠠᠰᠢᠭᠤᠳᠠᠵᠤ ᠪᠠᠢᠳᠠᠭ ᠪᠠᠢᠪᠠ ᠃ ᠲᠡᠭᠡᠲᠡᠯᠡ ᠨᠢᠭᠡ ᠡᠳᠦᠷ ᠨᠥᠬᠥᠭᠡ ᠴᠢᠯᠠᠭᠤᠨ ᠢᠷᠡᠵᠦ ᠂ ᠲᠡᠭᠦᠨ ᠲᠡᠢ ᠬᠠᠮᠲᠤ ᠠᠢᠯ ᠬᠡᠰᠦᠬᠦ ᠪᠣᠯᠪᠠ ᠭᠡᠳ ᠳᠣᠷᠵᠢ ᠭᠤᠸᠠᠢ ᠶᠠᠷᠢᠶᠠ ᠪᠠᠨ ᠲᠠᠰᠤᠯᠵᠤ ᠬᠡᠰᠡᠭ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠣᠮᠣᠭᠣᠯᠲᠤᠭᠰᠠᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠴᠢᠭᠢᠭᠯᠡᠭᠦᠯᠦᠭᠡᠳ ᠄
- ᠲᠡᠷᠡ ᠡᠳᠦᠷ ᠯᠡ ᠲᠡᠭᠦᠨ ᠲᠡᠢ ᠶᠠᠪᠤᠳᠠᠭ ᠦᠭᠡᠢ ᠪᠠᠢᠭᠰᠠᠨ ᠶᠤᠮ ᠭᠡᠳ ᠭᠥᠯᠢᠷᠡᠨ ᠪᠣᠳᠣᠯ ᠪᠣᠯᠵᠤ ᠰᠠᠭᠤᠪᠠ ᠃ ᠪᠢ ᠲᠡᠭᠦᠨ ᠡᠴᠡ ᠨᠢᠳᠦ ᠪᠡᠨ ᠰᠠᠯᠭᠠᠭᠰᠠᠨ ᠦᠭᠡᠢ ᠃ ᠳᠣᠷᠵᠢ ᠭᠤᠸᠠᠢ ᠶ᠋ᠢᠨ ᠨᠢᠳᠦ ᠨᠢ ᠲᠣᠮᠣ ᠪᠠᠭᠠ ᠪᠣᠯᠵᠤ ᠰᠣᠯᠪᠢᠯᠵᠠᠨ ᠂ ᠬᠥᠮᠥᠰᠬᠡ ᠨᠢ ᠪᠠᠢᠨ ᠪᠠᠢᠨ ᠵᠠᠩᠭᠢᠷᠠᠨ ᠳᠠᠯᠪᠢᠷᠠᠵᠤ ᠪᠠᠢᠪᠠ ᠃ ᠲᠡᠭᠡᠭᠡᠳ ᠳᠠᠯᠤ ᠪᠠᠨ ᠬᠥᠳᠡᠯᠭᠡᠵᠦ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠨᠠᠮᠤᠭᠤᠬᠠᠨ ᠪᠣᠯᠪᠠᠴᠤ ᠲᠣᠳᠣ ᠳᠠᠭᠤ ᠪᠠᠷ ᠄
- ᠴᠢᠯᠠᠭᠤᠨ ᠬᠣᠲᠠ ᠶ᠋ᠢᠨ ᠨᠢᠭᠡ ᠠᠩᠭᠢ ᠳ᠋ᠤ᠌ ᠰᠠᠯᠠᠭᠠᠨ ᠳᠠᠷᠤᠭᠠ ᠪᠠᠷ ᠠᠵᠢᠯᠯᠠᠵᠤ ᠪᠠᠢᠪᠠ ᠃ ᠨᠢᠭᠡ ᠡᠳᠦᠷ ᠴᠢᠯᠠᠭᠤᠨ ᠵᠠᠮ ᠳ᠋ᠤ᠌ ᠪᠠᠨ ᠳᠤᠯᠮᠠ ᠭᠡᠳᠡᠭ ᠬᠡᠦᠬᠡᠨ ᠲᠡᠢ ᠲᠠᠨᠢᠯᠴᠠᠪᠠ ᠃ ᠲᠡᠭᠡᠭᠡᠳ ᠄《 ᠬᠣᠶᠠᠭᠤᠯᠠ ᠲᠡᠳᠡᠨ ᠦ᠌ ᠳ᠋ᠦ᠍ ᠬᠠᠮᠲᠤ ᠣᠴᠢᠶᠠ ᠂ ᠪᠢ ᠰᠠᠭᠤᠬᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ ᠃ ᠴᠢ ᠯᠡ ᠬᠡᠯᠡᠵᠦ ᠥᠭᠴᠦ ᠮᠠᠭᠤ ᠡᠪᠦᠭᠡᠨ ᠢ᠋ᠶ᠋ᠡᠨ ᠡᠬᠡᠨᠡᠷ ᠲᠡᠢ ᠪᠣᠯᠭᠠᠵᠤ ᠥᠭᠭᠥᠭᠡᠴᠢ ᠳ᠋ᠠ 》 ᠭᠡᠪᠡ ᠃
ᠳᠤᠯᠮᠠ ᠪᠣᠯ ᠬᠣᠲᠠ ᠶ᠋ᠢᠨ ᠨᠢᠭᠡ ᠪᠠᠢᠭᠤᠯᠭᠠ ᠳ᠋ᠤ᠌ ᠮᠠᠰᠢᠨ ᠤ᠋ ᠪᠢᠴᠢᠭᠡᠴᠢ ᠪᠡᠷ ᠠᠵᠢᠯᠯᠠᠳᠠᠭ ᠬᠥᠮᠦᠨ ᠪᠠᠢᠪᠠ ᠃ ᠪᠢᠳᠡ ᠳᠤᠯᠮᠠ ᠶ᠋ᠢᠨ ᠳ᠋ᠦ᠍ ᠣᠷᠣᠢ ᠪᠣᠯᠲᠠᠯᠠ ᠰᠠᠭᠤᠵᠤ ᠪᠥᠬᠡ ᠴᠡᠭᠡ ᠨᠢᠰᠠᠯᠤᠭᠠᠳ ( ᠱᠠᠭᠠ ᠣᠷᠬᠢᠵᠤ ᠠᠳᠠᠯᠢ ᠳᠦᠷᠰᠦ ᠪᠡᠷ ᠨᠢᠰᠠᠯᠵᠤ ᠨᠠᠭᠠᠳᠬᠤ ) ᠪᠤᠰᠤᠳ ᠠᠢᠯ ᠢ᠋ᠶ᠋ᠠᠷ ᠨᠢ ᠬᠡᠰᠦᠭᠰᠡᠨ ᠦᠭᠡᠢ ᠃ ᠰᠥᠨᠢ ᠪᠢᠳᠡ ᠬᠣᠶᠠᠷ ᠢ᠋ ᠳᠤᠯᠮᠠ ᠭᠠᠷᠭᠠᠵᠤ ᠥᠭᠭᠥᠭᠡᠳ ᠄
- ᠲᠠ ᠨᠠᠷ ᠮᠠᠨ ᠤ᠋ ᠬᠢ ᠪᠡᠷ ᠢᠷᠡᠵᠦ ᠪᠠᠢᠭᠠᠷᠠᠢ ᠭᠡᠯᠡ ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠪᠢᠳᠡ ᠬᠣᠶᠠᠷ ᠳᠤᠯᠮᠠ ᠶ᠋ᠢᠨ ᠳ᠋ᠦ᠍ ᠬᠡᠳᠦ ᠳᠠᠬᠢᠨ ᠣᠴᠢᠵᠤ ᠲᠡᠭᠦᠨ ᠲᠡᠢ ᠰᠠᠢᠨ ᠲᠠᠨᠢᠯᠴᠠᠯᠠ ᠃ ᠠᠮᠠᠷᠠᠯᠲᠠ ᠶ᠋ᠢᠨ ᠨᠢᠭᠡ ᠡᠳᠦᠷ ᠴᠢᠯᠠᠭᠤᠨ ᠪᠢ ᠬᠣᠶᠠᠷ ᠳᠤᠯᠮᠠ ᠶ᠋ᠢᠨ ᠳ᠋ᠦ᠍ ᠣᠴᠢᠵᠤ ᠲᠣᠭᠯᠠᠵᠤ ᠪᠠᠢᠭᠠᠳ ᠲᠢᠶᠡᠲ᠋ᠷ ᠲᠤ᠌ ᠣᠴᠢᠵᠤ ᠵᠦᠴᠦᠭᠡ ᠦᠵᠡᠬᠦ ᠪᠡᠷ ᠪᠣᠯᠪᠠ ᠃ ᠴᠢᠯᠠᠭᠤᠨ ᠪᠠᠯᠧᠲ ᠠᠪᠬᠤ ᠪᠠᠷ ᠶᠠᠪᠤᠬᠤ ᠳ᠋ᠤ᠌ ᠪᠠᠨ᠄《ᠵᠠ ᠡᠪᠦᠭᠡᠨ ᠮᠢᠨᠢ ᠂ ᠴᠢ ᠥᠨᠥᠳᠥᠷ ᠡᠨᠡ ᠬᠡᠦᠬᠡᠨ ᠲᠡᠢ ᠰᠠᠢᠨ ᠶᠠᠷᠢᠨᠠ ᠰᠢᠦ 》ᠭᠡᠵᠦ ᠨᠠᠳᠠ ᠳ᠋ᠤ᠌ ᠬᠡᠯᠡᠪᠡ ᠃ ᠳᠤᠯᠮᠠ ᠲᠠᠢ ᠬᠣᠶᠠᠭᠤᠯᠠ ᠪᠠᠨ ᠦᠯᠡᠳᠡᠵᠦ ᠶᠠᠷᠢᠶᠠ ᠪᠠᠨ ᠡᠬᠢᠯᠡᠬᠦ ᠪᠣᠯᠬᠤ ᠳ᠋ᠤ᠌ ᠶᠠᠷᠢᠬᠤ ᠶᠠᠭᠤᠮᠠ ᠪᠠᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠠᠪᠠᠴᠤ ᠶᠠᠭᠠᠬᠢᠵᠤ ᠡᠬᠢᠯᠡᠵᠦ ᠂ ᠬᠡᠷᠬᠢᠨ ᠳᠠᠭᠤᠰᠬᠠᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠬᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠬᠠᠯᠵᠠ ᠳᠠᠭᠠᠷᠢᠭᠠᠳ ᠦᠵᠡᠶᠡ ᠭᠡᠵᠦ ᠰᠢᠢᠳᠦᠭᠡᠳ ᠄
- ᠪᠢ ᠴᠢᠯᠠᠭᠤᠨ ᠲᠠᠢ ᠣᠯᠠᠨ ᠵᠢᠯ ᠠᠵᠢᠯᠯᠠᠭᠰᠠᠨ ᠃ ᠴᠢᠯᠠᠭᠤᠨ ᠬᠥᠮᠦᠨ ᠰᠠᠢᠲᠠᠢ ᠂ ᠡᠪᠯᠢᠭ ᠬᠥᠮᠦᠨ ᠰᠢᠦ ᠃ ᠴᠢᠮᠠ ᠳ᠋ᠤ᠌ ᠰᠡᠳᠬᠢᠯ ᠲᠡᠢ ᠪᠣᠯᠤᠭᠠᠳ ᠪᠠᠢᠭᠠ ᠶ᠋ᠢ ᠨᠢ ᠴᠢ ᠯᠠᠪ ᠭᠠᠳᠠᠷᠯᠠᠵᠤ ᠪᠠᠢᠭᠠ ᠪᠠᠢᠬᠤ ᠠ᠋ ᠃ ᠲᠠ ᠬᠣᠶᠠᠷ ᠰᠠᠭᠤᠬᠤ ᠶᠤᠮ ᠪᠣᠯ ᠠᠶᠠᠲᠠᠢ ᠰᠠᠢᠬᠠᠨ ᠭᠡᠷ ᠪᠦᠯᠢ ᠪᠣᠯᠤᠨᠠ ᠭᠡᠵᠦ ᠳᠤᠯᠮᠠ ᠳ᠋ᠤ᠌ ᠦᠭᠡ ᠪᠡᠨ ᠡᠪᠯᠡᠭᠦᠯᠦᠨ ᠶᠠᠳᠠᠵᠤ ᠬᠡᠯᠡᠪᠡ ᠃ ᠳᠤᠯᠮᠠ ᠪᠣᠳᠣᠯᠬᠢᠯᠠᠨ ᠬᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠠᠨᠴᠤᠢ ᠶ᠋ᠢ ᠤᠷᠤᠯᠳᠤᠵᠤ ᠪᠠᠢᠭᠠᠳ ᠄
- ᠴᠢᠯᠠᠭᠤᠨ ᠴᠤ᠌ ᠰᠠᠢᠨ ᠯᠠ ᠬᠥᠮᠦᠨ ᠪᠠᠢᠬᠤ ᠠ᠋ ᠃ ᠭᠡᠪᠡᠴᠦ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠬᠣᠯᠪᠣᠬᠤ ᠳ᠋ᠤ᠌ ᠰᠠᠢᠨ ᠪᠠᠢᠬᠤ ᠶ᠋ᠢᠨ ᠬᠠᠮᠲᠤ ᠰᠡᠳᠬᠢᠯ ᠳ᠋ᠦ᠍ ᠮᠢᠨᠢ ᠲᠣᠬᠢᠷᠠᠭᠰᠠᠨ ᠰᠠᠢᠬᠠᠨ ᠪᠠᠢᠬᠤ ᠬᠡᠷᠡᠭᠲᠡᠢ ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠳᠦᠭᠦᠷᠡᠩ ᠵᠢᠷᠭᠠᠯᠲᠠᠢ ᠭᠡᠷ ᠪᠦᠯᠢ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠦ ᠳ᠋ᠠ ᠭᠡᠪᠡ ᠃
- ᠲᠡᠷᠡ ᠴᠦ᠍ ᠲᠡᠢᠮᠦ ᠯᠠ ᠪᠠᠢᠬᠤ ᠠ᠋ ᠃ ᠮᠠᠨ ᠤ᠋ ᠴᠢᠯᠠᠭᠤᠨ ᠠᠯᠢ ᠴᠤ᠌ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠰᠠᠢᠬᠠᠨ ᠡᠷᠡ ᠃ ᠴᠢᠮᠠ ᠳ᠋ᠤ᠌ ᠶᠡᠬᠡ ᠯᠡ ᠢᠲᠡᠭᠡᠵᠦ ᠪᠠᠢᠳᠠᠭ ᠬᠥᠮᠦᠨ ᠶᠦ᠍ᠮ ᠰᠢᠦ ᠭᠡᠵᠦ ᠨᠠᠮᠠ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠳᠤᠯᠮᠠ ᠶᠣᠵᠣᠲᠠᠢ ᠢᠨᠢᠶᠡᠮᠰᠦᠭᠯᠡᠵᠦ᠄
- ᠳᠤᠷᠠ ᠦᠭᠡᠢ ᠯᠠᠮᠠ ᠶ᠋ᠢ ᠳᠠᠷᠤᠵᠤ ᠪᠠᠢᠵᠤ ᠰᠠᠬᠢᠯ ᠥᠭᠭᠥᠨᠡ ᠭᠡᠭᠴᠢ ᠪᠡᠷ ᠰᠡᠳᠬᠢᠯ ᠦᠭᠡᠢ ᠪᠣᠯ ᠬᠡᠴᠡᠭᠦᠦ ᠰᠢᠦ ᠳ᠋ᠠ ᠃ ᠬᠠᠷᠢᠨ ᠁ ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠵᠤ ᠳᠣᠭᠣᠭᠰᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄《 ᠬᠥᠮᠦᠨ ᠂ ᠬᠥᠮᠦᠨ ᠦ᠌ ᠪᠣᠳᠣᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠳᠡᠭ ᠪᠣᠯ ᠰᠠᠢᠬᠠᠨ ᠠ᠋ 》ᠭᠡᠳ ᠨᠠᠳᠠ ᠤᠷᠤᠭᠤ ᠬᠠᠷᠠᠬᠤ ᠳ᠋ᠤ᠌ ᠨᠢ ᠨᠥᠬᠥᠭᠡ ᠰᠠᠶᠢᠬᠠᠨ ᠤ ᠶᠣᠵᠣᠲᠠᠢ ᠢᠨᠢᠶᠡᠮᠰᠦᠭᠯᠡᠯ ᠨᠢ ᠠᠯᠢ ᠡᠷᠲᠡ ᠦᠭᠡᠢ ᠪᠣᠯᠤᠭᠠᠳ ᠠᠷᠭᠠ ᠨᠢ ᠪᠠᠷᠠᠭᠳᠠᠭᠰᠠᠨ ᠭᠣᠮᠣᠳᠠᠯ ᠨᠢᠳᠦᠨ ᠳ᠋ᠦ᠍ ᠨᠢ ᠲᠣᠳᠣᠷᠠᠵᠤ ᠪᠠᠢᠪᠠ ᠃
ᠨᠥᠬᠥᠷ ᠲᠦ᠍ ᠪᠡᠨ ᠡᠬᠡᠨᠡᠷ ᠣᠯᠵᠤ ᠥᠭᠬᠦ ᠭᠡᠰᠡᠨ ᠪᠢᠰᠢ ᠂ ᠥᠪᠡᠷ ᠢ᠋ᠶ᠋ᠡᠨ ᠬᠡᠷᠡᠭ ᠲᠦ᠍ ᠣᠷᠣᠬᠤ ᠪᠣᠯᠤᠭᠰᠠᠨ ᠢ᠋ ᠳᠤᠯᠮᠠ ᠶ᠋ᠢᠨ ᠨᠠᠳᠠ ᠤᠷᠤᠭᠤ ᠰᠢᠷᠲᠡᠵᠦ ᠪᠠᠢᠭᠠ ᠨᠢᠳᠦᠨ ᠡᠴᠡ ᠣᠢᠯᠠᠭᠠᠪᠠ ᠃ ᠪᠢ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠭᠠᠷᠤᠭᠠᠳ ᠭᠤᠳᠤᠮᠵᠢ ᠪᠠᠷ ᠶᠠᠪᠤᠵᠤ ᠪᠠᠢᠲᠠᠯᠠ ᠭᠤᠷᠪᠠᠨ ᠪᠢᠯᠧᠲ ᠠᠪᠤᠭᠠᠳ ᠢᠷᠡᠵᠦ ᠶᠠᠪᠤᠭᠠ ᠴᠢᠯᠠᠭᠤᠨ ᠲᠠᠢ ᠲᠠᠭᠠᠷᠠᠯᠳᠤᠵᠤ ᠪᠦᠬᠦ ᠶᠠᠪᠤᠳᠠᠯ ᠢ᠋ ᠢᠯᠠᠨ ᠳᠠᠯᠠᠨ ᠦᠭᠡᠢ ᠬᠡᠯᠡᠭᠰᠡᠨ ᠳ᠋ᠦ᠍ ᠨᠢᠭᠡ ᠶᠡᠬᠡ ᠬᠠᠷᠠᠮᠰᠠᠵᠤ ᠭᠣᠮᠣᠳᠠᠬᠤ ᠰᠢᠨᠵᠢ ᠦᠭᠡᠢ᠄《 ᠮᠣᠩᠭᠣᠯ ᠳ᠋ᠤ᠌ ᠬᠡᠦᠬᠡᠨ ᠮᠤᠩᠳᠠᠭᠰᠠᠨ ᠪᠢᠰᠢ 》ᠭᠡᠪᠡ ᠃
- ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠂ ᠮᠣᠩᠭᠣᠯ ᠳ᠋ᠤ᠌ ᠬᠡᠦᠬᠡᠨ ᠮᠤᠩᠳᠠᠬᠤ ᠦᠭᠡᠢ ᠨᠢ ᠦᠨᠡᠨ ᠪᠣᠯᠪᠠᠴᠤ ᠰᠡᠳᠬᠢᠯ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠦᠨᠡᠨᠴᠢ ᠬᠠᠨᠢ ᠣᠯᠤᠨᠠ ᠭᠡᠳᠡᠭ ᠠᠮᠠᠷ ᠦᠭᠡᠢ ᠬᠡᠷᠡᠭ ᠃ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠣᠴᠢᠵᠤ ᠳᠤᠯᠮᠠ ᠲᠠᠢ ᠰᠠᠢᠨ ᠶᠠᠷᠢᠭ ᠭᠡᠯᠡ ᠃
- ᠲᠡᠷᠡ ᠵᠡᠷᠭᠡ ᠶ᠋ᠢᠨ ᠢᠲᠠᠭᠤ ( ᠨᠢᠭᠡ ᠲᠥᠷᠥᠯ ᠦ᠋ᠨ ᠰᠢᠪᠠᠭᠤ ) ᠶ᠋ᠢ ᠭᠤᠶᠤᠵᠤ ᠶᠠᠪᠤᠳᠠᠭ ᠡᠷᠡ ᠪᠢᠰᠢ ᠠ᠋ ᠭᠡᠵᠦ ᠴᠢᠯᠠᠭᠤᠨ ᠶᠡᠬᠡ ᠯᠡ ᠪᠠᠷᠳᠠᠮ ᠬᠡᠯᠡᠨᠡ ᠃
- ᠡᠪᠦᠭᠡᠨ ᠮᠢᠨᠢ ᠂ ᠴᠢ ᠦᠨᠡᠬᠡᠷ ᠰᠡᠳᠬᠢᠯ ᠲᠠᠢ ᠶᠤᠮ ᠪᠣᠯ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠂ ᠰᠠᠢᠨ ᠶᠠᠷᠢᠬᠤ ᠬᠡᠷᠡᠭᠲᠡᠢ ᠃ ᠳᠤᠯᠮᠠ ᠮᠠᠭᠤ ᠬᠥᠮᠦᠨ ᠪᠢᠰᠢ ᠰᠢᠦ ᠭᠡᠬᠦ ᠳ᠋ᠦ᠍ ᠮᠢᠨᠢ ᠴᠢᠯᠠᠭᠤᠨ ᠰᠦᠷᠡᠬᠡᠢ ᠤᠴᠠᠭᠠᠷᠯᠠᠩᠭᠤᠢ ᠪᠠᠷ᠄
- ᠳᠤᠯᠮᠠ ᠶ᠋ᠢ ᠴᠢ ᠲᠡᠭᠡᠵᠦ ᠬᠦᠰᠡᠭᠡᠳ ᠪᠠᠢᠭᠠ ᠶᠤᠮ ᠪᠣᠯ ᠥᠪᠡᠷ ᠢ᠋ᠶ᠋ᠡᠨ ᠣᠴᠢᠵᠤ ᠶᠠᠷᠢᠭᠠᠳ ᠯᠠ ᠥᠪᠡᠷ ᠢ᠋ᠶ᠋ᠡᠨ ᠰᠠᠭᠤᠬᠤ ᠦᠭᠡᠢ ᠦᠦ ᠭᠡᠵᠦ ᠬᠡᠭᠵᠢᠭᠦᠨ ᠬᠡᠯᠡᠪᠡ ᠃ ᠰᠠᠢᠬᠠᠨ ᠰᠡᠳᠬᠢᠯ ᠢ᠋ ᠮᠢᠨᠢ ᠳᠣᠷᠣᠮᠵᠢᠯᠠᠵᠤ ᠡᠢᠮᠦ ᠦᠭᠡ ᠬᠡᠯᠡᠬᠦ ᠳ᠋ᠦ᠍ ᠨᠢ ᠴᠢᠯᠠᠭᠤᠨ ᠳ᠋ᠤ᠌ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠭᠣᠮᠣᠳᠠᠵᠤ ᠨᠢᠭᠤᠷ ᠤᠷᠤᠭᠤ ᠨᠢ ᠨᠤᠯᠮᠤᠵᠤ ᠣᠷᠬᠢᠮᠠᠷ ᠪᠣᠳᠣᠭᠳᠠᠭᠰᠠᠨ ᠪᠣᠯᠪᠠᠴᠤ ᠲᠡᠰᠪᠦᠷᠢᠯᠡᠨ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠯᠠ ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠳᠣᠯᠣᠭᠠᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠠᠵᠢᠯ ᠳᠡᠭᠡᠷᠡ ᠪᠡᠨ ᠪᠠᠢᠵᠤ ᠪᠠᠢᠭᠰᠠᠨ ᠴᠢᠨᠢ ᠨᠢᠭᠡ ᠬᠡᠦᠬᠡᠨ ᠠᠭᠤᠯᠵᠠᠶᠠ ᠭᠡᠰᠡᠨ ᠳ᠋ᠦ᠍ ᠭᠠᠷᠴᠤ ᠣᠴᠢᠪᠠᠯ ᠨᠥᠬᠥᠭᠡ ᠳᠤᠯᠮᠠ ᠪᠠᠢᠯᠠ ᠃
- ᠪᠢ ᠴᠢᠮᠠ ᠶ᠋ᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠬᠣᠷ ᠶᠠᠭᠤ ᠪᠣᠯᠴᠢᠬᠠᠭᠰᠠᠨ ᠶᠤᠮ ᠪᠣᠯ ᠭᠡᠳ ᠢᠷᠡᠯᠡ ᠭᠡᠵᠦ ᠬᠡᠯᠡᠭᠡᠳ ᠨᠢᠭᠤᠷ ᠨᠢ ᠤᠯᠠᠰᠬᠢᠵᠦ ᠴᠢᠷᠠᠢ ᠪᠠᠨ ᠪᠤᠷᠤᠭᠤᠯᠠᠪᠠ ᠃
- ᠪᠠᠶᠠᠷᠯᠠᠯᠠ ᠂ ᠠᠵᠢᠯ ᠶᠡᠬᠡᠲᠡᠢ ᠪᠣᠯᠤᠭᠠᠳ ᠯᠠ ᠣᠴᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠃ ᠣᠢᠷᠠ ᠳ᠋ᠤ᠌ ᠴᠢᠯᠠᠭᠤᠨ ᠲᠠᠢ ᠪᠠᠨ ᠲᠠᠭᠠᠷᠠᠯᠳᠤᠭᠰᠠᠨ ᠦᠭᠡᠢ ᠦᠦ ᠭᠡᠵᠦ ᠪᠢ ᠬᠡᠯᠡᠪᠡ ᠃
- ᠴᠢᠯᠠᠭᠤᠨ ᠴᠤ᠌ ᠮᠠᠨ ᠤ᠋ ᠬᠢ ᠪᠡᠷ ᠬᠣᠶᠠᠷ ᠤᠳᠠᠭᠠ ᠣᠴᠢᠭᠰᠠᠨ ᠯᠠ ᠳᠠ ᠃ ᠶᠡᠬᠡ ᠯᠡ ᠶᠠᠭᠤᠮᠠ ᠶᠠᠷᠢᠵᠤ ᠪᠠᠢᠭᠠ ᠯᠠ ᠃ ᠵᠠ ᠲᠡᠷᠡ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠃ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠬᠦ ᠰᠠᠢᠨ ᠡᠳᠦᠷ ( ᠭᠠᠷᠠᠭ ᠤ᠋ᠨ ᠡᠳᠦᠷ ) ᠣᠴᠢᠭᠠᠷᠠᠢ ᠂ ᠵᠠᠪᠠᠯ ᠰᠢᠦ ᠭᠡᠳ ᠡᠷᠭᠢᠵᠦ ᠶᠠᠪᠤᠯᠠ ᠃
ᠰᠠᠢᠨ ᠡᠳᠦᠷ ᠡᠷᠲᠡ ᠪᠣᠰᠴᠤ ᠴᠢᠯᠠᠭᠤᠨ ᠤ᠋ ᠳ᠋ᠤ᠌ ᠣᠴᠢᠭᠠᠳ ᠳᠤᠯᠮᠠ ᠲᠠᠢ ᠠᠭᠤᠯᠵᠠᠭᠰᠠᠨ᠂ ᠲᠡᠭᠦᠨ ᠲᠡᠢ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠭᠡᠳ ᠬᠠᠮᠲᠤ ᠣᠴᠢᠶᠠ ᠭᠡᠰᠡᠨ ᠳ᠋ᠦ᠍ ᠲᠡᠷᠡ ᠨᠠᠮᠠ ᠶ᠋ᠢ ᠬᠣᠲᠠ ᠤᠷᠤᠭᠤ ᠥᠩᠭᠡᠢᠵᠦ ᠪᠠᠢᠭᠠ ᠴᠢᠨᠣᠠ ᠰᠢᠭ᠋ ᠮᠠᠭᠤᠬᠠᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠄
- ᠪᠢ ᠴᠢᠮᠠ ᠳ᠋ᠤ᠌ ᠰᠠᠭᠠᠳ ᠪᠣᠯᠬᠤ ᠦᠭᠡᠢ ᠃ ᠴᠢ ᠣᠴᠢᠵᠤ ᠲᠡᠭᠦᠨ ᠲᠡᠢ ᠪᠡᠨ ᠰᠠᠭᠤ ᠭᠡᠯᠡ ᠃
ᠮᠢᠨᠦ ᠦᠶᠡᠷᠬᠡᠵᠦ ᠶᠠᠪᠤᠭᠰᠠᠨ ᠨᠥᠬᠥᠷ ᠰᠦ ᠰᠢᠭ ᠴᠠᠭᠠᠨ ᠰᠡᠳᠬᠢᠯ ᠢ᠋ ᠮᠢᠨᠢ ᠬᠥ᠋ ᠰᠢᠭ ᠬᠠᠷᠠ ᠪᠠᠷ ᠪᠣᠳᠣᠭᠰᠠᠨ ᠳ᠋ᠤ᠌ ᠭᠣᠮᠣᠳᠠᠬᠤ ᠠᠭᠤᠷᠯᠠᠬᠤ ᠬᠣᠶᠠᠷ ᠵᠡᠷᠭᠡᠴᠡᠨ ᠲᠡᠭᠦᠨ ᠳ᠋ᠦ᠍ ᠬᠡᠳᠦᠨ ᠰᠢᠷᠦᠭᠦᠨ ᠦᠭᠡ ᠬᠡᠯᠡᠭᠡᠳ ᠡᠷᠭᠢᠵᠦ ᠭᠡᠷ ᠤᠷᠤᠭᠤ ᠪᠠᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠥᠷᠢᠲᠡᠢ ᠬᠥᠮᠦᠨ ᠵᠡᠭᠡᠯᠢ ᠳᠡᠭᠡᠷᠡ ᠂ ᠥᠰᠢᠶᠡᠲᠡᠢ ᠬᠥᠮᠦᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠭᠡᠭᠴᠢ ᠪᠡᠷ ᠳᠤᠯᠮᠠ ᠲᠠᠢ ᠲᠠᠭᠠᠷᠠᠯᠳᠤᠵᠤ ᠲᠡᠳᠡᠨ ᠦ᠌ ᠭᠡᠷ ᠲᠦ᠍ ᠣᠴᠢᠪᠠ ᠃ ᠬᠡᠳᠦᠨ ᠡᠳᠦᠷ ᠦ᠋ᠨ
ᠡᠮᠦᠨᠡ ᠴᠢᠯᠠᠭᠤᠨ ᠳᠤᠯᠮᠠ ᠶ᠋ᠢᠨ ᠳ᠋ᠦ᠍ ᠬᠣᠶᠠᠷ ᠤᠳᠠᠭᠠ ᠣᠴᠢᠵᠤ ᠰᠠᠭᠤᠶᠠ ᠭᠡᠵᠦ ᠭᠤᠶᠤᠭᠰᠠᠨ ᠃ ᠳᠤᠯᠮᠠ ᠲᠡᠭᠦᠨ ᠲᠡᠢ ᠰᠠᠭᠤᠬᠤ ᠰᠡᠳᠬᠢᠯ ᠦᠭᠡᠢ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ ᠰᠣᠨᠣᠰᠪᠠ ᠃ ᠪᠠᠰᠠ ᠳᠤᠯᠮᠠ ᠶ᠋ᠢᠨ ᠶᠠᠷᠢᠶᠠ ᠪᠦᠬᠦᠨ ᠡᠴᠡ ᠲᠡᠭᠦᠨ ᠦ᠌ ᠨᠠᠳᠠ ᠰᠡᠳᠬᠢᠯ ᠲᠡᠢ ᠶ᠋ᠢ ᠨᠢ ᠮᠡᠳᠡᠭᠰᠡᠨ ᠪᠣᠯᠪᠠᠴᠤ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ ᠪᠤᠴᠠᠪᠠ ᠃ ᠭᠡᠲᠡᠯᠡ ᠴᠢᠯᠠᠭᠤᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠠᠭᠤᠬᠤ ᠭᠡᠵᠦ ᠪᠠᠢᠭᠰᠠᠨ ᠬᠡᠦᠬᠡᠨ ᠢ᠋ ᠪᠤᠯᠢᠶᠠᠯᠠ ᠭᠡᠵᠦ ᠲᠠᠨᠢᠯ ᠨᠥᠬᠥᠳ ᠲᠦ᠍ ᠶᠠᠷᠢᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠠᠭᠤᠷ ᠬᠦᠷᠴᠦ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠨ ᠬᠡᠷᠡᠯᠳᠦᠵᠦ ᠲᠠᠩᠭᠠᠷᠢᠭ ᠲᠠᠰᠤᠷᠠᠪᠠ (ᠨᠠᠢᠷ ᠵᠢᠷᠤᠮ ᠡᠪᠳᠡᠷᠡᠪᠡ ) ᠃ ᠨᠥᠬᠥᠳ ᠮᠢᠨᠢ ᠴᠦ᠍ ᠨᠠᠮᠠ ᠶ᠋ᠢ ᠶᠠᠮᠠᠷ ᠴᠤ᠌ ᠪᠤᠷᠤᠭᠤ ᠦᠭᠡᠢ ᠶ᠋ᠢ ᠮᠡᠳᠡᠵᠦ ᠴᠢᠯᠠᠭᠤᠨ ᠢ ᠵᠢᠮᠡᠯᠡᠪᠡ ᠃ ᠭᠡᠪᠡᠴᠦ ᠲᠡᠭᠦᠨ ᠦ᠌ ᠭᠦᠳᠬᠡᠬᠦ ᠨᠢ ᠬᠢᠷᠢ ᠬᠡᠮᠵᠢᠶᠡᠨ ᠡᠴᠡ ᠬᠡᠲᠦᠷᠡᠭᠡᠳ ᠪᠢᠳᠡ ᠬᠣᠶᠠᠷ ᠨᠠᠮᠠ ᠶ᠋ᠢᠨ ᠲᠣᠪᠴᠢᠶᠠ ᠪᠠᠷ ᠬᠡᠷᠡᠭ ᠰᠢᠭᠦᠯᠭᠡᠵᠦ ᠂ ᠴᠢᠯᠠᠭᠤᠨ ᠪᠤᠷᠤᠭᠤᠲᠠᠨ ᠪᠣᠯᠵᠤ ᠰᠠᠨᠠᠭᠤᠯᠭᠠ ᠠᠪᠤᠯᠠ ᠃ ᠲᠡᠷᠡ ᠡᠳᠦᠷ ᠡᠴᠡ ᠡᠬᠢᠯᠡᠨ ᠰᠡᠳᠬᠢᠯ ᠳ᠋ᠦ᠍ ᠮᠢᠨᠢ ᠳᠤᠯᠮᠠ ᠳᠣᠲᠣᠨᠣ ᠪᠣᠯᠵᠤ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠪᠢᠳᠡ ᠬᠣᠶᠠᠷ ᠰᠠᠭᠤᠪᠠ ᠃
ᠢᠩᠭᠢᠭᠡᠳ ᠠᠢᠯ ᠪᠣᠯᠵᠤ ᠬᠠᠭᠠᠰ ᠵᠢᠯ ᠭᠠᠷᠤᠢ ᠪᠣᠯᠤᠯᠠ ᠃
ᠵᠢᠷᠭᠤᠭᠠ
ᠨᠢᠭᠡ ᠰᠥᠨᠢ ᠡᠭᠦᠳᠡ ᠶ᠋ᠢ ᠮᠢᠨᠢ ᠬᠦᠴᠦᠲᠡᠢ ᠪᠠᠯᠪᠠᠯᠠᠭᠰᠠᠨ ᠠ᠋ᠴᠠ ᠰᠣᠴᠢᠨ ᠰᠡᠷᠡᠵᠦ ᠪᠣᠰᠤᠭᠠᠳ ᠂ ᠲᠠᠢᠯᠵᠤ ᠥᠭᠪᠡᠯ ᠡᠩ ᠦ᠋ᠨ ᠬᠣᠪᠴᠠᠰᠤᠲᠠᠢ ᠭᠤᠷᠪᠠᠨ ᠬᠥᠮᠦᠨ ᠣᠷᠣᠵᠤ ᠢᠷᠡᠭᠡᠳ ᠄
- ᠳᠣᠷᠵᠢ ᠭᠡᠳᠡᠭ ᠦᠦ? ᠭᠡᠬᠦ ᠳ᠋ᠦ᠍ ᠨᠢ ᠪᠢ ᠄
- ᠲᠡᠢᠮᠦ ᠠ᠋ ᠳᠣᠷᠵᠢ ᠭᠡᠳᠡᠭ ᠭᠡᠯᠡ ᠃
- ᠪᠤᠰᠢᠭᠤᠬᠠᠨ ᠴᠡᠪᠡᠷ ᠳᠤᠯᠠᠭᠠᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰ ᠭᠡᠵᠦ ᠨᠢᠭᠡ ᠨᠢ ᠲᠤᠰᠢᠶᠠᠩᠭᠤᠢ ᠬᠡᠯᠡᠬᠦ ᠳ᠋ᠦ᠍ ᠨᠢ ᠮᠢᠨᠦ ᠡᠭᠳᠡᠭᠦᠦ ᠬᠦᠷᠬᠦ ᠰᠢᠭ ᠪᠣᠯᠵᠤ ᠄
- ᠶᠠᠭᠠᠬᠢᠬᠤ ᠨᠢ ᠪᠣᠢ ᠂ ᠲᠠ ᠨᠠᠷ ᠶᠠᠭᠤᠨ ᠤ᠋ ᠤᠯᠤᠰ ᠪᠣᠢ ᠭᠡᠵᠦ ᠭᠡᠳᠡᠷᠡᠩᠭᠦᠢ ᠳᠠᠭᠤ ᠪᠠᠷ ᠠᠰᠠᠭᠤᠪᠠ ᠃
- ᠡᠭᠦᠨ ᠢ᠋ ᠦᠵᠡᠭᠡᠳ ᠤᠢᠯᠠᠭᠠ ᠭᠡᠵᠦ ᠵᠢᠵᠢᠭᠬᠡᠨ ᠤᠯᠠᠭᠠᠨ ᠬᠠᠭᠤᠳᠠᠰᠤ ᠥᠭᠭᠦᠭᠰᠡᠨ ᠢ᠋ ᠠᠪᠴᠤ ᠦᠵᠡᠪᠡᠯ ᠨᠠᠮᠠ ᠶ᠋ᠢ ᠳᠠᠢᠴᠢᠯᠠᠨ ᠪᠠᠷᠢᠪᠴᠢᠯᠠᠬᠤ ᠶᠢ ᠵᠥᠪᠰᠢᠶᠡᠷᠡᠭᠰᠡᠨ ᠪᠠᠷᠢᠪᠴᠢᠯᠠᠭᠠ ᠶ᠋ᠢᠨ ᠪᠢᠴᠢᠭ ᠪᠠᠢᠪᠠ ᠃ ᠵᠢᠪᠡᠭᠦᠦ ᠴᠦ᠍ ᠬᠦᠷᠬᠦ ᠰᠢᠭ ᠂ ᠠᠶᠤᠬᠤ ᠴᠤ᠌ ᠰᠢᠭ᠋ ᠪᠣᠯᠵᠤ ᠄
- ᠬᠢᠭᠰᠡᠨ ᠬᠡᠷᠡᠭ ᠪᠠᠢᠬᠤ ᠦᠭᠡᠢ ᠃ ᠶᠠᠭᠤ ᠪᠣᠯᠤᠭᠠᠳ ᠨᠠᠮᠠ ᠶ᠋ᠢ ᠪᠠᠷᠢᠬᠤ ᠪᠣᠯᠤᠭᠰᠠᠨ ᠶᠤᠮ ᠭᠡᠰᠡᠨ ᠴᠢᠨᠢ ᠨᠢᠭᠡ ᠨᠢ ᠪᠦᠷ ᠵᠠᠩᠳᠤᠷᠤᠩᠭᠤᠢ ᠳᠠᠭᠤ ᠪᠠᠷ ᠄
- ᠣᠴᠢᠭᠠᠳ ᠮᠡᠳᠡᠨᠡ ᠭᠡᠵᠦ ᠬᠡᠯᠡᠪᠡ ᠃ ᠪᠢ ᠤᠯᠤᠰ ᠤ᠋ᠨ ᠡᠰᠡᠷᠭᠦ ᠶᠠᠮᠠᠷ ᠴᠤ᠌ ᠬᠡᠷᠡᠭ ᠬᠢᠭᠡ ᠦᠭᠡᠢ ᠪᠣᠯᠬᠣᠷ ᠠᠨᠳᠠᠭᠤᠷᠠᠭᠰᠠᠨ ᠨᠢ ᠳᠠᠮᠵᠢᠭ ᠦᠭᠡᠢ ᠃ ᠢᠩᠭᠢᠬᠦᠯᠡᠷ ᠲᠡᠳᠡᠨ ᠲᠡᠢ ᠮᠠᠷᠭᠤᠵᠤ ᠪᠠᠢᠬᠤ ᠶ᠋ᠢᠨ ᠣᠷᠣᠨ ᠳᠤ ᠲᠦᠷᠭᠡᠨ ᠣᠴᠢᠵᠤ ᠵᠣᠬᠢᠬᠤ ᠬᠥᠮᠦᠰ ᠲᠡᠢ ᠶᠠᠷᠢᠯᠴᠠᠨ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠶᠠ ᠭᠡᠵᠦ ᠰᠢᠢᠳᠦᠭᠡᠳ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ ᠄
- ᠨᠠᠳᠠ ᠬᠢᠭᠰᠡᠨ ᠬᠡᠷᠡᠭ ᠪᠠᠢᠬᠤ ᠦᠭᠡᠢ ᠃ ᠪᠢ ᠣᠴᠢᠵᠤ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠭᠠᠳ ᠲᠦᠷᠭᠡᠨ ᠢᠷᠡᠶᠡ ᠭᠡᠵᠦ ᠳᠤᠯᠮᠠ ᠳ᠋ᠤ᠌ ᠪᠠᠨ ᠬᠡᠯᠡᠭᠰᠡᠨ ᠴᠢᠨᠢ ᠲᠡᠷᠡ ᠤᠬᠢᠯᠠᠵᠤ ᠄《 ᠡᠨᠡ ᠴᠢᠨᠢ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶᠤᠮ ᠪᠣᠢ ? ᠴᠢ ᠪᠠᠷᠢᠭᠳᠠᠬᠤ ᠬᠡᠷᠡᠭ ᠬᠢᠭᠰᠡᠨ ᠶᠦ᠍ᠮ ᠭᠡᠵᠦ ᠦᠦ ! 》ᠭᠡᠳ ᠯᠡ ᠰᠦᠢᠳ ᠪᠣᠯᠪᠠ ᠃ ᠲᠡᠭᠡᠲᠡᠯᠡ ᠨᠥᠭᠥᠭᠡ ᠭᠤᠷᠪᠠ ᠶ᠋ᠢᠨ ᠨᠢᠭᠡ ᠨᠢ ᠨᠠᠮᠠ ᠶ᠋ᠢ ᠲᠦᠷᠭᠡᠨ ᠶᠠᠪᠤ᠋ ᠭᠡᠵᠦ ᠱᠠᠭᠠᠷᠳᠠᠪᠠ ᠃ ᠢᠩᠭᠢᠭᠡᠳ ᠶᠠᠪᠤᠬᠤ ᠳ᠋ᠤ᠌ ᠲᠡᠳᠡ ᠨᠠᠮᠠ ᠶ᠋ᠢ ᠤᠷᠭᠤᠴᠢᠬᠠᠨᠠ ᠭᠡᠰᠡᠨ ᠶᠦ᠍ᠮ ᠰᠢᠭ ᠲᠠᠯᠠ ᠪᠦᠷᠢ ᠡᠴᠡ ᠠᠩᠭᠠᠢᠯᠳᠤᠨ ᠶᠠᠪᠤᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠂ 《 ᠬᠣᠶᠠᠷᠬᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠳᠠᠢᠰᠤᠨ ᠤ᠋ ᠰᠤᠮᠤ ᠶ᠋ᠢᠨ ᠳᠤᠮᠳᠠᠭᠤᠷ ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠨ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠣᠷᠬᠢᠵᠤ ᠠᠮᠢ ᠴᠥᠯᠡᠨ ᠲᠤᠯᠤᠯᠳᠤᠵᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠣᠳᠣ ᠡᠨᠡ ᠭᠤᠷᠪᠠᠨ ᠳᠣᠯᠳᠣᠷᠠᠢ ᠬᠠᠷᠠ ᠬᠦᠦ ᠳ᠋ᠦ᠍ ᠂ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠥᠪᠡᠷ ᠦ᠋ᠨ ᠲᠠᠯᠠ ᠶ᠋ᠢᠨ ᠨᠢᠭᠡ ᠰᠡᠳᠬᠢᠯ ᠂ ᠨᠢᠭᠡ ᠵᠣᠷᠢᠯᠭᠠ ᠲᠠᠢ ᠬᠥᠮᠦᠰ ᠲᠦ᠍ ᠶᠠᠮᠠᠷ ᠴᠤ᠌ ᠬᠡᠷᠡᠭ ᠦᠭᠡᠢ ᠪᠠᠢᠲᠠᠯᠠ ᠶᠠᠯᠠᠲᠠᠨ ᠪᠣᠯᠵᠤ ᠲᠠᠭᠤᠭᠳᠠᠭᠠᠳ ᠶᠠᠪᠤᠵᠤ ᠪᠠᠢᠬᠤ ᠭᠡᠵᠦ ᠳᠠ 》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠰᠡᠳᠬᠢᠯ ᠳ᠋ᠦ᠍ ᠠᠶᠠᠭᠦᠢ ᠮᠠᠭᠤᠬᠠᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠣᠴᠢᠭᠠᠳ ᠦᠨᠡᠨ ᠮᠥᠨ ᠢ᠋ᠶ᠋ᠡᠨ ᠣᠯᠤᠭᠠᠳ ᠲᠦᠷᠭᠡᠨ ᠬᠠᠷᠢᠨᠠ ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠠᠰᠠᠨ ᠶᠠᠪᠤᠵᠤ ᠪᠢᠯᠡ ᠃
ᠪᠠᠢᠰᠢᠩ ᠳ᠋ᠤ᠌ ᠣᠷᠣᠲᠠᠯᠠ ᠤᠷᠢᠳᠤ ᠲᠠᠨᠢᠬᠤ ᠳᠡᠳ᠋ ᠬᠤᠷᠠᠩᠳᠠ ᠵᠣᠭᠰᠣᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠪᠠᠶᠠᠷᠯᠠᠵᠤ ᠂《 ᠳᠡᠳ᠋ ᠬᠤᠷᠠᠩᠳᠠ ᠶ᠋ᠢᠨ ᠠᠮᠤᠷ ᠢ᠋ ᠡᠷᠢᠶᠡ 》ᠭᠡᠵᠦ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨ ᠣᠴᠢᠲᠠᠯᠠ ᠲᠡᠷᠡ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠵᠠᠢᠯᠠᠪᠠ ᠃
- ᠳᠡᠳ᠋ ᠬᠤᠷᠠᠩᠳᠠ ᠳ᠋ᠤ᠌ ᠬᠡᠷᠡᠭᠲᠡᠨ ᠳᠣᠷᠵᠢ ᠶᠢ ᠪᠠᠷᠢᠪᠴᠢᠯᠠᠨ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠳᠡᠶᠡ ᠭᠡᠵᠦ ᠨᠥᠭᠥᠭᠡ ᠭᠤᠷᠪᠠ ᠶ᠋ᠢᠨ ᠨᠢᠭᠡ ᠨᠢ ᠬᠡᠯᠡᠪᠡ ᠃
- ᠵᠠ ᠮᠡᠳᠡᠯᠡ ᠂ ᠭᠦᠢᠴᠡᠳᠭᠡ ! ᠭᠡᠵᠦ ᠳᠡᠳ᠋ ᠬᠤᠷᠠᠩᠳᠠ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠨᠥᠬᠥᠭᠡ ᠭᠤᠷᠪᠠ ᠢᠷᠡᠵᠦ ᠂ ᠴᠢᠰᠤ ᠪᠠᠨ ᠤᠷᠤᠰᠬᠠᠵᠤ ᠪᠠᠢᠮᠠᠨᠵᠢᠨ ᠬᠦᠷᠲᠡᠭᠰᠡᠨ ᠲᠡᠮᠳᠡᠭ ᠦ᠋ᠳ ᠢ᠋ ᠮᠢᠨᠢ ᠲᠠᠰᠤ ᠲᠡᠳᠡᠨ ᠠᠪᠬᠤ ᠳ᠋ᠤ᠌ ᠪᠢ ᠡᠰᠡᠷᠭᠦᠴᠡᠭᠰᠡᠨ ᠪᠣᠯᠪᠠᠴᠤ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ ᠃ ᠲᠡᠭᠡᠭᠡᠳ ᠬᠡᠨ ᠲᠡᠢ ᠴᠦ᠍ ᠠᠭᠤᠯᠵᠠᠭᠤᠯᠤᠭᠰᠠᠨ ᠦᠭᠡᠢ ᠱᠣᠷᠣᠩ ᠳ᠋ᠤ᠌ ᠬᠢᠬᠦ ᠳ᠋ᠦ᠍ ᠨᠢ ᠄
- ᠭᠡᠮ ᠦᠭᠡᠢ ᠬᠥᠮᠦᠨ ᠢ᠋ ᠬᠣᠷᠢᠬᠤ ᠡᠷᠬᠡ ᠲᠠ ᠨᠠᠷ ᠲᠤ᠌ ᠪᠠᠢᠬᠤ ᠦᠭᠡᠢ ᠂ ᠲᠠ ᠨᠠᠷ ᠮᠡᠳᠡᠳᠡᠭ ᠦᠭᠡᠢ ᠶᠦ᠍ᠮ ᠪᠣᠯ ᠮᠡᠳᠡᠳᠡᠭ ᠬᠥᠮᠦᠨ ᠲᠡᠢ ᠪᠡᠨ ᠠᠭᠤᠯᠵᠠᠭᠤᠯᠤᠭᠠᠳ ᠠᠯᠢ ᠃ ᠪᠢ ᠦᠨᠡᠨ ᠵᠥᠪᠬᠡᠨ ᠢ᠋ᠶ᠋ᠡᠨ ᠣᠯᠤᠶᠠ ᠭᠡᠰᠡᠨ ᠳ᠋ᠦ᠍ ᠨᠥᠬᠥᠭᠡ ᠭᠤᠷᠪᠠ ᠶ᠋ᠢᠨ ᠨᠢᠭᠡ ᠨᠢ ᠰᠢᠷᠦᠭᠦᠨ ᠳᠠᠭᠤ ᠪᠠᠷ ᠄
- ᠴᠢ ᠪᠢᠲᠡᠭᠡᠢ ᠬᠠᠰᠬᠢᠷᠤᠭᠠᠳ ᠪᠠᠢ ᠃ ᠴᠢᠨᠦ ᠳᠤᠷᠠ ᠪᠠᠷ ᠪᠣᠯᠳᠠᠭ ᠦᠭᠡᠢ ᠶᠦ᠍ᠮ ᠭᠡᠵᠦ ᠬᠡᠯᠡᠭᠡᠳ ᠬᠠᠭᠠᠯᠭᠠ ᠬᠠᠭᠠᠵᠤ ᠳᠠᠩ ᠬᠢᠲᠡᠯᠡ ᠴᠣᠣᠵᠢᠯᠠᠭᠠᠳ ᠶᠠᠪᠤᠴᠢᠬᠠᠪᠠ ᠃ ᠲᠡᠷᠡ ᠴᠣᠣᠵᠢ ᠶ᠋ᠢᠨ ᠮᠠᠭᠤᠬᠠᠢ ᠳᠤᠤᠭᠠᠷᠤᠭᠰᠠᠨ ᠭᠡᠳᠡᠭ ᠢ᠋ ᠰᠠᠨᠠᠬᠤ ᠪᠦᠷᠢ ᠶᠠᠰᠤᠨ ᠳ᠋ᠤ᠌ ᠶᠠᠩᠭᠢᠨᠠᠵᠤ ᠰᠡᠳᠬᠢᠯ ᠡᠪ ᠦᠭᠡᠢ ᠪᠣᠯᠳᠠᠭ ᠶᠤᠮ ᠃
ᠴᠢᠭᠢᠭ ᠳᠠᠭᠠᠭᠠᠭᠰᠠᠨ ᠬᠠᠷᠠᠩᠭᠤᠢ ᠲᠠᠰᠤᠯᠭᠠᠨ ᠳ᠋ᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠬᠠᠨᠠ ᠶ᠋ᠢ ᠮᠥᠷᠭᠥᠭᠡᠳ ᠦᠬᠦᠮᠡᠷ ᠪᠣᠳᠣᠭᠳᠠᠵᠤ ᠪᠠᠢᠯᠠ ᠃ ᠭᠡᠪᠡᠴᠦ ᠡᠨᠡ ᠶᠠᠪᠤᠳᠠᠯ ᠤ᠋ᠨ ᠴᠠᠭᠠᠨᠠ ᠥᠪᠡᠷ ᠦ᠋ᠨ ᠵᠠᠰᠠᠭ ᠂ ᠥᠪᠡᠷ ᠤᠨ ᠮᠢᠨᠢ ᠮᠠᠨ ᠪᠠᠢᠭᠠ ᠶᠤᠮ ᠬᠣᠢᠨᠠ ᠦᠨᠡᠨ ᠵᠥᠪᠬᠡᠨ ᠢ᠋ ᠯᠠᠪ ᠣᠯᠤᠨᠠ ᠭᠡᠵᠦ ᠢᠳᠡᠭᠡᠨ ᠂ ᠲᠡᠷᠡ ᠢᠲᠡᠭᠡᠯ ᠢᠶᠠᠨ ᠲᠦᠰᠢᠵᠦ ᠴᠣᠣᠵᠢ ᠲᠠᠢᠯᠤᠭᠳᠠᠬᠤ ᠶ᠋ᠢ ᠬᠦᠯᠢᠶᠡᠨ ᠰᠠᠭᠤᠪᠠ ᠃ ᠵᠢᠵᠢᠭᠬᠡᠨ ᠭᠡᠭᠡᠪᠴᠢ ᠪᠡᠷ ᠨᠠᠷᠠ ᠲᠣᠰᠴᠤ ᠥᠷᠯᠥᠭᠡ ᠪᠣᠯᠪᠠ ᠂ ᠤᠳᠠᠬᠤ ᠦᠭᠡᠢ ᠬᠠᠭᠠᠯᠭᠠᠨ ᠤ᠋ ᠵᠢᠵᠢᠭ ᠨᠦᠬᠡ ᠨᠡᠭᠡᠭᠡᠭᠳᠡᠬᠦ ᠳ᠋ᠦ᠍ ᠤᠬᠤᠰᠬᠢᠨ ᠪᠣᠰᠴᠤ ᠣᠴᠢᠪᠠᠯ ᠴᠠᠭᠠᠨ ᠲᠡᠮᠦᠷ ᠰᠠᠪᠠ ᠲᠠᠢ ᠬᠣᠭᠣᠯᠠ ᠂ ᠫᠡᠯᠠᠩ ᠲᠠᠢ ᠬᠦᠷᠡᠩ ᠠᠶᠠᠭᠠ ᠲᠠᠢ ᠴᠠᠢ ᠪᠠᠢᠪᠠ ᠃ ᠪᠢ ᠬᠣᠭᠣᠯᠠ ᠴᠠᠢ ᠶ᠋ᠢ ᠴᠠᠭᠠᠱᠢ ᠲᠦᠯᠬᠢᠵᠦ ᠤᠨᠠᠭᠠᠭᠠᠳ ᠬᠠᠭᠠᠯᠭᠠᠨ ᠤ᠋ ᠨᠦᠬᠡ ᠪᠡᠷ ᠬᠣᠭᠣᠯᠠ ᠥᠭᠭᠦᠭᠰᠡᠨ ᠬᠥᠮᠦᠨ ᠤ ᠬᠣᠢᠨᠠ ᠠ᠋ᠴᠠ《 ᠬᠥᠶᠢ ᠂ ᠨᠥᠬᠥᠷ ᠠ᠋ ᠂ ᠨᠠᠮᠠ ᠶ᠋ᠢ ᠭᠠᠷᠭᠠᠭᠠᠳ ᠠᠯᠢ 》 ᠭᠡᠵᠦ ᠬᠠᠰᠬᠢᠷᠪᠠ ᠃
- ᠶᠠᠮᠠᠷ ᠣᠮᠣᠭᠲᠠᠢ ᠡᠷᠡ ᠪᠣᠢ ᠃ ᠭᠠᠢᠭᠤᠢ ᠨᠣᠮᠣᠬᠠᠷᠠᠨᠠ ᠭᠡᠵᠦ ᠲᠠᠴᠢᠭᠢᠨᠠᠲᠠᠯᠠ ᠢᠨᠢᠶᠡᠭᠡᠳ ᠴᠠᠭᠠᠱᠢ ᠶᠠᠪᠤᠴᠢᠬᠠᠪᠠ ᠃ ᠠᠷᠭᠠ ᠮᠤᠬᠤᠷᠳᠠᠨ ᠭᠡᠳᠡᠷᠭᠦ ᠪᠤᠴᠠᠵᠤ ᠰᠠᠭᠤᠪᠠ ᠃ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠳᠠ᠃ ᠡᠨᠡ ᠴᠢᠭᠢᠭ ᠲᠡᠢ ᠬᠠᠷᠠ ᠨᠦᠬᠡᠨ ᠳ᠋ᠦ᠍ ᠣᠷᠣᠬᠤ ᠭᠡᠵᠦ ᠠᠮᠢ ᠪᠠᠨ ᠴᠦᠯᠡᠵᠦ ᠂ ᠴᠢᠰᠤ ᠪᠠᠨ ᠠᠰᠬᠠᠷᠠᠭᠤᠯᠤᠨ ᠪᠠᠢᠯᠳᠤᠭᠰᠠᠨ ᠭᠡᠵᠦ ᠦᠦ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠭᠣᠮᠣᠳᠠᠬᠤ ᠭᠠᠢᠬᠠᠬᠤ ᠬᠣᠯᠢᠯᠳᠤᠨ ᠪᠠᠢᠪᠠ ᠃ ᠡᠰᠡᠬᠦᠯᠡ ᠴᠢ ᠬᠡᠷᠡᠭ ᠬᠢᠭᠰᠡᠨ ᠬᠥᠮᠦᠨ ᠦᠦ ᠭᠡᠵᠦ ᠪᠦᠬᠦ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠪᠣᠳᠣᠬᠤ ᠳ᠋ᠤ᠌ ᠡᠨᠳᠡ ᠣᠷᠣᠵᠤ ᠢᠷᠡᠭᠡᠳ ᠄《 ᠡᠬᠡ ᠣᠷᠣᠨ ᠠ᠋ᠴᠠ ᠪᠠᠨ ᠤᠷᠪᠠᠭᠴᠢ ᠪᠣᠰ 》ᠭᠡᠵᠦ ᠵᠠᠩᠳᠤᠷᠠᠪᠠ ᠃《 ᠤᠷᠪᠬᠠᠴᠢ 》ᠭᠡᠳᠡᠭ ᠨᠡᠷᠡ ᠶ᠋ᠢ ᠰᠣᠨᠣᠰᠬᠤ ᠲᠠᠢ ᠵᠡᠷᠭᠡ ᠪᠦᠬᠦ ᠪᠡᠶᠡ ᠵᠢᠷᠤᠰᠬᠢᠵᠦ ᠳᠣᠲᠣᠷᠠ ᠮᠠᠨᠠᠷᠠᠨ ᠄《 ᠪᠢᠲᠡᠭᠡᠢ ᠭᠦᠳᠬᠡ ! ᠴᠢᠮᠠ ᠶ᠋ᠢ ᠬᠣᠲᠠ ᠳ᠋ᠤ᠌ ᠬᠡᠦᠬᠡᠨ ᠡᠷᠭᠢᠭᠦᠯᠵᠦ ᠶᠠᠪᠤᠬᠤ ᠳ᠋ᠤ᠌ ᠬᠢᠯᠢ ᠳᠡᠭᠡᠷᠡ ᠴᠢᠰᠤ ᠪᠠᠨ ᠠᠰᠬᠠᠵᠤ ᠶᠠᠪᠤᠭᠰᠠᠨ ᠬᠥᠮᠦᠨ 》ᠭᠡᠵᠦ ᠬᠠᠰᠬᠢᠷᠤᠭᠠᠳ ᠦᠰᠦᠷᠦᠨ ᠣᠴᠢᠵᠤ ᠪᠠᠷᠢᠵᠤ ᠠᠪᠤᠭᠰᠠᠨ ᠴᠢᠨᠢ ᠬᠣᠶᠠᠷ ᠭᠤᠷᠪᠠᠨ ᠬᠥᠮᠦᠨ ᠣᠷᠣᠵᠤ ᠢᠷᠡᠭᠡᠳ ᠭᠠᠷ ᠢ᠋ ᠮᠢᠨᠢ ᠱᠠᠵᠢᠭᠢᠨᠠᠭᠤᠯᠤᠨ ᠮᠤᠰᠬᠢᠵᠦ ᠪᠠᠢᠭᠠᠳ ᠨᠠᠮᠠ ᠶ᠋ᠢ ᠰᠠᠭᠤᠯᠭᠠᠪᠠ ᠃ ᠳᠣᠷᠣᠮᠵᠢᠯᠠᠯ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠨᠡᠷᠡ ᠬᠦᠯᠢᠶᠡᠵᠦ ᠪᠣᠯᠤᠨᠠ ᠃ ᠬᠠᠷᠢᠨ《 ᠡᠬᠡ ᠣᠷᠣᠨ ᠠ᠋ᠴᠠ ᠪᠠᠨ ᠤᠷᠪᠠᠭᠴᠢ 》ᠭᠡᠳᠡᠭ ᠨᠡᠷᠡ ᠶ᠋ᠢ ᠪᠢ ᠬᠡᠷᠬᠢᠪᠡᠴᠦ ᠬᠦᠯᠢᠶᠡᠬᠦ ᠦᠭᠡᠢ ᠃ ᠪᠦᠬᠦ ᠪᠡᠶᠡ ᠮᠢᠨᠢ ᠴᠡᠴᠡᠷᠡᠨ ᠄《 ᠪᠢ ᠤᠷᠪᠠᠭᠴᠢ ᠪᠢᠰᠢ ᠂ ᠬᠠᠷᠢᠨ ᠴᠢ ᠯᠠᠪ ᠤᠷᠪᠠᠭᠴᠢ ᠪᠠᠢᠬᠤ 》ᠭᠡᠵᠦ ᠬᠠᠰᠬᠢᠷᠤᠨ ᠪᠠᠢᠪᠠ ᠃
ᠲᠡᠷᠡ ᠣᠷᠣᠢ ᠨᠠᠮᠠᠶ᠋ᠢ ᠪᠠᠢᠴᠠᠭᠠᠯᠲᠠ ᠳ᠋ᠤ᠌ ᠠᠪᠠᠴᠢᠪᠠ ᠃ ᠶᠠᠷᠢᠶᠠᠨ ᠠ᠋ᠴᠠ ᠦᠵᠡᠪᠡᠯ ᠨᠥᠭᠥᠭᠡ ᠳᠡᠪᠰᠢᠯᠲᠡ ᠶ᠋ᠢ ᠰᠠᠨᠠᠭᠠ ᠲᠠᠢ ᠪᠠᠷ ᠬᠢᠵᠦ ᠰᠠᠯᠠᠭᠠ ᠴᠡᠷᠢᠭ ᠰᠦᠢᠳᠬᠡᠭᠰᠡᠨ ᠬᠡᠷᠡᠭ ᠲᠦ᠍ ᠲᠠᠲᠠᠭᠳᠠᠭᠰᠠᠨ ᠪᠣᠯᠤᠯᠲᠠᠢ ᠃ ᠪᠠᠢᠴᠠᠭᠠᠭᠴᠢ ᠨᠠᠮᠠ ᠶ᠋ᠢ ᠮᠠᠨ ᠤ᠋ ᠠᠩᠭᠢ ᠳ᠋ᠤ᠌ ᠤᠴᠠᠷᠠᠵᠤ ᠪᠠᠢᠭᠰᠠᠨ ᠭᠠᠷᠤᠵᠠ ᠬᠣᠬᠢᠷᠠᠯ ᠢ᠋ ᠶᠠᠫᠣᠨ ᠤ᠋ ᠳᠠᠭᠠᠭᠠᠯᠭᠠᠪᠤᠷᠢ ᠪᠠᠷ ᠰᠠᠨᠠᠭᠠᠲᠠᠢ ᠬᠢᠭᠰᠡᠨ ᠪᠣᠯᠭᠠᠬᠤ ᠭᠡᠵᠦ ᠪᠢ ᠡᠨᠡ ᠪᠦᠬᠦᠨ ᠢ᠋ ᠴᠢᠩ ᠦᠨᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠬᠡ ᠣᠷᠣᠨ ᠂ ᠠᠷᠠᠳ ᠲᠦᠮᠡᠨ ᠦ᠌ ᠪᠡᠨ ᠲᠥᠯᠥᠭᠡ ᠬᠢᠭᠰᠡᠨ ᠭᠡᠳᠡᠭ ᠢ᠋ᠶ᠋ᠡᠨ ᠪᠠᠲᠤᠯᠠᠬᠤ ᠭᠡᠭᠰᠡᠭᠡᠷ ᠬᠡᠳᠦᠨ ᠰᠠᠷᠠ ᠪᠣᠯᠪᠠ ᠃ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠨᠥᠬᠥᠳ ᠲᠡᠢ ᠪᠡᠨ ᠨᠠᠷᠭᠢᠨ ᠲᠣᠭᠯᠠᠵᠤ ᠶᠠᠷᠢᠭᠰᠠᠨ ᠶᠠᠷᠢᠶᠠ ᠂ ᠠᠵᠢᠯ ᠬᠢᠬᠦ ᠵᠠᠭᠤᠷᠠ ᠠᠯᠳᠠᠵᠤ ᠶᠠᠪᠤᠭᠰᠠᠨ ᠵᠢᠵᠢᠭ ᠳᠤᠲᠠᠭᠳᠠᠯ ᠴᠥᠮ ᠯᠡ ᠥᠨᠳᠡᠢᠨ ᠶᠠᠷᠢᠭᠳᠠᠵᠤ ᠪᠠᠢᠪᠠ ᠃
ᠪᠠᠢᠴᠠᠭᠠᠭᠴᠢ ᠨᠠᠳᠠ ᠳ᠋ᠤ᠌ ᠪᠠᠢᠬᠤ ᠦᠭᠡᠢ ᠵᠦᠢᠯ ᠢ᠋ ᠣᠯᠬᠤ ᠭᠡᠵᠦ ᠂ ᠪᠢ ᠤᠷᠪᠠᠭᠴᠢ ᠪᠢᠰᠢ ᠭᠡᠳᠡᠭ ᠢ᠋ᠶ᠋ᠡᠨ ᠦᠨᠡᠨᠰᠢᠭᠦᠯᠬᠦ ᠭᠡᠵᠦ ᠵᠠᠷᠢᠮ ᠳ᠋ᠤ᠌ ᠪᠠᠨ ᠬᠡᠷᠡᠯᠳᠦᠵᠦ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠳᠠᠨ ᠪᠠᠢᠪᠠ ᠃ ᠨᠢᠭᠡ ᠵᠣᠷᠢᠯᠭᠠ ᠲᠠᠢ ᠂ ᠨᠢᠭᠡ ᠵᠦᠢᠯ ᠦ᠋ᠨ ᠲᠥᠯᠥᠭᠡ ᠵᠢᠳᠬᠦᠵᠦ ᠪᠠᠢᠭᠠ ᠬᠥᠮᠦᠰ ᠢᠩᠭᠢᠵᠦ ᠣᠢᠯᠠᠭᠠᠯᠴᠠᠵᠤ ᠴᠢᠳᠠᠬᠤ ᠦᠭᠡᠢ ᠳᠠᠢᠰᠤᠩᠨᠠᠵᠤ ᠪᠠᠢᠬᠤ ᠰᠢᠭ᠋ ᠮᠠᠭᠤᠬᠠᠢ ᠶᠠᠭᠤᠮᠠ ᠬᠣᠪᠣᠷ ᠪᠠᠢᠬᠤ ᠠ᠋ ᠭᠡᠳ ᠳᠣᠷᠵᠢ ᠭᠤᠸᠠᠢ ᠲᠣᠯᠣᠭᠠᠢ ᠪᠠᠨ ᠠᠯᠭᠤᠷᠬᠠᠨ ᠰᠡᠭᠰᠦᠷᠬᠦ ᠳ᠋ᠦ᠍ ᠨᠢ ᠭᠠᠰᠢᠭᠤᠳᠠᠯ ᠭᠣᠮᠣᠳᠠᠯ ᠤ᠋ᠨ ᠠᠷᠭᠠ ᠪᠠᠷᠠᠭᠳᠠᠭᠰᠠᠨ ᠰᠡᠳᠬᠢᠯ ᠨᠢᠭᠤᠷ ᠲᠤ᠌ ᠨᠢ ᠲᠣᠳᠣᠷᠠᠵᠤ ᠪᠠᠢᠪᠠ ᠃
- ᠪᠢᠲᠡᠭᠦᠦ ᠲᠠᠰᠤᠯᠭᠠᠨ ᠳ᠋ᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠡᠪᠲᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠠᠨ ᠪᠠᠢᠴᠠᠭᠠᠭᠴᠢ ᠬᠠᠮᠢᠭᠠ ᠠ᠋ᠴᠠ ᠠᠮᠢᠳᠤᠷᠠᠯ ᠤ᠋ᠨ ᠮᠢᠨᠢ ᠨᠠᠷᠢᠨ ᠶᠠᠪᠤᠳᠠᠯ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠪᠡ ᠭᠡᠳᠡᠭ ᠢ᠋ ᠪᠣᠳᠣᠵᠤ ᠡᠬᠢᠯᠡᠪᠡ᠃ᠲᠡᠭᠡᠭᠡᠳ ᠡᠨᠡ ᠪᠦᠬᠦᠨ ᠢ᠋ ᠨᠥᠬᠥᠭᠡ ᠴᠢᠯᠠᠭᠤᠨ ᠴᠤᠭᠯᠠᠭᠤᠯᠵᠤ ᠥᠭᠭᠥᠭᠰᠡᠨ ᠪᠣᠯᠤᠯᠲᠠᠢ ᠭᠡᠳ ᠪᠠᠢᠴᠠᠭᠠᠭᠴᠢ ᠠ᠋ᠴᠠ ᠬᠡᠳᠦᠨ ᠳᠠᠬᠢᠨ ᠠᠰᠠᠭᠤᠭᠰᠠᠨ ᠪᠣᠯᠪᠠᠴᠤ ᠤᠯᠤᠰ ᠤ᠋ᠨ ᠨᠢᠭᠤᠴᠠ ᠭᠡᠳ ᠬᠡᠯᠡᠵᠦ ᠥᠭᠭᠥᠭᠰᠡᠨ ᠦᠭᠡᠢ ᠃ ᠡᠳᠦᠷ ᠢᠷᠡᠬᠦ ᠲᠤᠲᠤᠮ ᠨᠠᠮᠠ ᠶ᠋ᠢ ᠬᠢᠯᠢᠰ ᠬᠡᠷᠡᠭ ᠲᠦ᠍ ᠬᠢᠭᠰᠡᠨ ᠬᠥᠮᠦᠨ ᠪᠣᠯ ᠴᠢᠯᠠᠭᠤᠨ ᠭᠡᠳᠡᠭ ᠪᠣᠳᠣᠯ ᠰᠡᠳᠬᠢᠯ ᠳ᠋ᠦ᠍ ᠮᠢᠨᠢ ᠲᠣᠳᠣᠷᠬᠠᠢ ᠪᠣᠯᠵᠤ ᠪᠠᠢᠪᠠ ᠃ ᠲᠥᠷᠥ ᠲᠦᠮᠡᠨ ᠨᠢᠳᠦ ᠲᠡᠢ ᠲᠤᠯᠠ ᠵᠢᠯ ᠭᠠᠷᠤᠢ ᠪᠠᠢᠴᠠᠭᠠᠭᠳᠠᠵᠤ ᠪᠠᠢᠭᠠᠳ ᠶᠠᠮᠠᠷ ᠴᠤ᠌ ᠬᠡᠷᠡᠭ ᠦᠭᠡᠢ ᠴᠠᠭᠠᠳᠬᠠᠵᠤ ᠨᠢᠭᠡ ᠣᠷᠣᠢ ᠨᠠᠮᠠ ᠶ᠋ᠢ ᠭᠠᠷᠭᠠᠯᠠ ᠃
ᠦᠷᠭᠦᠯᠵᠢᠯᠡᠯ ᠪᠠᠢᠨᠠ ᠌᠁