ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠠᠷᠪᠠᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ > Хөх судар - Инжинаш < Арван тавдугаар бүлэг >
325ᠣᠷᠢᠶᠠᠩᠬᠠᠨ ᠤ᠋ ᠵᠠᠯᠮᠠ ᠲᠥᠷᠥ ᠶᠠᠮᠤᠨᠠ ᠤᠴᠢᠷ ᠢ᠋ ᠰᠢᠭᠦᠮᠵᠢᠯᠡᠵᠦ ᠦᠨᠡᠨ ᠬᠤᠳᠠᠯ ᠢ᠋ ᠨᠡᠬᠡᠮᠵᠢᠯᠡᠪᠡ
ᠰᠣᠯᠣᠩᠭᠣᠰ ᠤ᠋ᠨ ᠭᠦᠩᠵᠦ ᠪᠠᠭᠤᠳᠠᠯ ᠥᠷᠲᠡᠭᠡᠨᠡ ᠵᠦᠢ ᠶ᠋ᠢ ᠰᠢᠨᠵᠢᠯᠡᠵᠦ ᠬᠢᠯᠢᠰ ᠭᠦᠵᠢᠷ ᠢ᠋ ᠴᠠᠭᠠᠳᠬᠠᠪᠠ
ᠠᠷᠪᠠᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ
ᠰᠥᠩ ᠭᠤᠸᠠᠩᠽᠦ᠋ᠩ ᠦᠨ ᠱᠣᠣ ᠰᠢ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠤᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠩᠽᠦ᠋ᠩ ᠤᠨ ᠴᠠᠩ ᠮᠢᠩ ᠦᠨ
ᠪᠠᠰᠠ ᠭᠤᠷᠪᠠᠳᠤᠭᠠᠷ ᠣᠨ ᠂ ᠬᠠᠷᠠ ᠬᠤᠯᠤᠭᠠᠨᠠ ᠵᠢᠯ ᠂ ᠲᠠᠢᠽᠦ ᠭᠤᠴᠢᠨ ᠨᠢᠭᠡᠨ ᠰᠡᠭᠦᠳᠡᠷ ᠲᠡᠢ ᠪᠠᠢᠭᠰᠠᠭᠠᠷ
ᠣᠷᠢᠶᠠᠩᠬᠠᠨ ᠤ᠋ ᠵᠠᠯᠮᠠ ᠲᠥᠷᠥ ᠶᠠᠮᠤᠨᠠ ᠤᠴᠢᠷ ᠢ᠋ ᠰᠢᠭᠦᠮᠵᠢᠯᠡᠵᠦ ᠦᠨᠡᠨ ᠬᠤᠳᠠᠯ ᠢ᠋ ᠨᠡᠬᠡᠮᠵᠢᠯᠡᠪᠡ
ᠰᠣᠯᠣᠩᠭᠣᠰ ᠤ᠋ᠨ ᠭᠦᠩᠵᠦ ᠪᠠᠭᠤᠳᠠᠯ ᠥᠷᠲᠡᠭᠡᠨᠡ ᠵᠦᠢ ᠶ᠋ᠢ ᠰᠢᠨᠵᠢᠯᠡᠵᠦ ᠬᠢᠯᠢᠰ ᠭᠦᠵᠢᠷ ᠢ᠋ ᠴᠠᠭᠠᠳᠬᠠᠪᠠ
ᠰᠤᠳᠠᠷᠠᠰᠤᠨ ᠤ᠋ ᠦᠷᠡᠰ ᠪᠣᠭᠳᠠ ᠲᠠᠢᠽᠦ ᠶ᠋ᠢᠨ ᠤᠬᠠᠭᠠᠨ ᠤ᠋ ᠨᠠᠷᠠᠨ ᠭᠡᠭᠡᠬᠡᠨ
ᠰᠣᠨᠣᠰᠤᠮᠠᠭᠴᠠ ᠲᠥᠰᠥᠭᠡᠯᠡᠭᠴᠢ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠤᠬᠠᠮᠵᠢᠯᠠᠬᠤ ᠮᠡᠷᠭᠡᠨ ᠬᠤᠷᠴᠠ ᠂
ᠰᠤᠷᠲᠠᠯ ᠰᠣᠶᠣᠯᠲᠤ ᠰᠠᠢᠳ ᠵᠡᠯᠮᠡ ᠶ᠋ᠢᠨ ᠤᠷᠤᠭᠰᠢᠯᠠᠬᠤ ᠮᠠᠲᠠᠯ ᠦᠯᠡᠮᠵᠢ
ᠰᠣᠯᠣᠩᠭᠣᠰ ᠤ᠋ᠨ ᠭᠦᠩᠵᠦ ᠭᠣᠣᠯ ᠰᠠᠷᠠᠨ ᠤ᠋ ᠣᠶᠤᠨ ᠰᠠᠷᠠᠨ ᠲᠤᠩᠭᠠᠯᠠᠭ ᠃
ᠲᠡᠨᠳᠡᠴᠡ ᠲᠠᠢᠽᠦ ᠮᠤᠬᠤᠯᠠᠢ ᠶ᠋ᠢ ᠤᠯᠤᠰ ᠢ᠋ ᠰᠠᠬᠢ ᠂ ᠪᠤᠭᠤᠷᠵᠢ ᠶ᠋ᠢ ᠳᠠᠭᠠᠭᠤᠯᠤᠨ ᠰᠣᠯᠣᠩᠭᠣᠰ ᠢ᠋ ᠲᠠᠢᠯᠠᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠶᠠᠭᠠᠷᠠᠨ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ ᠄《ᠰᠣᠯᠣᠩᠭᠣᠰ ᠂ ᠰᠣᠯᠣᠩᠭᠤᠳ ᠂ ᠰᠣᠯᠣᠩᠭᠠ ᠡᠨᠡ ᠭᠤᠷᠪᠠᠨ ᠤᠯᠤᠰ ᠬᠡᠮᠡᠭᠴᠢ ᠯᠢᠶᠣᠤ ᠤᠯᠤᠰ ᠂ ᠠᠯᠲᠠᠨ ᠤᠯᠤᠰ ᠲᠤᠷ ᠰᠢᠷᠪᠡᠭᠳᠡᠨ ᠦᠵᠡᠬᠦ ᠤᠯᠤᠰ ᠂ ᠴᠥᠮ ᠡᠮᠦᠨᠡ ᠬᠢᠲᠠᠳ ᠤᠯᠤᠰ ᠤ᠋ᠨ ᠵᠠᠩ ᠰᠤᠷᠲᠠᠯ ᠲᠠᠢ ᠪᠣᠯᠵᠤᠬᠤᠢ ᠂ ᠳᠣᠷᠣᠮᠵᠢᠯᠠᠨ ᠪᠠᠰᠤᠵᠤ ᠦᠯᠦ ᠪᠣᠯᠤᠮᠤᠢ ᠃ ᠴᠣᠬᠢᠨ ᠣᠷᠣᠵᠤ ᠨᠡᠪᠲᠡᠯᠦᠨ ᠪᠠᠢᠯᠳᠤᠬᠤᠢ ᠳ᠋ᠤᠷ ᠲᠦᠰᠢᠮᠡᠯ ᠪᠢ ᠪᠤᠭᠤᠷᠵᠢ ᠠᠬᠠᠢ ᠳ᠋ᠤᠷ ᠬᠦᠷᠬᠦ ᠦᠭᠡᠢ ᠂ ᠴᠠᠭ ᠲᠤᠷ ᠲᠡᠩᠴᠡᠭᠦᠯᠦᠨ ᠬᠤᠪᠢᠰᠬᠠᠨ ᠤᠯᠠᠷᠢᠭᠤᠯᠬᠤᠢ ᠳ᠋ᠤᠷ ᠪᠤᠭᠤᠷᠵᠢ ᠠᠬᠠᠢ ᠲᠦᠰᠢᠮᠡᠯ ᠨᠠᠳᠠ ᠳ᠋ᠤᠷ ᠦᠯᠦ ᠬᠥᠷᠥᠮᠦᠢ᠂ ᠲᠦᠰᠢᠮᠡᠯ ᠪᠢ ᠭᠠᠪᠢᠶᠠ ᠪᠦᠲᠦᠭᠡᠬᠦᠢ ᠳ᠋ᠦ᠍ᠷ ᠪᠤᠯᠢᠶᠠᠯᠳᠤᠬᠤ ᠪᠤᠰᠤ ᠂ ᠭᠠᠪᠢᠶᠠ ᠪᠦᠲᠦᠬᠦ ᠶ᠋ᠢ ᠠᠯᠳᠠᠬᠤ ᠠ᠋ᠴᠠ ᠪᠣᠯᠭᠤᠮᠵᠢᠯᠠᠮᠤᠢ ᠃ ᠪᠤᠭᠤᠷᠵᠢ ᠠᠬᠠᠢ ᠶ᠋ᠢᠨ ᠰᠦᠷ ᠠᠯᠳᠠᠷᠰᠢᠭᠰᠠᠨ ᠮᠠᠰᠢ ᠶᠡᠬᠡ ᠲᠤᠯᠠ ᠤᠯᠤᠰ ᠢ᠋ ᠳᠤᠷᠠ ᠪᠠᠷ ᠬᠠᠮᠠᠭᠠᠯᠠᠨ ᠰᠠᠬᠢᠵᠤ ᠴᠢᠳᠠᠮᠤᠢ ᠃ ᠲᠦᠰᠢᠮᠡᠯ ᠪᠢ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠭᠠᠳᠠᠨᠠ ᠳᠠᠭᠠᠵᠤ ᠡᠰᠡ ᠡᠴᠢᠪᠡᠰᠦ ᠰᠡᠳᠬᠢᠯ ᠠᠮᠤᠬᠤ ᠦᠭᠡᠢ ᠃ 》ᠬᠡᠮᠡᠭᠰᠡᠨ ᠳ᠋ᠤᠷ ᠲᠠᠢᠽᠦ ᠮᠠᠰᠢᠳᠠ ᠪᠡᠶᠡᠰᠦᠨ ᠵᠠᠬᠢᠷᠤᠨ᠄ 《 ᠵᠢᠨᠦᠩ ᠤᠨ ᠦᠭᠡ ᠮᠠᠰᠢ ᠴᠢᠬᠡᠴᠢ ᠦᠨᠡᠨ᠂ ᠪᠢ ᠴᠢᠮᠠᠶᠢ ᠶᠠᠭᠤᠨ ᠬᠡᠯᠡᠬᠦ ᠪᠣᠯᠪᠠ ᠬᠡᠮᠡᠭᠰᠡᠨ ᠪᠥᠯᠥᠭᠡ᠂ ᠴᠢᠪᠬᠢᠲᠡᠯᠡ ᠮᠢᠨᠦ ᠴᠢᠨᠠᠳᠤ ᠰᠠᠨᠠᠭᠠᠨ ᠳ᠋ᠤᠷ ᠨᠡᠢᠴᠡᠵᠦᠬᠦᠢ!》 ᠬᠡᠮᠡᠬᠦᠢ ᠳ᠋ᠦ᠍ᠷ ᠪᠤᠭᠤᠷᠵᠢ ᠮᠥᠨ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ : 《ᠲᠦᠰᠢᠮᠡᠯ ᠪᠢ ᠠᠯᠵᠠᠭᠤᠷᠠᠨ ᠵᠠᠯᠬᠠᠭᠤᠷᠠᠨ ᠴᠡᠷᠢᠭ ᠤᠨ ᠵᠢᠨᠦᠩ ᠤᠨ ᠦᠭᠡ ᠶ᠋ᠢ ᠳᠠᠭᠠᠭᠤᠯᠵᠤ ᠂ ᠲᠡᠭᠦᠨ ᠳ᠋ᠦ᠍ᠷ ᠲᠦᠯᠬᠢᠬᠦ ᠪᠤᠰᠤ᠂ ᠵᠢᠨᠦᠩ ᠤᠨ ᠥᠪᠡᠷᠡ ᠪᠠ ᠪᠤᠰᠤᠳ ᠢ᠋ ᠮᠡᠳᠡᠭᠰᠡᠨ ᠢᠨᠤ ᠪᠢᠴᠢᠬᠠᠨ ᠴᠤ᠌ ᠬᠡᠯᠪᠡᠢᠭᠦᠦ ᠦᠭᠡᠢ ᠂ ᠡᠨᠡ ᠭᠠᠪᠢᠶᠠ ᠶ᠋ᠢ ᠲᠤᠰᠢᠮᠡᠯ ᠪᠢ ᠳᠤᠷᠠᠲᠠᠶᠠ ᠵᠢᠨᠦᠩ ᠳ᠋ᠦ᠍ᠷ ᠲᠦᠯᠬᠢᠨ ᠥᠭᠰᠦᠭᠡᠢ᠃ ᠭᠠᠭᠴᠠ ᠴᠡᠷᠢᠭ ᠠᠷᠠᠬᠠᠨ ᠨᠥᠰᠬᠦᠢ ᠦᠭᠡᠢ ᠦᠦ ?》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠪᠤᠭᠤᠷᠵᠢ ᠶ᠋ᠢ ᠴᠡᠷᠢᠭ ᠤᠨ ᠶᠣᠰᠣ ᠶ᠋ᠢ ᠮᠡᠳᠡᠪᠡ ᠭᠡᠮᠡᠨ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠥᠭᠦᠯᠡᠷᠦᠨ ᠄ 《 ᠠᠬᠠᠢ ᠶ᠋ᠢᠨ ᠦᠭᠡ ᠮᠠᠰᠢ ᠮᠥᠨ ᠂ ᠭᠠᠭᠴᠠ ᠴᠠᠭ ᠢ᠋ ᠡᠰᠡ ᠬᠢᠨᠠᠵᠤᠬᠤᠢ᠃ ᠡᠨᠡ ᠵᠢᠯ ᠤᠨ ᠵᠦᠰᠡ ᠬᠤᠷᠠ ᠳ᠋ᠤᠷ ᠡᠪᠡᠰᠦ ᠥᠰᠴᠦ ᠮᠠᠨ ᠤ᠋ ᠴᠡᠷᠢᠭ ᠤᠨ ᠠᠭᠲᠠ ᠠᠰᠤᠷᠤ ᠲᠠᠷᠭᠤᠯᠠᠵᠤᠬᠤᠢ᠃ ᠡᠳᠦᠭᠡ ᠬᠠᠷᠠᠬᠠᠨ ᠮᠣᠷᠢ ᠲᠡᠮᠡᠭᠡ ᠶ᠋ᠢ ᠬᠠᠭᠰᠠᠭᠠᠨ ᠰᠣᠢᠬᠤ ᠴᠠᠭ ᠂ ᠪᠤᠰᠤ ᠪᠣᠯᠪᠠᠰᠤ ᠬᠣᠢᠲᠤ ᠬᠠᠪᠤᠷ ᠯᠠᠪ ᠬᠥᠯ ᠪᠤᠯᠵᠠᠬᠤ ᠵᠠᠷ ᠪᠣᠯᠤᠮᠤᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠪᠤᠭᠤᠷᠵᠢ ᠰᠠᠶ᠋ᠢ ᠰᠩᠬᠢᠵᠦ ᠨᠠᠮᠤᠷ ᠤᠨ ᠨᠠᠢ᠌ᠮᠠᠨ ᠰᠠᠷᠠ ᠶ᠋ᠢ ᠰᠠᠨᠠᠭᠠᠯᠵᠠᠪᠠ ᠃
ᠲᠡᠳᠦᠢ ᠡᠵᠡᠨ ᠲᠦᠰᠢᠮᠡᠯ ᠰᠡᠳᠬᠢᠯ ᠨᠢᠭᠡᠳᠴᠦ ᠵᠠᠩᠵᠤᠨ ᠴᠡᠷᠢᠭ ᠢ᠋ ᠲᠡᠭᠰᠢᠯᠡᠨ ᠂ ᠤᠯᠤᠰ ᠢ᠋ ᠰᠠᠬᠢᠬᠤ ᠪᠠ ᠴᠡᠷᠢᠭ ᠲᠦ᠍ᠷ ᠳᠠᠭᠠᠬᠤ ᠶ᠋ᠢ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠲᠣᠷᠭᠠᠨ ᠰᠢᠷᠠ ᠂ ᠴᠡᠷᠢᠭ ᠤᠨ ᠵᠢᠨᠦᠩ ᠮᠤᠬᠤᠯᠢ ᠨᠠᠷ ᠵᠢᠨᠦᠩ ᠤᠨ ᠴᠠᠴᠠᠷ ᠲᠤᠷ ᠵᠥᠪᠯᠡᠨ ᠲᠣᠭᠲᠠᠭᠠᠵᠤ ᠴᠠᠭᠠᠵᠠ ᠵᠠᠷᠯᠠᠭᠰᠠᠨ ᠠᠨᠤ ᠄ 《ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠲᠣᠷᠭᠠᠨ ᠰᠢᠷᠠ᠂ ᠬᠦᠯᠦᠭ ᠪᠤᠭᠤᠷᠵᠢ ᠬᠣᠶᠠᠭᠤᠯᠠ ᠤᠯᠤᠰ ᠤ᠋ᠨ ᠣᠯᠠᠨ ᠢ᠋ ᠠᠪᠴᠤ ᠤᠯᠤᠰ ᠢ᠋ ᠰᠠᠬᠢ ᠂ ᠡᠵᠡᠨ ᠤ ᠪᠡᠶᠡ ᠂ ᠵᠢᠨᠦᠩ ᠮᠤᠬᠤᠯᠢ ᠵᠠᠩᠵᠤᠨ ᠴᠡᠷᠢᠭ ᠢ᠋ ᠬᠠᠭᠠᠰᠯᠠᠨ ᠠᠪᠴᠤ ᠰᠣᠯᠣᠩᠭᠣᠰ ᠢ᠋ ᠳᠠᠢᠯᠠᠮᠤᠢ ᠂ ᠲᠣᠭᠲᠣᠩᠭᠣ᠌ ᠪᠠᠭᠠᠲᠤᠷ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠬᠣᠶᠠᠭᠤᠯᠠ ᠳ᠋ᠤᠷ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠵᠠᠬᠢᠷᠤᠭᠤᠯᠵᠤ ᠂ ᠸᠠᠢᠵᠢᠩ ᠂ ᠠᠯᠠᠢᠵᠢᠩ ᠬᠣᠶᠠᠷ ᠵᠠᠩᠵᠤᠨ ᠢ᠋ ᠲᠤᠰᠢᠶᠠᠨ ᠥᠭᠴᠦ ᠠᠭᠤᠯᠠᠨ ᠳ᠋ᠤᠷ ᠤᠴᠠᠷᠠᠪᠠᠰᠤ ᠵᠠᠮ ᠨᠡᠬᠡᠭᠡ ᠂ ᠤᠰᠤᠨ ᠳ᠋ᠤᠷ ᠤᠴᠠᠷᠠᠪᠠᠰᠤ ᠬᠥᠭᠥᠷᠭᠡ ᠳᠡᠯᠪᠢ ᠂ ᠲᠠᠯᠠ ᠳ᠋ᠤᠷ ᠪᠣᠯᠪᠠᠰᠤ ᠪᠠᠭᠤᠳᠠᠯ ᠪᠡᠯᠡᠳᠭᠡ ᠂ ᠠᠢᠯ ᠳ᠋ᠤᠷ ᠪᠣᠯᠪᠠᠰᠤ ᠴᠠᠭᠳᠠᠭᠤᠯ ᠪᠣᠯ !》 ᠭᠡᠮᠡᠨ ᠬᠣᠰᠢᠭᠤᠴᠢ ᠪᠣᠯᠭᠠᠨ ᠤᠷᠢᠳᠠ ᠮᠣᠷᠳᠠᠭᠤᠯᠤᠭᠠᠳ ᠵᠢᠴᠢ ᠬᠠᠪᠤᠲᠤ ᠬᠠᠰᠠᠷ ᠂ ᠬᠦᠷᠭᠡᠨ ᠪᠣᠲ᠋ᠣ ᠂ ᠣᠢᠲᠤ ᠤᠴᠢᠭ ᠂ ᠤᠷᠠᠨ ᠭᠠᠴᠤᠭ ᠂ ᠳᠥᠷᠪᠡᠭᠦᠯᠡ ᠳ᠋ᠦ᠍ᠷ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠥᠭᠴᠦ ᠲᠡᠷᠢᠭᠦᠨ ᠠᠩᠭᠢ ᠳ᠋ᠤᠷ ᠶᠠᠪᠤᠭᠤᠯᠤᠨ ᠂ ᠵᠢᠨᠦᠩ ᠮᠤᠬᠤᠯᠢ ᠥᠪᠡᠷ ᠢᠶᠠᠨ ᠭᠢᠯᠥᠭᠡᠨ ᠪᠠᠭᠠᠲᠤᠷ ᠂ ᠮᠠᠩᠭᠤᠳ ᠤ᠋ᠨ ᠬᠤᠢᠯᠠᠳᠠᠷ ᠪᠠᠭᠠᠲᠤᠷ ᠂ ᠠᠯᠤᠬᠠ ᠂ ᠰᠦᠬᠡ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠂ ᠨᠡᠢᠲᠡ ᠳᠥᠷᠪᠡᠨ ᠪᠠᠭᠠ ᠵᠠᠩᠵᠤᠨ ᠨᠠᠷ ᠢ᠋ ᠠᠪᠴᠤ ᠳᠥᠷᠪᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ ᠵᠠᠬᠢᠷᠤᠨ ᠳᠡᠳ᠋ ᠠᠩᠭᠢ ᠳ᠋ᠤᠷ ᠪᠣᠯᠵᠤ ᠂ ᠲᠠᠢᠽᠦ ᠴᠤᠤ ᠮᠡᠷᠭᠡᠨ ᠂ ᠬᠤᠳᠠᠭᠠᠨᠠ ᠪᠡᠬᠢ ᠂ ᠵᠡᠪᠡ ᠂ ᠵᠡᠯᠮᠡ ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠂ ᠣᠶᠤᠲᠤ ᠰᠡᠴᠡᠨ ᠂ ᠣᠶᠤᠨ ᠭᠤᠸᠠ ᠂ ᠲᠡᠭᠦᠰᠴᠣᠭᠲᠤ ᠂ ᠠᠷᠪᠠᠨ ᠪᠠᠭᠠ ᠵᠠᠩᠵᠤᠨ ᠨᠠᠷ ᠢ᠋ ᠠᠪᠴᠤ ᠰᠡᠭᠦᠯ ᠳ᠋ᠦ᠍ᠷ ᠪᠣᠯᠵᠤ ᠂ ᠪᠦᠬᠦ ᠪᠡᠯᠭᠦᠳᠡᠢ ᠂ ᠬᠦᠯᠦᠭ ᠴᠢᠯᠠᠭᠤᠨ ᠂ ᠬᠦᠯᠦᠭ ᠪᠤᠭᠤᠷᠤᠯ᠂ ᠤᠯᠤᠰ ᠤ᠋ᠨ ᠨᠠᠭᠠᠴᠤ ᠬᠤᠳᠠᠷᠭᠠ ᠪᠠᠭᠠᠲᠤᠷ ᠳᠥᠷᠪᠡᠭᠦᠯᠡ ᠬᠥᠮᠦᠨ ᠪᠦᠷᠢ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ ᠤᠯᠤᠰ ᠤ᠋ᠨ ᠳᠥᠷᠪᠡᠨ ᠡᠲᠡᠭᠡᠳ ᠲᠣᠷ ᠰᠡᠷᠭᠡᠢᠯᠡᠨ ᠰᠠᠬᠢᠭᠠᠳ ᠬᠣᠩᠬᠣᠲᠠᠨ ᠤ᠋ ᠮᠡᠩᠬᠡᠯᠢᠭ ᠂ ᠠᠷᠭᠠᠰᠤᠨ ᠤ᠋ ᠬᠣᠷᠭᠣᠯᠵᠢ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠢᠶᠠᠷ ᠬᠣᠷᠣᠭᠠ ᠬᠦᠷᠢᠶᠡ ᠶ᠋ᠢ ᠬᠠᠮᠠᠭᠠᠯᠠᠨ ᠰᠠᠬᠢᠵᠤ ᠂ ᠳᠣᠲᠣᠷᠠ ᠭᠠᠳᠠᠨᠠ ᠪᠡᠯᠡᠨ ᠵᠠᠯᠠᠨ ᠪᠣᠯᠤᠭᠰᠠᠨᠠ ᠂ ᠵᠢᠨᠦᠩ ᠮᠤᠬᠤᠯᠢ ᠂ ᠨᠠᠢ᠌ᠮᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ ᠲᠤᠭ ᠢ ᠳᠠᠬᠢᠭᠠᠳ ᠲᠡᠮᠳᠡᠭ ᠳᠠᠯᠪᠠᠭᠠ ᠨᠢᠭᠡᠨᠲᠡ ᠳᠠᠷᠤᠮᠠᠭᠴᠠ ᠴᠡᠷᠢᠭ ᠤᠨ ᠫᠤᠤ ᠨᠢᠭᠡᠨᠲᠡ ᠳᠤᠤᠭᠠᠷᠴᠤ ᠳᠥᠷᠪᠡᠨ ᠠᠩᠭᠢ ᠴᠡᠷᠢᠭ ᠬᠠᠮᠲᠤ ᠪᠠᠷ ᠬᠥᠳᠡᠯᠵᠦ ᠂ ᠰᠣᠯᠣᠩᠭᠣᠰ ᠤᠯᠤᠰ ᠤ᠋ᠨ ᠵᠦᠭ ᠮᠣᠷᠳᠠᠪᠠ ᠃ ᠭᠤᠷᠪᠠᠨ ᠠᠩᠭᠢ ᠶ᠋ᠢᠨ ᠴᠡᠷᠢᠭ ᠤᠨ ᠶᠠᠪᠤᠬᠤ ᠠᠨᠤ ᠬᠠᠨ ᠠᠭᠤᠯᠠ ᠨᠤᠷᠠᠵᠤ ᠬᠠᠲᠤᠨ ᠮᠥᠷᠡᠨ ᠰᠡᠲᠡᠷᠡᠭᠰᠡᠨ ᠮᠡᠲᠦ ᠠᠶᠤᠮᠰᠢᠭ ᠲᠠᠢ ᠃ ᠲᠤᠭ ᠬᠢᠭᠢᠷᠢ ᠨᠠᠷᠠᠨ ᠢ᠋ ᠬᠠᠯᠠᠭᠯᠠᠵᠤ ᠂ ᠵᠠᠷ ᠵᠡᠪᠰᠡᠭ ᠬᠠᠷᠴᠢᠭᠢᠨᠠᠨ ᠂ ᠥᠩᠭᠡᠲᠦ ᠬᠤᠶᠠᠭ ᠭᠢᠯᠪᠡᠯᠵᠡᠨ ᠂ ᠲᠠᠷᠭᠤᠨ ᠮᠣᠷᠢ ᠲᠠᠯᠠ ᠳ᠋ᠤᠷ ᠳᠦᠭᠦᠷᠦᠭᠡᠳ ᠲᠡᠳᠦᠢ ᠵᠠᠮ ᠳ᠋ᠤᠷ ᠵᠠᠷᠤᠳ ᠠᠢᠮᠠᠭ ᠤ᠋ᠨ ᠰᠤᠯᠤᠩᠭᠤᠳ ᠤᠯᠤᠰ ᠢᠶᠠᠷ ᠳᠠᠭᠠᠷᠢᠵᠤ ᠂ ᠨᠢᠳᠤᠨᠤᠨ ᠤ᠋ ᠨᠡᠮᠡᠵᠦ ᠬᠢᠯᠭᠡᠭᠰᠡᠨ ᠭᠤᠷᠪᠠᠨ ᠵᠠᠭᠤᠨ ᠰᠠᠯ ᠣᠩᠭᠣᠴᠠ ᠶ᠋ᠢ ᠵᠡᠯᠮᠡ ᠂ ᠬᠠᠰᠠᠷ ᠬᠣᠶᠠᠭᠤᠯᠠ ᠳ᠋ᠤᠷ ᠳᠠᠭᠠᠭᠠᠯᠭᠠᠵᠤ ᠂ ᠦᠯᠢᠶᠡᠨ ᠭᠣᠣᠯ ᠢ᠋ ᠤᠷᠤᠭᠤᠳᠠᠨ ᠦᠨᠡᠭᠡᠨ ᠮᠥᠷᠡᠨ ᠤ ᠰᠠᠯᠪᠤᠷᠢ ᠳ᠋ᠤᠷ ᠣᠷᠣᠭᠤᠯᠤᠨ ᠥᠭᠡᠳᠡᠯᠡᠭᠦᠯᠵᠦ ᠂ ᠴᠡᠷᠢᠭ ᠭᠡᠲᠦᠯᠬᠦ ᠣᠯᠣᠮ ᠳ᠋ᠤᠷ ᠬᠦᠯᠢᠶᠡᠯᠭᠡᠷᠡ ᠶᠠᠪᠤᠭᠤᠯᠪᠠ ᠃ ᠤᠭ ᠠ᠋ᠴᠠ ᠠᠷᠤ ᠭᠠᠵᠠᠷ ᠲᠤᠷ ᠭᠣᠣᠯ ᠮᠥᠷᠡᠨ ᠳ᠋ᠦ᠍ᠷ ᠣᠩᠭᠣᠴᠠ ᠰᠠᠯ ᠮᠠᠰᠢ ᠴᠥᠭᠡᠨ ᠂ ᠬᠡᠳᠦᠢ ᠵᠠᠷᠢᠮ ᠵᠠᠷᠢᠮ ᠳ᠋ᠤᠷ ᠨᠠᠮᠤᠷ ᠬᠠᠪᠤᠷ ᠲᠤᠷ ᠶᠡᠬᠡ ᠮᠥᠷᠡᠨ ᠭᠣᠣᠯ ᠢ᠋ ᠭᠡᠲᠦᠯᠬᠦ ᠴᠢᠬᠤᠯᠠ ᠬᠡᠷᠡᠭ ᠲᠦ᠍ᠷ ᠲᠣᠬᠢᠶᠠᠯᠳᠤᠪᠠᠰᠤ ᠣᠯᠠᠩᠬᠢ ᠨᠢ ᠴᠥᠮ ᠦᠬᠡᠷ ᠤᠨ ᠲᠦᠭᠦᠬᠡᠢ ᠠᠷᠠᠰᠤ ᠪᠠᠷ ᠮᠣᠳᠣᠨ ᠤ᠋ ᠠᠷᠠᠯ ᠳ᠋ᠤᠷ ᠪᠦᠷᠬᠦᠵᠦ ᠲᠡᠯᠡᠭᠰᠡᠨ ᠰᠠᠯ ᠢᠶᠡᠷ ᠭᠡᠲᠦᠯᠦᠮᠦᠢ ᠃ ᠲᠡᠷᠡ ᠰᠠᠯ ᠬᠣᠶᠠᠷ ᠭᠤᠷᠪᠠᠨ ᠬᠥᠮᠦᠨ ᠡᠴᠡ ᠢᠯᠡᠭᠦᠦ ᠶ᠋ᠢ ᠳᠠᠭᠠᠭᠠᠬᠤ ᠦᠭᠡᠢ ᠃ ᠡᠳᠦᠭᠡ ᠵᠠᠷᠤᠳ ᠤ᠋ᠨ ᠡᠨᠡ ᠣᠩᠭᠣᠴᠠ ᠪᠣᠯᠪᠠᠰᠤ ᠴᠥᠮ ᠵᠠᠷᠤᠳ ᠤ᠋ᠨ ᠶᠡᠬᠡ ᠮᠣᠳᠣᠨ ᠢ᠋ ᠤᠨᠠᠭᠠᠵᠤ ᠬᠢᠭᠰᠡᠨ ᠲᠤᠯᠠ ᠴᠡᠷᠢᠭ ᠭᠡᠲᠦᠯᠬᠦᠢ ᠳ᠋ᠦ᠍ᠷ ᠨᠢᠭᠡᠨ ᠣᠩᠭᠣᠴᠠᠨᠠ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠰᠠᠭᠤᠵᠤ ᠪᠣᠯᠤᠮᠤᠢ ᠃
ᠲᠡᠭᠦᠨᠴᠡ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠰᠣᠯᠤᠩᠭᠤᠳ ᠤ᠋ᠨ ᠴᠡᠷᠢᠭ ᠢ᠋ ᠨᠡᠮᠡᠨ ᠪᠠᠢᠭᠤᠯᠵᠤ ᠂ ᠲᠦᠳᠡ ᠵᠠᠮ ᠢᠶᠡᠷ ᠰᠣᠯᠣᠩᠭᠣᠰ ᠤᠯᠤᠰ ᠤ᠋ᠨ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠪᠦᠬᠦᠢ ᠶᠡᠬᠡ ᠦᠨᠡᠭᠡᠨ ᠤ ᠮᠥᠷᠡᠨ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠡᠳ ᠲᠠᠪᠤᠨ ᠬᠦᠷᠢᠶᠡ ᠪᠠᠢᠭᠤᠯᠵᠤ ᠂ ᠴᠡᠷᠢᠭ ᠢ᠋ ᠪᠠᠬᠠᠨ ᠠᠮᠤᠭᠤᠯᠵᠤ ᠂ ᠭᠤᠷᠪᠠᠨ ᠬᠣᠨᠣᠭ ᠪᠠᠢᠴᠠᠭᠠᠨ ᠪᠣᠯᠪᠠᠰᠤᠷᠠᠭᠤᠯᠲᠠᠯᠠ ᠣᠯᠠᠨ ᠣᠩᠭᠣᠴᠠ ᠳᠠᠷᠠᠭᠠ ᠪᠠᠷ ᠬᠦᠷᠴᠦ ᠢᠷᠡᠪᠡ ᠃ ᠲᠠᠢᠽᠦ ᠭᠠᠢᠬᠠᠵᠤ ᠮᠥᠷᠡᠨ ᠤ ᠬᠥᠪᠡᠭᠡ ᠳ᠋ᠦ᠍ᠷ ᠡᠴᠢᠵᠦ ᠦᠵᠡᠪᠡᠰᠦ ᠣᠩᠭᠣᠴᠠ ᠪᠦᠷᠢ ᠶ᠋ᠢᠨ ᠳᠤᠮᠳᠠ ᠴᠥᠮ ᠨᠢᠭᠡᠨ ᠰᠢᠷᠤᠭ ᠪᠣᠰᠬᠠᠵᠤ ᠳᠡᠭᠡᠷᠡ ᠢᠨᠤ ᠮᠣᠷᠢ ᠂ ᠬᠣᠨᠢ ᠂ ᠢᠮᠠᠭᠠ ᠶ᠋ᠢᠨ ᠠᠷᠠᠰᠤ ᠪᠠᠷ ᠡᠪᠭᠡᠭᠡᠰᠦᠲᠦ ᠳᠠᠷᠪᠠᠭᠤᠯ ᠬᠢᠵᠦ ᠡᠨᠡ ᠬᠡᠳᠦᠨ ᠡᠳᠦᠷ ᠪᠠᠰᠠ ᠡᠮᠦᠨᠡ ᠡᠴᠡ ᠰᠠᠯᠬᠢᠯᠠᠭᠰᠠᠨ ᠳ᠋ᠤᠷ ᠬᠠᠷᠪᠤᠭᠰᠠᠨ ᠰᠤᠮᠤ ᠮᠡᠲᠦ ᠲᠦᠷᠭᠡᠨᠡ ᠬᠦᠷᠴᠦ ᠢᠷᠡᠵᠦᠬᠦᠢ ᠃ ᠡᠳᠡᠭᠡᠷ ᠪᠣᠯᠪᠠᠰᠤ ᠵᠡᠯᠮᠡ ᠠᠨᠳᠤᠨ ᠴᠢᠩ ᠨᠠᠷ ᠤ᠋ᠨ ᠠᠷᠭᠠ ᠤᠬᠠᠭᠠᠨ ᠠᠵᠤᠭᠤ᠃ ᠲᠠᠢᠽᠦ ᠮᠠᠰᠢᠳᠠ ᠪᠡᠶᠡᠰᠴᠦ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢ ᠬᠥᠮᠦᠨ ᠢ᠋ ᠣᠯᠵᠤ ᠬᠡᠷᠡᠭᠯᠡᠪᠡ ᠭᠡᠮᠡᠨ ᠬᠦᠨᠳᠦ ᠱᠠᠩ ᠥᠭᠭᠦᠭᠰᠡᠨ ᠢ᠋ ᠮᠤᠬᠤᠯᠢ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠡᠭᠡᠮᠡᠭᠴᠡ ᠪᠠᠷᠢᠭᠰᠠᠭᠠᠷ ᠴᠥᠮ ᠵᠡᠯᠮᠡ ᠲᠡᠷᠢᠭᠦᠯᠡᠨ ᠠᠨᠳᠤᠨ ᠴᠢᠩ ᠲᠠᠨᠠ ᠱᠠᠩᠨᠠᠨ ᠥᠭᠭᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠠ᠋ᠴᠠ ᠲᠡᠷᠢᠭᠦᠯᠡᠨ ᠰᠤᠯᠠ ᠬᠤᠶᠠᠭ ᠲᠤᠷ ᠬᠦᠷᠲᠡᠯᠡ ᠪᠦᠭᠦᠳᠡᠭᠡᠷ ᠭᠠᠢᠬᠠᠨ ᠪᠢᠰᠢᠷᠡᠪᠡᠢ ᠃
ᠲᠡᠳᠦᠢ ᠮᠤᠬᠤᠯᠢ ᠮᠥᠨ ᠬᠦ᠌ ᠵᠡᠯᠮᠡ ᠂ ᠠᠨᠳᠤᠨ ᠴᠢᠩ ᠬᠣᠶᠠᠭᠤᠯᠠ ᠶ᠋ᠢ ᠠᠪᠤᠨ ᠪᠠᠢᠵᠤ ᠭᠤᠷᠪᠠᠨ ᠵᠠᠭᠤᠨ ᠣᠩᠭᠣᠴᠠ ᠪᠠᠷ ᠲᠣᠭᠣᠷᠢᠭᠤᠯᠤᠨ ᠨᠢᠭᠡᠨ ᠶᠡᠬᠡ ᠤᠰᠤᠨ ᠬᠦᠷᠢᠶᠡ ᠪᠠᠢᠭᠤᠯᠵᠤ ᠲᠤᠭ ᠬᠢᠭᠢᠷᠢ ᠰᠢᠭᠦᠷ ᠳᠠᠯᠪᠠᠭᠠ ᠶ᠋ᠢ ᠶᠡᠬᠡᠳᠡ ᠬᠠᠳᠬᠤᠭᠰᠠᠨ ᠳ᠋ᠤᠷ ᠬᠣᠯᠠ ᠠ᠋ᠴᠠ ᠦᠵᠡᠪᠡᠰᠦ ᠬᠡᠳᠦᠨ ᠮᠢᠩᠭᠠᠨ ᠣᠩᠭᠣᠴᠠ ᠮᠡᠲᠦ ᠣᠯᠠᠨ ᠦᠵᠡᠭᠳᠡᠮᠦᠢ ᠃ ᠲᠡᠳᠦᠢ ᠲᠣᠭᠣᠷᠢᠭᠤᠯᠵᠤ ᠰᠢᠷ ᠳᠡᠭᠡᠰᠦ ᠮᠣᠳᠣᠨ ᠭᠠᠳᠠᠰᠤ ᠪᠠᠷ ᠬᠣᠯᠪᠣᠨ ᠬᠠᠰᠢᠵᠤ ᠂ ᠨᠣᠢᠲᠠᠨ ᠠᠷᠠᠰᠤᠨ ᠤ᠋ ᠬᠠᠯᠬᠠᠪᠴᠢ ᠪᠠᠷ ᠬᠠᠯᠬᠠᠯᠠᠨ ᠂ ᠬᠥᠬᠡ ᠡᠪᠡᠰᠦᠨ ᠤ ᠪᠣᠭᠣᠳᠠᠯ ᠢᠶᠠᠷ ᠬᠠᠰᠢᠵᠤ ᠪᠡᠯᠡᠨ ᠵᠠᠯᠠᠨ ᠪᠣᠯᠭᠠᠵᠤ ᠂ ᠮᠤᠬᠤᠯᠢ ᠲᠠᠢᠽᠦ ᠶ᠋ᠢ ᠵᠠᠯᠠᠵᠤ ᠤᠰᠤᠨ ᠬᠦᠷᠢᠶᠡ ᠶ᠋ᠢ ᠦᠵᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠨᠢᠭᠡᠨᠲᠡᠭᠡᠭᠦᠷ ᠪᠡᠶᠡᠰᠦᠨ ᠦᠵᠡᠬᠦ ᠪᠥᠭᠡᠳ ᠨᠢᠭᠡᠨᠲᠡᠭᠡᠭᠦᠷ ᠰᠡᠮᠡᠬᠡᠷ ᠮᠤᠬᠤᠯᠢ ᠠ᠋ᠴᠠ ᠠᠰᠠᠭᠤᠷᠤᠨ᠄ 《 ᠵᠢᠨᠦᠩ ᠴᠢ ᠳᠠᠷᠤᠢ ᠮᠥᠷᠡᠨ ᠢ᠋ ᠦᠯᠦ ᠭᠡᠲᠦᠯᠬᠦ ᠢᠨᠤ ᠶᠠᠭᠤᠨ? 》ᠭᠡᠮᠡᠨ ᠠᠰᠠᠭᠤᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠬᠤᠷᠤᠭᠤ ᠪᠠᠷ ᠳᠠᠯᠪᠠᠭᠠ ᠶ᠋ᠢᠨ ᠸᠠᠳᠠᠩ ᠢ᠋ ᠵᠢᠭᠠᠵᠤ ᠮᠡᠳᠡᠭᠦᠯᠦᠷᠦᠨ᠄ 《 ᠡᠵᠡᠨ ᠮᠢᠨᠦ ᠡᠭᠦᠨ ᠢ᠋ ᠶᠠᠭᠤᠨ ᠳ᠋ᠤᠷ ᠦᠯᠦ ᠠᠢᠯᠠᠳᠤᠮᠤᠢ ? 》 ᠲᠠᠢᠽᠦ ᠦᠵᠡᠪᠡᠰᠦ ᠲᠤᠭ ᠬᠢᠭᠢᠷᠢ ᠶ᠋ᠢᠨ ᠸᠠᠳᠠᠩ ᠪᠦᠷᠢ ᠴᠥᠮ ᠡᠮᠦᠨᠡ ᠡᠴᠡ ᠬᠣᠢᠲᠤ ᠵᠦᠭ ᠲᠦ᠍ᠷ ᠳᠡᠷᠪᠡᠯᠵᠡᠨ ᠬᠡᠢᠰᠬᠦ ᠢᠨᠤ ᠮᠠᠰᠢ ᠬᠦᠴᠦᠲᠡᠢ ᠃ ᠲᠠᠢᠽᠦ ᠪᠠᠰᠠ ᠠᠰᠠᠭᠤᠷᠤᠨ ᠄ 《 ᠯᠠᠪ ᠬᠤᠷᠠ ᠣᠷᠣᠬᠤᠢ ᠶ᠋ᠢ ᠬᠡᠷᠬᠢᠨ ᠮᠡᠳᠡᠪᠡ ?》 ᠮᠤᠬᠤᠯᠢ ᠮᠡᠳᠡᠭᠦᠯᠦᠷᠦᠨ ᠄ ᠡᠵᠡᠨ ᠮᠢᠨᠦ ᠴᠠᠭ ᠦᠶᠡ ᠶ᠋ᠢ ᠠᠢᠯᠠᠳᠤᠨ ᠦᠵᠡᠮᠦ᠃ ᠡᠨᠡ ᠬᠡᠮᠡᠭᠴᠢ ᠬᠠᠷᠠᠬᠠᠨ ᠨᠠᠮᠤᠷ ᠤ᠋ᠨ ᠳᠤᠮᠳᠠᠳᠤ ᠰᠠᠷᠠ ᠪᠥᠭᠡᠲᠡᠯᠡ ᠡᠨᠡ ᠮᠡᠲᠦ ᠡᠮᠦᠨᠡ ᠡᠴᠡ ᠰᠠᠯᠬᠢᠯᠠᠬᠤ ᠠᠨᠤ ᠯᠠᠪ ᠨᠢᠭᠡᠨ ᠤᠳᠠᠭᠠ ᠶ᠋ᠢᠨ ᠶᠡᠬᠡ ᠬᠤᠷᠠ ᠪᠣᠢ ᠂ ᠳᠡᠳ᠋ ᠲᠣᠷ ᠡᠨᠡ ᠮᠥᠷᠡᠨ ᠤ ᠡᠮᠦᠨᠡ ᠦᠵᠦᠭᠦᠷ ᠵᠡᠭᠦᠨ ᠡᠮᠦᠨᠡ ᠳ᠋ᠦ᠍ᠷ ᠳᠠᠯᠠᠢ ᠳ᠋ᠤᠷ ᠴᠢᠳᠬᠤᠬᠤ ᠲᠤᠯᠠ ᠬᠠᠭᠠᠰ ᠰᠠᠷᠠ ᠰᠢᠬᠠᠮ ᠡᠳᠦᠷ ᠰᠥᠨᠢ ᠦᠭᠡᠢ ᠡᠮᠦᠨᠡ ᠡᠴᠡ ᠰᠠᠯᠬᠢᠯᠠᠪᠠᠰᠤ ᠳᠠᠯᠠᠢ ᠶ᠋ᠢᠨ ᠳᠠᠪᠠᠯᠭᠠᠨ ᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠨ ᠡᠨᠡ ᠮᠥᠷᠡᠨ ᠥᠭᠡᠳᠡ ᠦᠶᠡᠷᠯᠡᠵᠦ ᠲᠡᠯᠡᠮᠦᠢ ᠂ ᠲᠡᠢᠨ ᠬᠦ᠌ ᠡᠨᠡ ᠮᠡᠲᠦ ᠰᠡᠷᠭᠡᠢᠯᠡᠨ ᠪᠡᠯᠡᠳᠬᠡᠪᠡ ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠂ ᠲᠠᠢᠽᠦ ᠳᠣᠲᠣᠷᠠ ᠪᠠᠨ ᠮᠤᠬᠤᠯᠠᠢ ᠶ᠋ᠢᠨ ᠨᠠᠷᠢᠨ ᠬᠢᠨᠠᠮᠠᠭᠠᠢ ᠰᠡᠷᠡᠮᠵᠢ ᠬᠢᠴᠢᠶᠡᠯᠲᠡᠢ ᠶ᠋ᠢ ᠶᠡᠬᠡᠳᠡ ᠭᠠᠢᠬᠠᠪᠠ ᠃ ᠦᠨᠡᠬᠡᠷ ᠡᠨᠡ ᠰᠥᠨᠢ ᠭᠠᠬᠠᠢ ᠴᠠᠭ ᠠ᠋ᠴᠠ ᠦᠨᠡᠭᠡ ᠶ᠋ᠢᠨ ᠮᠥᠷᠡᠨ ᠥᠭᠡᠳᠡ ᠲᠡᠯᠡᠵᠦ ᠶᠡᠬᠡᠳᠡ ᠪᠢᠯᠬᠠᠵᠤ ᠂ ᠭᠡᠭᠡᠷᠡᠬᠦ ᠦᠶᠡ ᠳ᠋ᠦ᠍ᠷ ᠦᠨᠡᠬᠡᠷ ᠪᠠᠰᠠ ᠶᠡᠬᠡ ᠬᠤᠷᠠ ᠡᠬᠢᠯᠡᠨ ᠣᠷᠣᠵᠤ ᠭᠤᠷᠪᠠᠨ ᠡᠳᠦᠷ ᠪᠣᠯᠵᠤ ᠰᠠᠯᠬᠢᠨ ᠰᠠᠶ᠋ᠢ ᠵᠣᠭᠰᠣᠵᠤ ᠮᠥᠷᠡᠨ ᠰᠠᠶ᠋ᠢ ᠲᠠᠲᠠᠷᠠᠪᠠᠢ ᠃ ᠡᠭᠦᠨ ᠳ᠋ᠦ᠍ᠷ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠤᠳ ᠮᠠᠨ ᠤ᠋ ᠵᠢᠨᠦᠩ ᠳ᠋ᠦ᠍ᠷ ᠳᠡᠭᠷᠢᠯᠢᠭ ᠡᠵᠡᠨ ᠮᠡᠲᠦ ᠢᠷᠡᠭᠡᠳᠦᠢ ᠶ᠋ᠢ ᠠᠢᠯᠠᠳᠤᠨ ᠮᠡᠳᠡᠬᠦ ᠬᠤᠪᠢᠯᠭᠠᠨ ᠤᠪᠠᠳᠢᠰ ᠪᠣᠢ ᠭᠡᠮᠡᠨ ᠨᠡᠩᠳᠡ ᠭᠠᠢᠬᠠᠯᠳᠤᠨ ᠪᠢᠰᠢᠷᠡᠵᠦ ᠠᠶᠤᠨ ᠰᠢᠷᠪᠡᠭᠡᠲᠦᠪᠡᠢ ᠃ ᠡᠭᠦᠨᠴᠡ ᠴᠡᠷᠢᠭ ᠤᠨ ᠵᠠᠰᠠᠭ ᠴᠠᠭᠠᠵᠠ ᠶ᠋ᠢ ᠨᠡᠩ ᠬᠢᠴᠢᠶᠡᠨ ᠰᠠᠬᠢᠪᠠᠢ ᠃
ᠲᠡᠨᠳᠡᠴᠡ ᠰᠠᠯᠬᠢᠨ ᠬᠤᠷᠠ ᠠᠷᠢᠯᠵᠤ ᠂ ᠮᠥᠷᠡᠨ ᠤ᠋ ᠦᠶᠡᠷ ᠲᠠᠲᠠᠷᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢ ᠵᠤᠯᠠ ᠶ᠋ᠢᠨ ᠳᠣᠣᠷᠠ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠂ ᠮᠥᠷᠡᠨ ᠢ ᠭᠡᠲᠦᠯᠬᠦᠢ ᠶ᠋ᠢ ᠵᠥᠪᠯᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠮᠡᠳᠡᠭᠦᠯᠦᠷᠦᠨ ᠄ 《 ᠡᠵᠡᠨ ᠮᠢᠨᠦ ᠮᠥᠷᠡᠨ ᠢ ᠭᠡᠲᠦᠯᠬᠦ ᠶ᠋ᠢ ᠲᠦᠷ ᠪᠢᠲᠡᠭᠡᠢ ᠶᠠᠭᠠᠷᠠᠮᠤ ᠂ ᠲᠤᠰᠢᠮᠡᠯ ᠪᠢ ᠪᠣᠳᠣᠪᠠᠰᠤ ᠰᠣᠯᠣᠩᠭᠣᠰ ᠤᠯᠤᠰ ᠬᠡᠳᠦᠢᠪᠡᠷ ᠮᠠᠨ ᠤ᠋ ᠴᠡᠷᠢᠭ ᠢᠷᠡᠭᠰᠡᠨ ᠢ᠋ ᠮᠡᠳᠡᠪᠡᠴᠦ ᠡᠭᠡᠨᠡᠭᠲᠡ ᠰᠠᠨᠠᠭᠠᠨ ᠳ᠋ᠤᠷ ᠦᠭᠡᠢ ᠪᠠᠢᠭᠰᠠᠨ ᠲᠤᠯᠠ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠪᠣᠯᠪᠠᠴᠤ ᠬᠠᠷᠢᠶᠠᠲᠤ ᠴᠡᠷᠢᠭ ᠢᠶᠠᠨ ᠴᠤᠭᠯᠠᠭᠤᠯᠤᠨ ᠵᠠᠪᠳᠤᠬᠤ ᠦᠭᠡᠢ ᠢᠨᠤ ᠮᠠᠭᠠᠳ ᠲᠤᠯᠠ ᠡᠳᠦᠭᠡ ᠡᠵᠡᠨ ᠤ ᠡᠮᠦᠨᠡ ᠡᠴᠡ ᠨᠢᠭᠡᠨ ᠰᠠᠢᠨ ᠲᠠᠰᠤᠷᠬᠠᠢ ᠬᠡᠯᠡᠮᠦᠷᠴᠢ ᠢᠯᠡᠭᠡᠵᠦ ᠂ ᠮᠠᠨ ᠤ᠋ ᠬᠣᠶᠠᠷ ᠤᠯᠤᠰ ᠤᠭ ᠠ᠋ᠴᠠ ᠦᠰᠦᠨ ᠤ ᠲᠡᠳᠦᠢ ᠥ ᠦᠰ ᠦᠭᠡᠢ ᠪᠥᠭᠡᠲᠡᠯᠡ ᠶᠠᠭᠤᠨ ᠤ᠋ ᠤᠴᠢᠷ ᠶᠢᠰᠦᠨ ᠶᠡᠬᠡ ᠤᠯᠤᠰ ᠨᠡᠢᠯᠡᠵᠦ ᠮᠠᠨ ᠤ᠋ ᠤᠯᠤᠰ ᠢ᠋ ᠳᠠᠢᠯᠠᠨ ᠠᠷᠢᠯᠭᠠᠰᠤᠭᠠᠢ ᠭᠡᠮᠡᠨ ᠡᠯᠴᠢ ᠶᠠᠪᠤᠭᠤᠯᠤᠨ ᠵᠣᠪᠳᠡᠪᠡ ᠭᠡᠮᠡᠨ ᠶᠠᠯᠠ ᠠᠰᠠᠭᠤᠯᠭᠠᠷᠠ ᠵᠠᠷᠤᠰᠤᠭᠠᠢ᠃ ᠡᠢᠨ ᠪᠣᠯᠪᠠᠰᠤ ᠲᠡᠳᠡ ᠯᠠᠪ ᠪᠤᠴᠠᠵᠤ ᠪᠤᠯᠭᠢᠮᠤᠢ᠃ ᠲᠡᠷᠡ ᠴᠠᠭ ᠲᠤᠷ ᠳᠠᠷᠤᠢ ᠡᠨᠡ ᠬᠡᠷᠡᠢᠳ ᠤᠨ ᠡᠯᠴᠢ ᠪᠠ ᠪᠢᠴᠢᠭ ᠲᠡᠢ ᠭᠠᠷᠭᠠᠵᠤ ᠮᠣᠬᠣᠭᠠᠰᠤᠭᠠᠢ᠃ ᠡᠢᠮᠦ ᠪᠣᠯᠪᠠᠰᠤ ᠲᠡᠭᠦᠨ ᠤ ᠴᠡᠷᠢᠭ ᠪᠠᠰᠠ ᠪᠡᠯᠡᠨ ᠦᠭᠡᠢ ᠲᠤᠯᠠ ᠲᠡᠷᠡ ᠠᠮᠠ ᠰᠡᠳᠬᠢᠯ ᠬᠠᠮᠲᠤ ᠠᠶᠤᠨ ᠪᠢᠰᠢᠷᠡᠪᠡᠰᠦ ᠬᠠᠷᠢᠨ ᠴᠤ᠌ ᠢᠯᠳᠦᠨ ᠳ᠋ᠦ᠍ᠷ ᠴᠢᠰᠤ ᠨᠠᠭᠠᠯᠳᠤᠭᠤᠯᠤᠯ ᠦᠭᠡᠢ ᠪᠡᠷ ᠣᠯᠵᠤ ᠳᠠᠭᠠᠭᠤᠯᠬᠤ ᠴᠤ᠌ ᠮᠥᠨ ᠮᠠᠭᠠᠳ ᠦᠭᠡᠢ᠃ ᠲᠡᠷᠡ ᠬᠡᠷᠪᠡ ᠰᠡᠩᠬᠡᠷᠡᠰᠢ ᠦᠭᠡᠢ ᠮᠣᠩᠬᠠᠭᠳᠠᠨ ᠡᠷᠢᠨ ᠡᠰᠡ ᠬᠡᠯᠡᠯᠴᠡᠪᠡᠰᠦ ᠲᠡᠷᠡ ᠴᠠᠭ ᠲᠤᠷ ᠴᠣᠬᠢᠨ ᠣᠷᠣᠵᠤ ᠪᠠᠢᠯᠳᠤᠬᠤᠢ ᠳ᠋ᠤᠷ ᠮᠥᠨ ᠣᠷᠣᠢᠲᠠᠬᠤ ᠦᠭᠡᠢ᠃ ᠡᠢᠮᠦ ᠪᠣᠯᠪᠠᠰᠤ ᠲᠦᠮᠡᠨ ᠤᠯᠤᠰ ᠮᠢᠩᠭᠠᠨ ᠠᠢᠮᠠᠭ ᠰᠣᠨᠣᠰᠪᠠᠴᠤ ᠶᠠᠯᠠ ᠪᠤᠷᠤᠭᠤ ᠲᠡᠳᠡᠨ ᠳ᠋ᠦ᠍ᠷ ᠪᠣᠯᠬᠤ ᠪᠣᠢ ᠢ ᠠ ᠂ ᠮᠠᠨ ᠢ᠋ ᠰᠦᠷ ᠬᠦᠴᠦᠨ ᠳ᠋ᠡᠭᠡᠨ ᠡᠷᠡᠮᠰᠢᠵᠦ ᠭᠠᠳᠠᠭᠠᠳᠤ ᠤᠯᠤᠰ ᠢ ᠡᠷᠢᠨ ᠳᠠᠷᠤᠯᠠᠪᠠ ᠭᠡᠮᠡᠨ ᠵᠢᠮᠡᠯᠡᠬᠦ ᠦᠭᠡᠢ ᠪᠣᠯᠵᠤ ᠂ ᠬᠣᠢᠴᠢ ᠡᠳᠦᠷ ᠬᠣᠯᠠᠳᠠᠬᠢᠨ ᠢ᠋ ᠬᠤᠷᠢᠶᠠᠮᠵᠢᠯᠠᠨ ᠳᠠᠭᠠᠭᠤᠯᠬᠤᠢ ᠳ᠋ᠤᠷ ᠳᠥᠭᠥᠮ ᠬᠢᠯᠪᠠᠷ ᠪᠣᠯᠤᠮᠤᠢ!》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠳᠡ ᠪᠡᠶᠡᠰᠦᠨ ᠮᠤᠬᠤᠯᠢ ᠶ᠋ᠢ ᠮᠠᠭᠲᠠᠵᠤ ᠵᠠᠬᠢᠷᠤᠨ ᠄
ᠳᠡᠯᠭᠡᠳᠦ ᠪᠠᠶᠠᠨ ᠤ᠋ ᠳᠡᠯᠭᠡᠷᠡᠩᠭᠦᠢ ᠪᠣᠳᠣᠯᠭᠠᠲᠤ ᠬᠥᠪᠡᠭᠦᠨ
ᠵᠠᠯᠠᠢᠳ ᠠᠢᠮᠠᠭ ᠤ᠋ᠨ ᠵᠠᠰᠠᠭ ᠲᠤᠷ ᠮᠡᠷᠭᠡᠨ ᠮᠤᠬᠤᠯᠢ ᠮᠢᠨᠦ ᠂
ᠤᠮᠳᠠᠵᠤ ᠬᠡᠪᠲᠡᠪᠡᠴᠦ ᠤᠯᠤᠰ ᠢ᠋ ᠮᠢᠨᠦ ᠪᠣᠳᠣᠵᠤ
ᠢᠳᠡᠵᠦ ᠤᠤᠭᠤᠪᠠᠴᠤ ᠡᠵᠡᠨ ᠢᠶᠠᠨ ᠰᠡᠳᠬᠢᠭᠴᠢ ᠰᠠᠢᠳ ᠮᠢᠨᠦ !
ᠭᠡᠮᠡᠨ ᠵᠥᠪᠰᠢᠶᠡᠵᠦ ᠂ ᠶᠢᠰᠦᠨ ᠲᠤᠯᠭᠤᠷ ᠂ ᠵᠢᠷᠭᠤᠭᠠᠨ ᠰᠠᠢᠰᠢᠶᠠᠯ ᠤ᠋ᠨ ᠰᠠᠢᠳ ᠢ᠋ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠂ ᠡᠳᠡᠭᠡᠷ ᠤᠴᠢᠷ ᠢ᠋ ᠪᠦᠷᠢᠳᠬᠡᠨ ᠬᠡᠯᠡᠵᠦ ᠄《 ᠡᠨᠡ ᠡᠯᠴᠢ ᠳ᠋ᠦ᠍ᠷ ᠬᠡᠨ ᠡᠴᠢᠮᠦᠢ?》 ᠭᠡᠮᠡᠨ ᠠᠰᠠᠭᠤᠲᠠᠯᠠ ᠣᠯᠠᠨ ᠤ᠋ ᠰᠦᠷᠦᠭ ᠡᠴᠡ ᠣᠷᠢᠶᠠᠩᠬᠠᠨ ᠤ ᠰᠠᠢᠬᠠᠨ ᠵᠠᠯᠮᠠ ᠬᠡᠬᠦᠯᠵᠡᠨ ᠭᠠᠷᠴᠤ ᠄ 《 ᠲᠤᠰᠢᠮᠡᠯ ᠪᠢ ᠡᠴᠢᠬᠦ ᠶ᠋ᠢ ᠬᠦᠰᠡᠮᠦᠢ 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠠᠰᠠᠭᠤᠷᠤᠨ ᠄ 《ᠠᠶᠤᠯ ᠲᠦᠭᠰᠢᠭᠦᠷᠢ ᠡᠴᠡ ᠠᠶᠤᠬᠤ ᠦᠭᠡᠢ ᠦᠦ ? 》 ᠵᠡᠯᠮᠡ ᠮᠡᠳᠡᠭᠦᠯᠦᠷᠦᠨ᠄ 《ᠡᠵᠡᠨ ᠤ ᠬᠦᠨᠳᠦ ᠬᠡᠰᠢᠭ ᠥᠷᠥᠰᠢᠶᠡᠯ ᠢ᠋ ᠬᠦᠷᠲᠡᠭᠡᠳ ᠭᠡᠪᠴᠢᠶᠡᠲᠡᠢ ᠴᠢᠬᠤᠯᠠ ᠭᠠᠵᠠᠷ ᠲᠤᠷ ᠡᠰᠡ ᠶᠠᠪᠤᠪᠠᠰᠤ ᠶᠠᠮᠪᠠᠷ ᠠᠮᠲᠠ ᠂ ᠲᠦᠭᠰᠢᠯ ᠳ᠋ᠦ᠍ᠷ ᠲᠦᠳᠡᠵᠦ ᠂ ᠠᠶᠤᠯ ᠠ᠋ᠴᠠ ᠠᠶᠤᠪᠠᠰᠤ ᠲᠦᠰᠢᠮᠡᠯ ᠪᠣᠯᠵᠤ ᠶᠠᠭᠤ ᠬᠢᠮᠦᠢ ? ᠰᠠᠢᠳ ᠪᠢ ᠠᠶᠤᠬᠤ ᠦᠭᠡᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠲᠡᠭᠷᠢ ᠶ᠋ᠢᠨ ᠴᠢᠷᠠᠢ ᠳ᠋ᠤᠷ ᠪᠠᠶᠠᠷᠯᠠᠯ ᠢᠯᠡᠷᠡᠵᠦ ᠂ ᠮᠠᠰᠢ ᠰᠠᠢᠰᠢᠶᠠᠨ ᠳᠠᠷᠤᠢ ᠭᠡᠷᠡᠢ᠌ᠳ ᠤᠨ ᠪᠢᠴᠢᠭ ᠪᠠ ᠡᠯᠴᠢ ᠲᠤᠰᠢᠶᠠᠨ ᠥᠭᠴᠦ ᠵᠢᠴᠢ ᠥᠷᠯᠥᠭᠡ ᠦᠷ ᠤᠨ ᠬᠢᠷᠠᠭᠠ ᠳ᠋ᠤᠷ ᠭᠠᠷ ᠢᠶᠠᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠮᠣᠷᠳᠠᠭᠤᠯᠬᠤᠢ ᠳ᠋ᠤᠷ ᠵᠢᠨᠦᠩ ᠮᠤᠬᠤᠯᠢ ᠭᠡᠷᠡᠢ᠌ᠳ ᠤᠨ ᠡᠯᠴᠢ ᠶ᠋ᠢ ᠠᠴᠢᠷᠠᠵᠤ ᠵᠠᠬᠢᠷᠤᠨ ᠄ 《 ᠴᠢ ᠬᠡᠮᠡᠭᠴᠢ ᠲᠡᠭᠷᠢ ᠲᠠᠬᠢᠬᠤ ᠦᠬᠡᠷ ᠮᠣᠷᠢ ᠪᠣᠯᠠᠢ ᠂ ᠦᠨᠡᠨ ᠢᠶᠠᠨ ᠬᠡᠯᠡᠪᠡᠰᠦ ᠭᠡᠷ ᠲᠡᠭᠡᠨ ᠡᠴᠢᠵᠦ ᠡᠮᠡ ᠦᠷᠡ ᠯᠦ᠋ᠭᠡ ᠪᠡᠨ ᠵᠢᠷᠭᠠᠵᠤ ᠴᠢᠳᠠᠮᠤᠢ ᠂ ᠬᠡᠷᠪᠡ ᠬᠡᠯᠡ ᠪᠤᠴᠠᠵᠤ ᠦᠭᠡ ᠪᠡᠨ ᠪᠠᠯᠠᠯᠪᠠᠰᠤ ᠲᠣᠭᠣᠭᠠ ᠰᠢᠨᠠᠭᠠ ᠶ᠋ᠢᠨ ᠳᠣᠲᠣᠷᠠᠬᠢ ᠢᠯᠵᠠᠷᠠᠭᠰᠠᠨ ᠱᠥᠯᠥ ᠪᠣᠯᠬᠤ ᠪᠣᠯᠠᠢ ᠂ ᠦᠬᠦᠬᠦ ᠠᠮᠢᠳᠤᠷᠠᠬᠤ ᠴᠢᠨᠦ ᠥᠪᠡᠷ ᠤᠨ ᠨᠢᠭᠡᠨ ᠦᠮᠡᠬᠡᠢ ᠬᠡᠯᠡᠨ ᠳ᠋ᠦ᠍ᠷ ᠪᠣᠢ ᠪᠣᠯᠠᠢ ᠃ ᠴᠢ ᠠᠮᠢᠳᠤᠷᠠᠰᠤᠭᠠᠢ ᠬᠡᠮᠡᠮᠦᠢ ᠦᠦ ? ᠦᠬᠦᠰᠦᠭᠡᠢ ᠬᠡᠮᠡᠮᠦᠢ ᠦᠦ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠷᠡ ᠡᠯᠴᠢ ᠭᠠᠭᠴᠠ ᠠᠯᠠᠭᠤᠵᠠᠢ ᠭᠡᠮᠡᠨ ᠠᠶᠤᠵᠤ ᠪᠠᠢᠭᠰᠠᠨ ᠲᠤᠯᠠ ᠡᠳᠦᠭᠡ ᠠᠮᠢᠳᠤᠷᠠᠬᠤ ᠵᠠᠮ ᠭᠠᠷᠤᠭᠰᠠᠨᠠ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠮᠢᠩᠭᠠᠨ ᠵᠡᠷᠭᠡ ᠮᠥᠷᠭᠥᠵᠦ ᠦᠨᠡᠨ ᠢᠶᠠᠨ ᠴᠥᠮ ᠬᠡᠯᠡᠶᠡ ᠭᠡᠮᠡᠨ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠳ᠋ᠤᠷ ᠳᠠᠷᠤᠢ ᠳᠥᠩᠭᠡ ᠶ᠋ᠢ ᠠᠪᠴᠤ ᠵᠠᠯᠮᠠ ᠳ᠋ᠤᠷ ᠲᠤᠰᠢᠶᠠᠨ ᠥᠭᠪᠡᠢ᠃ ᠲᠡᠳᠦᠢ ᠲᠡᠷᠡ ᠡᠯᠴᠢ ᠵᠡᠯᠮᠡ ᠲᠠᠢᠽᠦ ᠳ᠋ᠤᠷ ᠮᠥᠷᠭᠥᠨ ᠠᠶᠠᠷᠯᠠᠵᠤ ᠠᠷᠪᠠᠭᠠᠳ ᠮᠣᠷᠢᠲᠠᠨ ᠢ᠋ ᠠᠪᠴᠤ ᠬᠣᠶᠠᠷ ᠣᠩᠭᠣᠴᠠ ᠶ᠋ᠢ ᠬᠣᠯᠪᠣᠨ ᠤᠶᠠᠵᠤ ᠂ ᠶᠡᠬᠡ ᠦᠨᠡᠭᠡ ᠶ᠋ᠢᠨ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ ᠬᠡᠳᠦᠨ ᠵᠠᠭᠤᠨ ᠭᠠᠵᠠᠷ ᠢ᠋ ᠳᠦᠯᠢᠢᠨ ᠶᠠᠪᠤᠵᠤ ᠵᠢᠴᠢ ᠡᠳᠦᠷ ᠤᠨ ᠦᠳᠡᠰᠢ ᠳᠠᠷᠤᠢ ᠰᠣᠯᠣᠩᠭᠣᠰ ᠤ᠋ᠨ ᠬᠠᠭᠠᠨ ᠤ᠋ ᠰᠠᠭᠤᠬᠤ ᠂ ᠮᠤᠷᠤᠢ ᠰᠠᠷᠠᠨ ᠬᠣᠲᠠᠨ ① ᠳ᠋ᠤᠷ ᠬᠦᠷᠪᠡ ᠃
– – – –
① ᠠᠷᠤ ᠭᠠᠵᠠᠷ ᠤ᠋ᠨ ᠬᠥᠮᠦᠨ ᠮᠣᠷᠢ ᠨᠢᠭᠡᠨ ᠡᠳᠦᠷ ᠬᠡᠳᠦᠨ ᠵᠠᠭᠤᠨ ᠭᠠᠵᠠᠷ ᠶᠠᠪᠤᠬᠤ ᠠᠨᠤ ᠲᠡᠳᠡᠨ ᠤ ᠡᠩ ᠤᠨ ᠶᠠᠪᠤᠳᠠᠯ ᠠᠵᠤᠭᠤ ᠃ ᠡᠳᠦᠭᠡ ᠪᠣᠯᠲᠠᠯᠠ ᠲᠡᠷᠡ ᠵᠠᠩ ᠠᠨᠤ ᠪᠠᠢᠭᠰᠠᠭᠠᠷ ᠪᠤᠶᠤ ᠃ ᠵᠢᠴᠢ ᠡᠨᠡ ᠰᠣᠯᠣᠩᠭᠣᠰ ᠤᠯᠤᠰ ᠤ᠋ᠨ ᠪᠤᠬᠠ ᠴᠠᠭᠠᠨ ᠬᠠᠭᠠᠨ ᠤ᠋ ᠨᠡᠢᠰᠯᠡᠯ ᠬᠣᠲᠠ ᠠᠨᠤ ᠠᠷᠤ ᠪᠡᠶᠡ ᠳ᠋ᠦ᠍ᠷ ᠠᠭᠤᠯᠠ ᠶ᠋ᠢ ᠲᠦᠰᠢᠵᠦ ᠂ ᠥᠪᠥᠷ ᠪᠡᠶᠡ ᠳ᠋ᠦ᠍ᠷ ᠤᠰᠤᠨ ᠢ᠋ ᠭᠦᠪᠡᠭᠡᠯᠡᠨ ᠂ ᠬᠠᠭᠠᠰ ᠰᠠᠷᠠᠨ ᠮᠡᠲᠦ ᠪᠠᠷᠢᠭᠰᠠᠨ ᠢᠶᠠᠷ ᠮᠤᠷᠤᠢ ᠰᠠᠷᠠᠨ ᠬᠣᠲᠠ ᠭᠡᠮᠡᠨ ᠨᠡᠷᠡᠢᠳᠪᠡᠢ᠃
ᠲᠡᠭᠦᠨᠴᠡ ᠵᠠᠯᠮᠠ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ ᠬᠡᠷᠡᠭ ᠤᠯᠠᠮᠵᠢᠯᠠᠬᠤ ᠶᠠᠮᠤᠨ ᠳ᠋ᠤᠷ ᠠᠪᠠᠷᠢᠵᠤ᠂ ᠴᠠᠭᠠᠨ ᠬᠠᠭᠠᠨ ᠳ᠋ᠤᠷ ᠨᠢᠭᠤᠷ ᠠᠭᠤᠯᠵᠠᠨ ᠬᠣᠶᠠᠷ ᠤᠯᠤᠰ ᠤ᠋ᠨ ᠡᠶᠡᠳᠦᠬᠦ ᠪᠠ ᠡᠪᠳᠡᠷᠡᠬᠦ ᠶ᠋ᠢ ᠵᠥᠪᠯᠡᠬᠦ ᠬᠡᠷᠡᠭ ᠪᠣᠢ ᠭᠡᠮᠡᠨ ᠬᠡᠯᠡᠭᠰᠡᠨᠡ᠂ ᠡᠨᠡ ᠦᠶᠡ ᠳ᠋ᠦ᠍ᠷ ᠰᠣᠯᠣᠩᠭᠣᠰ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠶᠡᠬᠡ ᠴᠡᠷᠢᠭ ᠢᠷᠡᠪᠡ ᠭᠡᠮᠡᠨ ᠶᠡᠬᠡᠯᠡ ᠠᠶᠤᠵᠤ ᠲᠣᠭᠣᠭᠠ ᠪᠤᠴᠠᠯᠬᠤ ᠮᠡᠲᠦ ᠪᠤᠷᠬᠢᠷᠠᠯᠳᠤᠨ ᠦᠢᠮᠡᠵᠦ᠂ ᠴᠡᠷᠢᠭ ᠤᠨ ᠮᠡᠳᠡᠭᠡ ᠶ᠋ᠢᠨ ᠮᠣᠷᠢ ᠨᠢᠭᠡᠨ ᠡᠳᠦᠷ ᠠᠷᠪᠠᠭᠠᠳ ᠤᠳᠠᠭᠠ ᠳᠣᠪᠲᠣᠯᠤᠨ ᠢᠷᠡᠵᠦ ᠮᠡᠳᠡᠭᠦᠯᠬᠦᠢ ᠳ᠋ᠦ᠍ᠷ ᠪᠤᠬᠠ ᠴᠠᠭᠠᠨ ᠬᠠᠭᠠᠨ ᠪᠡᠶᠡ ᠶ᠋ᠢᠨ ᠰᠦᠨᠡᠰᠦ ᠪᠡᠶᠡ ᠳ᠋ᠦ᠍ᠷ ᠦᠭᠡᠢ᠂ ᠴᠡᠷᠢᠭ ᠢ᠋ ᠨᠢᠭᠡᠨᠲᠡ ᠴᠤᠭᠯᠠᠭᠤᠯᠤᠨ ᠵᠠᠪᠳᠤᠬᠤ ᠦᠭᠡᠢ ᠳ᠋ᠦ᠍ᠷ ᠲᠦᠮᠡᠨᠲᠡ ᠪᠣᠳᠣᠪᠠᠴᠤ ᠭᠠᠷᠬᠤ ᠠᠷᠭᠠ ᠦᠭᠡᠢ ᠬᠠᠷᠠᠬᠠᠨ ᠰᠢᠬᠠᠮᠳᠠᠨ ᠪᠠᠴᠢᠮᠳᠠᠬᠤ ᠴᠠᠭ ᠲᠤᠯᠠ ᠳᠣᠣᠷᠠᠲᠤ ᠲᠦᠰᠢᠮᠡᠳ ᠶᠠᠭᠠᠷᠠᠨ ᠣᠷᠣᠵᠤ ᠪᠧᠲ᠋ᠠ᠋ ᠤᠯᠤᠰ ᠤᠨ ᠡᠶᠡᠳᠦᠬᠦ ᠪᠠ ᠡᠪᠳᠡᠷᠡᠬᠦ ᠶ᠋ᠢ ᠬᠡᠯᠡᠯᠴᠡᠬᠦ ᠡᠯᠴᠢ ᠢᠷᠡᠪᠡ ᠭᠡᠮᠡᠨ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠴᠠᠭᠠᠨ ᠬᠠᠭᠠᠨ ᠠᠷᠭᠠ ᠦᠭᠡᠢ ᠬᠠᠷᠰᠢ ᠳ᠋ᠤᠷ ᠭᠠᠷᠴᠤ ᠵᠠᠯᠮᠠ ᠶ᠋ᠢ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠵᠣᠯᠭᠠᠪᠠᠰᠤ᠂ ᠵᠡᠯᠮᠡ ᠥᠴᠦᠬᠡᠨ ᠴᠦ᠍ ᠶᠣᠰᠣᠯᠠᠬᠤ ᠦᠭᠡᠢ ᠬᠡᠬᠦᠯᠵᠡᠨ ᠵᠣᠭᠰᠣᠵᠤ᠂ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠨ ᠶᠡᠬᠡ ᠳᠠᠭᠤᠨ ᠢᠶᠠᠷ ᠥᠭᠦᠯᠡᠷᠦᠨ᠄《 ᠮᠢᠨᠦ ᠡᠵᠡᠨ ᠤ ᠵᠠᠬᠢᠶᠠ᠂ ᠡᠷᠭᠢᠨ ᠬᠠᠭᠠᠨ ᠠ᠋ᠴᠠ ᠠᠰᠠᠭᠤᠵᠤ ᠢᠷᠡ ᠬᠡᠮᠡᠭᠰᠡᠨ ᠢᠨᠦ᠄ ᠮᠠᠨ ᠤ᠋ ᠪᠠᠷᠠᠭᠤᠨ ᠬᠣᠢᠲᠤ ᠬᠠᠭᠤᠴᠢᠨ ᠪᠧᠲ᠋ᠠ᠋ ᠤᠯᠤᠰ ᠲᠠᠨ ᠤ᠋ ᠴᠢᠬᠡ ᠵᠡᠭᠦᠨ ᠰᠣᠯᠣᠩᠭᠣᠰ ᠤᠯᠤᠰ᠂ ᠬᠠᠷᠢᠯᠴᠠᠨ ᠮᠢᠩᠭᠠᠨ ᠢᠯᠡᠭᠦᠦ ᠭᠠᠵᠠᠷ ᠠᠯᠤᠰ ᠬᠣᠯᠠ ᠪᠥᠭᠡᠳ ᠪᠠᠰᠠ ᠡᠩ ᠡᠷᠲᠡ ᠤᠭ ᠢᠵᠠᠭᠤᠷ ᠠ᠋ᠴᠠ ᠦᠰᠦᠨ ᠤ ᠲᠡᠳᠦᠢ ᠥ ᠬᠢᠯᠭᠠᠰᠤᠨ ᠲᠡᠳᠦᠢ ᠬᠢᠮᠤᠷᠠᠯᠳᠤᠭᠠᠨ ᠪᠣᠯᠤᠭᠰᠠᠨ ᠥᠰᠢᠶᠡ ᠦᠭᠡᠢ ᠪᠥᠭᠡᠲᠡᠯᠡ ᠡᠷᠭᠢᠨ ᠬᠠᠭᠠᠨ ᠴᠢ ᠶᠠᠭᠤᠨ ᠳ᠋ᠤᠷ ᠣᠷᠴᠢᠨ ᠲᠣᠭᠣᠷᠢᠨ ᠲᠦᠮᠡᠨ ᠭᠠᠵᠠᠷ ᠤᠨ ᠨᠠᠢ᠌ᠮᠠᠨ ᠶᠡᠬᠡ ᠤᠯᠤᠰ ᠯᠤᠭᠠ ᠨᠡᠢᠯᠡᠵᠦ᠂ ᠭᠠᠭᠴᠠᠬᠠᠨ ᠮᠠᠨ ᠤ᠋ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠳᠠᠢᠯᠠᠨ ᠮᠥᠬᠥᠭᠡᠵᠦ᠂ ᠦᠨᠳᠦᠰᠦᠨ ᠢ᠋ ᠲᠠᠰᠤᠯᠤᠨ ᠦᠨᠡᠰᠦᠨ ᠢ᠋ ᠬᠡᠢᠰᠬᠡᠰᠦᠭᠡᠢ ᠭᠡᠮᠡᠨ ᠵᠥᠪᠯᠡᠯᠳᠦᠪᠡ ? ᠪᠢᠳᠡᠨ ᠦ᠌ ᠹᠸᠲ᠋ᠠ᠋ ᠤᠯᠤᠰ ᠲᠠᠨ ᠤ᠋ ᠡᠷᠭᠢᠨ ᠰᠣᠯᠣᠩᠭᠣᠰ ᠤᠯᠤᠰ ᠤ᠋ᠨ ᠰᠦᠷᠦᠭ ᠲᠣᠷ ᠠᠨᠤ ᠤᠷᠭᠠ ᠪᠠᠷᠢᠭᠰᠠᠨ ᠦᠭᠡᠢ᠂ ᠰᠦᠨ ᠳ᠋ᠦ᠍ᠷ ᠴᠢᠨᠦ ᠬᠤᠷᠤᠭᠤ ᠲᠥᠷᠥᠭᠰᠡᠨ ᠦᠭᠡᠢ ᠠᠲᠠᠯᠠ ᠶᠠᠭᠤᠨ ᠤ᠋ ᠤᠴᠢᠷ ᠦᠰ ᠦᠭᠡᠢ ᠪᠥᠭᠡᠳ ᠥ ᠳᠡᠭᠳᠡᠭᠡᠨ᠂ ᠬᠣᠷᠣᠰᠤᠯ ᠦᠭᠡᠢ ᠪᠠᠢᠲᠠᠯᠠ ᠬᠤᠮᠠᠭ ᠬᠡᠢᠰᠬᠡᠵᠦ᠂ ᠮᠠᠨ ᠤ᠋ ᠤᠯᠤᠰ ᠢ᠋ ᠳᠠᠢᠯᠠᠨ ᠮᠥᠬᠥᠭᠡᠶᠡ ᠬᠡᠮᠡᠪᠡ ? ᠡᠭᠦᠨ ᠤ ᠳᠣᠲᠣᠷᠠ ᠯᠠᠪ ᠨᠢᠭᠡᠨ ᠤᠴᠢᠷ ᠪᠣᠢ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠮᠠᠨ ᠤ᠋ ᠳᠡᠭᠷᠢᠯᠢᠭ ᠡᠵᠡᠨ ᠡᠷᠭᠢᠨ ᠬᠠᠭᠠᠨ ᠴᠢᠮᠠ ᠳ᠋ᠤᠷ ᠳᠠᠢᠯᠠᠭᠳᠠᠪᠠᠰᠤ ᠵᠣᠬᠢᠬᠤ ᠶᠠᠯᠠ ᠪᠠᠨ ᠲᠣᠳᠣᠷᠬᠠᠢ ᠣᠯᠵᠤ ᠮᠡᠳᠡᠬᠦ ᠦᠭᠡᠢ᠂ ᠬᠡᠷᠬᠢᠨ ᠰᠠᠨᠠᠪᠠᠴᠤ ᠪᠠᠰᠠ ᠣᠯᠬᠤ ᠦᠭᠡᠢ ᠲᠤᠯᠠ ᠪᠡᠶᠡ ᠪᠡᠷ ᠢᠷᠡᠵᠦ ᠮᠥᠷᠡᠨ ᠤ ᠠᠯᠤᠰ ᠪᠠᠭᠤᠳᠠᠯᠯᠠᠭᠠᠳ ᠳᠣᠣᠷᠠᠲᠤ ᠰᠠᠢᠳ ᠢᠶᠠᠨ ᠵᠡᠯᠮᠡ ᠨᠠᠮᠠᠶᠢ ᠤᠷᠢᠳᠠ ᠢᠯᠡᠭᠡᠵᠦ ᠲᠣᠳᠣᠷᠬᠠᠢᠯᠠᠨ ᠠᠰᠠᠭᠤᠵᠤ ᠢᠷᠡ ᠭᠡᠮᠡᠨ ᠵᠠᠷᠤᠪᠠ᠂ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠵᠠᠯᠮᠠ ᠪᠠᠷ ᠡᠷᠭᠢᠨ ᠬᠠᠭᠠᠨ ᠤ᠋ ᠲᠦᠮᠡᠨ ᠢᠯᠳᠦ ᠮᠢᠩᠭᠠᠨ ᠰᠦᠬᠡ ᠡᠴᠡ ᠵᠠᠢᠯᠠᠬᠤ ᠦᠭᠡᠢ ᠤᠭ ᠤᠴᠢᠷ ᠢ᠋ ᠠᠰᠠᠭᠤᠮᠤᠢ᠃ ᠦᠨᠡᠬᠡᠷ ᠮᠠᠨ ᠤ᠋ ᠹᠸᠲ᠋ᠠ᠋ ᠤᠯᠤᠰ ᠢ᠋ ᠳᠠᠢᠯᠠᠪᠠᠰᠤ ᠵᠣᠬᠢᠬᠤ ᠶᠠᠯᠠ ᠪᠣᠢ ᠪᠥᠭᠡᠰᠦ ᠲᠣᠳᠣᠷᠬᠠᠢᠯᠠᠨ ᠭᠠᠷᠭᠠᠭᠠᠳ ᠦᠨᠡᠨ ᠤᠴᠢᠷ ᠲᠤᠷ ᠨᠡᠢᠯᠡᠪᠡᠰᠦ᠂ ᠮᠢᠨᠦ ᠡᠵᠡᠨ ᠳᠤᠷᠠᠲᠠᠶᠠ ᠠᠷᠪᠠᠨ ᠲᠦᠮᠡᠨ ᠤ ᠣᠯᠠᠨ ᠤᠯᠤᠰ ᠠᠯᠪᠠᠲᠤ ᠴᠡᠷᠢᠭ ᠢᠷᠭᠡᠨ ᠢᠶᠠᠨ ᠪᠦᠬᠦᠯᠢ ᠪᠡᠷ ᠠᠪᠴᠤ ᠠᠴᠢᠶᠠ ᠪᠠᠨ ᠠᠴᠢᠭᠰᠠᠭᠠᠷ ᠲᠠᠲᠠᠯᠭᠠ ᠪᠠᠨ ᠲᠠᠲᠠᠭᠰᠠᠭᠠᠷ᠂ ᠡᠷᠭᠢᠨ ᠬᠠᠭᠠᠨ ᠴᠢᠮᠠ ᠳ᠋ᠤᠷ ᠶᠠᠯᠠ ᠬᠦᠯᠢᠶᠡᠨ ᠣᠷᠣᠵᠤ ᠳᠠᠭᠠᠰᠤᠭᠠᠢ ᠬᠡᠮᠡᠮᠦᠢ᠃ ᠬᠡᠷᠪᠡ ᠮᠠᠨ ᠤ᠋ ᠤᠯᠤᠰ ᠢ᠋ ᠳᠠᠢᠯᠠᠪᠠᠰᠤ ᠵᠣᠬᠢᠬᠤ ᠤᠴᠢᠷ ᠢ᠋ ᠲᠣᠳᠣᠷᠬᠠᠢᠯᠠᠨ ᠬᠡᠯᠡᠵᠦ ᠡᠰᠡ ᠭᠠᠷᠭᠠᠪᠠᠰᠤ᠂ ᠮᠥᠨ ᠬᠦ᠌ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢᠶᠠᠨ ᠠᠪᠴᠤ ᠠᠮᠢ ᠪᠠᠨ ᠲᠡᠪᠴᠢᠵᠦ ᠨᠢᠭᠡᠨ ᠵᠡᠷᠭᠡ ᠠᠯᠠᠯᠳᠤᠨ ᠪᠠᠢᠯᠳᠤᠵᠤ᠂ ᠠᠭᠠᠷᠤ ᠽᠠᠨᠳᠠᠨ ᠤ᠋ ᠤᠷᠳᠤᠳᠤ ᠬᠠᠰ ᠴᠢᠯᠠᠭᠤᠨ ᠤ᠋ ᠬᠠᠷᠰᠢᠲᠤ ᠬᠠᠢᠰᠠᠩ ᠬᠡᠷᠡᠮ ᠤᠨ ᠬᠣᠲᠠᠳᠤ ᠬᠠᠲᠠᠭᠤ ᠲᠡᠮᠦᠷ ᠤᠨ ᠬᠠᠭᠠᠯᠭᠠᠲᠤ ᠡᠷᠭᠢᠨ ᠬᠠᠭᠠᠨ ᠴᠢᠨᠦ ᠳᠤᠷᠠ ᠶ᠋ᠢ ᠰᠡᠷᠭᠦᠭᠡᠨ᠂ ᠤᠢᠳᠬᠠᠷ ᠢ᠋ ᠰᠠᠭᠠᠲᠠᠭᠤᠯᠰᠤᠭᠠᠢ ᠬᠡᠮᠡᠮᠦᠢ!》ᠬᠡᠮᠡᠭᠰᠡᠨ ᠡᠨᠡ ᠨᠢᠭᠡᠨ ᠵᠡᠷᠭᠡ ᠦᠭᠡᠨ ᠳ᠋ᠦ᠍ᠷ ᠪᠤᠬᠠ ᠴᠠᠭᠠᠨ ᠬᠠᠭᠠᠨ ᠤ᠋ ᠪᠤᠯᠲᠤ ᠪᠡᠶᠡ ᠤᠮᠳᠠᠷᠠᠵᠤ ᠪᠤᠴᠠᠵᠤ ᠪᠤᠯᠭᠢᠨ ᠥᠭᠦᠯᠡᠷᠦᠨ ᠄ 《ᠨᠠᠳᠠ ᠳ᠋ᠤᠷ ᠣᠭᠲᠣ ᠲᠡᠢᠮᠦ ᠶᠠᠪᠤᠳᠠᠯ ᠦᠭᠡᠢ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠡᠯᠮᠡ ᠲᠣᠰᠴᠤ ᠥᠭᠦᠯᠡᠷᠦᠨ᠄《ᠶᠡᠷᠦ ᠶ᠋ᠢᠨ ᠦᠭᠡᠨ ᠳ᠋ᠦ᠍ᠷ < ᠬᠠᠭᠠᠨ ᠬᠥᠮᠦᠨ ᠤ ᠦᠭᠡ ᠬᠠᠰ ᠬᠠᠳᠠ ᠮᠡᠲᠦ ᠪᠠᠲᠤ᠂ ᠬᠠᠷᠠᠴᠤ ᠪᠣᠭᠣᠯ ᠤ᠋ᠨ ᠦᠭᠡ ᠬᠠᠷᠠ ᠤᠩᠭᠠᠰᠤ ᠠᠳᠠᠯᠢ ᠬᠡᠪᠡᠷᠡᠭ > ᠬᠡᠮᠡᠳᠡᠭ ᠪᠢᠰᠢᠦ! 》ᠡᠷᠭᠢᠨ ᠬᠠᠭᠠᠨ ᠴᠢ ᠦᠨᠡᠬᠡᠷ ᠲᠡᠢᠮᠦ ᠶᠠᠪᠤᠳᠠᠯ ᠦᠭᠡᠢ ᠬᠡᠮᠡᠪᠡᠰᠦ ᠦᠭᠡ ᠵᠠᠬᠢᠶᠠ ᠪᠠᠨ ᠰᠠᠢᠲᠤᠷ ᠯᠠᠪᠯᠠᠵᠤ ᠪᠠᠲᠤᠯᠬᠠᠳᠤᠨ᠂ ᠪᠢ ᠡᠭᠡᠵᠦ ᠡᠴᠢᠪᠡᠰᠦ ᠡᠵᠡᠨ ᠳ᠋ᠦ᠍ᠷ ᠢᠶᠠᠨ ᠰᠠᠢᠬᠠᠨᠠ ᠮᠡᠳᠡᠭᠦᠯᠬᠦᠢ ᠳᠤᠷ ᠰᠠᠢᠨ! 》 ᠬᠡᠮᠡᠭᠰᠡᠨ ᠳᠤᠷ ᠴᠠᠭᠠᠨ ᠬᠠᠭᠠᠨ ᠡᠨᠡ ᠦᠶᠡ ᠳᠤᠷ ᠶᠡᠬᠡᠯᠡ ᠠᠶᠤᠨ ᠰᠢᠬᠠᠮᠳᠠᠬᠤ ᠴᠠᠭ ᠲᠤᠯᠠ ᠡᠨᠡ ᠦᠭᠡ ᠶᠢ ᠰᠣᠨᠣᠰᠤᠭᠠᠳ ᠵᠠᠢ ᠵᠠᠪᠰᠠᠷ ᠭᠠᠷᠴᠤ ᠴᠡᠷᠢᠭ ᠵᠣᠭᠰᠣᠬᠤ ᠴᠤ ᠮᠠᠭᠠᠳ ᠥᠬᠡᠢ ᠬᠡᠮᠡᠨ ᠰᠡᠳᠬᠢᠵᠦ᠂ ᠦᠨᠡᠬᠡᠷ ᠥᠬᠡᠢ ᠥᠬᠡᠢ ᠬᠡᠮᠡᠨ ᠦᠭᠡ ᠪᠠᠨ ᠲᠠᠬᠢᠨ ᠳᠠᠪᠲᠠᠨ ᠯᠠᠪᠯᠠᠬᠤᠢ ᠳᠤᠷ ᠵᠠᠯᠮᠠ ᠥᠭᠦᠯᠡᠷᠦᠨ ᠄ 《 ᠨᠠᠮᠠᠶᠢ ᠳᠠᠰᠢᠯᠠᠵᠤ ᠢᠷᠡᠭᠰᠡᠨ ᠮᠢᠨᠦ ᠨᠢᠭᠡᠨ ᠨᠥᠬᠥᠷ ᠡᠯᠴᠢ ᠪᠣᠢ᠂ ᠦᠨᠡᠬᠡᠷ ᠥᠬᠡᠢ ᠬᠡᠮᠡᠭᠰᠡᠨ ᠦᠭᠡ ᠪᠠᠨ ᠲᠡᠭᠦᠨ ᠢ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠢᠷᠡᠭᠡᠳ ᠬᠡᠯᠡᠪᠡᠰᠦ ᠂ ᠪᠢ ᠡᠭᠡᠵᠦ ᠡᠴᠢᠭᠡᠳ ᠡᠵᠡᠨ ᠳᠤᠷ ᠢᠶᠠᠨ ᠵᠠᠬᠢᠶᠠ ᠶᠢ ᠡᠭᠡᠭᠦᠯᠬᠦᠶ ᠳ᠋ᠤᠷ ᠰᠠᠢᠨ 》 ᠬᠡᠮᠡᠭᠰᠡᠨ ᠳ᠋ᠤᠷ ᠬᠠᠭᠠᠨ ᠪᠠ ᠲᠦᠰᠢᠮᠡᠳ ᠡᠨᠡ ᠯᠠᠪ ᠬᠡᠯᠡᠯᠴᠡᠨ ᠡᠶᠡᠳᠦᠭᠦ ᠵᠠᠮ ᠭᠠᠷᠪᠠ ᠬᠡᠮᠡᠨ ᠲᠤᠷᠠᠲᠠᠶᠠ ᠣᠷᠤᠭᠤᠯᠵᠤ ᠢᠷᠡᠭᠡᠳ ᠯᠤᠤ ᠳᠣᠬᠢᠭᠰᠠᠨ ᠡᠷᠳᠡᠨᠢ ᠶᠢᠨ ᠬᠠᠰ ᠤᠨ ᠶᠡᠨᠳᠡᠷ ᠲᠤᠷ ᠠᠪᠤᠨ ᠭᠠᠷᠴᠤ ᠢᠷᠡᠭᠰᠡᠨᠡ ᠵᠠᠯᠮᠠ ᠲᠡᠷᠡ ᠬᠥᠮᠦᠨ ᠢ ᠳᠡᠪᠰᠢᠭᠦᠯᠦᠨ ᠴᠠᠭᠠᠨ ᠬᠠᠭᠠᠨ ᠤ ᠡᠮᠦᠨᠡ ᠣᠢᠷᠠ ᠵᠣᠭᠰᠣᠭᠠᠵᠤ ᠴᠠᠭᠠᠨ ᠬᠠᠭᠠᠨ ᠠᠴᠠ ᠠᠰᠠᠭᠤᠷᠤᠨ᠄《 ᠡᠷᠬᠢᠨ ᠬᠠᠭᠠᠨ ᠴᠢ ᠡᠨᠡ ᠬᠥᠮᠦᠨ ᠢ ᠲᠠᠨᠢᠮᠤᠢ ᠦᠦ ᠥᠬᠡᠢ ᠦᠦ ?》 ᠬᠡᠮᠡᠬᠦᠢ ᠳᠤᠷ ᠴᠠᠭᠠᠨ ᠬᠠᠭᠠᠨ ᠰᠣᠨᠢᠷᠬᠠᠨ ᠲᠡᠷᠡ ᠬᠥᠮᠦᠨ ᠢ ᠬᠢᠨᠠᠨ ᠦᠵᠡᠪᠡᠰᠦ᠂ ᠦᠵᠡᠰᠡ ᠬᠠᠷᠢᠨ ᠬᠡᠷᠡᠢᠳ ᠤᠯᠤᠰ ᠤᠨ ᠸᠠᠩ ᠬᠠᠭᠠᠨ ᠤ ᠡᠯᠴᠢ ᠲᠤᠯᠠ ᠶᠡᠬᠡᠯᠡ ᠬᠢᠷᠳ᠋ᠬᠢᠵᠦ ᠰᠣᠴᠢᠪᠠ ᠃ ᠲᠡᠢᠨ ᠪᠣᠯᠪᠠᠴᠤ ᠦᠭᠡ ᠶᠢ ᠨᠢᠭᠡᠨᠲᠡ ᠡᠭᠡᠭᠦᠯᠵᠦ ᠪᠣᠯᠬᠤ ᠥᠬᠡᠢ ᠪᠣᠯᠣᠭᠰᠠᠨ ᠲᠤᠯᠠ ᠰᠢᠭᠤᠳ ᠲᠠᠨᠢᠬᠤ ᠥᠬᠡᠢ ᠬᠡᠮᠡᠬᠦᠢ ᠳᠤᠷ ᠵᠠᠯᠮᠠ ᠥᠭᠦᠯᠡᠷᠦᠨ ᠄ 《 ᠬᠠᠭᠠᠨ ᠴᠢ ᠡᠰᠡ ᠲᠠᠨᠢᠪᠠᠰᠤ ᠲᠡᠭᠦᠨ ᠤ ᠠᠮᠠᠨ ᠠᠴᠠ ᠠᠰᠠᠭᠤᠵᠤ ᠲᠠᠨᠢᠲᠤᠭᠠᠢ !》 ᠬᠡᠮᠡᠭᠡᠳ ᠲᠡᠷᠡ ᠬᠥᠮᠦᠨ ᠢ ᠡᠦᠲᠦ ᠦᠨᠡᠨ ᠢᠶᠠᠨ ᠬᠡᠯᠡᠬᠦ ᠥᠬᠡᠢ ᠶᠠᠮᠪᠠᠷ ᠴᠠᠭ ᠢ ᠬᠦᠯᠢᠶᠡᠮᠦᠢ ᠬᠡᠮᠡᠭᠰᠡᠨ ᠳᠤᠷ ᠲᠡᠷᠡ ᠬᠥᠮᠦᠨ ᠬᠠᠷᠠᠬᠠᠨ ᠰᠢᠬᠠᠮᠳᠠᠨ ᠠᠯᠠᠭᠤᠵᠠᠢ ᠬᠡᠮᠡᠨ ᠠᠶᠤᠵᠤ ᠪᠦᠬᠦᠢ ᠲᠤᠯᠠ ᠨᠢᠭᠡᠨ ᠦᠭᠡ ᠬᠡᠭᠡᠬᠦ ᠦᠭᠡ ᠪᠠᠷ ᠬᠦᠵᠦᠭᠦᠦ ᠪᠠᠨ ᠭᠦᠯᠳᠡᠢᠵᠦ᠂ ᠭᠠᠷ ᠬᠥᠯ ᠢᠶᠠᠨ ᠰᠡᠷᠪᠡᠯᠵᠡᠵᠦ᠂ ᠤᠷᠢᠳᠤ ᠬᠡᠷᠡᠭ ᠢ ᠲᠥᠷᠥ ᠳᠦᠭᠦᠷᠡᠩ ᠲᠦᠰᠢᠮᠡᠳ ᠤᠨ ᠡᠮᠦᠨᠡ ᠤᠯᠠᠢᠲᠠᠯᠠ ᠴᠠᠢᠲᠠᠯᠠ ᠴᠥᠮ ᠬᠡᠯᠡᠵᠦ ᠡᠬᠢᠨ ᠠᠴᠠ ᠠᠲᠠᠭ ᠲᠤᠷ ᠬᠦᠷᠲᠡᠯᠡ ᠲᠣᠭᠠᠴᠢᠨ ᠭᠠᠷᠭᠠᠵᠤ ᠪᠠᠰᠠ ᠡᠪᠦᠷ ᠢᠶᠠᠨ ᠲᠡᠮᠲᠡᠷᠢᠵᠦ ᠪᠤᠬᠠ ᠴᠠᠭᠠᠨ ᠬᠠᠭᠠᠨ ᠤ ᠸᠠᠩ ᠬᠠᠭᠠᠨ ᠳᠤᠷ ᠢᠯᠡᠭᠡᠭᠰᠡᠨ ᠵᠥᠪᠳᠡᠯ ᠤᠨ ᠪᠢᠴᠢᠭ ᠢ ᠭᠠᠷᠭᠠᠪᠠ᠃ ᠡᠭᠦᠨ ᠳᠤᠷ ᠵᠠᠯᠮᠠ ᠳᠠᠷᠤᠢ ᠲᠣᠰᠴᠤ ᠠᠪᠤᠭᠠᠳ ᠣᠯᠠᠨ ᠤ ᠡᠮᠦᠨᠡ ᠥᠨᠳᠥᠷ ᠲᠠᠭᠤᠨ ᠢᠶᠠᠷ ᠨᠢᠭᠡᠨ ᠵᠡᠷᠭᠡ ᠳᠠᠭᠤᠳᠠᠨ ᠤᠩᠰᠢᠵᠤ ᠰᠣᠨᠣᠰᠬᠠᠭᠠᠳ ᠴᠠᠭᠠᠨ ᠬᠠᠭᠠᠨ ᠠᠴᠠ᠄《 ᠡᠨᠡ ᠪᠢᠴᠢᠭ ᠡᠷᠬᠢᠨ ᠬᠠᠭᠠᠨ ᠴᠢᠨᠦ ᠪᠢᠴᠢᠭ ᠮᠥᠨ ᠦᠦ ? 》 ᠬᠡᠮᠡᠨ ᠠᠰᠠᠭᠤᠭᠰᠠᠨ ᠳᠤᠷ ᠂ ᠪᠤᠬᠠ ᠴᠠᠭᠠᠨ ᠬᠠᠭᠠᠨ ᠤ ᠴᠠᠪ ᠴᠠᠭᠠᠨ ᠴᠢᠷᠠᠢ ᠠᠨᠤ ᠪᠤᠷᠤᠢᠵᠤ ᠣᠪ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠳ᠋ᠤᠷ ᠬᠠᠵᠠᠭᠤ ᠠ᠋ᠴᠠ ᠬᠣᠶᠠᠷ ᠴᠢᠩᠰᠢᠶᠠᠩ ᠠᠨᠤ ᠣᠷᠣᠭᠰᠢ ᠳᠠᠪᠰᠢᠪᠠ ᠃ ᠨᠢᠭᠡᠨ ᠤ ᠨᠡᠷᠡ ᠠᠭᠠᠷ᠂ ᠨᠢᠭᠡᠨ ᠤ ᠨᠡᠷᠡ ᠣᠳᠣᠨ ᠡᠨᠡ ᠬᠣᠶᠠᠭᠤᠯᠠ ᠵᠡᠷᠭᠡ ᠪᠡᠷ ᠲᠠᠪᠰᠢᠵᠤ ᠵᠡᠯᠮᠡ ᠶ᠋ᠢᠨ ᠵᠦᠭ ᠰᠠᠢᠨ ᠢᠶᠠᠷ ᠥᠭᠦᠯᠡᠷᠦᠨ ᠄ 《 ᠮᠠᠨ ᠤ᠋ ᠡᠵᠡᠨ ᠬᠡᠳᠦᠢᠪᠡᠷ ᠥᠷᠥᠰᠢᠶᠡᠯ ᠨᠢᠭᠦᠯᠡᠰᠬᠦᠢ ᠪᠡᠷ ᠵᠡᠭᠡᠢ ᠪᠣᠯᠪᠠᠴᠤ ᠡᠭᠡᠨᠡᠭᠲᠡ ᠮᠠᠨ ᠤ᠋ ᠲᠩᠷᠢ ᠡᠵᠡᠨ ᠪᠥᠭᠡᠲᠡᠯᠡ ᠡᠷᠭᠢᠨ ᠡᠯᠴᠢ ᠠᠷᠠᠬᠠᠨ ᠡᠨᠡ ᠮᠡᠲᠦ ᠳᠠᠷᠤᠬᠤ ᠠᠨᠤ ᠶᠣᠰᠣᠲᠤ ᠤᠯᠤᠰ ᠠ᠋ᠴᠠ ᠢᠷᠡᠭᠰᠡᠨ ᠪᠠᠢᠳᠠᠯ ᠦᠭᠡᠢ ᠪᠤᠰᠤ ᠤᠤ ? 》ᠬᠡᠮᠡᠲᠡᠯᠡ ᠵᠡᠯᠮᠡ ᠶᠡᠬᠡᠯᠡ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄《 ᠲᠠᠨ ᠤ᠋ ᠡᠨᠡ ᠶᠠᠮᠪᠠᠷ ᠦᠭᠡ ᠬᠡᠮᠡᠭᠴᠢ ᠪᠣᠢ? ᠬᠠᠷᠠᠴᠤ ᠬᠥᠮᠦᠨ ᠬᠠᠭᠠᠨ ᠬᠥᠮᠦᠨ ᠢ᠋ ᠳᠠᠷᠤᠯᠠᠮᠤᠢ ᠬᠡᠮᠡᠭᠴᠢ ᠬᠠᠮᠢᠭᠠ ᠪᠠᠢᠬᠤ ᠬᠡᠷᠡᠭ᠂ ᠭᠠᠭᠴᠠ ᠬᠠᠭᠠᠨ ᠪᠥᠭᠡᠳ ᠬᠠᠷᠠᠴᠤᠰ ᠲᠤᠷ ᠦᠯᠦ ᠬᠦᠷᠬᠦ ᠦᠢᠯᠡ ᠶ᠋ᠢ ᠶᠠᠪᠤᠪᠠᠰᠤ ᠪᠣᠯᠤᠮᠤᠢ ᠤᠤ ? ᠨᠢᠭᠡᠨ ᠤᠯᠤᠰ ᠢ᠋ ᠡᠵᠡᠯᠡᠬᠦ ᠬᠠᠭᠠᠨ ᠬᠡᠮᠡᠭᠴᠢ ᠬᠠᠮᠤᠭ ᠬᠠᠷᠠᠴᠤᠰ ᠤ᠋ᠨ ᠬᠠᠵᠠᠭᠠᠢ ᠲᠡᠭᠰᠢ ᠶ᠋ᠢ ᠢᠯᠭᠠᠨ ᠰᠠᠯᠭᠠᠵᠤ ᠲᠡᠭᠰᠢᠯᠡᠨ ᠵᠠᠰᠠᠬᠤ ᠶ᠋ᠢᠨ ᠲᠤᠯᠠ ᠰᠠᠶ᠋ᠢ ᠬᠠᠭᠠᠨ ᠬᠡᠮᠡᠭᠰᠡᠨ ᠪᠥᠭᠡᠳ ᠬᠠᠷᠢ ᠤᠯᠤᠰ ᠠ᠋ᠴᠠ ᠢᠷᠡᠭᠰᠡᠨ ᠬᠠᠷᠠᠴᠤ ᠬᠥᠮᠦᠨ ᠤ ᠦᠭᠡ ᠶ᠋ᠢ ᠶᠠᠭᠤᠨ ᠳ᠋ᠤᠷ ᠦᠯᠦ ᠠᠢᠯᠠᠳᠤᠮᠤᠢ ? ᠦᠨᠡᠨ ᠬᠤᠳᠠᠯ ᠢ᠋ ᠮᠥᠨ ᠢᠯᠭᠠᠪᠠᠰᠤ ᠵᠣᠬᠢᠮᠤᠢ ᠶᠠ !》 ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠭᠠᠷ ᠴᠢᠩᠰᠢᠶᠠᠩ ᠢᠨᠤ ᠲᠣᠰᠴᠤ ᠥᠭᠦᠯᠡᠷᠦᠨ ᠄ 《ᠡᠨᠡ ᠪᠢᠴᠢᠭ ᠢ᠋ ᠯᠠᠪ ᠡᠳᠡᠭᠡᠷ ᠪᠣᠭᠣᠯᠴᠤᠳ ᠠᠷᠭᠠ ᠡᠭᠦᠰᠬᠡᠨ ᠬᠠᠭᠤᠷᠮᠠᠭ ᠵᠣᠬᠢᠶᠠᠵᠤ᠂ ᠲᠠᠨ ᠢ᠋ ᠮᠡᠬᠡᠯᠡᠵᠦ ᠬᠦᠨᠳᠦ ᠱᠠᠩ ᠣᠯᠰᠤᠭᠠᠢ ᠬᠡᠮᠡᠭᠰᠡᠭᠡᠷ ᠮᠠᠨ ᠤ ᠬᠣᠶᠠᠷ ᠤᠯᠤᠰ ᠢ᠋ ᠡᠪᠳᠡᠷᠡᠬᠦᠢ ᠳ᠋ᠦ᠍ᠷ ᠭᠥᠷᠦᠭᠦᠯᠪᠡᠢ ᠶᠠ !》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠡᠯᠮᠡ ᠨᠡᠩᠳᠡ ᠶᠡᠬᠡ ᠯᠡ ᠬᠠᠳᠠᠭᠠᠨᠠᠨ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ ᠄ 《 ᠠᠪᠠᠢ ! ᠶᠡᠷᠦ ᠶ᠋ᠢᠨ ᠦᠭᠡᠨ ᠳ᠋ᠦ᠍ᠷ < ᠡᠬᠢ ᠢᠨᠤ ᠬᠠᠮᠢᠭᠠᠰᠢ ᠪᠣᠯᠪᠠᠰᠤ ᠲᠥᠷᠥ ᠢᠨᠤ ᠲᠡᠰᠢ > ᠬᠡᠮᠡᠭᠰᠡᠴᠢᠯᠡᠨ᠂ ᠡᠷᠭᠢᠨ ᠲᠤᠰᠢᠮᠡᠯ ᠴᠢ ᠨᠢᠭᠡᠨ ᠤᠯᠤᠰ ᠤ᠋ᠨ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠲᠠᠢᠱᠢ ᠪᠢᠯᠡ᠂ ᠴᠢᠩᠰᠢᠶᠠᠩ ᠬᠡᠮᠡᠭᠳᠡᠬᠦ ᠪᠥᠭᠡᠳ ᠶᠠᠭᠤᠨ ᠳ᠋ᠤ᠌ ᠨᠢᠭᠡᠨ ᠨᠢᠯᠬᠠ ᠬᠡᠦᠬᠡᠳ ᠪᠠ ᠮᠠᠭᠤ ᠴᠠᠯᠴᠢᠶᠠ ᠡᠬᠡᠨᠡᠷ ᠤᠨ ᠦᠭᠡ ᠶ᠋ᠢ ᠬᠡᠯᠡᠵᠦ ᠪᠡᠯᠴᠢᠵᠦ ᠬᠠᠯᠴᠢᠬᠤ ᠠᠵᠢ ? ᠲᠡᠷᠢᠭᠦᠨ ᠳ᠋ᠦ᠍ᠷ ᠡᠨᠡ ᠡᠯᠴᠢ ᠲᠠᠨ ᠢ᠋ ᠴᠥᠮ ᠲᠠᠨᠢᠮᠤᠢ᠂ ᠬᠣᠶᠠᠷ ᠲᠤᠷ ᠲᠡᠭᠦᠨ ᠢ᠋ ᠮᠠᠨ ᠤ ᠤᠯᠤᠰ ᠤ᠋ᠨ ᠬᠢᠵᠠᠭᠠᠷ ᠤ᠋ᠨ ᠴᠠᠭᠳᠠᠭᠤᠯ ᠪᠠᠷᠢᠭᠰᠠᠨ ᠪᠣᠢ ᠶᠠ ᠃ ᠲᠡᠷᠡ ᠥᠪᠡᠷ ᠢᠶᠠᠨ ᠡᠴᠢᠭᠰᠡᠨ ᠢᠨᠤ ᠪᠤᠰᠤ᠂ ᠭᠤᠷᠪᠠᠨ ᠳ᠋ᠤᠷ ᠲᠡᠷᠡ ᠲᠡᠢᠮᠦ ᠨᠢᠭᠡᠨ ᠬᠠᠭᠤᠷᠮᠠᠭ ᠪᠢᠴᠢᠭ ᠬᠦᠷᠭᠡᠭᠰᠡᠨ ᠢᠶᠠᠷ ᠲᠡᠭᠦᠨ ᠳ᠋ᠦ᠍ᠷ ᠶᠠᠮᠪᠠᠷ ᠱᠠᠩ ᠣᠯᠵᠠ ᠪᠠᠢᠬᠤ ᠠᠵᠢ᠂ ᠭᠡᠳᠡᠷᠭᠦ ᠲᠡᠭᠦᠨ ᠤ ᠪᠡᠶᠡ ᠶᠡᠬᠡ ᠬᠣᠯᠪᠣᠭᠳᠠᠯ ᠲᠠᠢ ᠪᠣᠯᠵᠤ ᠴᠢᠷᠦᠭᠳᠡᠬᠦ ᠪᠣᠢ ᠶᠠ᠂ ᠲᠠᠨ ᠡᠰᠡ ᠢᠲᠡᠭᠡᠪᠡᠰᠦ ᠲᠡᠭᠦᠨ ᠤ ᠪᠠᠷᠢᠮᠲᠠᠯᠠᠭᠳᠠᠭᠰᠠ ᠲᠦᠩ ᠭᠠᠪᠠᠵᠢ ᠶ᠋ᠢᠨ ᠰᠢᠷᠬᠠ ᠶ᠋ᠢ ᠦᠵᠡᠲᠦᠭᠡᠢ ! 》 ᠭᠡᠮᠡᠨ ᠲᠠᠢᠯᠤᠨ ᠦᠵᠡᠭᠦᠯᠦᠭᠡᠳ ᠪᠠᠰᠠ ᠥᠭᠦᠯᠡᠷᠦᠨ᠄《ᠳᠥᠷᠪᠡᠨ ᠳ᠋ᠦ᠍ᠷ ᠪᠢᠳᠡ ᠵᠥᠪ ᠵᠦᠭᠡᠷ ᠪᠠᠢᠭᠰᠠᠭᠠᠷ ᠨᠢᠭᠡᠬᠡᠨ ᠬᠥᠮᠦᠨ ᠳ᠋ᠦ᠍ᠷ ᠮᠡᠬᠡᠯᠡᠭᠳᠡᠵᠦ ᠭᠡᠷ ᠭᠠᠳᠠᠨᠠᠬᠢ ᠲᠠᠢ ᠵᠠᠭᠤᠨ ᠲᠦᠮᠡᠨ ᠢᠶᠠᠨ ᠬᠥᠳᠡᠯᠭᠡᠵᠦ᠂ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠭᠠᠳᠠᠨᠠ ᠠᠯᠠᠯᠳᠤᠭᠠᠨ ᠪᠠᠢᠯᠳᠤᠭᠠᠨ ᠢ᠋ ᠡᠷᠢᠬᠦ ᠶᠣᠰᠣ ᠪᠣᠢ ᠤᠤ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠠᠭᠠᠷ ᠴᠢᠩᠰᠢᠶᠡᠩ ᠲᠡᠷᠢᠭᠦᠯᠡᠨ ᠨᠢᠭᠡᠨ ᠲᠥᠷᠥ ᠶ᠋ᠢᠨ ᠬᠣᠲᠠᠯᠠᠭᠠᠷ ᠴᠥᠮ ᠠᠮᠠᠨ ᠬᠠᠮᠬᠢᠭᠰᠠᠨ ᠳ᠋ᠤᠷ ᠵᠡᠯᠮᠡ ᠪᠠᠰᠠ ᠥᠭᠦᠯᠡᠷᠦᠨ᠄《ᠰᠠᠢᠨ ᠪᠠ ᠮᠠᠭᠤ᠂ ᠦᠨᠡᠨ ᠪᠠ ᠬᠤᠳᠠᠯ ᠢ᠋ ᠬᠢᠭᠰᠡᠨ ᠬᠥᠮᠦᠨ ᠤ ᠴᠡᠭᠡᠵᠢᠨ ᠳ᠋ᠦ᠍ᠷ ᠴᠥᠮ ᠬᠡᠪ ᠭᠡᠭᠡᠬᠡᠨ ᠪᠠᠢᠬᠤ ᠲᠤᠯᠠ ᠲᠥᠷᠥ ᠶ᠋ᠢᠨ ᠬᠣᠲᠠᠯᠠᠭᠠᠷ ᠲᠠ ᠪᠦᠭᠦᠳᠡᠭᠡᠷ ᠪᠣᠳᠣᠵᠤ ᠦᠵᠡᠭᠲᠦᠨ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠪᠤᠬᠠ ᠴᠠᠭᠠᠨ ᠬᠠᠭᠠᠨ ᠪᠣᠳᠣᠵᠤ ᠦᠵᠡᠬᠦᠯᠡ ᠵᠠᠯᠮᠠ ᠶ᠋ᠢᠨ ᠦᠭᠡ ᠮᠠᠰᠢ ᠮᠥᠨ ᠲᠤᠯᠠ ᠰᠠᠨᠠᠪᠠᠴᠤ ᠨᠢᠭᠤᠬᠤᠶᠠ ᠪᠡᠷᠬᠡ ᠪᠣᠯᠪᠠ ᠬᠡᠮᠡᠭᠰᠡᠨ ᠪᠠᠢᠳᠠᠯ ᠢ᠋ ᠣᠳᠣᠨ ᠴᠢᠩᠰᠢᠶᠠᠩ ᠠᠨᠤ ᠦᠵᠡᠵᠦ ᠭᠠᠷᠤᠭᠠᠳ ᠤᠷᠤᠭᠰᠢ ᠲᠠᠪᠰᠢᠵᠤ᠂ ᠵᠡᠯᠮᠡ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ᠄《 ᠡᠷᠲᠡᠨ ᠤ ᠦᠭᠡᠰ ᠲᠤᠷ < ᠡᠵᠡᠨ ᠢᠴᠢᠩᠭᠦᠷᠡᠪᠡᠰᠦ ᠲᠦᠰᠢᠮᠡᠯ ᠦᠬᠦᠮᠦᠢ > ᠬᠡᠮᠡᠵᠦᠬᠦᠢ᠃ ᠡᠷᠭᠢᠨ ᠡᠯᠴᠢ ᠲᠦᠰᠢᠮᠡᠯ ᠴᠦ᠍ ᠮᠥᠨ ᠡᠵᠡᠨ ᠰᠠᠢᠳ ᠲᠤ ᠤᠯᠤᠰ ᠲᠤᠷ ᠪᠠᠢᠬᠤ ᠪᠣᠯᠠᠢ᠂ ᠣᠯᠠᠨ ᠲᠦᠰᠢᠮᠡᠳ ᠦᠨ ᠳᠡᠷᠭᠡᠳᠡ ᠢᠨᠤ ᠡᠵᠡᠨ ᠳ᠋ᠦ᠍ᠷ ᠮᠢᠨᠦ ᠪᠠᠬᠠᠨ ᠰᠦᠷ ᠴᠠᠭᠠᠵᠠ ᠶ᠋ᠢᠨ ᠭᠠᠵᠠᠷ ᠢ᠋ ᠦᠯᠡᠳᠡᠭᠡᠪᠡᠰᠦ ᠵᠣᠬᠢᠮᠤᠢ᠃ ᠡᠷᠭᠢᠨ ᠡᠯᠴᠢ ᠲᠦᠷ ᠮᠠᠨ ᠤ᠋ ᠥᠴᠦᠬᠡᠨ ᠤᠯᠤᠰ ᠲᠤᠷ ᠪᠡᠶᠡ ᠪᠡᠨ ᠭᠤᠲᠤᠭᠠᠨ ᠬᠡᠳᠦᠨ ᠡᠳᠦᠷ ᠪᠡᠶᠡ ᠠᠮᠠᠷᠠᠨ ᠰᠠᠭᠤᠲᠤᠭᠠᠢ᠂ ᠪᠢᠳᠡ ᠡᠵᠡᠨ ᠲᠦᠰᠢᠮᠡᠯ ᠬᠡᠯᠡᠯᠴᠡᠨ ᠲᠣᠭᠲᠠᠰᠤᠭᠠᠢ᠃ 》 ᠬᠡᠮᠡᠲᠡᠯᠡ ᠴᠠᠭᠠᠨ ᠬᠠᠭᠠᠨ ᠪᠠᠰᠠ ᠵᠠᠯᠭᠠᠵᠤ ᠥᠭᠦᠯᠡᠷᠦᠨ᠄《 ᠳᠠᠷᠤᠢ ᠲᠡᠢᠨ ᠬᠦ᠌ ᠪᠣᠯᠲᠤᠭᠠᠢ᠂ ᠪᠢ ᠡᠷᠬᠡᠪᠰᠢ ᠰᠠᠢᠨ ᠦᠯᠡᠮᠵᠢ᠂ ᠮᠠᠭᠤ ᠴᠥᠭᠡᠨ ᠢᠶᠠᠷ ᠠᠪᠠᠴᠢᠮᠤᠶᠠ᠂ ᠡᠷᠭᠢᠨ ᠡᠯᠴᠢ ᠪᠡᠶᠡ ᠪᠡᠨ ᠠᠮᠠᠷᠠᠲᠤᠭᠠᠢ᠂ ᠶᠠᠭᠠᠬᠢᠪᠠᠴᠤ ᠴᠢᠮᠠ ᠳ᠋ᠤ᠌ ᠬᠣᠣᠷ ᠦᠯᠦ ᠭᠦᠷᠭᠡᠮᠤᠢ᠃ 》 ᠵᠠᠯᠮᠠ ᠥᠭᠦᠯᠡᠷᠦᠨ᠄《 ᠪᠢ ᠪᠡᠶᠡ ᠪᠡᠨ ᠦᠬᠦᠬᠦ ᠡᠴᠡ ᠥᠴᠦᠬᠡᠨ ᠴᠦ᠍ ᠠᠶᠤᠬᠤ ᠦᠭᠡᠢ᠂ ᠠᠶᠤᠪᠠᠰᠤ ᠢᠷᠡᠬᠦ ᠦᠭᠡᠢ᠂ ᠲᠠᠨ ᠤ᠋ ᠠᠯᠠᠬᠤ ᠠ᠋ᠴᠠ ᠠᠶᠤᠪᠠᠰᠤ ᠡᠨᠡ ᠮᠡᠲᠦ ᠮᠥᠨ ᠬᠡᠯᠡᠬᠦ ᠦᠭᠡᠢ ᠪᠥᠯᠥᠭᠡ᠃ ᠲᠠ ᠦᠨᠡᠬᠡᠷ ᠠᠯᠠᠪᠠᠴᠤ ᠮᠢᠨᠦ ᠡᠵᠡᠨ ᠪᠠᠰᠠ ᠦᠰ ᠠᠪᠴᠤ ᠴᠢᠳᠠᠮᠤᠢ᠃ ᠨᠡᠩ ᠪᠠᠰᠠ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠡᠨᠡ ᠬᠡᠳᠦᠨ ᠵᠢᠯ ᠤᠯᠤᠰ ᠠᠢᠮᠠᠭ ᠢ᠋ ᠣᠯᠵᠤ ᠡᠰᠡ ᠳᠠᠢᠯᠠᠭᠰᠠᠨ ᠢᠶᠠᠷ ᠣᠯᠠᠨ ᠴᠡᠷᠢᠭ ᠤᠨ ᠭᠠᠷ ᠬᠥᠯ ᠵᠠᠭᠠᠲᠤᠨᠠᠨ ᠬᠥᠳᠡᠯᠵᠦ᠂ ᠴᠡᠷᠢᠭ ᠤᠨ ᠵᠡᠪᠰᠡᠭ ᠬᠥᠮᠦᠨ ᠤ ᠴᠢᠰᠤᠨ ᠣᠯᠵᠤ ᠡᠰᠡ ᠤᠤᠭᠤᠭᠰᠠᠨ ᠢᠶᠠᠷ ᠴᠥᠮ ᠤᠮᠳᠠᠭᠠᠰᠤᠨ ᠠᠩᠭᠠᠵᠤ ᠥᠪᠡᠷ ᠢᠶᠠᠷ ᠬᠢᠷᠴᠢᠭᠢᠨᠡᠨ ᠳᠠᠭᠤᠨ ᠭᠠᠷᠤᠮᠣᠢ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠴᠡᠷᠢᠭ ᠴᠥᠮ ᠪᠠᠢᠯᠳᠤᠬᠤ ᠶ᠋ᠢ ᠬᠦᠰᠡᠵᠦᠬᠦᠢ᠃ 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠣᠳᠣᠨ ᠲᠠᠢᠱᠢ ᠥᠭᠦᠯᠡᠷᠦᠨ᠄《 ᠲᠡᠢᠨ ᠪᠢᠲᠡᠭᠡᠢ ᠠᠶᠤᠯᠭᠠᠨ ᠥᠭᠦᠯᠡᠭᠲᠦᠨ᠂ ᠣᠯᠠᠨ ᠴᠡᠷᠢᠭ ᠦᠬᠦᠯ ᠢ᠋ ᠡᠷᠢᠨ ᠪᠠᠢᠯᠳᠤᠬᠤ ᠳᠤᠷᠠᠲᠠᠢ ᠶᠣᠰᠣ ᠪᠣᠢ ᠤᠤ ? 》 ᠵᠡᠯᠮᠡ ᠥᠭᠦᠯᠡᠷᠦᠨ᠄《 ᠡᠷᠭᠢᠨ ᠲᠠᠢᠱᠢ ᠴᠢ ᠨᠢᠭᠡᠨ ᠢ᠋ ᠮᠡᠳᠡᠨ ᠠᠲᠠᠯᠠ ᠬᠣᠶᠠᠷ ᠢ᠋ ᠡᠰᠡ ᠤᠬᠠᠵᠤᠬᠤᠢ᠃ ᠴᠡᠷᠢᠭ ᠤᠨ ᠶᠣᠰᠣ ᠦᠬᠦᠬᠦ ᠢᠨᠤ ᠭᠡᠷ ᠲᠦ᠍ ᠭᠠᠪᠢᠶᠠ ᠪᠣᠢ᠂ ᠦᠬᠦᠭᠰᠡᠨ ᠦᠭᠡᠢ ᠦᠯᠡᠳᠡᠭᠰᠡᠨ ᠢᠨᠤ ᠴᠡᠷᠢᠭ ᠤᠨ ᠣᠯᠵᠠ ᠪᠣᠢ᠂ ᠦᠬᠦᠬᠦ ᠡᠭᠡᠨᠡᠭᠲᠡ ᠴᠥᠭᠡᠨ᠂ ᠦᠯᠡᠬᠦ ᠢᠨᠦ ᠪᠠᠰᠠ ᠬᠦ᠌ ᠦᠯᠡᠮᠵᠢ᠃ ᠮᠠᠨ ᠤ᠋ ᠲᠡᠭᠷᠢᠯᠢᠭ ᠡᠵᠡᠨ ᠤ ᠳᠡᠢᠯᠦᠭᠰᠡᠨ ᠢᠨᠤ ᠣᠯᠠᠨ᠂ ᠳᠠᠷᠤᠭᠳᠠᠭᠰᠠᠨ ᠠᠨᠤ ᠴᠥᠭᠡᠨ ᠪᠣᠯᠤᠭᠰᠠᠨ ᠢᠶᠡᠷ ᠴᠡᠷᠢᠭ ᠦᠨ ᠠᠷᠠᠳ ᠣᠯᠠᠩᠬᠢ ᠨᠢ ᠠᠮᠲᠠᠰᠢᠵᠤᠬᠤᠢ᠃ ᠶᠠᠭᠤᠨ ᠳ᠋ᠤᠷ ᠨᠠᠮᠠᠶᠢ ᠪᠠᠷᠳᠠᠮᠨᠠᠭᠰᠠᠨ ᠪᠣᠯᠭᠠᠨ ᠰᠠᠨᠠᠮᠤᠢ ? ᠦᠨᠡᠨ ᠢ᠋ ᠬᠡᠯᠡᠪᠡᠰᠦ ᠮᠢᠨᠦ ᠡᠵᠡᠨ ᠤᠳᠠᠭᠠ ᠪᠦᠷᠢ ᠲᠠᠢᠯᠵᠤ᠂ ᠡᠨᠡ ᠮᠡᠲᠦ ᠶᠡᠬᠡᠯᠡ ᠡᠰᠡ ᠮᠠᠨᠳᠤᠭᠰᠠᠨ ᠪᠥᠭᠡᠰᠦ ᠡᠷᠭᠢᠨ ᠬᠠᠭᠠᠨ ᠴᠤ᠌ ᠮᠥᠨ ᠮᠠᠨ ᠤ᠋ ᠤᠯᠤᠰ ᠢ᠋ ᠮᠥᠬᠥᠭᠡᠰᠦᠭᠡᠢ ᠭᠡᠮᠡᠨ ᠤᠷᠤᠭᠰᠢ ᠬᠣᠢᠰᠢ ᠵᠥᠪᠯᠡᠬᠦ ᠴᠦ᠍ ᠦᠭᠡᠢ᠃ ᠬᠡᠳᠦᠢ ᠦᠨᠡᠬᠡᠷ ᠵᠥᠪᠯᠡᠪᠡᠴᠦ ᠪᠢᠳᠡ ᠮᠥᠨ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠭᠠᠳᠠᠨᠠ ᠡᠷᠭᠢᠨ ᠤᠯᠤᠰ ᠲᠤᠷ ᠮᠥᠨ ᠬᠦᠷᠴᠦ ᠢᠷᠡᠬᠦ ᠲᠡᠩᠬᠡᠭᠡ ᠦᠭᠡᠢ ᠪᠣᠯᠠᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ᠂ ᠣᠳᠣᠨ ᠲᠠᠢᠱᠢ ᠠᠨᠤ ᠪᠠᠰᠠ ᠬᠤᠰᠤᠭᠳᠠᠵᠤ ᠬᠣᠢᠰᠢ ᠤᠬᠤᠷᠢᠵᠤ ᠵᠣᠭᠰᠣᠭᠰᠠᠨ ᠳ᠋ᠤᠷ ᠵᠡᠯᠮᠡ ᠶᠢᠨ ᠰᠦᠷ ᠣᠮᠣᠭ ᠨᠡᠩ ᠪᠠᠳᠠᠷᠠᠵᠤ ᠪᠠᠰᠠ ᠥᠭᠦᠯᠡᠷᠦᠨ᠄《 ᠡᠳᠦᠭᠡ ᠬᠡᠷᠪᠡ ᠪᠢ ᠡᠶᠡᠳᠦᠵᠦ ᠡᠴᠢᠪᠡᠰᠦ ᠮᠠᠨ ᠤ᠋ ᠣᠯᠠᠨ ᠴᠡᠷᠢᠭ ᠬᠠᠷᠢᠨ ᠭᠡᠳᠡᠷᠭᠦ ᠲᠡᠳᠡᠨ ᠤ ᠣᠯᠵᠠ ᠣᠮᠣᠭ ᠢ᠋ ᠬᠠᠯᠬᠠᠯᠠᠪᠠ ᠭᠡᠮᠡᠨ ᠮᠢᠨᠦ ᠮᠢᠬᠠ ᠶ᠋ᠢ ᠢᠳᠡᠭᠡᠳ ᠬᠠᠩᠬᠤ ᠦᠭᠡᠢ ᠮᠡᠲᠦ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠠᠷᠭᠠ ᠮᠤᠬᠤᠷᠳᠠᠵᠤ ᠵᠠᠯᠮᠠ ᠶ᠋ᠢᠨ ᠵᠦᠭ ᠰᠠᠢᠨ ᠦᠭᠡ ᠪᠡᠷ ᠲᠣᠬᠣᠨᠢᠭᠤᠯᠤᠨ ᠥᠭᠦᠯᠡᠷᠦᠨ᠄《 ᠡᠯᠴᠢ ᠲᠦᠰᠢᠮᠡᠯ ᠴᠢ ᠮᠠᠨ ᠤ᠋ ᠬᠣᠶᠠᠷ ᠤᠯᠤᠰ ᠤ᠋ᠨ ᠪᠦᠲᠦᠬᠦ ᠡᠪᠳᠡᠷᠡᠬᠦ ᠶ᠋ᠢᠨ ᠵᠠᠪᠰᠠᠷ ᠶᠠᠪᠤᠬᠤᠢ ᠶ᠋ᠢᠨ ᠲᠤᠯᠠᠳᠠ ᠪᠢᠲᠡᠭᠡᠢ ᠴᠢᠬᠤᠯᠳᠠᠨ ᠶᠠᠭᠠᠷᠠᠵᠤ ᠶᠡᠬᠡ ᠬᠡᠷᠡᠭ ᠢ᠋ ᠡᠪᠳᠡᠷᠡᠭᠦᠯ᠂ ᠬᠡᠷᠬᠢᠪᠡᠴᠦ ᠬᠡᠳᠦᠨ ᠡᠳᠦᠷ ᠬᠦᠯᠢᠴᠡᠨ ᠲᠡᠰᠪᠦᠷᠢᠯᠡᠵᠦ ᠪᠠᠬᠠᠨ ᠬᠦᠯᠢᠶᠡᠨ ᠰᠠᠭᠤᠲᠤᠭᠠᠢ᠃ ᠪᠢ ᠬᠡᠷᠬᠢᠪᠡᠴᠦ ᠪᠢᠴᠢᠬᠠᠨ ᠰᠡᠳᠬᠢᠯ ᠢᠶᠠᠷ ᠶᠡᠬᠡ ᠤᠯᠤᠰ ᠢᠶᠠᠨ ᠰᠠᠮᠠᠭᠤᠨ ᠦᠯᠦ ᠪᠣᠯᠭᠠᠮᠤᠢ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠯᠮᠠ ᠴᠠᠭᠠᠨ ᠬᠠᠭᠠᠨ ᠤ᠋ ᠭᠦᠨ ᠤᠬᠠᠭᠠᠨᠲᠠᠢ ᠶ᠋ᠢ ᠡᠨᠡ ᠨᠢᠭᠡᠬᠡᠨ ᠦᠭᠡᠰ ᠲᠣᠷ ᠳᠠᠷᠤᠢ ᠮᠡᠳᠡᠭᠡᠳ ᠳᠣᠲᠣᠷᠠ ᠪᠠᠨ ᠰᠠᠨᠠᠷᠤᠨ ᠄ ᠬᠡᠲᠦᠷᠬᠡᠶᠡ ᠰᠢᠬᠠᠮᠳᠠᠭᠤᠯᠪᠠᠰᠤ ᠳᠡᠭᠡᠰᠦᠨ ᠤ ᠡᠷᠴᠢᠮ ᠲᠠᠰᠤᠷᠠᠬᠤᠢ ᠳ᠋ᠤᠷ ᠬᠥᠷᠥᠭᠦᠵᠡᠢ ᠬᠡᠮᠡᠵᠦ ᠄ 《 ᠡᠷᠭᠢᠨ ᠤ ᠵᠠᠬᠢᠶᠠ ᠪᠠᠷ ᠬᠦᠯᠢᠶᠡᠨ ᠦᠵᠡᠰᠦᠭᠡᠢ 》ᠬᠡᠮᠡᠬᠦᠢ ᠳ᠋ᠦ᠍ᠷ᠂ ᠠᠭᠠᠷ ᠂ ᠣᠳᠣᠨ ᠬᠣᠶᠠᠷ ᠴᠧᠩᠰᠢᠶᠠᠩ ᠢᠨᠤ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠂ ᠵᠡᠯᠮᠡ ᠶ᠋ᠢᠨ ᠭᠠᠷ ᠠ᠋ᠴᠠ ᠪᠠᠷᠢᠵᠤ ᠬᠦᠨᠳᠦ ᠪᠡᠷ ᠬᠦᠨᠳᠦᠯᠡᠨ ᠡᠷᠭᠦᠵᠦ ᠂ ᠳᠡᠭᠡᠳᠦ ᠵᠣᠴᠢᠨ ᠤ᠋ ᠶᠠᠮᠤᠨ ᠳ᠋ᠤᠷ ᠪᠠᠭᠤᠯᠭᠠᠵᠤ ᠶᠡᠬᠡᠳᠡ ᠡᠷᠭᠦᠨ ᠬᠦᠨᠳᠦᠯᠡᠵᠦ ᠬᠤᠷᠢᠮ ᠪᠠᠷᠢᠮᠤᠢ ᠃
ᠲᠡᠭᠦᠨᠴᠡ ᠴᠠᠭᠠᠨ ᠬᠠᠭᠠᠨ ᠶᠡᠬᠡᠯᠡ ᠵᠣᠪᠠᠨᠢᠵᠤ ᠳᠣᠲᠣᠭᠠᠳᠤ ᠣᠷᠳᠣᠨ ᠳ᠋ᠤᠷ ᠯᠤᠤᠲᠤ ᠵᠤᠯᠠ ᠶ᠋ᠢᠨ ᠳᠣᠣᠷᠠ᠂ ᠠᠭᠠᠷ ᠣᠳᠣᠨ ᠬᠣᠶᠠᠷ ᠴᠧᠩᠰᠢᠶᠠᠩ ᠲᠡᠷᠢᠭᠦᠯᠡᠨ ᠵᠥᠪᠰᠢᠶᠡᠯ ᠤᠨ ᠶᠢᠰᠦᠨ ᠴᠢᠩ ᠬᠡᠮᠡᠭᠳᠡᠬᠦ ᠰᠠᠢᠳ ᠤᠳ ᠢᠶᠠᠨ ᠴᠤᠭᠯᠠᠭᠤᠯᠤᠨ ᠵᠥᠪᠳᠡᠵᠦ ᠥᠭᠦᠯᠡᠷᠦᠨ᠄《 ᠡᠨᠡ ᠬᠡᠷᠡᠭ ᠤᠨ ᠦᠨᠳᠦᠰᠦᠨ ᠤᠭ ᠠ᠋ᠴᠠ ᠭᠡᠷᠡᠢᠳ ᠤᠯᠤᠰ ᠤ᠋ᠨ ᠾᠧ ᠸᠠᠩ ᠠ᠋ᠴᠠ ᠡᠳᠦᠭᠡᠳ ᠪᠠᠰᠠ ᠲᠡᠭᠦᠨ ᠤ ᠬᠥᠮᠦᠨ ᠡᠴᠡ ᠬᠡᠯᠡ ᠭᠠᠷᠴᠤ ᠡᠳᠦᠭᠡ ᠮᠠᠨ ᠤ᠋ ᠤᠯᠤᠰ ᠲᠥᠷᠥ ᠳ᠋ᠤᠷ ᠬᠥᠮᠥᠰᠬᠡ ᠬᠤᠢᠬᠠᠯᠠᠬᠤ ᠮᠡᠲᠦ ᠲᠦᠷᠭᠡᠨ ᠵᠣᠪᠠᠯᠠᠩ ᠬᠦᠷᠴᠦ ᠢᠷᠡᠪᠡ᠃ ᠨᠡᠩ ᠪᠠᠰᠠ ᠮᠢᠨᠦ ᠴᠡᠷᠢᠭ ᠪᠡᠯᠡᠨ ᠦᠭᠡᠢ ᠶ᠋ᠢ ᠴᠦ᠍ ᠪᠠᠢᠲᠤᠭᠠᠢ ᠬᠡᠳᠦᠢ ᠪᠡᠯᠡᠨ ᠪᠦᠬᠦᠢ ᠪᠠᠢᠪᠠᠴᠤ ᠮᠥᠨ ᠠᠷᠤ ᠴᠡᠷᠢᠭ ᠲᠦ᠍ᠷ ᠲᠤᠯᠤᠨ ᠦᠯᠦ ᠲᠡᠩᠴᠡᠮᠦᠢ᠂ ᠡᠳᠦᠭᠡ ᠳᠠᠷᠤᠢ ᠬᠤᠷᠢᠶᠠᠪᠠᠴᠤ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠴᠡᠷᠢᠭ ᠨᠢᠭᠡᠨ ᠰᠠᠷᠠ ᠳ᠋ᠤᠷ ᠪᠠᠰᠠ ᠪᠦᠷᠢᠳᠴᠦ ᠴᠢᠳᠠᠬᠤ ᠦᠭᠡᠢ᠃ ᠡᠨᠡ ᠴᠢᠯᠥᠭᠡᠨ ᠳ᠋ᠦ᠍ᠷ ᠳᠠᠢᠰᠤᠨ ᠮᠠᠨ ᠤ᠋ ᠬᠣᠲᠠ ᠶ᠋ᠢ ᠠᠪᠤᠨ ᠲᠡᠭᠦᠰᠬᠦ ᠪᠣᠯᠠᠢ᠃ ᠡᠨᠡ ᠬᠡᠳᠦᠨ ᠵᠢᠯ ᠤᠨ ᠵᠤᠳ ᠲᠤᠷᠠᠬᠠᠨ ᠳ᠋ᠤᠷ ᠰᠠᠩ ᠤᠨ ᠠᠮᠤ ᠪᠠᠰᠠ ᠡᠯᠪᠡᠭ ᠬᠤᠷᠢᠶᠠᠭᠰᠠᠨ ᠦᠭᠡᠢ ᠪᠡᠷ ᠣᠯᠠᠨ ᠴᠡᠷᠢᠭ ᠢ᠋ ᠴᠤᠭᠯᠠᠭᠤᠯᠵᠤ ᠲᠡᠵᠢᠭᠡᠬᠦ ᠶ᠋ᠢ ᠠᠯᠳᠠᠭᠰᠠᠭᠠᠷ ᠡᠨᠡ ᠵᠣᠪᠠᠯᠠᠩ ᠳ᠋ᠤᠷ ᠲᠣᠬᠢᠶᠠᠯᠳᠤᠪᠠ᠃ ᠨᠡᠩ ᠪᠠᠰᠠ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠦᠰᠢᠮᠡᠳ ᠢ᠋ ᠰᠣᠨᠣᠰᠬᠤᠯᠠ ᠴᠥᠮ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠮᠡᠲᠦ ᠭᠠᠢᠬᠠᠮᠰᠢᠭᠲᠠᠢ᠂ ᠲᠡᠮᠦᠵᠢᠨ ᠬᠡᠮᠡᠭᠴᠢ ᠳᠣᠲᠣᠷᠬᠠᠶᠠ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠮᠥᠨ᠂ ᠢᠯᠡ ᠳᠠᠯᠳᠠ ᠶ᠋ᠢ ᠠᠢᠯᠠᠳᠬᠤ ᠬᠤᠪᠢᠯᠭᠠᠨ ᠮᠠᠲᠠᠯ᠂ ᠰᠠᠬᠢᠭᠤᠯᠰᠤᠨ ᠤ᠋ ᠬᠦᠴᠦᠨ ᠪᠣᠢ ᠬᠡᠮᠡᠮᠦᠢ᠂ ᠬᠢᠯᠪᠠᠷᠬᠠᠨ ᠢᠶᠠᠷ ᠳᠠᠢᠯᠠᠨ ᠦᠯᠦ ᠴᠢᠳᠠᠮᠤᠢ᠃ ᠡᠭᠦᠨ ᠢ᠋ ᠣᠳᠣ ᠬᠡᠷᠬᠢᠪᠡᠰᠦ ᠰᠠᠢᠨ ? 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠣᠳᠣᠨ ᠲᠠᠢᠱᠢ ᠠᠨᠤ ᠮᠡᠳᠡᠭᠦᠯᠦᠷᠦᠨ᠄《 ᠡᠨᠡ ᠬᠡᠷᠡᠭ ᠮᠠᠰᠢ ᠬᠢᠯᠪᠠᠷ᠂ ᠡᠵᠡᠨ ᠮᠠᠷᠭᠠᠲᠠ ᠥᠷᠯᠥᠭᠡ ᠶ᠋ᠢᠨ ᠲᠥᠷᠥ ᠳ᠋ᠤᠷ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠲᠦᠰᠢᠮᠡᠯ ᠲᠦᠰᠢᠶᠡ ᠴᠡᠷᠢᠭ ᠢᠷᠭᠡᠨ ᠢ᠋ ᠰᠠᠷᠠᠨ ᠭᠣᠣᠯ ᠤ᠋ᠨ ᠠᠭᠤᠳᠠᠮ ᠬᠦᠷᠢᠶᠡᠨ ᠳ᠋ᠦ᠍ᠷ ᠴᠤᠭᠯᠠᠭᠤᠯᠵᠤ ᠂ ᠣᠯᠠᠨ ᠤ᠋ ᠰᠠᠨᠠᠭᠠᠨ ᠢ᠋ ᠳᠠᠩᠰᠠᠨ ᠠᠰᠠᠭᠤᠵᠤ ᠦᠵᠡᠭᠡᠳ ᠵᠢᠴᠢ ᠲᠣᠭᠲᠠᠭᠠᠶᠠ᠂ ᠡᠨᠡ ᠳᠠᠷᠤᠢ ᠲᠡᠭᠷᠢ ᠶ᠋ᠢᠨ ᠰᠠᠨᠠᠭᠠᠨ ᠢ᠋ ᠮᠡᠳᠡᠪᠡᠰᠦ ᠪᠣᠯᠬᠤ ᠭᠣᠣᠯᠴᠢ ᠵᠠᠮ ᠮᠥᠨ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠦᠭᠡ ᠶ᠋ᠢ ᠵᠥᠪᠰᠢᠶᠡᠵᠦ᠂ ᠵᠢᠴᠢ ᠥᠷᠯᠥᠭᠡ ᠶᠡᠬᠡ ᠬᠦᠷᠢᠶᠡᠯᠡᠩ ᠤᠨ ᠰᠠᠷᠠᠨ ᠬᠠᠷᠰᠢ ᠳ᠋ᠤᠷ ᠭᠠᠷᠴᠤ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠴᠡᠷᠢᠭ ᠢᠷᠭᠡᠨ ᠳ᠋ᠦ᠍ᠷ ᠬᠦᠷᠲᠡᠯᠡ ᠴᠤᠭᠯᠠᠭᠤᠯᠤᠭᠠᠳ ᠥᠪᠡᠷ ᠤᠨ ᠨᠢᠭᠤᠷ ᠤ᠋ᠨ ᠡᠮᠦᠨᠡ ᠪᠸᠲ᠋ᠠ᠋ ᠤᠯᠤᠰ ᠯᠤᠭᠠ ᠦᠬᠦᠨ ᠪᠠᠢᠯᠳᠤᠵᠤ ᠲᠤᠯᠪᠠᠰᠤ ᠰᠠᠢᠨ ᠤᠤ ? ᠪᠤᠷᠤᠭᠤ ᠬᠦᠯᠢᠶᠡᠨ ᠳᠠᠭᠠᠪᠠᠰᠤ ᠰᠠᠢᠨ ᠤᠤ ? ᠭᠡᠮᠡᠨ ᠳᠠᠬᠢᠨ ᠳᠠᠪᠲᠠᠨ ᠱᠠᠭᠠᠷᠳᠠᠨ ᠠᠰᠠᠭᠤᠭᠰᠠᠨ ᠳ᠋ᠤᠷ ᠣᠯᠠᠨ ᠢᠶᠠᠷ ᠠᠷᠭᠠ ᠦᠭᠡᠢ᠂ ᠥᠪᠡᠷ ᠥᠪᠡᠷ ᠤᠨ ᠰᠠᠨᠠᠭᠠ ᠪᠠᠨ ᠰᠢᠪᠠᠭᠠ ᠳ᠋ᠤᠷ ᠪᠢᠴᠢᠵᠦ ᠪᠠᠷᠢᠪᠠ ᠃
ᠲᠡᠳᠦᠢ ᠣᠳᠣᠨ ᠴᠧᠩᠰᠢᠶᠠᠩ ᠣᠯᠠᠨ ᠤ᠋ ᠰᠢᠪᠠᠭᠠ ᠶ᠋ᠢ ᠬᠣᠷᠢᠶᠠᠨ ᠦᠵᠡᠪᠡᠰᠦ ᠠᠷᠪᠠᠨ ᠬᠤᠪᠢ ᠠ᠋ᠴᠠ ᠳᠣᠯᠣᠭᠠᠨ ᠬᠤᠪᠢ ᠠᠨᠤ ᠡᠶᠡᠳᠦᠬᠦ ᠶ᠋ᠢ ᠬᠦᠰᠡᠬᠦ ᠲᠤᠯᠠ ᠴᠠᠭᠠᠨ ᠬᠠᠭᠠᠨ ᠶᠡᠬᠡᠯᠡ ᠠᠶᠤᠵᠤ ᠠᠷᠭᠠ ᠦᠭᠡᠢ ᠤᠷᠲᠤ ᠰᠡᠭᠦᠷᠡᠰᠦ ᠠᠯᠳᠠᠵᠤ᠂ ᠣᠷᠳᠣᠨ ᠳ᠋ᠤᠷ ᠡᠭᠡᠭᠡᠳ ᠬᠥᠮᠥᠰᠬᠡ ᠠᠲᠤᠷᠢᠨ ᠲᠣᠯᠣᠭᠠᠢ ᠳᠠᠷᠤᠨ ᠵᠣᠪᠠᠨ ᠪᠦᠬᠦᠢ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠤ᠋ ᠭᠠᠭᠴᠠ ᠥᠬᠢᠨ ᠰᠠᠷᠠᠨ ᠭᠦᠩᠵᠦ ᠢᠨᠤ ᠡᠴᠢᠭᠡ ᠶᠦ᠍ᠭᠡᠨ ᠠᠮᠤᠷ ᠢ᠋ ᠡᠷᠢᠷᠡ ᠢᠨᠢᠶᠡᠭᠰᠡᠭᠡᠷ ᠢᠷᠡᠵᠦ ᠶᠣᠰᠣᠯᠠᠨ᠂ ᠬᠠᠭᠠᠨ ᠡᠴᠢᠭᠡ ᠶᠦ᠍ᠭᠡᠨ ᠴᠢᠬᠤᠯᠳᠠᠨ ᠵᠣᠪᠠᠨᠢᠬᠤ ᠴᠢᠷᠠᠢ ᠶ᠋ᠢ ᠦᠵᠡᠭᠡᠳ ᠶᠡᠬᠡᠯᠡ ᠬᠢᠷᠲ᠌ᠭᠢᠪᠡ᠃ ᠡᠨᠡ ᠭᠦᠩᠵᠦ ᠶ᠋ᠢ ᠲᠥᠷᠥᠬᠦᠢ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠤ᠋ ᠭᠣᠣᠯ ᠬᠠᠷᠰᠢ ᠶ᠋ᠢᠨ ᠳᠡᠭᠡᠷᠡ ᠨᠢᠭᠡᠨ ᠶᠡᠬᠡ ᠰᠠᠷᠠᠨ ᠮᠠᠨᠳᠤᠪᠠ ᠭᠡᠮᠡᠨ ᠵᠡᠭᠦᠳᠦᠯᠡᠭᠡᠳ ᠰᠣᠴᠢᠨ ᠰᠠᠷᠢᠲᠠᠯᠠ ᠣᠷᠳᠣᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ᠷ ᠲᠡᠭᠷᠢ ᠶ᠋ᠢᠨ ᠬᠦᠵᠢᠰ ᠤᠨ ᠦᠨᠦᠷ ᠠᠩᠬᠢᠯᠵᠤ ᠂ ᠣᠷᠳᠣᠨ ᠤ᠋ ᠡᠷᠡᠮᠳᠡᠭ ᠵᠠᠷᠤᠴᠠ ① ᠢᠷᠡᠵᠦ ᠲᠥᠪ ᠤᠨ ᠶᠡᠬᠡ ᠬᠠᠲᠤᠨ ᠠ᠋ᠴᠠ ᠨᠢᠭᠡᠨ ᠠᠪᠠᠬᠠᠢ ᠮᠡᠨᠳᠦᠯᠡᠪᠡ ᠬᠡᠮᠡᠭᠰᠡᠨ ᠢᠶᠠᠷ ᠲᠡᠢᠨ ᠬᠦ᠌ ᠨᠡᠷᠡ ᠶ᠋ᠢ ᠭᠣᠣᠯ ᠬᠠᠷᠰᠢ ᠳ᠋ᠤᠷ ᠰᠠᠷᠠᠨ ᠮᠠᠨᠳᠤᠭᠰᠠᠨ ᠮᠡᠲᠦ ᠭᠡᠵᠦ 《ᠭᠣᠣᠯ ᠤ᠋ᠨ ᠰᠠᠷᠠᠨ 》② ᠭᠡᠮᠡᠨ ᠨᠡᠷᠡᠢᠳᠦᠭᠰᠡᠨ ᠠᠵᠤᠭᠤ ᠃ ᠲᠡᠭᠦᠨᠴᠡ ᠡᠨᠡ ᠭᠣᠣᠯ ᠤ᠋ᠨ ᠰᠠᠷᠠᠨ ᠭᠦᠩᠵᠦ ᠶ᠋ᠢᠨ ᠬᠣᠶᠠᠷ ᠨᠠᠰᠤᠨ ᠳ᠋ᠤᠷ ᠡᠬᠡ ᠢᠨᠤ ᠨᠥᠭᠴᠢᠭᠰᠡᠨ ᠲᠤᠯᠠ ᠪᠤᠬᠠ ᠴᠠᠭᠠᠨ ᠬᠠᠭᠠᠨ ᠥᠨᠥᠴᠢᠨ ᠥᠬᠢᠨ ᠭᠡᠮᠡᠨ ᠬᠡᠲᠦᠷᠬᠡᠶᠡ ᠠᠮᠠᠷᠠᠭ ᠪᠣᠯᠠᠢ᠃
– – – –
①ᠡᠷᠡᠮᠳᠡᠭ ᠵᠠᠷᠤᠴᠠ ᠬᠡᠮᠡᠭᠴᠢ ᠡᠷᠡ ᠶ᠋ᠢᠨ ᠪᠡᠯᠬᠡᠰ ᠢ᠋ ᠣᠭᠲᠣᠯᠵᠤ ᠠᠪᠤᠭᠰᠠᠨ ᠲᠠᠢᠭᠠᠨ ᠤ᠋ ᠮᠣᠩᠭᠣᠯ ᠨᠡᠷᠡ ᠠᠵᠤᠭᠤ ᠃
②ᠡᠨᠡ ᠨᠡᠷᠡ ᠶ᠋ᠢ ᠵᠠᠷᠢᠮ ᠰᠤᠳᠤᠷ ᠤᠳ ᠲᠤᠷ ᠬᠠᠯᠭᠤᠷᠠᠨ ᠲᠠᠰᠢᠶᠠᠷᠠᠵᠤ 《ᠭᠣᠯᠠᠨ ᠬᠠᠲᠤᠨ 》 ᠬᠡᠮᠡᠬᠦ ᠴᠦ᠍ ᠪᠣᠢ ᠃ 《ᠴᠢᠳᠠᠭᠴᠢ ᠶ᠋ᠢᠨ ᠡᠷᠬᠡᠲᠦ ᠴᠠᠳᠢᠭ 》 ᠲᠤᠷ ᠰᠣᠯᠣᠩᠭᠣᠰ ᠤᠯᠤᠰ ᠢ ᠬᠠᠷᠢᠨ ᠰᠢᠭᠤᠳ ᠰᠣᠯᠣᠩᠭᠠ ᠤᠯᠤᠰ ᠪᠣᠯᠭᠠᠨ ᠡᠨᠳᠡᠭᠦᠷᠡᠵᠦᠬᠦᠢ ᠃ ᠰᠣᠯᠣᠩᠭᠠ ᠤᠯᠤᠰ ᠬᠡᠮᠡᠭᠴᠢ ᠵᠡᠭᠦᠨ ᠡᠮᠦᠨᠡ ᠶ᠋ᠢᠨ ᠭᠠᠤᠯᠢ ᠤᠯᠤᠰ ᠤ᠋ᠨ ᠮᠣᠩᠭᠣᠯ ᠨᠡᠷᠡ ᠲᠤᠯᠠ ᠡᠨᠡ ᠭᠣᠯᠠᠨ ᠬᠠᠲᠤᠨ ᠢ᠋ ᠬᠠᠷᠢᠨ ᠰᠢᠭᠤᠳ 《ᠭᠣᠯᠢᠨ ᠬᠠᠲᠤᠨ 》ᠬᠡᠮᠡᠭᠴᠢ ᠴᠦ᠍ ᠪᠣᠢ ᠠᠮᠤᠢ ᠃ ᠡᠳᠡᠭᠡᠷ ᠴᠥᠮ ᠨᠠᠷᠢᠨ ᠨᠢᠭᠲᠠ ᠰᠤᠳᠤᠷ ᠢ᠋ ᠡᠰᠡ ᠦᠵᠡᠭᠰᠡᠨ ᠡᠴᠡ ᠪᠣᠯᠵᠤᠬᠤᠢ ᠃ ᠰᠣᠯᠣᠩᠭᠣᠰ ᠤᠯᠤᠰ ᠤ᠋ᠨ ᠵᠡᠭᠦᠨ ᠡᠮᠦᠨᠡ ᠵᠠᠬᠠ ᠠᠨᠤ ᠰᠣᠯᠣᠩᠭᠠ ᠤᠯᠤᠰ ᠲᠤᠷ ᠵᠠᠬᠠ ᠨᠡᠢᠯᠡᠭᠰᠡᠨ ᠢᠨᠤ ᠦᠨᠡᠨ ᠪᠣᠯᠪᠠᠴᠤ ᠴᠣᠬᠣᠮ ᠰᠣᠯᠣᠩᠭᠠ ᠤᠯᠤᠰ ᠪᠤᠰᠤ ᠂ ᠶᠡᠬᠡ ᠪᠠᠷᠤᠭ ᠳᠠᠷᠤᠢ ᠡᠨᠡ ᠦᠶᠡ ᠶ᠋ᠢᠨ ᠰᠣᠯᠣᠨ ᠠᠢᠮᠠᠭ ᠤ᠋ᠨ ᠭᠠᠵᠠᠷ ᠮᠥᠨ ᠃ ᠲᠡᠢᠨ ᠬᠦ᠌ ᠭᠠᠤᠯᠢ ᠤᠯᠤᠰ ᠲᠤᠷ ᠣᠢᠷᠠ ᠲᠤᠯᠠ ᠰᠢᠭᠤᠳ ᠭᠠᠤᠯᠢ ᠪᠣᠯᠭᠠᠨ ᠡᠨᠳᠡᠭᠦᠷᠡᠵᠤᠬᠦᠢ ᠃
ᠨᠡᠩᠳᠡ ᠡᠨᠡ ᠭᠣᠣᠯ ᠤ᠋ᠨ ᠰᠠᠷᠠᠨ ᠤ᠋ ᠥᠩᠭᠡ ᠵᠢᠰᠦ᠂ ᠤᠬᠠᠭᠠᠨ ᠮᠠᠲᠠᠯ ᠶᠢᠷᠲᠢᠨᠴᠦ ᠳ᠋ᠤᠷ ᠲᠠᠰᠤᠷᠬᠠᠢ᠂ ᠣᠷᠴᠢᠯᠠᠩ ᠳ᠋ᠤᠷ ᠴᠤᠬᠠᠭ ᠪᠣᠯᠵᠤ᠂ ᠭᠤᠷᠪᠠᠨ ᠳᠥᠷᠪᠡᠨ ᠨᠠᠰᠤᠨ ᠠ᠋ᠴᠠ ᠪᠢᠴᠢᠭ ᠦᠰᠦᠭ ᠢ᠋ ᠲᠥᠰᠦᠭᠡᠯᠡᠵᠦ᠂ ᠵᠢᠷᠭᠤᠭᠠ ᠳᠣᠯᠣᠭᠠᠨ ᠨᠠᠰᠤᠯᠠᠮᠠᠭᠴᠠ ᠰᠢᠳᠡᠷᠡ ᠮᠢᠭᠮᠡᠨ ᠢ᠋ ᠰᠤᠷᠤᠭᠠᠳ ᠠᠷᠪᠠᠨ ᠨᠠᠰᠤ ᠭᠠᠷᠤᠮᠠᠭᠴᠠ ᠵᠡᠭᠦᠦ ᠤᠳᠠᠰᠤᠨᠠ ᠮᠡᠷᠭᠡᠰᠢᠵᠦ ᠂ ᠣᠶᠣᠬᠤ ᠳᠣᠪᠬᠢᠭᠦ ᠂ ᠡᠭᠡᠷᠡᠬᠦ ᠨᠡᠬᠡᠬᠦ ᠪᠠ ᠪᠢᠴᠢᠬᠦ ᠵᠢᠷᠤᠬᠤ ᠂ ᠲᠠᠯᠪᠢᠬᠤ ᠴᠢᠪᠬᠠᠳᠠᠬᠤ ᠂ ᠶᠠᠲᠤᠭᠠ ᠮᠢᠭᠮᠡᠨ᠂ ᠡᠯᠡ ᠵᠦᠢᠯ ᠳ᠋ᠦ᠍ᠷ ᠴᠥᠮ ᠮᠡᠷᠭᠡᠰᠢᠭᠡᠳ ᠨᠡᠩ ᠢᠯᠠᠩᠭᠤᠶᠠ ᠠᠷᠪᠠᠨ ᠲᠠᠪᠤ ᠵᠢᠷᠭᠤᠭᠠᠨ ᠨᠠᠰᠤᠨ ᠳ᠋ᠤᠷ ᠬᠦᠷᠦᠭᠡᠳ ᠥᠩᠭᠡ ᠵᠢᠰᠦ ᠢᠨᠤ ᠴᠡᠴᠡᠭ ᠲᠣᠷ ᠦᠯᠢᠳᠬᠡᠪᠡᠰᠦ ᠴᠡᠴᠡᠭ ᠡᠴᠡ ᠠᠮᠢᠳᠤᠯᠢᠭ᠂ ᠰᠠᠷᠠᠨ ᠳ᠋ᠤᠷ ᠠᠳᠠᠯᠢᠳᠬᠠᠪᠠᠰᠤ ᠰᠠᠷᠠᠨ ᠠ᠋ᠴᠠ ᠠᠩᠬᠢᠯᠤᠮᠠᠯ ᠂ ᠡᠯᠡᠲᠡᠯᠡ ᠵᠦᠯᠭᠦᠭᠰᠡᠨ ᠬᠠᠰ ᠤ᠋ᠨ ᠲᠣᠯᠢ ᠮᠡᠲᠦ ᠂ ᠲᠥᠭᠥᠷᠢᠭ ᠪᠥᠮᠪᠥᠭᠡᠷ ᠵᠢᠰᠦ ᠳ᠋ᠦ᠍ᠷ ᠡᠪᠬᠡᠷᠡᠵᠦ ᠬᠥᠪᠬᠡᠯᠵᠡᠬᠦ ᠬᠠᠷᠠ ᠪᠡᠬᠡᠰ ᠠᠳᠠᠯᠢ ᠂ ᠡᠭᠦᠯᠡᠰ ᠤᠨ ᠦᠰᠦ ᠬᠡᠷᠡᠯᠳᠦᠭᠡᠳ ᠰᠡᠴᠡᠨ ᠤᠬᠠᠮᠰᠠᠷ ᠢ ᠠᠬᠤᠭᠤᠯᠤᠭᠰᠠᠨ ᠬᠣᠶᠠᠷ ᠮᠤᠷᠤᠢ ᠰᠠᠢᠬᠠᠨ ᠬᠥᠮᠥᠰᠬᠡ ᠳ᠋ᠦ᠍ᠷ ᠠᠰᠠᠷᠠᠬᠤ ᠨᠢᠭᠦᠯᠡᠰᠬᠦᠢ ᠶ᠋ᠢ ᠣᠨᠢᠰᠤᠯᠠᠵᠤ ᠂ ᠮᠡᠷᠭᠡᠨ ᠭᠡᠭᠡᠬᠡᠨ ᠢ᠋ ᠢᠯᠡᠷᠡᠭᠦᠯᠦᠭᠰᠡᠨ ᠨᠢᠭᠡᠨ ᠲᠡᠭᠦᠰ ᠲᠤᠩᠭᠠᠯᠠᠭ ᠨᠢᠳᠦᠨ ᠳ᠋ᠦ᠍ᠷ ᠬᠤᠪᠢᠯᠭᠠᠨ ᠪᠢᠯᠢᠭ ᠢ᠋ ᠲᠣᠪᠴᠢᠯᠠᠵᠤᠬᠤᠢ᠃ ᠦᠨᠡᠬᠡᠷ ᠬᠠᠰ ᠤᠨ ᠬᠤᠯᠤᠰᠤᠨ ᠮᠡᠲᠦ ᠲᠡᠭᠰᠢ ᠰᠢᠯᠤᠭᠤᠨ ᠴᠣᠭᠴᠠ ᠪᠡᠶᠡ ᠂ ᠯᠢᠩᠬᠤᠠ ᠶ᠋ᠢᠨ ᠦᠨᠳᠦᠰᠦᠨ ᠠᠳᠠᠯᠢ ᠵᠥᠭᠡᠯᠡᠨ ᠨᠡᠮᠡᠭᠦᠨ ᠦᠶᠡᠰ ᠭᠡᠰᠢᠭᠦᠨ ᠲᠡᠢ᠃ ᠦᠨᠡᠨ ᠢᠶᠠᠷ ᠴᠦ᠍ ᠰᠠᠭᠤᠭᠰᠠᠨ ᠣᠷᠳᠣᠨ ᠳ᠋ᠤᠷ ᠽᠠᠨᠳᠠᠨ ᠭᠠᠪᠢᠷᠠ ᠶ᠋ᠢᠨ ᠦᠨᠦᠷ ᠰᠢᠩᠭᠡᠭᠡᠳ ᠠᠯᠬᠤᠭᠰᠠᠨ ᠵᠠᠮ ᠳ᠋ᠤᠷ ᠴᠤ᠌ ᠠᠩᠬᠢᠯᠤᠮᠠ ᠵᠠᠭᠠᠷ ᠤ᠋ᠨ ᠬᠦᠵᠢᠰ ᠬᠣᠴᠣᠷᠴᠤ ᠥᠭᠦᠯᠡᠵᠦ ᠬᠡᠯᠡᠯᠴᠡᠪᠡᠰᠦ ᠶᠢᠰᠦᠨ ᠲᠡᠭᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠥᠬᠢᠨ ᠮᠡᠲᠦ᠂ ᠥᠴᠦᠬᠡᠨ ᠢᠨᠢᠶᠡᠪᠡᠰᠦ ᠲᠦᠮᠡᠨ ᠴᠡᠴᠡᠭ ᠬᠠᠮᠲᠤ ᠪᠠᠷ ᠳᠡᠯᠭᠡᠷᠡᠭᠰᠡᠨ ᠠᠳᠠᠯᠢ ᠂ ᠬᠡᠢ᠍ᠪᠡᠩ ᠴᠠᠭᠠᠨ ᠬᠠᠰ ᠤ᠋ᠨ ᠴᠢᠷᠠᠢ ᠣ ᠶ᠋ᠢ ᠢᠴᠡᠭᠡᠨ ᠂ ᠪᠤᠯᠪᠠᠷᠠᠢ ᠨᠡᠮᠡᠭᠦᠨ ᠤᠯᠠᠭᠠᠨ ᠥᠩᠭᠡ ᠡᠩᠭᠡᠰᠬᠡ ᠶ᠋ᠢ ᠬᠡᠷᠡᠭᠰᠡᠬᠦ ᠦᠭᠡᠢ᠃ ᠯᠠᠪ ᠬᠤᠷᠮᠤᠰᠲᠠ ᠲᠩᠷᠢ ᠶ᠋ᠢᠨ ᠰᠤᠳᠠᠷᠠᠰᠤᠨ ᠪᠠᠯᠭᠠᠰᠤᠨ ᠠ᠋ᠴᠠ ᠢᠷᠡᠵᠦ ᠲᠥᠷᠥᠭᠰᠡᠨ ᠲᠡᠭᠷᠢ ᠷᠠᠬᠢᠨᠢᠰ ᠤ᠋ᠨ ᠬᠤᠪᠢᠯᠭᠠᠨ ᠥᠬᠢᠨ ᠪᠤᠰᠤ ᠪᠣᠯᠪᠠᠴᠤ ᠮᠠᠭᠠᠳ ᠥᠯᠵᠡᠢᠲᠦ ᠡᠬᠡ ᠶ᠋ᠢᠨ ᠤᠳᠠᠷᠠᠶᠠᠨ ᠤ᠋ ᠣᠷᠣᠨ ᠠ᠋ᠴᠠ ᠪᠠᠭᠤᠯᠭᠠᠨ ᠲᠥᠷᠥᠭᠦᠯᠦᠭᠰᠡᠨ ᠪᠣᠭᠳᠠ ᠬᠠᠳ ᠤᠳ ᠤ᠋ᠨ ᠬᠣᠣᠰᠯᠠᠯ ᠬᠠᠲᠤᠨ ᠮᠥᠨ᠃ ᠡᠨᠡ ᠭᠣᠣᠯ ᠤ᠋ᠨ ᠰᠠᠷᠠᠨ ᠭᠦᠩᠵᠦ ᠨᠠᠢ᠌ᠮᠠᠨ ᠨᠠᠰᠤᠨ ᠤ᠋ ᠦᠶᠡ ᠳ᠋ᠦ᠍ᠷ ᠲᠡᠭᠦᠨ ᠤ ᠳᠣᠣᠷᠠᠬᠢ ᠨᠢᠭᠡᠨ ᠣᠷᠳᠣᠨ ᠤ᠋ ᠥᠬᠢᠳ ᠤᠰᠤ ᠪᠤᠴᠠᠯᠭᠠᠬᠤ ᠲᠦᠭᠦᠬᠡᠢ ᠰᠢᠷᠡᠮᠦ ᠶ᠋ᠢᠨ ᠬᠦᠬᠦᠷ ᠢ᠋ ᠳᠣᠲᠣᠷᠠ ᠠᠨᠤ ᠵᠤᠵᠠᠭᠠᠨ ᠬᠠᠭᠰᠢᠷᠠᠨ ᠤᠰᠤ ᠪᠤᠴᠠᠯᠬᠤ ᠤᠳᠠᠭᠠᠨ ᠬᠡᠮᠡᠵᠦ ᠬᠤᠷᠴᠠ ᠭᠠᠯ ᠤ᠋ᠨ ᠬᠢᠰᠠ ᠳ᠋ᠤᠷ ᠬᠢᠵᠦ ᠤᠯᠠᠢᠯᠭᠠᠭᠠᠳ ᠮᠣᠳᠣ ᠪᠠᠷ ᠡᠲᠡᠵᠦ ᠤᠨᠠᠭᠠᠰᠤᠭᠠᠢ ᠬᠡᠮᠡᠵᠦ ᠠᠮᠠᠰᠠᠷ ᠢ᠋ ᠠᠨᠤ ᠰᠡᠳᠡ ᠡᠲᠡᠵᠦ ᠡᠮᠲᠡᠯᠦᠭᠰᠡᠨ ᠳ᠋ᠦ᠍ᠷ ᠲᠡᠭᠦᠨ ᠤ ᠭᠥᠭᠦᠯᠳᠦ ᠡᠷᠭᠦᠯᠳᠦ ᠡᠮᠡᠭᠡᠨ ᠯᠠᠪ ᠲᠡᠷᠡ ᠥᠬᠢᠨ ᠢ᠋ ᠴᠢᠯᠠᠭᠤᠨ ᠳ᠋ᠤᠷ ᠠᠯᠳᠠᠵᠤ ᠡᠮᠲᠡᠯᠦᠭᠡᠳ ᠬᠤᠳᠠᠯ ᠬᠡᠯᠡᠪᠡ ᠭᠡᠮᠡᠨ ᠠᠭᠤᠷᠯᠠᠨ ᠵᠠᠨᠴᠢᠵᠤ ᠬᠠᠷᠢᠶᠠᠨ ᠵᠣᠭᠰᠣᠬᠤ ᠦᠭᠡᠢ ᠳ᠋ᠦ᠍ᠷ᠂ ᠲᠡᠷᠡ ᠥᠬᠢᠨ ᠡᠭᠡᠨᠡᠭᠲᠡ ᠭᠠᠯ ᠳ᠋ᠤᠷ ᠤᠯᠠᠢᠯᠭᠠᠭᠠᠳ ᠡᠲᠡᠵᠦ ᠭᠠᠷᠭᠠᠬᠤᠶᠠ ᠬᠡᠯᠲᠡᠷᠡᠪᠡ ᠭᠡᠮᠡᠨ ᠴᠢᠷᠮᠠᠢᠨ ᠥᠴᠢᠵᠦ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ ᠲᠤᠯᠠ ᠨᠠᠰᠤᠲᠠᠢ
ᠡᠮᠡᠭᠡᠨ ᠪᠢᠴᠢᠬᠠᠨ ᠥᠬᠢᠨ ᠴᠠᠷᠭᠢᠯᠳᠤᠨ ᠵᠣᠭᠰᠣᠬᠤ ᠦᠭᠡᠶᠡ ᠂ ᠭᠣᠣᠯ ᠤ᠋ᠨ ᠰᠠᠷᠠᠨ ᠭᠦᠩᠵᠦ ᠬᠠᠵᠠᠭᠤ ᠳ᠋ᠤᠷ ᠪᠠᠢᠵᠤ ᠬᠠᠷᠠᠭᠰᠠᠭᠠᠷ ᠬᠠᠭᠰᠢᠷᠠᠵᠤ ᠲᠡᠷᠡ ᠬᠡᠯᠲᠡᠷᠡᠭᠰᠡᠨ ᠢ᠋ ᠬᠢᠨᠠᠨ ᠦᠵᠡᠭᠡᠳ ᠡᠮᠡᠭᠡᠨ ᠤ ᠵᠦᠭ ᠥᠭᠦᠯᠡᠷᠦᠨ : 《 ᠴᠢ ᠲᠡᠷᠡ ᠥᠬᠢᠨ ᠢ᠋ ᠪᠢᠲᠡᠭᠡᠢ ᠵᠠᠨᠴᠢ ᠂ ᠡᠨᠡ ᠬᠦᠬᠦᠷ ᠤᠨ ᠭᠠᠯ ᠳ᠋ᠤᠷ ᠡᠪᠳᠡᠷᠡᠭᠰᠡᠨ ᠢᠨᠤ ᠦᠨᠡᠨ ᠪᠣᠯᠠᠢ᠃ 》 ᠬᠡᠮᠡᠪᠡᠴᠦ ᠲᠡᠷᠡ ᠡᠷᠭᠦᠯᠳᠦ ᠡᠮᠡᠭᠡᠨ ᠨᠡᠩ ᠠᠭᠤᠷᠯᠠᠵᠤ ᠄ 《 ᠲᠡᠢᠮᠦ ᠵᠤᠵᠠᠭᠠᠨ ᠲᠡᠮᠦᠷ ᠭᠠᠯ ᠳ᠋ᠤᠷ ᠤᠯᠠᠢᠮᠠᠭᠴᠠ ᠡᠪᠳᠡᠷᠡᠬᠦ ᠶᠣᠰᠣ ᠪᠣᠢ ᠤᠤ ？ ᠠᠪᠠᠬᠠᠢ ᠪᠠᠰᠠ ᠦᠶᠡ ᠶ᠋ᠢᠨ ᠥᠬᠢᠨ ᠢᠶᠠᠨ ᠥᠮᠥᠭᠡᠷᠡᠮᠦᠢ ᠂ ᠮᠢᠨᠦ ᠵᠠᠨᠴᠢᠭᠰᠠᠨ ᠠᠨᠤ ᠪᠤᠷᠤᠭᠤ ᠤᠤ ? 》ᠭᠡᠮᠡᠨ ᠪᠠᠪᠠᠨᠠᠲᠤᠬᠤᠢ ᠳ᠋ᠤᠷ ᠭᠣᠣᠯ ᠤ᠋ᠨ ᠰᠠᠷᠠᠨ ᠭᠦᠩᠵᠦ ᠪᠠᠬᠠᠨ ᠢᠨᠢᠶᠡᠵᠦ ᠄ 《 ᠡᠨᠡ ᠶᠠᠮᠪᠠᠷ ᠪᠡᠷᠬᠡ ᠭᠠᠵᠠᠷ ᠪᠣᠢ ᠂ ᠦᠨᠡᠨ ᠬᠤᠳᠠᠯ ᠢ᠋ ᠵᠣᠭᠰᠣᠭᠠ ᠪᠠᠷ ᠣᠯᠵᠤ ᠪᠣᠯᠬᠤ ᠪᠣᠯᠠᠢ! 》 ᠬᠡᠮᠡᠵᠦ ᠳᠠᠷᠤᠢ ᠲᠡᠷᠡ ᠥᠬᠢᠨ ᠢᠶᠠᠷ ᠲᠡᠷᠡ ᠬᠡᠯᠲᠡᠷᠬᠡᠢ ᠬᠦᠬᠦᠷ ᠢ᠋ ᠤᠭ ᠶᠣᠰᠣᠭᠠᠷ ᠭᠠᠯ ᠤ᠋ᠨ ᠳᠡᠭᠡᠷᠡ ᠲᠠᠯᠪᠢᠭᠤᠯᠵᠤ ᠤᠪ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠂ ᠭᠣᠣᠯ ᠤ᠋ᠨ ᠰᠠᠷᠠᠨ ᠭᠦᠩᠵᠦ ᠳᠠᠷᠤᠢ ᠲᠡᠷᠡ ᠥᠬᠢᠨ ᠦ᠌ ᠮᠣᠳᠣ ᠶ᠋ᠢ ᠠᠴᠢᠷᠠᠭᠤᠯᠤᠨ ᠲᠡᠷᠡ ᠡᠮᠡᠭᠡᠨ ᠳ᠋ᠤᠷ ᠥᠭᠴᠦ ᠬᠦᠬᠦᠷ ᠢ᠋ ᠡᠲᠡᠵᠦ ᠭᠠᠷᠭᠠᠲᠤᠭᠠᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠷᠡ ᠡᠮᠡᠭᠡᠨ ᠠᠭᠤᠷᠯᠠᠨ᠄《 ᠲᠡᠮᠦᠷ ᠬᠦᠬᠦᠷ ᠤᠯᠠᠢᠵᠤ ᠬᠡᠯᠲᠡᠷᠡᠬᠦ ᠶᠣᠰᠣ ᠪᠣᠢ ᠤᠤ ? 》ᠭᠡᠮᠡᠨ ᠬᠡᠮᠡᠭᠰᠡᠭᠡᠷ ᠳᠤᠭᠲᠤᠷᠤᠨ ᠡᠴᠢᠵᠦ ᠳᠠᠷᠤᠢ ᠮᠣᠳᠣ ᠪᠠᠷ ᠰᠢᠷᠡᠮᠦᠨ ᠬᠦᠬᠦᠷ ᠤᠨ ᠰᠠᠨᠵᠢᠨ ᠠ᠋ᠴᠠ ᠨᠢᠭᠡᠨᠲᠡ ᠡᠲᠡᠭᠰᠡᠨ ᠳ᠋ᠦ᠍ᠷ ᠬᠦᠴᠦᠨ ᠶᠡᠬᠡᠳᠡᠭᠰᠡᠨ ᠢᠶᠠᠷ ᠰᠢᠷᠮᠠᠳ ᠬᠦᠬᠦᠷ ᠤᠨ ᠰᠠᠨᠵᠢ ᠢᠨᠤ ᠮᠤᠯᠲᠤ ᠡᠴᠢᠵᠦ᠂ ᠲᠠᠪᠤ ᠵᠢᠷᠭᠤᠭᠠᠨ ᠠᠯᠬᠤᠮ ᠬᠣᠯᠠ ᠦᠰᠦᠷᠦᠨ ᠡᠴᠢᠭᠰᠡᠨᠡ᠂ ᠲᠡᠷᠡ ᠡᠮᠡᠭᠡᠨ ᠶᠡᠬᠡᠯᠡ ᠢᠴᠢᠩᠭᠦᠷᠡᠨ ᠪᠠᠰᠠ ᠮᠣᠳᠣ ᠪᠠᠨ ᠡᠷᠭᠢᠭᠦᠯᠵᠦ ᠬᠦᠬᠦᠷ ᠤᠨ ᠠᠮᠠᠰᠠᠷ ᠲᠤ᠌ ᠬᠢᠵᠦ ᠨᠢᠭᠡᠨᠲᠡ ᠡᠲᠡᠪᠡᠰᠦ ᠨᠢᠭᠡᠨᠲᠡ ᠰᠡᠳᠡ ᠡᠴᠢᠭᠡᠳ ᠬᠣᠶᠠᠷᠲᠠ ᠡᠲᠡᠪᠡᠰᠦ ᠬᠣᠶᠠᠷᠲᠠ ᠰᠡᠲᠡᠷᠡᠭᠡᠳ ᠶᠠᠭᠤᠨᠠᠢ ᠭᠠᠷᠭᠠᠵᠤ ᠪᠣᠯᠬᠤ ᠪᠣᠢ! 》 ᠡᠭᠦᠨ ᠳ᠋ᠦ᠍ᠷ ᠲᠡᠷᠡ ᠡᠮᠡᠭᠡᠨ ᠨᠡᠩ ᠶᠡᠬᠡᠯᠡ ᠢᠴᠢᠩᠭᠦᠷᠡᠨ ᠤᠨᠲᠤᠭᠤᠴᠠᠵᠤ ᠳᠠᠪᠬᠤᠷ ᠳᠠᠪᠬᠤᠷ ᠡᠳᠡᠨ ᠴᠢᠴᠢᠭᠰᠡᠭᠡᠷ ᠲᠦᠭᠦᠬᠡᠢ ᠰᠢᠷᠠᠮᠤ ᠶ᠋ᠢᠨ ᠬᠦᠬᠦᠷ ᠭᠠᠯ ᠤ᠋ᠨ ᠬᠢᠰᠠ ᠳᠣᠲᠣᠷᠠ ᠨᠢᠭᠡᠨᠲᠡ ᠬᠡᠰᠡᠭ ᠬᠡᠰᠡᠭ ᠪᠣᠯᠵᠤ ᠤᠶᠠᠷᠠᠨ ᠵᠢᠮᠡᠷᠡᠵᠦ ᠡᠴᠢᠭᠡᠳ ᠭᠠᠯ ᠪᠠ ᠬᠦᠬᠦᠷ ᠬᠣᠶᠠᠭᠤᠯᠠ ᠨᠢᠭᠡᠨᠲᠡ ᠢᠯᠭᠠᠭᠨᠲᠠᠨ ᠲᠠᠨᠢᠭᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠰᠠᠷᠠᠨ ᠭᠦᠩᠵᠦ ᠬᠡᠴᠢᠨᠡᠨ ᠢᠨᠢᠶᠡᠭᠰᠡᠭᠡᠷ ᠡᠯᠢᠭᠡ ᠬᠥᠰᠢᠵᠦ ᠦᠬᠢᠳ ᠤ᠋ᠨ ᠡᠪᠦᠷ ᠳᠡᠭᠡᠷᠡ ᠰᠠᠭᠤᠵᠤ ᠢᠨᠢᠶᠡᠬᠦᠢ ᠳ᠋ᠤᠷ ᠲᠡᠷᠡ ᠡᠮᠡᠭᠡᠨ ᠲᠡᠷᠡ ᠬᠦᠬᠦᠷ ᠢ ᠴᠢᠴᠢᠵᠦ ᠭᠣᠪᠢᠭᠰᠠᠭᠠᠷ ᠨᠢᠭᠡᠨᠲᠡ ᠬᠡᠰᠡᠭ ᠬᠡᠰᠡᠭ ᠵᠡᠮᠳᠡᠭ ᠪᠣᠯᠭᠠᠨ ᠬᠡᠮᠬᠡᠯᠦᠨ ᠲᠤᠩ ᠠᠷᠭᠠ ᠦᠭᠡᠢ ᠪᠣᠯᠤᠭᠠᠳ ᠶᠡᠬᠡᠯᠡ ᠴᠢᠬᠤᠯᠳᠠᠨ ᠢᠴᠢᠩᠭᠦᠷᠡᠵᠦ ᠭᠠᠯ ᠲᠠᠢ ᠮᠣᠳᠣ ᠪᠠᠨ ᠲᠣᠰᠬᠢᠲᠡᠯᠡ ᠭᠠᠵᠠᠷ ᠲᠤᠷ ᠲᠠᠶᠠᠭᠳᠠᠭᠠᠳ ᠳᠠᠷᠤᠢ ᠪᠤᠷᠤᠭᠤ ᠬᠠᠨᠳᠤᠨ ᠪᠠᠷᠤᠢᠵᠤ ᠡᠴᠢᠭᠰᠡᠨᠡ ᠭᠣᠣᠯ ᠤ᠋ᠨ ᠰᠠᠷᠠᠨ ᠨᠡᠩ ᠳᠠᠰᠤᠨ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ᠂ ᠥᠬᠢᠳ ᠤᠨ ᠪᠡᠶᠡ ᠳᠡᠭᠡᠷᠡ ᠤᠷᠪᠠᠨ ᠬᠥᠷᠪᠡᠨ ᠥᠩᠬᠥᠷᠢᠨ ᠢᠨᠢᠶᠡᠬᠦᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠭᠡᠨᠡᠳᠲᠡ ᠬᠠᠭᠠᠨ ᠡᠴᠢᠭᠡ ᠢᠨᠤ ᠳᠠᠭᠤᠳᠠᠬᠤᠢ ᠳ᠋ᠤᠷ ᠣᠷᠳᠣᠨ ᠤ᠋ ᠡᠷᠡᠮᠳᠡᠭ ᠤᠳ ᠲᠡᠪᠡᠷᠢᠨ ᠠᠪᠠᠴᠢᠲᠠᠯᠠ ᠪᠠᠰᠠ ᠬᠦ᠌ ᠢᠨᠢᠶᠡᠨ ᠵᠣᠭᠰᠣᠬᠤ ᠦᠭᠡᠢ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠤᠴᠢᠷ ᠢ ᠠᠰᠠᠭᠤᠵᠤ ᠮᠡᠳᠡᠭᠡᠳ ᠬᠡᠦᠬᠡᠨ ᠡᠴᠡ ᠪᠡᠨ ᠴᠢ ᠲᠡᠭᠦᠨ ᠤ ᠤᠴᠢᠷ ᠢ᠋ ᠬᠡᠷᠬᠢᠨ ᠣᠯᠵᠤ ᠮᠡᠳᠡᠪᠡ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠭᠣᠣᠯ ᠤ᠋ᠨ ᠰᠠᠷᠠᠨ ᠭᠦᠩᠵᠦ ᠢᠨᠢᠶᠡᠨ ᠮᠡᠳᠡᠭᠦᠯᠦᠷᠦᠨ᠄《 ᠬᠡᠦᠬᠡᠨ ᠪᠢ ᠲᠡᠷᠡ ᠬᠡᠯᠲᠡᠷᠡᠭᠰᠡᠨ ᠬᠡᠯᠲᠡᠷᠬᠡᠢ ᠶ᠋ᠢᠨ ᠢᠷ ᠢ᠋ ᠦᠵᠡᠪᠡᠰᠦ ᠣᠭᠲᠣ ᠡᠷᠡᠰᠬᠡᠨ ᠬᠡᠯᠲᠡᠷᠡᠭᠰᠡᠨ ᠬᠤᠷᠴᠠ ᠢᠷ ᠪᠤᠰᠤ ᠪᠥᠭᠡᠳ ᠬᠡᠯᠲᠡᠷᠬᠡᠢ ᠢᠨᠤ ᠡᠮᠰᠡᠢᠵᠦ ᠬᠠᠮᠰᠢᠢᠭᠠᠳ ᠬᠠᠭᠠᠷᠠᠬᠠᠢ ᠭᠠᠵᠠᠷ ᠲᠤᠷ ᠢᠶᠠᠨ ᠵᠣᠬᠢᠷᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠢᠶᠠᠷ ᠯᠠᠪ ᠭᠠᠯ ᠳ᠋ᠤᠷ ᠬᠠᠢᠯᠵᠤ ᠡᠪᠳᠡᠷᠡᠭᠰᠡᠨ ᠢ᠋ ᠣᠯᠵᠤ ᠮᠡᠳᠡᠪᠡ ᠃ ᠬᠡᠷᠪᠡ ᠴᠢᠯᠠᠭᠤᠨ ᠳ᠋ᠤᠷ ᠲᠣᠰᠴᠤ ᠬᠠᠭᠠᠷᠠᠭᠰᠠᠨ ᠪᠥᠭᠡᠰᠦ ᠡᠷᠬᠡᠪᠰᠢ ᠬᠤᠷᠴᠠ ᠢᠷ ᠪᠠᠢᠵᠤ ᠱᠠᠵᠠᠩ ᠰᠠᠪᠠ ᠬᠠᠭᠠᠷᠠᠭᠰᠠᠨ ᠮᠡᠲᠦ ᠬᠡᠯᠲᠡᠷᠬᠡᠢ ᠶ᠋ᠢ ᠨᠡᠢᠯᠡᠭᠦᠯᠪᠡᠰᠦ ᠯᠠᠪ ᠨᠢᠭᠡᠨ ᠠᠳᠠᠯᠢ ᠪᠣᠯᠬᠤ ᠦᠭᠡᠢ ᠦᠦ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠨᠠᠢ᠌ᠮᠠᠬᠠᠨ ᠨᠠᠰᠤ ᠲᠠᠢ ᠪᠥᠭᠡᠳ ᠡᠨᠡ ᠮᠡᠲᠦ ᠨᠠᠷᠢᠨ ᠬᠢᠨᠠᠮᠠᠭᠠᠢ ᠳ᠋ᠤᠷ ᠨᠡᠩ ᠢᠯᠡᠭᠦᠦ ᠠᠮᠠᠷᠠᠭ ᠪᠣᠯᠵᠤ ᠂ ᠴᠠᠭ ᠮᠥᠴᠡ ᠴᠦ᠍ ᠪᠡᠶᠡ ᠡᠴᠡ ᠪᠡᠨ ᠰᠠᠯᠭᠠᠬᠤ ᠦᠭᠡᠢ ᠠᠮᠠᠨ ᠳ᠋ᠤᠷ ᠢᠶᠠᠨ ᠡᠮᠬᠦᠪᠡᠰᠦ ᠬᠠᠢᠯᠤᠭᠤᠵᠠᠢ᠂ ᠠᠯᠠᠭᠠ ᠳ᠋ᠠᠭᠠᠨ ᠲᠠᠯᠪᠢᠪᠠᠰᠤ ᠥᠩᠬᠥᠷᠢᠭᠦᠵᠡᠢ ᠭᠡᠮᠡᠨ ᠬᠡᠳᠦᠢ ᠭᠠᠳᠠᠭᠰᠢ ᠭᠠᠷᠪᠠᠴᠤ ᠠᠪᠴᠤ ᠶᠠᠪᠤᠳᠠᠭ ᠠᠵᠤᠭᠤ᠃ ᠪᠠᠰᠠ ᠨᠢᠭᠡᠨ ᠤᠳᠠᠭᠠ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠨ ᠳ᠋ᠤᠷ ᠢᠶᠠᠨ ᠡᠴᠢᠭᠡ ᠬᠠᠭᠠᠨ ᠢᠶᠠᠨ ᠳᠠᠭᠠᠵᠤ᠂ ᠮᠢᠩᠭᠠᠨ ᠠᠪᠠ ᠪᠠᠷ ᠤᠯᠤᠰ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠢᠷᠭᠡᠨ ᠢᠶᠠᠨ ᠴᠠᠭᠳᠠᠨ ᠶᠠᠪᠤᠬᠤᠢ ᠳ᠋ᠤᠷ ᠨᠢᠭᠡᠨ ᠶᠡᠬᠡ ᠠᠢᠯ ᠳ᠋ᠤᠷ ᠪᠠᠭᠤᠳᠠᠯᠯᠠᠭᠰᠠᠨᠠ ᠭᠡᠨᠡᠳᠲᠡ ᠨᠢᠭᠡᠨ ᠡᠮᠡᠭᠡᠨ ᠵᠠᠮ ᠲᠣᠰᠴᠤ ᠤᠬᠢᠯᠠᠨ ᠪᠠᠷᠬᠢᠷᠠᠵᠤ᠄ 《ᠪᠡᠷᠢ ᠮᠢᠨᠦ᠂ ᠮᠢᠨᠦ ᠭᠠᠭᠴᠠ ᠬᠥᠪᠡᠭᠦᠨ ᠢ᠋ ᠬᠣᠣᠷᠠᠳᠠᠭᠠᠨ ᠠᠯᠠᠪᠠ !》ᠭᠡᠮᠡᠨ ᠵᠠᠭᠠᠯᠳᠤᠪᠠ ᠃ ᠲᠡᠳᠦᠢ ᠪᠠᠭᠤᠳᠠᠯ ᠳ᠋ᠤᠷ ᠢᠷᠡᠵᠦ ᠲᠦᠰᠢᠮᠡᠯ ᠳ᠋ᠦ᠍ᠷ ᠢᠶᠠᠨ ᠲᠤᠰᠢᠶᠠᠨ ᠰᠢᠳᠬᠡᠨ ᠠᠰᠠᠭᠤᠯᠭᠠᠪᠠᠰᠤ ᠬᠡᠳᠦ ᠬᠡᠳᠦᠨ ᠡᠳᠦᠷ ᠠᠰᠠᠭᠤᠭᠠᠳ ᠰᠢᠭᠦᠨ ᠲᠣᠳᠣᠷᠬᠠᠢᠯᠠᠨ ᠴᠢᠳᠠᠬᠤ ᠦᠭᠡᠢ ᠳ᠋ᠦ᠍ᠷ ᠲᠡᠷᠡ ᠡᠮᠡᠭᠡᠨ ᠪᠠᠰᠠ ᠵᠠᠮ ᠲᠣᠰᠴᠤ ᠪᠠᠷᠬᠢᠷᠠᠨ ᠣᠬᠢᠯᠠᠭᠰᠠᠨᠠ ᠴᠠᠭᠠᠨ ᠬᠠᠭᠠᠨ ᠶᠡᠬᠡᠯᠡ ᠰᠡᠵᠢᠭᠯᠡᠵᠦ ᠪᠡᠶᠡ ᠪᠡᠷ ᠰᠢᠭᠦᠨ ᠠᠰᠠᠭᠤᠪᠠᠰᠤ ᠡᠮᠡᠭᠡᠨ ᠥᠴᠢᠷᠦᠨ ᠄ 《 ᠮᠢᠨᠦ ᠭᠠᠭᠴᠠ ᠬᠥᠪᠡᠭᠦᠨ ᠡᠨᠡ ᠪᠠᠷᠢ ᠶ᠋ᠢ ᠡᠨᠡ ᠡᠳᠦᠷ ᠢᠨᠤ ᠠᠪᠤᠮᠠᠭᠴᠠ ᠮᠠᠷᠭᠠᠲᠠ ᠴᠡᠷᠢᠭ ᠤᠨ ᠠᠯᠪᠠᠨᠠ ᠭᠠᠷᠤᠭᠠᠳ ᠴᠢᠨᠠᠳᠤ ᠡᠲᠡᠭᠡᠳ ᠤᠨ ᠳᠠᠢᠰᠤᠨᠠ ᠪᠠᠷᠢᠭᠳᠠᠵᠤ ᠭᠤᠷᠪᠠᠨ ᠵᠢᠯ ᠪᠣᠯᠵᠤ᠂ ᠤᠷᠵᠢᠳᠤᠷ ᠭᠡᠨᠡᠳᠲᠡ ᠤᠷᠭᠤᠨ ᠬᠠᠷᠢᠵᠤ ᠢᠷᠡᠬᠦᠶᠡ ᠪᠢ ᠭᠡᠷ ᠲᠦ᠍ ᠪᠠᠢᠭᠰᠠᠨ ᠦᠭᠡᠢ ᠂ ᠲᠡᠭᠦᠨ ᠤ ᠢᠷᠡᠭᠰᠡᠨ ᠡᠳᠦᠷ ᠲᠣᠷ ᠪᠡᠷᠢ ᠳᠠᠷᠤᠢ ᠮᠢᠨᠦ ᠬᠥᠪᠡᠭᠦᠨ ᠳ᠋ᠦ᠍ᠷ ᠬᠣᠣᠷᠠ ᠥᠭᠴᠦ ᠶᠢᠰᠦᠨ ᠰᠦᠪᠡ ᠡᠴᠡ ᠴᠢᠰᠤ ᠭᠠᠷᠴᠤ ᠦᠬᠦᠵᠦᠬᠦᠢ᠃ ᠲᠡᠢᠨ ᠬᠦ᠌ ᠬᠣᠣᠷᠠᠳᠠᠭᠰᠠᠨ ᠢ᠋ ᠣᠯᠵᠤ ᠮᠡᠳᠡᠪᠡ 》 ᠬᠡᠮᠡᠮᠦᠢ᠃ ᠪᠡᠷᠢ ᠡᠴᠡ ᠠᠰᠠᠭᠤᠪᠠᠰᠤ᠄《ᠮᠢᠨᠦ ᠡᠷᠡ ᠭᠡᠨᠡᠳᠲᠡ ᠬᠠᠷᠢᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠢ ᠪᠠᠶᠠᠷᠯᠠᠵᠤ᠂ ᠰᠢᠨᠡ ᠴᠠᠢ ᠪᠤᠴᠠᠯᠭᠠᠵᠤ ᠵᠠᠪᠳᠤᠬᠤ ᠦᠭᠡᠢ ᠂ ᠴᠠᠭ ᠪᠠᠰᠠ ᠬᠠᠯᠠᠭᠤᠨ ᠲᠤᠯᠠ ᠶᠠᠭᠠᠷᠠᠨ ᠰᠦᠨ ᠲᠠᠷᠠᠭ ᠨᠢᠭᠡᠨ ᠠᠶᠠᠭᠠ ᠠᠴᠢᠷᠠᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ᠷ ᠡᠷᠡ ᠮᠢᠨᠦ ᠤᠮᠳᠠᠭᠠᠰᠴᠤ ᠳᠠᠷᠤᠢ ᠤᠤᠭᠤᠪᠠ᠃ ᠡᠬᠡᠨᠡᠷ ᠪᠢ ᠨᠢᠭᠡᠨᠲᠡᠭᠡᠭᠦᠷ ᠬᠠᠳᠠᠮ ᠡᠬᠡ ᠳ᠋ᠦ᠍ᠷ ᠬᠡᠯᠡᠵᠦ ᠢᠯᠡᠭᠡᠭᠡᠳ ᠨᠢᠭᠡᠨᠲᠡᠭᠡᠭᠦᠷ ᠨᠠᠷᠢ ᠢᠳᠡᠰᠢ ᠪᠡᠯᠡᠳᠬᠡᠬᠦᠶᠡ᠂ ᠡᠷᠡ ᠮᠢᠨᠦ ᠭᠡᠨᠡᠳᠲᠡ ᠦᠨᠡᠨ ᠬᠡᠪᠲᠡᠵᠦ ᠶᠢᠰᠦᠨ ᠰᠦᠪᠡ ᠡᠴᠡ ᠴᠢᠰᠤᠨ ᠭᠠᠷᠴᠤ ᠦᠬᠦᠪᠡ 》 ᠬᠡᠮᠡᠮᠦᠢ ᠃ ᠡᠭᠦᠨ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠲᠡᠷᠡ ᠡᠮᠡᠭᠡᠨ ᠡᠴᠡ ᠠᠰᠠᠭᠤᠷᠤᠨ᠄《 ᠴᠢᠨᠦ ᠡᠨᠡ ᠪᠡᠷᠢ ᠶᠡᠷᠦ ᠶ᠋ᠢᠨ ᠡᠳᠦᠷ ᠴᠢᠮᠠᠶᠢ ᠰᠤᠪᠢᠯᠠᠬᠤ ᠠᠨᠤ ᠶᠠᠮᠪᠠᠷ ? ᠠᠢᠯ ᠠᠢᠮᠠᠭ ᠤ᠋ᠨ ᠶᠠᠮᠪᠠᠷ ᠬᠥᠮᠦᠨ ᠯᠦ᠋ᠭᠡ ᠬᠥᠯ ᠨᠡᠢᠯᠡᠵᠦ ᠶᠠᠪᠤᠳᠠᠭ ᠢ᠋ ᠴᠢ ᠮᠡᠳᠡᠭᠰᠡᠨ ᠭᠠᠵᠠᠷ ᠪᠣᠢ ᠤᠤ ? ᠦᠭᠡᠢ ᠦᠦ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠷᠡ ᠡᠮᠡᠭᠡᠨ ᠤᠬᠢᠯᠠᠨ ᠠᠢᠯᠠᠳᠬᠠᠷᠤᠨ᠄ ᠮᠢᠨᠦ ᠪᠡᠷᠢ ᠬᠡᠳᠦᠢ ᠮᠢᠨᠦ ᠬᠥᠪᠡᠭᠦᠨ ᠯᠦ᠋ᠭᠡ ᠨᠢᠭᠡᠬᠡᠨ ᠰᠥᠨᠢ ᠶ᠋ᠢᠨ ᠡᠷᠡ ᠡᠮᠡ ᠪᠣᠯᠪᠠᠴᠤ ᠮᠢᠨᠦ ᠬᠥᠪᠡᠭᠦᠨ ᠴᠡᠷᠢᠭ ᠲᠦ᠍ᠷ ᠮᠣᠷᠳᠠᠨ ᠳᠠᠢᠰᠤᠨ ᠳ᠋ᠤᠷ ᠪᠠᠷᠢᠭᠳᠠᠵᠤ ᠭᠤᠷᠪᠠᠨ ᠵᠢᠯ ᠪᠣᠯᠲᠠᠯᠠ ᠨᠠᠳᠠ ᠳ᠋ᠤᠷ ᠨᠢᠭᠡᠬᠡᠨ ᠤᠳᠠᠭᠠ ᠴᠤ᠌ ᠣᠰᠣᠯᠳᠠᠭᠰᠠᠨ ᠭᠠᠵᠠᠷ ᠦᠭᠡᠢ᠂ ᠬᠥᠭᠰᠢᠨ ᠨᠠᠳᠠ ᠳ᠋ᠤᠷ ᠥᠪᠡᠷᠡ ᠬᠥᠪᠡᠭᠦᠨ ᠥᠬᠢᠨ ᠦᠭᠡᠢ᠂ ᠦᠵᠡᠵᠦ ᠨᠠᠮᠠᠶᠢ ᠵᠠᠭᠤᠨ ᠵᠦᠢᠯ ᠢᠶᠠᠷ ᠵᠥᠭᠡᠪᠴᠢᠯᠡᠨ ᠰᠤᠪᠢᠯᠠᠬᠤ ᠠᠨᠤ ᠦᠨᠡᠬᠡᠷ ᠲᠥᠷᠥᠭᠰᠡᠨ ᠦᠷᠡ ᠡᠴᠡ ᠳᠡᠮᠡᠢ ᠥᠪᠡᠷᠡ ᠦᠭᠡᠢ ᠃ ᠨᠡᠩ ᠪᠠᠰᠠ ᠶᠡᠷᠦ ᠶ᠋ᠢᠨ ᠡᠳᠦᠷ ᠠᠢᠯ ᠠᠢᠮᠠᠭ ᠤ᠋ᠨ ᠵᠠᠯᠠᠭᠤ ᠡᠷᠡ ᠬᠥᠮᠦᠨ ᠤ ᠵᠦᠭ ᠦᠭᠡ ᠴᠦ᠍ ᠬᠡᠯᠡᠳᠡᠭ ᠦᠭᠡᠢ ᠂ ᠰᠠᠢᠨ ᠠᠷᠢᠭᠤᠨ ᠨᠤᠲᠠ ᠵᠣᠷᠢᠭ ᠲᠠᠢ ᠶ᠋ᠢ ᠠᠢᠮᠠᠭ ᠴᠤ᠌ ᠴᠥᠮ ᠮᠡᠳᠡᠮᠦᠢ᠃ ᠭᠠᠭᠴᠠ ᠶᠠᠭᠤᠨ ᠤ᠋ ᠤᠴᠢᠷ ᠬᠥᠪᠡᠭᠦᠨ ᠢ᠋ ᠮᠢᠨᠦ ᠬᠣᠣᠷᠠᠯᠠᠵᠤ ᠠᠯᠠᠭᠰᠠᠨ ᠢ᠋ ᠦᠯᠦ ᠮᠡᠳᠡᠮᠦᠢ? ᠬᠥᠭᠰᠢᠨ ᠮᠢᠨᠦ ᠡᠷᠡ ᠬᠡᠳᠦᠢᠨᠡᠢ ᠥᠩᠭᠡᠷᠡᠭᠡᠳ ᠭᠠᠭᠴᠠ ᠬᠥᠪᠡᠭᠦᠨ ᠪᠠᠰᠠ ᠡᠢᠨ ᠬᠦ᠌ ᠦᠬᠦᠭᠰᠡᠨ ᠳ᠋ᠦ᠍ᠷ ᠦᠨᠡᠨ ᠢᠶᠠᠷ ᠣᠷᠣᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠪᠠ 》 ᠬᠡᠮᠡᠮᠦᠢ᠃ ᠪᠡᠷᠢ ᠡᠴᠡ ᠠᠰᠠᠭᠤᠪᠠᠰᠤ ᠄ 《ᠬᠠᠳᠠᠮ ᠡᠬᠡ ᠶ᠋ᠢᠨ ᠦᠭᠡ ᠪᠦᠷᠢ ᠴᠥᠮ ᠦᠨᠡᠨ᠂ ᠳᠤᠷᠠᠲᠠᠶᠠ ᠡᠷᠡ ᠶ᠋ᠢᠨ ᠲᠥᠯᠥᠭᠡ ᠠᠮᠢ ᠲᠥᠯᠥᠵᠦ ᠶᠠᠯᠠ ᠬᠦᠯᠢᠶᠡᠨ ᠦᠬᠦᠬᠦ ᠶ᠋ᠢ ᠬᠦᠰᠡᠮᠦᠢ! 》ᠭᠡᠮᠡᠨ ᠤᠬᠢᠯᠠᠨ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠭᠠᠭᠴᠠ ᠬᠣᠣᠷᠠ ᠨᠠᠢᠷᠠᠭᠤᠯᠤᠭᠰᠠᠨ ᠤᠴᠢᠷ ᠢ᠋ ᠨᠡᠢᠴᠡᠭᠦᠯᠦᠨ ᠥᠴᠢᠵᠦ ᠴᠢᠳᠠᠬᠤ ᠦᠭᠡᠢ ᠂ ᠡᠭᠦᠨ ᠳ᠋ᠦ᠍ᠷ ᠬᠠᠭᠠᠨ ᠰᠠᠢᠳ ᠡᠨᠡ ᠬᠡᠷᠡᠭ ᠢ ᠦᠨᠡᠨ ᠮᠠᠭᠠᠳ ᠢ᠋ ᠣᠯᠤᠨ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠳᠠᠷᠤᠢ ᠲᠡᠷᠡ ᠪᠡᠷᠢ ᠶ᠋ᠢᠨ ᠳᠤᠷᠠᠲᠠᠶᠠ ᠶᠠᠯᠠ ᠬᠦᠯᠢᠶᠡᠭᠰᠡᠨ ᠶᠣᠰᠣᠭᠠᠷ ᠰᠢᠳᠬᠡᠨ ᠲᠠᠰᠤᠯᠵᠤ᠂ ᠲᠡᠷᠡ ᠣᠶᠤᠨ ᠰᠦᠶᠡ ᠨᠡᠷᠡᠲᠦ ᠪᠡᠷᠢ ᠳ᠋ᠦ᠍ᠷ ᠠᠯᠠᠬᠤ ᠶᠠᠯᠠ ᠲᠤᠯᠭᠠᠵᠤ ᠲᠦᠯᠬᠢᠨ ᠭᠠᠷᠭᠠᠭᠰᠠᠨ ᠳ᠋ᠤᠷ ᠡᠨᠡ ᠬᠢᠷᠢ ᠭᠣᠣᠯ ᠤ᠋ᠨ ᠰᠠᠷᠠᠨ ᠭᠦᠩᠵᠦ ᠬᠠᠭᠠᠨ ᠡᠴᠢᠭᠡ ᠶᠦ᠍ᠭᠡᠨ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠲᠤᠯᠠ ᠬᠠᠭᠠᠨ ᠡᠴᠢᠭᠡ ᠢᠨᠦ ᠲᠥᠷᠥ ᠡᠴᠡ ᠪᠠᠭᠤᠵᠤ ᠰᠠᠢᠳ ᠲᠦᠰᠢᠮᠡᠳ ᠢᠨᠦ ᠲᠠᠷᠬᠠᠭᠰᠠᠨ ᠬᠣᠢᠨᠠ ᠭᠣᠣᠯ ᠤ᠋ᠨ ᠰᠠᠷᠠᠨ ᠬᠥᠩᠵᠦ ᠡᠴᠢᠭᠡ ᠬᠠᠭᠠᠨ ᠳ᠋ᠤᠷ ᠢᠶᠠᠨ ᠥᠭᠦᠯᠡᠷᠦᠨ᠄《ᠡᠨᠡ ᠡᠳᠦᠷ ᠤᠨ ᠰᠢᠳᠬᠡᠭᠰᠡᠨ ᠬᠡᠷᠡᠭ ᠮᠠᠰᠢ ᠰᠡᠵᠢᠭᠯᠡᠯᠲᠡᠢ ᠂ ᠬᠡᠦᠬᠡᠨ ᠪᠢ ᠲᠡᠷᠡ ᠣᠶᠤᠨ ᠰᠦᠶᠡ ᠨᠡᠷᠡᠲᠦ ᠪᠡᠷᠢ ᠶ᠋ᠢ ᠦᠵᠡᠪᠡᠰᠦ ᠮᠠᠰᠢ ᠨᠢᠭᠡᠨ ᠰᠡᠴᠡᠨ ᠮᠡᠷᠭᠡᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠰᠠᠢᠨ ᠬᠥᠮᠦᠨ᠂ ᠬᠡᠷᠬᠢᠪᠡᠴᠦ ᠡᠷᠡ ᠪᠡᠨ ᠠᠯᠠᠬᠤ ᠬᠥᠮᠦᠨ ᠪᠤᠰᠤ᠂ ᠬᠡᠳᠦᠢ ᠲᠡᠷᠡ ᠳᠤᠷᠠᠲᠠᠶᠠ ᠦᠬᠦᠬᠦ ᠶᠠᠯᠠ ᠶ᠋ᠢ ᠬᠦᠯᠢᠶᠡᠪᠡᠴᠦ ᠲᠡᠭᠦᠨ ᠤ ᠳᠣᠲᠣᠷᠠ ᠤᠴᠢᠷ ᠪᠣᠢ ᠪᠣᠢ ᠶᠠ᠃ 》ᠴᠠᠭᠠᠨ ᠬᠠᠭᠠᠨ ᠥᠭᠦᠯᠡᠷᠦᠨ᠄《 ᠬᠡᠷᠡᠭ ᠤᠨ ᠦᠨᠡᠨ ᠮᠠᠭᠠᠳ ᠢ᠋ ᠬᠡᠷᠬᠢᠨ ᠣᠯᠪᠠᠰᠤ ᠰᠠᠢᠨ?》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠭᠣᠣᠯ ᠤ᠋ᠨ ᠰᠠᠷᠠᠨ ᠭᠦᠩᠵᠦ ᠥᠭᠦᠯᠡᠷᠦᠨ᠄《 ᠡᠨᠡ ᠬᠡᠷᠡᠭ ᠮᠠᠰᠢ ᠬᠢᠯᠪᠠᠷ᠂ ᠡᠴᠢᠭᠡ ᠬᠠᠭᠠᠨ ᠨᠢᠭᠡᠨ ᠰᠢᠳᠤᠷᠭᠤ ᠲᠦᠰᠢᠮᠡᠯ ᠢᠶᠠᠷ ᠲᠡᠳᠡᠨ ᠤ ᠡᠬᠡ ᠪᠡᠷᠢ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠠᠭᠤᠯᠤᠨ ᠠᠪᠠᠴᠢᠵᠤ᠂ ᠲᠡᠭᠦᠨ ᠤ ᠡᠷᠡ ᠳ᠋ᠦ᠍ᠷ ᠢᠶᠠᠨ ᠤᠤᠭᠤᠯᠭᠠᠭᠰᠠᠨ ᠲᠠᠷᠠᠭ ᠢ᠋ ᠬᠢᠭᠰᠡᠨ ᠰᠠᠪᠠ ᠲᠠᠢ ᠠᠨᠤ ᠠᠪᠴᠤ ᠢᠷᠡᠭᠦᠯ᠂ ᠯᠠᠪ ᠲᠠᠷᠠᠭ ᠪᠠ ᠬᠢᠭᠰᠡᠨ ᠰᠠᠪᠠ ᠳ᠋ᠤᠷ ᠠᠨᠤ ᠤᠴᠢᠷ ᠪᠣᠢ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠶᠡᠬᠡᠯᠡ ᠭᠠᠢᠬᠠᠨ ᠪᠡᠶᠡᠰᠴᠦ ᠳᠠᠬᠢᠨ ᠳᠣᠬᠢᠶᠠ ᠲᠠᠯᠪᠢᠵᠤ ᠣᠯᠠᠨ ᠰᠠᠢᠳ ᠤᠳ ᠢ᠋ ᠴᠤᠭᠯᠠᠭᠤᠯᠤᠨ᠂ ᠳᠠᠬᠢᠨ ᠭᠠᠷᠴᠤ ᠰᠧᠯᠡᠭᠡᠳ ① ᠰᠠᠷᠠᠨ ᠭᠦᠩᠵᠦ ᠪᠡᠨ ᠬᠠᠵᠠᠭᠤᠳᠠ ᠪᠠᠨ ᠵᠣᠭᠰᠣᠭᠠᠵᠤ᠂ ᠳᠠᠷᠤᠢ ᠰᠢᠳᠠᠷ ᠢᠲᠡᠭᠡᠯᠲᠡᠢ ᠬᠡᠳᠦᠨ ᠰᠠᠢᠳ ᠢ᠋ ᠢᠯᠡᠭᠡᠵᠦ᠂ ᠲᠡᠳᠡᠨ ᠤ ᠡᠬᠡ ᠪᠡᠷᠢ ᠬᠣᠶᠠᠷ ᠢ ᠠᠪᠴᠤ ᠡᠴᠢᠨ ᠲᠡᠷᠡ ᠲᠠᠷᠠᠭ ᠢ᠋ ᠬᠢᠭᠰᠡᠨ ᠴᠠᠷᠠ ᠲᠠᠢ ᠠᠨᠤ ᠠᠪᠴᠤ ᠢᠷᠡᠭᠦᠯᠬᠦᠢ ᠳ᠋ᠦ᠍ᠷ ᠴᠠᠷᠠ ᠲᠠᠢ ᠲᠠᠷᠠᠭ ᠢ᠋ ᠬᠢᠭᠰᠡᠨ ᠪᠣᠭᠣᠨᠢ ᠥᠭᠡᠭ ᠤᠨ ᠳᠣᠲᠣᠷᠠ᠂ ᠴᠠᠷᠠ ᠶ᠋ᠢᠨ ᠠᠷᠤ ᠳ᠋ᠤᠷ ᠨᠢᠭᠡᠨ ᠤᠯᠠᠭᠠᠨ ᠬᠦᠵᠦᠭᠦᠦ ᠨᠣᠭᠣᠭᠠᠨ ᠪᠡᠶᠡ ᠲᠡᠢ ᠪᠢᠴᠢᠬᠠᠨ ᠬᠣᠣᠷᠠᠲᠤ ᠮᠣᠭᠠᠢ ᠪᠦᠬᠦᠯᠢ ᠪᠡᠶᠡ ᠳᠡᠯᠪᠡᠷᠡᠲᠡᠯᠡ ᠬᠠᠪᠤᠳᠴᠤ ᠦᠬᠦᠵᠦᠬᠦᠢ᠃ ᠲᠡᠢᠨ ᠬᠦ᠌ ᠲᠠᠷᠠᠭ ᠪᠠ ᠮᠣᠭᠠᠢ ᠬᠣᠶᠠᠭᠤᠯᠠ ᠲᠠᠢ ᠠᠪᠴᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠯᠠᠪ ᠡᠨᠡ ᠮᠣᠭᠠᠢ ᠲᠠᠷᠠᠭ ᠲᠤᠷ ᠤᠨᠠᠵᠤ ᠲᠡᠭᠦᠨ ᠤ ᠬᠣᠣᠷᠠ ᠪᠠᠷ ᠬᠥᠮᠦᠨ ᠤᠤᠭᠤᠪᠠᠰᠤ ᠦᠬᠦᠮᠦᠢ ᠶᠠ᠂ ᠲᠡᠷᠡ ᠪᠡᠷᠢ ᠬᠢᠯᠢᠰ ᠭᠡᠵᠦ ᠶᠠᠯᠠ ᠶ᠋ᠢ ᠭᠡᠯᠳᠦᠷᠢᠭᠦᠯ ᠬᠡᠮᠡᠲᠡᠯᠡ ᠰᠠᠷᠠᠨ ᠭᠦᠩᠵᠦ ᠲᠦᠷ ᠵᠣᠭᠰᠣᠭᠠᠵᠤ ᠂ ᠲᠡᠳᠡᠨ ᠤ ᠭᠡᠷ ᠤᠨ ᠨᠢᠭᠡᠨ ᠨᠣᠬᠠᠢ ᠶ᠋ᠢ ᠠᠴᠢᠷᠠᠭᠤᠯᠵᠤ ᠡᠨᠡ ᠲᠠᠷᠠᠭ ᠢ᠋ ᠢᠳᠡᠭᠦᠯᠦᠭᠰᠡᠨᠡ ᠂ ᠲᠡᠷᠡ ᠨᠣᠬᠠᠢ ᠳᠣᠯᠢᠶᠠᠵᠤ ᠪᠠᠢᠭᠰᠠᠭᠠᠷ ᠳᠠᠷᠤᠢ ᠭᠠᠰᠠᠯᠤᠨ ᠤᠨᠠᠵᠤ ᠪᠠᠰᠠ ᠶᠢᠰᠦᠨ ᠰᠦᠪᠡ ᠡᠴᠡ ᠴᠢᠰᠤ ᠭᠠᠷᠴᠤ ᠦᠬᠦᠭᠰᠡᠨᠡ ᠂ ᠬᠠᠭᠠᠨ ᠰᠠᠢᠳ ᠪᠦᠭᠦᠳᠡᠭᠡᠷ ᠭᠠᠢᠬᠠᠯᠳᠤᠵᠤ ᠯᠠᠪ ᠮᠣᠭᠠᠢ ᠶ᠋ᠢᠨ ᠬᠣᠣᠷᠠ ᠬᠡᠮᠡᠬᠦᠢ ᠳ᠋ᠦ᠍ᠷ ᠰᠠᠷᠠᠨ ᠭᠦᠩᠵᠦ ᠪᠠᠰᠠ ᠮᠠᠭᠠᠳ ᠪᠣᠯᠭᠠᠬᠤ ᠦᠭᠡᠢ ᠪᠡᠷ ᠣᠯᠠᠨ ᠴᠡᠷᠢᠭ ᠪᠠ ᠠᠢᠯ ᠤ᠋ᠨ ᠠᠷᠠᠳ ᠲᠤᠷ ᠡᠨᠡ ᠮᠣᠭᠠᠢ ᠶ᠋ᠢ ᠦᠵᠡᠭᠦᠯᠵᠦ ᠂ ᠡᠭᠦᠨ ᠳ᠋ᠦ᠍ᠷ ᠠᠳᠠᠯᠢ ᠮᠣᠭᠠᠢ ᠶ᠋ᠢ ᠡᠷᠢᠨ ᠠᠴᠢᠷᠠᠪᠠᠰᠤ ᠨᠢᠭᠡᠨ ᠯᠠᠩ ᠮᠥᠩᠭᠥᠨ ᠤ ᠱᠠᠩ ᠥᠭᠭᠦᠮᠥᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠷᠡ ᠦᠶᠡ ᠬᠠᠷᠠᠬᠠᠨ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠦᠶᠡ ᠲᠤᠯᠠ ᠴᠡᠷᠢᠭ ᠤᠨ ᠠᠷᠠᠳ ᠤᠳᠠᠭᠰᠠᠨ ᠦᠭᠡᠢ ᠬᠡᠳᠦ ᠬᠡᠳᠦᠨ ᠮᠣᠭᠠᠢ ᠠᠪᠴᠤ ᠢᠷᠡᠭᠰᠡᠨ ᠳ᠋ᠦ᠍ ᠦᠵᠡᠪᠡᠰᠦ ᠠᠳᠠᠯᠢ ᠠᠨᠤ ᠮᠥᠨ ᠪᠣᠢ᠂ ᠥᠭᠡᠷᠡ ᠢᠨᠤ ᠮᠥᠨ ᠪᠣᠢ᠃ ᠲᠡᠳᠦᠢ ᠬᠠᠮᠲᠤ ᠪᠠᠷ ᠢ᠋ ᠥᠪᠡᠷᠡ ᠰᠠᠢᠬᠠᠨ ᠳᠠᠷᠬᠠᠭ ᠠᠴᠢᠷᠠᠭᠤᠯᠵᠤ ᠲᠡᠷᠡ ᠬᠡᠳᠦᠨ ᠮᠣᠭᠠᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠲᠡᠷᠡ ᠲᠠᠷᠠᠭ ᠤ᠋ᠨ ᠳᠣᠲᠣᠷᠠ ᠲᠥᠷᠥᠭᠦᠯᠵᠦ᠂ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠲᠡᠷᠡ ᠤᠯᠠᠭᠠᠨ ᠬᠦᠵᠦᠭᠦᠲᠦ ᠨᠣᠭᠣᠭᠠᠨ ᠪᠡᠶᠡᠲᠦ ᠮᠣᠭᠠᠢ ᠠᠨᠤ ᠤᠷᠪᠠᠨ ᠬᠦᠷᠪᠡᠵᠦ ᠭᠤᠷᠪᠠᠯᠵᠠᠭᠰᠠᠭᠠᠷ ᠬᠠᠷᠠᠵᠤ ᠪᠠᠢᠲᠠᠯᠠ ᠪᠦᠬᠦᠯᠢ ᠪᠡᠶᠡ ᠬᠠᠪᠤᠳᠴᠤ ᠦᠬᠦᠪᠡ ᠃ ᠪᠤᠰᠤ ᠬᠠᠷᠠ ᠴᠠᠭᠠᠨ ᠡᠷᠢᠶᠡᠨ ᠮᠣᠭᠠᠢ ᠠᠨᠤ ᠣᠭᠲᠣ ᠠᠯᠵᠢᠭᠰᠠᠨ ᠦᠭᠡᠢ᠃ ᠲᠡᠳᠦᠢ ᠲᠡᠷᠡ ᠲᠠᠷᠠᠭ ᠢ᠋ ᠠᠨᠤ ᠪᠤᠰᠤ ᠨᠣᠬᠠᠢ ᠳ᠋ᠤᠷ ᠢᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠤᠷᠢᠳᠤ ᠶ᠋ᠢᠨ ᠨᠣᠬᠠᠢ ᠯᠤᠭᠠ ᠠᠪ ᠠᠳᠠᠯᠢ ᠦᠬᠦᠭᠰᠡᠨ ᠳ᠋ᠦ᠍ᠷ᠂ ᠲᠡᠷᠡ ᠡᠮᠡᠭᠡᠨ ᠡᠬᠡᠨᠡᠷ ᠡᠳᠡᠭᠡᠷ ᠢ ᠦᠵᠡᠭᠡᠳ ᠦᠨᠡᠨ ᠤᠴᠢᠷ ᠢ᠋ ᠤᠬᠠᠵᠤ ᠮᠡᠳᠡᠭᠡᠳ ᠳᠠᠷᠤᠢ᠄《 ᠮᠢᠨᠤ ᠪᠡᠷᠢ ᠮᠠᠰᠢ ᠬᠢᠯᠢᠰ ᠲᠡᠭᠦᠨ ᠤ ᠶᠠᠯᠠ ᠶᠢ ᠭᠡᠯᠳᠦᠷᠢᠭᠦᠯ! 》 ᠭᠡᠮᠡᠨ ᠤᠬᠢᠯᠠᠨ ᠮᠥᠷᠭᠥᠵᠦ ᠭᠣᠶᠣᠬᠤᠢ ᠳ᠋ᠤᠷ ᠪᠡᠷᠢ ᠢᠨᠤ ᠪᠣᠯᠬᠤ ᠦᠭᠡᠢ᠄《 ᠪᠢ ᠬᠡᠳᠦᠢ ᠰᠠᠨᠠᠭᠠᠲᠠᠢ ᠬᠣᠣᠷᠠᠳᠠᠭᠠᠨ ᠠᠯᠠᠭᠰᠠᠨ ᠪᠤᠰᠤ ᠪᠣᠯᠪᠠᠴᠤ ᠡᠭᠡᠨᠡᠭᠲᠡ ᠮᠢᠨᠦ ᠭᠠᠷ ᠲᠤᠷ ᠡᠷᠡ ᠮᠢᠨᠦ ᠦᠬᠦᠪᠡ᠂ ᠵᠢᠴᠢ ᠳ᠋ᠦ᠍ᠷ ᠠᠷᠪᠠᠨ ᠳᠣᠯᠣᠭᠠᠲᠠᠢ ᠡᠷᠡ ᠳ᠋ᠦ᠍ᠷ ᠭᠠᠷᠴᠤ ᠨᠢᠭᠡᠨ ᠡᠳᠦᠷ ᠪᠣᠯᠣᠮᠠᠭᠴᠠ ᠡᠷᠡ ᠮᠢᠨᠦ ᠦᠬᠦᠯ ᠤᠨ ᠴᠡᠷᠢᠭ ᠲᠦ᠍ᠷ ᠡᠴᠢᠪᠡ ᠂ ᠭᠤᠷᠪᠠᠨ ᠵᠢᠯ ᠪᠣᠯᠵᠤ ᠡᠭᠡᠨ ᠢᠷᠡᠭᠡᠳ ᠨᠠᠳᠠ ᠳ᠋ᠤᠷ ᠤᠴᠠᠷᠠᠮᠠᠭᠴᠠ ᠪᠠᠰᠠ ᠬᠣᠣᠷᠠᠳᠠᠵᠤ ᠦᠬᠦᠪᠡ ᠂ ᠲᠡᠢᠨ ᠬᠦ᠌ ᠡᠬᠡᠨᠡᠷ ᠪᠢ ᠠᠮᠢᠳᠤᠷᠠᠬᠤ ᠶ᠋ᠢ ᠨᠢᠭᠡᠨᠲᠡ ᠰᠠᠨᠠᠬᠤ ᠦᠭᠡᠢ ᠪᠣᠯᠪᠠ ᠃ ᠬᠡᠷᠪᠡ ᠥᠪᠡᠷ ᠤᠨ ᠵᠣᠷᠢᠭ ᠢᠶᠠᠷ ᠦᠬᠦᠪᠡᠰᠦ ᠬᠠᠳᠠᠮ ᠡᠬᠡ ᠶ᠋ᠢ ᠰᠤᠪᠢᠯᠠᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠬᠤ ᠲᠤᠯᠠ ᠠᠴᠢᠯᠠᠯ ᠲᠠᠬᠢᠮᠳᠠᠭᠤ ᠦᠭᠡᠢ ᠪᠣᠯᠤᠮᠤᠢ᠂ ᠵᠠᠰᠠᠭ ᠤ᠋ᠨ ᠴᠠᠭᠠᠵᠠ ᠪᠠᠷ ᠦᠬᠦᠪᠡᠰᠦ ᠰᠠᠶ᠋ᠢ ᠬᠡᠯᠡᠯᠴᠡᠬᠦ ᠭᠠᠵᠠᠷ ᠦᠭᠡᠢ ᠪᠣᠯᠤᠮᠤᠢ᠃ ᠲᠡᠢᠨ ᠬᠦ᠌ ᠳᠤᠷᠠᠲᠠᠶᠠ ᠵᠠᠰᠠᠭ ᠤ᠋ᠨ ᠴᠠᠭᠠᠵᠠ ᠪᠠᠷ ᠦᠬᠦᠬᠦ ᠶ᠋ᠢ ᠬᠦᠰᠡᠮᠦᠢ ᠬᠡᠮᠡᠮᠦᠢ᠂ ᠬᠡᠳᠦᠢ ᠮᠢᠨᠦ ᠶᠠᠯᠠ ᠶ᠋ᠢ ᠬᠡᠯᠲᠦᠷᠢᠭᠦᠯᠪᠡᠴᠦ ᠪᠢ ᠮᠥᠨ ᠦᠬᠦᠬᠦ ᠪᠣᠢ ᠶᠠ᠂ ᠠᠮᠢᠳᠤᠷᠠᠨ ᠴᠢᠳᠠᠬᠤ ᠦᠭᠡᠢ!》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠡᠨᠡ ᠡᠬᠡᠨᠡᠷ ᠦᠨᠡᠨ ᠲᠠᠬᠢᠮᠳᠠᠭᠤ ᠪᠡᠷᠢ ᠭᠡᠮᠡᠨ ᠰᠠᠢᠰᠢᠶᠠᠵᠤ᠂ ᠲᠡᠭᠦᠨ ᠤ ᠲᠥᠷᠥᠯ ᠤᠨ ᠳᠣᠲᠣᠷᠠ ᠠ᠋ᠴᠠ ᠳᠤᠷᠠ ᠪᠠᠷ ᠨᠢᠭᠡᠨ ᠬᠥᠪᠡᠭᠦᠨ ᠢ᠋ ᠰᠣᠩᠭᠣᠨ ᠠᠪᠴᠤ ᠣᠶᠤᠨ ᠰᠦᠶᠡ ᠪᠡᠷᠢ ᠲᠡᠵᠢᠭᠡᠵᠦ ᠡᠷᠡ ᠶ᠋ᠢᠨ ᠲᠠᠬᠢᠯ ᠢ᠋ ᠵᠠᠯᠭᠠᠮᠵᠢᠯᠠᠭᠤᠯ ᠂ ᠤᠯᠤᠰ ᠤ᠋ᠨ ᠬᠥᠬᠢᠭᠦᠯᠬᠦ ᠱᠠᠩᠨᠠᠬᠤ ᠱᠠᠩ ᠠ᠋ᠴᠠ ᠵᠠᠭᠤᠨ ᠯᠠᠩ ᠮᠥᠩᠭᠥ ᠂ ᠬᠣᠷᠢᠨ ᠦᠬᠡᠷ ᠂ ᠠᠷᠪᠠᠨ ᠡᠷᠡ ᠶ᠋ᠢᠨ ᠲᠠᠷᠢᠶᠠ ᠲᠠᠢ ᠣᠶᠤᠨ ᠰᠦᠶᠡ ᠳ᠋ᠦ᠍ᠷ ᠱᠠᠩᠨᠠᠵᠤ ᠡᠬᠡ ᠪᠡᠨ ᠲᠡᠵᠢᠭᠡ᠂ ᠬᠡᠷᠪᠡ ᠵᠠᠬᠢᠶᠠ ᠠ᠋ᠴᠠ ᠵᠥᠷᠢᠴᠡᠵᠦ ᠦᠬᠦᠪᠡᠰᠦ ᠡᠳᠡᠭᠡᠷ ᠢ᠋ ᠴᠥᠮ ᠡᠭᠡᠭᠦᠯᠵᠦ ᠠᠪᠤᠮᠤᠢ ᠭᠡᠮᠡᠨ ᠵᠠᠬᠢᠵᠤ ᠪᠠᠭᠤᠯᠭᠠᠪᠠ᠃ ᠡᠨᠡ ᠬᠡᠷᠡᠭ ᠢ᠋ ᠰᠢᠳᠬᠡᠬᠦ ᠲᠤᠬᠠᠢ ᠳ᠋ᠤᠷ ᠭᠣᠣᠯ ᠤ᠋ᠨ ᠰᠠᠷᠠᠨ ᠭᠦᠩᠵᠦ ᠰᠠᠶ᠋ᠢ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤ ᠲᠠᠢ ᠠᠵᠤᠭᠤ᠃ ᠡᠨᠡ ᠨᠢᠭᠡᠨ ᠬᠡᠷᠡᠭ ᠡᠴᠡ ᠰᠠᠷᠠᠨ ᠬᠦᠩᠵᠦ ᠶ᠋ᠢ ᠤᠯᠤᠰ ᠤ᠋ᠨ ᠬᠣᠲᠠᠯᠠᠭᠠᠷ ᠶᠡᠬᠡᠯᠡ ᠭᠠᠢᠬᠠᠨ ᠪᠢᠰᠢᠷᠡᠵᠦ᠂ ᠮᠡᠷᠭᠡᠨ ᠨᠡᠷᠡ ᠶᠡᠬᠡᠯᠡ ᠠᠯᠳᠠᠷᠰᠢᠨ᠂ ᠴᠠᠭᠠᠨ ᠬᠠᠭᠠᠨ ᠤᠯᠤᠰ ᠤ᠋ᠨ ᠬᠡᠷᠡᠭ ᠢ᠋ ᠪᠣᠯᠪᠠᠴᠤ ᠡᠨᠡ ᠭᠦᠩᠵᠦ ᠯᠦ᠋ᠭᠡ ᠪᠡᠨ ᠵᠥᠪᠯᠡᠳᠡᠭ ᠠᠵᠤᠭᠤ᠃ ᠡᠳᠦᠭᠡ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤᠯᠠᠵᠤ ᠂ ᠥᠩᠭᠡ ᠡᠷᠳᠡᠮ ᠣᠷᠴᠢᠯᠠᠩ ᠳ᠋ᠤᠷ ᠬᠣᠣᠰ ᠦᠭᠡᠢ ᠪᠦᠷᠢᠳᠦᠭᠰᠡᠨ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠥᠪᠡᠷ ᠤᠨ ᠤᠯᠤᠰ ᠪᠠ ᠭᠠᠳᠠᠭᠠᠳᠤ ᠠᠢᠮᠠᠭ ᠤᠨ ᠡᠵᠡᠳ ᠡᠴᠡ ᠬᠦᠷᠭᠡᠨ ᠰᠣᠩᠭᠣᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠰᠠᠷᠠᠨ ᠭᠦᠩᠵᠦ ᠬᠠᠭᠠᠰ ᠨᠠᠭᠠᠳᠤᠮ᠂ ᠬᠠᠭᠠᠰ ᠡᠷᠬᠡᠯᠡᠵᠦ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ᠄ 《 ᠬᠡᠦᠬᠡᠨ ᠮᠢᠨᠦ ᠪᠡᠶᠡ ᠶ᠋ᠢᠨ ᠬᠡᠷᠡᠭ ᠢ᠋ ᠪᠢᠲᠡᠭᠡᠢ ᠶᠠᠭᠠᠷᠠ ᠂ ᠤᠴᠢᠷ ᠲᠣᠮᠣᠭᠠ ᠦᠭᠡᠢ ᠬᠥᠮᠦᠨ ᠳ᠋ᠦ᠍ᠷ ᠪᠦᠦ ᠠᠮᠠᠨ ᠠᠯᠳᠠᠭᠳᠠᠬᠤᠢ᠂ ᠬᠡᠦᠬᠡᠨ ᠪᠢ ᠬᠠᠰ ᠬᠠᠳᠠ ᠮᠡᠲᠦ ᠬᠠᠮᠤᠭ ᠢ᠋ ᠡᠵᠡᠯᠡᠭᠴᠢ ᠬᠠᠭᠠᠨ ᠬᠥᠮᠦᠨ ᠪᠤᠰᠤ ᠪᠣᠯᠪᠠᠰᠤ ᠡᠴᠢᠬᠦ ᠦᠭᠡᠢ ᠪᠣᠯᠠᠢ᠃ ᠮᠢᠨᠦ ᠮᠡᠳᠡᠭᠦᠯᠬᠦ ᠶ᠋ᠢ ᠬᠦᠯᠢᠶᠡ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠠᠭᠠᠨ ᠬᠠᠭᠠᠨ ᠬᠡᠦᠬᠡᠨ ᠳ᠋ᠡᠭᠡᠨ ᠬᠡᠲᠦᠷᠬᠡᠢ ᠠᠮᠠᠷᠠᠭ ᠲᠤᠯᠠ ᠳᠠᠷᠤᠢ ᠲᠡᠭᠦᠨ ᠦ ᠦᠭᠡ ᠶ᠋ᠢ ᠳᠠᠭᠠᠵᠤ ᠬᠦᠯᠢᠶᠡᠭᠰᠡᠨ ᠠᠵᠤᠭᠤ᠃ ᠡᠳᠦᠭᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠪᠡᠶᠡ ᠪᠡᠷ ᠠᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠠᠪᠴᠤ ᠶᠠᠯᠠ ᠠᠰᠠᠭᠤᠨ ᠪᠠᠢᠯᠳᠤᠷᠠ ᠢᠷᠡᠭᠡᠳ ᠤᠷᠢᠳᠠ ᠡᠯᠴᠢ ᠵᠠᠷᠤᠵᠤ ᠠᠮᠤᠷ ᠡᠷᠢᠭᠦᠯᠦᠨ᠂ ᠠᠯᠠᠯᠳᠤᠬᠤ ᠪᠠ ᠠᠮᠠᠷᠠᠭᠯᠠᠬᠤ ᠶ᠋ᠢ ᠬᠡᠯᠡᠯᠴᠡᠭᠦᠯᠦᠷᠡ ᠵᠠᠷᠤᠭᠰᠠᠨ ᠳ᠋ᠤᠷ ᠠᠮᠠᠷᠬᠠᠯᠠᠪᠠᠰᠤ ᠠᠯᠭᠠᠰᠠᠯ ᠦᠭᠡᠢ ᠲᠡᠭᠦᠨ ᠢ᠋ ᠦᠢᠯᠡᠴᠢᠯᠡᠮᠦᠢ ᠂ ᠠᠯᠠᠯᠳᠤᠪᠠᠰᠤ ᠠᠷᠪᠠᠨ ᠬᠤᠪᠢ ᠲᠡᠭᠦᠨ ᠳ᠋ᠦ᠍ᠷ ᠳᠠᠷᠤᠭᠳᠠᠮᠤᠢ᠃ ᠲᠡᠢᠨ ᠬᠦ᠌ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠬᠠᠪᠴᠢᠭᠳᠠᠵᠤ᠂ ᠲᠠᠰᠤᠯᠤᠨ ᠴᠢᠳᠠᠬᠤ ᠦᠭᠡᠢ ᠶᠡᠬᠡᠯᠡ ᠵᠣᠪᠠᠨᠢᠵᠤ᠂ ᠪᠠᠰᠠ ᠰᠣᠯᠤᠩᠭᠤᠳ ᠤᠯᠤᠰ ᠤ᠋ᠨ ᠸᠠᠩᠴᠤᠭ ᠬᠠᠭᠠᠨ ᠤ᠋ ᠥᠴᠦᠬᠡᠨ ᠣᠰᠤᠯᠳᠤᠭᠠᠳ ᠠᠷᠠᠢᠬᠠᠨ ᠠᠮᠢᠨ ᠠ᠋ᠴᠠ ᠪᠠᠨ ᠬᠠᠭᠠᠴᠠᠨ ᠠᠯᠳᠠᠵᠤ ᠠᠯᠢᠪᠠ ᠤᠯᠤᠰ ᠢᠶᠠᠨ ᠮᠥᠬᠥᠭᠡᠬᠦᠶᠡ ᠰᠢᠬᠠᠭᠰᠠᠨ ᠢ᠋ ᠪᠣᠳᠣᠵᠤ᠂ ᠬᠠᠵᠠᠭᠤ ᠶ᠋ᠢᠨ ᠬᠠᠷᠰᠢ ᠳ᠋ᠤᠷ ᠬᠠᠵᠠᠭᠤᠯᠠᠨ ᠬᠡᠪᠲᠡᠵᠦ᠂ ᠪᠤᠳᠠᠭᠠ ᠴᠤ᠌ ᠮᠥᠨ ᠢᠳᠡᠬᠦ ᠦᠭᠡᠢ ᠲᠡᠰᠬᠡᠯ ᠦᠭᠡᠢ ᠵᠣᠪᠠᠨ ᠪᠥᠬᠥᠶᠡ᠂ ᠳᠣᠣᠷᠠᠬᠢ ᠪᠢᠨ ᠹᠧᠢ ᠥᠬᠢᠳ ᠲᠠᠢᠭᠠᠨ ᠨᠠᠷ ᠶᠠᠭᠠᠷᠠᠨ ᠡᠴᠢᠵᠦ ᠰᠠᠷᠠᠨ ᠭᠦᠩᠵᠦ ᠳ᠋ᠦ᠍ᠷ ᠢᠶᠠᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠰᠠᠷᠠᠨ ᠬᠥᠩᠵᠦ ᠶᠠᠭᠠᠷᠠᠨ ᠡᠴᠢᠭᠡ ᠬᠠᠭᠠᠨ ᠳ᠋ᠤᠷ ᠢᠶᠠᠨ ᠥᠷᠯᠥᠭᠡ ᠶ᠋ᠢᠨ ᠶᠣᠰᠣᠨ ᠢᠶᠠᠷ ᠵᠣᠯᠭᠠᠷᠠ ᠢᠷᠡᠭᠰᠡᠨᠡ᠂ ᠴᠠᠭᠠᠨ ᠬᠠᠭᠠᠨ ᠬᠡᠦᠬᠡᠨ ᠢᠶᠠᠨ ᠦᠵᠡᠮᠡᠭᠴᠡ ᠬᠠᠭᠠᠰ ᠵᠣᠪᠠᠨᠢᠯ ᠠᠯᠳᠠᠷᠠᠨ ᠡᠴᠢᠭᠡᠳ ᠥᠬᠢᠨ ᠢᠶᠠᠨ ᠶᠣᠰᠣᠯᠠᠵᠤ ᠪᠠᠷᠠᠭᠰᠠᠨ ᠤ᠋ ᠳᠠᠷᠤᠢ ᠭᠠᠷ ᠠ᠋ᠴᠠ ᠠᠳᠬᠤᠨ ᠬᠠᠵᠠᠭᠤ ᠳ᠋ᠠᠭᠠᠨ ᠰᠠᠭᠤᠯᠭᠠᠵᠤ ᠡᠷᠬᠡᠯᠡᠭᠦᠯᠬᠦᠢ ᠳ᠋ᠦ᠍ᠷ ᠰᠠᠷᠠᠨ ᠭᠦᠩᠵᠦ ᠳᠠᠷᠤᠢ ᠬᠠᠭᠠᠨ ᠡᠴᠢᠭᠡ ᠶᠦ᠍ᠭᠡᠨ ᠡᠪᠦᠷ ᠲᠣᠷ ᠥᠩᠬᠥᠷᠢᠵᠦ᠂ ᠡᠴᠢᠭᠡ ᠶᠠᠭᠤᠨ ᠤ᠋ ᠤᠴᠢᠷ ᠲᠤᠷ ᠲᠤᠩᠭᠠᠯᠠᠭ ᠢ᠋ ᠠᠯᠲᠠᠨ ᠰᠡᠳᠬᠢᠯ ᠴᠢᠯᠡᠵᠦ᠂ ᠵᠣᠭᠣᠭ ᠡᠰᠡ ᠵᠣᠭᠣᠭᠯᠠᠪᠠ ᠭᠡᠮᠡᠨ ᠠᠰᠠᠭᠤᠭᠰᠠᠨᠠ᠂ ᠴᠠᠭᠠᠨ ᠬᠠᠭᠠᠨ ᠳᠠᠷᠤᠢ ᠬᠡᠦᠬᠡᠨ ᠶᠦ᠍ᠭᠡᠨ ᠮᠠᠰᠢ ᠰᠡᠴᠡᠨ ᠭᠡᠮᠡᠨ ᠮᠡᠳᠡᠬᠦ ᠲᠤᠯᠠ ᠵᠥᠪᠯᠡᠨ ᠦᠵᠡᠰᠦᠭᠡᠢ ᠭᠡᠮᠡᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠰᠢᠯᠲᠠᠭᠠᠨ ᠢ᠋ ᠪᠦᠷᠢᠨ ᠢᠶᠠᠷ ᠨᠢᠭᠡᠨ ᠵᠡᠷᠭᠡ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠳ᠋ᠦ᠍ᠷ ᠰᠠᠷᠠᠨ ᠭᠦᠩᠵᠦ ᠪᠠᠬᠠᠨ ᠢᠨᠢᠶᠡᠵᠦ ᠨᠢᠭᠡᠨ ᠵᠦᠢᠯ ᠤᠨ ᠠᠷᠭᠠ ᠭᠠᠷᠭᠠᠨ ᠬᠡᠯᠡᠭᠡᠳ ᠤᠯᠤᠰ ᠲᠥᠷᠥ ᠪᠡᠨ ᠠᠮᠤᠭᠤᠯᠠᠩ ᠢᠶᠠᠷ ᠬᠠᠮᠠᠭᠠᠯᠠᠨ ᠭᠠᠷᠭᠠᠪᠠ᠃ ᠶᠠᠮᠪᠠᠷ ᠠᠷᠭᠠ ᠶ᠋ᠢ ᠮᠡᠳᠡᠰᠦᠭᠡᠢ ᠬᠡᠮᠡᠪᠡᠰᠦ ᠳᠣᠣᠷᠠᠲᠤ ᠪᠦᠯᠦᠭ ᠲᠣᠷ ᠦᠵᠡᠲᠦᠭᠡᠢ ᠃
– – – –
① ᠰᠧᠯᠡᠭᠡᠳ︱ᠬᠤᠷᠠᠯᠳᠤᠭᠠᠳ
ᠴᠣᠬᠣᠯᠠᠭᠰᠠᠨ ᠠᠨᠤ
ᠡᠨᠡ ᠪᠦᠯᠦᠭ ᠲᠣᠷ ᠬᠠᠷᠢᠨ ᠳᠡᠮᠡᠢ ᠣᠯᠠᠨ ᠵᠦᠢᠯ ᠤ᠋ᠨ ᠤᠴᠢᠷ ᠦᠭᠡᠢ ᠂ ᠭᠠᠭᠴᠠ ᠳᠦᠷᠪᠡᠭᠡᠨ ᠠᠩᠭᠢ ᠴᠢᠬᠤᠯᠠ ᠭᠠᠵᠠᠷ ᠪᠤᠶᠤ ᠃ ᠠᠯᠢ ᠳᠥᠷᠪᠡᠨ ᠭᠠᠵᠠᠷ ᠬᠡᠮᠡᠪᠡᠰᠦ ᠄ ᠲᠡᠷᠢᠭᠦᠨ ᠳ᠋ᠦ᠍ᠷ ᠲᠠᠢᠽᠤ ᠶ᠋ᠢᠨ ᠮᠤᠬᠤᠯᠢ ᠂ ᠪᠤᠭᠤᠷᠵᠢ ᠬᠣᠶᠠᠭᠤᠯᠠ ᠶ᠋ᠢ ᠤᠯᠤᠰ ᠢ ᠰᠠᠬᠢᠬᠤ ᠪᠠ ᠴᠡᠷᠢᠭ ᠲᠦ᠍ᠷ ᠳᠠᠭᠠᠬᠤ ᠶ᠋ᠢ ᠲᠡᠩᠰᠡᠵᠦ ᠠᠰᠠᠭᠤᠨ ᠵᠥᠪᠯᠡᠨ ᠲᠣᠭᠲᠠᠭᠠᠭᠰᠠᠨ ᠡᠨᠡ ᠨᠢᠭᠡ ᠂ ᠲᠡᠷᠡ ᠢᠨᠤ ᠬᠡᠷᠪᠡ ᠭᠠᠳᠠᠨᠠᠬᠢ ᠶ᠋ᠢ ᠲᠡᠩᠴᠡᠭᠦᠯᠦᠭᠰᠡᠨ ᠭᠦᠨ ᠬᠣᠯᠠ ᠪᠣᠳᠣᠯᠭᠠ ᠂ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠭᠠᠳᠠᠨᠠ ᠭᠠᠷᠴᠤ ᠲᠦᠮᠡᠨ ᠪᠠᠢᠯᠳᠤᠭᠠᠨ ᠬᠢᠬᠦ ᠠᠷᠭᠠ ᠶ᠋ᠢ ᠲᠠᠩᠬᠢᠮ ᠤ᠋ᠨ ᠳᠣᠲᠣᠷᠠ ᠲᠣᠭᠲᠠᠭᠠᠬᠤ ᠂ ᠡᠷᠲᠡᠨ ᠤ ᠰᠦᠨ ᠦᠽᠢ ᠶ᠋ᠢᠨ ᠴᠡᠷᠢᠭ ᠬᠡᠷᠡᠭᠯᠡᠬᠦ ᠶᠣᠰᠣ ᠳ᠋ᠤᠷ ᠨᠡᠢᠴᠡᠵᠤᠬᠦᠢ ᠃ ᠵᠢᠴᠢ ᠬᠣᠶᠠᠳᠤᠭᠠᠷ ᠲᠤᠷ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠰᠣᠯᠣᠩᠭᠣᠰ ᠤ᠋ᠨ ᠦᠨᠡᠭᠡ ᠶᠢᠨ ᠮᠦᠷᠡᠨ ᠦ ᠬᠥᠪᠡᠭᠡ ᠳ᠋ᠤᠷ ᠬᠦᠷᠴᠦ ᠨᠠᠮᠤᠷ ᠤ᠋ᠨ ᠦᠶᠡ ᠶ᠋ᠢᠨ ᠡᠮᠦᠨᠡᠲᠦ ᠰᠠᠯᠬᠢᠨᠠ ᠲᠡᠭᠷᠢ ᠶ᠋ᠢᠨ ᠴᠠᠭ ᠤᠨ ᠬᠤᠷᠠ ᠤᠰᠤᠨ ᠪᠠ ᠮᠥᠷᠡᠨ ᠭᠣᠣᠯ ᠤ᠋ᠨ ᠥᠭᠡᠳᠡ ᠲᠡᠯᠡᠬᠦ ᠶ᠋ᠢ ᠤᠭᠲᠤᠵᠤ ᠮᠡᠳᠡᠭᠰᠡᠨ ᠢᠨᠦ ᠴᠡᠷᠢᠭ ᠦᠨ ᠪᠢᠴᠢᠭ ᠢ᠋ ᠦᠵᠡᠭᠰᠡᠨ ᠦᠭᠡᠢ ᠪᠥᠭᠡᠳ ᠴᠡᠷᠢᠭ ᠤᠨ ᠪᠢᠴᠢᠭ ᠢ᠋ ᠦᠵᠡᠭᠰᠡᠨ ᠮᠡᠷᠭᠡᠳ ᠡᠴᠡ ᠬᠡᠲᠦᠷᠡᠵᠦ ᠂ ᠲᠡᠭᠷᠢ ᠶ᠋ᠢᠨ ᠴᠠᠭ ᠪᠠ ᠭᠠᠵᠠᠷ ᠤ᠋ᠨ ᠵᠦᠢ ᠶ᠋ᠢ ᠤᠬᠠᠵᠤ ᠂ ᠪᠠᠰᠠ ᠬᠥᠮᠦᠨ ᠤ ᠪᠠᠢᠳᠠᠯ ᠢ ᠮᠡᠳᠡᠵᠦ ᠂ ᠭᠠᠭᠴᠠ ᠰᠦᠷ ᠨᠡᠷᠡ ᠪᠡᠷ ᠰᠣᠯᠣᠩᠭᠣᠰ ᠢ᠋ ᠣᠷᠣᠭᠤᠯᠵᠤ ᠠᠪᠰᠤᠭᠠᠢ ᠬᠡᠮᠡᠭᠰᠡᠨ ᠢᠨᠤ ᠲᠡᠭᠷᠢ ᠶ᠋ᠢᠨ ᠲᠥᠷᠥᠯᠬᠢ ᠪᠡᠯᠭᠡ ᠪᠢᠯᠢᠭᠲᠦ ᠬᠥᠮᠦᠨ ᠪᠤᠰᠤ ᠤᠤ! ᠡᠷᠲᠡᠨ ᠤ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠦᠶᠡ ᠶ᠋ᠢᠨ ᠵᠦ᠍ ᠭᠧ ᠡᠤ ᠾᠧᠦ ᠂ ᠬᠤ᠌ ᠯᠦ᠍ ᠬᠦ᠋ ᠵᠡᠪᠡ ᠳ᠋ᠤᠷ ᠰᠧ ᠮᠠ ᠢ ᠶ᠋ᠢ ᠸᠧᠢ ᠶᠠᠨ ᠢᠶᠠᠷ ᠤᠳᠤᠷᠢᠳᠤᠨ ᠣᠷᠣᠭᠤᠯᠤᠭᠠᠳ ᠬᠣᠶᠠᠭᠤᠯᠠ ᠶ᠋ᠢ ᠬᠠᠮᠲᠤ ᠰᠢᠲᠠᠭᠠᠵᠤ ᠠᠯᠠᠰᠤᠭᠠᠢ ᠬᠡᠮᠡᠲᠡᠯᠡ ᠶᠡᠬᠡ ᠬᠤᠷᠠ ᠣᠷᠣᠵᠤ ᠨᠣᠴᠣᠭᠰᠠᠨ ᠲᠦᠢᠮᠡᠷ ᠢ᠋ ᠴᠥᠮ ᠤᠮᠳᠠᠷᠠᠭᠠᠭᠰᠠᠨ ᠲᠡᠷᠡ ᠲᠤᠬᠠᠢ ᠳ᠋ᠤᠷ ᠵᠦ᠍ ᠭᠧ ᠯᠢᠶᠠᠩ ᠲᠡᠭᠷᠢ ᠶ᠋ᠢᠨ ᠲᠣᠭᠠ ᠶ᠋ᠢ ᠡᠰᠡ ᠪᠣᠳᠣᠵᠤ ᠣᠯᠪᠠ ᠃ ᠵᠦ᠍ ᠭᠧ ᠯᠢᠶᠠᠩ ᠬᠡᠮᠡᠭᠴᠢ ᠪᠢᠴᠢᠭ ᠰᠤᠷᠲᠠᠯ ᠂ ᠪᠦᠲᠦᠭᠡᠯ ᠪᠢᠰᠢᠯᠭᠠᠯ ᠴᠥᠮ ᠪᠦᠷᠢᠳᠦᠭᠰᠡᠨ ᠪᠣᠯᠪᠠᠴᠤ ᠲᠡᠷᠡ ᠲᠤᠬᠠᠢ ᠶ᠋ᠢᠨ ᠲᠡᠭᠷᠢ ᠶ᠋ᠢᠨ ᠵᠦᠢ ᠶ᠋ᠢ ᠪᠣᠳᠣᠵᠤ ᠠᠯᠳᠠᠭᠰᠠᠨ ᠪᠥᠭᠡᠲᠡᠯᠡ ᠡᠨᠡ ᠮᠤᠬᠤᠯᠢ ᠡᠯᠡᠰᠦ ᠬᠤᠮᠠᠭ ᠤ᠋ᠨ ᠪᠢᠲᠡᠭᠦᠯᠢᠭ ᠡᠷᠡ ᠪᠣᠯᠪᠠᠴᠤ ᠡᠨᠡ ᠤᠳᠠᠭᠠ ᠶ᠋ᠢᠨ ᠲᠡᠭᠷᠢ ᠶ᠋ᠢᠨ ᠤᠳᠬᠠ ᠂ ᠪᠠᠰᠠ ᠮᠥᠷᠡᠨ ᠤ ᠥᠭᠡᠳᠡ ᠲᠡᠯᠡᠬᠦ ᠭᠠᠵᠠᠷ ᠤ᠋ᠨ ᠵᠦᠢ ᠂ ᠨᠡᠩ ᠪᠠᠰᠠ ᠰᠣᠯᠣᠩᠭᠣᠰ ᠤ᠋ᠨ ᠠᠶᠤᠨ ᠡᠮᠢᠶᠡᠬᠦ ᠬᠥᠮᠦᠨ ᠤ ᠰᠡᠳᠬᠢᠯ ᠲᠡᠢ ᠂ ᠲᠡᠭᠷᠢ ᠂ ᠭᠠᠵᠠᠷ ᠂ ᠬᠥᠮᠦᠨ ᠭᠤᠷᠪᠠᠭᠤᠯᠠ ᠶ᠋ᠢ ᠬᠠᠮᠲᠤ ᠪᠠᠷ ᠪᠣᠳᠣᠵᠤ ᠭᠠᠷᠭᠠᠭᠰᠠᠨ ᠠᠨᠤ ᠦᠨᠡᠨ ᠢᠶᠠᠷ ᠭᠠᠢᠬᠠᠮᠰᠢᠭ ᠲᠠᠢ ᠦᠭᠡᠢ ᠦᠦ ? ᠵᠦ᠍ ᠭᠧ ᠯᠢᠶᠠᠩ ᠤᠨ ᠪᠡᠶᠡ ᠳ᠋ᠤᠷ ᠪᠣᠯᠪᠠᠰᠤ ᠭᠠᠢᠬᠠᠮᠰᠢᠭ ᠦᠭᠡᠢ ᠂ ᠮᠤᠬᠤᠯᠢ ᠪᠣᠯᠤᠭᠰᠠᠨ ᠲᠤᠯᠠ ᠭᠠᠢᠬᠠᠮᠰᠢᠭ ᠲᠠᠢ ᠪᠣᠯᠵᠤᠬᠤᠢ ᠃ ᠮᠡᠷᠭᠡᠳ ᠤᠨ ᠮᠡᠳᠡᠬᠦ ᠢᠨᠦ ᠭᠠᠢᠬᠠᠮᠰᠢᠭ ᠦᠭᠡᠢ ᠂ ᠡᠭᠡᠯ ᠤᠨ ᠮᠡᠳᠡᠭᠰᠡᠨ ᠢᠨᠤ ᠰᠠᠶ᠋ᠢ ᠭᠠᠢᠬᠠᠮᠰᠢᠭᠲᠠᠢ ᠪᠤᠰᠤ ᠤᠤ ? ᠵᠢᠴᠢ ᠭᠤᠲᠠᠭᠠᠷ ᠲᠤᠷ ᠣᠷᠢᠶᠠᠩᠬᠠᠨ ᠤ᠋ ᠰᠠᠢᠬᠠᠨ ᠵᠡᠯᠮᠡ ᠬᠡᠳᠦᠢ ᠤᠭ ᠲᠤᠷ ᠶᠢᠰᠦᠨ ᠤᠯᠤᠰ ᠤ᠋ᠨ ᠦᠭᠡ ᠬᠡᠯᠡᠨ ᠢ᠋ ᠰᠤᠷᠴᠤ ᠵᠢᠷᠭᠤᠭᠠᠨ ᠵᠦᠢᠯ ᠤᠨ ᠦᠰᠦᠭ ᠪᠢᠴᠢᠭ ᠢ᠋ ᠲᠥᠰᠥᠭᠡᠯᠡᠪᠡ ᠭᠡᠮᠡᠨ ᠬᠡᠯᠡᠵᠦ ᠪᠠᠢᠬᠤ ᠪᠣᠯᠪᠠᠴᠤ ᠠᠷᠪᠠᠨ ᠶᠢᠰᠦᠲᠡᠢ ᠳ᠋ᠡᠭᠡᠨ ᠲᠠᠢᠽᠤ ᠶ᠋ᠢ ᠳᠠᠭᠠᠭᠰᠠᠨ ᠠ᠋ᠴᠠ ᠡᠳᠦᠭᠡ ᠪᠣᠯᠲᠠᠯᠠ ᠴᠠᠭ ᠮᠥᠴᠡ ᠴᠦ᠍ ᠬᠠᠭᠠᠴᠠᠭᠠᠳᠤᠢ ᠲᠤᠯᠠ ᠨᠡᠮᠡᠵᠦ ᠪᠣᠯᠪᠠᠰᠤᠷᠠᠭᠤᠯᠬᠤ ᠴᠢᠯᠥᠭᠡ ᠦᠭᠡᠢ ᠶ᠋ᠢ ᠴᠦ᠍ ᠪᠠᠢᠲᠤᠭᠠᠢ ᠂ ᠠᠯᠤᠰᠲᠠᠨ ᠤᠮᠠᠷᠲᠠᠪᠠᠴᠤ ᠮᠥᠨ ᠤᠮᠠᠷᠲᠠᠭᠰᠠᠨ ᠪᠥᠭᠡᠲᠡᠯᠡ ᠡᠨᠡ ᠤᠳᠠᠭᠠ ᠳ᠋ᠤᠷ ᠡᠯᠴᠢ ᠪᠣᠯᠤᠨ ᠰᠣᠯᠣᠩᠭᠣᠰ ᠤ᠋ᠨ ᠲᠥᠷᠥ ᠳ᠋ᠦ᠍ᠷ ᠭᠠᠭᠴᠠ ᠪᠡᠶᠡ ᠪᠡᠷ ᠭᠠᠷᠴᠤ ᠲᠡᠳᠡᠨ ᠤ ᠲᠦᠮᠡᠨ ᠢᠯᠲᠤ ᠮᠢᠩᠭᠠᠨ ᠰᠦᠬᠡ ᠡᠴᠡ ᠥᠴᠦᠬᠡᠨ ᠴᠦ᠍ ᠠᠶᠤᠨ ᠵᠢᠷᠦᠬᠡᠰᠢᠶᠡᠬᠦ ᠦᠭᠡᠢ ᠰᠣᠯᠣᠩᠭᠣᠰ ᠤᠨ ᠨᠢᠭᠡᠨ ᠲᠥᠷᠥ ᠶ᠋ᠢᠨ ᠡᠵᠡᠨ ᠲᠦᠰᠢᠮᠡᠳ ᠢ᠋ ᠡᠪᠡᠰᠦ ᠰᠤᠢᠬᠠ ᠪᠠᠷ ᠦᠵᠡᠵᠦ ᠂ ᠨᠢᠯᠬᠠ ᠬᠡᠦᠬᠡᠳ ᠠᠳᠠᠯᠢ ᠵᠠᠩᠳᠠᠨ ᠬᠡᠯᠡᠭᠰᠡᠨ ᠢᠨᠤ ᠲᠡᠭᠦᠨ ᠤ ᠬᠡᠬᠦᠳᠡᠭ ᠲᠣᠷ ᠡᠷᠳᠡᠮ ᠰᠤᠷᠲᠠᠯ ᠦᠭᠡᠢ ᠪᠣᠯᠪᠠᠰᠤ ᠶᠠᠭᠤᠨ ᠤ᠋ ᠲᠡᠷᠡ ᠮᠡᠲᠦ ᠴᠢᠬᠡ ᠴᠢᠭᠢᠷᠠᠭ ᠵᠢᠷᠦᠬᠡ ᠰᠥᠰᠥ ᠪᠠᠢᠬᠤ ᠠᠵᠢ? ᠦᠨᠡᠬᠡᠷ ᠡᠷᠲᠡᠨ ᠤ ᠴᠢᠨ ᠤᠯᠤᠰ ᠲᠤᠷ ᠡᠴᠢᠭᠡᠳ ᠬᠠᠰ ᠢᠶᠠᠨ ᠲᠡᠪᠡᠷᠢᠵᠦ ᠡᠰᠡ ᠠᠯᠳᠠᠭᠰᠠᠨ ᠂ ᠵᠣᠣ ᠤᠯᠤᠰ ᠤ᠋ᠨ ᠬᠤᠪᠢ ᠶ᠋ᠢᠨ ᠰᠠᠢᠳ ᠯᠢᠨ ᠰᠢᠶᠠᠩ ᠿᠦ᠍ ᠪᠠᠰᠠ ᠬᠠᠨ ᠤᠯᠤᠰ ᠤ᠋ᠨ ᠴᠦ᠋ ᠳ᠋ᠦ᠍ᠷ ᠡᠴᠢᠭᠡᠳ ᠡᠰᠡ ᠬᠤᠪᠢᠰᠤᠭᠰᠠᠨ ᠵᠠᠩ ᠽᠢ ᠹᠠᠩ ᠠ᠋ᠴᠠ ᠬᠡᠲᠦᠢᠳᠴᠦᠬᠦᠢ ᠃ ᠡᠨᠡ ᠮᠡᠲᠦ ᠸᠠᠩ ᠤ᠋ᠨ ᠲᠤᠰᠠᠯᠠᠭᠴᠢ ᠮᠡᠷᠭᠡᠨ ᠰᠠᠢᠳ ᠠᠬᠤᠢ ᠳ᠋ᠤᠷ ᠲᠠᠢᠽᠤ ᠪᠣᠭᠳᠠ ᠦᠨᠡᠨ ᠢᠶᠠᠷ ᠶᠠᠮᠪᠠᠷ ᠵᠣᠪᠠᠬᠤ ᠭᠠᠵᠠᠷ ᠪᠣᠢ? ᠵᠢᠴᠢ ᠳᠥᠲᠥᠭᠡᠷ ᠢᠨᠤ ᠪᠤᠬᠠ ᠴᠠᠭᠠᠨ ᠬᠠᠭᠠᠨ ᠤ᠋ ᠭᠣᠣᠯ ᠤᠨ ᠰᠠᠷᠠᠨ ᠬᠥᠩᠴᠦ ᠶ᠋ᠢᠨ ᠪᠠᠭᠠ ᠨᠠᠰᠤᠨᠠ ᠭᠡᠷ ᠪᠠ ᠭᠠᠳᠠᠨᠠ ᠬᠣᠶᠠᠷ ᠲᠤᠷ ᠰᠢᠳᠬᠡᠭᠰᠡᠨ ᠡᠨᠡ ᠬᠣᠶᠠᠷ ᠵᠠᠷᠭᠤ ᠶ᠋ᠢ ᠬᠠᠭᠠᠯᠤᠭᠰᠠᠨ ᠠᠨᠤ ᠬᠡᠳᠦᠢᠪᠡᠷ ᠥᠴᠦᠬᠡᠨ ᠬᠡᠷᠡᠭ ᠪᠣᠯᠪᠠᠴᠤ ᠨᠢᠭᠡᠨ ᠣ ᠶ᠋ᠢᠨ ᠴᠢᠷᠠᠢ ᠡᠩᠭᠡᠰᠬᠡ ᠶ᠋ᠢᠨ ᠤᠷᠤᠭᠤᠯᠳᠠᠨ ᠤ᠋ ᠰᠦᠷᠦᠭ ᠲᠣᠷ ᠦᠨᠡᠨ ᠢᠶᠠᠷ ᠴᠤᠬᠠᠭ ᠴᠥᠭᠡᠨ᠂ ᠡᠷᠲᠡᠨ ᠤ ᠶ᠋ᠢᠨ ᠸᠧᠨ ᠬᠦᠩ ᠤᠨ ᠡᠮᠡ ᠂ ᠴᠢ ᠤᠯᠤᠰ ᠤ᠋ᠨ ᠵᠢᠶᠠᠩ ᠱᠢ ᠂ ᠪᠠᠰᠠ ᠬᠠᠨ ᠵᠦᠩ ᠸᠠᠩ ᠤ᠋ᠨ ᠬᠠᠲᠤᠨ ᠂ ᠡᠤ ᠤᠯᠤᠰ ᠤ᠋ᠨ ᠰᠦᠨ ᠹᠦ᠋ ᠿᠧᠨ ᠨᠠᠷ ᠤ᠋ᠨ ᠵᠡᠷᠭᠡ ᠶ᠋ᠢᠨ ᠡᠬᠡᠨᠡᠷ ᠤᠳ ᠴᠥᠮ ᠰᠡᠴᠡᠨ ᠮᠡᠷᠭᠡᠨ ᠭᠡᠭᠡᠬᠡᠨ ᠬᠡᠲᠦᠷᠬᠡᠢ ᠡᠬᠡᠨᠡᠷ ᠤᠳ ᠪᠣᠯᠪᠠᠴᠤ ᠠᠯᠢ ᠨᠢ ᠠᠨᠤ ᠡᠨᠡ ᠰᠠᠷᠠᠨ ᠭᠦᠩᠵᠦ ᠳ᠋ᠦ᠍ᠷ ᠬᠦᠷᠴᠦ ᠴᠢᠳᠠᠮᠤᠢ? ᠴᠥᠮ ᠡᠷᠡ ᠡᠮᠡ ᠪᠡᠨ ᠰᠡᠳᠬᠢᠭᠰᠡᠨ ᠪᠣᠢ ᠶᠠ ᠂ ᠤᠯᠤᠰ ᠲᠥᠷᠥ ᠪᠡᠨ ᠣᠭᠲᠣ ᠪᠣᠳᠣᠭᠰᠠᠨ ᠦᠭᠡᠢ ᠂ ᠬᠠᠷᠢᠨ ᠡᠨᠡ ᠰᠠᠷᠠᠨ ᠬᠥᠩᠵᠦ ᠪᠢᠴᠢᠬᠠᠨ ᠨᠠᠰᠤᠨ ᠳ᠋ᠤᠷ ᠳᠠᠩ ᠰᠠᠴᠠᠭᠤ ᠶ᠋ᠢ ᠦᠯᠦ ᠬᠦᠰᠡᠨ ᠭᠠᠭᠴᠠ ᠤᠯᠤᠰ ᠲᠥᠷᠥ ᠶ᠋ᠢᠨ ᠨᠡᠢᠲᠡ ᠶ᠋ᠢ ᠰᠠᠨᠠᠵᠤ ᠪᠡᠶᠡ ᠪᠡᠷ ᠪᠠᠯᠩ ᠤ᠋ᠨ ᠲᠡᠷᠢᠭᠦᠨ ᠪᠣᠯᠵᠤ ᠂ ᠡᠴᠢᠭᠡ ᠶ᠋ᠢᠨ ᠲᠦᠭᠰᠢᠯ ᠢ᠋ ᠬᠤᠪᠢᠶᠠᠨ ᠤᠯᠤᠰ ᠤ᠋ᠨ ᠵᠣᠪᠠᠯᠠᠩ ᠢ᠋ ᠠᠷᠢᠯᠭᠠᠭᠰᠠᠨ ᠠᠨᠤ ᠦᠨᠡᠨ ᠢᠶᠠᠷ ᠳᠥᠷᠪᠡᠨ ᠶᠡᠬᠡ ᠲᠠᠪᠤᠨ ᠡᠭᠦᠷᠢᠳᠡ ᠶ᠋ᠢ ᠪᠦᠷᠢᠳᠬᠡᠨ ᠴᠢᠳᠠᠵᠤᠬᠤᠢ ᠃ ᠡᠭᠦᠨ ᠤ ᠪᠦᠷᠢᠳᠬᠡᠭᠰᠡᠨ ᠢ᠋ ᠳᠣᠣᠷᠠᠲᠤ ᠪᠦᠯᠦᠭ ᠢ᠋ ᠤᠷᠪᠠᠭᠤᠯᠤᠮᠠᠭᠴᠠ ᠳᠠᠷᠤᠢ ᠣᠯᠵᠤ ᠮᠡᠳᠡᠬᠦ ᠪᠣᠯᠠᠢ ᠃