ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠶᠢᠰᠦᠳᠦᠭᠡᠷ ᠪᠦᠯᠦᠭ > Хөх судар - Инжинаш <Есдүгээр бүлэг >
360ᠳᠦᠭᠦᠯᠡ ᠮᠥᠷᠡᠨ ᠳ᠋ᠦ᠍ᠷ ᠳᠤᠭᠤᠯᠠᠭᠠ ᠬᠠᠷᠪᠤᠵᠤ ᠠᠯᠲᠠᠨ ᠤ᠋ ᠡᠯᠴᠢ ᠶ᠋ᠢ ᠰᠦᠷᠳᠡᠭᠡᠪᠡᠢ
ᠢᠵᠢᠯᠵᠢ ᠠᠢᠮᠠᠭ ᠲᠤᠷ ᠤᠷᠤᠭ ᠪᠠᠷᠢᠵᠤ ᠬᠠᠰ ᠤ᠋ᠨ ᠰᠠᠯᠠᠭᠠᠨ ᠢ᠋ ᠬᠠᠢᠷᠠᠯᠠᠪᠠᠢ
ᠶᠢᠰᠦᠳᠦᠭᠡᠷ ᠪᠦᠯᠦᠭ
ᠰᠥᠩ ᠰᠢᠶᠤᠤᠽᠦ᠋ᠩ ᠦ᠋ᠨ ᠴᠦᠨ ᠰᠢ ᠶ᠋ᠢᠨ ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠣᠨ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ
ᠱ᠌ᠢᠽᠦ᠋ᠩ ᠦ᠋ᠨ ᠳᠡ ᠳ᠋ᠢᠩ ᠦ᠋ᠨ ᠬᠣᠷᠢᠨ ᠵᠢᠷᠭᠤᠳᠤᠭᠠᠷ ᠣᠨ ᠂ ᠤᠯᠠᠭᠠᠨ ᠮᠣᠷᠢᠨ ᠵᠢᠯ ᠲᠠᠢᠽᠦ ᠬᠣᠷᠢᠨ ᠲᠠᠪᠤᠲᠠᠢ ᠂
ᠡᠨᠡ ᠵᠢᠯ ᠲᠠᠢᠽᠦ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠲᠠᠢᠽᠢ ᠥᠭᠡᠳᠡᠢ ᠶ᠋ᠢ ᠲᠥᠷᠥᠪᠡ ᠂ ᠬᠣᠵᠢᠮ ᠬᠠᠭᠠᠨ ᠰᠠᠭᠤᠪᠠ
ᠳᠦᠭᠦᠯᠡ ᠮᠥᠷᠡᠨ ᠳ᠋ᠦ᠍ᠷ ᠳᠤᠭᠤᠯᠠᠭᠠ ᠬᠠᠷᠪᠤᠵᠤ ᠠᠯᠲᠠᠨ ᠤ᠋ ᠡᠯᠴᠢ ᠶ᠋ᠢ ᠰᠦᠷᠳᠡᠭᠡᠪᠡᠢ
ᠢᠵᠢᠯᠵᠢ ᠠᠢᠮᠠᠭ ᠲᠤᠷ ᠤᠷᠤᠭ ᠪᠠᠷᠢᠵᠤ ᠬᠠᠰ ᠤ᠋ᠨ ᠰᠠᠯᠠᠭᠠᠨ ᠢ᠋ ᠬᠠᠢᠷᠠᠯᠠᠪᠠᠢ
ᠮᠠᠲᠠᠯ ᠥᠴᠦᠬᠡᠨ ᠸᠧᠢ ᠸᠠᠩ ᠶᠦᠩ ᠵᠢᠢ ᠲᠡᠭᠷᠢ ᠶ᠋ᠢ ᠦᠯᠦ ᠲᠠᠨᠢᠮᠤᠢ
ᠮᠡᠬᠡᠲᠡᠢ ᠬᠠᠷᠪᠤᠭᠠᠴᠢ ᠢᠵᠢᠯᠵᠢ ᠶ᠋ᠢᠨ ᠪᠣᠲ᠋ᠤ ᠴᠠᠭ ᠤ᠋ᠨ ᠤᠴᠠᠷᠠᠯ ᠢ᠋ ᠣᠯᠵᠤᠬᠤᠢ ᠂
ᠮᠡᠨᠳᠦᠯᠡᠮᠡᠭᠴᠡ ᠪᠡᠯᠭᠡᠲᠡᠢ ᠲᠠᠢᠽᠦ᠋ᠩ ᠥᠭᠡᠳᠡᠢ ᠶᠢᠷᠲᠢᠨᠴᠦ ᠶ᠋ᠢᠨ ᠢᠷᠣᠠ ᠶ᠋ᠢ ᠵᠢᠭᠠᠪᠠᠢ
ᠮᠡᠷᠭᠡᠨ ᠬᠡᠲᠦᠢᠳᠦᠭᠰᠡᠨ ᠲᠠᠢᠽᠦ ᠪᠣᠭᠳᠠ ᠬᠤᠢᠴᠢᠬᠢ ᠶ᠋ᠢᠨ ᠬᠡᠷᠡᠭ ᠢ᠋ ᠠᠢᠯᠠᠳᠪᠠᠢ ᠃
ᠲᠡᠨᠳᠡᠴᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠸᠧᠢ ᠸᠠᠩ ᠶᠦᠩ ᠵᠢᠢ ᠬᠠᠷᠠᠬᠠᠨ ᠬᠡᠮᠵᠢᠶᠡ ᠦᠭᠡᠢ ᠰᠦᠷ ᠲᠠᠯᠪᠢᠨ᠂ ᠬᠢᠷᠢ ᠦᠭᠡᠢ ᠶᠡᠬᠡ ᠪᠠᠢᠷᠢ ᠭᠠᠷᠭᠠᠨ ᠶᠠᠪᠤᠭᠰᠠᠭᠠᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠣᠷᠣᠮᠠᠭᠴᠠ ᠭᠡᠨᠡᠳᠲᠡ ᠨᠢᠭᠡᠨ ᠠᠩᠭᠢ ᠤᠯᠠᠭᠠᠨ ᠲᠤᠭ ᠬᠢᠭᠢᠷᠢ᠂ ᠤᠯᠠᠭᠠᠨ ᠬᠤᠶᠠᠭ ᠳᠤᠭᠤᠯᠠᠭᠠᠲᠤ ᠨᠢᠭᠡᠨ ᠰᠠᠯᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤᠷ ᠲᠡᠭᠷᠢ ᠭᠠᠵᠠᠷ ᠳᠡᠯᠪᠡᠷᠡᠨ᠂ ᠮᠣᠷᠢᠨ ᠤ᠋ ᠲᠣᠭᠣᠰᠣᠨ ᠠᠭᠤᠯᠠ ᠨᠠᠷᠠᠨ ᠢ᠋ ᠬᠠᠯᠠᠬᠠᠯᠠᠨ ᠬᠥᠨᠳᠡᠯᠢᠰᠦᠨ ᠵᠢᠭᠰᠠᠭᠠᠭᠰᠠᠨ ᠳ᠋ᠤᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠶᠡᠬᠡᠯᠡ ᠰᠣᠴᠢᠵᠤ ᠶᠠᠭᠠᠷᠠᠨ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ᠂ ᠦᠵᠡᠰᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠮᠦᠨᠡ ᠳ᠋ᠡᠬᠢ ᠬᠣᠰᠢᠭᠤᠴᠢ ᠬᠦᠯᠦᠭ ᠪᠤᠭᠤᠷᠵᠢ᠂ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠵᠠᠬᠢᠶᠠ ᠪᠠᠷ ᠲᠠᠪᠤᠨ ᠵᠠᠭᠤᠨ ᠰᠢᠯᠭᠠᠳᠠᠭ ᠴᠡᠷᠢᠭ ᠢ᠋ ᠠᠪᠴᠤ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠵᠠᠬᠠ ᠬᠢᠵᠠᠭᠠᠷ ᠢ᠋ ᠴᠠᠭᠳᠠᠨ ᠶᠠᠪᠤᠬᠤ ᠠᠵᠤᠭᠤ᠃ ᠲᠡᠳᠦᠢ ᠸᠧᠢ ᠸᠠᠩ ᠶᠦᠩ ᠶ᠋ᠢᠢ ᠢᠷᠡᠭᠰᠡᠨ ᠤᠴᠢᠷ ᠢ᠋ᠶ᠋ᠠᠨ ᠲᠣᠳᠣᠷᠬᠠᠢᠯᠠᠨ ᠬᠡᠯᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠬᠦᠯᠦᠭ ᠪᠤᠭᠤᠷᠵᠢ ᠥᠪᠡᠷ ᠦ᠋ᠨ ᠴᠡᠷᠢᠭ ᠲᠦ᠍ᠷ ᠴᠠᠭᠠᠵᠠ ᠵᠠᠷᠯᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠭᠤᠳᠠᠯᠯᠠᠭᠤᠯᠵᠤ᠂ ᠵᠠᠯᠮᠠ ᠪᠠ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠬᠣᠶᠠᠭᠤᠯᠠ ᠶ᠋ᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤᠷ ᠢᠯᠡᠭᠡᠵᠦ᠂ ᠵᠣᠴᠢᠨ ᠤ᠋ ᠶᠣᠰᠣᠨ ᠢ᠋ᠶ᠋ᠠᠷ ᠲᠣᠭᠣᠰᠣᠨ ᠢ᠋ ᠭᠦᠪᠢᠬᠦ ᠬᠤᠷᠢᠮ ᠤ᠋ᠨ ᠠᠷᠢᠬᠢ ᠬᠣᠨᠢ ᠬᠦᠷᠭᠡᠯᠭᠡᠨ ᠦᠭᠡ ᠬᠡᠯᠡᠯᠴᠡᠷᠡ ᠢᠯᠡᠭᠡᠪᠡ᠃ ᠡᠨᠡ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠬᠡᠮᠡᠭᠴᠢ ᠶ᠋ᠢ ᠪᠢᠴᠢᠭ ᠦᠵᠡᠬᠦ ᠮᠡᠷᠭᠡᠳ ᠮᠡᠳᠡᠬᠦ ᠦᠭᠡᠢ ᠪᠣᠯᠠᠢ᠂ ᠠᠩᠬᠠ ᠪᠦᠯᠦᠭ ᠦ᠋ᠨ ᠴᠠᠴᠠᠷ ᠠᠭᠤᠯᠠᠨ ᠤ᠋ ᠶᠡᠬᠡ ᠪᠠᠢᠯᠳᠤᠭᠠᠨ ᠳ᠋ᠤᠷ ᠴᠢᠯᠥᠭᠡ ᠣᠯᠵᠤ᠂ ᠡᠨᠡ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠶ᠋ᠢᠨ ᠤᠴᠢᠷ ᠢ᠋ ᠭᠠᠷᠭᠠᠨ ᠵᠠᠪᠳᠤᠭᠰᠠᠨ ᠦᠭᠡᠢ᠃ ᠡᠨᠡ ᠬᠡᠮᠡᠭᠴᠢ ᠤᠭ ᠲᠤᠷ ᠮᠥᠨ ᠰᠢ ᠯᠢᠶᠣᠤ — ᠬᠠᠷᠠ ᠬᠢᠳᠠᠨ ᠤᠯᠤᠰ ᠤ᠋ᠨ ᠬᠥᠮᠦᠨ᠂ ᠳᠡᠭᠡᠳᠦ ᠬᠡᠮᠡᠬᠦ ᠨᠡᠷᠡ ᠲᠡᠢ ᠭᠠᠵᠠᠷ ᠲᠤᠷ ᠰᠠᠭᠤᠬᠤᠶᠠ᠂ ᠬᠡᠳᠦᠨ ᠣᠨ ᠤ᠋ ᠡᠮᠦᠨᠡ ᠲᠠᠢᠽᠦ ᠮᠢᠩᠭᠠᠨ ᠠᠪᠠ ᠪᠠᠷ ᠠᠪᠠᠯᠠᠭᠰᠠᠭᠠᠷ ᠲᠠᠩᠳᠦ ᠶ᠋ᠢᠨ ᠭᠣᠣᠯ ᠳ᠋ᠤᠷ ᠬᠦᠷᠪᠡᠰᠦ ᠨᠢᠭᠡᠨ ᠰᠠᠢᠬᠠᠨ ᠲᠥᠷᠥᠭᠰᠡᠨ ᠠᠷᠪᠠᠨ ᠬᠡᠳᠦᠨ ᠨᠠᠰᠤᠨ ᠤ᠋ ᠬᠥᠪᠡᠭᠦᠨ ᠬᠣᠨᠢ ᠠᠳᠤᠭᠤᠯᠠᠬᠤ ᠪᠥᠭᠡᠳ ᠪᠠᠷᠢᠭᠰᠠᠨ ᠰᠢᠲᠠᠮ ᠢ᠋ᠶ᠋ᠠᠨ ᠭᠠᠵᠠᠷ ᠲᠤᠷ ᠬᠠᠳᠬᠤᠵᠤ᠂ ᠳᠡᠭᠡᠷᠡ ᠢᠨᠦ ᠮᠠᠯᠠᠭᠠ ᠪᠠᠨ ᠲᠠᠯᠪᠢᠭᠠᠳ ᠲᠡᠭᠦᠨ ᠦ᠌ ᠡᠮᠦᠨᠡ ᠶᠣᠰᠣᠯᠠᠨ ᠮᠥᠷᠭᠥᠵᠦ ᠨᠠᠭᠠᠳᠬᠤ ᠶ᠋ᠢ ᠦᠵᠡᠭᠡᠳ ᠲᠠᠢᠽᠦ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠪᠠᠨ ᠵᠠᠯᠠᠵᠤ ᠲᠡᠷᠡ ᠬᠥᠪᠡᠭᠦᠨ ᠦ᠌ ᠣᠢᠷᠠ ᠬᠦᠷᠴᠦ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ᠂ ᠲᠡᠷᠡ ᠬᠥᠮᠦᠨ ᠰᠥᠭᠥᠳᠦᠭᠰᠡᠭᠡᠷ ᠮᠡᠳᠡᠭᠦᠯᠦᠷᠦᠨ᠄ 《 ᠪᠢ ᠬᠥᠮᠦᠨ ᠯᠣᠭᠡ ᠬᠠᠮᠲᠤ ᠶᠠᠪᠤᠪᠠᠰᠤ ᠨᠠᠰᠤᠨ ᠤ᠋ ᠠᠬᠠ ᠪᠠᠷ ᠠᠨᠤ ᠬᠦᠨᠳᠦᠯᠡᠮᠦᠢ᠂ ᠪᠢ ᠬᠡᠷᠪᠡᠷ ᠭᠠᠭᠴᠠᠭᠠᠷ ᠪᠠᠢᠬᠤ ᠠᠪᠠᠰᠤ ᠲᠣᠯᠣᠭᠠᠢ ᠳ᠋ᠤᠷ ᠡᠮᠦᠰᠦᠭᠰᠡᠨ ᠮᠠᠯᠠᠭᠠ ᠪᠠᠨ ᠡᠷᠬᠢᠮ ᠢ᠋ᠶ᠋ᠡᠷ ᠬᠦᠨᠳᠦᠯᠡᠮᠦᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠮᠦᠰᠢᠶᠡᠵᠦ ᠠᠰᠠᠭᠤᠷᠤᠨ᠄ 《 ᠲᠡᠷᠡ ᠮᠡᠲᠦ ᠬᠦᠨᠳᠦᠯᠡᠬᠦ ᠤᠴᠢᠷ ᠠᠨᠤ ᠶᠠᠭᠤᠨ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ᠂ ᠲᠡᠷᠡ ᠬᠥᠪᠡᠭᠦᠨ ᠮᠡᠳᠡᠭᠦᠯᠦᠷᠦᠨ᠄ 《 ᠬᠥᠮᠦᠨ ᠪᠦᠬᠦᠨ ᠭᠦᠢᠬᠡᠨ ᠬᠡᠯᠡᠯᠴᠡᠬᠦ ᠢᠨᠦ᠄ ᠬᠥᠮᠦᠨ ᠦ᠌ ᠡᠵᠡᠨ ᠲᠩᠷᠢᠯᠢᠭ ᠴᠢᠮᠠᠶ᠋ᠢ ᠢᠷᠠᠮᠤ ᠬᠡᠮᠡᠬᠦᠢ ᠳ᠋ᠦ᠍ᠷ ᠪᠢ ᠬᠦᠨᠳᠦᠯᠡᠬᠦ ᠶᠣᠰᠣᠯᠠᠬᠤ ᠮᠥᠷᠭᠥᠬᠦ ᠰᠥᠭᠥᠳᠬᠦ ᠲᠥᠷᠥ ᠶᠣᠰᠣᠨ ᠢ᠋ ᠰᠠᠨᠠᠵᠤ ᠪᠣᠯᠪᠠᠰᠤᠷᠠᠭᠤᠯᠤᠮᠠᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠳᠡ ᠰᠣᠨᠢᠷᠬᠠᠨ ᠪᠡᠶᠡᠰᠴᠦ ᠲᠡᠭᠦᠨ ᠦ᠌ ᠨᠡᠷᠡ ᠣᠪᠣᠭ ᠨᠠᠰᠤ ᠵᠢᠯ ᠢ ᠠᠰᠠᠭᠤᠪᠠᠰᠤ ᠲᠡᠷᠡ ᠬᠥᠪᠡᠭᠦᠨ ᠮᠡᠳᠡᠭᠦᠯᠦᠷᠦᠨ᠄ 《ᠳᠠᠩᠲᠦ ᠶ᠋ᠢᠨ ᠭᠣᠣᠯ ᠳ᠋ᠤᠷ ᠨᠤᠲᠤᠭᠰᠢᠭᠰᠠᠨ ᠢ᠋ᠶ᠋ᠠᠷ ᠳᠠᠩ ᠡᠦ ᠨᠢ ᠣᠪᠣᠭᠲᠤ ᠪᠣᠯᠪᠠ᠂ ᠰᠠᠢᠬᠠᠨ ᠵᠢᠰᠦᠲᠡᠢ ᠲᠥᠷᠥᠭᠰᠡᠨ ᠢ᠋ᠶ᠋ᠡᠷ ᠮᠢᠨᠦ ᠡᠴᠢᠭᠡ ᠴᠣᠴᠣᠯᠢ ᠨᠠᠮᠠᠶ᠋ᠢ ᠰᠠᠢᠬᠠᠨ ᠭᠡᠮᠡᠨ ᠨᠡᠷᠡᠢᠳᠪᠡ᠃ ᠰᠠᠢᠬᠠᠨ ᠪᠢ ᠡᠨᠡ ᠵᠢᠯ ᠠᠷᠪᠠᠨ ᠨᠢᠭᠡᠨ ᠨᠠᠰᠤ ᠲᠠᠢ᠂ ᠰᠢᠷᠬᠠᠴᠢᠨ ᠦᠬᠡᠷ ᠵᠢᠯ ᠲᠡᠢ ᠪᠣᠯᠠᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠲᠡᠭᠦᠨ ᠢ᠋ ᠰᠠᠢᠰᠢᠶᠠᠨ ᠪᠡᠶᠡᠰᠴᠦ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠭᠡᠮᠡᠨ ᠨᠡᠷᠡ ᠬᠠᠢᠷᠠᠯᠠᠭᠠᠳ ᠭᠡᠷ ᠡᠷᠦᠬᠡ ᠲᠡᠢ ᠢᠨᠤ ᠤᠯᠤᠰ ᠭᠡᠷ ᠲᠦ᠍ᠷ ᠢ᠋ᠶ᠋ᠡᠨ ᠠᠪᠴᠢᠷᠠᠭᠠᠳ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠶ᠋ᠢ ᠰᠡᠴᠡᠨ ᠵᠦᠰᠦᠨ ᠪᠦᠷᠲᠡᠭᠡᠯᠵᠢᠨ ᠬᠠᠲᠤᠨ ᠳ᠋ᠠᠭᠠᠨ ᠲᠤᠰᠢᠶᠠᠨ ᠥᠭᠴᠦ ᠵᠠᠷᠤᠭᠳᠠᠭᠤᠯᠤᠨ ᠲᠠᠢᠽᠦ ᠶ᠋ᠢᠨ ᠶᠡᠬᠡ ᠬᠥᠪᠡᠭᠦᠨ ᠵᠣᠴᠢ ᠯᠤᠭᠡ ᠨᠠᠭᠠᠳᠤᠭᠤᠯᠤᠨ ᠥᠰᠬᠡᠯᠭᠡᠵᠦ᠂ ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤᠯᠠᠵᠤ᠂ ᠬᠤᠷᠴᠠ ᠰᠡᠷᠭᠦᠯᠡᠩ ᠣᠯᠠᠨ ᠠ᠋ᠴᠠ ᠣᠨᠴᠠᠭᠠᠢ᠂ ᠲᠡᠭᠦᠨ ᠦ᠌ ᠡᠴᠢᠭᠡ ᠡᠴᠡ ᠳᠥᠷᠪᠡᠨ ᠡᠲᠡᠭᠡᠳ ᠦ᠋ᠨ ᠬᠡᠯᠡ ᠰᠤᠷᠭᠠᠭᠰᠠᠨ ᠲᠤᠯᠠ ᠵᠡᠯᠮᠡ ᠶ᠋ᠢᠨ ᠬᠠᠮᠲᠤ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠢᠷᠡᠭᠰᠡᠨ ᠸᠧᠢ ᠸᠠᠩ ᠶᠦᠩ ᠶ᠋ᠢᠢ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤᠷ ᠢᠷᠡᠵᠦ ᠮᠡᠳᠡᠭᠦᠯᠦᠷᠦᠨ᠄ 《 ᠡᠷᠭᠢᠨ ᠠᠯᠲᠠᠨ ᠤᠯᠤᠰ ᠬᠡᠳᠦᠢ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠪᠠᠭᠠ ᠬᠠᠭᠠᠰ ᠢ᠋ ᠡᠵᠡᠯᠡᠪᠡᠴᠦ ᠪᠢᠳᠡᠨ ᠦ᠌ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠬᠠᠷᠢᠶᠠ ᠦᠭᠡᠢ ᠲᠤᠯᠠ ᠪᠢᠳᠡ ᠮᠠᠨ ᠤ᠋ ᠡᠵᠡᠨ ᠡᠴᠡ ᠡᠰᠢ ᠵᠠᠬᠢᠶᠠ ᠦᠭᠡᠢ ᠪᠡᠷ ᠶᠡᠬᠡ ᠸᠠᠩ ᠢ᠋ ᠵᠠᠬᠠ ᠶ᠋ᠢᠨ ᠳᠣᠲᠣᠷᠠ ᠲᠠᠯᠪᠢᠨ ᠣᠷᠣᠭᠤᠯᠵᠤ ᠦᠯᠦ ᠴᠢᠳᠠᠮᠤ᠃ ᠲᠡᠢᠨ ᠬᠦ᠌ ᠶᠡᠬᠡ ᠸᠠᠩ ᠲᠦᠷ ᠪᠠᠬᠠᠨ ᠲᠦᠳᠡᠭᠡᠯᠵᠡᠨ ᠪᠠᠭᠤᠮᠤ᠂ ᠪᠢᠳᠡ ᠶᠡᠬᠡ ᠸᠠᠩ ᠤ᠋ᠨ ᠢᠷᠡᠭᠰᠡᠨ ᠤᠴᠢᠷ ᠢ᠋ ᠲᠣᠳᠣᠷᠬᠠᠢᠯᠠᠨ ᠮᠡᠳᠡᠭᠦᠯᠵᠦ᠂ ᠲᠡᠮᠳᠡᠭ ᠵᠡᠪᠡ ᠢᠷᠡᠭᠰᠡᠨ ᠴᠠᠭ ᠲᠤᠷ ᠵᠢᠴᠢ ᠵᠠᠯᠠᠷᠠᠮᠤ !》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠥᠭᠦᠯᠡᠷᠦᠨ᠄ 《ᠬᠡᠳᠦᠢᠨᠡᠢ ᠵᠠᠬᠢᠶᠠ ᠳᠣᠪᠲᠣᠯᠭᠠᠭᠰᠠᠨ ᠪᠣᠯᠠᠢ᠃ 》 ᠵᠡᠯᠮᠡ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠬᠣᠶᠠᠭᠤᠯᠠ ᠥᠴᠢᠷᠦᠨ᠄ 《ᠬᠡᠳᠦᠢ ᠶᠡᠬᠡ ᠸᠠᠩ ᠤ᠋ᠨ ᠮᠡᠳᠡᠭᠡ ᠡᠴᠢᠭᠰᠡᠨ ᠪᠣᠯᠪᠠᠴᠤ ᠮᠠᠨ ᠤ᠋ ᠲᠤᠰᠢᠶᠠᠯ ᠤ᠋ᠨ ᠭᠠᠵᠠᠷ ᠲᠡᠮᠳᠡᠭ ᠢᠷᠡᠭᠡᠳᠦᠢ᠃ 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠠᠷᠭᠠ ᠦᠭᠡᠢ ᠠᠭᠤᠷ ᠢ᠋ ᠬᠦᠯᠢᠴᠡᠵᠦ ᠨᠢᠭᠡᠨ ᠡᠳᠦᠷ ᠲᠦᠳᠡᠭᠡᠯᠵᠡᠲᠡᠯᠡ ᠳᠠᠷᠠᠭᠠ ᠡᠳᠦᠷ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡ ᠡᠴᠡ ᠳᠡᠭᠦᠦ ᠪᠡᠨ ᠬᠠᠪᠤᠲᠤ ᠬᠠᠰᠠᠷ᠂ ᠣᠢᠲᠤ ᠸᠴᠢᠷ ᠬᠣᠶᠠᠭᠤᠯᠠ ᠶ᠋ᠢ ᠲᠡᠮᠳᠡᠭ ᠵᠡᠪᠡ ᠪᠠᠷᠢᠭᠤᠯᠤᠨ ᠢᠯᠡᠭᠡᠵᠦ᠂ ᠸᠧᠢ ᠸᠠᠩ ᠶᠦᠩ ᠵᠢᠢ ᠶ᠋ᠢ ᠤᠭᠲᠤᠭᠤᠯᠵᠤ᠂ ᠲᠠᠰᠢᠷᠠᠮ ᠳ᠋ᠤᠷ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠴᠢᠦᠢ ᠰᠢᠦᠸᠠᠢ ᠡᠦ ᠶ᠋ᠢ ᠵᠢᠷᠤᠮᠲᠤ ᠰᠠᠢᠳ ᠭᠡᠮᠡᠨ ᠲᠡᠭᠦᠨ ᠦ᠌ ᠬᠡᠭᠦᠷ ᠢ᠋ ᠨᠠᠢ᠍ᠮᠠᠨ ᠤ᠋ ᠵᠠᠬᠠ ᠳ᠋ᠤᠷ ᠬᠦᠷᠭᠡᠭᠦᠯᠦᠭᠡᠳ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢ ᠤᠳᠤᠷᠢᠳᠤᠨ ᠤᠯᠤᠰ ᠲᠤᠷ ᠣᠷᠣᠭᠤᠯᠬᠤᠢ ᠳ᠋ᠤᠷ ᠬᠦᠯᠦᠭ ᠪᠤᠭᠤᠷᠵᠢ᠂ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠵᠠᠬᠢᠶᠠ ᠪᠠᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠶ᠋ᠢᠨ ᠴᠡᠷᠢᠭ ᠢ᠋ ᠵᠠᠬᠠ ᠶ᠋ᠢᠨ ᠭᠠᠳᠠᠨᠠ ᠬᠣᠴᠣᠷᠤᠭᠤᠯᠵᠤ᠂ ᠪᠤᠭᠤᠷᠵᠢ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠡᠰᠡᠷᠭᠦᠴᠡᠯᠡᠨ ᠪᠠᠭᠤᠵᠤ ᠠᠷᠢᠬᠢ ᠰᠢᠭᠦᠰᠦ ᠢᠯᠡᠭᠡᠵᠦ ᠬᠤᠷᠢᠮ ᠲᠠᠯᠪᠢᠪᠠ᠃ ᠡᠭᠦᠨ ᠳ᠋ᠦ᠍ᠷ ᠸᠧᠢ ᠸᠠᠩ ᠶᠦᠩ ᠶ᠋ᠢᠢ ᠬᠡᠳᠦᠢ ᠠᠭᠤᠷᠯᠠᠪᠠᠴᠤ ᠠᠷᠭᠠ ᠦᠭᠡᠢ ᠬᠠᠰᠠᠷ ᠸᠴᠢᠷ ᠬᠣᠶᠠᠭᠤᠯᠠ ᠯᠤᠭᠠ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠣᠷᠣᠵᠤ ᠢᠷᠡᠨ ᠬᠡᠳᠦᠨ ᠡᠳᠦᠷ ᠶᠠᠪᠤᠵᠤ ᠳᠥᠭᠦᠯᠡ ᠮᠥᠷᠡᠨ ᠦ᠌ ᠬᠥᠪᠡᠭᠡ ᠳ᠋ᠦ᠍ᠷ ᠬᠦᠷᠴᠦ ᠲᠠᠢᠽᠦ ᠶ᠋ᠢᠨ ᠵᠣᠴᠢᠨ ᠳ᠋ᠤᠷ ᠵᠣᠯᠭᠠᠬᠤ ᠶᠡᠬᠡ ᠥᠷᠲᠡᠭᠡ ᠪᠠᠭᠤᠳᠠᠯ ᠳ᠋ᠤᠷ ᠲᠠᠢᠽᠦ ᠯᠤᠭᠠ ᠬᠠᠷᠢᠯᠴᠠᠨ ᠵᠣᠯᠭᠠᠯᠳᠤᠬᠤᠶᠠ᠂ ᠸᠧᠢ ᠸᠠᠩ ᠶᠦᠩ ᠵᠢᠢ ᠲᠠᠢᠽᠦ ᠶ᠋ᠢ ᠬᠦᠵᠢᠰ ᠦ᠋ᠨ ᠰᠢᠷᠡᠭᠡ ᠪᠡᠯᠡᠳᠴᠦ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠮᠥᠷᠭᠥᠵᠦ ᠬᠦᠯᠢᠶᠡᠨ ᠠᠪ ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠥᠴᠦᠬᠡᠨ ᠢᠨᠢᠶᠡᠵᠦ ᠬᠠᠷᠢᠭᠤ ᠥᠴᠢᠷᠦᠨ᠄ 《 ᠮᠠᠨ ᠤ᠋ ᠪᠧᠲ᠋ᠠ᠋ ᠤᠯᠤᠰ ᠬᠡᠮᠡᠭᠴᠢ ᠡᠷᠲᠡᠨ ᠡᠳᠦᠭᠡ ᠡᠴᠡ ᠰᠠᠯᠤᠨ ᠭᠠᠷᠴᠤ ᠲᠥᠪᠡᠳ ᠦ᠋ᠨ ᠬᠦᠵᠦᠭᠦᠨ ᠰᠠᠨᠳᠠᠯᠢᠲᠤ ᠬᠠᠭᠠᠨ ᠳ᠋ᠤᠷ ᠤᠯᠠᠮᠵᠢᠯᠠᠨ ᠵᠢᠴᠢ ᠡᠩ ᠲᠡᠷᠢᠭᠦᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠪᠥᠷᠲᠡ ᠴᠢᠨᠣᠠ ᠠ᠋ᠴᠠ ᠡᠨᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠪᠣᠯᠤᠭᠰᠠᠭᠠᠷ ᠮᠢᠨᠦ ᠪᠡᠶᠡ ᠳ᠋ᠦ᠍ᠷ ᠬᠦᠷᠲᠡᠯᠡ ᠬᠣᠷᠢᠨ ᠲᠠᠪᠤᠨ ᠦᠶᠡ ᠪᠣᠯᠲᠠᠯᠠ᠂ ᠡᠮᠦᠨᠡ ᠬᠢᠲᠠᠳ ᠪᠠ ᠳᠠᠰᠢᠩ ᠤᠯᠤᠰ ᠲᠤᠷ ᠪᠣᠭᠣᠯ ᠪᠣᠯᠤᠨ ᠳᠠᠭᠠᠭᠰᠠᠨ ᠭᠠᠵᠠᠷ ᠣᠭᠲᠣ ᠦᠭᠡᠢ ᠪᠥᠭᠡᠲᠡᠯᠡ ᠳᠤᠮᠳᠠᠳᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠶᠠᠭᠠᠬᠢᠨ ᠨᠠᠮᠠᠶ᠋ᠢ ᠪᠣᠭᠣᠯ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠠᠳᠠᠯᠢᠬᠠᠨ ᠦᠵᠡᠵᠦ ᠪᠣᠯᠬᠤ ᠠᠵᠢ ! ᠪᠢ ᠴᠦ᠍ ᠮᠥᠨ ᠶᠠᠮᠪᠠᠷ ᠠᠶᠤᠮᠰᠢᠭ ᠦᠭᠡᠢ ᠤᠷᠢᠳᠤᠰ ᠡᠪᠦᠭᠡᠳ ᠦ᠋ᠨ ᠪᠠᠢᠭᠤᠯᠤᠭᠰᠠᠨ ᠤᠯᠤᠰ ᠲᠥᠷᠥ ᠶ᠋ᠢ ᠬᠦᠯᠢᠶᠡᠨ ᠡᠵᠡᠯᠡᠵᠦ ᠪᠠᠢᠭᠠᠳ ᠳᠡᠭᠡᠳᠦᠰ ᠦ᠋ᠨ ᠶᠠᠰᠤᠨ ᠢ᠋ ᠱᠠᠷᠭᠢᠷᠠᠭᠤᠯᠤᠨ ᠲᠠᠨ ᠤ᠋ ᠤᠯᠤᠰ ᠲᠤᠷ ᠪᠣᠭᠣᠯᠴᠢᠯᠠᠵᠤ ᠪᠣᠯᠤᠮᠤᠢ ! ᠳᠡᠭᠡᠳᠦ ᠡᠪᠦᠭᠡᠳ ᠦ᠋ᠨ ᠶᠠᠰᠤᠨ ᠢ᠋ ᠱᠠᠷᠭᠢᠷᠠᠭᠤᠯᠤᠨ ᠰᠦᠯᠳᠡ ᠶ᠋ᠢ ᠭᠤᠲᠤᠭᠠᠬᠤ ᠶ᠋ᠢ ᠪᠢ ᠦᠯᠦ ᠴᠢᠳᠠᠮᠤᠢ !》 ᠭᠡᠮᠡᠨ ᠵᠦᠭᠡᠷ ᠬᠠᠷᠢ ᠵᠣᠴᠢᠨ ᠤ᠋ ᠶᠣᠰᠣᠭᠠᠷ ᠵᠣᠯᠭᠠᠯᠳᠤᠬᠤᠢ ᠳ᠋ᠤᠷ ᠸᠧᠢ ᠸᠠᠩ ᠶᠦᠩ ᠶ᠋ᠢᠢ ᠠᠭᠤᠷ ᠴᠢᠭᠯᠡᠷᠡᠪᠡᠴᠦ ᠲᠠᠢᠽᠦ ᠶ᠋ᠢᠨ ᠥᠴᠢᠬᠦ ᠢᠨᠦ ᠮᠥᠨ ᠵᠦᠢ ᠪᠥᠭᠡᠳ ᠪᠠᠰᠠ ᠨᠢᠳᠦ ᠡᠷᠭᠦᠨ ᠦᠵᠡᠬᠦᠯᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠦ᠌ ᠭᠤᠷᠪᠠᠨ ᠬᠦᠯᠦᠭ᠂ ᠳᠥᠷᠪᠡᠨ ᠳᠡᠭᠦᠦ᠂ ᠵᠢᠷᠭᠤᠭᠠᠨ ᠰᠠᠢᠳ᠂ ᠶᠢᠰᠦᠨ ᠡᠩ ᠦ᠋ᠨ ᠵᠡᠷᠭᠡ ᠶ᠋ᠢᠨ ᠣᠯᠠᠨ ᠰᠠᠢᠳ ᠲᠦᠰᠢᠮᠡᠳ ᠢᠨᠦ ᠬᠣᠶᠠᠷ ᠠᠢᠮᠠᠭᠯᠠᠨ ᠬᠠᠷᠢᠶᠠᠴᠠᠢ ᠶ᠋ᠢᠨ ᠵᠢᠭᠦᠷ ᠮᠡᠲᠦ ᠵᠠᠭᠰᠠᠭᠠᠭᠰᠠᠨ ᠠᠨᠤ᠂ ᠵᠠᠬᠠ ᠳᠠᠷᠠᠭᠠᠯᠠᠨ ᠴᠥᠮ ᠴᠣᠯᠭᠣᠷᠠᠭᠰᠠᠨ ᠣᠳᠣᠳ ᠤ᠋ᠨ ᠬᠡᠲᠦᠢᠳᠦᠭᠰᠡᠨ ᠨᠤᠭᠤᠯᠬᠤ ᠪᠠᠢᠳᠠᠯ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠳᠣᠲᠣᠷᠠ ᠠᠶᠤᠨ ᠲᠦᠭᠰᠢᠵᠦ ᠴᠠᠷᠭᠢᠯᠲᠤᠨ ᠪᠤᠯᠢᠶᠠᠯᠳᠤᠵᠤ ᠮᠥᠨ ᠴᠢᠳᠠᠬᠤ ᠦᠭᠡᠢ᠂ ᠠᠷᠭᠠ ᠦᠭᠡᠢ ᠵᠣᠴᠢᠨ ᠤ᠋ ᠰᠠᠭᠤᠳᠠᠯ ᠳ᠋ᠤᠷ ᠰᠠᠭᠤᠵᠤ ᠢᠷᠡᠭᠰᠡᠨ ᠤᠴᠢᠷ ᠲᠤᠬᠠᠢ ᠪᠠᠨ ᠬᠡᠯᠡᠵᠦ ᠡᠷᠭᠦᠮᠵᠢᠯᠡᠨ ᠱᠠᠩᠨᠠᠬᠤ ᠰᠢᠯᠲᠠᠭᠠᠨ ᠢ᠋ ᠥᠭᠦᠯᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠬᠥᠩᠭᠡᠮᠰᠦᠭᠯᠡᠨ ᠮᠠᠷᠭᠤᠵᠤ ᠥᠭᠦᠯᠡᠷᠦᠨ᠄ 《ᠨᠠᠳᠠ ᠳ᠋ᠤᠷ ᠡᠷᠳᠡᠮ ᠴᠢᠳᠠᠯ ᠦᠭᠡᠢ᠂ ᠣᠶᠤᠨ ᠶᠠᠪᠤᠳᠠᠯ ᠮᠥᠴᠢᠳ ᠪᠥᠭᠡᠲᠡᠯᠡ ᠡᠷᠭᠢᠨ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠲᠠᠨ ᠤ᠋ ᠡᠵᠡᠨ ᠡᠨᠡ ᠮᠡᠲᠦ ᠬᠦᠨᠳᠦ ᠪᠡᠷ ᠦᠵᠡᠵᠦ ᠡᠳᠡᠭᠡᠷ ᠵᠦᠢᠯ ᠦ᠋ᠨ ᠡᠷᠭᠦᠮᠵᠢᠯᠡᠯ ᠬᠡᠰᠢᠭ ᠢ᠋ ᠢᠯᠡᠭᠡᠭᠰᠡᠨ ᠢᠨᠤ ᠦᠨᠡᠬᠡᠷ ᠪᠠᠶᠠᠷᠯᠠᠨ ᠲᠠᠯᠠᠷᠬᠠᠵᠤ ᠪᠠᠷᠠᠰᠢ ᠦᠭᠡᠢ᠃ ᠭᠠᠭᠴᠠ ᠮᠠᠨ ᠤ᠋ ᠡᠨᠡ ᠬᠣᠢᠲᠤ ᠭᠠᠵᠠᠷ ᠬᠡᠮᠡᠭᠴᠢ ᠡᠷᠲᠡᠨ ᠡᠴᠡ ᠢᠨᠠᠭᠰᠢ ᠰᠢᠯᠤᠭᠤᠨ ᠦᠨᠡᠨᠴᠢ ᠶ᠋ᠢ ᠰᠠᠬᠢᠯ ᠪᠣᠯᠭᠠᠳᠠᠭ ᠲᠤᠯᠠ ᠬᠣᠭᠣᠰᠣᠨ ᠨᠡᠷᠡ ᠬᠥᠨᠳᠡᠢ ᠡᠷᠭᠦᠮᠵᠢᠯᠡᠯ ᠢ᠋ ᠡᠷᠬᠢᠯᠡᠬᠦ ᠦᠭᠡᠢ᠂ ᠨᠡᠩ ᠪᠠᠰᠠ ᠮᠢᠨᠦ ᠡᠨᠡ ᠪᠠᠭᠠ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠡᠷᠬᠡᠪᠰᠢ ᠪᠠᠲᠤ ᠰᠢᠯᠤᠭᠤᠨ ᠴᠢᠬᠡᠴᠢ ᠦᠨᠡᠨᠴᠢ ᠶ᠋ᠢ ᠣᠨᠣᠯ ᠪᠣᠯᠭᠠᠳᠠᠭ ᠲᠤᠯᠠ ᠲᠡᠳᠡᠭᠡᠷ ᠠᠯᠲᠠᠨ ᠰᠤᠪᠤᠳ ᠤ᠋ᠨ ᠶᠠᠩᠵᠤᠯᠠᠬᠤ ᠴᠢᠮᠡᠭᠯᠡᠬᠦ ᠶ᠋ᠢ ᠶᠡᠬᠡᠳᠡ ᠴᠡᠭᠡᠷᠯᠡᠬᠦᠢ ᠶ᠋ᠢᠨ ᠣᠴᠢᠷᠠ᠂ ᠬᠡᠳᠦᠢᠪᠡᠷ ᠰᠢᠷᠠ ᠠᠯᠲᠠᠨ ᠥᠩᠭᠡᠲᠦ ᠲᠣᠷᠭᠠ᠂ ᠭᠡᠷᠡᠯᠲᠦ ᠰᠤᠪᠤᠳ᠂ ᠰᠠᠢᠬᠠᠨ ᠬᠠᠰ ᠪᠠᠢᠪᠠᠴᠤ ᠣᠭᠲᠣᠬᠠᠨ ᠴᠤ᠌ ᠬᠡᠷᠡᠭᠯᠡᠬᠦ ᠭᠠᠵᠠᠷ ᠦᠭᠡᠢ᠃ ᠡᠷᠭᠢᠨ ᠳᠡᠭᠡᠳᠦ ᠤᠯᠤᠰ ᠲᠠᠯᠠᠭᠠᠷ ᠰᠡᠳᠬᠢᠯ ᠰᠦᠢᠳᠬᠡᠵᠦ ᠶᠠᠭᠤ ᠬᠢᠬᠦ ᠪᠣᠢ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠳᠠᠷᠤᠢ ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠵᠠᠩ ᠢ᠋ᠶ᠋ᠠᠷ ᠶᠣᠰᠣᠯᠠᠯ ᠬᠥᠭᠵᠢᠮ ᠦ᠋ᠨ ᠬᠡᠪ ᠳᠦᠷᠢᠮ ᠪᠠ ᠲᠠᠮᠠᠭᠠ ᠡᠷᠭᠦᠮᠵᠢᠯᠡᠯ ᠦ᠋ᠨ ᠡᠷᠭᠢᠨ ᠥᠨᠳᠥᠷ ᠬᠢᠭᠡᠳ ᠠᠯᠲᠠᠨ ᠲᠣᠷᠭᠠ ᠶ᠋ᠢᠨ ᠳᠦᠷᠢᠮ ᠳᠦᠷᠰᠦ᠂ ᠬᠠᠰ ᠰᠤᠪᠤᠳ ᠤ᠋ᠨ ᠴᠤᠬᠠᠭ ᠦᠨᠡᠲᠡᠢ ᠶ᠋ᠢ ᠨᠢᠭᠡᠨ ᠵᠡᠷᠭᠡ ᠲᠣᠭᠠᠴᠢᠨ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠪᠠᠰᠠ ᠥᠴᠦᠬᠡᠨ ᠮᠦᠰᠢᠶᠡᠵᠦ ᠬᠠᠷᠢᠭᠤ ᠥᠭᠦᠯᠡᠷᠦᠨ᠄《 ᠮᠠᠨ ᠤ᠋ ᠪᠢᠲᠡᠭᠦᠯᠢᠭ ᠤᠯᠤᠰ ᠲᠤᠷ ᠬᠠᠷᠢᠨ ᠡᠳᠡᠭᠡᠷ ᠢ᠋ ᠣᠭᠲᠣ ᠮᠡᠳᠡᠬᠦ ᠦᠭᠡᠢ᠂ ᠭᠠᠭᠴᠠ ᠬᠢᠴᠢᠶᠡᠬᠦ ᠢᠨᠤ ᠡᠵᠡᠨ ᠢᠨᠤ ᠢᠲᠡᠭᠡᠮᠵᠢ ᠲᠡᠢ ᠪᠡᠷ ᠡᠨᠡᠷᠢᠬᠦ᠂ ᠰᠠᠢᠳ ᠠᠨᠤ ᠴᠢᠬᠡᠴᠢ ᠪᠡᠷ ᠵᠢᠳᠬᠦᠬᠦ᠂ ᠡᠷᠢᠬᠦ ᠢᠨᠤ ᠤᠯᠤᠰ ᠠᠢᠮᠠᠭ᠂ ᠬᠦᠰᠡᠬᠦ ᠢᠨᠤ ᠭᠠᠵᠠᠷ ᠣᠷᠣᠨ ᠪᠣᠯᠠᠢ ᠃ ᠬᠡᠷᠪᠡ ᠡᠵᠡᠨ ᠢᠨᠤ ᠬᠣᠪᠳᠣᠭ ᠤᠵᠢᠳ᠂ ᠲᠦᠰᠢᠮᠡᠯ ᠢᠨᠤ ᠵᠠᠯᠢᠬᠠᠢ ᠵᠢᠰᠤᠷ ᠪᠣᠯᠤᠭᠠᠳ ᠡᠷᠢᠬᠦ ᠢᠨᠤ ᠡᠳ᠋ ᠠᠰᠢᠭ᠂ ᠬᠦᠰᠡᠬᠦ ᠢᠨᠤ ᠵᠢᠷᠭᠠᠯ ᠴᠡᠩᠭᠡᠯ ᠪᠣᠯᠪᠠᠰᠤ ᠬᠡᠳᠦᠢ ᠲᠡᠳᠡᠭᠡᠷ ᠲᠠᠮᠠᠭᠠ ᠡᠷᠭᠦᠮᠵᠢᠯᠡᠯ ᠪᠠ ᠠᠯᠲᠠᠨ ᠲᠣᠷᠭᠠ ᠪᠠᠢᠪᠠᠰᠤ ᠡᠭᠡᠨᠡᠭᠲᠡ ᠶᠠᠭᠤᠨ ᠤ᠋ ᠲᠤᠰᠠ ᠠᠵᠢ ! ᠭᠡᠳᠡᠷᠭᠦ ᠬᠠᠷᠢᠨ ᠳᠣᠣᠷᠠᠳᠤᠰ ᠢ᠋ ᠤᠷᠠᠨ ᠵᠠᠯᠢᠬᠠᠢ ᠪᠠᠷ ᠥᠨᠳᠥᠷ ᠡᠷᠬᠢᠮ ᠢ᠋ ᠡᠷᠡᠭᠡᠯᠵᠡᠭᠦᠯᠦᠨ᠂ ᠭᠠᠵᠢᠭᠤ ᠲᠠᠰᠢᠮᠠᠭᠠᠢ ᠪᠠᠷ ᠤᠳᠤᠷᠢᠳᠬᠤ ᠦᠨᠳᠦᠰᠦ ᠡᠭᠦᠰᠬᠡᠯ ᠪᠣᠯᠣᠮᠢ᠃ ᠤᠯᠤᠰ ᠢ᠋ᠶ᠋ᠠᠨ ᠥᠰᠬᠡᠵᠦ ᠣᠯᠠᠨ ᠢ᠋ᠶ᠋ᠠᠨ ᠠᠮᠤᠵᠢᠭᠤᠯᠬᠤ᠂ ᠲᠥᠷᠥ ᠪᠡᠨ ᠲᠦᠪᠰᠢᠳᠬᠡᠵᠦ ᠲᠦᠮᠡᠨ ᠢ᠋ᠶ᠋ᠡᠨ ᠵᠢᠷᠭᠠᠭᠤᠯᠬᠤ᠂ ᠪᠣᠯᠬᠢ ᠪᠢᠲᠡᠭᠦᠯᠢᠭ ᠨᠠᠳᠠ ᠳ᠋ᠤᠷ ᠲᠡᠳᠡᠭᠡᠷ ᠲᠠᠮᠠᠬᠠ ᠲᠡᠮᠳᠡᠭ᠂ ᠡᠷᠭᠦᠮᠵᠢ ᠴᠣᠯᠠ᠂ ᠠᠯᠲᠠᠨ ᠲᠣᠷᠭᠠ᠂ ᠬᠠᠰ ᠰᠤᠪᠤᠳ ᠣᠭᠲᠣ ᠬᠡᠷᠡᠭ ᠦᠭᠡᠢ ᠪᠣᠯᠠᠢ ! 》 ᠬᠡᠮᠡᠭᠡᠳ ᠡᠯᠡ ᠵᠦᠢᠯ ᠢ᠋ ᠢᠨᠤ ᠥᠴᠦᠬᠡᠨ ᠴᠦ᠍ ᠠᠪᠬᠤ ᠦᠭᠡᠢ ᠪᠡᠷ ᠰᠠᠢᠨ ᠰᠡᠳᠬᠢᠯ ᠦ᠋ᠨ ᠬᠠᠷᠢᠭᠤ ᠳ᠋ᠤᠷ ᠰᠠᠢᠬᠠᠨ ᠬᠤᠷᠢᠮ ᠬᠤᠷᠢᠮᠯᠠᠬᠤᠶᠠ᠂ ᠱᠠᠪᠠᠩ ᠬᠥᠭᠵᠢᠮ ᠡᠭᠦᠰᠬᠡᠯᠭᠡᠬᠦ ᠶ᠋ᠢ ᠵᠣᠭᠰᠣᠭᠠᠵᠤ ᠶᠦᠩ ᠵᠢᠢ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ᠄ 《 ᠮᠠᠨ ᠤ᠋ ᠤᠮᠠᠷᠠᠲᠤ ᠪᠢᠲᠡᠭᠦᠯᠢᠭ ᠭᠠᠵᠠᠷ ᠲᠤᠷ ᠲᠠᠨ ᠤ᠋ ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠮᠡᠲᠦ ᠤᠷᠠᠨ ᠨᠠᠷᠢᠨ ᠪᠥᠵᠢᠭ᠂ ᠨᠠᠭᠠᠳᠤᠮ ᠤ᠋ᠨ ᠶᠠᠩᠵᠤᠯᠠᠬᠤ ᠴᠢᠮᠡᠭᠯᠡᠬᠦ ᠬᠥᠷ ᠨᠠᠢᠷ ᠦᠭᠡᠢ᠂ ᠬᠡᠳᠦᠢᠪᠡᠷ ᠬᠡᠳᠦᠨ ᠵᠦᠢᠯ ᠦ᠋ᠨ ᠬᠤᠭᠤᠷ ᠴᠣᠭᠣᠷ᠂ ᠶᠠᠲᠤᠭᠠ ᠪᠢᠰᠬᠢᠭᠦᠷ ᠦ᠋ᠨ ᠬᠥᠭ ᠳᠠᠭᠤᠨ ᠪᠠᠢᠪᠠᠴᠤ ᠶᠡᠷᠦ ᠶ᠋ᠢᠨ ᠬᠥᠭᠵᠢᠮ᠂ ᠶᠡᠷᠦ ᠭᠠᠢᠬᠠᠯᠲᠠᠢ ᠭᠠᠵᠠᠷ ᠠᠨᠤ ᠦᠭᠡᠢ᠃ ᠲᠡᠢᠨ ᠬᠦ᠌ ᠳᠡᠭᠡᠳᠦ ᠤᠯᠤᠰ ᠤ᠋ᠨ ᠡᠷᠬᠢᠮ ᠲᠦᠰᠢᠮᠡᠯ ᠢ᠋ ᠥᠪᠡᠷᠡ ᠬᠦᠨᠳᠦᠯᠡᠬᠦ ᠰᠠᠢᠨ ᠶᠠᠭᠤᠮᠠ ᠦᠭᠡᠢ᠂ ᠣᠳᠣ ᠭᠠᠭᠴᠠ ᠪᠢᠲᠡᠭᠦᠯᠢᠭ ᠮᠢᠨᠦ ᠡᠩ ᠦ᠋ᠨ ᠡᠳᠦᠷ ᠡᠷᠬᠢᠯᠡᠳᠡᠭ ᠤᠯᠤᠰ ᠲᠥᠷᠥ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠢ᠋ᠶ᠋ᠡᠷ ᠡᠷᠭᠢᠨ ᠲᠦᠰᠢᠮᠡᠯ ᠦ᠋ᠨ ᠨᠢᠳᠦᠨ ᠢ᠋ ᠰᠡᠷᠭᠦᠭᠡᠨ᠂ ᠬᠤᠷᠢᠮ ᠤ᠋ᠨ ᠬᠥᠷ ᠨᠠᠢᠷ ᠪᠣᠯᠭᠠᠮᠤᠢ ᠶᠠ! 》 ᠬᠡᠮᠡᠭᠡᠳ ᠦᠷᠭᠦᠭᠡᠨ ᠦ᠌ ᠲᠣᠭᠤᠷᠭᠠᠨᠠ ᠡᠯᠭᠦᠭᠰᠡᠨ ᠠᠷᠰᠯᠠᠨᠲᠤ ᠰᠠᠭᠠᠳᠠᠭ ᠠ᠋ᠴᠠ ᠨᠢᠭᠡᠨ ᠠᠯᠲᠠᠨ ᠲᠣᠭᠣᠨᠣᠪᠲᠤ ᠵᠡᠪᠡ ᠶ᠋ᠢ ᠰᠤᠭᠤᠯᠤᠭᠤᠯᠵᠤ᠂ ᠣᠶᠤᠲᠤ ᠰᠡᠴᠡᠨ ᠢ᠋ᠶ᠋ᠡᠷ ᠵᠢᠨᠦᠩ ᠮᠤᠬᠤᠯᠢ ᠳ᠋ᠤᠷ ᠢᠯᠡᠭᠡᠮᠡᠭᠴᠡ ᠭᠡᠨᠡᠳᠲᠡ ᠵᠢᠨᠦᠩ ᠦ᠋ᠨ ᠥᠨᠳᠥᠷ ᠲᠠᠭᠲᠤ ᠶ᠋ᠢᠨ ᠪᠠᠷᠰ ᠤ᠋ᠨ ᠴᠠᠴᠠᠷ ᠲᠤᠷ ᠶᠡᠬᠡ ᠵᠡᠰ ᠪᠦᠷᠢᠶᠡ ᠲᠠᠲᠠᠬᠤ ᠳᠠᠭᠤᠨ ᠭᠠᠷᠴᠤ ᠳᠦᠭᠦᠯᠡ ᠮᠥᠷᠡᠨ ᠦ᠌ ᠶᠡᠬᠡ ᠲᠠᠯᠠ ᠶ᠋ᠢᠨ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠠ᠋ᠴᠠ ᠤᠯᠠᠭᠠᠨ ᠲᠣᠭᠣᠰᠣᠨ ᠲᠡᠭᠷᠢ ᠳ᠋ᠦ᠍ᠷ ᠲᠤᠯᠲᠠᠯᠠ ᠳᠡᠭᠳᠡᠵᠦ᠂ ᠲᠤᠭ ᠬᠢᠭᠢᠷᠢ ᠨᠠᠷᠠᠨ ᠢ᠋ ᠬᠠᠯᠬᠠᠯᠠᠲᠠᠯᠠ ᠵᠡᠷᠭᠡᠯᠡᠵᠦ ᠵᠢᠷᠭᠤᠭᠠᠨ ᠲᠦᠮᠡᠨ ᠰᠢᠳᠠᠷ ᠴᠡᠷᠢᠭ ᠴᠠᠭ ᠭᠱᠠᠨᠠ ᠨᠢᠳᠦᠨ ᠦ᠌ ᠡᠮᠦᠨᠡ ᠬᠤᠷᠠᠵᠤ ᠢᠷᠡᠭᠡᠳ ᠬᠤᠶᠠᠭ ᠳᠤᠭᠤᠯᠠᠭᠠ ᠨᠢᠳᠦᠨ ᠢ᠋ ᠭᠢᠯᠠᠰᠬᠠᠨ᠂ ᠵᠠᠷ ᠵᠡᠪᠰᠡᠭ ᠨᠡᠷᠡᠨᠡ ᠭᠢᠯᠪᠡᠯᠵᠡᠨ᠂ ᠰᠤᠮᠤᠨ ᠤ᠋ ᠥᠳᠥ ᠰᠢᠭᠤᠢ ᠮᠡᠲᠦ ᠬᠠᠷᠠᠯᠠᠵᠤ ᠴᠡᠷᠢᠭ ᠦ᠋ᠨ ᠳᠠᠯᠪᠠᠭᠠ ᠰᠣᠯᠣᠩᠭᠠ ᠠᠳᠠᠯᠢ ᠵᠡᠷᠭᠡᠯᠡᠨ᠂ ᠬᠣᠶᠠᠷ ᠡᠲᠡᠭᠡᠳ ᠵᠥᠷᠢᠭᠦᠯᠦᠨ ᠬᠣᠷᠢᠨ ᠭᠠᠵᠠᠷ ᠤᠷᠲᠤ ᠵᠢᠭᠰᠠᠭᠠᠨ ᠵᠣᠭᠰᠣᠭᠰᠠᠨ ᠳ᠋ᠤᠷ ᠲᠡᠷᠡ ᠴᠠᠭ ᠤ᠋ᠨ ᠰᠦᠷ ᠭᠡᠷᠡᠯ ᠲᠡᠰᠬᠡᠯ ᠦᠭᠡᠢ ᠬᠤᠷᠴᠠ ᠠᠶᠤᠮᠰᠢᠭᠲᠠᠢ᠃ ᠡᠭᠦᠨ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠢᠷᠡᠭᠰᠡᠨ ᠵᠠᠭᠤᠨ ᠢᠯᠡᠭᠦᠦ ᠳᠠᠭᠠᠭᠰᠠᠳ ᠪᠠ ᠵᠢᠴᠢ ᠸᠧᠢ ᠸᠠᠩ ᠶᠦᠩ ᠵᠢᠢ ᠶᠡᠬᠡᠯᠡ ᠠᠶᠤᠵᠤ ᠴᠢᠷᠠᠢ ᠠᠨᠤ ᠴᠥᠮ ᠰᠢᠷᠣᠢ ᠮᠡᠲᠦ ᠪᠣᠯᠤᠯᠴᠠᠵᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠡᠵᠡᠨ ᠳᠠᠭᠠᠭᠰᠠᠳ ᠨᠠᠷ ᠬᠠᠷᠢᠯᠴᠠᠨ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠨ ᠰᠢᠷᠲᠡᠯᠴᠡᠵᠦ᠂ ᠸᠧᠢ ᠸᠠᠩ ᠶᠦᠩ ᠵᠢᠢ ᠠᠷᠢᠬᠢᠨ ᠤ᠋ ᠬᠤᠨᠳᠠᠭᠠ ᠪᠠᠨ ᠭᠠᠷ ᠴᠡᠴᠡᠷᠬᠢᠯᠡᠨ ᠭᠠᠵᠠᠷ ᠲᠤᠷ ᠠᠯᠳᠠᠭᠠᠳ ᠮᠡᠩᠳᠡᠨ ᠰᠡᠩᠳᠡᠨ ᠭᠦᠶᠦᠨ ᠪᠣᠰᠴᠤ ᠬᠣᠭᠣᠯᠠᠢ ᠴᠡᠴᠡᠷᠡᠨ ᠪᠡᠶᠡ ᠳᠠᠭᠵᠢᠵᠤ ᠲᠠᠢᠽᠦ ᠶ᠋ᠢᠨ ᠵᠦᠭ ᠬᠣᠣᠰ ᠡᠪᠦᠳᠦᠭ ᠢ᠋ᠶ᠋ᠡᠷ ᠬᠦᠰᠡᠷᠡ ᠲᠦᠰᠬᠢᠲᠡᠯᠡ ᠰᠥᠭᠥᠳᠴᠦ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠯᠡ ᠰᠣᠴᠢᠵᠤ᠂ ᠡᠨᠡ ᠶᠠᠭᠠᠬᠢᠭᠰᠠᠨ ᠪᠣᠢ ᠭᠡᠮᠡᠨ ᠶᠠᠭᠠᠷᠠᠨ ᠭᠦᠶᠦᠨ ᠢᠷᠡᠵᠦ ᠶᠦᠩ ᠵᠢᠢ ᠶ᠋ᠢ ᠲᠡᠳᠬᠦᠨ ᠪᠣᠰᠬᠠᠵᠤ ᠮᠦᠰᠢᠶᠡᠨ ᠥᠭᠦᠯᠡᠷᠦᠨ᠄ 《 ᠡᠷᠭᠢᠨ ᠸᠠᠩ ᠡᠨᠡ ᠬᠡᠷᠬᠢᠭᠰᠡᠨ ᠪᠣᠢ? ᠶᠠᠭᠤᠨ ᠳ᠋ᠤᠷ ᠪᠢᠲᠡᠭᠦᠯᠢᠭ ᠨᠠᠮᠠᠶ᠋ᠢ ᠡᠢᠨ ᠬᠦ᠌ ᠪᠤᠰᠤᠴᠢᠯᠠᠨ ᠦᠵᠡᠵᠦ ᠰᠡᠵᠢᠭᠯᠡᠮᠦᠢ ? ᠮᠢᠨᠦ ᠡᠨᠡ ᠢᠨᠦ ᠣᠭᠲᠣᠬᠠᠨ ᠴᠤ᠌ ᠥᠪᠡᠷᠡ ᠰᠡᠳᠬᠢᠯ ᠦᠭᠡᠢ᠂ ᠨᠢᠭᠡᠨ ᠳ᠋ᠦ᠍ᠷ ᠡᠷᠭᠢᠨ ᠸᠠᠩ ᠴᠢᠨᠦ ᠰᠡᠳᠬᠢᠯ ᠢ᠋ ᠰᠡᠷᠭᠦᠭᠡᠨ ᠨᠢᠳᠦᠨ ᠢ᠋ ᠪᠠᠶᠠᠰᠬᠠᠨ᠂ ᠪᠣᠯᠬᠢ ᠤᠯᠤᠰ ᠤ᠋ᠨ ᠬᠦᠨᠳᠦᠯᠡᠯ ᠢ᠋ ᠭᠦᠢᠴᠡᠳᠬᠡᠶᠡ᠃ ᠬᠣᠶᠠᠷ ᠲᠤᠷ ᠪᠢᠲᠡᠭᠦᠯᠢᠭ ᠨᠠᠳᠠ ᠳ᠋ᠤᠷ ᠮᠥᠨ ᠬᠡᠳᠦᠨ ᠲᠦᠰᠢᠮᠡᠯ ᠪᠣᠢ᠂ ᠲᠡᠳᠡᠨ ᠢ᠋ ᠬᠤᠷᠢᠶᠠᠵᠤ ᠡᠷᠬᠢᠮ ᠤᠯᠤᠰ ᠠ᠋ᠴᠠ ᠬᠦᠨᠳᠦᠳᠬᠡᠨ ᠬᠦᠷᠲᠡᠭᠡᠭᠰᠡᠨ ᠢ᠋ ᠬᠡᠷᠬᠢᠨ ᠬᠠᠷᠢᠭᠤᠯᠠᠬᠤ ᠶ᠋ᠢ ᠡᠷᠭᠢᠨ ᠸᠠᠩ ᠴᠢᠮᠠᠶ᠋ᠢ ᠪᠠᠢᠲᠠᠯᠠ ᠳᠠᠷᠤᠢ ᠵᠥᠪᠯᠡᠨ ᠲᠣᠭᠲᠠᠭᠠᠶᠠ ᠭᠡᠮᠡᠨ ᠵᠠᠷᠯᠠᠭᠰᠠᠨ ᠪᠥᠯᠥᠭᠡ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠰᠠᠶᠢ ᠰᠡᠳᠬᠢᠯ ᠠᠮᠠᠷᠠᠵᠤ ᠴᠢᠷᠠᠢ ᠲᠣᠬᠣᠷᠤᠨ ᠰᠡᠮᠡᠬᠡᠷ ᠤᠷᠲᠤ ᠨᠢᠭᠡᠨᠲᠡ ᠰᠣᠢᠯᠠᠵᠤ ᠬᠣᠢᠰᠢ ᠤᠬᠤᠷᠢᠨ ᠰᠠᠭᠤᠳᠠᠯ ᠳ᠋ᠤᠷ ᠰᠠᠭᠤᠪᠠ᠃ ᠳᠠᠭᠠᠭᠰᠠᠨ ᠠᠷᠠᠳ ᠡᠭᠡᠨᠡᠭᠲᠡ ᠠᠶᠤᠨ ᠴᠡᠴᠡᠷᠬᠢᠯᠡᠮᠦᠢ᠃
ᠲᠡᠳᠦᠢ ᠲᠠᠢᠽᠦ ᠶᠦᠩ ᠵᠢᠢ ᠶ᠋ᠢ ᠲᠣᠬᠣᠷᠤᠭᠤᠯᠤᠨ ᠥᠭᠦᠯᠡᠷᠦᠨ᠄ 《ᠡᠷᠭᠢᠨ ᠸᠠᠩ ᠰᠡᠵᠢᠭ ᠪᠢᠲᠡᠭᠡᠢ ᠲᠥᠷᠥ᠂ ᠰᠠᠢᠨ ᠡᠷᠡ ᠬᠣᠯᠠ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢ ᠦᠯᠦ ᠳᠠᠷᠤᠯᠠᠮᠤᠢ᠂ ᠪᠢ ᠪᠢᠲᠡᠭᠦᠯᠢᠭ ᠪᠣᠯᠪᠠᠴᠤ ᠡᠬᠡᠨᠡᠷ ᠦ᠋ᠨ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠦᠯᠦ ᠶᠠᠪᠤᠮᠤᠢ !》 ᠬᠡᠮᠡᠵᠦ ᠠᠷᠰᠯᠠᠨᠲᠤ ᠬᠢᠭᠢᠷᠢ ᠶ᠋ᠢ ᠳᠠᠯᠠᠯᠤᠭᠤᠯᠵᠤ ᠣᠯᠠᠨ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ᠂ ᠵᠥᠪᠰᠢᠶᠡᠯ ᠦ᠋ᠨ ᠰᠠᠢᠳ ᠢ᠋ ᠠᠷᠰᠯᠠᠨᠲᠤ ᠥᠷᠭᠥᠭᠡ ᠳ᠋ᠦ᠍ᠷ ᠳᠡᠪᠰᠢᠭᠦᠯᠵᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠳᠡᠭᠡᠷ ᠤᠴᠢᠷ ᠢ᠋ ᠬᠡᠯᠡᠵᠦ ᠵᠥᠪᠳᠡᠨ ᠠᠰᠠᠭᠤᠪᠠᠰᠤ᠂ ᠵᠢᠨᠦᠩ ᠮᠤᠬᠤᠯᠢ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ᠄ 《ᠪᠢᠳᠡᠨ ᠦ᠌ ᠡᠵᠡᠨ ᠶᠡᠷᠦ ᠡᠮᠦᠨᠡ ᠬᠢᠲᠠᠳ ᠤᠯᠤᠰ ᠲᠤᠷ ᠪᠣᠭᠣᠯᠴᠢᠯᠠᠭᠰᠠᠨ ᠭᠠᠵᠠᠷ ᠦᠭᠡᠢ᠂ ᠲᠡᠳᠡᠨ ᠦ᠌ ᠡᠷᠭᠦᠮᠵᠢᠯᠡᠯ ᠊ᠢ ᠬᠡᠷᠬᠢᠨ ᠬᠦᠯᠢᠶᠡᠵᠦ ᠪᠣᠯᠬᠤ? ᠡᠵᠡᠨ ᠦ᠌ ᠮᠢᠨᠦ ᠡᠭᠡᠭᠦᠯᠦᠭᠰᠡᠨ ᠢᠨᠤ ᠮᠠᠰᠢ ᠵᠣᠬᠢᠭᠰᠠᠨ ᠪᠣᠯᠠᠢ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠡᠭᠦᠨ ᠡᠲᠡᠭᠡᠳ ᠦ᠋ᠨ ᠲᠡᠷᠢᠭᠦᠯᠡᠭᠰᠡᠨ ᠰᠠᠢᠳ -- ᠤᠯᠤᠰ ᠤ᠋ᠨ ᠨᠠᠭᠠᠴᠤ ᠲᠠᠢ ᠰᠡᠴᠡᠨ ᠦ᠌ ᠬᠠᠵᠠᠭᠤ ᠠ᠋ᠴᠠ ᠲᠣᠷᠭᠠᠨ ᠰᠢᠷᠠ ᠲᠠᠪᠰᠢᠨ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ᠄ 《 ᠬᠡᠳᠦᠢᠪᠡᠷ ᠲᠡᠢᠨ ᠪᠣᠯᠪᠠᠴᠤ ᠬᠣᠯᠠ ᠳ᠋ᠠᠬᠢ ᠶᠡᠬᠡ ᠤᠯᠤᠰ ᠤ᠋ᠨ ᠰᠠᠢᠨ ᠢ᠋ᠶ᠋ᠠᠷ ᠡᠷᠢᠵᠦ ᠦᠵᠡᠭᠰᠡᠨ ᠢ᠋ ᠲᠡᠰᠡᠷᠭᠦᠯᠡᠨ ᠦᠲᠡᠭᠡᠷᠬᠦ ᠢᠨᠤ ᠠᠷᠠᠢᠬᠠᠨ ᠬᠡᠷᠴᠡᠭᠡᠢ ᠪᠣᠯᠬᠤ ᠪᠥᠭᠡᠳ ᠪᠠᠰᠠ ᠬᠣᠢᠴᠢ ᠡᠳᠦᠷ ᠦ᠋ᠨ ᠬᠣᠯᠠ ᠳ᠋ᠠᠬᠢ ᠤᠯᠤᠰ ᠤ᠋ᠨ ᠡᠷᠢᠨ ᠢᠷᠡᠬᠦ ᠵᠠᠮ ᠢ᠋ ᠲᠠᠰᠤᠯᠤᠭᠤᠵᠠᠢ ᠭᠡᠮᠡᠨ ᠰᠠᠨᠠᠭᠳᠠᠮᠤᠢ᠃ ᠲᠡᠢᠨ ᠬᠦ᠌ ᠲᠡᠭᠦᠨ ᠦ᠌ ᠡᠷᠭᠦᠮᠵᠢᠯᠡᠯ ᠢ᠋ ᠬᠦᠯᠢᠶᠡᠨ ᠡᠰᠡ ᠠᠪᠤᠪᠠᠰᠤ᠂ ᠲᠡᠭᠦᠨ ᠦ᠌ ᠶᠣᠰᠣᠲᠤ ᠪᠡᠯᠡᠭ ᠢ᠋ ᠢᠨᠤ ᠦᠯᠡᠳᠡᠭᠡᠨ ᠠᠪᠤᠪᠠᠰᠤ ᠵᠣᠬᠢᠨᠠᠮ ᠊ᠶᠠ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠥᠭᠦᠯᠡᠷᠦᠨ᠄ 《ᠬᠥᠮᠦᠨ ᠦ᠌ ᠡᠷᠭᠦᠮᠵᠢᠯᠡᠯ ᠢ᠋ ᠡᠰᠡ ᠬᠦᠯᠢᠶᠡᠨ ᠪᠥᠭᠡᠳ ᠬᠥᠮᠦᠨ ᠦ᠌ ᠡᠳ᠋ ᠢ᠋ ᠦᠯᠡᠳᠡᠭᠡᠪᠡᠰᠦ ᠬᠣᠪᠳᠣᠭ ᠥᠴᠦᠬᠡᠨ ᠡᠴᠡ ᠬᠡᠷᠬᠢᠨ ᠬᠡᠯᠲᠦᠷᠢᠵᠦ ᠪᠣᠯᠤᠮᠤᠢ᠃ 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠬᠠᠵᠠᠭᠤ ᠠ᠋ᠴᠠ ᠳᠡᠭᠦᠦ ᠢᠨᠤ ᠬᠠᠪᠤᠲᠤ ᠬᠠᠰᠠᠷ᠂ ᠪᠠᠰᠠ ᠰᠠᠢᠰᠢᠶᠠᠯ ᠤ᠋ᠨ ᠰᠠᠢᠳ ᠠ᠋ᠴᠠ ᠵᠡᠯᠮᠡ ᠬᠣᠶᠠᠭᠤᠯᠠ ᠵᠡᠷᠭᠡ ᠪᠡᠷ ᠭᠠᠷᠴᠤ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ᠄ 《 ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠪᠡᠯᠡᠭ ᠦ᠋ᠨ ᠬᠠᠷᠢᠭᠤ ᠪᠡᠯᠡᠭ ᠢᠯᠡᠭᠡᠪᠡᠰᠦ ᠨᠠᠢᠷ ᠭᠦᠢᠴᠡᠬᠦ ᠪᠣᠯᠠᠢ᠂ ᠡᠵᠡᠨ ᠮᠢᠨᠦ ᠨᠡᠢᠲᠡ ᠶ᠋ᠢ ᠦᠲᠡᠭᠡᠷᠪᠡᠰᠦ ᠬᠣᠯᠠ ᠳ᠋ᠠᠬᠢ ᠤᠯᠤᠰ ᠤ᠋ᠨ ᠡᠯᠢᠭᠡᠰᠢᠶᠡᠨ ᠦᠵᠡᠬᠦ ᠶ᠋ᠢ ᠠᠯᠳᠠᠭᠤᠵᠠᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠨᠢᠭᠡᠨ ᠰᠠᠨᠠᠭᠠᠨ ᠣᠯᠵᠤ ᠵᠢᠨᠦᠩ ᠮᠤᠬᠤᠯᠢ ᠠ᠋ᠴᠠ ᠠᠰᠠᠭᠤᠷᠤᠨ᠄ 《ᠵᠢᠨᠦᠩ ᠳᠠᠬᠢᠨ ᠰᠠᠨᠠᠵᠤ ᠦᠵᠡ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠷᠢᠭᠤ ᠬᠡᠷᠬᠢᠨ ᠬᠠᠷᠢᠭᠤᠯᠤᠮᠤᠢ ? 》 ᠮᠤᠬᠤᠯᠢ ᠡᠵᠡᠨ ᠦ᠌ ᠰᠠᠨᠠᠭᠠᠨ ᠢ᠋ ᠤᠬᠠᠵᠤ ᠮᠡᠳᠡᠭᠦᠯᠦᠷᠦᠨ᠄ 《ᠠᠯᠲᠠᠨ ᠤᠯᠤᠰ ᠡᠮᠦᠨᠡ ᠰᠥᠩ ᠤᠯᠤᠰ ᠠ᠋ᠴᠠ ᠦᠰ ᠠᠪᠬᠤ ᠶ᠋ᠢᠨ ᠤᠴᠢᠷ ᠠᠯᠤᠰ ᠮᠠᠨ ᠤ᠋ ᠤᠯᠤᠰ ᠢ᠋ ᠠᠷᠭᠠᠳᠠᠷᠠ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠪᠢᠳᠡ ᠲᠡᠭᠦᠨ ᠦ᠌ ᠤᠷᠠᠬᠠ ᠳ᠋ᠤᠷ ᠡᠰᠡ ᠣᠷᠣᠵᠤ᠂ ᠲᠡᠭᠦᠨ ᠦ᠌ ᠡᠷᠭᠦᠮᠵᠢᠯᠡᠯ ᠢ᠋ ᠡᠭᠡᠭᠦᠯᠵᠦ ᠪᠡᠯᠡᠭ ᠢ᠋ ᠦᠯᠡᠳᠡᠭᠡᠪᠡᠴᠦ ᠪᠠᠯᠩ ᠢ᠋ ᠢᠨᠤ ᠦᠨᠡᠨ ᠡᠷᠳᠡᠮᠲᠦ ᠴᠡᠷᠢᠭ ᠲᠦ᠍ᠷ ᠢ᠋ᠶ᠋ᠡᠨ ᠲᠦᠭᠡᠭᠡᠨ ᠥᠭᠴᠦ ᠢᠷᠡᠭᠰᠡᠨ ᠡᠯᠴᠢ ᠶ᠋ᠢᠨ ᠡᠮᠦᠨᠡ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠢ᠋ ᠦᠵᠡᠭᠦᠯᠰᠦᠭᠡᠢ᠃ ᠡᠢᠨ ᠬᠦ᠌ ᠲᠦᠭᠡᠭᠡᠳ ᠬᠠᠷᠢᠭᠤ ᠳ᠋ᠤᠷ ᠠᠨᠤ ᠢᠷᠡᠭᠰᠡᠨ ᠡᠳ᠋ ᠦ᠋ᠨ ᠬᠦᠷᠬᠦ ᠴᠢᠨᠡᠭᠡ ᠪᠡᠷ᠂ ᠡᠵᠡᠨ ᠲᠡᠳᠡᠨ ᠦ᠌ ᠰᠥᠩ ᠤᠯᠤᠰ ᠯᠤᠭᠠ ᠪᠠᠢᠯᠳᠤᠬᠤ ᠶ᠋ᠢ ᠰᠣᠨᠣᠰᠤᠭᠰᠠᠨ ᠲᠤᠯᠠ ᠲᠡᠳᠡᠨ ᠦ᠌ ᠴᠡᠷᠢᠭ ᠲᠦ᠍ᠷ ᠣᠷᠣᠰ ᠤᠯᠤᠰ ᠤ᠋ᠨ ᠵᠡᠪᠰᠡᠭ᠂ ᠵᠢᠴᠢ ᠮᠠᠨ ᠤ᠋ ᠭᠠᠵᠠᠷ ᠤ᠋ᠨ ᠮᠣᠷᠢ ᠪᠠᠷ ᠪᠡᠯᠡᠭ ᠬᠦᠷᠭᠡᠭᠦᠯᠪᠡᠰᠦ ᠡᠨᠡ ᠴᠣᠬᠣᠮ ᠲᠡᠳᠡᠨ ᠦ᠌ ᠴᠢᠬᠤᠯᠠ ᠬᠡᠷᠡᠭ ᠪᠣᠯᠠᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠮᠠᠰᠢᠳᠠ ᠰᠠᠢᠰᠢᠶᠠᠨ ᠵᠢᠨᠦᠩ ᠮᠢᠨᠦ ᠰᠠᠨᠠᠭᠠᠨ ᠢ᠋ ᠣᠨᠣᠪᠠ ᠭᠡᠮᠡᠨ ᠳᠠᠷᠤᠢ ᠸᠧᠢ ᠸᠠᠩ ᠶᠦᠩ ᠵᠢᠢ ᠶ᠋ᠢᠨ ᠵᠦᠭ ᠥᠭᠦᠯᠡᠷᠦᠨ᠄ 《 ᠪᠢᠲᠡᠭᠦᠯᠢᠭ ᠪᠢ ᠡᠷᠭᠢᠨ ᠤᠯᠤᠰ ᠤ᠋ᠨ ᠡᠷᠭᠦᠮᠵᠢᠯᠡᠯ ᠬᠡᠰᠢᠭ ᠢ᠋ ᠪᠦᠷᠢᠨᠡ ᠬᠦᠯᠢᠶᠡᠰᠦᠭᠡᠢ ᠬᠡᠮᠡᠬᠦᠯᠡ ᠮᠢᠨᠦ ᠳᠣᠣᠷᠠᠬᠢ ᠲᠦᠰᠢᠮᠡᠳ ᠨᠠᠷ ᠳᠠᠭᠠᠬᠤ ᠦᠭᠡᠢ᠂ ᠴᠥᠮ ᠡᠭᠡᠭᠦᠯᠰᠦᠭᠡᠢ ᠬᠡᠮᠡᠬᠦᠯᠡ ᠡᠷᠬᠢᠮ ᠤᠯᠤᠰ ᠤ᠋ᠨ ᠨᠢᠭᠤᠷ ᠲᠤᠷ ᠪᠠᠰᠠ ᠠᠷᠠᠢᠬᠠᠨ ᠮᠠᠭᠤᠬᠠᠢ ᠪᠣᠯᠵᠤ ᠤᠭ ᠰᠠᠢᠨ ᠰᠡᠳᠬᠢᠯ ᠳ᠋ᠦ᠍ᠷ ᠬᠠᠷᠰᠢᠬᠤ ᠶ᠋ᠢᠨ ᠲᠤᠯᠠ ᠪᠣᠯᠬᠢ ᠮᠢᠨᠦ ᠳᠣᠲᠣᠷᠠ ᠪᠠᠰᠠ ᠮᠠᠰᠢ ᠲᠦᠪᠳᠡᠬᠦ ᠦᠭᠡᠢ᠃ ᠲᠡᠢᠨ ᠬᠦ᠌ ᠪᠣᠯᠬᠢ ᠪᠢ ᠠᠳᠠᠪᠠᠰᠢ ᠲᠠᠲᠠᠭᠠᠯᠵᠠᠮᠤᠢ᠂ ᠬᠡᠷᠬᠢᠪᠡᠰᠦ ᠰᠠᠢᠨ ? 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠤᠭ ᠠ᠋ᠴᠠ ᠬᠣᠢᠲᠤ ᠡᠲᠡᠭᠡᠳ ᠊ᠢ ᠨᠠᠮᠬᠠᠷᠠᠭᠤᠯᠤᠷᠠ ᠢᠷᠡᠭᠰᠡᠨ ᠲᠤᠯᠠ ᠡᠳᠡᠨ ᠦ᠌ ᠤᠷᠠᠬᠠ ᠳ᠋ᠤᠷ ᠦᠯᠦ ᠣᠷᠣᠬᠤ ᠶ᠋ᠢ ᠦᠵᠡᠭᠡᠳ ᠡᠭᠡᠵᠦ ᠡᠴᠢᠪᠡᠰᠦ ᠵᠠᠷᠯᠢᠭ ᠢ᠋ ᠡᠭᠡᠭᠦᠯᠬᠦᠶᠡ ᠪᠡᠷᠬᠡ ᠳ᠋ᠦ᠍ᠷ ᠬᠠᠷᠠᠬᠠᠨ ᠪᠡᠭᠲᠡᠷᠦᠨ ᠵᠣᠪᠠᠬᠤᠶᠠ᠂ ᠡᠳᠦᠭᠡ ᠡᠢᠮᠦ ᠨᠢᠭᠡᠨ ᠠᠶᠠᠰ ᠳᠠᠢᠬᠠᠨ ᠦᠭᠡᠰ ᠢ᠋ ᠰᠣᠨᠣᠰᠤᠭᠠᠳ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠶᠠᠭᠠᠷᠠᠨ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠪᠣᠰᠴᠤ ᠠᠷᠢᠬᠢ ᠬᠢᠯᠭᠡᠨ ᠪᠠᠷᠢᠵᠤ ᠥᠭᠦᠯᠡᠷᠦᠨ᠄ 《ᠡᠨᠡ ᠢᠨᠤ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠶ᠋ᠢᠨ ᠮᠡᠷᠭᠡᠨ ᠭᠡᠭᠡᠬᠡᠨ ᠪᠣᠯᠠᠢ᠂ ᠵᠣᠬᠢᠰ ᠢ᠋ ᠢᠨᠤ ᠦᠵᠡᠬᠦ ᠪᠣᠯᠪᠠᠤ !》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠮᠥᠨ ᠶᠠᠭᠠᠷᠠᠨ ᠬᠠᠷᠢᠭᠤ ᠠᠷᠢᠬᠢ ᠪᠠᠷᠢᠵᠤ ᠥᠭᠦᠯᠡᠷᠦᠨ᠄ 《 ᠡᠷᠬᠢᠮ ᠤᠯᠤᠰ ᠤ᠋ᠨ ᠡᠨᠡ ᠮᠡᠲᠦ ᠳᠣᠲᠣᠨᠣᠯᠠᠨ ᠦᠵᠡᠭᠰᠡᠨ ᠢᠨᠤ ᠤᠷᠢᠳᠤ ᠡᠳᠦᠷ ᠦ᠋ᠨ ᠰᠠᠮᠠᠭᠤᠨ ᠡᠭᠦᠰᠬᠡᠭᠰᠡᠨ ᠮᠡᠭᠡᠵᠢᠨ ᠰᠡᠭᠡᠷ ᠦ᠋ᠨ ᠲᠣᠯᠣᠭᠠᠢ ᠶ᠋ᠢ ᠡᠷᠭᠦᠭᠰᠡᠨ ᠦ᠌ ᠰᠢᠯᠲᠠᠭᠠᠨ ᠲᠤᠯᠠ ᠲᠡᠷᠡ ᠰᠢᠯᠲᠠᠭᠠᠨ ᠴᠤ᠌ ᠮᠢᠨᠦ ᠳᠣᠣᠷᠠᠬᠢ ᠵᠠᠩᠵᠤᠨ ᠴᠡᠷᠢᠭ ᠦ᠋ᠨ ᠭᠠᠪᠢᠶᠠ ᠪᠣᠢ ᠊ᠶᠠ᠂ ᠮᠢᠨᠦ ᠭᠠᠭᠴᠠᠭᠠᠷ ᠤ᠋ᠨ ᠬᠦᠴᠦᠨ ᠪᠤᠰᠤ ᠲᠤᠯᠠ ᠡᠷᠬᠢᠮ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠬᠦᠨᠳᠦ ᠬᠡᠰᠢᠭ ᠢ᠋ ᠪᠣᠯᠬᠢ ᠮᠢᠨᠦ ᠵᠠᠩᠵᠤᠨ ᠴᠡᠷᠢᠭ ᠦᠨᠡᠨ ᠡᠷᠡ ᠶ᠋ᠢᠨ ᠡᠷᠳᠡᠮ ᠲᠡᠢ ᠳ᠋ᠦ᠍ᠷ ᠢᠨᠤ ᠱᠠᠩᠨᠠᠪᠠᠰᠤ ᠭᠠᠭᠴᠠ ᠪᠢ ᠠᠪᠤᠭᠰᠠᠨ ᠠ᠋ᠴᠠ ᠲᠦᠮᠡᠨ ᠬᠤᠪᠢ ᠳᠡᠭᠡᠷᠡ᠃ ᠲᠡᠢᠨ ᠬᠡᠮᠡᠭᠡᠳ ᠮᠢᠨᠦ ᠵᠠᠩᠵᠤᠨ ᠴᠡᠷᠢᠭ ᠦ᠋ᠨ ᠦᠨᠡᠨ ᠡᠷᠳᠡᠮ ᠪᠠᠢᠬᠤ ᠪᠠ ᠦᠭᠡᠢ ᠶ᠋ᠢ ᠦᠵᠡᠬᠦ ᠬᠡᠷᠡᠭᠲᠡᠢ᠃ ᠦᠨᠡᠬᠡᠷ ᠦᠨᠡᠨ ᠡᠷᠳᠡᠮ ᠠᠪᠠᠰᠤ ᠭᠥᠷᠳᠡᠲᠦᠭᠡᠢ᠃ ᠬᠡᠷᠪᠡ ᠦᠭᠡᠢ ᠪᠥᠭᠡᠰᠦ ᠪᠠᠢᠲᠤᠭᠠᠢ !》 ᠬᠡᠮᠡᠭᠡᠳ《ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠬᠣᠢᠨᠠ ᠵᠠᠭᠤᠨ ᠨᠣᠮᠣᠨ ᠤ᠋ ᠭᠠᠵᠠᠷ ᠠ᠋ᠴᠠ ᠠᠯᠲᠠᠨ ᠳᠤᠭᠤᠯᠠᠭᠠ ᠬᠠᠷᠪᠤᠵᠤ᠂ ᠶᠡᠬᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠪᠡᠯᠡᠭ ᠢ᠋ ᠲᠦᠭᠡᠭᠡᠮᠦᠢ 》 ᠭᠡᠮᠡᠨ ᠵᠠᠷᠯᠠᠭᠠᠳ ᠬᠤᠷᠢᠮ ᠲᠠᠷᠬᠠᠪᠠ᠃
ᠭᠤᠷᠪᠠᠳᠤᠭᠠᠷ ᠡᠳᠦᠷ ᠲᠣᠷ ᠦᠨᠡᠬᠡᠷ ᠬᠤᠷᠢᠮ ᠤ᠋ᠨ ᠡᠮᠦᠨᠡ ᠵᠠᠭᠤᠨ ᠨᠣᠮᠣᠨ ᠤ᠋ ᠦᠵᠦᠭᠦᠷ ᠵᠢᠷᠤᠭᠰᠠᠨ ᠰᠢᠷᠤᠭ ᠪᠣᠰᠬᠠᠵᠤ᠂ ᠵᠠᠭᠤᠨ ᠭᠠᠵᠠᠷ ᠠᠭᠤᠳᠠᠮ ᠲᠠᠯᠠ ᠳ᠋ᠤᠷ ᠲᠦᠰᠢᠮᠡᠯ ᠴᠡᠷᠢᠭ ᠦ᠋ᠨ ᠬᠤᠷᠠᠭᠰᠠᠨ ᠠᠨᠤ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠶ᠋ᠢ ᠪᠦᠷᠬᠦᠵᠦᠬᠦᠢ᠂ ᠲᠡᠳᠦᠢ ᠲᠡᠷᠡ ᠰᠢᠷᠤᠭ ᠤ᠋ᠨ ᠣᠷᠣᠢ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠪᠡᠯᠡᠭ ᠲᠣᠷ ᠢᠷᠡᠭᠰᠡᠨ ᠠᠯᠲᠠᠨ ᠳᠤᠭᠤᠯᠠᠭᠠ ᠶ᠋ᠢ ᠡᠮᠦᠰᠬᠡᠵᠦ᠂ ᠳᠣᠣᠷᠠ ᠢᠨᠤ ᠭᠤᠷᠪᠠᠨ ᠤᠯᠠᠭᠠᠨ ᠨᠠᠷᠠᠨ ᠵᠢᠷᠤᠭᠰᠠᠨ ᠬᠢᠭᠢᠷᠢ ᠤᠶᠠᠭᠠᠳ ᠬᠣᠶᠠᠷ ᠬᠠᠵᠠᠭᠤ ᠳ᠋ᠤᠷ ᠴᠥᠮ ᠬᠡᠳᠦᠨ ᠮᠢᠩᠭᠠᠨ ᠬᠣᠣᠰ ᠴᠡᠴᠡᠭ ᠦ᠋ᠨ ᠬᠡᠩᠭᠡᠷᠭᠡ ᠬᠠᠷᠠᠩᠭᠠ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠢ᠋ ᠵᠢᠭᠰᠠᠭᠠᠵᠤ᠂ ᠬᠢᠭᠢᠷᠢ ᠢ᠋ ᠬᠠᠷᠪᠤᠵᠤ ᠣᠨᠣᠪᠠᠰᠤ ᠮᠥᠩᠭᠥ ᠲᠣᠷᠭᠠ᠂ ᠨᠠᠷᠠᠨ ᠢ᠋ ᠤᠨᠤᠪᠠᠰᠤ ᠮᠠᠩᠨᠤᠭ ᠰᠤᠪᠤᠳ ᠱᠠᠩᠨᠠᠮᠤᠢ᠂ ᠳᠤᠭᠤᠯᠠᠭᠠ ᠶ᠋ᠢ ᠣᠨᠣᠪᠠᠰᠤ ᠬᠤᠶᠠᠭ ᠳᠤᠭᠤᠯᠠᠭᠠ ᠠᠯᠲᠠᠨ ᠬᠠᠰ ᠨᠡᠮᠡᠵᠦ ᠱᠠᠩᠨᠠᠮᠤᠢ ᠭᠡᠮᠡᠨ ᠵᠠᠷᠯᠠᠭᠰᠠᠨ ᠤ᠋ ᠲᠤᠯᠠᠳᠠ ᠬᠣᠯᠠ ᠣᠢᠷᠠ ᠶ᠋ᠢᠨ ᠤᠯᠤᠰ ᠠᠢᠮᠠᠭ ᠤ᠋ᠳ ᠪᠠᠰᠠ ᠴᠥᠮ ᠳᠣᠪᠲᠣᠯᠤᠨ ᠬᠦᠷᠴᠦ ᠢᠷᠡᠵᠦᠬᠦᠢ᠃ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠠᠢᠽᠦ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠸᠧᠢ ᠸᠠᠩ ᠶᠦᠩ ᠵᠢᠢ ᠬᠣᠶᠠᠭᠤᠯᠠ ᠥᠨᠳᠥᠷ ᠳᠣᠪᠣ ᠶ᠋ᠢᠨ ᠠᠷᠰᠯᠠᠨᠲᠤ ᠥᠷᠭᠥᠭᠡ ᠳ᠋ᠦ᠍ᠷ ᠵᠣᠴᠢᠨ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠶᠣᠰᠣᠭᠠᠷ ᠡᠰᠡᠷᠭᠦᠴᠡᠯᠡᠨ ᠰᠠᠭᠤᠵᠤ᠂ ᠬᠤᠷᠢᠮ ᠤ᠋ᠨ ᠠᠯᠲᠠᠨ ᠬᠤᠨᠳᠠᠭᠠᠲᠤ ᠰᠠᠷᠬᠤᠳ ᠤ᠋ᠨ ᠰᠢᠷᠡᠭᠡ ᠣᠷᠣᠮᠠᠭᠴᠠ ᠰᠠᠢᠬᠠᠨ ᠰᠤᠷᠲᠠᠯᠲᠤ᠂ ᠣᠶᠤᠲᠤ ᠰᠡᠴᠡᠨ ᠬᠣᠶᠠᠭᠤᠯᠠ ᠬᠣᠶᠠᠷ ᠲᠡᠰᠢ ᠠᠷᠢᠬᠢ ᠡᠷᠭᠦᠮᠡᠭᠴᠡ ᠵᠢᠨᠦᠩ ᠦ᠋ᠨ ᠪᠠᠷᠰ ᠤ᠋ᠨ ᠴᠠᠴᠠᠷ ᠲᠤᠷ ᠶᠡᠬᠡ ᠪᠠᠢᠯᠳᠤᠭᠠᠨ ᠤ᠋ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠬᠦᠩᠭᠢᠷᠡᠰᠡᠨ ᠭᠠᠷᠴᠤ ᠣᠯᠠᠨ ᠪᠠᠭᠠᠲᠤᠷ ᠵᠠᠩᠵᠤᠨ ᠤ᠋ᠳ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠴᠦ ᠰᠠᠭᠠᠳᠠᠭ ᠠᠭᠰᠠᠨ ᠭᠠᠷᠴᠤ ᠳᠠᠷᠠᠭᠠ ᠳᠠᠷᠠᠭᠠ ᠪᠠᠷ ᠳᠠᠪᠰᠢᠵᠤ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠬᠠᠷᠪᠤᠯᠴᠠᠬᠤᠶᠠ᠂ ᠭᠤᠷᠪᠠᠨ ᠬᠤᠪᠢ ᠠ᠋ᠴᠠ ᠬᠣᠶᠠᠷ ᠬᠤᠪᠢ ᠠᠨᠤ ᠬᠢᠭᠢᠷᠢ ᠶ᠋ᠢ ᠤᠨᠤᠵᠤ᠂ ᠪᠠᠰᠠ ᠨᠢᠭᠡᠨ ᠬᠤᠪᠢ ᠠᠨᠤ ᠤᠯᠠᠭᠠᠨ ᠨᠠᠷᠠᠨ ᠢ᠋ ᠤᠨᠤᠵᠤ ᠭᠠᠷᠬᠤᠶᠠ᠂ ᠣᠯᠠᠨ ᠴᠡᠷᠢᠭ ᠦ᠋ᠨ ᠪᠠᠶᠠᠷᠯᠠᠯᠴᠠᠨ ᠬᠡᠩᠭᠡᠷᠭᠡ ᠴᠣᠬᠢᠨ ᠬᠠᠰᠬᠢᠷᠤᠯᠳᠤᠬᠤ ᠳᠠᠭᠤᠨ ᠳ᠋ᠤᠷ ᠮᠥᠷᠡᠨ ᠲᠠᠯᠠ ᠬᠦᠩᠭᠢᠷᠡᠰᠡᠮᠦᠢ᠃ ᠱᠠᠩ ᠬᠡᠰᠢᠭ ᠢ᠋ ᠬᠦᠯᠢᠶᠡᠯᠴᠡᠨ ᠡᠴᠢᠬᠦ ᠢᠨᠤ ᠨᠢᠳᠦᠨ ᠢ᠋ ᠭᠢᠯᠠᠰᠬᠠᠮᠤᠢ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠳᠡᠭᠡᠷᠡ ᠳᠣᠣᠷᠠ ᠪᠠᠷ ᠠᠮᠠ ᠪᠠᠨ ᠪᠠᠷᠢᠯᠴᠠᠨ ᠭᠠᠢᠬᠠᠯᠳᠤᠬᠤᠶᠠ᠂ ᠪᠠᠷᠠᠭᠤᠨ ᠡᠲᠡᠭᠡᠳ ᠤᠯᠠᠭᠠᠨ ᠲᠠᠷᠮᠠ ᠶ᠋ᠢᠨ ᠨᠢᠰᠬᠦ ᠪᠠᠷᠰ ᠵᠢᠷᠤᠭᠰᠠᠨ ᠵᠢᠷᠭᠤᠳᠤᠭᠠᠷ ᠲᠤᠭ ᠤ᠋ᠨ ᠳᠣᠣᠷᠠ ᠠ᠋ᠴᠠ ᠨᠢᠭᠡᠨ ᠶᠡᠬᠡ ᠵᠠᠩᠵᠤᠨ ᠪᠡᠶᠡ ᠳ᠋ᠦ᠍ᠷ ᠮᠥᠩᠭᠥᠨ ᠬᠤᠶᠠᠭ ᠳᠤᠭᠤᠯᠠᠭᠠ᠂ ᠪᠡᠯᠭᠡᠭᠦᠰᠦᠨ ᠳ᠋ᠦ᠍ᠷ ᠬᠠᠨᠳᠠᠭᠠᠢ ᠪᠤᠭᠤ ᠶ᠋ᠢᠨ ᠪᠦᠰᠡ᠂ ᠵᠠᠵᠢ ᠳ᠋ᠤᠷ ᠦᠨᠡᠭᠡ ᠶ᠋ᠢᠨ ᠰᠡᠭᠦᠯ ᠦ᠋ᠨ ᠤᠨᠵᠢᠯᠭᠠ᠂ ᠰᠡᠭᠦᠵᠢᠨ ᠳ᠋ᠦ᠍ᠷ ᠤᠯᠠᠭᠠᠨ ᠢᠷᠪᠢᠰ ᠦ᠋ᠨ ᠰᠠᠭᠠᠳᠠᠭ ᠠᠭᠰᠠᠵᠤ᠂ ᠬᠠᠰ ᠴᠠᠭᠠᠨ ᠰᠠᠢᠬᠠᠨ ᠴᠢᠷᠠᠢ ᠳ᠋ᠤᠷ ᠭᠤᠷᠪᠠᠨ ᠮᠤᠰᠬᠢᠶᠡ ᠬᠠᠷᠠ ᠰᠠᠬᠠᠯ ᠬᠡᠢᠰᠴᠦ ᠭᠠᠷ ᠲᠤᠷ ᠮᠥᠩᠭᠥᠨ ᠵᠢᠳᠠ ᠪᠠᠷᠢᠨ᠂ ᠰᠠᠷᠠᠯ ᠮᠣᠷᠢ ᠤᠨᠤᠨ ᠳᠣᠪᠲᠣᠯᠤᠨ ᠭᠠᠷᠴᠤ ᠢᠷᠡᠭᠡᠳ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠳᠠᠭᠤᠳᠠᠨ ᠥᠭᠦᠯᠡᠷᠦᠨ᠄ 《ᠭᠠᠭᠴᠠ ᠬᠢᠭᠢᠷᠢ ᠶ᠋ᠢ ᠤᠨᠤᠬᠤ ᠶ᠋ᠢ ᠮᠡᠷᠭᠡᠨ ᠳ᠋ᠦ᠍ᠷ ᠦᠯᠦ ᠲᠣᠭᠠᠴᠠᠮᠤᠢ᠂ ᠮᠢᠨᠦ ᠡᠨᠡ ᠡᠳᠦᠷ ᠦ᠋ᠨ ᠬᠢᠭᠢᠷᠢ ᠪᠠ ᠨᠠᠷᠠᠨ ᠬᠢᠭᠡᠳ ᠳᠤᠭᠤᠯᠠᠭᠠ ᠶ᠋ᠢ ᠴᠥᠮ ᠤᠨᠤᠵᠤ᠂ ᠭᠤᠷᠪᠠᠨ ᠳᠠᠪᠬᠤᠷ ᠱᠠᠩ ᠳ᠋ᠤᠷ ᠬᠦᠷᠲᠡᠬᠦ ᠶ᠋ᠢ ᠦᠵᠡ !》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠯᠠᠨ ᠬᠥᠮᠦᠨ ᠰᠣᠴᠢᠨ ᠦᠵᠡᠪᠡᠰᠦ᠂ ᠦᠵᠡᠰᠡ ᠵᠢᠷᠭᠤᠭᠠᠨ ᠰᠠᠢᠰᠢᠶᠠᠯ ᠳ᠋ᠤᠷ ᠣᠷᠣᠭᠰᠠᠨ ᠰᠠᠢᠳ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠴᠤᠤ ᠮᠡᠷᠭᠡᠨ ᠠᠵᠤᠭᠤ᠃ ᠣᠯᠠᠨ ᠬᠥᠮᠦᠨ ᠪᠠᠶᠠᠰᠤᠯᠴᠠᠨ ᠦᠵᠡᠬᠦᠶᠡ᠂ ᠴᠤᠤ ᠮᠡᠷᠭᠡᠨ ᠵᠢᠳᠠ ᠶᠤᠭᠠᠨ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠳ᠋ᠦ᠍ᠷ ᠬᠠᠪᠴᠢᠭᠤᠯᠤᠭᠠᠳ ᠵᠡᠭᠦᠨ ᠭᠠᠷ ᠲᠠᠭᠠᠨ ᠰᠠᠬᠢᠭᠤᠯᠰᠤᠨ ᠨᠤᠮᠤ ᠪᠠᠨ ᠠᠳᠬᠤᠵᠤ᠂ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠬᠤᠪᠢᠯᠭᠠᠨ ᠰᠤᠮᠤ ᠶᠤᠭᠠᠨ ᠣᠨᠢᠯᠠᠭᠠᠳ ᠤᠷᠠᠨ ᠨᠤᠮᠤ ᠰᠠᠷᠠᠨ ᠮᠡᠲᠦ ᠳᠦᠭᠦᠷᠴᠦ ᠣᠨᠣᠴᠢᠲᠤ ᠰᠤᠮᠤ ᠣᠳᠣᠨ ᠠᠳᠠᠯᠢ ᠡᠴᠢᠭᠡᠳ ᠲᠡᠷᠢᠭᠦᠨ ᠰᠤᠮᠤ ᠳ᠋ᠤᠷ ᠬᠢᠭᠢᠷᠢ ᠶ᠋ᠢ ᠤᠨᠤᠵᠤ᠂ ᠳᠡᠳ᠋ ᠰᠤᠮᠤ ᠳ᠋ᠤᠷ ᠨᠠᠷᠠᠨ ᠢ᠋ ᠤᠨᠤᠭᠠᠳ ᠭᠤᠲᠠᠭᠠᠷ ᠰᠤᠮᠤ ᠠᠨᠤ ᠳᠤᠭᠤᠯᠠᠭᠠ ᠶ᠋ᠢᠨ ᠬᠦᠵᠦᠭᠦᠪᠲᠦᠷ ᠲᠣᠷ ᠭᠠᠳᠠᠭᠰᠠᠨ ᠳ᠋ᠤᠷ ᠬᠣᠶᠠᠷ ᠤᠯᠤᠰ ᠤ᠋ᠨ ᠡᠵᠡᠳ ᠰᠠᠢᠳ ᠵᠠᠩᠵᠤᠨ ᠴᠡᠷᠢᠭ ᠰᠤᠯᠠ ᠠᠷᠠᠳ ᠲᠤᠷ ᠬᠦᠷᠲᠡᠯᠡ ᠴᠥᠮ ᠳᠠᠭᠤᠨ ᠠᠯᠳᠠᠯᠴᠠᠨ ᠮᠠᠭᠲᠠᠨ ᠰᠠᠢᠰᠢᠶᠠᠵᠤ᠂ ᠳᠠᠭᠤᠳᠠᠯᠴᠠᠬᠤ ᠳᠠᠭᠤᠨ ᠳ᠋ᠤ᠌ ᠳᠠᠪᠠᠭᠠ ᠬᠥᠪᠡᠭᠡ ᠠᠨᠢᠷᠯᠠᠵᠤ᠂ ᠰᠠᠯᠬᠢᠨ ᠤᠷᠤᠭᠤ ᠠᠷᠪᠠᠨ ᠭᠠᠵᠠᠷ ᠳᠠᠪᠠᠲᠠᠯᠠ ᠰᠣᠨᠣᠰᠳᠠᠬᠤᠶᠠ᠂ ᠳᠠᠭᠤᠳᠠᠭᠰᠠᠨ ᠮᠡᠲᠦ ᠪᠠᠰᠠ ᠨᠢᠭᠡᠨ ᠶᠡᠬᠡ ᠵᠠᠩᠵᠤᠨ ᠢ᠋ ᠬᠥᠳᠡᠯᠭᠡᠵᠦ ᠳᠠᠯᠳᠠ ᠠ᠋ᠴᠠ ᠳᠣᠪᠲᠣᠯᠤᠨ ᠭᠠᠷᠴᠤ ᠢᠷᠡᠪᠡ᠃ ᠡᠨᠡ ᠬᠡᠨ ᠬᠡᠮᠡᠪᠡᠰᠦ ᠲᠠᠢᠯᠤᠨ ᠮᠡᠳᠡᠭᠦᠯᠬᠦ ᠶ᠋ᠢ ᠰᠣᠨᠣᠰ᠄ ᠡᠨᠡ ᠦᠶᠡ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠭᠠᠳᠠᠨᠠ ᠵᠦᠷᠴᠢᠳ ᠤᠯᠤᠰ ᠤ᠋ᠨ ᠣᠢᠷᠠᠯᠴᠠᠭᠠ ᠢᠵᠢᠯᠵᠢ᠂ ᠮᠠᠢᠯᠵᠢ᠂ ᠴᠠᠢᠯᠵᠢ ᠬᠡᠮᠡᠬᠦ ᠭᠤᠷᠪᠠᠨ ᠠᠢᠮᠠᠭ ᠪᠣᠢ ᠪᠥᠯᠥᠭᠡ᠃ ᠢᠵᠢᠯᠵᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠥᠯᠵᠡᠢᠲᠦ᠂ ᠡᠭᠦᠨ ᠦ᠌ ᠬᠥᠪᠡᠭᠦᠨ ᠪᠣᠲ᠋ᠤ᠃ ᠴᠠᠢᠯᠵᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠤᠷᠲᠤ᠂ ᠮᠠᠢᠯᠵᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠤᠨᠨᠳᠤᠷ᠂ ᠥᠨᠢ ᠥᠨᠳᠥᠷ ᠬᠡᠮᠡᠬᠦ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠪᠥᠯᠥᠭᠡ᠃ ᠥᠨᠢ ᠢᠨᠤ ᠲᠠᠢᠽᠦ ᠶ᠋ᠢ ᠪᠠᠭᠠ ᠴᠠᠭ ᠲᠤᠷ ᠤᠷᠪᠠᠵᠤ ᠭᠠᠷᠤᠭᠠᠳ ᠳᠣᠣᠷᠠᠬᠢ ᠬᠥᠮᠦᠨ ᠳ᠋ᠦ᠍ᠷ ᠢ᠋ᠶ᠋ᠡᠨ ᠲᠣᠳᠣ ᠬᠡᠮᠡᠭᠴᠢ ᠳ᠋ᠦ᠍ᠷ ᠠᠯᠠᠭᠳᠠᠵᠤ᠂ ᠠᠢᠮᠠᠭ ᠢ᠋ᠶ᠋ᠠᠨ ᠪᠤᠯᠢᠶᠠᠬᠠᠨᠳᠠᠨ ᠡᠵᠡᠯᠡᠭᠳᠡᠪᠡ᠃ ᠳᠡᠭᠦᠦ ᠢᠨᠤ ᠥᠨᠳᠥᠷ ᠠᠬᠠ ᠪᠠᠨ ᠳᠠᠭᠠᠵᠤ ᠡᠴᠢᠬᠦ ᠦᠭᠡᠢ ᠬᠡᠳᠦᠢᠴᠢᠨᠡᠭᠡᠨ ᠬᠣᠷᠢᠭᠯᠠᠭᠰᠠᠨ ᠵᠦᠢ ᠪᠣᠢ᠂ ᠬᠣᠢᠨᠠ ᠭᠠᠷᠴᠤ ᠢᠷᠡᠮᠦᠢ᠃
ᠡᠳᠦᠭᠡ ᠥᠭᠦᠯᠡᠬᠦ ᠢᠨᠤ᠂ ᠭᠠᠭᠴᠠ ᠡᠨᠡ ᠢᠵᠢᠯᠵᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠯᠢᠶᠧ ᠰᠧ ᠣᠪᠣᠭᠲᠤ ᠢᠯᠭᠦᠨᠡ ᠬᠡᠮᠡᠬᠦ ᠨᠤᠲᠤᠭ ᠤ᠋ᠨ ᠥᠯᠵᠡᠢᠲᠦ ᠶ᠋ᠢᠨ ᠭᠠᠭᠴᠠ ᠬᠥᠪᠡᠭᠦᠨ᠂ ᠨᠡᠷᠡ ᠪᠣᠲ᠋ᠤ ᠬᠡᠮᠡᠭᠴᠢ ᠡᠨᠡ ᠵᠢᠯ ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤ ᠲᠠᠢ᠂ ᠲᠥᠷᠥᠭᠰᠡᠨ ᠢᠨᠤ ᠠᠷᠢᠭᠤᠨ ᠭᠡᠭᠡᠬᠡᠨ ᠬᠡᠰᠢᠭᠲᠡᠢ ᠰᠠᠢᠬᠠᠨ᠂ ᠪᠠᠭᠠ ᠠ᠋ᠴᠠ ᠬᠠᠷᠪᠤᠬᠤ ᠨᠠᠮᠨᠠᠬᠤᠢ ᠳ᠋ᠤᠷ ᠮᠠᠰᠢ ᠮᠡᠷᠭᠡᠨ᠂ ᠡᠨᠡ ᠡᠳᠦᠷ ᠠᠯᠲᠠᠨ᠂ ᠪᠧᠲ᠋ᠠ᠋ ᠬᠣᠶᠠᠷ ᠤᠯᠤᠰ ᠳᠥᠭᠦᠯᠡ ᠮᠥᠷᠡᠨ ᠦ᠌ ᠲᠠᠯᠠ ᠳ᠋ᠤ᠌ ᠠᠯᠲᠠᠨ ᠳᠤᠭᠤᠯᠠᠭᠠ ᠬᠠᠷᠪᠤᠵᠤ᠂ ᠬᠣᠶᠠᠷ ᠤᠯᠤᠰ ᠡᠷᠳᠡᠮ ᠮᠥᠷᠥᠢᠴᠡᠮᠦᠢ ᠬᠡᠮᠡᠬᠦ ᠶ᠋ᠢ ᠰᠣᠨᠣᠰᠴᠤ ᠲᠡᠷᠡ ᠢᠷᠪᠢᠰ ᠦ᠋ᠨ ᠰᠢᠷᠪᠥᠰᠥᠲᠦ ᠨᠤᠮᠤ᠂ ᠳᠡᠰ ᠰᠢᠪᠠᠭᠤᠨ ᠤ᠋ ᠥᠳᠥᠲᠦ ᠰᠤᠮᠤᠨ ᠤ᠋ ᠰᠠᠭᠠᠳᠠᠭ ᠢ᠋ᠶ᠋ᠠᠨ ᠠᠭᠰᠠᠵᠤ᠂ ᠡᠷᠡᠮᠡᠭ ᠰᠠᠷᠠᠯ ᠮᠣᠷᠢᠨ ᠢ᠋ᠶ᠋ᠠᠨ ᠤᠨᠤᠭᠠᠳ ᠢᠯᠡᠭᠦᠦ ᠬᠣᠶᠠᠷ ᠳᠠᠭᠠᠭᠰᠠᠳ ᠬᠥᠲᠥᠴᠢ ᠪᠡᠨ ᠠᠪᠴᠤ ᠢᠯᠭᠦᠨᠡ ᠶ᠋ᠢᠨ ᠭᠣᠣᠯ᠂ ᠳᠦᠭᠦᠯᠡ ᠮᠥᠷᠡᠨ ᠣᠢᠷᠠ ᠲᠤᠯᠠ ᠳᠣᠪᠲᠣᠯᠤᠨ ᠬᠦᠷᠴᠦ ᠢᠷᠡᠭᠡᠳ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠪᠠᠷᠰ ᠤ᠋ᠨ ᠴᠠᠴᠠᠷ ᠲᠤᠷ ᠢᠷᠡᠵᠦ ᠥᠴᠢᠷᠦᠨ᠄ 《 ᠠᠯᠲᠠᠨ ᠤᠯᠤᠰ ᠲᠤᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠡᠴᠡᠭᠦᠦ ᠶᠦ᠍ᠭᠡᠨ ᠦᠵᠡᠬᠦᠯᠭᠦᠢ ᠳ᠋ᠦ᠍ᠷ ᠠᠯᠤᠰ ᠬᠣᠯᠠ ᠠᠢᠮᠠᠭ ᠪᠣᠯᠪᠠᠴᠤ ᠠᠰᠢᠳᠠ ᠬᠠᠪᠰᠤᠷᠪᠠᠰᠤ᠂ ᠠᠬᠤᠢ ᠶᠡᠬᠡ ᠲᠡᠭᠷᠢᠯᠢᠭ ᠦ᠋ᠨ ᠦᠷᠡᠰ ᠦ᠋ᠨ ᠰᠦᠷ ᠪᠤᠶᠠᠨ ᠪᠥᠭᠡᠲᠡᠯᠡ ᠠᠯᠳᠠᠰᠢ ᠦᠭᠡᠢ ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤᠷ ᠦᠯᠦ ᠬᠠᠷᠪᠤᠭᠤᠯᠤᠮᠤᠢ ? 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠲᠡᠭᠦᠨ ᠦ᠌ ᠬᠠᠷᠪᠤᠬᠤ ᠠᠨᠤ ᠰᠠᠢᠨ ᠢ᠋ ᠬᠡᠳᠦᠢᠨᠡᠢ ᠰᠣᠨᠣᠰᠤᠭᠰᠠᠨ ᠲᠤᠯᠠ ᠶᠠᠭᠠᠷᠠᠨ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄《 ᠠᠭᠡ ᠴᠢᠮᠠᠶ᠋ᠢ ᠠᠯᠢ ᠦᠶᠡ ᠡᠴᠡ ᠠᠳᠠᠪᠠᠰᠢ ᠰᠠᠢᠬᠠᠨ ᠬᠠᠷᠪᠤᠵᠤ ᠨᠠᠮᠨᠠᠮᠤᠢ ᠭᠡᠮᠡᠨ ᠰᠣᠨᠣᠰᠤᠯᠤᠭᠠ᠂ ᠠᠯᠳᠠᠯ ᠥᠭᠡᠶᠡ ᠡᠨᠡ ᠡᠳᠦᠷ ᠣᠨᠣᠪᠠᠰᠤ ᠠᠷᠤ ᠭᠠᠵᠠᠷ ᠬᠠᠮᠤᠭ ᠪᠦᠬᠦᠨ ᠦ᠌ ᠨᠡᠷᠡ ᠪᠣᠯᠠᠢ !》 ᠬᠡᠮᠡᠵᠦ ᠶᠠᠭᠠᠷᠠᠨ ᠲᠡᠭᠦᠨ ᠦ᠌ ᠪᠡᠶᠡ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠶᠣᠰᠣᠨ ᠤ᠋ ᠬᠤᠪᠴᠠᠳ᠂ ᠲᠥᠷᠥ ᠶ᠋ᠢᠨ ᠳᠤᠭᠤᠯᠠᠭᠠ ᠬᠠᠯᠠᠨ ᠡᠮᠦᠰᠬᠡᠵᠦ᠂ ᠳᠠᠷᠤᠢ ᠴᠤᠤ ᠮᠡᠷᠭᠡᠨ ᠦ᠌ ᠳᠠᠷᠠᠭᠠ ᠳ᠋ᠤᠷ ᠳᠣᠪᠲᠣᠯᠭᠠᠨ ᠣᠷᠣᠭᠤᠯᠤᠭᠰᠠᠨᠠ ᠪᠣᠲ᠋ᠤ ᠪᠦᠷᠭᠦᠳ ᠦ᠋ᠨ ᠥᠳᠥᠲᠦ ᠰᠤᠮᠤᠨ ᠢ᠋ᠶ᠋ᠠᠨ ᠪᠥᠭᠲᠦᠭᠡᠷ ᠬᠠᠷᠠ ᠨᠤᠮᠤ ᠳ᠋ᠤᠷ ᠣᠨᠢᠯᠠᠭᠠᠳ ᠪᠥᠬᠥᠢᠵᠦ ᠱᠣᠩᠬᠣᠨ ᠳᠣᠪᠲᠣᠯᠵᠤ ᠣᠷᠣᠭᠠᠳ ᠪᠥᠵᠢᠭᠯᠡᠨ ᠮᠠᠭᠰᠢᠵᠤ ᠡᠬᠢᠯᠡᠵᠦ ᠬᠠᠷᠪᠤᠭᠠᠳ ᠲᠡᠷᠢᠭᠦᠨ ᠰᠤᠮᠤ ᠳ᠋ᠤᠷ ᠬᠢᠭᠢᠷᠢ ᠶ᠋ᠢ ᠤᠨᠤᠵᠤ ᠳᠡᠳ᠋ ᠰᠤᠮᠤ ᠳ᠋ᠤᠷ ᠨᠠᠷᠠᠨ ᠢ᠋ ᠤᠨᠤᠵᠤ᠂ ᠭᠤᠲᠠᠭᠠᠷ ᠰᠤᠮᠤ ᠳ᠋ᠤᠷ ᠳᠤᠭᠤᠯᠠᠭᠠ ᠶ᠋ᠢ ᠤᠨᠤᠵᠤ ᠰᠤᠮᠤ ᠭᠠᠳᠠᠭᠰᠠᠭᠠᠷ ᠤᠨᠤᠵᠤ ᠢᠷᠡᠭᠰᠡᠨᠡ᠂ ᠬᠣᠶᠠᠷ ᠠᠢᠮᠠᠭ ᠤ᠋ᠨ ᠬᠡᠳᠦᠨ ᠲᠦᠮᠡᠨ ᠣᠯᠠᠨ ᠴᠡᠷᠢᠭ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠢ᠋ᠶ᠋ᠡᠨ ᠵᠡᠷᠭᠡ ᠪᠡᠷ ᠳᠠᠭᠤᠷᠢᠰᠬᠠᠨ ᠂ ᠬᠠᠷᠠᠩᠭᠠ ᠬᠡᠩᠭᠡᠷᠭᠡ ᠪᠡᠨ ᠬᠠᠮᠲᠤ ᠪᠠᠷ ᠴᠣᠬᠢᠵᠤ ᠮᠠᠭᠲᠠᠨ ᠰᠠᠢᠰᠢᠶᠠᠵᠤ ᠪᠠᠶᠠᠰᠤᠯᠴᠠᠨ ᠳᠠᠭᠤᠳᠠᠬᠤ ᠳᠠᠭᠤᠨ ᠳ᠋ᠤᠷ ᠳᠠᠯᠠᠢ ᠪᠤᠴᠠᠯᠵᠤ ᠮᠥᠷᠡᠨ ᠲᠦᠯᠬᠢᠬᠦ ᠮᠡᠲᠦ ᠂ ᠠᠭᠤᠯᠠᠨ ᠤ᠋ ᠭᠥᠷᠦᠭᠡᠰᠦᠨ ᠦᠷᠭᠦᠵᠦ ᠲᠠᠯᠠ ᠶ᠋ᠢᠨ ᠠᠩ ᠨᠠᠳᠬᠤᠵᠤᠬᠤᠢ ᠃ ᠡᠭᠦᠨ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠸᠧᠢ ᠸᠠᠩ ᠶᠦᠩ ᠶ᠋ᠢᠢ ᠶ᠋ᠢᠨ ᠳᠣᠲᠣᠷᠠ ᠬᠥᠳᠡᠯᠵᠦ ᠂ ᠰᠠᠨᠠᠭᠠᠨ ᠪᠢᠰᠢᠷᠡᠭᠡᠳ ᠵᠢᠷᠦᠬᠡ ᠳᠣᠯᠭᠢᠰᠤᠨ ᠰᠥᠰᠥ ᠬᠡᠮᠬᠡᠷᠡᠬᠦᠶᠡ ᠪᠠᠰᠠ ᠪᠠᠷᠠᠭᠤᠨ ᠮᠥᠷᠥ ᠶ᠋ᠢᠨ ᠳᠡᠭᠡᠳᠦ ᠪᠠᠢᠷᠢ ᠶ᠋ᠢᠨ ᠤᠯᠠᠭᠠᠨ ᠢᠰᠡᠭᠡᠢ ᠳ᠋ᠦ᠍ᠷ ᠠᠯᠲᠠᠨ ᠤ᠋ ᠠᠷᠰᠯᠠᠨ ᠬᠠᠲᠠᠭᠰᠠᠨ ᠲᠤᠭ ᠬᠥᠳᠡᠯᠵᠦ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ᠂ ᠨᠢᠭᠡᠨ ᠶᠡᠬᠡ ᠵᠠᠩᠵᠤᠨ ᠬᠡᠬᠦᠯᠵᠡᠨ ᠭᠠᠷᠴᠤ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ᠄ 《 ᠵᠠᠭᠤᠨ ᠨᠣᠮᠣᠨ ᠤ᠋ ᠦᠵᠦᠭᠦᠷ ᠲᠣᠬᠣᠢ ᠶ᠋ᠢᠨ ᠴᠢᠨᠡᠭᠡᠨ ᠶᠠᠭᠤᠮᠠ ᠶ᠋ᠢ ᠬᠠᠷᠪᠤᠵᠤ ᠤᠨᠤᠬᠤ ᠶ᠋ᠢ ᠭᠡᠷᠭᠡᠨ ᠮᠡᠷᠭᠡᠨ ᠳ᠋ᠦ᠍ᠷ ᠳᠣᠭᠣᠴᠠᠵᠤ ᠪᠣᠯᠤᠮᠤᠢ? ᠮᠥᠩᠭᠥ ᠲᠣᠷᠭᠠ ᠮᠠᠩᠨᠤᠭ ᠰᠤᠪᠤᠳ᠂ ᠠᠯᠲᠠᠨ ᠬᠠᠰ ᠬᠤᠶᠠᠭ ᠳᠤᠭᠤᠯᠠᠭᠠ ᠶ᠋ᠢ ᠲᠦᠷ ᠦᠯᠡᠳᠡᠭᠡ᠂ ᠮᠢᠨᠦ ᠳᠤᠭᠤᠯᠠᠭᠠ ᠶ᠋ᠢᠨ ᠨᠢᠭᠡᠨ ᠰᠥᠭᠥᠮ ᠦ᠋ᠨ ᠲᠡᠳᠦᠢ ᠰᠣᠨᠣᠪᠲᠤᠷ ᠢ᠋ ᠬᠠᠷᠪᠤᠬᠤ ᠶ᠋ᠢ ᠦᠵᠡ!》 ᠬᠡᠮᠡᠭᠡᠳ ᠪᠡᠶᠡ ᠳ᠋ᠦ᠍ᠷ ᠠᠯᠲᠠᠨ ᠭᠠᠷᠠᠬᠠ ᠶ᠋ᠢᠨ ᠡᠷᠳᠡᠨᠢ ᠶ᠋ᠢᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠴᠦ ᠰᠢᠷᠠ ᠣᠯᠪᠣᠭ ᠤ᠋ᠨ ᠳᠠᠪᠬᠤᠷᠯᠢᠭ ᠳᠠᠷᠤᠯᠭᠠ ᠳᠠᠷᠤᠵᠤᠬᠤᠢ᠃ ᠲᠠᠢᠽᠦ ᠦᠵᠡᠪᠡᠰᠦ ᠳᠡᠭᠦᠦ ᠬᠠᠪᠤᠲᠤ ᠬᠠᠰᠠᠷ ᠲᠤᠯᠠ ᠲᠠᠢᠽᠦ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠥᠪᠡᠷ ᠦ᠋ᠨ ᠠᠷᠰᠯᠠᠨᠲᠤ ᠰᠠᠭᠠᠳᠠᠭ ᠠ᠋ᠴᠠ ᠪᠠᠨ ᠭᠠᠯᠪᠢᠩᠭᠠ ᠶ᠋ᠢᠨ ᠥᠳᠥᠲᠦ ᠠᠯᠲᠠᠨ ᠲᠣᠭᠣᠨᠣᠪᠲᠤ ᠣᠨᠢ ᠪᠠᠨ ᠭᠤᠷᠪᠠᠨᠲᠠ ᠰᠤᠭᠤᠯᠵᠤ᠂ ᠪᠠᠰᠠ ᠣᠷᠣᠰ ᠲᠡᠮᠦᠷ ᠦ᠋ᠨ ᠰᠢᠷᠬᠡᠭᠲᠦ ᠲᠤᠷᠰᠢ ᠪᠤᠭᠤ ᠶ᠋ᠢᠨ ᠡᠯᠢᠭᠡᠲᠦ ᠨᠤᠮᠤ ᠯᠤᠭᠠ ᠪᠠᠨ ᠬᠠᠮᠲᠤ ᠭᠠᠷ ᠢ᠋ᠶ᠋ᠠᠷ ᠥᠭᠭᠦᠭᠰᠡᠨ ᠳ᠋ᠦ᠍ᠷ ᠬᠠᠰᠠᠷ ᠶᠠᠭᠠᠷᠠᠨ ᠲᠣᠰᠴᠤ ᠠᠪᠤᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠬᠡᠭᠡᠷ ᠮᠣᠷᠢᠨ ᠳ᠋ᠤᠷ ᠢ᠋ᠶ᠋ᠠᠨ ᠠᠯᠠᠪᠬᠢᠨ ᠳᠣᠪᠲᠣᠯᠤᠨ ᠭᠠᠷᠴᠤ᠂ ᠳᠣᠲᠣᠷᠠ ᠪᠠᠨ ᠰᠡᠮᠡᠬᠡᠷ ᠲᠡᠭᠷᠢ ᠶ᠋ᠢᠨ ᠵᠦᠭ ᠵᠠᠯᠪᠠᠷᠢᠵᠤ ᠰᠡᠳᠬᠢᠷᠦᠨ᠄ ᠮᠢᠨᠦ ᠠᠬᠠ ᠦᠨᠡᠬᠡᠷ ᠳᠡᠭᠷᠢᠯᠢᠭ ᠦ᠋ᠨ ᠦᠷᠡᠰ ᠮᠠᠭᠠᠳ ᠮᠥᠨ ᠪᠣᠯᠪᠠᠰᠤ ᠲᠡᠭᠦᠨ ᠦ᠌ ᠡᠨᠡ ᠲᠡᠭᠷᠢ ᠶ᠋ᠢᠨ ᠭᠤᠷᠪᠠᠨ ᠰᠤᠮᠤ ᠳ᠋ᠤᠷ ᠲᠡᠷᠡ ᠬᠦ᠌ ᠳᠤᠭᠤᠯᠠᠭᠠ ᠶ᠋ᠢ ᠳᠠᠷᠠᠭᠠ ᠪᠠᠷ ᠭᠤᠷᠪᠠᠨᠲᠠ ᠤᠨᠤᠵᠤ ᠲᠡᠮᠳᠡᠭᠲᠡᠶᠡ ᠶᠡᠬᠡ ᠠᠯᠲᠠᠨ ᠤᠯᠤᠰ ᠢ᠋ ᠪᠢᠰᠢᠷᠡᠭᠦᠯᠵᠦ᠂ ᠲᠡᠮᠦᠵᠢᠨ ᠡᠵᠡᠨ ᠮᠢᠨᠦ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠲᠦᠭᠡᠢ ᠬᠡᠮᠡᠭᠡᠳ ᠳᠠᠷᠤᠢ ᠲᠡᠷᠡ ᠳᠤᠭᠤᠯᠠᠭᠠ ᠶ᠋ᠢ ᠪᠥᠰ ᠲᠣᠷᠭᠠ ᠪᠠᠷ ᠪᠠᠲᠤᠳᠠ ᠣᠷᠢᠶᠠᠨ ᠤᠶᠠᠭᠤᠯᠤᠭᠠᠳ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ᠄《 ᠮᠢᠨᠦ ᠲᠡᠷᠢᠭᠦᠨ ᠰᠤᠮᠤ ᠳ᠋ᠤᠷ ᠳᠤᠭᠤᠯᠠᠭᠠ ᠶ᠋ᠢᠨ ᠵᠡᠭᠦᠨ ᠵᠠᠵᠢᠭᠤᠷ ᠢ᠋ ᠤᠨᠤᠵᠤ᠂ ᠳᠡᠳ᠋ ᠰᠤᠮᠤ ᠪᠠᠷ ᠳᠤᠭᠤᠯᠠᠭᠠ ᠶ᠋ᠢᠨ ᠪᠠᠷᠠᠭᠤᠨ ᠵᠠᠵᠢᠭᠤᠷ ᠢ᠋ ᠤᠨᠤᠵᠤ ᠰᠡᠭᠦᠯ ᠦ᠋ᠨ ᠰᠤᠮᠤ ᠳ᠋ᠤᠷ ᠳᠤᠭᠤᠯᠠᠭᠠ ᠶ᠋ᠢᠨ ᠰᠣᠨᠣᠪᠲᠠᠷ ᠵᠠᠯᠠᠭᠠ ᠲᠠᠢ ᠬᠠᠮᠲᠤ ᠪᠠᠷ ᠬᠠᠷᠪᠤᠵᠤ ᠠᠪᠬᠤ ᠶ᠋ᠢ ᠦᠵᠡ!》 ᠬᠡᠮᠡᠭᠡᠳ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠬᠠᠨ ᠠᠭᠤᠯᠠ ᠶ᠋ᠢ ᠲᠦᠯᠬᠢᠵᠦ᠂ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠨᠢᠯᠬᠠ ᠬᠡᠦᠬᠡᠳ ᠢ᠋ ᠲᠡᠪᠡᠷᠢᠬᠦ ᠮᠡᠲᠦ ᠲᠠᠲᠠᠬᠤᠢ ᠳ᠋ᠤᠷ ᠨᠤᠮᠤ ᠳᠥᠭᠥᠷᠦᠨ ᠲᠡᠷᠭᠡᠯ ᠰᠠᠷᠠᠨ ᠪᠣᠯᠤᠭᠠᠳ ᠰᠤᠮᠤ ᠡᠴᠢᠬᠦᠶᠡ ᠤᠨᠠᠬᠤ ᠣᠳᠣᠨ ᠬᠠᠷᠪᠤᠵᠤ ᠴᠢᠪᠬᠢᠲᠡᠯᠡ ᠳᠤᠭᠤᠯᠠᠭᠠ ᠶ᠋ᠢᠨ ᠵᠡᠭᠦᠨ ᠵᠠᠵᠢᠭᠤᠷ ᠲᠤᠷ ᠭᠣᠷᠣᠢᠲᠠᠯᠠ ᠭᠠᠳᠠᠪᠠ᠃ ᠣᠯᠠᠨ ᠴᠡᠷᠢᠭ ᠬᠠᠮᠲᠤ ᠪᠠᠷ ᠬᠠᠰᠬᠢᠷᠤᠨ ᠭᠤᠷᠪᠠᠨ ᠵᠡᠷᠭᠡ ᠦᠯᠢᠶᠡᠨ ᠳᠡᠯᠡᠳᠪᠡ᠃ ᠳᠡᠳ᠋ ᠰᠤᠮᠤ ᠳ᠋ᠤᠷ ᠵᠡᠭᠦᠨ ᠨᠢᠳᠤᠷᠭᠠ ᠡᠮᠦᠨᠡ ᠠᠭᠤᠯᠠ ᠶ᠋ᠢᠨ ᠪᠠᠷᠰ ᠢ᠋ ᠨᠤᠳᠤᠷᠴᠤ ᠪᠠᠷᠠᠭᠤᠨ ᠲᠣᠬᠣᠢ ᠬᠣᠢᠲᠤ ᠳᠠᠯᠠᠢ ᠶ᠋ᠢᠨ ᠯᠤᠤᠰ ᠢ᠋ ᠮᠣᠰᠬᠢᠭᠠᠳ ᠬᠠᠲᠠᠭᠠᠢ ᠶ᠋ᠢᠨ ᠨᠤᠮᠤ ᠪᠠᠨ ᠴᠠᠳᠲᠠᠯᠠ ᠢᠳᠡᠰᠢᠯᠡᠭᠡᠳ ᠭᠠᠯᠪᠢᠩᠭᠠ ᠶ᠋ᠢᠨ ᠥᠳᠥ ᠪᠡᠨ ᠵᠠᠪᠠᠵᠢ ᠪᠠᠨ ᠳᠠᠪᠠᠭᠤᠯᠵᠤ ᠬᠥᠪᠴᠢ ᠳᠤᠤᠭᠠᠷᠴᠤ ᠰᠤᠮᠤ ᠭᠠᠷᠤᠭᠠᠳ ᠪᠠᠰᠠ ᠲᠦᠪᠭᠢᠲᠡᠯᠡ ᠳᠤᠭᠤᠯᠠᠭᠠ ᠶ᠋ᠢᠨ ᠪᠠᠷᠠᠭᠤᠨ ᠵᠠᠵᠢᠭᠤᠷ ᠲᠤᠷ ᠭᠣᠷᠣᠢᠲᠠᠯᠠ ᠭᠠᠳᠠᠪᠠ᠃ ᠣᠯᠠᠨ ᠴᠡᠷᠢᠭ ᠴᠤᠭᠠᠷ ᠬᠠᠰᠬᠢᠷᠤᠯᠳᠤᠨ ᠵᠢᠷᠭᠤᠭᠠᠨ ᠵᠡᠷᠭᠡ ᠦᠯᠢᠶᠡᠨ ᠳᠡᠯᠡᠳᠪᠡ᠃ ᠰᠡᠭᠦᠯ ᠦ᠋ᠨ ᠰᠤᠮᠤ ᠳ᠋ᠤᠷ ᠬᠦᠷᠴᠦ ᠢᠷᠡᠭᠰᠡᠨᠡ᠂ ᠲᠠᠢᠽᠦ ᠮᠥᠨ ᠲᠡᠭᠷᠢ ᠶ᠋ᠢᠨ ᠵᠦᠭ ᠰᠡᠮᠡᠬᠡᠷ ᠵᠠᠯᠪᠠᠷᠢᠬᠤᠶᠠ ᠂ ᠭᠡᠨᠡᠳᠲᠡ ᠬᠠᠪᠤᠲᠤ ᠬᠠᠰᠠᠷ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ᠄ 《ᠮᠠᠨ ᠤ᠋ ᠲᠡᠭᠷᠢᠯᠢᠭ ᠦ᠋ᠨ ᠠᠬᠠ ᠡᠵᠡᠨ ᠢ᠋ᠶ᠋ᠡᠷ ᠮᠠᠭᠠᠳ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠶᠡᠷᠦᠩᠬᠡᠢᠯᠡᠨ ᠨᠡᠢᠭᠡᠮᠯᠡᠬᠦ ᠶᠡᠬᠡ ᠪᠤᠶᠠᠨ ᠢ᠋ ᠡᠨᠡ ᠨᠢᠭᠡᠬᠡᠨ ᠰᠤᠮᠤ ᠳ᠋ᠤᠷ ᠦᠵᠡᠭᠳᠡᠬᠦᠢ!》 ᠬᠡᠮᠡᠭᠡᠳ ᠵᠡᠭᠦᠨ ᠠᠯᠠᠭᠠᠨ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠢ᠋ ᠬᠡᠮᠬᠡᠷᠡᠲᠡᠯᠡ ᠠᠳᠬᠠᠳ᠂ ᠪᠠᠷᠠᠭᠤᠨ ᠮᠥᠷᠥ ᠳ᠋ᠦ᠍ᠷ ᠪᠧᠲ᠋ᠠ᠋ ᠤᠯᠤᠰ ᠢ᠋ᠶ᠋ᠠᠨ ᠡᠷᠭᠦᠨ ᠲᠡᠪᠡᠷᠢᠵᠦ᠂ ᠪᠣᠯᠣᠳ ᠤ᠋ᠨ ᠰᠢᠷᠬᠡᠭᠲᠦ ᠨᠤᠮᠤ ᠶ᠋ᠢ ᠳᠠᠭᠤᠨ ᠭᠠᠷᠲᠠᠯᠠ ᠳᠦᠭᠦᠷᠭᠡᠭᠡᠳ ᠠᠯᠲᠠᠨ ᠣᠨᠢᠲᠤ ᠰᠤᠮᠤ ᠶ᠋ᠢ ᠵᠡᠪᠡ ᠳ᠋ᠦ᠍ᠷ ᠲᠤᠯᠲᠠᠯᠠ ᠲᠠᠲᠠᠭᠠᠳ ᠣᠨᠢᠯᠠᠨ ᠲᠣᠭᠲᠠᠭᠠᠵᠤ᠂ ᠡᠷᠡᠬᠡᠢᠪᠴᠢ ᠪᠣᠯᠳᠣᠷᠠᠨ ᠲᠠᠮᠰᠢᠶᠠᠯᠠᠭᠠ ᠲᠠᠮᠰᠢᠶᠠᠯᠠᠨ ᠬᠥᠪᠴᠢ ᠳᠦᠩᠭᠢᠨᠡᠵᠦ᠂ ᠰᠤᠮᠤ ᠱᠣᠷᠴᠢᠭᠢᠨᠠᠨ ᠳᠤᠭᠤᠯᠠᠭᠠ ᠳᠠᠭᠤᠷᠢᠰᠴᠤ ᠰᠣᠨᠣᠪᠲᠤᠷ ᠦᠰᠦᠷᠦᠨ ᠡᠴᠢᠭᠰᠡᠨ ᠳ᠋ᠦ᠍ᠷ ᠠᠶᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠶᠢᠰᠦᠨ ᠲᠦᠮᠡᠨ ᠦ᠌ ᠶᠡᠬᠡ ᠣᠯᠠᠨ ᠢ᠋ᠶ᠋ᠠᠷ ᠢᠭᠲᠦᠯᠲᠡᠯᠡ ᠦᠰᠦᠷᠬᠢᠯᠡᠨ ᠳᠡᠪᠬᠡᠴᠡᠨ ᠪᠠᠶᠠᠰᠤᠯᠴᠠᠵᠤ᠂ ᠶᠢᠰᠦᠨ ᠵᠡᠷᠭᠡ ᠦᠯᠢᠶᠡᠨ ᠳᠡᠯᠡᠳᠴᠦ ᠰᠠᠢᠰᠢᠶᠠᠨ ᠮᠠᠭᠲᠠᠯᠴᠠᠵᠤ᠂ ᠳᠠᠭᠤᠳᠠᠨ ᠬᠠᠰᠬᠢᠷᠤᠯᠳᠤᠬᠤ ᠠᠨᠤ ᠲᠡᠭᠷᠢ ᠬᠦᠷᠴᠢᠭᠢᠨᠡᠨ ᠭᠠᠵᠠᠷ ᠬᠥᠳᠡᠯᠵᠦ᠂ ᠮᠥᠷᠡᠨ ᠲᠦᠯᠬᠢᠵᠦ ᠳᠠᠯᠠᠢ ᠪᠤᠴᠠᠯᠬᠤ ᠮᠡᠲᠦ ᠦᠢᠮᠡᠯᠳᠦᠮᠦᠢ᠃ ᠡᠭᠦᠨ ᠳ᠋ᠦ᠍ᠷ ᠲᠡᠷᠡ ᠬᠦ᠌ ᠵᠢᠨᠦᠩ ᠮᠤᠬᠤᠯᠢ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠲᠣᠷᠭᠠᠨ ᠰᠢᠷᠠ ᠬᠣᠶᠠᠭᠤᠯᠠ ᠶᠠᠭᠠᠷᠠᠨ ᠵᠢᠨᠦᠩ ᠦ᠋ᠨ ᠪᠠᠷᠰ ᠤ᠋ᠨ ᠴᠠᠴᠠᠷ ᠠ᠋ᠴᠠ ᠪᠠᠭᠤᠵᠤ ᠣᠯᠠᠨ ᠰᠠᠢᠳ ᠲᠦᠰᠢᠮᠡᠳ ᠢ᠋ ᠠᠪᠴᠤ ᠲᠠᠢᠽᠦ ᠶ᠋ᠢᠨ ᠠᠷᠰᠯᠠᠨᠲᠤ ᠳᠠᠭᠲᠤᠷ ᠲᠤᠷ ᠠᠪᠠᠷᠢᠵᠤ᠂ ᠠᠯᠲᠠᠨ ᠴᠥᠭᠥᠴᠡ ᠳ᠋ᠦ᠍ᠷ ᠠᠷᠢᠬᠢ ᠬᠢᠵᠦ ᠪᠠᠷᠢᠭᠠᠳ ᠵᠢᠨᠦᠩ ᠮᠤᠬᠤᠯᠢ ᠰᠥᠭᠥᠳᠴᠦ ᠥᠨᠳᠥᠷ ᠰᠠᠢᠬᠠᠨ ᠢᠷᠠᠭᠤ ᠡᠭᠡᠰᠢᠭᠲᠦ ᠳᠠᠭᠤᠨ ᠢ᠋ᠶ᠋ᠠᠷ ᠡᠢᠨ ᠪᠡᠯᠭᠡᠯᠡᠵᠦ ᠮᠡᠳᠡᠭᠦᠯᠦᠷᠦᠨ᠄
ᠪᠣᠯᠣᠳ ᠤ᠋ᠨ ᠳᠤᠭᠤᠯᠠᠭᠠ ᠳ᠋ᠤᠷ
ᠪᠣᠰᠣᠬᠠ ᠬᠣᠶᠠᠷ ᠡᠪᠡᠷ ᠮᠡᠲᠦ ᠰᠤᠮᠤ ᠬᠠᠳᠬᠤᠭᠰᠠᠨ ᠢ᠋ᠶ᠋ᠠᠷ
ᠪᠤᠶᠠᠨᠲᠤ ᠡᠵᠡᠨ ᠪᠤᠯᠲᠤ ᠭᠠᠵᠠᠷ ᠢ᠋ ᠡᠵᠡᠯᠡᠬᠦ ᠪᠡᠯᠭᠡ ᠢᠯᠡᠷᠡᠪᠡ ᠃
ᠠᠯᠳᠠᠮᠠᠯ ᠳᠤᠭᠤᠯᠠᠭᠠ ᠶ᠋ᠢᠨ ᠠᠳᠠᠪᠠᠰᠢ ᠭᠠᠭᠴᠠ ᠰᠣᠨᠣᠪᠲᠤᠷ ᠢ᠋ ᠠᠨᠤ ᠤᠨᠤᠭᠰᠠᠨ ᠢ᠋ᠶ᠋ᠠᠷ
ᠠᠯᠲᠠᠨ ᠤᠯᠤᠰ ᠠᠯᠪᠠ ᠪᠠᠷᠢᠬᠤ ᠮᠠᠭᠠᠳ ᠪᠣᠯᠤᠭᠰᠠᠨ ᠢᠷᠣᠠ ᠮᠡᠳᠡᠭᠳᠡᠪᠡ !
ᠭᠡᠮᠡᠨ ᠪᠠᠶᠠᠷ ᠲᠤᠷ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠮᠠᠰᠢᠳᠠ ᠪᠡᠶᠡᠰᠴᠦ ᠸᠧᠢ ᠸᠠᠩ ᠶᠦᠩ ᠵᠢᠢ ᠳ᠋ᠦ᠍ᠷ ᠮᠥᠨ ᠠᠷᠢᠬᠢ ᠪᠠᠷᠢᠭᠤᠯᠵᠤ᠂ ᠳᠠᠷᠤᠢ ᠪᠡᠶᠡ ᠡᠭᠡᠵᠦ ᠳᠡᠭᠦᠦ ᠬᠠᠪᠤᠲᠤ ᠬᠠᠰᠠᠷ ᠲᠤᠷ ᠭᠠᠷ ᠢ᠋ᠶ᠋ᠠᠷ ᠠᠷᠢᠬᠢ ᠥᠭᠴᠦ ᠪᠡᠯᠭᠡᠯᠡᠷᠦᠨ᠄
ᠬᠠᠰ ᠶᠡᠬᠡ ᠲᠥᠷᠥ ᠶ᠋ᠢ ᠮᠢᠨᠦ
ᠬᠠᠷᠪᠤᠬᠤ ᠮᠡᠲᠦ ᠪᠦᠲᠦᠭᠡ᠂
ᠬᠠᠮᠤᠭ ᠣᠯᠠᠨ ᠳᠠᠢᠰᠤᠨ ᠢ᠋ ᠮᠢᠨᠦ
ᠬᠠᠳᠤᠬᠤ ᠠᠳᠠᠯᠢ ᠠᠷᠢᠯᠭᠠ᠃
ᠬᠠᠨ ᠶᠡᠬᠡ ᠤᠯᠤᠰ ᠢ᠋ ᠮᠢᠨᠦ
ᠬᠠᠷᠪᠤᠬᠤ ᠮᠡᠲᠦ ᠪᠦᠲᠦᠭᠡ᠂
ᠬᠠᠷᠢ ᠬᠣᠯᠠ ᠠᠢᠮᠠᠭ ᠤ᠋ᠳ ᠢ᠋ ᠮᠢᠨᠦ
ᠬᠠᠷᠮᠠᠬᠤ ᠠᠳᠠᠯᠢ ᠬᠤᠷᠢᠶᠠ᠂
ᠬᠡᠮᠡᠭᠡᠳ ᠪᠠᠰᠠ ᠢᠵᠢᠯᠵᠢ ᠠᠢᠮᠠᠭ ᠤ᠋ᠨ ᠢᠯᠭᠦᠨᠡ ᠶ᠋ᠢᠨ ᠪᠤᠲᠸ᠋ ᠳ᠋ᠦ᠋ᠷ ᠮᠣᠳᠣᠷ ᠢ᠋ᠶ᠋ᠠᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠰᠠᠢᠰᠢᠶᠠᠷᠤᠨ ᠄
ᠢᠵᠢᠯᠴᠢ ᠠᠢᠮᠠᠭ ᠤ᠋ᠨ
ᠢᠲᠡᠭᠡᠯᠲᠡᠢ ᠰᠠᠢᠬᠠᠨ ᠪᠤᠲ᠋ᠤ ᠴᠢ
ᠢᠷᠡᠮᠡᠭᠴᠡ ᠰᠡᠴᠡ ᠢᠯᠡᠭᠦᠦ ᠳᠤᠲᠠᠭᠤ ᠦᠭᠡᠢ ᠪᠡᠷ
ᠢᠷᠡᠭᠡᠲᠦ ᠰᠤᠮᠤ ᠪᠠᠷ ᠭᠤᠷᠪᠠᠨᠲᠠ ᠤᠨᠤᠵᠤ ᠴᠢᠳᠠᠭᠰᠠᠨ ᠠᠨᠤ
ᠢᠯᠡᠷᠬᠡᠢ ᠮᠢᠨᠦ ᠢᠨᠠᠭ ᠲᠡᠳᠬᠦᠭᠴᠢ ᠮᠥᠨ ᠪᠤᠶᠤ !
ᠬᠡᠮᠡᠵᠦ᠂ ᠪᠠᠰᠠ ᠵᠦᠷᠴᠢᠳ ᠦ᠋ᠨ ᠰᠠᠢᠰᠢᠶᠠᠯ ᠤ᠋ᠨ ᠰᠠᠢᠳ ᠬᠤᠪᠢᠯᠭᠠᠨ ᠬᠠᠷᠪᠤᠭᠠᠴᠢ ᠴᠤᠤ ᠮᠡᠷᠭᠡᠨ ᠳ᠋ᠦ᠍ᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠰᠠᠢᠰᠢᠶᠠᠷᠤᠨ ᠄
ᠲᠦᠮᠡᠨ ᠴᠡᠷᠢᠭ ᠲᠦ᠍ᠷ ᠲᠡᠷᠢᠭᠦᠯᠡᠭᠰᠡᠨ ᠢ᠋ ᠢᠨᠤ ᠤᠨᠤᠭᠴᠢ
ᠲᠥᠷᠥ ᠶ᠋ᠢᠨ ᠡᠮᠦᠨᠡ ᠦᠭᠡ ᠳ᠋ᠦ᠍ᠷ ᠶᠦ᠍ᠭᠡᠨ ᠬᠦᠷᠦᠭᠴᠢ᠂
ᠲᠦᠪᠡᠭᠳᠡᠭᠰᠡᠨ ᠮᠡᠷᠭᠡᠳ ᠢ᠋ ᠨᠢᠭᠡᠬᠡᠨ ᠰᠤᠮᠤ ᠳ᠋ᠤᠷ ᠳᠠᠭᠠᠭᠤᠯᠤᠭᠰᠠᠨ
ᠲᠦᠳᠡᠯ ᠦᠭᠡᠢ ᠴᠤᠤ ᠮᠡᠷᠭᠡᠨ ᠰᠠᠢᠳ ᠮᠢᠨᠦ!
ᠬᠡᠮᠡᠵᠦ ᠲᠣᠷᠭᠠᠨ ᠰᠢᠷᠠ᠂ ᠵᠢᠨᠦᠩ ᠮᠤᠬᠤᠯᠢ ᠬᠣᠶᠠᠭᠤᠯᠠ ᠳ᠋ᠤᠷ ᠮᠥᠨ ᠮᠣᠳᠣᠷ ᠢ᠋ᠶ᠋ᠠᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠪᠡᠯᠭᠡᠯᠡᠷᠦᠨ᠄
ᠬᠣᠴᠢ ᠦᠭᠡᠢ ᠬᠣᠶᠠᠷ ᠰᠠᠢᠳ ᠲᠠᠨ ᠤ᠋ ᠪᠡᠯᠭᠡᠯᠡᠭᠰᠡᠨ ᠢ᠋ᠶ᠋ᠡᠷ
ᠬᠣᠢᠴᠢ ᠡᠳᠦᠷ ᠳᠡᠯᠡᠬᠡᠢ ᠶ᠋ᠢ ᠡᠵᠡᠯᠡᠵᠦ ᠳᠡᠭᠡᠷᠡ ᠳᠣᠣᠷᠠ ᠪᠠᠷ ᠵᠢᠷᠭᠠᠯᠳᠤᠶᠠ᠂
ᠬᠣᠯᠠ ᠪᠣᠳᠣᠯᠭᠠᠲᠤ ᠬᠣᠣᠰ ᠲᠦᠰᠢᠮᠡᠯ ᠲᠠᠨ ᠤ᠋ ᠪᠡᠯᠭᠡᠳᠡᠭᠰᠡᠨ ᠢ᠋ᠶ᠋ᠡᠷ
ᠬᠣᠴᠣᠷᠯᠢ ᠦᠭᠡᠢ ᠬᠠᠮᠤᠭ ᠢ᠋ ᠬᠤᠷᠢᠶᠠᠵᠤ ᠬᠣᠯᠠ ᠣᠢᠷᠠ ᠶ᠋ᠢ ᠠᠮᠤᠷᠵᠢᠭᠤᠯᠤᠶᠠ!
ᠬᠡᠮᠡᠭᠡᠳ ᠬᠠᠪᠤᠲᠤ ᠬᠠᠰᠠᠷ ᠲᠡᠷᠢᠭᠦᠯᠡᠨ ᠭᠤᠷᠪᠠᠨ ᠬᠥᠮᠦᠨ ᠳ᠋ᠦ᠍ᠷ ᠳᠡᠰ ᠳᠠᠷᠠᠭᠠᠯᠠᠨ ᠮᠥᠩᠭᠥ ᠲᠣᠷᠭᠠ᠂ ᠠᠯᠲᠠᠨ ᠮᠠᠩᠨᠤᠭ᠂ ᠬᠠᠰ ᠰᠤᠪᠤᠳ᠂ ᠨᠤᠮᠤ ᠵᠡᠪᠡ᠂ ᠬᠤᠶᠠᠭ ᠳᠤᠭᠤᠯᠠᠭᠠ ᠱᠠᠩᠨᠠᠵᠤ ᠬᠥᠬᠢᠭᠦᠯᠬᠦ ᠶ᠋ᠢ ᠦᠵᠡᠭᠦᠯᠪᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠸᠧᠢ ᠸᠠᠩ ᠶᠦᠩ ᠵᠢᠢ ᠲᠡᠷᠢᠭᠦᠯᠡᠨ ᠵᠠᠭᠤᠨ ᠢᠯᠡᠭᠦᠦ ᠨᠥᠬᠥᠳ ᠳᠠᠭᠠᠭᠰᠠᠳ᠂ ᠵᠠᠭᠤᠨ ᠢᠯᠡᠭᠦᠦ ᠬᠥᠮᠦᠨ ᠦᠨᠡᠬᠡᠷ ᠴᠥᠮ ᠰᠣᠴᠢᠨ ᠪᠠᠯᠠᠷᠠᠵᠤ ᠭᠠᠢᠬᠠᠨ ᠪᠢᠰᠢᠷᠡᠭᠡᠳ ᠬᠠᠷᠢᠯᠴᠠᠨ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠨ ᠪᠦᠯᠲᠡᠢᠯᠴᠡᠨ ᠬᠠᠷᠠᠯᠴᠠᠵᠤ᠂ ᠶᠦᠩ ᠵᠢᠢ ᠰᠠᠭᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠪᠠᠨ ᠪᠣᠰᠴᠤ ᠲᠠᠢᠽᠦ ᠳ᠋ᠦ᠍ᠷ ᠠᠷᠢᠬᠢ ᠪᠠᠷᠢᠵᠤ ᠥᠴᠢᠷᠦᠨ᠄ 《 ᠡᠷᠭᠢᠨ ᠶᠤᠸᠠᠨᠱᠤᠸᠠᠢ ᠶ᠋ᠢᠨ ᠦᠪᠡᠳᠡᠭᠰᠢ ᠤᠯᠤᠰ ᠪᠠ ᠭᠠᠷ ᠤ᠋ᠨ ᠳᠣᠣᠷᠠ ᠡᠨᠡ ᠮᠡᠲᠦ ᠮᠡᠷᠭᠡᠳ ᠪᠠᠭᠠᠲᠤᠳ ᠪᠠᠢᠬᠤ ᠲᠤᠯᠠ ᠬᠣᠢᠲᠤ ᠭᠠᠵᠠᠷ ᠢ᠋ ᠬᠤᠷᠢᠶᠠᠮᠵᠢᠯᠠᠨ ᠨᠡᠢᠭᠡᠮᠯᠡᠵᠦ ᠠᠮᠤᠭᠤᠯᠤᠨ ᠲᠦᠪᠰᠢᠳᠬᠡᠬᠦᠢ ᠳ᠋ᠦ᠍ᠷ ᠦᠨᠡᠬᠡᠷ ᠭᠠᠷ ᠤ᠋ᠨ ᠠᠯᠠᠭᠠ ᠤᠷᠪᠠᠭᠤᠯᠬᠤ ᠮᠡᠲᠦ ᠬᠢᠯᠪᠠᠷ ᠪᠣᠯᠠᠢ !》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠮᠥᠨ ᠶᠠᠭᠠᠷᠠᠨ ᠬᠠᠷᠢᠭᠤ ᠠᠷᠢᠬᠢ ᠪᠠᠷᠢᠵᠤ ᠮᠠᠷᠭᠤᠨ ᠥᠭᠦᠯᠡᠷᠦᠨ᠄ 《 ᠡᠳᠡᠭᠡᠷ ᠴᠥᠮ ᠴᠡᠷᠢᠭ ᠦ᠋ᠨ ᠡᠷᠡ ᠶ᠋ᠢᠨ ᠶᠡᠷᠦ ᠶ᠋ᠢᠨ ᠰᠤᠷᠲᠠᠯ ᠡᠩ ᠦ᠋ᠨ ᠡᠷᠳᠡᠮ ᠪᠣᠯᠠᠢ ! ᠶᠠᠮᠪᠠᠷ ᠶᠡᠬᠡ ᠭᠠᠢᠬᠠᠯᠲᠠᠢ ᠭᠠᠵᠠᠷ ᠰᠠᠢᠰᠢᠶᠠᠯᠲᠠᠢ ᠵᠦᠢᠯ ᠪᠣᠢ ! ᠭᠠᠭᠴᠠ ᠡᠷᠭᠢᠨ ᠸᠠᠩ ᠢ᠋ ᠳᠠᠢᠴᠢᠯᠠᠨ ᠰᠡᠷᠭᠦᠭᠡᠬᠦ ᠰᠠᠢᠨ ᠵᠦᠢᠯ ᠦᠭᠡᠢ ᠲᠤᠯᠠ ᠵᠦᠭᠡᠷ ᠨᠢᠭᠡᠨ ᠬᠤᠷᠢᠮ ᠤ᠋ᠨ ᠬᠥᠷ ᠨᠠᠢᠷ ᠪᠣᠯᠭᠠᠭᠰᠠᠨ ᠪᠣᠯᠠᠢ ᠃ ᠶᠡᠷᠦ ᠶ᠋ᠢᠨ ᠡᠳᠦᠷ ᠡᠮᠦᠨᠡ ᠤᠯᠤᠰ ᠤ᠋ᠨ ᠬᠥᠮᠦᠨ ᠡᠴᠡ ᠰᠣᠨᠣᠰᠬᠤᠯᠠ ᠂ ᠡᠷᠬᠢᠮ ᠦ᠋ᠨ ᠡᠮᠦᠨᠡᠲᠦ ᠤᠯᠤᠰ ᠲᠤᠷ ᠵᠠᠭᠤᠨ ᠠᠯᠴᠠᠮ ᠭᠠᠵᠠᠷ ᠠ᠋ᠴᠠ ᠬᠤᠨᠳᠠᠷ ᠮᠣᠳᠣᠨ ᠤ᠋ ᠨᠠᠪᠴᠢ ᠪᠠ ᠠᠯᠲᠠᠨ ᠵᠣᠭᠣᠰ ᠤ᠋ᠨ ᠨᠦᠬᠡ ᠪᠡᠷ ᠨᠡᠪᠲᠡ ᠤᠨᠤᠳᠠᠭ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠣᠯᠠᠨᠲᠠ ᠭᠠᠷᠴᠤ ᠡᠮᠦᠨᠡᠲᠦ ᠤᠯᠤᠰ ᠤ᠋ᠨ ᠪᠢᠴᠢᠭ ᠰᠤᠳᠤᠷ ᠲᠤᠷ ᠡᠭᠦᠷᠢᠳᠡ ᠬᠣᠴᠣᠷᠳᠠᠭ ᠭᠡᠮᠡᠨ ᠤᠷᠲᠤᠳᠠ ᠰᠣᠨᠣᠰᠤᠯᠤᠭᠠ ᠂ ᠡᠷᠭᠢᠨ ᠸᠠᠩ ᠤ᠋ᠨ ᠠᠯᠲᠠᠨ ᠤᠯᠤᠰ ᠬᠡᠮᠡᠭᠴᠢ ᠲᠡᠭᠷᠢ ᠭᠠᠵᠠᠷ ᠤ᠋ᠨ ᠳᠤᠮᠳᠠᠳᠤ ᠶ᠋ᠢ ᠡᠵᠡᠯᠡᠭᠰᠡᠨ ᠶᠡᠬᠡ ᠲᠡᠭᠷᠢ ᠶ᠋ᠢᠨ ᠤᠯᠤᠰ ᠬᠡᠮᠡᠳᠡᠭ ᠲᠤᠯᠠ ᠯᠠᠪ ᠨᠡᠩ ᠭᠠᠢᠬᠠᠯᠲᠠᠢ ᠠᠨᠤ ᠮᠠᠭᠠᠳ ᠣᠯᠳᠠᠬᠤᠯᠠ ᠰᠢᠳᠠᠷ ᠵᠠᠩᠵᠤᠨ ᠨᠤᠭᠤᠳ ᠲᠤᠷ ᠵᠠᠬᠢᠶᠠᠯᠠᠵᠤ ᠮᠥᠨ ᠬᠡᠳᠦᠨ ᠰᠤᠮᠤ ᠬᠠᠷᠪᠤᠭᠤᠯᠵᠤ ᠂ ᠮᠠᠨ ᠤ᠋ ᠪᠢᠲᠡᠭᠦᠯᠢᠭ ᠥᠴᠦᠬᠡᠨ ᠤᠯᠤᠰ ᠤ᠋ᠨ ᠣᠯᠠᠨ ᠤ᠋ ᠨᠢᠳᠦ ᠶ᠋ᠢ ᠨᠡᠭᠡᠭᠡᠯᠭᠡᠵᠦ ᠂ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠭᠠᠢᠬᠠᠯ ᠢ᠋ ᠨᠢᠭᠡᠨ ᠤᠳᠠᠭᠠ ᠦᠵᠡᠭᠦᠯᠦᠮᠦ !》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠶᠦᠩ ᠵᠢᠢ ᠶᠡᠬᠡᠯᠡ ᠬᠢᠷᠲ᠌ᠬᠢᠪᠡ ᠃ ᠶᠠᠭᠤᠨ ᠬᠡᠮᠡᠪᠡᠰᠦ ᠡᠨᠡ ᠦᠶᠡ ᠳ᠋ᠦ᠍ᠷ ᠯᠢᠶᠣᠤ ᠤᠯᠤᠰ ᠮᠥᠬᠥᠵᠦ ᠰᠥᠩ ᠤᠯᠤᠰ ᠭᠢᠰᠬᠢᠯᠡᠭᠳᠡᠭᠡᠳ ᠠᠯᠲᠠᠨ ᠤᠯᠤᠰ ᠠᠮᠤᠷ ᠪᠣᠯᠤᠭᠰᠠᠨ ᠠ᠋ᠴᠠ ᠬᠠᠳ ᠠᠨᠤ ᠵᠥᠭᠡᠯᠡᠨ ᠨᠡᠮᠡᠭᠦᠨ ᠵᠢᠷᠭᠠᠯ ᠴᠡᠩᠭᠡᠯ ᠳ᠋ᠦ᠍ᠷ ᠰᠢᠨᠤᠵᠤ᠂ ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠳ ᠦ᠋ᠨ ᠬᠣᠭᠣᠰᠣᠨ ᠬᠣᠩᠰᠢᠶᠠᠷ ᠤ᠋ᠨ ᠴᠢᠮᠡᠭᠯᠡᠬᠦ ᠦᠭᠡᠰ ᠲᠣᠷ ᠬᠠᠭᠤᠷᠲᠠᠭᠳᠠᠵᠤ᠂ ᠲᠥᠷᠥ ᠶ᠋ᠢᠨ ᠬᠦᠨᠳᠦ ᠡᠷᠬᠡ ᠶ᠋ᠢ ᠴᠥᠮ ᠪᠢᠴᠢᠭ ᠦ᠋ᠨ ᠰᠠᠢᠳ ᠲᠤᠷ ᠪᠠᠷᠢᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠴᠡᠷᠢᠭ ᠦ᠋ᠨ ᠲᠦᠰᠢᠮᠡᠳ ᠴᠥᠮ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠢ᠋ ᠣᠷᠬᠢᠵᠤ ᠭᠡᠭᠡᠭᠡᠳ᠂ ᠪᠢᠴᠢᠭ ᠲᠦ᠍ᠷ ᠣᠷᠣᠵᠤ ᠬᠢᠴᠢᠶᠡᠯᠴᠡᠨ᠂ ᠡᠷᠬᠢᠮ ᠶᠡᠬᠡ ᠶ᠋ᠢ ᠬᠥᠭᠡᠭᠡᠯᠴᠡᠭᠰᠡᠭᠡᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠰᠤᠷᠲᠠᠯ ᠨᠢᠭᠡᠮᠦᠰᠦᠨ ᠪᠦᠷᠢᠯᠦᠨ ᠳᠠᠭᠤᠰᠴᠤ ᠪᠠᠬᠠᠨ ᠴᠤ᠌ ᠠᠪᠤᠰᠢᠲᠠᠢ ᠬᠥᠮᠦᠨ ᠪᠣᠯᠪᠠᠰᠤ ᠪᠢᠴᠢᠭ ᠦ᠋ᠨ ᠵᠠᠮ ᠢ᠋ᠶ᠋ᠠᠷ ᠪᠠᠶᠠᠨ ᠡᠷᠬᠢᠮ ᠢ᠋ ᠬᠢᠴᠢᠶᠡᠭᠰᠡᠭᠡᠷ ᠴᠡᠷᠢᠭ ᠦ᠋ᠨ ᠬᠠᠷᠢᠶᠠᠲᠤ ᠳ᠋ᠤᠷ ᠰᠢᠭᠤᠳ ᠬᠥᠮᠦᠨ ᠦᠭᠡᠢ ᠪᠣᠯᠵᠤᠬᠤᠢ᠃ ᠬᠡᠳᠦᠢᠪᠡᠷ ᠴᠡᠷᠢᠭ ᠦ᠋ᠨ ᠬᠠᠷᠢᠶᠠᠲᠤ ᠲᠤᠰᠢᠶᠠᠯᠲᠠᠨ ᠪᠣᠯᠪᠠᠴᠤ ᠡᠰᠡᠬᠦᠯᠡ ᠬᠣᠭᠣᠰᠣᠨ ᠨᠡᠷᠡ ᠶ᠋ᠢᠨ ᠲᠡᠳᠦᠢ ᠶ᠋ᠢ ᠡᠭᠦᠷᠦᠭᠰᠡᠨ ᠢᠯᠵᠠᠷᠬᠠᠢ ᠪᠢᠴᠢᠭ ᠦ᠋ᠨ ᠠᠷᠠᠳ ᠪᠤᠰᠤ ᠪᠣᠯᠪᠠᠰᠤ ᠳᠠᠷᠤᠢ ᠬᠡᠷᠡᠭ ᠦᠭᠡᠢ ᠭᠡᠭᠡᠭᠳᠡᠵᠦ ᠣᠷᠬᠢᠭᠳᠠᠭᠰᠠᠨ ᠡᠩ ᠥᠲᠡᠯᠡ ᠮᠤᠩᠬᠠᠨ ᠠᠷᠠᠳ ᠪᠣᠢ ᠊ᠶᠠ᠃ ᠨᠢᠭᠡᠬᠡᠨ ᠴᠦ᠍ ᠦᠨᠡᠨ ᠡᠷᠳᠡᠮ ᠴᠢᠳᠠᠯᠲᠤ ᠶᠡᠬᠡᠬᠡᠨ ᠵᠠᠩᠵᠤᠨ ᠨᠤᠭᠤᠳ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠᠳᠠ ᠳᠣᠣᠷᠠᠲᠤ ᠴᠡᠷᠢᠭ ᠦ᠋ᠨ ᠠᠷᠠᠳ ᠰᠢᠭᠤᠳ ᠮᠣᠷᠢ ᠤᠨᠤᠵᠤ ᠵᠡᠪᠰᠡᠭ ᠪᠠᠷᠢᠨ ᠴᠢᠳᠠᠬᠤ ᠦᠭᠡᠢ ᠳ᠋ᠦ᠍ᠷ ᠬᠦᠷᠴᠦᠬᠦᠢ᠃ ᠲᠡᠢᠨ ᠬᠦ᠌ ᠡᠳᠦᠭᠡ ᠳᠠᠭᠠᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠨ ᠲᠦᠰᠢᠮᠡᠳ ᠬᠡᠮᠡᠬᠦ ᠠᠷᠠᠳ ᠠᠨᠤ ᠴᠥᠮ ᠢ᠋ᠶ᠋ᠡᠷ ᠪᠠᠷᠰ ᠤ᠋ᠨ ᠠᠷᠠᠰᠤ ᠪᠠᠷ ᠪᠠᠭᠯᠠᠭᠰᠠᠨ ᠡᠯᠵᠢᠭᠡ ᠨᠤᠭᠦᠳ ᠲᠤᠯᠠ ᠶᠠᠭᠤᠨ ᠤ᠋ ᠮᠣᠷᠢ ᠳᠣᠪᠲᠣᠯᠤᠨ ᠭᠠᠷᠴᠤ ᠬᠠᠷᠪᠤᠨ ᠨᠠᠮᠨᠠᠵᠤ ᠴᠢᠳᠠᠬᠤ ᠠᠵᠢ !
ᠲᠡᠳᠦᠢ ᠸᠧᠢ ᠸᠠᠩ ᠶᠠᠭᠠᠷᠠᠨ ᠥᠴᠢᠷᠦᠨ᠄ 《 ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠨᠡᠷᠡᠲᠡᠢ ᠴᠡᠷᠢᠭ ᠦ᠋ᠨ ᠡᠷᠳᠡᠮᠲᠡᠨ ᠴᠥᠮ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠪᠣᠢ᠂ ᠮᠡᠬᠦᠰ ᠸᠠᠩ ᠨᠠᠮᠠᠶ᠋ᠢ ᠳᠠᠭᠠᠵᠤ ᠬᠡᠳᠦᠢ ᠨᠢᠭᠡᠨ ᠬᠣᠶᠠᠷ ᠦᠵᠡᠵᠦ ᠪᠣᠯᠤᠮᠠᠷ ᠠᠨᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠡᠷᠭᠢᠨ ᠤᠯᠤᠰ ᠤ᠋ᠨ ᠬᠢᠵᠠᠭᠠᠷ ᠤ᠋ᠨ ᠭᠠᠳᠠᠨᠠ ᠦᠯᠡᠳᠡᠵᠦᠬᠦᠢ᠃ ᠡᠨᠳᠡ ᠳᠠᠭᠠᠵᠤ ᠢᠷᠡᠭᠰᠡᠨ ᠦᠭᠡᠢ》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠴᠠᠴᠠᠷ ᠤ᠋ᠨ ᠡᠮᠦᠨᠡ ᠵᠢᠭᠰᠠᠭᠠᠨ ᠵᠣᠭᠰᠣᠭᠰᠠᠨ ᠠᠷᠪᠠᠨ ᠬᠡᠳᠦᠨ ᠠᠯᠲᠠᠨ ᠮᠥᠩᠭᠥᠨ ᠦ᠌ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠴᠦ ᠬᠠᠰ ᠨᠣᠮᠢᠨ ᠤ᠋ ᠪᠦᠰᠡ ᠪᠦᠰᠡᠯᠡᠨ᠂ ᠳᠣᠭᠣᠯᠠᠬᠠ ᠳ᠋ᠤᠷ ᠬᠠᠳᠬᠤᠭᠰᠠ ᠬᠢᠷᠭᠤᠤᠯ ᠤ᠋ᠨ ᠰᠡᠭᠦᠯ ᠦ᠋ᠨ ᠦᠵᠦᠭᠦᠷ ᠢᠨᠦ ᠭᠠᠵᠠᠷ ᠰᠢᠭᠦᠷᠡᠵᠦ᠂ ᠠᠷᠤ ᠳ᠋ᠤᠷ ᠤᠶᠠᠭᠰᠠᠨ ᠳᠠᠯᠪᠠᠬᠠ ᠶ᠋ᠢᠨ ᠪᠦᠴᠡ ᠢᠨᠤ ᠪᠡᠶᠡ ᠶ᠋ᠢ ᠣᠷᠢᠶᠠᠨ ᠲᠠᠷᠪᠠᠯᠵᠠᠭᠰᠠᠨ᠂ ᠨᠢᠳᠦ ᠬᠢᠯᠠᠰᠬᠢᠵᠦ ᠭᠡᠷᠡᠯ ᠭᠠᠷᠬᠤ ᠲᠡᠳᠡᠭᠡᠷ ᠠᠯᠲᠠᠨ ᠤᠯᠤᠰ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠨᠤᠭᠤᠳ ᠢ᠋ ᠵᠢᠭᠠᠵᠤ ᠠᠰᠠᠭᠤᠷᠤᠨ᠄ 《 ᠡᠳᠡᠭᠡᠷ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠮᠡᠲᠦ ᠰᠠᠢᠬᠠᠨ ᠵᠠᠩᠵᠤᠨ ᠨᠠᠷ ᠡᠳᠦᠢᠬᠡᠨ ᠢ᠋ ᠴᠢᠳᠠᠬᠤ ᠦᠭᠡᠢ ᠦᠦ ? 》 ᠬᠡᠮᠡᠪᠡᠰᠦ ᠶᠦᠩ ᠵᠢᠢ ᠠᠷᠭᠠ ᠦᠭᠡᠢ ᠥᠴᠢᠷᠦᠨ᠄ 《 ᠡᠳᠡᠭᠡᠷ ᠴᠥᠮ ᠵᠡᠷᠭᠡ ᠶ᠋ᠢᠨ ᠠᠷᠠᠳ ᠪᠣᠢ ᠊ᠶᠠ᠂ ᠭᠠᠢᠬᠠᠯᠲᠠᠢ ᠭᠠᠵᠠᠷ ᠦᠭᠡᠢ᠂ ᠵᠦᠭᠡᠷ ᠨᠢᠭᠡᠨ ᠪᠡᠶᠡ ᠶ᠋ᠢ ᠬᠠᠮᠵᠢᠭᠴᠢ ᠪᠣᠯᠠᠢ !》 ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠥᠴᠦᠬᠡᠨ ᠮᠦᠰᠢᠶᠡᠵᠦ ᠥᠭᠦᠯᠡᠷᠦᠨ᠄《 ᠲᠡᠢᠮᠦ ᠶᠣᠰᠣ ᠪᠣᠢ ᠤᠤ ? ᠴᠥᠮ ᠲᠡᠭᠷᠢ ᠶ᠋ᠢᠨ ᠵᠠᠩᠵᠤᠨ ᠨᠠᠷ ᠮᠡᠲᠦ ᠰᠦᠷᠲᠡᠢ ᠭᠡᠷᠡᠯᠲᠡᠢ ᠪᠥᠭᠡᠳ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠦᠭᠡᠢ ᠬᠡᠮᠡᠬᠦ ᠢᠨᠦ ᠬᠤᠳᠠᠯ ᠬᠡᠷᠡᠭ᠂ ᠭᠠᠭᠴᠠ ᠡᠷᠭᠢᠨ ᠸᠠᠩ ᠶᠡᠬᠡ ᠤᠯᠤᠰ ᠤ᠋ᠨ ᠳᠡᠭᠡᠳᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠠᠭᠠ ᠤᠯᠤᠰ ᠲᠤᠷ ᠡᠷᠳᠡᠮ ᠢ᠋ ᠦᠵᠡᠭᠦᠯᠬᠦ ᠦᠭᠡᠢ ᠶᠡᠬᠡᠷᠬᠡᠬᠦᠢ ᠶ᠋ᠢᠨ ᠰᠢᠯᠲᠠᠭᠠᠨ ᠪᠣᠢ ᠊ᠶᠠ !》 ᠭᠡᠮᠡᠨ ᠬᠡᠷᠬᠢᠨ ᠥᠳᠥᠭᠡᠪᠡᠴᠦ ᠶᠦᠩ ᠵᠢᠢ ᠳᠠᠬᠢᠨ ᠳᠠᠬᠢᠨ ᠥᠨᠳᠡᠢᠵᠦ ᠮᠠᠷᠭᠤᠨ ᠬᠡᠯᠡᠵᠦ ᠡᠭᠡᠨᠡᠭᠲᠡ ᠵᠠᠩᠵᠤᠨ ᠨᠠᠷ ᠢ᠋ᠶ᠋ᠠᠨ ᠭᠠᠷᠭᠠᠬᠤ ᠦᠭᠡᠢ ᠳ᠋ᠦ᠍ᠷ ᠲᠠᠢᠽᠦ ᠤᠷᠮᠠ ᠬᠠᠷᠢᠵᠤ ᠬᠤᠷᠢᠮ ᠲᠠᠷᠬᠠᠭᠠᠳ ᠵᠢᠴᠢ ᠡᠳᠦᠷ ᠪᠡᠶᠡ ᠪᠡᠷ ᠶᠦᠩ ᠵᠢᠢ ᠶ᠋ᠢ ᠮᠣᠷᠳᠠᠭᠤᠯᠤᠨ ᠬᠣᠢᠨᠠ ᠠ᠋ᠴᠠ ᠢᠨᠦ ᠮᠣᠷᠢ ᠤᠨᠤᠭᠰᠠᠨ ᠳᠦᠷᠢᠮ ᠢ᠋ ᠦᠵᠡᠭᠡᠳ ᠡᠭᠡᠵᠦ ᠪᠠᠭᠤᠬᠤᠶᠠ᠂ ᠣᠯᠠᠨ ᠲᠦᠰᠢᠮᠡᠳ ᠦ᠋ᠨ ᠵᠦᠭ ᠥᠭᠦᠯᠡᠷᠦᠨ᠄ 《ᠡᠨᠡ ᠬᠥᠪᠡᠭᠦᠨ ᠨᠢᠭᠡᠨ ᠸᠠᠩ ᠬᠥᠮᠦᠨ ᠪᠥᠭᠡᠳ ᠬᠥᠩᠭᠡᠨ ᠱᠥᠢᠪᠦᠷ᠂ ᠬᠡᠷᠬᠢᠪᠡᠴᠦ ᠤᠷᠲᠤ ᠨᠠᠰᠤᠯᠠᠬᠤ ᠦᠭᠡᠢ ᠪᠥᠭᠡᠳ ᠯᠠᠪ ᠰᠠᠢᠨ ᠢ᠋ᠶ᠋ᠠᠷ ᠣᠯᠵᠤ ᠦᠬᠦᠬᠦ ᠦᠭᠡᠢ᠂ ᠲᠠ ᠦᠵᠡᠵᠦ ᠪᠠᠢᠭᠲᠤᠨ᠃ 》 ᠬᠡᠮᠡᠪᠡ᠃
ᠲᠡᠭᠦᠨᠴᠡ ᠸᠧᠢ ᠸᠠᠩ ᠶᠦᠩ ᠵᠢᠢ᠂ ᠵᠣᠣ ᠲᠤᠤ ᠱᠢ ᠶ᠋ᠢᠨ ᠠᠯᠲᠠᠨ ᠲᠠᠮᠠᠭᠠ ᠪᠠ ᠡᠷᠭᠦᠮᠵᠢᠯᠡᠭᠰᠡᠨ ᠪᠢᠴᠢᠭ ᠢ᠋ᠶ᠋ᠡᠨ ᠴᠥᠮ ᠶᠠᠭ ᠲᠠᠭ ᠨᠢᠭᠤᠵᠤ ᠳᠠᠷᠤᠭᠠᠳ ᠳᠠᠭᠠᠵᠤ ᠢᠷᠡᠭᠰᠡᠨ ᠠᠷᠠᠳ ᠤ᠋ᠨ ᠵᠦᠭ 《 ᠮᠠᠨ ᠤ᠋ ᠢᠷᠡᠭᠰᠡᠨ ᠭᠠᠪᠢᠶᠠ ᠪᠦᠷᠢᠨ ᠪᠣᠯᠪᠠ 》 ᠭᠡᠮᠡᠨ ᠬᠡᠯᠡᠯᠴᠡᠨ ᠠᠯᠳᠠᠷᠰᠢᠭᠤᠯᠤᠭᠰᠠᠭᠠᠷ ᠲᠠᠢᠽᠦ ᠶ᠋ᠢᠨ ᠬᠦᠷᠭᠡᠭᠰᠡᠨ ᠡᠯᠴᠢ ᠯᠤᠭᠡ ᠬᠡᠳᠦᠨ ᠡᠳᠦᠷ ᠶᠠᠪᠤᠵᠤ ᠰᠠᠶᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠢᠵᠠᠭᠠᠷ ᠲᠤᠷ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠤᠭᠤᠷᠵᠢ ᠬᠡᠳᠦᠢᠨᠡᠢ ᠮᠡᠳᠡᠭᠡ ᠰᠣᠨᠣᠰᠤᠭᠰᠠᠭᠠᠷ ᠤᠳᠠᠭᠰᠠᠨ ᠲᠤᠯᠠ ᠵᠢᠬᠡᠭᠦᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ᠂ ᠥᠪᠡᠷ ᠪᠤᠰᠤᠳ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠲᠦ᠍ᠷ ᠴᠥᠮ ᠬᠤᠷᠢᠮ ᠲᠠᠯᠪᠢᠨ᠂ ᠡᠵᠡᠨ ᠦ᠌ ᠬᠡᠰᠢᠭ ᠢ᠋ ᠢᠯᠡᠳᠬᠡᠵᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠸᠧᠢ ᠸᠠᠩ ᠶᠦᠩ ᠵᠢᠢ ᠶ᠋ᠢ ᠰᠠᠢᠬᠠᠨ ᠰᠤᠷᠲᠠᠯᠲᠤ᠂ ᠣᠶᠤᠲᠤ ᠰᠡᠴᠡᠨ ᠬᠣᠶᠠᠭᠤᠯᠠ ᠪᠠᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠠᠬᠠ ᠶ᠋ᠢᠨ ᠭᠠᠳᠠᠨᠠ ᠵᠠᠭᠤᠨ ᠭᠠᠵᠠᠷ ᠤ᠋ᠨ ᠡᠴᠦᠰ ᠭᠠᠷᠲᠠᠯᠠ ᠦᠳᠡᠭᠦᠯᠵᠦ ᠂ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠡᠭᠡᠵᠦ ᠵᠠᠬᠢᠶᠠ ᠶ᠋ᠢ ᠡᠭᠡᠭᠦᠯᠪᠡ ᠃ ᠬᠥᠭᠡᠷᠦᠬᠦᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠸᠧᠢ ᠸᠠᠩ ᠶᠦᠩ ᠵᠢᠢ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠲᠤᠢᠯ ᠤ᠋ᠨ ᠢᠴᠢᠩᠭᠦᠷᠡᠯ ᠢ᠋ ᠴᠠᠳᠲᠠᠯᠠ ᠢᠳᠡᠭᠡᠳ ᠵᠠᠮ ᠤ᠋ᠨ ᠭᠣᠳᠣᠰ ᠲᠤᠷ ᠳᠣᠲᠣᠷᠠ ᠪᠠᠨ ᠰᠡᠳᠬᠢᠷᠦᠨ ᠄ ᠡᠨᠡ ᠪᠧᠲ᠋ᠠ᠋ ᠤᠯᠤᠰ ᠶᠠᠭᠤ ᠲᠠᠢ ᠦᠮᠡᠬᠡᠢ ᠪᠥᠭᠡᠳ ᠬᠠᠲᠠᠭᠤ ᠪᠣᠢ ? ᠬᠣᠢᠴᠢ ᠡᠳᠦᠷ ᠡᠳᠡ ᠬᠡᠷᠪᠡ ᠵᠣᠪᠠᠯᠠᠩ ᠪᠣᠯᠬᠤᠢ ᠳ᠋ᠤᠷ ᠬᠦᠷᠪᠡᠰᠦ ᠭᠠᠭᠴᠠ ᠠᠷᠭᠠ ᠪᠠᠷ ᠲᠤᠯᠪᠠᠰᠤ ᠪᠣᠯᠬᠤ ᠪᠣᠢ ᠊ᠶᠠ᠂ ᠬᠦᠴᠦᠨ ᠢ᠋ᠶ᠋ᠡᠷ ᠪᠠᠢᠯᠳᠤᠪᠠᠰᠤ ᠪᠣᠯᠬᠤ ᠦᠭᠡᠢ ᠠᠵᠤᠭᠤ ! ᠭᠡᠮᠡᠨ ᠪᠣᠳᠣᠭᠰᠠᠭᠠᠷ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠬᠦᠷᠴᠦ ᠳᠠᠷᠤᠢ ᠬᠣᠢᠲᠤ ᠶ᠋ᠢ ᠨᠢᠭᠡᠨᠲᠡ ᠠᠮᠤᠭᠤᠯᠵᠤ ᠢᠷᠡᠪᠡ᠃ ᠤᠳᠠᠯ ᠦᠭᠡᠢ ᠬᠠᠭᠠᠰ ᠣᠨ᠂ ᠨᠢᠭᠡᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠳᠠ ᠳ᠋ᠠᠨ ᠤᠯᠤᠰ ᠠ᠋ᠴᠠ ᠡᠷᠬᠡᠪᠰᠢ ᠪᠡᠯᠡᠭ ᠬᠦᠷᠭᠡᠵᠦ ᠠᠯᠪᠠ ᠪᠠᠷᠢᠷᠠ ᠢᠷᠡᠮᠦᠢ ᠬᠡᠮᠡᠵᠦ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠱᠢᠽᠦ᠋ᠩ ᠬᠠᠭᠠᠨ ᠸᠠᠨ ᠶᠠᠨ ᠶᠦᠩ ᠢ᠋ ᠦᠰᠦᠷᠲᠡᠯᠡ ᠮᠡᠬᠡᠯᠡᠨ ᠪᠦᠷᠢᠨᠡ ᠭᠠᠪᠢᠶᠠ ᠶ᠋ᠢ ᠠᠪᠴᠤ ᠳᠠᠭᠠᠭᠰᠠᠨ ᠨᠥᠬᠥᠷ ᠰᠡᠯᠲᠡ ᠨᠡᠢᠲᠡ ᠪᠡᠷ ᠨᠢᠭᠡᠨ ᠵᠡᠷᠭᠡ ᠲᠠᠪᠰᠢᠯᠴᠠᠪᠠ᠃
ᠡᠭᠦᠨ ᠢ᠋ ᠲᠦᠷ ᠥᠭᠦᠯᠡᠬᠦ ᠦᠭᠡᠢ ᠃ ᠣᠳᠣ ᠭᠠᠭᠴᠠ ᠬᠡᠯᠡᠬᠦ ᠢᠨᠦ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠠᠯᠠᠭᠲᠠᠢ ᠳ᠋ᠤᠷ ᠳᠠᠷᠤᠭᠳᠠᠭᠰᠠᠨ ᠢ᠋ ᠲᠣᠪᠴᠢᠯᠠᠨ ᠬᠡᠯᠡᠵᠦ ᠬᠤᠷᠢᠶᠠᠰᠤᠭᠠᠢ ᠃ ᠠᠯᠬᠠᠲᠠᠢ ᠠᠭᠤᠯᠠᠨᠠ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠶᠡᠬᠡᠳᠡ ᠳᠠᠷᠤᠭᠳᠠᠵᠤ ᠲᠣᠯᠣᠭᠠᠢ ᠡᠷᠭᠢᠯ ᠦᠭᠡᠢ ᠨᠢᠭᠡᠨ ᠠᠮᠢ ᠪᠠᠷ ᠳᠤᠲᠠᠭᠠᠵᠤ ᠂ ᠡᠳᠦᠷ ᠰᠥᠨᠢ ᠦᠭᠡᠢ ᠳᠣᠪᠲᠣᠯᠤᠨ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠬᠦᠷᠴᠦ ᠬᠣᠲᠠᠨ ᠳ᠋ᠤ᠌ ᠣᠷᠣᠭᠠᠳ ᠠᠯᠲᠠᠨᠱᠠᠭᠠ ᠡᠴᠢᠭᠡ ᠶᠦ᠍ᠭᠡᠨ ᠳᠠᠢᠶᠠᠩ ᠬᠠᠨ ᠤ᠋ ᠡᠪᠦᠳᠦᠭ ᠢ᠋ ᠲᠡᠪᠡᠷᠢᠨ ᠤᠬᠢᠯᠠᠵᠤ ᠂ ᠴᠡᠷᠢᠭ ᠳᠠᠷᠤᠭᠳᠠᠵᠤ ᠶᠤᠸᠠᠨᠱᠤᠸᠠᠢ ᠦᠬᠦᠭᠰᠡᠨ ᠢ᠋ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠲᠠᠢᠶᠠᠩ ᠬᠠᠨ ᠤᠭᠰᠠᠭᠠ ᠳ᠋ᠤᠷ ᠣᠷᠣᠭᠤᠯᠤᠭᠰᠠᠨ ᠶᠡᠬᠡ ᠶᠤᠸᠠᠨᠱᠤᠸᠠᠢ ᠴᠢᠦᠢ ᠰᠢᠦᠸᠠᠢ ᠡᠦ ᠶ᠋ᠢᠨ ᠦᠬᠦᠭᠰᠡᠨ ᠢ᠋ ᠰᠣᠨᠣᠰᠤᠮᠠᠭᠴᠠ ᠤᠬᠢᠯᠠᠨ ᠬᠠᠷᠠᠩᠭᠤᠳᠴᠤ ᠂ ᠰᠡᠷᠭᠦᠭᠰᠡᠨ ᠬᠣᠢᠨᠠ ᠪᠡᠶᠡ ᠪᠡᠷ ᠪᠡᠯᠪᠡᠰᠦᠷᠡᠯ ᠡᠮᠦᠰᠴᠦ ᠵᠥᠭᠴᠢᠯᠡᠨ ᠬᠠᠨᠳᠤᠵᠤ ᠠᠷᠢᠬᠢ ᠰᠠᠴᠤᠨ ᠭᠡᠭᠡᠵᠦ ᠪᠥᠬᠥᠶᠡ ᠂ ᠬᠠᠷᠢᠨ ᠰᠠᠨᠠᠭᠠᠨ ᠳ᠋ᠤᠷ ᠦᠭᠡᠢ ᠪᠧᠲ᠋ᠠ᠋ ᠤᠯᠤᠰ ᠠ᠋ᠴᠠ ᠴᠢᠦᠢ ᠰᠢᠦᠸᠠᠢ ᠡᠦ ᠶ᠋ᠢᠨ ᠲᠣᠯᠣᠭᠠᠢ ᠪᠡᠶᠡ ᠶ᠋ᠢ ᠬᠠᠮᠲᠤᠳᠬᠠᠨ ᠣᠶᠣᠵᠤ ᠲᠣᠷᠭᠠ ᠪᠠᠷ ᠣᠷᠢᠶᠠᠨ ᠂ ᠰᠢᠷ ᠢ᠋ᠶ᠋ᠡᠷ ᠰᠢᠷᠯᠡᠭᠡᠳ ᠬᠦᠷᠭᠡᠵᠦ ᠢᠷᠡᠨ ᠬᠢᠵᠠᠭᠠᠷ ᠤ᠋ᠨ ᠴᠠᠭᠳᠠᠭᠤᠯ ᠠᠪᠴᠤ ᠢᠷᠡᠭᠰᠡᠨᠡ ᠂ ᠲᠠᠢᠶᠠᠩ ᠬᠠᠨ ᠶᠠᠰᠤᠨ ᠢ᠋ ᠲᠡᠪᠡᠷᠢᠨ ᠤᠬᠢᠯᠠᠵᠤ ᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠴᠢᠦᠢ ᠱᠢ ᠯᠢ ᠶ᠋ᠢ ᠠᠪᠤᠨ ᠪᠠᠢᠵᠤ ᠶᠠᠰᠤᠨ ᠢ᠋ ᠬᠦᠨᠳᠦᠳᠬᠡᠨ ᠪᠤᠮᠪᠠᠯᠠᠭᠠᠳ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠢ᠋ ᠵᠢᠷᠤᠮ ᠤ᠋ᠨ ᠬᠥᠪᠡᠭᠦᠨ ᠪᠣᠯᠭᠠᠪᠠ ᠃ ᠭᠠᠳᠠᠨᠠ ᠪᠠᠰᠠ ᠵᠠᠭᠤᠨ ᠡᠷᠦᠬᠡ ᠬᠠᠷᠢᠶᠠᠲᠤ ᠥᠭᠴᠦ ᠤᠭᠰᠠᠭᠠ ᠶ᠋ᠢᠨ ᠳᠡᠳ᠋ ᠬᠦᠩ ᠭᠡᠮᠡᠨ ᠡᠷᠭᠦᠪᠡ ᠃ ᠡᠨᠡ ᠴᠢᠦᠢ ᠱᠢ ᠯᠢ ᠴᠦ᠍ ᠲᠥᠷᠥᠭᠰᠡᠨ ᠢᠨᠦ ᠬᠤᠷᠴᠠ ᠬᠠᠳᠠᠨ ᠬᠥᠮᠦᠨ ᠲᠤᠯᠠ ᠳᠠᠷᠤᠢ ᠲᠡᠭᠦᠨ ᠦ᠌ ᠡᠴᠢᠭᠡ ᠶ᠋ᠢᠨ ᠣᠷᠣ ᠳ᠋ᠤᠷ ᠶᠡᠬᠡ ᠵᠠᠩᠵᠤᠨ ᠡᠷᠭᠦᠮᠵᠢᠯᠡᠪᠡ ᠃ ᠴᠢᠦᠢ ᠱᠢ ᠯᠢ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠡᠷᠬᠡ ᠲᠣᠪᠴᠢ ᠶ᠋ᠢ ᠴᠤᠭᠠᠷ ᠡᠵᠡᠯᠡᠵᠦ ᠂ ᠨᠠᠰᠤ ᠰᠠᠶᠢ ᠬᠣᠷᠢᠨ ᠬᠣᠶᠠᠷ ᠪᠣᠯᠪᠠᠴᠤ ᠪᠣᠳᠣᠯᠭᠠ ᠰᠠᠨᠠᠭᠠᠨ ᠥᠲᠡᠯᠡ ᠪᠤᠰᠤ ᠃ ᠭᠠᠭᠴᠠ ᠪᠧᠲ᠋ᠠ᠋ ᠤᠯᠤᠰ ᠠ᠋ᠴᠠ ᠦᠰ ᠠᠪᠬᠤ ᠶ᠋ᠢ ᠰᠡᠳᠬᠢᠵᠦ ᠂ ᠥᠷᠯᠥᠭᠡ ᠦᠳᠡᠰᠢ ᠬᠥᠮᠥᠰᠬᠡ ᠳᠡᠯᠭᠡᠬᠦ ᠦᠭᠡᠢ ᠶ᠋ᠢ ᠲᠠᠢᠶᠠᠩ ᠬᠠᠨ ᠤ᠋ ᠤᠷᠢᠵᠤ ᠠᠪᠴᠢᠷᠠᠨ ᠤᠯᠤᠰ ᠤ᠋ᠨ ᠶᠡᠬᠡ ᠡᠷᠬᠡ ᠶ᠋ᠢ ᠲᠤᠰᠢᠶᠠᠭᠰᠠᠨ ᠰᠠᠢᠳ ᠮᠥᠩᠭᠦ᠋ᠯᠵᠢ ᠳᠠᠬᠢᠨ ᠳᠠᠪᠲᠠᠨ ᠰᠡᠷᠭᠦᠭᠡᠨ ᠬᠣᠷᠢᠭᠯᠠᠪᠠᠴᠤ ᠴᠢᠦᠢ ᠱᠢ ᠯᠢ ᠭᠠᠭᠴᠠ ᠡᠴᠢᠭᠡ ᠶ᠋ᠢ ᠠᠯᠠᠭᠰᠠᠨ ᠥᠰᠢᠶᠡ ᠳ᠋ᠦ᠍ᠷ ᠨᠢᠭᠡᠨ ᠲᠡᠭᠷᠢ ᠶ᠋ᠢ ᠰᠢᠲᠦᠬᠦ ᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠥᠩᠭᠦ᠋ᠯᠵᠢ ᠳ᠋ᠠᠳᠠᠳᠤᠩᠭᠠ ᠬᠠᠮᠲᠤ ᠪᠠᠷ ᠤᠷᠲᠤ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ ᠄ 《 ᠡᠷᠲᠡᠨ ᠦ᠌ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠸᠧᠢ ᠤᠯᠤᠰ ᠤ᠋ᠨ ᠡᠦ ᠳᠢ ᠼᠤᠤ ᠼᠤᠤ ᠡᠴᠢᠭᠡ ᠶᠦ᠍ᠭᠡᠨ ᠦᠰ ᠢ᠋ ᠠᠪᠴᠤ ᠡᠰᠡ ᠴᠢᠳᠠᠪᠠ ᠃ ᠴᠢ ᠬᠡᠷᠪᠡ ᠡᠨᠡ ᠰᠡᠳᠬᠢᠯ ᠢ᠋ ᠡᠰᠡ ᠡᠭᠡᠭᠦᠯᠪᠡᠰᠦ ᠂ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠵᠠᠭᠤᠨ ᠣᠪᠣᠭᠲᠠᠨ ᠪᠠ ᠲᠠᠬᠢᠯᠭᠠ ᠲᠠᠪᠢᠯᠭᠠ ᠡᠴᠦᠰ ᠲᠦ᠍ᠷ ᠶᠡᠬᠡ ᠲᠦᠭᠰᠢᠯᠲᠡᠢ ᠪᠣᠯᠣᠮᠢ !》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠦᠢ ᠱᠢ ᠯᠢ ᠠᠮᠠᠨ ᠳ᠋ᠤᠷ ᠠ ᠬᠡᠮᠡᠪᠡᠴᠦ ᠠᠯᠤᠰ ᠲᠤᠷ ᠶᠡᠬᠡᠯᠡ ᠬᠣᠷᠣᠰᠪᠠ ᠃ ᠡᠭᠦᠨ ᠢ᠋ ᠪᠠᠰᠠ ᠲᠦᠷ ᠬᠡᠯᠡᠬᠦ ᠦᠭᠡᠢ ᠃
ᠣᠳᠣ ᠬᠡᠯᠡᠬᠦ ᠢᠨᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠠᠢᠽᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠶ᠋ᠢ ᠡᠭᠡᠭᠦᠯᠵᠦ ᠂ ᠪᠤᠷᠬᠠᠨ ᠭᠠᠯᠳᠤᠨᠠ ᠳ᠋ᠤᠷ ᠡᠭᠡᠵᠦ ᠢᠷᠠᠪᠠᠰᠤ ᠂ ᠲᠠᠢᠽᠦ ᠶ᠋ᠢᠨ ᠲᠥᠪ ᠦ᠋ᠨ ᠶᠡᠬᠡ ᠪᠦᠷᠳᠡᠭᠡᠯᠵᠢᠨ ᠵᠦᠰᠦᠨ ᠰᠡᠴᠡᠨ ᠬᠠᠲᠤᠨ ᠪᠠᠰᠠ ᠨᠢᠭᠡᠨ ᠬᠥᠪᠡᠭᠦᠨ ᠬᠥᠩᠭᠡᠵᠢᠵᠦ ᠂ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠦ᠋ᠨ ᠥᠯᠥᠭᠡᠢ ᠳ᠋ᠦ᠍ᠷ ᠣᠷᠣᠭᠤᠯᠬᠤ ᠬᠤᠷᠢᠮ ᠳ᠋ᠤᠷ ᠲᠣᠬᠢᠶᠠᠯᠳᠤᠭᠰᠠᠨ ᠢ᠋ᠶ᠋ᠠᠷ ᠲᠠᠢᠽᠦ ᠡᠳᠦᠷ ᠢ᠋ ᠪᠣᠳᠣᠪᠠᠰᠤ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠪᠡᠯᠡᠭ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠲᠣᠬᠢᠶᠠᠯᠳᠤᠵᠤ ᠂ ᠪᠠᠰᠠ ᠶᠡᠬᠡ ᠠᠯᠲᠠᠨ ᠤᠯᠤᠰ ᠢ᠋ ᠡᠷᠳᠡᠮ ᠢ᠋ᠶ᠋ᠡᠷ ᠳᠡᠢᠯᠦᠭᠰᠡᠨ ᠡᠳᠦᠷ ᠲᠣᠷ ᠲᠥᠷᠥᠭᠰᠡᠨ ᠲᠤᠯᠠ ᠤᠯᠤᠰ ᠲᠥᠷᠥ ᠤᠯᠠᠮ ᠥᠭᠡᠳᠡᠯᠡᠭᠦᠯᠬᠦ ᠪᠡᠯᠭᠡ ᠳ᠋ᠦ᠍ᠷ ᠲᠣᠬᠢᠶᠠᠯᠳᠤᠨ ᠲᠥᠷᠥᠪᠡ ᠬᠡᠮᠡᠵᠦ ᠨᠡᠷᠡ ᠶ᠋ᠢ ᠥᠭᠡᠳᠡᠢ ᠭᠡᠮᠡᠨ ᠬᠠᠢᠷᠠᠯᠠᠵᠤ ᠂ ᠭᠡᠷ ᠦ᠋ᠨ ᠲᠦᠰᠢᠮᠡᠳ ᠦ᠋ᠨ ᠵᠦᠭ ᠵᠠᠬᠢᠭᠰᠠᠨ ᠠᠨᠤ ᠄ 《 ᠬᠣᠢᠴᠢ ᠡᠳᠦᠷ ᠠᠯᠲᠠᠨ ᠤᠯᠤᠰ ᠡᠨᠡ ᠭᠤᠷᠪᠠᠳᠤᠭᠠᠷ ᠬᠥᠪᠡᠭᠦᠨ ᠦ᠌ ᠭᠠᠷ ᠲᠤᠷ ᠠᠪᠲᠠᠵᠤ ᠠᠯᠢᠪᠠ ᠵᠦᠢᠯ ᠠᠨᠤ ᠠᠷᠢᠯᠤᠨ ᠳᠠᠭᠤᠰᠴᠤ ᠦᠨᠳᠦᠰᠦᠨ ᠲᠡᠰᠦᠷᠡᠨᠡᠮ ᠊ᠶᠠ᠂ ᠲᠠ ᠲᠡᠮᠳᠡᠭᠯᠡᠵᠦ ᠠᠪᠤᠭᠲᠤᠨ 》 ᠬᠡᠮᠡᠪᠡ ᠃ ᠣᠶᠤᠲᠤ ᠰᠡᠴᠡᠨ ᠰᠢᠩᠬᠤᠲᠤ ᠦᠵᠦᠭ ᠢ᠋ᠶ᠋ᠡᠷ ᠪᠢᠴᠢᠵᠦ ᠠᠪᠤᠪᠠ ᠃ ᠲᠡᠭᠦᠨᠴᠡ ᠵᠢᠴᠢ ᠥᠷᠯᠥᠭᠡ ᠵᠢᠨᠦᠩ ᠮᠤᠬᠤᠯᠢ ᠳ᠋ᠤᠷ ᠵᠠᠬᠢᠶᠠ ᠪᠠᠭᠤᠯᠭᠠᠨ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠷᠢᠭᠤ ᠬᠦᠷᠭᠡᠬᠦ ᠪᠡᠯᠡᠭ ᠦ᠋ᠨ ᠲᠠᠪᠤᠨ ᠵᠠᠭᠤᠨ ᠮᠣᠷᠢ ᠵᠡᠪᠰᠡᠭ ᠢ᠋ ᠪᠡᠯᠡᠳᠬᠡᠵᠦ ᠵᠡᠯᠮᠡ ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠬᠣᠶᠠᠭᠤᠯᠠ ᠶ᠋ᠢ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠮᠣᠷᠳᠠᠭᠤᠯᠤᠮᠤᠢ ᠬᠡᠮᠡᠭᠡᠳ ᠣᠶᠤᠲᠤ ᠰᠡᠴᠡᠨ ᠂ ᠣᠶᠤᠨ ᠭᠤᠸᠠ ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠭᠤᠷᠪᠠᠭᠤᠯᠠ ᠪᠠᠷ ᠬᠢᠲᠠᠳ ᠦᠰᠦᠭ ᠦ᠋ᠨ ᠬᠠᠷᠢᠭᠤ ᠲᠠᠯᠠᠷᠬᠠᠬᠤ ᠪᠢᠴᠢᠭ ᠢ᠋ ᠲᠣᠳᠣᠷᠬᠠᠢᠯᠠᠨ ᠬᠢᠯᠭᠡᠵᠦ ᠬᠠᠪᠤᠲᠤ ᠬᠠᠰᠠᠷ ᠂ ᠣᠢᠲᠤ ᠸᠴᠢᠷ ᠬᠣᠶᠠᠭᠤᠯᠠ ᠬᠠᠪᠰᠤᠷᠠ ᠬᠡᠮᠡᠭᠡᠳ ᠪᠠᠰᠠ ᠵᠠᠯᠮᠠ ᠶ᠋ᠢ ᠳᠣᠲᠣᠭᠠᠳᠤ ᠥᠷᠭᠥᠭᠡ ᠳ᠋ᠦ᠍ᠷ ᠳᠠᠭᠤᠳᠠᠵᠤ ᠵᠠᠬᠢᠷᠤᠨ ᠄ 《 ᠪᠢ ᠲᠡᠷᠡ ᠡᠳᠦᠷ ᠳᠥᠭᠦᠯᠡ ᠮᠥᠷᠡᠨ ᠳ᠋ᠦ᠍ᠷ ᠳᠤᠭᠤᠯᠠᠭᠠ ᠬᠠᠷᠪᠤᠭᠰᠠᠨ ᠶᠡᠬᠡ ᠴᠢᠭᠤᠯᠭᠠᠨᠠ ᠦᠵᠡᠪᠡᠰᠦ ᠂ ᠢᠵᠢᠯᠵᠢ ᠠᠢᠮᠠᠭ ᠤ᠋ᠨ ᠢᠯᠭᠦᠨᠡ ᠶ᠋ᠢᠨ ᠭᠣᠣᠯ ᠤ᠋ᠨ ᠲᠡᠷᠡ ᠥᠯᠵᠡᠢᠲᠦ ᠶ᠋ᠢᠨ ᠬᠥᠪᠡᠭᠦᠨ ᠪᠣᠲ᠋ᠤ ᠶ᠋ᠢᠨ ᠲᠥᠷᠥᠭᠰᠡᠨ ᠢᠨᠦ ᠡᠭᠡᠨᠡᠭᠲᠡ ᠥᠲᠡᠯᠡ ᠬᠥᠮᠦᠨ ᠪᠤᠰᠤ ᠂ ᠦᠭᠡ ᠶᠠᠪᠤᠳᠠᠯ ᠢ᠋ ᠦᠵᠡᠬᠦᠯᠡ ᠬᠡᠷᠡᠭ ᠲᠡᠢ ᠬᠥᠮᠦᠨ ᠪᠠᠢᠨᠠᠮ ᠃ ᠨᠡᠩ ᠪᠠᠰᠠ ᠲᠡᠭᠦᠨ ᠦ᠌ ᠦᠭᠡ ᠶᠠᠪᠤᠳᠠᠯ ᠢ᠋ ᠰᠢᠨᠵᠢᠪᠡᠰᠦ ᠮᠠᠰᠢ ᠮᠡᠷᠭᠡᠨ ᠴᠢᠳᠠᠪᠤᠷᠢᠲᠤ ᠬᠥᠮᠦᠨ ᠪᠥᠭᠡᠳ ᠨᠠᠰᠤᠨ ᠪᠠᠰᠠ ᠢᠳᠡᠷ ᠵᠠᠯᠠᠭᠤ ᠶ᠋ᠢᠨ ᠰᠠᠢᠬᠠᠨ ᠴᠠᠭ ᠂ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠡᠷᠬᠢᠮ ᠬᠤᠷᠴᠠ ᠂ ᠦᠨᠡᠬᠡᠷ ᠨᠢᠭᠡᠨ ᠬᠦᠮᠦᠵᠢᠯᠲᠦ ᠬᠥᠮᠦᠨ ᠪᠤᠶᠤ ᠃ ᠭᠠᠭᠴᠠ ᠭᠡᠷᠭᠡᠢ ᠠᠪᠤᠭᠰᠠᠨ ᠪᠣᠯᠪᠠᠤ ᠦᠭᠡᠢ ᠦᠦ ? ᠪᠢ ᠲᠡᠭᠦᠨ ᠢ᠋ ᠮᠠᠰᠢ ᠲᠠᠭᠠᠯᠠᠨ ᠪᠠᠶᠠᠰᠤᠮᠤᠢ ᠃ ᠡᠳᠦᠭᠡ ᠡᠮᠦᠨᠡ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠦᠵᠡᠮᠵᠢᠲᠦ ᠵᠦᠢᠯ ᠂ ᠰᠠᠢᠬᠠᠨ ᠶᠠᠭᠤᠮᠠ ᠠ᠋ᠴᠠ ᠪᠠᠰᠠ ᠪᠠᠬᠠᠨ ᠨᠡᠮᠡᠵᠦ ᠱᠠᠩᠨᠠᠰᠤᠭᠠᠢ ᠬᠡᠮᠡᠮᠦᠢ ᠃ ᠭᠠᠭᠴᠠ ᠡᠴᠢᠪᠡᠰᠦ ᠵᠣᠬᠢᠰ ᠲᠠᠢ ᠲᠡᠢᠮᠦ ᠲᠡᠭᠦᠰ ᠲᠡᠭᠰᠢ ᠬᠣᠣᠰ ᠪᠦᠷᠢᠳᠦᠭᠰᠡᠨ ᠨᠠᠰᠤᠨ ᠪᠤᠶᠠᠨᠲᠤ ᠬᠥᠮᠦᠨ ᠦᠭᠡᠢ ᠂ ᠣᠳᠣ ᠭᠠᠭᠴᠠ ᠬᠢᠨᠠᠨ ᠪᠣᠳᠣᠪᠠᠰᠤ ᠴᠢᠨᠦ ᠡᠴᠢᠭᠡ ᠵᠠᠷᠴᠢᠭᠤᠲᠠᠢ ᠡᠪᠦᠭᠡᠨ ᠡᠴᠡ ᠥᠪᠡᠷᠡ ᠬᠥᠮᠦᠨ ᠦᠭᠡᠢ ᠪᠣᠯᠵᠤᠬᠤᠢ ᠃ ᠲᠡᠢᠨ ᠬᠦ᠌ ᠮᠢᠨᠦ ᠣᠨᠴᠠᠭᠠᠢ ᠦᠵᠡᠵᠦ ᠡᠯᠢᠭᠡᠰᠢᠶᠡᠨ ᠰᠠᠨᠠᠭᠰᠠᠨ ᠱᠠᠩ ᠢ᠋ ᠴᠢᠨᠦ ᠡᠴᠢᠭᠡ ᠬᠦᠷᠭᠡᠨ ᠠᠪᠠᠴᠢᠭᠲᠤᠨ ᠂ ᠮᠢᠨᠦ ᠦᠭᠡ ᠰᠠᠨᠠᠭᠠᠨ ᠢ᠋ ᠪᠣᠳᠣᠯᠭᠠᠲᠤ ᠰᠠᠢᠳ ᠴᠢ ᠡᠴᠢᠭᠡ ᠳ᠋ᠡᠭᠡᠨ ᠪᠦᠷᠢᠳᠬᠡᠨ ᠬᠡᠯᠡᠭᠲᠦᠨ ᠃ 》 ᠬᠡᠮᠡᠭᠡᠳ ᠥᠩᠭᠡᠲᠦ ᠲᠣᠷᠭᠠ ᠳᠥᠷᠪᠡᠨ ᠪᠠᠭᠴᠠ ᠂ ᠰᠠᠢᠬᠠᠨ ᠰᠤᠪᠤᠳ ᠳᠥᠷᠪᠡᠨ ᠮᠥᠬᠥᠯᠢᠭ ᠂ ᠪᠣᠷᠣ ᠪᠤᠯᠠᠭ ᠤ᠋ᠨ ᠬᠤᠶᠠᠭ ᠤ᠋ᠨ ᠳᠠᠪᠬᠤᠴᠠ ᠣᠯᠪᠣᠭ ᠨᠢᠭᠡ ᠂ ᠡᠷᠳᠡᠨᠢ ᠰᠢᠭᠢᠳᠬᠡᠷᠲᠦ ᠡᠷᠳᠡᠨᠢ ᠶ᠋ᠢᠨ ᠰᠡᠯᠡᠮᠡ ᠨᠢᠭᠡ ᠂ ᠪᠠᠰᠠ ᠡᠷᠳᠡᠨᠢ ᠶ᠋ᠢᠨ ᠰᠢᠭᠢᠳᠬᠡᠷᠲᠦ ᠰᠠᠭᠠᠳᠠᠭ ᠨᠢᠭᠡ ᠂ ᠨᠡᠢᠲᠡ ᠲᠠᠪᠤᠨ ᠵᠦᠢᠯ ᠢ᠋ ᠵᠠᠯᠮᠠ ᠳ᠋ᠤᠷ ᠲᠤᠰᠢᠶᠠᠨ ᠥᠭᠪᠡ ᠃ ᠤᠷᠢᠶᠠᠩᠬᠠᠨ ᠤ᠋ ᠤᠬᠠᠭᠠᠨ ᠰᠠᠢᠲᠤ ᠵᠡᠯᠮᠡ ᠲᠠᠢᠽᠦ ᠶ᠋ᠢᠨ ᠰᠠᠨᠠᠭᠠᠨ ᠢ᠋ ᠬᠡᠳᠦᠢᠨᠡᠢ ᠮᠡᠳᠡᠭᠡᠳ ᠳᠤᠷᠠᠲᠠᠶᠠ ᠵᠠᠬᠢᠶᠠ ᠪᠠ ᠱᠠᠩ ᠤ᠋ᠨ ᠡᠳ᠋ ᠲᠡᠢ ᠬᠦᠯᠢᠶᠡᠨ ᠠᠪᠴᠤ ᠭᠡᠷ ᠲᠡᠭᠡᠨ ᠢᠷᠡᠵᠦ ᠂ ᠡᠴᠢᠭᠡ ᠳ᠋ᠡᠭᠡᠨ ᠲᠠᠢᠽᠦ ᠶ᠋ᠢᠨ ᠢᠯᠡᠷᠬᠡᠢ ᠦᠭᠡ ᠪᠠ ᠳᠠᠯᠳᠠ ᠰᠠᠨᠠᠭᠠᠨ ᠢ᠋ ᠠᠨᠤ ᠪᠦᠷᠢᠳᠬᠡᠨ ᠬᠡᠯᠡᠭᠡᠳ ᠱᠠᠩ ᠤ᠋ᠨ ᠡᠳ᠋ ᠢ᠋ ᠲᠣᠳᠣᠷᠬᠠᠢᠯᠠᠨ ᠲᠤᠰᠢᠶᠠᠭᠠᠳ ᠡᠴᠢᠭᠡ ᠳ᠋ᠡᠭᠡᠨ ᠥᠭᠦᠯᠡᠷᠦᠨ ᠄ 《 ᠡᠨᠡ ᠬᠡᠷᠡᠭ ᠢᠯᠡ ᠳ᠋ᠦ᠍ᠷ ᠡᠵᠡᠨ ᠦ᠌ ᠨᠢᠭᠤᠷ ᠢ᠋ ᠬᠢᠴᠢᠶᠡᠨ ᠪᠦᠲᠦᠭᠡᠵᠦ ᠂ ᠳᠠᠯᠳᠠ ᠳ᠋ᠤᠷ ᠡᠵᠡᠨ ᠦ᠌ ᠵᠠᠬᠢᠶᠠ ᠶ᠋ᠢ ᠡᠰᠡ ᠢᠴᠡᠭᠡᠪᠡᠰᠦ ᠰᠠᠶᠢ ᠪᠣᠯᠤᠮᠤᠢ ᠃ 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠠᠷᠴᠢᠭᠤᠲᠠᠢ ᠡᠪᠦᠭᠡᠨ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ ᠄ 《 ᠵᠢᠱ᠌ᠢᠯᠡᠭᠡ ᠰᠠᠢᠲᠤ ᠵᠡᠯᠮᠡ ᠬᠥᠪᠡᠭᠦᠨ ᠦ᠌ ᠦᠭᠡ ᠂ ᠵᠢᠷᠠᠨ ᠨᠠᠰᠤᠲᠤ ᠮᠢᠨᠦ ᠰᠠᠨᠠᠭᠠᠨ ᠳ᠋ᠤᠷ ᠶᠡᠬᠡᠯᠡ ᠨᠡᠢᠴᠡᠪᠡ !》 ᠬᠡᠮᠡᠵᠦ ᠵᠢᠴᠢ ᠡᠳᠦᠷ ᠳᠠᠷᠤᠢ ᠵᠢᠷᠭᠤᠭᠠ ᠳᠣᠯᠣᠭᠠᠨ ᠬᠥᠮᠦᠨ ᠳᠠᠭᠠᠭᠤᠯᠵᠤ ᠂ ᠵᠢᠭᠠᠭᠰᠠᠭᠠᠷ ᠢᠯᠭᠦᠨᠡ ᠶ᠋ᠢᠨ ᠨᠤᠲᠤᠭ ᠲᠤᠷ ᠬᠦᠷᠴᠦ ᠮᠣᠷᠢᠨ ᠠ᠋ᠴᠠ ᠪᠠᠭᠤᠲᠠᠯᠠ ᠪᠣᠲ᠋ᠤ ᠨᠢᠭᠡᠨᠲᠡ ᠮᠡᠳᠡᠭᠡ ᠣᠯᠤᠭᠰᠠᠨ ᠲᠤᠯᠠ ᠶᠠᠭᠠᠷᠠᠨ ᠶᠣᠰᠣᠯᠠᠨ ᠤᠭᠲᠤᠵᠤ ᠠᠪᠤᠭᠠᠳ ᠶᠣᠰᠣᠯᠠᠨ ᠬᠦᠨᠳᠦᠯᠡᠵᠦ ᠦᠬᠡᠷ ᠨᠢᠲᠤᠯᠵᠤ ᠂ ᠱᠠᠩᠨᠠᠭᠰᠠᠨ ᠶᠠᠭᠤᠮᠠ ᠶ᠋ᠢ ᠪᠦᠷᠢᠨᠡ ᠮᠥᠷᠭᠥᠨ ᠪᠠᠶᠠᠷᠯᠠᠵᠤ ᠬᠦᠯᠢᠶᠡᠨ ᠠᠪᠤᠭᠠᠳ ᠬᠤᠷᠢᠮ ᠲᠠᠯᠪᠢᠵᠤ ᠵᠠᠷᠴᠢᠭᠤᠲᠠᠢ ᠶ᠋ᠢ ᠬᠦᠨᠳᠦᠯᠡᠵᠦ ᠠᠷᠢᠬᠢ ᠪᠠᠷᠢᠵᠤ ᠂ ᠬᠡᠳᠦᠨ ᠡᠳᠦᠷ ᠬᠥᠷ ᠨᠠᠢᠷ ᠬᠢᠵᠦ ᠡᠮᠡᠭᠡᠯ ᠬᠠᠵᠠᠭᠠᠷᠲᠤ ᠰᠠᠢᠨ ᠮᠣᠷᠢᠨ ᠤ᠋ ᠲᠡᠷᠢᠭᠦᠯᠡᠭᠰᠡᠨ ᠪᠠᠯᠩ ᠪᠠᠷᠢᠵᠤ ᠂ ᠳᠠᠭᠠᠭᠤᠯᠤᠭᠰᠠᠨ ᠠᠷᠠᠳ ᠲᠤᠷ ᠪᠠᠰᠠ ᠰᠢᠭᠦᠰᠦ ᠵᠤᠮᠠ ᠶ᠋ᠢᠨ ᠪᠡᠯᠡᠭ ᠥᠭᠴᠦ ᠰᠠᠢᠨ ᠮᠣᠷᠢ ᠬᠠᠯᠠᠨ ᠤᠨᠤᠭᠤᠯᠵᠤ ᠂ ᠡᠴᠢᠭᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠠᠶᠠᠷᠯᠠᠵᠤ ᠨᠥᠬᠥᠳ ᠰᠡᠯᠲᠡ ᠪᠡᠨ ᠠᠪᠴᠤ ᠡᠯᠴᠢ ᠵᠠᠷᠴᠢᠭᠤᠲᠠᠢ ᠯᠤᠭᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠪᠤᠷᠬᠠᠨ ᠭᠠᠯᠳᠤᠨᠠ ᠶ᠋ᠢᠨ ᠬᠣᠷᠣᠭᠠᠨᠠ ᠂ ᠲᠠᠢᠽᠦ ᠶ᠋ᠢᠨ ᠬᠡᠰᠢᠭ ᠲᠣᠷ ᠮᠥᠷᠭᠥᠷᠡ ᠢᠷᠡᠵᠦ ᠲᠠᠢᠽᠦ ᠳ᠋ᠦ᠍ᠷ ᠨᠢᠭᠤᠷ ᠵᠣᠯᠭᠠᠵᠤ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠮᠡᠳᠡᠭᠦᠯᠦᠷᠦᠨ ᠄
ᠡᠷᠬᠡᠲᠦ ᠡᠵᠡᠨ ᠴᠢᠨᠦ ᠦᠪᠡᠳᠡᠭᠰᠢ ᠡᠷᠳᠡᠮ ᠢ᠋ ᠦᠵᠡᠬᠦᠯᠡ
ᠡᠭᠦᠯᠡ ᠠᠷᠢᠯᠤᠭᠰᠠᠨ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠᠨ ᠮᠡᠲᠦ ᠂
ᠡᠪᠦᠯ ᠦ᠋ᠨ ᠦᠶᠡ ᠶ᠋ᠢᠨ ᠡᠷᠴᠢᠵᠦ ᠬᠥᠯᠳᠡᠭᠰᠡᠨ ᠮᠥᠯᠰᠥ
ᠡᠶᠡᠪᠡᠷᠭᠦ ᠰᠠᠯᠬᠢᠨᠠ ᠭᠡᠰᠴᠦ ᠬᠠᠢᠯᠬᠤ ᠳ᠋ᠤᠷ ᠠᠳᠠᠯᠢ ᠃
ᠡᠴᠢᠭᠡ ᠬᠥᠪᠡᠭᠦᠨ ᠬᠠᠮᠲᠤ ᠪᠠᠷ ᠪᠠᠶᠠᠷᠯᠠᠵᠤ
ᠡᠨᠡ ᠰᠡᠳᠬᠢᠯ ᠡᠭᠦᠷᠢᠳᠡ ᠰᠢᠳᠦᠨ ᠰᠦᠰᠦᠭᠯᠡᠪᠡ ᠂
ᠡᠮᠦᠨᠡ ᠴᠢᠨᠦ ᠬᠠᠯᠬᠠᠪᠴᠢᠨ ᠪᠣᠯᠬᠤ ᠶ᠋ᠢ ᠬᠦᠰᠡᠮᠦᠢ
ᠡᠭᠡᠬᠦᠢ ᠳ᠋ᠦ᠍ᠷ ᠢᠨᠤ ᠬᠠᠢᠭᠤᠯ ᠪᠣᠯᠬᠤ ᠶ᠋ᠢ ᠰᠠᠨᠠᠮᠤᠢ!
ᠭᠡᠮᠡᠨ ᠳᠠᠬᠢᠨ ᠳᠠᠬᠢᠨ ᠮᠥᠷᠭᠥᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠪᠡᠶᠡᠰᠦᠨ ᠮᠠᠷᠭᠤᠵᠤ ᠮᠦᠰᠢᠶᠡᠨ ᠥᠭᠦᠯᠡᠷᠦᠨ ᠄
ᠡᠷᠡ ᠬᠥᠮᠦᠨ ᠦ᠌ ᠡᠷᠳᠡᠮ ᠡᠷᠡᠬᠡᠢ ᠬᠤᠷᠤᠭᠤᠨ ᠤ᠋ ᠴᠢᠳᠠᠯ ᠢ᠋ᠶ᠋ᠠᠷ
ᠡᠷᠬᠡ ᠶᠠᠰᠤᠲᠤ ᠠᠯᠲᠠᠨ ᠤ᠋ ᠡᠷᠬᠢᠮ ᠸᠠᠩ ᠢ᠋ ᠪᠢᠰᠢᠷᠡᠭᠦᠯᠦᠭᠰᠡᠨᠡ
ᠡᠭᠦᠷᠢᠳᠡ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ᠷ ᠡᠯᠢᠭᠡᠰᠢᠶᠡᠨ ᠰᠡᠳᠬᠢᠬᠦ ᠶ᠋ᠢᠨ ᠲᠤᠯᠠᠳᠠ
ᠡᠳᠦᠢ ᠲᠡᠳᠦᠢᠬᠡᠨ ᠱᠠᠩᠨᠠᠪᠠᠢ ᠂ ᠡᠷᠬᠡᠪᠰᠢ ᠶᠣᠰᠣᠯᠠᠬᠤ ᠪᠤᠶᠤ ᠃
ᠭᠡᠮᠡᠨ ᠬᠤᠷᠢᠮ ᠬᠠᠢᠷᠠᠯᠠᠵᠤ ᠬᠠᠷᠢᠭᠤᠯᠬᠤᠶᠠ ᠂ ᠲᠠᠢᠽᠦ ᠶ᠋ᠢᠨ ᠬᠠᠷᠢᠯᠠᠭᠠᠳᠤᠢ ᠬᠠᠢᠷᠠ ᠶᠡᠬᠡᠲᠦ ᠲᠤᠨᠤᠮᠠᠯ ᠨᠡᠷᠡᠲᠦ ᠨᠢᠭᠡᠨ ᠬᠠᠰ ᠰᠠᠢᠬᠠᠨ ᠬᠡᠦᠬᠡᠨ ᠳᠡᠭᠦᠦ ᠪᠠᠢᠨᠠᠮ ᠭᠡᠮᠡᠨ ᠰᠣᠨᠣᠰᠴᠤ ᠬᠠᠯᠳᠠᠨ ᠭᠤᠶᠤᠵᠤ ᠪᠣᠯᠬᠤ ᠪᠣᠯᠪᠠᠤ ᠭᠡᠮᠡᠨ ᠬᠠᠮᠲᠤ ᠢᠷᠡᠭᠰᠡᠨ ᠵᠠᠷᠴᠢᠭᠤᠲᠠᠢ ᠠ᠋ᠴᠠ ᠠᠰᠠᠭᠤᠭᠰᠠᠨ ᠳ᠋ᠤᠷ ᠬᠠᠪᠤᠲᠠᠶᠠ ᠵᠠᠷᠴᠢᠭᠤᠲᠠᠢ ᠡᠪᠦᠭᠡᠨ ᠬᠠᠷᠢᠭᠤ ᠡᠢᠨ ᠭᠡᠮᠡᠨ ᠥᠴᠢᠷᠦᠨ᠄
ᠬᠠᠨ ᠦᠨᠳᠦᠰᠦᠲᠦ ᠪᠣᠷᠵᠢᠭᠢᠳ
ᠬᠠᠷᠢ ᠤᠷᠤᠭ ᠪᠠᠷᠢᠬᠤᠢ ᠳ᠋ᠤᠷ
ᠬᠠᠷᠭᠢᠰ ᠮᠠᠭᠤ ᠶ᠋ᠢ ᠵᠢᠭᠰᠢᠨᠡᠮ ᠶᠠ ᠃
ᠬᠠᠷᠪᠤᠯᠭᠠ ᠰᠠᠢᠲᠤ ᠴᠢᠮᠠᠶ᠋ᠢ
ᠬᠠᠷᠠᠲᠠᠯᠠ ᠦᠯᠦ ᠦᠲᠡᠭᠡᠷᠦᠮᠦ ᠂
ᠬᠠᠯᠳᠠᠨ ᠦᠵᠡᠰᠦᠭᠡᠢ ᠬᠡᠮᠡᠪᠡᠰᠦ
ᠬᠠᠱᠠᠩ ᠮᠢᠨᠦ ᠪᠡᠶᠡ
ᠬᠠᠢᠮᠰᠠᠨ ᠲᠡᠩᠰᠡᠵᠦ ᠦᠵᠡᠰᠦᠭᠡᠢ ᠃
ᠬᠠᠷᠢᠵᠤ ᠰᠠᠨᠠᠭᠠ ᠪᠠᠨ ᠲᠣᠭᠲᠠᠵᠤ
ᠬᠠᠮᠤᠭ ᠢ᠋ᠶ᠋ᠠᠷ ᠢᠷᠡᠭᠳᠡᠬᠦᠢ !
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠷᠪᠤᠯᠭᠠ ᠰᠠᠢᠲᠤ ᠪᠣᠲ᠋ᠤ ᠪᠠᠷ ᠬᠠᠨᠲᠠᠯᠠ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠬᠠᠷᠢᠵᠤ ᠳᠣᠪᠲᠣᠯᠤᠨ ᠢᠷᠡᠭᠡᠳ ᠬᠠᠮᠤᠭ ᠰᠠᠨᠠᠭᠠ ᠪᠠᠨ ᠭᠠᠷᠭᠠᠵᠤ ᠂ ᠬᠠᠢᠷᠠᠯᠠᠬᠤ ᠡᠴᠢᠭᠡ ᠳ᠋ᠡᠭᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠡᠴᠢᠭᠡ ᠢᠨᠤ ᠥᠭᠦᠯᠡᠷᠦᠨ ᠄ 《 ᠪᠣᠭᠳᠠ ᠢᠴᠡᠭᠤᠷᠲᠤ ᠪᠣᠷᠵᠢᠭᠢᠳ᠂ ᠲᠡᠭᠷᠢᠯᠢᠭ ᠦᠨᠳᠦᠰᠦᠲᠦ ᠲᠡᠮᠦᠵᠢᠨ ᠂ ᠶᠠᠭᠤᠨ ᠤ᠋ ᠮᠠᠨ ᠯᠤᠭᠠ ᠤᠷᠤᠭ ᠪᠠᠷᠢᠮᠤ ᠬᠡᠮᠡᠮᠦ ᠃ ᠲᠡᠢᠨ ᠪᠣᠯᠪᠠᠴᠤ ᠪᠤᠶᠠᠨ ᠶᠡᠬᠡᠲᠦ ᠪᠣᠷᠵᠢᠭᠢᠳ ᠤ᠋ᠨ ᠪᠦᠪᠡᠢᠯᠡᠨ ᠦᠵᠡᠬᠦ ᠬᠠᠢᠷᠠ ᠳ᠋ᠤᠷ ᠭᠤᠶᠤᠵᠤ ᠦᠵᠡᠰᠦᠭᠡᠢ ᠃ ᠬᠠᠨ ᠦᠨᠳᠦᠰᠦᠲᠦ ᠲᠡᠮᠦᠵᠢᠨ ᠦ᠌ ᠬᠠᠢᠷᠠᠯᠠᠨ ᠦᠵᠡᠬᠦ ᠬᠡᠰᠢᠭ ᠲᠣᠷ ᠬᠠᠯᠳᠠᠵᠤ ᠦᠵᠡᠰᠦᠭᠡᠢ ᠃ 》 ᠬᠡᠮᠡᠭᠡᠳ ᠲᠥᠷᠥᠭᠰᠡᠨ ᠠᠬᠠ ᠶᠠᠪᠤᠴᠢᠲᠠᠢ ᠶ᠋ᠢ ᠭᠤᠶᠤᠵᠤ ᠂ ᠬᠥᠪᠡᠭᠦᠨ ᠪᠤᠲ᠋ᠤ ᠶ᠋ᠢ ᠳᠠᠭᠠᠭᠤᠯᠤᠨ ᠥᠭᠴᠦ ᠮᠥᠨ ᠬᠦ᠌ ᠤᠷᠢᠳᠠ ᠲᠠᠨᠢᠭᠰᠠᠨ ᠣᠷᠢᠶᠠᠩᠬᠠᠨ ᠤ᠋ ᠵᠠᠷᠴᠢᠭᠤᠲᠠᠢ ᠥᠲᠡᠭᠦᠰ ᠢ᠋ ᠭᠤᠶᠤᠵᠤ ᠵᠠᠭᠤᠴᠢ ᠪᠣᠯᠭᠠᠰᠤᠭᠠᠢ ᠭᠡᠮᠡᠨ ᠪᠡᠯᠡᠭ ᠦ᠋ᠨ ᠮᠣᠷᠢ ᠲᠡᠮᠡᠭᠡ ᠶ᠋ᠢ ᠬᠥᠭᠡᠭᠡᠵᠦ ᠶᠡᠬᠡ ᠨᠡᠭᠦᠳᠡᠯ ᠢ᠋ᠶ᠋ᠡᠷ ᠬᠦᠷᠴᠦ ᠢᠷᠡᠭᠡᠳ ᠵᠠᠷᠴᠢᠭᠤᠲᠠᠢ ᠥᠲᠡᠭᠦᠰ ᠲᠣᠷ ᠵᠣᠯᠭᠠᠵᠤ ᠤᠴᠢᠷ ᠲᠤᠬᠠᠢ ᠪᠠᠨ ᠭᠠᠷᠭᠠᠵᠤ ᠭᠤᠶᠤᠴᠢᠯᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠵᠠᠷᠴᠢᠭᠤᠲᠠᠢ ᠳᠤᠷᠠᠲᠠᠶᠠ ᠬᠦᠯᠢᠶᠡᠨ ᠠᠪᠴᠤ ᠥᠭᠦᠯᠡᠷᠦᠨ ᠄ 《 ᠣᠭ᠌ᠶᠤ ᠱ᠌ᠢᠷᠦ ᠶ᠋ᠢᠨ ᠣᠭᠣᠰᠣᠷ ᠬᠡᠯᠬᠢᠶᠡ ᠶ᠋ᠢ ᠬᠡᠯᠡᠯᠴᠡᠨ ᠲᠣᠭᠲᠠᠪᠠᠰᠤ ᠂ ᠤᠷᠲᠤ ᠨᠠᠰᠤᠨ ᠥᠯᠵᠡᠢ ᠬᠤᠲᠤᠭ ᠳᠡᠯᠭᠡᠷᠡᠨᠡᠮ ᠬᠡᠮᠡᠯᠦᠭᠡ ᠂ ᠪᠦᠲᠦᠪᠡ ᠡᠰᠡ ᠪᠦᠲᠦᠪᠡ ᠮᠡᠳᠡᠭᠦᠯᠦᠨ ᠪᠠᠢᠵᠤ ᠦᠵᠡᠮᠦᠢ ᠶᠠ !》 ᠬᠡᠮᠡᠵᠦ ᠂ ᠬᠥᠪᠡᠭᠦᠨ ᠵᠠᠯᠮᠠ ᠳ᠋ᠤᠷ ᠬᠡᠯᠡᠭᠦᠯᠵᠦ ᠲᠠᠢᠽᠦ ᠳ᠋ᠦ᠍ᠷ ᠮᠡᠳᠡᠭᠦᠯᠪᠡᠰᠦ ᠂ ᠲᠠᠢᠽᠦ ᠮᠠᠰᠢ ᠶᠡᠬᠡ ᠪᠡᠶᠡᠰᠴᠦ ᠵᠠᠷᠴᠢᠭᠤᠲᠠᠢ ᠪᠠ ᠶᠠᠪᠤᠴᠢᠲᠠᠢ ᠬᠣᠶᠠᠭᠤᠯᠠ ᠶ᠋ᠢ ᠠᠷᠰᠯᠠᠨᠲᠤ ᠴᠠᠴᠠᠷ ᠲᠤᠷ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠵᠣᠯᠭᠠᠭᠰᠠᠨ ᠳ᠋ᠤᠷ ᠶᠠᠪᠤᠴᠢᠲᠠᠢ ᠲᠠᠢᠽᠦ ᠶ᠋ᠢᠨ ᠠᠰᠤᠷᠤ ᠰᠦᠷᠲᠡᠢ ᠶ᠋ᠢ ᠦᠵᠡᠭᠡᠳ ᠭᠱᠠᠨ ᠵᠠᠭᠤᠷᠠ ᠤᠬᠠᠭᠠᠨ ᠪᠠᠯᠠᠷᠠᠭᠠᠳ ᠰᠥᠭᠥᠳ ᠰᠥᠭᠥᠳᠦᠭᠰᠡᠭᠡᠷ ᠨᠢᠭᠡᠮᠦᠰᠦᠨ ᠳᠠᠭᠤᠨ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠠᠳ ᠶᠠᠭ ᠲᠠᠭ ᠪᠣᠯᠤᠭᠰᠠᠨ ᠳ᠋ᠤᠷ ᠵᠠᠷᠴᠢᠭᠤᠲᠠᠢ ᠬᠡᠷᠬᠢᠨ ᠲᠦᠯᠬᠢᠨ ᠲᠠᠲᠠᠪᠠᠴᠤ ᠨᠢᠭᠡᠨᠲᠡ ᠵᠣᠭ ᠵᠣᠭᠰᠣᠵᠤ ᠬᠡᠯᠡ ᠲᠠᠲᠠᠭᠰᠠᠨ ᠳ᠋ᠤᠷ ᠵᠠᠷᠴᠢᠭᠤᠲᠠᠢ ᠡᠪᠦᠭᠡᠨ ᠠᠷᠭᠠ ᠦᠭᠡᠢ ᠣᠷᠣᠭᠰᠢ ᠳᠠᠪᠰᠢᠨ ᠰᠥᠭᠥᠳᠴᠦ ᠶᠠᠭ ᠲᠠᠭ ᠪᠣᠯᠤᠭᠰᠠᠨ ᠶᠠᠪᠤᠴᠢᠲᠠᠢ ᠡᠪᠦᠭᠡᠨ ᠦ᠌ ᠲᠤᠯᠠ ᠲᠥᠯᠥᠭᠡᠯᠡᠨ ᠡᠢᠨ ᠮᠡᠳᠡᠭᠦᠯᠦᠷᠦᠨ ᠄
ᠪᠣᠭᠳᠠ ᠢᠵᠠᠭᠤᠷᠲᠤ ᠪᠣᠷᠵᠢᠭᠢᠳ ᠪᠤᠶᠠᠨ ᠶᠡᠬᠡᠲᠦ ᠡᠵᠡᠨ ᠴᠢᠮᠠ ᠳ᠋ᠤᠷ
ᠪᠣᠯᠣᠷ ᠮᠡᠲᠦ ᠠᠷᠢᠭᠤᠨ ᠪᠤᠯᠠᠭ ᠠᠳᠠᠯᠢ ᠲᠤᠩᠭᠠᠯᠠᠭ ᠂
ᠪᠣᠳᠣᠯᠭᠠ ᠤᠬᠠᠭᠠᠨ ᠪᠦᠷᠢᠳᠦᠭᠰᠡᠨ ᠪᠤᠯᠪᠠᠷᠠᠢ ᠬᠠᠰ ᠲᠤᠷ ᠲᠡᠩᠴᠡᠬᠦ
ᠪᠣᠱᠣᠭᠲᠤ ᠰᠠᠢᠬᠠᠨ ᠬᠡᠦᠬᠡᠨ ᠳᠡᠭᠦᠦ ᠪᠠᠢᠨᠠᠮ ᠭᠡᠮᠡᠨ ᠂
ᠢᠵᠢᠯᠵᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠢᠲᠡᠭᠡᠯᠲᠡᠢ ᠬᠠᠷᠪᠣᠯᠭᠠᠲᠤ ᠪᠤᠲ᠋ᠤ
ᠢᠷᠡᠵᠦ ᠡᠴᠢᠬᠦᠶᠡ ᠰᠣᠨᠣᠰᠤᠭᠠᠳ ᠶᠢᠰᠦᠨ ᠴᠠᠭᠠᠨ ᠢ᠋ᠶ᠋ᠠᠨ ᠪᠡᠯᠡᠳᠴᠦ
ᠢᠷᠦᠭᠡᠯᠲᠦ ᠠᠪᠠᠬᠠᠢ ᠶ᠋ᠢ ᠭᠤᠶᠤᠵᠤ ᠢᠨᠠᠭ ᠤᠷᠤᠭ ᠪᠣᠯᠰᠤᠭᠠᠢ ᠬᠡᠮᠡᠮᠦᠢ᠃
ᠢᠯᠡᠷᠭᠡᠶᠡ ᠵᠠᠬᠢᠶᠠ ᠶ᠋ᠢ ᠭᠤᠶᠤᠨᠠᠮ ᠢᠪᠡᠭᠡᠨ ᠬᠠᠢᠷᠠᠯᠠᠵᠤ ᠰᠣᠶᠣᠷᠬᠠ
ᠬᠠᠭᠠᠨ ᠢᠵᠠᠭᠤᠷᠲᠤ ᠪᠣᠷᠵᠢᠭᠢᠳ ᠬᠠᠢᠷᠠ ᠶᠡᠬᠡᠲᠦ ᠡᠵᠡᠨ ᠴᠢᠮᠠ ᠳ᠋ᠤᠷ ᠂
ᠬᠠᠰ ᠮᠡᠲᠦ ᠡᠷᠬᠢᠮ ᠬᠠᠮᠠᠭᠠᠯᠠᠯᠲᠤ ᠥᠬᠢᠨ ᠳᠡᠭᠦᠦ ᠪᠠᠢᠨᠠᠮ ᠭᠡᠮᠡᠨ
ᠢᠯᠭᠦᠨᠡ ᠶ᠋ᠢᠨ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠯᠢᠶ᠋ᠸ ᠰᠧ ᠣᠪᠣᠭᠲᠤ ᠪᠤᠲ᠋ᠤ
ᠢᠯᠪᠢᠨ ᠬᠦᠷᠲᠡᠭᠡᠭᠰᠡᠨ ᠬᠡᠰᠢᠭ ᠢ᠋ ᠢᠭᠲᠦᠯᠦᠨ ᠬᠦᠷᠲᠡᠵᠦ ᠶᠠᠪᠤᠬᠤᠶᠠ
ᠢᠯᠡᠷᠬᠡᠢ ᠠᠯᠳᠠᠷ ᠢ᠋ ᠰᠣᠨᠣᠰᠴᠤ ᠶᠢᠰᠦᠨ ᠪᠠᠯᠠᠩ ᠢ᠋ᠶ᠋ᠠᠨ ᠪᠠᠷᠢᠵᠤ
ᠢᠩᠬᠥᠢᠮᠡ ᠵᠠᠷᠯᠢᠭ ᠢ᠋ ᠭᠤᠶᠤᠨᠠᠮ ᠢᠷᠥᠭᠡᠨ ᠬᠠᠢᠷᠠᠯᠠᠵᠤ ᠰᠣᠶᠣᠷᠬᠠ ᠃
ᠬᠠᠰ ᠤ᠋ᠨ ᠰᠠᠯᠠᠭᠠᠨ ᠢ᠋ ᠭᠤᠶᠤᠵᠤ ᠬᠠᠮᠤᠭ ᠬᠠᠢᠷᠠ ᠭᠤᠶᠤᠨᠠᠮ
ᠬᠠᠢᠷᠠᠯᠠᠨ ᠥᠷᠥᠰᠢᠶᠡᠨ ᠥᠭᠴᠦ ᠬᠠᠯᠠᠭᠤᠨ ᠵᠠᠬᠢᠶᠠ ᠶ᠋ᠢ ᠰᠣᠶᠣᠷᠬᠠᠮᠤ !
ᠬᠡᠮᠡᠭᠡᠳ ᠶᠠᠪᠤᠴᠢᠲᠠᠢ ᠡᠪᠦᠭᠡᠨ ᠢ᠋ ᠲᠦᠯᠬᠢᠵᠦ ᠭᠤᠶᠤᠳᠠᠯ ᠢ᠋ᠶ᠋ᠠᠨ ᠮᠡᠳᠡᠭᠦᠯ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠶᠠᠪᠤᠴᠢᠲᠠᠢ ᠡᠪᠦᠭᠡᠨ ᠦ᠌ ᠵᠢᠷᠦᠬᠡ ᠰᠠᠶᠢ ᠪᠠᠬᠠᠨ ᠲᠣᠭᠲᠠᠨᠢᠵᠤ ᠂ ᠬᠡᠳᠦ ᠬᠡᠳᠦᠨᠲᠡ ᠢᠨᠴᠠᠭᠯᠠᠨ ᠬᠠᠨᠢᠶᠠᠵᠤ ᠰᠠᠶᠢ ᠬᠣᠭᠣᠯᠠᠢ ᠴᠡᠴᠡᠷᠡᠨ ᠮᠡᠳᠡᠭᠦᠯᠦᠷᠦᠨ ᠄
ᠠᠯᠲᠠᠨ ᠶᠠᠰᠤᠲᠤ ᠪᠣᠷᠵᠢᠭᠢᠳ ᠠᠯᠳᠠᠷ ᠶᠡᠬᠡᠲᠦ ᠡᠵᠡᠨ ᠴᠢᠮᠠ ᠳ᠋ᠤᠷ
ᠠᠳᠠᠯᠢᠳᠬᠠᠰᠢ ᠦᠭᠡᠢ ᠪᠤᠶᠠᠨᠲᠤ ᠠᠪᠠᠬᠠᠢ ᠥᠬᠢᠨ ᠳᠡᠭᠦᠦ ᠪᠠᠢᠨᠠᠮ ᠬᠡᠮᠡᠮᠦ ᠃
ᠬᠢᠶᠦᠳ ᠶᠠᠰᠤᠲᠤ ᠪᠣᠷᠵᠢᠭᠢᠳ ᠬᠢᠯᠢᠩ ᠶᠡᠬᠡᠲᠦ ᠡᠵᠡᠨ ᠴᠢᠮᠠ ᠳ᠋ᠤᠷ
ᠭᠬᠢᠷᠢ ᠦᠭᠡᠢ ᠭᠡᠷᠡᠯᠲᠦ ᠭᠬᠢᠷᠲᠦᠯ ᠦᠭᠡᠢ ᠬᠡᠦᠬᠡᠨ ᠳᠡᠭᠦᠦ ᠪᠠᠢᠨᠠᠮ ᠬᠡᠮᠡᠮᠦ ᠃
ᠲᠡᠭᠷᠢᠯᠢᠭ ᠶᠠᠰᠤᠲᠤ ᠪᠣᠷᠵᠢᠭᠢᠳ ᠲᠡᠩᠴᠡᠰᠢ ᠦᠭᠡᠢ ᠡᠵᠡᠨ ᠴᠢᠮᠠ ᠳ᠋ᠤᠷ
ᠲᠡᠭᠦᠰ ᠡᠷᠳᠡᠮ ᠪᠦᠷᠢᠳᠦᠭᠰᠡᠨ ᠲᠡᠭᠷᠢ ᠮᠡᠲᠦ ᠬᠡᠦᠬᠡᠨ ᠳᠡᠭᠦᠦ ᠪᠠᠢᠨᠠᠮ ᠬᠡᠮᠡᠯᠦᠭᠡ ᠃
ᠢᠯᠭᠦᠨᠡ ᠶ᠋ᠢᠨ ᠨᠤᠲᠤᠭ ᠤ᠋ᠨ ᠪᠤᠲ᠋ᠤ ᠶᠢᠰᠦᠨ ᠮᠣᠷᠢ ᠪᠠᠨ ᠪᠠᠷᠢᠵᠤ ᠢᠷᠡᠨ
ᠢᠲᠡᠭᠡᠯᠲᠦ ᠵᠠᠬᠢᠶᠠ ᠶ᠋ᠢ ᠭᠤᠶᠤᠨᠠᠮ ᠂ ᠢᠯᠪᠢᠨ ᠬᠠᠢᠷᠠᠯᠠᠵᠤ ᠰᠣᠶᠣᠷᠬᠠ !
ᠬᠡᠮᠡᠬᠦᠶᠡ ᠲᠠᠢᠽᠦ ᠪᠠᠬᠠᠨ ᠮᠦᠰᠢᠶᠡᠵᠦ ᠡᠢᠨ ᠭᠡᠮᠡᠨ ᠵᠠᠬᠢᠷᠤᠨ ᠄
ᠬᠥᠪᠡᠭᠦᠨ ᠬᠥᠮᠦᠵᠢᠪᠡᠰᠦ ᠪᠡᠷᠢ ᠠᠪᠬᠤ ᠥᠬᠢᠨ ᠦᠰᠪᠡᠰᠦ
ᠬᠦᠷᠭᠡᠨ ᠳ᠋ᠦ᠍ᠷ ᠥᠭᠬᠦ ᠢᠨᠦ ᠡᠷᠲᠡᠨ ᠦ᠌ ᠬᠠᠳ ᠤ᠋ᠨ ᠬᠠᠤᠯᠢ ᠪᠤᠶᠤ
ᠬᠥᠮᠦᠨ ᠲᠥᠷᠥᠪᠡᠰᠦ ᠴᠢᠷᠮᠠᠢᠨ ᠶᠠᠪᠤᠬᠤ
ᠬᠡᠦᠬᠡᠨ ᠪᠣᠯᠪᠠᠴᠤ ᠳᠡᠭᠡᠭᠰᠢᠳᠡ ᠵᠢᠳᠬᠦᠬᠦ ᠢᠨᠤ ᠡᠷᠡ ᠶ᠋ᠢᠨ ᠳᠦᠷᠰᠦᠲᠡᠨ ᠦ᠌ ᠶᠣᠰᠣ ᠪᠤᠶᠤ ᠂
ᠬᠥᠮᠦᠵᠢᠯᠳᠦ ᠤᠯᠤᠰ ᠬᠦᠰᠡᠵᠦ ᠡᠷᠢᠨ ᠢᠷᠡᠭᠡᠳ
ᠬᠥᠭᠰᠢᠳ ᠢ᠋ᠶ᠋ᠡᠷ ᠡᠢᠨ ᠬᠦ᠌ ᠮᠡᠳᠡᠭᠦᠯᠦᠭᠦᠯᠦᠨ ᠭᠣᠶᠣᠬᠤᠢ ᠳ᠋ᠤᠷ
ᠬᠥᠰᠢᠭᠦᠷᠯᠡᠨ ᠮᠤᠰᠬᠢᠬᠤ ᠪᠠᠷ ᠶᠠᠭᠤᠨ ᠪᠣᠯᠤᠨᠠᠮ ᠊ᠶᠠ ᠃
ᠬᠦᠷᠭᠡᠨ ᠪᠣᠯᠤᠭᠴᠢᠳ ᠠᠨᠤ ᠬᠠᠮᠢᠭᠠ ᠪᠣᠢ ?
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠷᠴᠢᠭᠤᠲᠠᠢ ᠂ ᠶᠠᠪᠤᠴᠢᠲᠠᠢ ᠬᠣᠶᠠᠭᠤᠯᠠ ᠶᠠᠭᠠᠷᠠᠨ ᠭᠠᠷᠴᠤ ᠢᠷᠡᠨ ᠂ ᠬᠦᠷᠭᠡᠨ ᠪᠣᠯᠤᠭᠴᠢ ᠪᠤᠲ᠋ᠤ ᠶ᠋ᠢ ᠳᠠᠭᠠᠭᠤᠯᠤᠨ ᠣᠷᠣᠵᠤ ᠢᠷᠡᠭᠡᠳ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡ ᠣᠢᠷᠠ ᠰᠥᠭᠥᠳᠬᠡᠭᠰᠡᠨ ᠳ᠋ᠦ᠍ᠷ ᠂ ᠲᠠᠢᠽᠦ ᠦᠵᠡᠭᠡᠳ ᠪᠡᠶᠡᠰᠴᠦ ᠵᠠᠬᠢᠷᠤᠨ ᠄
ᠠᠯᠲᠠᠨ ᠤᠯᠤᠰ ᠢ᠋ ᠠᠶᠤᠲᠠᠯᠠ ᠠᠯᠢᠪᠠ ᠪᠦᠬᠦᠨ ᠢ᠋ ᠪᠠᠶᠠᠷᠯᠠᠲᠠᠯᠠ
ᠠᠵᠢᠭ ᠥᠭᠡᠶᠡ ᠣᠷᠣᠵᠤ ᠠᠯᠲᠠᠨ ᠳᠤᠭᠤᠯᠠᠭᠠ ᠶ᠋ᠢ ᠤᠨᠤᠭᠰᠠᠨ ᠂
ᠠᠰᠤᠷᠤ ᠮᠡᠷᠭᠡᠨ ᠬᠠᠷᠪᠣᠯᠭᠠᠲᠤ ᠠᠳᠠᠪᠠᠰᠢ ᠰᠠᠢᠨ ᠣᠨᠣᠴᠢᠲᠤ
ᠠᠷᠢᠭᠤᠨ ᠰᠠᠢᠬᠠᠨ ᠲᠥᠷᠥᠭᠰᠡᠨ ᠠᠮᠤᠷᠯᠢᠩᠭᠤᠢ ᠴᠢ ᠠᠵᠤᠭᠤ ᠬᠡᠮᠡᠭᠡᠳ
ᠪᠤᠭᠤᠷᠵᠢ ᠪᠤᠭᠤᠷᠤᠯ ᠬᠣᠶᠠᠭᠤᠯᠠ ᠳ᠋ᠤᠷ ᠪᠣᠱᠣᠭ ᠵᠠᠬᠢᠶᠠ ᠪᠠᠭᠤᠯᠭᠠᠵᠤ
ᠪᠤᠯᠲᠤ ᠤᠯᠤᠰ ᠢ᠋ ᠬᠤᠷᠢᠶᠠᠵᠤ ᠪᠣᠯᠬᠤ ᠡᠰᠡᠬᠦ ᠶ᠋ᠢ ᠵᠥᠪᠯᠡᠭᠡᠳ
ᠪᠤᠴᠠᠯ ᠥᠭᠡᠶᠡ ᠲᠣᠭᠲᠠᠵᠤ ᠪᠣᠯᠢᠯ ᠦᠭᠡᠢ ᠮᠡᠳᠡᠭᠦᠯ
ᠪᠣᠱᠣᠭᠲᠤ ᠥᠵᠢᠨ ᠳ᠋ᠦ᠍ᠷ ᠮᠡᠳᠡᠭᠦᠯᠵᠦ ᠪᠤᠶᠠᠨᠲᠤ ᠦᠢᠯᠡ ᠶ᠋ᠢ ᠪᠦᠲᠦᠭᠡᠶᠡ ᠂
ᠪᠤᠭᠤᠷᠵᠢ ᠂ ᠪᠤᠭᠤᠷᠤᠯ ᠵᠧ ᠭᠡᠵᠦ ᠪᠤᠰᠤᠳ ᠥᠪᠡᠷ ᠢ᠋ ᠬᠣᠷᠢᠶᠠᠨ
ᠪᠣᠯᠪᠠᠰᠤᠨ ᠪᠣᠯᠲᠠᠯᠠ ᠵᠥᠪᠳᠡᠭᠡᠳ ᠪᠤᠷᠬᠠᠨ ᠭᠠᠯᠳᠤᠨᠠ ᠶ᠋ᠢᠨ ᠲᠠᠯᠠ ᠳ᠋ᠤᠷ
ᠪᠣᠳᠠᠲᠤ ᠬᠤᠷᠢᠮ ᠪᠡᠯᠡᠳᠬᠡᠨ ᠪᠣᠷᠣ ᠰᠠᠷᠬᠤᠳ ᠪᠠᠷᠢᠵᠤ ᠂
ᠪᠣᠭᠰᠢᠵᠤ ᠡᠢᠨ ᠮᠡᠳᠡᠭᠦᠯᠦᠷᠦᠨ ᠄
ᠬᠠᠨ ᠬᠤᠷᠮᠤᠰᠲᠠ ᠠ᠋ᠴᠠ ᠵᠠᠶᠠᠭᠠ ᠲᠠᠢ ᠮᠡᠨᠳᠦᠯᠡᠭᠰᠡᠨ
ᠬᠠᠰ ᠬᠠᠳᠠ ᠮᠡᠲᠦ ᠡᠵᠡᠨ ᠴᠢᠨᠦ ᠂
ᠬᠠᠢᠷᠠ ᠶᠡᠬᠡᠲᠦ ᠬᠡᠦᠬᠡᠨ ᠳᠡᠭᠦᠦ ᠶᠦ᠍ᠭᠡᠨ
ᠬᠠᠷᠠᠰᠢ ᠦᠭᠡᠢ ᠲᠤᠨᠤᠮᠠᠯ ᠲᠠᠵᠢ ᠠᠪᠠᠬᠠᠢ ᠶ᠋ᠢ ᠪᠢᠳᠡ ᠃
ᠬᠠᠰᠢᠶᠠ ᠲᠥᠰᠢᠶᠡ ᠢᠵᠢᠯᠵᠢ ᠠᠢᠮᠠᠭ ᠤ᠋ᠨ ᠡᠵᠡᠨ
ᠬᠠᠷᠪᠤᠯᠭᠠ ᠰᠠᠢᠲᠤ ᠢᠯᠭᠦᠨᠡ ᠶ᠋ᠢᠨ ᠨᠤᠲᠤᠭ ᠤ᠋ᠨ ᠪᠣᠲ᠋ᠤ ᠳ᠋ᠤᠷ
ᠬᠠᠢᠷᠠᠯᠠᠯ ᠥᠭᠡᠶᠡ ᠬᠣᠯᠪᠣᠵᠤ ᠪᠣᠯᠬᠤ ᠪᠠᠢᠨᠠᠮ
ᠬᠠᠮᠤᠭ ᠤᠯᠤᠰ ᠪᠦᠷᠢᠨᠡ ᠳᠤᠷᠠᠲᠠᠢ ᠪᠠᠶᠠᠷᠯᠠᠮᠤᠢ !
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠪᠡᠶᠡᠰᠦᠨ ᠮᠦᠰᠢᠶᠡᠵᠦ ᠂ ᠳᠥᠷᠪᠡᠨ ᠳᠡᠭᠦᠦ ᠪᠡᠨ ᠳᠠᠭᠠᠭᠤᠯᠤᠨ ᠥᠭᠡᠯᠦᠨ ᠥᠵᠢᠨ ᠡᠬᠡ ᠳ᠋ᠦ᠍ᠷ ᠤᠯᠠᠮᠵᠢᠯᠠᠨ ᠮᠡᠳᠡᠭᠦᠯᠵᠦ ᠲᠣᠭᠲᠠᠭᠠᠨ ᠶᠡᠬᠡ ᠴᠠᠴᠠᠷ ᠲᠤᠷ ᠰᠠᠭᠤᠵᠤ ᠵᠠᠬᠢᠷᠤᠨ ᠄
ᠠᠬᠠ ᠳᠡᠭᠦᠦ ᠪᠢᠳᠡ ᠲᠠᠪᠤᠭᠤᠯᠠ ᠶ᠋ᠢᠨ ᠳᠣᠲᠣᠷᠠ
ᠠᠷᠠᠬᠠᠨ ᠭᠠᠭᠴᠠ ᠡᠨᠡ ᠨᠢᠭᠡᠬᠡᠨ ᠬᠡᠦᠬᠡᠨ ᠳᠡᠭᠦᠦ ᠪᠥᠯᠥᠭᠡ ᠃
ᠠᠭᠠᠯᠢ ᠰᠠᠢᠲᠤ ᠢᠯᠭᠦᠨᠡ ᠶ᠋ᠢᠨ ᠪᠣᠲ᠋ᠤ ᠳ᠋ᠤᠷ ᠭᠣᠶᠣᠪᠠᠰᠤ
ᠠᠷᠭᠠᠳᠠᠯ ᠦᠭᠡᠢ ᠠᠮᠠᠨ ᠠᠯᠳᠠᠵᠤ ᠤᠷᠤᠭ ᠪᠣᠯᠤᠨᠠᠮ ᠊ᠶᠠ᠃
ᠠᠯᠢᠪᠠ ᠤᠭᠰᠠᠭᠠ ᠠᠯᠪᠠᠲᠤ ᠤᠯᠤᠰ ᠲᠤᠷ ᠬᠦᠷᠲᠡᠯᠡ
ᠠᠬᠤ ᠪᠦᠭᠦᠳᠡᠭᠡᠷ ᠳᠤᠷᠠᠲᠠᠢ ᠪᠣᠯᠤᠭᠰᠠᠨ ᠤ᠋ ᠲᠤᠯᠠᠳᠠ
ᠠᠯᠲᠠᠨ ᠮᠡᠲᠦ ᠬᠡᠦᠬᠡᠨ ᠳᠡᠭᠦᠦ ᠠᠪᠠᠬᠠᠢ ᠶᠤᠭᠠᠨ
ᠠᠷᠢᠭᠤᠨ ᠲᠥᠷᠥᠭᠰᠡᠨ ᠪᠣᠲ᠋ᠤ ᠳ᠋ᠤᠷ ᠬᠠᠲᠤᠨ ᠪᠣᠯᠭᠠᠨᠠᠮ ᠊ᠶᠠ ᠬᠡᠮᠡᠵᠦ ᠂
ᠭᠠᠯ ᠭᠣᠯᠣᠮᠲᠠ ᠳ᠋ᠤᠷ ᠱᠠᠭᠠᠨᠲᠤ ᠣᠷᠬᠢᠨ ᠳᠠᠬᠢᠭᠤᠯᠵᠤ
ᠭᠠᠯᠳᠤᠨᠠ ᠠᠭᠤᠯᠠᠨ ᠳ᠋ᠤᠷ ᠰᠠᠴᠤᠯᠢ ᠡᠷᠭᠦᠨ ᠮᠥᠷᠭᠥᠭᠦᠯᠦᠭᠡᠳ
ᠭᠠᠳᠠᠨᠠ ᠳᠣᠲᠣᠨᠠ ᠠᠬᠠ ᠵᠠᠬᠠᠰ ᠲᠤᠷ ᠶᠣᠰᠣᠯᠠᠭᠤᠯᠤᠨ
ᠭᠠᠷ ᠬᠥᠯ ᠦ᠋ᠨ ᠤᠷᠤᠭ ᠰᠠᠳᠤᠨ ᠢ᠋ ᠴᠥᠮ ᠲᠠᠨᠢᠭᠤᠯᠤᠭᠰᠠᠨ ᠬᠣᠢᠨᠠ
ᠬᠠᠨᠳᠠᠭᠠᠢ ᠪᠤᠭᠤ ᠶ᠋ᠢᠨ ᠡᠯᠢᠭᠡᠲᠦ ᠨᠤᠮᠤ
ᠭᠠᠯᠪᠢᠩᠭᠠ ᠰᠢᠪᠠᠭᠤᠨ ᠤ᠋ ᠥᠳᠥᠲᠦ ᠰᠤᠮᠤ ᠳ᠋ᠤ᠌
ᠭᠠᠢᠬᠠᠯᠲᠠᠢ ᠡᠷᠳᠡᠨᠢᠰ ᠦ᠋ᠨ ᠰᠢᠭᠢᠳᠬᠡᠷᠲᠦ ᠰᠠᠭᠠᠳᠠᠭ ᠢ᠋
ᠭᠠᠷ ᠢ᠋ᠶ᠋ᠠᠷ ᠱᠠᠩᠨᠠᠨ ᠬᠦᠷᠭᠡᠨ ᠪᠣᠲ᠋ᠤ ᠳ᠋ᠤᠷ ᠪᠦᠰᠡᠯᠡᠭᠦᠯᠦᠭᠡᠳ
ᠭᠠᠭᠴᠠ ᠶᠢᠰᠦᠨ ᠦ᠌ ᠪᠡᠯᠡᠭ ᠢ᠋ ᠢᠨᠦ ᠦᠯᠡᠳᠡᠭᠡᠨ ᠲᠣᠭᠲᠠᠭᠠᠭᠠᠳ
ᠭᠠᠪᠰᠢᠭᠠᠢ ᠬᠠᠷᠪᠤᠭᠴᠢ ᠢᠯᠭᠦᠨᠡ ᠶ᠋ᠢᠨ ᠪᠣᠲ᠋ᠤ ᠶ᠋ᠢ ᠮᠥᠷᠭᠥᠭᠦᠯᠵᠦ ᠂
ᠭᠠᠳᠠᠰᠤ ᠮᠡᠲᠦ ᠳᠡᠭᠦᠦ ᠬᠦᠷᠭᠡᠨ ᠢ᠋ᠶ᠋ᠡᠨ ᠪᠣᠯᠭᠠᠭᠠᠳ
ᠭᠠᠢᠬᠠᠯᠲᠠᠢ ᠪᠣᠳᠣᠯᠭᠠᠲᠤ ᠬᠡᠮᠡᠬᠦ ᠴᠣᠯᠠ ᠥᠭᠴᠦ ᠬᠠᠢᠷᠠᠯᠠᠨ ᠂
ᠭᠠᠢᠬᠠᠮᠰᠢᠭᠲᠤ ᠰᠠᠢᠬᠠᠨ ᠮᠠᠩᠨᠤᠭ ᠳᠡᠪᠡᠯ ᠡᠮᠦᠰᠬᠡᠨ
ᠭᠠᠷᠤᠳᠢ ᠶ᠋ᠢᠨ ᠡᠮᠡᠭᠡᠯᠲᠦ ᠨᠡᠷᠡᠲᠡᠢ ᠮᠣᠷᠢ ᠤᠨᠤᠭᠤᠯᠵᠤ ᠂
ᠭᠠᠵᠠᠷ ᠳᠡᠯᠡᠬᠡᠢ ᠮᠡᠲᠦ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠵᠤ
ᠭᠠᠳᠠᠭᠰᠠᠨ ᠠᠳᠠᠯᠢ ᠰᠤᠮᠤᠨ ᠤ᠋ ᠪᠡᠯᠡᠭ ᠢ᠋ ᠲᠠᠯᠪᠢᠨ ᠲᠣᠭᠲᠠᠵᠤ ᠂
ᠠᠨᠳᠠ ᠬᠣᠲᠠ ᠪᠣᠯᠤᠭᠰᠠᠨ ᠵᠠᠷᠴᠢᠭᠤᠲᠠᠢ ᠶᠠᠪᠤᠴᠢᠲᠠᠢ ᠪᠠᠷ
ᠠᠪᠴᠤ ᠥᠭᠬᠦ ᠪᠣᠭᠲᠣᠯᠠᠬᠤ ᠶ᠋ᠢᠨ ᠪᠡᠯᠡᠭ ᠢ᠋ ᠬᠡᠯᠡᠯᠴᠡᠬᠦᠶᠡ ᠂
ᠠᠳᠤᠭᠤ ᠮᠠᠯ ᠬᠡᠳᠦᠨ ᠭᠣᠣᠯ ᠳᠦᠭᠦᠷᠡᠩ ᠣᠷᠣᠬᠤ ᠶ᠋ᠢ
ᠠᠶᠤᠮᠰᠢᠭ ᠦᠭᠡᠢ ᠡᠷᠲᠡᠬᠡᠨ ᠵᠠᠬᠢᠶᠠᠯᠠᠨ ᠪᠡᠯᠡᠳᠬᠡᠰᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ
ᠲᠠᠢᠽᠦ ᠮᠦᠰᠢᠶᠡᠵᠦ ᠵᠠᠬᠢᠷᠤᠨ ᠄
ᠠᠯᠲᠠᠨ ᠬᠣᠭᠣᠯᠠᠪᠴᠢᠳᠤ ᠬᠡᠦᠬᠡᠨ ᠳᠡᠭᠦᠦ ᠳ᠋ᠦ᠍ᠷ ᠮᠢᠨᠦ ᠬᠣᠯᠪᠣᠵᠤ
ᠠᠮᠠᠷᠠᠭ ᠢᠨᠠᠭ ᠤᠷᠤᠭ ᠰᠠᠳᠤᠨ ᠪᠣᠯᠤᠭᠰᠠᠨ ᠤ᠋ ᠲᠤᠯᠠᠳᠠ
ᠠᠯᠢᠪᠠ ᠦᠢᠯᠡᠰ ᠲᠣᠷ ᠵᠣᠪᠠᠯᠠᠩ ᠵᠢᠷᠭᠠᠯᠠᠩ ᠢ᠋ ᠬᠠᠮᠲᠤᠳᠬᠠᠵᠤ
ᠠᠰᠢᠳᠠ ᠬᠠᠮᠲᠤ ᠶᠡᠬᠡ ᠲᠥᠷᠥ ᠳ᠋ᠦ᠍ᠷ ᠮᠢᠨᠦ ᠵᠢᠳᠬᠦᠵᠦ
ᠠᠯᠲᠠᠨ ᠳᠡᠯᠡᠬᠡᠢ ᠳᠡᠭᠡᠷᠡᠬᠢ ᠶ᠋ᠢ ᠨᠡᠢᠭᠡᠮᠯᠡᠨ ᠬᠤᠷᠢᠶᠠᠪᠠᠰᠤ ᠪᠠᠷᠠᠪᠠ ᠃
ᠠᠳᠠᠪᠠᠰᠢ ᠲᠡᠳᠦᠢᠴᠢᠨᠡᠭᠡᠨ ᠵᠤᠵᠠᠭᠠᠨ ᠪᠡᠯᠡᠭ ᠢ᠋ᠶ᠋ᠡᠷ ᠶᠠᠭᠤ ᠬᠢᠬᠦ ?
ᠠᠷᠠᠢ ᠶᠢᠰᠦ ᠶᠢᠰᠦᠨ ᠦ᠌ ᠶᠣᠰᠣᠨ ᠳ᠋ᠤᠷ ᠲᠣᠬᠣᠷᠪᠠᠰᠤ ᠪᠠᠷᠠᠪᠠ ᠃
ᠠᠬᠤᠢ ᠶᠡᠬᠡ ᠡᠳ᠋ ᠮᠠᠯ ᠢ᠋ ᠰᠦᠢᠳᠬᠡᠬᠦ ᠬᠡᠷᠡᠭ ᠦᠭᠡᠢ !
ᠬᠡᠮᠡᠵᠦ ᠬᠤᠷᠢᠮ ᠲᠡᠭᠦᠰᠴᠦ ᠤᠷᠤᠭ ᠮᠣᠷᠳᠠᠪᠠ ᠂ ᠡᠨᠡ ᠮᠡᠳᠡᠭᠡ ᠶ᠋ᠢ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠮᠢᠩᠭᠠᠨ ᠭᠠᠵᠠᠷ ᠰᠣᠨᠣᠰᠴᠤ ᠠᠯᠲᠠᠨ ᠤᠯᠤᠰ ᠠ᠋ᠴᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠳ᠋ᠦ᠍ᠷ ᠠᠯᠪᠠ ᠬᠦᠷᠭᠡᠵᠦ ᠢᠷᠡᠪᠡ ᠃ ᠲᠡᠷᠡ ᠪᠠᠰᠠ ᠢᠵᠢᠯᠵᠢ ᠠᠢᠮᠠᠭ ᠢ᠋ ᠤᠷᠤᠭ ᠤ᠋ᠨ ᠨᠠᠢᠷ ᠢ᠋ᠶ᠋ᠠᠷ ᠣᠷᠣᠭᠤᠯᠵᠤ ᠠᠪᠤᠪᠠ ᠭᠡᠮᠡᠨ ᠲᠦᠷᠭᠢᠯᠦᠨ ᠬᠡᠯᠡᠯᠴᠡᠮᠦᠢ ᠃ ᠡᠨᠡ ᠵᠠᠪᠰᠠᠷ ᠲᠤᠷ ᠤᠷᠢᠶᠠᠩᠬᠠᠨ ᠤ᠋ ᠵᠡᠯᠮᠡ ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠂ ᠣᠶᠤᠨ ᠭᠤᠸᠠ ᠂ ᠣᠶᠤᠲᠤ ᠰᠡᠴᠡᠨ ᠳᠥᠷᠪᠡᠭᠦᠯᠡ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠶ᠋ᠢᠨ ᠡᠴᠢᠭᠡ ᠴᠣᠴᠣᠯᠢ ᠶ᠋ᠢᠨ ᠪᠢᠴᠢᠭᠰᠡᠨ ᠬᠠᠷᠢᠭᠤ ᠪᠢᠴᠢᠭ ᠢ᠋ ᠠᠪᠴᠤ ᠠᠯᠲᠠᠨ ᠤᠯᠤᠰ ᠲᠤᠷ ᠲᠠᠪᠤᠨ ᠵᠠᠭᠤᠨ ᠰᠠᠢᠨ ᠮᠣᠷᠢ ᠂ ᠲᠠᠪᠤᠨ ᠵᠠᠭᠤᠨ ᠰᠠᠢᠨ ᠵᠡᠪᠰᠡᠭ ᠬᠦᠷᠭᠡᠨ ᠡᠴᠢᠭᠡᠳ ᠪᠢᠴᠢᠭ ᠢ᠋ ᠡᠷᠭᠦᠭᠰᠡᠨ ᠳ᠋ᠦ᠍ᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠱᠢᠽᠦ᠋ᠩ ᠬᠠᠭᠠᠨ ᠸᠠᠨ ᠶᠠᠨ ᠶᠦᠩ ᠬᠣᠢᠲᠤ ᠶ᠋ᠢᠨ ᠡᠯᠴᠢ ᠶ᠋ᠢ ᠬᠦᠨᠳᠦᠯᠡᠨ ᠡᠭᠡᠭᠦᠯᠵᠦ ᠮᠥᠨ ᠪᠢᠴᠢᠭ ᠢ᠋ᠶ᠋ᠡᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠶ᠋ᠢ ᠡᠵᠡᠨ ᠢ᠋ ᠮᠡᠬᠡᠯᠡᠵᠦ ᠡᠳᠦᠷ ᠢ᠋ ᠥᠩᠭᠡᠷᠡᠭᠡᠪᠡ ᠬᠡᠮᠡᠵᠦ ᠶᠠᠯᠠ ᠬᠡᠯᠡᠯᠴᠡᠭᠦᠯᠵᠦ ᠬᠦᠨᠳᠦᠳᠡ ᠲᠣᠷᠭᠠᠪᠠ ᠃ ᠸᠧᠢ ᠸᠠᠩ ᠶᠦᠩ ᠵᠢᠢ ᠬᠣᠶᠠᠷ ᠳᠠᠰᠢ ᠴᠥᠮ ᠬᠣᠷᠣᠰᠤᠯ ᠢ᠋ ᠡᠪᠦᠷᠯᠡᠪᠡ ᠂ ᠵᠣᠣ ᠲᠤᠤ ᠱᠢ ᠶ᠋ᠢᠨ ᠲᠠᠮᠠᠭᠠ ᠶ᠋ᠢ ᠲᠡᠭᠦᠨ ᠦ᠌ ᠭᠡᠷ ᠡᠴᠡ ᠨᠡᠩᠵᠢᠨ ᠭᠠᠷᠭᠠᠪᠠ ᠃
ᠲᠠᠲᠠᠴᠠ ᠬᠣᠢᠲᠤ ᠶ᠋ᠢᠨ ᠡᠯᠴᠢ ᠵᠡᠯᠮᠡ ᠲᠠᠨ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠢᠷᠠᠪᠠᠰᠤ ᠂ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠶᠡᠬᠡᠯᠡ ᠦᠢᠮᠡᠯᠳᠦᠮᠦᠢ ᠂ ᠡᠰᠡ ᠠᠯᠵᠢᠶᠠᠪᠠᠰᠤ ᠳᠣᠣᠷᠠ ᠦᠵᠡᠭᠳᠡᠬᠦᠢ ᠃
ᠴᠣᠬᠣᠯᠠᠭᠰᠠᠨ ᠠᠨᠤ
ᠡᠨᠡ ᠪᠦᠯᠦᠭ ᠲᠣᠷ ᠰᠠᠶᠢ ᠲᠠᠢᠽᠦ ᠶ᠋ᠢᠨ ᠦᠨᠡᠬᠡᠷ ᠲᠩᠷᠢ ᠶ᠋ᠢᠨ ᠲᠥᠷᠥᠯᠬᠢ ᠪᠣᠭᠳᠠ ᠬᠥᠮᠦᠨ ᠢᠨᠤ ᠲᠣᠳᠣᠷᠬᠠᠢ ᠢᠯᠡᠷᠡᠨ ᠭᠠᠷᠴᠤ ᠢᠷᠡᠪᠡ᠃ ᠠᠯᠢ ᠭᠠᠵᠠᠷ ᠲᠤᠷ ᠢᠯᠡᠷᠡᠪᠡ ᠬᠡᠮᠡᠪᠡᠰᠦ᠄ ᠲᠣᠳᠣᠷᠬᠠᠢ ᠢᠯᠡᠷᠡᠭᠰᠡᠨ ᠭᠤᠷᠪᠠᠨ ᠵᠦᠢᠯ ᠪᠣᠢ᠂ ᠠᠯᠢ ᠭᠤᠷᠪᠠᠨ ᠵᠦᠢᠯ ᠬᠡᠮᠡᠪᠡᠰᠦ᠄ ᠲᠡᠷᠢᠭᠦᠨ ᠳ᠋ᠦ᠍ᠷ ᠸᠧᠢ ᠸᠠᠩ ᠶᠦᠩ ᠵᠢᠢ ᠶ᠋ᠢᠨ ᠬᠣᠢᠴᠢ ᠡᠳᠦᠷ ᠦ᠋ᠨ ᠬᠣ ᠬᠠᠨ ᠬᠣ ᠳ᠋ᠤᠷ ᠠᠯᠠᠭᠳᠠᠬᠤ ᠶ᠋ᠢ ᠤᠭᠲᠤᠨ ᠤᠬᠠᠵᠤ ᠠᠢᠯᠠᠳᠪᠠ᠃ ᠬᠣᠶᠠᠷ ᠲᠤᠷ ᠭᠤᠷᠪᠠᠳᠤᠭᠠᠷ ᠬᠥᠪᠡᠭᠦᠨ ᠥᠭᠡᠳᠡᠢ ᠶ᠋ᠢᠨ ᠳᠥᠴᠢᠨ ᠶᠢᠰᠦᠨ ᠣᠨ ᠳ᠋ᠤᠷ ᠠᠯᠲᠠᠨ ᠤᠯᠤᠰ ᠢ᠋ ᠮᠥᠬᠥᠭᠡᠬᠦ ᠶ᠋ᠢ ᠳᠣᠳᠣᠷᠬᠠᠶᠠ ᠠᠢᠯᠠᠳᠪᠠ᠃ ᠭᠤᠷᠪᠠᠳᠤᠭᠠᠷ ᠲᠤᠷ ᠢᠯᠭᠦᠨᠡ ᠶ᠋ᠢᠨ ᠪᠣᠲ᠋ᠤ ᠶ᠋ᠢᠨ ᠤᠯᠤᠰ ᠨᠡᠭᠡᠭᠡᠬᠦ ᠶᠡᠬᠡ ᠵᠠᠩᠵᠤᠨ᠂ ᠤᠷᠤᠭ ᠤ᠋ᠨ ᠲᠦᠰᠢᠮᠡᠯ ᠪᠣᠯᠬᠤ ᠶ᠋ᠢ ᠨᠢᠭᠡᠨᠲᠡ ᠦᠵᠡᠮᠡᠭᠴᠡ ᠨᠡᠪᠲᠡ ᠲᠣᠯᠢᠳᠠᠵᠤ ᠭᠠᠷᠭᠠᠪᠠ᠃ ᠡᠭᠦᠨ ᠳ᠋ᠦ᠍ᠷ ᠰᠠᠶᠢ ᠡᠷᠲᠡᠨ ᠦ᠌ ᠵᠧᠦ ᠤᠯᠤᠰ ᠤ᠋ᠨ ᠸᠸᠨ ᠸᠠᠩ ᠪᠣᠭᠳᠠ ᠮᠥᠨ ᠥᠪᠡᠷ ᠦ᠋ᠨ ᠳᠣᠯᠣᠭᠠᠨ ᠵᠢᠯ ᠢᠦ ᠯᠢ ᠬᠣᠲᠠ ᠳ᠋ᠤᠷ ᠬᠣᠷᠢᠭᠳᠠᠬᠤ ᠵᠣᠪᠠᠯᠠᠩ ᠪᠠ ᠵᠢᠴᠢ ᠬᠠᠭᠤᠴᠢᠨ ᠬᠡᠭᠦᠷ ᠡᠴᠡ ᠭᠠᠷᠤᠭᠰᠠᠨ ᠠᠶᠤᠩᠭᠠ ᠶ᠋ᠢᠨ ᠳᠠᠭᠤᠨ ᠠ᠋ᠴᠠ ᠣᠯᠤᠭᠰᠠᠨ ᠬᠥᠪᠡᠭᠦᠨ ᠯᠧᠢ ᠵᠸᠨ ᠽᠢ ᠶ᠋ᠢᠨ ᠬᠣᠢᠴᠢ ᠡᠳᠦᠷ ᠪᠠᠰᠠ ᠨᠢᠭᠡᠨ ᠤᠯᠤᠰ ᠨᠡᠭᠡᠭᠡᠬᠦ ᠵᠠᠩᠵᠤᠨ ᠪᠣᠯᠬᠤ ᠶ᠋ᠢ ᠮᠡᠳᠡᠭᠰᠡᠨ ᠬᠢᠭᠡᠳ ᠪᠠᠰᠠ ᠱᠠᠩ ᠤᠯᠤᠰ ᠤ᠋ᠨ ᠵᠧᠦ ᠬᠠᠭᠠᠨ ᠱᠸᠤ ᠰᠢᠨ ᠦ᠌ ᠬᠣᠷᠢᠨ ᠣᠨ ᠤ᠋ ᠳᠣᠲᠣᠷᠠ ᠪᠡᠶᠡ ᠪᠡᠨ ᠭᠠᠯ ᠢ᠋ᠶ᠋ᠠᠷ ᠰᠢᠲᠠᠭᠠᠨ ᠦᠬᠦᠬᠦ ᠶ᠋ᠢ ᠵᠢᠭᠠᠨ ᠭᠠᠷᠭᠠᠭᠰᠠᠨ ᠡᠨᠡ ᠭᠤᠷᠪᠠᠨ ᠵᠦᠢᠯ ᠯᠦᠭᠡ ᠠᠳᠠᠯᠢ ᠪᠣᠯᠤᠭᠰᠠᠨ ᠳ᠋ᠤᠷ ᠰᠠᠶᠢ ᠮᠠᠭᠠᠳ ᠪᠣᠭᠳᠠ ᠬᠥᠮᠦᠨ ᠦ᠌ ᠲᠥᠷᠥᠯᠬᠢ ᠳᠠᠭᠠᠵᠤ ᠲᠥᠷᠥᠬᠦ ᠭᠠᠢᠬᠠᠮᠰᠢᠭᠲᠤ ᠮᠠᠲᠠᠯ ᠬᠡᠮᠡᠭᠴᠢ ᠢᠨᠤ ᠡᠨᠡ ᠮᠡᠲᠦ ᠠᠵᠤᠭᠤ ᠭᠡᠮᠡᠨ ᠭᠠᠢᠬᠠᠵᠤ ᠲᠡᠷᠢᠭᠦᠨ ᠳᠣᠬᠢᠪᠠ᠃ ᠪᠠᠰᠠ ᠸᠸᠨ ᠸᠠᠩ ᠵᠢᠢ ᠴᠠᠩ ᠤ᠋ᠨ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠡᠦ ᠸᠠᠩ ᠶ᠋ᠢᠢ ᠹᠠ ᠶ᠋ᠢᠨ ᠳᠡᠭᠦᠦ ᠵᠧᠦ ᠬᠦᠩ᠂ ᠵᠢᠢ ᠳ᠋ᠠᠨ ᠢ᠋ ᠯᠦ᠍ ᠬᠡᠮᠡᠬᠦ ᠤᠯᠤᠰ ᠲᠤᠷ ᠡᠷᠭᠦᠮᠵᠢᠯᠡᠪᠡ᠃ ᠲᠡᠷᠡ ᠯᠦ᠍ ᠤᠯᠤᠰ ᠤ᠋ᠨ ᠭᠠᠵᠠᠷ ᠡᠳᠦᠭᠡᠬᠢ ᠶ᠋ᠢᠨ ᠱᠠᠨᠳᠦ᠋ᠩ ᠮᠣᠵᠢ ᠶ᠋ᠢᠨ ᠶᠠᠨ ᠵᠧᠦ ᠹᠦ ᠶ᠋ᠢᠨ ᠬᠠᠷᠢᠶᠠᠲᠤ ᠭᠠᠵᠠᠷ ᠪᠥᠯᠥᠭᠡ᠃ ᠪᠠᠰᠠ ᠵᠧᠦ ᠤᠯᠤᠰ ᠤ᠋ᠨ ᠲᠤᠯᠭᠤᠷ ᠨᠡᠭᠡᠭᠡᠭᠰᠡᠨ ᠭᠠᠪᠢᠶᠠᠲᠤ ᠵᠢᠶᠠᠩ ᠲᠠᠢ ᠬᠦᠩ᠂ ᠵᠢᠶᠠᠩ ᠱᠠᠩ ᠢ᠋ ᠴᠢ ᠤᠯᠤᠰ ᠲᠤᠷ ᠡᠷᠭᠦᠮᠵᠢᠯᠡᠪᠡ᠃ ᠡᠨᠡ ᠴᠢ ᠤᠯᠤᠰ ᠤ᠋ᠨ ᠭᠠᠵᠠᠷ ᠡᠳᠦᠭᠡᠬᠢ ᠱᠠᠨᠳᠦ᠋ᠩ ᠮᠣᠵᠢ ᠶ᠋ᠢᠨ ᠴᠢᠩ ᠵᠧᠦ ᠹᠦ ᠶ᠋ᠢᠨ ᠭᠠᠵᠠᠷ ᠮᠥᠨ᠃ ᠲᠡᠢᠨ ᠬᠦ᠌ ᠵᠧᠦ ᠬᠦᠩ ᠢ᠋ ᠡᠦ ᠸᠠᠩ ᠳᠡᠷᠭᠡᠳᠡ ᠪᠡᠨ ᠪᠠᠢᠯᠭᠠᠵᠤ᠂ ᠪᠡᠶᠡ ᠪᠠᠰᠠ ᠲᠥᠷᠥ ᠳ᠋ᠦ᠍ᠷ ᠠᠯᠪᠠ ᠲᠠᠢ ᠰᠠᠯᠤᠨ ᠴᠢᠳᠠᠬᠤ ᠦᠭᠡᠢ ᠲᠤᠯᠠ ᠵᠧᠦ ᠬᠦᠩ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠪᠦᠸᠧ ᠴᠢᠨ ᠢ᠋ ᠰᠤᠷᠭᠠᠵᠤ ᠤᠯᠤᠰ ᠢ᠋ᠶ᠋ᠠᠨ ᠵᠠᠰᠠᠭᠤᠯᠤᠷᠠ ᠢᠯᠡᠭᠡᠪᠡ᠃ ᠲᠠᠢ ᠬᠦᠩ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠢ᠋ ᠠᠪᠴᠤ ᠪᠡᠶᠡ ᠪᠡᠷ ᠡᠴᠢᠵᠦ ᠴᠢ ᠤᠯᠤᠰ ᠢ᠋ ᠲᠠᠪᠤᠬᠠᠨ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠵᠠᠰᠠᠵᠤ ᠡᠭᠡᠨ ᠢᠷᠡᠵᠦ ᠤᠯᠤᠰ ᠵᠠᠰᠠᠭᠳᠠᠭᠰᠠᠨ ᠭᠠᠪᠢᠶᠠ ᠪᠠᠨ ᠮᠡᠳᠡᠭᠦᠯᠪᠡ᠃ ᠵᠧᠦ ᠬᠦᠩ ᠦ᠋ᠨ ᠬᠥᠪᠡᠭᠦᠨ ᠯᠦ᠍ ᠤᠯᠤᠰ ᠢ᠋ ᠬᠣᠶᠠᠷ ᠣᠨ ᠤᠷᠤᠯᠳᠤᠵᠤ ᠰᠠᠶᠢ ᠵᠠᠰᠠᠨ ᠭᠠᠪᠢᠶᠠ ᠶ᠋ᠢ ᠮᠡᠳᠡᠭᠦᠯᠪᠡ᠃ ᠬᠣᠢᠨᠠ ᠡᠦ ᠸᠠᠩ ᠭᠡᠨᠡᠳᠲᠡ ᠶᠡᠬᠡᠯᠡ ᠴᠢᠯᠡᠭᠡᠷᠬᠡᠭᠰᠡᠨ ᠳ᠋ᠦ᠍ᠷ ᠳᠡᠭᠦᠦ ᠢᠨᠤ ᠵᠧᠦ ᠬᠦᠩ ᠬᠠᠭᠠᠨ ᠤ᠋ ᠲᠥᠯᠥᠭᠡ ᠦᠬᠦᠰᠦᠭᠡᠢ᠂ ᠲᠠᠢᠽᠢ ᠪᠠᠭᠠ ᠭᠡᠮᠡᠨ ᠥᠨᠳᠥᠷ ᠮᠠᠨᠳᠠᠯ ᠴᠣᠭᠴᠠᠯᠠᠵᠤ᠂ ᠲᠩᠷᠢ ᠪᠠ ᠳᠡᠭᠡᠳᠦᠰ ᠦ᠋ᠨ ᠶᠡᠬᠡ ᠲᠠᠬᠢᠯ ᠡᠷᠭᠦᠵᠦ᠂ ᠴᠢᠩ ᠦᠨᠡᠨ ᠢ᠋ᠶ᠋ᠡᠷ ᠤᠬᠢᠯᠠᠨ ᠭᠤᠶᠤᠭᠰᠠᠨ ᠳ᠋ᠤᠷ᠂ ᠡᠦ ᠸᠠᠩ ᠦᠨᠡᠬᠡᠷ ᠡᠪᠡᠳᠴᠢᠨ ᠰᠠᠢᠨ ᠪᠣᠯᠤᠭᠰᠠᠨ ᠳ᠋ᠤᠷ ᠨᠠᠢ᠍ᠮᠠᠨ ᠵᠠᠭᠤᠨ ᠮᠣᠵᠢ ᠶ᠋ᠢᠨ ᠪᠡᠢᠰᠡ ᠴᠥᠮ ᠬᠤᠷᠠᠵᠤ᠂ ᠵᠧᠦ ᠬᠦᠩ ᠦ᠋ᠨ ᠭᠠᠪᠢᠶᠠᠲᠤ ᠦᠭᠡᠰ ᠢ᠋ ᠠᠯᠲᠠᠨ ᠬᠣᠷᠭᠣ ᠳ᠋ᠤᠷ ᠬᠣᠷᠢᠶᠠᠨ ᠬᠠᠳᠠᠭᠠᠯᠠᠵᠤ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠬᠤᠢ ᠳ᠋ᠤᠷ᠂ ᠵᠧᠦ ᠬᠦᠩ ᠦ᠋ᠨ ᠬᠥᠪᠡᠭᠦᠨ ᠪᠦᠸᠧ ᠴᠢᠨ ᠪᠠᠰᠠ ᠢᠷᠡᠭᠰᠡᠨ ᠲᠤᠯᠠ ᠵᠧᠦ ᠬᠦᠩ᠂ ᠵᠢᠶᠠᠩ ᠲᠠᠢ ᠬᠦᠩ ᠡᠴᠡ ᠠᠰᠠᠭᠤᠷᠤᠨ᠄ 《 ᠬᠦᠩ ᠴᠢ᠂ ᠴᠢ ᠤᠯᠤᠰ ᠢ᠋ ᠵᠠᠰᠠᠬᠤᠢ ᠳ᠋ᠤᠷ ᠶᠠᠭᠠᠬᠢᠨ ᠲᠠᠪᠤᠬᠠᠨ ᠰᠠᠷᠠ ᠶ᠋ᠢᠨ ᠳᠣᠲᠣᠷᠠ ᠭᠠᠪᠢᠶᠠ ᠪᠦᠲᠦᠭᠡᠪᠡ? 》 ᠲᠠᠢ ᠬᠦᠩ ᠥᠴᠢᠷᠦᠨ᠄ 《 ᠪᠢ ᠴᠢ ᠤᠯᠤᠰ ᠢ᠋ ᠵᠠᠰᠠᠬᠤᠢ ᠳ᠋ᠤᠷ ᠶᠠᠩᠵᠤᠯᠠᠬᠤ ᠴᠢᠮᠡᠭᠯᠡᠬᠦ ᠶ᠋ᠢ ᠴᠥᠮ ᠪᠠᠢᠯᠭᠠᠵᠤ ᠬᠥᠮᠦᠨ ᠳ᠋ᠦ᠍ᠷ ᠲᠡᠩᠴᠡᠭᠦᠯᠦᠭᠰᠡᠨ ᠲᠤᠯᠠ ᠵᠠᠭᠤᠨ ᠣᠪᠣᠭᠲᠠᠨ ᠬᠢᠯᠪᠠᠷ ᠢ᠋ᠶ᠋ᠠᠷ ᠲᠦᠷᠭᠡᠨᠡ ᠵᠠᠰᠠᠭᠳᠠᠵᠤ ᠭᠠᠪᠢᠶᠠ ᠪᠦᠲᠦᠭᠡᠪᠡᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠧᠦ ᠬᠦᠩ ᠪᠡᠶᠡ ᠡᠭᠡᠵᠦ ᠬᠥᠪᠡᠭᠦᠨ ᠪᠦᠸᠧ ᠴᠢᠨ ᠡᠴᠡ ᠠᠰᠠᠭᠤᠷᠤᠨ᠄ 《ᠴᠢ ᠯᠦ᠍ ᠤᠯᠤᠰ ᠢ᠋ ᠵᠠᠰᠠᠬᠤᠢ ᠳ᠋ᠤᠷ ᠶᠠᠭᠤᠨ ᠳ᠋ᠤᠷ ᠬᠣᠶᠠᠷ ᠣᠨ ᠪᠣᠯᠲᠠᠯᠠ ᠤᠳᠠᠪᠠ ? 》ᠬᠡᠮᠡᠬᠦᠢ ᠳ᠋ᠦ᠍ᠷ ᠪᠦᠸᠧ ᠴᠢᠨ ᠮᠡᠳᠡᠭᠦᠯᠦᠷᠦᠨ᠄ 《 ᠯᠦ᠍ ᠤᠯᠤᠰ ᠤ᠋ᠨ ᠬᠠᠭᠤᠴᠢᠨ ᠮᠠᠭᠤ ᠵᠠᠰᠠᠭ ᠢ᠋ ᠴᠥᠮ ᠪᠠᠢᠯᠭᠠᠵᠤ ᠂ ᠣᠯᠠᠨ ᠢᠷᠭᠡᠨ ᠢ᠋ ᠭᠤᠷᠪᠠᠨ ᠵᠢᠯ ᠦ᠋ᠨ ᠪᠡᠯᠪᠡᠰᠦᠷᠡᠯ ᠦ᠋ᠨ ᠶᠣᠰᠣᠨ ᠢ᠋ ᠲᠣᠭᠲᠠᠭᠠᠵᠤ ᠳᠠᠭᠠᠭᠤᠯᠤᠨ ᠶᠠᠪᠤᠭᠤᠯᠬᠤᠢ ᠳ᠋ᠤᠷ ᠢᠷᠭᠡᠨ ᠳᠠᠭᠤᠷᠢᠶᠠᠨ ᠶᠠᠪᠤᠬᠤ ᠠᠨᠤ ᠪᠡᠷᠬᠡ ᠲᠤᠯᠠ ᠬᠣᠶᠠᠷ ᠣᠨ ᠪᠣᠯᠪᠠ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠧᠦ ᠬᠦᠩ ᠲᠣᠯᠣᠭᠠᠢ ᠳᠣᠬᠢᠵᠤ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ ᠥᠭᠦᠯᠡᠷᠦᠨ᠄ 《 ᠬᠣᠢᠴᠢ ᠡᠳᠦᠷ ᠴᠢ ᠤᠯᠤᠰ ᠲᠦᠷᠢᠮᠡᠬᠡᠢ ᠪᠣᠯᠤᠭᠠᠳ ᠯᠦ᠍ ᠤᠯᠤᠰ ᠪᠠᠭᠤᠷᠠᠢ ᠪᠣᠯᠤᠮᠤᠢ !》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠡᠦ ᠸᠠᠩ ᠤᠴᠢᠷ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤᠷ ᠵᠧᠦ ᠬᠦᠩ ᠠᠢᠯᠠᠳᠬᠠᠷᠤᠨ᠄ 《 ᠳᠥᠭᠥᠮ ᠵᠠᠰᠠᠭ ᠬᠡᠮᠡᠭᠴᠢ ᠢᠷᠭᠡᠨ ᠳ᠋ᠦ᠍ᠷ ᠨᠡᠢᠴᠡᠮᠦᠢ᠂ ᠲᠡᠢᠨ ᠬᠦ᠌ ᠪᠠᠲᠤ᠂ ᠲᠦᠪᠡᠭ ᠵᠠᠰᠠᠭ ᠢᠷᠭᠡᠨ ᠳ᠋ᠦ᠍ᠷ ᠪᠡᠷᠬᠡ᠂ ᠲᠡᠢᠨ ᠬᠦ᠌ ᠬᠡᠪᠡᠷᠡᠭ᠂ ᠬᠣᠢᠴᠢ ᠡᠳᠦᠷ ᠯᠦ᠍ ᠤᠯᠤᠰ ᠯᠠᠪ ᠴᠢ ᠤᠯᠤᠰ ᠢ᠋ ᠦᠢᠯᠡᠴᠢᠯᠡᠬᠦ ᠶ᠋ᠢ ᠡᠭᠦᠨ ᠳ᠋ᠦ᠍ᠷ ᠣᠯᠵᠤ ᠮᠡᠳᠡᠪᠡ᠃ 》 ᠬᠣᠢᠨᠠ ᠦᠨᠡᠬᠡᠷ ᠲᠡᠢᠮᠦ ᠪᠣᠯᠪᠠ᠂ ᠲᠡᠢᠨ ᠬᠦ᠌ ᠡᠨᠡ ᠪᠣᠭᠳᠠ ᠬᠥᠮᠦᠨ ᠦ᠌ ᠤᠷᠢᠳᠠᠰᠠ ᠤᠭᠲᠤᠨ ᠮᠡᠳᠡᠬᠦ ᠢᠨᠦ ᠡᠷᠲᠡᠨ ᠡᠴᠡ ᠪᠠᠢᠭᠰᠠᠭᠠᠷ ᠲᠤᠯᠠ ᠡᠨᠡ ᠡᠤᠳᠠᠭᠠ ᠲᠠᠢᠽᠦ ᠪᠣᠭᠳᠠ ᠶ᠋ᠢᠨ ᠡᠨᠡ ᠭᠤᠷᠪᠠᠨ ᠵᠦᠢᠯ ᠳ᠋ᠦ᠍ ᠮᠠᠰᠢᠳᠠ ᠨᠡᠢᠴᠡᠪᠡ᠃