ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠲᠤᠬᠠᠢ ᠮᠠᠭᠲᠠᠭᠠᠯ ᠳᠠᠭᠤᠤ ᠰᠢᠯᠦᠭ-ᠰᠢᠷᠠ ᠵᠤᠤ-ᠴᠢᠮᠡᠳ ᠂ ᠫᠣᠩᠰᠣᠭShar juu-Chamd ,PonsgШар жуу-Чамд ,Понсг
216ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠲᠤᠬᠠᠢ ᠮᠠᠭᠲᠠᠭᠠᠯ ᠳᠠᠭᠤᠤ ᠰᠢᠯᠦᠭ
ᠣᠷᠳᠣᠰ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠤ᠋ ᠬᠠᠮᠲᠤ ᠶ᠋ᠢᠨ ᠮᠠᠲᠠᠯ ᠳ᠋ᠠᠬᠢ ᠴᠢᠭᠤᠯᠭᠠᠨ ᠰᠦᠮᠡ ᠪᠣᠯᠬᠤ ᠰᠢᠷᠠ ᠵᠣᠣ ᠨᠢ ᠪᠠᠷᠢᠯᠭᠠ ᠶ᠋ᠢᠨ ᠬᠡᠪ ᠨᠠᠮᠪᠠ᠂ ᠨᠣᠮ ᠪᠢᠰᠢᠯᠭᠠᠯ ᠤ᠋ᠨ ᠭᠦᠨ ᠨᠠᠷᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠷᠤ ᠥᠪᠥᠷ ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠮᠠᠰᠢ ᠠᠯᠳᠠᠷᠲᠠᠢ ᠪᠢᠯᠡ᠃ ᠲᠡᠭᠦᠨᠴᠢᠯᠡᠨ ᠰᠢᠷᠠ ᠵᠣᠣ ᠶ᠋ᠢᠨ ᠲᠤᠬᠠᠢ ᠳᠠᠭᠤᠤ ᠰᠢᠯᠦᠭ ᠴᠦ᠍ ᠪᠢᠰᠢᠭᠦᠢ ᠣᠯᠠᠨ ᠪᠠᠢᠳᠠᠭ᠃ ᠠᠷᠠᠳ ᠤ᠋ᠨ ᠳᠤᠮᠳᠠ ᠡᠢᠮᠦ ᠨᠢᠭᠡᠨ ᠳᠠᠭᠤᠤ ᠥᠷᠭᠡᠨ ᠲᠠᠷᠬᠠᠵᠤ᠂ ᠣᠳᠣ ᠪᠣᠯᠲᠠᠯᠠ ᠤᠯᠠᠮᠵᠢᠯᠠᠭᠳᠠᠨ ᠳᠠᠭᠤᠯᠠᠭᠳᠠᠭᠰᠠᠭᠠᠷ ᠪᠠᠢᠭᠠ ᠶ᠋ᠢ ᠡᠨᠳᠡ ᠲᠡᠮᠳᠡᠭᠯᠡᠨ ᠲᠣᠯᠢᠯᠠᠭᠤᠯᠤᠶᠠ᠃ ᠡᠨᠡ ᠳᠠᠭᠤᠤ ᠳ᠋ᠤ᠌᠄
ᠳᠤᠭᠤᠢ ᠤᠯᠠᠭᠠᠨ ᠬᠦᠷᠢᠶᠡ ᠲᠡᠢ
ᠳᠤᠮᠳᠠ ᠪᠠᠨ ᠨᠠᠢ᠍ᠮᠠᠨ ᠳᠤᠭᠠᠩ ᠲᠠᠢ
ᠳᠤᠭᠤᠢ ᠬᠣᠶᠠᠷ ᠬᠠᠭᠠᠯᠭᠠ ᠲᠠᠢ
ᠲᠤᠩ ᠪᠦᠷᠢᠶᠡ ᠶ᠋ᠢᠨ ᠳᠣᠬᠢᠶᠠ ᠲᠠᠢ᠂
ᠠᠷᠤ ᠬᠦᠷᠢᠶᠡ ᠳᠡᠪᠰᠡᠭ ᠲᠡᠢ
ᠠᠯᠲᠠᠨ ᠭᠠᠨᠵᠤᠤᠷ ᠰᠢᠲᠦᠭᠡᠨ ᠲᠡᠢ
ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠬᠤᠷᠠᠯ ᠲᠠᠢ
ᠠᠷᠢᠶᠠᠪᠠᠯᠤ ᠶ᠋ᠢᠨ ᠭᠣᠮᠰᠠᠯ ᠲᠠᠢ᠂
ᠡᠭᠴᠡᠰ ᠭᠤᠷᠪᠠᠨ ᠰᠤᠪᠤᠷᠭᠠ ᠲᠠᠢ
ᠡᠵᠡᠨ ᠵᠢᠷᠭᠤᠭᠠᠨ ᠵᠠᠰᠠᠭ ᠲᠠᠢ
ᠡᠵᠡᠨ ᠬᠣᠶᠠᠷ ᠰᠢᠲᠦᠭᠡᠨ ᠲᠡᠢ( ᠪᠠᠷᠠᠭᠤᠨ ᠵᠡᠭᠦᠨ ᠯᠠᠮᠠ)
ᠡᠷᠳᠡᠨᠢ ᠶ᠋ᠢᠨ ᠴᠠᠭᠠᠨ ᠠᠷᠰᠯᠠᠨ ᠲᠠᠢ᠂
ᠵᠠᠭᠠᠨ ᠨᠠᠢ᠍ᠮᠠᠨ ᠬᠣᠰᠢᠭᠤ ᠲᠠᠢ
ᠽᠠᠨᠳᠠᠨ ᠳᠥᠷᠪᠡᠨ ᠲᠤᠯᠭᠠᠭᠤᠷᠢ ᠲᠠᠢ
ᠵᠠᠶᠢᠭ ᠪᠠᠷᠢᠭᠰᠠᠨ ᠭᠡᠰᠬᠦᠢ ᠲᠡᠢ
ᠵᠠᠬᠠ ᠳᠥᠷᠪᠡᠨ ᠬᠠᠶᠠᠩ ᠲᠠᠢ᠂
ᠲᠠᠷᠢᠮᠠᠯ ᠲᠠᠪᠤᠨ ᠲᠣᠭᠣᠷᠢᠭ ᠲᠠᠢ
ᠲᠠᠯᠠ ᠶ᠋ᠢᠨ ᠴᠠᠢᠳᠠᠮ ᠪᠡᠯᠴᠢᠭᠡᠷ ᠲᠡᠢ
ᠲᠠᠪᠢᠨ ᠲᠠᠪᠤᠨ ᠭᠡᠯᠦᠩ ᠲᠡᠢ
ᠲᠠᠢᠪᠤᠩ ᠴᠠᠭ ᠤ᠋ᠨ ᠬᠤᠷᠠᠯ ᠲᠠᠢ᠂
ᠪᠡᠴᠢᠨ ᠵᠢᠯ ᠦ᠋ᠨ ᠬᠠᠪᠤᠷ ᠤ᠋ᠨ ᠰᠠᠷᠠ
ᠳᠥᠷᠪᠡᠨ ᠴᠠᠭ ᠢ᠋ᠶ᠋ᠠᠷ ᠲᠠᠢᠪᠤᠩ ᠪᠠᠢᠨᠠ
ᠪᠦᠭᠲᠦ ᠶ᠋ᠢᠨ ᠰᠢᠷᠠ ᠵᠣᠣ ᠶ᠋ᠢᠨ ᠱᠠᠪᠢ ᠨᠠᠷ
ᠪᠦᠭᠦᠳᠡᠭᠡᠷ ᠳᠠᠶᠠᠭᠠᠷ ᠠᠮᠤᠭᠤᠯᠠᠩ ᠪᠠᠢᠨᠠ᠃
ᠨᠠᠢ᠍ᠮᠠᠨ ᠲᠦᠮᠡᠨ ᠬᠤᠸᠠᠷᠠᠭ ᠲᠠᠢ
ᠨᠠᠷᠢᠨ ᠬᠤᠷᠠᠯ ᠤ᠋ᠨ ᠵᠠᠶᠢᠭ ᠲᠠᠢ( ᠬᠠᠤᠯᠢ ᠶ᠋ᠢ ᠬᠡᠯᠡᠨᠡ)
ᠨᠠᠰᠤ ᠪᠦᠷᠢᠨ ᠤᠷᠲᠤ ᠲᠠᠢ
ᠨᠠᠰᠤ ᠵᠠᠯᠠᠭᠤ ᠰᠢᠲᠦᠭᠡᠨ ᠲᠡᠢ᠂
ᠭᠠᠩ ᠪᠦᠷᠢᠶᠡ ᠪᠡᠨ ᠲᠠᠲᠠᠯᠠ
ᠭᠠᠨᠵᠤᠤᠷ ᠳ᠋ᠠᠨᠵᠤᠤᠷ ᠢ᠋ᠶ᠋ᠠᠨ ᠬᠤᠷᠠᠯᠠ
ᠭᠠᠰᠠᠯᠤᠭᠰᠠᠨ ᠳᠠᠢᠰᠤᠨ ᠢ᠋ ᠴᠣᠬᠢᠵᠤ
ᠭᠠ ᠶ᠋ᠢᠨ ᠦᠰᠦᠭ ᠢ᠋ᠶ᠋ᠡᠷ ᠳᠠᠷᠤᠯᠠ ᠭᠡᠵᠦ ᠨᠡᠢᠳᠡᠮ ᠦᠷᠭᠦᠯᠵᠢ ᠳᠠᠭᠤᠯᠠᠳᠠᠭ᠃
ᠰᠢᠷᠠ ᠵᠣᠣ ᠬᠡᠢᠳ ᠦ᠋ᠨ ᠳᠠᠭᠤᠤ ᠨᠠᠢ᠍ᠮᠠᠨ ᠪᠠᠳᠠᠭ ᠭᠡᠵᠦ ᠲᠦᠮᠡᠨ ᠦ᠌ ᠳᠤᠮᠳᠠ ᠲᠠᠷᠬᠠᠵᠤ ᠪᠠᠢᠪᠠᠴᠤ ᠰᠡᠭᠦᠯ ᠦ᠋ᠨ ᠬᠣᠶᠠᠷ ᠪᠠᠳᠠᠭ ᠢ᠋ ᠮᠡᠳᠡᠬᠦ ᠬᠥᠮᠦᠨ ᠴᠥᠭᠡᠨ ᠠᠵᠢ᠃
ᠣᠷᠳᠣᠰ ᠤ᠋ᠨ ᠠᠯᠳᠠᠷᠲᠤ ᠳᠥᠷᠪᠡᠨ ᠰᠢᠯᠦᠭᠴᠢᠨ ( ᠢᠰᠢᠳᠠᠨᠽᠠᠨᠸᠠᠩᠵᠢᠯ᠂ ᠯᠣᠷᠣᠢᠰᠠᠮᠪᠤ ᠂ ᠭᠡᠰᠢᠭᠪᠠᠲᠤ᠂ ᠠᠮᠤᠷᠵᠢᠷᠭᠠᠯ) ᠤ ᠨᠢᠭᠡ ᠪᠣᠯᠬᠤ ᠠᠮᠤᠷᠵᠢᠷᠭᠠᠯ ᠰᠢᠷᠠ ᠵᠣᠣ ᠶ᠋ᠢᠨ ᠲᠤᠬᠠᠢ ᠰᠢᠯᠦᠭᠯᠡᠬᠦ ᠳ᠋ᠡᠭᠡᠨ᠄
ᠰᠢᠷᠠ ᠡᠯᠢᠭᠡ ᠬᠡᠮᠡᠭᠳᠡᠬᠦ ᠰᠢᠯᠢ ᠶ᠋ᠢᠨ ᠡᠩᠭᠡᠷ ᠲᠦ᠍
ᠰᠢᠷᠠ ᠨᠣᠭᠣᠭᠠᠨ ᠳᠡᠭᠡᠪᠦᠷ ᠲᠡᠢ ᠰᠠᠢᠬᠠᠨ ᠰᠦᠮᠡ ᠪᠠᠢᠨᠠ᠂
ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠳᠡᠯᠭᠡᠷᠡᠭᠰᠡᠨ ᠠᠴᠢ ᠬᠦᠴᠦᠨ ᠳ᠋ᠦ᠍
ᠰᠢᠷᠠ ᠬᠠᠷᠠ ᠠᠳᠢᠰᠳᠠᠨ ᠳ᠋ᠤ᠌ ᠰᠢᠲᠦᠭᠳᠡᠵᠦ ᠪᠠᠢᠨᠠ ᠭᠡᠵᠡᠢ᠃
ᠳᠠᠬᠢᠪᠠᠯ ᠪᠠᠰᠠ ᠨᠢᠭᠡ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠮᠠᠭᠲᠠᠭᠠᠯ ᠭᠡᠰᠡᠨ ᠰᠢᠯᠦᠭ ᠪᠣᠢ( ᠵᠣᠬᠢᠶᠠᠭᠴᠢ ᠨᠢ ᠲᠣᠳᠣᠷᠬᠠᠢ ᠦᠭᠡᠢ)᠃ ᠲᠤᠰ ᠰᠢᠯᠦᠭ ᠲᠦ᠍᠄
ᠴᠣᠭᠲᠤ ᠪᠠᠷᠠᠢᠪᠤᠩ ᠶᠡᠬᠡ ᠬᠡᠢᠳ ᠦ᠋ᠨ ᠳᠦᠷᠰᠦ ᠪᠡᠷ
ᠴᠣᠭᠴᠠᠯᠠᠵᠤ ᠪᠠᠢᠭᠤᠯᠤᠭᠰᠠᠨ ᠰᠠᠢᠬᠠᠨ ᠬᠡᠢᠳ
ᠴᠣᠭᠲᠤ ᠲᠡᠭᠦᠰ ᠴᠢᠨᠳᠠᠮᠤᠨᠢ ᠶ᠋ᠢ ᠪᠡᠨ
ᠴᠤᠬᠠᠭ ᠡᠷᠳᠡᠨᠢ ᠪᠣᠯᠭᠠᠨ ᠰᠢᠲᠦᠶᠡ᠃
ᠰᠠᠷᠠᠨ ᠠᠰᠠᠷ ᠰᠢᠵᠢᠷ ᠠᠯᠲᠠᠨ ᠳᠡᠭᠡᠪᠦᠷ ᠲᠡᠢ
ᠱᠠᠭᠠᠵᠠᠩ ᠸᠠᠭᠠᠷ ᠮᠢᠩᠭᠠᠨ ᠵᠠᠭᠠᠨ ᠤ᠋ ᠬᠣᠩᠰᠢᠶᠠᠷ ᠲᠠᠢ
ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠬᠤᠸᠠᠷᠠᠭ ᠤ᠋ᠳ ᠴᠤᠭᠯᠠᠵᠤ
ᠰᠠᠶᠠ ᠣᠯᠠᠨ ᠮᠥᠷᠭᠥᠯᠴᠢᠨ ᠰᠦᠰᠦᠭᠯᠡᠵᠦ ᠬᠤᠷᠠᠪᠠᠢ᠃
ᠵᠢᠮᠢᠰ ᠴᠡᠴᠡᠭ ᠵᠦᠢᠯ ᠦ᠋ᠨ ᠰᠢᠪᠠᠭᠤᠳ
ᠵᠢᠷᠭᠢᠨ ᠳᠣᠩᠭᠣᠳᠤᠭᠰᠠᠨ ᠣᠷᠣᠨ
ᠵᠢᠷᠭᠤᠭᠠᠨ ᠵᠦᠢᠯᠲᠦ ᠠᠮᠢᠲᠠᠨ ᠢ᠋
ᠵᠢᠷᠭᠠᠨ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠣᠷᠣᠨ᠂
ᠠᠷᠤ ᠬᠠᠩᠭᠠᠢ ᠶ᠋ᠢᠨ ᠰᠢᠯᠢ ᠳᠡᠭᠡᠷᠡ
ᠠᠯᠲᠠᠨ ᠮᠠᠩᠬᠠᠨ ᠤ᠋ ᠬᠥᠪᠡᠭᠡᠨ ᠳᠡᠭᠡᠷᠡ
ᠠᠯᠢ ᠰᠠᠢᠬᠠᠨ ᠳᠡᠨᠵᠢᠨ ᠳᠡᠭᠡᠷᠡ
ᠠᠯᠳᠠᠷᠲᠤ ᠪᠣᠭᠳᠠ ᠶ᠋ᠢᠨ ᠬᠡᠢᠳ ᠪᠠᠢᠨᠠ᠃
ᠡᠬᠢ ᠶ᠋ᠢᠨ ᠳᠥᠷᠪᠡᠨ ᠣᠮᠰᠠᠳ ᠲᠠᠢ
ᠡᠷᠭᠢᠭᠦᠯᠭᠡᠨ ᠳᠥᠷᠪᠡᠨ ᠬᠦᠷᠳᠦ ᠲᠡᠢ
ᠡᠷᠭᠢ ᠶ᠋ᠢᠨ ᠬᠣᠷᠢᠨ ᠪᠦᠷᠢᠶᠡ ᠲᠡᠢ
ᠢᠳᠡᠷ ᠯᠤᠤ ᠶ᠋ᠢᠨ ᠳᠠᠭᠤ ᠲᠠᠢ ᠭᠡᠵᠦ ᠰᠢᠯᠦᠭᠯᠡᠭᠰᠡᠨ ᠪᠠᠢᠳᠠᠭ᠃