ᠰᠢᠷᠠ ᠵᠣᠣ ᠰᠦᠮᠡ ᠳ᠋ᠡᠬᠢ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠠᠵᠢᠯᠯᠠᠭᠠᠨ ᠤ᠋ ᠴᠠᠭ-ᠰᠢᠷᠠ ᠵᠤᠤ-ᠴᠢᠮᠡᠳ ᠂ ᠫᠣᠩᠰᠣᠭShar juu-Chamd ,PonsgШар жуу
175ᠰᠢᠷᠠ ᠵᠣᠣ ᠰᠦᠮᠡ ᠳ᠋ᠡᠬᠢ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠠᠵᠢᠯᠯᠠᠭᠠᠨ ᠤ᠋ ᠴᠠᠭ
ᠰᠢᠷᠠ ᠵᠣᠣ ᠰᠦᠮᠡ ᠨᠢ ᠬᠣᠷᠢᠳᠤᠭᠠᠷ ᠵᠠᠭᠤᠨ ᠤ᠋ ᠬᠣᠷᠢᠭᠠᠳ ᠣᠨ ᠳ᠋ᠤ᠌ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠠᠵᠢᠯᠯᠠᠭᠠᠨ ᠤ᠋ ᠭᠣᠣᠯ ᠭᠠᠵᠠᠷ ᠤ᠋ᠨ ᠨᠢᠭᠡ ᠪᠣᠯᠵᠤ ᠪᠠᠢᠭᠰᠠᠨ ᠶᠤᠮ᠃ ᠲᠤᠰ ᠰᠦᠮᠡ ᠶ᠋ᠢᠨ ᠱᠠᠪᠢ ᠯᠣᠷᠣᠢᠰᠠᠮᠪᠤ᠂ ᠴᠣᠢᠮᠰᠤᠨ ᠵᠡᠷᠭᠡ ᠠᠷᠪᠠᠭᠠᠳ ᠬᠥᠮᠦᠨ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠢᠳᠡᠪᠬᠢᠲᠡᠢ ᠠᠵᠢᠯᠯᠠᠭᠴᠢ ᠪᠠᠢᠭᠰᠠᠨ ᠪᠥᠭᠡᠳ ᠬᠠᠯᠬᠠ ᠠ᠋ᠴᠠ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠲᠦ᠍ ᠫᠤᠤ ᠰᠤᠮᠤ ᠵᠥᠭᠡᠭᠡᠪᠦᠷᠢᠯᠡᠵᠦ ᠪᠠᠢᠵᠠᠢ᠃ ᠯᠣᠷᠣᠢᠰᠠᠮᠪᠤ ᠪᠣᠯ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠣᠷᠴᠢᠨ ᠦᠶᠡ ᠶ᠋ᠢᠨ ᠠᠷᠠᠳᠴᠢᠯᠠᠭᠰᠠᠨ ᠰᠢᠯᠦᠭᠴᠢ ᠮᠥᠷᠲᠡᠭᠡᠨ ᠬᠤᠪᠢᠰᠬᠠᠯᠴᠢ ᠶᠤᠮ᠃ ᠲᠡᠭᠦᠨ ᠦ᠌ ᠰᠢᠯᠦᠭ ᠨᠢ ᠹᠧᠣᠳᠠᠯ ᠬᠠᠭᠤᠴᠢᠨ ᠶᠣᠰᠣ ᠶ᠋ᠢ ᠴᠢᠩᠭᠠ ᠪᠤᠷᠤᠭᠤᠰᠢᠶᠠᠵᠤ᠂ ᠰᠠᠢᠨ ᠰᠠᠢᠬᠠᠨ ᠰᠢᠨᠡ ᠠᠮᠢᠳᠤᠷᠠᠯ ᠢ᠋ ᠬᠦᠰᠡᠨ ᠮᠥᠷᠥᠭᠡᠳᠦᠭᠰᠡᠨ ᠠᠷᠠᠳᠴᠢᠯᠠᠭᠰᠠᠨ ᠦᠵᠡᠯ ᠰᠠᠨᠠᠭᠠ ᠪᠠᠷ ᠪᠢᠯᠬᠠᠮᠠ ᠪᠠᠢᠳᠠᠭ᠃《 ᠭᠢᠨᠳᠠᠨ ᠤ᠋ ᠬᠠᠨᠠ ᠶ᠋ᠢᠨ ᠰᠢᠯᠦᠭ》 ᠨᠢ ᠲᠡᠭᠦᠨ ᠦ᠌ ᠬᠠᠮᠤᠭ ᠠ᠋ᠴᠠ ᠠᠯᠳᠠᠷᠲᠠᠢ᠂ ᠲᠥᠯᠥᠭᠡᠯᠡᠭᠴᠢ ᠪᠦᠲᠦᠭᠡᠯ ᠨᠢ ᠪᠣᠯᠬᠤ ᠶᠤᠮ᠃
ᠯᠣᠷᠣᠢᠰᠠᠮᠪᠤ ᠶ᠋ᠢᠨ ᠲᠡᠷᠡ ᠬᠦ᠌᠄
ᠤᠷᠢᠳᠤ ᠰᠢᠯᠢ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ ᠬᠠᠷᠠᠬᠤᠯᠠᠷ ᠬᠥᠶᠢ
ᠤᠯᠠᠭᠠᠨ ᠨᠠᠮ ᠤ᠋ᠨ ᠠᠷᠠᠳ ᠲᠦᠮᠡᠨ ᠪᠤᠴᠠᠯᠵᠤ ᠪᠠᠢᠨᠠ ᠬᠥᠶᠢ
ᠪᠥᠭᠳᠦ ᠶ᠋ᠢᠨ ᠰᠢᠷᠠ ᠵᠣᠣ ᠪᠦᠭᠦᠳᠡ ᠮᠠᠨ ᠤ᠋ ᠵᠢᠰᠦᠯᠡᠭᠰᠡᠨ ᠳ᠋ᠡᠭᠡᠨ ᠰᠠᠢᠨ
ᠪᠥᠭᠲᠦᠭᠡᠷ ᠬᠠᠷᠠ ᠭᠠᠢ ᠯᠠᠨ ᠫᠤᠤ ᠪᠠᠨ ᠡᠭᠦᠷᠦᠭᠰᠡᠨ ᠳ᠋ᠡᠭᠡᠨ ᠰᠠᠢᠨ ᠭᠡᠰᠡᠨ ᠰᠢᠯᠦᠭ ᠲᠡᠭᠡᠨ ᠬᠤᠪᠢᠰᠬᠠᠯ ᠤ᠋ᠨ ᠥᠷᠨᠢᠯᠲᠡ ᠶ᠋ᠢ ᠮᠠᠭᠲᠠᠵᠤ ᠵᠡᠪᠰᠡᠭ ᠠᠳᠬᠤᠬᠤ ᠶ᠋ᠢ ᠤᠷᠢᠶᠠᠯᠠᠭᠰᠠᠨ ᠪᠠᠢᠳᠠᠭ᠃
ᠯᠣᠷᠣᠢᠰᠠᠮᠪᠤ ᠦᠷᠭᠦᠯᠵᠢ《 ᠲᠠᠨᠤᠰ ᠵᠠᠯᠠᠭᠤ ᠪᠠᠭᠠᠴᠤᠳ ᠳᠡᠮᠡᠢ ᠶᠠᠭᠤᠮᠠ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠂ ᠭᠡᠪᠡᠴᠦ ᠲᠠᠨᠤᠰ ᠯᠠᠪ ᠦᠵᠡᠬᠦ ᠶᠦᠮ᠂ ᠤᠳᠠᠯ ᠦᠭᠡᠢ ᠨᠡᠢᠭᠡᠮ ᠳᠡᠯᠡᠬᠡᠢ ᠬᠥᠮᠦᠨ ᠪᠦᠬᠦᠨ ᠡᠷᠬᠡ ᠲᠡᠭᠰᠢ᠂ ᠲᠡᠢᠨ ᠳᠠᠵᠢᠨ ᠦᠭᠡᠢ᠂ ᠦᠢᠮᠡᠭᠡᠨ ᠰᠠᠮᠠᠭᠤᠨ ᠦᠭᠡᠢ ᠶᠢᠷᠲᠢᠨᠴᠦ ᠬᠦᠷᠴᠦ ᠢᠷᠡᠬᠦ ᠶᠦᠮ》 ᠭᠡᠵᠦ ᠶᠠᠷᠢᠵᠤ ᠪᠠᠢᠵᠠᠢ᠃
ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠥᠷᠨᠢᠯᠲᠡ ᠬᠥᠭᠵᠢᠯᠲᠡ ᠨᠢ ᠭᠣᠮᠢᠨᠳᠠᠩ ᠤ᠋ᠨ ᠲᠡᠷᠰᠯᠡᠭᠦᠴᠦᠳ ᠪᠣᠯᠤᠨ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠶᠡᠬᠡ ᠵᠣᠣ ᠴᠢᠭᠤᠯᠭᠠᠨ ᠪᠠ ᠬᠣᠰᠢᠭᠤ ᠨᠤᠭᠤᠳ ᠤ᠋ᠨ ᠸᠠᠩ ᠨᠣᠶᠠᠳ ᠤ᠋ᠨ ᠨᠣᠶᠠᠷᠬᠠᠯ ᠳ᠋ᠤ᠌ ᠬᠦᠨᠳᠦ ᠰᠦᠷᠡᠬᠡᠢ ᠰᠦᠷᠳᠡᠭᠦᠯᠦᠯ ᠪᠣᠯᠤᠭᠰᠠᠨ ᠪᠠᠢᠨᠠ᠃
1926 ᠣᠨ ᠤ᠋ ᠭᠠᠯ ᠲᠠᠬᠢᠬᠤ ᠦᠶᠡ ᠯᠣᠷᠣᠢᠰᠠᠮᠪᠤ ᠵᠡᠷᠭᠡ ᠭᠣᠣᠯ ᠪᠣᠯᠬᠤ ᠬᠥᠮᠦᠰ ᠴᠢᠯᠠᠭᠤᠨ ᠣᠪᠣᠭᠠᠨ ᠤ᠋ ᠣᠷᠴᠢᠮ ᠠᠢᠯ ᠳ᠋ᠤ᠌ ᠪᠠᠢᠲᠠᠯᠠ ᠦᠬᠡᠷ ᠠᠮᠤᠭᠤᠯᠠᠩ ᠲᠦᠷᠦᠭᠦᠲᠡᠢ ᠠᠷᠪᠠᠨ ᠨᠢᠭᠡᠨ ᠴᠡᠷᠢᠭ ᠢᠷᠡᠵᠦ ᠯᠣᠷᠣᠢᠰᠠᠮᠪᠤ ᠂ ᠴᠣᠢᠮᠰᠤᠨ᠂ ᠳᠠᠮᠪᠢᠨᠢᠩᠷᠤᠩ᠂ ᠳᠠᠮᠷᠢᠨ ᠳᠥᠷᠪᠡᠨ ᠬᠥᠮᠦᠨ ᠢ᠋ ᠪᠠᠷᠢᠪᠴᠢᠯᠠᠵᠤ ᠬᠣᠰᠢᠭᠤ ᠶᠠᠮᠤᠨ ᠳ᠋ᠤ᠌ ᠬᠦᠷᠭᠡᠭᠰᠡᠨ ᠪᠠ ᠪᠤᠰᠤᠳ ᠢ᠋ ᠨᠢ ᠬᠣᠶᠠᠷ ᠰᠠᠭᠤᠯᠠᠭᠠ ᠮᠣᠷᠢᠨ ᠪᠣᠷᠳᠣᠭᠠ ᠪᠠᠷ ᠶᠠᠯᠠᠯᠠᠭᠰᠠᠨ ᠪᠠᠢᠨᠠ᠃
ᠯᠣᠷᠣᠢᠰᠠᠮᠪᠤ ᠪᠠᠷᠢᠪᠴᠢᠯᠠᠭᠳᠠᠵᠤ ᠲᠡᠷᠡ ᠴᠠᠭ ᠤ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠨ ᠲᠡᠮᠳᠡᠭᠯᠡᠬᠦ ᠳ᠋ᠡᠭᠡᠨ᠄
ᠲᠡᠷᠢᠭᠦᠯᠡᠭᠰᠡᠨ ᠠᠮᠤᠭᠤᠯᠠᠩ ᠲᠡᠭ ᠳᠤᠮᠳᠠ ᠶ᠋ᠢᠨ ᠬᠢᠷᠢ ᠶᠠ
ᠲᠡᠭᠦᠨᠴᠢᠯᠡᠨ ᠳᠠᠷᠠᠭᠠᠯᠠᠭᠰᠠᠨ ᠵᠠᠭᠤᠨᠨᠠᠰᠤᠨ ᠭᠣᠣᠯ ᠰᠢᠭ᠋ ᠶᠠ
ᠲᠡᠮᠡᠭᠡᠨ ᠳ᠋ᠦ᠍ ᠳᠤᠷᠠᠯᠠᠭᠰᠠᠨ ᠴᠣᠯᠮᠣᠨ ᠱ᠌ᠢᠵᠠᠩ ᠭᠡᠷᠭᠡᠨ ᠶᠠ
ᠲᠡᠮᠲᠡᠴᠢᠵᠦ ᠪᠠᠷᠠᠳᠠᠭᠰᠠᠨ ᠪᠦᠷᠢᠨᠪᠡᠨᠽᠡᠷ ᠱᠠᠯᠢᠭ ᠶᠠ
ᠪᠠᠭᠠ ᠴᠡᠷᠢᠭ ᠪᠠᠳᠠᠷᠠᠩᠭᠤᠢ ᠶ᠋ᠢᠨ ᠪᠠᠭᠠᠲᠤᠷ ᠶᠠᠩᠵᠤ ᠶᠠ
ᠪᠠᠷᠢᠨ ᠠᠪᠤᠭᠰᠠᠨ ᠬᠠᠷᠠ ᠮᠣᠷᠢᠨ ᠳ᠋ᠤ᠌ ᠳᠤᠷᠠᠯᠠᠭᠰᠠᠨ ᠨᠢ ᠢᠯᠡ ᠶᠠ
ᠪᠠᠰᠠ ᠳᠡᠯᠢᠮ ᠳ᠋ᠦ᠍ ᠣᠷᠣᠯᠴᠠᠭᠰᠠᠨ ᠪᠠᠲᠤᠳᠣᠷᠵᠢ ᠭᠣᠩᠳᠣᠣ( ᠭᠦᠨᠳᠦᠭᠦᠨ) ᠶᠠ
ᠪᠠᠯᠠᠷ ᠳᠤᠮᠳᠠ ᠳᠠᠭᠠᠯᠳᠤᠭᠰᠠᠨ ᠬᠣᠶᠠᠷ ᠴᠡᠷᠢᠭ ᠬᠥᠭᠡᠷᠦᠬᠦᠢ ᠶᠠ
ᠬᠠᠮᠲᠤᠷᠠᠵᠤ ᠣᠷᠣᠯᠴᠠᠭᠰᠠᠨ ᠰᠢᠳᠢ ᠶ᠋ᠢᠨ ᠰᠡᠳᠬᠢᠯ ᠳᠣᠣᠷᠠ ᠶᠠ
ᠬᠠᠮᠤᠷᠴᠤ ᠬᠤᠷᠢᠶᠠᠭᠰᠠᠨ ᠲᠠᠪᠤᠨ ᠲᠡᠮᠡᠭᠡ ᠲᠠᠷᠭᠤᠨ ᠶᠠ
ᠬᠠᠮᠠᠷ ᠦᠭᠡᠢ ᠲᠠᠪᠢᠽᠢ ᠦᠨᠦᠷ ᠬᠠᠩᠭᠢ ᠴᠢᠩᠭᠠ ᠪᠠᠷᠠᠭᠠ ᠶᠠ
ᠬᠠᠪᠢᠷᠭᠠ ᠳ᠋ᠤᠨᠢ ᠠᠯᠲᠠᠨᠭᠡᠷᠡᠯ ᠳᠤᠮᠳᠠᠭᠤᠷ ᠠᠯᠲᠠ ᠶ᠋ᠢᠨ ᠬᠢᠷᠢ ᠶᠠ ᠭᠡᠵᠦ ᠢᠷᠡᠭᠰᠡᠨ ᠬᠥᠮᠦᠰ ᠦ᠋ᠨ ᠵᠢᠰᠦ ᠴᠢᠷᠠᠢ ᠪᠡᠶᠡ ᠪᠢᠯᠳᠠᠷ ᠠ᠋ᠴᠠ ᠪᠣᠳᠣᠯ ᠰᠡᠳᠬᠢᠯ ᠢ᠋ ᠰᠢᠨᠵᠢᠨ ᠵᠠᠳᠠᠯᠵᠤ ᠲᠣᠯᠣᠭᠠᠢ ᠰᠡᠭᠦᠯ ᠬᠣᠯᠪᠣᠵᠤ ᠳᠦᠷᠰᠦᠯᠡᠨ ᠰᠢᠭᠦᠮᠵᠢᠯᠡᠭᠰᠡᠨ ᠪᠠᠢᠨᠠ᠃
ᠯᠣᠷᠣᠢᠰᠠᠮᠪᠤ ᠨᠠᠷ ᠢ᠋ ᠬᠡᠳᠦᠢᠪᠡᠷ ᠭᠠᠪᠠ ᠳᠥᠩᠭᠡ ᠣᠷᠣᠭᠤᠯᠵᠤ ᠶᠠᠯᠠᠯᠠᠨ ᠲᠠᠮᠤᠯᠠᠭᠰᠠᠨ ᠴᠣ ᠲᠡᠳᠡᠨ ᠦ᠌ ᠡᠰᠡᠷᠭᠦᠴᠡᠯ ᠦ᠋ᠨ ᠲᠡᠮᠡᠴᠡᠯ ᠦ᠋ᠨ ᠵᠣᠷᠢᠭ ᠢ᠋ ᠨᠢ ᠮᠣᠬᠣᠭᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
ᠮᠣᠩᠭᠣᠯ ᠤ᠋ᠨ ᠣᠷᠴᠢᠨ ᠦᠶᠡ ᠶ᠋ᠢᠨ ᠤᠷᠠᠨ ᠵᠣᠬᠢᠶᠠᠯ ᠤ᠋ᠨ ᠲᠡᠦᠬᠡᠨ ᠳ᠋ᠦ᠍ ᠬᠤᠪᠢᠰᠬᠠᠯᠲᠤ ᠠᠭᠤᠯᠭᠠ ᠪᠠᠷ ᠣᠨᠴᠠᠭᠠᠢ ᠪᠠᠢᠷᠢ᠂ ᠦᠨᠡᠯᠡᠯᠲᠡ ᠶ᠋ᠢ ᠣᠯᠤᠭᠰᠠᠨ《 ᠭᠢᠨᠳᠠᠨ ᠤ᠋ ᠬᠠᠨᠠ ᠶ᠋ᠢᠨ ᠰᠢᠯᠦᠭ》 ᠲᠦ᠍᠄
ᠪᠠᠷᠰ ᠵᠢᠯ ᠦ᠋ᠨ ᠪᠠᠶᠠᠷ ᠬᠥᠭᠵᠢᠮ ᠤᠯᠠᠮ ᠪᠠᠳᠠᠷᠠ
ᠪᠠᠭᠤᠷᠠᠭᠰᠠᠨ ᠬᠥᠭᠰᠢᠳ ᠦ᠋ᠨ ᠵᠣᠷᠢᠭ ᠪᠠᠳᠠᠷᠠ
ᠪᠠᠭᠠ ᠵᠠᠯᠠᠭᠤᠴᠤᠳ ᠤ᠋ᠨ ᠬᠡᠢ ᠮᠣᠷᠢ ᠪᠠᠳᠠᠷᠠ
ᠪᠠᠰᠠ ᠭᠠᠩᠭᠤᠨ ᠡᠮᠡᠭᠲᠡᠢᠴᠦᠳ ᠦ᠋ᠨ ᠬᠦᠰᠡᠯ ᠪᠠᠳᠠᠷᠠ
ᠪᠠᠶᠠᠷ ᠴᠡᠩᠭᠡᠯ ᠦᠷᠭᠦᠯᠵᠢᠳᠡ ᠥᠨᠢᠳᠡ ᠪᠠᠳᠠᠷᠠ
ᠪᠠᠰᠠ ᠮᠠᠨ ᠤ᠋ ᠨᠠᠮ ᠤ᠋ᠨ ᠶᠣᠰᠣ ᠤᠯᠠᠮ ᠪᠠᠳᠠᠷᠠ
ᠪᠠᠷᠢᠭᠳᠠᠭᠰᠠᠨ ᠪᠢᠳᠡ ᠨᠠᠷ ᠤ᠋ᠨ ᠨᠡᠷᠡ ᠪᠠᠳᠠᠷᠠ
ᠪᠠᠶᠠᠳ ᠨᠣᠶᠠᠳ ᠨᠠᠷ ᠤ᠋ᠨ ᠬᠦᠰᠡᠭᠰᠡᠨ ᠨᠢ ᠬᠠᠨᠤᠭᠲᠤᠨ ᠭᠡᠵᠡᠢ᠃
ᠯᠣᠷᠣᠢᠰᠠᠮᠪᠤ (1882—1938) ᠪᠣᠯ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠣᠷᠴᠢᠨ ᠦᠶᠡ ᠶ᠋ᠢᠨ ᠰᠢᠯᠢᠳᠡᠭ ᠰᠢᠯᠦᠭᠴᠢᠨ ᠦ᠌ ᠨᠢᠭᠡ᠂ ᠬᠡᠳᠦᠢᠪᠡᠷ ᠲᠡᠭᠦᠨ ᠦ᠌ ᠰᠡᠳᠦᠭᠰᠡᠨ ᠦᠢᠯᠡ ᠶ᠋ᠢᠨ ᠲᠤᠬᠠᠢ ᠪᠦᠷᠢᠨ ᠭᠦᠢᠴᠡᠳ ᠡᠮᠬᠢᠳᠬᠡᠨ ᠴᠤᠭᠯᠠᠭᠤᠯᠵᠤ ᠴᠢᠳᠠᠭᠠᠳᠤᠢ ᠪᠣᠯᠪᠠᠴᠤ ᠣᠯᠠᠨ ᠠᠷᠪᠢᠨ ᠰᠢᠯᠦᠭ ᠨᠢ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠤᠷᠠᠨ ᠵᠣᠬᠢᠶᠠᠯ ᠬᠤᠪᠢᠰᠬᠠᠯ ᠤ᠋ᠨ ᠲᠡᠦᠬᠡᠨ ᠬᠠᠭᠤᠳᠠᠰᠤᠨ ᠳ᠋ᠤ᠌ ᠠᠯᠳᠠᠷ ᠨᠡᠷᠡ ᠪᠡᠨ ᠲᠡᠮᠳᠡᠭᠯᠡᠭᠦᠯᠵᠦ ᠴᠢᠳᠠᠭᠰᠠᠨ ᠶᠤᠮ᠃