ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠡᠪᠳᠡᠭᠳᠡᠭᠰᠡᠨ ᠪᠠ ᠵᠠᠰᠠᠭᠰᠠᠨ-ᠰᠢᠷᠠ ᠵᠤᠤ-ᠴᠢᠮᠡᠳ ᠂ ᠫᠣᠩᠰᠣᠭShar juu-Chamd ,PonsgШар жуу-Чамд ,Понсг
186ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠡᠪᠳᠡᠭᠳᠡᠭᠰᠡᠨ ᠨᠢ
ᠰᠢᠷᠠ ᠵᠣᠣ ᠰᠦᠮᠡ ᠳᠡᠭᠡᠷᠡ ᠵᠠᠭᠤᠨ ᠳ᠋ᠤ᠌ ᠬᠡᠳᠦ ᠤᠳᠠᠭᠠᠨ ᠤ᠋ ᠬᠦᠨᠳᠦ ᠡᠪᠳᠡᠭᠳᠡᠯ ᠰᠦᠢᠳᠦᠯ ᠳ᠋ᠦ᠍ ᠤᠴᠠᠷᠠᠵᠤ᠂ ᠡᠴᠦᠰ ᠲᠡᠭᠡᠨ ᠬᠠᠭᠠᠷᠬᠠᠢ ᠲᠣᠭᠣᠰᠬᠠ᠂ ᠬᠡᠯᠲᠡᠷᠬᠡᠢ ᠸᠠᠭᠠᠷ ᠤ᠋ᠨ ᠣᠪᠣᠭᠠ ᠲᠡᠳᠦᠢ ᠯᠡ ᠦᠯᠡᠳᠡᠵᠦ ᠬᠣᠴᠣᠷᠤᠭᠰᠠᠨ ᠶᠤᠮ᠃
1922 ᠣᠨ ᠤ᠋ 5 ᠰᠠᠷᠠ ᠶ᠋ᠢᠨ 22——26 ᠤ᠋ ᠡᠳᠦᠷ ᠮᠢᠩᠭᠠ ᠢᠯᠡᠭᠦᠦ ᠮᠠᠭᠤ ᠬᠤᠯᠠᠭᠠᠢ ᠶ᠋ᠢᠨ ᠳᠡᠭᠡᠷᠡᠮ ᠴᠠᠭᠠᠨ ᠲᠣᠯᠣᠭᠠᠢ᠂ ᠮᠠ᠋ ᡂᠢ ᠶ᠋ᠢᠨ ᠣᠯᠣᠮ ᠢ᠋ᠶ᠋ᠠᠷ ᠬᠠᠲᠤᠨ ᠭᠣᠣᠯ ᠢ᠋ ᠭᠠᠲᠤᠯᠵᠤ ᠰᠢᠷᠠ ᠵᠣᠣ ᠳ᠋ᠤ᠌ ᠴᠥᠮᠥᠷᠡᠨ ᠢᠷᠡᠵᠦ᠂ ᠴᠠᠮ ᠤ᠋ᠨ ᠬᠤᠪᠴᠠᠰᠤ᠂ ᠡᠳ᠋ ᠬᠣᠭᠰᠢᠯ᠂ ᠠᠯᠲᠠ ᠮᠥᠩᠭᠥ᠂ ᠮᠣᠷᠢ ᠤᠨᠤᠭᠠ ᠶ᠋ᠢ ᠲᠣᠨᠣᠨ ᠳᠡᠭᠡᠷᠡᠮᠳᠡᠵᠦ᠂ ᠰᠦᠮᠡ ᠶ᠋ᠢᠨ ᠭᠣᠣᠯ ᠳᠤᠭᠠᠩ᠂ ᠬᠣᠶᠠᠷ ᠵᠢᠭᠦᠷ ᠦ᠋ᠨ ᠰᠦᠮᠡ ᠶ᠋ᠢ ᠭᠠᠯᠳᠠᠭᠰᠠᠨ ᠪᠠᠢᠨᠠ᠃ ᠬᠠᠮᠤᠭ ᠤ᠋ᠨ ᠲᠣᠮᠣ ᠪᠤᠷᠬᠠᠨ ᠡᠪᠳᠡᠭᠳᠡᠵᠦ᠂ ᠭᠠᠨᠵᠤᠤᠷ ᠵᠡᠷᠭᠡ ᠣᠯᠠᠨ ᠠᠷᠪᠢᠨ ᠦᠨᠡ ᠴᠠᠨᠠ ᠲᠠᠢ ᠪᠤᠷᠬᠠᠨ ᠨᠣᠮ ᠰᠤᠳᠤᠷ ᠭᠠᠯᠳᠠᠭᠳᠠᠵᠤ ᠦᠷᠡᠭᠳᠡᠭᠰᠡᠨ ᠪᠥᠭᠡᠳ ᠣᠢᠷᠠ ᠣᠷᠴᠢᠮ ᠤ᠋ᠨ ᠠᠢᠯ᠂ ᠱᠠᠪᠢ ᠨᠠᠷ ᠡᠷᠦᠬᠡ ᠴᠦ᠍ ᠠᠶᠤᠯ ᠰᠦᠢᠳᠦᠯ ᠳ᠋ᠦ᠍ ᠤᠴᠠᠷᠠᠵᠠᠢ᠃
ᠲᠤᠰ ᠵᠢᠯ ᠦ᠋ᠨ ᠨᠠᠮᠤᠷ᠂ ᠰᠦᠮᠡ ᠶ᠋ᠢᠨ ᠣᠷᠴᠢᠮ ᠤ᠋ᠨ ᠠᠢᠯ ᠤ᠋ᠳ ᠰᠦᠮᠡ ᠲᠡᠢ ᠭᠠᠵᠠᠷ ᠪᠤᠯᠢᠶᠠᠯᠳᠤᠭᠰᠠᠨ ᠠ᠋ᠴᠠ ᠳᠠ ᠠ᠋ᠴᠠ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠰᠦᠮᠡ ᠡᠴᠡ ᠵᠡᠭᠦᠨᠰᠢ᠂ ᠪᠠᠷᠠᠭᠤᠨᠰᠢ 2500 ᠠᠯᠬᠤᠮ᠂ ᠤᠷᠤᠭᠰᠢ ᠬᠣᠢᠰᠢ 5000 ᠠᠯᠬᠤᠮ ᠢ᠋ᠶ᠋ᠠᠷ ᠰᠦᠮᠡ ᠶ᠋ᠢᠨ ᠵᠠᠩᠷᠠᠭ ᠤ᠋ᠨ ᠭᠠᠵᠠᠷ ᠢ᠋ᠶ᠋ᠠᠷ ᠲᠣᠭᠲᠠᠭᠠᠵᠤ᠂ ᠰᠦᠮᠡ ᠶ᠋ᠢ ᠬᠡᠷᠡᠭ ᠡᠭᠦᠰᠬᠡᠯᠡ ᠭᠡᠵᠦ27 ᠮᠠᠯ ᠢ᠋ᠶ᠋ᠠᠷ ᠲᠣᠷᠭᠠᠵᠠᠢ᠃
1941 ᠣᠨ ᠤ᠋10 ᠰᠠᠷᠠ ᠶ᠋ᠢᠨ10 ᠳ᠋ᠤ᠌ ᠬᠠᠲᠤᠨ ᠭᠣᠣᠯ ᠤ᠋ᠨ ᠬᠣᠢᠲᠤ ᠲᠠᠯᠠ ᠠ᠋ᠴᠠ ᠨᠢᠭᠡ ᠪᠦᠯᠦᠭ ᠳᠡᠭᠡᠷᠡᠮ ᠢᠷᠡᠵᠦ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠳᠥᠴᠢ ᠭᠠᠷᠤᠢ ᠲᠠᠰᠤᠯᠭᠠ ᠪᠠᠢᠰᠢᠩ ᠢ᠋ ᠭᠠᠯᠳᠠᠵᠤ ᠳᠥᠴᠢ ᠭᠠᠷᠤᠢ ᠮᠣᠷᠢ᠂ ᠬᠣᠶᠠᠷ ᠵᠠᠭᠤ ᠲᠠᠪᠢᠭᠠᠳ ᠦᠬᠡᠷ᠂ ᠬᠣᠷᠢ ᠭᠠᠷᠤᠢ ᠡᠯᠵᠢᠭᠡ ᠶ᠋ᠢ ᠳᠡᠭᠡᠷᠡᠮᠳᠡᠵᠦ ᠲᠠᠭᠤᠭᠰᠠᠨ ᠪᠥᠭᠡᠳ12 ᠰᠠᠷᠠ ᠶ᠋ᠢᠨ29 ᠳ᠋ᠦ᠍ ᠶᠠᠫᠣᠨ ᠳᠡᠭᠡᠷᠡᠮ ᠦ᠋ᠨ ᠨᠢᠭᠡ ᠮᠣᠷᠢᠲᠤ ᠴᠡᠷᠢᠭ ᠠᠩᠭᠢ ᠬᠡᠳᠦ ᠵᠠᠭᠤᠨ ᠬᠥᠮᠦᠨ ᠬᠠᠲᠤᠨ ᠭᠣᠣᠯ ᠢ᠋ ᠭᠡᠲᠦᠯᠵᠦ᠂ ᠰᠢᠷᠠ ᠵᠣᠣ ᠣᠷᠴᠢᠮ ᠢ᠋ ᠶᠡᠬᠡ ᠪᠡᠷ
ᠳᠡᠭᠡᠷᠡᠮᠳᠡᠭᠰᠡᠨ ᠪᠥᠭᠡᠳ ᠨᠢᠭᠡ ᠨᠢᠰᠬᠡᠯ ᠢᠷᠡᠵᠦ ᠰᠢᠷᠠ ᠵᠣᠣ ᠶ᠋ᠢ ᠪᠥᠮᠪᠥᠭᠡᠳᠡᠵᠦ᠂310 ᠭᠠᠷᠤᠢ ᠲᠠᠰᠤᠯᠭᠠ ᠠᠷᠠᠳ ᠤ᠋ᠨ ᠪᠠᠢᠰᠢᠩ ᠢ᠋ ᠭᠠᠯᠳᠠᠵᠤ ᠬᠥᠮᠦᠨ ᠬᠠᠷᠠ ᠠᠷᠪᠢᠨ ᠦᠬᠦᠵᠦ1200 ᠭᠠᠷᠤᠢ ᠪᠤᠲᠠ᠂ 5300 ᠭᠠᠷᠤᠢ ᠪᠤᠭ ᠮᠠᠯ ᠢ᠋ ᠳᠡᠭᠡᠷᠡᠮᠳᠡᠵᠦ᠂ ᠶᠡᠬᠡ ᠴᠣᠭᠴᠢᠨ ᠳᠤᠭᠠᠩ᠂ ᠰᠤᠪᠤᠷᠭᠠ ᠶ᠋ᠢ ᠫᠤᠤᠳᠠᠵᠤ᠂ 560 ᠰᠠᠭᠤᠯᠠᠭᠠ ᠠᠮᠤ ᠳᠡᠭᠡᠷᠡᠮᠳᠡᠨ ᠠᠪᠠᠴᠢᠵᠠᠢ᠃
1964 ᠣᠨ ᠳ᠋ᠤ᠌ ᠴᠣᠭᠴᠢᠨ ᠳᠤᠭᠠᠩ ᠵᠤᠯᠠ ᠶ᠋ᠢᠨ ᠬᠤᠷᠠᠯ ᠳᠡᠭᠡᠷᠡ ᠭᠠᠯ ᠠᠯᠳᠠᠭᠳᠠᠵᠤ ᠰᠦᠢᠳᠪᠡ᠃
1967 ᠣᠨ ᠳ᠋ᠤ᠌᠂ ᠰᠣᠶᠣᠯ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠤᠯᠠᠭᠠᠨ ᠰᠢᠭᠤᠷᠭᠠᠨ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠳᠣᠯᠣᠭᠠᠨ ᠳᠤᠭᠠᠩ᠂ ᠰᠤᠪᠤᠷᠭᠠ᠂ ᠤᠯᠠᠭᠠᠨ ᠬᠦᠷᠢᠶᠡ᠂ ᠰᠠᠩ ᠵᠢᠰᠠ᠂ ᠯᠠᠮᠠ ᠨᠠᠷ ᠤ᠋ᠨ ᠣᠷᠣᠨ ᠰᠠᠭᠤᠴᠠ ᠪᠠᠷᠤᠭ ᠬᠣᠭ ᠦᠭᠡᠢ ᠪᠣᠯᠲᠠᠯᠠ ᠰᠦᠢᠳᠬᠡᠭᠳᠡᠭᠰᠡᠨ ᠶᠦᠮ᠃ ᠰᠦᠮᠡ ᠳᠤᠭᠠᠩ ᠢ᠋ ᠨᠤᠷᠠᠭᠠᠭᠠᠳ ᠡᠳ᠋ ᠲᠠᠸᠠᠷ᠂ ᠮᠣᠳᠣ ᠲᠣᠭᠣᠰᠬᠠ ᠵᠡᠷᠭᠡ ᠶ᠋ᠢ ᠨᠢ ᠡᠯᠡ ᠪᠠᠷᠢᠭᠠᠳᠠ ᠳ᠋ᠤ᠌ ᠬᠤᠪᠢᠶᠠᠨ ᠥᠭᠴᠦ᠂ ᠦᠨᠡ ᠥᠷᠲᠡᠭ ᠪᠣᠳᠣᠵᠤ᠂ ᠤᠯᠤᠰ ᠤ᠋ᠨ ᠡᠳ᠋ ᠦ᠋ᠨ ᠵᠠᠰᠠᠭ ᠲᠤ᠌ ᠲᠤᠰᠢᠶᠠᠭᠰᠠᠨ ᠪᠠᠢᠨᠠ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠰᠢᠷᠠ ᠵᠣᠣ ᠰᠤᠮᠤᠨ ᠤ᠋ ᠡᠯᠡᠰᠦ ᠮᠠᠩᠬᠠ ᠶ᠋ᠢ ᠥᠭᠡᠷᠡᠴᠢᠯᠡᠬᠦ ᠥᠷᠲᠡᠭᠡ ᠨᠢ ᠰᠦᠮᠡ ᠶ᠋ᠢᠨ ᠭᠠᠵᠠᠷ ᠢ᠋ ᠡᠵᠡᠯᠡᠨ ᠰᠠᠭᠤᠵᠠᠢ᠃ ᠶᠡᠬᠡ ᠵᠢᠰᠠ ᠶ᠋ᠢ ᠰᠢᠷᠠ ᠵᠣᠣ ᠪᠠᠭᠠ ᠰᠤᠷᠭᠠᠭᠤᠯᠢ᠂ ᠷᠠᠰᠠᠩ ᠵᠢᠰᠠ ᠶ᠋ᠢ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ᠂ ᠨᠦᠩᠨᠠᠢ ᠵᠢᠰᠠ ᠶ᠋ᠢ ᠮᠠᠯ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ᠂ ᠱᠠᠩ ᠢ᠋ ᠬᠠᠩᠭᠠᠨ ᠪᠣᠷᠣᠯᠠᠭᠤᠯᠬᠤ ᠬᠣᠷᠰᠢᠶᠠ ᠡᠵᠡᠯᠡᠵᠦ ᠪᠠᠢᠯᠠ᠃
1968 ᠣᠨ ᠳ᠋ᠤ᠌ ᠰᠢᠷᠠ ᠵᠣᠣ ᠰᠤᠮᠤ ᠶ᠋ᠢ ᠳᠤᠭᠤᠢᠳᠠᠯᠠ ᠭᠦᠩᠱᠧ ᠲᠡᠢ ᠨᠡᠢᠯᠡᠭᠦᠯᠦᠭᠡᠳ ᠰᠤᠮᠤ ᠨᠡᠭᠦᠵᠦ ᠶᠠᠪᠤᠭᠠᠳ᠂ ᠳᠣᠣᠷᠠᠬᠢ ᠪᠠᠢᠭᠤᠯᠭᠠ ᠨᠤᠭᠤᠳ ᠨᠢ ᠴᠦ᠍ ᠳᠠᠭᠠᠵᠤ ᠰᠢᠯᠵᠢᠵᠡᠢ᠃ ᠮᠥᠨ ᠲᠡᠷᠡ ᠵᠢᠯ ᠳ᠋ᠡᠭᠡᠨ ᠱᠠᠩ ᠵᠢᠰᠠ ᠪᠣᠯᠤᠨ ᠯᠠᠮᠠ ᠨᠠᠷ ᠤ᠋ᠨ ᠬᠡᠰᠡᠭ ᠪᠠᠢᠰᠢᠩ ᠬᠦᠷᠢᠶᠡ ᠶ᠋ᠢ ᠴᠦ᠍ ᠪᠠᠭᠤᠯᠭᠠᠨ ᠨᠤᠷᠠᠭᠠᠵᠤ᠂ ᠰᠤᠮᠤᠨ ᠤ᠋ ᠪᠠᠢᠰᠢᠩ ᠢ᠋ ᠰᠢᠬᠢᠷ ᠦ᠋ᠨ ᠭᠠᠯ ( ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠰᠢᠬᠢᠷ ᠡᠪᠡᠰᠦ ᠬᠣᠷᠢᠶᠠᠨ ᠠᠪᠴᠤ ᠪᠣᠷᠣᠯᠠᠭᠤᠯᠬᠤ ᠪᠤᠶᠤ ᠬᠠᠳᠠᠭᠠᠯᠠᠳᠠᠭ ᠪᠠᠢᠪᠠ) ᠳ᠋ᠤ᠌ ᠬᠤᠳᠠᠯᠳᠤᠨ ᠥᠭᠴᠡᠢ᠃ ᠡᠯᠡᠰᠦ ᠮᠠᠩᠬᠠ ᠶ᠋ᠢ ᠥᠭᠡᠷᠡᠴᠢᠯᠡᠬᠦ ᠥᠷᠲᠡᠭᠡ ᠴᠦ᠍ ᠭᠡᠷ ᠪᠠᠢᠰᠢᠩ ᠢ᠋ᠶ᠋ᠠᠨ ᠣᠷᠬᠢᠭᠠᠳ ᠶᠠᠪᠤᠵᠤ ᠠᠷᠢᠯᠤᠭᠰᠠᠨ ᠪᠠᠢᠨᠠ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢ ᠳᠠᠬᠢᠨ ᠰᠡᠯᠪᠢᠨ ᠵᠠᠰᠠᠭᠰᠠᠨ ᠨᠢ
ᠲᠡᠦᠬᠡᠨ ᠳ᠋ᠦ᠍ ᠭᠠᠷᠤᠭᠠᠳᠤᠢ ᠰᠣᠶᠣᠯ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠬᠦᠴᠦᠲᠡᠢ ᠲᠠᠯᠬᠢᠯᠲᠠ ᠶ᠋ᠢ ᠥᠩᠭᠡᠷᠡᠭᠡᠵᠦ᠂ ᠲᠥᠷᠥ ᠲᠦᠪᠰᠢᠷᠡᠨ ᠲᠦᠮᠡᠨ ᠠᠮᠤᠷᠵᠢᠭᠰᠠᠨ ᠰᠢᠨᠡ ᠡᠷᠡᠨ ᠲᠡᠢ ᠵᠣᠯᠭᠠᠯᠠ᠃ ᠪᠤᠷᠬᠠᠨ ᠨᠣᠮ ᠲᠠᠬᠢᠬᠤ᠂ ᠱᠠᠰᠢᠨ ᠰᠢᠲᠦᠯᠭᠡ ᠴᠢᠯᠥᠭᠡᠲᠡᠢ ᠪᠣᠯᠤᠭᠰᠠᠨ1983 ᠣᠨ( ᠬᠠᠷᠠᠭᠴᠢᠨ ᠭᠠᠬᠠᠢ ᠵᠢᠯ) ᠳ᠋ᠦ᠍ ᠲᠣᠪᠳᠤᠨᠫᠸᠯᠵᠠᠢ ᠲᠦᠷᠦᠭᠦᠲᠡᠢ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠬᠡᠰᠡᠭ ᠯᠠᠮᠠ ᠨᠠᠷ ᠤᠤᠯ ᠤ᠋ᠨ ᠡᠯᠡᠰᠦ ᠮᠠᠩᠬᠠ ᠶ᠋ᠢ ᠥᠭᠡᠷᠡᠴᠢᠯᠡᠬᠦ ᠥᠷᠲᠡᠭᠡᠨ ᠦ᠌ ᠠᠯᠪᠠᠨ ᠭᠡᠷ᠂ ᠰᠠᠩ ᠬᠥᠮᠥᠷᠭᠡ ᠶ᠋ᠢ ᠰᠤᠯᠠᠯᠠᠨ ᠠᠪᠴᠤ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠮᠠᠨᠢ ᠶ᠋ᠢᠨ ᠬᠤᠷᠠᠯ ᠢ᠋ᠶ᠋ᠠᠨ ᠬᠤᠷᠠᠪᠠ᠃ ᠪᠠᠷᠠᠭᠤᠨ ᠯᠠᠮᠠ ᠲᠤᠪᠳᠤᠨᠫᠸᠯᠵᠡᠢ᠂ ᠰᠤᠩᠷᠤᠢ᠂ ᠵᠣᠷᠳᠣᠩ᠂ ᠲᠤᠤᠬᠠᠢ᠂ ᠨᠠᠮᠰᠢᠳ᠂ ᠨᠢᠩᠵᠢᠳ ᠵᠡᠷᠭᠡ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠯᠠᠮᠠ ᠨᠠᠷ ᠠᠳᠠᠯᠢ ᠪᠤᠰᠤ ᠪᠤᠷᠬᠠᠨ ᠤ᠋ ᠵᠦᠢᠯᠡᠰ ᠢ᠋ ᠪᠦᠷᠢᠯᠳᠦᠭᠦᠯᠵᠦ᠂ ᠬᠤᠷᠠᠯ ᠢ᠋ᠶ᠋ᠠᠨ ᠡᠬᠢᠯᠡᠵᠦ ᠬᠤᠷᠠᠭᠰᠠᠨ ᠪᠢᠯᠡ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍᠂ ᠲᠤᠤᠬᠠᠢ ᠭᠡᠪᠬᠦᠢ᠂ ᠰᠤᠩᠷᠤᠢ ᠤᠮᠵᠠᠳ ᠪᠣᠯᠵᠤ ᠪᠠᠢᠭᠰᠠᠨ᠃ ᠰᠤᠩᠷᠤᠢ ᠵᠣᠷᠳᠣᠩ ᠨᠠᠷ ᠭᠡᠷ ᠡᠴᠡ ᠪᠡᠨ ᠠᠮᠤ ᠬᠦᠨᠡᠰᠦ ᠠᠪᠴᠢᠷᠠᠨ ᠬᠤᠷᠠᠯ ᠤ᠋ᠨ ᠴᠠᠪ ᠮᠠᠩᠵᠠ ᠶ᠋ᠢ ᠪᠡᠯᠡᠳᠦᠭᠰᠡᠨ ᠪᠢᠯᠡ᠃
1985 ᠣᠨ ᠳ᠋ᠤ᠌ ᠬᠤᠰᠢᠭᠤᠨ ᠤ᠋ ᠦᠨᠳᠦᠰᠦᠲᠡᠨ ᠦ᠌ ᠬᠡᠷᠡᠭ ᠡᠷᠬᠢᠯᠡᠬᠦ ᠵᠥᠪᠯᠡᠯ ᠡᠴᠡ ᠲᠠᠪᠤᠨ ᠮᠢᠩᠭᠠᠨ ᠲᠥᠭᠥᠷᠢᠭ( ᠬᠣᠶᠠᠷ ᠤᠳᠠᠭᠠ ᠨᠡᠢᠯᠡᠭᠡᠳ) ᠳᠡᠮᠵᠢᠵᠦ᠂ ᠰᠤᠩᠷᠤᠢ ᠣᠯᠠᠨ ᠠᠷᠠᠳ ᠠ᠋ᠴᠠ ᠪᠠᠳᠢᠷ ᠪᠠᠷᠢᠵᠤ᠂ ᠶᠡᠬᠡ ᠲᠠᠯᠠ ᠲᠣᠭᠣᠰᠬᠠ ᠡᠨᠡ ᠲᠡᠷᠡ ᠪᠡᠷ ᠠᠷᠪᠠᠨ ᠬᠣᠶᠠᠷ ᠲᠠᠰᠤᠯᠭᠠ ᠶ᠋ᠢᠨ ᠰᠢᠲᠦᠭᠡᠨ ᠰᠦᠮᠡ ᠶ᠋ᠢ ᠡᠷᠬᠢᠯᠡᠨ ᠪᠠᠢᠭᠤᠯᠪᠠ᠃ ᠪᠠᠯᠳᠠᠨᠲᠤᠪᠴᠢ ᠶᠢᠰᠤᠨᠵᠢᠩ ᠨᠠᠷ ᠪᠠᠷᠢᠯᠭᠠ ᠶ᠋ᠢ ᠤᠷᠠᠯᠠᠨ ᠪᠠᠷᠢᠭᠰᠠᠨ ᠶᠤᠮ᠃ ᠲᠤᠰ ᠵᠢᠯ ᠳ᠋ᠡᠭᠡᠨ ᠴᠠᠮ ᠤ᠋ᠨ ᠬᠤᠪᠴᠠᠰᠤ᠂ ᠮᠠᠯᠠᠭᠠᠢ ᠵᠡᠷᠭᠡ ᠶ᠋ᠢ ᠪᠡᠯᠡᠳᠬᠡᠨ᠂ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠮᠠᠨᠢ ᠶ᠋ᠢᠨ ᠬᠤᠷᠠᠯ ᠳᠡᠭᠡᠷᠡ ᠴᠠᠮ ᠴᠠᠮᠨᠠᠭᠰᠠᠨ ᠪᠢᠯᠡ᠃
1986 ᠣᠨ (ᠤᠯᠠᠭᠠᠨ ᠪᠠᠷᠰ ᠵᠢᠯ) ᠵᠣᠷᠳᠣᠩ ᠣᠯᠠᠨ ᠠ᠋ᠴᠠ ᠪᠠᠳᠢᠷ ᠪᠠᠷᠢᠵᠤ᠂ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠣᠷᠢᠨ ᠲᠠᠪᠤᠨ ᠲᠠᠰᠤᠯᠭᠠ ᠶ᠋ᠢᠨ ᠭᠣᠮᠪᠣ ᠶ᠋ᠢᠨ ᠳᠤᠭᠠᠩ ᠢ᠋ ᠪᠠᠷᠢᠵᠤ ᠡᠬᠢᠯᠡᠭᠦᠯᠦᠭᠡᠳ᠂ 1998 ᠣᠨ ᠳ᠋ᠤ᠌ ᠪᠠᠷᠢᠵᠤ ᠪᠠᠷᠠᠭᠠᠭᠠᠳ᠂ ᠲᠤᠰ ᠵᠢᠯ ᠦ᠋ᠨ ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠮᠠᠨᠢ ᠶ᠋ᠢᠨ ᠬᠤᠷᠠᠯ ᠢ᠋ᠶ᠋ᠠᠨ ᠡᠨᠡ ᠰᠦᠮᠡ ᠳ᠋ᠦ᠍ ᠬᠤᠷᠠᠭᠰᠠᠨ ᠪᠠᠢᠨᠠ᠃ ᠲᠤᠰ ᠰᠦᠮᠡ ᠶ᠋ᠢᠨ ᠤᠤᠯ ᠨᠡᠷᠡ ᠶ᠋ᠢ ᠨᠢ ᠶᠡᠬᠡ ᠵᠣᠣ ᠭᠡᠳᠡᠭ᠃
1997 ᠣᠨ ᠳ᠋ᠤ᠌ ᠶᠡᠬᠡ ᠴᠠᠭᠠᠨ ᠰᠤᠪᠤᠷᠭᠠ ᠶ᠋ᠢ ᠰᠤᠩᠷᠤᠢ᠂ ᠭᠣᠩᠴᠤᠭᠪᠠᠯᠳᠠᠨ᠂ ᠰᠠᠳᠠᠩᠨᠣᠷᠪᠤ ᠠᠷᠠᠳ ᠠ᠋ᠴᠠ ᠪᠠᠳᠢᠷ ᠪᠠᠷᠢᠵᠤ᠂ ᠤᠤᠯ ᠤ᠋ᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠠᠯᠲᠠ ᠶ᠋ᠢᠨ ᠴᠠᠭᠠᠨ ᠰᠤᠪᠤᠷᠭᠠ ᠶ᠋ᠢᠨ ᠣᠷᠣᠨ ᠳᠡᠭᠡᠷᠡ ᠪᠠᠭᠠ ᠴᠠᠭᠠᠨ ᠰᠤᠪᠤᠷᠭᠠ ᠶ᠋ᠢ ᠪᠠᠷᠢᠭᠰᠠᠨ ᠶᠤᠮ᠃
2002 ᠣᠨ ᠳ᠋ᠤ᠌᠂ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠠᠯᠳᠠᠷ ᠬᠦᠨᠳᠦᠲᠡᠢ ᠪᠠᠷᠠᠭᠤᠨ ᠪᠠᠭᠰᠢ ᠲᠣᠪᠳᠤᠨᠫᠸᠯᠵᠡᠢ ᠶ᠋ᠢᠨ ᠱᠠᠪᠢ ᠨᠠᠮᠰᠢᠳ (ᠤᠯᠤᠰ ᠲᠥᠷᠥ ᠶ᠋ᠢᠨ ᠵᠥᠪᠯᠡᠯᠭᠡᠨ ᠦ᠌ ᠭᠡᠰᠢᠭᠦᠨ )᠂ ᠭᠣᠮᠪᠣ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠡᠮᠦᠨᠡ ᠪᠠᠭᠠ ᠴᠠᠭᠠᠨ ᠰᠤᠪᠤᠷᠭᠠ ᠶ᠋ᠢ ᠪᠠᠢᠭᠤᠯᠵᠤ ᠲᠡᠭᠦᠰᠬᠡᠭᠡᠳ᠂ ᠲᠤᠰ ᠵᠢᠯ ᠦ᠋ᠨ ᠮᠠᠨᠢ ᠶ᠋ᠢᠨ ᠬᠤᠷᠠᠯ ᠳᠡᠭᠡᠷᠡ ᠰᠤᠪᠤᠷᠭᠠ ᠪᠦᠲᠦᠭᠡᠭᠰᠡᠨ ᠨᠠᠢᠷ ᠬᠢᠭᠰᠡᠨ ᠪᠢᠯᠡ᠃
1998 ᠣᠨ ᠳ᠋ᠤ᠌ ᠨᠣᠷᠪᠤᠰᠠᠮᠪᠤᠤ ᠵᠣᠭᠣᠰ ᠭᠠᠷᠭᠠᠨ᠂ ᠠᠴᠢ ᠬᠦᠷᠭᠡᠨ ᠪᠠᠪᠤᠳᠣᠷᠵᠢ ᠨᠢ ᠪᠠᠷᠠᠭᠤᠨ ᠱᠠᠩ ᠢ᠋ ᠪᠠᠷᠢᠵᠤ ᠪᠢᠯᠡ᠃ ᠭᠣᠮᠪᠣ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠲᠡᠭᠦᠰᠬᠡᠯ ᠳ᠋ᠦ᠍ ᠴᠦ᠍ ᠨᠣᠷᠪᠤᠰᠠᠮᠪᠤᠤ ᠵᠣᠭᠣᠰ ᠬᠠᠨᠳᠢᠪᠯᠠᠨ ᠭᠦᠢᠴᠡᠳᠬᠡᠭᠰᠡᠨ ᠶᠦᠮ᠃
ᠭᠣᠩᠴᠣᠭᠪᠠᠯᠳᠠᠨ ᠶᠡᠬᠡ ᠵᠢᠰᠠ ᠶ᠋ᠢᠨ ᠤᠤᠯ ᠤ᠋ᠨ ᠰᠢᠪᠡᠷ ᠪᠠᠢᠰᠢᠩ ᠢ᠋ ᠲᠣᠭᠣᠰᠬᠠ ᠪᠠᠷ ᠭᠠᠳᠠᠷᠯᠠᠵᠤ ᠪᠠᠢᠭᠤᠯᠤᠭᠰᠠᠨ ᠪᠥᠭᠡᠳ ᠰᠢᠲᠦᠭᠡᠨ ᠰᠦᠮᠡ ᠶ᠋ᠢᠨ ᠪᠤᠷᠬᠠᠨ ᠤ᠋ ᠥᠷᠥᠭᠡ ᠶ᠋ᠢ ᠴᠦ᠍ ᠵᠣᠭᠣᠰ ᠬᠠᠨᠳᠢᠪᠯᠠᠨ ᠬᠢᠯᠭᠡᠭᠰᠡᠨ ᠶᠦᠮ᠃
ᠰᠦᠮᠡ ᠬᠡᠢᠳ ᠢ᠋ᠶ᠋ᠡᠨ ᠳᠠᠬᠢᠨ ᠪᠠᠢᠭᠤᠯᠬᠤ ᠳ᠋ᠤ᠌ ᠨᠣᠷᠪᠤᠰᠠᠮᠪᠤᠤ᠂ ᠰᠤᠩᠷᠤᠢ ᠂ ᠵᠣᠷᠳᠣᠩ᠂ ᠭᠣᠩᠴᠣᠭᠪᠠᠯᠳᠠᠨ᠂ ᠪᠡᠭᠡᠵᠢᠩ ᠦ᠋ᠨ ᠨᠠᠢᠷᠠᠯᠲᠤ ᠨᠠᠢᠷᠠᠮᠳᠠᠬᠤ ᠰᠦᠮᠡ ᠶ᠋ᠢᠨ ᠰᠦᠷᠦᠩᠵᠠᠠᠮᠰᠤ ᠵᠡᠷᠭᠡ ᠶ᠋ᠢᠨ ᠯᠠᠮᠠ ᠨᠠᠷ ᠭᠣᠣᠯ ᠪᠣᠯᠵᠤ ᠪᠤᠶᠠᠨ ᠦᠢᠯᠡᠳᠦᠭᠰᠡᠨ ᠪᠥᠭᠡᠳ ᠨᠣᠷᠪᠤᠰᠠᠮᠪᠤᠤ ᠰᠦᠷᠦᠩᠵᠠᠮᠰᠤ ᠬᠣᠶᠠᠷ ᠯᠠᠮᠠ ᠬᠡᠳᠦᠨ ᠠᠷᠪᠠᠨ ᠲᠦᠮᠡᠨ ᠲᠥᠭᠥᠷᠢᠭ ᠦ᠋ᠨ ᠮᠥᠩᠭᠥ ᠵᠠᠷᠤᠴᠠᠭᠤᠯᠤᠨ ᠮᠠᠰᠢ ᠠᠷᠪᠢᠨ ᠪᠤᠷᠬᠠᠨ᠂ ᠨᠣᠮ᠂《ᠭᠠᠨᠵᠤᠤᠷ》 ᠰᠡᠯᠲᠡ ᠶ᠋ᠢ ᠵᠠᠯᠠᠵᠤ ᠠᠪᠴᠢᠷᠠᠵᠠᠢ᠃ ᠮᠠᠭᠤ ᠬᠤᠯᠠᠭᠠᠢ ᠶ᠋ᠢᠨ ᠳᠡᠭᠡᠷᠡᠮ ᠳ᠋ᠦ᠍ ᠲᠠᠯᠬᠢᠳᠠᠭᠳᠠᠬᠤ ᠳ᠋ᠤ᠌ ᠰᠦᠢᠳᠦᠭᠰᠡᠨ ᠪᠤᠷᠬᠠᠨ ᠢ᠋ ᠴᠦ᠍ ᠪᠦᠷᠢᠳᠬᠡᠨ ᠠᠪᠴᠢᠷᠠᠭᠰᠠᠨ ᠪᠢᠯᠡ᠂
ᠪᠤᠶᠠᠨ ᠤ᠋ ᠨᠡᠮᠡᠷᠢ ᠡᠷᠭᠦᠭᠰᠡᠨ ᠬᠥᠮᠦᠰ ᠲᠦ᠍ ᠦᠦᠰᠢᠨ ᠲᠣᠭᠲᠠᠬᠤ᠂ ᠪᠠᠳᠮᠴᠡᠴᠡᠭ᠂ ᠨᠠᠰᠤᠨᠳᠡᠯᠭᠡᠷ᠂ ᠮᠦᠩᠭᠦᠨᠳᠥᠪᠴᠢ᠂ ᠵᠠᠮᠢᠶᠠᠨᠳᠣᠵᠢ ( ᠰᠦᠮᠡ ᠶ᠋ᠢᠨ ᠷᠠᠰᠠᠩ ᠯᠠᠮᠠ)᠂ ᠫᠤᠩᠰᠤᠭ᠂ ᠪᠠᠯᠳᠠᠨᠨᠢᠩᠪᠤ᠂ ᠰᠤᠸᠠᠳᠢ᠂ ᠵᠢᠷᠠᠨᠬᠤᠸᠠᠷ᠂ ᠠᠮᠤᠭᠤᠯᠠᠩ᠂ ᠵᠠᠩ ᠱᠤᠸᠠᠩ ᠸᠠᠩ᠂ ᠮᠥᠩᠬᠡᠪᠠᠶᠠᠷ᠂ ᠵᠠᠩ ᠺᠤᠸᠠᠨ᠂ ᠸᠠᠩ ᠴᠧᠩ᠂ ᠭᠣᠣ ᠠᠢ᠂ ᠯᠢ ᠬᠠᠢ ᠴᠢᠩ᠂ ᠠᠯᠲᠠᠨᠪᠤᠤ ( ᠮᠠᠢᠳᠠᠷᠢ ᠶ᠋ᠢᠨ ᠭᠦᠩᠭᠠᠷᠠᠪᠠ ᠶ᠋ᠢ ᠤᠷᠠᠯᠠᠭᠰᠠᠨ ᠬᠥᠮᠦᠨ)᠂ ᠪᠠᠯᠳᠠᠨᠴᠣᠢᠷᠠᠭ᠂ ᠪᠠᠯᠳᠠᠨᠷᠠᠪᠳᠠᠨ( ᠴᠠᠮ ᠤ᠋ᠨ ᠪᠠᠭ ᠢ᠋ ᠬᠢᠭᠰᠡᠨ ᠬᠥᠮᠦᠨ) ᠵᠡᠷᠭᠡ ᠪᠣᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠣᠳᠣᠬᠢ ᠪᠠᠢᠳᠠᠯ
ᠰᠢᠷᠠ ᠵᠣᠣ ᠰᠦᠮᠡ ᠡᠳᠦᠭᠡ ᠭᠣᠮᠪᠣ ᠶ᠋ᠢᠨ ᠳᠤᠭᠠᠩ᠂ ᠰᠢᠲᠦᠭᠡᠨ ᠰᠦᠮᠡ ᠵᠡᠷᠭᠡ ᠬᠣᠶᠠᠷ ᠰᠦᠮᠡ ᠲᠡᠢ᠃ ᠶᠡᠬᠡ ᠵᠢᠰᠠ᠂ ᠪᠠᠷᠠᠭᠤᠨ ᠱᠠᠩ᠂ ᠶᠡᠬᠡ ᠪᠠᠭᠠ ᠬᠣᠶᠠᠷ ᠴᠠᠭᠠᠨ ᠰᠤᠪᠤᠷᠭᠠ ᠲᠠᠢ᠃ ᠨᠡᠢᠲᠡ ᠶ᠋ᠢᠨ ᠱᠠᠪᠢ ᠨᠠᠷ ᠰᠠᠭᠤᠬᠤ ᠣᠷᠣᠨ ᠵᠢᠷᠭᠤᠭᠠᠨ ᠲᠠᠰᠤᠯᠭᠠ᠂ ᠯᠠᠮᠠ ᠨᠠᠷ ᠤ᠋ᠨ ᠥᠪᠡᠷ ᠢ᠋ᠶ᠋ᠡᠨ ᠪᠠᠷᠢᠭᠰᠠᠨ ᠣᠷᠣᠨ ᠭᠡᠷ ᠠᠷᠪᠠᠨ ᠨᠢᠭᠡ ᠪᠣᠢ᠃ ᠡᠳᠦᠭᠡ ᠪᠠᠢᠬᠤ ᠲᠤᠰ ᠰᠦᠮᠡ ᠶ᠋ᠢᠨ ᠱᠠᠪᠢ ᠨᠠᠷ ᠯᠠᠮᠠ ᠳᠥᠴᠢᠨ ᠳᠥᠷᠪᠡ ᠪᠣᠢ᠃
ᠡᠳᠦᠭᠡ ᠪᠠᠢᠬᠤ ᠰᠦᠮᠡ ᠶ᠋ᠢᠨ ᠭᠠᠵᠠᠷ ᠭᠡᠪᠡᠯ᠂ ᠰᠦᠮᠡ ᠲᠣᠭᠣᠷᠢᠭᠰᠠᠨ ᠬᠣᠶᠠᠷ ᠵᠠᠭᠤᠨ ᠮᠦ᠍᠂ ᠰᠦᠮᠡ ᠶ᠋ᠢᠨ ᠪᠠᠷᠠᠭᠤᠨ ᠪᠡᠶᠡ ᠳ᠋ᠦ᠍ ᠨᠠᠶᠠᠨ ᠮᠦ᠍᠂ ᠬᠠᠷᠠ ᠳᠠᠯᠠᠩ ᠳ᠋ᠤ᠌ ᠨᠠᠶᠠᠨ ᠮᠦ᠍᠂ ᠨᠡᠢᠲᠡ ᠭᠤᠷᠪᠠᠨ ᠵᠠᠭᠤ ᠵᠢᠷᠠᠨ ᠮᠦ᠍ ᠪᠠᠢᠨᠠ᠃
ᠪᠤᠷᠬᠠᠨ᠂ ᠨᠣᠮ᠂ ᠪᠦᠷᠢᠶᠡ ᠪᠢᠰᠬᠢᠭᠦᠷ᠂ ᠴᠠᠩ ᠬᠡᠩᠭᠡᠷᠭᠡ᠂ ᠴᠠᠮ ᠤ᠋ᠨ ᠪᠠᠭ᠂ ᠬᠤᠪᠴᠠᠰᠤ ᠪᠦᠷᠢᠨ ᠲᠥᠬᠥᠷ ᠪᠣᠢ᠃
ᠴᠠᠭ ᠴᠠᠭ ᠤ᠋ᠨ ᠬᠤᠷᠠᠯ ᠢ᠋ᠶ᠋ᠠᠨ ᠠᠯᠳᠠᠯ ᠦᠭᠡᠢ ᠬᠤᠷᠠᠵᠤ᠂ ᠲᠠᠬᠢᠯᠭᠠ ᠪᠠᠨ ᠲᠠᠰᠤᠯᠳᠠᠯ ᠦᠭᠡᠢ ᠬᠢᠵᠦ ᠪᠠᠢᠭᠠ ᠶ᠋ᠢ ᠬᠤᠷᠠᠯ ᠨᠣᠮ ᠤ᠋ᠨ ᠪᠦᠯᠦᠭ ᠲᠦ᠍ ᠶᠠᠷᠢᠭᠰᠠᠨ ᠲᠤᠯᠠ ᠡᠨᠳᠡ ᠳᠥᠭᠥᠮᠴᠢᠯᠡᠰᠦᠭᠡᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠪᠡᠨ ᠳᠠᠬᠢᠨ ᠪᠠᠷᠢᠭᠰᠠᠨ ᠤ᠋ ᠬᠣᠢᠨᠠ ᠷᠠᠰᠠᠩ ᠯᠠᠮᠠ ᠵᠠᠮᠢᠶᠠᠨᠳᠣᠷᠵᠢ᠂ ᠳᠠᠷᠵᠠᠢ ᠨᠠᠷ ᠪᠠᠢᠵᠠᠢ᠃ ᠳᠡ ᠯᠠᠮᠠ ᠰᠤᠩᠷᠤᠢ᠂ ᠭᠡᠪᠬᠦᠢ ᠨᠢ ᠲᠤᠤᠬᠠᠢ᠂ ᠰᠤᠮᠢᠶᠠ᠂ ᠨᠢᠩᠵᠢᠳ᠂ ᠳᠡ ᠳᠡᠮᠴᠢ ᠭᠤᠩᠴᠤᠭᠪᠠᠯᠳᠠᠨ ᠨᠠᠷ ᠪᠠᠢᠪᠠ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠵᠠᠬᠢᠷᠤᠯ ᠤ᠋ᠨ ᠪᠦᠷᠢᠯᠳᠦᠬᠦᠨ ᠳ᠋ᠦ᠍ ᠰᠤᠩᠷᠤᠢ᠂ ᠭᠤᠩᠴᠤᠭᠪᠠᠯᠳᠠᠨ ᠂ ᠨᠠᠮᠰᠢᠳ᠂ ᠨᠢᠩᠵᠢᠳ᠂ ᠰᠤᠩᠳᠤᠢᠵᠠᠪ ᠵᠡᠷᠭᠡ ᠲᠠᠪᠤᠨ ᠯᠠᠮᠠ᠂ ᠳᠡᠭᠡᠷᠡ ᠨᠢ ᠮᠠᠯᠴᠢᠨ ᠤ᠋ ᠲᠥᠯᠥᠭᠡᠯᠡᠭᠴᠢ ᠦᠦᠰᠢᠨ ᠲᠣᠭᠲᠠᠬᠤ᠂ ᠭᠠᠴᠠᠭᠠᠨ ᠤ᠋ ᠲᠥᠯᠥᠭᠡᠯᠡᠭᠴᠢ ᠳᠣᠯᠣᠨᠵᠢᠩ ᠵᠡᠷᠭᠡ ᠳᠣᠯᠣᠭᠠᠨ ᠬᠥᠮᠦᠨ ᠪᠠᠢᠵᠠᠢ᠃
ᠡᠳᠦᠭᠡ ᠰᠦᠮᠡ ᠶ᠋ᠢᠨ ᠡᠵᠡᠨ ᠯᠠᠮᠠ ᠨᠢ ᠲᠡᠷᠢᠭᠦᠨᠪᠠᠶᠠᠷ (2007 ᠣᠨ ᠤ᠋11 ᠰᠠᠷᠠ ᠶ᠋ᠢᠨ1 ᠦ᠌ ᠡᠳᠦᠷ ᠵᠡᠭᠦᠨ ᠯᠠᠮᠠ ᠶ᠋ᠢᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠳᠦᠷᠢ ᠪᠡᠷ ᠲᠣᠳᠣᠯᠠᠭᠳᠠᠨ ᠱᠠᠪᠷᠤᠩ ᠤ᠋ᠨ ᠰᠢᠷᠡᠭᠡᠨ ᠳ᠋ᠦ᠍ ᠵᠠᠯᠠᠭᠳᠠᠵᠠᠢ)᠂ ᠷᠠᠰᠠᠩ ᠯᠠᠮᠠ ᠨᠢ ᠪᠠᠯᠵᠤᠤᠷ᠂ ᠳᠠ ᠯᠠᠮᠠ ᠯᠤᠴᠢᠨᠰᠠᠷᠡᠩ᠂ ᠳᠡᠳ᠋ ᠳᠡ ᠯᠠᠮᠠ ᠯᠤᠪᠰᠠᠩᠰᠢᠷᠠᠪ᠂ ᠭᠡᠪᠬᠦᠢ ᠨᠢ ᠰᠠᠳᠠᠩᠨᠣᠷᠪᠤ᠂ ᠤᠮᠵᠠᠳ ᠨᠢ ᠰᠢᠷᠠᠪ ᠪᠣᠯᠤᠨ ᠴᠤᠭᠪᠠᠶᠠᠷ᠂ ᠳᠠ ᠳᠡᠮᠴᠢ ᠶᠡᠷᠡᠨᠲᠡᠢ᠂ ᠰᠦᠮᠡ ᠯᠠᠮᠠ ᠨᠢᠩᠵᠢᠳ᠂ ᠨᠢᠷᠪᠠ ᠴᠠᠭᠠᠨᠪᠠᠨᠳᠢ᠂ ᠭᠣᠨᠢᠷ ᠨᠢ ᠭᠣᠮᠪᠣ ᠪᠣᠯᠤᠨ ᠫᠤᠩᠰᠤᠭ ᠵᠡᠷᠭᠡ ᠪᠣᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠡᠳᠦᠭᠡ ᠶ᠋ᠢᠨ ᠵᠠᠬᠢᠷᠤᠯ ᠤ᠋ᠨ ᠬᠥᠮᠦᠰ ᠭᠡᠪᠡᠯ᠂ ᠯᠤᠴᠢᠨᠰᠠᠷᠡᠩ᠂ ᠰᠠᠳᠠᠩᠨᠣᠷᠪᠤ᠂ ᠶᠡᠷᠡᠨᠲᠡᠢ᠂ ᠭᠣᠮᠪᠣ᠂ ᠵᠢᠷᠭᠠᠯ ᠵᠡᠷᠭᠡ ᠲᠠᠪᠤᠨ ᠯᠠᠮᠠ᠂ ᠳᠡᠭᠡᠷᠡ ᠨᠢ ᠭᠠᠴᠠᠭᠠᠨ ᠤ᠋ ᠲᠥᠯᠥᠭᠡᠯᠡᠭᠴᠢ ᠤᠷᠭᠤᠭᠠ᠂ ᠮᠠᠯᠴᠢᠨ ᠤ᠋ ᠲᠥᠯᠥᠭᠡᠯᠡᠭᠴᠢ ᠫᠤᠩᠰᠤᠭ ( ᠰᠦᠮᠡ ᠶ᠋ᠢᠨ ᠨᠢᠭᠲᠠᠯᠠᠨ ᠪᠣᠳᠣᠭᠴᠢ) ᠨᠠᠷ ᠪᠣᠢ᠃