ᠰᠢᠷᠠ ᠵᠤᠤ-ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠲᠣᠢᠮᠣ-ᠴᠢᠮᠡᠳ ᠂ ᠫᠣᠩᠰᠣᠭShar juu-Chamd ,PonsgШар жуу-Чамд ,Понсг
224
ᠰᠣᠶᠣᠯ ᠤ᠋ᠨ ᠥᠪ ᠰᠤᠪᠤᠳ ᠤ᠋ᠨ ᠬᠡᠯᠬᠢᠶᠡ
ᠣᠷᠳᠣᠰᠴᠤᠳ ᠪᠣᠯ ᠡᠷᠲᠡ ᠳᠡᠭᠡᠳᠦ ᠦᠶᠡ ᠡᠴᠡ ᠪᠡᠨ ᠮᠣᠩᠭᠣᠯ ᠥᠪ ᠰᠣᠶᠣᠯ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠵᠤ ᠶᠠᠪᠤᠭᠰᠠᠨ ᠮᠣᠩᠭᠣᠯ ᠤ᠋ᠨ ᠨᠢᠭᠡᠨ ᠠᠢᠮᠠᠭ ᠤᠭᠰᠠᠭᠠ ᠪᠣᠯᠬᠤ ᠶᠤᠮ᠃ ᠣᠷᠳᠤᠰᠴᠤᠳ ᠴᠢᠩᠭᠢᠰ ᠦ᠋ᠨ ᠨᠠᠢ᠍ᠮᠠᠨ ᠴᠠᠭᠠᠨ ᠣᠷᠳᠣᠨ ᠵᠡᠷᠭᠡ ᠮᠠᠰᠢ ᠣᠯᠠᠨ ᠰᠦᠯᠳᠡ ᠰᠢᠲᠦᠭᠡᠨ ᠢ᠋ᠶ᠋ᠡᠨ ᠲᠠᠰᠤᠯᠳᠠᠯ ᠦᠭᠡᠢ ᠲᠠᠬᠢᠭᠰᠠᠭᠠᠷ ᠢᠷᠡᠵᠦ᠂ ᠡᠯᠪᠡᠭ ᠪᠠᠶᠠᠯᠢᠭ ᠲᠠᠬᠢᠯᠭᠠ ᠶ᠋ᠢᠨ ᠰᠣᠶᠣᠯ ᠢ᠋ᠶ᠋ᠠᠨ ᠨᠡᠯᠢᠶᠡᠳ ᠪᠦᠷᠢᠨ ᠪᠦᠲᠦᠨ ᠬᠠᠳᠠᠭᠠᠯᠠᠵᠤ ᠴᠢᠳᠠᠭᠰᠠᠨ ᠪᠠᠢᠨᠠ᠃ ᠣᠢᠷᠠ ᠶ᠋ᠢᠨ ᠬᠡᠳᠦᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠂ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠪᠠᠭᠠ ᠪᠤᠰᠤ ᠪᠢᠴᠢᠭ ᠰᠣᠶᠣᠯ ᠲᠠᠢ ᠬᠥᠮᠦᠰ ᠭᠠᠷᠴᠤ ᠨᠡᠯᠢᠶᠡᠳ ᠠᠷᠪᠢᠨ ᠪᠢᠴᠢᠭ ᠳᠤᠷᠠᠰᠬᠠᠯ ᠤ᠋ᠨ ᠵᠦᠢᠯ ᠢ᠋ ᠦᠯᠡᠳᠡᠭᠡᠵᠦ ᠬᠣᠴᠣᠷᠭᠠᠵᠠᠢ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠣᠷᠳᠤᠰᠴᠤᠳ ᠤ᠋ᠨ ᠠᠷᠠᠳ ᠤ᠋ᠨ ᠠᠮᠠᠨ ᠵᠣᠬᠢᠶᠠᠯ᠂ ᠵᠠᠩ ᠦᠢᠯᠡ ᠶ᠋ᠢᠨ ᠰᠣᠶᠣᠯ ᠴᠤ᠌ ᠮᠠᠰᠢ ᠡᠯᠪᠡᠭ ᠪᠠᠶᠠᠯᠢᠭ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ ᠪᠠᠢᠳᠠᠭ᠃ ᠡᠳᠡᠭᠡᠷ ᠨᠢ ᠪᠦᠷ ᠮᠠᠨ ᠤ᠋ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠬᠣᠪᠣᠷ ᠨᠠᠨᠳᠢᠨ ᠥᠪ ᠰᠣᠶᠣᠯ ᠪᠣᠯᠬᠤ ᠶᠤᠮ᠃
ᠥᠩᠭᠡᠷᠡᠭᠰᠡᠨ ᠵᠠᠭᠤᠨ ᠤ᠋ ᠨᠠᠶᠠᠭᠠᠳ ᠣᠨ ᠠ᠋ᠴᠠ ᠨᠠᠭᠠᠰᠢ᠂ ᠣᠷᠳᠣᠰ ᠤ᠋ᠨ ᠤᠯᠠᠮᠵᠢᠯᠠᠯᠲᠤ ᠥᠪ ᠰᠣᠶᠣᠯ ᠢ᠋ ᠱᠠᠯᠠᠪᠳᠠᠨ ᠠᠪᠤᠷᠠᠵᠤ ᠴᠤᠭᠯᠠᠭᠤᠯᠬᠤ ᠠᠵᠢᠯ ᠮᠠᠰᠢ ᠡᠷᠴᠢᠮᠲᠡᠢ ᠶᠠᠪᠤᠭᠳᠠᠵᠤ ᠢᠷᠡᠭᠰᠡᠨ ᠪᠢᠯᠡ᠃ ᠤᠤᠯ ᠤ᠋ᠨ ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠠᠢᠮᠠᠭ ᠂ ᠬᠣᠰᠢᠭᠤ ᠬᠣᠶᠠᠷ ᠱᠠᠲᠤᠨ ᠤ᠋ ᠮᠣᠩᠭᠣᠯ ᠬᠡᠯᠡ ᠪᠢᠴᠢᠭ ᠦ᠋ᠨ ᠠᠵᠢᠯ ᠤ᠋ᠨ ᠵᠥᠪᠯᠡᠯ᠂ ᠦᠨᠳᠦᠰᠦᠲᠡᠨ ᠦ᠌ ᠬᠡᠷᠡᠭ ᠡᠷᠬᠢᠯᠡᠬᠦ ᠵᠥᠪᠯᠡᠯ᠂ ᠤᠳᠬᠠ ᠤᠷᠠᠯᠢᠭ ᠤ᠋ᠨ ᠬᠢᠨ ᠦ᠌ ᠬᠣᠯᠪᠣᠭᠠ ᠨᠢ ᠮᠠᠰᠢ ᠣᠯᠠᠨ ᠬᠥᠮᠦᠨ ᠦ᠌ ᠪᠠ ᠪᠣᠳᠠᠰ ᠤ᠋ᠨ ᠬᠦᠴᠦᠨ ᠢ᠋ ᠵᠠᠷᠤᠵᠤ᠂ ᠣᠷᠳᠣᠰ ᠤ᠋ᠨ ᠤᠯᠠᠮᠵᠢᠯᠠᠯᠲᠤ ᠥᠪ ᠰᠣᠶᠣᠯ ᠢ᠋ ᠱᠠᠯᠠᠪᠳᠠᠨ ᠠᠪᠤᠷᠠᠬᠤ ᠲᠠᠯᠠ ᠪᠠᠷ ᠮᠠᠰᠢ ᠠᠷᠪᠢᠨ ᠠᠵᠢᠯ ᠬᠢᠵᠦ᠂ ᠦᠯᠡᠮᠵᠢ ᠣᠯᠠᠨ ᠰᠣᠶᠣᠯ ᠤ᠋ᠨ ᠥᠪ ᠬᠥᠷᠥᠩᠭᠡ ᠶ᠋ᠢ ᠠᠪᠤᠷᠠᠵᠤ ᠴᠤᠭᠯᠠᠭᠤᠯᠵᠤ᠂ ᠬᠣᠢᠰᠢᠳᠠ ᠶ᠋ᠢᠨ ᠡᠮᠬᠢᠳᠬᠡᠵᠦ ᠬᠡᠪᠯᠡᠭᠦᠯᠬᠦ ᠠᠵᠢᠯ ᠳ᠋ᠤ᠌ ᠪᠠᠲᠤ ᠰᠠᠭᠤᠷᠢ ᠲᠠᠯᠪᠢᠵᠠᠢ᠃ ᠡᠨᠡ ᠰᠠᠭᠤᠷᠢᠨ ᠳᠡᠭᠡᠷᠡ ᠤᠤᠯ ᠤ᠋ᠨ ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠦᠨᠳᠦᠰᠦᠲᠡᠨ ᠦ᠌ ᠬᠡᠷᠡᠭ ᠡᠷᠬᠢᠯᠡᠬᠦ ᠵᠥᠪᠯᠡᠯ᠂ ᠮᠣᠩᠭᠣᠯ ᠬᠡᠯᠡ ᠪᠢᠴᠢᠭ ᠦ᠋ᠨ ᠠᠵᠢᠯ ᠤ᠋ᠨ ᠵᠥᠪᠯᠡᠯ ᠨᠢ ᠪᠠᠰᠠ ᠠᠷᠪᠠᠭᠠᠳ ᠨᠣᠮ ᠰᠤᠳᠤᠷ ᠢ᠋ ᠡᠮᠬᠢᠳᠬᠡᠵᠦ ᠬᠡᠪᠯᠡᠭᠦᠯᠦᠭᠰᠡᠨ ᠪᠠᠢᠨᠠ᠃ ᠡᠳᠡᠭᠡᠷ ᠨᠢ ᠪᠦᠷ ᠳᠠᠩ ᠳᠡᠪᠲᠡᠷ ᠢ᠋ᠶ᠋ᠡᠷ ᠬᠡᠪᠯᠡᠭᠳᠡᠭᠰᠡᠨ ᠪᠣᠯᠬᠣᠷ ᠰᠢᠰᠲ᠋ᠧᠮ ᠦᠭᠡᠢ ᠪᠣᠯᠵᠠᠢ᠃ ᠬᠡᠷᠪᠡ ᠴᠤᠪᠤᠷᠠᠯ ᠨᠣᠮ ᠤ᠋ᠨ ᠮᠠᠶᠢᠭ ᠢ᠋ᠶ᠋ᠠᠷ ᠡᠮᠬᠢᠳᠬᠡᠵᠦ ᠬᠡᠪᠯᠡᠭᠦᠯᠬᠦ ᠳ᠋ᠦ᠍ ᠬᠦᠷᠪᠡᠯ᠂ ᠰᠢᠰᠲ᠋ᠧᠮ ᠲᠡᠢ ᠪᠣᠯᠵᠤ ᠤᠩᠰᠢᠵᠤ ᠠᠰᠢᠭᠯᠠᠬᠤ ᠳ᠋ᠤ᠌ ᠮᠠᠰᠢ ᠳᠥᠭᠥᠮ ᠪᠣᠯᠬᠤ ᠮᠥᠷᠲᠡᠭᠡᠨ ᠰᠣᠶᠣᠯ ᠤ᠋ᠨ ᠬᠤᠷᠠᠮᠳᠤᠭᠤᠯᠤᠯ ᠳ᠋ᠤ᠌ ᠴᠤ᠌ ᠶᠡᠬᠡ ᠠᠰᠢᠭᠲᠠᠢ ᠶᠤᠮ᠃ ᠡᠭᠦᠨ ᠡᠴᠡ ᠪᠣᠯᠵᠤ᠂ ᠪᠢᠳᠡ ᠡᠨᠡ ᠵᠢᠯ ᠡᠴᠡ ᠡᠬᠢᠯᠡᠨ《 ᠣᠷᠳᠣᠰ ᠰᠤᠳᠤᠷ ᠪᠢᠴᠢᠭ ᠦ᠋ᠨ ᠴᠤᠪᠤᠷᠠᠯ ᠪᠢᠴᠢᠭ》ᠢ᠋ ᠡᠮᠬᠢᠳᠬᠡᠵᠦ ᠬᠡᠪᠯᠡᠭᠦᠯᠬᠦ ᠪᠡᠷ ᠲᠣᠭᠲᠠᠪᠠ᠃ ᠮᠠᠨ ᠤ᠋ ᠨᠥᠬᠥᠴᠡᠯ ᠪᠣᠯᠤᠮᠵᠢ ᠪᠠᠨ ᠦᠵᠡᠵᠦ᠂ ᠵᠦᠢᠯ ᠳ᠋ᠦ᠍1——2 ᠨᠣᠮ ᠬᠡᠪᠯᠡᠭᠦᠯᠵᠦ ᠭᠠᠷᠭᠠᠬᠤ ᠪᠠᠷ ᠴᠢᠷᠮᠠᠢᠵᠤ ᠪᠣᠢ᠃ ᠰᠣᠳᠣ ᠶ᠋ᠢ ᠨᠢ ᠰᠣᠩᠭᠣᠨ᠂ ᠰᠢᠭᠠᠷᠤ ᠶ᠋ᠢ ᠨᠢ ᠬᠠᠶᠠᠵᠤ᠂ ᠡᠷᠲᠡᠨ ᠦ᠌ ᠬᠢ ᠶ᠋ᠢ ᠡᠳᠦᠭᠡ ᠳ᠋ᠦ᠍ ᠦᠢᠯᠡᠴᠢᠯᠡᠭᠦᠯᠬᠦ ᠣᠪᠣᠷ ᠢ᠋ᠶ᠋ᠠᠷ ᠤᠯᠠᠮᠵᠢᠯᠠᠯᠲᠤ ᠰᠣᠶᠣᠯ ᠳ᠋ᠤ᠌ ᠪᠠᠨ ᠬᠠᠨᠳᠤᠵᠤ᠂ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠥᠪ ᠰᠣᠶᠣᠯ ᠢ᠋ ᠵᠠᠯᠭᠠᠮᠵᠢᠯᠠᠵᠤ ᠬᠥᠭᠵᠢᠭᠦᠯᠬᠦ ᠪᠣᠯ ᠪᠢᠳᠡ ᠳᠠᠶᠠᠭᠠᠷ ᠤ᠋ᠨ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠪᠣᠯᠬᠤ ᠶᠤᠮ᠃ ᠨᠡᠢᠭᠡᠮ ᠨᠡᠢᠲᠡ ᠳ᠋ᠦ᠍ ᠬᠢᠨ ᠮᠠᠨ ᠤ᠋ ᠴᠤᠪᠤᠷᠠᠯ ᠪᠢᠴᠢᠭ ᠨᠠᠢᠷᠠᠭᠤᠯᠵᠤ ᠬᠡᠪᠯᠡᠭᠦᠯᠬᠦ ᠠᠵᠢᠯ ᠳ᠋ᠤ᠌ ᠳᠡᠮᠵᠢᠵᠦ ᠲᠤᠰᠠᠯᠠᠬᠤ ᠶ᠋ᠢ ᠬᠦᠰᠡᠨ ᠨᠠᠢᠳᠠᠶᠠ᠃
ᠣᠷᠳᠣᠰ ᠰᠤᠳᠤᠷ ᠪᠢᠴᠢᠭ ᠦ᠋ᠨ ᠴᠤᠪᠤᠷᠠᠯ ᠪᠢᠴᠢᠭ ᠨᠠᠢᠷᠠᠭᠤᠯᠬᠤ ᠺᠣᠮᠢᠰ
2005 ᠤ᠋ ᠶ᠋ᠢᠨ10 ᠰᠠᠷᠠ
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠲᠣᠢᠮᠣ
ᠵᠠᠷᠯᠢᠭ ᠢ᠋ᠶ᠋ᠠᠷ ᠰᠣᠶᠣᠷᠬᠠᠭᠰᠠᠨ ᠪᠢᠯᠢᠭ ᠢ᠋ ᠪᠠᠳᠠᠷᠠᠭᠤᠯᠤᠭᠴᠢ ᠰᠢᠷᠠ ᠵᠣᠣ ᠰᠦᠮᠡ ᠨᠢ ᠣᠷᠳᠣᠰ ᠤ᠋ᠨ ᠥᠨᠳᠥᠷᠯᠢᠭ ᠦ᠋ᠨ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠤᠤᠯ ᠤ᠋ᠨ ᠰᠢᠷᠠ ᠵᠣᠣ ᠰᠤᠮᠤᠨ ᠤ᠋ ᠤᠯᠠᠭᠠᠨ ᠣᠳᠣ ᠭᠠᠴᠠᠭᠠᠨ ᠤ᠋ ᠲᠠᠤᠯᠠᠢ ᠶ᠋ᠢᠨ ᠠᠮᠠᠨ ᠤ᠋ ᠵᠡᠭᠦᠨ ᠬᠣᠢᠲᠤ ᠲᠠᠪᠰᠠᠩ ᠳ᠋ᠤ᠌ ᠪᠠᠢᠷᠢᠰᠢᠵᠤ ᠪᠠᠢᠳᠠᠭ᠃ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠤᠷᠢᠳᠤ ᠪᠡᠶᠡ ᠳ᠋ᠦ᠍ ᠮᠥᠷᠭᠥᠴᠡᠭ ᠦ᠋ᠨ ᠣᠷᠣᠢ ᠭᠡᠵᠦ ᠪᠣᠢ᠃ ᠤᠷᠤᠭᠰᠢ ᠲᠠᠢᠲᠠᠭᠠᠢ ᠶ᠋ᠢᠨ ᠣᠪᠣᠭᠠ᠂ ᠵᠡᠭᠦᠨᠲᠡᠢᠬᠡᠨ ᠬᠥᠬᠡ ᠲᠣᠯᠣᠭᠠᠢ ᠬᠠᠷᠠᠭᠳᠠᠳᠠᠭ᠃ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠵᠡᠭᠦᠨ ᠬᠣᠢᠲᠠᠢ ᠮᠣᠳᠣᠨ ᠣᠪᠣᠭᠠ᠂ ᠪᠠᠷᠠᠭᠤᠨ ᠬᠣᠢᠨᠠ ᠨᠢ ᠬᠠᠳᠠᠨ ᠣᠪᠣᠭᠠ ᠪᠣᠢ᠃ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠪᠠᠷᠠᠭᠤᠨ ᠬᠣᠢᠨᠠᠬᠠᠨ ᠬᠠᠳᠬᠤᠵᠤ ᠭᠠᠷᠤᠭᠰᠠᠨ ᠡᠯᠡᠰᠦᠨ ᠬᠤᠰᠢᠭᠤᠨ ᠳ᠋ᠤ᠌ ᠥᠨᠳᠥᠷ ᠤᠯᠠᠭᠠᠨ ᠭᠡᠵᠦ ᠱᠣᠷᠣᠩ ᠮᠠᠩᠬᠠ ᠪᠠᠢᠳᠠᠭ᠃ ᠵᠡᠭᠦᠨᠰᠢ ᠬᠠᠲᠤᠨ ᠭᠣᠣᠯ ᠥᠭᠰᠥᠭᠦᠯᠦᠨ ᠬᠠᠷᠠᠪᠠᠯ ᠮᠤᠨᠢ ᠠᠭᠤᠯᠠ ᠬᠥᠬᠡᠷᠡᠨ ᠰᠡᠬᠦᠢᠵᠦ᠂ ᠳᠡᠭᠡᠷᠡᠮ ᠦ᠋ᠨ ᠵᠢᠯᠠᠭᠠ ᠮᠡᠲᠦ ᠶ᠋ᠢᠨ ᠭᠣᠣ ᠰᠠᠷᠬᠢᠶᠠᠭ ᠲᠣᠪ ᠲᠣᠳᠣᠬᠠᠨ ᠬᠠᠷᠠᠭᠳᠠᠬᠤ ᠠᠵᠢ᠃ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠵᠡᠭᠦᠨ ᠳᠣᠣᠷᠠ ᠠ᠋ᠴᠠ ᠤᠷᠤᠭᠰᠢ ᠬᠣᠢᠰᠢ ᠲᠠᠬᠢᠯᠲᠤ᠂ ᠲᠣᠭᠣᠭᠠᠨ ᠪᠤᠯᠠᠭ ᠮᠡᠲᠦ ᠶ᠋ᠢᠨ ᠣᠨᠳᠣᠷᠣᠭᠠ ᠰᠠᠢᠲᠠᠢ ᠭᠣᠷᠣᠬᠠ ᠰᠢᠪᠠᠷ ᠴᠠᠢᠳᠠᠮ ᠬᠡᠳᠦᠨ ᠠᠷᠪᠠᠨ ᠭᠠᠵᠠᠷ ᠦᠷᠭᠦᠯᠵᠢᠯᠡᠳᠡᠭ ᠰᠠᠨ᠃ ᠳᠡᠯᠭᠡᠷ ᠵᠤᠨ ᠤ᠋ ᠤᠯᠠᠷᠢᠯ ᠳ᠋ᠤ᠌ ᠡᠨᠡ ᠶᠡᠬᠡ ᠠᠭᠤᠳᠠᠮ ᠴᠠᠢᠳᠠᠮ ᠳ᠋ᠤ᠌ ᠤᠰᠤᠨ ᠤ᠋ ᠰᠢᠪᠠᠭᠤᠳ ᠭᠠᠩᠭᠠᠨᠠᠯᠳᠤᠨ ᠳᠣᠩᠭᠣᠳᠴᠤ᠂ ᠮᠠᠯ ᠰᠦᠷᠦᠭ ᠲᠠᠪᠠᠲᠠᠢ ᠳᠠᠷᠬᠠᠨ ᠢᠳᠡᠰᠢᠯᠡᠭᠰᠡᠨ ᠠᠮᠢᠲᠠᠨ ᠵᠢᠭᠦᠷᠲᠡᠨ ᠦ᠌ ᠨᠠᠢᠷᠠᠯ ᠬᠥᠭᠵᠢᠮ ᠲᠡᠢ ᠵᠢᠷᠭᠠᠯ ᠤ᠋ᠨ ᠣᠷᠣᠨ ᠪᠣᠯᠳᠠᠭ᠃ ᠬᠥᠪᠴᠢ ᠶ᠋ᠢᠨ ᠡᠯᠡᠰᠦ ᠪᠠᠷᠠᠭᠤᠨ ᠬᠣᠢᠨᠠ ᠠ᠋ᠴᠠ ᠬᠣᠰᠢᠭᠤᠷᠠᠨ ᠰᠢᠷᠠ ᠵᠣᠣ ᠶ᠋ᠢᠨ ᠪᠠᠷᠠᠭᠤᠨ ᠪᠡᠶᠡ ᠪᠡᠷ ᠤᠷᠤᠭᠰᠢ ᠳᠠᠭᠠᠷᠢᠨ ᠳᠠᠯᠠᠳ ᠤ᠋ᠨ ᠬᠤᠰᠢᠭᠤᠨ ᠤ᠋ ᠪᠦᠷᠢᠶᠡ ᠮᠠᠩᠬᠠ ᠲᠤᠯᠳᠠᠭ᠃ ᠠᠷᠤ ᠲᠠᠪᠢᠨ ᠳᠣᠯᠣᠭᠠ᠂ ᠥᠪᠥᠷ ᠳᠥᠴᠢ ᠶᠢᠰᠦᠨ ᠬᠤᠰᠢᠭᠤᠨ ᠳ᠋ᠤ᠌ ᠠᠯᠳᠠᠷᠲᠠᠢ᠂ ᠳᠥᠷᠪᠡᠯᠵᠢᠨ ᠶᠡᠬᠡ ᠬᠦᠷᠢᠶᠡ ᠲᠡᠢ᠂ ᠳᠤᠮᠳᠠ ᠪᠠᠨ ᠨᠠᠢ᠍ᠮᠠᠨ ᠳᠤᠭᠠᠩ ᠲᠠᠢ᠂ ᠴᠢᠩ ᠰᠦᠰᠦᠭᠲᠦ ᠨᠣᠮ ᠤ᠋ᠨ ᠬᠠᠭᠠᠨ ᠤ᠋ ᠱᠠᠩ ᠲᠠᠢ᠂ ᠪᠠᠷᠠᠭᠤᠨ ᠵᠡᠭᠦᠨ ᠱᠠᠪᠷᠤᠩ ᠪᠠᠭᠰᠢ ᠶ᠋ᠢᠨ ᠣᠷᠳᠣᠨ ᠲᠠᠢ᠂ ᠬᠡᠳᠦ ᠬᠡᠳᠦᠨ ᠵᠢᠰᠠ ᠶ᠋ᠢᠨ ᠬᠦᠷᠢᠶᠡ ᠲᠡᠢ᠂ ᠵᠢᠯ ᠦ᠋ᠨ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠨᠣᠮ ᠬᠤᠷᠠᠯ ᠲᠠᠰᠤᠷᠠᠳᠠᠭ ᠦᠭᠡᠢ᠂ ᠡᠨᠡ ᠬᠦ᠌ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢ ᠴᠢᠩ ᠤᠯᠤᠰ ᠦ᠋ᠨ ᠡᠩᠬᠡ ᠠᠮᠤᠭᠤᠯᠠᠩ ᠤ᠋ᠨ ᠭᠤᠴᠢᠨ ᠵᠢᠷᠭᠤᠳᠤᠭᠠᠷ ᠣᠨ(1697) ᠳ᠋ᠤ᠌ ᠬᠠᠯᠬᠠ ᠶ᠋ᠢᠨ ᠴᠢᠩ ᠰᠦᠰᠦᠭᠲᠦ ᠨᠣᠮ ᠤ᠋ᠨ ᠬᠠᠭᠠᠨ ᠨᠣᠷᠪᠤᠰᠢᠷᠠᠪ᠂ ᠣᠷᠳᠣᠰ ᠤ᠋ᠨ ᠬᠡᠳᠦᠨ ᠬᠤᠰᠢᠭᠤᠨ ᠤ᠋ ᠸᠠᠩ᠂ ᠪᠡᠢᠯᠡ᠂ ᠪᠠᠢᠰᠠ᠂ ᠬᠦᠩ ᠨᠠᠷ ᠲᠠᠢ ᠬᠠᠮᠲᠤ ᠪᠠᠷ ᠰᠡᠳᠦᠵᠦ ᠬᠠᠯᠬᠠ ᠶ᠋ᠢᠨ ᠴᠢᠩ ᠰᠦᠰᠦᠭᠲᠦ ᠨᠣᠮ ᠤ᠋ᠨ ᠬᠠᠭᠠᠨ ᠨᠣᠷᠪᠤᠰᠢᠷᠠᠪ ᠯᠠᠮᠠ ᠤᠳᠤᠷᠢᠳᠴᠤ ᠪᠠᠢᠭᠤᠯᠤᠭᠰᠠᠨ ᠪᠢᠯᠡ᠃ ᠴᠣᠭᠴᠢᠨ ᠳᠤᠭᠠᠩ ᠨᠢ ᠰᠢᠷᠠ ᠱᠠᠭᠠᠵᠠᠩ ᠸᠠᠭᠠᠷᠤᠨ ᠳᠡᠭᠡᠪᠦᠷ ᠲᠡᠢ ᠪᠣᠯᠬᠣᠷ ᠰᠢᠷᠠ ᠵᠣᠣ ᠭᠡᠮᠡᠨ ᠠᠯᠳᠠᠷᠰᠢᠵᠠᠢ᠃ ᠲᠥᠪᠡᠳ ᠨᠡᠷᠡ ᠨᠢ ᠰᠢᠷᠠᠪᠫᠢᠯᠪᠢᠯᠢᠩ᠂ ᠬᠢᠲᠠᠳ ᠢ᠋ᠶ᠋ᠠᠷ ᠭᠤᠸᠠᠩ ᠬᠤᠢ ᠰᠧ(广慧寺) ᠭᠡᠳᠡᠭ᠃ ᠲᠩᠷᠢ ᠲᠡᠳᠬᠦᠭᠴᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠠᠷᠯᠢᠭ ᠢ᠋ᠶ᠋ᠠᠷ《 ᠪᠢᠯᠢᠭ ᠢ᠋ ᠪᠠᠳᠠᠷᠠᠭᠤᠯᠤᠭᠴᠢ ᠰᠦᠮᠡ》ᠭᠡᠳᠡᠭ ᠨᠡᠷᠡ ᠰᠣᠶᠣᠷᠬᠠᠵᠤ ᠂ ᠳᠥᠴᠢᠨ ᠲᠠᠪᠤᠨ ᠯᠠᠮᠠ ᠪᠠᠨᠳᠢ ᠳ᠋ᠤ᠌ ᠬᠢᠶᠠᠪᠤ ᠳᠦᠳᠢᠶᠡ ᠲᠡᠮᠳᠡᠭ ᠣᠯᠭᠣᠵᠤ᠂ ᠳᠦᠳᠢᠶᠡ ᠬᠡᠢᠳ ᠪᠣᠯᠭᠠᠭᠰᠠᠨ ᠪᠠᠢᠨᠠ᠃ ᠰᠢᠷᠠ ᠵᠣᠣ ᠰᠦᠮᠡ ᠪᠣᠯ ᠣᠷᠳᠣᠰ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠤ᠋ ᠬᠠᠮᠲᠤ ᠶ᠋ᠢᠨ ᠮᠠᠲᠠᠯ ᠳ᠋ᠠᠬᠢ ᠬᠡᠢᠳ ᠪᠣᠯᠬᠤ ᠤᠴᠢᠷ ᠡᠨᠡ ᠬᠦ᠌ ᠳᠥᠴᠢᠨ ᠲᠠᠪᠤᠨ ᠳᠦᠳᠢᠶᠡ ᠯᠠᠮᠠ ᠶ᠋ᠢ ᠣᠷᠳᠣᠰ ᠤ᠋ᠨ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠠ᠋ᠴᠠ ᠬᠤᠪᠢᠶᠠᠨ ᠲᠣᠮᠢᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠮ ᠂ ᠹᠦᠩᠯᠦ ᠴᠠᠯᠢᠩ ᠢ᠋ ᠨᠢ ᠴᠦ᠍ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠠ᠋ᠴᠠ ᠭᠠᠷᠭᠠᠵᠤ ᠪᠠᠢᠪᠠ᠃ ᠰᠦᠮᠡ ᠰᠡᠯᠪᠢᠨ ᠵᠠᠰᠠᠬᠤ ᠵᠠᠷᠤᠳᠠᠯ ᠮᠥᠩᠭᠥ ᠶ᠋ᠢ ᠨᠢ ᠴᠦ᠍ ᠮᠥᠨ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠠ᠋ᠴᠠ ᠭᠠᠷᠭᠠᠳᠠᠭ᠃ ᠬᠡᠳᠦᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢ᠂ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢ ᠳᠠᠬᠢᠨ ᠳᠠᠬᠢᠨ ᠥᠷᠭᠡᠳᠬᠡᠨ ᠪᠠᠷᠢᠭᠰᠠᠭᠠᠷ ᠪᠠᠢᠭᠠᠳ ᠢᠷᠭᠡᠨ ᠤᠯᠤᠰ ᠤ᠋ᠨ ᠦᠶᠡ ᠪᠣᠯᠬᠤ ᠳ᠋ᠤ᠌ ᠶᠡᠬᠡ ᠪᠠᠭᠠ ᠠᠷᠪᠠ ᠭᠠᠷᠤᠢ ᠳᠤᠭᠠᠩ ᠲᠠᠢ᠂ ᠬᠡᠳᠦᠨ ᠵᠠᠭᠤᠨ ᠯᠠᠮᠠ ᠬᠤᠸᠠᠷᠠᠭ ᠲᠠᠢ᠂ ᠴᠢᠭᠤᠯᠭᠠᠨ ᠳ᠋ᠠᠭᠠᠨ ᠠᠯᠳᠠᠷᠲᠠᠢ ᠬᠡᠢᠳ ᠪᠣᠯᠵᠠᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠪᠠᠢᠭᠤᠯᠬᠤ ᠦᠶᠡ ᠶ᠋ᠢᠨ ᠬᠣᠰᠢᠭᠤ ᠵᠠᠰᠠᠭ ᠤ᠋ᠨ ᠪᠠᠢᠳᠠᠯ
ᠴᠢᠩ ᠤᠯᠤᠰ ᠤ᠋ᠨ ᠨᠣᠶᠠᠷᠬᠠᠭᠴᠢᠳ ᠣᠷᠳᠣᠰ ᠤ᠋ᠨ ᠬᠦᠴᠦᠨ ᠢ᠋ ᠠᠰᠢᠭᠯᠠᠨ ᠥᠪᠡᠷ ᠦ᠋ᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠳᠠᠢᠰᠤᠨ ᠢ᠋ ᠤᠰᠠᠳᠬᠠᠬᠤ ᠶ᠋ᠢᠨ ᠵᠡᠷᠭᠡ ᠪᠡᠷ ᠣᠷᠳᠣᠰ ᠤ᠋ᠨ ᠬᠦᠴᠦᠨ ᠢ᠋ ᠴᠦ᠍ ᠳᠣᠷᠣᠢᠲᠠᠭᠤᠯᠵᠤ ᠪᠠᠢᠭᠠᠳ᠂1649—1651 ᠣᠨ ᠳ᠋ᠤ᠌ ᠣᠷᠳᠣᠰ ᠢ᠋ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠭᠠᠷᠯᠠᠭᠰᠠᠨ ᠵᠢᠷᠭᠤᠭᠠᠨ ᠬᠣᠰᠢᠭᠤ ᠬᠤᠪᠢᠶᠠᠭᠰᠠᠨ ᠪᠢᠯᠡ᠃ ᠬᠠᠩᠭᠢᠨ ᠬᠣᠰᠢᠭᠤ ᠨᠢ ᠣᠷᠳᠣᠰ ᠪᠠᠷᠠᠭᠤᠨ ᠭᠠᠷᠤᠨ ᠬᠣᠢᠲᠤ ᠬᠣᠰᠢᠭᠤ ᠬᠡᠮᠡᠭᠳᠡᠨ ᠨᠡᠷᠡᠢᠳᠦᠭᠳᠡᠪᠡ᠃
ᠰᠤᠨᠤᠮ ᠤ᠋ᠨ ᠬᠥᠪᠡᠭᠦᠨ ᠳᠦᠭᠦᠷᠡᠩ᠂1672 ᠣᠨ ᠳ᠋ᠤ᠌ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠦᠰᠢᠶᠡ ᠬᠦᠩ ᠵᠡᠷᠭᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠵᠤ᠂ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠭᠤᠷᠪᠠᠳᠤᠭᠠᠷ ᠵᠠᠰᠠᠭ ᠪᠣᠯᠵᠠᠢ᠃ ᠡᠩᠬᠡ ᠠᠮᠤᠭᠤᠯᠠᠩ ᠤ᠋ᠨ ᠭᠤᠴᠢᠨ ᠳᠣᠯᠣᠳᠤᠭᠠᠷ ᠣᠨ(1698 ᠣᠨ᠂ ᠰᠢᠷᠠ ᠪᠠᠷᠰ ᠵᠢᠯ) ᠳ᠋ᠦ᠍ ᠵᠦᠩᠭᠠᠷ ᠤ᠋ᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢ ᠳᠠᠷᠤᠩᠭᠤᠢᠯᠠᠬᠤ ᠳ᠋ᠤ᠌ ᠭᠠᠪᠢᠶᠠ ᠲᠠᠢ ᠭᠡᠮᠡᠨ ᠵᠠᠰᠠᠭ ᠪᠠᠢᠰᠠ ᠪᠠᠷ ᠳᠠᠪᠰᠢᠪᠠ᠃ ᠡᠩᠬᠡ ᠠᠮᠤᠭᠤᠯᠠᠩ ᠤ᠋ᠨ ᠳᠥᠴᠢᠨ ᠳᠣᠯᠣᠳᠤᠭᠠᠷ ᠣᠨ(1707 ᠣᠨ᠂ ᠤᠯᠠᠭᠴᠢᠨ ᠭᠠᠬᠠᠢ ᠵᠢᠯ ) ᠳ᠋ᠦ᠍ ᠨᠠᠰᠤ ᠪᠠᠷᠠᠵᠠᠢ ᠃
ᠳᠦᠭᠦᠷᠡᠩ ᠦ᠋ᠨ ᠠᠬᠠᠮᠠᠳ ᠬᠥᠪᠡᠭᠦᠨ ᠰᠡᠷᠡᠩᠷᠡᠰᠢ ᠂1707 ᠣᠨ ᠳ᠋ᠤ᠌ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠰᠠᠭ ᠪᠡᠢᠰᠡ ᠵᠡᠷᠭᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠵᠤ᠂ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠳᠥᠷᠪᠡᠳᠦᠭᠡᠷ ᠵᠠᠰᠠᠭ ᠪᠣᠯᠵᠠᠢ᠃ ᠡᠩᠬᠡ ᠠᠮᠤᠭᠤᠯᠠᠩ ᠤ᠋ᠨ ᠲᠠᠪᠢᠨ ᠨᠢᠭᠡᠳᠦᠭᠡᠷ ᠣᠨ(1712 ᠣᠨ᠂ ᠬᠠᠷᠠ ᠯᠤᠤ ᠵᠢᠯ) ᠳ᠋ᠦ᠍ ᠨᠠᠰᠤ ᠪᠠᠷᠠᠪᠠ᠃
ᠯᠦᠮᠪᠦ ( ᠳᠦᠭᠦᠷᠡᠩ ᠦ᠋ᠨ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ )᠂1712 ᠣᠨ ᠳ᠋ᠤ᠌ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠰᠠᠭ ᠪᠡᠢᠰᠡ ᠵᠡᠷᠭᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠵᠤ ᠂ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠲᠠᠪᠤᠳᠤᠭᠠᠷ ᠵᠠᠰᠠᠭ ᠪᠣᠯᠵᠠᠢ᠃ ᠡᠩᠬᠡ ᠠᠮᠤᠭᠤᠯᠠᠩ ᠤ᠋ᠨ ᠲᠠᠪᠢᠨ ᠵᠢᠷᠭᠤᠳᠤᠭᠠᠷ ᠣᠨ ( 1717 ᠣᠨ᠂ ᠤᠯᠠᠭᠴᠢᠨ ᠲᠠᠬᠢᠶᠠ ᠵᠢᠯ ) ᠳ᠋ᠦ᠍ ᠨᠠᠰᠤ ᠪᠠᠷᠠᠪᠠ᠃ ᠦᠷᠡ ᠬᠡᠦᠬᠡᠳ ᠦᠭᠡᠢ᠃
ᠰᠡᠷᠡᠩᠨᠡᠮᠵᠢᠯ ( ᠳᠦᠭᠦᠷᠡᠩ ᠦ᠋ᠨ ᠭᠤᠷᠪᠠᠳᠤᠭᠠᠷ ᠬᠥᠪᠡᠭᠦᠨ) 1717 ᠣᠨ ᠳ᠋ᠤ᠌ ᠠᠬᠠ ᠯᠦᠮᠪᠦ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠰᠠᠭ ᠪᠡᠢᠰᠡ ᠵᠡᠷᠭᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠵᠤ ᠂ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠵᠢᠷᠭᠤᠳᠤᠭᠠᠷ ᠵᠠᠰᠠᠭ ᠪᠣᠯᠵᠠᠢ᠃ ᠲᠤᠰ ᠵᠢᠯ ᠳ᠋ᠡᠭᠡᠨ ᠨᠠᠰᠤ ᠪᠠᠷᠠᠵᠠᠢ᠃
ᠴᠠᠸᠠᠩᠪᠠᠯᠵᠤᠤᠷ ( ᠰᠡᠷᠡᠩᠨᠡᠮᠵᠢᠯ ᠦ᠋ᠨ ᠠᠬᠠᠮᠠᠳ ᠬᠥᠪᠡᠭᠦᠨ )1717 ᠣᠨ ᠳ᠋ᠤ᠌ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠰᠠᠭ ᠪᠡᠢᠰᠡ ᠵᠡᠷᠭᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠵᠤ᠂ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠳᠣᠯᠣᠳᠤᠭᠠᠷ ᠵᠠᠰᠠᠭ ᠪᠣᠯᠵᠠᠢ᠃ ᠨᠠᠢᠷᠠᠯᠲᠤ ᠲᠥᠪ ᠦ᠋ᠨ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠣᠨ(1733) ᠳ᠋ᠤ᠌ ᠲᠡᠭᠦᠨ ᠦ᠌ ᠲᠣᠮᠢᠯᠠᠭᠰᠠᠨ ᠴᠡᠷᠢᠭ ᠨᠢ ᠪᠠᠢᠯᠳᠤᠬᠤ ᠴᠢᠳᠠᠪᠤᠷᠢ ᠪᠠᠷ ᠰᠤᠯᠠ ᠳᠣᠷᠣᠢ ᠤᠴᠢᠷ ᠠ᠋ᠴᠠ ᠵᠠᠰᠠᠭ ᠪᠠᠢᠰᠠ ᠵᠡᠷᠭᠡ ᠶ᠋ᠢ ᠨᠢ ᠬᠠᠰᠤᠵᠤ ᠂ ᠲᠥᠰᠢᠶᠡ ᠬᠦᠩ ᠵᠡᠷᠭᠡ ᠲᠡᠢ ᠪᠣᠯᠭᠠᠪᠠ᠃ ᠲᠩᠷᠢ ᠲᠡᠳᠬᠦᠭᠴᠢ ᠶ᠋ᠢᠨ ᠠᠷᠪᠠ ᠶᠢᠰᠦᠳᠦᠭᠡᠷ ᠣᠨ (1754) ᠳ᠋ᠦ᠍ ᠴᠢᠩ ᠤᠯᠤᠰ ᠤ᠋ᠨ ᠲᠠᠪᠠᠭᠠᠴᠢ ᠶ᠋ᠢ ᠳᠠᠯᠠᠢᠭᠰᠠᠨ ᠴᠡᠷᠢᠭ ᠲᠦ᠍ ᠶᠡᠬᠡ ᠬᠡᠮᠵᠢᠶᠡᠨ ᠦ᠌ ᠦᠬᠡᠷ ᠠᠳᠤᠭᠤ ᠲᠡᠮᠡᠭᠡ ᠢᠮᠠᠭᠠ ᠬᠦᠷᠭᠡᠭᠰᠡᠨ ᠢ᠋ᠶ᠋ᠡᠷ ᠭᠠᠪᠢᠶᠠ ᠪᠠᠢᠭᠤᠯᠵᠤ᠂ ᠵᠠᠰᠠᠭ ᠲᠥᠷᠥ ᠶ᠋ᠢᠨ ᠪᠡᠢᠯᠡ ᠪᠡᠷ ᠳᠠᠪᠰᠢᠵᠠᠢ᠃ ᠲᠩᠷᠢ ᠲᠡᠳᠬᠦᠭᠴᠢ ᠶ᠋ᠢᠨ ᠭᠤᠴᠢᠨ ᠳᠣᠯᠣᠳᠤᠭᠠᠷ ᠣᠨ ( 1772ᠣᠨ ᠂ ᠬᠠᠷᠠ ᠯᠤᠤ ᠵᠢᠯ ) ᠳ᠋ᠦ᠍ ᠨᠠᠰᠤ ᠪᠠᠷᠠᠵᠠᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠪᠠᠷᠢᠯᠭᠠ
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠪᠠᠷᠢᠯᠭᠠ ᠶ᠋ᠢᠨ ᠣᠨᠴᠠᠯᠢᠭ᠂ ᠬᠡᠪ ᠨᠠᠮᠪᠠ ᠨᠢ ᠬᠢᠲᠠᠳ ᠮᠠᠶᠢᠭ ᠤ᠋ᠨ ᠪᠠ ᠲᠥᠪᠡᠳ ᠮᠠᠶᠢᠭ ᠤ᠋ᠨ ᠬᠢ ᠭᠡᠵᠦ ᠬᠣᠶᠠᠷ ᠵᠦᠢᠯ ᠪᠠᠢᠳᠠᠭ ᠴᠤ᠌ ᠬᠢᠲᠠᠳ ᠮᠠᠶᠢᠭ ᠤ᠋ᠨ ᠰᠦᠮᠡ ᠭᠣᠣᠯᠳᠠᠭᠤ ᠪᠠᠢᠭᠰᠠᠨ ᠶᠤᠮ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠰᠢᠷᠠ ᠵᠣᠣ ᠰᠦᠮᠡ ᠨᠢ ᠬᠠᠩᠭᠢᠨ ᠬᠤᠰᠢᠭᠤᠨ ᠳ᠋ᠠᠭᠠᠨ ᠬᠠᠮᠤᠭ ᠤ᠋ᠨ ᠣᠯᠠᠨ ᠳᠤᠭᠠᠩ ᠲᠠᠢ ᠰᠦᠮᠡ ᠳ᠋ᠦ᠍ ᠲᠣᠭᠠᠴᠠᠭᠳᠠᠳᠠᠭ ᠪᠠᠢᠵᠠᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠭᠠᠳᠠᠭᠤᠷ ᠢ᠋ᠶ᠋ᠠᠨ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠣᠷᠣᠭᠰᠢ ᠬᠣᠢᠰᠢ ᠲᠤᠰ ᠲᠤᠰ133 ᠮᠧᠲ᠋ᠷ ᠤᠷᠲᠤ ᠂3 ᠮᠧᠲ᠋ᠷ ᠥᠷᠭᠡᠨ᠂8 ᠲᠣᠬᠣᠢ ᠥᠨᠳᠥᠷ ᠂ ᠬᠦᠷᠢᠶᠡᠨ ᠦ᠌ ᠣᠷᠣᠢ ᠶ᠋ᠢ ᠨᠢ ᠰᠢᠷᠠ ᠸᠠᠭᠠᠷ ᠢ᠋ᠶ᠋ᠠᠷ ᠮᠠᠯᠠᠭᠠᠢᠯᠠᠵᠤ᠂ ᠬᠡᠷᠡᠮ ᠢ᠋ ᠨᠢ ᠤᠯᠠᠭᠠᠨ ᠢ᠋ᠶ᠋ᠠᠷ ᠪᠣᠳᠣᠭᠰᠠᠨ ᠳᠥᠷᠪᠡᠯᠵᠢᠨ ᠤᠯᠠᠭᠠᠨ ᠬᠦᠷᠢᠶᠡ ᠲᠡᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠣᠯᠠᠨ ᠳᠤᠭᠠᠩ ᠤ᠋ᠳ ᠤ᠋ᠨ ᠳᠣᠲᠣᠷᠠ ᠬᠠᠮᠤᠭ ᠠ᠋ᠴᠠ ᠰᠦᠷᠯᠢᠭ ᠦᠵᠡᠮᠵᠢ ᠲᠡᠢ᠂ ᠬᠡᠪᠴᠢᠶᠡ ᠲᠠᠯᠠᠪᠠᠢ ᠪᠠᠷ ᠬᠠᠮᠤᠭ ᠠ᠋ᠴᠠ ᠶᠡᠬᠡ ᠨᠢ ᠴᠣᠭᠴᠢᠨ ᠳᠤᠭᠠᠩ ᠶᠤᠮ᠃
ᠴᠣᠭᠴᠢᠨ ᠳᠤᠭᠠᠩ ᠨᠢ ᠰᠢᠷᠠ ᠱᠠᠭᠠᠵᠠᠩ ᠸᠠᠭᠠᠷᠤᠨ ᠳᠡᠭᠡᠪᠦᠷ ᠲᠡᠢ ᠂ ᠳᠥᠴᠢ ᠶᠢᠰᠦᠨ ᠲᠠᠰᠤᠯᠭᠠ ᠶ᠋ᠢᠨ ᠳᠠᠪᠬᠤᠷᠯᠢᠭ ᠲᠠᠢ᠂ ᠬᠢᠲᠠᠳ ᠮᠠᠶᠢᠭ ᠤ᠋ᠨ ᠳᠤᠭᠠᠩ ᠪᠢᠯᠡ᠃ ᠣᠷᠣᠢ ᠳᠡᠭᠡᠷᠡ ᠨᠢ ᠬᠣᠶᠠᠷ ᠪᠣᠳᠢ ᠭᠥᠷᠥᠭᠡᠰᠦ ᠲᠣᠭᠯᠠᠭᠰᠠᠨ ᠠᠯᠲᠠᠨ ᠭᠠᠨᠵᠢᠷᠠ ᠲᠠᠢ᠂ ᠳᠤᠮᠳᠠ ᠨᠢ ᠨᠠᠢ᠍ᠮᠠᠨ ᠬᠣᠷᠯᠣ ᠲᠠᠢ᠃
ᠽᠡᠨᠢᠳ ᠷᠠᠰᠠᠩ ᠨᠢ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠠᠷᠤ ᠳ᠋ᠤ᠌ ᠪᠠᠢᠷᠢᠰᠢᠵᠤ᠂ ᠬᠣᠷᠢᠨ ᠲᠠᠪᠤᠨ ᠲᠠᠰᠤᠯᠭᠠ ᠲᠠᠢ ᠨᠣᠭᠣᠭᠠᠨ ᠱᠠᠭᠠᠵᠠᠩ ᠸᠠᠭᠠᠷᠤᠨ ᠳᠡᠭᠡᠪᠦᠷ ᠲᠡᠢ᠃ ᠮᠥᠨ ᠬᠢᠲᠠᠳ ᠮᠠᠶᠢᠭ ᠤ᠋ᠨ ᠳᠤᠭᠠᠩ ᠪᠢᠯᠡ᠃ ᠡᠮᠦᠨᠡ ᠨᠢ ᠬᠣᠶᠠᠷ ᠠᠷᠰᠯᠠᠨ ᠲᠠᠢ᠂ ᠮᠥᠨ ᠴᠦ᠍ ᠭᠣᠮᠪᠣ ᠶ᠋ᠢᠨ ᠳᠤᠭᠠᠩ ᠭᠡᠳᠡᠭ᠃
ᠰᠢᠲᠦᠭᠡᠨ ᠰᠦᠮᠡ ᠨᠢ ᠭᠣᠮᠪᠣ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠪᠣᠢ᠃ ᠪᠠᠷᠢᠯᠭᠠ ᠶ᠋ᠢᠨ ᠬᠡᠪ ᠨᠠᠮᠪᠠ ᠨᠢ ᠲᠥᠪᠡᠳ ᠮᠠᠶᠢᠭ ᠤ᠋ᠨ ᠬᠢ᠂ ᠠᠷᠪᠠᠨ ᠬᠣᠶᠠᠷ ᠲᠠᠰᠤᠯᠭᠠ ᠲᠠᠢ᠃
ᡀᠠᠮᠣ ᠶ᠋ᠢᠨ ᠳᠤᠭᠠᠩ ᠨᠢ ᠭᠣᠮᠪᠣ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠪᠠᠢᠷᠢᠰᠢᠳᠠᠭ᠃ ᠵᠢᠷᠭᠤᠭᠠᠨ ᠲᠠᠰᠤᠯᠭᠠ ᠶ᠋ᠢᠨ ᠬᠢᠲᠠᠳ ᠮᠠᠶᠢᠭ ᠤ᠋ᠨ ᠳᠤᠭᠠᠩ ᠪᠢᠯᠡ᠃
ᠳ᠋ᠠᠷᠠ ᠡᠬᠡ ᠶ᠋ᠢᠨ ᠰᠦᠮᠡ ᠨᠢ ᠵᠢᠷᠭᠤᠭᠠᠨ ᠲᠠᠰᠤᠯᠭᠠ ᠬᠢᠲᠠᠳ ᠮᠠᠶᠢᠭ ᠤ᠋ᠨ ᠰᠦᠮᠡ ᠠᠵᠢ᠃ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌᠂ ᡀᠠᠮᠣ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠡᠮᠦᠨᠡ ᠪᠡᠶᠡ ᠳ᠋ᠦ᠍ ᠪᠠᠢᠷᠢᠰᠢᠵᠤ ᠪᠣᠢ᠃
ᠷᠠᠰᠠᠩ ᠳᠤᠭᠠᠩ ᠨᠢ ᠳ᠋ᠠᠷᠠ ᠡᠬᠡ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠤᠷᠢᠳᠤ ᠪᠡᠶᠡ ᠳ᠋ᠦ᠍ ᠪᠠᠢᠷᠢᠰᠢᠳᠠᠭ ᠠᠷᠪᠠᠨ ᠬᠣᠶᠠᠷ ᠲᠠᠰᠤᠯᠭᠠ ᠶ᠋ᠢᠨ ᠲᠥᠪᠡᠳ ᠮᠠᠶᠢᠭ ᠤ᠋ᠨ ᠳᠤᠭᠠᠩ ᠶᠤᠮ᠃ ᠨᠣᠮ ᠰᠤᠷᠴᠤ᠂ ᠪᠤᠳ᠋ᠳ᠋ᠾᠠ ᠶ᠋ᠢᠨ ᠱᠠᠰᠢᠨ ᠤ᠋ ᠭᠣᠣᠯ ᠣᠨᠣᠯ᠂ ᠭᠦᠨ ᠤᠬᠠᠭᠠᠨ ᠢ᠋ ᠶᠠᠷᠢᠯᠴᠠᠨ ᠮᠠᠷᠭᠤᠯᠳᠤᠵᠤ᠂ ᠴᠣᠢᠷᠣᠠ ᠬᠠᠶᠠᠯᠴᠠᠳᠠᠭ ᠴᠣᠢᠷᠣᠠ ᠷᠠᠰᠠᠩ ᠪᠢᠯᠡ᠃
ᠰᠡᠩᠺᠡᠩ ᠳᠤᠭᠠᠩ ᠨᠢ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠪᠠᠢᠷᠢᠰᠢᠳᠠᠭ ᠠᠷᠪᠠᠨ ᠬᠣᠶᠠᠷ ᠲᠠᠰᠤᠯᠭᠠ ᠳ᠋ᠤ᠌ ᠲᠥᠪᠡᠳ ᠮᠠᠶᠢᠭ ᠤ᠋ᠨ ᠳᠤᠭᠠᠩ ᠠᠵᠢ᠃
ᠳᠣᠭᠰᠢᠳ ᠤ᠋ᠨ ᠳᠤᠭᠠᠩ ᠨᠢ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠪᠠᠷᠠᠭᠤᠨ ᠡᠮᠦᠨᠡ᠂ ᠰᠡᠩᠺᠡᠩ ᠳᠤᠭᠠᠩ ᠤ᠋ᠨ ᠡᠮᠦᠨᠡ ᠲᠠᠯᠠ ᠳ᠋ᠤ᠌ ᠪᠠᠢᠷᠢᠰᠢᠵᠤ ᠪᠣᠢ᠃ ᠠᠷᠪᠠᠨ ᠬᠣᠶᠠᠷ ᠲᠠᠰᠤᠯᠭᠠ ᠶ᠋ᠢᠨ ᠲᠥᠪᠡᠳ ᠮᠠᠶᠢᠭ ᠤ᠋ᠨ ᠳᠤᠭᠠᠩ ᠶᠤᠮ᠃ ᠲᠤᠰ ᠳᠤᠭᠠᠩ ᠳ᠋ᠤ᠌ ᠳᠠᠬᠢᠳᠠᠭ ᠠᠷᠪᠠᠨ ᠳᠣᠭᠰᠢᠳ ᠭᠡᠪᠡᠯ᠂ ᠶᠠᠮᠠᠨᠳᠠᠭᠠ᠂ ᠮᠠᡁᠠᠺᠠᠯᠠ ᠂ ᠡᠷᠯᠢᠭ ᠬᠠᠭᠠᠨ᠂ ᠥᠬᠢᠨ ᠲᠩᠷᠢ( ᡀᠠᠮᠣ ᠪᠤᠶᠤ ᠶᠠᠩᠵᠢᠨᡀᠠᠮᠤ ᠂ ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ ᠰᠠᠬᠢᠭᠤᠯᠰᠤᠨ ᠴᠤ᠌ ᠭᠡᠳᠡᠭ)᠃ ᠵᠡᠮᠰᠦ᠋ᠷᠦᠩ᠂ ᠪᠢᠰᠮᠠᠨ᠂ ᠲᠠᠪᠤᠨ ᠬᠠᠨ᠂ ᠴᠠᠭᠠᠨ ᠮᠠᠷᠯᠠᠨ᠂ ᠬᠠᠷᠠ ᠮᠠᠨᠽᠤᠰᠢᠷᠢ᠂ ᠬᠠᠶᠢᠩᠬᠢᠷᠤᠠ ᠵᠡᠷᠭᠡ ᠪᠣᠢ᠃
ᠳᠥᠷᠪᠡᠯᠵᠢᠨ ᠶᠡᠬᠡ ᠤᠯᠠᠭᠠᠨ ᠬᠦᠷᠢᠶᠡᠨ ᠦ᠌ ᠤᠷᠢᠳᠤ ᠲᠠᠯᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠲᠡᠭ ᠳᠤᠮᠳᠠ ᠨᠢ ᠠᠷᠪᠠᠨ ᠬᠣᠶᠠᠷ ᠲᠠᠰᠤᠯᠭᠠ ᠶ᠋ᠢᠨ ᠮᠠᠬᠠᠷᠠᠨᠽᠠ ᠶ᠋ᠢᠨ ᠳᠤᠭᠠᠩ ᠲᠠᠢ ᠃ ᠳᠣᠲᠣᠷᠠ ᠨᠢ ᠴᠠᠭᠠᠨ ᠴᠢᠷᠠᠢ ᠲᠠᠢ ᠶᠣᠯᡁᠣᠷᠰᠥ᠋ᠷᠦᠩ᠂ ᠬᠥᠬᠡ ᠴᠢᠷᠠᠢ ᠲᠠᠢ ᠫᠠᠭᠵᠸᠪᠤ᠂ ᠤᠯᠠᠭᠠᠨ ᠴᠢᠷᠠᠢ ᠲᠠᠢ ᠵᠠᠮᠢᠰᠠᠩ᠂ ᠰᠢᠷᠠ ᠴᠢᠷᠠᠢ ᠲᠠᠢ ᠨᠠᠮᠲ᠋ᠥ᠋ᠢᠰᠡᠷᠡᠢ ᠵᠡᠷᠭᠡ ᠶ᠋ᠢᠨ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠡᠭᠦᠳᠡ ᠰᠠᠬᠢᠭᠴᠢ᠂ ᠳᠥᠷᠪᠡᠨ ᠮᠠᠬᠠᠷᠠᠨᠽᠠ ᠶ᠋ᠢ ᠳᠠᠬᠢᠳᠠᠭ᠃
ᠮᠠᠬᠠᠷᠠᠨᠽᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠬᠣᠶᠠᠷ ᠲᠠᠯᠠ ᠳ᠋ᠤᠨᠢ ᠠᠪ ᠠᠳᠠᠯᠢᠬᠠᠨ ᠬᠣᠶᠠᠷ ᠡᠭᠦᠳᠡᠨ ᠦ᠌ ᠠᠰᠠᠷ ᠲᠠᠢ᠂ ᠬᠣᠶᠠᠷ ᠡᠭᠦᠳᠡᠨ ᠠᠰᠠᠷ ᠤ᠋ᠨ ᠠᠷᠤ ᠪᠡᠶᠡ ᠳ᠋ᠦ᠍ ᠵᠢᠷᠭᠤᠭᠠ ᠵᠢᠷᠭᠤᠭᠠᠨ ᠠᠯᠲᠠ ᠶ᠋ᠢᠨ ᠬᠣᠶᠠᠷ ᠴᠠᠭᠠᠨ ᠰᠤᠪᠤᠷᠭᠠ ᠲᠠᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠤᠯᠠᠭᠠᠨ ᠬᠦᠷᠢᠶᠡᠨ ᠦ᠌ ᠡᠷᠭᠢᠨ ᠲᠣᠭᠣᠷᠢᠨ ᠤ᠋ ᠰᠤᠪᠤᠷᠭᠠ᠂ ᠵᠢᠰᠠ᠂ ᠱᠠᠩ᠂ ᠯᠠᠮᠠ ᠨᠠᠷ ᠤ᠋ᠨ ᠣᠷᠣᠨ ᠰᠠᠭᠤᠴᠠ ᠭᠡᠵᠦ ᠪᠢᠰᠢᠭᠦᠢ ᠠᠷᠪᠢᠨ ᠪᠠᠷᠢᠯᠭᠠ ᠪᠠᠢᠭᠰᠠᠨ ᠶᠤᠮ᠃ ᠰᠦᠮᠡ ᠶ᠋ᠢᠨ ᠠᠰ ᠬᠣᠢᠨᠠ ᠠᠷᠪᠠᠨ ᠵᠢᠷᠭᠤᠭᠠᠨ ᠠᠯᠲᠠ ᠶ᠋ᠢᠨ ᠨᠢᠭᠡᠨ ᠴᠠᠭᠠᠨ ᠰᠤᠪᠤᠷᠭᠠ ᠲᠠᠢ ᠃ ᠲᠡᠭᠡᠪᠡᠯ ᠰᠦᠮᠡ ᠶ᠋ᠢᠨ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠪᠤᠩᠬᠤᠨ ᠰᠦᠮᠡ ᠨᠢᠭᠡ᠂ ᠴᠢᠩ ᠰᠦᠰᠦᠭᠲᠦ ᠨᠣᠮ ᠤ᠋ᠨ ᠬᠠᠭᠠᠨ ᠨᠣᠷᠪᠤᠰᠢᠷᠠᠪ ᠤ᠋ᠨ ᠱᠠᠩ ᠠᠷᠪᠠᠨ ᠲᠠᠰᠤᠯᠭᠠ᠂ ᠪᠠᠷᠠᠭᠤᠨ ᠯᠠᠮᠠ ᠶ᠋ᠢᠨ ᠱᠠᠩ ᠠᠷᠪᠠᠨ ᠲᠠᠰᠤᠯᠭᠠ᠂ ᠵᠡᠭᠦᠨ ᠯᠠᠮᠠ ᠶ᠋ᠢᠨ ᠱᠠᠩ ᠨᠠᠢ᠍ᠮᠠᠨ ᠲᠠᠰᠤᠯᠭᠠ ᠂ ᠶᠡᠬᠡ ᠵᠢᠰᠠ ᠬᠣᠷᠢᠨ ᠲᠠᠪᠤᠨ ᠲᠠᠰᠤᠯᠭᠠ᠂ ᠷᠠᠰᠠᠩ ᠵᠢᠰᠠ ᠠᠷᠪᠠ ᠶᠢᠰᠦᠨ ᠲᠠᠰᠤᠯᠭᠠ᠂ ᠨᠥᠩᠨᠡᠢ ᠶ᠋ᠢᠨ ᠵᠢᠰᠠ ᠠᠷᠪᠠᠨ ᠲᠠᠪᠤᠨ ᠲᠠᠰᠤᠯᠭᠠ᠂ ᠯᠠᠮᠠ ᠨᠠᠷ ᠤ᠋ᠨ ᠣᠷᠣᠨ ᠰᠠᠭᠤᠴᠠ ᠭᠡᠵᠦ ᠵᠠᠭᠤ ᠭᠠᠷᠤᠢ ᠲᠠᠰᠤᠯᠭᠠ ᠪᠠᠢᠵᠠᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠪᠠᠢᠭᠤᠯᠤᠮᠵᠢ
ᠬᠠᠯᠬᠠ ᠶ᠋ᠢᠨ ᠰᠠᠢᠨ ᠨᠣᠶᠠᠨ ᠬᠠᠨ ᠠᠢᠮᠠᠭ ᠤ᠋ᠨ ᠴᠢᠩ ᠰᠦᠰᠦᠭᠲᠦ ᠨᠣᠮ ᠤ᠋ᠨ ᠬᠠᠭᠠᠨ ᠨᠣᠷᠪᠤᠰᠢᠷᠷᠪ ᠯᠠᠮᠠ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠵᠠᠰᠠᠭ ᠪᠡᠢᠯᠡ ᠶ᠋ᠢᠨ ᠵᠠᠯᠠᠯᠭᠠ ᠪᠠᠷ ᠢᠷᠡᠵᠦ᠂ ᠶᠠᠰᠢᠯᠲᠤ ᠶ᠋ᠢᠨ ᠳᠤᠭᠠᠩ᠂ ᠪᠦᠷᠢᠳᠦ ᠶ᠋ᠢᠨ ᠳᠤᠭᠠᠩ᠂ ᠰᠢᠷᠠ ᠵᠣᠣ ᠵᠡᠷᠭᠡ ᠭᠤᠷᠪᠠᠨ ᠰᠦᠮᠡ ᠶ᠋ᠢ ᠪᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ ᠬᠠᠯᠬᠠ ᠳ᠋ᠠᠭᠠᠨ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠮᠤᠨᠢ ᠠᠭᠤᠯᠠᠨ ᠳ᠋ᠤ᠌ ᠪᠢᠰᠢᠯᠭᠠᠯ ᠬᠢᠵᠦ ᠪᠠᠢᠭᠰᠠᠨ ᠬᠣᠶᠠᠷ ᠯᠠᠮᠠ ᠲᠠᠢ ᠵᠣᠯᠭᠠᠵᠤ᠂ ᠲᠡᠷᠡ ᠬᠣᠶᠠᠷ ᠯᠠᠮᠠ ᠶ᠋ᠢ ᠲᠣᠮᠢᠯᠠᠵᠤ᠂ ᠰᠢᠷᠠ ᠵᠣᠣ ᠶ᠋ᠢᠨ ᠡᠵᠡᠨ ᠯᠠᠮᠠ ᠪᠣᠯᠭᠠᠵᠠᠢ᠃ ᠡᠨᠡ ᠨᠢ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠬᠣᠶᠠᠷ ᠱᠠᠪᠷᠤᠩ ᠤ᠋ᠨ ᠠᠩᠬᠠ ᠳᠦᠷᠢ ᠪᠣᠯᠬᠤ ᠶᠤᠮ᠃ ᠶᠡᠷᠦ ᠳ᠋ᠡᠭᠡᠨ ᠪᠠᠷᠠᠭᠤᠨ ᠯᠠᠮᠠ᠂ ᠵᠡᠭᠦᠨ ᠯᠠᠮᠠ ᠭᠡᠳᠡᠭ᠃
ᠲᠤᠰ ᠰᠦᠮᠡ ᠳ᠋ᠦ᠍ ᠳᠦᠳᠢᠶᠡ ᠳᠡ ᠯᠠᠮᠠ᠂ ᠳᠡᠳ᠋ ᠳᠦᠳᠢᠶᠡ ᠳᠡ ᠯᠠᠮᠠ᠂ ᠲᠠᠮᠠᠭᠠ ᠬᠠᠮᠢᠶᠠᠷᠤᠭᠴᠢ ᠳᠠ ᠳᠡᠮᠴᠢ᠂ ᠳᠡᠳ᠋ ᠳᠡ ᠳᠡᠮᠴᠢ᠂ ᠳᠡ ᠭᠡᠪᠬᠦᠢ᠂ ᠳᠡ ᠤᠮᠵᠠᠳ᠂ ᠳᠠ ᠭᠣᠨᠢᠷ᠂ ᠳᠠ ᠨᠢᠷᠪᠠ᠂ ᠬᠣᠶᠠᠷ ᠵᠠᠢᠰᠠᠩ ᠢ᠋ᠶ᠋ᠠᠷ ᠪᠦᠷᠢᠯᠳᠦᠭᠰᠡᠨ ᠠᠷᠪᠠᠨ ᠽᠤᠭᠲᠤᠢ ᠲᠠᠢ᠃ ᠡᠭᠦᠨ ᠳ᠋ᠦ᠍᠂ ᠲᠠᠮᠠᠭᠠ ᠬᠠᠮᠢᠶᠠᠷᠤᠭᠴᠢ ᠳᠠ ᠳᠡᠮᠴᠢ ᠶ᠋ᠢ ᠳᠡᠯᠡᠳ ᠬᠤᠰᠢᠭᠤᠨ ᠤ᠋ ᠯᠠᠮᠠ᠂ ᠳᠡᠳ᠋ ᠳᠡ ᠳᠡᠮᠴᠢ ᠶ᠋ᠢ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠯᠠᠮᠠ᠂ ᠳᠦᠳᠢᠶᠡ ᠳᠡ ᠯᠠᠮᠠ ᠶ᠋ᠢ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠯᠠᠮᠠ᠂ ᠳᠡᠳ᠋ ᠳᠦᠳᠢᠶᠡ ᠳᠡ ᠯᠠᠮᠠ ᠶ᠋ᠢ ᠵᠢᠶᠦ᠋ᠨ ᠸᠠᠩ ᠬᠤᠰᠢᠭᠤᠨ ᠤ᠋ ᠯᠠᠮᠠ᠂ ᠳᠠ ᠭᠡᠪᠬᠦᠢ ᠶ᠋ᠢ ᠣᠲᠣᠭ ᠬᠤᠰᠢᠭᠤᠨ ᠤ᠋ ᠯᠠᠮᠠ᠂ ᠳᠠ ᠭᠣᠨᠢᠷ ᠢ᠋ ᠵᠡᠭᠦᠨᠭᠠᠷ ᠬᠤᠰᠢᠭᠤᠨ ᠤ᠋ ᠯᠠᠮᠠ᠂ ᠳᠠ ᠤᠮᠵᠠᠳ ᠢ᠋ ᠵᠠᠰᠠᠭ ᠬᠤᠰᠢᠭᠤᠨ ᠤ᠋( ᠤᠤᠯ ᠳ᠋ᠠᠭᠠᠨ ᠵᠡᠭᠦᠨᠭᠠᠷ ᠬᠤᠰᠢᠭᠤᠨ ᠤ᠋ ᠯᠠᠮᠠ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠣᠵᠢᠮ ᠨᠢ ᠵᠠᠰᠠᠭ ᠬᠤᠰᠢᠭᠤᠨ ᠤ᠋ ᠯᠠᠮᠠ ᠰᠠᠭᠤᠵᠤ ᠪᠣᠯᠵᠠᠢ) ᠯᠠᠮᠠ ᠲᠤᠰ ᠲᠤᠰ ᠰᠠᠭᠤᠳᠠᠭ ᠪᠠᠢᠵᠠᠢ᠃
ᠢᠷᠭᠡᠨ ᠤᠯᠤᠰ ᠤ᠋ᠨ ᠰᠡᠭᠦᠯᠴᠢ ᠪᠡᠷ ᠬᠣᠶᠠᠷ ᠵᠠᠭᠤ ᠭᠠᠷᠤᠢ ᠯᠠᠮᠠ ᠬᠤᠸᠠᠷᠠᠭ ᠲᠠᠢ ᠪᠠᠢᠪᠠ᠃ ᠰᠢᠷᠠ ᠵᠣᠣ ᠰᠦᠮᠡ ᠪᠠᠰᠠ ᠬᠣᠷᠢᠨ ᠨᠢᠭᠡᠨ ᠱᠠᠪᠢ ᠨᠠᠷ ᠡᠷᠦᠬᠡ ᠪᠣᠯᠤᠨ ᠳᠥᠴᠢᠨ ᠲᠠᠪᠤᠨ ᠳᠦᠳᠢᠶᠡ ᠯᠠᠮᠠ ᠶ᠋ᠢ ᠳᠠᠭᠠᠭᠰᠠᠨ ᠳᠥᠴᠢᠨ ᠲᠠᠪᠤᠨ ᠱᠠᠪᠢ ᠨᠠᠷ ᠡᠷᠦᠬᠡ ᠲᠡᠢ᠃ ᠡᠳᠡᠭᠡᠷ ᠱᠠᠪᠢ ᠨᠠᠷ ᠡᠷᠦᠬᠡ ᠳ᠋ᠦ᠍ ᠨᠢᠭᠡ ᠮᠡᠢᠷᠡᠨ ᠵᠡᠷᠭᠡ ᠲᠡᠢ ᠵᠠᠢᠰᠠᠩ᠂ ᠬᠣᠶᠠᠷ ᠪᠣᠱᠣᠭᠣ ᠲᠠᠢ᠃ ᠲᠤᠰ ᠰᠦᠮᠡ ᠶ᠋ᠢᠨ ᠳᠦᠳᠢᠶᠡ ᠯᠠᠮᠠ ᠶ᠋ᠢᠨ ᠶᠠᠮᠤᠨ ᠳ᠋ᠤ᠌ ᠬᠠᠮᠢᠶᠠᠷᠤᠭᠳᠠᠳᠠᠭ ᠱᠠᠪᠢ ᠬᠡᠢᠳ ᠭᠡᠪᠡᠯ ᠤᠯᠠᠭᠠᠨ ᠡᠷᠭᠢ ᠶ᠋ᠢᠨ ᠰᠦᠮᠡ᠂ ᠰᠢᠨᠡᠰᠦᠮᠡ᠂ ᠷᠠᠪᠵᠠᠮᠪᠠ ᠶ᠋ᠢᠨ ᠰᠦᠮᠡ᠂ ᠪᠦᠷᠢᠳᠦ ᠶ᠋ᠢᠨ ᠳᠤᠭᠠᠩ᠂ ᠶᠠᠰᠢᠯᠲᠤ ᠶ᠋ᠢᠨ ᠳᠤᠭᠠᠩ᠂᠂ ᠪᠢᠯᠢᠭᠦᠨ ᠰᠢᠲᠦᠭᠡᠨ ᠰᠦᠮᠡ ᠵᠡᠷᠭᠡ ᠵᠢᠷᠭᠤᠭᠠᠨ ᠰᠦᠮᠡ ᠲᠡᠢ ᠪᠠᠢᠪᠠ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠰᠠᠩ ᠵᠢᠰᠠ
ᠳᠣᠯᠣᠭᠠᠨ ᠬᠤᠰᠢᠭᠤᠨ ᠠ᠋ᠴᠠ ᠡᠵᠡᠨ ᠮᠡᠳᠡᠵᠦ ᠪᠦᠬᠦᠢ ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠵᠠᠩᠷᠠᠭ ᠤ᠋ᠨ ᠭᠠᠵᠠᠷ ᠨᠢ ᠡᠷᠭᠢᠨ ᠲᠣᠭᠣᠷᠢᠨ ᠵᠠᠭᠤ ᠬᠣᠷᠢᠨ ᠭᠠᠵᠠᠷ ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ ᠪᠠᠭᠠᠰᠴᠤ᠂ ᠵᠡᠭᠦᠨᠰᠢ ᠣᠷᠬᠢᠬᠤ ᠪᠤᠯᠠᠭ ᠬᠦᠷᠲᠡᠯᠡ ᠬᠣᠷᠢᠨ ᠭᠠᠵᠠᠷ ᠂ ᠪᠠᠷᠠᠭᠤᠨᠰᠢ ᠶᠡᠬᠡ ᠡᠯᠡᠰᠦᠨ ᠠᠮᠠ ᠬᠦᠷᠲᠡᠯᠡ ᠬᠣᠷᠢᠨ ᠭᠠᠵᠠᠷ᠂ ᠬᠣᠢᠰᠢ ᠪᠠᠨ ᠴᠠᠭᠠᠨ ᠡᠯᠡᠰᠦ( ᠰᠢᠷᠠ ᠶ᠋ᠢᠨ ᠥᠨᠳᠥᠷ) ᠡᠮᠦᠨᠡᠰᠢ ᠰᠢᠷᠭᠠᠳᠤ ᠶ᠋ᠢᠨ ᠬᠣᠰᠢᠭᠤ ᠬᠦᠷᠲᠡᠯᠡ ᠵᠢᠷᠠᠨ ᠭᠠᠵᠠᠷ ᠪᠣᠯᠵᠠᠢ᠃ ᠵᠠᠰᠠᠭ ᠰᠠᠩ ᠤ᠋ᠨ ᠤᠰᠤᠨ ᠲᠠᠷᠢᠶᠠᠨ ᠤ᠋ ᠭᠠᠵᠠᠷ ᠠᠷᠪᠠᠨ ᠴᠢᠩ᠂ ᠵᠢᠯ ᠳ᠋ᠦ᠍ ᠵᠠᠭᠤ ᠬᠣᠷᠢ ᠭᠠᠷᠤᠢ ᠳ᠋ᠠᠨ ᠠᠮᠤ ᠲᠦᠷᠢᠶᠡᠰᠦ ᠬᠤᠷᠢᠶᠠᠳᠠᠭ᠃ ᠵᠢᠰᠠ ᠶ᠋ᠢᠨ ᠪᠤᠭ ᠮᠠᠯ ᠳᠥᠷᠪᠡᠨ ᠮᠢᠩᠭᠠ ᠭᠠᠷᠤᠢ᠂ ᠦᠬᠡᠷ ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ᠂ ᠲᠡᠮᠡᠭᠡ ᠠᠷᠪᠠ᠂ ᠮᠣᠷᠢ ᠠᠷᠪᠠᠨ ᠲᠠᠪᠤᠨ ᠲᠣᠯᠣᠭᠠᠢ ᠪᠠᠢᠵᠠᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠶ᠋ᠢᠨ ᠬᠤᠷᠠᠯ ᠨᠣᠮ
ᠰᠢᠷᠠ ᠵᠣᠣ ᠰᠦᠮᠡ ᠨᠢ ᠴᠠᠭ ᠴᠠᠭ ᠤ᠋ᠨ ᠬᠤᠷᠠᠯ ᠲᠠᠬᠢᠯᠭᠠ ᠲᠠᠰᠤᠯᠳᠠᠳᠠᠭ ᠦᠭᠡᠢ᠂ ᠱᠠᠰᠢᠨ ᠤ᠋ ᠠᠵᠢᠯᠯᠠᠭᠠ ᠬᠥᠭᠵᠢᠶᠡᠨ ᠲᠡᠢ ᠬᠡᠢᠳ ᠦ᠋ᠨ ᠨᠢᠭᠡ ᠪᠢᠯᠡ᠃ ᠵᠢᠯ ᠪᠦᠷᠢ ᠶ᠋ᠢᠨ ᠪᠢᠯᠢᠭ ᠦ᠋ᠨ ᠤᠯᠠᠷᠢᠯ ᠤ᠋ᠨ ᠨᠠᠮᠤᠷ ᠤ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠨᠠᠢ᠍ᠮᠠᠨ ᠠ᠋ᠴᠠ ᠠᠷᠪᠠᠨ ᠲᠠᠪᠤᠨ ᠪᠣᠯᠲᠠᠯᠠ ᠶᠠᠪᠤᠭᠳᠠᠬᠤ ᠮᠠᠨᠢ ᠷᠢᠯᠦ ᠪᠦᠲᠦᠭᠡᠬᠦ ᠮᠥᠩᠬᠡ ᠮᠠᠨᠢ ᠶ᠋ᠢᠨ ᠬᠤᠷᠠᠯ ᠨᠢ ᠬᠡᠪᠴᠢᠶᠡ ᠪᠡᠷ ᠬᠠᠮᠤᠭ ᠤ᠋ᠨ ᠦᠪᠡᠳᠡᠭᠰᠢ ᠶᠡᠬᠡ ᠬᠤᠷᠠᠯ ᠪᠢᠯᠡ᠃ ᠡᠨᠡ ᠬᠤᠷᠠᠯ ᠳᠡᠭᠡᠷᠡ ᠶᠡᠬᠡ ᠴᠠᠮ ᠲᠠᠢ᠃ ᠬᠣᠯᠠ ᠣᠢᠷᠠ ᠠ᠋ᠴᠠ ᠮᠥᠷᠭᠥᠯᠴᠢᠳ ᠰᠦᠰᠦᠭᠲᠡᠨ ᠨᠠᠷ ᠬᠤᠷᠠᠨ ᠴᠤᠭᠯᠠᠷᠠᠵᠤ ᠳᠠᠭᠠᠳᠬᠠᠯ ᠬᠢᠵᠦ᠂ ᠨᠣᠮ ᠬᠤᠷᠠᠯ ᠬᠤᠷᠠᠭᠤᠯᠵᠤ᠂ ᠰᠦᠰᠦᠭ ᠢ᠋ᠶ᠋ᠡᠨ ᠭᠦᠢᠴᠡᠳᠬᠡᠬᠦ ᠨᠢᠭᠡ ᠲᠠᠯᠠ ᠪᠣᠢ ᠭᠡᠬᠦ ᠳ᠋ᠦ᠍ ᠴᠠᠮ ᠪᠥᠵᠢᠭ ᠰᠣᠨᠢᠷᠬᠠᠬᠤ᠂ ᠮᠠᠢᠮᠠᠢ ᠳᠡᠯᠭᠡᠭᠦᠷ ᠬᠡᠰᠦᠬᠦ᠂ ᠪᠥᠬᠡ ᠪᠠᠷᠢᠯᠳᠤᠬᠤ᠂ ᠮᠣᠷᠢ ᠣᠷᠣᠯᠳᠣᠬᠤ᠂ ᠰᠤᠷ ᠬᠠᠷᠪᠤᠬᠤ ᠵᠡᠷᠭᠡ ᠶ᠋ᠢᠨ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠨᠠᠢᠷ ᠨᠠᠭᠠᠳᠤᠮ ᠦᠵᠡᠬᠦ ᠪᠡᠷ ᠢᠷᠡᠵᠡᠭᠡᠳᠡᠭ ᠨᠢᠭᠡ ᠲᠠᠯᠠ ᠴᠤ᠌ ᠪᠣᠢ ᠯᠠ ᠳᠠ᠃ ᠡᠨᠡ ᠬᠤᠷᠠᠯ ᠴᠠᠮ ᠳᠡᠭᠡᠷᠡ ᠥᠭᠯᠢᠭᠡ ᠶ᠋ᠢᠨ ᠡᠵᠡᠳ ᠴᠦ᠍ ᠠᠷᠪᠢᠨ ᠴᠤᠭᠯᠠᠷᠠᠵᠤ᠂ ᠲᠤᠩ ᠶᠡᠬᠡ ᠡᠷᠭᠦᠴᠡ ᠪᠠᠷᠢᠴᠠ ᠪᠠᠢᠳᠠᠭ ᠶᠤᠮ᠃
ᠳᠠᠬᠢᠪᠠᠯ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠬᠤᠷᠠᠯ᠂ ᠭᠠᠨᠵᠤᠤᠷ ᠤ᠋ᠨ ᠬᠤᠷᠠᠯ᠂ ᠲᠠᠷᠠᠪᠠ ᠶ᠋ᠢᠨ ᠬᠤᠷᠠᠯ ᠵᠡᠷᠭᠡ ᠬᠤᠷᠠᠯ ᠤ᠋ᠳ ᠪᠣᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠰᠠᠷᠠ ᠪᠦᠷᠢ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠤ᠋ᠨ ᠲᠠᠬᠢᠯᠭᠠ᠂ ᠰᠠᠷᠠ ᠪᠦᠷᠢ ᠶ᠋ᠢᠨ ᠠᠷᠪᠠᠨ᠂ ᠬᠣᠷᠢᠨ ᠲᠠᠪᠤᠨ ᠤ᠋ ᠰᠣᠭᠯᠤᠤ ᠪᠠᠨ ᠠᠯᠳᠠᠯ ᠦᠭᠡᠢ ᠬᠤᠷᠠᠳᠠᠭ ᠠ᠋ᠴᠠ ᠭᠠᠳᠠᠨᠠ᠂ ᠶᠠᠮᠠᠷ ᠶᠠᠮᠠᠷ ᠬᠤᠷᠠᠯ ᠬᠤᠷᠠᠳᠠᠭ᠂ ᠬᠡᠵᠢᠶᠡ ᠬᠤᠷᠠᠳᠠᠭ ᠢ᠋ ᠨᠢ ᠨᠠᠷᠢᠨ ᠰᠢᠭ᠋ ᠲᠣᠳᠣᠷᠠᠭᠤᠯᠵᠤ ᠶᠠᠷᠢᠮᠠᠷ ᠪᠠᠢᠨᠠ᠃ ᠡᠳᠦᠭᠡ ᠰᠢᠨᠡ ᠵᠢᠯ ᠴᠠᠭᠠᠨ ᠰᠠᠷᠠ ᠠ᠋ᠴᠠ ᠨᠢ ᠡᠬᠢᠯᠡᠨ ᠪᠦᠬᠦ ᠵᠢᠯ ᠦ᠋ᠨ ᠬᠤᠷᠠᠯ ᠨᠣᠮ᠂ ᠲᠠᠬᠢᠯᠭᠠ ᠶ᠋ᠢ ᠲᠣᠭᠠᠴᠢᠰᠤᠭᠠᠢ᠃
ᠰᠢᠷᠠ ᠵᠣᠣ ᠰᠦᠮᠡ ᠥᠭᠡᠯᠵᠢᠨ ᠰᠠᠷᠠ ᠬᠣᠷᠢᠨ ᠳᠥᠷᠪᠡᠨ ᠳ᠋ᠦ᠍ ᠵᠢᠰᠠ᠂ ᠱᠠᠩ ᠭᠠᠯ ᠢ᠋ᠶ᠋ᠠᠨ ᠲᠠᠬᠢᠬᠤ ᠠ᠋ᠴᠠ ᠡᠬᠢᠯᠡᠨ ᠢᠷᠡᠬᠦ ᠪᠦᠬᠦ ᠵᠢᠯ ᠦ᠋ᠨ ᠨᠣᠮ ᠲᠠᠬᠢᠯᠭᠠ ᠶ᠋ᠢᠨ ᠡᠬᠢᠯᠡᠯᠲᠡ ᠶ᠋ᠢᠨ ᠬᠥᠭᠵᠢᠮ ᠢ᠋ᠶ᠋ᠡᠨ ᠡᠷᠭᠦᠴᠢᠬᠡᠬᠦ ᠨᠢ ᠲᠡᠷᠡ᠃ ᠬᠣᠶᠠᠷ ᠶᠢᠰᠦᠨ( ᠭᠤᠴᠢᠨ ᠢ᠋ᠶ᠋ᠠᠷ ᠪᠢᠲᠡᠭᠦᠯᠡᠳᠡᠭ ᠪᠣᠯ ᠪᠢᠲᠡᠭᠦᠨ ᠳ᠋ᠦ᠍) ᠳ᠋ᠦ᠍ ᠬᠠᠭᠤᠴᠢᠨ ᠵᠢᠯ ᠦ᠋ᠨ ᠬᠤᠷᠠᠯ ᠢ᠋ᠶ᠋ᠠᠨ ᠬᠤᠷᠠᠵᠤ᠂ ᠪᠢᠲᠡᠭᠦᠨ ᠦ᠌ ᠪᠦᠲᠦᠨ ᠰᠥᠨᠢ ᠶ᠋ᠢ ᠳᠦᠯᠢᠵᠦ ᠬᠣᠨᠣᠭᠠᠳ᠂ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠦ᠌ ᠥᠷᠯᠥᠭᠡ ᠡᠷᠲᠡ ᠨᠠᠷᠠᠨ ᠮᠠᠨᠳᠤᠬᠤ ᠳ᠋ᠤ᠌ ᠰᠡᠢᠳᠡᠷ ᠡᠷᠭᠦᠳᠡᠭ᠃ ᠲᠡᠭᠡᠭᠡᠳ ᠯᠡ ᠰᠢᠨᠡ ᠶ᠋ᠢᠨ ᠵᠣᠯᠭᠠᠯᠲᠠ ᠪᠠᠨ ᠡᠬᠢᠯᠡᠭᠦᠯᠴᠢᠬᠡᠨᠡ᠃ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠦ᠌ ᠦᠳᠡ ᠶ᠋ᠢᠨ ᠬᠣᠢᠨᠠ ᠨᠢ ᠢᠷᠦᠭᠡᠯ ᠦ᠋ᠨ ᠬᠤᠷᠠᠯ ᠢ᠋ᠶ᠋ᠠᠨ ᠬᠤᠷᠠᠨᠠ᠃
ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠲᠤ᠌ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠲᠠᠬᠢᠯᠭᠠ ᠲᠠᠢ᠃
ᠰᠢᠨᠡ ᠶ᠋ᠢᠨ ᠭᠤᠷᠪᠠᠨ ᠳ᠋ᠤ᠌ ᠪᠠᠷᠠᠭᠤᠨ ᠱᠠᠩ ᠨᠣᠮ ᠢ᠋ᠶ᠋ᠠᠨ ᠱᠠᠩ ᠳ᠋ᠠᠭᠠᠨ ᠤᠩᠰᠢᠴᠢᠬᠠᠭᠠᠳ ᠣᠪᠣᠭᠠᠨ ᠳᠡᠭᠡᠷᠡ ᠰᠠᠩ ᠲᠠᠯᠪᠢᠨ ᠬᠦᠵᠢ ᠵᠤᠯᠠ ᠮᠠᠨᠳᠤᠭᠠᠨ᠂ ᠰᠡᠷᠵᠢᠮ ᠡᠷᠭᠦᠳᠡᠭ᠃ ᠤᠵᠠᠭᠤᠷ ᠲᠤ᠌ ᠰᠢᠨᠡ ᠶ᠋ᠢᠨ ᠭᠤᠷᠪᠠᠨ ᠳ᠋ᠤ᠌ ᠰᠠᠩᠴᠢᠨ ᠳᠠᠬᠢᠵᠤ᠂ ᠯᠠᠮᠠ ᠨᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠪᠥᠬᠡ ᠪᠠᠷᠢᠯᠳᠤᠬᠤ ᠮᠡᠲᠦ ᠶ᠋ᠢᠨ ᠨᠠᠭᠠᠳᠤᠮ ᠡᠭᠦᠰᠬᠡᠳᠡᠭ ᠪᠠᠢᠯᠠ᠃
ᠰᠢᠨᠡ ᠶ᠋ᠢᠨ ᠨᠠᠢ᠍ᠮᠠᠨ ᠳ᠋ᠤ᠌ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠬᠤᠷᠠᠯ ᠡᠬᠢᠯᠡᠴᠢᠬᠡᠳᠡᠭ᠃ ᠰᠢᠨᠡ ᠶ᠋ᠢᠨ ᠨᠠᠢ᠍ᠮᠠᠨ ᠳ᠋ᠤ᠌ ᠡᠬᠢᠯᠡᠭᠰᠡᠨ ᠬᠤᠷᠠᠯ ᠨᠢ ᠠᠷᠪᠠᠨ ᠳᠥᠷᠪᠡᠨ ᠬᠦᠷᠦᠭᠡᠳ ᠶᠢᠰᠦᠨ ᠳᠣᠭᠰᠢᠳ ᠬᠤᠷᠠᠵᠤ ᠨᠢᠭᠡ ᠰᠥᠨᠢ ᠳᠦᠯᠢᠭᠡᠳ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠴᠠᠮ ᠢ᠋ᠶ᠋ᠠᠨ ᠴᠠᠮᠨᠠᠳᠠᠭ( ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠴᠠᠮ ᠴᠠᠮᠨᠠᠬᠤ ᠬᠥᠮᠦᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠪᠦᠲᠦᠨ ᠰᠥᠨᠢ ᠶ᠋ᠢᠨ ᠳᠦᠯᠢᠯᠭᠡ ᠳ᠋ᠦ᠍ ᠣᠷᠣᠯᠴᠠᠳᠠᠭ ᠪᠠᠢᠯᠠ᠃ ᠣᠳᠣ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠤ᠋ ᠴᠠᠮ ᠢ᠋ ᠨᠢ ᠪᠠᠷᠤᠭ ᠴᠠᠮᠨᠠᠵᠤ ᠦᠭᠡᠢ)᠃
ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠠ᠋ᠴᠠ ᠡᠬᠢᠯᠡᠨ ᠪᠤᠮ ᠳ᠋ᠠᠷᠠ (1——2 ᠡᠳᠦᠷ) ᠤᠩᠰᠢᠨᠠ᠃
ᠬᠣᠶᠠᠷ ᠰᠠᠷᠠ ᠶ᠋ᠢᠨ( ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ ᠲᠠᠪᠤᠨ ᠰᠠᠷᠠ) ᠰᠢᠨᠡ ᠶ᠋ᠢᠨ ᠨᠠᠢ᠍ᠮᠠᠨ ᠠ᠋ᠴᠠ ᠡᠬᠢᠯᠡᠨ ᠭᠠᠨᠵᠤᠤᠷ ᠬᠤᠷᠠᠵᠤ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠭᠠᠨᠵᠤᠤᠷ ᠢ᠋ᠶ᠋ᠠᠨ ᠵᠠᠯᠭᠠᠭᠠᠳ ᠬᠠᠷᠠ ᠰᠢᠷᠠ ᠪᠦᠭᠦᠳᠡᠭᠡᠷ ᠨᠡᠢᠯᠡᠨ ᠭᠣᠷᠢᠶᠠ ᠡᠷᠭᠢᠳᠡᠭ᠃
ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠡᠴᠡ ᠠᠷᠪᠠᠨ ᠲᠠᠪᠤᠨ ᠬᠦᠷᠲᠡᠯᠡ ᠲᠠᠷᠠᠪᠠ ᠬᠤᠷᠠᠳᠠᠭ᠃
ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠡᠴᠡ ᠶᠠᠷᠨᠢ ᠬᠤᠷᠠᠳᠠᠭ᠃ ᠤᠵᠠᠭᠤᠷ ᠲᠤ᠌ ᠪᠣᠯ ᠶᠡᠷᠨᠢ ᠳ᠋ᠦ᠍ ᠰᠠᠭᠤᠭᠰᠠᠨ ᠯᠠᠮᠠ ᠳᠥᠴᠢᠨ ᠲᠠᠪᠤ ᠬᠣᠨᠣᠭ ᠭᠤᠷᠢᠶᠠᠨ ᠠ᠋ᠴᠠ ᠭᠠᠷᠤᠯ ᠦᠭᠡᠢ᠂ ᠤᠯᠠᠭᠠᠨ ᠢᠳᠡᠭᠡᠨ ᠢᠳᠡᠳᠡᠭ ᠦᠭᠡᠢ ᠪᠠᠢᠯᠠ᠃
ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠠᠢ᠍ᠮᠠᠨ ᠠ᠋ᠴᠠ ᠡᠬᠢᠯᠡᠨ ᠮᠠᠨᠢ ᠬᠤᠷᠠᠵᠤ᠂ ᠠᠷᠪᠠᠨ ᠳᠥᠷᠪᠡᠨ ᠳ᠋ᠦ᠍ᠨᠢ ᠳᠣᠭᠰᠢᠳ ᠬᠤᠷᠠᠵᠤ᠂ ᠰᠤᠷ ᠢ᠋ᠶ᠋ᠠᠨ ᠵᠠᠯᠠᠭᠠᠳ ᠴᠣᠳᠬᠢᠷ ᠴᠠᠮᠨᠠᠨᠠ᠃ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠶᠡᠬᠡ ᠴᠠᠮ ᠴᠠᠮᠨᠠᠨᠠ᠃ ᠴᠠᠮ ᠢ᠋ᠶ᠋ᠠᠨ ᠴᠠᠮᠨᠠᠵᠤ ᠳᠠᠭᠤᠰᠤᠭᠠᠳ ᠳᠥᠷᠪᠡᠨ ᠵᠦᠭ ᠲᠦ᠍ ᠮᠠᠩᠷᠠᠯ ᠡᠷᠭᠦᠵᠦ ᠲᠠᠬᠢᠯᠭᠠ ᠲᠠᠯᠪᠢᠳᠠᠭ᠃ ᠡᠮᠦᠨᠡ ᠬᠠᠭᠠᠯᠭᠠᠨ ᠳ᠋ᠤ᠌ ᠨᠦᠩᠨᠡᠢ ᠶ᠋ᠢᠨ ᠵᠢᠰᠠ ᠲᠠᠬᠢᠯᠭᠠ ᠡᠷᠭᠦᠳᠡᠭ᠃ ᠪᠠᠷᠠᠭᠤᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠪᠠᠷᠠᠭᠤᠨ ᠱᠠᠩ᠂ ᠵᠡᠭᠦᠨ ᠱᠠᠩ ᠲᠠᠬᠢᠯᠭᠠ ᠲᠠᠯᠪᠢᠳᠠᠭ᠃ ᠬᠣᠢᠲᠤ ᠬᠠᠭᠠᠯᠭᠠᠨ ᠳ᠋ᠤ᠌ ᠷᠠᠰᠠᠩ ᠵᠢᠰᠠ ᠲᠠᠬᠢᠯᠭᠠ ᠲᠠᠯᠪᠢᠵᠤ᠂ ᠵᠡᠭᠦᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠶᠡᠬᠡ ᠵᠢᠰᠠ ᠲᠠᠬᠢᠯᠭᠠ ᠲᠠᠯᠪᠢᠳᠠᠭ᠃ ᠳᠥᠷᠪᠡᠨ ᠵᠦᠭ ᠲᠦ᠍ ᠮᠠᠩᠷᠠᠯ ᠡᠷᠭᠦᠵᠦ ᠲᠠᠬᠢᠯᠭᠠ ᠲᠠᠯᠪᠢᠬᠤ ᠳ᠋ᠠᠭᠠᠨ ᠮᠠᠢᠳᠠᠷᠢ ᠪᠠᠨ ᠵᠠᠯᠠᠵᠤ ᠭᠣᠷᠢᠶᠠ ᠪᠠᠨ ᠡᠷᠭᠢᠳᠡᠭ᠃ ᠴᠠᠮ ᠨᠢ ᠴᠦ᠍ ᠠᠷᠤ ᠠ᠋ᠴᠠ ᠨᠢ ᠳᠠᠭᠠᠵᠤ ᠡᠷᠭᠢᠵᠦ ᠢᠷᠡᠭᠡᠳ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠴᠠᠮ ᠢ᠋ᠶ᠋ᠠᠨ ᠴᠠᠮᠨᠠᠭᠠᠳ ᠲᠠᠷᠬᠠᠳᠠᠭ᠃
ᠠᠷᠪᠠᠨ ᠵᠢᠷᠭᠤᠭᠠᠨ᠂ ᠠᠷᠪᠠᠨ ᠳᠣᠯᠣᠭᠠᠨ ᠬᠣᠶᠠᠷ ᠡᠳᠦᠷ ᠢᠷᠦᠭᠡᠯ ᠦ᠋ᠨ ᠬᠤᠷᠠᠯ ᠬᠤᠷᠠᠨᠠ᠃
ᠳᠣᠯᠣᠭᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠳᠣᠯᠣᠭᠠᠨ ᠠ᠋ᠴᠠ ᠬᠣᠷᠢ ᠶᠢᠰᠦᠨ ᠳ᠋ᠦ᠍ ᠶᠡᠬᠡ ᠵᠢᠰᠠ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠪᠦᠲᠦᠭᠡᠯ ᠲᠡᠢ᠃ ᠵᠢᠷᠭᠤᠭᠠᠨ ᠬᠥᠮᠦᠨ ᠵᠠᠯᠠᠯᠭᠠ ᠪᠠᠷ ᠬᠦᠷᠴᠦ ᠪᠦᠲᠦᠭᠡᠯ ᠬᠢᠳᠡᠭ᠃
ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠳ᠋ᠦ᠍ ᠲᠠᠯᠠᠯᠠᠭᠠ ᠲᠠᠢ᠃
ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠬᠣᠶᠠᠷ ᠤ᠋ᠨ ᠡᠳᠦᠷ ᠰᠤᠪᠠᠭ ᠤ᠋ᠨ ᠳ᠋ᠤᠢᠴᠢᠨ ᠬᠤᠷᠠᠯ ᠲᠠᠢ᠃ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠪᠤᠷᠬᠠᠨ ᠪᠠᠭᠤᠭᠰᠠᠨ ᠡᠳᠦᠷ ᠭᠡᠳᠡᠭ᠃
ᠬᠣᠷᠢᠨ ᠲᠠᠪᠤᠨ ᠳ᠋ᠤᠨᠢ ᠽᠤᠩᠺᠠᠸᠠ ᠶ᠋ᠢᠨ ᠮᠡᠨᠳᠦᠯᠡᠭᠰᠡᠨ ᠵᠤᠯᠠ ᠶ᠋ᠢᠨ ᠬᠤᠷᠠᠯ ᠲᠠᠢ᠃
ᠠᠷᠪᠠᠨ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠠᠷᠪᠠ ᠶᠢᠰᠦᠨ ᠡᠴᠡ ᠭᠣᠮᠪᠣ ᠲᠠᠷᠠᠪᠠ ᠶ᠋ᠢᠨ ᠪᠦᠲᠦᠭᠡᠯ ᠦ᠋ᠨ ᠬᠤᠷᠠᠯ ᠲᠠᠢ᠃ ᠡᠳᠦᠷ ᠰᠥᠨᠢ ᠦᠭᠡᠢ ᠳᠦᠯᠢᠵᠦ ᠬᠤᠷᠠᠭᠠᠳ ᠲᠠᠷᠬᠠᠳᠠᠭ᠃
ᠲᠡᠭᠡᠪᠡᠯ ᠶᠢᠰᠦ ᠡᠬᠢᠯᠡᠭᠰᠡᠨ ᠡᠳᠦᠷ ᠨᠢᠭᠡ ᠡᠳᠦᠷ ᠬᠤᠷᠠᠯ ᠬᠤᠷᠠᠳᠠᠭ᠃
ᠥᠭᠡᠯᠵᠢᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠳ᠋ᠤ᠌ ᠡᠳᠦᠷ ᠰᠥᠨᠢ ᠬᠣᠶᠠᠷ ᠨᠠᠭᠠᠳᠤᠮ ᠲᠠᠯᠪᠢᠳᠠᠭ ᠪᠠᠢᠯᠠ᠃ ᠱᠠᠭᠠ ᠨᠢᠰᠠᠯᠬᠤ᠂ ᠮᠣᠳᠣᠨ ᠫᠠᠢ᠂ ᠪᠤᠭᠤ ᠰᠢᠲᠠᠷᠠ ᠲᠠᠯᠪᠢᠬᠤ ᠮᠡᠲᠦ ᠶ᠋ᠢᠨ ᠨᠡᠯᠢᠶᠡᠳ ᠴᠢᠯᠥᠭᠡᠲᠡᠢ ᠨᠠᠭᠠᠳᠤᠮ ᠪᠣᠯᠳᠠᠭ ᠪᠠᠢᠭᠰᠠᠨ᠃