ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ <ᠠᠷᠪᠠᠨ ᠵᠢᠷᠭᠤᠭᠠ> Хялгасан дөрөөн дээр – Хасвулаг зохиов <16>
227ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ - <ᠠᠷᠪᠠᠨ ᠵᠢᠷᠭᠤᠭᠠ>
ᠲᠦᠪᠰᠢᠨ ᠭᠤᠸᠠᠢ ᠶ᠋ᠢ ᠦᠳᠡ ᠶ᠋ᠢᠨ ᠬᠣᠢᠨᠠ ᠠᠯᠪᠠᠨ ᠭᠡᠷ ᠲᠤ ᠪᠠᠨ ᠢᠷᠡᠬᠦ ᠳ᠋ᠦ᠍᠂ ᠬᠥᠬᠡᠲᠣᠯᠢ ᠪᠢᠴᠢᠭᠡᠴᠢ ᠨᠢᠭᠤᠷ ᠳᠦᠭᠦᠷᠡᠩ ᠪᠠᠶᠠᠷ ᠲᠠᠢ ᠴᠢᠷᠠᠢᠯᠠᠨ ᠡᠮᠦᠨᠡ ᠡᠴᠡ ᠨᠢ ᠤᠭᠲᠤᠨ ᠭᠠᠷᠴᠤ ᠢᠷᠡᠯᠡ᠃ ᠲᠡᠭᠡᠭᠡᠳ ᠲᠡᠷᠡ᠄
— ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠠ᠋᠂ ᠥᠨᠥᠳᠥᠷ ᠪᠢ ᠰᠢᠤᠳᠠᠨ ᠲᠣᠪᠴᠢᠶᠠᠨ ᠠ᠋ᠴᠠ ᠪᠣᠯᠤᠷᠴᠠᠭᠠᠨ ᠤ᠋ ᠠᠪᠤ ᠨᠢ ᠬᠦᠦ ᠳᠦ ᠪᠡᠨ ᠢᠷᠡᠭᠦᠯᠦᠭᠰᠡᠨ ᠨᠢᠭᠡ ᠬᠤᠪᠢ ᠴᠢᠮᠡᠭᠡ ᠶ᠋ᠢ ᠣᠯᠵᠤ ᠠᠪᠤᠯᠠ᠃ ᠡᠨᠡ ᠵᠠᠬᠢᠳᠠᠯ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍᠂ ᠪᠣᠯᠤᠷᠴᠠᠭᠠᠨ ᠠᠷᠪᠠᠨ ᠲᠠᠪᠤᠨ ᠤ᠋ ᠡᠳᠦᠷ ᠦ᠋ᠨ ᠦᠳᠡ ᠶ᠋ᠢᠨ ᠬᠣᠢᠨᠠ ᠭᠡᠷ ᠲᠤ ᠪᠠᠨ ᠬᠠᠷᠢᠬᠤ ᠶ᠋ᠢᠨ ᠡᠮᠦᠨᠡ᠂ ᠣᠨᠣᠪᠴᠢᠲᠠᠢ ᠬᠡᠯᠡᠪᠡᠯ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠬᠤ ᠶ᠋ᠢᠨ ᠡᠮᠦᠨᠡ ᠨᠢᠭᠡ ᠴᠠᠭ ᠤ᠋ᠨ ᠳᠣᠲᠣᠷᠠ ᠨᠢᠭᠡᠨᠲᠡ ᠠᠪᠤ ᠳᠤ ᠪᠠᠨ ᠭᠡᠷᠢᠶᠡᠰ ᠦᠯᠡᠳᠡᠭᠡᠨ ᠵᠣᠭᠣᠰ ᠭᠤᠢᠪᠢᠭᠤᠯᠤᠭᠰᠠᠨ ᠪᠠᠢᠨᠠ᠃ ᠡᠨᠡ ᠨᠢ ᠲᠡᠷᠡ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠬᠤ ᠳᠤ ᠪᠠᠨ ᠨᠠᠷᠢᠨ ᠪᠡᠯᠡᠳᠬᠡᠯ ᠬᠢᠭᠰᠡᠨ ᠢ᠋ ᠬᠠᠷᠠᠭᠤᠯᠵᠤ ᠪᠠᠢᠨᠠ᠃ ᠪᠢᠳᠡ ᠶᠡᠬᠡ ᠡᠷᠡᠭᠡᠯᠵᠡᠨ ᠰᠡᠵᠢᠭᠯᠡᠬᠦ ᠭᠠᠵᠠᠷ ᠦᠭᠡᠢ ᠪᠠᠢᠨᠠ᠃ ᠮᠠᠢ᠂ ᠡᠨᠡ ᠵᠠᠬᠢᠳᠠᠯ ᠢ᠋ ᠦᠵᠡ ᠭᠡᠪᠡ᠃
ᠲᠦᠪᠰᠢᠨ ᠵᠠᠬᠢᠳᠠᠯ ᠢ᠋ ᠠᠪᠴᠤ ᠦᠵᠡᠪᠡᠯ᠄
ᠬᠠᠢᠷᠠᠲᠤ ᠬᠦᠦ ᠪᠣᠯᠣᠷᠴᠠᠭᠠᠨ ᠳ᠋ᠤ᠌᠄
ᠠᠷᠪᠠᠨ ᠳᠥᠷᠪᠡᠨ ᠦ᠌ ᠡᠳᠦᠷ ᠢᠯᠡᠭᠡᠭᠰᠡᠨ ᠮᠢᠩᠭᠠᠨ ᠲᠥᠭᠥᠷᠢᠭ ᠢ᠋ ᠴᠢᠨᠢ ᠣᠯᠵᠤ ᠠᠪᠤᠭᠠᠳ ᠳᠡᠭᠦᠦ ᠶ᠋ᠢ ᠴᠢᠨᠢ ᠳᠠᠭᠠᠭᠤᠯᠤᠨ ᠮᠠᠨᠳᠤᠬᠤ ᠬᠣᠲᠠ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠬᠡᠳᠦᠨ ᠰᠠᠷᠠ ᠡᠮᠨᠡᠭᠦᠯᠦᠭᠡᠳ ᠡᠳᠦᠭᠡ ᠢᠯᠠᠷᠢ ᠪᠣᠯᠤᠯᠠ᠃ ᠰᠠᠨᠠᠭᠠ ᠠᠮᠤᠷ ᠪᠠᠢᠭᠠᠷᠠᠢ᠃ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠳ᠋ᠦ᠍ ᠴᠢᠨᠢ ᠪᠢ ᠶᠡᠷᠦ ᠭᠣᠮᠣᠳᠠᠬᠤ ᠦᠭᠡᠢ᠃ ᠣᠳᠣ ᠰᠠᠷᠠ ᠬᠢᠷᠢᠲᠡᠢ ᠡᠮᠨᠡᠭᠦᠯᠪᠡᠯ ᠪᠢ ᠳᠠᠷᠤᠢ ᠬᠠᠷᠢᠬᠤ ᠪᠣᠯᠤᠨᠠ᠃ ᠪᠤᠰᠤᠳ ᠢ᠋ ᠨᠢ ᠬᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ ᠬᠡᠯᠡᠯᠴᠡᠶᠡ᠃
ᠠᠪᠤ ᠴᠢᠨᠢ
ᠭᠡᠵᠦ ᠳᠥᠬᠥᠮᠬᠡᠨ ᠬᠡᠳᠦᠨ ᠦᠭᠡ ᠪᠢᠴᠢᠭᠰᠡᠨ ᠪᠠᠢᠯᠠ᠃
ᠲᠦᠪᠰᠢᠨ ᠪᠠᠬᠠᠨ ᠭᠠᠢᠬᠠᠰᠬᠢᠨ᠄
— ᠡᠭᠦᠨ ᠡᠴᠡ ᠦᠵᠡᠬᠦ ᠳ᠋ᠦ᠍᠂ ᠪᠣᠯᠤᠷᠴᠠᠭᠠᠨ ᠤ᠋ ᠠᠪᠤ ᠨᠢ ᠣᠳᠣ ᠪᠣᠯᠲᠠᠯᠠ ᠬᠦᠦ ᠨᠢ ᠪᠠᠷᠢᠪᠴᠢᠯᠠᠭᠳᠠᠭᠠᠳ ᠠᠯᠠᠭᠳᠠᠬᠤ ᠶᠠᠯᠠ ᠲᠠᠢ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠡᠳᠦᠢ ᠰᠢᠲᠠ᠃
— ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠪᠣᠯᠤᠨ ᠠᠯᠠᠬᠤ ᠪᠠᠷ ᠲᠣᠭᠲᠠᠭᠰᠠᠨ ᠡᠳᠦᠷ᠂ ᠬᠡᠭᠦᠷ ᠢ᠋ ᠨᠢ ᠠᠪᠬᠤ ᠡᠰᠡᠬᠦ ᠶ᠋ᠢ ᠯᠠᠪᠯᠠᠭᠰᠠᠨ ᠮᠡᠳᠡᠭᠳᠡᠯ ᠢ᠋ ᠪᠦᠷ ᠭᠡᠷ ᠲᠦ᠋ᠨᠢ ᠢᠯᠡᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ᠃ ᠪᠣᠳᠣᠬᠤ ᠳ᠋ᠤ᠌ ᠲᠥᠷᠥᠯ ᠰᠠᠳᠤᠨ ᠨᠢ ᠪᠣᠯᠤᠷᠴᠠᠭᠠᠨ ᠤ᠋ ᠠᠪᠤ ᠶ᠋ᠢᠨ ᠡᠪᠡᠳᠴᠢᠨ ᠳ᠋ᠦ᠍ ᠨᠥᠯᠥᠭᠡ ᠪᠣᠯᠬᠤ ᠠ᠋ᠴᠠ ᠵᠣᠪᠠᠭᠠᠳ ᠬᠡᠯᠡᠭᠰᠡᠨ ᠦᠭᠡᠢ ᠪᠠᠢᠬᠠ᠃ ᠡᠨᠡ ᠴᠤ᠌ ᠦᠷᠭᠦᠯᠵᠢ ᠭᠠᠷᠳᠠᠭ ᠯᠠ ᠦᠵᠡᠭᠳᠡᠯ ᠰᠢᠦ᠃
— ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠠ᠋᠂ ᠪᠣᠯᠤᠷᠴᠠᠭᠠᠨ ᠪᠠᠷᠢᠭᠳᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠡᠨᠡ ᠬᠦ᠌ ᠵᠣᠭᠣᠰᠤᠨ ᠤ᠋ ᠠᠰᠠᠭᠤᠳᠠᠯ ᠢ᠋ ᠶᠡᠷᠦ ᠪᠤᠯᠲᠠᠢᠯᠭᠠᠭᠰᠠᠨ ᠦᠭᠡᠢ᠃ ᠲᠡᠭᠦᠨ ᠦ᠌ ᠪᠣᠳᠣᠯ ᠳᠣᠲᠣᠷᠠ ᠯᠠᠪ ᠴᠢᠳᠬᠥᠷ ᠲᠡᠢ ᠪᠠᠢᠬᠤ᠃ ᠲᠡᠷᠡ ᠡᠨᠡ ᠭᠡᠷᠡᠴᠢ ᠡᠴᠡ ᠪᠡᠨ ᠵᠠᠢᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠣᠯᠠᠨ ᠤᠳᠠᠭᠠᠨ ᠤ᠋ ᠲᠤᠰᠢᠶᠠᠯᠲᠠ ᠳᠤ ᠪᠠᠨ ᠦᠬᠦᠭᠰᠡᠨ ᠡᠬᠡᠨᠡᠷ ᠲᠤ ᠪᠠᠨ ᠭᠦᠵᠢᠷ ᠨᠥᠮᠥᠷᠭᠡᠨ᠂ ᠡᠬᠡᠨᠡᠷ ᠡᠴᠡ ᠨᠢ ᠢᠷᠡᠯ ᠨᠢ ᠲᠣᠳᠣᠷᠬᠠᠢ ᠦᠭᠡᠢ ᠵᠣᠭᠣᠰ ᠭᠠᠷᠴᠤ ᠢᠷᠡᠭᠰᠡᠨ ᠡᠴᠡ ᠬᠥᠯ ᠢ᠋ ᠨᠢ ᠬᠤᠭᠤᠯᠤᠭᠰᠠᠨ ᠭᠡᠳᠡᠭ᠃ ᠲᠡᠭᠦᠨ ᠦ᠌ ᠢᠩᠭᠢᠵᠦ ᠬᠡᠯᠡᠳᠡᠭ ᠦ᠋ᠨ ᠴᠠᠭᠠᠳᠤᠬᠢ ᠰᠠᠨᠠᠭᠠ ᠨᠢ ᠶᠠᠭᠤ ᠪᠣᠯᠬᠤ ᠪᠣᠯ? ᠦᠨᠡᠨ ᠳᠦ ᠪᠡᠨ ᠡᠬᠡᠨᠡᠷ ᠲᠦ᠋ᠨᠢ ᠲᠡᠢᠮᠦ ᠠᠷᠪᠢᠨ ᠵᠣᠭᠣᠰ ᠪᠠᠢᠭᠰᠠᠨ ᠡᠰᠡᠬᠦ ᠶ᠋ᠢ ᠨᠢ ᠴᠤ᠌ ᠪᠠᠢᠴᠠᠭᠠᠭᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠡᠨᠡ ᠲᠤᠬᠠᠢ ᠭᠡᠷᠡᠴᠢ ᠪᠠᠷᠢᠮᠲᠠ ᠪᠠᠰᠠ ᠦᠭᠡᠢ᠃ ᠦᠨᠡᠬᠡᠷ ᠠᠷᠪᠢᠨ ᠵᠣᠭᠣᠰ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠪᠣᠳᠣᠬᠤ ᠳ᠋ᠤ᠌ ᠵᠠᠪᠠᠯ ᠦᠵᠡᠰᠬᠦᠯᠡᠩ ᠢᠩᠭᠢᠵᠦ ᠴᠢᠩᠭᠢᠵᠦ ᠣᠯᠤᠯᠠ ᠭᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠬᠠᠷᠢᠨ ᠪᠣᠯᠤᠷᠴᠠᠭᠠᠨ ᠶᠠᠮᠠᠷ ᠨᠢᠭᠡᠨ ᠪᠤᠵᠠᠷ ᠢᠷᠡᠯ ᠲᠡᠢ ᠵᠣᠭᠣᠰ ᠠᠪᠴᠢᠷᠠᠭᠠᠳ ᠡᠬᠡᠨᠡᠷ ᠲᠤ ᠪᠠᠨ ᠰᠡᠷᠡᠭᠳᠡᠭᠡᠳ ᠵᠣᠳᠣᠯᠴᠠᠭᠰᠠᠨ ᠴᠤ᠌ ᠪᠠᠢᠵᠤ ᠮᠡᠳᠡᠨᠡ᠃ ᠨᠡᠭᠡᠷᠡᠨ ᠨᠢᠳᠦ ᠪᠡᠨ ᠪᠥᠯᠳᠡᠢᠵᠦ ᠪᠠᠢᠭᠠᠳ ᠬᠤᠳᠠᠯ ᠴᠠᠯᠴᠢᠵᠤ ᠪᠠᠢᠬᠤ ᠴᠤ᠌ ᠮᠠᠭᠠᠳ ᠦᠭᠡᠢ᠃ ᠴᠠᠭᠠᠵᠠ ᠶ᠋ᠢᠨ ᠲᠠᠯᠠᠪᠠᠢ ᠠ᠋ᠴᠠ ᠪᠤᠴᠠᠭᠠᠵᠤ ᠠᠪᠴᠢᠷᠠᠭᠰᠠᠨ ᠨᠢ ᠢᠯᠡᠭᠦᠴᠡ᠁ ᠭᠡᠪᠡ᠃
ᠤᠤᠯ ᠨᠢ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠢ᠋ ᠬᠥᠬᠡᠲᠣᠯᠢ ᠰᠢᠭᠦᠬᠦ ᠬᠣᠷᠢᠶᠠᠨ ᠤ᠋ ᠰᠢᠭᠦᠭᠴᠢ ᠶ᠋ᠢᠨ ᠬᠤᠪᠢ ᠪᠠᠷ ᠭᠠᠷᠳᠠᠨ ᠠᠪᠤᠭᠠᠳ᠂ ᠪᠠᠢᠴᠠᠭᠠᠨ ᠬᠢᠨᠠᠵᠤ ᠢᠯᠡ ᠪᠡᠷ ᠰᠢᠭᠦᠨ᠂ ᠲᠣᠳᠣᠷᠬᠠᠢ ᠬᠡᠷᠡᠭ ᠢ᠋ᠶ᠋ᠡᠷ ᠬᠢᠨᠠᠨ ᠪᠠᠲᠤᠯᠠᠵᠤ ᠬᠠᠷᠢᠭᠤ ᠮᠡᠳᠡᠭᠦᠯᠦᠭᠡᠳ᠂ ᠵᠠᠭᠠᠯᠳᠤᠯᠭᠠ ᠪᠠᠨ ᠳᠡᠭᠡᠳᠦ ᠱᠠᠲᠤᠨ ᠳ᠋ᠤ᠌ ᠳᠠᠮᠵᠢᠭᠤᠯᠤᠨ ᠵᠥᠪᠰᠢᠶᠡᠷᠡᠭᠦᠯᠦᠭᠰᠡᠨ ᠶᠦᠮ᠃
ᠡᠢᠮᠦ ᠡᠴᠡ ᠵᠠᠯᠠᠭᠤ ᠰᠢᠭᠦᠭᠴᠢ ᠴᠠᠭᠠᠨᠠ ᠠ᠋ᠴᠠ ᠪᠠᠨ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠲᠦ᠍ ᠳᠠᠬᠢᠨ ᠣᠨᠴᠠᠭᠠᠢ ᠶᠡᠬᠡ ᠬᠤᠪᠢᠷᠠᠯᠲᠠ ᠭᠠᠷᠬᠤ ᠶ᠋ᠢ ᠢᠲᠡᠭᠡᠬᠦ ᠦᠭᠡᠢ ᠮᠥᠷᠲᠡᠭᠡᠨ ᠭᠠᠷᠬᠤ ᠶ᠋ᠢ ᠴᠤ᠌ ᠬᠦᠰᠡᠬᠦ ᠦᠭᠡᠢ ᠪᠠᠢᠯᠠ᠃
ᠣᠷᠴᠢᠮ ᠤ᠋ᠨ ᠡᠳᠦᠷ ᠦ᠋ᠳ ᠦ᠋ᠨ ᠪᠠᠢᠴᠠᠭᠠᠯᠲᠠ ᠳᠤᠮᠳᠠ ᠪᠠᠭᠠ ᠰᠠᠭᠠ ᠴᠤ᠌ ᠪᠣᠯᠤᠭ ᠤᠤᠯ ᠬᠡᠷᠡᠭ ᠢ᠋ ᠪᠠᠲᠤᠳᠬᠠᠬᠤ ᠬᠠᠮᠢᠶᠠᠲᠠᠢ ᠭᠡᠷᠡᠴᠢ ᠪᠠᠷᠢᠮᠲᠠ ᠢᠯᠡᠷᠡᠬᠦ ᠪᠦᠷᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠤᠭ ᠦᠵᠡᠯᠲᠡ ᠪᠡᠨ ᠪᠠᠷᠢᠮᠲᠠᠯᠠᠬᠤ ᠰᠠᠨᠠᠭᠠ ᠦᠭᠡ ᠶᠠᠷᠢᠶᠠᠨ ᠳᠤ ᠪᠠᠨ ᠢᠯᠡᠷᠡᠭᠦᠯᠳᠡᠭ ᠪᠠᠢᠯᠠ᠃
ᠲᠦᠪᠰᠢᠨ ᠡᠨᠡ ᠬᠦ᠌ ᠦᠵᠡᠯ ᠰᠠᠨᠠᠭᠠᠨ ᠤ᠋ ᠥᠪᠡᠷᠮᠢᠴᠡ ᠪᠠᠢᠳᠠᠯ ᠢ᠋ ᠠᠯᠢ ᠡᠷᠲᠡ ᠦᠵᠡᠵᠦ ᠭᠠᠷᠴᠠᠢ᠃ ᠡᠴᠦᠰ ᠦ᠋ᠨ ᠦᠷᠡ ᠳ᠋ᠦᠩ ᠭᠠᠷᠬᠤ ᠠ᠋ᠴᠠ ᠡᠮᠦᠨᠡ ᠢᠩᠭᠢᠵᠦ ᠪᠣᠳᠣᠵᠤ ᠰᠡᠳᠬᠢᠬᠦ ᠶ᠋ᠢ ᠪᠤᠷᠤᠭᠤ ᠭᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠬᠤ ᠳᠤ ᠪᠠᠨ ᠬᠠᠶᠠᠭᠠᠨ ᠳ᠋ᠤᠨᠢ ᠬᠠᠶᠠᠵᠤ ᠳᠤᠷᠠ ᠪᠠᠷ ᠨᠢ ᠶᠠᠷᠢᠭᠤᠯᠳᠠᠭ ᠪᠠᠢᠪᠠ᠃
ᠥᠨᠥᠳᠥᠷ ᠴᠤ᠌ ᠲᠦᠪᠰᠢᠨ ᠭᠤᠸᠠᠢ ᠬᠥᠬᠡᠲᠣᠯᠢ ᠶ᠋ᠢᠨ ᠵᠠᠬᠢᠳᠠᠯ ᠠ᠋ᠴᠠ ᠵᠦᠢᠴᠢᠯᠡᠭᠰᠡᠨ ᠲᠠᠢᠯᠪᠤᠷᠢ ᠶ᠋ᠢ ᠰᠣᠨᠣᠰᠤᠭᠰᠠᠨ ᠡᠰᠡᠬᠦ ᠶ᠋ᠢᠨ ᠬᠣᠭᠣᠷᠣᠨᠳᠣ ᠥᠩᠭᠡᠷᠡᠵᠦ᠂ ᠪᠣᠯᠤᠷᠴᠠᠭᠠᠨ ᠤ᠋ ᠠᠪᠤ ᠶ᠋ᠢᠨ ᠬᠢᠨᠢ ᠵᠠᠬᠢᠳᠠᠯ ᠢ᠋ ᠪᠤᠴᠠᠭᠠᠨ ᠭᠠᠷᠳᠠᠭᠤᠯᠤᠭᠠᠳ᠄
— ᠴᠢ ᠡᠳᠡᠭᠡᠷ ᠠᠰᠠᠭᠤᠳᠠᠯ ᠢ᠋ ᠰᠠᠢᠲᠤᠷ ᠪᠠᠢᠴᠠᠭᠠᠭᠰᠠᠨ ᠤᠤ? ᠭᠡᠵᠦ ᠨᠠᠮᠵᠢᠭᠤᠬᠠᠨ ᠠᠰᠠᠭᠤᠪᠠ᠃
ᠬᠥᠬᠡᠲᠣᠯᠢ ᠲᠦᠪᠰᠢᠨ ᠦ᠌ ᠦᠭᠡ ᠶ᠋ᠢ ᠭᠠᠵᠠᠷ ᠰᠢᠷᠤᠢᠳᠠᠭᠤᠯᠤᠯ ᠦᠭᠡᠢ ᠡᠯᠭᠦᠨ ᠠᠪᠴᠤ᠄
— ᠪᠠᠢᠴᠠᠭᠠᠵᠠᠢ᠃ ᠪᠢ ᠥᠨᠥᠳᠥᠷ ᠬᠣᠲᠠ ᠶ᠋ᠢᠨ ᠰᠢᠤᠳᠠᠨ ᠭᠠᠵᠠᠷ ᠣᠴᠢᠵᠤ ᠲᠡᠭᠦᠨ ᠦ᠌ ᠠᠪᠤ ᠳᠤ ᠪᠠᠨ ᠪᠢᠴᠢᠭᠰᠡᠨ ᠲᠦᠷᠭᠡᠨ ᠴᠠᠬᠢᠯᠭᠠᠨ ᠤ᠋ ᠡᠬᠡ ᠨᠣᠣᠷᠠᠭ ᠪᠣᠯᠤᠨ ᠵᠣᠭᠣᠰ ᠭᠤᠢᠪᠢᠭᠤᠯᠤᠭᠰᠠᠨ ᠭᠠᠷᠳᠠᠮ ᠢ᠋ ᠨᠢ ᠣᠯᠵᠤ ᠠᠪᠴᠠᠢ᠃ ᠲᠠ ᠡᠨᠡ ᠲᠡᠮᠳᠡᠭᠯᠡᠯ ᠢ᠋ ᠦᠵᠡᠯ ᠳᠡ ᠭᠡᠳ ᠪᠠᠢᠴᠠᠭᠠᠯᠲᠠ ᠶ᠋ᠢᠨ ᠨᠢᠭᠤᠴᠠ ᠲᠡᠮᠳᠡᠭᠯᠡᠯ ᠭᠡᠬᠦ ᠪᠢᠴᠢᠭᠡᠰᠦ ᠲᠡᠢ ᠬᠥᠬᠡ ᠬᠠᠪᠲᠠᠰᠤ ᠶ᠋ᠢ ᠭᠠᠷᠳᠠᠭᠤᠯᠪᠠ᠃
ᠲᠦᠷᠭᠡᠨ ᠴᠠᠬᠢᠯᠭᠠᠨ ᠳᠤ ᠪᠠᠨ
ᠬᠦᠨᠳᠦᠳᠦ ᠠᠪᠤ ᠲᠠᠨᠠ᠄
ᠡᠪᠡᠳᠴᠢᠯᠡᠭᠰᠡᠨ ᠢ᠋ ᠲᠠᠨᠢ ᠰᠣᠨᠣᠰᠤᠭᠠᠳ ᠰᠦᠷᠡᠬᠡᠢ ᠵᠣᠪᠠᠯᠠ᠃ ᠭᠡᠲᠡᠯᠡ ᠠᠵᠢᠯ ᠶᠠᠭᠠᠷᠠᠤ ᠶ᠋ᠢᠨ ᠬᠠᠷᠠᠭᠠ ᠪᠠᠷ ᠣᠴᠢᠵᠤ ᠠᠮᠵᠢᠬᠤ ᠦᠭᠡᠢ ᠪᠣᠯᠤᠯᠠ᠃ ᠠᠪᠤ ᠮᠢᠨᠢ ᠪᠢᠲᠡᠭᠡᠢ ᠭᠣᠮᠣᠳᠠᠭᠠᠷᠠᠢ! ᠲᠠ ᠳᠡᠭᠦᠦ ᠶ᠋ᠢ ᠳᠠᠭᠠᠭᠤᠯᠵᠤ ᠲᠦᠷᠭᠡᠨ ᠶᠠᠪᠤᠵᠤ ᠡᠮᠨᠡᠭᠦᠯ᠃ ᠮᠢᠨᠦ ᠪᠣᠳᠣᠬᠤ ᠪᠠᠷ ᠮᠠᠨᠳᠤᠬᠤ ᠬᠣᠲᠠ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠣᠴᠢᠵᠤ ᠦᠵᠡᠭᠦᠯᠪᠡᠯ ᠳᠡᠭᠡᠷᠡ ᠪᠠᠢᠬᠠ᠃ ᠮᠠᠨ ᠤ᠋ ᠬᠣᠷᠢᠶᠠ ᠨᠠᠰᠤᠲᠠᠢᠴᠤᠳ ᠢ᠋ ᠡᠮᠨᠡᠬᠦ ᠨᠥᠬᠥᠴᠡᠯ ᠢ᠋ᠶ᠋ᠡᠷ ᠲᠡᠨᠳᠡᠬᠢ ᠳ᠋ᠦ᠍ ᠬᠦᠷᠬᠦ ᠦᠭᠡᠢ ᠰᠢᠦ᠃ ᠵᠠᠮ ᠳᠤ ᠪᠠᠨ ᠪᠡᠶᠡ ᠪᠡᠨ ᠢᠯᠡᠭᠦᠬᠡᠨ ᠬᠢᠴᠢᠶᠡᠭᠡᠷᠡᠢ᠃ ᠬᠠᠷᠢᠭᠤ ᠵᠠᠬᠢᠳᠠᠯ ᠪᠢᠴᠢᠭᠰᠡᠨ ᠦ᠌ ᠬᠡᠷᠡᠭ ᠦᠭᠡᠢ᠃ ᠢᠩᠭᠢᠵᠦ ᠴᠢᠩᠭᠢᠵᠦ ᠪᠠᠢᠭᠠᠳ ᠴᠠᠭ ᠢ᠋ ᠰᠠᠭᠠᠲᠠᠭᠠᠵᠤ ᠡᠪᠡᠳᠴᠢᠨ ᠢ᠋ᠶ᠋ᠡᠨ ᠪᠤᠤ ᠬᠦᠨᠳᠦᠷᠡᠭᠦᠯᠴᠢᠬᠡ ᠳᠡ᠃ ᠡᠷᠲᠡᠬᠡᠨ ᠶᠠᠪᠤᠭᠠᠷᠠᠢ! ᠳᠠᠭᠠᠯᠳᠤᠭᠤᠯᠤᠨ ᠮᠢᠩᠭᠠᠨ ᠲᠥᠭᠥᠷᠢᠭ ᠭᠤᠢᠪᠢᠭᠤᠯᠪᠠ᠃ ᠡᠷᠲᠡᠬᠡᠨ ᠡᠷᠡᠭᠦᠯ ᠪᠣᠯᠬᠤ ᠶ᠋ᠢ ᠲᠠᠨᠢ ᠢᠷᠥᠭᠡᠶᠡ!
ᠬᠦᠦ ᠴᠢᠨᠢ ᠪᠣᠯᠤᠷᠴᠠᠭᠠᠨ
ᠭᠡᠰᠡᠨ ᠪᠠᠢᠯᠠ᠃ ᠳᠣᠣᠷᠠ ᠨᠢ ᠰᠢᠤᠳᠠᠨ ᠲᠣᠪᠴᠢᠶᠠᠨ ᠤ᠋ ᠲᠦᠷᠭᠡᠨ ᠴᠠᠬᠢᠯᠭᠠᠨ ᠭᠠᠷᠳᠠᠭᠰᠠᠨ ᠴᠠᠭ ᠢ᠋ ᠣᠷᠣᠢ ᠶ᠋ᠢᠨ ᠲᠠᠪᠤᠨ ᠴᠠᠭ ᠬᠣᠷᠢᠨ ᠳᠣᠯᠣᠭᠠᠨ ᠮᠢᠨᠦ᠋ᠲ ᠭᠡᠵᠦ ᠪᠢᠴᠢᠵᠦ ᠪᠠᠢᠯᠠ᠃
ᠡᠨᠡ ᠨᠢ ᠨᠡᠭᠡᠷᠡᠨ ᠬᠥᠬᠡᠲᠣᠯᠢ ᠶ᠋ᠢᠨ ᠬᠡᠯᠡᠭᠰᠡᠨ ᠰᠢᠭ ᠢ᠋ᠶ᠋ᠡᠷ ᠦᠵᠡᠰᠬᠦᠯᠡᠩ ᠬᠣᠣᠷᠯᠠᠭᠳᠠᠬᠤ ᠠ᠋ᠴᠠ ᠨᠢᠭᠡ ᠴᠠᠭ ᠭᠠᠷᠤᠢ ᠶ᠋ᠢᠨ ᠡᠮᠦᠨᠡᠬᠢ ᠶᠠᠪᠤᠳᠠᠯ ᠪᠠᠢᠪᠠ᠃ ᠵᠣᠭᠣᠰ ᠭᠤᠢᠪᠢᠭᠤᠯᠤᠭᠰᠠᠨ ᠭᠠᠷᠳᠠᠮ ᠳᠡᠭᠡᠷᠡ ᠴᠤ᠌ ᠪᠣᠯᠤᠷᠴᠠᠭᠠᠨ ᠤ᠋ ᠨᠡᠷᠡ ᠶ᠋ᠢ ᠳᠤᠷᠠᠢᠲᠠᠯᠠ ᠪᠢᠴᠢᠵᠦ ᠪᠠᠢᠪᠠ᠃
ᠲᠦᠪᠰᠢᠨ ᠲᠡᠮᠳᠡᠭᠯᠡᠯ ᠢ᠋ ᠦᠵᠡᠵᠦ ᠪᠠᠢᠬᠤ ᠳ᠋ᠤ᠌ ᠬᠥᠬᠡᠲᠣᠯᠢ᠄
— ᠪᠢ ᠪᠣᠯᠤᠷᠴᠠᠭᠠᠨ ᠤ᠋ ᠬᠡᠷᠡᠭ ᠦ᠋ᠨ ᠡᠪᠬᠡᠮᠡᠯ ᠢ᠋ ᠳᠠᠬᠢᠨ ᠡᠷᠭᠢᠭᠦᠯᠵᠦ ᠦᠵᠡᠬᠦᠯᠡ ᠲᠡᠷᠡ ᠲᠤᠰ ᠡᠳᠦᠷ ᠦ᠋ᠨ ᠲᠠᠪᠤᠨ ᠴᠠᠭ ᠤ᠋ᠨ ᠦᠶᠡ ᠪᠡᠷ ᠠᠵᠢᠯ ᠠ᠋ᠴᠠ ᠪᠠᠨ ᠪᠠᠭᠤᠵᠠᠢ᠃ ᠪᠢ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠠ᠋ᠴᠠ ᠭᠠᠷᠤᠭᠠᠳ ᠰᠢᠤᠳᠠᠨ ᠲᠣᠪᠴᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠴᠠᠬᠢᠯᠭᠠᠨ ᠭᠤᠢᠪᠢᠭᠤᠯᠬᠤ ᠬᠠᠭᠤᠳᠠᠰᠤ ᠳᠡᠭᠡᠷᠡ ᠲᠡᠢᠮᠦ ᠨᠢᠭᠡ ᠳᠥᠭᠥᠮ ᠵᠠᠬᠢᠳᠠᠯ ᠪᠢᠴᠢᠭᠡᠳ ᠲᠤᠰᠢᠶᠠᠬᠤ ᠳ᠋ᠤ᠌ ᠴᠣᠬᠣᠮ ᠬᠡᠳᠦᠢ ᠴᠠᠭ ᠣᠷᠣᠬᠤ ᠶ᠋ᠢ ᠲᠤᠰᠬᠠᠢᠯᠠᠨ ᠲᠤᠷᠰᠢᠵᠤ ᠦᠵᠡᠬᠦ ᠳ᠋ᠦ᠍ ᠬᠣᠷᠢ ᠭᠠᠷᠤᠢ ᠮᠢᠨᠦ᠋ᠲ ᠪᠣᠯᠤᠭᠰᠠᠨ᠃ ᠢᠩᠭᠢᠬᠦᠯᠡ ᠡᠳᠡᠭᠡᠷ ᠨᠢ ᠴᠠᠭ ᠤ᠋ᠨ ᠲᠠᠯᠠ ᠪᠠᠷ ᠵᠦᠷᠢᠶᠡᠨ ᠦᠭᠡᠢ᠃ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠬᠥᠮᠦᠰ ᠦ᠋ᠨ ᠬᠡᠯᠡᠯᠴᠡᠬᠦ ᠪᠡᠷ ᠬᠡᠷᠡᠭ ᠭᠠᠷᠬᠤ ᠶ᠋ᠢᠨ ᠡᠮᠦᠨᠡ ᠬᠣᠶᠠᠷ ᠡᠳᠦᠷ ᠪᠣᠯᠤᠷᠴᠠᠭᠠᠨ ᠤ᠋ ᠰᠡᠳᠬᠢᠯ ᠮᠠᠰᠢ ᠶᠡᠬᠡ ᠳᠠᠷᠤᠭᠠᠰᠤ ᠲᠠᠢ ᠪᠠᠢᠭᠰᠠᠨ ᠭᠡᠨᠡ᠃ ᠲᠡᠷᠡ ᠵᠠᠬᠢᠳᠠᠯ ᠳᠤ ᠪᠠᠨ ᠠᠪᠤ ᠪᠠᠨ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠳ᠋ᠤ᠌ ᠢᠷᠡᠬᠦ ᠶ᠋ᠢ ᠢᠳᠬᠠᠨ ᠬᠣᠷᠢᠭᠯᠠᠵᠤ᠂ ᠮᠠᠨᠳᠤᠬᠤ ᠬᠣᠲᠠ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠪᠠᠷ ᠠᠷᠭᠠᠯᠠᠭᠰᠠᠨ ᠨᠢ ᠬᠣᠵᠢᠮ ᠨᠢ ᠪᠣᠯᠬᠤ ᠦᠢᠯᠡ ᠬᠡᠷᠡᠭ ᠨᠠᠰᠤᠲᠠᠨ ᠤ᠋ ᠰᠡᠳᠬᠢᠯᠭᠡ ᠶ᠋ᠢ ᠥᠩᠭᠡᠷᠡᠦ ᠵᠣᠪᠠᠭᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠭᠰᠠᠨ ᠪᠠᠢᠵᠤ ᠮᠡᠳᠡᠨᠡ᠃ ᠦᠨᠡᠨ ᠢ᠋ ᠬᠡᠯᠡᠪᠡᠯ ᠲᠦᠮᠡᠨᠨᠠᠰᠤᠲᠤ ᠬᠣᠲᠠ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠨᠥᠬᠥᠴᠡᠯ ᠮᠠᠨᠳᠤᠬᠤ ᠬᠣᠲᠠ ᠶ᠋ᠢᠨ ᠬᠢ ᠡᠴᠡ ᠬᠣᠯᠠ ᠳᠡᠭᠡᠷᠡ ᠶᠦᠮ᠃ ᠨᠠᠭᠠᠳᠤ ᠵᠠᠬᠠ ᠳᠤ ᠪᠠᠨ ᠵᠠᠮ ᠨᠢ ᠮᠠᠨᠳᠤᠬᠤ ᠬᠣᠲᠠ ᠬᠦᠷᠬᠦ ᠡᠴᠡ ᠣᠢᠷᠠ ᠰᠢᠳᠡ᠃ ᠲᠢᠩᠬᠢᠮ ᠦ᠋ᠨ ᠳᠠᠷᠤᠭᠠ ᠠ᠋᠂ ᠲᠠ ᠡᠨᠡ ᠴᠠᠬᠢᠯᠭᠠᠨ ᠮᠡᠳᠡᠭᠡᠨ ᠦ᠌ ᠡᠬᠡ ᠨᠣᠣᠷᠠᠭ ᠤ᠋ᠨ ᠭᠠᠷ ᠤ᠋ᠨ ᠲᠢᠭ ᠢ᠋ ᠦᠵᠡᠭᠡᠴᠢ᠂ ᠬᠡᠳᠦᠢ ᠶᠠᠭᠠᠷᠠᠤ ᠰᠠᠨᠳᠤᠷᠤᠤ ᠪᠢᠴᠢᠭᠰᠡᠨ ᠪᠣᠢ᠃ ᠲᠡᠰᠢᠶᠡ ᠦᠰᠦᠭ ᠪᠣᠯᠤᠨ ᠭᠦᠶᠦᠯᠭᠡᠨ ᠲᠠᠲᠠᠯᠠᠭᠰᠠᠨ ᠠ᠋ᠴᠠ ᠨᠢ ᠦᠵᠡᠪᠡᠯ᠂ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠶᠠᠭᠠᠷᠠᠭᠰᠠᠨ ᠢ᠋ ᠨᠢ ᠪᠣᠳᠣᠯᠬᠢᠯᠠᠭᠤᠰᠢᠲᠠᠢ ᠰᠢᠦ! ᠭᠡᠵᠦ ᠶᠠᠷᠢᠵᠤ ᠪᠠᠷᠠᠬᠤ ᠳ᠋ᠤ᠌ ᠲᠦᠪᠰᠢᠨ᠄
— ᠪᠣᠯᠤᠷᠴᠠᠭᠠᠨ ᠤ᠋ ᠭᠡᠷ ᠡᠴᠡ ᠰᠢᠤᠳᠠᠨ ᠲᠣᠪᠴᠢᠶᠠ ᠬᠦᠷᠬᠦ ᠪᠣᠯᠤᠨ ᠬᠣᠲᠠ ᠶ᠋ᠢᠨ ᠭᠤᠷᠪᠠᠳᠤᠭᠠᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠠ᠋ᠴᠠ ᠰᠢᠤᠳᠠᠨ ᠲᠣᠪᠴᠢᠶᠠ ᠬᠦᠷᠬᠦ ᠵᠠᠢ ᠠᠯᠢ ᠨᠢ ᠬᠣᠯᠠ ᠪᠣᠢ? ᠭᠡᠵᠦ ᠭᠡᠨᠡᠳᠲᠡ ᠠᠰᠠᠭᠤᠪᠠ᠃
— ᠪᠠᠷᠤᠭ ᠠᠳᠠᠯᠢᠪᠲᠤᠷ᠃
— ᠴᠢ ᠡᠨᠡ ᠲᠦᠷᠭᠡᠨ ᠴᠠᠬᠢᠯᠭᠠᠨ ᠤ᠋ ᠡᠬᠡ ᠨᠣᠣᠷᠠᠭ ᠢ᠋ ᠪᠣᠯᠤᠷᠴᠠᠭᠠᠨ ᠤ᠋ ᠭᠠᠷ ᠤ᠋ᠨ ᠲᠢᠭ ᠲᠡᠢ ᠬᠠᠷᠢᠴᠠᠭᠤᠯᠤᠨ ᠪᠠᠢᠴᠠᠭᠠᠭᠰᠠᠨ ᠤᠤ?
— ᠦᠭᠡᠢ᠂ ᠮᠢᠨᠦ ᠪᠣᠳᠣᠬᠤ ᠪᠠᠷ ᠥᠭᠡᠷᠡ ᠬᠥᠮᠦᠨ ᠪᠣᠯᠤᠷᠴᠠᠭᠠᠨ ᠤ᠋ ᠨᠡᠷᠡ ᠪᠡᠷ ᠠᠪᠤ ᠳ᠋ᠤᠨᠢ ᠮᠢᠩᠭᠠᠨ ᠲᠥᠭᠥᠷᠢᠭ ᠥᠭᠬᠦ ᠪᠣᠯᠤᠯᠴᠠᠭᠠ ᠠᠷᠠᠢ ᠦᠭᠡᠢ ᠪᠠᠢᠬᠠ᠃
— ᠦᠵᠡᠰᠬᠦᠯᠡᠩ ᠥᠭᠴᠦ ᠪᠣᠯᠤᠨᠠ ᠰᠢᠲᠠ᠃
— ᠲᠡᠷᠡ ᠬᠣᠶᠠᠭᠤᠯᠠ ᠲᠡᠭᠡᠵᠦ ᠵᠣᠳᠣᠯᠴᠠᠵᠤ ᠴᠤᠤᠭᠢᠭᠠᠳ ᠶᠠᠪᠤᠳᠠᠯ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠦᠵᠡᠰᠬᠦᠯᠡᠩ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠬᠢᠬᠦ ᠪᠣᠢ? ᠪᠠᠰᠠ ᠬᠥᠯ ᠨᠢ ᠬᠤᠭᠤᠷᠠᠭᠠᠳ ᠬᠡᠪᠲᠡᠷᠢ ᠳᠦ ᠪᠡᠨ ᠪᠠᠢᠭᠰᠠᠨ ᠶᠤᠮ ᠴᠢᠨᠢ᠂ ᠢᠩᠭᠢᠵᠦ ᠬᠢᠬᠦ ᠪᠣᠯᠤᠯᠴᠠᠭᠠ ᠦᠭᠡᠢ᠃
— ᠴᠢ ᠣᠴᠢᠵᠤ ᠪᠠᠢᠴᠠᠭᠠᠭᠠᠷᠠᠢ᠃ ᠡᠨᠡ ᠬᠦ᠌ ᠨᠣᠣᠷᠠᠭ ᠳᠠᠬᠢ ᠭᠠᠷ ᠤ᠋ᠨ ᠲᠢᠭ ᠪᠣᠯᠤᠷᠴᠠᠭᠠᠨ ᠤ᠋ ᠬᠢ ᠪᠢᠰᠢ ᠪᠠᠢᠬᠤ ᠶᠣᠰᠣᠲᠠᠢ᠃
— ᠪᠢ ᠢᠲᠡᠭᠡᠬᠦ ᠦᠭᠡᠢ᠃ ᠭᠡᠪᠡᠴᠦ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠣᠴᠢᠵᠤ ᠪᠠᠢᠴᠠᠭᠠᠶᠠ᠃
— ᠬᠡᠷᠡᠭ ᠦᠭᠡᠢ᠃ ᠬᠣᠵᠢᠮ ᠲᠣᠬᠢᠶᠠᠯ ᠲᠠᠭᠠᠷᠠᠭᠤᠯᠤᠨ ᠪᠠᠢᠴᠠᠭᠠᠵᠤ ᠦᠵᠡ᠃ ᠴᠢ ᠨᠢᠭᠡᠳᠦᠭᠡᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠳᠠᠩᠰᠠ ᠡᠪᠬᠡᠮᠡᠯ ᠢ᠋ ᠪᠠᠢᠴᠠᠭᠠᠪᠠ ᠤᠤ?
— ᠪᠠᠢᠴᠠᠭᠠᠵᠠᠢ᠃ ᠡᠨᠡ ᠬᠣᠷᠢᠶᠠᠨ ᠤ᠋ ᠡᠮᠨᠡᠯᠭᠡ ᠶ᠋ᠢᠨ ᠰᠦᠢᠳᠬᠡᠯ ᠡᠨᠡ ᠲᠡᠷᠡ ᠭᠡᠳ ᠵᠣᠭᠣᠰ ᠮᠥᠩᠭᠥᠨ ᠦ᠌ ᠭᠦᠢᠯᠭᠡᠭᠡ ᠡᠳᠦᠷ ᠲᠦ᠍ ᠬᠡᠳᠦᠨ ᠲᠦᠮᠡᠨ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠲᠣᠭᠲᠠᠬᠤ ᠦᠭᠡᠢ ᠪᠣᠯᠬᠣᠷ ᠪᠠᠢᠴᠠᠭᠠᠬᠤ ᠳ᠋ᠤ᠌ ᠮᠠᠰᠢ ᠬᠦᠴᠢᠷᠲᠡᠢ᠃ ᠦᠵᠡᠰᠬᠦᠯᠡᠩ ᠢ᠋ ᠬᠣᠣᠷᠯᠠᠭᠳᠠᠬᠤ ᠠ᠋ᠴᠠ ᠡᠮᠦᠨᠡ ᠬᠡᠳᠦᠨ ᠰᠠᠷᠠ ᠳ᠋ᠤ᠌ ᠬᠤᠪᠢ ᠬᠥᠮᠦᠨ ᠲᠡᠢᠮᠦ ᠶᠡᠬᠡ ᠵᠣᠭᠣᠰ ᠵᠢᠭᠡᠯᠡᠭᠰᠡᠨ ᠪᠠᠷᠢᠮᠲᠠ ᠦᠭᠡᠢ᠃ ᠭᠠᠭᠴᠠ ᠰᠡᠵᠢᠭᠯᠡᠭᠦᠰᠢᠲᠡᠢ ᠵᠦᠢᠯ ᠪᠣᠯ ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠳ ᠢ᠋ᠶ᠋ᠠᠷ ᠬᠣᠷᠢᠶᠠᠨ ᠳᠠᠷᠤᠭᠠ ᠶ᠋ᠢᠨ ᠨᠡᠷᠡ ᠪᠡᠷ ᠪᠡᠯᠡᠨ ᠮᠥᠩᠭᠥ ᠭᠤᠷᠪᠠᠨ ᠮᠢᠩᠭᠠᠨ ᠲᠥᠭᠥᠷᠢᠭ ᠭᠠᠷᠭᠠᠭᠰᠠᠨ ᠪᠣᠯᠪᠠᠴᠤ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠲᠤᠨᠢ ᠲᠣᠭᠠ ᠶᠣᠰᠣᠭᠠᠷ ᠪᠤᠴᠠᠭᠠᠭᠰᠠᠨ ᠪᠠᠢᠨᠠ᠃ ᠭᠡᠲᠡᠯᠡ ᠵᠢᠭᠡᠯᠡᠪᠦᠷᠢ ᠶ᠋ᠢᠨ ᠪᠠᠷᠢᠮᠲᠠ ᠪᠠᠨ ᠵᠣᠭᠣᠰ ᠢ᠋ᠶ᠋ᠠᠨ ᠪᠤᠴᠠᠭᠠᠬᠤ ᠳᠤ ᠪᠠᠨ ᠤᠰᠠᠳᠬᠠᠴᠢᠬᠠᠭᠰᠠᠨ ᠠ᠋ᠴᠠ ᠠᠯᠪᠠᠨ ᠳᠠᠩᠰᠠᠨ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠶᠠᠭᠤᠮᠠ ᠦᠭᠡᠢ᠃
— ᠠᠯᠢ ᠬᠣᠷᠢᠶᠠᠨ ᠳᠠᠷᠤᠭᠠ ᠵᠢᠭᠡᠯᠡᠭᠰᠡᠨ ᠪᠣᠢ? ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠵᠢᠭᠡᠯᠡᠭᠰᠡᠨ ᠤᠤ?
— ᠲᠣᠳᠣᠷᠬᠠᠢ ᠦᠭᠡᠢ᠂ ᠵᠢᠭᠡᠯᠡᠪᠦᠷᠢ ᠶ᠋ᠢᠨ ᠪᠠᠷᠢᠮᠲᠠ ᠪᠠᠨ ᠨᠢᠭᠡᠨᠲᠡ ᠤᠰᠠᠳᠬᠠᠭᠰᠠᠨ ᠲᠤᠯᠠ ᠳᠠᠩᠰᠠᠨ ᠤ᠋ ᠲᠣᠳᠣᠷᠬᠠᠢᠯᠠᠯᠲᠠ ᠳᠡᠭᠡᠷᠡ ᠵᠥᠪᠰᠢᠶᠡᠷᠡᠭᠰᠡᠨ ᠬᠥᠮᠦᠨ ᠬᠣᠷᠢᠶᠠᠨ ᠳᠠᠷᠤᠭᠠ ᠭᠡᠵᠦ ᠪᠠᠢᠬᠤ ᠠ᠋ᠴᠠ ᠪᠢᠰᠢ᠂ ᠨᠡᠷᠡ ᠨᠢ ᠦᠭᠡᠢ᠃
— ᠶᠠᠮᠠᠷ ᠤᠴᠢᠷ ᠰᠢᠯᠲᠠᠭᠠᠨ ᠠ᠋ᠴᠠ ᠵᠢᠭᠡᠯᠡᠭᠰᠡᠨ ᠪᠣᠢ?
— ᠲᠣᠳᠣᠷᠬᠠᠢ ᠦᠭᠡᠢ᠂ ᠨᠢᠭᠲᠠᠯᠠᠨ ᠪᠣᠳᠣᠭᠴᠢ ᠨᠠᠷ ᠤ᠋ᠨ ᠡᠷᠭᠢᠴᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ ᠲᠡᠷᠡ ᠦᠶᠡ ᠳ᠋ᠦ᠍ X ᠰᠠᠴᠤᠷᠠᠭ ᠤ᠋ᠨ ᠮᠠᠰᠢᠨ ᠢ᠋ ᠵᠠᠰᠠᠬᠤ ᠭᠡᠵᠦ ᠵᠢᠭᠡᠯᠡᠭᠡᠳ᠂ ᠰᠡᠭᠦᠯᠡᠷ ᠨᠢ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠴᠢᠨᠠᠷ ᠮᠠᠭᠤ ᠪᠣᠯᠬᠣᠷ ᠠᠪᠬᠤ ᠦᠭᠡᠢ ᠪᠣᠯᠵᠤ ᠵᠣᠭᠣᠰ ᠢ᠋ ᠨᠢ ᠲᠣᠭᠠ ᠶᠣᠰᠣᠭᠠᠷ ᠪᠤᠴᠠᠭᠠᠭᠰᠠᠨ ᠤᠳᠠᠭᠠ ᠪᠣᠢ ᠭᠡᠨᠡ᠃ ᠵᠣᠭᠣᠰᠤᠨ ᠤ᠋ ᠲᠣᠭᠠ ᠨᠢ ᠴᠤ᠌ ᠬᠣᠶᠠᠷ ᠭᠤᠷᠪᠠᠨ ᠮᠢᠩᠭᠠᠨ ᠲᠥᠭᠥᠷᠢᠭ ᠪᠠᠢᠭᠰᠠᠨ᠃ ᠪᠠᠷᠤᠭ ᠲᠡᠷᠡ ᠵᠢᠭᠡᠯᠡᠪᠦᠷᠢ ᠶ᠋ᠢᠨ ᠳᠠᠩᠰᠠ ᠪᠠᠷᠢᠮᠲᠠ ᠪᠠᠢᠬᠠ ᠭᠡᠵᠦ ᠲᠠᠭᠠᠮᠠᠭᠯᠠᠵᠤ ᠪᠠᠢᠯᠠ᠃
— ᠵᠣᠭᠣᠰ ᠵᠢᠭᠡᠯᠡᠭᠰᠡᠨ ᠬᠥᠮᠦᠨ ᠦ᠌ ᠨᠡᠷᠡ ᠪᠣᠯᠤᠨ ᠰᠢᠯᠲᠠᠭᠠᠨ ᠨᠢ ᠪᠠᠩᠬᠢ ᠶ᠋ᠢᠨ ᠳᠠᠩᠰᠠᠨ ᠳ᠋ᠤ᠌ ᠪᠠᠢᠬᠤ ᠶᠣᠰᠣᠲᠠᠢ᠃
— ᠪᠠᠩᠬᠢ ᠳ᠋ᠤ᠌ ᠭᠠᠷ ᠭᠦᠢᠴᠡᠳᠬᠡᠯ ᠬᠢᠭᠰᠡᠨ ᠦᠭᠡᠢ᠃ ᠵᠢᠭᠡᠯᠡᠬᠦ ᠪᠠᠷᠢᠮᠲᠠ ᠶ᠋ᠢ ᠨᠢ ᠡᠳ᠋ ᠦ᠋ᠨ ᠶᠠᠪᠤᠳᠠᠯ ᠤ᠋ᠨ ᠰᠠᠯᠠᠭᠠᠨ ᠳ᠋ᠤ᠌ ᠬᠢᠵᠦ᠂ ᠪᠡᠯᠡᠨ ᠮᠥᠩᠭᠥ ᠶ᠋ᠢ ᠨᠢ ᠲᠤᠰ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠳ᠋ᠤᠭᠠᠷᠯᠠᠬᠤ ᠭᠡᠷ᠂ ᠡᠮ ᠦ᠋ᠨ ᠰᠦᠢᠳᠬᠡᠯ ᠬᠤᠷᠢᠶᠠᠬᠤ ᠭᠡᠷ ᠡᠴᠡ ᠰᠢᠭᠤᠳ ᠠᠪᠴᠠᠢ᠃ ᠪᠤᠴᠠᠭᠠᠬᠤ ᠦᠶᠡ ᠳ᠋ᠦ᠍ ᠪᠠᠷᠢᠮᠲᠠ ᠨᠡᠷᠡ ᠨᠢ ᠪᠦᠷ ᠤᠰᠠᠳᠴᠤ᠂ ᠵᠢᠭᠡᠯᠡᠭᠰᠡᠨ ᠰᠢᠯᠲᠠᠭᠠᠨ ᠨᠢ ᠴᠤ᠌ ᠣᠯᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃
— ᠶᠠᠭᠠᠬᠢᠭᠠᠳ ᠬᠣᠷᠢᠶᠠᠨ ᠳᠠᠷᠤᠭᠠ ᠨᠠᠷ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠵᠣᠭᠣᠰ ᠵᠢᠭᠡᠯᠡᠵᠦ ᠮᠠᠲ᠋ᠧᠷᠢᠶᠠᠯ ᠬᠠᠷᠢᠯᠴᠠᠬᠤ ᠪᠣᠯᠴᠢᠬᠠᠪᠠ?
— ᠡᠨᠡ ᠪᠠᠢᠭᠤᠯᠭᠠ ᠶ᠋ᠢᠨ ᠡᠳ᠋ ᠦ᠋ᠨ ᠵᠠᠰᠠᠭ ᠤ᠋ᠨ ᠲᠣᠭᠲᠠᠭᠠᠯ ᠳ᠋ᠤ᠌ ᠲᠠᠪᠤᠨ ᠵᠠᠭᠤᠨ ᠲᠥᠭᠥᠷᠢᠭ ᠡᠴᠡ ᠳᠡᠭᠡᠭᠰᠢ ᠭᠠᠷᠪᠠᠯ ᠡᠷᠬᠡᠪᠰᠢ ᠬᠣᠷᠢᠶᠠᠨ ᠳᠠᠷᠤᠭᠠ ᠨᠠᠷ ᠵᠥᠪᠰᠢᠶᠡᠷᠡᠵᠦ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠳᠠᠭ ᠭᠡᠨᠡ᠃ ᠭᠡᠲᠡᠯᠡ ᠵᠠᠷᠢᠮ ᠳᠤ ᠪᠠᠨ ᠬᠣᠷᠢᠶᠠᠨ ᠳᠠᠷᠤᠭᠠ ᠶ᠋ᠢᠨ ᠨᠡᠷᠡ ᠶ᠋ᠢ ᠪᠤᠰᠤᠳ ᠬᠥᠮᠦᠨ ᠣᠷᠣᠯᠠᠵᠤ ᠵᠢᠷᠤᠬᠤ ᠶᠠᠪᠤᠳᠠᠯ ᠴᠤ᠌ ᠭᠠᠷᠳᠠᠭ ᠭᠡᠨᠡ᠃ ᠶᠠᠭᠠᠷᠠᠯᠲᠠᠢ ᠦᠶᠡ ᠳ᠋ᠦ᠍ ᠪᠣᠯ ᠤᠷᠢᠳ ᠢ᠋ᠶ᠋ᠠᠷ ᠵᠣᠭᠣᠰ ᠢ᠋ ᠨᠢ ᠵᠢᠭᠡᠯᠡᠵᠦ ᠠᠪᠤᠭᠠᠳ ᠭᠠᠷ ᠭᠦᠢᠴᠡᠳᠬᠡᠯ ᠢ᠋ ᠨᠢ ᠬᠣᠵᠢᠮ ᠨᠥᠬᠥᠬᠦ ᠶᠠᠪᠤᠳᠠᠯ ᠴᠤ᠌ ᠭᠠᠷᠳᠠᠭ ᠭᠡᠨᠡ᠃ ᠡᠨᠡ ᠤᠳᠠᠭᠠ ᠴᠤ᠌ ᠢᠩᠭᠢᠵᠦ ᠵᠢᠭᠡᠯᠡᠭᠡᠳ ᠳᠣᠣᠷᠠ ᠨᠢ ᠪᠤᠴᠠᠭᠠᠭᠰᠠᠨ ᠲᠤᠯᠠ ᠬᠡᠨ ᠴᠤ᠌ ᠠᠩᠬᠠᠷᠤᠭᠰᠠᠨ ᠦᠭᠡᠢ ᠡᠴᠡ ᠳᠠᠩᠰᠠᠨ ᠤ᠋ ᠡᠰᠢ ᠪᠠᠷᠢᠮᠲᠠ ᠲᠣᠳᠣᠷᠬᠠᠢ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ᠃
ᠦᠵᠡᠰᠬᠦᠯᠡᠩ ᠬᠣᠣᠷᠯᠠᠭᠳᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡᠬᠡᠨ ᠵᠣᠭᠣᠰ ᠵᠤᠭᠠ ᠭᠡᠭᠴᠢ ᠶ᠋ᠢ ᠤᠰᠤ ᠴᠠᠰᠤ ᠰᠢᠭ᠋ ᠵᠠᠷᠤᠵᠤ᠂ ᠵᠢᠭᠡᠯᠡᠪᠦᠷᠢ ᠡᠨᠡ ᠲᠡᠷᠡ ᠪᠡᠨ ᠲᠥᠯᠥᠵᠦ ᠪᠠᠢᠭᠰᠠᠨ ᠨᠢ ᠶᠠᠭ ᠦᠨᠡᠨ ᠪᠠᠢᠵᠠᠢ᠃
ᠲᠡᠷᠡ ᠶᠠᠭᠠᠬᠢᠭᠠᠳ ᠭᠡᠨᠡᠳᠲᠡᠬᠡᠨ ᠡᠢᠮᠦ ᠶᠡᠬᠡ ᠵᠣᠭᠣᠰ ᠲᠠᠢ ᠪᠣᠯᠤᠭᠰᠠᠨ ᠢ᠋ ᠰᠡᠵᠢᠭᠯᠡᠵᠦ ᠲᠤᠰᠬᠠᠢᠯᠠᠨ ᠪᠠᠢᠴᠠᠭᠠᠭᠠᠳ ᠦᠷᠡ ᠳ᠋ᠦᠩ ᠨᠢ ᠡᠢᠮᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠲᠦᠪᠰᠢᠨ ᠶᠡᠬᠡ ᠬᠠᠩᠭᠠᠮᠵᠢ ᠦᠭᠡᠢ ᠪᠣᠯᠪᠠ᠃
ᠡᠳ᠋ ᠦ᠋ᠨ ᠬᠡᠷᠡᠭ᠂ ᠡᠮᠡ ᠶ᠋ᠢᠨ ᠬᠡᠷᠡᠭ᠂ ᠡᠷᠡᠭᠦᠦ ᠵᠠᠷᠭᠤ ᠠᠮᠢ ᠨᠠᠰᠤ ᠲᠠᠢ ᠬᠣᠯᠪᠣᠭᠳᠠᠬᠤ ᠦᠶᠡ ᠳ᠋ᠦ᠍ ᠰᠦᠷᠡᠬᠡᠢ ᠠᠩᠬᠠᠷᠳᠠᠭ ᠢ᠋ ᠪᠠᠢᠴᠠᠭᠠᠨ ᠮᠥᠷᠳᠡᠭᠴᠢᠳ ᠦ᠋ᠨ ᠨᠠᠢᠳᠠ ᠶ᠋ᠢᠨ ᠣᠨᠴᠠᠯᠢᠭ ᠭᠡᠵᠦ ᠪᠣᠯᠤᠮᠠᠷ ᠪᠢᠯᠡ᠃
ᠤᠩᠰᠢᠭᠰᠠᠨ ᠨᠢ ᠄ ᠴᠡᠴᠡᠭᠮᠡ