ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – ᠬᠠᠰᠪᠤᠯᠠᠭ ᠵᠣᠬᠢᠶᠠᠪᠠ᠂ < ᠠᠷᠪᠠᠨ ᠬᠣᠶᠠᠷ > Хялгасан дөрөөн дээр – Хасвулаг зохиов <12>
153ᠬᠢᠯᠭᠠᠰᠤᠨ ᠳᠥᠷᠥᠭᠡᠨ ᠳᠡᠭᠡᠷᠡ – < ᠠᠷᠪᠠᠨ ᠬᠣᠶᠠᠷ >
ᠠᠷᠪᠠᠨ ᠬᠣᠶᠠᠷ
ᠲᠦᠪᠰᠢᠨ ᠭᠤᠸᠠᠢ ᠭᠢᠯᠲᠠᠭᠠᠨᠠᠮᠠ ᠰᠢᠷ ᠲᠡᠢ ᠥᠷᠭᠡᠨ ᠶᠡᠬᠡ ᠰᠢᠷᠡᠭᠡᠨ ᠦ᠌ ᠪᠡᠨ ᠠᠷᠤ ᠳ᠋ᠤ᠌ ᠰᠠᠭᠤᠭᠠᠳ᠂ ᠡᠮᠨᠡᠯᠭᠡ ᠶᠢᠨ ᠪᠠᠢᠴᠠᠭᠠᠨ ᠨᠤᠲᠠᠯᠠᠯᠲᠠ ᠬᠢᠭᠰᠡᠨ ᠦᠷᠡ ᠳ᠋ᠦᠩ ᠦ᠋ᠨ ᠮᠡᠳᠡᠭᠦᠯᠦᠯᠲᠡ ᠶ᠋ᠢ ᠳᠠᠬᠢᠨ ᠳᠠᠪᠲᠠᠨ ᠡᠷᠭᠢᠭᠦᠯᠵᠦ ᠤᠷᠪᠠᠭᠤᠯᠵᠤ ᠦᠵᠡᠬᠦ ᠳ᠋ᠦ᠍᠂ ᠬᠥᠩᠬᠥᠷ ᠰᠢᠷᠠ ᠨᠢᠳᠦᠨ ᠡᠴᠡ ᠨᠢ ᠬᠤᠷᠴᠠ ᠭᠡᠷᠡᠯ ᠰᠠᠴᠤᠷᠠᠨᠠ᠃
ᠡᠳᠡᠭᠡᠷ ᠵᠦᠢᠯ ᠲᠡᠭᠦᠨ ᠳ᠋ᠦ᠍ ᠶᠡᠬᠡ ᠦᠨᠡ ᠴᠠᠨᠠ ᠲᠠᠢ ᠶᠠᠭᠤᠮᠠ ᠪᠣᠯᠤᠭᠠᠳ ᠭᠦᠨ ᠪᠣᠳᠣᠯ ᠤ᠋ᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠲᠦᠯᠬᠢᠭᠳᠡᠨ ᠣᠷᠣᠭᠰᠠᠨ ᠢ᠋ ᠨᠢᠳᠦᠨ ᠦ᠌ ᠬᠢᠨᠢ ᠭᠡᠷᠡᠯ ᠪᠣᠯᠤᠨ ᠴᠢᠷᠠᠢ ᠶ᠋ᠢᠨ ᠬᠤᠪᠢᠷᠠᠯᠲᠠ ᠠ᠋ᠴᠠ ᠨᠢ ᠢᠯᠡᠬᠡᠨ ᠬᠠᠷᠠᠭᠳᠠᠨᠠ᠃ ᠡᠨᠡ ᠪᠣᠯ ᠳᠠᠷᠤᠢ ᠬᠣᠲᠠ ᠶ᠋ᠢᠨ ᠡᠮ ᠡᠮᠨᠡᠯᠭᠡ ᠶ᠋ᠢ ᠰᠤᠳᠤᠯᠬᠤ ᠭᠠᠵᠠᠷ ᠤ᠋ᠨ ᠬᠠᠨ ᠠᠪᠤᠭᠠᠢ ᠶ᠋ᠢᠨ ᠨᠢᠭᠤᠴᠠ ᠪᠠᠷ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠮᠡᠳᠡᠭᠦᠯᠦᠯᠲᠡ ᠪᠣᠯᠤᠨᠠ᠃ ᠬᠠᠨ ᠠᠪᠤᠭᠠᠢ ᠡᠨᠡ ᠮᠡᠳᠡᠭᠦᠯᠦᠯᠲᠡ ᠳᠦ ᠪᠡᠨ ᠭᠤᠷᠪᠠᠨ ᠨᠣᠬᠠᠢ ᠳ᠋ᠤ᠌ ᠠᠳᠠᠯᠢ ᠪᠤᠰᠤ ᠶ᠋ᠢᠨ ᠬᠡᠮᠵᠢᠶᠡ ᠪᠡᠷ Aᠭᠤᠷᠪᠠᠳᠤᠭᠠᠷ ᠪᠠ Bᠵᠢᠷᠭᠤᠳᠤᠭᠠᠷ ᠢ᠋ ᠲᠠᠷᠢᠵᠤ ᠲᠤᠷᠰᠢᠯᠲᠠ ᠬᠢᠭᠰᠡᠨ ᠦᠷᠡ ᠳ᠋ᠦᠩ ᠢ᠋ ᠲᠣᠳᠣᠷᠬᠠᠢᠯᠠᠵᠠᠢ᠃
ᠲᠤᠷᠰᠢᠯᠲᠠ ᠬᠢᠭᠰᠡᠨ ᠮᠡᠳᠡᠭᠦᠯᠦᠯᠲᠡ
Aᠨᠣᠬᠠᠢ ᠳ᠋ᠤ᠌ ᠬᠣᠶᠠᠷ ᠮᠢᠯᠢᠯᠢᠲ᠋ᠷ Aᠭᠤᠷᠪᠠᠳᠤᠭᠠᠷ ᠪᠣᠯᠤᠨ B ᠵᠢᠷᠭᠤᠳᠤᠭᠠᠷ ᠢ᠋ ᠬᠣᠯᠢᠵᠤ ᠲᠠᠷᠢᠭᠰᠠᠨ ᠳ᠋ᠤ᠌ ᠠᠷᠪᠠᠨ ᠨᠠᠢ᠍ᠮᠠᠨ ᠮᠢᠨᠦ᠋ᠲ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠨᠣᠬᠠᠢ ᠮᠠᠩᠰᠢᠭᠤᠷᠠᠨ ᠮᠠᠨᠠᠷᠠᠵᠤ ᠪᠦᠬᠦᠯᠢ ᠵᠢᠷᠭᠤᠭᠠᠨ ᠴᠠᠭ ᠪᠣᠯᠤᠭᠠᠳ ᠰᠠᠶᠢ ᠰᠡᠷᠡᠪᠡ᠃ ᠰᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠰᠦᠷ ᠰᠦᠯᠳᠡ ᠨᠢ ᠶᠡᠬᠡ ᠮᠠᠭᠤᠳᠠᠵᠤ ᠠᠷᠠᠢ ᠴᠢᠷᠠᠢ ᠪᠡᠶᠡ ᠪᠡᠨ ᠳᠠᠭᠠᠭᠠᠨ ᠠᠯᠬᠤᠯᠠᠵᠤ ᠪᠠᠢᠪᠠ᠃ ᠢᠳᠡᠰᠢ ᠬᠣᠭᠣᠯᠠᠨ ᠳ᠋ᠤ᠌ ᠳᠤᠷᠠᠰᠢᠯ ᠦᠭᠡᠢ ᠠᠷᠪᠠᠭᠠᠳ ᠮᠢᠨᠦ᠋ᠲ ᠪᠣᠯᠤᠭᠠᠳ ᠰᠠᠶᠢ ᠭᠦᠢᠴᠡᠳ ᠰᠠᠷᠠᠨ ᠬᠡᠪ ᠦ᠋ᠨ ᠪᠠᠢᠳᠠᠯ ᠳ᠋ᠠᠭᠠᠨ ᠣᠷᠣᠪᠠ᠃
Bᠨᠣᠬᠠᠢ ᠳ᠋ᠤ᠌ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷA ᠭᠤᠷᠪᠠᠳᠤᠭᠠᠷ ᠢ᠋ ᠳᠠᠩ ᠢ᠋ᠶ᠋ᠠᠷ ᠲᠠᠷᠢᠭᠰᠠᠨ ᠳ᠋ᠤ᠌ ᠠᠷᠪᠠᠨ ᠳᠣᠯᠣᠭᠠᠨ ᠮᠢᠨᠦ᠋ᠲ ᠦ᠋ᠨ ᠳᠠᠷᠠᠭᠠ ᠮᠠᠩᠰᠢᠭᠤᠷᠠᠨ ᠮᠠᠨᠠᠷᠠᠵᠤ ᠪᠦᠬᠦᠯᠢ ᠠᠷᠪᠠᠨ ᠴᠠᠭ ᠪᠣᠯᠤᠭᠠᠳ ᠴᠤ᠌ ᠰᠡᠷᠡᠭᠰᠡᠨ ᠦᠭᠡᠢ ᠡᠴᠡ ᠦᠵᠡᠪᠡᠯ ᠡᠭᠦᠨ ᠡᠴᠡ ᠤᠷᠲᠤ ᠴᠠᠭ ᠲᠤ᠌ ᠴᠤ᠌ ᠰᠡᠷᠡᠬᠦ ᠦᠭᠡᠢ ᠪᠣᠯᠤᠯᠴᠠᠭᠠ ᠪᠠᠢᠵᠤ ᠮᠡᠳᠡᠨᠡ᠃ ᠢᠩᠭᠢᠭᠡᠳ ᠰᠡᠷᠡᠭᠡᠨ ᠲᠠᠮᠢᠷᠵᠢᠭᠤᠯᠬᠤ ᠡᠮ ᠲᠠᠷᠢᠵᠤ ᠠᠪᠤᠷᠠᠪᠠ᠃
Cᠨᠣᠬᠠᠢ ᠳ᠋ᠤ᠌ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷ Aᠭᠤᠷᠪᠠᠳᠤᠭᠠᠷ ᠪᠠ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷB ᠵᠢᠷᠭᠤᠳᠤᠭᠠᠷ ᠢ᠋ ᠬᠣᠯᠢᠵᠤ ᠲᠠᠷᠢᠭᠰᠠᠨ ᠳ᠋ᠤ᠌ ᠠᠷᠪᠠᠨ ᠨᠠᠢ᠍ᠮᠠᠨ ᠮᠢᠨᠦ᠋ᠲ ᠦ᠋ᠨ ᠳᠠᠷᠠᠭᠠ ᠮᠠᠩᠰᠢᠭᠤᠷᠠᠨ ᠮᠠᠨᠠᠷᠠᠵᠤ ᠤᠯᠠᠮ ᠠ᠋ᠴᠠ ᠤᠯᠠᠮ ᠬᠦᠨᠳᠦ ᠪᠣᠯᠬᠤ ᠪᠠᠢᠳᠠᠯ ᠭᠠᠷᠤᠭᠰᠠᠭᠠᠷ ᠪᠠᠢᠭᠠᠳ ᠬᠡᠰᠡᠭ ᠬᠡᠰᠡᠭ ᠲᠠᠲᠠᠪᠠᠯᠵᠠᠨ ᠬᠥᠳᠡᠯᠵᠦ ᠵᠢᠷᠦᠬᠡᠨ ᠴᠣᠬᠢᠯᠭᠠ ᠨᠢ ᠢᠳᠡᠭ ᠢᠳᠡᠭ ᠢ᠋ᠶ᠋ᠡᠷ ᠤᠳᠠᠭᠠᠨ ᠪᠣᠯᠤᠭᠠᠳ ᠬᠣᠶᠠᠷ ᠴᠠᠭ ᠳᠥᠴᠢᠨ ᠮᠢᠨᠦ᠋ᠲ ᠦ᠋ᠨ ᠬᠤᠭᠤᠴᠠᠭᠠ ᠬᠡᠷᠡᠭᠯᠡᠭᠡᠳ ᠵᠢᠷᠦᠬᠡᠨ ᠴᠣᠬᠢᠯᠭᠠ ᠨᠢ ᠪᠦᠷᠢᠮᠦᠰᠦᠨ ᠵᠣᠭᠰᠣᠵᠤ ᠠᠮᠢᠰᠬᠤᠯ ᠨᠢ ᠲᠠᠰᠤᠷᠠᠪᠠ᠃
ᠲᠦᠪᠰᠢᠨ ᠭᠤᠸᠠᠢ᠂ ᠳᠥᠬᠥᠮᠬᠡᠨ ᠪᠢᠴᠢᠭᠰᠡᠨ ᠡᠨᠡ ᠮᠡᠳᠡᠭᠦᠯᠦᠯᠲᠡ ᠶ᠋ᠢ ᠶᠠᠭ ᠯᠠ ᠦᠵᠡᠭᠡᠳ ᠬᠠᠩᠬᠤ ᠦᠭᠡᠢ ᠰᠢᠭ ᠳᠠᠬᠢᠨ ᠳᠠᠪᠲᠠᠨ ᠣᠯᠠᠨ ᠵᠦᠢᠯ ᠲᠡᠢ ᠬᠣᠯᠪᠣᠭᠳᠠᠭᠤᠯᠤᠨ ᠪᠣᠳᠣᠯᠬᠢᠯᠠᠭᠰᠠᠭᠠᠷ ᠨᠢᠭᠡ ᠡᠳᠦᠷ ᠪᠣᠯᠵᠠᠢ᠃
ᠥᠨᠳᠡᠭᠡᠨ ᠡᠴᠡ ᠶᠠᠰᠤ ᠡᠷᠢᠵᠦ᠂ ᠥᠭᠡᠬᠦᠨ ᠡᠴᠡ ᠰᠢᠷᠪᠥᠰᠥ ᠬᠠᠢᠬᠤ ᠭᠡᠳᠡᠭ ᠢ᠋ᠶ᠋ᠡᠷ ᠲᠦᠪᠰᠢᠨ᠂ ᠪᠠᠢᠴᠠᠭᠠᠯᠲᠠ ᠶ᠋ᠢᠨ ᠳᠤᠮᠳᠠᠬᠢ ᠮᠠᠳᠠᠭ ᠲᠠᠢ ᠠᠰᠠᠭᠤᠯᠲᠠ ᠳ᠋ᠤ᠌ ᠡᠢᠮᠦ ᠣᠪᠣᠷ ᠠᠪᠳᠠᠭ ᠪᠠᠢᠨᠠ᠃ AᠭᠤᠷᠪᠠᠳᠤᠭᠠᠷB ᠵᠢᠷᠭᠤᠳᠤᠭᠠᠷ ᠢ᠋ ᠳᠥᠷᠪᠡ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷ ᠢ᠋ᠶ᠋ᠡᠷ ᠬᠣᠯᠢᠵᠤ ᠲᠠᠷᠢᠭᠠᠳ ᠨᠣᠬᠠᠢ ᠪᠠᠷᠤᠭ ᠭᠤᠷᠪᠠᠨ ᠴᠠᠭ ᠰᠢᠬᠠᠭᠤ ᠠᠮᠢᠳᠤᠷᠠᠭᠰᠠᠨ ᠢ᠋ ᠭᠠᠢᠬᠠᠵᠤ ᠪᠠᠢᠵᠠᠢ᠃ ᠲᠡᠭᠦᠨ ᠦ᠌ ᠭᠣᠣᠯ ᠪᠣᠯᠬᠤ ᠢᠯᠡᠷᠡᠯ ᠨᠢ ᠲᠠᠰᠤ ᠮᠡᠳᠡᠭᠡ ᠠᠯᠲᠠᠨ ᠮᠠᠨᠠᠷᠠᠨ ᠤᠨᠲᠠᠵᠤ ᠵᠢᠷᠦᠬᠡᠨ ᠴᠣᠬᠢᠯᠭᠠ ᠨᠢ ᠠᠯᠭᠤᠷ ᠨᠠᠮᠵᠢᠷᠠᠭᠰᠠᠭᠠᠷ ᠦᠬᠦᠭᠰᠡᠨ ᠪᠠᠢᠨᠠ᠃
ᠭᠡᠲᠡᠯᠡ ᠦᠵᠡᠰᠬᠦᠯᠡᠩ ᠬᠠᠭᠠᠰ ᠴᠠᠭ ᠴᠤ᠌ ᠪᠣᠯᠤᠭᠠᠳᠤᠢ ᠪᠠᠷ ᠠᠮᠢᠰᠬᠤᠯ ᠬᠤᠷᠢᠶᠠᠵᠤ᠂ ᠲᠡᠷᠡᠴᠢᠯᠡᠨ ᠥᠴᠦᠬᠡᠨ ᠴᠤ᠌ ᠠᠮᠤᠷᠵᠢᠵᠤ ᠮᠠᠨᠠᠷᠠᠭᠰᠠᠨ ᠪᠠᠢᠳᠠᠯ ᠦᠭᠡᠢ ᠮᠥᠷᠲᠡᠭᠡᠨ ᠴᠢᠷᠠᠯᠠᠨ ᠪᠠᠷᠬᠢᠷᠠᠵᠤ ᠰᠦᠷᠡᠬᠡᠢ ᠵᠣᠪᠠᠭᠤᠷᠢᠯᠠᠵᠤ ᠰᠠᠷᠪᠠᠯᠵᠠᠭᠰᠠᠭᠠᠷ ᠦᠬᠦᠭᠰᠡᠨ ᠪᠠᠢᠨᠠ᠃ ᠶᠠᠭᠠᠬᠢᠭᠠᠳ ᠠᠳᠠᠯᠢᠬᠠᠨ ᠡᠮ ᠳ᠋ᠦ᠍ ᠡᠢᠮᠦ ᠡᠷᠡᠰ ᠣᠨᠳᠣᠣ ᠬᠣᠶᠠᠷ ᠵᠦᠢᠯ ᠦ᠋ᠨ ᠢᠯᠡᠷᠡᠯ ᠭᠠᠷᠤᠭᠰᠠᠨ ᠪᠣᠢ? ᠨᠣᠬᠠᠢ ᠪᠣᠯᠤᠨ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢᠨ ᠳᠣᠲᠣᠭᠠᠳᠤ ᠡᠷᠬᠡᠲᠡᠨ ᠦ᠌ ᠪᠠᠢᠳᠠᠯ ᠪᠠᠢᠷᠢᠯᠠᠯ ᠪᠠ ᠡᠮ ᠡᠰᠡᠷᠭᠦᠴᠡᠬᠦ ᠴᠢᠳᠠᠪᠤᠷᠢ ᠦᠨᠳᠦᠰᠦᠨ ᠳ᠋ᠡᠭᠡᠨ ᠠᠳᠠᠯᠢᠪᠲᠤᠷ ᠪᠠᠢᠳᠠᠭ᠃ ᠶᠠᠭ ᠠᠳᠠᠯᠢ ᠦᠭᠡᠢ ᠴᠤ᠌ ᠭᠡᠰᠡᠨ ᠡᠮ ᠦ᠋ᠨ ᠦᠢᠯᠡᠳᠦᠯ ᠲᠤᠰᠬᠠᠯ ᠤ᠋ᠨ ᠲᠠᠯᠠ ᠪᠠᠷ ᠡᠢᠮᠦ ᠶᠡᠬᠡ ᠵᠦᠷᠢᠶᠡᠨ ᠭᠠᠷᠬᠤ ᠪᠣᠯᠤᠯᠴᠠᠭᠠ ᠯᠠᠪ ᠦᠭᠡᠢ ᠶᠦᠮ᠃
ᠦᠵᠡᠰᠬᠦᠯᠡᠩ ᠦ᠋ᠨ ᠪᠡᠶᠡ ᠶ᠋ᠢᠨ ᠪᠦᠲᠦᠴᠡ᠂ ᠡᠮ ᠡᠰᠡᠷᠭᠦᠴᠡᠬᠦ ᠴᠢᠳᠠᠪᠤᠷᠢ ᠥᠭᠡᠷᠡ ᠪᠤᠰᠤᠳ ᠠ᠋ᠴᠠ ᠣᠨᠴᠠᠭᠠᠢ ᠭᠡᠵᠢ ᠤᠤ? ᠠᠮᠢᠳᠤᠷᠠᠯ ᠤ᠋ᠨ ᠳᠤᠮᠳᠠ ᠰᠣᠴᠢᠵᠤ ᠭᠠᠢᠬᠠᠮᠠ ᠰᠠᠨᠠᠭᠠᠨ ᠠ᠋ᠴᠠ ᠭᠠᠳᠠᠨᠠᠬᠢ ᠦᠢᠯᠡ ᠬᠡᠷᠡᠭ ᠣᠯᠠᠨ ᠲᠣᠬᠢᠶᠠᠯᠳᠤᠳᠠᠭ ᠢ᠋ ᠲᠦᠪᠰᠢᠨ ᠭᠤᠸᠠᠢ ᠢᠲᠡᠭᠡᠵᠦ ᠶᠠᠪᠤᠳᠠᠭ ᠪᠣᠯᠪᠠᠴᠤ ᠡᠨᠡ ᠬᠦ᠌ ᠡᠮ᠂ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠬᠣᠭᠣᠷᠣᠨᠳᠣ ᠡᠢᠮᠦ ᠶᠡᠬᠡ ᠵᠥᠷᠢᠶᠡ ᠭᠠᠷᠬᠤ ᠶ᠋ᠢ ᠲᠡᠷᠡ ᠬᠡᠨ ᠡᠴᠡ ᠴᠤ᠌ ᠢᠯᠡᠭᠦᠦ ᠰᠡᠵᠢᠭᠯᠡᠵᠦ ᠪᠠᠢᠭᠠ ᠠᠵᠢ᠃
ᠨᠠᠢ᠍ᠮᠠᠨ ᠮᠢᠯᠢᠯᠢᠲ᠋ᠷ ᠭᠡᠳᠡᠭ ᠪᠣᠯ ᠵᠥᠪᠬᠡᠨ ᠲᠡᠷᠡ ᠶᠠᠯᠠᠲᠠᠨ ᠤ᠋ ᠠᠮᠠᠨ ᠥᠴᠢᠭ ᠦ᠋ᠨ ᠲᠡᠳᠦᠢ ᠯᠡ ᠶᠦᠮ᠃ ᠬᠠᠷᠢᠨ ᠦᠨᠡᠨ ᠭᠡᠷᠡᠴᠢ ᠥᠴᠦᠬᠡᠨ ᠴᠤ᠌ ᠪᠠᠢᠬᠤ ᠦᠭᠡᠢ ᠰᠢᠦ᠃ ᠡᠮ ᠲᠠᠷᠢᠬᠤ ᠪᠠᠭᠠᠵᠢ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠣᠷᠣ ᠮᠥᠷ ᠢ᠋ᠶ᠋ᠡᠷ ᠦᠵᠡᠬᠦ ᠳ᠋ᠦ᠍᠂ ᠰᠠᠶᠢ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷ ᠪᠠᠢᠭᠰᠠᠨ᠃ ᠬᠡᠷᠡᠭ ᠦ᠋ᠨ ᠲᠠᠯᠠᠪᠠᠢ ᠠ᠋ᠴᠠ ᠴᠤ᠌ ᠬᠣᠶᠠᠷ ᠮᠢᠯᠢᠯᠢᠲ᠋ᠷ ᠰᠠᠪᠠᠯᠠᠳᠠᠭA ᠭᠤᠷᠪᠠᠳᠤᠭᠠᠷ ᠤ᠋ᠨ ᠯᠣᠩᠬᠣ ᠨᠢᠭᠡ᠂ Bᠵᠢᠷᠭᠤᠳᠤᠭᠠᠷ ᠤ᠋ᠨ ᠯᠣᠩᠬᠣ ᠨᠢᠭᠡ ᠶ᠋ᠢ ᠣᠯᠤᠭᠰᠠᠨ᠃ ᠨᠡᠢᠯᠡᠭᠦᠯᠪᠡᠯ ᠰᠠᠶᠢ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷ᠃ ᠡᠳᠡᠭᠡᠷ ᠡᠳᠦᠷ ᠲᠦ᠍ ᠲᠦᠪᠰᠢᠨ ᠭᠤᠸᠠᠢ ᠴᠤ᠌ ᠦᠨᠡᠨ ᠳᠦ ᠪᠡᠨ ᠦᠵᠡᠰᠬᠦᠯᠡᠩ ᠳ᠋ᠦ᠍ ᠨᠡᠢᠲᠡ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷ ᠡᠮ ᠲᠠᠷᠢᠭᠰᠠᠨ ᠢ᠋ ᠳᠡᠢᠯᠦᠩᠭᠦᠢ ᠢᠲᠡᠭᠡᠬᠦ ᠪᠣᠯᠤᠭᠰᠠᠨ ᠶᠤᠮ᠃ ᠬᠡᠷᠪᠡ ᠳᠥᠷᠪᠡᠨ ᠮᠢᠯᠢᠯᠢᠲ᠋ᠷ ᠦ᠋ᠨ ᠬᠢᠷᠢᠲᠡᠢ ᠪᠣᠯ ᠬᠥᠮᠦᠨ ᠦ᠌ ᠠᠮᠢᠨ ᠳ᠋ᠤ᠌ ᠬᠦᠷᠬᠦ ᠪᠣᠯᠤᠯᠴᠠᠭᠠ ᠦᠭᠡᠢ ᠶ᠋ᠢ ᠨᠢᠭᠡᠨᠲᠡ ᠲᠤᠷᠰᠢᠨ ᠪᠠᠲᠤᠯᠠᠭᠰᠠᠨ ᠪᠢᠰᠢ ᠤᠤ? ᠢᠩᠭᠢᠪᠡᠯ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠴᠣᠬᠣᠮ ᠥᠭᠡᠷᠡ ᠪᠠᠰᠠ ᠶᠠᠮᠠᠷ ᠠᠰᠠᠭᠤᠳᠠᠯ ᠣᠷᠣᠰᠢᠵᠤ ᠪᠠᠢᠳᠠᠭ ᠪᠣᠢ?
ᠲᠦᠪᠰᠢᠨ ᠭᠤᠸᠠᠢ ᠡᠯᠳᠡᠪ ᠰᠡᠵᠢᠭ ᠦ᠋ᠨ ᠶᠠᠭᠤᠮᠠ ᠪᠣᠳᠣᠭᠰᠠᠭᠠᠷ ᠣᠷᠣᠢ ᠶ᠋ᠢᠨ ᠠᠵᠢᠯ ᠪᠠᠭᠤᠬᠤ ᠳ᠋ᠤ᠌ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠤᠬᠤᠰᠬᠢᠨ ᠪᠣᠰᠴᠤ ᠳ᠋ᠢᠶᠠᠩᠬᠤᠸᠠ ᠶ᠋ᠢᠨ ᠨᠣᠮᠧᠷ ᠢ᠋ ᠱᠠᠷᠴᠢᠭᠢᠨᠠᠲᠠᠯᠠ ᠡᠷᠭᠢᠯᠳᠦᠭᠦᠯᠬᠦ ᠳ᠋ᠦ᠍ ᠨᠢᠭᠤᠷ ᠲᠤᠨᠢ ᠬᠠᠨᠤᠮᠵᠢᠲᠠᠢ ᠢᠨᠢᠶᠡᠳᠦ ᠲᠣᠳᠣᠷᠠᠵᠤ ᠪᠠᠢᠯᠠ᠃
《ᠠᠰᠠᠷ》ᠠᠪᠤᠭᠠᠢ ᠤᠤ? ᠠᠮᠢᠳᠤ ᠮᠡᠨᠳᠦ ᠤᠤ? ᠾᠧᠩ᠂ ᠭᠠᠭᠴᠠ ᠴᠢᠨᠦ ᠲᠡᠷᠡ ᠨᠣᠪᠰᠢ ᠶ᠋ᠢᠨ ᠮᠡᠳᠡᠭᠦᠯᠦᠯᠲᠡ ᠨᠠᠳᠠ ᠪᠣᠯᠠᠢ ᠶᠡᠬᠡ ᠶᠠᠷᠰᠢᠭ ᠲᠠᠲᠠᠭᠰᠠᠨ ᠳᠠ᠃ ᠶᠠᠭᠤ ᠭᠡᠨᠡ ᠠ᠋? ᠬᠣᠬᠢ ᠳᠤ ᠪᠠᠨ ᠭᠡᠨᠡ ᠤᠤ? ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠵᠦ ᠥᠭᠭᠦᠶᠡ! ᠴᠢ ᠨᠢᠭᠡᠨᠲᠡ ᠭᠠᠷᠭᠠᠭᠰᠠᠨ ᠦᠷᠡ ᠳ᠋ᠦᠩ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠰᠢᠢᠳᠪᠦᠷᠢᠯᠡᠬᠦ ᠬᠡᠷᠡᠭᠲᠡᠢ᠃ ᠡᠪᠦᠭᠡ ᠨᠢ ᠶᠠᠭᠠᠬᠢᠵᠤ ᠰᠢᠢᠳᠪᠦᠷᠢᠯᠡᠬᠦ ᠪᠣᠢ? ᠴᠢ ᠨᠠᠳᠠ ᠦᠵᠡᠰᠬᠦᠯᠡᠩ ᠦ᠋ᠨ ᠬᠡᠭᠦᠷ ᠢ᠋ ᠳᠠᠬᠢᠨ ᠲᠤᠶᠠᠴᠢᠵᠤ ᠥᠭᠬᠦ ᠬᠡᠷᠡᠭᠲᠡᠢ ᠪᠣᠯᠤᠯᠠ᠃ ᠦ᠂ ᠪᠣᠳᠣᠬᠤ ᠳ᠋ᠤ᠌ ᠬᠡᠭᠦᠷ ᠨᠢ ᠪᠠᠷᠤᠭ ᠡᠪᠳᠡᠷᠡᠭᠰᠡᠨ ᠦᠭᠡᠢ ᠪᠠᠢᠬᠤ᠃ ᠨᠢᠳᠤᠨᠤᠨ ᠤ᠋ ᠠᠷᠪᠠᠨ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠬᠥᠯᠳᠡᠭᠦᠦ ᠳ᠋ᠦ᠍ ᠪᠤᠯᠠᠭᠰᠠᠨ᠃ ᠲᠡᠷᠡ ᠮᠥᠷᠲᠡᠭᠡᠨ ᠣᠳᠣ ᠪᠠᠰᠠ ᠭᠠᠵᠠᠷ ᠭᠦᠢᠴᠡᠳ ᠬᠡᠰᠦᠭᠡᠳᠦᠢ ᠶᠦᠮ ᠴᠢᠨᠢ ᠯᠠᠪᠲᠠᠢ ᠭᠡᠮ ᠦᠭᠡᠢ ᠪᠠᠢᠬᠤ᠃ ᠲᠡᠢᠮᠦ ᠠ᠋᠂ ᠲᠡᠢᠮᠦ᠂ ᠪᠢ ᠰᠦᠷᠡᠬᠡᠢ ᠰᠡᠵᠢᠭᠯᠡᠵᠦ ᠪᠠᠢᠨᠠ᠃ ᠦᠵᠡᠰᠬᠦᠯᠡᠩ ᠥᠭᠡᠷᠡ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠦᠬᠦᠭᠰᠡᠨ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠬᠤ ᠪᠣᠯᠴᠢᠬᠠᠯᠠ᠃ ᠴᠢᠨᠦ ᠪᠣᠳᠣᠯ ᠲᠠᠢ ᠠᠳᠠᠯᠢᠬᠠᠨ ᠭᠡᠨᠡ? ᠮᠠᠭᠤ ᠵᠠᠯᠢᠬᠠᠢ ᠵᠣᠯᠢᠭ᠃ 《ᠠᠰᠠᠷ ᠬᠠᠮᠠᠷᠲᠤ》 ᠴᠢᠮᠠ ᠶᠢ ᠳᠠ! ᠦ᠂ ᠪᠣᠯᠤᠨᠠ᠂ ᠪᠣᠯᠤᠨᠠ᠃ ᠲᠤᠷᠰᠢᠯᠲᠠ ᠬᠢᠵᠦ ᠪᠠᠢᠭᠠ ᠰᠤᠷᠤᠭᠴᠢ ᠪᠠᠨ ᠳᠠᠭᠠᠭᠤᠯᠬᠤ ᠪᠠᠢᠲᠤᠭᠠᠢ ᠡᠮᠡᠭᠡᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠣᠴᠢᠭᠠᠳ ᠲᠤᠶᠠᠴᠢᠭᠰᠠᠨ ᠴᠤ᠌ ᠵᠥᠪᠰᠢᠶᠡᠷᠡᠬᠦ ᠬᠡᠷᠡᠭ᠃ ᠭᠡᠪᠡᠴᠦ ᠵᠠᠪᠠᠯ ᠨᠢᠭᠤᠴᠠ ᠪᠠᠢᠬᠤ ᠬᠡᠷᠡᠭᠲᠡᠢ ᠰᠢᠦ᠃ ᠵᠠ ᠢᠩᠭᠢᠵᠦ ᠲᠣᠭᠲᠠᠶᠠ᠃ ᠮᠠᠷᠭᠠᠰᠢ ᠳᠠᠷᠤᠢ ᠠᠪᠰᠠ ᠠᠭᠤᠳᠠᠯᠤᠨ ᠲᠤᠶᠠᠴᠢᠵᠤ ᠪᠣᠯᠤᠨᠠ᠃ ᠬᠠᠢᠯᠤᠭᠤᠯᠬᠤ ᠶ᠋ᠢ ᠬᠣᠷᠢᠭᠯᠠᠭᠰᠠᠨ ᠰᠡᠵᠢᠭᠲᠡᠢ ᠬᠡᠭᠦᠷ ᠣᠷᠣᠰᠢᠭᠤᠯᠬᠤ ᠲᠠᠯᠠᠪᠠᠢ ᠶ᠋ᠢᠨ ᠨᠠᠢ᠍ᠮᠠᠳᠤᠭᠠᠷ ᠨᠣᠮᠧᠷᠲᠦ ᠪᠤᠯᠠᠰᠢ᠃ ᠪᠢ ᠴᠢᠮᠠ ᠳ᠋ᠦ᠍ ᠬᠡᠭᠦᠷ ᠠᠭᠤᠳᠠᠯᠠᠵᠤ ᠲᠤᠶᠠᠴᠠᠬᠤ ᠵᠥᠪᠰᠢᠶᠡᠷᠡᠯ ᠭᠡᠷᠡᠴᠢ ᠭᠠᠷᠭᠠᠵᠤ ᠥᠭᠭᠦᠶᠡ᠂ ᠬᠡᠭᠦᠷ ᠲᠤᠶᠠᠴᠢᠬᠤ ᠳ᠋ᠤ᠌ ᠵᠠᠷᠤᠴᠠᠭᠤᠯᠤᠭᠰᠠᠨ ᠠᠯᠢᠪᠠ ᠰᠦᠢᠳᠬᠡᠯ ᠢ᠋ ᠨᠢ ᠪᠢᠳᠡ ᠬᠠᠷᠢᠭᠤᠴᠠᠶᠠ᠂ 《ᠠᠰᠠᠷ ᠬᠠᠮᠠᠷᠲᠤ》ᠮᠢᠨᠢ ᠭᠡᠳ ᠳ᠋ᠢᠶᠠᠩᠬᠤᠸᠠ ᠪᠠᠨ ᠲᠠᠯᠪᠢᠯᠠ᠃
ᠲᠦᠪᠰᠢᠨ ᠢᠩᠭᠢᠵᠦ ᠦᠵᠡᠰᠬᠦᠯᠡᠩ ᠦ᠋ᠨ ᠬᠡᠭᠦᠷ ᠢ᠋ ᠳᠠᠬᠢᠨ ᠲᠤᠶᠠᠴᠢᠬᠤ ᠭᠡᠨᠡᠳᠲᠡ ᠶ᠋ᠢᠨ ᠰᠢᠢᠳᠪᠦᠷᠢ ᠪᠡᠨ ᠪᠣᠳᠠᠲᠤ ᠬᠥᠮᠦᠨ ᠳ᠋ᠦ᠍ ᠳᠣᠣᠷᠠ ᠨᠢ ᠨᠠᠢᠳᠠᠪᠤᠷᠢᠵᠢᠭᠤᠯᠤᠨ ᠲᠤᠰᠢᠶᠠᠭᠠᠳ ᠰᠢᠷᠠ ᠨᠢᠳᠦᠨ ᠡᠴᠡ ᠪᠡᠨ ᠲᠠᠢᠪᠤᠰᠢᠷᠠᠭᠰᠠᠨ ᠭᠡᠷᠡᠯ ᠬᠠᠷᠪᠤᠭᠤᠯᠤᠨ ᠠᠭᠤᠵᠢᠮ ᠭᠡᠭᠴᠢ ᠨᠢᠭᠡ ᠠᠮᠢᠰᠬᠤᠵᠤ ᠠᠪᠤᠯᠠ᠃
ᠬᠦᠨᠳᠦ ᠬᠡᠷᠡᠭ ᠲᠦ᠍ ᠬᠣᠯᠪᠣᠭᠳᠠᠭᠰᠠᠨ ᠰᠡᠵᠢᠭ ᠲᠡᠢ ᠬᠡᠭᠦᠷ ᠦ᠋ᠳ ᠢ᠋ ᠬᠠᠢᠯᠤᠭᠤᠯᠬᠤ ᠦᠭᠡᠢ ᠪᠡᠷ ᠪᠤᠯᠠᠳᠠᠭ ᠨᠢ ᠡᠨᠡ ᠬᠣᠲᠠ ᠶ᠋ᠢᠨ ᠨᠢᠭᠡᠨ ᠵᠤᠷᠰᠢᠭᠰᠠᠨ ᠲᠣᠭᠲᠠᠭᠠᠯ ᠪᠠᠢᠵᠠᠢ᠃ ᠡᠨᠡ ᠨᠢ ᠥᠨᠥᠳᠥᠷ ᠦᠵᠡᠰᠬᠦᠯᠡᠩ ᠦ᠋ᠨ ᠬᠡᠭᠦᠷ ᠢ᠋ ᠳᠠᠬᠢᠨ ᠲᠤᠶᠠᠴᠢᠬᠤ ᠪᠠᠷ ᠠᠪᠰᠠ ᠨᠡᠭᠡᠭᠡᠬᠦ ᠳ᠋ᠦ᠍ ᠮᠠᠰᠢ ᠳᠥᠭᠥᠮ ᠨᠥᠬᠥᠴᠡᠯ ᠪᠣᠯᠵᠠᠢ᠃
ᠤᠩᠰᠢᠭᠰᠠᠨ ᠨᠢ᠄ ᠴᠡᠴᠡᠭᠮᠠ