ᠪᠠᠲᠤ ᠬᠠᠭᠠᠨ 8-15ᠲᠠᠪᠢᠯᠠᠩᠲᠤ ᠡᠳᠦᠷ-ᠰᠢᠭᠤᠷᠭᠠ ᠲᠠᠯᠪᠢᠪᠠBat khaan Бат хаан-ᠷᠣᠮᠠᠨ
67ᠠᠷᠪᠠᠨ ᠲᠠᠪᠤ ᠂ ᠲᠠᠪᠢᠯᠠᠩᠲᠤ ᠡᠳᠦᠷ
1238᠂ ᠶᠦᠷᠢ ᠬᠣᠶᠠᠳᠤᠭᠠᠷ ( ᠰᠦᠽᠳᠠᠯᠢ ᠶ᠋ᠢᠨ ᠪᠤᠶᠤ ᠸᠯᠠᠳᠢᠮᠢᠷ ᠤ᠋ᠨ ᠶᠡᠬᠡ ᠸᠠᠩ) ᠰᠢᠲ ᠭᠣᠣᠯ ᠤ᠋ᠨ ᠳᠡᠷᠭᠡᠳᠡ ᠪᠤᠲᠠ ᠴᠣᠬᠢᠭᠳᠠᠵᠤ ᠠᠯᠳᠠᠷ ᠲᠠᠢ ᠬᠥᠮᠦᠰ ᠦ᠋ᠨ ᠬᠠᠮᠲᠤ ᠪᠠᠢᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠳᠡᠭᠡᠷᠡ ᠠᠮᠢ ᠠᠯᠳᠠᠵᠠᠢ᠃ ᠣᠷᠣᠰ ᠤ᠋ᠨ ᠬᠤᠪᠢ ᠵᠠᠶᠠᠭᠠ ᠨᠢ 250 ᠵᠢᠯ ᠳ᠋ᠦ᠍ ᠰᠢᠢᠳᠪᠦᠷᠢᠯᠡᠭᠳᠡᠪᠡ᠃
( ᠺ᠊᠂ ᠮᠠᠷᠺᠰ᠂ ᠣᠨ ᠳᠠᠷᠠᠭᠠᠯᠠᠭᠰᠠᠨ ᠲᠡᠮᠳᠡᠭᠯᠡᠯ ᠦ᠋ᠳ)
᠁ ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠲᠦᠮᠡᠲᠦ ᠶ᠋ᠢᠨ ᠲᠡᠷᠢᠭᠦᠨ ᠳ᠋ᠦ᠍ ᠳᠠᠪᠬᠢᠵᠤ ᠪᠠᠢᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠳᠡᠭᠡᠷᠡ ᠬᠦᠷᠴᠦ ᠢᠷᠡᠪᠡ᠃ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠲᠡᠭᠦᠨ ᠢ᠋ ᠢᠳᠬᠠᠵᠤ ᠬᠡᠯᠡᠭᠰᠡᠨ ᠨᠢ ᠳᠡᠮᠡᠢ ᠪᠣᠯᠵᠤ ᠲᠡᠷᠡ ᠢᠳᠬᠠᠬᠤ ᠳ᠋ᠠᠭᠠᠨ᠄
— ᠮᠡᠷᠭᠡᠨ ᠡᠪᠦᠭᠡ( ᠪᠡᠨ )ᠰᠠᠨᠠᠭᠲᠤᠨ᠃ ᠲᠡᠷᠡ ᠡᠷᠡᠯᠬᠡᠭ ᠨᠡᠷᠡ ᠶ᠋ᠢ ᠣᠯᠬᠤ ᠶ᠋ᠢᠨ ᠲᠤᠯᠠ ᠰᠣᠭᠲᠣᠭᠤ ᠴᠡᠷᠢᠭ ᠰᠢᠭ᠌ ᠣᠯᠠᠨ ᠤ᠋ ᠡᠮᠦᠨᠡ ᠲᠦᠷᠦᠭᠦᠯᠡᠨ ᠳᠠᠪᠬᠢᠳᠠᠭ ᠦᠭᠡᠢ ᠰᠠᠨ᠂ ᠲᠡᠷᠡ ᠦᠷᠭᠦᠯᠵᠢ ᠲᠡᠮᠦᠷ ᠮᠡᠲᠦ ᠢᠯᠠᠭᠳᠠᠰᠢ ᠦᠭᠡᠢ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠶᠠᠪᠤᠵᠤ ᠲᠡᠳᠡᠨ ᠢ᠋ ᠴᠢᠳᠠᠮᠠᠭᠠᠢ ᠪᠠᠷ ᠵᠢᠯᠣᠭᠣᠳᠴᠤ ᠶᠠᠪᠤᠭᠰᠠᠨ ᠪᠤᠶᠤ ᠬᠠᠮᠢᠭᠠ ᠪᠠᠨ ᠰᠢᠢᠳᠪᠦᠷᠢᠲᠡᠢ ᠴᠣᠬᠢᠯᠲᠠ ᠶ᠋ᠢ ᠥᠭᠬᠦ ᠬᠡᠷᠡᠭ ᠲᠡᠢ ᠪᠣᠯᠤᠭᠰᠠᠨ ᠭᠠᠵᠠᠷ ᠲᠤᠰᠠᠯᠠᠮᠵᠢ ᠶ᠋ᠢᠨ ᠴᠡᠷᠢᠭ ᠶᠠᠪᠤᠭᠤᠯᠵᠤ ᠪᠠᠢᠭᠰᠠᠨ ᠰᠢᠦ᠃ ᠥᠪᠡᠷ ᠦ᠋ᠨ ᠵᠠᠯᠠᠭᠤ ᠳᠡᠭᠦᠦ ᠬᠥᠩᠭᠡᠮᠰᠦᠭ ᠺᠶᠦᠯᠺᠡᠨ ( ᠬᠥᠯᠭᠡᠨ ) ᠬᠠᠭᠠᠨ ᠢ᠋ ᠰᠠᠨᠠᠭᠲᠤᠨ᠃ ᠲᠡᠷᠡ ᠭᠠᠪᠰᠢᠭᠠᠢ ᠭᠠᠷᠮᠠᠭᠠᠢ ᠪᠠᠨ ᠭᠠᠢᠬᠠᠭᠤᠯᠬᠤ ᠭᠡᠵᠦ ᠶᠠᠪᠤᠭᠠᠳ ᠶᠠᠮᠠᠷ ᠴᠤ᠌ ᠠᠰᠢᠭ ᠦᠭᠡᠢ᠂ ᠬᠣᠭᠣᠯᠠᠢ ᠳ᠋ᠠᠭᠠᠨ ᠰᠤᠮᠤ ᠰᠢᠭᠠᠯᠭᠠᠭᠰᠠᠨ ᠪᠢᠯᠡ᠁
ᠪᠠᠲᠤ ᠬᠠᠭᠠᠨ ᠳᠤᠭᠤᠢ ᠪᠠᠢᠵᠤ᠂ ᠳᠤᠷᠠ ᠦᠭᠡᠢᠴᠡᠨ᠂ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠨᠢ᠄
— ᠲᠦᠮᠡᠲᠦ ᠶ᠋ᠢᠨ ᠳᠠᠷᠤᠭᠠ ᠪᠣᠷᠣᠨᠲᠠᠢ ᠠᠭᠤᠤ ᠶᠡᠬᠡ ᠢᠯᠠᠯᠲᠠ ᠶ᠋ᠢ ᠮᠢᠨᠦ ᠡᠪᠦᠷ ᠡᠴᠡ ᠪᠤᠯᠢᠶᠠᠨ ᠠᠪᠬᠤ ᠶ᠋ᠢ ᠨᠢ ᠪᠢ ᠬᠦᠰᠡᠬᠦ ᠦᠭᠡᠢ ᠪᠠᠢᠨᠠ᠃
ᠪᠠᠲᠤ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠢᠯᠠᠯᠲᠠ ᠭᠤᠢᠪᠢᠵᠤ ᠪᠠᠢᠬᠤ ᠦᠶᠡᠰ ᠲᠦ᠍ ᠰᠢᠲ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠬᠦᠷᠦᠯᠴᠡᠨ ᠢᠷᠡᠵᠡᠭᠡᠪᠡ᠃ ᠣᠷᠣᠰ ᠤ᠋ᠳ ᠮᠠᠰᠢ ᠭᠠᠷᠮᠠᠭᠠᠢ ᠪᠠᠷ ᠪᠠᠢᠯᠳᠤᠵᠤ ᠪᠠᠢᠪᠠ᠃ ᠲᠠᠲ᠋ᠠᠷ ᠤ᠋ᠳ ᠶᠠᠮᠠᠷ ᠴᠤ᠌ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠪᠡᠷ ᠦᠢᠮᠡᠯᠳᠦᠵᠦ ᠪᠠᠢᠪᠠ᠃
ᠲᠦᠮᠡᠲᠦ ᠶ᠋ᠢᠨ ᠳᠠᠷᠤᠭᠠ ᠪᠣᠷᠣᠨᠲᠠᠢ ᠳᠠᠢᠰᠤᠨ ᠤ᠋ ᠰᠢᠷᠦᠭᠦᠨ ᠡᠰᠡᠷᠭᠦᠴᠡᠯ ᠢ᠋ ᠭᠠᠭᠴᠠᠬᠠᠨ ᠴᠣᠬᠢᠯᠲᠠ ᠪᠠᠷ ᠨᠢᠴᠤᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠥᠪᠡᠷ ᠦ᠋ᠨ ᠲᠠᠷᠬᠠᠵᠤ ᠪᠤᠲᠠᠷᠠᠭᠰᠠᠨ ᠮᠣᠷᠢᠨ ᠴᠡᠷᠢᠭ ᠦ᠋ᠳ ᠢ᠋ ᠴᠤᠭᠯᠠᠭᠤᠯᠤᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃
ᠰᠢᠨᠡ ᠢᠷᠡᠭᠰᠡᠨ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠶᠡᠬᠡ ᠲᠤᠯᠤᠯᠳᠤᠭᠠᠨ ᠤ᠋ ᠲᠡᠭᠦᠰᠬᠡᠯ ᠢ᠋ ᠰᠢᠢᠳᠪᠦᠷᠢᠯᠡᠵᠡᠢ᠃ ᠣᠷᠣᠰ ᠤ᠋ᠳ ᠤᠬᠤᠷᠢᠵᠤ ᠭᠣᠣᠯ ᠤ᠋ᠨ ᠡᠭᠴᠡ ᠡᠷᠭᠢ ᠡᠴᠡ ᠤᠷᠤᠭᠤᠳᠠᠨ ᠤᠨᠠᠵᠠᠭᠠᠵᠤ ᠣᠢ ᠮᠣᠳᠣ ᠶ᠋ᠢ ᠴᠢᠭᠯᠡᠨ ᠵᠢᠭᠤᠲᠠᠵᠤ ᠡᠬᠢᠯᠡᠪᠡ᠃ ᠲᠠᠲ᠋ᠠᠷ ᠤ᠋ᠨ ᠰᠢᠨᠡ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠣᠲ᠋ᠷᠢᠶᠠᠳ᠋ ᠤ᠋ᠳ ᠲᠠᠢ ᠡᠰᠡᠷᠭᠦᠴᠡᠨ ᠲᠡᠭᠦᠪᠦᠷᠢᠯᠡᠬᠦ ᠬᠦᠴᠦᠨ ᠲᠡᠳᠡᠨ ᠳ᠋ᠦ᠍ ᠪᠠᠢᠭᠰᠠᠨ ᠦᠭᠡᠢ ᠪᠢᠯᠡ᠃ ᠲᠡᠮᠡᠴᠡᠯ ᠪᠠᠢᠯᠳᠤᠭᠴᠢ ᠨᠠᠷ ᠢ᠋ ᠨᠢᠭᠡᠳᠬᠡᠨ ᠪᠥᠭᠡᠮᠨᠡᠷᠡᠭᠦᠯᠵᠦ ᠠᠶᠤᠯᠲᠠᠢ ᠭᠠᠵᠠᠷ ᠤᠷᠤᠭᠤ ᠴᠢᠭᠯᠡᠭᠦᠯᠬᠦ ᠤᠳᠤᠷᠢᠳᠤᠭᠴᠢ ᠪᠠᠢᠭᠰᠠᠨ ᠦᠭᠡᠢ᠂ ᠬᠠᠷᠠ ᠲᠤᠭ ᠤᠨᠠᠵᠤ ᠸᠠᠩ ᠭᠸᠤᠷᠬᠢ ᠠᠯᠠᠭᠳᠠᠭᠰᠠᠨ ᠪᠠ ᠲᠤᠷᠰᠢᠯᠭᠠ ᠲᠠᠢ ᠡᠷᠡᠯᠬᠡᠭ ᠵᠣᠷᠢᠭᠲᠠᠢ ᠸᠠᠩ ᠸᠠᠰᠢᠯᠢᠺᠤ ᠠᠮᠢᠳᠤ ᠪᠠᠷ ᠣᠯᠵᠠᠯᠠᠭᠳᠠᠭᠰᠠᠨ ᠪᠠᠢᠵᠠᠢ᠃ ᠣᠷᠣᠰ ᠤ᠋ᠨ ᠴᠡᠷᠢᠭ ᠦ᠋ᠳ ᠶᠠᠮᠠᠷ ᠴᠥ᠍ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠪᠥᠭᠡᠮᠨᠡᠷᠡᠨ ᠦᠢᠮᠡᠯᠳᠦᠬᠦ ᠪᠣᠯᠤᠭᠰᠠᠨ ᠪᠠ ᠬᠥᠮᠦᠨ ᠪᠦᠷᠢ ᠥᠪᠡᠷ ᠦ᠋ᠨ ᠴᠢᠳᠠᠬᠤ ᠬᠢᠷᠢ ᠪᠡᠷ ᠪᠠᠢᠯᠳᠤᠵᠤ ᠪᠠᠢᠪᠠ᠃ ᠴᠡᠷᠢᠭ ᠦ᠋ᠳ ᠦ᠋ᠨ ᠡᠷᠡᠯᠬᠡᠭ ᠵᠣᠷᠢᠭ ᠪᠠ ᠲᠡᠳᠡᠭᠡᠷ ᠦ᠋ᠨ ᠶᠡᠬᠡ ᠳᠤᠷᠠᠰᠬᠠᠯᠲᠤ ᠵᠢᠳᠬᠦᠯ ᠨᠢ ᠠᠰᠢᠭ ᠲᠤᠰᠠ ᠲᠠᠢ ᠪᠣᠯᠵᠠᠢ᠃
ᠪᠠᠲᠤ ᠬᠠᠭᠠᠨ ᠨᠢᠭᠡᠨ ᠥᠨᠳᠥᠷᠯᠢᠭ ᠬᠥᠪᠡᠭᠡᠨ ᠳᠡᠭᠡᠷᠡ ᠭᠠᠷᠴᠤ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠬᠡᠷᠬᠢᠨ ᠬᠠᠰᠬᠢᠷᠤᠯᠳᠤᠨ ᠳᠣᠪᠲᠣᠯᠬᠤ ᠪᠠ ᠣᠷᠣᠰ ᠤ᠋ᠳ ᠲᠠᠢ ᠲᠤᠯᠭᠠᠷᠠᠮᠠᠭᠴᠠ ᠬᠡᠷᠬᠢᠨ ᠳᠠᠭᠤ ᠴᠢᠮᠡᠭᠡ ᠪᠡᠨ ᠬᠤᠷᠢᠶᠠᠵᠤ ᠬᠡᠷᠬᠢᠨ ᠭᠠᠯᠵᠠᠭᠤᠷᠠᠭᠰᠠᠨ ᠮᠡᠲᠦ ᠴᠠᠪᠴᠢᠯᠳᠤᠬᠤ ᠶ᠋ᠢ ᠲᠡᠨᠳᠡ ᠡᠴᠡ ᠬᠢᠨᠠᠨ ᠬᠠᠷᠠᠵᠤ ᠪᠠᠢᠵᠠᠢ᠃ ᠭᠠᠭᠴᠠᠬᠦ ᠬᠦᠨᠳᠦ ᠪᠡᠷ ᠰᠢᠷᠬᠠᠲᠤᠭᠰᠠᠨ ᠬᠥᠮᠦᠰ ᠦ᠋ᠨ ᠬᠠᠶᠠ ᠬᠠᠰᠬᠢᠷᠴᠤ ᠭᠠᠰᠠᠯᠬᠤ ᠨᠢ ᠴᠠᠰᠤᠲᠤ ᠲᠠᠯᠠ ᠶ᠋ᠢ ᠠᠶᠤᠮᠰᠢᠭᠲᠤ ᠮᠠᠭᠤᠬᠠᠢ ᠳᠠᠭᠤ ᠨᠤᠭᠤᠳ ᠢ᠋ᠶ᠋ᠠᠷ ᠪᠦᠷᠬᠦᠭᠦᠯᠦᠨᠡ᠃
ᠲᠡᠭᠦᠨ ᠦ᠌ ᠳᠠᠷᠤᠭᠠ ( ᠳᠠᠷᠠᠭᠠ ) ᠪᠣᠷᠤᠨᠳᠠᠢ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠠᠶᠠᠷᠬᠠᠨ ᠶᠠᠪᠤᠵᠤ ᠲᠣᠯᠣᠭᠠᠢ ᠳᠡᠭᠡᠷᠡ ᠭᠠᠷᠪᠠ᠃ ᠬᠡᠵᠢᠶᠡᠳᠡ ᠶᠠᠭᠤᠮᠠ ᠤᠷᠤᠭᠤ ᠳᠣᠷᠣᠢ ᠤᠢᠳᠬᠠᠷᠲᠠᠢ ᠪᠠᠷ ᠶᠠᠪᠤᠳᠠᠭ ᠪᠤᠷᠤᠨᠳᠠᠢ᠂ ᠪᠠᠲᠤ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠬᠦᠷᠴᠦ ᠥᠷᠥᠭᠡᠰᠦᠨ ᠬᠥᠯ ᠢ᠋ᠶ᠋ᠡᠨ ᠰᠥᠭᠥᠳᠦᠨ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠶ᠋ᠢ ᠦᠨᠦᠰᠪᠡ᠃ ᠪᠣᠷᠣᠨᠳᠠᠢ ᠡᠷᠭᠢᠵᠦ ᠬᠣᠢᠨᠠ ᠠ᠋ᠴᠠ ᠪᠠᠨ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠴᠡᠷᠢᠭ ᠦ᠋ᠨ ᠭᠠᠷ ᠠ᠋ᠴᠠ ᠠᠯᠲᠠᠨ ᠬᠡ ᠬᠤᠸᠠᠷᠲᠠᠢ ᠪᠠᠭᠠᠬᠠᠨ ᠪᠣᠯᠣᠳ ᠪᠠᠮᠪᠠᠢ ᠶ᠋ᠢ ᠠᠪᠴᠤ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠡᠷᠭᠦᠭᠰᠡᠨ ᠨᠢ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠸᠠᠩ ᠭᠧᠤᠷᠬᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠲᠠᠯᠪᠢᠭᠰᠠᠨ ᠠᠵᠢ᠃
ᠪᠠᠲᠤ ᠬᠠᠭᠠᠨ ᠪᠣᠷᠤᠨᠳᠠᠢ ᠶ᠋ᠢ ᠣᠭᠲᠣ ᠠᠵᠢᠬᠤ ᠦᠭᠡᠢ ᠠᠯᠤᠰ ᠢ᠋ ᠬᠠᠷᠠᠵᠤ᠂ ᠡᠭᠳᠡᠭᠦᠷᠬᠡᠨ᠂
— ᠶᠠᠭᠤᠨ ᠳ᠋ᠤ᠌ ᠣᠷᠣᠰ ᠤ᠋ᠨ ᠪᠤᠷᠬᠠᠨ ᠤ᠋ ᠰᠦᠮᠡ ᠰᠢᠳᠡᠵᠦ ᠪᠠᠢᠨᠠ ᠪᠣᠢ? ᠮᠣᠩᠭᠣᠯᠴᠤᠳ ᠤ᠋ᠨ ᠠᠭᠤᠤ ᠶᠡᠬᠡ ᠬᠠᠭᠠᠨ ᠤ᠋ ᠲᠥᠯᠥᠭᠡᠨᠡ ᠮᠥᠷᠭᠥᠯ ᠬᠢᠵᠦ ᠪᠠᠢᠬᠤ ᠶ᠋ᠢᠨ ᠲᠤᠯᠠ ᠣᠷᠣᠰ ᠤ᠋ᠨ ᠪᠥᠬᠡ ᠨᠠᠷ ᠢ᠋ ᠥᠷᠥᠰᠢᠶᠡᠵᠦ ᠬᠠᠮᠠᠭᠠᠯᠠᠵᠤ ᠪᠠᠢᠭᠲᠤᠨ ᠭᠡᠵᠦ ᠪᠢ ᠲᠤᠰᠢᠶᠠᠭᠰᠠᠨ ᠪᠢᠯᠡ! ᠭᠡᠵᠦ ᠳᠤᠷᠠ ᠦᠭᠡᠢᠴᠡᠨ ᠬᠡᠯᠡᠪᠡ᠃
ᠪᠣᠷᠤᠨᠳᠠᠢ ᠮᠥᠨ ᠪᠠᠮᠪᠠᠢ ᠶ᠋ᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠪᠠᠷᠢᠵᠤ ᠳᠠᠭᠤ ᠴᠢᠮᠡᠭᠡ ᠦᠭᠡᠢ ᠪᠡᠷ ᠡᠪᠦᠳᠦᠭᠯᠡᠵᠦ ᠵᠣᠭᠰᠣᠭᠰᠠᠭᠠᠷ ᠪᠠᠢᠨᠠ᠃ ᠪᠠᠲᠤ ᠬᠠᠭᠠᠨ᠂ ᠣᠷᠣᠰ ᠤ᠋ᠨ ᠸᠠᠩ ᠭᠧᠤᠷᠬᠢ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠬᠠᠷᠠᠭᠠ ᠪᠠᠨ ᠳᠤᠰᠬᠠᠪᠠ᠃ ᠲᠡᠭᠦᠨ ᠦ᠌ ᠪᠤᠵᠢᠭᠢᠷ ᠪᠤᠭᠤᠷᠤᠯ ᠦᠰᠦᠲᠡᠢ᠂ ᠬᠠᠷᠠ ᠰᠠᠬᠠᠯᠲᠠᠢ᠂ ᠬᠠᠷᠠ ᠬᠦᠷᠡᠩ ᠴᠢᠰᠤ ᠪᠣᠯᠤᠭᠰᠠᠨ ᠨᠢᠭᠤᠷ ᠨᠢ ᠭᠠᠰᠠᠯᠠᠩ ᠵᠣᠪᠠᠯᠠᠩ ᠢ᠋ ᠶᠡᠷᠦ ᠮᠡᠳᠡᠬᠦ ᠦᠭᠡᠢ ᠤᠨᠲᠠᠵᠤ ᠪᠠᠢᠭᠠ ᠰᠢᠭ᠋ ᠰᠠᠨᠠᠭᠳᠠᠪᠠ᠃
ᠪᠠᠲᠤ ᠬᠠᠭᠠᠨ ᠡᠷᠡᠰ ᠲᠣᠩᠭᠣᠢᠵᠤ ᠣᠭᠲᠣᠯᠤᠭᠰᠠᠨ ᠲᠣᠯᠣᠭᠠᠢ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ ᠬᠦᠷᠴᠦ ᠦᠵᠡᠭᠡᠳ᠄
— ᠴᠢᠬᠢ ᠨᠢ ᠤᠷᠠᠭᠳᠠᠵᠤ ᠭᠡᠮᠲᠦᠭᠰᠡᠨ ᠪᠠᠢᠨᠠ! ᠴᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠣᠷᠢᠨ ᠤ᠋ ᠰᠡᠭᠦᠯ ᠳ᠋ᠦ᠍ ᠤᠶᠠᠵᠤ ᠴᠢᠷᠴᠦ ᠣᠷᠬᠢᠭᠰᠠᠨ ᠡᠨᠡ ᠪᠡᠯᠡᠭ ᠢ᠋ ᠨᠠᠳᠠᠳᠤ ᠬᠦᠷᠭᠡᠵᠦ ᠪᠠᠷᠢᠵᠤ ᠪᠠᠢᠨᠠ ᠤᠤ? ᠴᠢ ᠨᠠᠳᠠ ᠪᠠᠷ ᠢᠨᠢᠶᠡᠳᠦᠮ ᠪᠣᠯᠭᠠᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠨᠠ ᠤᠤ? ᠁ ᠵᠠᠢᠯᠠ!
ᠪᠠᠲᠤ ᠬᠠᠭᠠᠨ ᠲᠡᠷᠡ ᠪᠠᠮᠪᠠᠢ ᠶ᠋ᠢ ᠲᠠᠰᠢᠭᠤᠷᠳᠠᠪᠠ᠃ ᠳᠡᠭᠡᠷᠡᠬᠢ ᠲᠣᠯᠣᠭᠠᠢ ᠨᠢ ᠤᠨᠠᠵᠤ ᠥᠨᠳᠥᠷ ᠬᠥᠪᠡᠭᠡᠨ ᠦ᠌ ᠡᠭᠴᠡ ᠪᠠᠯ ᠢ᠋ ᠤᠷᠤᠭᠤᠳᠠᠨ ᠥᠩᠬᠥᠷᠢᠵᠦ ᠴᠠᠰᠤᠨ ᠳ᠋ᠤ᠌ ᠰᠢᠭᠢᠳᠴᠦ ᠵᠣᠭᠰᠣᠪᠠ᠃ ᠠᠭᠤᠷᠯᠠᠭᠰᠠᠨ ᠰᠢᠷᠠ ᠴᠢᠷᠠᠢ ᠲᠠᠢ ᠪᠣᠷᠤᠨᠲᠠᠢ ᠡᠪᠦᠳᠦᠭ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠲᠣᠩᠭᠣᠢᠵᠤ ᠬᠦᠨᠳᠦᠳᠬᠡᠭᠰᠡᠨ ᠵᠢᠵᠢᠭᠬᠡᠨ ᠠᠯᠬᠤᠮ ᠢ᠋ᠶ᠋ᠠᠷ ᠵᠠᠢᠯᠠᠵᠤ ᠣᠳᠪᠠ᠃
ᠪᠠᠲᠤ ᠬᠠᠭᠠᠨ ᠤ᠋ ᠪᠠᠷᠠ ᠪᠣᠯᠤᠭᠴᠢᠳ ᠨᠢ ᠵᠠᠩᠵᠤᠨ ᠴᠠᠰᠢ ᠶᠠᠭᠠᠬᠢᠬᠤ ᠪᠠ ᠥᠪᠡᠷ ᠦ᠋ᠨ ᠠᠭᠤᠷ ᠢ᠋ ᠬᠡᠷᠬᠢᠨ ᠭᠠᠷᠭᠠᠬᠤ ᠶ᠋ᠢ ᠮᠠᠰᠢ ᠰᠣᠨᠢᠷᠬᠠᠨ ᠬᠠᠷᠠᠵᠠᠭᠠᠵᠤ ᠪᠠᠢᠪᠠ᠃ ᠭᠡᠲᠡᠯᠡ ᠪᠠᠲᠤ ᠬᠠᠭᠠᠨ ᠶᠠᠭᠤ ᠨᠢ ᠴᠦ᠍ ᠮᠡᠳᠡᠭᠳᠡᠬᠦ ᠦᠭᠡᠢ ᠨᠢᠭᠤᠷ ᠴᠢᠷᠠᠢ ᠭᠠᠷᠭᠠᠵᠤ ᠲᠤᠯᠤᠯᠳᠤᠭᠠᠨ ᠢ᠋ ᠲᠠᠢᠪᠤᠩ ᠢ᠋ᠶ᠋ᠠᠷ ᠬᠢᠨᠠᠨ ᠬᠠᠷᠠᠭᠰᠠᠭᠠᠷ ᠵᠣᠭᠰᠣᠵᠤ ᠪᠠᠢᠯᠠ᠃
ᠣᠷᠣᠰ ᠤ᠋ᠳ ᠵᠦᠭ ᠪᠦᠷᠢ ᠳ᠋ᠦ᠍ ᠤᠬᠤᠷᠢᠵᠤ ᠡᠭᠴᠡ ᠡᠷᠭᠢ ᠳᠡᠭᠡᠷᠡ ᠡᠴᠡ ᠬᠤᠷᠳᠤᠨ ᠭᠦᠶᠦᠯᠳᠦᠨ ᠮᠥᠰᠥᠨ ᠳᠡᠭᠡᠷᠡ ᠪᠠᠭᠤᠵᠤ ᠨᠥᠭᠦᠭᠡ ᠡᠷᠭᠢ ᠥᠭᠡᠳᠡ ᠶᠠᠭᠠᠷᠠᠨ ᠭᠠᠷᠤᠭᠠᠳ ᠣᠢ ᠮᠣᠳᠣᠨ ᠤ᠋ ᠭᠦᠨ ᠳ᠋ᠦ᠍ ᠳᠠᠯᠳᠠ ᠣᠷᠣᠨᠠ᠃ ᠲᠠᠲ᠋ᠠᠷ ᠤ᠋ᠳ ᠲᠡᠳᠡᠨ ᠢ᠋ ᠭᠦᠢᠴᠡᠨ ᠣᠴᠢᠵᠤ ᠪᠠᠷᠢᠯᠴᠠᠨ ᠠᠪᠤᠯᠴᠠᠵᠤ ᠴᠠᠪᠴᠢᠯᠳᠤᠨ ᠴᠠᠰᠢ ᠳᠠᠪᠬᠢᠯᠳᠤᠵᠠᠭᠠᠨᠠ᠃ ᠴᠠᠰᠤᠲᠠᠢ ᠴᠠᠭᠠᠨ ᠲᠠᠯᠠ ᠳᠡᠭᠡᠷᠡ ᠠᠯᠠᠭᠳᠠᠭᠴᠢᠳ ᠤ᠋ᠨ ᠬᠡᠭᠦᠷ ᠦ᠋ᠳ ᠬᠣᠴᠣᠷᠤᠨᠠ᠃
ᠵᠠᠩᠵᠤᠨ ᠠᠯᠠᠭᠳᠠᠭᠰᠠᠨ ᠸᠠᠩ ᠭᠸᠤᠷᠬᠢ ᠶ᠋ᠢᠨ ᠪᠡᠶᠡ ᠶ᠋ᠢ ᠦᠵᠡᠬᠦ ᠶ᠋ᠢ ᠬᠦᠰᠡᠬᠦ ᠤᠴᠢᠷ ᠬᠥᠪᠡᠭᠡᠨ ᠦ᠌ ᠳᠡᠭᠡᠷᠡ ᠡᠴᠡ ᠪᠠᠭᠤᠬᠤ ᠪᠠᠷ ᠬᠥᠳᠡᠯᠪᠡ᠃ ᠲᠡᠭᠦᠨ ᠦ᠌ ᠪᠣᠷᠣ ᠮᠣᠷᠢ ᠨᠢ ᠬᠥᠯ ᠢ᠋ᠶ᠋ᠡᠨ ᠡᠷᠭᠦᠵᠦ ᠦᠬᠦᠭᠴᠢᠳ ᠦ᠋ᠨ ᠬᠡᠭᠦᠷ ᠦ᠋ᠨ ᠳᠡᠭᠡᠭᠦᠷ ᠬᠠᠷᠠᠢᠵᠤ ᠪᠣᠯᠭᠣᠮᠵᠢᠲᠠᠢ ᠪᠠᠷ ᠠᠯᠬᠤᠯᠠᠨ ᠶᠠᠪᠤᠨᠠ᠃ ᠪᠣᠷᠤᠨᠲᠠᠢ ᠵᠠᠮ ᠵᠢᠭᠠᠵᠤ ᠡᠮᠦᠨᠡ ᠨᠢ ᠶᠠᠪᠤᠪᠠ᠃
ᠣᠷᠣᠰ ᠤ᠋ᠨ ᠸᠠᠩ ᠤ᠋ᠨ ᠬᠡᠭᠦᠷ ᠦ᠋ᠨ ᠳᠡᠷᠭᠡᠳᠡ ᠬᠣᠶᠠᠷ ᠴᠡᠷᠢᠭ ᠵᠣᠳᠣᠯᠳᠤᠵᠤ ᠪᠠᠢᠪᠠ᠃ ᠨᠢᠭᠡ ᠨᠢ ᠬᠡᠭᠦᠷ ᠦ᠋ᠨ ᠬᠥᠯ ᠡᠴᠡ ᠨᠢ ᠤᠯᠠᠭᠠᠨ ᠰᠠᠪᠢᠬᠢᠨ ᠭᠤᠲᠤᠯ ᠤ᠋ᠨ ᠥᠷᠥᠭᠡᠰᠦᠨ ᠢ᠋ ᠲᠠᠢᠯᠵᠤ ᠠᠪᠤᠭᠠᠳ ᠰᠤᠭᠤᠨ ᠳ᠋ᠠᠭᠠᠨ ᠬᠠᠪᠴᠢᠭᠤᠯᠵᠤ ᠨᠥᠭᠦᠭᠡ ᠶ᠋ᠢ ᠨᠢ ᠲᠠᠢᠯᠵᠤ ᠠᠪᠬᠤ ᠶ᠋ᠢ ᠣᠷᠣᠯᠳᠣᠨᠠ᠃ ᠨᠥᠭᠦᠭᠡ ᠨᠢ ᠲᠡᠭᠦᠨ ᠢ᠋ ᠵᠠᠢᠯᠠᠭᠤᠯᠬᠤ ᠭᠡᠵᠦ ᠲᠦᠯᠬᠢᠯᠴᠡᠨ ᠨᠢᠭᠤᠷ ᠤᠷᠤᠭᠤ ᠨᠢ ᠨᠢᠳᠤᠷᠭᠠᠯᠠᠨᠠ᠃ ᠲᠡᠷᠡ ᠬᠣᠶᠠᠷ ᠶᠡᠬᠡ ᠠᠭᠤᠷᠯᠠᠯᠳᠤᠨ ᠵᠣᠳᠣᠯᠳᠤᠵᠤ ᠪᠠᠢᠭᠰᠠᠨ ᠲᠤᠯᠠ ᠴᠡᠷᠢᠭ ᠦ᠋ᠨ ᠶᠡᠬᠡ ᠨᠣᠶᠠᠳ ᠤ᠋ᠨ ᠣᠢᠷᠠᠲᠤᠵᠤ ᠢᠷᠡᠭᠰᠡᠨ ᠢ᠋ ᠶᠡᠷᠦ ᠮᠡᠳᠡᠭᠰᠡᠨ ᠦᠭᠡᠢ ᠠᠵᠢ᠃
一 ᠡᠳᠡᠨᠠᠷ ᠢ᠋ ᠪᠠᠷᠢᠵᠤ ᠠᠪᠤᠭᠲᠤᠨ! ᠰᠠᠪᠢᠬᠢᠨ ᠭᠤᠲᠤᠯ ᠢ᠋ ᠮᠢᠨᠦ ᠠᠴᠢᠶᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠬᠢᠭᠲᠦᠨ᠁ ᠭᠡᠵᠦ ᠪᠠᠲᠤ ᠬᠠᠭᠠᠨ ᠲᠤᠰᠢᠶᠠᠪᠠ᠃ ᠰᠢᠳᠠᠷ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠠᠭᠠᠵᠤ ᠨᠥᠭᠦᠭᠡ ᠵᠣᠳᠣᠭᠠᠴᠢ ᠨᠠᠷ ᠢ᠋ ᠪᠠᠷᠢᠵᠤ ᠠᠪᠤᠪᠠ᠃
一 ᠶᠢᠷᠲᠢᠨᠴᠦᠰ ᠦ᠋ᠨ ᠶᠡᠬᠡ ᠡᠵᠡᠨ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠬᠡᠷᠡᠭᠦᠯ ᠵᠣᠳᠣᠭᠠᠨ᠂ ᠬᠤᠯᠠᠭᠠᠢ ᠬᠤᠳᠠᠯ᠂ ᠬᠣᠭᠣᠷᠣᠨᠳᠣ ᠪᠠᠨ ᠠᠯᠠᠯᠳᠤᠬᠤ ᠶᠠᠪᠤᠳᠠᠯ ᠪᠠᠢᠬᠤ ᠶᠣᠰᠣ ᠦᠭᠡᠢ᠃ ᠬᠡᠷᠪᠡ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠳ ᠬᠣᠭᠣᠷᠣᠨᠳᠣ ᠪᠠᠨ ᠵᠠᠨᠴᠢᠯᠳᠤᠬᠤ ᠶᠤᠮ ᠪᠣᠯ ᠶᠠᠭᠠᠬᠢᠨ ᠢᠯᠠᠵᠤ ᠴᠢᠳᠠᠬᠤ ᠶᠤᠮ ᠪᠢᠯᠡ? ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠠᠰᠠᠭ ᠤ᠋ᠨ ᠬᠠᠤᠯᠢ ᠶ᠋ᠢ ᠪᠠᠲᠤ ᠪᠠᠷ ᠰᠠᠨᠠᠬᠤ ᠬᠡᠷᠡᠭᠲᠡᠢ᠃ ᠭᠡᠮᠲᠦ ᠡᠲᠡᠭᠡᠳ ᠨᠠᠷ ᠨᠢᠭᠡᠨ ᠠᠳᠠᠯᠢ ᠠᠯᠠᠭᠳᠠᠬᠤ ᠶᠠᠯᠠ ᠶ᠋ᠢ ᠡᠳ᠋ᠯᠡᠨᠡ᠃ ᠲᠡᠳᠡᠨᠡᠷ ᠲᠦ᠍ ᠡᠨᠡ ᠳᠣᠣᠷᠠ ᠨᠢ ᠰᠢᠢᠳᠬᠡᠯ ᠢ᠋ ᠨᠢ ᠦᠵᠡᠭᠦᠯ!
ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠢᠨᠢᠶᠡᠯᠳᠦᠵᠦ ᠵᠣᠳᠣᠯᠳᠤᠭᠰᠠᠨ ᠬᠥᠮᠦᠰ ᠦ᠋ᠨ ᠨᠢᠭᠡ ᠶ᠋ᠢ ᠨᠢ ᠲᠣᠯᠣᠭᠠᠢ ᠪᠠᠷ ᠤᠷᠤᠭᠤ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠪᠠ᠃ ᠲᠡᠭᠦᠨ ᠦ᠌ ᠤᠷᠲᠤ ᠱᠣᠪᠬᠣ ᠥᠰᠥᠭᠡᠢ ᠲᠡᠢ ᠬᠠᠭᠤᠴᠢᠨ ᠵᠠᠩ ᠲᠠᠯᠪᠢᠭᠰᠠᠨ ᠰᠢᠷᠠ ᠰᠠᠪᠢᠬᠢᠨ ᠭᠤᠲᠤᠯ ᠲᠠᠢ ᠬᠥᠯ ᠨᠢ ᠠᠭᠠᠷ ᠢ᠋ᠶ᠋ᠠᠷ ᠬᠡᠢᠰᠬᠦ ᠮᠡᠲᠦ ᠦᠵᠡᠭᠳᠡᠪᠡ᠃ ᠲᠡᠷᠡ ᠪᠠᠷᠢᠭᠳᠠᠭᠰᠠᠨ ᠴᠡᠷᠢᠭ ᠨᠢ ᠠᠮᠢᠰᠬᠤᠭᠠᠳᠠᠵᠤ ᠨᠣᠴᠣᠯᠳᠤᠵᠤ ᠬᠠᠰᠬᠢᠷᠬᠤ ᠨᠢ᠂
一 ᠮᠢᠨᠦ ᠪᠤᠷᠤᠭᠤ ᠪᠢᠰᠢ᠂ ᠬᠠᠷᠢᠨ ᠲᠡᠷᠡ ᠳᠡᠯᠲᠦ ᠴᠢᠨᠣᠠ ᠪᠠ ᠭᠠᠬᠠᠢ ᠶ᠋ᠢᠨ ᠬᠦᠦ ᠺᠢᠫᠴᠠᠺ ᠪᠣᠯᠪᠠ ᠭᠡᠵᠦ ᠤᠷᠢᠯᠠᠨᠠ᠃
ᠴᠢᠭᠢᠷᠠᠭ ᠬᠣᠶᠠᠷ ᠮᠣᠩᠭᠣᠯᠴᠤᠳ᠂ᠰᠢᠢᠳᠬᠡᠭᠳᠡᠵᠦ ᠪᠠᠢᠭᠠ ᠬᠥᠮᠦᠨ ᠦ᠌ ᠬᠥᠯ ᠦ᠋ᠨ ᠤᠯᠠ ᠶ᠋ᠢ ᠲᠡᠭᠦᠨ ᠦ᠌ ᠰᠢᠯᠢ ᠶ᠋ᠢᠨ ᠬᠦᠵᠦᠭᠦᠨ ᠳ᠋ᠦ᠍ ᠲᠤᠯᠭᠠᠵᠤ ᠨᠤᠵᠢᠭᠢᠨᠠᠲᠠᠯᠠ ᠳᠠᠷᠤᠪᠠ᠃ ᠴᠣᠴᠢᠮᠠᠭ ᠣᠷᠢᠯᠠᠬᠤ ᠳᠠᠭᠤ ᠭᠡᠨᠡᠳᠲᠡ ᠲᠠᠰᠤᠷᠠᠪᠠ᠃ ᠪᠠᠰᠠ ᠡᠢᠮᠦ ᠶᠠᠪᠤᠳᠠᠯ ᠨᠥᠭᠦᠭᠡ ᠳ᠋ᠦ᠍ᠨᠢ ᠳᠠᠪᠲᠠᠭᠳᠠᠪᠠ᠃ᠨᠥᠭᠦᠭᠡ ᠵᠣᠳᠣᠯᠳᠤᠭᠠᠴᠢ᠄
— ᠪᠢ ᠲᠠᠬᠢᠶᠠᠨ ᠤ᠋ ᠮᠠᠨᠠᠭᠠᠴᠢ ᠨᠠᠽᠠᠷ ᠺᠶᠡᠷᠢᠽᠧᠺ ᠦ᠋ᠨ ᠬᠦᠦ ᠪᠦᠷᠢᠪᠡᠢ ᠪᠠᠢᠨᠠ ᠭᠡᠰᠡᠨ᠂ ᠭᠡᠪᠡᠴᠦ ᠴᠠᠷᠭᠢᠶᠠ ᠳᠠᠭᠤ ᠠᠷᠠᠢ ᠪᠣᠭᠣᠨᠢᠬᠠᠨ ᠰᠣᠨᠣᠰᠳᠠᠭᠠᠳ ᠲᠡᠰᠬᠢᠬᠦ ᠴᠢᠮᠡᠭᠡ ᠭᠠᠷᠭᠠᠨ ᠲᠠᠰᠤᠯᠳᠠᠪᠠ᠃ ᠢᠩᠭᠢᠭᠡᠳ ᠠᠯᠠᠭᠳᠠᠭᠴᠢᠳ ᠭᠠᠢᠬᠠᠭᠰᠠᠨ ᠮᠡᠲᠦ ᠨᠢᠳᠦ ᠪᠡᠨ ᠬᠠᠷᠠᠵᠤ ᠴᠠᠰᠤᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠬᠣᠴᠣᠷᠪᠠ᠃
ᠲᠤᠯᠤᠯᠳᠤᠭᠠᠨ ᠲᠡᠭᠦᠰᠪᠡ᠃ ᠲᠠᠯᠠ ᠲᠠᠯᠠ ᠠ᠋ᠴᠠ ᠪᠠᠨ ᠪᠦᠰᠡᠯᠡᠭᠳᠡᠭᠰᠡᠨ ᠠᠪᠠᠴᠤ ᠡᠰᠡᠷᠭᠦᠴᠡᠭᠰᠡᠭᠡᠷ ᠦᠯᠡᠳᠡᠭᠰᠡᠨ ᠣᠷᠣᠰ ᠤ᠋ᠳ ᠢ᠋ ᠮᠣᠩᠭᠣᠯᠴᠤᠳ ᠴᠠᠪᠴᠢᠯᠠᠨ ᠰᠥᠨᠥᠭᠡᠵᠦ ᠳᠠᠭᠤᠰᠪᠠ᠃
ᠪᠠᠲᠤ ᠬᠠᠭᠠᠨ᠂ ᠮᠣᠷᠢ ᠪᠠ ᠴᠡᠷᠢᠭ ᠦ᠋ᠨ ᠬᠡᠭᠦᠷ ᠢ᠋ᠶ᠋ᠡᠷ ᠪᠦᠷᠬᠦᠭᠳᠡᠭᠰᠡᠨ ᠣᠷᠣᠰ ᠤ᠋ᠨ ᠪᠡᠬᠢᠯᠡᠯᠲᠡ ᠶ᠋ᠢᠨ ᠳᠠᠭᠠᠤ ᠶᠠᠪᠤᠵᠤ ᠭᠣᠣᠯ ᠤ᠋ᠨ ᠨᠥᠭᠦᠭᠡ ᠡᠷᠭᠢ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠭᠡᠳ ᠰᠢᠲᠠᠭᠰᠠᠨ ᠰᠦᠮᠡ ᠶ᠋ᠢᠨ ᠪᠠᠭᠤᠷᠢᠨ ᠤ᠋ ᠳᠡᠷᠭᠡᠳᠡ ᠵᠣᠭᠰᠣᠪᠠ᠃ ᠲᠡᠷᠡ ᠲᠡᠨᠳᠡ ᠠᠮᠠᠷᠠᠬᠤ ᠶ᠋ᠢ ᠬᠦᠰᠡᠵᠡᠢ᠃ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠣᠷᠣᠰ ᠤ᠋ᠨ ᠪᠥᠬᠡ ᠶ᠋ᠢᠨ ᠪᠠᠢᠰᠢᠩ ᠳᠣᠲᠣᠷᠠ ᠠ᠋ᠴᠠ ᠬᠥᠯᠳᠡᠭᠰᠡᠨ ᠬᠣᠨᠢᠨ ᠤ᠋ ᠮᠢᠬᠠ ᠣᠯᠵᠤ ᠠᠪᠤᠭᠠᠳ ᠮᠣᠳᠣᠨ ᠰᠠᠪᠠᠭᠠ ᠪᠠᠷ ᠨᠡᠪᠲᠡ ᠱᠣᠷᠣᠯᠠᠵᠤ ᠪᠦᠲᠦᠨ ᠢ᠋ᠶ᠋ᠡᠷ ᠨᠢ ᠤᠯᠠᠭᠠᠨ ᠴᠣᠭ ᠤ᠋ᠨ ᠳᠡᠭᠡᠷᠡ ᠪᠠᠷᠢᠵᠤ ᠰᠢᠷᠠᠵᠤ ᠢᠳᠡᠪᠡ᠃
ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠪᠠᠲᠤ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠢᠰᠡᠭᠡᠢ ᠨᠥᠮᠥᠷᠭᠡᠨ ᠳᠡᠭᠡᠷᠡ ᠰᠠᠭᠤᠵᠤ ᠲᠩᠷᠢ ᠥᠭᠡᠳᠡ ᠵᠢᠭᠠᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠦᠭᠡᠯᠡᠨᠡ᠃
— ᠣᠷᠣᠰ ᠤ᠋ᠨ ᠪᠥᠬᠡ ᠨᠠᠷ ᠶᠠᠭᠤ ᠴᠥ᠍ ᠭᠡᠰᠡᠨ ᠮᠠᠰᠢ ᠶᠡᠬᠡ ᠬᠦᠴᠦᠲᠡᠢ ᠰᠢᠦ᠂ ᠪᠢᠳᠡᠨ ᠳ᠋ᠦ᠍ ᠬᠣᠣᠷ ᠬᠥᠨᠥᠭᠡᠯ ᠢ᠋ ᠤᠴᠠᠷᠠᠭᠤᠯᠤᠨᠠ᠃ ᠡᠨᠡ ᠬᠠᠷᠠᠩᠭᠤᠢ ᠣᠢ ᠮᠣᠳᠣᠨ ᠨᠦᠬᠡᠨ ᠡᠴᠡ ᠭᠠᠷᠴᠤ ᠣᠳᠬᠤ ᠴᠠᠭ ᠪᠢᠳᠡᠨ ᠳ᠋ᠦ᠍ ᠲᠤᠯᠭᠠᠷᠠᠨ ᠢᠷᠡᠵᠡᠢ᠃
— ᠪᠢ ᠤᠷᠢᠳᠠᠪᠡᠷ ᠨᠣᠸᠭᠣᠷᠣᠳ᠋ ᠢ᠋ ᠠᠪᠤᠨᠠ! ᠭᠡᠵᠦ ᠪᠠᠲᠤ ᠬᠠᠭᠠᠨ ᠬᠠᠷᠢᠭᠤ ᠲᠠᠯᠪᠢᠪᠠ᠃
ᠦᠳᠡ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠰᠠᠯᠬᠢ ᠥᠭᠡᠷᠡᠴᠢᠯᠡᠭᠳᠡᠨ ᠨᠥᠭᠦᠭᠡ ᠵᠦᠭ ᠲᠡᠰᠢ ᠦᠯᠢᠶᠡᠵᠦ ᠬᠥᠬᠡ ᠪᠣᠷᠣ ᠡᠭᠦᠯᠡ ᠨᠤᠭᠦᠳ ᠢ᠋ ᠲᠠᠷᠬᠠᠭᠠᠨ ᠬᠥᠭᠡᠭᠡᠭᠰᠡᠨ ᠳ᠋ᠦ᠍ ᠬᠠᠪᠤᠷ ᠤ᠋ᠨ ᠬᠥᠬᠡ ᠴᠡᠩᠬᠡᠷ ᠲᠡᠭᠷᠢ ᠳ᠋ᠦ᠍ ᠭᠡᠷᠡᠯᠲᠦ ᠰᠢᠷᠠ ᠨᠠᠷᠠᠨ ᠦᠵᠡᠭᠳᠡᠪᠡ᠃ ᠠᠯᠲᠠᠨ ᠰᠢᠷᠠ ᠲᠤᠶᠠᠭᠠ ᠴᠠᠰᠤ ᠲᠠᠢ ᠲᠠᠯᠠᠪᠠᠢ ᠶ᠋ᠢᠨ ᠳᠡᠭᠡᠭᠦᠷ ᠭᠢᠯᠪᠠᠯᠵᠠᠵᠤ ᠬᠠᠯᠠᠭᠠᠬᠤ ᠳ᠋ᠤ᠌ ᠭᠠᠵᠠᠷ ᠪᠦᠷᠢ ᠴᠠᠰᠤ ᠬᠠᠢᠯᠵᠤ᠂ ᠭᠣᠷᠣᠬᠠ ᠱᠠᠯᠪᠠᠭ ᠢ᠋ ᠤᠷᠤᠰᠬᠠᠨ ᠴᠠᠰᠤ ᠰᠡᠪᠰᠡᠭᠡᠷ ᠰᠡᠢᠷᠡᠭ ᠪᠣᠯᠪᠠ᠃ ᠮᠣᠷᠢᠳ ᠨᠢ ᠴᠠᠰᠤᠨ ᠳ᠋ᠤ᠌ ᠡᠪᠦᠳᠦᠭ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠴᠥᠮᠥᠷᠡᠬᠦ ᠪᠣᠯᠪᠠ᠃
ᠬᠡᠳᠦᠨ ᠬᠠᠷᠠ ᠰᠢᠪᠠᠭᠤ ᠴᠠᠰᠤ ᠪᠠᠷ ᠪᠦᠷᠬᠦᠭᠳᠡᠭᠰᠡᠨ ᠬᠡᠭᠦᠷ ᠦ᠋ᠳ ᠳᠡᠭᠡᠷᠡ ᠢᠷᠡᠵᠦ ᠰᠠᠭᠤᠪᠠ᠃ ᠲᠠᠲ᠋ᠠᠷ ᠤ᠋ᠳ ᠮᠠᠯᠠᠭᠠᠢ ᠨᠤᠭᠤᠳ ᠢ᠋ᠶ᠋ᠠᠨ ᠠᠪᠴᠤ ᠬᠢᠲᠤᠭᠠ ᠪᠠᠷ ᠬᠤᠰᠤᠭᠳᠠᠭᠰᠠᠨ ᠠᠷᠤ ᠰᠢᠯᠢ ᠪᠡᠨ ᠮᠠᠭᠠᠵᠢᠵᠤ ᠠᠭᠠᠷ ᠢ᠋ ᠦᠨᠦᠷᠲᠦᠨᠡ᠃
— ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠠ᠋ᠴᠠ ᠳᠤᠯᠠᠭᠠᠨ ᠰᠠᠯᠬᠢ ᠰᠡᠩᠭᠢᠨᠡᠵᠦ ᠪᠠᠢᠨᠠ᠁ ᠬᠠᠷᠠᠪᠠᠤ᠂ ᠬᠠᠷᠠ ᠰᠢᠪᠠᠭᠤ ᠨᠢᠰᠴᠦ ᠢᠷᠡᠵᠡᠢ᠃ ᠰᠡᠭᠦᠯ ᠳᠡᠭᠡᠷᠡ ᠪᠡᠨ ᠬᠠᠪᠤᠷ ᠢ᠋ ᠠᠪᠴᠤ ᠢᠷᠡᠵᠡᠢ! ᠭᠡᠯᠴᠡᠨᠡ᠃
ᠵᠡᠰ ᠬᠠᠷᠠᠩᠭᠠ ᠨᠤᠭᠤᠳ ᠢ᠋ ᠲᠦᠷᠭᠡᠨ ᠲᠦᠷᠭᠡᠨ ᠴᠣᠬᠢᠯᠠᠵᠤ ᠭᠡᠳᠡᠷᠭᠦ ᠪᠤᠴᠠᠵᠤ ᠴᠤᠭᠯᠠᠷᠠᠬᠤ ᠶ᠋ᠢ ᠤᠷᠢᠶᠠᠯᠠᠨᠠ᠃ ᠲᠡᠮᠦᠷ ᠮᠡᠲᠦ ᠬᠠᠲᠠᠭᠤ ᠰᠠᠬᠢᠯᠭᠠᠨ ᠳ᠋ᠤ᠌ ᠵᠡᠬᠢᠷᠣᠬᠳᠠᠰᠠᠨ ᠲᠠᠲ᠋ᠠᠷ ᠤ᠋ᠳ ᠨᠢ ᠣᠯᠵᠠᠨ ᠠ᠋ᠴᠠ ᠬᠠᠭᠠᠴᠠᠪᠠ ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠭᠰᠠᠭᠠᠷ ᠬᠡᠭᠦᠷ ᠦ᠋ᠳ ᠢ᠋ ᠲᠤᠨᠤᠬᠤ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠣᠷᠬᠢᠵᠤ ᠮᠣᠷᠢᠳ ᠢ᠋ᠶ᠋ᠠᠨ ᠡᠷᠭᠢᠭᠦᠯᠦᠨ ᠰᠠᠢᠬᠠᠨ ᠪᠠᠢᠭᠰᠠᠨ ᠲᠣᠰᠬᠣᠨ ᠤ᠋ ᠣᠷᠣᠨ ᠳ᠋ᠤ᠌ ᠤᠲᠤᠭᠠ ᠮᠠᠨᠠᠷᠠᠨ ᠪᠠᠢᠭᠠ ᠭᠠᠵᠠᠷ ᠢ᠋ ᠴᠢᠭᠯᠡᠨ ᠳᠠᠪᠬᠢᠵᠠᠭᠠᠪᠠ᠃ ᠡᠨᠳᠡ ᠵᠠᠩᠵᠤᠨ ᠤ᠋ ᠵᠡᠰ ᠪᠠ ᠠᠯᠲᠠᠨ ᠴᠢᠮᠡᠭ ᠢ᠋ᠶ᠋ᠡᠷ ᠭᠢᠯᠠᠯᠵᠠᠭᠰᠠᠨ ᠬᠡᠭᠡᠷ ᠮᠣᠷᠢᠨ ᠤ᠋ ᠰᠡᠭᠦᠯ ᠪᠦᠬᠦᠢ ᠬᠢᠶᠤᠷ᠂ ᠭᠠᠯ ᠤ᠋ᠨ ᠠᠶᠤᠯ ᠠ᠋ᠴᠠ ᠦᠯᠡᠳᠡᠵᠦ ᠬᠣᠴᠣᠷᠤᠭᠰᠠᠨ ᠴᠠᠭᠠᠨ ᠪᠠᠢᠰᠢᠩ ᠤ᠋ᠨ ᠳᠡᠷᠭᠡᠳᠡ ᠪᠤᠰᠬᠠᠭᠰᠠᠨ ᠥᠨᠳᠥᠷ ᠱᠣᠩ ᠤ᠋ᠨ ᠳᠡᠭᠡᠷᠡ ᠦᠵᠡᠭᠳᠡᠵᠦ ᠪᠠᠢᠪᠠ᠃ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠵᠦᠭ ᠪᠦᠷᠢ ᠲᠠᠰᠢ ᠪᠠᠨ ᠳᠠᠪᠬᠢᠵᠠᠭᠠᠵᠤ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠲᠤᠰ ᠪᠦᠷᠢ ᠶ᠋ᠢᠨ ᠣᠲ᠋ᠷᠢᠶᠠᠳ᠋ ᠲᠸ᠋ ᠴᠤᠭᠯᠠᠭᠤᠯᠤᠨᠠ᠃
— ᠪᠠᠶᠠᠨ ᠨᠤᠸᠭᠣᠷᠤᠳ᠋ ᠲᠡᠰᠢ ᠶᠠᠪᠤᠯᠠ! ᠡᠨᠳᠡ ᠡᠴᠡ᠂ ᠪᠤᠭ ᠴᠢᠳᠬᠥᠷ ᠲᠡᠢ ᠨᠠᠮᠤᠭ ᠠ᠋ᠴᠠ ᠲᠦᠷᠭᠡᠨ ᠵᠠᠢᠯᠠᠶᠠ!ᠪᠤᠰᠢᠭᠤᠯᠠ! ᠡᠰᠡᠬᠦᠯᠡ ᠪᠢᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠡᠨᠳᠡ ᠦᠬᠦᠨᠡ! ᠭᠡᠵᠦ ᠬᠠᠰᠬᠢᠷᠤᠯᠳᠤᠬᠤ ᠳᠠᠭᠤ ᠨᠤᠭᠤᠳ ᠰᠣᠨᠣᠰᠳᠠᠨᠠ᠃
ᠲᠠᠲ᠋ᠠᠷ ᠤ᠋ᠳ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠬᠠᠰᠬᠢᠷᠤᠯᠳᠤᠨ ᠲᠦᠷᠭᠡᠨ ᠢ᠋ᠶ᠋ᠡᠷ ᠠᠷᠪᠠᠲᠤ᠂ ᠵᠠᠭᠤᠲᠤ ᠨᠤᠭᠤᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠢᠭᠰᠠᠵᠠᠭᠠᠪᠠ᠃ ᠲᠡᠳᠡᠭᠡᠷ ᠦ᠋ᠨ ᠵᠠᠷᠢᠮ ᠨᠢ ᠣᠯᠵᠠᠯᠠᠭᠰᠠᠨ ᠲᠤᠷᠠᠩᠬᠠᠢ ᠮᠣᠷᠢᠳ ᠢ᠋ ᠴᠠᠯᠮᠠ ᠪᠡᠷ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠨᠢ ᠬᠥᠲᠥᠯᠵᠦ ᠶᠠᠪᠤᠵᠠᠭᠠᠨᠠ᠃
ᠤᠳᠠᠯ ᠦᠭᠡᠢ ᠵᠠᠩᠵᠤᠨ ᠤ᠋ ᠬᠢᠶᠤᠷ ᠨᠠᠢᠭᠤᠯᠵᠠᠨ ᠬᠥᠳᠡᠯᠵᠦ ᠪᠡᠶᠡ ᠬᠠᠮᠠᠭᠠᠯᠠᠬᠤ ᠵᠠᠭᠤᠲᠤ ᠶ᠋ᠢᠨ ᠡᠮᠦᠨᠡ ᠨᠢ ᠭᠠᠷᠴᠤ ᠢᠷᠡᠪᠡ᠃ ᠪᠠᠲᠤ ᠬᠠᠭᠠᠨ᠂ ᠴᠣᠬᠣᠷ ᠪᠣᠷᠣ ᠮᠣᠷᠢ ᠶ᠋ᠢ ᠤᠨᠤᠵᠤ ᠪᠣᠳᠣᠯᠭᠠ ᠪᠣᠳᠣᠭᠰᠠᠨ ᠤᠢᠳᠬᠠᠷ ᠲᠠᠢ ᠴᠢᠷᠠᠢ ᠲᠠᠢ ᠠᠵᠢ᠃ ᠲᠡᠷᠡ ᠨᠢᠳᠦ ᠪᠡᠨ ᠠᠨᠢᠪᠴᠢᠯᠠᠵᠤ ᠬᠡᠳᠦᠨ ᠵᠠᠭᠤᠨ ᠨᠠᠰᠤᠲᠠᠢ ᠣᠢ ᠮᠣᠳᠣᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠠᠵᠢᠭᠯᠠᠨ ᠬᠠᠷᠠᠨᠠ᠃ ᠪᠠᠲᠤ ᠬᠠᠭᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠡᠪᠦᠭᠡᠨ 《 ᠢᠯᠠᠭᠳᠠᠰᠢ ᠦᠭᠡᠢ 》 ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠪᠠ ᠪᠤᠰᠤᠳ ᠰᠢᠳᠠᠷ ᠬᠠᠭᠠᠳ ᠳᠠᠭᠠᠵᠤ ᠶᠠᠪᠤᠨᠠ᠃ ᠲᠡᠳᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠤᠷᠲᠤ ᠪᠠ ᠲᠠᠰᠤᠷᠠᠯᠲᠠ ᠦᠭᠡᠢ ᠴᠤᠪᠤᠭᠠ ᠲᠠᠬᠢᠷᠯᠠᠨ ᠶᠠᠪᠤᠬᠤ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ 2᠂ ᠬᠦᠦᠳᠠᠭᠠᠭᠤᠯ 1᠂ ᠡᠷᠳᠡᠨᠢᠭᠣᠸᠠ 2᠂ ᠮᠡᠷᠭᠡᠨᠭᠣᠸᠠ 1᠂ ᠬᠡᠷᠡᠶ᠋ᠢᠳ ᠂ ᠮᠥᠩᠬᠡᠨᠠᠰᠤᠨ 1᠂ ᠭᠡᠷᠡᠯ 1
ᠬᠢᠨᠠᠭᠴᠢ᠄ ᠭᠡᠷᠡᠯ 1᠂ ᠪᠠᠯ 1᠂ ᠲ᠂ ᠬᠦᠮᠦᠵᠢᠯᠲᠦ 1
ᠶᠡᠷᠦᠩᠬᠡᠢ ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ 8᠂ ᠠᠷᠢᠭᠤᠨ 8