ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ07ᠳᠣᠯᠣᠳᠤᠭᠠᠷ ᠳᠡᠪᠲᠡᠷ᠂ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ
395ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ-ᠳᠣᠯᠣᠳᠤᠭᠠᠷ ᠳᠡᠪᠲᠡᠷ
ᠳᠣᠯᠣᠳᠤᠭᠠᠷ ᠳᠡᠪᠲᠡᠷ᠂ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ
ᠨᠢᠭᠡ
ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢᠨ ᠬᠣᠲᠠ ᠬᠦᠷᠢᠶᠡᠨ ᠦ᠌ ᠵᠦᠭ ᠨᠡᠭᠦᠳᠡᠯ ᠠᠢᠰᠤᠢ᠃ ᠵᠡᠭᠦᠨᠭᠠᠷ ᠤ᠋ᠨ ᠨᠤᠲᠤᠭ ᠢ᠋ᠶ᠋ᠠᠷ ᠳᠠᠭᠠᠷᠢᠵᠤ ᠥᠩᠭᠡᠷᠡᠳᠡᠭ ᠬᠤᠳᠠᠯᠳᠤᠭᠠᠴᠢᠳ᠂ ᠠᠶᠠᠨᠴᠢᠳ ᠪᠤᠰᠤ ᠬᠥᠬᠡᠨᠠᠭᠤᠷ ᠤ᠋ᠨ ᠪᠣᠷᠣ ᠲᠠᠯᠠ ᠳ᠋ᠤ᠌ ᠨᠤᠲᠤᠭ ᠲᠠᠢ ᠬᠣᠱᠤᠳ ᠣᠪᠣᠭ ᠤ᠋ᠨ ᠬᠢᠨ ᠪᠠᠢᠯᠠ᠃ ᠬᠣᠱᠤᠳ ᠣᠪᠣᠭ ᠤ᠋ᠨ ᠬᠢᠨ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠭᠦᠨ ᠰᠢᠭᠤᠢ ᠳ᠋ᠤ᠌ ᠪᠠᠭᠤᠳᠠᠯᠯᠠᠪᠠ᠃ ᠰᠢᠭᠤᠢ ᠠ᠋ᠴᠠ ᠬᠠᠷᠠ ᠲᠤᠷᠢᠶᠠᠬᠠ ᠨᠢᠰᠤᠯᠳᠤᠪᠠ᠃ ᠭᠠᠯᠳᠠᠨ ᠳᠤᠷᠠᠨᠳᠠᠬᠤ ᠪᠠᠨ ᠪᠣᠯᠢᠵᠤ᠂
— ᠬᠠᠲᠤᠨ ᠲᠠ ᠡᠯᠴᠢ ᠵᠠᠷᠤᠵᠤ ᠥᠪᠡᠷ ᠦ᠋ᠨ ᠬᠣᠱᠤᠳ ᠣᠪᠣᠭ ᠤ᠋ᠨ ᠬᠢᠨ ᠢ᠋ᠶ᠋ᠡᠨ ᠳᠠᠭᠤᠳᠠᠭᠰᠠᠨ ᠪᠤᠰᠤ ᠤᠤ? ᠭᠡᠮᠡᠨ ᠦᠵᠡᠰᠬᠦᠯᠡᠩᠲᠦ ᠬᠠᠲᠤᠨ ᠠ᠋ᠴᠠ ᠪᠠᠨ ᠬᠠᠷᠢᠭᠤ ᠱᠠᠭᠠᠷᠳᠠᠪᠠ᠃ ᠠᠨᠤ ᠬᠠᠲᠤᠨ᠂
— ᠬᠠᠭᠠᠨ ᠲᠠᠨ ᠤ᠋ ᠵᠠᠷᠯᠢᠭ ᠦᠭᠡᠢ ᠪᠡᠷ ᠢᠩᠭᠢᠵᠦ ᠶᠠᠭᠠᠬᠢᠵᠤ ᠵᠢᠷᠦᠬᠡᠯᠡᠨᠡ ᠭᠡᠮᠡᠨ ᠬᠠᠷᠢᠭᠤᠯᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠣᠱᠤᠳ ᠣᠪᠣᠭᠲᠠᠨ ᠤ᠋ ᠵᠦᠭ ᠢᠯᠡᠭᠡᠭᠰᠡᠨ ᠡᠯᠴᠢ ᠪᠤᠴᠠᠵᠤ ᠢᠷᠡᠪᠡ᠃ ᠡᠯᠴᠢ ᠵᠠᠬᠢᠳᠠᠯ ᠠᠪᠴᠢᠷᠠᠵᠠᠢ᠃ ᠠᠨᠤ ᠬᠠᠲᠤᠨ ᠵᠠᠬᠢᠳᠠᠯ ᠢ᠋ ᠠᠪᠴᠤ ᠤᠩᠰᠢᠨᠠ᠃
— ᠪᠢᠳᠡ ᠰᠠᠢᠨ ᠳᠤᠷᠠ ᠠ᠋ᠴᠠ ᠪᠠᠨ ᠢᠷᠡᠪᠡ᠃ ᠪᠤᠷᠬᠠᠨ ᠤ᠋ ᠬᠤᠪᠢᠯᠭᠠᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠲᠠᠨ ᠤ᠋ ᠢᠪᠡᠭᠡᠯ ᠳ᠋ᠦ᠍ ᠪᠠᠭᠲᠠᠬᠤ ᠭᠡᠰᠡᠨ ᠶᠤᠮ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠰᠠᠩ᠂ ᠰᠦᠮᠡ ᠬᠡᠢᠳ ᠦ᠋ᠨ ᠵᠢᠰᠠ ᠶ᠋ᠢᠨ ᠬᠥᠷᠥᠩᠭᠡ ᠳ᠋ᠦ᠍ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠲᠤᠰᠢᠶᠠᠬᠤ ᠪᠠᠷ ᠰᠢᠢᠳᠪᠡ᠃ ᠯᠤᠤᠰ ᠤ᠋ᠨ ᠬᠣᠣᠷᠯᠠᠯ ᠠ᠋ᠴᠠ ᠰᠠᠯᠭᠠᠵᠤ ᠬᠠᠢᠷᠠᠯᠠ ᠁ ᠭᠡᠵᠦ ᠥᠷᠥᠰᠢᠶᠡᠯ ᠭᠤᠶᠤᠵᠠᠢ᠃
— ᠸᠴᠢᠷᠲᠤ ᠰᠡᠴᠡᠨ ᠪᠣᠯ ᠨᠡᠷᠡ ᠨᠥᠯᠥᠭᠡ ᠲᠡᠢ ᠬᠥᠮᠦᠨ᠃ ᠨᠠᠳᠠᠳᠤ ᠲᠡᠭᠦᠨ ᠦ᠌ ᠠᠯᠪᠠᠲᠤ ᠢᠷᠭᠡᠳ ᠢ᠋ ᠲᠠᠰᠤᠯᠵᠤ ᠬᠤᠷᠢᠶᠠᠬᠤ ᠪᠣᠳᠣᠯ ᠦᠭᠡᠢ ᠪᠢᠯᠡ᠃ ᠬᠡᠷᠡᠭ ᠦ᠋ᠨ ᠡᠵᠡᠨ ᠬᠡᠩᠭᠡᠷᠭᠡ ᠶ᠋ᠢᠨ ᠳᠣᠬᠢᠭᠤᠷ ᠢ᠋ ᠣᠯᠵᠤ ᠴᠡᠭᠡᠷᠯᠡᠭᠦᠯ᠃ ᠥᠷᠲᠡᠭᠡᠨ ᠦ᠌ ᠰᠠᠢᠳ ᠢ᠋ ᠵᠠᠷᠤᠵᠤ ᠬᠣᠱᠤᠳ ᠣᠪᠣᠭᠲᠠᠨ ᠳ᠋ᠤ᠌ ᠤᠰᠤ ᠤᠷᠭᠤᠮᠠᠯ ᠲᠡᠭᠰᠢ ᠪᠡᠯᠴᠢᠭᠡᠷ ᠨᠤᠲᠤᠭ ᠢ᠋ ᠵᠢᠭᠠᠵᠤ ᠰᠠᠭᠤᠷᠢᠰᠢᠭᠤᠯ ᠭᠡᠮᠡᠨ ᠭᠠᠯᠳᠠᠨ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠪᠠ᠃
ᠸᠴᠢᠷᠲᠤ ᠰᠡᠴᠡᠨ ᠦ᠌ ᠠᠯᠪᠠᠲᠤ ᠨᠤᠭᠤᠳ ᠠ᠋ᠴᠠ ᠨᠡᠭᠦᠯᠭᠡᠵᠦ ᠴᠢᠳᠠᠪᠠ ᠤᠤ? ᠭᠡᠵᠦ ᠡᠷᠢᠯᠴᠢ ᠶ᠋ᠢᠨ ᠨᠡᠷᠡ ᠪᠡᠷ ᠬᠣᠱᠤᠳ ᠤ᠋ᠨ ᠬᠥᠬᠡᠨᠠᠭᠤᠷ ᠤᠷᠤᠭᠤ ᠶᠠᠪᠤᠭᠤᠯᠤᠭᠰᠠᠨ ᠬᠥᠮᠦᠰ ᠡᠴᠡ ᠰᠠᠪᠳᠠᠨᠵᠠᠯ ᠸᠠᠩ ᠯᠠᠪᠯᠠᠵᠤ ᠪᠠᠢᠬᠤ ᠶ᠋ᠢ ᠮᠠᠯ ᠤ᠋ᠨ ᠡᠷᠢᠯ ᠳ᠋ᠦ᠍ ᠲᠤᠢᠯᠳᠠᠭᠰᠠᠨ ᠨᠤᠲᠤᠭ ᠤ᠋ᠨ ᠬᠠᠷᠠ ᠬᠦᠦ ᠬᠠᠭᠠᠨ ᠤ᠋ ᠰᠣᠨᠣᠷ ᠲᠤ᠌ ᠢᠯᠡᠭᠡᠵᠡᠢ᠃
ᠬᠠᠭᠠᠨ ᠤ᠋ ᠴᠢᠬᠢ ᠰᠣᠨᠣᠷ᠂ ᠨᠢᠳᠦ ᠰᠣᠷᠭᠣᠭ᠂ ᠭᠠᠷ ᠤᠷᠲᠤ ᠪᠠᠢᠳᠠᠭ ᠪᠢᠯᠡ᠃ ᠵᠡᠯᠢᠭᠦᠳ ᠬᠡᠭᠡᠷᠡ ᠶ᠋ᠢᠨ ᠡᠪᠡᠰᠦ ᠨᠣᠭᠣᠭᠠ᠂ ᠵᠡᠷᠯᠢᠭ ᠠᠳᠤᠭᠤᠰᠤᠨ ᠠᠮᠢᠲᠠᠨ ᠬᠦᠷᠲᠡᠯᠡ ᠨᠡᠭᠦᠳᠡᠯᠴᠢᠳ ᠦ᠋ᠨ ᠨᠤᠲᠤᠭ ᠲᠤ᠌ ᠲᠣᠭᠠ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠬᠡᠳᠦ ᠬᠡᠴᠢᠨᠡᠭᠡᠨ ᠠᠮᠢᠳᠤᠷᠠᠵᠤ ᠪᠠᠢᠳᠠᠭ ᠢ᠋ ᠭᠠᠯᠳᠠᠨ ᠬᠠᠭᠠᠨ ᠭᠠᠳᠠᠷᠯᠠᠳᠠᠭ ᠶᠤᠮ᠃
— ᠪᠣᠷᠣ ᠲᠠᠯᠠ ᠶ᠋ᠢᠨ ᠠᠢᠯ ᠡᠷᠦᠬᠡ ᠨᠦ᠍ᠭᠦᠳ ᠳᠦᠷᠪᠡᠭᠰᠡᠨ ᠶᠦᠮ ᠰᠢᠭ᠋ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠴᠠᠢᠵᠠ ᠪᠡᠬᠢᠯᠡᠯᠲᠡ ᠪᠦᠬᠦᠢ ᠬᠠᠷᠠ ᠡᠷᠴᠢᠰ ᠭᠣᠣᠯ ᠤᠷᠤᠭᠤ ᠨᠡᠭᠦᠪᠡ᠃ ᠨᠡᠭᠦᠳᠡᠯ ᠬᠥᠷᠪᠡᠭᠡᠳ ᠶᠠᠪᠤᠴᠢᠬᠠᠯᠠ᠃ ᠪᠣᠷᠣ ᠲᠠᠯᠠ ᠡᠵᠡᠭᠦᠢᠷᠡᠪᠡ᠃ ᠪᠣᠷᠣ ᠲᠠᠯᠠ ᠳ᠋ᠤ᠌ ᠰᠢᠪᠠᠭᠤᠨ ᠤ᠋ ᠡᠭᠦᠷ ᠦᠯᠡᠲᠡᠯᠡ ᠭᠡᠵᠦ ᠠᠶᠠᠨ ᠵᠠᠮ ᠤ᠋ᠨ ᠪᠣᠰᠤᠭᠤᠯ ᠤ᠋ᠳ ᠶᠠᠷᠢᠵᠤ ᠪᠠᠢᠬᠤ ᠶ᠋ᠢ ᠡᠷᠢᠯᠴᠢᠨ ᠬᠠᠷᠠ ᠬᠦᠦ ᠰᠣᠨᠣᠰᠴᠤ ᠲᠤᠭᠤᠯᠤᠭᠰᠠᠨ ᠪᠠᠢᠪᠠ᠃ ᠭᠠᠯᠳᠠᠨ ᠬᠠᠭᠠᠨ ᠪᠤᠷᠬᠠᠨ ᠤ᠋ ᠨᠢᠳᠦᠨ ᠡᠷᠢᠭᠡ ᠪᠡᠨ ᠢᠮᠡᠷᠦᠨ ᠱᠣᠳᠠᠵᠤ ᠦᠵᠡᠭᠡᠳ ᠭᠤᠷᠪᠠᠨᠲᠠ ᠠᠭᠠᠷ ᠭᠤᠶᠠᠳᠠᠵᠤ ᠲᠣᠮ ᠬᠢᠭᠡᠳ᠂
— ᠢᠵᠢᠯ ᠮᠥᠷᠡᠨ ᠤᠷᠤᠭᠤ ᠨᠡᠭᠦᠭᠰᠡᠨ ᠨᠡᠭᠦᠳᠡᠯᠴᠢᠳ ᠢ᠋ ᠪᠤᠴᠠᠭᠠᠵᠤ ᠠᠪᠴᠢᠷᠠ᠃ ᠴᠡᠷᠢᠭ ᠬᠥᠳᠡᠯᠭᠡᠵᠦ ᠵᠠᠮ ᠵᠠᠭᠤᠷᠠ ᠬᠠᠮᠠᠭᠠᠯᠠᠬᠤ ᠬᠡᠷᠡᠭᠲᠡᠢ ᠭᠡᠮᠡᠨ ᠬᠢᠯᠢ ᠶ᠋ᠢᠨ ᠬᠠᠢᠴᠢ ᠶ᠋ᠢ ᠰᠠᠬᠢᠨ ᠰᠠᠭᠤᠭᠠ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠭᠠᠢᠲᠠᠪ ᠪᠠᠭᠠᠲᠤᠷ ᠲᠤ᠌ ᠡᠯᠴᠢ ᠢᠯᠡᠭᠡᠪᠡ᠃
ᠭᠡᠲᠡᠯᠡ ᠨᠢᠭᠡᠨᠲᠡ ᠬᠣᠵᠢᠮᠳᠠᠵᠤ ᠨᠡᠭᠦᠳᠡᠯᠴᠢᠳ ᠢᠵᠢᠯ ᠮᠥᠷᠡᠨ ᠬᠦᠷᠦᠭᠰᠡᠨ ᠪᠠᠢᠯᠠ᠃ ᠵᠡᠭᠦᠨᠭᠠᠷ ᠤ᠋ᠨ ᠳᠣᠲᠣᠭᠠᠳᠤ ᠳ᠋ᠤ᠌ ᠦᠢᠮᠡᠭᠡᠨ ᠳᠡᠭᠳᠡᠭᠡᠭᠰᠡᠨ ᠨᠢ ᠰᠠᠪᠳᠠᠨᠵᠠᠯ ᠲᠦᠷᠦᠭᠦᠦ ᠲᠡᠢ ᠨᠣᠶᠠᠳ ᠤ᠋ᠨ ᠭᠠᠯᠳᠠᠨ ᠳ᠋ᠤ᠌ ᠬᠠᠨᠳᠤᠭᠰᠠᠨ ᠬᠦᠢᠲᠡᠨ ᠰᠡᠳᠬᠢᠯ ᠦ᠋ᠨ ᠦᠢᠯᠡᠳᠦᠯ ᠪᠥᠯᠥᠭᠡ᠃
— ᠲᠠᠯᠠ ᠨᠤᠲᠤᠭ ᠲᠤ᠌ ᠪᠣᠲᠣᠭᠣ ᠲᠠᠢ ᠢᠩᠭᠡ ᠦᠬᠦᠭᠦᠯᠪᠡ᠃ ᠡᠬᠡ ᠨᠢ ᠦᠬᠦᠭᠰᠡᠨ ᠲᠤᠯᠠ ᠪᠣᠲᠣᠭᠣ ᠲᠡᠷᠡ ᠭᠠᠵᠠᠷ ᠠ᠋ᠴᠠ ᠶᠠᠪᠤᠬᠤ ᠦᠭᠡᠢ ᠡᠷᠭᠢᠯᠳᠦᠨ ᠪᠠᠢᠭᠰᠠᠭᠠᠷ ᠪᠠᠢᠯᠠ᠃ ᠪᠢᠳᠡᠨ ᠦ᠌ ᠡᠷᠢᠯᠴᠢᠳ ᠠᠢᠯ ᠤ᠋ᠳ ᠢ᠋ᠶ᠋ᠠᠷ ᠯᠤᠤᠰ ᠤ᠋ᠨ ᠬᠣᠣᠷᠯᠠᠯ ᠪᠣᠯᠪᠠ ᠭᠡᠵᠦ ᠴᠤᠤ ᠲᠠᠷᠬᠠᠭᠠᠪᠠ᠃ ᠯᠤᠤᠰ ᠤ᠋ᠨ ᠬᠣᠣᠷᠯᠠᠯ ᠢ᠋ ᠳᠠᠷᠤᠳᠠᠭ ᠷᠢᠳᠢ ᠰᠢᠳᠢᠲᠦ ᠬᠤᠪᠢᠯᠭᠠᠨ ᠪᠣᠯ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠮᠥᠨ ᠡᠴᠡ ᠮᠥᠨ ᠭᠡᠮᠡᠨ ᠬᠣᠲᠠ ᠠᠢᠯ ᠤ᠋ᠳ ᠢ᠋ᠶ᠋ᠠᠷ ᠪᠠᠭᠤᠵᠤ ᠮᠣᠷᠳᠠᠬᠤ ᠳᠤᠭᠤᠢᠯᠠᠩ ᠳ᠋ᠠᠭᠠᠨ ᠰᠠᠪᠳᠠᠨᠵᠠᠯ ᠤ᠋ᠨ ᠬᠢᠨ ᠶᠠᠷᠢᠨᠠ᠃ ᠦᠬᠦᠭᠰᠡᠨ ᠢᠩᠭᠡ ᠶ᠋ᠢᠨ ᠰᠡᠭ ᠢ᠋ ᠠᠢᠯ ᠤ᠋ᠳ ᠤ᠋ᠨ ᠪᠠᠭᠤᠴᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠬᠠᠶᠠᠨᠠ᠃ ᠪᠣᠲᠣᠭᠣ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠡᠭ ᠲᠦ᠍ ᠪᠤᠢᠯᠠᠵᠤ ᠡᠷᠭᠢᠨᠡ᠃ ᠡᠢᠮᠦ ᠪᠠᠢᠳᠠᠯ ᠲᠠᠢ ᠢᠩᠭᠡ ᠶ᠋ᠢᠨ ᠦᠬᠦᠯ᠂ ᠪᠣᠲᠣᠭᠣ ᠶ᠋ᠢᠨ ᠪᠤᠢᠯᠠᠭᠠᠨ ᠳᠤᠮᠳᠠ ᠬᠣᠱᠤᠳ ᠣᠪᠣᠭ ᠤ᠋ᠨ ᠬᠢᠨ ᠦ᠌ ᠨᠡᠭᠦᠳᠡᠯᠴᠢᠳ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠢ᠋ ᠵᠣᠷᠢᠵᠠᠢ᠃ ᠰᠠᠪᠳᠠᠨᠵᠠᠯ ᠤ᠋ᠨ ᠥᠳᠥᠭᠡᠭᠰᠡᠨ ᠦᠢᠮᠡᠭᠡᠨ ᠴᠥᠪ ᠦ᠋ᠨ ᠴᠠᠭ ᠤ᠋ᠨ ᠳᠠᠭᠤᠳᠠᠯᠭᠠ ᠪᠣᠯᠪᠠ᠃
ᠬᠣᠶᠠᠷ
— ᠠᠢᠯ ᠤ᠋ᠳ ᠨᠡᠭᠦᠵᠦ ᠪᠠᠢᠨᠠ᠃ ᠬᠣᠱᠤᠳ ᠣᠪᠣᠭ ᠤ᠋ᠨ ᠬᠢᠨ ᠪᠠᠷᠤᠭ ᠨᠡᠭᠦᠭᠡᠳ ᠳᠠᠭᠤᠰᠤᠯᠠ ᠭᠡᠵᠦ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠲᠥᠷᠥ ᠶ᠋ᠢᠨ ᠰᠠᠢᠳ ᠮᠡᠷᠭᠡᠨ ᠠᠢᠯᠠᠳᠪᠠ᠃
— ᠲᠠᠢᠪᠤᠩ ᠠᠮᠤᠭᠤᠯᠠᠩ ᠠᠷᠠᠳ ᠢᠷᠭᠡᠳ ᠨᠤᠲᠤᠭ ᠤᠰᠤ ᠶ᠋ᠢ ᠮᠢᠨᠢ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠭᠠᠷ ᠬᠥᠯ ᠪᠣᠯᠤᠭᠰᠠᠨ ᠰᠠᠪᠳᠠᠨᠵᠠᠯ ᠸᠠᠩ ᠦᠢᠮᠡᠭᠦᠯᠵᠦ ᠢᠳᠬᠠᠪᠠ᠃ ᠪᠢ ᠠᠪᠳᠠᠷᠠ ᠪᠠᠨ ᠣᠩᠭᠢᠴᠢᠭᠤᠯᠬᠤ ᠦᠭᠡᠢ᠃ ᠬᠢᠯᠢ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠰᠠᠭᠤᠭᠠ ᠭᠠᠯᠳᠠᠮᠠ ᠪᠠᠭᠠᠲᠤᠷ ᠢ᠋ ᠬᠦᠷᠲᠡᠯᠡ ᠬᠣᠣᠷᠯᠠᠪᠠ᠃ ᠰᠠᠪᠳᠠᠨᠵᠠᠯ ᠠ᠋ᠴᠠ ᠶᠠᠯᠠ ᠠᠰᠠᠭᠤᠬᠤ ᠴᠠᠭ ᠪᠣᠯᠤᠯᠠ ᠭᠡᠮᠡᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠪᠠ᠃
ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠬᠡᠭᠡᠷᠡ ᠶ᠋ᠢᠨ ᠦᠷᠭᠦᠭᠡᠨ ᠦ᠌ ᠬᠣᠢᠮᠣᠷ ᠲᠤ᠌ ᠰᠠᠪᠳᠠᠨᠵᠠᠯ ᠳᠠᠭᠠᠭᠤᠯᠢ ᠤ᠋ᠳ ᠤ᠋ᠨ ᠬᠠᠮᠲᠤ ᠴᠠᠷᠠ ᠲᠠᠪᠠᠭ ᠲᠠᠢ ᠮᠢᠬᠠ ᠢᠳᠡᠵᠦ᠂ ᠰᠠᠷᠬᠤᠳ ᠰᠥᠩᠨᠡᠨ ᠪᠠᠢᠪᠠ᠃ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠴᠡᠸᠡᠩᠷᠠᠪᠳᠠᠨ ᠬᠠᠨ ᠬᠦᠦ ᠰᠠᠭᠤᠨᠠ᠃ ᠴᠡᠸᠡᠩᠷᠠᠪᠳᠠᠨ ᠥᠰᠴᠡᠢ᠃
ᠭᠠᠯᠳᠠᠨ ᠢ᠋ ᠬᠠᠭᠠᠨ ᠪᠣᠯᠬᠤ ᠠ᠋ᠴᠠ ᠡᠮᠦᠨᠡᠬᠡᠨ ᠬᠠᠨ ᠬᠦᠦ ᠴᠡᠸᠡᠩᠷᠠᠪᠳᠠᠨ ᠡᠪᠦᠭᠡ ᠡᠴᠢᠭᠡ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠢᠷᠡᠵᠡᠢ᠃ ᠸᠴᠢᠷᠲᠤ ᠰᠡᠴᠡᠨ ᠬᠥᠪᠡᠭᠦᠨ ᠳ᠋ᠦ᠍ ᠬᠠᠤᠯᠢ ᠴᠠᠭᠠᠵᠠ᠂ ᠲᠣᠭᠠ ᠪᠣᠳᠣᠯᠭᠠ᠂ ᠱᠠᠰᠢᠨ ᠤ᠋ ᠲᠡᠦᠬᠡ᠂ ᠮᠣᠩᠭᠣᠯᠴᠤᠳ ᠤ᠋ᠨ ᠤᠭᠰᠠᠭᠠ ᠭᠠᠷᠪᠠᠯᠢ᠂ ᠴᠡᠷᠢᠭ ᠦ᠋ᠨ ᠤᠷᠠᠯᠢᠭ ᠵᠢᠭᠠᠵᠤ ᠨᠢᠳᠦ ᠶ᠋ᠢ ᠨᠢ ᠨᠡᠭᠡᠭᠡᠭᠰᠡᠨ ᠪᠥᠯᠥᠭᠡ᠃ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠪᠤᠭᠤᠷᠤᠯ ᠱᠣᠳᠣᠩ ᠭᠡᠵᠢᠭᠡ ᠪᠡᠷ ᠢ᠋ᠶ᠋ᠡᠨ ᠤᠷᠤᠯᠳᠤᠨ ᠰᠠᠪᠳᠠᠨᠵᠠᠯ ᠸᠠᠩ ᠢ᠋ ᠰᠢᠷᠲᠡᠨ ᠡᠢᠨ ᠬᠦ᠌ ᠥᠭᠦᠯᠡᠪᠡ᠃
— ᠭᠠᠯᠳᠠᠨ ᠪᠣᠱᠣᠭᠲᠤ ᠬᠣᠱᠤᠳ ᠢᠷᠭᠡᠳ ᠢ᠋ ᠣᠯᠠᠨ ᠢ᠋ᠶ᠋ᠠᠷ ᠨᠡᠭᠦᠯᠭᠡᠵᠦ ᠨᠠᠮᠠᠶ᠋ᠢ ᠢᠳᠡᠵᠦ ᠡᠬᠢᠯᠡᠪᠡ᠃ ᠨᠠᠳᠠᠳᠤ ᠬᠠᠷᠠ ᠰᠠᠨᠠᠮᠠᠷ ᠦᠭᠡᠢ ᠰᠠᠨ᠃ ᠰᠡᠩᠭᠡ ᠶ᠋ᠢᠨ ᠬᠥᠪᠡᠭᠦᠨ ᠴᠠᠸᠠᠩᠷᠠᠪᠳᠠᠨ ᠭᠠᠯ ᠤ᠋ᠨ ᠵᠢᠭᠡ ᠲᠤᠯᠠ ᠮᠠᠨ ᠤ᠋ ᠳ᠋ᠤ᠌ ᠥᠰᠴᠦ ᠪᠠᠢᠭᠠ ᠨᠢ ᠦᠨᠡᠨ᠃ ᠪᠢ ᠪᠣᠱᠣᠭᠲᠤ ᠬᠠᠭᠠᠨ ᠢ᠋ ᠳᠡᠮᠵᠢᠵᠦ ᠡᠳᠦᠢ ᠬᠦᠷᠦᠭᠰᠡᠨ᠃ ᠤᠷᠤᠭ ᠪᠠᠷᠢᠯᠳᠤᠭᠰᠠᠨ ᠡᠴᠢᠭᠡ ᠪᠡᠨ ᠭᠣᠮᠣᠳᠠᠭᠠᠵᠤ ᠪᠠᠢᠨᠠ ᠳᠠ ᠭᠡᠬᠦ ᠶ᠋ᠢ ᠰᠠᠪᠳᠠᠨᠵᠠᠯ ᠰᠣᠨᠣᠰᠴᠤ ᠰᠠᠭᠤᠬᠤ ᠳ᠋ᠠᠭᠠᠨ ᠦᠶᠡ ᠦᠶᠡ ᠬᠠᠯᠬᠠᠯᠠᠬᠤ ᠮᠡᠲᠦ ᠲᠣᠯᠣᠭᠠᠢ ᠰᠡᠭᠰᠦᠷᠦᠨᠡ᠃ ᠰᠠᠪᠳᠠᠨᠵᠠᠯ᠂
— ᠬᠥᠮᠦᠨ ᠦ᠌ ᠳᠣᠲᠣᠷᠠ ᠣᠷᠣᠵᠤ ᠦᠵᠡᠭᠰᠡᠨ ᠪᠢᠰᠢ ᠳᠡ᠃ ᠬᠥᠮᠦᠨ ᠦ᠌ ᠡᠷᠢᠶᠡᠨ ᠳᠣᠲᠣᠷᠠ ᠪᠠᠨ᠂ ᠮᠣᠭᠠᠢ ᠶ᠋ᠢᠨ ᠡᠷᠢᠶᠡᠨ ᠭᠠᠳᠠᠨᠠ ᠪᠠᠨ ᠭᠡᠳᠡᠭ ᠪᠤᠰᠤ ᠤᠤ? ᠬᠠᠲᠤᠨ ᠡᠬᠡ ᠪᠠᠯᠵᠢᠳᠠᠷᠠ ᠶ᠋ᠢ ᠴᠦᠯᠡᠭᠰᠡᠨ ᠰᠢᠦ ᠳᠡ᠃ ᠴᠡᠴᠡᠨ᠂ ᠵᠣᠳᠪᠠᠭᠠᠲᠤᠷ ᠬᠣᠶᠠᠷ ᠤ᠋ᠨ ᠶᠠᠯᠠ ᠶ᠋ᠢ ᠬᠥᠭᠡᠷᠦᠬᠦᠢ ᠡᠬᠡ ᠳ᠋ᠦ᠍ᠨᠢ ᠳᠤᠬᠤᠵᠠᠢ᠃ ᠪᠠᠯᠵᠢᠳᠠᠷᠠ ᠬᠠᠲᠤᠨ ᠤᠬᠢᠯᠠᠭᠰᠠᠭᠠᠷ ᠪᠠᠢᠭᠠᠳ ᠰᠢᠷᠠ ᠮᠢᠬᠠ ᠲᠠᠢ ᠪᠠᠨ ᠬᠠᠲᠠᠵᠤ ᠦᠬᠦᠭᠰᠡᠨ᠁ ᠭᠡᠮᠡᠨ ᠥᠭᠦᠯᠡᠬᠦ ᠳ᠋ᠦ᠍ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠥᠳᠬᠡᠨ ᠬᠥᠮᠥᠰᠬᠡ ᠪᠡᠨ ᠰᠡᠷᠪᠡᠯᠵᠡᠭᠦᠯᠦᠨ ᠬᠥᠳᠡᠯᠭᠡᠭᠡᠳ ᠁
— ᠭᠠᠯᠳᠠᠮᠠ ᠪᠠᠭᠠᠲᠤᠷ ᠬᠦᠦ ᠶ᠋ᠢ ᠮᠢᠨᠢ ᠦᠵᠦᠮ ᠬᠠᠲᠤᠨ᠂ ᠪᠣᠭᠣᠯ ᠺᠸᠮᠴᠢ ᠬᠣᠶᠠᠷ ᠲᠤ᠌ ᠬᠣᠣᠷᠯᠠᠭᠳᠠᠬᠤ ᠳ᠋ᠤ᠌ ᠭᠠᠯᠳᠠᠨ ᠪᠣᠱᠣᠭᠲᠤ ᠶᠡᠬᠡᠳᠡ ᠡᠮᠭᠡᠨᠢᠨ ᠭᠠᠰᠢᠭᠤᠳᠠᠭᠠᠳ ᠨᠠᠮᠠᠶ᠋ᠢ ᠳᠡᠷᠭᠡᠳᠡ ᠪᠡᠨ ᠠᠪᠠᠴᠢᠨᠠ ᠭᠡᠬᠦ ᠪᠡᠷ ᠨᠢ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠪᠢᠯᠡ᠃ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠠᠨᠤ ᠶ᠋ᠢ ᠬᠦᠷᠲᠡᠯᠡ ᠨᠠᠭᠠᠰᠢ ᠨᠢ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ᠃ ᠶᠡᠬᠡ ᠬᠠᠲᠠᠭᠤ ᠰᠡᠳᠬᠢᠯ ᠲᠡᠢ ᠶᠤᠮ᠃ ᠭᠡᠬᠦ ᠳ᠋ᠦ᠍ ᠰᠡᠴᠡᠨ ᠬᠠᠭᠠᠨ ᠤ᠋ ᠭᠣᠮᠣᠳᠠᠯ ᠴᠥᠬᠥᠷᠡᠯ ᠦ᠋ᠨ ᠦᠭᠡ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠰᠠᠪᠳᠠᠨᠵᠠᠯ ᠬᠢᠲᠤᠭᠠ ᠪᠠᠨ ᠬᠤᠢᠯᠠᠵᠤ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠪᠠ᠃
— ᠭᠠᠯᠳᠠᠨ ᠢ᠋ ᠨᠣᠮᠣᠬᠠᠷᠠᠭᠤᠯᠬᠤ ᠭᠡᠪᠡᠯ ᠪᠢ ᠬᠦᠴᠦᠨ ᠲᠤᠰᠠᠯᠠᠵᠤ ᠪᠣᠯᠤᠨᠠ ᠰᠢᠦ ᠭᠡᠬᠦ ᠳ᠋ᠦ᠍ ᠤᠭ ᠤ᠋ᠨ ᠬᠠᠰᠢᠷ ᠬᠡᠷᠰᠡᠦ ᠵᠠᠩ ᠲᠠᠢ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠦᠯᠦ ᠲᠣᠭᠣᠨ ᠳᠤᠭᠤᠢ ᠰᠠᠭᠤᠭᠰᠠᠭᠠᠷ ᠥᠩᠭᠡᠷᠡᠭᠦᠯᠵᠡᠢ᠃ ᠰᠠᠪᠳᠠᠨᠵᠠᠯ ᠳᠠᠬᠢᠭᠠᠳ ᠦᠭᠡ ᠬᠡᠯᠡᠯ ᠦᠭᠡᠢ ᠬᠦᠯᠢᠶᠡᠪᠡ᠃
ᠰᠠᠪᠳᠠᠨᠵᠠᠯ ᠤ᠋ᠨ ᠴᠡᠷᠢᠭ ᠦ᠋ᠳ ᠠᠰᠠᠷ ᠮᠠᠢᠬᠠᠨ ᠢ᠋ᠶ᠋ᠠᠨ ᠬᠤᠷᠢᠶᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠵᠡᠬᠡᠭᠰᠡᠨ ᠲᠤᠯᠠ ᠲᠡᠷᠡ ᠪᠡᠷ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠢ᠋ ᠲᠤᠷᠰᠢᠬᠤ ᠮᠡᠲᠦ᠂
— ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠨᠠᠳᠠᠳᠤ ᠵᠢᠶᠦ᠋ᠨ ᠸᠠᠩ ᠴᠣᠯᠠ ᠣᠯᠭᠣᠭᠰᠠᠨ ᠢ᠋ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠰᠠᠢᠰᠢᠶᠠᠬᠤ ᠦᠭᠡᠢ ᠪᠠᠢᠨᠠ᠃ ᠲᠠ ᠴᠡᠷᠢᠭ ᠦ᠋ᠨ ᠬᠥᠯ ᠳ᠋ᠦ᠍ ᠦᠷᠡᠭᠳᠡᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠵᠤ ᠪᠠᠢᠭᠠᠷᠠᠢ᠃ ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠥᠯᠵᠡᠢ ᠲᠡᠢ ᠶᠠᠪᠤᠭᠠᠷᠠᠢ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠸᠴᠢᠷᠲᠤ ᠰᠡᠴᠡᠨ ᠡᠷᠡᠭᠡᠯᠵᠡᠩᠭᠦᠢ ᠪᠣᠯᠵᠤ᠂
— ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ᠂ ᠰᠠᠪᠳᠠᠨᠵᠠᠯ ᠸᠠᠩ ᠢ᠋ ᠥᠭᠡᠳᠡ ᠨᠢ ᠲᠠᠲᠠᠵᠤ ᠪᠠᠢᠭᠠ ᠶᠤᠮ ᠭᠡᠵᠦ ᠬᠠᠷᠠᠮᠰᠠᠩᠭᠤᠢ ᠥᠭᠦᠯᠡᠯᠡ᠃
ᠴᠣᠬᠣᠮ ᠳ᠋ᠠᠭᠠᠨ ᠰᠠᠪᠳᠠᠨᠵᠠᠯ ᠪᠣᠯᠪᠠᠰᠤ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ᠂ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠤ᠋ᠨ ᠬᠣᠭᠣᠷᠣᠨᠳᠣ ᠳᠠᠪᠬᠢᠭᠰᠠᠭᠠᠷ ᠡᠭᠡᠵᠢᠭᠲᠡᠢ ᠴᠠᠭ ᠢ᠋ ᠬᠦᠯᠢᠶᠡᠵᠦ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠰᠡᠨᠳᠡᠢ ᠳ᠋ᠦ᠍ ᠰᠠᠨᠠᠭᠠᠷᠬᠠᠬᠤ ᠪᠣᠯᠵᠠᠢ᠃
ᠰᠠᠪᠳᠠᠨᠵᠠᠯ ᠬᠠᠯᠬᠠ ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠢ᠋ᠶ᠋ᠠᠷ ᠳᠠᠮᠵᠢᠨ ᠮᠠᠨᠵᠤ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠬᠢᠨ ᠲᠡᠢ ᠬᠣᠯᠪᠣᠭᠠ ᠰᠦᠯᠪᠡᠭᠡ ᠪᠡᠨ ᠪᠡᠬᠢᠵᠢᠭᠦᠯᠬᠦ ᠪᠡᠷ ᠬᠦᠯᠦᠭ ᠦ᠋ᠨ ᠬᠤᠷᠳᠤᠨ ᠢ᠋ ᠤᠨᠤᠵᠤ ᠶᠠᠪᠤᠭᠠ ᠶ᠋ᠢ ᠸᠴᠢᠷᠲᠤ ᠰᠡᠴᠡᠨ ᠭᠠᠳᠠᠷᠯᠠᠵᠤ《 ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠴᠠᠬᠠᠷ ᠲᠡᠷᠢᠭᠦᠲᠡᠨ ᠳᠥᠴᠢᠨ ᠶᠢᠰᠦᠨ ᠬᠣᠰᠢᠭᠤ ᠮᠠᠨᠵᠤ ᠳ᠋ᠤ᠌ ᠳᠠᠭᠠᠷᠠ ᠣᠷᠣᠭᠰᠠᠨ᠃ ᠣᠳᠣ ᠡᠨᠡ ᠰᠠᠪᠳᠠᠨᠵᠠᠯ ᠵᠡᠭᠥᠨᠭᠠᠷ ᠢ᠋ ᠨᠦᠬᠡᠯᠡᠬᠦ ᠨᠢ ᠠ᠋᠃ ᠭᠦᠷᠦᠨ ᠤᠯᠤᠰ ᠳᠤᠮᠳᠠ ᠪᠠᠨ ᠨᠦᠬᠡ ᠲᠡᠢ ᠪᠣᠯ ᠶᠠᠭᠤ ᠪᠣᠯᠬᠤ ᠰᠠᠨ ᠪᠢᠯᠡ᠃ ᠡᠷᠬᠡᠪᠰᠢ ᠬᠤᠪᠢᠯᠭᠠᠨ ᠬᠥᠮᠦᠨ ᠪᠣᠯᠬᠤ ᠪᠠᠷ ᠢ᠋ᠶ᠋ᠠᠨ ᠭᠠᠯᠳᠠᠨ ᠨᠠᠳᠠ ᠠ᠋ᠴᠠ ᠳᠤᠲᠠᠭᠤ ᠪᠣᠳᠣᠵᠤ ᠭᠡᠵᠦ ᠤᠤ? ᠨᠠᠳᠠᠳᠤ ᠲᠥᠷᠥᠭᠰᠡᠨ ᠰᠡᠵᠢᠭ ᠭᠠᠯᠳᠠᠨ ᠳ᠋ᠤ᠌ ᠪᠠᠰᠠ ᠪᠣᠢ ᠪᠠᠢᠭᠠ ᠪᠣᠢ ᠵ᠋ᠡ 》ᠭᠡᠮᠡᠨ ᠪᠣᠳᠣᠭᠠᠳ ᠴᠡᠭᠡᠵᠢᠨ ᠦ᠌ ᠭᠦᠨ ᠡᠴᠡ ᠰᠠᠨᠠᠭᠠ ᠠᠯᠳᠠᠯᠠ᠃
ᠰᠡᠪᠳᠡᠨᠵᠠᠯ ᠢ᠋ ᠮᠠᠨᠵᠤ ᠨᠤᠭᠤᠳ ᠬᠥᠭᠡᠷᠭᠡᠵᠦ ᠪᠠᠢᠯᠠ᠃ ᠮᠠᠨᠵᠤ ᠶ᠋ᠢᠨ ᠲᠠᠩᠨᠠᠭᠤᠯ ᠲᠤᠷᠰᠢᠭᠤᠯ ᠣᠢᠷᠠᠳ ᠨᠤᠲᠤᠭ ᠢ᠋ᠶ᠋ᠠᠷ ᠬᠦᠯᠬᠦᠵᠦ ᠰᠠᠪᠳᠠᠨᠵᠡᠯ ᠮᠡᠲᠦ ᠶ᠋ᠢᠨ ᠤᠷᠪᠠᠭᠴᠢ ᠨᠣᠶᠠᠳ ᠰᠡᠭᠦᠯ ᠢ᠋ᠶ᠋ᠡᠨ ᠰᠠᠷᠪᠠᠯᠵᠠᠭᠤᠯᠵᠤ ᠪᠠᠢᠲᠠᠯᠠ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠴᠢᠭᠤᠯᠭᠠᠨ ᠬᠤᠷᠠᠯᠳᠤᠭᠤᠯᠬᠤ ᠨᠡᠷᠡ ᠶ᠋ᠢᠨ ᠳᠣᠣᠷᠠ᠂ ᠴᠢᠩ ᠤᠯᠤᠰ ᠤ᠋ᠨ ᠬᠠᠤᠯᠢ ᠶ᠋ᠢᠨ ᠳᠣᠣᠷᠠ ᠣᠢᠷᠠᠳ᠂ ᠮᠣᠩᠭᠣᠯ᠂ ᠬᠠᠯᠬᠠ ᠮᠣᠩᠭᠣᠯ ᠢ᠋ ᠨᠢᠭᠡᠳᠬᠡᠬᠦ ᠪᠡᠷ ᠪᠣᠯᠵᠠᠢ᠃ ᠴᠥᠪ ᠦ᠋ᠨ ᠴᠠᠭ ᠤ᠋ᠨ ᠪᠣᠱᠣᠭ ᠤ᠋ᠨ ᠳᠡᠭᠡᠷᠡ ᠣᠢᠷᠠᠳ ᠤ᠋ᠨ ᠠᠮᠢᠳᠤᠷᠠᠯ ᠲᠤᠯᠵᠤ ᠢᠷᠡᠪᠡ᠃
ᠭᠤᠷᠪᠠ
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠵᠡᠭᠦᠨ ᠭᠠᠷ ᠤ᠋ᠨ ᠱᠤ᠌ ᠠ᠋ᠴᠠ ᠡᠷᠢᠭᠡ ᠪᠡᠨ ᠠᠪᠴᠤ ᠭᠤᠷᠪᠠ ᠳᠠᠬᠢᠨ ᠱᠣᠳᠠᠨ ᠬᠤᠪᠢᠶᠠᠵᠤ ᠦᠵᠡᠭᠡᠳ ᠮᠥᠩᠭᠥᠨ ᠠᠶᠠᠭᠠ ᠲᠠᠢ ᠴᠠᠢ ᠠ᠋ᠴᠠ ᠵᠣᠭᠣᠭᠯᠠᠪᠠ᠃ ᠡᠷᠢᠭᠡ ᠪᠡᠷ ᠢ᠋ᠶ᠋ᠡᠨ ᠲᠠᠰᠢᠭᠤᠷᠳᠠᠪᠠ᠃ ᠭᠠᠯᠳᠠᠨ ᠶᠡᠬᠡᠳᠡ ᠠᠭᠤᠷᠰᠠᠨ ᠳᠣᠭᠰᠢᠷᠠᠵᠠᠢ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠪᠠᠨᠴᠢᠨ ᠪᠣᠭᠳᠠ ᠶ᠋ᠢᠨ ᠬᠠᠮᠠᠷ ᠤ᠋ᠨ ᠢ᠋ᠶ᠋ᠠᠨ ᠰᠢᠩᠬᠤ ᠲᠦᠷᠬᠢᠵᠦ ᠳᠣᠮᠨᠠᠭᠰᠠᠨ ᠡᠮᠡ ᠬᠥᠮᠦᠨ ᠦ᠌ ᠭᠠᠪᠠᠯᠠ ᠠᠶᠠᠭᠠ ᠶ᠋ᠢ ᠰᠡᠨᠳᠡᠢ ᠶ᠋ᠢᠨ ᠣᠢᠷᠠᠯᠴᠠᠭᠠᠬᠢ ᠱᠦᠭᠦᠷ ᠡᠴᠡ ᠭᠠᠷᠭᠠᠵᠤ ᠤᠳᠠᠲᠠᠯᠠ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠢᠲᠠᠪᠠ᠃
— ᠬᠣᠷᠸᠠ ᠴᠢᠨᠢ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠦᠲᠦᠭᠰᠡᠨ ᠶᠤᠮ ᠰᠢᠦ ᠳᠡ ᠭᠡᠮᠡᠨ ᠬᠡᠨ ᠳ᠋ᠦ᠍ ᠴᠤ᠌ ᠶᠤᠮ ᠬᠦᠩᠭᠢᠨᠡᠨ ᠠᠢᠯᠠᠳᠤᠭᠠᠳ ᠡᠷᠢᠭᠡ ᠪᠡᠨ ᠱᠤ᠌ ᠳ᠋ᠠᠭᠠᠨ ᠣᠷᠢᠶᠠᠪᠠ᠃ ᠭᠠᠯᠳᠠᠨ ᠴᠠᠭᠠᠰᠢ ᠨᠢ᠂
— ᠪᠢ ᠴᠣᠬᠣᠨᠳᠣᠷᠵᠢ ᠬᠣᠩ ᠲᠠᠢᠵᠢ ᠲᠠᠢ ᠪᠠᠢᠯᠳᠤᠬᠤ ᠦᠭᠡᠢ᠃ ᠬᠠᠷᠢᠨ ᠲᠡᠭᠦᠨ ᠦ᠌ ᠴᠡᠷᠢᠭ ᠵᠡᠪᠰᠡᠭ ᠢ᠋ ᠬᠤᠷᠢᠶᠠᠵᠤ ᠥᠪᠡᠷ ᠲᠡᠭᠡᠨ ᠨᠢᠭᠡᠳᠬᠡᠭᠡᠳ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠠ᠋ᠴᠠ ᠶᠠᠯᠠ ᠠᠰᠠᠭᠤᠮᠠᠷ ᠰᠠᠨᠠᠭᠳᠠᠨᠠ᠃ ᠮᠣᠩᠭᠣᠯ ᠣᠢᠷᠠᠳ ᠤ᠋ᠨ ᠬᠠᠤᠯᠢ ᠶ᠋ᠢ ᠮᠠᠨᠵᠤ ᠶ᠋ᠢᠨ ᠬᠠᠤᠯᠢ ᠪᠠᠷ ᠡᠷᠬᠡᠰᠢᠶᠡᠬᠦ ᠶ᠋ᠢ ᠬᠡᠵᠢᠶᠡ ᠴᠦ᠍ ᠦᠯᠦ ᠵᠥᠪᠰᠢᠶᠡᠷᠡᠨᠡ ᠭᠡᠮᠡᠨ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤᠨ ᠳᠡᠭᠡᠷᠡ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠬᠤ ᠳ᠋ᠤ᠌ ᠲᠣᠮᠣ᠂ ᠵᠢᠵᠢᠭ ᠣᠯᠠᠨ ᠭᠠᠷ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠳᠠᠪᠬᠤᠷᠯᠠᠪᠠ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠲᠠᠩᠭᠠᠷᠢᠭ ᠲᠠᠯᠪᠢᠵᠠᠭᠠᠪᠠ᠃ ᠠᠨᠤ ᠬᠠᠲᠤᠨ᠂ ᠳᠠᠨᠵᠢᠯᠠ ᠵᠠᠩᠵᠤᠨ᠂ ᠠᠷᠴᠠ᠂ ᠭᠠᠢᠲᠠᠪ ᠪᠠᠭᠠᠲᠤᠷ᠂ ᠲᠥᠷᠥ ᠶ᠋ᠢᠨ ᠰᠠᠢᠳ ᠮᠡᠷᠭᠡᠨ ᠪᠣᠯᠤᠨ ᠣᠯᠠᠨ ᠪᠠᠭᠠᠲᠤᠷ ᠵᠠᠩᠵᠤᠳ᠂ ᠰᠠᠢᠳ ᠨᠠᠷ ᠭᠠᠷ ᠭᠠᠷ ᠢ᠋ᠶ᠋ᠠᠨ ᠳᠠᠪᠬᠤᠷᠯᠠᠨ ᠪᠡᠶᠡᠰ ᠦ᠋ᠨ ᠥᠭᠡᠳᠡ ᠡᠴᠡ ᠬᠠᠷᠠᠵᠠᠭᠠᠨ᠂ ᠤᠴᠠᠷᠠᠯ ᠳᠦᠭᠦᠷᠡᠩ ᠬᠠᠷᠠᠴᠠ ᠪᠠᠷ ᠰᠢᠷᠲᠡᠵᠡᠭᠡᠨᠡ᠃
ᠤᠴᠠᠷᠠᠯ ᠬᠠᠭᠠᠴᠠᠯ ᠤ᠋ᠨ ᠬᠣᠯᠪᠣᠭᠠᠰᠤ ᠶ᠋ᠢ ᠤᠯᠠᠮ ᠵᠤᠵᠠᠭᠠᠳᠬᠠᠨ ᠭᠠᠯᠳᠠᠨ ᠬᠠᠭᠠᠨ᠂
— ᠬᠠᠯᠬᠠ ᠣᠢᠷᠠᠳ ᠬᠠᠤᠯᠢ ᠶ᠋ᠢ ᠮᠠᠨᠵᠤ ᠨᠤᠭᠤᠳ ᠬᠦᠴᠦᠨ ᠦᠭᠡᠢ ᠪᠣᠯᠭᠠᠭᠰᠠᠨ᠃ ᠬᠠᠯᠬᠠ ᠮᠣᠩᠭᠣᠯ ᠢ᠋ ᠵᠡᠭᠥᠨᠭᠠᠷ ᠲᠤ᠌ ᠬᠤᠮᠢᠵᠤ ᠴᠠᠭᠠᠰᠢᠯᠠᠭᠠᠳ ᠮᠠᠨᠵᠤ ᠶ᠋ᠢ ᠰᠥᠭᠦᠳᠦᠭᠦᠯᠬᠦ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃ ᠨᠢᠭᠡᠨ ᠲᠤᠭ ᠤ᠋ᠨ ᠳᠣᠣᠷᠠ ᠪᠦᠬᠦ ᠴᠡᠷᠢᠭ ᠢ᠋ᠶ᠋ᠡᠨ ᠨᠢᠭᠡᠳᠬᠡᠶᠡ᠃ ᠲᠥᠪᠡᠳ ᠦ᠋ᠨ ᠶᠡᠷᠦᠩᠬᠡᠢ ᠰᠠᠢᠳ ᠰᠠᠩᠵᠠᠢᠵᠠᠮᠰᠤ᠂ ᠣᠷᠣᠰ ᠤ᠋ᠨ ᠲᠣᠪᠣᠯᠰᠺ ᠬᠣᠲᠠ ᠶ᠋ᠢᠨ ᠵᠠᠬᠢᠷᠤᠭᠴᠢ ᠰᠥᠮᠡᠷᠤᠺᠥᠸ ᠲᠦ᠍ ᠡᠯᠴᠢ ᠢᠯᠡᠭᠡᠵᠦ ᠲᠤᠰᠠᠯᠠᠮᠵᠢ ᠬᠦᠰᠡᠭᠲᠦᠨ ᠭᠡᠮᠡᠨ ᠠᠰᠠᠷ ᠲᠤ᠌ ᠪᠠᠢᠬᠤ ᠳᠡᠭᠡᠳᠦᠴᠦᠦᠯ᠂ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ᠂ ᠰᠠᠢᠳ ᠨᠣᠶᠠᠳ ᠲᠤ᠌ ᠲᠤᠩᠬᠠᠭᠯᠠᠨ ᠥᠭᠦᠯᠡᠪᠡ᠃
—ᠬᠠᠤᠯᠢ ᠶ᠋ᠢ ᠨᠢ ᠭᠠᠤᠯᠢ ᠪᠣᠯᠭᠠᠵᠤ ᠮᠠᠨᠵᠤ ᠶ᠋ᠢᠨ ᠬᠠᠤᠯᠢ ᠳ᠋ᠤ᠌ ᠡᠷᠬᠡ ᠴᠢᠯᠥᠭᠡ ᠣᠯᠭᠣᠯᠠ ᠭᠡᠳᠡᠭ ᠲᠣᠭᠯᠠᠭᠠᠮ ᠮᠡᠷᠭᠡᠨ ᠰᠠᠢᠳ ᠮᠢᠨᠦ ᠭᠣᠣᠯ ᠢ᠋ ᠭᠣᠬᠠᠳᠠᠪᠠ᠃ ᠬᠠᠤᠯᠢ ᠦᠭᠡᠢ ᠤᠯᠤᠰ ᠪᠣᠯ ᠲᠣᠭᠯᠠᠭᠠᠮ ᠤ᠋ᠨ ᠤᠯᠤᠰ ᠪᠢᠯᠡ᠃ ᠲᠣᠭᠯᠠᠭᠠᠮ ᠪᠣᠯᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠡᠩᠬᠡ ᠠᠮᠤᠭᠤᠯᠠᠩ ᠤ᠋ᠨ ᠴᠡᠷᠢᠭ ᠦ᠋ᠳ ᠢ᠋ ᠨᠢᠳᠤᠷᠭᠠᠯᠠᠵᠤ ᠨᠤᠭᠤᠰᠤᠯᠠᠬᠤ ᠨᠢ ᠵᠥᠪ ᠭᠡᠵᠦ ᠮᠡᠷᠭᠡᠨ ᠪᠠᠢᠵᠤ ᠶᠠᠳᠠᠨ ᠥᠭᠦᠯᠡᠪᠡ᠃
—ᠮᠣᠩᠭᠣᠯ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠤᠯᠠ ᠳ᠋ᠠᠭᠠᠨ ᠭᠢᠰᠬᠢᠯᠡ᠃ ᠡᠨᠡ ᠪᠤᠰᠤᠷᠮᠠᠭ ᠶᠠᠪᠤᠳᠠᠯ ᠢ᠋ ᠶᠠᠭᠠᠬᠢᠪᠠᠴᠤ ᠦᠯᠦ ᠵᠥᠪᠰᠢᠶᠡᠷᠡᠨᠡ᠃ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠳᠡᠭᠡᠷᠡ ᠬᠥᠬᠡ ᠲᠩᠷᠢ ᠡᠴᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠪᠠᠢᠬᠤ ᠶᠣᠰᠣ ᠦᠭᠡᠢ᠃ ᠮᠠᠨᠵᠤ ᠨᠤᠭᠤᠳ ᠤ᠋ᠨ ᠡᠮᠦᠰᠦᠭᠰᠡᠨ ᠮᠠᠯᠠᠭᠠᠢ ᠶ᠋ᠢ ᠴᠠᠬᠠᠷ ᠲᠡᠷᠢᠭᠦᠲᠡᠨ ᠥᠪᠥᠷᠯᠡᠭᠴᠢ ᠨᠣᠶᠠᠳ ᠠᠪᠴᠤ ᠰᠢᠳᠡᠬᠦ ᠴᠠᠭ ᠪᠣᠯᠵᠠᠢ ᠭᠡᠵᠦ ᠭᠠᠢᠲᠠᠪ ᠪᠠᠭᠠᠲᠤᠷ ᠬᠦᠩᠭᠢᠨᠡᠨ ᠳᠤᠤᠭᠠᠷᠤᠯᠠ᠃
ᠳᠥᠷᠪᠡ
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠭᠠᠯᠳᠠᠨ ᠤ᠋ ᠰᠠᠯᠬᠢᠨ ᠳ᠋ᠤ᠌ ᠬᠤᠢᠯᠠᠷᠠᠨ ᠪᠣᠰᠴᠠᠢ᠃ ᠰᠦᠮᠡ ᠳᠤᠭᠠᠩ᠂ ᠬᠣᠲᠠ ᠬᠦᠷᠢᠶᠡ᠂ ᠬᠡᠷᠡᠮ ᠴᠠᠢᠵᠠ ᠴᠡᠷᠢᠭ ᠦ᠋ᠳ ᠦ᠋ᠨ ᠠᠷᠤ ᠳ᠋ᠤ᠌ ᠬᠣᠴᠣᠷᠪᠠ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠠᠯᠲᠠᠢ ᠶ᠋ᠢᠨ ᠪᠠᠯ ᠠ᠋ᠴᠠ ᠬᠥᠳᠡᠯᠵᠦ ᠰᠦᠯᠳᠡ ᠲᠤᠭ ᠢ᠋ᠶ᠋ᠠᠨ ᠨᠠᠮᠢᠷᠠᠭᠤᠯᠤᠨ ᠶᠠᠪᠤᠭᠰᠠᠭᠠᠷ ᠲᠥᠪ ᠬᠠᠯᠬᠠ ᠶ᠋ᠢᠨ ᠨᠤᠲᠤᠭ ᠲᠤ᠌ ᠣᠷᠣᠵᠤ ᠢᠷᠡᠬᠦ ᠦᠶᠡ ᠳ᠋ᠦ᠍ ᠡᠷᠳᠡᠨᠢ ᠵᠣᠣ ᠬᠡᠮᠡᠬᠦ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠬᠡᠢᠳ ᠡᠵᠡᠨ ᠦᠭᠡᠢ ᠪᠠᠢᠯᠠ᠃ ᠪᠤᠯᠠᠭᠠᠨ ᠬᠠᠩᠭᠠᠢ ᠶ᠋ᠢᠨ ᠥᠪᠥᠷ ᠲᠦ᠍ ᠣᠷᠣᠰᠢᠬᠤ ᠬᠥᠭᠡᠨᠡ ᠬᠠᠭᠠᠨ ᠤ᠋ ᠬᠡᠢᠳ ᠦ᠋ᠨ ᠮᠢᠩᠭᠠᠨ ᠯᠠᠮᠠ ᠬᠤᠷᠠᠯ ᠬᠤᠷᠠᠵᠤ ᠪᠠᠢᠬᠤ ᠲᠠᠢ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠲᠠᠭᠠᠷᠠᠯᠳᠤᠯᠠ᠃ ᠬᠠᠭᠠᠨ ᠬᠤᠷᠠᠯ ᠳᠠᠭᠤᠰᠲᠠᠯᠠ ᠴᠢᠩᠨᠠᠵᠠᠢ᠃《 ᠤᠩᠰᠢᠯᠭᠠ ᠰᠠᠢᠲᠠᠢ ᠶᠤᠮ》 ᠭᠡᠵᠦ ᠭᠠᠯᠳᠠᠨ ᠪᠣᠱᠣᠭᠲᠤ ᠪᠣᠳᠣᠵᠠᠢ᠃ ᠡᠨᠡ ᠬᠣᠭᠣᠷᠣᠨᠳᠣ ᠵᠡᠭᠥᠨᠭᠠᠷ ᠤ᠋ᠨ ᠶᠡᠬᠡ ᠴᠡᠷᠢᠭ ᠪᠤᠲᠠ ᠰᠥᠭᠡᠭ ᠪᠦᠬᠦᠢ ᠲᠤᠩᠭᠠᠯᠠᠭ ᠴᠠᠰᠤᠲᠤ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠪᠠᠭᠤᠳᠠᠯᠯᠠᠵᠠᠢ᠃ ᠬᠥᠭᠯᠡᠷᠡᠨ ᠪᠠᠭᠤᠭᠰᠠᠨ ᠴᠡᠷᠢᠭ ᠦ᠋ᠨ ᠮᠠᠢᠬᠠᠨ᠂ ᠵᠣᠳᠭᠡᠷ ᠢ᠋ᠶ᠋ᠡᠷ ᠵᠡᠷᠯᠢᠭ ᠡᠪᠡᠰᠦᠲᠦ ᠬᠡᠭᠡᠷᠡ ᠲᠠᠯᠠ ᠨᠤᠲᠤᠭ ᠢ᠋ ᠪᠢᠲᠡᠭᠦᠦ ᠬᠤᠴᠢᠵᠤ ᠪᠠᠭᠤᠳᠠᠯᠯᠠᠭᠰᠠᠨ ᠲᠤᠯᠠ ᠬᠡᠢᠳ ᠦ᠋ᠨ ᠯᠠᠮᠠ ᠨᠠᠷ ᠠᠶᠤᠨ ᠰᠦᠷᠳᠡᠵᠡᠢ᠃ ᠬᠥᠭᠡᠨᠡ ᠬᠠᠭᠠᠨ ᠤ᠋ ᠠᠭᠤᠯᠠᠰ ᠲᠦᠩᠬᠦᠢᠨᠡ᠃ ᠬᠤᠷᠠᠯ ᠬᠤᠷᠠᠵᠤ ᠪᠣᠢ ᠯᠠᠮᠠ ᠨᠠᠷ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠢ᠋ ᠲᠠᠨᠢᠵᠤ ᠳᠠᠭᠤ ᠪᠠᠨ ᠨᠠᠮᠤᠰᠬᠠᠨ ᠨᠠᠮᠤᠰᠬᠠᠭᠰᠠᠭᠠᠷ ᠴᠢᠮᠡᠭᠡ ᠦᠭᠡᠢ ᠪᠣᠯᠤᠨᠠ᠃
—ᠪᠢ ᠵᠡᠭᠥᠨᠭᠠᠷ ᠤ᠋ᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠪᠠᠢᠨᠠ᠃ ᠴᠠᠬᠤᠨᠳᠤᠷᠵᠢ ᠬᠣᠩ ᠲᠠᠢᠵᠢ᠂ ᠴᠡᠷᠢᠭ ᠦ᠋ᠳ ᠲᠡᠢ ᠪᠡᠨ ᠥᠨᠳᠥᠷ ᠭᠡᠭᠡᠨ ᠢ᠋ ᠠᠪᠤᠭᠠᠳ ᠨᠠᠳᠠ ᠠ᠋ᠴᠠ ᠨᠢᠭᠤᠷ ᠪᠤᠷᠤᠭᠤᠯᠠᠵᠠᠢ᠃ ᠴᠢᠩᠭᠡᠰ ᠬᠠᠭᠠᠨ ᠤ᠋ ᠭᠠᠯ ᠭᠣᠯᠣᠮᠲᠠ ᠠᠷᠢᠭᠤᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠮᠣᠩᠭᠣᠯᠴᠤᠳ ᠨᠢᠭᠡᠨ ᠦ᠌ ᠪᠡᠨ ᠴᠢᠰᠤ ᠶ᠋ᠢ ᠤᠷᠤᠰᠬᠠᠬᠤ ᠶᠣᠰᠣ ᠦᠭᠡᠢ᠃ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠲᠡᠢ ᠪᠠᠢᠯᠳᠤᠬᠤ ᠳ᠋ᠠᠭᠠᠨ ᠬᠥᠮᠦᠨ ᠦ᠌ ᠬᠦᠴᠦ᠂ ᠣᠨᠣᠯᠭᠠ ᠨᠠᠳᠠ ᠬᠡᠷᠡᠭ ᠲᠡᠢ ᠲᠤᠯᠠ ᠪᠢ ᠲᠠ ᠨᠠᠷ ᠢ᠋ ᠴᠡᠷᠢᠭ ᠦ᠋ᠨ ᠠᠯᠪᠠᠨ ᠳ᠋ᠤ᠌ ᠲᠡᠢᠴᠢᠯᠡᠯᠡ᠃ ᠬᠡᠨ ᠳᠤᠷᠠ ᠦᠭᠡᠢᠴᠡᠨᠡ᠃ ᠲᠡᠭᠦᠨ ᠢ᠋ ᠤᠷᠪᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠵᠤ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠭᠠᠨᠠ ᠭᠡᠵᠦ ᠥᠨᠳᠥᠷ ᠳᠠᠭᠤ ᠪᠠᠷ ᠥᠭᠦᠯᠡᠪᠡ᠃ ᠲᠠᠬᠢᠯᠴᠢ ᠯᠠᠮᠠ᠂
— ᠪᠣᠱᠣᠭᠲᠤ ᠬᠠᠨ ᠲᠠ ᠪᠣᠯ ᠪᠤᠷᠬᠠᠨ ᠤ᠋ ᠱᠠᠪᠢ᠃ ᠥᠨᠳᠥᠷ ᠭᠡᠭᠡᠨ ᠦ᠌ ᠤᠷᠠᠯᠠᠭᠰᠠᠨ ᠪᠤᠷᠬᠠᠳ ᠢ᠋ ᠶᠠᠭᠠᠬᠢᠬᠤ ᠪᠢᠯᠡ ᠭᠡᠵᠦ ᠠᠰᠠᠭᠤᠯᠠ᠃ ᠪᠣᠱᠣᠭᠲᠤ ᠬᠠᠭᠠᠨ᠂
—ᠪᠤᠷᠬᠠᠨ ᠪᠣᠯ ᠦᠬᠦᠬᠦ ᠲᠥᠷᠥᠬᠦ ᠶ᠋ᠢᠨ ᠵᠠᠪᠰᠠᠷ ᠵᠠᠢ ᠶᠤᠮ᠃ ᠬᠡᠢᠳ ᠪᠣᠯᠤᠨ ᠪᠤᠷᠬᠠᠨ ᠢ᠋ ᠮᠠᠨᠠᠵᠤ᠂ ᠲᠠᠬᠢᠯᠴᠢ᠂ ᠳᠤᠭᠠᠩᠴᠢ ᠯᠠᠮᠠ᠂ ᠭᠠᠪᠵᠤ᠂ ᠴᠣᠷᠵᠢ᠂ ᠭᠡᠭᠡᠨ ᠨᠦ᠍ᠭᠦᠳ ᠦᠯᠡᠳᠡᠨᠡ ᠭᠡᠳ ᠬᠡᠢᠳ ᠡᠴᠡ ᠭᠠᠷᠴᠤ ᠶᠠᠪᠤᠯᠠ᠃
ᠬᠡᠢᠳ ᠡᠴᠡ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠭᠠᠷᠴᠤ ᠢᠷᠡᠬᠦ ᠵᠠᠭᠤᠷᠠ ᠵᠠᠭᠤᠲᠤ᠂ ᠮᠢᠩᠭᠠᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠠᠬᠠᠯᠠᠭᠴᠢ ᠨᠠᠷ ᠪᠦᠬᠦ ᠯᠠᠮᠠ ᠶ᠋ᠢ ᠵᠢᠭᠰᠠᠭᠠᠭᠰᠠᠨ ᠪᠠᠢᠪᠠ᠃ ᠨᠢᠭᠡ ᠯᠠᠮᠠ᠂
— ᠪᠢ ᠬᠥᠮᠦᠨ ᠠᠯᠠᠬᠤ ᠦᠭᠡᠢ ᠭᠡᠳ ᠶᠠᠩᠭᠢᠨᠠᠨ ᠤᠬᠢᠯᠠᠪᠠ᠃
ᠭᠠᠯᠳᠠᠨ ᠬᠠᠭᠠᠨ ᠡᠷᠢᠭᠡ ᠪᠡᠷ ᠢ᠋ᠶ᠋ᠡᠨ ᠠᠭᠠᠷ ᠲᠠᠰᠢᠭᠤᠷᠳᠠᠵᠤ᠂
— ᠬᠥᠩᠭᠡᠯᠡ ᠭᠡᠵᠦ ᠲᠤᠰᠢᠶᠠᠪᠠ᠃ ᠵᠠᠭᠤᠲᠤ ᠶ᠋ᠢᠨ ᠠᠬᠠᠯᠠᠭᠴᠢ ᠨᠢᠳᠦ ᠨᠢ ᠳᠦᠷᠯᠡᠢᠵᠦ᠂
— ᠶᠠᠭᠤ ᠭᠡᠨᠡ᠂᠂᠂᠂ ᠭᠡᠮᠡᠨ ᠳᠦᠯᠡᠢ ᠶᠦᠮ ᠰᠢᠭ᠋ ᠪᠣᠪᠳᠤᠨᠠᠪᠠ᠃ ᠪᠣᠱᠣᠭᠲᠤ ᠬᠠᠨ᠂
— ᠨᠠᠭᠠᠳᠤ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠ᠃ ᠲᠠᠢᠭᠠᠨ ᠪᠣᠯᠤᠭᠰᠠᠨ ᠬᠣᠢᠨᠠ ᠬᠥᠮᠦᠨ ᠠᠯᠠᠳᠠᠭ ᠪᠣᠯᠤᠨᠠ ᠭᠡᠯᠡ᠃
ᠬᠥᠭᠡᠨᠡ ᠬᠠᠭᠠᠨ ᠤ᠋ ᠬᠡᠢᠳ ᠦ᠋ᠨ ᠮᠢᠩᠭᠠᠨ ᠯᠠᠮᠠ ᠶ᠋ᠢᠨ ᠨᠡᠯᠢᠶᠡᠳ ᠢ᠋ ᠲᠠᠢᠭᠠᠨ ᠪᠣᠯᠭᠠᠭᠠᠳ ᠠᠷᠪᠠᠲᠤ ᠴᠡᠷᠢᠭ ᠦ᠋ᠨ ᠠᠮᠢ ᠨᠠᠰᠤ ᠶ᠋ᠢ ᠳᠠᠭᠠᠭᠠᠵᠤ᠂ ᠴᠡᠷᠢᠭ ᠦ᠋ᠨ ᠯᠠᠮᠠ ᠪᠣᠯᠵᠤ ᠶᠠᠪᠤᠬᠤ ᠶ᠋ᠢ ᠪᠣᠱᠣᠭᠲᠤ ᠬᠠᠭᠠᠨ ᠲᠤᠰᠢᠶᠠᠪᠠ᠃ ᠨᠢᠭᠡ ᠯᠠᠮᠠ ᠭᠠᠯᠳᠠᠨ ᠢ᠋ ᠬᠠᠷᠠᠵᠤ ᠤᠬᠢᠯᠠᠭᠰᠠᠭᠠᠷ ᠢᠷᠡᠭᠡᠳ᠂
—ᠪᠢ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠳ᠋ᠤ᠌ ᠵᠢᠳᠬᠦᠶᠡ ᠭᠡᠵᠦ ᠬᠡᠯᠡᠭᠡᠳ ᠲᠣᠯᠣᠭᠠᠢ ᠪᠠᠨ ᠴᠠᠪᠴᠢᠭᠤᠯᠪᠠ᠃ ᠳᠠᠷᠠᠭᠠ ᠶ᠋ᠢᠨ ᠯᠠᠮᠠ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠡᠮᠦᠨᠡ ᠣᠴᠢᠵᠤ᠂
— ᠲᠠᠨ ᠳ᠋ᠤ᠌ ᠵᠢᠳᠬᠦᠶᠡ ᠭᠡᠵᠦ ᠥᠴᠢᠪᠡ᠃ ᠲᠡᠷᠡ ᠯᠠᠮᠠ ᠠᠷᠪᠠᠲᠤ ᠶ᠋ᠢᠨ ᠠᠬᠠᠯᠠᠭᠴᠢ ᠪᠣᠯᠪᠠ᠃
ᠲᠠᠪᠤ
ᠯᠠᠮᠠ ᠨᠠᠷ ᠢ᠋ ᠠᠷᠪᠠᠲᠤ᠂ ᠵᠠᠭᠤᠲᠤ᠂ ᠮᠢᠩᠭᠠᠲᠤ ᠪᠠᠷ ᠲᠠᠷᠬᠠᠭᠠᠵᠤ᠂ ᠪᠠᠨᠴᠢᠨ᠌ᠡᠷᠳᠡᠨᠢ ᠶ᠋ᠢᠨ ᠬᠠᠮᠠᠷ ᠤ᠋ᠨ ᠴᠢᠰᠤ ᠲᠦᠷᠬᠢᠭᠰᠡᠨ ᠡᠮᠡ ᠬᠥᠮᠦᠨ ᠦ᠌ ᠭᠠᠪᠠᠯᠠ ᠶ᠋ᠢᠨ ᠶᠠᠰᠤ ᠪᠠᠷ ᠠᠳᠢᠰᠯᠠᠵᠤ ᠲᠣᠮ ᠬᠢᠪᠡ᠃ ᠭᠠᠯᠳᠠᠨ ᠬᠠᠭᠠᠨ ᠥᠨᠳᠥᠷ ᠳᠠᠭᠤ ᠪᠠᠷ᠂
—ᠪᠤᠷᠬᠠᠨ ᠤ᠋ ᠨᠣᠮ ᠢ᠋ᠶ᠋ᠠᠷ ᠲᠠ ᠨᠠᠷ ᠬᠣᠢᠲᠤ ᠲᠥᠷᠥᠯ ᠳ᠋ᠡᠭᠡᠨ ᠰᠠᠢᠨ ᠯᠠᠮᠠ ᠪᠣᠯᠵᠤ ᠲᠥᠷᠥᠨᠡ᠃ ᠲᠡᠷᠡ ᠰᠠᠢᠬᠠᠨ ᠴᠠᠭ ᠲᠤ᠌ ᠰᠠᠮᠠᠭᠤᠨ ᠴᠠᠭ ᠤ᠋ᠨ ᠶᠠᠪᠤᠳᠠᠯ ᠢ᠋ ᠮᠠᠷᠲᠠᠵᠤ ᠪᠣᠱᠣᠭᠲᠤ ᠬᠠᠭᠠᠨ ᠢ᠋ ᠳᠤᠷᠠᠰᠬᠤ ᠪᠢᠵᠡ᠃ ᠪᠤᠷᠬᠠᠨ ᠳ᠋ᠠᠭᠠᠨ ᠵᠠᠯᠪᠠᠷᠢᠵᠤ ᠶᠠᠪᠤᠭᠲᠤᠨ ᠭᠡᠪᠡ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠪᠠᠭᠤᠳᠠᠯ ᠬᠥᠮᠦᠨ ᠮᠠᠯ ᠬᠣᠶᠠᠷ ᠢ᠋ᠶ᠋ᠠᠷ ᠳᠦᠭᠦᠷᠡᠩ ᠪᠠᠢᠯᠠ᠃ ᠡᠮᠬᠢ ᠴᠡᠭᠴᠡ ᠪᠦᠬᠦᠢ ᠮᠢᠩᠭᠠᠲᠤ ᠴᠡᠷᠢᠭ ᠦ᠋ᠨ ᠲᠣᠭᠣᠷᠢᠭ ᠳᠤᠮᠳᠠ ᠵᠡᠪᠰᠡᠭ ᠪᠣᠭᠴᠣ ᠶ᠋ᠢᠨ ᠦᠵᠡᠯᠭᠡ ᠪᠣᠯᠵᠤ ᠳᠠᠭᠤᠰᠪᠠ᠃ᠴᠡᠷᠢᠭ ᠪᠦᠷᠢ ᠶ᠋ᠢᠨ ᠵᠣᠳᠭᠡᠷ ᠲᠦᠳᠡᠬᠡᠨ ᠬᠤᠷᠢᠶᠠᠭᠳᠠᠨ᠂ ᠴᠡᠷᠢᠭ ᠦ᠋ᠳ ᠮᠣᠷᠢ ᠲᠠᠢ ᠪᠠᠨ ᠰᠢᠯᠢ ᠪᠡᠨ ᠳᠠᠷᠤᠨ ᠬᠥᠳᠡᠯᠪᠡ᠃ ᠶᠡᠬᠡ ᠴᠡᠷᠢᠭ ᠦ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠭᠠᠯᠳᠠᠨ ᠬᠠᠭᠠᠨ᠂ ᠠᠨᠤ ᠬᠠᠲᠤᠨ ᠤ᠋ ᠬᠠᠮᠲᠤ ᠶᠠᠪᠤᠨᠠ᠃ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠢ᠋ ᠳᠤᠮᠳᠠ ᠪᠠᠨ ᠪᠥᠭᠡᠴᠡᠢᠯᠡᠵᠦ ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯᠠ ᠪᠠᠷ ᠡᠩᠨᠡᠨ᠂ ᠲᠡᠳᠡᠨ ᠦ᠌ ᠳᠤᠮᠳᠠ ᠰᠡᠦᠬᠡ ᠵᠢᠤᠵᠠ ᠲᠡᠷᠭᠡ ᠲᠠᠯᠠ ᠨᠤᠲᠤᠭ ᠤ᠋ᠨ ᠬᠥᠷᠥᠰᠥ ᠰᠢᠷᠣᠢ ᠶ᠋ᠢ ᠲᠠᠮᠠᠭᠠᠯᠠᠬᠤ ᠪᠥᠯᠥᠭᠡ᠃
ᠣᠢᠷᠠᠳ ᠠ᠋ᠴᠠ ᠲᠥᠪ ᠬᠠᠯᠬᠠ ᠬᠦᠷᠲᠡᠯᠡ ᠵᠢᠯ ᠭᠠᠷᠤᠢ ᠠᠶᠠᠯᠠᠵᠤ ᠶᠠᠪᠤᠭᠠ ᠲᠤᠯᠠ ᠬᠡᠭᠡᠷᠡ ᠲᠤᠬᠠᠯᠠᠬᠤ ᠴᠠᠭ ᠵᠠᠪ ᠪᠠᠭᠠ ᠪᠠᠢᠯᠠ᠃ ᠴᠠᠬᠤᠨᠳᠣᠷᠵᠢ ᠬᠣᠩ ᠲᠠᠢᠵᠢ ᠶ᠋ᠢ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠢ᠋ ᠲᠡᠮᠡᠭᠡᠨ ᠳ᠋ᠦ᠍ ᠲᠠᠩᠨᠠᠨ ᠣᠳᠤᠭᠰᠠᠨ ᠢ᠋ ᠲᠤᠭᠤᠯᠤᠭᠰᠠᠨ ᠠ᠋ᠴᠠ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢᠨ ᠣᠮᠣᠭᠯᠠᠩ ᠠᠷᠠᠨᠰᠢᠨ ᠰᠦ ᠮᠡᠲᠦ ᠲᠠᠪᠠᠷᠠᠨᠠ᠃ ᠬᠠᠭᠠᠨ ᠳ᠋ᠤ᠌ ᠵᠠᠭᠠᠲᠤᠨᠠᠭᠠ ᠪᠠᠢᠳᠠᠭ ᠪᠢᠯᠡ᠃ ᠲᠡᠢᠮᠦ ᠰᠠᠨᠠᠭᠠ ᠶ᠋ᠢ ᠴᠠᠬᠤᠨᠳᠣᠷᠵᠢ ᠰᠠᠲᠤᠵᠠᠢ᠃ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠥᠷᠥᠭᠰᠡᠨ ᠳᠡᠭᠦᠦ ᠶ᠋ᠢ ᠬᠣᠩ ᠲᠠᠢᠵᠢ ᠴᠠᠭᠠᠵᠠᠯᠠᠵᠤ ᠬᠣᠷᠣᠭᠠᠭᠰᠠᠨᠠ᠋ᠴᠠ ᠪᠣᠯᠵᠤ ᠲᠡᠭᠦᠨ ᠲᠡᠢ ᠲᠤᠯᠤᠯᠳᠤᠬᠤ ᠨᠢᠭᠤᠴᠠ ᠪᠣᠳᠣᠯ ᠭᠠᠯᠳᠠᠨ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠶᠤᠮ᠃
ᠵᠢᠷᠭᠤᠭᠠ
ᠬᠠᠯᠬᠠ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠳᠤᠮᠳᠠᠭᠤᠷ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠢ᠋ ᠵᠣᠷᠢᠭᠰᠠᠨ ᠡᠯᠴᠢ᠂ ᠪᠠᠷᠠᠭᠠ ᠬᠥᠰᠬᠡ᠂ ᠮᠠᠯ ᠲᠠᠪᠠ ᠪᠠᠷ ᠥᠩᠭᠡᠷᠡᠵᠦ ᠣᠳᠳᠠᠭ ᠪᠠᠢᠯᠠ᠃ ᠮᠠᠨᠵᠤ ᠨᠤᠭᠤᠳ ᠬᠠᠯᠬᠠ ᠮᠣᠩᠭᠣᠯ ᠪᠣᠯᠤᠨ ᠥᠪᠥᠷ ᠮᠣᠩᠭᠣᠯ ᠢ᠋ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠲᠤ᠌ ᠵᠣᠷᠴᠢᠬᠤ ᠡᠭᠦᠳᠡ ᠬᠠᠭᠠᠯᠭᠠ ᠪᠣᠯᠭᠠᠵᠠᠢ᠃
ᠵᠡᠭᠦᠨᠭᠠᠷ ᠡᠴᠡ ᠶᠠᠪᠤᠭᠠ ᠡᠯᠴᠢ ᠶ᠋ᠢ ᠵᠠᠮ ᠳ᠋ᠤᠨᠢ ᠪᠠᠢᠴᠠᠭᠠᠵᠤ᠂ ᠶᠡᠭᠦᠳᠬᠡᠬᠦ ᠵᠡᠷᠭᠡ ᠪᠡᠷ ᠰᠦᠷᠭᠦᠯᠳᠡᠬᠦ᠂ ᠰᠠᠭᠠᠳ ᠬᠢᠬᠦ ᠶ᠋ᠢ ᠵᠣᠭᠰᠣᠭᠠᠬᠤ ᠵᠣᠷᠢᠯᠭᠠ ᠪᠠᠷ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠭᠠᠯᠳᠠᠨ ᠨᠢᠭᠡᠨ ᠵᠦᠢᠯ ᠪᠣᠳᠣᠵᠤ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠦᠶᠡ ᠶ᠋ᠢᠨ ᠪᠥᠭᠲᠥᠷ ᠮᠣᠩᠭᠣᠯ ᠪᠢᠴᠢᠭ ᠪᠦᠬᠦᠢ ᠵᠢᠷᠦᠬᠡᠨ ᠲᠠᠮᠠᠭᠠ ᠪᠠᠨ ᠳᠠᠷᠤᠵᠤ ᠢᠯᠡᠭᠡᠪᠡ᠃ ᠵᠢᠷᠦᠬᠡᠨ ᠲᠠᠮᠠᠭᠠ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠨᠤᠲᠠᠯᠠᠳᠠᠭ ᠪᠢᠯᠡ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠮᠠᠨᠵᠤ ᠳ᠋ᠤ᠌ ᠥᠷᠢ ᠦᠭᠡᠢ ᠠᠲᠠᠯᠠ ᠡᠩᠬᠡ ᠠᠮᠤᠭᠤᠯᠠᠩ ᠥᠷᠢ ᠶ᠋ᠢᠨ ᠳᠠᠷᠤᠮᠲᠠ ᠡᠭᠦᠰᠬᠡᠵᠡᠢ᠃ ᠠᠯᠪᠠᠨ ᠲᠠᠲᠠᠪᠤᠷᠢ ᠭᠤᠪᠴᠢᠭᠤᠷ ᠨᠡᠬᠡᠵᠦ ᠭᠠᠯᠳᠠᠨ ᠢ᠋ ᠰᠦᠷ ᠬᠦᠴᠦ ᠪᠡᠷ ᠳᠠᠯᠠᠢᠯᠭᠠᠪᠠᠴᠤ ᠣᠢᠷᠠᠳ ᠤ᠋ᠳ ᠮᠠᠨᠵᠤ ᠲᠠᠢ ᠬᠤᠳᠠᠯᠳᠤᠭᠠ ᠬᠢᠭᠰᠡᠭᠡᠷ ᠪᠠᠢᠯᠠ᠃ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠡᠯᠴᠢ ᠴᠡᠳᠡᠳ ᠬᠡᠮᠡᠬᠦ ᠰᠠᠢᠳ ᠠᠰᠤᠷᠤ ᠶᠡᠬᠡ ᠪᠡᠯᠡᠭ ᠰᠡᠯᠲᠡ ᠲᠡᠢ ᠭᠠᠯᠳᠠᠨ ᠬᠠᠭᠠᠨ ᠳ᠋ᠤ᠌ ᠪᠠᠷᠠᠭᠠᠯᠠᠭᠠᠳ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠣᠢᠷᠠᠳ ᠤ᠋ᠨ ᠭᠤᠷᠪᠠᠨ ᠵᠠᠭᠤᠨ ᠴᠡᠷᠢᠭ ᠪᠦᠬᠦᠢ ᠨᠦᠰᠡᠷ ᠪᠡᠯᠡᠭ ᠢ᠋ ᠡᠩᠬᠡ ᠠᠮᠤᠭᠤᠯᠠᠩ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠳ᠋ᠤ᠌ ᠵᠠᠮ ᠵᠠᠭᠤᠷᠠ ᠳ᠋ᠤᠨᠢ ᠲᠦᠰᠢᠶᠡᠲᠦ ᠬᠠᠭᠠᠨ ᠴᠠᠬᠤᠨᠳᠣᠷᠵᠢ ᠴᠡᠷᠢᠭᠯᠡᠨ ᠳᠡᠭᠡᠷᠡᠮᠳᠡᠵᠡᠢ᠃
ᠭᠠᠯᠳᠠᠨ ᠬᠠᠭᠠᠨ ᠲᠥᠷᠥᠭᠰᠡᠨ ᠳᠡᠭᠦᠦ ᠳᠣᠷᠵᠢᠵᠠᠪ ᠢ᠋ᠶ᠋ᠠᠨ ᠡᠨᠡ ᠬᠦ᠌ ᠪᠠᠷᠠᠭᠠ ᠬᠥᠰᠬᠡ ᠶ᠋ᠢᠨ ᠠᠬᠠᠯᠠᠭᠴᠢ ᠪᠠᠷ ᠶᠠᠪᠤᠭᠤᠯᠬᠤ ᠳ᠋ᠠᠭᠠᠨ᠂
— ᠴᠢ ᠵᠠᠷᠤᠴᠠ ᠪᠣᠭᠣᠯ ᠪᠤᠰᠤ᠂ ᠴᠢ ᠵᠡᠭᠦᠨᠭᠠᠷ ᠤ᠋ᠨ ᠶᠡᠬᠡ ᠭᠦᠷᠦᠨ ᠦ᠌ ᠬᠠᠭᠠᠨ ᠤ᠋ ᠭᠠᠷ ᠤ᠋ᠨ ᠲᠦᠰᠢᠮᠡᠯ᠃ ᠵᠠᠮ ᠵᠠᠭᠤᠷᠠ ᠶᠠᠮᠠᠷ ᠨᠢᠭᠡᠨ ᠰᠠᠭᠠᠳ ᠲᠣᠳᠬᠠᠷ ᠤᠴᠠᠷᠠᠬᠤ ᠠᠪᠠᠰᠤ ᠠᠯᠲᠠᠨ ᠬᠡᠷᠡᠭᠡ ᠪᠡᠨ ᠡᠷᠭᠦᠵᠦ ᠦᠭᠡ ᠪᠡᠨ ᠬᠡᠯᠡᠵᠦ ᠪᠠᠢ᠃ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠳ᠋ᠤ᠌ ᠰᠥᠭᠥᠳᠦᠯ ᠦᠭᠡᠢ ᠪᠡᠷ ᠪᠢᠴᠢᠭ ᠢ᠋ᠶ᠋ᠡᠨ ᠪᠡᠷᠢ ᠭᠡᠮᠡᠨ ᠠᠢᠯᠠᠳᠴᠠᠢ᠃
ᠬᠠᠯᠬᠠ ᠶ᠋ᠢᠨ ᠲᠠᠯᠠ ᠨᠤᠲᠤᠭ ᠲᠤ᠌ ᠭᠡᠨᠡᠳᠲᠡ ᠪᠦᠯᠦᠭ ᠴᠡᠷᠢᠭ ᠦ᠋ᠳ ᠭᠠᠷᠴᠤ ᠢᠷᠡᠪᠡ᠃ ᠴᠠᠭᠠᠨ ᠱᠣᠩᠬᠣᠷ ᠰᠦᠯᠳᠡ ᠲᠤᠭ ᠲᠠᠢ ᠴᠡᠷᠢᠭ ᠦ᠋ᠳ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠴᠠᠬᠤᠨᠳᠤᠷᠵᠢ ᠭᠠᠷᠴᠤ᠂
— ᠵᠡᠭᠥᠨᠭᠠᠷ ᠤ᠋ᠨ ᠣᠢᠷᠠᠳ ᠤ᠋ᠳ ᠬᠠᠯᠬᠠ ᠶ᠋ᠢᠨ ᠨᠤᠲᠤᠭ ᠲᠤ᠌ ᠶᠠᠭᠤᠨ ᠳ᠋ᠤ᠌ ᠣᠷᠣᠪᠠ᠃ ᠬᠠᠮᠠᠭᠠᠯᠠᠬᠤ ᠡᠵᠡᠨ ᠦᠭᠡᠢ᠂ ᠬᠠᠳᠬᠤᠯᠳᠤᠨ ᠪᠠᠢᠯᠳᠤᠬᠤ ᠴᠡᠷᠢᠭ ᠦᠭᠡᠢ ᠶᠤᠮ ᠭᠡᠵᠦ ᠪᠣᠳᠣᠨᠠ ᠤᠤ? ᠭᠡᠮᠡᠨ ᠥᠳᠥᠭᠡᠨ ᠬᠠᠳᠬᠤᠵᠤ ᠠᠰᠠᠭᠤᠪᠠ᠃ ᠳᠣᠷᠵᠢᠵᠠᠪ ᠨᠣᠶᠠᠨ᠂
— ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠭᠤᠷᠪᠠᠨ ᠲᠠᠮᠠᠭᠠᠲᠤ ᠡᠪ ᠦ᠋ᠨ ᠪᠢᠴᠢᠭ ᠢ᠋ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠳ᠋ᠤ᠌ ᠪᠠᠷᠢᠬᠤ ᠪᠠᠷ ᠤᠳᠤᠮᠤᠢ᠃ ᠵᠠᠮ ᠵᠠᠭᠤᠷᠠ ᠶ᠋ᠢᠨ ᠬᠠᠯᠬᠠ ᠮᠣᠩᠭᠣᠯᠴᠤᠳ ᠰᠠᠳᠠᠭᠠ ᠪᠤᠤ ᠪᠣᠯᠲᠤᠭᠠᠢ ᠭᠡᠮᠡᠨ ᠤᠴᠢᠷᠯᠠᠪᠠ᠃ ᠲᠦᠰᠢᠶᠡᠲᠦ ᠬᠠᠭᠠᠨ ᠪᠢ᠂
— ᠵᠠᠰᠠᠭᠲᠤ ᠬᠠᠭᠠᠨ ᠤ᠋ ᠴᠤᠤ ᠮᠡᠷᠭᠡᠨ ᠢ᠋ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠵᠠᠯᠠᠵᠤ᠂ ᠸᠠᠩᠴᠣᠭ ᠢ᠋ ᠠᠯᠠᠭᠰᠠᠨ ᠶᠠᠯᠠ ᠶ᠋ᠢ ᠭᠠᠯᠳᠠᠨ ᠪᠣᠱᠣᠭᠲᠤ ᠠ᠋ᠴᠠ ᠠᠰᠠᠭᠤᠬᠤ ᠤᠴᠢᠷ ᠲᠠᠢ᠃ ᠸᠠᠩᠴᠣᠭ ᠤ᠋ᠨ ᠬᠥᠮᠦᠰ ᠨᠠᠳᠠ ᠠ᠋ᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠬᠤ ᠳ᠋ᠤ᠌ ᠪᠢ ᠣᠢᠷᠠᠳ ᠤ᠋ᠨ ᠴᠡᠷᠢᠭ ᠲᠡᠢ ᠲᠤᠯᠤᠯᠳᠤᠵᠤ ᠲᠡᠳᠡᠨ ᠢ᠋ ᠪᠤᠲᠠ ᠴᠣᠬᠢᠭᠰᠠᠨ ᠪᠢᠯᠡ᠃ ᠥᠨᠥᠳᠥᠷ ᠵᠡᠪᠰᠡᠭᠲᠦ ᠴᠡᠷᠢᠭ ᠨᠢ ᠮᠢᠨᠦ ᠨᠤᠲᠤᠭ ᠳᠡᠭᠡᠭᠦᠷ ᠶᠠᠭᠤᠨ ᠳ᠋ᠤ᠌ ᠨᠥᠮᠥᠷᠦᠨ ᠳᠠᠪᠬᠢᠯᠳᠤᠳᠠᠭ ᠪᠢᠯᠡ ᠭᠡᠵᠦ ᠠᠰᠠᠭᠤᠭᠠᠳ ᠳᠣᠷᠵᠢᠵᠠᠪ ᠢ᠋ ᠥᠳᠥᠭᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠬᠠᠷᠠᠨᠠ᠃ ᠳᠣᠷᠵᠢᠵᠠᠪ ᠨᠣᠶᠠᠨ᠂
— ᠬᠥᠬᠡ ᠮᠣᠩᠭᠣᠯ ᠤ᠋ᠨ ᠦᠷᠡᠰ ᠪᠢᠳᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠠᠨ ᠭᠠᠵᠠᠷ ᠨᠤᠲᠤᠭ ᠳᠡᠭᠡᠭᠦᠷ ᠶᠠᠪᠤᠬᠤ ᠳ᠋ᠤ᠌ ᠶᠠᠭᠠᠬᠢᠳᠠᠭ ᠶᠤᠮ᠃ ᠴᠠᠬᠤᠨᠳᠤᠷᠵᠢ ᠲᠠ ᠲᠠᠭᠠᠯᠠᠬᠤ ᠦᠭᠡᠢ ᠪᠠᠢᠭᠠ ᠪᠣᠯ ᠪᠢᠳᠡ ᠪᠤᠴᠠᠶᠠ ᠭᠡᠮᠡᠨ ᠲᠤᠯᠤᠯᠳᠤᠬᠤ ᠰᠠᠨᠠᠭᠠ ᠦᠭᠡᠢ ᠪᠣᠯᠬᠤ ᠪᠠᠨ ᠢᠯᠡᠴᠢᠯᠡᠨ ᠥᠭᠦᠯᠡᠬᠦ ᠳ᠋ᠦ᠍ ᠲᠦᠰᠢᠶᠡᠲᠦ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠭᠤᠸᠠᠭᠴᠢᠨ ᠬᠠᠰᠬᠢᠷᠤᠯᠳᠤᠪᠠ᠃ ᠴᠠᠬᠤᠨᠳᠣᠷᠵᠢ ᠬᠠᠭᠠᠨ᠂
— ᠣᠢᠷᠠᠳ ᠤ᠋ᠳ ᠢ᠋ ᠵᠡᠭᠡᠷᠡ ᠭᠥᠷᠥᠭᠡᠰᠦ ᠰᠢᠭ ᠨᠠᠮᠨᠠᠵᠠᠭᠠᠶᠠ ᠭᠡᠵᠦ ᠢᠯᠡᠳᠲᠡ ᠳᠡᠭᠡᠷᠡᠩᠭᠦᠢ ᠬᠠᠰᠬᠢᠷᠤᠭᠠᠳ ᠴᠡᠷᠢᠭ ᠦ᠋ᠨ ᠬᠦᠴᠦ ᠪᠡᠷ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢᠨ ᠡᠯᠴᠢ ᠴᠡᠷᠢᠭ ᠦ᠋ᠳ ᠢ᠋ ᠪᠤᠲᠠ ᠴᠣᠬᠢᠵᠤ ᠲᠡᠭᠦᠨ ᠦ᠌ ᠳᠡᠭᠦᠦ ᠳᠣᠷᠵᠢᠵᠠᠪ ᠢ᠋ ᠪᠠᠷᠢᠵᠤ ᠴᠠᠭᠠᠵᠠᠯᠠᠨ ᠬᠣᠷᠣᠭᠠᠵᠠᠢ᠃
ᠳᠣᠯᠣᠭᠠ
— ᠡᠷᠬᠢᠮ ᠬᠣᠩ ᠲᠠᠶ᠋ᠢᠵᠢᠲᠠᠨ ᠶᠣᠰᠣ ᠵᠤᠲᠠᠭ ᠲᠠᠢ ᠪᠠᠢᠪᠠᠯ ᠳᠡᠭᠡᠷᠡ ᠰᠠᠨ᠃ ᠪᠣᠱᠣᠭᠲᠤ ᠬᠠᠭᠠᠨ ᠲᠠᠨ ᠤ᠋ ᠦᠭᠡ ᠶ᠋ᠢ ᠰᠣᠨᠣᠰᠪᠠᠯ ᠶᠡᠬᠡ ᠬᠢᠯᠢᠩᠨᠡᠬᠦ ᠪᠤᠰᠤ ᠤᠤ? ᠭᠡᠵᠦ ᠳᠣᠷᠵᠢᠵᠠᠪ ᠰᠡᠭᠦᠯᠴᠢ ᠶ᠋ᠢᠨ ᠤᠳᠠᠭᠠ ᠥᠭᠦᠯᠡᠭᠡᠳ《 ᠬᠠᠯᠬᠠ ᠮᠣᠩᠭᠣᠯᠴᠤᠳ ᠠᠬᠠ ᠳᠡᠭᠦᠦᠰ ᠲᠡᠭᠡᠨ ᠵᠢᠲᠥᠭᠡᠷᠬᠡᠵᠦ ᠶᠠᠭᠤ ᠬᠣᠵᠢᠨᠠ》 ᠬᠡᠮᠡᠬᠦ ᠪᠣᠳᠣᠯ ᠲᠠᠢ ᠪᠠᠨ ᠬᠠᠯᠢᠵᠤ ᠣᠳᠤᠭᠰᠠᠨ ᠪᠠᠢᠨᠠ᠃
ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠠ᠋ᠴᠠ ᠭᠤᠷᠪᠠᠨ ᠮᠣᠷᠢᠲᠠᠨ ᠵᠢᠭᠤᠲᠠᠨ ᠭᠠᠷᠴᠤ ᠬᠦᠢᠲᠡᠨ ᠴᠠᠭᠠᠨ ᠲᠠᠯᠠ ᠳᠤᠮᠳᠠᠭᠤᠷ ᠶᠠᠳᠠᠷᠠᠵᠤ ᠲᠤᠢᠯᠳᠠᠨ ᠶᠠᠪᠤᠨᠠ᠃ ᠲᠡᠳᠡᠨ ᠦ᠌ ᠨᠢᠭᠤᠷ ᠬᠥᠯᠳᠡᠵᠦ ᠲᠣᠯᠪᠣᠲᠠᠵᠠᠢ᠃ ᠲᠡᠳᠡᠭᠡᠷ ᠴᠡᠷᠢᠭ ᠦ᠋ᠳ ᠣᠢᠷᠠᠳ ᠲᠠᠭᠠᠨ ᠢᠷᠡᠵᠡᠢ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠡᠮᠦᠨᠡ ᠭᠤᠷᠪᠠᠨ ᠴᠡᠷᠢᠭ ᠰᠥᠭᠥᠳᠦᠨ ᠰᠠᠭᠤᠨᠠ᠃ ᠨᠢᠭᠡ ᠴᠡᠷᠢᠭ ᠨᠢ᠂
— ᠲᠠᠨ ᠤ᠋ ᠳᠡᠭᠦᠦ ᠳᠣᠷᠵᠢᠵᠠᠪ ᠢ᠋ ᠴᠠᠬᠤᠨᠳᠤᠷᠵᠢ ᠬᠣᠩ ᠲᠠᠢᠵᠢ ᠠᠯᠠᠪᠠ᠃ ᠲᠡᠷᠡ ᠵᠠᠰᠠᠭᠲᠤ ᠬᠠᠭᠠᠨ ᠤ᠋ ᠴᠤᠤ ᠮᠡᠷᠭᠡᠨ ᠳ᠋ᠦ᠍ ᠲᠤᠰᠠᠯᠠᠭᠰᠠᠨ ᠭᠡᠵᠦ ᠲᠠᠨ ᠳ᠋ᠤ᠌ ᠥᠰᠢᠶᠡᠷᠬᠡᠳᠡᠭ ᠪᠣᠯᠤᠯᠲᠠᠢ ᠭᠡᠮᠡᠨ ᠥᠭᠦᠯᠡᠪᠡ᠃ ᠨᠥᠭᠦᠭᠡ ᠴᠡᠷᠢᠭ ᠨᠢ᠂
— ᠲᠦᠰᠢᠶᠡᠲᠦ ᠬᠠᠭᠠᠨ ᠤ᠋ ᠴᠡᠷᠢᠭ ᠣᠯᠠᠭᠤᠯᠠ ᠶᠤᠮ ᠭᠡᠮᠡᠨ ᠥᠴᠢᠯᠡ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠵᠢᠭᠤᠲᠠᠵᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠥᠪᠡᠷ ᠦ᠋ᠨ ᠳᠠᠭᠠᠭᠤᠯᠢ ᠬᠢᠶᠡ ᠳ᠋ᠦ᠍᠂
— ᠡᠳᠡᠨ ᠢ᠋ ᠬᠣᠭᠣᠯᠠᠯᠠᠵᠤ ᠠᠮᠠᠷᠠᠭᠠ ᠭᠡᠵᠦ ᠲᠤᠰᠢᠶᠠᠭᠠᠳ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠠᠯᠤᠰ ᠤ᠋ᠨ ᠠᠭᠤᠯᠠᠰ ᠢ᠋ ᠬᠠᠷᠠᠵᠤ ᠪᠠᠢᠪᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ《 ᠮᠣᠩᠭᠣᠯᠴᠤᠳ ᠬᠣᠭᠣᠷᠣᠨᠳᠣ ᠪᠠᠨ ᠠᠯᠠᠯᠳᠤᠭᠰᠠᠭᠠᠷ ᠡᠳᠦᠢ ᠬᠦᠷᠪᠡ᠃ ᠮᠢᠨᠦ ᠥᠩᠭᠡᠨ ᠳᠡᠭᠡᠷᠡ ᠣᠢᠷᠠᠳ ᠬᠠᠯᠬᠠ ᠬᠣᠶᠠᠷ ᠡᠪᠯᠡᠷᠡᠬᠦ ᠦᠭᠡᠢ ᠭᠡᠵᠦ ᠤᠤ? ᠮᠠᠨᠵᠤ ᠨᠤᠭᠤᠳ ᠮᠣᠩᠭᠣᠯᠴᠤᠳ ᠢ᠋ ᠬᠤᠷᠢᠶᠠᠵᠤ ᠬᠤᠮᠢᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠬᠤ ᠳ᠋ᠤ᠌ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠢ᠋ᠶ᠋ᠠᠨ ᠠᠷᠤ ᠠ᠋ᠴᠠ ᠲᠡᠳᠡᠨ ᠦ᠌ ᠠᠮᠠᠨ ᠳ᠋ᠤ᠌ ᠣᠷᠣᠵᠤ ᠶᠠᠭᠠᠬᠢᠨ ᠪᠣᠯᠤᠨᠠ᠃ ᠵᠠᠨᠠᠪᠠᠽᠠᠷ ᠭᠡᠭᠡᠨᠲᠡᠨ ᠤᠷᠠᠯᠠᠨ ᠠ᠋ᠴᠠ ᠪᠠᠨ ᠴᠤᠬᠤᠢᠬᠤ ᠦᠭᠡᠢ ᠶᠦᠮ᠃ ᠪᠣᠭᠳᠠ ᠭᠡᠭᠡᠨ ᠢ᠋ ᠨᠣᠮ ᠢ᠋ᠶ᠋ᠠᠨ ᠪᠢᠰᠢᠯᠭᠠᠭᠰᠠᠭᠠᠷ ᠰᠠᠭᠤᠲᠠᠯᠠ ᠳᠡᠭᠦᠦ ᠴᠠᠬᠤᠨᠳᠤᠷᠵᠢ ᠨᠢ ᠵᠣᠷᠢᠭ ᠢ᠋ᠶ᠋ᠠᠷ ᠠᠪᠤᠷᠢᠯᠠᠵᠤ ᠦᠬᠦᠯ ᠦ᠋ᠨ ᠭᠠᠯ ᠨᠣᠴᠣᠭᠠᠵᠤ ᠪᠠᠢᠨᠠ᠃ ᠪᠣᠭᠳᠠ ᠭᠡᠭᠡᠨ ᠳ᠋ᠦ᠍ ᠮᠥᠷᠭᠥᠵᠦ ᠰᠠᠨᠠᠭᠠ ᠪᠣᠳᠣᠯ ᠢ᠋ ᠨᠢ ᠮᠡᠳᠡᠶᠡ》 ᠭᠡᠵᠦ ᠠᠭᠤᠯᠠᠰ ᠲᠡᠢᠰᠢ ᠬᠠᠷᠠᠨᠠ᠃ ᠠᠮᠤᠭᠤᠯᠠᠩ ᠶᠡᠬᠡ ᠠᠭᠤᠯᠠᠰ ᠨᠠᠯᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠠᠯᠠᠢᠵᠤ᠂ ᠲᠦᠩᠬᠦᠢᠭᠰᠡᠨ ᠬᠡᠪ ᠢ᠋ᠶ᠋ᠡᠷ ᠪᠥᠯᠥᠭᠡ᠃
ᠨᠠᠢ᠍ᠮᠠ
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ᠂ ᠠᠨᠤ ᠬᠠᠲᠤᠨ ᠤ᠋ ᠬᠠᠮᠲᠤ ᠦᠷᠭᠦᠭᠡᠨ ᠳ᠋ᠡᠭᠡᠨ ᠪᠠᠢᠨᠠ᠃ ᠭᠠᠯᠳᠠᠨ᠂
— ᠬᠠᠷᠪᠸᠺ ᠲᠠᠢ ᠲᠤᠯᠤᠯᠳᠤᠬᠤ ᠳ᠋ᠤ᠌ ᠬᠠᠲᠤᠨ ᠲᠠ ᠬᠥᠯ ᠬᠦᠨᠳᠦ ᠪᠠᠢᠭᠰᠠᠨ ᠪᠤᠰᠤ ᠤᠤ? ᠶᠠᠭᠤᠨ ᠳ᠋ᠤ᠌ ᠵᠣᠷᠢᠭ ᠢ᠋ᠶ᠋ᠠᠷ ᠠᠭᠠᠰᠢᠯᠠᠪᠠ᠃ ᠠᠮᠢ ᠪᠠᠨ ᠵᠣᠯᠢᠬᠤ ᠰᠢᠬᠠᠯᠠ ᠰᠢᠦ ᠳᠡ ᠭᠡᠵᠦ ᠬᠦᠩᠭᠢᠨᠡᠨ ᠥᠭᠦᠯᠡᠪᠡ᠃ ᠠᠨᠤ᠂
— ᠲᠡᠭᠡᠲᠡᠯᠡ ᠲᠤᠷᠭᠢᠬᠤ ᠶᠤᠮ ᠭᠡᠵᠦ ᠰᠠᠨᠠᠭᠰᠠᠨ ᠦᠭᠡᠢ᠃ ᠤᠭ ᠨᠢ ᠪᠢ ᠬᠠᠭᠠᠨ ᠲᠠᠨ ᠳ᠋ᠤ᠌ ᠪᠠᠰᠠ ᠨᠢᠭᠡ ᠬᠦᠦ ᠲᠥᠷᠥᠭᠦᠯᠵᠦ ᠥᠭᠬᠦ ᠪᠠᠢᠭᠰᠠᠨ ᠶᠤᠮᠰᠠᠨ᠃ ᠳᠠᠩᠴᠤ ᠮᠢᠨᠦ ᠬᠤᠪᠢ ᠳᠤᠲᠠᠯᠠ ᠭᠡᠳ ᠠᠮᠠ ᠥᠮᠥᠯᠵᠡᠪᠡ᠃ ᠭᠠᠯᠳᠠᠨ ᠬᠠᠭᠠᠨ
— ᠶᠠᠭᠠᠬᠢᠭᠠᠳ ᠬᠦᠦ ᠲᠥᠷᠥᠭᠦᠯᠬᠦ ᠶ᠋ᠢ ᠬᠦᠰᠡᠨᠡ᠁ ᠭᠡᠵᠦ ᠯᠠᠪᠯᠠᠨ ᠠᠰᠠᠭᠤᠪᠠ᠃ ᠠᠨᠤ ᠬᠠᠲᠤᠨ᠂
— ᠮᠣᠩᠭᠣᠯᠴᠤᠳ ᠡᠷᠲᠡᠨ ᠡᠴᠡ ᠪᠡᠨ ᠨᠢᠭᠡ ᠬᠦᠦ ᠶ᠋ᠢ ᠦᠭᠡᠢ ᠳ᠋ᠦ᠍ ᠪᠣᠳᠣ᠂ ᠬᠣᠶᠠᠷ ᠬᠦᠦ ᠶ᠋ᠢ ᠨᠢᠭᠡ ᠳ᠋ᠦ᠍ ᠪᠣᠳᠣ ᠭᠡᠮᠡᠨ ᠶᠠᠷᠢᠳᠠᠭ ᠪᠤᠰᠤ ᠤᠤ? ᠭᠡᠬᠦ ᠳ᠋ᠦ᠍ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠠᠨᠤ ᠬᠠᠲᠤᠨ ᠤ᠋ ᠰᠠᠨᠠᠭᠠ ᠶ᠋ᠢ ᠳᠡᠮᠵᠢᠬᠦ ᠮᠡᠲᠦ ᠲᠣᠯᠣᠭᠠᠢ ᠳᠣᠬᠢᠭᠠᠳ ᠬᠠᠲᠤᠨ ᠤ᠋ ᠪᠠᠨ ᠭᠠᠷ ᠢ᠋ ᠠᠳᠬᠤᠨ ᠢᠯᠢᠵᠦ ᠰᠠᠭᠤᠪᠠ᠃
— ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠮᠣᠩᠭᠣᠯᠴᠤᠳ ᠤ᠋ᠨ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠲᠥᠯᠥᠭᠡ ᠶᠡᠬᠡ ᠵᠣᠪᠠᠳᠠᠭ ᠪᠣᠯᠵᠠᠢ᠃ ᠰᠠᠪᠳᠠᠨᠪᠠᠯᠵᠢᠷ ᠬᠦᠦ ᠶ᠋ᠢ ᠮᠢᠨᠢ ᠪᠠᠷᠢᠴᠠᠭᠠᠯᠠᠵᠤ ᠪᠠᠶᠠᠨ ᠬᠣᠰᠢᠭᠤ ᠶ᠋ᠢ ᠨᠣᠶᠠᠨ ᠪᠣᠯᠭᠠᠴᠢᠬᠠᠯᠠ᠃ ᠮᠠᠨᠵᠤ ᠶ᠋ᠢᠨ ᠭᠤᠸᠠ ᠥᠬᠢᠳ ᠡᠴᠡ ᠬᠠᠲᠤᠨ ᠡᠷᠭᠦᠮᠵᠢᠯᠡᠯᠡ᠃ ᠮᠠᠨᠵᠤ ᠲᠠᠢ ᠪᠢ ᠤᠷᠤᠭ ᠪᠠᠷᠢᠯᠳᠤᠵᠤ ᠲᠠᠯᠠ ᠵᠠᠰᠠᠬᠤ ᠦᠭᠡᠢ᠃ ᠬᠦᠦ ᠪᠡᠨ ᠨᠢᠭᠡ ᠡᠳᠦᠷ ᠠᠪᠬᠤ ᠪᠣᠯᠤᠨᠠ ᠭᠡᠮᠡᠨ ᠭᠠᠯᠳᠠᠨ ᠢ᠋ ᠥᠭᠦᠯᠡᠬᠦ ᠳ᠋ᠦ᠍ ᠠᠨᠤ ᠬᠠᠲᠤᠨ᠂
— ᠬᠠᠭᠠᠨ ᠲᠠ ᠬᠦᠦ ᠪᠡᠨ ᠮᠠᠨᠵᠤ ᠳ᠋ᠤ᠌ ᠠᠯᠳᠠᠴᠢᠬᠠᠯᠠ ᠰᠢᠦ ᠳᠡ᠃ ᠪᠠᠷᠢᠴᠠᠭᠠᠨ ᠳ᠋ᠤ᠌ ᠠᠪᠤᠭᠰᠠᠨ ᠭᠡᠮᠡᠨ ᠥᠮᠥᠯᠵᠡᠪᠡ᠃ ᠭᠠᠯᠳᠠᠨ ᠬᠠᠭᠠᠨ᠂
— ᠰᠠᠪᠳᠠᠨᠪᠠᠯᠵᠢᠷ ᠬᠥᠪᠡᠭᠦᠨ ᠮᠠᠨᠵᠤ ᠶ᠋ᠢ ᠳᠣᠲᠣᠷᠠ ᠠ᠋ᠴᠠ ᠨᠢ ᠢᠯᠵᠡᠯᠡᠵᠦ ᠪᠠᠢᠭᠠ ᠶᠤᠮ᠃ ᠲᠡᠷᠡ ᠢᠯᠵᠠᠷᠠᠯ ᠲᠣᠮᠣᠷᠠᠭᠰᠠᠭᠠᠷ ᠮᠠᠨᠵᠤ ᠶ᠋ᠢ ᠬᠥᠨᠥᠭᠡᠬᠦ ᠪᠣᠯᠤᠨᠠ᠃ ᠲᠡᠷᠡ ᠪᠣᠯᠲᠠᠯᠠ ᠬᠦᠯᠢᠶᠡᠬᠦ ᠬᠡᠷᠡᠭᠲᠡᠢ᠃ ᠬᠦᠯᠢᠶᠡᠭᠰᠡᠨ ᠦ᠌ ᠡᠴᠦᠰ ᠲᠦ᠍ ᠤᠴᠢᠷ ᠣᠯᠳᠠᠨᠠ᠃ ᠬᠦᠯᠢᠶᠡᠬᠦ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠬᠠᠲᠤᠨ ᠲᠠ ᠨᠠᠳᠠ ᠲᠠᠢ ᠴᠣᠭ ᠡᠳ᠋ᠯᠡᠵᠦ ᠪᠠᠢᠨᠠ ᠭᠡᠵᠦ ᠬᠡᠯᠡᠪᠡ᠃ ᠭᠠᠯᠳᠠᠨ《 ᠮᠠᠨᠵᠤ ᠨᠤᠭᠤᠳ ᠥᠷᠥᠴᠡ ᠢᠰᠬᠦᠯᠪᠡ᠃ ᠦᠷᠦ ᠥᠮᠥᠯᠵᠡᠪᠡ》 ᠭᠡᠮᠡᠨ ᠭᠠᠰᠢᠭᠤᠨ ᠢ᠋ᠶ᠋ᠠᠷ ᠰᠠᠨᠠᠵᠤ᠂
— ᠬᠠᠲᠤᠨ ᠲᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠤᠤ ᠴᠢᠯᠡᠭᠡ᠃ ᠲᠠᠨ ᠤ᠋ ᠲᠥᠷᠥᠭᠦᠯᠦᠭᠰᠡᠨ ᠬᠥᠪᠡᠭᠦᠳ ᠪᠡᠷᠬᠡ ᠶ᠋ᠢ ᠠᠮᠰᠠᠵᠤ᠂ ᠬᠣᠷᠸᠠ ᠶ᠋ᠢ ᠲᠠᠨᠢᠵᠤ ᠶᠠᠪᠤᠭ ᠭᠡᠮᠡᠨ ᠠᠷᠭᠠᠳᠠᠩᠭᠤᠢ ᠥᠭᠦᠯᠡᠪᠡ᠃
ᠠᠨᠤ ᠬᠠᠲᠤᠨ᠂
— ᠡᠮᠡᠭᠲᠡᠢᠴᠦᠳ ᠦ᠋ᠨ ᠲᠡᠪᠴᠢᠶᠡᠷᠢ ᠪᠠᠷᠠᠭᠳᠠᠳᠠᠭ ᠦᠭᠡᠢ ᠶᠦᠮ ᠭᠡᠵᠦ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠦᠭᠡ ᠶ᠋ᠢᠨ ᠬᠠᠷᠢᠭᠤ ᠳ᠋ᠤ᠌ ᠬᠡᠯᠡᠭᠰᠡᠨ ᠨᠢ ᠭᠠᠯᠳᠠᠨ ᠢ᠋ ᠮᠣᠬᠣᠭᠠᠬᠤ ᠪᠤᠰᠤ ᠥᠳᠥᠭᠡᠬᠦ ᠰᠠᠨᠠᠭᠠ ᠪᠠᠢᠯᠠ᠃ ᠭᠠᠯᠳᠠᠨ ᠪᠠᠶᠠᠰᠤᠯ ᠲᠠᠢ ᠪᠠᠷ᠂
— ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠢ᠋ᠶ᠋ᠠᠷ ᠪᠣᠯ ᠠᠷᠭᠠ ᠪᠢᠯᠢᠭ ᠨᠢ ᠨᠡᠢᠯᠡᠵᠦ ᠬᠣᠷᠸᠠ ᠪᠦᠲᠦᠨ ᠪᠣᠯᠳᠠᠭ᠃ ᠠᠢᠯ ᠭᠡᠷ ᠬᠦᠷᠲᠡᠯᠡ ᠠᠷᠭᠠ ᠪᠢᠯᠢᠭ ᠪᠤᠶᠤ ᠡᠷᠡ ᠡᠮᠡ ᠬᠣᠶᠠᠷ ᠠ᠋ᠴᠠ ᠪᠦᠲᠦᠳᠡᠭ᠃ ᠲᠣᠭᠣᠨᠣ ᠪᠦᠲᠦᠨ ᠳᠤᠭᠤᠢ ᠪᠢᠯᠡ᠃ ᠬᠥᠪᠡᠭᠦᠳ ᠬᠠᠨᠠᠲᠤ ᠭᠡᠷ ᠢ᠋ᠶ᠋ᠡᠨ ᠣᠷᠬᠢᠵᠤ ᠪᠠᠳᠠᠷᠠᠵᠤ ᠶᠠᠪᠤᠭᠠ ᠪᠤᠰᠤ ᠤᠤ? ᠣᠢᠷᠠᠳ ᠤ᠋ᠨ ᠬᠥᠪᠡᠭᠦᠳ ᠰᠠᠯᠬᠢ ᠲᠠᠲᠠᠭᠤᠯᠤᠨ ᠳᠠᠪᠬᠢᠵᠤ ᠶᠠᠪᠤᠨᠠ᠃ ᠨᠣᠮᠣᠬᠠᠨ ᠪᠤᠰᠤ ᠣᠮᠣᠭᠯᠠᠩ ᠬᠥᠪᠡᠭᠦᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠭᠠᠨ ᠪᠢ ᠪᠠᠬᠠᠷᠬᠠᠨᠠ ᠭᠡᠮᠡᠨ ᠥᠭᠦᠯᠡᠪᠡ᠃ ᠠᠨᠤ ᠬᠠᠲᠤᠨ ᠨᠡᠬᠡᠯ ᠬᠠᠲᠠᠭᠤ ᠵᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ᠂
— ᠠᠷᠴᠠ ᠬᠦᠵᠢ ᠶ᠋ᠢᠨ ᠦᠨᠦᠷ ᠲᠡᠢ
ᠠᠷᠢᠭᠤᠨ ᠳᠤᠭᠠᠩ ᠳ᠋ᠠᠭᠠᠨ ᠵᠠᠯᠠᠷᠠᠵᠤ
ᠠᠰᠤᠷᠤ ᠠᠭᠤᠳᠠᠮ ᠨᠤᠲᠤᠭ ᠢ᠋ᠶ᠋ᠠᠷ
ᠠᠷᠪᠠᠨᠠᠢᠯᠠᠵᠤ ᠰᠠᠭᠤᠳᠠᠭ ᠪᠣᠭᠳᠠ ᠮᠢᠨᠦ ᠭᠡᠬᠦ ᠳ᠋ᠦ᠍᠂ ᠭᠠᠯᠳᠠᠨ ᠬᠠᠭᠠᠨ ᠡᠷᠢᠭᠡ ᠪᠡᠨ ᠢᠮᠡᠷᠦᠨ ᠵᠣᠯᠪᠣᠭᠠᠲᠤ ᠬᠦᠷᠡᠩ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠲᠣᠭᠣᠨᠣ ᠥᠭᠡᠳᠡ ᠬᠠᠷᠠᠪᠠ᠃ ᠲᠣᠭᠣᠨᠣ ᠪᠠᠷ ᠪᠦᠷᠭᠦᠳ ᠦ᠋ᠨ ᠳᠠᠯᠠᠪᠴᠢ ᠴᠤᠬᠤᠢᠵᠤ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠮᠠᠩᠨᠠᠢ ᠳ᠋ᠤ᠌ ᠠᠳᠢᠰ ᠲᠠᠯᠪᠢᠬᠤ ᠮᠡᠲᠦ ᠪᠣᠯᠪᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠡᠷᠢᠭᠡ ᠪᠡᠷ ᠢ᠋ᠶ᠋ᠡᠨ ᠠᠭᠠᠷ ᠤᠷᠤᠯᠳᠤᠨ ᠰᠢᠬᠠᠭᠤᠷᠳᠠᠬᠤ ᠳ᠋ᠤ᠌ ᠵᠣᠪᠬᠢᠨ ᠳᠡᠭᠡᠷᠡᠬᠢ ᠮᠡᠩᠭᠡ ᠨᠢ ᠬᠠᠷᠠ ᠣᠳᠣ ᠮᠡᠲᠦ ᠬᠥᠳᠡᠯᠦᠨᠡ᠃ ᠬᠠᠭᠠᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠨᠠᠷᠠ ᠰᠠᠷᠠ ᠪᠠᠢᠨᠠ᠃
— ᠨᠠᠮᠠᠶ᠋ᠢ ᠲᠩᠷᠢ ᠳᠠᠭᠤᠳᠠᠪᠠ ᠭᠡᠮᠡᠨ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠡᠷᠡᠮᠡᠬᠡᠢ ᠥᠭᠦᠯᠡᠬᠦ ᠳ᠋ᠦ᠍ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠬᠥᠨᠳᠡᠢ ᠶ᠋ᠢ ᠳᠦᠭᠦᠷᠲᠡᠯᠡ ᠰᠡᠲᠡᠷᠲᠦ ᠴᠠᠭᠠᠨ ᠠᠵᠢᠷᠭᠠ ᠢᠨᠴᠠᠭᠠᠵᠤ᠂ ᠴᠠᠭᠠᠨ ᠢᠷᠪᠢᠰ ᠬᠣᠷᠮᠣᠢ ᠠ᠋ᠴᠠ ᠡᠭᠦᠳᠡ ᠬᠦᠷᠲᠡᠯᠡ ᠰᠤᠨᠢᠶᠠᠪᠠ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠢ᠋ ᠴᠠᠭ ᠬᠤᠭᠤᠴᠠᠭᠠᠨ ᠤ᠋ ᠢᠳᠡᠮᠡᠬᠡᠢ ᠬᠥᠬᠡ ᠰᠠᠯᠬᠢ ᠳᠠᠯᠠᠯᠤᠨ ᠳᠠᠭᠤᠳᠠᠵᠤ ᠪᠠᠢᠯᠠ᠃
ᠠᠨᠤ ᠰᠡᠴᠡᠨ ᠬᠠᠲᠤᠨ ᠴᠤ᠌ ᠬᠠᠭᠠᠨ ᠢ᠋ ᠤᠤᠬᠠᠢᠯᠠᠵᠤ᠂
— ᠪᠦᠷᠭᠦᠳ ᠮᠢᠨᠢ ᠨᠢᠰ! ᠭᠡᠵᠦ ᠴᠠᠭ ᠬᠤᠭᠤᠴᠠᠭᠠ ᠶ᠋ᠢ ᠡᠵᠡᠯᠡᠭᠰᠡᠨ ᠣᠶᠤᠨ ᠰᠠᠨᠠᠭᠠ ᠶ᠋ᠢ ᠲᠡᠪᠢᠷᠡᠭᠦᠯᠦᠨ ᠥᠭᠦᠯᠡᠪᠡ᠃
ᠶᠢᠰᠦ
ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠲᠦ᠍ ᠪᠤᠲᠠ ᠴᠣᠬᠢᠭᠳᠠᠭᠰᠠᠨ ᠸᠴᠢᠷᠳᠤ ᠰᠡᠴᠡᠨ ᠦ᠌ ᠰᠠᠷᠨᠢᠨ ᠪᠤᠲᠠᠷᠠᠭᠰᠠᠨ ᠨᠡᠭᠦᠳᠡᠯ ᠤᠨᠳᠤᠢ ᠰᠤᠨᠳᠤᠢ᠁ ᠨᠡᠭᠦᠳᠡᠯ ᠢᠵᠢᠯ ᠮᠥᠷᠡᠨ ᠬᠦᠷᠴᠦ ᠪᠠᠭᠤᠬᠤ ᠳ᠋ᠤ᠌ ᠺᠢᠷᠭᠢᠽ ᠬᠠᠰᠠᠭ ᠲᠤ᠌ ᠴᠣᠬᠢᠭᠳᠠᠵᠠᠢ᠃ ᠣᠢᠷᠠᠳ ᠤ᠋ᠨ ᠪᠤᠳᠤᠯᠢᠶᠠᠨ ᠢ᠋ ᠬᠣᠱᠤᠳ ᠣᠪᠣᠭᠲᠠᠨ ᠡᠬᠢᠯᠡᠭᠦᠯᠵᠡᠢ᠃
ᠰᠠᠪᠳᠠᠨᠵᠡᠯ ᠵᠢᠶᠦ᠋ᠨ ᠸᠠᠩ᠂ ᠠᠮᠢᠨᠳᠠᠷᠠ ᠬᠣᠶᠠᠷ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠢ᠋ ᠬᠠᠳᠠᠮ ᠡᠴᠢᠭᠡ ᠸᠴᠢᠷᠲᠤ ᠰᠡᠴᠡᠨ ᠲᠡᠢ ᠮᠠᠭᠤᠲᠠᠯᠴᠠᠭᠤᠯᠬᠤ ᠠᠷᠭᠠ ᠰᠡᠳᠦᠵᠦ᠂ ᠴᠤᠤ ᠲᠠᠷᠬᠠᠭᠠᠭᠰᠠᠨ ᠤ᠋ ᠬᠠᠷᠠ ᠭᠠᠢ ᠪᠠᠷ ᠬᠠᠭᠠᠷᠠᠯ ᠤ᠋ᠨ ᠡᠭᠦᠳᠡ ᠶ᠋ᠢ ᠳᠡᠯᠭᠡᠵᠦ ᠴᠢᠳᠠᠵᠠᠢ᠃
ᠬᠣᠱᠤᠳ ᠣᠪᠣᠭ ᠤ᠋ᠨ ᠬᠢᠨ ᠭᠠᠯᠳᠠᠨ ᠤᠷᠤᠭᠤ ᠨᠡᠭᠦᠪᠡ᠃ ᠬᠠᠷᠢᠨ ᠸᠴᠢᠷᠳᠤ ᠰᠡᠴᠡᠨ ᠢᠵᠢᠯ ᠮᠥᠷᠡᠨ ᠲᠡᠢᠰᠢ ᠣᠳᠴᠤ ᠡᠷᠭᠢᠵᠦ ᠪᠤᠴᠠᠬᠤ ᠳ᠋ᠠᠭᠠᠨ ᠳᠡᠭᠡᠷᠡᠮᠳᠡᠭᠦᠯᠦᠭᠰᠡᠨ ᠪᠢᠯᠡ᠃
ᠸᠴᠢᠷᠳᠤ ᠰᠡᠴᠡᠨ ᠥᠪᠡᠷ ᠦ᠋ᠨ ᠭᠠᠯ ᠤ᠋ᠨ ᠵᠢᠭᠡ ᠬᠦᠦ ᠴᠠᠸᠠᠩᠷᠠᠪᠳᠠᠨ ᠳ᠋ᠤ᠌ ᠬᠠᠳᠠ ᠨᠠᠯᠠᠵᠤ ᠰᠠᠭᠤᠭᠠᠳ ᠬᠡᠯᠡᠪᠡ᠃
— ᠨᠠᠮᠠᠶ᠋ᠢ ᠰᠠᠢᠨ ᠬᠠᠷᠠ᠂ ᠬᠥᠪᠡᠭᠦᠨ ᠮᠢᠨᠢ᠂ ᠪᠢ ᠭᠠᠯ ᠮᠡᠲᠦ ᠤᠨᠲᠠᠷᠠᠵᠤ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠰᠢᠩᠭᠡᠨ ᠪᠤᠭᠤᠷᠤᠯ ᠦᠰᠦ ᠨᠠᠮᠤᠷ ᠴᠠᠭ ᠤ᠋ᠨ ᠭᠢᠯᠭᠠᠨᠠ ᠮᠡᠲᠦ ᠰᠠᠯᠬᠢᠨᠠ ᠰᠥᠷᠪᠡᠯᠵᠡᠨ ᠬᠡᠢᠰᠦᠨᠡ᠃ ᠴᠡᠸᠠᠩᠷᠠᠪᠳᠠᠨ ᠡᠪᠦᠭᠡ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠬᠦᠯ ᠢ᠋ ᠬᠠᠷᠠᠵᠤ ᠪᠠᠢᠨᠠ᠃ ᠸᠴᠢᠷᠳᠤ ᠰᠡᠴᠡᠨ ᠦ᠌ ᠴᠢᠷᠠᠢ ᠲᠠᠯᠪᠢᠭᠤᠨ ᠭᠡᠭᠡᠨ ᠪᠥᠭᠡᠳ ᠵᠣᠪᠬᠢ ᠳᠡᠭᠡᠷᠡᠬᠢ ᠦᠷᠴᠢᠯᠡᠭᠡ ᠨᠢ ᠨᠢᠳᠦᠨ ᠦ᠌ ᠪᠡᠨ ᠠᠨᠢᠰᠬᠠ ᠲᠠᠢ ᠨᠡᠢᠯᠡᠵᠦ ᠲᠡᠭᠦᠨ ᠦ᠌ ᠰᠢᠨᠡ ᠤᠷᠤᠭᠤ ᠬᠣᠪᠢᠯ ᠮᠡᠲᠦ ᠣᠷᠣᠵᠠᠢ᠃ ᠬᠠᠳᠠ ᠨᠤᠭᠤᠳ ᠤ᠋ᠨ ᠬᠣᠭᠣᠷᠣᠨᠳᠣ ᠳᠤᠲᠠᠭᠤ ᠡᠯᠭᠦᠭᠰᠡᠨ ᠣᠨᠢ᠂ ᠲᠣᠭᠣᠨᠣ᠂ ᠬᠡᠪᠲᠡᠭᠰᠡᠨ ᠲᠡᠮᠡᠭᠡ᠂ ᠬᠠᠳᠠᠨ ᠳᠡᠭᠡᠷᠡ ᠣᠪᠣᠭᠠᠯᠠᠰᠤᠲᠡᠢ ᠪᠠᠷᠠᠭᠠ ᠬᠥᠭᠯᠡᠷᠡᠨᠡ᠃ ᠸᠴᠢᠷᠳᠤ ᠰᠡᠴᠡᠨ ᠬᠠᠭᠠᠨ ᠪᠣᠷᠣ ᠲᠠᠯᠠ ᠨᠤᠲᠤᠭ ᠲᠠᠭᠠᠨ ᠣᠴᠢᠬᠤ ᠲᠡᠩᠬᠡᠭᠡ ᠦᠭᠡᠢ ᠪᠣᠯᠵᠠᠢ᠃ ᠸᠴᠢᠷᠳᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠠᠴᠢ ᠴᠠᠸᠠᠩᠷᠠᠪᠳᠠᠨ ᠡᠪᠦᠭᠡ ᠡᠴᠢᠭᠡ ᠶ᠋ᠢᠨ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠶ᠋ᠢ ᠲᠦᠰᠢᠵᠦ ᠳᠦᠷᠡᠯᠵᠡᠨ ᠠᠰᠠᠬᠤ ᠬᠠᠷᠠᠴᠠ ᠪᠠᠷ ᠵᠠᠳᠠᠭᠠᠢ ᠭᠠᠯ ᠰᠢᠷᠳᠡᠵᠦ ᠪᠠᠢᠪᠠ᠃ ᠸᠴᠢᠷᠳᠤ ᠰᠡᠴᠡᠨ ᠵᠢᠭᠡ ᠬᠥᠪᠡᠭᠦᠨ ᠳ᠋ᠡᠭᠡᠨ᠂
— ᠨᠢᠭᠡ ᠨᠠᠷᠠ ᠲᠠᠢ ᠡᠳᠦᠷ ᠴᠢᠨᠦ ᠴᠠᠭ ᠢᠷᠡᠨᠡ᠃ ᠲᠡᠷᠡ ᠴᠠᠭ ᠲᠤ᠌ ᠭᠠᠯᠳᠠᠨ ᠳ᠋ᠤ᠌ ᠮᠢᠨᠦ ᠭᠣᠮᠣᠳᠠᠯ ᠢ᠋ ᠳᠡᠢᠯᠦᠨᠡ ᠭᠡᠮᠡᠨ ᠵᠠᠬᠢᠭᠠᠳ ᠨᠢᠳᠦ ᠪᠡᠨ ᠠᠭᠠᠵᠢᠮᠬᠠᠨ ᠠᠨᠢᠵᠤ ᠶᠢᠷᠲᠢᠨᠴᠦ ᠶ᠋ᠢᠨ ᠮᠥᠩᠬᠡ ᠪᠤᠰᠤ ᠶ᠋ᠢ ᠦᠵᠡᠪᠡ᠃
ᠦᠯᠡᠳᠡᠭᠰᠡᠨ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠴᠠᠸᠠᠩᠷᠠᠪᠳᠠᠨ ᠬᠠᠨ ᠬᠦᠦ ᠳᠠᠭᠠᠭᠤᠯᠵᠤ ᠭᠠᠯᠳᠠᠨ ᠤ᠋ ᠡᠰᠡᠷᠭᠦ ᠪᠣᠰᠬᠤ ᠪᠠᠷ ᠰᠢᠷᠭᠠᠭᠤ ᠪᠡᠯᠡᠳᠬᠡᠪᠡ᠃ ᠴᠠᠸᠠᠩᠷᠠᠪᠳᠠᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠪᠡᠨ ᠪᠣᠷᠣ ᠲᠠᠯᠠ ᠳ᠋ᠤ᠌ ᠡᠭᠦᠰᠬᠡᠪᠡ᠃
— ᠭᠠᠯᠳᠠᠨ ᠢ᠋ ᠥᠷᠥᠰᠢᠶᠡᠬᠦ ᠦᠭᠡᠢ ᠭᠡᠵᠦ ᠴᠠᠸᠠᠩᠷᠠᠪᠳᠡᠨ ᠠᠮᠠᠯᠠᠪᠠ᠃
ᠠᠷᠪᠠ
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠯᠠᠮᠠ ᠬᠤᠪᠴᠠᠰᠤ ᠲᠠᠢ ᠮᠥᠷᠭᠥᠯᠴᠢᠨ ᠮᠠᠶᠢᠭ ᠢ᠋ᠶ᠋ᠠᠷ ᠲᠦᠪᠭᠦᠨ ᠬᠡᠢᠳ ᠲᠦ᠍ ᠣᠴᠢᠵᠠᠢ᠃ ᠭᠠᠯᠳᠠᠨ ᠬᠠᠭᠠᠨ ᠠᠶᠠᠨ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠶ᠋ᠢᠨ ᠡᠮᠦᠨᠡ ᠬᠣᠪᠲᠣ ᠳ᠋ᠤ᠌ ᠪᠠᠢᠬᠤ ᠳ᠋ᠠᠭᠠᠨ ᠶᠠᠪᠤᠭᠰᠠᠨ ᠪᠢᠯᠡ᠃ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠰᠦᠮᠡ ᠶ᠋ᠢᠨ ᠢ᠋ᠶ᠋ᠡᠨ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠳ᠋ᠦ᠍ ᠴᠠᠭᠠᠨ ᠳ᠋ᠠᠷᠠ ᠡᠬᠡ᠂ ᠨᠣᠭᠣᠭᠠᠨ ᠳ᠋ᠠᠷᠠ ᠡᠬᠡ ᠪᠡᠨ ᠴᠢᠳᠬᠤᠮᠠᠯᠳᠤᠨ ᠤᠷᠠᠯᠠᠭᠰᠠᠨ ᠢ᠋ᠶ᠋ᠠᠨ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠲᠠᠯᠠ ᠬᠠᠭᠠᠯᠭᠠᠴᠢ ᠯᠠᠮᠠ ᠣᠷᠣᠵᠤ ᠢᠷᠡᠨᠡ᠃ ᠵᠠᠨᠠᠪᠠᠽᠠᠷ ᠭᠡᠭᠡᠨ ᠡᠷᠭᠢᠵᠦ ᠬᠠᠷᠠᠨᠠ᠃ ᠯᠠᠮᠠ ᠠᠯᠠᠭᠠ ᠬᠠᠪᠰᠤᠷᠪᠠ᠃
— ᠲᠥᠪᠡᠳ ᠡᠴᠡ ᠨᠢᠭᠡᠨ ᠯᠠᠮᠠᠳᠠᠨ ᠢᠷᠡᠯᠡ᠃ ᠭᠡᠭᠡᠨᠳᠠᠨ ᠲᠠᠨ ᠳ᠋ᠤ᠌ ᠠᠢᠯᠠᠳᠬᠠᠯ ᠲᠠᠢ ᠭᠡᠨᠡ ᠭᠡᠮᠡᠨ ᠣᠴᠢᠵᠤ ᠬᠡᠯᠡᠪᠡ᠃ ᠭᠡᠭᠡᠡᠳᠡᠨ ᠰᠣᠨᠣᠰᠤᠩᠭᠤᠲᠠ᠂
— ᠤᠷᠤᠭᠤᠯ ᠭᠡᠵᠦ ᠯᠠᠮᠠ ᠳ᠋ᠤ᠌ ᠥᠭᠦᠯᠡᠪᠡ᠃
ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠭᠰᠡᠨ ᠯᠠᠮᠠ ᠨᠢᠭᠤᠷ ᠢ᠋ᠶ᠋ᠠᠨ ᠪᠦᠲᠡᠭᠡᠭᠰᠡᠨ ᠣᠷᠬᠢᠮᠵᠢ ᠪᠠᠨ ᠰᠡᠬᠦᠬᠦ ᠳ᠋ᠦ᠍ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢᠨ ᠬᠦᠷᠡᠩ ᠨᠢᠳᠦ᠂ ᠭᠦᠷᠡᠭᠡᠷ ᠰᠢᠨᠠ᠂ ᠮᠣᠩᠬᠣᠷ ᠬᠠᠮᠠᠷ ᠬᠠᠷᠠᠭᠳᠠᠪᠠ᠃ ᠲᠡᠭᠦᠨ ᠦ᠌ ᠨᠢᠳᠦᠨ ᠦ᠌ ᠵᠣᠪᠬᠢ ᠳᠡᠭᠡᠷᠡᠬᠢ ᠬᠣᠶᠠᠷ ᠮᠡᠩᠭᠡ ᠢᠷᠪᠠᠯᠵᠠᠨ ᠪᠠᠢᠨᠠ᠃
ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠤ᠋ᠨ ᠴᠢᠷᠠᠢ ᠳ᠋ᠤ᠌ ᠬᠦᠯᠢᠴᠡᠩᠭᠦᠢ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠵᠤ ᠣᠯᠪᠣᠭ ᠳᠡᠭᠡᠷᠡ ᠪᠡᠨ ᠵᠠᠪᠢᠯᠠᠨ ᠰᠠᠭᠤᠯᠠ᠃ ᠲᠥᠪᠡᠳ ᠦ᠋ᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠲᠠᠨᠢᠯᠴᠠᠭᠰᠠᠨ ᠭᠠᠯᠳᠠᠨ ᠮᠣᠳᠣᠨ ᠤ᠋ ᠦᠨᠳᠦᠰᠦ ᠯᠦ᠍ᠭᠡ ᠪᠠᠲᠤ ᠰᠠᠭᠤᠷᠢ ᠲᠠᠢ ᠪᠣᠯᠤᠭᠰᠠᠨ ᠢ᠋ ᠥᠨᠳᠥᠷ ᠭᠡᠭᠡᠨ ᠮᠡᠳᠡᠪᠡ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠡᠷᠢᠭᠡ ᠣᠷᠢᠶᠠᠭᠰᠠᠨ ᠱᠤ᠌ ᠪᠠᠨ ᠵᠣᠷᠢᠭᠤᠳᠠ ᠢᠯᠡ ᠭᠠᠷᠭᠠᠵᠤ ᠥᠨᠳᠥᠷ ᠭᠡᠭᠡᠨ ᠡᠴᠡ ᠠᠳᠢᠰ ᠠᠪᠤᠪᠠ᠃ ᠥᠨᠳᠥᠷ ᠭᠡᠭᠡᠨ ᠦ᠌ ᠭᠠᠷ ᠬᠠᠯᠠᠭᠤᠨ ᠰᠢᠲᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠠᠵᠢ᠃ ᠥᠨᠳᠥᠷ ᠭᠡᠭᠡᠨ ᠤᠭ ᠠ᠋ᠴᠠ ᠬᠠᠯᠠᠭᠤᠨ ᠬᠥᠮᠦᠨ ᠪᠢᠯᠡ᠃
— ᠪᠣᠭᠳᠠ ᠭᠡᠭᠡᠨᠳᠠᠨ ᠲᠠᠨ ᠤ᠋ ᠯᠠᠭᠱᠠᠨ ᠲᠤᠩᠭᠠᠯᠠᠭ᠂ ᠠᠮᠤᠷ ᠠᠮᠤᠭᠤᠯᠠᠩ ᠠᠢᠯᠠᠳᠴᠤ ᠪᠠᠢᠨᠠ ᠤᠤ? ᠭᠡᠮᠡᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠮᠡᠨᠳᠦ ᠮᠡᠳᠡᠯᠡ᠃
— ᠪᠤᠷᠬᠠᠨ ᠪᠢᠳᠡ ᠬᠣᠶᠠᠷ ᠢ᠋ ᠣᠯᠠᠨᠲᠠ ᠤᠴᠠᠷᠠᠭᠤᠯᠤᠯᠠ᠃ ᠪᠢᠳᠡᠨ ᠦ᠌ ᠬᠠᠲᠤᠨ ᠡᠬᠡ ᠴᠢᠰᠤᠨ ᠲᠥᠷᠥᠯ ᠤᠴᠢᠷ ᠠ᠋ᠴᠠ ᠪᠤᠷᠬᠠᠨ ᠲᠠᠭᠠᠯᠠᠨ ᠪᠣᠯᠭᠣᠭᠠᠵᠤ ᠪᠠᠢᠭᠠ᠂᠂᠂᠂ ᠭᠡᠵᠦ ᠨᠠᠢᠷᠰᠠᠭ ᠳᠣᠲᠣᠨᠣ ᠪᠠᠷ ᠥᠨᠳᠥᠷ ᠭᠡᠭᠡᠨ ᠥᠭᠦᠯᠡᠯᠡ᠃ ᠪᠣᠱᠣᠭᠲᠤ ᠬᠠᠭᠠᠨ ᠢ᠋᠂
— ᠣᠢᠷᠠᠳ ᠬᠠᠯᠬᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠭᠠᠯ ᠤᠰᠤ ᠬᠠᠷᠰᠢᠬᠤ ᠮᠡᠲᠦ ᠦᠢᠮᠡᠭᠡᠨ ᠰᠠᠮᠠᠭᠤᠨ ᠦᠶᠡ ᠦᠶᠡ ᠭᠠᠷᠴᠤ ᠪᠠᠢᠭᠠ ᠳ᠋ᠤ᠌ ᠰᠡᠳᠬᠢᠯ ᠲᠥᠪᠳᠡᠨᠡ ᠭᠡᠵᠦ ᠥᠭᠦᠯᠡᠬᠦ ᠳ᠋ᠦ᠍ ᠥᠨᠳᠥᠷ ᠭᠡᠭᠡᠨ ᠵᠠᠯᠪᠠᠷᠢᠪᠠ᠃ ᠵᠠᠯᠪᠠᠷᠢᠵᠤ ᠪᠠᠢᠬᠤ ᠳ᠋ᠠᠭᠠᠨ᠂
— ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠳᠣᠯᠣᠨᠨᠠᠭᠤᠷ ᠲᠤ᠌ ᠴᠢᠭᠤᠯᠭᠠᠨ ᠬᠤᠷᠠᠯᠳᠤᠭᠤᠯᠵᠤ ᠵᠡᠭᠦᠨᠭᠠᠷ᠂ ᠬᠠᠯᠬᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠶᠠᠰᠤ ᠬᠠᠶᠠᠯᠠ᠃ ᠬᠠᠶᠠᠭᠰᠠᠨ ᠶᠠᠰᠤ ᠪᠣᠯᠭᠠᠨ ᠢ᠋ ᠨᠣᠬᠠᠢ ᠰᠢᠭ᠋ ᠪᠤᠯᠢᠶᠠᠴᠠᠯᠳᠤᠵᠤ ᠬᠡᠮᠬᠡᠯᠳᠦᠬᠦ ᠨᠢ ᠶᠣᠰᠣ ᠦᠭᠡᠢ ᠬᠡᠷᠡᠭ ᠭᠡᠮᠡᠨ ᠲᠦᠪᠰᠢᠨ ᠠᠮᠤᠭᠤᠯᠠᠩ ᠬᠡᠯᠡᠭᠡᠳ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢᠨ ᠡᠷᠡᠰᠬᠦᠳ ᠬᠦᠳᠡᠷ ᠴᠢᠷᠠᠢ ᠶ᠋ᠢ ᠰᠢᠷᠳᠡᠪᠡ᠃
— 1640 ᠣᠨ ᠤ᠋ ᠮᠣᠩᠭᠣᠯ ᠣᠢᠷᠠᠳ ᠤ᠋ᠨ ᠴᠢᠭᠤᠯᠭᠠᠨ ᠤ᠋ ᠴᠠᠭᠠᠵᠠ ᠶ᠋ᠢᠨ ᠪᠢᠴᠢᠭ ᠢ᠋ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠬᠡᠷᠡᠭᠰᠡᠬᠦ ᠦᠭᠡᠢ ᠪᠣᠯᠭᠠᠬᠤ ᠡᠷᠬᠡ ᠦᠭᠡᠢ ᠭᠡᠵᠦ ᠪᠢ ᠪᠣᠳᠣᠨᠠ᠃ ᠪᠣᠭᠳᠠ ᠭᠡᠭᠡᠨᠲᠡᠨ ᠮᠢᠨᠢ ᠬᠠᠯᠬᠠ ᠨᠣᠢᠷᠠᠳ ᠬᠣᠶᠠᠷ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠰᠠᠳᠤᠨ ᠪᠤᠰᠤ ᠤᠤ? ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠭᠣᠯᠣᠮᠲᠠ ᠶ᠋ᠢ ᠭᠡᠭᠡᠨᠲᠡᠨ ᠲᠠ ᠪᠢᠳᠡ ᠰᠠᠬᠢᠵᠤ ᠪᠣᠢ ᠪᠣᠯᠬᠣᠷ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠡᠪᠰᠡᠬᠦ ᠶᠣᠰᠣᠲᠠᠢ ᠭᠡᠵᠦ ᠭᠠᠯᠳᠠᠨ ᠬᠡᠯᠡᠭᠡᠳ《 ᠡᠰᠡ ᠲᠡᠭᠡᠪᠡᠰᠦ ᠥᠪᠥᠷ ᠮᠣᠩᠭᠣᠯ ᠯᠤᠭᠠ ᠮᠠᠨᠵᠤ ᠶ᠋ᠢᠨ ᠪᠣᠭᠣᠯ ᠪᠣᠯᠬᠤ ᠨᠢ》ᠭᠡᠵᠦ ᠴᠡᠭᠡᠵᠢᠨ ᠦ᠌ ᠪᠡᠨ ᠮᠢᠬᠠ ᠶ᠋ᠢ ᠪᠠᠷᠠᠲᠠᠯᠠ ᠪᠣᠳᠣᠭᠰᠠᠨ ᠪᠣᠳᠣᠯ ᠢ᠋ᠶ᠋ᠠᠨ ᠠᠭᠤᠳᠠᠯᠠᠪᠠ᠃ ᠡᠨᠡ ᠰᠠᠴᠠᠭᠤ ᠭᠡᠭᠡᠨᠲᠡᠨ᠂
— ᠬᠠᠯᠬᠠ ᠣᠢᠷᠠᠳ ᠤ᠋ᠨ ᠳᠣᠲᠣᠭᠠᠳᠤ ᠬᠡᠷᠡᠭ ᠲᠦ᠍ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠬᠤᠳᠬᠤᠯᠳᠤᠵᠤ ᠤᠯᠠᠮ ᠢ᠋ᠶ᠋ᠠᠷ ᠬᠠᠭᠠᠷᠠᠯ ᠡᠭᠦᠰᠬᠡᠵᠦ ᠮᠣᠩᠭᠣᠯᠴᠤᠳ ᠤ᠋ᠨ ᠬᠣᠭᠣᠷᠣᠨᠳᠣ ᠢᠯᠭᠠᠭᠠ ᠵᠠᠭᠠᠭ ᠭᠠᠷᠭᠠᠯᠠ᠃ ᠪᠣᠱᠣᠭᠲᠤ ᠬᠠᠭᠠᠨ ᠲᠠᠨ ᠤ᠋ ᠲᠠᠭᠠᠯᠠᠯ ᠢ᠋ᠶ᠋ᠠᠷ ᠡᠪ ᠢ᠋ ᠰᠠᠬᠢᠬᠤ ᠴᠠᠭ ᠪᠣᠯᠵᠠᠢ᠃ ᠵᠠᠰᠠᠭᠲᠤ ᠬᠠᠭᠠᠨ ᠤ᠋ ᠨᠤᠲᠤᠭ ᠲᠤ᠌ ᠲᠠᠨ ᠤ᠋ ᠵᠠᠩᠵᠤᠨ ᠳᠠᠨᠵᠢᠯᠠ ᠶ᠋ᠢᠨ ᠴᠡᠷᠢᠭ ᠢ᠋ ᠴᠠᠬᠤᠨᠳᠣᠷᠵᠢ ᠬᠣᠩ ᠲᠠᠢᠵᠢ ᠪᠤᠲᠠ ᠴᠣᠬᠢᠵᠠᠢ᠃ ᠴᠠᠬᠤᠨᠳᠣᠷᠵᠢ ᠪᠣᠯ ᠰᠦᠰᠦᠭ ᠪᠠᠭᠠ᠂ ᠬᠠᠷᠠ ᠶᠡᠬᠡ᠂ ᠵᠣᠷᠢᠮᠠᠭ ᠮᠤᠢᠬᠤᠷ ᠬᠥᠮᠦᠨ ᠤᠴᠢᠷ ᠭᠡᠭᠡᠨᠲᠡᠨ ᠮᠢᠨᠦ ᠦᠭᠡ ᠶ᠋ᠢ ᠠᠪᠬᠤ ᠦᠭᠡᠢ ᠪᠠᠢᠨᠠ᠃ ᠪᠢ ᠲᠡᠭᠦᠨ ᠳ᠋ᠦ᠍ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠮᠡᠳᠬᠡᠯᠡᠨ ᠵᠢᠳᠬᠦᠯᠦᠭᠰᠡᠭᠡᠷ ᠢᠷᠡᠭᠰᠡᠨ ᠦ᠌ ᠤᠴᠢᠷ ᠢ᠋ ᠰᠡᠩᠬᠡᠷᠡᠭᠦᠯᠬᠦ ᠶ᠋ᠢ ᠬᠢᠴᠢᠶᠡᠶᠡ ᠭᠡᠵᠦ ᠬᠦᠯᠢᠶᠡᠴᠡ ᠲᠡᠢ ᠶᠠᠷᠢᠪᠠ᠃ ᠪᠣᠱᠣᠭᠲᠤ ᠬᠠᠭᠠᠨ᠂
— ᠮᠠᠨᠤᠰ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠭᠣᠯᠣᠮᠲᠠ ᠳ᠋ᠤ᠌ ᠴᠥᠪ ᠰᠠᠭᠤᠯᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠲᠡᠭᠡᠪᠡᠯ ᠪᠤᠷᠬᠠᠨ ᠳ᠋ᠤ᠌ ᠲᠡᠷᠰᠯᠡᠭᠰᠡᠨ ᠬᠡᠷᠡᠭ ᠪᠣᠯᠤᠨᠠ᠃ ᠪᠤᠷᠬᠠᠨ ᠲᠠᠢ ᠤᠯᠤᠰ ᠰᠢᠦ᠂ ᠪᠢᠳᠡ ᠁ ᠭᠡᠳ ᠨᠠᠮᠠᠨᠴᠢᠯᠠᠨ ᠵᠠᠯᠪᠠᠷᠢᠪᠠ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠬᠣᠷᠢᠨ ᠨᠢᠭᠡᠨ ᠳ᠋ᠠᠷᠠ ᠡᠬᠡ ᠭᠢᠯᠠᠯᠵᠠᠵᠤ ᠪᠠᠢᠪᠠ᠃ ᠭᠠᠯᠳᠠᠨ ᠬᠠᠳᠠ ᠮᠣᠳᠣ ᠪᠦᠬᠦᠢ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠪᠠᠷᠢᠭᠰᠠᠨ ᠲᠦᠪᠭᠦᠨ ᠬᠡᠢᠳ ᠦ᠋ᠨ ᠳᠡᠭᠡᠪᠦᠷ ᠳᠡᠭᠡᠷᠡ ᠠᠮᠤᠷ ᠠᠮᠤᠭᠤᠯᠠᠩ ᠢ᠋ ᠪᠡᠯᠭᠡᠳᠡᠨ ᠪᠣᠢ ᠡᠷᠡ ᠡᠮᠡ ᠪᠣᠳᠢ ᠭᠥᠷᠥᠭᠡᠰᠦ ᠡᠭᠦᠷᠢᠳᠡ ᠠᠮᠤᠭᠤᠯᠠᠩ ᠠᠵᠤᠭᠤ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠲᠠᠢ ᠵᠥᠷᠢᠭᠡᠳ ᠬᠠᠭᠠᠯᠭᠠᠴᠢ ᠯᠠᠮᠠ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠠᠢᠯᠠᠳᠬᠠᠯ ᠬᠢᠨᠡ᠃
— ᠲᠥᠪᠡᠳ ᠯᠠᠮᠠ ᠶ᠋ᠢᠨ ᠳᠠᠭᠠᠭᠤᠯᠢ ᠤ᠋ᠳ ᠮᠥᠷᠭᠥᠯᠴᠢᠳ ᠪᠢᠰᠢ ᠪᠣᠯᠤᠯᠲᠠᠢ᠂ ᠬᠥᠳᠡᠯᠭᠡᠭᠡᠨ ᠬᠤᠷᠳᠤᠨ ᠱᠠᠯᠠᠮᠠᠭᠠᠢ᠂ ᠠᠯᠬᠤᠭᠠ ᠭᠢᠰᠬᠢᠭᠡ ᠴᠢᠭᠢᠷᠠᠭ ᠴᠡᠷᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠬᠢᠭᠰᠡᠨ ᠬᠥᠮᠦᠰ ᠬᠠᠷᠠᠭᠳᠠᠨᠠ ᠭᠡᠬᠦ ᠳ᠋ᠦ᠍ ᠥᠨᠳᠥᠷ ᠭᠡᠭᠡᠨ ᠲᠣᠯᠣᠭᠠᠢ ᠳᠣᠬᠢᠵᠤ᠂ ᠭᠦᠨ ᠪᠢᠰᠢᠯᠭᠠᠯ ᠳ᠋ᠤ᠌ ᠠᠪᠲᠠᠭᠰᠠᠨ ᠪᠠᠢᠯᠠ᠃ ᠥᠨᠳᠥᠷ ᠭᠡᠭᠡᠨ ᠮᠠᠨᠵᠤ ᠶ᠋ᠢᠨ ᠲᠦᠷᠢᠮᠡᠬᠡᠢᠯᠡᠯ ᠳ᠋ᠦ᠍ ᠳᠤᠷᠠ ᠦᠭᠡᠢᠴᠡᠨ᠂ ᠳᠤᠷᠠ ᠦᠭᠡᠢᠴᠡᠯ ᠢ᠋ᠶ᠋ᠡᠨ ᠳᠣᠲᠣᠷ ᠬᠥᠮᠦᠨ ᠲᠡᠢ ᠪᠡᠨ ᠬᠤᠪᠢᠶᠠᠯᠴᠠᠨᠠ᠃ ᠭᠠᠯᠳᠠᠨ ᠢ᠋ ᠬᠠᠷᠠᠭᠠᠳ ᠥᠨᠳᠥᠷ ᠭᠡᠭᠡᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠣᠲᠣᠭᠠᠳᠤ ᠳᠤᠷᠠ ᠦᠭᠡᠢᠴᠡᠯ ᠢ᠋ ᠮᠡᠳᠡᠷᠡᠵᠡᠢ᠃ ᠮᠣᠩᠭᠣᠯᠴᠤᠳ ᠥᠪᠡᠷ ᠵᠠᠭᠤᠷᠠ ᠪᠠᠨ ᠤᠴᠢᠷ ᠢ᠋ᠶ᠋ᠠᠨ ᠣᠯᠤᠯᠴᠠᠨᠠ᠃ ᠬᠠᠷᠢᠨ ᠬᠠᠷᠢ ᠮᠠᠨᠵᠤ ᠲᠠᠢ ᠬᠡᠵᠢᠶᠡ ᠴᠦ᠍ ᠦᠯᠦ ᠡᠪᠯᠡᠷᠡᠨᠡ᠃ ᠭᠠᠯᠳᠠᠨ ᠬᠠᠭᠠᠨ᠂ ᠥᠨᠳᠥᠷ ᠭᠡᠭᠡᠨ ᠨᠠᠷ ᠤ᠋ᠨ ᠪᠣᠳᠣᠯ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠳ᠋ᠤ᠌ ᠴᠢᠳᠬᠤᠬᠤ ᠭᠣᠷᠣᠬᠠ ᠮᠡᠲᠦ ᠨᠡᠢᠯᠡᠵᠦ ᠪᠠᠢᠯᠠ᠃ ᠪᠣᠱᠣᠭᠲᠤ ᠬᠠᠭᠠᠨ᠂
— ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠳ᠋ᠤ᠌ ᠲᠡᠭᠦᠰ ᠢᠲᠡᠭᠡᠭᠰᠡᠨ᠂ ᠭᠦᠨ ᠰᠦᠵᠢᠭᠲᠦ ᠪᠣᠭᠳᠠ ᠯᠠᠮᠠ ᠲᠠᠨ ᠤ᠋ ᠲᠠᠭᠠᠯᠠᠯ ᠳ᠋ᠤ᠌ ᠵᠢᠷᠭᠤᠭᠠᠨ ᠵᠦᠢᠯ ᠬᠠᠮᠤᠭ ᠠᠮᠢᠲᠠᠨ ᠪᠠᠭᠲᠠᠨᠠ᠃ ᠲᠡᠳᠡᠨ ᠦ᠌ ᠳᠤᠮᠳᠠ ᠠ᠋ᠴᠠ ᠬᠥᠮᠦᠨ ᠬᠡᠮᠡᠬᠦ ᠬᠣᠶᠠᠷ ᠬᠥᠯᠲᠦ᠂ ᠬᠣᠬᠢᠮᠠᠢ ᠲᠣᠯᠣᠭᠠᠢᠲᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠠᠮᠢᠲᠠᠨ ᠭᠠᠢ ᠲᠠᠷᠢᠳᠠᠭ ᠪᠤᠰᠤ ᠤᠤ? ᠰᠠᠮᠠᠭᠤᠨ ᠴᠠᠭ ᠣᠢᠷᠠᠬᠠᠨ ᠲᠤᠯᠠ ᠬᠥᠮᠦᠨ ᠦ ᠨᠢᠭᠦᠯ ᠢ᠋ ᠠᠷᠢᠭᠤᠰᠬᠠᠵᠤ ᠬᠠᠢᠷᠠᠯᠠ᠃ ᠭᠠᠯᠳᠠᠨ ᠬᠠᠭᠠᠨ ᠰᠡᠨᠳᠡᠢ ᠳ᠋ᠦ᠍ ᠵᠠᠯᠠᠷᠠᠵᠤ ᠴᠢᠰᠤ ᠲᠠᠢ ᠬᠤᠳᠬᠤᠯᠳᠤᠭᠰᠠᠨ ᠲᠤᠯᠠ ᠨᠢᠭᠦᠯ ᠬᠢᠯᠢᠨᠴᠡ ᠪᠡᠨ ᠳᠠᠭᠠᠭᠠᠬᠤ ᠪᠠᠨ ᠪᠣᠯᠢᠪᠠ᠃ ᠲᠡᠭᠡᠪᠡᠴᠦ ᠪᠢ ᠮᠠᠨᠵᠤ ᠶ᠋ᠢ ᠢᠰᠬᠦᠯᠦᠨᠡ᠃ ᠬᠠᠯᠬᠠ ᠣᠢᠷᠠᠳ ᠢ᠋ ᠨᠢᠭᠡᠳᠬᠡᠨᠡ᠃ ᠴᠡᠬᠤᠨᠳᠤᠷᠵᠢ ᠶ᠋ᠢᠨ ᠬᠢᠯᠢᠩ ᠡᠴᠡ ᠦᠯᠦ ᠰᠣᠴᠢᠨᠠ᠃ ᠪᠣᠭᠳᠠ ᠭᠡᠭᠡᠨᠲᠡᠨ ᠪᠡᠶᠡ ᠯᠠᠭᠱᠠᠨ ᠲᠤᠩᠭᠠᠯᠠᠭ ᠰᠠᠭᠤᠭᠠᠷᠠᠢ᠃ ᠲᠠ ᠵᠥᠪᠬᠡᠨ ᠥᠪᠡᠷ ᠢ᠋ ᠪᠡᠨ ᠬᠠᠢᠷᠠᠯᠠᠳᠠᠭ ᠶᠤᠮ ᠰᠢᠦ ᠭᠡᠪᠡ᠃ ᠥᠨᠳᠥᠷ ᠭᠡᠭᠡᠨ᠂
— ᠬᠠᠮᠤᠭ ᠠᠮᠢᠲᠠᠨ ᠢ᠋ ᠮᠠᠷᠲᠠᠵᠤ᠂ ᠥᠳᠥ ᠰᠢᠪᠠᠵᠢ ᠶ᠋ᠢᠨ ᠬᠣᠭᠣᠯᠠ ᠪᠣᠯᠬᠤ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠬᠠᠢᠷᠠᠯᠠᠬᠤ ᠭᠡᠵᠦ ᠤᠤ? ᠭᠡᠮᠡᠨ ᠠᠰᠠᠭᠤᠪᠠ᠃
ᠪᠣᠱᠣᠭᠲᠤ ᠬᠠᠭᠠᠨ᠂
— ᠪᠣᠭᠳᠠ ᠯᠠᠮᠠ ᠲᠠᠨ ᠢ᠋ ᠰᠦᠰᠦᠭᠲᠡᠨ ᠨᠦ᠍ᠭᠦᠳ ᠬᠠᠷᠠᠵᠤ ᠵᠠᠯᠪᠠᠷᠢᠵᠤ ᠪᠠᠢᠨᠠ᠃ ᠲᠠ ᠲᠡᠭᠡᠬᠦ ᠪᠡᠷ ᠡᠷᠡᠭᠦᠯ ᠣᠷᠣᠰᠢᠬᠤ ᠬᠡᠷᠡᠭᠲᠡᠢ᠃ ᠡᠷᠡᠭᠦᠯ ᠪᠠᠢᠬᠤ ᠶ᠋ᠢᠨ ᠲᠤᠯᠠᠳᠠ ᠴᠡᠬᠤᠨᠳᠤᠷᠵᠢ ᠲᠠᠢ ᠪᠠᠨ ᠬᠡᠯᠡ ᠠᠮᠠ ᠪᠠᠨ ᠣᠯᠤᠯᠴᠠᠵᠤ ᠪᠣᠯᠤᠨᠠ ᠰᠢᠦ ᠳᠡ᠃ ᠲᠠᠨ ᠢ᠋ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠠᠰᠢᠭᠯᠠᠬᠤ ᠶ᠋ᠢ ᠪᠣᠳᠣᠨᠠ᠃ ᠮᠠᠨᠵᠤ ᠳ᠋ᠤ᠌ ᠶᠠᠭᠠᠬᠢᠵᠤ ᠬᠠᠨᠳᠤᠬᠤ ᠪᠠᠨ ᠨᠠᠳᠠ ᠪᠠᠷ ᠬᠡᠯᠡᠭᠦᠯᠬᠦ ᠶᠠᠭᠤᠨ ᠪᠢᠯᠡ ᠭᠡᠪᠡ᠃
ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠭᠠᠯᠳᠠᠨ ᠢ᠋ ᠰᠥᠨᠢ ᠬᠤᠭᠤᠰᠯᠠᠨ ᠮᠣᠷᠳᠠᠬᠤ ᠳ᠋ᠤ᠌ ᠰᠠᠷᠢᠳᠠᠭ ᠥᠨᠳᠥᠷ ᠦ᠋ᠨ ᠲᠩᠷᠢ ᠣᠪᠣᠭᠠᠨ ᠳᠡᠭᠡᠷᠡ ᠪᠡᠨ ᠦᠯᠡᠳᠡᠪᠡ᠃
ᠠᠷᠪᠠᠨ ᠨᠢᠭᠡ
ᠭᠠᠯᠳᠠᠨ ᠬᠠᠭᠠᠨ ᠤ᠋ ᠬᠥᠲᠥᠴᠢ ᠴᠡᠷᠢᠭ᠂
— ᠲᠦᠰᠢᠶᠡᠲᠦ ᠬᠠᠭᠠᠨ ᠴᠡᠬᠤᠨᠳᠤᠷᠵᠢ ᠵᠡᠭᠦᠨᠭᠠᠷ ᠲᠤ᠌ ᠳᠣᠪᠲᠣᠯᠬᠤ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠪᠠᠵᠠᠭᠠᠵᠤ ᠪᠠᠢᠭᠠ ᠭᠡᠨᠡ᠃ ᠮᠥᠷᠭᠥᠯᠴᠢᠳ ᠦ᠋ᠨ ᠰᠢᠪᠡᠷ ᠢᠪᠢᠷ ᠶᠠᠷᠢᠯᠴᠠᠬᠤ ᠶ᠋ᠢ ᠰᠣᠨᠣᠰᠤᠯᠠ ᠭᠡᠪᠡ᠃ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠲᠦᠪᠭᠦᠨ ᠬᠡᠢᠳ ᠦ᠋ᠨ ᠭᠣᠷᠢᠶᠠ ᠠ᠋ᠴᠠ ᠭᠠᠷᠤᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠡᠯᠴᠢ ᠢᠷᠡᠯᠡ᠃
— ᠬᠠᠭᠠᠨ ᠤ᠋ ᠲᠤᠷᠰᠢᠭᠤᠯ ᠠᠯᠠᠭᠳᠠᠵᠠᠢ ᠭᠡᠵᠦ ᠡᠯᠴᠢ ᠬᠡᠯᠡᠪᠡ᠃
— ᠬᠡᠨ ᠠᠯᠠᠭᠰᠠᠨ᠁ ᠭᠡᠵᠦ ᠬᠠᠭᠠᠨ ᠠᠰᠠᠭᠤᠪᠠ᠃
— ᠲᠦᠰᠢᠶᠡᠲᠦ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠁ ᠭᠡᠪᠡ᠃
— ᠭᠠᠭᠴᠠ ᠲᠤᠷᠰᠢᠭᠤᠯ ᠲᠠᠢ ᠵᠢᠭᠤᠷᠠᠯᠳᠤᠵᠤ ᠪᠠᠢᠭᠠ ᠪᠣᠯ ᠠᠷᠤ ᠬᠠᠯᠬᠠ ᠶ᠋ᠢᠨ ᠲᠣᠯᠣᠭᠠᠶ᠋ᠢᠲᠠᠨ ᠢ᠋ ᠪᠥᠬᠥᠢᠯᠭᠡᠬᠦ ᠴᠠᠭ ᠪᠣᠯᠵᠠᠢ ᠭᠡᠳ ᠡᠯᠴᠢ ᠵᠠᠷᠤᠵᠤ ᠵᠡᠭᠥᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠲᠤ᠌ ᠪᠠᠢᠯᠳᠤᠭᠠᠨ ᠤ᠋ ᠵᠠᠷᠯᠠᠯ ᠳᠠᠭᠤᠳᠠᠬᠤ ᠵᠠᠷ ᠲᠠᠷᠬᠠᠭᠠ ᠭᠡᠪᠡ᠃
ᠲᠩᠷᠢ ᠣᠪᠣᠭᠠᠨ ᠤ᠋ ᠳᠡᠷᠭᠡᠳᠡ ᠵᠠᠨᠠᠪᠠᠽᠠᠷ ᠭᠡᠭᠡᠨᠲᠡᠨ ᠭᠠᠯᠳᠠᠨ ᠢ᠋ ᠬᠠᠷᠠᠵᠤ ᠵᠣᠭᠰᠣᠬᠤ ᠳ᠋ᠠᠭᠠᠨ《ᠰᠠᠬᠢᠭᠤᠰᠤ ᠳᠣᠭᠰᠢᠷᠠᠵᠠᠢ᠃ ᠭᠠᠯᠳᠠᠨ ᠦᠶᠡᠷ ᠦ᠋ᠨ ᠤᠰᠤ ᠰᠢᠭ᠋ ᠡᠷᠴᠢᠯᠡᠨ ᠪᠠᠭᠤᠨᠠ᠃ ᠦᠶᠡᠷ ᠦ᠋ᠨ ᠤᠰᠤ ᠤᠷᠭᠤᠭᠠ ᠮᠣᠳᠣ ᠶ᠋ᠢ ᠪᠣᠯᠭᠣ ᠲᠠᠲᠠᠪᠠᠴᠤ ᠲᠦᠳᠡᠭᠡᠨᠡ ᠰᠠᠭᠠᠷᠠᠳᠠᠭ ᠪᠤᠰᠤ ᠤᠤ? ᠬᠠᠯᠬᠠ ᠮᠣᠩᠭᠣᠯ ᠢ᠋ ᠭᠠᠯᠳᠠᠨ ᠬᠠᠮᠤᠵᠤ ᠣᠳᠤᠯᠠ ᠭᠡᠬᠦ ᠳ᠋ᠦ᠍ ᠬᠠᠮᠢᠭᠠᠬᠦᠷᠬᠦ ᠪᠢᠯᠡ᠃ ᠦᠶᠡᠷ ᠠᠮᠠᠷᠬᠠᠨ ᠲᠠᠲᠠᠷᠠᠳᠠᠭ ᠭᠡᠮ ᠲᠡᠢ》 ᠭᠡᠵᠦ ᠪᠣᠳᠣᠨᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ《 ᠥᠨᠳᠥᠷ ᠭᠡᠭᠡᠨ ᠢ᠋ ᠪᠢ ᠳᠠᠭᠠᠭᠤᠯᠤᠭᠠᠳ ᠶᠠᠪᠤᠯᠠ ᠭᠡᠬᠦ ᠳ᠋ᠦ᠍ ᠴᠠᠬᠤᠨᠳᠣᠷᠵᠢ ᠠᠮᠤᠷ ᠵᠠᠶᠠᠭᠠ ᠦᠵᠡᠭᠦᠯᠬᠦ ᠦᠭᠡᠢ᠃ ᠥᠨᠳᠥᠷ ᠭᠡᠭᠡᠨ ᠳᠡᠭᠦᠦ ᠬᠣᠩ ᠲᠠᠢᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠲᠠᠭᠤ ᠭᠠᠷ ᠤ᠋ᠨ ᠠᠶᠠ ᠶ᠋ᠢ ᠳᠠᠭᠠᠭᠠᠬᠤ ᠪᠢᠵᠡ ᠠ᠋ 》 ᠭᠡᠵᠦ ᠪᠣᠳᠣᠵᠤ ᠶᠠᠪᠤᠯᠠ᠃
ᠠᠷᠪᠠᠨ ᠬᠣᠶᠠᠷ
ᠬᠠᠯᠬᠠ ᠮᠣᠩᠭᠣᠯ ᠤ᠋ᠨ ᠬᠣᠩ ᠲᠠᠢᠵᠢ ᠴᠠᠬᠤᠨᠳᠣᠷᠵᠢ᠂ ᠪᠣᠭᠳᠠ ᠭᠡᠭᠡᠨ ᠬᠣᠶᠠᠷ ᠲᠤ᠌ ᠭᠠᠯᠳᠠᠨ ᠬᠣᠷᠣᠰᠤᠯ ᠡᠪᠦᠷᠯᠡᠭᠰᠡᠨ ᠦᠭᠡᠢ᠃ ᠥᠨᠳᠥᠷ ᠭᠡᠭᠡᠨ ᠦ᠌ ᠦᠷᠭᠦᠭᠡᠨ ᠳ᠋ᠦ᠍ ᠰᠡᠭᠦᠯᠴᠢ ᠶ᠋ᠢᠨ ᠤᠳᠠᠭᠠ ᠪᠣᠭᠣᠨᠢᠬᠠᠨ ᠬᠤᠭᠤᠴᠠᠭᠠ ᠵᠠᠷᠤᠵᠠᠢ᠃ ᠲᠥᠪᠬᠦᠨ ᠬᠡᠢᠳ ᠦ᠋ᠨ ᠳᠣᠲᠣᠭᠠᠳᠤ ᠬᠠᠷᠰᠢ ᠳ᠋ᠤ᠌ ᠤᠷᠠᠨ ᠪᠦᠲᠦᠭᠡᠯ ᠦ᠋ᠨ ᠠᠮᠢᠳᠤ ᠬᠠᠯᠠᠭᠤᠨ ᠶᠠᠷᠢᠶᠠ ᠬᠦᠪᠦᠷᠡᠭᠦᠯᠵᠦ᠂ ᠠᠮᠢᠨᠠ ᠪᠦᠰᠡᠭᠦᠢ ᠶ᠋ᠢᠨ ᠮᠥᠩᠬᠡ ᠶ᠋ᠢᠨ ᠳᠦᠷᠢ ᠶ᠋ᠢ ᠬᠠᠷᠠᠵᠤ ᠠᠭᠤᠯᠵᠠᠭᠰᠠᠨ ᠢ᠋ᠶ᠋ᠠᠨ ᠭᠠᠯᠳᠠᠨ ᠰᠡᠭᠦᠯᠴᠢ ᠶ᠋ᠢᠨ ᠤᠳᠠᠭᠠ ᠥᠨᠳᠥᠷ ᠭᠡᠭᠡᠨ ᠳ᠋ᠦ᠍ ᠳᠤᠷᠠᠳᠤᠭᠠ ᠦᠭᠡᠢ ᠪᠢᠯᠡ᠃ ᠨᠢᠭᠡ ᠮᠣᠩᠭᠣᠯ ᠤ᠋ᠨ ᠰᠠᠯᠬᠢ ᠶ᠋ᠢ ᠬᠣᠶᠠᠷ ᠬᠤᠪᠢᠶᠠᠵᠤ ᠪᠣᠯᠤᠨᠠ ᠭᠡᠵᠦ ᠤᠤ? ᠠᠭᠤᠯᠠ ᠶ᠋ᠢᠨ ᠰᠠᠯᠬᠢ ᠪᠠᠷᠠᠭᠤᠨ ᠵᠡᠭᠦᠨ ᠰᠤᠭᠤ ᠪᠠᠷ ᠥᠭᠡᠷᠡ ᠥᠭᠡᠷᠡ ᠰᠠᠯᠬᠢᠯᠠᠳᠠᠭ ᠭᠡᠵᠦ ᠤᠤ? ᠬᠠᠯᠬᠠ ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠤᠷᠤᠭᠤ ᠴᠡᠷᠢᠭ ᠦ᠋ᠨ ᠴᠤᠪᠤᠭᠠ ᠪᠠᠷ ᠨᠡᠪᠲᠡᠷᠡᠵᠦ ᠣᠷᠣᠭᠰᠠᠨ ᠠ᠋ᠴᠠ ᠬᠣᠢᠰᠢ ᠭᠠᠯᠳᠠᠨ ᠬᠠᠭᠠᠨ ᠡᠯᠳᠡᠪ ᠪᠣᠳᠣᠯ ᠬᠡᠯᠬᠢᠵᠦ ᠥᠩᠭᠡᠷᠡᠭᠰᠡᠨ ᠢ᠋ ᠡᠷᠭᠢᠴᠡᠭᠦᠯᠦᠨ ᠲᠡᠮᠳᠡᠭᠯᠡᠵᠦ ᠪᠠᠢᠪᠠ᠃
ᠵᠠᠨᠠᠪᠠᠽᠠᠷ ᠭᠡᠭᠡᠨ ᠭᠠᠯᠳᠠᠨ ᠬᠠᠭᠠᠨ ᠲᠠᠢ ᠤᠯᠤᠰ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠶᠠᠷᠢᠬᠤ ᠠ᠋ᠴᠠ ᠢᠮᠠᠭᠲᠠ ᠲᠠᠲᠠᠭᠠᠯᠵᠠᠭᠰᠠᠭᠠᠷ ᠢᠷᠡᠵᠡᠢ᠃《 ᠭᠠᠯᠳᠠᠨ ᠪᠣᠯ ᠶᠡᠬᠡ ᠮᠣᠩᠭᠣᠯ ᠰᠡᠳᠬᠢᠯ ᠲᠡᠢ》 ᠭᠡᠮᠡᠨ ᠪᠣᠭᠳᠠ ᠯᠠᠮᠠ ᠪᠠᠲᠤ ᠨᠤᠲᠠ ᠪᠣᠳᠣᠳᠠᠭ ᠲᠤᠯᠠ ᠭᠠᠯᠳᠠᠨ ᠤ᠋ ᠳᠣᠪᠲᠣᠯᠭᠠᠨ ᠤ᠋ ᠦᠶᠡᠷ ᠲᠦ᠍ ᠤᠷᠤᠰᠴᠤ ᠠᠯᠠᠭᠠ ᠪᠣᠯᠬᠤ ᠠ᠋ᠴᠠ ᠡᠮᠢᠶᠡᠳᠡᠭ ᠪᠠᠢᠯᠠ᠃
ᠭᠠᠯᠳᠠᠨ ᠬᠠᠭᠠᠨ ᠪᠣᠯᠬᠤ ᠪᠠᠷ《 ᠥᠨᠳᠥᠷ ᠭᠡᠭᠡᠨᠲᠡᠨ ᠮᠤᠬᠤᠷ ᠰᠦᠰᠦᠭ ᠲᠡᠢ ᠪᠤᠰᠤ ᠭᠦᠨ ᠤᠬᠠᠭᠠᠨᠲᠠᠨ᠂ ᠥᠨᠳᠥᠷ ᠭᠡᠭᠡᠨ ᠦ᠌ ᠪᠣᠳᠣᠯᠭᠠ᠂ ᠲᠠᠯᠠᠷᠬᠠᠯ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠳ᠋ᠤ᠌ ᠬᠦᠷᠲᠡᠭᠡᠯ ᠲᠡᠢ᠃ ᠪᠠᠭᠠ ᠵᠠᠯᠠᠭᠤ ᠳ᠋ᠠᠭᠠᠨ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠳ᠋ᠤ᠌ ᠸᠴᠢᠷᠳᠠᠷᠠ ᠪᠤᠷᠬᠠᠨ ᠪᠦᠲᠦᠭᠡᠵᠦ ᠪᠡᠯᠡᠭᠯᠡᠭᠰᠡᠨ ᠶᠤᠮᠳᠠᠭ᠃ ᠶᠠᠭᠠᠬᠢᠭᠠᠳ ᠲᠡᠷᠡ ᠬᠦ᠌ ᠠᠩᠬᠠᠨ ᠤ᠋ ᠪᠦᠲᠦᠭᠡᠯ ᠢ᠋ᠶ᠋ᠡᠨ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠳ᠋ᠤ᠌ ᠪᠡᠯᠡᠭᠯᠡᠵᠦ᠂ ᠥᠪᠡᠷ ᠢ᠋ ᠪᠡᠨ ᠲᠠᠨᠢᠭᠤᠯᠤᠭᠰᠠᠨ ᠶᠤᠮ ᠪᠣᠯ? ᠥᠨᠳᠥᠷ ᠭᠡᠭᠡᠨ ᠢ᠋ ᠭᠠᠭᠴᠠ ᠬᠦ᠌ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠵᠦᠭ ᠣᠳᠤᠨᠠ ᠭᠡᠳᠡᠭ ᠢ᠋ ᠲᠠᠭᠠᠪᠤᠷᠢᠯᠠᠵᠤ ᠪᠢᠯᠡ》 ᠭᠡᠮᠡᠨ ᠮᠠᠰᠢ ᠭᠠᠢᠬᠠᠨᠠ᠃
ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ᠂ ᠣᠢᠷᠠᠳ ᠤ᠋ᠨ ᠪᠣᠱᠣᠭᠲᠤ ᠬᠠᠭᠠᠨ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣᠬᠢ ᠶ᠋ᠢᠨ ᠵᠥᠷᠢᠴᠡᠯ ᠳ᠋ᠦ᠍ ᠪᠤᠷᠤᠭᠤᠲᠠᠨ ᠪᠠᠢᠭᠰᠠᠨ ᠦᠭᠡᠢ᠃ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠤ᠋ᠨ ᠶᠠᠪᠤᠭᠰᠠᠨ ᠵᠦᠭ ᠲᠦ᠍ ᠭᠠᠯᠳᠠᠨ ᠬᠠᠭᠠᠨ ᠶᠠᠪᠤᠵᠤ ᠪᠠᠢᠯᠠ᠃ ᠮᠣᠩᠭᠣᠯ ᠤ᠋ᠨ ᠲᠣᠮᠣ ᠬᠤᠲᠤᠭᠲᠠᠨ ᠨᠤᠭᠤᠳ ᠮᠠᠨᠵᠤ ᠶ᠋ᠢᠨ ᠲᠦᠷᠢᠮᠡᠬᠡᠢᠯᠡᠯ ᠦ᠋ᠨ ᠪᠣᠳᠣᠯᠭᠠ ᠶ᠋ᠢ ᠰᠦᠷᠦᠵᠡᠢ᠃ ᠥᠨᠳᠥᠷ ᠭᠡᠭᠡᠨ ᠮᠠᠨᠵᠤ ᠶ᠋ᠢᠨ ᠴᠡᠷᠢᠭ ᠲᠦ᠍ ᠬᠣᠣᠷᠯᠠᠭᠳᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠲᠡᠳᠡᠨ ᠦ᠌ ᠡᠭᠦᠷ ᠲᠦ᠍ ᠲᠠᠢᠪᠤᠩ ᠰᠠᠭᠤᠬᠤ ᠶ᠋ᠢ ᠵᠥᠪ ᠲᠦ᠍ ᠪᠣᠳᠣᠵᠠᠢ᠃ ᠬᠠᠷᠢᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠶᠠᠰᠤ ᠪᠠᠨ ᠴᠠᠢᠲᠠᠯᠠ ᠦᠵᠡᠯᠴᠡᠬᠦ ᠪᠡᠷ ᠰᠢᠢᠳᠦᠭᠰᠡᠨ ᠪᠠᠢᠪᠠ᠃ ᠥᠷᠢ ᠲᠥᠯᠥᠭᠡᠰᠦ᠂ ᠲᠠᠲᠠᠪᠤᠷᠢ ᠭᠤᠪᠴᠢᠭᠤᠷ ᠨᠡᠬᠡᠳᠡᠭ ᠮᠠᠨᠵᠤ ᠨᠤᠭᠤᠳ ᠪᠦᠷ ᠳᠠᠪᠠᠭᠤᠷᠠᠭᠰᠠᠭᠠᠷ ᠶᠡᠬᠡ ᠴᠠᠭᠠᠵᠠ ᠬᠠᠤᠯᠢ ᠳ᠋ᠤ᠌ ᠬᠠᠯᠳᠠᠭᠰᠠᠨ ᠲᠤᠯᠠ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠵᠢᠷᠦᠬᠡ ᠶ᠋ᠢ ᠴᠢᠮᠬᠢᠵᠦ᠂ ᠬᠢᠯᠢᠩ ᠢ᠋ ᠪᠠᠳᠠᠷᠠᠭᠠᠵᠠᠢ᠃ ᠥᠨᠳᠥᠷ ᠭᠡᠭᠡᠨ ᠮᠠᠨᠵᠤ ᠳ᠋ᠤ᠌ ᠳᠤᠷᠠ ᠦᠭᠡᠢ ᠬᠢᠷᠢ ᠨᠢ ᠥᠪᠡᠷ ᠢ᠋ ᠪᠡᠨ ᠨᠢᠭᠤᠵᠤ ᠠᠮᠢᠳᠤᠷᠠᠬᠤ ᠶ᠋ᠢ ᠬᠦᠰᠡᠬᠦ ᠨᠢ ᠤᠷᠠᠯᠠᠵᠤ ᠳᠠᠭᠤᠰᠤᠭᠠ ᠦᠭᠡᠢ ᠪᠤᠷᠬᠠᠳ ᠤ᠋ᠨ ᠨᠥᠯᠥᠭᠡ ᠪᠢᠯᠡ᠃ ᠪᠣᠭᠳᠠ ᠭᠡᠭᠡᠨ ᠳ᠋ᠦ᠍ ᠪᠢᠰᠢᠯᠭᠠᠵᠤ ᠳᠠᠭᠤᠰᠤᠭᠠ ᠦᠭᠡᠢ ᠶᠠᠭᠤᠮᠠ ᠵᠥᠩᠳᠡᠭᠡᠨ ᠦᠯᠡᠳᠡᠵᠡᠢ᠃ ᠥᠨᠳᠥᠷ ᠭᠡᠭᠡᠨ ᠢ᠋ ᠡᠷᠭᠢᠭᠦᠯᠵᠦ ᠠᠪᠴᠢᠷᠠᠬᠤ ᠡᠰᠡᠬᠦ ᠪᠡᠨ ᠭᠠᠯᠳᠠᠨ ᠳᠣᠲᠣᠷ ᠭᠠᠯᠳᠠᠨ ᠲᠠᠢ ᠪᠠᠨ ᠲᠡᠷᠰᠯᠡᠯᠳᠦᠵᠦ ᠵᠥᠪᠯᠡᠭᠰᠡᠭᠡᠷ ᠪᠠᠢᠯᠠ᠃
ᠠᠷᠪᠠᠨ ᠭᠤᠷᠪᠠ
— ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠳᠤᠮᠳᠠ ᠴᠠᠭᠠᠨ ᠢᠷᠪᠢᠰ ᠨᠠᠳᠠ ᠲᠠᠢ ᠲᠤᠯᠭᠠᠷᠠᠵᠤ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠡᠨ ᠰᠠᠷᠲᠠᠯᠵᠠᠪᠠ᠃ ᠢᠷᠪᠢᠰ ᠦ᠋ᠨ ᠰᠢᠷᠠ ᠲᠤᠶᠠᠭᠠᠲᠤ ᠴᠡᠩᠬᠡᠷ ᠨᠢᠳᠦ ᠠᠭᠠᠵᠢᠮ ᠢ᠋ᠶ᠋ᠠᠷ ᠨᠣᠮᠣᠬᠠᠨ ᠬᠦᠯᠢᠴᠡᠩᠭᠦᠢ ᠪᠣᠯᠪᠠ᠃ ᠢᠷᠪᠢᠰ ᠨᠠᠳᠠᠳᠤ ᠣᠯᠵᠠᠯᠠᠭᠳᠠᠬᠤ ᠨᠢ ᠲᠡᠷᠡ ᠠ᠋᠃ ᠴᠠᠭᠠᠨ ᠢᠷᠪᠢᠰ ᠨᠠᠮᠠᠶ᠋ᠢ ᠳᠠᠭᠠᠵᠤ ᠴᠣᠷᠣᠰ ᠣᠪᠣᠭ ᠤ᠋ᠨ ᠬᠣᠲᠠ ᠬᠦᠷᠢᠶᠡᠨ ᠳ᠋ᠦ᠍ ᠠᠮᠢᠳᠤᠷᠠᠬᠤ ᠳ᠋ᠤ᠌ ᠠᠯᠮᠠᠢᠷᠠᠭᠰᠠᠨ ᠠᠷᠠᠳ ᠢᠷᠭᠡᠳ《 ᠡᠨᠡ ᠠᠷᠢᠶᠠᠲᠠᠨ ᠬᠡᠳᠦᠢ ᠳ᠋ᠦ᠍ ᠮᠠᠯ ᠰᠦᠷᠦᠭ ᠢ᠋ ᠮᠢᠨᠢ ᠰᠠᠪᠰᠠ ᠲᠠᠢ ᠬᠤᠳᠬᠤᠬᠤ ᠪᠣᠯ ᠭᠡᠵᠦ ᠠᠶᠤᠭᠰᠠᠨ ᠭᠡᠳᠡᠭ ᠁ 》 ᠭᠡᠮᠡᠨ ᠭᠠᠯᠳᠠᠨ ᠲᠡᠮᠳᠡᠭᠯᠡᠪᠡ᠃
ᠭᠠᠯᠳᠠᠨ ᠬᠠᠭᠠᠨ᠂ ᠠᠨᠤ ᠬᠠᠲᠤᠨ ᠬᠣᠶᠠᠷ ᠢ᠋ ᠴᠠᠭᠠᠨ ᠢᠷᠪᠢᠰ ᠳᠠᠭᠠᠵᠤ ᠶᠠᠪᠤᠨᠠ᠃ ᠴᠡᠷᠢᠭ ᠦ᠋ᠨ ᠪᠡᠬᠢᠯᠡᠯᠲᠡ ᠡᠴᠡ ᠢᠷᠡᠬᠦ ᠳ᠋ᠡᠭᠡᠨ ᠬᠠᠭᠠᠨ ᠴᠠᠭᠠᠨ ᠢᠷᠪᠢᠰ ᠳᠠᠭᠠᠭᠤᠯᠤᠭᠰᠠᠨ ᠪᠠᠢᠵᠠᠢ᠃
ᠠᠩᠬᠢᠷᠲᠤ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠬᠠᠷᠠ ᠮᠣᠷᠢ ᠲᠠᠢ᠂ ᠠᠨᠤ ᠬᠠᠲᠤᠨ ᠴᠠᠭᠠᠨ ᠮᠣᠷᠢ ᠲᠠᠢ ᠢᠷᠡᠬᠦ ᠳ᠋ᠦ᠍ ᠨᠠᠭᠤᠷ ᠤ᠋ᠨ ᠣᠰᠤᠨᠠ ᠲᠡᠳᠡᠨ ᠦ᠌ ᠳᠦᠷᠢ ᠵᠢᠷᠤᠭ ᠲᠣᠳᠣᠷᠠᠨᠠ᠃ ᠯᠠᠮᠠ ᠰᠢᠪᠠᠭᠤ ᠴᠤᠷᠬᠢᠷᠠᠨ ᠨᠠᠭᠤᠷ ᠲᠤ᠌ ᠨᠠᠭᠠᠳᠤᠨᠠ᠃ ᠢᠷᠪᠢᠰ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠠᠩᠭᠢᠷ ᠰᠢᠪᠠᠭᠤ ᠶᠡᠷᠦ ᠪᠤᠰᠤ ᠶ᠋ᠢᠨ ᠭᠣᠶᠣᠮᠰᠣᠭ ᠢ᠋ᠶ᠋ᠠᠷ ᠲᠤᠰᠬᠤ ᠠᠵᠢ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠰᠠᠨᠠᠭᠠ ᠠᠯᠳᠠᠨᠠ᠃ ᠠᠶᠠᠨ ᠲᠡᠢᠨ ᠳ᠋ᠦ᠍ ᠮᠣᠷᠢᠯᠠᠬᠤ ᠴᠠᠭ ᠳᠥᠭᠥᠵᠡᠢ᠃ ᠠᠨᠤ ᠬᠠᠲᠤᠨ᠂
— ᠬᠠᠭᠠᠨ ᠲᠠᠨ ᠳ᠋ᠤ᠌ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠬᠦᠦ ᠥᠬᠢᠨ ᠬᠣᠶᠠᠷ ᠲᠥᠷᠥᠭᠦᠯᠵᠦ ᠥᠭᠭᠦᠯᠡ᠃ ᠣᠳᠣ ᠬᠠᠲᠤᠨ ᠪᠢ ᠣᠢᠷᠠᠳ ᠤ᠋ᠨ ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠳᠣᠣᠷᠠ ᠵᠡᠪᠰᠡᠭ ᠠᠭᠰᠠᠵᠤ ᠶᠠᠪᠤᠮᠠᠷ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠭᠠᠯᠳᠠᠨ ᠤ᠋ ᠬᠥᠮᠥᠰᠬᠡ ᠨᠢ ᠨᠤᠮᠤᠷᠠᠨ᠂ ᠮᠣᠩᠬᠣᠷᠳᠠᠭᠤ ᠬᠠᠮᠠᠷ᠂ ᠬᠦᠷᠡᠩ ᠨᠢᠳᠦ᠂ ᠥᠷᠭᠡᠨ ᠰᠢᠨᠡ ᠨᠢ ᠰᠠᠯᠬᠢᠨ ᠳ᠋ᠤ᠌ ᠢᠯᠪᠢᠭᠦᠯᠪᠡ᠃ ᠠᠨᠤ᠂ ᠬᠠᠭᠠᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠮᠥᠷᠥ ᠶ᠋ᠢ ᠨᠠᠯᠠᠵᠤ ᠨᠠᠭᠤᠷ ᠤ᠋ᠨ ᠵᠡᠭᠡᠰᠦᠲᠦ ᠲᠣᠬᠣᠢ ᠳ᠋ᠤ᠌ ᠱᠤᠩᠪᠠᠨ ᠵᠤᠭᠠᠴᠠᠬᠤ ᠠᠩᠭᠢᠷ ᠢ᠋ ᠬᠠᠷᠠᠨᠠ᠃ ᠭᠠᠯᠳᠠᠨ ᠬᠠᠭᠠᠨ᠂
— ᠴᠠᠸᠠᠩᠷᠠᠪᠳᠠᠨ ᠢ᠋ ᠪᠦᠷᠢᠮᠦᠰᠦᠨ ᠠᠯᠳᠠᠯᠠ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠥᠷᠭᠥᠭᠡ ᠭᠡᠷ ᠡᠴᠡ ᠬᠥᠨᠳᠡᠢᠷᠡᠵᠦ ᠭᠦᠢᠴᠡᠯᠡ ᠭᠡᠬᠦ ᠳ᠋ᠦ᠍ ᠠᠨᠤ ᠬᠠᠲᠤᠨ ᠥᠪᠡᠷ ᠢ᠋ ᠪᠡᠨ ᠵᠥᠪᠰᠢᠶᠡᠷᠡᠭᠦᠯᠬᠦ ᠰᠠᠨᠠᠭᠠ ᠲᠠᠢ ᠬᠡᠯᠡᠭᠰᠡᠨ ᠦᠭᠡ ᠪᠡᠨ ᠵᠠᠯᠭᠠᠵᠤ ᠬᠠᠭᠠᠨ ᠤ᠋ ᠮᠥᠷᠥ ᠶ᠋ᠢ ᠨᠠᠯᠠᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠬᠡᠯᠡᠪᠡ᠃
— ᠪᠢ ᠴᠠᠸᠠᠩᠷᠠᠪᠳᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ᠂ ᠲᠡᠭᠦᠨ ᠢ᠋ ᠰᠠᠨᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠭᠡᠮᠡᠨ ᠴᠠᠭᠠᠷᠠᠭᠤᠯᠪᠠ᠃
— ᠲᠡᠷᠭᠡᠯ ᠰᠠᠷᠠ ᠲᠠᠢ ᠰᠥᠨᠢ ᠯᠡ ᠪᠢ ᠵᠢᠷᠮᠦᠰᠦᠯᠡᠳᠡᠭ ᠶᠦᠮ ᠭᠡᠵᠦ ᠡᠷᠬᠡᠯᠡᠩᠭᠦᠢ ᠥᠭᠦᠯᠡᠬᠦ ᠳ᠋ᠦ᠍᠂ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠭᠡᠷ ᠦ᠋ᠨ ᠪᠠᠷᠠ ᠬᠠᠷᠠᠯ ᠦᠭᠡᠢ ᠤᠳᠠᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠰᠠᠨᠠᠪᠠ᠃ ᠮᠡᠳᠡᠭᠡᠵᠢ ᠠᠨᠤ ᠬᠠᠲᠤᠨ ᠵᠣᠷᠢᠭᠤᠳᠠ ᠰᠠᠨᠠᠭᠤᠯᠤᠭᠰᠠᠨ ᠪᠢᠵᠡ᠃
ᠵᠡᠭᠦᠨᠭᠠᠷ ᠤ᠋ᠨ ᠨᠤᠲᠤᠭ ᠳᠤᠮᠳᠠᠭᠤᠷ ᠴᠠᠸᠠᠩᠷᠠᠪᠳᠠᠨ ᠤ᠋ ᠵᠢᠮ ᠭᠠᠷᠴᠤ᠂ ᠲᠡᠭᠦᠨ ᠢ᠋ ᠮᠢᠩᠭᠠᠲᠤ ᠴᠡᠷᠢᠭ ᠲᠡᠢ ᠵᠡᠪᠰᠡᠭ ᠲᠡᠢ ᠪᠣᠯᠤᠭᠰᠠᠨ ᠢ᠋ ᠠᠨᠤ ᠮᠡᠳᠡᠵᠦ ᠪᠠᠢᠯᠠ᠃ ᠬᠥᠪᠡᠭᠦᠨ ᠨᠢ ᠭᠠᠯᠳᠠᠨ ᠠ᠋ᠴᠠ ᠵᠢᠭᠤᠲᠠᠵᠤ ᠠᠮᠢᠳᠤᠷᠠᠳᠠᠭ ᠪᠢᠯᠡ᠃
ᠠᠨᠤᠲᠠᠷᠠ ᠨᠠᠭᠤᠷ ᠤ᠋ᠨ ᠣᠰᠤᠨᠠ ᠤᠰᠤ ᠦᠰᠦᠴᠢᠭᠦᠯᠦᠨ ᠰᠡᠯᠢᠵᠦ ᠴᠠᠭᠠᠨ ᠢᠷᠪᠢᠰ ᠲᠡᠭᠦᠨ ᠦ᠌ ᠬᠥᠳᠡᠯᠭᠡᠭᠡᠨ ᠪᠦᠷᠢ ᠶ᠋ᠢ ᠠᠵᠢᠭᠯᠠᠨ ᠬᠣᠶᠠᠷ ᠬᠥᠯ ᠢ᠋ᠶ᠋ᠡᠨ ᠳᠡᠷᠡᠢᠲᠡᠯᠡ ᠵᠢᠭᠢᠵᠦ ᠴᠢᠭᠢᠭ ᠲᠡᠢ ᠬᠥᠬᠡ ᠨᠣᠭᠣᠭᠠ ᠶ᠋ᠢ ᠡᠯᠢᠭᠡ ᠪᠡᠷ ᠢ᠋ᠶ᠋ᠡᠨ ᠳᠠᠷᠤᠵᠤ ᠬᠡᠪᠲᠡᠨᠡ᠃《 ᠠᠨᠤᠲᠠᠷᠠ ᠮᠢᠨᠦ ᠤᠶᠠᠭᠠ ᠶ᠋ᠢ ᠳᠠᠭᠠᠷᠠᠭᠤᠯᠳᠠᠭ ᠪᠣᠯᠤᠯᠲᠠᠢ᠃ ᠬᠠᠭᠠᠨ ᠪᠢ ᠡᠮᠡᠰ ᠦ᠋ᠨ ᠢᠷᠠᠭᠤᠬᠠᠨ ᠡᠭᠡᠰᠢᠭᠯᠡᠩᠲᠦ ᠳᠠᠭᠤ ᠶ᠋ᠢ ᠰᠣᠨᠣᠰᠴᠤ ᠭᠤᠸᠠ ᠪᠡᠶᠡ ᠶ᠋ᠢ ᠲᠠᠭᠠᠯᠠᠬᠤ ᠳᠤᠷᠠᠲᠠᠢ ᠪᠣᠯᠵᠠᠢ᠃ ᠪᠢ ᠪᠤᠷᠬᠠᠨ ᠤ᠋ ᠬᠣᠲᠠ ᡀᠠᠰᠠ ᠤᠷᠤᠭᠤ ᠰᠡᠯᠡᠮᠡ ᠠᠳᠬᠤᠵᠤ ᠲᠥᠷᠥ ᠶ᠋ᠢᠨ ᠲᠠᠮᠠᠭᠠ ᠪᠠᠷᠢᠭᠰᠠᠨ ᠴᠠᠭ ᠠ᠋ᠴᠠ ᠬᠣᠢᠰᠢ ᠣᠴᠢᠭᠰᠠᠨ ᠦᠭᠡᠢ᠃ ᠡᠨᠡ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠳᠠᠯᠠᠢ ᠯᠠᠮᠠ ᠣᠯᠠᠨᠲᠠ ᠢᠷᠡᠵᠦ ᠮᠢᠨᠦ ᠪᠡᠶᠡ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠪᠡᠯᠡᠭ ᠢ᠋ ᠪᠠᠭᠰᠢ ᠳ᠋ᠤ᠌ ᠭᠦᠷᠭᠡᠭᠦᠯᠪᠡ 》 ᠭᠡᠵᠦ ᠭᠠᠯᠳᠠᠨ ᠬᠠᠭᠠᠨ ᠪᠣᠳᠣᠵᠤ ᠪᠠᠢᠪᠠ᠃ ᠭᠠᠯᠳᠠᠨ ᠢ᠋ ᠲᠡᠢᠨ ᠳ᠋ᠦ᠍ ᠶᠠᠪᠤᠭᠰᠠᠨ ᠠᠷᠤ ᠬᠣᠢᠭᠤᠷ ᠠᠨᠤ ᠬᠠᠲᠤᠨ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠰᠣᠨᠣᠷ ᠰᠡᠷᠡᠮᠵᠢ᠂ ᠪᠠᠢᠯᠳᠤᠭᠠᠨ ᠤ᠋ ᠳᠠᠳᠤᠯᠭᠠ ᠰᠤᠷᠭᠠᠭᠤᠯᠢ ᠶ᠋ᠢ ᠪᠡᠶᠡᠴᠢᠯᠡᠨ ᠰᠢᠯᠭᠠᠳᠠᠭ ᠪᠥᠯᠥᠭᠡ᠃ ᠠᠨᠤ ᠬᠠᠲᠤᠨ ᠢ᠋ ᠪᠠᠢᠬᠤ ᠳ᠋ᠤ᠌ ᠭᠠᠯᠳᠠᠨ ᠴᠡᠷᠢᠭ ᠦ᠋ᠨ ᠴᠠᠢᠵᠠ ᠪᠡᠬᠢᠯᠡᠯᠲᠡ᠂ ᠬᠦᠷᠢᠶᠡ ᠶ᠋ᠢ ᠲᠡᠷᠡ ᠪᠦᠷᠢ ᠶ᠋ᠢ ᠰᠢᠯᠭᠠᠬᠤ ᠬᠡᠷᠡᠭ ᠦᠭᠡᠢ ᠪᠠᠢᠳᠠᠭ᠃ ᠠᠨᠤ ᠬᠠᠲᠤᠨ ᠣᠮᠣᠭᠯᠠᠩ ᠮᠣᠷᠢ ᠪᠠᠷ ᠳᠠᠪᠬᠢᠵᠤ ᠮᠣᠷᠢᠨ ᠤ᠋ ᠬᠠᠲᠠᠷᠢᠶᠠ ᠳ᠋ᠤ᠌ ᠬᠠᠷᠪᠤᠵᠤ ᠨᠡᠮᠨᠡᠨᠡ᠃ ᠴᠡᠷᠢᠭ ᠡᠷᠡᠰ ᠠᠨᠤ ᠶ᠋ᠢ ᠬᠠᠷᠠᠬᠤ ᠪᠠᠷ ᠢ᠋ᠶ᠋ᠠᠨ ᠨᠢᠳᠦ᠂ ᠬᠡᠢᠮᠣᠷᠢ ᠨᠢ ᠰᠡᠷᠭᠦᠵᠦ᠂
— ᠬᠠᠲᠤᠲᠠᠨ ᠣᠷᠣᠯᠳᠣᠬᠤ ᠤᠤ? ᠭᠡᠮᠡᠨ ᠠᠰᠠᠭᠤᠳᠠᠭ ᠪᠠᠢᠯᠠ᠃
ᠴᠠᠭᠠᠨ ᠢᠷᠪᠢᠰ ᠬᠠᠲᠤᠨ ᠠᠪᠠᠬᠠᠢ ᠶ᠋ᠢ ᠵᠡᠭᠡᠰᠦᠲᠦ ᠲᠣᠬᠣᠢ ᠳ᠋ᠤ᠌ ᠨᠢᠭᠤᠭᠳᠠᠬᠤ ᠪᠠᠭ ᠴᠡᠷᠢᠭ ᠡᠴᠡ ᠬᠠᠮᠠᠭᠠᠯᠠᠨ᠂ ᠰᠢᠷᠠ ᠨᠢᠳᠦ ᠪᠡᠨ ᠲᠡᠨᠳᠡ ᠡᠴᠡ ᠦᠯᠦ ᠰᠠᠯᠭᠠᠨᠠ᠃ ᠭᠠᠯᠳᠠᠨ ᠬᠠᠭᠠᠨ ᠤᠰᠤ ᠳᠤᠰᠤᠯᠠᠭᠤᠯᠤᠨ ᠭᠠᠷᠴᠤ ᠢᠷᠡᠭᠰᠡᠨ ᠠᠨᠤ ᠬᠠᠲᠤᠨ ᠳ᠋ᠤ᠌ ᠬᠠᠨᠳᠤᠵᠤ᠂
— ᠲᠣᠷᠭᠠᠨ ᠤ᠋ ᠵᠠᠮ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠮᠠᠲᠠᠯ ᠳ᠋ᠤ᠌ ᠪᠦᠷᠢᠨ ᠰᠢᠯᠵᠢᠭᠰᠡᠨ ᠪᠤᠰᠤ ᠤᠤ? ᠲᠣᠷᠭᠠᠨ ᠤ᠋ ᠵᠠᠮ ᠳᠠᠭᠤ ᠳᠡᠭᠡᠷᠡᠮ ᠦ᠋ᠨ ᠪᠦᠯᠦᠭ ᠡᠭᠦᠷᠯᠡᠵᠡᠢ᠃ ᠳᠡᠭᠡᠷᠡᠮᠴᠢᠨ ᠦ᠌ ᠡᠭᠦᠷ ᠢ᠋ ᠴᠡᠷᠢᠭᠯᠡᠨ ᠤᠰᠠᠳᠬᠠᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ ᠭᠡᠪᠡᠰᠦ ᠠᠨᠤ ᠬᠠᠲᠤᠨ᠂
— ᠲᠠ ᠨᠠᠮᠠᠶ᠋ᠢ᠁ ᠭᠡᠵᠦ ᠠᠰᠠᠭᠤᠪᠠ᠃
— ᠬᠠᠲᠤᠨ ᠲᠠᠨ ᠢ᠋ ᠠᠪᠴᠤ ᠣᠳᠤᠨᠠ᠃
— ᠬᠥᠪᠡᠭᠦᠨ᠂ ᠥᠬᠢᠨ ᠬᠣᠶᠠᠷ ᠲᠣᠮᠣ ᠪᠣᠯᠤᠯᠠ᠃ ᠲᠠᠨ ᠢ᠋ ᠴᠡᠷᠢᠭ ᠦ᠋ᠨ ᠬᠠᠷᠠ ᠰᠦᠯᠳᠡ᠂ ᠲᠠᠬᠢᠯᠲᠤ ᠬᠦᠷᠡᠩ ᠪᠦᠷᠭᠦᠳ ᠦ᠋ᠨ ᠰᠠᠯᠬᠢᠨ ᠳ᠋ᠤ᠌ ᠢᠯᠪᠢᠭᠦᠯᠵᠦ ᠶᠠᠪᠤᠪᠠᠰᠤ ᠨᠠᠷᠠᠨ ᠮᠡᠲᠦ ᠢᠪᠡᠭᠡᠯ ᠲᠡᠢ ᠪᠢᠯᠡ᠂ ᠰᠠᠷᠠᠨ ᠮᠡᠲᠦ ᠭᠡᠭᠡ ᠲᠠᠨᠢ ᠨᠠᠳᠠᠳᠤ ᠦᠭᠡᠢᠯᠡᠭᠳᠡᠨᠡ᠃ ᠬᠠᠭᠠᠨ ᠲᠠᠨ ᠠ᠋ᠴᠠ ᠬᠣᠯᠠᠳᠬᠤ ᠶ᠋ᠢ ᠦᠯᠦ ᠬᠦᠰᠡᠨᠡ᠃
— ᠠᠨᠤ ᠬᠠᠲᠤᠨ ᠮᠢᠨᠢ ᠪᠠᠷᠠᠭᠤᠨ ᠭᠠᠷ ᠰᠢᠦ᠃ ᠪᠤᠷᠬᠠᠨ ᠴᠢᠮᠠᠶ᠋ᠢ ᠨᠠᠳᠠᠳᠤ ᠵᠠᠶᠠᠭᠠᠭᠰᠠᠨ ᠲᠤᠯᠠ ᠪᠠᠷᠠᠭᠤᠨ ᠲᠠᠯᠠ ᠪᠠᠨ ᠬᠠᠲᠤᠨ ᠠᠪᠠᠬᠠᠢ ᠲᠠᠨ ᠳ᠋ᠤ᠌ ᠲᠤᠰᠢᠶᠠᠶᠠ᠃ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠳᠠᠨᠵᠢᠯᠠ ᠪᠠᠭᠠᠲᠤᠷ ᠪᠣᠢ᠃ ᠭᠠᠢᠲᠠᠪ᠂ ᠠᠷᠴᠠ ᠪᠠᠭᠠᠲᠤᠷ ᠤ᠋ᠳ ᠪᠠᠷᠠᠭᠤᠨ ᠵᠡᠭᠦᠨ ᠮᠢᠩᠭᠠᠲᠤ ᠴᠡᠷᠢᠭ ᠢ᠋ ᠬᠣᠯᠪᠣᠳᠠᠭ ᠪᠤᠰᠤ ᠤᠤ? ᠳᠡᠭᠡᠷᠡᠮ ᠦ᠋ᠨ ᠪᠦᠯᠦᠭ ᠲᠦ᠍ ᠮᠠᠨᠵᠤ ᠶ᠋ᠢᠨ ᠲᠥᠯᠥᠭᠡᠨ ᠦ᠌ ᠬᠥᠮᠦᠰ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠵᠡᠭᠦᠨᠭᠠᠷ ᠢ᠋ ᠳᠣᠲᠣᠷᠠ ᠠ᠋ᠴᠠ ᠨᠢ ᠬᠠᠭᠠᠯᠵᠤ ᠰᠦᠢᠳᠬᠡᠬᠦ ᠶ᠋ᠢ ᠲᠡᠳᠡ ᠬᠢᠴᠢᠶᠡᠵᠦ ᠪᠠᠢᠨᠠ᠃ ᠴᠡᠷᠢᠭ ᠦ᠋ᠨ ᠬᠦᠴᠦ ᠶ᠋ᠢ ᠰᠡᠯᠪᠢᠵᠦ ᠪᠡᠬᠢᠵᠢᠭᠦᠯᠬᠦ ᠳ᠋ᠦ᠍ ᠬᠠᠲᠤᠨ ᠲᠠᠨ ᠤ᠋ ᠲᠤᠰᠠᠯᠠᠯᠴᠠᠭᠠ ᠨᠠᠳᠠᠳᠤ ᠶᠡᠬᠡ ᠬᠡᠷᠡᠭ ᠲᠡᠢ᠃
— ᠲᠡᠭᠷᠢ ᠲᠠᠨ ᠢ᠋ ᠢᠪᠡᠭᠡᠭ !
ᠠᠷᠪᠠᠨ ᠳᠥᠷᠪᠡ
ᠯᠠᠮᠠ ᠰᠢᠪᠠᠭᠤᠲᠤ ᠨᠠᠭᠤᠷ ᠤ᠋ᠨ ᠠᠩᠭᠢᠷ ᠪᠣᠷᠣᠭᠠ ᠬᠤᠷᠠ ᠳᠠᠭᠤᠳᠠᠬᠤ ᠯᠤᠭᠠ ᠴᠤᠷᠬᠢᠷᠠᠨ ᠭᠠᠩᠭᠠᠨᠠᠵᠤ᠂ ᠰᠤᠨᠢᠶᠠᠵᠤ ᠬᠡᠪᠲᠡᠭᠰᠡᠨ ᠴᠠᠭᠠᠨ ᠢᠷᠪᠢᠰ ᠬᠦᠴᠦᠷᠬᠡᠭ ᠬᠥᠯ ᠢ᠋ᠶ᠋ᠡᠷ ᠭᠠᠵᠠᠷ ᠲᠡᠷᠡᠢᠨ ᠪᠣᠰᠤᠯᠠ᠃ ᠠᠩᠭᠢᠷ ᠰᠢᠪᠠᠭᠤ ᠦᠷᠭᠦᠨ ᠨᠢᠰᠦᠯᠡ᠃ ᠬᠡᠨ ᠰᠣᠴᠢᠭᠠᠪᠠ ᠭᠡᠬᠦ ᠰᠢᠭ ᠭᠠᠯᠳᠠᠨ᠂ ᠠᠨᠤ ᠬᠣᠶᠠᠷ ᠨᠠᠭᠤᠷ ᠤ᠋ᠨ ᠵᠡᠭᠡᠰᠦ ᠤᠷᠤᠭᠤ ᠰᠢᠷᠳᠡᠨᠡ᠃ ᠵᠡᠭᠡᠰᠦ ᠶ᠋ᠢᠨ ᠲᠡᠭ ᠳᠤᠮᠳᠠ ᠰᠠᠪᠳᠠᠨᠵᠠᠯ ᠤ᠋ᠨ ᠢᠯᠡᠭᠡᠭᠰᠡᠨ ᠲᠤᠷᠰᠢᠭᠤᠯ ᠤ᠋ᠳ ᠬᠡᠪᠲᠡᠨᠡ᠃ ᠵᠡᠭᠡᠰᠦ ᠦᠯᠦ ᠮᠡᠳᠡᠭ ᠨᠠᠢᠭᠤᠵᠤ ᠬᠥᠳᠡᠯᠦᠨᠡ᠃ ᠵᠡᠭᠡᠰᠦ ᠶ᠋ᠢᠨ ᠤᠷᠲᠤ ᠪᠣᠰᠤᠭᠠ ᠡᠰᠢ ᠠᠮᠢᠰᠬᠤᠯ ᠭᠦᠨᠵᠡᠭᠡᠢ ᠠᠪᠬᠤ ᠲᠡᠳᠦᠢ ᠳ᠋ᠦ᠍ ᠨᠠᠢᠭᠤᠳᠠᠭ ᠪᠢᠯᠡ᠃
ᠵᠡᠭᠡᠰᠦ ᠶ᠋ᠢᠨ ᠳᠣᠲᠣᠷᠠ ᠠ᠋ᠴᠠ ᠨᠠᠮ ᠭᠦᠮ ᠠᠭᠠᠷ ᠢ᠋ ᠵᠦᠰᠦᠬᠦ ᠯᠦ᠍ᠭᠡ ᠰᠤᠮᠤ ᠱᠦᠩᠭᠢᠨᠡᠨ ᠬᠣᠣᠰ ᠠᠩᠭᠢᠷ ᠤ᠋ᠨ ᠨᠢᠭᠡ ᠨᠢ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠤ᠋ᠨ ᠳᠡᠷᠭᠡᠳᠡ ᠤᠨᠠᠬᠤ ᠨᠢ ᠲᠡᠷᠡ᠃ ᠠᠨᠤ ᠬᠠᠲᠤᠨ᠂
— ᠠ᠋ ᠬᠥᠬᠡ ᠲᠩᠷᠢ ᠮᠢᠨᠢ! ᠭᠡᠮᠡᠨ ᠪᠠᠴᠢᠭᠤᠷᠠᠨ ᠳᠠᠭᠤ ᠠᠯᠳᠠᠬᠤ ᠬᠣᠭᠣᠷᠣᠨᠳᠣ ᠴᠠᠭᠠᠨ ᠢᠷᠪᠢᠰ ᠨᠠᠭᠤᠷ ᠤ᠋ᠨ ᠤᠰᠤ ᠤᠷᠤᠭᠤ ᠱᠤᠩᠪᠠᠨ ᠣᠷᠣᠵᠤ ᠤᠷᠲᠤ ᠪᠡᠶᠡ ᠨᠢ ᠵᠢᠭᠠᠰᠤ ᠠᠳᠠᠯᠢ ᠭᠣᠯᠪᠠᠯᠵᠠᠨ ᠣᠳᠤᠯᠠ᠃ ᠬᠣᠣᠰ ᠠᠩᠭᠢᠷ ᠤ᠋ᠨ ᠨᠢᠭᠡ ᠨᠢ ᠲᠡᠭᠷᠢ ᠶ᠋ᠢᠨ ᠬᠥᠬᠡᠯᠪᠡᠢ ᠬᠣᠭᠣᠰᠣᠨ ᠳᠠᠢᠳᠤ ᠳ᠋ᠤ᠌ ᠠᠯᠠᠭᠠ ᠪᠣᠯᠵᠠᠢ᠃ ᠭᠡᠨᠡᠳᠲᠡ ᠮᠥᠨᠥᠬᠢ ᠲᠡᠭᠷᠢ ᠳ᠋ᠦ᠍ ᠠᠭᠤᠰᠤᠭᠰᠠᠨ ᠠᠩᠭᠢᠷ ᠴᠤᠷᠬᠢᠷᠠᠵᠤ ᠬᠠᠰᠬᠢᠷᠤᠭᠰᠠᠭᠠᠷ ᠬᠣᠰᠢᠭᠤ ᠬᠦᠵᠦᠭᠦᠦ ᠨᠢ ᠭᠠᠯᠲᠤ ᠰᠤᠮᠤ ᠮᠡᠲᠦ ᠣᠷᠣᠭᠰᠢ ᠪᠠᠨ ᠨᠠᠷᠢᠰᠴᠤ ᠵᠡᠭᠡᠰᠦ ᠤᠷᠤᠭᠤ ᠠᠯᠠᠭᠠ ᠪᠣᠯᠬᠤ ᠳ᠋ᠤ᠌ ᠪᠢᠲᠡᠭᠦᠦ ᠬᠡᠩᠬᠡᠢᠬᠦ ᠳᠠᠭᠤ ᠭᠠᠷᠴᠤ ᠠᠩᠭᠢᠷ ᠤ᠋ᠨ ᠤᠯᠠᠭᠠᠨ ᠰᠢᠷᠠ ᠥᠳᠥ ᠭᠠᠯ ᠰᠠᠴᠤᠨ ᠪᠤᠲᠠ ᠦᠰᠦᠷᠬᠦ ᠠᠵᠢ᠃
ᠭᠠᠯᠳᠠᠨ ᠬᠠᠭᠠᠨ ᠬᠠᠲᠤᠨ ᠤ᠋ ᠬᠠᠮᠲᠤ ᠣᠳᠣᠬᠠᠨ ᠳ᠋ᠠᠭᠠᠨ ᠪᠦᠷᠬᠦᠭ ᠪᠠᠢᠭᠠ ᠡᠨᠡ ᠶᠠᠪᠤᠳᠠᠯ ᠢ᠋ ᠠᠩᠬᠠᠷᠤᠯᠲᠠᠢ ᠠᠵᠢᠭᠯᠠᠵᠤ᠂ ᠵᠡᠪᠰᠡᠭ ᠳᠤᠭᠤᠯᠠᠭᠠ ᠪᠠᠨ ᠠᠭᠰᠠᠨ ᠠᠶᠤᠯ ᠤ᠋ᠨ ᠥᠭᠡᠳᠡ ᠡᠴᠡ ᠰᠥᠷᠬᠦ ᠳ᠋ᠦ᠍ ᠪᠡᠯᠡᠨ ᠪᠠᠢᠪᠠ᠃
ᠲᠦᠳᠡ ᠤᠳᠠᠯ ᠦᠭᠡᠢ ᠨᠠᠭᠤᠷ ᠢ᠋ ᠨᠢᠳᠦ ᠢᠷᠮᠡᠬᠦ ᠵᠠᠭᠤᠷᠠ ᠲᠤᠭᠤᠯᠵᠤ ᠣᠳᠤᠭᠰᠠᠨ ᠴᠠᠭᠠᠨ ᠢᠷᠪᠢᠰ ᠰᠤᠮᠤ ᠪᠠᠨ ᠳᠠᠬᠢᠨ ᠡᠭᠰᠢᠭᠡᠭᠡᠳ ᠲᠠᠯᠪᠢᠵᠤ ᠴᠢᠳᠠᠯ ᠦᠭᠡᠢ ᠵᠢᠷᠦᠬᠡᠨ ᠳ᠋ᠡᠭᠡᠨ ᠠᠩᠭᠢᠷ ᠤ᠋ᠨ ᠬᠣᠰᠢᠭᠤ ᠵᠣᠭᠣᠯᠭᠠᠭᠰᠠᠨ ᠵᠠᠭᠤᠲᠤ ᠶ᠋ᠢᠨ ᠠᠬᠠᠯᠠᠭᠴᠢ ᠶ᠋ᠢ ᠵᠠᠭᠤᠵᠤ ᠢᠷᠡᠪᠡ᠃ ᠯᠠᠮᠠ ᠰᠢᠪᠠᠭᠤ ᠲᠠᠢ ᠪᠤᠰᠤ ᠭᠠᠯᠳᠠᠨ ᠬᠠᠭᠠᠨ ᠲᠠᠢ ᠣᠷᠣᠯᠳᠣᠭᠰᠠᠨ ᠲᠤᠷᠰᠢᠭᠤᠯ ᠤ᠋ᠳ ᠦᠵᠡᠭᠡ ᠦᠭᠡᠢ ᠪᠡᠨ ᠦᠵᠡᠵᠦ ᠴᠢᠳᠬᠤᠯᠠᠩ ᠤ᠋ᠨ ᠥᠨᠳᠥᠷ ᠡᠷᠭᠢ ᠶ᠋ᠢᠨ ᠬᠠᠳᠠᠨ ᠨᠤᠷᠠᠩᠭᠢ ᠠ᠋ᠴᠠ ᠮᠣᠷᠢ ᠲᠠᠢ ᠪᠠᠨ ᠨᠢᠰᠴᠦ ᠦᠬᠦᠵᠡᠭᠡᠵᠦ ᠪᠠᠢᠯᠠ᠃ ᠲᠡᠳᠡᠨ ᠳ᠋ᠦ᠍ ᠠᠩᠭᠢᠷ ᠤ᠋ᠨ ᠬᠠᠷᠢᠶᠠᠯ ᠬᠦᠷᠴᠡᠢ᠃
ᠭᠠᠯᠳᠠᠨ ᠬᠠᠭᠠᠨ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠶ᠋ᠢᠨ ᠬᠠᠷᠢᠶᠠᠯ ᠤᠷᠤᠰᠬᠠᠵᠤ ᠥᠩᠭᠡᠷᠡᠬᠦ ᠳ᠋ᠦ᠍᠂
— ᠰᠠᠪᠳᠠᠨᠵᠠᠯ ᠮᠠᠨᠵᠤ ᠶ᠋ᠢᠨ ᠲᠣᠭᠣᠭᠠᠨ ᠳ᠋ᠤ᠌ ᠣᠷᠣᠵᠠᠢ᠃ ᠠᠪᠠᠭᠠ ᠠᠬᠠ ᠴᠦᠬᠦᠢ ᠤᠪᠠᠰᠢ ᠶ᠋ᠢᠨ ᠬᠣᠨᠣᠭ ᠤ᠋ᠨ ᠲᠣᠭᠠ ᠭᠦᠢᠴᠡᠵᠡᠢ᠃ ᠬᠠᠭᠠᠨ ᠠᠬᠠ ᠶ᠋ᠢᠨ ᠬᠥᠪᠡᠭᠦᠨ ᠴᠠᠸᠠᠩᠷᠠᠪᠳᠠᠨ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠳᠤᠷᠠᠯᠠᠵᠠᠢ᠃ ᠪᠥᠭᠡᠷᠡᠩᠬᠡᠢ ᠬᠣᠷᠸᠠ ᠠ᠋? ᠭᠡᠬᠦ ᠳ᠋ᠦ᠍ ᠠᠨᠤ ᠬᠠᠲᠤᠨ᠂
— ᠡᠬᠡ ᠶ᠋ᠢᠨ ᠰᠠᠨᠠᠭᠠ ᠦᠷᠡ ᠳ᠋ᠦ᠍ ᠪᠢᠯᠡ᠃ ᠦᠷᠡ ᠶ᠋ᠢᠨ ᠰᠠᠨᠠᠭᠠ ᠬᠠᠳᠠᠨ ᠳ᠋ᠤ᠌ ᠪᠢᠯᠡ᠃ ᠠᠩᠭᠢᠷ ᠰᠢᠪᠠᠭᠤᠨ ᠤ᠋ ᠥᠰᠢᠶᠡ ᠶ᠋ᠢ ᠡᠮᠡ ᠨᠢ ᠠᠪᠤᠪᠠ᠃ ᠡᠨᠡ ᠣᠷᠴᠢᠯᠠᠩ ᠬᠢᠲᠤᠭᠠ ᠶ᠋ᠢᠨ ᠢᠷ ᠳᠡᠭᠡᠷᠡ ᠶᠤᠮ ᠪᠠᠢᠨᠠ᠃ ᠬᠠᠭᠠᠨ ᠲᠠᠨ ᠤ᠋ ᠪᠠᠷᠠᠭᠤᠨ ᠭᠠᠷ ᠪᠣᠯᠵᠤ ᠲᠤᠯᠤᠯᠳᠤᠶᠠ ᠭᠡᠮᠡᠨ ᠭᠦᠳᠦᠰ ᠰᠢᠯᠤᠭᠤᠨ ᠥᠴᠢᠯᠡ᠃ ᠭᠠᠯᠳᠠᠨ ᠬᠠᠭᠠᠨ ᠢᠨᠢᠶᠡᠮᠰᠦᠭᠯᠡᠨ ᠳᠣᠭᠰᠢᠷᠠᠵᠤ᠂
— ᠨᠠᠷᠠ ᠬᠠᠭᠠᠳᠠᠭ ᠡᠭᠦᠯᠡ ᠭᠡᠵᠦ ᠦᠭᠡᠢ
ᠨᠠᠰᠤ ᠨᠡᠮᠡᠳᠡᠭ ᠪᠤᠷᠬᠠᠨ ᠭᠡᠵᠦ ᠦᠭᠡᠢ
ᠨᠠᠮᠠᠶ᠋ᠢ ᠵᠣᠭᠰᠣᠭᠠᠳᠠᠭ ᠠᠯᠪᠢᠨ ᠭᠡᠵᠦ ᠦᠭᠡᠢ
ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤ᠌ ᠬᠢᠵᠠᠭᠠᠷ ᠭᠡᠵᠦ ᠦᠭᠡᠢ ᠁ ᠭᠡᠳ ᠦᠬᠦᠯ ᠪᠣᠯᠤᠭᠰᠠᠨ ᠴᠡᠷᠢᠭ ᠦ᠋ᠨ ᠵᠢᠷᠦᠬᠡᠨ ᠡᠴᠡ ᠠᠩᠭᠢᠷ ᠤ᠋ᠨ ᠬᠣᠰᠢᠭᠤ ᠶ᠋ᠢ ᠰᠤᠭᠤ ᠲᠠᠲᠠᠵᠤ᠂《 ᠡᠮᠡ ᠠᠮᠢᠲᠠᠨ ᠤ᠋ ᠬᠣᠷᠣᠰᠤᠯ ᠡᠯᠢᠭᠡ ᠶ᠋ᠢ ᠨᠢ ᠰᠦᠪᠡᠯᠡᠵᠡᠢ᠃ ᠠᠩᠭᠢᠷ ᠤ᠋ᠨ ᠰᠤᠮᠤ ᠶ᠋ᠢ ᠪᠠᠰᠠ ᠠᠪᠤᠶᠠ》 ᠭᠡᠯᠡ᠃ ᠬᠥᠪᠡᠭᠡᠨ ᠦ᠌ ᠨᠠᠭᠠᠨᠠ ᠠ᠋ᠴᠠ ᠲᠣᠷᠭᠠᠨ ᠴᠡᠷᠢᠭ ᠦ᠋ᠨ ᠪᠠᠭ ᠭᠠᠷᠴᠤ ᠢᠷᠡᠯᠡ᠃ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠳ᠋ᠤ᠌ ᠭᠠᠯᠳᠠᠨ᠂
— ᠬᠡᠭᠦᠷ ᠢ᠋ ᠤᠰᠤᠨ ᠠ᠋ᠴᠠ ᠬᠣᠯᠠᠳᠤᠭᠤᠯᠵᠤ ᠬᠠᠶᠠ᠃ ᠠᠩᠭᠢᠷ ᠢ᠋ ᠳᠡᠭᠳᠡᠭᠡᠬᠡᠢ ᠡᠴᠡ ᠨᠢ ᠨᠢᠭᠤᠵᠤ ᠭᠠᠵᠠᠷ ᠯᠤᠤᠰ ᠲᠤ᠌ ᠰᠢᠩᠭᠡᠭᠡ ᠭᠡᠮᠡᠨ ᠲᠤᠰᠢᠶᠠᠪᠠ᠃
— ᠲᠤᠷᠰᠢᠭᠤᠯ ᠤ᠋ᠳ ᠢ᠋ ᠨᠡᠬᠡᠬᠦ ᠤᠤ? ᠭᠡᠮᠡᠨ ᠵᠠᠩᠵᠤᠨ ᠢ᠋ ᠠᠰᠠᠭᠤᠬᠤ ᠳ᠋ᠤ᠌᠂
— ᠲᠤᠷᠰᠢᠭᠤᠯ ᠤ᠋ᠳ ᠤ᠋ᠨ ᠵᠠᠮ ᠮᠤᠬᠤᠷᠳᠠᠭᠰᠠᠨ᠃ ᠴᠡᠷᠢᠭ ᠬᠥᠳᠡᠯᠭᠡᠵᠦ ᠤᠷᠪᠠᠭᠴᠢ ᠴᠥᠬᠦᠢ ᠤᠪᠠᠰᠢ ᠶ᠋ᠢ ᠪᠠᠷᠢᠵᠤ ᠢᠷᠡ ᠭᠡᠵᠦ ᠭᠠᠯᠳᠠᠨ ᠬᠠᠭᠠᠨ ᠨᠡᠮᠡᠵᠦ ᠲᠤᠰᠢᠶᠠᠯᠠ᠃
ᠠᠷᠪᠠᠨ ᠲᠠᠪᠤ
ᠴᠦᠬᠦᠢ ᠤᠪᠠᠰᠢ ᠶ᠋ᠢ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠴᠢᠳᠬᠤᠯᠠᠩ ᠠ᠋ᠴᠠ ᠤᠰᠤ ᠵᠠᠯᠭᠢᠯᠠᠵᠤ ᠪᠠᠢᠬᠤ ᠳ᠋ᠤ᠌ ᠭᠠᠢᠲᠠᠪ ᠪᠠᠭᠠᠲᠤᠷ ᠪᠠᠷᠢᠵᠠᠢ᠃ ᠯᠠᠮᠠ ᠰᠢᠪᠠᠭᠤᠨ ᠤ᠋ ᠨᠠᠭᠤᠷ ᠤ᠋ᠨ ᠡᠷᠭᠢ ᠳ᠋ᠦ᠍ ᠪᠣᠯᠤᠭᠰᠠᠨ ᠠᠩᠭᠢᠷ ᠤ᠋ᠨ ᠦᠬᠦᠯ ᠦ᠋ᠨ ᠪᠤᠷᠤᠭᠤᠲᠠᠨ ᠢ᠋ ᠪᠠᠷᠢᠬᠤ ᠪᠠᠷ ᠭᠠᠢᠳᠠᠪ ᠬᠡᠳᠦᠨ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠣᠳᠴᠠᠢ᠃ ᠡᠷᠡᠦ ᠶ᠋ᠢᠨ ᠰᠠᠬᠠᠯ ᠴᠠᠭᠠᠨ ᠲᠠᠢ ᠬᠣᠯᠢᠯᠳᠤᠭᠰᠠᠨ ᠬᠢᠵᠢᠶᠡᠯᠢ ᠨᠠᠰᠤᠨ ᠤ᠋ ᠲᠡᠷᠡ ᠡᠷᠡ ᠶ᠋ᠢ ᠭᠠᠢᠲᠠᠪ᠂
— ᠨᠡᠷᠡ ᠲᠠᠨᠢ ᠬᠡᠨ ᠰᠠᠨ ᠪᠢᠯᠡ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠴᠦᠬᠦᠢ ᠤᠪᠠᠰᠢ ᠢᠨᠢᠶᠡᠳᠦ ᠠᠯᠳᠠᠵᠤ᠂
— ᠨᠠᠮᠠᠶ᠋ᠢ ᠪᠠᠭᠠ ᠳ᠋ᠤ᠌ ᠨᠡᠷᠡ ᠥᠭᠭᠦᠭᠡ ᠦᠭᠡᠢ ᠶᠦᠮ᠂ ᠠᠭᠤᠯᠠ ᠬᠠᠳᠠ ᠪᠠᠷ ᠠᠩ ᠬᠦᠷᠦᠭᠡ ᠬᠢᠵᠦ ᠶᠠᠪᠤᠭᠰᠠᠭᠠᠷ ᠣᠨᠣᠭᠠᠭᠰᠠᠨ ᠨᠡᠷᠡ ᠪᠡᠨ ᠮᠠᠷᠲᠠᠵᠠᠢ᠃ ᠮᠢᠨᠦ ᠨᠡᠷᠡ ᠬᠡᠨ ᠳ᠋ᠦ᠍ ᠬᠡᠷᠡᠭ ᠲᠡᠢ ᠶᠤᠮ ᠭᠡᠵᠦ ᠮᠡᠳᠬᠡᠪᠡ᠃
— ᠨᠠᠳᠠᠳᠤ ᠬᠡᠷᠡᠭ ᠲᠡᠢ ᠭᠡᠵᠦ ᠭᠠᠢᠲᠠᠪ ᠥᠭᠦᠯᠡᠪᠡ᠃
— ᠴᠢ ᠬᠡᠨ ᠪᠣᠢ? ᠲᠡᠨᠦᠮᠡᠯ ᠯᠦᠳ᠋ ᠮᠢᠨᠢ ᠭᠡᠳ ᠴᠦᠬᠦᠢ ᠤᠪᠠᠰᠢ ᠤᠯᠠᠭᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠪᠠᠪᠠᠯᠵᠠᠭᠤᠯᠵᠤ ᠬᠡᠯᠡᠪᠡ᠃
— ᠴᠦᠬᠦᠢ ᠣᠪᠰᠢ ᠶ᠋ᠢ ᠪᠡᠷᠢ ᠭᠡᠵᠦ ᠭᠠᠢᠳᠠᠪ ᠪᠠᠭᠠᠲᠤᠷ ᠴᠡᠷᠢᠭ ᠦ᠋ᠳ ᠲᠡᠭᠡᠨ ᠲᠤᠰᠢᠶᠠᠪᠠ᠃
ᠴᠡᠷᠢᠭ ᠦ᠋ᠳ ᠲᠡᠭᠦᠨ ᠢ᠋ ᠪᠠᠷᠢᠬᠤ ᠭᠡᠵᠦ ᠤᠬᠤᠰᠬᠢᠲᠡᠯᠡ ᠴᠢᠳᠬᠤᠯᠠᠩ ᠤ᠋ᠨ ᠵᠠᠬᠠ ᠤᠷᠤᠭᠤ ᠴᠦᠬᠦᠢ ᠤᠪᠠᠰᠢ ᠦᠰᠦᠷᠪᠡ᠃ ᠲᠡᠷᠡ ᠳᠣᠣᠷᠠ ᠪᠠᠢᠬᠤ ᠬᠠᠪᠲᠠᠭᠠᠢ ᠬᠠᠳᠠᠨᠠ ᠲᠡᠷᠡ ᠪᠡᠷ ᠨᠢᠷᠤᠭᠤ ᠪᠠᠷ ᠴᠢᠮᠡᠭᠡ ᠲᠡᠢ ᠤᠨᠠᠵᠤ ᠪᠢᠴᠠᠷᠠᠯᠠ᠃
ᠴᠦᠬᠦᠢ ᠤᠪᠠᠰᠢ ᠶ᠋ᠢᠨ ᠰᠡᠭ ᠢ᠋ ᠭᠠᠢᠲᠠᠪ ᠪᠠᠭᠠᠲᠤᠷ ᠬᠥᠲᠥᠯᠦᠭᠡ ᠮᠣᠷᠢᠨ ᠳ᠋ᠤ᠌ ᠲᠡᠩᠨᠡᠵᠦ ᠠᠴᠢᠭᠠᠳ ᠲᠦᠷᠦᠭᠦᠴᠢ ᠶ᠋ᠢᠨ ᠠᠩᠭᠢᠷ ᠤ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠰᠦᠯᠪᠡᠭᠦᠯᠦᠭᠰᠡᠨ ᠴᠡᠷᠢᠭ ᠦ᠋ᠨ ᠳᠡᠷᠭᠡᠳᠡ ᠣᠷᠣᠰᠢᠭᠤᠯᠪᠠ᠃ ᠴᠦᠬᠦᠢ ᠤᠪᠠᠰᠢ ᠪᠥᠭᠡᠰᠦ ᠡᠷᠳᠡᠨᠢᠪᠠᠭᠠᠲᠤᠷ ᠬᠣᠩ ᠲᠠᠢᠵᠢ ᠶ᠋ᠢᠨ ᠡᠴᠢᠭᠡ ᠨᠢᠭᠡᠲᠦ ᠳᠡᠭᠦᠦ ᠶᠤᠮ᠃ ᠠᠬᠠ ᠶ᠋ᠢ ᠪᠡᠨ ᠲᠩᠷᠢ ᠳ᠋ᠦ᠍ ᠬᠠᠯᠢᠬᠤ ᠳ᠋ᠤ᠌ ᠴᠦᠬᠦᠢ ᠤᠪᠠᠰᠢ ᠬᠠᠭᠠᠨ ᠰᠠᠭᠤᠳᠠᠯ ᠤ᠋ᠨ ᠲᠥᠯᠥᠭᠡ ᠵᠢᠳᠬᠦᠵᠡᠢ᠃ ᠲᠡᠷᠡ ᠪᠡᠷ ᠤᠰᠤᠨ ᠤ᠋ ᠬᠥᠭᠡᠰᠦ ᠯᠦ᠍ᠭᠡ ᠬᠣᠭᠣᠰᠣᠨ ᠵᠦᠢᠯ ᠬᠥᠭᠡᠭᠡᠴᠡᠯᠳᠦᠨ ᠨᠡᠷᠡ ᠪᠡᠨ ᠪᠠᠷᠠᠵᠠᠢ᠃ ᠬᠥᠭᠡᠰᠦ ᠪᠡᠷ ᠲᠣᠭᠯᠠᠳᠠᠭ ᠬᠡᠨ ᠪᠠᠢᠬᠤ ᠪᠢᠯᠡ᠃ ᠬᠥᠭᠡᠰᠦ ᠪᠣᠯ ᠬᠥᠭᠡᠰᠦ ᠰᠢᠦ ᠳᠡ᠃ ᠬᠥᠭᠡᠰᠦᠨ ᠪᠥᠮᠪᠥᠯᠢᠭ ᠦ᠋ᠳ ᠴᠦᠬᠦᠢ ᠤᠪᠠᠰᠢ ᠶ᠋ᠢᠨ ᠲᠠᠷᠢᠬᠢ ᠪᠠᠷ ᠳᠦᠭᠦᠷᠴᠦ ᠰᠣᠯᠢᠶᠠᠷᠠᠯ ᠡᠭᠦᠰᠦᠭᠰᠡᠨ ᠪᠠᠢᠵᠠᠢ᠃ ᠲᠡᠷᠡ ᠪᠡᠷ ᠬᠥᠭᠡᠰᠦ ᠰᠢᠭ ᠠᠮᠢᠳᠤᠷᠠᠭᠠᠳ ᠬᠥᠭᠡᠰᠦ ᠰᠢᠭ ᠵᠠᠮᠬᠠᠷᠠᠵᠤ ᠠᠷᠢᠯᠪᠠ᠃
ᠴᠢᠳᠬᠤᠯᠠᠩ ᠳ᠋ᠤ᠌ ᠬᠥᠭᠡᠰᠦ ᠪᠥᠮᠪᠥᠢᠵᠦ ᠴᠠᠢᠷᠠᠵᠤ ᠶᠡᠬᠡ ᠤᠰᠤᠨ ᠤ᠋ ᠬᠦᠴᠦᠲᠦ ᠤᠷᠤᠰᠬᠠᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠭᠠᠷ ᠪᠠᠢᠳᠠᠭ ᠪᠢᠯᠡ᠃ ᠴᠦᠬᠦᠢ ᠤᠪᠠᠰᠢ ᠶ᠋ᠢ ᠨᠠᠰᠤ ᠡᠴᠦᠰᠯᠡᠬᠦ ᠳ᠋ᠦ᠍ ᠬᠠᠷᠠᠮᠰᠠᠵᠤ ᠬᠠᠯᠬᠠᠯᠠᠬᠤ ᠬᠡᠨ ᠨᠢᠭᠡᠨ ᠦᠭᠡᠢ ᠪᠠᠢᠯᠠ᠃ ᠴᠦᠬᠦᠢ ᠤᠪᠠᠰᠢ ᠶ᠋ᠢᠨ ᠦᠬᠦᠯ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠰᠠᠨᠠᠭᠠ ᠵᠣᠷᠢᠭ ᠢ᠋ ᠴᠡᠪᠡᠷᠰᠢᠭᠦᠯᠦᠨ《 ᠯᠤᠤᠰ ᠤ᠋ᠨ ᠬᠣᠣᠷᠯᠠᠯ》 ᠭᠡᠰᠡᠨ ᠪᠣᠳᠣᠯ ᠢ᠋ ᠨᠢ ᠭᠦᠨᠵᠡᠭᠡᠢᠷᠡᠭᠦᠯᠵᠡᠢ᠃
ᠠᠷᠪᠠᠨ ᠵᠢᠷᠭᠤᠭᠠ
ᠬᠠᠰᠠᠭ ᠤ᠋ᠨ ᠬᠠᠷᠪᠸᠺ ᠥᠷᠥᠭᠡᠰᠦᠨ ᠭᠠᠷ ᠢ᠋ᠶ᠋ᠠᠨ ᠨᠡᠬᠡᠬᠦ ᠪᠡᠷ ᠢᠷᠡᠭᠦᠯ ᠳᠣᠯᠣᠭᠠᠨ ᠳ᠋ᠤ᠌ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠳᠠᠭᠤᠳᠠᠵᠤ᠂ ᠭᠣᠣᠯ ᠤᠰᠤ᠂ ᠲᠠᠯᠠ ᠨᠤᠲᠤᠭ ᠢ᠋ᠶ᠋ᠠᠷ ᠳᠡᠭᠡᠷᠡᠮ ᠲᠣᠨᠣᠭᠤᠯ ᠬᠢᠵᠡᠢ᠃ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠲᠡᠮᠦᠷ ᠭᠠᠷ ᠬᠡᠪᠲᠡᠵᠦ ᠪᠠᠢᠪᠠ᠃ ᠶᠠᠭ ᠤᠴᠢᠷ ᠳᠡᠭᠡᠷᠡ ᠪᠡᠨ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠴᠠᠪᠴᠢᠭᠤᠯᠤᠭᠰᠠᠨ ᠠᠮᠢᠳᠤ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠥᠯᠥᠭᠡ ᠥᠰᠢᠶᠡ ᠠᠪᠬᠤ ᠪᠠᠷ ᠬᠠᠷᠪᠸᠺ ᠰᠢᠨᠤᠵᠤ ᠪᠠᠢᠵᠠᠢ᠃
ᠡᠨᠡ ᠶᠠᠪᠤᠳᠠᠯ ᠵᠠᠰᠠᠭᠲᠤ ᠬᠠᠭᠠᠨ ᠤ᠋ ᠨᠤᠲᠤᠭ ᠤᠷᠤᠭᠤ ᠴᠡᠷᠢᠭ ᠢ᠋ᠶ᠋ᠡᠨ ᠢᠯᠡᠭᠡᠭᠰᠡᠨ ᠬᠣᠢᠨᠠ ᠪᠣᠯᠤᠭᠰᠠᠨ ᠪᠥᠭᠡᠳ ᠭᠠᠯᠳᠠᠨ ᠤ᠋ ᠣᠮᠣᠭᠯᠠᠩ ᠪᠠᠭᠠᠲᠤᠷ ᠭᠠᠢᠳᠠᠪ᠂ ᠠᠷᠴᠠ ᠬᠣᠶᠠᠭᠤᠯᠠ ᠠᠯᠤᠰ ᠣᠳᠴᠠᠢ᠃ ᠳᠠᠢᠴᠢᠨ ᠪᠠᠭᠠᠲᠤᠷ ᠡᠷᠡᠰ ᠨᠢ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠭᠰᠠᠨ ᠬᠣᠢᠨᠠ ᠬᠠᠷᠪᠸᠺ ᠡᠵᠡᠭᠦᠢᠴᠢᠯᠡᠵᠦ ᠪᠠᠢᠭᠠ ᠳ᠋ᠤ᠌ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠳᠤᠷᠠ ᠦᠭᠡᠢ
249-254
ᠬᠦᠷᠴᠡᠢ᠃ ᠣᠢᠷᠠᠳ ᠤ᠋ᠨ ᠪᠠᠭᠠᠲᠤᠷ ᠤ᠋ᠳ ᠢ᠋ ᠪᠠᠰᠤᠵᠤ ᠳᠣᠷᠣᠮᠵᠢᠯᠠᠬᠤ ᠤᠴᠢᠷ ᠦᠭᠡᠢ ᠭᠡᠵᠦ ᠭᠠᠯᠳᠠᠨ ᠪᠣᠳᠣᠵᠤ ᠪᠠᠢᠯᠠ᠃
ᠬᠥᠪᠡᠭᠡ ᠳᠠᠮᠨᠠᠨ ᠬᠠᠰᠠᠭ ᠤ᠋ᠨ ᠬᠠᠷᠠ ᠮᠢᠩᠭᠠᠲᠤ ᠵᠣᠭᠰᠣᠵᠠᠢ᠃ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠤ᠋ ᠮᠢᠩᠭᠠᠲᠤ ᠴᠡᠷᠢᠭ ᠦ᠋ᠳ ᠰᠢᠷᠠ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠪᠤᠲᠠᠷᠭᠠᠨᠠᠲᠤ ᠲᠠᠯᠠ ᠤᠷᠤᠭᠤ ᠰᠤᠨᠢᠶᠠᠵᠤ ᠵᠢᠭᠰᠠᠵᠠᠢ᠃
ᠠᠷᠪᠠᠲᠤ ᠶ᠋ᠢᠨ ᠠᠬᠠᠯᠠᠭᠴᠢ ᠴᠡᠷᠢᠭ ᠦ᠋ᠨ ᠪᠣᠭᠴᠣᠨ ᠳ᠋ᠤ᠌ ᠪᠠᠢᠬᠤ ᠬᠣᠣᠰ ᠦᠩᠬᠦᠯᠴᠡᠭ ᠤᠭᠤᠲᠠᠨ ᠳ᠋ᠤ᠌ ᠰᠢᠷᠬᠠ ᠡᠮᠨᠡᠳᠡᠭ ᠰᠢᠷᠣᠢ᠂ ᠬᠣᠢᠯᠣᠭ ᠰᠢᠪᠠᠭᠤᠨ ᠤ᠋ ᠶᠠᠰᠤ ᠮᠢᠬᠠ ᠶ᠋ᠢᠨ ᠨᠤᠨᠲᠠᠭ ᠡᠮ ᠦ᠋ᠨ ᠪᠡᠯᠡᠳᠦᠮᠡᠯ ᠪᠠᠢᠭᠠ ᠡᠰᠡᠬᠦ ᠶ᠋ᠢ ᠰᠢᠯᠭᠠᠪᠠ᠃ ᠴᠡᠷᠢᠭ ᠦ᠋ᠨ ᠪᠣᠭᠴᠣᠨ ᠳ᠋ᠤ᠌ ᠪᠠᠰᠠ ᠬᠠᠷᠠ ᠤᠯᠠᠭᠠᠨ ᠥᠩᠭᠡ ᠶ᠋ᠢᠨ ᠵᠤᠰᠤ ᠪᠣᠳᠣᠭ ᠪᠠᠢᠬᠤ ᠪᠥᠭᠡᠳ ᠲᠤᠯᠤᠯᠳᠤᠭᠠᠨ ᠤ᠋ ᠰᠦᠷ ᠢ᠋ ᠨᠡᠮᠡᠬᠦ ᠶ᠋ᠢᠨ ᠲᠤᠯᠠᠳᠠ ᠰᠢᠯᠦᠰᠦ ᠪᠡᠷ ᠢ᠋ᠶ᠋ᠡᠨ ᠨᠣᠷᠭᠠᠵᠤ ᠨᠢᠭᠤᠷ ᠢ᠋ᠶ᠋ᠠᠨ ᠪᠣᠳᠣᠳᠠᠭ ᠵᠠᠩᠰᠢᠯ ᠲᠠᠢ ᠪᠥᠯᠥᠭᠡ᠃
ᠭᠠᠯᠳᠠᠨ ᠬᠠᠭᠠᠨ ᠤ᠋ ᠠᠷᠤ ᠲᠠᠯᠠ ᠳ᠋ᠤ᠌ ᠬᠡᠳᠦ ᠬᠡᠳᠦᠨ ᠪᠦᠷᠭᠦᠳ ᠲᠣᠭᠰᠢᠨ ᠰᠢᠷᠠ ᠨᠢᠳᠦ ᠪᠡᠷ ᠭᠠᠵᠠᠷ ᠲᠤ᠌ ᠥᠳᠥ ᠬᠣᠷᠣᠬᠠᠢ ᠮᠡᠲᠦ ᠢᠵᠠᠭᠠᠨᠠᠬᠤ ᠴᠡᠷᠢᠭ ᠦ᠋ᠳ ᠢ᠋ ᠰᠢᠷᠳᠡᠨᠡ᠃ ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠬᠣᠶᠠᠷ ᠪᠦᠷᠭᠦᠳ ᠪᠥᠭᠡᠰᠦ ᠭᠠᠯᠲᠤ ᠰᠢᠷᠣᠢ ᠲᠦᠷᠬᠢᠵᠦ ᠰᠥᠨᠢ ᠶ᠋ᠢᠨ ᠴᠠᠭ ᠲᠤ᠌ ᠬᠡᠷᠡᠯᠳᠦᠵᠦ ᠬᠠᠷᠠᠭᠳᠠᠳᠠᠭ ᠵᠡᠰ ᠲᠣᠨᠣᠭ ᠲᠠᠢ ᠲᠡᠭᠷᠢ ᠶ᠋ᠢᠨ ᠰᠠᠬᠢᠯ ᠲᠠᠢ ᠵᠢᠭᠦᠷᠲᠡᠨ ᠶᠤᠮ᠃
ᠬᠠᠰᠠᠭ ᠤ᠋ᠨ ᠬᠠᠷᠠ ᠮᠢᠩᠭᠠᠲᠤ ᠶ᠋ᠢᠨ ᠠᠬᠠᠯᠠᠭᠴᠢ ᠬᠠᠷᠪᠸᠺ ᠬᠠᠰᠬᠢᠷᠤᠨ᠂
— ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠬᠡᠷᠴᠢᠭᠦᠯᠦᠭᠰᠡᠨ ᠦ᠌ ᠲᠥᠯᠥᠭᠡ ᠥᠰᠢᠶᠡ ᠵᠠᠩᠭᠢᠳᠴᠤ ᠪᠠᠢᠨᠠ᠃ ᠢᠷᠡᠭᠦᠯ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠳᠠᠭᠤᠳᠠᠵᠤ ᠪᠠᠢᠨᠠ᠃ ᠨᠠᠳᠠᠳᠤ ᠭᠠᠷ ᠪᠣᠢ᠃ ᠪᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠲᠠ ᠨᠠᠷ ᠲᠤ᠌ ᠥᠭᠭᠥᠭᠰᠡᠨ᠃ ᠴᠢᠳᠠᠳᠠᠭ ᠶᠤᠮ ᠪᠣᠯ ᠳᠠᠬᠢᠭᠠᠳ ᠮᠢᠨᠦ ᠭᠤᠷᠪᠠᠳᠠᠬᠢ ᠭᠠᠷ ᠢ᠋ ᠠᠪᠤᠭᠲᠤᠨ ᠭᠡᠯᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠭᠠᠯᠳᠠᠨ ᠬᠠᠭᠠᠨ᠂
— ᠡᠴᠢᠭᠡ ᠬᠣᠩ ᠲᠠᠢᠵᠢ ᠶ᠋ᠢᠨ ᠲᠥᠯᠥᠭᠡᠰᠦᠨ ᠳ᠋ᠦ᠍ ᠭᠤᠷᠪᠠᠨ ᠭᠠᠷ ᠪᠠᠭᠠᠳᠠᠨᠠ ᠭᠡᠯᠡ᠃
ᠬᠠᠷᠪᠸᠺ ᠰᠡᠯᠡᠮᠡ ᠪᠡᠷ ᠢ᠋ᠶ᠋ᠡᠨ ᠴᠢᠴᠢᠯᠡᠨ᠂
— ᠬᠤᠪᠢᠯᠭᠠᠨ ᠯᠠᠮᠠ ᠲᠠ ᠶᠠᠩᠭᠢᠷ ᠰᠤᠯᠲᠠᠨ ᠤ᠋ ᠰᠦᠨᠡᠰᠦ ᠶ᠋ᠢ ᠳᠠᠭᠤᠳᠠᠵᠤ ᠠᠰᠠᠭᠤ᠃ ᠠᠮᠢ ᠶ᠋ᠢ ᠠᠮᠢ ᠪᠠᠷ ᠲᠥᠯᠥᠳᠡᠭ ᠶᠦᠮ ᠭᠡᠵᠦ ᠠᠮᠢᠰᠬᠤᠭᠠᠳᠠᠪᠠ᠃ ᠭᠠᠯᠳᠠᠨ ᠬᠠᠭᠠᠨ ᠲᠡᠭᠦᠨ ᠡᠴᠡ᠂
— ᠴᠢᠮᠠ ᠳ᠋ᠤ᠌ ᠪᠤᠷᠬᠠᠨ ᠪᠠᠢᠭᠠ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃ ᠬᠠᠷᠪᠸᠺ ᠮᠣᠷᠢ ᠪᠠᠨ ᠲᠡᠪᠴᠢᠨ᠂
— ᠨᠠᠳᠠᠳᠤ ᠪᠤᠷᠬᠠᠨ ᠪᠠᠢᠬᠤ ᠦᠭᠡᠢ᠃ ᠨᠠᠳᠠᠳᠤ ᠰᠡᠭᠦᠳᠡᠷ ᠪᠠᠢᠭᠠ᠃ ᠪᠢ ᠰᠡᠭᠦᠳᠡᠷ ᠢ᠋ᠶ᠋ᠡᠨ ᠬᠠᠷᠠᠭᠠᠳ ᠠᠮᠢᠳᠤ ᠶᠠᠪᠤᠭᠠ ᠪᠠᠨ ᠮᠡᠳᠡᠳᠡᠭ᠃ ᠪᠢᠳᠡᠨ ᠦ᠌ ᠡᠴᠢᠭᠡ ᠨᠦ᠍ᠭᠦᠳ ᠦ᠋ᠨ ᠰᠡᠭᠦᠳᠡᠷ ᠠᠯᠠᠭᠠ ᠪᠣᠯᠵᠠᠢ᠃ ᠰᠦᠨᠡᠰᠦ᠂ ᠰᠡᠭᠦᠳᠡᠷ ᠦᠭᠡᠢ ᠪᠠᠢᠬᠤ ᠶ᠋ᠢ ᠪᠢ ᠦᠯᠦ ᠬᠦᠰᠡᠨᠡ᠃ ᠨᠠᠳᠠ ᠲᠠᠢ ᠲᠤᠯᠤᠯᠳᠤᠬᠤ ᠶ᠋ᠢ ᠬᠦᠰᠡᠭᠰᠡᠨ ᠨᠢ ᠭᠠᠷᠤᠭᠠᠳ ᠢᠷᠡ᠃ ᠡᠨᠡ ᠤᠳᠠᠭᠠ ᠪᠢ ᠠᠮᠠ ᠭᠠᠷᠴᠤ ᠨᠡᠷᠡ ᠳᠠᠭᠤᠳᠠᠬᠤ ᠦᠭᠡᠢ ᠭᠡᠯᠡ᠃
ᠭᠠᠯᠳᠠᠨ ᠬᠠᠭᠠᠨ ᠲᠡᠭᠦᠨ ᠳ᠋ᠦ᠍᠂
— ᠴᠢᠮᠠᠶ᠋ᠢ ᠰᠡᠭᠦᠳᠡᠷ ᠦᠭᠡᠢ ᠪᠣᠯᠭᠠᠨᠠ ᠭᠡᠵᠦ ᠳᠤᠤᠭᠠᠷᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠭᠠᠯᠳᠠᠨ ᠤ᠋ ᠴᠡᠷᠢᠭ ᠦ᠋ᠳ ᠲᠠᠪᠤᠨ ᠬᠤᠷᠤᠭᠤᠨ ᠤ᠋ ᠥᠨᠳᠡᠭᠡ ᠪᠡᠷ ᠨᠢᠭᠤᠷ ᠢ᠋ᠶ᠋ᠠᠨ ᠠᠷᠴᠢᠭᠰᠠᠨ ᠳ᠋ᠤ᠌ ᠣᠢᠷᠠᠳ ᠴᠡᠷᠢᠭ ᠦ᠋ᠨ ᠨᠢᠭᠤᠷ᠂ ᠬᠠᠴᠠᠷ᠂ ᠬᠠᠮᠠᠷ ᠳᠡᠭᠡᠷᠡ ᠪᠡᠨ ᠲᠠᠰᠢᠭᠤ ᠬᠠᠷᠠ᠂ ᠤᠯᠠᠭᠠᠨ ᠰᠤᠳᠠᠯ ᠲᠠᠢ ᠪᠣᠯᠪᠠ᠃ ᠭᠡᠨᠡᠳᠲᠡ ᠪᠦᠷᠭᠦᠳ ᠮᠡᠲᠦ ᠴᠤᠢᠯᠡᠨ ᠭᠠᠷᠴᠤ ᠢᠷᠡᠭᠰᠡᠨ ᠪᠠᠭᠠᠲᠤᠷ ᠠᠨᠤ ᠬᠠᠲᠤᠨ ᠪᠥᠯᠥᠭᠡ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠪᠠᠷᠤᠭᠠᠷᠳᠠᠭᠤ ᠴᠢᠷᠠᠢ ᠥᠭᠡᠳᠡ ᠰᠢᠷᠳᠡᠬᠦ ᠳ᠋ᠦ᠍ ᠲᠡᠷᠡ ᠪᠡᠷ ᠪᠠᠷᠠᠭᠤᠨ ᠨᠢᠳᠦ ᠶ᠋ᠢ ᠢᠷᠮᠡᠪᠡ᠃ ᠡᠨᠡ ᠪᠣᠯ ᠵᠥᠪᠰᠢᠶᠡᠷᠡᠭᠰᠡᠨ ᠦ᠌ ᠳᠣᠬᠢᠶᠠ ᠪᠣᠯᠪᠠ᠃ ᠠᠨᠤ ᠬᠠᠲᠤᠨ ᠮᠣᠷᠢ ᠲᠠᠢ ᠪᠠᠨ ᠡᠷᠭᠢᠴᠡᠨ ᠴᠤᠢᠯᠠᠪᠠ᠃
ᠢᠷᠡᠭᠦᠯ ᠳᠣᠯᠣᠭᠠᠨ ᠤᠯᠠᠭᠠᠨ ᠲᠣᠭᠣᠰᠣᠨ ᠳ᠋ᠤ᠌ ᠦᠷᠭᠦᠯᠵᠢᠯᠡᠵᠦ ᠨᠢᠳᠦ ᠢᠷᠮᠡᠬᠦ ᠶ᠋ᠢᠨ ᠵᠠᠭᠤᠷᠠ ᠲᠡᠭᠦᠰᠬᠡᠯ ᠨᠢ ᠬᠠᠷᠠᠭᠳᠠᠪᠠ᠃ ᠬᠠᠷᠪᠸᠻ ᠤ᠋ᠨ ᠥᠷᠥᠭᠡᠰᠦᠨ ᠭᠠᠷ ᠰᠡᠯᠡᠮᠡ ᠲᠡᠢ ᠪᠡᠨ ᠲᠠᠰᠤᠷᠠᠵᠤ ᠤᠨᠠᠯᠠ᠃ ᠬᠠᠷᠪᠸᠻ ᠭᠠᠷ ᠦᠭᠡᠢ ᠪᠣᠯᠤᠯᠠ᠃
ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠠᠨᠤ ᠬᠠᠲᠤᠨ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠴᠠᠩᠭᠢᠨᠠᠭᠰᠠᠨ ᠴᠠᠷᠢᠭᠤ ᠬᠣᠭᠣᠯᠠᠢ ᠪᠠᠷ᠂
— ᠮᠣᠩᠭᠣᠯ ᠡᠬᠡᠴᠦᠳ ᠦ᠋ᠨ ᠤᠷᠤᠰᠤᠭᠰᠠᠨ ᠨᠢᠯᠪᠤᠰᠤ ᠦᠨᠡᠲᠡᠢ ᠪᠠᠢᠳᠠᠭ ᠶᠤᠮ᠃ ᠴᠠᠭᠠᠨ ᠰᠦ ᠶ᠋ᠢᠨ ᠨᠡᠬᠡᠯ ᠬᠠᠲᠠᠭᠤ ᠪᠠᠢᠳᠠᠭ ᠶᠤᠮ ᠭᠡᠮᠡᠨ ᠴᠢᠩᠭᠠ ᠪᠠᠷ ᠬᠡᠯᠡᠬᠦ ᠳ᠋ᠦ᠍ ᠮᠣᠩᠭᠣᠯ᠂ ᠬᠠᠰᠠᠭ ᠴᠡᠷᠢᠭ ᠦ᠋ᠳ ᠮᠠᠯ ᠭᠠᠢᠬᠠᠵᠤ᠂ ᠴᠡᠯ ᠬᠥᠬᠡᠷᠡᠵᠦ ᠬᠣᠴᠣᠷᠤᠯᠠ᠃ ᠬᠠᠰᠠᠭ ᠤ᠋ᠨ ᠬᠠᠷᠠ ᠮᠢᠩᠭᠠᠲᠤ ᠡᠨᠡ ᠡᠳᠦᠷ ᠦ᠋ᠨ ᠳᠣᠯᠣᠭᠠᠨ ᠳ᠋ᠤ᠌ ᠬᠣᠬᠢᠷᠠᠯ ᠪᠠᠭᠠᠲᠠᠢ ᠬᠣᠴᠣᠷᠤᠯᠠ᠃
ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠬᠠᠷᠪᠸᠻ ᠬᠣᠶᠠᠷ ᠭᠠᠷ ᠲᠠᠢ ᠺᠢᠷᠭᠢᠽ ᠲᠣᠰᠬᠣᠨ ᠢ᠋ ᠳᠡᠭᠡᠷᠡᠮᠳᠡᠭᠰᠡᠨ ᠪᠠᠢᠯᠠ᠃
ᠠᠷᠪᠠᠨ ᠳᠣᠯᠣᠭᠠ
ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠣᠢᠷᠠᠳ ᠤ᠋ᠳ ᠬᠠᠷᠪᠸᠻ ᠢ᠋ ᠬᠣᠶᠠᠷ ᠭᠠᠷ ᠲᠠᠢ ᠪᠠᠢᠯᠳᠤᠵᠤ ᠶᠠᠪᠤᠭᠰᠠᠨ ᠢ᠋ ᠬᠠᠷᠠᠭᠠᠳ《 ᠬᠠᠷᠪᠸᠻ ᠮᠥᠨ ᠤᠤ? ᠰᠢᠵᠠᠷᠠᠭᠤᠨ ᠡᠷᠡ ᠬᠣᠶᠠᠷ ᠭᠠᠷ ᠠ᠋ᠴᠠ ᠪᠠᠨ ᠰᠠᠯᠤᠭᠰᠠᠨ ᠪᠤᠰᠤ ᠤᠤ? ᠬᠡᠨ ᠭᠠᠷ ᠥᠭᠪᠡ?》 ᠭᠡᠮᠡᠨ ᠣᠨᠢᠰᠣᠭᠠ ᠳᠠᠭᠠᠬᠤ ᠶ᠋ᠢ ᠬᠢᠴᠢᠶᠡᠪᠡ᠃ ᠺᠢᠷᠭᠢᠽ ᠲᠣᠰᠬᠣᠨ ᠤ᠋ ᠲᠠᠷᠢᠶᠠᠴᠢᠳ ᠬᠠᠷᠪᠸᠻ ᠠ᠋ᠴᠠ ᠠᠶᠤᠬᠤ ᠳ᠋ᠠᠭᠠᠨ ᠤᠯᠠᠭᠠᠨ ᠪᠤᠭᠤᠳᠠᠢ ᠶ᠋ᠢᠨ ᠨᠡᠷᠡᠮᠡᠯ ᠢ᠋ᠶ᠋ᠡᠨ ᠸᠠᠭᠠᠷ ᠲᠠᠢ ᠨᠢ ᠠᠪᠴᠢᠷᠠᠵᠤ ᠰᠥᠩᠨᠡᠨᠡ᠃ ᠬᠠᠷᠪᠸᠻ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠳᠣᠯᠢᠩᠭᠠᠷᠰᠢᠵᠤ ᠬᠡᠭᠡᠷᠡ ᠶ᠋ᠢᠨ ᠠᠮᠢᠲᠠᠨ ᠰᠢᠭ᠋ ᠪᠣᠯᠤᠭᠰᠠᠨ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠭᠡᠷ ᠣᠷᠣᠨ ᠳ᠋ᠤ᠌ ᠲᠠᠷᠬᠠᠭᠠᠵᠤ᠂ ᠴᠤᠭᠯᠠᠷᠠᠬᠤ ᠬᠤᠭᠤᠴᠠᠭᠠ ᠶ᠋ᠢ ᠰᠠᠷᠠ ᠣᠳᠣ ᠶ᠋ᠢᠨ ᠲᠣᠬᠢᠶᠠᠯ ᠢ᠋ᠶ᠋ᠠᠷ ᠲᠣᠭᠲᠠᠭᠠᠵᠠᠢ᠃ ᠨᠡᠷᠡᠮᠡᠯ ᠦ᠋ᠨ ᠣᠬᠢ ᠦᠨᠦᠷᠲᠦᠭᠰᠡᠨ ᠰᠢᠪᠠᠷ ᠣᠷᠣᠮᠵᠢ ᠳ᠋ᠤ᠌ ᠬᠠᠷᠪᠸᠻ ᠤ᠋ᠨ ᠰᠢᠷᠠᠳᠠᠭᠰᠠᠨ ᠬᠣᠳᠣᠭᠣᠳᠣ ᠢᠰᠬᠦᠯᠡᠩ ᠳᠠᠷᠠᠰᠤ ᠨᠡᠬᠡᠵᠦ ᠵᠣᠪᠠᠭᠠᠨᠠ᠃ ᠬᠠᠷᠪᠸᠻ ᠨᠥᠮᠥᠷᠴᠦ ᠡᠮᠦᠰᠳᠡᠭ ᠴᠠᠮᠴᠠᠨ ᠳ᠋ᠠᠭᠠᠨ ᠬᠣᠯᠪᠣᠭᠠ ᠭᠠᠷ ᠬᠢᠯᠭᠡᠵᠦ ᠪᠤᠯᠢᠭᠠᠷᠢ ᠪᠠᠷ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠡᠬᠢᠯᠡᠭᠦᠯᠵᠦ ᠳᠠᠰᠬᠠᠯ ᠬᠢᠭᠰᠡᠭᠡᠷ ᠲᠣᠬᠣᠢ ᠠ᠋ᠴᠠ ᠤᠷᠤᠭᠰᠢ ᠲᠠᠰᠤᠳᠠᠭᠤᠯᠤᠭᠰᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠶᠠᠭᠠ ᠲᠠᠢ ᠪᠠᠨ ᠪᠠᠷᠢᠬᠤ ᠠ᠋ᠴᠠ ᠭᠠᠳᠠᠨᠠ ᠵᠢᠳᠠ ᠪᠠᠷ ᠬᠠᠳᠬᠤᠳᠠᠭ ᠪᠣᠯᠵᠠᠢ᠃
ᠰᠢᠪᠡᠷ ᠣᠷᠣᠮᠵᠢ ᠵᠢᠵᠢᠭ ᠲᠣᠣᠷ ᠤ᠋ᠨ ᠴᠣᠩᠬᠣ ᠲᠠᠢ ᠪᠠᠢᠪᠠ᠃ ᠣᠢᠷᠠᠯᠴᠠᠭᠠᠬᠢ ᠲᠣᠰᠬᠣᠳ ᠠ᠋ᠴᠠ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠳ ᠬᠣᠭᠣᠯᠠ ᠵᠥᠭᠡᠭᠡᠨᠡ᠃ ᠠᠩ ᠤ᠋ᠨ ᠴᠢᠨᠠᠭᠰᠠᠨ ᠮᠢᠬᠠ ᠰᠦ ᠪᠡᠷ ᠬᠣᠭᠣᠯᠠᠯᠠᠳᠠᠭ ᠬᠠᠷᠪᠸᠺ ᠰᠡᠭᠦᠯ ᠳ᠋ᠡᠭᠡᠨ ᠰᠠᠷᠬᠤᠳ ᠵᠣᠭᠣᠭᠯᠠᠬᠤ ᠪᠣᠯᠵᠠᠢ᠃ ᠰᠠᠷᠬᠤᠳ ᠤ᠋ᠨ ᠠᠭᠠᠭ ᠲᠤ᠌ ᠬᠠᠯᠠᠮᠴᠠᠭᠠᠳ ᠢᠷᠡᠬᠦ ᠪᠡᠷ ᠢ᠋ᠶ᠋ᠡᠨ ᠬᠠᠷᠪᠸᠺ᠂
— ᠪᠢ ᠴᠢᠨᠢ ᠮᠣᠩᠭᠣᠯ ᠬᠥᠮᠦᠨ ᠰᠢᠦ ᠳᠡ᠃ ᠨᠠᠮᠠᠶ᠋ᠢ ᠮᠣᠩᠭᠣᠯ ᠴᠢᠰᠤ ᠲᠠᠢ ᠭᠡᠳᠡᠭ ᠶᠤᠮ᠃ ᠣᠢᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠳ ᠲᠡᠢ ᠤᠳᠠᠭᠠᠨ ᠵᠢᠯ ᠪᠠᠢᠯᠳᠤᠯᠠ᠃ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠬᠠᠲᠤᠨ ᠶᠠᠮᠠᠷ ᠡᠷᠡᠮᠡᠬᠡᠢ ᠪᠣᠢ᠂ ᠲᠡᠷᠡ ᠬᠠᠲᠤᠨ ᠢ᠋ ᠪᠢ ᠣᠯᠵᠠᠯᠠᠵᠤ ᠥᠪᠡᠷ ᠦ᠋ᠨ ᠪᠣᠯᠭᠠᠮᠠᠷ ᠪᠠᠢᠨᠠ᠃ᠲᠠᠨᠤᠰ ᠲᠤᠰᠠᠯᠠᠭᠠᠳ ᠥᠭᠭᠦᠭᠡᠴᠢ ᠭᠡᠮᠡᠨ ᠡᠯᠳᠡᠪ ᠢ᠋ ᠥᠭᠦᠯᠡᠨᠡ᠃
ᠬᠠᠷᠪᠸᠺ ᠬᠠᠮᠢᠭᠠ ᠨᠢᠭᠤᠭᠳᠠᠵᠤ ᠪᠠᠢᠭᠠ ᠶ᠋ᠢ ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠣᠢᠷᠠᠳ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠬᠢᠨ ᠲᠠᠩᠨᠠᠭᠰᠠᠭᠠᠷ ᠪᠠᠢᠵᠠᠢ᠃ ᠬᠠᠯᠠᠮᠴᠠᠭᠤ ᠦᠶᠡ ᠳ᠋ᠡᠭᠡᠨ ᠬᠠᠷᠪᠸᠺ ᠶᠡᠬᠡᠳᠡ ᠲᠠᠢᠳᠬᠤᠷᠠᠭᠰᠠᠨ ᠪᠠᠢᠳᠠᠭ᠃
— ᠡᠴᠢᠭᠡ ᠶ᠋ᠢᠨ ᠥᠰᠢᠶᠡ ᠶ᠋ᠢ ᠪᠢ ᠠᠪᠤᠭᠰᠠᠨ᠃ᠨᠠᠮᠠᠶ᠋ᠢ ᠠᠳᠤᠭᠤᠰᠤ ᠪᠣᠯᠭᠠᠯᠠ᠃ ᠪᠢ ᠠᠳᠤᠭᠤᠰᠤ ᠪᠣᠯᠤᠮᠠᠷ ᠦᠭᠡᠢ ᠪᠠᠢᠨᠠ᠃ ᠪᠢ ᠠᠷᠢᠶᠠᠲᠠᠨ ᠪᠠᠢᠮᠠᠷ ᠪᠠᠢᠨᠠ᠃ ᠮᠣᠩᠭᠣᠯᠴᠤᠳ ᠤ᠋ᠨ ᠳᠤᠮᠳᠠ ᠥᠪᠡᠷ ᠦ᠋ᠨ ᠬᠥᠮᠦᠨ ᠲᠡᠢ ᠪᠠᠢᠵᠤ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠶᠡᠬᠡ ᠬᠦᠷᠢᠶᠡ ᠶ᠋ᠢ ᠡᠵᠡᠯᠡᠪᠡᠯ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠬᠠᠭᠠᠨ ᠤ᠋ ᠬᠠᠲᠤᠨ ᠢ᠋ ᠠᠪᠤᠨᠠ᠃ᠨᠠᠮᠠᠶ᠋ᠢ ᠶᠠᠮᠠᠷ ᠲᠦᠷᠢᠮᠡᠬᠡᠢ᠂ ᠬᠦᠴᠦ ᠲᠡᠢ ᠪᠣᠯᠬᠤ ᠶ᠋ᠢ ᠲᠡᠷᠡ ᠳᠠᠢᠴᠢᠨ ᠬᠠᠲᠤᠨ ᠳ᠋ᠤ᠌ ᠮᠡᠳᠡᠷᠡᠭᠦᠯᠬᠦ ᠶᠤᠮᠰᠠᠨ ᠭᠡᠮᠡᠨ ᠬᠠᠷᠪᠸᠺ ᠡᠬᠢ ᠠᠳᠠᠭ ᠦᠭᠡᠢ ᠬᠠᠰᠬᠢᠷᠤᠨᠠ᠃
— ᠪᠸᠺ ᠲᠠ ᠲᠠᠢᠪᠤᠩ ᠪᠠᠢᠭᠲᠤᠨ᠃ᠲᠣᠰᠬᠣᠨ ᠤ᠋ ᠳᠣᠲᠣᠷᠠ ᠡᠯᠵᠢᠭᠡ ᠬᠥᠲᠥᠯᠦᠭᠰᠡᠨ ᠨᠡᠭᠦᠳᠡᠯᠴᠢᠳ ᠴᠤᠪᠤᠵᠤ ᠶᠠᠪᠤᠨᠠ᠃ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠳᠣᠮᠣᠭᠲᠤ ᠮᠣᠩᠭᠣᠯᠴᠤᠳ ᠣᠷᠣᠭᠠᠳ ᠢᠷᠡᠭᠰᠡᠨ ᠪᠠᠢᠵᠤ ᠮᠡᠳᠡᠨᠡ ᠰᠢᠦ᠃ ᠣᠢᠷᠠᠳ ᠤ᠋ᠨ ᠴᠡᠷᠢᠭ ᠮᠠᠨᠵᠤ ᠲᠠᠢ ᠲᠤᠯᠤᠯᠳᠤᠬᠤ ᠪᠠᠷ ᠶᠠᠪᠤᠵᠤ ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠳᠠᠢᠴᠢᠳ ᠨᠤᠲᠤᠭ ᠤᠷᠤᠭᠤ ᠪᠠᠨ ᠣᠳᠤᠭᠰᠠᠨ᠃ᠮᠣᠩᠭᠣᠯᠴᠤᠳ ᠡᠷᠭᠢᠭᠡᠳ ᠢᠷᠡᠨᠡ᠃ ᠲᠠᠨ ᠤ᠋ ᠬᠦᠴᠦ ᠪᠥᠭᠡᠮᠨᠡᠷᠡᠵᠦ ᠭᠦᠢᠴᠡᠭᠡ ᠦᠭᠡᠢ ᠲᠤᠯᠠ ᠨᠢᠭᠤᠭᠳᠠᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠪᠦᠯᠵᠢᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠭᠡᠷ ᠦ᠋ᠨ ᠡᠵᠡᠨ ᠤᠷᠲᠤ ᠰᠠᠬᠠᠯᠲᠤ ᠶ᠋ᠢ ᠥᠴᠢᠬᠦ ᠳ᠋ᠦ᠍ ᠬᠠᠷᠪᠸᠺ ᠮᠤᠬᠤᠷᠳᠠᠪᠠ᠃
ᠲᠡᠮᠦᠷ ᠢ᠋ᠶ᠋ᠡᠷ ᠭᠢᠨᠵᠢᠯᠡᠵᠦ ᠤᠷᠲᠤ ᠮᠣᠳᠣ ᠪᠠᠷ ᠴᠦᠯᠡᠭᠰᠡᠨ ᠮᠣᠳᠣᠨ ᠬᠠᠭᠠᠯᠭᠠᠨ ᠤ᠋ ᠥᠭᠢᠷᠡᠵᠦ ᠮᠠᠭᠤᠳᠠᠭᠰᠠᠨ ᠳᠠᠯᠠᠪᠴᠢ ᠰᠠᠯᠬᠢᠨ ᠳ᠋ᠤ᠌ ᠰᠡᠨᠵᠢᠭᠢᠨᠡᠨ ᠳᠤᠤᠭᠠᠷᠬᠤ ᠳ᠋ᠤ᠌ ᠬᠠᠷᠪᠸᠺ ᠬᠠᠷᠠ ᠴᠣᠬᠢᠵᠤ ᠤᠷᠲᠤ ᠰᠠᠬᠠᠯᠲᠤ ᠳ᠋ᠤ᠌᠂
— ᠬᠠᠭᠠᠯᠭᠠᠨ ᠤ᠋ ᠪᠠᠨ ᠳᠠᠯᠠᠪᠴᠢ ᠶ᠋ᠢ ᠰᠣᠯᠢ ᠭᠡᠵᠦ ᠣᠮᠣᠭᠳᠠᠪᠠ᠃ ᠬᠠᠷᠪᠸᠺ ᠲᠠᠢ ᠴᠣᠭ ᠠᠭᠤᠯᠠ ᠪᠠᠷ ᠭᠡᠷᠦᠨ ᠬᠡᠰᠦᠭᠦᠴᠢᠯᠡᠵᠦ ᠲᠣᠷᠭᠠᠨ ᠤ᠋ ᠵᠠᠮ ᠳᠠᠭᠠᠤ ᠳᠡᠭᠡᠷᠡᠮ ᠲᠣᠨᠣᠭᠤᠯ ᠬᠢᠵᠦ᠂ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠲᠤ᠌ ᠤᠤᠯᠭᠠᠯᠠᠨ ᠳᠠᠭᠠᠷᠢᠳᠠᠭ ᠮᠢᠩᠭᠠᠲᠤ ᠶ᠋ᠢᠨ ᠵᠠᠷᠢᠮ ᠨᠢ ᠣᠷᠣᠬᠤ ᠣᠷᠣᠨ ᠦᠭᠡᠢ ᠪᠢᠯᠡ᠃ ᠲᠡᠳᠡ ᠬᠡᠰᠡᠭ ᠪᠤᠰᠠᠭ ᠢ᠋ᠶ᠋ᠠᠷ ᠰᠠᠷᠢ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠦ᠌ ᠲᠣᠰᠬᠣᠳ ᠢ᠋ ᠲᠣᠨᠣᠵᠤ ᠲᠤᠢᠯᠳᠠᠭᠰᠠᠨ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠥᠮᠦᠰ ᠢ᠋ ᠠᠶᠤᠯᠭᠠᠨᠠ᠃
ᠬᠠᠷᠪᠸᠺ ᠤ᠋ᠨ ᠨᠢᠳᠦ ᠨᠢ ᠨᠣᠭᠣᠭᠠᠨ᠂ ᠤᠯᠠᠭᠠᠨ ᠬᠦᠷᠡᠩ ᠰᠠᠬᠠᠯ ᠨᠢ ᠴᠠᠭᠠᠨ ᠰᠤᠷ ᠲᠠᠢ ᠪᠣᠯᠵᠤ ᠲᠣᠯᠣᠭᠠᠢ ᠪᠠᠨ ᠳᠠᠪᠤᠤ ᠪᠠᠷ ᠪᠢᠲᠡᠭᠦᠯᠡᠵᠦ ᠣᠷᠢᠶᠠᠨᠠ᠃ ᠵᠤᠵᠠᠭᠠᠨ ᠮᠣᠳᠣᠨ ᠲᠠᠪᠴᠠᠩ ᠲᠠᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠸᠠᠭᠠᠷ ᠲᠠᠢ ᠨᠡᠷᠡᠮᠡᠯ ᠲᠠᠯᠪᠢᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠬᠠᠷᠠ ᠬᠥᠯᠥᠰᠥ ᠴᠢᠳᠬᠤᠨᠠ᠃ ᠨᠡᠷᠡᠮᠡᠯ ᠢ᠋ ᠦᠬᠡᠷ ᠦ᠋ᠨ ᠡᠪᠡᠷ ᠲᠣᠨᠣᠭᠯᠠᠵᠤ᠂ ᠠᠮᠠᠰᠠᠷ ᠢ᠋ ᠵᠡᠰ ᠢ᠋ᠶ᠋ᠡᠷ ᠪᠦᠷᠢᠭᠰᠡᠨ ᠤᠷᠲᠤ ᠮᠤᠰᠬᠢᠶᠡ ᠡᠪᠡᠷ ᠠᠶᠠᠭᠠᠨ ᠳ᠋ᠤ᠌ ᠳᠦᠭᠦᠷᠭᠡᠵᠦ ᠤᠷᠲᠤ ᠰᠠᠬᠠᠯᠲᠤ ᠨᠢ ᠬᠠᠷᠪᠸᠺ ᠲᠤ᠌ ᠪᠠᠷᠢᠪᠠ᠃ ᠲᠡᠷᠡ ᠳᠠᠢᠴᠢᠨ ᠡᠷᠡ ᠦᠬᠡᠷ ᠦ᠋ᠨ ᠡᠪᠡᠷ ᠠᠶᠠᠭᠠᠨ ᠳ᠋ᠤ᠌ ᠶᠡᠭᠦᠯᠡᠭᠰᠡᠨ ᠰᠠᠷᠬᠤᠳ ᠢ᠋ ᠭᠠᠭᠴᠠ ᠠᠮᠢᠰᠬᠤᠭᠠ ᠪᠠᠷ ᠬᠥᠨᠲᠥᠷᠪᠡ᠃
ᠰᠤᠯᠲᠠᠨ ᠤ᠋ ᠰᠢᠯᠲᠦᠭᠡᠨ ᠳ᠋ᠦ᠍ ᠲᠤᠬᠠᠯᠠᠬᠤ ᠳᠤᠷᠠ ᠦᠭᠡᠢ ᠬᠠᠷᠪᠸᠻ ᠡᠩ ᠦ᠋ᠨ ᠬᠣᠲᠠ ᠲᠣᠰᠬᠣᠨ ᠢ᠋ᠶ᠋ᠠᠷ ᠬᠡᠰᠦᠭᠦᠴᠢᠯᠡᠨ ᠲᠡᠨᠦᠵᠦ᠂ ᠤᠢᠳᠤᠭᠰᠠᠨ ᠦᠶᠡ ᠳ᠋ᠡᠭᠡᠨ ᠳᠤᠮᠳᠠᠳᠤ ᠠᠽᠢᠶᠠ ᠳᠠᠶᠠᠭᠠᠷ《 ᠭᠠᠯᠳᠠᠨ ᠬᠠᠭᠠᠨ ᠤ᠋ ᠬᠠᠲᠤᠨ ᠠᠨᠤ ᠬᠡᠮᠡᠬᠦ ᠦᠵᠡᠰᠬᠦᠯᠡᠩ ᠲᠡᠭᠦᠯᠳᠡᠷ᠂ ᠪᠠᠭᠠᠲᠤᠷᠯᠢᠭ ᠡᠮᠡᠭᠲᠡᠢ ᠪᠠᠢᠨᠠ᠃ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢᠨ ᠳᠠᠢᠴᠢᠨ ᠲᠥᠷᠬᠦ ᠪᠠᠢᠳᠠᠯ᠂ ᠰᠡᠯᠡᠮᠡ ᠶ᠋ᠢᠨ ᠡᠷᠳᠡᠮ ᠴᠢᠳᠠᠯ ᠭᠠᠢᠬᠠᠮᠰᠢᠭᠲᠠᠢ》 ᠭᠡᠮᠡᠨ ᠴᠤᠤ ᠲᠠᠷᠬᠠᠭᠠᠪᠠ᠃ ᠮᠥᠨ ᠬᠠᠰᠠᠭ ᠤ᠋ᠨ ᠰᠤᠯᠲᠠᠨ ᠨᠣᠶᠠᠨ ᠲᠡᠭᠦᠨ ᠦ᠌ ᠦᠭᠡᠨ ᠳ᠋ᠦ᠍ ᠢᠲᠡᠭᠡᠵᠦ ᠠᠨᠤ ᠬᠠᠲᠤᠨ ᠢ᠋ ᠨᠢᠳᠦ ᠪᠡᠷ ᠬᠠᠷᠠᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠯᠠ᠃
ᠬᠠᠷᠪᠸᠻ ᠢ᠋ ᠬᠥᠯᠴᠥᠭᠦᠦ ᠪᠠᠢᠬᠤ ᠳ᠋ᠤ᠌ ᠰᠢᠯᠲᠦᠭᠡᠨ ᠳ᠋ᠦ᠍ ᠠᠪᠠᠴᠢᠪᠠ᠃
— ᠠᠨᠤ ᠬᠠᠲᠤᠨ ᠶᠠᠮᠠᠷᠰᠢᠤ ᠪᠦᠰᠡᠭᠦᠢ ᠪᠠᠢᠭᠰᠠᠨ ᠢ᠋ ᠬᠡᠯᠡᠭᠡᠳ ᠥᠭ᠃ ᠲᠡᠷᠡ ᠬᠠᠲᠤᠨ ᠤ᠋ ᠦᠵᠡᠰᠬᠦᠯᠡᠩ ᠶᠠᠮᠠᠷ ᠪᠣᠢ? ᠭᠡᠮᠡᠨ ᠰᠤᠯᠲᠠᠨ ᠰᠢᠯᠣᠩᠬᠡᠢᠳᠡᠪᠡ᠃ ᠬᠠᠷᠪᠸᠻ ᠨᠢᠳᠦ ᠪᠡᠨ ᠠᠨᠢᠵᠤ᠂
— ᠮᠣᠷᠢᠨ ᠳᠡᠭᠡᠷᠡ ᠤᠷᠭᠤᠭᠰᠠᠨ ᠬᠤᠰᠤ ᠯᠤᠭᠠ ᠤᠷᠠᠨ ᠨᠠᠯᠠᠷᠬᠠᠢ ᠪᠡᠶᠡ ᠲᠡᠢ᠂ ᠬᠥᠳᠡᠯᠭᠡᠭᠡᠨ ᠡᠪᠰᠡᠯ ᠨᠢ ᠨᠠᠭᠤᠷ ᠤ᠋ᠨ ᠳᠣᠯᠭᠢᠶᠠᠨ ᠮᠡᠲᠦ ᠨᠠᠮᠢᠯᠵᠠᠭᠠ ᠲᠠᠢ᠂ ᠳᠠᠭᠤ ᠬᠣᠭᠣᠯᠠᠢ ᠨᠢ ᠵᠢᠮᠪᠦᠷ ᠦ᠋ᠨ ᠡᠭᠡᠰᠢᠭ ᠯᠦ᠍ᠭᠡ ᠠᠳᠠᠯᠢ ᠤᠶᠠᠩᠭᠠᠯᠢᠭ ᠪᠦᠰᠡᠭᠦᠢ ᠪᠠᠢᠭᠰᠠᠨ᠃ ᠲᠡᠷᠡ ᠠᠨᠤ ᠬᠠᠲᠤᠨ ᠮᠣᠷᠢᠨ ᠳᠡᠭᠡᠷᠡ ᠪᠥᠵᠢᠭᠯᠡᠬᠦ ᠮᠡᠲᠦ ᠰᠡᠯᠡᠮᠡᠳᠡᠨᠡ᠃ ᠣᠨᠴᠠ ᠭᠠᠷᠮᠠᠭᠠᠢ ᠪᠠᠭᠠᠲᠤᠷ ᠶᠤᠮ ᠪᠢᠯᠡ ᠭᠡᠮᠡᠨ ᠳᠦᠷᠰᠦᠯᠡᠵᠦ ᠶᠠᠳᠠᠨ ᠥᠭᠦᠯᠡᠪᠡ᠃
— ᠬᠠᠷᠪᠸᠻ ᠴᠢᠮᠠᠶ᠋ᠢ ᠠᠯᠠᠬᠤ ᠪᠠᠷ ᠮᠥᠷᠳᠡᠵᠦ ᠪᠠᠢᠭᠠ ᠰᠤᠷᠠᠭ ᠭᠠᠷᠪᠠ᠃ ᠬᠣᠲᠠ ᠲᠣᠰᠬᠣᠨ ᠢ᠋ᠶ᠋ᠠᠷ ᠲᠡᠨᠦᠭᠦᠴᠢᠯᠡᠵᠦ ᠶᠠᠪᠤᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠰᠢᠯᠲᠦᠭᠡᠨ ᠳ᠋ᠦ᠍ ᠵᠠᠯᠠᠷᠠᠵᠤ ᠰᠠᠭᠤᠬᠤ ᠶ᠋ᠢ ᠴᠢᠮᠠ ᠳ᠋ᠤ᠌ ᠲᠤᠰᠢᠶᠠᠨᠠ᠃ ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠣᠢᠷᠠᠳ ᠤ᠋ᠳ ᠶᠠᠮᠠᠷ ᠣᠮᠣᠭᠯᠠᠩ ᠪᠢᠯᠡ᠃ ᠬᠢᠯᠢ ᠬᠠᠢᠴᠢ ᠪᠠᠷ ᠵᠠᠯᠭᠠᠯᠳᠤᠭᠰᠠᠨ ᠣᠢᠷᠠᠳ ᠤ᠋ᠳ ᠳᠣᠪᠲᠣᠯᠤᠨ ᠢᠷᠡᠪᠡᠯ ᠶᠠᠭᠠᠬᠢᠬᠤ ᠪᠢᠯᠡ? ᠭᠡᠮᠡᠨ ᠰᠤᠯᠲᠠᠨ ᠵᠠᠷᠯᠢᠭᠳᠠᠪᠠ᠃ ᠬᠠᠷᠪᠸᠻ ᠶᠣᠣᠵᠠ ᠦᠭᠡᠢ ᠢᠨᠢᠶᠡᠵᠦ᠂
— ᠬᠠᠲᠤᠨ ᠠᠪᠠᠬᠠᠢ ᠵᠢᠷᠦᠬᠡᠨ ᠳ᠋ᠦ᠍ ᠣᠷᠣᠴᠢᠬᠠᠯᠠ ᠭᠡᠵᠦ ᠴᠡᠭᠡᠵᠢ ᠪᠡᠨ ᠳᠠᠷᠤᠪᠠ᠃
— ᠠᠨᠤ ᠬᠠᠲᠤᠨ ᠪᠣᠯ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠤ᠋ ᠵᠢᠩᠳᠠᠭᠠᠨ ᠳ᠋ᠤ᠌ ᠴᠡᠯ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠣᠴᠢᠭᠰᠠᠨ ᠳᠣᠮᠣᠭ ᠰᠢᠭ᠋ ᠪᠦᠰᠡᠭᠦᠢ᠃ ᠲᠡᠢᠮᠦ ᠵᠠᠷ ᠲᠤ᠌ ᠭᠠᠷᠤᠭᠰᠠᠨ ᠪᠦᠰᠡᠭᠦᠢ ᠳ᠋ᠦ᠍ ᠭᠠᠷ ᠢ᠋ᠶ᠋ᠠᠨ ᠲᠠᠰᠤᠯᠤᠭᠤᠯᠤᠯᠠ᠃ ᠴᠢᠨᠦ ᠪᠤᠵᠠᠷ ᠭᠠᠷ ᠡᠳᠦᠢ ᠳ᠋ᠦ᠍ ᠥᠳᠥ ᠶ᠋ᠢᠨ ᠬᠣᠭᠣᠯᠠ ᠪᠣᠯᠤᠭᠰᠠᠨ᠃ ᠳᠠᠷᠠᠰᠤ ᠵᠣᠭᠣᠭᠯᠠᠬᠤ ᠪᠠᠨ ᠪᠣᠯᠢᠵᠤ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠤ᠋ ᠡᠷᠬᠡ ᠶᠠᠩᠪᠠ ᠶ᠋ᠢ ᠡᠳ᠋ᠯᠡᠵᠦ ᠰᠠᠭᠤᠬᠤ ᠶ᠋ᠢ ᠬᠠᠷᠪᠸᠻ ᠲᠤ᠌ ᠲᠤᠰᠢᠶᠠᠨᠠ ᠭᠡᠵᠦ ᠰᠤᠯᠲᠠᠨ ᠬᠡᠯᠡᠪᠡ᠃ ᠬᠠᠷᠪᠸᠻ ᠪᠣᠯ ᠵᠠᠷ ᠲᠠᠢ ᠳᠡᠭᠡᠷᠡᠮᠴᠢᠨ ᠲᠡᠳᠦᠢ ᠦᠭᠡᠢ ᠬᠠᠰᠠᠭ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠶᠤᠮ᠃
— ᠴᠢ ᠦᠬᠦᠵᠦ ᠦᠯᠦ ᠪᠣᠯᠤᠨᠠ᠂ ᠴᠢᠨᠦ ᠦᠬᠦᠯ ᠢ᠋ ᠪᠢ ᠴᠠᠭᠠᠵᠠ ᠪᠠᠷ ᠬᠣᠷᠢᠪᠠ᠃ ᠬᠠᠷᠪᠸᠻ ᠢ᠋ ᠦᠬᠦᠭᠰᠡᠨ ᠪᠠᠢᠪᠠᠯ ᠨᠢᠭᠤᠬᠤ ᠬᠡᠷᠡᠭᠲᠡᠢ᠃ ᠮᠠᠨ ᠤ᠋ ᠬᠠᠰᠠᠭ ᠤ᠋ᠳ ᠴᠢᠮᠠᠶ᠋ᠢ ᠥᠨᠳᠥᠷ ᠦᠨᠡᠯᠡᠳᠡᠭ᠃
— ᠳᠠᠷᠠᠰᠤ ᠨᠡᠷᠡᠳᠡᠭ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠳ ᠲᠤ᠌ ᠪᠢ ᠣᠷᠣᠩᠨᠠᠮᠠᠷ ᠪᠠᠢᠨᠠ᠃ ᠤᠯᠠᠭᠠᠨ ᠪᠤᠭᠤᠳᠠᠢ ᠶ᠋ᠢᠨ ᠲᠠᠷᠢᠶᠠᠯᠠᠩ ᠢ᠋ ᠨᠠᠳᠠᠳᠤ ᠬᠠᠷᠢᠭᠤᠴᠠᠭᠤᠯᠪᠠᠯ ᠲᠠᠯᠠᠷᠬᠠᠨᠠ᠃
— ᠬᠦᠴᠦᠲᠦ ᠬᠠᠷᠪᠸᠻ ᠵᠠᠩᠵᠤᠨ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠤ᠋ ᠬᠠᠲᠤᠨ ᠳ᠋ᠤ᠌ ᠵᠢᠷᠦᠬᠡ ᠪᠡᠨ ᠥᠭᠴᠡᠢ᠃ ᠵᠢᠷᠦᠬᠡ ᠪᠡᠨ ᠪᠤᠴᠠᠭᠠᠵᠤ ᠠᠪ᠃ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠲᠠᠯᠠ ᠨᠤᠲᠤᠭ᠂ ᠠᠭᠤᠯᠠᠷᠬᠠᠭ ᠥᠨᠳᠥᠷᠯᠢᠭ ᠲᠦ᠍ ᠴᠢᠮᠠ ᠳ᠋ᠤ᠌ ᠲᠣᠬᠢᠷᠠᠬᠤ ᠪᠦᠰᠡᠭᠦᠢ ᠵᠥᠩᠳᠡᠭᠡᠨ ᠪᠣᠢ᠃ ᠲᠡᠨᠳᠡ ᠡᠴᠡ ᠨᠢᠭᠡ ᠶ᠋ᠢ ᠠᠪᠴᠢᠷᠠᠵᠤ ᠴᠢᠨᠦ ᠡᠪᠦᠷ ᠲᠦ᠍ ᠬᠢᠶᠡ᠃ ᠴᠢ ᠭᠠᠷ ᠦᠭᠡᠢ ᠪᠤᠰᠤ ᠤᠤ? ᠴᠢᠮᠠ ᠳ᠋ᠤ᠌ ᠭᠠᠷ ᠬᠡᠷᠡᠭᠲᠡᠢ᠃
— ᠰᠤᠯᠲᠠᠨ ᠬᠠᠭᠠᠨ ᠲᠠ ᠥᠷᠥᠰᠢᠶᠡ! ᠲᠠᠪᠤᠨ ᠨᠠᠰᠤ ᠲᠠᠢ ᠳ᠋ᠠᠭᠠᠨ ᠬᠥᠪᠴᠢ ᠪᠡᠨ ᠲᠠᠰᠤᠯᠤᠭᠤᠯᠵᠤ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠨ ᠳ᠋ᠠᠭᠠᠨ ᠠᠢᠯ ᠤ᠋ᠨ ᠡᠬᠡᠨᠡᠷ ᠢ᠋ ᠴᠢᠰᠤ ᠠᠯᠳᠠᠭᠤᠯᠵᠤ ᠶᠠᠪᠤᠭᠰᠠᠨ᠃ ᠨᠠᠳᠠᠳᠤ ᠲᠠᠭᠠᠷᠠᠬᠤ ᠡᠬᠡᠨᠡᠷ ᠳᠤᠮᠳᠠᠳᠤ ᠠᠽᠢᠶᠠ ᠳ᠋ᠤ᠌ ᠪᠠᠢᠬᠤ ᠦᠭᠡᠢ ᠰᠢᠦ᠃ ᠠᠯᠯᠠᠾ ᠲᠩᠷᠢ ᠮᠡᠳᠡᠨᠡ᠃
— ᠬᠥᠯᠴᠥᠭᠦᠦ ᠬᠠᠷᠪᠸᠺ ᠴᠢ ᠪᠤᠤ ᠲᠣᠩᠭᠣᠰ᠃ ᠴᠢᠨᠦ ᠰᠠᠯᠲᠠᠭᠠᠨ ᠤ᠋ ᠶᠠᠭᠤᠮᠠ ᠠᠮᠠᠨ ᠳ᠋ᠠᠭᠠᠨ ᠣᠷᠣᠬᠤ ᠪᠣᠯᠤᠭᠠ ᠦᠭᠡᠢ᠃ ᠲᠣᠮᠣ ᠡᠷᠬᠡᠲᠡᠨ ᠬᠦᠰᠡᠳᠡᠭ ᠬᠡᠦᠬᠡᠨ ᠨᠦ᠍ᠭᠦᠳ ᠵᠥᠩᠳᠡᠭᠡᠨ ᠪᠤᠰᠤ ᠤᠤ?
— ᠰᠤᠯᠲᠠᠨ ᠮᠢᠨᠢ ᠪᠢ ᠳᠡᠷᠡᠰᠦᠨ ᠦ᠌ ᠦᠨᠦᠷ ᠲᠦ᠍ ᠣᠢᠷᠠᠬᠠᠨ ᠪᠠᠢᠮᠠᠷ ᠪᠠᠢᠨᠠ᠃ ᠳᠡᠷᠡᠰᠦᠨ ᠦ᠌ ᠦᠨᠦᠷ ᠬᠡᠦᠬᠡᠨ ᠡᠴᠡ ᠢᠯᠡᠭᠦᠦ ᠢᠯᠳᠠᠮ᠂ ᠢᠯᠡᠭᠦᠦ ᠠᠩᠬᠢᠯᠤᠭᠤᠨ ᠪᠢᠯᠡ᠃
— ᠲᠡᠭᠡᠪᠡᠯ ᠴᠢᠨᠦ ᠵᠢᠷᠦᠬᠡ ᠪᠡᠨ ᠠᠯᠳᠠᠭᠠᠳ ᠪᠠᠢᠭᠠ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠤ᠋ ᠠᠨᠤ ᠬᠠᠲᠤᠨ ᠶᠠᠮᠠᠷ ᠪᠣᠯ᠂᠂᠂᠂
— ᠲᠡᠷᠡ ᠬᠠᠲᠤᠨ ᠲᠩᠷᠢ ᠡᠴᠡ ᠵᠠᠯᠠᠷᠠᠭᠰᠠᠨ ᠪᠢᠵᠡ᠃ ᠲᠡᠭᠦᠨ ᠦ᠌ ᠪᠠᠷᠠ ᠶ᠋ᠢ ᠬᠠᠷᠠᠬᠤ ᠦᠭᠡᠢ ᠪᠣᠯ ᠲᠠᠢᠳᠬᠤᠷᠠᠵᠤ ᠴᠢᠳᠠᠰᠢ ᠦᠭᠡᠢ᠃
ᠰᠤᠯᠲᠠᠨ ᠤ᠋ ᠰᠢᠯᠲᠦᠭᠡᠨ ᠢ᠋ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠣᠷᠭᠢᠯ ᠤ᠋ᠨ ᠨᠠᠯᠠᠤ ᠶ᠋ᠢ ᠲᠡᠭᠰᠢᠯᠡᠵᠦ ᠪᠠᠷᠢᠵᠠᠢ᠃ ᠰᠢᠯᠲᠦᠭᠡᠨ ᠦ᠌ ᠨᠢᠭᠡ ᠲᠠᠯᠠ ᠨᠢ ᠠᠭᠤᠯᠠ ᠶ᠋ᠢᠨ ᠬᠠᠳᠠᠨ ᠳ᠋ᠤ᠌ ᠰᠢᠭᠢᠳᠦᠭᠰᠡᠨ ᠪᠠᠢᠪᠠ᠃ ᠰᠢᠯᠲᠦᠭᠡᠨ ᠳ᠋ᠦ᠍ ᠬᠦᠷᠬᠦ ᠵᠠᠮ ᠨᠢ ᠠᠯᠤᠰ ᠠ᠋ᠴᠠ ᠥᠭᠰᠥᠬᠡᠷ ᠪᠥᠭᠡᠳ ᠬᠡᠳᠦ ᠬᠡᠳᠦᠨ ᠬᠠᠭᠠᠯᠲᠠ ᠬᠠᠰᠢᠯᠲᠠ ᠶ᠋ᠢ ᠣᠩᠭᠣᠢᠯᠭᠠᠵᠤ ᠨᠦᠰᠡᠷ ᠳᠡ ᠮᠸᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠲᠤᠯᠤᠨᠠ᠃ ᠬᠠᠭᠠᠯᠭᠠ ᠣᠩᠭᠣᠢᠬᠤ ᠦᠭᠡᠢ ᠪᠣᠯ ᠣᠷᠣᠬᠤ ᠠᠷᠭᠠ ᠦᠭᠡᠢ ᠪᠢᠯᠡ᠃ ᠲᠡᠷᠡ ᠬᠦ᠌ ᠲᠠᠩᠰᠤᠭ ᠰᠢᠯᠲᠦᠭᠡᠨ ᠳ᠋ᠦ᠍ ᠬᠠᠷᠪᠸᠺ ᠲᠣᠭᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠰᠠᠭᠠᠷ ᠨᠢᠭᠡ ᠪᠦᠦᠳᠡᠭᠡᠷ ᠡᠳᠦᠷ ᠮᠣᠷᠢᠨ ᠤ᠋ ᠬᠤᠷᠳᠤ ᠪᠠᠷ ᠳᠠᠪᠬᠢᠵᠤ ᠣᠳᠴᠠᠢ᠃
ᠠᠷᠪᠠᠨ ᠨᠠᠢ᠍ᠮᠠ
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠶᠡᠬᠡ ᠬᠠᠲᠤᠨ ᠠᠨᠤ ᠶ᠋ᠢᠨ ᠴᠣᠭ ᠵᠢᠪᠬᠤᠭᠠᠯᠢᠭ ᠲᠥᠷᠬᠦ᠂ ᠳᠠᠢᠴᠢᠨ ᠴᠢᠨᠠᠷ ᠠᠯᠯᠠᠾ ᠤ᠋ᠨ ᠦᠨᠡᠨᠴᠢ ᠬᠥᠪᠡᠭᠦᠳ ᠥᠬᠢᠳ ᠦ᠋ᠨ ᠳᠤᠮᠳᠠ ᠠᠯᠢ ᠬᠡᠳᠦᠢᠨᠡᠢ ᠳᠣᠮᠣᠭ ᠪᠣᠯᠤᠭᠰᠠᠨ ᠪᠠᠢᠪᠠ᠃ᠬᠡᠷᠴᠡᠭᠡᠢ ᠬᠠᠷᠪᠸᠺ ᠲᠡᠷᠡ ᠳᠣᠮᠣᠭ ᠢ᠋ ᠤᠯᠠᠮ ᠳᠠᠭᠤᠷᠢᠰᠬᠠᠵᠠᠢ᠃ ᠬᠠᠷᠪᠸᠺ ᠤ᠋ᠨ ᠳᠤᠷᠠᠯᠠᠯ ᠬᠣᠭᠣᠰᠣᠨ ᠮᠥᠷᠲᠡᠭᠡᠨ ᠪᠣᠳᠠᠲᠠᠢ ᠪᠠᠢᠪᠠ᠃ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠣᠢᠷᠠᠳ ᠲᠤ᠌ ᠥᠳᠥ ᠰᠢᠪᠠᠵᠢ ᠶ᠋ᠢᠨ ᠢᠳᠡᠰᠢ ᠪᠣᠯᠭᠠᠭᠰᠠᠨ ᠬᠠᠷᠪᠸᠺ ᠰᠡᠭᠦᠯᠴᠢ ᠶ᠋ᠢᠨ ᠲᠤᠯᠤᠯᠳᠤᠭᠠᠨ ᠠ᠋ᠴᠠ ᠡᠷᠭᠢᠵᠦ ᠢᠷᠡᠭᠰᠡᠨ ᠦ᠌ ᠪᠡᠨ ᠳᠠᠷᠠᠭᠠ ᠬᠥᠯᠴᠥᠭᠦᠷᠡᠬᠦ ᠪᠦᠷᠢ ᠳ᠋ᠡᠭᠡᠨ ᠠᠨᠤ ᠬᠠᠲᠤᠨ ᠢ᠋ ᠮᠠᠭᠲᠠᠨᠠ᠃ ᠠᠨᠤ ᠬᠠᠲᠤᠨ ᠢ᠋ ᠮᠠᠭᠲᠠᠬᠤ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠵᠦᠬᠡᠨᠡ᠃
— ᠠᠨᠤ ᠶ᠋ᠢ ᠪᠢ ᠢᠷᠡᠭᠦᠯ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠳᠠᠭᠤᠳᠠᠨᠠ᠃ ᠲᠡᠮᠦᠷ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠦᠴᠦ ᠶ᠋ᠢ ᠦᠵᠡᠭᠦᠯᠦᠨᠡ᠃ ᠲᠡᠷᠡ ᠨᠠᠳᠠ ᠲᠠᠢ ᠲᠤᠯᠤᠯᠳᠤᠵᠤ ᠦᠬᠦᠨᠡ᠃ ᠦᠬᠦᠳᠡᠯ ᠪᠣᠯᠤᠭᠰᠠᠨ ᠠᠨᠤ ᠬᠠᠲᠤᠨ ᠢ᠋ ᠪᠢ ᠭᠠᠷ ᠳᠡᠭᠡᠷᠡ ᠪᠡᠨ ᠡᠷᠭᠦᠵᠦ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠣᠷᠣᠰᠢᠭᠤᠯᠤᠨᠠ ᠭᠡᠵᠦ ᠬᠠᠷᠪᠸᠺ ᠢ᠋ ᠬᠠᠰᠬᠢᠷᠬᠤ ᠳ᠋ᠤ᠌ ᠬᠥᠯᠴᠥᠭᠦᠦ ᠡᠷᠡᠴᠦᠳ ᠪᠠᠷᠬᠢᠯᠳᠤᠨ᠂
— ᠡᠮᠡ ᠬᠥᠮᠦᠨ ᠢ᠋ ᠳᠣᠯᠣᠭᠠᠨ ᠳ᠋ᠤ᠌ ᠳᠠᠭᠤᠳᠠᠨᠠ ᠭᠡᠨᠡ᠃ ᠢᠴᠢᠬᠦ ᠨᠢᠭᠤᠷ ᠪᠠᠢᠨᠠ ᠤᠤ? ᠦᠬᠦᠭᠰᠡᠨ ᠬᠣᠢᠨᠠ ᠨᠢ ᠲᠡᠪᠡᠷᠢᠵᠦ ᠢᠨᠠᠭᠯᠠᠬᠤ ᠶᠤᠮ ᠤᠤ? ᠬᠠᠷᠪᠸᠺ ᠪᠠᠭᠠᠲᠤᠷ ᠰᠠᠷᠬᠤᠳ ᠤ᠋ᠨ ᠠᠭᠠᠭ ᠲᠤ᠌ ᠰᠣᠯᠢᠶᠠᠷᠠᠵᠠᠢ᠃ ᠦᠬᠡᠷ ᠦ᠋ᠨ ᠡᠪᠡᠷ ᠲᠦ᠍ ᠳᠦᠭᠦᠷᠭᠡᠭᠡᠳ ᠨᠠᠭᠠᠳᠤᠬᠢ ᠳ᠋ᠠᠭᠠᠨ ᠴᠢᠳᠬᠤ᠃ ᠴᠢᠳᠬᠤᠭᠠᠳ ᠪᠠᠢ᠃ ᠨᠠᠭᠠᠳᠤ ᠳᠦᠭᠦᠷᠳᠡᠭ ᠦᠭᠡᠢ ᠲᠣᠷᠬᠠ ᠪᠠᠨ ᠳᠦᠭᠦᠷᠭᠡᠭᠡᠳ ᠣᠷᠭᠢ᠃ ᠢᠰᠦᠭᠡᠳ ᠬᠡᠪᠲᠡᠵᠦ ᠪᠠᠢᠭ᠃ ᠦᠬᠦᠪᠡᠯ ᠦᠬᠦᠭ ᠭᠡᠬᠦᠵᠡᠭᠡᠪᠡ᠃ᠬᠠᠷᠪᠸᠺ ᠰᠡᠯᠡᠮᠡ ᠪᠡᠨ ᠰᠤᠭᠤ ᠲᠠᠲᠠᠵᠤ ᠬᠠᠰᠬᠢᠷᠤᠨ᠂
— ᠴᠠᠪᠴᠢᠵᠤ ᠣᠷᠬᠢᠨᠠ ᠰᠢᠦ᠃ ᠰᠢᠪᠡᠷ ᠬᠡᠷᠡᠮ ᠦ᠋ᠨ ᠢᠷᠣᠭᠠᠯ ᠳ᠋ᠤ᠌ ᠪᠤᠯᠠᠴᠢᠬᠠᠬᠤ ᠳ᠋ᠤ᠌ ᠬᠡᠨ ᠮᠡᠳᠡᠳᠡᠭ ᠶᠤᠮ ᠭᠡᠪᠡ᠃ ᠪᠠᠷᠬᠢᠷᠠᠯᠳᠤᠵᠤ ᠪᠠᠢᠭᠰᠠᠨ ᠡᠷᠡᠴᠦᠦᠯ ᠳᠠᠭᠤ ᠪᠠᠨ ᠬᠤᠷᠢᠶᠠᠵᠤ ᠬᠡᠷᠴᠡᠭᠡᠢ ᠬᠠᠷᠪᠸᠺ ᠤ᠋ᠨ ᠨᠣᠭᠣᠭᠠᠨ ᠨᠢᠳᠦᠨ ᠳ᠋ᠦ᠍ ᠣᠯᠵᠠᠯᠠᠭᠳᠠᠪᠠ᠃ ᠤᠯᠠᠭᠠᠨ ᠪᠤᠭᠤᠳᠠᠢ ᠶ᠋ᠢᠨ ᠲᠠᠯᠠᠪᠠᠢ ᠠ᠋ᠴᠠ ᠡᠬᠡᠭᠦᠨ ᠦᠨᠦᠷ ᠰᠡᠩᠭᠢᠨᠡᠨᠡ᠃ ᠭᠣᠣᠯ ᠤ᠋ᠨ ᠬᠣᠢᠲᠤ ᠤᠷᠢᠳᠤ ᠬᠠᠪᠴᠢᠯ ᠳ᠋ᠤ᠌ ᠠᠳᠤᠭᠤ ᠳᠣᠷᠭᠢᠨᠠ᠃ ᠵᠡᠷᠭᠡᠯᠡᠳᠡᠭᠡᠬᠢ ᠪᠠᠢᠰᠢᠩ ᠳ᠋ᠤ᠌ ᠮᠣᠳᠣᠨ ᠲᠣᠷᠬᠠᠨ ᠳ᠋ᠤ᠌ ᠪᠤᠭᠤᠳᠠᠢ ᠢᠰᠬᠡᠵᠦ ᠪᠦᠯᠢᠬᠦ ᠨᠢ ᠰᠣᠨᠣᠰᠤᠭᠳᠠᠨᠠ᠃ ᠬᠠᠰᠠᠭ ᠡᠷᠡᠴᠦᠳ ᠭᠠᠷ ᠬᠠᠳᠤᠭᠤᠷ ᠪᠠᠷᠢᠵᠤ ᠤᠯᠠᠭᠠᠨ ᠪᠤᠭᠤᠳᠠᠢ ᠪᠠᠨ ᠬᠠᠳᠤᠭᠠᠳ ᠰᠢᠭᠤᠳᠠᠢᠯᠠᠵᠤ ᠠᠪᠴᠢᠷᠠᠭᠠᠳ ᠰᠠᠪᠠᠨᠠ᠃ ᠰᠠᠢᠲᠤᠷ ᠰᠡᠪᠡᠭᠰᠡᠨ ᠤᠯᠠᠭᠠᠨ ᠪᠤᠭᠤᠳᠠᠢ ᠶ᠋ᠢᠨ ᠬᠠᠯᠢᠰᠤ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠦᠨᠡ᠃ ᠬᠠᠯᠢᠰᠤ ᠦᠭᠡᠢ ᠪᠣᠯᠤᠭᠰᠠᠨ ᠤᠯᠠᠭᠠᠨ ᠪᠤᠭᠤᠳᠠᠢ ᠶ᠋ᠢᠨ ᠬᠠᠮᠠᠷ ᠰᠡᠲᠡᠯᠡᠮᠡ ᠦᠨᠦᠷ ᠠᠮᠲᠠᠯᠢᠭ ᠲᠠᠭᠠᠲᠠᠢ ᠮᠡᠳᠡᠷᠡᠮᠵᠢ ᠲᠥᠷᠥᠭᠦᠯᠳᠡᠭ ᠪᠠᠢᠯᠠ᠃ ᠰᠣᠶᠣᠭᠠ ᠲᠠᠢ ᠤᠯᠠᠭᠠᠨ ᠪᠤᠭᠤᠳᠠᠢ ᠤᠯᠠᠮ ᠲᠣᠮᠣᠷᠠᠵᠤ ᠢᠵᠠᠷᠠᠬᠤ ᠶ᠋ᠢᠨ ᠦᠶᠡᠰ ᠠᠢᠷᠠᠭ ᠮᠡᠲᠦ ᠢᠰᠬᠡᠷᠡᠵᠦ ᠥᠰᠴᠢᠬᠦ ᠴᠢᠮᠡᠭᠡ ᠭᠠᠷᠴᠤ᠂ ᠲᠣᠰᠬᠣᠳ ᠳᠤᠮᠳᠠ ᠶᠠᠪᠤᠭᠠ ᠡᠷᠡ ᠡᠮᠡ ᠬᠥᠮᠦᠰ ᠰᠢᠪᠠᠷ ᠬᠡᠷᠡᠮᠲᠦ ᠪᠢᠲᠡᠭᠦᠦ ᠤᠯᠢᠶᠠᠰᠤ ᠲᠠᠷᠢᠭᠰᠠᠨ ᠪᠠᠢᠰᠢᠩ ᠢ᠋ ᠴᠢᠭᠯᠡᠨᠡ᠃ ᠲᠣᠷᠬᠠ ᠲᠠᠢ ᠤᠯᠠᠭᠠᠨ ᠪᠤᠭᠤᠳᠠᠢ ᠶ᠋ᠢ ᠪᠢᠲᠡᠭᠦᠯᠡᠵᠦ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠵᠠᠳᠠᠯᠤᠨᠠ᠃ ᠲᠣᠷᠬᠠ ᠨᠢ ᠬᠦᠷᠲᠡᠯᠡ ᠢᠰᠦᠭᠰᠡᠨ ᠪᠠᠢᠳᠠᠭ᠃
ᠺᠢᠷᠭᠢᠽ ᠲᠣᠰᠬᠣᠨ ᠤ᠋ ᠳᠤᠮᠳᠠᠭᠤᠷ ᠡᠯᠵᠢᠭᠡ ᠬᠥᠲᠥᠯᠦᠭᠰᠡᠨ᠂ ᠥᠷᠭᠡᠨ ᠥᠮᠥᠳᠥ ᠲᠡᠢ᠂ ᠲᠣᠭᠣᠷᠴᠣᠭ ᠲᠠᠢ ᠴᠡᠭᠡᠵᠢᠪᠴᠢ ᠪᠡᠨ ᠪᠡᠶᠡ ᠳ᠋ᠡᠭᠡᠨ ᠰᠠᠢᠲᠤᠷ ᠪᠡᠬᠢᠯᠡᠵᠦ᠂ ᠣᠯᠣᠮ ᠢ᠋ᠶ᠋ᠠᠷ ᠨᠢ ᠴᠢᠩᠭᠠᠯᠠᠭᠠᠳ ᠭᠤᠲᠤᠮ ᠢ᠋ᠶ᠋ᠠᠷ ᠬᠡᠯᠲᠦᠷᠢᠬᠦ ᠠᠶᠠᠨᠴᠢᠳ ᠢ᠋ ᠬᠠᠰᠢᠶᠠᠨ ᠤ᠋ ᠰᠡᠢᠮᠡᠬᠡᠢ ᠪᠡᠷ ᠬᠠᠷᠠᠪᠠ᠃
ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠨᠠᠶ᠋ᠢᠷᠴᠢᠳ ᠤᠨᠳᠤᠢ ᠰᠤᠨᠳᠤᠢ ᠬᠡᠪᠲᠡᠵᠡᠭᠡᠨᠡ᠃ ᠬᠠᠰᠠᠭ ᠡᠷᠡᠴᠦᠳ ᠰᠣᠭᠲᠣᠵᠤ ᠤᠨᠲᠠᠵᠠᠢ᠃ ᠠᠶᠠᠨᠴᠢᠳ ᠤ᠋ᠨ ᠨᠢᠭᠡ ᠨᠢ ᠣᠢᠷᠠᠳ ᠤ᠋ᠨ ᠬᠠᠪᠲᠠᠭᠠᠢ ᠮᠥᠷᠲᠡᠭᠡᠨ ᠶᠡᠦᠳᠡᠨ ᠬᠣᠩᠰᠢᠶᠠᠷ ᠲᠠᠢ ᠭᠤᠲᠤᠯ ᠡᠮᠦᠰᠴᠡᠢ᠃ ᠲᠡᠳᠡ ᠠᠶᠠᠨᠴᠢᠳ ᠪᠤᠰᠤ ᠮᠥᠷᠭᠥᠯᠴᠢᠳ ᠪᠠᠰᠠ ᠪᠢᠰᠢ ᠪᠠᠢᠯᠠ᠃ ᠨᠢᠳᠦᠨ ᠦ᠌ ᠬᠠᠷᠠᠴᠠ ᠨᠢ ᠳᠡᠩᠳᠡᠭᠦᠦ ᠬᠢᠨᠠᠭᠰᠠᠨ ᠶᠠᠩᠵᠤ ᠲᠠᠢ ᠠᠵᠢ᠃
ᠰᠠᠷᠬᠤᠳ ᠤ᠋ᠨ ᠠᠭᠠᠭ ᠲᠤ᠌ ᠨᠠᠮ ᠴᠣᠬᠢᠭᠤᠯᠤᠭᠰᠠᠨ ᠡᠷᠡᠴᠦᠦᠯ ᠢ᠋ ᠬᠠᠷᠪᠸᠺ ᠢᠰᠬᠦᠯᠵᠦ ᠪᠣᠰᠬᠠᠪᠠ᠃
— ᠲᠣᠰᠬᠣᠨ ᠢ᠋ᠶ᠋ᠠᠷ ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠬᠢᠨ ᠳᠦᠭᠦᠷᠴᠡᠢ ᠭᠡᠵᠦ ᠬᠠᠷᠪᠸᠺ ᠬᠡᠯᠡᠪᠡ᠃ ᠲᠡᠳᠡᠨ ᠦ᠌ ᠨᠣᠢᠷᠮᠤᠭ ᠰᠣᠭᠲᠣᠭᠤ ᠨᠢᠳᠦ ᠡᠷᠢᠶᠡᠯᠵᠡᠨᠡ᠃ ᠵᠠᠷᠢᠮ ᠨᠢ ᠡᠷᠭᠢᠵᠦ ᠬᠡᠪᠲᠡᠨᠡ᠃ ᠭᠡᠷ ᠦ᠋ᠨ ᠡᠵᠡᠨ ᠬᠠᠰᠠᠭ ᠠ᠋ᠴᠠ ᠬᠠᠷᠪᠸᠺ 《 ᠲᠠᠨ ᠤ᠋ ᠵᠣᠭᠣᠷᠢ ᠵᠠᠢ ᠲᠠᠢ ᠤᠤ?》 ᠭᠡᠵᠦ ᠠᠰᠠᠭᠤᠪᠠ᠃
— ᠠᠭᠤᠵᠢᠮ᠁ ᠭᠡᠵᠦ ᠤᠷᠲᠤ ᠰᠠᠬᠠᠯ ᠲᠠᠢ ᠡᠵᠡᠨ ᠬᠠᠷᠢᠭᠤᠯᠪᠠ᠃
ᠬᠠᠷᠪᠸᠺ ᠤ᠋ᠨ ᠭᠠᠷ ᠤ᠋ᠨ ᠬᠥᠳᠡᠯᠭᠡᠭᠡᠨ ᠡᠪᠰᠡᠯ ᠮᠠᠭᠤᠲᠠᠢ ᠪᠢᠯᠡ᠃ ᠪᠠᠷᠠᠭᠤᠨ ᠲᠠᠢᠰᠢ ᠨᠢᠭᠡᠨ ᠭᠡᠮ ᠢ᠋ᠶ᠋ᠡᠷ ᠬᠥᠳᠡᠯᠵᠦ ᠲᠡᠷᠡ ᠭᠡᠮ ᠢ᠋ᠶ᠋ᠡᠷ ᠪᠤᠴᠠᠨᠠ᠃ ᠵᠡᠭᠦᠨ ᠲᠡᠢᠰᠢ ᠭᠠᠷ ᠨᠢ ᠨᠢᠭᠡᠨ ᠭᠡᠮ ᠦ᠋ᠨ ᠬᠥᠳᠡᠯᠭᠡᠭᠡᠨ ᠬᠢᠬᠦ ᠨᠢ ᠲᠡᠭᠦᠨ ᠦ᠌ ᠵᠣᠷᠢᠮᠠᠭ᠂ ᠱᠠᠯᠠᠮᠠᠭ ᠪᠠᠢᠳᠠᠯ ᠳ᠋ᠤ᠌ ᠨᠥᠯᠥᠭᠡᠯᠡᠵᠦ ᠠᠭᠤᠷ ᠴᠢᠬᠤᠯ ᠨᠢ ᠪᠠᠷᠠᠨᠠ᠃
— ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠪᠴᠤ ᠵᠣᠭᠣᠷᠢᠨ ᠳ᠋ᠤ᠌ ᠨᠢᠭᠤᠭᠳᠠᠵᠠᠭᠠ᠃ ᠤᠷᠲᠤ ᠰᠠᠬᠠᠯᠲᠤ ᠴᠢ ᠰᠤᠯᠲᠠᠨ ᠳ᠋ᠤ᠌ ᠬᠡᠯᠡ ᠲᠤᠭᠤᠯᠭᠠ᠃ ᠣᠢᠷᠠᠳ ᠤ᠋ᠳ ᠡᠵᠡᠯᠡᠵᠡᠢ᠃ ᠭᠤᠳᠤᠮᠵᠢ ᠶ᠋ᠢᠨ ᠥᠨᠴᠥᠭ ᠪᠤᠯᠤᠩ ᠪᠦᠷᠢ ᠳ᠋ᠦ᠍ ᠡᠯᠵᠢᠭᠡ ᠲᠡᠢ ᠠᠶᠠᠨᠴᠢᠳ ᠪᠠᠢᠨᠠ᠃ ᠲᠡᠷᠡ ᠵᠡᠪᠰᠡᠭ ᠲᠡᠢ᠃
ᠳᠣᠮᠣᠭᠲᠤ ᠠᠨᠤ ᠬᠠᠲᠤᠨ ᠤ᠋ ᠭᠠᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠰᠠᠭᠤᠳᠠᠭ ᠶᠤᠮ᠂ ᠨᠠᠮᠠᠶ᠋ᠢ ᠠᠨᠤ ᠶ᠋ᠢ ᠣᠯᠵᠠᠯᠠᠵᠤ ᠠᠪᠴᠢᠷᠠᠬᠤ ᠠ᠋ᠴᠠ ᠡᠮᠦᠨᠡ ᠪᠢᠲᠡᠭᠡᠢ ᠠᠮᠢ ᠨᠠᠰᠤ ᠶ᠋ᠢ ᠮᠢᠨᠢ ᠰᠦᠢᠳᠬᠡᠵᠦ ᠣᠷᠭᠢ ᠭᠡᠮᠡᠨ ᠡᠯᠴᠢ ᠵᠠᠷᠤᠵᠠᠢ᠃
ᠬᠠᠷᠪᠸᠺ ᠤ᠋ᠨ ᠨᠣᠭᠣᠭᠠᠨ ᠨᠢᠳᠦ ᠤᠰᠤᠨ ᠤ᠋ ᠵᠠᠮᠠᠭ ᠰᠢᠭ᠋ ᠵᠢᠭᠤᠷᠠᠯᠳᠤᠭᠰᠠᠨ ᠬᠠᠷᠠᠴᠠ ᠲᠠᠢ ᠪᠠᠢᠭᠠ ᠨᠢ ᠭᠥᠯᠴᠤᠬᠥᠷᠡᠯ ᠦ᠋ᠨ ᠭᠠᠢ ᠶᠤᠮ᠃ ᠬᠠᠷᠪᠸᠺ ᠠᠷᠭᠠ ᠪᠠᠨ ᠪᠠᠷᠠᠵᠠᠢ᠃ ᠲᠣᠰᠬᠣᠨ ᠠ᠋ᠴᠠ ᠭᠠᠷᠴᠤ ᠶᠠᠪᠤᠬᠤ ᠨᠦᠬᠡ ᠰᠦᠪᠡ ᠣᠳᠣᠬᠠᠨ ᠳ᠋ᠠᠭᠠᠨ ᠪᠣᠳᠣᠭᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠲᠡᠢᠨ ᠳᠣᠯᠣᠭᠠᠨ ᠤ᠋ ᠬᠥᠯ ᠳ᠋ᠦ᠍ ᠲᠤᠢᠯᠳᠠᠵᠤ ᠪᠦᠷ ᠠᠮᠤᠰᠭᠢᠭᠰᠠᠨ ᠬᠠᠰᠠᠭ ᠳᠠᠢᠴᠢᠳ ᠪᠣᠰᠤᠭᠠ ᠣᠷᠣᠯᠠᠩ ᠮᠡᠲᠦ ᠬᠠᠷᠪᠸᠺ ᠤ᠋ᠨ ᠠᠮᠠᠨ ᠠ᠋ᠴᠠ ᠭᠠᠷᠬᠤ ᠵᠠᠷᠯᠢᠭ ᠵᠠᠬᠢᠶᠠᠮᠵᠢ ᠶ᠋ᠢ ᠬᠦᠯᠢᠶᠡᠨᠡ᠃
— ᠠᠭᠠᠯᠵᠢ ᠶ᠋ᠢᠨ ᠰᠢᠯᠦᠰᠦ ᠮᠡᠲᠦ ᠲᠣᠣᠷ ᠪᠢᠳᠡᠨ ᠢ᠋ ᠪᠦᠲᠡᠭᠡᠯᠡ᠃ ᠲᠣᠣᠷ ᠲᠤ᠌ ᠣᠷᠢᠶᠠᠴᠠᠯᠳᠤᠪᠠ᠃ ᠲᠤᠯᠤᠯᠳᠤᠭᠰᠠᠨ ᠴᠤ᠌ ᠢᠯᠠᠭᠳᠠᠨᠠ᠃ ᠤᠯᠠᠭᠠᠨ ᠪᠤᠭᠤᠳᠠᠢ ᠶ᠋ᠢᠨ ᠨᠡᠷᠡᠮᠡᠯ ᠢᠳᠡ ᠣᠷᠭᠢᠯᠵᠤ ᠪᠠᠢᠬᠤ ᠳ᠋ᠤ᠌ ᠭᠡᠳᠡᠰᠦ ᠪᠡᠨ ᠬᠡᠣ᠋ᠯᠡᠭᠦᠯᠬᠦ ᠶᠠᠮᠠᠷ ᠪᠣᠢ? ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠭᠰᠠᠵᠤ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠦᠬᠦᠭᠰᠡᠨ ᠨᠢ ᠳᠡᠭᠡᠷᠡ ᠪᠢᠵᠡ᠃ ᠨᠠᠳᠠᠳᠤ ᠣᠯᠵᠠᠯᠠᠭᠳᠠᠬᠤ ᠢᠴᠢᠬᠡᠪᠲᠤᠷ ᠪᠠᠢᠨᠠ᠃ ᠮᠣᠷᠢᠳ ᠪᠡᠯᠴᠢᠭᠡᠷ ᠲᠡᠭᠡᠨ ᠪᠠᠢᠳᠠᠭ᠃ ᠬᠥᠯ ᠦ᠋ᠨ ᠤᠯᠠ ᠪᠠᠷ ᠭᠠᠵᠠᠷ ᠪᠥᠮᠪᠥᠷᠢᠳᠦᠭᠡᠳ ᠬᠡᠳᠦᠢ ᠬᠢᠷᠢ ᠲᠤᠯᠤᠯᠳᠤᠬᠤ ᠶᠤᠮ ᠪᠣᠢ? ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠭᠰᠠᠵᠤ ᠲᠤᠯᠤᠯᠳᠤᠬᠤ ᠳ᠋ᠤ᠌ ᠪᠡᠯᠡᠳᠭᠡ ᠭᠡᠵᠦ ᠬᠠᠷᠪᠸᠺ ᠰᠢᠵᠠᠭᠤᠷ ᠵᠠᠭᠤᠵᠤ ᠥᠭᠦᠯᠡᠪᠡ᠃ ᠵᠠᠭᠤᠲᠤ ᠶ᠋ᠢᠨ ᠠᠬᠠᠯᠠᠭᠴᠢ ᠪᠣᠰᠤᠭᠠ ᠮᠠᠯᠠᠭᠠᠢᠲᠤ᠂
— ᠠᠯᠯᠠᠾ ᠪᠢᠳᠡᠨ ᠢ᠋ ᠥᠷᠥᠰᠢᠶᠡᠭ! ᠭᠡᠯᠡ᠃
ᠠᠯᠯᠠᠾ ᠤ᠋ᠨ ᠦᠨᠡᠨᠴᠢ ᠱᠠᠪᠢ ᠨᠠᠷ ᠰᠥᠭᠥᠳᠴᠦ ᠰᠠᠭᠤᠭᠠᠳ ᠲᠩᠷᠢ ᠳ᠋ᠡᠭᠡᠨ ᠮᠥᠷᠭᠥᠪᠡ᠃ ᠲᠩᠷᠢ ᠲᠡᠳᠡᠨ ᠢ᠋ ᠬᠠᠷᠠᠵᠤ ᠪᠠᠢᠭᠠ ᠪᠢᠯᠡ᠃
— ᠭᠢᠨᠳᠠᠨ ᠮᠡᠲᠦ ᠬᠦᠢᠲᠡᠨ ᠬᠣᠩᠭᠢᠯ ᠠ᠋ᠴᠠ ᠭᠠᠷᠴᠠᠭᠠᠶᠠ᠃ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠳᠠᠭᠠᠷᠢᠨ ᠢᠷᠡᠪᠡᠯ ᠤᠭᠤᠴᠠ ᠪᠠᠨ ᠨᠡᠢᠯᠡᠭᠦᠯᠦᠨ ᠳᠤᠭᠤᠢᠷᠠᠵᠤ ᠪᠠᠢᠯᠳᠤᠶᠠ᠃ ᠳᠤᠭᠤᠢ ᠬᠦᠷᠢᠶᠡ ᠪᠡᠨ ᠰᠡᠲᠡᠯᠡᠭᠦᠯᠵᠦ ᠪᠣᠯᠬᠤ ᠦᠭᠡᠢ᠃ ᠬᠡᠨ ᠨᠢᠭᠡ ᠨᠢ ᠦᠬᠦᠪᠡᠯ ᠰᠡᠲᠡᠷᠬᠡᠢ ᠶ᠋ᠢ ᠨᠥᠬᠥᠵᠦ ᠨᠡᠢᠯᠡᠭᠦᠯᠦᠭᠡᠳ ᠪᠠᠢᠬᠤ ᠶᠤᠮ ᠰᠢᠦ ᠭᠡᠵᠦ ᠬᠠᠷᠪᠸᠺ ᠵᠠᠬᠢᠯᠠ᠃
ᠬᠠᠷᠪᠸᠺ ᠤ᠋ᠨ ᠴᠡᠷᠢᠭ ᠦ᠋ᠳ ᠢ᠋ ᠲᠡᠮᠦᠷ ᠪᠠᠮᠪᠠᠢ ᠲᠠᠢ ᠪᠠᠨ ᠭᠠᠳᠠᠭᠠ ᠭᠠᠷᠴᠤ᠂ ᠴᠡᠯᠡᠭᠡᠷ ᠭᠤᠳᠤᠮᠵᠢ ᠪᠠᠷ ᠠᠯᠬᠤᠬᠤ ᠳ᠋ᠤ᠌ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠠᠮᠠ ᠶ᠋ᠢ ᠪᠣᠭᠣᠵᠤ ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠣᠢᠷᠠᠳ ᠤ᠋ᠳ ᠮᠣᠷᠢ ᠲᠠᠢ ᠪᠠᠨ ᠡᠩᠨᠡᠨ ᠭᠠᠷᠴᠤ ᠢᠷᠡᠪᠡ᠃ ᠬᠠᠰᠠᠭ ᠴᠡᠷᠢᠭ ᠦ᠋ᠳ ᠦᠯᠦ ᠰᠡᠳᠡᠷᠡᠬᠦ ᠲᠣᠭᠣᠷᠢᠭ ᠡᠭᠦᠰᠬᠡᠪᠡ᠃ ᠳᠤᠭᠤᠢ ᠲᠣᠭᠣᠷᠢᠭ ᠳᠣᠣᠷᠠ ᠪᠠᠨ ᠡᠷᠭᠢᠨᠡ᠃
ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠬᠦᠷᠢᠶᠡᠨ ᠡᠴᠡ ᠮᠢᠩᠭᠠᠲᠤ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠭᠠᠢᠳᠠᠪ ᠪᠠᠭᠠᠲᠤᠷ ᠲᠤ᠌ ᠬᠠᠭᠠᠨ ᠤ᠋ ᠡᠯᠴᠢ《ᠬᠠᠷᠪᠸᠺ ᠢ᠋ ᠣᠯᠵᠠᠯᠠᠵᠤ᠂ ᠤᠯᠠᠭᠠᠨ ᠪᠤᠭᠤᠳᠠᠢ ᠪᠡᠯᠡᠳᠬᠡᠨ ᠨᠡᠢᠯᠡᠭᠦᠯᠦᠭᠴᠢ ᠺᠢᠷᠭᠢᠽ ᠦ᠋ᠳ ᠦ᠋ᠨ ᠲᠦᠢᠳᠬᠡᠷ ᠢ᠋ ᠠᠷᠢᠯᠭᠠᠭᠠᠳ ᠴᠣᠷᠣᠰ ᠠᠢᠮᠠᠭ ᠲᠠᠭᠠᠨ ᠢᠷᠡ》 ᠭᠡᠮᠡᠨ ᠲᠤᠰᠢᠶᠠᠭᠰᠠᠨ ᠭᠡᠳᠡᠭ ᠢ᠋ ᠳᠣᠭᠣᠯᠭᠠᠪᠠ᠃ ᠭᠠᠢᠲᠠᠪ ᠲᠤᠷᠰᠢᠭᠤᠯ ᠶᠠᠪᠤᠭᠤᠯᠵᠤ ᠬᠠᠷᠪᠸᠺ ᠤ᠋ᠨ ᠣᠷᠣᠩᠨᠠᠨ ᠨᠢᠭᠤᠭᠳᠠᠵᠤ ᠬᠥᠯᠴᠥᠭᠦᠷᠡᠨ ᠵᠢᠷᠭᠠᠵᠤ ᠪᠠᠢᠭᠠ ᠲᠣᠰᠬᠣᠨ ᠢ᠋ ᠮᠡᠳᠡᠵᠡᠢ᠃
— ᠬᠠᠷᠪᠸᠺ ᠭᠠᠷᠤᠭᠠᠳ ᠢᠷᠡ!
— ᠲᠡᠷᠡ ᠰᠢᠯᠲᠦᠭᠡᠨ ᠳ᠋ᠦ᠍ ᠮᠣᠷᠢᠯᠠᠭᠰᠠᠨ᠃
— ᠬᠤᠳᠠᠯ ᠠ᠋᠂ ᠳᠤᠭᠤᠢ ᠬᠦᠷᠢᠶᠡᠨ ᠳᠤᠮᠳᠠ ᠪᠠᠢᠨᠠ᠃
— ᠪᠠᠭᠠᠲᠤᠷ ᠡᠷᠡ ᠪᠠᠭᠤᠵᠤ ᠥᠭᠳᠡᠭ ᠦᠭᠡᠢ ᠶᠦᠮ᠃
— ᠡᠨᠡ ᠤᠷᠲᠤ ᠰᠠᠬᠠᠯᠲᠤ ᠪᠠᠨ ᠠᠪᠴᠠᠭᠠ᠂ ᠨᠡᠷᠡᠮᠡᠯ ᠢ᠋ᠶ᠋ᠡᠨ ᠤᠤᠭᠤᠵᠠᠭᠠ᠂ ᠬᠠᠷᠪᠸᠺ ᠢ᠋ ᠥᠭ᠃
ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠦ᠋ᠨ ᠠᠷᠤ ᠠ᠋ᠴᠠ ᠤᠷᠲᠤ ᠰᠠᠬᠠᠯᠲᠤ ᠶ᠋ᠢ ᠲᠠᠭᠤᠵᠤ ᠭᠠᠷᠭᠠᠪᠠ᠃ ᠤᠷᠲᠤ ᠰᠠᠬᠠᠯᠲᠤ ᠬᠥᠯ ᠳᠡᠭᠡᠷᠡ ᠪᠡᠨ
ᠲᠡᠩᠴᠡᠵᠦ ᠶᠠᠳᠠᠨᠠ᠃ ᠳᠤᠭᠤᠢ ᠬᠦᠷᠢᠶᠡᠨ ᠡᠴᠡ ᠲᠡᠷᠡ ᠦᠬᠦᠳᠡᠯ ᠪᠣᠯᠲᠠᠯᠠ ᠪᠠᠨ ᠠᠶᠤᠵᠠᠢ᠃ ᠶᠠᠪᠤ ᠭᠡᠵᠦ ᠤᠷᠲᠤ ᠰᠠᠬᠠᠯᠲᠤ ᠶ᠋ᠢᠨ ᠠᠷᠤ ᠠ᠋ᠴᠠ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠬᠠᠳᠬᠤᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠰᠥᠬᠥᠷᠡᠵᠦ ᠤᠨᠠᠯᠠ᠃ ᠬᠠᠰᠠᠭ ᠴᠡᠷᠢᠭ ᠦ᠋ᠨ ᠲᠣᠭᠣᠷᠢᠭ ᠪᠢᠲᠡᠭᠦᠦ ᠬᠡᠪ ᠢ᠋ᠶ᠋ᠡᠷ ᠪᠠᠢᠯᠠ᠃ ᠲᠡᠷᠡ ᠲᠣᠭᠣᠷᠢᠭ ᠠ᠋ᠴᠠ ᠬᠡᠨ ᠴᠦ᠍ ᠭᠠᠷᠤᠭᠰᠠᠨ ᠦᠭᠡᠢ᠃
ᠠᠷᠪᠠ ᠶᠢᠰᠦ
ᠲᠣᠰᠬᠣᠨ ᠨᠠᠮ ᠭᠦᠮ᠃ ᠰᠢᠪᠡᠷ ᠪᠠᠢᠰᠢᠩ ᠬᠠᠰᠢᠶᠠᠨ ᠠ᠋ᠴᠠ ᠴᠤᠬᠤᠢᠬᠤ ᠮᠠᠯ ᠠᠳᠤᠭᠤᠰᠤ ᠠᠯᠠᠭᠠ᠂ ᠲᠣᠰᠬᠣᠨ ᠤ᠋ ᠢᠷᠭᠡᠳ ᠦ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠠᠴᠢᠶᠠ ᠪᠣᠯᠵᠤ ᠪᠠᠢᠭᠰᠠᠨ ᠬᠠᠷᠪᠸᠺ ᠢ᠋ ᠪᠠᠷᠢᠭᠳᠠᠪᠠᠯ ᠲᠦᠷ ᠵᠠᠭᠤᠷᠠ ᠪᠣᠯᠪᠠᠰᠤ ᠲᠣᠰᠬᠣᠨ ᠤ᠋ ᠢᠷᠭᠡᠳ ᠠᠮᠠᠷᠠᠬᠤ ᠪᠠᠢᠯᠠ᠃ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠭᠠᠢᠲᠠᠪ ᠪᠠᠭᠠᠲᠤᠷ ᠴᠡᠯ ᠵᠠᠯᠠᠭᠤ ᠴᠡᠷᠢᠭ ᠳᠡᠮᠪᠡᠷᠢᠯ ᠢ᠋ ᠳᠤᠬᠤᠳᠠᠨ ᠬᠠᠷᠠᠵᠤ《 ᠪᠤᠭᠤᠢᠯᠢ ᠲᠠᠢ ᠤᠤ?》 ᠭᠡᠵᠦ ᠠᠰᠠᠭᠤᠪᠠ᠃ ᠲᠡᠷᠡ ᠴᠡᠷᠢᠭ ᠡᠮᠡᠭᠡᠯ ᠦ᠋ᠨ ᠭᠠᠨᠵᠤᠭᠠ ᠶ᠋ᠢ ᠭᠠᠷ ᠢ᠋ᠶ᠋ᠠᠷ ᠴᠣᠬᠢᠪᠠ᠃ ᠭᠠᠨᠵᠤᠭᠠᠯᠠᠭᠠᠨ ᠳ᠋ᠤ᠌ ᠡᠪᠬᠡᠭᠡᠰᠦᠲᠡᠢ ᠪᠤᠭᠤᠢᠯᠢ ᠦᠵᠡᠭᠳᠡᠨᠡ᠃
— ᠴᠢ ᠠᠳᠤᠭᠤᠴᠢᠨ ᠪᠢᠵᠡ ᠳᠡ ᠭᠡᠬᠦ ᠳ᠋ᠦ᠍ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ《 ᠲᠡᠢᠮᠦ》 ᠭᠡᠪᠡ᠃
— ᠣᠷᠣᠭᠠ ᠮᠣᠷᠢ ᠪᠤᠭᠤᠢᠯᠢᠳᠠᠵᠤ ᠪᠠᠢᠭᠰᠠᠨ ᠤᠤ?
— ᠲᠡᠭᠡᠯᠭᠦᠢ ᠶᠠᠭᠠᠬᠢᠬᠤᠪ᠂ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠠᠯᠳᠠᠳᠠᠭ ᠦᠭᠡᠢ ᠪᠠᠢᠭᠰᠠᠨ᠃
— ᠰᠡᠭᠦᠯᠴᠢ ᠶ᠋ᠢᠨ ᠢᠷᠡᠭᠦᠯ ᠳᠣᠯᠣᠭᠠᠨ ᠢ᠋ ᠰᠠᠨᠠᠵᠤ ᠪᠠᠢᠨᠠ ᠤᠤ? ᠠᠨᠤ ᠬᠠᠲᠤᠨ ᠲᠤᠯᠤᠯᠳᠤᠭᠰᠠᠨ ᠰᠢᠦ ᠳᠡ᠃
— ᠬᠠᠰᠠᠭ ᠤ᠋ᠨ ᠪᠠᠭᠠᠲᠤᠷ ᠳᠤᠭᠤᠢ ᠬᠦᠷᠢᠶᠡᠨ ᠳ᠋ᠦ᠍ ᠵᠣᠭᠰᠣᠵᠤ ᠪᠠᠢᠨᠠ᠃ ᠪᠢ ᠬᠠᠷᠠᠯᠠ᠂ ᠥᠷᠭᠡᠨ ᠴᠡᠭᠡᠵᠢ ᠲᠡᠢ᠂ ᠰᠡᠷᠪᠡᠭᠡ ᠨᠢ ᠬᠦᠭᠳᠦᠭᠡᠷ ᠡᠷᠡ᠂ ᠳᠦᠷᠢ ᠪᠡᠷ ᠢ᠋ᠶ᠋ᠡᠨ ᠮᠥᠨ᠃
— ᠲᠡᠭᠦᠨ ᠢ᠋ ᠪᠤᠭᠤᠢᠯᠢᠳᠠ᠃ ᠴᠢ ᠢᠳᠡᠷ ᠵᠠᠯᠠᠭᠤ᠃ ᠲᠡᠷᠡ ᠬᠠᠷᠪᠸᠺ ᠳᠥᠴᠢ ᠭᠠᠷᠤᠭᠰᠠᠨ ᠪᠤᠰᠤ ᠤᠤ? ᠳᠠᠷᠠᠭᠠ ᠨᠢ ᠪᠢ ᠲᠤᠰᠢᠶᠠᠯ ᠥᠭᠭᠥᠨᠠ᠃
ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠮᠣᠷᠢ ᠪᠠᠨ ᠭᠤᠶᠠᠳᠠᠨ ᠬᠤᠢᠯᠠᠷᠠᠨ ᠳᠠᠪᠬᠢᠪᠠ᠃ ᠲᠡᠷᠡ ᠪᠡᠷ ᠲᠣᠩᠭᠣᠢᠭᠰᠠᠨ ᠢ᠋ᠶ᠋ᠠᠨ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠰᠤᠷ ᠤ᠋ᠨ ᠪᠤᠭᠤᠢᠯᠢ ᠪᠠᠷᠢᠵᠠᠢ᠃ ᠬᠠᠰᠠᠭ ᠴᠡᠷᠢᠭ ᠤ᠋ᠨ ᠳᠤᠭᠤᠢ ᠬᠦᠷᠢᠶᠡᠨ ᠳ᠋ᠦ᠍ ᠣᠢᠷᠠᠲᠤᠨ ᠣᠴᠢᠬᠤ ᠳ᠋ᠤ᠌ ᠤᠯᠠᠩᠭᠠᠰᠤᠭᠰᠠᠨ ᠳᠠᠢᠴᠢᠳ ᠰᠡᠯᠡᠮᠡ ᠵᠢᠳᠠ ᠪᠠᠨ ᠪᠠᠷᠢᠵᠠᠭᠠᠨ ᠳᠤᠭᠤᠢᠷᠠᠨ ᠡᠷᠭᠢᠯᠳᠦᠨᠡ᠃ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠲᠣᠭᠣᠷᠢᠨ ᠳᠠᠪᠬᠢᠯᠠ᠃ ᠭᠡᠨᠡᠳᠲᠡ ᠰᠠᠯᠬᠢ ᠲᠠᠲᠠᠭᠤᠯᠤᠨ ᠪᠤᠭᠤᠢᠯᠢ ᠠᠭᠠᠷ ᠲᠤ᠌ ᠭᠤᠯᠠᠰᠴᠤ ᠱ᠌ᠢᠪ ᠱᠠᠪ ᠬᠢᠭᠰᠡᠨ ᠳᠠᠭᠤ ᠭᠠᠷᠤᠯᠠ᠃ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠬᠥᠪᠡᠭᠦᠨ ᠳᠡᠮᠪᠡᠷᠢᠯ ᠦ᠋ᠨ ᠣᠨᠣᠴᠠ ᠲᠠᠢ ᠰᠢᠳᠡᠭᠰᠡᠨ ᠪᠤᠭᠤᠢᠯᠢ ᠬᠠᠷᠪᠸᠻ ᠤ᠋ᠨ ᠴᠡᠭᠡᠵᠢᠨ ᠳ᠋ᠦ᠍ ᠣᠷᠣᠵᠤ ᠲᠡᠮᠦᠷ ᠭᠠᠷ ᠢ᠋ ᠨᠢ ᠲᠡᠪᠬᠡᠳᠡᠨ ᠠᠪᠬᠤ ᠳ᠋ᠤ᠌ ᠳᠡᠮᠪᠡᠷᠢᠯ ᠦ᠋ᠨ ᠵᠦᠭ ᠤᠷᠤᠭᠤ ᠵᠢᠳᠠ ᠢᠰᠬᠡᠷᠪᠡ᠃ ᠣᠨᠣᠪᠴᠢᠲᠠᠢ ᠰᠢᠳᠡᠭᠰᠡᠨ ᠵᠢᠳᠠ ᠳᠡᠮᠪᠡᠷᠢᠯ ᠦ᠋ᠨ ᠮᠣᠷᠢᠨ ᠤ᠋ ᠴᠡᠭᠡᠵᠢᠨ ᠳ᠋ᠦ᠍ ᠵᠣᠭᠣᠭᠳᠠᠪᠠ᠃ ᠳᠡᠮᠪᠡᠷᠢᠯ ᠦ᠋ᠨ ᠲᠤᠭᠤᠯᠠᠭᠠᠨ ᠳ᠋ᠤ᠌ ᠨᠢᠭᠡ ᠵᠢᠳᠠ ᠬᠠᠩ ᠬᠢᠨ ᠭᠠᠵᠠᠷ ᠲᠤ᠌ ᠤᠨᠠᠪᠠ᠃
ᠣᠢᠷᠠᠳ ᠤ᠋ᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠤᠤᠬᠠᠢᠯᠠᠪᠠ᠃ ᠭᠠᠢᠲᠠᠪ ᠪᠠᠭᠠᠲᠤᠷ ᠥᠨᠳᠥᠷ ᠴᠢᠩᠭᠠ ᠳᠠᠭᠤ ᠪᠠᠷ᠂
— ᠬᠠᠷᠪᠸᠻ ᠢ᠋ ᠠᠪᠤᠯᠠ᠃ ᠪᠤᠰᠤᠳ ᠴᠡᠷᠢᠭ ᠦ᠋ᠳ ᠲᠠᠷᠬᠠᠵᠠᠭᠠ᠃ ᠬᠡᠷᠪᠡ ᠲᠠᠨᠤᠰ ᠢ᠋ ᠪᠥᠭᠡᠮᠨᠡᠷᠡᠭᠡᠳ ᠪᠠᠢᠪᠠᠯ ᠬᠢᠳᠤᠵᠤ ᠣᠷᠬᠢᠨᠠ ᠰᠢᠦ ᠳᠡ ᠭᠡᠯᠡ᠃ ᠬᠥᠯᠴᠥᠭᠦᠷᠡᠵᠦ ᠰᠡᠷᠡᠮᠵᠢ ᠠᠯᠳᠠᠭᠰᠠᠨ ᠬᠠᠷᠪᠸᠻ ᠡᠩ ᠰᠠᠴᠠᠭᠤ ᠬᠠᠰᠬᠢᠷᠤᠨ᠂
— ᠠᠮᠢ ᠪᠠᠨ ᠠᠪᠤᠭᠠᠳ ᠠᠷᠢᠯᠤᠭᠲᠤᠨ᠃ ᠨᠠᠮᠠᠶ᠋ᠢ ᠣᠷᠬᠢᠭᠠᠳ ᠰᠤᠯᠲᠠᠨ ᠳ᠋ᠤ᠌ ᠣᠴᠢᠭᠲᠤᠨ᠃ ᠨᠢᠭᠡ ᠠᠮᠢ ᠪᠠᠷ ᠲᠠᠨᠤᠰ ᠳᠤᠲᠠᠬᠤ ᠦᠭᠡᠢ ᠭᠡᠪᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠳᠡᠮᠪᠡᠷᠢᠯ ᠦ᠋ᠨ ᠮᠣᠷᠢ ᠦᠬᠦᠳᠬᠢᠨ ᠤᠨᠠᠵᠤ ᠤᠷᠤᠭᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠷᠣᠢ ᠡᠮᠬᠦᠯᠡ᠃ ᠮᠣᠷᠢᠨ ᠤ᠋ ᠨᠢᠳᠦᠨ ᠡᠴᠡ ᠲᠤᠩᠭᠠᠯᠠᠭ ᠨᠢᠯᠪᠤᠰᠤ ᠤᠷᠤᠰᠴᠤ ᠶᠡᠬᠡᠳᠡ ᠬᠠᠷᠠᠭᠤᠰᠬᠤ ᠮᠡᠲᠦ ᠰᠠᠮᠰᠠᠢ ᠲᠠᠲᠠᠯᠠ᠃ ᠳᠡᠮᠪᠡᠷᠢᠯ ᠲᠦᠳᠡᠬᠡᠨ ᠮᠣᠷᠢ ᠪᠠᠨ ᠶᠡᠭᠦᠯᠡᠪᠡ᠃ ᠡᠨᠡ ᠶᠠᠪᠤᠳᠠᠯ ᠢ᠋ ᠬᠠᠷᠪᠸᠻ ᠲᠣᠭᠣᠮᠵᠢᠷ ᠦᠭᠡᠢ ᠬᠠᠷᠠᠨᠠ᠃ ᠬᠠᠷᠪᠸᠻ ᠤ᠋ᠨ ᠪᠡᠶᠡ ᠡᠴᠡ ᠪᠤᠭᠤᠢᠯᠢ ᠶ᠋ᠢ ᠠᠪᠴᠠᠢ᠃ ᠲᠡᠷᠡ ᠪᠡᠷ ᠴᠢᠯᠥᠭᠡᠲᠡᠢ ᠪᠣᠯᠵᠠᠢ᠃
— ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠴᠢᠮᠠᠶ᠋ᠢ ᠴᠠᠭᠠᠵᠠᠯᠠᠨᠠ᠃ ᠬᠠᠷᠪᠸᠻ ᠴᠢ ᠣᠯᠠᠨ ᠤᠳᠠᠭᠠ ᠬᠣᠲᠠ ᠳ᠋ᠤ᠌ ᠣᠷᠣᠭᠰᠠᠨ ᠴᠢᠨᠣᠠ ᠰᠢᠭ᠋ ᠣᠢᠷᠠᠳ ᠤ᠋ᠨ ᠨᠤᠲᠤᠭ ᠲᠤ᠌ ᠳᠣᠪᠲᠣᠯᠵᠤ ᠬᠥᠮᠦᠨ ᠮᠠᠯ ᠰᠦᠢᠳᠬᠡᠪᠡ᠃ ᠡᠭᠦᠨ ᠦ᠌ ᠲᠥᠯᠥᠭᠡ ᠴᠢᠮᠠ ᠠ᠋ᠴᠠ ᠶᠠᠯᠠ ᠠᠰᠠᠭᠤᠬᠤ ᠳ᠋ᠤ᠌ ᠪᠠᠭᠠᠳᠠᠨᠠ᠃ ᠴᠢᠨᠦ ᠴᠠᠭ ᠳᠠᠭᠤᠰᠤᠭᠰᠠᠨ᠃ ᠠᠨᠤ ᠬᠠᠲᠤᠨ ᠢ᠋ ᠣᠯᠵᠠᠯᠠᠨᠠ ᠭᠡᠮᠡᠨ ᠴᠠᠯᠴᠢᠨᠠ ᠭᠡᠯᠡ᠃ ᠨᠠᠭᠠᠳᠤ ᠬᠡᠯᠡ ᠶ᠋ᠢ ᠴᠢᠨᠢ ᠣᠭᠲᠣᠯᠵᠤ ᠬᠠᠶᠠᠨᠠ ᠭᠡᠮᠡᠨ ᠭᠠᠢᠲᠠᠪ ᠰᠢᠷᠦᠭᠦᠬᠡᠨ ᠥᠭᠦᠯᠡᠪᠡ᠃ ᠬᠠᠷᠪᠸᠻ ᠬᠠᠷᠢᠭᠤ ᠳ᠋ᠤᠨᠢ᠂
— ᠤᠷᠲᠤ ᠰᠠᠬᠠᠯᠲᠤ ᠬᠡᠯᠡ ᠮᠡᠳᠡᠭᠡᠴᠢ ᠪᠠᠢᠬᠤ ᠨᠢ ᠠ᠋ ᠭᠡᠵᠦ ᠠᠭᠳᠤᠢᠨ ᠭᠠᠵᠠᠷ ᠳᠡᠪᠰᠡᠯᠡ᠃
— ᠴᠢ ᠲᠣᠰᠬᠣᠨ ᠤ᠋ ᠭᠡᠮ ᠦᠭᠡᠢ ᠣᠢᠷᠠᠳ ᠤ᠋ᠨ ᠴᠢᠰᠤ ᠤᠷᠤᠰᠬᠠᠬᠤ ᠨᠢ ᠤᠤ? ᠨᠠᠭᠠᠳᠤ ᠪᠣᠭᠣᠯ ᠤ᠋ᠳ ᠲᠠᠨ ᠤ᠋ ᠰᠠᠢᠨ ᠮᠠᠭᠤ ᠶ᠋ᠢ ᠢᠯᠭᠠᠳᠠᠭ ᠶᠤᠮ ᠭᠡᠳ ᠬᠠᠷᠪᠸᠻ ᠲᠤ᠌ ᠮᠣᠷᠢ᠂ ᠰᠡᠯᠡᠮᠡ᠂ ᠢᠯᠳᠦ᠂ ᠪᠠᠮᠪᠠᠢ᠂ ᠶᠠᠭᠤ ᠬᠡᠷᠡᠭ ᠲᠡᠢ ᠪᠦᠬᠦᠨ ᠢ᠋ ᠥᠭᠭᠥᠭᠲᠤᠨ ᠭᠡᠪᠡ᠃ ᠬᠠᠷᠪᠸᠻ ᠤ᠋ᠨ ᠨᠣᠭᠣᠭᠠᠨ ᠨᠢᠳᠦᠨ ᠳ᠋ᠦ᠍ ᠬᠥᠷ ᠪᠠᠶᠠᠷ ᠤ᠋ᠨ ᠭᠡᠷᠡᠯ ᠮᠠᠨᠠᠯᠵᠠᠵᠤ᠂ ᠴᠡᠷᠢᠭ ᠬᠠᠪᠲᠠᠭᠠᠢ ᠡᠮᠡᠭᠡᠯ ᠳᠡᠭᠡᠷᠡ ᠬᠡᠢ ᠦᠭᠡᠢ ᠦᠰᠦᠷᠦᠨ ᠮᠣᠷᠳᠠᠯᠠ᠃ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠭᠠᠢᠲᠠᠪ ᠪᠠᠭᠠᠲᠤᠷ᠂
— ᠬᠣᠶᠠᠭᠤᠯᠠ ᠪᠠᠨ ᠲᠤᠯᠤᠯᠳᠤᠶᠠ᠃ ᠴᠢᠨᠦ ᠵᠣᠷᠢᠭ ᠢ᠋ ᠬᠦᠨᠳᠦᠯᠡᠵᠦ ᠪᠠᠢᠨᠠ᠃ ᠴᠢᠮᠠᠶ᠋ᠢ ᠥᠴᠢᠭ ᠦᠭᠡᠢ ᠴᠠᠪᠴᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠡᠢᠮᠣᠷᠢ ᠶ᠋ᠢ ᠲᠠᠨᠢ ᠰᠡᠷᠭᠦᠭᠡᠶᠡ ᠭᠡᠰᠡᠨ ᠶᠤᠮ᠃ ᠨᠡᠷᠡ ᠪᠡᠨ ᠪᠠᠭᠠᠰᠤᠳᠠᠬᠤ ᠦᠭᠡᠢ ᠪᠢᠵᠡ ᠳᠡ ᠭᠡᠮᠡᠨ ᠦᠲᠦᠭᠡᠩᠬᠦᠢ ᠥᠭᠦᠯᠡᠪᠡ᠃ ᠬᠠᠰᠠᠭ ᠤ᠋ᠨ ᠬᠠᠷᠪᠸᠻ ᠲᠤᠷᠬᠢᠷᠠᠨ ᠰᠢᠷᠤᠩᠬᠠᠢᠯᠠᠵᠤ᠂
— ᠣᠢᠷᠠᠳ ᠤ᠋ᠳ ᠬᠥᠮᠦᠨᠯᠢᠭ ᠶᠤᠮ ᠭᠡᠭᠴᠢ᠃ ᠨᠠᠮᠠᠶ᠋ᠢ ᠠᠯᠢ ᠡᠷᠲᠡ ᠢᠩᠭᠢᠵᠦ ᠬᠦᠨᠳᠦᠳᠬᠡᠬᠦ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠤᠳᠠᠭᠠᠨ ᠵᠢᠯ ᠳᠤᠷᠠ ᠦᠭᠡᠢ ᠬᠦᠷᠭᠡᠪᠡ᠃ ᠤᠳᠠᠭᠠᠨ ᠵᠢᠯ ᠰᠢᠦ᠃ ᠠᠨᠤ ᠬᠠᠲᠤᠨ ᠢ᠋ᠶ᠋ᠠᠨ ᠥᠮᠥᠭᠡᠷᠡᠪᠡ᠃ ᠣᠢᠷᠠᠳ ᠡᠷᠡᠴᠦᠦᠯ ᠦ᠋ᠨ ᠰᠠᠬᠢᠭᠤᠰᠤ ᠲᠡᠷᠡ ᠠᠨᠤ ᠬᠠᠲᠤᠨ ᠶᠤᠮ ᠤᠤ? ᠲᠡᠭᠡᠪᠡᠯ ᠰᠠᠬᠢᠭᠤᠰᠤ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠲᠤᠯᠤᠯᠳᠤᠬᠤ ᠪᠣᠯᠵᠠᠢ ᠳᠠ᠃ ᠪᠢ ᠪᠠᠰᠠ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠠᠬᠢᠭᠤᠰᠤ ᠶ᠋ᠢᠨ ᠲᠥᠯᠥᠭᠡ ᠲᠤᠯᠤᠯᠳᠤᠨᠠ ᠭᠡᠯᠡ᠃
ᠺᠢᠷᠭᠢᠽ ᠲᠣᠰᠬᠣᠨ ᠤ᠋ ᠲᠠᠷᠢᠶᠠᠴᠢᠳ ᠥᠬᠢᠳ ᠬᠡᠦᠬᠡᠨ ᠨᠦ᠍ᠭᠦᠳ ᠲᠤᠯᠤᠯᠳᠤᠭᠠᠨ ᠤ᠋ ᠳᠠᠷᠠᠭᠠ ᠠᠶᠤᠵᠤ ᠴᠡᠴᠡᠷᠡᠭᠰᠡᠨ ᠵᠢᠷᠦᠬᠡ ᠪᠡᠨ ᠳᠠᠷᠤᠨ ᠠᠯᠯᠠᠾ ᠲᠩᠷᠢ ᠶ᠋ᠢᠨ ᠥᠷᠥᠰᠢᠶᠡᠯ ᠢ᠋ ᠳᠠᠭᠤᠳᠠᠵᠤ ᠤᠩᠰᠢᠯᠭᠠ ᠤᠩᠰᠢᠵᠤ᠂ ᠬᠠᠭᠠᠴᠠᠯ ᠤ᠋ᠨ ᠳᠠᠭᠤᠤ ᠳᠠᠭᠤᠯᠠᠵᠠᠭᠠᠪᠠ᠃ ᠬᠠᠷᠪᠸᠻ ᠦ᠋ᠨ ᠴᠣᠭᠴᠠᠰ ᠢ᠋ ᠯᠠᠯᠤ ᠶ᠋ᠢᠨ ᠰᠢᠲᠦᠯᠭᠡᠲᠡᠨ ᠨᠦ᠍ᠭᠦᠳ ᠠᠪᠴᠤ ᠣᠳᠤᠯᠠ᠃ ᠬᠠᠷᠪᠸᠻ ᠦ᠋ᠨ ᠡᠴᠢᠭᠡ ᠶ᠋ᠢᠨ ᠬᠢᠨᠢ ᠱᠠᠷᠢᠯ ᠪᠦᠬᠦᠢ ᠵᠣᠭᠣᠷᠢᠯᠠᠨ ᠣᠬᠣᠭᠰᠠᠨ ᠭᠦᠨ ᠨᠦᠬᠡᠨ ᠳ᠋ᠦ᠍ ᠣᠷᠣᠰᠢᠭᠤᠯᠪᠠ᠃ ᠨᠦᠬᠡᠨ ᠦ᠌ ᠠᠮᠠᠰᠠᠷ ᠢ᠋ ᠴᠢᠯᠠᠭᠤ ᠪᠠᠷ ᠬᠦᠷᠢᠶᠡᠯᠡᠵᠦ ᠣᠯᠠᠨ ᠨᠠᠰᠤᠲᠠᠢ ᠤᠷᠭᠤᠮᠠᠯ ᠲᠠᠷᠢᠭᠰᠠᠨ ᠪᠢᠯᠡ᠃
ᠬᠣᠷᠢ
ᠬᠠᠷᠪᠸᠻ ᠦ᠋ᠨ ᠬᠠᠮᠢᠭᠠ ᠣᠷᠣᠩᠨᠠᠵᠤ ᠪᠣᠢ ᠮᠡᠳᠡᠭᠡ ᠶ᠋ᠢ ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠣᠢᠷᠠᠳ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠥᠭᠭᠦᠭᠰᠡᠨ ᠬᠥᠮᠦᠨ ᠪᠣᠯ ᠤᠷᠲᠤ ᠰᠠᠬᠠᠯᠲᠤ ᠭᠡᠮᠡᠨ ᠨᠡᠷᠡᠯᠡᠭᠳᠡᠭᠰᠡᠨ ᠤᠮᠠᠷ ᠪᠠᠢᠵᠠᠢ᠃ ᠭᠠᠯ ᠤᠰᠤᠨ ᠠ᠋ᠴᠠ ᠴᠤᠴᠠᠳᠠᠭ ᠦᠭᠡᠢ ᠬᠠᠷᠪᠸᠻ ᠦᠬᠦᠪᠡᠯ ᠲᠠᠷᠢᠶᠠᠴᠢᠳ ᠠᠮᠤᠷ ᠲᠠᠢᠪᠤᠩ ᠪᠣᠯᠵᠤ ᠨᠢᠷᠤᠭᠤ ᠨᠢ ᠲᠡᠨᠢᠢᠬᠦ ᠶᠦᠮ ᠭᠡᠮᠡᠨ ᠤᠮᠠᠷ ᠤ᠋ᠨ ᠣᠪᠣᠭ ᠤ᠋ᠨ ᠬᠢᠨ ᠶᠠᠷᠢᠯᠴᠠᠭᠰᠠᠨ ᠠᠲᠠᠯᠠ《 ᠬᠡᠨ ᠬᠣᠪ ᠵᠥᠭᠡᠭᠡᠪᠡ》 ᠭᠡᠳᠡᠭ ᠳᠤᠤᠯᠢᠶᠠᠨ ᠲᠠᠷᠬᠠᠭᠠᠪᠠ᠃
ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠡᠯᠴᠢ ᠮᠢᠩᠭᠠᠲᠤ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠭᠠᠢᠲᠠᠪ《 ᠢᠮᠠᠭᠲᠠ ᠬᠠᠯᠠᠭᠤᠨ ᠢᠰᠬᠦᠯᠡᠩ ᠶᠠᠪᠤᠳᠠᠭ ᠭᠠᠷ ᠦᠭᠡᠢ ᠪᠠᠭᠠᠲᠤᠷ ᠬᠠᠷᠪᠸᠻ ᠠᠮᠢ ᠪᠠᠨ ᠠᠯᠳᠠᠭᠰᠠᠨ ᠠ᠋ᠴᠠ ᠪᠣᠯᠵᠤ ᠲᠡᠯᠢᠢᠪᠡ᠃ ᠮᠠᠨ ᠤ᠋ ᠭᠠᠯᠳᠠᠨ ᠬᠠᠭᠠᠨ ᠬᠡᠯᠡᠬᠦ ᠳ᠋ᠡᠭᠡᠨ 〈 ᠠᠮᠠ ᠪᠣᠯ ᠵᠦᠩ ᠰᠤᠪᠢᠩ ᠤ᠋ᠨ ᠨᠢᠳᠦ ᠬᠠᠭᠠᠯᠭᠠ ᠶᠤᠮ᠂ ᠠᠮᠠ ᠪᠠᠷ ᠶᠣᠷᠣᠯᠠᠪᠠᠯ ᠰᠡᠳᠬᠢᠯ ᠢ᠋ᠶ᠋ᠡᠷ ᠶᠣᠷᠣᠯᠠᠭᠰᠠᠨ ᠠ᠋ᠴᠠ ᠠᠶᠤᠯᠲᠠᠢ᠃ ᠠᠰᠢᠳᠠ ᠶ᠋ᠢᠨ ᠪᠡᠯᠭᠡ ᠡᠴᠡ ᠠᠮᠠᠨ ᠤ᠋ ᠪᠡᠯᠭᠡ ᠭᠡᠳᠡᠭ ᠶᠤᠮ᠃ ᠬᠥᠮᠦᠨ ᠦ᠌ ᠠᠮᠠᠨ ᠠ᠋ᠴᠠ ᠢᠷᠦᠭᠡᠯ ᠬᠠᠷᠢᠶᠠᠯ ᠬᠣᠶᠠᠷ ᠤᠷᠤᠰᠴᠤ ᠪᠠᠢᠳᠠᠭ᠃ ᠢᠷᠦᠭᠡᠯ ᠢ᠋ ᠨᠢ ᠪᠠᠢᠩᠭᠤ ᠬᠡᠯᠡᠵᠦ ᠪᠠᠢᠪᠠᠯ ᠪᠤᠷᠬᠠᠨ ᠳ᠋ᠤ᠌ ᠲᠠᠭᠠᠯᠠᠭᠳᠠᠨᠠ᠃ ᠬᠠᠷᠢᠶᠠᠯ ᠤᠷᠤᠰᠬᠠᠵᠤ ᠪᠠᠢᠪᠠᠯ ᠮᠠᠭᠤ ᠵᠦᠭ ᠦ᠋ᠨ ᠰᠠᠪᠳᠠᠭ ᠤ᠋ᠳ ᠣᠯᠵᠠᠯᠠᠨᠠ 〉 ᠭᠡᠰᠡᠨ ᠪᠢᠯᠡ᠃
— ᠬᠠᠷᠪᠸᠻ ᠢ᠋ ᠰᠠᠪᠳᠠᠭ ᠣᠯᠵᠠᠯᠠᠪᠠ᠃ ᠬᠠᠷᠢᠨ ᠤᠮᠠᠷ ᠬᠠᠮᠢᠭᠠ ᠪᠠᠢᠨᠠ᠃ ᠨᠠᠭᠠᠰᠢ ᠪᠠᠨ ᠬᠦᠷᠦᠭᠡᠳ ᠢᠷᠡ ᠭᠡᠵᠦ ᠳᠠᠭᠤᠳᠠᠪᠠ᠃ ᠤᠮᠠᠷ ᠬᠡᠮᠡᠬᠦ ᠡᠷᠡ ᠲᠡᠢᠨ ᠦ᠌ ᠵᠠᠷᠯᠠᠨ ᠳᠠᠭᠤᠳᠠᠯᠭᠠ ᠠᠪᠤᠭᠰᠠᠨ ᠦᠶᠡ ᠳ᠋ᠡᠭᠡᠨ ᠴᠡᠷᠢᠭ ᠪᠣᠯᠳᠠᠭ᠂ ᠪᠤᠰᠤᠳ ᠴᠠᠭ ᠲᠤ᠌ ᠤᠯᠠᠭᠠᠨ ᠪᠤᠭᠤᠳᠠᠢ ᠶ᠋ᠢᠨ ᠲᠠᠷᠢᠶᠠᠯᠠᠩ ᠡᠷᠬᠢᠯᠡᠵᠦ ᠪᠠᠭᠠ ᠰᠢᠭ᠋ ᠡᠳ᠋ᠯᠡᠩ ᠭᠠᠵᠠᠷ ᠡᠵᠡᠮᠰᠢᠨᠡ᠃ ᠤᠮᠠᠷ ᠨᠢᠭᠡ ᠤᠳᠠᠭᠠ ᠶ᠋ᠢᠨ ᠢᠷᠡᠭᠦᠯ ᠲᠤᠯᠤᠯᠳᠤᠭᠠᠨ ᠤ᠋ ᠳᠠᠷᠠᠭᠠ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠲᠦ᠍ ᠣᠯᠵᠠᠯᠠᠭᠳᠠᠵᠠᠢ᠃ ᠤᠮᠠᠷ ᠰᠥᠭᠥᠳᠦᠨ ᠮᠥᠷᠭᠥᠵᠦ ᠠᠯᠯᠠᠾ ᠤ᠋ᠨ ᠨᠡᠷᠡ ᠶ᠋ᠢ ᠪᠠᠷᠢᠵᠤ ᠭᠠᠯᠳᠠᠨ ᠠ᠋ᠴᠠ ᠠᠮᠢ ᠭᠤᠶᠤᠭᠰᠠᠨ ᠪᠢᠯᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠭᠠᠢᠲᠠᠪ ᠪᠠᠭᠠᠲᠤᠷ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠪᠠᠢᠵᠠᠢ᠃ ᠭᠠᠢᠲᠠᠪ ᠬᠡᠮᠡᠬᠦ ᠬᠣᠱᠤᠳ ᠡᠷᠡ ᠭᠠᠯᠳᠠᠨ ᠳ᠋ᠤ᠌ ᠦᠨᠡᠨᠴᠢ ᠵᠢᠳᠬᠦᠵᠦ ᠨᠠᠶ᠋ᠢᠭᠠᠯ ᠡᠬᠡᠨᠡᠷ ᠲᠡᠢ ᠳᠡᠷᠡ ᠨᠡᠢᠯᠡᠭᠦᠯᠦᠭᠰᠡᠨ ᠡᠴᠡ ᠬᠣᠢᠰᠢ ᠨᠠᠢ᠍ᠮᠠᠨ ᠬᠥᠪᠡᠭᠦᠨ ᠲᠡᠢ ᠥᠨᠢᠷ ᠥᠳᠬᠡᠨ ᠠᠢᠯ ᠤ᠋ᠨ ᠡᠵᠡᠨ ᠪᠣᠯᠵᠠᠢ᠃ ᠭᠣᠣᠨᠢ ᠡᠷᠡ ᠨᠠᠢ᠍ᠮᠠᠨ ᠬᠥᠪᠡᠭᠦᠨ ᠲᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠭᠠᠯᠳᠠᠨ ᠮᠠᠩᠨᠠᠢ ᠲᠡᠨᠢᠢᠵᠦ ᠬᠣᠱᠤᠳ ᠤ᠋ᠨ ᠬᠦᠷᠢᠶᠡᠨ ᠦ᠌ ᠲᠡᠭ ᠳᠤᠮᠳᠠ ᠥᠷᠭᠥᠭᠡ ᠪᠤᠰᠬᠠᠵᠤ ᠥᠭᠴᠡᠢ᠃
ᠭᠠᠯᠳᠠᠨ ᠬᠠᠭᠠᠨ ᠣᠯᠵᠠᠯᠠᠭᠳᠠᠭᠰᠠᠨ ᠤᠮᠠᠷ ᠤ᠋ᠨ ᠭᠤᠶᠤᠯᠲᠠ ᠶ᠋ᠢ ᠰᠣᠨᠣᠰᠪᠠ᠃ ᠭᠠᠢᠲᠠᠪ ᠪᠠᠭᠠᠲᠤᠷ ᠤᠮᠠᠷ ᠠ᠋ᠴᠠ᠂
— ᠡᠷᠭᠢᠭᠡᠳ ᠬᠠᠷᠪᠸᠺ ᠲᠠᠢ ᠨᠡᠢᠯᠡᠬᠦ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
ᠤᠮᠠᠷ ᠤᠬᠢᠯᠠᠩᠨᠠᠨ᠂
— ᠥᠴᠦᠬᠡᠨ ᠪᠣᠭᠣᠯ ᠤ᠋ᠨ ᠠᠮᠢ ᠬᠠᠷᠪᠸᠺ ᠤ᠋ᠨ ᠠᠳᠬᠤᠨ ᠳ᠋ᠤ᠌ ᠰᠢᠦ ᠳᠡ᠃ ᠪᠢ ᠲᠡᠭᠦᠨ ᠡᠴᠡ ᠪᠤᠯᠲᠠᠬᠤ ᠵᠢᠭᠤᠲᠠᠬᠤ ᠠᠷᠭᠠ ᠦᠭᠡᠢ ᠭᠡᠮᠡᠨ ᠥᠴᠢᠪᠡ᠃ ᠬᠠᠭᠠᠨ ᠰᠡᠳᠬᠢᠷᠦᠨ᠂
— ᠬᠠᠷᠪᠸᠺ ᠲᠠᠢ ᠣᠢᠷᠠᠬᠠᠨ ᠪᠠᠢᠬᠤ ᠮᠢᠨᠢ᠃ ᠲᠡᠷᠡ ᠶᠠᠭᠤ ᠬᠡᠯᠡᠨᠡ᠃ ᠲᠡᠷᠡ ᠶᠠᠭᠤ ᠥᠭᠦᠯᠡᠨᠡ᠃ ᠪᠢ ᠲᠡᠭᠦᠨ ᠢ᠋ ᠰᠣᠨᠣᠰᠬᠤ ᠶᠣᠰᠣᠲᠠᠢ᠃ ᠤᠮᠠᠷ ᠴᠢ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠴᠢᠬᠢ ᠪᠣᠯ ᠭᠡᠮᠡᠨ ᠲᠤᠰᠢᠶᠠᠪᠠ᠃ ᠭᠠᠢᠲᠠᠪ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠬᠥᠷ ᠪᠠᠶᠠᠰᠤᠯ ᠬᠡᠷᠡᠯᠳᠦᠵᠦ᠂
— ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠰᠣᠨᠣᠰᠤᠯᠠ᠃ ᠶᠠᠭᠤ ᠭᠡᠮᠡᠷ ᠪᠠᠢᠨᠠ ᠳᠠ ᠭᠡᠵᠦ ᠤᠮᠠᠷ ᠠ᠋ᠴᠠ ᠯᠠᠪᠯᠠᠬᠤ ᠳ᠋ᠤ᠌《 ᠪᠢ ᠴᠢᠬᠢ ᠪᠣᠯᠤᠶᠠ》 ᠭᠡᠪᠡ᠃
— ᠴᠢᠬᠢᠨ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠬᠠᠳᠠᠭᠠᠯᠠᠵᠤ ᠪᠠᠢ᠃ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠬᠡᠷᠡᠭᠴᠡᠭᠡ ᠭᠠᠷᠪᠠᠯ ᠰᠣᠨᠣᠰᠤᠨᠠ᠃ ᠨᠠᠮᠠᠶ᠋ᠢ ᠰᠣᠨᠣᠰᠪᠠ ᠭᠡᠵᠦ ᠪᠣᠳᠣ᠃ ᠴᠢᠮᠠᠶ᠋ᠢ ᠠᠮᠢᠳᠤ ᠦᠯᠡᠳᠡᠭᠡᠪᠡ᠃ ᠡᠴᠡᠭᠰᠡᠨ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠡᠳ ᠬᠠᠷᠪᠸᠺ ᠤ᠋ᠨ ᠠᠷᠤ ᠠ᠋ᠴᠠ ᠲᠣᠨᠢᠯ ᠭᠡᠵᠦ ᠭᠠᠯᠳᠠᠨ ᠬᠠᠭᠠᠨ ᠥᠷᠥᠰᠢᠶᠡᠯ ᠦ᠋ᠨ ᠦᠭᠡ ᠬᠡᠯᠡᠪᠡ᠃《 ᠤᠮᠠᠷ ᠮᠡᠲᠦ ᠶ᠋ᠢᠨ ᠲᠠᠷᠢᠶᠠᠴᠢᠳ ᠤ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠬᠠᠷᠪᠸᠺ ᠰᠠᠭᠤᠵᠤ ᠪᠠᠢᠳᠠᠭ ᠠᠵᠢ᠃ ᠲᠡᠭᠦᠨ ᠡᠴᠡ ᠲᠠᠷᠢᠶᠠᠴᠢᠳ ᠵᠠᠯᠬᠠᠵᠠᠢ᠃ ᠬᠠᠷᠪᠸᠺ ᠠ᠋ᠴᠠ ᠰᠠᠯᠬᠤ ᠶ᠋ᠢᠨ ᠲᠤᠯᠠᠳᠠ ᠤᠮᠠᠷ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌ ᠣᠢᠷᠠᠳ ᠲᠤ᠌ ᠲᠤᠰᠠᠯᠠᠨᠠ᠃ ᠨᠢᠭᠡ ᠬᠥᠮᠦᠨ ᠦ᠌ ᠲᠤᠰᠠ ᠪᠠᠭᠠᠳᠠᠬᠤ ᠦᠭᠡᠢ》 ᠭᠡᠮᠡᠨ ᠭᠠᠯᠳᠠᠨ ᠪᠣᠳᠣᠭᠰᠠᠨ ᠪᠢᠯᠡ᠃
ᠤᠮᠠᠷ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠰᠠᠨ ᠬᠠᠪᠲᠠᠭᠠᠢ ᠲᠣᠭᠣᠷᠴᠣᠭ ᠢ᠋ ᠰᠣᠯᠢᠵᠤ ᠴᠠᠭᠠᠨ ᠳᠠᠪᠤᠤ ᠪᠠᠷ ᠲᠣᠯᠣᠭᠠᠢ ᠪᠠᠨ ᠪᠠᠭᠯᠠᠵᠤ ᠣᠷᠢᠶᠠᠵᠠᠢ᠃ ᠨᠢᠭᠡᠨᠲᠡ ᠭᠠᠢᠲᠠᠪ ᠪᠠᠭᠠᠲᠤᠷ ᠳᠠᠭᠤᠳᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠪᠡᠷ ᠪᠠᠭᠠ ᠵᠡᠷᠭᠡ ᠬᠣᠯᠴᠢᠭᠢᠨᠠᠨ ᠣᠴᠢᠯᠠ᠃ ᠮᠢᠩᠭᠠᠲᠤ ᠴᠡᠷᠢᠭ ᠦ᠋ᠳ ᠳᠤᠭᠤᠢᠷᠠᠨ ᠬᠦᠷᠢᠶᠡ ᠡᠭᠦᠰᠬᠡᠵᠦ ᠵᠣᠭᠰᠣᠵᠠᠢ᠃ ᠳᠤᠭᠤᠢ ᠳᠣᠲᠣᠷᠠ ᠤᠮᠠᠷ ᠣᠷᠣᠪᠠ᠃
— ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠰᠠᠩ ᠳ᠋ᠤ᠌ ᠤᠯᠠᠭᠠᠨ ᠪᠤᠭᠤᠳᠠᠢ ᠬᠡᠳᠦᠨ ᠲᠣᠭᠣᠭᠠ ᠶ᠋ᠢ ᠨᠡᠢᠯᠡᠭᠦᠯᠵᠦ ᠪᠠᠢᠨᠠ ᠭᠡᠵᠦ ᠭᠠᠢᠲᠠᠪ ᠠᠰᠠᠭᠤᠪᠠ᠃ ᠤᠮᠠᠷ ᠬᠡᠮᠡᠬᠦ ᠤᠷᠲᠤ ᠰᠠᠬᠠᠯ ᠲᠠᠢ ᠵᠣᠭᠣᠩᠭᠢ ᠡᠷᠡ ᠠᠮᠠ ᠪᠠᠨ ᠥᠮᠥᠯᠵᠡᠭᠦᠯᠦᠨ᠂
— ᠬᠠᠭᠠᠨ ᠳ᠋ᠤ᠌ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠵᠢᠯ ᠳ᠋ᠡᠭᠡᠨ ᠵᠠᠭᠤᠨ ᠲᠣᠭᠣᠭᠠ ᠶ᠋ᠢ ᠥᠭᠳᠡᠭ ᠭᠡᠪᠡ᠃ ᠭᠠᠢᠳᠠᠪ ᠪᠠᠭᠠᠲᠤᠷ ᠢᠨᠢᠶᠡᠵᠦ᠂
— ᠴᠢᠮᠠᠶ᠋ᠢ ᠬᠠᠷᠪᠸᠺ ᠤ᠋ᠨ ᠣᠷᠣᠨ ᠳ᠋ᠤ᠌ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠪᠣᠯᠭᠠᠶᠠ᠃ ᠪᠤᠷᠤᠭᠤᠲᠠᠨ ᠢ᠋ ᠭᠡᠰᠬᠡᠪᠡ᠃ ᠲᠡᠭᠡᠬᠦ ᠪᠡᠷ ᠬᠠᠷᠠ ᠮᠢᠩᠭᠠᠲᠤ ᠪᠠᠨ ᠠᠪᠴᠤ ᠵᠡᠭᠦᠨᠭᠠᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠳᠠᠷᠤᠢᠬᠠᠨ ᠣᠴᠢ᠃ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠠᠶᠠᠨ ᠲᠡᠢᠨ ᠳ᠋ᠦ᠍ ᠣᠳᠬᠤ ᠪᠠᠷ ᠪᠡᠯᠡᠳᠬᠡᠵᠦ ᠪᠠᠢᠭᠠ ᠪᠢᠯᠡ ᠭᠡᠪᠡ᠃
ᠲᠡᠷᠡᠬᠡᠨ ᠵᠠᠭᠤᠷᠠ ᠪᠤᠭᠤᠳᠠᠢ ᠳ᠋ᠤ᠌ ᠳᠤᠷᠠᠲᠠᠢ ᠬᠠᠷᠠ ᠲᠤᠷᠯᠢᠶᠠᠬᠠ ᠰᠦᠷᠦᠭᠯᠡᠨ ᠨᠢᠰᠴᠦ ᠥᠩᠭᠡᠷᠡᠪᠡ᠃ ᠲᠣᠯᠣᠭᠠᠢ ᠳᠡᠭᠡᠷᠡ ᠰᠢᠪᠠᠭᠤᠨ ᠤ᠋ ᠰᠡᠭᠦᠳᠡᠷ ᠲᠣᠰᠤᠯᠠ ᠭᠡᠮᠡᠨ ᠣᠢᠷᠠᠳ ᠴᠡᠷᠢᠭ ᠦ᠋ᠳ ᠭᠡᠭᠡᠷᠡᠨ ᠨᠢᠯᠪᠤᠪᠠ᠃ ᠴᠡᠷᠢᠭ ᠦ᠋ᠳ ᠦ᠋ᠨ ᠰᠢᠯᠦᠰᠦ ᠠᠭᠠᠷ ᠲᠤ᠌ ᠦᠰᠦᠴᠢᠯᠡ᠃
— ᠰᠤᠯᠲᠠᠨ ᠶᠠᠭᠤ ᠭᠡᠬᠦ ᠪᠣᠯ? ᠨᠠᠮᠠᠶ᠋ᠢ᠂᠂᠂᠂
— ᠲᠡᠷᠡ ᠰᠤᠯᠲᠠᠨ ᠪᠠᠢᠬᠤ ᠪᠠᠨ ᠪᠣᠯᠢᠭᠰᠠᠨ᠃
— ᠪᠠᠷᠢᠭᠳᠠᠭᠰᠠᠨ ᠤᠤ?
— ᠠᠯᠠᠭᠳᠠᠭᠰᠠᠨ᠃
— ᠮᠠᠨ ᠤ᠋ ᠮᠢᠩᠭᠠᠲᠤ ᠬᠠᠮᠢᠭᠠ ᠣᠴᠢᠭᠰᠠᠨ ᠪᠣᠢ?
— ᠴᠠᠭᠠᠨ ᠠᠭᠤᠯᠠ ᠶ᠋ᠢᠨ ᠣᠢᠷᠠᠳ ᠴᠡᠷᠢᠭ ᠦ᠋ᠨ ᠮᠠᠲᠠᠯ ᠳ᠋ᠤ᠌ ᠣᠷᠣᠵᠠᠢ᠃ ᠰᠠᠶᠢᠬᠠᠨ ᠬᠠᠷᠠ ᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠪᠣᠰᠤᠯᠭᠠ ᠭᠠᠷᠭᠠᠵᠤ ᠪᠢ ᠪᠣᠰᠤᠯᠭᠠ ᠶ᠋ᠢ ᠳᠠᠷᠤᠯᠠ᠃
— ᠤᠮᠠᠷ ᠪᠢ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠪᠣᠯᠤᠭᠰᠠᠨ ᠤᠤ?
— ᠲᠡᠭᠡᠭᠰᠡᠨ᠃ ᠴᠡᠷᠢᠭ ᠢ᠋ᠶ᠋ᠡᠨ ᠴᠤᠭᠯᠠᠭᠤᠯᠵᠤ ᠵᠡᠭᠥᠨᠭᠠᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠰᠢᠨᠡ ᠪᠡᠷ ᠲᠥᠪᠬᠢᠨᠡᠨ ᠰᠠᠭᠤᠬᠤ ᠪᠣᠯᠤᠯᠠ᠃ ᠲᠠᠨᠤᠰ ᠤ᠋ᠨ ᠣᠪᠣᠭ ᠤ᠋ᠨ ᠵᠥᠴᠢ ᠬᠠᠭᠠᠨ ᠲᠡᠨᠳᠡ ᠰᠠᠭᠤᠳᠠᠭ ᠪᠠᠢᠭᠰᠠᠨ ᠭᠡᠯᠡ᠃
ᠤᠮᠠᠷ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠳᠡᠮᠵᠢᠵᠦ᠂
— ᠬᠠᠷᠪᠸᠺ ᠮᠣᠩᠭᠣᠯ ᠴᠢᠰᠤ ᠲᠠᠢ ᠪᠠᠷ ᠢ᠋ᠶ᠋ᠠᠨ ᠭᠠᠢᠬᠠᠭᠤᠯᠳᠠᠭ ᠪᠠᠢᠪᠠ᠃ ᠪᠢ ᠴᠦ᠍ ᠮᠣᠩᠭᠣᠯ ᠤᠳᠤᠮ ᠤ᠋ᠨ ᠬᠠᠭᠠᠨ ᠤ᠋ ᠣᠪᠣᠭ ᠪᠢᠯᠡ᠃ ᠨᠠᠮᠠᠶ᠋ᠢ ᠠᠯᠯᠠᠾ ᠲᠡᠭᠷᠢ ᠥᠷᠥᠰᠢᠶᠡᠨᠡ᠃ ᠲᠡᠭᠷᠢ ᠶ᠋ᠢᠨ ᠲᠠᠭᠠᠯᠠᠯ ᠳ᠋ᠤ᠌ ᠨᠡᠢᠴᠡᠭᠰᠡᠨ ᠳ᠋ᠡᠭᠡᠨ ᠪᠠᠶᠠᠷ ᠲᠠᠢ ᠪᠠᠢᠨᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠢᠷᠦᠭᠡᠯ ᠦ᠋ᠨ ᠰᠠᠪᠠᠨ ᠳ᠋ᠤ᠌ ᠢᠷᠦᠭᠡᠯ ᠡᠷᠭᠦᠶᠡ ᠭᠡᠯᠡ᠃
ᠬᠣᠷᠢᠨ ᠨᠢᠭᠡ
ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠶᠡᠬᠡᠩᠬᠢ ᠨᠤᠲᠤᠭ ᠢ᠋ ᠭᠠᠯᠳᠠᠨ ᠡᠷᠬᠡᠰᠢᠶᠡᠵᠦ ᠪᠠᠢᠪᠠ᠃ ᠲᠡᠨᠳᠡ ᠮᠢᠩᠭᠠ ᠭᠠᠷᠤᠢ ᠬᠣᠲᠠ ᠪᠠᠯᠭᠠᠳ ᠰᠠᠭᠤᠷᠢᠨ ᠪᠣᠢ᠃ ᠢᠷᠭᠡᠳ ᠨᠢ ᠪᠤᠷᠬᠠᠨ ᠰᠢᠲᠦᠨᠡ᠃ᠠᠯᠯᠠᠾ ᠰᠢᠲᠦᠨᠡ᠂ ᠾᠷᠢᠰᠲ᠋ᠣᠰ ᠰᠢᠲᠦᠨᠡ᠃ᠲᠣᠰᠬᠣᠨ ᠳ᠋ᠤ᠌ ᠭᠤᠷᠪᠠᠨ ᠰᠦᠮᠡ ᠪᠠᠢᠬᠤ ᠳ᠋ᠤ᠌ ᠨᠢᠭᠡ ᠨᠢ ᠯᠠᠯᠤ ᠶ᠋ᠢᠨ᠂ ᠨᠥᠭᠦᠭᠡ ᠨᠢ ᠪᠤᠷᠬᠠᠨ ᠤ᠋᠂ ᠳᠠᠷᠠᠭᠠᠬᠢ ᠨᠢ ᠾᠷᠢᠰᠲ᠋ᠣᠰ ᠤ᠋ᠨ ᠬᠢ ᠪᠢᠯᠡ᠃ ᠬᠣᠯᠢᠮᠠᠭ ᠰᠢᠲᠦᠯᠭᠡ ᠭᠡᠵᠦ ᠦᠭᠡᠢ᠃ ᠬᠣᠭᠣᠷᠣᠨᠳᠣ ᠪᠠᠨ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠢᠵᠦ᠂ ᠲᠡᠯᠢᠢᠵᠦ ᠣᠳᠤᠭᠰᠠᠨ ᠬᠡᠨ ᠨᠢᠭᠡᠨ ᠦ᠌ ᠪᠡᠨ ᠠᠷᠤ ᠠ᠋ᠴᠠ ᠥᠪᠡᠷᠰᠡᠳ ᠦ᠋ᠨ ᠵᠠᠩ ᠵᠠᠩᠰᠢᠯ᠂ ᠠᠬᠤᠢ᠂ ᠪᠤᠷᠬᠠᠨ ᠤ᠋ ᠨᠡᠷᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠣᠢ ᠭᠠᠰᠢᠭᠤ ᠪᠠᠨ ᠲᠠᠢᠯᠵᠤ᠂ ᠶᠠᠳᠠᠷᠠᠭᠰᠠᠨ ᠢ᠋ᠶ᠋ᠠᠨ ᠳᠡᠮᠵᠢᠵᠦ ᠠᠮᠢᠳᠤᠷᠠᠨᠠ᠃ ᠲᠠᠷᠢᠶᠠ ᠨᠣᠭᠣᠭᠠ ᠶ᠋ᠢᠨ ᠲᠠᠯᠠᠪᠠᠢ᠂ ᠡᠯᠵᠢᠭᠡ ᠯᠠᠭᠤᠰᠠ ᠪᠠᠨ ᠬᠦᠷᠲᠡᠯᠡ ᠨᠢᠭᠡᠨ ᠳ᠋ᠡᠭᠡᠨ ᠵᠢᠭᠡᠯᠡᠭᠡ ᠪᠡᠷ ᠡᠵᠡᠮᠰᠢᠭᠦᠯᠵᠦ ᠰᠡᠳᠬᠢᠯ ᠨᠢᠭᠡᠳᠳᠡᠭ ᠪᠠᠢᠯᠠ᠃
ᠮᠢᠩᠭᠠᠲᠤ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠵᠠᠭᠥᠨᠭᠠᠷ ᠤ᠋ᠨ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠬᠦᠷᠦᠯᠴᠡᠵᠦ ᠣᠴᠢᠭᠰᠠᠨ ᠤᠮᠠᠷ ᠨᠢᠭᠡᠨ ᠲᠡᠦᠬᠡ ᠶ᠋ᠢ ᠳᠡᠯᠭᠡᠭᠰᠡᠨ ᠶᠤᠮ᠃ ᠭᠠᠯᠳᠠᠨ ᠬᠠᠭᠠᠨ ᠲᠡᠷᠡ ᠲᠡᠦᠬᠡ ᠶ᠋ᠢ ᠲᠡᠮᠳᠡᠭᠯᠡᠵᠦ ᠠᠪᠤᠭᠰᠠᠨ ᠪᠢᠯᠡ᠃ ᠬᠠᠷᠪᠸᠺ ᠤ᠋ᠨ ᠡᠴᠢᠭᠡ ᠶᠠᠩᠭᠢᠷ ᠰᠤᠯᠲᠠᠨ ᠶᠤᠮ᠃ ᠶᠠᠩᠭᠢᠷ ᠰᠤᠯᠲᠠᠨ ᠤ᠋ ᠡᠴᠢᠭᠡ ᠬᠥᠨᠳᠡᠢ ᠪᠢᠯᠡ᠃ ᠬᠥᠨᠳᠡᠢ ᠲᠠᠷᠢᠶᠠᠴᠢᠨ ᠭᠠᠷᠤᠯᠲᠠᠢ᠃ ᠬᠥᠨᠳᠡᠢ ᠶ᠋ᠢᠨ ᠠᠬᠠ ᠳᠡᠭᠦᠦᠰ ᠠᠭᠤᠯᠠ ᠲᠠᠯᠠ ᠬᠣᠣᠰᠯᠠᠭᠰᠠᠨ ᠨᠤᠲᠤᠭ ᠲᠤ᠌ ᠭᠣᠣᠯ ᠤ᠋ᠨ ᠠᠢ ᠰᠠᠪᠠ ᠪᠠᠷ ᠲᠠᠷᠢᠶᠠ ᠲᠠᠷᠢᠵᠤ᠂ ᠬᠤᠯᠤᠰᠤ ᠣᠪᠢᠶᠠᠰᠤ ᠤᠷᠭᠤᠭᠤᠯᠵᠤ ᠣᠷᠣᠨ ᠪᠠᠢᠷᠢ ᠪᠠᠨ ᠪᠠᠷᠢᠵᠤ ᠠᠮᠢᠳᠤᠷᠠᠳᠠᠭ ᠪᠠᠢᠵᠠᠢ᠃ ᠲᠡᠳᠡᠨ ᠦ᠌ ᠳᠡᠭᠡᠳᠦ ᠡᠪᠦᠭᠡ ᠨᠢ ᠵᠥᠴᠢ ᠶ᠋ᠢᠨ ᠮᠣᠩᠭᠣᠯᠴᠤᠳ ᠠ᠋ᠴᠠ ᠭᠠᠷᠤᠯᠲᠠᠢ ᠶᠤᠮ᠃
ᠬᠥᠨᠳᠡᠢ ᠲᠠᠷᠢᠶᠠᠴᠢᠨ ᠤ᠋ ᠦᠶᠡ ᠳ᠋ᠦ᠍ ᠲᠡᠳᠡᠨ ᠦ᠌ ᠭᠡᠷ ᠪᠦᠯᠢ ᠭᠡᠨᠡᠳᠲᠡ ᠪᠠᠶᠠᠵᠢᠵᠠᠢ᠃ ᠬᠥᠨᠳᠡᠢ ᠠᠷᠭᠤᠮᠠᠭ ᠮᠣᠷᠢ ᠲᠠᠢ᠂ ᠠᠲᠠᠨ ᠲᠡᠮᠡᠭᠡ ᠲᠡᠢ᠂ ᠵᠠᠷᠤᠴᠠ ᠪᠣᠭᠣᠯ ᠤ᠋ᠳ ᠲᠠᠢ ᠪᠣᠯᠵᠤ ᠰᠠᠷᠢ ᠮᠥᠷᠡᠨ ᠦ᠌ ᠬᠥᠪᠡᠭᠡᠨ ᠳ᠋ᠦ᠍ ᠲᠣᠰᠬᠣᠨ ᠪᠠᠢᠭᠤᠯᠪᠠ᠃
ᠲᠣᠰᠬᠣᠨ ᠢ᠋ ᠬᠥᠨᠳᠡᠢ ᠭᠡᠵᠦ ᠨᠠᠷᠠᠯᠠᠪᠠ᠃ ᠬᠥᠨᠳᠡᠢ ᠶ᠋ᠢᠨ ᠠᠬᠠᠮᠠᠳ ᠬᠥᠪᠡᠭᠦᠨ ᠶᠠᠩᠭᠢᠷ ᠰᠤᠯᠲᠠᠨ ᠵᠡᠪᠰᠡᠭᠯᠡᠭᠰᠡᠨ ᠪᠦᠯᠦᠭ ᠠᠬᠠᠯᠠᠵᠤ᠂ ᠳᠠᠷᠠᠭᠠ ᠨᠢ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠪᠣᠯᠵᠤ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠡᠭᠦᠰᠬᠡᠵᠡᠢ᠃ ᠪᠠᠭᠠ ᠳ᠋ᠠᠭᠠᠨ ᠴᠢᠨᠣᠠ ᠬᠥᠬᠥᠵᠦ ᠥᠰᠦᠭᠰᠡᠨ ᠬᠡᠮᠡᠬᠦ ᠳᠣᠮᠣᠭ ᠴᠤᠤ ᠲᠡᠷᠡ ᠦᠶᠡ ᠳ᠋ᠦ᠍ ᠲᠠᠷᠬᠠᠵᠤ ᠪᠢᠯᠡ᠃ ᠴᠢᠨᠣᠠ ᠬᠥᠬᠥᠭᠰᠡᠨ ᠨᠢ ᠦᠨᠡᠨ ᠴᠤ᠌ ᠪᠢᠵᠡ᠂ ᠬᠤᠳᠠᠯ ᠴᠤ᠌ ᠪᠢᠵᠡ᠃ ᠶᠠᠩᠭᠢᠷ ᠰᠤᠯᠲᠠᠨ ᠡᠴᠢᠭᠡ ᠶ᠋ᠢᠨ ᠬᠠᠮᠲᠤ ᠠᠯᠲᠠᠢ ᠶ᠋ᠢᠨ ᠬᠢᠵᠠᠭᠠᠷ ᠲᠤ᠌ ᠨᠢᠭᠡᠨ ᠵᠢᠯ ᠢ᠋ ᠦᠳᠡᠵᠦ᠂ ᠲᠠᠷᠳᠠᠭ ᠲᠠᠭᠠᠨ ᠪᠣᠯᠲᠠᠯᠠ ᠶᠠᠳᠠᠷᠠᠭᠰᠠᠨ ᠠᠮᠢᠲᠠᠳ ᠪᠤᠴᠠᠵᠤ ᠢᠷᠡᠭᠰᠡᠨ ᠪᠠᠢᠨᠠ᠃
ᠲᠡᠷᠡ ᠵᠤᠨ ᠠᠷᠠᠪ ᠤ᠋ᠨ ᠲᠠᠩᠭᠢᠰ ᠤ᠋ᠨ ᠬᠥᠪᠡᠭᠡ ᠬᠦᠷᠲᠡᠯᠡ ᠠᠶᠠᠯᠠᠭᠠᠳ ᠢᠷᠡᠬᠦ ᠳ᠋ᠡᠭᠡᠨ ᠮᠣᠷᠢ ᠤᠨᠤᠵᠤ ᠲᠡᠮᠡᠭᠡ ᠬᠥᠲᠥᠯᠦᠭᠰᠡᠨ ᠪᠠᠢᠪᠠ᠃ ᠤᠮᠠᠷ ᠤ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠠᠷᠠᠳ ᠤ᠋ᠳ ᠤ᠋ᠨ ᠨᠢᠭᠡ ᠨᠢ《 ᠪᠠᠶᠠᠨ ᠠᠢᠯ ᠲᠠᠯᠬᠢᠵᠠᠢ》 ᠭᠡᠵᠦ ᠲᠠᠭᠠᠮᠠᠭᠯᠠᠪᠠ᠃ ᠨᠥᠭᠦᠭᠡ ᠨᠢ《 ᠠᠯᠲᠠ ᠣᠯᠤᠭᠰᠠᠨ ᠪᠠᠢᠨᠠ》 ᠭᠡᠮᠡᠨ ᠪᠣᠳᠣᠪᠠ᠃
ᠬᠠᠷᠢᠨ ᠠᠯᠢ ᠨᠢ ᠴᠦ᠍ ᠪᠢᠰᠢ ᠪᠠᠢᠯᠠ᠃ ᠬᠠᠰᠠᠭ ᠤ᠋ᠳ ᠮᠥᠨ ᠬᠦ᠌ ᠬᠥᠨᠳᠡᠢ ᠶ᠋ᠢᠨ ᠪᠠᠶᠠᠵᠢᠭᠰᠠᠨ ᠲᠡᠦᠬᠡ ᠶ᠋ᠢ ᠳᠠᠭᠠᠬᠤ ᠭᠡᠵᠦ ᠣᠷᠣᠯᠳᠣᠭᠠᠳ ᠴᠢᠳᠠᠭᠠ ᠦᠭᠡᠢ᠃ ᠲᠡᠷᠡ ᠲᠡᠦᠬᠡ ᠨᠢᠭᠤᠴᠠ ᠬᠡᠪ ᠢ᠋ᠶ᠋ᠡᠷ ᠬᠣᠴᠣᠷᠤᠭᠰᠠᠨ ᠦᠭᠡᠢ᠃ ᠶᠠᠩᠭᠢᠷ ᠰᠤᠯᠲᠠᠨ ᠠᠮᠢ ᠲᠠᠯᠪᠢᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠵᠠᠳᠠᠯᠵᠠᠢ᠃ ᠴᠡᠭᠡᠵᠢ ᠪᠡᠨ ᠴᠣᠭᠣ ᠴᠠᠪᠴᠢᠭᠤᠯᠤᠭᠰᠠᠨ ᠶᠠᠩᠭᠢᠷ ᠰᠤᠯᠲᠠᠨ ᠮᠠᠰᠢ ᠶᠡᠬᠡ ᠬᠠᠯᠠᠭᠤᠷᠠᠵᠤ ᠲᠣᠰᠬᠣᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠪᠠᠢᠨᠠ᠃
— ᠣᠢᠷᠠᠳ ᠤ᠋ᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠥᠷᠭᠡᠨ ᠬᠥᠨᠳᠡᠢ᠂ ᠠᠭᠤᠵᠢᠮ ᠬᠠᠪᠴᠢᠯ ᠪᠠᠢᠳᠠᠭ ᠶᠤᠮ᠃ ᠡᠴᠢᠭᠡ ᠪᠢᠳᠡ ᠬᠣᠶᠠᠷ ᠲᠡᠨᠳᠡ ᠡᠴᠡ ᠡᠪᠡᠰᠦ ᠤᠷᠭᠤᠮᠠᠯ ᠲᠡᠭᠦᠵᠦ ᠬᠠᠲᠠᠭᠠᠭᠠᠳ ᠨᠦᠳᠦᠵᠦ ᠨᠤᠨᠲᠠᠭᠯᠠᠭᠠᠳ ᠠᠷᠠᠪ ᠲᠤ᠌ ᠬᠤᠳᠠᠯᠳᠤᠵᠤ ᠪᠠᠶᠠᠵᠢᠭᠰᠠᠨ ᠶᠤᠮ ᠭᠡᠵᠡᠢ᠃
— ᠲᠡᠷᠡ ᠡᠪᠡᠰᠦ ᠶ᠋ᠢᠨ ᠨᠡᠷᠡ ᠶ᠋ᠢ ᠮᠡᠳᠡᠬᠦ ᠤᠤ?
— ᠬᠠᠷᠠ ᠡᠪᠡᠰᠦ᠂ ᠮᠠᠭᠠᠯᠢᠩᠭᠤ᠂ ᠵᠡᠷᠯᠢᠭ ᠣᠯᠣᠰᠣ ᠭᠡᠳᠡᠭ᠃ ᠴᠡᠴᠡᠭ ᠨᠢ ᠶᠠᠭᠠᠨ ᠪᠤᠳᠠᠩ ᠲᠠᠢ᠃ ᠰᠠᠨᠠᠮᠰᠠᠷ ᠦᠭᠡᠢ ᠲᠥᠭᠡᠷᠢᠵᠦ ᠶᠠᠪᠤᠭᠰᠠᠭᠠᠷ ᠲᠡᠨᠳᠡ ᠣᠴᠢᠭᠰᠠᠨ ᠶᠤᠮ᠃ ᠵᠡᠭᠡᠷᠡ ᠤᠨᠲᠠᠵᠤ ᠪᠠᠢᠪᠠ᠃ ᠡᠴᠢᠭᠡ ᠲᠡᠭᠦᠨ ᠢ᠋ ᠠᠮᠠᠷᠬᠠᠨ ᠠᠯᠠᠵᠤ ᠮᠢᠬᠠ ᠶ᠋ᠢ ᠨᠢ ᠰᠢᠷᠠᠵᠤ ᠢᠳᠡᠭᠡᠳ ᠬᠣᠨᠣᠪᠠ᠃ ᠲᠡᠭᠡᠭᠡᠳ ᠶᠠᠭᠤ ᠪᠣᠯᠤᠭᠰᠠᠨ ᠭᠡᠵᠦ ᠪᠣᠳᠣᠨᠠ᠃ ᠨᠣᠬᠠᠢ ᠮᠠᠨᠢ ᠦᠬᠦᠴᠢᠬᠡᠭᠰᠡᠨ ᠶᠣᠮᠰᠢᠭ ᠬᠡᠪᠲᠡᠭᠡᠳ ᠪᠠᠢᠯᠠ᠃ ᠪᠢᠳᠡ ᠬᠣᠶᠠᠷ ᠪᠠᠰᠠ ᠳᠦᠢᠩᠭᠢᠳᠡᠪᠡ᠃ ᠡᠴᠢᠭᠡ ᠨᠠᠮᠠᠶ᠋ᠢ ᠬᠥᠲᠥᠯᠦᠭᠰᠡᠭᠡᠷ ᠤᠰᠤ ᠲᠠᠢ ᠠᠭᠤᠢ ᠳ᠋ᠤ᠌ ᠣᠷᠣᠩᠨᠠᠵᠤ ᠪᠠᠢᠯᠠ᠃ ᠡᠴᠢᠭᠡ ᠨᠣᠬᠠᠢ ᠪᠠᠨ ᠲᠡᠪᠡᠷᠢᠵᠦ ᠢᠷᠡᠪᠡ᠃
— ᠨᠣᠬᠠᠢ ᠵᠦᠭᠡᠷ ᠪᠠᠢᠭᠰᠠᠨ ᠤᠤ?
— ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠬᠤᠴᠠᠵᠤ ᠤᠯᠢᠭᠠᠳ ᠡᠬᠢᠯᠡᠪᠡ᠃
— ᠵᠡᠭᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠮᠢᠬᠠ ᠶ᠋ᠢ ᠶᠠᠭᠠᠬᠢᠭᠰᠠᠨ ᠪᠣᠢ?
— ᠠᠪᠴᠢᠷᠠᠭᠠᠳ ᠢᠳᠡᠴᠢᠬᠡᠭᠰᠡᠨ᠃
— ᠲᠡᠭᠡᠭᠡᠳ᠁
— ᠡᠴᠢᠭᠡ ᠨᠠᠮᠠᠶ᠋ᠢ ᠶᠠᠭᠠᠨ ᠴᠡᠴᠡᠭ ᠤᠷᠤᠭᠤ ᠶᠠᠪᠤᠭᠤᠯᠪᠠ᠃ ᠴᠢᠨᠣᠠ ᠶ᠋ᠢᠨ ᠪᠡᠯᠲᠡᠷᠭᠡ ᠤᠨᠲᠠᠵᠤ ᠪᠠᠢᠪᠠ᠃ ᠲᠡᠪᠡᠷᠢᠵᠦ ᠢᠷᠡᠭᠡᠳ ᠮᠢᠬᠠ ᠥᠭᠭᠦᠭᠰᠡᠭᠡᠷ ᠳᠠᠰᠬᠠᠪᠠ᠃ ᠲᠡᠷᠡ ᠶᠠᠭᠠᠨ ᠴᠡᠴᠡᠭ ᠡᠴᠡ ᠲᠡᠭᠦᠵᠦ ᠠᠪᠴᠢᠷᠠᠭᠠᠳ ᠦᠨᠦᠷᠲᠦᠭᠦᠯᠬᠦ ᠪᠡᠷ ᠪᠡᠯᠲᠡᠷᠭᠡ ᠤᠨᠲᠠᠴᠢᠬᠠᠨᠠ᠃ ᠨᠣᠬᠠᠢ ᠳ᠋ᠠᠭᠠᠨ ᠦᠨᠦᠷᠲᠦᠭᠦᠯᠪᠡ᠃ ᠮᠥᠨ ᠠᠳᠠᠯᠢ ᠤᠨᠳᠤᠴᠢᠬᠠᠨᠠ᠃
— ᠲᠡᠭᠡᠭᠡᠳ ᠴᠠᠭᠠᠰᠢ ᠪᠠᠨ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠬᠤᠷᠳᠤᠨ ᠶᠠᠷᠢᠭᠠᠴᠢ᠃ ᠪᠡᠶᠡ ᠲᠠᠨᠢ ᠮᠠᠭᠤ ᠪᠠᠢᠨᠠ᠃
— ᠨᠤᠬᠤᠵᠤ ᠦᠨᠦᠷᠲᠦᠳᠡᠭ ᠨᠤᠨᠲᠠᠭ ᠴᠠᠭᠠᠨ ᠶᠠᠭᠤᠮᠠ ᠶ᠋ᠢ ᠬᠤᠳᠠᠯᠳᠤᠭᠠᠴᠢᠳ ᠲᠤ᠌ ᠥᠨᠳᠥᠷ ᠦᠨᠡ ᠪᠡᠷ ᠵᠠᠷᠤᠵᠤ ᠪᠠᠢᠬᠤ ᠶ᠋ᠢ ᠡᠴᠢᠭᠡ ᠬᠠᠷᠠᠭᠰᠠᠨ ᠶᠤᠮᠰᠠᠨᠵᠠᠢ᠃ ᠦᠴᠢᠨᠡᠬᠡᠨ ᠡᠪᠡᠰᠦ ᠨᠣᠭᠣᠭᠠ᠂ ᠴᠡᠴᠡᠭ ᠲᠡᠭᠦᠵᠦ ᠬᠠᠨᠠᠨ ᠬᠠᠳᠠ ᠳ᠋ᠤ᠌ ᠬᠠᠲᠠᠭᠠᠭᠠᠳ ᠳᠠᠷᠠᠭᠠ ᠨᠢ ᠨᠤᠬᠤᠵᠤ ᠨᠤᠨᠲᠠᠭᠯᠠᠭᠠᠳ ᠪᠣᠭᠴᠣᠨ ᠳ᠋ᠠᠭᠠᠨ ᠬᠣᠶᠠᠷᠬᠠᠨ ᠪᠣᠭᠣᠳᠠᠯ ᠲᠠᠢ ᠨᠤᠲᠤᠭ ᠲᠠᠭᠠᠨ ᠣᠴᠢᠭᠰᠠᠨ᠃ ᠠᠵᠠ ᠪᠠᠨ ᠲᠤᠷᠰᠢᠬᠤ ᠪᠠᠷ ᠠᠷᠠᠪ ᠤ᠋ᠨ ᠲᠠᠩᠭᠢᠰ ᠬᠦᠷᠲᠡᠯᠡ ᠠᠶᠠᠯᠠᠵᠤ ᠤᠰᠤᠨ ᠪᠣᠭᠣᠮᠲᠠ ᠶ᠋ᠢᠨ ᠬᠤᠳᠠᠯᠳᠤᠭᠠᠴᠢᠳ ᠲᠤ᠌ ᠵᠠᠷᠤᠭᠰᠠᠨ᠃ ᠲᠡᠭᠡᠭᠡᠳ ᠵᠠᠮ ᠳ᠋ᠠᠭᠠᠨ ᠮᠣᠷᠢ᠂ ᠲᠡᠮᠡᠭᠡ ᠬᠤᠳᠠᠯᠳᠤᠵᠤ ᠠᠪᠤᠭᠠᠳ ᠢᠷᠡᠭᠰᠡᠨ᠃
— ᠲᠠ ᠲᠡᠷᠡ ᠭᠠᠵᠠᠷ ᠢ᠋ᠶ᠋ᠠᠨ ᠵᠢᠭᠠᠵᠤ ᠥᠭᠴᠦ ᠴᠢᠳᠠᠨᠠ ᠤᠤ?
— ᠪᠢ ᠲᠠᠢᠰᠢ ᠪᠠᠨ ᠶᠠᠪᠤᠭᠠᠳ ᠬᠦᠷᠴᠦ ᠴᠢᠳᠠᠯ ᠦᠭᠡᠢ ᠪᠤᠲᠠ ᠴᠣᠬᠢᠭᠤᠯᠤᠭᠰᠠᠭᠠᠷ ᠪᠠᠢᠨᠠ᠃ ᠲᠡᠷᠡ ᠨᠤᠲᠤᠭ ᠣᠳᠣ ᠵᠡᠬᠥᠨᠭᠠᠷ ᠲᠤ᠌ ᠪᠠᠢᠭᠠ᠃
— ᠴᠣᠬᠣᠮ ᠬᠠᠮᠢᠭᠠ ᠪᠣᠢ? ᠡᠷᠬᠢᠮ ᠰᠤᠯᠲᠠᠨ!
— ᠠᠭᠤᠯᠠᠨ ᠳ᠋ᠤ᠌᠃ ᠠᠭᠤᠯᠠ ᠶ᠋ᠢᠨ ᠲᠡᠷᠡ ᠬᠠᠪᠴᠢᠯ ᠢ᠋ ᠠᠪᠬᠤ ᠶ᠋ᠢᠨ ᠲᠥᠯᠥᠭᠡ ᠪᠢ ᠪᠠᠢᠯᠳᠤᠳᠠᠭ ᠶᠤᠮ ᠰᠢᠦ ᠳᠡ᠃ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠠᠷᠠᠪᠠᠯ ᠪᠢ ᠲᠠᠨᠢᠨᠠ᠃ ᠣᠳᠣ ᠳᠠᠩᠴᠤ ᠥᠩᠭᠡᠷᠡᠯᠡ᠃
— ᠲᠠ ᠬᠡᠯᠡᠭᠡᠳ ᠥᠭᠭᠦᠭᠡᠴᠢ ᠳᠡ᠃
— ᠲᠡᠷᠡ ᠬᠠᠪᠴᠢᠯ ᠢ᠋ ᠣᠯᠪᠠᠯ ᠳᠡᠯᠡᠬᠡᠢ ᠳᠠᠭᠠᠭᠠᠬᠤ ᠦᠭᠡᠢ ᠪᠠᠶᠠᠨ ᠪᠣᠯᠤᠨᠠ᠃ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠲᠡᠷᠡ ᠬᠠᠪᠴᠢᠯ ᠪᠠᠢᠳᠠᠭ ᠶᠤᠮ᠃
ᠶᠠᠩᠭᠢᠷ ᠰᠤᠯᠲᠠᠨ ᠠᠮᠢᠰᠬᠤᠯ ᠬᠤᠷᠢᠶᠠᠯᠠ᠃ ᠬᠠᠰᠠᠭ ᠴᠡᠷᠢᠭ ᠦ᠋ᠳ ᠪᠡᠶᠡᠰ ᠦ᠋ᠨ ᠥᠭᠡᠳᠡ ᠡᠴᠡ ᠬᠠᠷᠠᠪᠠ᠃ ᠤᠮᠠᠷ ᠭᠡᠨᠡᠳᠲᠡ《 ᠬᠠᠷᠪᠸᠺ ᠬᠠᠮᠢᠭᠠ ᠣᠴᠢᠪᠠ》 ᠭᠡᠵᠦ ᠠᠰᠠᠭᠤᠯᠠ᠃ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠡᠴᠢᠭᠡ ᠶ᠋ᠢ ᠪᠡᠨ ᠠᠮᠢᠰᠬᠤᠯ ᠨᠢ ᠲᠠᠰᠤᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠵᠦᠰᠦᠭᠦᠯᠦᠭᠰᠡᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠰᠢᠷᠬᠠ ᠶ᠋ᠢ ᠭᠥᠷᠦᠭᠡᠰᠦᠨ ᠦ᠌ ᠷᠠᠰᠢᠶᠠᠨ ᠢ᠋ᠶ᠋ᠠᠷ ᠱᠠᠪᠰᠢᠵᠤ ᠰᠠᠭᠤᠭᠰᠠᠨ ᠪᠠᠢᠵᠠᠢ᠃
ᠭᠠᠯᠳᠠᠨ ᠬᠠᠭᠠᠨ ᠮᠠᠰᠢᠳᠠ ᠬᠦᠯᠢᠶᠡᠴᠡᠲᠡᠢ ᠪᠣᠳᠣᠯᠬᠢᠯᠠᠵᠤ《 ᠶᠠᠩᠭᠢᠷ ᠰᠤᠯᠲᠠᠨ᠂ ᠬᠠᠷᠪᠸᠺ ᠨᠠᠷ ᠤ᠋ᠨ ᠣᠯᠠᠩᠭᠠᠰᠣᠯ ᠡᠢᠮᠦ ᠤᠴᠢᠷ ᠲᠠᠢ ᠪᠠᠢᠵᠠᠢ᠃ ᠠᠢᠷᠬᠠᠲᠤ ᠬᠠᠪᠴᠢᠯ ᠮᠢᠨᠦ ᠡᠪᠦᠷ ᠲᠦ᠍ ᠪᠠᠢᠨᠠ᠃ ᠪᠤᠷᠬᠠᠨ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠪᠡ᠃ ᠳᠣᠮᠣᠭ ᠪᠣᠯ ᠳᠣᠮᠣᠭ᠃ ᠳᠣᠮᠣᠭ ᠲᠤ᠌ ᠦᠨᠡᠨ ᠪᠠᠭᠲᠠᠨᠠ᠃ ᠡᠨᠡ ᠦᠭᠦᠴᠡ ᠶ᠋ᠢ ᠬᠠᠷᠠ ᠰᠠᠨᠠᠭᠠᠲᠠᠳ ᠠᠭᠤᠳᠠᠯᠬᠤ ᠠᠪᠠᠰᠤ ᠭᠠᠢ ᠪᠠᠷᠴᠢᠳ ᠪᠤᠰᠤ ᠤᠤ? ᠮᠠᠩᠰᠢᠭᠤᠷᠠᠵᠤ ᠳᠣᠩᠲᠣᠳᠠᠭ ᠡᠪᠡᠳᠴᠢᠨ ᠲᠠᠷᠬᠠᠭᠠᠵᠤ ᠶᠠᠭᠠᠬᠢᠵᠤ ᠪᠣᠯᠤᠨᠠ᠃ ᠡᠨᠡ ᠪᠣᠯ ᠮᠢᠨᠦ ᠨᠢᠭᠤᠴᠠ》 ᠭᠡᠮᠡᠨ ᠯᠠᠮᠠ ᠭᠠᠯᠳᠠᠨ ᠳ᠋ᠠᠭᠠᠨ ᠥᠭᠦᠯᠡᠵᠦ ᠪᠠᠢᠯᠠ᠃
ᠣᠢᠷᠠᠳ( ᠷᠣᠮᠠᠨ)
ᠨᠠᠷᠠ ᠰᠢᠩᠭᠡᠭᠰᠡᠨ ᠬᠣᠢᠨᠠ ᠪᠠᠨ ᠮᠠᠨᠳᠤᠨᠠ
ᠨᠠᠪᠴᠢ ᠨᠢ ᠭᠠᠩᠳᠠᠭᠰᠠᠨ ᠬᠣᠢᠨᠠ ᠪᠠᠨ ᠳᠡᠯᠭᠡᠷᠡᠨᠡ
ᠣᠢᠷᠠᠳ ᠤ᠋ᠳ ᠬᠦᠯᠦᠭ ᠦ᠋ᠨ ᠵᠣ ᠳ᠋ᠤ᠌ ᠲᠥᠷᠥᠭᠡᠳ
ᠣᠢᠷᠠᠳ ᠤ᠋ᠳ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤ᠌ ᠤᠳᠤᠮᠤᠢ
ᠰᠠᠪᠠ ᠰᠢᠮᠡ ᠶ᠋ᠢᠨ ᠠᠭᠤᠯᠠ ᠠᠯᠲᠠᠢ
ᠰᠠᠷᠠᠨ ᠨᠠᠷᠠᠨ ᠬᠣᠶᠠᠷ ᠳᠠᠭᠠᠭᠤᠯᠢ ᠲᠠᠢ
ᠣᠢᠷᠠᠳ ᠤ᠋ᠳ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠥᠲᠡᠯᠵᠦ
ᠣᠢᠷᠠᠳ ᠤ᠋ᠳ ᠳᠥᠷᠪᠡᠨ ᠴᠢᠰᠤᠨ ᠠ᠋ᠴᠠ ᠪᠦᠲᠦᠨᠡᠮ
ᠲᠣᠪᠰᠢᠭᠤᠷ ᠤ᠋ᠨ ᠠᠶᠠᠯᠭᠤ ᠬᠥᠰᠬᠡ ᠨᠡᠭᠦᠳᠡᠯ ᠢ᠋ ᠳᠠᠭᠠᠨ ᠤᠷᠤᠰᠴᠤ᠂ ᠲᠩᠷᠢ ᠶ᠋ᠢᠨ ᠪᠤᠳᠠᠩ ᠳ᠋ᠤ᠌ ᠠᠭᠤᠰᠤᠨᠠ᠃ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠡᠷᠲᠡᠨ ᠦ᠌ ᠨᠤᠲᠤᠭ ᠲᠣᠭᠣᠰᠣ ᠲᠠᠢ ᠬᠣᠴᠣᠷᠴᠤ ᠢᠩᠭᠡᠨ ᠲᠡᠮᠡᠭᠡ ᠪᠤᠢᠯᠠᠨᠠ᠃ ᠲᠡᠮᠡᠭᠡ ᠶ᠋ᠢᠨ ᠨᠤᠲᠤᠭ ᠲᠤ᠌ ᠨᠠᠮᠤᠷ ᠤ᠋ᠨ ᠪᠣᠷᠣᠭᠠ ᠴᠠᠢᠷᠠᠵᠤ᠂ ᠬᠡᠦᠬᠡᠳ ᠪᠠᠭᠠᠴᠤᠤᠯ ᠬᠤᠷᠳᠤᠨ ᠬᠦᠯᠦᠭ ᠦ᠋ᠨ ᠵᠣ ᠳ᠋ᠤ᠌ ᠲᠠᠷᠴᠤᠭᠯᠠᠨ ᠳᠠᠪᠬᠢᠵᠠᠭᠠᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠳᠣᠨᠭᠡᠷᠡᠯ᠂ ᠠᠮᠤᠷᠪᠠᠶᠠᠷ᠂ ᠨᠠᠷᠠᠨᠲᠣᠭᠣᠰ᠂ ᠡᠷᠳᠡᠨᠢᠪᠢᠯᠢᠭ᠂ ᠪᠦᠷᠢᠨᠴᠡᠴᠡᠭ᠂ ᠠ᠊• ᠮᠢᠬᠤᠸᠠᠷ᠂ ᠤᠤᠭᠠᠨᠵᠢᠳ᠂ ᠣᠶᠤᠨᠴᠢᠮᠡᠭ᠂ ᠣᠳᠬᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠠᠨᠢᠷ᠂ ᠤᠤᠭᠠᠨᠵᠢᠳ᠂ ᠨᠠᠷᠠᠨᠲᠣᠭᠤᠰ