ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ08ᠨᠠᠢ᠍ᠮᠠᠳᠤᠭᠠᠷ ᠳᠡᠪᠲᠡᠷ᠂ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ
298ᠨᠠᠢ᠍ᠮᠠᠳᠤᠭᠠᠷ ᠳᠡᠪᠲᠡᠷ
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ
ᠨᠢᠭᠡ
ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠭᠤᠴᠢᠨ ᠮᠢᠩᠭᠠᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠲᠣᠭᠣᠰᠣᠨ ᠳ᠋ᠤ᠌ ᠬᠠᠨ ᠠᠯᠲᠠᠢ ᠪᠤᠳᠠᠩᠲᠤᠵᠤ᠂ ᠠᠶᠠᠨ ᠲᠡᠢᠨ ᠦ᠌ ᠨᠦᠰᠡᠷ ᠴᠤᠪᠤᠭᠠ ᠠᠷᠤ ᠮᠣᠩᠭᠣᠯ ᠬᠢᠭᠡᠳ ᠮᠠᠨᠵᠤ ᠴᠢᠩ ᠤᠯᠤᠰ ᠲᠤ᠌ ᠳᠠᠢᠯᠠᠷᠠ ᠮᠣᠷᠳᠠᠪᠠ᠃ ᠣᠢᠷᠠᠳ ᠤ᠋ᠨ ᠬᠦᠷᠢᠶᠡ ᠬᠡᠢᠳ ᠡᠴᠡ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠣᠯᠢᠨᠠ᠃ ᠴᠣᠷᠣᠰ ᠤ᠋ᠨ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠴᠠᠭᠠᠨ ᠢᠷᠪᠢᠰ ᠠᠭᠤᠯᠠ ᠶ᠋ᠢᠨ ᠶᠠᠩ ᠲᠠᠭᠲᠤ ᠳ᠋ᠤ᠌ ᠳᠡᠭᠦᠯᠢᠵᠦ ᠣᠲᠣᠭᠠᠳ ᠪᠤᠴᠠᠵᠤ ᠠᠨᠤ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠢᠷᠡᠪᠡ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠪᠡᠬᠢᠯᠡᠯᠲᠡ᠂ ᠴᠠᠢᠵᠠ ᠨᠥᠬᠥᠴᠡ ᠢᠷᠭᠡᠳ ᠴᠡᠷᠢᠭ ᠢ᠋ᠶ᠋ᠡᠷ ᠰᠡᠯᠪᠢᠭᠳᠡᠪᠡ᠃
ᠮᠢᠨᠦ ᠨᠢᠳᠦᠨ ᠳ᠋ᠦ᠍ ᠮᠠᠨᠠᠨ ᠪᠤᠳᠠᠩ ᠲᠠᠲᠠᠵᠠᠢ᠃ ᠭᠠᠯᠳᠠᠨ ᠬᠠᠭᠠᠨ ᠮᠠᠨᠠᠨᠲᠤ ᠠᠭᠤᠯᠠᠰ ᠢ᠋ᠶ᠋ᠠᠨ ᠰᠠᠷᠠᠪᠴᠢᠯᠠᠨᠠ᠃ ᠠᠭᠤᠯᠠᠰ ᠬᠣᠯᠠᠳᠤᠭᠰᠠᠭᠠᠷ ᠪᠠᠢᠯᠠ᠃
ᠬᠣᠶᠠᠷ
ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠳᠣᠯᠣᠭᠠᠨ ᠤ᠋ ᠲᠡᠷᠭᠡᠯ ᠰᠠᠷᠠ ᠲᠠᠢ ᠦᠳᠡᠰᠢ ᠨᠠᠯᠠᠢᠪᠠ᠃ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠬᠡᠯᠡᠬᠦ ᠠᠭᠤᠯᠠᠰ ᠤ᠋ᠨ ᠮᠠᠩᠨᠠᠢ ᠳᠡᠭᠡᠷᠡ ᠣᠳᠣᠳ ᠵᠢᠭᠰᠠᠵᠤ ᠡᠬᠢᠯᠡᠪᠡ᠃ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠶᠡᠬᠡ ᠦᠷᠭᠦᠭᠡᠨ ᠦ᠌ ᠳᠣᠲᠣᠷᠠ ᠬᠠᠭᠠᠨ ᠪᠢᠷ ᠶᠠᠨᠲᠠᠢ ᠨᠡᠢᠯᠡᠭᠦᠯᠦᠨ ᠲᠡᠮᠳᠡᠭᠯᠡᠯ ᠬᠥᠲᠥᠯᠵᠦ ᠠᠪᠠᠢ᠃ ᠦᠷᠭᠦᠭᠡᠨ ᠳ᠋ᠦ᠍ ᠮᠢᠭᠮᠠᠨᠰᠠᠩᠵᠠᠢ ᠣᠷᠣᠭᠠᠳ᠂
— ᠠᠨᠤ ᠬᠠᠲᠤᠨ ᠴᠠᠸᠠᠩᠷᠠᠪᠳᠠᠨ ᠲᠠᠢᠰᠢ ᠣᠳᠤᠭᠰᠠᠨ ᠭᠡᠨᠡ᠃ ᠬᠠᠭᠠᠨ ᠲᠠᠨ ᠤ᠋ ᠪᠡᠶᠡ ᠯᠠᠭᠱᠠᠨ ᠲᠤᠩᠭᠠᠯᠠᠭ ᠪᠣᠢ ᠵ᠋ᠡ ᠭᠡᠮᠡᠨ ᠠᠮᠤᠷ ᠠᠮᠤᠭᠤᠯᠠᠩ ᠢ᠋ ᠡᠷᠢᠪᠡ᠃
ᠬᠠᠭᠠᠨ ᠤ᠋ ᠳᠤᠬᠤᠨ ᠳ᠋ᠤ᠌ ᠣᠨ ᠵᠢᠯ ᠦ᠋ᠨ ᠨᠠᠷᠠ ᠰᠠᠯᠬᠢᠨ ᠤ᠋ ᠬᠡ ᠲᠣᠭᠲᠠᠵᠠᠢ᠃ ᠬᠠᠭᠠᠨ ᠮᠢᠭᠮᠠᠨᠰᠠᠩᠵᠠᠢ ᠠ᠋ᠴᠠ ᠬᠠᠲᠤᠨ ᠡᠬᠡ ᠶ᠋ᠢᠨ ᠪᠡᠶᠡ ᠢᠯᠠᠷᠢᠰᠢᠵᠤ ᠰᠠᠢᠨ ᠰᠠᠭᠤᠭᠠ ᠶ᠋ᠢ ᠳᠤᠭᠤᠯᠤᠭᠠᠳ ᠪᠠᠶᠠᠰᠬᠤᠯᠠᠩ ᠲᠡᠭᠦᠯᠳᠡᠷ᠂
— ᠪᠢ ᠮᠠᠷᠭᠠᠰᠢ ᠬᠠᠲᠤᠨ ᠡᠬᠡ ᠳ᠋ᠡᠭᠡᠨ ᠣᠴᠢᠨᠠ ᠭᠡᠯᠡ᠃
— ᠨᠠᠮᠠᠶ᠋ᠢ ᠲᠠ ᠰᠣᠨᠣᠰᠤᠭᠠᠴᠢ᠃ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠴᠡᠷᠢᠭ ᠦ᠋ᠨ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠰᠠᠭᠤᠭᠠ᠃ ᠬᠥᠪᠡᠭᠦᠨ ᠬᠠᠭᠠᠨ ᠲᠠᠨ ᠢ᠋ ᠥᠪᠴᠢᠵᠦ ᠲᠥᠷᠥᠭᠰᠡᠨ ᠪᠤᠰᠤ ᠤᠤ? ᠰᠠᠪᠳᠠᠨᠪᠠᠯᠵᠢᠷ ᠠ᠋ᠴᠠ ᠭᠤᠷᠪᠠᠬᠠᠨ ᠰᠠᠷᠠ ᠶ᠋ᠢᠨ ᠠᠬᠠ ᠪᠤᠰᠤ ᠤᠤ? ᠬᠥᠪᠡᠭᠦᠳ ᠨᠢᠭᠡᠨ ᠢ᠋ᠶ᠋ᠡᠨ ᠦᠯᠦ ᠮᠡᠳᠡᠨᠡ᠃ ᠪᠢ ᠪᠠᠷᠯᠤᠭ ᠪᠣᠯᠪᠠᠴᠤ᠁ ᠬᠥᠪᠡᠭᠦᠨ ᠳ᠋ᠡᠭᠡᠨ ᠮᠠᠰᠢ ᠶᠡᠬᠡ ᠵᠣᠪᠠᠨᠠ᠃ ᠲᠠᠨ ᠤ᠋ ᠬᠥᠪᠡᠭᠦᠨ ᠳᠠᠢᠴᠢᠨ ᠡᠷᠡ ᠪᠣᠯᠤᠯᠠ ᠰᠢᠦ ᠳᠡ᠁
ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠶ᠋ᠢᠨ ᠬᠢ ᠰᠢᠭ ᠲᠣᠷᠮᠣᠯᠵᠠᠭᠰᠠᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠮᠡᠯᠲᠡᠷᠡᠪᠡ᠃ ᠮᠢᠭᠮᠠᠨᠰᠠᠩᠵᠠᠢ ᠶᠡᠬᠡᠳᠡ ᠤᠬᠢᠯᠠᠪᠠ᠃ ᠭᠠᠯᠳᠠᠨ ᠬᠠᠭᠠᠨ ᠪᠣᠳᠣᠯᠭᠠᠰᠢᠷᠠᠨᠠ᠃ ᠬᠠᠭᠠᠨ ᠪᠢᠷ ᠢ᠋ᠶ᠋ᠡᠨ ᠶᠠᠨᠲᠠᠢ ᠳ᠋ᠦ᠍ ᠲᠥᠷᠥᠪᠡ᠃
— ᠳᠡᠮᠪᠡᠷᠢᠯ ᠦ᠋ᠨ ᠨᠠᠰᠤ ᠬᠡᠳᠦ ᠪᠢᠯᠡ?
— ᠬᠣᠷᠢᠨ ᠵᠢᠷᠭᠤᠭᠠ᠁
— ᠬᠠᠭᠠᠨ ᠣᠷᠣ ᠰᠠᠭᠤᠬᠤ ᠳ᠋ᠠᠭᠠᠨ ᠪᠢ ᠬᠣᠷᠢᠨ ᠵᠢᠷᠭᠤᠭᠠ ᠲᠠᠢ ᠪᠠᠢᠪᠠ᠃ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠪᠤᠰᠤ ᠤᠤ? ᠴᠠᠭᠠᠨ ᠠᠭᠤᠯᠠᠨ ᠳ᠋ᠤ᠌ ᠰᠠᠢᠨ ᠪᠠᠢᠯᠳᠤᠭᠰᠠᠨ᠃ ᠲᠡᠷᠡ ᠬᠥᠪᠡᠭᠦᠨ ᠮᠢᠨᠦ ᠭᠡᠭᠡᠨ ᠳ᠋ᠦ᠍ ᠥᠰᠴᠦ ᠥᠨᠳᠡᠢᠯᠡ᠃ ᠬᠥᠪᠡᠭᠦᠨ ᠢ᠋ ᠨᠢᠳᠦᠨ ᠳ᠋ᠡᠭᠡᠨ ᠪᠠᠭᠲᠠᠭᠠᠵᠤ ᠪᠣᠢ᠃
— ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠮᠥᠨ᠃ ᠰᠢᠯᠢᠳᠡᠭ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ᠁
— ᠬᠠᠭᠠᠨ ᠤ᠋ ᠲᠣᠷᠭᠠᠨ ᠴᠡᠷᠢᠭ ᠲᠦ᠍ ᠲᠠᠲᠠᠵᠤ ᠠᠪᠤᠶᠠ᠃
— ᠬᠠᠭᠠᠨ ᠲᠠ ᠬᠥᠪᠡᠭᠦᠨ ᠳ᠋ᠡᠭᠡᠨ ᠢᠲᠡᠭᠡᠵᠦ ᠰᠢᠯᠭᠠᠬᠤ ᠴᠠᠭ ᠢᠷᠡᠵᠡᠢ᠃ ᠲᠡᠷᠡ ᠬᠥᠪᠡᠭᠦᠨ ᠱᠠᠯᠠᠮᠠᠭᠠᠢ᠂ ᠪᠠᠭᠠᠲᠤᠷ ᠵᠣᠷᠢᠭ ᠲᠠᠢ᠃
— ᠨᠠᠮᠠᠶ᠋ᠢ ᠮᠡᠳᠡᠳᠡᠭ ᠭᠡᠮᠡᠨ ᠬᠥᠪᠡᠭᠦᠨ ᠳ᠋ᠦ᠍ ᠬᠡᠯᠡᠭᠡᠷᠡᠢ᠃
ᠮᠢᠭᠮᠠᠨᠰᠠᠩᠵᠠᠢ ᠬᠠᠭᠠᠨ ᠤ᠋ ᠬᠠᠷᠠᠴᠠᠨ ᠠ᠋ᠴᠠ ᠵᠠᠢᠯᠠᠰᠬᠢᠪᠡ᠃
— ᠲᠤᠯᠤᠯᠳᠤᠭᠠᠨ ᠠ᠋ᠴᠠ ᠡᠷᠭᠢᠵᠦ ᠢᠷᠡᠲᠡᠯᠡ ᠬᠠᠲᠤᠨ ᠡᠬᠡ ᠶ᠋ᠢ ᠬᠢᠴᠢᠶᠡᠵᠦ ᠠᠰᠠᠷᠠᠭᠠᠷᠠᠢ᠃ ᠬᠠᠲᠤᠨ ᠡᠬᠡ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠲᠡᠩᠬᠡᠯ ᠳᠣᠷᠣᠢᠲᠠᠭᠰᠠᠨ᠃ ᠪᠠᠢᠩᠭᠤ ᠶ᠋ᠢᠨ ᠰᠤᠪᠢᠯᠠᠭᠠ ᠬᠡᠷᠡᠭᠲᠡᠢ᠃ ᠴᠢᠨᠦ ᠭᠠᠷ ᠤ᠋ᠨ ᠬᠣᠭᠣᠯᠠ ᠴᠠᠢ ᠳ᠋ᠤ᠌ ᠢᠳᠡᠭᠡᠰᠢᠭᠰᠡᠨ ᠲᠤᠯᠠ ᠴᠢᠮᠠ ᠠ᠋ᠴᠠ ᠬᠣᠯᠠᠳᠤᠭᠤᠯᠬᠤ ᠠᠷᠭᠠ ᠦᠭᠡᠢ᠃ ᠴᠢ ᠪᠣᠯ ᠥᠬᠢᠨ ᠨᠢ ᠮᠥᠨ᠃
— ᠲᠡᠭᠡᠶᠡ᠃ ᠲᠠ ᠶᠠᠭᠤ ᠵᠠᠬᠢᠨᠠ᠃ ᠪᠢ ᠪᠦᠭᠦᠳᠡ ᠶ᠋ᠢ ᠭᠦᠢᠴᠡᠭᠡᠵᠦ ᠬᠢᠨᠡ᠃ ᠬᠥᠪᠡᠭᠦᠨ ᠢ᠋ ᠲᠠᠨ ᠳ᠋ᠤ᠌ ᠳᠠᠭᠠᠳᠬᠠᠵᠤ ᠰᠡᠳᠬᠢᠯ ᠠᠮᠠᠷᠠᠯᠠ᠃ ᠬᠥᠪᠡᠭᠦᠨ ᠭᠠᠭᠴᠠ ᠲᠤᠯᠠ ᠦᠷᠭᠦᠯᠵᠢ ᠵᠣᠪᠠᠨᠠ᠃
— ᠰᠠᠷᠠ ᠪᠦᠲᠦᠨ ᠪᠠᠢᠭᠠ ᠶ᠋ᠢ ᠠᠵᠢᠭᠯᠠᠪᠠ ᠤᠤ?
ᠬᠠᠭᠠᠨ ᠤ᠋ ᠰᠠᠨᠠᠭᠠ ᠶ᠋ᠢ ᠣᠢᠯᠠᠭᠠᠭᠰᠠᠨ ᠮᠢᠭᠮᠠᠨᠰᠠᠩᠵᠠᠢ ᠶ᠋ᠢᠨ ᠴᠢᠷᠠᠢ ᠤᠯᠠᠭᠠ ᠪᠤᠲᠠᠷᠠᠵᠠᠢ᠃ ᠬᠠᠭᠠᠨ ᠶᠡᠬᠡᠳᠡ ᠳᠣᠭᠳᠣᠯᠤᠭᠰᠠᠨ ᠪᠠᠢᠯᠠ᠃ ᠬᠣᠯᠠ ᠣᠢᠷᠠ ᠶ᠋ᠢᠨ ᠠᠶᠠᠨ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠳ᠋ᠠᠭᠠᠨ ᠡᠢᠨ ᠬᠦ᠌ ᠰᠡᠳᠬᠢᠯ ᠦ᠋ᠨ ᠤᠲᠠᠰᠤ ᠶ᠋ᠢ ᠬᠦᠪᠦᠵᠦ ᠪᠠᠢᠬᠤ ᠶ᠋ᠢ ᠨᠢ ᠮᠢᠭᠮᠠᠨᠰᠠᠩᠵᠠᠢ ᠦᠵᠡᠭᠡ ᠦᠭᠡᠢ ᠤᠴᠢᠷ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠰᠠᠢᠲᠤᠷ ᠰᠣᠨᠵᠢᠪᠠ᠃ ᠬᠠᠭᠠᠨ ᠲᠦᠷᠡᠢ ᠲᠡᠢ ᠭᠤᠲᠤᠯ ᠲᠠᠢ᠂ ᠪᠣᠰᠤᠭᠠ ᠵᠠᠬᠠ ᠲᠠᠢ ᠴᠠᠮᠴᠠ ᠲᠠᠢ ᠶᠡᠷᠦᠳᠡ ᠶ᠋ᠢᠨ ᠬᠢ ᠪᠡᠷ ᠢ᠋ᠶ᠋ᠡᠨ ᠠᠵᠢ᠃
— ᠭᠤᠸᠠᠯᠢᠭ ᠬᠠᠲᠤᠳ᠂ ᠡᠮᠡᠰ ᠥᠬᠢᠳ ᠦᠴᠢᠨᠡᠬᠡᠨ ᠪᠠᠢᠬᠤ ᠳ᠋ᠤ᠌ ᠭᠡᠮᠡᠨ ᠮᠢᠭᠮᠠᠨᠰᠠᠩᠵᠠᠢ ᠳᠤᠷᠠ ᠦᠭᠡᠢᠴᠡᠵᠦ ᠴᠠᠭᠠᠷᠭᠤᠯᠠᠯ ᠦᠭᠡᠢ ᠬᠦᠨᠳᠦᠳᠬᠡᠯ ᠦ᠋ᠨ ᠡᠭᠦᠳᠡᠨ ᠡᠴᠡ ᠥᠴᠢᠪᠡ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠮᠢᠭᠮᠠᠨᠰᠠᠩᠵᠠᠢ ᠳ᠋ᠤ᠌ ᠡᠷᠲᠡ ᠮᠠᠷᠲᠠᠭᠳᠠᠭᠰᠠᠨ ᠨᠢᠭᠡᠨ ᠳᠤᠷᠠᠰᠤᠮᠵᠢ ᠶ᠋ᠢ ᠰᠠᠨᠠᠭᠤᠯᠬᠤ ᠯᠤᠭᠠ᠂
— ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠳᠤᠮᠳᠠ ᠣᠴᠢᠳᠠᠭ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
— ᠬᠡᠨ ᠲᠡᠢ ᠪᠡᠨ ᠰᠠᠭᠤᠬᠤ ᠪᠢᠯᠡ ᠭᠡᠮᠡᠨ ᠮᠢᠭᠮᠠᠨᠰᠠᠩᠵᠠᠢ ᠵᠢᠷᠦᠬᠡ ᠪᠡᠨ ᠬᠠᠢᠯᠲᠠᠯᠠ ᠰᠠᠨᠠᠭᠠᠰᠢᠷᠠᠨ ᠥᠭᠦᠯᠡᠪᠡ᠃
— ᠨᠠᠳᠠ ᠲᠠᠢ᠂᠂᠂᠂ ᠬᠡᠮᠡᠭᠡᠳ ᠬᠠᠭᠠᠨ ᠬᠥᠬᠥᠷᠡᠪᠡ᠃
— ᠶᠡᠬᠡ ᠬᠠᠭᠠᠨ ᠮᠢᠨᠢ ᠥᠷᠥᠰᠢᠶᠡ᠃ ᠲᠠ ᠨᠠᠮᠠᠶ᠋ᠢ ᠲᠡᠭᠡᠬᠦ ᠳ᠋ᠦ᠍ ᠴᠡᠴᠡᠭ ᠮᠡᠲᠦ ᠵᠤᠯᠭᠠᠭᠠᠭᠰᠠᠨ᠃ ᠪᠢ ᠲᠠᠨ ᠠ᠋ᠴᠠ ᠵᠢᠷᠦᠬᠡ ᠪᠡᠨ ᠬᠠᠷᠠᠮᠯᠠᠭᠠ ᠦᠭᠡᠢ᠃ ᠲᠠᠨ ᠤ᠋ ᠦᠷᠡ ᠶ᠋ᠢ ᠲᠡᠭᠡᠭᠡᠵᠦ ᠲᠥᠷᠥᠭᠦᠯᠦᠨᠡ ᠴᠢᠨᠡᠭᠡ ᠰᠠᠨᠠᠭᠠ ᠦᠭᠡᠢ᠃ ᠪᠤᠷᠬᠠᠨ ᠬᠢᠰᠠᠭᠠ ᠦᠭᠡᠢ᠃ ᠲᠥᠪᠡᠳ ᠡᠴᠡ ᠢᠷᠡᠬᠦ ᠳ᠋ᠡᠭᠡᠨ ᠲᠠ ᠪᠤᠷᠬᠠᠨ ᠪᠠᠢᠭᠰᠠᠨ᠃ ᠣᠳᠣ ᠬᠠᠭᠠᠨ ᠪᠣᠯᠤᠭᠰᠠᠨ᠃ ᠪᠢ ᠪᠤᠷᠬᠠᠨ ᠤ᠋ ᠬᠡᠰᠢᠭ ᠢ᠋ ᠬᠦᠷᠲᠡᠭᠰᠡᠨ ᠬᠥᠮᠦᠨ᠃
— ᠪᠤᠷᠬᠠᠨ᠂ ᠬᠠᠭᠠᠨ ᠬᠣᠶᠠᠷ ᠢᠯᠭᠠᠭᠠ ᠲᠠᠢ ᠤᠤ?
— ᠶᠡᠬᠡ ᠢᠯᠭᠠᠭᠠ ᠪᠣᠢ᠃ ᠪᠤᠷᠬᠠᠨ ᠪᠣᠯ ᠨᠣᠮᠣᠬᠠᠨ᠃ ᠪᠤᠷᠬᠠᠨ ᠪᠥᠭᠡᠰᠦ ᠰᠡᠳᠬᠢᠯ ᠦ᠋ᠨ ᠣᠷᠣᠨ ᠵᠠᠢ ᠳ᠋ᠤ᠌ ᠠᠮᠤᠷᠯᠢᠩᠭᠤᠢ ᠣᠷᠣᠰᠢᠨᠠ᠃ ᠬᠠᠭᠠᠨ ᠪᠣᠯ ᠢᠯᠡᠳᠲᠡ᠃ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠵᠥᠷᠢᠴᠡᠪᠡᠯ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠤᠨᠠ᠃ ᠬᠠᠭᠠᠨ ᠳᠠᠢᠰᠤᠨ ᠲᠠᠢ᠂ ᠬᠠᠷᠢᠨ ᠪᠤᠷᠬᠠᠨ ᠬᠥᠮᠦᠨ ᠢ᠋ ᠠᠪᠤᠷᠠᠳᠠᠭ᠃
— ᠪᠤᠷᠬᠠᠨ ᠠ᠋ᠴᠠ ᠠᠶᠤᠬᠤ ᠦᠭᠡᠢ ᠮᠥᠷᠲᠡᠯᠡ ᠪᠡᠨ ᠬᠠᠭᠠᠨ ᠠ᠋ᠴᠠ ᠠᠶᠤᠬᠤ ᠨᠢ ᠶᠠᠭᠤᠨ?
— ᠬᠠᠭᠠᠨ ᠠᠮᠢᠳᠤ ᠬᠥᠮᠦᠨ ᠪᠤᠰᠤ ᠤᠤ?
— ᠪᠤᠷᠬᠠᠨ ᠠᠮᠢᠳᠤ ᠪᠤᠰᠤ ᠭᠡᠵᠦ ᠤᠤ?
— ᠪᠢ ᠪᠤᠷᠬᠠᠨ ᠢ᠋ ᠬᠠᠷᠠᠭᠠ ᠦᠭᠡᠢ᠂ ᠮᠡᠳᠡᠬᠦ ᠦᠭᠡᠢ᠃
— ᠨᠠᠳᠠ ᠲᠠᠢ ᠤᠨᠲᠠᠬᠤ ᠤᠤ?
— ᠲᠡᠭᠡᠶᠡ᠂ ᠪᠢ ᠲᠡᠪᠴᠢᠶᠡᠷᠢ ᠪᠡᠨ ᠪᠠᠷᠠᠭᠰᠠᠨ ᠡᠮᠡᠭᠴᠢᠨ᠃
ᠲᠡᠷᠭᠡᠯ ᠰᠠᠷᠠᠨ ᠤ᠋ ᠳᠣᠣᠷᠠ ᠮᠢᠭᠮᠠᠨᠰᠠᠩᠵᠠᠢ ᠨᠢᠴᠦᠭᠦᠨ ᠪᠡᠶᠡ ᠪᠡᠨ ᠬᠠᠷᠠᠪᠠ᠃ ᠰᠠᠷᠠ ᠲᠡᠭᠦᠨ ᠢ᠋ ᠮᠥᠩᠭᠥᠯᠢᠭ ᠪᠣᠯᠭᠠᠵᠠᠢ᠃ ᠬᠠᠭᠠᠨ ᠬᠡᠦᠬᠡᠨ ᠦ᠌ ᠬᠥᠬᠥ ᠶ᠋ᠢ ᠠᠳᠬᠤᠵᠤ《ᠣᠩᠭᠣᠨ ᠶᠤᠮ ᠰᠢᠭ᠋ ᠬᠠᠲᠠᠭᠤ ᠶᠤᠮ᠃ ᠴᠢᠮᠠ ᠠ᠋ᠴᠠ ᠴᠡᠴᠡᠭ ᠦᠨᠦᠷᠲᠦᠭᠰᠡᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠢᠪ᠃ ᠰᠠᠷᠠ ᠵᠢᠯ ᠦ᠋ᠨ ᠤᠷᠲᠤ ᠳ᠋ᠤ᠌ ᠥᠴᠢᠨᠡᠭᠡᠨ ᠪᠦᠰᠡᠭᠦᠢ ᠲᠡᠢ ᠵᠢᠷᠭᠠᠪᠠᠴᠤ ᠬᠣᠩᠭᠣᠷ ᠨᠠᠰᠤᠨ ᠤ᠋ ᠮᠢᠭᠮᠠᠨᠰᠠᠩᠵᠠᠢ ᠴᠢᠮᠠᠶ᠋ᠢ ᠶᠠᠭᠠᠬᠢᠬᠤ ᠭᠦᠢᠴᠡᠨᠡ》ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠠᠩᠬᠠᠢᠲᠠᠯᠠ ᠰᠠᠨᠠᠭᠠ ᠠᠯᠳᠠᠵᠤ᠂《ᠪᠡᠶᠡ ᠮᠢᠨᠢ ᠠᠯᠤᠰ ᠪᠠᠢᠪᠠᠴᠤ ᠰᠡᠳᠬᠢᠯ ᠮᠢᠨᠢ ᠲᠠᠨ ᠤ᠋ ᠬᠢ ᠰᠢᠦ 》 ᠭᠡᠮᠡᠨ ᠬᠡᠦᠬᠡᠨ ᠰᠢᠪᠡᠨᠡᠪᠡ᠃
ᠦᠦᠷ ᠴᠠᠢᠭᠰᠠᠨ ᠬᠣᠢᠨᠠ ᠰᠡᠷᠡᠭᠰᠡᠨ ᠮᠢᠭᠮᠠᠨᠰᠠᠩᠵᠠᠢ ᠬᠠᠭᠠᠨ ᠤ᠋ ᠶᠡᠬᠡ ᠦᠷᠭᠦᠭᠡᠨ ᠡᠴᠡ ᠶᠠᠭᠠᠷᠠᠨ ᠭᠠᠷᠴᠤ ᠡᠪᠡᠰᠦᠨ ᠳᠤᠮᠳᠠ ᠠ᠋ᠴᠠ ᠲᠤᠱᠠ ᠲᠠᠢ ᠮᠣᠷᠢ ᠪᠠᠨ ᠤᠨᠤᠵᠤ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠬᠠᠵᠠᠭᠤ ᠶ᠋ᠢᠨ ᠠᠭᠤᠯᠠ ᠥᠭᠰᠥᠭᠰᠡᠨ ᠵᠠᠮ ᠢ᠋ᠶ᠋ᠠᠷ ᠣᠳᠤᠯᠠ᠃ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠮᠢᠭᠮᠠᠨᠰᠠᠩᠵᠠᠢ ᠬᠡᠦᠬᠡᠨ ᠰᠦᠨᠡᠰᠦ ᠪᠡᠨ ᠭᠡᠭᠡᠪᠡ᠃ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠰᠦᠨᠡᠰᠦ ᠦᠯᠡᠳᠡᠵᠦ ᠬᠡᠭᠡᠷᠡ ᠬᠤᠨᠣᠬᠰᠡ ᠰᠠᠷᠠ ᠶ᠋ᠢ ᠲᠡᠪᠡᠷᠢᠨᠡ᠃
ᠭᠤᠷᠪᠠ
ᠴᠠᠸᠠᠩᠷᠠᠪᠳᠠᠨ ᠠᠭᠤᠷ ᠲᠠᠢ ᠪᠠᠷ᠂
— ᠬᠠᠲᠤᠨ ᠡᠬᠡ ᠲᠠ ᠶᠠᠭᠤᠨ ᠳ᠋ᠤ᠌ ᠨᠠᠮᠠᠶ᠋ᠢ ᠢᠳᠬᠠᠨᠠ᠃ ᠣᠢᠷᠠᠳ ᠤ᠋ᠨ ᠶᠡᠬᠡ ᠴᠡᠷᠢᠭ ᠠᠰᠠᠭᠰᠠᠨ ᠭᠠᠯ ᠰᠢᠭ᠋ ᠳᠦᠷᠡᠯᠵᠡᠨ ᠬᠥᠳᠡᠯᠬᠦ ᠳ᠋ᠡᠭᠡᠨ ᠭᠠᠭᠴᠠ ᠨᠠᠳᠠ ᠪᠠᠷ ᠳᠤᠲᠠᠨᠠ ᠭᠡᠵᠦ ᠤᠤ? ᠬᠠᠯᠬᠠ ᠮᠣᠩᠭᠣᠯ ᠤ᠋ᠨ ᠨᠣᠶᠠᠳ ᠵᠡᠭᠦᠨᠭᠠᠷ ᠢ᠋ ᠳᠠᠭᠠᠬᠤ ᠦᠭᠡᠢ ᠪᠢᠵᠡ᠃ ᠲᠡᠳᠡ ᠬᠦᠴᠦᠷᠬᠡᠭ ᠮᠠᠨᠵᠤ ᠭᠦᠷᠦᠨ ᠢ᠋ ᠴᠢᠷᠠᠢᠴᠢᠯᠠᠬᠤ ᠪᠢᠵᠡ᠃ ᠮᠠᠨᠵᠤ ᠨᠤᠭᠤᠳ ᠤᠭ ᠠ᠋ᠴᠠ ᠪᠠᠨ ᠬᠠᠯᠬᠠ ᠮᠣᠩᠭᠣᠯ ᠢ᠋ ᠡᠷᠲᠡ ᠢᠳᠡᠵᠦ ᠡᠬᠢᠯᠡᠭᠰᠡᠨ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠮᠠᠨᠵᠤ ᠲᠠᠢ ᠪᠠᠢᠯᠳᠤᠨᠠ᠃ ᠣᠢᠷᠠᠳ ᠠ᠋ᠴᠠ ᠲᠠᠪᠤ ᠳᠠᠬᠢᠨ ᠢᠯᠡᠭᠦᠦ ᠴᠡᠷᠢᠭ ᠲᠡᠢ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠢ᠋ ᠮᠥᠬᠥᠭᠡᠬᠦ ᠭᠡᠪᠡᠯ ᠠᠷᠭᠠ ᠤᠬᠠᠭᠠᠨ ᠠ᠋ᠴᠠ ᠭᠠᠳᠠᠨᠠ ᠴᠡᠷᠢᠭ ᠦ᠋ᠨ ᠬᠦᠴᠦ ᠬᠡᠷᠡᠭ ᠲᠡᠢ᠃ ᠠᠷᠤ ᠬᠠᠯᠬᠠ ᠡᠰᠡᠷᠭᠦᠴᠡᠯ ᠦᠵᠡᠭᠦᠯᠬᠦ ᠦᠭᠡᠢ᠃ ᠴᠡᠷᠢᠭ ᠦ᠋ᠨ ᠬᠦᠴᠦ ᠪᠡᠨ ᠬᠠᠯᠬᠠ ᠮᠣᠩᠭᠣᠯ ᠠ᠋ᠴᠠ ᠵᠤᠵᠠᠭᠠᠳᠬᠠᠨ ᠪᠠᠵᠠᠭᠠᠵᠤ ᠪᠣᠯᠬᠤ ᠶᠤᠮ᠃ ᠪᠢ ᠵᠡᠭᠦᠨᠭᠠᠷ ᠲᠠᠭᠠᠨ ᠦᠯᠡᠳᠡᠨᠡ ᠭᠡᠯᠡ᠃
ᠴᠠᠸᠠᠩᠷᠠᠪᠳᠠᠨ ᠬᠡᠮᠡᠬᠦ ᠨᠡᠯᠢᠶᠡᠳ ᠰᠢᠵᠠᠷᠠᠭᠤᠨ ᠬᠠᠨ ᠬᠦᠦ ᠠᠨᠤ ᠬᠠᠲᠤᠨ ᠳ᠋ᠤ᠌ ᠡᠢᠨ ᠬᠦ᠌ ᠬᠡᠯᠡᠬᠦ ᠳ᠋ᠡᠭᠡᠨ ᠡᠪᠦᠭᠡ ᠡᠴᠢᠭᠡ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠠᠮᠢᠰᠬᠤᠯ ᠬᠤᠷᠢᠶᠠᠬᠤ ᠶ᠋ᠢᠨ ᠡᠮᠦᠨᠡ《ᠭᠠᠯᠳᠠᠨ ᠨᠠᠮᠠᠶ᠋ᠢ ᠲᠡᠭᠦᠰᠬᠡᠪᠡ᠃ ᠭᠠᠯᠳᠠᠨ ᠤ᠋ ᠡᠨᠡ ᠶᠠᠪᠤᠳᠠᠯ ᠢ᠋ ᠪᠦᠦ ᠮᠠᠷᠲᠠ᠃ ᠭᠠᠯᠳᠠᠨ ᠲᠠᠢ ᠡᠴᠦᠰ ᠦ᠋ᠨ ᠡᠴᠦᠰ ᠬᠡᠷᠬᠢᠨ ᠲᠡᠮᠡᠴᠡᠬᠦ ᠪᠡᠨ ᠮᠡᠳᠡᠭᠲᠦᠨ》 ᠭᠡᠰᠡᠨ ᠨᠢ ᠰᠠᠨᠠᠭᠳᠠᠪᠠ᠃
ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠬᠣᠱᠤᠳ ᠣᠪᠣᠭᠲᠠᠨ ᠢ᠋ᠶ᠋ᠠᠨ ᠲᠡᠷᠢᠭᠦᠯᠡᠨ ᠢᠵᠢᠯ ᠮᠥᠷᠡᠨ ᠲᠠᠢᠰᠢ ᠨᠡᠭᠦᠵᠦ ᠪᠤᠴᠠᠬᠤ ᠳ᠋ᠠᠭᠠᠨ ᠺᠢᠷᠭᠢᠽ ᠬᠠᠰᠠᠭ ᠤ᠋ᠨ ᠳᠡᠭᠡᠷᠡᠮᠴᠢᠳ ᠲᠦ᠍ ᠪᠤᠲᠠ ᠴᠣᠬᠢᠭᠤᠯᠵᠤ ᠦᠢᠯᠡ ᠪᠡᠨ ᠦᠵᠡᠭᠰᠡᠭᠡᠷ ᠨᠤᠲᠤᠭ ᠤ᠋ᠨ ᠪᠠᠷᠠ ᠬᠠᠷᠠᠵᠤ ᠨᠢᠳᠦᠨ ᠳ᠋ᠡᠭᠡᠨ ᠨᠢᠯᠪᠤᠰᠤ ᠲᠠᠢ《ᠭᠠᠯᠳᠠᠨ ᠪᠢᠳᠡᠨ ᠢ᠋ ᠰᠦᠢᠳᠬᠡᠪᠡ᠃ ᠭᠠᠯᠳᠠᠨ ᠮᠢᠨᠦ ᠥᠬᠢᠳ ᠲᠡᠢ ᠭᠡᠷᠯᠡᠭᠰᠡᠨ ᠭᠢᠷᠢᠨᠡ ᠡᠪᠦᠭᠡᠨ ᠨᠠᠮᠠᠶ᠋ᠢ ᠳᠠᠷᠤᠩᠭᠤᠢᠯᠠᠨ ᠬᠣᠭᠣᠰᠣᠯᠠᠪᠠ 》ᠭᠡᠵᠦ ᠭᠣᠮᠣᠳᠠᠯᠯᠠᠵᠤ ᠪᠠᠢᠵᠠᠢ᠃ ᠴᠣᠬᠣᠮ ᠳ᠋ᠠᠭᠠᠨ ᠰᠠᠪᠳᠠᠨᠵᠠᠯ ᠤ᠋ᠨ ᠮᠠᠨᠵᠤ ᠶ᠋ᠢᠨ ᠲᠤᠷᠰᠢᠭᠤᠯ᠂ ᠲᠥᠯᠥᠭᠡᠨ ᠦ᠌ ᠬᠥᠮᠦᠰ ᠦ᠋ᠨ ᠵᠢᠭᠠᠪᠤᠷᠢ ᠪᠠᠷ ᠳᠣᠲᠣᠷᠠ ᠠ᠋ᠴᠠ ᠨᠢ ᠬᠠᠭᠠᠯᠤᠭᠰᠠᠨ ᠬᠣᠣᠷᠲᠤ ᠰᠠᠨᠠᠭᠠ ᠪᠠᠢᠵᠠᠢ᠃
ᠠᠨᠤ ᠬᠠᠲᠤᠨ ᠴᠢᠬᠡ ᠰᠠᠭᠤᠵᠤ᠂
— ᠬᠥᠪᠡᠭᠦᠨ ᠮᠢᠨᠢ ᠲᠥᠷᠥᠭᠰᠡᠨ ᠡᠬᠡ ᠪᠡᠨ ᠰᠣᠨᠣᠰ᠃ ᠴᠢ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠳᠡᠮᠵᠢᠬᠦ ᠤᠤ? ᠭᠡᠮᠡᠨ ᠴᠠᠸᠠᠩᠷᠠᠪᠳᠠᠨ ᠠ᠋ᠴᠠ ᠠᠰᠠᠭᠤᠵᠠᠢ᠃
— ᠭᠠᠯᠳᠠᠨ ᠨᠠᠮᠠᠶ᠋ᠢ ᠠᠯᠠᠬᠤ ᠪᠠᠢᠭᠰᠠᠨ᠃ ᠪᠢ ᠵᠢᠭᠤᠲᠠᠭᠰᠠᠭᠠᠷ ᠡᠳᠦᠢ ᠬᠦᠷᠪᠡ᠃ ᠲᠥᠪᠡᠳ ᠡᠴᠡ ᠠᠯᠠᠬᠤ ᠳᠠᠭᠠᠭᠠᠯᠭᠠᠪᠤᠷᠢ ᠠᠪᠤᠭᠰᠠᠨ᠃ ᠨᠠᠰᠤᠨ ᠤ᠋ ᠪᠤᠷᠬᠠᠨ ᠤ᠋ ᠨᠡᠷᠡ ᠲᠡᠢ ᠬᠥᠮᠦᠨ ᠢ᠋ ᠠᠯᠠᠬᠤ ᠶᠣᠰᠣᠲᠠᠢ᠃ ᠭᠠᠯᠳᠠᠨ ᠬᠠᠭᠠᠨ ᠯᠠᠮᠠ ᠬᠤᠸᠠᠷᠠᠭ ᠬᠥᠮᠦᠨ ᠪᠣᠯᠬᠣᠷ ᠴᠡᠭᠡᠵᠢ ᠰᠠᠢᠲᠠᠢ᠃ ᠯᠠᠪ ᠮᠠᠷᠲᠠᠭᠠ ᠦᠭᠡᠢ ᠶᠠᠪᠤᠨᠠ᠃ ᠡᠨᠡ ᠶᠠᠪᠤᠳᠠᠯ ᠢ᠋ ᠴᠢᠬᠢ ᠪᠡᠷ ᠰᠣᠨᠣᠰᠤᠭᠰᠠᠨ ᠯᠠᠮᠠ ᠬᠥᠮᠦᠨ ᠡᠴᠡ ᠪᠢ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠰᠣᠨᠣᠰᠤᠭᠰᠠᠨ᠃ ᠬᠠᠲᠤᠨ ᠡᠬᠡ ᠲᠠ ᠬᠣᠯᠠ ᠵᠠᠮ ᠲᠤᠭᠤᠯᠵᠤ ᠨᠠᠳᠠ ᠤᠷᠤᠭᠤ ᠳᠡᠮᠡᠢ ᠢᠷᠡᠵᠡᠢ᠃ ᠮᠢᠨᠦ ᠬᠡᠯᠡᠭᠰᠡᠨ ᠢ᠋ ᠭᠠᠯᠳᠠᠨ ᠬᠠᠭᠠᠨ ᠳ᠋ᠤ᠌ ᠬᠡᠯᠡᠭᠡᠷᠡᠢ᠃ ᠬᠠᠯᠬᠠ ᠮᠣᠩᠭᠣᠯ ᠳ᠋ᠤ᠌ ᠢᠲᠡᠭᠡᠬᠦ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠭᠡᠳᠡᠭ ᠢ᠋ ᠪᠠᠰᠠ ᠳᠣᠭᠣᠯᠭᠠᠭᠠᠷᠠᠢ ᠭᠡᠮᠡᠨ ᠲᠦᠷᠦᠭᠦᠴᠢ ᠶ᠋ᠢᠨ ᠬᠢ ᠡᠴᠡ ᠪᠡᠨ ᠠᠷᠠᠢ ᠠᠶᠠᠳᠠᠭᠤᠬᠠᠨ ᠥᠭᠦᠯᠡᠭᠡᠳ ᠴᠠᠸᠠᠩᠷᠠᠪᠳᠠᠨ ᠵᠢᠷᠳᠡᠭᠡᠷ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠡᠬᠡ ᠪᠡᠨ ᠬᠠᠷᠠᠪᠠ᠃
ᠠᠨᠤ ᠬᠠᠲᠤᠨ ᠤ᠋ ᠲᠣᠭᠲᠠᠭᠤᠨ ᠭᠡᠢᠩᠭᠡ ᠴᠢᠷᠠᠢ ᠳ᠋ᠤ᠌ ᠡᠷᠡᠭᠡᠯᠵᠡᠭᠡ ᠡᠭᠦᠰᠴᠦ《ᠴᠠᠸᠠᠩᠷᠠᠪᠳᠠᠨ ᠢ᠋ ᠠᠯᠠᠬᠤ ᠶᠣᠰᠣᠲᠠᠢ ᠪᠠᠢᠵᠠᠢ》ᠭᠡᠮᠡᠨ ᠥᠪᠡᠷ ᠲᠡᠭᠡᠨ ᠰᠢᠪᠡᠨᠡᠭᠡᠳ《ᠰᠠᠪᠳᠠᠨᠪᠠᠯᠵᠢᠷ ᠲᠠᠢ ᠬᠠᠮᠲᠤ ᠥᠰᠬᠡᠬᠦ ᠨᠢ ᠥᠩᠭᠡ ᠶ᠋ᠢᠨ ᠦᠭᠡ ᠪᠠᠢᠭᠰᠠᠨ ᠭᠡᠵᠦ ᠤᠤ? 》 ᠭᠡᠮᠡᠨ ᠥᠪᠡᠷ ᠲᠡᠢ ᠪᠡᠨ ᠭᠡᠷᠡᠯᠲᠦᠪᠡ᠃ ᠬᠠᠨ ᠬᠦᠦ ᠴᠠᠸᠠᠩᠷᠠᠪᠳᠠᠨ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠳ᠋ᠦ᠍ ᠬᠣᠣᠷ ᠲᠤᠰᠤᠭᠠᠪᠠ᠃
ᠳᠥᠷᠪᠡ
ᠠᠭᠠᠯᠵᠢ ᠶ᠋ᠢᠨ ᠰᠢᠯᠦᠰᠦ ᠮᠡᠲᠦ ᠲᠣᠣᠷᠯᠠᠵᠤ ᠬᠡᠷᠦᠭᠰᠡᠨ ᠣᠯᠠᠨ ᠰᠠᠨᠠᠭᠠᠲᠠᠨ ᠳᠤᠮᠳᠠ ᠠᠨᠤ ᠬᠠᠲᠤᠨ ᠠᠩᠬᠠ ᠤᠳᠠᠭᠠ ᠰᠠᠮᠠᠭᠠᠷᠳᠠᠨ᠂ ᠲᠥᠷᠥᠭᠰᠡᠨ ᠬᠥᠪᠡᠭᠦᠨ ᠴᠠᠸᠠᠩᠷᠠᠪᠳᠠᠨ ᠢ᠋ᠶ᠋ᠠᠨ ᠣᠭᠲᠣ ᠲᠠᠨᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠣᠢᠯᠠᠭᠠᠵᠠᠢ᠃ ᠬᠠᠲᠤᠨ ᠡᠬᠡ ᠶ᠋ᠢᠨ ᠰᠡᠳᠬᠢᠯ ᠦ᠋ᠨ ᠴᠡᠭᠡᠯ ᠳ᠋ᠦ᠍ ᠰᠡᠪ ᠰᠠᠭᠤᠯᠭᠠᠬᠤ ᠦᠭᠡᠢ ᠭᠡᠵᠦ ᠴᠠᠸᠠᠩᠷᠠᠪᠳᠠᠨ ᠬᠢᠴᠢᠶᠡᠭᠰᠡᠨ ᠴᠦ᠍ ᠤᠭ ᠤ᠋ᠨ ᠭᠦᠵᠢᠷᠮᠡᠭ᠂ ᠣᠮᠣᠭᠯᠠᠩ ᠵᠠᠩ ᠲᠠᠢ ᠲᠤᠯᠠ ᠲᠡᠪᠴᠢᠶᠡᠷᠢ ᠠᠯᠳᠠᠵᠤ᠂ ᠲᠥᠪᠡᠳ ᠯᠠᠮᠠ ᠶ᠋ᠢᠨ ᠦᠭᠡ ᠶ᠋ᠢ ᠬᠡᠯᠡᠵᠦ ᠣᠷᠬᠢᠵᠠᠢ᠃
ᠠᠨᠤ ᠬᠠᠲᠤᠨ ᠶᠡᠬᠡ ᠡᠪᠡᠰᠦᠲᠦ ᠲᠠᠯᠠ᠂ ᠬᠡᠭᠡᠷᠡ ᠨᠤᠲᠤᠭ ᠢ᠋ ᠲᠤᠭᠤᠯᠵᠤ ᠶᠠᠪᠤᠬᠤ ᠳ᠋ᠠᠭᠠᠨ《ᠭᠠᠯᠳᠠᠨ ᠬᠠᠭᠠᠨ ᠴᠠᠸᠠᠩᠷᠠᠪᠳᠠᠨ ᠢ᠋ ᠠᠯᠠᠬᠤ ᠰᠠᠨᠠᠭᠠ ᠪᠠᠨ ᠬᠤᠷᠢᠶᠠᠭᠰᠠᠨ ᠶᠤᠮ ᠪᠣᠯᠪᠠ ᠤᠤ? ᠭᠠᠯᠳᠠᠨ ᠨᠢᠭᠤᠴᠠᠯᠢᠭ ᠬᠥᠮᠦᠨ ᠪᠢᠯᠡ᠃ ᠳᠡᠷᠭᠡᠳᠡ ᠪᠠᠢᠭᠠ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠭᠠᠯᠳᠠᠨ ᠢ᠋ ᠥᠪᠴᠢᠵᠦ ᠲᠥᠷᠥᠭᠰᠡᠨ ᠠᠲᠠᠯᠠ ᠨᠠᠳᠠᠳᠤ ᠡᠨᠡ ᠲᠤᠬᠠᠢ ᠬᠡᠯᠡᠭᠰᠡᠨ ᠪᠢᠯᠢᠤ? ᠬᠠᠭᠠᠨ ᠢ᠋ ᠬᠠᠷᠠᠮᠯᠠᠬᠤ ᠡᠷᠬᠡ ᠨᠠᠳᠠᠳᠤ ᠪᠠᠢᠬᠤ ᠦᠭᠡᠢ᠃ ᠬᠠᠭᠠᠨ ᠤ᠋ ᠦᠷᠡ ᠰᠠᠲᠤ ᠥᠨᠢᠷ ᠥᠳᠬᠡᠨ ᠪᠠᠢᠬᠤ ᠲᠣᠰᠤᠮ ᠤᠳᠤᠮ ᠤᠭᠰᠠᠭᠠ ᠨᠢ ᠪᠡᠬᠢᠵᠢᠨᠡ᠃ ᠬᠡᠷᠪᠡ ᠴᠠᠸᠠᠩᠷᠠᠪᠳᠠᠨ ᠢ᠋ ᠠᠪᠴᠢᠷᠠᠭᠰᠠᠨ ᠪᠣᠯ ᠭᠠᠯᠳᠠᠨ ᠬᠠᠭᠠᠨ ᠠᠯᠠᠬᠤ ᠪᠠᠢᠭᠰᠠᠨ ᠤᠤ? ᠴᠠᠸᠠᠩᠷᠠᠪᠳᠠᠨ ᠳ᠋ᠤ᠌ ᠣᠢᠷᠠᠳ ᠡᠷᠡ ᠶ᠋ᠢᠨ ᠣᠮᠣᠭᠯᠠᠩ ᠵᠢᠷᠦᠬᠡ᠂ ᠬᠠᠯᠠᠭᠤᠨ ᠴᠢᠰᠤ ᠪᠤᠴᠠᠯᠬᠤ ᠬᠢᠷᠢ ᠨᠢ ᠭᠠᠯᠳᠠᠨ ᠢ᠋ ᠳᠠᠭᠠᠬᠤ ᠳᠤᠷᠠ ᠦᠭᠡᠢ ᠶᠤᠮ᠃ ᠬᠠᠭᠠᠨ ᠡᠴᠢᠭᠡ᠂ ᠬᠥᠪᠡᠭᠦᠨ ᠢ᠋ ᠥᠪᠡᠷ ᠦ᠋ᠨ ᠬᠢ ᠪᠡᠷ ᠢ᠋ᠶ᠋ᠡᠨ ᠬᠥᠮᠦᠨ ᠪᠣᠯᠭᠠᠵᠠᠢ᠃ ᠶᠡᠬᠡ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠪᠤᠳᠠᠩ ᠳ᠋ᠤ᠌ ᠲᠥᠭᠡᠷᠢᠯᠳᠦᠵᠦ ᠰᠡᠳᠬᠢᠯ ᠰᠠᠨᠠᠭᠠ ᠲᠠᠢᠪᠤᠩ ᠦᠭᠡᠢ ᠪᠠᠢᠨᠠ》ᠭᠡᠮᠡᠨ ᠡᠷᠭᠢᠴᠡᠭᠦᠯᠦᠨᠡ᠃ ᠠᠨᠤ ᠬᠠᠲᠤᠨ ᠤ᠋ ᠰᠠᠭᠤᠵᠤ ᠶᠠᠪᠤᠭᠠ ᠰᠡᠦᠬᠡ ᠲᠡᠷᠭᠡ ᠵᠣᠭᠰᠣᠪᠠ᠃
— ᠬᠠᠲᠤᠨ ᠲᠠ ᠠᠮᠠᠷᠠᠬᠤ ᠤᠤ? ᠨᠡᠯᠢᠶᠡᠳ ᠤᠳᠠᠭᠠᠨ ᠶᠠᠪᠤᠴᠢᠬᠠᠯᠠ ᠭᠡᠮᠡᠨ ᠬᠥᠬᠡ ᠪᠤᠭᠤᠷᠤᠯ ᠰᠠᠬᠠᠯ ᠲᠠᠢ ᠭᠦᠵᠢᠷᠮᠡᠭ ᠡᠷᠡ ᠶ᠋ᠢ ᠥᠭᠦᠯᠡᠬᠦ ᠳ᠋ᠦ᠍ ᠠᠨᠤ ᠬᠠᠲᠤᠨ᠂
— ᠪᠢ ᠡᠨᠳᠡ ᠥᠰᠦᠭᠰᠡᠨ ᠶᠤᠮ ᠳᠡ ᠭᠡᠳ ᠰᠡᠦᠬᠡ ᠡᠴᠡ ᠪᠠᠭᠤᠯᠠ᠃
ᠬᠢᠵᠠᠭᠠᠷ ᠦᠭᠡᠢ ᠲᠠᠯᠠ ᠶ᠋ᠢᠨ ᠬᠠᠶᠠᠭᠠ ᠬᠣᠯᠠᠬᠢ ᠴᠡᠩᠬᠡᠷ ᠠᠭᠤᠯᠠᠰ ᠲᠠᠢ ᠨᠡᠢᠯᠡᠵᠡᠢ᠃ ᠲᠠᠯᠠ ᠬᠡᠭᠡᠷᠡ ᠨᠤᠲᠤᠭ ᠢ᠋ᠶ᠋ᠠᠷ ᠬᠣᠲᠠ ᠬᠣᠲᠠ ᠲᠡᠮᠡᠭᠡ ᠪᠡᠯᠴᠢᠨᠡ᠃ ᠬᠥᠲᠥᠴᠢ ᠬᠠᠲᠤᠨ ᠠ᠋ᠴᠠ ᠬᠣᠯᠠᠳᠪᠠ᠃ ᠳᠠᠭᠠᠭᠤᠯᠢ ᠴᠡᠷᠢᠭ ᠦ᠋ᠳ ᠬᠠᠲᠤᠨ ᠤ᠋ ᠰᠡᠦᠬᠡ ᠲᠡᠷᠭᠡᠨ ᠡᠴᠡ ᠵᠠᠢᠳᠠᠭᠤᠬᠠᠨ ᠵᠣᠭᠰᠣᠵᠤ᠂ ᠮᠣᠷᠢᠳ ᠰᠢᠭᠡᠰᠦ ᠠᠯᠳᠠᠬᠤ ᠠᠵᠢ᠃ ᠠᠭᠢ᠂ ᠭᠠᠩᠭᠠ ᠶ᠋ᠢᠨ ᠦᠨᠦᠷ ᠠᠮᠠ ᠬᠠᠮᠠᠷ ᠢ᠋ᠶ᠋ᠠᠷ ᠰᠡᠩᠭᠢᠨᠡᠨ ᠬᠠᠩᠬᠤᠯᠬᠤ ᠳ᠋ᠤ᠌ ᠠᠨᠤ ᠬᠠᠲᠤᠨ ᠭᠦᠨᠵᠡᠭᠡᠢ ᠠᠮᠢᠰᠬᠤᠯᠯᠠᠵᠤ᠂
— ᠬᠥᠲᠥᠴᠢ ᠲᠠ ᠠᠯᠢ ᠨᠤᠲᠤᠭ ᠤ᠋ᠨ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
— ᠬᠥᠬᠡᠨᠠᠭᠤᠷ ᠤ᠋ᠨ ᠬᠣᠱᠤᠳ ᠁
— ᠳᠠᠩᠴᠤ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠢ᠋ ᠮᠡᠳᠡᠭᠡᠳ ᠪᠠᠢᠭᠰᠠᠨ ᠶᠤᠮ ᠠ᠋᠃ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠡᠵᠡᠭᠦᠢᠷᠡᠵᠡᠢ᠃ ᠵᠤᠨ ᠤ᠋ ᠡᠬᠢ ᠪᠡᠷ ᠠᠩᠭᠠᠬᠠᠢ ᠳᠡᠭᠳᠡᠭᠡᠬᠡᠢ ᠱᠤᠯᠤᠭᠠᠨᠠᠵᠤ ᠪᠠᠢᠳᠠᠭ ᠰᠠᠨ᠃ ᠰᠢᠪᠠᠭᠤᠨ ᠤ᠋ ᠵᠢᠭᠦᠷ ᠤᠷᠭᠤᠬᠤ ᠪᠠᠷ ᠡᠭᠦᠷ ᠢ᠋ᠶ᠋ᠡᠨ ᠣᠷᠬᠢᠭᠠᠳ ᠨᠢᠰᠴᠢᠬᠡᠨᠡ᠃ ᠪᠢ ᠴᠦ᠍ ᠢᠯᠭᠠᠭᠠ ᠦᠭᠡᠢ ᠰᠦᠢᠲᠦ ᠬᠠᠨ ᠬᠦᠦ ᠳ᠋ᠡᠭᠡᠨ ᠣᠴᠢᠭᠰᠠᠨ᠃ ᠡᠮᠡᠰ ᠥᠬᠢᠳ ᠪᠣᠯᠬᠣᠷ ᠲᠡᠭᠡᠷᠮᠡ ᠳ᠋ᠦ᠍ ᠣᠷᠣᠵᠤ ᠪᠠᠢᠭᠠ ᠲᠠᠷᠢᠶᠠ ᠰᠢᠭ᠋ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠢᠴᠠᠯᠠᠭᠳᠠᠵᠦ ᠣᠷᠬᠢᠨᠠ᠃
— ᠬᠠᠲᠤᠨ ᠲᠠ ᠰᠠᠢᠬᠠᠨ ᠬᠡᠯᠡᠯᠡ᠃ ᠥᠬᠢᠨ ᠦᠷᠡ ᠶ᠋ᠢᠨ ᠵᠠᠶᠠᠭᠠ ᠬᠥᠮᠦᠨ ᠦ᠌ ᠠᠳᠬᠤᠨ ᠳ᠋ᠤ᠌ ᠪᠤᠰᠤ ᠤᠤ?
— ᠡᠮᠡᠰ ᠪᠢᠳᠡ ᠦᠢᠯᠡ ᠯᠠᠢ ᠶᠡᠬᠡᠲᠡᠢ ᠳᠡ᠃ ᠦᠢᠯᠡ ᠶ᠋ᠢᠨ ᠦᠷᠡ ᠡᠴᠡ ᠶᠠᠮᠠᠷ ᠵᠠᠢᠯᠠᠬᠤ ᠪᠢᠰᠢ᠃ ᠦᠢᠯᠡ ᠪᠡᠨ ᠳᠠᠭᠠᠭᠠᠳ ᠠᠮᠢᠳᠤᠷᠠᠭᠠᠳ ᠶᠠᠪᠤᠨᠠ ᠰᠢᠦ ᠳᠡ᠃
— ᠬᠠᠲᠤᠨ ᠲᠠ ᠭᠤᠨᠢᠭ ᠲᠠᠢ ᠦᠭᠡ ᠶᠠᠭᠤᠨ ᠳ᠋ᠤ᠌ ᠤᠷᠤᠰᠬᠠᠨᠠ᠃ ᠲᠠᠨ ᠤ᠋ ᠰᠡᠳᠬᠢᠯ ᠲᠠᠪᠠ ᠦᠭᠡᠢ ᠪᠠᠢᠨᠠ ᠤᠤ?
— ᠡᠴᠢᠭᠡ ᠡᠬᠡ ᠶ᠋ᠢᠨ ᠨᠤᠲᠤᠭ ᠵᠡᠭᠦᠳᠦ ᠰᠢᠭ ᠰᠠᠨᠠᠭᠳᠠᠨᠠ᠃ ᠬᠠᠭᠠᠨ ᠣᠷᠳᠣᠨ ᠳ᠋ᠤ᠌ ᠣᠴᠢᠭᠰᠠᠨ ᠴᠠᠭ ᠠ᠋ᠴᠠ ᠡᠨᠳᠡ ᠴᠥᠭᠡᠨ ᠢᠷᠡᠵᠡᠢ᠃ ᠬᠣᠱᠤᠳ ᠤ᠋ᠨ ᠪᠤᠢᠷ ᠡᠵᠡᠭᠦᠢ ᠬᠠᠷᠠᠭᠳᠠᠨᠠ᠃
— ᠠᠯᠪᠠ ᠶᠡᠬᠡᠲᠡᠢ ᠪᠣᠯᠬᠣᠷ ᠠᠷᠭᠠ ᠦᠭᠡᠢ ᠪᠢᠵᠡ᠃
— ᠮᠢᠨᠦ ᠵᠢᠷᠦᠬᠡ ᠳᠤᠲᠠᠭᠰᠠᠨ ᠠ᠋ᠴᠠ ᠪᠣᠯᠵᠠᠢ᠃ ᠨᠠᠳᠠ ᠠ᠋ᠴᠠ ᠥᠭᠡᠷᠡ ᠵᠣᠷᠢᠮᠠᠭ ᠬᠠᠲᠤᠨ ᠪᠠᠢᠭᠰᠠᠨ ᠪᠣᠯ ᠦᠴᠢᠨᠡᠬᠡᠨ ᠢᠷᠡᠬᠦ ᠰᠠᠨ᠃ ᠬᠥᠭᠡᠷᠦᠬᠦᠢ ᠠᠬᠠᠳᠠᠷᠠ ᠮᠢᠨᠢ ᠬᠠᠮᠢᠭᠠ ᠶᠠᠪᠤᠳᠠᠭ ᠪᠣᠯ ᠳᠠ? ᠵᠠᠭᠠᠷ ᠤ᠋ᠨ ᠣᠷᠣᠨ ᠳ᠋ᠤ᠌ ᠪᠡᠶᠡ ᠪᠡᠨ ᠵᠣᠯᠢᠭᠰᠠᠨ᠃
— ᠠᠬᠠᠢᠲᠠᠨ ᠴᠡᠯ ᠵᠠᠯᠠᠭᠤ ᠪᠠᠷ ᠢ᠋ᠶ᠋ᠠᠨ ᠬᠠᠨᠳᠠᠮᠠ ᠳ᠋ᠤ᠌ ᠬᠤᠪᠢᠯᠤᠭᠰᠠᠨ ᠭᠡᠳᠡᠭ᠃ ᠶᠠᠭᠠᠬᠢᠭᠰᠠᠨ ᠭᠡᠵᠦ ᠲᠡᠷᠡ ᠶᠤᠮ ᠪᠣᠯ ᠳᠠ?
— ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠰᠤᠳᠤᠷ ᠪᠢᠴᠢᠭ ᠦ᠋ᠨ ᠳᠠᠭᠤᠨ ᠬᠥᠷᠪᠡᠭᠦᠯᠭᠡ ᠶ᠋ᠢ ᠲᠤᠯᠭᠠᠵᠤ ᠤᠩᠰᠢᠭᠰᠠᠭᠠᠷ ᠡᠴᠦᠰ ᠲᠡᠭᠡᠨ ᠢᠲᠡᠭᠡᠵᠦ ᠲᠡᠢᠮᠦ ᠬᠠᠴᠢᠨ ᠰᠢᠢᠳᠪᠦᠷᠢ ᠳ᠋ᠦ᠍ ᠠᠬᠠᠳᠠᠷᠠ ᠮᠢᠨᠢ ᠬᠦᠷᠦᠭᠰᠡᠨ ᠰᠠᠨ᠃ ᠥᠭᠡᠷᠡ ᠵᠣᠪᠠᠯᠠᠩ ᠲᠡᠭᠦᠨ ᠳ᠋ᠦ᠍ ᠪᠣᠢ᠃ ᠶᠡᠬᠡ ᠵᠣᠪᠠᠯᠠᠩ ᠳ᠋ᠤ᠌ ᠤᠨᠠᠭᠰᠠᠨ ᠬᠡᠦᠬᠡᠨ᠃
ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠬᠡ ᠲᠡᠢ ᠰᠢᠷᠢᠮᠡᠯ ᠣᠯᠪᠣᠭ ᠳᠡᠪᠢᠰᠴᠦ ᠬᠠᠲᠤᠨ ᠪᠣᠬᠢᠷᠤᠨ ᠰᠠᠭᠤᠭᠠᠳ ᠠᠶᠠᠨ ᠤ᠋ ᠴᠠᠢ ᠵᠣᠭᠣᠭᠯᠠᠪᠠ᠃ ᠥᠷᠥᠮᠡ᠂ ᠪᠢᠰᠢᠯᠠᠭ᠂ ᠬᠤᠷᠤᠳ ᠲᠡᠷᠢᠭᠦᠲᠡᠨ ᠢᠳᠡᠭᠡ ᠶ᠋ᠢ ᠣᠯᠪᠣᠭ ᠳᠡᠭᠡᠷᠡ ᠥᠷᠥᠵᠡᠢ᠃ ᠳᠠᠭᠠᠭᠤᠯᠢ ᠴᠡᠷᠢᠭ ᠡᠷᠡᠰ ᠪᠣᠭᠴᠣᠨ ᠠ᠋ᠴᠠ ᠪᠠᠨ ᠮᠢᠬᠠ ᠭᠠᠷᠭᠠᠵᠤ ᠵᠤᠯᠭᠠᠭᠠᠵᠤ ᠢᠳᠡᠵᠡᠭᠡᠪᠡ᠃ ᠡᠪᠡᠰᠦ ᠨᠣᠭᠣᠭᠠᠨ ᠤ᠋ ᠬᠦᠷᠡᠩ ᠪᠢᠳᠤᠷᠲᠤ ᠲᠣᠯᠣᠭᠠᠢ ᠬᠡᠭᠡᠷᠡ ᠶ᠋ᠢᠨ ᠰᠠᠯᠬᠢᠨ ᠤ᠋ ᠠᠶᠠᠰ ᠢ᠋ᠶ᠋ᠠᠷ ᠬᠠᠯᠢᠭᠤᠷᠠᠵᠤ ᠳᠣᠯᠭᠢᠶᠠᠯᠠᠨᠠ᠃ ᠡᠪᠡᠰᠦ ᠨᠣᠭᠣᠭᠠ ᠶᠠᠮᠠᠷ ᠶᠡᠬᠡ ᠤᠢᠳᠬᠠᠷᠲᠠᠢ ᠳᠣᠯᠭᠢᠶᠠᠯᠠᠨ ᠨᠠᠢᠭᠤᠳᠠᠭ ᠢ᠋ ᠠᠨᠤ ᠬᠠᠲᠤᠨ ᠬᠠᠷᠠᠭᠰᠠᠭᠠᠷ ᠪᠠᠢᠯᠠ᠃ ᠬᠣᠱᠤᠳ ᠨᠤᠲᠤᠭ ᠤ᠋ᠨ ᠡᠪᠡᠰᠦ ᠬᠦᠷᠲᠡᠯᠡ ᠬᠥᠪᠰᠥᠯᠵᠡᠨ ᠨᠠᠢᠭᠤᠳᠠᠭ ᠪᠠᠢᠯᠠ᠃ ᠶᠡᠬᠡ ᠡᠪᠡᠰᠦᠨ ᠳᠠᠯᠠᠢ ᠳ᠋ᠤ᠌ ᠵᠡᠭᠡᠷᠡ ᠶ᠋ᠢᠨ ᠢᠨᠵᠠᠭᠠ ᠲᠥᠷᠥᠳᠡᠭ ᠪᠤᠰᠤ ᠤᠤ?
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠴᠢᠮᠡᠭ᠂ ᠨᠠᠷᠠᠨᠲᠣᠭᠣᠰ᠂ ᠡᠷᠳᠡᠨᠢᠪᠢᠯᠢᠭ᠂ ᠤᠳᠤᠨᠭᠡᠷᠡᠯ᠂ ᠠᠮᠤᠷᠪᠠᠶᠠᠷ᠂ ᠪᠦᠷᠢᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ᠄ ᠤᠤᠭᠠᠨᠵᠢᠳ᠂ ᠨᠠᠷᠠᠨᠲᠣᠭᠣᠰ
ᠲᠠᠪᠤ
ᠬᠠᠲᠤᠨ ᠡᠬᠡ ᠨᠢ ᠭᠡᠨᠡᠳᠲᠡ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠴᠠᠸᠠᠩᠷᠠᠪᠳᠠᠨ ᠤᠭ ᠠ᠋ᠴᠠ ᠳᠤᠷᠠᠮᠵᠢᠬᠠᠨ ᠪᠠᠢᠪᠠ᠃ ᠬᠣᠱᠤᠳ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠨᠢᠭᠡ ᠲᠠᠯᠠ ᠳ᠋ᠠᠭᠠᠨ ᠵᠢᠯᠠᠭᠠ ᠲᠠᠢ ᠥᠨᠳᠥᠷ ᠮᠥᠷᠭᠥᠴᠡᠭ ᠳᠡᠭᠡᠷᠡ ᠪᠠᠢᠷᠢᠯᠠᠵᠠᠢ᠃ ᠴᠠᠸᠠᠩᠷᠠᠪᠳᠠᠨ ᠬᠠᠨ ᠬᠦᠦ ᠶ᠋ᠢᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠪᠡᠯᠡᠳᠬᠡᠯ ᠰᠤᠷᠭᠠᠭᠤᠯᠢ ᠰᠠᠢᠲᠠᠢ ᠠᠵᠢ᠃ ᠴᠠᠰᠤ ᠵᠤᠳ᠂ ᠭᠠᠩ ᠭᠠᠴᠢᠭ᠂ ᠦᠬᠦᠯ ᠬᠠᠭᠠᠴᠠᠯ ᠲᠤᠭᠤᠯᠵᠤ ᠪᠡᠷᠬᠡ ᠶ᠋ᠢ ᠠᠮᠰᠠᠭᠰᠠᠨ ᠴᠠᠸᠠᠩᠷᠠᠪᠳᠠᠨ ᠬᠠᠨ ᠬᠦᠦ ᠬᠠᠲᠤᠨ ᠡᠬᠡ ᠪᠡᠨ ᠲᠡᠷᠡ ᠪᠦᠷᠢ ᠳ᠋ᠦ᠍ ᠪᠤᠷᠤᠭᠤᠳᠬᠠᠵᠤ ᠪᠠᠢᠭᠠ ᠦᠭᠡᠢ ᠪᠣᠯᠪᠠᠴᠤ ᠠᠪᠠᠭᠠ ᠬᠠᠭᠠᠨ ᠭᠠᠯᠳᠠᠨ ᠢ᠋ ᠡᠪᠦᠭᠡ ᠡᠴᠢᠭᠡ ᠶ᠋ᠢᠨ ᠠᠳᠠᠯᠢ ᠪᠤᠷᠤᠭᠤᠳᠬᠠᠳᠠᠭ ᠪᠠᠢᠯᠠ᠃
ᠬᠠᠲᠤᠨ ᠡᠬᠡ ᠠᠨᠤ ᠨᠢ ᠶᠡᠷᠦᠳᠡ ᠶ᠋ᠢᠨ ᠲᠣᠷᠭᠠᠨ ᠬᠤᠪᠴᠠᠰᠤ ᠲᠠᠢ ᠪᠠᠢᠪᠠ᠃ ᠠᠨᠤ ᠨᠢᠳᠦᠨ ᠳ᠋ᠡᠭᠡᠨ ᠨᠢᠯᠪᠤᠰᠤ ᠮᠡᠯᠲᠡᠯᠵᠡᠭᠦᠯᠦᠨ ᠬᠥᠪᠡᠭᠦᠨ ᠲᠡᠢ ᠪᠡᠨ ᠵᠣᠯᠭᠠᠪᠠ᠃ ᠬᠠᠨ ᠬᠥᠪᠡᠭᠦᠨ ᠴᠠᠸᠠᠩᠷᠠᠪᠳᠠᠨ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠣᠩᠭᠣᠭᠰᠠᠨ ᠬᠥᠷᠥᠰᠥᠯᠢᠭ ᠴᠢᠷᠠᠢ ᠲᠠᠢ᠂ ᠴᠡᠭᠡᠵᠢ ᠲᠡᠨᠢᠭᠦᠨ᠂ ᠨᠢᠳᠦ ᠡᠴᠢᠭᠡ ᠬᠠᠭᠠᠨ ᠯᠤᠬᠠ ᠵᠢᠷᠳᠡᠭᠡᠷ ᠵᠢᠬᠡᠭᠦᠨ ᠠᠵᠢ᠃
— ᠡᠬᠡ ᠲᠠᠨ ᠢ᠋ ᠬᠡᠨ ᠵᠠᠷᠤᠪᠠ? ᠲᠠ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠶᠡᠬᠡ ᠬᠠᠲᠤᠨ ᠪᠤᠰᠤ ᠤᠤ? ᠶᠠᠭᠤᠨ ᠳ᠋ᠤ᠌ ᠥᠴᠦᠬᠡᠨ ᠬᠥᠪᠡᠭᠦᠨ ᠢ᠋ ᠵᠣᠷᠢᠪᠠ᠃
— ᠢᠷᠡᠶᠡ ᠭᠡᠵᠦ ᠢᠷᠡᠯᠡ᠂ ᠬᠥᠪᠡᠭᠦᠨ!
— ᠨᠠᠳᠠᠳᠤ ᠳᠠᠢᠰᠤᠨ ᠨᠥᠬᠥᠷ ᠬᠣᠶᠠᠭᠤᠯᠠ ᠪᠠᠨ ᠪᠣᠢ᠃ ᠠᠪᠠᠭᠠ ᠬᠠᠭᠠᠨ ᠨᠠᠳᠠᠳᠤ ᠠᠲᠠᠭᠠᠲᠤ ᠳᠠᠢᠰᠤᠨ ᠮᠡᠲᠦ ᠰᠠᠨᠠᠭᠳᠠᠳᠠᠭ᠃ ᠨᠠᠮᠠᠶ᠋ᠢ ᠠᠯᠠᠬᠤ ᠰᠠᠨᠠᠭᠠ ᠪᠠᠨ ᠲᠡᠷᠡ ᠪᠡᠷ ᠬᠤᠷᠢᠶᠠᠭᠰᠠᠨ ᠭᠡᠵᠦ ᠤᠤ? ᠪᠤᠷᠬᠠᠨ ᠲᠡᠭᠦᠨ ᠢ᠋ ᠢᠳᠬᠠᠭᠰᠠᠨ ᠪᠤᠰᠤ ᠤᠤ?
— ᠬᠠᠭᠠᠨ ᠤ᠋ ᠶᠠᠪᠤᠳᠠᠯ ᠢ᠋ ᠪᠢ ᠶᠠᠭᠠᠬᠢᠵᠤ ᠮᠡᠳᠡᠨᠡ᠃ ᠴᠢᠮᠠᠶ᠋ᠢ ᠬᠥᠪᠡᠭᠦᠨ ᠲᠡᠢ ᠪᠡᠨ ᠬᠠᠮᠲᠤ ᠥᠰᠬᠡᠬᠦ ᠶᠤᠮᠰᠠᠨ᠃ ᠲᠡᠷᠡ ᠪᠢᠳᠡᠨ ᠡᠴᠡ ᠬᠣᠯᠠᠳᠤᠯᠠ ᠰᠢᠦ ᠳᠡ ᠭᠡᠳᠡᠭ ᠪᠠᠢᠭᠰᠠᠨ᠃
— ᠬᠥᠬᠡ ᠲᠩᠷᠢ ᠶ᠋ᠢᠨ ᠳᠠᠭᠤᠳᠠᠯᠭᠠ ᠢᠷᠡᠪᠡᠯ ᠰᠠᠪᠳᠠᠨᠪᠠᠯᠵᠢᠷ ᠪᠢᠳᠡ ᠨᠢᠭᠡᠳᠦᠨᠡ᠃ ᠴᠣᠷᠣᠰ ᠠᠢᠮᠠᠭ ᠤ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠨᠠᠮᠠᠶ᠋ᠢ ᠠᠪᠠᠴᠢᠨᠠ ᠭᠡᠪᠡᠯ ᠪᠢ ᠲᠠᠲᠠᠭᠠᠯᠵᠠᠨᠠ᠃ ᠳᠠᠢᠯᠠᠷᠠ ᠮᠠᠨᠵᠤ ᠳ᠋ᠤ᠌ ᠮᠣᠷᠳᠠᠬᠤ ᠰᠠᠨᠠᠯ ᠲᠠᠯᠪᠢᠪᠠᠯ ᠪᠢ ᠪᠠᠰᠠ ᠲᠠᠲᠠᠭᠠᠯᠵᠠᠨᠠ᠃ ᠠᠪᠠᠭᠠ ᠬᠠᠭᠠᠨ ᠠ᠋ᠴᠠ ᠬᠣᠯᠠ ᠪᠠᠢᠬᠤ ᠶ᠋ᠢ ᠬᠦᠰᠡᠨᠡ᠃ ᠰᠢᠯᠲᠠᠭᠠᠨ ᠪᠣᠢ᠃
— ᠬᠥᠪᠡᠭᠦᠨ ᠴᠢ! ᠨᠠᠮᠠᠶ᠋ᠢ ᠡᠬᠡ ᠪᠣᠯᠭᠠᠭᠰᠠᠨ᠃ ᠪᠢ ᠴᠢᠮᠠᠶ᠋ᠢ ᠠᠷᠪᠠᠨ ᠰᠠᠷᠠ ᠲᠡᠭᠡᠭᠡᠵᠦ ᠲᠥᠷᠥᠭᠦᠯᠦᠭᠰᠡᠨ᠃ ᠠᠴᠢ ᠨᠡᠬᠡᠵᠦ ᠪᠠᠢᠭᠠ ᠪᠤᠰᠤ ᠰᠢᠦ᠃ ᠵᠠᠷᠤᠯ ᠢ᠋ᠶ᠋ᠠᠷ ᠶᠠᠪᠤᠭᠠ ᠭᠡᠪᠡᠯ ᠡᠨᠳᠡᠭᠦᠷᠡᠯ ᠪᠣᠯᠤᠨᠠ᠃ ᠵᠢᠷᠦᠬᠡ ᠪᠡᠷ ᠢ᠋ᠶ᠋ᠡᠨ ᠢᠷᠡᠭᠰᠡᠨ᠃ ᠪᠢ ᠲᠠᠢᠪᠤᠩ ᠬᠣᠨᠣᠭᠠᠳ ᠪᠤᠴᠠᠶᠠ᠃
— ᠶᠠᠭᠠᠷᠠᠬᠤ ᠶᠠᠭᠤ ᠰᠠᠨ ᠪᠢᠯᠡ᠂ ᠡᠬᠡ ᠮᠢᠨᠢ᠃ ᠨᠠᠮᠠᠶ᠋ᠢ ᠢᠳᠬᠠᠵᠤ ᠳᠥᠩᠭᠡᠬᠦ ᠦᠭᠡᠢ ᠡᠴᠡ ᠠᠶᠠᠨ ᠵᠠᠮ ᠤ᠋ᠨ ᠴᠢᠯᠡᠭᠡ ᠪᠡᠨ ᠭᠠᠷᠭᠠᠭᠠᠳ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠪᠤᠴᠠᠭᠲᠤᠨ᠃
ᠴᠡᠸᠠᠩᠷᠠᠪᠳᠡᠨ ᠤᠭ ᠠ᠋ᠴᠠ ᠪᠠᠨ ᠵᠥᠷᠢᠭᠦᠳ ᠦᠭᠡᠢ ᠠᠲᠠᠯᠠ ᠡᠬᠡ ᠲᠡᠢ ᠪᠡᠨ ᠴᠥᠭᠡᠨ ᠠᠭᠤᠯᠵᠠᠵᠤ ᠨᠢᠯᠬᠠ ᠪᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠭᠡᠭᠡᠨ ᠳᠤᠷᠠᠰᠤᠮᠵᠢ ᠶ᠋ᠢ ᠠᠷᠢᠭᠤᠨ ᠬᠠᠳᠠᠭᠠᠯᠠᠬᠤ ᠪᠣᠳᠣᠯ ᠲᠠᠢ ᠪᠠᠢᠵᠠᠢ᠃ ᠠᠭᠤᠯᠠ ᠶ᠋ᠢᠨ ᠬᠢᠨ ᠦ᠌ ᠠᠷᠠᠨᠰᠢᠨ᠂ ᠲᠠᠯᠠ ᠨᠤᠲᠤᠭ ᠤ᠋ᠨ ᠬᠢᠨ ᠦ᠌ ᠠᠭᠠᠰᠢ ᠠᠪᠤᠷᠢ ᠬᠣᠭᠣᠷᠣᠨᠳᠣ ᠪᠠᠨ ᠵᠥᠷᠢᠶᠡ ᠲᠡᠢ ᠪᠢᠯᠡ᠃ ᠤᠳᠠᠭᠠᠨ ᠪᠣᠳᠣᠵᠤ ᠤᠷᠲᠤ ᠰᠠᠨᠠᠳᠠᠭ ᠠᠪᠤᠷᠢ ᠠᠷᠠᠨᠰᠢᠨ ᠲᠠᠢ ᠬᠠᠨ ᠬᠦᠦ ᠠᠨᠤ ᠬᠠᠲᠤᠨ ᠲᠠᠢ ᠪᠣᠭᠣᠨᠢᠬᠠᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠬᠥᠨᠳᠡᠢᠪᠲᠦᠷ ᠠᠭᠤᠯᠵᠠᠵᠠᠢ᠃ ᠭᠠᠯᠳᠠᠨ ᠬᠠᠭᠠᠨ ᠳ᠋ᠤ᠌ ᠭᠣᠮᠣᠳᠠᠭᠰᠠᠨ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠭᠣᠮᠣᠳᠠᠯ ᠴᠡᠸᠠᠩᠷᠠᠪᠳᠡᠨ ᠦ᠌ ᠵᠢᠷᠦᠬᠡᠨ ᠳ᠋ᠦ᠍ ᠭᠦᠨ ᠰᠣᠷᠪᠢ ᠮᠡᠲᠦ ᠬᠣᠴᠣᠷᠴᠠᠢ᠃
ᠵᠢᠷᠭᠤᠭᠠ
ᠠᠨᠤ ᠬᠠᠲᠤᠨ ᠤ᠋ ᠴᠡᠭᠡᠵᠢᠨ ᠳ᠋ᠦ᠍ ᠭᠠᠯᠳᠠᠨ᠂ ᠴᠡᠸᠠᠩᠷᠠᠪᠳᠡᠨ ᠬᠣᠶᠠᠷ ᠰᠦᠷᠭᠦᠯᠳᠦᠨᠡ᠃ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠣᠢᠷᠠᠬᠠᠨ ᠪᠠᠢᠯᠭᠠᠬᠤ ᠶᠤᠮᠰᠠᠨ ᠭᠡᠵᠦ ᠬᠠᠲᠤᠨ ᠳ᠋ᠤᠷ ᠥᠭᠦᠯᠡᠵᠦ ᠪᠠᠢᠵᠠᠢ᠃ ᠬᠠᠭᠠᠨ ᠰᠡᠩᠭᠡ ᠶ᠋ᠢ ᠬᠣᠣᠷᠯᠠᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠴᠡᠸᠠᠩᠷᠠᠪᠳᠠᠨ ᠬᠥᠪᠡᠭᠦᠨ ᠢ᠋ ᠸᠴᠢᠷᠲᠦ ᠰᠡᠴᠡᠨ ᠬᠠᠭᠠᠨ ᠭᠠᠷ ᠳᠡᠭᠡᠷᠡ ᠪᠡᠨ ᠠᠪᠤᠭᠰᠠᠨ ᠨᠢ ᠵᠢᠭᠡ ᠬᠦᠦ ᠪᠡᠨ ᠬᠠᠤᠯᠢ ᠴᠠᠭᠠᠵᠠ᠂ ᠭᠦᠨ ᠤᠬᠠᠭᠠᠨ᠂ ᠲᠡᠦᠬᠡ ᠮᠡᠳᠡᠳᠡᠭ᠂ ᠶᠣᠰᠣ ᠵᠢᠷᠤᠮ ᠲᠠᠢ ᠡᠷᠬᠢᠮ ᠨᠢᠭᠡᠨ ᠪᠣᠯᠭᠠᠬᠤ ᠭᠡᠰᠡᠨ ᠬᠣᠯᠠᠴᠢ ᠪᠣᠳᠣᠯ ᠪᠠᠢᠵᠠᠢ᠃
ᠸᠴᠢᠷᠲᠥ ᠰᠡᠴᠡᠨ ᠬᠠᠭᠠᠨ ᠤᠳᠤᠮ ᠵᠠᠯᠭᠠᠭᠰᠠᠨ ᠤᠭᠰᠠᠭᠠ ᠭᠠᠷᠪᠠᠯᠢ ᠥᠨᠳᠥᠷ ᠴᠡᠸᠠᠩᠷᠠᠪᠲᠡᠨ ᠢ᠋ ᠬᠠᠭᠠᠨ ᠰᠠᠭᠤᠳᠠᠯ ᠳ᠋ᠤ᠌ ᠪᠡᠯᠡᠳᠬᠡᠬᠦ ᠲᠠᠯᠠ ᠳ᠋ᠤ᠌ ᠰᠠᠨᠠᠭᠠ ᠪᠠᠰᠠ ᠡᠪᠦᠷᠯᠡᠵᠡᠢ᠃
ᠮᠠᠨᠵᠤ ᠶ᠋ᠢᠨ ᠵᠦᠭ ᠡᠴᠡ ᠶᠠᠪᠤᠭᠤᠯᠤᠭᠰᠠᠨ ᠬᠠᠭᠠᠯᠤᠨ ᠪᠤᠲᠠᠷᠠᠭᠠᠬᠤ᠂ ᠬᠠᠷᠭᠤᠯᠳᠤᠭᠤᠯᠤᠨ ᠦᠢᠮᠡᠭᠦᠯᠬᠦ᠂ ᠥᠪᠡᠷ ᠬᠣᠭᠣᠷᠣᠨᠳᠣ ᠶ᠋ᠢᠨ ᠢᠲᠡᠭᠡᠯ ᠢ᠋ ᠠᠯᠳᠠᠭᠤᠯᠬᠤ ᠪᠣᠳᠣᠯ ᠤ᠋ᠨ ᠵᠣᠯᠢᠶᠠᠰᠤ ᠳ᠋ᠤ᠌ ᠰᠡᠴᠡᠨ ᠬᠠᠭᠠᠨ ᠥᠷᠲᠥᠨ ᠬᠣᠱᠤᠳ ᠲᠦᠮᠡᠨ ᠦ᠌ ᠬᠢᠨ ᠬᠠᠮᠲᠤ ᠣᠯᠠᠨ ᠢ᠋ᠶ᠋ᠠᠷ ᠬᠣᠯᠠ ᠵᠠᠮ ᠲᠤᠭᠤᠯᠵᠤ ᠪᠡᠷᠬᠡ ᠬᠠᠲᠠᠭᠤ ᠶ᠋ᠢ ᠦᠵᠡᠭᠰᠡᠨ ᠨᠢ ᠴᠡᠸᠠᠩᠷᠠᠪᠲᠡᠨ ᠬᠠᠨ ᠬᠦᠦ ᠶ᠋ᠢ ᠲᠡᠰᠪᠦᠷᠢ᠂ ᠲᠡᠪᠴᠢᠶᠡᠷᠢ ᠲᠡᠢ᠂ ᠭᠦᠵᠢᠷᠮᠡᠭ ᠬᠠᠲᠠᠭᠤ ᠠᠷᠠᠨᠰᠢᠨ ᠲᠠᠢ᠂ ᠤᠴᠢᠷ ᠢ᠋ ᠡᠷᠭᠢᠴᠡᠭᠦᠯᠬᠦ ᠤᠪᠠᠳᠢᠰ ᠲᠠᠢ ᠪᠣᠯᠬᠤ ᠳ᠋ᠤ᠌ ᠰᠤᠷᠭᠠᠵᠠᠢ᠃
ᠸᠴᠢᠷᠲᠥ ᠰᠡᠴᠡᠨ ᠬᠠᠭᠠᠨ ᠨᠢᠭᠡ ᠤᠳᠠᠭᠠ ᠬᠥᠪᠡᠭᠦᠨ ᠡᠴᠡ᠂
— ᠬᠠᠲᠤᠨ ᠡᠬᠡ ᠳ᠋ᠡᠭᠡᠨ ᠵᠣᠯᠭᠠᠵᠤ᠂ ᠬᠠᠭᠠᠨ ᠠᠪᠠᠭᠠ ᠠ᠋ᠴᠠ ᠪᠠᠨ ᠠᠳᠢᠰ ᠭᠥᠷᠳᠡᠪᠡᠯ ᠶᠠᠮᠠᠷ ᠪᠣᠢ? ᠭᠡᠮᠡᠨ ᠰᠣᠨᠵᠢᠬᠤ ᠮᠡᠲᠦ ᠠᠰᠠᠭᠤᠵᠠᠢ᠃ ᠡᠪᠦᠭᠡ ᠬᠠᠭᠠᠨ ᠤ᠋ ᠠᠰᠠᠭᠤᠯᠲᠠ ᠳ᠋ᠤ᠌ ᠴᠡᠸᠠᠩᠷᠠᠪᠲᠡᠨ᠂
— ᠮᠢᠨᠦ ᠵᠠᠮ ᠨᠢᠭᠡᠨ ᠴᠠᠭ ᠲᠤ᠌ ᠭᠠᠯᠳᠠᠨ ᠬᠠᠭᠠᠨ ᠲᠠᠢ ᠬᠠᠷᠭᠤᠯᠳᠤᠬᠤ ᠪᠣᠢ ᠵ᠋ᠠ᠃ ᠲᠡᠷᠡ ᠪᠣᠯᠲᠠᠯᠠ ᠬᠦᠯᠢᠶᠡᠨᠡ᠃ ᠪᠤᠷᠬᠠᠨ ᠪᠤᠭ ᠬᠣᠶᠠᠷ ᠢ᠋ ᠵᠡᠷᠭᠡ ᠳᠠᠬᠢᠳᠠᠭ ᠬᠠᠭᠠᠨ ᠠᠪᠠᠭᠠ ᠳ᠋ᠤ᠌ ᠪᠠᠷᠠᠭᠠᠯᠠᠬᠠᠬᠣ ᠠᠪᠠᠰᠤ ᠬᠠᠷᠠ ᠲᠣᠯᠣᠭᠠᠢ ᠪᠠᠨ ᠴᠢᠰᠤᠳᠠᠬᠤ ᠪᠤᠯᠤᠭᠤᠵᠢᠨ᠃ ᠬᠠᠲᠤᠨ ᠡᠬᠡ ᠨᠠᠮᠠᠶ᠋ᠢ ᠮᠠᠷᠲᠠᠭᠰᠠᠨ᠂ ᠮᠠᠷᠲᠠᠭᠳᠠᠭᠰᠠᠨ ᠴᠢᠭ ᠲᠡᠭᠡᠨ ᠶᠠᠪᠤᠶᠠ ᠭᠡᠵᠡᠢ᠃ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠪᠣᠳᠣᠯᠭᠠᠰᠢᠷᠠᠨ᠂
— ᠯᠠᠮᠠ ᠨᠠᠷ ᠤ᠋ᠨ ᠢᠳᠬᠠᠯ ᠢ᠋ ᠮᠠᠷᠲᠠᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ? ᠭᠡᠪᠡᠰᠦ ᠴᠡᠸᠠᠩᠷᠠᠪᠲᠡᠨ᠂
— ᠭᠠᠯᠳᠠᠨ ᠬᠠᠭᠠᠨ ᠪᠠᠭᠰᠢ ᠯᠠᠮᠠ ᠳ᠋ᠠᠭᠠᠨ ᠢᠲᠡᠭᠡᠳᠡᠭ᠃ ᠯᠠᠮᠠ ᠶ᠋ᠢᠨ ᠱᠣ ᠶ᠋ᠢᠨ ᠨᠦᠬᠡ ᠨᠠᠮᠠᠶ᠋ᠢ ᠠᠯᠠᠬᠤ ᠶ᠋ᠢ ᠲᠡᠭᠦᠨ ᠳ᠋ᠦ᠍ ᠬᠡᠯᠡᠭᠰᠡᠨ᠃ ᠭᠠᠯᠳᠠᠨ ᠬᠠᠭᠠᠨ ᠮᠢᠨᠦ ᠡᠴᠢᠭᠡ ᠶ᠋ᠢᠨ ᠥᠰᠢᠶᠡ ᠶ᠋ᠢ ᠬᠣᠣᠷᠯᠠᠭᠴᠢᠨ ᠰᠠᠨᠠᠭᠠᠲᠠᠨ ᠠ᠋ᠴᠠ ᠰᠠᠢᠨ ᠠᠪᠤᠭᠰᠠᠨ᠃ ᠠᠪᠠᠭᠠ ᠠᠬᠠ ᠴᠦᠬᠦᠢ ᠤᠪᠠᠰᠢ ᠪᠠᠨ ᠬᠦᠷᠲᠡᠯᠡ ᠪᠢᠴᠠᠯᠤᠭᠰᠠᠨ᠃ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠲᠡᠨᠦᠭᠦᠯᠴᠢ ᠵᠣᠯᠪᠢᠩ ᠰᠠᠨᠠᠭᠠᠲᠠᠨ ᠪᠢᠰᠢ᠃ ᠤᠬᠠᠭᠠᠨ ᠤ᠋ ᠪᠠᠨ ᠰᠦᠪᠡ ᠶ᠋ᠢ ᠨᠡᠭᠡᠭᠡᠵᠦ ᠬᠡᠬᠡᠷᠡᠭᠰᠡᠨ ᠬᠤᠪᠢᠯᠭᠠᠨ᠃ ᠬᠠᠤᠯᠢ ᠴᠠᠭᠠᠵᠠ ᠲᠣᠭᠲᠠᠭᠠᠬᠤ ᠳ᠋ᠠᠭᠠᠨ ᠭᠠᠷᠮᠠᠭᠠᠢ ᠬᠠᠭᠠᠨ᠃ ᠣᠳᠣᠬᠠᠨ ᠳ᠋ᠠᠭᠠᠨ ᠬᠠᠭᠠᠨ ᠲᠠᠢ ᠲᠡᠷᠰᠯᠡᠮᠡ ᠦᠭᠡᠢ ᠪᠠᠢᠪᠠ᠃ ᠰᠢᠲᠦᠯᠭᠡ ᠲᠡᠢ ᠲᠠᠷᠢᠬᠢᠨ ᠳ᠋ᠤ᠌ ᠲᠣᠭᠲᠠᠭᠰᠠᠨ ᠨᠠᠭᠠᠯᠳᠤᠰᠤ ᠠᠷᠢᠯᠳᠠᠭ ᠦᠭᠡᠢ ᠪᠢᠯᠡ ᠭᠡᠪᠡ᠃
ᠡᠪᠦᠭᠡᠨ ᠬᠠᠭᠠᠨ ᠤ᠋ ᠵᠦᠩ ᠰᠤᠪᠢᠨ ᠰᠡᠷᠡᠵᠦ《ᠴᠡᠸᠠᠩᠷᠠᠪᠳᠡᠨ ᠬᠠᠨ ᠬᠦᠦ ᠨᠢᠭᠦᠯ ᠢ᠋ ᠨᠢᠭᠦᠯ ᠢ᠋ᠶ᠋ᠡᠷ᠂ ᠠᠴᠢ ᠶ᠋ᠢ ᠠᠴᠢ ᠪᠠᠷ ᠬᠠᠷᠢᠭᠤᠯᠬᠤ ᠶᠤᠮ ᠪᠠᠢᠨᠠ᠃ ᠮᠢᠨᠦ ᠭᠠᠯ ᠭᠣᠯᠣᠮᠲᠠ ᠳ᠋ᠤ᠌ ᠠᠰᠬᠠᠭᠰᠠᠨ ᠤᠰᠤ ᠰᠢᠷᠭᠢᠬᠦ ᠶ᠋ᠢᠨ ᠴᠠᠭ ᠲᠤ᠌ ᠴᠠᠸᠠᠩᠷᠠᠪᠳᠠᠨ ᠪᠣᠰᠤᠨᠠ᠃ ᠸᠴᠢᠷᠲᠤ ᠰᠡᠴᠡᠨ ᠬᠠᠭᠠᠨ ᠤ᠋ ᠭᠣᠯᠣᠮᠲᠠ ᠰᠡᠷᠭᠦᠨᠡ᠃ ᠥᠬᠢᠨ ᠦᠷᠡ ᠣᠷᠴᠢᠯᠠᠩ ᠤ᠋ᠨ ᠪᠤᠳᠠᠩ ᠳ᠋ᠤ᠌ ᠲᠥᠭᠡᠷᠢᠳᠡᠭ ᠠᠵᠢ᠃ ᠠᠨᠤ ᠥᠬᠢᠨ ᠮᠢᠨᠢ ᠭᠠᠯᠳᠠᠨ ᠢ᠋ ᠳᠠᠭᠠᠵᠤ ᠭᠠᠯᠳᠠᠨ ᠢ᠋ ᠲᠥᠷᠥᠭᠦᠯᠵᠦ ᠣᠢᠷᠠᠳ ᠳᠠᠶᠠᠭᠠᠷ ᠲᠠᠷᠬᠠᠯᠠᠭᠠᠵᠢᠪᠠ᠃ ᠮᠢᠨᠦ ᠥᠬᠢᠨ ᠨᠠᠳᠠᠳᠤ ᠬᠦᠷᠲᠡᠭᠡᠯ ᠦᠭᠡᠢ ᠪᠣᠯᠪᠠ》 ᠭᠡᠮᠡᠨ ᠰᠡᠳᠬᠢᠬᠦ ᠵᠠᠭᠤᠷᠠ᠂
— ᠡᠬᠡ ᠡᠴᠡ ᠪᠡᠨ ᠤᠷᠪᠠᠭᠰᠠᠨ ᠬᠥᠮᠦᠨ ᠪᠠᠢᠳᠠᠭ ᠦᠭᠡᠢ ᠶᠤᠮ ᠭᠡᠵᠦ ᠴᠠᠸᠠᠩᠷᠠᠪᠳᠠᠨ ᠬᠠᠨ ᠬᠦᠦ ᠳ᠋ᠦ᠍ ᠬᠡᠯᠡᠵᠡᠢ᠃
— ᠡᠬᠡ ᠪᠣᠯ ᠵᠥᠪᠬᠡᠨ ᠪᠡᠶᠡ ᠶ᠋ᠢ ᠲᠥᠷᠥᠭᠦᠯᠳᠡᠭ ᠭᠡᠵᠦ ᠬᠠᠨ ᠬᠦᠦ ᠮᠡᠳᠬᠡᠪᠡ᠃
— ᠴᠡᠸᠠᠩᠷᠠᠪᠳᠡᠨ ᠢ᠋ ᠬᠡᠨ ᠲᠥᠷᠥᠭᠦᠯᠦᠭᠰᠡᠨ ᠪᠢᠯᠡ ᠭᠡᠮᠡᠨ ᠡᠪᠦᠭᠡ ᠬᠠᠭᠠᠨ ᠬᠥᠪᠡᠭᠦᠨ ᠢ᠋ ᠮᠣᠬᠣᠭᠠᠬᠤ ᠭᠡᠲᠡᠯᠡ᠂
— ᠴᠡᠸᠠᠩᠷᠠᠪᠳᠡᠨ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠨᠢ ᠦᠨᠡᠨ ᠪᠣᠯᠪᠠᠴᠤ ᠴᠠᠸᠠᠩᠷᠠᠪᠳᠠᠨ ᠢ᠋ ᠲᠠ ᠬᠥᠮᠦᠨ ᠪᠣᠯᠭᠠᠭᠰᠠᠨ᠃ ᠢᠳᠡᠬᠦ ᠡᠮᠦᠰᠬᠦ ᠨᠢ ᠮᠠᠬᠠᠪᠣᠳ ᠤ᠋ᠨ ᠬᠡᠷᠡᠭ ᠪᠥᠭᠡᠳ ᠣᠶᠤᠨ ᠰᠠᠨᠠᠭᠠ ᠲᠠᠢ ᠪᠠᠨ ᠨᠡᠢᠯᠡᠬᠦ ᠪᠡᠷ ᠬᠥᠮᠦᠨ ᠪᠣᠯᠳᠠᠭ᠃ ᠴᠠᠸᠠᠩᠷᠠᠪᠳᠠᠨ ᠪᠣᠯ ᠲᠠᠨ ᠤ᠋ ᠪᠦᠲᠦᠭᠡᠯ᠃ ᠴᠠᠸᠠᠩᠷᠠᠪᠳᠠᠨ ᠤ᠋ ᠵᠠᠮ ᠪᠤᠰᠤᠳ ᠠ᠋ᠴᠠ ᠥᠭᠡᠷᠡ ᠪᠣᠯᠪᠠᠴᠤ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠬᠤᠪᠢ ᠵᠠᠶᠠᠭᠠᠨ ᠳ᠋ᠤ᠌ ᠤᠶᠠᠭᠠᠲᠠᠢ᠃
ᠲᠠᠨ ᠤ᠋ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠤᠷᠭᠤᠮᠠᠯ ᠬᠡᠷᠬᠢᠨ ᠤᠷᠭᠤᠵᠤ ᠰᠣᠶᠣᠭᠠᠯᠠᠭᠰᠠᠨ ᠢ᠋ ᠬᠠᠷᠠᠵᠤ ᠪᠠᠢᠨᠠ ᠤᠤ? ᠡᠪᠦᠭᠡ ᠡᠴᠢᠭᠡ ᠮᠢᠨᠢ᠁ ᠭᠡᠳ ᠢᠨᠢᠶᠡᠪᠡ᠃
ᠲᠠᠯᠠ ᠬᠡᠭᠡᠷᠡ ᠨᠤᠲᠤᠭ ᠤ᠋ᠨ ᠲᠩᠷᠢ ᠳ᠋ᠦ᠍ ᠲᠣᠭᠣᠷᠤᠤ ᠵᠡᠯᠡᠯᠡᠵᠦ ᠪᠠᠢᠪᠠ᠃ ᠪᠤᠭᠤᠷᠤᠯ ᠪᠣᠯᠲᠠᠯᠠ ᠪᠠᠨ ᠤᠳᠬᠠ ᠲᠡᠭᠦᠯᠳᠡᠷ ᠠᠮᠢᠳᠤᠷᠠᠭᠰᠠᠨ ᠡᠪᠦᠭᠡᠨ ᠬᠠᠭᠠᠨ ᠸᠴᠢᠷᠲᠤ ᠰᠡᠴᠡᠨ ᠴᠠᠸᠠᠩᠷᠠᠪᠳᠠᠨ ᠠ᠋ᠴᠠ ᠬᠦᠰᠡᠯ ᠦ᠋ᠨ ᠢ᠋ᠶ᠋ᠡᠨ ᠣᠷᠭᠢᠯ ᠲᠤᠢᠯ ᠢ᠋ ᠬᠠᠷᠠᠵᠠᠢ᠃
ᠳᠣᠯᠣᠭᠠ
ᠠᠨᠤ ᠬᠠᠲᠤᠨ ᠢ᠋ ᠪᠢ ᠰᠠᠢᠲᠤᠷ ᠮᠡᠳᠡᠳᠡᠭ ᠪᠠᠢᠯᠠ᠃ ᠠᠨᠤ ᠶ᠋ᠢᠨ ᠭᠡᠷᠡᠯ ᠰᠠᠴᠤᠷᠠᠭᠰᠠᠨ ᠨᠢᠳᠦᠨ ᠳ᠋ᠦ᠍ ᠤᠢᠳᠬᠠᠷ ᠰᠦᠮᠡᠯᠵᠡᠬᠦ ᠪᠣᠯᠤᠯᠠ᠃ ᠨᠠᠮᠠᠶ᠋ᠢ ᠮᠢᠭᠮᠠᠨᠰᠠᠩᠵᠠᠢ ᠲᠠᠢ ᠴᠡᠴᠡᠭ ᠦ᠋ᠨ ᠪᠤᠳᠠᠩ ᠳᠤᠮᠳᠠ ᠠ᠋ᠴᠠ ᠪᠤᠴᠠᠵᠤ ᠢᠷᠡᠭᠰᠡᠨ ᠲᠡᠷᠡ ᠵᠢᠯ ᠦ᠋ᠨ ᠨᠢᠭᠡᠨ ᠰᠥᠨᠢ ᠠᠨᠤ ᠶ᠋ᠢᠨ ᠨᠢᠳᠦ ᠶᠡᠷᠦ ᠪᠤᠰᠤ ᠶ᠋ᠢᠨ ᠭᠤᠨᠢᠭ ᠲᠤ᠌ ᠠᠪᠲᠠᠭᠳᠠᠭᠰᠠᠨ ᠢ᠋ ᠮᠠᠷᠲᠠᠳᠠᠭ ᠦᠭᠡᠢ ᠰᠠᠨ᠃ ᠠᠨᠤ ᠶ᠋ᠢᠨ ᠤᠬᠠᠭᠠᠨ ᠬᠤᠷᠴᠠ ᠰᠡᠷᠭᠦᠯᠡᠩ᠂ ᠣᠪᠰᠣᠭᠠ ᠲᠠᠢ᠂ ᠰᠡᠯᠡᠮᠡᠳᠡᠬᠦ ᠡᠷᠳᠡᠮ ᠳ᠋ᠦ᠍ ᠪᠠᠭᠠ ᠠ᠋ᠴᠠ ᠰᠤᠷᠤᠯᠴᠠᠭᠰᠠᠨ ᠳᠠᠢᠴᠢᠨ ᠪᠦᠰᠡᠭᠦᠢ᠃ ᠬᠠᠰᠠᠭ ᠤ᠋ᠨ ᠬᠠᠷᠪᠸᠺ ᠤ᠋ᠨ ᠭᠠᠭᠴᠠ ᠠᠮᠢᠳᠤ ᠭᠠᠷ ᠢ᠋ ᠲᠠᠰᠤ ᠴᠠᠪᠴᠢᠵᠤ ᠣᠷᠬᠢᠭᠠᠳ ᠰᠥᠨᠢᠵᠢᠨ ᠢ᠋ᠶ᠋ᠡᠨ ᠳᠡᠷᠡ ᠨᠣᠷᠭᠠᠨ ᠤᠬᠢᠯᠠᠵᠤ《ᠲᠡᠷᠡ ᠡᠷᠡ ᠪᠤᠷᠤᠭᠤ ᠨᠣᠮ ᠲᠠᠢ ᠴᠤ᠌ ᠬᠣᠶᠠᠷ ᠵᠢᠭᠦᠷ ᠢ᠋ᠶ᠋ᠡᠨ ᠲᠠᠰᠤᠯᠤᠭᠤᠯᠪᠠ᠃ ᠳᠠᠯᠠᠪᠴᠢ ᠦᠭᠡᠢ ᠵᠢᠭᠦᠷᠲᠡᠨ ᠨᠢᠰᠦᠨᠡ ᠭᠡᠵᠦ ᠤᠤ? ᠬᠠᠷᠪᠸᠺ ᠢ᠋ ᠪᠢ ᠥᠷᠦᠪᠳᠦᠵᠦ ᠪᠠᠢᠨᠠ 》ᠭᠡᠵᠡᠢ᠃
ᠭᠠᠯᠳᠠᠨ ᠡᠷᠢᠭᠡ ᠪᠡᠨ ᠱᠣᠳᠠᠵᠤ ᠦᠵᠡᠭᠡᠳ《ᠡᠴᠢᠭᠡ ᠶ᠋ᠢᠨ ᠥᠰᠢᠶᠡ ᠶ᠋ᠢ ᠬᠦᠦ ᠡᠴᠡ ᠨᠢ᠂ ᠬᠦᠦ ᠶ᠋ᠢᠨ ᠥᠰᠢᠶᠡ ᠶ᠋ᠢ ᠠᠴᠢ ᠠ᠋ᠴᠠ ᠨᠢ ᠠᠪᠴᠤ ᠪᠣᠯᠳᠠᠭ᠃ ᠪᠤᠷᠬᠠᠨ ᠴᠢᠮᠠ ᠳ᠋ᠤ᠌ ᠬᠢᠯᠢᠩᠨᠡᠭᠡ ᠦᠭᠡᠢ ᠪᠠᠢᠨᠠ᠃ ᠬᠠᠲᠤᠨ ᠲᠠ ᠲᠠᠢᠪᠤᠩ ᠨᠣᠢᠷᠰᠤ》 ᠭᠡᠮᠡᠨ ᠥᠭᠦᠯᠡᠵᠡᠢ᠃
ᠠᠨᠤ ᠶ᠋ᠢᠨ ᠵᠤᠯᠠᠢ ᠳᠡᠭᠡᠷᠡ ᠨᠠᠮᠠᠶ᠋ᠢ ᠡᠷᠢᠭᠡ ᠪᠡᠨ ᠰᠢᠪᠰᠢᠨ ᠲᠠᠯᠪᠢᠬᠤ ᠳ᠋ᠤ᠌᠂
— ᠨᠠᠳᠠᠳᠤ ᠡᠨᠳᠡ ᠨᠥᠬᠥᠴᠡᠵᠡᠢ ᠭᠡᠯᠡ᠃
— ᠴᠢᠮᠠᠶ᠋ᠢ ᠳᠤᠸᠠ ᠰᠣᠬᠣᠷ ᠳᠠᠭᠤᠳᠠᠵᠤ᠁
—ᠦᠬᠦᠯ ᠳ᠋ᠦ᠍ ᠳᠠᠭᠤᠳᠠᠭᠰᠠᠨ ᠪᠠᠢᠨᠠ ᠤᠤ?
—ᠲᠩᠷᠢ ᠡᠴᠢᠭᠡ ᠬᠠᠷᠠᠵᠠᠢ᠃ ᠦᠷᠭᠦᠯᠵᠢ ᠨᠠᠮᠠᠶ᠋ᠢ᠂ ᠴᠢᠮᠠᠶ᠋ᠢ ᠳᠤᠸᠠ ᠰᠣᠬᠣᠷ ᠳᠠᠭᠤᠳᠠᠵᠤ ᠪᠠᠢᠳᠠᠭ᠃ ᠲᠡᠷᠡ ᠳᠠᠭᠤᠳᠠᠯᠭᠠ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠬᠠᠲᠤᠨ ᠴᠢᠮᠠᠶ᠋ᠢ ᠴᠣᠢᠯᠤᠨ ᠭᠠᠷᠬᠤ ᠳ᠋ᠤ᠌ ᠬᠦᠷᠭᠡᠭᠰᠡᠨ ᠪᠢᠯᠡ᠃
—ᠣᠢᠷᠠᠳ ᠤ᠋ᠳ ᠳᠤᠸᠠ ᠰᠣᠬᠣᠷ ᠤ᠋ᠨ ᠳᠠᠭᠤᠳᠠᠯᠭᠠ ᠲᠠᠢ ᠶᠤᠮ ᠤᠤ?
—ᠳᠠᠭᠤᠳᠠᠯᠭᠠ ᠲᠠᠢ ᠪᠠᠷ ᠪᠠᠷᠠᠬᠤ ᠤᠤ? ᠳᠤᠸᠠ ᠰᠣᠬᠣᠷ ᠪᠢᠳᠡᠨ ᠦ᠌ ᠲᠩᠷᠢ᠂ ᠳᠡᠭᠡᠷᠡ ᠪᠠᠢᠭᠠ ᠲᠩᠷᠢ ᠪᠣᠯ ᠳᠤᠸᠠ ᠰᠣᠬᠣᠷ᠃ ᠲᠡᠷᠡ ᠲᠩᠷᠢ ᠳ᠋ᠦ᠍ ᠪᠢᠳᠡ ᠢᠪᠡᠭᠡᠭᠳᠡᠵᠦ ᠪᠠᠢᠳᠠᠭ᠃
— ᠬᠠᠭᠠᠨᠲᠠᠨ ᠮᠢᠨᠢ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠭᠡᠷᠡᠢ! ᠪᠢ ᠲᠤᠯᠭᠤᠷ ᠪᠡᠶᠡᠲᠡᠨ ᠦ᠌ ᠬᠠᠷᠠ ᠭᠠᠢ ᠪᠠᠷ ᠲᠡᠷᠡ ᠳᠠᠢᠴᠢᠨ ᠡᠷᠡ ᠶ᠋ᠢ ᠥᠷᠥᠪᠳᠦᠭᠰᠡᠨ ᠪᠢᠯᠡ᠃ ᠬᠡᠪᠡᠯᠢ ᠪᠡᠨ ᠳᠠᠭᠠᠭᠠᠳ ᠰᠡᠳᠬᠢᠯ ᠨᠢᠯᠬᠠᠷᠠᠳᠠᠭ ᠪᠤᠰᠤ ᠤᠤ?
— ᠲᠡᠢᠨ ᠦ᠌ ᠬᠥᠯ ᠡᠴᠡ ᠵᠠᠢᠳᠠᠭᠤ ᠶᠠᠪᠤᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠠᠨᠤ ᠮᠢᠨᠢ᠃
—ᠨᠠᠮᠠᠶ᠋ᠢ ᠲᠡᠭᠡᠵᠦ ᠡᠮᠡ ᠬᠥᠮᠦᠨ ᠦ᠌ ᠬᠦᠷᠳᠦᠨ ᠳ᠋ᠦ᠍ ᠵᠠᠶᠠᠭᠠᠭᠰᠠᠨ ᠦᠭᠡᠢ᠂ ᠬᠦᠢᠲᠡᠨ ᠬᠥᠨᠵᠢᠯᠡ ᠳ᠋ᠦ᠍ ᠰᠢᠨᠠᠯᠵᠤ ᠬᠡᠪᠲᠡᠭᠰᠡᠨ ᠡᠴᠡ ᠬᠡᠭᠡᠷᠡ ᠶ᠋ᠢᠨ ᠰᠠᠯᠬᠢᠨ ᠳ᠋ᠤ᠌ ᠠᠯᠠᠭᠠᠳᠠᠭᠤᠯᠵᠤ ᠶᠠᠪᠤᠬᠤ ᠮᠢᠨᠢ ᠬᠠᠪᠢ ᠦᠭᠡᠢ ᠢᠯᠡᠭᠦᠦ᠂ ᠲᠠ ᠪᠣᠯ ᠨᠠᠷᠠ ᠵᠥᠪ ᠡᠷᠭᠢᠳᠡᠭ ᠬᠦᠷᠳᠦ᠂ ᠬᠠᠲᠤᠨ ᠪᠢ ᠪᠥᠭᠡᠰᠦ ᠰᠠᠷᠠ ᠪᠤᠷᠤᠭᠤ ᠡᠷᠭᠢᠳᠡᠭ ᠬᠦᠷᠳᠦ᠂ ᠪᠢᠳᠡ ᠬᠣᠶᠠᠷ ᠨᠡᠢᠯᠡᠵᠦ ᠬᠠᠰ ᠪᠣᠯᠳᠠᠭ᠃
— ᠪᠡᠶᠡ ᠪᠡᠨ ᠢᠯᠠᠷᠢᠰᠢᠬᠤ ᠪᠠᠷ ᠬᠦᠯᠦᠭ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠰᠡᠯᠡᠮᠡ ᠪᠡᠨ ᠠᠳᠬᠤᠭᠲᠤᠨ!
— ᠬᠤᠶᠠᠭ ᠳᠤᠭᠤᠯᠠᠭᠠ ᠲᠠᠢ ᠪᠠᠨ ᠠᠮᠠᠷᠠᠵᠤ ᠰᠤᠷᠤᠶᠠ᠃ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠲᠠᠭᠤ ᠪᠠᠢᠯᠭᠠᠶᠠ᠃
— ᠲᠩᠷᠢ ᠡᠴᠢᠭᠡ ᠶ᠋ᠢᠨ ᠢᠪᠡᠭᠡᠯ ᠳ᠋ᠦ᠍ ᠪᠠᠭᠲᠠᠭᠰᠠᠨ ᠲᠤᠯᠠ ᠬᠠᠲᠤᠨ ᠲᠠ ᠤᠢᠳᠬᠠᠷ ᠰᠢᠨᠠᠯᠤᠯ ᠢ᠋ᠶ᠋ᠠᠨ ᠵᠢᠷᠦᠬᠡᠨ ᠡᠴᠡ ᠪᠡᠨ ᠠᠪᠴᠤ ᠴᠢᠯᠠᠭᠤᠳᠠ᠃ ᠤᠳᠠᠭᠠᠨ ᠬᠠᠳᠠᠭᠠᠯᠠᠭᠰᠠᠨ ᠰᠢᠨᠠᠯᠤᠯ ᠮᠣᠳᠣᠨ ᠤ᠋ ᠦᠮᠡᠬᠡᠢ ᠮᠡᠲᠦ ᠪᠡᠶᠡ ᠰᠡᠳᠬᠢᠯ ᠢ᠋ ᠢᠳᠡᠵᠦ᠂ ᠵᠠᠮ ᠮᠥᠷ ᠢ᠋ ᠬᠠᠷᠠᠯᠠᠭᠤᠯᠳᠠᠭ ᠶᠤᠮ᠃ ᠪᠤᠷᠬᠠᠨ ᠤ᠋ ᠨᠣᠮ ᠢ᠋ᠶ᠋ᠠᠷ ᠰᠡᠳᠬᠢᠯ ᠢ᠋ ᠲᠠᠨᠢ ᠪᠢ ᠵᠠᠰᠠᠶᠠ᠃
— ᠲᠠ ᠴᠠᠸᠠᠩᠷᠠᠪᠳᠠᠨ ᠢ᠋ ᠬᠡᠷᠬᠢᠬᠦ ᠪᠣᠢ?
— ᠬᠠᠨ ᠬᠦᠦ ᠨᠠᠳᠠ ᠠ᠋ᠴᠠ ᠵᠦᠭ ᠪᠤᠷᠤᠭᠤᠯᠠᠭᠰᠠᠨ᠃ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌ ᠬᠠᠷᠭᠤᠯᠳᠤᠨᠠ᠃ ᠡᠬᠡ ᠨᠤᠲᠤᠭ ᠢ᠋ᠶ᠋ᠠᠨ ᠮᠠᠨᠠᠵᠤ ᠦᠯᠡᠳᠡᠭ᠃ ᠲᠡᠷᠡ ᠪᠤᠷᠬᠠᠨ ᠠ᠋ᠴᠠ ᠢᠯᠡᠭᠦᠦ ᠨᠤᠲᠤᠭ ᠤᠰᠤᠨ ᠳ᠋ᠠᠭᠠᠨ ᠦᠨᠡᠨᠴᠢ ᠪᠢᠯᠡ᠃
— ᠴᠡᠸᠠᠩᠷᠠᠪᠳᠡᠨ ᠲᠡᠢᠮᠦ ᠦᠨᠡᠨᠴᠢ ᠭᠡᠵᠦ ᠤᠤ?
— ᠲᠡᠢᠮᠦ ᠪᠥᠯᠥᠭᠡ᠃ ᠪᠦᠷᠢᠯᠳᠦᠭᠰᠡᠨ ᠰᠠᠪᠠ ᠨᠢ ᠡᠬᠡ ᠶ᠋ᠢᠨ ᠬᠢ ᠪᠢᠯᠡ᠃ ᠦᠷᠡ ᠨᠢ ᠡᠬᠡ ᠲᠡᠢ ᠪᠡᠨ ᠮᠥᠩᠬᠡ ᠶ᠋ᠢᠨ ᠬᠣᠯᠪᠣᠭᠠ ᠲᠠᠢ ᠶᠠᠪᠤᠳᠠᠭ᠃ ᠲᠠᠰᠤᠷᠠᠳᠠᠭ ᠦᠭᠡᠢ ᠭᠦᠨ ᠬᠣᠯᠪᠣᠭᠠ ᠡᠬᠡ ᠦᠷᠡ ᠶ᠋ᠢᠨ ᠬᠣᠭᠣᠷᠣᠨᠳᠣ ᠡᠭᠦᠰᠳᠡᠭ᠃ ᠪᠤᠷᠬᠠᠨ ᠮᠡᠳᠡᠨᠡ᠃
— ᠬᠥᠪᠡᠭᠦᠨ ᠮᠢᠨᠢ ᠳᠠᠩᠴᠤ ᠪᠣᠳᠣᠭᠳᠠᠭᠠᠳ᠂ ᠲᠠᠷᠴᠢᠯᠠᠭᠠᠭᠠᠳ ᠪᠠᠢᠬᠤ ᠪᠣᠯᠤᠯᠠ᠃ ᠴᠠᠸᠠᠩᠷᠠᠪᠳᠠᠨ ᠢ᠋ ᠪᠢ ᠶᠡᠷᠦ ᠲᠣᠭᠣᠳᠠᠭ ᠦᠭᠡᠢ ᠪᠠᠢᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠵᠣᠷᠢᠵᠤ ᠣᠴᠢᠯᠠ᠃ ᠪᠤᠴᠠᠵᠤ ᠢᠷᠡᠯᠡ᠃ ᠵᠥᠷᠢᠵᠦ ᠥᠩᠭᠡᠷᠡᠳᠡᠭ ᠬᠠᠷᠭᠤᠢ ᠵᠠᠮ ᠪᠠᠢᠳᠠᠭ ᠠᠵᠢ᠃
— ᠲᠩᠷᠢ ᠪᠤᠷᠬᠠᠨ ᠠᠭᠤᠯᠵᠠᠭᠤᠯᠵᠤ ᠪᠠᠢᠨᠠ᠃ ᠲᠡᠷᠡ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠰᠠᠯᠭᠠᠵᠤ ᠪᠠᠢᠨᠠ᠃ ᠬᠠᠮᠢᠭᠠᠰᠢ ᠪᠠᠨ ᠣᠳᠬᠤ ᠶ᠋ᠢ ᠪᠦᠷᠢᠮᠦᠰᠦᠨ ᠵᠢᠭᠠᠭᠰᠠᠨ ᠪᠤᠷᠬᠠᠨ ᠳ᠋ᠠᠭᠠᠨ ᠲᠠᠯᠠᠷᠬᠠᠬᠤ ᠬᠡᠷᠡᠭᠲᠡᠢ᠃
ᠪᠢ ᠠᠨᠤ ᠬᠠᠲᠤᠨ ᠲᠠᠢ ᠤᠷᠤᠭ ᠪᠠᠷᠢᠯᠳᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠤᠢᠮᠤᠷᠠᠭᠰᠠᠨ᠂ ᠲᠡᠪᠴᠢᠶᠡᠷᠢ ᠠᠯᠳᠠᠵᠤ ᠪᠠᠢᠭᠰᠠᠨ ᠢ᠋ ᠨᠢ ᠶᠡᠷᠦ ᠦᠵᠡᠭᠡ ᠦᠭᠡᠢ ᠪᠢᠯᠡ᠃ ᠠᠨᠤ ᠬᠠᠲᠤᠨ ᠪᠤᠷᠬᠠᠨ ᠤ᠋ ᠰᠠᠳᠤᠨ ᠶᠤᠮ᠃ ᠰᠡᠪᠲᠡᠨᠪᠠᠯᠵᠢᠷ ᠬᠥᠪᠡᠭᠦᠨ ᠢ᠋ ᠮᠢᠨᠢ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠪᠠᠷᠢᠴᠠᠭᠠᠨ ᠳ᠋ᠤ᠌ ᠠᠪᠤᠭᠰᠠᠨ ᠨᠢ ᠨᠠᠮᠠᠶ᠋ᠢ ᠳᠠᠢᠳᠤᠬᠤ ᠳ᠋ᠤ᠌ ᠬᠦᠷᠭᠡᠭᠰᠡᠨ ᠦᠭᠡᠢ᠃ ᠣᠢᠷᠠᠳ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠴᠠᠭᠠᠵᠠ ᠬᠠᠤᠯᠢ ᠶ᠋ᠢ ᠮᠠᠨᠵᠤ ᠨᠤᠭᠤᠳ ᠥᠪᠡᠷ ᠦ᠋ᠨ ᠬᠠᠤᠯᠢ ᠪᠠᠷ ᠡᠷᠬᠡᠰᠢᠶᠡᠵᠦ᠂ ᠭᠦᠷᠦᠨ ᠶᠡᠬᠡ ᠤᠯᠤᠰ ᠢ᠋ ᠮᠢᠨᠢ ᠳᠣᠷᠣᠮᠵᠢᠯᠠᠭᠰᠠᠨ ᠲᠤᠯᠠ ᠬᠠᠭᠠᠨ ᠪᠢ ᠴᠡᠷᠢᠭᠯᠡᠨ ᠳᠠᠭᠠᠷᠢᠬᠤ ᠪᠠᠷ ᠰᠢᠢᠳᠪᠡ᠃ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠳᠠᠢᠳᠤᠬᠤ ᠶ᠋ᠢ ᠠᠽᠢᠶᠠ ᠶ᠋ᠢᠨ ᠤᠯᠤᠰ ᠤ᠋ᠳ ᠠᠵᠢᠭᠯᠠᠪᠠ᠃ ᠢᠯᠠᠩᠭᠤᠶᠠ ᠠᠷᠤ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ᠂ ᠣᠷᠣᠰ᠂ ᠲᠥᠪᠡᠳ ᠦ᠋ᠨ ᠬᠠᠭᠠᠳ ᠬᠦᠷᠲᠡᠯᠡ ᠵᠡᠭᠦᠨᠭᠠᠷ ᠤ᠋ᠨ ᠤᠯᠤᠰ ᠢ᠋ ᠬᠠᠷᠠᠵᠠᠭᠠᠪᠠ᠃ ᠬᠦᠴᠦᠷᠬᠡᠭ ᠵᠡᠭᠦᠨᠭᠠᠷ ᠮᠠᠨᠵᠤ ᠶ᠋ᠢᠨ ᠡᠵᠡᠮᠰᠢᠯ᠂ ᠲᠦᠷᠢᠮᠡᠬᠡᠢᠯᠡᠯ ᠢ᠋ ᠰᠥᠷᠴᠦ ᠵᠣᠭᠰᠣᠬᠤ ᠭᠠᠭᠴᠠ ᠨᠠᠢᠳᠠᠪᠤᠷᠢ ᠪᠣᠯᠤᠭᠰᠠᠨ ᠶᠤᠮ᠃
ᠤᠳᠠᠭᠠᠨ ᠵᠢᠯ ᠠᠶᠠᠨ ᠲᠡᠢᠨ ᠦ᠌ ᠵᠠᠮ ᠬᠠᠷᠭᠤᠢ ᠶ᠋ᠢ ᠨᠡᠭᠡᠭᠡᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠠᠷᠤ ᠥᠪᠥᠷ ᠡᠴᠡ ᠡᠭᠡᠯᠵᠢᠯᠡᠨ ᠢᠷᠡᠬᠦ ᠡᠯᠴᠢ ᠪᠡᠷ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠢ᠋ ᠵᠠᠯᠭᠠᠵᠤ ᠰᠤᠷᠴᠠᠢ᠃ ᠬᠠᠯᠬᠠ ᠮᠣᠩᠭᠣᠯ ᠤ᠋ᠨ ᠬᠣᠩ ᠲᠠᠢᠵᠢ ᠴᠠᠬᠤᠨᠳᠤᠷᠵᠢ᠂ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠬᠣᠶᠠᠷ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠳ᠋ᠤ᠌ ᠣᠴᠢᠭᠰᠠᠨ ᠢ᠋ ᠭᠠᠢᠬᠠᠭᠠᠳ ᠪᠠᠷᠠᠰᠢ ᠦᠭᠡᠢ ᠪᠢᠯᠡ᠃ ᠲᠡᠢᠨ ᠦ᠌ ᠨᠡᠭᠦᠳᠡᠯ ᠪᠣᠯ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠮᠢᠳᠤᠷᠠᠯ ᠶᠤᠮ᠃ ᠲᠡᠮᠡᠭᠡ ᠮᠠᠯ ᠡᠴᠡᠵᠦ᠂ ᠬᠡᠦᠬᠡᠳ ᠲᠥᠷᠥᠵᠦ᠂ ᠠᠪᠠ ᠬᠣᠮᠣᠷᠭᠠ ᠬᠢᠵᠦ᠂ ᠵᠡᠪᠰᠡᠭ ᠬᠦᠨᠡᠰᠦ ᠨᠥᠭᠡᠴᠡᠯᠡᠵᠦ ᠶᠠᠪᠤᠯᠠ᠃
《ᠪᠤᠷᠬᠠᠨ ᠨᠠᠮᠠᠶ᠋ᠢ ᠭᠠᠯᠳᠠᠨ ᠬᠠᠭᠠᠨ ᠲᠠ ᠶᠠᠪᠤᠭᠠᠳ ᠪᠣᠢ᠃ ᠬᠠᠯᠬᠠ ᠮᠣᠩᠭᠣᠯ ᠢ᠋ ᠢᠳᠡᠵᠦ ᠡᠷᠬᠡᠰᠢᠶᠡᠯ ᠳ᠋ᠡᠭᠡᠨ ᠣᠷᠣᠭᠤᠯᠬᠤ ᠲᠦᠪᠡᠭ ᠦᠭᠡᠢ᠃ ᠢᠯᠠᠭᠤᠭᠰᠠᠨ ᠬᠤᠲᠤᠭᠲᠤ ᠶ᠋ᠢᠨ ᠮᠢᠩᠭᠠᠨ ᠯᠠᠮᠠ ᠠᠷᠤ ᠬᠠᠯᠬᠠ ᠶ᠋ᠢᠨ ᠨᠤᠲᠤᠭ ᠢ᠋ᠶ᠋ᠠᠷ ᠲᠠᠷᠬᠠᠵᠤ ᠰᠠᠭᠤᠷᠢᠰᠢᠭᠠᠳ ᠪᠤᠷᠬᠠᠨ ᠤ᠋ ᠬᠤᠪᠢᠯᠭᠠᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠳ᠋ᠤ᠌ ᠢᠳᠡᠭᠡ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠠᠪᠤᠷᠠᠨᠠ᠂ ᠥᠭᠡᠷᠡ ᠠᠪᠤᠷᠠᠯ ᠪᠠᠢᠬᠤ ᠦᠭᠡᠢ ᠭᠡᠵᠦ ᠤᠬᠠᠭᠤᠯᠭᠠ᠂ ᠢᠳᠬᠠᠯ ᠢ᠋ᠶ᠋ᠠᠨ ᠬᠢᠵᠦ ᠪᠠᠢᠨᠠ᠃ ᠭᠠᠯᠳᠠᠨ ᠬᠠᠭᠠᠨ ᠶᠡᠬᠡ ᠬᠦᠯᠢᠶᠡᠭᠰᠡᠨ᠃ ᠲᠡᠭᠦᠨ ᠦ᠌ ᠲᠡᠪᠴᠢᠶᠡᠷᠢ ᠪᠠᠷᠠᠭᠳᠠᠪᠠ᠃ ᠭᠠᠯᠳᠠᠨ ᠤ᠋ ᠴᠡᠷᠢᠭ ᠦ᠋ᠳ ᠮᠣᠩᠭᠣᠯ ᠢ᠋ ᠠᠮᠤᠷ ᠠᠮᠤᠭᠤᠯᠠᠩ ᠪᠣᠯᠭᠠᠨᠠ᠃ ᠣᠢᠷᠠᠳ ᠤ᠋ᠳ ᠣᠮᠣᠭ ᠲᠠᠢ᠂ ᠵᠣᠪᠠᠯᠠᠩ ᠲᠤᠭᠤᠯᠤᠭᠰᠠᠨ ᠬᠥᠮᠦᠰ ᠰᠢᠦ᠃ ᠳᠥᠷᠪᠡᠨ ᠣᠢᠷᠠᠳ ᠲᠤ᠌ ᠮᠣᠩᠭᠣᠯ ᠢ᠋ᠶ᠋ᠠᠨ ᠳᠠᠭᠠᠳᠬᠠᠵᠤ ᠰᠡᠳᠬᠢᠯ ᠲᠦᠪᠰᠢᠨ ᠰᠠᠭᠤᠶᠠ᠃ ᠡᠢᠮᠦ ᠶ᠋ᠢᠨ ᠲᠤᠯᠠᠳᠠ ᠪᠤᠷᠬᠠᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢ ᠢᠯᠡᠭᠡᠪᠡ》 ᠭᠡᠮᠡᠨ ᠲᠣᠯᠣᠭᠠᠢ ᠲᠠᠢ ᠪᠣᠯᠭᠠᠨ ᠳ᠋ᠤ᠌ ᠠᠢᠯᠠᠳᠴᠤ ᠪᠠᠢᠭᠠ ᠶ᠋ᠢ ᠢᠯᠠᠭᠤᠭᠰᠠᠨ ᠬᠤᠲᠤᠭᠲᠤ ᠶ᠋ᠢᠨ ᠡᠯᠴᠢ ᠥᠭᠦᠯᠡᠪᠡ᠃
ᠢᠯᠠᠭᠤᠭᠰᠠᠨ ᠬᠤᠲᠤᠭᠲᠤ ᠶ᠋ᠢᠨ ᠲᠡᠨᠳᠡ ᠡᠴᠡ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠴᠡᠷᠢᠭ᠂ ᠵᠡᠪᠰᠡᠭ᠂ ᠬᠥᠮᠦᠨ ᠬᠦᠴᠦ ᠶ᠋ᠢᠨ ᠲᠠᠯᠠ ᠪᠠᠷ ᠭᠠᠯᠳᠠᠨ ᠬᠠᠭᠠᠨ ᠳ᠋ᠤ᠌ ᠡᠯᠴᠢ ᠮᠡᠳᠡᠭᠡᠯᠡᠭᠰᠡᠭᠡᠷ ᠥᠷᠲᠡᠭᠡ ᠤᠯᠠᠭᠠ ᠦᠯᠦ ᠲᠠᠰᠤᠷᠠᠨᠠ᠃《ᠭᠠᠯᠳᠠᠨ ᠨᠠᠮᠠᠶ᠋ᠢ ᠲᠩᠷᠢ ᠲᠡᠳᠬᠦᠵᠦ ᠠᠷᠤ ᠬᠠᠯᠬᠠ ᠳ᠋ᠤ᠌ ᠣᠷᠣᠭᠤᠯᠪᠠ᠃ ᠭᠠᠯᠳᠠᠨ ᠨᠠᠮᠠᠶ᠋ᠢ ᠪᠤᠷᠬᠠᠨ ᠬᠦᠯᠢᠶᠡᠬᠦ ᠶ᠋ᠢ ᠭᠤᠶᠤᠵᠤ ᠪᠠᠢᠯᠠ᠃》
ᠭᠠᠯᠳᠠᠨ ᠬᠠᠭᠠᠨ᠂ ᠯᠠᠮᠠ ᠭᠠᠯᠳᠠᠨ ᠤ᠋ ᠲᠠᠢᠳᠬᠤᠷᠠᠯ᠂ ᠬᠦᠯᠢᠴᠡᠨ ᠬᠦᠯᠢᠶᠡᠬᠦ ᠶ᠋ᠢᠨ ᠤᠬᠠᠭᠠᠷᠠᠯ ᠳᠤᠮᠳᠠ ᠶᠠᠪᠤᠭᠰᠠᠭᠠᠷ ᠪᠠᠢᠯᠠ᠃ ᠭᠠᠯᠳᠠᠨ ᠪᠣᠯ ᠬᠠᠭᠠᠨ ᠴᠤ᠌ ᠮᠥᠨ᠂ ᠯᠠᠮᠠ ᠴᠤ᠌ ᠮᠥᠨ᠃ ᠭᠠᠯᠳᠠᠨ ᠬᠦᠯᠢᠶᠡᠵᠦ ᠰᠤᠷᠤᠭᠰᠠᠨ᠂ ᠳᠠᠢᠳᠤᠵᠤ ᠰᠤᠷᠤᠭᠰᠠᠨ᠃ ᠭᠠᠯᠳᠠᠨ ᠤᠴᠠᠷᠠᠯ᠂ ᠬᠠᠭᠠᠴᠠᠯ ᠤ᠋ᠨ ᠳᠤᠮᠳᠠᠭᠤᠷ ᠶᠠᠪᠤᠭᠠ᠃
ᠨᠠᠢ᠍ᠮᠠ
ᠴᠡᠸᠠᠩᠷᠠᠪᠳᠡᠨ ᠪᠣᠯ ᠬᠠᠭᠠᠨ ᠤᠳᠤᠮ ᠲᠠᠢ᠂ ᠬᠠᠷᠰᠢ ᠰᠠᠨᠠᠭᠠ ᠲᠠᠢ᠂ ᠢᠵᠠᠭᠤᠷ ᠨᠢᠭᠡ ᠲᠡᠢ᠂ ᠬᠠᠤᠯᠢ ᠴᠠᠭᠠᠵᠠ ᠶ᠋ᠢᠨ ᠡᠷᠳᠡᠮ ᠳ᠋ᠦ᠍ ᠪᠣᠯᠪᠠᠰᠤᠷᠠᠭᠰᠠᠨ᠂ ᠬᠠᠲᠠᠭᠤᠵᠢᠯᠲᠠᠢ᠂ ᠲᠡᠢᠨ ᠦ᠌ ᠬᠥᠯ ᠳ᠋ᠦ᠍ ᠦᠭᠡᠢᠷᠡᠵᠦ ᠲᠤᠢᠯᠳᠠᠬᠤ ᠶ᠋ᠢ ᠦᠵᠡᠭᠰᠡᠨ᠂ ᠬᠠᠲᠠᠭᠤ ᠴᠢᠩᠭᠠ ᠬᠥᠮᠦᠨ ᠪᠢᠯᠡ᠃ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠬᠥᠯ ᠭᠠᠷ ᠬᠡᠳᠦᠢᠨᠡ ᠵᠡᠭᠥᠨᠭᠠᠷ ᠲᠤ᠌ ᠪᠣᠢ ᠪᠣᠯᠵᠤ ᠮᠣᠩᠭᠣᠯ ᠠᠢᠮᠠᠭ ᠤᠭᠰᠠᠭᠠᠲᠠᠨ ᠳ᠋ᠤ᠌ ᠨᠥᠯᠥᠭᠡᠯᠡᠵᠦ ᠪᠤᠰᠠᠨᠢᠭᠤᠯᠤᠭᠰᠠᠨ ᠪᠢᠯᠡ᠃ ᠰᠡᠪᠲᠡᠨᠵᠡᠯ ᠦ᠋ᠨ ᠪᠠᠯᠠᠭ ᠢ᠋ᠶ᠋ᠠᠷ ᠬᠣᠱᠤᠳ ᠣᠪᠣᠭᠲᠠᠨ ᠬᠠᠷᠢ ᠳ᠋ᠤ᠌ ᠣᠳᠴᠤ᠂ ᠨᠤᠲᠤᠭ ᠬᠣᠰᠢᠭᠤ ᠡᠵᠡᠭᠦᠢᠷᠡᠵᠡᠢ᠃ ᠰᠡᠪᠡᠲᠡᠨᠵᠡᠯ ᠰᠤᠷᠠᠭ ᠦᠭᠡᠢ ᠪᠣᠯᠪᠠ᠃ ᠸᠴᠢᠷᠲᠥ ᠰᠡᠴᠡᠨ ᠬᠠᠭᠠᠨ ᠤ᠋ ᠵᠢᠭᠡ ᠬᠥᠪᠡᠭᠦᠨ ᠴᠡᠸᠡᠩᠷᠠᠪᠲᠠᠨ ᠨᠤᠲᠤᠭ ᠲᠠᠢ ᠪᠠᠨ ᠬᠣᠴᠣᠷᠤᠭᠰᠠᠨ ᠨᠢ ᠭᠠᠯᠳᠠᠨ ᠬᠠᠭᠠᠨ ᠳ᠋ᠤ᠌ ᠬᠠᠷᠠᠳᠠᠬᠤ ᠰᠡᠳᠬᠢᠯ ᠲᠥᠷᠥᠭᠦᠯᠪᠡ᠃
ᠮᠠᠨᠵᠤ ᠶ᠋ᠢᠨ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ᠂ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢ ᠴᠡᠷᠢᠭᠯᠡᠨ ᠬᠥᠳᠡᠯᠦᠭᠰᠡᠨ ᠢ᠋ ᠮᠡᠳᠡᠭᠡᠳ《ᠰᠠᠯᠬᠢᠨ ᠤ᠋ ᠵᠦᠭ ᠡᠴᠡ ᠲᠣᠭᠣᠰᠣ ᠦᠨᠦᠷᠲᠦᠯᠡ᠃ ᠲᠣᠭᠣᠰᠣ ᠰᠢᠷᠣᠢ ᠳ᠋ᠤ᠌ ᠳᠠᠷᠤᠭᠤᠯᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠴᠡᠷᠢᠭ ᠢ᠋ ᠴᠢᠩᠭᠠᠯᠠᠵᠤ᠂ ᠰᠡᠷᠡᠮᠵᠢ ᠲᠡᠢ ᠪᠠᠢᠭᠲᠤᠨ᠃
ᠭᠡᠢᠮᠡᠯ ᠭᠦᠩᠵᠦ ᠶ᠋ᠢ ᠭᠠᠯᠳᠠᠨ ᠬᠠᠭᠠᠨ ᠲᠠᠲᠠᠪᠤᠷᠢ ᠡᠮᠡᠰ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ ᠬᠠᠶᠠᠭᠰᠠᠨ ᠪᠠᠢᠭᠠ ᠶᠤᠮ᠃ ᠭᠦᠩᠵᠦ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠰᠡᠷᠡᠭᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠭᠠᠯᠳᠠᠨ ᠢ᠋ ᠡᠪᠦᠷ ᠡᠴᠡ ᠨᠢ ᠳᠤᠨᠳᠠᠭᠤᠯᠵᠤ ᠭᠡᠢᠮᠡᠯ ᠭᠦᠩᠵᠦ ᠰᠠᠷᠬᠤᠳ ᠤ᠋ᠨ ᠳᠡᠭᠡᠵᠢ ᠪᠠᠷᠢᠵᠤ ᠪᠥᠬᠥᠢᠬᠦ ᠪᠡᠨ ᠤᠮᠠᠷᠲᠠᠵᠠᠢ᠃
ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠤ᠋ ᠢᠷᠡᠬᠦ ᠵᠠᠮ ᠢ᠋ ᠬᠠᠭᠠᠵᠤ ᠬᠠᠯᠬᠠ ᠶ᠋ᠢᠨ ᠨᠤᠲᠤᠭ ᠢ᠋ᠶ᠋ᠠᠷ ᠰᠠᠭᠠᠳ ᠲᠠᠢ ᠣᠷᠣᠭᠤᠯᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠰᠢᠳᠠᠷ ᠨᠣᠶᠠᠳ᠂ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠪᠠᠭᠠᠲᠤᠷ ᠤ᠋ᠳ ᠤ᠋ᠨ ᠨᠢᠭᠤᠴᠠ ᠠᠭᠤᠯᠵᠠᠯᠲᠠ ᠳ᠋ᠤ᠌ ᠥᠭᠦᠯᠡᠭᠰᠡᠨ ᠢ᠋ ᠢᠯᠠᠭᠤᠭᠰᠠᠨ ᠬᠤᠲᠤᠭᠲᠤ ᠶ᠋ᠢᠨ ᠲᠤᠷᠰᠢᠭᠤᠯ ᠯᠠᠮᠠ ᠭᠠᠯᠳᠠᠨ ᠪᠣᠱᠣᠭᠲᠤ ᠳ᠋ᠤ᠌ ᠮᠡᠳᠡᠭᠡᠯᠡᠵᠡᠢ᠃
ᠣᠢᠷᠠᠳ ᠤ᠋ᠨ ᠪᠦᠷᠭᠦᠳ ᠦ᠋ᠨ ᠲᠠᠪᠢᠯᠲᠠᠲᠤ ᠬᠥᠬᠡ ᠰᠦᠯᠳᠡ ᠲᠥᠪ ᠬᠠᠯᠬᠠ ᠶ᠋ᠢᠨ ᠨᠤᠲᠤᠭ ᠲᠤ᠌ ᠲᠡᠭᠷᠢ ᠳ᠋ᠦ᠍ ᠳᠡᠷᠪᠡᠯᠵᠡᠨ ᠬᠡᠢᠰᠴᠦ ᠴᠡᠷᠢᠭ ᠦ᠋ᠨ ᠯᠠᠮᠠ ᠨᠠᠷ ᠳᠠᠢᠰᠤᠨ ᠢ᠋ ᠮᠣᠬᠣᠭᠠᠬᠤ ᠲᠠᠷᠨᠢ ᠤᠩᠰᠢᠵᠤ᠂ ᠲᠣᠮ ᠰᠢᠪᠰᠢᠯᠭᠡ ᠰᠠᠴᠤᠭᠰᠠᠭᠠᠷ ᠪᠠᠢᠪᠠ᠃
ᠶᠢᠰᠦ
ᠵᠠᠭᠥᠨᠭᠠᠷ ᠤ᠋ᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ᠂ ᠵᠣᠷᠢᠭᠲᠤ ᠠᠨᠤ ᠬᠠᠲᠤᠨ ᠤ᠋ ᠪᠠᠨ ᠬᠠᠮᠲᠤ ᠴᠡᠷᠢᠭ ᠦ᠋ᠨ ᠬᠡᠭᠡᠷᠡ ᠶ᠋ᠢᠨ ᠠᠰᠠᠷ ᠲᠤ᠌ ᠵᠣᠭᠣᠭ ᠪᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠲᠡᠷᠲᠡᠭᠡᠬᠢ ᠣᠷᠭᠢᠯ ᠤ᠋ᠨ ᠲᠡᠨᠳᠡ ᠡᠴᠡ ᠲᠤᠤᠯᠢ ᠬᠠᠢᠯᠠᠵᠤ ᠲᠣᠪᠰᠢᠭᠤᠷ ᠤ᠋ᠨ ᠲᠣᠬᠢᠷᠠᠯᠲᠠ ᠰᠣᠨᠣᠰᠳᠠᠪᠠ᠃ ᠠᠨᠤ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠢᠨᠢᠶᠡᠮᠰᠦᠭᠯᠡᠨ ᠬᠠᠭᠠᠨ ᠤ᠋ ᠨᠠᠷᠠ ᠰᠠᠷᠠ ᠨᠠᠭᠠᠳᠤᠭᠰᠠᠨ ᠵᠣᠪᠬᠢ ᠶ᠋ᠢ ᠰᠢᠷᠳᠡᠨᠡ᠃
— ᠬᠠᠭᠠᠨ! ᠡᠨᠡ ᠡᠭᠡᠰᠢᠭᠯᠡᠩᠲᠦ ᠳᠠᠭᠤᠳᠠᠯᠭᠠ ᠶᠠᠭᠤ ᠥᠭᠦᠯᠡᠨᠡ᠃ ᠲᠠᠨ ᠤ᠋ ᠰᠦᠷ ᠬᠦᠴᠦ ᠶ᠋ᠢ ᠬᠠᠯᠬᠠ ᠮᠣᠩᠭᠣᠯ ᠳ᠋ᠤ᠌ ᠰᠣᠨᠣᠰᠬᠠᠵᠤ ᠪᠠᠢᠨᠠ᠃ ᠬᠠᠭᠠᠨ ᠤ᠋ ᠬᠡᠭᠡᠷᠡ ᠶ᠋ᠢᠨ ᠴᠢᠭᠤᠯᠭᠠᠨ ᠥᠴᠥᠭᠡᠳᠦᠷᠬᠡᠨ ᠬᠤᠷᠠᠯᠳᠤᠭᠰᠠᠨ ᠪᠤᠰᠤ ᠤᠤ? ᠲᠠᠨ ᠢ᠋ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠭᠠᠨ ᠭᠡᠵᠦ ᠡᠷᠭᠦᠮᠵᠢᠯᠡᠬᠦ ᠪᠡᠷ ᠪᠣᠯᠤᠭᠰᠠᠨ᠃ ᠨᠢᠭᠡᠨᠲᠡ ᠬᠠᠯᠬᠠ ᠮᠣᠩᠭᠣᠯ᠂ ᠣᠢᠷᠠᠳ ᠮᠣᠩᠭᠣᠯ ᠨᠢᠭᠡᠳᠦᠯᠡ ᠰᠢᠦ ᠳᠡ᠃
— ᠨᠠᠮᠠᠶ᠋ᠢ ᠬᠠᠭᠠᠨ ᠭᠠᠯᠳᠠᠨ ᠢᠮᠠᠭᠲᠠ ᠳᠠᠷᠤᠩᠭᠤᠢᠯᠠᠭᠰᠠᠭᠠᠷ ᠢᠷᠡᠭᠰᠡᠨ᠃ ᠯᠠᠮᠠ ᠭᠠᠯᠳᠠᠨ ᠥᠭᠡᠷᠡ ᠪᠣᠳᠣᠯ ᠲᠠᠢ᠃ ᠠᠮᠢᠳᠤᠷᠠᠯ ᠤᠳᠬᠠ ᠬᠣᠭᠣᠰᠣᠨ ᠪᠢᠯᠡ᠃ ᠬᠣᠭᠣᠰᠣᠨ ᠠᠮᠢᠳᠤᠷᠠᠯ ᠢ᠋ ᠤᠳᠬᠠ ᠤᠴᠢᠷ ᠲᠠᠢ ᠪᠣᠯᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠬᠠᠭᠠᠨ ᠯᠠᠮᠠ ᠬᠣᠶᠠᠭᠤᠯᠠ ᠵᠡᠷᠭᠡ ᠵᠢᠳᠬᠦᠪᠡ᠃ ᠬᠠᠭᠠᠨ ᠭᠦᠷᠦᠨ ᠤᠯᠤᠰ ᠢ᠋ᠶ᠋ᠠᠨ ᠡᠮᠬᠢᠯᠡᠵᠦ ᠳᠠᠢᠳᠤᠪᠠ᠃ ᠯᠠᠮᠠ ᠬᠡᠢᠳ ᠪᠣᠰᠬᠠᠵᠤ ᠭᠦᠷᠢᠮ ᠬᠢᠪᠡ᠃ ᠬᠣᠭᠣᠰᠣᠨ ᠢ᠋ ᠶᠠᠭᠤ ᠪᠠᠷ ᠳᠦᠭᠦᠷᠭᠡᠬᠦ ᠪᠢᠯᠡ᠃ ᠬᠠᠲᠤᠨ ᠲᠠ ᠶᠠᠭᠤ ᠰᠡᠳᠬᠢᠪᠡ᠂᠂᠂᠂
ᠲᠤᠤᠯᠠ ᠶ᠋ᠢᠨ ᠪᠤᠷᠭᠠᠰᠤ ᠨᠠᠢᠭᠤᠭᠰᠠᠨ ᠤᠷᠲᠤ ᠬᠥᠨᠳᠡᠢ ᠪᠡᠷ ᠣᠢᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠳ ᠳᠦᠭᠦᠷᠡᠩ ᠪᠠᠭᠤᠳᠠᠯᠯᠠᠵᠤ᠂ ᠴᠡᠷᠢᠭ ᠦ᠋ᠨ ᠮᠢᠩᠭᠠᠲᠤ᠂ ᠵᠠᠭᠤᠲᠤ᠂ ᠠᠷᠪᠠᠲᠤ ᠶ᠋ᠢᠨ ᠮᠠᠢᠬᠠᠨ᠂ ᠵᠣᠳᠬᠡ᠋ᠷ ᠳᠤᠭᠤᠢᠷᠠᠨ ᠪᠠᠭᠤᠵᠠᠢ᠃ ᠥᠷᠯᠥᠭᠡᠨ ᠦ᠌ ᠴᠠᠢ ᠪᠣᠯᠵᠤ ᠤᠲᠤᠭᠠ ᠰᠠᠪᠰᠠᠨᠠ᠃ ᠴᠡᠷᠢᠭ ᠦ᠋ᠨ ᠠᠭᠲᠠ ᠡᠪᠡᠰᠦ ᠲᠡᠢ ᠨᠤᠭᠤ ᠲᠣᠬᠣᠢ ᠳ᠋ᠤ᠌ ᠪᠦᠴᠢᠵᠦ᠂ ᠲᠡᠮᠡᠭᠡᠨ ᠲᠡᠷᠭᠡ᠂ ᠦᠬᠡᠷ ᠲᠡᠷᠭᠡ ᠨᠢᠭᠡᠨ ᠬᠣᠲᠣᠭᠣᠷ ᠢ᠋ ᠪᠦᠷᠬᠦᠵᠦ ᠪᠠᠢᠯᠠ᠃
ᠰᠣᠨᠣᠰᠬᠤᠯᠠᠩᠲᠤ ᠲᠤᠤᠯᠢ ᠶ᠋ᠢᠨ ᠠᠶᠠᠯᠭᠤ ᠶ᠋ᠢ ᠴᠢᠮᠡᠭᠯᠡᠭᠰᠡᠨ ᠴᠡᠷᠢᠭ ᠦ᠋ᠨ ᠬᠣᠲᠠ ᠶ᠋ᠢᠨ ᠬᠢᠨ ᠪᠦᠬᠦᠯᠢ ᠳ᠋ᠡᠭᠡᠨ ᠶᠠᠮᠠᠷ ᠨᠢᠭᠡᠨ ᠰᠣᠪᠢᠩ ᠳ᠋ᠤ᠌ ᠠᠪᠲᠠᠭᠰᠠᠨ ᠮᠡᠲᠦ᠃ ᠲᠤᠤᠯᠠ ᠶ᠋ᠢᠨ ᠬᠥᠨᠳᠡᠢ ᠪᠡᠷ ᠣᠢᠷᠠᠳ ᠤ᠋ᠨ ᠬᠠᠷᠠ ᠰᠦᠯᠳᠡ ᠶ᠋ᠢ ᠵᠠᠯᠠᠭᠰᠠᠨ ᠮᠣᠷᠢᠲᠠᠨ ᠴᠡᠷᠢᠭ ᠦ᠋ᠳ ᠳᠠᠪᠬᠢᠨ ᠭᠠᠷᠴᠤ ᠢᠷᠡᠯᠡ᠃ ᠰᠦᠯᠳᠡ ᠶ᠋ᠢᠨ ᠠᠷᠤ ᠠ᠋ᠴᠠ ᠬᠥᠬᠡ ᠲᠤᠭ ᠨᠠᠮᠢᠷᠠᠨᠠ᠃ ᠬᠥᠬᠡ ᠲᠤᠭ᠂ ᠬᠥᠬᠡ ᠬᠢᠭᠢᠷᠢ ᠪᠦᠷᠭᠦᠳ ᠰᠦᠯᠳᠡ ᠲᠡᠢ ᠠᠵᠢ᠃ ᠲᠤᠤᠯᠠ ᠶ᠋ᠢᠨ ᠬᠥᠪᠡᠭᠡᠨ ᠡᠴᠡ ᠨᠢᠭᠡᠨ ᠵᠠᠭᠤᠲᠤ ᠴᠡᠷᠢᠭ ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠰᠤᠭᠤ ᠶ᠋ᠢ ᠳᠡᠷᠡᠯᠡᠵᠦ ᠪᠠᠭᠤᠪᠠ᠃ ᠴᠡᠷᠢᠭ ᠦ᠋ᠳ ᠠᠭᠤᠯᠠ ᠥᠭᠡᠳᠡ ᠭᠦᠶᠦᠯᠳᠦᠨᠡ᠃ ᠡᠨᠡ ᠠᠭᠤᠯᠠ ᠶ᠋ᠢᠨ ᠪᠠᠯ ᠠᠭᠤᠵᠢᠮ᠂ ᠣᠷᠣᠢ ᠨᠢ ᠳᠤᠭᠤᠢ᠂ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠠᠭᠠᠨ ᠭᠣᠣ ᠰᠠᠷᠬᠢᠶᠠᠭ ᠪᠠᠭᠠ ᠲᠠᠢ ᠠᠵᠢ᠃ ᠴᠡᠷᠢᠭ ᠦ᠋ᠳ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠭᠦᠶᠦᠭᠰᠡᠭᠡᠷ ᠭᠠᠷᠬᠤ ᠳ᠋ᠤ᠌ ᠲᠤᠤᠯᠠ ᠶ᠋ᠢᠨ ᠬᠥᠨᠳᠡᠢ ᠳᠦᠭᠦᠷᠡᠩ ᠪᠥᠮᠪᠥᠷ ᠴᠠᠩ ᠬᠡᠩᠭᠡᠷᠭᠡ ᠳᠡᠯᠡᠳᠪᠡ᠃ ᠶᠡᠬᠡ ᠴᠡᠷᠢᠭ ᠦ᠋ᠳ ᠠᠷᠪᠠᠲᠤ᠂ ᠵᠠᠭᠤᠲᠤ᠂ ᠮᠢᠩᠭᠠᠲᠤ ᠶ᠋ᠢᠨ ᠪᠠᠭᠴᠠᠨ ᠳ᠋ᠤ᠌ ᠨᠢᠭᠡᠳᠴᠦ ᠵᠢᠭᠰᠠᠪᠠ᠃ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠷ ᠢ᠋ ᠬᠡᠭᠡᠷᠡ ᠶ᠋ᠢᠨ ᠠᠰᠠᠷ ᠠ᠋ᠴᠠ ᠭᠠᠷᠬᠤ ᠳ᠋ᠤ᠌ ᠰᠢᠳᠠᠷ ᠪᠠᠭᠠᠲᠤᠷ ᠤ᠋ᠳ᠂ ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠳ᠂ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠳ ᠡᠭᠦᠳᠡᠨ ᠦ᠌ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠱᠤᠭᠤᠮᠳᠠᠨ ᠵᠢᠭᠰᠠᠭᠰᠠᠨ ᠪᠥᠭᠡᠳ ᠳᠠᠨᠵᠢᠯᠠ ᠵᠠᠩᠵᠤᠨ᠂ ᠠᠷᠴᠠ ᠪᠠᠭᠠᠲᠤᠷ᠂ ᠬᠠᠴᠠᠷ ᠳᠠᠭᠠᠨ ᠭᠦᠨ ᠰᠣᠷᠪᠢ ᠲᠠᠢ ᠭᠠᠢᠲᠠᠪ ᠪᠠᠭᠠᠲᠤᠷ ᠲᠡᠷᠢᠭᠦᠯᠡᠵᠡᠢ᠃ ᠠᠨᠤ ᠬᠠᠲᠤᠨ ᠴᠡᠷᠢᠭ ᠦ᠋ᠳ ᠪᠦᠷᠬᠦᠭᠰᠡᠨ ᠠᠭᠤᠯᠠ ᠶ᠋ᠢᠨ ᠵᠦᠭ ᠭᠠᠷ ᠢ᠋ᠶ᠋ᠠᠷ ᠵᠢᠭᠠᠵᠤ᠂
— ᠲᠡᠷᠡ ᠪᠣᠯ ᠲᠣᠭᠣᠨᠣ ᠠᠭᠤᠯᠠ᠂ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠶᠣᠰᠣᠯᠠᠯ ᠦᠢᠯᠡᠳᠦᠨᠡ᠃ ᠡᠨᠡ ᠶᠣᠰᠣᠯᠠᠯ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠢ᠋ ᠪᠦᠬᠦ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠨ ᠲᠤᠩᠬᠠᠭᠯᠠᠬᠤ ᠶᠤᠮ᠃ ᠬᠠᠲᠤᠨ ᠮᠢᠨᠦ ᠪᠡᠶᠡ ᠶᠣᠰᠣᠯᠠᠯ ᠢ᠋ ᠦᠢᠯᠡᠳᠬᠦ ᠪᠣᠯᠤᠨᠠ ᠭᠡᠯᠡ᠃
— ᠣᠢᠷᠠᠳ ᠤ᠋ᠨ ᠴᠢᠭᠤᠯᠭᠠᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠢ᠋ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠡᠷᠭᠦᠮᠵᠢᠯᠡᠭᠰᠡᠨ ᠰᠢᠦ ᠳᠡ ᠭᠡᠮᠡᠨ ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠯ ᠢ᠋ ᠦᠭᠡ ᠨᠡᠮᠡᠬᠦ ᠳ᠋ᠦ᠍ ᠬᠠᠭᠠᠨ ᠤ᠋ ᠰᠢᠳᠠᠷ ᠵᠥᠪᠯᠡᠬᠦ ᠨᠦ᠍ᠭᠦᠳ《ᠦᠨᠡᠨ ᠳ᠋ᠡᠭᠡᠨ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ᠂ ᠳᠠᠯᠠᠢ ᠯᠠᠮᠠ ᠬᠣᠶᠠᠭᠤᠯᠠ ᠪᠠᠨ ᠴᠣᠯᠠ ᠡᠷᠭᠦᠮᠵᠢᠯᠡᠯ ᠢ᠋ᠶ᠋ᠡᠨ ᠬᠦᠷᠲᠡᠭᠡᠭᠰᠡᠨ᠃ ᠮᠣᠩᠭᠣᠯᠴᠤᠳ ᠡᠳᠦᠢ ᠬᠦᠷᠲᠡᠯᠡ ᠳᠠᠭᠤ ᠪᠠᠨ ᠬᠤᠷᠢᠶᠠᠭᠰᠠᠨ᠃ ᠥᠨᠥᠳᠥᠷ ᠲᠩᠷᠢ ᠲᠡᠳᠬᠦᠭᠰᠡᠨ ᠡᠳᠦᠷ᠃ ᠠᠨᠤ ᠬᠠᠲᠤᠨ ᠲᠤᠩ ᠶᠡᠬᠡ ᠪᠡᠷ ᠪᠡᠯᠭᠡᠰᠢᠶᠡᠵᠦ ᠶᠣᠰᠣᠯᠠᠯ ᠦᠢᠯᠡᠳᠬᠦ ᠶ᠋ᠢ ᠵᠠᠷᠯᠢᠭᠯᠠᠭᠰᠠᠨ ᠪᠢᠯᠡ》 ᠭᠡᠮᠡᠨ ᠵᠡᠷᠭᠡ ᠰᠢᠬᠠᠮ ᠥᠴᠢᠯᠡ᠃
ᠭᠠᠯᠳᠠᠨ ᠬᠠᠭᠠᠨ ᠠᠨᠤ ᠬᠠᠲᠤᠨ ᠲᠠᠢᠰᠢ ᠲᠣᠯᠣᠭᠠᠢ ᠪᠠᠨ ᠡᠷᠭᠢᠭᠦᠯᠦᠨ ᠬᠠᠷᠠᠬᠤ ᠳ᠋ᠤ᠌ ᠪᠡᠶᠡ ᠶ᠋ᠢᠨ ᠭᠠᠯᠪᠢᠷ ᠨᠢ ᠥᠭᠡᠷᠡᠴᠢᠯᠡᠭᠳᠡᠭᠡ ᠦᠭᠡᠢ ᠵᠢᠪᠬᠤᠯᠠᠩ ᠬᠠᠲᠤᠨ ᠬᠠᠢᠷᠠ ᠶ᠋ᠢᠨ ᠬᠠᠷᠠᠴᠠ ᠪᠠᠷ ᠬᠠᠷᠢᠭᠤ ᠪᠠᠷᠢᠯᠠ᠃ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠ ᠶ᠋ᠢᠨ ᠮᠠᠩᠨᠠᠢ ᠲᠦᠩᠬᠦᠢᠵᠦ ᠬᠠᠷᠠᠭᠳᠠᠳᠠᠭ ᠪᠥᠯᠥᠭᠡ᠃ ᠨᠤᠲᠤᠭ ᠤᠰᠤᠨ ᠤ᠋ ᠠᠭᠤᠯᠠᠰ ᠪᠡᠶᠡ ᠪᠡᠶᠡ ᠪᠡᠨ ᠣᠷᠭᠢᠯ ᠲᠡᠷᠢᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠷᠢᠯᠴᠠᠨ ᠨᠠᠷᠠ ᠰᠠᠷᠠ ᠶ᠋ᠢᠨ ᠳᠣᠣᠷᠠ ᠬᠡᠳᠦᠨ ᠵᠠᠭᠤᠨ ᠵᠢᠯ ᠢ᠋ ᠦᠳᠡᠭᠰᠡᠨ ᠪᠢᠯᠡ᠃
— ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠ᠁ ᠭᠡᠮᠡᠨ ᠭᠠᠯᠳᠠᠨ ᠬᠠᠭᠠᠨ ᠪᠡᠯᠭᠡᠰᠢᠶᠡᠨ ᠥᠭᠦᠯᠡᠭᠡᠳ ᠵᠠᠯᠪᠠᠷᠢᠪᠠ᠃
ᠭᠠᠯᠳᠠᠨ ᠤ᠋ ᠭᠠᠢᠬᠠᠰᠢᠷᠠᠭᠰᠠᠨ ᠶᠠᠭᠤᠮᠠ ᠪᠣᠯ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠲᠩᠷᠢ ᠣᠷᠣᠢ ᠳ᠋ᠤ᠌ ᠨᠢᠭᠡ ᠵᠠᠭᠤᠨ ᠨᠠᠢ᠍ᠮᠠᠨ ᠶᠠᠰᠤᠲᠤ ᠮᠡᠯᠡᠬᠡᠢ ᠥᠷᠥᠵᠦ ᠬᠠᠭᠠᠨ ᠤ᠋ ᠥᠯᠮᠡᠢ᠂ ᠬᠠᠭᠠᠨ ᠤ᠋ ᠮᠡᠯᠮᠡᠢ ᠶ᠋ᠢ ᠮᠢᠯᠢᠶᠠᠭᠰᠠᠨ ᠶᠠᠪᠤᠳᠠᠯ ᠪᠠᠢᠯᠠ᠃ ᠵᠠᠭᠤᠨ ᠨᠠᠢ᠍ᠮᠠᠨ ᠶᠠᠰᠤᠲᠤ ᠮᠡᠯᠡᠬᠡᠢ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠ ᠠ᠋ᠴᠠ ᠡᠬᠢ ᠠᠪᠤᠭᠰᠠᠨ ᠤᠨᠤᠨ᠂ ᠬᠡᠷᠦᠯᠦᠨ᠂ ᠲᠤᠤᠯᠠ ᠭᠣᠣᠯ ᠤ᠋ᠨ ᠰᠠᠪᠠ ᠳᠠᠭᠠᠤ ᠯᠤᠤᠰ ᠤ᠋ᠨ ᠤᠷᠲᠤ ᠬᠠᠷᠰᠢ ᠳ᠋ᠤ᠌ ᠪᠠᠢᠷᠢᠯᠠᠵᠤ ᠪᠠᠢᠵᠠᠢ᠃ ᠯᠤᠤᠰ ᠤ᠋ᠨ ᠠᠮᠢᠲᠠᠨ ᠢ᠋ ᠱᠠᠭᠠ ᠪᠠᠷ ᠥᠷᠥᠵᠦ ᠲᠣᠭᠯᠠᠳᠠᠭ ᠣᠢᠷᠠᠳ ᠮᠣᠩᠭᠣᠯ ᠤ᠋ᠨ ᠵᠠᠩᠰᠢᠯ ᠪᠣᠢ᠃ ᠭᠠᠯᠳᠠᠨ ᠬᠠᠭᠠᠨ ᠳ᠋ᠤ᠌ ᠦᠷᠦᠭᠰᠡᠨ ᠵᠠᠭᠤᠨ ᠨᠠᠢ᠍ᠮᠠᠨ ᠮᠡᠯᠡᠬᠡᠢ ᠨᠢᠭᠡ ᠲᠣᠮᠣ ᠮᠡᠯᠡᠬᠡᠢ ᠪᠣᠯᠵᠠᠢ᠃ ᠲᠡᠭᠦᠨ ᠦ᠌ ᠬᠡᠯᠪᠡᠷᠢ ᠨᠢ ᠵᠡᠭᠥᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠨᠤᠲᠤᠭ ᠮᠡᠲᠦ᠃ ᠵᠠᠭᠤᠨ ᠨᠠᠢ᠍ᠮᠠᠨ ᠲᠣᠭᠠ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠴᠡᠭᠡᠵᠢᠨᠡ ᠵᠡᠭᠦᠯᠲᠡ ᠲᠡᠢ ᠡᠷᠢᠭᠡ ᠮᠡᠲᠦ᠃ ᠭᠠᠯᠳᠠᠨ ᠬᠠᠭᠠᠨ ᠡᠷᠢᠭᠡ ᠪᠡᠷ ᠢ᠋ᠶ᠋ᠡᠨ ᠰᠢᠪᠰᠢᠯᠭᠡ ᠦᠢᠯᠡᠳᠴᠦ ᠣᠢᠷᠠᠳ ᠴᠡᠷᠢᠭ ᠦ᠋ᠨ ᠬᠡᠢᠮᠣᠷᠢ ᠶ᠋ᠢ ᠰᠡᠷᠭᠦᠭᠡᠨ ᠬᠤᠷᠤᠢᠯᠠᠪᠠ᠃
ᠭᠠᠯᠳᠠᠨ ᠮᠡᠯᠡᠬᠡᠢ ᠶ᠋ᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠵᠠᠪᠢᠯᠠᠨ ᠰᠠᠭᠤᠵᠤ ᠡᠷᠢᠭᠡ ᠪᠡᠨ ᠱᠣᠳᠠᠵᠤ ᠦᠵᠡᠭᠡᠳ᠂
— ᠬᠦᠯᠢᠶᠡᠭᠰᠡᠨ ᠴᠠᠭ ᠢᠷᠡᠵᠡᠢ ᠭᠡᠪᠡ᠃
— ᠢᠯᠠᠯᠲᠠ ᠬᠡᠨ ᠦ᠌ ᠲᠠᠯᠠ ᠳ᠋ᠤ᠌ ᠪᠠᠢᠨᠠ᠂ ᠬᠠᠭᠠᠨᠲᠠᠨ! ᠭᠡᠵᠦ ᠭᠠᠢᠳᠠᠪ ᠪᠠᠭᠠᠲᠤᠷ ᠵᠠᠪᠢᠯᠠᠭᠠ ᠲᠠᠢ ᠬᠠᠭᠠᠨ ᠠ᠋ᠴᠠ ᠵᠣᠷᠢᠮᠠᠭᠬᠠᠨ ᠠᠰᠠᠭᠤᠪᠠ᠃
— ᠢᠯᠠᠨᠠ ᠭᠡᠵᠦ ᠪᠣᠳᠣᠵᠠᠭᠠ᠂ ᠪᠣᠳᠣᠭᠰᠠᠨ ᠢ᠋ᠶ᠋ᠠᠷ ᠪᠣᠯᠤᠨᠠ ᠰᠢᠦ᠃ ᠶᠠᠭ ᠮᠢᠨᠦ ᠰᠠᠭᠤᠭᠠ ᠡᠨᠡ ᠭᠠᠵᠠᠷ ᠲᠤ᠌ ᠨᠢᠭᠡ ᠰᠦᠨᠡᠰᠦ ᠣᠷᠣᠰᠢᠨᠠ᠃ ᠲᠡᠷᠡ ᠰᠦᠨᠡᠰᠦ ᠨᠠᠳᠠ ᠲᠠᠢ ᠴᠣᠭ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠣᠷᠣᠵᠠᠢ᠃ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠭᠠᠯᠲᠤ ᠰᠤᠮᠤ ᠲᠠᠯᠪᠢᠵᠠᠭᠠ᠂ ᠭᠠᠯ ᠠᠰᠠᠭᠠ ᠭᠡᠵᠦ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠥᠭᠦᠯᠡᠪᠡ᠃ ᠬᠠᠭᠠᠨ ᠶᠠᠰᠤᠲᠤ ᠮᠡᠯᠡᠬᠡᠢ ᠶ᠋ᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠵᠠᠪᠢᠯᠠᠭᠠ ᠲᠠᠢ ᠪᠠᠨ ᠤᠳᠠᠭᠠᠨ ᠰᠠᠭᠤᠵᠤ ᠣᠢᠷᠠᠳ᠂ ᠬᠠᠯᠬᠠ ᠴᠡᠷᠢᠭ ᠦ᠋ᠳ ᠬᠥᠨᠳᠡᠢ ᠳᠦᠭᠦᠷᠡᠩ ᠤᠤᠬᠠᠢᠯᠠᠵᠤ᠂ ᠶᠡᠬᠡ ᠦᠳᠡ ᠪᠣᠯᠬᠤ ᠳ᠋ᠤ᠌ ᠰᠠᠮᠠᠭᠤᠨ ᠢ᠋ ᠠᠷᠢᠯᠭᠠᠬᠤ ᠪᠠᠷ ᠬᠣᠰᠢᠭᠤᠷᠠᠨ ᠪᠠᠭᠤᠪᠠ᠃
ᠮᠣᠩᠭᠣᠯᠴᠤᠳ ᠶᠡᠬᠡ ᠤᠯᠤᠰ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠬᠤ ᠪᠠᠷ ᠨᠢᠭᠡᠳᠴᠡᠢ᠃
ᠠᠷᠪᠠ
ᠢᠯᠠᠭᠤᠭᠰᠠᠨ ᠬᠤᠲᠤᠭᠲᠤ ᠶ᠋ᠢᠨ ᠡᠯᠴᠢ ᠮᠠᠨᠵᠤ ᠠ᠋ᠴᠠ ᠢᠷᠡᠭᠡᠳ ᠵᠢᠤᠵᠠ ᠲᠡᠷᠭᠡᠨ ᠳ᠋ᠦ᠍ ᠶᠠᠪᠤᠭᠰᠠᠨ ᠭᠠᠯᠳᠠᠨ ᠬᠠᠭᠠᠨ ᠳ᠋ᠤ᠌ ᠪᠢᠴᠢᠭ ᠵᠠᠬᠢᠶᠠ ᠥᠭᠴᠡᠢ᠃ ᠵᠢᠤᠵᠠ ᠲᠡᠷᠭᠡ ᠡᠴᠡ ᠳᠤᠭᠤᠢ ᠤᠨᠢᠶᠠᠷᠲᠤᠭᠰᠠᠨ ᠲᠠᠯᠠ ᠶ᠋ᠢᠨ ᠡᠪᠡᠰᠦ ᠨᠣᠭᠣᠭᠠ ᠶ᠋ᠢ ᠰᠢᠭᠦᠰᠦ ᠲᠡᠢ ᠨᠢ ᠬᠤᠳᠬᠤᠨ᠂ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥᠨ ᠳ᠋ᠦ᠍ ᠮᠥᠷ ᠢ᠋ᠶ᠋ᠡᠨ ᠦᠯᠡᠳᠡᠭᠡᠵᠦ ᠤᠷᠤᠭᠰᠢᠯᠠᠨᠠ᠃ ᠲᠣᠷᠭᠠᠨ ᠴᠡᠷᠢᠭ ᠦ᠋ᠨ ᠪᠠᠭ ᠬᠠᠭᠠᠨ ᠤ᠋ ᠵᠢᠤᠵᠠ ᠲᠠᠢ ᠴᠣᠭ ᠵᠣᠭᠰᠣᠪᠠ᠃
《ᠲᠣᠰᠣ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠥᠲᠥᠵᠡᠢ᠃ ᠯᠠᠮᠠ ᠨᠠᠷ ᠤ᠋ᠨ ᠨᠢᠭᠤᠴᠠ ᠪᠦᠯᠬᠦᠮ ᠢᠯᠡᠴᠢᠯᠩᠳᠠᠵᠤ ᠵᠠᠭᠤᠨ ᠯᠠᠮᠠ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠴᠠᠭᠠᠵᠠᠯᠠᠭᠳᠠᠪᠠ᠃ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠲᠣᠭᠲᠠᠪᠤᠷᠢ ᠦᠭᠡᠢ ᠪᠣᠯᠵᠤ ᠴᠡᠷᠢᠭ ᠬᠠᠷᠠᠭᠤᠯ ᠢ᠋ᠶ᠋ᠠᠨ ᠴᠢᠩᠭᠠᠳᠬᠠᠪᠠ᠃ ᠬᠠᠭᠠᠨ ᠲᠠ ᠰᠠᠢᠲᠤᠷ ᠪᠣᠯᠭᠣᠭᠠᠵᠤ ᠡᠪᠦᠷ ᠲᠡᠭᠡᠨ ᠬᠣᠣᠷ ᠣᠷᠣᠭᠤᠯᠪᠠ ᠊ᠢᠠ᠃ ᠬᠥᠬᠡᠬᠣᠲᠠ ᠶ᠋ᠢᠨ ᠪᠠᠢᠳᠠᠯ ᠳᠠᠭᠠ ᠦᠭᠡᠢ ᠪᠠᠢᠨᠠ᠃
ᠥᠪᠥᠷᠯᠡᠭᠴᠢ ᠶ᠋ᠢᠨ ᠳᠥᠴᠢᠨ ᠶᠢᠰᠦᠨ ᠬᠣᠰᠢᠭᠤ ᠮᠠᠨᠵᠤ ᠶ᠋ᠢᠨ ᠲᠠᠯᠬᠢᠨ ᠳ᠋ᠤ᠌ ᠬᠢᠷᠢ ᠤᠳᠠᠭᠠᠨ ᠵᠣᠪᠠᠬᠤ ᠶ᠋ᠢ ᠳᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ᠃ ᠲᠥᠪᠡᠳ ᠦ᠋ᠨ ᠳ᠋ᠶ᠋ᠸᠠ ᠰᠠᠩᠵᠠᠢᠵᠠᠮᠰᠤ ᠶ᠋ᠢᠨ ᠨᠢᠭᠤᠴᠠ ᠵᠠᠳᠠᠷᠠᠵᠤ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠲᠠᠭᠠᠯᠠᠯ ᠲᠡᠭᠦᠰᠦᠭᠰᠡᠨ ᠢ᠋ ᠠᠷᠪᠠᠨ ᠲᠠᠪᠤᠨ ᠵᠢᠯ ᠨᠢᠭᠤᠵᠠᠢ᠃ ᠠᠷᠪᠠᠨ ᠲᠠᠪᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠳ᠋ᠶ᠋ᠸᠠ ᠰᠠᠩᠵᠠᠢᠵᠠᠮᠰᠤ᠂ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠨᠡᠷᠡ ᠶ᠋ᠢ ᠪᠠᠷᠢᠵᠤ ᠶᠠᠪᠤᠵᠠᠢ᠃ ᠡᠨᠡ ᠪᠦᠬᠦᠨ ᠡᠴᠡ ᠦᠵᠡᠪᠡᠯ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠢ᠋ ᠰᠥᠷᠬᠦ ᠭᠠᠭᠴᠠ ᠨᠠᠢᠳᠠᠯᠭᠠ ᠬᠠᠭᠠᠨ ᠲᠠ ᠪᠢᠯᠡ᠃
ᠬᠠᠭᠠᠨ ᠲᠠᠨ ᠤ᠋ ᠰᠠᠬᠢᠭᠤᠰᠤᠨ ᠳ᠋ᠤ᠌ ᠵᠠᠯᠪᠠᠷᠢᠶᠠ᠃ ᠲᠠᠨ ᠤ᠋ ᠥᠯᠮᠡᠢ ᠪᠠᠲᠤ ᠣᠷᠣᠰᠢᠬᠤ ᠪᠣᠯᠲᠤᠭᠠᠢ᠃ ᠢᠯᠠᠭᠤᠭᠰᠠᠨ ᠬᠤᠲᠤᠭᠲᠤ ᠢᠯᠡᠭᠡᠪᠡ᠃》
ᠭᠠᠯᠳᠠᠨ ᠤ᠋ ᠴᠢᠷᠠᠢ ᠳ᠋ᠤ᠌ ᠵᠠᠨᠤᠯᠬᠢᠯᠡᠯ ᠨᠡᠪᠲᠡ ᠬᠡᠷᠡᠯᠳᠦᠵᠦ ᠵᠠᠬᠢᠳᠠᠯ ᠤ᠋ᠨ ᠮᠠᠯᠠᠭᠠᠢ ᠶ᠋ᠢ ᠲᠣᠭᠲᠠᠭᠠᠨ ᠤᠩᠰᠢᠵᠤ《ᠭᠠᠯᠳᠠᠨ ᠱᠠᠰᠢᠨ ᠢ᠋ ᠳᠡᠯᠭᠡᠷᠡᠭᠦᠯᠦᠭᠴᠢ ᠪᠣᠱᠣᠭᠲᠤ ᠬᠠᠭᠠᠨ ᠲᠠᠨᠠ 》ᠭᠡᠵᠡᠢ᠃ ᠬᠤᠪᠢᠯᠭᠠᠨ ᠭᠠᠯᠳᠠᠨ ᠳ᠋ᠤ᠌ ᠣᠯᠭᠣᠭᠰᠠᠨ ᠲᠥᠪᠡᠳ ᠦᠰᠦᠭ ᠦ᠋ᠨ ᠲᠠᠮᠠᠭᠠ ᠶ᠋ᠢᠨ ᠦᠭᠡ ᠦᠰᠦᠭ᠂ ᠤᠳᠬᠠ ᠠᠭᠤᠯᠭᠠ ᠢᠯᠠᠭᠤᠭᠰᠠᠨ ᠬᠤᠲᠤᠭᠲᠤ ᠶ᠋ᠢᠨ ᠵᠠᠬᠢᠶᠠ ᠶ᠋ᠢᠨ ᠮᠠᠯᠠᠭᠠᠢ ᠮᠥᠨ ᠤᠴᠢᠷ ᠢᠲᠡᠭᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠢᠯᠡ᠃ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ᠋ ᠤᠷᠠᠬᠠ ᠤᠯᠠᠮ ᠬᠤᠮᠢᠭᠳᠠᠨ ᠤᠯᠠᠮ ᠢ᠋ᠶ᠋ᠠᠷ ᠲᠥᠯᠥᠭᠡᠨ ᠦ᠌ ᠡᠲᠡᠭᠡᠳ ᠢ᠋ᠶ᠋ᠡᠨ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠲᠠᠯᠠ ᠨᠤᠲᠤᠭ᠂ ᠥᠨᠳᠥᠷᠯᠢᠭ ᠠᠭᠤᠯᠠᠰ ᠤ᠋ᠨ ᠣᠷᠣᠨ ᠳ᠋ᠤ᠌ ᠰᠢᠪᠡᠭᠡᠯᠡᠭᠦᠯᠦᠨ ᠰᠠᠭᠤᠯᠭᠠᠵᠠᠢ᠃
ᠲᠣᠰᠣ ᠦᠲᠦᠭᠰᠡᠨ ᠨᠢ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠢᠯᠡᠴᠢᠯᠡᠭᠰᠡᠨ ᠭᠡᠰᠡᠨ ᠦᠭᠡ᠃ ᠬᠡᠨ ᠨᠢᠭᠡᠨ ᠢ᠋ ᠥᠩᠭᠡ ᠮᠥᠩᠭᠥ ᠪᠡᠷ ᠬᠤᠳᠠᠯᠳᠤᠭᠠᠳ ᠠᠪᠴᠢᠬᠠᠵᠠᠢ᠃ ᠮᠠᠨᠵᠤ ᠨᠤᠭᠤᠳ ᠳᠣᠲᠣᠷᠠ ᠠ᠋ᠴᠠ ᠨᠢ ᠬᠠᠭᠠᠯᠵᠤ᠂ ᠳᠤᠮᠳᠠ ᠨᠢ ᠬᠣᠣᠷ ᠠᠰᠬᠠᠬᠤ ᠳ᠋ᠠᠭᠠᠨ ᠭᠠᠷᠭᠠᠭᠤᠨ᠃ ᠡᠪᠦᠷ ᠲᠡᠭᠡᠨ ᠬᠣᠣᠷ ᠣᠷᠣᠭᠤᠯᠤᠭᠤᠵᠠᠢ ᠭᠡᠰᠡᠨ ᠨᠢ ᠤᠷᠪᠠᠭᠴᠢ ᠶ᠋ᠢ ᠬᠡᠯᠡᠪᠡ ᠤᠤ? ᠡᠰᠡᠬᠦᠯᠡ ᠡᠮᠡᠰ ᠢ᠋ ᠬᠡᠯᠡᠪᠡ ᠤᠤ? ᠠᠯᠢ ᠠᠯᠢ ᠨᠢ ᠬᠣᠣᠷ ᠮᠥᠨ᠃
ᠲᠥᠪᠡᠳ ᠦ᠋ᠨ ᠪᠠᠢᠳᠠᠯ ᠮᠠᠭᠤᠳᠠᠭᠰᠠᠨ ᠨᠢ ᠬᠠᠭᠠᠨ ᠮᠢᠨᠦ ᠨᠢᠭᠡ ᠭᠢᠰᠬᠢᠭᠦᠷ ᠬᠤᠭᠤᠷᠠᠬᠤ ᠳ᠋ᠤ᠌ ᠬᠦᠷᠭᠡᠪᠡ᠃ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠰᠤᠳᠤᠷ ᠨᠣᠮ ᠢ᠋ ᠪᠢᠰᠢᠯᠭᠠᠵᠤ᠂ ᠲᠥᠪᠡᠳ ᠦ᠋ᠨ ᠳᠠᠮ ᠲᠤᠰᠠ ᠶ᠋ᠢ ᠬᠦᠷᠲᠡᠭᠡ ᠦᠭᠡᠢ ᠰᠠᠨ ᠪᠣᠯ ᠭᠠᠯᠳᠠᠨ ᠪᠢ ᠲᠥᠪ ᠠᠽᠢᠶᠠ ᠳ᠋ᠤ᠌ ᠨᠥᠯᠥᠭᠡ ᠪᠦᠬᠦᠢ ᠤᠯᠤᠰ ᠭᠦᠷᠦᠨ ᠢ᠋ ᠲᠥᠪᠬᠢᠨᠡᠭᠦᠯᠵᠦ ᠶᠠᠭᠠᠬᠢᠨ ᠴᠢᠳᠠᠬᠤ ᠪᠢᠯᠡ᠃ ᠮᠠᠨᠵᠤ ᠨᠤᠭᠤᠳ ᠳᠣᠣᠭᠤᠷ ᠮᠢᠨᠢ ᠨᠦᠬᠡ ᠤᠬᠤᠵᠤ᠂ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠲᠤ᠌ ᠴᠣᠯᠠ ᠭᠤᠩᠰᠢᠨ ᠬᠠᠢᠷᠠᠯᠠᠵᠤ ᠮᠣᠩᠭᠣᠯᠴᠤᠳ ᠤ᠋ᠨ ᠬᠣᠭᠣᠷᠣᠨᠳᠣ ᠲᠦᠢᠮᠡᠷ ᠲᠠᠯᠪᠢᠵᠤ ᠤᠳᠠᠭᠠᠨ ᠵᠢᠯ ᠪᠣᠯᠪᠠ᠃ ᠬᠠᠯᠬᠠ ᠨᠢ ᠣᠢᠷᠠᠳ ᠢ᠋ᠶ᠋ᠠᠨ ᠭᠢᠯᠦᠢᠵᠦ᠂ ᠣᠢᠷᠠᠳ ᠨᠢ ᠬᠠᠯᠬᠠ ᠪᠠᠨ ᠵᠥᠭᠡᠵᠦ ᠶᠠᠭᠠᠬᠢᠨᠠᠮ᠃
ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠢ᠋ ᠠᠩᠬᠠᠨ ᠳ᠋ᠠᠭᠠᠨ ᠳᠥᠷᠪᠡ ᠬᠤᠪᠢᠶᠠᠵᠤ᠂ ᠳᠠᠷᠠᠭᠠ ᠨᠢ ᠬᠡᠷᠴᠢᠮ ᠬᠡᠷᠴᠢᠮ ᠢ᠋ᠶ᠋ᠡᠷ ᠵᠢᠵᠢᠭᠯᠡᠵᠦ ᠠᠯᠳᠠᠭᠰᠠᠭᠠᠷ ᠡᠴᠦᠰ ᠲᠦ᠋ᠨᠢ ᠮᠠᠨᠵᠤ ᠴᠢᠩ ᠤᠯᠤᠰ ᠥᠪᠥᠷᠯᠡᠭᠴᠢ ᠮᠣᠩᠭᠣᠯ ᠢ᠋ ᠡᠮᠬᠦᠪᠡ᠃ ᠮᠠᠨᠵᠤ ᠨᠤᠭᠤᠳ ᠬᠠᠯᠬᠠ ᠮᠣᠩᠭᠣᠯ ᠢ᠋ ᠡᠪᠦᠷᠲᠦᠯᠡᠪᠡ᠃ ᠣᠳᠣ ᠵᠡᠭᠦᠨᠭᠠᠷ ᠤ᠋ᠨ ᠣᠢᠷᠠᠳ ᠮᠣᠩᠭᠣᠯᠴᠤᠳ ᠢ᠋ ᠥᠯᠥᠨ ᠨᠢᠳᠦ ᠪᠡᠷ ᠬᠠᠷᠠᠵᠤ ᠪᠠᠢᠨᠠ᠃ ᠢᠯᠠᠭᠤᠭᠰᠠᠨ ᠭᠡᠭᠡᠨ ᠮᠠᠨᠵᠤ ᠤᠷᠤᠭᠤ ᠴᠥᠮᠥᠷᠡᠬᠦ ᠡᠴᠡ ᠡᠮᠦᠨᠡ ᠠᠮᠵᠢᠵᠤ ᠬᠡᠯᠡ ᠳᠣᠭᠣᠯᠭᠠᠪᠠ᠃
ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠲᠥᠪᠡᠳ᠂ ᠥᠷᠭᠡᠨ ᠲᠠᠯᠠ ᠨᠤᠲᠤᠭ ᠤ᠋ᠨ ᠨᠡᠭᠦᠳᠡᠯᠴᠢᠳ᠂ ᠣᠷᠣᠰ ᠲᠠᠲ᠋ᠠᠷ ᠤ᠋ᠳ ᠬᠦᠷᠲᠡᠯᠡ ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤ᠌ ᠠᠵᠢᠨᠠ᠃ ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤ᠌ ᠬᠦᠯᠢᠶᠡᠨᠡ᠃ ᠢᠷᠡᠭᠡ ᠦᠭᠡᠢ ᠴᠠᠭ ᠬᠤᠭᠤᠴᠠᠭᠠ ᠬᠦᠯᠢᠶᠡᠯᠲᠡ ᠪᠤᠰᠤ ᠤᠤ? ᠳᠥᠷᠥᠭᠡ ᠦᠭᠡᠢ ᠡᠮᠡᠰ ᠬᠡᠪᠡᠯᠢ ᠪᠡᠨ ᠴᠢᠩᠨᠠᠵᠤ ᠦᠷᠡ ᠪᠡᠨ ᠬᠦᠯᠢᠶᠡᠵᠦ᠂ ᠲᠥᠷᠥᠭᠰᠡᠨ ᠬᠣᠢᠨᠠ ᠨᠢ ᠥᠰᠬᠦ ᠶ᠋ᠢ ᠨᠢ ᠬᠦᠯᠢᠶᠡᠵᠦ᠂ ᠭᠡᠷᠯᠡᠬᠦ ᠶ᠋ᠢ ᠨᠢ ᠬᠦᠯᠢᠶᠡᠵᠦ᠂ ᠠᠴᠢ ᠵᠢᠴᠢ ᠪᠡᠨ ᠦᠵᠡᠬᠦ ᠶ᠋ᠢ ᠬᠦᠯᠢᠶᠡᠵᠦ᠂ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠥᠲᠡᠯᠬᠦ ᠶ᠋ᠢ ᠬᠦᠯᠢᠶᠡᠵᠦ ᠠᠮᠢᠳᠤᠷᠠᠳᠠᠭ ᠪᠢᠯᠡ᠃ ᠬᠣᠷᠸᠠ ᠶ᠋ᠢᠨ ᠵᠢᠮᠡ ᠳ᠋ᠦ᠍ ᠶᠡᠷᠦ ᠶᠠᠭᠠᠬᠢᠯᠲᠠᠢ ᠪᠣᠢ?
ᠠᠷᠪᠠᠨ ᠨᠢᠭᠡ
ᠭᠠᠯᠳᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠭᠤᠷᠪᠠᠨ ᠵᠠᠮ ᠢ᠋ᠶ᠋ᠠᠷ ᠴᠤᠪᠤᠷᠠᠨᠠ᠃ ᠴᠠᠭᠠᠨ ᠢᠷᠪᠢᠰ᠂ ᠴᠣᠬᠣᠷ ᠪᠠᠷᠰ ᠴᠠᠰᠤᠲᠤ ᠠᠯᠲᠠᠢ ᠳ᠋ᠠᠭᠠᠨ ᠦᠯᠡᠳᠡᠵᠦ᠂ ᠬᠣᠩᠭᠣᠷᠬᠠᠨ ᠦᠷᠡᠰ ᠡᠪᠦᠭᠡᠳ ᠡᠮᠡᠭᠡᠳ ᠭᠠᠯ ᠰᠠᠬᠢᠵᠤ ᠬᠣᠴᠣᠷᠪᠠ᠃ ᠵᠢᠤᠵᠠ ᠲᠡᠷᠭᠡ ᠬᠥᠳᠡᠯᠬᠦ ᠳ᠋ᠦ᠍ ᠠᠨᠤ ᠬᠠᠲᠤᠨ ᠵᠡᠷᠭᠡᠴᠡᠨ ᠢᠷᠡᠵᠦ ᠮᠣᠷᠢᠨ ᠠ᠋ᠴᠠ ᠪᠠᠨ ᠱᠠᠯᠠᠮᠠᠭ ᠪᠠᠭᠤᠭᠠᠳ ᠬᠠᠭᠠᠨ ᠲᠠᠢ ᠪᠥᠭᠡᠷᠡ ᠨᠡᠢᠯᠡᠭᠦᠯᠦᠨ ᠰᠠᠭᠤᠵᠤ ᠪᠤᠲᠠᠷᠭᠠᠨᠠ ᠪᠠᠭᠰᠠᠢᠭᠰᠠᠨ ᠲᠠᠯᠠ ᠳᠤᠮᠳᠠᠭᠤᠷ ᠣᠳᠤᠯᠠ᠃ ᠬᠥᠲᠥᠴᠢ ᠬᠠᠷᠠ ᠬᠦᠦ ᠶ᠋ᠢᠨ ᠲᠠᠰᠢᠭᠤᠷ ᠠᠭᠠᠷ ᠢᠰᠬᠡᠷᠦᠭᠦᠯᠦᠨ ᠭᠤᠶᠠᠳᠠᠬᠤ ᠳ᠋ᠤ᠌ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠᠨ ᠳ᠋ᠤ᠌ ᠠᠶᠤᠩᠭᠠ ᠶ᠋ᠢᠨ ᠭᠢᠯᠪᠠᠭᠠ ᠮᠥᠰᠥ ᠬᠠᠨᠵᠠᠷᠠᠬᠤ ᠯᠤᠭᠠ ᠲᠠᠰᠬᠢᠪᠡ᠃
— ᠬᠠᠲᠤᠨ ᠲᠠ ᠶᠠᠳᠠᠷᠠᠨᠠ ᠤᠤ?
— ᠪᠢ ᠦᠯᠦ ᠵᠦᠳᠡᠷᠡᠨᠡ᠃ ᠰᠡᠳᠬᠢᠯ ᠪᠢᠴᠢᠬᠠᠨ ᠬᠥᠨᠳᠡᠭᠦᠷ᠃ ᠨᠢᠭᠡᠨ ᠪᠡᠶᠡ ᠶ᠋ᠢᠨ ᠵᠣᠪᠠᠯᠠᠩ ᠥᠴᠦᠬᠡᠨ ᠪᠢᠯᠡ᠃ ᠭᠦᠷᠦᠨ ᠤᠯᠤᠰ ᠤ᠋ᠨ ᠡᠵᠡᠨ ᠬᠠᠭᠠᠨ ᠲᠠᠨ ᠳ᠋ᠤ᠌ ᠢᠯᠡᠭᠦᠦ ᠶᠡᠬᠡ ᠵᠣᠪᠠᠨᠢᠯ ᠣᠷᠣᠰᠢᠨᠠᠮ ᠪᠤᠰᠤ ᠤᠤ?
— ᠭᠠᠯᠳᠠᠨ ᠬᠠᠭᠠᠨ ᠬᠠᠭ ᠬᠥᠪᠳᠥ ᠳ᠋ᠦ᠍ ᠳᠠᠷᠤᠭᠳᠠᠭᠰᠠᠨ ᠬᠠᠳᠠ ᠪᠣᠯᠵᠠᠢ᠃ ᠨᠠᠳᠠ ᠳᠡᠭᠡᠷᠡ ᠡᠪᠡᠰᠦ ᠨᠣᠭᠣᠭᠠ ᠤᠷᠭᠤᠵᠤ ᠪᠠᠢᠨᠠ᠃ ᠮᠢᠨᠦ ᠠᠴᠢᠶᠠ ᠵᠠᠷᠢᠮ ᠳ᠋ᠠᠭᠠᠨ ᠬᠥᠩᠭᠡᠨ ᠴᠦ᠍ ᠶᠤᠮ ᠰᠢᠭ᠂ ᠵᠠᠷᠢᠮ ᠳ᠋ᠠᠭᠠᠨ ᠳᠠᠭᠠᠭᠠᠭᠳᠠᠰᠢ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠬᠠᠲᠤᠨ ᠲᠠ ᠨᠠᠮᠠᠶ᠋ᠢ ᠠᠮᠤᠷᠵᠢᠭᠤᠯᠵᠤ ᠠᠰᠠᠷᠠᠨᠠ᠃
— ᠬᠠᠭᠠᠨ ᠲᠠᠨ ᠢ᠋ ᠪᠤᠷᠬᠠᠨ ᠠᠮᠤᠷᠵᠢᠭᠤᠯᠳᠠᠭ ᠪᠤᠰᠤ ᠤᠤ? ᠮᠢᠨᠦ ᠠᠰᠠᠷᠠᠮᠵᠢ ᠥᠴᠦᠬᠡᠨ ᠪᠢᠯᠡ᠃
— ᠪᠤᠷᠬᠠᠨ ᠲᠠᠢ ᠪᠠᠨ ᠬᠣᠶᠠᠭᠤᠯᠠᠬᠠᠨ ᠦᠯᠡᠳᠡᠬᠦ ᠴᠠᠭ ᠲᠤ᠌ ᠪᠤᠷᠬᠠᠨ ᠠ᠋ᠴᠠ ᠭᠣᠶᠣᠯᠭᠠ ᠭᠤᠶᠤᠨᠠ᠃ ᠪᠤᠷᠬᠠᠨ ᠥᠭᠯᠢᠭᠡ ᠶ᠋ᠢᠨ ᠰᠠᠪᠠ ᠲᠠᠢ᠃ ᠨᠠᠳᠠᠳᠤ ᠪᠤᠷᠬᠠᠨ ᠶᠡᠬᠡ ᠶᠠᠭᠤᠮᠠ ᠥᠭᠭᠦᠭᠰᠡᠨ᠃ ᠪᠤᠷᠬᠠᠨ ᠨᠠᠳᠠ ᠠ᠋ᠴᠠ ᠶᠠᠭᠤ ᠴᠤ᠌ ᠭᠤᠶᠤᠬᠤ ᠦᠭᠡᠢ᠃ ᠥᠭᠭᠦᠭᠰᠡᠨ ᠢ᠋ᠶ᠋ᠡᠨ ᠡᠷᠭᠢᠭᠦᠯᠵᠦ ᠨᠡᠬᠡᠬᠦ ᠦᠭᠡᠢ᠃ ᠰᠠᠬᠢᠯ ᠰᠠᠨᠸᠠᠷ ᠢ᠋ᠶ᠋ᠠᠨ ᠡᠷᠭᠦᠬᠦ ᠳ᠋ᠡᠭᠡᠨ ᠪᠢ ᠪᠤᠷᠬᠠᠨ ᠳ᠋ᠤ᠌ ᠥᠷᠢ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠥᠴᠢᠭᠰᠡᠨ᠃ ᠪᠤᠷᠬᠠᠨ ᠲᠡᠭᠡᠬᠦ ᠳ᠋ᠦ᠍ ᠵᠥᠪᠰᠢᠶᠡᠷᠡᠭᠰᠡᠨ᠃ ᠪᠢ ᠬᠠᠲᠤᠨ ᠡᠬᠡ ᠳ᠋ᠡᠭᠡᠨ ᠥᠷᠢ ᠲᠡᠢ᠃
— ᠬᠠᠲᠤᠨ ᠡᠬᠡ ᠥᠩᠭᠡᠷᠡᠭᠰᠡᠨ ᠡᠪᠦᠯ ᠮᠡᠨᠳᠦ ᠠᠮᠤᠷ ᠣᠷᠣᠭᠰᠠᠨ ᠭᠡᠨᠡ ᠯᠠᠢ᠃ ᠮᠢᠭᠮᠠᠨᠰᠠᠩᠵᠠᠢ ᠬᠠᠲᠤᠨ ᠡᠬᠡ ᠶ᠋ᠢ ᠥᠬᠢᠨ ᠦᠷᠡ ᠡᠴᠡ ᠳᠤᠲᠠᠭᠤ ᠦᠭᠡᠢ ᠠᠰᠠᠷᠠᠵᠤ ᠲᠡᠳᠬᠦᠳᠡᠭ ᠪᠤᠰᠤ ᠤᠤ?
— ᠬᠥᠭᠡᠷᠦᠬᠦᠢ ᠪᠦᠰᠡᠭᠦᠢ ᠥᠨᠥᠴᠢᠨ ᠪᠣᠲᠣᠭᠣ ᠮᠡᠲᠦ᠁ ᠲᠡᠷᠡ ᠬᠣᠶᠠᠷ ᠬᠣᠶᠠᠭᠤᠯᠠ ᠪᠠᠨ ᠭᠠᠭᠴᠠ ᠪᠤᠰᠤ ᠤᠤ?
— ᠮᠢᠭᠮᠠᠨᠰᠠᠩᠵᠠᠢ ᠦᠷᠡ ᠲᠡᠢ ᠬᠥᠮᠦᠨ᠃ ᠦᠷᠡ ᠳ᠋ᠡᠭᠡᠨ ᠬᠠᠷᠠᠮ ᠶᠤᠮ ᠪᠢᠯᠡ᠃ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠡᠪᠦᠭᠡ ᠡᠴᠢᠭᠡ ᠶ᠋ᠢᠨ ᠠᠳᠠᠯᠢ ᠳᠠᠢᠴᠢᠨ ᠡᠷᠡ ᠪᠣᠯᠵᠠᠢ᠃ ᠬᠠᠭᠠᠨ ᠲᠠᠨ ᠤ᠋ ᠬᠠᠷᠠᠭᠠᠨ ᠳ᠋ᠤ᠌ ᠪᠠᠭᠲᠠᠵᠤ ᠶᠠᠪᠤᠭᠠ ᠪᠤᠰᠤ ᠤᠤ?
— ᠬᠠᠲᠤᠨᠲᠠᠨ ᠮᠢᠨᠦ ᠪᠣᠳᠣᠯ ᠢ᠋ ᠳᠠᠭᠠᠪᠠ᠃ ᠰᠠᠶᠢᠬᠠᠨ ᠳᠡᠮᠪᠡᠷᠢᠯ ᠦ᠋ᠨ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠶᠤᠮ᠃ ᠬᠠᠭᠠᠨ ᠤ᠋ ᠬᠥᠪᠡᠭᠦᠨ ᠠᠲᠠᠯᠠ ᠬᠠᠷᠠᠴᠤ ᠪᠠᠷᠯᠤᠭ ᠤ᠋ᠨ ᠠᠳᠠᠯᠢ ᠨᠠᠰᠤ ᠶ᠋ᠢ ᠡᠯᠡᠭᠡᠬᠦ ᠡᠮᠭᠡᠨᠢᠯᠲᠦ ᠲᠠᠪᠢᠯᠠᠩ ᠳ᠋ᠤ᠌ ᠲᠡᠷᠡ ᠬᠥᠪᠡᠭᠦᠨ ᠲᠥᠷᠥᠵᠡᠢ᠃ ᠬᠥᠮᠦᠨ ᠦ᠌ ᠲᠥᠭᠡᠷᠭᠡ ᠲᠠᠪᠢᠯᠠᠩ ᠢ᠋ ᠪᠤᠷᠬᠠᠨ ᠴᠠᠭᠠᠨᠠ ᠠ᠋ᠴᠠ ᠨᠢ ᠵᠢᠷᠤᠳᠠᠭ᠃ ᠪᠤᠷᠬᠠᠨ ᠤ᠋ ᠵᠢᠷᠤᠭ ᠢ᠋ ᠬᠠᠭᠠᠨ ᠪᠢ ᠥᠭᠡᠷᠡᠴᠢᠯᠡᠵᠦ ᠦᠯᠦ ᠴᠢᠳᠠᠨᠠ᠃
— ᠬᠠᠶᠠ ᠠᠬᠠᠳᠠᠷᠠ ᠳᠡᠭᠦᠦ ᠪᠡᠨ ᠪᠣᠳᠣᠨᠠ᠃
— ᠠᠬᠠᠳᠠᠷᠠ ᠰᠣᠩᠭᠣᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠪᠤᠭᠰᠠᠨ᠃ ᠵᠡᠭᠦᠳᠦ ᠵᠡᠷᠭᠡᠯᠭᠡ ᠮᠡᠲᠦ ᠠᠮᠢᠳᠤᠷᠠᠯ ᠳᠤᠮᠳᠠ ᠣᠴᠢᠭᠰᠠᠨ᠃ ᠠᠬᠠᠳᠠᠷᠠ ᠭᠦᠩᠵᠦ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠲᠥᠭᠡᠷᠢᠭᠳᠡᠯ ᠢ᠋ᠶ᠋ᠡᠷ ᠬᠠᠭᠠᠨ ᠤ᠋ ᠬᠣᠲᠠ ᠬᠦᠷᠢᠶᠡ ᠶ᠋ᠢ ᠣᠷᠬᠢᠭᠰᠠᠨ᠁ ᠪᠤᠷᠬᠠᠨ ᠲᠡᠭᠦᠨ ᠢ᠋ ᠥᠷᠥᠰᠢᠶᠡᠨᠡ᠃
— ᠵᠣᠣᠪᠠ ᠲᠠᠢᠭᠠᠨ ᠢ᠋ ᠠᠬᠠᠳᠠᠷᠠ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠬᠡᠨ ᠶᠠᠪᠤᠭᠤᠯᠤᠭᠰᠠᠨ ᠪᠣᠢ? ᠨᠠᠳᠠᠳᠤ ᠣᠳᠣ ᠬᠢᠷᠢ ᠨᠢ ᠣᠨᠢᠰᠣᠭᠠ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠲᠡᠷᠡ ᠲᠠᠢᠭᠠᠨ ᠴᠥᠯᠡᠯᠭᠡ ᠡᠴᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠷᠡᠭᠰᠡᠨ᠃ ᠵᠣᠣᠪᠠ ᠢᠷᠡᠬᠦ ᠳ᠋ᠡᠭᠡᠨ ᠠᠯᠲᠠ ᠲᠠᠢ ᠤᠭᠤᠲᠠ ᠡᠭᠦᠷᠵᠦ ᠢᠷᠡᠭᠰᠡᠨ᠃
ᠠᠯᠲᠠ ᠪᠠᠨ ᠬᠠᠭᠠᠨ ᠤ᠋ ᠰᠠᠩ ᠳ᠋ᠤ᠌ ᠬᠣᠷᠢᠶᠠᠯᠭᠠᠵᠤ ᠮᠠᠯ ᠠᠬᠤᠢ ᠠᠪᠤᠭᠰᠠᠨ ᠭᠢᠷᠢᠨᠡ ᠲᠣᠭᠲᠠᠵᠤ ᠴᠢᠳᠠᠯ ᠦᠭᠡᠢ ᠠᠬᠠᠳᠠᠷᠠ ᠶ᠋ᠢ ᠣᠯᠵᠤ ᠢᠷᠡᠬᠦ ᠪᠡᠷ ᠪᠡᠳᠡᠷᠢᠭᠰᠡᠨ ᠪᠤᠰᠤ ᠤᠤ?
— ᠬᠠᠭᠠᠨ ᠲᠠ ᠵᠥᠷᠢᠭᠦᠦ ᠪᠣᠳᠣᠵᠤ ᠪᠠᠢᠨᠠ᠃ ᠵᠣᠣᠪᠠ ᠪᠢᠳᠡᠨ ᠢ᠋ ᠬᠠᠭᠤᠷᠴᠤ ᠰᠢᠨᠤᠯ ᠳ᠋ᠠᠭᠠᠨ ᠬᠥᠲᠥᠯᠦᠭᠳᠡᠭᠰᠡᠨ᠃ ᠠᠯᠲᠠ ᠦᠵᠡᠭᠰᠡᠨ ᠬᠥᠮᠦᠨ ᠦ᠌ ᠨᠣᠢᠷ ᠬᠦᠷᠳᠡᠭ ᠦᠭᠡᠢ ᠶᠤᠮ ᠭᠡᠨᠡ ᠯᠠᠢ᠃ ᠵᠣᠣᠪᠠ ᠶ᠋ᠢᠨ ᠠᠮᠢ ᠶ᠋ᠢ ᠡᠯᠡᠰᠦᠨ ᠴᠦᠩᠬᠦᠯ ᠳ᠋ᠦ᠍ ᠪᠣᠢ ᠠᠯᠲᠠ ᠳᠠᠭᠤᠳᠠᠵᠠᠢ᠃ ᠵᠣᠣᠪᠠ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ᠃
— ᠬᠠᠭᠠᠨ ᠲᠠ ᠲᠡᠢᠨ ᠡᠴᠡ ᠡᠷᠭᠢᠵᠦ ᠣᠴᠢᠭᠠᠳ ᠨᠠᠳᠠᠳᠤ ᠲᠤᠰᠬᠠᠢ ᠥᠷᠭᠥᠭᠡ ᠪᠠᠷᠢᠵᠤ ᠥᠭᠭᠦᠭᠡᠷᠡᠢ!
— ᠠᠨᠤ ᠬᠠᠲᠤᠨ ᠪᠢᠲᠡᠭᠡᠢ ᠵᠣᠪᠠ᠃ ᠶᠡᠬᠡ ᠬᠠᠲᠤᠨ ᠲᠠᠨ ᠤ᠋ ᠡᠷᠬᠡ ᠶᠠᠩᠪᠠ ᠬᠡᠪ ᠢ᠋ᠶ᠋ᠡᠷ ᠪᠠᠢᠬᠤ ᠪᠣᠯᠤᠨᠠ᠃ ᠮᠢᠨᠦ ᠭᠤᠴᠢᠨ ᠮᠢᠩᠭᠠᠨ ᠴᠡᠷᠢᠭ ᠦ᠋ᠨ ᠬᠡᠳᠦ ᠨᠢ ᠪᠤᠴᠠᠬᠤ ᠪᠣᠯ᠁ ᠣᠢᠷᠠᠳ ᠲᠤ᠌ ᠬᠡᠴᠢᠨᠡᠭᠡᠨ ᠡᠮᠡᠰ ᠪᠡᠯᠪᠡᠰᠦᠷᠡᠬᠦ ᠪᠣᠯ᠁ ᠬᠠᠭᠠᠨ ᠮᠢᠨᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢᠭᠦᠯ ᠦ᠋ᠨ ᠬᠠᠷᠠ ᠡᠭᠦᠯᠡ ᠬᠤᠷᠠᠯᠳᠤᠨᠠ᠃
— ᠶᠡᠬᠡ ᠡᠭᠦᠯᠡ ᠶ᠋ᠢ ᠠᠶᠤᠩᠭᠠ ᠵᠠᠳᠠᠯᠳᠠᠭ ᠰᠢᠦ ᠳᠡ᠃ ᠬᠠᠭᠠᠨᠲᠠᠨ ᠮᠢᠨᠢ! ᠠᠶᠤᠩᠭᠠ ᠶ᠋ᠢᠨ ᠭᠢᠯᠪᠠᠭᠠ ᠬᠠᠷᠠᠭᠳᠠᠵᠤ ᠪᠠᠢᠨᠠ᠃
ᠭᠠᠯᠳᠠᠨ ᠬᠠᠭᠠᠨ ᠤ᠋ ᠰᠡᠳᠬᠢᠯ ᠨᠢᠭᠡᠨᠲᠡ ᠳᠣᠯᠭᠢᠯᠠᠵᠤ᠂ ᠨᠢᠭᠡᠨᠲᠡ ᠡᠷᠴᠢᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠨᠡᠭᠦᠳᠡᠯ ᠳᠤᠮᠳᠠ ᠠᠷᠴᠠ ᠪᠠᠭᠠᠲᠤᠷ ᠤ᠋ᠨ ᠡᠬᠡᠨᠡᠷ ᠰᠡᠷᠢᠭᠦᠯ ᠲᠥᠷᠥᠯᠡ᠃ ᠰᠡᠷᠢᠭᠦᠯ ᠪᠦᠰᠡᠭᠦᠢ ᠶ᠋ᠢ ᠬᠥᠪᠡᠭᠦᠨ ᠦ᠌ ᠬᠠᠮᠲᠤ ᠪᠤᠮᠪᠠᠲᠤ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠬᠠᠶᠠᠭᠠᠨ ᠳ᠋ᠤ᠌ ᠨᠢᠭᠡᠨ ᠡᠪᠦᠭᠡᠨ ᠦ᠌ ᠳ᠋ᠦ᠍ ᠦᠯᠡᠳᠡᠭᠡᠪᠡ᠃ ᠠᠷᠴᠠ ᠪᠠᠭᠠᠲᠤᠷ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠮᠣᠷᠢᠨ ᠳᠡᠭᠡᠷᠡ ᠲᠡᠪᠡᠷᠢᠵᠦ ᠢᠷᠡᠭᠡᠳ ᠭᠠᠯᠳᠠᠨ ᠬᠠᠭᠠᠨ ᠢ᠋ᠶ᠋ᠠᠷ ᠠᠳᠢᠰᠯᠠᠭᠤᠯᠤᠭᠰᠠᠨ ᠪᠢᠯᠡ᠃
ᠠᠷᠪᠠᠨ ᠬᠣᠶᠠᠷ
ᠬᠠᠭᠠᠨ ᠪᠢ ᠪᠡᠷ ᠠᠬᠠᠳᠠᠷᠠ ᠭᠦᠩᠵᠦ ᠲᠡᠢ ᠠᠮᠠᠷᠠᠭᠯᠠᠭᠰᠠᠨ ᠪᠦᠯᠢᠶᠡᠨ ᠰᠥᠨᠢ ᠶ᠋ᠢ ᠵᠡᠭᠦᠳᠦᠯᠡᠵᠦ᠂ ᠳᠣᠷᠣᠨᠠ ᠶ᠋ᠢᠨ ᠰᠠᠷᠠᠨ ᠤ᠋ ᠴᠠᠭᠠᠨ ᠲᠤᠶᠠᠭᠠᠲᠤ ᠦᠦᠷ ᠢ᠋ ᠤᠭᠲᠤᠪᠠ᠃ ᠠᠬᠠᠳᠠᠷᠠ ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠪᠡᠶᠡ ᠪᠡᠷ ᠲᠣᠷᠭᠠᠮᠰᠤᠭ ᠬᠥᠨᠵᠢᠯᠡ ᠳ᠋ᠦ᠍ ᠰᠢᠷᠭᠤᠨ ᠣᠷᠣᠬᠤ ᠳ᠋ᠤ᠌ ᠲᠡᠭᠦᠨ ᠢ᠋ ᠲᠡᠪᠡᠷᠢᠵᠦ ᠳᠤᠯᠠᠭᠠᠴᠠᠭᠤᠯᠪᠠ᠃ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠷ ᠭᠦᠩᠵᠦ ᠶ᠋ᠢᠨ ᠬᠥᠬᠥᠨ ᠲᠣᠪᠴᠢ ᠶ᠋ᠢ ᠲᠥᠭᠡᠨᠡᠨ ᠢᠯᠪᠢᠬᠦ ᠳ᠋ᠦ᠍ ᠠᠬᠠᠳᠠᠷᠠ ᠶᠡᠬᠡᠳᠡ ᠴᠣᠴᠢᠷᠳᠠᠨ ᠵᠥᠭᠡᠯᠡᠨ ᠬᠡᠪᠡᠯᠢ ᠪᠡᠨ ᠰᠢᠬᠠᠵᠤ ᠨᠠᠭᠠᠯᠳᠤᠭᠤᠯᠪᠠ᠃ ᠠᠬᠠᠳᠠᠷᠠ ᠶ᠋ᠢᠨ ᠪᠡᠶᠡ ᠪᠦᠬᠦᠯᠢ ᠳ᠋ᠡᠭᠡᠨ ᠬᠠᠭᠤᠷᠠᠢ ᠪᠠᠢᠪᠠ᠃ ᠬᠠᠭᠤᠷᠠᠢ ᠬᠠᠯᠠᠭᠤᠨ ᠪᠡᠶᠡ ᠶ᠋ᠢᠨ ᠢᠯᠴᠢ ᠲᠥᠭᠡᠨᠡᠨᠡ᠃ ᠰᠢᠲᠠᠵᠤ ᠪᠠᠢᠭᠠ ᠭᠠᠯ ᠰᠢᠭ᠋ ᠬᠠᠯᠠᠭᠤᠨ ᠪᠡᠶᠡ ᠡᠴᠡ ᠲᠥᠭᠡᠨᠡᠬᠦ ᠰᠢᠷᠠ ᠲᠤᠶᠠᠭᠠ᠂ ᠬᠥᠬᠥ ᠶ᠋ᠢᠨ ᠪᠢᠴᠠᠷᠠᠭᠠ ᠦᠭᠡᠢ ᠲᠣᠪᠴᠢ᠂ ᠵᠠᠳᠠᠷᠠᠭᠠ ᠦᠭᠡᠢ ᠠᠮᠢᠰᠬᠤᠯ᠂ ᠵᠠᠩᠭᠢᠯᠠᠭᠠ ᠨᠢ ᠲᠡᠨᠢᠢᠭᠡ ᠦᠭᠡᠢ ᠪᠤᠯᠴᠢᠩ ᠮᠡᠲᠦᠰ ᠨᠢ ᠨᠠᠳᠠᠳᠤ ᠲᠠᠭᠠᠯᠠᠮᠵᠢᠲᠠᠢ ᠪᠠᠢᠯᠠ᠃
ᠠᠬᠠᠳᠠᠷᠠ ᠶ᠋ᠢᠨ ᠬᠥᠬᠥ ᠶ᠋ᠢᠨ ᠲᠣᠪᠴᠢ ᠠᠭᠠᠵᠢᠮ ᠢ᠋ᠶ᠋ᠠᠷ ᠴᠢᠬᠢᠭᠳᠡᠵᠦ ᠬᠠᠯᠠᠭᠤᠨ ᠳ᠋ᠠᠭᠠᠨ ᠰᠢᠲᠠᠭᠰᠠᠨ ᠪᠡᠶᠡ ᠨᠢ ᠵᠥᠭᠡᠯᠡᠨ ᠪᠤᠯᠴᠢᠩ ᠢ᠋ᠶ᠋ᠠᠨ ᠰᠤᠯᠠᠯᠠᠵᠤ ᠦᠢᠯᠡ ᠶ᠋ᠢᠨ ᠦᠷᠡ ᠶ᠋ᠢ ᠠᠮᠲᠠᠯᠠᠬᠤ ᠳ᠋ᠤ᠌ ᠪᠡᠯᠡᠨ ᠪᠣᠯᠬᠤ ᠳ᠋ᠤ᠌ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠤᠷᠤᠰᠬᠠᠯ ᠣᠷᠣ ᠬᠥᠨᠵᠢᠯᠡ ᠶ᠋ᠢᠨ ᠳᠣᠣᠭᠤᠷ ᠬᠥᠪᠦᠯᠵᠡᠵᠦ ᠴᠢᠬᠢᠨᠡ ᠨᠢᠭᠡᠨ ᠭᠡᠮ ᠦ᠋ᠨ ᠠᠮᠢᠰᠬᠤᠭᠠ ᠰᠣᠨᠣᠰᠤᠭᠳᠠᠪᠠ᠃ ᠤᠷᠤᠰᠬᠠᠯ ᠤᠰᠤᠨ ᠤ᠋ ᠠᠶᠠᠯᠭᠤ ᠶᠠᠮᠠᠷᠬᠠᠨ ᠠᠶᠠᠳᠠᠭᠤ ᠪᠣᠢ? ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠪᠠᠷ ᠪᠤᠳᠠᠩ ᠰᠠᠭᠤᠵᠤ᠂ ᠴᠢᠭᠢᠭ ᠦ᠋ᠨ ᠰᠢᠮᠡ ᠰᠢᠭᠦᠳᠡᠷᠢᠯᠡᠵᠦ ᠪᠥᠩᠵᠢᠬᠢ ᠨᠠᠪᠴᠢ ᠴᠡᠴᠡᠭᠡᠨᠠ ᠲᠣᠭᠲᠠᠬᠤ ᠳ᠋ᠤ᠌ ᠤᠷᠭᠤᠮᠠᠯ ᠤ᠋ᠨ ᠦᠨᠳᠦᠰᠦ ᠳᠣᠷᠣᠭᠰᠢ ᠪᠠᠨ ᠤᠷᠭᠤᠵᠤ ᠪᠠᠢᠯᠠ᠃
ᠠᠬᠠᠳᠠᠷᠠ《ᠦ᠂᠂᠂᠂ ᠦ᠂᠂᠂᠂ ᠦ!》 ᠭᠡᠳ ᠬᠥᠯᠥᠷᠡᠭᠰᠡᠨ ᠪᠡᠶᠡ ᠪᠡᠨ ᠴᠢᠨᠠᠳᠤ ᠨᠢ ᠣᠷᠬᠢᠵᠤ᠂ ᠭᠠᠷ ᠢ᠋ᠶ᠋ᠠᠨ ᠠᠯᠳᠠᠯᠠᠨ ᠠᠭᠤᠵᠢᠮ ᠲᠡᠨᠢᠭᠦᠨ ᠠᠮᠢᠰᠬᠤᠯᠯᠠᠵᠤ ᠪᠣᠷᠣᠭᠠᠨ ᠤ᠋ ᠳᠠᠷᠠᠭᠠ ᠳᠡᠪᠲᠦᠵᠦ ᠨᠣᠵᠣᠭᠣᠷᠠᠭᠰᠠᠨ ᠭᠠᠵᠠᠷ ᠰᠢᠭ᠋ ᠲᠠᠢᠪᠤᠰᠢᠷᠠᠯᠠ᠃
ᠠᠭᠠᠵᠢᠮ ᠢ᠋ᠶ᠋ᠠᠷ ᠲᠠᠢᠪᠤᠰᠢᠷᠠᠭᠰᠠᠭᠠᠷ ᠠᠬᠠᠳᠠᠷᠠ ᠭᠦᠩᠵᠦ᠂
— ᠬᠠᠭᠠᠨ ᠲᠠ ᠨᠠᠮᠠᠶ᠋ᠢ ᠲᠠᠮᠤ ᠶ᠋ᠢᠨ ᠢᠷᠣᠭᠠᠯ ᠳ᠋ᠤ᠌ ᠤᠨᠠᠭᠠᠯᠠ ᠭᠡᠮᠡᠨ ᠰᠢᠨᠠᠯᠤᠭᠰᠠᠨ ᠪᠤᠰᠤ ᠵᠢᠷᠭᠠᠵᠤ ᠬᠠᠨᠤᠭᠰᠠᠨ ᠪᠦᠰᠡᠭᠦᠢ ᠶ᠋ᠢᠨ ᠰᠥᠭᠡᠩᠭᠢ ᠲᠤᠨᠢᠷᠠᠬᠤ ᠳᠠᠭᠤ ᠪᠠᠷ ᠥᠭᠦᠯᠡᠪᠡ᠃
— ᠭᠦᠩᠵᠦ ᠲᠠᠨ ᠢ᠋ ᠪᠢ ᠬᠡᠦᠬᠡᠨ ᠪᠣᠯᠭᠠᠯᠠ ᠭᠡᠵᠦ ᠬᠠᠭᠠᠨ ᠢ᠋ ᠥᠭᠦᠯᠡᠪᠡᠯ᠂
—ᠲᠠᠮᠤ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠵᠢᠪᠴᠢᠬᠡᠯᠡ ᠭᠡᠮᠡᠨ ᠠᠬᠠᠳᠠᠷᠠ ᠰᠡᠭᠦᠷᠡᠰᠦ ᠠᠯᠳᠠᠵᠤ ᠢᠨᠢᠶᠡᠮᠰᠦᠭᠯᠡᠪᠡ᠃
ᠴᠠᠭ ᠬᠤᠭᠤᠴᠠᠭᠠ ᠥᠩᠭᠡᠷᠡᠬᠦ ᠳᠣᠳᠣᠮ ᠠᠬᠠᠳᠠᠷᠠ ᠬᠠᠭᠠᠨ ᠳ᠋ᠤ᠌ ᠲᠡᠰᠴᠦ ᠪᠠᠢᠯᠠ᠃ ᠪᠠᠭᠠ ᠬᠠᠲᠤᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠪᠠᠷ ᠬᠠᠭᠠᠨ ᠰᠠᠭᠠᠳᠠᠨ ᠮᠣᠷᠢᠯᠠᠵᠤ ᠴᠠᠰᠤ ᠪᠣᠷᠣᠭᠠᠨ ᠤ᠋ ᠪᠤᠳᠠᠩ ᠲᠠᠲᠠᠬᠤ ᠳ᠋ᠤ᠌ ᠪᠠᠶᠠᠨ ᠢ᠋ᠶ᠋ᠠᠨ ᠦᠭᠡᠢᠯᠡᠨ ᠰᠠᠨᠠᠭᠠᠯᠵᠠᠵᠤ᠂ ᠮᠥᠷᠡᠨ ᠭᠣᠣᠯ ᠰᠥᠩ ᠲᠥᠷᠥᠬᠦ ᠳ᠋ᠦ᠍ ᠦᠶᠡᠷᠯᠡᠨ ᠣᠢᠷᠠᠳᠴᠤ ᠠᠮᠠᠷᠠᠭ ᠤ᠋ᠨ ᠴᠡᠩᠭᠡᠯ ᠮᠠᠩᠰᠢᠭᠤᠷᠠᠯ ᠳ᠋ᠤ᠌ ᠠᠪᠲᠠᠵᠤ᠂ ᠠᠶᠠᠨ ᠲᠡᠢᠨ ᠡᠴᠡ ᠢᠷᠡᠬᠦ ᠴᠠᠭ ᠮᠥᠴᠡ ᠶ᠋ᠢ ᠲᠡᠳᠡ ᠲᠡᠰᠴᠦ ᠶᠠᠳᠠᠨ ᠬᠦᠯᠢᠶᠡᠨᠡ᠃
ᠠᠬᠠᠳᠠᠷᠠ ᠶ᠋ᠢᠨ ᠬᠡᠪᠡᠯᠢ ᠶ᠋ᠢᠨ ᠬᠠᠯᠠᠭᠤᠨ ᠰᠢᠲᠠᠴᠢᠬᠠᠭᠰᠠᠨ ᠪᠠᠢᠨᠠ᠃ ᠬᠠᠭᠠᠨ ᠨᠠᠳᠠ ᠲᠠᠢ ᠡᠭᠦᠯᠡ ᠮᠡᠲᠦ ᠬᠥᠪᠰᠥᠯᠵᠡᠨ᠂ ᠤᠰᠤ ᠮᠡᠲᠦ ᠬᠠᠷᠭᠢᠶᠠᠯᠠᠨ᠂ ᠪᠣᠷᠣᠭᠠ ᠮᠡᠲᠦ ᠵᠦᠰᠡᠷᠡᠵᠦ ᠬᠣᠨᠣᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠠᠬᠠᠳᠠᠷᠠ ᠬᠠᠲᠤᠨ ᠬᠤᠷᠤᠭᠤᠨ ᠤ᠋ ᠪᠠᠨ ᠥᠨᠳᠡᠭᠡ ᠡᠴᠡ ᠡᠬᠢᠯᠡᠵᠦ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠯᠠᠭᠤᠨ ᠢ᠋ ᠬᠡᠪᠡᠯᠢ ᠳ᠋ᠡᠭᠡᠨ ᠰᠢᠩᠭᠡᠭᠡᠵᠦ᠂ ᠴᠠᠰᠤᠨ ᠤ᠋ ᠳᠣᠣᠷᠠ ᠬᠠᠪᠤᠷ ᠢ᠋ ᠬᠦᠯᠢᠶᠡᠬᠦ ᠴᠡᠴᠡᠭ ᠮᠡᠲᠦ ᠨᠠᠮ ᠬᠦᠮᠬᠡᠨ ᠪᠣᠯᠤᠨᠠ᠃
ᠬᠠᠯᠠᠭᠤᠨ ᠠᠮᠠᠷᠠᠭ ᠤ᠋ᠨ ᠶᠠᠪᠤᠳᠠᠯ ᠭᠡᠨᠡᠳᠲᠡ ᠨᠢᠭᠡᠨ ᠡᠳᠦᠷ ᠲᠠᠰᠤᠷᠠᠪᠠ᠃ ᠠᠬᠠᠳᠠᠷᠠ ᠬᠠᠲᠤᠨ ᠡᠳᠦᠷ ᠡᠳᠦᠷ ᠢ᠋ᠶ᠋ᠡᠷ ᠬᠦᠢᠲᠡᠷᠡᠭᠰᠡᠭᠡᠷ᠂ ᠬᠠᠭᠠᠨ ᠤ᠋ ᠦᠷᠡ ᠬᠡᠦᠬᠡᠳ ᠥᠰᠴᠦ ᠲᠣᠮᠣᠷᠠᠬᠤ ᠶ᠋ᠢ ᠬᠠᠷᠠᠵᠤ ᠲᠡᠰᠬᠦ ᠪᠡᠨ ᠪᠣᠯᠢᠵᠠᠢ᠃ ᠠᠬᠠᠳᠠᠷᠠ ᠳ᠋ᠤ᠌ ᠬᠠᠭᠠᠨ ᠤ᠋ ᠦᠷᠡ ᠵᠠᠶᠠᠭᠠᠭᠰᠠᠨ ᠦᠭᠡᠢ ᠶᠠᠪᠤᠳᠠᠯ ᠠ᠋ᠴᠠ ᠪᠠᠨ ᠪᠦᠷᠢᠮᠦᠰᠦᠨ ᠲᠠᠲᠠᠭᠠᠯᠵᠠᠨ᠂ ᠳᠡᠯᠪᠢ ᠪᠡᠨ ᠬᠤᠮᠢᠵᠤ ᠭᠥᠷᠥᠰᠢ ᠦᠭᠡᠢ ᠬᠣᠯᠠ ᠮᠡᠲᠦ ᠣᠷᠣᠰᠢᠬᠤ ᠰᠦᠮᠡ ᠬᠡᠢᠳ ᠦ᠋ᠨ ᠲᠠᠷᠴᠢᠯᠠᠭᠠᠩᠳᠤ ᠬᠣᠩᠭᠢᠯ ᠢ᠋ ᠵᠣᠷᠢᠨ ᠣᠳᠤᠬᠰᠡ ᠶᠤᠮ᠃
ᠠᠷᠪᠠᠨ ᠭᠤᠷᠪᠠ
ᠮᠠᠨᠵᠤ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠠᠮᠠ ᠠ᠋ᠴᠠ ᠨᠢ ᠭᠠᠯ ᠲᠤᠷᠭᠢᠭᠰᠠᠨ᠂ ᠴᠠᠭᠠᠨ ᠳᠡᠯᠲᠦ ᠯᠤᠤ ᠪᠦᠬᠦᠢ ᠤᠯᠠᠭᠠᠨ ᠲᠤᠭ ᠢ᠋ᠶ᠋ᠠᠨ ᠡᠷᠭᠦᠭᠰᠡᠭᠡᠷ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠵᠣᠭᠰᠣᠨᠠ᠃
ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠵᠡᠭᠦᠨᠭᠠᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠳᠣᠭᠰᠢᠨ ᠬᠠᠷᠠ ᠰᠦᠯᠳᠡ ᠪᠡᠨ ᠨᠠᠮᠢᠷᠠᠭᠤᠯᠤᠨ ᠪᠣᠰᠤᠭᠠ ᠣᠷᠣᠯᠠᠩ ᠮᠡᠲᠦ ᠰᠡᠬᠦᠢᠨᠡ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠡᠷᠢᠭᠡ ᠪᠡᠨ ᠠᠪᠴᠤ ᠱᠣᠳᠠᠵᠤ ᠦᠵᠡᠭᠡᠳ ᠪᠤᠴᠠᠭᠠᠵᠤ ᠣᠷᠢᠶᠠᠬᠤ ᠵᠠᠭᠤᠷᠠ᠂
— ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠯ ᠢ᠋ ᠳᠠᠭᠤᠳᠠ! ᠭᠡᠪᠡ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠥᠭᠦᠯᠡᠷᠦᠨ᠂
《ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠪᠢᠴᠢᠭ᠃ ᠮᠣᠩᠭᠣᠯ ᠤ᠋ᠨ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠬᠤᠪᠢᠯᠭᠠᠨ ᠪᠠᠭᠰᠢ᠂ ᠠᠩᠬᠠᠳᠤᠭᠠᠷ ᠪᠣᠭᠳᠠ ᠵᠢᠪᠽᠤᠨᠳᠠᠮᠪᠠ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ᠂ ᠬᠠᠯᠬᠠ ᠶ᠋ᠢᠨ ᠲᠦᠰᠢᠶᠡᠲᠦ ᠬᠠᠭᠠᠨ ᠬᠣᠩ ᠲᠠᠢᠵᠢ ᠴᠠᠬᠤᠨᠳᠣᠷᠵᠢ ᠨᠠᠷ ᠢ᠋ ᠨᠠᠳᠠᠳᠤ ᠲᠤᠰᠢᠶᠠᠪᠠᠯ ᠪᠢ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠬᠤᠷᠢᠶᠠᠵᠤ ᠳᠠᠷᠤᠢᠬᠠᠨ ᠪᠤᠴᠠᠬᠤ ᠪᠣᠯᠤᠨᠠ᠃ ᠡᠰᠡ ᠲᠤᠰᠢᠶᠠᠬᠤ ᠠᠪᠠᠰᠤ ᠬᠦᠴᠦ ᠬᠡᠷᠡᠭᠯᠡᠨ ᠪᠠᠢᠯᠳᠤᠵᠤ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠪᠠᠢᠭᠤᠯᠤᠭᠰᠠᠨ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠭᠠᠵᠠᠷ ᠨᠤᠲᠤᠭ ᠲᠤ᠌ ᠠᠮᠢᠳᠤᠷᠠᠭᠴᠢ ᠬᠠᠭᠠᠨ ᠲᠠᠨ ᠢ᠋ ᠤᠯᠤᠰ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠠᠮᠲᠤ ᠬᠤᠷᠢᠶᠠᠨᠠ᠃ ᠬᠠᠭᠠᠨ ᠲᠠ ᠳᠠᠷᠤᠢ ᠰᠣᠶᠣᠷᠬᠠᠨ ᠪᠣᠯᠭᠣᠭᠠᠨᠠ ᠤᠤ?》 ᠭᠡᠵᠦ ᠪᠢᠴᠢᠭᠦᠯᠪᠡ᠃
ᠪᠦᠷᠭᠦᠳ ᠳᠡᠪᠢᠭᠰᠡᠨ ᠬᠥᠬᠡ ᠲᠤᠭ ᠪᠠᠷᠢᠭᠰᠠᠨ ᠡᠯᠴᠢ ᠶ᠋ᠢ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠤᠷᠤᠭᠤ ᠢᠯᠡᠭᠡᠪᠡ᠃
ᠣᠳᠤᠯᠲᠠ ᠳ᠋ᠤ᠌ ᠵᠡᠬᠡᠭᠰᠡᠨ ᠮᠣᠩᠭᠣᠯ᠂ ᠮᠠᠨᠵᠤ ᠴᠡᠷᠢᠭ ᠦ᠋ᠳ ᠬᠥᠪᠡᠭᠡᠨ ᠦ᠌ ᠣᠷᠣᠢ ᠳᠡᠭᠡᠷᠡ ᠡᠴᠡ ᠪᠡᠶᠡᠰ ᠢ᠋ ᠬᠠᠷᠠᠵᠠᠭᠠᠨᠠ᠃ ᠡᠯᠴᠢ ᠪᠢᠴᠢᠭ ᠢ᠋ ᠵᠠᠳᠠᠯᠵᠤ ᠭᠠᠯᠳᠠᠨ ᠬᠠᠭᠠᠨ ᠳ᠋ᠤ᠌ ᠡᠷᠭᠦᠨ ᠪᠠᠷᠢᠬᠤ ᠳ᠋ᠤ᠌ ᠳᠡᠷᠭᠡᠳᠡ ᠪᠡᠨ ᠵᠣᠭᠰᠣᠬᠤ ᠳᠠᠨᠵᠢᠯᠠ ᠵᠠᠩᠵᠤᠨ ᠲᠠᠢᠰᠢ ᠪᠠᠨ ᠳᠣᠬᠢᠪᠠ᠃ ᠳᠠᠨᠵᠢᠯᠠ ᠤᠩᠰᠢᠨᠠ᠃
《ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ᠋ ᠪᠢᠴᠢᠭ᠃ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠮᠢᠨᠦ ᠠᠰᠠᠷᠠᠮᠵᠢ ᠳ᠋ᠤ᠌ ᠪᠠᠭᠲᠠᠭᠰᠠᠨ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ᠂ ᠲᠡᠭᠦᠨ ᠦ᠌ ᠳᠡᠭᠦᠦ ᠬᠣᠩ ᠲᠠᠢᠵᠢ ᠴᠠᠬᠤᠨᠳᠣᠷᠵᠢ ᠨᠠᠷ ᠢ᠋ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠲᠠ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢᠷᠡᠵᠦ ᠬᠦᠯᠢᠶᠡᠨ ᠠᠪᠤᠭᠲᠤᠨ᠃ ᠡᠷᠬᠢᠮ ᠳᠡᠭᠡᠳᠦᠰ ᠦ᠋ᠨ ᠠᠮᠢ ᠪᠡᠶᠡ ᠨᠢ ᠦᠨᠡᠲᠦ ᠡᠷᠳᠡᠨᠢ ᠲᠤᠯᠠ ᠬᠦᠷᠭᠡᠵᠦ ᠥᠭᠬᠦ ᠡᠴᠡ ᠲᠦᠳᠡᠭᠡᠯᠵᠡᠨᠡ》 ᠭᠡᠰᠡᠨ ᠪᠠᠢᠪᠠ᠃ ᠪᠣᠱᠣᠭᠲᠤ ᠬᠠᠭᠠᠨ᠂
— ᠨᠠᠮᠠᠶ᠋ᠢ ᠯᠤᠤ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠲᠣᠯᠣᠭᠠᠢ ᠪᠠᠨ ᠲᠥᠷᠥᠨᠡ ᠭᠡᠵᠦ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠰᠡᠷᠡᠭᠦᠨ ᠵᠡᠭᠦᠳᠦᠯᠡᠵᠡᠢ᠃ ᠥᠨᠳᠥᠷ ᠭᠡᠭᠡᠨ᠂ ᠴᠠᠬᠤᠨᠳᠣᠷᠵᠢ ᠬᠣᠶᠠᠷ ᠢ᠋ ᠶᠠᠭᠠᠬᠢᠵᠤ ᠠᠪᠤᠷᠠᠬᠤ ᠪᠢᠯᠡ ᠭᠡᠮᠡᠨ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠪᠠᠷᠢᠭᠰᠠᠨ ᠬᠡᠭᠡᠷᠡ ᠶ᠋ᠢᠨ ᠠᠰᠠᠷ ᠴᠤᠭᠯᠠᠷᠠᠭᠰᠠᠨ ᠰᠠᠢᠳ ᠵᠠᠩᠵᠤᠳ ᠠ᠋ᠴᠠ ᠪᠠᠨ ᠠᠰᠠᠭᠤᠯᠠ᠃
ᠳᠣᠷᠣᠨᠠᠲᠤ ᠶ᠋ᠢᠨ ᠠᠭᠤᠳᠠᠮ ᠲᠠᠯᠠ ᠳᠤᠨᠢᠶᠠᠷᠲᠤᠵᠤ᠂ ᠤᠯᠠᠭᠠᠨᠴᠠᠪ ᠤ᠋ᠨ ᠠᠭᠤᠯᠠᠰ ᠵᠡᠷᠭᠡᠯᠭᠡᠨ ᠳ᠋ᠦ᠍ ᠥᠨᠳᠡᠯᠵᠡᠨ ᠪᠠᠢᠬᠤ ᠳ᠋ᠤ᠌ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠮᠤᠭᠠᠢᠪᠴᠢᠯᠠᠨ ᠶᠠᠪᠤᠭᠰᠠᠭᠠᠷ ᠥᠨᠳᠥᠷ ᠥᠨᠳᠥᠷ ᠬᠢᠷᠠ ᠳᠡᠭᠡᠭᠦᠷ ᠴᠤᠬᠤᠯᠵᠠᠬᠤ ᠮᠠᠨᠵᠤ ᠴᠡᠷᠢᠭ ᠦ᠋ᠨ ᠬᠠᠷᠠᠭᠠᠨ ᠠ᠋ᠴᠠ ᠬᠣᠯᠠᠳᠪᠠ᠃ ᠭᠠᠯᠳᠠᠨ ᠢ᠋ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠣᠳᠪᠠ ᠭᠡᠮᠡᠨ ᠮᠠᠨᠵᠤ ᠨᠤᠭᠤᠳ ᠢᠲᠡᠭᠡᠵᠦ ᠬᠠᠭᠠᠨ ᠳ᠋ᠤ᠌ ᠡᠯᠴᠢ ᠵᠠᠷᠤᠪᠠ᠃ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠬᠡᠳᠦᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠭᠠᠯᠳᠠᠨ ᠠ᠋ᠴᠠ ᠬᠠᠷᠢᠭᠤ ᠬᠦᠯᠢᠶᠡᠪᠡ᠃ ᠣᠢᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠳ ᠭᠠᠵᠠᠷ ᠤ᠋ᠨ ᠭᠠᠪᠠ ᠤᠷᠤᠭᠤ ᠣᠷᠣᠭᠰᠠᠨ ᠮᠡᠲᠦ ᠪᠣᠯᠵᠠᠢ᠃
ᠭᠠᠯᠳᠠᠨ ᠬᠠᠭᠠᠨ ᠬᠣᠶᠠᠷ ᠵᠢᠯ ᠰᠢᠬᠠᠮ ᠨᠡᠭᠦᠳᠡᠯᠯᠡᠨ ᠶᠠᠪᠤᠭᠰᠠᠭᠠᠷ ᠵᠣᠷᠢᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠢᠷᠡᠭᠡᠳ ᠲᠡᠨᠳᠡ ᠡᠴᠡ ᠪᠡᠨ ᠤᠬᠤᠷᠢᠨ《ᠮᠠᠨᠵᠤ ᠶ᠋ᠢᠨ ᠬᠦᠴᠦ ᠵᠤᠵᠠᠭᠠᠷᠠᠭᠰᠠᠨ ᠲᠤᠯᠠ ᠲᠥᠭᠡᠷᠢᠭᠳᠡᠭᠦᠯᠬᠦ ᠠᠷᠭᠠ ᠬᠡᠷᠡᠭᠯᠡᠶᠡ᠃ ᠴᠡᠷᠢᠭ ᠢ᠋ᠶ᠋ᠡᠨ ᠠᠷᠤ ᠬᠠᠯᠬᠠ ᠤᠷᠤᠭᠤ ᠢᠯᠡᠭᠡᠪᠡᠯ ᠠᠷᠤ ᠬᠤᠳᠠᠷᠭᠠ ᠪᠠᠷ ᠳᠠᠭᠠᠷᠢᠨ ᠪᠠᠢᠯᠳᠤᠵᠤ ᠪᠤᠲᠠ ᠴᠣᠬᠢᠬᠤ ᠨᠢ ᠨᠠᠳᠠᠳᠤ ᠠᠰᠢᠭᠲᠠᠢ᠃ ᠮᠠᠨᠵᠤ ᠶ᠋ᠢᠨ ᠬᠦᠴᠦ ᠶ᠋ᠢ ᠳᠠᠷᠤᠮᠳᠠᠭᠤᠯᠬᠤ ᠬᠡᠷᠡᠭᠲᠡᠢ》ᠭᠡᠵᠦ ᠲᠥᠯᠥᠪᠯᠡᠵᠡᠢ᠃ ᠡᠨᠡ ᠬᠣᠭᠣᠷᠣᠨᠳᠣ ᠮᠠᠨᠵᠤ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠭᠤᠷᠪᠠ ᠬᠤᠪᠢᠶᠠᠭᠳᠠᠵᠠᠢ᠃
ᠠᠷᠪᠠᠨ ᠳᠥᠷᠪᠡ
ᠭᠠᠯᠳᠠᠨ ᠢ᠋ ᠲᠤᠯᠭᠠᠬᠤ ᠪᠢᠴᠢᠭ ᠦ᠋ᠨ ᠬᠠᠷᠢᠭᠤ ᠶ᠋ᠢ ᠪᠠᠲᠤᠯᠠᠭᠠ ᠲᠠᠢ ᠠᠪᠤᠨᠠ ᠭᠡᠳᠡᠭ ᠲᠦ᠍ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠪᠣᠳᠣᠯ ᠵᠠᠷᠤᠵᠤ ᠪᠠᠢᠯᠠ᠃ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠭᠠᠯᠳᠠᠨ ᠲᠠᠢ ᠮᠠᠢᠮᠠᠢ ᠬᠢᠬᠦ᠂ ᠡᠰᠡᠬᠦᠯᠡ ᠬᠡᠳᠦᠨ ᠲᠦᠮᠡᠨ ᠴᠡᠷᠢᠭ ᠦ᠋ᠨ ᠢᠯᠡᠭᠦᠦ ᠬᠦᠴᠦ ᠪᠡᠷ ᠣᠢᠷᠠᠳ ᠴᠡᠷᠢᠭ ᠢ᠋ ᠪᠤᠲᠠ ᠴᠣᠬᠢᠬᠤ ᠡᠷᠡᠮᠡᠯᠵᠡᠯ ᠲᠡᠢ ᠠᠵᠢ᠃ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠴᠠᠬᠤᠨᠳᠣᠷᠵᠢ ᠶ᠋ᠢᠨ ᠴᠡᠷᠢᠭ ᠢ᠋ᠶ᠋ᠡᠷ ᠬᠦᠴᠦ ᠰᠡᠯᠪᠢᠵᠡᠢ᠃
ᠭᠡᠨᠡᠳᠲᠡ ᠣᠢᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠳ ᠭᠠᠷᠴᠤ ᠢᠷᠡᠭᠰᠡᠨ ᠲᠤᠯᠠ ᠮᠠᠨᠵᠤ ᠨᠤᠭᠤᠳ ᠤ᠋ᠨ ᠡᠭᠳᠡᠭᠦᠦ ᠬᠥᠳᠡᠯᠵᠦ《ᠲᠤᠯᠤᠯᠳᠤᠬᠤ ᠠ᠋ᠴᠠ ᠠᠶᠤᠵᠤ ᠤᠬᠤᠷᠢᠯᠠ》 ᠭᠡᠮᠡᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠢᠲᠡᠭᠡᠪᠡ᠃ ᠵᠠᠩᠵᠤᠨ ᠬᠠᠭᠠᠨ ᠳ᠋ᠠᠭᠠᠨ ᠳᠠᠮᠵᠢᠭᠤᠯᠪᠠ᠃
ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠭᠠᠯᠳᠠᠨ ᠬᠠᠭᠠᠨ ᠲᠠᠢ ᠪᠣᠢᠳᠠ ᠬᠡᠭᠡᠷᠡ ᠭᠠᠵᠠᠷ ᠲᠣᠪᠯᠠᠵᠤ ᠶᠠᠷᠢᠯᠴᠠᠬᠤ ᠶ᠋ᠢ ᠬᠦᠰᠡᠵᠡᠢ᠃ ᠲᠡᠷᠡ ᠲᠡᠮᠳᠡᠭᠲᠦ ᠭᠠᠵᠠᠷ ᠴᠡᠷᠢᠭ ᠦ᠋ᠨ ᠰᠢᠷᠠ ᠠᠰᠠᠷ ᠪᠤᠰᠬᠠᠵᠠᠢ᠃ ᠰᠢᠷᠠ ᠠᠰᠠᠷ ᠬᠣᠯᠠ ᠶ᠋ᠢᠨ ᠬᠣᠯᠠ ᠠ᠋ᠴᠠ ᠪᠠᠷᠠ ᠲᠠᠢ ᠪᠥᠯᠥᠭᠡ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠰᠢᠷᠠ ᠠᠰᠠᠷ ᠢ᠋ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠠᠯᠤᠰ ᠠ᠋ᠴᠠ ᠬᠠᠷᠠᠬᠤ ᠪᠠᠷᠠ ᠶ᠋ᠢᠨ ᠭᠠᠵᠠᠷ ᠪᠣᠰᠬᠠᠭᠰᠠᠨ ᠶᠤᠮ᠃
ᠡᠨᠡ ᠪᠣᠯ ᠬᠣᠶᠠᠷ ᠶᠡᠬᠡ ᠬᠠᠭᠠᠨ ᠤ᠋ ᠣᠷᠣᠨ ᠵᠠᠢ᠂ ᠴᠠᠭ ᠬᠤᠭᠤᠴᠠᠭᠠ ᠶ᠋ᠢ ᠪᠤᠯᠢᠶᠠᠴᠠᠯᠳᠤᠭᠰᠠᠨ ᠠᠭᠤᠯᠵᠠᠯᠲᠠ ᠶᠤᠮ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠣᠯᠠ ᠭᠠᠵᠠᠷ ᠠ᠋ᠴᠠ ᠢᠷᠡᠵᠡᠢ᠃ ᠡᠩᠬᠡ ᠠᠮᠤᠭᠤᠯᠠᠩ ᠨᠤᠲᠤᠭ ᠣᠢᠷᠠ ᠪᠣᠯᠪᠠᠴᠤ ᠬᠡᠭᠡᠷᠡ ᠶ᠋ᠢᠨ ᠠᠰᠠᠷ ᠲᠤ᠌ ᠬᠣᠨᠣᠨ ᠥᠨᠵᠢᠨ᠂ ᠨᠠᠷᠠ ᠰᠠᠯᠬᠢᠨ ᠤ᠋ ᠰᠠᠭᠠᠲᠠᠯ ᠳ᠋ᠤ᠌ ᠠᠯᠵᠢᠶᠠᠭᠰᠠᠨ ᠪᠠᠢᠪᠠ᠃
ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠶᠠᠩᠪᠠ ᠶᠡᠬᠡ ᠲᠤᠯᠠ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠢᠯᠠᠯᠲᠠ ᠳ᠋ᠤ᠌ ᠣᠨᠴᠠᠭᠠᠢ ᠠᠩᠬᠠᠷᠴᠤ ᠬᠡᠯᠡ ᠮᠡᠳᠡᠭᠡᠴᠢ ᠶ᠋ᠢᠨ ᠢᠷᠡᠬᠦ ᠴᠠᠭ ᠨᠠᠷᠠ ᠶ᠋ᠢ ᠬᠦᠯᠢᠶᠡᠵᠦ ᠶᠠᠳᠠᠷᠠᠳᠠᠭ ᠪᠠᠢᠪᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠵᠦᠭ ᠪᠤᠷᠤᠭᠤᠯᠠᠨ ᠣᠳᠬᠤ ᠭᠠᠵᠠᠷ ᠤ᠋ᠨ ᠬᠠᠵᠠᠭᠠᠢ᠂ ᠠᠭᠤᠯᠠ ᠶ᠋ᠢᠨ ᠨᠤᠷᠠᠩᠭᠢ ᠰᠣᠩᠭᠣᠬᠤ ᠳ᠋ᠠᠭᠠᠨ ᠭᠣᠢᠳᠠ ᠪᠥᠭᠡᠳ ᠯᠠᠮᠠ ᠳᠡᠪᠡᠯ ᠢ᠋ᠶ᠋ᠡᠨ ᠲᠣᠷᠭᠠᠨ ᠴᠡᠷᠢᠭ ᠦ᠋ᠨ ᠠᠴᠢᠶᠠ ᠪᠠᠷᠠᠭᠠᠨ ᠳ᠋ᠤ᠌ ᠠᠪᠴᠤ ᠶᠠᠪᠤᠨᠠ᠃ ᠪᠣᠱᠣᠭᠲᠤ ᠬᠠᠭᠠᠨ ᠢ᠋ ᠬᠤᠪᠢᠯᠭᠠᠨ ᠴᠢᠨᠠᠷ ᠲᠠᠢ ᠤᠴᠢᠷ ᠠ᠋ᠴᠠ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠮᠠᠨᠵᠤ ᠨᠤᠭᠤᠳ ᠤ᠋ᠨ ᠵᠠᠢᠷᠠᠩ ᠤ᠋ᠳ ᠢ᠋ ᠴᠤᠭᠯᠠᠭᠤᠯᠵᠤ ᠨᠢᠭᠡᠨ ᠪᠠᠭ ᠪᠣᠯᠭᠠᠭᠠᠳ《ᠭᠠᠯᠳᠠᠨ ᠤ᠋ ᠡᠷᠴᠢ ᠶ᠋ᠢ ᠰᠠᠭᠠᠷᠠᠭᠤᠯ》 ᠭᠡᠵᠦ ᠲᠤᠰᠢᠶᠠᠵᠠᠢ᠃
ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨ ᠭᠠᠯᠳᠠᠨ ᠲᠠᠢ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠷᠠᠵᠤ ᠶᠠᠷᠢᠯᠴᠠᠬᠤ ᠵᠠᠭᠤᠷᠠ ᠭᠡᠨᠡᠳᠲᠡ ᠳᠠᠭᠤᠨ ᠠᠯᠳᠠᠵᠤ《ᠲᠠ ᠬᠥᠮᠦᠨ ᠮᠥᠨ ᠤᠤ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠭᠠᠯᠳᠠᠨ ᠬᠠᠭᠠᠨ《ᠢᠷᠪᠢᠰ》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃ ᠨᠡᠭᠡᠷᠡᠨ ᠢᠷᠪᠢᠰ ᠰᠢᠭ ᠲᠡᠭᠦᠨ ᠳ᠋ᠦ᠍ ᠰᠠᠨᠠᠭᠳᠠᠵᠠᠢ᠃
ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠮᠠᠨᠵᠤ ᠶ᠋ᠢᠨ ᠡᠯᠴᠢ ᠴᠠᠳᠠᠳ ᠣᠢᠷᠠᠳ ᠤ᠋ᠨ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠪᠠᠷᠠᠭᠠᠯᠠᠵᠤ ᠲᠡᠭᠦᠨ ᠳ᠋ᠦ᠍ ᠭᠡᠢᠮᠡᠯ ᠬᠡᠮᠡᠬᠦ ᠶᠠᠭᠠᠨ ᠭᠦᠩᠵᠦ ᠶ᠋ᠢ ᠪᠡᠯᠡᠭᠯᠡᠵᠦ ᠪᠤᠴᠠᠭᠰᠠᠨ ᠪᠢᠯᠡ᠃ ᠴᠠᠳᠠᠳ ᠬᠠᠭᠠᠨ ᠳ᠋ᠠᠭᠠᠨ ᠣᠢᠷᠠᠳ ᠲᠤ᠌ ᠦᠵᠡᠭᠰᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡᠳ ᠨᠢᠭᠡ ᠦᠭᠡᠢ ᠥᠭᠦᠯᠡᠵᠡᠢ᠃ ᠠᠨᠤ ᠬᠠᠲᠤᠨ ᠲᠠᠩᠳᠠ ᠪᠠᠨ ᠴᠠᠭᠠᠨ ᠢᠷᠪᠢᠰ ᠲᠡᠢ ᠴᠣᠭ ᠶᠠᠪᠤᠨᠠ᠃ ᠴᠠᠭᠠᠨ ᠢᠷᠪᠢᠰ ᠭᠠᠯᠳᠠᠨ ᠬᠠᠭᠠᠨ ᠲᠠᠢ ᠳᠣᠲᠣᠨᠣ ᠶᠤᠮ᠃ ᠢᠷᠪᠢᠰ ᠦ᠋ᠨ ᠰᠢᠷᠠ ᠴᠠᠭᠠᠨ ᠬᠣᠣᠰᠯᠠᠭᠰᠠᠨ ᠨᠢᠳᠦᠨ ᠳ᠋ᠦ᠍ ᠬᠠᠷᠢ ᠶ᠋ᠢᠨ ᠬᠥᠮᠦᠰ ᠪᠠᠭᠲᠠᠭᠠᠳ ᠪᠠᠢᠬᠤ ᠶᠤᠮ᠃ ᠵᠠᠷᠢᠮ ᠳ᠋ᠠᠭᠠᠨ ᠭᠠᠯᠳᠠᠨ ᠬᠠᠭᠠᠨ ᠨᠠᠳᠠᠳᠤ ᠢᠷᠪᠢᠰ ᠪᠣᠯᠵᠤ ᠬᠠᠷᠠᠭᠳᠠᠨᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠴᠠᠭᠠᠨ ᠢᠷᠪᠢᠰ ᠲᠦ᠍ ᠬᠤᠪᠢᠯᠳᠠᠭ ᠪᠤᠰᠤ ᠤᠤ? ᠲᠡᠮᠡᠭᠡᠨ ᠳ᠋ᠦ᠍ ᠲᠡᠩᠨᠡᠵᠦ ᠠᠴᠢᠳᠠᠭ ᠭᠤᠨᠠᠨ ᠫᠤᠤ ᠲᠠᠢ ᠶᠤᠮ᠃ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤ᠌ ᠠᠭᠤᠯᠠ ᠶ᠋ᠢᠨ ᠴᠢᠯᠠᠭᠤ ᠨᠤᠷᠠᠵᠤ ᠪᠠᠢᠯᠠ᠃ ᠭᠠᠯᠳᠠᠨ ᠤ᠋ ᠴᠡᠷᠢᠭ ᠦ᠋ᠳ ᠳᠣᠲᠣᠷᠠ ᠴᠠᠭᠠᠨ ᠬᠠᠷᠠ ᠠᠷᠠᠰᠤᠲᠠᠨ ᠪᠠᠢᠬᠤ ᠠ᠋ᠴᠠ ᠭᠠᠳᠠᠨᠠ ᠴᠡᠷᠢᠭ ᠦ᠋ᠨ ᠯᠠᠮᠠ ᠨᠠᠷ ᠵᠥᠩᠳᠡᠭᠡᠨ᠃ ᠴᠡᠷᠢᠭ ᠦ᠋ᠨ ᠪᠡᠬᠢᠯᠡᠯᠲᠡ ᠳᠡᠭᠡᠷᠡ ᠪᠡᠨ ᠵᠠᠭᠠᠯᠮᠠᠢ᠂ ᠬᠦᠷᠳᠦ ᠪᠣᠰᠬᠠᠵᠠᠢ᠃ ᠱᠠᠰᠢᠨ ᠢ᠋ ᠳᠡᠭᠡᠳᠦᠯᠡᠳᠡᠭ ᠶᠤᠮ ᠪᠠᠢᠨᠠ᠃
ᠬᠥᠮᠦᠨ ᠰᠦᠭ ᠦ᠋ᠳ ᠬᠢᠵᠦ ᠵᠢᠳᠠᠯᠠᠵᠤ ᠴᠠᠪᠴᠢᠳᠠᠭ ᠴᠡᠷᠢᠭ ᠦ᠋ᠨ ᠬᠡᠭᠡᠷᠡ ᠶ᠋ᠢᠨ ᠲᠠᠯᠠᠪᠠᠢ ᠪᠠᠢᠨᠠ᠃ ᠲᠡᠷᠡ ᠢᠷᠪᠢᠰ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠢᠯᠢᠨᠴᠡ ᠠᠭᠤᠯᠤᠭᠰᠠᠨ ᠨᠢᠳᠦ ᠲᠡᠢ ᠶᠤᠮ ᠭᠡᠮᠡᠨ ᠴᠠᠳᠠᠳ ᠰᠠᠢᠳ ᠳᠠᠭᠤᠨ ᠠᠯᠳᠠᠵᠤ ᠪᠠᠢᠵᠠᠢ᠃
ᠠᠷᠪᠠᠨ ᠲᠠᠪᠤ
ᠵᠣᠭᠣᠭ ᠰᠢᠭᠦᠰᠦ ᠨᠠᠷ ᠬᠠᠩᠪᠤ᠂ ᠨᠠᠨᠳᠢᠨ ᠴᠢᠪᠠᠭᠠ᠂ ᠪᠤᠳᠠᠭᠠ᠂ ᠮᠠᠨᠲ᠋ᠸᠤ᠂ ᠸᠠᠭᠠᠷ ᠰᠠᠪᠠ ᠲᠠᠢ ᠤᠮᠳᠠᠭᠠ ᠦᠷᠦᠭᠰᠡᠨ ᠰᠢᠷᠡᠭᠡᠨ ᠣ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠵᠡᠭᠥᠨᠭᠠᠷ ᠤ᠋ᠨ ᠬᠠᠭᠠᠨ ᠭᠠᠯᠳᠠᠨ᠂ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠨᠠᠷ ᠳᠠᠭᠤᠳᠠᠯᠭᠠ ᠬᠤᠷᠠᠯᠳᠤᠭᠠᠨ ᠳ᠋ᠤ᠌ ᠰᠠᠭᠤᠪᠠ᠃
ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠲᠠᠷᠭᠤᠨ ᠴᠠᠳᠬᠤᠯᠠᠩ᠂ ᠵᠠᠯᠢᠲᠠᠢ ᠬᠥᠮᠦᠨ ᠪᠠᠢᠯᠠ᠃ ᠪᠣᠱᠣᠭᠲᠤ ᠬᠠᠭᠠᠨ᠂
— ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠤᠷᠪᠠᠭᠰᠠᠨ ᠤᠤ? ᠭᠡᠵᠦ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠠ᠋ᠴᠠ ᠲᠤᠯᠭᠠᠨ ᠠᠰᠠᠭᠤᠪᠠ᠃ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ᠂
— ᠳᠠᠭᠠᠷᠠ ᠣᠷᠣᠭᠰᠠᠨ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠭᠠᠯᠳᠠᠨ ᠬᠠᠭᠠᠨ᠂
— ᠲᠦᠮᠡᠨ ᠠᠭᠲᠠ ᠪᠠᠷ ᠥᠨᠳᠥᠷ ᠭᠡᠭᠡᠨ᠂ ᠴᠠᠬᠤᠨᠳᠣᠷᠵᠢ ᠬᠣᠩ ᠲᠠᠢᠵᠢ ᠬᠣᠶᠠᠷ ᠢ᠋ ᠰᠣᠯᠢᠵᠤ ᠠᠪᠤᠶᠠ ᠭᠡᠬᠦ ᠳ᠋ᠦ᠍ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠶᠠᠯᠢᠭᠦᠢ ᠮᠤᠰᠢᠢᠭᠠᠳ ᠬᠠᠷᠢᠭᠤ ᠬᠡᠯᠡᠪᠡ᠃
— ᠥᠨᠳᠥᠷ ᠭᠡᠭᠡᠨ᠂ ᠴᠠᠬᠤᠨᠳᠣᠷᠵᠢ ᠬᠣᠩ ᠲᠠᠢᠵᠢ ᠬᠣᠶᠠᠷ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠪᠢ ᠦᠨᠡᠯᠡᠨᠡ᠃ ᠬᠠᠷᠢᠨ ᠲᠠ ᠪᠣᠯ ᠴᠠᠪᠴᠢᠵᠤ ᠣᠷᠬᠢᠨᠠ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠪᠡ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠪᠣᠳᠣᠯ ᠪᠣᠯᠵᠤ᠂
— ᠪᠢ ᠯᠠᠮᠠ ᠬᠥᠮᠦᠨ᠃ ᠥᠨᠳᠥᠷ ᠭᠡᠭᠡᠨ ᠪᠣᠯ ᠮᠣᠩᠭᠣᠯ ᠤ᠋ᠨ ᠠᠩᠬᠠᠳᠤᠭᠠᠷ ᠪᠣᠭᠳᠠ᠃ ᠬᠣᠩ ᠲᠠᠢᠵᠢ ᠴᠠᠬᠤᠨᠳᠤᠷᠵᠢ ᠪᠣᠯ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠯᠲᠠᠨ ᠤᠷᠤᠭ ᠤ᠋ᠨ ᠡᠷᠬᠢᠮ ᠬᠥᠮᠦᠨ᠃ ᠡᠨᠡ ᠬᠣᠶᠠᠷ ᠡᠷᠬᠢᠮ ᠳᠡᠭᠡᠳᠦ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠳ᠋ᠤ᠌ ᠮᠡᠰᠡ ᠬᠦᠷᠭᠡᠪᠡᠯ ᠠᠯᠳᠠᠰ ᠪᠣᠯᠤᠨᠠ᠃ ᠲᠠ ᠰᠠᠢᠨ ᠪᠣᠯᠭᠣᠭᠠᠨᠠ ᠤᠤ? ᠭᠡᠯᠡ᠃
ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠷᠡᠳᠡᠭᠦᠦ ᠪᠠᠷᠳᠠᠮ ᠵᠠᠩ ᠢ᠋ᠶ᠋ᠠᠷ᠂
— ᠬᠠᠭᠠᠨ ᠲᠠ ᠨᠠᠳᠠ ᠲᠠᠢ ᠮᠠᠢᠮᠠᠢ ᠬᠢᠬᠦ ᠭᠡᠳ ᠪᠠᠢᠨᠠ ᠤᠤ? ᠠᠷᠠᠢ ᠥᠭᠡᠷᠡ ᠮᠠᠢᠮᠠᠢ ᠶᠠᠷᠢᠬᠤ ᠶᠤᠮ ᠪᠢᠰᠢᠦ ᠭᠡᠬᠦ ᠳ᠋ᠦ᠍᠂ ᠭᠠᠯᠳᠠᠨ ᠤ᠋ ᠲᠣᠯᠣᠭᠠᠢ ᠳ᠋ᠤ᠌ ᠬᠥᠪᠡᠭᠦᠨ ᠰᠡᠪᠳᠡᠨᠪᠠᠯᠵᠢᠷ ᠨᠢ ᠬᠠᠳᠠᠭᠠᠰᠤᠲᠠᠢ ᠪᠠᠢᠪᠠ᠃ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠦᠷᠦ ᠨᠢ ᠡᠪᠡᠳᠪᠡ᠃ ᠬᠥᠪᠡᠭᠦᠨ ᠢ᠋ ᠮᠠᠨᠵᠤ ᠨᠤᠭᠤᠳ ᠪᠠᠷᠢᠴᠠᠭᠠᠨ ᠳ᠋ᠤ᠌ ᠠᠪᠤᠭᠰᠠᠨ ᠪᠢᠯᠡ᠃ ᠰᠡᠪᠳᠡᠨᠪᠠᠯᠵᠢᠷ ᠢ᠋ ᠬᠣᠰᠢᠭᠤ ᠵᠠᠬᠢᠷᠤᠭᠤᠯᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠦᠨᠡᠨ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠮᠠᠲᠠᠯ ᠳ᠋ᠤ᠌ ᠪᠠᠢᠯᠠ᠃ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠬᠠᠨ ᠬᠦᠦ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠥᠨᠳᠥᠷ ᠦᠨᠡᠯᠡᠬᠦ ᠪᠣᠯᠤᠯᠲᠠᠢ ᠨᠢ ᠭᠠᠯᠳᠠᠨ ᠪᠣᠱᠣᠭᠲᠤ ᠳ᠋ᠤ᠌ ᠮᠡᠳᠡᠷᠡᠭᠳᠡᠪᠡ᠃ ᠭᠠᠯᠳᠠᠨ ᠬᠠᠭᠠᠨ ᠡᠨᠡ ᠬᠦ᠌ ᠬᠠᠮᠤᠭ ᠤ᠋ᠨ ᠡᠮᠵᠡᠭ ᠶᠠᠷᠢᠶᠠ ᠶ᠋ᠢ ᠬᠠᠲᠤᠨ ᠲᠠᠢ ᠪᠠᠨ ᠬᠦᠷᠲᠡᠯᠡ ᠬᠥᠨᠳᠡᠯ ᠦᠭᠡᠢ ᠲᠠᠩᠳᠠ ᠲᠣᠭᠣᠷᠢᠵᠤ ᠪᠠᠢᠵᠠᠢ᠃ ᠰᠡᠪᠳᠡᠨᠪᠠᠯᠵᠢᠷ ᠪᠣᠯ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠪᠤᠷᠬᠠᠨ ᠲᠠᠢ ᠲᠣᠢᠴᠡᠭᠰᠡᠨ ᠭᠠᠭᠴᠠ ᠪᠣᠯᠤᠮᠵᠢ ᠶᠤᠮ᠃
ᠪᠤᠷᠬᠠᠨ ᠤ᠋ ᠬᠤᠲᠤᠭᠲᠤ ᠭᠠᠯᠳᠠᠨ ᠬᠠᠨ ᠬᠦᠦ ᠪᠡᠨ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠢᠷᠲᠦ ᠮᠡᠰᠡ ᠪᠡᠨ ᠦᠵᠦᠭᠦᠷ ᠲᠦ᠍ ᠦᠯᠡᠳᠡᠭᠡᠬᠦ ᠦᠭᠡᠢ ᠨᠢ ᠯᠠᠪᠲᠠᠢ᠃ ᠭᠠᠯᠳᠠᠨ ᠶᠡᠬᠡ ᠬᠠᠲᠤᠨ ᠠ᠋ᠴᠠ ᠪᠠᠨ ᠭᠠᠭᠴᠠ ᠬᠥᠪᠡᠭᠦᠨ ᠲᠡᠢ᠃ ᠣᠢᠷᠠᠳ ᠤ᠋ᠨ ᠤᠷᠪᠠᠭᠴᠢᠳ ᠤ᠋ᠨ ᠪᠠᠯᠠᠭ ᠢ᠋ᠶ᠋ᠠᠷ ᠬᠠᠨ ᠬᠦᠦ ᠰᠡᠪᠳᠡᠨᠪᠠᠯᠵᠢᠷ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠠᠮᠠᠨ ᠳ᠋ᠤ᠌ ᠣᠷᠣᠵᠠᠢ᠃ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠠᠮᠠᠨ ᠳ᠋ᠠᠭᠠᠨ ᠡᠮᠬᠦᠭᠰᠡᠨ ᠰᠢᠷᠠ ᠲᠣᠰᠣ ᠶ᠋ᠢ ᠪᠤᠴᠠᠭᠠᠬᠤ ᠬᠥᠮᠦᠨ ᠪᠢᠰᠢ᠃ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠪᠣᠯᠤᠮᠵᠢ ᠶ᠋ᠢ ᠠᠰᠢᠭᠯᠠᠨ ᠭᠠᠯᠳᠠᠨ ᠢ᠋ ᠵᠠᠯᠭᠢᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠪᠠ᠃
ᠬᠠᠭᠠᠨ ᠭᠠᠯᠳᠠᠨ ᠳ᠋ᠤ᠌ ᠯᠠᠮᠠ ᠭᠠᠯᠳᠠᠨ ᠥᠭᠦᠯᠡᠷᠦᠨ《ᠲᠡᠦᠬᠡ ᠶ᠋ᠢᠨ ᠬᠦᠷᠳᠦ ᠶ᠋ᠢ ᠤᠬᠤᠷᠢᠭᠤᠯᠬᠤ ᠵᠠᠮ ᠦᠭᠡᠢ᠃ ᠬᠠᠭᠠᠨ ᠲᠠ ᠲᠡᠦᠬᠡ ᠶ᠋ᠢᠨ ᠬᠦᠷᠳᠦᠨ ᠳ᠋ᠦ᠍ ᠭᠡᠷᠦᠭᠡᠰᠦᠯᠡᠬᠳᠡᠪᠡ᠃ ᠪᠤᠷᠬᠠᠨ ᠲᠠᠨ ᠢ᠋ ᠬᠠᠷᠠᠵᠤ ᠪᠠᠢᠨᠠ᠃ ᠪᠤᠷᠤᠭᠤ ᠵᠥᠷᠢᠭᠦᠦ ᠶ᠋ᠢ ᠪᠤᠷᠬᠠᠨ ᠲᠤᠩᠭᠠᠬᠤ ᠦᠭᠡᠢ᠃ ᠲᠡᠦᠬᠡ ᠶ᠋ᠢᠨ ᠪᠤᠭᠤᠷᠤᠯ ᠬᠠᠭᠤᠳᠠᠰᠤ ᠭᠡᠷᠡᠴᠢᠯᠡᠨᠡ᠃ ᠡᠭᠡᠵᠢᠭᠲᠡᠢ ᠮᠥᠴᠡ ᠳ᠋ᠦ᠍ ᠪᠤᠷᠬᠠᠨ ᠠ᠋ᠴᠠ ᠪᠤᠰᠤ ᠬᠠᠭᠠᠨ ᠭᠠᠯᠳᠠᠨ ᠤ᠋ ᠰᠢᠢᠳᠪᠦᠷᠢ ᠶ᠋ᠢ ᠰᠣᠨᠣᠰᠤᠭᠲᠤᠨ》 ᠭᠡᠵᠡᠢ᠃ ᠬᠠᠭᠠᠨ ᠭᠠᠯᠳᠠᠨ ᠳ᠋ᠤ᠌ ᠭᠠᠰᠢᠭᠤᠨ ᠪᠠᠢᠯᠠ᠃
ᠠᠷᠪᠠᠨ ᠵᠢᠷᠭᠤᠭᠠ
ᠬᠡᠷᠪᠡ ᠲᠡᠢᠨ ᠳ᠋ᠦ᠍ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠢᠯᠠᠪᠠᠯ ᠣᠢᠷᠠᠳ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠰᠡᠪᠳᠡᠨᠪᠠᠯᠵᠢᠷ ᠤ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠪᠠᠢᠭᠤᠯᠵᠤ ᠮᠠᠨᠵᠤ ᠶ᠋ᠢᠨ ᠨᠤᠲᠤᠭ ᠨᠥᠭᠡᠯᠡᠭᠳᠡᠨᠡ᠃ ᠢᠯᠠᠭᠳᠠᠬᠤ ᠠᠪᠠᠰᠤ ᠰᠡᠪᠳᠡᠨᠪᠠᠯᠵᠢᠷ ᠮᠠᠨᠵᠤ ᠳᠤᠮᠳᠠ ᠱᠠᠯᠵᠠ ᠮᠡᠲᠦ ᠦᠯᠡᠳᠡᠨᠡ᠃ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠮᠠᠨᠵᠤ ᠶ᠋ᠢ ᠨᠦᠬᠡᠯᠡᠬᠦ ᠲᠣᠭᠠᠴᠠᠭᠠ ᠠᠩᠬᠠᠨ ᠠ᠋ᠴᠠ ᠪᠠᠨ ᠪᠦᠲᠦᠯ ᠦᠭᠡᠢᠳᠡᠵᠦ ᠡᠬᠢᠯᠡᠭᠰᠡᠨ ᠶᠤᠮ᠃ ᠡᠵᠡᠭᠦᠢ ᠬᠣᠴᠣᠷᠤᠭᠰᠠᠨ ᠬᠠᠯᠬᠠ ᠮᠣᠩᠭᠣᠯ ᠲᠦᠮᠡᠨ ᠢ᠋ ᠭᠠᠯᠳᠠᠨ ᠪᠣᠱᠣᠭᠲᠤ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠲᠤ᠌ ᠨᠢᠭᠡᠳᠬᠡᠵᠦ ᠥᠪᠡᠷ ᠢ᠋ ᠪᠡᠨ《ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠭᠠᠨ 》 ᠭᠡᠮᠡᠨ ᠲᠤᠩᠬᠠᠭᠯᠠᠨ ᠵᠠᠷᠯᠠᠭᠰᠠᠨ ᠪᠢᠯᠡ᠃ ᠭᠠᠯᠳᠠᠨ ᠬᠠᠭᠠᠨ᠂
— ᠲᠠ ᠮᠢᠨᠦ ᠬᠦᠦ ᠶ᠋ᠢ ᠶᠠᠭᠠᠬᠢᠵᠤ ᠦᠯᠡᠳᠡᠭᠡᠨᠡ ᠭᠡᠵᠦ ᠰᠤᠨᠵᠢᠨ ᠠᠰᠠᠭᠤᠪᠠ᠃
— ᠠᠯᠠᠱᠠ ᠬᠣᠰᠢᠭᠤ ᠪᠠᠷ ᠰᠣᠯᠢᠵᠤ ᠪᠣᠯᠬᠤ ᠶᠤᠮ ᠭᠡᠵᠦ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠰᠢᠭᠤᠳᠬᠠᠨ ᠥᠭᠦᠯᠡᠪᠡ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢᠨ ᠨᠢᠳᠦ ᠳᠦᠷᠯᠡᠢᠵᠦ ᠢᠷᠪᠢᠰ ᠦ᠋ᠨ ᠰᠢᠨᠵᠢ ᠲᠥᠷᠬᠦ ᠶ᠋ᠢ ᠣᠯᠤᠭᠠᠳ᠂
— ᠡᠭᠦᠯᠡᠨ ᠴᠢᠯᠥᠭᠡᠨ ᠦ᠌ ᠨᠠᠷᠠ ᠰᠢᠭ ᠦᠵᠡᠭᠳᠡᠭᠡᠳ ᠥᠩᠭᠡᠷᠡᠬᠦ ᠮᠢᠬᠠᠨ ᠪᠡᠶᠡ ᠶ᠋ᠢ ᠥᠨᠢ ᠡᠭᠦᠷᠢᠳᠡ ᠶ᠋ᠢᠨ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠣᠯᠢᠵᠤ ᠶᠠᠭᠠᠬᠢᠨ ᠪᠣᠯᠬᠤ ᠪᠢᠯᠡ ᠭᠡᠪᠡᠯ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠥᠨᠳᠡᠰᠬᠢᠨ ᠪᠣᠰᠤᠭᠠᠳ ᠳᠠᠬᠢᠨ ᠠᠭᠤᠯᠵᠠᠬᠤ ᠦᠭᠡᠢ ᠭᠡᠰᠡᠨ ᠰᠢᠭ ᠪᠤᠷᠤᠭᠤ ᠬᠠᠷᠠᠵᠤ ᠠᠰᠠᠷ ᠤ᠋ᠨ ᠡᠭᠦᠳᠡ ᠪᠡᠷ ᠭᠠᠷᠪᠠ᠃
ᠮᠣᠩᠭᠣᠯᠴᠤᠳ ᠡᠷᠲᠡᠨ ᠡᠴᠡ ᠡᠷᠭᠢᠵᠦ ᠠᠭᠤᠯᠵᠠᠬᠤ ᠨᠢᠭᠤᠷ ᠲᠠᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠵᠦ ᠢᠷᠡᠵᠡᠢ᠃ ᠭᠡᠲᠡᠯᠡ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠪᠤᠷᠤᠭᠤ ᠬᠠᠷᠠᠪᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠮᠥᠨ ᠬᠦ ᠵᠥᠷᠢᠭᠦᠦ ᠬᠠᠷᠠᠯᠠ᠃ ᠬᠠᠭᠠᠳ ᠤ᠋ᠨ ᠠᠭᠤᠯᠵᠠᠯᠲᠠ ᠶ᠋ᠢᠨ ᠠᠰᠠᠷ ᠳᠡᠷᠪᠡᠯᠵᠡᠬᠦ ᠥᠨᠳᠥᠷᠯᠢᠭ ᠬᠡᠳᠦᠨ ᠵᠠᠭᠤᠨ ᠤ᠋ ᠡᠮᠦᠨᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠨᠤᠲᠤᠭ ᠪᠠᠢᠵᠠᠢ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠡᠯᠢᠭᠡ ᠵᠢᠷᠦᠬᠡ ᠥᠮᠥᠷᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠵᠣᠷᠢᠭ ᠨᠢ ᠤᠯᠠᠮ ᠪᠠᠳᠠᠷᠠᠵᠠᠢ᠃
ᠵᠠᠷ ᠵᠡᠪᠰᠡᠭ ᠦᠭᠡᠢ ᠬᠣᠶᠠᠷ ᠬᠠᠭᠠᠨ ᠬᠥᠲᠥᠴᠢ ᠶ᠋ᠢᠨ ᠭᠠᠷ ᠠ᠋ᠴᠠ ᠮᠣᠷᠢᠳ ᠢ᠋ᠶ᠋ᠠᠨ ᠠᠪᠴᠤ ᠬᠣᠶᠠᠷ ᠲᠠᠢᠰᠢ ᠰᠠᠯᠵᠤ ᠳᠠᠪᠬᠢᠪᠠ᠃ ᠭᠠᠯᠳᠠᠨ ᠳᠣᠭᠰᠢᠷᠠᠵᠠᠢ᠃ ᠭᠠᠯᠳᠠᠨ ᠬᠠᠭᠠᠨ ᠦᠶᠡᠷᠯᠡᠬᠦ ᠪᠡᠷ ᠪᠣᠯᠵᠠᠢ᠃
ᠲᠡᠷᠲᠡᠭᠡ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠲᠡᠢᠨ ᠦ᠌ ᠲᠣᠭᠰᠢᠨ ᠬᠠᠷᠠ ᠰᠦᠯᠳᠡ ᠨᠢ ᠬᠠᠭᠠᠨ ᠢ᠋ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠨᠥᠭᠦᠭᠡ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠴᠠᠭᠠᠨ ᠲᠠᠯᠲᠤ ᠯᠤᠤ ᠤᠷᠠᠯᠠᠭᠰᠠᠨ ᠤᠯᠠᠭᠠᠨ ᠰᠦᠯᠳᠡ ᠪᠠᠢᠨᠠ᠃ ᠮᠠᠨᠵᠤ ᠨᠤᠭᠤᠳ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠢ᠋ ᠲᠣᠰᠴᠤ ᠠᠪᠤᠭᠠᠳ ᠭᠣᠶᠣᠮᠰᠣᠭ ᠰᠡᠳᠬᠡᠨ ᠳ᠋ᠦ᠍ ᠡᠷᠭᠦᠵᠦ ᠣᠷᠣᠭᠤᠯᠪᠠ᠃
ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠣᠢᠷᠠᠳ ᠤ᠋ᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢ《ᠡᠨᠡ ᠶᠡᠷᠦ ᠨᠢ ᠬᠥᠮᠦᠨ ᠮᠥᠨ ᠤᠤ?》 ᠭᠡᠮᠡᠨ ᠡᠷᠡᠭᠡᠯᠵᠡᠵᠦ ᠲᠡᠭᠡᠨᠡᠭᠡᠯᠵᠡᠨ ᠪᠣᠳᠣᠭᠰᠠᠭᠠᠷ ᠶᠠᠪᠤᠯᠠ᠃ ᠭᠠᠯᠳᠠᠨ ᠬᠠᠭᠠᠨ《ᠡᠩᠬᠡ ᠠᠮᠤᠭᠤᠯᠠᠩ ᠤ᠋ᠨ ᠴᠡᠷᠢᠭ ᠢ᠋ ᠬᠠᠯᠬᠠ ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠲᠤ᠌ ᠪᠤᠲᠠ ᠴᠣᠬᠢᠶᠠ᠃ ᠬᠠᠷᠢ ᠶ᠋ᠢᠨ ᠨᠤᠲᠤᠭ ᠲᠤ᠌ ᠳᠠᠢᠳᠤᠬᠤ ᠠᠪᠠᠰᠤ ᠮᠥᠭᠥ ᠨᠢ ᠬᠦᠷᠲᠡᠯᠡ ᠯᠤᠤᠰ ᠤ᠋ᠨ ᠬᠣᠣᠷᠯᠠᠯ ᠲᠠᠢ᠃ ᠮᠠᠨᠵᠤ ᠨᠤᠭᠤᠳ ᠢ᠋ ᠭᠠᠵᠠᠷ ᠤ᠋ᠨ ᠴᠠᠭᠠᠨ ᠮᠥᠭᠥ ᠰᠢᠭ ᠨᠢᠳᠬᠡᠷᠡᠵᠦ ᠬᠠᠶᠠᠬᠤ ᠶᠤᠮᠰᠠᠨ》 ᠭᠡᠵᠦ ᠰᠢᠷᠠᠯᠠᠬᠠᠨ ᠪᠠᠢᠯᠠ᠃
ᠲᠡᠷᠡ ᠰᠥᠨᠢ ᠶ᠋ᠢᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠮᠠᠨᠵᠤ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠬᠢᠶᠠᠷ ᠴᠣᠬᠢᠭᠤᠯᠵᠤ ᠠᠷᠤ ᠬᠠᠯᠬᠠ ᠶ᠋ᠢᠨ ᠨᠤᠲᠤᠭ ᠤᠷᠤᠭᠤ ᠣᠳᠤᠭᠰᠠᠨ ᠨᠡᠮᠡᠭᠳᠡᠯ ᠬᠦᠴᠦ ᠪᠡᠨ ᠡᠷᠭᠢᠵᠦ ᠢᠷᠡᠬᠦ ᠶ᠋ᠢ ᠬᠠᠭᠠᠨ ᠤ᠋ ᠵᠠᠩᠵᠤᠨ ᠲᠤᠰᠢᠶᠠᠪᠠ᠃ ᠭᠣᠣᠯ ᠵᠠᠮ ᠤ᠋ᠨ ᠴᠡᠷᠢᠭ ᠢ᠋ ᠡᠷᠭᠢᠵᠦ ᠢᠷᠡᠬᠦ ᠶ᠋ᠢᠨ ᠬᠣᠭᠣᠷᠣᠨᠳᠣ ᠣᠢᠷᠠᠳ ᠤ᠋ᠨ ᠴᠡᠷᠢᠭ ᠦ᠋ᠳ ᠨᠤᠲᠤᠭ ᠤ᠋ᠨ ᠭᠦᠨ ᠳ᠋ᠦ᠍ ᠣᠷᠣᠵᠤ ᠰᠢᠪᠡᠭᠡᠯᠡᠨ ᠪᠡᠬᠢᠯᠡᠪᠡ᠃ ᠠᠷᠤ ᠠ᠋ᠴᠠ ᠨᠢ ᠨᠡᠬᠡᠵᠦ ᠶᠠᠪᠤᠭᠠ ᠴᠡᠷᠢᠭ ᠦ᠋ᠨ ᠬᠦᠴᠦ ᠶ᠋ᠢ ᠢᠷᠡᠲᠡᠯᠡ ᠭᠠᠯᠳᠠᠨ ᠬᠠᠭᠠᠨ ᠠᠷᠤ ᠮᠣᠩᠭᠣᠯ ᠳ᠋ᠤ᠌ ᠳᠠᠢᠴᠢᠯᠠᠭᠠ ᠶᠠᠪᠤᠭᠤᠯᠵᠤ᠂ᠵᠠᠷᠢᠮ ᠬᠦᠷᠢᠶᠡ ᠬᠡᠢᠳ ᠦ᠋ᠨ ᠯᠠᠮᠠ ᠨᠠᠷ ᠢ᠋ ᠴᠡᠷᠢᠭ ᠲᠦ᠍ ᠬᠠᠤ ᠬᠠᠮᠤᠵᠠᠢ᠃
ᠬᠠᠭᠠᠨ ᠭᠠᠯᠳᠠᠨ ᠤ᠋ ᠴᠢᠰᠤ ᠪᠤᠴᠠᠯᠵᠤ 《ᠮᠢᠨᠦ ᠬᠥᠪᠡᠭᠦᠨ ᠢ᠋ ᠮᠢᠨᠦ ᠵᠢᠷᠦᠬᠡᠨ ᠡᠴᠡ ᠰᠤᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠶᠦ᠍ᠮ ᠴᠢᠨᠢ ᠁ 》 ᠭᠡᠮᠡᠨ ᠪᠣᠳᠣᠵᠤ ᠪᠠᠢᠪᠠ᠃
ᠠᠷᠪᠠᠨ ᠳᠣᠯᠣᠭᠠ
ᠲᠤᠤᠯᠠ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠦ᠌ ᠡᠯᠡᠰᠦᠨ ᠮᠠᠩᠬᠠ ᠪᠦᠬᠦᠢ ᠬᠥᠪᠡᠭᠡ ᠳᠣᠪᠣᠴᠠᠭ ᠢ᠋ ᠳᠠᠮᠨᠠᠨ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠳᠤᠭᠤᠢᠷᠠᠨ ᠪᠠᠭᠤᠵᠠᠢ᠃ ᠭᠣᠣᠯ ᠤ᠋ᠨ ᠨᠥᠭᠦᠭᠡ ᠬᠥᠪᠡᠭᠡᠨ ᠦ᠌ ᠬᠠᠷᠠ ᠠᠰᠬᠠᠲᠤ ᠡᠩᠭᠡᠷ ᠢ᠋ ᠳᠠᠭᠠᠵᠤ ᠠᠷᠤ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠭᠠᠯᠳᠠᠨ ᠢ᠋ ᠳᠡᠮᠵᠢᠬᠦ ᠪᠡᠷ ᠴᠡᠷᠢᠭᠯᠡᠨ ᠠᠢᠯᠰᠠᠵᠠᠢ᠃ ᠤᠴᠢᠷ ᠨᠢ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠳᠥᠴᠢᠨ ᠶᠢᠰᠦᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠬᠠᠭᠠᠨ ᠪᠣᠯᠵᠤ ᠳᠥᠷᠪᠡᠨ ᠵᠠᠭᠤᠨ ᠤ᠋ ᠡᠮᠦᠨᠡᠬᠢ ᠡᠷᠭᠦᠮᠵᠢᠯᠡᠯ ᠢ᠋ ᠲᠣᠭᠣᠨᠣ ᠠᠭᠤᠯᠠ ᠳ᠋ᠤ᠌ ᠳᠠᠪᠲᠠᠵᠠᠢ᠃
ᠬᠠᠭᠠᠨ ᠠᠰᠠᠷ ᠲᠤ᠌ ᠵᠠᠭᠤᠨ ᠨᠠᠢ᠍ᠮᠠᠨ ᠮᠡᠯᠡᠬᠡᠢ ᠲᠣᠭᠣᠨᠣ ᠠᠭᠤᠯᠠᠨ ᠠ᠋ᠴᠠ ᠠᠪᠴᠢᠷᠠᠵᠤ ᠥᠷᠥᠪᠡ᠃ ᠠᠯᠠᠭ ᠮᠡᠯᠡᠬᠡᠢ ᠬᠡᠮᠡᠬᠦ ᠬᠦᠨᠳᠦᠳᠬᠡᠯ ᠦ᠋ᠨ ᠲᠣᠭᠯᠠᠭᠠᠮ ᠢ᠋ ᠱᠠᠭᠠ ᠪᠠᠷ ᠪᠤᠰᠤ ᠠᠮᠢᠳᠤ ᠮᠡᠯᠡᠬᠡᠢ ᠪᠡᠷ ᠥᠷᠥᠵᠦ ᠭᠤᠷᠪᠠᠨ ᠵᠠᠭᠤ ᠨᠠᠰᠤᠯᠠᠳᠠᠭ ᠶᠠᠰᠤᠲᠤ ᠮᠡᠯᠡᠬᠡᠢ ᠶ᠋ᠢᠨ ᠶᠠᠰᠤᠨ ᠬᠤᠶᠠᠭ ᠦᠯᠦ ᠮᠡᠳᠡᠭ ᠬᠥᠳᠡᠯᠬᠦ ᠪᠥᠯᠥᠭᠡ᠃ ᠭᠠᠯᠳᠠᠨ ᠬᠠᠭᠠᠨ ᠮᠡᠯᠡᠬᠡᠢ ᠶ᠋ᠢᠨ ᠬᠤᠶᠠᠭ ᠳᠡᠭᠡᠷᠡ ᠵᠠᠪᠢᠯᠠᠨ ᠰᠠᠭᠤᠵᠠᠢ᠃
ᠬᠠᠭᠠᠨ ᠤ᠋ ᠶᠡᠬᠡ ᠠᠰᠠᠷ ᠲᠤ᠌ ᠭᠠᠯᠳᠠᠨ ᠣᠷᠣᠭᠰᠠᠨ ᠬᠣᠢᠨᠠ ᠪᠠᠨ᠂
— ᠨᠠᠮᠠᠶ᠋ᠢ ᠭᠤᠷᠪᠠᠨ ᠵᠠᠭᠤᠨ ᠵᠢᠯ ᠨᠠᠰᠤᠯᠠᠬᠤ ᠶ᠋ᠢ ᠢᠷᠥᠭᠡᠵᠦ ᠪᠠᠢᠭᠠ ᠶᠤᠮ ᠤᠤ? ᠡᠰᠡᠬᠦᠯᠡ ᠵᠠᠭᠤᠨ ᠵᠢᠯ ᠳᠤᠷᠠᠰᠤᠭᠳᠠᠬᠤ ᠶ᠋ᠢ ᠪᠡᠯᠭᠡᠰᠢᠶᠡᠵᠦ ᠪᠠᠢᠨᠠ ᠤᠤ? ᠭᠡᠮᠡᠨ ᠠᠰᠠᠭᠤᠪᠠ᠃ ᠣᠢᠷᠠᠳ ᠤ᠋ᠨ ᠭᠠᠢᠲᠠᠪ ᠪᠠᠭᠠᠲᠤᠷ ᠳᠥᠷᠪᠡᠯᠵᠢᠨ ᠬᠠᠩᠬᠠᠭᠠᠷ ᠴᠡᠭᠡᠵᠢ ᠪᠡᠨ ᠲᠡᠭᠰᠢᠯᠡᠭᠡᠳ᠂
— ᠬᠠᠭᠠᠨᠲᠠᠨ ᠲᠠ ᠮᠡᠯᠡᠬᠡᠢ ᠶ᠋ᠢᠨ ᠨᠡᠭᠦᠳᠡᠯ ᠳᠡᠭᠡᠷᠡ ᠠᠮᠠᠷᠠᠵᠤ ᠬᠠᠢᠷᠠᠯᠠ ᠭᠡᠮᠡᠨ ᠥᠭᠦᠯᠡᠪᠡ᠃ ᠬᠠᠭᠠᠨ ᠡᠷᠢᠭᠡ ᠪᠡᠨ ᠱᠣᠳᠠᠵᠤ ᠦᠵᠡᠭᠡᠳ᠂
— ᠥᠭᠡᠷᠡ ᠵᠠᠮ ᠠᠯᠠᠭᠠ ᠭᠡᠮᠡᠨ ᠬᠦᠩᠭᠢᠨᠡᠨ ᠳᠤᠤᠭᠠᠷᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠶ᠋ᠢᠨ ᠵᠠᠩᠵᠤᠨ ᠪᠠᠭᠠᠲᠤᠷ ᠤ᠋ᠳ ᠭᠠᠢᠬᠠᠵᠠᠭᠠᠨ ᠬᠠᠷᠠᠪᠠᠯ᠂
— ᠡᠨᠡ ᠦᠷᠦᠭᠰᠡᠨ ᠮᠡᠯᠡᠬᠡᠢ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠦ᠋ᠨ ᠵᠢᠷᠤᠭ ᠢ᠋ ᠤᠷᠢᠳ ᠡᠮᠦᠨᠡᠬᠢ ᠰᠢᠭ ᠰᠠᠨᠠᠭᠳᠠᠭᠤᠯᠵᠤ ᠪᠠᠢᠨᠠ᠃ ᠬᠠᠭᠠᠨ ᠪᠢ ᠪᠦᠬᠦ ᠨᠤᠲᠤᠭ ᠳᠡᠭᠡᠷᠡ ᠪᠡᠨ ᠠᠮᠠᠷᠠᠵᠤ᠂ ᠡᠬᠡ ᠨᠤᠲᠤᠭ ᠲᠠᠭᠠᠨ ᠢᠯᠴᠢ ᠪᠡᠨ ᠰᠢᠩᠭᠡᠭᠡᠬᠦ ᠪᠣᠯᠵᠠᠢ ᠭᠡᠵᠦ ᠪᠠᠬᠠᠳᠤᠯᠲᠠᠢ ᠥᠭᠦᠯᠡᠨ ᠠᠨᠤ ᠬᠠᠲᠤᠨ ᠢ᠋ᠶ᠋ᠠᠨ ᠬᠠᠢᠷᠠ ᠶ᠋ᠢᠨ ᠬᠠᠷᠠᠴᠠ ᠪᠠᠷ ᠬᠠᠷᠠᠪᠠ᠃ ᠠᠨᠤ ᠬᠠᠲᠤᠨ ᠤ᠋ ᠴᠣᠭ ᠵᠢᠪᠬᠤᠭᠠ ᠬᠠᠭᠤᠴᠢᠨ ᠶᠠᠩᠵᠤ ᠪᠠᠷ ᠪᠥᠭᠡᠳ ᠥᠨᠳᠡᠭᠡᠲᠦ ᠴᠥᠭᠥᠷᠥᠮ ᠦ᠋ᠨ ᠬᠥᠪᠡᠭᠦᠨ ᠳ᠋ᠦ᠍᠂
— ᠭᠠᠯᠳᠠᠨ ᠳᠡᠭᠦᠦ ᠴᠠᠭᠠᠰᠢ ᠨᠠᠭᠠᠰᠢ ᠶᠠᠪᠤᠬᠤ ᠳ᠋ᠠᠭᠠᠨ ᠡᠨᠡᠭᠦᠷ ᠢᠷᠡᠵᠦ ᠪᠠᠢᠭᠠᠷᠠᠢ ᠭᠡᠮᠡᠨ ᠲᠣᠳᠣ ᠴᠠᠩᠭᠢᠨᠠᠨ ᠬᠡᠯᠡᠭᠰᠡᠨ ᠨᠢ ᠭᠠᠯᠳᠠᠨ ᠳ᠋ᠤ᠌ ᠪᠣᠳᠣᠭᠳᠠᠪᠠ᠃ ᠠᠨᠤ ᠬᠠᠲᠤᠨ ᠠᠩᠬᠠ ᠤᠳᠠᠭᠠ《ᠭᠠᠯᠳᠠᠨ ᠬᠠᠭᠠᠨ ᠨᠢᠭᠤᠴᠠᠯᠢᠭ ᠬᠥᠮᠦᠨ ᠰᠢᠦ》 ᠭᠡᠵᠦ ᠪᠣᠳᠣᠯᠠ᠃ ᠭᠠᠯᠳᠠᠨ ᠢᠯᠡ ᠦᠭᠡ ᠲᠡᠢ᠂ ᠵᠥᠭᠡᠯᠡᠨ ᠡᠶᠡᠪᠡᠷᠭᠦᠦ ᠵᠠᠩ ᠲᠠᠢ ᠠᠲᠠᠯᠠ ᠵᠠᠷᠢᠮ ᠳ᠋ᠠᠭᠠᠨ ᠳᠣᠭᠰᠢᠷᠠᠵᠤ ᠪᠡᠶᠡ ᠪᠡᠨ ᠪᠠᠷᠢᠵᠤ ᠶᠠᠳᠠᠨ ᠰᠢᠵᠠᠭᠤᠷ ᠵᠠᠭᠤᠳᠠᠭ ᠵᠠᠩ ᠲᠠᠢ ᠶᠤᠮ᠃ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠯᠤᠤᠰ ᠤ᠋ᠨ ᠠᠮᠢᠲᠠᠨ ᠲᠠᠢ ᠳᠦᠢᠴᠡᠭᠦᠯᠦᠨ᠂ ᠮᠡᠯᠡᠬᠡᠢ ᠶ᠋ᠢᠨ ᠨᠠᠪᠴᠢᠨ ᠬᠡᠯᠪᠡᠷᠢᠲᠦ ᠬᠤᠶᠠᠭ ᠳᠡᠭᠡᠷᠡ ᠵᠠᠯᠠᠵᠤ ᠪᠠᠢᠯᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠭᠠᠯᠳᠠᠨ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠦᠴᠦ ᠶ᠋ᠢ ᠬᠠᠮᠢᠭᠠ ᠲᠥᠪᠯᠡᠷᠡᠭᠦᠯᠵᠦ ᠴᠣᠬᠢᠯᠲᠠ ᠶ᠋ᠢ ᠬᠡᠷᠬᠢᠨ ᠬᠢᠬᠦ ᠪᠡᠨ ᠪᠣᠳᠣᠯᠬᠢᠯᠠᠨ ᠰᠢᠲᠠᠷᠠ ᠶ᠋ᠢᠨ ᠨᠡᠭᠦᠳᠡᠯ ᠰᠢᠭ ᠥᠷᠥᠵᠦ ᠪᠠᠢᠪᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠰᠢᠳᠡᠷᠡ ᠨᠡᠭᠦᠬᠦ ᠳ᠋ᠡᠭᠡᠨ ᠭᠠᠷᠭᠠᠭᠠᠳ ᠪᠢᠯᠡ᠃ ᠰᠢᠳᠡᠷᠡ ᠶ᠋ᠢᠨ ᠬᠥᠯᠭᠡ ᠳᠡᠭᠡᠷᠡ ᠬᠠᠮᠤᠭ ᠤ᠋ᠨ ᠣᠩᠭᠢᠶᠠ ᠦᠭᠡᠢ ᠨᠡᠭᠦᠳᠡᠯ ᠲᠡᠢ ᠨᠢ ᠨᠣᠶᠠᠨ ᠪᠠᠢᠳᠠᠭ᠃ ᠨᠣᠶᠠᠨ ᠵᠥᠪᠬᠡᠨ ᠬᠠᠮᠠᠭᠠᠯᠠᠯᠲᠠ ᠳ᠋ᠤ᠌ ᠣᠷᠣᠰᠢᠨᠠ᠃ ᠤᠷᠤᠭᠰᠢ ᠦᠭᠡᠢ ᠨᠣᠶᠠᠨ ᠬᠠᠮᠢᠭᠠᠰᠢ ᠪᠠᠨ ᠨᠡᠭᠦᠭᠰᠡᠨ ᠴᠦ᠍ ᠮᠠᠳ ᠲᠠᠯᠪᠢᠬᠤ ᠠᠶᠤᠯ ᠳ᠋ᠤ᠌ ᠣᠷᠣᠳᠠᠭ᠃ ᠭᠠᠯᠳᠠᠨ ᠬᠠᠭᠠᠨ ᠮᠣᠷᠢᠨ ᠤ᠋ ᠠᠴᠠᠨ ᠰᠠᠯᠠᠭᠠ ᠪᠠᠷ ᠲᠣᠭᠯᠠᠬᠤ ᠳᠤᠷᠠᠲᠠᠢ᠃ ᠲᠡᠭᠡᠪᠡᠯ ᠮᠠᠨᠵᠤ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠢ᠋ ᠠᠴᠠᠨ ᠰᠠᠯᠠᠭᠠᠨ ᠳ᠋ᠤ᠌ ᠣᠷᠣᠭᠤᠯᠬᠤ ᠲᠡᠭᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠤᠬᠤᠷᠳᠠᠭᠤᠯᠤᠨ ᠪᠤᠲᠠ ᠴᠣᠬᠢᠬᠤ ᠶ᠋ᠢ ᠲᠥᠯᠥᠪᠯᠡᠵᠦ ᠪᠣᠳᠣᠨᠠ᠃ ᠳᠠᠨᠵᠢᠯᠠ ᠵᠠᠩᠵᠤᠨ ᠮᠡᠷᠭᠡᠨ ᠰᠠᠢᠳ᠂ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠳ ᠬᠠᠭᠠᠨ ᠤ᠋ ᠪᠠᠨ ᠨᠡᠭᠦᠳᠡᠯ ᠢ᠋ ᠵᠥᠪ ᠭᠡᠳᠡᠭ ᠲᠦ᠍ ᠡᠷᠡᠭᠡᠯᠵᠡᠬᠦ ᠦᠭᠡᠢ ᠪᠠᠢᠪᠠ᠃
ᠮᠠᠨᠵᠤ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠠᠷᠤ ᠲᠠᠯᠠ ᠠ᠋ᠴᠠ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠵᠠᠯᠠᠷᠠᠵᠤ ᠶᠠᠪᠤᠭᠠ ᠨᠢ ᠰᠢᠷᠠ ᠶᠡᠬᠡᠲᠡᠢ ᠶ᠋ᠢᠨ ᠰᠢᠨᠵᠢ᠃
ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠳ᠋ᠤ᠌ ᠭᠠᠭᠴᠠᠬᠠᠨ ᠪᠣᠳᠣᠯ ᠪᠣᠢ᠃ ᠲᠡᠷᠡ ᠪᠣᠳᠣᠯ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢ ᠪᠤᠲᠠ ᠴᠣᠬᠢᠵᠤ ᠢᠯᠠᠯᠲᠠ ᠶ᠋ᠢᠨ ᠲᠤᠭ ᠬᠢᠭᠢᠷᠢ ᠪᠡᠨ ᠡᠷᠭᠦᠬᠦ ᠪᠥᠯᠥᠭᠡ᠃ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠭᠠᠯ ᠳᠥᠯᠥ ᠶ᠋ᠢᠨ ᠳᠡᠯ ᠲᠡᠢ ᠯᠤᠤ ᠰᠦᠯᠳᠡ ᠶᠠᠭᠠᠬᠢᠵᠤ ᠳᠣᠭᠰᠢᠷᠠᠪᠠᠴᠤ ᠭᠠᠯᠳᠠᠨ ᠤ᠋ ᠴᠠᠭᠠᠨᠠ ᠭᠠᠷᠬᠤ ᠳ᠋ᠤ᠌ ᠮᠠᠰᠢ ᠪᠡᠷᠬᠡ ᠪᠢᠯᠡ᠃ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠲᠣᠭᠰᠢᠨ ᠣᠮᠣᠭ᠂ ᠬᠤᠪᠢᠯᠭᠠᠨ ᠲᠥᠷᠬᠦ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠢ᠋ ᠮᠤᠬᠤᠷᠳᠠᠭᠤᠯᠤᠨᠠ᠃
《ᠭᠠᠯᠳᠠᠨ ᠪᠣᠱᠣᠭᠲᠤ ᠭᠠᠭᠴᠠ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠬᠦᠰᠡᠷᠡ ᠬᠠᠶᠠᠪᠠ᠃ ᠡᠴᠢᠭᠡ ᠬᠠᠭᠠᠨ ᠳ᠋ᠤ᠌ ᠰᠡᠪᠳᠡᠨᠪᠠᠯᠵᠢᠷ ᠠ᠋ᠴᠠ ᠥᠭᠡᠷᠡ ᠦᠨᠡᠲᠦ ᠵᠦᠢᠯ ᠪᠠᠢᠵᠠᠢ᠃ ᠨᠤᠲᠤᠭ ᠤᠰᠤ ᠨᠢ ᠬᠥᠪᠡᠭᠦᠨ ᠦ᠌ ᠠᠮᠢᠨ ᠠ᠋ᠴᠠ ᠢᠯᠡᠭᠦᠦ ᠶᠤᠮ᠃ ᠭᠠᠯᠳᠠᠨ ᠢ᠋ ᠮᠥᠬᠥᠭᠡᠬᠦ ᠬᠡᠷᠡᠭᠲᠡᠢ᠃ ᠰᠡᠪᠳᠡᠨᠪᠠᠯᠵᠢᠷ ᠢ᠋ ᠬᠣᠷᠣᠭᠠᠵᠤ ᠭᠠᠯᠳᠠᠨ ᠤ᠋ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠤᠨᠠ ᠭᠡᠪᠡᠯ ᠬᠥᠩᠭᠡᠨ ᠭᠣᠣᠮᠠᠢ ᠬᠡᠷᠡᠭ ᠪᠣᠯᠤᠨᠠ᠃ ᠭᠠᠯᠳᠠᠨ ᠭᠦᠨ ᠪᠠᠲᠤ ᠦᠨᠳᠦᠰᠦᠯᠡᠭᠰᠡᠨ ᠶᠤᠮ᠃ ᠮᠠᠷᠭᠠᠰᠢ ᠶ᠋ᠢᠨ ᠥᠭᠡᠬᠦ ᠡᠴᠡ ᠥᠨᠥᠳᠥᠷ ᠦ᠋ᠨ ᠠᠭᠤᠰᠬᠢ ᠭᠡᠮᠡᠨ ᠮᠣᠩᠭᠣᠯᠴᠤᠳ ᠤ᠋ᠨ ᠶᠠᠷᠢᠳᠠᠭ ᠢ᠋ᠶ᠋ᠠᠷ ᠭᠠᠯᠳᠠᠨ ᠠ᠋ᠴᠠ ᠰᠠᠯᠵᠤ ᠴᠢᠳᠠᠪᠠᠯ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠮᠢᠨᠦ ᠡᠷᠬᠡᠰᠢᠶᠡᠯ ᠳ᠋ᠦ᠍ ᠵᠡᠭᠦᠨᠭᠠᠷ ᠤ᠋ᠨ ᠤᠯᠤᠰ ᠠᠳᠬᠤᠭᠳᠠᠨᠠ᠃ ᠵᠡᠭᠦᠨᠭᠠᠷ ᠤ᠋ᠨ ᠮᠥᠷᠭᠥᠯᠴᠢᠳ ᠥᠨᠳᠥᠷ ᠭᠡᠭᠡᠨ ᠡᠴᠡ ᠰᠠᠬᠢᠯ ᠬᠦᠷᠲᠡᠵᠦ ᠠᠳᠢᠰ ᠠᠪᠬᠤ ᠪᠠᠷ ᠣᠯᠠᠨ ᠴᠥᠭᠡᠨ ᠢ᠋ᠶ᠋ᠡᠷ ᠴᠤᠪᠤᠷᠠᠨᠠ᠃ ᠳᠠᠯᠠᠢ ᠯᠠᠮᠠ ᠤᠷᠤᠭᠤ ᠣᠳᠬᠤ ᠨᠢ ᠣᠳᠤᠨᠠ ᠪᠢᠵᠡ᠃ ᠲᠥᠪᠡᠳ ᠢ᠋ ᠪᠢ ᠪᠠᠰᠠ ᠡᠷᠬᠡᠰᠢᠶᠡᠨᠡ᠃
ᠭᠠᠯᠳᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠠᠪᠴᠤ ᠬᠠᠶᠠᠭᠰᠠᠨ ᠤ᠋ ᠳᠠᠷᠠᠭᠠ ᠪᠢ ᠲᠩᠷᠢ ᠪᠣᠯᠤᠨᠠ᠃ ᠡᠩᠬᠡ ᠠᠮᠤᠭᠤᠯᠠᠩ ᠨᠠᠮᠠᠶ᠋ᠢ ᠭᠠᠯᠳᠠᠨ ᠵᠣᠪᠠᠭᠠᠵᠤ ᠪᠠᠢᠨᠠ᠃ ᠭᠠᠯᠳᠠᠨ ᠤ᠋ ᠲᠣᠭᠰᠢᠨ ᠰᠠᠬᠢᠭᠤᠰᠤ᠂ ᠡᠷᠴᠢ ᠬᠦᠴᠦ ᠶ᠋ᠢ ᠰᠠᠭᠠᠷᠠᠭᠤᠯᠵᠤ ᠨᠣᠮᠣᠬᠠᠳᠬᠠᠵᠤ᠂ ᠤᠯᠠ ᠳ᠋ᠠᠭᠠᠨ ᠭᠢᠰᠬᠢᠵᠦ ᠴᠢᠳᠠᠪᠠᠯ ᠠᠽᠢᠶᠠ ᠶ᠋ᠢᠨ ᠲᠠᠯᠠ ᠨᠤᠲᠤᠭ ᠮᠠᠨᠵᠤ ᠴᠢᠩ ᠤᠯᠤᠰ ᠤ᠋ᠨ ᠬᠠᠷᠢᠶᠠᠲᠤ ᠪᠣᠯᠬᠤ ᠪᠤᠰᠤ ᠤᠤ? ᠮᠢᠨᠦ ᠡᠮᠦᠨᠡ ᠭᠠᠯᠳᠠᠨ ᠠᠭᠤᠯᠠ ᠮᠡᠲᠦ ᠬᠥᠨᠳᠡᠯᠢᠰᠦᠨᠡ᠃ ᠭᠠᠯᠳᠠᠨ ᠢ᠋ ᠳᠠᠪᠠᠭᠠ ᠦᠭᠡᠢ ᠴᠠᠭ ᠲᠤ᠌ ᠢᠯᠠᠯᠲᠠ ᠪᠣᠯ ᠢᠯᠠᠯᠲᠠ ᠪᠢᠰᠢ᠂ ᠦᠬᠦᠯ ᠪᠣᠯ ᠦᠬᠦᠯ ᠪᠢᠰᠢ ᠪᠢᠯᠡ᠃ 》
ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ᠋ ᠰᠡᠳᠬᠢᠯ ᠦ᠋ᠨ ᠵᠤᠯᠠ ᠰᠠᠯᠬᠢᠨ ᠳ᠋ᠤ᠌ ᠳᠠᠯᠳᠠᠴᠢᠨ᠂ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠬᠣᠷᠣᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠰᠢᠨᠠᠯᠵᠤ ᠶᠠᠪᠤᠯᠠ᠃
ᠲᠤᠤᠯᠠ ᠶ᠋ᠢᠨ ᠬᠥᠪᠡᠭᠡᠨᠡ ᠪᠠᠭᠤᠳᠠᠯᠯᠠᠭᠰᠠᠨ ᠴᠡᠷᠢᠭ ᠦ᠋ᠳ ᠮᠠᠨᠵᠤ ᠨᠤᠭᠤᠳ ᠢ᠋ ᠴᠠᠭᠠᠷᠢᠭᠯᠠᠨ ᠤᠰᠠᠳᠬᠠᠬᠤ ᠪᠠᠷ ᠪᠡᠯᠡᠳᠬᠡᠵᠦ ᠲᠡᠷᠡ ᠵᠦᠭ ᠡᠴᠡ ᠢᠷᠡᠬᠦ ᠴᠡᠷᠢᠭ ᠦ᠋ᠳ ᠢ᠋ ᠨᠢᠭᠡ ᠠᠮᠠ ᠪᠠᠷ ᠣᠷᠣᠭᠤᠯᠵᠤ ᠪᠢᠲᠡᠭᠦᠦ ᠲᠣᠭᠣᠷᠢᠭ ᠲᠤ᠌ ᠪᠤᠲᠠ ᠴᠣᠬᠢᠬᠤ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠬᠠᠩᠭᠠᠪᠠ᠃ ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠶ᠋ᠢ ᠰᠣᠩᠭᠣᠭᠰᠠᠨ ᠪᠠᠢᠪᠠ᠃ ᠴᠠᠰᠤ ᠮᠡᠲᠦ ᠴᠠᠭᠠᠨ ᠡᠯᠡᠰᠦ ᠲᠡᠢ᠂ᠰᠡᠢᠷᠡᠭ ᠬᠠᠷᠠ ᠮᠣᠳᠣ ᠲᠠᠢ ᠥᠷᠭᠡᠨ ᠬᠥᠨᠳᠡᠢ ᠮᠠᠨᠵᠤ ᠶ᠋ᠢᠨ ᠰᠦᠷᠦᠭᠯᠡᠨ ᠶᠠᠪᠤᠭᠠ ᠴᠡᠷᠢᠭ ᠦ᠋ᠳ ᠢ᠋ ᠡᠮᠬᠦᠵᠦ᠂ ᠪᠤᠴᠠᠬᠤ ᠵᠠᠮ ᠢ᠋ ᠬᠠᠭᠠᠵᠤ ᠴᠠᠭᠠᠷᠢᠭ ᠢ᠋ᠶ᠋ᠠᠨ ᠬᠤᠮᠢᠵᠤ ᠪᠠᠭᠠᠯᠵᠠᠭᠤᠷᠳᠠᠬᠤ ᠲᠥᠯᠥᠪᠯᠡᠭᠡ ᠶ᠋ᠢ ᠭᠠᠯᠳᠠᠨ ᠬᠠᠭᠠᠨ ᠵᠠᠩᠵᠤᠨ ᠪᠠᠭᠠᠲᠤᠷ ᠤ᠋ᠳ ᠲᠠᠢ ᠪᠠᠨ ᠵᠥᠪᠰᠢᠵᠦ ᠡᠯᠴᠢ᠂ ᠬᠡᠯᠡ ᠮᠡᠳᠡᠭᠴᠢ ᠶ᠋ᠢᠨ ᠪᠤᠤᠬᠢᠶᠠ ᠶ᠋ᠢ ᠬᠦᠯᠢᠶᠡᠪᠡ᠃
ᠨᠠᠮᠤᠷ ᠴᠠᠭ ᠤ᠋ᠨ ᠰᠢᠷᠠ ᠨᠠᠷᠠᠨ ᠳᠣᠣᠷᠠ ᠡᠪᠡᠰᠦ ᠨᠣᠭᠣᠭᠠ ᠶ᠋ᠢᠨ ᠰᠢᠮᠡ ᠳ᠋ᠦ᠍ ᠲᠠᠷᠭᠤᠯᠠᠭᠰᠠᠨ ᠮᠠᠯ ᠪᠡᠯᠴᠢᠭᠡᠷ ᠲᠡᠭᠡᠨ ᠬᠣᠨᠣᠵᠤ᠂ ᠲᠤᠤᠯᠠ ᠶ᠋ᠢᠨ ᠭᠣᠣᠯ ᠴᠡᠩᠬᠡᠷ ᠮᠣᠭᠠᠢ ᠮᠡᠲᠦ ᠮᠢᠷᠠᠯᠵᠠᠨᠠ᠃
ᠠᠷᠪᠠᠨ ᠨᠠᠢ᠍ᠮᠠ
ᠬᠡᠭᠡᠷᠡ ᠶ᠋ᠢᠨ ᠠᠰᠠᠷ ᠤ᠋ᠨ ᠬᠣᠢᠮᠣᠷ ᠲᠤ᠌ ᠭᠠᠯᠳᠠᠨ ᠬᠠᠭᠠᠨ᠂ ᠠᠨᠤ ᠬᠠᠲᠤᠨ ᠬᠣᠶᠠᠷ ᠵᠠᠯᠠᠷᠠᠵᠤ ᠨᠠᠢᠷ ᠬᠠᠪᠲᠠᠭᠠᠢᠷᠠᠪᠠ᠃
ᠮᠥᠩᠭᠥᠨ ᠭᠦᠴᠡ ᠲᠡᠢ ᠰᠠᠷᠬᠤᠳ ᠠ᠋ᠴᠠ ᠮᠥᠩᠭᠥᠨ ᠬᠤᠨᠳᠠᠭᠠᠨ ᠳ᠋ᠤ᠌ ᠠᠶᠠᠭᠠᠯᠠᠵᠤ ᠬᠠᠭᠠᠨ ᠳ᠋ᠤ᠌ ᠪᠠᠷᠢᠬᠤ ᠳ᠋ᠤ᠌ ᠬᠣᠶᠠᠷ ᠭᠠᠷᠳᠠᠨ ᠠᠪᠤᠪᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ《ᠪᠢ ᠰᠢᠯᠦᠭ ᠬᠡᠯᠡᠶᠡ》 ᠭᠡᠪᠡ᠃
ᠢᠯᠠᠬᠤ ᠭᠡᠵᠦ ᠦᠭᠡᠢ
ᠢᠯᠠᠭᠳᠠᠬᠤ ᠭᠡᠵᠦ ᠦᠭᠡᠢ
ᠶᠠᠭᠠᠬᠢᠭᠰᠠᠨ ᠬᠠᠲᠠᠭᠤ ᠬᠣᠷᠸᠠ ᠪᠢᠯᠡ
ᠶᠠᠮᠠᠷ ᠭᠠᠰᠢᠭᠤᠨ ᠦᠨᠡᠨ ᠪᠢᠯᠡ
ᠬᠣᠵᠢᠬᠤ ᠭᠡᠵᠦ ᠦᠭᠡᠢ
ᠬᠣᠵᠢᠭᠳᠠᠬᠤ ᠭᠡᠵᠦ ᠦᠭᠡᠢ
ᠬᠣᠵᠢᠮ ᠠᠮᠢᠳᠤᠷᠠᠬᠤ ᠨᠢ ᠬᠣᠭᠣᠰᠣᠨ ᠪᠢᠯᠡ
ᠬᠣᠢᠲᠤ ᠲᠥᠷᠥᠯ ᠢ᠋ᠶ᠋ᠡᠨ ᠣᠯᠬᠤ ᠨᠢ ᠬᠢᠰᠠᠯᠠᠩ ᠪᠢᠯᠡ
ᠬᠠᠭᠠᠨ ᠤ᠋ ᠰᠢᠯᠦᠭ ᠢ᠋ ᠤᠤᠬᠠᠢᠯᠠᠨ ᠲᠦᠷᠢᠵᠦ ᠲᠤᠩᠭᠠᠯᠠᠭ ᠦᠳᠡᠰᠢ ᠣᠳᠣᠳ ᠵᠢᠭᠰᠠᠬᠤ ᠶ᠋ᠢ ᠲᠠᠭᠠᠯᠠᠨ ᠪᠣᠯᠭᠣᠭᠠᠵᠤ ᠲᠦᠳᠡᠭ ᠠᠰᠠᠭᠠᠵᠤ ᠲᠤᠤᠯᠠ ᠶ᠋ᠢᠨ ᠤᠰᠤᠨ ᠳ᠋ᠤ᠌ ᠰᠢᠷᠠ ᠭᠡᠷᠡᠯ ᠪᠠᠭᠤᠵᠠᠢ᠃ ᠮᠠᠨᠵᠤ ᠶ᠋ᠢᠨ ᠴᠡᠷᠢᠭ ᠨᠡᠬᠡᠨ ᠠᠢᠰᠤᠢ ᠮᠡᠳᠡᠭᠡ ᠪᠠᠢᠯᠠ᠃ ᠣᠢᠷᠠᠳ ᠴᠡᠷᠢᠭ ᠦ᠋ᠳ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠪᠡᠯᠡᠳᠬᠡᠵᠦ ᠥᠨᠳᠥᠷᠯᠢᠭ ᠭᠠᠵᠠᠷ ᠢ᠋ ᠰᠣᠩᠭᠣᠵᠠᠢ᠃ ᠴᠡᠷᠢᠭ ᠦ᠋ᠳ ᠰᠥᠨᠢ ᠶ᠋ᠢᠨ ᠭᠡᠭᠡᠨ ᠳ᠋ᠦ᠍ ᠠᠶᠠ ᠳᠠᠭᠤᠤ ᠶ᠋ᠢᠨ ᠡᠭᠡᠰᠢᠭ ᠢ᠋ ᠰᠣᠨᠣᠰᠴᠤ᠂ ᠪᠦᠦᠳᠡᠭᠡᠷ ᠮᠠᠨᠠᠨ ᠲᠠᠲᠠᠬᠤ ᠳ᠋ᠤ᠌ ᠨᠤᠲᠤᠭ ᠢ᠋ᠶ᠋ᠠᠨ ᠦᠭᠡᠢᠯᠡᠨᠡ᠃
ᠬᠠᠭᠠᠨ ᠤ᠋ ᠠᠰᠠᠷ ᠲᠤ᠌ ᠬᠣᠣᠰ ᠬᠣᠣᠰ ᠢ᠋ᠶ᠋ᠠᠷ ᠵᠤᠯᠠ ᠠᠰᠠᠭᠠᠵᠠᠢ᠃ ᠵᠤᠯᠠ ᠶ᠋ᠢᠨ ᠰᠢᠷᠠ ᠲᠤᠶᠠᠭᠠ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠰᠡᠭᠦᠳᠡᠷ ᠦᠭᠡᠢ ᠭᠡᠷᠡᠯᠲᠦᠭᠦᠯᠬᠦ ᠨᠢ ᠭᠠᠯᠳᠠᠨ ᠬᠠᠭᠠᠨ ᠳ᠋ᠤ᠌ ᠥᠨᠳᠥᠷ ᠭᠡᠭᠡᠨ ᠦ᠌ ᠯᠤᠤᠰ ᠤ᠋ᠨ ᠬᠠᠷᠰᠢ ᠶ᠋ᠢ ᠰᠠᠨᠠᠭᠳᠠᠭᠤᠯᠤᠨᠠ᠃ ᠮᠥᠨ ᠲᠥᠪᠡᠳ ᠦ᠋ᠨ ᠲᠠᠰᠢᠯᠠᡁᠠᠮᠤ ᠬᠡᠢᠳ ᠦ᠋ᠨ ᠶᠡᠬᠡ ᠳᠤᠭᠠᠩ ᠢ᠋ ᠪᠣᠳᠣᠭᠳᠠᠭᠤᠯᠤᠨᠠ᠃ ᠠᠰᠠᠷ ᠲᠤ᠌ ᠨᠠᠢᠷᠯᠠᠨ ᠪᠦᠬᠦᠢ ᠶᠡᠬᠡᠰ ᠳᠡᠭᠡᠳᠦᠰ ᠮᠣᠩᠭᠣᠯᠴᠤᠳ ᠨᠢᠭᠡᠨ ᠳᠡᠭᠡᠪᠦᠷ ᠳᠣᠣᠷᠠ ᠮᠥᠩᠬᠡᠲᠡ ᠣᠷᠣᠰᠢᠬᠤ ᠶ᠋ᠢᠨ ᠪᠡᠯᠭᠡᠳᠡᠯ ᠢ᠋ ᠰᠠᠨᠠᠨ ᠮᠥᠷᠥᠭᠡᠳᠦᠭᠰᠡᠨ ᠦ᠌ ᠬᠢ ᠪᠠᠢᠯᠠ᠃ ᠲᠡᠳᠡᠨ ᠦ᠌ ᠤᠷᠲᠤ ᠶ᠋ᠢᠨ ᠳᠠᠭᠤᠤ᠂ ᠲᠣᠪᠰᠢᠭᠤᠷ ᠬᠤᠭᠤᠷ ᠤ᠋ᠨ ᠤᠶᠠᠩᠭᠠ᠂ ᠲᠤᠤᠯᠢ ᠬᠠᠢᠯᠠᠬᠤ ᠬᠠᠬᠢᠷᠤᠭᠰᠠᠨ ᠴᠢᠮᠡᠭᠡ ᠨᠢ ᠰᠡᠷᠡᠵᠦ ᠪᠣᠢ ᠭᠤᠨᠢᠭ ᠤ᠋ᠨ ᠠᠶᠠᠯᠭᠤ ᠪᠢᠯᠡ᠃
ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳᠡᠭᠡᠭᠦᠷ ᠠᠯᠤᠰᠯᠠᠨ ᠣᠳᠬᠤ ᠠᠶᠠᠯᠭᠤ ᠠᠭᠤᠵᠢᠷᠠᠨ ᠴᠡᠭᠡᠯᠰᠢᠵᠦ ᠬᠣᠯᠠᠳᠤᠨᠠ᠃ ᠲᠡᠷᠡ ᠠᠶᠠᠯᠭᠤ ᠪᠤᠷᠬᠠᠨ ᠬᠠᠯᠳᠤᠨ ᠠᠭᠤᠯᠠ ᠶ᠋ᠢᠨ ᠵᠦᠭ ᠡᠴᠡ ᠡᠷᠭᠢᠵᠦ ᠬᠣᠷᠭᠣᠨᠠ᠃ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠡᠷᠭᠢᠵᠦ ᠶᠠᠪᠤᠭᠰᠠᠨ ᠳᠠᠨᠵᠢᠯᠠ ᠪᠠᠭᠠᠲᠤᠷ ᠳᠠᠭᠠᠭᠤᠯᠢ ᠤ᠋ᠳ ᠲᠠᠭᠠᠨ᠂
— ᠬᠠᠭᠠᠨ ᠰᠠᠢᠬᠠᠨ ᠳᠠᠭᠤᠯᠠᠳᠠᠭ ᠠᠵᠢ᠃ ᠲᠡᠭᠦᠨ ᠦ᠌ ᠳᠠᠭᠤᠯᠠᠬᠤ ᠶ᠋ᠢ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠦᠭᠡᠢ ᠭᠡᠬᠦ ᠳ᠋ᠦ᠍ ᠮᠣᠷᠢ ᠪᠠᠨ ᠤᠰᠤᠯᠠᠵᠤ ᠵᠣᠭᠰᠣᠭᠰᠠᠨ ᠨᠢᠭᠡᠨ ᠡᠷᠡ᠂
— ᠭᠤᠨᠢᠭ ᠲᠠᠢ ᠬᠥᠮᠦᠨ ᠯᠡ ᠳᠠᠭᠤᠯᠠᠳᠠᠭ ᠰᠢᠦ ᠳᠡ ᠭᠡᠬᠦ ᠮᠥᠷᠲᠡᠭᠡᠨ ᠠᠭᠤᠯᠠ ᠶ᠋ᠢᠨ ᠬᠠᠷᠭᠢᠶᠠ ᠶᠡᠬᠡᠲᠡᠢ ᠤᠰᠤ ᠰᠢᠮᠡᠳᠡᠭ ᠠᠳᠤᠭᠤ ᠲᠣᠭᠲᠠᠭᠤᠨ ᠤᠰᠤᠨ ᠠ᠋ᠴᠠ ᠣᠯᠢᠭ ᠲᠠᠢ ᠤᠤᠭᠤᠬᠤ ᠦᠭᠡᠢ ᠶᠤᠮ ᠭᠡᠵᠦ ᠨᠡᠮᠡᠵᠦ ᠬᠡᠯᠡᠪᠡ᠃ ᠬᠡᠭᠡᠷᠡ ᠶ᠋ᠢᠨ ᠠᠰᠠᠷ ᠲᠤ᠌ ᠳᠠᠭᠤᠯᠠᠯᠳᠤᠬᠤ ᠪᠥᠯᠥᠭᠡ᠃
ᠠᠷᠪᠠ ᠶᠢᠰᠦ
ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠳᠡᠭᠡᠷᠡ ᠡᠴᠡ ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠠᠯᠠᠭᠠᠨ ᠳᠡᠭᠡᠷᠡ ᠮᠡᠲᠦ ᠬᠠᠷᠠᠭᠳᠠᠬᠤ ᠪᠥᠯᠥᠭᠡ᠃
ᠵᠡᠭᠦᠨᠭᠠᠷ ᠤ᠋ᠨ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠲᠡᠷᠡᠯᠵᠢ ᠶ᠋ᠢᠨ ᠵᠠᠭᠤᠨ ᠮᠣᠳᠣ ᠮᠡᠲᠦ ᠳᠡᠷᠡᠰᠦᠨ ᠲᠦᠩ᠂ ᠤᠰᠤ ᠮᠣᠳᠣ ᠲᠠᠢ ᠵᠠᠳᠠᠭᠠᠢ ᠭᠠᠵᠠᠷ ᠲᠤ᠌ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠲᠡᠢ ᠤᠤᠬᠠᠢᠯᠠᠨ ᠲᠤᠯᠤᠯᠳᠤᠪᠠ᠃ ᠰᠢᠬᠠᠭᠠ ᠳ᠋ᠤ᠌ ᠣᠷᠣᠭᠰᠠᠨ ᠮᠠᠨᠵᠤ ᠴᠡᠷᠢᠭ ᠦ᠋ᠳ ᠳᠠᠪᠬᠤᠷᠯᠠᠨ ᠤᠨᠠᠪᠠᠴᠤ ᠨᠡᠮᠡᠭᠳᠡᠭᠰᠡᠭᠡᠷ ᠠᠵᠢ᠃ ᠰᠢᠷᠭᠤᠯᠵᠢ ᠮᠡᠲᠦ ᠣᠯᠠᠨ ᠴᠡᠷᠢᠭ ᠲᠡᠢ ᠪᠠᠢᠪᠠ᠃
ᠭᠠᠯᠳᠠᠨ ᠬᠠᠭᠠᠨ ᠠᠨᠤ ᠬᠠᠲᠤᠨ ᠬᠣᠶᠠᠭᠤᠯᠠ ᠪᠠᠨ ᠰᠣᠷᠢᠨᠵᠢᠨ ᠮᠡᠲᠦ ᠲᠤᠯᠤᠯᠳᠤᠭᠠᠨ ᠤ᠋ ᠭᠠᠯ ᠳ᠋ᠤ᠌ ᠲᠠᠲᠠᠭᠳᠠᠨ ᠣᠷᠣᠵᠤ ᠴᠠᠪᠴᠢᠯᠳᠤᠨ ᠬᠠᠳᠬᠤᠯᠳᠤᠪᠠ᠃
ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠢᠯᠡᠭᠦᠦ ᠬᠣᠬᠢᠷᠠᠯ ᠠᠮᠰᠠᠵᠤ ᠨᠢᠭᠡᠨ ᠳᠣᠪᠣᠴᠠᠭ ᠥᠭᠡᠳᠡ ᠤᠬᠤᠷᠢᠵᠤ ᠭᠠᠷᠲᠠᠯᠠ ᠰᠠᠪᠳᠠᠨᠵᠠᠯ ᠡᠮᠡᠭᠲᠡᠢ ᠪᠠᠭᠠᠲᠤᠷ ᠤ᠋ᠨ ᠬᠤᠪᠴᠠᠰᠤ ᠪᠠᠷ ᠨᠢ ᠠᠨᠤ ᠬᠠᠲᠤᠨ ᠢ᠋ ᠬᠠᠢᠭᠰᠠᠭᠠᠷ ᠣᠯᠵᠤ ᠠᠪᠤᠭᠠᠳ ᠦᠬᠦᠯ ᠦ᠋ᠨ ᠰᠤᠮᠤ ᠲᠠᠯᠪᠢᠵᠠᠢ᠃
ᠲᠡᠷᠡ ᠰᠤᠮᠤ ᠠᠨᠤ ᠬᠠᠲᠤᠨ ᠤ᠋ ᠵᠢᠷᠦᠬᠡᠨ ᠳ᠋ᠦ᠍ ᠵᠣᠭᠣᠭᠳᠠᠪᠠ᠃ ᠡᠨᠡ ᠶᠠᠪᠤᠳᠠᠯ ᠳᠠᠨᠵᠢᠯᠠ ᠶ᠋ᠢᠨ ᠨᠢᠳᠦᠨ ᠡᠴᠡ ᠭᠠᠷᠤᠭᠰᠠᠨ ᠦᠭᠡᠢ᠃ ᠳᠠᠨᠵᠢᠯᠠ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠵᠠᠢ᠃
ᠠᠨᠤ ᠬᠠᠲᠤᠨ ᠤ᠋ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠨᠢᠳᠦ ᠬᠠᠷᠠᠭᠠ ᠲᠠᠢ ᠬᠡᠪ ᠢ᠋ᠶ᠋ᠡᠷ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠴᠡᠭᠡᠵᠢ ᠶ᠋ᠢ ᠳᠡᠷᠡᠯᠡᠨ ᠠᠮᠢᠰᠬᠤᠯ ᠬᠤᠷᠢᠶᠠᠪᠠ᠃ ᠬᠠᠭᠠᠨ ᠨᠢᠳᠦ ᠶ᠋ᠢ ᠨᠢ ᠳᠠᠷᠤᠯᠠ᠃ ᠰᠡᠪᠳᠡᠨᠵᠡᠯ ᠢ᠋ ᠳᠠᠨᠵᠢᠯᠠ ᠪᠠᠭᠠᠲᠤᠷ ᠪᠤᠭᠤᠢᠯᠢᠳᠠᠵᠤ ᠬᠠᠷᠠ ᠮᠣᠳᠣᠨ ᠳ᠋ᠤ᠌ ᠬᠦᠯᠢᠭᠡᠳ ᠲᠣᠯᠣᠭᠠᠢ ᠶ᠋ᠢ ᠨᠢ ᠴᠠᠪᠴᠢᠪᠠ᠃
ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠬᠡᠭᠡᠷᠡ ᠶ᠋ᠢᠨ ᠮᠠᠢᠬᠠᠨ ᠳ᠋ᠠᠭᠠᠨ ᠭᠤᠷᠪᠠᠨ ᠬᠣᠨᠣᠭ ᠭᠠᠰᠢᠭᠤᠳᠠᠨ ᠳᠠᠭᠤ ᠪᠠᠨ ᠬᠤᠷᠢᠶᠠᠪᠠ᠃ ᠠᠨᠤ ᠬᠠᠲᠤᠨ ᠢ᠋ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠣᠷᠣᠰᠢᠭᠤᠯᠪᠠ᠃ ᠠᠨᠤ ᠬᠠᠲᠤᠨ ᠲᠣᠭᠣᠨᠣ ᠠᠭᠤᠯᠠ ᠳ᠋ᠤ᠌ ᠮᠥᠩᠬᠡᠳᠡ ᠠᠮᠤᠭᠤᠯᠠᠩ ᠦᠯᠡᠳᠡᠵᠡᠢ᠃ ᠭᠠᠯᠳᠠᠨ ᠬᠠᠭᠠᠨ ᠪᠤᠲᠠ ᠴᠣᠬᠢᠭᠳᠠᠵᠤ ᠰᠠᠷᠨᠢᠭᠰᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠡᠮᠬᠢᠯᠡᠵᠦ ᠨᠤᠲᠤᠭ ᠤ᠋ᠨ ᠵᠦᠭ ᠬᠥᠳᠡᠯᠪᠡ᠃
ᠭᠠᠯᠳᠠᠨ ᠬᠠᠭᠠᠨ ᠢ᠋ ᠰᠦᠯᠳᠡ ᠬᠢᠭᠢᠷᠢ ᠪᠡᠨ ᠮᠠᠨᠳᠤᠭᠤᠯᠤᠨ ᠣᠳᠬᠤ ᠳ᠋ᠤ᠌ ᠦᠯᠳᠡ ᠬᠥᠭᠡᠭᠡᠵᠦ᠂ ᠬᠡᠰᠡᠭ ᠪᠤᠰᠠᠭ ᠲᠤᠯᠤᠯᠳᠤᠭᠠᠨ ᠪᠣᠯᠤᠭᠰᠠᠭᠠᠷ ᠪᠠᠢᠯᠠ᠃ ᠭᠠᠯᠳᠠᠨ ᠬᠠᠭᠠᠨ《ᠮᠠᠨᠵᠤ ᠳ᠋ᠤ᠌ ᠳᠠᠭᠠᠷᠠ ᠣᠷᠣᠬᠤ ᠦᠭᠡᠢ᠂ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠡᠮᠦᠨᠡ ᠬᠡᠵᠢᠶᠡ ᠴᠦ᠍ ᠪᠥᠬᠥᠢᠬᠦ ᠦᠭᠡᠢ》 ᠭᠡᠰᠡᠨ ᠬᠠᠲᠠᠭᠤ ᠪᠣᠳᠣᠯ ᠢ᠋ᠶ᠋ᠠᠨ ᠭᠦᠢᠴᠡᠭᠡᠬᠦ ᠭᠡᠰᠡᠨ ᠰᠢᠭ ᠳᠣᠪᠲᠣᠯᠭᠠᠨᠠ᠃
ᠲᠣᠭᠣᠨᠣ ᠠᠭᠤᠯᠠᠨ ᠳ᠋ᠤ᠌ ᠬᠠᠭᠠᠨ ᠡᠷᠭᠦᠮᠵᠢᠯᠡᠬᠦ ᠶᠣᠰᠣᠯᠠᠯ ᠦᠢᠯᠡᠳᠴᠦ᠂ ᠶᠠᠰᠤᠲᠤ ᠮᠡᠯᠡᠬᠡᠢ ᠭᠢᠰᠬᠢᠭᠦᠯᠵᠦ ᠵᠠᠯᠪᠠᠷᠢᠯ ᠬᠢᠭᠰᠡᠨ ᠥᠨᠳᠥᠷᠯᠢᠭ ᠨᠢ ᠠᠨᠤ ᠬᠠᠲᠤᠨ ᠤ᠋ ᠮᠥᠩᠬᠡ ᠶ᠋ᠢᠨ ᠠᠮᠢ ᠣᠷᠣᠰᠢᠬᠤ ᠨᠤᠲᠤᠭ ᠪᠠᠢᠪᠠ᠃ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠵᠦᠩ ᠰᠤᠪᠢᠨ ᠶᠠᠰᠤᠲᠤ ᠮᠡᠯᠡᠬᠡᠢ ᠶ᠋ᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠠᠶᠠᠵᠢᠵᠤ《ᠠᠳᠠ ᠯᠤᠤᠰ ᠬᠥᠳᠡᠯᠦᠨᠡ》 ᠭᠡᠮᠡᠨ ᠥᠭᠦᠯᠡᠵᠦ ᠪᠠᠢᠵᠠᠢ᠃ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷ ᠨᠤᠲᠤᠭ ᠠᠨᠤ ᠬᠠᠲᠤᠨ ᠢ᠋ ᠰᠢᠩᠭᠡᠭᠡᠵᠦ ᠯᠤᠤᠰ ᠤ᠋ᠨ ᠢᠪᠡᠭᠡᠯ ᠳ᠋ᠦ᠍ ᠪᠠᠭᠲᠠᠭᠠᠭᠰᠠᠨ ᠶᠤᠮ᠃ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠰᠠᠯᠬᠢ ᠪᠤᠷᠬᠠᠨ ᠬᠠᠯᠳᠤᠨ ᠲᠡᠢᠰᠢ ᠰᠠᠯᠬᠢᠯᠠᠨᠠ᠃ ᠣᠢᠷᠠᠳ ᠨᠤᠲᠤᠭ ᠤ᠋ᠨ ᠡᠭᠦᠯᠡᠰ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠳᠡᠭᠡᠷᠡ ᠬᠤᠷᠠ ᠪᠠᠨ ᠠᠰᠬᠠᠵᠤ ᠨᠡᠭᠦᠳᠡᠯᠯᠡᠨ ᠶᠠᠪᠤᠭᠠ ᠶᠠᠰᠤᠲᠤ ᠮᠡᠯᠡᠬᠡᠢ ᠯᠦ᠍ᠭᠡ ᠠᠭᠠᠵᠢᠮᠬᠠᠨ ᠬᠤᠢᠯᠠᠷᠠᠵᠤ᠂ ᠵᠦᠰᠡᠷᠡᠭᠡ ᠪᠣᠷᠣᠭᠠ ᠪᠠᠷ ᠢ᠋ᠶ᠋ᠠᠨ ᠡᠷᠭᠢᠵᠦ ᠱᠠᠪᠰᠢᠨᠠ᠃ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢᠨ ᠤᠷᠭᠤᠮᠠᠯ ᠨᠣᠭᠣᠭᠠ ᠶ᠋ᠢᠨ ᠦᠨᠳᠦᠰᠦ ᠲᠤᠤᠯᠠ ᠶ᠋ᠢᠨ ᠴᠡᠩᠬᠡᠷ ᠤᠰᠤ ᠪᠠᠷ ᠲᠥᠯᠵᠢᠵᠦ᠂ ᠨᠠᠮᠤᠷ ᠴᠠᠭ ᠤ᠋ᠨ ᠤᠷᠲᠤ ᠳ᠋ᠤ᠌ ᠪᠢᠲᠡᠭᠦᠦ ᠠᠭᠢ ᠰᠢᠪᠠᠭ ᠲᠤ᠌ ᠣᠷᠢᠶᠠᠴᠠᠯᠳᠤᠨ ᠪᠥᠮᠪᠥᠢᠲᠡᠯᠡ ᠬᠤᠴᠢᠨᠠ᠃ ᠨᠣᠭᠣᠭᠠ ᠳ᠋ᠤ᠌ ᠬᠤᠴᠢᠭᠠᠰᠤᠲᠠᠢ ᠲᠣᠭᠣᠨᠣ ᠠᠭᠤᠯᠠ ᠲᠥᠪ ᠬᠠᠯᠬᠠ ᠶ᠋ᠢᠨ ᠶᠡᠬᠡ ᠬᠡᠭᠡᠷᠡ ᠲᠠᠯᠠ ᠨᠤᠲᠤᠭ᠂ ᠬᠠᠩᠭᠠᠢ ᠶ᠋ᠢᠨ ᠲᠦᠩᠬᠦᠢᠭᠰᠡᠨ ᠨᠢᠷᠤᠭᠤᠳ ᠳᠤᠮᠳᠠ ᠰᠦᠮᠡᠢᠭᠰᠡᠭᠡᠷ ᠬᠣᠴᠣᠷᠤᠯᠠ᠃ ᠭᠠᠯᠳᠠᠨ ᠬᠠᠭᠠᠨ《ᠪᠢ ᠵᠢᠷᠦᠬᠡ ᠪᠡᠨ ᠣᠷᠣᠰᠢᠭᠤᠯᠪᠠ᠃ ᠵᠢᠯ ᠪᠦᠷᠢ ᠶ᠋ᠢᠨ ᠨᠠᠮᠤᠷ ᠤ᠋ᠨ ᠬᠡᠨᠵᠡ ᠨᠣᠭᠣᠭᠠ ᠪᠠᠷ ᠲᠣᠭᠣᠨᠣ ᠠᠭᠤᠯᠠ ᠶ᠋ᠢ ᠲᠠᠬᠢᠬᠤ ᠶᠣᠰᠣᠲᠠᠢ》 ᠭᠡᠵᠦ ᠯᠠᠮᠠ ᠭᠠᠯᠳᠠᠨ ᠳ᠋ᠠᠭᠠᠨ ᠥᠭᠦᠯᠡᠪᠡ᠃
ᠬᠣᠷᠢ
ᠠᠯᠲᠠᠢ ᠬᠠᠨ ᠤ᠋ ᠰᠦᠷᠯᠢᠭ ᠣᠷᠭᠢᠯ ᠤ᠋ᠨ ᠨᠢᠭᠡᠨ ᠲᠣᠮᠣ ᠠᠭᠤᠢ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠢᠷᠡᠭᠡᠳ ᠭᠠᠯᠳᠠᠨ ᠬᠠᠭᠠᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠯᠠ᠃ ᠳᠠᠨᠵᠢᠯᠠ ᠵᠠᠩᠵᠤᠨ ᠳᠥᠷᠥᠭᠡ ᠮᠤᠯᠲᠦᠯᠡᠪᠡ᠃ ᠪᠠᠭ ᠴᠡᠷᠢᠭ ᠦ᠋ᠳ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠮᠣᠷᠢ ᠲᠠᠢ ᠪᠠᠨ ᠰᠡᠬᠦᠢᠨ ᠵᠣᠭᠰᠣᠨᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ᠂
— ᠳᠠᠨᠵᠢᠯᠠ! ᠮᠢᠨᠦ ᠯᠠᠮᠠ ᠬᠤᠪᠴᠠᠰᠤ ᠶ᠋ᠢ ᠠᠪᠤᠭᠠᠳ ᠢᠷᠡ ᠭᠡᠪᠡ᠃ ᠭᠠᠯᠳᠠᠨ ᠯᠠᠮᠠ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠯᠡ᠃ ᠲᠡᠷᠡ ᠪᠡᠷ ᠮᠠᠷᠲᠠᠭᠰᠠᠨ ᠶᠠᠭᠤᠮᠠ ᠶᠠᠭᠤ ᠪᠢᠯᠡ ᠭᠡᠰᠡᠨ ᠰᠢᠭ ᠡᠢᠰᠢ ᠲᠡᠢᠰᠢ ᠬᠠᠷᠠᠭᠠᠴᠢᠯᠠᠪᠠ᠃
— ᠭᠠᠯ ᠠᠰᠠᠭᠠ! ᠭᠡᠵᠦ ᠳᠠᠨᠵᠢᠯᠠ ᠬᠠᠰᠬᠢᠷᠤᠯᠠ᠃
ᠠᠭᠤᠯᠠ ᠶ᠋ᠢᠨ ᠣᠷᠭᠢᠯ ᠨᠢ ᠪᠠᠯ ᠬᠣᠷᠮᠣᠢ ᠲᠠᠢ ᠪᠠᠨ ᠵᠠᠯᠭᠠᠳᠠᠭ ᠴᠠᠰᠤᠨ ᠤ᠋ ᠬᠥᠯ ᠳ᠋ᠦ᠍ ᠠᠰᠤᠷᠤ ᠲᠣᠮᠣ ᠭᠠᠯ ᠲᠦᠷᠳᠦᠵᠦ᠂ ᠲᠡᠷᠡ ᠬᠦ᠌ ᠭᠠᠯ ᠤ᠋ᠨ ᠪᠠᠳᠮᠠᠯᠠᠬᠤ ᠳᠥᠯᠥ ᠳ᠋ᠦ᠍ ᠲᠡᠭᠦᠨ ᠦ᠌ ᠴᠠᠭᠠᠨᠠ ᠣᠷᠣᠰᠢᠬᠤ ᠴᠠᠰᠤ ᠮᠥᠰᠥ ᠬᠥᠯᠲᠡᠨ ᠨᠠᠮᠢᠯᠵᠠᠵᠤ᠂ ᠦᠶᠡᠯᠵᠡᠨ ᠳᠣᠯᠭᠢᠶᠠᠯᠠᠵᠤ ᠡᠬᠢᠯᠡᠪᠡ᠃ ᠭᠠᠯ ᠢ᠋ ᠲᠣᠭᠣᠷᠢᠵᠤ ᠬᠦᠷᠡᠩ ᠴᠢᠷᠠᠢ ᠲᠠᠢ᠂ ᠤᠯᠠᠭᠠᠨ ᠨᠢᠳᠦ ᠲᠡᠢ᠂ ᠵᠡᠪᠰᠡᠭ ᠠᠭᠰᠠᠭᠰᠠᠨ ᠣᠢᠷᠠᠳ ᠤ᠋ᠨ ᠪᠠᠭᠠᠲᠤᠷ ᠡᠷᠡᠰ ᠳᠤᠭᠤᠢᠷᠠᠵᠤ ᠵᠣᠭᠰᠣᠨᠠ᠃
— ᠡᠯᠴᠢ ᠢᠷᠡᠯᠡ᠁ ᠭᠡᠵᠦ ᠬᠣᠯᠠ ᠠ᠋ᠴᠠ ᠬᠠᠰᠬᠢᠷᠪᠠ᠃ ᠭᠠᠯᠳᠠᠨ ᠬᠠᠭᠠᠨ ᠡᠯᠴᠢ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃ ᠯᠠᠮᠠ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠠᠭᠠᠨ ᠤ᠋ ᠡᠮᠦᠨᠡ ᠡᠯᠴᠢ ᠮᠥᠷᠭᠥᠨ ᠰᠥᠬᠥᠷᠡᠪᠡ᠃ ᠡᠯᠴᠢ ᠲᠣᠯᠣᠭᠠᠢ ᠥᠨᠳᠡᠢᠯᠭᠡᠵᠦ ᠲᠣᠷᠵᠢᠭᠢᠨᠠᠭᠤᠯᠤᠨ᠂
— ᠣᠢᠷᠠᠳ ᠢ᠋ ᠴᠠᠸᠠᠩᠷᠠᠪᠳᠠᠨ ᠵᠠᠬᠢᠷᠬᠤ ᠪᠣᠯᠤᠭᠰᠠᠨ᠃ ᠲᠠᠨ ᠢ᠋ ᠨᠤᠲᠤᠭ ᠠ᠋ᠴᠠ ᠪᠠᠨ ᠭᠠᠷᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠴᠠᠸᠠᠩᠷᠠᠪᠳᠠᠨ ᠬᠠᠭᠠᠨ ᠰᠠᠭᠤᠵᠠᠢ᠃ ᠣᠳᠣ ᠲᠠᠨ ᠢ᠋ ᠲᠣᠰᠴᠤ ᠴᠣᠬᠢᠨᠠ ᠭᠡᠮᠡᠨ ᠬᠦᠯᠢᠶᠡᠵᠦ ᠪᠠᠢᠨᠠ ᠭᠡᠪᠡ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠢᠨᠢᠶᠡᠮᠰᠦᠭᠯᠡᠵᠦ᠂
— ᠮᠢᠨᠦ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠡᠵᠡᠨ ᠲᠡᠢ ᠪᠣᠯᠵᠠᠢ᠃ ᠴᠠᠸᠠᠩᠷᠠᠪᠳᠠᠨ ᠬᠠᠭᠠᠨ ᠰᠠᠭᠤᠳᠠᠭ ᠨᠢ ᠵᠥᠪ᠃ ᠮᠢᠨᠦ ᠣᠢᠷᠠᠳ ᠨᠤᠲᠤᠭ ᠡᠵᠡᠨ ᠲᠡᠢ ᠬᠣᠢᠨᠠ ᠪᠢ ᠲᠠᠢᠪᠤᠰᠢᠷᠠᠯᠠ᠃ ᠴᠡᠸᠠᠩᠷᠠᠪᠳᠠᠨ ᠮᠠᠨᠵᠤ ᠳ᠋ᠤ᠌ ᠪᠥᠬᠥᠢᠬᠦ ᠬᠥᠮᠦᠨ ᠪᠢᠰᠢ ᠭᠡᠮᠡᠨ ᠭᠠᠯᠳᠠᠨ ᠳᠥᠯᠥ ᠮᠡᠲᠦ ᠳᠦᠷᠡᠯᠵᠡᠨ ᠪᠣᠢ ᠠᠭᠤᠯᠠ ᠳ᠋ᠠᠭᠠᠨ ᠵᠠᠯᠪᠠᠷᠢᠪᠠ᠃
ᠭᠠᠯᠳᠠᠨ ᠬᠠᠭᠠᠨ ᠴᠡᠷᠢᠭ ᠦ᠋ᠨ ᠲᠣᠭᠰᠢᠨ ᠬᠠᠷᠠ ᠰᠦᠯᠳᠡ ᠶ᠋ᠢ ᠠᠪᠴᠢᠷᠠᠭᠤᠯᠪᠠ᠃ ᠲᠣᠭᠰᠢᠨ ᠬᠠᠷᠠ ᠰᠦᠯᠳᠡ ᠶ᠋ᠢ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠰᠢᠨᠳᠠᠰᠤᠲᠤ ᠬᠦᠯᠦᠭ ᠦ᠋ᠨ ᠵᠣ ᠳ᠋ᠤ᠌ ᠡᠷᠭᠦᠵᠦ ᠪᠠᠢᠯᠠ᠃ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠦ᠌ ᠬᠠᠷᠠᠴᠠ ᠨᠢ ᠰᠢᠢᠳᠮᠡᠭ᠂ ᠬᠦᠯᠦᠭ ᠨᠢ ᠰᠢᠨᠳᠠᠰᠤ ᠲᠠᠢ᠂ ᠰᠡᠯᠡᠮᠡ ᠨᠢ ᠢᠷ ᠲᠡᠢ ᠪᠢᠯᠡ᠃ ᠬᠠᠭᠠᠨ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠪᠣᠰᠴᠤ ᠳᠣᠭᠰᠢᠨ ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠣᠮᠠᠨ ᠰᠢᠷᠬᠡᠭ ᠲᠦ᠍ ᠨᠠᠮᠢᠷᠠᠭᠰᠠᠨ ᠤᠷᠲᠤ ᠰᠠᠭᠠᠭ ᠠ᠋ᠴᠠ ᠠᠳᠬᠤᠵᠤ ᠮᠠᠩᠨᠠᠢ ᠳ᠋ᠠᠭᠠᠨ ᠬᠦᠷᠭᠡᠭᠡᠳ ᠥᠭᠦᠯᠡᠷᠦᠨ᠂
— ᠳᠣᠭᠰᠢᠨ ᠬᠠᠷᠠ ᠰᠦᠯᠳᠡ ᠲᠤᠭ ᠢ᠋ ᠴᠡᠸᠡᠩᠷᠠᠪᠳᠠᠨ ᠬᠠᠭᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠲᠤᠰᠢᠶᠠᠭᠲᠤᠨ!
ᠬᠠᠷᠠ ᠰᠦᠯᠳᠡ ᠳ᠋ᠦ᠍ ᠣᠢᠷᠠᠳ ᠤ᠋ᠨ ᠭᠤᠴᠢᠨ ᠮᠢᠩᠭᠠᠨ ᠪᠠᠭᠠᠲᠤᠷ ᠡᠷᠡ ᠶ᠋ᠢᠨ ᠰᠦᠨᠡᠰᠦ ᠰᠢᠩᠭᠡᠭᠰᠡᠨ ᠶᠤᠮ᠃ ᠬᠠᠷᠠ ᠰᠦᠯᠳᠡ ᠶᠢᠷᠲᠢᠨᠴᠦ ᠶ᠋ᠢᠨ ᠨᠠᠷᠠ ᠰᠠᠷᠠᠨ ᠤ᠋ ᠲᠣᠬᠢᠶᠠᠯ ᠳ᠋ᠤ᠌ ᠪᠥᠬᠥᠢᠬᠦ ᠶᠣᠰᠣ ᠦᠭᠡᠢ ᠰᠢᠦ᠃ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ᠂ ᠵᠠᠭᠤᠲᠤ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠴᠡᠸᠡᠩᠷᠠᠪᠳᠠᠨ ᠬᠠᠭᠠᠨ ᠳ᠋ᠤ᠌ ᠵᠢᠳᠬᠦ᠃ ᠴᠡᠷᠢᠭ ᠡᠷᠡ ᠶ᠋ᠢᠨ ᠨᠡᠷᠡ ᠲᠥᠷᠥ ᠪᠡᠨ ᠡᠷᠬᠢᠮᠯᠡᠵᠦ ᠶᠠᠪᠤᠭᠲᠤᠨ! ᠭᠡᠯᠡ᠃ ᠳᠥᠷᠪᠡᠯᠵᠢᠨ ᠴᠡᠭᠡᠵᠢ ᠲᠡᠢ᠂ ᠭᠦᠳᠦᠰ ᠦᠭᠡ ᠲᠡᠢ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ᠂
—ᠬᠠᠭᠠᠨ ᠲᠠᠨ ᠤ᠋ ᠵᠠᠷᠯᠢᠭ ᠢ᠋ ᠶᠣᠰᠣᠴᠢᠯᠠᠨ ᠭᠦᠢᠴᠡᠳᠬᠡᠶᠡ ᠭᠡᠵᠡᠢ᠃
ᠦᠰᠬᠦᠯᠡᠬᠦᠨ ᠪᠡᠶᠡ ᠲᠡᠢ᠂ ᠦᠷᠦ ᠵᠥᠭᠡᠯᠡᠨ ᠲᠡᠢ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠦ᠌ ᠵᠠᠭᠤᠲᠤ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠡᠴᠡ ᠬᠠᠷᠠ ᠰᠦᠯᠳᠡ ᠪᠡᠨ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠬᠡᠨ ᠬᠡᠢᠰᠬᠡᠭᠰᠡᠭᠡᠷ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠵᠦᠭ ᠬᠦᠯᠦᠭ ᠦ᠋ᠨ ᠵᠢᠯᠣᠭᠣ ᠶ᠋ᠢ ᠵᠠᠯᠠᠵᠤ ᠬᠣᠯᠠᠳᠬᠤ ᠳ᠋ᠤ᠌ ᠬᠠᠭᠠᠨ ᠪᠡᠶᠡ ᠲᠠᠯᠪᠢᠭᠤᠷᠠᠨ᠂ ᠰᠡᠳᠬᠢᠯ ᠠᠭᠤᠵᠢᠷᠠᠨ ᠪᠠᠢᠯᠠ᠃ ᠲᠤᠭ ᠰᠦᠯᠳᠡ ᠨᠢ ᠡᠵᠡᠨ ᠳ᠋ᠡᠭᠡᠨ ᠣᠴᠢᠬᠤ ᠪᠠᠷ ᠣᠳᠪᠠ᠃
— ᠡᠯᠴᠢ ᠢᠷᠡᠯᠡ ᠭᠡᠮᠡᠨ ᠬᠣᠯᠠ ᠠ᠋ᠴᠠ ᠳᠠᠬᠢᠨ ᠴᠤᠤᠷᠢᠶᠠᠲᠤᠪᠠ᠃
— ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠠᠨ ᠤ᠋ ᠬᠦᠦ ᠰᠡᠪᠳᠡᠨᠪᠠᠯᠵᠢᠷ ᠢ᠋ ᠬᠣᠷᠣᠭᠠᠪᠠ᠃ ᠬᠠᠨ ᠬᠦᠦ ᠶ᠋ᠢ ᠠᠯᠲᠠᠢ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠨᠤᠲᠤᠭᠯᠠᠭᠤᠯᠪᠠ ᠭᠡᠮᠡᠨ ᠠᠷᠠᠢᠬᠠᠨ ᠬᠡᠯᠡᠭᠡᠳ ᠡᠯᠴᠢ ᠮᠠᠭᠤᠵᠢᠷᠠᠨ ᠤᠨᠠᠯᠠ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ᠂
— ᠠᠨᠤ ᠬᠠᠲᠤᠨ ᠮᠢᠨᠢ ᠦᠨᠡᠨ ᠬᠡᠯᠡᠵᠡᠢ᠃ ᠭᠠᠭᠴᠠ ᠶ᠋ᠢ ᠦᠭᠡᠢ ᠳ᠋ᠦ᠍ ᠪᠣᠳᠣ ᠭᠡᠵᠦ ᠶᠠᠭᠤᠲᠠᠢ ᠭᠠᠰᠢᠭᠤᠨ ᠦᠨᠡᠨ ᠪᠣᠢ? ᠣᠳᠣ ᠨᠠᠳᠠᠳᠤ ᠪᠦᠲᠦᠨ ᠣᠢᠷᠠᠳ ᠨᠤᠲᠤᠭ ᠮᠢᠨᠢ ᠦᠯᠡᠲᠡᠯᠡ᠃ ᠪᠤᠷᠬᠠᠨ ᠭᠤᠶᠤᠭᠰᠠᠨ ᠴᠤ᠌ ᠮᠢᠨᠦ ᠨᠤᠲᠤᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠪᠤᠤ ᠥᠭ! ᠭᠡᠵᠦ ᠬᠣᠢᠲᠤ ᠶ᠋ᠢᠨ ᠤᠳᠤᠮ ᠰᠤᠳᠤᠷ ᠲᠠᠭᠠᠨ ᠲᠡᠮᠳᠡᠭᠯᠡᠵᠦ ᠦᠯᠡᠳᠡᠭᠡᠭᠰᠡᠨ ᠰᠢᠦ ᠭᠡᠳ ᠭᠠᠯᠳᠠᠨ ᠬᠥᠬᠡ ᠲᠩᠷᠢ ᠥᠭᠡᠳᠡ ᠰᠢᠷᠲᠡᠪᠡ᠃
ᠭᠠᠯᠳᠠᠨ ᠬᠠᠭᠠᠨ ᠳᠠᠨᠵᠢᠯᠠ ᠳ᠋ᠤ᠌᠂
— ᠪᠢ ᠣᠳᠣ ᠪᠢᠰᠢᠯᠭᠠᠯ ᠭᠡᠨᠡ᠃ ᠨᠠᠮᠠᠶ᠋ᠢ ᠯᠠᠮᠠ ᠪᠣᠯᠭᠠᠭᠰᠠᠨ ᠨᠢ ᠤᠴᠢᠷᠲᠠᠢ ᠪᠠᠢᠵᠠᠢ᠃ ᠣᠢᠷᠠᠳ ᠤ᠋ᠨ ᠳᠠᠪᠠᠯᠭᠠ ᠤᠯᠠᠮ ᠬᠦᠴᠦᠲᠡᠢ ᠪᠣᠯᠵᠤ ᠴᠣᠷᠣᠰ ᠴᠢᠰᠤᠨ ᠠ᠋ᠴᠠ ᠣᠢᠷᠠᠳ ᠪᠦᠲᠦᠨᠡ᠃ ᠲᠡᠷᠡ ᠰᠠᠢᠬᠠᠨ ᠴᠠᠭ ᠤ᠋ᠨ ᠲᠤᠯᠠᠳᠠ ᠪᠢᠰᠢᠯᠭᠠᠯ ᠬᠢᠬᠦ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠭᠡᠳ ᠲᠡᠭᠦᠨ ᠦ᠌ ᠠᠴᠢ ᠶ᠋ᠢ ᠰᠠᠨᠠᠵᠤ ᠶᠠᠪᠤᠳᠠᠭ ᠢ᠋ᠶ᠋ᠠᠨ ᠭᠠᠯ ᠨᠢ ᠬᠠᠷᠢᠭᠠ ᠦᠭᠡᠢ ᠬᠦᠷᠡᠩ ᠨᠢᠳᠦ ᠪᠠᠷ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠪᠡ᠃
ᠭᠠᠯᠳᠠᠨ ᠯᠠᠮᠠ ᠵᠠᠬᠢᠶᠠᠰᠤ ᠪᠣᠯᠭᠠᠵᠤ᠂
— ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠢᠷᠦᠭᠡᠯᠲᠦ ᠡᠳᠦᠷ ᠮᠢᠨᠦ ᠭᠠᠷ ᠠ᠋ᠴᠠ ᠨᠢᠭᠡᠨ ᠵᠦᠢᠯ ᠢ᠋ ᠠᠪ᠃ ᠮᠢᠨᠦ ᠪᠠᠶᠠᠨ ᠠ᠋ᠴᠠ ᠨᠢᠭᠡᠨ ᠵᠦᠢᠯ ᠢ᠋ ᠪᠠᠰᠠ ᠠᠪ ᠭᠡᠵᠦ ᠵᠠᠬᠢᠯᠠ᠃
ᠳᠠᠨᠵᠢᠯᠠ ᠵᠠᠩᠵᠤᠨ《ᠵᠠ᠂ ᠬᠠᠭᠠᠨᠲᠠᠨ》 ᠭᠡᠪᠡ᠃
ᠡᠳᠦᠷ ᠬᠣᠨᠣᠭ ᠤᠯᠠᠭᠠᠯᠠᠨ ᠣᠳᠴᠤ ᠰᠠᠷᠠ ᠪᠣᠯᠤᠯᠠ᠃ ᠣᠢᠷᠠᠳ ᠤ᠋ᠨ ᠳᠠᠨᠵᠢᠯᠠ ᠲᠡᠷᠢᠭᠦᠲᠡᠢ ᠪᠠᠭᠠᠲᠤᠷ ᠡᠷᠡᠰ ᠠᠯᠲᠠᠢ ᠶ᠋ᠢᠨ ᠬᠢᠵᠠᠭᠠᠷ ᠲᠤ᠌ ᠬᠠᠭᠠᠨ ᠤ᠋ ᠪᠠᠨ ᠲᠣᠪᠯᠠᠭᠰᠠᠨ ᠡᠳᠦᠷ ᠢ᠋ ᠬᠦᠯᠢᠶᠡᠵᠡᠢ᠃
ᠬᠤᠭᠤᠴᠠᠭᠠᠨ ᠤ᠋ ᠤᠷᠲᠤ ᠳ᠋ᠤ᠌ ᠬᠠᠭᠠᠨ ᠤ᠋ ᠴᠡᠩᠬᠡᠷ ᠮᠣᠷᠢ ᠶ᠋ᠢ ᠰᠣᠢᠵᠠᠢ᠃ ᠶᠦᠮ ᠠᠭᠠ ᠬᠠᠲᠤᠨ ᠡᠬᠡ ᠨᠢ ᠨᠤᠲᠤᠭ ᠤ᠋ᠨ ᠣᠭᠣᠷᠴᠣᠭ ᠲᠤᠯᠤᠭᠠᠳ ᠤ᠋ᠨ ᠨᠠᠷᠠᠨ ᠤ᠋ ᠡᠭᠡᠪᠦᠷ ᠡᠩᠭᠡᠷ ᠲᠦ᠍ ᠬᠥᠪᠡᠭᠦᠳ᠂ ᠠᠴᠢ᠂ ᠵᠢᠴᠢ ᠪᠡᠨ ᠬᠠᠷᠠᠭᠤᠯᠳᠠᠨ ᠮᠥᠩᠬᠡ ᠶ᠋ᠢᠨ ᠠᠮᠤᠭᠤᠯᠠᠩ ᠢ᠋ ᠣᠯᠪᠠ᠃ ᠮᠢᠭᠮᠠᠨᠰᠠᠩᠵᠠᠢ ᠴᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠵᠢ ᠶ᠋ᠢ ᠨᠠᠷᠠᠨ ᠳ᠋ᠤ᠌ ᠡᠷᠭᠦᠨᠡ᠃ ᠲᠡᠭᠦᠨ ᠦ᠌ ᠬᠠᠢᠷᠠ ᠡᠨᠡᠷᠢᠯ᠂ ᠲᠦᠢᠳᠬᠡᠷ ᠬᠢᠰᠠᠯ᠂ ᠬᠦᠯᠢᠶᠡᠭᠰᠡᠨ ᠡᠳᠦᠷ ᠦ᠋ᠳ ᠨᠢ ᠳᠡᠮᠪᠡᠷᠢᠯ ᠬᠥᠪᠡᠭᠦᠨ ᠲᠡᠢ ᠴᠣᠭ ᠣᠴᠢᠯᠠ᠃ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠳᠡᠮᠪᠡᠷᠢᠯ ᠡᠬᠡ ᠶ᠋ᠢᠨ ᠥᠯᠮᠡᠢ ᠳ᠋ᠦ᠍ ᠰᠥᠬᠥᠷᠡᠨ᠂
— ᠡᠵᠢ ᠠ᠋᠂ ᠪᠢ ᠴᠡᠸᠡᠩᠷᠠᠪᠲᠠᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠪᠣᠯᠤᠭᠰᠠᠨ᠃ ᠪᠣᠱᠣᠭᠲᠤ ᠬᠠᠭᠠᠨ ᠨᠠᠮᠠᠶ᠋ᠢ ᠰᠦᠯᠳᠡ ᠳ᠋ᠡᠭᠡᠨ ᠪᠠᠭᠲᠠᠭᠠᠭᠰᠠᠨ ᠭᠡᠵᠦ ᠥᠴᠢᠵᠡᠢ᠃《ᠬᠠᠭᠠᠨ ᠤ᠋ ᠰᠦᠯᠳᠡ ᠳ᠋ᠦ᠍ ᠪᠠᠭᠲᠠᠭᠰᠠᠨ ᠪᠣᠯ ᠮᠢᠨᠦ ᠬᠥᠪᠡᠭᠦᠨ ᠠᠯᠵᠢᠶᠠᠬᠤ ᠦᠭᠡᠢ ᠪᠢᠵᠡ᠃ ᠴᠡᠸᠡᠩᠷᠠᠪᠲᠠᠨ ᠪᠣᠯ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠤᠳᠤᠮ᠃ ᠬᠠᠭᠠᠨ ᠤ᠋ ᠤᠳᠤᠮ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠢᠨᠠ》 ᠭᠡᠵᠦ ᠮᠢᠭᠮᠠᠨᠰᠠᠩᠵᠠᠢ ᠪᠣᠳᠣᠭᠠᠳ《ᠬᠥᠮᠦᠨ ᠦ᠌ ᠨᠠᠰᠤ ᠶᠠᠮᠠᠷ ᠣᠬᠣᠷᠬᠠᠨ ᠶᠤᠮ ᠪᠣᠢ? ᠳᠥᠷᠪᠡᠨ ᠤᠯᠠᠷᠢᠯ ᠡᠷᠭᠢᠬᠦ ᠬᠣᠭᠣᠷᠣᠨᠳᠣ ᠥᠲᠡᠯᠴᠢᠬᠡᠨᠡ᠃ ᠣᠢᠷᠠᠳ ᠤ᠋ᠳ ᠣᠳᠣ ᠴᠡᠯ ᠵᠠᠯᠠᠭᠤᠬᠠᠨ ᠪᠣᠯᠴᠢᠬᠠᠯᠠ᠃
ᠬᠠᠷᠠᠭᠰᠠᠨ ᠵᠦᠭ ᠪᠦᠷᠢ ᠳ᠋ᠦ᠍ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠬᠥᠪᠡᠭᠦᠳ ᠳᠠᠪᠬᠢᠯᠳᠤᠨᠠ᠃ ᠠᠭᠤᠯᠠ ᠠᠯᠲᠠᠢ ᠤᠯᠠᠮ ᠰᠦᠷᠯᠢᠭ ᠪᠣᠯᠵᠠᠢ᠃ ᠭᠠᠩᠳᠠᠰᠢ ᠦᠭᠡᠢ ᠥᠩᠭᠡ ᠠᠭᠤᠯᠠᠨ ᠳ᠋ᠤ᠌ ᠪᠠᠢᠳᠠᠭ ᠠᠵᠢ᠃ ᠭᠠᠯᠳᠠᠨ ᠬᠠᠭᠠᠨ ᠤᠭ ᠠ᠋ᠴᠠ ᠪᠠᠨ ᠪᠤᠷᠬᠠᠨ ᠤ᠋ ᠢᠷᠦᠭᠡᠯ ᠲᠡᠢ ᠲᠤᠯᠠ ᠪᠤᠷᠬᠠᠨ ᠳ᠋ᠠᠭᠠᠨ ᠢᠷᠥᠭᠡᠭᠳᠡᠪᠡ᠃ ᠶᠡᠬᠡ ᠬᠠᠭᠠᠨ ᠤ᠋ ᠳᠦᠷᠢ ᠵᠢᠷᠤᠭ ᠬᠥᠬᠡ ᠲᠩᠷᠢ ᠳ᠋ᠦ᠍ ᠣᠷᠣᠰᠢᠳᠠᠭ》 ᠭᠡᠵᠦ ᠰᠦᠰᠦᠭᠯᠡᠪᠡ᠃
ᠬᠣᠷᠢᠨ ᠨᠢᠭᠡ
ᠠᠯᠲᠠᠢ ᠶ᠋ᠢᠨ ᠰᠦᠷᠯᠢᠭ ᠨᠢᠭᠡᠨ ᠣᠷᠭᠢᠯ ᠤ᠋ᠨ ᠣᠷᠣᠢ ᠳ᠋ᠤ᠌ ᠪᠣᠮᠠᠨ ᠴᠡᠩᠬᠡᠷ ᠨᠠᠪᠴᠢᠲᠤ ᠬᠠᠢᠯᠠᠰᠤ ᠤᠷᠭᠤᠭᠰᠠᠨ ᠨᠢ ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠭᠠᠩᠳᠠᠵᠤ ᠴᠠᠭᠠᠨ ᠰᠢᠷᠠ ᠨᠠᠪᠴᠢ ᠲᠠᠢ ᠪᠣᠯᠵᠠᠢ᠃ ᠬᠠᠭᠠᠨ ᠤ᠋ ᠪᠢᠰᠢᠯᠭᠠᠯ ᠤ᠋ᠨ ᠠᠭᠤᠢ ᠶ᠋ᠢᠨ ᠴᠢᠩᠬᠠ ᠳᠡᠭᠡᠷᠡ ᠬᠠᠢᠯᠠᠰᠤ ᠬᠡᠳᠦᠢ ᠳ᠋ᠡᠭᠡᠨ ᠤᠷᠭᠤᠭᠰᠠᠨ ᠢ᠋ ᠳᠠᠨᠵᠢᠯᠠ ᠵᠠᠩᠵᠤᠨ ᠮᠡᠳᠡᠭᠰᠡᠨ ᠦᠭᠡᠢ᠃ ᠳᠠᠨᠵᠢᠯᠠ ᠪᠣᠯ ᠭᠠᠯᠳᠠᠨ ᠤ᠋ ᠦᠶᠡᠯᠢ ᠪᠥᠭᠡᠳ ᠭᠠᠯᠳᠠᠨ ᠳ᠋ᠤ᠌ ᠦᠨᠡᠨᠴᠢ ᠵᠢᠳᠬᠦᠭᠰᠡᠭᠡᠷ ᠣᠢᠷᠠᠳ ᠳᠠᠶᠠᠭᠠᠷ ᠴᠤᠤᠲᠠᠢ ᠴᠤ᠌ ᠡᠴᠦᠰ ᠲᠡᠭᠡᠨ ᠬᠠᠷᠠ ᠰᠦᠯᠳᠡ ᠶ᠋ᠢᠨ ᠲᠠᠬᠢᠯᠴᠢ ᠪᠣᠯᠵᠠᠢ᠃
ᠡᠨᠡ ᠦᠶᠡ ᠳ᠋ᠦ᠍ ᠪᠦᠷᠭᠦᠳ ᠲᠡᠭᠷᠢ ᠳ᠋ᠦ᠍ ᠰᠤᠮᠤ ᠮᠡᠲᠦ ᠴᠣᠢᠯᠤᠨ ᠬᠦᠴᠦᠷᠬᠡᠭ ᠳᠠᠯᠠᠪᠴᠢ ᠪᠠᠨ ᠲᠠᠪᠢᠨ ᠳᠡᠪᠢᠭᠰᠡᠭᠡᠷ ᠴᠠᠭ ᠲᠡᠳᠦᠢ ᠠᠯᠤᠰᠷᠠᠬᠤ ᠠᠭᠱᠠᠨ ᠳ᠋ᠤ᠌ ᠲᠣᠪᠰᠢᠭᠤᠷ ᠤ᠋ᠨ ᠭᠤᠨᠢᠭᠲᠤ ᠠᠶᠠᠯᠭᠤ ᠨᠢᠯᠪᠤᠰᠤ ᠮᠡᠲᠦ ᠲᠠᠷᠢᠬᠢᠨ ᠳ᠋ᠤ᠌ ᠨᠠᠪᠴᠢᠨ᠂ ᠴᠤᠭᠤᠷ ᠤ᠋ᠨ ᠡᠭᠡᠰᠢᠭ ᠢᠷᠠᠭᠤᠬᠠᠨ ᠢ᠋ᠶ᠋ᠠᠷ ᠤᠷᠤᠰᠴᠤ᠂ ᠠᠮᠢᠳᠤᠷᠠᠯ ᠤ᠋ᠨ ᠥᠷᠥᠰᠢᠶᠡᠯ ᠦᠭᠡᠢ ᠬᠠᠲᠠᠭᠤ ᠵᠢᠮᠡ ᠶᠣᠰᠣ᠂ ᠲᠡᠦᠬᠡ ᠴᠠᠳᠢᠭ ᠤ᠋ᠨ ᠭᠡᠷᠡᠴᠢ ᠪᠣᠯᠵᠤ ᠪᠣᠮᠠᠨ ᠨᠠᠪᠴᠢᠲᠤ ᠬᠠᠢᠯᠠᠰᠤᠨ ᠤ᠋ ᠳᠡᠭᠡᠷᠡ ᠡᠷᠭᠢᠨᠡ᠃ ᠡᠨᠡ ᠦᠶᠡ ᠪᠣᠯ1697 ᠣᠨ ᠪᠣᠯᠠᠢ᠃ ᠤᠯᠠᠭᠴᠢᠨ ᠦᠬᠡᠷ ᠵᠢᠯ ᠪᠢᠯᠡ᠃
᠂᠂᠂᠂ ᠬᠥᠬᠡ ᠲᠩᠷᠢ ᠶ᠋ᠢ ᠡᠵᠡᠩᠨᠡᠨ ᠳᠠᠷᠤᠩᠭᠤᠢᠯᠠᠭᠴᠢ
ᠬᠦᠴᠦᠲᠦ ᠪᠦᠷᠭᠦᠳ ᠰᠦᠯᠳᠡ ᠮᠢᠨᠢ ᠰᠣᠨᠣᠰᠤᠭᠲᠤᠨ!
ᠴᠢᠰᠤ ᠨᠡᠪᠴᠢᠭᠰᠡᠨ ᠭᠠᠵᠠᠷ ᠳᠡᠭᠡᠭᠦᠷ
ᠴᠠᠭᠠᠨ ᠲᠡᠭᠷᠢ ᠶ᠋ᠢᠨ ᠰᠦ ᠲᠤᠰᠤᠭᠠᠵᠤ ᠠᠷᠢᠭᠤᠰᠬᠠᠭᠲᠤᠨ!
ᠬᠠᠷᠢᠶᠠᠯ ᠰᠢᠩᠭᠡᠭᠰᠡᠨ ᠬᠥᠮᠦᠨ ᠦ᠌ ᠵᠢᠷᠦᠬᠡ ᠶ᠋ᠢ
ᠬᠠᠷᠠ ᠲᠡᠭᠷᠢ ᠶ᠋ᠢᠨ ᠬᠢᠯᠢᠩ ᠢ᠋ᠶ᠋ᠡᠷ ᠨᠣᠮᠣᠬᠠᠳᠬᠠᠭᠲᠤᠨ!
ᠶᠡᠷᠡᠨ ᠶᠢᠰᠦᠨ ᠲᠡᠭᠷᠢ ᠥᠭᠡᠳᠡ ᠪᠦᠷᠭᠦᠳ ᠮᠢᠨᠢ ᠨᠢᠰᠦᠭᠡᠷᠡᠢ
ᠢᠷᠦᠭᠡᠯ ᠲᠡᠭᠡᠭᠡᠵᠦ᠂ ᠢᠷᠣᠠ ᠵᠥᠩᠨᠡᠵᠦ ᠪᠦᠷᠭᠦᠳ ᠮᠢᠨᠢ ᠣᠢᠷᠠᠳ ᠲᠠᠭᠠᠨ ᠣᠴᠢᠭᠠᠷᠠᠢ᠂᠂᠂᠂
ᠪᠦᠷᠭᠦᠳ ᠱᠤᠩᠪᠠᠬᠤ ᠬᠥᠬᠡ ᠲᠩᠷᠢ ᠶ᠋ᠢᠨ ᠵᠠᠬᠠ ᠬᠢᠵᠠᠭᠠᠷ ᠦᠭᠡᠢ ᠴᠦᠯ ᠥᠭᠡᠳᠡ ᠳᠠᠨᠵᠢᠯᠠ ᠬᠠᠷᠠᠨᠠ᠃ ᠭᠠᠢᠲᠠᠪ ᠪᠠᠭᠠᠲᠤᠷ ᠤ᠋ᠨ ᠭᠤᠷᠪᠠᠨ ᠬᠥᠪᠡᠭᠦᠨ ᠳᠠᠨᠵᠢᠯᠠ ᠶ᠋ᠢᠨ ᠳᠡᠷᠭᠡᠳᠡ ᠶᠠᠪᠤᠭᠠ ᠪᠢᠯᠡ᠃ ᠬᠠᠷᠢᠨ ᠠᠷᠴᠠ ᠪᠠᠭᠠᠲᠤᠷ ᠴᠣᠷᠣᠰ ᠬᠦᠷᠢᠶᠡᠨ ᠦ᠌ ᠪᠡᠨ ᠲᠠᠢᠰᠢ ᠨᠢᠭᠡᠨ ᠳᠡᠰ ᠬᠠᠷᠠ ᠨᠢᠳᠦ ᠲᠡᠢ᠂ ᠪᠣᠷᠣ ᠠᠷᠠᠰᠤ ᠲᠠᠢ ᠬᠥᠪᠡᠭᠦᠨ ᠢ᠋ ᠲᠡᠪᠡᠷᠢᠵᠦ ᠰᠡᠷᠢᠭᠦᠯ ᠪᠦᠰᠡᠭᠦᠢ ᠶ᠋ᠢ ᠲᠡᠮᠡᠭᠡ ᠲᠡᠢ ᠠᠴᠢᠶᠠᠨ ᠳ᠋ᠤ᠌ ᠰᠠᠭᠤᠯᠭᠠᠵᠤ ᠣᠳᠤᠭᠰᠠᠨ ᠪᠢᠯᠡ᠃ ᠲᠡᠭᠦᠨ ᠢ᠋ ᠳᠠᠭᠠᠵᠤ ᠢᠰᠢᠭᠡ ᠲᠡᠢ ᠢᠮᠠᠭᠠ᠂ ᠬᠤᠷᠠᠭᠠ ᠲᠠᠢ ᠬᠣᠨᠢ ᠲᠠᠭᠤᠭᠰᠠᠨ ᠴᠡᠷᠢᠭ ᠦ᠋ᠨ ᠠᠷᠤ ᠲᠠᠯᠠ ᠶ᠋ᠢᠨ ᠬᠢᠨ ᠲᠡᠮᠡᠭᠡᠨ ᠲᠡᠷᠭᠡ ᠪᠡᠷ ᠬᠥᠰᠬᠡ ᠨᠡᠭᠦᠳᠡᠯ ᠦ᠋ᠨ ᠵᠠᠮ ᠢ᠋ᠶ᠋ᠠᠨ ᠨᠡᠭᠡᠭᠡᠵᠡᠢ᠃ ᠬᠣᠨᠢ ᠢᠮᠠᠭᠠ ᠮᠠᠢᠯᠠᠯᠳᠤᠨ᠂ ᠢᠩᠭᠡ ᠪᠣᠢᠯᠠᠵᠤ ᠵᠡᠷᠭᠡᠯᠭᠡᠨ ᠳᠤᠮᠳᠠ ᠰᠦᠮᠡᠯᠵᠡᠨ ᠥᠨᠳᠡᠢᠬᠦ ᠠᠯᠲᠠᠢ ᠶ᠋ᠢᠨ ᠨᠢᠷᠤᠭᠤ ᠪᠠᠨ ᠵᠣᠷᠢᠭᠰᠠᠨ ᠶᠤᠮ᠃ ᠣᠢᠷᠠᠳ ᠤ᠋ᠨ ᠮᠠᠯ ᠬᠦᠷᠲᠡᠯᠡ ᠣᠯᠠᠨ ᠢ᠋ᠶ᠋ᠠᠷ ᠲᠥᠯᠯᠡᠵᠡᠢ᠃
ᠬᠣᠪᠲᠣ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠤᠰᠤᠯᠠᠭᠠ ᠲᠠᠢ ᠲᠠᠷᠢᠶᠠᠯᠠᠩ ᠰᠢᠷᠭᠠᠯᠲᠤᠵᠤ ᠲᠠᠷᠢᠶᠠ ᠪᠠᠨ ᠶᠡᠬᠡ ᠬᠤᠷᠢᠶᠠᠵᠤ ᠪᠠᠢᠬᠤ ᠪᠥᠭᠡᠳ ᠼᠡᠮᠪᠤᠭᠠᠷᠪᠤ ᠬᠠᠢᠷᠬᠠᠨ ᠤ᠋ ᠮᠥᠩᠭᠥᠨ ᠴᠠᠭᠠᠨ ᠵᠤᠯᠠᠢ ᠨᠠᠷᠠᠨ ᠳ᠋ᠤ᠌ ᠭᠢᠯᠠᠯᠵᠠᠨᠠ᠃
ᠬᠠᠢᠯᠠᠰᠤᠨ ᠤ᠋ ᠪᠤᠮ ᠨᠠᠪᠴᠢᠰ ᠳᠡᠭᠡᠷᠡ ᠲᠣᠳᠣ ᠮᠣᠩᠭᠣᠯ ᠦᠰᠦᠭ ᠭᠠᠷᠴᠠᠢ᠃ ᠲᠡᠷᠡ ᠬᠦ᠌ ᠲᠣᠳᠣ ᠦᠰᠦᠭ ᠢ᠋ᠶ᠋ᠡᠷ ᠭᠠᠯᠳᠠᠨ ᠪᠣᠱᠣᠭᠲᠤ ᠢᠢᠨ ᠬᠦ᠌ ᠰᠢᠯᠦᠭᠯᠡᠭᠰᠡᠨ ᠪᠠᠢᠯᠠ᠃ ᠳᠠᠨᠵᠢᠯᠠ ᠰᠡᠯᠡᠮᠡ ᠪᠡᠨ ᠰᠤᠯᠠ ᠤᠨᠵᠢᠭᠤᠯᠤᠨ ᠣᠷᠣᠬᠤ ᠳ᠋ᠤ᠌ ᠭᠠᠯᠳᠠᠨ ᠬᠠᠭᠠᠨ ᠮᠣᠳᠣᠨ ᠤ᠋ ᠬᠦᠴᠦᠷᠬᠡᠭ ᠴᠤᠯᠤ ᠦᠨᠳᠦᠰᠦ ᠮᠡᠲᠦ ᠬᠠᠷᠠᠭᠳᠠᠨᠠ᠃ ᠵᠠᠪᠢᠯᠠᠨ ᠪᠣᠢ ᠭᠠᠯᠳᠠᠨ ᠬᠠᠭᠠᠨ ᠤ᠋ ᠵᠥᠷᠢᠭᠦᠯᠵᠦ ᠡᠷᠭᠦᠭᠰᠡᠨ ᠠᠯᠠᠭᠠᠨ ᠳᠡᠭᠡᠷᠡ ᠪᠤᠷᠬᠠᠨ ᠤ᠋ ᠨᠢᠳᠦ ᠬᠡᠮᠡᠬᠦ ᠵᠢᠮᠢᠰ ᠦ᠋ᠨ ᠶᠠᠰᠤ ᠪᠠᠷ ᠬᠢᠭᠰᠡᠨ ᠡᠷᠢᠭᠡ ᠶ᠋ᠢᠨ ᠨᠢᠭᠡ ᠦᠷᠢᠯ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠭᠠᠷ ᠤ᠋ᠨ ᠠᠯᠠᠭᠠᠨ ᠳᠡᠭᠡᠷᠡ ᠢᠳᠤᠭᠠᠨ ᠡᠮᠡ ᠶ᠋ᠢᠨ ᠭᠠᠪᠠᠯᠠ ᠶ᠋ᠢᠨ ᠴᠣᠢᠵᠢᠯ ᠳᠣᠲᠣᠷᠠ ᠷᠠᠰᠢᠶᠠᠨ ᠳ᠋ᠤ᠌ ᠲᠥᠷᠥᠭᠡᠰᠦᠲᠡᠢ ᠪᠠᠢᠪᠠ᠃ ᠷᠠᠰᠢᠶᠠᠨ ᠳᠣᠲᠣᠷᠠ ᠪᠤᠷᠬᠠᠨ ᠤ᠋ ᠦᠷᠢᠯ ᠵᠢᠮᠢᠰ ᠦ᠋ᠨ ᠶᠠᠰᠤ ᠲᠣᠳᠣᠷᠠᠵᠤ ᠬᠠᠷᠠᠭᠳᠠᠨᠠ᠃ ᠵᠢᠮᠢᠰ ᠦ᠋ᠨ ᠶᠠᠰᠤᠨ ᠳᠣᠲᠣᠷᠠ ᠭᠠᠯᠳᠠᠨ ᠬᠠᠭᠠᠨ ᠢ᠋ ᠰᠡᠢᠯᠵᠡᠢ᠃ ᠪᠢᠰᠢᠯᠭᠠᠯ ᠬᠢᠵᠦ ᠪᠣᠢ ᠯᠠᠮᠠ ᠭᠠᠯᠳᠠᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠡᠢᠯᠪᠦᠷᠢ ᠶ᠋ᠢ ᠬᠠᠷᠠᠭᠰᠠᠭᠠᠷ ᠪᠠᠢᠪᠠ᠃ ᠡᠨᠡ ᠬᠦ᠌ ᠡᠷᠢᠭᠡ ᠶ᠋ᠢ ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠱᠦᠩᠰᠢᠭᠯᠡᠭᠰᠡᠨ ᠶᠤᠮ᠃
ᠭᠠᠯᠳᠠᠨ ᠪᠤᠷᠬᠠᠨ ᠤ᠋ ᠨᠢᠳᠦ ᠬᠡᠮᠡᠬᠦ ᠵᠢᠮᠢᠰ ᠦ᠋ᠨ ᠶᠠᠰᠤᠨ ᠳᠡᠭᠡᠷᠡᠬᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠦᠷᠢ ᠶ᠋ᠢ ᠵᠢᠮᠢᠰ ᠦ᠋ᠨ ᠶᠠᠰᠤᠨ ᠤ᠋ ᠪᠥᠭᠡᠷᠡ ᠶ᠋ᠢᠨ ᠳᠡᠭᠡᠷᠡ ᠰᠡᠢᠯᠵᠡᠢ᠃ ᠴᠣᠬᠣᠮ ᠶᠠᠭᠤ ᠲᠤᠩᠭᠠᠵᠤ ᠰᠡᠢᠯᠦᠭᠰᠡᠨ ᠢ᠋ ᠪᠤᠷᠬᠠᠨ ᠮᠡᠳᠡᠬᠦ ᠪᠣᠢ ᠊ᠢᠠ᠃
ᠥᠨᠳᠥᠷ ᠭᠡᠭᠡᠨ ᠵᠠᠨᠠᠪᠠᠽᠠᠷ ᠤ᠋ᠨ ᠰᠡᠢᠯᠪᠦᠷᠢ ᠶ᠋ᠢᠨ ᠨᠢᠭᠤᠴᠠ ᠦᠯᠦ ᠲᠠᠢᠯᠤᠭᠳᠠᠨᠠ᠃ ᠡᠨᠡ ᠨᠢᠭᠤᠴᠠ ᠨᠢ ᠭᠠᠯᠳᠠᠨ ᠤ᠋ ᠳᠦᠷᠢ ᠮᠥᠩᠬᠡ ᠶᠤᠮ ᠭᠡᠰᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠢᠮᠢᠰ ᠦ᠋ᠨ ᠶᠠᠰᠤᠨ ᠡᠷᠢᠭᠡ ᠶ᠋ᠢᠨ ᠦᠷᠢᠯ ᠳ᠋ᠦ᠍ ᠰᠢᠩᠭᠡᠭᠡᠭᠰᠡᠨ ᠪᠢᠵᠡ ᠠ᠋᠃
ᠳᠠᠨᠵᠢᠯᠠ ᠬᠠᠭᠠᠨ ᠤ᠋ ᠪᠠᠨ ᠵᠠᠬᠢᠶᠠᠰᠤ ᠶᠣᠰᠣᠭᠠᠷ ᠲᠡᠭᠦᠨ ᠦ᠌ ᠬᠤᠷᠤᠭᠤᠨ ᠤ᠋ ᠨᠢᠭᠡᠨ ᠦᠶᠡ ᠶ᠋ᠢ ᠠᠪᠤᠪᠠ᠃ ᠳᠠᠨᠵᠢᠯᠠ ᠥᠭᠡᠳᠡ ᠪᠡᠨ ᠬᠠᠷᠠᠪᠠ᠃ ᠮᠣᠳᠣᠨ ᠤ᠋ ᠦᠨᠳᠦᠰᠦ ᠮᠥᠴᠢᠷ ᠰᠢᠷᠢᠯᠳᠦᠵᠦ ᠲᠡᠭᠦᠨ ᠦ᠌ ᠬᠤᠷᠤᠭᠤᠨ ᠤ᠋ ᠦᠶᠡ ᠮᠡᠲᠦ ᠰᠠᠷᠪᠠᠢᠨᠠ᠃ ᠬᠠᠭᠠᠨ ᠢ᠋ᠶ᠋ᠠᠷ ᠯᠠᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠷᠢᠳᠢ ᠰᠢᠳᠢ ᠪᠡᠷ ᠬᠠᠳᠠ ᠮᠣᠳᠣ ᠮᠡᠲᠦ ᠪᠣᠯᠵᠤ ᠬᠣᠯᠲᠣᠰᠣ ᠪᠦᠷᠬᠦᠭᠦᠯ ᠨᠢ ᠬᠤᠶᠠᠭ ᠳᠤᠭᠤᠯᠠᠭᠠ ᠯᠤᠭᠠ ᠨᠥᠮᠥᠷᠦᠨᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠳᠠᠨᠵᠢᠯᠠ ᠪᠢᠲᠡᠭᠦᠦ ᠰᠢᠷᠠ ᠭᠡᠷᠡᠯ ᠳ᠋ᠦ᠍ ᠣᠷᠣᠪᠠ᠃ ᠲᠠᠰᠢᠯᠠᡁᠠᠮᠤ ᠬᠡᠢᠳ ᠦ᠋ᠨ ᠲᠣᠮᠣ ᠳᠤᠭᠠᠩ᠂ ᠲᠥᠪᠬᠡᠨ ᠬᠡᠢᠳ ᠦ᠋ᠨ ᠯᠤᠤᠰ ᠤ᠋ᠨ ᠣᠷᠳᠣᠨ ᠳ᠋ᠤ᠌ ᠡᠢᠮᠦᠷᠬᠦᠦ ᠰᠢᠷᠠ ᠭᠡᠷᠡᠯ ᠲᠠᠲᠠᠳᠠᠭ ᠪᠢᠯᠡ᠃ ᠳᠠᠨᠵᠢᠯᠠ ᠵᠠᠩᠵᠤᠨ ᠰᠥᠬᠥᠷᠡᠵᠦ ᠰᠠᠭᠤᠭᠠᠳ ᠥᠪᠡᠷ ᠦ᠋ᠨ ᠠᠪᠠᠭᠠ ᠠᠬᠠ ᠭᠠᠯᠳᠠᠨ ᠬᠤᠪᠢᠯᠭᠠᠨ ᠤ᠋ ᠠᠯᠠᠭᠠᠨ ᠳᠡᠭᠡᠷᠡᠬᠢ ᠴᠣᠢᠵᠢᠯ ᠲᠠᠢ ᠷᠠᠰᠢᠶᠠᠨ ᠢ᠋ ᠬᠦᠷᠲᠡᠭᠡᠳ ᠮᠥᠨᠥᠬᠢ ᠵᠢᠮᠢᠰ ᠦ᠋ᠨ ᠪᠥᠭᠡᠷᠡᠩᠬᠡᠢ ᠦᠷᠢᠯ ᠢ᠋ ᠠᠪᠤᠯᠠ᠃ ᠳᠠᠨᠵᠢᠯᠠ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠵᠠᠬᠢᠶᠠᠰᠤ ᠶ᠋ᠢ ᠭᠦᠢᠴᠡᠭᠡᠭᠰᠡᠨ ᠬᠣᠢᠨᠠ ᠨᠠᠷᠠ ᠰᠠᠷᠠ᠂ ᠰᠠᠯᠬᠢᠨ ᠤ᠋ ᠳᠣᠣᠷᠠ ᠬᠤᠪᠢᠯᠭᠠᠨ ᠭᠠᠯᠳᠠᠨ ᠬᠡᠴᠢᠨᠡᠭᠡᠨ ᠣᠨ ᠵᠢᠯ ᠪᠢᠰᠢᠯᠭᠠᠯ ᠬᠢᠬᠦ ᠪᠣᠯ ᠭᠡᠮᠡᠨ ᠪᠣᠳᠣᠪᠠ᠃ ᠣᠢᠷᠠᠳ ᠤ᠋ᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠳᠠᠨᠵᠢᠯᠠ ᠶ᠋ᠢ ᠳᠠᠭᠠᠨ ᠠᠯᠲᠠᠢ ᠶ᠋ᠢᠨ ᠶᠡᠬᠡ ᠠᠭᠤᠯᠠ ᠶ᠋ᠢ ᠲᠣᠭᠣᠷᠢᠨ ᠭᠣᠷᠢᠶᠠ ᠬᠢᠵᠦ ᠶᠠᠪᠤᠬᠤ ᠦᠶᠡ ᠳ᠋ᠦ᠍ ᠳᠠᠨᠵᠢᠯᠠ ᠶ᠋ᠢᠨ ᠵᠢᠷᠦᠬᠡᠨ ᠳ᠋ᠦ᠍《ᠬᠠᠭᠠᠨ ᠠᠭᠤᠯᠠ ᠪᠣᠯᠵᠠᠢ᠃ ᠪᠢ ᠡᠨᠡ ᠠᠭᠤᠯᠠ ᠶ᠋ᠢᠨ ᠲᠠᠬᠢᠯᠴᠢ ᠨᠢ ᠶᠤᠮ 》 ᠭᠡᠰᠡᠨ ᠦᠭᠡᠰ ᠴᠢᠳᠬᠤᠨᠠ᠃
ᠭᠠᠯᠳᠠᠨ ᠬᠠᠭᠠᠨ ᠳᠡᠭᠡᠭᠰᠢ ᠪᠡᠨ ᠬᠠᠢᠯᠠᠰᠤ ᠪᠣᠯᠤᠨ ᠨᠠᠪᠴᠢᠯᠠᠵᠤ ᠲᠡᠭᠦᠨ ᠦ᠌ ᠵᠢᠷᠦᠬᠡᠨ ᠦ᠌ ᠪᠢᠴᠢᠯᠭᠡ ᠰᠢᠯᠦᠭ ᠪᠣᠯᠵᠤ ᠨᠡᠪᠴᠢᠨᠡ ᠰᠡᠢᠯᠦᠭᠳᠡᠨᠡ᠃ ᠬᠠᠭᠠᠨ ᠣᠢᠷᠠᠳ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠭᠠᠵᠠᠷ ᠰᠢᠷᠣᠢ ᠳ᠋ᠤ᠌ ᠦᠨᠳᠦᠰᠦᠯᠡᠵᠡᠢ᠃ ᠲᠡᠷᠡ ᠦᠨᠳᠦᠰᠦ ᠨᠢ ᠠᠯᠲᠠᠢ ᠶ᠋ᠢᠨ ᠴᠠᠰᠤᠲᠤ ᠠᠭᠤᠯᠠ᠂ ᠥᠷᠭᠡᠨ ᠭᠣᠪᠢ᠂ ᠠᠭᠤᠳᠠᠮ ᠬᠡᠭᠡᠷᠡ ᠲᠠᠯᠠ ᠨᠤᠲᠤᠭ ᠢ᠋ ᠬᠣᠯᠪᠣᠵᠤ ᠤᠰᠤ ᠬᠥᠬᠥᠵᠦ ᠪᠣᠷᠣᠭᠠ ᠣᠷᠣᠭᠤᠯᠳᠠᠭ ᠬᠠᠷᠠ ᠡᠷᠴᠢᠰ ᠮᠥᠷᠡᠨ ᠦ᠌ ᠰᠤᠳᠠᠰᠤ ᠪᠢᠯᠡ᠃
ᠡᠨᠡ ᠠᠭᠱᠠᠨᠠ ᠲᠣᠪᠰᠢᠭᠤᠷ ᠤ᠋ᠨ ᠠᠶᠠᠯᠭᠤ ᠬᠤᠷᠠ ᠪᠣᠷᠣᠭᠠ ᠮᠡᠲᠦ ᠱᠠᠭᠢᠨᠠ᠃ ᠴᠤᠭᠤᠷ ᠤ᠋ᠨ ᠭᠡᠭᠡᠯᠭᠡᠨ ᠠᠶᠠᠰ ᠢ᠋ᠶ᠋ᠠᠷ ᠡᠪᠡᠰᠦ ᠨᠣᠭᠣᠭᠠ ᠠᠮᠢᠯᠠᠨ ᠤᠷᠭᠤᠵᠤ ᠵᠡᠭᠦᠨᠭᠠᠷ ᠤ᠋ᠨ ᠠᠭᠤᠯᠠ᠂ ᠲᠠᠯᠠ ᠶ᠋ᠢᠨ ᠣᠷᠣᠨ ᠳᠤᠨᠢᠶᠠᠷᠲᠤᠨ ᠴᠠᠯᠠᠢᠨᠠ᠃ ᠳᠡᠭᠡᠭᠦᠷ ᠨᠢ ᠳᠣᠮᠣᠭᠲᠤ ᠬᠦᠷᠡᠩ ᠪᠦᠷᠭᠦᠳ ᠡᠷᠭᠢᠯᠳᠦᠨ ᠪᠠᠢᠬᠤ ᠠᠵᠢ᠃
ᠪᠠᠭᠠᠲᠤᠷᠯᠢᠭ ᠬᠦᠷᠡᠩ ᠪᠦᠷᠭᠦᠳ ᠦ᠋ᠨ ᠳᠡᠪᠢᠬᠦ ᠳᠠᠯᠠᠪᠴᠢ ᠠᠭᠠᠷ ᠬᠥᠭᠯᠡᠪᠡ᠃ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠰᠡᠳᠬᠢᠯ ᠵᠢᠷᠦᠬᠡ ᠨᠢᠯᠬᠠ ᠪᠠᠭᠠ ᠳ᠋ᠠᠭᠠᠨ ᠡᠬᠡᠰᠢᠭ ᠲᠡᠢ ᠪᠣᠯᠵᠠᠢ᠃ᠲᠡᠷᠡ ᠡᠬᠡᠰᠢᠭ ᠳᠠᠭᠤᠷᠢᠰᠤᠭᠰᠠᠭᠠᠷ ᠠᠪᠠᠢ᠃
《᠁ ᠴᠣᠷᠣᠰ ᠤᠭᠰᠠᠭᠠᠲᠠᠨ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠢ᠋ ᠪᠠᠢᠭᠤᠯᠤᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠡᠭᠡᠳᠦ ᠢᠵᠠᠭᠤᠷ ᠳᠤᠸᠠ ᠰᠣᠬᠣᠷ ᠤ᠋ᠨ ᠤᠳᠤᠮ ᠤ᠋ᠨ ᠲᠡᠦᠬᠡ ᠶ᠋ᠢ ᠳᠠᠷᠬᠠᠯᠠᠪᠠ᠃ ᠴᠣᠷᠣᠰ ᠬᠡᠮᠡᠬᠦ ᠲᠣᠮᠣ ᠰᠤᠳᠤᠷ ᠪᠦᠲᠦᠭᠡᠪᠡ᠃ ᠳᠤᠸᠠ ᠰᠣᠬᠣᠷ᠂ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠤ᠋ ᠬᠣᠭᠣᠷᠣᠨᠳᠣ ᠴᠣᠷᠣᠰ ᠴᠢᠰᠤ ᠪᠤᠯᠠᠩᠭᠢᠷᠲᠤᠭᠰᠠᠨ ᠦᠭᠡᠢ᠃ ᠴᠣᠷᠣᠰ ᠣᠪᠣᠭ ᠤ᠋ᠨ ᠪᠠᠭᠠᠲᠤᠷ ᠤ᠋ᠳ ᠡᠮᠡᠭᠡᠯ ᠳᠡᠭᠡᠷᠡ ᠡᠴᠡ ᠪᠠᠭᠤᠭᠰᠠᠨ ᠦᠭᠡᠢ᠃
᠁ ᠮᠢᠨᠦ ᠨᠤᠲᠤᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠪᠤᠷᠬᠠᠨ ᠭᠤᠶᠤᠭᠰᠠᠨ ᠴᠤ᠌ ᠪᠤᠤ ᠥᠭ!
ᠰᠡᠳᠬᠢᠯ ᠳ᠋ᠦ᠍ ᠪᠠᠭᠲᠠᠭᠰᠠᠨ ᠪᠥᠭᠡᠰᠦ ᠶᠡᠬᠡ ᠪᠠᠭᠠ ᠢᠯᠭᠠᠯ ᠦᠭᠡᠢ ᠁ ᠭᠡᠮᠡᠨ ᠣᠢᠷᠠᠳ ᠤ᠋ᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠬᠠᠭᠠᠨ ᠰᠢᠯᠦᠭᠯᠡᠨ ᠭᠡᠷᠢᠶᠡᠰᠦᠯᠡᠪᠡ ᠁》ᠲᠣᠪᠰᠢᠭᠤᠷ ᠤ᠋ᠨ ᠠᠶᠠᠯᠭᠤ ᠳᠣᠯᠭᠢᠶᠠᠯᠠᠨᠠ᠃
ᠡᠯᠴᠢ ᠠᠢᠰᠤᠢ᠃ ᠣᠢᠷᠠᠳ ᠮᠣᠩᠭᠣᠯ ᠤ᠋ᠨ ᠡᠯᠴᠢ ᠴᠣᠷᠣᠰ ᠬᠠᠷᠠ ᠬᠦᠦ ᠳᠠᠨᠵᠢᠯᠠ ᠵᠠᠩᠵᠤᠨ ᠳ᠋ᠤ᠌《ᠬᠣᠪᠲᠣ ᠶ᠋ᠢᠨ ᠬᠢᠵᠠᠭᠠᠷ ᠢ᠋ ᠲᠣᠬᠣᠨᠢᠭᠤᠯᠵᠤ ᠴᠡᠷᠢᠭ ᠢ᠋ᠶ᠋ᠡᠨ ᠵᠠᠰᠠᠬᠤ ᠶ᠋ᠢ ᠴᠠᠸᠡᠩᠷᠠᠪᠳᠠᠨ ᠬᠠᠭᠠᠨ ᠵᠠᠷᠯᠢᠭ ᠪᠣᠯᠪᠠ》᠃ ᠭᠡᠮᠡᠨ ᠨᠠᠷᠠᠨ ᠰᠠᠷᠠᠨ ᠭᠠᠯ ᠪᠦᠬᠦᠢ ᠬᠡᠷᠡᠭᠡ ᠪᠡᠨ ᠥᠨᠳᠥᠷ ᠲᠦ᠍ ᠡᠷᠭᠦᠪᠡ ᠠ᠋᠃
ᠣᠢᠷᠠᠳ ᠤ᠋ᠨ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠬᠤᠪᠢᠯᠭᠠᠨ ᠯᠠᠮᠠ᠂ ᠵᠡᠭᠦᠨᠭᠠᠷ ᠤ᠋ᠨ ᠬᠠᠭᠠᠨᠲᠤ ᠤᠯᠤᠰ ᠤ᠋ᠨ ᠬᠠᠭᠠᠨ ᠭᠠᠯᠳᠠᠨ ᠪᠣᠱᠣᠭᠲᠤ ᠶ᠋ᠢᠨ ᠨᠡᠷᠡᠲᠦ ᠳ᠋ᠦ᠍ ᠵᠠᠯᠠᠷᠠᠭᠰᠠᠨ370 ᠵᠢᠯ ᠦ᠋ᠨ ᠣᠢ 2014 ᠣᠨ ᠳ᠋ᠤ᠌ ᠲᠣᠬᠢᠶᠠᠬᠤ ᠲᠤᠯᠠ ᠡᠨᠡ ᠷᠣᠮᠠᠨ ᠢ᠋ᠶ᠋ᠠᠷ ᠢᠷᠦᠭᠡᠯ ᠡᠷᠭᠦᠪᠡ᠃ ᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠣᠷᠣᠰᠢᠪᠠᠢ᠃
ᠵᠣᠬᠢᠶᠠᠯᠴᠢ ᠳ᠂ ᠵᠠᠮᠢᠶᠠᠨ ᠢ᠋ᠶ᠋ᠠᠷ ᠰᠥᠭᠥᠳᠦᠨ ᠮᠥᠷᠭᠥᠮᠦᠢ᠃
2009 ᠣᠨ ᠤ᠋ ᠨᠠᠮᠤᠷ ᠤ᠋ᠨ ᠠᠳᠠᠭ ᠰᠠᠷᠠ ᠶ᠋ᠢᠨ ᠳᠠᠰᠢᠨᠢᠮᠠ᠂
ᠪᠠᠯᠵᠢᠨᠢᠮᠠ ᠬᠣᠣᠰᠯᠠᠭᠰᠠᠨ ᠪᠢᠯᠢᠭᠲᠦ ᠰᠠᠢᠨ ᠡᠳᠦᠷ ᠪᠦᠲᠦᠭᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠡᠷᠳᠡᠨᠢᠪᠢᠯᠢᠭ᠂ ᠠᠮᠤᠷᠪᠠᠶᠠᠷ᠂ ᠣᠶᠤᠨᠴᠢᠮᠡᠭ᠂ ᠤᠤᠭᠠᠨᠵᠢᠳ᠂ ᠨᠠᠷᠠᠨᠲᠣᠭᠣᠰ᠂ ᠪᠦᠷᠢᠨᠴᠡᠴᠡᠭ᠂ ᠤᠳᠤᠨᠭᠡᠷᠡᠯ᠂ ᠨᠠ᠊᠂ ᠴᠠᠭᠠᠨ᠂ ᠣᠳᠬᠠᠨᠴᠡᠴᠡᠭ᠂
ᠬᠢᠨᠠᠭᠴᠢ ᠪᠠᠭᠰᠢ᠄ ᠲᠣᠳᠤᠭᠡᠷᠡᠯ᠂ ᠤᠤᠭᠠᠨᠵᠢᠳ᠂ ᠨᠠᠷᠠᠨᠲᠣᠭᠣᠰ᠂ ᠠᠨᠢᠷ