ᠪᠠᠲᠤ ᠬᠠᠭᠠᠨ 8-06 ᠬᠡᠢᠳ ᠦ᠋ᠨ ᠴᠡᠴᠡᠷᠯᠢᠭ ᠲᠦ᠍-ᠰᠢᠭᠤᠷᠭᠠ ᠲᠠᠯᠪᠢᠪᠠBat khaan Бат хаан-ᠷᠣᠮᠠᠨ
141ᠵᠢᠷᠭᠤᠭᠠ᠂ ᠬᠡᠢᠳ ᠦ᠋ᠨ ᠴᠡᠴᠡᠷᠯᠢᠭ ᠲᠦ᠍
ᠲᠠᠯᠠ ᠰᠠᠷᠠᠨ ᠤ᠋ ᠬᠥᠬᠡ ᠭᠡᠷᠡᠯ ᠳ᠋ᠦ᠍ ᠬᠡᠢᠳ ᠦ᠋ᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠲᠦ᠍ ᠴᠠᠰᠤ ᠪᠠᠭᠰᠤᠷᠴᠤ ᠮᠠᠨᠠᠨ ᠳᠣᠲᠣᠷᠠ ᠰᠡᠭᠦᠳᠡᠷᠯᠡᠨ ᠬᠠᠷᠠᠭᠳᠠᠨᠠ᠃ ᠬᠥᠭᠰᠢᠨ ᠠᠯᠢᠮᠠ ᠶ᠋ᠢᠨ ᠮᠣᠳᠣᠨ ᠤ᠋ ᠣᠯᠠᠨ ᠮᠥᠴᠢᠷ ᠦ᠋ᠨ ᠳᠣᠣᠷᠠ ᠵᠢᠳᠠ ᠪᠠᠨ ᠲᠦᠰᠢᠭᠰᠡᠨ ᠮᠣᠩᠭᠣᠯ ᠨᠥᠬᠥᠷ ᠴᠡᠷᠢᠭ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠴᠠᠰᠤᠨ ᠳᠣᠲᠣᠷᠠ ᠵᠣᠭᠰᠣᠭᠠᠵᠤ ᠭᠠᠢᠬᠠᠭᠰᠠᠨ ᠪᠥᠭᠡᠳ ᠦᠯᠦ ᠣᠢᠯᠠᠭᠠᠬᠤ ᠬᠠᠷᠠᠴᠠ ᠪᠠᠷ ᠴᠠᠰᠤᠨ ᠬᠣᠩᠬᠣᠷ ᠢ᠋ ᠰᠢᠷᠳᠡᠨᠡ᠃ ᠲᠡᠨᠳᠡ ᠬᠣᠶᠠᠷ ᠬᠥᠮᠦᠨ ᠬᠡᠪᠲᠡᠨᠡ᠃ ᠬᠦ ᠬᠤᠶᠠᠭ ᠲᠠᠢ ᠪᠠᠢᠯᠳᠤᠭᠴᠢ ᠪᠠ ᠠᠯᠲᠠᠨ ᠬᠡ ᠲᠡᠢ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠵᠠᠯᠠᠭᠤ ᠪᠦᠰᠡᠭᠦᠢ ᠬᠣᠶᠠᠷ ᠢ᠋ ᠲᠤᠰ ᠲᠤᠰ ᠪᠠᠭᠤᠤ ᠶ᠋ᠢ ᠨᠢᠷᠤᠭᠤᠨ ᠳ᠋ᠤᠨᠢ ᠬᠦᠯᠢᠵᠦ ᠬᠠᠶᠠᠵᠠᠢ᠃ ᠲᠣᠯᠣᠭᠠᠢ ᠨᠢᠴᠦᠭᠦᠨ ᠪᠠᠢᠯᠳᠤᠭᠴᠢ ᠶ᠋ᠢᠨ ᠤᠷᠲᠤ ᠬᠠᠷᠠ ᠦᠰᠦ ᠨᠢ ᠺᠢᠫᠴᠠᠺ ᠤ᠋ᠨ ᠵᠠᠯᠠᠭᠤᠴᠤᠳ ᠤ᠋ᠨ ᠶᠡᠬᠡᠩᠬᠢ ᠶ᠋ᠢᠨ ᠠᠳᠠᠯᠢ ᠮᠥᠷᠦᠨ ᠳᠡᠭᠡᠷᠡ ᠨᠢ ᠤᠨᠠᠵᠠᠢ᠃ ᠪᠠᠢᠯᠳᠤᠭᠴᠢ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠳ᠋ᠦ᠍ ᠪᠦᠰᠡᠭᠦᠢ ᠬᠠᠶᠠ ᠶᠣᠢᠯᠠᠨ ᠬᠠᠷᠢᠭᠤᠯᠤᠨᠠ᠃ ᠴᠡᠷᠢᠭ ᠦ᠋ᠳ ᠡᠳᠡᠨᠡᠷ ᠦ᠋ᠨ ᠰᠢᠪᠡᠨᠡᠯᠳᠦᠨ ᠶᠠᠷᠢᠬᠤ ᠶ᠋ᠢ ᠦᠯᠦ ᠣᠢᠯᠠᠭᠠᠨᠠ᠂ ᠲᠡᠭᠡᠭᠡᠳ ᠵᠢᠳᠠ ᠪᠠᠨ ᠳᠥᠰᠢᠨ ᠰᠠᠭᠤᠨᠠ᠃
— ᠪᠢ ᠴᠢᠮᠠ ᠶ᠋ᠢ ᠮᠢᠨᠦ ᠠᠬᠠ ᠭᠡᠵᠦ ᠬᠡᠯᠡᠨᠡ᠂ ᠲᠡᠭᠡᠪᠡᠯ ᠴᠢᠮᠠᠶ᠋ᠢ ᠰᠤᠯᠠᠯᠠᠵᠤ ᠵᠠᠩᠵᠤᠨ ᠴᠢᠮᠠ ᠳ᠋ᠤ᠌ ᠠᠯᠲᠠᠨ ᠮᠣᠷᠢ ᠥᠭᠴᠦ ᠲᠣᠷᠭᠠ ᠪᠠᠷ ᠬᠤᠪᠴᠠᠰᠤᠯᠠᠭᠤᠯᠤᠨᠠ᠁
— ᠪᠢ ᠭᠠᠭᠴᠠᠬᠠᠨ ᠠᠬᠠ ᠪᠣᠯᠬᠤ ᠳᠤᠷᠠ ᠦᠭᠡᠢ ᠪᠠᠢᠨᠠ᠃ ᠴᠢᠨᠦ ᠳᠡᠷᠭᠡᠳᠡ ᠦᠬᠦᠬᠦ ᠨᠢ ᠮᠢᠨᠦ ᠵᠢᠷᠭᠠᠯ᠃ ᠪᠢ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠴᠢᠮᠠᠶ᠋ᠢ ᠮᠢᠨᠦ ᠢᠨᠠᠭ ᠭᠡᠵᠦ ᠬᠡᠯᠡᠨᠡ᠃
— ᠴᠢ ᠡᠭᠦᠨ ᠢ᠋ ᠬᠡᠯᠡᠵᠦ ᠦᠯᠦ ᠪᠣᠯᠤᠨᠠ᠃ ᠪᠢᠳᠡᠨᠡᠷ ᠡᠨᠡ ᠵᠣᠪᠠᠯᠠᠩ ᠠ᠋ᠴᠠ ᠠᠩᠭᠢᠵᠢᠷᠠᠬᠤ ᠬᠡᠷᠡᠭᠲᠡᠢ᠁ ᠴᠢ ᠨᠠᠮᠠᠶ᠋ᠢ ᠳᠡᠭᠦᠦ ᠪᠡᠨ ᠭᠡᠵᠦ ᠲᠩᠷᠢ ᠳ᠋ᠦ᠍ ᠲᠠᠩᠭᠠᠷᠢᠭᠯᠠᠭᠠᠷᠠᠢ ᠭᠡᠬᠦ ᠳ᠋ᠦ᠍᠂ ᠮᠣᠩᠭᠣᠯ ᠵᠢᠳᠠ ᠪᠠᠨ ᠡᠷᠭᠦᠵᠦ᠂
— ᠪᠠᠢᠵᠠ᠂ ᠳᠤᠭᠤᠢ ᠪᠠᠢᠵᠠᠭᠠ᠂ ᠵᠠᠩᠵᠤᠨ ᠲᠠᠨᠠᠷ ᠤ᠋ᠨ ᠶᠠᠷᠢᠬᠤ ᠶ᠋ᠢ ᠴᠠᠭᠠᠵᠠᠯᠠᠭᠰᠠᠨ ᠭᠡᠵᠦ ᠬᠡᠯᠡᠪᠡ᠃
ᠡᠨᠡ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠬᠦᠯᠢᠭᠲᠡᠢ ᠪᠠᠢᠯᠳᠤᠭᠴᠢ ᠶ᠋ᠢ ᠰᠠᠢᠨ ᠮᠡᠳᠡᠨᠡ᠂ ᠡᠨᠡ ᠲᠦᠷᠦᠭᠦᠴᠢ ᠶ᠋ᠢᠨ ᠵᠠᠭᠤᠲᠤ ᠶ᠋ᠢᠨ ᠵᠣᠷᠢᠭᠲᠠᠢ ᠭᠠᠪᠰᠢᠭᠠᠢ ᠵᠠᠯᠠᠭᠤ ᠪᠥᠭᠡᠳ ᠰᠠᠢᠨ ᠮᠣᠷᠢ ᠤᠨᠤᠨᠠ᠂ ᠠᠷᠠᠫᠱᠠ ᠶ᠋ᠢᠨ ᠬᠠᠢᠷᠠᠲᠤ ᠬᠥᠮᠦᠨ ᠪᠢᠯᠡ᠃ ᠡᠭᠦᠨ ᠦ᠌ ᠪᠣᠳᠣᠯ ᠢ᠋ ᠶᠠᠭᠤ ᠲᠥᠭᠡᠷᠢᠭᠦᠯᠪᠡ? ᠵᠠᠩᠵᠤᠨ ᠤ᠋ ᠵᠠᠯᠠᠭᠤ ᠬᠠᠲᠤᠨ ᠥᠭᠡᠳᠡ ᠬᠡᠷᠬᠢᠨ ᠵᠣᠷᠢᠭᠯᠠᠵᠤ ᠨᠢᠳᠦ ᠪᠡᠨ ᠡᠷᠭᠦᠵᠦ ᠬᠠᠷᠠᠪᠠ? ᠣᠳᠣ ᠡᠭᠦᠨ ᠢ᠋ ᠬᠤᠷᠳᠤᠨ ᠠᠯᠠᠬᠤ ᠪᠢᠵᠡ ᠭᠡᠵᠦ ᠪᠣᠳᠣᠨᠠ᠃
ᠬᠥᠭᠰᠢᠨ ᠮᠣᠳᠣ ᠨᠤᠭᠤᠳ ᠤ᠋ᠨ ᠳᠤᠮᠳᠠᠭᠤᠷ ᠬᠡᠢᠳ ᠦ᠋ᠨ ᠲᠣᠮᠣ ᠨᠣᠬᠠᠳ ᠰᠦᠷᠦᠭ ᠢ᠋ᠶ᠋ᠡᠷ ᠢᠷᠡᠵᠦ ᠶᠠᠪᠤᠨᠠ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠨᠣᠬᠠᠢ ᠣᠢᠷᠠᠬᠠᠨ ᠣᠴᠢᠵᠤ ᠬᠡᠪᠲᠡᠵᠦ ᠪᠠᠢᠭᠠ ᠬᠥᠮᠦᠰ ᠢ᠋ ᠥᠪᠡᠷ ᠦ᠋ᠨ ᠬᠤᠷᠳᠤᠨ ᠣᠯᠤᠭᠰᠠᠨ ᠣᠯᠵᠠ ᠮᠡᠲᠦ ᠬᠠᠷᠠᠵᠤ ᠬᠦᠯᠢᠶᠡᠨ ᠰᠠᠭᠤᠨᠠ᠂ ᠨᠣᠬᠠᠢ ᠨᠤᠭᠤᠳ ᠤ᠋ᠨ ᠨᠢᠭᠡ ᠨᠢ ᠠᠶᠤᠮᠰᠢᠭ ᠦᠭᠡᠢ ᠣᠢᠷᠠᠲᠤᠪᠠ᠂ ᠨᠥᠬᠥᠷ ᠵᠢᠳᠠ ᠪᠠᠨ ᠴᠢᠯᠠᠭᠤᠳᠠᠵᠤ ᠬᠥᠭᠡᠭᠡᠪᠡ᠂ ᠨᠣᠬᠠᠢ ᠭᠠᠰᠠᠯᠵᠤ ᠵᠠᠢᠯᠠᠨ ᠳᠠᠪᠬᠢᠪᠠ᠂ ᠪᠤᠰᠤᠳ ᠨᠢ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠭᠦᠶᠦᠯᠳᠦᠪᠡ᠂ ᠮᠣᠩᠭᠣᠯ ᠭᠦᠨᠵᠡᠭᠡᠢ ᠴᠠᠰᠤᠨ ᠳᠤᠮᠳᠠᠭᠤᠷ ᠶᠠᠪᠤᠵᠤ ᠵᠢᠳᠠ ᠪᠠᠨ ᠠᠪᠤᠭᠠᠳ ᠡᠷᠭᠢᠵᠦ ᠪᠠᠢᠷᠢᠨ ᠳ᠋ᠠᠭᠠᠨ ᠢᠷᠡᠪᠡ ᠃
ᠱᠠᠲᠤ ᠳᠡᠭᠡᠷᠡᠬᠢ ᠡᠭᠦᠳᠡ ᠳᠤᠤᠭᠠᠷᠪᠠ᠂ ᠬᠠᠭᠠᠯᠭᠠ ᠬᠢᠬᠤᠨᠠᠵᠤ ᠬᠡᠳᠦᠨ ᠬᠥᠮᠦᠰ ᠶᠠᠪᠤᠵᠤ ᠢᠷᠡᠪᠡ᠂ ᠨᠣᠬᠠᠳ ᠬᠤᠴᠠᠵᠤ ᠤᠭᠲᠤᠨ ᠭᠦᠶᠦᠯᠳᠦᠪᠡ᠃ ᠭᠡᠲᠡᠯᠡ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠠᠷᠠᠫᠱᠠ ᠬᠠᠳ᠋ᠵᠢ ᠷᠠᡁᠢ᠍ᠮ ᠪᠣᠯᠤᠨ ᠭᠤᠷᠪᠠᠨ ᠨᠥᠬᠥᠷ ᠦ᠋ᠳ ᠪᠠᠢᠨᠠ᠃ ᠬᠠᠳ᠋ᠵᠢ ᠷᠠᡁᠢ᠍ᠮ ᠲᠣᠰᠣ ᠨᠡᠪᠲᠡᠷᠡᠭᠰᠡᠨ ᠲᠣᠷᠭᠠᠨ ᠳ᠋ᠧᠩᠯᠦ ᠨᠣᠴᠣᠭᠠᠵᠤ ᠶᠠᠪᠤᠬᠤ ᠪᠥᠭᠡᠳ ᠨᠢᠭᠡᠳᠦᠭᠡᠷ ᠲᠦ᠍ ᠲᠣᠮᠣ ᠠᠯᠬᠤᠯᠠᠨ ᠶᠦᠯᠳᠥ᠋ᠽ ᠳᠡᠭᠡᠷᠡ ᠣᠴᠢᠵᠤ ᠪᠥᠬᠥᠢᠨ ᠳ᠋ᠧᠩᠯᠦ ᠶ᠋ᠢᠨ ᠶᠠᠳᠠᠮᠠᠭ ᠭᠡᠷᠡᠯ ᠳ᠋ᠦ᠍ ᠵᠣᠪᠠᠨᠢᠭᠰᠠᠨ ᠴᠢᠷᠠᠢ ᠶ᠋ᠢ ᠬᠠᠷᠠᠪᠠ᠃
一 ᠡᠷᠲᠡ ᠤᠷᠢᠳᠤ ᠴᠢ ᠨᠠᠮᠠᠶ᠋ᠢ ᠲᠡᠵᠢᠭᠡᠵᠦ ᠪᠠᠢᠭᠰᠠᠨ ᠪᠢᠰᠢ ᠪᠢᠯᠢᠤ᠂ ᠴᠢ ᠰᠦ᠋ ᠪᠠ ᠬᠠᠯᠠᠭᠤᠨ ᠪᠢᠩ ᠠᠪᠴᠢᠷᠠᠵᠤ ᠥᠭᠭᠦᠭᠡᠳ ᠬᠥᠭᠰᠢᠨ ᠮᠢᠨᠦ ᠵᠣᠪᠠᠯᠠᠩᠲᠤ ᠠᠮᠢᠳᠤᠷᠠᠯ ᠤ᠋ᠨ ᠡᠳᠦᠷ ᠢ᠋ ᠰᠤᠩᠭᠠᠵᠤ ᠥᠭᠭᠦᠭᠰᠡᠨ ᠪᠢᠯᠡ᠂ ᠣᠳᠣ ᠴᠢ ᠬᠡᠷᠬᠢᠭᠰᠡᠨ ᠪᠣᠢ᠂ ᠪᠢᠴᠢᠬᠠᠨ ᠶᠦᠯᠳᠥ᠋ᠽ ᠬᠠᠲᠤᠨ ᠣᠷᠣᠰ ᠤ᠋ᠨ ᠴᠠᠰᠤᠨ ᠳᠣᠲᠣᠷᠠ ᠤᠮᠪᠠᠪᠠ? ᠴᠢ ᠡᠨᠡ ᠥᠯᠥᠰᠬᠦᠯᠡᠩ ᠠᠮᠢᠲᠠᠳ ᠤ᠋ᠨ ᠣᠯᠵᠠ ᠪᠣᠯᠵᠤ ᠪᠣᠯᠤᠨᠠ ᠰᠢᠦ! ᠬᠤᠷᠳᠤᠨ ᠂ ᠬᠤᠷᠳᠤᠨ ᠰᠡᠷᠢᠭᠡᠭᠲᠦᠨ! ᠭᠡᠵᠦ ᠬᠠᠳ᠋ᠵᠢ ᠷᠠᡁᠢ᠍ᠮ ᠳ᠋ᠧᠩᠯᠦ ᠪᠡᠨ ᠴᠠᠰᠤᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠬᠥᠯᠳᠡᠭᠰᠡᠨ ᠬᠦᠯᠢᠭ ᠦ᠋ᠨ ᠣᠭᠣᠰᠣᠷ ᠢ᠋ ᠵᠣᠪᠠᠵᠤ ᠲᠠᠢᠯᠪᠠ᠂ ᠲᠡᠭᠡᠭᠡᠳ ᠮᠡᠳᠡᠷᠡᠯ ᠦᠭᠡᠢ ᠪᠣᠯᠵᠤ ᠤᠰᠤᠲᠤᠭᠰᠠᠨ ᠶᠦᠯᠳᠥ᠋ᠽ ᠲᠦ᠍ ᠲᠤᠰᠠᠯᠠᠵᠤ ᠡᠷᠭᠦᠨ ᠪᠣᠰᠬᠠᠪᠠ᠃ ᠠᠷᠠᠫᠱᠠ ᠲᠡᠭᠦᠨ ᠢ᠋ ᠪᠤᠯᠠᠭᠠᠨ ᠳᠡᠪᠡᠯ ᠳᠣᠲᠣᠷᠠ ᠣᠷᠢᠶᠠᠪᠠ᠃ ᠬᠦᠯᠢᠭ ᠡᠴᠡ ᠪᠡᠨ ᠰᠤᠯᠠᠷᠠᠭᠰᠠᠨ ᠮᠦᠰᠥ᠋ᠺ ᠪᠣᠰᠤᠨ ᠬᠠᠷᠠᠢᠵᠤ ᠬᠥᠯ ᠢ᠋ᠶ᠋ᠡᠨ ᠠᠯᠴᠠᠢᠯᠭᠠᠨ ᠵᠣᠭᠰᠣᠵᠤ ᠡᠨᠡᠬᠦ ᠪᠣᠯᠵᠤ ᠪᠠᠢᠭᠠ ᠶᠠᠪᠤᠳᠠᠯ ᠤ᠋ᠳ ᠲᠡᠭᠦᠨ ᠳ᠋ᠦ᠍ ᠶᠡᠷᠦ ᠦᠯᠦ ᠬᠠᠮᠢᠶᠠᠷᠬᠤ ᠮᠡᠲᠦ ᠰᠢᠨᠵᠢᠲᠡᠢ ᠬᠥᠳᠡᠯᠦᠯ ᠦᠭᠡᠢ ᠵᠣᠭᠰᠣᠬᠤ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠳᠡᠭᠡᠷᠡ ᠭᠠᠩᠬᠤᠭᠰᠠᠭᠠᠷ ᠬᠦᠷᠴᠦ ᠢᠷᠡᠪᠡ᠃
一 ᠴᠢ ᠬᠡᠨ ᠦ᠌ ᠬᠡᠦᠬᠡᠳ ᠪᠣᠢ? ᠲᠣᠳᠣᠷᠬᠠᠢ ᠬᠡᠯᠡ ᠭᠡᠵᠦ ᠬᠠᠳ᠋ᠵᠢ ᠷᠠᡁᠢ᠍ᠮ ᠠᠰᠠᠭᠤᠪᠠ᠃
一 ᠴᠢᠯᠥᠭᠡᠲᠦ ᠰᠠᠯᠬᠢᠨ ᠤ᠋ ᠭᠡᠵᠦ ᠮᠦᠰᠥ᠋ᠺ ᠬᠠᠷᠢᠭᠤᠯᠪᠠ᠃
一 ᠡᠨᠡ ᠪᠦᠰᠡᠭᠦᠢ ᠬᠡᠨ ᠪᠣᠢ? ᠭᠡᠵᠦ ᠬᠠᠳ᠋ᠵᠢ ᠷᠠᡁᠢ᠍ᠮ ᠦᠷᠭᠦᠯᠵᠢᠯᠡᠨ᠂
一 ᠴᠢ ᠡᠭᠦᠨ ᠢ᠋ ᠲᠠᠨᠢᠬᠤ ᠤᠤ? ᠮᠦᠰᠥ᠋ᠺ ᠳᠠᠭᠤ ᠦᠯᠦ ᠭᠠᠷᠤᠨᠠ᠃ ᠭᠡᠲᠡᠯᠡ ᠳᠡᠪᠡᠯ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠳᠣᠷᠣᠢ ᠳᠠᠭᠤ ᠭᠠᠷᠴᠤ᠂
— ᠡᠨᠡ ᠮᠢᠨᠦ ᠠᠬᠠ ᠮᠦᠰᠥ᠋ᠺ᠂ ᠪᠢᠳᠡ ᠬᠣᠶᠠᠭᠤᠯᠠ ᠪᠠᠨ ᠰᠢᠭ᠌ᠨᠠᠺ ᠤ᠋ᠨ ᠨᠠᠽᠠᠷ ᠺᠢᠶᠠᠷᠢᠽᠸᠺ ᠤ᠋ᠨ ᠬᠡᠦᠬᠡᠳ ᠶᠤᠮ ᠭᠡᠵᠦ( ᠭᠡᠬᠦ ᠳ᠋ᠦ᠍) ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠬᠣᠭᠣᠷᠣᠨᠳᠣ ᠨᠢ ᠣᠷᠣᠵᠤ᠂
— ᠬᠠᠲᠠᠵᠢ ᠷᠠᠾᠢᠮ ᠶᠠᠭᠤ ᠭᠡᠵᠦ ᠬᠡᠯᠡᠨᠡ? ᠲᠡᠷᠡ ᠬᠡᠵᠢᠶᠡᠳᠡ ᠵᠥᠪ᠂ ᠡᠨᠡ ᠬᠠᠷᠠ ᠪᠥᠬᠡ ᠨᠠᠷ ᠤ᠋ᠨ ᠪᠠᠢᠰᠢᠩ ᠳ᠋ᠤ᠌ ᠴᠥᠮ ᠢ᠋ᠶ᠋ᠡᠷ ᠤᠬᠠᠭᠠᠨ ᠠᠯᠳᠠᠵᠠᠢ᠂ ᠪᠠᠢᠯᠳᠤᠭᠴᠢ ᠮᠦᠰᠥ᠋ᠺ ᠴᠢ ᠨᠠᠳᠠᠳᠤ ᠰᠠᠯᠬᠢᠨ ᠤ᠋ ᠬᠦᠦ ᠭᠡᠭᠴᠢ ᠪᠡᠨ ᠦᠵᠡᠭᠦᠯᠵᠦ ᠥᠭᠬᠦ ᠬᠡᠷᠡᠭᠲᠡᠢ᠃ ᠴᠢ ᠲᠦᠷᠦᠭᠦᠯᠡᠵᠦ ᠬᠠᠮᠤᠭ ᠤ᠋ᠨ ᠬᠡᠴᠡᠭᠦᠦ ᠲᠠᠩᠨᠠᠭᠤᠯ ᠳ᠋ᠤ᠌ ᠶᠠᠪᠤᠨᠠ᠂ ᠴᠡᠷᠢᠭ ᠦ᠋ᠳ ᠶᠦᠯᠳᠥ᠋ᠽ ᠬᠠᠲᠤᠨ ᠢ᠋ ᠡᠷᠭᠦᠵᠦ ᠠᠪᠤᠭᠠᠳ ᠠᠪᠠᠴᠢᠵᠤ ᠠᠮᠠᠷᠠᠭᠤᠯ ᠭᠡᠪᠡ᠃
ᠵᠠᠩᠵᠤᠨ ᠤ᠋ ᠣᠷᠣᠰᠢᠬᠤ ᠲᠠᠰᠤᠯᠭᠠᠨ ᠤ᠋ ᠡᠭᠦᠳᠡᠨ ᠡᠴᠡ ᠰᠦᠷᠡᠬᠡᠢ ᠪᠠᠷᠬᠢᠷᠠᠬᠤ ᠪᠠ ᠵᠡᠷᠯᠢᠭ ᠢ᠋ᠶ᠋ᠡᠷ ᠭᠠᠰᠠᠯᠬᠤ ᠳᠠᠭᠤ ᠰᠣᠨᠣᠰᠳᠠᠨᠠ᠂ ᠴᠡᠷᠢᠭ ᠬᠠᠨᠠ ᠨᠠᠯᠠᠵᠤ ᠵᠣᠭᠰᠣᠨᠠ᠃
— ᠲᠡᠨᠳᠡ ᠶᠠᠭᠤ ᠪᠣᠯᠪᠠ ᠭᠡᠵᠦ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠠᠰᠠᠭᠤᠪᠠ᠃
— ᠵᠠᠩᠵᠤᠨ ᠰᠣᠯᠢᠶᠠᠷᠠᠵᠠᠢ᠂ ᠰᠡᠯᠡᠮᠡ ᠪᠡᠷ ᠣᠷᠣᠰ ᠤ᠋ᠨ ᠪᠤᠷᠬᠠᠨ ᠢ᠋ ᠴᠠᠪᠴᠢᠵᠤ ᠪᠠᠰᠠ ᠲᠠᠪᠠᠭ ᠳᠣᠯᠢᠶᠠᠵᠠᠢ᠂ ᠬᠣᠶᠠᠷ ᠨᠥᠬᠥᠷ ᠢ᠋ ᠣᠭᠲᠣᠯᠵᠤ ᠠᠯᠠᠭᠠᠳ ᠣᠳᠣ ᠥᠪᠡᠷ ᠢ᠋ᠶ᠋ᠡᠨ ᠤᠬᠢᠯᠠᠵᠤ ᠪᠠᠢᠨᠠ᠃
— ᠤᠬᠢᠯᠠᠵᠤ ᠪᠠᠢᠨᠠ ᠭᠡᠵᠢ ᠤᠤ?
— ᠲᠠ ᠰᠣᠨᠣᠰᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠢ ᠤᠤ?
ᠰᠦᠪᠡᠭᠡᠳᠡᠢ ᠡᠭᠦᠳᠡᠨ ᠦ᠌ ᠳᠡᠷᠭᠡᠳᠡ ᠣᠴᠢᠪᠠ᠂ ᠲᠡᠨᠳᠡ ᠡᠴᠡ ᠮᠠᠭᠤᠬᠠᠢ ᠣᠯᠢᠬᠤ ᠮᠡᠲᠦ ᠳᠠᠭᠤ ᠭᠠᠷᠤᠨᠠ᠃
— ᠪᠤᠤ ᠣᠷᠣ᠂ ᠲᠠᠨ ᠢ᠋ ᠴᠠᠪᠴᠢᠨᠠ ᠰᠢᠦ᠃
ᠠᠷᠠᠫᠱᠠ ᠶᠦᠯᠳᠥ᠋ᠽ ᠢ᠋ ᠠᠪᠴᠢᠷᠠᠵᠤ ᠵᠡᠷᠭᠡᠯᠡᠳᠡᠭᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠭᠤᠯᠤᠨ ᠣᠷᠣᠨ ᠳᠡᠭᠡᠷᠡ ᠲᠠᠯᠪᠢᠪᠠ᠃ ᠬᠢᠲᠠᠳ ᠥᠬᠢᠨ ᠢ ᠯᠡ ᠾᠧ ᠤᠶᠠᠬᠠᠨ ᠢ᠋ᠶ᠋ᠠᠷ ᠲᠡᠭᠦᠨ ᠢ᠋ ᠠᠷᠴᠢᠵᠤ ᠡᠬᠢᠯᠡᠪᠡ᠃
ᠰᠦᠪᠡᠭᠡᠳᠠᠢ ᠬᠠᠭᠠᠯᠭᠠᠨ ᠤ᠋ ᠳᠡᠷᠭᠡᠳᠡ ᠬᠦᠯᠢᠶᠡᠨ ᠵᠣᠭᠰᠣᠪᠠ᠃
— ᠶᠠᠮᠠᠷ ᠴᠠᠭᠠᠵᠠ ᠪᠣᠢ? ᠣ— ᠣ᠂ ᠶᠠᠮᠠᠷ ᠲᠦᠷᠢᠮᠡᠬᠡᠢᠯᠡᠯ ᠪᠣᠢ? — ᠣ— ᠣ ! ᠬᠣᠣᠷᠲᠠᠨ ᠨᠤᠭᠤᠳ ᠪᠠᠰᠠ ᠳᠠᠬᠢᠨ ᠮᠢᠨᠦ ᠵᠠᠮ ᠳ᠋ᠤ᠌ ᠪᠣᠰᠴᠠᠢ! ᠣ— ᠣ! ᠲᠡᠳᠡᠨᠡᠷ ᠨᠠᠮᠠᠶ᠋ᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠴᠢ ᠬᠦᠦ ᠭᠡᠵᠦ ᠦᠵᠡᠨᠡ ᠳ᠋ᠠ! ᠲᠡᠳᠡᠨᠡᠷ ᠡᠭᠦᠨ ᠢ᠋ ᠦᠵᠡᠨᠡ ᠳ᠋ᠠ!᠁ ᠭᠡᠵᠦ ᠪᠠᠷᠬᠢᠷᠠᠬᠤ ᠳᠠᠭᠤ ᠳᠠᠬᠢᠨ ᠰᠣᠨᠣᠰᠳᠠᠪᠠ᠃
ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠪᠥᠬᠥᠢᠭᠰᠡᠭᠡᠷ ᠪᠠᠢᠭᠠᠳ ᠲᠡᠭᠦᠨ ᠦ᠌ ᠥᠷᠭᠡᠨ ᠨᠢᠷᠤᠭᠤ ᠨᠢ ᠪᠠᠷᠤᠭ ᠪᠥᠭᠡᠷᠡᠩᠬᠡᠢ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠰᠢᠢᠳᠪᠦᠷᠢ ᠲᠡᠢ ᠪᠡᠷ ᠨᠢᠳᠦ ᠶ᠋ᠢ ᠨᠡᠭᠡᠭᠡᠵᠦ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠪᠠ᠃
ᠰᠢᠷᠡᠭᠡᠨ ᠦ᠌ ᠳᠣᠣᠷᠠ ᠠ᠋ᠴᠠ ᠴᠠᠪᠴᠢᠭᠳᠠᠭᠰᠠᠨ ᠬᠥᠮᠦᠰ ᠦ᠋ᠨ ᠬᠥᠯ ᠦᠵᠡᠭᠳᠡᠨᠡ᠂ ᠱᠠᠯᠠ ᠳᠡᠭᠡᠷᠡ ᠴᠢᠰᠤ ᠲᠤᠨᠤᠵᠠᠢ᠃ ᠪᠠᠲᠤ ᠬᠠᠭᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠥᠯ ᠢ᠋ᠶ᠋ᠡᠨ ᠠᠲᠤᠢᠯᠭᠠᠨ ᠰᠠᠭᠤᠵᠤ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠲᠠᠬᠢᠷ ᠰᠡᠯᠡᠮᠡ ᠪᠠᠷᠢᠵᠠᠢ᠃ ᠨᠢᠭᠤᠷ ᠨᠢ ᠬᠠᠪᠠᠭᠠᠨᠠᠵᠤ᠂ ᠨᠢᠳᠦ ᠨᠢ ᠤᠯᠠᠢᠵᠠᠢ᠃ ᠲᠡᠷᠡ ᠰᠦᠪᠡᠭᠡᠳᠠᠢ ᠲᠠᠰᠢ ᠲᠣᠭᠰᠢᠨ ᠢ᠋ᠶ᠋ᠠᠷ ᠰᠢᠷᠲᠡᠨᠡ᠂ ᠲᠡᠷᠡ ᠡᠭᠴᠡᠯᠡᠨ ᠵᠣᠭᠰᠣᠵᠤ ᠲᠡᠭᠦᠨ ᠦ᠌ ᠨᠢᠭᠤᠷ ᠲᠡᠰᠢ ᠴᠢᠭ᠌ ᠰᠢᠷᠳᠡᠬᠦ ᠳ᠋ᠦ᠍ ᠰᠦᠪᠡᠭᠡᠳᠠᠢ ᠮᠠᠰᠢ ᠤᠶᠠᠬᠠᠨ ᠢ᠋ᠶ᠋ᠠᠷ᠂
— ᠵᠠᠩᠵᠤᠨ ᠮᠢᠨᠢ ᠶᠠᠭᠤᠨ ᠳ᠋ᠤ᠌ ᠤᠬᠢᠯᠠᠨᠠ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
ᠪᠠᠲᠤ ᠬᠠᠭᠠᠨ ᠶᠠᠮᠠᠷ ᠨᠢᠭᠡ ᠬᠥᠮᠦᠨ ᠢ᠋ ᠴᠠᠪᠴᠢᠬᠤ ᠶ᠋ᠢ ᠪᠣᠳᠣᠭᠰᠠᠨ ᠶᠤᠮ ᠰᠢᠭ᠋ ᠰᠡᠯᠡᠮᠡ ᠪᠡᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠡᠷᠭᠦᠨ᠂ ᠭᠡᠨᠡᠳᠲᠡ ᠡᠷᠭᠢᠵᠦ ᠬᠤᠪᠢᠯᠭᠠᠨ ᠸᠯᠠᠰᠠᠢ᠍ᠲ ᠭᠡᠳᠡᠭ ᠪᠤᠷᠬᠠᠨ ᠢ᠋ ᠴᠠᠪᠴᠢᠵᠤ ᠡᠬᠢᠯᠡᠪᠡ᠃ ᠰᠡᠯᠡᠮᠡ ᠬᠠᠩᠭᠢᠨᠠᠵᠤ ᠪᠤᠷᠬᠠᠨ ᠠ᠋ᠴᠠ ᠵᠣᠮᠭᠣᠯ ᠦᠰᠦᠷᠦᠨᠡ᠃
— ᠶᠠᠭᠤᠨ ᠳ᠋ᠤ᠌ ᠴᠢ ᠣᠷᠣᠰ ᠤ᠋ᠨ ᠪᠤᠷᠬᠠᠨ ᠢ᠋ ᠵᠢᠮᠡᠯᠡᠨᠡ ᠪᠣᠢ? ᠭᠡᠵᠦ ᠰᠥᠪᠡᠭᠡᠳᠠᠢ ᠡᠩ ᠦ᠋ᠨ ᠪᠤᠰᠤ ᠵᠥᠭᠡᠯᠡᠨ ᠪᠥᠭᠡᠳ ᠡᠴᠢᠭᠡ ᠰᠢᠨᠵᠢ ᠶ᠋ᠢᠨ ᠳᠠᠭᠤ ᠪᠠᠷ ᠦᠷᠭᠦᠯᠵᠢᠯᠡᠨ᠂
— ᠨᠠᠳᠠᠳᠤ ᠡᠨᠡᠬᠦ ᠤᠷᠲᠤ ᠰᠠᠬᠠᠯᠲᠤ ᠪᠤᠷᠬᠠᠨ ᠪᠣᠯ ᠵᠣᠪᠠᠯᠠᠩᠲᠠᠨ ᠢ᠋ ᠠᠪᠤᠷᠠᠵᠤ ᠠᠯᠢᠪᠠ ᠨᠢᠭᠡᠨ ᠮᠠᠯ ᠠᠳᠤᠭᠤᠰᠤ ᠶ᠋ᠢ ᠬᠠᠮᠠᠭᠠᠯᠠᠳᠠᠭ ᠭᠡᠵᠦ ᠬᠡᠯᠡᠭᠰᠡᠨ ᠶᠤᠮ ᠭᠡᠲᠡᠯᠡ᠂
一ᠬᠠᠷᠢᠨ ᠮᠢᠨᠦ ᠲᠥᠯᠥᠭᠡ ᠶᠠᠭᠤ ᠴᠥ᠍ ᠬᠢᠭᠰᠡᠨ ᠦᠭᠡᠢ! ᠬᠠᠨᠠ ᠳ᠋ᠤ᠌ ᠡᠯᠭᠦᠭᠡᠰᠦᠲᠡᠢ ᠡᠨᠡ ᠴᠢᠨᠢ ᠨᠠᠮᠠᠶ᠋ᠢ ᠮᠠᠭᠤᠬᠠᠢ ᠬᠠᠷᠠᠵᠤ ᠪᠠᠢᠨᠠ᠂ ᠣᠷᠣᠰ ᠤ᠋ᠳ ᠤ᠋ᠨ ᠪᠤᠷᠬᠠᠨ ( ᠣ ) ᠬᠡᠷᠡᠭ ᠠᠯᠠᠭᠠ ᠭᠡᠨᠡ᠃
— ᠶᠠᠭᠤ ᠪᠣᠯᠪᠠ? ᠬᠡᠨ ᠴᠦ᠍ ᠦᠬᠦᠭᠡ ᠦᠭᠡᠢ ᠰᠢᠦ ᠳ᠋ᠠ ᠭᠡᠬᠦ ᠳ᠋ᠦ᠍ ᠪᠠᠲᠤ ᠬᠠᠭᠠᠨ ᠰᠣᠭᠲᠣᠭᠤ ᠪᠤᠯᠠᠩᠭᠢᠷ ᠨᠢᠳᠦ ᠪᠡᠷ ᠰᠥᠪᠡᠭᠡᠳᠡᠢ ᠶ᠋ᠢ ᠭᠢᠯᠦᠢᠨᠡ᠃
— ᠦᠬᠦᠭᠡ ᠦᠭᠡᠢ ᠭᠡᠨᠡ ᠤᠤ? ᠣ— ᠣ᠂ ᠣᠴᠢ ᠪᠠᠰᠠ ᠮᠢᠨᠦ ᠨᠥᠬᠥᠳ ᠦ᠋ᠨ ᠳᠤᠮᠳᠠ ᠪᠠᠢᠬᠤ ᠶ᠋ᠢ ᠪᠣᠳᠣᠵᠤ ᠪᠠᠢᠨᠠ ᠤᠤ? ᠨᠠᠳᠠᠳᠤ ᠨᠥᠬᠥᠳ ᠦ᠋ᠨ ᠬᠡᠷᠡᠭ ᠦᠭᠡᠢ᠂ ᠨᠠᠳᠠᠳᠤ ᠭᠠᠭᠴᠠᠬᠦ ᠰᠢᠳᠤᠷᠭᠤ ᠪᠣᠭᠣᠯᠴᠤᠳ ᠬᠡᠷᠡᠭ ᠲᠡᠢ᠁ ᠵᠠᠯᠢᠬᠠᠢᠴᠤᠳ ᠢ᠋ ᠪᠢ ᠥᠷᠥᠰᠢᠶᠡᠬᠦ ᠦᠭᠡᠢ᠂ ᠬᠠᠭᠤᠴᠢᠨ ᠬᠣᠶᠠᠷ ᠨᠥᠬᠥᠷ ᠦ᠋ᠨ ᠮᠢᠨᠢ ᠬᠥᠯ ᠨᠢ ᠲᠡᠷᠡ ᠴᠤᠬᠤᠢᠵᠤ ᠪᠠᠢᠨᠠ᠃ ᠪᠢ ᠲᠡᠳᠡᠨ ᠢ᠋ ᠪᠤᠯᠤᠩ ᠤᠷᠤᠭᠤ ᠲᠦᠯᠬᠢᠵᠦ ᠣᠷᠬᠢᠭᠰᠠᠨ ᠶᠤᠮ᠃ ᠡᠳᠡᠨᠡᠷ ᠪᠠᠰᠠ ᠮᠢᠨᠦ ᠦᠭᠡ ᠶ᠋ᠢ ᠪᠠᠷᠢᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠨᠠ ᠭᠡᠨᠡ᠃ ᠡᠳᠡᠨᠡᠷ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠲᠡᠭᠡᠵᠦ ᠦᠵᠡᠪᠡᠯ ᠬᠡᠷᠬᠢᠬᠦ ᠪᠠᠢᠭᠰᠠᠨ ᠪᠣᠯ! ᠣ— ᠣ᠂ ᠡᠨᠡ ᠪᠠᠢᠰᠢᠩ ᠤ᠋ᠨ ᠵᠠᠪᠰᠠᠷ ᠠ᠋ᠴᠠ ᠲᠣᠭᠰᠢᠨ ᠬᠠᠷᠠ ᠣᠩᠭᠣᠨ ( ᠣᠩᠭᠣᠳ ) ᠭᠠᠷᠴᠤ ᠢᠷᠡᠭᠡᠳ ᠬᠥᠮᠦᠰ ᠢ᠋ ᠤᠬᠠᠭᠠᠨ ᠦᠭᠡᠢ ᠪᠣᠯᠭᠠᠵᠤ ᠪᠠᠢᠨᠠ᠁ ᠭᠡᠪᠡ᠃ ᠰᠥᠪᠡᠭᠡᠳᠡᠢ ᠠᠮᠤᠭᠤᠯᠠᠩ ᠬᠡᠪ ᠢ᠋ᠶ᠋ᠡᠷ ᠯᠡ ᠪᠠᠢᠪᠠ᠃ ᠪᠠᠲᠤ ᠬᠠᠭᠠᠨ ᠱᠠᠯᠠᠨ ᠳᠡᠭᠡᠷᠡ ᠳᠡᠪᠬᠡᠴᠡᠨ ᠪᠠᠭᠤᠵᠤ ᠰᠥᠪᠡᠭᠡᠳᠡᠢ ᠶ᠋ᠢ ᠬᠠᠨᠴᠤᠢ ᠠ᠋ᠴᠠ ᠨᠢ ᠲᠠᠲᠠᠵᠤ᠂
— ᠶᠠᠪᠤᠶᠠ᠂ ᠪᠢ ᠴᠢᠮᠠᠲᠤ ᠲᠡᠳᠡᠨᠡᠷ ᠦ᠋ᠨ ᠶᠠᠭᠤ ᠬᠢᠭᠰᠡᠨ ᠢ᠋ ᠦᠵᠡᠭᠦᠯᠦᠶᠡ᠂ ᠮᠢᠨᠦ ᠬᠣᠢᠨᠠ ᠠ᠋ᠴᠠ᠁ ᠬᠠᠳ᠋ᠵᠢ ᠷᠠᠾᠢᠮ ᠴᠢ ᠴᠦ᠍ ᠪᠠᠰᠠ ᠪᠢᠳᠡᠨ ᠲᠡᠢ ᠶᠠᠪᠤ᠂ ᠴᠢᠨᠦ ᠳ᠋ᠧᠩᠯᠦ ᠬᠠᠮᠢᠭᠠ ᠪᠠᠢᠨᠠ? ᠲᠡᠭᠦᠨ ᠢ᠋ ᠪᠡᠨ ᠨᠣᠴᠣᠭᠠ ᠭᠡᠪᠡ᠃
ᠪᠠᠲᠤ ᠬᠠᠭᠠᠨ ᠲᠦᠷᠭᠡᠨ ᠲᠦᠷᠭᠡᠯᠡᠵᠦ ᠪᠤᠰᠤᠳ ᠨᠢ ᠳᠠᠭᠠᠯᠳᠤᠨ ᠶᠠᠪᠤᠪᠠ᠃ ᠲᠡᠳᠡ ᠶᠠᠪᠤᠵᠤ ᠴᠡᠴᠡᠷᠯᠢᠭ ᠤᠷᠤᠭᠤ ᠣᠷᠣᠪᠠ᠃
— ᠲᠡᠨᠳᠡ ᠬᠡᠨ ᠴᠦ᠍ ᠪᠠᠢᠬᠤ ᠦᠭᠡᠢ ᠭᠡᠵᠦ ᠰᠥᠪᠡᠭᠡᠳᠡᠢ ᠥᠭᠦᠯᠡᠪᠡᠯ᠂
— ᠴᠢ ᠨᠠᠮᠠᠶ᠋ᠢ ᠬᠠᠭᠤᠷᠴᠤ ᠪᠠᠢᠨᠠ?
ᠪᠠᠲᠤ ᠬᠠᠭᠠᠨ ᠠᠯᠢᠮᠠ ᠶ᠋ᠢᠨ ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠳᠡᠷᠭᠡᠳᠡ ᠣᠴᠢᠵᠤ ᠵᠣᠭᠰᠣᠭᠠᠳ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠬᠠᠷᠠᠵᠤ《 ᠵᠠ᠂ ᠵᠠ》 ᠭᠡᠵᠦ ᠢᠰᠬᠡᠷᠦᠭᠡᠳ ᠴᠢᠨᠠᠭᠰᠢᠳᠠ ᠶᠠᠭᠠᠷᠠᠪᠴᠢᠯᠠᠨ ᠶᠠᠪᠤᠪᠠ᠃ ᠮᠣᠩᠭᠣᠯᠴᠤᠳ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠮᠣᠷᠢᠨ ᠤ᠋ ᠬᠠᠰᠢᠶᠠ ᠰᠠᠷᠠᠪᠴᠢ ᠪᠦᠬᠦᠢ ᠬᠡᠢᠳ ᠦ᠋ᠨ ᠴᠢᠮᠡᠭᠡ ᠠᠨᠢᠷ ᠦᠭᠡᠢ ᠬᠠᠰᠢᠶᠠᠨ ᠳ᠋ᠤ᠌ ᠢᠷᠡᠪᠡ᠃
— ᠬᠠᠳ᠋ᠵᠢ ᠷᠠᠾᠢᠮ ᠡᠭᠦᠨ ᠢ᠋ ᠭᠡᠷᠡᠯᠲᠦᠭᠦᠯ᠃
ᠴᠠᠰᠤᠨ ᠳᠡᠭᠡᠷᠡ ᠬᠠᠷᠠ ᠮᠣᠷᠢ ᠬᠥᠯ ᠢ᠋ᠶ᠋ᠡᠨ ᠵᠢᠭᠢᠨ ᠬᠡᠪᠲᠡᠨᠡ᠃ ᠲᠡᠷᠡ ᠲᠣᠯᠣᠭᠠᠢ ᠪᠠᠨ ᠡᠷᠭᠦᠵᠦ ᠤᠬᠠᠭᠠᠯᠢᠭ ᠪᠦᠯᠲᠡᠭᠡᠷ ᠨᠢᠳᠦ ᠪᠡᠷ ᠪᠠᠲᠤ ᠬᠠᠭᠠᠨ ᠢ᠋ ᠬᠠᠷᠠᠨᠠ᠂ ᠲᠡᠭᠡᠭᠡᠳ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠳᠠᠬᠢᠨ ᠪᠠᠭᠤᠪᠠ᠃ ᠡᠪᠦᠳᠦᠭ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠴᠠᠭᠠᠨ ᠪᠣᠯᠲᠠᠯᠠ ᠨᠢ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠠᠰᠤ ᠴᠠᠪᠴᠢᠯᠠᠵᠠᠢ᠃
— ᠶᠠᠮᠠᠷ ᠨᠢᠭᠡᠨ ᠡᠲᠡᠭᠡᠳ ᠮᠣᠷᠢ ᠶ᠋ᠢ ᠮᠢᠨᠢ ᠬᠣᠣᠷᠯᠠᠬᠤ ᠲᠣᠭᠰᠢᠨ ᠮᠠᠩᠭᠤᠰ ᠤᠤ? ᠡᠰᠡᠬᠦᠯᠡ ᠣᠷᠣᠰ ᠤ᠋ᠨ ᠬᠠᠷᠠ ᠪᠥᠬᠡ ᠨᠠᠷ ᠤᠤ? ᠡᠰᠡᠬᠦᠯᠡ ᠴᠡᠷᠢᠭ ᠦ᠋ᠳ ᠤᠤ? ᠲᠡᠳᠡᠨᠡᠷ ᠨᠠᠮᠠᠶ᠋ᠢ ᠡᠨᠡ ᠮᠣᠷᠢ ᠪᠠᠨ ᠤᠨᠤᠵᠤ ᠸᠠᠩ ᠭᠧᠦᠷᠬᠢ ᠶ᠋ᠢ ᠭᠦᠢᠴᠡᠵᠦ ᠴᠠᠪᠴᠢᠬᠤ ᠳ᠋ᠤ᠌ ᠠᠲᠠᠭᠠᠷᠬᠠᠨ ᠲᠠᠲᠠᠭᠠᠯᠵᠠᠭᠰᠠᠨ ᠶᠤᠮ᠁ ᠣ— ᠣ ᠬᠡᠭᠡᠷ ᠬᠠᠷᠠ ᠮᠢᠨᠢ ᠬᠡᠯᠡᠭᠡᠴᠢ ! ᠬᠡᠨ ᠴᠢᠮᠠᠶ᠋ᠢ ᠬᠣᠣᠷᠯᠠᠪᠠ? ᠭᠡᠨᠡ᠃
ᠮᠣᠷᠢ᠂ ᠬᠥᠮᠦᠨ ᠮᠡᠲᠦ ᠰᠠᠨᠠᠭᠠ ᠠᠯᠳᠠᠵᠤ ᠬᠦᠵᠦᠭᠦᠦ ᠪᠡᠨ ᠨᠤᠭᠤᠯᠤᠨ ᠬᠠᠵᠠᠭᠤ ᠪᠠᠨ ᠳᠣᠯᠢᠶᠠᠨᠠ᠃
— ᠬᠠᠳ᠋ᠵᠢ — ᠷᠠᠾᠢᠮ ᠴᠢ ᠭᠠᠷᠠᠭ ᠢ᠋ᠶ᠋ᠠᠷ ᠮᠡᠷᠭᠡᠯᠡᠵᠦ ᠴᠢᠳᠠᠳᠠᠭ ᠰᠢᠦ ᠳ᠋ᠠ᠂ ᠬᠡᠨ ᠮᠢᠨᠦ ᠮᠣᠷᠢ ᠶ᠋ᠢ ᠠᠯᠠᠭᠰᠠᠨ ᠢ᠋ ᠮᠣᠷᠢᠳ ᠠ᠋ᠴᠠ ᠰᠣᠨᠣᠰᠴᠤ ᠮᠡᠳᠡ ᠭᠡᠪᠡ᠃
ᠬᠠᠳ᠋ᠵᠢ— ᠷᠠᠾᠢᠮ ᠮᠣᠷᠢᠨ ᠤ᠋ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠭᠠᠵᠠᠷ ᠢ᠋ ᠳ᠋ᠧᠩᠯᠦ ᠪᠡᠷ ᠭᠡᠷᠡᠯᠲᠦᠭᠦᠯᠵᠦ ᠮᠣᠷᠢᠨ ᠤ᠋ ᠡᠪᠡᠳᠴᠢᠯᠡᠭᠰᠡᠨ ᠬᠠᠵᠠᠭᠤ ᠶ᠋ᠢ ᠭᠠᠷ ᠢ᠋ᠶ᠋ᠠᠷ ᠪᠠᠷᠢᠵᠤ ᠲᠡᠮᠲᠡᠷᠢᠵᠦ ᠦᠵᠡᠭᠡᠳ᠂
— ᠡᠨᠳᠡ ᠬᠠᠪᠤᠳᠴᠠᠢ᠂ ᠴᠢᠰᠤ ᠢᠳᠡᠭᠡ ᠭᠠᠷᠴᠤ ᠪᠠᠢᠨᠠ᠂ ᠮᠣᠷᠢ ᠡᠭᠦᠨ ᠡᠴᠡ ᠪᠣᠯᠵᠤ ᠦᠬᠦᠵᠡᠢ ᠭᠡᠵᠦ ᠰᠢᠷᠬᠠ ᠠ᠋ᠴᠠ ᠨᠠᠷᠢᠨ ᠬᠤᠷᠴᠠ ᠲᠡᠮᠦᠷ ᠭᠠᠷᠭᠠᠪᠠ᠃
ᠪᠠᠲᠤ ᠬᠠᠭᠠᠨ ᠪᠦᠷᠦᠭ ᠳ᠋ᠧᠩᠯᠦ ᠲᠡᠰᠢ ᠪᠥᠬᠥᠢᠪᠡ᠃
— ᠡᠨᠡ ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠦᠰᠦᠨ ᠦ᠌ ᠰᠦᠯᠪᠡᠭᠦᠷ ᠪᠠᠢᠨᠠ ᠭᠡᠵᠦ ᠨᠢᠭᠡ ᠬᠥᠮᠦᠨ ᠦ᠌ ᠦᠭᠡ ᠰᠣᠨᠣᠰᠳᠠᠨᠠ᠃
— ᠦᠭᠡᠢ᠂ ᠡᠨᠡ ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠰᠦᠯᠪᠡᠭᠦᠷ ᠪᠢᠰᠢ ᠭᠡᠵᠦ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠬᠤᠷᠴᠠ ᠦᠵᠦᠭᠦᠷᠲᠦ ᠶᠠᠭᠤᠮᠠ ᠶ᠋ᠢ ᠦᠵᠡᠵᠦ᠂
一 ᠪᠦᠰᠡᠭᠦᠢᠴᠦᠳ ᠰᠦᠯᠪᠡᠭᠦᠷ ᠢ᠋ᠶ᠋ᠡᠷ ᠡᠵᠡᠨ ᠢ᠋ᠶ᠋ᠡᠨ ᠤᠨᠲᠠᠵᠤ ᠪᠠᠢᠬᠤ ᠳ᠋ᠤ᠌ ᠠᠯᠠᠳᠠᠭ ᠠ᠋ᠴᠠ ᠪᠢᠰᠢ ᠲᠡᠭᠦᠨ ᠦ᠌ ᠮᠣᠷᠢ ᠶ᠋ᠢ ᠶᠡᠷᠦ ᠴᠦ᠍ ᠠᠯᠠᠬᠤ ᠦᠭᠡᠢ᠂ ᠡᠭᠦᠨ ᠢ᠋ ᠰᠠᠢᠨ ᠰᠡᠳᠬᠢᠯᠲᠦ ᠨᠥᠬᠥᠳ ᠬᠢᠵᠡᠢ᠃ ᠪᠢ ᠴᠢᠮᠠᠲᠤ ᠳᠡᠮᠡᠢ ᠪᠢᠯᠳᠠᠤᠴᠢ ᠨᠠᠷ ᠢ᠋ ᠪᠤᠤ ᠤᠷᠮᠠᠰᠢᠭᠤᠯ᠂ ᠬᠠᠷᠢᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠭᠠᠭᠴᠠᠬᠦ ᠦᠨᠡᠨᠴᠢ ᠵᠠᠷᠤᠴᠠ ᠶ᠋ᠢ ᠪᠠᠢᠯᠭᠠ ᠭᠡᠵᠦ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠰᠢᠦ᠁ ᠡᠨᠡ ᠪᠣᠯ ᠬᠢᠲᠤᠭᠠᠨ ᠤ᠋ ᠡᠮᠲᠡᠷᠬᠡᠢ ᠪᠠᠢᠨᠠ ( ᠭᠡᠪᠡ᠃ )
ᠮᠣᠷᠢ ᠰᠤᠨᠢᠶᠠᠵᠤ ᠬᠥᠯ ᠢ᠋ᠶ᠋ᠡᠷ ᠴᠣᠬᠢᠯᠠᠨᠠ᠂ ᠪᠠᠲᠤ ᠬᠠᠭᠠᠨ ᠲᠡᠭᠦᠨ ᠦ᠌ ᠡᠮᠦᠨᠡ ᠶᠠᠪᠠᠭᠠᠨ ᠰᠠᠭᠤᠪᠠ᠃
— ᠬᠠᠷᠠ ᠮᠣᠷᠢ ᠮᠢᠨᠢ᠂ ᠡᠵᠡᠯᠡᠭᠰᠡᠨ ᠬᠣᠲᠠ ᠶ᠋ᠢᠨ ᠰᠢᠲᠠᠵᠤ ᠪᠠᠢᠭᠠ ᠳᠥᠯᠥ ᠳᠤᠮᠳᠠᠭᠤᠷ ᠴᠢᠮᠠᠲᠠᠢ ᠪᠠᠨ ᠬᠠᠮᠲᠤ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ᠁ ᠴᠢ ᠨᠠᠳᠠᠳᠤ ᠰᠢᠳᠤᠷᠭᠤ ᠪᠠᠷ ᠵᠢᠳᠬᠦᠭᠰᠡᠨ ᠶᠤᠮᠰᠠᠨ᠂ ᠨᠠᠰᠤ ᠴᠢᠨᠢ ᠪᠣᠭᠣᠨᠢ ᠪᠠᠢᠵᠠᠢ᠂ ᠣ— ᠣ ᠭᠡᠨᠡ᠃
ᠪᠠᠲᠤ ᠬᠠᠭᠠᠨ ᠪᠣᠰᠤᠨ ᠬᠠᠷᠠᠢᠵᠤ᠂ ᠴᠡᠴᠡᠷᠯᠢᠭ ᠢ᠋ᠶ᠋ᠡᠷ ᠳᠠᠮᠵᠢᠨ ᠱᠠᠲᠤ ᠤᠷᠤᠭᠤ ᠭᠦᠶᠦᠨ ᠭᠠᠷᠪᠠ᠂ ᠪᠦᠭᠦᠳᠡᠭᠡᠷ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠭᠦᠶᠦᠪᠡ᠃ ᠥᠪᠡᠷ ᠢ᠋ᠶ᠋ᠡᠨ ᠲᠠᠰᠤᠯᠭᠠᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠪᠠᠲᠤ ᠬᠠᠭᠠᠨ ᠬᠦᠷᠴᠦ ᠢᠷᠡᠭᠡᠳ ᠪᠤᠯᠠᠩᠭᠢᠷᠲᠤ ᠬᠠᠷᠠᠴᠠ ᠪᠠᠷ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠶ᠋ᠢ ᠡᠷᠢᠬᠦ ᠮᠡᠲᠦ ᠯᠠᠪᠯᠠᠨ ᠬᠠᠷᠠᠨᠠ᠃ ᠲᠡᠭᠡᠭᠡᠳ ᠣᠷᠣᠵᠤ ᠰᠢᠪᠡᠷ ᠰᠠᠪᠠ ᠲᠠᠢ ᠠᠷᠢᠬᠢ ᠠᠪᠴᠤ ᠰᠦᠪᠡᠭᠡᠳᠡᠢ ᠳᠠᠰᠢ ᠭᠢᠯᠦᠢᠵᠦ᠂
— ᠠ᠋᠂ ᠡᠨᠡ ᠵᠡᠷᠭᠡᠯᠡᠳᠡᠭᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠬᠡᠨ ᠪᠠᠢᠨᠠ ᠪᠣᠢ?
— ᠣᠴᠢᠵᠤ ᠦᠵᠡ! ᠭᠡᠪᠡ᠃
ᠪᠠᠲᠤ ᠬᠠᠭᠠᠨ ᠭᠠᠷ ᠲᠠᠭᠠᠨ ᠰᠠᠪᠠ ᠪᠠᠷᠢᠵᠤ ᠵᠡᠷᠭᠡᠯᠡᠳᠡᠭᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠪᠠ᠃ ᠣᠷᠣᠨ ᠳᠡᠭᠡᠷᠡ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠶᠦᠯᠳᠥ᠋ᠽ ᠬᠠᠲᠤᠨ ᠬᠡᠪᠲᠡᠵᠦ ᠪᠠᠢᠬᠤ ᠬᠠᠷᠠᠭᠳᠠᠨᠠ᠂ ᠲᠡᠷᠡ ᠣᠢᠷᠠᠲᠤᠨ ᠢᠷᠡᠬᠦ ᠪᠠᠲᠤ ᠬᠠᠭᠠᠨ ᠢ᠋ ᠬᠠᠷᠠᠭᠠᠳ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠪᠤᠯᠠᠭᠠᠨ ᠳᠡᠪᠡᠯ ᠢ᠋ ᠨᠥᠮᠥᠷᠪᠡ᠃
— ᠪᠡᠶᠡ ᠨᠢ ᠵᠦᠭᠡᠷ ᠤᠤ? ᠭᠡᠵᠦ ᠪᠠᠲᠤ ᠬᠠᠭᠠᠨ ᠠᠰᠠᠭᠤᠪᠠ᠂
— ᠶᠦᠯᠳᠥ᠋ᠽ ᠬᠠᠲᠤᠨ ᠤ᠋ ᠪᠡᠶᠡ ᠰᠠᠢᠨ ᠪᠠᠢᠨᠠ! ᠭᠡᠵᠦ ᠬᠢᠲᠠᠳ ᠥᠬᠢᠨ ᠢ ᠯᠡ ᠾᠧ ᠬᠠᠷᠢᠭᠤᠯᠪᠠ᠃
ᠪᠠᠲᠤ ᠬᠠᠭᠠᠨ᠂ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠳᠠᠰᠢ ᠡᠷᠭᠢᠵᠦ᠂
— ᠴᠢ ᠡᠭᠦᠨ ᠢ᠋ ᠢᠩᠭᠢᠵᠦ ᠠᠪᠤᠷᠠᠪᠠ ᠤᠤ?
— ᠲᠡᠢᠮᠦ ᠠ᠋ ᠪᠢ᠂
— ᠭᠠᠭᠴᠠᠬᠠᠨ ᠴᠢ ᠨᠠᠮᠠᠶ᠋ᠢ ᠣᠢᠯᠠᠭᠠᠳᠠᠭ ᠶᠤᠮ᠁ ᠴᠢ ᠮᠢᠨᠦ ᠦᠨᠡᠨᠴᠢ ᠵᠠᠷᠤᠴᠠ᠂ ᠪᠢ ᠡᠭᠦᠨ ᠢ᠋ ᠴᠠᠭᠠᠵᠠᠯᠠ ᠭᠡᠵᠦ ᠲᠤᠰᠢᠶᠠᠭᠠ ᠦᠭᠡᠢ ᠶᠤᠮ᠂ ᠬᠠᠷᠢᠨ ᠮᠢᠨᠦ ᠨᠡᠷᠡ ᠶ᠋ᠢ ᠪᠠᠷᠢᠵᠤ ᠮᠢᠨᠦ ᠴᠡᠷᠢᠭ ᠦ᠋ᠳ ᠲᠡᠭᠡᠭᠰᠡᠨ ᠪᠠᠢᠨᠠ ᠰᠠᠨ᠁ ᠭᠡᠳ ᠰᠠᠪᠠ ᠲᠠᠢ ᠠᠷᠢᠬᠢ ᠤᠤᠭᠤᠵᠤ ᠴᠡᠭᠡᠵᠢ ᠪᠡᠨ ᠬᠠᠯᠠᠭᠠᠨᠠ᠃ ᠲᠡᠭᠡᠭᠡᠳ ᠭᠤᠢᠪᠢᠵᠤ ᠱᠠᠯᠠ ᠳᠡᠭᠡᠷᠡ ᠰᠤᠨᠤᠨ ᠣᠢᠴᠢᠪᠠ᠃
ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠪᠣᠯᠭᠣᠮᠵᠢᠲᠠᠢ ᠪᠠᠷ ᠰᠢᠪᠠᠷ ᠰᠠᠪᠠ ᠶ᠋ᠢ ᠠᠪᠴᠤ ᠰᠡᠮᠬᠡᠨ ᠭᠠᠷᠴᠤ ᠣᠳᠪᠠ᠃
ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ᠂ ᠬᠦᠯᠢᠶᠡᠵᠦ ᠪᠠᠢᠭᠠ ᠴᠡᠷᠢᠭ ᠲᠠᠰᠢ ᠬᠠᠨᠳᠤᠵᠤ᠄
— ᠦᠷ ᠴᠠᠢᠬᠤ ᠳ᠋ᠤ᠌ ᠪᠢᠳᠡᠨᠡᠷ ᠲᠠᠪᠰᠢᠨᠠ᠃ ᠪᠢᠳᠡ ᠲᠦᠷᠭᠡᠨ ᠬᠣᠯᠠ ᠶᠠᠪᠤᠬᠤ ᠬᠡᠷᠡᠭᠲᠡᠢ ᠪᠣᠯᠪᠠ᠂ ᠴᠥᠮ ᠢ᠋ᠶ᠋ᠡᠷ ᠪᠡᠯᠡᠬᠡᠨ ᠪᠠᠢᠭᠲᠤᠨ᠂ ᠪᠢ᠂ ᠪᠢᠴᠢᠭᠡᠴᠢ ᠶ᠋ᠢ ᠳᠠᠭᠤᠳᠠ ᠭᠡᠵᠦ ᠲᠤᠰᠢᠶᠠᠭᠰᠠᠨ᠂ ᠲᠡᠳᠡᠨᠡᠷ ᠬᠠᠮᠢᠭᠠ ᠪᠠᠢᠨᠠ? ᠭᠡᠬᠦ ᠳ᠋ᠦ᠍
— ᠲᠡᠳᠡᠨᠡᠷ ᠲᠠᠨ ᠢ᠋ ᠬᠦᠯᠢᠶᠡᠵᠦ ᠪᠠᠢᠨᠠ᠂ ᠦᠯᠦ ᠢᠯᠠᠭᠳᠠᠭᠴᠢ ᠠ᠋! ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ 3᠂ ᠭᠡᠷᠡᠯ 2᠂ ᠪᠠᠶᠠᠨᠴᠡᠴᠡᠭ 1᠂ ᠮᠡᠷᠭᠡᠨᠭᠣᠸᠠ 1᠂ ᠬᠦᠦᠳᠠᠭᠠᠭᠤᠯ 1᠂ ᠬᠡᠷᠡᠶ᠋ᠢᠳ ᠂ ᠮᠥᠩᠬᠡᠨᠠᠰᠤᠨ 1
ᠬᠢᠨᠠᠭᠴᠢ᠄ ᠪᠠᠯ 2᠂ ᠪᠠᠶᠠᠨᠴᠡᠴᠡᠭ 3᠂ ᠠᠷᠢᠭᠤᠨ 3᠂ ᠲ᠂ ᠬᠦᠮᠦᠵᠢᠯᠲᠦ 1
ᠶᠡᠷᠦᠩᠬᠡᠢ ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ 9᠂ ᠠᠷᠢᠭᠤᠨ 9