ᠪᠠᠲᠤ ᠬᠠᠭᠠᠨ 8-05ᠪᠠᠢᠯᠳᠤᠭᠠᠨ ᠤ᠋ ᠪᠠᠢᠷᠢ-ᠰᠢᠭᠤᠷᠭᠠ ᠲᠠᠯᠪᠢᠪᠠBat khaan Бат хаан-ᠷᠣᠮᠠᠨ
276ᠳᠥᠷᠪᠡ ᠂ ᠲᠠᠰᠤᠯᠭᠠᠨ ᠤ ᠡᠭᠦᠳᠡᠨ ᠳ᠋ᠦ᠍
ᠥᠷᠭᠡᠨ ᠬᠠᠩᠬᠠᠭᠠᠷ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠲᠦᠯᠬᠢᠭᠦᠷᠴᠢ ᠯᠠᠮᠠ ᠶ᠋ᠢᠨ ᠬᠠᠪᠴᠢᠭ ᠲᠠᠰᠤᠯᠭᠠᠨ ᠤ᠋ ᠣᠷᠣᠨ ᠳᠡᠭᠡᠷᠡ ᠬᠣᠨᠢᠨ ᠬᠥᠨᠵᠢᠯᠡ ᠨᠥᠮᠥᠷᠴᠦ᠂ ᠵᠠᠪᠢᠯᠠᠨ ᠰᠠᠭᠤᠨᠠ᠃ ᠶᠡᠬᠡ ᠴᠡᠷᠢᠭ ᠦ᠋ᠨ ᠡᠪᠦᠭᠡᠨ ᠵᠠᠩᠵᠤᠨ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠮᠣᠳᠣᠨ ᠰᠠᠮᠪᠠᠷᠠ ᠳᠡᠭᠡᠷᠡ ᠰᠡᠢᠯᠦᠭᠰᠡᠨ ᠪᠤᠷᠬᠠᠨ ᠲᠡᠰᠢ ᠠᠵᠢᠭᠯᠠᠨ ᠬᠠᠷᠠᠨᠠ᠃ ᠲᠡᠭᠦᠨ ᠳᠡᠭᠡᠷᠡ ᠭᠡᠷ ᠦ᠋ᠨ ᠮᠠᠯ ᠤ᠋ᠳ ᠪᠣᠯᠤᠨ ᠪᠤᠰᠤᠳ ᠠᠮᠢᠲᠠᠨ ᠨᠤᠭᠤᠳ ᠤ᠋ᠨ ᠡᠵᠡᠨ ᠬᠤᠪᠢᠯᠭᠠᠨ ᠸᠯᠠᠰ ᠢ᠋ ᠳᠦᠷᠰᠦᠯᠡᠵᠡᠢ᠃ ᠡᠨᠡ ᠪᠣᠯ ᠶᠣᠰᠣᠲᠠᠢ ᠮᠠᠨ ᠤ᠋ ᠮᠣᠩᠭᠣᠯ ᠤᠯᠤᠰ ᠲᠤ᠌ ᠵᠣᠬᠢᠬᠤ ᠪᠤᠷᠬᠠᠨ ᠭᠡᠵᠦ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠥᠪᠡᠷ ᠲᠡᠭᠡᠨ ᠴᠢᠩᠭᠠ ᠪᠠᠷ ᠬᠡᠯᠡᠵᠦ ᠠᠩᠬᠠᠷᠤᠮᠵᠢ ᠲᠠᠢ ᠪᠠᠷ ᠸᠯᠠᠰ ᠤ᠋ᠨ ᠬᠠᠷᠠ ᠬᠦᠷᠡᠩ ᠴᠢᠷᠠᠢ ᠪᠠ ᠦᠵᠦᠭᠦᠷ ᠲᠡᠭᠡᠨ ᠪᠤᠷᠵᠢᠢᠭᠰᠠᠨ ᠪᠤᠭᠤᠷᠤᠯ ᠰᠠᠬᠠᠯ ᠢ᠋ ᠨᠢ ᠬᠠᠷᠠᠨᠠ᠃
— ᠡᠨᠡ ᠪᠣᠯ ᠶᠣᠰᠣᠲᠠᠢ ᠮᠣᠩᠭᠣᠯ ᠤ᠋ᠨ ᠪᠤᠷᠬᠠᠨ᠂ ᠡᠨᠡ ᠪᠣᠯ ᠮᠠᠯ ᠳ᠋ᠤ᠌ ᠬᠠᠢᠷᠠᠲᠠᠢ ᠪᠥᠭᠡᠳ ᠦᠬᠡᠷ᠂ ᠬᠣᠨᠢ᠂ ᠠᠳᠤᠭᠤ ᠵᠡᠷᠭᠡ ᠶ᠋ᠢ ᠬᠠᠮᠠᠭᠠᠯᠠᠨᠠ᠂ ᠮᠠᠨ ᠤ᠋ ᠮᠣᠷᠢᠲᠤ ᠴᠡᠷᠢᠭ ᠲᠸ᠋ ᠬᠠᠮᠠᠭᠠᠯᠠᠭᠴᠢ ᠬᠡᠷᠡᠭ ᠲᠡᠢ᠂ ᠲᠡᠭᠡᠬᠦ ᠦᠭᠡᠢ ᠪᠣᠯ ᠵᠠᠮ ᠨᠢ ᠨᠠᠮᠤᠭ ᠢ᠋ᠶ᠋ᠠᠷ ᠲᠦᠭᠵᠢᠭᠳᠡᠭᠰᠡᠨ᠂ ᠨᠠᠷᠠᠰᠤ ᠬᠤᠰᠤ ᠨᠢ ᠠᠭᠤᠯᠠ ᠮᠡᠲᠦ ᠥᠨᠳᠥᠷ ᠡᠨᠡ ᠣᠷᠣᠰ ᠤ᠋ᠨ ᠭᠠᠵᠠᠷ ᠮᠣᠷᠢᠳ ᠮᠢᠨᠢ ᠦᠬᠦᠴᠢᠬᠡᠬᠦ ᠪᠣᠯᠤᠨᠠ᠃ ᠠ᠋᠂ ᠡᠩ ᠦ᠋ᠨ ᠬᠠᠷᠠ ᠬᠥᠮᠦᠰ ᠶᠡᠬᠡᠳᠡ ᠠᠭᠤᠷᠰᠠᠭᠰᠠᠨ ᠳ᠋ᠠᠭᠠᠨ ᠪᠤᠶᠤ ᠤᠬᠠᠭᠠᠨ ᠮᠡᠳᠡᠷᠡᠯ ᠦᠭᠡᠢ ᠳ᠋ᠡᠭᠡᠨ ᠲᠠᠯᠬᠠᠨ ᠤ᠋ ᠰᠦᠷᠡᠯ ᠪᠠ ᠣᠪᠣᠭᠠᠯᠠᠭᠠᠲᠠᠢ ᠡᠪᠡᠰᠦ ᠶ᠋ᠢ ᠰᠢᠲᠠᠭᠠᠨᠠ᠃ ᠰᠠᠺᠯᠠᠪ᠂ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠣᠷᠣᠰ ᠰᠢᠦ᠂ ᠲᠡᠳᠡᠨᠡᠷ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠪᠠᠢᠭᠠ ᠶᠤᠮ ᠪᠣᠢ? ᠮᠣᠩᠭᠣᠯ ᠤ᠋ᠨ ᠡᠵᠡᠨ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠳᠠᠭᠠᠵᠤ ᠣᠷᠣᠪᠠᠯ ᠳᠡᠭᠡᠷᠡ ᠭᠡᠵᠦ ᠪᠣᠳᠣᠪᠠ ᠤᠤ? ᠪᠤᠰᠤ ᠪᠤᠶᠤ?
ᠡᠭᠦᠳᠡᠨ ᠦ᠌ ᠬᠠᠵᠠᠭᠤ ᠶ᠋ᠢᠨ ᠪᠠᠨᠲᠠᠩ ᠳᠡᠭᠡᠷᠡ ᠰᠠᠭᠤᠵᠤ ᠡᠨᠳᠡ ᠲᠤᠷᠠᠩᠬᠠᠢ ᠪᠣᠭᠣᠯ ᠵᠡᠭᠦᠷᠮᠡᠭ ᠲᠠᠢᠪᠤᠩ ᠳᠠᠭᠤ ᠪᠠᠷ᠂
— ᠪᠢ ᠣᠳᠣ ᠳᠠᠷᠤᠢ ᠳᠥᠴᠢᠨ ᠵᠢᠯ ᠡᠨᠳᠡ ᠪᠠᠢᠭᠰᠠᠨ ᠦᠭᠡᠢ᠂ ᠮᠠᠨ ᠤ᠋ ᠰᠦᠽᠳᠠᠯᠢ ᠶ᠋ᠢᠨ ᠡᠷᠡᠴᠦᠳ ᠶᠠᠭᠤ ᠪᠣᠳᠣᠵᠤ ᠪᠠᠢᠭᠠ ᠶ᠋ᠢ ᠣᠳᠣ ᠪᠢ ᠶᠡᠷᠦ ᠦᠯᠦ ᠮᠡᠳᠡᠨᠡ᠃ ᠴᠠᠭᠠᠨ ᠭᠡᠭᠡ ᠣᠷᠣᠮᠠᠭᠴᠠ ᠦᠷᠭᠦᠯᠵᠢ ᠲᠠᠨ ᠲᠠᠢ ᠭᠠᠩᠬᠤᠵᠤ ᠪᠠᠢᠬᠤ ᠶᠤᠮ᠃ ᠬᠥᠮᠦᠨ ᠲᠡᠢ ᠶᠠᠷᠢᠳᠠᠭ ᠦᠭᠡᠢ᠂ ᠲᠣᠭᠣᠭᠠᠴᠢ ᠨᠠᠷ ᠪᠣᠯᠣᠳ ᠲᠣᠭᠣᠭᠠᠨ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠦᠯᠦ ᠦᠵᠡᠨᠡ ᠭᠡᠬᠦ ᠳ᠋ᠦ᠍ ᠰᠦᠪᠡᠭᠡᠳᠡᠢ ᠥᠪᠡᠷ ᠦ᠋ᠨ ᠪᠣᠭᠣᠯ ᠢ᠋ ᠰᠤᠷᠭᠠᠬᠤ ᠪᠠᠷ ᠦᠷᠭᠦᠯᠵᠢᠯᠡᠪᠡ᠃
— ᠰᠠᠺᠯᠠᠪ ᠴᠢ ᠴᠥᠮ ᠢ᠋ ᠮᠠᠷᠲᠠᠵᠠᠢ! ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠂ ᠪᠦᠭᠦᠳᠡ ᠶ᠋ᠢ ᠲᠣᠭᠲᠠᠭᠠᠵᠤ ᠪᠦᠭᠦᠳᠡ ᠶ᠋ᠢ ᠥᠪᠡᠷ ᠦ᠋ᠨ ᠡᠵᠡᠨ ᠳ᠋ᠡᠭᠡᠨ ᠲᠠᠢᠯᠪᠤᠷᠢᠯᠠᠵᠤ ᠪᠠᠢᠬᠤ ᠬᠡᠷᠡᠭᠲᠡᠢ ᠭᠡᠳ ᠰᠦᠪᠡᠭᠡᠳᠠᠢ ᠪᠡᠶᠡ ᠪᠡᠨ ᠡᠭᠴᠡᠯᠡᠨ ᠣᠭᠵᠣᠮ ᠪᠥᠭᠡᠳ ᠵᠠᠬᠢᠷᠬᠤ ᠳᠠᠭᠤ ᠪᠠᠷ᠂
— ᠴᠡᠷᠢᠭ ᠦ᠋ᠳ ᠪᠠᠢᠷᠢᠨ ᠳ᠋ᠠᠭᠠᠨ ᠪᠠᠢᠬᠤ ᠦᠭᠡᠢ ᠤᠤ? ᠵᠡᠭᠦᠷᠮᠡᠭᠯᠡᠵᠦ ᠪᠠᠢᠭᠠ ᠤᠤ ᠦᠭᠡᠢ ᠤᠤ? ᠶᠠᠪᠤᠵᠤ ᠦᠵᠡᠭᠡᠳ ᠣᠳᠣᠬᠠᠨ ᠡᠷᠭᠢᠵᠦ ᠢᠷᠡ! ᠭᠡᠪᠡ᠃
— ᠢᠩᠭᠢᠨᠡ ᠭᠡᠵᠦ ᠮᠡᠳᠡᠭᠰᠡᠨ ᠶᠤᠮ! ᠶᠠᠳᠠᠬᠤ ᠳ᠋ᠠᠭᠠᠨ ᠰᠥᠨᠢ ᠴᠦ᠍ ᠠᠮᠠᠷᠠᠬᠤ ᠦᠭᠡᠢ ᠶᠤᠮ ! ᠭᠡᠵᠦ ᠥᠭᠦᠯᠡᠭᠰᠡᠭᠡᠷ ᠰᠡᠺᠯᠡᠪ ᠭᠠᠷᠴᠤ ᠣᠳᠪᠠ᠃
ᠰᠥᠪᠡᠭᠡᠲᠡᠢ ᠨᠢᠳᠦ ᠪᠡᠨ ᠠᠨᠢᠵᠤ ᠲᠣᠯᠣᠭᠠᠢ ᠪᠠᠨ ᠤᠨᠵᠢᠢᠯᠭᠠᠨ ᠠᠮᠠ ᠪᠠᠨ ᠠᠩᠭᠠᠢᠨ ᠤᠨᠲᠠᠪᠠ᠃ ᠲᠡᠷᠡ᠂ ᠨᠣᠢᠷ ᠲᠠᠭᠠᠨ ᠠᠪᠲᠠᠭᠳᠠᠵᠤ ᠵᠡᠭᠦᠳᠦᠯᠡᠪᠡ᠁ ᠵᠠᠬᠠ ᠬᠢᠵᠠᠭᠠᠷ ᠦᠭᠡᠢ ᠴᠡᠩᠬᠡᠷᠯᠡᠭᠰᠡᠨ ᠲᠠᠯᠠ ᠪᠠ ᠰᠠᠯᠬᠢᠨ ᠳ᠋ᠤ᠌ ᠭᠠᠩᠬᠤᠵᠤ ᠪᠠᠢᠭᠠ ᠥᠨᠳᠥᠷ ᠰᠢᠷᠠ ᠴᠡᠴᠡᠭ ᠢ᠋ ᠦᠵᠡᠪᠡ᠃ ᠲᠣᠮᠣ ᠤᠯᠠᠭᠠᠨ ᠨᠠᠷᠠ ᠳᠣᠪᠣᠴᠠᠭ ᠤ᠋ᠨ ᠴᠠᠭᠠᠨᠠ ᠲᠠᠯᠲᠠᠷᠢᠨ ᠰᠢᠩᠭᠡᠵᠦ ᠪᠠᠢᠨᠠ᠃ ᠰᠦᠷᠦᠭ ᠵᠡᠭᠡᠷᠡ ᠲᠠᠯᠠ ᠳᠣᠲᠣᠷᠠ ᠳᠠᠪᠬᠢᠯᠳᠤᠨᠠ᠂ ᠨᠠᠷᠠ ᠣᠷᠣᠬᠤ ᠠ᠋ᠴᠠ ᠤᠷᠢᠳ ᠥᠷᠲᠡᠭᠡ ᠬᠦᠷᠲᠡᠯᠡ ᠲᠦᠷᠭᠡᠯᠡᠨ ᠳᠠᠪᠬᠢ ᠭᠡᠵᠦ ᠨᠢᠭᠡᠨ ᠬᠥᠮᠦᠨ ᠦ᠌ ᠰᠢᠪᠡᠨᠡᠬᠦ ᠰᠣᠨᠣᠰᠲᠠᠯᠠ᠂ ᠨᠠᠷᠠ ᠶ᠋ᠢ ᠪᠠᠷᠢᠵᠤ ᠪᠠᠢᠬᠤ ᠶ᠋ᠢᠨ ᠲᠤᠯᠠᠳᠠ ᠲᠡᠷᠡ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨᠠ᠂ ᠭᠠᠷ ᠨᠢ ᠪᠦᠬᠦ ᠲᠠᠯᠠ ᠶ᠋ᠢ ᠥᠩᠭᠡᠷᠡᠲᠡᠯᠡ ᠰᠤᠨᠤᠨᠠ᠃ ᠭᠠᠷ ᠲᠤᠨᠢ ᠵᠢᠳᠠ ᠪᠠᠢᠨᠠ᠂ ᠬᠤᠷᠴᠠ ᠮᠡᠰᠡ ᠨᠠᠷᠠ ᠶ᠋ᠢ ᠨᠤᠭᠤᠯᠪᠠ᠃ ᠡᠨᠡ ᠨᠠᠷᠠ ᠪᠢᠰᠢ᠂ ᠬᠠᠷᠢᠨ ᠷᠶᠠᠽᠠᠨ ᠤ᠋ ᠴᠡᠷᠢᠭ ᠦ᠋ᠨ ᠤᠳᠤᠷᠢᠳᠤᠭᠴᠢ ᠺᠡᠹᠢ ( ᠶ᠋ᠢᠨ ) ᠴᠢᠰᠤ ᠤᠷᠤᠰᠤᠭᠰᠠᠨ ᠲᠣᠯᠣᠭᠠᠢ᠂ ᠡᠭᠦᠨ ᠢ᠋ ᠰᠢᠷᠬᠠᠲᠤᠭᠰᠠᠨ ᠬᠥᠮᠦᠰ ᠦ᠋ᠨ ᠬᠠᠮᠲᠤ ᠴᠡᠷᠢᠭ ᠦ᠋ᠳ ᠪᠠᠷᠢᠵᠤ ᠢᠷᠡᠬᠦ ᠳ᠋ᠦ᠍ ᠬᠠᠷᠢᠨ ᠬᠥᠳᠡᠯᠦᠭᠰᠡᠭᠡᠷ ᠪᠠᠢᠭᠰᠠᠨ ᠪᠥᠭᠡᠳ ᠬᠦᠴᠦᠲᠦ ᠲᠣᠬ᠌ᠷᠦᠢ᠍ᠯ ᠲᠡᠷᠡ ᠡᠪᠦᠭᠡᠨ ᠳᠠᠷᠤᠭᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠲᠠᠰᠤ ᠴᠠᠪᠴᠢᠬᠤ ᠳ᠋ᠤ᠌᠂ ᠲᠣᠯᠣᠭᠠᠢ ᠨᠢᠳᠦ ᠪᠡᠨ ᠨᠡᠭᠡᠭᠡᠵᠦ
— ᠲᠦᠷᠭᠡᠯᠡᠭᠲᠦᠨ! ᠲᠡᠭᠡᠬᠦ ᠦᠭᠡᠢ ᠪᠣᠯ ᠴᠢᠨᠦ ᠵᠣᠯ ᠵᠠᠶᠠᠭᠠ ᠦᠭᠡᠢ ᠴᠡᠷᠢᠭ ᠦ᠋ᠳ ᠴᠠᠰᠤᠨ ᠳᠣᠲᠣᠷᠠ ᠰᠢᠭᠢᠳᠬᠦ ᠪᠣᠯᠤᠨᠠ ᠭᠡᠵᠦ ᠰᠢᠪᠡᠨᠡᠪᠡ! ᠭᠡᠵᠦ ᠵᠡᠭᠦᠳᠦᠯᠡᠪᠡ᠃
ᠡᠭᠦᠳᠡ ᠶ᠋ᠢ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠴᠣᠬᠢᠪᠠ᠃ ᠳ᠋ᠧᠩ ᠦ᠋ᠨ ᠳᠥᠯᠥ ᠴᠦ᠍ ᠳᠡᠭᠡᠪᠦᠷ ᠲᠦ᠍ ᠰᠡᠭᠦᠳᠡᠷ ᠪᠥᠷᠲᠥᠯᠵᠡᠨᠡ᠃ ᠴᠠᠰᠤᠨ ᠳ᠋ᠤ᠌ ᠪᠤᠯᠠᠭᠳᠠᠭᠰᠠᠨ ᠲᠣᠮᠣ ᠭᠡᠭᠴᠢ ᠮᠣᠩᠭᠣᠯ ᠴᠡᠷᠢᠭ ᠣᠷᠣᠵᠤ ᠢᠷᠡᠭᠡᠳ ᠪᠠᠨᠲᠠᠩ ᠳ᠋ᠤ᠌ ᠪᠦᠳᠦᠷᠢᠪᠡ᠃ ᠦᠰᠦᠲᠡᠢ ᠮᠠᠯᠠᠭᠠᠢ ᠶ᠋ᠢ ᠪᠠᠭᠤᠯᠭᠠᠭᠰᠠᠨ ᠨᠢ ᠴᠢᠬᠢ ᠨᠢᠭᠤᠷ ᠢ᠋ ᠳᠠᠯᠳᠠᠯᠠᠵᠠᠢ᠃ ᠭᠠᠭᠴᠠᠬᠦ ᠬᠥᠯᠳᠡᠵᠦ ᠬᠠᠷᠠ ᠲᠣᠯᠪᠣ ᠰᠠᠭᠤᠭᠰᠠᠨ ᠬᠠᠮᠠᠷ ᠪᠠ ᠠᠷᠠᠢ ᠶᠠᠳᠠᠨ ᠬᠥᠳᠡᠯᠬᠦ ᠤᠷᠤᠭᠤᠯ ᠨᠢ ᠦᠵᠡᠭᠳᠡᠨᠡ᠃
— ᠠᠶᠤᠭᠲᠤᠨ᠂ ᠪᠢᠰᠢᠷᠡᠭᠲᠦᠨ! ᠭᠡᠬᠦ ᠳ᠋ᠦ᠍᠂
— ᠵᠠ ᠶᠠᠭᠤ ᠭᠡᠪᠡ? ᠭᠡᠵᠦ ᠶᠡᠬᠡ ᠴᠡᠷᠢᠭ ᠦ᠋ᠨ ᠡᠪᠦᠭᠡᠨ ᠵᠠᠩᠵᠤᠨ ᠲᠣᠭᠣᠮᠰᠠᠷ ᠦᠭᠡᠢ ᠠᠰᠠᠭᠤᠪᠠ᠃— ᠣᠷᠣᠰ ᠤ᠋ᠨ ᠬᠠᠷᠠ ᠪᠥᠬᠡ!
— 《 ᠪᠠᠢᠵᠠ 》᠂ ᠰᠥᠪᠡᠭᠡᠲᠡᠢ᠂
—《 ᠪᠠᠢᠵᠠ 》 ᠭᠡᠵᠦ ᠬᠣᠶᠠᠷ ᠬᠡᠯᠡᠭᠡᠳ ᠨᠠᠰᠢ ᠲᠦᠯᠬᠢᠯᠴᠡᠭᠡᠳ ᠪᠣᠯᠬᠤ ᠦᠭᠡᠢ ᠲᠤᠯᠠ᠂
— ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠠᠷᠠᠫᠠᠱᠠ ᠠ᠋ᠴᠠ ᠲᠠᠨ ᠳ᠋ᠤ᠌ ᠬᠦᠷᠭᠡᠵᠦ ᠥᠭ ᠭᠡᠵᠦ ᠲᠤᠰᠢᠶᠠᠪᠠ ᠭᠡᠪᠡ᠃
— ᠬᠠᠷᠠ ᠪᠥᠬᠡ ᠬᠠᠮᠢᠭᠠ ᠪᠠᠨ ᠪᠠᠢᠨᠠ?
— ᠡᠨᠳᠡ ᠪᠠᠢᠨᠠ ᠭᠡᠵᠦ ᠮᠣᠩᠭᠣᠯ ᠬᠠᠵᠠᠭᠤ ᠲᠡᠰᠢ ᠵᠠᠢᠯᠠᠪᠠᠯ᠂ ᠲᠡᠭᠦᠨ ᠦ᠌ ᠠᠷᠤ ᠳ᠋ᠤ᠌ ᠮᠥᠨ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠤᠷᠲᠤ ᠳᠡᠪᠡᠯ ᠲᠡᠢ ᠬᠠᠷᠠ ᠯᠠᠮᠠ᠂ ᠬᠠᠷᠠ ᠮᠠᠯᠠᠭᠠᠢ ᠪᠠᠨ ᠬᠥᠮᠥᠰᠬᠡ ᠪᠡᠨ ᠬᠦᠷᠲᠡᠯᠡ ᠪᠠᠭᠤᠯᠭᠠᠭᠰᠠᠨ ᠵᠣᠭᠰᠣᠨᠠ᠃ ᠰᠥᠪᠡᠭᠡᠲᠡᠢ ᠨᠢᠳᠦ ᠪᠡᠨ ᠠᠨᠢᠰᠬᠢᠵᠤ ᠯᠠᠮᠠ ᠥᠭᠡᠳᠡ ᠬᠠᠷᠠᠪᠠ᠂ ᠲᠡᠷᠡ ᠮᠠᠯᠠᠭᠠᠢ ᠪᠠᠨ ᠠᠪᠤᠪᠠ᠂ ᠪᠤᠭᠤᠷᠤᠯ ᠰᠠᠭᠤᠭᠰᠠᠨ ᠦᠰᠦ ᠪᠠ ᠤᠷᠲᠤ ᠬᠠᠷᠠ ᠰᠠᠬᠠᠯ ᠨᠢ ᠮᠠᠰᠢ ᠲᠠᠨᠢᠯ ᠪᠣᠯᠤᠯᠲᠠᠢ ᠦᠵᠡᠭᠳᠡᠪᠡ᠃ ᠲᠡᠭᠡᠭᠡᠳ ᠲᠡᠷᠡ ᠲᠠᠲ᠋ᠠᠷ ᠬᠡᠯᠡ ᠪᠡᠷ ᠥᠭᠦᠯᠡᠷᠦᠨ᠂
— ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠴᠢᠬᠤᠯᠠ ᠮᠡᠳᠡᠭᠡ ᠪᠠᠢᠨᠠ ᠭᠡᠬᠦ ᠳ᠋ᠦ᠍ ᠵᠠᠩᠵᠤᠨ ᠴᠡᠷᠢᠭ ᠲᠡᠰᠢ ᠬᠠᠨᠳᠤᠵᠤ᠂
— ᠴᠢ ᠭᠠᠷᠤᠭᠠᠳ ᠡᠭᠦᠳᠡᠨ ᠳ᠋ᠦ᠍ ᠪᠠᠢᠵᠤ ᠪᠠᠢᠭᠠᠷᠠᠢ᠂ ᠪᠢ ᠴᠢᠮᠠᠶ᠋ᠢ ᠳᠠᠭᠤᠳᠠᠨᠠ ᠭᠡᠵᠦ ᠲᠤᠰᠢᠶᠠᠪᠠ᠃
ᠮᠣᠩᠭᠣᠯ ᠲᠣᠮᠣ ᠭᠤᠲᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠢᠰᠬᠢᠯᠡᠨ ᠭᠠᠷᠪᠠ᠃
ᠡᠭᠦᠳᠡᠨ ᠴᠦ᠍ ᠬᠠᠭᠠᠭᠳᠠᠪᠠ᠂ ᠯᠠᠮᠠ ᠭᠡᠳᠡᠷᠭᠦ ᠨᠢᠭᠡ ᠬᠠᠷᠠᠭᠠᠳ ᠭᠠᠳᠠᠭᠤᠷ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠵᠤ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠤ᠋ᠨ ᠳᠡᠷᠭᠡᠳᠡ ᠣᠷᠣᠨ ᠳᠡᠭᠡᠷᠡ ᠵᠡᠷᠭᠡᠯᠡᠨ ᠰᠠᠭᠤᠪᠠ᠃
— ᠪᠢ ᠯᠠᠮᠠ ᠬᠤᠪᠴᠠᠰᠤ ᠡᠮᠦᠰᠦᠭᠡᠳ᠂ ᠬᠠᠷᠠ ᠬᠥᠮᠦᠰ ᠲᠦ᠍ ᠮᠥᠷᠭᠥᠯ ᠲᠠᠯᠪᠢᠪᠠ᠂ ᠴᠥᠮ ᠮᠢᠨᠦ ᠭᠠᠷ ᠢ᠋ ᠦᠨᠦᠰᠴᠢᠬᠡᠭᠰᠡᠨ ᠭᠡᠬᠦ ᠳ᠋ᠦ᠍᠂
— ᠲᠡᠭᠡᠭᠡᠳ ᠸᠠᠩ ᠭᠯᠸᠪ ᠴᠢ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢ!
— ᠪᠢ ᠶᠡᠬᠡ ᠸᠠᠩ ᠭᠸᠤᠷᠬᠢ ᠸᠰᠸᠸᠯᠤᠳᠤᠸᠢᠴ ᠤ᠋ᠨ ᠬᠠᠮᠢᠭᠠ ᠪᠠᠨ ᠪᠠᠢᠭᠠ ᠶ᠋ᠢ ᠬᠥᠮᠦᠨ ᠪᠦᠬᠦᠨ ᠡᠴᠡ ᠠᠰᠠᠭᠤᠪᠠ᠃《 ᠸᠠᠩ ᠬ᠌ᠸᠣᠷᠭᠢ ᠬᠠᠮᠢᠭᠠ ᠪᠠᠢᠨᠠ? ᠬᠠᠮᠢᠭᠠ ᠴᠡᠷᠢᠭ ᠴᠤᠭᠯᠠᠷᠠᠵᠤ ᠪᠠᠢᠨᠠ? 》 ᠭᠡᠳᠡᠭ ᠠᠰᠠᠭᠤᠯᠲᠠ ᠮᠢᠨᠦ ᠡᠷᠭᠢᠨ ᠲᠣᠭᠣᠷᠢᠨ ᠰᠣᠨᠣᠰᠳᠠᠵᠤ ᠪᠠᠢᠪᠠ ᠃ ᠴᠢᠳᠠᠯᠲᠠᠢ ᠪᠦᠬᠦᠨ ᠬᠢᠲᠤᠭᠠ ᠰᠦᠬᠡ ᠪᠡᠨ ᠬᠤᠷᠴᠠᠯᠠᠵᠤ ᠪᠠᠢᠨᠠ᠂ ᠴᠥᠮ ᠬᠣᠢᠲᠤ ᠵᠦᠭ ᠶᠠᠪᠤᠭᠠ᠂ ᠪᠢ ᠪᠠᠰᠠ ᠲᠦᠷᠭᠡᠯᠡᠵᠦ ᠪᠣᠯᠬᠤ ᠭᠠᠵᠠᠷ ᠲᠤ᠌ ᠴᠢᠷᠭᠠᠨ ᠳ᠋ᠤ᠌ ᠰᠠᠭᠤᠵᠤ᠂ ᠦᠯᠦ ᠪᠣᠯᠬᠤ ᠭᠠᠵᠠᠷ ᠢ᠋ᠶ᠋ᠠᠷ ᠶᠠᠪᠠᠭᠠᠨ ᠶᠠᠪᠤᠪᠠ᠃
— ᠠ᠂ ᠲᠡᠭᠡᠭᠡᠳ ᠸᠠᠩ ᠭᠯᠸᠪ᠂ ᠴᠢᠨᠠᠭᠰᠢ ᠶᠠᠷᠢ!
— ᠤᠯᠠᠭᠠᠴᠢ ᠨᠠᠮᠠᠶ᠋ᠢ ᠴᠢᠷᠭᠠ ᠪᠠᠷ ᠲᠡᠭᠡᠭᠡᠵᠦ ᠶᠠᠪᠤᠭᠠᠳ ᠪᠢᠳᠡᠨ ᠦ᠌ ᠲᠥᠯᠥᠭᠡ ᠮᠥᠷᠭᠥᠯ ᠬᠢᠵᠦ ᠳᠠᠢᠰᠤᠨ ᠢ᠋ ᠢᠯᠠᠬᠤ ᠴᠢᠳᠠᠯ ᠢ᠋ ᠣᠯᠭᠣᠨᠠ ᠤᠤ ᠭᠡᠪᠡ᠃
— ᠡᠨᠡ ᠲᠤᠬᠠᠢ ᠪᠣᠯᠢᠶᠠ᠂ ᠬᠠᠷᠢᠨ ᠸᠠᠩ ᠭᠸᠤᠷᠭᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ?
— ᠪᠢ ᠡᠷᠲᠡ ᠴᠠᠭ ᠤ᠋ᠨ ᠨᠡᠪᠲᠡᠷᠡᠰᠢ ᠦᠭᠡᠢ ᠣᠢ ᠶ᠋ᠢᠨ ᠨᠠᠮᠤᠭ ᠳᠤᠮᠳᠠᠭᠤᠷ ᠶᠠᠪᠤᠵᠤ ᠢᠷᠡᠯᠡ᠃
— ᠬᠠᠮᠢᠭᠠᠰᠢ ᠪᠠᠨ?
— ᠮᠣᠯᠤᠭᠠ ᠭᠣᠣᠯ ᠢ᠋ᠶ᠋ᠠᠷ᠃
— ᠮᠣᠯᠤᠭᠠ? ᠮᠣᠯᠤᠭᠠ ᠬᠠᠮᠢᠭᠠ ᠪᠠᠢᠨᠠ?
— ᠬᠣᠢᠲᠤ ᠵᠦᠭ ᠲᠦ᠍᠂ ᠴᠢᠬᠤᠯᠠ ᠮᠡᠳᠡᠭᠡ ᠠᠪᠴᠢᠷᠠᠪᠠᠯ ᠨᠠᠳᠠᠳᠤ ᠬᠡᠦᠳᠡᠢ ᠲᠡᠢ ᠠᠯᠲᠠ ᠥᠭᠭᠦᠨᠡ ᠭᠡᠵᠦ ᠴᠢ ᠠᠮᠠᠯᠠᠭᠰᠠᠨ ᠰᠢᠦ ᠳ᠋ᠠ᠃
— ᠪᠢ ᠶᠡᠷᠦ ᠬᠤᠳᠠᠯ ᠮᠡᠳᠡᠭᠡ ᠰᠣᠨᠣᠰᠬᠤ ᠦᠭᠡᠢ ᠪᠠᠢᠨᠠ᠂ ᠴᠢ ᠶᠠᠪᠤᠭᠠᠳ ᠯᠠ ᠪᠠᠢᠨᠠ᠂ ᠶᠠᠪᠤᠭᠠᠳ ᠯᠠ ᠪᠠᠢᠨᠠ᠂ ᠶᠠᠮᠠᠷ ᠴᠤ᠌ ᠲᠦᠯᠬᠢᠴᠡ ᠠᠯᠠᠭᠠ ᠭᠡᠨᠡ᠃
ᠸᠠᠩ ᠭᠯᠸᠪ᠂ ᠵᠠᠩᠵᠤᠨ ᠤ᠋ ᠴᠢᠯᠠᠭᠤ ᠮᠡᠲᠦ ᠴᠢᠷᠠᠢ ᠶ᠋ᠢ ᠦᠨᠡᠮᠰᠢᠬᠦ ᠦᠭᠡᠢ ᠮᠠᠶᠢᠭ ᠢ᠋ᠶ᠋ᠠᠷ ᠰᠢᠷᠳᠡᠨᠡ᠃ ᠲᠡᠭᠦᠨ ᠦ᠌ ᠮᠣᠢᠨᠣᠭ ᠬᠤᠷᠤᠭᠤ ᠨᠤᠭᠤᠳ ᠠᠯᠲᠠ ᠶ᠋ᠢ ᠭᠣᠷᠢᠳᠠᠬᠤ ᠮᠡᠲᠦ ᠣᠷᠣᠭᠰᠢ ᠰᠠᠷᠪᠠᠢᠨᠠ᠃
— ᠪᠢ ᠴᠦ᠍ ᠶᠡᠬᠡ ᠬᠢᠯᠢᠨᠴᠡ ᠲᠡᠢ ᠦᠢᠯᠡᠳᠦᠯᠡ! ᠲᠥᠷᠥᠭᠰᠡᠨ ᠤᠯᠤᠰ ᠢ᠋ᠶ᠋ᠠᠨ ᠳᠠᠢᠰᠤᠩᠨᠠᠵᠤ ᠪᠠᠢᠨᠠ᠂ ᠦᠬᠦᠯ ᠦ᠋ᠨ ᠣᠷᠣᠨ ᠳ᠋ᠤ᠌ ᠡᠷᠯᠢᠭ ᠦ᠋ᠳ ᠨᠠᠮᠠᠶ᠋ᠢ ᠭᠠᠯ ᠳ᠋ᠤ᠌ ᠰᠢᠲᠠᠭᠠᠬᠤ ᠪᠢᠵᠡ ᠠ᠋᠃
— ᠬᠠᠷᠢᠨ ᠰᠠᠢᠨ ᠪᠠᠢᠨᠠ᠂ ᠡᠨᠡ ᠴᠢᠨᠢ ᠴᠢᠮᠠ ᠳ᠋ᠤ᠌ ᠭᠠᠪᠢᠶᠠ ᠪᠣᠯᠤᠨᠠ!
— ᠪᠢ ᠠᠯᠲᠠ ᠭᠣᠷᠢᠳᠠᠵᠤ ᠪᠠᠢᠨᠠ᠃
— ᠪᠢ ᠲᠡᠭᠦᠨ ᠢ᠋ ᠦᠭᠭᠦᠨᠡ᠂ ᠶᠡᠬᠡ ᠪᠡᠷ ᠦᠭᠭᠦᠨᠡ᠂ ᠮᠡᠳᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡ᠃
— ᠮᠣᠯᠤᠭᠠ᠂ ᠢᠵᠢᠯ ᠮᠥᠷᠡᠨ ᠳ᠋ᠦ᠍ ᠴᠢᠳᠬᠤᠬᠤ ᠪᠠ ᠮᠣᠯᠤᠭᠠ ᠳ᠋ᠤ᠌ ᠰᠢᠲ ᠭᠡᠳᠡᠭ ᠭᠣᠣᠯ ᠴᠢᠳᠬᠤᠨᠠ᠃ ᠡᠨᠡ ᠭᠣᠣᠯ ᠤ᠋ᠨ ᠡᠷᠭᠢ ᠳ᠋ᠦ᠍ ᠪᠤᠵᠸᠨ᠋ᠷᠢ ᠭᠡᠭᠴᠢ ᠰᠠᠭᠤᠷᠢᠨ ᠪᠣᠢ᠂ ᠡᠭᠦᠨ ᠳ᠋ᠦ᠍ ᠬᠠᠭᠤᠴᠢᠨ ᠤ᠋ ᠰᠦᠮᠡ ᠪᠣᠢ! ᠰᠦᠮᠡ ᠶ᠋ᠢᠨ ᠳᠡᠷᠭᠡᠳᠡ ᠯᠠᠮᠠ ᠶ᠋ᠢᠨ ᠪᠠᠢᠰᠢᠩ ᠳ᠋ᠤ᠌ ᠸᠠᠩ ᠭᠸᠤᠷᠬᠢ ᠸᠰᠸᠸᠤᠯᠤᠳᠤᠸᠢᠴ ᠰᠠᠭᠤᠵᠤ ᠲᠡᠨᠳᠡ ᠶᠡᠬᠡ ᠴᠡᠷᠢᠭ ᠬᠤᠷᠠᠯᠳᠤᠭᠤᠯᠵᠤ ᠪᠠᠢᠨᠠ᠃
ᠰᠦᠪᠡᠭᠡᠳᠡᠢ ᠭᠡᠳᠡᠷᠭᠦ ᠤᠬᠤᠷᠢᠵᠤ ᠨᠢᠳᠦ ᠨᠢ ᠳᠡᠭᠡᠭᠰᠢ ᠬᠠᠷᠠᠵᠤ᠂ ᠬᠠᠭᠤᠴᠢᠨ ᠮᠣᠳᠣᠨ ᠳᠡᠭᠡᠪᠦᠷ ᠢ᠋ ᠶᠠᠭ ᠰᠢᠷᠳᠡᠨᠡ᠃ ᠲᠡᠭᠡᠭᠰᠡᠨᠡ ᠵᠡᠭᠦᠨ ᠭᠠᠷ ᠢ᠋ᠶ᠋ᠠᠷ ᠡᠷᠢᠶᠡᠨ ᠣᠭᠣᠰᠣᠷ ᠲᠠᠢ ᠤᠭᠤᠲᠠ ᠶ᠋ᠢ ᠡᠪᠦᠷ ᠡᠴᠡ ᠭᠠᠷᠭᠠᠵᠤ᠂
— ᠡᠨᠳᠡ ᠭᠤᠷᠪᠠᠨ ᠵᠠᠭᠤᠨ ᠠᠯᠲᠠᠨ ᠵᠣᠭᠣᠰ ᠪᠣᠢ᠂ ᠬᠠᠭᠠᠰ ᠢ᠋ ᠨᠢ ᠴᠢ ᠣᠳᠣ ᠠᠪᠤᠨᠠ᠂ ᠦᠯᠡᠳᠡᠭᠰᠡᠨ ᠢ᠋ ᠨᠢ ᠰᠢᠲ ᠭᠣᠣᠯ ᠳᠡᠭᠡᠷᠡ ᠣᠴᠢᠭᠰᠠᠨ ᠤ᠋ ᠬᠣᠢᠨᠠ ᠴᠢ ᠠᠪᠤᠨᠠ᠃ ᠴᠢ ᠵᠠᠮ ᠵᠢᠭᠠᠵᠤ ᠦᠭᠭᠦᠨᠡ᠃ ᠬᠡᠷᠪᠡ ᠴᠢ ᠮᠡᠬᠡᠯᠡᠭᠰᠡᠨ ᠪᠣᠯ ᠰᠢᠲ ᠭᠣᠣᠯ ᠳᠡᠭᠡᠷᠡ ᠴᠢᠮᠠᠶ᠋ᠢ ᠱᠣᠷᠯᠠᠨ ᠵᠠᠳᠠᠭᠠᠢ ᠭᠠᠯ ᠳ᠋ᠤ᠌ ᠰᠢᠲᠠᠭᠠᠨᠠ᠂ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠴᠢᠮᠠᠶ᠋ᠢ ᠦᠬᠦᠲᠡᠯᠡ ᠴᠢᠨᠢ ᠰᠢᠲᠠᠭᠠᠨᠠ ᠪᠢᠵᠡ ᠭᠡᠬᠦ ᠳ᠋ᠦ᠍᠂ ᠸᠠᠩ ᠭᠯᠸᠪ ᠭᠡᠮᠰᠢᠨ
— ᠡᠨᠡ ᠴᠦ᠍ ᠮᠠᠰᠢ ᠪᠠᠭᠠ ᠪᠠᠢᠨᠠ ᠭᠡᠵᠦ ᠰᠢᠪᠡᠨᠡᠨᠡ᠃
— ᠳᠤᠷᠠ ᠦᠭᠡᠢ ᠪᠣᠯ ᠪᠤᠤ ᠠᠪ!
ᠰᠦᠪᠡᠭᠡᠳᠡᠢ ᠱᠠᠯᠠᠮᠠᠭᠠᠢ ᠪᠠᠷ ᠨᠢᠭᠡᠨ ᠭᠠᠷ ᠢ᠋ᠶ᠋ᠠᠷ ᠪᠠᠷᠢᠵᠤ ᠰᠢᠳᠦ ᠪᠡᠷ ᠬᠠᠵᠠᠵᠤ ᠤᠭᠤᠲᠠ ᠶ᠋ᠢᠨ ᠠᠮᠠᠰᠠᠷ ᠢ᠋ ᠲᠠᠢᠯᠵᠤ ᠡᠪᠦᠷ ᠳᠡᠭᠡᠷᠡ ᠪᠡᠨ ᠠᠰᠬᠠᠭᠠᠳ ᠠᠯᠲᠠᠨ ᠵᠣᠭᠣᠰ ᠠ᠋ᠴᠠ ᠬᠡᠰᠡᠭ ᠢ᠋ ᠠᠳᠬᠤᠵᠤ ᠸᠠᠩ ᠳᠠᠰᠢ ᠭᠠᠷ ᠰᠤᠩᠭᠠᠪᠠᠯ᠂ ᠲᠡᠷᠡ ᠬᠣᠶᠠᠷ ᠠᠯᠠᠭᠠ ᠪᠠᠨ ᠲᠣᠰᠴᠤ᠄
— ᠡᠨᠡ ᠠᠯᠲᠠ ᠶ᠋ᠢ ᠪᠢ ᠠᠪᠬᠤ ᠳ᠋ᠠᠭᠠᠨ ᠵᠥᠪᠬᠡᠨ ᠥᠪᠡᠷ ᠦ᠋ᠨ ᠠᠵᠢᠯ ᠶᠠᠪᠤᠳᠠᠯ ᠤ᠋ᠨ ᠲᠤᠯᠠᠳᠠ ᠠᠪᠤᠨᠠ᠃ ᠬᠠᠷᠢᠨ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠴᠢ ᠪᠠᠢᠯᠳᠤᠭᠠᠨ ᠳᠠᠭᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠨᠠᠳᠠᠳᠤ ᠷᠶᠠᠽᠠᠨ᠂ ᠰᠦᠽᠳ᠋ᠠᠯᠢ ᠵᠡᠷᠭᠡ ᠪᠠᠰᠠ ᠪᠤᠰᠤ ᠭᠠᠵᠠᠷ ᠤ᠋ᠨ ᠶᠡᠬᠡ ᠡᠵᠡᠨ ᠸᠠᠩ ᠪᠣᠯᠭᠠᠬᠤ ᠶᠠᠪᠤᠳᠠᠯ ᠳ᠋ᠤ᠌ ᠲᠤᠰᠠᠯᠠᠬᠤ ᠤᠤ? ᠭᠠᠭᠴᠠᠬᠦ ᠡᠭᠦᠨ ᠦ᠌ ᠲᠥᠯᠥᠭᠡ ᠥᠪᠡᠷ ᠦ᠋ᠨ ᠳᠠᠢᠰᠤᠨ ᠸᠠᠩ ᠭᠸᠤᠷᠬᠢ ᠸᠯᠡᠳᠢᠮᠢᠷᠰᠺᠢ ᠶ᠋ᠢ ᠪᠤᠲᠠ ᠨᠢᠷᠭᠡᠬᠦ ᠶ᠋ᠢᠨ ᠲᠤᠯᠠ ᠪᠢ ᠲᠠᠨᠠᠷ ᠲᠸ᠋ ᠡᠢᠨ ᠬᠦ᠌ ᠲᠤᠰᠠᠯᠠᠵᠤ ᠪᠠᠢᠨᠠ ᠭᠡᠪᠡ᠃
— ᠮᠠᠷᠭᠠᠰᠢ ᠶ᠋ᠢᠨ ᠶᠠᠭᠤᠮᠠ᠂ ᠮᠠᠷᠭᠠᠰᠢ ᠳ᠋ᠠᠭᠠᠨ ᠪᠣᠯᠳᠠᠭ ᠲᠤᠯᠠ ᠲᠡᠭᠡᠭᠰᠡᠨ ᠬᠣᠢᠨᠠ ᠶᠠᠭᠤ ᠬᠢᠬᠦ ᠶ᠋ᠢ ᠰᠢᠢᠳᠪᠦᠷᠢᠯᠡᠨᠡ᠃ ᠭᠡᠲᠡᠯᠡ ᠡᠭᠦᠳᠡ ᠶ᠋ᠢ ᠴᠢᠩᠭᠠ ᠲᠣᠭᠰᠢᠵᠤ ᠶᠠᠷᠢᠶᠠ ᠶ᠋ᠢ ᠲᠠᠰᠤᠯᠪᠠ᠃ ᠨᠢᠭᠡᠨ ᠬᠥᠮᠦᠨ ᠡᠭᠦᠳᠡ ᠪᠠᠯᠪᠠᠵᠤ᠄
— ᠪᠠᠢᠵᠠ! ᠪᠠᠢᠵᠠ! ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠭᠡᠵᠦ ᠬᠠᠰᠬᠢᠷᠪᠠ᠃ ᠯᠠᠮᠠ ᠲᠦᠷᠭᠡᠨ ᠢ᠋ᠶ᠋ᠡᠷ ᠮᠥᠩᠭᠥ ᠪᠡᠨ ᠨᠢᠭᠤᠪᠠ᠃
ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠪᠣᠰᠴᠤ ᠮᠣᠳᠣᠨ ᠡᠭᠦᠳᠡ ᠶ᠋ᠢ ᠲᠦᠯᠬᠢᠵᠦ ᠨᠡᠭᠡᠭᠡᠪᠡᠯ ᠲᠠᠰᠤᠯᠭᠠᠨ ᠳ᠋ᠤ᠌ ᠬᠠᠷᠠ ᠲᠣᠷᠭᠠᠨ ᠨᠥᠮᠥᠷᠭᠡ ᠨᠥᠮᠥᠷᠦᠭᠰᠡᠨ ᠬᠢᠲᠠᠳ ᠥᠬᠢᠨ ᠢ ᠯᠡ ᠾᠧ ᠭᠦᠶᠦᠨ ᠣᠷᠣᠵᠤ ᠡᠪᠦᠳᠦᠭ ᠰᠥᠭᠥᠳᠦᠨ ᠠᠮᠢᠰᠬᠤᠭᠠᠳᠠᠵᠤ ᠵᠠᠩᠵᠤᠨ ᠤ᠋ ᠬᠤᠪᠴᠠᠰᠤᠨ ᠠ᠋ᠴᠠ ᠰᠢᠭᠦᠷᠡᠨ ᠠᠪᠤᠪᠠ᠃ ᠵᠠᠩᠵᠤᠨ ᠲᠡᠭᠦᠨ ᠢ᠋ ᠭᠡᠳᠡᠷᠭᠦ ᠲᠦᠯᠬᠢᠵᠦ᠂ ᠯᠠᠮᠠ ᠶ᠋ᠢ ᠲᠠᠰᠤᠯᠭᠠᠨ ᠠ᠋ᠴᠠ ᠪᠠᠨ ᠭᠠᠷᠭᠠᠵᠤ ᠲᠠᠢᠪᠤᠩ ᠢ᠋ᠶ᠋ᠠᠷ ᠡᠭᠦᠳᠡ ᠪᠡᠨ ᠬᠠᠭᠠᠪᠠ᠃
— ᠠᠶᠤᠯ᠂ ᠮᠠᠭᠤᠬᠠᠢ ᠪᠣᠯᠤᠯᠠ ᠭᠡᠵᠦ ᠬᠢᠲᠠᠳ ᠥᠬᠢᠨ ᠨᠢᠯᠪᠤᠰᠤ ᠴᠤᠪᠤᠷᠠᠭᠤᠯᠤᠨ᠂
— ᠡᠨᠡ ᠣᠷᠣᠰ ᠤ᠋ᠨ ᠬᠠᠷᠢᠶᠠᠯ ᠢ᠋ᠶ᠋ᠠᠷ ᠪᠦᠲᠦᠭᠰᠡᠨ ᠪᠥᠬᠡ ᠨᠠᠷ ᠵᠠᠩᠵᠤᠨ ᠳ᠋ᠤ᠌ ᠬᠣᠣᠷ ᠤᠤᠭᠤᠯᠭᠠᠴᠢᠬᠠᠵᠠᠢ᠃ ᠲᠡᠷᠡ ᠤᠬᠠᠭᠠᠨ ᠠᠯᠲᠠᠨ ᠭᠠᠯᠵᠠᠭᠤᠷᠠᠭᠠᠳ ᠰᠡᠯᠡᠮᠡ ᠪᠠᠷᠢᠵᠤ ᠬᠡᠪᠲᠡᠭᠰᠡᠨ ᠪᠦᠭᠦᠳᠡ ᠶ᠋ᠢ ᠴᠠᠪᠴᠢᠯᠠᠵᠤ ᠣᠷᠣᠰ ᠤ᠋ᠨ ᠪᠤᠷᠬᠠᠨ ᠨᠤᠭᠤᠳ ᠢ᠋ ᠴᠣᠬᠢᠯᠠᠨ ᠰᠠᠨᠳᠠᠯᠢ ᠰᠢᠷᠡᠭᠡ ᠶ᠋ᠢ ᠬᠠᠨᠠ ᠤᠷᠤᠭᠤ ᠴᠢᠯᠠᠭᠤᠳᠠᠭᠠᠳ ᠪᠠᠢᠨᠠ ᠭᠡᠪᠡ᠃
— ᠲᠡᠷᠡ ᠨᠠᠳᠠᠳᠤ ᠬᠠᠮᠢᠶᠠ ᠦᠭᠡᠢ ᠭᠡᠵᠦ ᠰᠥᠪᠡᠭᠡᠲᠡᠢ ᠬᠦᠢᠲᠡᠨ ᠰᠢᠨᠵᠢ ᠪᠡᠷ ᠬᠠᠷᠢᠭᠤᠯᠪᠠ᠃
— ᠪᠢ ᠪᠣᠯ ᠵᠥᠪᠬᠡᠨ ᠪᠠᠢᠯᠳᠤᠭᠠᠨ ᠤ᠋ ᠵᠥᠪᠯᠡᠬᠦ᠂ ᠬᠠᠷᠢᠨ ᠵᠠᠩᠵᠤᠨ ᠭᠡᠷ ᠲᠡᠭᠡᠨ ᠶᠠᠭᠤ ᠰᠠᠨᠠᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠭᠡᠵᠦ ᠪᠠᠢᠭ ᠭᠡᠪᠡ᠃ ᠢ ᠯᠡ ᠾᠧ᠂ ᠦᠷᠭᠦᠯᠵᠢᠯᠡᠨ ᠤᠬᠢᠯᠠᠵᠤ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠤ᠋ᠨ ᠳᠡᠪᠡᠯ ᠢ᠋ ᠦᠯᠦ ᠲᠠᠯᠪᠢᠨᠠ᠃ ᠲᠡᠷᠡ ᠡᠨᠡᠬᠦ ᠥᠬᠢᠨ ᠦ᠌ ᠨᠠᠷᠢᠨ ᠴᠣᠩᠬᠢᠭᠠᠷ ᠨᠢᠭᠤᠷ᠂ ᠪᠢᠴᠢᠬᠠᠨ ᠠᠮᠠ᠂ ᠲᠠᠤᠯᠠᠢ ᠶ᠋ᠢᠨ ᠰᠢᠲᠦ ᠠᠳᠠᠯᠢ ᠣᠷᠣᠭᠰᠢ ᠪᠠᠨ ᠭᠠᠷᠤᠭᠰᠠᠨ ᠬᠣᠶᠠᠷ ᠡᠭᠦᠳᠡᠨ ᠰᠢᠲᠦ ᠵᠡᠷᠭᠡ ᠶ᠋ᠢ ᠨᠢ ᠰᠣᠨᠢᠷᠬᠠᠨ ᠬᠠᠷᠠᠨᠠ᠃
— ᠴᠢ ᠶᠠᠭᠤᠨ ᠳ᠋ᠤ᠌ ᠤᠬᠢᠯᠠᠨᠠ ᠪᠣᠢ? ᠣᠷᠣᠰ ᠤ᠋ᠳ ᠤ᠋ᠨ ᠪᠤᠷᠬᠠᠨ ᠴᠢᠮᠠᠲᠤ ᠬᠠᠢᠷᠠᠨ ᠰᠠᠨᠠᠭᠳᠠᠨᠠ ᠤᠤ?
— ᠵᠠᠩᠵᠤᠨ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠲᠡᠷᠡ ᠪᠣᠢ᠂ ᠵᠠᠩᠵᠤᠨ ᠤᠬᠠᠭᠠᠨ ᠠᠯᠳᠠᠵᠤ ᠪᠢᠴᠢᠬᠠᠨ ᠶᠥᠯᠳᠦ᠋ᠽ ᠬᠠᠲᠤᠨ ᠤ᠋ ᠭᠠᠷ ᠬᠥᠯ ᠢ᠋ ᠬᠦᠯᠢ ᠭᠡᠵᠦ ᠲᠤᠰᠢᠶᠠᠪᠠ ᠭᠡᠨᠡ᠃
— ᠡᠨᠡ ᠲᠡᠭᠦᠨ ᠦ᠌ ᠡᠷᠬᠡ᠂ ᠡᠷᠡ ᠨᠢ ᠥᠪᠡᠷ ᠦ᠋ᠨ ᠡᠬᠡᠨᠡᠷ ᠢ᠋ ᠬᠡᠷᠬᠢᠭᠰᠡᠨ ᠴᠦ᠍ ᠳᠤᠷᠠ᠃
— ᠮᠢᠨᠦ ᠡᠵᠡᠨ ᠬᠠᠲᠤᠨ ᠢ᠋ ᠡᠭᠦᠳᠡᠨ ᠳ᠋ᠦ᠍ ᠪᠠᠢᠭᠰᠠᠨ ᠮᠠᠨᠠᠭᠠᠨ ᠴᠡᠷᠢᠭ ᠲᠡᠢ ᠬᠣᠯᠪᠣᠨ ᠬᠥᠭᠡᠭᠡᠭᠡᠳ ᠴᠡᠴᠡᠷᠯᠢᠭ ᠳᠣᠲᠣᠷᠠ ᠴᠠᠰᠤᠨ ᠳᠣᠲᠣᠷᠠ ᠬᠠᠶᠠᠭᠰᠠᠨ ᠪᠥᠭᠡᠳ ᠲᠡᠨᠳᠡ ᠬᠥᠮᠦᠨ ᠢᠳᠡᠭᠴᠢ ᠭᠦᠶᠦᠯᠳᠦᠵᠦ ᠪᠠᠢᠨᠠ᠃ ᠣᠳᠣ ᠪᠥᠬᠡ ᠪᠧᠾᠢ ᠪᠣᠯᠤᠨ ᠲᠡᠭᠦᠨ ᠦ᠌ ᠲᠤᠰᠠᠯᠠᠭᠴᠢᠳ ᠢᠷᠡᠵᠦ ᠬᠠᠲᠤᠨ ᠶᠥᠯᠳᠦ᠋ᠽ ᠪᠣᠯᠤᠨ ᠵᠠᠯᠠᠭᠤ ᠴᠡᠷᠢᠭ ᠲᠦ᠍ ᠬᠠᠷᠢᠶᠠᠯ ᠬᠢᠵᠦ ᠠᠯᠠᠨᠠ ᠪᠠᠢᠬᠠ᠃
— ᠲᠡᠷᠡ ᠨᠠᠳᠠᠳᠤ ᠬᠠᠮᠢᠶᠠ ᠦᠭᠡᠢ᠂ ᠪᠢ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠶᠠᠪᠤᠬᠤ ᠶ᠋ᠢ ᠮᠡᠳᠡᠨᠡ᠂ ᠬᠠᠷᠢᠨ ᠵᠠᠩᠵᠤᠨ ᠤ᠋ ᠡᠬᠡᠨᠡᠷ ᠦ᠋ᠨ ᠭᠡᠷ ᠲᠦ᠍ ᠪᠣᠯᠬᠤ ᠶᠠᠪᠤᠳᠠᠯ ᠢ᠋ ᠲᠡᠭᠦᠨ ᠦ᠌ ᠪᠥᠬᠡ ᠨᠠᠷ ᠪᠣᠯᠤᠨ ᠬᠢᠲᠠᠳ ᠰᠢᠪᠡᠭᠡᠴᠢᠨ ᠨᠠᠷ ᠮᠡᠳᠡᠨᠡ᠃
— ᠵᠠᠩᠵᠤᠨ ᠲᠠᠨ ᠠ᠋ᠴᠠ ᠥᠭᠡᠷᠡ ᠬᠡᠨ ᠦ᠌ ᠴᠦ᠍ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠦᠭᠡᠢ᠂ ᠦᠯᠦ ᠢᠯᠠᠭᠳᠠᠭᠴᠢ ᠮᠢᠨᠢ! ᠶᠥᠯᠳᠦ᠋ᠽ ᠬᠠᠲᠤᠨ ᠢ᠋ ᠠᠪᠤᠷᠠᠭᠠᠴᠢ! ᠲᠠᠩᠭᠠᠷᠢᠭᠯᠠᠶᠠ! ᠶᠠᠮᠠᠷ ᠴᠥ᠍ ᠭᠡᠮ ᠦᠭᠡᠢ᠂ ᠲᠡᠷᠡ ᠴᠡᠷᠢᠭ ᠪᠣᠯ ᠲᠡᠭᠦᠨ ᠦ᠌ ᠠᠬᠠ ᠶᠤᠮ!
— ᠬᠢᠲᠠᠳ ᠥᠬᠢᠨ ᠴᠢ ᠱᠠᠯ ᠳᠡᠮᠡᠢ ᠨᠠᠳᠠᠳᠤ ᠢᠷᠡᠵᠡᠢ! ᠪᠠᠲᠤ ᠬᠠᠭᠠᠨ ᠤ᠋ ᠪᠠᠢᠯᠳᠤᠭᠠᠨ ᠤ᠋ ᠲᠠᠪᠰᠢᠯᠲᠠ ᠶ᠋ᠢᠨ ᠨᠣᠮ ᠪᠢᠴᠢᠵᠦ ᠪᠠᠢᠭᠠ ᠬᠠᠳ᠋ᠵᠢ ᠷᠠᠾᠢᠮ ᠢ᠋ ᠡᠷᠢᠵᠦ ᠣᠯ᠃ ᠲᠡᠷᠡ ᠲᠡᠭᠦᠨ ᠦ᠌ ᠪᠠᠭᠰᠢ ᠲᠤᠯᠠ ᠵᠠᠩᠵᠤᠨ ᠲᠡᠭᠦᠨ ᠦ᠌ ᠦᠭᠡᠨ ᠳ᠋ᠦ᠍ ᠣᠷᠣᠨᠠ᠃ ᠲᠡᠷᠡ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠡᠳᠡᠭᠡᠷᠡᠬᠦ ᠡᠮ ᠥᠭᠪᠡᠯ ᠪᠢᠴᠢᠬᠠᠨ ᠡᠬᠡᠨᠡᠷ ᠢ᠋ ᠪᠡᠨ ᠥᠷᠥᠰᠢᠶᠡᠬᠦ ᠪᠢᠵᠡ ᠭᠡᠬᠦ ᠳ᠋ᠦ᠍᠂
— ᠪᠢ ᠬᠠᠷᠠᠩᠭᠤᠢ ᠰᠥᠨᠢ ᠬᠠ ᠶᠠ ᠦᠭᠡᠢ ᠮᠠᠨᠠᠭᠠ ᠬᠠᠷᠠᠭᠤᠯ ᠲᠠᠢ ᠪᠠᠢᠬᠤ ᠳ᠋ᠤ᠌ ᠬᠠᠮᠢᠭᠠᠰᠢ ᠪᠠᠨ ᠭᠦᠶᠦᠬᠦ ᠪᠣᠢ? ᠬᠠᠮᠢᠭᠠ ᠠ᠋ᠴᠠ ᠣᠳᠣ ᠬᠠᠳ᠋ᠵᠢ ᠷᠠᠾᠢᠮ ᠢ᠋ ᠣᠯᠬᠤ ᠪᠣᠢ? ᠥᠨᠥᠳᠥᠷ ᠪᠥᠬᠡ ᠨᠠᠷ ᠨᠢ ᠪᠢᠴᠢᠬᠠᠨ ᠡᠵᠡᠨ ᠢ᠋ ᠪᠣᠭᠣᠵᠤ ᠠᠯᠠᠨᠠ᠂ ᠮᠠᠷᠭᠠᠰᠢ ᠶᠠᠮᠠᠷ ᠡᠮᠴᠢ ᠴᠦ᠍ ᠠᠪᠤᠷᠠᠬᠤ ᠦᠭᠡᠢ ᠪᠣᠯᠤᠨᠠ ᠭᠡᠳ ᠬᠢᠲᠠᠳ ᠥᠬᠢᠨ ᠱᠠᠯᠠ ᠳᠡᠭᠡᠷᠡ ᠤᠨᠠᠵᠤ ᠲᠣᠯᠣᠭᠠᠢ ᠪᠠᠨ ᠴᠣᠬᠢᠵᠤ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠨᠠ᠃ ᠰᠥᠪᠡᠭᠡᠳᠡᠢ ᠲᠡᠭᠦᠨ ᠢ᠋ ᠪᠣᠯᠭᠣᠮᠵᠢᠲᠠᠢ ᠲᠣᠭᠣᠷᠢᠨ ᠶᠠᠪᠤᠵᠤ ᠡᠭᠦᠳᠡ ᠨᠡᠭᠡᠭᠡᠵᠦ ᠮᠠᠨᠠᠭᠠᠨ ᠤ᠋ ᠴᠡᠷᠢᠭ ᠢ᠋ ᠳᠠᠭᠤᠳᠠᠪᠠ᠃
ᠶᠦᠷᠲ᠋ᠳ᠋ᠵᠢ ᠳ᠋ᠦ᠍ ᠭᠦᠶᠦᠵᠦ ᠣᠴᠢᠭᠠᠳ᠂
— ᠨᠠᠳᠠ ᠳᠡᠭᠡᠷᠡ ᠲᠦᠷᠭᠡᠨ ᠢᠷᠡ ᠭᠡᠵᠦ ᠬᠡᠯᠡ!
— ᠮᠡᠳᠡᠪᠡ ᠭᠡᠵᠦ ᠨᠥᠬᠥᠷ ᠬᠠᠷᠠᠭᠤᠯᠴᠢ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠠᠷᠴᠢᠭᠢᠨᠠᠭᠤᠯᠤᠨ ᠭᠦᠶᠦᠨ ᠣᠳᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠮᠡᠷᠭᠡᠨᠭᠣᠸᠠ 3᠂ ᠠᠯᠲᠠᠨᠴᠢᠮᠡᠭ 2᠂ ᠬᠦᠦᠳᠠᠭᠠᠭᠤᠯ 1᠂ ᠬᠡᠷᠡᠶ᠋ᠢᠳ ᠂ ᠮᠥᠩᠬᠡᠨᠠᠰᠤᠨ 1᠂ ᠭᠡᠷᠡᠯ 1
ᠬᠢᠨᠠᠭᠴᠢ᠄ ᠲ᠂ ᠬᠦᠮᠦᠵᠢᠯᠲᠦ 1
ᠶᠡᠷᠦᠩᠬᠡᠢ ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ 8᠂ ᠠᠷᠢᠭᠤᠨ 8