ᠪᠠᠲᠤ ᠬᠠᠭᠠᠨ 8-03ᠪᠠᠲᠤ ᠬᠠᠭᠠᠨ ᠰᠦᠮᠡ ᠳᠣᠲᠣᠷᠠ-ᠰᠢᠭᠤᠷᠭᠠ ᠲᠠᠯᠪᠢᠪᠠBat khaan Бат хаан-ᠷᠣᠮᠠᠨ
150ᠭᠤᠷᠪᠠ ᠂ ᠪᠠᠲᠤ ᠬᠠᠭᠠᠨ ᠰᠦᠮᠡ ᠳᠣᠲᠣᠷᠠ
ᠪᠠᠲᠤ ᠬᠠᠭᠠᠨ ᠦᠭᠯᠢᠴᠢ ᠳ᠋ᠦ᠍ ᠬᠦᠷᠴᠦ ᠮᠣᠷᠢ ᠪᠠᠨ ᠲᠡᠳᠡᠨ ᠵᠣᠭᠰᠣᠭᠠᠳ᠂ ᠡᠮᠬᠢ ᠵᠢᠷᠤᠮ ᠦᠭᠡᠢ ᠪᠡᠷ ᠨᠢᠭᠡ ᠨᠢᠭᠡᠨ ᠳ᠋ᠦ᠍ᠨᠢ ᠨᠠᠭᠠᠯᠳᠤᠭᠤᠯᠤᠭᠰᠠᠨ ᠮᠡᠲᠦ ᠪᠡᠷ ᠰᠢᠪᠬᠠᠷᠠᠯᠳᠤᠭᠤᠯᠤᠨ ᠪᠠᠷᠢᠭᠰᠠᠨ ᠪᠥᠭᠡᠳ ᠣᠷᠣᠢ ᠳᠡᠭᠡᠷᠡ ᠪᠡᠨ ᠵᠠᠭᠠᠯᠮᠠᠢ ᠲᠠᠢ ᠳ᠋ᠦ᠋ᠨᠵᠡᠨ ᠪᠠᠢᠰᠢᠩ ᠤ᠋ᠳ ᠤ᠋ᠨ ᠰᠦᠷᠯᠢᠭ ᠪᠠᠷᠠ ᠲᠡᠰᠢ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠵᠢᠭᠠᠵᠤ᠂
— ᠡᠨᠡ ᠶᠠᠭᠤ ᠭᠡᠭᠴᠢ ᠪᠣᠢ? ᠭᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠶᠠᠪᠤᠭᠰᠠᠨ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠵᠡᠭᠦᠷᠮᠡᠭᠯᠡᠭᠰᠡᠨ ᠢ᠋ᠶ᠋ᠡᠨ ᠰᠡᠷᠢᠭᠰᠡᠨ ᠶᠤᠮ ᠰᠢᠭ᠌᠂
— ᠬᠡᠯᠡᠮᠦᠷᠴᠢ! ᠬᠡᠯᠡᠮᠦᠷᠴᠢ ᠶ᠋ᠢ ᠳᠠᠭᠤᠳᠠᠭᠲᠤᠨ ᠭᠡᠵᠦ ᠬᠠᠰᠬᠢᠷᠪᠠ᠃
— ᠬᠡᠯᠡᠮᠦᠷᠴᠢ ᠠ᠋! ᠭᠡᠵᠦ ᠴᠡᠷᠢᠭ ᠦ᠋ᠳ ᠪᠠᠷᠬᠢᠷᠠᠪᠠ᠃
ᠫᠤᠯᠤᠸ ᠭᠠᠵᠠᠷ ᠤ᠋ᠨ ᠬᠠᠭᠤᠴᠢᠨ ᠬᠡᠯᠡᠮᠦᠷᠴᠢ ᠬᠦᠷᠴᠦ ᠢᠷᠡᠭᠡᠳ᠂
— ᠡᠨᠡ ᠡᠷᠡᠭᠲᠡᠢᠴᠦᠳ ᠦ᠋ᠨ ᠸᠤᠰᠺᠷᠸᠰᠸᠨ᠋ᠰᠺᠢ ᠭᠡᠭᠴᠢ ᠰᠦᠮᠡ᠂ ᠡᠨᠳᠡ ᠬᠡᠳᠦᠨ ᠵᠠᠭᠤᠨ ᠭᠡᠯᠦᠩ ᠰᠠᠭᠤᠨᠠ᠃ ᠡᠳᠡᠨᠡᠷ ᠪᠣᠯ ᠪᠦᠰᠡᠭᠦᠢ ᠬᠥᠮᠦᠨ ᠳᠠᠰᠢ ᠣᠭᠲᠣ ᠬᠠᠷᠠᠳᠠᠭ ᠦᠭᠡᠢ ᠪᠥᠬᠡ ᠨᠤᠭᠦᠳ ᠶᠤᠮ᠃ ᠡᠳᠡᠨᠡᠷ ᠴᠠᠭ ᠦᠷᠭᠦᠯᠵᠢ ᠮᠥᠷᠭᠥᠯ ᠬᠢᠵᠦ᠂ ᠬᠣᠭᠣᠯᠠ ᠢᠳᠡᠵᠦ ᠰᠠᠭᠤᠨᠠ ᠭᠡᠪᠡ᠃
— ᠡᠳᠡᠨᠡᠷ ᠶᠠᠭᠤᠨ ᠲᠤᠬᠠᠢ ᠮᠥᠷᠭᠥᠳᠡᠭ ᠪᠣᠢ?
— ᠭᠠᠵᠠᠷ ᠳᠡᠭᠡᠷᠡ ᠠᠮᠤᠭᠤᠯᠠᠩ ᠲᠠᠢᠪᠤᠩ᠂ ᠴᠢᠮᠡᠭᠡ ᠠᠨᠢᠷ ᠦᠭᠡᠢ ᠪᠠᠢᠯᠭᠠᠬᠤ ᠶ᠋ᠢᠨ ᠲᠤᠯᠠ᠃
— ᠨᠠᠳᠠᠳᠤ ᠡᠭᠦᠨ ᠦ᠌ ᠬᠡᠷᠡᠭ ᠠᠯᠠᠭᠠ!
— ᠭᠠᠰᠠᠯᠠᠩ ᠥᠯᠥᠰᠬᠦᠯᠡᠩ᠂ ᠭᠠᠵᠠᠷ ᠬᠥᠳᠡᠯᠬᠦ ᠠᠶᠤᠯ ᠪᠣᠯᠤᠨ ᠭᠠᠯ ᠲᠦᠢᠮᠡᠷ ᠭᠠᠷᠭᠠᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠲᠤᠯᠠ ᠮᠥᠷᠭᠥᠳᠡᠭ ᠶᠤᠮ᠃
— ᠲᠡᠷᠡ ᠴᠢᠨᠢ ᠪᠠᠰᠠ ᠬᠡᠷᠡᠭ ᠦᠭᠡᠢ᠂ ᠬᠠᠷᠢᠨ ᠡᠳᠡᠨᠡᠷ ᠮᠠᠨᠢ ᠸᠠᠩ ᠭᠧᠦᠷᠬᠢ ᠲᠡᠢ ᠬᠢᠬᠦ ᠪᠠᠢᠯᠳᠤᠭᠠᠨ( ᠢ᠋) ᠬᠡᠷᠬᠢᠨ ᠳᠠᠭᠤᠰᠬᠠᠬᠤ ᠶ᠋ᠢ ᠬᠡᠯᠡᠵᠦ ᠴᠢᠳᠠᠬᠤ ᠪᠣᠯᠪᠠ ᠤᠤ?
— ᠴᠢᠳᠠᠨᠠ!
— ᠪᠢ ᠥᠨᠥᠳᠥᠷ ᠡᠨᠡ ᠪᠤᠷᠬᠠᠨ ᠤ᠋ ᠪᠠᠢᠰᠢᠩ ᠳ᠋ᠤ᠌ ᠤᠨᠲᠠᠨᠠ ᠭᠡᠵᠦ ᠪᠠᠲᠤ ᠬᠠᠭᠠᠨ ᠰᠦᠪᠡᠭᠡᠳᠡᠢ ᠳᠠᠰᠢ ᠭᠢᠯᠦᠪᠬᠢᠨ ᠬᠠᠷᠠᠪᠠ᠃ ᠰᠦᠪᠡᠭᠡᠳᠡᠢ ᠬᠦᠴᠦᠲᠡᠢ ᠨᠠᠢᠲᠠᠭᠠᠵᠠᠢ᠃
— ᠬᠡᠯᠡᠮᠦᠷᠴᠢ ᠠ᠋! ᠵᠠᠭᠤᠨ ᠴᠡᠷᠢᠭ ᠠᠪᠤᠭᠠᠳ ᠰᠢᠭᠤᠳ ᠣᠷᠣᠰ ᠤ᠋ᠳ ᠤ᠋ᠨ ᠪᠤᠷᠬᠠᠨ ᠤ᠋ ᠪᠠᠢᠰᠢᠩ ᠳ᠋ᠤ᠌ ᠶᠡᠷᠦᠩᠬᠡᠢ ᠪᠥᠬᠡ ᠳ᠋ᠦ᠍ᠨᠢ ᠣᠳᠣᠬᠠᠨ ᠠᠭᠤᠤ ᠶᠡᠬᠡ ᠡᠵᠡᠨ ᠬᠠᠭᠠᠨ ᠪᠠᠲᠤ ᠬᠠᠭᠠᠨ ᠮᠣᠷᠢᠯᠠᠨ ᠢᠷᠡᠨᠡ ᠭᠡᠵᠦ ᠬᠡᠯᠡ ᠭᠡᠵᠦ ᠰᠦᠪᠡᠭᠡᠳᠡᠢ ᠳ᠋ᠦ᠍ ᠲᠤᠰᠢᠶᠠᠪᠠ᠃
— ᠦᠯᠦ ᠢᠯᠠᠭᠳᠠᠭᠴᠢ ᠠ᠋! ᠭᠦᠢᠴᠡᠳᠬᠡᠶᠡ! ᠭᠡᠪᠡ᠃ ᠬᠡᠯᠡᠮᠦᠷᠴᠢ ᠵᠠᠭᠤᠨ ᠴᠡᠷᠢᠭ ᠢ᠋ ᠲᠣᠯᠣᠭᠠᠢᠯᠠᠨ ᠰᠦᠮᠡ ᠥᠭᠡᠳᠡ ᠳᠠᠪᠬᠢᠨ ᠣᠳᠪᠠ᠃ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠶ᠋ᠢ ᠳᠠᠭᠤᠳᠠᠪᠠ᠃ ᠠᠷᠠᠫᠱᠠ ᠭᠤᠶᠤᠵᠤ ᠴᠢᠮᠡᠭᠯᠡᠭᠰᠡᠨ ᠬᠡᠭᠡᠷ ᠮᠣᠷᠢᠲᠠᠢ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠪᠠᠷᠠᠭᠠᠨ ᠦᠰᠦᠨ ᠳᠡᠭᠡᠷᠡ ᠴᠠᠭᠠᠨ ᠮᠥᠩᠭᠥᠨ ᠬᠡᠷᠡᠭᠯᠡᠯ ᠢᠯᠭᠠᠷᠠᠨ ᠬᠠᠷᠠᠭᠳᠠᠨᠠ᠃ ᠯᠠᠪ ᠣᠷᠣᠰ ᠤ᠋ᠨ ᠠᠯᠠᠭᠳᠠᠭᠰᠠᠨ ᠵᠠᠩᠵᠤᠨ ᠠ᠋ᠴᠠ ᠮᠤᠯᠲᠤᠯᠵᠤ ᠠᠪᠤᠭᠰᠠᠨ ᠪᠠᠢᠬᠤ ᠭᠡᠮᠡᠷ ᠠᠯᠲᠠᠨ ᠮᠥᠩᠭᠥᠨ ᠲᠣᠨᠣᠭ ᠪᠦᠬᠦᠢ ᠬᠠᠵᠠᠭᠠᠷ ᠬᠤᠳᠠᠷᠭᠠ ᠬᠢᠵᠡᠢ᠃
— ᠬᠡᠢᠳ ᠢ᠋ ᠬᠦᠷᠢᠶᠡᠯᠡᠵᠦ ᠪᠦᠰᠡᠯᠡᠨ ᠡᠭᠦᠳᠡ ᠪᠦᠬᠦᠨ ᠳ᠋ᠦ᠍ ᠮᠠᠨᠠᠭᠠ ᠳᠡᠯᠪᠢ! ᠪᠦᠬᠦ ᠪᠠᠢᠰᠢᠩ ᠤ᠋ᠳ ᠪᠣᠯᠤᠨ ᠵᠣᠭᠣᠷᠢ ᠨᠤᠭᠤᠳ ᠢ᠋ ᠨᠡᠩᠵᠢᠵᠦ ᠦᠵᠡ᠂ ᠨᠢᠭᠤᠭᠳᠠᠭᠰᠠᠨ ᠪᠠᠢᠯᠳᠤᠭᠴᠢ ᠪᠤᠶᠤ ᠵᠠᠯᠢᠲᠠᠢ ᠲᠠᠩᠨᠠᠭᠤᠯ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠂ ᠣᠷᠣᠰ ᠤ᠋ᠳ ᠤ᠋ᠨ ᠭᠡᠷ ᠲᠦ᠍ ᠶᠢᠷᠲᠢᠨᠴᠦ ᠶ᠋ᠢᠨ ᠡᠵᠡᠨ ᠥᠪᠡᠷ ᠢ᠋ᠶ᠋ᠡᠨ ᠤᠨᠲᠠᠬᠤ ᠶᠡᠬᠡ ᠵᠠᠪᠰᠢᠶᠠᠨ ᠲᠣᠬᠢᠶᠠᠯᠳᠤᠵᠤ ᠪᠠᠢᠭᠠ ᠶ᠋ᠢ ᠬᠡᠯᠡ! ᠥᠪᠡᠷ ᠢ᠋ᠶ᠋ᠡᠨ ᠪᠠᠢᠰᠢᠩ ᠤ᠋ᠨ ᠳᠣᠲᠣᠷᠠ ᠱᠠᠲᠤᠨ ᠳᠡᠭᠡᠷᠡ ᠡᠭᠦᠳᠡᠨ ᠳ᠋ᠦ᠍ ᠮᠠᠨᠠᠭᠠ ᠲᠠᠯᠪᠢᠪᠠ᠃ ᠬᠠᠮᠤᠭ ᠤ᠋ᠨ ᠶᠡᠬᠡ ᠥᠯᠥᠰᠦᠭᠰᠡᠨ ᠴᠡᠷᠢᠭ ᠦ᠋ᠳ ᠡᠴᠡ ᠠᠷᠪᠠ ᠶ᠋ᠢ ᠭᠠᠯ ᠲᠣᠭᠣᠭᠠᠨ ᠤ᠋ ᠭᠠᠵᠠᠷ ᠳᠡᠯᠪᠢ! ᠲᠡᠳᠡ ᠨᠠᠷ ᠲᠡᠨᠳᠡ ᠴᠠᠳᠴᠠᠭᠠᠨ᠂ ᠪᠠᠰᠠ ᠪᠥᠬᠡ ᠨᠠᠷ ᠶᠠᠮᠠᠷ ᠨᠢᠭᠡᠨ ᠮᠠᠭᠤ ᠬᠣᠣᠷᠲᠠᠢ ᠶᠠᠭᠤᠮᠠ ᠬᠢᠬᠦ ᠡᠰᠡᠬᠦ ᠶ᠋ᠢ ᠠᠵᠢᠭᠯᠠᠵᠤ ᠬᠡᠷᠪᠡ ᠨᠢᠭᠡ ᠯᠡ ᠪᠢᠰᠢ ᠪᠣᠯᠤᠯᠲᠠᠢ ᠪᠣᠯᠬᠤ ᠪᠤᠶᠤ ᠮᠠᠭᠤ ᠬᠣᠣᠷᠲᠠᠢ ᠶᠠᠪᠤᠳᠠᠯ ᠤ᠋ᠨ ᠠᠵᠢᠭ ᠠᠪᠤᠪᠠᠯ ᠲᠣᠭᠤᠭᠠᠴᠢᠳ ᠤ᠋ᠨ ᠰᠢᠯᠢᠨ ᠬᠦᠵᠦᠭᠦᠨ ᠳ᠋ᠦ᠍ᠨᠢ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠨᠴᠢ᠂ ᠲᠡᠭᠦᠨ ᠡᠴᠡ ᠭᠠᠳᠠᠨᠠ ᠵᠠᠩᠵᠤᠨ ᠪᠠᠲᠤ ᠬᠠᠭᠠᠨ ᠢ᠋ ᠠᠮᠠᠷᠠᠵᠤ ᠪᠠᠢᠬᠤ ᠴᠠᠭ ᠲᠸ᠋ ᠮᠣᠩᠭᠣᠯ ᠤ᠋ᠨ ᠪᠠᠢᠯᠳᠤᠭᠴᠢᠳ ᠠ᠋ᠴᠠ ᠨᠢᠭᠡ ᠴᠥ᠍ ᠬᠥᠮᠦᠨ ᠢ᠋ ᠣᠷᠣᠭᠤᠯᠵᠤ ᠦᠯᠦ ᠪᠣᠯᠬᠤ ᠶ᠋ᠢ ᠬᠠᠷᠠᠭᠠᠯᠵᠠᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠲᠤᠰᠢᠶᠠᠪᠠ᠃
— ᠮᠡᠳᠡᠪᠡ᠂ ᠣᠢᠰᠢᠶᠠᠪᠠ! ᠭᠡᠵᠦ ᠠᠷᠠᠫᠠᠱᠠ ᠬᠠᠷᠢᠭᠤᠯᠵᠤ ᠲᠤᠰᠢᠶᠠᠯ ᠪᠡᠶᠡᠯᠡᠭᠦᠯᠬᠦ ᠪᠡᠷ ᠳᠠᠪᠬᠢᠨ ᠣᠳᠪᠠ᠃
ᠬᠡᠢᠳ ᠦ᠋ᠨ ᠭᠣᠣᠯ ᠶᠡᠬᠡ ᠰᠦᠮᠡ ᠶ᠋ᠢᠨ ᠳᠣᠲᠣᠷᠠ ᠶᠣᠰᠣᠯᠠᠯ ᠤ᠋ᠨ ᠮᠥᠷᠭᠥᠯ ᠶᠠᠪᠤᠭᠳᠠᠵᠤ ᠪᠠᠢᠪᠠ᠃ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠬᠡᠪᠢᠰ ᠢ᠋ᠶ᠋ᠡᠷ ᠪᠦᠷᠬᠦᠭᠰᠡᠨ ᠥᠨᠳᠥᠷ ᠨᠠᠯᠠᠪᠴᠢᠲᠡᠢ ᠬᠣᠶᠠᠷ ᠲᠣᠮᠣ ᠰᠠᠨᠳᠠᠯᠢ ᠪᠠᠢᠨᠠ᠃ ᠨᠢᠭᠡᠨ ᠳᠡᠭᠡᠷᠡ ᠨᠢ ᠪᠠᠲᠤ ᠬᠠᠭᠠᠨ ᠵᠠᠪᠢᠯᠠᠨ ᠰᠠᠭᠤᠭᠠᠳ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠲᠠᠬᠢᠷ ᠰᠡᠯᠡᠮᠡ ᠲᠠᠯᠪᠢᠵᠠᠢ᠃ ᠨᠥᠭᠦᠭᠡ ᠳᠡᠭᠡᠷᠡ ᠶᠦᠯᠳᠥ᠋ᠽ ᠬᠠᠲᠤᠨ ᠠᠯᠲᠠ ᠪᠣᠯᠤᠨ ᠰᠤᠪᠤᠳ ᠤᠲᠠᠰᠤ ᠪᠠᠷ ᠴᠢᠮᠡᠭᠯᠡᠭᠰᠡᠨ ᠥᠨᠳᠥᠷ ᠬᠠᠷᠠ ᠮᠠᠯᠠᠭᠠᠢ ᠡᠮᠦᠰᠴᠦ ᠰᠠᠭᠤᠨᠠ᠃ ᠪᠠᠲᠤ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠵᠢᠷᠭᠤᠭᠠᠨ ᠭᠣᠣᠯ ᠬᠠᠭᠠᠳ ᠱᠠᠯᠠ ᠳᠡᠭᠡᠷᠡ ᠰᠠᠭᠤᠵᠠᠭᠠᠵᠠᠢ᠃
ᠲᠡᠭᠦᠨ ᠳᠣᠲᠣᠷᠠ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠪᠠᠢᠬᠤ ᠪᠥᠭᠡᠳ ᠰᠦᠮᠡ ᠶ᠋ᠢᠨ ᠳᠣᠲᠣᠷᠠ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠢᠲᠡᠭᠡᠮᠵᠢ ᠦᠭᠡᠢ ᠨᠢᠳᠦ ᠪᠡᠷ ᠦᠷᠭᠦᠯᠵᠢ ᠠᠵᠢᠭᠯᠠᠨᠠ᠃
ᠪᠤᠷᠬᠠᠨ ᠳ᠋ᠤ᠌ ᠮᠥᠷᠭᠥᠯ ᠬᠢᠬᠦ ᠶᠡᠬᠡ ᠶᠣᠰᠣᠯᠠᠯ ᠪᠣᠯᠪᠠ᠃ ᠮᠥᠷᠭᠥᠯ ᠢ᠋ ᠲᠠᠲ᠋ᠠᠷ ᠤ᠋ᠳ ᠠ᠋ᠴᠠ ᠠᠪᠤᠷᠠᠬᠤ ᠪᠠᠷ ᠬᠡᠢᠳ ᠳᠡᠭᠡᠷᠡ ᠢᠷᠡᠭᠰᠡᠨ ᠦᠰᠬᠤᠸ ᠭᠡᠳᠡᠭ ᠶᠡᠬᠡ ᠯᠠᠮᠠ ᠥᠪᠡᠷ ᠢ᠋ᠶ᠋ᠡᠨ ᠬᠢᠪᠡ᠃ ᠬᠥᠭᠰᠢᠨ ᠬᠠᠲᠠᠩᠭᠢᠷ ᠪᠥᠭᠲᠥᠷ ᠬᠠᠮᠪᠤ ᠯᠠᠮᠠ᠂ ᠭᠢᠯᠠᠯᠵᠠᠭᠰᠠᠨ ᠠᠯᠲᠠᠨ ᠳᠠᠷᠤᠭᠤᠯᠭᠠ ᠲᠠᠢ ᠬᠣᠷᠭᠣᠢ ᠮᠠᠯᠠᠭᠠᠢ ᠡᠮᠦᠰᠴᠦ ᠰᠦᠮᠡ ᠶ᠋ᠢᠨ ᠳᠤᠮᠳᠠ ᠣᠷᠣᠰᠢᠬᠤ ᠥᠨᠳᠥᠷᠯᠢᠭ ᠳᠡᠭᠡᠷᠡ ᠭᠠᠷᠪᠠ᠃ ᠭᠣᠶᠣᠯᠠᠯ ᠤ᠋ᠨ ᠡᠷᠢᠶᠡᠨ ᠬᠣᠷᠭᠣᠢ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠣᠶᠠᠷ( ᠬᠣᠣᠰ) ᠯᠠᠮᠠ ᠨᠠᠷ ᠬᠠᠮᠪᠤ ᠠ᠋ᠴᠠ ᠣᠷᠣᠭᠰᠢ ᠲᠠᠯᠠ ᠪᠦᠷᠢ ᠵᠢᠷᠭᠤᠭᠠ ᠵᠢᠷᠭᠤᠭᠠ ᠪᠠᠷ ᠴᠤᠪᠤᠷᠠᠨ ᠵᠣᠭᠰᠣᠵᠠᠭᠠᠵᠠᠢ᠃ ᠮᠥᠨ ᠬᠣᠷᠭᠣᠢ ᠳᠡᠪᠡᠯ ᠲᠡᠢ ᠬᠣᠶᠠᠷ ᠬᠡᠦᠬᠡᠳ ᠤᠷᠲᠤ ᠯᠠ ᠪᠠᠷᠢᠭᠠᠳ ᠬᠠᠮᠪᠤ ᠶ᠋ᠢᠨ ᠬᠣᠶᠠᠷ ᠬᠠᠵᠠᠭᠤ ᠳ᠋ᠤ᠌ ᠵᠣᠭᠰᠣᠨᠠ᠃ ᠪᠤᠷᠬᠠᠨ ᠤ᠋ ᠡᠮᠦᠨᠡ ᠨᠢ ᠯᠡ ᠪᠠ ᠵᠤᠯᠠ ᠨᠣᠴᠣᠬᠤ ᠪᠥᠭᠡᠳ ᠲᠡᠭᠦᠨ ᠦ᠌ ᠰᠦᠮᠡᠯᠵᠡᠬᠦ ᠨᠢ ᠪᠤᠷᠬᠠᠨ ᠤ᠋ ᠠᠯᠲᠠᠨ ᠬᠦᠷᠢᠶᠡ ᠪᠠ ᠬᠣᠷᠭᠣᠢ ᠳᠡᠭᠡᠷᠡ ᠲᠤᠰᠤᠨᠠ᠃
ᠪᠠᠲᠤ ᠬᠠᠭᠠᠨ ᠰᠢᠨᠡ ᠶᠠᠭᠤᠮᠠ ᠦᠵᠡᠭᠰᠡᠨ ᠳ᠋ᠡᠭᠡᠨ ᠬᠠᠨᠤᠮᠵᠢᠲᠠᠢ ᠪᠠᠢᠨᠠ᠂ ᠵᠠᠷᠢᠮ ᠳ᠋ᠠᠭᠠᠨ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠵᠤ ᠳᠠᠭᠤᠤ ᠶ᠋ᠢ ᠳᠠᠭᠠᠯᠳᠤᠨ ᠳᠠᠭᠤᠯᠠᠬᠤ ᠭᠡᠵᠦ ᠴᠦ᠍ ᠣᠷᠣᠯᠳᠣᠨᠠ᠃ ᠡᠭᠦᠨ ᠦ᠌ ᠨᠢᠭᠤᠷ ᠢ᠋ ᠬᠠᠮᠠᠭᠠᠯᠠᠭᠰᠠᠨ ᠠᠯᠲᠠᠨ ᠰᠤᠮᠤ ᠲᠠᠢ ᠭᠠᠩ ᠳᠤᠭᠤᠯᠠᠭᠠ ᠪᠠ ᠮᠥᠩᠭᠥᠨ ᠬᠤᠶᠠᠭ ᠬᠢᠭᠡᠳ ᠬᠦᠵᠦᠭᠦᠨ ᠳ᠋ᠦ᠍ᠨᠢ ᠵᠡᠭᠦᠭᠰᠡᠨ ᠲᠣᠮᠣ ᠳᠣᠷᠵᠢᠫᠯᠠᠮᠠ ᠶ᠋ᠢᠨ ᠡᠷᠳᠡᠨᠢ ᠴᠢᠯᠠᠭᠤ ᠨᠤᠭᠤᠳ ᠠ᠋ᠴᠠ ᠨᠢ ᠣᠯᠠᠨ ᠥᠩᠭᠡ ᠶ᠋ᠢᠨ ᠣᠴᠢ ᠲᠤᠶᠠᠭᠠ ᠭᠢᠯᠠᠯᠵᠠᠨᠠ᠃
ᠪᠠᠲᠤ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠥᠨᠳᠥᠷ ᠪᠡᠶᠡᠯᠢᠭ ᠯᠠᠮᠠ ᠬᠦᠷᠴᠦ ᠢᠷᠡᠭᠡᠳ ᠰᠠᠩ ᠤ᠋ᠨ ᠪᠣᠢᠫᠣᠷ ᠢ᠋ ᠰᠠᠪᠰᠠᠬᠤ ᠪᠦᠷᠢ ᠰᠠᠢᠬᠠᠨ ᠦᠨᠦᠷ ᠠᠩᠬᠢᠯᠤᠨᠠ᠃ ᠪᠠᠲᠤ ᠬᠠᠭᠠᠨ ᠳᠤᠷᠠᠲᠠᠢᠶᠠ ᠲᠣᠯᠣᠭᠠᠢ ᠪᠠᠨ ᠮᠡᠬᠦᠢᠰᠬᠢᠵᠦ ᠲᠡᠷᠡᠬᠦ ᠠᠮᠲᠠᠲᠠᠢ ᠤᠲᠤᠭᠠ ᠶ᠋ᠢ ᠠᠮᠢᠰᠬᠤᠯᠠᠨᠠ᠃ ᠶᠦᠯᠳᠦ᠋ᠽ ᠭᠦᠨ ᠰᠠᠨᠳᠠᠯᠢ ᠳᠡᠭᠡᠷᠡ ᠬᠥᠳᠡᠯᠦᠯ ᠦᠭᠡᠢ ᠰᠠᠭᠤᠨᠠ᠃
ᠮᠥᠩᠭᠥᠨ ᠰᠠ ᠤᠭᠠᠯᠵᠠ ᠲᠠᠢ ᠬᠢᠲᠠᠳ ᠲᠣᠷᠭᠠᠨ ᠳᠡᠪᠡᠯ ᠡᠮᠦᠰᠴᠦ ᠦᠨᠡᠲᠦ ᠴᠢᠮᠡᠭ ᠵᠡᠭᠦᠵᠦ ᠭᠠᠷ ᠲᠠᠭᠠᠨ ᠡᠷᠳᠡᠨᠢ ᠴᠢᠯᠠᠭᠤᠨ ᠪᠥᠭᠡᠵᠢ ᠨᠤᠭᠦᠳ ᠬᠢᠭᠰᠡᠨ ᠴᠣᠩᠬᠢᠭᠠᠷ ᠴᠠᠭᠠᠨ ᠴᠢᠷᠠᠢᠲᠠᠢ ᠲᠡᠷᠡ ᠠᠪᠠᠭᠠᠢ ᠨᠢ ᠪᠢᠴᠢᠬᠠᠨ ᠳᠠᠭᠢᠨᠢ ᠮᠡᠲᠦ ᠠᠵᠢ᠃ ᠭᠠᠭᠴᠠᠬᠦ ᠮᠡᠯᠮᠡᠷᠡᠨ ᠰᠢᠷᠲᠡᠬᠦ ᠨᠢᠳᠦ ᠨᠢ ᠭᠠᠢᠬᠠᠰᠢᠷᠠᠨ ᠭᠢᠯᠠᠯᠵᠠᠨᠠ᠃ ᠦᠨᠡᠨᠴᠢ ᠢ ᠯᠡ ᠾᠧ ᠰᠠᠨᠳᠠᠯᠢ ᠶ᠋ᠢᠨ ᠳᠡᠷᠭᠡᠳᠡ ᠵᠣᠭᠰᠣᠵᠤ᠂ ᠶᠦᠯᠳᠦ᠋ᠽ ᠲᠡᠰᠢ ᠨᠠᠯᠠᠵᠤ᠂ ᠪᠥᠬᠥᠢᠨ ᠰᠢᠪᠡᠨᠡᠵᠦ᠂
— ᠠᠮᠤᠭᠤᠯᠠᠩ ᠪᠠᠢᠬᠤ ᠬᠡᠷᠡᠭᠲᠡᠢ ᠂ ᠰᠠᠨᠳᠤᠷᠤᠭᠰᠠᠨ ᠪᠠᠢᠳᠠᠯ ᠪᠤᠤ ᠦᠵᠡᠭᠦᠯ᠂ ᠡᠷᠬᠢᠮ ᠦ᠋ᠳ ᠠᠵᠢᠭ ᠠᠪᠤᠨᠠ ᠰᠢᠦ ᠭᠡᠨᠡ᠃
— ᠲᠡᠷᠡ᠂ ᠴᠣᠩᠬᠣᠨ ᠤ᠋ ᠳᠡᠷᠭᠡᠳᠡ ᠲᠡᠢᠮᠦ ᠣᠢᠷᠠᠬᠠᠨ ᠪᠠᠢᠨᠠ᠂ ᠪᠢ ᠲᠡᠭᠦᠨ ᠲᠡᠢ ᠶᠠᠷᠢᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠶᠦᠯᠳᠦ᠋ᠽ ᠰᠢᠪᠡᠨᠡᠨ ᠬᠠᠷᠢᠭᠤᠯᠪᠠ ᠃
ᠬᠠᠵᠠᠭᠤ ᠶ᠋ᠢᠨ ᠡᠭᠦᠳᠡᠨ ᠦ᠌ ᠳᠡᠷᠭᠡᠳᠡ ᠵᠢᠳᠠ ᠪᠠᠨ ᠲᠤᠯᠤᠭᠰᠠᠨ ᠴᠡᠷᠢᠭ ᠦ᠋ᠳ ᠵᠣᠭᠰᠣᠨᠠ᠃ ᠲᠡᠷᠡ ᠭᠠᠩ ᠳᠤᠭᠤᠯᠠᠭᠠ᠂ ᠭᠠᠩ ᠬᠤᠶᠠᠭ᠂ ᠪᠣᠯᠭᠠᠷᠢ ᠭᠠᠵᠠᠷ ᠤ᠋ᠨ ᠡᠵᠡᠨ( ᠦ᠌ ) ᠰᠠᠪᠢᠬᠢᠨ ᠭᠤᠲᠤᠯ ᠡᠮᠦᠰᠴᠡᠢ᠃ ᠲᠡᠭᠦᠨ ᠦ᠌ ᠰᠠᠬᠠᠯ ᠦᠰᠦ ᠦᠭᠡᠢ ᠵᠠᠯᠠᠭᠤ ᠶ᠋ᠢᠨ ᠴᠢᠷᠠᠢ ᠨᠢ ᠲᠠᠢᠪᠤᠩ ᠰᠢᠨᠵᠢᠲᠡᠢ ᠪᠥᠭᠡᠳ ᠬᠠᠶᠠ ᠨᠢᠭᠡ ᠪᠠᠲᠤ ᠬᠠᠭᠠᠨ ᠤ᠋ ᠵᠦᠭ ᠬᠠᠷᠠᠬᠤ ᠪᠣᠯᠪᠠᠴᠤ ᠶᠡᠬᠡ ᠲᠥᠯᠥᠪ ᠬᠦᠢᠲᠡᠨ ᠪᠦᠷᠬᠦᠭ ᠡᠳᠦᠷ ᠦ᠋ᠨ ᠪᠦᠳᠡᠭᠢ ᠭᠡᠷᠡᠯ ᠨᠡᠪᠲᠡᠷᠡᠬᠦ ᠲᠣᠮᠣ ᠪᠤᠰᠤ ᠭᠢᠯᠲᠠᠭᠠᠨᠠᠭᠤᠷ ᠴᠣᠩᠬᠣ ᠲᠡᠰᠢ ᠰᠢᠷᠳᠡᠨᠡ᠃ ᠡᠨᠡ ᠪᠣᠯ ᠡᠭᠦᠳᠡᠨ ᠦ᠌ ᠮᠠᠨᠠᠭᠠᠨ ᠳ᠋ᠤ᠌ ᠭᠠᠷᠤᠭᠰᠠᠨ ᠮᠦᠰᠦ᠋ᠺ ᠠᠵᠢ᠃ ᠭᠡᠨᠡᠳᠲᠡ ᠲᠡᠷᠡ ᠲᠡᠭᠦᠨ ᠢ᠋ ᠮᠥᠷᠥᠭᠡᠳᠦᠨ ᠰᠢᠷᠳᠡᠭᠴᠢ ᠪᠠᠲᠤ ᠬᠠᠭᠠᠨ ᠤ᠋ ᠡᠬᠡᠨᠡᠷ ᠦ᠋ᠨ ᠬᠠᠷᠠᠴᠠ ᠶ᠋ᠢ ᠠᠵᠢᠭᠯᠠᠪᠠ᠃ ᠮᠥᠰᠥ᠋ᠺ ᠥᠭᠡᠷᠡ ᠲᠠᠰᠢ ᠡᠷᠭᠢᠭᠰᠡᠨ ᠪᠣᠯᠪᠠᠴᠤ ᠤᠳᠠᠭᠰᠠᠨ ᠦᠭᠡᠢ ᠮᠥᠨ ᠯᠡ ᠵᠠᠯᠠᠭᠤ ᠪᠦᠰᠡᠭᠦᠢ ᠶ᠋ᠢᠨ ᠡᠭᠴᠡᠯᠡᠨ ᠰᠢᠷᠳᠡᠬᠦ ᠬᠠᠷᠠᠴᠠ ᠲᠠᠢ ᠮᠥᠷᠭᠥᠯᠳᠦᠪᠡ᠃
《 ᠨᠠᠳᠠᠳᠤ ᠣᠨᠴᠠ ᠨᠢ ᠶᠠᠭᠤ ᠪᠠᠢᠬᠤ ᠪᠢᠯᠡ? ᠬᠠᠲᠤᠨ ᠶᠠᠭᠤᠨ ᠳ᠋ᠤ᠌ ᠨᠠᠮᠠᠶ᠋ᠢ ᠢᠩᠭᠢᠵᠦ ᠬᠠᠷᠠᠨᠠ ᠪᠣᠢ?》 ᠭᠡᠵᠦ ᠮᠥᠰᠥ᠋ᠺ ᠪᠣᠳᠣᠪᠠ᠃ ᠲᠡᠷᠡ ᠲᠡᠭᠦᠨ ᠦ᠌ ᠬᠠᠷᠠᠴᠠ ᠶ᠋ᠢ ᠪᠠᠰᠠ ᠳᠠᠬᠢᠨ ᠨᠢᠭᠡ ᠣᠯᠵᠤ ᠬᠠᠷᠠᠪᠠ᠃ ᠵᠠᠷᠤᠴᠠ ᠥᠬᠢᠨ ᠲᠡᠭᠦᠨ ᠳᠠᠰᠢ ᠪᠥᠬᠥᠢᠵᠦ ᠲᠠᠢᠪᠤᠰᠢᠷᠠᠭᠤᠯᠵᠤ ᠪᠠᠢᠬᠤ ᠮᠠᠶᠢᠭ ᠲᠠᠢ ᠪᠣᠯᠬᠤ ᠶ᠋ᠢ ᠠᠵᠢᠭᠯᠠᠪᠠ᠃ ᠬᠡᠪ ᠭᠡᠨᠡᠳᠲᠡ ᠮᠥᠰᠥ᠋ᠺ ᠦ᠋ᠨ ᠳᠣᠲᠣᠷᠠ᠂
—《 ᠡᠨᠡ ᠬᠠᠷᠠ ᠨᠢᠳᠦ᠂ ᠡᠨᠡ ᠰᠠᠢᠬᠠᠨ ᠨᠢᠭᠤᠷ᠂ ᠶᠠᠭᠤ ᠠᠳᠠᠯᠢ ᠪᠢᠯᠡ! ᠶᠡᠷᠦ ᠨᠢ ᠲᠠᠯᠠ ᠶ᠋ᠢᠨ ᠶᠠᠳᠠᠭᠤ ᠪᠦᠰᠡᠭᠦᠢ ᠪᠠ ᠦᠨᠡᠲᠦ ᠡᠷᠳᠡᠨᠢᠰ ᠴᠢᠮᠡᠭᠯᠡᠯ ᠵᠡᠷᠭᠡ ᠪᠡᠷ ᠴᠢᠮᠡᠭᠯᠡᠭᠰᠡᠨ ᠪᠥᠭᠡᠳ ᠳᠠᠶᠠᠭᠠᠷ ᠳᠡᠯᠡᠬᠡᠢ ᠶ᠋ᠢ ᠪᠠᠢᠯᠳᠤᠨ ᠳᠠᠭᠠᠭᠤᠯᠤᠭᠴᠢ ᠬᠥᠮᠦᠨ ᠦ᠌ ᠡᠬᠡᠨᠡᠷ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠢᠯᠭᠠᠭᠠ ᠶᠠᠭᠤ ᠪᠢᠯᠡ᠂ ᠦᠭᠡᠢ ᠡᠨᠡ ᠪᠣᠯ ᠵᠡᠭᠦᠳᠦ᠂ ᠡᠢᠮᠦ ᠪᠠᠢᠵᠤ ᠪᠣᠯᠬᠤ ᠦᠭᠡᠢ 》ᠭᠡᠬᠦ ᠲᠣᠳᠣ ᠪᠣᠳᠣᠯ ᠲᠥᠷᠥᠭᠡᠳ ᠳᠠᠬᠢᠨ ᠴᠣᠩᠬᠣ ᠪᠠᠷ ᠬᠠᠷᠠᠨᠠ᠃
ᠰᠠᠨᠠᠮᠰᠠᠷ ᠦᠭᠡᠢ ᠪᠠᠢᠲᠠᠯᠠ ᠣᠭᠵᠣᠮ ᠳᠠᠭᠤ ᠮᠥᠰᠥ᠋ᠺ ᠢ᠋ ᠰᠣᠴᠢᠭᠠᠪᠠ᠃ ᠲᠣᠮᠣ ᠤᠮᠵᠠᠳ ᠭᠡᠯᠦᠩ ᠨᠥᠮᠥᠷᠭᠡ ᠡᠮᠦᠰᠴᠦ ᠪᠣᠰᠤᠭᠤᠨ ᠴᠢᠩᠭᠠ ᠳᠠᠭᠤ ᠪᠠᠷ
— ᠶᠡᠬᠡ ᠬᠦᠴᠦᠲᠦ ᠡᠵᠡᠨ ᠲᠠᠨ ᠳ᠋ᠤ᠌᠂ ᠠᠰᠠᠷ ᠭᠠᠢᠬᠠᠮᠰᠢᠭᠲᠤ ᠬᠠᠭᠠᠨ ᠲᠠᠨ ᠳ᠋ᠤ᠌ ᠭᠡᠲᠡᠯᠡ ᠰᠠᠢᠨ ᠰᠠᠨᠠᠭᠠᠲᠤ ᠶᠡᠬᠡᠮᠰᠦᠭ ᠨᠢᠷᠪᠠ ᠬᠡᠰᠡᠭ ᠭᠡᠯᠦᠩ ᠦ᠋ᠳ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠤᠷᠤᠭᠰᠢᠯᠠᠨ ᠢᠯᠭᠠᠷᠠᠵᠤ ᠵᠥᠭᠡᠯᠡᠨ ᠢ᠋ᠶ᠋ᠡᠷ ᠯᠠᠮᠠ ᠳ᠋ᠤ᠌ ᠣᠢᠷᠠᠲᠤᠨ ᠣᠴᠢᠵᠤ ᠲᠡᠭᠦᠨ ᠦ᠌ ᠮᠢᠬᠠᠯᠢᠭ ᠤᠯᠠᠭᠠᠨ ᠴᠢᠬᠢᠨ ᠳ᠋ᠦ᠍᠂
— ᠥᠨᠳᠥᠷ ᠳᠠᠭᠤ ᠪᠠᠷ ᠬᠡᠯᠡ! ᠭᠡᠵᠦ ᠰᠢᠪᠡᠨᠡᠪᠡ᠃
ᠨᠢᠷᠪᠠ ᠶ᠋ᠢ ᠬᠡᠯᠡᠮᠡᠭᠴᠡ᠂
— ᠡᠵᠡᠨ ᠲᠠᠨ ᠳ᠋ᠤ᠌ ᠤᠷᠲᠤ ᠨᠠᠰᠤᠯᠠᠬᠤ ᠶ᠋ᠢ ᠢᠷᠥᠭᠡᠶᠡ ᠭᠡᠲᠡᠯᠡ᠂
— ᠤᠯᠠᠮ ᠥᠨᠳᠥᠷ ᠢ᠋ᠶ᠋ᠡᠷ! ᠳᠤᠤᠭᠠᠷ! ᠭᠡᠵᠦ ᠨᠢᠷᠪᠠ ᠱᠠᠭᠠᠷᠳᠠᠪᠠ᠃ᠨᠢᠭᠤᠷ ᠢ᠋ᠶ᠋ᠠᠨ ᠤᠯᠠᠢᠲᠠᠯᠠ ᠬᠣᠭᠣᠯᠠᠢ ᠪᠠᠨ ᠰᠢᠬᠠᠵᠤ᠂
— ᠮᠠᠨ ᠤ᠋ ᠡᠵᠡᠨ ᠪᠠ ᠣᠢᠷᠠ ᠬᠣᠯᠠ ᠪᠦᠭᠦᠳᠡ ᠶ᠋ᠢ ᠵᠠᠬᠢᠷᠤᠭᠴᠢ ᠪᠠᠲᠤ ᠬᠠᠭᠠᠨ ᠤᠷᠲᠤ ᠨᠠᠰᠤᠯᠠᠬᠤ ᠪᠣᠯᠲᠤᠭᠠᠢ ᠭᠡᠬᠦ ᠳ᠋ᠦ᠍ ᠣᠯᠠᠨ ᠬᠥᠮᠦᠰ ᠨᠢᠭᠡᠨ ᠳᠠᠭᠤ ᠪᠠᠷ ᠭᠤᠷᠪᠠ ᠳᠠᠬᠢᠨ᠂
— ᠤᠷᠲᠤ ᠨᠠᠰᠤᠯᠠᠬᠤ ᠪᠣᠯᠲᠤᠭᠠᠢ ᠭᠡᠪᠡ᠃
ᠮᠥᠷᠭᠥᠯ ᠲᠡᠭᠦᠰᠦᠭᠰᠡᠨ ᠦ᠌ ᠳᠠᠷᠠᠭᠠ᠂ ᠴᠤᠭᠯᠠᠷᠠᠭᠴᠢᠳ ᠤᠷᠲᠤ ᠨᠠᠷᠢᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠪᠠ᠃ ᠲᠡᠨᠳᠡ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠬᠣᠭᠣᠯᠠ ᠴᠠᠢ ᠶ᠋ᠢ ᠯᠠᠮᠠ ᠨᠠᠷ᠂ ᠳᠤᠭᠠᠩᠴᠢ ᠨᠠᠷ ᠵᠡᠷᠭᠡ ᠨᠢᠷᠪᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠪᠠᠷ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠶᠠᠭᠤᠮᠠ ᠪᠦᠭᠦᠳᠡ ᠶ᠋ᠢ ᠬᠢᠭᠰᠡᠨ ᠪᠠᠢᠪᠠ᠃ᠪᠦᠲᠦᠨ ᠢ᠋ᠶ᠋ᠡᠷ ᠴᠢᠨᠠᠭᠰᠠᠨ ᠵᠢᠭᠠᠰᠤ᠂ ᠵᠢᠮᠢᠰ ᠬᠠᠪᠴᠢᠭᠤᠯᠤᠭᠰᠠᠨ ᠨᠠᠷᠢᠨ ᠪᠣᠣᠪᠣ᠂ ᠵᠢᠵᠢᠭ ᠴᠠᠪᠴᠢᠯᠠᠭᠰᠠᠨ ᠬᠣᠷᠣᠬᠠᠢ᠂ ᠮᠥᠭᠥ ᠪᠤᠭᠤᠳᠠᠢ ᠶ᠋ᠢ ᠵᠥᠭᠡᠢ ᠶ᠋ᠢᠨ ᠪᠠᠯ ᠲᠠᠢ ᠪᠤᠴᠠᠯᠭᠠᠭᠰᠠᠨ ᠢᠳᠡᠭᠡ᠂ ᠨᠣᠢᠲᠠᠨ ᠠᠯᠢᠮᠠ᠂ ᠵᠢᠭᠠᠰᠤᠨ ᠤ᠋ ᠬᠠᠷᠠ ᠦᠷᠡ ᠵᠡᠷᠭᠡ ᠶ᠋ᠢ ᠵᠠᠷᠤᠴᠠ ᠨᠠᠷ ᠲᠣᠮᠣ ᠮᠣᠳᠣᠨ ᠮᠠᠲᠠᠮᠠᠯ ᠲᠠᠪᠠᠭ ᠲᠤ᠌ ᠬᠢᠵᠦ ᠵᠥᠭᠡᠭᠡᠨᠡ᠂ ᠯᠠᠮᠠ ᠨᠠᠷ ᠵᠣᠭᠣᠷᠢ ᠳᠣᠲᠣᠷᠠ ᠠ᠋ᠴᠠ ᠲᠠᠯᠬᠠ ᠪᠠᠷ ᠨᠡᠷᠡᠭᠰᠡᠨ ᠨᠣᠭᠣᠭᠠᠨ ᠥᠩᠭᠡ ᠲᠡᠢ ᠠᠷᠢᠬᠢ ᠪᠠ ᠬᠦᠴᠦᠲᠡᠢ ᠵᠥᠭᠡᠢ ᠶ᠋ᠢᠨ ᠪᠠᠯ ᠭᠠᠷᠭᠠᠨᠠ᠂ ᠪᠠᠰᠠ ᠪᠤᠰᠤ ᠨᠡᠷᠡᠰ ᠭᠦᠵᠡᠯᠵᠡᠭᠡᠨᠡ ᠪᠡᠷ ᠨᠡᠷᠡᠭᠰᠡᠨ ᠠᠷᠢᠬᠢ ᠤᠤᠭᠤᠨᠠ᠃
ᠰᠢᠷᠡᠭᠡᠨ ᠦ᠌ ᠡᠴᠦᠰ ᠲᠦ᠍ ᠪᠠᠲᠤ ᠬᠠᠭᠠᠨ ᠰᠠᠭᠤᠵᠤ ᠪᠠᠢᠨᠠ᠃ ᠵᠡᠭᠦᠨ ᠭᠠᠷ ᠳᠠᠭᠠᠤ ᠵᠡᠷᠭᠡᠯᠡᠵᠦ ᠬᠠᠮᠪᠤ ᠯᠠᠮᠠ᠂ ᠴᠠᠰᠢ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ᠂ ᠪᠠᠷᠠᠭᠤᠨ ᠭᠠᠷ ᠲᠸ᠋ ᠦᠨᠡᠲᠦ ᠡᠷᠳᠡᠨᠢ ᠨᠤᠭᠦᠳ ᠢ᠋ ᠭᠢᠯᠠᠯᠵᠠᠭᠤᠯᠵᠤ ᠥᠩᠭᠡᠲᠦ ᠬᠤᠪᠴᠠᠰᠤ ᠶ᠋ᠢ ᠡᠮᠦᠰᠦᠭᠰᠡᠨ ᠶᠦᠯᠳᠦ᠋ᠽ ᠬᠠᠲᠤᠨ᠂ ᠲᠡᠭᠦᠨ ᠦ᠌ ᠳᠠᠷᠠᠭᠠᠪᠠᠷ ᠰᠢᠳᠠᠷ ᠵᠢᠷᠭᠤᠭᠠᠨ ᠬᠠᠭᠠᠳ ᠰᠠᠭᠤᠨᠠ᠃ ᠲᠡᠭᠦᠨ ᠦ᠌ ᠳᠣᠣᠷᠠ ᠣᠪᠣᠭᠠᠲᠠᠢ ᠪᠠ ᠤᠷᠲᠤ ᠬᠠᠷᠠ ᠨᠥᠮᠥᠷᠭᠡ ᠲᠡᠢ ᠬᠠᠮᠤᠭ ᠤ᠋ᠨ ᠬᠥᠭᠰᠢᠨ ᠬᠦᠨᠳᠦᠲᠡᠢ ᠯᠠᠮᠠ ᠰᠠᠭᠤᠵᠤ ᠪᠠᠢᠪᠠ᠃ ᠬᠥᠭᠰᠢᠨ ᠬᠠᠮᠪᠤ ᠮᠥᠷᠭᠥᠯ ᠲᠠᠯᠪᠢᠵᠤ ᠥᠭᠭᠦᠭᠡᠳ ᠬᠠᠭᠤᠴᠢ ᠬᠥᠳᠡᠯᠵᠦ ᠲᠡᠩᠬᠡᠯ ᠠᠯᠳᠠᠨᠠ ᠭᠡᠵᠦ ᠠᠮᠠᠷᠠᠬᠤ ᠪᠠᠷ ᠥᠪᠡᠷ ᠦ᠋ᠨ ᠲᠠᠰᠤᠯᠭᠠᠨ ᠳ᠋ᠠᠭᠠᠨ ᠣᠴᠢᠪᠠ᠃
ᠪᠠᠲᠤ ᠬᠠᠭᠠᠨ ᠶᠡᠬᠡ ᠪᠣᠯᠭᠣᠮᠵᠢᠯᠠᠨ ᠮᠠᠰᠢ ᠪᠠᠭᠠ ᠪᠠᠷ ᠢᠳᠡᠭᠡᠯᠡᠬᠦ ᠪᠣᠯᠪᠠᠴᠤ ᠴᠥᠮ ᠡᠴᠡ ᠠᠮᠰᠠᠨᠠ᠃ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠭᠠᠭᠴᠠᠬᠦ ᠰᠣᠩᠭᠢᠨᠠ ᠪᠠ ᠲᠣᠰᠣᠲᠠᠢ ᠪᠤᠳᠠᠭᠠ ᠶ᠋ᠢ ᠵᠠᠵᠢᠯᠤᠨᠠ᠃ ᠲᠡᠷᠡ ᠪᠤᠳᠠᠭᠠ ᠶ᠋ᠢ ᠲᠠᠪᠠᠭ ᠲᠠᠢ ᠨᠢ ᠲᠠᠲᠠᠵᠤ ᠢᠷᠡᠭᠡᠳ᠂ ᠥᠪᠡᠷ ᠲᠡᠭᠡᠨ ᠭᠠᠷᠭᠠᠭᠰᠠᠨ ᠵᠡᠰ ᠠᠶᠠᠭᠠᠨ ᠳ᠋ᠠᠭᠠᠨ ᠬᠢᠵᠦ ᠢᠳᠡᠪᠡ᠃ ᠳᠠᠷᠠᠭᠠ ᠨᠢ ᠠᠶᠠᠭᠠ ᠪᠠᠨ ᠳᠣᠯᠢᠶᠠᠵᠤ ᠴᠡᠪᠡᠷᠯᠡᠭᠡᠳ ᠠᠷᠢᠬᠢ ᠤᠮᠳᠠ ᠪᠠᠨ ( ᠤᠮᠳᠠᠭᠠ ᠠ᠋ᠴᠠ ) ᠪᠦᠭᠦᠳᠡ ᠶ᠋ᠢ ᠠᠮᠰᠠᠵᠤ ᠦᠵᠡᠬᠦ ᠪᠥᠭᠡᠳ ᠮᠠᠭᠤᠬᠠᠢ ᠰᠠᠨᠠᠭᠳᠠᠭᠰᠠᠨ ᠢ᠋ ᠪᠡᠨ ᠱᠠᠯᠠ ᠳᠡᠭᠡᠷᠡ ᠰᠠᠴᠤᠨᠠ᠃ ᠬᠣᠭᠣᠯᠠ ᠢᠳᠡᠵᠦ ᠪᠠᠢᠬᠤ ᠳᠤᠮᠳᠠᠭᠤᠷ ᠪᠠᠲᠤ ᠬᠠᠭᠠᠨ ᠳᠡᠭᠡᠷᠡ ᠬᠢᠲᠠᠳ ᠥᠬᠢᠨ ᠢ ᠯᠡ ᠾᠧ ᠣᠴᠢᠵᠤ᠂
— ᠶᠦᠯᠳᠦ᠋ᠽ ᠬᠠᠲᠤᠨ ᠳᠠᠪᠤᠰᠤᠯᠠᠭᠰᠠᠨ ᠵᠢᠭᠠᠰᠤᠨ ᠤ᠋ ᠦᠨᠦᠷ ᠪᠣᠯᠣᠳ ᠣᠷᠣᠰ ᠪᠥᠬᠡ ᠨᠠᠷ ᠤ᠋ᠨ ᠪᠣᠯᠬᠢ ᠳᠠᠭᠤᠨ ᠳ᠋ᠤ᠌ ᠲᠡᠰᠴᠦ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠪᠠ᠂ ᠣᠳᠣ ᠶᠠᠳᠠᠷᠠᠵᠤ ᠤᠨᠠᠬᠤ ᠳ᠋ᠤ᠌ ᠣᠢᠷᠠᠲᠤᠭᠠᠳ ᠪᠠᠢᠨᠠ᠂ ᠡᠨᠳᠡ ᠡᠴᠡ ᠵᠠᠢᠯᠠᠭᠤᠯᠬᠤ ᠶᠤᠮᠰᠠᠨ! ᠭᠡᠵᠦ ᠬᠡᠯᠡᠪᠡ᠃
ᠪᠠᠲᠤ ᠬᠠᠭᠠᠨ ᠶᠦᠯᠳᠦ᠋ᠽ ᠲᠡᠰᠢ ᠬᠠᠷᠠᠪᠠᠯ ᠲᠡᠷᠡ ᠬᠥᠳᠡᠯᠦᠯ ᠦᠭᠡᠢ ᠨᠢᠳᠦ ᠪᠡᠨ ᠠᠨᠢᠵᠤ ᠤᠨᠲᠠᠭᠰᠠᠨ ᠮᠡᠲᠦ ᠪᠠᠢᠨᠠ᠃ ᠪᠠᠲᠤ ᠬᠠᠭᠠᠨ᠂
— ᠪᠠᠭᠠ ᠬᠠᠲᠤᠨ ᠢ᠋ ᠠᠪᠠᠴᠢᠵᠤ ᠠᠮᠠᠷᠠᠭᠤᠯᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠲᠤᠰᠢᠶᠠᠪᠠ᠃
ᠶᠡᠬᠡ ᠨᠢᠷᠪᠠ ᠪᠣᠰᠴᠤ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠢᠵᠦ ᠥᠪᠡᠷ ᠢ᠋ᠶ᠋ᠡᠨ ᠬᠠᠲᠤᠨ ᠪᠠ ᠬᠢᠲᠠᠳ ᠥᠬᠢᠨ ᠢ᠋ ᠳᠠᠭᠠᠭᠤᠯᠤᠨ ᠬᠠᠮᠤᠭ ᠤ᠋ᠨ ᠰᠠᠢᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠭᠤᠯᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠮᠡᠷᠭᠡᠨᠭᠣᠸᠠ 2᠂ ᠪᠠᠶᠡᠨᠴᠡᠴᠡᠭ 1᠂ ᠳ᠂ ᠣᠶᠤᠨᠪᠢᠯᠢᠭ᠌ 1᠂ ᠬᠦᠦᠳᠠᠭᠠᠭᠤᠯ 1᠂ ᠬᠡᠷᠡᠢᠳ ᠂ ᠮᠥᠩᠬᠡᠨᠠᠰᠤᠨ 1. ᠭᠡᠷᠡᠯ 1 ᠬᠢᠨᠠᠭᠴᠢ᠄ ᠲ᠂ ᠬᠦᠮᠦᠵᠢᠯᠲᠦ1
ᠶᠡᠷᠦᠩᠬᠡᠢ ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ 7᠂ ᠠᠷᠢᠭᠤᠨ 7