ᠪᠠᠲᠤ ᠬᠠᠭᠠᠨ 7-07 ᠪᠧᠷᠧᠨ᠋ᠳᠧᠶᠧᠸ ᠦ᠋ᠨ ᠨᠠᠮᠤᠭ-ᠲᠣᠭᠰᠢᠨ ᠶᠸᠸᠫᠡᠲBat khaan Бат хаан-ᠷᠣᠮᠠᠨ
171ᠳᠣᠯᠣᠭᠠ᠂ ᠪᠧᠷᠧᠨ᠋ᠳᠧᠶᠧᠸ ᠦ᠋ᠨ ᠨᠠᠮᠤᠭ
ᠪᠠᠲᠤ ᠬᠠᠭᠠᠨ᠂ ᠮᠣᠩᠭᠣᠯ ᠤ᠋ᠨ ᠪᠠᠭ ᠣᠲ᠋ᠷᠢᠶᠠᠳ᠋ ᠤ᠋ᠨ ᠰᠥᠨᠥᠭᠰᠡᠨ ᠲᠤᠬᠠᠢ ᠮᠡᠳᠡᠭᠡᠳ ᠰᠦᠽᠳᠡᠯᠢ ᠶ᠋ᠢᠨ ᠣᠷᠣᠰ ᠨᠤᠲᠤᠭ ᠲᠤ᠌ ᠶᠠᠪᠤᠵᠤ ᠪᠠᠢᠯᠳᠤᠬᠤ ᠪᠠᠭ ᠤ᠋ᠳ ᠢ᠋ ᠳᠠᠭᠤᠳᠠᠬᠤ ᠪᠠᠷ ᠡᠯᠴᠢ ᠨᠠᠷ ᠢ᠋ ᠵᠦᠭ ᠪᠦᠬᠦᠨᠡ ᠮᠣᠷᠳᠠᠭᠤᠯᠪᠠ᠃ ᠡᠭᠦᠨᠡ ᠠᠭᠤᠯᠵᠠᠵᠤ ᠨᠡᠢᠯᠡᠯᠴᠡᠬᠦ ᠭᠠᠵᠠᠷ ᠢ᠋ ᠫᠧᠷᠧᠶᠡᠰᠯᠡᠸᠯᠶᠡ— ᠽᠡᠯᠧᠰᠰᠺ ᠭᠡᠳᠡᠭ ᠬᠣᠲᠠ ᠶ᠋ᠢᠨ ᠣᠷᠴᠢᠮ ᠭᠡᠵᠦ ᠵᠢᠭᠠᠭᠰᠠᠨ ᠪᠥᠭᠡᠳ ᠪᠠᠭ ᠤ᠋ᠳ ᠲᠣᠬᠢᠶᠠᠯᠳᠤᠭᠴᠢᠳ ᠢ᠋ ᠰᠢᠪᠬᠠᠴᠢᠨ ᠬᠥᠭᠡᠭᠡᠭᠰᠡᠭᠡᠷ ᠪᠦᠰᠡᠯᠡᠨ ᠪᠠᠷᠢᠳᠠᠭ ᠠᠪᠠ ᠮᠡᠲᠦ ᠬᠦᠷᠢᠶᠡᠯᠡᠨ ᠠᠪᠬᠤ ᠶᠣᠰᠣᠲᠠᠢ ᠪᠠᠢᠵᠠᠢ᠃
ᠭᠡᠲᠡᠯᠡ ᠲᠡᠷᠡ ᠤᠷᠭᠠ ᠪᠠᠷ ᠪᠠᠷᠢᠭᠳᠠᠳᠠᠭ ᠦᠭᠡᠢ ᠦᠰᠦᠷᠳᠡᠭ ᠣᠷᠣᠰ ᠤ᠋ᠳ ᠪᠠᠰᠠ ᠲᠠᠲ᠋ᠠᠷ ᠤ᠋ᠨ ᠬᠡᠳᠦᠨ ᠪᠠᠭ ᠢ᠋ ᠬᠦᠢᠰᠦ ᠲᠡᠮᠲᠡᠷᠢᠭᠡᠳ ᠫᠸᠷᠸᠶᠠᠰᠯᠠᠸᠯᠶᠠ— ᠽᠡᠯᠧᠰᠰᠺ ᠦ᠋ᠨ ᠣᠢᠷᠠ ᠬᠠᠷᠠᠩᠭᠤᠢ ᠣᠢ ᠳᠣᠲᠣᠷᠠ ᠣᠷᠣᠵᠤ ᠦᠭᠡᠢ ᠪᠣᠯᠪᠠ ᠭᠡᠬᠦ ᠰᠢᠨᠡ ᠮᠡᠳᠡᠭᠡ ᠶ᠋ᠢ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠬᠦᠷᠭᠡᠵᠡᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠶᠧᠸᠫᠡᠲ ᠥᠪᠡᠷ ᠦ᠋ᠨ ᠨᠠᠮ ᠨᠡᠢᠯᠡᠭᠴᠢᠳ ᠦ᠋ᠨ ᠬᠠᠮᠲᠤ ᠪᠠᠷ ᠤᠮᠠᠷᠠ ᠵᠦᠭ ᠲᠠᠪᠰᠢᠨ ᠶᠠᠪᠤᠯᠠ᠃ ᠲᠡᠷᠡ ᠬᠦ᠌ ᠶᠠᠪᠤᠬᠤ ᠳ᠋ᠠᠭᠠᠨ ᠲᠠᠲ᠋ᠠᠷ ᠦ᠋ᠳ ᠨᠠᠰᠢ ᠪᠠᠨ ᠶᠠᠪᠤᠭᠠ ᠦᠭᠡᠢ ᠪᠥᠭᠡᠳ ᠬᠣᠢᠰᠢ ᠪᠤᠴᠠᠭᠰᠠᠨ ᠭᠡᠳᠡᠭ ᠮᠡᠳᠡᠭᠡ ᠶ᠋ᠢ ᠣᠢ ᠳ᠋ᠤ᠌ ᠤᠷᠭᠤᠵᠤ ᠨᠢᠭᠤᠭᠳᠠᠭᠴᠢᠳ ᠠ᠋ᠴᠠ ᠣᠯᠵᠤ ᠰᠣᠨᠣᠰᠤᠭᠠᠳ ᠶᠸᠸᠫᠡᠲ ᠦ᠋ᠨ ᠳᠣᠲᠣᠷᠠ ᠶᠡᠬᠡᠳᠡ ᠳᠣᠩᠰᠣᠯᠪᠠ᠃ ᠤᠴᠢᠷ ᠨᠢ ᠲᠠᠲ᠋ᠠᠷ ᠤ᠋ᠳ ᠲᠠᠯᠠ ᠪᠦᠬᠦᠨᠡ ᠪᠣᠢ ᠤᠴᠢᠷ ᠲᠡᠳᠡᠨ ᠦ᠌ ᠳᠤᠮᠳᠠᠭᠤᠷ ᠨᠡᠪᠲᠡᠷᠡᠨ ᠭᠠᠷᠴᠤ ᠴᠠᠰᠢ ᠶᠠᠪᠤᠬᠤ ᠬᠡᠷᠡᠭᠲᠡᠢ ᠪᠠᠢᠭᠰᠠᠨ ᠶᠤᠮ᠃ ᠭᠡᠲᠡᠯᠡ ᠲᠡᠵᠢᠭᠡᠯ ᠳᠠᠭᠤᠰᠤᠨ ᠲᠠᠯᠬᠠ ᠲᠠᠷᠢᠶᠠᠨ ᠤ᠋ ᠠᠯᠢᠨ ᠨᠢ ᠴᠦ᠍ ᠦᠭᠡᠢ ᠪᠣᠯᠵᠤ ᠪᠠᠢᠯᠠ᠃ ᠶᠸᠸᠫᠡᠲ ᠣᠢ ᠶ᠋ᠢᠨ ᠬᠠᠷᠭᠤᠢ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠭᠰᠠᠭᠠᠷ ᠫᠯᠧᠱᠧᠶᠧᠸ ᠦ᠋ᠨ ᠨᠠᠭᠤᠷ ᠲᠸ᠋ ᠴᠢᠳᠬᠤᠬᠤ ᠲᠷᠦᠪᠸᠵ ᠭᠣᠣᠯ ᠤ᠋ᠨ ᠤᠷᠤᠰᠤᠭᠰᠠᠨ ᠪᠸᠷᠸᠨ᠋ᠳ᠋ᠸᠶᠸᠸ ᠦ᠋ᠨ ᠨᠠᠮᠤᠭ ᠤᠷᠤᠭᠤ ᠣᠷᠣᠪᠠ᠃ ᠲᠠᠲ᠋ᠠᠷ ᠤ᠋ᠨ ᠪᠠᠭ ᠤ᠋ᠳ ᠪᠦᠰᠡᠯᠡᠯᠲᠡ ᠳᠣᠲᠣᠷᠠ ᠠ᠋ᠴᠠ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠢ᠋ ᠳᠠᠭᠠᠵᠤ ᠭᠠᠷᠤᠭᠠᠳ ᠥᠭᠯᠢᠴ ᠦ᠋ᠨ ᠵᠦᠭ ᠶᠠᠪᠤᠬᠤ ᠪᠠᠷ ᠶᠸᠸᠫᠡᠲ ᠪᠣᠳᠣᠯᠠ᠃
ᠬᠥᠯᠳᠡᠭᠦᠦ ᠨᠠᠮᠤᠭ ᠤ᠋ᠨ ᠳᠡᠭᠡᠭᠦᠷ ᠲᠠᠯᠠ ᠳᠡᠭᠡᠷᠡ ᠬᠡᠪ ᠭᠡᠨᠡᠳᠲᠡ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠮᠣᠷᠢᠲᠠᠢ ᠴᠡᠷᠢᠭ ᠦ᠋ᠨ ᠶᠠᠪᠤᠬᠤ ᠨᠢ ᠦᠵᠡᠭᠳᠡᠪᠡ᠃ ᠪᠠᠭᠠ ᠪᠡᠶᠡ ᠲᠡᠢ ᠴᠢᠭᠢᠷᠠᠭ ᠮᠣᠷᠢᠳ ᠢ᠋ ᠤᠨᠤᠵᠤ ᠵᠠᠷ ᠵᠡᠪᠰᠡᠭ ᠢ᠋ ᠵᠡᠭᠦᠭᠰᠡᠨ ᠲᠡᠳᠡ ᠴᠢᠬᠢᠭᠦᠨ ᠣᠢ ᠳᠣᠲᠣᠷᠠ ᠠ᠋ᠴᠠ ᠭᠠᠷᠤᠭᠠᠳ ᠶᠸᠸᠫᠡᠲ ᠦ᠋ᠨ ᠪᠠᠭ ᠤ᠋ᠨ ᠵᠦᠭ ᠮᠥᠰᠥᠨ ᠳᠡᠭᠡᠭᠦᠷ ᠳᠠᠪᠬᠢᠯᠳᠤᠪᠠ᠃ ᠲᠠᠲ᠋ᠠᠷ ᠤ᠋ᠳ ᠬᠡᠳᠦᠨ ᠠᠯᠬᠤᠮ ᠣᠢᠷᠠᠬᠠᠨ ᠢᠷᠡᠭᠡᠳ ᠬᠡᠳᠦᠨ ᠰᠤᠮᠤ ᠲᠠᠯᠪᠢᠴᠢᠬᠠᠭᠠᠳ ᠳᠠᠢᠰᠤᠨ ᠳ᠋ᠤ᠌ ᠬᠥᠭᠡᠭᠡᠭᠳᠡᠨ ᠶᠠᠪᠤᠭᠠ ᠮᠡᠲᠦ ᠪᠡᠷ ᠲᠦᠷᠭᠡᠨ ᠵᠠᠭᠤᠷᠠ ᠵᠠᠢᠯᠠᠨ ᠣᠳᠪᠠ᠃
ᠶᠸᠸᠫᠡᠲ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠤᠪ ᠮᠡᠬᠡ ᠶ᠋ᠢ ᠮᠡᠳᠡᠭᠡᠳ ᠥᠪᠡᠷ ᠦ᠋ᠨ ᠪᠠᠭ ᠢ᠋ ᠫᠯᠧᠱᠧᠶᠧᠸ ᠦ᠋ᠨ ᠨᠠᠭᠤᠷ ᠤ᠋ᠨ ᠵᠦᠭ ᠠᠪᠴᠤ ᠮᠣᠷᠳᠠᠪᠠ᠃ ᠭᠡᠲᠡᠯᠡ ᠲᠠᠲ᠋ᠠᠷ ᠤ᠋ᠨ ᠣᠯᠠᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠵᠠᠮ ᠢ᠋ᠶ᠋ᠠᠷ ᠳᠠᠬᠢᠨ ᠦᠵᠡᠭᠳᠡᠬᠦ ᠪᠥᠭᠡᠳ ᠲᠡᠳᠡ ᠪᠠᠢᠯᠳᠤᠬᠤ ᠠ᠋ᠴᠠ ᠵᠠᠢᠯᠠᠰᠬᠢᠨ ᠣᠢ ᠳᠣᠲᠣᠷᠠ ᠶᠠᠭᠠᠷᠠᠯ ᠦᠭᠡᠢ ᠣᠷᠣᠵᠤ ᠪᠠᠢᠯᠠ᠃ ᠶᠸᠸᠫᠡᠲ ᠥᠨᠥᠬᠢ ᠲᠷᠦᠪᠸᠵ ᠭᠣᠣᠯ ᠤ᠋ᠨ ᠵᠠᠬᠠ ᠳ᠋ᠤ᠌ ᠤᠷᠢᠳᠤᠬᠢ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠨ ᠶᠠᠪᠤᠭᠰᠠᠭᠠᠷ ᠪᠠᠢᠪᠠ᠃
ᠨᠠᠷᠠᠰᠤ ᠲᠠᠢ ᠥᠨᠳᠥᠷᠯᠢᠭ ᠭᠠᠵᠠᠷ ᠡᠮᠦᠨᠡ ᠨᠢ ᠦᠵᠡᠭᠳᠡᠪᠡ᠃ ᠲᠡᠭᠦᠨ ᠦ᠌ ᠣᠷᠣᠢ ᠶ᠋ᠢᠨ ᠲᠤᠰᠢᠶᠠ ᠭᠠᠵᠠᠷ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠡᠷᠲᠡᠨ ᠦ᠌ ᠴᠢᠯᠠᠭᠤᠨ ᠪᠠᠷᠢᠯᠭᠠ ᠶ᠋ᠢᠨ ᠡᠪᠳᠡᠷᠬᠡᠢ ᠰᠠᠭᠤᠷᠢᠨ ᠭᠠᠵᠠᠷ ᠬᠠᠷᠠᠭᠳᠠᠨᠠ᠃
— ᠪᠸᠷᠸᠨ᠋ᠳ᠋ᠸᠢ ᠬᠠᠭᠠᠨ ᠤ᠋ ᠣᠷᠳᠣᠨ ᠪᠠᠢᠨᠠ᠃
ᠡᠪᠦᠳᠦᠭ ᠢ᠋ᠶ᠋ᠡᠨ ᠬᠦᠷᠦᠭᠰᠡᠨ ᠰᠠᠭᠯᠳᠠᠢ ᠪᠸᠷᠸᠨ᠋ᠳ᠋ᠸᠢ ᠬᠠᠭᠠᠨ ᠭᠡᠳᠡᠭ ᠡᠨᠳᠡ ᠰᠠᠭᠤᠵᠤ ᠪᠠᠢᠭᠰᠠᠨ ᠶᠤᠮ ᠭᠡᠳᠡᠭ ᠭᠡᠵᠦ ᠨᠠᠮ ᠨᠡᠢᠯᠡᠭᠴᠢᠳ ᠶᠠᠷᠢᠯᠴᠠᠪᠠ᠃ ᠲᠡᠷᠡᠬᠦ ᠡᠪᠳᠡᠷᠬᠡᠢ ᠪᠠᠯᠭᠠᠰᠤᠨ ᠤ᠋ ᠳᠡᠷᠭᠡᠳᠡᠬᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠰᠠ ᠲᠠᠲ᠋ᠠᠷ ᠤ᠋ᠨ ᠰᠢᠨᠡ ᠪᠠᠭ ᠭᠠᠷᠴᠤ ᠢᠷᠡᠭᠰᠡᠨ ᠨᠢ ᠤᠷᠲᠤ ᠠ᠋ᠴᠠ ᠤᠷᠲᠤ ᠴᠠᠭᠠᠨ ᠲᠤᠭ ᠪᠠᠷᠢᠵᠠᠢ᠃
— ᠪᠠᠲᠤ ᠲᠡᠨᠳᠡ ᠪᠠᠢᠨᠠ ᠭᠡᠵᠦ ᠶᠸᠸᠫᠡᠲ ᠬᠠᠰᠬᠢᠷᠪᠠ᠃
— ᠤᠷᠤᠭᠰᠢ ᠳᠠᠪᠰᠢᠭᠲᠤᠨ! ᠭᠡᠵᠦ ᠮᠣᠷᠢᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠠᠮᠲᠤ ᠪᠠᠷ ᠲᠡᠷᠡᠬᠦ ᠲᠣᠯᠣᠭᠠᠢ ᠶ᠋ᠢᠨ ᠵᠦᠭ ᠥᠰᠥᠷᠬᠡᠪᠡ᠃ ᠨᠠᠮ ᠨᠡᠢᠯᠡᠭᠰᠡᠨ ᠶᠠᠪᠠᠭᠠᠨᠴᠤᠳ ᠨᠢ ᠴᠸᠷᠨᠢᠭᠤᠸ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠲᠤᠰᠠᠯᠠᠬᠤ ᠪᠠᠷ ᠪᠡᠯᠡᠳᠬᠡᠨ ᠵᠡᠷᠭᠡᠴᠡᠨ ᠠᠯᠬᠤᠵᠠᠭᠠᠨᠠᠮ᠃ ᠲᠡᠷᠡᠬᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠢᠭᠰᠠᠨ ᠲᠠᠲ᠋ᠠᠷ ᠤ᠋ᠳ ᠦᠢᠮᠡᠯᠳᠦᠨ᠂ ᠮᠥᠰᠥᠨ ᠦ᠌ ᠵᠦᠭ ᠪᠠᠭᠤᠵᠠᠭᠠᠨᠠ᠃ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠲᠡᠷᠡ ᠲᠣᠯᠣᠭᠠᠢ ᠶ᠋ᠢᠨ ᠪᠠᠯ ᠳ᠋ᠤ᠌ ᠲᠠᠲ᠋ᠠᠷ ᠤ᠋ᠳ ᠲᠠᠢ ᠲᠤᠯᠤᠯᠳᠤᠪᠠ᠃ ᠶᠸᠸᠫᠡᠲ ᠲᠣᠬᠢᠶᠠᠯᠳᠤᠭᠰᠠᠨ ᠬᠡᠳᠦᠨ ᠲᠠᠲ᠋ᠠᠷ ᠤ᠋ᠳ ᠢ᠋ ᠤᠨᠠᠭᠠᠭᠠᠳ ᠳᠡᠭᠡᠭᠰᠢ ᠴᠠᠭᠠᠨ ᠲᠤᠭ ᠤ᠋ᠨ ᠵᠦᠭ ᠥᠰᠥᠷᠬᠡᠪᠡ᠃
ᠰᠠᠷᠠᠯ ᠮᠣᠷᠢᠲᠠᠢ ᠲᠠᠬᠢᠷ ᠰᠡᠯᠡᠮᠡ ᠳᠠᠯᠠᠢᠭᠰᠠᠨ ᠲᠣᠮᠣ ᠮᠣᠩᠭᠣᠯ ᠬᠥᠮᠦᠨ ᠶᠸᠸᠫᠡᠲ ᠦ᠋ᠨ ᠡᠭᠴᠡ ᠡᠮᠦᠨᠡ ᠡᠴᠡ ᠴᠠᠪᠴᠢᠯᠠᠨ ᠢᠷᠡᠯᠡ᠃ ᠶᠸᠸᠫᠡᠲ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠬᠠᠵᠠᠭᠤ ᠳᠠᠰᠢ ᠲᠠᠲᠠᠵᠤ ᠲᠡᠭᠦᠨ ᠲᠡᠢ ᠵᠡᠷᠭᠡᠴᠡᠬᠦ ᠶ᠋ᠢᠨ ᠬᠠᠮᠲᠤ ᠲᠡᠷᠡᠬᠦ ᠮᠣᠩᠭᠣᠯ ᠬᠡᠢ ᠴᠠᠪᠴᠢᠨ ᠥᠩᠬᠥᠷᠢᠪᠡ᠃ ᠶᠸᠸᠫᠡᠲ ᠶᠡᠬᠡᠳᠡ ᠬᠦᠴᠦᠲᠡᠢ ᠴᠣᠬᠢᠭᠰᠠᠨ ᠠ᠋ᠴᠠ ᠲᠡᠷᠡᠬᠦ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠪᠠᠷᠢᠭᠰᠠᠨ ᠰᠡᠯᠡᠮᠡ ᠬᠤᠭᠤᠷᠠᠵᠠᠢ᠃ ᠶᠸᠸᠫᠡᠲ ᠬᠣᠶᠠᠷ ᠲᠠᠬᠢ ᠴᠠᠪᠴᠢᠯᠲᠠ ᠪᠠᠷ ᠢ᠋ᠶ᠋ᠠᠨ ᠲᠡᠷᠡᠬᠦ ᠮᠣᠩᠭᠣᠯ ᠤ᠋ᠨ ᠪᠥᠰᠡᠨ ᠳ᠋ᠦ᠍ ᠲᠤᠯᠲᠠᠯᠠ ᠴᠠᠪᠴᠢᠭᠰᠠᠨ ᠲᠤᠯᠠ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠤᠨᠠᠪᠠ᠃ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠳᠤᠮᠳᠠ ᠮᠠᠭᠤᠬᠠᠢ ᠬᠠᠰᠬᠢᠷᠤᠯᠳᠤᠬᠤ ᠴᠢᠮᠡᠭᠡ ᠰᠣᠨᠣᠰᠳᠠᠵᠤ᠄
— ᠲᠣᠭᠣᠷᠤᠤ ᠯᠠ ᠠᠯᠠᠭᠳᠠᠪᠠ᠁ ᠲᠣᠭᠣᠷᠤᠤ ᠯᠠ ᠠᠯᠠᠭᠳᠠᠪᠠ᠁ ᠭᠡᠵᠦ ᠪᠠᠢᠪᠠ᠃
ᠶᠸᠸᠫᠡᠲ ᠳᠠᠬᠢᠨ ᠲᠡᠷᠡ ᠲᠣᠯᠣᠭᠠᠢ ᠳᠡᠭᠡᠷᠡ ᠭᠠᠷᠪᠠ᠃ ᠲᠡᠭᠦᠨ ᠦ᠌ ᠬᠠᠮᠲᠤᠪᠠᠷ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠨᠢ ᠳᠠᠭᠠᠷᠢᠨ ᠪᠦᠬᠦᠢ ᠳᠠᠶ᠋ᠢᠰᠤᠨ ᠨᠤᠭᠤᠳ ᠢ᠋ ᠴᠣᠬᠢᠭᠰᠠᠭᠠᠷ ᠳᠠᠪᠬᠢᠯᠳᠤᠨᠠ᠃ ᠲᠡᠷᠡᠬᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠢᠭᠰᠠᠨ ᠲᠠᠲ᠋ᠠᠷ ᠤ᠋ᠳ ᠵᠦᠭ ᠪᠦᠬᠦᠨ ᠳ᠋ᠡᠭᠡᠨ ᠰᠠᠷᠨᠢᠨ ᠳᠠᠪᠬᠢᠯᠳᠤᠪᠠ᠃ ᠶᠸᠸᠫᠡᠲ ᠲᠡᠭᠦᠨ ᠦ᠌ ᠣᠷᠣᠢ ᠳᠡᠭᠡᠷᠡ ᠵᠣᠭᠰᠣᠨ ᠬᠠᠷᠠᠪᠠᠰᠤ ᠲᠠᠲ᠋ᠠᠷ ᠤ᠋ᠳ ᠲᠠᠯᠠ ᠪᠦᠬᠦᠨ ᠡᠴᠡ ᠨᠢ ᠭᠠᠷᠴᠤ ᠢᠷᠡᠪᠡ᠃ ᠣᠢ ᠳᠣᠲᠣᠷᠠ ᠠ᠋ᠴᠠ ᠰᠢᠨᠡ ᠰᠢᠨᠡ ᠪᠠᠭ ᠤ᠋ᠳ ᠭᠠᠷᠴᠤ ᠢᠷᠡᠭᠡᠳ ᠲᠡᠷᠡᠬᠦ ᠡᠪᠳᠡᠷᠬᠡᠢ ᠪᠠᠯᠭᠠᠰᠤᠨ ᠳᠡᠭᠡᠷᠡ ᠴᠤᠭᠯᠠᠷᠠᠭᠰᠠᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠪᠠᠢᠭᠠ ᠱᠣᠪᠣᠭᠣᠷ ᠲᠣᠯᠣᠭᠠᠢ ᠶ᠋ᠢ ᠪᠦᠰᠡᠯᠡᠪᠡ᠃ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠲᠠᠲ᠋ᠠᠷ ᠣᠷᠣᠰ ᠤ᠋ᠳ ᠢ᠋ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠳᠠᠭᠠᠷᠢᠨ ᠣᠷᠣᠵᠤ ᠪᠢᠯᠡ᠃ ᠴᠸᠷᠨᠢᠭᠤᠸ ᠤ᠋ᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠲᠡᠷᠡ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠪᠠᠭᠤᠬᠤ ᠦᠭᠡᠢ ᠴᠢᠭᠢᠷᠠᠭ ᠢ᠋ᠶ᠋ᠠᠷ ᠲᠡᠮᠡᠴᠡᠭᠰᠡᠨ ᠶᠤᠮ ᠠ᠋᠃ ᠵᠡᠪᠰᠡᠭ ᠮᠠᠭᠤᠲᠠᠢ ᠨᠠᠮ ᠨᠡᠢᠯᠡᠭᠴᠢᠳ ᠨᠢ ᠲᠡᠷᠡᠬᠦ ᠬᠡᠴᠡᠭᠦᠦ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠴᠥᠭᠡᠨ ᠪᠤᠰᠤ ᠲᠠᠲ᠋ᠠᠷ ᠤ᠋ᠳ ᠢ᠋ ᠡᠳᠡ ᠪᠠᠳ ᠪᠣᠯᠭᠠᠪᠠ᠃ ᠭᠡᠪᠡᠴᠦ ᠣᠷᠣᠰ ᠤ᠋ᠳ ᠤ᠋ᠨ ᠵᠢᠭᠰᠠᠭᠠᠯ ᠴᠥ᠍ ᠮᠡᠳᠡᠭᠳᠡᠬᠦ ᠪᠡᠷ ᠪᠠᠭᠠ ᠪᠣᠯᠤᠭᠰᠠᠨ ᠠᠵᠢ᠃
ᠴᠡᠷᠢᠭ ᠦ᠋ᠳ ᠣᠯᠠᠨ ᠢ᠋ᠶ᠋ᠠᠷ ᠡᠯᠰᠡᠵᠦ ᠨᠤᠮᠤ ᠰᠤᠮᠤ ᠶ᠋ᠢᠨ ᠬᠠᠷᠪᠤᠬᠤ ᠴᠢᠮᠡᠭᠡ ᠦᠷᠭᠦᠯᠵᠢᠳᠡ ᠭᠠᠷᠤᠭᠠᠳ ᠬᠢᠲᠤᠭᠠ ᠰᠡᠯᠡᠮᠡ ᠪᠡᠨ ᠬᠠᠩᠭᠢᠨᠠᠭᠤᠯᠤᠨ ᠭᠣᠣᠯᠯᠠᠵᠤ ᠪᠠᠢᠭᠰᠠᠨ ᠭᠠᠵᠠᠷ ᠤ᠋ᠳ ᠲᠤᠨᠢ ᠬᠣᠶᠠᠷ ᠥᠨᠳᠥᠷ ᠴᠡᠷᠢᠭ ᠣᠨᠴᠣᠭᠣᠢᠷᠠᠨ ᠪᠠᠢᠯᠠ᠃ ᠲᠡᠳᠡ ᠪᠣᠯ ᠴᠣᠬᠢᠯᠲᠠ ᠠ᠋ᠴᠠ ᠳᠠᠯᠳᠠᠯᠠᠬᠤ ᠶ᠋ᠢᠨ ᠲᠤᠯᠠᠳᠠ ᠭᠠᠵᠠᠷ ᠴᠥ᠍ ᠲᠡᠪᠡᠷᠢᠨ ᠬᠡᠪᠲᠡᠭᠰᠡᠨ ᠦᠭᠡᠢ᠂ ᠬᠠᠷᠪᠤᠭᠰᠠᠨ ᠰᠤᠮᠤᠨ ᠠ᠋ᠴᠠ ᠬᠠᠯᠲᠤᠷᠢᠨ ᠨᠢᠭᠤᠭᠳᠠᠵᠤ ᠴᠥ᠍ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠳᠡ ᠪᠣᠯ ᠡᠭᠴᠡ ᠰᠢᠯᠤᠭᠤᠨ ᠵᠣᠭᠰᠣᠨ ᠤᠬᠤᠷᠢᠯᠲᠠ ᠦᠭᠡᠢ ᠪᠡᠷ ᠴᠣᠬᠢᠯᠳᠤᠵᠤ ᠪᠠᠢᠪᠠ᠃
ᠲᠡᠳᠡᠨ ᠲᠡᠢ ᠨᠢᠭᠡ ᠬᠠᠮᠲᠤ ᠡᠩᠨᠡᠭᠡᠨ ᠳ᠋ᠦ᠍ ᠣᠷᠣᠰ ᠤ᠋ᠨ ᠴᠡᠷᠢᠭ ᠦ᠋ᠳ ᠲᠡᠮᠡᠴᠡᠯᠳᠦᠵᠦ ᠠᠭᠰᠠᠨ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠮᠡᠷᠭᠡᠨ ᠰᠤᠮᠤ ᠨᠢ ᠲᠡᠳᠡᠨ ᠦ᠌ ᠪᠥᠬᠡ ᠬᠤᠶᠠᠭ ᠢ᠋ ᠳᠠᠭᠠᠭᠠᠭᠰᠠᠨ ᠦᠭᠡᠢ ᠤᠨᠠᠵᠤ ᠪᠢᠯᠡ᠃ ᠲᠠᠬᠢᠷ ᠰᠡᠯᠡᠮᠡ ᠨᠤᠭᠦᠳ ᠲᠡᠳᠡᠨ ᠳ᠋ᠦ᠍ ᠬᠠᠪᠢᠳᠠᠵᠤ ᠪᠠᠢᠭᠰᠠᠨ ᠦᠭᠡᠢ ᠪᠢᠯᠡ᠃ ᠲᠡᠳᠡ ᠪᠣᠯ ᠡᠪᠳᠡᠷᠡᠰᠢ ᠦᠭᠡᠢ ᠬᠡᠷᠡᠮ ᠪᠣᠯᠤᠨ ᠵᠣᠭᠰᠣᠵᠤ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠭᠠᠯᠵᠠᠭᠤ ᠳᠣᠪᠲᠣᠯᠤᠯᠲᠠ ᠨᠤᠭᠤᠳ ᠢ᠋ ᠪᠤᠲᠠ ᠴᠣᠬᠢᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠠᠶᠤᠮᠰᠢᠭᠲᠤ ᠠᠪᠢᠶᠠ ᠨᠤᠭᠤᠳ ᠤ᠋ᠨ ᠳᠤᠮᠳᠠᠭᠤᠷ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠵᠡᠷᠯᠢᠭ ᠢ᠋ᠶ᠋ᠡᠷ ᠪᠠᠷᠬᠢᠷᠠᠬᠤ᠂ ᠣᠷᠣᠰ ᠤ᠋ᠳ ᠬᠠᠰᠬᠢᠷᠬᠤ ᠂ ᠮᠣᠷᠢᠳ ᠤ᠋ᠨ ᠢᠨᠴᠠᠭᠠᠬᠤ᠂ ᠲᠠᠯᠠ ᠪᠠᠷ ᠬᠠᠩᠭᠢᠨᠠᠬᠤ ᠰᠢᠷᠬᠠᠳᠤᠭᠴᠢᠳ ᠤ᠋ᠨ ᠶᠣᠢᠯᠠᠬᠤ ᠨᠢ ᠲᠣᠳᠣ ᠳᠠᠭᠤ ᠪᠠᠷ ᠰᠣᠨᠣᠰᠳᠠᠨᠠ᠃
— ᠶᠸᠸᠫᠡᠲ ᠦ᠋ᠨ ᠨᠥᠬᠥᠳ᠂ ᠣᠷᠣᠭᠰᠢ ᠲᠠᠪᠰᠢᠭᠲᠤᠨ᠂ ᠲᠡᠳᠡᠨ ᠦ᠌ ᠭᠠᠯᠵᠠᠭᠤᠷᠠᠭᠴᠢᠳ ᠢ᠋ ᠰᠥᠨᠥᠭᠡᠭᠲᠦᠨ᠃ ᠡᠭᠦᠨ ᠦ᠌ ᠬᠠᠷᠢᠭᠤ ᠳ᠋ᠤ᠌᠂
— ᠪᠤᠤ ᠠᠶᠤ᠂ ᠡᠴᠢᠭᠡ ᠷᠠᠲ᠋ᠢᠪᠤᠷ ᠪᠠᠢᠵᠤ ᠪᠠᠢᠨᠠ᠃ ᠬᠢᠴᠢᠶᠡᠵᠦ ᠲᠤᠯᠤᠯᠳᠤᠶᠠ ᠭᠡᠬᠦ ᠳᠠᠭᠤᠨ ᠰᠣᠨᠣᠰᠳᠠᠨᠠ᠃ ᠭᠢᠯᠠᠯᠵᠠᠭᠰᠠᠨ ᠡᠭᠴᠡ ᠰᠡᠯᠡᠮᠡ ᠷᠠᠲ᠋ᠢᠪᠤᠷ ᠤ᠋ᠨ ᠭᠠᠷ ᠲᠸ᠋ ᠢᠰᠬᠡᠷᠦᠯᠳᠦᠨᠡ᠃ ᠳᠡᠷᠭᠡᠳᠡ ᠨᠢ ᠷᠠᠲ᠋ᠢᠪᠤᠷ ᠥᠪᠡᠷ ᠦ᠋ᠨ ᠠᠶᠤᠮᠰᠢᠭᠲᠤ ᠪᠣᠷᠣᠣᠬᠠᠢ ᠪᠠᠷ ᠬᠠᠯᠳᠠᠨ ᠢᠷᠡᠭᠰᠡᠨ ᠲᠠᠲ᠋ᠠᠷ ᠤ᠋ᠳ ᠢ᠋ ᠰᠥᠨᠥᠭᠡᠨᠡ᠃ ᠬᠠᠭᠠᠳ ᠤ᠋ᠳ ᠰᠢᠯᠢᠳᠡᠭ ᠰᠠᠢᠨ ᠮᠣᠷᠢᠨ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠡᠨᠳᠡ ᠢᠷᠡᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠮᠣᠷᠢᠳ ᠨᠢ ᠦᠷᠭᠦᠨ ᠴᠣᠪᠬᠣᠷᠴᠤ ᠬᠠᠵᠠᠭᠤ ᠲᠡᠰᠢ ᠳᠠᠪᠬᠢᠨᠠ᠃ ᠵᠠᠷᠢᠮ ᠨᠢ ᠪᠠᠭᠠᠲᠤᠷ ᠤ᠋ᠨ ᠴᠣᠬᠢᠯᠲᠠ ᠳ᠋ᠤ᠌ ᠵᠠᠢᠯᠠᠵᠤ ᠬᠠᠯᠬᠠᠪᠴᠢ ᠶ᠋ᠢᠨ ᠬᠠᠮᠲᠤ ᠤᠨᠠᠨᠠ᠃
ᠶᠸᠸᠫᠡᠲ ᠦ᠋ᠨ ᠰᠡᠯᠡᠮᠡ ᠡᠴᠡ ᠠᠮᠵᠢᠵᠤ ᠡᠷᠭᠢᠭᠰᠡᠨ ᠢ᠋ ᠷᠠᠲ᠋ᠢᠪᠤᠷ ᠤ᠋ᠨ ᠪᠣᠷᠣᠣᠬᠠᠢ ᠦᠯᠦ ᠭᠠᠷᠭᠠᠨᠠ᠃ ᠲᠣᠮᠣ ᠭᠢᠯᠠᠯᠵᠠᠭᠰᠠᠨ ᠲᠡᠮᠦᠷ ᠮᠠᠯᠠᠭᠠᠢ ᠤᠷᠲᠤ ᠪᠤᠭᠤᠷᠤᠯ ᠦᠰᠦᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠭᠠᠯ ᠲᠦᠯᠡᠯᠵᠡᠬᠦ (ᠳᠦᠷᠡᠯᠵᠡᠬᠦ) ᠮᠡᠲᠦ ᠤᠯᠠᠭᠠ ᠪᠤᠲᠠᠷᠠᠭᠰᠠᠨ ᠨᠢᠭᠤᠷ ᠲᠤᠨᠢ ᠲᠤᠩᠭᠠᠯᠠᠭ ᠬᠠᠷᠠ ᠨᠢᠳᠦ ᠭᠢᠯᠠᠯᠵᠠᠵᠤ ᠭᠠᠷ ᠲᠠᠭᠠᠨ ᠬᠦᠨᠳᠦ ᠪᠣᠷᠣᠣᠬᠠᠢ ᠪᠠᠷᠢᠭᠰᠠᠨ ᠷᠠᠲ᠋ᠢᠪᠤᠷ ᠬᠠᠯᠳᠠᠨ ᠳᠣᠪᠲᠣᠯᠤᠭᠴᠢᠳ ᠢ᠋ ᠬᠢᠳᠤᠵᠤ ᠪᠠᠢᠪᠠ᠃ ᠲᠡᠷᠡᠴᠢᠯᠡᠨ ᠶᠸᠸᠫᠠᠲ ᠮᠥᠨ ᠥᠪᠡᠷ ᠢ᠋ᠶ᠋ᠡᠨ ᠡᠷᠡᠯᠬᠡᠭ ᠰᠢᠢᠳᠪᠦᠷᠢᠲᠡᠢ ᠲᠤᠯᠤᠯᠳᠤᠵᠤ ᠪᠠᠢᠯᠠ᠃
ᠲᠠᠲ᠋ᠠᠷ ᠤ᠋ᠳ ᠠᠶᠤᠵᠤ ᠤᠬᠤᠷᠢᠪᠠ᠃
ᠲᠡᠷᠲᠡᠭᠡ ᠲᠠᠯᠠ ᠳ᠋ᠤ᠌ ᠬᠠᠢᠷᠠᠲᠠᠢ ᠴᠣᠬᠣᠷ ᠠᠵᠢᠷᠭᠠ ᠪᠠᠨ ᠤᠨᠤᠵᠤ ᠣᠯᠠᠨ ᠪᠠᠭᠠᠲᠤᠷ ᠤ᠋ᠳ ᠢ᠋ᠶ᠋ᠠᠷ ᠬᠦᠷᠢᠶᠡᠯᠡᠭᠦᠯᠦᠨ ᠪᠠᠲᠤ ᠬᠠᠭᠠᠨ ᠲᠤᠯᠤᠯᠳᠤᠭᠠᠨ ᠢ᠋ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠠᠷ ᠢ᠋ᠶ᠋ᠠᠨ ᠳᠠᠯᠠᠯᠵᠤ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠢ᠋ ᠳᠠᠭᠤᠳᠠᠵᠤ᠂
— ᠨᠠᠳᠠᠳᠤ ᠲᠡᠷᠡ ᠬᠣᠶᠠᠷ ᠣᠷᠣᠰ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠵᠤ ᠠᠪᠴᠢᠷᠠᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠨᠠ ᠭᠡᠪᠡ᠃
ᠰᠥᠪᠡᠭᠡᠲᠡᠢ ᠰᠢᠯᠢᠳᠡᠭ ᠵᠠᠭᠤᠲᠤ ᠪᠠᠨ ᠶᠠᠪᠤᠭᠤᠯᠤᠭᠠᠳ ᠪᠠᠰᠠ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠣᠶᠠᠷ ᠳᠠᠬᠢ ᠶ᠋ᠢ ᠶᠠᠪᠤᠭᠤᠯᠪᠠᠴᠤ ᠪᠠᠢᠯᠳᠤᠭᠴᠢᠳ ᠡᠷᠭᠢᠵᠦ ᠢᠷᠡᠭᠡ ᠦᠭᠡᠢ ᠪᠠ ᠣᠷᠣᠰ ᠤ᠋ᠳ ᠲᠤᠯᠤᠯᠳᠤᠭᠰᠠᠭᠠᠷ ᠪᠠᠢᠯᠠ᠃ ᠭᠡᠲᠡᠯᠡ ᠨᠢᠭᠡ ᠰᠢᠷᠬᠠ ᠲᠠᠢ ᠴᠡᠷᠢᠭ ᠮᠣᠷᠢᠨ ᠤ᠋ ᠬᠤᠷᠳᠤᠨ ᠢ᠋ᠶ᠋ᠠᠷ ᠳᠠᠪᠬᠢᠨ ᠲᠡᠷᠡ ᠪᠠᠲᠤ ᠬᠠᠭᠠᠨ ᠤ᠋ ᠬᠥᠯ ᠦ᠋ᠨ ᠳᠡᠷᠭᠡᠳᠡ ᠤᠨᠠᠵᠤ ᠥᠭᠦᠯᠡᠬᠦ ᠨᠢ᠄
— ᠵᠠᠩᠵᠤᠨ ᠠ᠋᠂ ᠲᠡᠳᠡᠨᠡᠷ ᠢ᠋ ᠪᠠᠷᠢᠵᠤ ᠦᠯᠦ ᠪᠣᠯᠤᠨᠠ᠃ ᠲᠡᠳᠡᠨᠡᠷ ᠴᠢᠨᠢ ᠯᠠᠪ ᠣᠷᠣᠰ ᠤ᠋ᠳ ᠤ᠋ᠨ ᠰᠦᠯᠳᠡ ᠨᠢ ᠮᠥᠨ ᠪᠠᠢᠬᠠ ᠭᠡᠪᠡ᠃ ᠰᠢᠷᠬᠠ ᠲᠠᠢ ᠬᠥᠮᠦᠨ ᠰᠡᠭᠦᠯᠴᠢ ᠶ᠋ᠢᠨ ᠦᠭᠡ ᠪᠡᠨ ᠰᠢᠪᠡᠭᠡᠨᠡᠵᠦ ᠬᠡᠯᠡᠭᠡᠳ ᠰᠤᠯᠠᠷᠠᠨ ᠤᠨᠠᠵᠤ ᠠᠮᠢᠰᠬᠤᠭᠠ ᠪᠠᠨ ᠲᠠᠲᠠᠪᠠ ᠃
ᠪᠠᠲᠤ ᠬᠠᠭᠠᠨ ᠪᠤᠷᠤᠭᠤ ᠬᠠᠷᠠᠭᠠᠳ ᠨᠢᠭᠤᠷ ᠨᠢ ᠬᠣᠪᠢᠰᠬᠢᠪᠡ᠃
— ᠶᠠᠭᠤᠨ ᠳ᠋ᠤ᠌ ᠮᠢᠨᠦ ᠪᠥᠬᠡ ᠨᠠᠷ ᠤᠨᠲᠠᠵᠤ ᠪᠠᠢᠨᠠ ᠪᠣᠢ? ᠭᠡᠵᠦ ᠠᠭᠤᠷᠰᠠᠨᠠ᠃
ᠪᠥᠬᠡ ᠨᠠᠷ ᠭᠦᠶᠦᠨ ᠢᠷᠡᠭᠡᠳ ᠣᠷᠢᠯᠠᠨ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ ᠳᠡᠪᠬᠡᠴᠡᠵᠦ ᠪᠠᠢᠪᠠ᠃ ᠪᠦᠬᠦᠨ ᠢ᠋ ᠴᠢᠳᠠᠭᠴᠢ ᠮᠣᠩᠭᠣᠯ ᠤ᠋ᠨ ᠰᠦᠯᠳᠡ ᠡᠴᠡ ᠣᠷᠣᠰ ᠤ᠋ᠨ ᠲᠩᠷᠢ ᠶ᠋ᠢ ᠢᠯᠠᠬᠤ ᠶ᠋ᠢ ᠭᠤᠶᠤᠵᠤ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠣᠭᠣᠯᠠᠢ ᠪᠠᠷ ᠲᠡᠭᠷᠢ ᠨᠠᠷ ᠢ᠋ᠶ᠋ᠠᠨ ᠤᠷᠢᠨ ᠳᠠᠭᠤᠳᠠᠵᠤ ᠢᠪᠡᠭᠡᠨ ᠲᠡᠳᠬᠦᠬᠦ ᠶ᠋ᠢ ᠭᠤᠶᠤᠵᠤ ᠬᠠᠷᠠ ᠮᠣᠷᠢ ᠪᠣᠯᠤᠨ ᠶᠡᠷᠡᠨ ᠶᠢᠰᠦᠨ ᠣᠯᠵᠠᠯᠠᠭᠳᠠᠭᠰᠠᠨ ᠵᠠᠯᠠᠭᠤ ᠪᠠᠷ ᠪᠤᠶᠠᠨ ᠠᠮᠠᠯᠠᠨᠠ᠃
ᠭᠡᠲᠡᠯᠡ ᠪᠤᠷᠬᠠᠨ ᠰᠦᠯᠳᠡ ᠬᠢᠯᠢᠩᠨᠡᠵᠦ ᠭᠦᠨ ᠴᠠᠰᠤ ᠢᠷᠣᠭᠠᠷ ᠦᠭᠡᠢ ᠨᠠᠮᠤᠭ ᠲᠤ᠌ ᠣᠷᠣᠬᠤ ᠠ᠋ᠴᠠ ᠠᠪᠤᠷᠠᠭᠰᠠᠨ ᠦᠭᠡᠢ᠂ ᠰᠢᠭᠤᠷᠭᠠ ᠰᠢᠭᠤᠷᠴᠤ ᠵᠢᠪᠠᠷ ᠵᠢᠩᠨᠡᠭᠰᠡᠨ ᠣᠷᠣᠰ ᠤ᠋ᠳ ᠤ᠋ᠨ ᠳᠣᠭᠰᠢᠨ ᠭᠠᠵᠠᠷ ᠪᠥᠬᠡ ᠨᠠᠷ ᠲᠤ᠌ ᠲᠣᠬᠢᠷᠠᠭᠰᠠᠨ ᠦᠭᠡᠢ᠃ ᠡᠳᠡ ᠨᠠᠷ ᠮᠣᠩᠭᠣᠯ ᠤ᠋ᠨ ᠴᠢᠯᠥᠭᠡᠲᠡᠢ ᠲᠠᠯᠠ ᠳ᠋ᠠᠭᠠᠨ ᠬᠣᠴᠣᠷᠤᠭᠰᠠᠨ ᠠᠪᠤᠷᠠᠯᠲᠠᠢ ᠪᠤᠷᠬᠠᠨ ᠳ᠋ᠠᠭᠠᠨ ᠣᠴᠢᠬᠤ ᠶ᠋ᠢ ᠬᠦᠰᠡᠵᠡᠭᠡᠨᠡ᠃
ᠴᠡᠷᠢᠭ ᠦ᠋ᠳ ᠣᠷᠣᠰ ᠤ᠋ᠨ ᠠᠶᠤᠮᠰᠢᠭᠲᠤ ᠪᠠᠭᠠᠲᠤᠷ ᠤ᠋ᠳ ᠢ᠋ ᠲᠣᠭᠣᠷᠢᠨ ᠤᠨᠠᠭᠰᠠᠭᠠᠷ ᠪᠠᠢᠯᠠ᠃ ᠲᠤᠯᠤᠯᠳᠤᠭᠠᠨ ᠤᠳᠠᠭᠠᠨ ᠤᠳᠠᠲᠠᠯᠠ ᠦᠷᠭᠦᠯᠵᠢᠯᠡᠪᠡ᠃ ᠭᠡᠪᠡᠴᠦ ᠷᠠᠲ᠋ᠢᠪᠤᠷ᠂ ᠶᠸᠸᠫᠠᠲ ᠨᠠᠷ ᠶᠠᠳᠠᠷᠠᠭᠰᠠᠨ ᠰᠢᠨᠵᠢ ᠦᠭᠡᠢ᠂ ᠲᠡᠭᠦᠨ ᠦ᠌ ᠵᠢᠳᠠ ᠪᠠ ᠪᠣᠷᠣᠣᠬᠠᠢ ᠨᠢ ᠡᠬᠢᠨ ᠦ᠌ ᠠᠳᠠᠯᠢ ᠬᠦᠴᠦᠲᠡᠢ ᠬᠡᠪ ᠢ᠋ᠶ᠋ᠡᠷ ᠦᠰᠦᠷᠦᠨ ᠪᠠᠭᠤᠭᠰᠠᠭᠠᠷ ᠪᠠᠢᠯᠠ᠃ ᠷᠠᠲ᠋ᠢᠪᠤᠷ ᠤ᠋ᠨ ᠤᠷᠢᠶᠠᠯᠠᠬᠤ ᠨᠢ ᠴᠢᠩᠭᠠ ᠬᠡᠪ ᠢ᠋ᠶ᠋ᠡᠷ ᠳᠠᠭᠤᠷᠢᠰᠤᠭᠳᠠᠬᠤ ᠪᠠ ᠮᠥᠨ ᠶᠸᠸᠫᠠᠲ ᠴᠤ᠌ ᠤᠷᠢᠳᠤ ᠶ᠋ᠢᠨ ᠠᠳᠠᠯᠢ ᠳᠦᠭᠦᠷᠡᠩ ᠬᠠᠷᠢᠭᠤᠯᠵᠤ ᠪᠠᠢᠪᠠ᠃ᠣᠷᠣᠰ ᠤ᠋ᠨ ᠪᠠᠢᠯᠳᠤᠭᠴᠢᠳ ᠶᠠᠳᠠᠷᠠᠬᠤ ᠪᠠᠨ ᠮᠠᠷᠲᠠᠵᠤ ᠡᠩᠨᠡᠭᠡ ᠪᠡᠨ ᠵᠡᠷᠭᠡᠴᠡᠭᠦᠯᠦᠨ ᠦᠷᠭᠦᠯᠵᠢᠯᠡᠭᠦᠯᠵᠦ ᠪᠠᠢᠯᠳᠤᠨᠠ᠃ ᠲᠡᠳᠡᠨᠡᠷ
— ᠣᠷᠣᠭᠰᠢ ᠪᠠᠨ! ᠴᠸᠷᠨᠢᠭᠤᠸᠴᠤᠳ ᠷᠶᠠᠽᠠᠨ ᠢ᠋ ᠬᠠᠮᠠᠭᠠᠯᠠᠭᠲᠤᠨ᠁ ᠲᠠᠲ᠋ᠠᠷ ᠤ᠋ᠳ ᠢ᠋ ᠳᠠᠭᠠᠷᠢᠨ ᠣᠷᠣᠨᠠ᠂ ᠣᠷᠣᠰ ᠤ᠋ᠨ ᠡᠷᠬᠡ ᠴᠢᠯᠥᠭᠡ ᠶ᠋ᠢᠨ ᠲᠥᠯᠥᠭᠡ! ᠭᠡᠵᠦ ᠬᠠᠰᠬᠢᠷᠤᠯᠳᠤᠨ ᠪᠡᠶᠡ ᠪᠡᠶᠡ ᠡᠴᠡ ᠪᠡᠨ ᠵᠣᠷᠢᠬᠵᠢᠭᠤᠯᠤᠨᠠ᠃
ᠪᠠᠲᠤ ᠶᠡᠬᠡ ᠯᠡ ᠠᠩᠬᠠᠷᠤᠯᠲᠠᠢ ᠪᠠᠷ ᠪᠠᠢᠯᠳᠤᠭᠠᠨ ᠢ᠋ ᠰᠢᠷᠳᠡᠨᠡ᠃ ᠡᠭᠦᠨ ᠢ᠋ ᠬᠠᠷᠠᠭᠰᠠᠭᠠᠷ ᠪᠠᠢᠲᠠᠯᠠ ᠭᠤᠷᠪᠠᠳᠤᠭᠠᠷ ᠵᠠᠭᠤᠲᠤ ᠨᠢ ᠠᠶᠤᠮᠰᠢᠭᠲᠤ ᠣᠷᠣᠰ ᠤ᠋ᠳ ᠤ᠋ᠨ ᠳᠣᠣᠷᠠ ᠣᠷᠣᠪᠠ᠃
— ᠪᠢ ᠥᠪᠡᠷ ᠦ᠋ᠨ ᠰᠢᠯᠢᠳᠡᠭ ᠰᠣᠩᠭᠣᠳᠠᠭ ᠳᠠᠢᠴᠢᠳ ᠢ᠋ᠶ᠋ᠠᠨ ᠠᠯᠳᠠᠯᠠ ᠭᠡᠨᠡ᠃ ᠵᠠᠩᠵᠤᠨ ᠤ᠋ ᠳᠡᠷᠭᠡᠳᠡ ᠰᠢᠬᠠᠯᠳᠤᠨ ᠪᠠᠢᠭᠠ ᠨᠣᠶᠠᠳ ᠤᠬᠤᠷᠢᠵᠠᠭᠠᠪᠠ᠃
— ᠸᠠᠢ — ᠳ᠋ᠤᠲ ᠭᠡᠵᠦ ᠪᠠᠷᠬᠢᠷᠠᠵᠠᠭᠠᠬᠤ ᠡᠳᠡ ᠨᠠᠷ ᠢ᠋ ᠬᠡᠷᠬᠢᠬᠦ ᠪᠢᠯᠡ? ᠡᠨᠡ ᠬᠥᠮᠦᠨ ᠪᠢᠰᠢ᠃
ᠪᠠᠲᠤ ᠬᠠᠭᠠᠨ᠂
—ᠪᠠᠲᠤ ᠪᠡᠬᠢ ᠴᠢᠯᠠᠭᠤ ᠪᠠᠢᠯᠭᠦᠢ᠃
ᠪᠠᠲᠤ ᠬᠠᠭᠠᠨ ᠬᠠᠴᠠᠷ ᠶᠤᠭᠠᠨ ᠠᠯᠠᠭᠠᠳᠠᠨ᠂
— ᠰᠦᠪᠡᠭᠡᠳᠡᠢ᠂ ᠰᠦᠪᠡᠭᠡᠳᠡᠢ ᠭᠡᠵᠦ ᠴᠢᠷᠠᠯᠠᠨᠠ᠃ ᠲᠡᠭᠡᠭᠡᠳ ᠲᠡᠷᠡ ᠳᠠᠪᠬᠢᠨ ᠢᠷᠡᠭᠰᠡᠨ ᠲᠡᠷᠡ ᠬᠥᠭᠰᠢᠨ ᠵᠠᠩᠵᠤᠨ ᠳ᠋ᠤ᠌ ᠶᠠᠮᠠᠷ ᠨᠢᠭᠡ ᠲᠤᠰᠢᠶᠠᠯ ᠥᠭᠪᠡ᠃ ᠴᠡᠷᠢᠭ ᠦ᠋ᠳ ᠭᠦᠶᠦᠯᠳᠦᠨᠡ᠃ ᠮᠣᠷᠢᠨ ᠲᠤᠭᠤᠷᠠᠢ ᠶ᠋ᠢᠨ ᠴᠢᠮᠡᠭᠡ ᠬᠢᠬᠤᠨᠠᠵᠤ ᠲᠠᠴᠢᠭᠢᠨᠠᠬᠤ ᠰᠦᠷᠡᠬᠡᠢ ᠳᠠᠭᠤ ᠭᠠᠷᠤᠨᠠ᠃ ᠳᠠᠬᠢᠨ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠪᠠᠷᠬᠢᠷᠠᠬᠤ ᠴᠢᠷᠠᠯᠠᠬᠤ ᠴᠢᠮᠡᠭᠡ ᠰᠣᠨᠣᠰᠳᠠᠪᠠ᠃
ᠵᠡᠰ ᠪᠠᠮᠪᠠᠢ ᠶ᠋ᠢ ᠴᠣᠬᠢᠭᠰᠠᠨ ᠤ᠋ ᠡᠷᠡᠰ ᠳᠠᠭᠤᠨ᠂ ᠣᠷᠣᠰ ᠤ᠋ᠳ ᠲᠠᠢ ᠲᠤᠯᠤᠯᠳᠤᠵᠤ ᠪᠠᠢᠭᠰᠠᠨ ᠲᠠᠲ᠋ᠠᠷ ᠤ᠋ᠳ ᠢ᠋ ᠳᠣᠪᠣ ᠶ᠋ᠢᠨ ᠲᠡᠨᠳᠡ ᠡᠴᠡ ᠬᠣᠢᠰᠢ ᠳᠠᠭᠤᠳᠠᠪᠠ᠃
ᠶᠸᠸᠫᠡᠲ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠤᠬᠤᠷᠢᠬᠤ ᠶ᠋ᠢ ᠦᠵᠡᠭᠡᠳ ᠰᠡᠯᠡᠮᠡ ᠪᠡᠨ ᠥᠨᠳᠥᠷ ᠳᠠᠯᠠᠢᠵᠤ᠂
— ᠤᠷᠤᠭᠰᠢ ᠪᠠᠨ ᠣᠷᠣᠰ ᠤ᠋ᠨ ᠲᠥᠯᠥᠭᠡ ᠭᠡᠵᠦ ᠪᠠᠷᠬᠢᠷᠠᠨᠠ᠃ ᠭᠡᠲᠡᠯᠡ ᠠᠶᠤᠮᠰᠢᠭᠲᠠᠢ ᠴᠣᠬᠢᠯᠲᠠ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠲᠣᠰᠴᠤ ᠬᠦᠴᠦᠲᠦ ᠳᠠᠭᠤᠨ ᠢ᠋ ᠨᠢ ᠲᠠᠰᠤᠯᠪᠠ᠃ ᠲᠡᠷᠡ ᠴᠢᠰᠤ ᠪᠠᠨ ᠠᠰᠬᠠᠷᠠᠭᠤᠯᠤᠨ ᠤᠨᠠᠪᠠ᠃ ᠠᠶᠤᠯᠲᠠᠢ ᠲᠣᠮᠣ ᠴᠢᠯᠠᠭᠤ ᠮᠠᠰᠢ ᠬᠦᠴᠦᠲᠡᠢ ᠪᠡᠷ ᠨᠢᠰᠦᠨ ᠢᠷᠡᠵᠦ ᠵᠠᠮ ᠳ᠋ᠠᠭᠠᠨ ᠲᠣᠬᠢᠶᠠᠯᠳᠤᠭᠰᠠᠨ ᠢ᠋ᠶ᠋ᠠᠨ ᠬᠡᠮᠬᠡ ᠴᠣᠬᠢᠯᠠᠵᠤ ᠳᠣᠪᠣᠨ ᠳᠡᠭᠡᠷᠡ ᠰᠢᠪᠠᠯᠳᠤᠨ ᠪᠠᠢᠭᠰᠠᠨ ᠣᠷᠣᠰ ᠤ᠋ᠳ ᠤ᠋ᠨ ᠳᠤᠮᠳᠠ ᠤᠨᠠᠪᠠ᠃ ᠡᠨᠡ ᠨᠢ ᠬᠢᠲᠠᠳ ᠤ᠋ᠨ ᠴᠢᠯᠠᠭᠤ ᠰᠢᠳᠡᠭᠴᠢ ᠴᠢᠳᠥᠷ ᠣᠨᠢᠰᠣ ᠶ᠋ᠢ ᠲᠠᠲ᠋ᠠᠷ ᠤ᠋ᠳ ᠬᠡᠷᠡᠭᠯᠡᠬᠦ ᠪᠡᠷ ᠠᠪᠴᠢᠷᠠᠭᠰᠠᠨ ᠠᠵᠢ᠃ ᠷᠠᠲ᠋ᠢᠪᠤᠷ ᠴᠢᠨᠣᠠ ᠮᠡᠲᠦ ᠮᠠᠭᠤᠬᠠᠢ ᠬᠠᠰᠬᠢᠷᠤᠨ ᠪᠣᠷᠣᠣᠬᠠᠢ ᠪᠠᠨ ᠪᠠᠭᠤᠯᠭᠠᠵᠤ ᠬᠠᠢᠷᠠᠲᠤ ᠨᠥᠬᠥᠷ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠭᠠᠰᠠᠯᠠᠩᠲᠤ ᠪᠠᠢᠳᠠᠯ ᠢ᠋ᠶ᠋ᠠᠷ᠂
— ᠴᠢ ᠮᠢᠨᠢ ᠠᠮᠢᠳᠤ ᠤᠤ? ᠶᠸᠸᠫᠡᠲ ᠮᠢᠨᠢ ᠬᠠᠷᠠᠭᠠᠴᠢ ᠭᠡᠳ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠠᠶᠠᠲᠠᠢ ᠣᠢᠷᠠᠲᠤᠨᠠ᠃
ᠥᠩᠭᠡᠷᠡᠵᠡᠢ᠂ ᠲᠡᠷᠡ ᠬᠣᠶᠠᠭᠤᠯᠠ ᠪᠠᠨ ᠣᠷᠣᠰ ᠤ᠋ᠨ ᠲᠥᠷᠥᠯᠬᠢ ᠨᠤᠲᠤᠭ ᠤ᠋ᠨ ᠲᠥᠯᠥᠭᠡ ᠬᠠᠮᠲᠤ ᠪᠠᠢᠯᠳᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃ ᠲᠡᠷᠡ ᠲᠣᠯᠣᠭᠠᠢ ᠪᠠᠨ ᠡᠷᠭᠦᠵᠦ ᠬᠠᠷᠠᠪᠠᠯ ᠵᠦᠭ ᠪᠦᠬᠦᠨ ᠡᠴᠡ ᠠᠶᠤᠮᠰᠢᠭᠲᠤ ᠴᠢᠯᠠᠭᠤᠨ ᠢᠰᠬᠡᠷᠦᠨ ᠨᠢᠰᠴᠦ ᠢᠷᠡᠭᠡᠳ ᠣᠷᠣᠰ ᠤ᠋ᠨ ᠵᠣᠷᠢᠭᠲᠠᠨ ᠨᠤᠭᠤᠳ ᠢ᠋ ᠰᠥᠨᠥᠭᠡᠵᠦ ᠪᠠᠢᠪᠠ᠃
ᠷᠠᠲ᠋ᠢᠪᠤᠷ ᠨᠠᠰᠤ ᠪᠠᠷᠠᠭᠰᠠᠨ ᠨᠥᠬᠥᠷ ᠲᠡᠭᠡᠨ ᠮᠡᠬᠦᠢᠰᠬᠢᠨ ᠶᠣᠰᠣᠯᠠᠭᠠᠳ ᠲᠣᠮᠣ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠡᠭᠴᠡᠯᠡᠨ ᠪᠣᠰᠴᠤ ᠵᠡᠪᠰᠡᠭ ᠦᠭᠡᠢ ᠲᠡᠭᠦᠨ ᠦ᠌ ᠲᠣᠮᠣ ᠪᠥᠭᠡᠳ ᠠᠶᠤᠮᠰᠢᠭᠲᠠᠢ ᠴᠡᠭᠡᠵᠢ ᠨᠢ ᠰᠠᠯᠬᠢᠨ ᠮᠡᠲᠦ ᠠᠮᠢᠰᠬᠤᠯᠯᠠᠵᠤ ᠨᠢᠳᠦ ᠨᠢ ᠴᠣᠭ ᠮᠡᠲᠦ ᠪᠣᠯᠵᠤ ᠦᠯᠦ ᠵᠠᠢᠯᠠᠬᠤ ᠦᠬᠦᠯ ᠦ᠋ᠨ ᠵᠦᠭ ᠶᠠᠪᠤᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ 3᠂ ᠭᠡᠷᠡᠯ 1᠂ ᠳ᠂ ᠣᠶᠤᠨᠪᠢᠯᠢᠭ᠌ 1᠂ ᠮᠡᠷᠭᠡᠨᠭᠣᠸᠠ 1᠂ ᠬᠦᠦᠳᠠᠭᠠᠭᠤᠯ 1
ᠬᠢᠨᠠᠭᠴᠢ᠄ ᠪᠠᠯ 1
ᠶᠡᠷᠦᠩᠬᠡᠢ ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ 8᠂ ᠠᠷᠢᠭᠤᠨ 8