ᠪᠠᠲᠤ ᠬᠠᠭᠠᠨ 7-05 ᠪᠠᠲᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠨᠡᠬᠡᠭᠰᠡᠨ ᠨᠢ-ᠲᠣᠭᠰᠢᠨ ᠶᠸᠸᠫᠡᠲBat khaan Бат хаан-ᠷᠣᠮᠠᠨ
198ᠲᠠᠪᠤ ᠂ ᠪᠠᠲᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠨᠡᠬᠡᠭᠰᠡᠨ ᠨᠢ
ᠷᠶᠠᠽᠠᠨ ᠤ᠋ ᠭᠠᠯᠳᠠᠭᠳᠠᠭᠰᠠᠨ ᠠᠮᠢᠲᠠᠨ ᠦᠭᠡᠢ ᠪᠠᠯᠭᠠᠰᠤᠨ ᠳᠡᠭᠡᠷᠡ ᠰᠢᠲᠠᠭᠰᠠᠨ ᠰᠦᠮᠡ ᠶ᠋ᠢᠨ ᠬᠤᠩᠬᠠ ᠥᠪᠡᠷ ᠢ᠋ᠶ᠋ᠡᠨ ᠳᠤᠤᠭᠠᠷᠪᠠ ᠭᠡᠰᠡᠨ ᠴᠤᠤ ᠦᠭᠡ ᠣᠷᠣᠰ ᠤ᠋ᠨ ᠨᠤᠲᠤᠭ ᠢ᠋ᠶ᠋ᠠᠷ ᠲᠠᠷᠬᠠᠪᠠ᠃ ᠲᠡᠷᠡ ᠬᠤᠩᠬᠠ ᠬᠡᠪ ᠭᠡᠨᠡᠳᠲᠡ ᠦᠨᠡᠰᠦᠨ ᠳᠣᠲᠣᠷᠠ ᠠ᠋ᠴᠠ ᠥᠪᠡᠷ ᠢ᠋ᠶ᠋ᠡᠨ ᠪᠣᠰᠴᠤ ᠠᠭᠠᠷ ᠲᠤ᠌ ᠳᠡᠭᠦᠵᠢᠯᠡᠭᠳᠡᠭᠡᠳ《 ᠷᠶᠠᠽᠠᠨ ᠤ᠋ ᠠᠷᠠᠳ ᠲᠦᠮᠡᠨ ᠲᠠᠲ᠋ᠠᠷ ᠤ᠋ᠳ ᠲᠠᠢ ᠲᠡᠮᠡᠴᠡᠭᠲᠦᠨ 》ᠭᠡᠵᠦ ᠤᠷᠢᠶᠠᠯᠠᠨ ᠳᠤᠤᠭᠠᠷᠤᠭᠰᠠᠨ ᠭᠡᠨᠡ ᠭᠡᠵᠦ ᠤᠯᠠᠮᠯᠠᠨ ᠶᠠᠷᠢᠭᠰᠠᠭᠠᠷ ᠪᠠᠢᠯᠠ᠃
ᠪᠣᠲᠠᠨᠢᠷᠭᠡᠭᠳᠡᠭᠰᠡᠨ ᠣᠷᠣᠰ ᠨᠢ ᠨᠡᠯᠢᠶᠡᠳ ᠣᠯᠠᠨ ᠭᠠᠵᠠᠷ ᠬᠥᠳᠡᠯᠵᠦ ᠪᠣᠢ ᠭᠡᠨᠡ᠃ ᠣᠢ ᠶ᠋ᠢᠨ ᠳᠣᠲᠣᠷᠠ ᠨᠢᠭᠤᠭᠳᠠᠨ ᠪᠠᠢᠭᠰᠠᠨ ᠡᠷᠡᠴᠦᠳ ᠨᠠᠮ ᠨᠡᠢᠯᠡᠨ ᠪᠠᠭ ᠪᠣᠯᠵᠤ ᠴᠤᠭᠯᠠᠷᠠᠨ ᠪᠣᠢ ᠭᠡᠨᠡ᠃ ᠲᠡᠳᠡᠨ ᠦ᠌ ᠲᠡᠷᠢᠭᠦᠯᠡᠭᠴᠢ ᠨᠢ ᠪᠦᠬᠦ ᠣᠢ ᠶ᠋ᠢᠨ ᠵᠠᠮ ᠬᠠᠷᠭᠤᠢ ᠣᠷᠣᠴᠠ ᠭᠠᠷᠴᠠ ᠶ᠋ᠢ ᠮᠡᠳᠡᠳᠡᠭ ᠰᠦᠷᠡᠬᠡᠢ ᠠᠩᠴᠢᠨ ᠵᠣᠷᠢᠭᠲᠠᠢ ᠪᠠᠭᠠᠲᠤᠷ ᠶᠸᠸᠫᠡᠲ ᠺᠤᠯᠤᠸᠷᠠᠲ ᠭᠡᠭᠴᠢ ᠬᠥᠮᠦᠨ ᠭᠡᠨᠡ᠂ ᠲᠡᠭᠦᠨ ᠦ᠌ ᠪᠠᠭ ᠨᠢ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠳ ᠲᠡᠢ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠲᠤᠯᠤᠯᠳᠤᠵᠤ ᠲᠡᠳᠡᠨ ᠦ᠌ ᠪᠦᠬᠦᠢᠯᠡ ᠪᠠᠭ ᠤ᠋ᠳ ᠢ᠋ ᠤᠰᠠᠳᠬᠠᠭᠰᠠᠨ ᠭᠡᠨᠡ ᠭᠡᠵᠦ ᠶᠠᠷᠢᠯᠴᠠᠬᠤ ᠪᠣᠯᠪᠠ᠃
ᠣᠯᠠᠨ ᠵᠢᠯ ᠢ᠋ᠶ᠋ᠡᠷ ᠣᠢ ᠳᠣᠲᠣᠷᠠ ᠣᠷᠣᠰᠢᠨ ᠠᠮᠢᠳᠤᠷᠠᠭᠴᠢ ᠪᠠᠢᠭᠰᠠᠨ ᠲᠠᠷᠢᠶᠠᠴᠢᠳ ᠠᠩᠴᠢᠳ ᠡᠢᠮᠦ ᠶᠠᠷᠢᠶᠠ ᠨᠤᠭᠤᠳ ᠢ᠋ ᠰᠣᠨᠣᠰᠤᠭᠠᠳ᠂ ᠭᠠᠷ ᠨᠢ ᠰᠤᠯᠠᠷᠠᠵᠤ ᠨᠢᠳᠦ ᠨᠢ ᠮᠠᠭᠤᠳᠠᠭᠴᠢᠳ ᠠ᠋ᠴᠠ ᠪᠤᠰᠤᠳ ᠨᠢ ᠶᠠᠭᠠᠷᠠᠨ ᠬᠢᠲᠤᠭᠠ ᠰᠢᠪᠦᠭᠡ ᠬᠠᠳᠤᠭᠤᠷ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ᠂ ᠴᠢᠯᠠᠭᠤ ᠪᠠᠷ ᠬᠤᠷᠴᠠᠯᠠᠭᠰᠠᠨ ᠪᠣᠷᠣᠣᠬᠠᠢ ᠰᠢᠳᠡᠮ ᠪᠠᠷᠢᠵᠤ ᠬᠦᠯᠢᠭᠡᠳ ᠰᠦᠬᠡ ᠶᠦ᠍ᠭᠡᠨ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠤᠨ ᠶᠸᠸᠫᠡᠲ ᠦ᠋ᠨ ᠪᠠᠢᠯᠳᠤᠭᠠᠨ ᠤ᠋ ᠨᠥᠬᠥᠷᠯᠡᠯ ᠦ᠋ᠨ ᠴᠡᠷᠢᠭ ᠲᠡᠢ ᠨᠡᠢᠯᠡᠬᠦ ᠪᠡᠷ ᠵᠠᠮ ᠤ᠋ᠨ ᠠᠭᠤᠯᠵᠠᠷ ᠢ᠋ᠶ᠋ᠠᠷ ᠭᠠᠷᠴᠤ ᠶᠠᠪᠤᠬᠤ ᠪᠤᠯᠵᠠᠭᠠᠪᠠ᠃
ᠲᠡᠷᠡ ᠴᠠᠭ ᠶᠸᠸᠫᠡᠲ ᠺᠤᠯᠤᠸᠷᠡᠲ᠂ ᠪᠠᠲᠤ ᠶ᠋ᠢᠨ ᠴᠡᠷᠢᠭ ᠢ᠋ ᠮᠥᠷᠳᠡᠨ ᠤᠮᠠᠷᠠ ᠵᠦᠭ ᠶᠠᠪᠤᠭᠰᠠᠨ ᠠᠵᠤᠭᠤ᠃ ᠶᠸᠸᠫᠡᠲ ᠥᠪᠡᠷᠰᠡᠳ ᠦ᠋ᠨ ᠳᠤᠷᠠ ᠪᠠᠷ ᠶᠠᠪᠤᠬᠤ ᠬᠥᠮᠦᠰ ᠢ᠋ ᠡᠯᠰᠡᠭᠦᠯᠦᠨ ᠬᠡᠳᠦᠨ ᠠᠷᠪᠠᠨ ᠵᠠᠭᠤ ᠪᠠᠷ ᠲᠡᠭᠰᠢ ᠬᠤᠪᠢᠶᠠᠵᠤ ᠵᠠᠬᠢᠷᠬᠤ ᠠᠲ᠋ᠠᠮ ᠨᠤᠭᠤᠳ ᠢ᠋ ᠲᠣᠮᠢᠯᠠᠨ ᠤᠪ ᠮᠡᠬᠡᠲᠦ ᠳᠠᠶ᠋ᠢᠰᠤᠨ ᠨᠤᠭᠤᠳ ᠲᠠᠢ ᠬᠡᠷᠬᠢᠨ ᠲᠡᠮᠡᠴᠡᠯᠳᠦᠬᠦ᠂ ᠬᠡᠷᠬᠢᠨ ᠲᠡᠳᠡᠨ ᠢ᠋ ᠪᠠᠷᠢᠨ ᠠᠪᠬᠤ᠂ ᠲᠠᠲ᠋ᠠᠷ ᠤ᠋ᠨ ᠬᠠᠭᠤᠷᠬᠤ ᠠᠷᠭᠠ ᠳ᠋ᠤ᠌ ᠬᠡᠷᠬᠢᠨ ᠦᠯᠦ ᠮᠡᠬᠡᠯᠡᠭᠳᠡᠬᠦ ᠵᠡᠷᠭᠡ ᠶ᠋ᠢ ᠪᠦᠭᠦᠳᠡ ᠳ᠋ᠦ᠍ ᠵᠢᠭᠠᠪᠤᠷᠢᠯᠠᠨ ᠥᠭᠴᠡᠢ᠃ ᠶᠸᠸᠫᠡᠲ ᠦ᠋ᠨ ᠴᠡᠷᠢᠭ ᠦ᠋ᠨ ᠳᠥᠩᠭᠡᠵᠢ ᠭᠤᠷᠪᠠᠨ ᠤ᠋ ᠨᠢᠭᠡ ᠨᠢ ᠮᠣᠷᠢ ᠲᠠᠢ ᠪᠠᠢᠭᠰᠠᠨ ᠪᠤᠶᠤ ᠭᠡᠪᠡᠴᠦ ᠶᠠᠪᠠᠭᠠᠨᠴᠤᠳ ᠨᠢ ᠮᠣᠷᠢ ᠲᠠᠢ ᠠ᠋ᠴᠠ ᠪᠠᠨ ᠦᠯᠦ ᠴᠤᠴᠠᠷᠠᠨ ᠬᠤᠷᠳᠤᠨ ᠠᠯᠬᠤᠵᠤ ᠭᠦᠶᠦᠯᠳᠦᠬᠦ ᠵᠡᠷᠭᠡ ᠪᠡᠷ ᠶᠡᠬᠡ ᠭᠠᠵᠠᠷ ᠢ᠋ ᠠᠪᠴᠤ ᠪᠠᠢᠯᠠ᠃
ᠶᠸᠸᠫᠡᠲ ᠶᠡᠬᠡ ᠶᠠᠭᠠᠷᠠᠨ ᠴᠢᠰᠤᠲᠤ ᠪᠠᠲᠤ ᠶ᠋ᠢᠨ ᠶᠠᠪᠤᠭᠰᠠᠨ ᠵᠠᠮ ᠢ᠋ ᠳᠣᠬᠢᠶᠠᠯᠳᠤᠭᠴᠢᠳ ᠠ᠋ᠴᠠ ᠯᠠᠪᠯᠠᠨ ᠰᠤᠷᠪᠤᠯᠵᠢᠯᠠᠭᠰᠠᠭᠠᠷ ᠶᠠᠪᠤᠪᠠ᠃ ᠲᠡᠷᠡ ᠣᠢ ᠳᠣᠲᠣᠷᠠ ᠪᠠᠭᠤᠳᠠᠯᠯᠠᠬᠤ ᠳ᠋ᠠᠭᠠᠨ ᠤᠳᠠᠭᠠᠰᠢᠷᠠᠯ ᠦᠭᠡᠢ ᠬᠥᠳᠡᠯᠵᠦ ᠪᠠᠢᠭᠰᠠᠨ ᠪᠥᠭᠡᠳ ᠤᠴᠢᠷ ᠨᠢ ᠣᠷᠣᠭᠰᠢ ᠪᠠᠨ ᠲᠦᠷᠭᠡᠯᠡᠨ ᠶᠠᠪᠤᠵᠤ ᠣᠨᠣᠯᠭᠠ ᠮᠣᠷᠢᠳ ᠳᠠᠭᠠᠨ ᠲᠡᠵᠢᠭᠡᠯ᠂ ᠴᠡᠷᠢᠭ ᠣᠯᠠᠨ ᠳ᠋ᠠᠭᠠᠨ ᠲᠠᠯᠬᠠ ᠣᠯᠤᠭᠠᠳ ᠭᠣᠣᠯ ᠳᠠᠢᠰᠤᠨ ᠪᠠᠲᠤ ᠬᠠᠭᠠᠨ ᠢ᠋ ᠬᠤᠷᠳᠤᠨᠠ ᠬᠥᠭᠡᠭᠡᠨ ᠭᠦᠢᠴᠡᠭᠡᠳ ᠶᠠᠭᠠᠷᠠᠬᠤ ᠬᠡᠷᠡᠭᠲᠡᠢ ᠪᠠᠢᠭᠰᠠᠨ ᠠᠵᠢ᠃
ᠨᠢᠭᠡᠨ ᠪᠠᠭᠤᠳᠠᠯ ᠤ᠋ᠨ ᠭᠠᠵᠠᠷ ᠮᠠᠨᠠᠭᠠᠴᠢᠳ ᠬᠣᠶᠠᠷ ᠯᠠᠮᠠ ᠶ᠋ᠢ ᠪᠠᠷᠢᠯᠠ᠃ ᠲᠡᠷᠡ ᠬᠣᠶᠠᠷ ᠯᠠᠮᠠ ᠤᠷᠲᠤ ᠬᠠᠷᠠ ᠲᠡᠮᠦᠷ ᠰᠦᠬᠡ ᠶ᠋ᠢ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠤᠭᠠᠳ ᠰᠢᠭᠤᠳᠠᠢ ᠱᠤᠤᠮᠠᠰᠤ ᠶᠠᠭᠤᠮᠠ ᠶ᠋ᠢ ᠡᠭᠦᠷᠭᠡᠯᠡᠨ ᠡᠮᠦᠨᠡ ᠺᠢᠫᠴᠡᠺ ᠦ᠋ᠨ ᠲᠠᠯᠠ ᠶ᠋ᠢᠨ ᠵᠦᠭ ᠶᠠᠪᠤᠵᠤ ᠪᠢᠯᠡ᠃ ᠨᠢᠭᠡᠨ ᠥᠨᠳᠥᠷ ᠲᠤᠷᠠᠩᠬᠠᠢ ᠯᠠᠮᠠ ᠲᠦᠷᠦᠭᠦᠯᠡᠨ ᠶᠠᠪᠤᠨᠠ᠃ ᠨᠥᠭᠦᠭᠡ ᠨᠠᠮᠬᠠᠨ ᠪᠥᠭᠡᠳ ᠥᠷᠭᠡᠨ ᠪᠡᠶᠡ ᠲᠡᠢ᠂ ᠨᠢᠯᠪᠤᠰᠤ ᠭᠦᠢᠯᠭᠡᠨᠡᠭᠰᠡᠨ ᠨᠢᠳᠦ ᠲᠡᠢ ᠯᠠᠮᠠ ᠨᠢ ᠤᠷᠲᠤ ᠮᠣᠳᠣᠨ ᠲᠠᠶᠠᠭ ᠢ᠋ ᠡᠮᠦᠨᠡ ᠪᠡᠨ ᠬᠠᠪᠴᠢᠭᠤᠯᠤᠨ ᠨᠥᠬᠥᠷ ᠡᠴᠡ ᠬᠣᠴᠣᠷᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠶᠠᠪᠤᠨᠠ᠃
— ᠪᠤᠰᠤᠳ ᠤ᠋ᠨ ᠮᠥᠷᠥ ᠡᠴᠡ ᠮᠤᠯᠲᠤᠯᠵᠤ ᠠᠪᠤᠭᠰᠠᠨ ᠬᠤᠪᠴᠠᠰᠤ ᠶ᠋ᠢ ᠲᠠᠨᠠᠷ ᠶᠠᠭᠤᠨ ᠳ᠋ᠤ᠌ ᠡᠮᠦᠰᠪᠡ? ᠲᠠᠨᠠᠷ ᠬᠠᠮᠢᠭᠠᠰᠢ ᠣᠴᠢᠬᠤ ᠪᠠᠷ ᠶᠠᠪᠤᠭᠠ ᠪᠢᠯᠡ? ᠭᠡᠵᠦ ᠸᠡᠥ᠋ᠯ ᠠᠰᠠᠭᠤᠨᠠ᠃
ᠤᠯᠠᠭᠠᠨ ᠨᠢᠳᠦᠲᠦ ᠨᠢ ᠪᠣᠷᠣ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠴᠦ ᠲᠦᠷᠦᠭᠦᠨ ᠳ᠋ᠦ᠍ᠨᠢ ᠣᠷᠣᠭᠠᠳ ᠪᠦᠰᠡᠯᠡᠭᠦᠷ ᠢ᠋ᠶ᠋ᠡᠷ ᠨᠤᠭᠤᠷᠠᠵᠤ ᠭᠠᠵᠠᠷ ᠲᠤᠯᠲᠠᠯᠠ ᠮᠥᠷᠭᠥᠨ ᠥᠭᠦᠯᠡᠬᠦ ᠨᠢ᠄
— ᠪᠢᠳᠡ ᠶᠢᠷᠲᠢᠨᠴᠦ ᠳᠠᠶᠠᠭᠠᠷ ᠢ᠋ ᠬᠠᠢᠷᠠ ᠭᠠᠮ ᠦᠭᠡᠢ ᠪᠦᠷᠢᠯᠭᠡᠵᠦ ᠪᠠᠢᠭᠠ ᠠᠶᠤᠯᠲᠤ ᠲᠠᠲ᠋ᠠᠷ ᠤ᠋ᠳ ᠠ᠋ᠴᠠ ᠵᠢᠭᠤᠲᠠᠨ ᠶᠠᠪᠤᠭᠠ ᠲᠤᠯᠠ ᠶᠠᠭᠠᠬᠢᠬᠤ ᠶ᠋ᠢ ᠲᠠᠨᠠᠷ ᠮᠢᠨᠢ ᠮᠡᠳᠡ ᠭᠡᠪᠡ᠃
— ᠲᠡᠭᠡᠭᠡᠳ ᠲᠠᠨᠠᠷ ᠵᠠᠩᠴᠢ ᠨᠥᠮᠥᠷᠦᠭᠰᠡᠨ ᠶᠤᠮ ᠤᠤ ᠭᠡᠬᠦ ᠳ᠋ᠦ᠍᠂
— ᠡᠨᠡ ᠵᠠᠩᠴᠢ ᠪᠣᠯ ᠤᠤᠯ ᠠ᠋ᠴᠠ ᠪᠠᠨ ᠪᠢᠳᠡᠨ ᠦ᠌ ᠪᠥᠭᠡᠳ ᠪᠠᠭᠠ ᠨᠠᠰᠤᠨ ᠠ᠋ᠴᠠ ᠪᠠᠨ ᠡᠮᠦᠰᠦᠭᠰᠡᠨ ᠶᠤᠮ ᠭᠡᠵᠦ ᠥᠨᠳᠥᠷ ᠯᠠᠮᠠ ᠨᠢ ᠡᠬᠡᠨᠡᠷ ᠬᠥᠮᠦᠨ ᠦ᠌ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
— ᠬᠥᠮᠦᠰ ᠶᠠᠳᠠᠭᠤ ᠪᠥᠭᠡᠳ ᠬᠠᠷᠠᠮᠴᠢ ᠨᠠᠷᠢᠨ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠬᠠ᠃ ᠯᠠᠮᠠ ᠨᠠᠷ ᠢ᠋ ᠡᠷᠭᠦᠨ ᠬᠦᠨᠳᠦᠯᠡᠬᠦ ᠴᠦ᠍ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ ᠪᠠᠢᠨᠠ᠃ ᠪᠢᠳᠡᠨ ᠦ᠌ ᠨᠢᠳᠦ ᠪᠡᠷ ᠦᠵᠡᠭᠡ ᠦᠭᠡᠢ ᠶᠤᠮ ᠤᠤ ? ᠭᠡᠵᠦ ᠤᠯᠠᠭᠠᠨ ᠨᠢᠳᠦᠲᠦ ᠵᠠᠯᠭᠠᠵᠤ ᠬᠡᠯᠡᠪᠡ᠃
— ᠪᠤᠷᠬᠠᠨ ᠦᠭᠡᠢ ᠮᠠᠯ ᠤ᠋ᠳ᠂ ᠪᠤᠶᠠᠨ ᠦᠭᠡᠢ ᠴᠢᠯᠠᠭᠤ ᠨᠤᠭᠤᠳ᠂ ᠣᠳᠣ ᠶ᠋ᠢᠨ ᠡᠨᠡ ᠪᠣᠯᠵᠤ ᠪᠠᠢᠭᠠ ᠶᠠᠪᠤᠳᠠᠯ ᠠ᠋ᠴᠠ ᠦᠬᠦᠬᠦ ᠤᠬᠢᠯᠠᠬᠤ ᠬᠣᠶᠠᠷ ᠢᠷᠡᠵᠦ ᠪᠣᠯᠤᠨᠠ᠂ ᠠᠶᠠ᠂ ᠬᠠᠯᠠᠭ ᠬᠣᠬᠣᠢ᠂
— ᠲᠠᠨᠠᠷ ᠴᠢᠨᠢ ᠠᠯᠢ ᠵᠠᠮ ᠢ᠋ ᠪᠠᠷᠢᠵᠤ ᠶᠠᠪᠤᠭᠠ ᠪᠢᠯᠡ ᠭᠡᠵᠦ ᠸᠡᠥ᠋ᠯ ᠬᠠᠲᠠᠭᠤ ᠪᠠᠷ ᠠᠰᠠᠭᠤᠪᠠ᠃
— ᠮᠥᠬᠥᠯ ᠡᠴᠡ ᠵᠢᠭᠤᠲᠠᠨ ᠶᠠᠪᠤᠨᠠ ᠤᠤ? ᠡᠰᠡᠪᠡᠯ ᠭᠠᠷᠭᠠᠭᠠᠳ ᠦᠬᠦᠯ ᠤᠷᠤᠭᠤ ᠪᠠᠨ ᠶᠠᠪᠤᠨᠠ ᠤᠤ?
— ᠴᠢ ᠴᠢᠨᠢ ᠶᠠᠮᠠᠷ ᠮᠠᠭᠤᠬᠠᠢ ᠦᠭᠡ ᠬᠡᠯᠡᠳᠡᠭ ᠶᠤᠮ ᠪᠣᠢ? ᠪᠢᠳᠡ ᠺᠢᠶᠸᠸ ᠲᠦ᠍ ᠣᠴᠢᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ᠃ ᠲᠡᠨᠳᠡ ᠪᠣᠯ ᠡᠨᠳᠡᠬᠢ ᠲᠡᠢ ᠠᠳᠠᠯᠢ ᠯᠠᠮᠠ ᠨᠠᠷ ᠥᠯᠪᠡᠷᠴᠦ ᠵᠢᠭᠤᠲᠠᠳᠠᠭ ᠦᠭᠡᠢ ᠭᠡᠨᠡ᠃ ᠬᠠᠷᠢᠨ ᠰᠦᠮᠡ ᠶ᠋ᠢᠨ ᠭᠠᠵᠠᠷ ᠵᠣᠬᠢᠰᠲᠠᠢ ᠪᠠᠷ ᠰᠠᠭᠤᠵᠤ ᠪᠠᠢᠳᠠᠭ ᠭᠡᠨᠡ᠁ ᠲᠡᠢᠮᠦ ᠶ᠋ᠢᠨ ᠲᠤᠯᠠᠳᠠ ᠲᠡᠨᠳᠡᠬᠢ ᠶ᠋ᠢᠨ ᠬᠥᠮᠦᠰ ᠪᠤᠷᠬᠠᠨ ᠳ᠋ᠤ᠌ ᠪᠦᠷᠢᠨ ᠦᠨᠡᠨᠴᠢ ᠪᠥᠭᠡᠳ ᠲᠡᠭᠦᠨ ᠡᠴᠡ ᠠᠶᠤᠳᠠᠭ ᠭᠠᠯᠵᠠᠭᠤ ᠲᠠᠲ᠋ᠠᠷ ᠤ᠋ᠳ ᠬᠣᠯᠠ ᠪᠠᠢᠳᠠᠭ ᠶᠤᠮ᠃ ᠲᠡᠳᠡᠨ ᠦ᠌ ᠲᠤᠬᠠᠢ ᠲᠡᠨᠳᠡ ᠴᠢᠮᠡᠭᠡ ᠴᠦ᠍ ᠰᠣᠨᠣᠰᠤᠭᠳᠠᠳᠠᠭ ᠦᠭᠡᠢ ᠭᠡᠨᠡ᠃
— ᠲᠠᠨᠠᠷ ᠰᠦᠬᠡ ᠪᠠᠷᠢᠵᠤ ᠴᠢᠳᠠᠳᠠᠭ ᠤᠤ? ᠡᠰᠡᠪᠡᠯ ᠫᠢᠰᠢᠩ ᠦ᠋ᠨ ᠴᠠᠭᠠᠨᠠ ᠨᠢᠭᠤᠭᠳᠠᠳᠠᠭ ᠤᠤ? ᠭᠡᠵᠦ ᠸᠡᠥ᠋ᠯ ᠠᠰᠠᠭᠤᠪᠠ᠃
— ᠡᠬᠡ ᠡᠴᠡ ᠲᠥᠷᠥᠭᠰᠡᠨ ᠡᠴᠡ ᠬᠣᠢᠰᠢ ᠭᠠᠷ ᠲᠠᠭᠠᠨ ᠰᠦᠬᠡ ᠪᠠᠷᠢᠭᠠ ᠦᠭᠡᠢ ᠪᠢᠳᠡ ᠴᠢᠨᠢ ᠲᠡᠢᠮᠦ ᠬᠠᠷᠠ ᠠᠵᠢᠯ ᠢ᠋ ᠬᠠᠮᠢᠭᠠ ᠠ᠋ᠴᠠ ᠬᠢᠬᠦ ᠪᠢᠯᠡ ᠳ᠋ᠠ᠃ ᠪᠤᠷᠬᠠᠨ ᠤ᠋ ᠨᠣᠮ ᠢ᠋ ᠪᠢᠰᠢᠯᠭᠠᠨ ᠡᠰᠡᠪᠡᠯ ᠡᠷᠭᠦᠯ ᠮᠥᠷᠭᠥᠯ ᠦᠢᠯᠡᠳᠦᠨ ᠰᠠᠭᠤᠨᠠᠮ᠃
— ᠮᠣᠩᠭᠣᠯᠴᠤᠳ ᠬᠡᠦᠬᠡᠳ ᠨᠢᠯᠬᠠᠰ ᠢ᠋ ᠭᠠᠯ ᠳ᠋ᠤ᠌ ᠬᠠᠶᠠᠵᠤ ᠴᠢᠰᠤ ᠤᠷᠤᠰᠬᠠᠨ ᠪᠠᠢᠭᠠ ᠴᠠᠭ ᠲᠸ᠋ ᠲᠠᠨᠠᠷ ᠲᠥᠷᠥᠭᠰᠡᠨ ᠨᠤᠲᠤᠭ ᠠ᠋ᠴᠠ ᠪᠠᠨ ᠵᠢᠭᠤᠲᠠᠨ ᠶᠠᠪᠤᠬᠤ ᠶ᠋ᠢ ᠴᠢᠨᠢ ᠪᠢᠳᠡ ᠦᠵᠡᠯᠡ ᠭᠡᠵᠦ ᠼᠪᠶᠠᠭᠠ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠬᠡᠯᠡᠪᠡ᠃
—ᠮᠠᠨ ᠤ᠋ ᠪᠠᠭ ᠣᠲ᠋ᠷᠢᠶᠠᠳ᠋ ᠤ᠋ᠳ ᠲᠤ᠌ ᠷᠠᠲ᠋ᠢᠪᠤᠷ ᠤ᠋ᠨ ᠡᠴᠢᠭᠡ ᠯᠠᠮᠠ ᠪᠠᠰᠠ ᠪᠠᠢᠨᠠ ᠰᠢᠦ᠃ ᠲᠡᠭᠡᠭᠡᠳ ᠪᠠᠰᠠ ᠬᠤᠪᠴᠠᠰᠤ ᠪᠠᠨ ᠬᠠᠶᠠᠭᠠᠳ ᠵᠡᠪᠰᠡᠭ ᠪᠠᠷᠢᠵᠤ ᠶᠠᠪᠤᠭᠠ ᠬᠥᠮᠦᠨ ᠳᠥᠷᠪᠡ ᠪᠣᠢ᠃ ᠬᠠᠷᠢᠨ ᠲᠠ ᠬᠣᠶᠠᠷ ᠶᠠᠭᠠᠬᠢᠨᠠ ᠪᠣᠢ?
— ᠲᠠᠨᠠᠷ ᠪᠣᠯ ᠬᠡᠷᠡᠭ ᠦᠭᠡᠢ ᠵᠦᠭᠡᠷ ᠰᠠᠭᠤᠵᠤ ᠢᠳᠡᠭᠴᠢᠳ ᠮᠥᠨ᠂ ᠲᠠᠨᠠᠷ ᠶᠠᠮᠠᠷ ᠴᠥ᠍ ᠠᠴᠢ ᠲᠤᠰᠠ ᠦᠭᠡᠢ ᠡᠲᠡᠭᠡᠳ ᠮᠥᠨ᠃ ᠲᠠᠨᠠᠷ ᠲᠠᠲ᠋ᠠᠷ ᠤ᠋ᠳ ᠢ᠋ ᠬᠠᠮᠢᠭᠠ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠨᠢᠭᠤᠯ ᠦᠭᠡᠢ ᠬᠡᠯᠡᠭᠲᠦᠨ᠃
— ᠰᠦᠽᠳᠠᠯᠢ ᠶ᠋ᠢᠨ ᠨᠤᠲᠤᠭ ᠲᠤ᠌ ᠪᠠᠢᠨᠠ᠃ ᠳᠡᠭᠦᠦ ᠨᠠᠷ ᠮᠢᠨᠢ᠂ ᠲᠠᠲ᠋ᠠᠷ ᠤ᠋ᠳ ᠪᠠ ᠮᠣᠩᠭᠣᠯᠴᠤᠳ ᠲᠡᠨᠳᠡᠬᠢ ᠶ᠋ᠢᠨ ᠪᠦᠬᠦ ᠲᠣᠰᠬᠣᠨ ᠢ᠋ᠶ᠋ᠠᠷ ᠰᠠᠷᠨᠢᠨ ᠲᠠᠷᠬᠠᠵᠤ ᠲᠠᠷᠢᠶᠠᠴᠢᠳ ᠢ᠋ ᠰᠢᠲᠠᠭᠠᠨ ᠠᠯᠠᠵᠤ ᠬᠦᠴᠦᠷᠬᠡᠨ ᠵᠣᠪᠠᠭᠠᠵᠤ ᠪᠠᠢᠨᠠᠮ᠃
— ᠠᠶᠤᠬᠤ ᠴᠤ᠌ ᠦᠭᠡᠢ ᠶᠤᠮ ᠤᠤ?
— ᠲᠡᠳᠡ ᠴᠢᠨᠢ ᠬᠡᠨ ᠡᠴᠡ ᠠᠶᠤᠬᠤ ᠪᠢᠯᠡ᠃ ᠸᠠᠩ ᠭᠸᠤᠷᠭᠢ ᠸᠰᠸᠸᠤᠯᠤᠳᠤᠸᠢᠴ ᠰᠦᠽᠳᠠᠯᠢᠰᠺ ( ᠤ᠋ᠨ ) ᠠᠯᠤᠰ ᠬᠣᠯᠠ ᠴᠠᠭᠠᠨ ᠨᠢᠷᠤᠭᠤ ᠨᠤᠭᠤᠳ ᠤ᠋ᠨ ᠣᠢ ᠳᠣᠲᠣᠷᠠ ᠶᠡᠬᠡ ᠬᠣᠷᠢᠶᠠ ᠴᠡᠷᠢᠭ ᠢ᠋ ᠡᠯᠰᠡᠭᠦᠯᠬᠦ ᠪᠡᠷ ᠶᠠᠪᠤᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠳ ᠬᠣᠲᠠ ᠨᠤᠭᠤᠳ ᠤ᠋ᠨ ᠪᠠᠲᠤ ᠬᠡᠷᠡᠮ ᠦ᠋ᠨ ᠳᠣᠲᠣᠷᠠ ᠳᠠᠯᠳᠠᠯᠠᠨ ᠰᠠᠭᠤᠵᠠᠭᠠᠵᠤ ᠪᠣᠢ ᠭᠡᠵᠦ ᠬᠡᠯᠡᠯᠴᠡᠬᠦ ᠶᠤᠮ ᠃ ᠪᠢᠳᠡ ᠶᠠᠭᠤᠮᠠ ᠢᠳᠡᠬᠦ ᠶᠤᠮᠰᠠᠨ ᠃
— ᠪᠣᠯᠤᠨᠠ᠂ ᠭᠠᠯ ᠳ᠋ᠤ᠌ ᠣᠢᠷᠠᠲᠤᠵᠤ ᠰᠠᠭᠤᠭᠲᠤᠨ᠃ ᠲᠠᠨᠠᠷ ᠢ᠋ ᠬᠡᠨ ᠪᠣᠯᠪᠠᠴᠤ ᠬᠣᠭᠣᠯᠠᠯᠠᠭᠤᠯᠬᠤ ᠮᠠᠭᠠᠳ ᠦᠭᠡᠢ ᠪᠢᠵᠡ᠃ ᠬᠣᠶᠠᠷ ᠯᠠᠮᠠ ᠡᠭᠦᠷᠭᠡ ᠪᠡᠨ ᠪᠠᠭᠤᠯᠭᠠᠯ ᠦᠭᠡᠢ ᠪᠡᠷ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠣᠢᠷᠠᠲᠤᠨ ᠰᠠᠭᠤᠪᠠ᠃ᠲᠡᠨᠳᠡ ᠲᠡᠷᠡᠬᠦ ᠭᠠᠯ ᠳᠡᠭᠡᠷᠡ ᠮᠠᠭᠤ ᠰᠢᠪᠡᠷ ᠲᠦᠩᠫᠸᠩ ᠳ᠋ᠦ᠍ ᠶᠠᠭᠤᠮᠠ ᠪᠤᠴᠠᠯᠵᠤ ᠪᠠᠢᠪᠠ ᠃
— ᠶᠠᠭᠤ ᠴᠢᠨᠠᠵᠤ ᠪᠠᠢᠭᠠ ᠶᠤᠮ ᠪᠣᠢ?
— ᠦᠵᠡᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠰᠢᠨᠡ ᠵᠢᠭᠠᠰᠤ᠃
— ᠰᠢᠨᠡ ᠭᠡᠨᠡ ᠤᠤ? ᠶᠠᠮᠠᠷ ᠰᠠᠢᠬᠠᠨ ᠶᠤᠮ ᠪᠣᠢ? ᠣᠳᠣ ᠴᠤ᠌ ᠠᠸᠷᠠᠮᠢ ᠮᠢᠨᠢ ᠡᠨᠡ ᠪᠢᠲᠡᠭᠦᠦ ᠣᠢ ᠳ᠋ᠤ᠌ ᠪᠠᠰᠠ ᠲᠡᠢᠮᠦ ᠵᠢᠭᠠᠰᠤ ᠪᠠᠢᠳᠠᠭ ᠶᠤᠮ ᠠ᠋᠃
— ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤᠪ᠃ ᠮᠠᠨ ᠤ᠋ ᠡᠨᠳᠡ ᠱᠦᠺᠠ ᠪᠠ ᠪᠸᠯᠦᠭᠠ ᠭᠡᠳᠡᠭ ᠬᠣᠶᠠᠷ ᠵᠢᠭᠠᠰᠤ ᠣᠢ ᠳᠣᠲᠣᠷᠠ ᠶᠠᠪᠤᠵᠤ ᠪᠠᠢᠭᠰᠠᠨ ᠶᠤᠮ ᠃ ᠣᠢ ᠤᠨᠠᠵᠤ ᠠᠭᠤᠯᠠ ᠪᠣᠰᠬᠤ ᠶ᠋ᠢᠨ ᠬᠠᠮᠲᠤ ᠱᠦᠺᠠ ᠶ᠋ᠢᠨ ᠰᠡᠭᠦᠯ ᠭᠣᠳᠣᠭᠣᠨᠠᠭᠠᠳ ᠦᠯᠡᠳᠡᠪᠡ ᠭᠡᠵᠦ ᠸᠠᠥ᠋ᠯ ᠬᠠᠷᠢᠭᠤᠯᠪᠠ ᠃
— ᠴᠢ ᠶᠠᠮᠠᠷ ᠬᠠᠴᠢᠨ ᠶᠠᠭᠤᠮᠠ ᠬᠡᠯᠡᠨᠡ ᠪᠣᠢ?
ᠤᠷᠲᠤ ᠪᠡᠶᠡᠲᠦ ᠯᠠᠮᠠ ᠲᠦᠩᠫᠧᠩ ᠳᠣᠲᠣᠷᠠᠬᠢ ᠶ᠋ᠢ ᠥᠨᠳᠡᠢᠨ ᠬᠠᠷᠠᠪᠠ᠃
— ᠵᠢᠭᠠᠰᠤ ᠴᠢᠨᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠠᠢᠨᠠ ᠰᠢᠦ ᠳ᠋ᠠ᠃
— ᠵᠠ ᠲᠡᠭᠡᠪᠡᠯ ᠶᠠᠭᠠᠬᠢᠬᠤ ᠪᠣᠢ ᠳ᠋ᠠ᠃ ᠴᠢᠨᠦ ᠡᠭᠦᠷᠭᠡ ᠡᠴᠡ ᠱᠦᠺᠡ ᠵᠢᠭᠠᠰᠤᠨ ᠤ᠋ ᠰᠡᠭᠦᠯ ᠭᠣᠵᠣᠯᠵᠠᠭᠠᠳ᠂ ᠲᠡᠭᠦᠨ ᠢ᠋ ᠲᠦᠩᠫᠧᠩ ᠬᠦᠯᠢᠶᠡᠭᠡᠳ ᠪᠠᠢᠨᠠ᠃ ᠲᠡᠭᠦᠨ ᠢ᠋ ᠪᠡᠨ ᠨᠡᠰᠢ ᠥᠭᠭᠦᠭᠲᠦᠨ᠃
ᠯᠠᠮᠠ ᠶᠡᠬᠡᠳᠡ ᠳᠤᠷᠠ ᠦᠭᠡᠢ ᠪᠡᠷ ᠡᠭᠦᠷᠭᠡ ᠪᠡᠨ ᠪᠠᠭᠤᠯᠭᠠᠭᠠᠳ ᠠᠮᠠᠨ ᠳᠣᠲᠣᠷᠠ ᠪᠠᠨ ᠥᠭᠦᠯᠡᠭᠰᠡᠭᠡᠷ ᠬᠥᠯᠳᠡᠭᠰᠡᠨ ᠱᠦᠺᠡ ᠵᠢᠭᠠᠰᠤ ᠶ᠋ᠢ ᠭᠠᠷᠭᠠᠪᠠ᠃
— ᠵᠠᠮ ᠳ᠋ᠤ᠌ ᠬᠦᠨᠡᠰᠦ ᠪᠣᠯᠭᠠᠵᠤ ᠰᠠᠢᠨ ᠬᠥᠮᠦᠨ ᠥᠭᠭᠦᠭᠰᠡᠨ ᠶᠤᠮ᠂ ᠺᠢᠶᠸᠧ ᠬᠦᠷᠲᠡᠯᠡ ᠪᠢᠳᠡ ᠬᠣᠶᠠᠷ ᠤ᠋ᠨ ᠶᠠᠪᠤᠬᠤ ᠵᠠᠮ ᠤᠷᠲᠤ ᠪᠠᠢᠨᠠ᠁ ᠳᠡᠭᠦᠦ ᠨᠠᠷ ᠮᠢᠨᠢ ᠢᠳᠡᠭᠲᠦᠨ᠂ ᠭᠠᠭᠴᠠᠬᠠᠨ ᠪᠢᠳᠡᠨ ᠢ᠋ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠭᠠᠷᠠᠢ᠃
ᠸᠡᠥ᠋ᠯ ᠲᠡᠷᠡ ᠵᠢᠭᠠᠰᠤ ᠶ᠋ᠢ ᠠᠪᠤᠭᠠᠳ ᠬᠢᠲᠤᠭᠠ ᠪᠠᠷ ᠬᠡᠳᠦᠨ ᠬᠡᠰᠡᠭ ᠪᠣᠯᠭᠠᠭᠠᠳ ᠲᠦᠩᠫᠧᠩ ᠲᠣᠭᠣᠭᠠᠨ ᠳ᠋ᠠᠭᠠᠨ ᠬᠢᠪᠡ᠃
— ᠭᠤᠯᠢᠷ ᠰᠠᠴᠤᠭᠠᠳ ᠣᠷᠬᠢᠪᠠᠯ ᠠᠶᠠᠲᠠᠢᠬᠠᠨ ᠵᠢᠭᠠᠰᠤᠨ ᠤ᠋ ᠱᠥᠯᠥ ᠪᠣᠯᠤᠨᠠ᠃ ᠴᠢᠮᠠᠲᠤ ᠳᠠᠪᠤᠰᠤ ᠪᠣᠢ ᠪᠢᠵᠡ ᠳ᠋ᠠ?
— ᠪᠢᠴᠢᠬᠠᠨ ᠪᠣᠢ᠁
ᠲᠡᠭᠡᠪᠡᠯ ᠳᠠᠪᠤᠰᠤ ᠪᠠᠨ ᠴᠥ᠍ ᠥᠭᠭᠦᠭᠲᠦᠨ! ᠪᠢᠳᠡ ᠳᠠᠪᠤᠰᠤ ᠦᠭᠡᠢ ᠬᠣᠭᠣᠯᠠᠯᠠᠭᠰᠠᠭᠠᠷ ᠤᠳᠠᠭᠰᠠᠨ ᠰᠢᠦ᠃
ᠥᠨᠥᠬᠢ ᠥᠨᠳᠥᠷ ᠯᠠᠮᠠ ᠰᠠᠨᠠᠭᠠ ᠠᠯᠲᠠᠨ ᠪᠠᠢᠵᠤ ᠡᠭᠦᠷᠭᠡᠨ ᠡᠴᠡ ᠪᠡᠨ ᠳᠠᠪᠤᠤ ᠳ᠋ᠤ᠌ ᠪᠣᠭᠣᠭᠰᠠᠨ ᠳᠠᠪᠤᠰᠤ ᠭᠠᠷᠭᠠᠵᠤ ᠲᠦᠩᠫᠧᠩ ᠳ᠋ᠦ᠍ ᠪᠢᠴᠢᠬᠠᠨ ᠰᠠᠴᠤᠭᠠᠳ ᠳᠠᠬᠢᠨ ᠬᠢᠮᠠᠭᠠᠳᠠᠨ ᠪᠣᠭᠣᠪᠠ᠃ ᠲᠡᠭᠡᠭᠡᠳ ᠲᠡᠷᠡ ᠬᠣᠶᠠᠷ ᠯᠠᠮᠠ ᠮᠣᠳᠣᠨ ᠬᠠᠯᠪᠠᠭᠠ ᠪᠠᠨ ᠪᠠᠷᠢᠭᠰᠠᠭᠠᠷ ᠲᠦᠩᠫᠧᠩ ᠳ᠋ᠦ᠍ ᠣᠢᠷᠠᠲᠤᠪᠠ᠃
— ᠣᠲᠣᠴᠢ ( ᠣᠲᠠᠴᠢ ) ᠴᠢ ᠶᠠᠭᠤᠨ ᠳ᠋ᠤ᠌ ᠦᠷᠭᠦᠯᠵᠢ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠶᠤᠮ ᠪᠣᠢ?
— ᠰᠡᠭᠦᠳᠡᠷ ᠫᠧᠲ᠋ᠷᠦᠸ ᠦ᠋ᠨ ᠡᠳᠦᠷ ᠨᠢᠰᠦᠨ ᠢᠷᠡᠭᠡᠳ ᠬᠣᠵᠤᠤᠯᠠ ᠳᠡᠭᠡᠷᠡ ᠰᠠᠭᠤᠵᠤ ᠤᠬᠢᠯᠠᠵᠤ ᠡᠬᠢᠯᠡᠭᠰᠡᠨ ᠳ᠋ᠦ᠍ ᠦᠰᠦ ᠪᠤᠭᠤᠷᠤᠯᠲᠤᠵᠤ ᠪᠠᠢᠨᠠ᠃
ᠣᠢ ᠮᠣᠳᠣᠨ ᠱᠤᠤᠭᠢᠵᠤ ᠪᠠᠢᠨᠠ᠃ ᠴᠢ ᠶᠠᠭᠤᠨ ᠳ᠋ᠤ᠌ ᠤᠬᠢᠯᠠᠨᠠ ? ᠬᠣᠢᠲᠤ ᠶᠢᠷᠲᠢᠨᠴᠦ ᠳ᠋ᠦ᠍ ᠳᠠᠪᠤᠰᠤ ᠲᠠᠢ ᠪᠠᠨ ᠣᠴᠢᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠨᠠ ᠤᠤ? ᠭᠡᠵᠦ ᠼᠪᠶᠠᠭᠠ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠯᠠᠮᠠ ᠠᠶᠤᠵᠤ᠂
— ᠵᠠ ᠪᠢᠳᠡ ᠬᠠᠮᠢᠶᠠ ᠦᠭᠡᠢ᠂ ᠪᠢᠳᠡ ᠳᠤᠷᠠᠲᠠᠢ ᠪᠠᠢᠨᠠ᠃ ᠭᠠᠭᠴᠠᠬᠠᠨ ᠪᠢᠳᠡᠨ ᠢ᠋ ᠥᠷᠥᠰᠢᠶᠡᠵᠦ ᠶᠠᠪᠤᠭᠤᠯᠤᠭᠠᠷᠠᠢ ᠭᠡᠨᠡ᠃
— ᠪᠢᠳᠡ ᠲᠠᠨᠠᠷ ᠮᠡᠲᠦ ᠶ᠋ᠢᠨ ᠨᠣᠪᠰᠢ ᠶ᠋ᠢ ᠠᠪᠴᠤ ᠶᠠᠪᠤᠭᠠᠳ ᠶᠠᠭᠤ ᠪᠠᠨ ᠬᠢᠬᠦ ᠪᠢᠯᠡ ᠭᠡᠵᠦ ᠸᠡᠥ᠋ᠯ ᠬᠡᠯᠡᠪᠡ᠃
ᠬᠣᠶᠠᠷ ᠯᠠᠮᠠ ᠮᠣᠩᠭᠢᠨᠡᠨ ᠱᠥᠯᠥ ᠶ᠋ᠢ ᠨᠢ ᠬᠡᠳᠦᠢᠨ ᠮᠠᠷᠲᠠᠭᠠᠳ ᠬᠠᠯᠪᠠᠭᠠ ᠪᠠᠨ ᠡᠪᠦᠷᠯᠡᠵᠦ ᠴᠥᠮ ᠳ᠋ᠦ᠍ ᠮᠥᠷᠭᠥᠭᠰᠡᠭᠡᠷ ᠡᠮᠦᠨᠡ ᠵᠦᠭ ᠢ᠋ ᠴᠢᠭᠯᠡᠨ ᠵᠠᠮ ᠢ᠋ᠶ᠋ᠠᠷ ᠲᠦᠷᠭᠡᠨ ᠠᠯᠬᠤᠨ ᠶᠠᠪᠤᠯᠠ᠃
ᠨᠠᠮ ᠨᠡᠢᠯᠡᠭᠴᠢᠳ ᠬᠣᠭᠣᠯᠠ ᠪᠠᠨ ᠢᠳᠡᠵᠦ ᠰᠠᠭᠤᠲᠠᠯᠠ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠰᠡᠨ ᠬᠥᠮᠦᠨ ᠮᠣᠳᠣᠨ ᠤ᠋ ᠳᠤᠮᠳᠠᠭᠤᠷ ᠭᠠᠷᠴᠤ ᠢᠷᠡᠯᠡ᠃
— ᠬᠡᠨ ᠶᠠᠭᠤᠨ ( ᠤ᠋ ) ᠬᠥᠮᠦᠨ ᠪᠣᠢ? ᠭᠡᠵᠦ ᠮᠠᠨᠠᠭᠠᠴᠢ ᠬᠠᠰᠬᠢᠷᠪᠠ᠃
— ᠺᠤᠯᠤᠮᠤᠨ ᠠ᠋ᠴᠠ ᠭᠠᠷᠤᠭᠰᠠᠨ ᠡᠯᠴᠢ ᠪᠠᠢᠨᠠ᠃
— ᠴᠢ ᠪᠢᠳᠡᠨ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠬᠡᠷᠡᠭ ᠲᠡᠢ ᠬᠥᠮᠦᠨ ᠪᠠᠢᠨᠠ ᠂ ᠳᠠᠷᠤᠭᠠ ᠳᠡᠭᠡᠷᠡ ᠣᠴᠢᠶᠠ᠃ ᠰᠢᠷᠢᠩᠭᠢ ᠳᠡᠭᠡᠷᠡ ᠭᠠᠯ ᠰᠢᠲᠠᠵᠤ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠤᠶᠠᠭᠠ ᠲᠠᠢ ᠮᠣᠷᠢᠳ ᠪᠠᠢᠪᠠ᠃ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠴᠡᠷᠢᠭ ᠦ᠋ᠳ ᠰᠠᠭᠤᠵᠠᠭᠠᠨᠠ᠃ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠦᠰᠦᠲᠡᠢ ᠪᠣᠭᠣᠨᠢᠬᠠᠨ ᠳᠡᠪᠡᠯ ᠲᠡᠢ ( ᠨᠢ ) ᠤᠷᠠᠭᠳᠠᠭᠰᠠᠨ ᠭᠤᠲᠤᠯ ᠢ᠋ᠶ᠋ᠠᠨ ᠣᠶᠣᠵᠤ ᠰᠠᠭᠤᠪᠠ᠃ ᠨᠥᠭᠦᠭᠡ ᠨᠢ ᠴᠢᠯᠠᠭᠤ ᠪᠠᠷ ᠰᠦᠬᠡ ᠢᠷᠯᠡᠵᠦ ᠪᠠᠢᠪᠠ᠃ ᠭᠤᠷᠪᠠ ᠳ᠋ᠠᠬᠢ ᠨᠢ ᠦᠯᠢᠭᠡᠷ ᠶᠠᠷᠢᠨᠠ᠃ ᠲᠡᠭᠦᠨ ᠦ᠌ ᠶᠠᠷᠢᠬᠤ ᠨᠢ᠄
ᠠᠯᠸᠱ ᠪᠠᠭᠠᠲᠤᠷ ᠭᠡᠳᠡᠭ ᠢ᠋ ᠷᠸᠳ᠋ᠸᠳ᠋ᠶᠠ ᠭᠡᠭᠴᠢ ᠨᠢᠭᠡ ᠴᠢᠳᠠᠯᠲᠠᠢ ᠡᠷᠡ ᠪᠠᠷᠢᠵᠤ ᠠᠪᠤᠭᠠᠳ ᠲᠡᠭᠦᠨ ᠦ᠌ ᠴᠡᠭᠡᠵᠢ ᠶ᠋ᠢ ᠴᠣᠬᠢᠬᠤ ᠶ᠋ᠢ ᠵᠠᠪᠳᠤᠲᠠᠯᠠ ᠵᠣᠷᠢᠭᠲᠤ ᠠᠯᠸᠱ ᠫᠤᠫᠤᠸᠢᠴ ᠷᠸᠳ᠋ᠸᠳ᠋ᠶᠠ ᠶ᠋ᠢ ᠲᠣᠯᠣᠭᠠᠢ ᠠ᠋ᠴᠠ ᠨᠢ ᠰᠢᠭᠦᠷᠡᠨ ᠡᠷᠭᠦᠨ ᠭᠠᠵᠠᠷ ᠲᠸ᠋ ᠰᠢᠭᠢᠳᠲᠡᠯᠡ ᠰᠢᠳᠡᠭᠰᠡᠨ ᠳ᠋ᠦ᠍ ᠷᠸᠳ᠋ᠸᠳ᠋ᠶᠠ ᠤᠬᠠᠭᠠᠨ ᠠᠯᠳᠠᠵᠤ ᠮᠠᠭᠤᠵᠢᠷᠠᠨ ᠤᠨᠠᠪᠠ ᠭᠡᠨᠡ᠁
ᠲᠡᠷᠡᠬᠦ ᠦᠯᠢᠭᠡᠷ ᠬᠡᠯᠡᠭᠴᠢ ᠲᠣᠪ ᠳᠤᠭᠤᠢ ᠪᠣᠯᠤᠭᠠᠳ ᠪᠦᠭᠦᠳᠡᠭᠡᠷ ᠲᠡᠷᠡ ᠬᠦ᠌ ᠢᠷᠡᠵᠦ ᠶᠠᠪᠤᠭᠴᠢ ᠬᠥᠮᠦᠨ ᠢ᠋ ᠬᠠᠷᠠᠵᠠᠭᠠᠨᠠ᠃ ᠲᠡᠷᠡ ᠲᠤᠩ ᠵᠠᠯᠠᠭᠤ᠂ ᠰᠠᠬᠠᠯ ᠦᠭᠡᠢ᠂ ᠵᠡᠪᠰᠡᠭ ᠵᠡᠭᠦᠭᠰᠡᠨ᠂ ᠥᠨᠳᠥᠷ ᠪᠤᠯᠢᠭᠠᠷᠢ ᠶ᠋ᠢᠨ ᠰᠠᠪᠢᠬᠢᠨ ᠭᠤᠲᠤᠯ ᠲᠠᠢ ᠬᠥᠮᠦᠨ ᠲᠡᠭᠦᠨ ᠦ᠌ ᠤᠨᠤᠭᠰᠠᠨ ᠮᠣᠷᠢ ᠨᠢ ᠰᠠᠢᠬᠠᠨ ᠪᠡᠶᠡ ᠲᠡᠢ ᠪᠣᠯᠪᠠᠴᠤ ᠨᠡᠩ ᠶᠡᠬᠡ ᠡᠴᠡᠵᠦ ᠲᠤᠷᠠᠭᠰᠠᠨ ᠠᠵᠤᠭᠤ᠃
— ᠴᠢᠨᠦ ᠮᠣᠷᠢ ᠡᠢᠨ ᠬᠦ᠌ ᠶᠡᠬᠡ ᠶᠠᠳᠠᠷᠠᠭᠰᠠᠨ ᠢ᠋ ᠦᠵᠡᠪᠡᠯ ᠴᠢ ᠠᠯᠤᠰ ᠠ᠋ᠴᠠ ᠭᠠᠷᠤᠭᠰᠠᠨ ᠬᠥᠮᠦᠨ ᠮᠥᠨ ᠤᠤ? ᠭᠡᠵᠦ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠰᠠᠭᠤᠭᠴᠢᠳ ᠤ᠋ᠨ ᠨᠢᠭᠡ ᠨᠢ ᠠᠰᠠᠭᠤᠪᠠ᠃
— ᠶᠡᠬᠡ ᠸᠠᠩ ᠭᠸᠤᠷᠬᠢ ᠳ᠋ᠤ᠌ ᠣᠴᠢᠬᠤ ᠪᠠᠷ ᠺᠤᠯᠤᠮᠤᠨ ᠠ᠋ᠴᠠ ᠵᠠᠷᠯᠢᠭ ᠢ᠋ᠶ᠋ᠠᠷ ᠶᠠᠪᠤᠨᠠ᠃
— ᠴᠢ ᠶᠠᠭᠤᠨ ᠳ᠋ᠤ᠌ ᠡᠢᠨ ᠬᠦ᠌ ᠮᠤᠷᠤᠢ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠭᠠ ᠪᠢᠯᠡ ᠭᠡᠵᠦ ᠥᠨᠥᠬᠢ ᠭᠤᠲᠤᠯ ᠰᠡᠯᠪᠢᠨ ᠰᠠᠭᠤᠭᠠ ᠴᠡᠷᠢᠭ ᠠᠰᠠᠭᠤᠪᠠ ᠃
— ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠦ᠋ᠳ ᠭᠠᠵᠠᠷ ᠪᠦᠬᠦᠨᠡ ᠶᠠᠪᠤᠵᠤ ᠪᠠᠢᠨᠠ᠃ ᠡᠢᠨᠬᠦ ᠶᠠᠪᠤᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠁
— ᠬᠦᠦ ᠴᠢᠨᠦ ᠨᠢᠭᠤᠷ ᠢ᠋ ᠦᠵᠡᠪᠡᠯ ᠲᠠᠨᠢᠬᠤ ᠶᠤᠮ ᠰᠢᠭ᠋ ᠪᠠᠢᠨᠠ᠂ ᠶᠠᠭᠤ ᠪᠢᠯᠡ ?
— ᠬᠠᠷᠢᠨ ᠪᠢ ᠲᠠᠨ ᠢ᠋ ᠮᠡᠳᠡᠵᠦ ᠪᠠᠢᠨᠠ ᠭᠡᠵᠦ ᠢᠷᠡᠭᠴᠢ ᠬᠥᠮᠦᠨ ᠬᠠᠷᠢᠭᠤᠯᠪᠠ᠃
ᠫᠸᠷᠤᠢ᠍ᠨᠤᠸ—ᠪᠣᠷ ᠲᠸ᠋ ᠪᠠᠭᠠᠪᠠᠭᠠᠢ ᠠᠪᠠᠯᠠᠬᠤ ᠪᠠᠷ ᠲᠠᠨ ᠲᠠᠢ ᠤᠴᠠᠷᠠᠵᠤ ᠶᠠᠪᠤᠭᠰᠠᠨ ᠪᠤᠰᠤ ᠤᠤ? ᠮᠢᠨᠦ ᠡᠴᠢᠭᠡ ᠰᠡᠸᠸᠯᠢ ᠳ᠋ᠢᠺᠤᠷᠤᠰ ᠲᠠᠨ ᠢ᠋ ᠣᠢ ᠳᠤᠮᠳᠠᠭᠤᠷ ᠵᠠᠮᠴᠢᠯᠠᠨ ᠶᠠᠪᠤᠭᠰᠠᠨ ᠰᠢᠦ ᠳ᠋ᠠ᠃ ᠶᠸᠸᠫᠠᠲ ᠺᠣᠯᠤᠸᠷᠠᠲ ᠮᠡᠨᠳᠦ ᠰᠠᠢᠨ ᠤᠤ?
— ᠲᠤᠷᠤᠫᠺᠠ ᠮᠥᠨ ᠤᠤ? ᠴᠢ ᠴᠢᠨᠢ ᠶᠠᠮᠠᠷ ᠰᠦᠷᠡᠬᠡᠢ ᠪᠠᠭᠠᠲᠤᠷ ᠪᠣᠯᠤᠭᠰᠠᠨ ᠪᠢᠯᠡ᠂ ᠵᠠ᠂ ᠲᠡᠭᠡᠭᠡᠳ ᠶᠠᠭᠤᠨ ᠳ᠋ᠤ᠌ ᠵᠣᠭᠰᠣᠨᠠ᠂ ᠪᠢᠳᠡᠨ ᠦ᠌ ᠳᠡᠷᠭᠡᠳᠡ ᠰᠠᠭᠤᠭᠲᠤᠨ᠃
ᠲᠣᠷᠣᠫᠺᠠ ᠮᠣᠷᠢ ᠪᠠᠨ ᠮᠣᠳᠣᠨ ᠠ᠋ᠴᠠ ᠤᠶᠠᠭᠠᠳ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠢᠷᠡᠵᠦ ᠰᠠᠭᠤᠪᠠ᠃
ᠲᠡᠷᠡ ᠪᠡᠷ ᠺᠤᠯᠤᠮᠤᠨ᠂ ᠸᠯᠠᠳᠢᠮᠢᠷ ᠵᠡᠷᠭᠡ ᠶ᠋ᠢᠨ ᠬᠣᠲᠠ ᠶ᠋ᠢ ᠬᠡᠷᠬᠢᠨ ᠡᠵᠡᠯᠡᠭᠰᠡᠨ᠂ ᠥᠪᠡᠷ ᠢ᠋ᠶ᠋ᠡᠨ ᠬᠡᠷᠬᠢᠨ ᠤᠷᠭᠤᠨ ᠵᠢᠭᠤᠲᠠᠭᠰᠠᠨ᠂ ᠮᠣᠩᠭᠣᠯᠴᠤᠳ ᠲᠠᠢ ᠬᠡᠷᠬᠢᠨ ᠲᠣᠬᠢᠶᠠᠯᠳᠤᠭᠰᠠᠨ ᠲᠤᠬᠠᠢ ᠶ᠋ᠢ ᠳᠡᠯᠭᠡᠷᠡᠩᠭᠦᠢ ᠪᠡᠷ ᠶᠠᠷᠢᠯᠠ᠃ ᠡᠭᠦᠨ ᠢ᠋ ᠶᠸᠸᠫᠠᠲ ᠲᠠᠲ᠋ᠠᠷ ᠤ᠋ᠨ ᠪᠠᠭ ᠤ᠋ᠳ ᠣᠳᠣ ᠴᠣᠬᠣᠮ ᠬᠠᠮᠢᠭᠠ ᠪᠣᠢ᠂ ᠪᠠᠲᠤ ᠬᠠᠭᠠᠨ ᠬᠠᠮᠢᠭᠠ ᠶᠠᠪᠤᠭᠠ ᠵᠡᠷᠭᠡ ᠶ᠋ᠢ ᠲᠡᠭᠦᠨ ᠡᠴᠡ ᠰᠤᠷᠪᠤᠯᠵᠢᠯᠠᠨ ᠠᠰᠠᠭᠤᠪᠠ᠃
ᠲᠤᠷᠤᠫᠺᠠ ᠥᠪᠡᠷ ᠦ᠋ᠨ ᠦᠵᠡᠵᠦ ᠮᠡᠳᠡᠭᠰᠡᠨ ᠢ᠋ᠶ᠋ᠡᠨ ᠰᠠᠢᠲᠤᠷ ᠲᠠᠢᠯᠪᠤᠷᠢᠯᠠᠨ ᠬᠡᠯᠡᠪᠡ᠃
ᠲᠡᠭᠡᠭᠡᠳ ᠶᠸᠸᠫᠠᠲ ᠨᠠᠮ ᠨᠡᠢᠯᠡᠭᠴᠢᠳ ᠦ᠋ᠨ ᠵᠦᠭ ᠡᠷᠭᠢᠨ᠂
— ᠪᠠᠭᠤᠳᠠᠯ ᠠ᠋ᠴᠠ ᠪᠠᠨ ᠬᠥᠳᠡᠯᠦᠭᠲᠦᠨ᠂ ᠤᠮᠠᠷᠠ ᠲᠡᠰᠢ ᠶᠠᠪᠤᠵᠠᠭᠠᠶᠠ ᠭᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ 1᠂ ᠠᠯᠲᠠᠨᠴᠢᠮᠡᠭ 1᠂ ᠪᠠᠶᠠᠨᠴᠡᠴᠡᠭ 2᠂ ᠮᠡᠷᠭᠡᠨᠭᠣᠸᠠ 2᠂ ᠬᠦᠦᠳᠠᠭᠠᠭᠤᠯ 1
ᠬᠢᠨᠠᠭᠴᠢ᠄ ᠲ᠂ ᠬᠦᠮᠦᠵᠢᠯᠲᠦ 1᠂ᠪᠠᠶᠠᠨᠴᠠᠡᠴᠡᠭ 1᠂ ᠬᠡᠷᠡᠢᠳ ᠂ ᠮᠥᠩᠬᠡᠨᠠᠰᠤᠨ 1
ᠶᠡᠷᠦᠩᠬᠡᠢ ᠬᠢᠨᠠᠭᠴᠢ᠄ ᠠᠯᠲᠠᠨᠴᠢᠮᠡᠭ 7᠂ ᠠᠷᠢᠭᠤᠨ 7