ᠪᠠᠲᠤ ᠬᠠᠭᠠᠨ 6-05ᠮᠣᠰᠺᠸᠠ ᠤᠷᠤᠭᠤ ᠶᠠᠪᠤᠵᠠᠭᠠᠶᠠ-ᠣᠷᠣᠰ ᠨᠤᠲᠤᠭ ᠢ᠋ ᠬᠠᠷᠠ ᠡᠭᠦᠯᠡ ᠪᠦᠷᠬᠦᠪᠡBat khaan Бат хаан-ᠷᠣᠮᠠᠨ
210ᠲᠠᠪᠤ ᠂ ᠮᠣᠰᠺᠸᠠ ᠤᠷᠤᠭᠤ ᠶᠠᠪᠤᠵᠠᠭᠠᠶᠠ
ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠪᠠᠲᠤ ᠬᠠᠭᠠᠨ ᠤ᠋ ᠵᠦᠭ ᠬᠠᠨᠳᠤᠵᠤ᠂
— ᠵᠠᠩᠵᠤᠨ ᠴᠢ ᠥᠪᠡᠷ ᠦ᠋ᠨ ᠦᠨᠡᠨᠴᠢ ᠨᠥᠬᠥᠷ ᠦ᠋ᠨ ᠦᠭᠡ ᠶ᠋ᠢ ᠰᠣᠨᠣᠰ! ᠴᠢᠬᠤᠯᠠ ᠬᠡᠷᠡᠭ ᠡᠮᠦᠨᠡ ᠲᠤᠯᠭᠠᠷᠠᠨ ᠢᠷᠡᠯᠡ᠃ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠡᠭᠦᠳᠡ ᠬᠠᠭᠠᠯᠭᠠᠨ ᠳ᠋ᠤ᠌ ᠬᠦᠷᠬᠦ ᠲᠦᠯᠬᠢᠭᠦᠷ ᠢ᠋ ᠴᠢ ᠦᠵᠡᠬᠦ ᠪᠢᠵᠡ? ᠪᠢᠳᠡ ᠳᠠᠷᠤᠢ ᠬᠥᠳᠡᠯᠵᠦ ᠮᠣᠰᠺᠸᠠ ᠬᠣᠲᠠᠨᠠ ᠬᠦᠷᠴᠦ ᠪᠤᠰᠤᠳ ᠬᠠᠭᠠᠳ ᠤ᠋ᠨ ᠡᠵᠡᠯᠡᠬᠦ ᠡᠴᠡ ᠤᠷᠢᠳ ᠲᠡᠭᠦᠨ ᠢ᠋ ᠠᠪᠬᠤ ᠶᠣᠰᠣᠲᠠᠢ ᠪᠠᠢᠨᠠ᠃ ᠪᠤᠰᠤᠳ ᠣᠷᠣᠨ ᠠ᠋ᠴᠠ ᠠᠪᠴᠢᠷᠠᠭᠰᠠᠨ ᠪᠠᠷᠠᠭᠠ ᠲᠠᠸᠠᠷ ᠠᠬᠤᠭᠤᠯᠬᠤ ᠪᠠᠷᠢᠯᠭᠠ ᠶ᠋ᠢ ᠲᠡᠨᠳᠡ ᠪᠠᠷᠢᠭᠰᠠᠨ ᠶᠤᠮ᠃ ᠲᠡᠨᠳᠡ ᠭᠠᠳᠠᠭᠠᠳᠤ ᠶ᠋ᠢᠨ ᠬᠤᠳᠠᠯᠳᠤᠭᠠᠴᠢᠳ ᠰᠠᠭᠤᠵᠤ ᠪᠣᠢ᠂ ᠳᠠᠯᠠᠢ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠢᠷᠡᠭᠰᠡᠨ ᠡᠳ᠋ ᠠᠯᠲᠠ ᠮᠥᠩᠭᠥ ᠪᠣᠯᠤᠨ ᠭᠷᠸᠢᠭ᠌ ᠦ᠋ᠨ ᠤᠯᠠᠭᠠᠨ ᠠᠷᠢᠬᠢ ᠭᠧᠷᠮᠠᠨ ᠤ᠋ ᠴᠡᠮᠪᠡ ᠪᠣᠯᠤᠨ ᠶᠡᠬᠡ ᠪᠠᠶᠠᠯᠢᠭ ᠢ᠋ ᠲᠡᠨᠳᠡ ᠡᠴᠡ ᠣᠯᠵᠤ ᠠᠪᠤᠭᠠᠷᠠᠢ ᠭᠡᠪᠡ᠃
ᠪᠠᠲᠤ ᠬᠠᠭᠠᠨ ᠨᠢᠳᠦ ᠶ᠋ᠢ ᠳᠤᠲᠠᠭᠤ ᠠᠨᠢᠵᠤ ᠶᠠᠳᠠᠷᠠᠭᠰᠠᠨ ᠳᠠᠭᠤ ᠪᠠᠷ ᠬᠡᠯᠡᠬᠦ ᠨᠢ᠄
— ᠣᠳᠣ ᠪᠢ ᠴᠢᠬᠤᠯᠠ ᠠᠵᠢᠯ ᠲᠠᠢ ᠪᠠᠢᠨᠠ᠂ ᠪᠢᠳᠡ ᠲᠡᠭᠦᠨ ᠢ᠋ ᠮᠠᠷᠭᠠᠰᠢ ᠭᠦᠢᠴᠡᠳᠬᠡᠵᠦ ᠠᠮᠵᠢᠨᠠ᠃
ᠰᠦᠪᠡᠭᠡᠲᠡᠢ᠂ ᠪᠠᠲᠤ ᠬᠠᠭᠠᠨ ᠤ᠋ ᠬᠦᠨᠳᠦ ᠠᠯᠲᠠᠨ ᠡᠭᠡᠮᠦᠭ ᠵᠡᠭᠦᠭᠰᠡᠨ ᠴᠢᠬᠢᠨ ᠳ᠋ᠦ᠍ ᠣᠢᠷᠠᠲᠤᠵᠤ ᠨᠠᠮᠤᠭᠤᠨ ᠳᠠᠭᠤ ᠪᠠᠷ᠂
— ᠲᠡᠢᠨ ᠳ᠋ᠦ᠍ ᠨᠢᠭᠡ ᠡᠳᠦᠷ ᠨᠢᠭᠡ ᠴᠠᠭ ᠢ᠋ ᠲᠠᠯᠠᠭᠠᠷ ᠥᠩᠭᠡᠷᠡᠭᠦᠯᠬᠦ ᠨᠢ ᠢᠯᠠᠯᠲᠠ ᠶ᠋ᠢ ᠠᠯᠳᠠᠵᠤ ᠶᠡᠷᠡᠨ ᠶᠢᠰᠦᠨ ᠵᠢᠯ ᠦ᠋ᠨ ᠬᠥᠳᠡᠯᠮᠦᠷᠢ ᠶ᠋ᠢ ᠬᠣᠭᠣᠰᠣᠨ ᠪᠣᠯᠭᠠᠳᠠᠭ ᠭᠡᠳᠡᠭ᠃ ᠴᠢ ᠴᠢᠬᠤᠯᠠ ᠡᠳᠦᠷ ᠢ᠋ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠥᠩᠭᠡᠷᠡᠭᠦᠯᠬᠦ ᠭᠡᠵᠦ ᠪᠠᠢᠭᠠ ᠶᠤᠮ ᠪᠢᠰᠢ ᠤᠤ? ᠡᠨᠡ ᠬᠠᠷᠢ ᠭᠠᠵᠠᠷ ᠮᠤᠤᠰᠠᠢᠨ ᠠᠮᠢᠲᠠᠳ ᠢ᠋ ᠤᠯᠠᠭᠠᠨ ᠮᠠᠩᠭᠤᠰ ᠤ᠋ᠨ ᠵᠦᠭ ᠬᠥᠭᠡᠭᠡᠵᠦ ᠶᠠᠪᠤᠭᠤᠯ᠂ ᠡᠳᠡᠨ ᠢ᠋ ᠬᠥᠭᠡᠭᠡᠵᠦ ᠶᠠᠪᠤᠭᠤᠯ᠂ ᠡᠰᠡᠪᠡᠯ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠪᠤᠶᠠ᠃ ᠪᠢ ᠣᠳᠣᠬᠠᠨ ᠥᠪᠡᠷ ᠦ᠋ᠨ (ᠬᠢ ) ᠡᠴᠡ ᠪᠡᠨ《ᠮᠢᠩᠭᠠᠨ ᠭᠠᠯᠵᠠᠭᠤ》ᠶ᠋ᠢ ᠠᠪᠴᠢᠷᠠᠭᠤᠯᠵᠤ ᠪᠠᠢᠭᠠᠳ ᠴᠥᠮ ᠢ᠋ ᠡᠨᠳᠡ ᠴᠢᠨᠢ ᠠᠷᠢᠯᠭᠠᠶᠠ᠃
ᠪᠠᠲᠤ ᠬᠠᠭᠠᠨ ᠤ᠋ ᠠᠭᠤᠷ ᠶᠡᠬᠡᠳᠡ ᠬᠦᠷᠦᠭᠰᠡᠨ ᠡᠴᠡ ᠰᠠᠬᠠᠯ ᠨᠢ ᠰᠡᠷᠪᠡᠯᠵᠡᠵᠦ ᠰᠦᠪᠡᠭᠡᠳᠡᠢ ᠶ᠋ᠢᠨ ᠨᠢᠭᠤᠷ ᠢ᠋ ᠡᠭᠴᠡ ᠰᠢᠷᠲᠡᠨᠡ᠃ ᠡᠷᠭᠢᠨ ᠲᠣᠭᠣᠷᠢᠨ ᠰᠣᠷᠪᠢ ᠪᠣᠯᠤᠭᠰᠠᠨ ᠲᠣᠭᠰᠢᠨ ᠬᠠᠷᠠᠴᠠᠲᠤ ᠨᠢᠳᠦ ᠪᠠ ᠲᠥᠷᠥᠭᠰᠡᠨ ᠴᠠᠭ ᠠ᠋ᠴᠠ ᠪᠠᠨ ᠬᠣᠢᠰᠢ ᠨᠢᠭᠡ ᠴᠦ᠍ ᠤᠬᠢᠶᠠᠭᠠ ᠦᠭᠡᠢ ᠨᠢᠭᠤᠷ ᠲᠤᠨᠢ ᠬᠡᠰᠡᠭ ᠬᠡᠰᠡᠭ ᠪᠣᠯᠤᠭᠰᠠᠨ ᠰᠢᠷᠦᠭᠦᠨ ᠤᠰᠤ ᠤᠨᠠᠵᠤ᠂ ᠰᠠᠯᠬᠢᠨᠠ ᠬᠠᠭᠠᠷᠠᠭᠰᠠᠨ ᠤᠷᠤᠭᠤᠯ ᠳᠡᠭᠡᠭᠦᠷ ᠬᠥᠭᠡᠰᠦ ᠪᠤᠷᠭᠢᠨ ᠪᠠᠢᠭᠠ ᠶ᠋ᠢ ᠦᠵᠡᠪᠡᠰᠦ ᠰᠦᠪᠡᠭᠡᠳᠡᠢ ᠶ᠋ᠢᠨ ᠬᠢᠯᠢᠩ ᠶᠡᠬᠡᠳᠡ ᠬᠦᠷᠴᠡᠢ᠃ ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠲᠦᠰᠢᠭᠯᠡᠨ ᠬᠥᠮᠦᠵᠢᠭᠦᠯᠦᠭᠴᠢ ᠪᠡᠨ ᠬᠢᠯᠢᠩᠨᠡᠭᠦᠯᠬᠦ ᠡᠴᠡ ᠪᠣᠯᠭᠣᠮᠵᠢᠯᠠᠵᠤ ᠡᠪᠯᠡᠷᠡᠪᠡ᠃ ᠪᠠᠲᠤ᠂ ᠳᠥᠷᠪᠡᠨ ᠬᠥᠯᠯᠡᠨ ᠬᠡᠪᠲᠡᠭᠡᠳ ᠲᠣᠯᠣᠭᠠᠢ ᠪᠠᠨ ᠭᠠᠵᠠᠷ ᠲᠤᠯᠲᠠᠯᠠ ᠪᠥᠬᠥᠢᠵᠦ ᠥᠷᠥᠰᠢᠶᠡᠯ ᠢ᠋ ᠠᠢᠯᠠᠳᠬᠠᠬᠤ ᠪᠠᠷ ᠢᠷᠡᠭᠰᠡᠨ ᠮᠣᠩᠭᠣᠯ ᠤ᠋ᠨ ᠵᠦᠭ ᠡᠷᠭᠢᠵᠦ ᠬᠠᠷᠠᠪᠠ᠃
ᠲᠡᠢᠮᠦᠷᠬᠦ ᠮᠣᠩᠭᠣᠯᠴᠤᠳ᠂ ᠪᠦᠬᠦ ᠮᠣᠳᠣᠨ ᠰᠦᠮᠡ ᠨᠤᠭᠦᠳ ᠡᠴᠡ ᠡᠬᠢᠯᠡᠨ ᠬᠠᠭᠠᠯᠭᠠ ᠪᠠᠷ ᠣᠷᠣᠭᠠᠳ ᠬᠠᠰᠢᠶᠠᠨ ᠳᠣᠲᠣᠷᠠ ᠴᠠᠰᠤᠨ ᠲᠠᠯᠠ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠵᠦ ᠪᠠᠢᠪᠠ᠃
ᠪᠠᠲᠤ ᠬᠠᠭᠠᠨ ᠰᠠᠨᠳᠤᠷᠤᠭᠰᠠᠨ ᠢ᠋ᠶ᠋ᠠᠨ ᠨᠢᠭᠤᠬᠤ ᠶ᠋ᠢ ᠤᠷᠤᠯᠳᠤᠵᠤ᠄
— ᠨᠠᠮᠠᠶ᠋ᠢ ᠣᠯᠠᠨ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ《ᠥᠷᠥᠰᠢᠶᠡᠯ ᠢᠪᠡᠭᠡᠯᠲᠦ 》 ᠰᠠᠢᠨ ᠬᠠᠭᠠᠨ ᠭᠡᠳᠡᠭ ᠨᠢ ᠶᠡᠷᠦ ᠳᠡᠮᠡᠢ ᠦᠭᠡ ᠪᠤᠰᠤ ᠰᠢᠦ᠃ ᠨᠠᠳᠠᠳᠤ ᠦᠨᠡᠨᠴᠢ ᠪᠠᠢᠭᠰᠠᠨ ᠬᠡᠨ ᠪᠣᠯᠪᠠᠴᠤ ᠨᠠᠳᠠᠲᠠᠢ ᠨᠢᠭᠤᠷ ᠭᠣᠮᠣᠳᠠᠯ ᠤᠴᠠᠷᠠᠵᠤ (ᠨᠢᠭᠤᠷ ᠤᠴᠠᠷᠠᠵᠤ ᠭᠣᠮᠣᠳᠠᠯ ) ᠤᠴᠢᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠪᠠᠢᠳᠠᠭ ᠡᠷᠬᠡ ᠲᠡᠢ ᠭᠡᠪᠡ᠃
ᠰᠦᠪᠡᠭᠡᠲᠠᠢ ᠲᠦᠷᠭᠡᠨ ᠵᠠᠭᠤᠷᠠ ᠤᠷᠲᠤ ᠬᠡᠯᠡ ᠪᠡᠨ ᠭᠠᠷᠭᠠᠵᠤ ᠤᠷᠤᠭᠤᠯ ᠢ᠋ᠶ᠋ᠠᠨ ᠳᠣᠯᠢᠶᠠᠨᠠ᠃
ᠪᠠᠲᠤ ᠬᠠᠭᠠᠨ ᠠᠨᠢᠪᠠᠰ ᠬᠢᠭᠡᠳ᠂
— ᠪᠢ ᠣᠳᠣ ᠬᠣᠶᠠᠷ ᠬᠥᠮᠦᠨ ᠦ᠌ ᠭᠣᠮᠣᠳᠠᠯ ᠢ᠋ ᠳᠠᠭᠤᠰᠬᠠᠭᠠᠳ ᠴᠢᠮᠠᠲᠠᠢ ᠶᠠᠷᠢᠯᠴᠠᠶᠠ ᠭᠡᠨᠡ᠃
ᠪᠠᠲᠤ ᠬᠠᠭᠠᠨ ᠰᠦᠮᠡ ᠶ᠋ᠢᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠵᠠᠪᠢᠯᠠᠨ ᠰᠠᠭᠤᠵᠤ ᠪᠠᠢᠲᠠᠯᠠ ᠺᠢᠫᠴᠠᠺ ᠮᠠᠶᠢᠭ ᠤ᠋ᠨ ᠰᠤᠳᠠᠯ ᠲᠠᠢ ᠬᠤᠪᠴᠠᠰᠤ ᠲᠠᠢ ᠨᠢᠭᠡᠨ ᠡᠪᠦᠭᠡᠨ ᠰᠦᠮᠡ ᠶ᠋ᠢᠨ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠢᠷᠡᠭᠡᠳ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠮᠥᠯᠬᠥᠨ ᠪᠠᠲᠤ ᠳ᠋ᠤ᠌ ᠣᠢᠷᠠᠲᠤᠨ ᠢᠷᠡᠵᠡᠢ᠃ ᠪᠠᠲᠤ ᠬᠠᠭᠠᠨ ᠲᠡᠭᠦᠨ ᠢ᠋ ᠨᠠᠮᠤᠭᠤᠬᠠᠨ ᠴᠢᠷᠠᠢ ᠭᠠᠷᠭᠠᠨ ᠰᠢᠷᠲᠡᠬᠦ ᠳ᠋ᠦ᠍ᠨᠢ ᠨᠢᠳᠦ ᠨᠢ ᠪᠠᠰᠠᠯᠠ ᠳᠤᠲᠠᠭᠤ ᠠᠨᠢᠭᠳᠠᠬᠤ ᠠᠵᠠᠢ᠃
— ᠴᠢ ᠶᠠᠭᠤ ᠮᠡᠳᠡᠭᠦᠯᠬᠦ ᠭᠡᠵᠦ ᠶᠠᠪᠤᠨᠠ ᠪᠣᠢ?
— ᠮᠢᠨᠦ ᠨᠡᠷᠡ ᠨᠠᠽᠠᠷ ᠭᠡᠳᠡᠭ᠃ ᠪᠢ ᠰᠢᠭᠨᠡᠺ ᠭᠠᠵᠠᠷ ᠠ᠋ᠴᠠ ᠲᠠᠨ ᠤ᠋ ᠢᠯᠠᠭᠳᠠᠰᠢ ᠦᠭᠡᠢ ᠶᠡᠬᠡ ᠴᠢᠷᠢᠭ ᠲᠦ᠍ ᠣᠷᠣᠵᠤ ᠳᠠᠭᠠᠯᠳᠤᠨ ᠶᠠᠪᠤᠭᠠ ᠶᠤᠮ᠃ ᠪᠢ ᠴᠢᠩ ᠦᠨᠡᠨ ᠡᠴᠡ ᠪᠡᠨ ᠲᠡᠰᠪᠦᠷᠢᠯᠡᠨ ᠵᠢᠳᠬᠦᠨ ᠶᠠᠪᠤᠨᠠ᠃
— ᠮᠠᠭᠤ ᠡᠪᠦᠭᠡᠨ ᠴᠢ ᠨᠠᠳᠠᠳᠤ ᠶᠠᠮᠠᠷ ᠠᠵᠢᠯ ᠪᠦᠲᠦᠭᠡᠵᠦ ᠶᠠᠪᠤᠭᠠ ᠶᠤᠮ ᠪᠣᠢ?
— ᠪᠢ ᠮᠣᠬᠣᠰᠢ ᠦᠭᠡᠢ ᠵᠣᠷᠢᠭᠲᠤ ᠰᠦᠪᠡᠭᠡᠲᠠᠢ ᠪᠠᠭᠠᠲᠤᠷ ᠤ᠋ᠨ ᠰᠡᠷᠭᠦᠯᠡᠩ ᠲᠠᠬᠢᠶᠠ ᠶ᠋ᠢ ᠮᠠᠨᠠᠵᠤ ᠲᠡᠵᠢᠭᠡᠵᠦ ᠶᠠᠪᠤᠳᠠᠭ ᠬᠥᠮᠦᠨ᠁ ᠭᠡᠰᠡᠨ ᠳ᠋ᠤ᠌ ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠳᠣᠭᠰᠢᠨ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠶᠠᠮᠠᠷᠪᠠ ᠦᠭᠡ ᠶᠠᠷᠢᠶᠠ ᠰᠣᠨᠣᠰᠬᠤ ᠳᠤᠷᠠᠲᠠᠢ ᠲᠤᠯᠠ ᠬᠡ ᠬᠡ ᠭᠡᠵᠦ ᠢᠨᠢᠶᠡᠵᠡᠢ᠃
— ᠴᠢ ᠲᠡᠭᠡᠭᠡᠳ ᠶᠠᠭᠤ ᠮᠡᠳᠡᠭᠦᠯᠵᠦ ᠪᠠᠢᠭᠠ ᠪᠢᠯᠡ? ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠴᠢᠮᠠᠶ᠋ᠢ ᠭᠤᠮᠤᠳᠠᠭᠤᠯᠤᠭᠰᠠᠨ ᠭᠡᠵᠢ ᠤᠤ?
— ᠦᠭᠡᠢ ᠨᠢ ᠲᠦᠮᠡᠨ ᠦᠨᠡᠨ᠂ ᠶᠡᠬᠡ ᠠᠯᠠᠯᠾ ᠲᠩᠷᠢ ᠨᠠᠮᠠᠶ᠋ᠢ ᠵᠢᠮᠡᠯᠡᠭᠰᠡᠨ ᠪᠣᠯᠪᠠᠴᠤ ᠲᠡᠳᠡᠨᠡᠷ ᠦ᠋ᠨ ᠮᠢᠨᠢ ᠠᠯᠳᠠᠷ ᠡᠭᠦᠷᠢᠳᠡ ᠮᠠᠨᠳᠤᠬᠤ ᠪᠣᠯᠲᠤᠭᠠᠢ᠃ ᠮᠢᠨᠦ ᠳᠥᠷᠪᠡᠨ ᠰᠠᠢᠬᠠᠨ ᠬᠥᠪᠡᠭᠦᠨ ᠨᠠᠳᠠᠲᠠᠢ ᠬᠠᠮᠲᠤ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠭᠰᠠᠨ ᠪᠢᠯᠡ᠃
— ᠡᠨᠡ ᠴᠢᠨᠢ ᠴᠣᠬᠣᠮ ᠳ᠋ᠠᠭᠠᠨ ᠬᠦᠨᠳᠦ ᠲᠡᠢ ᠬᠡᠷᠡᠭ ᠰᠢᠪ ᠳ᠋ᠠ᠃ ᠲᠡᠳᠡᠨᠡᠷ ᠴᠢᠨᠢ ᠶᠡᠬᠡ ᠠᠯᠳᠠᠷ ᠭᠠᠪᠢᠶᠠ ᠣᠯᠵᠤ ᠶᠠᠪᠤᠭᠠ᠃
— ᠣᠷᠣᠰ ᠤ᠋ᠳ ᠲᠠᠢ ᠲᠤᠯᠤᠯᠳᠤᠭᠰᠠᠨ ᠠᠩᠬᠠᠨ ᠤ᠋ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠮᠢᠨᠦ ᠶᠡᠬᠡ ᠬᠦᠦ ᠵᠣᠷᠢᠭᠲᠤ ᠳ᠋ᠸᠮᠸᠷ ᠮᠢᠨᠢ ᠠᠯᠠᠭᠳᠠᠭᠰᠠᠨ᠂ ᠲᠡᠭᠦᠨ ᠦ᠌ ᠰᠦᠨᠡᠰᠦ ᠶ᠋ᠢ ᠠᠯᠯᠠᠾ ᠲᠩᠷᠢ ᠡᠴᠡ ᠥᠪᠡᠷ ᠦ᠋ᠨ ᠴᠡᠴᠡᠷᠯᠢᠭ ᠲᠦ᠍ ᠲᠥᠷᠥᠭᠦᠯᠬᠦ ᠪᠢᠵᠡ? ᠭᠡᠵᠦ ᠡᠪᠦᠭᠡᠨ ᠨᠢᠳᠦ ᠶᠤᠭᠡᠨ ᠳᠡᠪᠡᠯ ᠦ᠋ᠨ ᠨᠢᠳᠤᠷᠭᠠ ᠪᠠᠷ ᠠᠷᠴᠢᠵᠤ ᠬᠥᠨᠳᠡᠯᠡᠨ ᠬᠠᠷᠠᠪᠠ᠃
— ᠴᠢᠨᠦ ᠬᠦᠦ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠶᠠᠪᠤᠵᠤ ᠦᠬᠦᠭᠰᠡᠨ ᠭᠡᠵᠦ ᠴᠢ ᠪᠠᠬᠠᠷᠬᠠᠵᠤ ᠪᠠᠢ᠃ ᠪᠢ ᠴᠢᠮᠠᠶ᠋ᠢ ᠶᠠᠭᠤ ᠪᠠᠷ ᠱᠠᠩᠨᠠᠬᠤ ᠪᠢᠯᠡ ᠭᠡᠬᠦ ᠳ᠋ᠦ᠍ ᠨᠠᠽᠠᠷ ᠬᠠᠮᠠᠷ ᠢ᠋ᠶ᠋ᠠᠨ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠷ ᠠᠷᠴᠢᠵᠤ᠂
— ᠪᠢ ᠴᠢᠨᠦ ᠮᠠᠲᠠᠯ ᠤ᠋ᠨ ᠬᠥᠮᠦᠨ᠂ ᠴᠢᠨᠦ ᠰᠠᠢᠬᠠᠨ ᠦᠭᠡ ᠴᠢᠨᠢ ᠨᠠᠳᠠᠳᠤ ᠳ᠋ᠠᠭᠠᠨ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠱᠠᠩᠨᠠᠯ ᠪᠣᠯᠤᠨᠠ ᠭᠡᠪᠡ᠃ ᠰᠥᠪᠡᠭᠡᠳᠡᠢ ᠬᠥᠨᠳᠡᠯᠡᠨ ᠡᠴᠡ᠂
— ᠪᠢ ᠡᠨᠡ ᠡᠪᠦᠭᠡᠨ ᠢ᠋ ᠮᠡᠳᠡᠨᠡ᠃ ᠡᠨᠡ ᠪᠣᠯ ᠪᠦᠬᠦ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠵᠢᠳᠬᠦᠬᠦ ᠶ᠋ᠢ ᠤᠷᠤᠯᠳᠤᠨ ᠶᠠᠪᠤᠳᠠᠭ ᠬᠥᠮᠦᠨ ᠲᠤᠯᠠ ᠪᠢᠳᠡᠨ ᠳ᠋ᠦ᠍ ᠲᠤᠰᠠᠲᠠᠢ ᠳᠠᠭᠠᠭᠠᠯᠭᠠᠪᠤᠷᠢ ᠶ᠋ᠢ ᠥᠭᠴᠦ ᠪᠣᠯᠤᠨᠠ᠂ ᠡᠪᠦᠭᠡᠨ ᠴᠢ ᠴᠠᠭᠠᠨᠠ ᠪᠠᠨ ᠵᠣᠭᠰᠣᠭᠠᠳ ᠬᠦᠯᠢᠶᠡᠵᠦ ᠪᠠᠢᠭᠲᠤᠨ ᠭᠡᠪᠡ᠃
ᠳᠠᠷᠠᠭᠠ ᠳ᠋ᠤᠨᠢ ᠬᠡᠷᠡᠭ ᠮᠡᠳᠡᠭᠦᠯᠬᠦ ᠪᠡᠷ ᠨᠣᠣᠰᠣᠨ ᠳᠡᠪᠡᠯ ᠲᠡᠢ ᠠᠭᠠᠳ ᠮᠦᠰᠡᠯᠢᠮ ᠴᠠᠭᠠᠨ ᠮᠠᠯᠠᠭᠠᠢ ᠲᠠᠢ ᠡᠢᠮᠦ ᠠᠷᠠᠪ ᠮᠠᠶᠢᠭ ᠤ᠋ᠨ ᠬᠤᠪᠴᠠᠰᠤ
ᠡᠮᠦᠰᠦᠭᠰᠡᠨ ᠬᠥᠮᠦᠨ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠥᠮᠥᠳᠥ ᠨᠢ ᠤᠷᠠᠭᠳᠠᠵᠤ ᠰᠠᠯᠪᠠᠷᠠᠨ ᠤᠨᠵᠢᠢᠵᠠᠢ᠃ ᠲᠡᠷᠡ ᠬᠤᠳᠠᠯᠳᠤᠭᠠᠴᠢᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠰᠥᠭᠥᠳᠦᠨ ᠬᠠᠭᠠᠨ ᠤ᠋ ᠰᠢᠷᠡᠭᠡᠨ ᠳ᠋ᠦ᠍ ᠣᠢᠷᠠᠲᠤᠵᠤ ᠭᠠᠷ ᠢ᠋ᠶ᠋ᠠᠨ ᠵᠠᠩᠭᠢᠳᠤᠨ ᠴᠡᠭᠡᠵᠢ ᠪᠡᠨ ᠪᠠᠯᠪᠠᠵᠤ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠥᠭᠦᠯᠡᠨᠡ᠃
— ᠡᠨᠡ ᠴᠢᠨᠢ ᠶᠠᠭᠤ ᠭᠡᠳ ᠪᠠᠢᠭᠠ ᠶᠤᠮ? ᠡᠭᠦᠨ ᠦ᠌ ᠦᠭᠡ ᠶ᠋ᠢ ᠪᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠦ ᠪᠠᠲᠤ ᠬᠠᠭᠠᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠬᠡᠯᠡᠮᠦᠷᠴᠢ ᠡᠴᠡ᠂
— ᠡᠨᠡ ᠪᠣᠯ ᠪᠤᠬᠠᠷ ᠤ᠋ᠨ ᠬᠤᠳᠠᠯᠳᠤᠭᠠᠴᠢᠨ ᠂ ᠪᠤᠰᠤᠳ ᠠᠷᠪᠠᠨ ᠬᠣᠶᠠᠷ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠠᠬᠠᠯᠠᠭᠴᠢ ᠨᠢ ᠶᠤᠮ᠃ ᠡᠳᠡᠨᠠᠷ ᠲᠠᠨ ᠤ᠋ ᠴᠡᠷᠢᠭ ᠢ᠋ ᠳᠠᠭᠠᠯᠳᠤᠨ ᠶᠠᠪᠤᠵᠤ ᠲᠡᠢᠨ ᠳ᠋ᠦ᠍ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠬᠤᠪᠴᠠᠰᠤ ᠵᠦᠢᠯ ᠢ᠋ ᠴᠡᠷᠢᠭ ᠦ᠋ᠳ ᠡᠴᠡ ᠬᠤᠳᠠᠯᠳᠤᠨ ᠠᠪᠳᠠᠭ ᠶᠤᠮ ᠭᠡᠨᠡ᠃ ᠲᠡᠭᠡᠭᠡᠳ ᠡᠨᠡ ᠪᠤᠬᠠᠷ ᠤ᠋ᠨ ᠬᠤᠳᠠᠯᠳᠤᠭᠠᠴᠢᠳ ᠢ᠋ ᠲᠠᠨ ᠤ᠋ ᠴᠡᠷᠢᠭ ᠦ᠋ᠳ ᠵᠣᠳᠣᠵᠤ ᠪᠦᠬᠦ ᠡᠳ᠋ ᠶᠠᠭᠤᠮᠠ ᠶ᠋ᠢ ᠪᠤᠯᠢᠶᠠᠨ ᠠᠪᠤᠯᠠ ᠭᠡᠵᠦ ᠭᠣᠮᠣᠳᠠᠯ ᠮᠡᠳᠡᠭᠦᠯᠵᠦ ᠪᠠᠢᠨᠠ ᠭᠡᠵᠦ ᠲᠠᠢᠯᠪᠤᠷᠢᠯᠠᠪᠠ᠃
ᠪᠠᠲᠤ ᠬᠠᠭᠠᠨ ᠶᠡᠬᠡᠳᠡ ᠬᠥᠭᠵᠢᠵᠦ ᠵᠠᠯᠢ ᠲᠠᠢ ᠨᠢᠳᠦ ᠪᠡᠷ ᠠᠨᠢᠪᠬᠢᠨ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠷ ᠡᠪᠦᠳᠦᠭ ᠢ᠋ᠶ᠋ᠡᠨ ᠳᠡᠰ ᠳᠡᠰ ᠠᠯᠠᠭᠠᠳᠠᠵᠤ᠂
— ᠬᠤᠳᠠᠯᠳᠤᠭᠠᠴᠢᠨ ᠨᠠᠳᠠᠳᠤ ᠠᠰᠢᠭᠲᠠᠢ᠂ ᠬᠤᠳᠠᠯᠳᠤᠭᠠᠴᠢᠨ ᠪᠣᠯ ᠬᠡᠷᠡᠭ ᠲᠡᠢ ᠲᠠᠸᠠᠷ ᠢ᠋ ᠠᠪᠴᠢᠷᠠᠳᠠᠭ ᠶᠤᠮ᠃ ᠲᠡᠢᠨ ᠳ᠋ᠦ᠍ ᠤᠳᠠᠭᠠᠨ ᠶᠠᠪᠤᠭᠠ ᠮᠢᠨᠦ ᠴᠡᠷᠢᠭ ᠦ᠋ᠳ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠪᠦᠬᠦ ᠡᠳ᠋ ᠪᠠᠶᠠᠯᠢᠭ ᠢ᠋ᠶ᠋ᠠᠨ ᠬᠣᠯᠠ ᠠᠪᠴᠤ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠲᠤᠯᠠ ᠡᠳᠡᠭᠡᠷ ᠬᠤᠳᠠᠯᠳᠤᠭᠠᠴᠢᠳ ᠲᠡᠳᠡᠨ ᠳ᠋ᠦ᠍ ᠴᠦ᠍ ᠬᠡᠷᠡᠭ ᠲᠡᠢ᠃ ᠨᠠᠳᠠᠳᠤ ᠦᠨᠡᠨᠴᠢ ᠬᠤᠳᠠᠯᠳᠤᠭᠠᠴᠢᠳ ᠢ᠋ ᠳᠣᠷᠣᠮᠵᠢᠯᠠᠭᠰᠠᠨ ᠬᠡᠨ ᠨᠢᠭᠡᠨ ᠬᠥᠮᠦᠨ ᠪᠣᠯ ᠦᠬᠦᠯ ᠢ᠋ᠶ᠋ᠡᠨ ᠦᠵᠡᠨᠡ᠃ ᠴᠢᠮᠠᠶ᠋ᠢ ᠲᠡᠭᠡᠵᠦ ᠳᠡᠭᠡᠷᠡᠮᠳᠡᠭᠰᠡᠨ ᠰᠢᠷᠠ ᠨᠣᠬᠠᠢ ᠨᠤᠭᠤᠳ ᠢ᠋ ᠴᠢ ᠵᠢᠭᠠᠵᠤ ᠥᠭᠴᠦ ᠴᠢᠳᠠᠬᠤ ᠊ᠤᠤ?
— ᠲᠠᠨ ᠤ᠋ ᠴᠡᠷᠢᠭ ᠦ᠋ᠳ ᠪᠣᠯ ᠬᠠᠪᠤᠷ ᠤ᠋ᠨ ᠴᠠᠭ ᠲᠤ᠌ ᠨᠢᠰᠦᠨ ᠢᠷᠡᠳᠡᠭ ᠰᠢᠪᠠᠭᠤ ᠮᠡᠲᠦ ᠲᠣᠭᠠ ᠲᠣᠮᠰᠢ ᠦᠭᠡᠢ ᠣᠯᠠᠨ ᠶᠤᠮ᠃ ᠭᠡᠪᠡᠴᠦ ᠲᠡᠷᠡᠬᠦ ᠨᠠᠮᠠᠶ᠋ᠢ ᠳᠣᠷᠣᠮᠵᠢᠯᠠᠭᠰᠠᠨ ᠬᠥᠮᠦᠰ ᠬᠡᠷᠪᠡ ᠤᠴᠠᠷᠠᠪᠠᠰᠤ ᠪᠢ ᠲᠡᠳᠡᠨ ᠢ᠋ ᠵᠢᠭᠠᠵᠤ ᠴᠢᠳᠠᠨᠠ᠃
ᠰᠥᠪᠡᠭᠡᠳᠡᠢ ᠬᠥᠨᠳᠡᠯᠡᠨ ᠡᠴᠡ ᠨᠢ ᠄
— ᠥᠴᠦᠬᠡᠨ ᠵᠥᠪᠯᠡᠯᠭᠡ ᠬᠡᠯᠡᠬᠦ ᠶ᠋ᠢ ᠵᠥᠪᠰᠢᠶᠡᠷᠡᠨᠡ ᠤᠤ? ᠡᠨᠡ ᠡᠪᠦᠭᠡᠨ ᠢ᠋ ᠰᠡᠷᠢᠭᠦᠯᠭᠡ ᠶ᠋ᠢᠨ ᠲᠠᠬᠢᠶᠠ ᠬᠠᠳᠠᠭᠠᠯᠠᠭᠴᠢ ᠪᠥᠭᠡᠳ ᠬᠠᠷᠢ ᠭᠠᠵᠠᠷ ᠤ᠋ᠨ ᠬᠤᠳᠠᠯᠳᠤᠭᠠᠴᠢᠳ ᠢ᠋ ᠬᠠᠮᠠᠭᠠᠯᠠᠬᠤ ᠬᠡᠯᠡᠮᠦᠷᠴᠢ ᠪᠡᠷ ᠲᠣᠮᠢᠯᠠ᠃ ᠡᠨᠡ ᠪᠣᠯ ᠠᠷᠭᠠ ᠮᠡᠬᠡ ᠲᠡᠢ ᠬᠥᠮᠦᠨ᠂ ᠲᠡᠳᠡᠨ ᠢ᠋ ᠬᠠᠮᠠᠭᠠᠯᠠᠵᠤ ᠴᠢᠳᠠᠬᠤ ᠶ᠋ᠢᠨ ᠳᠡᠭᠡᠷᠡ ᠥᠪᠡᠷ ᠢ᠋ ᠪᠡᠨ ᠴᠦ᠍ ᠮᠠᠷᠲᠠᠬᠤ ᠦᠭᠡᠢ ᠪᠢᠵᠡ? ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍᠂
— ᠲᠡᠭᠡᠶᠡ ᠭᠡᠵᠦ ᠪᠠᠲᠤ ᠬᠠᠭᠠᠨ ᠬᠥᠯ ᠢ᠋ᠶ᠋ᠡᠨ ᠳᠣᠷᠣᠭᠰᠢ ᠲᠠᠯᠪᠢᠬᠤ ᠳ᠋ᠤᠨᠢ ᠲᠡᠭᠦᠨ ᠢ᠋ ᠴᠡᠷᠢᠭ ᠦ᠋ᠳ ᠲᠣᠰᠴᠤ ᠰᠢᠷᠡᠭᠡᠨ ᠡᠴᠡ ᠪᠠᠭᠤᠬᠤ ᠳ᠋ᠤᠨᠢ ᠲᠤᠰᠠᠯᠠᠪᠠ᠃ ᠪᠠᠲᠤ ᠬᠠᠭᠠᠨ ᠰᠢᠭᠤᠳ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠦ᠌ ᠵᠦᠭ ᠣᠴᠢᠵᠤ ᠦᠵᠡᠪᠡᠰᠦ ᠤᠴᠠᠷᠠᠵᠤ ᠪᠠᠷᠠᠯᠬᠠᠬᠤ ᠶ᠋ᠢ ᠬᠦᠰᠡᠭᠴᠢᠳ ᠲᠠᠯᠠ ᠪᠦᠬᠦᠨ ᠳ᠋ᠦ᠍ ᠵᠢᠭᠰᠠᠨ ᠵᠣᠭᠰᠣᠵᠠᠢ᠃
— ᠠᠭᠤᠤ ᠶᠡᠬᠡ ᠵᠣᠷᠢᠭᠲᠠᠨ ᠰᠠᠢᠨ ᠬᠠᠭᠠᠨ ᠲᠠ ᠪᠢᠳᠡᠨ ᠦ᠌ ᠦᠭᠡ ᠶ᠋ᠢ ᠰᠣᠨᠣᠰᠤᠨᠠ ᠤᠤ? ᠭᠡᠵᠦ ᠪᠠᠷᠬᠢᠷᠠᠯᠳᠤᠵᠤ ᠪᠠᠢᠪᠠ᠃ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠬᠠᠵᠠᠭᠤ ᠠ᠋ᠴᠠ ᠨᠢ᠂
— ᠡᠳᠡ ᠪᠦᠭᠦᠳᠡ ᠶ᠋ᠢ ᠤᠯᠠᠭᠠᠨ ᠮᠠᠩᠭᠤᠰ ᠤ᠋ᠨ ᠵᠦᠭ ᠬᠥᠭᠡᠭᠡᠵᠦ ᠶᠠᠪᠤᠭᠤᠯ ᠭᠡᠵᠦ ᠪᠢ ᠴᠢᠮᠠᠲᠤ ᠬᠡᠯᠡᠭᠡ ᠦᠭᠡᠢ ᠪᠢᠯᠢᠤ᠂ ᠴᠢᠨᠦ ᠡᠭᠦᠷᠭᠡ ᠪᠣᠯ ᠳᠠᠢᠳᠤᠬᠤ ᠠ᠋ᠴᠠ ᠪᠤᠰᠤ ᠬᠡᠷᠡᠭ ᠵᠠᠷᠭᠤ ᠲᠠᠰᠤᠯᠤᠨ ᠰᠠᠭᠣᠬᠴᠢᠨ ᠪᠢᠰᠢ᠂ ᠴᠡᠷᠢᠭ ᠦ᠋ᠳ ᠡᠳᠡ ᠪᠦᠭᠦᠳᠡ ᠶ᠋ᠢ ᠡᠨᠳᠡ ᠡᠴᠡ ᠬᠥᠭᠡᠭᠡᠵᠦ ᠭᠡᠷ ᠣᠷᠣᠨ ᠠ᠋ᠴᠠ ᠵᠠᠢᠯᠠᠭᠤᠯ ᠭᠡᠪᠡ᠃
ᠲᠠᠲ᠋ᠠᠷ ᠤ᠋ᠨ ᠲᠦᠮᠡᠲᠦ ᠨᠤᠭᠦᠳ ᠣᠯᠠᠨ ᠬᠡᠰᠡᠭ ᠠᠩᠭᠢ ᠪᠣᠯᠤᠨ ᠤᠷᠤᠭᠰᠢ ᠳᠠᠪᠰᠢᠨ ᠪᠠᠢᠬᠤ ᠵᠠᠮ ᠳ᠋ᠠᠭᠠᠨ ᠲᠣᠬᠢᠶᠠᠯᠳᠤᠭᠰᠠᠨ ᠬᠣᠲᠠ ᠲᠣᠰᠬᠣᠨ ᠨᠤᠭᠤᠳ ᠢ᠋ ᠳᠡᠭᠡᠷᠡᠮᠳᠡᠬᠦ ᠳ᠋ᠦ᠍ ᠪᠡᠶᠡ ᠪᠡᠶᠡᠰ ᠲᠡᠭᠡᠨ ᠰᠠᠭᠠᠳ ᠪᠣᠯᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠭᠠᠷ ( ᠤ᠋ᠨ ) ᠬᠤᠷᠤᠭᠤ ᠮᠡᠲᠦ ᠬᠣᠰᠢᠭᠤᠷᠠᠵᠤ ᠳᠠᠷᠬᠠᠨ ᠶᠠᠪᠤᠨᠠ᠃ ᠠᠩ ᠠᠪᠠᠯᠠᠷᠠ ᠶᠠᠪᠤᠭᠠ ᠮᠡᠲᠦ ᠪᠡᠷ ᠮᠣᠩᠭᠣᠯᠴᠤᠳ ᠣᠷᠣᠰ ᠤ᠋ᠨ ᠨᠤᠲᠤᠭ ᠢ᠋ ᠡᠵᠡᠯᠡᠨ ᠠᠪᠤᠭᠠᠳ ᠠᠷᠠᠰᠤ ᠪᠤᠯᠢᠭᠠᠷᠢ᠂ ᠵᠠᠷ ᠵᠡᠪᠰᠡᠭ ᠪᠣᠯᠪᠠᠰᠤᠷᠠᠭᠤᠯᠬᠤ᠂ ᠬᠤᠪᠴᠠᠰᠤ ᠬᠤᠨᠠᠷ ᠣᠶᠣᠭᠤᠯᠬᠤ ᠳ᠋ᠤ᠌ ᠬᠡᠷᠡᠭᠯᠡᠬᠦ ᠤᠷᠠᠴᠤᠳ ᠠ᠋ᠴᠠ ᠪᠤᠰᠤ ᠬᠥᠮᠦᠨ ᠪᠦᠬᠦᠨ ᠢ᠋ ᠬᠦᠢᠰᠦ ᠲᠡᠮᠲᠡᠷᠢᠨ ᠳᠠᠭᠤᠰᠬᠠᠬᠤ ᠶ᠋ᠢ ᠤᠷᠤᠯᠳᠤᠵᠤ ᠪᠠᠢᠪᠠ᠃
ᠮᠣᠩᠭᠣᠯ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠨᠦ᠍ᠭᠦᠳ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠭᠠᠵᠠᠷ ᠤ᠋ᠨ ᠬᠠᠰᠢᠶᠠ ᠬᠦᠷᠢᠶᠡ ᠪᠦᠬᠦᠨ ᠳ᠋ᠦ᠍ ᠲᠦᠷᠢᠨ ᠣᠷᠣᠭᠠᠳ᠂
— ᠪᠠᠲᠤ ᠬᠠᠭᠠᠨ ᠪᠢᠳᠡᠨ ᠢ᠋ ᠬᠠᠮᠢᠭᠠ ᠠᠪᠴᠢᠷᠠᠭᠰᠠᠨ ᠶᠤᠮ ᠪᠣᠢ? ᠲᠡᠷᠡ ᠪᠢᠳᠡᠨ ᠢ᠋ ᠪᠠᠶᠠᠰᠬᠠᠵᠤ ᠬᠡᠯᠡᠬᠦ ᠳ᠋ᠡᠭᠡᠨ ᠣᠷᠣᠰ ᠤ᠋ᠳ ᠪᠤᠯᠠᠭᠠᠨ ᠮᠠᠯᠠᠭᠠᠢ ᠲᠠᠢ᠂ᠮᠢᠨᠵᠢ ᠶ᠋ᠢᠨ ᠳᠡᠪᠡᠯ ᠲᠡᠢ ᠶᠠᠪᠤᠳᠠᠭ ᠲᠤᠯᠠ ᠪᠢᠳᠡ ᠲᠡᠳᠡᠭᠡᠷ ᠢ᠋ ᠠᠪᠴᠤ ᠡᠮᠦᠰᠦᠭᠡᠳ ᠴᠥᠮ ᠶᠡᠬᠡᠰ ᠨᠣᠶᠠᠳ ᠪᠠ ᠪᠠᠶᠠᠨ ᠬᠤᠳᠠᠯᠳᠤᠭᠠᠴᠢᠨ ᠰᠢᠭ᠋ ᠶᠠᠪᠤᠵᠠᠭᠠᠨᠠ ᠭᠡᠰᠡᠨ ᠴᠢᠨᠢ ᠬᠠᠷᠢᠨ ᠪᠤᠯᠢᠭᠠᠷᠢ ᠶ᠋ᠢᠨ ᠭᠤᠲᠤᠯ ᠲᠠᠢ ᠭᠠᠭᠴᠠᠬᠠᠨ ᠴᠤ᠌ ᠣᠷᠣᠰ ᠬᠥᠮᠦᠨ ᠢ᠋ ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ᠂ ᠴᠥᠮ ᠭᠡᠷ ᠲᠡᠭᠡᠨ ᠦᠢᠯᠡᠳᠦᠭᠰᠡᠨ ᠨᠡᠬᠡᠮᠡᠯ ᠮᠠᠯᠠᠭᠠᠢ ᠲᠠᠢ᠂ ᠬᠣᠨᠢᠨ ᠤ᠋ ᠨᠡᠬᠡᠢ ᠳᠡᠪᠡᠯ ᠲᠡᠢ᠂ ᠬᠥᠯ ᠳ᠋ᠡᠭᠡᠨ ᠬᠣᠯᠲᠣᠰᠣᠨ ᠱᠠᠬᠠᠢ ᠡᠮᠦᠰᠦᠭᠰᠡᠨ ᠶᠤᠮ᠃ ᠪᠢᠳᠡ ᠡᠨᠳᠡ ᠢᠷᠡᠬᠦ ᠬᠡᠷᠡᠭ ᠦᠭᠡᠢ ᠪᠠᠢᠵᠠᠢ᠃ ᠮᠠᠨ ᠤ᠋ ᠮᠣᠷᠢᠳ ᠪᠣᠯ ᠭᠦᠨ ᠵᠤᠵᠠᠭᠠᠨ ᠴᠠᠰᠤᠨ ᠳᠣᠣᠷᠠ ᠠ᠋ᠴᠠ ᠡᠪᠡᠰᠦ ᠣᠯᠵᠤ ᠢᠳᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠬᠠᠭᠤᠴᠢᠨ ᠰᠦᠷᠡᠯ ᠳᠠᠷᠠᠰᠤ ᠢᠳᠡᠵᠦ ᠡᠪᠡᠳᠴᠢᠯᠡᠭᠡᠳ ᠪᠠᠢᠨᠠ᠂ᠤᠳᠠᠯ ᠦᠭᠡᠢ ᠪᠢᠳᠡ ᠮᠣᠷᠢᠳ ᠠ᠋ᠴᠠ ᠪᠠᠨ ᠰᠠᠯᠬᠤ ᠪᠠᠢᠬᠠ᠂ ᠲᠡᠭᠡᠪᠡᠯ ᠣᠷᠣᠰ ᠤ᠋ᠳ ᠠ᠋ᠴᠠ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠮᠣᠷᠢᠳ ᠠᠯᠤᠰ ᠤ᠋ᠨ ᠣᠨᠣᠯᠭᠠ ᠳ᠋ᠤ᠌ ᠲᠣᠬᠢᠷᠠᠬᠤ ᠦᠭᠡᠢ᠃ ᠠᠴᠢᠶᠠᠨ ᠤ᠋ ᠲᠡᠷᠭᠡᠨ ᠳ᠋ᠦ᠍ ᠶᠠᠭᠤ ᠠᠴᠢᠬᠤ ᠪᠠᠨ ᠪᠢᠳᠡ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠭᠠᠭᠴᠠᠬᠠᠨ ᠦᠬᠡᠷ ᠦ᠋ᠨ ᠮᠢᠬᠠ ᠠᠴᠢᠭᠠᠳ ᠨᠢᠭᠡ ᠴᠦ᠍ ᠦᠨᠡᠭᠡᠨ ᠦ᠌ ᠠᠷᠠᠰᠤ ᠦᠭᠡᠢ ᠶᠠᠪᠤᠬᠤ ᠭᠡᠵᠢ ᠤᠤ? ᠡᠨᠡ ᠵᠠᠮ ᠬᠠᠷᠭᠤᠢ ᠨᠢ ᠪᠦᠰᠡᠯᠡᠬᠦᠢᠴᠡ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠪᠥᠭᠡᠳ ᠨᠢᠭᠡ ᠴᠦ᠍ ᠡᠪᠡᠰᠦ ᠪᠣᠷᠳᠣᠭᠠ ᠪᠠᠢᠬᠤ ᠦᠭᠡᠢ᠂ ᠮᠠᠭᠤ ᠵᠠᠯᠢᠲᠠᠨ ᠨᠤᠭᠤᠳ ᠪᠦᠬᠦ ᠶᠠᠭᠤᠮᠠ ᠪᠠᠨ ᠮᠣᠷᠢᠲᠠᠢ ᠬᠥᠮᠦᠨ ᠶᠠᠪᠤᠵᠤ ᠦᠯᠦ ᠪᠣᠯᠬᠤ ᠶᠡᠬᠡ ᠰᠢᠭᠤᠢ ᠳᠣᠲᠣᠷᠠ ᠨᠢᠭᠤᠵᠠᠢ ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠵᠠᠭᠠᠨᠠ᠃
ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠳ ᠣᠯᠵᠠ ᠠᠰᠢᠭ ᠮᠠᠭᠤ ᠣᠯᠳᠠᠬᠤ ᠳᠣᠳᠣᠮ ᠤᠯᠠᠮ ᠬᠣᠷᠣᠰᠴᠤ ᠣᠯᠵᠠᠯᠠᠨ ᠠᠪᠤᠭᠴᠢᠳ ᠢ᠋ ᠦᠵᠡᠨ ᠶᠠᠳᠠᠵᠤ ᠲᠡᠳᠡᠨ ᠦ᠌ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ ᠨᠢᠴᠦᠭᠦᠯᠡᠨ ᠠᠪᠴᠤ ᠤᠷᠠᠩᠬᠠᠢ ᠬᠤᠪᠴᠠᠰᠤ ᠶ᠋ᠢ ᠴᠦ᠍ ᠮᠤᠯᠲᠤᠯᠤᠨ ᠠᠪᠳᠠᠭ ᠪᠠᠢᠯᠠ᠃ ᠬᠠᠮᠢᠭᠠ ᠬᠠᠮᠢᠶᠠ ᠦᠭᠡᠢ ᠵᠦᠩ ᠳ᠋ᠦ᠍ᠨᠢ ᠬᠠᠶᠠᠯᠠᠭᠰᠠᠨ ᠰᠢᠷᠬᠠᠲᠤᠭᠴᠢᠳ ᠣᠯᠵᠠᠯᠠᠭᠳᠠᠭᠴᠢᠳ ᠨᠢ ᠬᠥᠯᠳᠡᠵᠦ ᠦᠬᠦᠳᠡᠭ ᠪᠠᠢᠪᠠ᠃
ᠪᠠᠲᠤ ᠬᠠᠭᠠᠨ ᠰᠦᠪᠡᠭᠡᠲᠡᠢ ᠪᠠᠭᠠᠲᠤᠷ ᠬᠣᠶᠠᠷ ᠤ᠋ᠨ ᠣᠲᠷᠢᠶᠠᠳ᠋ ᠤ᠋ᠳ ᠤᠺ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠤ᠋ᠨ ᠳᠠᠭᠠᠤ ᠲᠦᠷᠭᠡᠯᠡᠨ ᠶᠠᠪᠤᠵᠤ ᠲᠡᠨᠳᠡ ᠬᠠᠷᠢ ᠣᠷᠣᠨ ᠤ᠋ ᠲᠠᠸᠠᠷ ᠤ᠋ᠨ ᠵᠣᠭᠣᠷᠢ ᠲᠠᠢ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠮᠣᠰᠺᠸᠠ ᠭᠡᠭᠴᠢ ᠵᠢᠵᠢᠭ ᠬᠣᠲᠠᠨᠠ ᠶᠠᠭᠤᠨ ᠤ᠋ ᠡᠮᠦᠨᠡ ᠬᠦᠷᠬᠦ ᠶ᠋ᠢ ᠵᠣᠷᠢᠵᠠᠭᠠᠪᠠ᠃
ᠥᠷᠥᠭᠡᠰᠦᠨ ᠨᠢᠳᠦᠲᠦ ᠵᠠᠩᠵᠤᠨ ᠥᠪᠡᠷ ᠦ᠋ᠨ ᠳᠡᠷᠭᠡᠳᠡ ᠪᠤᠬᠠᠷ ᠣᠷᠣᠨ ᠤ᠋ ᠬᠡᠳᠦᠨ ᠬᠤᠳᠠᠯᠳᠤᠭᠠᠴᠢᠳ ᠢ᠋ ᠠᠪᠴᠤ ᠶᠠᠪᠤᠳᠠᠭ ᠪᠠᠢᠭᠰᠠᠨ ᠪᠠ ᠲᠡᠷᠡ ᠪᠠᠭᠤᠳᠠᠯᠯᠠᠬᠤ ᠪᠦᠷᠢ ᠳ᠋ᠡᠭᠡᠨ ᠴᠥᠮ ᠶᠠᠮᠠᠷ ᠵᠠᠮ ᠢ᠋ᠶ᠋ᠠᠷ ᠶᠠᠭᠠᠬᠢᠵᠤ ᠢᠷᠡᠭᠰᠡᠨ ᠪᠣᠢ? ᠳᠠᠯᠠᠢ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠶᠠᠮᠠᠷ ᠰᠢᠭ᠋ ᠲᠠᠸᠠᠷ ᠢ᠋ ᠠᠪᠴᠢᠷᠠᠳᠠᠭ ᠬᠢᠭᠡᠳ ᠵᠡᠷᠯᠢᠭ ᠣᠷᠣᠰ ᠤ᠋ᠳ ᠠ᠋ᠴᠠ ᠶᠠᠭᠤ ᠬᠤᠳᠠᠯᠳᠤᠨ ᠠᠪᠳᠠᠭ᠂ ᠮᠣᠰᠺᠸᠠ ᠭᠡᠵᠦ ᠶᠠᠮᠠᠷ ᠬᠣᠲᠠ ᠪᠣᠢ? ᠲᠡᠨᠳᠡᠬᠢ ᠶ᠋ᠢᠨ ᠬᠤᠳᠠᠯᠳᠤᠭᠠᠴᠢᠳ ᠬᠠᠮᠢᠭᠠ ᠰᠠᠭᠤᠳᠠᠭ᠂ ᠲᠡᠳᠡᠨ ᠦ᠌ ᠪᠠᠷᠠᠭᠠᠨ ᠤ᠋ ᠵᠣᠭᠣᠷᠢ ᠨᠤᠭᠤᠳ ᠬᠠᠮᠢᠭᠠ ᠪᠠᠢᠳᠠᠭ ? ᠲᠡᠳᠡ ᠥᠪᠡᠷᠰᠡᠳ ᠦ᠋ᠨ ᠲᠠᠯᠬᠠ ᠶ᠋ᠢ ᠬᠠᠮᠢᠭᠠ ᠨᠢᠭᠤᠭᠰᠠᠨ ᠪᠣᠢ? ᠬᠤᠳᠠᠯᠳᠤᠭᠠ ᠬᠢᠬᠦ ᠳ᠋ᠦ᠍ ᠠᠰᠢᠭ ᠣᠯᠵᠠ ᠲᠠᠢ ᠤᠤ? ᠬᠤᠳᠠᠯᠳᠤᠭᠠᠴᠢᠳ ᠬᠤᠳᠠᠯᠳᠤᠭᠠᠨ ᠤ᠋ ᠶᠠᠪᠤᠳᠠᠯ ᠬᠠᠮᠢᠭᠠ ᠠ᠋ᠴᠠ ᠰᠤᠷᠤᠭᠰᠠᠨ ᠪᠣᠢ? ᠭᠡᠵᠦ ᠪᠠᠢᠨ ᠪᠠᠢᠨ ᠯᠠᠪᠯᠠᠨ ᠠᠰᠠᠭᠤᠳᠠᠭ ᠪᠠᠢᠯᠠ᠃ ᠪᠠᠲᠤ ᠬᠠᠭᠠᠨ ᠤ᠋ ᠬᠠᠲᠤᠳ ᠪᠠ ᠲᠡᠭᠦᠨ ᠦ᠌《ᠳᠣᠯᠣᠭᠠᠨ ᠣᠳᠣᠳ 》ᠨᠢ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠦ᠌ ᠣᠲ᠋ᠷᠢᠶᠠᠳ᠋ ᠤ᠋ᠳ ᠤ᠋ᠨ ᠳᠠᠷᠠᠭᠠ ᠶᠠᠪᠤᠳᠠᠭ ᠪᠠᠢᠯᠠ᠃ ᠲᠡᠷᠡ ᠰᠣᠳᠣ ᠵᠠᠩᠵᠤᠨ ᠤ᠋ ᠲᠠᠭᠠᠯᠠᠯ ᠡᠢᠮᠦ ᠪᠠᠢᠵᠠᠢ᠃ ᠵᠠᠩᠵᠤᠨ ᠲᠡᠳᠡᠨ ᠢ᠋ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠵᠦᠢᠯ ᠢ᠋ᠶ᠋ᠡᠨ ᠠᠬᠤᠭᠤᠯᠳᠠᠭ ᠳᠣᠯᠣᠭᠠᠨ ᠰᠦᠮᠡ ᠳ᠋ᠡᠭᠡᠨ ᠬᠣᠴᠣᠷᠬᠤ ᠶ᠋ᠢ ᠦᠯᠦ ᠵᠥᠪᠰᠢᠶᠡᠷᠡᠵᠦ᠂ ᠣᠳᠣ ᠨᠤᠭᠤᠳ ᠨᠠᠮᠠᠶ᠋ᠢ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠭᠠᠵᠠᠷ ᠬᠠᠮᠲᠤ ᠶᠠᠪᠤᠭ ᠭᠡᠵᠦ ᠪᠠᠲᠤ ᠬᠠᠭᠠᠨ ᠬᠡᠯᠡᠵᠦ ᠪᠠᠢᠵᠠᠢ᠃ ᠬᠠᠲᠤᠳ ᠨᠢ ᠪᠤᠰᠤᠳ ᠠᠶᠠᠭᠠᠴᠢᠳ ᠤ᠋ᠨ ᠬᠠᠮᠲᠤ ᠡᠩ ᠦ᠋ᠨ ᠰᠡᠦᠬᠡ ᠲᠡᠷᠭᠡᠨᠡ ᠰᠠᠭᠤᠵᠤ ᠶᠠᠪᠤᠨᠠ᠃ ᠭᠠᠭᠴᠠᠬᠠᠨ ᠶᠡᠬᠡ ᠬᠠᠲᠤᠨ ᠮᠣᠩᠭᠣᠯ ᠡᠬᠡᠨᠡᠷ ᠨᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠪᠣᠳᠣᠭ ᠠᠯᠲᠠ ᠪᠠᠷ ᠲᠣᠨᠣᠯᠵᠢᠯᠠᠨ ᠴᠢᠮᠡᠭᠰᠡᠨ ᠠᠯᠲᠠᠳᠠᠭᠰᠠᠨ ᠰᠠᠴᠤᠭ ᠮᠣᠨᠴᠣᠭ ᠲᠠᠢ ᠤᠯᠠᠭᠠᠨ ᠲᠡᠷᠭᠡᠨ ᠳ᠋ᠦ᠍ ᠰᠠᠭᠤᠵᠤ ᠶᠠᠪᠤᠳᠠᠭ ᠪᠠᠢᠯᠠ᠃ ᠷᠶᠡᠽᠡᠨ ᠦ᠌ ᠬᠠᠮᠪᠤ ᠯᠠᠮᠠ ᠲᠡᠷᠡ ᠲᠡᠷᠭᠡᠨ ᠳ᠋ᠦ᠍ ᠤᠷᠢᠳ ᠶᠠᠪᠤᠵᠤ ᠪᠠᠢᠵᠠᠢ᠃ ᠲᠣᠬᠢᠶᠠᠯᠳᠤᠭᠰᠠᠨ ᠣᠷᠣᠰ ᠤ᠋ᠳ ᠲᠡᠷᠡ ᠵᠠᠭᠠᠯᠮᠠᠢᠲᠠᠢ ᠤᠯᠠᠭᠠᠨ ᠲᠡᠷᠭᠡ ᠶ᠋ᠢ ᠦᠵᠡᠭᠡᠳ ᠳᠠᠳᠤᠭᠰᠠᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠡᠪᠦᠳᠦᠭ ᠰᠥᠬᠥᠷᠡᠨ ᠮᠥᠷᠭᠥᠨᠡ᠃
ᠭᠣᠣᠯ ᠤ᠋ᠨ ᠨᠢᠭᠡᠨ ᠡᠷᠭᠢᠯᠲᠡ ᠳᠡᠭᠡᠷᠡ ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠬᠠᠷᠠ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠠᠲᠠᠵᠤ ᠳᠡᠷᠭᠡᠳᠡᠭᠦᠷ ᠢ᠋ᠶ᠋ᠡᠨ ᠶᠠᠪᠤᠭᠠ ᠣᠲ᠋ᠷᠢᠶᠠᠳ᠋ ᠢ᠋ ᠥᠩᠭᠡᠷᠡᠭᠦᠯᠦᠭᠡᠳ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠪᠡᠶᠡ ᠬᠠᠮᠠᠭᠠᠯᠠᠭᠰᠠᠨ ᠵᠠᠭᠤᠨ ᠴᠡᠷᠢᠭ ᠢ᠋ ᠵᠢᠭᠰᠠᠭᠠᠪᠠ᠃ ᠲᠡᠭᠦᠨ ᠦ᠌ ᠳᠡᠷᠭᠡᠳᠡᠭᠦᠷ ᠥᠩᠭᠡᠷᠡᠭᠰᠡᠨ ᠣᠯᠠᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠪᠤᠯᠢᠭᠠᠷᠢ ᠪᠣᠭᠴᠣ ᠲᠠᠢ ᠡᠯᠳᠡᠪ ᠵᠦᠢᠯ ᠦ᠋ᠨ ᠡᠳ᠋ ᠶᠠᠭᠤᠮᠠ ᠪᠠ ᠰᠢᠭᠤᠳᠠᠢ ᠲᠠᠢ ᠲᠠᠷᠢᠶᠠ ᠪᠤᠳᠠᠭᠠ ᠠᠴᠢᠭᠰᠠᠨ ᠨᠢᠭᠡ ᠬᠣᠶᠠᠷ ᠢᠯᠡᠭᠦᠦ ᠮᠣᠷᠢᠳ ᠢ᠋ ᠲᠣᠰᠪᠣᠷᠢ ᠳ᠋ᠠᠭᠠᠨ ᠬᠥᠲᠥᠯᠦᠭᠰᠡᠨ ᠠᠵᠢ᠃ ᠲᠦᠷᠦᠭᠦᠨ ᠦ᠌ ᠤᠲ᠋ᠷᠢᠶᠠᠳ᠋ ᠤ᠋ᠨ ᠬᠣᠢᠨᠠ ᠶᠠᠪᠤᠭᠠ ᠴᠢᠷᠭᠠᠨ ᠳ᠋ᠤ᠌ ᠪᠠᠲᠤ ᠬᠠᠭᠠᠨ ᠤ᠋ ᠳᠣᠯᠣᠭᠠᠨ ᠬᠠᠲᠤᠳ ᠠᠶᠠᠭᠠᠴᠢᠳ ᠤ᠋ᠨ ᠬᠠᠮᠲᠤᠪᠠᠷ ᠶᠠᠪᠤᠪᠠ᠃
ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠴᠡᠷᠢᠭ ᠢ᠋ ᠳᠠᠭᠤᠳᠠᠭᠠᠳ ᠲᠡᠭᠦᠨ ᠳ᠋ᠦ᠍ ᠨᠢᠭᠡ ᠶᠠᠭᠤᠮᠠ ᠰᠢᠪᠡᠨᠡᠨ ᠬᠡᠯᠡᠪᠡ᠃
ᠨᠢᠭᠡᠳᠦᠭᠡᠷ ᠬᠠᠲᠤᠨ ᠤ᠋ ᠰᠠᠭᠤᠭᠰᠠᠨ ᠤᠯᠠᠭᠠᠨ ᠲᠡᠷᠭᠡ ᠶ᠋ᠢ ᠭᠤᠷᠪᠠᠨ ᠴᠠᠭᠠᠨ ᠮᠣᠷᠢᠨ ᠳ᠋ᠤ᠌ ᠬᠥᠯᠵᠡᠢ᠃ ᠲᠡᠷᠭᠡᠨ ᠦ᠌ ᠡᠮᠦᠨᠡ ᠮᠣᠷᠢ ᠵᠢᠯᠣᠭᠣᠳᠤᠭᠴᠢ ᠵᠢᠳᠠ ᠪᠠᠷᠢᠨ ᠰᠠᠭᠤᠵᠤ ᠡᠭᠦᠨ ᠦ᠌ ᠬᠣᠶ᠋ᠢᠨᠠ ᠠ᠋ᠴᠠ ᠪᠠᠭᠠᠪᠠᠭᠠᠢ ᠶ᠋ᠢᠨ ᠠᠷᠠᠰᠤᠨ ᠪᠦᠲᠡᠭᠡᠯᠭᠡ ᠲᠡᠢ᠂ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠭᠣᠶᠣᠮᠰᠣᠭ ᠬᠡᠷᠡᠭᠯᠡᠯ ᠲᠡᠢ ᠲᠠᠪᠤᠨ ᠴᠢᠷᠭᠠ ᠶᠠᠪᠤᠪᠠ᠃ ᠭᠡᠲᠡᠯᠡ ᠲᠡᠷᠭᠡ ᠨᠦ᠍ᠭᠦᠳ ᠴᠥᠮ ᠵᠣᠭᠰᠣᠪᠠ᠃ ᠵᠠᠩᠵᠤᠨ ᠤ᠋ ᠥᠩᠭᠡ ᠶ᠋ᠢᠨ ᠳᠡᠪᠡᠯ ᠲᠡᠢ ᠲᠠᠷᠭᠤᠨ ᠬᠠᠲᠤᠨ ᠲᠡᠷᠭᠡᠨ ᠡᠴᠡ ᠪᠠᠭᠤᠵᠤ ᠮᠣᠩᠭᠣᠯ ᠤ᠋ᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠴᠠᠰᠤᠨ ᠳᠡᠭᠡᠷᠡ ᠥᠷᠥᠭᠡᠰᠦᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠨᠤᠭᠤᠯᠤᠨ ᠰᠠᠭᠤᠵᠤ ᠲᠡᠷᠭᠡ ᠬᠥᠳᠡᠯᠬᠦ ᠶ᠋ᠢ ᠬᠦᠯᠢᠶᠡᠨᠡ᠃ ᠪᠠᠲᠤ ᠬᠠᠭᠠᠨ ᠶᠡᠷᠦ ᠬᠥᠳᠡᠯᠬᠦ ᠦᠭᠡᠢ ᠰᠠᠭᠤᠵᠤ ᠯᠠ ᠪᠠᠢᠪᠠ᠃ ᠨᠢᠭᠡ ᠴᠡᠷᠢᠭ ᠲᠡᠷᠢᠭᠦᠨ ᠬᠠᠲᠤᠨ ᠳ᠋ᠤ᠌ ᠣᠴᠢᠵᠤ᠂
— ᠣᠳᠣ ᠬᠤᠷᠳᠤᠨ ᠶᠠᠪᠤᠬᠤ ᠪᠣᠯᠤᠨᠠ᠃ ᠴᠢᠷᠭᠠᠨ ᠳᠣᠲᠣᠷᠠ ᠪᠠᠨ ᠣᠷᠣᠵᠤ ᠰᠠᠭᠤ ᠭᠡᠵᠦ ᠵᠠᠩᠵᠤᠨ ᠬᠡᠯᠡᠵᠦ ᠪᠠᠢᠨᠠ ᠭᠡᠪᠡ᠃
ᠬᠣᠷᠭᠣᠢ ᠭᠠᠳᠠᠷ ᠲᠠᠢ ᠬᠦᠷᠮᠡ᠂ ᠠᠷᠠᠰᠤᠨ ᠳᠡᠪᠡᠯ ᠲᠡᠢ ᠬᠣᠶᠠᠳᠤᠭᠠᠷ ᠬᠠᠲᠤᠨ ᠬᠦᠷᠦᠯᠴᠡᠨ ᠢᠷᠡᠬᠦ ᠶ᠋ᠢ ᠦᠵᠡᠪᠡᠰᠦ ᠴᠢᠷᠭᠠᠨ ᠳ᠋ᠤ᠌ ᠭᠤᠷᠪᠠᠨ ᠵᠢᠵᠢᠭ ᠮᠣᠷᠢ ᠬᠥᠯᠵᠡᠢ᠃ ᠡᠨᠡ ᠭᠤᠷᠪᠠᠨ ᠮᠣᠷᠢ ᠪᠣᠯ ᠴᠠᠪ ᠴᠠᠭᠠᠨ ᠳᠡᠯ ᠲᠠᠢ᠂ ᠰᠢᠷᠭᠠ ᠵᠢᠰᠦᠮ ᠲᠡᠢ ᠠᠵᠢ᠃ ᠲᠦᠷᠦᠭᠦᠨ ᠦ᠌ ᠮᠣᠷᠢᠨ ᠳᠡᠭᠡᠷᠡ ᠬᠠᠭᠤᠴᠢᠨ ᠬᠣᠷᠭᠣᠢ ᠳᠡᠪᠡᠯ ᠲᠡᠢ ᠵᠠᠯᠠᠭᠤ ᠬᠥᠲᠥᠴᠢ ᠰᠠᠭᠤᠨᠠ᠃ ᠴᠢᠷᠭᠠ ᠠᠭᠠᠵᠢᠮ ᠢ᠋ᠶ᠋ᠠᠷ ᠶᠠᠪᠤᠨᠠ᠃ ᠤᠴᠢᠷ ᠨᠢ ᠲᠡᠭᠦᠨ ᠦ᠌ ᠰᠡᠭᠦᠯ ᠡᠴᠡ ᠬᠤᠸᠠᠭᠴᠢ ᠦᠨᠢᠶᠡ ᠤᠶᠠᠵᠠᠢ᠃ ᠲᠡᠷᠡ ᠦᠨᠢᠶᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠣᠯᠵᠠᠯᠠᠭᠳᠠᠭᠰᠠᠨ ᠪᠤᠷᠵᠢᠭᠢᠷ ᠦᠰᠦᠲᠡᠢ ᠣᠷᠣᠰ ᠬᠥᠪᠡᠭᠦᠨ᠂ ᠣᠭᠣᠰᠣᠷ ᠲᠠᠢ ᠬᠥᠲᠥᠯᠦᠭᠳᠡᠵᠦ ᠶᠠᠪᠤᠭᠠ ᠦᠨᠢᠶᠡ ᠶ᠋ᠢ ᠵᠠᠷᠢᠮ ᠳ᠋ᠠᠭᠠᠨ ᠴᠢᠩᠭᠠᠭᠠᠬᠤ ᠪᠣᠯᠪᠠᠴᠤ ᠣᠯᠵᠠᠯᠠᠭᠳᠠᠭᠰᠠᠨ ᠬᠥᠪᠡᠭᠦᠨ ᠲᠡᠭᠦᠨ ᠢ᠋ ᠰᠢᠯᠪᠢᠭᠦᠷᠳᠡᠵᠦ ᠶᠠᠪᠤᠨᠠ᠃ ᠦᠨᠢᠶᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠠᠴᠢᠶᠠ ᠲᠠᠢ ᠭᠤᠷᠪᠠᠨ ᠴᠢᠷᠭᠠ ᠳᠠᠭᠠᠵᠤ ᠲᠡᠭᠦᠨ ᠦ᠌ ᠰᠡᠭᠦᠯᠴᠢ ᠶ᠋ᠢᠨ ᠬᠢ ᠳᠡᠭᠡᠷᠡ ᠣᠯᠵᠠᠯᠠᠭᠳᠠᠭᠰᠠᠨ ᠭᠤᠷᠪᠠᠨ ᠣᠷᠣᠰ ᠡᠮᠡᠭᠲᠡᠢ ᠰᠠᠭᠤᠵᠤ ᠶᠠᠪᠤᠪᠠ᠃ ᠪᠤᠰᠤᠳ ᠬᠠᠲᠤᠳ ᠤ᠋ᠨ ᠰᠠᠭᠤᠵᠤ ᠶᠠᠪᠤᠭᠠ ᠴᠢᠷᠭᠠ ᠨᠤᠭᠤᠳ ᠴᠥᠮ ᠠᠳᠠᠯᠢ ᠶᠡᠬᠡ ᠠᠴᠢᠶᠠ ᠲᠠᠢ ᠪᠠᠢᠪᠠ᠃ ᠲᠡᠳᠡᠨ ᠦ᠌ ᠮᠣᠷᠢᠳ ᠤ᠋ᠨ ᠵᠢᠰᠦ ᠲᠤᠰ ᠲᠤᠰ ᠨᠢᠭᠡ ᠨᠢ ᠬᠢᠯᠢᠩ ᠬᠠᠷᠠ᠂ ᠪᠤᠰᠤᠳ ᠨᠢ ᠰᠠᠷᠠᠯ᠂ ᠬᠠᠯᠢᠭᠤᠨ ᠤᠯᠠᠭᠠᠨ ᠪᠤᠭᠤᠷᠤᠯ ᠵᠢᠰᠦ ᠲᠡᠢ ᠠᠵᠢ᠃ ᠺᠢᠫᠴᠡᠺ ᠦ᠋ᠨ ᠪᠠᠶᠠᠨᠳᠧᠷ ᠬᠠᠭᠠᠨ ᠤ᠋ ᠥᠬᠢᠨ— ᠵᠢᠷᠭᠤᠳᠤᠭᠠᠷ ᠬᠠᠲᠤᠨ ᠤ᠋ ᠰᠠᠭᠤᠭᠰᠠᠨ ᠴᠢᠷᠭᠠ ᠶ᠋ᠢᠨ ᠬᠣᠢᠨᠠ ᠳᠤᠯᠠᠭᠠᠨ ᠨᠡᠮᠨᠡᠭᠡ ᠲᠡᠢ ᠬᠣᠶᠠᠷ ᠬᠤᠷᠳᠤᠨ ᠮᠣᠷᠢ ᠶ᠋ᠢ ᠺᠢᠫᠴᠡᠺ ᠦ᠋ᠨ ᠴᠡᠷᠢᠭ ᠬᠥᠲᠥᠯᠦᠨ ᠶᠠᠪᠤᠯᠠ᠃ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠶᠠᠪᠤᠭᠰᠠᠨ ᠭᠤᠷᠪᠠᠨ ᠬᠠᠷᠠ ᠮᠣᠷᠢᠨ ᠳ᠋ᠤ᠌ ᠣᠷᠣᠭᠤᠯᠤᠭᠰᠠᠨ ᠴᠢᠷᠭᠠ ᠬᠣᠭᠣᠰᠣᠨ ᠪᠠᠢᠵᠠᠢ᠃ ᠪᠦᠬᠦ ᠴᠢᠷᠭᠠ ᠵᠣᠭᠰᠣᠬᠤ ᠶ᠋ᠢᠨ ᠬᠠᠮᠲᠤ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠬᠠᠲᠤᠨ ᠭᠠᠷᠴᠤ ᠡᠪᠦᠳᠦᠭ ᠢ᠋ᠶ᠋ᠡᠨ ᠰᠥᠭᠥᠳᠦᠨ ᠵᠠᠩᠵᠤᠨ ᠤ᠋ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠨᠡ᠃
— ᠶᠦᠯᠳᠥ᠋ᠽ ᠬᠠᠲᠤᠨ ᠬᠠᠮᠢᠭᠠ (ᠪᠠᠢᠨᠠ) ᠪᠣᠢ? ᠭᠡᠵᠦ ᠪᠠᠲᠤ ᠬᠠᠭᠠᠨ ᠠᠰᠠᠭᠤᠪᠠ᠃
ᠴᠡᠷᠢᠭ ᠨᠢ ᠪᠠᠷᠰ ᠤ᠋ᠨ ᠥᠩᠭᠡᠲᠦ ᠮᠣᠷᠢᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠬᠥᠮᠦᠨ ᠦ᠌ ᠵᠦᠭ ᠭᠦᠶᠦᠵᠦ ᠣᠴᠢᠭᠠᠳ ᠬᠥᠯ ᠢ᠋ᠶ᠋ᠡᠷ ᠴᠠᠰᠤ ᠪᠤᠵᠢᠭᠢᠨᠠᠭᠤᠯᠤᠭᠰᠠᠭᠠᠷ ᠡᠷᠭᠢᠵᠦ ᠢᠷᠡᠭᠡᠳ᠂
— ᠶᠦᠯᠳᠥ᠋ᠽ ᠬᠠᠲᠤᠨ ᠥᠪᠡᠷ ᠦ᠋ᠨ ᠠᠶᠠᠭᠠᠴᠢᠨ ᠤ᠋ ᠬᠠᠮᠲᠤ ᠮᠣᠷᠢ ᠤᠨᠤᠭᠠᠳ ᠲᠦᠷᠦᠭᠦᠯᠡᠵᠦ ᠲᠠᠩᠨᠠᠭᠤᠯ ᠤ᠋ᠨ ᠣᠲ᠋ᠷᠢᠶᠠᠳ᠋ ᠳᠡᠭᠡᠷᠡ ᠣᠴᠢᠬᠤ ᠪᠠᠷ ᠶᠠᠪᠤᠭᠰᠠᠨ ᠭᠡᠨᠡ ᠭᠡᠵᠦ ᠬᠡᠯᠡᠪᠡ᠃
ᠪᠠᠲᠤ ᠬᠠᠭᠠᠨ ᠵᠠᠭᠤᠲᠤ ᠶ᠋ᠢᠨ ᠨᠣᠶᠠᠨ ᠺᠦᠨᠳᠥ᠋ᠶᠡ ᠶ᠋ᠢ ᠳᠡᠷᠭᠡᠳᠡ ᠪᠡᠨ ᠳᠠᠭᠤᠳᠠᠨ ᠠᠪᠴᠢᠷᠠᠭᠠᠳ ᠰᠢᠷᠦᠭᠦᠨ ᠳᠠᠭᠤ ᠪᠠᠷ᠂
— ᠷᠶᠡᠽᠡᠨ ᠦ᠌ ᠣᠢᠷᠠ ᠪᠠᠢᠭᠠ ᠮᠢᠨᠦ ᠯᠠᠭᠧᠷ ᠲᠸ᠋ ᠳᠠᠷᠤᠢ ᠤᠷᠢᠭᠲᠤᠨ ᠭᠡᠵᠦ ᠪᠦᠬᠦ ᠬᠠᠲᠤᠳ ᠲᠸ᠋ ᠬᠡᠯᠡᠭᠲᠦᠨ᠃ ᠲᠡᠳᠡᠨᠡᠷ ᠲᠡᠨᠳᠡ ᠠᠮᠠᠷᠠᠵᠤ ᠪᠠᠢᠪᠠᠰᠤ ᠵᠣᠬᠢᠨᠠ᠃ ᠶᠡᠷᠦ ᠵᠠᠮ ᠠ᠋ᠴᠠ ᠭᠠᠷᠴᠤ ᠪᠣᠯᠬᠤ ᠦᠭᠡᠢ᠂ ᠡᠨᠳᠡ ᠲᠡᠨᠳᠡ ᠦᠭᠡᠢ ᠣᠷᠣᠰ ᠤ᠋ᠨ ᠳᠡᠭᠡᠷᠡᠮᠴᠦᠳ ᠲᠡᠨᠦᠨ ᠶᠠᠪᠤᠨᠠ᠃ ᠪᠢᠳᠡ ᠲᠡᠢᠨ ᠦ᠌ ᠭᠠᠵᠠᠷ ᠲᠤᠯᠤᠯᠳᠤᠬᠤ ᠲᠤᠯᠠ ᠲᠡᠨᠳᠡ ᠡᠮᠡᠭᠲᠡᠢᠴᠦᠳ ᠲᠦ᠍ ᠠᠶᠤᠯᠲᠠᠢ ᠭᠡᠵᠦ ᠬᠡᠯᠡᠪᠡ᠃ ᠲᠡᠨᠳᠡ ᠡᠴᠡ ᠪᠠᠲᠤ ᠬᠠᠭᠠᠨ ᠵᠠᠮ ᠢ᠋ᠶ᠋ᠠᠷ ᠤᠷᠤᠭᠰᠢ ᠲᠦᠷᠦᠭᠦᠯᠡᠨ ᠳᠣᠪᠲᠣᠯᠬᠤ ᠶ᠋ᠢᠨ ᠬᠠᠮᠲᠤ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠠᠮᠠᠭᠠᠯᠠᠬᠤ ᠵᠠᠭᠤᠨ ᠴᠡᠷᠢᠭ ᠳᠠᠭᠠᠯᠳᠤᠪᠠ᠃ ᠬᠠᠲᠤᠳ ᠤᠬᠢᠯᠠᠨ ᠬᠠᠰᠬᠢᠷᠤᠯᠳᠤᠵᠤ ᠡᠬᠢᠯᠡᠵᠡᠭᠡᠪᠡ᠃
— ᠪᠢᠳᠡ ᠳᠤᠷᠠ ᠦᠭᠡᠢ ᠪᠠᠢᠨᠠ᠃ ᠵᠠᠩᠵᠤᠨ ᠲᠠᠢ ᠭᠠᠭᠴᠠᠬᠠᠨ《ᠬᠠᠷᠠ ᠠᠵᠢᠯ 》 ᠤ᠋ᠨ ᠬᠠᠲᠤᠨ ᠶᠠᠭᠤᠨ ᠳ᠋ᠤ᠌ ᠶᠠᠪᠤᠳᠠᠭ ᠪᠢᠯᠡ? ᠶᠦᠯᠳᠥ᠋ᠽ ᠬᠠᠲᠤᠨ ᠪᠠᠰᠠ ᠪᠤᠴᠠᠵᠤ ᠢᠷᠡᠪᠡᠰᠦ ᠲᠠᠭᠠᠷᠠᠨᠠ᠃ ᠪᠢᠳᠡᠨᠡᠷ ᠬᠠᠭᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠲᠡᠭᠦᠨ ᠦ᠌ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠭᠠᠵᠠᠷ ᠤ᠋ᠨ ᠮᠤᠬᠤᠷ ᠬᠦᠷᠲᠡᠯᠡ ᠶᠠᠪᠤᠨᠠ ᠭᠡᠯᠴᠡᠨᠡ᠃
ᠪᠠᠲᠤ ᠬᠠᠭᠠᠨ ᠤ᠋ ᠲᠤᠰᠢᠶᠠᠯ ᠢ᠋ ᠰᠢᠳᠤᠷᠭᠤ ᠭᠦᠢᠴᠡᠳᠬᠡᠭᠴᠢ ᠺᠦᠨᠳᠥ᠋ᠶᠡ ᠶ᠋ᠢᠨ ᠵᠢᠭᠠᠪᠤᠷᠢ ᠪᠠᠷ ᠴᠡᠷᠢᠭ ᠦ᠋ᠳ ᠬᠠᠲᠤᠳ ᠢ᠋ ᠴᠢᠷᠭᠠᠨ ᠳ᠋ᠤ᠌ ᠬᠦᠴᠦᠯᠡᠨ ᠰᠠᠭᠤᠯᠭᠠᠭᠠᠳ ᠷᠶᠠᠽᠠᠨ ᠤ᠋ ᠵᠦᠭ ᠵᠠᠮᠨᠠᠭᠤᠯᠪᠠ᠃ ᠲᠡᠳᠦᠢ ᠲᠡᠳᠡᠨ ᠦ᠌ ᠴᠢᠷᠭᠠ ᠶ᠋ᠢ ᠲᠠᠯᠪᠢᠭᠠᠳ ᠴᠡᠷᠢᠭ ᠰᠠᠬᠢᠨ ᠬᠠᠮᠠᠭᠠᠯᠠᠵᠤ ᠶᠠᠪᠤᠪᠠ᠃ ᠬᠠᠲᠤᠳ ᠤ᠋ᠳ ᠠᠩᠬᠠᠨ ᠳ᠋ᠠᠭᠠᠨ ᠤᠬᠢᠯᠠᠨ ᠪᠠᠷᠬᠢᠷᠠᠨ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠰᠡᠭᠦᠯ ᠳ᠋ᠡᠭᠡᠨ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠡᠵᠡᠯᠡᠨ ᠰᠠᠭᠤᠭᠠᠳ ᠬᠠᠷᠢᠯᠴᠠᠨ ᠶᠠᠷᠢᠯᠴᠠᠬᠤ ᠪᠠ ᠢᠨᠢᠶᠡᠯᠳᠦᠬᠦ ᠵᠡᠷᠭᠡ ᠪᠡᠷ ᠶᠠᠪᠤᠪᠠ᠃ ᠷᠶᠠᠽᠠᠨ᠂ ᠫᠧᠷᠧᠶᠡᠰᠯᠡᠸᠯᠧ᠂ ᠢᠵᠧᠰᠯᠡᠸᠯᠧ ᠪᠠᠰᠠ ᠪᠤᠰᠤ ᠬᠣᠲᠠ ᠨᠤᠭᠤᠳ ᠲᠸ᠋ ᠶᠠᠮᠠᠷ ᠰᠠᠢᠬᠠᠨ ᠭᠣᠶᠣᠮᠰᠣᠭ ᠵᠦᠢᠯᠡᠰ ᠢ᠋ ᠬᠠᠭᠠᠨ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠢ᠋ ᠶᠠᠷᠢᠯᠴᠠᠨ ᠶᠠᠪᠤᠨᠠ᠃
— ᠳᠠᠯᠠᠢ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠢᠷᠡᠭᠰᠡᠨ ᠶᠡᠬᠡ ᠲᠠᠸᠠᠷ ᠲᠠᠢ ᠮᠣᠰᠺᠸᠠ ᠳ᠋ᠤ᠌ ᠪᠢᠳᠡ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ ᠮᠠᠨᠢ ᠮᠠᠰᠢ ᠬᠠᠷᠠᠮᠰᠠᠯᠲᠠᠢ᠂ ᠭᠡᠪᠡᠴᠦ ᠬᠠᠭᠠᠨ ᠥᠭᠯᠢᠭᠡᠴᠢ ᠬᠥᠮᠦᠨ ᠲᠤᠯᠠ ᠪᠢᠳᠡᠨ ᠢ᠋ ᠭᠣᠮᠣᠳᠠᠭᠠᠬᠤ ᠦᠭᠡᠢ ᠪᠢᠵᠡ ᠭᠡᠯᠴᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠾᠧ ᠢᠦᠢ᠂ ᠮᠡᠷᠭᠡᠨᠭᠣᠣᠠ᠂ ᠬᠦᠦᠳᠠᠭᠠᠭᠤᠯ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠠᠷᠢᠭᠤᠨ᠂ ᠵᠢᠩᠯᠢᠬᠤᠸᠠᠷ
ᠬᠢᠨᠠᠭᠴᠢ᠄ ᠲ· ᠬᠦᠮᠦᠵᠢᠯᠲᠦ᠂ ᠪᠠᠯ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ