ᠪᠠᠲᠤ ᠬᠠᠭᠠᠨ 5-11ᠦᠬᠦᠭᠴᠢᠳ ᠲᠠᠢ ᠰᠠᠯᠬᠤ ᠶ᠋ᠢᠨ ᠶᠣᠰᠣ ᠶ᠋ᠢ ᠭᠦᠢᠴᠡᠳᠬᠡᠭᠰᠡᠨ ᠨᠢ-ᠷᠶᠠᠽᠠᠨ ᠤ᠋ ᠭᠠᠵᠠᠷ ᠨᠤᠲᠤᠭ ᠰᠢᠲᠠᠵᠤ ᠪᠠᠢᠨᠠBat khaan Бат хаан-ᠷᠣᠮᠠᠨ
162ᠠᠷᠪᠠᠨ ᠨᠢᠭᠡ ᠦᠬᠦᠭᠴᠢᠳ ᠲᠠᠢ ᠰᠠᠯᠬᠤ ᠶ᠋ᠢᠨ ᠶᠣᠰᠣ ᠶ᠋ᠢ ᠭᠦᠢᠴᠡᠳᠬᠡᠭᠰᠡᠨ ᠨᠢ
ᠳᠣᠪᠲᠣᠯᠭᠠ ᠲᠡᠭᠦᠰᠪᠡ᠃ ᠲᠦᠢᠮᠡᠷ ᠦ᠋ᠨ ᠭᠠᠯ ᠨᠠᠮᠳᠠᠭᠰᠠᠭᠠᠷ ᠪᠠᠢᠨᠠ᠃ ᠦᠨᠡᠰᠦ ᠨᠡᠭᠦᠷᠡᠰᠦ ᠲᠣᠷᠲᠣᠭ ᠪᠣᠯᠤᠭᠰᠠᠨ ᠡᠪᠳᠡᠷᠬᠡᠢ ᠪᠠᠯᠭᠠᠰᠤ ᠪᠠᠷ
ᠳᠦᠭᠦᠷᠦᠭᠰᠡᠨ ᠷᠶᠡᠽᠡᠨ᠂ ᠲᠡᠷᠡ ᠰᠥᠨᠢ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠵᠤ ᠬᠡᠲᠦᠷᠬᠡᠢ ᠵᠡᠷᠡᠮᠳᠡᠭᠯᠡᠭᠳᠡᠭᠰᠡᠨ ᠬᠡᠭᠦᠷ ᠮᠥᠩᠭᠥᠨ ᠬᠣᠷᠭᠣᠢ ᠨᠥᠮᠥᠷᠴᠦ ᠬᠡᠪᠲᠡᠬᠦ ᠰᠢᠭ᠌ ᠦᠵᠡᠭᠳᠡᠨᠡ᠃ ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠢᠯᠠᠵᠤ ᠳᠠᠭᠠᠭᠤᠯᠤᠭᠰᠠᠨ ᠨᠡᠢᠰᠯᠡᠯ ᠬᠣᠲᠠ ᠪᠠᠷ ᠶᠠᠪᠤᠵᠤ ᠦᠵᠡᠬᠦ ᠶ᠋ᠢ ᠬᠦᠰᠡᠪᠡ᠃ ᠣᠢᠷᠠ ᠬᠠᠪᠢ ᠶ᠋ᠢᠨ《ᠦᠯᠦ ᠢᠯᠠᠭᠳᠠᠭᠴᠢ》ᠣᠲ᠋ᠷᠢᠶᠠᠳ᠋ ᠤ᠋ᠳ ᠲᠸ᠋ ᠡᠯᠴᠢ ᠨᠠᠷ ᠳᠠᠪᠬᠢᠨ ᠶᠠᠪᠤᠵᠤ ᠮᠠᠷᠭᠠᠰᠢ ᠨᠠᠷᠠ ᠮᠠᠨᠳᠤᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠷᠶᠡᠽᠡᠨ ᠦ᠌ ᠬᠠᠭᠠᠯᠭᠠ ᠶ᠋ᠢᠨ ᠡᠮᠦᠨᠡ ᠵᠢᠭᠰᠠᠬᠤ ᠲᠤᠰᠢᠶᠠᠯ ᠢ᠋ ᠬᠦᠷᠭᠡᠪᠡ᠃ ᠲᠠᠲ᠋ᠠᠷ ᠤ᠋ᠨ ᠣᠲ᠋ᠷᠢᠶᠠᠳ᠋ ᠤ᠋ᠳ ᠬᠥᠯᠳᠡᠭᠰᠡᠨ ᠣᠺ ᠮᠥᠷᠡᠨ ᠦ᠌ ᠡᠷᠭᠢ ᠶ᠋ᠢᠨ ᠳᠠᠭᠠᠤ ᠵᠢᠭᠳᠡ ᠪᠤᠰᠤ ᠪᠠᠷ ᠲᠠᠬᠢᠷᠯᠠᠨ ᠵᠢᠭᠰᠠᠵᠠᠢ᠃
ᠵᠠᠭᠤᠲᠤ ᠤ᠋ᠳ ᠨᠢ ᠠᠷᠪᠠᠨ ᠦᠶᠡ ᠮᠥᠷ ᠵᠢᠭᠰᠠᠵᠠᠢ᠃ ᠲᠠᠪᠢᠨ ᠴᠡᠷᠢᠭ ᠪᠦᠷᠢ ᠶ᠋ᠢᠨ ᠡᠮᠦᠨᠡ ᠦᠵᠦᠭᠦᠷ ᠲᠡᠭᠡᠨ ᠥᠩᠭᠡ ᠶ᠋ᠢᠨ ᠳᠠᠪᠤᠤ ᠴᠢᠮᠡᠭ ᠲᠡᠢ ᠵᠢᠳᠠ ᠪᠠᠷᠢᠭᠰᠠᠨ ᠡᠷᠡᠯᠬᠡᠭ ᠪᠠᠭᠠᠲᠤᠷ ᠮᠣᠷᠢ ᠤᠨᠤᠵᠤ ᠵᠣᠭᠰᠣᠬᠤ ᠪᠤᠶᠤ ᠵᠠᠭᠤᠲᠤ ᠶ᠋ᠢ ᠪᠦᠷᠢᠨ ᠡᠷᠬᠡᠲᠦ ᠵᠠᠭᠤᠨ ᠤ᠋ ᠨᠣᠶᠠᠳ ᠲᠣᠯᠣᠭᠠᠢᠯᠠᠨᠠ᠃ ᠲᠡᠭᠦᠨ ᠦ᠌ ᠬᠣᠢᠨᠠ ᠠᠷᠠᠰᠤ ᠪᠠᠷ ᠪᠦᠷᠢᠭᠰᠡᠨ ᠬᠣᠶᠠᠷ ᠪᠥᠮᠪᠥᠷ ᠲᠡᠢ ᠪᠥᠮᠪᠥᠷᠴᠢ᠂ ᠮᠥᠷᠦᠨ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠬᠥᠨᠳᠡᠯᠡᠨ ᠤᠶᠠᠭᠰᠠᠨ ᠪᠦᠷᠢᠶᠡ ᠲᠡᠢ ᠪᠦᠷᠢᠶᠡᠴᠢ ᠪᠠ ᠲᠣᠭᠣᠷᠢᠭ ᠵᠡᠰ ᠬᠠᠷᠠᠩᠭᠠ ᠪᠠᠷᠢᠭᠰᠠᠨ ᠳᠣᠬᠢᠶᠠᠴᠢ ᠨᠠᠷ ᠶᠠᠮᠠᠷ ᠴᠤ᠌ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠡᠷ ᠨᠣᠮᠣᠬᠠᠨ ᠵᠣᠭᠰᠣᠵᠤ ᠪᠠᠢᠨᠠ᠃ ᠵᠠᠭᠤᠲᠤ ᠨᠢ ᠮᠡᠳᠡᠭᠳᠡᠬᠦᠢᠴᠡ ᠪᠡᠷ ᠴᠥᠭᠡᠷᠡᠭᠰᠡᠨ ᠪᠠᠢᠵᠠᠢ᠃ ᠨᠡᠯᠢᠶᠡᠳ ᠣᠯᠠᠨ ᠠᠷᠪᠠᠲᠤ ᠨᠤᠭᠤᠳ ᠲᠤᠨᠢ ᠨᠢᠵᠡᠭᠡᠳ ᠪᠤᠶᠤ ᠬᠣᠶᠠᠷ ᠭᠤᠷᠪᠠᠨ ᠮᠣᠷᠢᠨ ᠴᠡᠷᠢᠭ ᠦ᠋ᠳ ᠳᠤᠲᠠᠭᠳᠠᠵᠤ ᠪᠠᠢᠪᠠ᠃ ᠦᠯᠡᠳᠡᠭᠰᠡᠳ ᠦ᠋ᠨ ᠳᠤᠮᠳᠠ ᠨᠢ ᠰᠢᠷᠬᠠ ᠪᠠᠨ ᠪᠣᠭᠣᠭᠰᠠᠨ ᠴᠡᠷᠢᠭ ᠦ᠋ᠳ ᠴᠥᠭᠡᠨ ᠦᠭᠡᠢ᠃ ᠡᠨᠡ ᠨᠢ ᠣᠷᠣᠰ ᠤ᠋ᠨ ᠰᠡᠯᠡᠮᠡ ᠪᠠ ᠰᠤᠮᠤ ᠶ᠋ᠢᠨ ᠮᠥᠷ ᠲᠡᠮᠳᠡᠭ ᠦ᠋ᠳ ᠪᠠᠢᠯᠠ᠃ ᠭᠣᠣᠯ ᠤ᠋ᠨ ᠳᠠᠭᠠᠤ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠬᠠᠵᠠᠭᠤ ᠪᠠ ᠵᠠᠮ ᠢ᠋ ᠳᠠᠭᠠᠵᠤ ᠦᠬᠦᠭᠴᠢᠳ ᠦ᠋ᠨ ᠬᠡᠭᠦᠷ ᠦ᠋ᠳ ᠬᠡᠪᠲᠡᠨᠡ᠃ ᠴᠢᠰᠤᠲᠠᠢ ᠪᠠᠷᠢᠴᠠᠯᠳᠤᠵᠤ ᠬᠥᠯᠳᠡᠭᠰᠡᠨ ᠬᠥᠮᠦᠰ ᠦ᠋ᠨ ᠨᠢᠴᠦᠭᠦᠨ ᠪᠡᠶᠡᠰ ᠦ᠋ᠳ ᠶᠡᠷᠦᠳᠡ ᠶ᠋ᠢᠨ ᠪᠤᠰᠤ ᠡᠯᠳᠡᠪ ᠪᠠᠢᠳᠠᠯ ᠤ᠋ᠳ ᠲᠠᠢ ᠪᠠᠷ ᠬᠡᠪᠲᠡᠨᠡ᠃ ᠡᠳᠡᠨ ᠦ᠌ ᠵᠠᠷᠢᠮ ᠨᠢ ᠠᠲᠤᠷᠢᠵᠤ ᠴᠠᠭᠠᠷᠢᠭᠯᠠᠨ ᠬᠡᠪᠲᠡᠬᠦ ᠪᠠ ᠵᠠᠷᠢᠮ ᠨᠢ ᠭᠠᠷ ᠬᠥᠯ ᠢ᠋ᠶ᠋ᠡᠨ ᠰᠠᠷᠪᠠᠢᠯᠭᠠᠵᠤ ᠵᠠᠷᠢᠮ ᠤ᠋ᠳ ᠨᠢ ᠨᠦᠬᠡᠨ ᠳ᠋ᠦ᠍ ᠲᠣᠯᠣᠭᠠᠢ ᠪᠠᠨ ᠬᠢᠵᠦ ᠴᠦ᠍ ᠬᠡᠪᠲᠡᠬᠦ ᠨᠢ ᠦᠵᠡᠭᠳᠡᠬᠦ ᠶᠤᠮ᠃ ᠭᠦᠨᠵᠡᠭᠡᠢ ᠴᠠᠰᠤᠨ ᠳᠣᠲᠣᠷᠠ ᠠ᠋ᠴᠠ ᠭᠤᠲᠤᠯ ᠢ᠋ ᠨᠢ ᠲᠠᠢᠯᠵᠤ ᠠᠪᠤᠭᠰᠠᠨ ᠨᠢᠴᠦᠭᠦᠨ ᠬᠥᠯ ᠦ᠋ᠳ ᠡᠨᠳᠡ ᠲᠡᠨᠳᠡ ᠴᠤᠬᠤᠢᠵᠤ ᠬᠠᠷᠠᠭᠳᠠᠬᠤ ᠪᠠ ᠲᠡᠳᠡᠭᠡᠷ ᠦ᠋ᠨ ᠳᠡᠭᠡᠷᠡ ᠨᠢ ᠠᠯᠠᠭ ᠲᠠᠭᠲᠠᠭᠠ ᠨᠤᠭᠤᠳ ᠬᠠᠰᠬᠢᠷᠤᠯᠳᠤᠨ ᠰᠠᠭᠤᠨᠠ᠃《ᠦᠯᠦ ᠢᠯᠠᠭᠳᠠᠭᠴᠢ》 ᠮᠢᠩᠭᠠᠲᠤ ᠨᠢ ᠭᠣᠣᠯ ᠤ᠋ᠨ ᠡᠷᠭᠢ ᠳᠠᠭᠠᠤ ᠬᠥᠳᠡᠢᠨ (ᠭᠦᠳᠦᠢᠨ) ᠵᠢᠭᠰᠠᠭᠰᠠᠨ ᠲᠤᠯᠠ ᠮᠣᠷᠢᠳ ᠤ᠋ᠨ ᠬᠥᠯ ᠨᠢ ᠴᠢᠯᠡᠵᠦ ᠵᠢᠯᠣᠭᠣ ᠪᠠᠨ ᠲᠠᠲᠠᠵᠠᠭᠠᠨᠠ᠃ ᠴᠡᠷᠢᠭ ᠦ᠋ᠨ ᠡᠪᠡᠷ ᠪᠦᠷᠢᠶᠡ ᠲᠠᠲᠠᠬᠤ ᠨᠢ ᠬᠣᠯᠠ ᠠ᠋ᠴᠠ ᠳᠤᠭᠤᠯᠳᠠᠮᠠᠭᠴᠠ ᠪᠤᠰᠤᠳ ᠪᠦᠷᠢᠶᠡ ᠨᠤᠭᠦᠳ ᠲᠡᠷᠡ ᠳᠣᠬᠢᠶᠠ ᠶ᠋ᠢ ᠲᠠᠲᠠᠨᠠ᠃ ᠨᠢᠭᠡᠳᠦᠭᠡᠷ ᠵᠠᠭᠤᠨ ᠤ᠋ ᠨᠣᠶᠠᠨ᠂
— ᠠᠩᠬᠠᠷᠤᠨ ᠰᠣᠨᠣᠰᠴᠤ ᠳᠠᠭᠠᠭᠲᠤᠨ᠁ ᠭᠡᠵᠦ ᠲᠤᠩᠭᠠᠯᠠᠭ ᠴᠢᠩᠭᠠ ᠳᠠᠭᠤ ᠪᠠᠷ ᠬᠠᠰᠬᠢᠷᠬᠤ ᠳ᠋ᠤ᠌ ᠪᠤᠰᠤᠳ ᠵᠠᠭᠤᠨ ᠤ᠋ ᠨᠣᠶᠠᠳ ᠠᠷᠪᠠᠨ ᠤ᠋ ᠳᠠᠷᠤᠭᠠ ᠨᠠᠷ ᠪᠠᠰᠠ᠂
— ᠠᠩᠬᠠᠷᠤᠨ ᠰᠣᠨᠣᠰᠴᠤ ᠳᠠᠭᠠᠭᠲᠤᠨ! ᠭᠡᠵᠦ ᠳᠠᠪᠲᠠᠨ ᠬᠠᠰᠬᠢᠷᠴᠠᠭᠠᠨᠠ᠃
ᠴᠡᠷᠢᠭ ᠦ᠋ᠳ ᠨᠢ ᠪᠡᠶᠡᠰ ᠢ᠋ᠶ᠋ᠡᠨ ᠴᠡᠭᠴᠡᠯᠡᠨ ᠵᠢᠯᠣᠭᠣ ᠪᠠᠨ ᠬᠤᠷᠢᠶᠠᠵᠤ ᠪᠠᠷᠢᠪᠠ᠃ ᠮᠢᠩᠭᠠᠲᠤ ᠨᠠᠮ ᠭᠦᠮ ᠪᠣᠯᠵᠤ ᠠᠩᠬᠠᠷᠤᠯᠲᠠᠢ ᠪᠠᠷ ᠨᠣᠮᠣᠬᠠᠨ ᠵᠣᠭᠰᠣᠵᠤ ᠬᠦᠯᠢᠶᠡᠨᠡ᠃ ᠲᠣᠰᠬᠣᠨ ᠤ᠋ ᠭᠠᠯ ᠤ᠋ᠨ ᠠᠶᠤᠯ ᠳ᠋ᠤ᠌ ᠠᠪᠲᠠᠭᠳᠠᠭᠠ ᠦᠭᠡᠢ ᠦᠯᠡᠳᠡᠭᠰᠡᠨ ᠰᠦᠮᠡ ᠶ᠋ᠢᠨ ᠲᠡᠨᠳᠡ ᠡᠴᠡ ᠮᠣᠷᠢᠲᠠᠢ ᠬᠡᠳᠦᠨ ᠬᠥᠮᠦᠰ ᠭᠠᠷᠴᠤ ᠢᠷᠡᠪᠡ᠃ ᠡᠮᠦᠨᠡ ᠨᠢ ᠭᠤᠷᠪᠠᠨ ᠬᠥᠮᠦᠨ ᠳᠠᠪᠬᠢᠵᠤ ᠶᠠᠪᠤᠨᠠ᠃ ᠲᠡᠳᠡ ᠨᠠᠷ ᠤ᠋ᠨ ᠳᠤᠮᠳᠠᠬᠢ ᠨᠢ ᠶᠢᠰᠦᠨ ᠥᠷᠭᠡᠨ ᠲᠤᠤᠰᠠ ᠶ᠋ᠢ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠬᠡᠭᠰᠡᠨ ᠲᠠᠪᠤᠨ ᠲᠠᠯᠠ ᠲᠠᠢ ᠴᠠᠭᠠᠨ ᠲᠤᠭ ᠢ᠋ ᠪᠠᠷᠢᠵᠤ ᠶᠠᠪᠤᠨᠠ᠃ ᠲᠡᠭᠦᠨ ᠦ᠌ ᠡᠰᠢ ᠨᠢ(ᠶ᠋ᠢᠨ) ᠦᠵᠦᠭᠦᠷ ᠲᠡᠬᠢ ᠠᠯᠲᠠᠨ ᠵᠡᠪᠡ ᠶ᠋ᠢᠨ ᠳᠣᠣᠷᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠰᠢᠷᠭᠠᠯ ᠠᠵᠢᠷᠭᠠᠨ ᠰᠡᠭᠦᠯ ᠤᠶᠠᠭᠠᠲᠠᠢ ᠪᠠᠢᠵᠠᠢ᠃ ᠲᠤᠭ ᠳᠡᠭᠡᠷᠡ ᠨᠢ ᠬᠡᠷᠢᠶᠡ ᠰᠢᠪᠠᠭᠤ ᠶ᠋ᠢ ᠰᠠᠪᠠᠷ ᠲᠠᠭᠠᠨ ᠠᠳᠬᠤᠭᠰᠠᠨ ᠨᠠᠴᠢᠨ ᠱᠣᠩᠬᠣᠷ ᠰᠢᠪᠠᠭᠤ ᠶ᠋ᠢ ᠠᠯᠲᠠᠨ ᠤᠲᠠᠰᠤ ᠪᠠᠷ ᠨᠡᠬᠡᠵᠦ ᠣᠶᠣᠭᠰᠠᠨ ᠠᠵᠢ᠃ ᠲᠡᠳᠡᠭᠡᠷ ᠦ᠋ᠨ ᠬᠣᠢᠨᠠ ᠠ᠋ᠴᠠ ᠥᠭᠡᠷᠡ ᠨᠢᠭᠡᠨ ᠮᠣᠷᠢᠲᠠᠢ ᠬᠥᠮᠦᠨ ᠶᠠᠪᠤᠪᠠ᠃ ᠲᠡᠳᠡ ᠷᠶᠡᠽᠡᠨ ᠦ᠌ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠸᠠᠳᠢᠮ ᠳ᠋ᠠᠨᠢᠯᠢᠴ ᠺᠣᠹᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠵᠢᠳᠠᠨ ᠤ᠋ ᠦᠵᠦᠭᠦᠷ ᠲᠦ᠍ ᠬᠠᠳᠬᠤᠵᠤ᠂ ᠠᠪᠴᠤ ᠶᠠᠪᠤᠭᠠ ᠲᠡᠷᠡ ᠲᠣᠯᠣᠭᠠᠢ ᠶ᠋ᠢᠨ ᠨᠢᠳᠦ ᠨᠢ ᠠᠨᠢᠭᠰᠠᠨ ᠪᠠ ᠨᠢᠭᠤᠷ ᠴᠢᠷᠠᠢ ᠨᠢ ᠰᠢᠷᠦᠭᠦᠨ ᠪᠥᠭᠡᠳ ᠲᠠᠢᠪᠤᠩ ᠤᠷᠲᠤ ᠪᠤᠭᠤᠷᠤᠯ ᠰᠠᠬᠠᠯ ᠪᠠ ᠮᠥᠩᠭᠥᠨ ᠴᠠᠭᠠᠨ ᠦᠰᠦ ᠨᠢ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠴᠦ ᠦᠵᠡᠭᠳᠡᠨᠡ᠃ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠪᠠᠷ ᠴᠠᠭᠠᠨ ᠬᠠᠨᠲᠠᠭᠠᠵᠠ ᠲᠠᠢ᠂ ᠴᠠᠭᠠᠨ ᠢᠯᠭᠢᠨ ᠭᠤᠲᠤᠯ ᠡᠮᠦᠰᠦᠭᠰᠡᠨ᠂ᠪᠥᠬᠡ ᠶ᠋ᠢᠨ ᠥᠨᠳᠥᠷ ᠴᠠᠭᠠᠨ ᠣᠷᠣᠢᠪᠴᠢ ᠮᠠᠯᠠᠭᠠᠢ ᠲᠠᠢ ᠬᠣᠶᠠᠷ ᠬᠢᠶᠡ ᠭᠠᠯ ᠰᠢᠭ᠋ ᠭᠢᠯᠪᠠᠯᠵᠠᠭᠰᠠᠨ ᠬᠠᠷᠠ ᠨᠢᠳᠦᠲᠡᠢ᠂ ᠨᠢᠳᠦ ᠠᠯᠳᠠᠮᠠ ᠭᠤᠸᠠ ᠰᠠᠢᠬᠠᠨ ᠴᠠᠭᠠᠨ ᠠᠵᠢᠷᠭᠠ ᠶ᠋ᠢ ᠴᠤᠯᠪᠤᠭᠤᠷ ᠠ᠋ᠴᠠ ᠨᠢ ᠬᠥᠲᠥᠯᠵᠦ ᠶᠠᠪᠤᠭᠠ᠃ ᠲᠡᠷᠡ ᠮᠣᠷᠢ ᠭᠤᠸᠠᠯᠢᠭ ᠰᠠᠢᠬᠠᠨ ᠲᠣᠯᠣᠭᠠᠢ ᠪᠠᠨ ᠡᠰᠢ ᠲᠡᠰᠢ ᠨᠢ ᠬᠠᠶᠠᠯᠠᠵᠤ ᠲᠠᠰᠤ ᠬᠠᠷᠠ ᠲᠤᠭᠤᠷᠠᠢ ᠲᠠᠢ ᠬᠥᠩᠭᠡᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠠᠪᠴᠢᠯᠠᠨ ᠳᠡᠪᠬᠡᠴᠡᠨ ᠮᠤᠯᠲᠤᠷᠠᠨ ᠣᠳᠬᠤ ᠶ᠋ᠢ ᠡᠷᠡᠮᠡᠯᠵᠡᠨᠡ᠃ ᠠᠯᠲᠠᠨ ᠤᠲᠠᠰᠤ ᠪᠠᠷ ᠤᠭᠠᠯᠵᠠᠯᠠᠨ ᠣᠶᠣᠭᠰᠠᠨ ᠬᠠᠷᠠ ᠬᠦᠷᠡᠩ ᠬᠢᠯᠢᠩ ᠨᠥᠮᠥᠷᠭᠡ ᠪᠡᠷ ᠪᠥᠷᠬᠥᠯᠡᠭᠰᠡᠨ ᠲᠡᠷᠡ ᠮᠣᠷᠢ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠᠨ ᠤ᠋ ᠤᠯᠠᠭᠠᠨ ᠲᠤᠶᠠᠭᠠᠨ ᠳ᠋ᠤ᠌ ᠦᠵᠡᠰᠬᠦᠯᠡᠩᠲᠦ ᠲᠣᠭᠯᠠᠭᠠᠮ ᠰᠢᠭ᠋ ᠭᠢᠯᠪᠠᠯᠵᠠᠨᠠ᠃ ᠮᠣᠩᠭᠣᠯᠴᠤᠳ ᠡᠨᠡ ᠴᠠᠭᠠᠨ ᠮᠣᠷᠢ ᠶ᠋ᠢ ᠬᠦᠨᠳᠦᠳᠬᠡᠨ ᠬᠠᠷᠠᠵᠠᠭᠠᠵᠤ ᠮᠣᠩᠭᠣᠯᠴᠤᠳ ᠲᠡᠳᠡᠨ ᠳ᠋ᠦ᠍ ᠰᠢᠨᠡ ᠢᠯᠠᠯᠲᠠ ᠶ᠋ᠢ ᠦᠭᠭᠦᠭᠰᠡᠨ ᠲᠡᠢᠨ ᠦ᠌ ᠰᠦᠯᠳᠡ ᠪᠤᠷᠬᠠᠨ᠂ ᠲᠡᠷᠡ ᠮᠣᠷᠢ ᠶ᠋ᠢ ᠤᠨᠤᠵᠤ ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠬᠦ ᠦᠭᠡᠢ ᠶᠠᠪᠤᠨᠠ ᠭᠡᠵᠦ ᠢᠲᠡᠭᠡᠨᠡ᠃
ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠪᠠᠢᠳᠠᠭ ᠲᠤᠯᠠ ᠥᠨᠥᠳᠥᠷ ᠲᠡᠷᠡ ᠴᠠᠭᠠᠨ ᠮᠣᠷᠢ ᠪᠠᠨ ᠰᠦᠯᠳᠡ ᠪᠤᠷᠬᠠᠨ ᠳ᠋ᠠᠭᠠᠨ ᠵᠣᠷᠢᠭᠤᠯᠵᠤ ᠪᠠᠢᠨᠠ᠃ ᠬᠡᠷᠪᠡ ᠬᠦᠰᠡᠪᠡᠯ ᠮᠠᠷᠭᠠᠰᠢ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠤᠨᠤᠵᠤ ᠶᠠᠪᠤᠬᠤ ᠪᠢᠵᠡ᠃ ᠲᠡᠷᠡ ᠥᠨᠥᠳᠥᠷ ᠣᠷᠣᠰ ᠤ᠋ᠳ ᠤ᠋ᠨ ᠬᠠᠷᠠ ᠮᠣᠷᠢ ᠶ᠋ᠢ ᠤᠨᠤᠵᠤ ᠶᠠᠪᠤᠨᠠ᠂ ᠭᠡᠪᠡᠴᠦ ᠮᠠᠷᠭᠠᠰᠢ ᠬᠥᠮᠦᠨ ᠬᠠᠷᠠ ᠭᠥᠷᠥᠭᠡᠰᠦ ᠶ᠋ᠢ ᠴᠦ᠍ ᠤᠨᠤᠵᠤ ᠮᠠᠭᠠᠳ᠁ ᠭᠡᠵᠦ ᠮᠣᠩᠭᠣᠯᠴᠤᠳ ᠬᠣᠭᠣᠷᠣᠨᠳᠣ ᠪᠠᠨ ᠰᠢᠪᠡᠨᠡᠨ ᠶᠠᠷᠢᠯᠴᠠᠵᠠᠭᠠᠨᠠ᠃ ᠪᠠᠲᠤ ᠬᠠᠭᠠᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠪᠡᠨ ᠳᠥᠷᠪᠡᠨ ᠬᠥᠯ ᠴᠠᠭᠠᠨ᠂ ᠮᠠᠩᠨᠠᠢ ᠳᠡᠭᠡᠷᠡ ᠪᠡᠨ ᠰᠠᠷᠠ ᠲᠠᠢ ᠠᠯᠲᠠᠨ ᠱᠠ ᠪᠠᠷ ᠴᠢᠮᠡᠭᠯᠡᠭᠳᠡᠭᠰᠡᠨ ᠭᠥᠯᠢᠮ ᠲᠡᠢ ᠲᠣᠮᠣ ᠬᠠᠷᠠ ᠮᠣᠷᠢ ᠶ᠋ᠢ ᠤᠨᠤᠵᠤ ᠶᠠᠪᠤᠨᠠ᠃ ᠲᠡᠷᠡ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠥᠩᠭᠡ ᠪᠤᠯᠢᠶᠠᠴᠠᠯᠳᠤᠭᠰᠠᠨ ᠮᠥᠩᠭᠥᠨ ᠴᠠᠭᠠᠨ ᠬᠤᠶᠠᠭ ᠲᠠᠢ᠂ ᠤᠷᠲᠤ ᠴᠠᠭᠠᠨ ᠥᠳᠥ ᠬᠠᠳᠬᠤᠭᠰᠠᠨ ᠠᠯᠲᠠᠨ ᠳᠤᠭᠤᠯᠠᠭᠠ ᠡᠮᠦᠰᠦᠭᠰᠡᠨ ᠠᠵᠢ᠃ ᠮᠣᠷᠢ ᠨᠢ ᠮᠥᠩᠭᠥᠨ ᠲᠣᠨᠣᠭ ᠲᠠᠢ᠂ ᠠᠯᠲᠠᠨ ᠪᠠᠭᠠᠪᠤᠷ ᠳᠠᠷᠤᠭᠤᠯᠭᠠ ᠲᠠᠢ᠂ ᠠᠯᠲᠠᠨ ᠳᠠᠪ ᠲᠠᠢ ᠮᠥᠩᠭᠥᠨ ᠬᠠᠵᠠᠭᠠᠷ ᠬᠤᠳᠠᠷᠭᠠ ᠬᠡᠷᠡᠭᠯᠡᠵᠡᠢ᠃ ᠡᠨᠡ ᠨᠢ ᠴᠥᠮ ᠣᠷᠣᠰ ᠤ᠋ᠨ ᠤᠷᠠᠴᠤᠳ ᠤ᠋ᠨ ᠬᠢᠴᠡ ᠪᠠᠢᠪᠠ᠃ ᠡᠨᠡ ᠮᠣᠷᠢ ᠶ᠋ᠢ ᠴᠢᠮᠡᠭᠯᠡᠵᠦ ᠣᠶᠣᠭᠰᠠᠨ ᠨᠢ ᠣᠷᠣᠰ ᠤ᠋ᠨ ᠸᠠᠩ ᠤ᠋ᠳ ᠤ᠋ᠨ ᠵᠠᠩᠰᠢᠭᠰᠠᠨ ᠶᠡᠷᠦᠳᠡ ᠶ᠋ᠢᠨ ᠴᠢᠮᠡᠭᠯᠡᠯ ᠦ᠋ᠨ ᠠᠳᠠᠯᠢ ᠪᠠᠢᠨᠠ᠃ ᠭᠤᠶᠤᠵᠤ ᠴᠢᠮᠡᠭᠯᠡᠭᠰᠡᠨ ᠮᠣᠷᠢᠳ ᠢ᠋ ᠤᠨᠤᠭᠰᠠᠨ ᠬᠠᠭᠠᠳ ᠵᠠᠩᠵᠤᠨ ᠤ᠋ ᠬᠣᠢᠨᠠ ᠠ᠋ᠴᠠ ᠶᠠᠪᠤᠬᠤ ᠪᠠ ᠲᠡᠳᠡᠭᠡᠷ ᠦ᠋ᠨ ᠳᠤᠮᠳᠠ ᠬᠢᠵᠢᠶᠡᠯᠢᠭ᠂ ᠲᠣᠮᠣ ᠪᠡᠶᠡ ᠲᠡᠢ ᠲᠣᠬᠢᠷ ᠨᠢᠷᠤᠭᠤ ᠲᠠᠢ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠣᠨᠴᠠ ᠬᠠᠷᠠᠭᠳᠠᠬᠤ ᠡᠩ ᠦ᠋ᠨ ᠰᠤᠷ ᠤ᠋ᠨ ᠲᠣᠨᠣᠭ ᠬᠡᠷᠡᠭᠯᠡᠯ ᠲᠡᠢ ᠪᠣᠭᠣᠨᠢ ᠬᠥᠯ ᠲᠡᠢ ᠵᠢᠷᠣᠭᠠ ᠬᠣᠯᠠ ᠮᠣᠷᠢ ᠶ᠋ᠢ ᠤᠨᠤᠵᠤ ᠶᠠᠪᠤᠨᠠ᠃ ᠪᠠᠲᠤ ᠬᠠᠭᠠᠨ ᠴᠡᠷᠢᠭ ᠦ᠋ᠨ ᠵᠢᠭᠰᠠᠭᠠᠯ ᠤ᠋ᠨ ᠭᠣᠣᠯ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤᠨᠢ ᠲᠠᠲ᠋ᠠᠷ ᠤ᠋ᠳ ᠪᠠ ᠮᠣᠩᠭᠣᠯᠴᠤᠳ ᠂
— ᠤᠷᠤᠭᠰᠢ ᠪᠠᠨ ᠭᠡᠵᠦ ᠬᠠᠰᠬᠢᠷᠤᠯᠳᠤᠬᠤ ᠪᠠ ᠺᠢᠫᠴᠠᠺᠴᠤᠳ ᠲᠡᠳᠡᠭᠡᠷ ᠢ᠋ ᠳᠠᠭᠤᠷᠢᠶᠠᠨ᠂
— ᠰᠠᠢᠬᠠᠨ ᠪᠠᠢᠨᠠ ᠭᠡᠵᠦ ᠬᠠᠰᠬᠢᠷᠤᠯᠳᠤᠨᠠ᠃ ᠵᠠᠩᠵᠤᠨ ᠡᠷᠭᠢᠵᠦ ᠶᠠᠪᠤᠪᠠ᠃《ᠦᠯᠦ ᠢᠯᠠᠭᠳᠠᠭᠴᠢ》 ᠵᠠᠭᠤᠲᠤ ᠪᠤᠰᠤᠳ ᠠ᠋ᠴᠠ ᠪᠠᠨ ᠲᠠᠰᠤᠷᠠᠵᠤ ᠲᠡᠭᠦᠨ ᠦ᠌ ᠬᠣᠶ᠋ᠢᠨᠠ ᠠ᠋ᠴᠠ ᠳᠠᠭᠠᠨ ᠣᠳᠪᠠ᠃ ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠪᠠᠷᠠ ᠪᠣᠯᠤᠭᠴᠢᠳ ᠤ᠋ᠨ ᠬᠠᠮᠲᠤ ᠪᠠᠷ ᠭᠣᠣᠯ ᠢ᠋ ᠬᠥᠨᠳᠡᠯᠡᠨ ᠭᠠᠷᠴᠤ ᠶᠠᠪᠤᠬᠤ ᠵᠠᠭᠤᠷᠠ ᠭᠣᠣᠯ ᠤ᠋ᠨ ᠮᠥᠰᠥᠨ ᠳᠡᠭᠡᠷᠡ ᠶᠡᠬᠡ ᠶᠡᠬᠡ ᠨᠦᠬᠡ ᠨᠤᠭᠦᠳ ᠪᠠ ᠬᠥᠮᠦᠨ ᠦ᠌ ᠬᠡᠭᠦᠷ ᠦ᠋ᠳ ᠬᠠᠷᠠᠯᠠᠵᠤ ᠬᠠᠷᠠᠭᠳᠠᠨᠠ᠃ ᠬᠣᠲᠠ ᠶ᠋ᠢᠨ ᠬᠠᠭᠠᠯᠭᠠ ᠶ᠋ᠢ ᠴᠡᠪᠡᠷᠯᠡᠭᠰᠡᠨ ᠠᠵᠢ᠃
ᠬᠡᠷᠡᠮ ᠦ᠋ᠨ ᠬᠠᠨᠠ ᠶ᠋ᠢᠨ ᠳᠡᠷᠭᠡᠳᠡ ᠣᠯᠵᠠᠯᠠᠭᠳᠠᠭᠴᠢᠳ ᠠᠵᠢᠯ ᠬᠢᠵᠦ ᠪᠠᠢᠪᠠ᠃ ᠲᠡᠳᠡᠨ ᠢ᠋ ᠭᠢᠯᠪᠠᠯᠵᠠᠭᠰᠠᠨ ᠲᠠᠬᠢᠷ ᠰᠡᠯᠡᠮᠡ ᠦ᠋ᠳ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠮᠥᠷᠥ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠪᠠᠷᠢᠭᠰᠠᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠬᠠᠷᠠᠭᠠᠯᠵᠠᠨ ᠪᠠᠢᠪᠠ᠃ ᠬᠣᠲᠠ ᠪᠦᠷᠢᠮᠦᠰᠦᠨᠡ ᠡᠪᠳᠡᠭᠳᠡᠵᠡᠢ᠃ ᠮᠣᠳᠣᠨ ᠪᠠᠢᠰᠢᠩ ᠪᠠᠷᠢᠯᠭᠠ ᠤ᠋ᠳ ᠴᠥᠮ ᠰᠢᠳᠡᠵᠦ᠂ᠨᠤᠷᠠᠭᠰᠠᠨ ᠳ᠋ᠥ᠋ᠨᠵᠡ ᠨᠤᠭᠦᠳ ᠨᠡᠭᠦᠷᠡᠰᠦ ᠲᠣᠷᠲᠣᠭ ᠪᠣᠯᠤᠨ ᠬᠠᠷᠠᠯᠠᠵᠤ ᠤᠲᠤᠭᠠ ᠪᠤᠷᠭᠢᠯᠪᠠ᠃ ᠲᠦᠯᠡᠵᠦ ᠰᠢᠲᠠᠭᠰᠠᠨ ᠮᠢᠬᠠᠨ ᠤ᠋ ᠦᠨᠦᠷ ᠬᠠᠩᠬᠤᠯᠤᠨ ᠦᠨᠦᠷᠲᠦᠵᠦ ᠪᠠᠢᠨᠠ᠃ ᠴᠣᠭᠰᠢᠵᠤ ᠨᠠᠮᠳᠠᠵᠤ ᠪᠠᠢᠭᠠ ᠭᠠᠯ ᠤ᠋ᠨ ᠳᠣᠣᠷᠠ ᠠ᠋ᠴᠠ ᠮᠠᠭᠤᠬᠠᠢ ᠪᠤᠵᠠᠷ ᠱᠠᠯᠪᠠᠭ ᠤ᠋ᠳ ᠤᠷᠤᠰᠤᠨᠠ᠃ ᠪᠠᠲᠤ ᠬᠠᠭᠠᠨ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠡᠪᠳᠡᠷᠬᠡᠢ ᠰᠠᠭᠤᠷᠢᠨᠠ ᠬᠦᠷᠦᠯᠴᠡᠨ ᠢᠷᠡᠭᠡᠳ ᠤᠷᠢᠳᠤ ᠬᠥᠮᠦᠰ ᠳᠡᠷᠭᠡᠳᠡ ᠨᠢ ᠴᠤᠭᠯᠠᠷᠠᠳᠠᠭ ᠪᠠᠢᠭᠰᠠᠨ ᠴᠢᠯᠠᠭᠤᠨ ᠳᠣᠪᠵᠢᠶᠠᠨ ᠤ᠋ ᠳᠡᠭᠡᠷᠡ ᠭᠠᠷᠪᠠ᠃ ᠡᠨᠳᠡ ᠭᠠᠯ ᠤ᠋ᠨ ᠳᠥᠯᠥ ᠤᠲᠤᠭᠠᠨ ᠳ᠋ᠤ᠌ ᠬᠠᠷᠠᠯᠠᠭᠰᠠᠨ ᠵᠡᠰ ᠬᠤᠩᠬᠠ ᠬᠡᠪᠲᠡᠵᠦ ᠪᠠᠢᠪᠠ᠃ ᠲᠡᠭᠦᠨ ᠢ᠋ ᠡᠯᠭᠦᠵᠦ ᠪᠠᠢᠭᠰᠠᠨ ᠬᠥᠨᠳᠡᠯᠡᠨ ᠮᠣᠳᠣ ᠰᠢᠲᠠᠭᠰᠠᠨ ᠲᠤᠯᠠ ᠢᠷᠭᠡᠨ ᠦ᠌ ᠬᠤᠷᠠᠯ ᠤ᠋ᠨ ᠲᠡᠷᠡ ᠬᠤᠩᠬᠠ ᠥᠷᠥᠭᠡᠰᠦᠨ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠴᠠᠰᠤᠨ ᠳ᠋ᠤ᠌ ᠰᠢᠭᠢᠳᠴᠦ ᠬᠡᠪᠲᠡᠨᠡ᠃
ᠮᠣᠩᠭᠣᠯ ᠤ᠋ᠨ ᠡᠵᠡᠨ ᠳᠡᠭᠡᠳᠦᠰ ᠦ᠋ᠨ ᠨᠢᠳᠦᠨ ᠦ᠌ ᠡᠮᠦᠨᠡ ᠰᠡᠳᠬᠢᠯ ᠬᠠᠷᠠᠯᠠᠮᠠᠷ ᠦᠵᠡᠭᠳᠡᠯ ᠬᠠᠷᠠᠭᠳᠠᠪᠠ᠃ ᠴᠢᠯᠥᠭᠡ ᠲᠠᠯᠠᠪᠠᠢ ᠶ᠋ᠢᠨ ᠳᠤᠮᠳᠠ ᠳ᠋ᠥ᠋ᠨᠵᠡ ᠪᠠᠩᠵᠠᠨ ᠡᠭᠦᠳᠡᠨ ᠬᠠᠭᠠᠯᠭᠠ᠂ ᠴᠣᠩᠬᠣᠨ ᠤ᠋ ᠮᠣᠳᠣ᠂ ᠲᠡᠷᠭᠡᠨ ᠦ᠌ ᠳᠤᠭᠤᠢ᠂ ᠴᠢᠷᠭᠠ ᠲᠡᠷᠭᠡᠨ ᠦ᠌ ᠠᠷᠠᠯ ᠪᠠ ᠷᠶᠠᠽᠠᠨ ᠤ᠋ ᠣᠷᠣᠰ ᠪᠠᠢᠰᠢᠩ ᠤ᠋ᠳ ᠤ᠋ᠨ ᠳᠤᠲᠠᠭᠤᠬᠠᠨ ᠰᠢᠲᠠᠭᠰᠠᠨ ᠦᠯᠡᠳᠡᠭᠳᠡᠯ ᠦ᠋ᠳ ᠢ᠋ ᠣᠪᠣᠭᠠᠯᠠᠵᠠᠢ᠃ ᠡᠨᠡ ᠣᠪᠣᠭᠠᠯᠠᠰᠤᠳᠠᠢ ᠵᠦᠢᠯᠡᠰ ᠳᠡᠭᠡᠷᠡ ᠷᠶᠠᠽᠠᠨ ᠢ᠋ ᠳᠠᠭᠠᠷᠢᠨ ᠳᠣᠪᠲᠣᠯᠵᠤ ᠣᠷᠣᠬᠤ ᠳ᠋ᠤ᠌ ᠦᠬᠦᠵᠦ ᠦᠷᠡᠭᠳᠡᠭᠰᠡᠨ ᠮᠣᠩᠭᠣᠯ ᠲᠠᠲ᠋ᠠᠷ ᠺᠢᠫᠴᠠᠺ ᠪᠣᠯᠤᠨ ᠪᠠᠰᠠ ᠪᠤᠰᠤ ᠬᠥᠮᠦᠰ ᠦ᠋ᠨ ᠬᠡᠭᠦᠷ ᠣᠪᠣᠭᠠᠷᠠᠨ ᠬᠡᠪᠲᠡᠨᠡ᠃ ᠡᠳᠡ ᠬᠡᠳᠦᠢᠴᠢᠨᠡᠨ ᠪᠣᠢ? ᠬᠡᠨ ᠲᠣᠭᠠᠯᠠᠵᠤ ᠪᠠᠷᠠᠬᠤ ᠪᠣᠢ? ᠡᠳᠡᠨ ᠦ᠌ ᠲᠥᠷᠥᠭᠰᠡᠨ ᠨᠤᠲᠤᠭ ᠨᠢ ᠬᠠᠮᠢᠭᠠ ᠪᠣᠯᠬᠤ ᠶ᠋ᠢ ᠬᠡᠨ ᠣᠯᠵᠤ ᠮᠡᠳᠡᠬᠦ ᠪᠣᠢ? ᠪᠠᠶᠠᠯᠢᠭ ᠣᠯᠵᠠ ᠠᠰᠢᠭ ᠢ᠋ ᠮᠣᠷᠢ ᠲᠡᠮᠡᠭᠡ ᠪᠡᠷ ᠠᠴᠢᠵᠤ ᠢᠷᠡᠨᠡ ᠭᠡᠵᠦ ᠶᠠᠪᠤᠭᠰᠠᠨ ᠠᠬᠠ ᠳᠡᠭᠦᠦ ᠡᠴᠢᠭᠡ ᠬᠦᠦ ᠪᠡᠨ ᠡᠷᠭᠢᠵᠦ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠡᠳᠦᠷ ᠰᠥᠨᠢ ᠦᠭᠡᠢ ᠪᠠᠷᠠᠭᠤᠨ ᠵᠦᠭ ᠢ᠋ ᠰᠢᠷᠲᠡᠨ ᠬᠠᠷᠠᠵᠤ ᠰᠠᠭᠤᠬᠤ ᠡᠳᠡᠨ ᠦ᠌ ᠠᠷᠤ ᠭᠡᠷ ᠦ᠋ᠨ ᠠᠮᠠᠷᠠᠭ ᠰᠠᠳᠤᠨ ᠭᠡᠷ ᠪᠦᠯᠢ ᠨᠢ ᠬᠡᠷᠬᠢᠬᠦ ᠶ᠋ᠢ ᠬᠡᠨ ᠮᠡᠳᠡᠬᠦ ᠪᠣᠢ? ᠠᠶᠤᠮᠰᠢᠭᠲᠠᠢ ᠮᠠᠭᠤᠬᠠᠢ ᠰᠢᠷᠬᠠ ᠰᠣᠷᠪᠢ ᠲᠠᠲᠠᠭᠰᠠᠨ᠂ ᠵᠣᠪᠠᠵᠤ ᠵᠦᠳᠡᠷᠡᠭᠰᠡᠨ ᠦ᠌ ᠤᠯᠠᠮ ᠠ᠋ᠴᠠ ᠲᠠᠨᠢᠰᠢ ᠦᠭᠡᠢ ᠮᠠᠭᠤᠬᠠᠢ ᠪᠣᠯᠵᠤ ᠴᠠᠷᠴᠠᠭᠰᠠᠨ ᠨᠢᠭᠤᠷ ᠴᠢᠷᠠᠢ ᠲᠠᠢ ᠬᠡᠭᠦᠷ ᠦ᠋ᠳ ᠥᠭᠡᠳᠡ ᠪᠡᠨ ᠬᠠᠷᠠᠵᠤ ᠬᠠᠷᠢ ᠶ᠋ᠢᠨ ᠬᠦᠢᠲᠡᠨ ᠲᠩᠷᠢ ᠶ᠋ᠢ ᠭᠥᠯᠢᠷᠡᠨ ᠰᠢᠷᠳᠡᠵᠦ ᠴᠢᠪ ᠴᠢᠮᠡᠭᠡ ᠦᠭᠡᠢ ᠬᠡᠪᠲᠡᠵᠡᠭᠡᠨᠡ᠃
ᠵᠠᠩᠵᠤᠨ ᠤ᠋ ᠶᠠᠷᠢᠶᠠᠨ ᠳ᠋ᠤ᠌ ᠳᠤᠷᠠᠲᠠᠢ ᠪᠠᠷᠠ ᠪᠣᠯᠤᠭᠴᠢᠳ ᠰᠠᠶᠢᠬᠠᠨ ᠮᠡᠨᠳᠦᠯᠡᠵᠦ᠂ ᠡᠳᠡᠭᠡᠷ ᠨᠥᠬᠥᠳ ᠢ᠋ ᠪᠡᠨ ᠬᠠᠷᠠᠭᠠᠳ ᠨᠠᠮ ᠭᠦᠮ ᠵᠣᠭᠰᠣᠵᠠᠭᠠᠵᠤ ᠪᠠᠢᠪᠠ᠃ ᠲᠡᠳᠡ ᠨᠠᠷ ᠤ᠋ᠨ ᠰᠦᠨᠡᠰᠦ ᠬᠠᠷᠢ ᠶ᠋ᠢᠨ ᠣᠭᠲᠠᠷᠭᠤᠢ ᠳ᠋ᠤ᠌ ᠪᠤᠴᠠᠯᠲᠠ ᠦᠭᠡᠢ ᠬᠠᠯᠢᠨ ᠤᠳᠤᠭᠠᠳ ᠬᠡᠢ ᠬᠣᠭᠣᠰᠣᠨ ᠰᠡᠭᠦᠳᠡᠷ ᠦ᠋ᠳ ᠪᠣᠯᠤᠨ ᠡᠭᠦᠯᠡ ᠶ᠋ᠢᠨ ᠴᠠᠭᠠᠨᠠ ᠪᠠᠢᠭᠠ ᠬᠤᠪᠢᠯᠭᠠᠨ ᠡᠵᠡᠨ ᠦ᠌ ᠴᠡᠷᠢᠭ ᠲᠦ᠍ ᠨᠡᠢᠯᠡᠨᠡ ᠭᠡᠵᠦ ᠪᠣᠳᠣᠨᠠ᠃ ᠪᠥᠬᠡ ᠨᠠᠷ ᠲᠡᠭᠡᠵᠦ ᠰᠤᠷᠭᠠᠮᠵᠢᠯᠠᠭᠰᠠᠨ ᠪᠢᠯᠡ᠃ ᠦᠬᠦᠭᠰᠡᠨ ᠴᠡᠷᠢᠭ ᠦ᠋ᠳ ᠶᠡᠷᠦᠳᠡ ᠶ᠋ᠢᠨ ᠡᠮᠦᠰᠴᠦ ᠶᠠᠪᠤᠳᠠᠭ ᠬᠣᠪᠴᠠᠰᠤᠲᠠᠢ ᠪᠠᠨ ᠪᠠᠢᠬᠤ ᠶᠤᠮ᠃ ᠦᠬᠦᠭᠰᠡᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠬᠥᠬᠡ ᠳᠡᠪᠡᠯ ᠪᠠ ᠤᠭᠠᠯᠵᠠ ᠲᠠᠢ ᠬᠠᠨᠲᠠᠭᠠᠵᠠ ᠶ᠋ᠢ ᠲᠠᠢᠯᠵᠤ ᠠᠪᠬᠤ ᠶ᠋ᠢ ᠡᠳᠡᠨ ᠦ᠌ ᠬᠡᠨ ᠴᠦ᠍ ᠵᠣᠷᠢᠭᠰᠠᠨ ᠦᠭᠡᠢ ᠪᠢᠯᠡ᠃ ᠤᠴᠢᠷ ᠨᠢ ᠦᠬᠦᠭᠴᠢᠳ ᠨᠢ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠰᠦᠨᠡᠰᠦᠨ ᠳ᠋ᠦ᠍ ᠣᠴᠢᠬᠤ ᠳ᠋ᠠᠭᠠᠨ ᠦᠵᠡᠮᠵᠢᠲᠡᠢ ᠪᠡᠷ ᠬᠤᠪᠴᠠᠰᠤᠯᠠᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ ᠠᠵᠢ᠃ ᠨᠡᠯᠢᠶᠡᠳ ᠣᠯᠠᠨ ᠬᠡᠭᠦᠷ ᠦ᠋ᠳ ᠦ᠋ᠨ ᠴᠡᠭᠡᠵᠢᠨ ᠳᠡᠭᠡᠷᠡ ᠨᠢ ᠲᠠᠷᠢᠶᠠ ᠪᠤᠳᠠᠭᠠ ᠪᠤᠶᠤ ᠬᠡᠰᠡᠭ ᠬᠡᠰᠡᠭ ᠮᠢᠬᠠ ᠪᠠᠷ ᠳᠦᠭᠦᠷᠭᠡᠭᠰᠡᠨ ᠵᠡᠰ ᠪᠤᠶᠤ ᠮᠣᠳᠣᠨ ᠠᠶᠠᠭᠠ ᠶ᠋ᠢ ᠲᠠᠯᠪᠢᠭᠰᠠᠨ ᠪᠠᠢᠨᠠ᠃ ᠰᠢᠯᠭᠠᠷᠠᠭᠰᠠᠨ ᠭᠠᠷᠮᠠᠭᠠᠢ ᠪᠠᠭᠠᠲᠤᠷ ᠤ᠋ᠳ ᠨᠢ ᠦᠯᠢᠭᠡᠷ ᠲᠣᠭᠣᠵᠢ ᠪᠠ ᠳᠠᠭᠤᠤ ᠬᠥᠭᠵᠢᠮ ᠪᠣᠯᠤᠭᠰᠠᠨ ᠵᠢᠷᠭᠠᠯᠠᠩ ᠤ᠋ᠨ ᠣᠷᠣᠨ ᠳ᠋ᠤ᠌ ᠥᠪᠡᠷᠰᠡᠳ ᠦ᠋ᠨ ᠲᠠᠬᠢᠷ ᠰᠡᠯᠡᠮᠡ ᠪᠡᠨ ᠪᠠᠷᠢᠭᠰᠠᠭᠠᠷ ᠣᠳᠬᠤ ᠤᠴᠢᠷ ᠲᠠᠬᠢᠷ ᠰᠡᠯᠡᠮᠡ ᠨᠤᠭᠦᠳ ᠢ᠋ ᠨᠢ ᠦᠬᠦᠭᠰᠡᠨ ᠪᠠᠭᠠᠲᠤᠷ ᠤ᠋ᠳ ᠤ᠋ᠨ ᠭᠠᠷ ᠠ᠋ᠴᠠ ᠤᠶᠠᠵᠤ ᠣᠷᠬᠢᠭᠰᠠᠨ ᠪᠠᠢᠨᠠ᠃ ᠡᠨᠡ ᠨᠠᠮ ᠭᠦᠮ ᠦ᠋ᠨ ᠳᠣᠲᠣᠷᠠ ᠭᠡᠨᠡᠳᠲᠡ ᠭᠠᠰᠠᠯᠠᠩ ᠤ᠋ᠨ ᠤᠷᠲᠤ ᠳᠠᠭᠤ ᠰᠣᠨᠣᠰᠳᠠᠪᠠ᠃ ᠡᠨᠡ ᠳᠠᠭᠤ ᠨᠢ ᠣᠪᠣᠭᠠᠯᠠᠵᠤ ᠣᠷᠬᠢᠭᠰᠠᠨ ᠬᠥᠯᠳᠡᠭᠦᠦ ᠬᠡᠭᠦᠷ ᠦ᠋ᠳ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠳᠤᠭᠤᠯᠳᠠᠪᠠ᠃ ᠲᠡᠷᠡ ᠳᠠᠭᠤ ᠨᠢ᠄
— ᠬᠦᠨᠳᠦ ᠪᠠᠢᠨᠠ······ ᠤᠰᠤ! ᠤᠰᠤ ᠭᠡᠵᠦ ᠲᠣᠳᠣᠷᠬᠠᠢ ᠪᠠᠷ ᠬᠡᠯᠡᠬᠦ ᠰᠣᠨᠣᠰᠳᠠᠨᠠ᠃
ᠮᠣᠩᠭᠣᠯᠴᠤᠳ ᠰᠠᠨᠳᠤᠷᠤᠨ ᠦᠢᠮᠡᠯᠳᠦᠵᠦ ᠲᠩᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠢ᠋ ᠰᠠᠨᠳᠤᠷᠭᠠᠵᠤ ᠪᠣᠯᠬᠤ ᠦᠭᠡᠢ( ᠭᠡᠵᠡᠭᠡᠨᠡ )᠃
ᠪᠠᠲᠤ ᠬᠠᠭᠠᠨ ᠣᠭᠲᠣ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠵᠣᠭᠰᠣᠵᠤ ᠪᠠᠢᠭᠠᠳ ᠰᠢᠲᠦᠨ ᠦ᠌ ᠪᠡᠨ ᠵᠠᠪᠰᠠᠷ ᠢ᠋ᠶ᠋ᠠᠷ᠄
— ᠲᠦᠷᠭᠡᠨ ᠡᠬᠢᠯᠡᠭᠲᠦᠨ ᠭᠡᠪᠡ᠃
ᠰᠢᠳᠠᠷ ᠬᠠᠭᠠᠳ ᠤ᠋ᠨ ᠨᠢᠭᠡ ᠨᠢ᠂
— ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠶ᠋ᠢᠨ ᠠᠭᠤᠤ ᠶᠡᠬᠡ ᠨᠡᠷᠡ ᠰᠦᠷ ᠦ᠋ᠨ ᠲᠥᠯᠥᠭᠡᠨᠡ ᠠᠮᠢ ᠪᠠᠨ ᠠᠯᠳᠠᠭᠰᠠᠨ ᠪᠠᠭᠠᠲᠤᠷ ᠤ᠋ᠳ ᠤ᠋ᠨ ᠬᠠᠮᠲᠤ ᠬᠤᠪᠢᠯᠭᠠᠨ ᠭᠠᠯ ᠤ᠋ᠨ ᠤᠲᠤᠭᠠᠨ ᠳ᠋ᠤ᠌ ᠠᠪᠲᠠᠭᠳᠠᠵᠤ ᠨᠢᠰᠦᠨ ᠣᠳᠤᠭᠴᠢ ᠬᠥᠮᠦᠨ ᠪᠦᠷᠢ ᠰᠠᠢᠨ ᠵᠠᠶᠠᠭᠠ ᠲᠠᠢ ᠪᠣᠯᠤᠭᠠᠳ ᠡᠭᠦᠯᠡ ᠶ᠋ᠢᠨ ᠴᠠᠭᠠᠳᠤᠬᠢ ᠰᠦᠯᠳᠡ ᠲᠩᠷᠢ ᠶ᠋ᠢᠨ ᠠᠯᠲᠠᠨ ᠣᠷᠳᠣᠨ ᠳ᠋ᠤ᠌ ᠲᠥᠷᠥᠨᠡ ᠭᠡᠵᠦ ᠠᠶᠠᠯᠤᠭᠤᠯᠤᠨ ᠬᠡᠯᠡᠪᠡ᠃ ᠪᠥᠮᠪᠥᠷ ᠨᠢᠵᠢᠭᠢᠨᠡᠵᠦ ᠡᠪᠡᠷ ᠪᠦᠷᠢᠶᠡ ᠲᠠᠲᠠᠪᠠ᠃ ᠪᠠᠭᠠᠪᠠᠭᠠᠢ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠮᠥᠷᠦᠨ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠲᠠᠯᠪᠢᠭᠰᠠᠨ ᠴᠠᠭᠠᠨ ᠬᠣᠪᠴᠠᠰᠤᠲᠠᠢ ᠭᠤᠴᠢᠨ ᠪᠥᠬᠡ ᠨᠠᠷ ᠬᠠᠩᠭᠢᠨᠠᠭᠰᠠᠨ ᠳᠠᠭᠤ ᠪᠠᠷ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠯᠳᠤᠨ ᠪᠥᠵᠢᠭᠯᠡᠨ ᠳᠡᠪᠬᠡᠴᠡᠵᠦ ᠲᠠᠯᠠ ᠬᠡᠩᠭᠡᠷᠭᠡ ᠶ᠋ᠢ ᠴᠣᠬᠢᠯᠠᠨ ᠡᠨᠡ ᠶᠡᠬᠡ ᠭᠠᠯ ᠢ᠋ ᠲᠣᠭᠣᠷᠢᠨ ᠭᠦᠶᠦᠯᠳᠦᠪᠡ᠃ ᠲᠥᠷᠥᠯ ᠰᠠᠳᠤᠨ ᠤ᠋ ᠬᠥᠮᠦᠰ ᠡᠴᠡ ᠠᠯᠳᠠᠭᠳᠠᠭᠰᠠᠨ ᠵᠠᠷᠢᠮ ᠨᠢᠭᠡᠨ ᠮᠣᠩᠭᠣᠯ ᠬᠥᠮᠦᠰ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠤᠭᠠᠯᠵᠠ ᠲᠠᠢ ᠲᠣᠷᠭᠠᠨ ᠠᠯᠴᠢᠭᠤᠷ ᠢ᠋ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠪᠠᠷᠢᠵᠤ ᠪᠥᠬᠡ ᠨᠠᠷ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠳᠠᠭᠠᠵᠠᠭᠠᠨᠠ᠃ ᠬᠢᠲᠠᠳ ᠤ᠋ᠨ ᠭᠠᠷ ᠤᠷᠠᠴᠤᠳ( ᠤ᠋ᠨ ) ᠲᠣᠰᠣ ᠠᠭᠤᠰᠬᠠᠭᠰᠠᠨ ᠪᠠᠮᠪᠠᠷ ᠢ᠋ᠶ᠋ᠠᠷ ᠨᠠᠢ᠍ᠮᠠᠨ ᠲᠠᠯᠠ ᠠ᠋ᠴᠠ ᠨᠢ ᠰᠢᠲᠠᠭᠠᠪᠠ᠃ ᠭᠠᠯ ᠤ᠋ᠨ ᠳᠡᠭᠡᠭᠦᠷ ᠪᠥᠭᠡᠮ ᠪᠥᠭᠡᠮ ᠬᠠᠷᠠ ᠤᠲᠤᠭᠠ ᠳᠡᠭᠳᠡᠵᠦ ᠬᠠᠭᠤᠷᠠᠢ
ᠪᠠᠩᠵᠠ ᠳ᠋ᠥ᠋ᠨᠵᠡ ᠶ᠋ᠢ ᠳᠠᠭᠠᠵᠤ ᠮᠠᠰᠢ ᠲᠦᠷᠭᠡᠨ ᠰᠤᠭᠤᠨᠠᠭᠯᠠᠨᠠ᠃ ᠭᠠᠯ ᠤ᠋ᠨ ᠳᠥᠯᠥ ᠤᠯᠠᠮ ᠶᠡᠬᠡᠰᠴᠦ ᠬᠡᠭᠦᠷ ᠦ᠋ᠳ ᠢ᠋ ᠬᠠᠮᠤᠷᠤᠨ ᠠᠪᠤᠭᠠᠳ ᠳᠡᠭᠡᠷᠡ ᠬᠦᠷᠲᠡᠯ ᠡᠤᠯᠠᠭᠠᠨ ᠳᠥᠯᠥ ᠳᠦᠷᠡᠯᠵᠡᠨᠡ᠃ ᠭᠠᠯ ᠤᠯᠠᠮ ᠤᠯᠠᠮ ᠶᠡᠬᠡᠰᠴᠦ ᠮᠣᠩᠭᠣᠯᠴᠤᠳ ᠨᠢ ᠭᠠᠯ ᠠ᠋ᠴᠠ ᠪᠠᠭᠠ ᠪᠠᠭᠠ ᠪᠠᠷ ᠬᠣᠯᠠᠳᠠᠬᠤ ᠪᠣᠯᠪᠠᠴᠤ ᠳᠠᠭᠤ ᠦᠭᠡᠢ ᠨᠠᠮᠤᠭᠤᠬᠠᠨ ᠵᠣᠭᠰᠣᠵᠤ ᠪᠠᠢᠭᠠ ᠵᠠᠩᠵᠤᠨ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠨᠥᠬᠥᠳ ᠲᠦ᠍᠂ ᠡᠴᠦᠰ ᠦ᠋ᠨ ᠶᠣᠰᠣᠯᠠᠯ ᠢ᠋ ᠥᠭᠴᠦ ᠪᠠᠢᠭᠠ ᠲᠤᠯᠠ ᠬᠡᠨ ᠴᠦ᠍ ᠵᠠᠢᠯᠠᠨ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠠᠵᠢ᠃ ᠵᠠᠩᠵᠤᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠵᠠᠷᠤᠴᠠ ᠪᠣᠭᠣᠯ ᠤ᠋ᠳ ᠨᠢ ᠡᠴᠦᠰ ᠦ᠋ᠨ ᠢ᠋ᠶ᠋ᠡᠨ ᠠᠮᠤᠷ ᠮᠡᠨᠳᠦ ᠶ᠋ᠢ ᠲᠡᠭᠦᠨᠡ ᠬᠦᠷᠭᠡᠬᠦ ᠶ᠋ᠢ ᠬᠦᠯᠢᠶᠡᠵᠦ᠂ ᠪᠠᠲᠤ ᠬᠠᠭᠠᠨ ᠵᠣᠭᠰᠣᠭᠰᠠᠭᠠᠷ ᠪᠠᠢᠪᠠ᠃ ᠭᠠᠯ ᠤ᠋ᠨ ᠳᠥᠯᠥ ᠬᠡᠭᠦᠷ ᠦ᠋ᠳ ᠢ᠋ ᠳᠣᠯᠢᠶᠠᠬᠤ ᠮᠡᠲᠦ ᠬᠤᠴᠢᠨᠠ᠃ ᠲᠣᠰᠣ ᠲᠠᠢ ᠬᠤᠪᠴᠠᠰᠤ ᠨᠢ ᠭᠡᠨᠡᠳᠲᠡ ᠠᠪᠤᠯᠴᠠᠨ ᠨᠣᠴᠣᠨᠠ᠃ ᠭᠠᠯ ᠤ᠋ᠨ ᠢᠯᠴᠢ ᠨᠢ ᠮᠠᠰᠢ ᠶᠡᠬᠡ ᠲᠤᠯᠠ ᠬᠡᠭᠦᠷ ᠦ᠋ᠳ ᠨᠢ ᠬᠥᠳᠡᠯᠬᠦ ᠪᠠ ᠠᠲᠤᠷᠢᠯᠳᠤᠬᠤ᠂ ᠬᠥᠯ ᠭᠠᠷ ᠢ᠋ᠶ᠋ᠠᠨ ᠬᠥᠳᠡᠯᠭᠡᠨᠡ᠃ ᠲᠣᠮᠣ ᠴᠢᠭᠢᠷᠠᠭ ᠪᠡᠶᠡ ᠲᠡᠢ ᠨᠢᠭᠡᠨ ᠵᠠᠭᠤᠨ ᠤ᠋ ᠨᠣᠶᠠᠨ ᠳᠡᠭᠡᠭᠰᠢ ᠪᠡᠨ ᠥᠨᠳᠡᠢᠵᠦ ᠢᠷᠡᠭᠡᠳ ᠡᠴᠦᠰ ᠦ᠋ᠨ ᠮᠡᠨᠳᠦ ᠶ᠋ᠢ ᠬᠦᠷᠭᠡᠵᠦ ᠪᠠᠢᠭᠠ ᠮᠡᠲᠦ ᠪᠡᠷ ᠲᠣᠯᠣᠭᠠᠢ ᠪᠠᠨ ᠡᠷᠭᠢᠭᠦᠯᠵᠦ ᠡᠷᠭᠢᠨ ᠲᠣᠭᠣᠷᠢᠨ ᠵᠣᠭᠰᠣᠵᠤ ᠪᠣᠢ ᠴᠡᠷᠢᠭ ᠦ᠋ᠨ ᠨᠥᠬᠥᠳ ᠢ᠋ ᠬᠠᠷᠠᠭᠠᠳ ᠤᠨᠠᠪᠠ᠃ ᠴᠡᠷᠢᠭ ᠦ᠋ᠳ ᠨᠢ ᠨᠢᠳᠦ ᠪᠡᠨ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠷ ᠬᠠᠯᠬᠠᠯᠠᠵᠤ ᠭᠠᠯ ᠤ᠋ᠨ ᠳᠥᠯᠥ ᠪᠠ ᠬᠥᠬᠡ ᠴᠡᠩᠬᠡᠷ ᠤᠲᠤᠭᠠ ᠶ᠋ᠢ ᠰᠢᠷᠪᠢᠨ ᠬᠠᠷᠠᠵᠠᠭᠠᠨᠠ᠃ ᠭᠠᠯ ᠤ᠋ᠨ ᠤᠯᠠᠭᠠᠨ ᠳᠥᠯᠥ ᠨᠣᠭᠦᠳ ᠮᠤᠰᠬᠢᠷᠠᠯᠳᠤᠨ ᠮᠣᠩᠭᠣᠯ ᠤ᠋ᠨ ᠪᠣᠭᠣᠨᠢ ᠬᠥᠯ ᠲᠡᠢ ᠮᠣᠷᠢᠳ ᠢ᠋ ᠤᠨᠤᠵᠤ ᠳᠠᠪᠬᠢᠨ ᠳᠡᠭᠳᠡᠬᠦ ᠬᠡᠢ ᠲᠣᠭᠣᠰᠣ ᠬᠥᠮᠦᠰ ᠪᠣᠯᠤᠨ ᠬᠤᠪᠢᠷᠠᠬᠤ ᠰᠢᠭ᠋ ᠬᠤᠷᠴᠠ ᠭᠡᠷᠡᠯᠲᠦ ᠪᠥᠭᠡᠮ ᠪᠥᠭᠡᠮ ᠣᠴᠢ ᠨᠤᠭᠤᠳ ᠤ᠋ᠨ ᠬᠠᠮᠲᠤ ᠳᠡᠭᠡᠭᠰᠢ ᠪᠡᠨ ᠦᠰᠦᠷᠴᠦ ᠪᠠᠢᠬᠤ ᠶ᠋ᠢ ᠨᠢ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠣᠷᠣᠨ ᠲᠠᠢ ᠶᠡᠬᠡ ᠡᠵᠡᠨ ᠴᠢᠩᠭᠢᠰ ᠬᠤᠪᠢᠯᠭᠠᠨ ᠳᠦᠷᠢ ᠳ᠋ᠦ᠍ ᠨᠢᠰᠦᠨ ᠣᠳᠴᠤ ᠪᠠᠢᠨᠠ ᠭᠡᠵᠦ ᠪᠠᠷᠬᠢᠷᠠᠵᠤ ᠪᠠᠢᠪᠠ᠃ ᠲᠡᠰᠬᠦᠶᠡ ᠪᠡᠷᠬᠡ ᠬᠠᠯᠠᠭᠤᠨ ᠪᠣᠯᠪᠠ᠃ ᠲᠠᠯᠠᠪᠠᠢ ᠶ᠋ᠢᠨ ᠳᠡᠭᠡᠭᠦᠷ ᠬᠠᠯᠠᠭᠤᠨ ᠬᠤᠢ ᠰᠠᠯᠬᠢᠨ ᠡᠷᠭᠢᠯᠳᠦᠨᠡ᠂ ᠭᠠᠯ ᠤᠯᠠᠭᠠᠨ ᠴᠤᠴᠠᠯᠢ ᠨᠤᠭᠤᠳ ᠪᠠ ᠪᠠᠩᠵᠠᠨ ᠤ᠋ ᠬᠤᠭᠤᠷᠬᠠᠢ ᠨᠤᠭᠤᠳ ᠲᠡᠭᠷᠢ ᠲᠡᠰᠢ ᠦᠰᠦᠷᠦᠨ ᠳᠡᠭᠳᠡᠨᠡ᠃ ᠪᠠᠲᠤ ᠬᠠᠭᠠᠨ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠯᠬᠠᠯᠠᠵᠤ᠂
— ᠪᠠᠶᠠᠷᠯᠠᠯᠠ᠂ ᠪᠠᠭᠠᠲᠤᠷ ᠵᠣᠷᠢᠭᠲᠠᠨ— ᠭᠡᠵᠦ ᠬᠠᠰᠬᠢᠷᠤᠭᠠᠳ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠵᠤ ᠤᠲᠤᠭᠠᠨ ᠳᠣᠲᠣᠷᠠ ᠠ᠋ᠴᠠ ᠭᠠᠷᠴᠤ ᠲᠡᠷᠡ ᠲᠠᠯᠠᠪᠠᠢ ᠠ᠋ᠴᠠ ᠭᠠᠷᠴᠤ᠂ ᠭᠣᠣᠯ ᠤ᠋ᠨ ᠵᠦᠭ ᠤᠷᠤᠭᠤᠳᠠᠨ ᠳᠠᠪᠬᠢᠪᠠ᠃ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠨᠢ᠄
— ᠪᠠᠶᠠᠷᠲᠠᠢ᠂ ᠪᠠᠶᠠᠷᠲᠠᠢ ᠭᠡᠵᠦ ᠬᠠᠰᠬᠢᠷᠤᠯᠳᠤᠭᠰᠠᠭᠠᠷ ᠮᠣᠩᠭᠣᠯ ᠤ᠋ᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠠᠩᠭᠢᠨᠠᠭᠤᠯᠤᠨ ᠵᠢᠭᠰᠠᠭᠠᠯ ᠵᠢᠷᠤᠮ ᠢ᠋ᠶ᠋ᠠᠨ ᠠᠯᠳᠠᠵᠤ ᠬᠣᠭᠣᠷᠣᠨᠳᠣ ᠪᠠᠨ ᠮᠥᠷᠭᠥᠴᠡᠯᠳᠦᠨ ᠰᠢᠬᠠᠴᠠᠯᠳᠤᠭᠰᠠᠭᠠᠷ ᠳᠠᠪᠬᠢᠯᠳᠤᠨ ᠶᠠᠪᠤᠪᠠ᠃
ᠬᠡᠭᠦᠷ ᠣᠷᠣᠰᠢᠭᠤᠯᠤᠭᠰᠠᠨ ᠳᠤᠷᠠᠰᠬᠠᠯ ᠤ᠋ᠨ ᠭᠠᠯ ᠳ᠋ᠤ᠌ ᠠᠪᠲᠠᠭᠳᠠᠭᠰᠠᠨ ᠷᠶᠡᠽᠡᠨ ᠬᠣᠲᠠ ᠲᠡᠢᠨ ᠰᠢᠲᠠᠵᠤ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠭᠠᠯ ᠤ᠋ᠨ ᠳᠥᠯᠥ ᠡᠨᠳᠡ ᠲᠡᠨᠳᠡ ᠦᠵᠡᠭᠳᠡᠬᠦ ᠪᠠ ᠲᠦᠯᠡᠭᠳᠡᠵᠦ ᠰᠢᠲᠠᠭᠰᠠᠨ ᠮᠢᠬᠠᠨ ᠤ᠋ ᠮᠠᠭᠤᠬᠠᠢ ᠦᠨᠦᠷ ᠬᠠᠩᠬᠤᠯᠬᠤ ᠪᠣᠯᠪᠠ᠃ ᠴᠡᠷᠢᠭ ᠦ᠋ᠳ ᠭᠤᠷᠪᠠᠨ ᠡᠳᠦᠷ ᠠᠮᠠᠷᠠᠪᠠ᠃ ᠡᠳᠡ ᠨᠠᠷ ᠲᠠᠭᠤᠵᠤ ᠠᠪᠴᠢᠷᠠᠭᠰᠠᠨ ᠮᠠᠯ ᠢ᠋ ᠠᠯᠠᠵᠤ ᠢᠳᠡᠨᠡ᠃ ᠬᠠᠭᠠᠳ ᠨᠣᠶᠠᠳ ᠨᠢ ᠤᠨᠠᠭᠠᠨ ᠤ᠋ ᠴᠢᠨᠠᠭᠰᠠᠨ ᠮᠢᠬᠠ ᠶ᠋ᠢ ᠢᠳᠡᠵᠦ ᠷᠶᠡᠽᠡᠨ ᠦ᠌ ᠸᠠᠩ ᠤ᠋ᠨ ᠵᠣᠭᠣᠷᠢᠨ ᠠ᠋ᠴᠠ ᠣᠯᠳᠠᠭᠰᠠᠨ ᠠᠷᠢᠬᠢ ᠶ᠋ᠢ ᠤᠤᠭᠤᠵᠠᠭᠠᠵᠤ᠂ ᠡᠩ ᠦ᠋ᠨ ᠴᠡᠷᠢᠭ ᠦ᠋ᠳ ᠦᠬᠡᠷ ᠦ᠋ᠨ ᠥᠭᠡᠬᠦ᠂ ᠭᠤᠯᠢᠷ ᠢ᠋ᠶ᠋ᠠᠷ ᠬᠢᠯᠴᠡᠭᠰᠡᠨ ᠶᠣᠣᠲᠠᠩ ᠲᠠᠢ ᠴᠠᠢ ᠤᠤᠭᠤᠬᠤ ᠶ᠋ᠢᠨ ᠢᠯᠳᠠᠮ ᠳ᠋ᠤ᠌ ᠰᠢᠪᠡᠨᠡᠨ ᠶᠠᠷᠢᠯᠴᠠᠨᠠ ᠃
— ᠬᠥᠶᠢ᠂ ᠬᠥᠶᠢ᠂ ᠬᠡᠷᠪᠡ ᠬᠣᠲᠠ ᠪᠦᠷᠢ ᠶ᠋ᠢ ᠳᠠᠭᠠᠷᠢᠨ ᠳᠣᠪᠲᠣᠯᠬᠤ ᠳ᠋ᠤ᠌ ᠡᠳᠦᠢᠴᠢᠨᠡᠭᠡᠨ ᠣᠯᠠᠨ ᠴᠡᠷᠢᠭ ᠦ᠋ᠳ ᠦᠬᠦᠬᠦ ᠶᠤᠮ ᠪᠣᠯ ᠬᠢᠷᠢ ᠣᠯᠠᠨ ᠪᠠᠭᠠᠲᠤᠷ ᠤ᠋ᠳ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠵᠤ ᠣᠴᠢᠬᠤ ᠪᠣᠯ ᠳ᠋ᠠ?
᠁ ᠮᠡᠳᠡᠭᠡᠷᠡᠢ᠂ ᠵᠠ᠂ ᠮᠠᠷᠭᠠᠰᠢ ᠶ᠋ᠢᠨ ᠡᠳᠦᠷ ᠦ᠋ᠨ ᠲᠤᠬᠠᠢ ᠪᠣᠳᠣᠬᠤ ᠪᠠᠨ ᠪᠣᠯᠢᠶᠠ᠂ ᠥᠨᠥᠳᠥᠷ ᠴᠡᠩᠭᠡᠵᠡᠭᠡᠶᠡ᠂ ᠤᠤᠭᠤᠵᠠᠭᠠᠶᠠ᠂ ᠴᠠᠳᠲᠠᠯᠠ ᠪᠠᠨ ᠢᠳᠡᠵᠡᠭᠡᠶᠡ᠁
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠡᠴᠡᠭ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠵᠢᠩᠯᠢᠬᠤᠸᠠᠷ· ᠮᠡᠷᠭᠡᠨᠭᠣᠣᠠ
ᠬᠢᠨᠠᠭᠴᠢ᠄ ᠪᠠᠯ᠂ ᠲ· ᠬᠦᠮᠦᠵᠢᠯᠲᠦ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ᠂ ᠪᠠᠶᠠᠨᠴᠡᠴᠡᠭ ᠂ ᠮᠡᠷᠭᠡᠨᠭᠣᠣᠠ