ᠪᠠᠲᠤ ᠬᠠᠭᠠᠨ 4-10ᠬᠡᠭᠦᠷᠲᠦ ᠲᠠᠯᠠᠪᠠᠢ-ᠮᠣᠩᠭᠣᠯᠴᠤᠳ ᠲᠠᠢ ᠠᠩᠬᠠ ᠤᠳᠠᠭᠠ ᠲᠤᠯᠤᠯᠳᠤᠭᠰᠠᠨ-Bat khaan Бат хаан-ᠷᠣᠮᠠᠨ
49ᠠᠷᠪᠠ ᠬᠡᠭᠦᠷᠲᠦ ᠲᠠᠯᠠᠪᠠᠢ
ᠠᠢ᠂ ᠦᠵᠡᠰᠬᠦᠯᠡᠩᠲᠦ ᠲᠠᠯᠠ ᠮᠢᠨᠢ ᠬᠡᠨ ᠴᠢᠮᠠᠲᠤ ᠦᠬᠦᠭᠡᠷ ᠦ᠋ᠨ ᠶᠠᠰᠤ ᠰᠠᠴᠤᠭᠰᠠᠨ ᠪᠣᠢ?
(ᠫᠦᠱᠺᠢᠨ)
ᠥᠷᠯᠥᠭᠡ ᠨᠢ ᠴᠠᠰᠤᠲᠤ ᠲᠠᠯᠠ ᠶ᠋ᠢᠨ ᠳᠡᠭᠡᠭᠦᠷ ᠴᠢᠰᠤᠨ ᠤ᠋ ᠰᠤᠳᠠᠯ ᠮᠡᠲᠦ ᠲᠤᠶᠠᠭᠠ ᠲᠠᠲᠠᠵᠤ ᠤᠯᠠᠭᠠᠨ ᠨᠠᠷᠠᠨ ᠮᠠᠨᠳᠤᠯᠠ᠃ ᠪᠠᠲᠤ ᠬᠠᠭᠠᠨ ᠤ᠋ ᠭᠡᠷ ᠲᠦ᠍ ᠡᠯᠴᠢ ᠨᠠᠷ ᠬᠦᠷᠦᠯᠴᠡᠨ ᠢᠷᠡᠵᠦ ᠭᠦᠶᠦᠭ ᠬᠠᠭᠠᠨ ᠤ᠋ ᠴᠡᠷᠢᠭ ᠢ᠋ ᠳᠣᠪᠲᠣᠯᠤᠨ ᠪᠠᠶ᠋ᠢᠯᠳᠤᠭᠰᠠᠨ ᠢ᠋ ᠲᠣᠭᠠᠴᠢᠨ ᠮᠡᠳᠡᠭᠡᠯᠡᠯᠡ᠃ ᠣᠷᠣᠰ ᠤ᠋ᠳ ᠨᠢ ᠠᠭᠤᠷ ᠶᠡᠬᠡ ᠵᠣᠷᠢᠭ ᠢ᠋ ᠭᠠᠷᠭᠠᠵᠤ ᠠᠭᠲᠠ ᠮᠣᠷᠢᠳ ᠢ᠋ ᠪᠣᠯᠤᠨ ᠠᠮᠢᠳᠤ ᠬᠥᠮᠦᠰ ᠢ᠋ ᠰᠦᠬᠡ ᠪᠡᠷ ᠴᠠᠪᠴᠢᠯᠠᠨ ᠠᠯᠠᠯᠳᠤᠭᠰᠠᠨ ᠨᠢ ᠬᠡᠷᠴᠡᠭᠡᠢ ᠮᠠᠩᠭᠤᠰ ᠤ᠋ᠳ ᠤ᠋ᠨ ᠠᠳᠠᠯᠢ ᠪᠠᠢᠯᠠ᠃ ᠬᠥᠶᠦᠭ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠳ ᠣᠷᠣᠰ ᠤ᠋ᠨ ᠬᠦᠴᠦᠨ ᠳ᠋ᠦ᠍ ᠠᠪᠲᠠᠭᠳᠠᠵᠤ ᠮᠠᠰᠢ ᠣᠯᠠᠨ ᠲᠣᠭᠠᠨ ᠤ᠋ ᠬᠥᠮᠦᠰ ᠢ᠋ᠶ᠋ᠡᠨ ᠠᠯᠳᠠᠵᠤ᠂ ᠲᠡᠰᠦᠭᠰᠡᠨ ᠦᠭᠡᠢ ᠭᠡᠳᠡᠷᠭᠦ ᠤᠬᠤᠷᠢᠯᠠ᠃
ᠪᠠᠲᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠬᠠᠭᠠᠳ ᠤ᠋ᠨ ᠰᠠᠨᠠᠯ ᠢ᠋ ᠠᠰᠠᠭᠤᠭᠠᠳ ᠰᠡᠭᠦᠯ ᠳ᠋ᠦ᠍ᠨᠢ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠤ᠋ᠨ ᠰᠠᠨᠠᠯ ᠢ᠋ ᠠᠰᠠᠭᠤᠭᠰᠠᠨ ᠳ᠋ᠤ᠌᠂
— ᠬᠥᠶᠦᠭ ᠬᠠᠭᠠᠨ ᠣᠷᠣᠰ ᠤ᠋ᠨ ᠴᠡᠷᠢᠭ ᠦ᠋ᠳ ᠲᠦ᠍ ᠳᠠᠬᠢᠨ ᠳᠣᠪᠲᠣᠯᠤᠨ ᠲᠤᠯᠤᠯᠳᠤᠬᠤ ᠶᠣᠰᠣᠲᠠᠢ ᠭᠡᠵᠦ ᠲᠡᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠪᠠᠲᠤ ᠬᠠᠭᠠᠨ᠂
— ᠭᠦᠶᠦᠭ ᠬᠠᠭᠠᠨ ᠣᠷᠣᠰ ᠤ᠋ᠨ ᠴᠥᠭᠡᠨ ᠲᠣᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠪᠣᠬᠰᠢᠵᠤ ᠪᠠᠢᠭᠰᠠᠨ ᠳᠣᠪᠣᠴᠠᠭ ᠲᠣᠯᠣᠭᠠᠢ ᠶ᠋ᠢ ᠡᠵᠡᠯᠡᠨ ᠠᠪᠴᠤ ᠴᠢᠳᠠᠭᠠ ᠦᠭᠡᠢ ᠪᠣᠯ ᠪᠠᠲᠤ ᠪᠡᠬᠢ ᠥᠨᠳᠥᠷ ᠬᠡᠷᠡᠮ ᠲᠡᠢ ᠷᠶᠡᠽᠡᠨ ᠬᠣᠲᠠ ᠶ᠋ᠢ ᠶᠠᠭᠠᠬᠢᠵᠤ ᠡᠵᠡᠯᠡᠵᠦ ᠴᠢᠳᠠᠬᠤ ᠪᠢᠯᠡ? ᠲᠡᠷᠡ ᠪᠡᠷ ᠮᠣᠩᠭᠣᠯ ᠤ᠋ᠨ ᠠᠯᠳᠠᠷ ᠭᠠᠪᠢᠶᠠᠲᠤ ᠪᠠ ᠠᠶᠤᠮᠰᠢᠭᠲᠤ ᠨᠡᠷᠡ ᠰᠦᠷ ᠢ᠋ ᠭᠤᠲᠤᠭᠠᠭᠰᠠᠨ ᠪᠠᠢᠨᠠ᠃ ᠭᠦᠶᠦᠭ ᠬᠠᠭᠠᠨ ᠣᠷᠣᠰ ᠤ᠋ᠳ ᠲᠠᠢ ᠪᠠᠢᠯᠳᠤᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠤᠷᠠᠭᠳᠠᠵᠤ ᠬᠠᠭᠠᠷᠠᠭᠰᠠᠨ ᠦᠮᠦᠳᠦᠨ ᠳ᠋ᠡᠭᠡᠨ ᠤᠷᠢᠳᠠᠯ ᠪᠣᠯᠭᠠᠨ ᠨᠥᠬᠥᠭᠡᠰᠦ ᠲᠠᠯᠪᠢᠵᠤ ᠰᠠᠭᠤᠭ! ᠮᠠᠨ ᠤ᠋ 《ᠢᠯᠠᠭᠳᠠᠰᠢ ᠦᠭᠡᠢ》ᠲᠦᠮᠡ ᠪᠠ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠤ᠋ᠨ 《ᠭᠠᠯᠵᠠᠭᠤ ᠲᠠᠢ》ᠲᠦᠮᠡ ᠳᠠᠷᠤᠢᠬᠠᠨ ᠢ᠋ᠶ᠋ᠠᠨ ᠬᠥᠳᠡᠯᠵᠦ ᠣᠷᠣᠰ ᠤ᠋ᠨ ᠪᠣᠬᠰᠢᠵᠤ ᠪᠠᠢᠭᠠ ᠳᠣᠪᠣᠴᠠᠭ ᠲᠣᠯᠣᠭᠠᠢ ᠶ᠋ᠢ ᠳᠣᠪᠲᠣᠯᠤᠨ ᠪᠠᠢᠯᠳᠤᠵᠤ ᠴᠠᠰᠢ ᠵᠣᠭᠰᠣᠯᠲᠠ ᠦᠭᠡᠢ ᠪᠡᠷ ᠷᠶᠡᠽᠡᠨ ᠢ᠋ ᠪᠠᠢᠯᠳᠤᠬᠤ ᠪᠠᠷ ᠶᠠᠪᠤᠰᠤᠭᠠᠢ᠃ ᠪᠢᠳᠡ ᠭᠦᠶᠦᠭ ᠬᠠᠭᠠᠨ ᠢ᠋ ᠬᠦᠯᠢᠶᠡᠬᠦ ᠦᠭᠡᠢ᠃ ᠮᠢᠨᠦ ᠮᠢᠩᠭᠠᠨ ᠴᠡᠷᠢᠭ ᠨᠠᠳᠠᠲᠠᠢ ᠬᠠᠮᠲᠤ ᠶᠠᠪᠤᠨᠠ᠃ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠪᠠᠢᠯᠳᠤᠭᠠᠨ ᠤ᠋ ᠶᠠᠪᠤᠴᠠ ᠶ᠋ᠢ ᠬᠢᠨᠠᠨ ᠤᠳᠤᠷᠢᠳᠤᠨᠠ᠃ ᠠᠮᠢᠳᠤ ᠪᠠᠷ ᠣᠯᠵᠠᠯᠠᠬᠳᠠᠬᠴᠢᠳ ᠢ᠋ ᠠᠯᠠᠵᠤ ᠵᠣᠭᠰᠣᠯᠲᠠ ᠦᠭᠡᠢ ᠪᠡᠷ ᠶᠠᠪᠤᠵᠤ ᠵᠠᠮ ᠵᠠᠭᠤᠷᠠ ᠵᠥᠪᠬᠡᠨ ᠠᠭᠲᠠ ᠮᠣᠷᠢᠳ ᠢ᠋ ᠲᠡᠵᠢᠭᠡᠬᠦ ᠪᠠ ᠠᠮᠠᠷᠠᠭᠤᠯᠬᠤ ᠲᠡᠳᠦᠢ ᠪᠠᠭᠠ ᠦᠳᠡᠯᠡᠭᠡ ᠨᠤᠭᠦᠳ ᠢ᠋ ᠬᠢᠰᠦᠭᠡᠢ᠃ ᠬᠠᠭᠠᠳ ᠤ᠋ᠳ ᠷᠶᠡᠽᠡᠨ ᠦ᠌ ᠬᠡᠷᠡᠮ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠥᠪᠡᠷᠰᠡᠳ ᠦ᠋ᠨ ᠭᠡᠷ ᠦ᠋ᠳ ᠢ᠋ ᠯᠠᠪᠲᠠᠢ ᠪᠠᠷᠢᠨᠠ ᠭᠡᠪᠡ᠃
ᠪᠠᠷᠠᠭᠠᠨ ᠬᠥᠬᠡ ᠡᠭᠦᠯᠡ ᠨᠣᠭᠦᠳ ᠡᠮᠦᠨᠡ ᠵᠦᠭ ᠬᠥᠭᠡᠭᠡᠭᠳᠡᠵᠦ ᠰᠠᠯᠬᠢ ᠰᠢᠭᠤᠷᠭᠠ ᠭᠡᠨᠡᠳᠲᠡ ᠵᠣᠭᠰᠣᠬᠤ ᠳ᠋ᠤ᠌᠂ ᠬᠥᠬᠡ ᠮᠥᠩᠭᠥᠨ ᠲᠡᠭᠷᠢ ᠳ᠋ᠦ᠍ ᠨᠠᠷᠠᠨ ᠦᠵᠡᠭᠳᠡᠯᠡ᠃ ᠬᠡᠳᠦ ᠬᠡᠳᠦᠨ ᠮᠢᠩᠭᠠᠨ ᠠᠯᠠᠭᠳᠠᠭᠰᠠᠨ ᠪᠠ ᠰᠢᠷᠬᠠᠲᠤᠭᠰᠠᠨ ᠬᠥᠮᠦᠰ ᠢ᠋ ᠴᠠᠰᠤ ᠪᠠᠷ ᠪᠦᠷᠬᠦᠵᠦ ᠣᠷᠣᠰᠢᠭᠤᠯᠤᠭᠰᠠᠨ ᠠᠭᠤᠳᠠᠮ ᠶᠡᠬᠡ ᠲᠠᠯᠠ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠠᠮᠤᠷᠯᠢᠩᠭᠤᠢ ᠪᠠᠷ ᠭᠢᠯᠠᠯᠵᠠᠨ ᠦᠵᠡᠭᠳᠡᠨᠡ᠃ ᠰᠦᠷᠦᠭ ᠴᠢᠨᠣᠠ ᠶ᠋ᠢᠨ ᠴᠤᠪᠤᠭᠠ᠂ ᠲᠠᠲᠠᠭᠰᠠᠨ ᠤᠲᠠᠰᠤ ᠰᠢᠭ᠋ ᠰᠢᠯᠤᠭᠤᠬᠠᠨ ᠵᠥᠷᠢᠭ ᠵᠠᠮ ᠢ᠋ᠶ᠋ᠠᠷ ᠴᠤᠪᠤᠷᠠᠯᠳᠤᠨ ᠱᠣᠭᠰᠢᠭᠰᠠᠭᠠᠷ ᠭᠠᠷᠴᠤ ᠢᠷᠡᠯᠡ᠃ ᠴᠢᠨᠣᠠ ᠪᠦᠷ ᠲᠦᠷᠦᠭᠦᠴᠢ ᠶ᠋ᠢᠨ ᠴᠢᠨᠣᠠ ᠶ᠋ᠢᠨ ᠮᠥᠷ ᠢ᠋ ᠠᠯᠳᠠᠬᠤ ᠦᠭᠡᠢ ᠭᠢᠰᠬᠢᠨᠡ᠃ ᠮᠠᠩᠯᠠᠢ ᠳ᠋ᠤ᠌ ᠶᠠᠪᠤᠭᠠ ᠴᠢᠨᠣᠠ ᠰᠢᠨᠡᠬᠡᠨ ᠴᠢᠰᠤᠨ ᠤ᠋ ᠦᠨᠦᠷ ᠬᠠᠩᠬᠤᠯᠬᠤ ᠵᠦᠭ ᠳᠠᠰᠢ ᠶᠠᠪᠤᠵᠤ ᠪᠠᠢᠯᠠ᠃ ᠴᠠᠰᠤᠲᠤ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠣᠯᠠᠨ ᠲᠣᠭᠠᠨ ᠤ᠋ ᠬᠡᠭᠦᠷ ᠦ᠋ᠳ ᠪᠠᠷᠤᠢᠵᠤ ᠦᠵᠡᠭᠳᠡᠨᠡ᠃
ᠴᠢᠨᠣᠠ ᠨᠤᠭᠤᠳ ᠤᠯᠠᠮ ᠣᠢᠷᠠᠲᠤᠵᠤ ᠢᠷᠡᠯᠡ᠃ ᠬᠡᠭᠦᠷ ᠦ᠋ᠳ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠵᠠᠷᠢᠮ ᠨᠢ ᠬᠠᠶᠠ ᠬᠥᠳᠡᠯᠬᠦ ᠳ᠋ᠦ᠍ ᠮᠠᠩᠯᠠᠢ ᠶ᠋ᠢᠨ ᠴᠢᠨᠣᠠ ᠬᠠᠵᠠᠭᠤ ᠲᠡᠰᠢ ᠪᠡᠨ ᠦᠰᠦᠷᠦᠨ ᠵᠠᠢᠯᠠᠰᠬᠢᠵᠦ ᠥᠭᠡᠷᠡ ᠵᠦᠭ ᠢ᠋ ᠴᠢᠭᠯᠡᠨ ᠶᠠᠪᠤᠨᠠ᠃ ᠬᠡᠷᠢᠶᠡ᠂ ᠠᠯᠠᠭ ᠳᠠᠭᠤ ᠨᠤᠭᠤᠳ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠲᠡᠰᠢ ᠰᠦᠷᠦᠭᠯᠡᠨ ᠨᠢᠰᠴᠦ ᠢᠷᠡᠭᠡᠳ ᠦᠬᠦᠭᠴᠢᠳ ᠦ᠋ᠨ ᠳᠡᠷᠭᠡᠳᠡ ᠪᠠᠭᠤᠵᠤ ᠰᠦᠯᠵᠢᠨ ᠦᠰᠦᠷᠦᠭᠰᠡᠭᠡᠷ ᠠᠭᠠᠵᠢᠮ ᠢ᠋ᠶ᠋ᠠᠷ ᠬᠡᠭᠦᠷ ᠦ᠋ᠳ ᠲᠦ᠍ ᠣᠢᠷᠠᠲᠤᠨᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠭᠠᠭᠴᠠ ᠨᠢᠭᠡ ᠭᠠᠷ ᠬᠥᠯ ᠬᠥᠳᠡᠯᠬᠦ ᠳ᠋ᠦ᠍ ᠰᠢᠪᠠᠭᠤᠨ ᠰᠦᠷᠦᠭ ᠰᠦᠭᠡᠨᠢᠭ (ᠰᠥᠭᠡᠩᠭᠢ) ᠳᠠᠭᠤ ᠪᠠᠷ ᠮᠠᠭᠤᠬᠠᠢ ᠪᠠᠷᠬᠢᠷᠠᠨ ᠳᠡᠭᠳᠡᠨ ᠨᠢᠰᠴᠦ ᠥᠭᠡᠷᠡ ᠨᠢᠭᠡᠨ ᠢᠳᠡᠰᠢ ᠡᠷᠢᠵᠡᠭᠡᠨᠡ᠃
ᠴᠢᠨᠣᠠ ᠨᠤᠭᠤᠳ ᠵᠢᠯᠠᠭᠠ ᠳᠠᠰᠢ ᠬᠠᠨᠳᠤᠨ ᠣᠷᠣᠬᠤ ᠶ᠋ᠢᠨ ᠰᠠᠴᠠᠭᠤ ᠭᠡᠨᠡᠳᠲᠡ ᠪᠤᠴᠠᠵᠤ ᠬᠠᠷᠠᠢᠵᠠᠭᠠᠪᠠ᠃ ᠵᠢᠯᠠᠭᠠ ᠳᠣᠲᠣᠷᠠ ᠠ᠋ᠴᠠ ᠮᠣᠷᠢᠲᠠᠢ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠰᠡᠨ ᠨᠢ ᠲᠣᠮᠣ ᠪᠡᠶᠡ ᠲᠡᠢ ᠬᠡᠭᠡᠷ ᠠᠵᠢᠷᠭᠠ ᠤᠨᠤᠵᠤ ᠮᠣᠩᠭᠣᠯ ᠮᠣᠷᠢ ᠨᠢᠭᠡ ᠶ᠋ᠢ ᠬᠥᠲᠥᠯᠦᠭᠰᠡᠨ᠂ ᠨᠠᠷᠠᠨ ᠳ᠋ᠤ᠌ ᠭᠢᠯᠠᠯᠵᠠᠭᠰᠠᠨ ᠪᠣᠯᠣᠳ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠦᠭᠰᠡᠨ ᠵᠠᠯᠠᠭᠤ ᠴᠡᠷᠢᠭ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠬᠡᠭᠦᠷ ᠦ᠋ᠳ ᠦ᠋ᠨ ᠳᠤᠮᠳᠠ ᠣᠷᠣᠵᠤ ᠡᠷᠭᠢᠨ ᠲᠣᠭᠣᠷᠢᠨ ᠠᠩᠬᠠᠷᠤᠯᠲᠠᠢ ᠪᠠᠷ ᠬᠠᠷᠠᠵᠤ ᠪᠠᠢᠲᠠᠯᠠ ᠬᠦᠨᠳᠦ ᠠᠮᠢᠰᠬᠤᠯ ᠪᠠ ᠶᠣᠢᠯᠠᠬᠤ ᠳᠠᠭᠤᠨ ᠲᠡᠭᠦᠨ ᠦ᠌ ᠠᠩᠬᠠᠷᠤᠯ ᠢ᠋ ᠲᠠᠲᠠᠯᠠ᠃ ᠲᠡᠭᠦᠨ ᠡᠴᠡ ᠬᠣᠯᠠ ᠦᠭᠡᠢ ᠥᠳᠬᠡᠨ ᠴᠠᠭᠠᠨ ᠪᠢᠲᠡᠭᠦᠦ ᠰᠠᠬᠠᠯᠲᠠᠢ ᠪᠠᠭᠠᠲᠤᠷ ᠰᠢᠨᠵᠢ ᠶ᠋ᠢᠨ ᠪᠡᠶᠡ ᠲᠡᠢ ᠬᠥᠮᠦᠨ ᠴᠠᠰᠤᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠯᠠ᠃ ᠲᠡᠷᠡ ᠵᠠᠯᠠᠭᠤ ᠮᠣᠷᠢᠨ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ ᠬᠡᠪᠲᠡᠵᠦ ᠪᠠᠢᠭᠠ ᠬᠥᠮᠦᠨ ᠦ᠌ ᠳᠡᠷᠭᠡᠳᠡ ᠣᠴᠢᠵᠤ ᠲᠣᠩᠭᠣᠢᠪᠠ᠃
— ᠷᠠᠲ᠋ᠢᠪᠤᠷ ᠴᠢ ᠠᠮᠢᠳᠤ ᠪᠠᠢᠨᠠ ᠤᠤ? ᠷᠠᠲ᠋ᠢᠪᠤᠷ? ᠭᠡᠳ ᠰᠢᠪᠠᠷ ᠯᠣᠩᠬᠣ ᠶ᠋ᠢ ᠭᠠᠷᠭᠠᠵᠤ ᠰᠢᠷᠬᠠᠲᠤᠭᠰᠠᠨ ᠬᠥᠮᠦᠨ ᠦ᠌ ᠤᠷᠤᠭᠤᠯ ᠳ᠋ᠤ᠌ ᠬᠦᠷᠭᠡᠮᠡᠭᠴᠡ ᠷᠠᠲ᠋ᠢᠪᠤᠷ ᠨᠢ ᠰᠢᠮᠳᠠᠨ ᠤᠤᠭᠤᠵᠤ ᠬᠦᠨᠳᠦ ᠪᠡᠷ ᠠᠮᠢᠰᠬᠤᠯ ᠠᠪᠴᠤ ᠨᠢᠳᠦ ᠪᠡᠨ ᠣᠩᠭᠣᠢᠯᠭᠠᠯᠠ᠃
— ᠷᠠᠲ᠋ᠢᠪᠤᠷ ᠪᠣᠰ᠂ ᠰᠡᠷᠢ᠂ ᠮᠣᠩᠭᠣᠯ ᠤ᠋ᠨ ᠬᠠᠷᠠᠭᠤᠯ ᠤ᠋ᠳ ᠬᠣᠯᠠ ᠦᠭᠡᠢ ᠶᠠᠪᠤᠵᠤ ᠪᠠᠢᠨᠠ ᠭᠡᠪᠡ᠃
— ᠴᠢ ᠬᠡᠨ ᠪᠣᠢ?
— ᠪᠢ ᠷᠣᠮᠠᠨ ᠪᠠᠢᠨᠠ᠃ ᠷᠶᠠᠽᠠᠨ ᠤ᠋ ᠸᠠᠩ ᠤ᠋ᠨ ᠬᠥᠪᠡᠭᠦᠨ ᠪᠠᠢᠨᠠ᠁ ᠬᠠᠮᠲᠤ ᠪᠠᠭᠠᠪᠠᠭᠠᠢ ᠠᠩᠨᠠᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠵᠤ ᠪᠠᠢᠨᠠ ᠤᠤ?
— ᠪᠢ ᠪᠣᠰᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ᠂ ᠲᠤᠰᠠᠯᠠᠭᠠᠷᠠᠢ᠁
ᠷᠠᠲ᠋ᠢᠪᠤᠷ ᠶᠣᠢᠯᠠᠭᠰᠠᠭᠠᠷ ᠪᠣᠰᠤᠭᠠᠳ ᠮᠣᠩᠭᠣᠯ ᠤ᠋ᠨ ᠴᠠᠬᠢᠷᠠᠭ ᠰᠠᠢᠨ ᠮᠣᠷᠢᠨ ᠳᠡᠭᠡᠷᠡ ᠷᠣᠮᠠᠨ ᠤ᠋ ᠲᠤᠰᠠᠯᠠᠮᠵᠢ ᠪᠠᠷ ᠮᠣᠷᠳᠠᠯᠠ᠃ ᠡᠨᠡ ᠬᠣᠶᠠᠷ ᠮᠣᠷᠢᠲᠠᠢ ᠬᠥᠮᠦᠨ ᠵᠢᠯᠠᠭᠠ ᠳ᠋ᠤ᠌ ᠣᠷᠣᠵᠤ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠤᠨ ᠶᠠᠪᠤᠯᠠ᠃
ᠴᠢᠨᠣᠠ ᠨᠤᠭᠤᠳ ᠪᠠ ᠬᠡᠷᠢᠶᠡ ᠨᠦ᠍ᠭᠦᠳ ᠭᠡᠬᠦᠷᠲᠦ ᠲᠠᠯᠠᠪᠠᠢ ᠶ᠋ᠢᠨ ᠳᠡᠭᠡᠷᠡ ᠴᠢᠰᠤᠲᠤ ᠨᠠᠢᠷ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨ ᠬᠣᠴᠣᠷᠤᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠣᠨ᠂ ᠮᠡᠷᠭᠡᠨᠭᠣᠣᠠ᠂ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠭᠡᠷᠡᠯ᠂ ᠠᠷᠢᠭᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠲ· ᠬᠦᠮᠦᠵᠢᠯᠲᠦ᠂ ᠵᠢᠩᠯᠢᠬᠤᠸᠠᠷ᠂ ᠪᠠᠯ