ᠪᠠᠲᠤ ᠬᠠᠭᠠᠨ 4-09ᠷᠶᠠᠽᠠᠨ ᠢ᠋ ᠪᠠᠢᠯᠳᠤᠬᠤ ᠪᠠᠷ ᠮᠣᠷᠳᠠᠯᠠ-ᠮᠣᠩᠭᠣᠯᠴᠤᠳ ᠲᠠᠢ ᠠᠩᠬᠠ ᠤᠳᠠᠭᠠ ᠲᠤᠯᠤᠯᠳᠤᠭᠰᠠᠨ-Bat khaan Бат хаан-ᠷᠣᠮᠠᠨ
66ᠶᠢᠰᠦ ᠷᠶᠠᠽᠠᠨ ᠢ᠋ ᠪᠠᠢᠯᠳᠤᠬᠤ ᠪᠠᠷ ᠮᠣᠷᠳᠠᠯᠠ
ᠪᠠᠲᠤ ᠬᠠᠭᠠᠨ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠤᠮᠠᠷᠠ ᠵᠦᠭ ᠮᠣᠷᠳᠠᠭᠤᠯᠤᠯᠠ᠃ ᠪᠤᠰᠤᠳ ᠣᠲ᠋ᠷᠢᠶᠠᠳ᠋ ᠲᠠᠢ ᠦᠷᠭᠦᠯᠵᠢ ᠶ᠋ᠢᠨ ᠬᠣᠯᠪᠣᠭᠠ ᠪᠠᠷᠢᠭᠤᠯᠬᠤ ᠪᠠᠷ ᠲᠡᠳᠡᠨᠡᠷ ᠲᠡᠰᠢ ᠲᠤᠰᠬᠠᠢ ᠡᠯᠴᠢᠳ ᠢ᠋ ᠢᠯᠡᠭᠡᠵᠡᠢ᠃ ᠬᠣᠶᠠᠷ ᠬᠣᠨᠣᠭ ᠪᠦᠷᠢ ᠳ᠋ᠦ᠍ ᠲᠡᠭᠦᠨ ᠦ᠌ ᠥᠷᠥᠭᠡᠨ ᠳ᠋ᠦ᠍ ᠡᠯᠴᠢ ᠱᠠᠯᠠᠮᠠᠭᠠᠢᠯᠠᠨ ᠢᠷᠡᠳᠡᠭ ᠪᠠᠢᠯᠠ᠃ ᠲᠡᠳᠡᠨᠡᠷ ᠮᠡᠳᠡᠭᠡ ᠠᠪᠴᠢᠷᠠᠵᠤ ᠵᠠᠩᠵᠤᠨ ᠤ᠋ ᠲᠤᠰᠢᠶᠠᠯ ᠢ᠋ ᠬᠦᠯᠢᠶᠡᠵᠦ ᠠᠪᠤᠨᠠ᠃ ᠴᠠᠰᠤᠨ ᠰᠢᠭᠤᠷᠭᠠ ᠡᠯᠴᠢ ᠶ᠋ᠢ ᠲᠥᠭᠡᠷᠢᠭᠦᠯᠵᠡᠢ᠃ ᠤᠲ᠋ᠷᠢᠶᠠᠳ᠋ ᠤ᠋ᠳ ᠲᠣᠮᠢᠯᠠᠭᠳᠠᠭᠰᠠᠨ ᠵᠠᠮ ᠢ᠋ᠶ᠋ᠠᠨ ᠠᠯᠳᠠᠵᠠᠢ᠃ ᠤᠳᠠᠯ ᠦᠭᠡᠢ ᠪᠠᠲᠤ ᠬᠠᠭᠠᠨ ᠵᠥᠪᠬᠡᠨ ᠥᠪᠡᠷ ᠦ᠋ᠨ《 ᠢᠯᠠᠭᠳᠠᠰᠢ ᠦᠭᠡᠢ》ᠭᠡᠳᠡᠭ ᠲᠦᠮᠡᠲᠦ ᠪᠠ ᠳᠡᠷᠭᠡᠳᠡ ᠨᠢ ᠪᠠᠢᠭᠠ《 ᠭᠠᠯᠵᠠᠭᠤ ᠲᠠᠢ》ᠭᠡᠳᠡᠭ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠤ᠋ᠨ ᠲᠦᠮᠡ᠂ ᠬᠣᠶᠠᠷ ᠤ᠋ᠨ ᠪᠠᠢᠭᠠ ᠭᠠᠵᠠᠷ ᠢ᠋ ᠮᠡᠳᠡᠯᠡ᠃ ᠴᠠᠰᠢ ᠶᠠᠪᠤᠬᠤ ᠠᠷᠭᠠ ᠦᠭᠡᠢ ᠪᠣᠯᠵᠤ ᠴᠡᠷᠢᠭ ᠨᠢ ᠵᠣᠭᠰᠣᠯᠠ᠃ ᠮᠣᠷᠢᠳ ᠢ᠋ ᠲᠡᠵᠢᠭᠡᠬᠦ ᠶᠠᠪᠤᠳᠠᠯ ᠪᠡᠷᠬᠡᠰᠢᠶᠡᠯᠲᠡᠢ ᠪᠣᠯᠤᠯᠠ᠃ ᠭᠦᠨᠵᠡᠭᠡᠢ ᠴᠠᠰᠤᠨ ᠳᠣᠲᠣᠷᠠ ᠠ᠋ᠴᠠ ᠬᠠᠭᠤᠷᠠᠢ ᠡᠪᠡᠰᠦ ᠶ᠋ᠢ ᠮᠣᠷᠢᠳ ᠨᠢ ᠠᠷᠠᠢᠬᠢᠵᠤ ᠮᠠᠯᠲᠠᠵᠤ ᠢᠳᠡᠨᠡ᠃ ᠥᠪᠡᠷ ᠦ᠋ᠨ ᠪᠡᠶᠡ ᠬᠠᠮᠠᠭᠠᠯᠠᠭᠴᠢᠳ ᠤ᠋ᠨ ᠮᠣᠷᠢᠳ ᠲᠸ᠋ ᠨᠢᠵᠡᠭᠡᠳ ᠰᠢᠭᠤᠳᠠᠢ ᠤᠯᠠᠭᠠᠨ ᠪᠤᠭᠤᠳᠠᠢ ᠣᠯᠭᠣᠬᠤ ᠶ᠋ᠢ ᠪᠠᠲᠤ ᠬᠠᠭᠠᠨ ᠮᠤᠬᠤᠯᠠᠭ ᠳᠣᠲᠣᠷᠠ ᠠ᠋ᠴᠠ ᠲᠤᠰᠢᠶᠠᠯᠠ᠃
—ᠬᠡᠷᠪᠡ ᠴᠠᠰᠤᠨ ᠰᠢᠭᠤᠷᠭᠠ ᠬᠡᠳᠦᠨ ᠬᠣᠨᠣᠭ ᠦᠷᠭᠦᠯᠵᠢᠯᠡᠪᠡᠯ ᠮᠣᠷᠢᠳ ᠦᠬᠦᠨᠡ᠃ ᠲᠡᠭᠦᠨ ᠦ᠌ ᠬᠠᠮᠲᠤ ᠮᠣᠩᠭᠣᠯ ᠤ᠋ᠨ ᠪᠦᠬᠦ ᠴᠡᠷᠢᠭ ᠰᠥᠨᠥᠬᠦ ᠪᠣᠯᠤᠨᠠ᠃ ᠷᠶᠠᠽᠠᠨ ᠲᠠᠰᠢ ᠤᠷᠤᠭᠰᠢ ᠪᠠᠨ! ᠭᠡᠵᠦ ᠮᠣᠩᠭᠣᠯᠴᠤᠳ ᠬᠠᠰᠬᠢᠷᠤᠯᠳᠤᠨᠠ᠃ ᠪᠠᠲᠤ ᠬᠠᠭᠠᠨ ᠪᠠ ᠪᠤᠰᠤᠳ ᠬᠠᠭᠠᠳ ᠢᠵᠠᠭᠤᠷᠲᠠᠨ ᠳ᠋ᠤ᠌ ᠭᠡᠷ ᠦ᠋ᠳ ᠢ᠋ ᠳᠠᠬᠢᠨ ᠪᠠᠷᠢᠵᠠᠭᠠᠪᠠ᠃
ᠭᠡᠷ ᠦ᠋ᠨ ᠲᠣᠭᠣᠨᠣ ᠪᠠᠷ ᠴᠠᠰᠤ ᠬᠠᠶᠠᠯᠠᠨᠠ᠃ ᠪᠥᠭᠡᠮ ᠤᠲᠤᠭᠠ ᠭᠡᠷ ᠢ᠋ᠶ᠋ᠡᠷ ᠳᠦᠭᠦᠷᠴᠦ ᠨᠢᠳᠦ ᠬᠣᠷᠣᠰᠬᠠᠨᠠ᠃ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠬᠡᠪᠲᠡᠬᠦ ᠡᠴᠡ ᠪᠢᠰᠢ ᠰᠠᠭᠤᠬᠤ ᠠᠷᠭᠠ ᠦᠭᠡᠢ ᠪᠠᠢᠯᠠ᠃ ᠪᠠᠲᠤ ᠬᠠᠭᠠᠨ ᠳᠣᠷᠣᠭᠰᠢ ᠬᠠᠷᠠᠵᠤ ᠭᠡᠳᠡᠰᠦ ᠪᠡᠷ ᠢ᠋ᠶ᠋ᠡᠨ ᠬᠡᠪᠲᠡᠭᠡᠳ᠂ ᠬᠤᠢᠯᠠᠭᠰᠠᠨ ᠬᠠᠲᠠᠭᠤ ᠴᠠᠭᠠᠰᠤᠨ ᠳᠡᠭᠡᠷᠡ ᠣᠷᠣᠰ ᠭᠠᠵᠠᠷ ᠤ᠋ᠨ ᠴᠢᠬᠤᠯᠠ ᠬᠣᠲᠠ ᠨᠤᠭᠤᠳ ᠂ ᠵᠠᠮ ᠤ᠋ᠳ᠂ ᠭᠣᠣᠯ ᠤ᠋ᠳ ᠢ᠋ ᠪᠣᠯᠬᠢ ᠪᠠᠷ ᠵᠢᠷᠤᠭᠰᠠᠨ ᠵᠢᠷᠤᠭ ᠢ᠋ ᠦᠵᠡᠨᠡ᠃
ᠲᠦᠷᠭᠡᠨ ᠭᠠᠲᠤᠯᠪᠠᠯ ᠵᠣᠬᠢᠬᠤ ᠵᠠᠮ ᠤ᠋ᠨ ᠤᠷᠲᠤ ᠶ᠋ᠢᠨ ᠬᠡᠮᠵᠢᠶᠡ ᠶ᠋ᠢ ᠲᠣᠭᠠᠯᠠᠵᠤ ᠪᠣᠳᠣᠨᠠ᠃ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠬᠠᠭᠠᠳ ᠨᠣᠶᠠᠳ ᠮᠢᠩᠭᠠᠲᠤ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠰᠢᠬᠠᠯᠴᠠᠯᠳᠤᠨᠠ᠃ ᠡᠳᠡᠨᠡᠷ ᠴᠥᠮ ᠪᠠᠲᠤ ᠬᠠᠭᠠᠨ ᠤ᠋ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠴᠢᠮᠡᠭᠡ ᠦᠭᠡᠢ ᠰᠣᠨᠣᠰᠴᠤ ᠨᠢᠭᠡᠨ ᠳᠠᠭᠤ ᠪᠠᠷ ᠵᠥᠪᠰᠢᠶᠡᠷᠡᠵᠦ ᠪᠠᠢᠨᠠ᠃ ᠰᠦᠪᠡᠭᠡᠳᠡᠢ ᠶ᠋ᠢᠨ ᠶᠠᠪᠤᠭᠤᠯᠤᠭᠰᠠᠨ ᠬᠠᠢᠭᠤᠯ ᠡᠷᠭᠢᠵᠦ ᠢᠷᠡᠵᠡᠢ᠃ ᠳᠡᠪᠡᠯ ᠨᠢ ᠴᠠᠰᠤ ᠪᠣᠯᠤᠭᠰᠠᠨ ᠤᠷᠠᠩᠬᠠᠢ ᠮᠠᠯᠠᠭᠠᠢ ᠲᠠᠢ ᠬᠣᠨᠢᠨ ᠤ᠋ ᠠᠷᠠᠰᠤᠨ ᠳᠡᠪᠡᠯ ᠲᠡᠢ᠂ ᠨᠣᠢᠲᠠᠨ ᠰᠤᠷ ᠤ᠋ᠨ ᠪᠦᠰᠡ ᠶ᠋ᠢ ᠴᠢᠩᠭᠠ ᠪᠦᠰᠡᠯᠡᠭᠰᠡᠨ ᠨᠠᠰᠤᠲᠠᠢ ᠴᠡᠷᠢᠭ ᠣᠷᠣᠵᠤ ᠢᠷᠡᠭᠡᠳ ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠰᠥᠬᠥᠷᠡᠨ ᠰᠠᠭᠤᠵᠤ ᠤᠷᠲᠤ ᠬᠠᠨᠴᠤᠢ ᠪᠠᠨ ᠬᠣᠢᠰᠢ ᠪᠣᠯᠭᠠᠵᠤ ᠮᠣᠢᠨᠣᠭ ᠬᠤᠷᠤᠭᠤ ᠪᠠᠨ ᠲᠡᠨᠢᠢᠯᠭᠡᠵᠦ ᠭᠠᠷ ᠢ᠋ᠶ᠋ᠠᠨ ᠡᠭᠡᠭᠡᠪᠡ᠃ ᠪᠠᠲᠤ ᠬᠠᠭᠠᠨ ᠤ᠋ ᠠᠰᠠᠭᠤᠬᠤ ᠳ᠋ᠤ᠌ ᠬᠥᠭᠰᠢᠨ ᠴᠡᠷᠢᠭ ᠬᠡᠯᠡᠭᠰᠡᠨ ᠨᠢ᠄
— ᠮᠠᠨ ᠤ᠋ ᠡᠮᠦᠨᠡ ᠣᠢᠷᠠᠬᠠᠨ ᠣᠷᠣᠰ ᠤ᠋ᠨ ᠴᠡᠷᠢᠭ ᠦ᠋ᠳ ᠵᠢᠯᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠬᠡᠪᠲᠡᠯᠡ᠃ ᠡᠢᠮᠦ ᠬᠠᠷᠠᠩᠭᠤᠢ ᠰᠥᠨᠢ ᠲᠡᠳᠡ ᠨᠠᠷ ᠪᠢᠳᠡᠨᠡᠷ ᠳᠡᠭᠡᠷᠡ ᠢᠷᠡᠵᠦ ᠮᠠᠨ ᠤ᠋ ᠪᠠᠢᠯᠳᠤᠭᠴᠢᠳ ᠢ᠋ ᠬᠡᠷᠴᠢᠨ ᠠᠯᠠᠨᠠ᠃
— ᠴᠢ ᠪᠠᠰᠠ ᠥᠭᠡᠷᠡ ᠶᠠᠭᠤ ᠮᠡᠳᠡᠪᠡ?
— ᠵᠡᠭᠦᠨ ᠭᠠᠷ ᠲᠤ᠌ ᠬᠣᠯᠠ ᠪᠤᠰᠤ ᠭᠠᠵᠠᠷ ᠭᠦᠶᠦᠭ ᠬᠠᠭᠠᠨ ᠤ᠋ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠶᠠᠪᠤᠵᠤ ᠪᠠᠢᠨᠠ᠃ ᠴᠡᠷᠢᠭ ᠬᠠᠷᠢᠶᠠᠯ ᠲᠠᠯᠪᠢᠵᠤ ᠴᠠᠰᠤ ᠪᠠᠷ ᠬᠤᠴᠢᠵᠤ ᠬᠡᠪᠲᠡᠵᠡᠭᠡᠭᠡᠳ᠄《 ᠰᠢᠭᠤᠷᠭᠠ ᠥᠩᠭᠡᠷᠡᠬᠦ ᠶ᠋ᠢ ᠬᠦᠯᠢᠶᠡᠶᠡ᠂ ᠦᠭᠡᠢ ᠪᠣᠯ ᠪᠢᠳᠡᠨ ᠦ᠌ ᠮᠣᠷᠢᠳ ᠬᠥᠰᠡᠷ ᠲᠦ᠍ ᠬᠠᠶᠠᠭᠳᠠᠨᠠ》ᠭᠡᠯᠴᠡᠨᠡ᠃ ᠭᠡᠲᠡᠯᠡ ᠭᠦᠶᠦᠭ ᠬᠠᠭᠠᠨ ᠲᠡᠨᠳᠡ ᠠᠯᠲᠠ ᠠᠷᠢᠬᠢ ᠲᠠᠯᠬᠠ ᠭᠣᠶᠣ ᠡᠬᠡᠨᠡᠷ ᠦ᠋ᠳ ᠢ᠋ᠶ᠋ᠡᠷ ᠪᠠᠶᠠᠨ᠂ 《 ᠬᠡᠷᠪᠡ ᠪᠢᠳᠡ ᠪᠠᠲᠤ ᠬᠠᠭᠠᠨ ᠠ᠋ᠴᠠ ᠲᠦᠷᠦᠭᠦᠯᠡᠵᠦ ᠷᠶᠡᠽᠡᠨ ᠢ᠋ ᠡᠵᠡᠯᠡᠬᠦ ᠦᠭᠡᠢ ᠪᠣᠯ ᠪᠢᠳᠡᠨ ᠳ᠋ᠦ᠍ ᠶᠠᠭᠤ ᠴᠤ᠌ ᠣᠯᠳᠠᠬᠤ ᠦᠭᠡᠢ ᠪᠣᠯᠤᠨᠠ 》ᠭᠡᠵᠦ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠶᠠᠭᠠᠷᠠᠪᠴᠢᠯᠠᠨ ᠤᠷᠤᠭᠰᠢ ᠬᠥᠭᠡᠭᠡᠵᠦ ᠪᠠᠢᠨᠠ ᠭᠡᠪᠡ᠃
ᠪᠠᠲᠤ ᠬᠠᠭᠠᠨ:
— ᠭᠦᠶᠦᠭ ᠬᠠᠭᠠᠨ ᠣᠷᠣᠰ ᠤ᠋ᠨ ᠲᠡᠷᠡᠬᠦ ᠶᠡᠬᠡ ᠬᠣᠲᠠ ᠶ᠋ᠢ ᠡᠵᠡᠯᠡᠨ ᠠᠪᠬᠤ ᠶ᠋ᠢ ᠬᠦᠰᠡᠵᠦ ᠪᠤᠰᠤᠳ ᠲᠦᠮᠡ ᠨᠦ᠍ᠭᠦᠳ ᠲᠦ᠍ ᠦᠯᠢᠭᠡᠷ ᠳᠠᠭᠤᠷᠢᠶᠠᠯ ᠪᠣᠯᠤᠨ ᠷᠶᠡᠽᠡᠨ ᠦ᠌ ᠳᠠᠰᠢ ᠰᠢᠮᠳᠠᠨ ᠶᠠᠪᠤᠭᠠ ᠨᠢ ᠮᠠᠰᠢ ᠰᠠᠢᠰᠢᠶᠠᠯᠲᠠᠢ ᠰᠠᠢᠨ ᠪᠠᠢᠨᠠ᠃ ᠬᠥᠶᠦᠭ ᠬᠠᠭᠠᠨ ᠣᠳᠣ ᠬᠠᠮᠢᠭᠠ ᠪᠠᠭᠤᠳᠠᠯᠯᠠᠨ ᠪᠠᠢᠭᠠ ᠶ᠋ᠢ ᠴᠢ ᠮᠡᠳᠡᠨᠡ ᠤᠤ? ᠲᠡᠭᠦᠨ ᠢ᠋ ᠣᠯᠵᠤ ᠴᠢ ᠴᠢᠳᠠᠬᠤ ᠤᠤ? ᠭᠡᠵᠦ ᠮᠠᠰᠢ ᠲᠠᠢᠪᠤᠩ ᠢ᠋ᠶ᠋ᠠᠷ ᠬᠡᠯᠡᠯᠡ᠃
— ᠪᠢ ᠮᠡᠳᠡᠨᠡ᠂ ᠣᠯᠵᠤ ᠴᠤ᠌ ᠴᠢᠳᠠᠨᠠ ᠭᠡᠵᠦ ᠨᠥᠭᠦᠭᠡ ᠴᠡᠷᠢᠭ ᠬᠠᠷᠢᠭᠤᠯᠪᠠ᠃
— ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠴᠢᠮᠠᠲᠤ ᠮᠢᠨᠦ ᠲᠠᠮᠠᠭᠠ ᠲᠠᠢ ᠪᠢᠴᠢᠭ ᠢ᠋ ᠥᠭᠭᠦᠨᠡ᠃ ᠴᠢ ᠲᠡᠭᠦᠨ ᠢ᠋ ᠠᠪᠴᠤ ᠭᠦᠶᠦᠭ ᠬᠠᠭᠠᠨ ᠳ᠋ᠤ᠌ ᠣᠴᠢᠵᠤ ᠬᠡᠯᠡ! ᠬᠥᠶᠦᠭ ᠬᠠᠭᠠᠨ ᠤ᠋ ᠴᠡᠷᠢᠭ ᠣᠷᠣᠭᠰᠢ ᠳᠠᠷᠤᠢ ᠶᠠᠭᠠᠷᠠᠯᠲᠠᠢ ᠪᠠᠷ ᠳᠠᠪᠰᠢᠨ ᠶᠠᠪᠤᠵᠤ ᠮᠠᠨ ᠤ᠋ ᠵᠠᠮ ᠢ᠋ ᠪᠣᠭᠣᠵᠤ ᠪᠠᠢᠭᠠ ᠣᠷᠣᠰ ᠤ᠋ᠨ ᠴᠡᠷᠢᠭ ᠢ᠋ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠡᠷᠢᠨ ᠣᠯᠵᠤ ᠪᠤᠲᠠ ᠨᠢᠷᠭᠡᠵᠦ ᠤᠰᠠᠳᠬᠠᠰᠤᠭᠠᠢ᠃ ᠬᠡᠷᠪᠡ ᠭᠦᠶᠦᠭ ᠬᠠᠭᠠᠨ ᠣᠷᠣᠰ ᠤ᠋ᠨ ᠴᠡᠷᠢᠭ ᠢ᠋ ᠳᠠᠭᠠᠷᠢᠨ ᠣᠷᠣᠬᠤ ᠳ᠋ᠤ᠌ ᠥᠪᠡᠷ ᠦ᠋ᠨ ᠬᠦᠴᠦ ᠶ᠋ᠢ ᠨᠢᠮᠭᠡᠨ ᠭᠡᠵᠦ ᠦᠵᠡᠬᠦ ᠪᠣᠯ ᠵᠠᠪᠠᠯ ᠬᠦᠯᠢᠶᠡᠵᠡᠭᠡᠵᠦ ᠨᠠᠳᠠᠳᠤ ᠮᠡᠳᠡᠭᠳᠡᠰᠦᠭᠡᠢ᠃ ᠲᠡᠭᠡᠪᠡᠯ ᠪᠢ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠤ᠋ᠨ ᠲᠦᠮᠡ ᠶ᠋ᠢ ᠶᠠᠪᠤᠭᠤᠯᠵᠤ ᠣᠷᠣᠰ ᠤ᠋ᠨ ᠴᠡᠷᠢᠭ ᠢ᠋ ᠬᠥᠶᠦᠭ ᠬᠠᠭᠠᠨ ᠤ᠋ ᠲᠤᠰᠠᠯᠠᠮᠵᠢ ᠦᠭᠡᠢ ᠪᠡᠷ ᠤᠰᠠᠳᠬᠠᠨᠠ ᠭᠡᠵᠦ ᠵᠠᠩᠵᠤᠨ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ ᠭᠡᠯᠡ᠃
ᠪᠠᠲᠤ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠠᠳᠠᠮᠠᠭ ᠪᠠ ᠤᠯᠠᠭᠠᠨ ᠪᠣᠳᠣᠭ ᠲᠠᠢ ᠠᠯᠲᠠᠨ ᠬᠠᠢᠷᠴᠠᠭ ᠢ᠋ ᠡᠪᠦᠷ ᠡᠴᠡ ᠪᠡᠨ ᠭᠠᠷᠭᠠᠨᠠ᠂ ᠨᠢᠵᠡᠭᠡᠳ ᠵᠤᠷᠪᠤᠰ ᠬᠠᠭᠤᠳᠠᠰᠤᠨ ᠳᠡᠭᠡᠷᠡ ᠵᠠᠩᠵᠤᠨ ᠤ᠋ ᠨᠡᠷᠡ ᠶ᠋ᠢ ᠳᠠᠷᠤᠵᠤ ᠥᠭᠬᠦ ᠳ᠋ᠦ᠍ ᠨᠥᠭᠦᠭᠡ ᠪᠤᠭᠤᠷᠤᠯ ᠡᠪᠦᠭᠡᠨ ᠲᠡᠷᠡ ᠵᠤᠷᠪᠤᠰ ᠢ᠋ ᠠᠪᠴᠤ ᠥᠪᠡᠷ ᠦ᠋ᠨ ᠤᠷᠠᠩᠬᠠᠢ ᠮᠠᠯᠠᠭᠠᠢ ᠶ᠋ᠢᠨ ᠳᠣᠲᠣᠷ ᠤ᠋ᠨ ᠵᠠᠪᠰᠠᠷ ᠬᠢᠵᠦ ᠭᠡᠷ ᠡᠴᠡ ᠮᠥᠯᠬᠥᠨ ᠭᠠᠷᠴᠤ ᠶᠠᠪᠤᠯᠠ᠃
ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠪᠠᠲᠤ ᠬᠠᠭᠠᠨ ᠤ᠋ ᠭᠡᠷ ᠲᠦ᠍ ᠥᠭᠡᠷᠡ ᠨᠢᠭᠡ ᠬᠠᠷᠠ ᠨᠢᠳᠦ ᠲᠡᠢ᠂ ᠥᠨᠳᠥᠷ ᠨᠠᠷᠢᠬᠠᠨ ᠪᠡᠶᠡ ᠲᠡᠢ᠂ ᠥᠷᠭᠡᠨ ᠴᠡᠭᠡᠵᠢ ᠲᠡᠢ᠂ ᠲᠡᠭᠰᠢ ᠰᠢᠯᠤᠭᠤᠨ ᠮᠥᠷᠥ ᠲᠡᠢ ᠪᠥᠭᠡᠳ ᠮᠠᠩᠨᠤᠭ ᠬᠣᠷᠭᠣᠢ ᠪᠠᠷ ᠡᠮᠵᠢᠭᠰᠡᠨ ᠬᠥᠬᠡ ᠴᠠᠮᠪᠠᠨ ᠨᠥᠮᠥᠷᠭᠡ ᠲᠡᠢ ᠵᠠᠯᠠᠭᠤ ᠡᠯᠴᠢ ᠣᠷᠣᠵᠤ ᠢᠷᠡᠮᠡᠭᠴᠡ ᠵᠠᠪᠢᠯᠠᠨ ᠰᠠᠭᠤᠭᠠᠳ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠬᠥᠮᠦᠰ ᠢ᠋ ᠥᠷᠥᠮᠳᠡᠭᠰᠡᠨ ᠬᠤᠷᠴᠠ ᠰᠡᠷᠭᠦᠯᠡᠩ ᠨᠢᠳᠦ ᠪᠡᠷ ᠡᠷᠭᠢᠨ ᠲᠣᠭᠣᠷᠢᠨ ᠬᠠᠷᠠᠵᠤ᠂
— ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠬᠠᠮᠢᠭᠠ ᠪᠠᠢᠨᠠ ᠭᠡᠵᠦ ᠠᠰᠠᠭᠤᠪᠠ᠃
ᠬᠣᠨᠢᠨ ᠬᠥᠨᠵᠢᠯᠡ ᠬᠥᠳᠡᠯᠵᠦ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠪᠦᠯᠲᠡᠭᠡᠷ ᠨᠢᠳᠦ ᠲᠡᠢ ᠤᠯᠠᠭᠠᠨ ᠴᠢᠷᠠᠢ ᠲᠠᠢ ᠬᠥᠮᠦᠨ ᠥᠨᠳᠡᠢᠵᠦ᠂
— ᠪᠢ ᠴᠢᠮᠠᠲᠤ ᠶᠠᠮᠠᠷ ᠬᠡᠷᠡᠭ ᠲᠡᠢ ᠪᠣᠯᠪᠠ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠨᠥᠭᠦᠭᠡ ᠡᠯᠴᠢ᠂
— ᠪᠢ ᠴᠢᠮᠠᠲᠤ ᠭᠠᠰᠢᠭᠤᠳᠠᠯ ᠲᠠᠢ ᠮᠡᠳᠡᠭᠡ ᠬᠦᠷᠭᠡᠵᠦ ᠢᠷᠡᠯᠡ᠃ ᠥᠴᠦᠬᠡᠨ ᠠᠮᠢ ᠶ᠋ᠢ ᠮᠢᠨᠢ ᠠᠭᠤᠴᠢᠯᠠᠵᠤ ᠬᠠᠢᠷᠠᠯᠠ ᠭᠡᠬᠦ ᠳ᠋ᠦ᠍ᠨᠢ ᠪᠠᠲᠤ ᠬᠠᠭᠠᠨ᠂
— ᠬᠡᠯᠡ᠂ ᠬᠡᠯᠡ ᠭᠡᠵᠦ ᠲᠡᠨᠳᠡ ᠡᠴᠡ ᠳᠤᠤᠭᠠᠷᠪᠠ᠃
— ᠪᠢ ᠭᠦᠶᠦᠭ ᠬᠠᠭᠠᠨ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠭᠠᠳ ᠵᠠᠮ ᠵᠠᠭᠤᠷᠠ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠤ᠋ᠨ ᠬᠦᠦ ᠵᠣᠷᠢᠭᠲᠤ ᠪᠠᠭᠠᠲᠤᠷ ᠦᠷᠶᠡᠩᠭ᠌ᠾ ᠭᠠᠳᠠᠩ (ᠤᠷᠢᠶᠠᠩᠬᠠᠶ᠋ᠢᠲᠠᠢ) ᠲᠠᠢ ᠠᠭᠤᠯᠵᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠪᠡᠷ ᠳᠥᠷᠪᠡᠨ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠶᠠᠪᠤᠵᠤ ᠪᠠᠢᠯᠠ······
— ᠲᠡᠷᠡ ᠨᠢ ᠶᠢᠰᠦᠭᠦᠯᠡ ᠪᠡᠨ ᠭᠠᠷᠤᠭᠰᠠᠨ ᠰᠢᠦ ᠳ᠋ᠠ ᠭᠡᠵᠦ ᠬᠠᠵᠠᠭᠤ ᠠ᠋ᠴᠠ ᠬᠥᠮᠦᠨ ᠬᠡᠯᠡᠪᠡ᠃
— ᠪᠢᠳᠡ ᠵᠢᠯᠠᠭᠠ ᠤᠷᠤᠭᠤᠳᠠᠵᠤ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠴᠤᠪᠤᠷᠠᠨ ᠠᠭᠠᠵᠢᠮ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠠᠢᠲᠠᠯᠠ ᠣᠯᠠᠨ ᠲᠣᠭᠠᠨ ᠤ᠋ ᠣᠷᠣᠰ ᠤ᠋ᠳ ᠪᠢᠳᠡᠨ ᠢ᠋ ᠳᠣᠪᠲᠣᠯᠤᠨ ᠳᠠᠭᠠᠷᠢᠯᠠ᠃ ᠮᠢᠨᠦ ᠮᠣᠷᠢ ᠨᠠᠳᠠ ᠶ᠋ᠢ ᠠᠪᠴᠤ ᠭᠠᠷᠤᠯᠠ᠃ ᠪᠢ ᠮᠣᠷᠢ ᠪᠠᠨ ᠵᠢᠯᠠᠭᠠ ᠶ᠋ᠢᠨ ᠡᠷᠭᠢ ᠳᠡᠭᠡᠷᠡ ᠬᠦᠯᠢᠵᠦ ᠣᠷᠬᠢᠭᠠᠳ ᠡᠷᠭᠢᠵᠦ ᠵᠢᠯᠠᠭᠠ ᠳ᠋ᠤ᠌ ᠣᠷᠣᠵᠤ᠂ ᠠᠯᠠᠭᠳᠠᠭᠰᠠᠨ ᠭᠤᠷᠪᠠᠨ ᠨᠥᠬᠥᠳ ᠢ᠋ ᠣᠯᠵᠤ ᠦᠵᠡᠭᠰᠡᠨ ᠪᠣᠯᠪᠠᠴᠤ ᠴᠢᠨᠦ ᠬᠦᠦ ᠶ᠋ᠢᠨ ᠬᠡᠭᠦᠷ ᠢ᠋ ᠣᠯᠤᠭᠰᠠᠨ ᠦᠭᠡᠢ᠂ ᠲᠡᠭᠦᠨ ᠢ᠋ ᠠᠮᠢᠳᠤ ᠪᠠᠷ ᠣᠯᠵᠠᠯᠠᠨ ᠠᠪᠴᠤ ᠶᠠᠪᠤᠭᠰᠠᠨ ᠨᠢ ᠮᠠᠭᠠᠳ᠂ ᠲᠡᠭᠦᠨ ᠦ᠌ ᠬᠠᠮᠲᠤ ᠵᠠᠯᠠᠭᠤ ᠺᠢᠫᠴᠡᠺ ᠮᠥᠰᠥ᠋ᠺ ᠠᠯᠠᠭᠠ ᠪᠣᠯᠤᠯᠠ ᠭᠡᠪᠡ᠃ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠮᠠᠰᠢ ᠶᠡᠬᠡᠪᠡᠷ ᠭᠠᠰᠢᠭᠤᠳᠠᠨ ᠠᠭᠤᠷᠯᠠᠵᠤ ᠳᠣᠷᠣᠭᠰᠢ ᠪᠠᠨ ᠪᠥᠬᠥᠢᠵᠦ ᠰᠠᠭᠤᠬᠤ ᠳ᠋ᠤᠨᠢ ᠲᠡᠭᠦᠨ ᠦ᠌ ᠴᠢᠷᠠᠢ ᠵᠢᠰᠦ ᠨᠢ ᠬᠠᠪᠤᠳᠤᠭᠰᠠᠨ ᠮᠡᠲᠦ ᠤᠯᠠᠭᠠᠨ ᠪᠣᠯᠵᠤ ᠪᠦᠯᠲᠡᠭᠡᠷ ᠨᠢᠳᠦ ᠨᠢ ᠠᠭᠠᠵᠢᠮ ᠢ᠋ᠶ᠋ᠠᠷ ᠠᠨᠢᠵᠤ ᠥᠴᠦᠬᠡᠨ ᠲᠡᠳᠦᠢ ᠵᠣᠷᠪᠤᠳᠠᠰᠤ ᠪᠣᠯᠬᠤ ᠶ᠋ᠢᠨ ᠰᠠᠴᠠᠭᠤ ᠦᠷᠴᠢᠭᠢᠷ ᠬᠠᠴᠠᠷ ᠤ᠋ᠨ ᠳᠡᠭᠡᠭᠦᠷ ᠭᠠᠭᠴᠠ ᠬᠣᠶᠠᠷ ᠥᠨᠥᠴᠢᠨ ᠨᠢᠯᠪᠤᠰᠤ ᠪᠥᠮᠪᠥᠷᠢᠯᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠠᠯᠲᠠᠨᠴᠢᠮᠡᠭ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠵᠢᠩᠯᠢᠬᠤᠸᠠᠷ᠂ ᠠᠯᠲᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠪᠠᠯ᠂ ᠪᠠᠶᠠᠨᠴᠡᠴᠡᠭ᠂ ᠭᠡᠷᠡᠯ᠂ ᠲ· ᠬᠦᠮᠦᠵᠢᠯᠲᠦ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ