ᠪᠠᠲᠤ ᠬᠠᠭᠠᠨ 4-06 ᠸᠠᠩ ᠤ᠋ᠨ ᠬᠠᠲᠤᠨ ᠶᠸᠧᠫᠷᠡᠺᠰᠧᠶᠥ᠋ᠱᠺᠡ-ᠮᠣᠩᠭᠣᠯᠴᠤᠳ ᠲᠠᠢ ᠠᠩᠬᠠ ᠤᠳᠠᠭᠠ ᠲᠤᠯᠤᠯᠳᠤᠭᠰᠠᠨ-Bat khaan Бат хаан-ᠷᠣᠮᠠᠨ
15ᠵᠢᠷᠭᠤᠭᠠ ᠸᠠᠩ ᠤ᠋ᠨ ᠬᠠᠲᠤᠨ ᠶᠸᠧᠫᠷᠡᠺᠰᠧᠶᠥ᠋ᠱᠺᠡ
ᠡᠳᠦᠷ ᠦ᠋ᠳ ᠥᠩᠭᠡᠷᠡᠭᠰᠡᠭᠡᠷ ᠪᠠᠢᠯᠠ᠃ ᠲᠠᠲ᠋ᠠᠷ ᠤ᠋ᠳ ᠲᠤ᠌ ᠶᠠᠪᠤᠭᠤᠯᠤᠭᠰᠠᠨ ᠡᠯᠴᠢᠨ ᠡᠴᠡ ᠮᠡᠳᠡᠭᠡ ᠦᠭᠡᠢ᠂ ᠷᠶᠠᠽᠠᠨ ᠬᠣᠲᠠᠨ ᠳ᠋ᠤ᠌ ᠶᠡᠷᠦ ᠪᠤᠰᠤ ᠪᠠᠷ ᠰᠠᠨᠳᠤᠷᠴᠤ ᠡᠬᠢᠯᠡᠯᠡ᠃
— ᠡᠯᠴᠢ ᠨᠤᠭᠦᠳ ᠶᠠᠭᠠᠬᠢᠪᠠ? ᠶᠠᠭᠤᠨ ᠳ᠋ᠤ᠌ ᠡᠯᠴᠢ ᠢᠯᠡᠭᠡᠳᠡᠭ ᠦᠭᠡᠢ ᠪᠢᠯᠡ? ᠬᠡᠳᠦᠢ ᠳ᠋ᠦ᠍ ᠢᠷᠡᠬᠦ ᠶᠤᠮ ᠪᠣᠯ ᠳ᠋ᠠ᠂ ᠸᠠᠩ ᠤ᠋ᠨ ᠬᠠᠲᠤᠨ ᠶᠸᠧᠫᠷᠡᠺᠰᠧᠶᠥ᠋ᠱᠺᠡ ᠪᠠᠢᠷᠢ ᠰᠠᠭᠤᠷᠢᠨ ᠳ᠋ᠠᠭᠠᠨ ᠲᠣᠭᠲᠠᠵᠤ ᠶᠠᠳᠠᠬᠤ ᠪᠣᠯᠤᠯᠠ᠃
— ᠶᠠᠭᠤᠨ ᠳ᠋ᠤ᠌ ᠪᠢ ᠹᠸᠣᠳᠣᠷ ᠢ᠋ ᠶᠠᠪᠤᠭᠤᠯᠤᠯᠠ᠂ ᠨᠠᠮᠠᠶ᠋ᠢ ᠠᠪᠤᠭᠠᠳ ᠶᠠᠪᠤ ᠭᠡᠵᠦ ᠶᠠᠭᠤᠨ ᠳ᠋ᠤ᠌ ᠭᠤᠶᠤᠭᠰᠠᠨ ᠦᠭᠡᠢ ᠪᠢᠯᠡ? ᠪᠢ ᠲᠡᠭᠦᠨ ᠢ᠋ ᠲᠡᠨᠳᠡ ᠬᠠᠮᠠᠭᠠᠯᠠᠭᠰᠠᠨ ᠭᠡᠵᠦ ᠬᠠᠲᠤᠨ ᠥᠨᠳᠥᠷ ᠰᠦᠮᠡ ᠶ᠋ᠢᠨ ᠳᠡᠭᠡᠳᠦ ᠲᠣᠰᠤᠯᠭᠠᠨ ᠳ᠋ᠤ᠌ ᠰᠠᠭᠤᠵᠤ ᠴᠠᠭ ᠢ᠋ ᠥᠩᠭᠡᠷᠡᠭᠡᠨᠡ᠃ ᠤᠳᠠᠲᠠᠯᠠ ᠬᠦᠯᠢᠶᠡᠭᠰᠡᠨ ᠠᠶᠠᠨᠴᠢᠨ ᠦᠵᠡᠭᠳᠡᠬᠦ ᠪᠣᠯᠪᠠᠤ ᠭᠡᠵᠦ ᠭᠡᠭᠡᠪᠴᠢ ᠪᠡᠷ ᠴᠠᠭᠠᠨ ᠲᠠᠯᠠ ᠶ᠋ᠢ ᠴᠥᠬᠥᠷᠡᠯ ᠦᠭᠡᠢ ᠰᠢᠷᠲᠡᠨᠡ᠃
ᠭᠡᠪᠡᠴᠦ ᠬᠢᠵᠠᠭᠠᠷ ᠦᠭᠡᠢ ᠬᠣᠭᠣᠰᠣᠨ ᠲᠠᠯᠠ ᠭᠤᠨᠢᠭ ᠲᠠᠢ ᠪᠠᠷ ᠲᠦᠩᠰᠦᠢᠵᠦ ᠮᠡᠨᠳᠦ ᠶ᠋ᠢᠨ ᠴᠥ᠍ ᠬᠠᠷᠢᠭᠤ ᠦᠭᠡᠢ ᠠᠵᠢ᠃ ᠶᠸᠧᠫᠷᠡᠺᠰᠧᠶᠥ᠋ᠱᠺᠡ ᠶ᠋ᠢᠨ ᠬᠠᠷᠠ ᠨᠢᠳᠦ ᠬᠡᠳᠦᠢ ᠰᠢᠷᠳᠡᠪᠡᠴᠦ᠂ ᠶᠠᠪᠤᠭᠰᠠᠨ ᠡᠯᠴᠢ ᠶ᠋ᠢᠨ ᠪᠠᠷᠠ ᠬᠠᠷᠠᠭᠳᠠᠬᠤ ᠦᠭᠡᠢ ᠠᠵᠢ᠃ ᠬᠠᠲᠤᠨ ᠤ᠋ ᠰᠠᠢᠬᠠᠨ ᠨᠢᠳᠦ ᠮᠠᠨᠠᠨᠲᠤᠵᠤ᠂ ᠵᠠᠯᠠᠭᠤ ᠴᠢᠷᠠᠢ ᠨᠢ ᠬᠤᠪᠠᠬᠠᠢᠷᠠᠨ ᠭᠤᠨᠢᠭᠲᠤ ᠨᠢᠯᠪᠤᠰᠤ ᠪᠠᠨ ᠠᠰᠬᠠᠷᠠᠭᠤᠯᠤᠨ ᠰᠤᠯᠠᠳᠠᠭᠰᠠᠨ ᠭᠠᠷ ᠳᠡᠭᠡᠷᠡ ᠪᠡᠨ ᠲᠣᠯᠣᠭᠠᠢ ᠪᠠᠨ ᠤᠨᠠᠭᠠᠨᠠ᠃ ᠬᠠᠢᠷᠠᠲᠤ ᠮᠢᠨᠢ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠪᠡᠶᠡ ᠪᠡᠨ ᠵᠣᠪᠠᠭᠠᠨᠠ ᠪᠣᠢ ᠭᠡᠵᠦ ᠠᠰᠠᠷᠠᠭᠴᠢ ᠡᠮᠡᠭᠡᠨ ᠠᠷᠭᠠᠳᠠᠨᠠ᠃
— ᠢᠩᠭᠢᠵᠦ ᠪᠣᠯᠬᠤ ᠦᠭᠡᠢ ᠰᠢᠦ ᠳ᠋ᠠ᠂ ᠸᠠᠩ ᠨᠣᠶᠠᠨᠲᠠᠨ ᠢᠷᠡᠭᠡᠳ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠶᠤᠮ ᠪᠣᠢ? ᠴᠢᠮᠠᠶ᠋ᠢ ᠠᠰᠠᠷᠠᠵᠤ ᠬᠠᠮᠠᠭᠠᠯᠠᠭᠰᠠᠨ ᠦᠭᠡᠢ᠁᠂᠂ ᠴᠢᠷᠠᠢ ᠪᠠᠨ ᠬᠠᠷᠠᠭᠠᠴᠢ !ᠬᠡᠴᠢᠨᠡᠨ ᠲᠤᠷᠠᠴᠢᠬᠠᠪᠠ?
— ᠪᠢ ᠵᠣᠪᠠᠵᠤ ᠭᠦᠢᠴᠡᠯᠡ᠂᠂᠂᠂᠂᠂
— ᠵᠢᠷᠦᠬᠡ ᠮᠢᠨᠢ ᠭᠠᠢ ᠵᠣᠪᠠᠯᠠᠩ ᠢ᠋ ᠵᠥᠩᠨᠡᠯᠡ᠃
— ᠵᠠ᠂ ᠪᠣᠯᠢ᠂ ᠴᠢ ᠶᠠᠭᠤ ᠶᠠᠷᠢᠨᠠ ᠪᠣᠢ?
ᠠᠮᠠᠨ ᠤ᠋ ᠮᠠᠭᠤ ᠪᠠᠷ ᠠᠰᠢᠳᠠ ᠶ᠋ᠢᠨ ᠪᠤᠶᠠᠨ ᠭᠡᠵᠦ ᠬᠥᠭᠰᠢᠨ ᠶᠠᠭᠠᠷᠠᠩᠭᠤᠢ ᠪᠠᠷ ᠡᠮᠦᠨᠡᠬᠢ ᠪᠤᠯᠤᠩ ᠳ᠋ᠠᠬᠢ ᠪᠤᠷᠬᠠᠨ ᠳ᠋ᠠᠭᠠᠨ ᠵᠠᠯᠪᠠᠷᠢᠵᠤ ᠨᠠᠮᠠᠨᠴᠢᠯᠠᠵᠤ ᠮᠥᠷᠭᠥᠪᠡ᠃ ᠶᠸᠧᠫᠷᠡᠺᠰᠧᠶᠥ᠋ᠱᠺᠡ ᠲᠦᠭᠰᠢᠭᠦᠷᠢᠲᠦ ᠭᠤᠨᠢᠭᠯᠠᠯ ᠳ᠋ᠤ᠌ ᠭᠠᠰᠠᠯᠤᠨ ᠮᠥᠷᠥᠭᠡᠳᠴᠦ ᠣᠷᠳᠣᠨ ᠤ᠋ ᠳᠣᠲᠣᠷᠠ ᠲᠡᠨᠦᠭᠦᠴᠢᠯᠡᠨ ᠶᠠᠪᠤᠲᠠᠯᠠ ᠬᠥᠮᠦᠰ ᠦ᠋ᠨ ᠴᠢᠩᠭᠠ ᠴᠢᠩᠭᠠ ᠣᠷᠢᠯᠠᠯᠳᠤᠬᠤ ᠬᠡᠷᠴᠡᠭᠡᠢ ᠳᠠᠭᠤᠨ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠬᠠᠲᠤᠨ ᠲᠡᠷᠡ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠪᠠᠯ ᠸᠠᠩ ᠤ᠋ᠳ ᠪᠣᠯᠤᠨ ᠪᠠᠢᠯᠳᠤᠭᠠᠨ ᠤ᠋ ᠤᠳᠤᠷᠢᠳᠤᠭᠴᠢᠳ ᠴᠤᠭᠯᠠᠭᠠᠳ᠂ ᠵᠥᠪᠯᠡᠯᠭᠡᠨ ᠬᠢᠵᠦ ᠪᠠᠢᠪᠠ᠃ ᠡᠳᠡ ᠨᠠᠷ ᠬᠠᠰᠬᠢᠷᠤᠯᠳᠤᠨ ᠶᠠᠷᠢᠯᠴᠠᠵᠤ ᠱᠤᠤᠭᠢᠯᠳᠤᠨ ᠲᠡᠮᠡᠴᠡᠯᠳᠦᠵᠦ ᠰᠠᠭᠤᠬᠤ ᠨᠢ ᠨᠢᠭᠡ ᠨᠢ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠨᠢ ᠡᠷᠡᠰ ᠲᠠᠲᠠᠭᠠᠯᠵᠠᠵᠤ ᠲᠡᠮᠡᠴᠡᠯᠳᠦᠭᠰᠡᠭᠡᠷ ᠶᠠᠮᠠᠷ ᠴᠤ᠌ ᠰᠢᠢᠳᠪᠦᠷᠢ ᠭᠠᠷᠭᠠᠵᠤ ᠴᠢᠳᠠᠯ ᠦᠭᠡᠢ ᠪᠡᠷ ᠤᠷᠲᠤ ᠰᠢᠷᠡᠭᠡᠨ ᠦ᠌ ᠬᠣᠢᠨᠠ ᠰᠠᠭᠤᠵᠤ ᠪᠠᠬᠠᠨ ᠢᠳᠡᠵᠦ ᠤᠤᠭᠤᠵᠤ ᠪᠠᠢᠭᠠᠳ ᠳᠠᠬᠢᠨ ᠮᠠᠷᠭᠤᠯᠳᠤᠵᠤ ᠡᠬᠢᠯᠡᠪᠡ᠃
— ᠪᠠᠰᠠ ᠳᠠᠬᠢᠨ ᠨᠢᠭᠡᠨ ᠤᠳᠠᠭᠠ ᠲᠣᠮᠣ ᠬᠣᠲᠠ ᠪᠦᠬᠦᠨ ᠳ᠋ᠦ᠍ ᠡᠯᠴᠢ ᠶᠠᠪᠤᠭᠤᠯᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠴᠡᠯ ᠪᠤᠭᠤᠷᠤᠯ ᠶᠡᠬᠡᠮᠰᠦᠭ ᠸᠠᠩ ᠬᠡᠯᠡᠪᠡ᠃
— ᠪᠦᠬᠦ ᠸᠠᠩ ᠤ᠋ᠳ ᠢ᠋ ᠴᠤᠭᠯᠠᠭᠤᠯᠵᠤ ᠪᠦᠬᠦ ᠣᠯᠠᠨ ᠲᠦᠮᠡᠨ ᠳ᠋ᠡᠭᠡᠨ ᠵᠠᠷᠯᠠᠭᠠᠳ ᠴᠥᠮ ᠰᠠᠨᠠᠯ ᠨᠢᠭᠡᠳᠬᠡᠨ ᠲᠠᠲ᠋ᠠᠷ ᠤ᠋ᠨ ᠲᠦᠷᠢᠮᠡᠬᠡᠢᠯᠡᠭᠴᠢᠳ ᠦ᠋ᠨ ᠡᠰᠡᠷᠭᠦ ᠬᠠᠮᠲᠤᠷᠠᠨ ᠮᠣᠷᠳᠠᠬᠤ ᠬᠡᠷᠡᠭᠲᠡᠢ᠃
— ᠬᠠᠷᠢᠨ ᠴᠥᠮ ᠢ᠋ ᠴᠤᠭᠯᠠᠭᠤᠯᠴᠢᠬᠠᠬᠤ ᠪᠠᠢᠬᠠ ᠭᠡᠵᠦ ᠸᠠᠩ ᠶᠦᠷᠢ ᠢᠩᠸᠠᠷᠸᠸᠢᠴ ᠵᠥᠷᠢᠨᠡ᠃ ᠸᠯᠠᠳᠢᠮᠢᠷ ᠰᠦᠽᠳ᠋ᠠᠯᠢᠰᠺ ᠤ᠋ᠨ ᠸᠠᠩ ᠭ᠌ᠸᠤᠷᠺᠢ ᠳ᠋ᠦ᠍ ᠪᠢ ᠮᠥᠨ ᠡᠢᠮᠦ ᠰᠠᠨᠠᠯ ᠢ᠋ ᠶᠠᠪᠤᠭᠤᠯᠤᠭᠰᠠᠨ ᠨᠢ ᠶᠠᠮᠠᠷ ᠴᠤ᠌ ᠪᠦᠲᠦᠯ ᠠᠯᠠᠭᠠ᠂ ᠶᠠᠳᠠᠬᠤ ᠳ᠋ᠠᠭᠠᠨ ᠬᠠᠷᠢᠭᠤ ᠴᠤ᠌ ᠢᠷᠡᠭᠰᠡᠨ ᠦᠭᠡᠢ᠃
— ᠶᠡᠬᠡ ᠸᠠᠩ ᠸᠯᠠᠳ᠋ᠢᠮᠢᠷᠰᠺᠢ ᠥᠪᠡᠷ ᠦ᠋ᠨ ᠬᠣᠲᠠ ᠪᠠᠨ ᠦᠯᠡᠳᠡᠭᠡᠵᠦ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠣᠷᠢᠶᠠᠳ ᠢ᠋ ᠬᠥᠳᠡᠯᠭᠡᠨ ᠲᠤᠰᠠᠯᠠᠬᠤ ᠪᠠᠷ ᠢᠷᠡᠬᠦ ᠦᠭᠡᠢ ᠭᠡᠵᠢ ᠤᠤ ᠳ᠋ᠠ᠃
— ᠤᠳᠠᠭᠠᠰᠢᠷᠠᠭᠤᠯᠬᠤ ᠨᠢ ᠯᠠᠪ᠃ ᠮᠠᠨ ᠤ᠋ ᠬᠣᠬᠢᠷᠠᠵᠤ ᠰᠦᠢᠳᠬᠦ ᠳ᠋ᠦ᠍ ᠲᠡᠷᠡ ᠪᠠᠶᠠᠷᠯᠠᠵᠤ ᠪᠠᠢᠬᠠ᠃ ᠤᠴᠢᠷ ᠨᠢ ᠲᠡᠷᠡ ᠷᠶᠠᠽᠠᠨ ᠤ᠋ ᠨᠤᠲᠤᠭ ᠢ᠋ ᠡᠵᠡᠯᠡᠵᠦ ᠠᠪᠬᠤ ᠰᠠᠨᠠᠭᠠ ᠶ᠋ᠢ ᠠᠬᠤᠭᠤᠯᠤᠭᠰᠠᠭᠠᠷ ᠥᠨᠥ ᠪᠣᠯᠵᠠᠢ ᠭᠡᠳ ᠡᠪᠦᠭᠡᠨ ᠸᠠᠩ ᠴᠠᠭᠠᠨ ᠲᠣᠯᠣᠭᠠᠢ ᠪᠠᠨ ᠭᠤᠨᠢᠭᠲᠠᠢ ᠪᠠᠷ ᠭᠠᠩᠬᠤᠭᠤᠯᠵᠤ ᠥᠭᠦᠯᠡᠷᠦᠨ᠄
— ᠬᠡᠷᠡᠭᠦᠯ ᠮᠠᠷᠭᠤᠭᠠᠨ ᠢ᠋ ᠣᠷᠬᠢᠬᠤ ᠴᠠᠭ ᠪᠣᠯᠤᠭᠠᠳ ᠪᠠᠢᠨᠠ᠃ ᠪᠢᠳᠡᠨᠡᠷ ᠭᠠᠭᠴᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠣᠯᠪᠠᠯ ᠲᠠᠲ᠋ᠠᠷ ᠤ᠋ᠳ ᠬᠢᠯᠪᠠᠷᠬᠠᠨ ᠳᠡᠢᠯᠬᠦ ᠪᠣᠯᠤᠨᠠ᠃ ᠪᠢᠳᠡ ᠬᠦᠴᠦ ᠪᠡᠨ ᠨᠢᠭᠡᠳᠬᠡᠪᠡᠯ ᠲᠡᠳᠡ ᠪᠢᠳᠡᠨ ᠢ᠋ ᠳᠡᠢᠯᠬᠦ ᠦᠭᠡᠢ ᠪᠣᠯᠤᠨᠠ᠃ ᠪᠢᠳᠡᠨᠡᠷ ᠬᠠᠮᠲᠤᠷᠠᠵᠤ ᠨᠢᠭᠡᠨ ᠲᠣᠯᠣᠭᠠᠢ ᠪᠠᠷ ᠪᠣᠳᠣᠬᠤ ᠬᠡᠷᠡᠭᠲᠡᠢ ᠭᠡᠬᠦ ᠳ᠋ᠦ᠍ ᠨᠢᠭᠡᠨ ᠵᠠᠯᠠᠭᠤ ᠸᠠᠩ ᠰᠣᠴᠢᠮᠠᠭ ᠠᠭᠤᠷᠯᠠᠵᠤ ᠰᠠᠭᠤᠳᠠᠯ ᠠ᠋ᠴᠠ ᠪᠣᠰᠤᠨ ᠬᠠᠷᠠᠢᠵᠤ᠂
— ᠠ᠂ ᠲᠡᠷᠡ ᠲᠣᠯᠣᠭᠠᠢᠯᠠᠭᠴᠢᠳ ᠨᠢ ᠴᠢᠮᠠᠶ᠋ᠢ ᠲᠣᠮᠢᠯᠠᠬᠤ ᠤᠤ?
— ᠪᠢ ᠲᠣᠬᠢᠷᠠᠬᠤ ᠦᠭᠡᠢ᠂ ᠨᠠᠰᠤ ᠥᠩᠭᠡᠷᠡᠵᠡᠢ᠃ ᠪᠢ ᠴᠢᠮᠠᠶ᠋ᠢ ᠮᠡᠳᠡᠵᠦ ᠪᠠᠢᠨᠠ᠃ ᠡᠷᠲᠡᠨ ᠦ᠌ ᠡᠷᠬᠡ ᠶᠠᠩᠪᠠ ᠡᠷᠡᠰ ᠢ᠋ᠶ᠋ᠡᠷ ᠪᠠᠢᠳᠠᠭ᠂ ᠪᠢ ᠬᠡᠵᠢᠶᠡ ᠴᠦ᠍ ᠴᠢᠮᠠᠳᠦ ᠵᠠᠬᠢᠷᠤᠭᠳᠠᠵᠤ ᠶᠠᠪᠤᠬᠤ ᠦᠭᠡᠢ᠃
ᠪᠢᠳᠡ ᠬᠡᠷᠡᠭᠦᠯ ᠢ᠋ᠶ᠋ᠡᠨ ᠪᠤᠯᠢᠵᠠᠭᠠᠶᠠ ᠭᠡᠵᠦ ᠶᠦᠷᠢ ᠢᠩᠭ᠌ᠸᠡᠷᠸᠸᠢ᠍ᠴ ᠬᠣᠷᠢᠭᠯᠠᠵᠤ ᠥᠭᠦᠯᠡᠷᠦᠨ᠄
— ᠬᠡᠷᠪᠡ ᠪᠠᠲᠤ ᠳ᠋ᠤ᠌ ᠵᠠᠬᠢᠷᠤᠭᠳᠠᠬᠤ ᠪᠣᠯᠪᠠᠯ ᠠᠷᠠᠢ ᠯᠠ ᠬᠡᠴᠡᠭᠦᠦ ᠪᠠᠢᠬᠠ᠂ ᠮᠢᠨᠦ ᠷᠶᠡᠽᠡᠨ ᠦ᠌ ᠬᠢᠨ ᠲᠡᠢ ᠬᠠᠮᠲᠤ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠵᠡᠷᠯᠢᠭ ᠲᠠᠯᠠ ᠳ᠋ᠤ᠌ ᠲᠠᠲ᠋ᠠᠷ ᠤ᠋ᠳ ᠢ᠋ ᠤᠭᠲᠤᠵᠤ ᠸᠯᠠᠳᠢᠮᠢᠷ ᠠ᠋ᠴᠠ ᠲᠤᠰᠠᠯᠠᠬᠤ ᠬᠦᠴᠦ ᠢᠷᠡᠲᠡᠯᠡ ᠬᠣᠷᠢᠭᠯᠠᠨ ᠰᠠᠭᠠᠲᠠᠭᠤᠯᠵᠤ ᠪᠠᠢᠶᠠ ᠭᠡᠵᠦ ᠪᠢ ᠪᠣᠳᠣᠵᠤ ᠪᠠᠢᠨᠠ᠃
— ᠭᠠᠭᠴᠠᠬᠠᠨ ᠷᠶᠡᠽᠡᠨ ᠦ᠌ ᠴᠡᠷᠢᠭ ᠴᠥᠭᠡᠨ ᠭᠡᠵᠦ ᠡᠪᠦᠭᠡᠨ ᠸᠠᠩ ᠲᠠᠲᠠᠭᠠᠯᠵᠠᠵᠤ᠂
— ᠣᠷᠣᠰ ᠭᠠᠵᠠᠷ ᠤ᠋ᠨ ᠪᠦᠬᠦ ᠠᠷᠠᠳ ᠲᠦᠮᠡᠨ ᠢ᠋ ᠪᠣᠰᠬᠠᠬᠤ ᠬᠡᠷᠡᠭᠲᠡᠢ᠃ ᠬᠣᠲᠠ ᠬᠥᠳᠡᠭᠡ ᠥᠬᠡᠢ ᠪᠦᠭᠦᠳᠡ ᠶ᠋ᠢ ᠳᠠᠢᠴᠢᠯᠠᠬᠤ ᠬᠡᠷᠡᠭᠲᠡᠢ ᠭᠡᠯᠡ᠃
—ᠬᠥᠳᠡᠭᠡᠨ ᠦ᠌ ᠡᠩ ᠦ᠋ᠨ ᠬᠠᠷᠠ ᠬᠥᠯᠲᠡᠨ ᠢ᠋ ᠳᠠᠢᠴᠢᠯᠠᠭᠠᠳ ᠶᠠᠭᠤ ᠬᠢᠳᠡᠭ ᠶᠤᠮ ᠪᠣᠢ? ᠭᠡᠵᠦ ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠳᠠᠭᠠᠭᠠᠮᠠᠯ ᠠᠭᠤᠷᠯᠠᠨ ᠬᠡᠯᠡᠪᠡ᠃
— ᠲᠡᠷᠡ ᠴᠢᠨᠢ ᠴᠡᠷᠢᠭ ᠦ᠋ᠨ ᠵᠠᠷᠢᠮ ᠨᠢᠭᠡ ᠳᠠᠭᠠᠭᠠᠮᠠᠯ ᠤ᠋ᠳ ᠠ᠋ᠴᠠ ᠴᠤ᠌ ᠢᠯᠡᠭᠦᠦ ᠬᠡᠷᠡᠭ ᠪᠦᠲᠦᠭᠡᠵᠦ ᠮᠠᠭᠠᠳ ᠰᠢᠦ ᠭᠡᠵᠦ ᠵᠠᠯᠠᠭᠤ ᠸᠠᠩ ᠬᠣᠱᠣᠩᠨᠠᠨ ᠬᠡᠯᠡᠪᠡ᠃ ᠰᠠᠭᠤᠵᠤ ᠪᠠᠢᠭᠰᠠᠨ ᠲᠡᠷᠡ ᠬᠣᠶᠠᠷ ᠦᠰᠦᠷᠦᠨ ᠪᠣᠰᠴᠠᠭᠠᠵᠤ ᠵᠣᠳᠣᠯᠳᠤᠪᠠ᠃
— ᠸᠠᠩ ᠤ᠋ᠳ ᠠ᠋᠂ ᠲᠠᠨᠠᠷ ᠢᠴᠢᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠵᠦ ᠶᠦᠷᠢ ᠸᠠᠩ ᠲᠠᠢᠳᠬᠤᠷᠠᠭᠤᠯᠤᠨ᠂
—ᠲᠠᠨᠠᠷ ᠪᠣᠳᠣᠵᠠᠭᠠᠭᠠᠴᠢ! ᠪᠢᠳᠡ ᠴᠥᠮ ᠠᠯᠠᠭᠳᠠᠬᠤ ᠠᠶᠤᠯ ᠲᠤᠯᠭᠠᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠲᠠᠨᠠᠷ ᠶᠠᠭᠠᠬᠢᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ?
— ᠴᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠭᠤ ᠭᠡᠵᠦ ᠭᠠᠢᠬᠠᠭᠤᠯᠤᠭᠰᠠᠨ ᠪᠢᠯᠡ? ᠭᠡᠵᠦ ᠪᠠᠰᠠ ᠬᠡᠷᠴᠡᠭᠡᠢ ᠬᠣᠭᠣᠯᠠᠢ ᠪᠠᠷ ᠬᠠᠰᠬᠢᠷᠤᠯᠠ᠃
— ᠪᠢ ᠬᠦᠦ ᠪᠡᠨ ᠬᠠᠢᠷᠠᠯᠠᠯ ᠦᠭᠡᠢ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠡᠮᠦᠨᠡ ᠡᠴᠡ ᠶᠠᠪᠤᠭᠤᠯᠤᠭᠰᠠᠨ ᠭᠡᠵᠦ ᠶᠥᠷᠢ ᠢᠩᠭ᠌ᠸᠡᠷᠸᠸᠢ᠍ᠴ ᠰᠢᠳᠤᠷᠭᠤ ᠪᠠᠷ ᠬᠠᠷᠢᠭᠤᠯᠵᠤ ᠲᠡᠭᠦᠨ ᠦ᠌ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠪᠤᠷᠬᠠᠨ ᠮᠡᠳᠡᠨᠡ᠃ ᠠᠶᠤᠯ ᠵᠣᠪᠠᠯᠠᠩ ᠲᠣᠬᠢᠶᠠᠯᠳᠤᠭᠠ ᠦᠭᠡᠢ ᠪᠣᠯ ᠤᠤ ᠳ᠋ᠠ? ᠣᠳᠣ ᠪᠣᠯᠲᠠᠯᠠ ᠮᠡᠳᠡᠭᠡ ᠰᠤᠷᠠᠭ ᠴᠤ᠌ ᠦᠭᠡᠢ ᠪᠠᠢᠨᠠ᠁ ᠪᠠᠲᠤ ᠬᠠᠭᠠᠨ ᠢ᠋ ᠢᠳᠬᠠᠨ ᠬᠡᠯᠡᠯᠴᠡᠭᠡ ᠬᠢᠵᠦ ᠴᠢᠳᠠᠭᠰᠠᠨ ᠴᠤ᠌ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠲᠠᠲ᠋ᠠᠷ ᠤ᠋ᠳ ᠪᠢᠳᠡᠨ ᠢ᠋ ᠳᠣᠪᠲᠣᠯᠬᠤ ᠪᠠᠨ ᠴᠤ᠌ ᠵᠣᠭᠰᠣᠭᠰᠠᠨ ᠴᠤ᠌ ᠪᠣᠯ ᠤᠤ?
— ᠲᠡᠳᠡᠨᠡᠷ ᠡᠴᠡ ᠪᠢᠳᠡ ᠶᠠᠭᠤ ᠭᠡᠵᠦ ᠠᠶᠤᠳᠠᠭ ᠶᠤᠮ ᠪᠣᠢ? ᠬᠡᠨ ᠲᠡᠳᠡ ᠨᠠᠷ ᠢ᠋ ᠦᠵᠡᠭᠰᠡᠨ ᠶᠤᠮ ᠪᠣᠢ? ᠶᠡᠷᠦ ᠠᠶᠤᠯᠲᠠᠢ ᠪᠢᠰᠢ ᠴᠦ᠍ ᠶᠤᠮ ᠪᠢᠯᠢᠤ?
ᠸᠠᠩ ᠤ᠋ᠳ ᠳᠠᠬᠢᠨ ᠮᠠᠷᠭᠤᠯᠳᠤᠵᠤ ᠱᠤᠤᠭᠢᠯᠳᠤᠨ ᠴᠢᠩᠭᠠ ᠴᠢᠩᠭᠠ ᠬᠠᠰᠬᠢᠷᠤᠯᠳᠤᠨ ᠪᠡᠶᠡ ᠪᠡᠶᠡ ᠪᠡᠨ ᠳᠠᠪᠠᠬᠤ ᠭᠡᠵᠦ ᠣᠷᠣᠯᠳᠣᠪᠠ᠃ ᠶᠸᠸᠫᠷᠡᠺᠰᠸᠶᠥ᠋ᠱᠺᠡ ᠡᠭᠦᠳᠡ ᠶ᠋ᠢᠨ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠴᠢᠩᠨᠠᠭᠠᠳ ᠤᠢᠳᠬᠠᠷᠲᠠᠢ ᠡᠷᠭᠢᠵᠦ ᠥᠪᠡᠷ ᠦ᠋ᠨ ᠥᠨᠳᠥᠷᠯᠢᠭ ᠳᠠᠬᠢ ᠲᠠᠰᠤᠯᠭᠠᠨ ᠳ᠋ᠠᠭᠠᠨ ᠪᠤᠴᠠᠯᠠ᠃
ᠰᠡᠳᠬᠢᠯ ᠳ᠋ᠦ᠍ ᠤᠯᠠᠮ ᠴᠤ᠌ ᠵᠣᠪᠠᠭᠤᠷᠢ ᠲᠠᠢ ᠪᠣᠯᠤᠯᠠ᠃ ᠶᠸᠸᠫᠷᠠᠺᠰᠸᠶᠥ᠋ᠱᠺᠡ ᠬᠥᠭᠰᠢᠨ ᠢ᠋ ᠭᠤᠶᠤᠵᠤ ᠮᠡᠷᠭᠡᠨ ᠡᠮᠡᠭᠡᠨ ᠢ᠋ ᠳᠠᠭᠤᠳᠠᠭᠤᠯᠪᠠ᠃ ᠲᠥᠯᠭᠡᠴᠢ ᠡᠮᠡᠭᠡᠨ ᠦᠵᠡᠭᠳᠡᠭᠡ ᠦᠭᠡᠢ ᠤᠭᠠᠯᠵᠠ ᠲᠠᠢ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠪᠠᠨ ᠪᠣᠭᠣᠵᠤ ᠢᠷᠡᠭᠡᠳ ᠲᠠᠷᠢᠶᠠᠨ ᠤ᠋ ᠦᠷᠡ ᠠᠰᠬᠠᠵᠤ ᠳᠡᠭᠡᠷᠡ ᠨᠢ ᠯᠡ ᠶ᠋ᠢᠨ ᠲᠣᠰᠣ ᠠᠰᠬᠠᠭᠠᠳ ᠰᠡᠭᠦᠳᠡᠷ ᠢ᠋ ᠨᠢ ᠬᠠᠷᠠᠪᠠ᠃
— ᠤᠳᠠᠬᠤ ᠦᠭᠡᠢ ᠬᠠᠲᠤᠨ ᠴᠢᠮᠠᠲᠤ ᠵᠣᠴᠢᠨ ᠢᠷᠡᠨᠡ᠃ ᠳᠠᠯᠠᠢ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠠᠪᠴᠢᠷᠠᠭᠰᠠᠨ ᠪᠡᠯᠡᠭ ᠢ᠋ ᠦᠭᠭᠦᠨᠡ᠃ ᠴᠢᠮᠠᠲᠤ ᠲᠤᠩ ᠶᠡᠬᠡ ᠪᠠᠶᠠᠷ ᠪᠣᠯᠤᠨᠠ᠃ ᠴᠢ ᠶᠠᠭᠤ ᠪᠣᠳᠣᠭᠠᠳ ᠦᠷᠭᠦᠯᠵᠢ ᠭᠠᠰᠢᠭᠤᠳᠠᠨᠠ ᠪᠣᠢ? ᠴᠢᠨᠦ ᠰᠡᠳᠬᠢᠯ ᠵᠢᠷᠦᠬᠡ ᠴᠢᠨᠢ ᠡᠨᠳᠡ ᠠᠯᠠᠭᠠ᠂ ᠠᠯᠤᠰ ᠬᠣᠯᠠ ᠪᠠᠢᠨᠠ᠃ ᠨᠢᠭᠡᠨ ᠰᠠᠢᠨ ᠡᠷᠡ ᠰᠡᠳᠬᠢᠯ ᠵᠢᠷᠦᠬᠡ ᠶ᠋ᠢ ᠴᠢᠨᠢ ᠠᠪᠤᠭᠠᠳ ᠶᠠᠪᠤᠵᠠᠢ᠃ ᠴᠢ ᠲᠡᠭᠦᠨ ᠢ᠋ ᠰᠠᠨᠠᠵᠤ ᠰᠥᠨᠢ ᠤᠳᠠᠲᠠᠯᠠ ᠤᠨᠲᠠᠬᠤ ᠦᠭᠡᠢ ᠪᠠᠢᠨᠠ ᠤᠤ? ᠰᠠᠨᠠᠭᠠ ᠪᠠᠨ ᠲᠠᠢᠳᠬᠤᠷ (ᠲᠠᠢᠳᠬᠤᠷᠠᠭᠤᠯ)᠃ᠲᠡᠭᠦᠨ ᠳ᠋ᠦ᠍ ᠭᠠᠢ ᠭᠠᠮᠰᠢᠭ ᠲᠣᠬᠢᠶᠠᠯᠳᠤᠬᠤ ᠦᠭᠡᠢ᠂ ᠲᠡᠭᠦᠨ ᠳ᠋ᠦ᠍ ᠠᠯᠤᠰ ᠤ᠋ᠨ ᠵᠠᠮ ᠪᠠᠢᠨᠠ᠃ ᠲᠡᠷᠡ ᠬᠠᠷᠠᠪᠠᠤ? ᠬᠡᠷᠪᠡ ᠨᠠᠮᠠᠶ᠋ᠢ ᠦᠨᠡᠮᠰᠢᠬᠦ ᠦᠭᠡᠢ ᠪᠠᠢᠪᠠᠯ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠠ᠄ᠬᠠᠢᠷᠠᠲᠤ ᠬᠣᠩᠭᠣᠷ ᠴᠢᠨᠢ ᠲᠡᠷᠡ ᠪᠠᠢᠨᠠ᠃ ᠪᠠᠰᠠ ᠲᠡᠷᠡ ᠤᠷᠲᠤ ᠠ᠋ᠴᠠ ᠤᠷᠲᠤ ᠬᠣᠯᠠ ᠵᠠᠮ ᠪᠠᠢᠨᠠ᠃ ᠶᠸᠸᠫᠷᠠᠺᠰᠸᠶᠥ᠋ᠱᠺᠠ ᠬᠠᠷᠠᠬᠤ ᠳ᠋ᠤᠨᠢ ᠴᠠᠭᠠᠨ ᠠᠯᠴᠢᠭᠤᠷ ᠳᠡᠭᠡᠷᠡᠬᠢ ᠪᠦᠳᠡᠭᠢ ᠰᠡᠭᠦᠳᠡᠷ ᠦᠨᠡᠬᠡᠷ ᠠᠮᠠᠷᠠᠭ ᠨᠥᠬᠥᠷ ᠦ᠋ᠨ ᠬᠢᠨᠢ ᠬᠣᠩᠭᠣᠷ ᠴᠢᠷᠠᠢ ᠰᠢᠭ᠋ ᠰᠠᠨᠠᠭᠳᠠᠯᠠ᠃ ᠶᠸᠸᠫᠷᠠᠺᠰᠸᠶᠥ᠋ᠱᠺᠡ ᠪᠡᠶᠡᠰᠴᠦ ᠲᠥᠯᠭᠡᠴᠢ ᠡᠮᠡᠭᠡᠨ ᠢ᠋ ᠬᠠᠨᠲᠠᠯᠠ ᠱᠠᠩᠨᠠᠭᠠᠳ ᠶᠠᠪᠤᠭᠤᠯᠪᠠ᠃ ᠰᠤᠪᠢᠯᠠᠭᠴᠢ ᠡᠮᠡᠭᠡᠨ ᠮᠥᠨ ᠬᠥᠭᠵᠢᠯᠲᠡᠢ ᠪᠣᠯᠤᠨᠠ (ᠪᠣᠯᠤᠯᠠ)᠃
— ᠬᠠᠷᠠᠪᠠᠤ᠂ ᠲᠠ ᠤᠷᠢᠳᠠᠪᠡᠷ ᠤᠬᠢᠯᠠᠬᠤ ᠬᠡᠷᠡᠭ ᠦᠭᠡᠢ ᠭᠡᠵᠦ ᠪᠢ ᠬᠡᠯᠡᠭᠡ ᠦᠭᠡᠢ ᠤᠤ᠂ ᠮᠠᠨ ᠤ᠋ ᠸᠠᠩ᠂ ᠬᠥᠭᠡᠷᠦᠬᠦᠢ ᠬᠣᠩᠭᠣᠷ ᠮᠢᠨᠢ ᠡᠷᠭᠢᠵᠦ ᠢᠷᠡᠨᠡ ᠰᠢᠦ ᠳ᠋ᠠ᠃ ᠶᠠᠮᠠᠷ ᠣᠢᠷᠠᠬᠠᠨ ᠵᠠᠮ ᠳ᠋ᠤ᠌ ᠶᠠᠪᠤᠭᠠ ᠪᠢᠰᠢ······ ᠶᠸᠸᠫᠷᠡᠺᠰᠸᠶᠥ᠋ᠱᠺᠡ ᠰᠢᠪᠡᠭᠴᠢᠨ ᠥᠬᠢᠨ ᠢ᠋ ᠳᠠᠭᠤᠳᠠᠨ ᠢᠷᠡᠭᠦᠯᠦᠭᠡᠳ ᠲᠡᠭᠦᠨ ᠦ᠌ ᠱᠠᠯᠠᠮᠠᠭᠠᠢ ᠭᠠᠷ ᠲᠸ᠋ ᠦᠢᠯᠡ ᠪᠤᠴᠠᠯᠵᠤ ᠡᠬᠢᠯᠡᠪᠡ᠃ ᠨᠥᠬᠥᠷ ᠢ᠋ ᠪᠡᠨ ᠤᠭᠲᠤᠬᠤ ᠳ᠋ᠤ᠌ ᠵᠣᠷᠢᠭᠤᠯᠵᠤ ᠰᠢᠨᠡ ᠰᠠᠢᠬᠠᠨ ᠬᠤᠪᠴᠠᠰᠤ ᠬᠢᠬᠦ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃
ᠸᠠᠩ ᠹᠸᠤᠳᠤᠷ᠂ ᠬᠠᠲᠤᠨ ᠢ᠋ᠶ᠋ᠠᠨ ᠰᠠᠢᠬᠠᠨ ᠬᠤᠪᠴᠠᠰᠤᠯᠠᠬᠤ ᠳᠤᠷᠠᠲᠠᠢ ᠪᠠ ᠢᠮᠠᠭᠲᠠ ᠡᠩᠬᠦᠷᠡᠢᠯᠡᠵᠦ ᠦᠵᠡᠰᠬᠦᠯᠡᠩ ᠭᠤᠸᠠ ᠶ᠋ᠢ ᠨᠢ ᠪᠠᠬᠠᠳᠤᠨᠠ᠃ ᠬᠡᠦᠬᠡᠨ ᠨᠤᠭᠦᠳ ᠳᠠᠭᠤᠤ ᠳᠠᠭᠤᠯᠠᠵᠤ ᠵᠢᠵᠢᠭᠬᠡᠨ ᠬᠠᠳᠬᠤᠯᠲᠠ ᠪᠠᠷ ᠵᠥᠭᠡᠯᠡᠨ ᠲᠣᠷᠭᠠ ᠶ᠋ᠢ ᠣᠶᠣᠨᠠ᠃ ᠶᠸᠸᠫᠷᠡᠰᠸᠶᠥ᠋ᠱᠺᠠ ᠲᠣᠷᠭᠠᠨ ᠴᠠᠮᠴᠠᠨ ᠳᠡᠭᠡᠷᠡ ᠴᠢᠳᠠᠮᠠᠭᠠᠢ ᠪᠠᠷ ᠵᠡᠭᠦᠦ ᠣᠷᠢᠶᠠᠵᠤ ᠤᠭᠠᠯᠵᠠᠯᠠᠭᠤᠯᠤᠨ ᠴᠡᠴᠡᠭ ᠭᠠᠷᠭᠠᠵᠤ ᠤᠷᠠᠯᠠᠭᠠᠳ ᠬᠠᠢᠷᠠᠲᠤ ᠨᠥᠬᠥᠷ ᠲᠡᠭᠡᠨ ᠪᠡᠯᠡᠭ ᠪᠣᠯᠭᠠᠨ ᠪᠡᠯᠡᠳᠬᠡᠨᠡ᠃ ᠤᠷᠮᠠᠲᠠᠢ ᠠᠵᠢᠯ ᠬᠣᠶᠠᠷ ᠡᠳᠦᠷ ᠦᠷᠭᠦᠯᠵᠢᠯᠡᠵᠦ ᠪᠠᠢᠭᠠᠳ ᠳᠠᠬᠢᠨ ᠭᠠᠷ ᠨᠢ ᠰᠤᠯᠠᠷᠠᠵᠤ ᠠᠵᠢᠯ ᠢ᠋ᠶ᠋ᠠᠨ ᠠᠯᠳᠠᠭᠠᠳ ᠤᠢᠳᠬᠠᠷ ᠲᠸ᠋ ᠤᠨᠠᠯᠠ᠃ ᠠᠰᠠᠷᠠᠭᠴᠢ ᠡᠮᠡᠭᠡᠨ ᠦ᠌ ᠢᠳᠬᠠᠯᠭᠠ ᠴᠥ᠍ ᠨᠡᠮᠡᠷᠢ ᠦᠭᠡᠢ ᠪᠣᠯᠵᠠᠢ᠃ ᠬᠠᠲᠤᠨ ᠤ᠋ ᠤᠢᠳᠬᠠᠷ ᠢ᠋ ᠰᠡᠷᠭᠦᠭᠡᠬᠦ ᠭᠡᠰᠡᠨ ᠬᠡᠦᠬᠡᠨ ᠨᠤᠭᠦᠳ ᠦ᠋ᠨ ᠣᠷᠣᠯᠳᠣᠯᠭᠠ ᠴᠥ᠍ ᠳᠡᠮᠡᠢ ᠬᠡᠷᠡᠭ ᠪᠣᠯᠤᠯᠠ᠃ ᠬᠠᠲᠤᠨ ᠳᠠᠬᠢᠨ ᠬᠣᠯᠠ ᠶ᠋ᠢᠨ ᠡᠵᠡᠭᠦᠢ ᠵᠠᠮ ᠢ᠋ ᠰᠢᠷᠲᠡᠵᠦ ᠤᠨᠳᠤᠷᠬᠤ ᠨᠢᠯᠪᠤᠰᠤ ᠪᠠᠨ ᠠᠰᠬᠠᠷᠠᠭᠤᠯᠤᠨᠠ᠃
ᠬᠠᠲᠤᠨ ᠡᠬᠡ ᠥᠪᠡᠷ ᠦ᠋ᠨ ᠵᠣᠪᠠᠭᠰᠠᠨ ᠢ᠋ ᠨᠢᠭᠤᠨ ᠳᠠᠯᠳᠠᠯᠠᠵᠤ ᠬᠠᠢᠷᠠᠲᠤ ᠪᠡᠷᠭᠡᠨ ᠢ᠋ᠶ᠋ᠡᠨ (ᠪᠡᠷᠢ ᠪᠡᠨ) ᠲᠠᠢᠳᠬᠤᠷᠠᠭᠤᠯᠤᠨᠠ᠃ ᠬᠠᠳᠠᠮ ᠲᠠᠢ ᠥᠬᠢᠳ ᠴᠥ᠍ ᠲᠡᠭᠦᠨ ᠢ᠋ ᠪᠠᠶᠠᠰᠤᠭᠤᠯᠬᠤ ᠶ᠋ᠢ ᠣᠷᠣᠯᠳᠣᠨᠠ᠃ ᠶᠸᠸᠫᠷᠡᠺᠰᠸᠶᠥ᠋ᠱᠺᠡ ᠬᠡᠨ ᠦ᠌ ᠴᠥ᠍ ᠦᠭᠡ ᠶ᠋ᠢ ᠠᠪᠤᠭᠰᠠᠨ ᠦᠭᠡᠢ᠂ᠬᠣᠭᠣᠰᠣᠷᠠᠭᠰᠠᠨ ᠵᠣᠴᠢᠯᠠᠬᠤ ᠲᠠᠰᠤᠯᠭᠠ ᠨᠤᠭᠤᠳ ᠢ᠋ᠶ᠋ᠠᠷ ᠳᠡᠮᠡᠢ ᠲᠡᠨᠦᠵᠦ ᠪᠠᠶᠠᠷ ᠦᠭᠡᠢ ᠭᠠᠭᠴᠠ ᠪᠣᠳᠣᠯᠭᠠ ᠶ᠋ᠢ ᠳᠠᠬᠢᠨ ᠳᠠᠬᠢᠨ ᠪᠣᠳᠣᠯᠬᠢᠯᠠᠨᠠ᠃
— ᠸᠠᠩ ᠤ᠋ᠳ ᠠ᠋ᠴᠠ ᠬᠠᠮᠠᠭᠠᠯᠠᠬᠤ ᠶ᠋ᠢ ᠬᠦᠯᠢᠶᠡᠭᠰᠡᠨ ᠦ᠌ ᠬᠡᠷᠡᠭ ᠠᠯᠠᠭᠠ᠃ ᠹᠧᠣᠳᠣᠷ ᠢᠷᠡᠬᠦ ᠦᠭᠡᠢ ᠨᠢ ᠪᠠᠢᠨᠠ᠁ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠢᠷᠡᠬᠦ ᠳ᠋ᠦ᠍ ᠬᠡᠨ ᠬᠠᠮᠠᠭᠠᠯᠠᠵᠤ ᠬᠡᠨ ᠪᠢᠳᠡᠨ ᠢ᠋ ᠳᠠᠯᠳᠠᠯᠠᠬᠤ ᠪᠢᠯᠡ? ᠸᠠᠩ ᠤ᠋ᠳ ᠮᠠᠷᠭᠤᠯᠳᠤᠭᠰᠠᠭᠠᠷ ᠭᠡᠷᠡᠯᠲᠦᠭᠰᠡᠭᠡᠷ ᠪᠠᠢᠨᠠ᠃ ᠬᠥᠮᠦᠨ ᠪᠦᠷᠢ ᠯᠡ ᠳᠠᠷᠤᠭᠠᠯᠠᠬᠤ ᠶ᠋ᠢ ᠬᠦᠰᠡᠭᠰᠡᠭᠡᠷ ᠪᠠᠢᠨᠠ᠃ ᠡᠳᠡ ᠢᠩᠭᠢᠭᠰᠡᠭᠡᠷ ᠪᠠᠢᠭᠠᠳ ᠣᠷᠣᠰ ᠤ᠋ᠨ ᠭᠠᠵᠠᠷ ᠨᠤᠲᠤᠭ ᠢ᠋ ᠪᠠᠯᠠᠯᠬᠤ ᠨᠢ ᠳ᠋ᠠ᠂ ᠲᠠᠲ᠋ᠠᠷ ᠤ᠋ᠳ ᠢᠷᠡᠭᠡᠳ ᠣᠭᠲᠣᠴᠢᠵᠤ ᠠᠯᠠᠬᠤ ᠶ᠋ᠢ ᠨᠢ ᠠᠯᠠᠭᠠᠳ ᠵᠠᠷᠢᠮ ᠢ᠋ ᠨᠢ ᠴᠢᠷᠴᠦ ᠭᠤᠯᠳᠤᠷᠴᠤ ᠠᠪᠠᠴᠢᠬᠤ ᠪᠢᠵᠡ?
ᠭᠡᠲᠡᠯᠡ ᠲᠡᠭᠦᠨ ᠦ᠌ ᠪᠠᠯᠴᠢᠷ ᠬᠥᠪᠡᠭᠦᠨ ᠨᠢ ᠬᠥᠯ ᠢ᠋ᠶ᠋ᠡᠨ ᠰᠣᠯᠢᠪᠢᠭᠤᠯᠤᠭᠰᠠᠭᠠᠷ ᠢᠷᠡᠭᠡᠳ ᠡᠬᠡ ᠳ᠋ᠡᠭᠡᠨ ᠴᠢᠩᠭᠠ ᠨᠠᠭᠠᠯᠳᠤᠵᠤ ᠡᠬᠡ ᠥᠭᠡᠳᠡ ᠪᠡᠨ ᠬᠠᠷᠠᠯᠠ᠃ ᠲᠡᠷᠡ ᠪᠠᠯᠴᠢᠷ ᠪᠣᠯᠪᠠᠴᠤ ᠡᠬᠡ ᠶ᠋ᠢᠨ ᠵᠣᠪᠠᠯᠠᠩᠲᠤ ᠪᠠᠢᠳᠠᠯ ᠢ᠋ ᠵᠥᠩᠨᠡᠨ ᠮᠡᠳᠡᠵᠡᠢ᠃ ᠶᠸᠸᠫᠷᠠᠺᠰᠸᠶᠥ᠋ᠱᠺᠡ ᠬᠠᠢᠷᠠᠲᠤ ᠦᠷᠡ ᠪᠡᠨ ᠲᠡᠪᠡᠷᠢᠭᠡᠳ ᠨᠢᠯᠪᠤᠰᠤ ᠪᠠᠨ ᠠᠷᠠᠢ ᠭᠡᠵᠦ ᠲᠣᠭᠲᠠᠭᠠᠵᠤ ᠪᠠᠢᠪᠠ᠃
— ᠮᠤᠤᠰᠠᠢᠨ ᠲᠠᠲ᠋ᠠᠷ ᠤ᠋ᠳ ᠲᠤ᠌ ᠴᠢᠮᠠᠶ᠋ᠢ ᠪᠠᠨ ᠥᠭᠬᠦ ᠦᠭᠡᠢ᠃ ᠹᠧᠣᠲᠣᠷ ᠤ᠋ᠨ ᠬᠥᠪᠡᠭᠦᠨ ᠸᠠᠨᠶᠤᠢ᠍ᠱᠠ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠪᠣᠭᠣᠯ ᠪᠣᠯᠬᠤ ᠦᠭᠡᠢ᠂ ᠲᠡᠭᠦᠨ ᠦ᠌ ᠡᠬᠡᠨᠡᠷ ᠶᠸᠸᠫᠷᠠᠺᠰᠸᠶᠥ᠋ᠱᠺᠡ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠰᠢᠪᠡᠭᠴᠢᠨ ᠪᠣᠯᠬᠤ ᠦᠭᠡᠢ᠃
ᠭᠡᠲᠡᠯᠡ ᠳᠣᠣᠷᠠᠲᠤ ᠲᠠᠰᠤᠯᠭᠠᠨ ᠳ᠋ᠤ᠌ ᠰᠦᠷᠡᠬᠡᠢ ᠬᠠᠴᠢᠨ ᠴᠢᠮᠡᠭᠡ ᠰᠣᠨᠣᠰᠳᠠᠵᠤ ᠬᠠᠭᠠᠯᠭᠠ ᠨᠤᠭᠤᠳ ᠰᠠᠪᠠᠴᠢᠭᠠᠳ ᠴᠢᠩᠭᠠ ᠳᠠᠭᠤ ᠠᠯᠲᠠᠨ ᠤᠬᠢᠯᠠᠪᠠ᠃
ᠶᠸᠸᠫᠷᠠᠺᠰᠸᠶᠥ᠋ᠱᠺᠡ ᠶ᠋ᠢᠨ ᠵᠢᠷᠦᠬᠡ ᠳᠡᠯᠪᠡᠷᠡᠬᠦ ᠰᠢᠭ᠌ ᠪᠣᠯᠤᠭᠠᠳ ᠬᠦᠦ ᠪᠡᠨ ᠴᠢᠩᠭᠠ ᠲᠡᠪᠡᠷᠢᠵᠦ ᠥᠭᠡᠷᠡ ᠶ᠋ᠢ ᠮᠠᠷᠲᠠᠨ ᠮᠡᠳᠡᠷᠡᠯ ᠦᠭᠡᠢ ᠳᠣᠷᠣᠭᠰᠢ ᠭᠦᠶᠦᠨ ᠪᠠᠭᠤᠵᠤ ᠵᠣᠴᠢᠯᠠᠬᠤ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠪᠠᠯ ᠤᠬᠢᠯᠠᠯᠳᠤᠭᠴᠢ ᠡᠬᠡᠨᠡᠷ ᠦ᠋ᠳ ᠦ᠋ᠨ ᠭᠠᠷ ᠳᠡᠭᠡᠷᠡ ᠡᠮᠡᠭᠡᠨ ᠠᠭᠷᠢᠫᠫᠢᠨᠠ ᠤᠨᠠᠵᠤ ᠪᠠᠢᠪᠠ᠃ ᠸᠠᠩ ᠶᠦᠷᠢ ᠤᠬᠠᠭᠠᠨ ᠦᠭᠡᠢ ᠮᠡᠲᠦ ᠪᠣᠯᠵᠠᠢ᠃
— ᠡᠳᠡᠨ ᠡᠴᠡ ᠪᠣᠯᠵᠤ ᠬᠦᠦ ᠮᠢᠨᠢ ᠦᠬᠦᠯᠡ᠃ ᠮᠢᠨᠦ ᠪᠤᠷᠤᠭᠤ᠁ ᠸᠠᠩ ᠶᠦᠷᠢ ᠳᠡᠪᠡᠯ ᠬᠤᠪᠴᠠᠰᠤ ᠪᠠᠨ ᠤᠷᠠᠵᠤ ᠪᠠᠷᠬᠢᠷᠠᠵᠤ ᠪᠠᠢᠪᠠ᠃ ᠸᠠᠩ ᠹᠧᠣᠲᠣᠷ ᠢ᠋ ᠪᠠᠭᠠ ᠠ᠋ᠴᠠ ᠨᠢ ᠥᠰᠬᠡᠭᠰᠡᠨ ᠦᠨᠡᠨᠴᠢ ᠵᠠᠷᠤᠴᠠ ᠡᠪᠦᠭᠡᠨ ᠠᠫᠤᠨᠢᠼ ᠡᠮᠦᠨᠡ ᠨᠢ ᠵᠣᠭᠰᠣᠵᠤ ᠪᠠᠢᠪᠠ᠃ ᠤᠷᠠᠩᠬᠠᠢ ᠪᠣᠬᠢᠷ ᠳᠡᠪᠡᠯ ᠲᠡᠢ᠂ ᠴᠢᠰᠤ ᠨᠢ ᠬᠠᠲᠠᠭᠰᠠᠨ ᠰᠢᠷᠬᠠ ᠲᠠᠢ ᠵᠣᠪᠠᠵᠤ ᠵᠦᠳᠡᠷᠡᠭᠰᠡᠨ ᠲᠡᠷᠡ ᠡᠪᠦᠭᠡᠨ ᠭᠠᠰᠢᠭᠤᠳᠠᠯ ᠤ᠋ᠨ ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠤᠨ ᠵᠣᠭᠰᠣᠭᠠᠳ᠂
— ᠳᠠᠢᠰᠤᠨ ᠨᠤᠭᠤᠳ ᠲᠡᠭᠦᠨ ᠢ᠋ ᠴᠠᠪᠴᠢᠵᠤ ᠠᠯᠠᠯᠠ᠂ ᠬᠡᠨ ᠢ᠋ ᠴᠦ᠍ ᠠᠮᠢᠳᠤ ᠪᠡᠷ ᠦᠯᠡᠳᠡᠭᠡᠭᠰᠡᠨ ᠦᠭᠡᠢ᠂ ᠭᠠᠭᠴᠠ ᠨᠠᠮᠠᠶ᠋ᠢ ᠲᠠᠨᠠᠷ ᠲᠸ᠋ ᠬᠡᠯᠡ ᠬᠦᠷᠭᠡᠬᠦ ᠪᠡᠷ ᠶᠠᠪᠤᠭᠤᠯᠪᠠ᠂ ᠮᠢᠨᠦ ᠭᠠᠷ ᠳᠡᠭᠡᠷᠡ ᠮᠠᠨ ᠤ᠋ ᠸᠠᠩ ᠬᠦᠦ ᠨᠠᠰᠤ ᠪᠠᠷᠠᠯᠠ᠃
ᠶᠸᠸᠫᠷᠠᠺᠰᠸᠶᠥ᠋ᠱᠺᠡ ᠪᠠᠷᠬᠢᠷᠠᠭᠰᠠᠨ ᠴᠥ᠍ ᠦᠭᠡᠢ᠂
ᠨᠢᠯᠪᠤᠰᠤ ᠪᠠᠨ ᠤᠷᠤᠰᠬᠠᠨ ᠦᠭᠡ ᠪᠡᠨ ᠪᠠᠷᠠᠵᠤ ᠤᠬᠢᠯᠠᠭᠰᠠᠨ ᠴᠥ᠍ ᠦᠭᠡᠢ᠂ ᠬᠦᠦ ᠪᠡᠨ ᠴᠡᠭᠡᠵᠢᠨ ᠳ᠋ᠡᠭᠡᠨ ᠴᠢᠩᠭᠠ ᠲᠡᠪᠡᠷᠢᠵᠦ ᠳᠠᠭᠤ ᠦᠭᠡᠢ ᠡᠷᠭᠢᠭᠡᠳ ᠵᠣᠴᠢᠯᠠᠬᠤ ᠲᠠᠰᠤᠯᠭᠠᠨ ᠠ᠋ᠴᠠ ᠭᠠᠷᠤᠭᠠᠳ ᠮᠤᠰᠬᠢᠷᠠᠭᠰᠠᠨ ᠱᠠᠲᠤ ᠪᠠᠷ ᠲᠡᠭᠡᠭᠡᠰᠢ ᠶᠠᠪᠤᠵᠤ ᠥᠪᠡᠷ ᠦ᠋ᠨ ᠲᠠᠰᠤᠯᠭᠠᠨ ᠳ᠋ᠠᠭᠠᠨ ᠢᠷᠡᠭᠡᠳ ᠴᠣᠩᠬᠣᠨ ᠳ᠋ᠠᠭᠠᠨ ᠳᠥᠩᠭᠡᠵᠢ ᠣᠴᠢᠭᠠᠳ ᠴᠣᠩᠬᠣ ᠪᠠᠨ ᠨᠡᠭᠡᠭᠡᠵᠦ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠡᠪᠡᠷᠢᠭᠰᠡᠭᠡᠷ ᠲᠡᠷᠲᠡᠭᠡ ᠳᠣᠣᠷᠠ ᠬᠠᠷᠠᠯᠠᠨ ᠬᠠᠷᠠᠭᠳᠠᠬᠤ ᠴᠢᠯᠠᠭᠤ ᠨᠤᠭᠤᠳ ᠤ᠋ᠨ ᠳᠡᠭᠡᠷᠡ ᠡᠴᠡ ᠦᠰᠦᠷᠦᠨ ᠤᠨᠠᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠵᠢᠩᠯᠢᠬᠤᠸᠠᠷ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨ᠂ ᠲ· ᠬᠦᠮᠦᠵᠢᠯᠲᠦ