ᠥᠭᠦᠯᠡᠪᠦᠷᠢ ᠶ᠋ᠢᠨ ᠵᠦᠢ04 ᠮᠣᠩᠭᠣᠯ ᠬᠡᠯᠡᠨ ᠦ᠌ ᠥᠭᠦᠯᠡᠪᠦᠷᠢ ᠶ᠋ᠢᠨ ᠲᠥᠷᠥᠯ ᠵᠦᠢᠯ
12ᠳᠥᠷᠪᠡ᠃ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠥᠭᠦᠯᠡᠪᠦᠷᠢ ᠶ᠋ᠢᠨ ᠲᠥᠷᠥᠯ ᠵᠦᠢᠯ
ᠥᠭᠦᠯᠡᠪᠦᠷᠢ ᠶ᠋ᠢ ᠬᠡᠯᠡᠬᠦ ᠵᠣᠷᠢᠯᠭᠠ᠂ ᠪᠠᠢᠳᠠᠯ᠂ ᠪᠦᠲᠦᠴᠡ ᠪᠡᠷ ᠨᠢ ᠶᠠᠩᠵᠤ ᠶᠠᠩᠵᠤ ᠶ᠋ᠢᠨ ᠲᠥᠷᠥᠯ ᠵᠦᠢᠯ ᠢ᠋ᠶ᠋ᠡᠷ ᠠᠩᠭᠢᠯᠠᠵᠤ ᠪᠣᠯᠤᠨᠠ᠃
(ᠨᠢᠭᠡ) ᠥᠭᠦᠯᠡᠪᠦᠷᠢ ᠶ᠋ᠢ ᠬᠡᠯᠡᠬᠦ ᠵᠣᠷᠢᠯᠭᠠ ᠪᠠᠷ ᠨᠢ ᠠᠩᠭᠢᠯᠠᠬᠤ
ᠥᠭᠦᠯᠡᠭᠴᠢ ᠡᠲᠡᠭᠡᠳ ᠦ᠋ᠨ ᠬᠡᠯᠡᠬᠦ ᠵᠣᠷᠢᠯᠭᠠ ᠪᠠᠷ ᠨᠢ ᠥᠭᠦᠯᠡᠪᠦᠷᠢ ᠶ᠋ᠢ ᠠᠰᠠᠭᠤᠬᠤ ᠥᠭᠦᠯᠡᠪᠦᠷᠢ᠂ ᠵᠠᠬᠢᠷᠬᠤ ᠬᠦᠰᠡᠬᠦ ᠥᠭᠦᠯᠡᠪᠦᠷᠢ᠂ ᠬᠦᠦᠷᠨᠢᠬᠦ ᠥᠭᠦᠯᠡᠪᠦᠷᠢ᠂ ᠠᠩᠬᠠᠷᠤᠭᠤᠯᠬᠤ ᠥᠭᠦᠯᠡᠪᠦᠷᠢ ᠭᠡᠵᠦ ᠬᠡᠳᠦᠨ ᠵᠦᠢᠯ ᠢ᠋ᠶ᠋ᠡᠷ ᠢᠯᠭᠠᠨ ᠦᠵᠡᠵᠦ ᠪᠣᠯᠤᠨᠠ᠃
ᠠᠰᠠᠭᠤᠬᠤ ᠥᠭᠦᠯᠡᠪᠦᠷᠢ
ᠬᠡᠨ? ᠶᠠᠭᠤ? ᠠᠯᠢ? ᠶᠠᠮᠠᠷ? ᠬᠡᠵᠢᠶᠡ? ᠬᠠᠮᠢᠭᠠ? ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠠᠰᠠᠭᠤᠬᠤ ᠲᠥᠯᠥᠭᠡᠨ ᠦ᠌ ᠦᠭᠡᠰ ᠦ᠋ᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠰᠠᠭᠤᠯᠲᠠ ᠶ᠋ᠢᠨ ᠬᠡᠯᠪᠡᠷᠢ ᠪᠡᠷ ᠢᠯᠡᠷᠡᠭᠰᠡᠨ ᠠᠰᠠᠭᠤᠭᠰᠠᠨ ᠤᠳᠬᠠ ᠲᠠᠢ ᠥᠭᠦᠯᠡᠪᠦᠷᠢ ᠶ᠋ᠢ ᠠᠰᠠᠭᠤᠬᠤ ᠥᠭᠦᠯᠡᠪᠦᠷᠢ ᠭᠡᠨᠡ᠃ ᠠᠰᠠᠭᠤᠬᠤ ᠥᠭᠦᠯᠡᠪᠦᠷᠢ ᠨᠢ ᠣᠯᠠᠩᠬᠢ ᠳ᠋ᠠᠭᠠᠨ《ᠤᠤ》 ᠭᠡᠰᠡᠨ ᠠᠰᠠᠭᠤᠬᠤ ᠰᠤᠯᠠ ᠦᠭᠡ᠂《ᠪᠣᠢ》 ᠭᠡᠰᠡᠨ ᠳᠤᠲᠠᠮᠠᠭ ᠦᠢᠯᠡ ᠦᠭᠡ ᠪᠡᠷ ᠢᠯᠡᠷᠡᠬᠦ ᠪᠥᠭᠡᠳ《ᠤᠤ》 ᠶ᠋ᠢ ᠠᠰᠠᠭᠤᠬᠤ ᠲᠥᠯᠥᠭᠡᠨ ᠦ᠌ ᠦᠭᠡ ᠦᠭᠡᠢ᠂ ᠠᠰᠠᠭᠤᠬᠤ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠬᠡᠷᠡᠭᠯᠡᠵᠦ᠂《ᠪᠣᠢ》 ᠶ᠋ᠢ ᠠᠰᠠᠭᠤᠬᠤ ᠲᠥᠯᠥᠭᠡᠨ ᠦ᠌ ᠦᠭᠡ ᠲᠡᠢ ᠠᠰᠠᠭᠤᠬᠤ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠬᠡᠷᠡᠭᠯᠡᠨᠡ᠃ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠠᠰᠠᠭᠤᠯᠲᠠ ᠶ᠋ᠢᠨ ᠲᠡᠮᠳᠡᠭ (?) ᠲᠠᠯᠪᠢᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ <1> ᠬᠥᠮᠦᠨ ᠦ᠌ ᠵᠥᠪ ᠦᠵᠡᠯ ᠰᠠᠨᠠᠭᠠ ᠬᠠᠮᠢᠭᠠ ᠠ᠋ᠴᠠ ᠢᠷᠡᠳᠡᠭ ᠪᠣᠢ?
<2> ᠬᠥᠮᠦᠨ ᠦ᠌ ᠶᠢᠷᠲᠢᠨᠴᠦ ᠶ᠋ᠢ ᠬᠡᠨ ᠪᠦᠲᠦᠭᠡᠭᠰᠡᠨ ᠪᠣᠢ?
ᠬᠥᠳᠡᠯᠮᠦᠷᠢᠴᠢᠨ ᠲᠦᠮᠡᠨ ᠪᠢᠳᠡ ᠶᠤᠮ᠃
ᠵᠠᠬᠢᠷᠬᠤ ᠬᠦᠰᠡᠬᠦ ᠥᠭᠦᠯᠡᠪᠦᠷᠢ
ᠵᠠᠬᠢᠷᠤᠭᠰᠠᠨ᠂ ᠬᠦᠰᠡᠭᠰᠡᠨ᠂ ᠪᠣᠯᠭᠣᠮᠵᠢᠯᠠᠭᠰᠠᠨ ᠤᠳᠬᠠ ᠲᠠᠢ ᠬᠡᠯᠡᠭᠰᠡᠨ ᠥᠭᠦᠯᠡᠪᠦᠷᠢ ᠶ᠋ᠢ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠵᠠᠬᠢᠷᠬᠤ ᠬᠦᠰᠡᠬᠦ ᠥᠭᠦᠯᠡᠪᠦᠷᠢ ᠭᠡᠨᠡ᠃ ᠵᠠᠬᠢᠷᠬᠤ ᠬᠦᠰᠡᠬᠦ ᠥᠭᠦᠯᠡᠪᠦᠷᠢ ᠶ᠋ᠢᠨ ᠥᠭᠦᠯᠡᠬᠦᠨ ᠨᠢ ᠵᠠᠬᠢᠷᠬᠤ ᠬᠦᠰᠡᠬᠦ ᠪᠣᠯᠭᠣᠮᠵᠢᠯᠠᠬᠤ ᠦᠢᠯᠡ ᠦᠭᠡ ᠶ᠋ᠢᠨ ᠬᠡᠯᠪᠡᠷᠢ ᠪᠡᠷ ᠢᠯᠡᠷᠡᠬᠦ ᠪᠥᠭᠡᠳ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠠᠩᠬᠠᠷᠤᠭᠤᠯᠬᠤ ᠲᠡᠮᠳᠡᠭ (!) ᠪᠤᠶᠤ ᠳᠠᠪᠬᠤᠷ ᠴᠠᠭ (᠃ ) ᠲᠠᠯᠪᠢᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ <1> ᠠᠴᠢᠲᠤ ᠪᠠᠭᠰᠢ ᠪᠠᠨ ᠠᠷᠠᠳ ᠲᠦᠮᠡᠨ ᠬᠠᠢᠷᠠᠯᠠᠨᠠ!
<2> ᠲᠠ ᠣᠯᠠᠨ ᠤ᠋ ᠪᠡᠶᠡ ᠰᠠᠢᠨ᠂ ᠰᠤᠷᠤᠯᠭᠠ ᠰᠠᠢᠨ᠂ ᠠᠵᠢᠯ ᠰᠠᠢᠨ ᠪᠠᠢᠬᠤ ᠶ᠋ᠢ ᠢᠷᠥᠭᠡᠶᠡ᠃
ᠬᠦᠦᠷᠨᠢᠬᠦ ᠥᠭᠦᠯᠡᠪᠦᠷᠢ
ᠥᠭᠦᠯᠡᠭᠴᠢ ᠡᠲᠡᠭᠡᠳ ᠥᠪᠡᠷ ᠦ᠋ᠨ ᠰᠠᠨᠠᠭᠠ ᠪᠠᠨ ᠡᠩ ᠦ᠋ᠨ ᠶᠠᠩᠵᠤ ᠪᠠᠷ ᠬᠦᠦᠷᠨᠢᠨ ᠨᠡᠪᠲᠡᠷᠡᠭᠦᠯᠦᠭᠰᠡᠨ ᠤᠳᠬᠠ ᠲᠠᠢ ᠥᠭᠦᠯᠡᠪᠦᠷᠢ ᠶ᠋ᠢ ᠬᠦᠦᠷᠨᠢᠬᠦ ᠥᠭᠦᠯᠡᠪᠦᠷᠢ ᠭᠡᠨᠡ᠃ ᠬᠦᠦᠷᠨᠢᠬᠦ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠳᠠᠪᠬᠤᠷ ᠴᠠᠭ (᠃) ᠲᠠᠯᠪᠢᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄<1> ᠮᠠᠷᠺᠰ ᠤ᠋ᠨ ᠦᠵᠡᠯ ᠪᠣᠯ ᠡᠪ ᠬᠠᠮᠲᠤ ᠶᠣᠰᠣ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠪᠦᠬᠦ ᠮᠡᠳᠡᠯᠭᠡ ᠶ᠋ᠢᠨ ᠳᠣᠲᠣᠷᠠ ᠠ᠋ᠴᠠ ᠪᠣᠢ ᠪᠣᠯᠤᠭᠰᠠᠨ ᠦᠯᠢᠭᠡᠷ ᠳᠠᠭᠤᠷᠢᠶᠠᠯ ᠮᠥᠨ᠃
<2> ᠠᠷᠠᠳ ᠲᠦᠮᠡᠨ ᠦ᠌ ᠪᠠᠭᠰᠢ ᠪᠣᠯᠤᠶᠠ ᠭᠡᠪᠡᠯ᠂ ᠤᠷᠢᠳᠠᠪᠡᠷ ᠠᠷᠠᠳ ᠲᠦᠮᠡᠨ ᠦ᠌ ᠰᠤᠷᠤᠭᠴᠢ ᠪᠣᠯᠬᠤ ᠬᠡᠷᠡᠭᠲᠡᠢ᠃
ᠠᠩᠬᠠᠷᠤᠭᠤᠯᠬᠤ ᠥᠭᠦᠯᠡᠪᠦᠷᠢ
ᠥᠭᠦᠯᠡᠭᠴᠢ ᠡᠲᠡᠭᠡᠳ ᠭᠠᠢᠬᠠᠬᠤ᠂ ᠰᠣᠴᠢᠬᠤ᠂ ᠪᠠᠶᠠᠷᠯᠠᠬᠤ᠂ ᠭᠣᠮᠣᠳᠠᠬᠤ᠂ ᠠᠶᠤᠬᠤ᠂ ᠵᠢᠭᠰᠢᠬᠦ ᠵᠡᠷᠭᠡ ᠪᠡᠷ ᠶᠡᠬᠡᠳᠡ ᠰᠡᠳᠬᠢᠯ ᠬᠥᠳᠡᠯᠦᠨ ᠬᠡᠯᠡᠭᠰᠡᠨ ᠥᠭᠦᠯᠡᠪᠦᠷᠢ ᠶ᠋ᠢ ᠠᠩᠬᠠᠷᠤᠭᠤᠯᠬᠤ ᠥᠭᠦᠯᠡᠪᠦᠷᠢ ᠭᠡᠨᠡ᠃ ᠠᠩᠬᠠᠷᠤᠭᠤᠯᠬᠤ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠮᠦᠨᠡ ᠪᠡᠨ ᠭᠣᠣᠯ ᠲᠥᠯᠥᠪ ᠵᠣᠬᠢᠬᠤ ᠠᠶᠠᠯᠭᠤ ᠦᠭᠡ ᠶ᠋ᠢ ᠬᠡᠷᠡᠭᠯᠡᠵᠦ᠂ ᠬᠣᠢᠨᠠ ᠪᠠᠨ ᠠᠩᠬᠠᠷᠤᠭᠤᠯᠬᠤ ᠲᠡᠮᠳᠡᠭ (!) ᠲᠠᠯᠪᠢᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠠᠷᠠᠳ ᠲᠦᠮᠡᠨ ᠮᠠᠨᠳᠤᠲᠤᠭᠠᠢ!
(ᠬᠣᠶᠠᠷ) ᠥᠭᠦᠯᠡᠪᠦᠷᠢ ᠶ᠋ᠢ ᠪᠦᠲᠦᠴᠡ ᠪᠡᠷ ᠨᠢ ᠠᠩᠭᠢᠯᠠᠬᠤ
ᠥᠭᠦᠯᠡᠪᠦᠷᠢ ᠶ᠋ᠢ ᠪᠦᠲᠦᠴᠡ ᠪᠡᠷ ᠨᠢ ᠡᠩ ᠦ᠋ᠨ ᠥᠭᠦᠯᠡᠪᠦᠷᠢ ᠪᠠ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ᠂ ᠬᠤᠷᠢᠶᠠᠩᠭᠤᠢ ᠥᠭᠦᠯᠡᠪᠦᠷᠢ ᠪᠠ ᠳᠡᠯᠭᠡᠷᠡᠩᠭᠦᠢ ᠥᠭᠦᠯᠡᠪᠦᠷᠢ᠂ ᠨᠢᠭᠡ ᠪᠦᠷᠢᠯᠳᠦᠬᠦᠨᠲᠦ ᠥᠭᠦᠯᠡᠪᠦᠷᠢ ᠪᠠ ᠬᠣᠶᠠᠷ ᠪᠦᠷᠢᠯᠳᠦᠬᠦᠨᠲᠦ ᠥᠭᠦᠯᠡᠪᠦᠷᠢ ᠵᠢᠴᠢ ᠵᠠᠷᠢᠮᠳᠠᠭ ᠥᠭᠦᠯᠡᠪᠦᠷᠢ ᠭᠡᠵᠦ ᠬᠡᠳᠦᠨ ᠲᠥᠷᠥᠯ ᠢ᠋ᠶ᠋ᠡᠷ ᠠᠩᠭᠢᠯᠠᠨ ᠦᠵᠡᠵᠦ ᠪᠣᠯᠤᠨᠠ᠃
ᠡᠩ ᠦ᠋ᠨ ᠥᠭᠦᠯᠡᠪᠦᠷᠢ
ᠴᠢᠨᠠᠭᠰᠢᠳᠠ ᠬᠣᠶᠠᠷ ᠪᠤᠶᠤ ᠬᠣᠶᠠᠷ ᠠ᠋ᠴᠠ ᠳᠡᠭᠡᠭᠰᠢ ᠥᠭᠦᠯᠡᠪᠦᠷᠢ ᠪᠣᠯᠭᠠᠨ ᠵᠠᠳᠠᠯᠵᠤ ᠪᠣᠯᠬᠤ ᠦᠭᠡᠢ᠂ ᠳᠠᠩ ᠭᠠᠭᠴᠠ ᠥᠭᠦᠯᠡᠭᠳᠡᠬᠦᠨ ᠦ᠌ ᠬᠡᠰᠡᠭ ᠪᠠ ᠥᠭᠦᠯᠡᠬᠦᠨ ᠦ᠌ ᠬᠡᠰᠡᠭ ᠡᠴᠡ ᠪᠦᠲᠦᠭᠰᠡᠨ ᠥᠭᠦᠯᠡᠪᠦᠷᠢ ᠶ᠋ᠢ ᠡᠩ ᠦ᠋ᠨ ᠥᠭᠦᠯᠡᠪᠦᠷᠢ ᠭᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠬᠦᠴᠦᠨ ᠴᠢᠳᠠᠯ ᠤ᠋ᠨ ᠡᠬᠢ ᠰᠤᠷᠪᠤᠯᠵᠢ ᠪᠣᠯ ᠠᠷᠠᠳ ᠣᠯᠠᠨ ᠮᠥᠨ᠃
ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ
ᠬᠣᠶᠠᠷ ᠪᠤᠶᠤ ᠬᠣᠶᠠᠷ ᠠ᠋ᠴᠠ ᠳᠡᠭᠡᠭᠰᠢ ᠲᠣᠭᠠᠨ ᠤ᠋ ᠡᠩ ᠦ᠋ᠨ ᠥᠭᠦᠯᠡᠪᠦᠷᠢ ᠨᠡᠢᠯᠡᠵᠦ ᠪᠦᠲᠦᠭᠰᠡᠨ ᠥᠭᠦᠯᠡᠪᠦᠷᠢ ᠶ᠋ᠢ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠭᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠪᠢᠳᠡ ᠲᠡᠢᠨ ᠦ᠌ ᠪᠡᠯᠡᠳᠬᠡᠯ ᠦ᠋ᠨ ᠠᠵᠢᠯ ᠬᠢᠵᠦ᠂ ᠲᠡᠳᠡ ᠭᠦᠨ ᠤᠬᠠᠭᠠᠨ ᠤ᠋ ᠵᠣᠬᠢᠶᠠᠯ ᠢ᠋ ᠰᠤᠷᠤᠯᠴᠠᠵᠤ ᠪᠠᠢᠨᠠ᠃ ᠭᠡᠬᠦ ᠮᠡᠲᠦ᠃
ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠶ᠋ᠢ ᠪᠦᠲᠦᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠨᠢ ᠦᠨᠳᠦᠰᠦ ᠪᠣᠯᠭᠠᠨ ᠵᠡᠷᠭᠡᠴᠡᠭᠰᠡᠨ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠪᠠ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠭᠡᠵᠦ ᠬᠤᠪᠢᠶᠠᠵᠤ ᠪᠣᠯᠤᠨᠠ᠃
1 ᠵᠡᠷᠭᠡᠴᠡᠭᠰᠡᠨ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ
ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠣᠲᠣᠷᠠᠬᠢ ᠭᠡᠰᠢᠭᠦᠨ ᠥᠭᠦᠯᠡᠪᠦᠷᠢ ᠨᠦ᠍ᠭᠦᠳ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠵᠠᠬᠢᠷᠤᠭᠳᠠᠭᠰᠠᠨ ᠬᠠᠷᠢᠴᠠᠭᠠ ᠪᠢᠰᠢ᠂ ᠬᠠᠷᠢᠨ ᠵᠡᠷᠭᠡᠴᠡᠭᠰᠡᠨ ᠬᠠᠷᠢᠴᠠᠭᠠ ᠲᠠᠢ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠶ᠋ᠢ ᠵᠡᠷᠭᠡᠴᠡᠭᠰᠡᠨ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠭᠡᠨᠡ᠃ ᠵᠡᠷᠭᠡᠴᠡᠭᠰᠡᠨ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠶ᠋ᠢ ᠪᠦᠲᠦᠭᠡᠬᠦ ᠳ᠋ᠦ᠍ ᠥᠭᠦᠯᠡᠪᠦᠷᠢ ᠨᠦ᠍ᠭᠦᠳ ᠦ᠋ᠨ ᠬᠡᠯᠪᠡᠷᠢ ᠨᠢ ᠶᠠᠮᠠᠷ ᠴᠤ᠌ ᠬᠤᠪᠢᠷᠠᠯᠲᠠ ᠦᠭᠡᠢ᠂ ᠥᠭᠦᠯᠡᠭᠳᠡᠬᠦᠨ ᠨᠢ ᠪᠦᠷ ᠨᠡᠷᠡᠯᠡᠬᠦ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠳ᠋ᠤ᠌ ᠪᠠᠢᠬᠤ ᠪᠠ ᠵᠥᠪᠬᠡᠨ ᠡᠴᠦᠰ ᠦ᠋ᠨ ᠪᠤᠰᠤ ᠥᠭᠦᠯᠡᠪᠦᠷᠢ ᠶ᠋ᠢᠨ ᠥᠭᠦᠯᠡᠬᠦᠨ ᠨᠢ ᠭᠣᠣᠯ ᠲᠥᠯᠥᠪ ᠵᠡᠷᠭᠡᠴᠡᠬᠦ᠂ᠤᠷᠢᠳᠴᠢᠯᠠᠬᠤ᠂ ᠬᠠᠮ ᠨᠥᠬᠥᠴᠡᠯ ᠦᠢᠯᠡ ᠦᠭᠡ ᠪᠡᠷ ᠬᠡᠯᠪᠡᠷᠢᠵᠢᠬᠦ ᠪᠤᠶᠤ ᠡᠰᠡᠬᠦᠯᠡ ᠥᠴᠦᠬᠡᠨ ᠴᠦ᠍ ᠥᠭᠡᠷᠡᠴᠢᠯᠡᠯ ᠦᠭᠡᠢ᠂ ᠭᠠᠭᠴᠠ ᠬᠦ᠌ ᠬᠡᠯᠡᠬᠦ ᠠᠶᠠᠯᠭᠤ ᠪᠠᠷ ᠬᠣᠯᠪᠣᠬᠤ ᠤᠳᠠᠭᠠ ᠪᠣᠢ᠃
ᠵᠢᠱ᠌ᠢᠶᠡᠯᠡᠪᠡᠯ᠄<1> ᠪᠦᠬᠦ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠦᠭᠡᠭᠦᠦ ᠠᠩᠭᠢ ᠶ᠋ᠢᠨ ᠣᠶᠤᠲᠠᠨ ᠢ᠋ ᠪᠡᠶᠡ ᠪᠡᠨ ᠬᠥᠳᠡᠯᠮᠦᠷᠢᠴᠢᠨ ᠲᠦᠮᠡᠨ ᠦ᠌ ᠰᠠᠯᠵᠤ ᠪᠣᠯᠣᠰᠢ ᠦᠭᠡᠢ ᠪᠦᠷᠢᠯᠳᠦᠬᠦᠨ ᠬᠡᠰᠡᠭ ᠢ᠋ᠶ᠋ᠡᠷ ᠦᠵᠡᠬᠦ ᠪᠣᠯᠭᠠᠵᠤ᠂ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠣᠶᠤᠲᠠᠳ ᠢ᠋ ᠨᠡᠢᠭᠡᠮ ᠦ᠋ᠨ ᠵᠢᠳᠬᠦᠯᠲᠡᠨ ᠢ᠋ᠶ᠋ᠡᠷ ᠪᠣᠳᠣᠬᠤ ᠪᠣᠯᠭᠠᠵᠤ᠂ ᠲᠡᠭᠦᠨᠴᠢᠯᠡᠨ ᠵᠢᠩᠬᠢᠨᠢ ᠨᠡᠢᠭᠡᠮ ᠦ᠋ᠨ ᠵᠢᠳᠬᠦᠯᠲᠡᠨ ᠭᠡᠳᠡᠭ ᠢ᠋ᠶ᠋ᠡᠨ ᠦᠢᠯᠡ ᠠᠵᠢᠯᠯᠠᠭᠠ ᠳᠡᠭᠡᠷᠡ ᠪᠡᠨ ᠢᠯᠡᠷᠡᠭᠦᠯᠬᠦ ᠪᠣᠯᠭᠠᠬᠤ ᠬᠡᠷᠡᠭᠲᠡᠢ— ᠡᠨᠡ ᠪᠣᠯ ᠨᠠᠮ ᠤ᠋ᠨ ᠬᠣᠶᠠᠳᠤᠭᠠᠷ ᠡᠭᠦᠷᠭᠡ ᠮᠥᠨ᠃
<2> ᠡᠪ ᠬᠠᠮᠲᠤ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠥᠪᠡᠷ ᠦ᠋ᠨ ᠬᠢ ᠪᠠᠨ ᠯᠠ ᠵᠥᠪ ᠭᠡᠳ ᠬᠥᠮᠦᠨ ᠡᠴᠡ ᠳᠡᠭᠡᠭᠦᠷ ᠠᠭᠠᠰᠢᠯᠠᠵᠤ᠂ ᠮᠢᠨᠦ ᠶᠠᠭᠤ ᠴᠦ᠍ ᠪᠦᠷ ᠰᠠᠢᠨ᠂ ᠬᠥᠮᠦᠨ ᠦ᠌ ᠶᠠᠭᠤ ᠴᠤ᠌ ᠪᠦᠷ ᠮᠠᠭᠤ ᠭᠡᠵᠦ ᠦᠵᠡᠵᠦ ᠣᠭᠲᠣ ᠪᠣᠯᠬᠤ ᠦᠭᠡᠢ᠃ ᠪᠡᠶᠡ ᠪᠠᠨ ᠢᠪᠴᠤᠤ ᠥᠷᠥᠭᠡᠨ ᠳ᠋ᠦ᠍ ᠬᠣᠷᠢᠵᠤ᠂ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠦᠯᠢᠶᠡᠨ ᠮᠠᠭᠲᠠᠵᠤ᠂ ᠡᠵᠡᠨ ᠮᠡᠳᠡᠨ ᠡᠵᠡᠷᠬᠡᠨ ᠠᠭᠠᠰᠢᠯᠠᠵᠤ ᠣᠭᠲᠣ ᠪᠣᠯᠬᠤ ᠦᠭᠡᠢ᠃
2 ᠬᠠᠪᠰᠤᠷᠤᠭᠰᠠᠨ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ
ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠣᠲᠣᠷᠠᠬᠢ ᠭᠡᠰᠢᠭᠦᠨ ᠥᠭᠦᠯᠡᠪᠦᠷᠢ ᠨᠦ᠍ᠭᠦᠳ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠵᠡᠷᠭᠡᠴᠡᠭᠰᠡᠨ ᠬᠠᠷᠢᠴᠠᠭᠠ ᠪᠢᠰᠢ᠂ ᠬᠠᠷᠢᠨ ᠵᠠᠬᠢᠷᠤᠭᠰᠠᠨ ᠬᠠᠷᠢᠴᠠᠭᠠ ᠲᠠᠢ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠶ᠋ᠢ ᠬᠠᠪᠰᠤᠷᠤᠭᠰᠠᠨ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠭᠡᠨᠡ᠃ ᠬᠠᠪᠰᠤᠷᠤᠭᠰᠠᠨ ᠨᠡᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠣᠲᠣᠷᠠ᠂ ᠪᠡᠶᠡ ᠪᠡᠨ ᠳᠠᠭᠠᠭᠠᠵᠤ ᠣᠷᠣᠭᠰᠠᠨ ᠥᠭᠦᠯᠡᠪᠦᠷᠢ ᠨᠢ ᠭᠣᠣᠯ ᠥᠭᠦᠯᠡᠪᠦᠷᠢ ᠪᠣᠯᠵᠤ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠪᠠᠢᠬᠤ ᠪᠥᠭᠡᠳ ᠭᠣᠣᠯ ᠥᠭᠦᠯᠡᠪᠦᠷᠢ ᠳ᠋ᠡᠭᠡᠨ ᠵᠠᠬᠢᠷᠤᠭᠳᠠᠭᠰᠠᠨ ᠥᠭᠦᠯᠡᠪᠦᠷᠢ ᠨᠢ ᠭᠡᠰᠢᠭᠦᠨ ᠥᠭᠦᠯᠡᠪᠦᠷᠢ ᠪᠣᠯᠵᠤ᠂ ᠥᠭᠦᠯᠡᠪᠦᠷᠢ ᠳ᠋ᠡᠭᠡᠨ ᠠᠯᠢ ᠨᠢᠭᠡᠨ ᠭᠡᠰᠢᠭᠦᠨ ᠦ᠌ ᠡᠭᠦᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠨᠡ᠃ ᠭᠣᠣᠯ ᠥᠭᠦᠯᠡᠪᠦᠷᠢ ᠶ᠋ᠢᠨ ᠪᠦᠲᠦᠴᠡ ᠨᠢ ᠡᠩ ᠦ᠋ᠨ ᠥᠭᠦᠯᠡᠪᠦᠷᠢ ᠲᠡᠢ ᠢᠯᠭᠠᠭᠠ ᠦᠭᠡᠢ᠂ ᠭᠡᠰᠢᠭᠦᠨ ᠥᠭᠦᠯᠡᠪᠦᠷᠢ ᠶ᠋ᠢᠨ ᠪᠦᠲᠦᠴᠡ ᠨᠢ ᠭᠣᠣᠯ ᠥᠭᠦᠯᠡᠪᠦᠷᠢ ᠶ᠋ᠢᠨ ᠱᠠᠭᠠᠷᠳᠠᠯᠭᠠ ᠠ᠋ᠴᠠ ᠪᠣᠯᠵᠤ ᠥᠭᠦᠯᠡᠭᠳᠡᠬᠦᠨ ᠨᠢ ᠵᠢᠭᠠᠬᠤ᠂ ᠬᠠᠷᠢᠶᠠᠯᠠᠬᠤ ᠶ᠋ᠢᠨ ᠲᠡᠢᠨ ᠢᠯᠭᠠᠯ ᠢ᠋ᠶ᠋ᠠᠷ ᠬᠡᠯᠪᠡᠷᠢᠵᠢᠨᠡ᠃ ᠥᠭᠦᠯᠡᠬᠦᠨ ᠨᠢ ᠲᠡᠮᠳᠡᠭ ᠦᠢᠯᠡ᠂ ᠨᠥᠬᠥᠴᠡᠯ ᠦᠢᠯᠡ ᠶ᠋ᠢᠨ ᠵᠠᠷᠢᠮ ᠬᠡᠯᠪᠡᠷᠢ ᠪᠡᠷ ᠬᠡᠯᠪᠡᠷᠢᠵᠢᠬᠦ ᠪᠠ ᠵᠣᠬᠢᠬᠤ ᠨᠡᠷᠡ ᠦᠭᠡ ᠪᠡᠷ ᠪᠠᠢᠵᠤ᠂ ᠭᠣᠣᠯ ᠥᠭᠦᠯᠡᠪᠦᠷᠢ ᠳ᠋ᠡᠭᠡᠨ ᠶᠠᠮᠠᠷ ᠨᠢᠭᠡᠨ ᠭᠡᠰᠢᠭᠦᠨ ᠦ᠌ ᠡᠭᠦᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠨ᠂ ᠥᠪᠡᠷ ᠲᠡᠭᠡᠨ ᠬᠣᠯᠪᠣᠭᠳᠠᠬᠤ ᠡᠮᠦᠨᠡᠬᠢ ᠭᠡᠰᠢᠭᠦᠳ ᠲᠡᠭᠡᠨ ᠥᠭᠦᠯᠡᠬᠦᠨ ᠦ᠌ ᠡᠭᠦᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠬᠦ ᠮᠡᠲᠦ ᠪᠡᠷ ᠬᠣᠶᠠᠷ ᠳᠠᠪᠬᠤᠷ ᠡᠭᠦᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠵᠦ ᠪᠠᠢᠬᠤ ᠶᠤᠮ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠪᠢᠳᠡ ᠶᠠᠭᠠᠬᠢᠭᠰᠠᠨ ᠴᠤ᠌ ᠡᠳᠡᠭᠡᠷ ᠳᠠᠢᠰᠤᠨ ᠢ᠋ ᠬᠥᠩᠭᠡᠪᠴᠢᠯᠡᠵᠦ ᠪᠣᠯᠬᠤ ᠦᠭᠡᠢ᠃ ᠬᠡᠷᠪᠡ ᠪᠢᠳᠡ ᠣᠳᠣ ᠢᠩᠭᠢᠵᠦ ᠠᠰᠠᠭᠤᠳᠠᠯ ᠢ᠋ ᠳᠤᠷᠠᠳᠴᠤ ᠠᠰᠠᠭᠤᠳᠠᠯ ᠢ᠋ ᠲᠠᠨᠢᠬᠤ ᠦᠭᠡᠢ ᠪᠣᠯ ᠳᠠᠷᠤᠢ ᠲᠤᠢᠯ ᠤ᠋ᠨ ᠶᠡᠬᠡ ᠠᠯᠳᠠᠭᠠ ᠭᠠᠷᠭᠠᠬᠤ ᠪᠣᠯᠤᠨᠠ᠃
3 ᠬᠥᠨᠳᠡᠯᠡᠨ ᠦ᠌ ᠦᠭᠡ
ᠭᠣᠣᠯ ᠥᠭᠦᠯᠡᠪᠦᠷᠢ ᠳ᠋ᠡᠭᠡᠨ ᠪᠤᠰᠤᠳ ᠤ᠋ᠨ ᠪᠤᠶᠤ ᠥᠪᠡᠷ ᠦ᠋ᠨ ᠦᠭᠡ ᠶ᠋ᠢ ᠲᠡᠷᠡ ᠬᠡᠪ ᠢ᠋ᠶ᠋ᠡᠷ ᠨᠢ ᠪᠤᠶᠤ ᠪᠠᠭᠠ ᠵᠡᠷᠭᠡ ᠨᠠᠢᠷᠠᠭᠤᠯᠤᠨ ᠣᠷᠣᠭᠤᠯᠤᠭᠰᠠᠨ ᠦᠭᠡ ᠶ᠋ᠢ ᠬᠥᠨᠳᠡᠯᠡᠨ ᠦ᠌ ᠦᠭᠡ ᠭᠡᠵᠦ ᠬᠡᠯᠡᠳᠡᠭ᠃ ᠬᠥᠨᠳᠡᠯᠡᠨ ᠦ᠌ ᠦᠭᠡ ᠨᠢ ᠤᠤᠯ ᠥᠭᠦᠯᠡᠪᠦᠷᠢ ᠳ᠋ᠡᠭᠡᠨ ᠭᠡᠰᠢᠭᠦᠨ ᠥᠭᠦᠯᠡᠪᠦᠷᠢ ᠪᠣᠯᠳᠠᠭ᠃
ᠵᠢᠱ᠌ᠢᠶᠡᠯᠡᠪᠡᠯ᠄<1> ᠪᠢᠳᠡᠨ ᠳ᠋ᠦ᠍᠄《ᠰᠠᠢᠲᠤᠷ ᠰᠤᠷᠤᠯᠴᠠᠵᠤ᠂ ᠡᠳᠦᠷ ᠡᠴᠡ ᠡᠳᠦᠷ ᠥᠭᠡᠳᠡᠯᠡ》 ᠭᠡᠵᠦ ᠰᠤᠷᠭᠠᠵᠠᠢ᠃
ᠨᠢᠭᠡᠨ ᠪᠦᠷᠢᠯᠳᠦᠬᠦᠨᠲᠦ ᠥᠭᠦᠯᠡᠪᠦᠷᠢ ᠪᠠ ᠬᠣᠶᠠᠷ ᠪᠦᠷᠢᠯᠳᠦᠬᠦᠨᠲᠦ ᠥᠭᠦᠯᠡᠪᠦᠷᠢ
ᠥᠭᠦᠯᠡᠪᠦᠷᠢ ᠶ᠋ᠢᠨ ᠭᠣᠣᠯ ᠭᠡᠰᠢᠭᠦᠨ ᠪᠣᠯᠬᠤ ᠥᠭᠦᠯᠡᠭᠳᠡᠬᠦᠨ ᠪᠤᠶᠤ ᠥᠭᠦᠯᠡᠬᠦᠨ ᠦ᠌ ᠠᠯᠢ ᠨᠢᠭᠡ ᠪᠡᠷ ᠪᠦᠲᠦᠭᠰᠡᠨ ᠥᠭᠦᠯᠡᠪᠦᠷᠢ ᠶ᠋ᠢ ᠨᠢᠭᠡᠨ ᠪᠦᠷᠢᠯᠳᠦᠬᠦᠨᠲᠦ ᠥᠭᠦᠯᠡᠪᠦᠷᠢ ᠭᠡᠵᠦ᠂ ᠥᠭᠦᠯᠡᠭᠳᠡᠬᠦᠨ ᠥᠭᠦᠯᠡᠬᠦᠨ ᠬᠣᠶᠠᠷ ᠣᠷᠣᠯᠴᠠᠭᠰᠠᠨ ᠥᠭᠦᠯᠡᠪᠦᠷᠢ ᠶ᠋ᠢ ᠬᠣᠶᠠᠷ ᠪᠦᠷᠢᠯᠳᠦᠬᠦᠨᠲᠦ ᠥᠭᠦᠯᠡᠪᠦᠷᠢ ᠭᠡᠳᠡᠭ᠃
ᠵᠢᠱ᠌ᠢᠶᠡᠯᠡᠪᠡᠯ᠄<1> ᠰᠢᠭᠦᠮᠵᠢᠯᠡᠯ ᠢ᠋ ᠴᠠᠭ ᠲᠤᠬᠠᠢ ᠳ᠋ᠤᠨᠢ ᠶᠠᠪᠤᠭᠤᠯᠬᠤ ᠬᠡᠷᠡᠭᠲᠡᠢ᠂ ᠪᠢᠲᠡᠭᠡᠢ ᠬᠡᠷᠡᠭ ᠶᠠᠪᠤᠳᠠᠯ ᠭᠠᠷᠤᠭᠰᠠᠨ ᠤ᠋ ᠬᠣᠢᠨᠠ ᠰᠠᠶᠢ ᠰᠢᠭᠦᠮᠵᠢᠯᠡᠬᠦ ᠭᠡᠵᠦ ᠣᠷᠣᠯᠳᠣᠭᠠᠳ ᠪᠠᠢ᠃ (ᠨᠢᠭᠡ ᠪᠦᠷᠢᠯᠳᠦᠬᠦᠨᠲᠦ ᠥᠭᠦᠯᠡᠪᠦᠷᠢ)
<2> ᠮᠠᠨ ᠤ᠋ ᠰᠤᠷᠭᠠᠨ ᠬᠥᠮᠦᠵᠢᠯ ᠦ᠋ᠨ ᠴᠢᠭᠯᠡᠯᠲᠡ ᠪᠣᠯ ᠰᠤᠷᠭᠠᠨ ᠬᠥᠮᠦᠵᠢᠯ ᠬᠦᠷᠲᠡᠭᠴᠢᠳ ᠢ᠋ ᠶᠣᠰᠣ ᠰᠤᠷᠲᠠᠬᠤᠨ ᠤ᠋ ᠬᠥᠮᠦᠵᠢᠯ᠂ ᠣᠶᠤᠨ ᠤᠬᠠᠭᠠᠨ ᠤ᠋ ᠬᠥᠮᠦᠵᠢᠯ ᠪᠠ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠬᠥᠮᠦᠵᠢᠯ ᠵᠡᠷᠭᠡ ᠬᠡᠳᠦᠨ ᠲᠠᠯᠠ ᠪᠠᠷ ᠬᠥᠭᠵᠢᠭᠦᠯᠵᠦ᠂ ᠨᠡᠢᠭᠡᠮ ᠵᠢᠷᠤᠮᠲᠤ ᠤᠬᠠᠮᠰᠠᠷ ᠲᠠᠢ ᠰᠣᠶᠣᠯ ᠪᠣᠯᠪᠠᠰᠤᠷᠠᠯ ᠲᠠᠢ ᠬᠥᠳᠡᠯᠮᠦᠷᠢᠴᠢᠨ ᠪᠣᠯᠭᠠᠬᠤ ᠶᠠᠪᠤᠳᠠᠯ ᠪᠣᠯᠤᠨᠠ᠃ (ᠬᠣᠶᠠᠷ ᠪᠦᠷᠢᠯᠳᠦᠬᠦᠨᠲᠦ ᠥᠭᠦᠯᠡᠪᠦᠷᠢ)
ᠬᠤᠷᠢᠶᠠᠩᠭᠤᠢ ᠥᠭᠦᠯᠡᠪᠦᠷᠢ ᠪᠠ ᠳᠡᠯᠭᠡᠷᠡᠩᠭᠦᠢ ᠥᠭᠦᠯᠡᠪᠦᠷᠢ
ᠵᠥᠪᠬᠡᠨ ᠥᠭᠦᠯᠡᠭᠳᠡᠬᠦᠨ ᠥᠭᠦᠯᠡᠬᠦᠨ ᠬᠣᠶᠠᠷ ᠠ᠋ᠴᠠ ᠪᠦᠲᠦᠭᠰᠡᠨ ᠥᠭᠦᠯᠡᠪᠦᠷᠢ ᠶ᠋ᠢ ᠬᠤᠷᠢᠶᠠᠩᠭᠤᠢ ᠥᠭᠦᠯᠡᠪᠦᠷᠢ ᠭᠡᠵᠦ᠂ ᠭᠣᠣᠯ ᠭᠡᠰᠢᠭᠦᠨ ᠥᠭᠦᠯᠡᠭᠳᠡᠬᠦᠨ ᠥᠭᠦᠯᠡᠬᠦᠨ ᠬᠣᠶᠠᠷ ᠠ᠋ᠴᠠ ᠭᠠᠳᠠᠨᠠ᠂ ᠳᠡᠳ᠋ ᠭᠡᠰᠢᠭᠦᠨ ᠣᠷᠣᠯᠴᠠᠭᠰᠠᠨ ᠥᠭᠦᠯᠡᠪᠦᠷᠢ ᠶ᠋ᠢ ᠳᠡᠯᠭᠡᠷᠡᠩᠭᠦᠢ ᠥᠭᠦᠯᠡᠪᠦᠷᠢ ᠭᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ (1) ᠪᠢᠳᠡ ᠰᠤᠷᠤᠯᠴᠠᠨᠠ᠃ ᠲᠡᠳᠡ ᠬᠥᠳᠡᠯᠮᠦᠷᠢᠯᠡᠨᠡ᠃ ( ᠬᠤᠷᠢᠶᠠᠩᠭᠤᠢ ᠥᠭᠦᠯᠡᠪᠦᠷᠢ)
(2) ᠰᠤᠷᠤᠭᠴᠢᠳ ᠪᠠᠰᠠ ᠡᠢᠮᠦ᠂ ᠰᠤᠷᠤᠯᠴᠠᠬᠤ ᠪᠠᠷ ᠭᠣᠣᠯ ᠪᠣᠯᠭᠠᠵᠤ᠂ ᠣᠨᠳᠣᠣ ᠵᠦᠢᠯ ᠢ᠋ ᠬᠠᠪᠰᠤᠷᠭᠠᠨ ᠰᠤᠷᠤᠨᠠ᠂ ᠰᠣᠶᠣᠯ ᠰᠤᠷᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠪᠠᠰᠠ ᠠᠵᠤ ᠦᠢᠯᠡᠳᠪᠦᠷᠢ ᠶ᠋ᠢ ᠰᠤᠷᠬᠤ᠂ ᠲᠠᠷᠢᠶᠠᠯᠠᠩ ᠢ᠋ ᠰᠤᠷᠬᠤ᠂ ᠴᠡᠷᠢᠭ ᠲᠡᠢᠨ ᠢ᠋ ᠰᠤᠷᠬᠤ ᠬᠡᠷᠡᠭᠲᠡᠢ᠂ ᠪᠠᠰᠠ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠢ᠋ ᠰᠤᠳᠤᠯᠬᠤ ᠬᠡᠷᠡᠭᠲᠡᠢ᠃( ᠳᠡᠯᠭᠡᠷᠡᠩᠭᠦᠢ ᠥᠭᠦᠯᠡᠪᠦᠷᠢ)
ᠵᠠᠷᠢᠮᠳᠠᠭ ᠥᠭᠦᠯᠡᠪᠦᠷᠢ
ᠨᠢᠭᠡᠨ ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠣᠲᠣᠷᠠ᠂ ᠥᠭᠦᠯᠡᠭᠳᠡᠬᠦᠨ ᠥᠭᠦᠯᠡᠬᠦᠨ ᠬᠣᠶᠠᠷ ᠤ᠋ᠨ ᠠᠯᠢ ᠨᠢᠭᠡ ᠨᠢ ᠪᠠᠢᠬᠤ ᠦᠭᠡᠢ ᠪᠣᠯ ᠲᠡᠭᠦᠨ ᠢ᠋ ᠵᠠᠷᠢᠮᠳᠠᠭ ᠥᠭᠦᠯᠡᠪᠦᠷᠢ ᠭᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ (1) ᠬᠠᠮᠢᠭᠠ ᠠ᠋ᠴᠠ ᠢᠷᠡᠪᠡ? ᠬᠣᠲᠠ ᠠ᠋ᠴᠠ ᠢᠷᠡᠯᠡ᠃
ᠬᠡᠨ ᠪᠣᠢ? ᠬᠥᠭᠵᠢᠯᠲᠦ᠃
ᠶᠠᠭᠤ ᠠᠪᠤᠭᠰᠠᠨ ᠪᠣᠢ?
《 ᠭᠦᠨ ᠤᠬᠠᠭᠠᠨ ᠤ᠋ ᠵᠣᠬᠢᠶᠠᠯ 》 ᠠ᠋ᠴᠠ ᠨᠢᠭᠡ ᠪᠣᠳᠢ ᠠᠪᠴᠠᠢ᠃
(2) ᠴᠢᠷᠮᠠᠢᠨ ᠰᠤᠷᠴᠤ᠂ ᠴᠢᠷᠮᠠᠢᠭᠰᠠᠨ ᠳᠡᠭᠡᠷᠡ ᠪᠡᠨ ᠴᠢᠷᠮᠠᠢᠳᠠᠭ ᠯᠠ ᠶᠤᠮ ᠪᠣᠯ ᠭᠡᠭᠡᠨ ᠰᠠᠷᠠᠭᠤᠯ ᠢᠷᠡᠭᠡᠳᠦᠢ ᠡᠮᠦᠨᠡᠬᠡᠨ ᠪᠠᠢᠨᠠ᠃