ᠥᠭᠦᠯᠡᠪᠦᠷᠢ ᠶ᠋ᠢᠨ ᠵᠦᠢ05 ᠮᠣᠩᠭᠣᠯ ᠬᠡᠯᠡᠨ ᠦ᠌ ᠥᠭᠦᠯᠡᠪᠦᠷᠢ ᠳ᠋ᠦ᠍ ᠴᠡᠭ ᠲᠡᠮᠳᠡᠭ ᠬᠡᠷᠡᠭᠯᠡᠬᠦ ᠲᠤᠬᠠᠢ
7ᠲᠠᠪᠤ᠃ ᠮᠣᠩᠭᠣᠯ ᠬᠡᠯᠡᠨ ᠦ᠌ ᠥᠭᠦᠯᠡᠪᠦᠷᠢ ᠳ᠋ᠦ᠍ ᠴᠡᠭ ᠲᠡᠮᠳᠡᠭ ᠬᠡᠷᠡᠭᠯᠡᠬᠦ ᠲᠤᠬᠠᠢ
(ᠨᠢᠭᠡ) ᠴᠠᠭ ᠲᠡᠮᠳᠡᠭ ᠦ᠋ᠨ ᠦᠢᠯᠡᠳᠦᠯ
ᠴᠠᠭ ᠲᠡᠮᠳᠡᠭ ᠨᠢ ᠪᠢᠴᠢᠭ ᠵᠣᠬᠢᠶᠠᠯ ᠤ᠋ᠨ ᠬᠡᠯᠡᠯᠭᠡ ᠳ᠋ᠦ᠍ ᠳᠤᠲᠠᠭᠳᠠᠵᠤ ᠪᠣᠯᠣᠰᠢ ᠦᠭᠡᠢ᠂ ᠬᠠᠪᠰᠤᠷᠤᠯᠭᠠ ᠶ᠋ᠢᠨ ᠪᠠᠭᠠᠵᠢ ᠮᠥᠨ᠃ ᠲᠡᠷᠡ ᠨᠢ ᠤᠩᠰᠢᠭᠴᠢ ᠶ᠋ᠢ ᠬᠠᠪᠰᠤᠷᠴᠤ ᠥᠭᠦᠯᠡᠪᠦᠷᠢ ᠶ᠋ᠢᠨ ᠪᠦᠲᠦᠴᠡ ᠶ᠋ᠢ ᠣᠢᠯᠠᠭᠠᠭᠤᠯᠤᠨ᠂ ᠬᠡᠯᠡᠬᠦ ᠠᠶᠠᠯᠭᠤ ᠶ᠋ᠢ ᠢᠯᠭᠠᠷᠠᠭᠤᠯᠤᠭᠠᠳ᠂ ᠤᠳᠬᠠ ᠰᠠᠨᠠᠭᠠ ᠶ᠋ᠢ ᠵᠥᠪ ᠣᠨᠣᠪᠴᠢᠲᠠᠢ ᠨᠡᠪᠲᠡᠷᠡᠭᠦᠯᠦᠨᠡ᠃ ᠡᠢᠮᠦ ᠡᠴᠡ ᠴᠠᠭ ᠲᠡᠮᠳᠡᠭ ᠭᠡᠳᠡᠭ ᠡᠨᠡᠬᠦ ᠪᠠᠭᠠᠵᠢ ᠨᠢ ᠪᠠᠢᠪᠠᠴᠤ ᠪᠣᠯᠬᠤ᠂ ᠦᠭᠡᠢ ᠪᠣᠯᠪᠠᠴᠤ ᠪᠣᠯᠬᠤ ᠲᠡᠢᠮᠦ ᠡᠩ ᠦ᠋ᠨ ᠡᠳ᠋ᠯᠡᠯ ᠪᠤᠰᠤ᠂ ᠬᠠᠷᠢᠨ ᠶᠠᠮᠠᠷ ᠨᠢᠭᠡᠨ ᠥᠭᠦᠯᠡᠯ ᠵᠣᠬᠢᠶᠠᠯ᠂ ᠪᠢᠴᠢᠭ ᠪᠠᠷᠢᠮᠲᠠ ᠶ᠋ᠢᠨ ᠵᠦᠢᠯ ᠳ᠋ᠦ᠍ ᠴᠦ᠍ ᠳᠤᠲᠠᠭᠳᠠᠵᠤ ᠪᠣᠯᠤᠰᠢ ᠦᠭᠡᠢ ᠪᠥᠭᠡᠳ ᠵᠠᠪᠠᠯ ᠵᠥᠪ ᠬᠡᠷᠡᠭᠯᠡᠬᠦ ᠬᠡᠷᠡᠭᠲᠡᠢ ᠶᠤᠮ᠃
(ᠬᠣᠶᠠᠷ) ᠴᠠᠭ ᠲᠡᠮᠳᠡᠭ ᠦ᠋ᠨ ᠵᠦᠢᠯ ᠪᠠ ᠬᠡᠷᠡᠭᠴᠡᠭᠡ
ᠪᠢᠳᠡᠨ ᠦ᠌ ᠶᠡᠷᠦ ᠶ᠋ᠢᠨ ᠬᠡᠷᠡᠭᠯᠡᠳᠡᠭ ᠴᠠᠭ ᠲᠡᠮᠳᠡᠭ ᠨᠢ ᠳᠣᠣᠷᠠᠬᠢ ᠮᠡᠲᠦ ᠬᠡᠳᠦᠨ ᠵᠦᠢᠯ ᠪᠣᠢ᠃
ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠬᠡᠷᠡᠭᠯᠡᠬᠦ ᠴᠠᠭ ᠲᠡᠮᠳᠡᠭ
1 ᠳᠠᠪᠬᠤᠷ ᠴᠠᠭ《᠃》
ᠡᠩ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠦᠦᠷᠨᠢᠨ ᠬᠡᠯᠡᠬᠦ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠦᠵᠡᠬᠦ ᠨᠢᠳᠦ ᠦᠭᠡᠢ ᠭᠤᠢᠷᠠᠨᠴᠢ ᠡᠴᠢᠭᠡ ᠪᠡᠨ ᠲᠡᠵᠢᠭᠡᠬᠦ ᠶ᠋ᠢᠨ ᠲᠥᠯᠥᠭᠡ ᠡᠭᠦᠳᠡ ᠳᠠᠷᠠᠭᠠᠯᠠᠨ ᠳᠠᠭᠤᠯᠠᠵᠤ ᠶᠠᠪᠤᠭᠰᠠᠨ ᠭᠤᠨᠢᠭᠲᠤ ᠬᠡᠦᠬᠡᠨ ᠥᠷᠥᠰᠢᠶᠡᠯ ᠲᠡᠭᠦᠯᠳᠡᠷ ᠪᠠᠢᠨᠠ᠃
2 ᠠᠰᠠᠭᠤᠯᠲᠠ ᠶ᠋ᠢᠨ ᠲᠡᠮᠳᠡᠭ《?》
ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠶ᠋ᠢ ᠠᠰᠠᠭᠤᠬᠤ ᠰᠠᠨᠠᠭᠠ ᠲᠠᠢ ᠬᠡᠯᠡᠭᠰᠡᠨ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄
ᠰᠠᠢᠨ ᠪᠠᠢᠨᠠ ᠦᠦ?
3 ᠠᠩᠬᠠᠷᠤᠯ ᠤ᠋ᠨ ᠲᠡᠮᠳᠡᠭ《!》
ᠬᠦᠨᠳᠦ ᠨᠦᠰᠡᠷ ᠭᠦᠨ ᠵᠤᠵᠠᠭᠠᠨ ᠬᠠᠢᠷᠠ ᠰᠡᠳᠬᠢᠯᠭᠡ ᠲᠡᠢ ᠪᠡᠷ ᠪᠤᠰᠤᠳ ᠲᠤ᠌ ᠠᠩᠬᠠᠷᠤᠭᠤᠯᠤᠨ ᠬᠡᠯᠡᠬᠦ ᠥᠭᠦᠯᠡᠪᠦᠷᠢ ᠶ᠋ᠢᠨ ᠡᠴᠦᠰ ᠲᠦ᠍ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠪᠦᠬᠦ ᠳᠡᠯᠡᠬᠡᠢ ᠶ᠋ᠢᠨ ᠦᠭᠡᠭᠦᠴᠦᠳ ᠬᠣᠯᠪᠣᠭᠠᠯᠠᠭᠲᠤᠨ!
ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠤᠮᠳᠠ ᠬᠡᠷᠡᠭᠯᠡᠬᠦ ᠴᠠᠭ ᠲᠡᠮᠳᠡᠭ
4 ᠳᠠᠩ ᠴᠡᠭ(᠂)
ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠣᠲᠣᠷᠠ ᠵᠡᠷᠭᠡᠴᠡᠭᠰᠡᠨ ᠭᠡᠰᠢᠭᠦᠨ ᠢ᠋ ᠪᠡᠶᠡ ᠪᠡᠶᠡ ᠡᠴᠡ ᠨᠢ ᠢᠯᠭᠠᠨ ᠦᠵᠡᠭᠦᠯᠬᠦ ᠪᠤᠶᠤ ᠬᠠᠭᠠᠰ ᠥᠭᠦᠯᠡᠪᠦᠷᠢ ᠶ᠋ᠢ ᠰᠠᠯᠭᠠᠨ ᠵᠢᠭᠠᠬᠤ ᠦᠶᠡ ᠳ᠋ᠦ᠍ ᠳᠠᠩ ᠴᠡᠭ ᠢ᠋ ᠬᠡᠷᠡᠭᠯᠡᠨᠡ
ᠵᠢᠱ᠌ᠢᠶᠡᠯᠡᠪᠡᠯ᠄ ᠮᠠᠷᠺᠰ᠂ ᠡᠩᠭᠧᠯᠰ᠂ ᠯᠧᠨᠢᠨ᠂ ᠰᠲ᠋ᠠᠯᠢᠨ ᠤ᠋ ᠣᠨᠣᠯ ᠪᠣᠯ《ᠣᠷᠣᠨ ᠪᠦᠬᠦᠨ ᠳ᠋ᠦ᠍ ᠲᠣᠬᠢᠷᠠᠬᠤ》 ᠣᠨᠣᠯ ᠮᠥᠨ᠃ ᠭᠡᠬᠦ ᠮᠡᠲᠦ᠃
5 ᠰᠠᠯᠭᠠᠬᠤ ᠴᠠᠭ(;)
ᠵᠡᠷᠭᠡᠴᠡᠭᠰᠡᠨ ᠥᠭᠦᠯᠡᠪᠦᠷᠢ ᠶ᠋ᠢ ᠬᠣᠭᠣᠷᠣᠨᠳᠣ ᠨᠢ ᠰᠠᠯᠭᠠᠬᠤ ᠳ᠋ᠤ᠌ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠬᠤᠪᠢᠰᠬᠠᠯᠲᠤ ᠰᠣᠶᠣᠯ ᠨᠢ ᠠᠷᠠᠳ ᠣᠯᠠᠨ ᠳ᠋ᠤ᠌ ᠪᠣᠯ ᠬᠤᠪᠢᠰᠬᠠᠯ ᠤ᠋ᠨ ᠬᠦᠴᠦᠲᠦ ᠵᠡᠪᠰᠡᠭ ᠮᠥᠨ᠃ ᠬᠤᠪᠢᠰᠬᠠᠯᠲᠤ ᠰᠣᠶᠣᠯ ᠨᠢ ᠬᠤᠪᠢᠰᠬᠠᠯ ᠠ᠋ᠴᠠ ᠡᠮᠦᠨᠡ ᠪᠣᠯ ᠬᠤᠪᠢᠰᠬᠠᠯ ᠤ᠋ᠨ ᠦᠵᠡᠯ ᠰᠠᠨᠠᠭᠠᠨ ᠤ᠋ ᠪᠡᠯᠡᠳᠬᠡᠯ ᠪᠣᠯᠤᠨᠠ; ᠬᠤᠪᠢᠰᠬᠠᠯ ᠤ᠋ᠨ ᠦᠶᠡ ᠳ᠋ᠦ᠍ ᠪᠣᠯ ᠬᠤᠪᠢᠰᠬᠠᠯ ᠤ᠋ᠨ ᠶᠡᠷᠦᠩᠬᠡᠢ ᠹᠷᠣᠨᠲ ᠤ᠋ᠨ ᠳᠣᠲᠣᠷᠠᠬᠢ ᠨᠢᠭᠡᠨ ᠬᠡᠷᠡᠭ ᠲᠡᠢ ᠪᠥᠭᠡᠳ ᠴᠢᠬᠤᠯᠠ ᠲᠠᠢ ᠹᠷᠣᠨᠲ ᠪᠣᠯᠤᠨᠠ᠃ ᠭᠡᠬᠦ ᠮᠡᠲᠦ᠃
6 ᠵᠡᠷᠭᠡᠴᠡᠭᠡ ᠴᠠᠭ《᠄ 》
ᠠᠯᠢᠪᠠ ᠬᠡᠯᠡᠬᠦ ᠭᠡᠵᠦ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠣᠭᠲᠤᠭᠤᠯᠣᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠷᠠᠭᠠ ᠵᠡᠷᠭᠡᠴᠡᠭᠡ ᠴᠡᠭ ᠲᠠᠯᠪᠢᠨᠠ᠃ ᠡᠰᠡᠪᠡᠯ ᠡᠰᠢ ᠲᠠᠲᠠᠭᠰᠠᠨ ᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠪᠤᠶᠤ ᠪᠤᠰᠤᠳ ᠤ᠋ᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠪᠢᠴᠢᠭ ᠲᠦ᠍ ᠲᠡᠮᠳᠡᠭᠯᠡᠬᠦ ᠳ᠋ᠡᠭᠡᠨ ᠡᠮᠦᠨᠡ ᠨᠢ ᠵᠡᠷᠭᠡᠴᠡᠭᠡ ᠴᠡᠭ ᠲᠠᠯᠪᠢᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠠᠭᠤᠤ ᠶᠡᠬᠡ ᠤᠳᠤᠷᠢᠳᠤᠭᠴᠢ ᠪᠢᠳᠡᠨ ᠳ᠋ᠦ᠍᠄《ᠮᠡᠳᠡᠯᠭᠡ ᠶ᠋ᠢᠨ ᠠᠰᠠᠭᠤᠳᠠᠯ ᠪᠣᠯ ᠨᠢᠭᠡ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠠᠰᠠᠭᠤᠳᠠᠯ ᠮᠥᠨ᠂ ᠡᠭᠦᠨ ᠳ᠋ᠦ᠍ ᠥᠴᠦᠬᠡᠨ ᠴᠦ᠍ ᠬᠤᠳᠠᠯ ᠬᠠᠭᠤᠷᠮᠠᠭ ᠪᠠ ᠣᠮᠣᠷᠬᠠᠭ ᠪᠠᠷᠳᠠᠮ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠂ ᠡᠷᠡᠰ ᠱᠠᠭᠠᠷᠳᠠᠭᠳᠠᠬᠤ ᠨᠢ ᠬᠠᠷᠢᠨ ᠲᠡᠭᠦᠨ ᠦ᠌ ᠡᠰᠡᠷᠭᠦ ᠲᠠᠯᠠ— ᠦᠨᠡᠨᠴᠢ ᠰᠢᠳᠤᠷᠭᠤ ᠪᠠ ᠨᠣᠮᠣᠬᠠᠨ ᠳᠠᠷᠤᠤ ᠣᠪᠣᠷ ᠪᠣᠯᠤᠨᠠ᠃》 ᠭᠡᠵᠦ ᠰᠤᠷᠭᠠᠭᠰᠠᠨ ᠪᠠᠢᠨᠠ᠃ ᠭᠡᠬᠦ ᠮᠡᠲᠦ᠃
ᠢᠯᠡᠳᠬᠡᠯ ᠲᠡᠮᠳᠡᠭ
7 ᠬᠠᠰᠢᠯᠲᠠ《《》》
ᠡᠰᠢ ᠲᠠᠲᠠᠭᠰᠠᠨ ᠦᠭᠡ᠂ ᠨᠣᠮ ᠪᠢᠴᠢᠭ ᠰᠣᠨᠢᠨ ᠰᠡᠳᠬᠦᠯ ᠦ᠋ᠨ ᠨᠡᠷᠡ᠂ ᠦᠭᠡ ᠶ᠋ᠢᠨ ᠤᠳᠬᠠ ᠶ᠋ᠢ ᠲᠣᠩᠭᠣᠷᠠᠭᠤᠯᠤᠨ ᠬᠡᠷᠡᠭᠯᠡᠬᠦ ᠪᠤᠶᠤ ᠥᠭᠡᠷᠡ ᠶᠠᠭᠤᠮᠠ ᠶ᠋ᠢᠨ ᠨᠡᠷᠡ ᠪᠣᠯᠭᠠᠨ ᠬᠡᠷᠡᠭᠯᠡᠬᠦ ᠵᠡᠷᠭᠡ ᠳ᠋ᠦ᠍ ᠪᠦᠷ ᠬᠠᠰᠢᠯᠲᠠ ᠶ᠋ᠢ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄《ᠭᠤᠷᠪᠠᠨ ᠡᠯᠳᠡᠭᠦᠷᠢᠴᠢᠨ ᠨᠡᠢᠯᠡᠪᠡᠯ ᠨᠢᠭᠡ ᠵᠣ᠌ ᠭᠧ ᠯᠢᠶᠠᠩ ᠲᠠᠢ ᠲᠡᠩᠴᠡᠨᠡ》 ᠭᠡᠳᠡᠭ ᠪᠢᠯᠡ᠂ ᠡᠨᠡ ᠪᠣᠯ ᠣᠯᠠᠨ ᠲᠦᠮᠡᠨ ᠳ᠋ᠦ᠍ ᠠᠭᠤᠤ ᠶᠡᠬᠡ ᠪᠦᠲᠦᠭᠡᠯᠴᠢ ᠴᠢᠳᠠᠪᠤᠷᠢ ᠪᠠᠢᠬᠤ ᠶ᠋ᠢ ᠬᠡᠯᠡᠵᠦ ᠪᠠᠢᠭᠠ ᠶᠤᠮ᠃ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠳᠣᠲᠣᠷᠠ ᠦᠨᠡᠬᠡᠷ ᠦᠢ ᠣᠯᠠᠨ《ᠵᠣ᠌ ᠭᠧ ᠯᠢᠶᠠᠩ》 ᠪᠠᠢᠨᠠ᠂ ᠠᠢᠯ ᠲᠣᠰᠬᠣᠨ ᠪᠦᠷᠢ ᠂ ᠬᠣᠲᠠ ᠪᠠᠯᠭᠠᠰᠤ ᠪᠦᠷᠢ ᠳ᠋ᠦ᠍ ᠴᠥᠮ ᠲᠤᠰ ᠲᠤᠰ ᠤ᠋ᠨ ᠬᠢᠨᠢ《ᠵᠣ᠌ ᠭᠧ ᠯᠢᠶᠠᠩ》 ᠪᠠᠢᠨᠠ᠃ ᠭᠡᠬᠦ ᠮᠡᠲᠦ᠃
8 ᠬᠠᠭᠠᠯᠲᠠ 《( ) 》
ᠥᠭᠦᠯᠡᠪᠦᠷᠢ ᠳ᠋ᠦ᠍ ᠲᠤᠰᠬᠠᠢᠯᠠᠨ ᠨᠡᠮᠡᠨ ᠣᠷᠣᠭᠤᠯᠬᠤ ᠲᠠᠢᠯᠪᠤᠷᠢ ᠥᠭᠦᠯᠡᠯ ᠢ᠋ ᠬᠠᠭᠠᠯᠲᠠ ᠳ᠋ᠤ᠌ ᠬᠠᠭᠠᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠬᠥᠮᠦᠨ ᠦ᠌ ᠣᠷᠴᠢᠯᠠᠩ ᠤ᠋ᠨ ᠡᠭᠦᠳᠦᠨ
ᠪᠦᠲᠦᠭᠡᠭᠰᠡᠨ ᠠᠯᠢ ᠪᠦᠬᠦᠨ ᠢ᠋ ᠲᠡᠷᠡ( ᠮᠠᠷᠺᠰ ᠢ᠋ ᠬᠡᠯᠡᠵᠦ ᠪᠠᠢᠨᠠ— ᠨᠠᠢᠷᠠᠭᠤᠯᠤᠭᠴᠢ) ᠴᠥᠮ ᠰᠢᠭᠦᠮᠵᠢᠯᠡᠯᠲᠦ ᠣᠪᠣᠷ ᠢ᠋ᠶ᠋ᠠᠷ ᠬᠢᠨᠠᠨ ᠰᠢᠯᠭᠠᠵᠤ ᠠᠯᠢᠨ ᠢ᠋ ᠴᠦ᠍ ᠬᠠᠭᠤᠳᠠᠮᠨᠠᠨ ᠣᠮᠲᠣᠭᠠᠢᠯᠠᠭᠠ ᠦᠭᠡᠢ᠃ ᠭᠡᠬᠦ ᠮᠡᠲᠦ᠃
9 ᠴᠤᠪᠤᠭᠠ ᠴᠠᠭ《᠁》
ᠥᠭᠦᠯᠡᠪᠦᠷᠢ ᠶ᠋ᠢᠨ ᠳᠣᠲᠣᠷᠠ ᠪᠤᠶᠤ ᠥᠭᠦᠯᠡᠯ ᠦ᠋ᠨ ᠳᠣᠲᠣᠷᠠ ᠥᠭᠦᠯᠡᠭᠴᠢ ᠡᠲᠡᠭᠡᠳ ᠡᠴᠡ ᠶᠠᠮᠠᠷ ᠨᠢᠭᠡᠨ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠬᠡᠯᠡᠬᠦ ᠭᠡᠰᠡᠨ ᠵᠦᠢᠯ ᠢ᠋ᠶ᠋ᠡᠨ ᠲᠠᠰᠤᠯᠳᠠᠭᠤᠯᠬᠤ ᠪᠤᠶᠤ ᠭᠦᠢᠴᠡᠳ ᠬᠡᠯᠡᠭᠰᠡᠨ ᠦᠭᠡᠢ ᠪᠠᠢᠳᠠᠯ ᠳ᠋ᠤ᠌ ᠴᠤᠪᠤᠭᠠ ᠴᠡᠭ ᠲᠠᠯᠪᠢᠨᠠ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠤᠳᠬᠠ ᠤᠷᠠᠯᠢᠭ ᠤ᠋ᠨ ᠰᠢᠭᠦᠮᠵᠢ ᠳ᠋ᠦ᠍ ᠬᠣᠶᠠᠷ ᠪᠠᠷᠢᠮᠵᠢᠶᠠ ᠪᠠᠢᠳᠠᠭ᠂ ᠨᠢᠭᠡ ᠨᠢ ᠤᠯᠤᠰ ᠲᠥᠷᠥ ᠶ᠋ᠢᠨ ᠪᠠᠷᠢᠮᠵᠢᠶᠠ᠂ ᠨᠥᠭᠦᠭᠡ ᠨᠢ ᠤᠷᠠᠯᠢᠭ ᠤ᠋ᠨ ᠪᠠᠷᠢᠮᠵᠢᠶᠠ ᠪᠣᠯᠤᠨᠠ᠃ ᠁ ᠭᠡᠬᠦ ᠮᠡᠲᠦ᠃
10 ᠵᠢᠷᠤᠭᠠᠰᠤ《—》
ᠬᠡᠯᠡᠭᠰᠡᠨ ᠵᠦᠢᠯ ᠢ᠋ᠶ᠋ᠡᠨ ᠤᠳᠬᠠ ᠶ᠋ᠢᠨ ᠲᠠᠯᠠ ᠪᠠᠷ ᠲᠣᠳᠣᠳᠬᠠᠬᠤ᠂ ᠡᠰᠢ ᠲᠠᠲᠠᠭᠰᠠᠨ ᠦᠭᠡ ᠨᠢ ᠬᠡᠨ ᠦ᠌ ᠪᠣᠯᠬᠤ ᠪᠠ ᠲᠣᠭᠠᠨ ᠤ᠋ ᠵᠦᠢᠯ ᠬᠡᠳᠦᠢ ᠡᠴᠡ ᠬᠡᠳᠦᠢ ᠪᠣᠯᠬᠤ᠂ ᠭᠠᠵᠠᠷ ᠤ᠋ᠨ ᠨᠡᠷᠡ ᠬᠠᠮᠢᠭᠠ ᠠ᠋ᠴᠠ ᠬᠠᠮᠢᠭᠠ ᠬᠦᠷᠬᠦ ᠵᠡᠷᠭᠡ ᠶ᠋ᠢ ᠢᠯᠡᠳᠬᠡᠬᠦ ᠳ᠋ᠦ᠍ ᠵᠢᠷᠤᠭᠠᠰᠤ ᠶ᠋ᠢ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠡᠵᠢ ᠨᠠᠭᠤᠷ— ᠬᠡᠳᠦᠢ ᠰᠠᠢᠬᠠᠨ ᠨᠡᠷᠡ ᠪᠣᠢ! ᠰᠠᠷᠠᠭᠤᠯ ᠠᠭᠤᠳᠠᠮ ᠲᠠᠯᠠ ᠨᠤᠲᠤᠭ ᠲᠤ᠌ ᠮᠢᠨᠢ ᠨᠠᠭᠤᠷ ᠲᠠᠩᠭᠢᠰ ᠲᠣᠭᠠ ᠦᠭᠡᠢ ᠣᠯᠠᠨ ᠪᠠᠢᠳᠠᠭ ᠪᠣᠯᠪᠠᠴᠤ ᠡᠢᠮᠦ ᠰᠠᠢᠬᠠᠨ ᠳᠣᠲᠣᠨᠣ ᠬᠠᠯᠠᠭᠤᠨ ᠨᠡᠷᠡᠲᠡᠢ ᠨᠠᠭᠤᠷ ᠪᠠᠢᠨᠠ ᠭᠡᠵᠢ ᠤᠤ? ᠭᠡᠬᠦ ᠮᠡᠲᠦ᠃
11 ᠴᠡᠭᠡᠷᠯᠡᠬᠦ ᠲᠡᠮᠳᠡᠭ《××》
ᠬᠥᠮᠦᠨ ᠶᠠᠭᠤᠮᠠ᠂ ᠬᠠᠮᠲᠤ ᠨᠢᠭᠡᠴᠢ ᠪᠤᠶᠤ ᠭᠠᠵᠠᠷ ᠣᠷᠣᠨ ᠤ᠋ ᠨᠡᠷᠡ ᠶ᠋ᠢ ᠢᠯᠡ ᠪᠡᠷ ᠳᠤᠷᠠᠳᠬᠤ ᠴᠢᠬᠤᠯᠠ ᠦᠭᠡᠢ ᠴᠡᠭᠡᠷᠯᠡᠨ ᠬᠡᠯᠡᠬᠦ ᠦᠶᠡ ᠳ᠋ᠦ᠍ ᠴᠡᠭᠡᠷᠯᠡᠬᠦ ᠲᠡᠮᠳᠡᠭ ᠢ᠋ ᠬᠡᠷᠡᠭᠯᠡᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠪᠠᠶᠠᠨ ᠰᠦᠮᠪᠦᠷ ×× ᠨᠤᠲᠤᠭ ᠤ᠋ᠨ
ᠪᠠᠳᠠᠷᠠᠭᠰᠠᠨ ᠶᠡᠬᠡ ᠨᠠᠭᠠᠳᠤᠮ ᠳᠡᠭᠡᠷᠡ
ᠣᠷᠣᠯᠳᠣᠭᠰᠠᠨ ᠪᠦᠬᠦᠨ ᠡᠴᠡ ᠲᠦᠷᠦᠭᠦᠯᠡᠵᠦ
ᠬᠤᠷᠠᠯᠳᠤᠭᠰᠠᠨ ᠪᠦᠬᠦᠨ ᠳ᠋ᠦ᠍ ᠭᠠᠢᠬᠠᠭᠳᠠᠭᠰᠠᠨ
ᠬᠤᠷᠳᠤᠨ ᠬᠦᠯᠦᠭ ᠡᠨᠡ ᠠᠭᠲᠠ ᠪᠣᠯ᠄
ᠰᠦᠷ ᠵᠢᠪᠬᠤᠯᠠᠩ ᠲᠡᠭᠦᠰ
ᠰᠤᠤ ᠵᠠᠯᠢ ᠪᠠᠷ ᠴᠢᠩᠭᠠ
ᠭᠠᠯ ᠡᠷᠳᠡᠨᠢ ᠶ᠋ᠢᠨ ᠨᠢᠳᠦ ᠲᠡᠢ
ᠭᠠᠪᠠᠯᠠ ᠡᠷᠳᠡᠨᠢ ᠶ᠋ᠢᠨ ᠮᠠᠩᠨᠠᠢ ᠲᠠᠢ
ᠭᠠᠩ ᠳᠥᠷᠪᠡᠨ ᠲᠤᠭᠤᠷᠠᠢ ᠲᠠᠢ
ᠭᠠᠷᠠᠬᠠᠨ ᠬᠣᠶᠠᠷ ᠨᠢᠳᠦ ᠲᠡᠢ
ᠭᠠᠯᠵᠠᠭᠤ ᠵᠠᠭᠠᠨ ᠤ᠋ ᠰᠢᠨᠵᠢ ᠲᠡᠢ
ᠵᠡᠭᠡᠷᠡ ᠶ᠋ᠢᠨ ᠢᠨᠵᠠᠭᠠ ᠶ᠋ᠢᠨ ᠲᠣᠯᠣᠭᠠᠢ ᠲᠠᠢ
ᠵᠢᠭᠦᠷ ᠰᠣᠳᠣᠨ ᠴᠢᠬᠢ ᠲᠡᠢ
ᠬᠠᠪᠢᠰᠤᠨ ᠳ᠋ᠠᠭᠠᠨ ᠵᠠᠪᠰᠠᠷ ᠲᠠᠢ
ᠬᠠᠷᠴᠠᠭᠠᠨ ᠳ᠋ᠠᠭᠠᠨ ᠦᠶᠡ ᠲᠡᠢ
ᠲᠤᠩ ᠪᠦᠷᠢᠶᠡᠨ ᠦ᠌ ᠳᠠᠭᠤᠨ ᠲᠠᠢ
ᠳᠠᠭᠤᠲᠤ ᠮᠥᠨᠳᠥᠷ ᠰᠦᠷ ᠲᠡᠢ
ᠬᠠᠵᠢ ᠮᠥᠩᠭᠥᠨ ᠤᠷᠤᠭᠤᠯ ᠲᠠᠢ
ᠬᠠᠪᠲᠠᠭᠠᠢ ᠮᠥᠩᠭᠥᠨ ᠵᠤᠤᠵᠠᠢ ᠲᠠᠢ
ᠵᠠᠯᠠᠭᠤ ᠽᠠᠨᠳᠠᠨ ᠬᠠᠪᠲᠠᠰᠤ ᠲᠠᠢ
ᠵᠠᠰᠠᠮᠠᠯ ᠰᠠᠢᠬᠠᠨ ᠪᠦᠭᠦᠷᠭᠡ ᠲᠡᠢ
ᠵᠠᠶᠠᠭᠠ ᠲᠡᠭᠦᠰ ᠡᠮᠡᠭᠡᠯ ᠲᠡᠢ
ᠵᠠᠭᠠᠨ ᠤ᠋ ᠶᠠᠰᠤᠨ ᠬᠤᠳᠠᠷᠭᠠ ᠲᠠᠢ
ᠨᠠᠷᠠᠨ ᠰᠠᠷᠠᠨ ᠳᠥᠷᠥᠭᠡ ᠲᠡᠢ
ᠨᠠᠪᠴᠢᠨ ᠬᠣᠶᠠᠷ ᠭᠥᠯᠢᠮ ᠲᠡᠢ
ᠳᠣᠪᠣ ᠮᠡᠷᠭᠡᠨ ᠲᠣᠪᠣᠷᠤᠤ ᠲᠠᠢ
ᠲᠠᠵᠢ ᠮᠠᠩᠨᠤᠭ ᠳᠡᠪᠰᠡ ᠲᠡᠢ
ᠭᠠᠩᠭᠠᠩ ᠪᠡᠶᠡ ᠲᠡᠢ
ᠭᠤᠸᠠ ᠵᠢᠰᠦ ᠲᠡᠢ
ᠬᠥᠩᠭᠡᠨ ᠰᠡᠭᠦᠯ ᠲᠡᠢ
ᠰᠢᠩᠭᠡᠨ ᠳᠡᠯ ᠲᠡᠢ
ᠨᠣᠭᠣᠭᠠᠨ ᠨᠣᠭᠲᠣ ᠲᠠᠢ
ᠨᠣᠯᠣᠮ ᠵᠢᠯᠣᠭᠣ ᠲᠠᠢ
ᠲᠣᠳᠣᠬᠠᠨ ᠮᠠᠩᠨᠠᠢ ᠲᠠᠢ
ᠲᠣᠷᠭᠠᠨ ᠵᠢᠯᠣᠭᠣ ᠲᠠᠢ
ᠰᠤᠮᠤᠨ ᠴᠤᠯᠪᠤᠭᠤᠷ ᠲᠠᠢ
ᠰᠠᠢᠬᠠᠨ ᠬᠠᠵᠠᠭᠠᠷ ᠲᠠᠢ
ᠡᠨᠡ ᠠᠭᠲᠠ ᠪᠣᠯ
ᠰᠤᠮᠤ ᠮᠡᠲᠦ ᠬᠤᠷᠳᠤᠨ
ᠰᠣᠯᠢᠷ ᠮᠡᠲᠦ ᠲᠦᠷᠭᠡᠨ
ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠲᠣᠭᠯᠠᠨ ᠭᠦᠶᠦᠳᠡᠭ
ᠲᠤᠩ ᠬᠣᠯᠠ ᠳ᠋ᠠᠭᠠᠨ ᠳᠡᠭᠳᠡᠨ ᠭᠦᠶᠦᠳᠡᠭ
ᠰᠡᠭᠦᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠠᠭᠠᠳᠤᠨ ᠭᠦᠶᠦᠳᠡᠭ
ᠰᠡᠭᠦᠳᠡᠷ ᠡᠴᠡ ᠪᠡᠨ ᠨᠠᠳᠬᠤᠨ ᠭᠦᠶᠦᠳᠡᠭ
ᠳᠠᠭᠠ ᠶ᠋ᠢᠨ ᠰᠡᠭᠦᠯ ᠢ᠋ᠶ᠋ᠡᠨ ᠬᠠᠶᠠᠯᠠᠨ ᠭᠦᠶᠦᠳᠡᠭ
ᠳᠠᠯᠳᠠ ᠶ᠋ᠢᠨ ᠵᠠᠮ ᠢ᠋ ᠲᠣᠪᠴᠢᠯᠠᠨ ᠭᠦᠶᠦᠳᠡᠭ
ᠵᠤᠤᠵᠠᠢ ᠪᠠᠷ ᠢ᠋ᠶ᠋ᠠᠨ ᠵᠦᠢᠷᠯᠡᠨ ᠭᠦᠶᠦᠳᠡᠭ
ᠵᠠᠭᠤᠨ ᠠᠭᠲᠠ ᠠ᠋ᠴᠠ ᠲᠦᠷᠦᠭᠦᠯᠡᠨ ᠭᠦᠶᠦᠳᠡᠭ
ᠡᠵᠡᠭᠦᠢ ᠬᠡᠭᠡᠷᠡ ᠪᠡᠷ ᠡᠷᠴᠢᠯᠡᠨ ᠭᠦᠶᠦᠳᠡᠭ
ᠡᠯᠡᠰᠦ ᠮᠠᠩᠬᠠ ᠶ᠋ᠢ ᠲᠤᠭᠤᠯᠤᠨ ᠭᠦᠶᠦᠳᠡᠭ
ᠬᠠᠵᠠᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠠᠭᠠᠳᠤᠨ ᠭᠦᠶᠦᠳᠡᠭ
ᠬᠠᠩᠭᠠᠢ ᠵᠠᠮ ᠢ᠋ ᠲᠣᠪᠴᠢᠯᠠᠨ ᠭᠦᠶᠦᠳᠡᠭ
ᠠᠭᠤᠯᠠᠨ ᠤ᠋ ᠴᠠᠭᠠᠨᠠ ᠠ᠋ᠴᠠ ᠦᠰᠦᠷᠦᠨ ᠭᠦᠶᠦᠳᠡᠭ
ᠤᠰᠤᠨ ᠤ᠋ ᠴᠠᠭᠠᠨᠠ ᠠ᠋ᠴᠠ ᠳᠡᠭᠳᠡᠨ ᠭᠦᠶᠦᠳᠡᠭ
ᠬᠠᠳᠠᠨ ᠤ᠋ ᠣᠷᠣᠢ ᠪᠠᠷ ᠬᠠᠷᠠᠢᠯᠠᠨ ᠭᠦᠶᠦᠳᠡᠭ
ᠬᠠᠷᠠ ᠲᠣᠭᠣᠰᠣ ᠶ᠋ᠢ ᠳᠡᠭᠳᠡᠭᠡᠨ ᠭᠦᠶᠦᠳᠡᠭ
ᠮᠢᠩᠭᠠᠨ ᠴᠠᠭᠠᠨ ᠠᠭᠲᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ
ᠮᠠᠩᠯᠠᠢᠯᠠᠨ ᠭᠦᠶᠦᠭᠰᠡᠨ ᠡᠨᠡ ᠠᠭᠲᠠ
ᠲᠦᠮᠡᠨ ᠴᠠᠭᠠᠨ ᠠᠭᠲᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ
ᠲᠦᠷᠦᠭᠦᠯᠡᠨ ᠭᠦᠶᠦᠭᠰᠡᠨ ᠡᠨᠡ ᠠᠭᠲᠠ
ᠨᠠᠢᠷ ᠪᠣᠯᠭᠠᠨ ᠳ᠋ᠤ᠌ ᠢᠷᠡᠵᠦ
ᠨᠠᠭᠠᠳᠤᠮ ᠪᠣᠯᠭᠠᠨ ᠳ᠋ᠤ᠌ ᠲᠦᠷᠦᠭᠦᠯᠡᠳᠡᠭ᠃
ᠡᠨᠡ ᠤᠳᠠᠭᠠ ᠶ᠋ᠢᠨ ᠨᠠᠭᠠᠳᠤᠮ ᠳ᠋ᠤ᠌
ᠡᠨᠳᠡᠭᠦᠷᠡᠯ ᠦᠭᠡᠢ ᠲᠦᠷᠦᠭᠦᠯᠡᠭᠰᠡᠨ
ᠡᠨᠡ ᠮᠣᠷᠢ ᠶ᠋ᠢ ᠪᠣᠯ
ᠤᠨᠠᠭᠠᠨ ᠳ᠋ᠤᠨᠢ ᠤᠶᠠᠭᠠᠳ
ᠳᠠᠭᠠ ᠳ᠋ᠤᠨᠢ ᠳᠠᠰᠬᠠᠭᠠᠳ
ᠦᠷᠢᠶᠡᠨ ᠳ᠋ᠦ᠍ᠨᠢ ᠬᠠᠭᠠᠷᠢᠭᠠᠳ
ᠰᠣᠶᠣᠯᠠᠩ ᠳ᠋ᠤᠨᠢ ᠤᠨᠤᠵᠠᠢ᠃
ᠡᠭᠦᠯᠡᠨ ᠬᠦᠯᠦᠭ ᠭᠡᠳᠡᠭ ᠴᠣᠯᠠ
ᠡᠨᠡ ᠡᠳᠦᠷ ᠡᠴᠡ ᠬᠣᠢᠰᠢ
ᠡᠩ ᠳᠡᠯᠡᠬᠡᠢ ᠶ᠋ᠢᠨ ᠭᠠᠵᠠᠷ
ᠥᠨᠢ ᠡᠭᠦᠷᠢᠳᠡ ᠠᠯᠳᠠᠷᠰᠢᠲᠤᠭᠠᠢ!
ᠲᠠᠢᠯᠪᠤᠷᠢᠯᠠᠬᠤ ᠲᠡᠮᠳᠡᠭ
12 ᠲᠠᠢᠯᠪᠤᠷᠢᠯᠠᠯ ᠲᠡᠮᠳᠡᠭ《* ①②③ 》
ᠵᠣᠬᠢᠶᠠᠭᠴᠢ ᠪᠤᠶᠤ ᠥᠭᠦᠯᠡᠭᠴᠢ ᠡᠴᠡ ᠵᠣᠬᠢᠶᠠᠯ ᠪᠣᠯᠤᠨ ᠥᠭᠦᠯᠡᠯ᠂ ᠵᠢᠴᠢ ᠵᠣᠬᠢᠶᠠᠯ ᠪᠣᠯᠤᠨ ᠥᠭᠦᠯᠡᠯ ᠦ᠋ᠨ ᠢ᠋ᠶ᠋ᠡᠨ ᠠᠯᠢ ᠨᠢᠭᠡ ᠬᠡᠰᠡᠭ ᠪᠤᠶᠤ ᠠᠯᠢ ᠨᠢᠭᠡ ᠦᠭᠡ ᠥᠭᠦᠯᠡᠪᠦᠷᠢ ᠶ᠋ᠢ ᠲᠣᠳᠣᠳᠬᠠᠨ ᠲᠠᠢᠯᠪᠤᠷᠢᠯᠠᠬᠤ ᠰᠠᠨᠠᠭᠠ ᠲᠠᠢ ᠪᠣᠯ ᠲᠡᠭᠦᠨ ᠦ᠌ ᠳᠣᠣᠷᠠ ᠲᠠᠢᠯᠪᠤᠷᠢᠯᠠᠯ ᠤ᠋ᠨ ᠲᠡᠮᠳᠡᠭ ᠲᠠᠯᠪᠢᠵᠤ᠂ ᠵᠣᠬᠢᠶᠠᠯ ᠤ᠋ᠨ ᠢ᠋ᠶ᠋ᠠᠨ ᠠᠷᠤ ᠪᠠᠷ ᠲᠠᠢᠯᠪᠤᠷᠢ ᠬᠢᠨᠡ᠃
ᠵᠢᠱ᠌ᠢᠶᠡᠯᠡᠪᠡᠯ᠄ ᠁
ᠠᠭᠤᠯᠠᠰ ᠮᠥᠩᠭᠥᠨ ᠮᠣᠭᠠᠢ ᠭᠤᠷᠪᠠᠯᠵᠠᠵᠤ
ᠥᠨᠳᠥᠷᠯᠢᠭ ᠦ᠋ᠳ ᠥᠭᠡᠬᠦᠨ ᠵᠠᠭᠠᠨ ᠲᠡᠯᠡᠮᠡᠭᠦᠯᠦᠨ *
ᠦᠪᠡᠳᠡᠭᠰᠢ ᠶᠡᠬᠡ ᠲᠩᠷᠢ ᠯᠦ᠍ᠭᠡ ᠥᠨᠳᠥᠷ ᠢ᠋ᠶ᠋ᠡᠨ ᠮᠥᠴᠡᠭᠡᠷᠬᠡᠬᠦ ᠶ᠋ᠢ ᠰᠠᠨᠠᠭᠠᠷᠬᠠᠮᠤᠢ᠃
᠁
——————
* ᠥᠨᠳᠥᠷᠯᠢᠭ ᠭᠡᠳᠡᠭ ᠨᠢ ᠱᠠᠨᠰᠢ᠂ ᠱᠠᠨ ᠰᠢ ᠬᠣᠶᠠᠷ ᠮᠣᠵᠢ ᠶ᠋ᠢᠨ ᠥᠨᠳᠥᠷᠯᠢᠭ ᠦ᠋ᠳ ᠢ᠋ ᠵᠢᠭᠠᠵᠠᠢ᠃
ᠮᠣᠩᠭᠣᠯ ᠬᠡᠯᠡᠨ ᠦ᠌ ᠥᠭᠦᠯᠡᠪᠦᠷᠢ ᠳ᠋ᠦ᠍ ᠪᠠᠢᠩᠭᠤ ᠬᠡᠷᠡᠭᠯᠡᠭᠳᠡᠵᠦ ᠪᠠᠢᠭᠠ ᠡᠳᠡᠭᠡᠷ ᠴᠠᠭ ᠲᠡᠮᠳᠡᠭ ᠡᠴᠡ ᠭᠠᠳᠠᠨᠠ ᠪᠠᠰᠠ ᠬᠣᠯᠪᠣᠭᠳᠠᠯ ᠪᠦᠬᠦᠢ ᠪᠤᠰᠤᠳ ᠴᠠᠭ ᠲᠡᠮᠳᠡᠭ ᠦ᠋ᠨ ᠦᠢᠯᠡᠳᠦᠯ ᠪᠠ ᠬᠡᠷᠡᠭᠴᠡᠭᠡ ᠶ᠋ᠢ ᠴᠦ᠍ ᠠᠩᠬᠠᠷᠤᠯ ᠳ᠋ᠠᠭᠠᠨ ᠠᠪᠤᠪᠠᠯ ᠵᠣᠬᠢᠨᠠ᠃
※ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠤᠤ ᠡᠷᠴᠢᠨ᠂ ᠪᠠᠢ᠂ ᠰᠠᠷᠠᠨᠠ᠂ ᠭᠡᠷᠡᠯ᠂ ᠨᠠᠷᠠᠨᠲᠤᠶᠠᠭᠠ᠂ ᠤᠷᠠᠨᠴᠢᠮᠡᠭ᠂ ᠠᠯᠲᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ ᠡᠭᠦᠯᠡᠩᠬᠤᠸᠠᠷ᠂ ᠮᠥᠩᠭᠥᠨ᠂ ᠪᠠᠶᠠᠨᠴᠡᠴᠡᠭ ᠬᠡᠷᠡᠶ᠋ᠢᠳ᠂ ᠮᠥᠩᠬᠡᠨᠠᠰᠤᠨ᠂ ᠣᠶᠤᠨᠴᠢᠮᠡᠭ᠂ ᠱᠠᠭᠰᠠᠯ᠂ ᠨᠠ᠊᠂ ᠮᠥᠩᠬᠡᠪᠠᠭᠠᠲᠤᠷ
※ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠨᠠᠷᠠᠨ᠂ ᠪᠤᠤ ᠡᠷᠴᠢᠨ᠂ ᠰᠡᠬᠡᠭᠡᠷᠡᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠪᠠᠶᠠᠨᠴᠡᠴᠡᠭ᠂ ᠲ᠂ ᠬᠦᠮᠦᠵᠢᠯᠲᠦ᠂ ᠤᠷᠠᠨᠴᠢᠮᠡᠭ᠂ ᠪᠠᠯ