ᠪᠠᠲᠤ ᠬᠠᠭᠠᠨ 4-04ᠣᠷᠢᠬᠢ ᠶ᠋ᠢᠨ ᠰᠢᠭᠤᠷᠭᠠ-Bat khaan Бат хаан-ᠷᠣᠮᠠᠨ
145ᠳᠥᠷᠪᠡ ᠣᠷᠢᠬᠢ ᠶ᠋ᠢᠨ ᠰᠢᠭᠤᠷᠭᠠ
ᠰᠢᠷᠠ ᠥᠩᠭᠡᠲᠦ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠲᠠᠲ᠋ᠠᠷ ᠤ᠋ᠨ ᠠᠯᠲᠠᠨ ᠯᠤᠤ ᠰᠦᠨᠳᠡᠷᠯᠡᠨ ᠦᠵᠡᠭᠳᠡᠨᠡ᠃ ᠲᠡᠷᠡ ᠨᠢ ᠭᠠᠤᠯᠢᠨ ᠲᠣᠯᠣᠭᠠᠢ ᠲᠠᠢ ᠭᠠᠳᠠᠰᠤᠨ ᠠ᠋ᠴᠠ ᠳᠡᠭᠡᠰᠦ ᠪᠡᠷ ᠪᠡᠬᠢᠯᠡᠭᠳᠡᠨ ᠤᠶᠠᠭᠳᠠᠵᠠᠢ᠃ ᠠᠰᠠᠷ ᠤ᠋ᠨ ᠳᠣᠲᠣᠷᠠ ᠬᠠᠭᠠᠳ ᠤ᠋ᠳ ᠡᠳᠦᠷ ᠪᠦᠷᠢ ᠵᠥᠪᠯᠡᠯᠭᠡᠨ ᠬᠢᠵᠦ ᠣᠷᠣᠢ ᠳ᠋ᠤᠨᠢ ᠨᠠᠢᠷᠯᠠᠨᠠ᠃
ᠪᠠᠲᠤ ᠬᠠᠭᠠᠨ᠂ ᠣᠯᠠᠨ ᠰᠢᠳᠠᠷ ᠪᠠᠷᠠ ᠪᠣᠯᠣᠭᠰᠠᠳ᠂ ᠠᠷᠠᠵᠠ ᠬᠣᠣᠷᠠᠵᠠ ᠳ᠋ᠤ᠌ ᠱᠤᠩᠭᠤᠭᠴᠢᠳ ᠴᠥᠮ ᠷᠶᠠᠽᠠᠨ ᠤ᠋ ᠡᠯᠴᠢ ᠶ᠋ᠢᠨ ᠠᠪᠴᠢᠷᠠᠭᠰᠠᠨ ᠪᠠᠯ ᠤ᠋ᠨ ᠠᠷᠢᠬᠢ ᠶ᠋ᠢ ᠤᠤᠭᠤᠵᠠᠭᠠᠨᠠ᠃ ᠬᠦᠢᠲᠡᠨ ᠡᠳᠦᠷ ᠪᠣᠯᠪᠠᠴᠤ ᠭᠢᠯᠠᠯᠵᠠᠭᠰᠠᠨ ᠬᠤᠷᠴᠠ ᠨᠠᠷᠠᠨ ᠬᠤᠷᠳᠤᠨᠠ ᠳᠤᠯᠠᠭᠠᠴᠠᠭᠤᠯᠬᠤ ᠲᠤᠯᠠ ᠯᠠᠭᠧᠷ ᠦ᠋ᠨ ᠳᠣᠲᠣᠷᠠ ᠴᠡᠩᠭᠡᠯ ᠲᠡᠢ ᠳᠠᠭᠤ ᠴᠢᠮᠡᠭᠡ ᠲᠡᠢ ᠪᠠᠢᠵᠠᠢ᠃ ᠬᠠᠳᠤᠭᠤᠷ ᠤ᠋ᠨ ᠢᠷ ᠦᠵᠡᠭᠡ ᠦᠭᠡᠢ ᠥᠷᠭᠡᠨ ᠲᠠᠯᠠ ᠳ᠋ᠤ᠌ ᠲᠡᠳᠡ ᠮᠣᠷᠢ ᠪᠠᠨ ᠪᠡᠯᠴᠢᠭᠡᠨᠡ᠃
ᠨᠢᠳᠦ ᠠᠯᠳᠠᠮᠠ ᠲᠡᠭᠰᠢ ᠡᠨᠡ ᠵᠡᠷᠯᠢᠭ ᠲᠠᠯᠠ ᠶ᠋ᠢᠨ ᠬᠠᠮᠢᠭᠠ ᠨᠢ ᠴᠦ᠍ ᠭᠡᠰᠡᠨ ᠣᠭᠲᠠᠷᠭᠤᠢ ᠥᠭᠡᠳᠡ ᠤᠲᠤᠭᠠ ᠬᠥᠬᠡᠷᠡᠨ ᠦᠵᠡᠭᠳᠡᠭᠡᠳ᠂ ᠮᠠᠯᠠᠭᠠᠢ ᠲᠠᠢ ᠠᠳᠠᠯᠢ ᠬᠠᠷᠠ ᠪᠠ ᠴᠠᠭᠠᠨ ᠣᠷᠣᠢ ᠲᠠᠢ ᠬᠠᠭᠠᠳ ᠤ᠋ᠨ ᠠᠪᠴᠢᠷᠠᠭᠰᠠᠨ ᠭᠡᠷ ᠦ᠋ᠳ ᠦᠵᠡᠭᠳᠡᠨᠡ᠃ ᠺᠢᠫᠴᠠᠺ ᠠ᠋ᠴᠠ ᠪᠤᠯᠢᠶᠠᠵᠤ ᠠᠪᠤᠭᠰᠠᠨ ᠴᠠᠭᠠᠨ ᠭᠡᠷ ᠦ᠋ᠳ ᠪᠠᠢᠨᠠ᠃ ᠨᠠᠷᠠᠨ ᠤ᠋ ᠲᠤᠶᠠᠭᠠᠨ ᠳ᠋ᠤ᠌ ᠴᠠᠰᠤᠨ ᠤ᠋ ᠳᠡᠭᠡᠳᠦ ᠲᠠᠯᠠ ᠬᠠᠢᠯᠵᠤ ᠰᠥᠨᠢ ᠪᠣᠯᠬᠤ ᠳ᠋ᠤ᠌ ᠰᠢᠯ ᠠᠳᠠᠯᠢ ᠬᠥᠷᠥᠰᠥ ᠲᠣᠭᠲᠠᠨᠠ᠃ ᠤᠮᠠᠷᠠ ᠵᠦᠭ ᠡᠴᠡ ᠬᠦᠢᠲᠡᠨ ᠬᠠᠪᠰᠠᠷᠭᠠ ᠦᠯᠢᠶᠡᠬᠦ ᠴᠠᠭ ᠲᠸ᠋ ᠲᠠᠯᠠ ᠠᠭᠤᠯᠠ ᠪᠠᠷ ᠵᠢᠵᠢᠭᠬᠡᠨ ᠮᠥᠰᠥᠨ ᠰᠢᠷᠬᠡᠭ ᠦ᠋ᠳ ᠬᠥᠭᠡᠭᠡᠭᠳᠡᠨ ᠶᠠᠪᠤᠵᠤ᠂ ᠮᠣᠩᠭᠣᠯ ᠤ᠋ᠨ ᠪᠠᠢᠯᠳᠤᠭᠴᠢᠳ ᠂ ᠲᠦᠯᠡᠭᠰᠡᠨ ᠭᠠᠯ ᠤ᠋ᠨ ᠲᠡᠨᠳᠡ ᠣᠴᠢᠵᠤ ᠣᠪᠣᠭᠠᠷᠠᠯᠳᠤᠨᠠ᠃ ᠰᠠᠯᠬᠢ ᠰᠥᠨᠢ ᠳ᠋ᠡᠭᠡᠨ ᠨᠡᠮᠡᠭᠳᠡᠭᠰᠡᠭᠡᠷ ᠤᠳᠠᠯ ᠦᠭᠡᠢ ᠰᠢᠭᠤᠷᠭᠠ ᠪᠣᠯᠵᠤ ᠬᠥᠩᠭᠡᠨ ᠭᠡᠷ ᠦ᠋ᠳ ᠢ᠋ ᠨᠤᠷᠠᠭᠠᠬᠤ ᠪᠤᠶᠤ ᠣᠯᠠᠨ ᠢ᠋ ᠬᠡᠢᠰᠬᠡᠵᠡᠢ᠃ ᠰᠠᠯᠬᠢ᠂ ᠪᠠᠲᠤ ᠬᠠᠭᠠᠨ ᠤ᠋ ᠠᠯᠲᠠᠨ ᠰᠢᠷᠭᠠᠯ ᠠᠰᠠᠷ ᠢ᠋ ᠨᠤᠷᠠᠭᠠᠵᠤ ᠣᠢᠷᠠᠬᠠᠨ ᠠᠰᠠᠵᠤ ᠪᠠᠢᠭᠰᠠᠨ ᠭᠠᠯ ᠤᠷᠤᠭᠤ ᠤᠨᠠᠭᠠᠭᠰᠠᠨ ᠳ᠋ᠤ᠌ ᠵᠠᠷᠤᠴᠠ ᠨᠠᠷ ᠠᠷᠠᠢ ᠭᠡᠵᠦ ᠠᠰᠠᠷ ᠢ᠋ ᠬᠣᠷᠢᠶᠠᠨ ᠦᠨᠡᠲᠦ ᠵᠦᠢᠯᠡᠰ ᠪᠣᠯᠤᠨ ᠠᠯᠲᠠᠨ ᠲᠢᠲᠢᠮ ᠢ᠋ ᠴᠤᠭᠯᠠᠭᠤᠯᠤᠨ ᠠᠪᠤᠪᠠ᠃ ᠲᠣᠭᠣᠨᠣ ᠪᠠᠷ ᠣᠷᠣᠭᠰᠠᠨ ᠰᠠᠯᠬᠢᠨ ᠳ᠋ᠤ᠌ ᠴᠣᠬᠢᠭᠳᠠᠭᠰᠠᠨ ᠭᠠᠯ ᠤ᠋ᠨ ᠤᠲᠤᠭᠠ ᠨᠢ ᠭᠠᠵᠠᠷ ᠢ᠋ᠶ᠋ᠠᠷ ᠡᠷᠭᠢᠯᠳᠦᠵᠦ ᠪᠠᠢᠭᠠ ᠲᠡᠢᠮᠦ ᠢᠰᠡᠭᠡᠢ ᠭᠡᠷ ᠲᠦ᠍ ᠪᠠᠲᠤ ᠬᠠᠭᠠᠨ ᠣᠷᠣᠪᠠ᠃ ᠰᠠᠯᠬᠢᠨ ᠳ᠋ᠤ᠌ ᠴᠠᠰᠤᠨ ᠤ᠋ ᠮᠥᠰᠥᠨ ᠰᠢᠷᠬᠡᠭ ᠦ᠋ᠳ ᠢ᠋ ᠴᠠᠰᠤ ᠪᠤᠯᠠᠵᠤ ᠪᠠᠢᠯᠠ᠃ ᠮᠣᠩᠭᠣᠯᠴᠤᠳ ᠵᠠᠩᠰᠢᠯ ᠢ᠋ᠶ᠋ᠠᠷ ᠬᠠᠨᠴᠤᠢ ᠪᠠᠨ ᠰᠢᠮᠡᠯᠡᠵᠦ ᠴᠠᠰᠤ ᠶ᠋ᠢ ᠬᠠᠭᠠᠯᠵᠤ ᠳᠣᠲᠣᠷᠠ ᠨᠢ ᠲᠠᠷᠪᠠᠭᠠ ᠮᠡᠲᠦ ᠰᠢᠷᠭᠤᠵᠤ ᠬᠡᠪᠲᠡᠵᠡᠭᠡᠨ ᠬᠥᠮᠦᠨ ᠦ᠌ ᠳᠠᠭᠤ ᠴᠢᠩᠭᠠ ᠪᠣᠯᠬᠤ ᠰᠢᠭ᠋ ᠰᠢᠷᠦᠭᠦᠨ ᠰᠠᠯᠬᠢᠨ ᠤ᠋ ᠱᠤᠤᠭᠢᠬᠤ ᠶ᠋ᠢ ᠲᠠᠢᠪᠤᠩ ᠢ᠋ᠶ᠋ᠠᠷ ᠰᠣᠨᠣᠰᠤᠭᠠᠳ ᠬᠡᠪᠲᠡᠵᠡᠭᠡᠵᠦ ᠪᠠᠢᠪᠠ᠃ ᠦᠷ ᠭᠡᠢᠮᠡᠭᠴᠡ ᠮᠣᠩᠭᠣᠯᠴᠤᠳ ᠪᠣᠰᠴᠤ ᠪᠠᠢᠷᠢ ᠠ᠋ᠴᠠ ᠪᠠᠨ ᠭᠠᠷᠴᠤ ᠴᠠᠰᠤ ᠪᠠᠨ ᠭᠦᠪᠢᠭᠡᠳ ᠭᠡᠷ ᠦ᠋ᠳ ᠪᠣᠯᠤᠨ ᠥᠪᠡᠷ ᠦ᠋ᠨ ᠭᠠᠯ ᠢ᠋ ᠡᠷᠢᠵᠦ ᠳᠠᠪᠬᠢᠯᠳᠤᠪᠠ᠃
ᠭᠠᠯ ᠤ᠋ᠨ ᠳᠡᠷᠭᠡᠳᠡ ᠰᠠᠭᠤᠵᠠᠭᠠᠵᠤ ᠮᠣᠳᠣᠨ ᠠᠶᠠᠭᠠᠨ ᠳ᠋ᠤ᠌ ᠭᠤᠯᠢᠷ ᠲᠣᠰᠣ ᠪᠦᠬᠦᠨ ᠢ᠋ ᠪᠤᠴᠠᠯᠭᠠᠭᠰᠠᠨ ᠴᠠᠢ ᠬᠢᠵᠦ᠂ ᠬᠠᠭᠤᠷᠤᠭᠰᠠᠨ ᠪᠤᠳᠠᠭᠠ ᠳᠡᠪᠲᠦᠭᠡᠵᠦ ᠢᠳᠡᠵᠡᠭᠡᠨᠡ ᠭᠡᠰᠡᠨ ᠴᠦ᠍ ᠢᠳᠡᠰᠢ ᠪᠠᠭᠠ ᠪᠠᠢᠵᠠᠢ᠃
ᠪᠠᠢᠯᠳᠤᠭᠴᠢᠳ ᠤ᠋ᠨ ᠶᠠᠷᠢᠬᠤ ᠨᠢ᠂
—ᠺᠢᠫᠴᠡᠺ ᠡᠴᠡ ᠳᠡᠭᠡᠷᠡᠮᠳᠡᠭᠰᠡᠨ ᠶᠠᠭᠤᠮᠠ ᠳᠠᠭᠤᠰᠬᠤ ᠣᠢᠷᠠᠲᠤᠵᠤ ᠪᠠᠢᠨᠠ᠂ ᠳᠠᠷᠤᠢ ᠳᠡᠪᠰᠢᠯᠲᠡ ᠬᠢᠬᠦ ᠬᠡᠷᠡᠭᠲᠡᠢ ᠭᠡᠵᠡᠭᠡᠨᠡ᠃ ᠴᠥᠮ ᠰᠥᠪᠡᠭᠡᠲᠡᠢ ᠪᠠᠭᠠᠲᠤᠷ ᠤ᠋ᠨ ᠴᠠᠭᠠᠨ ᠭᠡᠷ ᠥᠭᠡᠳᠡ ᠬᠠᠷᠠᠵᠠᠭᠠᠨᠠ᠃ ᠲᠡᠭᠦᠨ ᠳ᠋ᠦ᠍ ᠮᠣᠷᠢᠨ ᠤ᠋ ᠰᠡᠭᠦᠯ ᠲᠡᠢ ᠶᠢᠰᠦᠨ ᠳᠠᠷᠴᠠᠭ ᠪᠡᠬᠢᠯᠡᠭᠰᠡᠨ ᠪᠥᠭᠡᠳ ᠡᠨᠡ ᠨᠢ ᠪᠠᠲᠤ ᠬᠠᠭᠠᠨ ᠤ᠋ ᠬᠤᠪᠢ ᠶ᠋ᠢᠨ ᠴᠡᠷᠢᠭ ᠭᠣᠣᠯ ᠲᠦᠮᠡᠲᠦ ᠳ᠋ᠦ᠍ ᠬᠠᠮᠢᠶᠠᠷᠤᠭᠳᠠᠨᠠ᠃
ᠤᠳᠠᠯ ᠦᠭᠡᠢ ᠡᠨᠡ ᠳᠠᠷᠴᠠᠭ ᠤ᠋ᠳ ᠴᠡᠷᠢᠭ ᠦ᠋ᠳ ᠦ᠋ᠨ ᠡᠮᠦᠨᠡ ᠨᠠᠮᠢᠯᠵᠠᠵᠤ᠂ ᠠᠷᠪᠠᠭᠠᠳ ᠮᠢᠩᠭᠠᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠰᠡᠳᠬᠢᠯ ᠢ᠋ ᠪᠠᠶᠠᠰᠤᠭᠤᠯᠤᠨ ᠤᠮᠠᠷᠠ ᠵᠦᠭ ᠲᠠᠰᠢ᠂ ᠪᠠᠭᠤᠵᠤ ᠥᠭᠳᠡᠭ ᠦᠭᠡᠢ ᠠᠭᠤᠷᠰᠠᠭᠰᠠᠨ ᠣᠷᠣᠰ ᠤ᠋ᠨ ᠣᠷᠣᠨ ᠳᠠᠰᠢ ᠳᠠᠭᠠᠭᠤᠯᠬᠤ ᠪᠣᠯ ᠤᠤ? ᠭᠡᠵᠦ ᠶᠠᠭᠠᠷᠠᠵᠠᠭᠠᠨᠠ᠃ ᠴᠠᠭᠠᠨ ᠭᠡᠷ ᠡᠴᠡ ᠬᠣᠶᠠᠷ ᠮᠢᠩᠭᠠᠨ ᠮᠣᠩᠭᠣᠯ ᠭᠠᠷᠴᠤ ᠮᠣᠷᠢᠨ ᠤ᠋ ᠲᠤᠱᠠ ᠶ᠋ᠢ ᠲᠠᠢᠯᠵᠤ ᠮᠣᠷᠳᠠᠭᠠᠳ ᠣᠯᠠᠨ ᠵᠦᠭ ᠲᠦ᠍ ᠳᠠᠪᠬᠢᠨ ᠣᠳᠤᠯᠠ᠃
ᠲᠡᠳᠡ ᠨᠠᠷ ᠤ᠋ᠨ ᠬᠣᠢᠨᠠ ᠭᠠᠭᠴᠠᠬᠠᠨ ᠴᠠᠰᠤᠨ ᠲᠣᠭᠣᠰᠣ ᠪᠤᠵᠢᠭᠢᠨᠠᠨ ᠬᠣᠴᠣᠷᠬᠤ ᠨᠢ ᠦᠵᠡᠭᠳᠡᠪᠡ᠃ ᠲᠡᠳᠦᠢ ᠪᠠᠲᠤ ᠬᠠᠭᠠᠨ ᠬᠢᠲᠠᠳ ᠲᠣᠷᠭᠠᠨ ᠭᠠᠳᠠᠷ ᠲᠠᠢ ᠴᠠᠭᠠᠨ ᠦᠨᠡᠭᠡᠨ ᠳᠣᠲᠣᠷ ᠲᠠᠢ ᠳᠡᠪᠡᠯ ᠲᠡᠢ ᠭᠠᠷᠴᠤ ᠢᠷᠡᠭᠰᠡᠨ ᠳ᠋ᠦ᠍ ᠲᠤᠰᠬᠠᠢ ᠪᠡᠶᠡ ᠬᠠᠮᠠᠭᠠᠯᠠᠭᠴᠢ ᠨᠥᠬᠥᠳ ᠦ᠋ᠳ ᠷᠶᠡᠽᠡᠨ ᠦ᠌ ᠸᠠᠩ ᠠ᠋ᠴᠠ ᠪᠡᠯᠡᠭᠯᠡᠭᠰᠡᠨ ᠡᠪᠦᠳᠦᠭ ᠬᠠᠷᠠ ᠮᠣᠷᠢ ᠶ᠋ᠢ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠠᠪᠴᠢᠷᠠᠵᠤ ᠥᠭᠪᠡ᠃ ᠪᠠᠲᠤ ᠬᠠᠭᠠᠨ ᠬᠣᠯᠠ ᠪᠤᠰᠤ ᠨᠢᠭᠡᠨ ᠴᠠᠭᠠᠨ ᠭᠡᠷ ᠳᠡᠭᠡᠷᠡ ᠣᠴᠢᠵᠤ ᠪᠠᠭᠤᠨ ᠬᠠᠷᠠᠢᠭᠠᠳ ᠬᠡᠪᠢᠰ ᠦ᠋ᠳ ᠦ᠋ᠨ ᠴᠠᠭᠠᠨᠠ ᠳᠠᠯᠳᠠ ᠣᠷᠣᠪᠠ᠃ ᠬᠣᠶᠠᠷ ᠨᠥᠬᠥᠷ ᠵᠢᠳᠠ ᠪᠠᠷᠢᠵᠤ ᠬᠠᠷᠠᠭᠤᠯ ᠳ᠋ᠤ᠌ ᠵᠣᠭᠰᠣᠪᠠ᠃
ᠪᠤᠰᠤᠳ ᠨᠢ ᠬᠠᠷᠠ ᠮᠣᠷᠢ ᠶ᠋ᠢ ᠬᠠᠵᠠᠭᠤ ᠲᠡᠰᠢ ᠠᠪᠴᠢᠷᠠᠵᠤ ᠴᠣᠮᠴᠣᠢᠨ ᠰᠠᠭᠤᠵᠠᠭᠠᠭᠠᠳ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠶᠠᠷᠢᠬᠤ ᠨᠢ ᠄
—ᠡᠨᠳᠡ ᠬᠡᠨ ᠪᠠᠢᠳᠠᠭ ᠶᠤᠮ ᠪᠣᠢ?
—ᠳᠣᠯᠣᠳᠤᠭᠠᠷ ᠣᠳᠣᠨ᠃
—ᠤᠳᠠᠭᠠᠨ ᠬᠦᠯᠢᠶᠡᠬᠦ ᠪᠣᠯ ᠤᠤ?
—ᠵᠥᠪᠯᠡᠯᠭᠡᠨ ᠪᠣᠯᠤᠨᠠ᠂ ᠨᠣᠶᠠᠳ ᠬᠡᠳᠦᠢᠨ ᠴᠤᠭᠯᠠᠷᠠᠵᠠᠢ᠃
—ᠶᠠᠭᠤᠨ ᠲᠤᠬᠠᠢ ᠪᠣᠢ᠂ ᠮᠠᠲᠠᠪᠠᠤ?
—ᠲᠠᠪᠰᠢᠬᠤ ᠲᠤᠬᠠᠢ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃
—ᠭᠡᠳᠡᠷᠭᠦ ᠪᠤᠴᠠᠵᠤ ᠶᠠᠪᠤᠬᠤ ᠦᠭᠡᠢ ᠪᠠᠢᠭᠠ (ᠪᠠᠢᠬᠠ?)
— ᠳᠤᠭᠤᠢ᠂ ᠳᠤᠭᠤᠢ᠂ ᠴᠢᠮᠠᠶ᠋ᠢ ᠵᠠᠨᠴᠢᠨᠠ ᠰᠢᠦ ᠭᠡᠬᠦ ᠳ᠋ᠦ᠍ᠨᠢ᠂
— ᠮᠣᠷᠢᠳ ᠡᠪᠡᠰᠦ ᠶ᠋ᠢ ᠢᠳᠡᠵᠦ ᠳᠠᠭᠤᠰᠴᠠᠢ᠂ ᠬᠦᠯᠢᠶᠡᠬᠦ ᠠᠷᠭᠠ ᠦᠭᠡᠢ ᠪᠣᠯᠵᠤ ᠪᠠᠢᠨᠠ᠃
— ᠭᠠᠢᠭᠤᠢ ᠣᠷᠣᠰ ᠭᠠᠵᠠᠷ ᠳᠤᠯᠠᠭᠠᠴᠠᠨᠠ᠃
—ᠬᠣᠲᠠ ᠶ᠋ᠢ ᠨᠢ ᠰᠢᠲᠠᠭᠠᠨᠠ᠃
—ᠮᠣᠷᠢᠳ ᠢ᠋ᠶ᠋ᠠᠨ ᠲᠠᠯᠬᠠ ᠪᠠᠷ ᠲᠡᠵᠢᠭᠡᠨᠡ᠃ ᠲᠡᠳᠦᠢ ᠭᠠᠤᠯᠢᠨ ᠬᠠᠷᠠᠩᠭᠠ ᠴᠣᠬᠢᠭᠠᠳ ᠲᠡᠷᠡ ᠬᠣᠶᠠᠷ᠂ᠬᠡᠳᠦ ᠴᠣᠬᠢᠬᠤ ᠶ᠋ᠢ ᠨᠢ ᠲᠣᠭᠠᠯᠠᠪᠠ᠃
— ᠶᠢᠰᠦ᠂ ᠭᠠᠷᠳ᠋ᠢ (ᠭᠠᠷᠤᠳᠢ)—ᠭᠸᠯᠢ! ᠡᠨᠡ ᠴᠢᠮᠠᠶ᠋ᠢ ᠳᠠᠭᠤᠳᠠᠵᠠᠢ ᠭᠡᠬᠦ ᠳ᠋ᠦ᠍ᠨᠢ ᠪᠠᠢᠭᠰᠠᠳ ᠤ᠋ᠨ ᠨᠢᠭᠡ ᠨᠢ ᠰᠢᠷᠠ ᠥᠩᠭᠡ ᠲᠡᠢ ᠳᠡᠪᠡᠯ ᠦ᠋ᠨ ᠪᠠᠷᠠᠭᠤᠨ ᠬᠠᠨᠴᠤᠢ ᠪᠠᠨ ᠰᠢᠮᠡᠯᠡᠵᠦ ᠡᠭᠦᠳᠡ ᠶ᠋ᠢ ᠰᠡᠬᠦᠭᠡᠳ ᠮᠠᠯᠠᠭᠠᠢ ᠲᠠᠢ ᠲᠣᠯᠣᠭᠠᠢ ᠪᠠᠨ ᠭᠡᠷ ᠲᠦ᠍ ᠰᠢᠷᠭᠤᠭᠤᠯᠵᠤ ᠲᠤᠰᠢᠶᠠᠯ ᠢ᠋ ᠰᠣᠨᠣᠰᠤᠭᠠᠳ ᠡᠭᠡᠵᠦ ᠢᠷᠡᠪᠡ᠃
— ᠬᠥᠶᠢ ᠣᠷᠣ— ᠽᠠᠩ᠂ ᠳᠡᠭᠡᠳᠦ ᠡᠵᠡᠨ ᠡᠴᠡ ᠢᠳᠤᠭᠠᠨ ᠽᠠᠳᠠᠨ ᠢ᠋ ᠳᠠᠷᠤᠢ ᠠᠪᠴᠢᠷᠠ ᠭᠡᠵᠦ ᠪᠠᠢᠨᠠ᠃ ᠬᠠᠮᠲᠤ ᠶᠠᠪᠤᠬᠤ ᠤᠤ? ᠭᠡᠬᠦ ᠳ᠋ᠦ᠍ᠨᠢ ᠨᠠᠬᠢᠭᠤ ᠬᠠᠮᠠᠷ ᠲᠠᠢ ᠵᠠᠯᠠᠭᠤ ᠴᠡᠷᠢᠭ ᠪᠣᠰᠤᠨ ᠬᠠᠷᠠᠢᠵᠤ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ᠄
— ᠭᠠᠷᠳ᠋ᠢ (ᠭᠠᠷᠤᠳᠢ) ᠮᠢᠨᠢ᠂ ᠪᠢ ᠶᠠᠪᠤᠬᠤ ᠦᠭᠡᠢ᠂ ᠲᠡᠷᠡ ᠢᠳᠤᠭᠠᠨ ᠴᠢᠨᠢ ᠬᠠᠵᠠᠨᠠ ᠭᠡᠪᠡ᠃
— ᠶᠠᠪᠤ ᠭᠡᠰᠡᠨ ᠪᠣᠯ ᠶᠠᠪᠤᠵᠤ ᠪᠠᠢ᠂ ᠬᠠᠷᠢᠨ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠬᠠᠵᠠᠴᠢᠬᠠᠪᠠ ᠭᠡᠬᠦ ᠳ᠋ᠦ᠍ᠨᠢ ᠣᠷᠣ— ᠽᠠᠩ ᠪᠣᠰᠴᠤ᠂ ᠬᠣᠶᠠᠷ ᠮᠣᠩᠭᠣᠯ ᠡᠪᠦᠳᠦᠭ ᠲᠤᠯᠤᠮᠠ ᠴᠠᠰᠤᠨ ᠳᠣᠲᠣᠭᠤᠷ ᠠᠯᠬᠤᠵᠤ ᠥᠨᠥᠴᠢᠨ ᠬᠠᠢᠯᠠᠰᠤᠨ ᠤ᠋ ᠳᠣᠣᠷᠠᠬᠢ ᠬᠠᠷᠠ ᠭᠡᠷ ᠳᠸ᠋ ᠣᠴᠢᠪᠠ᠃ ᠬᠠᠢᠯᠠᠰᠤᠨ ᠤ᠋ ᠰᠢᠷᠠ ᠨᠠᠪᠴᠢ ᠰᠠᠯᠬᠢᠨ ᠳ᠋ᠤ᠌ ᠤᠨᠠᠭᠰᠠᠭᠠᠷ ᠬᠠᠭᠠᠰ ᠨᠢ ᠦᠯᠡᠳᠡᠵᠡᠢ᠃
ᠭᠡᠷ ᠲᠦ᠍ ᠠᠮᠢᠳᠤ ᠶᠠᠭᠤᠮᠠ ᠪᠠᠢᠭᠠ ᠶ᠋ᠢᠨ ᠲᠡᠮᠳᠡᠭ ᠦᠭᠡᠢ ᠪᠠᠢᠵᠠᠢ᠃ ᠬᠥᠭᠵᠢᠯᠲᠡᠢ ᠤᠲᠤᠭᠠ ᠲᠡᠭᠦᠨ ᠳᠡᠭᠡᠷᠡ ᠪᠤᠷᠭᠢᠭᠰᠠᠨ ᠦᠭᠡᠢ᠂ ᠬᠠᠭᠠᠰ ᠲᠠᠭᠠᠨ ᠲᠤᠯᠲᠠᠯᠠ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠭᠡᠷ ᠠᠵᠢ᠃ ᠣᠷᠣ— ᠽᠠᠩ ᠭᠠᠷᠳ᠋ᠢ (ᠭᠠᠷᠤᠳᠢ)ᠬᠣᠶᠠᠷ ᠂ ᠢᠳᠤᠭᠠᠨ ᠢ᠋ ᠬᠡᠳᠦ ᠳᠠᠬᠢᠨ ᠳᠠᠭᠤᠳᠠᠬᠤ ᠳ᠋ᠤ᠌ ᠬᠠᠷᠢᠭᠤ ᠥᠭᠭᠦᠭᠰᠡᠨ ᠦᠭᠡᠢ᠃ ᠡᠳᠡ ᠨᠠᠷ᠂ ᠭᠠᠷ ᠢ᠋ᠶ᠋ᠠᠷ ᠴᠠᠰᠤ ᠮᠠᠯᠲᠠᠵᠤ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠦᠭᠡᠳ ᠡᠷᠦᠬᠡ ᠶ᠋ᠢ ᠨᠢ ᠲᠠᠲᠠᠬᠤ ᠳ᠋ᠤ᠌ ᠴᠢᠨᠣᠠ ᠣᠯᠢᠬᠤ᠂ ᠨᠣᠬᠠᠢ ᠬᠤᠴᠠᠬᠤ ᠮᠡᠲᠦ ᠳᠠᠭᠤ ᠭᠠᠷᠤᠨᠠ᠃ ᠪᠠᠰᠠ ᠬᠣᠶᠠᠷ ᠮᠣᠩᠭᠣᠯ ᠬᠦᠷᠴᠦ ᠢᠷᠡᠭᠡᠳ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠪᠡ᠃ ᠭᠡᠷ ᠦ᠋ᠨ ᠳᠣᠲᠣᠷᠠ ᠣᠪᠤᠭᠠᠯᠠᠰᠤᠲᠠᠢ ᠢᠰᠡᠭᠡᠢ ᠬᠣᠨᠢᠨ ᠤ᠋ ᠨᠡᠬᠡᠢ ᠳᠣᠣᠷᠠ ᠠ᠋ᠴᠠ ᠬᠠᠷᠢᠶᠠᠬᠤ ᠲᠡᠳᠦᠢ ᠳᠠᠭᠤ ᠭᠠᠷᠤᠭᠰᠠᠨ ᠳ᠋ᠤ᠌ ᠴᠡᠷᠢᠭ ᠦ᠋ᠳ ᠲᠡᠷᠡ ᠢᠰᠡᠭᠡᠢ ᠶ᠋ᠢ ᠵᠠᠢᠯᠠᠭᠤᠯᠪᠠᠯ ᠳᠣᠲᠣᠷᠠ ᠠ᠋ᠴᠠ ᠨᠢ ᠬᠠᠩᠭᠢᠨᠠᠭᠰᠠᠨ ᠳᠠᠭᠤ ᠲᠠᠢ ᠬᠠᠷᠠ ᠨᠢᠳᠦ ᠲᠡᠢ ᠡᠮᠡᠭᠡᠨ ᠠᠭᠤᠷ ᠲᠠᠢ ᠳᠠᠭᠤ ᠪᠠᠷ᠄
— ᠲᠠᠨᠠᠷ ᠬᠠᠮᠢᠭᠠ ᠠ᠋ᠴᠠ ᠤᠷᠭᠤᠵᠤ ᠢᠷᠡᠪᠡ? ᠵᠠᠷᠢᠮ ᠤ᠋ᠨ ᠴᠢᠨᠢ ᠤᠷᠢᠳ ᠲᠠᠯᠠ ᠶ᠋ᠢ ᠨᠢᠯᠪᠤᠰᠤ ᠨᠢᠰᠦ ᠢᠳᠡᠵᠦ᠂ ᠵᠠᠷᠢᠮ ᠤ᠋ᠨ ᠴᠢᠨᠢ ᠠᠷᠤ ᠲᠠᠯᠠ ᠠ᠋ᠴᠠ ᠨᠢ ᠰᠠᠯᠬᠢ ᠳᠠᠭᠠᠭᠰᠠᠨ ᠮᠠᠭᠤ ᠰᠢᠷᠠ ᠵᠤᠯᠵᠠᠭᠠ ᠨᠤᠭᠤᠳ᠂ ᠲᠠᠨᠠᠷ ᠤ᠋ᠨ ᠮᠤᠩᠬᠠᠭ ᠨᠡᠷᠡᠰ ᠬᠡᠨ ᠭᠡᠳᠡᠭ ᠪᠣᠢ? ᠬᠡᠨ ᠳ᠋ᠦ᠍ ᠬᠡᠷᠡᠭᠲᠡᠢ ᠪᠣᠢ? ᠶᠠᠮᠠᠷ ᠠᠵᠢᠯ ᠲᠠᠢ ᠪᠣᠢ? ᠭᠡᠪᠡ᠃
ᠠᠬᠠᠯᠠᠭᠴᠢ ᠴᠡᠷᠢᠭ ᠨᠢ ᠠᠶᠠᠲᠠᠢ ᠲᠥᠯᠥᠪ ᠢ᠋ᠶ᠋ᠡᠷ ᠬᠠᠷᠢᠯᠴᠠᠬᠤ ᠶ᠋ᠢ ᠮᠡᠳᠡᠬᠦ ( ᠦᠭᠡᠢ) ᠲᠤᠯᠠ ᠠᠭᠤᠷᠰᠠᠩᠭᠤᠢ ᠬᠡᠯᠡᠭᠰᠡᠨ ᠨᠢ ᠄
—ᠬᠡᠨ ᠳ᠋ᠦ᠍ ᠶᠠᠮᠠᠷ ᠬᠡᠷᠡᠭ ᠲᠡᠢ᠂ ᠶᠠᠮᠠᠷ ᠠᠵᠢᠯ ᠲᠠᠢ ᠪᠣᠯ ᠪᠢᠳᠡ ᠲᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠮᠡᠬᠦᠢᠰᠬᠢᠨ ᠭᠤᠶᠤᠬᠤ ᠪᠠᠷ ᠢᠷᠡᠯᠡ᠃ ᠭᠡᠷᠡᠯᠲᠦ ᠡᠵᠡᠨ ᠡᠴᠡ ᠪᠢᠳᠡᠨ ᠦ᠌ ᠥᠴᠦᠬᠡᠨ ᠳᠣᠣᠷᠠᠳᠤᠰ ᠢ᠋ ᠶᠡᠬᠡ ᠢᠳᠤᠭᠠᠨ ᠽᠠᠳᠠᠨ ᠲᠠᠨ ᠢ᠋ ᠳᠠᠷᠤᠢᠬᠠᠨ ᠥᠪᠡᠷ ᠦ᠋ᠨ ᠠᠰᠠᠷ ᠲᠸ᠋ ᠴᠢᠬᠤᠯᠠ ᠬᠡᠷᠡᠭ ᠢ᠋ᠶ᠋ᠡᠷ ᠵᠠᠯᠠᠵᠤ ᠠᠪᠴᠢᠷᠠ ᠭᠡᠵᠦ ᠳᠠᠭᠤᠳᠠᠭᠤᠯᠬᠤ ᠪᠠᠷ ᠶᠠᠪᠤᠭᠤᠯᠪᠠ ᠭᠡᠬᠦ ᠳ᠋ᠦ᠍ᠨᠢ ᠢᠰᠡᠭᠡᠢ ᠳᠣᠣᠷᠠᠬᠢ ᠬᠥᠭᠰᠢᠨ ᠥᠨᠳᠡᠢᠵᠦ ᠡᠪᠦᠳᠦᠭ ᠢ᠋ᠶ᠋ᠡᠨ ᠲᠡᠪᠡᠷᠢᠨ ᠴᠣᠮᠴᠣᠢᠨ ᠰᠠᠭᠤᠵᠤ ᠬᠡᠯᠡᠪᠡ᠃
—ᠥᠪᠡᠷ ᠦ᠋ᠨ ᠦᠬᠦᠭᠰᠡᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠮᠢᠬᠠ ᠶ᠋ᠢ ᠢᠳᠡᠭᠰᠡᠨ ᠲᠡᠨᠡᠭ ᠰᠢᠷᠠ ᠭᠥᠯᠥᠭᠡ ᠨᠤᠭᠦᠳ! ᠰᠢᠭᠤᠷᠭᠠ ᠭᠡᠷ ᠦ᠋ᠨ ᠢᠰᠡᠭᠡᠢ ᠶ᠋ᠢ ᠰᠡᠭᠰᠦᠷᠴᠦ ᠡᠷᠦᠬᠡ ᠬᠠᠭᠤᠯᠠᠵᠦ ᠬᠠᠶᠠᠭᠠᠳ ᠡᠢᠮᠦ ᠬᠦᠢᠲᠡᠨ ᠪᠠᠢᠬᠤ ᠳ᠋ᠤ᠌ ᠬᠦᠴᠦᠨ ᠮᠡᠬᠦᠰ ᠡᠮᠡᠭᠡᠨ ᠢ᠋ ᠠᠪᠠᠴᠢᠬᠤ ᠪᠠᠷ ᠬᠡᠨ ᠢᠩᠭᠢᠵᠦ ᠳᠠᠭᠤᠳᠠᠨᠠ ᠪᠣᠢ? ᠲᠠᠨᠠᠷ ᠤᠷᠢᠳᠠᠪᠡᠷ ᠭᠠᠯ ᠠᠰᠠᠭᠠᠵᠤ ᠭᠠᠷ ᠬᠥᠯ ᠢ᠋ ᠮᠢᠨᠢ ᠳᠤᠯᠠᠭᠠᠴᠠᠭᠤᠯ᠂ ᠪᠢ ᠭᠤᠷᠪᠠᠨ ᠬᠣᠨᠣᠭ ᠢᠰᠡᠭᠡᠢ ᠳᠣᠣᠷᠠ ᠬᠡᠪᠲᠡᠵᠦ ᠬᠦᠷᠦᠵᠦ ᠲᠠᠭᠠᠷᠠᠴᠢᠬᠠᠯᠠ᠃
—ᠨᠠᠳᠠᠳᠤ ᠬᠡᠨ ᠴᠦ᠍ ᠬᠠᠲᠠᠭᠰᠠᠨ ᠪᠣᠣᠪᠣ ᠪᠣᠭᠣᠷᠰᠣᠭ ᠠᠪᠴᠢᠷᠠᠵᠤ ᠦᠭᠭᠦᠭᠰᠡᠨ ᠦᠭᠡᠢ᠃ ᠡᠨᠳᠡ ᠡᠴᠡ ᠭᠠᠷᠴᠠᠭᠠ᠂ ᠵᠡᠷᠯᠢᠭ ᠱᠤᠯᠤᠮ ᠨᠤᠭᠤᠳ! ᠡᠰᠡᠪᠡᠯ ᠪᠢ ᠭᠠᠤᠯᠢᠨ ᠬᠣᠰᠢᠭᠤ ᠲᠠᠢ ᠲᠡᠮᠦᠷ ᠰᠠᠪᠠᠷ ᠲᠠᠢ ᠬᠡᠷᠢᠶᠡ ᠶᠠᠪᠤᠭᠤᠯᠤᠨᠠ ᠭᠡᠪᠡ᠃ ᠴᠡᠷᠢᠭ ᠦ᠋ᠳ ᠶᠠᠭᠠᠷᠠᠪᠴᠢᠯᠠᠨ ᠭᠠᠯ ᠤ᠋ᠨ ᠬᠢᠨᠢ ᠴᠣᠭ ᠢ᠋ ᠠᠰᠠᠭᠠᠵᠤ ᠨᠥᠭᠦᠭᠡ ᠨᠢ ᠬᠠᠭᠤᠷᠠᠢ ᠬᠣᠵᠤᠤᠯᠠ ᠪᠥᠬᠡᠨᠡᠭᠦᠯᠦᠨ ᠭᠤᠷᠪᠠᠳᠤᠭᠠᠷ ᠨᠢ ᠮᠥᠴᠢᠷ ᠦ᠋ᠳ ᠢ᠋ ᠭᠡᠷ ᠦ᠋ᠨ ᠳᠤᠮᠳᠠ ᠠᠪᠴᠢᠷᠠᠪᠠ᠃ ᠳᠥᠷᠪᠡᠳᠦᠭᠡᠷ ᠨᠢ ᠡᠳᠡ ᠨᠠᠷ ᠤ᠋ᠨ ᠠᠬᠠᠯᠠᠭᠴᠢ ᠭᠠᠷᠳ᠋ᠢ (ᠭᠠᠷᠤᠳᠢ)ᠭᠸᠯᠢ ᠢᠳᠤᠭᠠᠨ ᠬᠡᠦᠬᠡᠨ ᠢ᠋ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠤᠴᠢᠯᠭᠠ ᠳᠣᠲᠣᠷᠠ ᠪᠠᠨ ᠰᠢᠷᠭᠤᠬᠤ ᠳ᠋ᠤ᠌ ᠢᠰᠡᠭᠡᠢ ᠠᠷᠠᠰᠤ ᠵᠡᠷᠭᠡ ᠶ᠋ᠢ ᠨᠢ ᠡᠷᠭᠢᠭᠦᠯᠦᠨ ᠬᠤᠴᠢᠭᠰᠠᠭᠠᠷ ᠪᠠᠢᠯᠠ᠃ ᠤᠳᠠᠭᠰᠠᠨ ᠦᠭᠡᠢ ᠮᠥᠴᠢᠷ ᠦ᠋ᠳ ᠠᠰᠠᠵᠤ ᠬᠥᠭᠵᠢᠯᠲᠡᠢ ᠭᠠᠯ ᠪᠠᠳᠠᠷᠠᠪᠠ᠃
ᠭᠠᠷᠳ᠋ᠢ (ᠭᠠᠷᠤᠳᠢ) ᠭᠸᠯᠢ᠂ ᠢᠳᠤᠭᠠᠨ ᠤ᠋ ᠭᠠᠷ ᠠ᠋ᠴᠠ ᠲᠠᠲᠠᠵᠤ ᠭᠠᠯ ᠳ᠋ᠤ᠌ ᠣᠢᠷᠠᠲᠤᠭᠤᠯᠪᠠ᠃ ᠢᠳᠤᠭᠠᠨ ᠬᠡᠦᠬᠡᠨ ᠪᠤᠳᠤᠩᠭᠤᠢ ᠴᠢᠷᠠᠢ ᠪᠠᠨ ᠤᠯᠠᠭᠠᠨ ᠬᠥᠬᠡ ᠪᠣᠳᠣᠭ ᠢ᠋ᠶ᠋ᠠᠷ ᠠᠯᠠᠭᠯᠠᠨ ᠪᠣᠳᠣᠵᠤ ᠪᠤᠭᠤᠷᠤᠯ ᠦᠰᠦ ᠪᠡᠨ ᠣᠯᠠᠨ ᠰᠠᠯᠠᠭᠠ ᠭᠡᠵᠢᠭᠡ ᠪᠣᠯᠭᠠᠵᠤ᠂ ᠮᠣᠭᠠᠢ ᠠᠳᠠᠯᠢ ᠬᠦᠷᠦᠵᠡᠢ᠃ ᠲᠡᠷᠡ ᠢᠳᠤᠭᠠᠨ ᠭᠠᠷᠳ᠋ᠢ (ᠭᠠᠷᠤᠳᠢ) ᠭᠸᠯᠢ
ᠶ᠋ᠢᠨ ᠭᠠᠷ ᠢ᠋ ᠬᠠᠵᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠣᠷᠬᠢᠵᠤ ᠵᠠᠢᠯᠠᠰᠬᠢᠪᠡ᠃ ᠲᠡᠭᠡᠭᠡᠳ ᠢᠳᠤᠭᠠᠨ ᠲᠦᠷᠭᠡᠨ ᠢ᠋ᠶ᠋ᠡᠷ ᠰᠢᠪᠠᠭᠤᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠴᠢᠮᠡᠭᠯᠡᠭᠰᠡᠨ ᠤᠷᠲᠤ ᠣᠷᠣᠢ ᠲᠠᠢ ᠦᠨᠡᠭᠡᠨ ᠰᠡᠭᠦᠯ ᠤᠨᠵᠢᠭᠤᠯᠤᠭᠰᠠᠨ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠴᠦ ᠨᠢᠷᠤᠭᠤᠨ ᠳ᠋ᠠᠭᠠᠨ ᠪᠠᠭᠠᠪᠠᠭᠠᠢ ᠶ᠋ᠢᠨ ᠠᠷᠠᠰᠤ ᠨᠥᠮᠥᠷᠴᠦ᠂ ᠴᠡᠭᠡᠵᠢᠨ ᠳ᠋ᠡᠭᠡᠨ ᠵᠡᠰ ᠲᠠᠪᠠᠭ ᠡᠯᠭᠦᠵᠦ᠂ ᠢᠰᠡᠭᠡᠢ ᠠᠪᠠᠭᠠᠯᠳᠠᠢ ᠡᠯᠭᠦᠭᠰᠡᠨ ᠰᠤᠷ ᠪᠦᠰᠡ ᠪᠡᠨ ᠪᠦᠰᠡᠯᠡᠪᠡ᠃ ᠲᠡᠭᠡᠭᠡᠳ ᠲᠣᠮᠣ ᠬᠡᠩᠭᠡᠷᠭᠡ ᠪᠡᠨ ᠳᠣᠬᠢᠭᠤᠷ ᠤ᠋ᠨ ᠬᠠᠮᠲᠤ ᠠᠪᠴᠤ ᠪᠦᠷᠢᠶᠡ ᠳᠡᠭᠦᠵᠢᠯᠡᠭᠰᠡᠨ ᠰᠠᠪᠠ ᠪᠠᠨ ᠤᠶᠠᠭᠠᠳ ᠬᠣᠨᠢᠨ ᠤ᠋ ᠳᠠᠯᠤ᠂ ᠢᠮᠠᠭᠠᠨ ᠤ᠋ ᠤᠷᠲᠤ ᠬᠥᠯ ᠢ᠋ᠶ᠋ᠡᠨ ᠠᠪᠤᠪᠠ᠃ ᠡᠳᠡᠭᠡᠷ ᠢ᠋ ᠠᠪᠬᠤ ᠳ᠋ᠠᠭᠠᠨ ᠤᠩᠰᠢᠯᠭᠠ ᠠᠶᠠᠯᠤᠨ ᠤᠩᠰᠢᠵᠤ ᠳᠡᠪᠬᠡᠷᠴᠦ ᠴᠣᠪᠬᠣᠷᠤᠨ ᠪᠠᠢᠯᠠ᠃ ᠭᠠᠯ ᠤ᠋ᠨ ᠳᠡᠷᠭᠡᠳᠡᠬᠢ ᠴᠡᠷᠢᠭ ᠦ᠋ᠳ ᠦᠭᠡ ᠳᠠᠭᠤ ᠦᠭᠡᠢ ᠭᠠᠢᠬᠠᠵᠤ ᠲᠡᠭᠦᠨ ᠢ᠋ ᠰᠢᠷᠪᠡᠭᠡᠲᠦᠨ ᠬᠠᠷᠠᠵᠠᠭᠠᠨᠠ᠃ ᠡᠴᠦᠰ ᠲᠤᠨᠢ ᠭᠠᠷᠳ᠋ᠢ (ᠭᠠᠷᠤᠳᠢ) ᠭᠧᠯᠢ ᠪᠡᠯᠡᠳᠬᠡᠯ ᠢ᠋ ᠪᠣᠯᠤᠨᠠ ᠭᠡᠰᠡᠨ ᠪᠣᠯᠤᠯᠲᠠᠢ ᠰᠢᠢᠳᠪᠦᠷᠢᠲᠡᠢ ᠪᠣᠰᠤᠭᠠᠳ᠄
— ᠣᠳᠣ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠣᠴᠢᠬᠤ ᠤᠤ? ᠭᠡᠪᠡ᠃
— ᠶᠡᠷᠦᠩᠬᠡᠢ ᠪᠥᠬᠡ ᠪᠧᠬᠢ ᠦᠭᠡᠢ ᠪᠡᠷ ᠪᠢ ᠣᠴᠢᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍ᠨᠢ᠂
— ᠣᠷᠣ— ᠽᠠᠩ ᠡᠭᠦᠨ ᠢ᠋ ᠪᠠᠭᠤᠤ ᠠ᠋ᠴᠠ ᠨᠢ ᠪᠡᠷᠢ᠂ ᠲᠡᠭᠡᠭᠡᠳ ᠡᠨᠡ ᠶᠡᠬᠡ ᠬᠥᠮᠦᠨ ᠢ᠋ ᠪᠠᠲᠤ ᠬᠠᠭᠠᠨ ᠳ᠋ᠤ᠌ ᠬᠦᠨᠳᠦᠳᠬᠡᠯ ᠲᠡᠢ ᠪᠡᠷ ᠠᠪᠠᠴᠢᠵᠤ ᠥᠭᠭᠦᠶᠡ ᠭᠡᠪᠡ᠃ ᠳᠥᠷᠪᠡᠨ ᠴᠡᠷᠢᠭ ᠪᠠᠷᠢᠵᠤ ᠠᠷᠤ ᠠ᠋ᠴᠠ ᠨᠢ ᠡᠪᠦᠳᠦᠭ ᠢ᠋ᠶ᠋ᠡᠷ ᠲᠦᠯᠬᠢᠨ ᠭᠡᠷ ᠡᠴᠡ ᠭᠠᠷᠴᠠᠭᠠᠪᠠ᠃
ᠨᠣᠴᠣᠯᠳᠤᠨ ᠲᠡᠮᠡᠴᠡᠯᠳᠦᠬᠦ ᠢᠳᠤᠭᠠᠨ ᠢ᠋ ᠪᠠᠰᠠ ᠯᠠ ᠪᠠᠷᠢᠵᠤ ᠶᠠᠪᠤᠭᠰᠠᠭᠠᠷ ᠢᠯᠠᠭᠳᠠᠰᠢ ᠦᠭᠡᠢ ᠪᠠᠲᠤ ᠬᠠᠭᠠᠨ ᠤ᠋ ᠲᠦᠷ ᠪᠠᠭᠤᠭᠰᠠᠨ ᠭᠡᠷ ᠲᠦ᠍ ᠬᠦᠷᠴᠦ ᠢᠷᠡᠪᠡ᠃
ᠢᠳᠤᠭᠠᠨ ᠽᠠᠳᠠᠨ ᠬᠤᠪᠢᠯᠭᠠᠨ ᠣᠩᠭᠣᠳ ᠲᠠᠢ ᠶᠠᠷᠢᠵᠤ ᠲᠩᠷᠢ ᠶ᠋ᠢᠨ ᠳᠤᠷᠠ ᠬᠦᠰᠡᠯ ᠢ᠋ ᠮᠡᠳᠡᠵᠦ ᠢᠷᠡᠭᠡᠳᠦᠢ ᠶ᠋ᠢ ᠤᠷᠢᠳᠠ ᠠ᠋ᠴᠠ ᠲᠣᠳᠣᠷᠬᠠᠢᠯᠠᠭᠴᠢ ᠬᠥᠮᠦᠨ ᠲᠤᠯᠠ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠭᠡᠷ ᠲᠦ᠍ ᠣᠷᠣᠪᠠ᠃ ᠭᠡᠷ ᠲᠦ᠍ ᠶᠡᠬᠡᠰ ᠬᠠᠭᠠᠳ ᠴᠤᠭᠯᠠᠷᠠᠭᠰᠠᠨ ᠪᠠᠢᠯᠠ᠃ ᠭᠡᠷ ᠲᠦ᠍ ᠭᠠᠯ ᠤ᠋ᠨ ᠳᠥᠯᠥ ᠳᠤᠯᠠᠭᠠᠨ ᠪᠥᠭᠡᠳ ᠭᠠᠯ ᠤ᠋ᠨ ᠠᠷᠤ ᠳ᠋ᠤ᠌ ᠪᠠᠲᠤ ᠬᠠᠭᠠᠨ ᠤᠯᠠᠭᠠᠨ ᠭᠤᠲᠤᠯ ᠲᠠᠢ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠡᠪᠢᠰ ᠳᠡᠭᠡᠷᠡ ᠵᠠᠪᠢᠯᠠᠨ ᠰᠠᠭᠤᠵᠤ ᠰᠢᠯᠭᠠᠨ ᠰᠢᠨᠵᠢᠯᠡᠬᠦ ᠬᠠᠷᠠᠴᠠ ᠪᠠᠷ ᠢᠳᠤᠭᠠᠨ ᠢ᠋ ᠠᠵᠢᠭᠯᠠᠨᠠ᠃
ᠢᠳᠤᠭᠠᠨ ᠡᠭᠦᠳᠡᠨ ᠦ᠌ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠬᠠᠩᠭᠢᠨᠠᠵᠤ ᠵᠢᠩᠭᠢᠨᠡᠭᠰᠡᠨ ᠳᠠᠭᠤ ᠴᠢᠮᠡᠭᠡ ᠭᠠᠷᠭᠠᠨ ᠰᠥᠭᠥᠳᠪᠡ᠃ ᠲᠡᠭᠡᠭᠡᠳ ᠳᠠᠭᠤ ᠴᠢᠮᠡᠭᠡ ᠭᠠᠷᠭᠠᠨ ᠪᠣᠰᠤᠨ ᠬᠠᠷᠠᠢᠵᠤ᠂ ᠠᠶᠤᠭᠰᠠᠨ ᠠ᠋ᠴᠠ ᠪᠣᠯᠵᠤ ᠭᠡᠳᠡᠷᠭᠦ ᠬᠠᠨᠠ ᠨᠠᠯᠠᠵᠤ ᠰᠠᠭᠤᠬᠤ ᠵᠠᠯᠠᠭᠤ ᠬᠠᠲᠤᠨ ᠳ᠋ᠤ᠌ ᠣᠴᠢᠵᠤ ᠡᠷᠬᠢᠮᠯᠡᠨ ᠦᠵᠡᠬᠦ ᠶ᠋ᠢᠨ ᠪᠠᠷᠢᠮᠲᠠ ᠪᠣᠯᠭᠠᠬᠤ ᠮᠡᠲᠦ ᠴᠢᠬᠢᠨ ᠡᠴᠡ ᠨᠢ ᠪᠠᠷᠢᠵᠤ ᠬᠠᠴᠠᠷ ᠢ᠋ ᠨᠢ ᠦᠨᠦᠰᠦᠭᠡᠳ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠨᠢᠳᠦ ᠶ᠋ᠢ ᠨᠢ ᠪᠣᠯᠭᠣᠭᠠᠨ ᠳᠣᠯᠢᠶᠠᠵᠤ ᠢᠯᠢᠵᠦ ᠳᠠᠭᠠᠯᠠᠭᠠᠳ ᠳᠡᠷᠭᠡᠳᠡ ᠨᠢ ᠰᠠᠭᠤᠨᠠ᠃ ᠢᠳᠤᠭᠠᠨ᠂ ᠪᠠᠲᠤ ᠬᠠᠭᠠᠨ ᠢ᠋ ᠭᠥᠯᠢᠷᠡᠨ ᠬᠠᠷᠠᠵᠤ᠄
— ᠰᠠᠢᠬᠠᠨ ᠰᠠᠨᠠᠭᠠᠲᠤ᠂ ᠬᠠᠮᠤᠭ ᠠ᠋ᠴᠠ ᠵᠣᠷᠢᠭᠲᠤ ᠰᠠᠢᠨ ᠬᠠᠭᠠᠨ ᠮᠢᠨᠢ ᠠ᠋! ᠴᠢ ᠪᠣᠯ ᠣᠯᠠᠨ ᠤ᠋ ᠪᠠᠶᠠᠷ ᠲᠠᠢᠳᠬᠤᠷᠠᠯ᠂ ᠴᠢ ᠪᠣᠯ ᠬᠤᠷᠳᠤᠨ ᠨᠢᠰᠦᠭᠴᠢ ᠪᠦᠷᠭᠦᠳ᠂ ᠴᠢ ᠪᠣᠯ ᠴᠠᠰᠤᠲᠤ ᠥᠨᠳᠥᠷ ᠦ᠋ᠨ ᠣᠷᠣᠢ ᠪᠠᠷ ᠳᠡᠭᠦᠯᠢᠨ ᠶᠠᠪᠤᠭᠴᠢ ᠬᠠᠷᠠ ᠡᠷᠢᠶᠡᠨ ᠪᠠᠷᠰ᠂ ᠴᠢ ᠪᠣᠯ ᠬᠠᠳᠠᠨ ᠤ᠋ ᠳᠡᠭᠡᠷᠡ ᠭᠠᠭᠴᠠᠭᠠᠷ ᠡᠵᠡᠮᠰᠢᠭᠴᠢ ᠪᠦᠷᠭᠦᠳ᠂ ᠴᠢ ᠪᠣᠯ ᠣᠯᠠᠨ ᠲᠦᠮᠡᠨ ᠦ᠌ ᠵᠢᠷᠦᠬᠡ᠃ ᠠᠢ ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤ᠌ ᠳᠠᠭᠤᠳᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠨᠡ ᠤᠤ? ᠴᠢᠨᠦ ᠲᠥᠯᠥᠭᠡ ᠪᠢ ᠪᠦᠭᠦᠳᠡ ᠶ᠋ᠢ ᠪᠦᠲᠦᠭᠡᠵᠦ ᠴᠢᠳᠠᠨᠠ᠃
ᠪᠠᠲᠤ ᠬᠠᠭᠠᠨ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
— ᠶᠡᠬᠡ ᠢᠳᠤᠭᠠᠨ ᠺᠸᠷᠢᠡᠺᠸᠢ— ᠽᠠᠳᠠᠨ ᠴᠢᠮᠠᠶ᠋ᠢ ᠪᠢ ᠳᠠᠭᠤᠳᠠᠭᠤᠯᠤᠭᠰᠠᠨ᠂ ᠴᠢ ᠪᠣᠯ ᠣᠯᠠᠨ ᠢ᠋ ᠠᠶᠤᠯᠭᠠᠨ ᠭᠤᠨᠢᠭᠯᠠᠭᠤᠯᠤᠭᠴᠢ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠦᠭᠡᠳ ᠪᠠᠢᠨᠠ᠃ ᠪᠢ ᠥᠨᠥᠳᠥᠷ ᠵᠡᠭᠦᠳᠦᠯᠡᠪᠡ ᠭᠡᠬᠦ ᠳ᠋ᠦ᠍ᠨᠢ᠄
— ᠵᠡᠭᠦᠳᠦ ᠪᠡᠨ ᠶᠠᠷᠢᠭᠲᠤᠨ ᠭᠡᠵᠦ ᠢᠳᠤᠭᠠᠨ ᠬᠡᠯᠡᠪᠡ᠃
— ᠲᠡᠭᠦᠨ ᠡᠴᠡ ᠪᠣᠯᠵᠤ ᠮᠢᠨᠦ ᠵᠢᠷᠦᠬᠡ ᠴᠣᠬᠢᠵᠤ ᠤᠬᠠᠭᠠᠨ ᠪᠠᠯᠠᠷᠳᠠᠨᠠ᠃ ᠮᠢᠨᠦ ᠲᠡᠷᠡ ᠵᠡᠭᠦᠳᠦ ᠶ᠋ᠢ ᠲᠠᠢᠯᠪᠤᠷᠢᠯᠠᠵᠤ ᠦᠭᠭᠦᠨᠡ ᠤᠤ? ᠮᠢᠨᠦ ᠵᠠᠮ ᠡᠭᠦᠨ ᠡᠴᠡ ᠲᠣᠳᠣᠷᠬᠠᠢᠯᠠᠭᠳᠠᠨᠠ᠃ ᠴᠢ ᠪᠣᠯ ᠰᠢᠷᠠ ᠣᠩᠭᠣᠳ ᠲᠠᠢ ᠪᠠᠨ ᠮᠥᠨ ᠳᠠᠯᠠᠨ ᠵᠦᠭ ᠦ᠋ᠨ ᠣᠩᠭᠣᠳ ᠲᠠᠢ ᠦᠭᠡ ᠰᠣᠯᠢᠯᠴᠠᠨᠠ᠃ ᠲᠡᠳᠡ ᠨᠠᠷ ᠢ᠋ᠶ᠋ᠠᠨ ᠤᠷᠢᠵᠤ ᠳᠠᠭᠤᠳᠠ᠂ ᠪᠢ ᠡᠨᠡ ᠰᠢᠭᠤᠷᠭᠠ ᠪᠠᠷ ᠤᠮᠠᠷᠠ ᠵᠦᠭ ᠦ᠋ᠨ ᠣᠢ ᠬᠥᠪᠴᠢ ᠶ᠋ᠢ ᠴᠢᠭᠯᠡᠵᠦ ᠤᠷᠲᠤ ᠰᠠᠬᠠᠯᠲᠤ ᠣᠷᠣᠰ ᠳᠠᠰᠢ ᠣᠴᠢᠬᠤ ᠤᠤ᠂ ᠡᠰᠡᠪᠡᠯ ᠬᠦᠯᠢᠶᠡᠬᠦ ᠤᠤ? ᠡᠰᠡᠪᠡᠯ ᠭᠡᠳᠡᠷᠭᠦ ᠪᠤᠴᠠᠵᠤ ᠡᠮᠦᠨᠡ ᠵᠦᠭ ᠦ᠋ᠨ ᠬᠥᠬᠡ ᠳᠠᠯᠠᠢ ᠶ᠋ᠢᠨ ᠳᠤᠯᠠᠭᠠᠨ ᠡᠷᠭᠢ ᠶ᠋ᠢᠨ ᠬᠥᠨᠳᠡᠢ ᠨᠤᠭᠦᠳ ᠢ᠋ᠶ᠋ᠠᠷ ᠨᠡᠭᠦᠳᠡᠯᠯᠡᠬᠦ ᠤᠤ? ᠦᠭᠡᠢ ᠪᠣᠯ ᠷᠶᠠᠽᠠᠨ ᠥᠭᠡᠳᠡ ᠣᠴᠢᠬᠤ ᠤᠤ? ᠡᠰᠡᠪᠡᠯ ᠡᠮᠦᠨᠡ ᠵᠦᠭ ᠦ᠋ᠨ ᠺᠢᠶᠧ ᠬᠣᠲᠠ ᠣᠷᠣᠬᠤ ᠤᠤ? ᠶᠠᠭᠠᠬᠢᠪᠠᠯ ᠵᠣᠬᠢᠬᠤ ᠪᠣᠢ? ᠭᠡᠲᠡᠯᠡ ᠢᠳᠤᠭᠠᠨ ᠨᠢᠳᠦ ᠪᠡᠨ ᠰᠣᠯᠪᠢᠵᠤ ᠭᠠᠭᠴᠠᠬᠠᠨ ᠴᠠᠭᠠᠨ ᠨᠢᠳᠦ ᠨᠢ ᠦᠵᠡᠭᠳᠡᠭᠡᠳ ᠬᠣᠶᠠᠷ ᠲᠡᠰᠢ ᠵᠠᠢᠮᠤᠷᠠᠵᠤ᠂ ᠠᠶᠤᠤ᠂ ᠠᠶᠤᠤ ᠭᠡᠵᠦ ᠳᠠᠭᠤᠳᠠᠨ ᠠᠷᠠᠰᠤᠨ ᠬᠡᠦᠳᠡᠢ ᠳᠣᠲᠣᠷᠠ ᠠ᠋ᠴᠠ ᠨᠣᠭᠣᠭᠠᠨ ᠠᠷᠴᠠ ᠭᠠᠷᠭᠠᠵᠤ ᠭᠠᠯ ᠤ᠋ᠨ ᠳᠣᠲᠣᠷᠠ ᠬᠢᠪᠡ᠃ ᠲᠦᠳᠡᠯ ᠦᠭᠡᠢ ᠴᠡᠩᠬᠡᠷ ᠤᠲᠤᠭᠠ ᠭᠡᠷ ᠳᠦᠭᠦᠷᠴᠦ ᠲᠠᠯᠠ ᠭᠠᠵᠠᠷ ᠤ᠋ᠨ ᠡᠪᠡᠰᠦᠨ ᠦ᠌ ᠠᠷᠢᠭᠤᠨ ᠦᠨᠦᠷ ᠦᠨᠦᠷᠲᠦᠯᠡ᠃
— ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠡᠭᠦᠳᠦ ᠶ᠋ᠢ ᠶᠠᠷᠢᠭᠲᠤᠨ᠃ ᠳᠠᠯᠠᠨ ᠰᠢᠷᠠ ᠣᠩᠭᠣᠳ ᠢ᠋ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠴᠢᠮᠠᠲᠤ ᠶᠠᠮᠠᠷ ᠵᠢᠷᠭᠠᠯ ᠶᠠᠮᠠᠷ ᠵᠣᠪᠠᠯᠠᠩ ᠤᠴᠠᠷᠠᠬᠤ ᠶ᠋ᠢ ᠠᠰᠠᠭᠤᠵᠤ ᠥᠭᠭᠦᠶᠡ ᠭᠡᠪᠡ᠃ ᠪᠠᠲᠤ ᠬᠠᠭᠠᠨ᠂ ᠲᠡᠰᠢ ᠪᠥᠬᠥᠢᠵᠦ ᠵᠥᠭᠡᠯᠡᠨ ᠳᠠᠭᠤ ᠪᠠᠷ ᠬᠡᠯᠡᠭᠰᠡᠨ ᠨᠢ᠄
— ᠪᠢ ᠢᠩᠭᠢᠵᠦ ᠵᠡᠭᠦᠳᠦᠯᠡᠪᠡ᠃ ᠪᠣᠷᠣ ᠮᠠᠨᠠᠨ ᠳᠣᠲᠣᠷᠠ ᠠ᠋ᠴᠠ ᠭᠠᠯ ᠲᠠᠢ ᠨᠡᠭᠦᠷᠡᠰᠦ ᠤᠨᠠᠵᠤ ᠲᠣᠯᠣᠭᠠᠢ ᠶ᠋ᠢ ᠮᠢᠨᠢ ᠬᠠᠭᠠᠷᠢᠪᠠ᠂ ᠡᠭᠦᠨ ᠡᠴᠡ ᠪᠣᠯᠵᠤ ᠮᠢᠨᠦ ᠠᠭᠤᠰᠬᠢ ᠵᠢᠷᠦᠬᠡ ᠳᠣᠯᠭᠢᠶᠠᠯᠠᠪᠠ᠃ ᠮᠢᠨᠦ ᠶᠢᠰᠦᠨ ᠰᠡᠭᠦᠯᠲᠦ ᠲᠤᠭ ᠭᠠᠩᠬᠤᠵᠤ ᠬᠠᠵᠠᠢᠪᠠ᠃ ᠪᠠᠰᠠ ᠮᠢᠬᠠ ᠠᠳᠠᠯᠢ ᠤᠯᠠᠭᠠᠨ ᠳᠠᠢᠰᠤᠨ ᠮᠠᠩᠭᠤᠰ ᠤ᠋ᠳ ᠮᠢᠨᠦ ᠮᠠᠯ ᠰᠦᠷᠦᠭ ᠠᠯᠪᠠᠲᠤ ᠶ᠋ᠢ ᠡᠵᠡᠮᠰᠢᠪᠡ᠃ ᠪᠠᠰᠠ ᠵᠡᠭᠦᠳᠦᠯᠡᠭᠰᠡᠨ ᠨᠢ ᠲᠡᠳᠡ ᠨᠠᠷ ᠮᠢᠨᠦ ᠲᠡᠮᠡᠭᠡ ᠨᠤᠭᠦᠳ ᠢ᠋ ᠵᠣᠪᠠᠭᠠᠵᠤ ᠭᠡᠷ ᠲᠡᠷᠭᠡ ᠠᠴᠢᠶᠠᠯᠠᠵᠤ ᠬᠣᠯᠠ ᠭᠠᠵᠠᠷ ᠨᠡᠭᠦᠬᠦ ᠭᠡᠵᠦ ᠪᠠᠢᠨᠠ ᠭᠡᠵᠦ ᠵᠡᠭᠦᠳᠦᠯᠡᠪᠡ᠃ ᠨᠠᠳᠠᠳᠤ ᠬᠠᠭᠠᠨ ᠲᠩᠷᠢ ᠡᠨᠡ ᠵᠡᠭᠦᠳᠦ ᠪᠡᠷ ᠶᠠᠭᠤ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ ᠢᠳᠤᠭᠠᠨ ᠺᠧᠷᠢᠨᠺᠧᠢ— ᠽᠠᠳᠠᠨ ᠴᠢ ᠲᠠᠢᠯᠪᠤᠷᠢᠯᠠᠵᠤ ᠥᠭ ᠭᠡᠪᠡ᠃
ᠢᠳᠤᠭᠠᠨ ᠪᠣᠰᠴᠤ ᠬᠡᠩᠭᠡᠷᠭᠡ ᠪᠡᠨ ᠠᠪᠴᠤ ᠨᠢᠭᠤᠷ ᠢ᠋ᠶ᠋ᠠᠨ ᠲᠠᠭᠯᠠᠨ ᠳᠡᠯᠡᠳᠴᠦ ᠳᠠᠭᠤᠳᠠᠯᠭᠠ ᠳᠠᠭᠤᠳᠠᠨ ᠠᠶᠠᠯᠵᠤ ᠴᠢᠨᠣᠠ᠂ ᠪᠠᠭᠠᠪᠠᠭᠠᠢ᠂ ᠰᠢᠷᠠ ᠰᠢᠪᠠᠭᠤ ᠪᠣᠯᠤᠨ ᠳᠤᠤᠭᠠᠷᠪᠠ᠃ ᠲᠡᠭᠡᠭᠡᠳ ᠪᠣᠰᠴᠤ ᠪᠠᠶ᠋ᠢᠷᠢ ᠳ᠋ᠠᠭᠠᠨ ᠳᠡᠪᠬᠡᠷᠴᠦ ᠴᠣᠪᠬᠣᠷᠤᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠨᠢᠭᠡ ᠬᠥᠯ ᠳᠡᠭᠡᠷᠡ ᠪᠡᠨ ᠳᠡᠪᠬᠡᠴᠡᠵᠦ ᠭᠡᠷ ᠡᠴᠡ ᠭᠦᠶᠦᠨ ᠭᠠᠷᠪᠠ᠃ ᠴᠡᠷᠢᠭ ᠦ᠋ᠳ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠭᠦᠶᠦᠯᠴᠡᠪᠡ᠃ ᠲᠡᠷᠡ ᠥᠨᠥᠬᠢ ᠥᠨᠥᠴᠢᠨ ᠬᠠᠢᠯᠠᠰᠤᠨ ᠳᠡᠭᠡᠷᠡ ᠣᠴᠢᠵᠤ ᠶᠡᠷᠦ ᠪᠤᠰᠤ ᠶ᠋ᠢᠨ ᠭᠠᠪᠰᠢᠭᠠᠢ ᠪᠠᠷ ᠠᠪᠠᠷᠢᠵᠤ ᠣᠷᠣᠢ ᠳᠡᠭᠡᠷᠡ ᠨᠢ ᠭᠠᠷᠪᠠ᠃ ᠲᠡᠭᠡᠭᠡᠳ ᠲᠡᠨᠳᠡ ᠪᠡᠨ ᠪᠠᠷᠬᠢᠷᠠᠵᠤ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠦᠨ ᠰᠢᠷᠣᠨ ᠰᠠᠪᠠ ᠠ᠋ᠴᠠ ᠪᠠᠨ ᠶᠠᠰᠤ ᠠᠪᠴᠤ ᠤᠮᠠᠷᠠ ᠣᠷᠣᠰ ᠤ᠋ᠨ ᠵᠦᠭ ᠬᠠᠶᠠᠪᠠ᠃ ᠳᠠᠷᠠᠭᠠ ᠪᠠᠷ ᠨᠢ ᠮᠥᠨ ᠲᠦᠷᠭᠡᠨ ᠳᠣᠷᠣᠭᠰᠢ ᠪᠠᠭᠤᠵᠤ ᠴᠠᠰᠤᠨ ᠳᠣᠲᠣᠭᠤᠷ ᠬᠤᠷᠳᠤᠯᠠᠨ ᠭᠦᠶᠦᠵᠦ ᠭᠡᠷ ᠲᠦ᠍ ᠡᠭᠡᠵᠦ ᠢᠷᠡᠯᠡ᠃ ᠪᠠᠲᠤ ᠬᠠᠭᠠᠨ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠵᠤ ᠪᠥᠬᠡ ᠶ᠋ᠢᠨ ᠬᠢᠭᠰᠡᠨ ᠶᠠᠪᠤᠳᠠᠯ ᠢ᠋ ᠴᠥᠮ ᠢ᠋ ᠠᠵᠢᠭᠯᠠᠨ ᠬᠠᠷᠠᠪᠠ᠃ ᠲᠡᠭᠦᠨ ᠢ᠋ ᠭᠡᠷ ᠲᠦ᠍ ᠣᠷᠣᠭᠰᠠᠨ ᠤ᠋ ᠳᠠᠷᠠᠭᠠ᠂ ᠥᠪᠡᠷ ᠢ᠋ᠶ᠋ᠡᠨ ᠪᠠᠰᠠ ᠭᠡᠷ ᠲᠦ᠍ ᠬᠡᠪᠢᠰ ᠳᠡᠭᠡᠷᠡ ᠰᠠᠭᠤᠪᠠ᠃ ᠢᠳᠤᠭᠠᠨ ᠰᠥᠭᠥᠳᠴᠦ ᠨᠢᠭᠤᠷ ᠢ᠋ᠶ᠋ᠠᠨ ᠬᠡᠩᠭᠡᠷᠭᠡ ᠪᠡᠷ ᠳᠠᠯᠳᠠᠯᠠᠵᠤ ᠳᠣᠷᠣᠢ ᠳᠠᠭᠤ ᠪᠠᠷ ᠥᠭᠦᠯᠡᠭᠰᠡᠨ ᠨᠢ᠄
— ᠪᠢ ᠮᠣᠳᠣᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ ᠲᠡᠭᠷᠢ ᠳᠡᠭᠡᠷᠡ ᠡᠭᠦᠯᠡᠨ ᠳᠣᠣᠷᠠ ᠬᠦᠷᠴᠦ ᠮᠥᠷᠭᠥᠯ ᠬᠢᠪᠡ᠃ ᠣᠩᠭᠣᠳ ᠤ᠋ᠳ ᠮᠢᠨᠢ ᠮᠥᠷ ᠢ᠋ᠶ᠋ᠡᠷ ᠡᠨᠳᠡ ᠢᠷᠡᠪᠡ᠃ ᠣᠳᠣ ᠲᠡᠳᠡᠨᠡᠷ ᠴᠢᠨᠦ ᠵᠡᠭᠦᠳᠦ ᠶ᠋ᠢ ᠲᠠᠢᠯᠪᠤᠷᠢᠯᠠᠨ ᠶᠠᠷᠢᠨᠠ ᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠤᠷᠢᠬᠠᠨ ᠳᠠᠭᠤ ᠪᠠᠷ ᠥᠭᠦᠯᠡᠭᠰᠡᠨ ᠨᠢ᠄
— ᠷᠶᠠᠽᠠᠨ ᠤ᠋ ᠭᠠᠵᠠᠷ ᠢ᠋ ᠵᠠᠬᠢᠷᠬᠤ ᠪᠠᠷ ᠲᠥᠷᠥᠭᠰᠡᠨ ᠵᠠᠯᠠᠭᠤ ᠣᠯᠠᠨ ᠸᠠᠩ ᠡᠵᠡᠨ ᠴᠢᠮᠠᠲᠤ ᠮᠡᠬᠦᠢᠰᠬᠢᠬᠦ ᠪᠡᠷ ᠢᠷᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠨᠠᠢ᠍ᠮᠠᠨ ᠵᠦᠭ ᠲᠦ᠍ ᠬᠠᠷᠠᠵᠤ᠂ ᠴᠢᠨᠦ ᠴᠡᠷᠢᠭ ᠢ᠋ ᠲᠣᠭᠠᠯᠠᠭᠰᠠᠨ ᠪᠢᠯᠡ᠃ ᠲᠡᠷᠡ ᠴᠢᠮᠠᠲᠤ ᠠᠷᠪᠠᠨ ᠬᠣᠶᠠᠷ ᠰᠠᠢᠬᠠᠨ ᠠᠳᠤᠭᠤ ᠪᠠᠷ ᠪᠡᠯᠡᠭ ᠬᠦᠷᠭᠡᠨ ᠢᠷᠡᠵᠡᠢ᠃ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠬᠠᠷᠠ ᠮᠣᠷᠢ ᠪᠣᠢ᠂ ᠲᠡᠭᠦᠨ ᠢ᠋ ᠭᠠᠭᠴᠠᠬᠦ ᠰᠢᠷᠠ ᠣᠩᠭᠣᠳ ᠤᠨᠤᠵᠤ ᠪᠣᠯᠤᠨᠠ᠃ ᠡᠨᠡ ᠰᠠᠢᠬᠠᠨ ᠮᠣᠷᠢ ᠪᠠᠷ ᠴᠢ ᠶᠠᠭᠤ ᠬᠢᠪᠡ? ᠭᠡᠬᠦ ᠳ᠋ᠦ᠍ᠨᠢ ᠪᠠᠲᠤ ᠬᠠᠭᠠᠨ ᠨᠢᠳᠦ ᠪᠡᠨ ᠠᠨᠢᠪᠴᠢᠨ ᠭᠠᠷ ᠢ᠋ᠶ᠋ᠠᠷ ᠵᠢᠭᠠᠵᠤ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨ᠂ ᠴᠢᠨᠦ ᠶᠠᠭᠤ ᠭᠤᠶᠤᠬᠤ ᠭᠡᠰᠡᠨ ᠢ᠋ ᠴᠢᠨᠢ ᠮᠡᠳᠡᠯᠡ ᠮᠡᠳᠡᠯᠡ ᠭᠡᠵᠦ ᠶᠠᠭ ᠬᠡᠯᠡᠬᠦ ᠭᠡᠰᠡᠨ ᠶᠤᠮᠰᠢᠭ᠋ ᠪᠣᠯᠤᠭᠠᠳ ᠬᠡᠯᠡᠭᠰᠡᠨ ᠨᠢ:
— ᠪᠢ ᠲᠡᠭᠦᠨ ᠢ᠋ᠶ᠋ᠡᠷ ᠶᠠᠭᠤ ᠬᠢᠭᠰᠡᠨ ᠪᠣᠢ ᠭᠡᠵᠢ ᠤᠤ? ᠪᠢ ᠷᠶᠡᠽᠡᠨ ᠦ᠌ ᠸᠠᠩ ᠢ᠋ ᠠᠯᠠᠭᠰᠠᠨ ᠲᠤᠯᠠ ᠲᠡᠭᠦᠨ ᠦ᠌ ᠬᠠᠷᠠ ᠮᠣᠷᠢ ᠶ᠋ᠢ ᠤᠨᠤᠬᠤ ᠪᠣᠯᠤᠨᠠ ᠭᠡᠪᠡ᠃ ᠲᠡᠷᠡ ᠢᠳᠤᠭᠠᠨ ᠳᠠᠬᠢᠨ ᠨᠠᠷᠢᠨ ᠳᠠᠭᠤ ᠪᠠᠷ ᠬᠡᠯᠡᠭᠰᠡᠨ ᠨᠢ:
— ᠪᠠᠲᠤ ᠬᠠᠭᠠᠨ ᠤ᠋ ᠵᠡᠭᠦᠳᠦ ᠶᠠᠭᠤ ᠪᠣᠯᠬᠤ ᠶ᠋ᠢ ᠶᠡᠬᠡ ᠰᠢᠷᠠ ᠣᠩᠭᠣᠳ ᠮᠢᠨᠢ ᠬᠡᠯᠡᠵᠦ ᠠᠯᠢ᠂ ᠡᠨᠡ ᠵᠡᠭᠦᠳᠦ ᠠᠶᠤᠯ ᠵᠦᠬᠡᠯ ᠶᠤᠮ ᠪᠢᠰᠢ ᠪᠢᠵᠡ? ᠭᠠᠰᠠᠯᠠᠩ ᠵᠣᠪᠠᠯᠠᠩ ᠢ᠋ ᠠᠷᠢᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠮᠥᠷᠭᠥᠯ ᠵᠠᠯᠪᠠᠷᠢᠯ ᠬᠡᠷᠡᠭ ᠲᠡᠢ ᠪᠢᠰᠢ ᠶᠤᠮ ᠪᠢᠵᠡ? ᠭᠡᠵᠦ ᠠᠰᠠᠭᠤᠭᠠᠳ ᠲᠡᠳᠦᠢ ᠳᠠᠭᠤ ᠪᠠᠨ ᠥᠭᠡᠷᠡᠴᠢᠯᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠷᠢ ᠶ᠋ᠢᠨ ᠣᠩᠭᠣᠳ ᠬᠡᠯᠡᠵᠦ ᠪᠠᠢᠭᠠ ᠶᠤᠮᠰᠢᠭ ᠪᠣᠯᠭᠠᠵᠤ ᠴᠢᠨᠣᠠ ᠶ᠋ᠢᠨ ᠣᠯᠢᠯᠲᠠ ᠮᠡᠲᠦ ᠨᠠᠷᠢᠨ ᠳᠠᠭᠤ ᠪᠠᠷ ᠪᠥᠬᠡᠯᠡᠭᠰᠡᠨ ᠨᠢ᠄
— ᠪᠣᠳᠣᠵᠤ ᠪᠠᠢᠭᠠ ᠠᠶᠠᠨ ᠲᠡᠢᠨ ᠬᠥᠮᠦᠨ ᠳ᠋ᠦ᠍ ᠪᠡᠷᠬᠡ ᠲᠡᠢ ᠪᠠᠢᠨᠠ᠃ ᠰᠠᠬᠠᠯᠲᠤ ᠣᠷᠣᠰ ᠤ᠋ᠳ ᠪᠣᠯ ᠲᠦᠭᠦᠬᠡᠢ ᠮᠢᠬᠠ ᠰᠢᠭ᠋ ᠰᠢᠷᠠ ᠤᠯᠠᠭᠠᠨ ᠮᠠᠩᠭᠤᠰ ᠤ᠋ᠨ ᠬᠥᠪᠡᠭᠦᠳ ᠶᠤᠮ᠃ ᠲᠡᠳᠡᠨ ᠲᠡᠢ ᠪᠠᠢᠯᠳᠤᠬᠤ ᠳ᠋ᠤ᠌ ᠠᠶᠤᠯᠲᠠᠢ᠃ ᠨᠢᠭᠡ ᠲᠣᠯᠣᠭᠠᠢ ( ᠶ᠋ᠢ) ᠲᠠᠰᠤ ᠴᠠᠪᠴᠢᠬᠤ ᠳ᠋ᠤ᠌ ᠬᠣᠶᠠᠷ ᠪᠣᠯᠵᠤ ᠤᠷᠭᠤᠨᠠ᠂ ᠬᠣᠶᠠᠷ ᠲᠣᠯᠣᠭᠠᠢ ᠶ᠋ᠢ ᠴᠠᠪᠴᠢᠪᠠᠯ ᠳᠥᠷᠪᠡ ᠪᠣᠯᠵᠤ ᠤᠷᠭᠤᠨᠠ᠃ ᠮᠥᠷᠭᠥᠯ ᠵᠠᠯᠪᠠᠷᠢᠯ ᠦᠭᠡᠢ ᠪᠡᠷ ᠣᠷᠣᠰ ᠤ᠋ᠳ ᠢ᠋ ᠪᠠᠢᠯᠳᠤᠵᠤ ᠪᠣᠯᠬᠤ ᠦᠭᠡᠢ᠃ ᠮᠣᠷᠢ᠂ ᠱᠠᠷ᠂ ᠬᠣᠨᠢ᠂ ᠲᠡᠮᠳᠡᠭ ᠦᠭᠡᠢ ᠬᠠᠷᠠ ᠢᠮᠠᠭᠠ ᠵᠡᠷᠭᠡ ᠶᠡᠷᠡᠨ ᠶᠢᠰᠦᠨ ᠬᠠᠷᠠ ᠮᠠᠯ ᠢ᠋ᠶ᠋ᠠᠷ ᠲᠠᠬᠢᠯ ᠡᠷᠭᠦᠬᠦ ᠬᠡᠷᠡᠭᠲᠡᠢ᠂ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠷᠶᠠᠽᠠᠨ ᠤ᠋ ᠸᠠᠩ ᠠ᠋ᠴᠠ ᠪᠡᠯᠡᠭᠯᠡᠭᠰᠡᠨ ᠬᠠᠷᠠ ᠮᠣᠷᠢ ᠶ᠋ᠢ ᠠᠯᠠᠬᠤ ᠬᠡᠷᠡᠭᠲᠡᠢ᠃ ᠢᠳᠤᠭᠠᠨ ᠰᠡᠭᠦᠯᠴᠢ ᠶ᠋ᠢᠨ ᠦᠭᠡ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠰᠤᠯᠠᠬᠠᠨ ᠳᠠᠭᠤ ᠪᠠᠷ ᠥᠭᠦᠯᠡᠬᠦ ᠨᠢ ᠭᠡᠷ ᠦ᠋ᠨ ᠳᠡᠭᠡᠪᠦᠷ ᠡᠴᠡ ᠰᠣᠨᠣᠰᠳᠠᠵᠤ ᠪᠠᠢᠭᠠ ᠮᠡᠲᠦ ᠪᠣᠯᠭᠠᠨᠠ᠃ ᠲᠡᠭᠡᠭᠡᠳ ᠢᠳᠤᠭᠠᠨ ᠭᠠᠵᠠᠷ ᠲᠸ᠋ ᠪᠥᠬᠥᠢᠵᠦ ᠪᠠᠢᠭᠠᠳ ᠭᠠᠵᠠᠷ ᠲᠸ᠋ ᠬᠠᠵᠠᠭᠤ ᠪᠠᠷ ᠬᠡᠪᠲᠡᠪᠡ᠃
ᠭᠡᠷ ᠤ᠋ᠨ ᠳᠣᠲᠣᠷᠠ ᠨᠠᠮ ᠭᠦᠮ᠂ ᠪᠦᠭᠦᠳᠡᠭᠡᠷ ᠪᠠᠲᠤ ᠬᠠᠭᠠᠨ ᠤ᠋ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠬᠦᠯᠢᠶᠡᠨᠡ᠃
ᠠᠪᠤᠷᠠᠯᠲᠤ ᠡᠵᠡᠨ ᠬᠥᠮᠥᠰᠬᠡ ᠠᠲᠤᠷᠢᠭᠤᠯᠤᠨ ᠬᠡᠯᠡᠪᠡ᠃
— ᠴᠢ ᠬᠥᠭᠰᠢᠨ ᠴᠢᠨᠣᠠ ᠰᠢᠭ᠋ ᠤᠬᠠᠮᠰᠠᠷ (ᠲᠠᠢ)᠂ ᠴᠢ ᠬᠠᠪᠬᠠᠨ ᠳ᠋ᠤ᠌ ᠣᠷᠣᠵᠤ ᠦᠵᠡᠭᠰᠡᠨ ᠦᠨᠡᠭᠡ ᠰᠢᠭ᠌ ᠬᠠᠰᠢᠷ᠃ ᠴᠢ ᠨᠠᠳᠠᠳᠤ ᠬᠡᠯᠡᠵᠦ ᠥᠭ᠂ ᠶᠡᠷᠦ ᠡᠴᠡ ᠪᠡᠨ ᠬᠣᠢᠲᠤ ᠵᠦᠭ ᠦ᠋ᠨ ᠣᠢ ᠰᠢᠭᠤᠢ ᠤᠷᠤᠭᠤ ᠣᠷᠣᠰ ᠤ᠋ᠨ ᠳᠠᠰᠢ ᠶᠠᠪᠤᠬᠤ ᠪᠠᠨ ᠪᠣᠯᠢᠬᠤ ᠤᠤ? ᠮᠠᠭᠠᠳ ᠦᠭᠡᠢ᠂ ᠮᠢᠨᠦ ᠴᠡᠷᠢᠭ ᠦ᠋ᠳ ᠤᠯᠠᠭᠠᠨ ᠰᠢᠷᠭᠠᠯ ᠣᠷᠣᠰ ᠤ᠋ᠳ ᠲᠤ᠌ ᠢᠳᠡᠭᠳᠡᠨ ᠳᠠᠭᠤᠰᠬᠤ ᠪᠣᠯᠪᠠᠤ? ᠮᠠᠭᠠᠳ ᠦᠭᠡᠢ᠂ ᠮᠢᠨᠦ ᠶᠢᠰᠦᠨ ᠬᠡᠯᠡ ᠲᠡᠢ ᠲᠤᠭ ᠴᠠᠪᠴᠢᠭᠳᠠᠭᠰᠠᠨ ᠰᠢᠭ᠋ ᠪᠥᠬᠥᠢᠵᠦ᠂ ᠮᠢᠨᠦ ᠮᠣᠩᠭᠣᠯᠴᠤᠳ ᠬᠠᠷᠢ ᠦᠨᠳᠦᠰᠦᠲᠡᠨ ᠳ᠋ᠦ᠍ ᠭᠢᠨᠵᠢᠯᠡᠭᠳᠡᠬᠦ ᠪᠣᠯ ᠤᠤ?
ᠢᠳᠤᠭᠠᠨ ᠳᠠᠭᠤ ᠦᠭᠡᠢ ᠪᠠᠢᠨᠠ᠃ ᠪᠠᠲᠤ ᠬᠠᠭᠠᠨ ᠦᠷᠭᠦᠯᠵᠢᠯᠡᠨ ᠬᠡᠯᠡᠪᠡ᠃
— ᠣᠷᠣᠰ ᠤ᠋ᠨ ᠲᠡᠰᠢ ᠶᠠᠪᠤᠭᠠᠳ ᠶᠠᠭᠠᠬᠢᠬᠤ ᠪᠢᠯᠡ? ᠨᠠᠪᠲᠠᠷᠠᠰᠢ ᠦᠭᠡᠢ ᠭᠦᠨ ᠣᠢ ᠬᠥᠪᠴᠢ ᠪᠣᠢ᠂ ᠲᠡᠷᠡ ᠣᠢ ᠳ᠋ᠤ᠌ ᠪᠠᠭᠠᠪᠠᠭᠠᠢ ᠶ᠋ᠢ ᠠᠯᠪᠠᠲᠤ ᠪᠣᠯᠭᠠᠨ ᠵᠠᠷᠤᠴᠠᠯᠠᠭᠰᠠᠨ ᠶᠢᠯᠸᠢ᠌ᠲᠦ ᠬᠥᠮᠦᠰ ᠲᠡᠨᠦᠭᠦᠴᠢᠯᠡᠨ ᠶᠠᠪᠤᠳᠠᠭ᠃ ᠬᠠᠷᠢᠨ ᠬᠥᠬᠡ ᠳᠠᠯᠠᠢ ᠶ᠋ᠢᠨ ᠰᠠᠯᠬᠢ ᠡᠪᠡᠰᠦᠨ ᠦ᠌ ᠮᠥᠩᠭᠥᠨ ᠰᠤᠷ ᠢ᠋ ᠳᠣᠯᠭᠢᠶᠠᠯᠠᠭᠤᠯᠤᠭᠰᠠᠨ ᠲᠠᠯᠠ ᠶ᠋ᠢᠨ ᠵᠦᠭ ᠶᠠᠪᠤᠬᠤ ᠨᠢ ᠳᠡᠭᠡᠷᠡ ᠪᠢᠰᠢ ᠤᠤ? ᠲᠡᠨᠳᠡ ᠲᠠᠷᠭᠤᠨ ᠴᠠᠭᠠᠨ ᠬᠣᠨᠢ᠂ ᠦᠬᠡᠷ᠂ ᠢᠮᠠᠭᠠ ᠰᠦᠷᠦᠭᠯᠡᠨ ᠪᠡᠯᠴᠢᠭᠡᠷᠯᠡᠳᠡᠭ᠃ ᠲᠡᠨᠳᠡ ᠳᠤᠷᠠ ᠪᠠᠷ ᠨᠡᠭᠦᠳᠡᠯᠯᠡᠵᠦ ᠪᠣᠯᠤᠨᠠ᠁ ᠭᠡᠵᠦ ᠬᠣᠨᠢᠨ ᠤ᠋ ᠰᠡᠭᠦᠯ ᠰᠢᠭ᠌ ᠵᠢᠷᠦᠬᠡ ᠨᠢ ᠳᠣᠭᠳᠣᠯᠵᠤ ᠪᠠᠢᠭᠠ ᠣᠯᠠᠨ ᠬᠥᠮᠦᠰ ᠨᠠᠳᠠᠳᠤ ᠬᠡᠯᠡᠳᠡᠭ᠃ ᠺᠧᠷᠢᠨᠺᠧᠢ— ᠽᠠᠳᠠᠨ ᠴᠢ ᠡᠨᠡ ᠠᠶᠤᠮᠠᠲᠠᠭᠠᠢ ᠶᠠᠭᠤ ᠪᠠᠨ ᠲᠡᠷᠡ ᠵᠣᠷᠢᠬᠭᠦᠢᠴᠤᠳ ᠠ᠋ᠴᠠ ᠰᠤᠷᠠᠪᠠᠤ? ᠮᠢᠨᠦ ᠪᠠᠭᠰᠢ ᠬᠠᠳ᠋ᠵᠢ ᠷᠠᠾᠢᠮ ᠬᠠᠮᠢᠭᠠ ᠪᠠᠢᠨᠠ?
ᠮᠣᠩᠭᠣᠯ ᠤ᠋ᠨ ᠬᠠᠭᠠᠳ ᠨᠣᠶᠠᠳ ᠤ᠋ᠨ ᠥᠷᠭᠡᠨ ᠴᠡᠭᠡᠵᠢ ᠨᠦ᠍ᠭᠦᠳ ᠦ᠋ᠨ ᠠᠷᠤ ᠠ᠋ᠴᠠ ᠬᠠᠲᠠᠩᠭᠢ ᠲᠤᠷᠠᠩᠬᠠᠢ ᠪᠡᠶᠡᠲᠡᠢ ᠤᠷᠲᠤ ᠴᠠᠭᠠᠨ ᠰᠠᠬᠠᠯ ᠲᠠᠢ᠂ ᠥᠨᠳᠥᠷ ᠮᠠᠯᠠᠭᠠᠢ ᠲᠠᠢ ᠡᠪᠦᠭᠡᠨ ᠪᠠᠳᠢᠷᠴᠢᠨ ᠪᠣᠰᠴᠤ ᠭᠠᠷ ᠢ᠋ᠶ᠋ᠠᠨ ᠡᠯᠢᠭᠡᠨ ᠳᠡᠭᠡᠷᠡ ᠪᠡᠨ ᠵᠥᠷᠢᠭᠦᠯᠦᠨ᠂
— ᠠᠩᠬᠠᠷᠤᠨ ᠰᠣᠨᠣᠰᠴᠤ ᠳᠠᠭᠠᠭᠲᠤᠨ᠃ ᠪᠠᠲᠤ ᠬᠠᠭᠠᠨ ᠵᠠᠷᠯᠢᠭ ᠢ᠋ ᠴᠢᠨᠢ ᠰᠣᠨᠣᠰᠤᠶᠠ᠃
— ᠬᠣᠶᠠᠷ ᠡᠪᠡᠷᠲᠦ ᠢᠰᠺᠸᠨ᠋ᠳ᠋ᠸᠷ ᠨᠢ ᠲᠡᠢᠨ ᠳ᠋ᠦ᠍ ᠠᠶᠠᠯᠠᠬᠤ ᠳ᠋ᠠᠭᠠᠨ ᠪᠡᠯᠴᠢᠭᠡᠷ ᠰᠠᠢᠲᠠᠢ ᠭᠠᠵᠠᠷ ᠢ᠋ ᠡᠷᠢᠳᠡᠭ ᠪᠠᠢᠭᠰᠠᠨ ᠤᠤ? ᠠᠯᠢ ᠦᠭᠡᠢ ᠤᠤ?
— ᠦᠭᠡᠢ ᠵᠠᠩᠵᠤᠨ ᠮᠢᠨᠢ᠂ ᠵᠥᠪᠬᠡᠨ ᠳᠠᠢᠰᠤᠨ ᠤ᠋ ᠪᠦᠭᠡᠨᠡᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠢ᠋ ᠡᠷᠢᠵᠦ ᠣᠯᠤᠭᠠᠳ ᠲᠩᠷᠢ ᠡᠴᠡ ᠪᠠᠭᠤᠬᠤ ᠪᠦᠷᠭᠦᠳ ᠰᠢᠭ᠌ ᠳᠠᠭᠠᠷᠢᠨ ᠣᠷᠣᠳᠠᠭ ᠪᠠᠢᠪᠠ᠃
— ᠲᠡᠷᠡ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠬᠤ ᠶ᠋ᠢᠨ ᠡᠮᠦᠨᠡ ᠬᠠᠷᠠ ᠮᠣᠷᠢ ᠪᠠᠨ ᠠᠯᠠᠵᠤ ᠢᠳᠡᠵᠦ ᠪᠠᠢᠭᠰᠠᠨ ᠤᠤ?
— ᠦᠭᠡᠢ ᠵᠠᠩᠵᠤᠨ ᠮᠢᠨᠢ᠂ ᠲᠡᠷᠡ ᠥᠪᠡᠷ ᠦ᠋ᠨ ᠬᠠᠢᠷᠠᠲᠠᠢ ᠪᠦᠼᠢᠹᠡᠯ ᠭᠡᠳᠡᠭ ᠬᠠᠷᠠ ᠠᠵᠢᠷᠭᠠ ᠪᠠᠨ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠪᠦᠬᠦᠨ ᠳ᠋ᠦ᠍ ᠦᠷᠭᠦᠯᠵᠢ ᠬᠥᠲᠥᠯᠵᠦ ᠶᠠᠪᠤᠳᠠᠭ ᠰᠠᠨ᠃ ᠪᠦᠼᠢᠹᠡᠯ ᠦ᠋ᠨ ᠪᠦᠷ ᠬᠥᠭᠰᠢᠷᠡᠭᠰᠡᠨ ᠬᠣᠢᠨᠠ ᠴᠤ᠌ ᠣᠷᠬᠢᠭᠠ ᠦᠭᠡᠢ ᠶᠤᠮ᠃
— ᠮᠢᠨᠦ ᠦᠨᠡᠨᠴᠢ ᠰᠢᠳᠤᠷᠭᠤ ᠮᠡᠷᠭᠡᠨ ᠪᠠᠭᠰᠢ ᠬᠠᠳ᠋ᠵᠢ ᠷᠠᠾᠢᠮ ᠴᠢᠮᠠᠲᠤ ᠪᠠᠶᠠᠷᠯᠠᠯᠠ᠃ ᠲᠡᠢᠨ ᠲᠤᠯᠤᠯᠳᠤᠭᠠᠨ ( ᠤ᠋)ᠮᠢᠨᠢ ᠪᠠᠭᠰᠢ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠤ᠋ᠨ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠶᠠ᠃ ᠣᠷᠣᠰ ᠤ᠋ᠨ ᠲᠡᠰᠢ ᠳᠠᠢᠯᠠᠷᠠ ᠮᠣᠷᠳᠠᠬᠤ ᠤᠤ? ᠬᠥᠬᠡ ᠳᠠᠯᠠᠢ ᠲᠡᠰᠢ ᠤᠬᠤᠷᠢᠵᠤ ᠠᠮᠠᠷᠠᠬᠤ ᠤᠤ?
ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠦᠯᠦ ᠢᠲᠡᠭᠡᠮᠵᠢᠯᠡᠭᠴᠢ ᠬᠡᠷᠴᠡᠭᠡᠢ ᠨᠢᠳᠦ ᠪᠡᠨ ᠡᠷᠭᠢᠯᠳᠦᠭᠦᠯᠦᠨ ᠥᠭᠦᠯᠡᠭᠰᠡᠨ ᠨᠢ᠄
— ᠴᠡᠷᠢᠭ ᠡᠨᠳᠡ ᠤᠳᠠᠲᠠᠯᠠ ᠵᠣᠭᠰᠣᠪᠠ᠃ ᠬᠣᠭᠣᠯᠠ ᠬᠦᠨᠡᠰᠦᠨ ᠦ᠌ ᠪᠡᠯᠡᠳᠬᠡᠯ ᠳᠠᠭᠤᠰᠪᠠ᠃ ᠰᠢᠭᠤᠷᠭᠠ ᠤᠯᠠᠮ ᠬᠦᠴᠦᠲᠡᠢ ᠪᠣᠯᠵᠤ ᠪᠠᠢᠨᠠ᠃ ᠣᠷᠣᠰ ᠤ᠋ᠨ ᠬᠣᠲᠠ ᠤ᠋ᠳ ᠲᠡᠰᠢ ᠳᠠᠷᠤᠢᠬᠠᠨ ᠴᠢᠭᠯᠡᠬᠦ ᠴᠠᠭ ᠪᠣᠯᠤᠭᠰᠠᠨ ᠪᠢᠰᠢ ᠤᠤ? ᠲᠡᠨᠳᠡ ᠬᠥᠮᠦᠨ᠂ ᠮᠣᠷᠢᠳ ᠢ᠋ ᠴᠠᠳᠬᠠᠵᠤ ᠪᠣᠯᠤᠨᠠ᠃ ᠳᠠᠯᠠᠨ ᠳᠣᠯᠣᠭᠠᠨ ᠮᠢᠩᠭᠠᠨ ᠮᠠᠩᠭᠤᠰ ᠤ᠋ᠳ ᠰᠠᠭᠠᠲᠠᠭᠤᠯᠪᠠᠴᠤ ᠴᠢ ᠷᠶᠡᠽᠠᠨ ᠤ᠋ ᠸᠠᠩ ᠤ᠋ᠨ ᠬᠠᠷᠠ ᠮᠣᠷᠢ ᠶ᠋ᠢ ᠤᠨᠤᠵᠤ ᠷᠶᠡᠽᠡᠨ ᠬᠣᠲᠠ ᠳ᠋ᠤ᠌ ᠣᠷᠣᠨᠠ᠃ ᠷᠶᠡᠽᠡᠨᠴᠤᠳ ᠤ᠋ᠨ ᠠᠪᠴᠢᠷᠠᠭᠰᠠᠨ ᠮᠣᠷᠢ ᠰᠢᠭ᠋ ᠲᠣᠮᠣ ᠬᠠᠷᠠ ᠭᠠᠬᠠᠢ ᠶ᠋ᠢᠨ ᠬᠥᠯᠳᠡᠭᠦᠦ ᠮᠢᠬᠠ ᠶ᠋ᠢ ᠢᠳᠤᠭᠠᠨ ᠺᠸᠷᠢᠨᠺᠸᠢ — ᠽᠠᠳᠠᠨ ᠢ᠋ ᠥᠯᠦᠰᠬᠡᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠪᠡᠯᠡᠳᠬᠡᠯᠡ᠃ ᠣᠷᠣᠰ ᠤ᠋ᠨ ᠠᠳᠤᠭᠤ ᠨᠤᠭᠤᠳ ᠢ᠋ ᠡᠵᠡᠯᠡᠨ ᠠᠪᠤᠭᠠᠳ ᠸᠯᠡᠳᠢᠮᠢᠷ ᠬᠣᠲᠠ ᠳ᠋ᠤ᠌ ᠳᠠᠯᠠᠨ ᠳᠣᠯᠣᠭᠠᠨ ᠰᠢᠷᠠ ᠣᠩᠭᠣᠳ ᠲᠩᠷᠢ ᠪᠡᠨ ᠲᠠᠬᠢᠨᠠ᠃ ᠣᠩᠭᠣᠳ ᠲᠩᠷᠢ ᠨᠦ᠍ᠭᠦᠳ ᠦ᠋ᠨ ᠰᠢᠭᠤᠷᠭᠠ ᠪᠠᠨ ᠵᠣᠭᠰᠣᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠺᠸᠷᠢᠨᠺᠸᠢ— ᠽᠠᠳᠠᠨ ᠮᠥᠷᠭᠥᠯ ᠢ᠋ᠶ᠋ᠡᠨ ᠰᠠᠢᠲᠤᠷ ᠬᠢᠭ᠌᠃ ᠡᠢᠮᠦ ᠭᠦᠨᠵᠡᠭᠡᠢ ᠴᠠᠰᠤᠨ ᠳ᠋ᠤ᠌ ᠶᠠᠪᠤᠬᠤ ᠳ᠋ᠤ᠌ ᠪᠡᠷᠬᠡ ᠲᠡᠢ ᠪᠠᠢᠨᠠ᠃ ᠬᠡᠷᠪᠡ ᠰᠢᠭᠤᠷᠭᠠ ᠳᠠᠬᠢᠭᠠᠳ ᠶᠢᠰᠦᠨ ᠡᠳᠦᠷ ᠡᠢᠮᠦ ᠬᠡᠷᠴᠡᠭᠡᠢ ᠪᠡᠷ ᠦᠷᠭᠦᠯᠵᠢᠯᠡᠪᠡᠯ ᠪᠢᠳᠡᠨᠡᠷ ᠮᠥᠩᠬᠡᠳᠡ ᠴᠠᠰᠤᠨ ᠳ᠋ᠤ᠌ ᠪᠤᠯᠠᠭᠳᠠᠨᠠ ᠭᠡᠳ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠳᠤᠭᠤᠢ ᠪᠣᠯᠵᠤ ᠥᠮᠥᠳᠦᠨ ᠦ᠌ ᠵᠡᠭᠦᠨ ᠱᠤᠤᠮᠠᠭ ᠢ᠋ ᠳᠡᠭᠡᠭᠰᠢ ᠨᠢ ᠰᠡᠬᠦᠵᠦ ᠪᠥᠭᠡᠰᠦᠨ ᠳ᠋ᠦ᠍ ᠬᠠᠵᠠᠭᠳᠠᠭᠰᠠᠨ ᠦᠰᠦᠯᠢᠭ ᠬᠥᠯ ᠢ᠋ᠶ᠋ᠡᠨ ᠶᠡᠬᠡᠯᠡ ᠰᠢᠨᠤᠬᠠᠢ ᠪᠠᠷ ᠮᠠᠭᠠᠵᠢᠯᠠᠨᠠ᠃ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠨᠠᠷ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠯᠴᠠᠭᠠᠳ ᠲᠡᠳᠡᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠪᠠᠶᠠᠷ ᠤ᠋ᠨ ᠣᠴᠢᠳ ᠭᠢᠯᠠᠯᠵᠠᠪᠠ᠃
— ᠦᠷᠭᠦᠯᠵᠢ ᠮᠡᠷᠭᠡᠨ ᠦᠭᠡ ᠬᠡᠯᠡᠳᠡᠭ ᠰᠥᠪᠡᠭᠡᠳᠡᠢ ᠪᠠᠭᠠᠲᠤᠷ ᠴᠢᠮᠠᠲᠤ ᠪᠠᠶᠠᠷᠯᠠᠨᠠ᠃ ᠪᠢ ᠴᠢᠮᠠ ᠠ᠋ᠴᠠ ᠡᠢᠮᠦ ᠦᠭᠡ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠮᠠᠷᠭᠠᠰᠢ ᠪᠠᠭᠤᠳᠠᠯ ᠠ᠋ᠴᠠ ᠪᠠᠨ ᠬᠥᠳᠡᠯᠦᠶᠡ᠃ ᠴᠡᠷᠢᠭ ᠦ᠋ᠳ ᠷᠶᠡᠽᠡᠨ ᠦ᠌ ᠭᠠᠵᠠᠷ ᠲᠸ᠋ ᠶᠡᠷᠡᠨ ᠶᠢᠰᠦᠨ ᠬᠠᠷᠠ ᠴᠤᠪᠤᠭᠠ ᠪᠠᠷ ᠴᠥᠮᠥᠷᠡᠨ ᠣᠷᠣᠨᠠ᠃ ᠪᠢ ᠮᠠᠩᠨᠠᠢ ᠳᠡᠭᠡᠷᠡ ᠪᠡᠨ ᠴᠠᠭᠠᠨ ᠰᠠᠷᠠᠲᠠᠢ᠂ ᠡᠪᠦᠳᠦᠭ ᠢ᠋ᠶ᠋ᠡᠨ ᠬᠦᠷᠲᠡᠯᠡ ᠴᠠᠭᠠᠨ ᠬᠥᠯ ᠲᠡᠢ ᠬᠠᠷᠠ ᠮᠣᠷᠢ ᠪᠠᠨ ᠤᠨᠤᠵᠤ ᠶᠠᠪᠤᠨᠠ᠃ ᠲᠡᠷᠡ ᠮᠣᠷᠢ ᠨᠠᠳᠠ ᠵᠢᠷᠭᠠᠯ ᠰᠠᠢᠨ ᠢᠷᠣᠠ ᠵᠣᠬᠢᠶᠠᠵᠤ ᠥᠭᠭᠦᠨᠡ᠃ ᠮᠢᠨᠦ ᠢᠰᠡᠭᠡᠢ ᠨᠡᠮᠨᠡᠭᠦᠰᠦᠲᠡᠢ ᠴᠠᠭᠠᠨ ᠮᠣᠷᠢ ᠠᠺᠴᠢᠶᠠᠨ ᠢ᠋ ᠬᠥᠬᠡ ᠳᠠᠯᠠᠢ ᠶ᠋ᠢᠨ ᠳᠠᠰᠢ ᠺᠢᠫᠴᠡᠺ ᠦ᠋ᠨ ᠠᠳᠤᠭᠤᠴᠢ ᠪᠠᠷ ᠠᠪᠴᠢᠭᠤᠯᠤᠨᠠ᠃
— ᠲᠡᠷᠡ ᠠᠷᠠᠪᠢᠰ᠂ ᠲᠡᠨᠳᠡ ᠲᠥᠷᠥᠭᠰᠡᠨ ᠲᠤᠯᠠ ᠡᠨᠡ ᠣᠷᠣᠰ ᠤ᠋ᠨ ᠪᠠᠭᠠᠪᠠᠭᠠᠢ ᠶ᠋ᠢᠨ ᠬᠦᠢᠲᠡᠨ ᠨᠤᠲᠤᠭ ᠲᠤ᠌ ᠲᠡᠰᠬᠦ ᠦᠭᠡᠢ ᠪᠣᠯᠬᠤ ᠤᠤ? ᠪᠢᠳᠡᠨᠡᠷ ᠣᠷᠣᠰ ᠤ᠋ᠨ ᠬᠠᠷᠠ ᠬᠥᠮᠦᠨ (ᠡᠩ ᠦ᠋ᠨ ᠬᠥᠮᠦᠰ) ᠲᠠᠷᠢᠶᠠᠴᠢᠳ ᠪᠦᠭᠦᠳᠡ ᠶ᠋ᠢ ᠠᠯᠠᠬᠤ ᠦᠭᠡᠢ᠂ ᠬᠠᠷᠢᠨ ᠠᠯᠢ ᠪᠣᠯᠬᠤ ᠪᠠᠷ ᠣᠯᠠᠨ ᠢ᠋ ᠪᠠᠷᠢᠪᠴᠢᠯᠠᠵᠤ ᠡᠮᠦᠨᠡ ᠪᠡᠨ ᠲᠠᠭᠤᠨᠠ᠃ ᠪᠢᠳᠡᠨᠡᠷ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠥᠭᠡᠳᠡ ᠳᠠᠪᠰᠢᠬᠤ ᠳ᠋ᠠᠭᠠᠨ ᠲᠡᠳᠡᠨ ᠢ᠋ ᠤᠷᠢᠳᠠᠪᠡᠷ ᠡᠮᠦᠨᠡ ᠪᠡᠨ ᠲᠠᠭᠤᠵᠤ ᠶᠠᠪᠤᠭᠤᠯᠤᠨᠠ᠃
—ᠲᠡᠳᠡᠨ ᠢ᠋ ᠶᠠᠭᠤ ᠪᠠᠷ ᠲᠡᠵᠢᠭᠡᠬᠦ ᠪᠣᠢ ᠭᠡᠵᠦ ᠨᠣᠶᠠᠨ ᠠᠰᠠᠭᠤᠪᠠᠯ᠂
— ᠣᠯᠵᠠ ᠶ᠋ᠢᠨ ᠬᠥᠮᠦᠰ ᠢ᠋ ᠲᠡᠵᠢᠭᠡᠬᠦ ᠬᠡᠷᠡᠭ ᠦᠭᠡᠢ᠂ ᠲᠡᠳᠡᠨᠡᠷ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠦᠬᠦᠭᠰᠡᠨ ᠮᠣᠷᠢ ᠵᠡᠷᠭᠡ ᠶᠠᠭᠤ ᠳᠤᠷᠠᠲᠠᠢ ᠪᠠᠨ ᠣᠯᠵᠤ ᠢᠳᠡᠭ᠃ ᠥᠨᠥᠳᠥᠷ ᠪᠢᠳᠡ ᠰᠠᠨᠠᠭᠠ ᠲᠠᠢᠪᠤᠩ ᠠᠮᠠᠷᠠᠵᠠᠭᠠᠶᠠ! ᠮᠠᠷᠭᠠᠰᠢ ᠴᠢᠰᠤᠨ ᠨᠠᠢᠷ ᠳᠠᠬᠢᠨ ᠡᠬᠢᠯᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠡᠷᠡᠯ᠂ ᠵᠢᠩᠯᠢᠬᠤᠸᠠᠷ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠠᠯᠲᠠᠨᠴᠢᠮᠡᠭ᠂ ᠠᠷᠢᠭᠤᠨᠠ᠂ ᠲ· ᠬᠦᠮᠦᠵᠢᠯᠲᠦ᠂ ᠪᠠᠯ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ